\id EPH - Muyang NT [muy] -Cameroon 2013 (web version -2014 bd) 
\h Efez 
\toc1 Wakita ga Pol ya àbikioru ana ndam Efez ni 
\toc2 Efez 
\toc3 Efe 
\mt1 Wakita ga Pol ya àbikioru ana ndam Efez ni 
\imt1 Ere ye ti məɗəmki ka wakita ga Pol ya àbikioru ana ndam Efez ni 
\ip Maslaŋa ya ti àbəki wakita hini ni ti àɗafa slimi gayaŋ a : àbəki ti Pol, zal asak ga Yezu ni (1.1 ; 3.1). Leli mə̀sər sarta ya àbəki wakita ni do, mə̀sər məlaŋ ya àbəki ni do daya. Ma ga Pol hini ya àbu məbəkiani a Wakita ge Melefit ni bu ni ti, àbiki ti ana ndam Efez : Efez ti kəsa gəɗakani ka haɗ Azi. Pol ànjəhaɗ eslini vi mahkər (Tʉwi 20.31), ay a wakita hini bu ni ti àbəki akaɗa ga bay ya ti àhi ma ana ndam ya naŋ àsəra tay a ni do. Àgri sa ana mis do, àləgi ana mis akaɗa gayaŋ ya àgray a wakita ndahaŋ bu ni do. A wakita ndahaŋ ya tə̀bəki ahaslani ni bu ni ti ma ya ti « kə̀bum a kəsa Efez bu ni » (1.1) àvu bi ; nahkay mis ndahaŋ tə̀ɗəm wakita hini ti Pol àslərioru ana ndam ga kəsa gərgəri kay bəlaŋ àna bəlaŋ ga məhi ma ana ndam ga Yezu ɗek. Ay tamal nahkay ti tàzay wakita ya tə̀slərioru ana ndam Efez ni ciliŋ, tə̀fiyu a Wakita ge Melefit vu ; tə̀mbrəŋ wakita ya tə̀slərioru ana ndam ga kəsa ndahaŋ ni ɗek. 
\ip Nahkay pakama ga Pol ya àɗəm a wakita hini bu ni ti kwa ka mənjəki gani àhi ana ndam ga Yezu ɗek. Ànjəki, àɗəm àna tʉwi ge Krist ti Melefit àgria zlam sulumani ana leli a kay : Melefit àdaba leli a, mìgia bəza gayaŋ a ; àmbərfəŋa zlam magudarani geli ni kè leli a ɗek ; àgray ti mîci ma gayaŋ maŋgahani ni. Ahaslani ti leli akaɗa mis məmətani, nihi ti mə̀bu àna sifa ya àndav ɗay-ɗay do ni ; mìgia akaɗa mis a bəlaŋ. Nahkay Pol ahəŋgalay Melefit ti ndam gayaŋ ni ɗek tîci zlam sulumani ya ti Melefit àgri ana tay ni lala : àgri zlam nday nani ɗek ana tay ti azuhva tʉwi ge Krist (1–3). 
\ip Leli mìgia bəza ge Melefit a ti, ahàr àɗəm mânjəhaɗum ahəmamam ? Pol àɗəm mîcivu, mâwayumvu, ku way way do mâgray tʉwi àna njəɗa ge Melefit ya àvi ni ; mə̂mbrəŋum zlam magudarani ɗek ; ku way way do, ku zal, ku wal, ku wur, ku ata bəŋ ga bəza, ku eviɗi, ku bay məgur eviɗi, mânjəhaɗ akaɗa ge Melefit ya awayay ni ciliŋ. Melefit àvia njəɗa ana leli a dal-dal : njəɗa gani nani ti akaɗa zlam ahar ga zal slewja, si mâgray tʉwi àna naŋ lala. Ahar gəɗakani mâhəŋgalay Melefit kəlavaɗ, mə̀mbrəŋum ba. Tamal magray nahkay ti Seteni àgosay leli koksah, àgri araŋa ana leli koksah (4–6). 
\ip Pakama ga Pol ya àhi ana ndam ga Yezu ahaslani ni ti, ahàr àɗəm leli day mə̂gəsumkabu. Si mîci pakama gayaŋ ni, màgray tʉwi àna naŋ kwa. 
\c 1  
\s1 Sa ga Pol 
\p  
\v 1 Nu Pol, Melefit àdaba nu a, nìgia zal asak ga Yezu *Krist a. Nəbikioru wakita hini ana kʉli ndam *njəlatani ya kəfumki ahàr ka Yezu Krist, kə̀bum a kəsa Efez bu ni.  
\v 2 Bəŋ geli Melefit nday ata Bay geli Yezu Krist tə̂gri sulum gatay ana kʉli, tâgray ti *kânjəhaɗumkabu àna sulumani ti. 
\s1 Melefit agri zlam sulumani kay ana ndam ga Yezu 
\p  
\v 3 Ahàr àɗəm məzləbum Melefit, Bəŋ ga Bay geli Yezu *Krist, aɗaba àgria zlam sulumana ɗek ana leli àna Məsuf gayaŋ a. Zlam sulumani gani nday nani ti a duniya bu do, nday e melefit bu. Àgri tay ana leli ti aɗaba leli mə̀bu akaba Yezu Krist akaɗa mis bəlaŋ palam.  
\v 4 Wuɗaka Melefit àgraya məlaŋ a ti àdəkiba leli a, ti mîgi mis *njəlatani ke eri gayaŋ, ti àŋgətfəŋa zlam magədavani kè leli ba. Àdəkiba leli a nahkay ti, ti mîgi akaba Yezu Krist akaɗa mis bəlaŋ. 
\p Naŋ gani àwaya leli a dal-dal,  
\v 5 nahkay àɗəmbiya kwa ahaslana emigi bəza gayaŋ àna tʉwi ga Yezu Krist. Àgray nahkay ti ka mawayay gayaŋ aɗaba àɓəlafəŋa dal-dal,  
\v 6 awayay ti mis tə̂sər naŋ gəɗakani, tâzləbay naŋ azuhva sulum gayaŋ ya àgri ana leli ni. Àgri sulum gani nani ana leli ti àna wur gayaŋ biliŋ biliŋeni ni. Awayay naŋ dal-dal. 
\p  
\v 7 Leli mìgia akaba Yezu Krist a akaɗa mis bəlaŋ, aɗaba Melefit àmba leli àna mimiz ga Yezu a, àmbərfəŋa zlam magudarani geli ni kè leli a. Àgray nahkay ti, awayay aɗafaki sulum gayaŋ ti kay dal-dal.  
\v 8 Sulum gani ya àvi ana leli ni àsaɓay ; àgray ti leli mə̂sər zlam akaba mîci ere ye ti awayay ni ɗek.  
\v 9 Ere ye ti Melefit awayay amagray kama ni maŋgahani, ay ti àɗəfiaba ana leli a. Ere gani nani ti àɓəlafəŋa dal-dal. Àɗəmbiya kwa ahaslani, amagravu àna tʉwi ga Yezu Krist.  
\v 10 Ere gani nani ti amagray ka sarta ya ti amaslamalakabá zlam a ɗek ni. Ere gani nihi : amaŋgasikabu ahàr ana zlam ɗek, zlam ya agavəla ɗek akaba zlam ya a ga haɗ ni ɗek, ti bay bəlaŋ mə̂gur tay. Bay gani nani ti Krist. 
\p  
\v 11 Leli ndam *Zʉde ya mə̀bu akaba Krist akaɗa mis bəlaŋ ni day Melefit àvia ja gani geli ana leli a. Melefit àgraya zlam a ɗek ka mawayay gayaŋ a akaɗa gayaŋ ya àɗəmbiyu ahaslani na, nahkay àdababiya leli kwa ahaslana.  
\v 12 Leli ndam ya mə̀fəki ahàr ke Krist enjenjeni ni Melefit àdababiya leli a nahkay ti, aɗaba awayay ti mis tazləbay naŋ dal-dal azuhva zlam ya àgri ana leli ni. 
\p  
\v 13 Lekʉlʉm day kə̀bum akaba Krist akaɗa mis bəlaŋ, aɗaba kìcʉma pakama ge jiri a, *Ma Mʉweni Sulumani ya Melefit àhəŋgay kʉli àna naŋ na. Nahkay kə̀fumkia ahàr ke Krist a, naŋ day àvia Məsuf gayaŋ ana kʉli a akaɗa ya àɗəmbiyu ahaslani ni. *Məsuf Njəlatani ya àvi ana kʉli ni ti akaɗa zlam gayaŋ ya àgrakia ke kʉli a, aɗafaki ti lekʉlʉm gayaŋ ni.  
\v 14 Àvi Məsuf Njəlatani nani ana leli ti aɗafaki amara mahəŋgay leli eɗeɗiŋ eɗeɗiŋeni ka ya ti emendeveriŋ tʉwi gayaŋ ɗekeni ni. Nahkay ti məzləbum naŋ dal-dal azuhva tʉwi gayaŋ ya àgri ana leli ni. 
\s1 Pol ahəŋgali Melefit ana ndam ga Yezu 
\p  
\v 15 Nahkay zla nahəma, nəgri sʉsi ana Melefit azuhva ere ye ti kəgrum ni, aɗaba nìcia lekʉlʉm kə̀fumkia ahàr ka Bay geli Yezu a, kawayum ndam ge Melefit ɗek daya.  
\v 16 Nahkay nə̀bu nəgri sʉsi ana Melefit kəlavaɗ azuhva ere ye ti kəgrum ni, nə̀mbrəŋ do. Nə̀bu nahəŋgali Melefit ana kʉli daya.  
\v 17 Melefit ti naŋ Melefit ga Bay geli Yezu *Krist, naŋ Bəŋ geli gəɗakani ya mazləbay ni. Nahəŋgalay naŋ ti mə̂vi məsər zlam, mə̂ɗəfiki ana kʉli ahəmamam kəsərumkivu naŋ ni.  
\v 18 Nahəŋgalay naŋ keti ti mə̂fiviyu majalay ahàr sulumani ana kʉli a ahàr vu, ga məsər ere ye ti azalaki kʉli ga məviani ana kʉli ni, ga məsər sulumani ya ti agri ana ndam gayaŋ ni. Sulumani gani nani ti kay dal-dal, àtama zlam ndahaŋ na ɗek.  
\v 19 Nahəŋgalay Melefit ti kə̂sərum njəɗa gayaŋ gəɗakani àtama njəɗa ndahaŋ a ɗek. Njəɗa gayaŋ gani nani ti àgri tʉwi ana leli àna naŋ, leli ndam ya mə̀bu məfəki ahàr ka naŋ ni. Àna njəɗa gani nani ti ere ye ti èsliki magrani àna naŋ do ni ti àbi.  
\v 20 Àna njəɗa gani nani ti àhəŋgaraba Krist e kisim ba, mək àfəkaɗ naŋ kà gəvay gayaŋ e melefit bu ka məlaŋ ga gəɗakani.  
\v 21 Eslini ti Krist agur *məslər ge Melefit akaba gəɗákani gatay ɗek, agur bəbay ɗek akaba ŋgumna ɗek daya. Ku ndam njəɗa-njəɗani weley weley do ɗek ya mis tacali slimi ana tay ni ti Krist agur tay daya. Agur nday ya tə̀bu ka sarta hini ni ciliŋ do, agur nday ya atələbu ka məlaŋ mʉweni ya Melefit amagraya ni daya.  
\v 22 Nahkay Melefit àmbriva zlam a ɗek a ahar va ana Krist a. Àfəki naŋ gəɗakani ka ahàr ga zlam ɗek, àfiyu naŋ bay gəɗakani ga ndam gayaŋ ya *təcakalavu ku eley eley do ɗek ni.  
\v 23 Ndam ya təfəki ahàr ke Krist ni ɗek ti nday ɗekeni tìgia vu gayaŋ a, aɗaba njəɗa gayaŋ ɗek àvu a tay bu. Krist ti njəɗa ge Melefit ɗek àvu a vu gayaŋ bu daya, njəɗa ge Melefit ya àhəcikivu ana naŋ ni ti àbi simiteni. 
\c 2  
\s1 Melefit àhəŋga leli àna sulum gayaŋ a 
\p  
\v 1 Ahaslani ti lekʉlʉm kə̀bum akaɗa ge kisim ni kè meleher ge Melefit aɗaba kàgudarumbiya zlam a ɗek.  
\v 2 Kàgudarumbiya zlam a kəlavaɗ ka sarta gani nana akaɗa ge mis ndahaŋ ya tagudar zlam a duniya bu ni. Lekʉlʉm kìcʉmikia slimi ana bay njəɗ-njəɗani magədavani na. Bay gani nani agur məlaŋ ya a gala-gala ge melefit bu akaba haɗ ni, nani məsuf, agray tʉwi ka sarta hini a vu ge mis ya tìciiki slimi ana Melefit do ni bu.  
\v 3 Leli ɗek ahaslani day leli mə̀bu akaɗa gatay ni, kəlavaɗ màgrabiya zlam magədavani ya məɓəruv geli àwayay na. Màjalakibiya ahàr ka zlam ya tàɓəlafəŋbiya kè leli a na ciliŋ. Manjəhaɗ geli ti nahkay. Àna manjəhaɗ geli gani nani ti akal Melefit amatraɓ leli akaɗa ya amatraɓ nday ndahaŋ ni. 
\p  
\v 4 Ay ti amagray nahkay va do. Melefit ti awayay leli dal-dal, məsi cicihi gəɗak.  
\v 5 Ku tamal leli mə̀bu akaɗa ge kisim ni kè eri gayaŋ aɗaba màgudara zlam a nəŋgu ni, àvia sifa ana leli a ka ahàr bəlaŋ akaba *Krist a. Naŋ àhəŋgay kʉli ti ga sulum gayaŋ.  
\v 6 Leli ti mìgia akaɗa mis bəlaŋ akaba Yezu Krist a. Nahkay Melefit àhəŋgaraba leli a ka ahar bəlaŋ akaba Krist e kisim ba, àbəhaɗa leli a digʉsgʉs ka ahar bəlaŋ akaba Krist e melefit ba daya.  
\v 7 Melefit àgri zlam sulumani gani nani ana leli azuhva tʉwi ga Yezu Krist nahkay ti, aɗaba awayay aɗəfiki ana mis ga sarta ya àbiyu kama ni ahəmamam sulum gayaŋ ti gəɗakani àsaɓay ni.  
\v 8 Melefit àhəŋgay kʉli ti ga sulum gayaŋ eɗeɗiŋ : agri sulum gani nani ana kʉli aɗaba kəfumki ahàr ka naŋ, do ni ti àgri ana kʉli ti ka duwa ge tʉwi gekʉli ya kəgrumi ni do. Zlam gani nani ɗek ti Melefit àgri ana kʉli ga sulum gayaŋ zlam gayaŋ.  
\v 9 Nahkay ti àhəŋgay kʉli aɗaba lekʉlʉm kə̀gruma tʉwi sulumana palam do, àhəŋgay kʉli ga sulum gayaŋ ciliŋ, ti ku way way do èji zlabay àna tʉwi gayaŋ gayaŋani ba.  
\v 10 Bay ya ti àgraya leli a ni ti Melefit. Àgraya leli a ti, leli akaba Yezu Krist akaɗa mis bəlaŋ ga magray zlam sulumani. Zlam sulumani gani nani ti Melefit àslamalivabiya ana leli a kwa ahaslana ti mâgray kəlavaɗ. 
\s1 Nday ya ndam Zʉde do ni tìgia jiba bəlaŋ akaba ndam Zʉde a 
\p  
\v 11 Nahkay zla nahəma, sərumki jiba gekʉli ahaslani ti jiba ga ndam *Zʉde do. Ndam Zʉde tə̀ɗəm lekʉlʉm kʉɗi gekʉli *mekeleni do, gatay ni ti mekeleni. Tə̀ɗəm nahkay ti, tə̀ɗəmki ti ka zlam ge mis ya təgri ana vu gatay ni ciliŋ.  
\v 12 Sərumki ahaslani ti lekʉlʉm kə̀sərum *Krist do, lekʉlʉm ndam *Izireyel do. Ahaslani Melefit *àwəlkabá məwəlvana akaba ndam gayaŋ a, àhi ana tay aməgri sulum gayaŋ ana tay, ay ti lekʉlʉm kə̀kumkibu bi. Ka sarta gani nani ere ye ti kə̀fumki ahàr ni ti àbi. Kə̀sərumbiyu Melefit a manjəhaɗ gekʉli a duniya bu ndo daya.  
\v 13 Ahaslani ti nahkay, ay nihi ti akaɗa nani va do. Ahaslani ti lekʉlʉm driŋ driŋ akaba Melefit, ay nihi àna tʉwi ga Yezu Krist nahəma lekʉlʉm kə̀bum kà gəvay ge Melefit. Krist àgray tʉwi nani ti àna mimiz gayaŋ ya àbaya ni.  
\v 14 Nahkay leli ɗek manjəhaɗkabu àna sulumani ti azuhva Krist. Ahaslani ti ndam Zʉde akaba ndam ya ti nday ndam Zʉde do ni jiba gatay gərgəri, ay nihi ti èbeɗekabá tay a, tìgia jiba bəlaŋ. Ahaslani ezir àbu e kiɗiŋ gatay bu, akaɗa gudu èdekaba tay a, nihi ti Krist àməta ti èmbeɗkaba gudu gani nana.  
\v 15 Mʉwiz a wakita gayaŋ ni bu aɗəmki ma ke *Divi akaba ka manjəhaɗ ga ndam Zʉde, ay azuhva tʉwi ge Krist ti wakita nani àgray tʉwi va do. Krist àgray nahkay ti awayay ndam Zʉde akaba nday ya ndam Zʉde do ni têbeɗevu, tîgi akaɗa mis bəlaŋ. Jiba gatay gərgəri va do, tìgia nday manjəhaɗkabani àna sulumani akaɗa mis bəlaŋ.  
\v 16 Gayaŋ ya àmət kà təndal ni ti àzaba ezir ya àvu ahaslani e kiɗiŋ gatay bu na. Nahkay tìgia akaɗa mis bəlaŋ aɗaba àŋgalabakabá tay akaba Melefit a.  
\v 17 Naŋ àra a duniya va ga məhi *Ma Mʉweni Sulumani ana mis, àɗəm si mis tânjəhaɗkabu akaba Melefit àna sulumani kwa. Àhi ana kʉli, lekʉlʉm ya kə̀bum driŋ driŋ akaba Melefit ni, àhi ana nday ya tə̀bu cifa cifa kà gəvay ge Melefit ni daya.  
\v 18 Nahkay àna tʉwi ge Krist day kwa ti leli ɗek mə̀ŋgət divi ga mahəɗakfəŋiyani kà Bəŋ geli Melefit àna njəɗa ga Məsuf gayaŋ biliŋ biliŋeni ni. 
\p  
\v 19 Nahkay ti lekʉlʉm akaɗa ndam mirkwi ahkay do ni akaɗa ndam jiba nahaŋ va do, kìgʉma ka ahar bəlaŋ akaba ndam ge Melefit a, kìgʉma ndam ga huɗ ahay gayaŋ a daya.  
\v 20 Nahkay zla ti kìgʉma akaɗa ga akur ya tèɗezl ahay àna tay na. Asak ga ahay ni ti ndam *asak ga Yezu akaba ndam mahəŋgaray *pakama ge Melefit. Akur gəɗakani ya akay ahay gani nani ti Yezu Krist naŋ naŋani àna ahàr gayaŋ.  
\v 21 Ahay gani nani ɗek anjəhaɗ lala, aləmvu lala azuhva Yezu Krist. Nahkay ahay ni egi ahay *njəlatani gəɗakani ge Melefit, ti Bay geli mânjəhaɗviyu.  
\v 22 Lekʉlʉm ya kìgʉma bəlaŋana akaba Yezu Krist a ni ti Melefit àhəla kʉli akaba ndam gayaŋ ndahaŋ na bilegeni akaɗa ga akur na, ga mələm ahay gayaŋ àna naŋ. A ahay gani nani bu nahəma *Məsuf ge Melefit anjəhaɗviyu. 
\c 3  
\s1 Tʉwi ga Pol ya agri ana ndam ya nday ndam Zʉde do ni 
\p  
\v 1 Nahkay zla nahəma, nu Pol nahəŋgali Melefit ana kʉli. Nu a daŋgay bu azuhva tʉwi ga Yezu *Krist ya nəgri ana kʉli ya lekʉlʉm ndam *Zʉde do ni.  
\v 2 Tʉwi ge Melefit ya àvu ga sulum gayaŋ ti nəgri ana kʉli ni ti àbi kìcʉma lala.  
\v 3 Melefit àɗəfuaba pakama ya *maŋgahani ahaslani na. Àki ka pakama gani nani ti nə̀bikia ma gana ana kʉli a gʉzit.  
\v 4 Pakama maŋgahani nani ti àɗəmki ke Krist. Tamal kèjeŋgʉma ere ye ti nə̀bəki na ti kəsərum nu nə̀səra pakama nana lala.  
\v 5 Pakama gani nani nahəma, Melefit àɗəfiaba ana mis ya ahaslana vay-vay ndo. Ay nihi ti àɗəfiaba ana ndam *asak gayaŋ *njəlatani na akaba ana ndam njəlatani ya tahəŋgaray *pakama gayaŋ na. Àɗəfiaba ana tay a àna njəɗa ga Məsuf Njəlatana.  
\v 6 Pakama gani nani maŋgahani ni ti nihi : Ere ye ti Melefit aməgri ana ndam Zʉde ni ti aməgri ana kʉli ya ndam Zʉde do ni daya. Lekʉlʉm ya ndam Zʉde do ni akaba ndam Zʉde ni Melefit èbeɗekabá kʉli a, kìgʉma jiba bəlaŋ. Nahkay ere ye ti Melefit àɗəm aməgri ana ndam Zʉde aɗaba nday akaba Yezu Krist akaɗa mis bəlaŋ ni ti aməgri ana kʉli ya ndam Zʉde do ni daya. Àɗəfiaba ere nani ana leli a ti àna *Ma Mʉweni Sulumani ya àhi ana leli ni. 
\p  
\v 7 Ma Mʉweni Sulumani nani ti Melefit àvua tʉwi gana ga məhiani ana mis a. Àvu ti ga sulum gayaŋ, àna njəɗa gayaŋ gəɗakani daya.  
\v 8 Nu ya nìsliviyu a ndam ge Melefit ndahaŋ ni vu do ni, Melefit àgrua sulum gayaŋ a, ga məhiani ana ndam ya nday ndam Zʉde do ni ahəmamam Krist naŋ àbu agri zlam sulumani kay ana mis ni. Zlam sulumani nani mis tə̀sərkaba koksah.  
\v 9 Àgrua sulum gayaŋ a ga məɗəfiaba ana mis a ahəmamam Melefit agroru tʉwi àna pakama gani nani maŋgahani ni. Melefit àgraya zlam a ɗek ahaslana ; kwa ka sarta gani nani àŋgahfəŋa pakama gani nana kè mis a.  
\v 10 Ay nihi ti Melefit awayay aɗafaba pakama maŋgahani nana àna tʉwi gayaŋ ya agray e kiɗiŋ ga ndam gayaŋ ya *təcakalavu ku eley eley do ni bu ɗek ni. Awayay ti *məslər akaba gəɗákani gatay ya tə̀bu e melefit bu ni ɗek tîci, ti tə̂sər ahəmamam Melefit àsəra zlam a ɗek, agray zlam ɗek kigeni ni.  
\v 11 Kwa ka sarta ya àgraya məlaŋ a faŋ ndo nəŋgu ni àɗəmbiya, nihi ti àgra àna tʉwi ga Bay geli Yezu Krist a.  
\v 12 Àna tʉwi gani nani ti Melefit àvia divi ana leli a ga mahəɗakfəŋiyana, nahkay mə̀grumfəŋa aŋgwaz a va do, aɗaba leli mə̀bu akaba Yezu Krist akaɗa mis biliŋ, mə̀bu məfumki ahàr daya.  
\v 13 Nahkay zla nahəma, nə̀hi ana kʉli daliya goro ya nəcakay àna tʉwi goro ya nagray azuhva kʉli ni ti kam-kam àziaba njəɗa ana kʉli a ba ti. Aɗaba mam, ahàr àɗəm daliya gani nani mə̂vi məmərani ana kʉli sawaŋ. 
\s1 Yezu awayay leli dal-dal 
\p  
\v 14 Nahkay zla nahəma nabəhaɗi mirdim ana Bəŋ geli Melefit ga mahəŋgalay naŋ.  
\v 15 Mis tə̀ɗəm ndam ya agavəla akaba nday ya a ga haɗ ni ti ata bəŋ gatay tə̀bu. Tə̀ɗəm nahkay tata nahəma, aɗaba Melefit naŋ Bəŋ geli naŋ biliŋ.  
\v 16 Naŋ ti gəɗakani àtam zlam ɗek, agur zlam ɗek daya. Nahkay ti nahəŋgalay naŋ ti mə̂vi njəɗa gəɗakani ana kʉli a məɓəruv vu àna tʉwi ga Məsuf gayaŋ,  
\v 17 ti *Krist mânjəhaɗ a məɓəruv gekʉli bu aɗaba kəfumki ahàr. Nahəŋgalay naŋ ti kâwayumvu dal-dal : nahkay akələbum àna njəɗa kay akaɗa ga məŋ ga zlam ya sliri gani tàdəgoru a haɗ vu driŋ ni, ahkay do ni akələbum àna njəɗa akaɗa ga ahay asak gani mafəkaɗani lala ni.  
\v 18 Nahəŋgalay Melefit ti mə̂vi njəɗa ana kʉli ka ahar bəlaŋ akaba ndam gayaŋ ndahaŋ ni ɗek, ti kə̂sərum ahəmamam Krist awayay mis ɗek ku driŋ eley eley do ni. Nahkay məlaŋ ya Krist àwayavù mis eslini do ni ti àbi.  
\v 19 Ahəmamam Krist awayay mis ti mis tə̀sərkaba koksah, ay ti nahəŋgalay Melefit ti kəsərumkaba lala. Nahkay ti akələbum àna *sulum ge Melefit ni ɗek, ere ye ti aməhəcikivu ana kʉli ti àbi simiteni. 
\p  
\v 20 Melefit ti esliki məgri zlam ana leli kay dal-dal àtama geli ya mihindifiŋa na, àtama geli ya majalaki ahàr na daya. Agray nahkay ni ti àna njəɗa gayaŋ ya agray tʉwi a leli bu ni.  
\v 21 Nahkay zla nahəma mâzləbay naŋ azuhva tʉwi gayaŋ ya agray e kiɗiŋ ga ndam gayaŋ ya *təcakalavu ku eley eley do ɗek ni bu ni, mâzləbay naŋ azuhva zlam gayaŋ ya àgri ana leli azuhva tʉwi ga Yezu Krist ni daya. Mâzləbay naŋ ku nihi, mâzləbay naŋ ka sarta ya amara ni ɗek, mâzləbay naŋ kaŋgay-kaŋgay. Aya nahkay. 
\c 4  
\s1 Ndam ga Yezu ti nday biliŋeni akaɗa vu bəlaŋ 
\p  
\v 1 Nahkay zla nahəma, nahəŋgalay kʉli ti kanjəhaɗumkabu lala aɗaba Melefit àzalay kʉli ti, awayay ti kə̂grum nahkay. Ahəŋgalay kʉli ti nu Pol ya a daŋgay bu azuhva tʉwi goro ya nəgri ana Bay geli ni.  
\v 2 Nəɗəm nahəma, həŋgrumoru ahàr a haɗ e kiɗiŋ gekʉli bu, njəhaɗum kuɗufa, ɓesʉm zlam ya tə̀gri ana kʉli ni, ndumkabu, wayumvu.  
\v 3 Kìgʉma akaɗa mis bəlaŋ àna tʉwi ga *Məsuf ge Melefit a. Nahkay ti zum njəɗa ti *kanjəhaɗumkabu àna sulumani gayaŋ.  
\v 4 Aɗaba mam, leli ndam ga Yezu mìgia akaɗa mis bəlaŋana, nahkay vu geli biliŋ. Məsuf ge Melefit ti naŋ bəlaŋ. Nahkay ti ere ye ti Melefit àzalaki leli ga məgriani ana leli ni ti bəlaŋ daya.  
\v 5 Bay geli ti naŋ bəlaŋ. Məfəki ahàr ti ka naŋ naŋ bəlaŋ. *Məbaray àna slimi gayaŋ, baray gani nani ti bəlaŋ.  
\v 6 Melefit ti naŋ bəlaŋ, naŋ Bəŋ geli ɗek, agur leli ɗek, agray tʉwi e leli bu ɗek, anjəhaɗ a məɓəruv geli bu ɗek daya. 
\p  
\v 7 Ay ti Krist àvia zlam sulumani gərgərana ana ku way way do geli a ɗek akaɗa gayaŋ ya awayay na.  
\v 8 Pakama gani àbu məbəkiani a Wakita ge Melefit bu nahkay hi : 
\q1 « Àcəloru agavəla, 
\q1 àgəs mis ga njəɗa, 
\q1 àvia zlam ana mis a daya.\f + \fr 4:8 \ft Mənjay Limis 68.19.\f* » 
\p  
\v 9 Ay ma ya tə̀ɗəm « àcəloru agavəla » ni ti awayay aɗəmvaba mam ? Awayay aɗəmvaba wuɗaka Krist àcəloru agavəla nahəma, àsləkabiya agavəla, àra ka haɗ a.  
\v 10 Nahkay bay ya àra ka haɗ a ni ti àcəloru agavəla ca-ca e melefit vu day naŋ gani bəlaŋani ni. Àgray nahkay ti mə̂zum bay, mə̂gur zlam eley eley do ɗek.  
\v 11 Naŋ gani àvia njəɗa ana mis ga magray tʉwi gərgərani àna naŋ a : mis ndahaŋ tìgia ndam *asak a, mis ndahaŋ ndam mahəŋgaray *pakama ge Melefit, mis ndahaŋ ndam məhioru *Ma Mʉweni Sulumani ana mis, mis ndahaŋ ti ni *ndam məbi slimi ana ndam ge Krist ahkay do ni ndam macahi zlam ana tay.  
\v 12 Krist àgray nahkay ti, ti mis nday nani tə̂jənaki ndam gayaŋ ga magray tʉwi ge Melefit lala. Ndam gayaŋ ni ti akaɗa vu gayaŋ, awayay ti tə̂ŋgət njəɗa, tâŋgoru kama kama.  
\v 13 Leli ɗek emigi akaɗa mis bəlaŋ ; nahkay ti aməfumki ahàr ka Wur ge Melefit ka ahar bəlaŋ, aməsərum naŋ ka ahar bəlaŋ daya. Emigi akaɗa mis məndəhani. Nahkay emigi akaɗa ge Krist ni, ere ye aməhəcikivu ana leli ni ti àbi.  
\v 14 Ka sarta gani nani ti leli amələbi akaɗa ga bəza ni va bi. Nahkay ndam magosay mis ya təcahi zlam gatay ana mis ni etisliki mijiŋkia leli ke divi a va do. Nday gani tawayay tijiŋkia leli ke divi a ti akaɗa ga aməɗ akaba yam ya təzoru *slalah ga yam eley eley do ɗek ni, ay ka sarta nani ti etisliki va do.  
\v 15 Ka gani nani ti aməɗəmum ma ge jiri, amawayumvu, amoru kama kama àna tʉwi ya magray ni ɗek, ti mîgi akaɗa ge Krist, naŋ ya ka ahàr geli, agur leli ni.  
\v 16 Leli ndam gayaŋ ti akaɗa vu gayaŋ. Tamal vu ge mis majakwakabani lala, zlam ga vu gayaŋ ni ɗek tagray tʉwi gatay lala ti vu ni ɗek aɗək lala daya. Leli day nahkay : tamal mawayumvu, ku way way do agray tʉwi ya Melefit àvi ni lala ti amoru kama kama àna sulumani. 
\s1 Manjəhaɗ geli mʉweni akaba Krist 
\p  
\v 17 Ere ye ti nawayay nəhi ana kʉli ni ti nəhiki ana kʉli àna slimi ga Bay geli. Ma gani nani ti nihi : Kànjəhaɗum akaɗa ga ndam ya tə̀fəki ahàr ke Melefit do ni va ba. Nday nahəma, majalay ahàr gatay ti masakani.  
\v 18 Nday ti akaɗa nday a ləvəŋ bu, tə̀sər araŋa do ferera. Kè meleher ge Melefit ti nday ndam mirkwi, tə̀ŋgət sifa gayaŋ ya avi ana mis ni ndo. Nday nahkay ti aɗaba ahàr gatay ɓaŋ-ɓaŋ, tìci ma do.  
\v 19 Nday gani mimili àki ka tay va bi, tə̀via ahàr gatay ana zlam magudarana ɗek, nahkay tagray zlam ya ti àɓəlay do simiteni ni ɗek kəlavaɗ, tìsliki məmbrəŋani koksah. 
\p  
\v 20 Lekʉlʉm zla nahəma, manjəhaɗani akaɗa hini ti àrakaboru akaba ma ge *Krist ya tə̀cahi ana kʉli ni do.  
\v 21 Pakama ya kìcʉm ni ti tə̀ɗəmki ka naŋ do aw ? Ere ye ti tə̀cahi ana kʉli ni ti manjəhaɗ gayaŋ do aw ? Zlam nday nani ɗek tagravu àna jiri ga Yezu ya àhi ana leli ni.  
\v 22 Nahkay ti mbatumkaba majalay ahàr gekʉli a, ti kànjəhaɗum akaɗa gekʉli ya ahaslani ni va ba. Manjəhaɗani gekʉli ya ahaslani ni ti agudar mis, aɗaba nday ya ti tanjəhaɗ nahkay ni ti tawayay zlam ya tigi eri, tijiŋ tay ni ciliŋ.  
\v 23 Gəsumkabá ti Melefit mâmbatikaba məɓəruv gekʉli ana kʉli a, ti kâjalum ahàr nahaŋ sulumani.  
\v 24 Ahàr àɗəm kîgʉm mis mʉweni ya Melefit àgraya tay ka mawayay gayaŋ a ni, ti kânjəhaɗum àna jiri, kə̂grum zlam sulumani aɗaba lekʉlʉm ndam gayaŋ. 
\p  
\v 25 Nahkay zla nahəma, kàsəkaɗum malfaɗa va ba, ɗəmumvu jiri e kiɗiŋ gekʉli bu sawaŋ, aɗaba lekʉlʉm ɗek kìgʉma vu a bəlaŋ. \f + \fr 4:25 \ft Mənjay Zakari 8.16.\f* 
\v 26 Tamal ti kə̀zumuma ɓəruv a nahəma, kàgudarum zlam àna naŋ ba. Wuɗaka fat àdiyu a ahay vu nahəma, kə̀mbrəŋuma məzum ɓəruv gekʉli na \f + \fr 4:26 \ft Mənjay Limis 4.5.\f* ;  
\v 27 kə̀vumi divi ana *Seteni ge mesipet kʉli ba.  
\v 28 Maslaŋa ya ti egi akal ahaslani ni ti mə̂mbrəŋ akal gayaŋ ni. Mâzay njəɗa ga magray tʉwi sulumani àna ahar gayaŋ gayaŋani ti mə̂ŋgət zlam ga məjənaki ndam talaga.  
\v 29 Kagudarumi ma ana mis ba. Kəɗəmum ma nahəma, ɗəmum ma sulumani ya azoru mis kama ni sawaŋ. Ɗəmum ma ya àgəski məɗəmani ni, nahkay ma gani avi njəɗa ana ndam ya ti tici ni.  
\v 30 Kə̀grum zlam ya ti ahəli ahàr ana *Məsuf Njəlatani ge Melefit ni ba. Məsuf gani nani ti Melefit àgrakia amal gayaŋ ke kʉli ɗek àna naŋ a, ga maɗafakiani kʉli ndam gayaŋ kà fat ya ti amara mahəŋgay leli ɗek ni.  
\v 31 Zumaba ezir e kiɗiŋ gekʉli ba, kə̀zumumvu ɓəruv ba, kə̀ləgumvu ba, kìndivʉmvu ba daya. Kə̀grum cuɗay ba simiteni.  
\v 32 Grum zlam sulumani e kiɗiŋ gekʉli bu, wayumvu, mbrəŋumfəŋa zlam ga bəza ga məŋ gekʉli ya tàgudari ana kʉli na kà tay a, nday day tə̂mbərfəŋa kè kʉli a, akaɗa ge Melefit ya àmbərfəŋa kè kʉli a ni. Àmbərfəŋa kè kʉli a ti àna tʉwi ge Krist ya àgray ni. 
\c 5  
\s1 Ndam ge Krist ti ahàr àɗəm tânjəhaɗ ahəmamam 
\p  
\v 1 Nihi ti lekʉlʉm bəza ge Melefit, awayay kʉli. Nahkay ti grum zlam akaɗa gayaŋ ya ti agray ni.  
\v 2 A huɗ ga manjəhaɗ gekʉli bu ɗek ti wayumvu akaɗa ge *Krist ni. Naŋ ti àɗafaki ti awayay leli, àmət ga mahəŋgay leli. Sifa gayaŋ ti àvi ana Melefit akaɗa ga sədaga ya təvi ana Melefit ni. Sədaga gayaŋ nani àɓəlafəŋ kè Melefit akaɗa ge tersel ya ti ezi sulumani ni. 
\p  
\v 3 Lekʉlʉm ndam ge Melefit, nahkay àgəski ti kə̀grum mesʉwehvu ba, kə̀grum zlam ge mimili ba simiteni, zlam ge mis ndahaŋ ègi eri ana kʉli ba. Zlam nday nani ɗek ti maslaŋa àcalki kʉli ba simiteni.  
\v 4 Àgəski day kə̀ɗəmum ma ge mimili ba, kə̀ɗəmum ma satat ba, kə̀bumvu seki ba daya. Àgəski ti grumi sʉsi ana Melefit azuhva tʉwi gayaŋ ya àgri ana kʉli ni sək sawaŋ.  
\v 5 Sərumki lala, maslaŋa ya agray mesʉwehvu ni, maslaŋa ya ti agray zlam ge mimili ni, maslaŋa ya ti zlam ge mis egi eri ni lu, nday nani ɗek tə̀huriyu a Məgur ga ata Krist nday ata Melefit ni vu koksah. Maslaŋa ya ti zlam egi eri ni àwayay Melefit do, azay zlam ga duniya sək Melefit gayaŋ. 
\p  
\v 6 Ndam ya ti tagray zlam nday nani ti təzumi ɓəruv ana Melefit. Melefit amatraɓ tay dal-dal, aɗaba tə̀gəsiki ma gayaŋ ni ndo. Nahkay maslaŋa àgosafəŋa kʉli kà ma hina àna ma kwaŋani ndahaŋ a ba.  
\v 7 Nahkay zla ti araŋa èbeɗekabu kʉli akaba ndam nday nani ba.  
\v 8 Ahaslani ti lekʉlʉm kə̀vum e ziŋ-ziŋeni bu, ay nihi ti lekʉlʉm kə̀bum a maslaɗani bu aɗaba lekʉlʉm kìgʉma akaɗa mis bəlaŋ akaba Bay geli a. Nahkay ahàr àɗəm njəhaɗum akaɗa ga ndam ya tə̀bu a maslaɗani bu ni.  
\v 9 Maslaɗani ti azəbiyu manjəhaɗani sulumani e kiɗiŋ ge mis bu, magray zlam jireni akaba məɗəm ma ge jiri.  
\v 10 Zum njəɗa ga məsər zlam ya ti àɓəlafəŋ kà Bay geli ni.  
\v 11 Kə̀hərumkiviyu ke tʉwi ge mis ya ti tagray e ziŋ-ziŋeni bu ni ba. Zlam nday nani ɗek ti zlam masakani. Àgəski ti kəɗəmumaya vay-vay, kìmbirʉmfiŋ ba : zlam nday nani ti zlam magədavani.  
\v 12 Zlam gatay nani ya tagray akal-akal ni ti ku macalfəŋani tekeɗi asay mimili.  
\v 13 Tamal kə̀ɗəmumaya zlam magədavana vay-vay nahəma, egi akaɗa ga zlam ya ti epivu a maslaɗani bu ni, nahkay mis tə̀sər ti zlam nani magədavani eɗeɗiŋ.  
\v 14 Zlam ya ti epivu lala a maslaɗani bu nahəma, ègia akaɗa ga maslaɗani na. Nahkay tə̀ɗəm : 
\q1 « Nak ya ti kinji ɗʉwir ni, piɗekvu. 
\q1 Cikaba e kiɗiŋ ga ndam məmətani ni ba, 
\q1 ti Krist mâslaɗay kur akaɗa ga fat ya aslaɗay məlaŋ ni. » 
\p  
\v 15 Nahkay zla nahəma bumi slimi lala ana manjəhaɗ gekʉli. Kànjəhaɗum akaɗa ga ndam muru ni ba, njəhaɗum akaɗa ga ndam məsər zlam ni sawaŋ.  
\v 16 Zemeni geli hini ti magədavani. Nahkay ka ya ti kislʉmki magray zlam sulumani nahəma, grum.  
\v 17 Kànjəhaɗum akaɗa ga ndam ya ti tə̀sər zlam do ni ba. Ay ti zum njəɗa ga məsər ere ye ti Bay geli awayay ti kə̂grum ni sawaŋ. 
\p  
\v 18 Kə̀vumi vu gekʉli ana zum ga makaɗ kʉli ba. Tamal kəgrum nahkay ti agudari manjəhaɗ gekʉli ana kʉli. Ahàr àɗəm *Məsuf ge Melefit mîsliviyu a vu vu ana kʉli cisl cisl sawaŋ.  
\v 19 Dʉm limis gərgərani kay ya Məsuf ge Melefit àvi ana kʉli ni. Dʉmi ana Melefit e kiɗiŋ gekʉli bu, zləbum Bay geli àna məmərani.  
\v 20 Grumi sʉsi ana Bəŋ geli Melefit àna slimi ga Bay geli Yezu Krist. Grumi sʉsi kəlavaɗ àki ka zlam ya ti àvi ana leli ni ɗek, kə̀mbrəŋum ba. 
\s1 Manjəhaɗ ga zal nday ata wal gayaŋ 
\p  
\v 21 Lekʉlʉm ya ti kəhəŋgrumioru ahàr a haɗ ana *Krist ni ti ku way way do mîciiki ma ana maslaŋa nahaŋ e kiɗiŋ gekʉli bu.  
\v 22 Lekʉlʉm wál cʉmiki ma ana zawal gekʉli akaɗa ya kicʉmiki ma ana Bay geli ni.  
\v 23 Aɗaba zal nahəma, naŋ gəɗakani àki ka wal gayaŋ akaɗa ge Krist naŋ gəɗakani àki ka ndam gayaŋ ya *təcakalavu ku eley eley do ɗek ni. Ndam gayaŋ ni ti vu gayaŋ, Bay ya ahəŋgay tay ni ti naŋ.  
\v 24 Nahkay wál tîciiki ma ana zawal gatay a zlam bu ɗek, akaɗa ga ndam ge Krist ya ticiiki ma ana Krist ni. 
\p  
\v 25 Lekʉlʉm zawal, ku way way do mâwayay wal gayaŋ akaɗa ge Krist ya awayay ndam gayaŋ ni. Krist àɗafaki mawayay gayaŋ nani ti àna məvi ahàr gayaŋ ana ndam gayaŋ ni.  
\v 26 Àgray nahkay ti, awayay ti tîgi *njəlatani kè eri ge Melefit. Nahkay zla nahəma àbara tay a lala àna yam a, tîgia njəlatana àna pakama gayaŋ ya tìci na.  
\v 27 Àgray nahkay ti mâmənjaləŋ ka tay tigi eri dal-dal, akaɗa ga wal maɓəlani ya tə̀ŋgətfəŋa ndivey a do ni. Nahkay awayay ti ndam gayaŋ ni tîgi njəlatani, tə̀ŋgətfəŋa zlam magudarani kà tay a ba simiteni.  
\v 28 Zal day mâwayay wal gayaŋ ti akaɗa ge Krist ya awayay ndam gayaŋ ni. Ahàr àɗəm zal ni mâwayay wal gayaŋ akaɗa ya ti awayay ahàr gayaŋ gayaŋani ni. Nahkay zal ya ti awayay wal gayaŋ ni awayay ahàr gayaŋ gayaŋani.  
\v 29 Maslaŋa ɗay-ɗay èzirey vu gayaŋ ndo : azumi zlam ana vu gayaŋ, aslamalay daya, akaɗa ge Krist ya aslamalay ndam gayaŋ ni,  
\v 30 aɗaba leli ndam gayaŋ ɗek ti vu gayaŋ.  
\v 31 Àbu məbəkiani a Wakita ge Melefit bu, Melefit àɗəm : « Nahkay ti mis zalani amahəraya a ahay ga bəŋani ata məŋani ba, atanjəhaɗkabu ata wal gayaŋ. Nday cʉeni ti vu gatay emigi bəlaŋ.\f + \fr 5:31 \ft Mənjəkiani 2.24.\f* »  
\v 32 A pakama hini bu nahəma, zlam gəɗakani maŋgahani àvu. Nu ti nə̀ɗəm pakama nani azlapaki ke Krist akaba ndam gayaŋ ya *təcakalavu ku eley eley do ɗek ni.  
\v 33 Ku tamal nahkay nəŋgu ni, ahàr àɗəm ku way way do e kiɗiŋ gekʉli bu mâwayay wal gayaŋ akaɗa ya awayay ahàr gayaŋ ni, wal day mə̂həŋgrioru ahàr a haɗ ana zal gayaŋ. 
\c 6  
\s1 Manjəhaɗ ga bəza akaba ata bəŋ gatayani 
\p  
\v 1 Gabəza, àgəski ti cʉmiki ma ana ata bəŋ gekʉli, aɗaba lekʉlʉm kìgʉma akaba Bay geli a akaɗa mis bəlaŋ.  
\v 2 Melefit àɗəm e *Divi gayaŋ ya àhi ana leli ɗəbum ni bu ahkado : « Ŋgwioru a haɗ ana ata buk ata muk. » Divi hini ti Divi ye enjenjeni ge Melefit àɗəm aməvələŋ zlam ni.  
\v 3 Ere ye ti àɗəm amavay ni ti nihi : « Nahkay ekeyey, akəpəs a duniya bu vi kay.\f + \fr 6:3 \ft Mahərana 20.12 ; Mimbiki 5.16.\f* » 
\p  
\v 4 Lekʉlʉm ata bəŋ ga bəza day kə̀zumumi ɓəruv ana bəza gekʉli ba. Ɗəfumiki zlam ana tay, humiki ma ana tay ka zlam ya tàgudar ni akaɗa ga Bay geli ya awayay ni sawaŋ. 
\s1 Manjəhaɗ ge eviɗi akaba ndam məgur tay 
\p  
\v 5 Lekʉlʉm eviɗi cʉmiki ma ana ndam məgur kʉli ya a duniya bu ni. Ŋgumioru a haɗ ana tay, grumfəŋa aŋgwaz kà tay a, grumi tʉwi ana tay àna ɓəruv bəlaŋ, akaɗa ya kəgrumi tʉwi ana *Krist ni.  
\v 6 Kə̀grum tʉwi kè eri gatay ti tâzləbay kʉli ciliŋ ba. Grum ere ye ti àɓəlafəŋ kè Melefit ni àna ɓəruv bəlaŋ sawaŋ, aɗaba lekʉlʉm eviɗi ge Krist.  
\v 7 Grumi tʉwi ana tay àna ɓəruv bəlaŋ akaɗa kəgrumi ana Bay geli, do ni ti ana mis hihirikeni do.  
\v 8 Ku tamal nak eviɗi, ku tamal nak eviɗi do nahəma, sərki maslaŋa ya ti agray tʉwi sulumani ni ti Bay geli aməviləŋ zlam daya. 
\p  
\v 9 Lekʉlʉm ya kə̀bum àna eviɗi ni day, grumi zlam sulumani ana tay bilegeni. Kàzlacumki ka tay ba. Sərumki lekʉlʉm akaba eviɗi gekʉli ni ti lekʉlʉm ɗek Bay məgur kʉli naŋ bəlaŋ, naŋ e melefit bu. Naŋ gani ti ècirkaba mis a do. 
\s1 Zlam ahar ge Melefit ya abi ana ndam gayaŋ ni 
\p  
\v 10 Pakama ya àgəjəni ga məhiani ana kʉli ni nihi : zum njəɗa ga Bay geli, aɗaba lekʉlʉm kə̀bum akaba naŋ akaɗa mis bəlaŋ. Njəɗa gayaŋ ni ti àtama njəɗa ndahaŋ a ɗek.  
\v 11 Bumkabu zlam ga kaɗvu ya Melefit abi ana kʉli ni ɗek. Nahkay ka ya ti *Seteni esipet kʉli àna wir-wir gayaŋ nahəma, kicikʉma gaŋ-gaŋ. \fig Zlam ahar ga zal slewja ga ndam Rom|src="lb00196c.tif" size="col" ref="6.11" \fig* 
\v 12 Nə̀ɗəm nahkay ti aɗaba leli mə̀bu magray silik. Ay silik gani nani ti akaba mis hihirikeni do, magray ti akaba seteni akaba bəbay gatayani akaba gəɗákani gatayani ɗek ya təgur duniya hini ziŋ-ziŋeni ni. Magray silik ni ti akaba seteni cuɗayani ya nday agavəla ni daya.  
\v 13 Nə̀hi ana kʉli həluma zlam ga kaɗvu ya Melefit avi ana kʉli na ɗek ni ti azuhva nani. Nahkay ti ndam ya atərəkia ke kʉli a kà fat ga kaɗvu gani nana ni ti etisliki ke kʉli do. Kələŋ ga kaɗvu nahəma, lekʉlʉm jika jika micikeni ka məlaŋ gekʉli ni. 
\p  
\v 14 Nahkay ti cikʉma gaŋ-gaŋ. Jiri ge Melefit ti jalumki ahàr ; ègia akaɗa maslpara ga ndam slewja ya təwəlvu àna naŋ na. Leli ndam jireni azuhva tʉwi ge Melefit ya àgri ana leli ni. Manjəhaɗ ge jiri gani nani ti jalumki ahàr ; ègia akaɗa ge endʉwi ga ambəl ga ndam slewja ya ti tafakabu ga maŋgah gugum gatay àna naŋ na.  
\v 15 Melefit àɗafaki leli ndam gayaŋ ge jireni àna *Ma Mʉweni Sulumani, nahkay araŋa àhəli ahàr ana leli va do. Jalumki ahàr ka manjəhaɗ gani nani akaɗa kimaka ga ndam slewja ya ti təbəvu a asak vu ni.  
\v 16 Ku ananaw do ɗek fumki ahàr ke Melefit. Məfəki ahàr nani ti akaɗa ga slaku ga ndam slewja ni. *Seteni esipet kʉli ti mesipet gani nani akaɗa ga kamnjagaɗ ya taɓal mis àna naŋ ni. Kamnjagaɗ nani aku àki ka ma gani ge meviyek mis àna naŋ. Ay məfəki ahàr gekʉli ni ègia akaɗa ga slaku ya ti acafəŋa kamnjagaɗ ge minjikiyeni ke kʉli a ni.  
\v 17 Melefit àhəŋga kʉli a. Mahəŋgani nani akaɗa ga gadagar ya ndam slewja təbəvu a ahàr vu ni. Nahkay jalumki ahàr. Jalumki ahàr ka ma ge Melefit daya. Ma gani nani ti akaɗa ga maslalam ya ti *Məsuf ge Melefit àvi ana kʉli ga makaɗvani àna naŋ ni.  
\v 18 A zlam gani nani bu ɗek ti həŋgalum Melefit, hindʉmfiŋa a sarta ba ɗek. Hindʉmfiŋa àna njəɗa ga Məsuf gayaŋ a. Həŋgalum Melefit àki ka ndam gayaŋ ɗek, kə̀mbrəŋum ba, njəhaɗum eri.  
\v 19 Həŋgalumu Melefit daya, ti ka sarta ya ti nəhi ma ana mis ni ti pakama ya nəhi ana tay ni goro do, ge Melefit sawaŋ ; ti nə̂hi Ma Mʉweni Sulumani ana mis, aŋgwaz àwərki nu ba. Ma Mʉweni Sulumani nani ti ahaslani maŋgahani, nihi ti Melefit àŋgazlaya vay-vay.  
\v 20 Yezu *Krist àslərbiyu nu ti ga məhi ma gani ana mis. Ku nu məwəlani a daŋgay bu nəŋgu ni, nə̀mbrəŋ məɗəm ma gani nani do, ègia tʉwi goro a. Nahkay həŋgalum Melefit ti nə̂ɗəm ma vay-vay, aŋgwaz àwərki nu ba, aɗaba Melefit awayay ti nagray nahkay. 
\s1 Sa ga Pol 
\p  
\v 21 Nawayay ti lekʉlʉm day kə̂sərum manjəhaɗ goro akaba ere ye ti nagray ni ɗek ; nəslərkioru wur ga məŋ geli Tisik ke kʉli ga məhi ma gani ana kʉli. Naŋ ti mawayay naŋ, agray tʉwi ga Bay geli lala.  
\v 22 Nəslərkioru naŋ ke kʉli ti ge tʉwi gani nani, ti kə̂sərum manjəhaɗ geli, ti kə̂ŋgətum njəɗa àna pakama gayaŋ ya ti ahi ana kʉli ni daya. 
\p  
\v 23 Bəŋ geli Melefit nday ata Bay geli Yezu *Krist tâgray ti bəza ga məŋ geli ɗek tânjəhaɗkabu àna sulumani ti. Bəza ga məŋ geli ni tâwayavu àkivu, tə̂fəki ahàr ka Yezu Krist àkivu ti.  
\v 24 Melefit mə̂gri sulum gayaŋ ana ndam ya tawayay Bay geli Yezu Krist ga kaŋgay-kaŋgayani ni ti.