\id 2TH - Maiwa NT [mti] -Papua New Guinea 2011 (web version -2017) 
\h 2 Tesaronika 
\toc1 Poru Gigirum Meuma Duwameba Tesaronika Igiyawa Munan Tenewa 
\toc2 2 Tesaronika 
\toc3 2Te 
\mt1 2 TESARONIKA  
\mt2 Poru Gigirum Meuma Duwameba Tesaronika Igiyawa Munan Tenewa  
\c 1  
\p
\v 1 Poru, Sairas\f + \fr 1:1 \ft Gae Griik gumbe me Siruvanus.\f* ge Timoti gumbo, Tesaronika siosi me Mamunwa God ge Ayapan Iesu Keriso danave wakeyanawa yenan teete.   
\p
\v 2 \x + \xo 1:2 \xt Rom 1:7\x*Mamunwa God ge Ayapan Iesu Keriso gumbe ano oraiwa ge yum ye guniyap.   
\s1 Nun Ge Gaun Wanigimtanwa  
\p
\v 3 Tatangwanen, nu evedni yenan God gaun wantanit di. Meib aigimtanit di. Kuiyawa anotumat yeuma kokavit yoig aivi. Sira ye desirom desirom baigan garagara ene me koka aivi.  
\v 4 \x + \xo 1:4 \xt 2Ko 7:4; 1Te 2:19\x*Meoya, God siosi meuma yapave nu wai yemete. Kuiyawa ye edawai ge yaigipam undag danave iyai wakeg anotumat amarene.   
\p
\v 5 Mame me God keptete meuma oraimina taibe atan oya. Ye matai God toimuwawa oya wat kiniya yempe. God toimuwawa oya ye mina gare danadawai auene.  
\v 6 \x + \xo 1:6 \xt Rom 12:19\x*God me oraimina di. Ye guniyap danadawai yempewa me garawa mu gumbo danadawai mumpe.  
\v 7 \x + \xo 1:7 \xt 1Te 3:13\x*Ye danadawai auene. God me nu gaibu garawa ye nonewa emtan yempe. Ayapan Iesu me aneya yusipama gaibu iyam meru danave kwimin apa uwapewa, mame matai matatpe.  
\v 8 \x + \xo 1:8 \xt Ais 66:15\x*Birabira God den anoyawa, Ayapan numa Iesu gae oraiwa meuma noiwa den anoemewa me nau ibnapam mumpe.  
\v 9 \x + \xo 1:9 \xt Ais 2:10\x*Mu Ayapan ginangawa namive sira me eyawa yusipama gumbe atatai impe. Me nau ibnapam aug amigimpe sira wakukamunigimpe viripusiwa onan.  
\v 10 \x + \xo 1:10 \xt 1Ko 3:4\x*Me uwape kumiwa apa, iyayapan iyakaisi meuma gumbo me eyawa aupe. Anotumat igiyawa undag gumbo me waiya waiya aupe. Kuiyawa nu yenan oya gae taibe watuwa gumbe anotumat ayana.   
\p
\v 11 \x + \xo 1:11 \xt 1Ko 1:9; 1Te 1:2-3\x*Mame oya nu evedni yenan nun vete. God numa yenan auwane. God me wat kiniya yempe. Me yusiwa meuma gumbe ye oraiwa undag aya anotumat nauwawa aya. Nu anoete God waita yempe sira nau oieba ape onanape.  
\v 12 Kuiyawa God numa Ayapan Iesu Keriso ano oraiwa gumbe, ye yapeyap Ayapan numa Iesu iviwa waiya waiya aupe, sira ye gaibu Ayapan gumbe eyawa auya.   
\c 2  
\s1 Gwangwan Togomiyaiviwa Abnawa Uwape  
\p
\v 1 Tatangwanen, Ayapan numa Iesu Keriso sira uwatan aiviwa, sira me gumbe nu agoniyatan etewa, nu me oya ye diruiete.  
\v 2 Guwawa gumbe go, gae gumbe go, gigirum me uga abnawa nu ivunwa gumbe tenewa go, mu Ayapan kum meuma wait uwane vemewa ye anoyana. Megara, tate ye danewa tet ag ipunapun den aya, sira daneyap ano pipanum den aya.  
\v 3 \x + \xo 2:3 \xt 1Ti 4:1; 1Jn 2:18; 4:3\x*Bira da uga ebuwawa undag gumbe den ugai yempe. Kuiyawa, namu iyayapan anotumat muma epa aoretanwa uwape. Sira apan da uwape me gwangwan togomiyape, apan mame me watkukamtan usiwa. Ivi Ayapan kum meuma uwape.  
\v 4 \x + \xo 2:4 \xt Ejk 28:2; Dan 11:36\x*Iyayapan God numa vemewa undag gumbo, go waiya waiya emewa undag gumbo, apan mame daiewa tobiyape. Me membovit iviwa wan enagatpe, sira me God temporu meuma danave seya meuma baraug yan wakeg me membovit God wape.   
\p
\v 5 Ye imug anoene? Ne ye guniyap wakenawa kumiwa apa dividivi mameiba oya diruina.  
\v 6 Ye anoyana, gare dimbae da me yumnasivi. Kuiyawa me kum meuma apa matai uwape.  
\v 7 Gwangwan togomaiviwa yusiwa meuma me wait guwave nau aivi. Megara gare me yumnasiviwa wakene me yumnasivi. Matai yumnasiviwa ebuwawa atan aupe.  
\v 8 \x + \xo 2:8 \xt Ais 11:4; Rev 19:15\x*Ivi gwangwan togomiyaiviwa abnawa uwape. Ayapan Iesu noiwa gaup meuma gumbe me toen gutpe. Ayapan eyawa danave uwape, me eyawa gumbe gwangwan togomiyaiviwa abnawa wakukampe onanape.  
\v 9 \x + \xo 2:9 \xt Rev 13:11-13\x*Gwangwan togomiyaivi abnawa onivi. Me Seitan nauwawa gumbe onivi. Me ugauga irayauyau meuma, irawa, anopipanum undag gaibu.  
\v 10 Sira iyayapan upeba mu watkukampe onanapewa wakeya. Mu gumbo me kukaeba gina ubeube undag ape. Mu watkukampe onanape, kuiyawa mu waita autan oya natawa baiganeba topai aya.  
\v 11 God mu gumbo anopipanum atan oya yusiwa baraupe aipe. Mu uga muma gumbe anotumat ape.  
\v 12 Iyayapan mu natawa gumbe anotumat den eme, kukaeba gumbe degadega emewa undag, mu matai keptete aupe.   
\s1 Kinkin Yoiya  
\p
\v 13 \x + \xo 2:13 \xt Epe 1:4; 2Te 1:3\x*Megara tatangwanen, Ayapan baigan yeniviwa, nu evedni yenanwa God gumbe gaun wantanit di. Kuiyawa God ye waita yentan oya amatoto gumbe ye wagomi yenne. Meoya Guwawa gumbe iyakaisi ai yenne sira natawa gumbe anotumat ai yenne.  
\v 14 Mame mina God gae oraiwa numawa gumbe yenan auwane. Sira Ayapan numa Iesu Keriso eyawa yenivi ye auyana.  
\v 15 Meoya tatangwanen, ye yaimoyai yoiya. Nu opata numa gumbe, go gigirum gumbe, toyau wayau ayentuwa me yumnasiya.   
\p
\v 16 Ne anoeniwa Ayapan numa Iesu Keriso ge Mamunwa God, me nu baigan nunivi sira ano oraiwa gumbe me yaibobot wattu nunne sira owanowan oraiwa nunnewa,  
\v 17 me membovit ye nonewa wattu yempe yusiwa yempe, ye oraivit aya sira oraivit waigimiya.   
\c 3  
\s1 Nunan Oya Nun Waya  
\p
\v 1 Oieba, tatangwanen, nunan oya nun waya. Ye guniyap meib di, Ayapan gae meumawa matai tate wateteyampe sira iyayapan waiya wampe.  
\v 2 Sira nun waya, nu kukaeba igiyawa gumbo tampe painau tenuntan oya. Kuiyawa iyayapan upeba anotumat gaibu, go upeba anotumat onan.  
\v 3 Megara, Ayapan me natawa abnawa, meoya me yusiwa yempe kukaeba igiyawa gumbo yenan papara vimpe.  
\v 4 \x + \xo 3:4 \xt 2Ko 7:16; Gar 5:10\x*Nu Ayapan gumbe anotumat ete. Nu diruietewa ye gare ene sira ye meib di aigimiya.  
\v 5 Ne anoeni Ayapan matai ye nonemagewa wasiwampe, sira God baigan meuma ge Keriso iyai waketanwa ye daneyap yempe.   
\s1 Ui Irai Irai Igiyawa Gumbo Yaukapa  
\p
\v 6 \x + \xo 3:6 \xt Rom 16:17\x*Tatangwanen, Ayapan Iesu Keriso iviwa gumbe nu diruiete. Ui irai irai tatanaiwa gumbo painau aisigimiya. Nu toyau wayau dirumtuwa gumbe mu den amome.  
\v 7 \x + \xo 3:7 \xt Pir 3:17\x*Kuiyawa ye yembovit anoyana ye aninin nu minun amon. Nu ye gaibu waketuwa nu ui irai irai den atu.  
\v 8 \x + \xo 3:8 \xt 1Te 2:9\x*Nu da bira nakwaeba natuwa nu garawa atu. Me mina, nu aram kum nau yaigipam atu yaigiwa kokavit autu. Kuiyawa nu imunup yapeyap da bira ibnawa den wantu.  
\v 9 \x + \xo 3:9 \xt 1Ko 9:4; 1Te 1:6\x*Nu yutunwa gaibu, go mame atu. Nu numbovit guwaguwawa yenan atu ye nu minun aigimtan oya.  
\v 10 Nu guniyap waketuwa, nu gwangwan mame yentu, “Apan da nau den apewa, me nakwai den nape.”   
\p
\v 11 \x + \xo 3:11 \xt 1Ti 5:13\x*Megara nu anotu. Ye yapeyap iyayapan upeba ui irai irai wakeya. Mu nau da den eme, yano veme, sira ui onan yai wakeg guigeme.  
\v 12 \x + \xo 3:12 \xt 1Te 4:11\x*Meoya Ayapan Iesu Keriso iviwa gumbe iyayapan meiba gumbo nu dirumta yusipamit wata. Mu yaimoyai wakeg mu mumbo nakwai tam nape.  
\v 13 \x + \xo 3:13 \xt Gar 6:9\x*Megara ye tatanaiwa, oraivit aigimiyawa den topai aigimiya.   
\p
\v 14 Gigirum mame danave toyau wayau ebuwawa tetu. Da bira me ebnotu den ape ipewa, apan mame yaukapa sira me gumbe evenan den ape. Meib aya ipewa me matai ubmam aupe.  
\v 15 \x + \xo 3:15 \xt 1Te 5:14\x*Megara me gumbe anavi den aya, tatan diya, sira yusipamit toyau waniya.   
\s1 Kaiwa Kaiwa Oieba  
\p
\v 16 Ne anoeni, Ayapan me yum tuiviwa me membovit kum evedni ge inaiinai undag danave yum yempe. Sira Ayapan ye undag guniyap wakeigimpe.   
\p
\v 17 Ne, Poru, kaiwa kaiwa ne naninap tena. Gigirum neuma undag danave ne irawa mame teeni. Mame me ne aninin gigirum tenawa.   
\p
\v 18 Ayapan numa Iesu Keriso ano oraiwa ye undag guniyap wakeigimpe.