\id TIT - Maiwa NT [mti] -Papua New Guinea 2011 (web version -2017) 
\h Taitosi 
\toc1 Poru Gigirum Meuma Taitosi Menan Tenewa 
\toc2 Taitosi 
\toc3 Tai 
\mt1 TAITOSI  
\mt2 Poru Gigirum Meuma Taitosi Menan Tenewa  
\c 1  
\p
\v 1 Poru, God nauwawa eniwa, sira Iesu Keriso apasoro meuma, God gomiya munne igiyawa anotumat muma oya sira anoano natawa me God namive oraiwa oya, me anegne apasoro ana.  
\v 2 \x + \xo 1:2 \xt 1Ko 1:27\x*God me oma den ane uga wape. Me watavit ampa di inaiinai yaibobot oya agi wane. Me nu anoetewa gumbe God wagomiya nedne.  
\v 3 Me anonewa kumive, gae mame toyau nunne. God me Waita Abnawa me nau mame atan oya didnedne.   
\p
\v 4 \x + \xo 1:4 \xt Rom 1:7; 2Ko 8:23; Gar 2:3\x*Ne utunwa Taitosi me anotumat desiroma aunewa gumbe. Mamunwa God ge nu Waita Abnawa numawa Keriso Iesu gumbe, God ano oraiwa ge yum ge gungap.   
\s1 At Kurete Apa Taitosi Nau Aivi  
\p
\v 5 Ne at Kurete apa kwegemna, kuiyawa me nau numawa onan den anewa ge yai waribiya sira ne genan wana mina, gwetoimu dada danave, ge namuyoiyoi igiyawa te muntan oya.  
\v 6 \x + \xo 1:6 \xt 1Ti 3:2-7; 2Ti 2:24-26\x*Namuyoiyoi abnawa me iyayapan pui den yuwameme, memawa vesin desirom, mamawa me usitainawa anotumat anoeme, sira usitainawa mu ano kukaeba mumawa oya pui den yuwameme sira mu nawankanu eme igiyawa onan.  
\v 7 Namuyoiyoi kokawa me God nauwawa aivi gumbe, me iyayapan pui den yuwamemewa. Me danawa piri den aigimpe, yoi yusipamitwa koka den naigimpe, mut atan den anoigimpe, anmagawa kukaeba gumbe den autan anoivi.  
\v 8 Megara baigan gumbe iyayapan warinamivi, me oraivit anoivi, me mokona aigimpe, ano meuma me oraimina, me inaiinai oraimina God namive, ge membovit amaraivi.  
\v 9 Me gae natawa me toyau waneyawa yaigipamit amaraivi. Kuiyawa gae oraiwa gumbe me watdega mumpe, sira yai mu wat dirumpe epin oraiwa.   
\p
\v 10 \x + \xo 1:10 \xt 1Ti 4:7\x*Kuiyawa nu gunup anavi eme igiyawa, gae uga veme igiyawa, iyayapan mu ape iyayapan upeba anopipanum ape igiyawa, obiren wakeya. Mu kwapituitui igiyawa danowo obiren wakeya.  
\v 11 \x + \xo 1:11 \xt 2Ti 3:5-6; 1Pi 5:2\x*Mu nouwa tobotpe. Mu imuwo anmagawa kukaeba autan oya dividivi mu den toyau mumpewa dirumeme, sira gwe gwe upeba mu kukai muteme.  
\v 12 Propeta me at muma desirom meib wane, “Kurete igiyawa mu evedni ugauga vemewa sira mae kukaeba, sira nau atan den anoeme megara mu nakwai nabot nabot igiyawa.”  
\v 13 \x + \xo 1:13 \xt 2Ti 4:2\x*Gae mame natawa di. Meoya, yusipamit wag diruma, meve mu yaimoyai yaug anope anotumat gumbe.  
\v 14 \x + \xo 1:14 \xt 1Ti 4:7\x*Ju igiyawa kuinuiyowa natawa onanwa den anope, sira natawa topaiemewa igiyawa gwangwan mumawa den anope.  
\v 15 Danowa iyakaisi igiyawa munan dividivi undag iyakaisi, megara kukaeba eme igiyawa munan ge den anotumat eme igiyawa munan, dividivi undag iyakaisi onan. Kuiyowa ge nibdanowa me kukaine.  
\v 16 \x + \xo 1:16 \xt 1Jn 1:6; 2:4\x*Mu veme God yaug anotu, go mu aninin emewa mu God topai eme. Mu di kukaimusia, sira mu God noiwa den aueme, sira oma den ane dividivi undag oraivit atan oya.   
\c 2  
\s1 God Toyau Toyau Meuma Gumbe Wakeg Aigimta  
\p
\v 1 Ge toyau toyau oraiwa gumbe gae diruma.  
\v 2 Iyai tayawa toyau muna. Mu mumbovit yaimoyai amarape, ayamareme igiyawa wakepe, sira mokona ag anotumat oraiwa ge baigan ge yaimoyai amaraigimtanwa gumbe bainda wakepe.   
\p
\v 3 \x + \xo 2:3 \xt 1Ti 3:11\x*Ebu desiroma, vesin tayawa gaibu toyau muna, mu God nauwawa eme, meoya mu God gumbe yaimoyai ape, yano den waigimpe, yoi yusipama kokavit den naigimpe, dividivi oraiwa toyau munigimpe.  
\v 4 Mu meib ape ipewa, vesin mataiwa oma ane toyau mumpe, memoutuwa ge usitainowa gumbo baigan atanwa,  
\v 5 \x + \xo 2:5 \xt Epe 5:22\x*mokona atanwa, uinantaraki onanwa, gwe danave dividivi undag amaraigimtanwa, baigan gumbe wakeigimtanwa, memoutuwa nouwa autanwa. Meib toyau mumpe. Mu gumbo iyayapan God gaiyawa den yan yawampe.   
\p
\v 6 Gina desiroma, iyayapan mataiwa mu toyau muna, yaimoyai anog amaraigimpe.  
\v 7 \x + \xo 2:7 \xt 1Ti 4:12\x*Sira dividivi undag gumbe ge oraiwa a, sira guwaguwawa oraiwa a. Ge toyau toyau geuma gumbe oraiwa ge ebnotu yaug anope.  
\v 8 \x + \xo 2:8 \xt 1Pi 2:15\x*Gae oraiminawa me iyayapan pui den yupewa ge wa. Meib a ipewa, anavi numawa oma den ane gae kukaeba nu gunup wape, mu ubmam ape.   
\p
\v 9 \x + \xo 2:9 \xt 1Ti 6:1\x*Ankwatave nau eme igiyawa diruma, dividivi undag gumbe kokawa muma nouwa aupe, yaug anope oma ape, sira kokawa muma gumbo gae garawa den dirumpe.  
\v 10 Sira diruma, ub mu gumbo den ape, natawa di wape. Me dividivi undag mu emewa gumbe God Waita Abnawa numawa toyau meuma ben waramtan oya.   
\p
\v 11 Kuiyawa God ano oraiwa mu waita muniviwa iyayapan undag gumbo uwane.  
\v 12 \x + \xo 2:12 \xt 1Jn 2:16\x*Me toyau nunnewa, God namive ebnotu onanwa ge piyu mame anoano meuma yankweta. Sira kum gare mokona gumbe, oraivit gumbe, inaiinai oraiwa God namive gumbe wakeigimta.  
\v 13 Sira toyau nunnewa, nu owanowan me waribiya nunnewa amaraigimta. Me natawa meib. God kokawa ge Waita Abnawa numawa Keriso Iesu mu eyawa gumbe matai uwape.  
\v 14 \x + \xo 2:14 \xt Eks 19:5; Deu 7:6; Ejk 37:23; Gar 1:4; 1Pi 2:9\x*Keriso me nunan boanewa me nu kukaeba numa oya sira gwiruwad nuntan oya, sira iyayapan meuma mu oraiwa atan oya anoemewa, me membovit oya wat muintan oya.   
\p
\v 15 \x + \xo 2:15 \xt 1Ti 4:12\x*Dividivi mame yusiwa kokavitwa gumbe toyau muna, wak diruma ape, sira pui yua. Mu den kwema, ge yan barau gempe.   
\c 3  
\p
\v 1 \x + \xo 3:1 \xt Rom 13:1-7; 1Pi 2:13-14\x*Iyayapan wak diruma, mu amara muniviwa ge yutuwa gaibu igiyawa nouwa aupe. Sira mu nouwa aug oraiwa undag atan anoeme igiyawa ape.  
\v 2 Sira gae kukaeba iyayapan gumbo den wape, sira mut den ape, yum gumbe wakepe, iyayapan undag gumbo baigan ape. Mu meib atan aigimpe igiyawa ape.   
\p
\v 3 \x + \xo 3:3 \xt 1Ko 6:9-11; Epe 2:1-2; 5:8\x*Watavit nu warago igiyawa mina atu, nouwa den aug anopipanum eme igiyawa mina atu, sira dividivi ano kukaeba ge piyu degadega meuma gumbe ankwatave nau eme igiyawa atu. Danapiri ge anoano numawa me iyayapan upeba mu degadega atan den anoetewa danave wakeete, sira nu topai nuniya igiyawa, sira nu gara topai atu igiyawa.  
\v 4 Megara God waita abnawa numa nonemagawa oraiwa ge baigan iyayapan munan uwane.  
\v 5 \x + \xo 3:5 \xt 2Ti 1:9; Ibr 10:22\x*Me kumiwa apa, waita nunne. Me divi da oraiwa nu atunewa onan, megara me ano oraiwa meuma oya. Guwawa Iyakaisiyapama gumbe, mataiwa yaitanwa gumbe, mataiwa atanwa gumbe muinne.  
\v 6 \x + \xo 3:6 \xt Apa 2:17-18\x*Iesu Keriso me Waita Abnawa numa gumbe, God Guwawa Iyakaisiyapama mame nunne gunup noidauwane.  
\v 7 Me Keriso ano oraiwa gumbe nu oraivit atanwa oya, sira inaiinai yaibobot oya anoetewa gumbe nu kwan autanwa igiyawa atan oya.  
\v 8 Gae mame me ano kokavitwa, meoya ne anoeniwa ge gae mame oya yusipamit diruma. Me God gumbe anotumat eme igiyawa mu dividivi oraiwa atan anotan oya. Dividivi mame me oraiwa, sira me iyayapan gumbo waita mumawa.   
\p
\v 9 \x + \xo 3:9 \xt 2Ti 2:14,16\x*Megara gae kukaeba, dam yaig onamiyawa, diguragut sira gwangwan gumbo gae gara wa atanwa yankweya. Me iyayapan gumbo waita muma onan, sira natawa onan.  
\v 10 \x + \xo 3:10 \xt Mat 18:15-17\x*Apan da dam meumawa ube ainampewa, koni desirom toyau wana, meve koni duwameba toyau wana, ivi ig aoreya aipe.  
\v 11 Ge yaug anoana apan meiba anokukam abnawa me membo yaug anone me kukaeba, megara kukaeba aigimpewa.   
\s1 Gae Oieba  
\p
\v 12 \x + \xo 3:12 \xt 1Ko 4:7-8; Epe 6:21-22\x*Ne Arutemas go Titikas tetna genan onampe. Me ivi, garawapa ge di nenan onaga. Ne Nikoporis apa waketna. Ne taig kumiwa me apa waketan anoeni.  
\v 13 \x + \xo 3:13 \xt Apa 18:24; 1Ko 3:5-6\x*Dividivi undag ake Gwangwan toewanewan Jenas go Aporos amdau ampe. Dividivi anoemewa ge tamibarip a.  
\v 14 \x + \xo 3:14 \xt Epe 4:28\x*Dividivi undag evedni anoetewa oya nau oraivit atanwa nu undag mina yaug anotanit di.   
\p
\v 15 Undag gunap wakeemewa genan gaun veme. Nu anotumat owanaiwa gumbo gaun numa wag diruma. God ano oraiwa ye undag guniyap wakeigimpe.