\id COL 
\ide UTF-8
\h KOLOSI
\toc1 Akɨnafarir Pol Kolosin Nguibamɨn itir Sios bagha Osirizim
\toc2 Kolosi
\toc3 Kl
\mt Akɨnafarir Pol Kolosin Nguibamɨn itir Sios bagha Osirizim
\is Akar Faragha Zuim
\ip Kolosi, a nguibar ekiar mam, Esian Provinsɨn iti. Egha a Efesusɨn nguibam mong an boroghɨn iti. Pol uabɨ Kolosin nguibamɨn sios gamizɨ an otozir puvatɨ. Pol Efesusɨn ikiava egha gumaziba amadazɨ, me ghua provinsɨn kamɨn nguibar mabar siosɨn ingangarim gamua, egha uaghan Kolosin ghu.
\ip Pol kamaghɨn oraki, gumazir maba Kolosibar nɨghnɨzir gavgavibagh asɨghasɨghasa. Kamaghɨn, a men nɨghnɨzir gavgaviba gavgavim dar anɨngasa, kamaghɨn an akɨnafarim osirigha me bagha anemada. A kamaghɨn mɨgei, Krais biziba bar dar dapanim. Krais uabɨra uam e iniam, eghtɨ tuavir igharaziba en akurveghan kogham. Tuavir kaba e inigh Kraisɨn saghuiamɨn mangam. Kraisrama, God bar bizibar ingarizɨ da otifi. Egh Kraisɨn ingangarimɨn God ua biziba bar da iniasa. Krais en aven iti, ezɨ e gumazamizir igiabar otivigha egha Kraisɨn arazibara gɨn zui.
\ip Egha Pol akɨnafarir kam osirigha gumazir pumuning ganɨngi, ezɨ aning a inigha Kolosin ghu. Gumazir faragha itim, a Tikikus. An gɨrara itir gumazim, a Onesimus, gumazir kam Pol Filemon bagh osirizir akɨnafarimɨn an gun mɨgɨrɨgɨar avɨribagha ami.
\c 1
\ms Krais a biziba bar dar dapanim, ezɨ Godɨn ikɨrɨmɨrir aghuim ko an arazir aghuiba bar a gizɨfa
\mr (Sapta 1:2-3:4)
\p
\v 1-2 Kɨ Pol, God uan ifongiamɨn gɨn ghua Krais Iesusɨn aposelɨn ikiasa na mɨsefe. Ezɨ kɨ ko en aveghbuam Timoti, ga ia bagha akɨnafarir kam osiri. Ia Godɨn gumazamizir Kolosin nguibar ekiamɨn itiba, ia gan adarasi, nɨghnɨzir gavgavim Kraisɨn ikia a ko poroghav itir darasi. Ga, e uan Afeziam God ko mɨgɨa ghaze, a ian apangkuvigh egh ian navibar amutɨ ia navir amɨrɨzimɨn ikɨ.
\s Ga ia bagha nɨghnɨgha God mɨnabavɨra iti
\p
\v 3-4 Ga ian arazir aghuim baragha kamaghɨn fo, ia nɨghnɨzir gavgavim Krais Iesusɨn ikiava egha ia Godɨn gumazamiziba bar, me gifonge. Kamaghɨn amizɨ, dughiaba bar ga ia bagha God ko mɨgɨava, ia gɨnɨghnɨgha God mɨnabavɨra iti. A en Ekiam Krais Iesusɨn Afeziam. 
\v 5 E fo, guizɨn akam, an akar aghuim, a faragha ia bagha ghuzɨma ia kamaghɨn oraki, bizir aghuir God ia danɨngamiba da An Nguibamɨn iti, egh ia da bagh mɨzuamɨva egh da iniam. Egha ia nɨghnɨzir gavgavim bizir kamɨn iti. Kamaghɨn, ia guizbangɨra nɨghnɨzir gavgavim Krais Iesusɨn ikiava egha Godɨn gumazamiziba bar, me gifonge. 
\v 6 Ezɨ nguazir kamɨn danganiba bar, me akar aghuir kamɨn akurazɨ gumazamizir avɨriba nɨghnɨzir gavgavim an ikiava an gɨn zuima akar aghuimɨn dagher aghuiba otiva ghuavɨra iti. Ezɨ ia uaghan, arazir kamra ian tongɨn oto. Ia dughiar faragha Godɨn apangkuvimɨn eghaghanim baregha ia bar guizbangɨra a gɨfozim, dughiar kam iza datɨrɨghɨn arazir kamra ian tongɨn otogha, ian ingaravɨra iti. 
\v 7 Epafras akar aghuir kam ian sure gami, ezɨ ia a gɨfo. Epafras, a ingangarir gumazir bar aghuir ga bar ifongezim, a ga ko ingarir mav. A ga gisɨn ian akurvagha, egha bar deravɨra Kraisɨn ingangarim gami. 
\v 8 Egha Epafras ga mɨgɨa ga geghari, Godɨn Duam ia gamima ia Godɨn gumazamiziba deraghavɨra me gifonge.
\s Pol Kolosin gumazamiziba gavgavim me danɨngasa God ko mɨgei
\p
\v 9 Bizir kam bagha, ga fomɨra ian araziba baragha iza datɨrɨkɨn, ga zurara ia bagha God ko mɨgei. Ga kamaghɨn an azangsɨsi, Godɨn Duam fofozir aghuiba ko nɨghnɨzir aghuiba ia danɨngtɨ, eghtɨ nɨghnɨzir kaba bar ia gizɨvagham. Eghtɨ bizir kamɨn ia Godɨn ifongiam bar a gɨfogham. 
\v 10 Kamaghɨn ia Ekiamɨn gumazamizibar mɨn ikɨva an arazibar amutɨma, a ia amir araziba dagh ifuegham. Egh ia ingangarir aghuir igharagha garir avɨribar amuam. Egh ia uaghan God gɨfogham, eghtɨ fofozir kam bar mangɨva ekevegham. 
\v 11-12 Ezɨ ga kamaghɨn God ko mɨgei, an gavgavir ekiar aghuimɨn, God gavgaviba bar ia danɨngam, eghtɨ ia tuivigh gavgavigh egh osɨmtɨziba ateram, egh nɨmɨra ikɨva osɨmtɨziba gɨvaghamin dughiam mɨzuam. Egh ia bar akueghɨva, egh en Afeziam mɨnabagh. A ia gamizɨma ia arazir aghuibar gɨn zui, egh ia bizir aghuir a ia bagha mɨseveziba da iniam. Ia Godɨn gumazamiziba ko da iniam, kar Godɨn Nguibamɨn angazangarimɨn aven itir darasi. 
\v 13-14 Faragha mɨtarmemɨn gavgavim e ikezɨma e an apengan itima, ezɨ God en akuragha e inigha uan Otarimɨn gavgavimɨn apengan e atɨzɨ an en Atrivim iti, Otarir kam a bar a gifonge. God uan Otarimɨn ingangarimɨn e gamizɨ e fɨraghɨre, egha tuavir kamra an en arazir kuraba da gɨn amada.\f + (1:13-14) Akar kam, “mɨtarmemɨn gavgavim,” an mɨngarimra kara: Satan ko bizir an ativazɨ an apengan itiba, kar tintinimɨn duar kuraba, aseba, adariaba, ko arazir kuraba bar moghɨra.\f*
\s Pol Kraisɨn araziba ko an ingangaribar gun mɨgei
\p
\v 15 E Godɨn ganighan kogham, ezɨ Krais an mɨrara gari. Krais an Otarir ivariam, a God ingarizir bizir kaba a bar dar dapanim. 
\v 16 Ezɨ Kraisɨn agharimɨn, God uan nguibamɨn itir biziba ko nguazimɨn itir biziba bar dar ingari. Kar bizir e gariba ko garir puvatɨzir biziba, da enselɨn gavgaviba ko duar gavgaviba ko aseba ko adariaba, bizir gavgaviba itiba. God Krais ko, aning bizir kaba bar dagh ami, ezɨ da bar Krais baghavɨra iti. 
\v 17 Ezɨ bizir kaba tɨghar otivam, Krais fomɨra iti. Egha a biziba bar dagh amima da deravɨra uari isasuigha bar deravɨra ingari. 
\v 18 Krais, a siosɨn dapanim, ezɨ sios an nivafɨzim. Egha a uabɨ ikɨrɨmɨrir igiamɨn faragha zuir gumazim. Krais Godɨn Otarir ivariam, egha a faragha ovevemɨn ua dɨkafi. God ghaze, Krais uabɨ biziba bar dar dapanimɨn ikiam. Kamagh sua, a Krais gamizɨ, a ua dɨkafi, 
\v 19 God kamaghɨn ifonge, an ikɨrɨmɨrir aghuim ko an araziba ko an gavgaviba Otarir kam gizɨvagham, kamaghɨn God uabɨ Kraisɨn aven iti. Kamaghɨn amizɨ, Krais Godɨn mɨrara gari.
\p
\v 20 Bizir God ingariziba, da an saghon ikegha apanir arazibar a gami. Ezɨ God kamaghɨn ifonge, a bizir kaba bar dar amutɨ da ua a ko navir vamɨra ikiam. A ghaze, a Kraisɨn ingangarimɨn arazir kam damuam. Ezɨ kamagh sua a Krais ataghizɨma a ter ighuvimɨn areme. Ezɨ an ghuzim irezɨ tuavir kamɨn en apanir araziba a da gɨfa. Egha bizir a ingariziba a bar ua da inizɨ da uam a ko iti, bizir an Nguibamɨn itiba ko nguazimɨn biziba uakan.
\p
\v 21 Iarara, ia fomɨra arazir kuraba ko nɨghnɨzir kurabagh amuavɨra iti. Kamaghɨn ia Godɨn saghon ikiava uan nɨghnɨzibar aven an apanim gami. 
\v 22 Ezɨ God kamaghɨn ifonge, a ia inigh uabɨda izam. Eghtɨ ia an gumazamizibar mɨn ikɨva, egh an damazimɨn bar zueghɨva, arazir kuratam ian ikian kogham. Kamagh sua datɨrɨghɨn Godɨn Otarim angamra gumazir mɨkarzim sara areme, ezɨ tuavir kamɨn God uam e ko navir vamɨra iniz. 
\v 23 Ezɨ dɨpenir guarim dɨpenimɨn suirazɨ moghɨn, ia nɨghnɨzir gavgavimɨn suiragh bar tuivigh gavgavigh ikɨ. Ia akar aghuim bareghava dughiar kam ia fo ia bizir aghuiba iniam, egha ia dav zuava nɨghnɨzir gavgavim iti. Egh ia akongɨva nɨghnɨzir gavgavim ataghraghan markɨ. Ezɨ kɨ Pol, kɨ akar aghuir kamɨn ingangarir gumazim, egha e gumazamizir nguazimɨn itiba bar me bagha anekuri.
\s Pol sios bagha ingangarim gami
\p
\v 24 Ezɨ datɨrɨghɨn kɨ ian akurvaghasa mɨzazim ini. Krais siosɨn akurvaghasa inizir mɨzaziba, da gɨvazir puvatɨ. Kɨ da gɨvasava ami. Ezɨ kɨ siosɨn akurvaghasa ifonge, a Kraisɨn nivafɨzimra. Bizir kam bagha kɨ bar akonge. 
\v 25 God uabɨ, ian akurvaghasa na mɨsefe, egha ingangarir kam na ganɨngi, ezɨ kɨ siosɨn ingangarir gumazimɨn oto. Ezɨ kɨ deravɨra Godɨn akam akurir ingangarim nan iti. 
\v 26 Dughiar fomɨra itibar iza datɨrɨghɨn, akar kam bar modo, ezɨ gumazamiziba bar a gɨfozir puvatɨ. Egha datɨrɨghɨn a Godɨn gumazamizibar damazibar azenim girɨ. 
\v 27 Ezɨ Godɨn nɨghnɨzim kamakɨn, a uabɨ akar aghuir modozir kam e an gumazamiziba, an en aka, eghtɨ e fogham, akar modozir kam a guizbangɨra bar dera, egha Kantrin Igharazibar Gumazamiziba bar men akuragham. Akar modozir kam kamakɨn, Krais ian navir averiabar aven iti, ezɨ ia fo, a ia inightɨ ia a ko mangɨva Godɨn Nguibamɨn ikɨva, egh ia an bizir aghuiba iniam, egha ia bizir kam bagha mɨzuai. 
\v 28 Ezɨ e Kraisɨn akar aghuim bar vaghvagha gumazamizibav kɨri. E kamaghɨn ifonge, me Krais ko porogh ikɨva fofozir aghuitamɨn oteveghan koghɨva, eghtɨ e me inigh Godɨn damazimɨn mangam. Kamagh sua, e nɨghnɨzir aghuim ko fofozir aghuimɨn gɨn ghua men sure gamua, egha akar gavgavim me ganɨdi. 
\v 29 Kamaghɨn kɨ, Krais na ganɨngizir gavgavir ekiam, a nan akurvazima, ezɨ tuavir kamɨn kɨ osɨmtɨziba sara ingangarir dafar kam gami.
\c 2
\s E nɨghnɨzir gavgavim ikɨva egh akar ifavariba batogham
\p
\v 1 Kɨ ia foghasa, kɨ akurvazir ingangarir dafam ia ko Laodisian nguibamɨn itir gumazamiziba bagha a gami, egha uaghan nan guamɨn ganizir puvatɨzir igharaziba sara. 
\v 2 Kɨ kamaghɨn ifonge, kɨ gavgavim men navibar anɨngtɨ me atiatingan kogham, egh kɨ me damutɨ me uari gifueghɨva uari inigh ikiam, egh me fofozir aghuim inightɨ nɨghnɨzir aghuir kam me damutɨ men nɨghnɨzir gavgavim bar ekevegham. Egh kamaghɨn me Godɨn akar modozimɨn mɨngarim deraghvɨra a gɨfogham, a Krais, a uabɨ akar modozir kamɨn mɨngarim. Kamagh sua kɨ ingangarir kam gami. 
\v 3 Godɨn fofozir aghuim ko nɨghnɨzir aghuim bar pɨn kogha Krais gizɨvagha modogha iti, mati dagɨaba dagɨabar dɨpenimɨn iti. Ezɨ Krais uabɨra fofozir aghuir kam en aka.
\p
\v 4 Ezɨ kɨ ghaze, tav ia gifarɨva egh akar amɨrɨzibar ia mɨkɨmɨva ia apezaperan kogham. Kamagh sua, kɨ akar kam ia mɨgei. 
\v 5 Kɨ uabɨ uan mɨkarzimɨn ia ko itir puvatɨ, egha kɨ ia gɨnɨghnɨghavɨra iti. Kamaghɨn kɨ akurvazir ingangarir dafar kam ia bagha a gami. Egha kɨ ian garima, ia uari inigha tuivighav ikiava deragha ingara egha nɨghnɨzir gavgavim Kraisɨn iti. Bizir kamɨn kɨ bar akonge.
\s E Kraisɨn porogh egh an tuivigh gavgavigham
\p
\v 6 Ezɨ ia Krais Iesus en Ekiam ia a inigha gɨfa, egh kamaghɨn ia a ko daruva an poroghɨv ikɨ. 
\v 7 Egh ia a gisɨn tuivigh gavgavigh, mati temem biba sara nguazimɨn tugha gavgafi. Uaghan mati dɨpenim dɨpenir akɨnir gavgavibagh isɨn tughav iti. Ia nɨghnɨzir gavgavim akar aghuir Epafras ian sure gamizir kamɨn iti, egh kamaghɨn ian nɨghnɨzir gavgavim aghung mangvɨra ikɨ. Egh zurara God mɨnabɨvɨra ikɨ.
\p
\v 8 Ia bar deragh uari bagh gan, gumazitam fofozir ifavariba ko akar kɨnitabar gun ia mɨkɨmtɨma ia an nɨghnɨzibar gɨn mangan markɨ, eghtɨ da ia ikɨrarɨghan kogham. Gumazir kaba, inazir afeziaba ko duar kurar overiam ko nguazim gativaziba, me me da fofozir kaba ini. Ezɨ fofozir kaba da Kraisɨn izezir puvatɨ.
\p
\v 9 Ia fo, Krais a en mɨrara gumazimɨn oto, ezɨ Godɨn ikɨrɨmɨrim ko araziba ko an gavgaviba bar a gizɨfa. 
\v 10 Egha a duar gavgaviba ko bizir gavgaviba itiba bar, dar dapanim. Ezɨ ia Kraisɨn poroghav itima, kamaghɨn God ia gamima ia guizbangɨra angamra ikiavɨra iti.
\p
\v 11 Ezɨ ia Kraisɨn poroghav ikia, egha mati uan mɨkarzir mogomebar ghorir arazim ini. Ezɨ arazir kam, gumazitam uan dafarimɨn a gamizɨma an otozir pu. Puvatɨ. Krais uabɨ mɨkarzir mogomebar aghorir arazir kam atɨ. Kraisɨn arazir kamɨn e, navir ghurimɨn gavgavir e ikiagharɨghɨzim, anetughavkɨnigha a gɨn amadagha, egha fɨriaghɨrɨ. Kar guizbangɨra mɨkarzibar aghorir arazim. 
\v 12 Ezɨ dughiar e ruezimɨn e Krais ko poroghav itima, God Krais ko e sara mozim gatɨ. Ezɨ e fo, God uan gavgavir ekiamɨn amodoghɨn ingarava Krais mozimɨn a gamizɨ a ua dɨkafi. Ezɨ e nɨghnɨzir gavgavim an ingangarir gavgavir kamɨn itima, ezɨ dughiar e ruezimɨn, God Iesus ko e gamizɨma e uaghan ua dɨkafi.
\p
\v 13 Ia faragha uan arazir kurabagh amir arazim bagha gumazir aremezibar moghɨn iti. Ia navir ghurimɨn arazibar gɨn ghua, eghtɨ Krais ian navir ghurimɨn araziba tɨghar da atughuvkɨnighɨva da gɨn amadagham, kamaghɨn ia gumazir aremezibar mɨn ami. Ezɨ datɨrɨghɨn God ia gamima ia Krais ko angamra iti. Ezɨ God en arazir kuraba bar a da gɨn amada.
\p
\v 14 Moses Osirizir Araziba, akam e gasaragha, en arazir kuraba aghurigha azenim gatɨ, egha e gamima e an akam ko an gavgavimɨn apengan iti. Ezɨ e gasir akar kaba God bar da batoke, egha uaghan Moses Osirizir Araziba isa Iesusɨn ter ighuvimɨn a gafu, egha tuavir kamɨn Moses Osirizir Arazibar gavgavim a gɨfa. 
\v 15 Ezɨ Krais ter ighuvimɨn duar gavgaviba ko bizir gavgaviba itiba, a dar gavgaviba deghavkɨnigha da gɨfa. God ter ighuvimɨn, kamaghɨn gumazamiziba bar men aka, a bar da dɨkabɨragha da ikegha dagh amima da pura bizir kɨnibar mɨn otifi.
\s E Krais koma areme, ezɨ nguazir kamɨn araziba en akuraghan kogham
\p
\v 16 Kamaghɨn amizɨ, ia tav ateghtɨma an akaba ia gasan markɨ, egh ia mɨkɨm suam, ia dagheba ko dɨpaba apir arazibar gɨn zuir puvatɨ, o ia Godɨn ziam fer dughiabar gɨn zuir puvatɨ, o iakinir igiabar isar araziba ko Sabatɨn dughiabar arazibar dar gɨn zuir puvatɨ. 
\v 17 Arazir kaba, da bizir gɨn izamibar nedazir kɨniba, ezɨ Krais a uabɨ guizbangɨn bizim. 
\v 18 Eghtɨ gumazitam bizitam irebamɨn mɨn bizimɨn ganigh, egh kamaghɨn a uabɨra uan ziam fɨtɨ, ia an akam baraghan markɨ. Gumazir kam suam, ia uarigh ifarɨva uari dɨkabɨnɨva egh enselbar ziaba fɨ. Eghtɨ ia an akam baraghan markɨ. Gumazir kam a uan nɨghnɨzim ko navir ghurimɨn arazibar gɨn ghua, egha pura mɨgɨa ghaze, kɨ uabɨ bar fo. Eghtɨ ia gumazir kamagh amitam ateghtɨ a ia dɨkabɨragh, ian ivezir aghuim okɨman kogham. 
\v 19 Egha a Kraisɨn suirazir puvatɨgha anetaki, Krais en dapanim, e an nivafɨzim. E an poroghav ikia dagheba isa egha a ko nivafɨzir agɨribar mɨn uari isasuiragha iti. Nivafɨzir kam Kraisɨn apengan itima an a gamima a God ifongezɨ moghɨn aghua gavgafi.
\p
\v 20 Ezɨ ia Krais ko poroghav ikia a ko areme, kamaghɨn ia duar kurar overiam ko nguazim gativaziba bar ada ategha uam adar apengan itir puvatɨ. Egha tizim sua ia nguazir kamɨn itir gumazibar mɨn aruavɨra iti? Egha tizim sua ia nguazir kamɨn arazibagh amuavɨra iti? Arazir kaba kamakɨn, 
\v 21 “Ia bizir kabar suighan markɨ,” egh “Dagher kabar aman markɨ,” egh uaghan “Bizir igharazir maba sara suighan markɨ.” 
\v 22 Ezɨ bizir kaba, e dar ingangaribagh amima da zuamɨra ikufi. Arazir kaba, gumazibara uari dagh amuava da arɨgha egha en sure gami. 
\v 23 E bar fo, arazir kaba me dav kɨm suam, da nɨghnɨzir aghuibar gɨn zui. Da guizbangɨra bar puvatɨ. Arazir kaba ghaze, ia uari uan ifongiamɨn gɨn mangɨva mɨghɨghvɨra lotun arazibar amu. Egha ghaze, ia uarigh ifarɨva uari dɨkabɨn. Egha ghaze, ia Godɨn ingangarim damuva uan mɨkarzim mɨzazir kuram a danɨng. Egha arazir kaba da en mɨkarzibar akuragh navir ghurimɨn araziba dɨkabɨragh da gɨvaghan kogham. Bar puvatɨgham.
\c 3
\s E Krais ko ua dɨkavigha ikɨrɨmɨrir igiamɨn iti
\p
\v 1 God ia gamizɨma ia Krais ko ua dɨkavigha ikɨrɨmɨrir igiamɨn iti. Egha bizir kam bagha, ia Godɨn Nguibamɨn pɨn itir biziba bar dagh ifongegh, da Krais itir naghɨn iti. Krais, Godɨn agharir guvimɨn amadaghan uan atrivir dabirabimɨn aperaghav iti. 
\v 2 Ezɨ ia bizir pɨn itiba baghɨvɨra nɨghnɨgh, egh nguazimɨn itir bizibagh nɨghnɨghan markɨ. 
\v 3 Ia fo, ia aremegha gɨfa, ezɨ ian ikɨrɨmɨrir angamra itim Krais ko ikiava egha Godɨn poroghav ikia egha modoghav ikia tɨghar azenimɨn otivam. 
\v 4 Ezɨ Kraisra, a guizbangɨra ian ikɨrɨmɨrir angamra itimɨn mɨngarim. Eghtɨ Krais uamategh izamin dughiam, ia uaghan a ko an angazangarir gavgavir ekiamɨn aven otivam.
\ms Krais en aven itima ezɨ e gumazamizir igiabar otifi
\mr (Sapta 3:5-4:18)
\s Ikɨrɨmɨrir ghurim koma ikɨrɨmɨrir igiam
\p
\v 5 Kamaghɨn ami, ia nguazimɨn itir arazir kurar ian navir averiamɨn itiba bar da gɨfagh. Bizir kaba, gumazamiziba uari bakɨa uari ko akuir arazim, ko arazir mɨzɨrɨziba, ko afiar araziba, ko arazir kurabar amuasa naviba dɨkavir arazim, koma gumazir igharazibar bizibar gara da ifuer arazim. Bizibar gara dagh ifuer arazir kam, mati uari isa ifavarir godbar anɨngizir arazimɨn mɨn ami. 
\v 6 Ezɨ bizir kaba bagha God uan anɨngagharimɨn ivezir bar kuram gumazir arazir kabagh amiba me bagha anetɨzɨma a iti. Kar gumazir Godɨn akam iriaghriazibar ivezir kuram. A izam. 
\v 7 Ia faragha arazir kurar kabar gɨn zuima, da ia gativagha ia ikiagharɨki.
\p
\v 8 Ezɨ datɨrɨghɨn ia arazir kaba uam adar amuan markɨ. Arazir kaba: adariba, ko anɨngaziba, ko navir kuraba ko akar kuraba uari gasir araziba, koma mɨgɨrɨgɨar mɨzɨrɨzir ian akatoribar otiviba, 
\v 9 ko uarigh ifarir arazim, ia arazir kabar amuan markɨ. Ia fo, ia navir ghurimɨn araziba ategha 
\v 10 egha gumazir igiabar otifi, mati gumazim korotiar ghurim sueghava korotiar igiam aru. Ezɨ God, gumazir ian ingarizɨ ia gumazir igiabar otivizir kam, a kamaghɨn ifonge, a ia damutɨ ia bar deravɨram a gɨfogham. Kamagh sua a ia gamuavɨra itima ia an mɨraram otivavɨra iti. 
\v 11 Kamaghɨn amizɨ, datɨrɨghɨn bɨbɨziba puvatɨ. Ia ua kamaghɨn nɨghnɨghan markɨ, e Judaba ko Kantrin Igharazibar Gumaziba, o e mɨkarzir mogomeba aghore, o daghorezir puvatɨ, o igharazir darazir akabav gei, o nguibar atiabar gumaziba, o e pura ingangarir gumazibar iti o e fɨriaghrezir gumaziba. E kamaghɨn nɨghnɨghan kogham. E fo, Krais uabɨra iti, egha Krais uabɨ bar en aven iti.
\s E igharazibagh ifongezir arazim damuam
\p
\v 12 God ua baghavɨra ia mɨsevezɨ, ia an gumazamizibar otivigha gɨfa, ezɨ a bar ia gifonge. Kamaghɨn amizɨ, ia arazir kabar amu: Ia gumazamizibar apangkuv, egh arazir aghuibar gumazir igharazibar amu, egh ia uari dɨkabɨragh, egh gumazibar asughasugh, egh dɨghorim amɨrazir arazim damu. 
\v 13 Egh ian tongɨn tav arazir kuratam igharazitav damightɨma an an osemeghɨva, egh ia zuamɨra uari uarir anɨngaghan markɨ, egh uari uan arazir kuraba gɨn amang. Ia fo, Ekiam ian arazir kuraba gɨn amada, ezɨ kamaghɨra ia uaghan uarira uan arazir kuraba gɨn amang. 
\v 14 Egh ia bar uarigh ifongegh. Arazir kam a bar arazir igharazibagh afira. Arazir kam, an arazir aghuir igharazibagh amima da bar deravɨram otiva, uari isa ingari. 
\v 15 Krais navir amɨrɨzim ia ganɨngi, egha ia gamizɨma ia navir vamɨra iti, ezɨ navir amɨrɨzir kam ian navir averiabar ikɨva ia gativaghɨva nɨghnɨzir aghuiba ia danɨngam. Ia fo, navir amɨrɨzir kam bagha God ian diazɨma ia bar uari inigha nivafɨzir vamɨran mɨn oto. Egh zurara God mɨnabɨ. 
\v 16 Egh Kraisɨn akam ian navir averiabar ikɨ gavgafigh. Eghtɨ ia vaghvagh nɨghnɨzir aghuiba ko fofozibar gɨn mangɨva uarira uarir sure damuva egh akurvazir akam uari danɨng. Egh Ighiabar Akɨnafarimɨn aven ighiabar amuva, egh Iesusɨn ziam fer ighiabar amuva, egh Godɨn Duam ian navir averiabagh atɨzir ighiabar amu. Dughiar ia ighiabar amuamim, ia uan navir averiabar God mɨnabɨ. 
\v 17 Ezɨ bizir manaba ia dagh ami, mɨgɨrɨgɨaba o ingangariba, ia bizir kaba bar Ekiam Iesusɨn ziamɨn dar amu. Egh an ziamɨn ia God Afeziam mɨnabɨ.
\s Pol, Kraisɨn arazibar gɨn mangasa, poroghamiba ko boribav gei.
\p
\v 18 Ia amuiba vaghvagh, ia uan pabar akaba baragh egh men apengan ikɨ. Kar Ekiam ifongezir arazim. 
\v 19 Ezɨ ia paba vaghvagh, ia uan amuiba bar deraghvɨra me damuva egh bar me gifongegh. Egh pura ingangarir amizir kɨnimɨn mɨn me damuan markɨ.
\p
\v 20 Ia boriba, ia zurara uan amebaba ko afeziabar akaba baraghɨva dar gɨn mangɨ. Ia fo, Ekiam ian arazir kam bagh bar akuegham. 
\v 21 Ia afeziaba uan boriba mɨghɨ me amir biziba bagh mɨkɨmɨva men nɨghnɨzibar amutɨ me ataran markɨ. Ia kamaghɨn damutɨ, borim osemeghɨva kamaghɨn mɨkɨm suam, kɨ bizitam damuan kogham. Markɨ. Kɨ aghua.
\s Pol ingangarir gumaziba ko gumazir ekiar men garibav gei
\p
\v 22 Ia ingangarir gumaziba vaghvagh, ia uan gumazir ekiar ian garibar akaba baragh, egh biziba bar dar amu. Egh ia kamaghɨn nɨghnɨghan markɨ, “E suam, dughiar me en gara itibar, e me apezeper ingangarir aghuibar amutɨ me e gifuegham.” Puvatɨ. Ia Ekiamɨn atiating, egh dughiaba bar uan navir averiabar aven deravɨra nɨghnɨgh, guizbangɨra ingangarim damu. 
\v 23 Ezɨ ia amir biziba bar, ia uan gavgaviba sara dar amu. Kar, ia gumaziba bagha ingarir puvatɨ. Ia Ekiam bagha ingangarim gami. 
\v 24 Ia bizir kam gɨnɨghnɨgh, ia Ekiam Kraisɨn ingangarir gumazamiziba, a uabɨra ian garir gumazir bar ekiam. Egha ia fo, Ekiam ivezir aghuir uan gumazamiziba bagha atɨzim, a gɨn ia danɨngam. 
\v 25 Ia fo, God gumazamizir vabara a men garir puvatɨ, a bar gumazamizibar gara men araziba ko navir averiabar deravɨra dar gara tuavir vamɨra me tuisɨsi. Kamaghɨn amizɨ, gumazir arazir kurabagh amizim, a uan arazir kurar an amizim bagh ivezir kuram iniam.
\c 4
\p
\v 1 Ia ingangarir gumazibar garir gumazir ekiaba, ia kamaghɨn fogh, ia uaghan gumazir ian garir ekiam a Godɨn Nguibamɨn pɨn iti. Kamaghɨn amizɨ, ia uan ingangarir gumaziba deravɨra men ganɨva Godɨn damazimɨn derazir arazimɨn me damuva arazir aghuibar me damu.
\s E God ko mɨgeir arazim pamtem a damuva egh deraghvɨra daruam
\p
\v 2 Ia God ko mɨkɨm mamaghɨra ikɨva, ia deraghvɨra ganɨva nɨghnɨghɨva God ko mɨkɨm, egh God mɨnabɨvɨra ikɨ. 
\v 3 Ia God ko mɨkɨmɨva egh uaghan e bagh kamaghɨn azangsɨgh, an e bagh tiam kuightɨma e Kraisɨn akam akunam. Akar kam a fomɨra modoghav iti. Ia fo, kɨ akar kam akunizɨ, me a baraghan aghuagha na isa kalabus gatɨ. 
\v 4 Ia God ko mɨkɨm egh suam, a nan akuraghtɨ kɨ God ifongezir moghɨra, deraghvɨra akar kam akunam.
\p
\v 5 Ezɨ ia, nɨghnɨzir gavgavim Kraisɨn itir puvatɨzir darasi, ia nɨghnɨzir aghuibar gɨn mangɨva egh arazir aghuibar me damu. Egh ia dughiaba vaghvagh Kraisɨn arazibar men akakaghsɨvɨra damuvɨra ikɨ. 
\v 6 Ia zurara akar aghuir sɨngtɨzibav kɨmtɨma, gumaziba da baragh dagh ifuegham. Kamaghɨn ia bar deravɨra foghɨva gumaziba vaghvagh men akaba ikarvagh.
\s Pol Tikikus ko Onesimus aning amadazɨ aning Kolosin zui
\p
\v 7 Tikikus e ko ingangarir gumazir mam, a en aveghbuar aghuir e bar ifongezim, egha a guizbangɨra Ekiamɨn ingangarir gumazir bar aghuim. A nan ingangariba bar dar gun ia mɨkɨmam. 
\v 8 Ezɨ bizir kam bagha, kɨ ia bagha anemada. Kɨ ghaze, ia fogham, e manmaghɨn iti, eghtɨ akar kam gavgavim ian navibar amutɨ ia ua bar akuegham. Kamagh sua, kɨ Tikikus amadazɨ, a ia bagha zui. 
\v 9 Eghtɨ Onesimus, a Tikikus ko izam, a guizbangɨra en guizɨn aveghbuar bar aghuir e bar ifongezim, a dughiaba bar Godɨn ingangarim gami. A ian mav. Eghtɨ aning bizir kagh otiviziba bar dar gun ia mɨkɨmam.\f + (4:9) Onesimus a pura Filemonɨn ingangarir gumazim. Nɨ akar Filemon akɨnafarir Pol a bagha osirizimɨn aven itimɨn gan.\f*
\s Pol Kolosiba bagha akɨnafarim amaga ghaze, Afeziam ia ko ikɨ.
\p
\v 10 Aristarkus, a na ko kalabusɨn iti, egha ghaze, Afeziam ia ko ikɨ. Ezɨ Mak, Barnabasɨn imurim, a uaghan akam amaga ghaze, Afeziam ia ko ikɨ. (Egh a izɨ ian tongɨn otoghtɨ ia a inigh uan dɨpenimɨn mangɨ. Kɨ ia Mak iniasa, ia bagha akar kam amadagha gɨfa.) 
\v 11 Ezɨ Iesus, an ziar mam Jastus, a uaghan ghaze, Afeziam ia ko ikɨ. Judan tongɨn itir gumazir kabara, me na ko ikia God Gumazamizibagh Ativir Ingangarim gamuava egha me bar deraghavɨra nan akurvasi.
\p
\v 12 Epafras uaghan ia gɨnɨghnɨgha ghaze, Afeziam ia ko ikɨ. A uaghan ian mav, egha Krais Iesusɨn ingangarir gumazim. A zurara ia bagha pamten God ko mɨgɨavɨra iti, egha ghaze, God ian akurvaghtɨ, ia tuivigh gavgavigh, egh fofozir aghuitam oteveghan koghɨva, egh Godɨn ifongiam bar a gɨfoghɨva an gɨn mangam. 
\v 13 Ezɨ kɨ kamaghɨn ia mɨkɨmasa, a bar akurvazir dafam ia bagha a gamuava egha uaghan Laodisian nguibamɨn itir darasi ko Hierapolisɨn nguibamɨn itir darasi, me bagha a gami. 
\v 14 Ezɨ Luk, a doktan e bar ifongezim, a Demas ko aning ghaze, Afeziam ia ko ikɨ.\f + (4:14) Gumazir avɨriba nɨghnɨgha ghaze, Lukɨn kamrama, akɨnafarir pumuning osiri, mam Luk Osirizir Akar Aghuim, egha igharazim Aposelbar Ingangariba.\f*
\p
\v 15 Eghtɨ ia Laodisian itir siosɨn mɨkɨm suam, Pol ghaze, Afeziam ia ko ikɨ. Egh ia Nimfa ko siosɨn an dɨpenimɨn uari akuvim sara, bar me mɨkɨm suam, Pol ghaze, Afeziam ia ko ikɨ. 
\v 16 Egh ia akɨnafarir kam uari tongɨn a dɨpon, egh gɨn Laodisian itir sios bagh anemadagh, eghtɨ me uaghan uarir tongɨn a dɨponam. Egh uaghan akɨnafarir kɨ Laodisiaba bagha amadazim, me ia bagh anemadaghtɨ, ia a inighɨva uarir tongɨn a dɨponam. 
\v 17 Egh ia kamaghɨn Arkipusɨn mɨkemegh, “Nɨ, Ekiam nɨ ganɨngizir ingangarim, nɨ deravɨra a damuva bar anegɨfagh.”
\b
\p
\v 18 Kɨ Pol, kɨ uan dafarimningɨn akar abuananam ia bagha an osira ghaze: God deravɨra ia damu. Kɨ kalabusɨn ikiavɨra iti, ezɨ ia na gɨn amangan markɨ. Kɨ ia bagha God ko mɨgɨa ghaze, Godɨn apangkuvim ia ko ikɨ.\f + (4:18) Nɨ 1 Korin 16:21ɨn gan.\f*