\id RUT - Sankaran
\ide UTF-8
\h Ruti
\toc2 RUT
\toc1 Ruti
\mt Ruti
\c 1
\s Ɛlimɛlɛki ni a la denbaya wara Mowabu la jamana rɔ
\p
\v 1-2 Kɛlɛkuntiilu tɛrɛ ye mɔɔilu marala waati mɛn na Isirayɛlika la jamana rɔ, kɔnkɔ ba donda ye waati wo rɔ. Wo tuma cɛɛ do siini tɛrɛ Bɛtilɛhɛmu so kɔndɔ, mɛn ye Yahuda la kabila la duu rɔ. Cɛɛ wo tɔɔ ko Ɛlimɛlɛki. A muso tɔɔ ko Nahomi. Dencɛ mɔɔ fila tɛrɛ ye ii bolo. Kelen tɔɔ ko Malon, do tɔɔ ko Kiliyon. Ɛlimɛlɛki ni a la denbaya bɔni Efirata la buruju le rɔ. Awa, kɔnkɔ ba wo kɛra sababu ri, Ɛlimɛlɛki ka a muso ni a dencɛ mɔɔ fila ta ka wa Mowabu la jamana rɔ. Ii taara ii sii ye. 
\v 3 Wo taminni kɔ rɔ, Ɛlimɛlɛki sara ka a muso Nahomi kelen to, a ni a dencɛ mɔɔ fila. 
\v 4 Waati wo taminni kɔ rɔ, a dencɛ mɔɔ fila wo ka Mowabuka muso fila furu. Kelen tɔɔ ko Oropa. Do wo tɔɔ ko Ruti. Nba, Nahomi ni a dencɛilu ka san tan de kɛ Mowabu la jamana rɔ. 
\v 5 Wo kɔ rɔ, Malon ni Kiliyon sara ka ii na Nahomi kelen to, dentanya ni cɛtanya rɔ.
\s Ruti taara Nahomi kɔfɛ Bɛtilɛhɛmu
\p
\v 6 Lon do rɔ, ka Nahomi to Mowabu la jamana rɔ, a fɔra a ɲana ko Allabatala ra a la ɲumaya yiraka a la mɔɔilu la. Ko a ka balo ko lanɔɔya ii yɛ. Wo rɔ, Nahomi ni a biranmuso fila ka ii rabɛn ko ii watɔ Nahomi wara Bɛtilɛhɛmu. 
\v 7 Ii bɔra i ɲɔɔn fɛ ii sii diya kɔrɔ rɔ ka sila mira ka wa Yahuda la kabila la duu rɔ. 
\v 8 Ka ii to sila kan, Nahomi ka a fɔ Oropa ni Ruti yɛ ko: «Sisen, ai fila bɛɛ ye i kɔsɛ ka wa ai nailu wara. Allabatala ye a la kaninteya yiraka ai la, ikomin ai ka kaninteya yiraka ai cɛɛilu la, mɛnilu sani, a ni nde jɛrɛ la. 
\v 9 Allabatala ye ai bɛn hɛrɛ ma cɛɛ kura wara.» A banni wo fɔla, a ka ii sunbu, ii tɛrɛ ye fara bolo le ma. Denmuso fila kasira kosɛbɛ. 
\v 10 Ii ka a fɔ Nahomi yɛ ko: «Ɛɛn! An di wa i kɔfɛ i badenmailu wara.» 
\v 11 Kɔni Nahomi ka a fɔ ko: «Ai ye ai kɔsɛ ai wara, n denmusoilu. Nfenna ai ye a fɛ ka na n kɔfɛ? Baa, n di se dencɛ gbɛrɛ sɔrɔnna butun, mɛn di ai furu? 
\v 12 Ai ye ai kɔsɛ ai wara, n denmusoilu. Ɔɔn, ai ye wa. N da kɔrɔya furu ma. Ni wo tɛ, ni n ka n miri ko tumado n di se dencɛ sɔrɔnna ikɔ, n tɛrɛ ri wa su ɲin dɔ cɛɛ kura wara, ka dencɛ do sɔrɔn a la, 
\v 13 ai ri se ai banna furu ko ma wo rɔ wa, ka ai sii ka n dencɛ woilu makɔnɔ haan ii ye bonya? Ɛɛn, n denmusoilu. N na dunuɲaratɛɛ gbɛlɛman ai ta ri, baa Allabatala jɛrɛ le ka tɔrɔya lala nde kan.»
\p
\v 14 Wo rɔ, Oropa ni Ruti kasira ikɔ kosɛbɛ. Oropa ka a biranmuso Nahomi tuwa ka a sunbu, kɔni Ruti fasani tora Nahomi ma. 
\v 15 Nahomi ka a fɔ Ruti yɛ ko: «I ɲa lɔ, i kɔrɔmuso kɔsɛtɔla ka wa a la mɔɔilu ma a ni a la batofen. I fanan ye i kɔsɛ i ye wa i wara. Ɔɔn, i ye wa a kɔfɛ.» 
\v 16 Kɔni Ruti ka a jabi: «I kana a fɔ n yɛ ko n ye n bɔ i kɔfɛ. I kana a fɔ n yɛ ko n ye wa n wara. I wa wa yɔrɔ yɔrɔ, n di wa ye. I wa i sii yɔrɔ mɛn dɔ, n di n sii ye. I la mɔɔilu ri kɛ n na mɔɔilu ri. I Maari fanan di kɛ n Maari ri. 
\v 17 I wa sa yɔrɔ mɛn dɔ, n fanan di sa ye. Mɔɔilu ri n su don ye. Ni n ka n bɔ i kɔfɛ ni saya tɛ, Allabatala a la jakankata juu ri be n kan.»
\p
\v 18 Nba, Nahomi ka a yen ko Ruti jusu latɛɛni ko a ri wa a kɔfɛ. Wo rɔ, a ma a sɔsɔ wo kɔ. 
\v 19 Ii mɔɔ fila ka sila mira ka wa se Bɛtilɛhɛmu. Ii seni ye, ka so bɛɛ lamaa. So musoilu ka i ɲɔɔn maɲininka ko: «Nahomi le ye ri wa?» 
\v 20 Kɔni Nahomi ka a fɔ ii yɛ ko: «Ai kana n kili de ko Nahomi butun fo Maratɔɔ\f + \fr 1.20 \fr*\ft Heburuilu ko nɔrɔjuu kɔrɔ le ye ko: «mara».\ft*\f*, baa Alla Sebɛɛtii a ra tɔrɔya ba lase n ma. 
\v 21 N bɔtɔla yan, fen siyaman tɛrɛ ye n bolo, kɔni Allabatala a ra n bolokolon nasɛ. Ai ye n kilila nfenna wo rɔ ko Nahomi? Alla Sebɛɛtii a ra ban a kɔnkɔ donna n na. A ra n tɔrɔya kojuuya.»
\p
\v 22 Awa, Nahomi ka a kɔsɛ Bɛtilɛhɛmu ɲa wo le ma ka bɔ Mowabu la jamana rɔ. A biranmuso Ruti mɛn ye Mowabuka di, wo nara a kɔfɛ. Ii sera Bɛtilɛhɛmu ka a tɛrɛn horija suman ka waati damirasan de tɛrɛ.
\c 2
\s Ruti ka sɛnɛgban matɔmɔn kɛ Bɔwasi la sɛnɛ rɔ
\p
\v 1 Nba, Nahomi cɛɛ mɛn sani, wo badenma do tɛrɛ ye ye, a ni mɛn ye buruju kelen mɔɔ ri. Wo tɔɔ ko Bɔwasi. Nanfulutii le, mɔɔba le. 
\v 2 Lon do rɔ, Mowabuka Ruti ka a fɔ Nahomi yɛ ko: «A to n ye wa sɛnɛ rɔ. N di wa sɛnɛgban matɔmɔn kɛ baaraden do kɔ, mɛn wa hina n na ka sɔn n ye to a kɔfɛ.» Nahomi ka a jabi: «Ale le wo ri n den. I ye wa.» 
\v 3 Ruti wulira wo rɔ ka wa sɛnɛ rɔ. A seni ye, a ka sɛnɛgban matɔmɔn damira baaraden do kɔfɛ, mɛnilu ye suman kala. A tɛrɛ ye sɛnɛ mɛn dɔ, Bɔwasi ta le wo ri, mɛn ni Ɛlimɛlɛki ye buruju kelen mɔɔ ri.
\p
\v 4 A ma mɛn bakɛ, Bɔwasi nara ka bɔ Bɛtilɛhɛmu. A ka baaradenilu fo ko: «Allabatala ye to ai fɛ!» Baaradenilu ka a lamira ko: «Allabatala ye ɲumaya kɛ i yɛ!» 
\v 5 Bɔwasi ka a la baaraden kuntii maɲininka ko: «Denmuso wo don? Yon ye a ri?» 
\v 6 Baaraden kuntii ka a fɔ ko: «Mowabuka denmuso le, mɛn ni Nahomi nani ka bɔ Mowabu la jamana rɔ. 
\v 7 A ka n madiya ko: ‹I ye n to n ye sɛnɛgban do matɔmɔn sumankalailu kɔfɛ.› A nara sɔɔma le, a ye baarala, haan sisen a ma a ɲɔɲɔ.» 
\v 8 Wo rɔ, Bɔwasi ka a fɔ Ruti yɛ ko: «N denmuso, i tolo malɔ: I kana wa sɛnɛgban matɔmɔn diya sɛnɛ gbɛrɛ rɔ de. I ye to yan. I ye baara n na baaraden musomanilu kɔfɛ. 
\v 9 I ye a ragbɛ cɛɛilu ye suman kala dinkira mɛn dɔ. I ye i bila baaraden musomanilu kɔfɛ. N da a fɔ n na baaradenilu yɛ ko ii kana i ɲagba. Ji lɔɔ wa i mira, i ye wa i min jundaa kɔndɔ, n na baaraden mɛsɛnilu ka mɛn nafa.» 
\v 10 Ruti ka a ɲakɔrɔ bɛn duu ma ka a fɔ Bɔwasi yɛ ko: «Nfenna i ra hina n na ka n mira koɲuma fewu? N tɛ foyi ri fo londan.» 
\v 11 Bɔwasi ka a jabi: «I ka mɛn kɛ i biranmuso yɛ, i cɛɛ sani kɔ, wo bɛɛ fɔra n ɲana. I ka i fa ni i na to ye ka i sɔrɔn jamana to ye, ka na i sii mɔɔ gbɛrɛ tɛma yan, i tun ma mɛnilu lɔn kɔrɔman na. 
\v 12 I ka mɛn kɛ, Allabatala a ye i sara wo bɛɛ la. I ra na ka i jɛrɛ bila Isirayɛlika Maari Allabatala lakandalila kɔrɔ. A ye i sara a ɲa jɛrɛjɛrɛ ma.» 
\v 13 Ruti ka Bɔwasi jabi: «N fa, i ra koɲuma kɛ n yɛ. I ka kuma ɲuma fɔ n yɛ ka a tɛrɛn n ma se i la baaraden musoman kelen dɔ. Wo ra n sɛɛbɛ don.»
\p
\v 14 Damunin waati seni, Bɔwasi ka a fɔ Ruti yɛ ko: «Na dɔɔnnin kɛ. Buru do ta. I ye a sun manfen dɔ.» Ruti nara a sii baaradenilu dafɛ tuma mɛn na, Bɔwasi ka sumankisɛ majaninni do di a ma. Ruti ka woilu dɔɔn ka a fa ka a tɔ to. 
\v 15 A banni dɔɔnninna, a ka a wuli ka wa sɛnɛgban matɔmɔn diya ikɔ. A wani ikɔ, Bɔwasi ka a fɔ a la baaraden cɛmanilu yɛ ko: «Ai ye a to a ye sɛnɛgban matɔmɔn sumansidi tɛma. Ai kana a makuma de. 
\v 16 Ka a la wo kan, ai wa suman ka, ai ye do bɔ ai bolo rɔ ka woilu labe duu ma, sa a ri ii matɔmɔn. Ai kana jalakili si la a kan.» 
\v 17 Ruti ka sɛnɛgban matɔmɔn ye haan wura fɛ, ka ban ka suman gbasi, a tun ka mɛn matɔmɔn. A ka horija suman kisɛ mɛn sɔrɔn, wo ka bɔrɔ tala kelen nafa.
\p
\v 18 A wara suman bɔrɔ tala wo ri so kɔndɔ. A biranmuso Nahomi ka a yen a ka suman kisɛ jate matɔmɔn. Ruti ka a la dɔɔnninfen tɔ fanan nabɔ ka a di a ma. 
\v 19 Nahomi ka a maɲininka ko: «I ka sɛnɛgban matɔmɔn kɛ mi bi? I ka baara kɛ sɛnɛ ɲuman de rɔ? Alla ye ɲumaya kɛ wo tii yɛ, mɛn ɲara i la.» Ruti ka dantɛɛli bɛɛ kɛ ko: «N ka baara kɛ sɛnɛ mɛn dɔ bi, wo tii tɔɔ ko Bɔwasi.» 
\v 20 Nahomi ka a fɔ ko: «Allabatala ye ɲumaya kɛ Bɔwasi yɛ, mɛn ma a la kaninteya yiraka boloka an niimailu la, a ni sayabatɔilu la. An sɔrɔn ɲɔɔn sudun mɛnilu ka kan ka an kunka, Bɔwasi ye woilu do le ri.» 
\v 21 Mowabuka Ruti ka a fɔ ko: «A ka a fɔ n yɛ fanan ko n ye to sɛnɛgban matɔmɔnna a la baaradenilu kɔfɛ haan ii wa ban a la suman bɛɛ kala.» 
\v 22 Nahomi ka a jabi: «Wo ka ɲi, n den. I ye to baarala Bɔwasi la baaraden musomanilu kɔfɛ sa mɔɔ gbɛrɛilu kana kojuu kɛ i la.»
\p
\v 23 Ruti tora wo rɔ sɛnɛgban matɔmɔnna Bɔwasi la baaraden musomanilu kɔfɛ haan bile ni horija suman ka bɛɛ banda. A siini tɛrɛ a biranmuso Nahomi wara tuma bɛɛ.
\c 3
\s Ruti wara suman magbasi gbeleke diya
\p
\v 1 Lon do rɔ, Nahomi ka a fɔ Ruti yɛ ko: «N den, n ka kan ka ɲaɲinin i la ko ma, sa i ri hɛrɛ sɔrɔn. 
\v 2 I tɛrɛ ye sɛnɛgban matɔmɔnna Bɔwasi la baaraden musomanilu kɔfɛ. I ka a lɔn Bɔwasi ye an badenma le ri. I ɲa lɔ. Wura ɲin na, i ri a tɛrɛn a ye horija suman rafɛla suman magbasi gbere ma. 
\v 3 I ye i ko ka sumadiyalan sisa i ma ka i la durukijan ɲuma bila i kan na. I ye wa ye, kɔni i kana i jɛrɛ yiraka a la fɔɔ a wa ban dɔɔnninna ka a min. 
\v 4 A wa taa a la tuma mɛn na, i ye a ragbɛ a ɲuma la sa i ri a lɔn a lani dinkira mɛn. A wa sunɔɔ, i ye i madon a la ka a la birinkan bɔ a sen ma ka i la a sen kɔrɔ. Wo rɔ i ka kan ka mɛn kɛ, a ri wo fɔ i yɛ.» 
\v 5 Ruti ka a fɔ ko: «I ka mɛn fɔ n yɛ, n di a bɛɛ kɛ.»
\p
\v 6 Ruti wara Bɔwasi la suman magbasi gbere ma. A biranmuso tun ka mɛn fɔ a yɛ, a ka wo bɛɛ latelen. 
\v 7 Bɔwasi banda dɔɔnninna ka a min, a nii lasɛwani tɛrɛ ye a ma. A taara a la suman ton dafɛ. Ruti ka a madon a la koɲuma, ka birinkan bɔ Bɔwasi sen ma, ka a la a sen kɔrɔ.
\p
\v 8 Duu talama, Bɔwasi barara i wulila. A ka a yɛlɛman ka muso do lani yen a sen kɔrɔ. 
\v 9 Bɔwasi ka a fɔ ko: «Yon ye?» Ruti ka a jabi: «Ruti le, i la jɔnmuso kɔnin. I ye n furu, baa i ye an sɔrɔn ɲɔɔn sudun de ri, mɛn ka kan ka n furu.» 
\v 10 Bɔwasi ka a jabi: «Allabatala ye baraka don i rɔ! I ma taa kanberenilu kɔ furu ko rɔ, kanberen fentii wala kanberen bolokolon. I banni mɛn kɛla ɲin di, wo ye kaninteya misaliya le ri i ni i biranmuso tɛma, wo ka bon ka tamin fɔlɔman kan. 
\v 11 Sisen, n den, i kana silan. I ye mɛn fɛ, n di wo bɛɛ kɛ i yɛ, ka a masɔrɔn so kɔndɔ mɔɔilu bɛɛ ka a lɔn ko muso telenni le ye ile ri. 
\v 12 Tuɲa le wo ri, n ye i kunkala le ri, mɛn ka kan ka i furu, kɔni i kunkala gbɛrɛ ye ye, mɛn fanan ye i sɔrɔn ɲɔɔn sudun i yɛ ka tamin nde la. 
\v 13 I ye to yan su ɲin dɔ. Sini sɔɔma, n di a mafɛnɛ ni cɛɛ wo ri i furu ikomin a ka kan ka a kɛ ɲa mɛn ma. Ni a ye a fɛ ka a kɛ, wo ri bɛn. A ye a kɛ, kɔni n ye n kalila Allabatala ɲenema tɔɔ la ko ni cɛɛ wo tɛ a fɛ ka a janto i rɔ, nde le ri a kɛ. I la yan haan sɔɔma.»
\p
\v 14 Wo rɔ, Ruti lani tora Bɔwasi sen kɔrɔ, kɔni a wulira suba dibi rɔ, sa mɔɔ kana a yen, baa Bɔwasi tɛ a fɛ mɔɔ ye a lɔn ko Ruti nara suman magbasi gbere ma ye. 
\v 15 Bɔwasi ka a fɔ a yɛ ko: «I la taafɛ kɔkansidi wo fulɛn, i ye a mira koɲuma.» A ka wo mira koɲuma. Bɔwasi ka horija suman kisɛ bɔrɔ kelen ɲɔɔn suman ka wo kɛ Ruti la taafɛ rɔ. Wo kɔ rɔ, Bɔwasi ka a kɔsɛ so kɔndɔ. 
\v 16 Ruti seni a biranmuso wara, wo ka a maɲininka ko: «A ye di, n den? A diyara wa?» Bɔwasi ka mɛn bɛɛ kɛ a yɛ, Ruti ka wo bɛɛ dantɛɛli kɛ. 
\v 17 Ka a la wo kan, Ruti ka a fɔ ko: «A ka bɔrɔ kelen ɲɔɔn di n ma ko n kana n kɔsɛ n biranmuso wara ni n ma a sanba.» 
\v 18 Nahomi ka a fɔ ko: «N den, i sabari. I ye makɔnɔni kɛ yan fɔɔ i wa a yen ko ɲin nabantɔ ɲa mɛn ma, baa cɛɛ wo jusu ti nala lala, ni a ma ko ɲin ɲabɔ bi.»
\c 4
\s Bɔwasi ka Ruti furu sidi
\p
\v 1 Nba, Bɔwasi wara ka i sii so donda la, makoilu ye ɲabɔla dinkira mɛn dɔ. A ma mɛn, a ka Ɛlimɛlɛki sɔrɔn ɲɔɔn sudun yen, a tun ka mɛn na ko fɔ Ruti yɛ. Cɛɛ wo tamintɔla le tɛrɛ. Bɔwasi ka a kili ko: «N fa! Na, i sii yan.» Wo rɔ, cɛɛ nara ka i sii. 
\v 2 Bɔwasi ka so mɔɔbakɔrɔ tan fanan kili ko ii ye na i sii. Woilu nara i sii. 
\v 3 Bɔwasi ka a fɔ Ɛlimɛlɛki sɔrɔn ɲɔɔn sudun yɛ ko: «Nahomi a ra na ka bɔ Mowabu la jamana rɔ. A ye an badenmacɛ Ɛlimɛlɛki la sɛnɛ mayira bolo le ma. 
\v 4 Wo le rɔ, a ye n kɔndɔ ko n ka kan ka wo la i tolo ma, ka i lali ko i ye sɛnɛ wo san mɔɔilu ɲana, n na mɔɔbakɔrɔilu ni mɔɔ tɔ mɛnilu siini yan. Awa, ni i ye a fɛ ka a kunka, i ye a kunka. Ni i tɛ a fɛ fanan, i ye a fɔ n yɛ, baa sɛnɛ kunka saratii ye i fɔlɔ le bolo, ka nde tuun ile la.» Cɛɛ ka a fɔ ko: «N di a kunka.» 
\v 5 Bɔwasi ka a fɔ ko: «Ni i ka sɛnɛ wo kunka Nahomi ma lon mɛn na, fo i ye Mowabuka Ruti furu wo lon, mɛn ye Ɛlimɛlɛki dencɛ la furuɲa muso ri. I ye Ruti furu, sa sayabatɔ a ri kɔ sɔrɔn, ka sɛnɛtiiya to a la denbaya kɔndɔ.» 
\v 6 Cɛɛ ka a fɔ ko: «Ni wo le, n ti se sɛnɛ kunkala baa n kana n jɛrɛ bolokolonya. Sɛnɛ kunka saratii a ye i bolo sisen, i ye a kunka. Nde ti se a kunkala.»
\p
\v 7 Nba, waati taminni kɔ, ni badenma sudun ka sayabatɔ la duu kunka Isirayɛlika wara, wala ka duu kunka saratii latamin mɔɔ gbɛrɛ ma, fo mɔɔ kelen ye a la sanbara bɔ a sen dɔ ka a madon a tɔ mɔɔ kelen bolo. Wo ri kɛ tɔɔmasere ri, ka ko wo lasereya. 
\v 8 Wo le ko kosɔn cɛɛ wo ka a fɔ Bɔwasi yɛ tuma mɛn na ko: «I ye wo sɛnɛ kunka.» A ka a la sanbara bɔ ka a di a ma. 
\v 9 Wo kɔ rɔ, Bɔwasi ka a fɔ mɔɔbakɔrɔilu ni mɔɔ tɔ bɛɛ yɛ ko: «Ai ye sereilu le ri bi ko n da Ɛlimɛlɛki ni Kiliyon ni Malon bolofen bɛɛ kunka Nahomi ma. 
\v 10 N ye Ruti fanan tala a ra a kɛ n muso ri. A ye Mowabuka muso le ri, mɛn tɛrɛ ye Malon kun. N ye Ruti furula sa kɔ ri bɔ sayabatɔ kɔ rɔ, ka sɛnɛtiiya to a la denbaya kɔndɔ. N ye a furula sa Malon tɔɔ kana tunun a badenmailu tɛma, a ni a fa so kɔndɔ. Ai ye wo sereilu ri bi.» 
\v 11 Wo rɔ, mɔɔbakɔrɔilu ni mɔɔ tɔ mɛnilu bɛɛ tɛrɛ ye so donda la ye, woilu ka a fɔ ko: «An ye wo sereilu le ri! Allabatala ye ɲumaya kɛ muso wo yɛ, mɛn dontɔ i wara! A ye a kɛ ikomin Rasɛli ni Leya, Yakuba la muso fila mɛnilu ka an benbailu sɔrɔn. Allabatala ye i sabati Efirata la bonkɔndɔla kɔndɔ, ka i tɔɔ bɔ Bɛtilɛhɛmu, Alla ma wo kɛra. 
\v 12 Allabatala ye den siyaman di i ma sunkurun ɲin fɛ. Ka i la denbaya kɛ ikomin Yahuda ni Tamari dencɛ Pɛrɛsi ta, Alla ma wo kɛra!»
\s Ruti ka mansa Dawuda benba Obedi sɔrɔn
\p
\v 13 Wo rɔ, Bɔwasi ka Ruti furu sidi. Ii dɛnda. Allabatala ka baraka don Ruti rɔ. A ka kɔnɔ ta ka dencɛ sɔrɔn. 
\v 14 Wo le kosɔn, Bɛtilɛhɛmu musoilu ka a fɔ Nahomi yɛ ko: «Tandoli ye Allabatala yɛ mɛn ma sɔn bi ka i bila ni kunkala sa i la. Ka wo tɔɔ bɔ Isirayɛlika tɛma, Alla ma wo kɛra. 
\v 15 A ri i nii lasɛwa ikɔ tuun, ka a lɔ i kɔrɔ i la kɔrɔya waati, baa i biranmusoni mɛn tɔnɔ ka bon i ma dencɛ wɔrɔnwula tɔnɔ ri, i duman mɛn yɛ kɔnin, wo le ka den ɲin sɔrɔn.» 
\v 16 Wo rɔ, Nahomi ka den ta ka a la a sen kan. Ale le ka den namɔ. 
\v 17 A siiɲɔɔ musoilu ka a fɔ ko: «Nahomi ra dencɛ sɔrɔn.» Ii ka den tɔɔ la ko Obedi. Obedi le kɛra Jɛsɛ fa ri. Jɛsɛ wo le ka Dawuda sɔrɔn.
\s Mansa Dawuda buruju
\pi
\v 18 Pɛrɛsi bɔnsɔn de ɲin di. Pɛrɛsi ka Hɛsirɔn sɔrɔn. 
\v 19 Hɛsirɔn ka Ramu sɔrɔn. Ramu ka Aminadabu sɔrɔn. 
\v 20 Aminadabu ka Nasɔn sɔrɔn. Nasɔn ka Salimɔn sɔrɔn. 
\v 21 Salimɔn ka Bɔwasi sɔrɔn. Bɔwasi ka Obedi sɔrɔn. 
\v 22 Obedi ka Jɛsɛ sɔrɔn. Jɛsɛ ka Dawuda sɔrɔn.