\id 1PE - Maiwa NT [mti] -Papua New Guinea 2011 (web version -2017) 
\h 1 Pita 
\toc1 Pita Gigirum Meuma Desiroma 
\toc2 1 Pita 
\toc3 1Pi 
\mt1 1 PITA  
\mt2 Pita Gigirum Meuma Desiroma  
\c 1  
\p
\v 1 Pita me Iesu Keriso apasoro meuma gumbe aipe, at Pontas, Garatia, Kapadosia, Esia ge Bitinia apa wakeyawa wat gomiyamunnewa igiyawa munan.  
\v 2 \x + \xo 1:2 \xt Rom 8:29; 2Te 2:13\x*Sira Mamunwa God watavit yaug anone gumbe iyayapan mu wat gomiyamunne, Guwawa Iyakaisiyapama mui yutuwa aukape Iesu Keriso amave amtan oya, sira me diyawa meuma aigiviwa autan oya. Meoya ne anoeniwa ano oraiwa sira yum guniyap wakeigimpe koka ape.   
\s1 God Gumbe Waiya Atanwa  
\p
\v 3 God me Ayapan Iesu Keriso Mamawa mu waiya aigimpe. God ano kokawa nunivi, Iesu Keriso boag boriruwayawa igiyawa gumbo inaig yoinewa gumbe me ane nu sira yaitune ge owanowan gaibu vinigimta.  
\v 4 \x + \xo 1:4 \xt 1Ko 1:12\x*Sira nu oma ane matai kwanawa auta. Me den kukaipe sira den miyot umpe sira den inanatpe. Kwan mame yenan kwimin danave amaraivi.  
\v 5 \x + \xo 1:5 \xt Jon 10:28; 17:11\x*Ye anotumat yeuma gumbe God yusiwa ye amara yenivi. Waita me kum oieba apa uwatan oya tamibarip anewa ye matai auya.  
\v 6 \x + \xo 1:6 \xt Jms 1:2; 1Pi 5:10\x*Meoya ye degadega kokavit ene. Megara gare mame kum koni kusida apa ye dawai gina ube ube anog dawai auene.  
\v 7 \x + \xo 1:7 \xt Pro 17:3; Jak 13:9; Mak 3:3; Jms 1:3\x*Anotumat oya dawai auenewa me garawa kokavit, gooru me iyam gumbe oraimina ane megara kukaipewa me garawa kusi. Sira Iesu Keriso uwapewa kumiwa apa, ye yaug anoya dawai mame aig waiya ge ayamat ge eyawa uwape.  
\v 8 \x + \xo 1:8 \xt Jon 20:29; 2Ko 5:7\x*Ye Iesu Keriso den yauyana, megara imuiwa me gumbe avivi. Gare ye me den yavene, megara anotumat ene. Sira Ye degadega kokavit ene. Ye oma den ane gae gumbe waya degadega mame oya. Kuiyawa degadega mame danave eyawa noidauwane.  
\v 9 Kuiyawa ye anotumat yeuma gumbe guwewa oya waita auyana.   
\p
\v 10 \x + \xo 1:10 \xt Mat 13:16-17\x*Propeta mu watavit ano oraiwa me matai yempewa oya waya. Mu gaibu waita mame oya yaimoyai anoya sira yaug anoya.  
\v 11 \x + \xo 1:11 \xt Sam 22; Ais 53; Ruk 24:26-27\x*Keriso Guwawa meuma me daneyap wakenewa me wait dirumwane Keriso edawai meuma ge eyawa me matai uwatan aiviwa oya. Sira mu yaug anoya bira aniyau uwatan aiviwa oya.  
\v 12 God toewan munnewa nau mumawa me munanwa oya onan megara nunan oya. Guwawa Iyakaisiyapama me God baraune kwimin apa aig onnewa gumbe iyayapan upeba gae oraiwa waya. Mu gare mame me oya ye diruyeg waya. Aneya mina mu yautanwa oya di anogugut eme.   
\s1 Iyakaisi Atanwa  
\p
\v 13 Meoya ye yenanwa tamibarip aya, yembovit amaraya. Iesu Keriso uwapewa ano oraiwa auya, meoya ye yaimoyai amaraigimiya.  
\v 14 \x + \xo 1:14 \xt Rom 12:2; Epe 2:3; 4:17-18\x*Ano atanwa usitainawa aya, watavit ye divi da den yaug anoyana. Me kumiwa apa ano kukaeba daneyap wakenewa me gumbe den aisiya.  
\v 15 Megara Iyakaisiyapama me yenan wanewa me iyakaisi, meoya ye mina dividivi undag enewa gumbe iyakaisi aya.  
\v 16 \x + \xo 1:16 \xt Rvt 11:44-45; Mat 5:48\x*Kuiyawa Baiboru wanewa, “Ye iyakaisi aya, kuiyawa ne iyakaisi eni oya.”   
\p
\v 17 \x + \xo 1:17 \xt Rom 2:11; Rev 2:23\x*God me desirom desirom gumbo kepte mumpe. Ye wayana me Maman. Meoya gare mame piyuwau waketu kumiwa apa me gumbe a gaibu wakeigimiya.  
\v 18 Ye yaug anoyana, nu wakewake numa kukaeba me isimuranaiwa gumbo onnewa gumbe sira gwiruwad yenne. God mame ane. Me siruva ge gooru mu matai kukai mutpewa me mina gumbe onan.  
\v 19 \x + \xo 1:19 \xt Apa 20:28; Ibr 9:12-14\x*Keriso me mae sip usiwa mina. Me siren ge miyot onan. Keriso diyawa oraiwa gumbe ane.  
\v 20 \x + \xo 1:20 \xt Epe 1:4; 2Ti 1:9-10\x*Keriso wait namu wat gomiyane, ivi piyu mame wadne. Sira mame kum oieba apa me yenan oya uwane.  
\v 21 \x + \xo 1:21 \xt Jon 14:6; Rom 5:1-2\x*God ane Keriso boriruwaya igiyawa gumbo sira inaine, eyawa wanne. Ye Keriso gumbe God me anotumat ene igiyawa. Mame mina, anotumat yeumawa ge ano imug yeumawa me God gumbe.   
\p
\v 22 \x + \xo 1:22 \xt Jon 13:34; Rom 12:10\x*Ye natawa gumbe atene, sira guwewa muiniyana, sira baigan yeuma tateaiwa gumbo, me ugauga onan. Meoya baigan yeuma noneyap garagara aya.  
\v 23 Ye sira yaiyana. Yawa me matai putaipewa me gumbe onan, megara yawa me den putaipewa gumbe sira yaiyana. Me God gaiyawa me wakeigimpewa ge matai den tobiyapewa.  
\v 24 \x + \xo 1:24 \xt Ais 40:6-8\x*Kuiyawa,  
\q1 “Iyayapan undag mu wayo mina.  
\q1 Eyawa mumawa me ben uba mina.  
\q1 Wayo butuig aigivi sira uba aigivi.   
\q1
\v 25 Megara God gaiyawa me den tobiyape yaibobot tunano.”  
\m Mame me Gae oraiwa gaiyawa me ye wag diruiyennewa.   
\c 2  
\p
\v 1 \x + \xo 2:1 \xt Epe 4:22; Jms 1:21\x*Meoya ye anoano kukaeba undag, ugauga undag, taibewa oraimina megara danavewa kukainewa, yaug anogugut, iyayapan upeba gumbo gae kukaeba watanwa undag yankweya.  
\v 2 Kikiyan matai yaieme mina, ye gae amawa sinsin anoigimiya, ye yoig waita autan oya.  
\v 3 \x + \xo 2:3 \xt Sam 34:8\x*Ye wait ag yauyana Ayapan me anoano oraivitwa.   
\s1 An Wakeiviwa Ge Iyayapan God Wat Gomiyamunnewa  
\p
\v 4 Ayapan gumbe oneya. Iyayapan mu Ayapan epa aoreya, megara God yangave me an wat gomiyanewa sira garawa kokavitwa sira wakeiviwa.  
\v 5 \x + \xo 2:5 \xt Epe 2:21-22; Rev 1:6\x*Ye gaibu an wakeiviwa mina, guwawa gweyawa guniyap sipe. Meve pirisi iyakaisi mina Keriso gumbe guwawa puyowawa me God degadega gumbe autanwa waniya.  
\v 6 \x + \xo 2:6 \xt Ais 28:16; Epe 2:20\x*Kuiyawa Baiboru maib waivi.  
\q1 “Yauya. Ne Saion apa an nium barautna.  
\q1 Me wat gomiyanawa sira garawa kokavitwa.  
\q1 Iyayapan mu me gumbe anotumat apewa matai danadawai den aupe.”   
\m
\v 7 \x + \xo 2:7 \xt Sam 118:22\x*Meoya ye bira da anotumat aiviwa oya me garawa kokavitwa.  
\q1 Megara bira da anotumat den aiviwa gumbo,  
\q1 “An me gwe sisi igiyawa topayayawa  
\q1 me an natawa oraivitwa me visidonawa apa teyawa ane.”   
\m
\v 8 \x + \xo 2:8 \xt Ais 8:14\x*Sira,  
\q1 “An me gumbe iyayapan tog uyug aigtan emewa.  
\q1 Sira me an koka me ebu tobodnewa.”  
\m Mu uyug aigeme, kuiyawa mu God gaiyawa gumbe den amome. Mu meib gomiya munne.   
\p
\v 9 \x + \xo 2:9 \xt Deu 7:6; 14:2; Ais 9:2; Apa 26:18; Epe 5:8\x*Megara ye wait gomiyayenne igiyawa, kin pirisi igiyawa, iyakaisi igiyawa, God iyayapan meuma. God yenan wane ye sisip dana dauwag me eyawa meuma oraiwa gumbe. Meoya ye oraiwa meuma taibe watanit di.  
\v 10 \x + \xo 2:10 \xt Ose 2:23\x*Ye watavit God iyayapan meuma onan, megara gare ye God iyayapan meuma. Watavit God yenan den ano yemne, megara gare wait di yenan anoivi.   
\p
\v 11 \x + \xo 2:11 \xt Gar 5:17,24\x*Iyayapan neuma, yenan anoeni. Ye amdau ampa aisiyana igiyawa sira aiseg wakeyana igiyawa. Meoya ye uinantaraki anoanowawa me ye guwewa gumbe anavi aiviwa epa aoreya.  
\v 12 \x + \xo 2:12 \xt Mat 5:16\x*Ye inaiinai oraiwa gumbe wakeya Ju onan igiyawa gumbo. Ye meib di aya. Ye diruig kukaeba gumbe waigimpe, megara mu wakewake yeuma oraiwa yaupe, ivi me uwanumpewa kumiwa apa God gumbe waiya ape.   
\s1 Namuyoiyoi Igiyawa Nouwa Autanwa  
\p
\v 13 \x + \xo 2:13 \xt Tai 3:1\x*Yusiwa mu iyayapan wak barauyawa wakeya. Ye mu undag nouwa auya Ayapan oya. Kin painauvitwa gumbe meib aya,  
\v 14 sira amareme igiyawa me kin tene onamiyawa mu kukaeba eme igiyawa gumbe pui yutan oya, oraiwa eme igiyawa waiya atan oya onamiyawa mu gumbo meib aya.  
\v 15 \x + \xo 2:15 \xt 1Pi 3:16\x*Oraiwa aya, sira kuiyowa onan igiyawa mu gae ui onan vemewa ye aya nouwa iyadmutpe. Me God ano meumawa.  
\v 16 Ui onan wakeiviwa mina ye yaimoyai wakeg aigimiya. Ye ano yeuma gumbe God ankwatave nau eme igiyawa mina aigimiya. Megara ano yeuma gumbe kukaeba da den aya.  
\v 17 \x + \xo 2:17 \xt Rom 12:10\x*Ye iyayapan undag ayamat muniya. Tateaiwa baigan muniya, God gumbe a aya, sira kin gumbe ayamat aya.   
\p
\v 18 \x + \xo 2:18 \xt Epe 6:5\x*Koukawa nau muma eme igiyawa. Kokawa yeuma noiwa noneyap auya. Kokawa yeuma oraimina ge yaimoyai aiviwa gumbe noiwa auya, sira kokawa yeuma me yaimoyai den aiviwa me mina gaibu meib desirom aug aigimiya.  
\v 19 Apan da gwambe den ane megara danadawai aune, megara God namive apan mame nonemagawa oraiwa gumbe danadawai aug uiwa nikiaiviwa, me gumbe God degadega ape.  
\v 20 \x + \xo 2:20 \xt 1Pi 3:14,17\x*Ye kukaeba ayanawa, matai ye guraipe. Ye uiwa nikiyaigimiyawa, me oraiwa yeuma onan. Ye oraiwa ag danadawai avigimiyawa, sira ye uiwa nikiaigimiyawa, God degadega ape.  
\v 21 \x + \xo 2:21 \xt Mat 16:24; Jon 13:15\x*Me oya God yenan auwane. Kuiyawa Keriso yenan edawai aune. Me ebu oraiwa toewan yenne, meoya ye ineyawa em aisiya.   
\q1
\v 22 \x + \xo 2:22 \xt Ais 53:9\x*“Keriso kukaeba da den ane, uga da den wane.”   
\m
\v 23 \x + \xo 2:23 \xt Ais 53:7; 1Pi 3:9\x*Iyayapan gae kukaeba me gumbe waya, megara me garawa kukaeba den wane. Iyayapan me gumbe edawai waniya, megara mu anog a atanwa oya den dirum wane. God me membovit oma ane oraivit keptete ape, meoya Keriso me membovit aug Mamunwa God namive baraune.  
\v 24 \x + \xo 2:24 \xt Ais 53:5-6; Rom 6:11\x*Korosi egave kukaeba numa me mekut aune. Natawa me kukaeba numa gumbe boag anoano oraivitwa gumbe wakeigimta. Keriso toyawa sirenawa gumbe ye inaigisiyana.  
\v 25 \x + \xo 2:25 \xt Ejk 34:5-6; Mat 9:36; Jon 10:14; Ibr 13:20-21\x*Ye mae sip mina pimpangitene, megara gare ye Apan me guwewa amaraiviwa abnawa ge namuyoiyoi abnawa wakenewa gumbe sira taig oniyana.   
\c 3  
\s1 Biyutuwa Ge Memotuwa  
\p
\v 1 \x + \xo 3:1 \xt Epe 5:22\x*Ebu desiroma, biyutuwa, ye memetuiwa nouwa auya. Memetuiwa gae anotan den apewa go, megara nouwa auya, kuiyawa vesin wakewake muma gae gaibu onanwa gumbe mu God igiyawa matai ape.  
\v 2 Kuiyawa ye God gumbe a ag iyakaisi ag wakeigimiyawa, meve memetuiwa ye wakewake yeuma iyakaisi yemigimpe.  
\v 3 \x + \xo 3:3 \xt 1Ti 2:9\x*Ye kuiye gumewa yakot ene, gooru gumbe ben warene, sira wape oraiwa gaibu warene. Dividivi mame mu taibewa benawa.  
\v 4 Megara ye daneyaba benawa gaibu ben wariya. Ye guwewa me mokonairenwa ge yaimoyai wakeiviwa auya. Me den putaipe. Me mina, inaiinai yeuma guwavewa gumbe ben wariya. Dividivi mame me garawa kokavit God namive.  
\v 5 Watavit vesin iyakaisi mu God gumbe anoemewa wakeya, sira vesin mame me mina mumbovit ben wariya, sira memotuwa nouwa auya.  
\v 6 \x + \xo 3:6 \xt Gen 18:12\x*Guwaguwawa me mamaib. Seira me Ebraam auwanewa me apan koka meumawa, sira noiwa aune. Ye gaibu dividivi undag a den aya, sira oraiwa ayawa, ye Seira gwaitawaiwa aya.   
\p
\v 7 \x + \xo 3:7 \xt Epe 5:25\x*Ebu desiroma, memetuiwa, ye yaug anoya bivituiwa mu vesin sira ye yutuipama megara mu yutuwa onan. Meve mu gaibu yaiyai wakeigimiya. Sira mu gumbo ayamat aigimiya, kuiyawa mu ano oraiwa gumbe ye gaibu inaiinai aupe. Meve nun yeuma divi da den wataipe.   
\s1 Oraiwa Atanwa  
\p
\v 8 Ne oieba watna. Ye imuiwa desirom ape, gara wad memeyam aya, tateaiwa gumbo baigan aigimiya, mu gumbo danadawai aug, mokona aya.  
\v 9 Bira da kukaeba guniyap apewa garawa gumbo kukaeba den aya, sira bira da yan yau yempewa ye mu yan den yawamiya. Megara waribiya muniya. God yenan auwane waribiya yentan oya.  
\v 10 \x + \xo 3:10 \xt Sam 34:12-16\x*Kuiyawa  
\q1 “Bira da membovit inaiinai meuma baigan niyape  
\q1 sira kum meuma oraiwa autan anoiviwa, me pednawa di amarape,  
\q1 gae kukaeba den di wape. Sira noiwa tobotpe, ugauga den di wape.   
\q1
\v 11 Me kukaeba gumbe di aipe, oraiwa di ape. Yum oya yobag, amave aipe.   
\q1
\v 12 Ayapan yangawa me iyayapan siwavitwa gumbo,  
\q1 sira Ayapan naunawa mu nun mumawa gumbo.  
\q1 Megara Ayapan ginanamiwa me kukaeba igiyawa gumbo namiwa pipau tope.”   
\p
\v 13 Ye kum evedni oraivit aigimiyawa, bira ye watkukamyempe. Bira da onan.  
\v 14 \x + \xo 3:14 \xt Ais 8:12-13; Mat 5:10; 1Pi 2:20; 4:14\x*Ye oraiwa oya danadawai avigimiyawa, me oraiwa. Mu gurepewa oya den a aya, danadawai den auya.  
\v 15 Megara nonemageyap Keriso waiya aigimiya, me Ayapan. Anoenewa me nonemagewa danave wakenewa oya bira da yenan singui yempe, meoya ye di tamibarip aya natawa wag toewan muntan oya.  
\v 16 \x + \xo 3:16 \xt 1Pi 2:12\x*Megara nonemagewa oraiwa esinewa gumbe gara wag toewan muniya. Iyayapan mu diruig waigimpewa mu ye inaiinai yeuma oraiwa Keriso gumbe ene oya. Mu matai ubmam warampe kuiyawa ye diruyeg veme oya.  
\v 17 God ano meuma wakenewa, danadawai avigimiya oraiwa yeuma ene oya me bainda, megara danadawai avigimiya kukaeba yeuma ene oya me bainda onan.  
\v 18 Keriso boane kukaeba oya kum desirom mekut. Apan oraiwa boane iyayapan kukaeba munan. Me kwapiwa gumbe barauya boane, megara guwawa gumbe sira inaine. Me ye tam God namive teyenne.  
\v 19 Guwawa gumbe, Keriso me guwowa mu tamiyawa gumbo aig opata wag dirumne, sira guwowa anoya.  
\v 20 \x + \xo 3:20 \xt Gen 6:1–7:22\x*Watavit Noa kumiwa apa Noa wa koka siiviwa, God yaiyai iyayapan munan amaraivi, megara mu God noiwa den auya. Guwowa tamiyawa me meib. Iyayapan 8 mukut wa koka danave yoi gumbe waita auya.  
\v 21 Yoi mame babataito guwaguwawa. Babataito me gare ye waita yenivi. Babataito me—kwapuiwa miyotawa den muintan onan, megara me nonemagewa oraiwa God gumbe agi atanwa,—sira me Iesu Keriso sira inaig yoinewa oya.  
\v 22 Keriso kwimin dog aine, sira God naniyutanwa apa wakene. Keriso ankwatave aneya wakeya, sira me yusipamitwa me nauwawa gumbe oniviwa ge yusiwa gaibu wakene.   
\c 4  
\p
\v 1 \x + \xo 4:1 \xt Rom 6:2,7\x*Mame mina, Keriso kwapiwa gumbe edawai aune, meoya ye mina meib beyan yeuma tamiya. Apan da me kwapiwa gumbe edawai aunewa kukaeba yankwene.  
\v 2 Sira piyu mame apa wakewake meuma kumiwa apa, me apan ano kukaeba oya onan megara God ano meuma oya yaiyai waketanit di.  
\v 3 \x + \xo 4:3 \xt Epe 2:2-3\x*Ye dividivi undag me Ju onan igiyawa atan anoemewa ayana. Guwaguwawa me mamaib, uinantaraki, vesin oya anoemewa, yoi yaigipama nemewa, pipamu temewa, buyunai egave degadega emewa, god ugaugaeba waiya emewa meiba. Watavit meib ag ongenewa, me minambe.  
\v 4 Ye mu gaibu kukaeba den ene, meoya mu anog pipamu teme, meoya mu ye guniyap anokukam eme.  
\v 5 \x + \xo 4:5 \xt Apa 10:42\x*God me mekut wakeyawa ge boriruwayawa matai keptete mumpe. Mu mukut God gumbe wakewake mumawa oya yaiyai watanit di.  
\v 6 Kuiyawa gae oraiwa opata boriruwaya igiyawa me mina gumbo wag dirumne. Natawa me iyayapan mu kwapuwa gumbe kepte mumpe, megara guwowa gambenwa God gumbe wakepe.   
\p
\v 7 \x + \xo 4:7 \xt Rom 13:11-12\x*Dividivi undag oieba oya koni aivi. Meoya nun oya imuiwa esipe sira amaraigimiya.  
\v 8 \x + \xo 4:8 \xt 1Pi 1:22\x*Namuirenwa baigan kokavit garawan aya. Kuiyawa baigan me kukaeba obiren umpe.  
\v 9 \x + \xo 4:9 \xt Ibr 13:2\x*Gara di diguragut den aya, baigan aigimiya.  
\v 10 \x + \xo 4:10 \xt Rom 12:6-8\x*Ye desirom desirom guniyap God puyo yenne, meoya God puyo meuma amareme igiyawa oraiwa aya. Sira puyo meuma gumbe gara waita aya.  
\v 11 Apan da gae watan apewa, me kweya God gaiyawa desiroma wape. Apan da God oya nau atan apewa, me kweya nau atanit di yusiwa God wannewa gumbe. Me dividivi undag gumbo Iesu Keriso gumbe God waiya waiya aigimtan oya. Keriso gumbe eyawa ge yusipama wakeg aigimpe viripusi onan. Amen.   
\s1 Kristian Danadawaeba  
\p
\v 12 Iyayapan neuma. Amaorot me iyam minawa ag yauyemivi, danadawai kokavit auene. Megara den anoya dividivi gina ubeube wait uwayemne.  
\v 13 \x + \xo 4:13 \xt Apa 5:41; Jms 1:2; 1Pi 1:6-7\x*Megara degadega auya, kuiyawa Keriso edawai meuma gaibu undag auene. Keriso uwapewa kumiwa apa degadega yeuma kokavit ape.  
\v 14 \x + \xo 4:14 \xt 1Pi 2:20\x*Keriso iviwa gumbe diruig wat kukayemigimpewa, ye me degadega aigimiya. Kuiyawa Eyawa Guwawa me God Guwawa me guniyap wakeigimpe.  
\v 15 Ye yapeyap, da tope boipe abnawa, ub abnawa, kukaeba aivi abnawa, iyayapan aya munivi abnawa me mina den aya. Kuiyawa me oya, iyayapan ye diruig meib waigimpewa me oraimina onan.  
\v 16 Megara ye Kristian ayana oya danadawai avigimiyawa, me ubmam den aya. Megara ivuiwa mame gumbe God waiya aya, kuiyawa ye me Keriso iviwa auyana.  
\v 17 Kuiyawa keptete kumiwa koni aivi. Me God iyayapan meuma gumbo amatope. Keptete namu nu gunup amatope ipewa, iyayapan mu God gae oraiwa gumbe anotumat den emewa gumbo keptete aninin ape?   
\m
\v 18 \x + \xo 4:18 \xt Pro 11:31\x*Sira, iyayapan oraiwa igiyawa aninin waita aupe ipewa, God anotumat den eme igiyawa sira kukaeba igiyawa mu gumbo aninin ape?   
\p
\v 19 Meoya iyayapan mu God ano meuma gumbe edawai auemewa, mu sira oraiwa ape mumbovit wad munnewa me natawa abnawa gumbe guwewa baraug anotumat ape.   
\c 5  
\s1 Siosi Amareme Igiyawa Ge Ud Mataiwa  
\p
\v 1 Siosi namuyoiyoi igiyawa guniyap wakeyawa mu gumbo ne anoeniwa dividivi undag mame ye matai aya. Ne mina gaibu siosi namuyoiyoi abnawa, ge Keriso edawai meuma yaug anonawa abnawa, sira eyawa me matai uwapewa gaibu autan eni abnawa.  
\v 2 \x + \xo 5:2 \xt Jon 21:15-17; Apa 20:28\x*God mae sip meuma guniyap wakeyawa amat amunigimiya. Ye yaiyai aya danapiripam onan. Garawa anmagawa autanwa oya onan, nonemageyap nau aya.  
\v 3 \x + \xo 5:3 \xt 2Ko 1:24; Pir 3:17; Tai 2:7\x*God anotumat yennewa gumbe ye apan kokawa den aya. Ye gwe gwe yeuma sip meuma gumbo guwaguwawa aya.  
\v 4 Mae sip amaraivi abnawa kokavitwa uwapewa, ye eyawa keret meuma me den kukaiviwa me auya.   
\p
\v 5 \x + \xo 5:5 \xt Pro 3:34; Epe 5:21; Jms 4:6\x*Ebu desiroma mina, ud mataiwa, ye namuyoiyoi igiyawa nouwa auya. Mokona garagara aya. Kuiyawa  
\q1 “God apanapan eme igiyawa topai munivi,  
\q1 sira ano oraiwa mokona igiyawa munivi.”   
\m
\v 6 \x + \xo 5:6 \xt Mat 23:12; Ruk 14:11; Jms 4:10\x*Meoya God naniwa yusipama ankwatave mokona aya. Kuiyawa God me kum oraiwa gumbe ye matai owan auyempe.  
\v 7 \x + \xo 5:7 \xt Mat 6:25-30\x*Ye danadawai yeuma undag God gumbe baraug yankweya. Kuiyawa God ye amat ayenigimpe.   
\p
\v 8 \x + \xo 5:8 \xt 1Te 5:6\x*Yaiyai wakeg amaraigimiya. Seitan me anavi yeuma. Me mae raion me ug tog waiviwa mina mae natan oya yobag gigivi.  
\v 9 \x + \xo 5:9 \xt Epe 6:11-13; Jms 4:7\x*Anotumat gumbe yusipamit owan yoig Seitan topayaya. Ye yaug anoyana, iyayapan mu tateaiwa piyu mame danave wakeyawa mu danadawai demtawa desiroma auya.   
\p
\v 10 God gumbe ano oraiwa undag noidauwane. Me God me Keriso gumbe eyawa yaibobot danave yenan auwanewa. Ye danadawai auene, megara kum koniwa onanapeve God aiyempe oraiminavit aya, aiyempe yusipamit owan yoiya, aiyempe yutuiwa wape, sira aiyempe siwavit yokeigimiya.  
\v 11 God gumbe yusiwa meib di wakeigimpe evedni viripusi onan. Amen.   
\s1 Gaun Oieba  
\p
\v 12 \x + \xo 5:12 \xt Apa 12:2,25; 13:13; 15:22,37-40\x*Ne yaug anona Sairas\f + \fr 5:12 \ft Namu teyawa danave desirom waiviwa me iviwa Siruvanus.\f* me anotumat oraiwa abnawa. Me waita meuma gumbe, ne taibe gigirum tena, ye yutuiwa wag diruiyentan oya sira mame me God ano oraiwa meuma natawa wag toyau yemtan oya. Ano oraiwa mame danave owan siwavit yoiya.  
\v 13 \x + \xo 5:13 \xt Apa 12:2; 2Ti 4:11\x*Vesin da guniyap wat gomiyanewa me Babiron apa wakenewa me gaun meuma guniyap waivi. Sira utunwa Mak gaibu gaun waivi.  
\v 14 Ye baigan uwatotoaeba gumbe gaun garawan aya. Ye undag Keriso gumbe wakeenewa, yum guniyap wakeigimpe.