\id JON 
\ide UTF-8
\h Yunusa
\toc2 YUN
\toc1 Yunusa
\mt Junusa
\c 1
\s Nabi Junusa ma sɔn Alla la kuma ma
\p
\v 1 Nba, lon do rɔ, Allabatala kumara Amitayi dencɛ Nabi Junusa yɛ. 
\v 2 A ka a fɔ ko: «I wuli! I ye sila mira i kɔrɔ. I ye wa Ninibe so ba kɔndɔ ka ye mɔɔilu jalakikan fɔ ii yɛ, baa ii ye kojuu mɛnilu kɛla, nde ka woilu lɔn.» 
\v 3 Kɔni Nabi Junusa ma sɔn ka wa Ninibe. A ka Tarasisi sila mira ka wa ko a ye a mataala Allabatala la ka bɔ a ɲakɔrɔ. A sera Jafa so kɔndɔ ka wa kɔɔji dala ye. A ka kulunba do tɛrɛn ye, mɛn watɔ Tarasisi. A ka kulunba tɛɛ sara bɔ, ka don kulunba kɔndɔ. A ni kulunkɔndɔ mɔɔilu wara kɔɔji ka a fɔ ko ii ye wala Tarasisi. Nabi Junusa ye a fɛ ka a mataa Allabatala la ka bɔ a ɲakɔrɔ.
\p
\v 4 Kɔni Allabatala ka fɔɲɔ ba lana kɔɔji kan. Fɔɲɔ bonyara fɔɔ kulunba tɛrɛ ye tiɲan ko rɔ. 
\v 5 Kulunkɔndɔ baaradenilu silanda kojuuya. Ii kelen kelenna bɛɛ ka a maari madiya ko wo ye ii kisi. Ii ka kulunkɔndɔ doninilu lafili kɔɔji rɔ sa kulunba ri fɛya kɔɔji kan. Wo ka a tɛrɛn Nabi Junusa ra jii kulunba kɔndɔ. A tɛrɛ ye sunɔɔla bakɛ. 
\v 6 Kulun naborila wara a tɛrɛn ye ka a kan nabɔ a ma ko: «Nfenna i lani sunɔɔ rɔ? I wuli! I ye i maari madiya! Tumado wo ri kininkinin an na ko la ka an kisi sa an kana faa.»
\p
\v 7 Kɔ fɛ, ii ka a fɔ i ɲɔɔn yɛ ko: «An ye a kalabe kɛ ka a lɔn mɛn ka kojuu ɲin nase an ma.» Ii ka a kalabe kɛ. Kala ka Nabi Junusa mira. 
\v 8 Ii ka Nabi Junusa maɲininka ko: «Yon ye kojuu ɲin nasela an ma? Ile don, i la baara ye nfen di? I bɔni mi? I ye jamana ɲuman de mɔɔ ri? Siya ɲuman ye i ri?» 
\v 9 Nabi Junusa ka ii jabi: «Heburu le nde ri. N ye Maari Allabatala le batola, sankolo Maari, mɛn ka kɔɔji ni duukolo dan.» 
\v 10 Ii silanda kojuuya kuma wo la, ka a maɲininka wo rɔ ko: «I ka ko suu ɲuman de kɛ?» Baa Nabi Junusa tun ka a fɔ ii yɛ kɔrɔman ko a boritɔla le ka bɔ Allabatala ɲakɔrɔ.
\p
\v 11 Nba, kɔɔji tora lamaala fɔɔ ka tamin fɔlɔma kan. Wo rɔ, ii ka a fɔ Nabi Junusa yɛ ko: «An ye nfen kɛ i la sa kɔɔji ri a masuma an naminin dɔ?» 
\v 12 Nabi Junusa ka a fɔ ko: «Ai ye n mira ka n nafili kɔɔji rɔ. Wo wa kɛ, kɔɔji ri a masuma ai laminin dɔ, baa n ka a lɔn ko fɔɲɔ ba ɲin wulini ai kanma nde le la ko rɔ.»
\p
\v 13 Wo bɛɛ ni a ta, kulunkɔndɔ baaradenilu ka kulun bori kɛ ii fanka bɛɛ la, sa ii ri gbere masɔrɔn. Kɔni ii ma se, baa kɔɔji tora lamaala fɔɔ ka tamin fɔlɔma kan. 
\v 14 Ii ka Allabatala matara wo rɔ ko: «Ɛɛ, Allabatala. I jaandi! Ni an ka cɛɛ ɲin nafili kɔɔji rɔ ka a faa, i kana an datiɲan. Ni an ka a faa ka a tɛrɛn a ye mɔɔ jalakibali le ri, i kana an jalaki a faa rɔ, baa, Allabatala, ko mɛn wa diya i yɛ, i ye wo le kɛla.» 
\v 15 Wo rɔ, ii ka Nabi Junusa mira ka a lafili kɔɔji rɔ. Kɔɔji masumara i kɔrɔ. 
\v 16 Kulunkɔndɔ baaradenilu ka wo yen tuma mɛn na, ii silanda Allabatala yɛ kosɛbɛ. Ii ka saraka bɔ ka Allabatala sɔ wo la, ka dakan ta a yɛ.
\s Nabi Junusa ka Alla matara kɔɔji kɔrɔ
\p
\v 17 Awa, Allabatala ka jɛɛ ba do lana mɛn ka Nabi Junusa lakunun. Nabi Junusa ka tele sawa ni su sawa kɛ jɛɛ kɔndɔ. 
\c 2
\p
\v 1 Ka a to jɛɛ kɔndɔ, Nabi Junusa ka a Maari Allabatala tara.
\q
\v 2 A ka a fɔ ko:
\q «Allabatala, ka n to tɔrɔya ba rɔ, n ka i matara.
\q I ka n jabi.
\q Ka n to lakira rɔ saya rɔ, n kulera dɛmɛnni ko rɔ.
\q I ka n namɛn.
\q
\v 3 I ka n nafili kɔɔji rɔ,
\q fɔɔ kɔɔji dun ba kɔrɔ.
\q Kɔɔji ka n naminin fan bɛɛ rɔ.
\q I ka kɔɔji kuru ba mɛnilu lana,
\q woilu bɛɛ lara n kan.
\q
\v 4 N tɛrɛ ye a fɔla n jɛrɛ ma ko i ra n gbɛn ka n bɔ i ɲakɔrɔ.
\q Kɔni n lani a la n di i la bon sɛniman yen ikɔ tuun.
\q
\v 5 Kɔɔji ka n natunun ka n na ɲenemaya masilan.
\q N jiira fɔɔ kɔɔji dun ba kɔrɔ.
\q Kɔɔjikɔrɔ binilu mɔrɔnmɔrɔnni tɛrɛ n kun ma.
\q
\v 6 N jiira fɔɔ koyinkɛilu sen kɔrɔ kɔɔji kɔrɔ.
\q N sera suilu la jamana rɔ. A da bɛɛ sɔɔra n ma kadawu.
\q Kɔni ile, n Maari Allabatala,
\q i ka n kɛndɛ layɛlɛ lakira kɔndɔ.
\q
\v 7 N Maari Allabatala, ka a to dɔɔni n tun di sa,
\q n miriya sera i ma.
\q I ka n na matarali kan namɛn
\q i la bon sɛniman kɔndɔ.
\q
\v 8 Mɔɔ mɛnilu ye batofen ɲatɔnɔntanilu batola,
\q woilu ri bɔnɔ i la kaninteya rɔ.
\q
\v 9 Kɔni nde ri kalaman bɔ i yɛ ka i tando,
\q ka saraka di i ma.
\q N ka dakan mɛn ta i yɛ, n di wo mafa.
\q Allabatala, ile kelen pe le ri se mɔɔ kisila.»
\p
\v 10 Awa, Allabatala kumara jɛɛ ba yɛ. Wo rɔ, jɛɛ ba ka Nabi Junusa labɔ gbere ma.
\c 3
\s Nabi Junusa wara Ninibe
\p
\v 1 Allabatala kumara Nabi Junusa yɛ a siɲa filana rɔ. 
\v 2 A ka a fɔ ko: «I ye i wuli ka wa Ninibe so ba kɔndɔ. N wa mɛn fɔ i yɛ, i ye wo lase Ninibekailu ma.» 
\v 3 Wo rɔ, Nabi Junusa wulira ka wa Ninibe, ikomin Allabatala ka a fɔ a yɛ ɲa mɛn ma. Ninibe tɛrɛ ye so ba le ri, mɔɔ ri tele sawa taama kɛ mɛn kɔndɔ. 
\v 4 Nabi Junusa seni Ninibe, a donda so kɔndɔ ka tele kelen kɛ taamala, ka ban ka ye mɔɔilu kawandi ko: «Yani tele binaanin, gbalo ba ri kɛ Ninibe.» 
\v 5 Alla ka mɛn fɔ Ninibekailu yɛ ka fara Nabi Junusa la, ii lara wo la. Ii ka a fɔ ko bɛɛ ye sun don ka landa faanin bila ii kan na, denilu ni mɔɔbailu bɛɛ. 
\v 6 Nba, wo kibaro sera Ninibe mansa ma tuma mɛn na, a ka i wuli a la mansaya siifen dɔ ka a la mansaya faanin bɔ a kan na. A ka landa faanin bila a kan na ka i sii buurigbɛ rɔ. 
\v 7 Wo kɔ, a ka mɔɔilu lɔ kelalasela Ninibekailu ma ko: «Mansacɛ ni a la ɲɛmɔɔilu ka a fɔ ko tɔn da sii mɔɔilu ni kolofenilu bɛɛ ma, nisiilu ni saailu ni bailu kɔnin. Ii si kana dɔɔnnin kɛ. Ii si kana ii min. 
\v 8 Mɔɔilu bɛɛ ye landa faanin bila ii kan na, ka do sidi kolofenilu bɛɛ kan na. Mɔɔ kelen kelenna bɛɛ ye Alla matara a fanka bɛɛ la. Bɛɛ ye a ban a sɔn juu rɔ, ka kojuu kɛ boloka. 
\v 9 Baa, yon ka a lɔn? Tumado ko Alla ri a la bolorabɛn yɛlɛman an kanma ka a ban a la mɔnɛ ba rɔ, kosa an kana faa.»
\p
\v 10 Alla ka a yen mɛn kɛ ko Ninibekailu ra nimisa ka ii la kojuuilu boloka, a ka a miriya yɛlɛman. A ka masilannikan mɛn fɔ ii yɛ ko a kɛtɔ gbalo ba lala ii kan, a ka wo to ye.
\c 4
\s Nabi Junusa mɔnɛra Alla la hina rɔ
\p
\v 1 Wo ma diya Nabi Junusa yɛ fewu. A mɔnɛra kosɛbɛ. 
\v 2 A ka Allabatala matara ko: «Aa, Allabatala, ka n to n na jamana kɔndɔ fɔlɔ, a miriya tɛrɛ ye n na ko i ri a kɛ ten. Wo le ka a kɛ, n ka n kaliya ka n bori ka wa Tarasisi. Baa n tun ka a lɔn fewu ko i ye Alla le ri, mɛn na kininkinin ni ɲumaya ka bon kosɛbɛ. I ti mɔnɛla jona. I ye mɔɔilu kaninna kojuuya. I wa masilannikan mɛnilu fɔ, i rabɛnni tuma bɛɛ ka woilu to ye. 
\v 3 Allabatala, sisen, i ye n bɔ duunuɲa rɔ yan, baa saya fisa n yɛ ka tamin ɲenemaya la.» 
\v 4 Allabatala ka Nabi Junusa jabi: «A ye di? I jɔ ye mɔnɛ rɔ wa?»
\p
\v 5 Nba, Nabi Junusa bɔra Ninibe so kɔndɔ, ka wa i sii telebɔ rɔ. A ka gbaa do lɔ ye, ka i sii wo kɔrɔ lulen na ka makɔnɔni kɛ, baa a ye a fɛ ka a yen ko mɛn tamintɔ so kɔndɔ. 
\v 6 Wo tuma, Maari Allabatala ka fɛɛjuu do lafɛrɛn ka yɛlɛ Nabi Junusa kun na ka lulen di a ma, ka a bɔ a la niilafin dɔ. Nabi Junusa sɛwara fɛɛjuu wo la kosɛbɛ. 
\v 7 Wo duusa gbɛ sɔɔma da la, Alla ka tunbu do lana. Tunbu wo donda fɛɛjuu rɔ ka a dɔɔn ka a ja. 
\v 8 Tele yɛlɛra tuma mɛn na, Alla ka fɔɲɔ ba kalaman nana ka bɔ telebɔ rɔ. Tele gbara Nabi Junusa kun na kojuuya fo a betɔ le tɛrɛ. A tɛrɛ ye a fɛ ka sa. A ka a fɔ ko: «Saya kɔni ka fisa n ma ka tamin ɲenemaya kan.» 
\v 9 Alla ka Nabi Junusa maɲininka ko: «A ye di? I jɔ ye mɔnɛ rɔ fɛɛjuu ja ko rɔ wa?» Nabi Junusa ka a fɔ ko: «N kɛ! N jɔ ye a rɔ! N da mɔnɛ haan ka n sɔn saya ma.» 
\v 10 Allabatala ka a fɔ ko: «Fɛɛjuu ni wo hina ye i la. I don ma baara si kɛ a la, mɛn di a labonya. A fɛrɛnda su fɔlɔ rɔ ka ja su filana rɔ. 
\v 11 I ye a fɛ nde kana kininkinin Ninibekailu ma, so belebele wo kɔndɔ mɔɔ waa kɛmɛ a ni waa muwan mɛnilu mɛn ti se bolokinin ni bolomaran faranfasila, kolofen siyaman ba wo ma jate ma lɔn.»