\id ZEP - drafted by Francis D; edited by Martin A, exeg checked by Marsha Miles, Robin Namai and Pais Asefi March 2016; Comprehension checked by Francis Dagonov and team May 2016; Consultant checked by Wes Beasley and Martin, Simon, Lawrence, Michael in August 2016.
\ide UTF-8
\h Sefanaia
\toc3 SEF
\toc2 Sefanaia
\toc1 Godɨn Akam Inigha Izir Gumazim Sefanaian Akɨnafarim
\mt Godɨn Akam Inigha Izir Gumazim // Sefanaian Akɨnafarim
\mt2 O
\mt1 Sefanaia
\imt Akar faragha zuim
\ip Dughiar atrivim Josaia Judabar arazir kuraba akɨrizimɨn, Sefanaia gɨn iza Ikiavɨra Itir God a ganɨngizir akabav gei. (Nɨ 2 Atriviba, sapta 22 ko, 23ɨn gan.) Sefanaia ghaze, Judan adarazi arazir kurar me Godɨn ziam fava amiba ataghɨragham. Puvatɨghtɨma, God me bagh osɨmtɨzir ekiam amadaghtɨ a izam.
\ip Sefanaia uaghan mɨgɨa ghaze, kantrin igharazir Judabar apanim gamiba, God uaghan me gasɨghasigham. Eghtɨ Jerusalem uaghan ikuvigham. Eghtɨ gumazamizir navibagh iragha arazir aghuibagh amiba, me deraghvɨra ikiam. Eghtɨ gɨn Jerusalem ua deragh otoghtɨ, gumazamizir Godɨn damazimɨn deraziba an aven ikiam.
\c 1
\ms Ikiavɨra Itir God Izamin Dughiam Otogham
\mr (Sapta 1--3)
\s Ikiavɨra Itir God Izamin Dughiam otoghtɨ, a gumazamiziba isɨ kot darɨgham
\p
\v 1 \x - \xo 1:1 \xo*\xt 2 Atriviba 22:1--23:30; 2 Eghaghaniba 34:1--35:27\xt*\x*Emonɨn otarim Josaia, a Judan atrivimɨn itima, Ikiavɨra Itir God akar kam Sefanaia ganɨngi. Sefanaia Atrivim Hesekian anabamɨn oto. Kusi, a Sefanaian afeziam, ezɨ Kusin afeziam Gedalia, ezɨ Gedalian afeziam Amaria, ezɨ Hesekia Amarian afeziam.
\p
\v 2 Ikiavɨra Itir God kamaghɨn Sefanaia mɨgei:
\b
\q1 “Kɨ nguazir kamɨn itir biziba bar ada avigha da makunizɨ moghɨn, dagh asɨghasigham,
\q1
\v 3 kar gumazamiziba bar moghɨra, ko asɨziba, ko kuarazir overiamɨn mɨghagha aruiba, ko osirir ongarimɨn aruiba.
\q2 Bizir kaba gumazamizibagh amima, me arazir kurabagh ami,
\q3 kɨ bar ada agɨvagham.
\q1 Eghtɨ tam ua ikian kogham.
\q2 Kɨ Ikiavɨra Itir God, kɨ mɨkemegha gɨfa.
\b
\q1
\v 4 “Judan gumazamiziba ko Jerusalemɨn gumazamiziba bar moghɨra,
\q2 kɨ mɨzazim me gasegham.
\q1 Asem Balɨn ziam fer arazimɨn bizir ikiavɨra itir vaghvaziba, ko an ofa gamir gumaziba,
\q2 kɨ bar me gasɨghasigham,
\q3 eghtɨ gumazamiziba ua me gɨnɨghnɨghan kogham.
\q1
\v 5 Gumazamizir uan dɨpenibar isɨriabar ghuavanaga, aruem ko, iakɨnim ko, mɨkovezibar ziaba feba,
\q2 kɨ me gasɨghasigham.
\q1 Gumazamizir avɨrim nan ziam fa kamaghɨn mɨgei,
\q2 ‘E Ikiavɨra Itir Godɨn ziamɨn pɨn an akakagha ghaze, Bar guizbangɨra, e an gɨn zui.’
\q1 Ezɨ puvatɨ, me uaghan asem Molekɨn ziam fa ghaze,
\q2 ‘E asem Molekɨn ziamɨn pɨn akakagha ghaze, Bar guizbangɨra, e asem Molekɨn gɨn zui.’
\q3 Kamaghɨn amizɨ, kɨ me gasɨghasigham.
\q1
\v 6 Gumazamiziba akɨrim na gasa, ua nan gɨn zuir puvatɨ,
\q2 egha tuavim uarir akakaghasa na bagha iza, nan azangsɨzir puvatɨ.
\q3 Kɨ uaghan gumazamizir kabagh asɨghasigham.”
\b
\q1
\v 7 Ikiavɨra Itir God Izamin Dughiar Ekiam a roghɨra izegha gɨfa.
\q2 Kamaghɨn amizɨ, ia an boroghɨn izɨ nɨmɨra ikɨ.
\q1 Ikiavɨra Itir God uan gumazamiziba me mɨsoghasava ami,
\q2 mati gumaziba ofa damuasa asɨzibav sosi.
\q1 Egha gumazir igharazibar diazɨ me iza garima,
\q2 a uan damazimɨn zuezir arazim damuasa me mɨgei.\f + \fr 1:7 \fr*\ft Vezɨn kamɨn akar isɨn zuim, a kamaghɨn mɨgɨa ghaze, bizir God damuasa mɨkemeziba, da mati gumaziba God bagh ofa damuasa amizir bizibar dughiam. Me asɨzibav sogha ofabagh ami. Egha me gumazir igharazibar deima me iza me ko uari akuvava asɨzir ofan kaba api. Ezɨ e deragha fozir puvatɨ, akar isɨn zuim, gumazir igharazir kaba, me taia. Gumazir maba ghaze, kar God diazir gumazir izɨ Judabagh asɨghasɨghamiba.\ft*\f*
\q1
\v 8 Ikiavɨra Itir God ghaze,
\q2 Dughiar kɨ uan gumazamizibav soghamim,
\q1 kɨ atrivimɨn gumazir dapaniba ko, atrivimɨn otariba ko, kantrin igharazibar arazibagh amir gumazamiziba,
\q2 kɨ me gasɨghasigham.
\q1
\v 9 Dughiar kamɨn, gumazamizir asebar ziaba fa,
\q2 uan gumazir ekiamɨn dɨpenim damutɨ a izɨvasa,
\q2 me okɨava gumazibav sozi me ariaghiri,
\q3 gumazir kaba, kɨ me gasɨghasigham.
\b
\q1
\v 10 Ikiavɨra Itir God ghaze,
\q2 Dughiar kamɨn ia oraghtɨ ararem Osirir Tiar Akar Jerusalemɨn itimɨn ikegh otivam,
\q3 eghtɨ azirakam Jerusalemɨn ruaghatevir igiamɨn ikegh otivam.
\q1 Egh ia oraghtɨ, mɨghsɨabagh isɨn dɨpeniba irɨ,
\q2 pamten tɨngagham.
\q1
\v 11 Ia gantɨ, ian gumazir dagɨar ingangaribagh amiba,
\q2 me bar arɨmɨghiregham.
\q1 Kamaghɨn amizɨ, ia nguibar ekiamɨn danganir zarimɨn ikɨ, bizir kaba baragh aziam.
\b
\q1
\v 12 Dughiar kamɨn, kɨ lamba inigh Jerusalemɨn averiam buriam.
\q2 Gumazir nan arazibagh ifongezir puvatɨziba, me ghaze me uari biziba bar dar amuam.
\q1 Me ghaze God pura iti.
\q2 A gumazir aghuibar akurvazir puvatɨgha,
\q3 gumazir kurabar araziba ikarvazir puvatɨ.
\q2 Eghtɨ kɨ gumazir kabagh asɨghasigham.
\q1
\v 13 \x - \xo 1:13 \xo*\xt Godɨn Araziba 28:30; 28:38-40; Amos 5:11; Maika 6:15\xt*\x*Gumazir kaba, gumazir igharaziba izɨ men biziba okemegh, men dɨpenibagh asɨghasigham.
\q2 Me dɨpenir igiabar ingarigh, dar ikian kogham.
\q1 Egh wainɨn azenir me opariba,
\q2 me dar wainɨn dɨpabar aman kogham.
\b
\q1
\v 14 Ikiavɨra Itir God Izamin Dughiar Ekiam, a roghɨra ize,
\q2 egh a bar zuamɨram otogham.
\q1 Ikiavɨra Itir God Izamin Dughiar Ekiam, a gumazamizibar amutɨ,
\q2 me bar osemegham.
\q1 Dughiar kamɨn, mɨdorozir gumazir gavgaviba,
\q2 me uaghan atiating pamten arangam.
\q1
\v 15 Dughiar kamɨn, Ikiavɨra Itir Godɨn anɨngagharim azenim giram,
\q2 eghtɨ gumazamiziba osɨmtɨzir ekiamɨn aven ikɨ men naviba bar ikuvigham,
\q3 eghtɨ biziba tintinimɨn ikuvam.
\q1 Eghtɨ ghuariaba aruem avaraghtɨ,
\q2 mɨtater pɨgha duar dafam otogham.
\q1
\v 16 Dughiar kamɨn mɨdorozir sɨgham arangtɨ,
\q2 mɨdorozir gumaziba izɨ,
\q2 nguibar ekiar dɨvazir gavgaviba itiba ko dɨpenir gavgavir ganganir gumaziba itiba,
\q3 me dav sogh pamten mɨkɨm, dɨmɨva arangam.
\b
\q1
\v 17 \x - \xo 1:17 \xo*\xt Godɨn Araziba 28:29; Onger Akaba 83:10; Jeremaia 9:22\xt*\x*Ikiavɨra Itir God kamaghɨn mɨgei,
\q2 Gumazamiziba arazir kurabar na gami,
\q2 kamaghɨn amizɨ, kɨ bizir kurar avɨrim damutɨ da me bativam,
\q3 eghtɨ me damazir okavɨrɨzibar mɨn punpun, daruamin tuaviba buriam.
\q1 Eghtɨ men ghuziba dɨpamɨn mɨn irɨtɨ me arɨmɨghiram.
\q2 Eghtɨ men kuaba nguazim gisɨn kurighirɨ mati afiar buariba.
\b
\q1
\v 18 Dughiar kamɨn, Ikiavɨra Itir God uan anɨngagharim akagham,
\q2 eghtɨ men gol ko silva tong bar men akuraghan kogham.
\q3 Bar puvatɨgham.
\q1 An anɨngagharim, avimɨn mɨn otogh nguazimɨn ruaghateviba
\q2 bar dar isigham.
\q1 A zuamɨram otogh, nguazimɨn gumazamiziba
\q2 bar me agɨvagham.
\c 2
\s Gumazamiziba navibagh iragh
\q1
\v 1 Ia kantrin kamɨn gumazamiziba,
\q2 ia uan arazir kurabar aghumsɨzir puvatɨ.
\q1 Ia deravɨra arazir kam gɨnɨghnɨgh,
\q2 egh a bagh aghumsɨgh.
\q1
\v 2 Puvatɨghtɨ, Ikiavɨra Itir God uan anɨngagharim akaghtɨ,
\q2 ia ikuvigham mati akɨmariba mɨdɨi.
\q1 Puvatɨghtɨ, Ikiavɨra Itir God ian ataram,
\q2 eghtɨ an adarim avimɨn mɨn ian isiam.
\b
\q1
\v 3 \x - \xo 2:3 \xo*\xt Aisaia 1:17; Amos 5:6; 5:14-15\xt*\x*Ia gumazamizir uari abɨra, Ikiavɨra Itir Godɨn apengan itiba,
\q2 ia a bagh izɨ a baghvɨra ikɨ.
\q3 Egh uari abɨnigh Godɨn damazimɨn arazir aghuibar amu.
\q1 Ia kamaghɨn damutɨ, Ikiavɨra Itir God uan anɨngagharim amadaghtɨ
\q2 a izɨ arazir kuraba ikarvaghamin dughiam,
\q3 ia ti an aven modogh deraghvɨra ikiam.
\s Judan kantrin boroghɨn itir kantriba Ikiavɨra Itir God me gasɨghasigham
\q1
\v 4 \x - \xo 2:4-7 \xo*\xt Aisaia 14:29-31; Jeremaia 47:1-7; Esekiel 25:15-17; Joel 3:4-8; Amos 1:6-8; Sekaraia 9:5-7\xt*\x*Ikiavɨra Itir God Filistian kantri gasɨghasightɨ,
\q2 gumazitam Gazan nguibar ekiamɨn ikian kogham.
\q3 Eghtɨ Askelonɨn nguibar ekiam uaghan gumaziba puvatɨgham.
\q1 Asdotɨn itir gumazamiziba, apaniba dughiar vamɨran me batuegham,
\q2 egh me uaghan Ekronɨn itir gumazamiziba batuegham.
\b
\q1
\v 5 O Filistian ongarir dadarimɨn itiba, ia ikuvigham.
\q2 Ikiavɨra Itir God ia isa kot gatɨgha gɨfa.
\q3 A ia gasɨghasightɨ, ian tav ikian kogham.
\q1
\v 6 Ian nguazir ongarir mɨriamɨn itim, grazir kɨnim a batogham.
\q2 Danganir kamɨn sipsipbagh eghuvir gumaziba,
\q3 ia uari bagha dɨpenir doziba ko sipsipba ikiamin dɨvazibar ingaram.
\q1
\v 7 Ezɨ Judan ikɨzimɨn ikiavɨra itir varazira, me ian nguazim iniam.
\q2 Eghtɨ men sipsipba danganir kamɨn itir grazibar amɨtɨ,
\q3 Judaba Askelonɨn nguibamɨn itir dɨpenibar dakuam.
\q1 Eghtɨ Ikiavɨra Itir God, a men God,
\q2 a me ko ikɨ me damutɨ
\q3 me deravɨra ikiam.
\b
\q1
\v 8 \x - \xo 2:8-11 \xo*\xt Aisaia 15:1--16:14; Aisaia 25:10-12; Jeremaia 48:1-47; 49:1-6; Esekiel 21:28-32; 25:1-11; Amos 1:13-15\xt*\x*Ikiavɨra Itir Godɨn Gavgaviba Bar Itim kamaghɨn mɨgei,
\q1 “Kɨ Moapɨn kantri ko, Amonɨn kantri barazima,
\q2 aning nan gumazamiziba dɨpova akar kurabar me mɨgɨa uari fe.
\q1 Me pamten mɨgɨa ghaze,
\q2 me Israelia abɨnigh men nguazim inigham.
\q1
\v 9 \x - \xo 2:9 \xo*\xt Jenesis 19:24\xt*\x*Kɨ Ikiavɨra Itir Godɨn Gavgaviba Bar Itim, Israelian God,
\q2 kɨ zurara angamɨra ikia, guizbangɨra mɨgɨa Akar Gavgavir kam gami,
\q1 Moapia ko, Amonia me ikuvigham,
\q2 mati Sodom ko, Gomora ikuvizɨ moghɨn me ikuvigham.
\q1 Eghtɨ ikarɨzir ataghatariba otivigh men nguazim bar anevegham.
\q2 Eghtɨ amangsɨzim itir moziba nguibar kamɨn otoghtɨ
\q3 a bar ikuvigh kamaghɨra ikiam.
\q1 Eghtɨ nan adarazir ikiavɨra itir varazira,
\q2 me, me mɨsogh pura men biziba iniva,
\q3 men nguaziba iniam.”
\b
\q1
\v 10 Moapia ko, Amonia uari fava akaba batosi,
\q2 egha Ikiavɨra Itir Godɨn Gavgaviba Bar Itimɨn gumazamiziba,
\q2 me dɨbovir akar kurabar me mɨgei.
\q3 Kamaghɨn amizɨ, God me ikaragh pazavɨra me damuam.
\q1
\v 11 Ikiavɨra Itir God me damutɨ,
\q2 me puvɨram atiatingam.
\q1 Kantriba bar, a men asebar amutɨ
\q2 da pura bizir kɨnibar mɨn otivam.
\q1 Eghtɨ gumazamizir ongarimɨn mɨriamɨn itiba ko, gumazamizir ongarir arighatɨzimɨn itiba,
\q2 me uan nguibabara ikɨva
\q3 uan teviba apɨr dapaniba avighɨva an ziam fam.
\b
\q1
\v 12 \x - \xo 2:12 \xo*\xt Aisaia 18:1-7\xt*\x*O Itiopian gumazamiziba, ia uaghan
\q2 Ikiavɨra Itir God mɨdorozimɨn aven ia mɨsoghtɨ
\q3 ia arɨmɨghiram.
\b
\q1
\v 13 \x - \xo 2:13-15 \xo*\xt Aisaia 10:5-34; 14:24-27; Nahum 1:1--3:19\xt*\x*Ikiavɨra Itir God uan gavgavimɨn Asirian gumazamizibagh asɨghasigham,
\q2 kantrin kam a notɨn amadaghan iti.
\q1 Egh a men nguibar ekiam Ninive gasɨghasigham.
\q2 Eghtɨ nguibar ekiar kam dɨpaba puvatɨzir danganimɨn mɨn otogham,
\q3 eghtɨ gumazamiziba ua an ikian kogham.
\q1
\v 14 Bulmakauba ko, sipsipba ko, memeba ko, asɨzir atiabara izɨ a dakuam.
\q2 Apaniba dɨpenibar itir ter arariba isɨ tintinimɨn da kunigham.
\q3 Kamaghɨn amizɨ, dɨpenir kaba bar ikuvigham.
\q1 Eghtɨ dɨmagarimɨn kuarazir biariba ko, mɨghɨaba ko, dariaba
\q2 da pura izɨ dɨpenir kabar ikɨva
\q3 dar dɨpenir akɨniba ko, tiar akaba ko, winduabar dapiagh ikɨva arangam.
\b
\q1
\v 15 Niniven adarazi nɨghnɨgha ghaze, me gavgavir ekiam iti,
\q2 me ikuvighan kogham, kamaghɨn amizɨ, me bar akonge.
\q1 Egha me ghaze, men nguibar ekiam a uabɨra kantrin igharazibar nguibar ekiaba, bar dagh afira.
\q2 Ezɨ bar puvatɨ.
\q3 Bizir kurar kaba Ninive bato.
\q1 Ezɨ nguibam ikuvigha kamaghɨra ikia,
\q2 asɨzir atiabar danganim gava.
\q1 Gumazir an boroghɨn zuiba me atiatiava
\q2 dapaniba roava bar an aghua.
\c 3
\s Ikiavɨra Itir God Jerusalemian arazir kuraba gɨn amada
\q1
\v 1 O Jerusalem, nɨ ikuvigham.
\q2 Nɨn gumazamizibar araziba, Ikiavɨra Itir Godɨn damazimɨn bar mɨzegha, kurigha bar ikufi.
\q3 Me an akaba batogha uan adarazira, paza me gami.
\q1
\v 2 Me Ikiavɨra Itir Godɨn akam barazir puvatɨ,
\q2 egha Ikiavɨra Itir God men araziba akɨran me aghua.
\q1 Egha nɨghnɨzir gavgavim an ikian aghua,
\q2 egha uarir akurvaghasa an azangsɨzir puvatɨ.
\b
\q1
\v 3 Men gumazir dapaniba mati laionba, mɨtiriam men azima
\q2 me pamten arava aroi.
\q1 Ezɨ men gumazir kotiaba tuisɨziba, mati afiar atiaba mɨtiriam puv men azi,
\q2 ezɨ me asɨziba apava,
\q3 gurumzaraghan bagha agharitam atɨzir puvatɨ.
\q1
\v 4 Godɨn akam inigha izir gumaziba deraghavɨra uan ingangarim gamir puvatɨ,
\q2 egha ifaghata gumazamizibagh asɨghasɨghasa pura me gifari.
\q1 Ofa gamir gumaziba, me bizir anogorogheziba paza dagh ami,
\q2 egha uarira uarir akurvaghasa Godɨn Akar Gavgaviba otavkɨri.
\b
\q1
\v 5 Ezɨ Ikiavɨra Itir God Jerusalemɨn ikiavɨra iti.
\q2 A guizɨn arazir aghuibaram ami, egha arazir derazir puvatɨziba ana dagh amir puvatɨ.
\q1 Mɨzarazibar zurara, a guizɨn uan arazimɨn gɨn ghua,
\q2 bar deragha kotiabagh amua, gumazamizibar araziba tuisɨsi.
\q3 Egha ingangarir kam ataghɨrazir puvatɨ.
\q1 Ezɨ gumazir kurar nguibar ekiar kamɨn itiba,
\q2 me guizɨn arazimɨn gɨn zuir puvatɨ,
\q3 egha aghumsɨzir puvatɨ.
\q4 Bar puvatɨ.
\b
\q1
\v 6 Ikiavɨra Itir God kamaghɨn mɨgɨa ghaze,
\q1 “Kɨ kantrin maba bar me agɨfa, egha men nguibar ekiabagh asɨghasɨki.
\q2 Ezɨ dar nguibar ekiar dɨvazir gavgaviba itiba ko, dɨpenir ruarir ganganir gumaziba itiba,
\q3 da ikuvigha iti.
\q1 Gumazitaba nguibar ekiabar itir puvatɨ,
\q2 kamaghɨn amizɨ, gumazamiziba ua nguibar ekiabar aven itir tuavibagh aruir puvatɨ.
\q1
\v 7 Kɨ ghaze gumazamiziba nan arazir kabar gan, nan apengan ikiam,
\q2 egh me nan amamangatɨghtɨ kɨ men arazir kuraba akɨram.
\q1 Egh kɨ deraghvɨra men sure gamizir biziba, me deragh dagh nɨghnɨghtɨ,
\q2 kɨ me gasɨghasighan kogham.
\q3 Ezɨ me nan suren akaba barazir pu. Puvatɨ.
\q2 Me zuamɨra ua dɨkavigha arazir kurabagh ami.”
\b
\q1
\v 8 Ikiavɨra Itir God kamaghɨn an gɨn zuir gumazamizibav gei,
\q2 “Kɨ men atara kamaghɨn uan nɨghnɨzim akɨrigha gɨfa,
\q2 kɨ kantriba bar dar gumazamiziba inigh izɨ me akuvagh,
\q3 men arazir kuraba ikarvagham.
\q1 Eghtɨ nan anɨngagharim avimɨn mɨn nguazir kamɨn danganiba bar dagh asɨghasigham.
\q2 Kamaghɨn amizɨ, ia nɨghnɨzir avɨribar amuan markɨ.
\q1 Ia Dughiar kɨ kantriba bar dar gumazamiziba isɨ kot darɨghamim bagh pura mɨzuam ikɨ.
\b
\q1
\v 9 “Dughiar kamɨn, kɨ kantriba bar dar gumazamiziba mɨgeir mɨgɨrɨgɨabagh iraghtɨ,
\q2 da ua igiabar otivigham.
\q3 Eghtɨ me mɨgeir mɨgɨrɨgɨaba bar zuegh bar deragham.
\q1 Egh me ua aseba ko, mɨkɨman kogham,
\q2 me narara mɨkɨmam.
\q3 Egh me navir vamɨra ikɨ, nan ingangarim damuam.
\q1
\v 10 Nan gumazamizibar marazi tintinimɨn kantrin igharazibar ghue,
\q2 ezɨ marazi kantri Itiopian iti,
\q3 me ofaba inigh na bagh izam.
\b
\q1
\v 11 “Nan gumazamiziba,
\q2 ia guizbangɨra nan akam batoke.
\q1 Eghtɨ kɨ bizir kabar amutɨ da otivamin dughiamɨn,
\q2 ian tongɨn itir gumazir uari fa akaba batoziba,
\q3 kɨ bar me batuegham.
\q1 Eghtɨ ia Jerusalemɨn ikiam, kar nan mɨghsɨam,
\q2 egh ia ifaghatɨ ua nan akaba batoghan kogham.
\q1 Kamaghɨn amizɨ, ia uamategh Jerusalemɨn izeghɨva,
\q2 nɨ ua uan arazir kurabagh nɨghnɨgh aghumsɨghan markɨ.
\q1
\v 12 Eghtɨ gumazamizitaba, kɨ me ateghtɨ me Jerusalemɨn nguibamɨn ikiam.
\q2 Me bizir avɨriba puvatɨgh guizbangɨra uari dɨkabɨragham.
\q3 Egh na bagh izɨ uarir akurvaghsɨ nan azangsɨgham.
\q1
\v 13 \x - \xo 3:13 \xo*\xt Akar Mogomem 14:5\xt*\x*Israelian ikiavɨra itir varazira, men dɨbobonim bar sufi.
\q2 Me arazir kurabar amuan koghɨva, akar ifavaribar amuan kogham.
\q1 Me guizɨn akabar amu, egh ifaran kogham.
\q2 Me deraghvɨra dapiagh avughsam,
\q3 eghtɨ bizitam me damutɨ me atiatingan kogham.”
\s Bar akongeghamin onger akar mam
\q1
\v 14 O Israelian gumazamiziba, ia pamten dɨmɨva ighiabar amu!
\q2 O gumazamizir Jerusalemɨn nguibamɨn itiba,
\q3 ian navir averiaba deraghtɨ ia bar akuegh mamaghɨra ikɨ!
\q1
\v 15 \x - \xo 3:15 \xo*\xt Aisaia 54:14\xt*\x*Ikiavɨra Itir God, ia gasɨghasɨghasa mɨkemezir akar kam,
\q2 a anegɨvagha ian apanibar agɨrazɨ me are.
\q1 Ikiavɨra Itir God, a Israelian atrivim,
\q2 a ian tongɨn iti.
\q3 Kamaghɨn amizɨ, ia bizitamɨn atiatingan markɨ.
\q1
\v 16 O Jerusalem, Dughiam izɨtɨ me nɨ mɨkɨm suam,
\q2 Ia Saionɨn gumazamiziba, ia puram akongɨva bizitamɨn atiatingan markɨ.
\q1
\v 17 \x - \xo 3:17 \xo*\xt Godɨn Araziba 30:9; Aisaia 62:5; Jeremaia 32:41\xt*\x*Ikiavɨra Itir God, a ian God, a ia ko iti.
\q2 An gavgavim ian akurazɨ, ia mɨdorozimɨn uan apaniba abɨra.
\q1 A ia bagha bar akongegh ighiabar amuam.
\q2 Mati gumazamiziba uari akuva Godɨn ziam fa onger akabagh ami moghɨn,
\q3 a ia bangɨn pamtem ongam.
\q1 Guizbangɨra a bar ia gifonge, ia kamaghɨn nɨghnɨzir kam damutɨ,
\q2 a mɨgɨrɨgɨabagh asagham.
\b
\q1
\v 18 Ikiavɨra Itir God ua kamaghɨn mɨgei,
\q1 “Kɨ faragha puv ia gamizɨ, ia nan saghon iti.
\q2 Ia fo, ia nan ziam fe puvatɨ,
\q2 ezɨ bizir kam ia gamima ia bar aghumsɨki.
\q3 Ezɨ kɨ datɨrɨghɨn ua ia inigh izasa.\f + \fr 3:18 \fr*\ft Hibrun akam me kagh deragha akamɨn mɨngarim abɨghizir puvatɨ.\ft*\f*
\q1
\v 19 Dughiar kamra, apanir ia abɨragha paza ia gamiziba,
\q2 kɨ me gasɨghasigham.
\q1 Ia Israelian tintinibar kantrin igharazibar itiba,
\q2 ia mati sipsipba tintinibar ghuezɨ, ian sueba ikufi.
\q3 Kɨ ia inigh ua ian nguibamɨn izam.
\q1 Ia datɨrɨghɨn igharaz darazir damazimɨn bar aghumsɨki,
\q2 ezɨ kɨ ian aghumsɨzim agɨvagh ziar ekiam ia danɨngam.
\q1 Eghtɨ nguazimɨn danganiba bar,
\q2 dar gumazamiziba ian ziaba fam.
\q1
\v 20 Dughiar kamɨn, ia itir danganiba bar,
\q2 kɨ ia inigh uamategh ian nguibamɨn izam.
\q1 Egh ziar ekiam ia danightɨ,
\q2 nguazimɨn gumazamiziba bar ian ziam fam.
\q1 Egh Dughiar kamɨn, kɨ ian ingangaribar amutɨ da bar deragh otivam,
\q2 eghtɨ ian dabirabim deragham.
\q3 Kɨ Ikiavɨra Itir God, kɨ mɨkemegha gɨfa.”