\id 1PE 
\ide UTF-8
\h Piyɛri Fɔlɔ
\toc2 1PI
\toc1 Piyɛri Fɔlɔ
\mt1 Piyɛri
\c 1
\p
\v 1 Nde Piyɛri, Isa Ɲenematɔmɔnin na talibidenba, nde le ɲin sɛbɛla Alla la mɔɔ suwandiniilu ma, mɛnilu lajɛnsɛnni londanya rɔ Pɔnti ni Kalati ni Kapadɔsi ni Asi a ni Bitini jamanailu rɔ. 
\v 2 Ai suwandini le ikomin An Fa Alla hankili tɛrɛ a ma ɲa mɛn ma. A ra ai lasɛninya a la Nii Sɛniman baraka rɔ kosa ai ye kolo Isa Ɲenematɔmɔnin ma, a jeli ye sadisadi ai ma ai lasɛninya kɔrɔ. Alla ye sɔlini ni jususuma sabati ai rɔ!
\s Habadan jii
\p
\v 3 Tando ye kɛ an na Maari Isa Ɲenematɔmɔnin na Fa a ni Alla yɛ. A ra a kɛ a la kininkinin ba rɔ, ka an kɔsɛ, ka sɔrɔn kokura, ka don niilakisi jii rɔ Isa Ɲenematɔmɔnin nawuli fɛ mɛn bɔni saya rɔ. 
\v 4 Cɛ mɛn tɛ tiɲanna, a tɛ kɔrikɔrila, a tɛ tununna ka tamin, wo le lamarani ai yɛ harijeene, 
\v 5 ai le mɛnilu kandani a fanka la lemɛniya fɛ kosa ai ye kisi sɔrɔn, mɛn ye bɔla kɛnɛma waati labanilu rɔ.
\p
\v 6 Wo rɔ, ai ye sɛwa, hali ai tɔrɔni ai kɔrɔbɔ ko su bɛɛ rɔ waatinin ɲin dɔ 
\v 7 kosa ai la lemɛniya ye sɛnsɛn. Hali sanin mɛn di se tiɲanna, wo ye lalenna ta le la, ka lasɛnsɛn. Wo rɔ, ai la lemɛniya mɛn tɔnɔ ka bon sanin di, wo fanan ka kan ka lasɛnsɛn kɔrɔbɔli rɔ, ka tandoli ni gbiliya ni kunnafulen sɔrɔn Isa Ɲenematɔmɔnin di bɔ waati rɔ kɛnɛma. 
\v 8 Ai ma Maari yen fɔlɔ kɔni ai ra a kanin. Ai tɛ a yenna sisen, kɔni ai ye ai lemɛniyala a ma, ai ye sɛwa ba rɔ mɛn ti se ɲafɔla. 
\v 9 Ka a masɔrɔn ai ye ai lemɛniya kun sɔrɔnna, mɛn kɛni ai sɔlɔmɛ kisi ko ri.
\p
\v 10 Nabiɲuma mɛnilu ka sɔlini ko fɔ, mɛn tɛrɛ latɛɛni ai ma, mɛn kɛni kisi ko ri, wo ra kɛ woilu la ko ɲaɲinin ni ko fɛsɛfɛsɛ kun di. 
\v 11 Ii tɛrɛ ye karanna waatiilu ni kɛɲailu lɔn kɔrɔ, Ɲenematɔmɔnin na Nii tɛrɛ ye mɛnilu lɛnkɛnɛmayala ii yɛ, baa a tɛrɛ ye ii rɔ, ka Ɲenematɔmɔnin na tɔrɔya ni a la gbiliya natɔla la ko fɔ yani a waati ye se. 
\v 12 Alla ka a yiraka le nabiilu la, ko ii tɛrɛ tɛ baarala ii jɛrɛ yɛ kɔni ai le, ii tɛrɛ ye koilu fɔla ai ka mɛnilu la ko lamɛn wo mɔɔilu la mɛnilu ka Kibaro Ɲuma lase ai ma Nii Sɛniman baraka rɔ mɛn bɔni harijeene. Hali mɛlɛkailu fanan kunfani wo ko fɛsɛfɛsɛ kɔrɔ.
\s An ye to Alla la Nii Sɛniman dɔ
\p
\v 13 Wo le rɔ, ai ye ai hankili rabɛn baara la ko rɔ, ka ai jɛrɛ mira, ka ai jii la wo sɔli rɔ ai ye mɛn sɔrɔnna Isa Ɲenematɔmɔnin di bɔ waati rɔ kɛnɛma. 
\v 14 Ai ye to ikomin Alla den koloniilu, ai kana sɔn tola ai la kunfan juuilu rɔ, ai tɛrɛ ye mɛnilu rɔ ai la hankilidɔɔya rɔ. 
\v 15 Kɔni ikomin Alla sɛniman da aile kili, aile fanan ye sɛninya ai kɛwaliilu bɛɛ rɔ. 
\v 16 Ka a masɔrɔn a sɛbɛni, «Ai ye sɛninya, ka a masɔrɔn nde sɛniman.\f + \fr 1.16\fr* Sarakalaselailu suran 19 kuma diya 2\f*»
\p
\v 17 Baa ai ye ai Fa Alla matarala, mɛn ye mɔɔilu bɛɛ kɛwaliilu makitila ɲa kelen ma, ai ye to ikomin londanilu dunuɲa ɲin dɔ, ka kolo Alla ma. 
\v 18 Ai ka a lɔn ko ai ma kunka ai failu la namun ko fuuilu ma, fen tiɲan tailu la ikomin wodi wala sanin, 
\v 19 kɔni ai kunkani Ɲenematɔmɔnin jeli fisamantɛ le la, mɛn bɔni sarakaya la ikomin saa bulan, fɛɛ tɛ mɛn na a ni mɛn ɲatɛɛni tɛ. 
\v 20 Alla tɛrɛ ra wo suwandi yani dunuɲa ye dan, ka a labɔ kɛnɛma ai le la ko rɔ waati laban ɲinilu rɔ. 
\v 21 Ai lemɛniyani Alla ma ale le baraka rɔ, Alla mɛn ka a lawuli saya rɔ, a ka gbiliya di wo ma, kosa ai la lemɛniya ni jii ye to Alla rɔ.
\p
\v 22 Baa ai ra ai jɛrɛ nii lasɛninya tuɲa mira fɛ, ka kaninteya bɛrɛ sɔrɔn ai nakelenɲɔɔmailu yɛ, wo rɔ, ai ye ai ɲɔɔn kanin ai fanka bɛɛ la, ai solɔmɛ sɛninya rɔ. 
\v 23 Ka a masɔrɔn ai ra ai kɔsɛ, ka sɔrɔn kuraya fanan, mɛn ma fara adamaden na mɛn ye faala, kɔni ka fara Alla la kuma la mɛn ye niila, a ri to habadan. 
\v 24 Baa a sɛbɛni Kitabu kɔndɔ ko,
\q «Adamadenilu bɛɛ kɛni de
\q ikomin bin,
\q ii la gbiliya bɛɛ kɛni
\q ikomin fen feren.
\q Binilu ye jala,
\q ii ferenilu ye burunna.
\q
\v 25 Kɔni Maari la kuma ye tola le habadan.»\f + \fr 1.25\fr* Esayi suran 40 kuma diya 6 haan 8\f*
\m Wo kuma kɛni Isa la Kibaro Ɲuma le ri mɛn naseni ai ma.
\c 2
\s Jama sɛniman
\p
\v 1 Wo rɔ, ai fara kojuu su bɛɛ la a ni janfateya ni filanfilanteya ni minlɛ ni kuma juu bɛɛ. 
\v 2 Nii balo bɛrɛ lɔɔ ye ai mira ikomin sin lɔɔ ye den ɲɛrɛn mirala ɲa mɛn ma, kosa ai fanan ye sabati ai kisi ko rɔ a fɛ, 
\v 3 baa ai ra a ragbɛ, ka a lɔn ko Maari ka ɲi.\f + \fr 2.3\fr* Yaburi suran 34 kuma diya 9\f*
\p
\v 4 Ai ye ai madon a la, mɛn kɛni siimaya kabakurun di, adamadenilu ka ii ban mɛn dɔ, kɔni Alla ka mɛn suwandi, mɛn dagbɛlɛyani a bolo fanan. 
\v 5 Aile fanan da kɛ Alla la bon lɔ fenilu ri ikomin siimaya kabakurunilu, ka kɛ sarakalasela jama sɛniman di, ka siimaya sarakailu bɔ Alla sɔnni mɛnilu rɔ ka fara Isa Ɲenematɔmɔnin na. 
\v 6 Ka a masɔrɔn Kitabu ka ɲin de fɔ ko,
\q «A ragbɛ! N da kaba do sii Siyon so kɔndɔ
\q ikomin bon tonkon kaba ɲuma kenɲi.
\q Mɛn wa lemɛniya a ma,
\q maloya ti se wo tii ma.»\f + \fr 2.6\fr* Esayi suran 28 kuma diya 16\f*
\m
\v 7 Kaba ɲin dagbɛlɛyani aile lemɛniya mɔɔilu le yɛ, kɔni Kitabu yɔrɔ ɲin de bɛnni lemɛniyabaliilu ma ko,
\q «Bon lɔlailu ka ii ban kabakurun mɛn dɔ,
\q wo ra kɛ bon jusii kabakurun di.»
\m
\v 8 A sɛbɛni Kitabu kɔndɔ fanan ko,
\q «Jama ye ii sennatula kaba mɛn na,
\q ka kɛ ii labe kaba ri.»\f + \fr 2.8\fr* A ragbɛ Yaburi suran 118 kuma diya 22 a ni Esayi suran 8 kuma diya 14 kɔndɔ.\f*
\m Ii ri ii sennatu a la ka a masɔrɔn ii ma sɔn kuma mirala, baa wo le tɛrɛ natɛɛni ii ma. 
\v 9 Kɔni aile ra kɛ siya suwandini ri. Mansailu la sarakalaselailu le aile ri, siya sɛniman, Alla ta ye jama mɛn di, kosa ai ye a la baara ɲuma bailu la ko lase, ale mɛn ka ai kili, ka ai bɔ dibi rɔ, ka wa a la kabannako kɛnɛya rɔ. 
\v 10 Fɔlɔman, Alla la jama tɛrɛ tɛ ai ri kɔni sisen, ai ra kɛ a la jama ri. Aile mɛn tɛrɛ ma Alla la kininkinin sɔrɔn, kɔni sisen, ai ra a la kininkinin sɔrɔn.
\s Lemɛniya mɔɔilu ye kolo
\p
\v 11 Nba, n kanintenilu, ai le mɛnilu kɛni ikomin londanilu ni taamalailu dunuɲa rɔ, n ye ai madiyala, ai ye ai jɛrɛ mira faribanku kunfan koilu ma mɛnilu ye ai nii kɛlɛla. 
\v 12 Ai kɛwaliilu ye ɲumaya lemɛniyabaliilu tɛma, kosa, ii wa ai makuma kojuu kɛla, ii ye ai kɛwali ɲumailu yen, ka Alla gbiliya a na lon.
\p
\v 13 Ai ye kolo adamadenya mansayailu bɛɛ kɔrɔ Maari la ko kosɔn, a wa kɛ mansa ba ri 
\v 14 wala jamanatiilu, a ka mɛnilu lawa baara koronilu sara diya kojuu kɛlailu la, ka koɲuma kɛlailu tando ii la baara ɲumailu la. 
\v 15 Ka a masɔrɔn Alla sawo le wo ri, ko ai la koɲuma kɛ ye hankilidɔɔilu da mira ii la hankilidɔɔya rɔ. 
\v 16 Ai ye kɛ mɔɔ hɔrɔniilu ri, kɔni ai kana ai la hɔrɔya kɛ kojuu dokon fen di, ai ye kɛ Alla la jɔn ɲumailu ri. 
\v 17 Ai ye mɔɔ bɛɛ gbiliya, ka ai lemɛniyamɔɔ ɲɔɔilu kanin, ka silan Alla ɲɛrɔ, ka mansacɛ gbiliya.
\s Isa la tɔrɔyailu misali
\p
\v 18 Jɔnilu, ai ye kolo ai la tiilu ma gbiliya ko bɛɛ rɔ, ka tii juuilu kolo ikomin tii ɲuma ni sabariniilu. 
\v 19 Ka a masɔrɔn, wo kɛni koɲuma le ri, ni mɔɔ lemɛniya ra ɲakankatan kɔrɔ Alla lɔn na ko rɔ, ka a sɔrɔn wo ɲakankatan bɛnni tɛ a kɛwaliilu ma. 
\v 20 Kɔni wo ri kɛ gbiliya ri ai yɛ di, ni ai ɲakankatanra ai la hakɛ na ko rɔ, ka tunadiya? Adon, ni ai tɔrɔra ai kɛwali ɲumailu la ko rɔ, ka lemɛniya, koɲuma le wo ri Alla ɲakɔrɔ. 
\v 21 Alla ka ai kili wo le ma, baa Ɲenematɔmɔnin jɛrɛ tɔrɔra le ai yɛ, ka misali to ai bolo kosa ai ye bila a kɔfɛ. 
\v 22 «A ma julumun si kɛ, a ma janfa kuma si fɔ fanan.»\f + \fr 2.22\fr* Esayi suran 53 kuma diya 9\f*
\p
\v 23 Ii ka a nani waati mɛn na, ale ma nanili kɛ. A tɔrɔra waati mɛn na, a ma yaman ii ma kɔni ka a jɛrɛ to kitilala telenni Alla le bolo.
\p
\v 24 Isa jɛrɛ ra an julumunilu donin ta a faribanku rɔ, a gbɔngbɔnni jiri kan, kosa an ye kɛ ikomin mɔɔ mɛn farani julumun dɔ, ka to an nii la telen dɔ. Ai ka kɛndɛya sɔrɔn a la madiminniilu le fɛ. 
\v 25 Ai tɛrɛ kɛni le ikomin saa mɛnilu tununni, kɔni sisen ai ra kɔsɛ fanan kolofen gbɛngbɛnna a ni nii kandanna tɔrɔfɛ.
\c 3
\s Musoilu ni ii cɛɛilu ko
\p
\v 1 Aile musoilu, ai ye kolo ai cɛɛilu ma, kosa ni ii le doilu lani tɛ Alla la kuma la, ii ye kɛ lemɛniya mɔɔilu ri, ka fara ii musoilu taamaɲa la, hali kuma tɛ, 
\v 2 ii wa ai taamaɲa lakɔrɔsi waati mɛn na ai ye sɛninya ni gbiliya mɛn dɔ. 
\v 3 Ai la kenɲa kana fara ai masidi ɲa si la, ikomin ka ai kun dan, wala ka sanin don wala ka faanin dagbɛlɛnilu don, 
\v 4 kɔni ai jusu rɔ ko ye ɲumaya mɛn dokonni, a tɛ kɔrɔyala, a ye kɛ nii masumani ni nii sabarini le ri, Alla ri mɛn jate haan! 
\v 5 Wo le tɛrɛ kɛni a fɔlɔ muso sɛnimanilu lakenɲa fen di, mɛnilu jii lani tɛrɛ Alla rɔ. Ii koloni tɛrɛ ii la cɛɛilu ma 
\v 6 ikomin Iburahima la muso Saran tɛrɛ koloni a ma ɲa mɛn ma, a tɛrɛ ye a kilila le ko, «N tii.» Wo denmusoilu le ai ri, ni ai ka koɲuma kɛ, ai tɛ silanna foyi ɲɛrɔ.
\p
\v 7 Aile cɛɛilu fanan ye wo ɲa le ma, ai ye a kɛ hankili la ai ni ai muso wa kɛ ai la dunuɲaratɛɛ kɛla ai ɲɔɔn fɛ, ka ii gbiliya baa ii faribanku fanka ma se ai ta rɔ, baa ai ni woilu bɛɛ ri nii lakisi sɔlini sɔrɔn ai cɛyala. Wo rɔ, foyi tɛ ai la Alla matara lalɔ.
\s Tɔrɔya telen dɔ
\p
\v 8 Nba, aile bɛɛ ye to hankili kelen dɔ, ka kininkinin, ka ai ɲɔɔn kanin nakelenɲɔɔya la, ka ɲumaya ai ɲɔɔn na, ka ai jɛrɛ majii. 
\v 9 Ai kana kojuu sara kojuu la, ka nanili sara nanili la, kɔni ai ye duwawu kɛ, ka a masɔrɔn Alla ka ai kili wo le ma kosa ai ye baraka sɔrɔn ai cɛɛya la. 
\v 10 Baa,
\q «Siimaya duman mɛn yɛ,
\q mɛn ye siimaya ɲuma fɛ,
\q wo tii ye a nɛn mira kuma juuilu ma,
\q ka a da mira wuya ma,
\q
\v 11 ka a kɔnkɔ don kojuu rɔ,
\q ka koɲuma kɛ,
\q ka jususuma ɲinin,
\q ka bila a kɔfɛ.
\q
\v 12 Maari ɲa ye mɔɔ telenniilu la,
\q a tolo malɔni ii la matarali kan na.
\q Kɔni Maari kɔnkɔ donni kojuu kɛlailu la.»\f + \fr 3.12\fr* Yaburi suran 34 kuma diya 13 haan 17\f*
\p
\v 13 Ni koɲuma kunfan ye ai la, yon di se kojuu kɛla ai la? 
\v 14 Kɔni hali ni ai wa tɔrɔ ai la baara ɲumailu la ko rɔ, sɛwa le wo ri ai yɛ. Ii ye silanna mɛn ɲɛrɔ, ai kana silan wo ɲɛrɔ, ai kana kɔndafili. 
\v 15 Kɔni ai ye Ɲenematɔmɔnin gbiliya ai Maari ri ai jusu rɔ. Ai ye to rabɛnni ai kun mafɔ ko la ka bɛn ai jii ma, ii wa ai maɲininka waati mɛn na. 
\v 16 Kɔni ai ye a kɛ sabarini ni gbiliya rɔ. Ai ye to kɔnɔgbɛya rɔ waati bɛɛ kosa ai wa kɛ baara ɲumailu kɛla Ɲenematɔmɔnin na ko rɔ, mɔɔ mɛnilu ye ai mafɔla, woilu ye maloya ii la kumailu la. 
\v 17 Ka a masɔrɔn ni Alla sawo le, a ka fisa mɔɔ ye tɔrɔ koɲuma kɛ diya yani a ye tɔrɔ a juuman kɛ diya. 
\v 18 Baa Ɲenematɔmɔnin faara le an julumunilu la ko rɔ siɲa kelen haan habadan, ale mɔɔ telennin telenbaliilu yɛ, kosa a ye na ai ri Alla ma. Mɔɔilu ra a faa ten faribanku rɔ, kɔni Alla ka a lakɛndɛya, Nii Sɛniman na baraka le rɔ. 
\v 19 Wo Nii Sɛniman fɛ, a wara kawandi bɔ diya nii kasola mɔɔilu yɛ, 
\v 20 mɛnilu tɛrɛ ra murunti Alla ma a damira, Alla tɛrɛ ye makɔnɔla Nuhan na teleilu rɔ, a la diɲɛ rɔ, a tɛrɛ ye kulun nadanna waati mɛn na. Mɔɔ dando le dɔrɔn kisira ji ta fan fɛla ma, wo kɔndɔ, mɔɔ seyin gbansan. 
\v 21 Wo ji kɛni sun ji rɔ misali le ri ai tubi kanma mɛn ye ai fanan nakisila sisen. A kɛni tɛ faribanku nɔɔni bɔ fen di, kɔni dakan ta Alla yɛ kɔnɔgbɛya rɔ. Wo sun ji rɔ le ai lakisila sisen Isa Ɲenematɔmɔnin nawuli fɛ mɛn bɔra saya rɔ, 
\v 22 mɛn wani harijeene, ka a sii Alla bolokininma mɛlɛkailu ni setiilu ni fankamailu bɛɛ kun na.
\c 4
\s Dunuɲaratɛɛ kura la ko
\p
\v 1 Wo le rɔ, ikomin Ɲenematɔmɔnin da tɔrɔ a faribanku la, ai fanan ye ai rabɛn wo hankili kelen na, ka a masɔrɔn mɛn da tɔrɔ faribanku la, wo ni julumun da fara. 
\v 2 Wo tii tɛ a la siimaya kɛla adamadenilu la kunfan koilu rɔ butun fo Alla sawo. 
\v 3 Ka a masɔrɔn ai tɛrɛ ra mɛn lemɛniyabaliilu diyana koilu kɛla waati taminni rɔ, ka ai sɛɛbɛ don ko haramuninilu ni kunfan juuilu ni dɔlɔ min ni haramuya sumunilu ni dɔlɔ min sumunilu ni joo bato kɔsɔni ma. 
\v 4 Wo rɔ, a ye kɛla ii latɛrɛnna ko ri baa ai tɛ ai borila ii kɔfɛ butun hankilidɔɔya ko ba siyaman ɲinilu rɔ, ka ai lafɛya. 
\v 5 Kɔni ii ri ii dantɛ Alla yɛ ko wo ma, mɛn dabɛnni mɔɔ faaniilu ni niilamailu kiti ko la. 
\v 6 Wo le rɔ, Alla la kuma Kibaro Ɲuma ra lase hali mɔɔ faaniilu ma, kosa ni ii faribanku koilu wa ban makitila ikomin adamadenilu bɛɛ, ii ye to nii lakisi rɔ Alla fɛ ka bɛn Nii Sɛniman na ko ma.
\s An ye Alla niilifenilu labaara kosɛbɛ
\p
\v 7 Koilu bɛɛ laban ra madon. Wo rɔ, ai ye a kɛ hankili la, ka ai jɛrɛ mira kosa ai ye se Alla matarala. 
\v 8 Wo bɛɛ rɔ, ai ye sɛɛbɛ don kaninteya ma ai ɲɔɔn yɛ, ka a masɔrɔn kaninteya le julumun siyaman banna.\f + \fr 4.8\fr* A ragbɛ Sandailu suran 10 kuma diya 12 a ni Yakuba suran 5 kuma diya 20 kɔndɔ.\f* 
\v 9 Ai ɲɔɔn jiya hali ai tɛ ai makasila. 
\v 10 Alla ka sɔlifen mɛn di ai kelen kelenna bɛɛ ma, ai ɲɔɔn dɛmɛn wo fanan na. Wo rɔ, ai ye kɛ le Alla la baaraden ɲumailu ri mɛnilu ye a hina suilu bɛɛ labaarala. 
\v 11 Ni mɛn di kuma ta, wo ye kuma ikomin a ye Alla la kumailu le jɛrɛ fɔla. Ni mɔɔ do ye walila doilu yɛ, a ye wali ikomin Alla ye a sɔla fanka la ɲa mɛn ma, kosa gbiliya ye di Alla ma ko bɛɛ rɔ Isa Ɲenematɔmɔnin baraka rɔ. Gbiliya ni fanka ye di ale le ma habadan haan habadan. Amina.
\s Tɔrɔya Isa fɛ
\p
\v 12 N kanintenilu, tɔrɔ gbɛlɛnni mɛn ye ai tɔrɔla, wo kana ai latɛrɛn, ikomin ko dahabali do ri ai bɔ. 
\v 13 Kɔni ni ai ni Ɲenematɔmɔnin tɔrɔra an ɲɔɔn fɛ, ai ye sɛwa wo rɔ, kosa a gbiliya ri bɔ kɛnɛma tuma mɛn na, a ni aile ye sɛwa haan. 
\v 14 Ni ii ka ai nani Ɲenematɔmɔnin tɔɔ la ko rɔ, sɛwa ai yɛ wo rɔ, ka a masɔrɔn Alla la Nii Sɛniman gbiliyani ye tola ai rɔ. 
\v 15 Adon, aile do si kana tɔrɔ baa ai ra kɛ mɔɔ faala ri wala son, wala kojuu kɛla, wala nafi. 
\v 16 Kɔni ni ai tɔrɔra baa Isa la mɔɔ le ai ri, maloya tɛ wo rɔ, fɔɔ ai ye Alla gbiliya, baa a tɔɔ ra to ai kun na.
\p
\v 17 Ka a masɔrɔn kiti la waati ra se, a ye damirala Alla la jama le ma. Adon, ni a ye damirala ande le ma, mɛnilu banna Alla la kuma Kibaro Ɲuma mirala woilu le laban mɔɔilu di? 
\v 18 «Ni mɔɔ telenni ri kisi dɔrɔn, Alla lɔnbaliilu ni kojuukɛlailu woilu ye tola di?»\f + \fr 4.18\fr* Sandailu suran 11 kuma diya 31\f* 
\v 19 Wo rɔ, mɛnilu tɔrɔla Alla sawo rɔ, woilu ye ii jɛrɛ sɔlɔmɛilu to ii Danni Maari bolo mɛn telenni, ii tora ko ɲuma kɛla.
\c 5
\s Mɔɔbakɔrɔilu baara la jama
\p
\v 1 N ye lemɛniya jama mɔɔbailu fanan madiyala ai tɛma ka a masɔrɔn n fanan kɛni jama mɔɔba do le ri ikomin iile, a ni Ɲenematɔmɔnin na tɔrɔya sereya do. Gbiliya mɛn natɔ bɔla kɛnɛma, n fanan di wo do sɔrɔn. 
\v 2 Ai ye ai janto Alla la kolofen kuru rɔ, a ka mɛn karifa ai la. Ai diyagboyanin kana ii mafɛnɛ le, kɔni niilifen ɲuma ye Alla sawo rɔ. Ai kana a kɛ malobaliya koilu tɔnɔ sɔrɔn ma kɔni fo ai sɛbɛ. 
\v 3 Mɛnilu karifani ai la, ai kana nɔya kɛ woilu la ikomin kuntiilu, kɔni ai ye a kɛ misali ri kuru yɛ. 
\v 4 Kolofen Gbɛngbɛnna Kuntii wa bɔ kɛnɛma waati mɛn na, ai ri mansaya tɔɔmasere fula sɔrɔn gbiliya rɔ mɛn tɛ tiɲanna muumɛ.
\p
\v 5 Kanberenilu, ai fanan ye kolo mɔɔbailu ma. Ai bɛɛ ye ai fanmajii ii yɛ ikomin faanin wa kɛ ai ɲɔɔn kan. Ka a masɔrɔn, «Alla ye a jɛrɛ wulila wasolailu kanma, kɔni a ye sɔli donna jɛrɛ majiilailu la.»\f + \fr 5.5\fr* Sandailu suran 3 kuma diya 34\f* 
\v 6 Ai ye ai majii Alla fanka kɔrɔ, kosa a ye ai mayɛlɛ a diyana waati rɔ. 
\v 7 Ai ye ai hamin koilu bɛɛ to a ma, ka a masɔrɔn a ri a janto le ai ko.
\p
\v 8 Ai ye ai jɛrɛ mira, ka a kɛ ai ye hankilila, ka a masɔrɔn ai juu Ibulusa ye taamala ikomin yara mɛn ye wurundula. A ye mɔɔilu ɲininna a ye mɛnilu dɔɔnna. 
\v 9 Ai ye ban a rɔ, ka to lemɛniya rɔ gben. Ai ye a lɔn ko wo tɔrɔ suilu ye ai nakelenɲɔɔmailu fanan kan dunuɲa yɔrɔ bɛɛ rɔ. 
\v 10 Ai wa tɔrɔ waati do rɔ, Alla hina bɛɛ tii mɛn ka ai kili habadan gbiliya rɔ Ɲenematɔmɔnin dɔ, wo jɛrɛ ri ai lawuli, ka ai fanka di ai ma, ka ai kologbɛlɛya, ai ma yɛrɛyɛrɛ. 
\v 11 Fanka ye to ale le la habadan! Amina.
\s Fo laban ni duwa
\p
\v 12 Silasi, n ye mɛn jatela nakelenɲɔɔ kɔnɔrɔdi ri, wo le ka n dɛmɛn bataki kundunyanin ɲin sɛbɛla ai ma, kosa n ye ai lalemɛniya, ka sereya bɔ ai yɛ, ko Alla la sɔlini tuɲa le ɲin di, ai ye mɛn dɔ gben! 
\v 13 Lemɛniya jama mɛn ye Babilɔni so kɔndɔ,\f + \fr 5.13\fr* \fk Babilɔni so\fk* kɛni gbundu kuma le ri mɛn kɔrɔ ye «Romi So.» \fk N dencɛ Marika:\fk* wo kɔrɔ le Piyɛri ye Marika kaninna ikomin a dencɛ. Tumado Piyɛri le Marika karanna lemɛniya ma.\f* Alla ka mɛnilu suwandi ikomin ai le, woilu ye ai tuwala. N dencɛ Marika fanan ye ai tuwala. 
\v 14 Ai ye ai ɲɔɔn tuwa nakelenɲɔɔya sunbuli rɔ.
\p Alla ye jususuma di ai bɛɛ ma ai le mɛnilu ye Ɲenematɔmɔnin dɔ.