\id 2PE 2pe
\ide UTF-8
\h Piyɛri Filana Suran
\toc1 Piyɛri Filana
\toc2 2PI
\mt1 Piyɛri la Kitabu Filana
\mt2 Piyɛri Alla la Kuma Kitabu Filana
\ip Kitabu yɔrɔ ɲin sɛbɛni lemɛniya mɔɔilu le ma. A sɛbɛ kun kɛni mɔɔilu le kɛlɛ ko ri mɛnilu ye dina ko karan kɛla mɛn kɛni tɛ Isa la ko Kibaro Ɲuma kelen di. Wo wuya karanmɔɔilu tɛrɛ ra basan lemɛniya mɔɔilu la Piyɛri la waati rɔ.
\ip Wuya dinailu lase mɔɔilu tɛ ban dunuɲa rɔ muumɛ. Wo rɔ, kawandili mɛn sɛbɛni Piyɛri la Kitabu filana kɔndɔ, wo koilu ri kɛ ikɔ tuun bi. A ye lemɛniya mɔɔilu kawandila ko ii ye fanka don Maari la ko lɔn dɔ, kosa ii kana ii jɛrɛ majuuwaya wuya karanmɔɔilu la fili kuma fuuilu fɛ.
\c 1
\p
\v 1 Nde Simɔn Piyɛri Isa Ɲenematɔmɔnin na baaraden ni a la talibidenba, nde le ka ɲin sɛbɛ, ka a lawa ai ma, ai le mɛnilu fanan da lemɛniya sɔrɔn mɛn ni an na gbiliya ka kan ai ka mɛn sɔrɔn an na Alla ni an na kisila la telenbaya fɛ, Isa Ɲenematɔmɔnin. 
\v 2 Alla ye hinani ni jususuma di ai ma, ka wara Alla la kolɔn ni an Maari Isa la kolɔn dɔ.
\s Lemɛniya mɔɔilu joo bɛrɛ
\p
\v 3 Alla la fanka ra fɛrɛ bɛɛ di an ma kosa an ye an na dunuɲaratɛɛ ni an na Alla ɲɛsilanɲɛ kɛ Alla ko lɔn dɔ mɛn ka an kili a la gbiliya ni a la ɲumaya rɔ. 
\v 4 Wo rɔ, a ra an lahidi lahidi gbɛlɛn na, mɛnilu ka bon ka tamin bɛɛ la, kosa ai ye ai jɛrɛ laban kɔsɔ koilu ma kunfan ye mɔɔilu lɔla mɛn ma dunuɲa ɲin dɔ, ko ai fanan di Alla la kɛɲa sɔrɔn. 
\v 5 Wo rɔ, ai ye karan ai fanka bɛɛ la, ka sɔnɲuma la ai la lemɛniya kan, ka lɔnnin la sɔnɲuma kan, 
\v 6 ka jɛrɛ mira la lɔnnin kan, ka tunadiya la jɛrɛ mira kan, ka Alla lɔn la tunadiya kan, 
\v 7 ka nakelenɲɔɔya ladiyaɲɛ la Alla lɔn kan, ka kaninteya la nakelenɲɔɔya ladiyaɲɛ kan. 
\v 8 Ni kɛɲa ɲinilu wa to ai rɔ, ka sabati, ii tɛ ai to tunnagbeya ni baarabaliya rɔ an Maari Isa Ɲenematɔmɔnin ko lɔn dɔ fewu. 
\v 9 Kɔni ni woilu tɛ mɔɔ mɛn dɔ, wo tii ɲa tɛ ko ragbɛla, a totɔ le ikomin ɲa fuyen, ka ɲina ko Alla ra a julumun kɔrɔilu kafari.
\p
\v 10 Wo le rɔ, nakelenɲɔɔmailu, ai ye ai raja ka tamin sisen na Alla la kilili lamɛnna diya a ni ai suwandini ko, ka a masɔrɔn ni ai ka wo kɛ, ai ti be muumɛ. 
\v 11 Wo rɔ, an Maari ni an Nakisila Isa Ɲenematɔmɔnin di habadan mansaya ladon fɛrɛ ba di ai ma.
\p
\v 12 Wo le ka a kɛ, n ye ko ɲinilu labilala ai la waati bɛɛ, hali ai ka ii lɔn, ka wo tuɲa ko mira fanan gben ai ka mɛn sɔrɔn. 
\v 13 N na miriya rɔ, fanin n ye n nii la faribanku rɔ, n ka kan n ye wo koilu labila ai la kosa ii ye to ai ɲana. 
\v 14 Ka a masɔrɔn n ka a lɔn, n nii bɔtɔla le ten faribanku rɔ, ikomin an Maari Isa Ɲenematɔmɔnin jɛrɛ ka n nalɔnni ɲa mɛn ma. 
\v 15 Wo rɔ, n ye karanna le fɛrɛ bɛɛ rɔ, hali n na saya kɔrɔ, ko ɲinilu ye se labilala ai la waati bɛɛ.
\s Piyɛri tɛrɛ ra Isa la gbiliya yen
\p
\v 16 Nba, Maari Isa Ɲenematɔmɔnin na ko rɔ a ni a la fanka, an ma mɔɔilu la tali rabɛniilu fɔ ai yɛ ka bɛn wo koilu ma, baa andeilu jɛrɛ le ka a la gbiliya yen an ɲailu la. 
\v 17 A ka kunnafulen ni gbiliya sɔrɔn an Fa Alla le bolo, a ka wo kan namɛn ka fara Gbiliya Kunnafulen ba la tuma mɛn na ko, «N Dencɛ le ɲin di, n ye mɛn kaninna, a ra n hɛnɛ kosɛbɛ!»\f + \fr 1.17\fr* A ragbɛ Matiyu suran 17 kuma diya 1 haan 5 ni Marika suran 9 kuma diya 2 haan 7 ni Luka suran 9 kuma diya 28 haan 35 kɔndɔ.\f* 
\v 18 An jɛrɛ ka wo kumakan mɛn, ka bɔ sankolo rɔ, an tɛrɛ ye a tɔrɔfɛ koyinkɛ sɛniman kan waati mɛn na.
\p
\v 19 Ikɔ tuun, nabiilu la kuma gbɛnin an ma ten ka tamin fɔlɔ la. Ai ka kan ka ai hankili lɔ woilu la ikomin fitina mɛn ye mɛlɛnna dibi rɔ haan bandaka, bandaka da lolo fanan ye mɛlɛn damira ai jusu rɔ. 
\v 20 Mɛn taminni a bɛɛ la, ai ka wo lɔn, ko Kitabu nabiya kuma si ma fara nabi la ko ɲafɔ ɲa ma. 
\v 21 Ka a masɔrɔn nabiya kuma si tɛrɛ tɛ bɔla adamadenilu sawo rɔ, kɔni Alla la Nii Sɛniman de tɛrɛ ye adamadenilu dɛmɛnna, ka kuma ka fara Alla la.
\c 2
\s Wuya karanmɔɔilu la ko
\p
\v 1 Kɔni wuya nabiilu tɛrɛ ye jama tɛma waati taminin. Wuya karanmɔɔilu fanan di yen ai tɛma. Ii ri wuya karanilu ladon ai tɛma gbundu rɔ mɛnilu ri mɔɔilu halaki haan ka ii ban ii Tii rɔ mɛn da ii kunka. Woilu ye halaki le kilila ii jɛrɛ ma jona! 
\v 2 Mɔɔ siyaman di bila ii la ko haramuninniilu kɔfɛ, ka tuɲa sila lafɛya. 
\v 3 Karanmɔɔ ɲinilu ri ai labaara majuwaya rɔ ii la kuma rabɛniilu fɛ ii la wasabaliya rɔ. Kɔni ii kiti ko ra damira bi tɛ wo ri, ii halaki ko tɛ mɛnna butun.
\p
\v 4 Mɛlɛka mɛnilu ka julumun kɛ waati taminin dɔ, Alla tɛ woilu latankala, kɔni a ka ii lafili jahanama rɔ, ka ii kɛ jɔlɔkɔ la dibi rɔ ii kiti lon ɲɛrɔ. 
\v 5 Mɔɔ fɔlɔilu dunuɲa rɔ, a ma woilu fanan natanka, a ka ji bɔni ba lana Alla lɔnbaliilu ma, kɔni a ka mɔɔ wɔrɔnwula le dɔrɔn nakisi a ni Nuhan mɛn tɛrɛ ye telenbaya la ko kawandili bɔla.\f + \fr 2.5\fr* A ragbɛ A Damira suran 6 kuma diya 1 haan suran 7 kuma diya 24 kɔndɔ.\f* 
\v 6 Alla ka Sɔdɔmu ni Kɔmɔri soilu fanan halaki le ta la, ka ii kɛ buuri ri. A ka ii kɛ misali ri Alla lafililailu yɛ, ko mɛn natɔ kɛ diya ii yɛ.\f + \fr 2.6\fr* A ragbɛ A Damira suran 19 kuma diya 24 kɔndɔ.\f* 
\v 7 Alla ka Luti mɔɔ telenni fanan kunka le, mɛn jusu tɔrɔra wo sariyalɔnbaliilu ko haramuninilu la ko rɔ. 
\v 8 Baa wo mɔɔ telenni tɛrɛ siini ii tɛma, a sɔlɔmɛ telenni tora tɔrɔla lon lon ii la kojuuilu la ko rɔ, a tɛrɛ ye mɛnilu yenna, ka ii lamɛn. 
\v 9 Wo koilu le bɛɛ ye a yirakala ko Maari ka a lɔn a ri mɔɔ kunka tɔrɔya rɔ ɲa mɛn ma mɛn telennin, ka telenbaliilu mara ɲakankatan ɲɛrɔ kiti la lon kɔrɔ, 
\v 10 katarabi wo mɔɔilu ma, mɛnilu bilani ko kɔsɔniilu kɔfɛ, ii faribanku diyana koilu, ka murunti fanka bɛɛ kɔrɔ.
\p Wuya karanmɔɔ ɲinilu wakalini, ii wasoni. Ii tɛ silanna gbiliya tiilu lafɛya la. 
\v 11 Hali mɛlɛka mɛnilu fanka ni sɛɛbɛ ka bon wuya karanmɔɔ ɲinilu ri, woilu tɛ wo suilu lafɛyala kiti rɔ Maari ɲakɔrɔ. 
\v 12 Kɔni mɔɔ ɲinilu ye koilu lafɛyala ii ma mɛnilu lɔn, ka kɛ ikomin sobo hankilidɔɔ mira ta mɛnilu ye halaki. Wo mɔɔilu halakila ikomin soboilu, 
\v 13 ii la telenbaliya bɛɛ ri sara ii la. A duman ii yɛ, ii ye wasa ii diyana ko kɔrɔnilu bɛɛ la tele rɔ. Ii wa kɛ dɔɔnnin kɛla ai tɔrɔfɛ, maloya ni kunnajii le a ri, ka sɛwa ii diyana koilu la. 
\v 14 Ii ye kaninkɛ ɲininna ii ɲa la. Ii tɛ wasala julumun na muumɛ! II ye fankatanilu masɔmɔnna. Ii jusu dorinnin wasabalidaya koilu le la. Dankadenilu le ii ri. 
\v 15 Ii ra sila telenni bila, ka bila Beyɔri dencɛ Balami la sila kɔfɛ fili rɔ mɛn kaninna telenbaliya sara la. 
\v 16 Kɔni a ka mafɔli sɔrɔn a la ko masɔsɔ rɔ. A la fali mɛn ti se kumala, wo ka a mɔɔ kan nabɔ le, ka nabi lasa a la hankilidɔɔya rɔ.\f + \fr 2.16\fr* A ragbɛ Jateilu suran 31 kuma diya 16 kɔndɔ.\f*
\p
\v 17 Wuya karanmɔɔ ɲinilu kɛni le ikomin tenke denka janin, ikomin fɔɲɔ ba ye duru mɛn tuntunna san ma, dibi ba le lamarani ii ɲɛrɔ. 
\v 18 Ii ye waso kuma fuuilu fɔla, ka mɔɔilu lakunfan faribanku diyana ko haramuninilu la, mɛnilu gbansan ye ii sɔrɔnna mɔɔ filiniilu la. 
\v 19 Ii ye mɔɔilu lahidila hɔrɔya la, adon, ii le jɛrɛ ye kɔsɔ koilu jɔnya rɔ. Ka a masɔrɔn foyi wa se mɔɔ la, a ri kɛ wo jɔn di. 
\v 20 Ni ii ra matanka dunuɲa kɔsɔ koilu ma an Maari ni an Nakisila Isa Ɲenematɔmɔnin lɔn ko rɔ, ka ii sɔn fanan wo koilu ye se ii la, ii la ban tun di juuya ka tamin ii la fɔlɔ la. 
\v 21 Baa a tun ka fisa wo tiilu kana telenbaya sila lɔn, yani ii ye a lɔn ka ii kɔnkɔ don jamari sɛniman na ii ka mɛn sɔrɔn. 
\v 22 Mɛn kɛni ii la, wo ra sanda ɲinilu tuɲa yiraka ko, «Wulu ye a kɔsɛla a baji ma le,»\f + \fr 2.22\fr* Sandailu suran 26 kuma diya 11\f* a ni «I wa kɔsɛ mako dɔrɔn, a ri wa a makurukuru bɔɔ rɔ.»
\c 3
\s Maari na lon ko
\p
\v 1 N kanintenilu, n na bataki filana le ɲin di, n da mɛn sɛbɛ ai ma. N ka ii fila sɛbɛ ai ma le kosa n ye koilu labila ai la, ka hankili sɛniman lasu, 
\v 2 kosa, nabi sɛnimanilu tɛrɛ ra kuma mɛnilu fɔ, woilu ye labila ai la a ni an Maari ni an Nakisila la jamariliilu, talibidenbailu ka mɛnilu lase ai ma. 
\v 3 Ai ye a lɔn fɔlɔ ko lon labanilu rɔ, mayɛlɛlilailu ri na ai mayɛlɛ diya mɛnilu ye bilala ii la kunfan kojuuilu kɔfɛ. 
\v 4 Ii ri a fɔ ko, «Isa ka ai lahidi a na ko mɛn na, wo ye mi? Kɛbi an benbailu faara waati mɛn na koilu bɛɛ ye ɲa kelen ma ka bɔ dunuɲa dan waati ma haan bi.» 
\v 5 Ka a masɔrɔn, ii ye a lawulila a ma le ka ɲina ɲin na ko, waati taminin siyaman Alla ka sankolo dan a kumakan na, ka duu ni ji bɔ a ɲɔɔnna ka to ji tɛma. 
\v 6 Wo ji le ka wo waati dunuɲa bɛɛ halaki ji bɔni ba la.\f + \fr 3.6\fr* A ragbɛ A Damira suran 1 kuma diya 6 haan 9 ni suran 7 kuma diya 11 kɔndɔ.\f* 
\v 7 Kɔni bi sankolo ni duukolo lamarani ta le kanma wo kuma kelen de fɛ, kiti la lon ni Alla lɔnbaliilu halaki kɔrɔ.
\p
\v 8 Kɔni, n kanintenilu, ai kana ɲina ko kelen ɲin na, tele kelen kɛnin de Maari ɲakɔrɔ ikomin san waa kelen, san waa kelen fanan ikomin tele kelen. 
\v 9 Maari tɛ mɛnna a la lahidi kanbali diya, ikomin mɔɔ doilu ye a mirila mɛnna ɲa mɛn ma. Kɔni a diɲani ai yɛ le ka a masɔrɔn a tɛ a fɛ mɔɔ si ye halaki, kɔni fɔɔ mɔɔilu bɛɛ ye ii kɔnkɔ don ii hakɛilu la.
\p
\v 10 Adon, Maari na lon ye sela le, a ri mɔɔilu latɛrɛn ikomin son. Wo lon, sankolo ri tamin halaki kan ba rɔ, a rakɛfenilu fanan di janin. Duukolo ni a rakɛfenilu bɛɛ ri lɛnkɛnɛmaya. 
\v 11 Baa woilu bɛɛ ye halakila le wo ɲa ma, ai ka kan ai ye kɛ mɔɔ su ɲumanilu di? Ai la dunuɲaratɛɛ ye sɛninya Alla lɔn dɔ, 
\v 12 ai wa Alla na lon makɔnɔ, ai kɛwaliilu ye a la na lakaliya, sankolo ni a rakɛfenilu ri halaki ta la lon mɛn na. 
\v 13 Adon, Alla ra a lahidi sankolo kura ni duukolo kura la, telenbaya ye tola yɔrɔ mɛn. An ye wo le makɔnɔla.\f + \fr 3.13\fr* A ragbɛ Esayi suran 65 kuma diya 17 ni suran 66 kuma diya 22 kɔndɔ.\f*
\p
\v 14 Wo le rɔ, n kanintenilu, baa ai ye wo ko makɔnɔla, ai ye fɛrɛ bɛɛ kɛ kosa a ye ai tɛrɛn kojuu ni sɔnjuu tɛ si ai la, jususuma ye to ai ni Alla tɛma. 
\v 15 Ai ye a lala ko an Maari la diɲɛ le mɔɔilu lakisila ikomin an diyana nakelenɲɔɔ Pɔli ka a sɛbɛ ai ma ɲa mɛn ma lɔnnin dɔ Alla ka mɛn di a ma. 
\v 16 A ka wo le sɛbɛ a la bataki bɛɛ kɔndɔ ka bɛn ko ɲinilu ma. A la bataki yɔrɔ doilu ɲayen ma di, hankilidɔɔilu ni karanbaliilu ri woilu kɔrɔilu ɲakɛ, ikomin ii ka Kitabu dogbɛrɛilu fanan kɛ ɲa mɛn ma, ka ii jɛrɛ halaki.
\p
\v 17 Wo le rɔ, n kanintenilu, baa ai le lalɔnni, ai ye a kɛ ai hankili la, kosa sariyalɔnbaliilu la fili kana se ai ma, ka bɔnɔ ai lɔdiya barakani rɔ. 
\v 18 Kɔni ai ye to bonyala an Maari ni an Nakisila Isa Ɲenematɔmɔnin na sɔli ni a lɔnnin dɔ. Gbiliya ye di ale le ma sisen haan habadan. Amina.