\id 1JN 
\ide UTF-8
\h Yuhana Fɔlɔ
\toc2 1YU
\toc1 Yuhana Fɔlɔ
\mt1 Yuhana Fɔlɔ
\c 1
\p
\v 1 Mɛn tɛrɛ ye fɔlɔfɔlɔ ka a tɛrɛn fen si ma dan fɔlɔ, an ka an tolo malɔ wo la ka an ɲa la a kan. An ka a ragbɛ ka an bolo maa a la. A ye kilila ko Kuma, mɛn ye ɲenemaya jɛrɛ jɛrɛ dila mɔɔilu ma. 
\v 2 Ɲenemaya wo lɛnkɛnɛmayara, an da a yen, an ye a sere ri, a ni an ye ɲenemaya banbali ko fɔla ai yɛ. Fɔlɔ, a tɛrɛ ye Fa Alla dafɛ, kɔni a lɛnkɛnɛmayara an ɲana. 
\v 3 An ka mɛn yen, ka mɛn mɛn, an ye wo le fɔla ai yɛ, sa ai fanan di don an na duɲɔɔya rɔ, andeilu mɛnilu ye Fa Alla ni a dencɛ Isa Ɲenematɔmɔnin na duɲɔɔya rɔ. 
\v 4 An ye ko ɲinilu sɛbɛla ka a lawa ai ma, sa an di se sɛwala fewu.
\s Fo lemɛniya mɔɔilu ye taama Alla la kɛnɛ rɔ
\p
\v 5 Nba, an ka kuma mɛn mɛn Isa Ɲenematɔmɔnin na, an ye wo lasela ai ma. Kuma wo le ɲin di: Alla ye kɛnɛ ri; dibi yɔrɔ si tɛ a rɔ. 
\v 6 Ni an ka a fɔ ko an ye Alla la duɲɔɔnya rɔ, ka a tɛrɛn an ye taamala kojuu dibi rɔ, an ye wuya fɔla. An tɛ an na koilu kɛla ka bɛn tuɲa ma. 
\v 7 Kɔni ni an ye taamala kɛnɛ rɔ, ikomin Alla jɛrɛ ye kɛnɛ rɔ ɲa mɛn ma, duɲɔɔnya ri kɛ an ni ɲɔɔn tɛma. Ka a la wo kan, a dencɛ Isa la jeli ri hakɛ bɛɛ bɔ an dɔ ka an sɛniya.
\p
\v 8 Ni an ka a fɔ ko julumun tɛ an ma, an ye an jɛrɛ le lafilila. An tɛ taamala ka bɛn tuɲa ma. 
\v 9 Alla ye kankelentii le ri. A telenni le fanan. Wo rɔ, ni an ka an lɔ an na julumun na ka woilu fɔ a yɛ, a ri an na kojuuilu makoto ka an sɛniya an na telenbaliya koilu bɛɛ ma. 
\v 10 Ni an ka a fɔ ko an ma hakɛ kɛ, an da Alla kɛ wuyafɔla ri wo rɔ, a ni a la kuma tɛ an jusu rɔ.
\c 2
\p
\v 1 N den mɛsɛnilu, n ye ko ɲinilu sɛbɛla ka a di ai ma, sa ai kana kojuu kɛ. Kɔni ni do ka kojuu kɛ, lalilila ye an bolo an Fa dafɛ mɛn di an na sɔlɔnali kɛ: wo ye Isa Ɲenematɔmɔnin de ri, mɛn telenni. 
\v 2 Ale le ka a jɛrɛ di ka kɛ saraka ri an na julumunilu kafari ko rɔ. Kɔni an kelen na julumunilu ko tɛ, fo dunuɲa mɔɔilu bɛɛ ta.
\p
\v 3 Ni an ye Alla la jamariilu labatola, wo ye a yirakala an na ko an ka Alla lɔn. 
\v 4 Ni mɔɔ mɛn ka a fɔ ko a ka Alla lɔn, ka a tɛrɛn a tɛ Alla la jamariliilu labatola, mɔɔ wo ye wuyafɔla le ri. A tɛ taamala ka bɛn tuɲa ma. 
\v 5 Kɔni mɔɔ mɛn ye Alla la kuma labatola, wo ye Alla kaninna a ɲa jɛrɛ le ma fewu. An di se a lɔnna ɲa mɛn ma ko an sidini Alla ma, wo le wo ri. 
\v 6 Ni mɔɔ mɛn ka a fɔ ko a sidini Alla ma, wo tii ka kan ka taama ikomin Isa jɛrɛ taamara ɲa mɛn ma.
\s Jamarili kura
\p
\v 7 N kanintenilu, n ye jamarili mɛn sɛbɛla ka a di ai ma ɲi, jamarili kura tɛ wo ri. Jamarili kɔrɔ le, ai ka mɛn lɔn kɛbi ai lemɛniya waati. Ai ka mɛn mɛn kɔrɔman, wo ni jamarili ɲin ye kelen de ri. 
\v 8 Wo bɛɛ ni a ta, n ye jamarili mɛn sɛbɛla ka a di ai ma, jamarili kura le wo ri fanan. Isa taamaɲa ni ai la taamaɲa ye wo yirakala tuɲa le ri, baa dibi bantɔ le, kɛnɛ jɛrɛ jɛrɛ ye bɔla sisen.
\p
\v 9 Ni mɔɔ mɛn ka a fɔ ko a ye taamala kɛnɛ rɔ, ka a tɛrɛn a ye a badenma ɲenematɔmɔnin kɔnna, wo tii ye dibi le rɔ butun. 
\v 10 Mɔɔ mɛn ye a badenma ɲenematɔmɔnin kaninna, wo le ye taamala kɛnɛ rɔ. Foyi tɛ wo tii la, mɛn di a lafili. 
\v 11 Kɔni mɔɔ mɛn ye a badenma kɔnna, wo ye dibi le rɔ. A ye taamala dibi rɔ fanan. A ma a lɔn a ye wala yɔrɔ mɛn na, baa dibi ra a ɲa fuyen.
\p
\v 12 Nba, n na den mɛsɛnilu, n ye sɛbɛ ɲin dila ai ma ka a masɔrɔn ai la julumun da makoto Isa kosɔn. 
\v 13 Failu, n ye sɛbɛ ɲin dila ai ma ka a masɔrɔn mɛn tɛrɛ ye kɛbi dunuɲa ma dan fɔlɔ, ai ka wo lɔn. Kanberenilu, n ye sɛbɛ ɲin dila ai ma ka a masɔrɔn ai ra se Ko Juu Tii la. 
\v 14 Den mɛsɛnilu, n ye sɛbɛ ɲin dila ai ma ka a masɔrɔn ai ka Fa Alla lɔn. Failu, n ye sɛbɛ ɲin dila ai ma ka a masɔrɔn mɛn tɛrɛ ye kɛbi dunuɲa ma dan fɔlɔ, ai ka wo lɔn. Kanberenilu, n ye sɛbɛ ɲin dila ai ma ka a masɔrɔn ai jusulatɛɛni. Alla la kuma ra don ai jusu rɔ. Ai ra se Ko Juu Tii la.
\p
\v 15 Nba, ai kana dunuɲa kanin, ai kana dunuɲa kɔndɔfenilu kanin. Ni mɔɔ ye dunuɲa kaninna, wo tii tɛ Fa Alla kaninna, 
\v 16 baa dunuɲa ko si ma bɔ Fa Alla rɔ: fari nata juu wo, ɲabɔnanfenilu wo, waso dunuɲa nanfulu la wo. Wo bɛɛ bɔni dunuɲa le rɔ. 
\v 17 Kɔni dunuɲa bantɔ le. A ye nata juu mɛnilu bilala mɔɔilu jusu rɔ, wo bɛɛ fanan bantɔ le. Kɔni mɔɔ mɛn ye Alla sawo kɛla, wo ri to kadawu.
\s Ɲenematɔmɔnin juu
\p
\v 18 N denilu, dunuɲa laban waati le ɲin. A fɔra ai yɛ kɔrɔman ko Ɲenematɔmɔnin juu ri na. Awa, Ɲenematɔmɔnin juuilu siyaman da wuli sisen. An ka a lɔn wo rɔ ko dunuɲa laban waati le ɲin. 
\v 19 Mɔɔ woilu bɔra an tɛma, kɔni ii tun tɛ an fen ri, baa ni ii tun ye an doilu ri, ii tun di to an fɛ. Kɔni ii bɔra an fɛ mɛn kɛ ka wa, wo ka a yiraka fewu ko ii si tun tɛ an fen di.
\p
\v 20 Kɔni Mɛn Sɛninman wo ra a Nii Sɛninman najii ai kan, ai bɛɛ a ko lɔn. 
\v 21 N ye sɛbɛ ɲin dila ai ma ka a masɔrɔn ai ka tuɲa lɔn. N ma a di ai ma tuɲa lɔnbaliya kosɔn. Ai ka a lɔn ko wuya si tɛ bɔla tuɲa rɔ.
\p
\v 22 A ye di? Yon ye wuyafɔla di? Wo ye mɔɔ le ri, mɛn ye a fɔla ko Isa tɛ Ɲenematɔmɔnin di. Mɛn ye wo fɔla, Ɲenematɔmɔnin juu le wo ri. A banni an Fa Alla ni a Dencɛ rɔ. 
\v 23 Mɔɔ mɛn banni Dencɛ wo rɔ, Fa Alla tɛ wo tii dafɛ. Kɔni mɛn di a lɔ a la ko Isa ye Alla Dencɛ le ri, wo fanan di Fa Alla lɔn.
\p
\v 24 Nba, ai ka karan mɛn mɛn kɛbi ai la lemɛniya waati, ai ye ai raja wo ye to ai kɔndɔ. Ni wo tora ai kɔndɔ, ai sidini ri to Alla Dencɛ ma, a ni Fa Alla ma. 
\v 25 Ɔɔn de! Ɲenematɔmɔnin ka lahidi mɛn ta an yɛ, wo le ɲin. A ka a fɔ ko a ri ɲenemaya banbali di an ma.
\p
\v 26 N ye ko woilu sɛbɛla ka ai lali mɔɔilu la ko rɔ, mɔɔ mɛnilu ye a kan ka ai lafili. 
\v 27 Kɔni Ɲenematɔmɔnin ka Nii Sɛniman mɛn di ai ma, wo toni ai fɛ. Ai mako tɛ karanmɔɔ la, baa Nii Sɛniman jɛrɛ ye ai karanna fen bɛɛ la. A la karan ye tuɲa le ri. Wuya tɛ a rɔ. Wo le kosɔn, ai sidini ye to Ɲenematɔmɔnin ma ikomin Nii Sɛniman ka ai karan ɲa mɛn ma.
\p
\v 28 N denilu, ai fasani ye to Ɲenematɔmɔnin ma, sa an di landaɲa ba sɔrɔn, a ye nala lon mɛn, a ni an kana maloya a ɲana. 
\v 29 Ai ka a lɔn ko Ɲenematɔmɔnin telenni le. Wo rɔ, ai ka kan ka a lɔn fanan ko mɔɔ mɛn ye taamala telenbaya kan, wo ye Alla den de ri.
\c 3
\p
\v 1 A ragbɛ! An Fa ye an kaninna ɲa mɛn ma, wo ka bon fewu! Fo a ye a fɔla an ma ko a denilu. An ye a denilu le ri jɔ. Dunuɲa mɔɔilu ma Alla lɔn. Wo le ka a kɛ, ii ti se a lɔnna ko andeilu ye a denilu le ri! 
\v 2 N kanintenilu, an ye Alla denilu le ri sisen! Kɔni an di kɛ ɲa mɛn ma, wo ma gbɛ fɔlɔ. Kɔni an ka a lɔn ko Isa Ɲenematɔmɔnin na ko wa lɛnkɛnɛmaya, an bɛɛ ri kɛ ikomin a jɛrɛ ye ɲa mɛn ma, baa a ye ɲa mɛn ma, an di a yen ten. 
\v 3 Mɔɔ mɛnilu jii lani a rɔ ko ii ri kɛ ikomin Isa, woilu ye ii jɛrɛ sɛninya ikomin Isa Ɲenematɔmɔnin sɛninyani ɲa mɛn ma.
\p
\v 4 Mɔɔ mɛnilu bɛɛ ye julumun kɛla, woilu ye Alla la sariya tiɲanna, baa julumun ye Alla la sariya tiɲan de ri. 
\v 5 Ai ka a lɔn ko Isa Ɲenematɔmɔnin nara sa a ri mɔɔilu la kojuu bɔ ii ma. Kojuu si tɛ ale ma. 
\v 6 Mɔɔ si tola Isa ma, wo tii tɛ to hakɛ kɛla. Mɛn tola julumun kɛla, wo tɛ Isa yenna fɔlɔ, a tɛrɛ ma a lɔn. 
\v 7 N den mɛsɛnilu, ai kana sɔn mɔɔ si ye ai lafili: mɔɔ mɛn ye taamala telenbaaya kan, wo telenni le ikomin Isa Ɲenematɔmɔnin telenni ɲa mɛn ma. 
\v 8 Mɔɔ mɛn ye kojuu kɛla, wo ye Kojuu Tii la mɔɔ le ri, baa kɛbi fɔlɔfɔlɔ Kojuu Tii ye kojuu kɛla. Alla Dencɛ nani le ka Kojuu Tii la kɛwaliilu tiɲan fewu.
\p
\v 9 Alla wa mɔɔ mɛnilu kɛ a denilu ri, woilu si tɛ tola kojuu kɛla butun, baa Alla la si ye to woilu ma. Ii ti se tola kojuu kɛla, baa Alla ra ii kɛ a denilu ri. 
\v 10 Alla denilu ni Kojuu Tii la denilu ye faranfaasila ɲa mɛn ma ka bɔ i ɲɔɔn na, wo le ɲin. Mɔɔ mɛn tɛ telenbaya sila taamala, wo tii tɛ Alla ta ri. Mɔɔ mɛn tɛ a badenma ɲenematɔmɔnin kaninna, wo tii tɛ Alla ta ri.
\s An ye an badenma ɲenematɔmɔninilu kanin
\p
\v 11 Ai ka kuma mɛn mɛn kɛbi ai la lemɛniya waati, wo le ɲin, fo an ye an ɲɔɔn kanin. 
\v 12 An kana kɛ ikomin Kabila. Ale tɛrɛ Ko Juu Tii la mɔɔ le ri, mɛn ka a dɔɔcɛ faa. Nfenna a ka a faa? A ka a faa, ka a masɔrɔn a jɛrɛ la kɛwaliilu juu le la, ka a tɛrɛn a dɔɔcɛ la kɛwaliilu telenni.
\p
\v 13 A kana bara ai rɔ, n badenma, ni ai gboman dunuɲa mɔɔilu yɛ. 
\v 14 Andeilu ye an badenma ɲenematɔmɔninilu kaninna. Wo le kosɔn, an ka a lɔn ko an da bɔ saya rɔ ka don ɲenemaya kura rɔ. Mɔɔ mɛnilu tɛ ii badenma ɲenematɔmɔninilu kaninna, woilu ye saya le rɔ butun. 
\v 15 Mɔɔ mɛn ka a badenma kɔn, wo tii ni mɔɔfaala bɛɛ ka kan. Ai ka a lɔn fanan ɲenemaya banbali tɛ mɔɔfaala si bolo. 
\v 16 Isa Ɲenematɔmɔnin ka a jɛrɛ di ka sa an yɛ. An ka kaninteya lɔn wo le fɛ. An fanan ka kan ka an jɛrɛ di ka sa an badenma ɲenematɔmɔninilu nɔ rɔ. 
\v 17 A ye di? Ni fentii ka a yen ko a badenma ɲenematɔmɔnin dɛsɛni don? Ni a ka a ban hinala a badenma ɲenematɔmɔnin wo la, a ri se a fɔla ko Alla la kaninteya ye a fari rɔ wa? 
\v 18 Nba, n denilu, an ye kaninteya mɛn yirakala an badenma ɲenematɔmɔninilu la, wo kana kɛ da rɔ kuma gbansan di. Kaninteya wo ye kɛ kaninteya jɛrɛ jɛrɛ le ri, mɛn ye yirakala an badenma ɲenematɔmɔninilu la an na kɛwaliilu fɛ.
\p
\v 19 Ni an ye an badenma ɲenematɔmɔninilu kaninna wo ɲa le, an di a lɔn ko an ye tuɲa kan. Ni an ye an badenma ɲenematɔmɔninilu kaninna wo ɲa le, an hankili siini ri to Alla ɲakɔrɔ fanan, 
\v 20 baa hali ni an hankili ka a fɔ ko an ye kojuu kɛlailu le ri, an ka a lɔn ko Alla ka bon an hankili ri paaɔn. Ale le ka ko bɛɛ lɔn. 
\v 21 N kanintenilu, ni an hankili ma an jalaki, an di se Alla tarala lemɛniya rɔ. 
\v 22 An ye fen mɛn tarala, a ri wo di an ma, baa an ye a la jamariliilu labatola. An ye a diyanan koilu le fanan kɛla. 
\v 23 A ka jamarili mɛn di an ma, wo le ɲin: an ye lemɛniya a dencɛ Isa Ɲenematɔmɔnin ma, a ni an ye an ɲɔɔn kanin ikomin Isa Ɲenematɔmɔnin ka an jamari ɲa mɛn ma. 
\v 24 Mɔɔ mɛn ye Alla la jamariliilu labatola, wo tii sidini ye tola Alla ma. Alla fanan sidini ye tola wo tii ma. An ka a lɔn ɲa mɛn ma ko a sidini ye tola an ma, wo le ɲin: an ye wo lɔnna Nii Sɛniman de sababu la, a ka mɛn di an ma.
\c 4
\s Wuya kelailu
\p
\v 1 N kanintenilu, wuya nabiilu ka siya dunuɲa rɔ sisen. Wo rɔ, mɔɔ mɛnilu ka a fɔ ko Alla Nii Sɛniman ye ii fɛ, ai kana la woilu bɛɛ la de! Ai ye ii kɔrɔbɔ butun, sa ai ri a lɔn Alla Nii ye mɛn fɛ. 
\v 2 Ai ri a lɔn ɲa mɛn ma Alla Nii ye mɛn fɛ, wo le ɲin: mɔɔ mɛn wa i lɔ a la ko Isa Ɲenematɔmɔnin nara dunuɲa rɔ ka kɛ adamaden di, Alla Nii Sɛniman ye mɔɔ wo fɛ. 
\v 3 Kɔni mɔɔ mɛn ma sɔn i lɔla Isa la ten, Alla Nii tɛ wo fɛ. Wo tii miriya bɔni Ɲenematɔmɔnin juu le rɔ. Ai ka wo la ko mɛn ko a natɔ dunuɲa rɔ. Kɔni sisen a ra na.
\p
\v 4 N denmisɛnilu, ai ye Alla ta le ri. Ai ra se wuya kelailu la, baa Alla Nii ye ai fɛ. Wo fanka ka bon Kojuu Tii ta ri, wo mɛn ye dunuɲa mɔɔilu fɛ. 
\v 5 Wuya kela woilu ye dunuɲa ta le ri. Wo le kosɔn, ii ye mɛn fɔla, wo bɛnni dunuɲa mɔɔilu la miriya le ma. Wo rɔ, dunuɲa mɔɔilu ye sɔnna ii la kuma ma. 
\v 6 Kɔni andeilu ye Alla ta le ri. Mɔɔ mɛn ka Alla lɔn, wo tii ri sɔn an na kuma ma. Kɔni mɔɔ mɛn tɛ Alla ta ri, wo tii ti sɔn an na kuma ma. An di a lɔn wo rɔ Alla Nii Sɛniman ye mɛnilu fɛ, Nii Sɛniman mɛn ye tuɲa yirakala mɔɔilu la. An di a lɔn fanan Kojuu Tii ye mɛnilu fɛ, Kojuu Tii mɛn ye mɔɔilu lafilila.
\s Alla ye a la ko bɛɛ kɛla kaninteya le la
\p
\v 7 N kanintenilu, an ye an ɲɔɔn kanin, baa kaninteya farani Alla le la. Mɔɔ si wa mɔɔ kanin, woilu bɛɛ ye Alla denilu le ri. Ii ka Alla lɔn fanan. 
\v 8 Mɔɔ mɛn tɛ a badenma ɲenematɔmɔninilu kaninna, wo tii ma Alla lɔn, baa Alla ye a la ko bɛɛ kɛla kaninteya le la. 
\v 9 Alla ka a yiraka an na wo le ma ko a ye an kaninna. Baa a ka a dencɛ kelen pe kelaya dunuɲa rɔ, sa an di ɲenemaya jɛrɛ jɛrɛ sɔrɔn dencɛ wo sababu la. 
\v 10 Kaninteya jɛrɛ jɛrɛ ye ɲa mɛn ma, wo le ɲin: ka a fɔ ko ande ra Alla kanin, wo tɛ; kɔni ale ka ande kanin ka a dencɛ lana ka a kɛ saraka di sa an na julumunilu ri makoto.
\p
\v 11 Nba, n kanintenilu, ni Alla ra an kanin ten, an fanan ka kan ka an ɲɔɔn kanin de! 
\v 12 Mɔɔ si ma Alla yen a ɲa la fɔlɔ. Kɔni ni an ka an ɲɔɔn kanin, wo ye a yirakala ko Alla sidini ye tola an ma. Ka a la wo kan, Alla ye an fɛ, a la kanintɛya dafani an dɔ.
\p
\v 13 An ka a lɔn ɲa mɛn ma ko an ye tola le a fɛ, ko a fanan ye tola le an fɛ, wo le ɲin di: baa a ra a la Nii Sɛniman di an ma. 
\v 14 An da a yen an ɲa la ka wo sereya bɔ ko Fa Alla ka a Dencɛ lana dunuɲa rɔ mɔɔilu kisi kanma. 
\v 15 Ni mɔɔ mɛn ka i lɔ a la ko Isa le Alla Dencɛ ri, Alla sidini ye tola wo tii ma. Wo tii sidini ye tola Alla ma fanan. 
\v 16 An ka a lɔn ko Alla ye an kaninna. An da an na lemɛniya la wo kan. Alla ye a la ko bɛɛ kɛla kaninteya le la. Mɔɔ mɛn ye kaninteya sila taamala, wo tii sidini ye tola Alla ma. Alla sidini ye tola wo tii ma fanan. 
\v 17 Kaninteya dafanin an fari rɔ ɲa wo le ma. Wo rɔ, ni Alla la kiti tɛɛ lon sera, an tɛ silan, baa an ye an taamala dunuɲa rɔ ikomin Isa Ɲenematɔmɔnin ka a kɛ ɲa mɛn ma. 
\v 18 Silan tɛ bɔla kaninteya rɔ. Alla ye an kaninna ka a dafa fewu. Wo rɔ, an tɛ silanna muumɛ, baa silan bɔni latɔn ko le rɔ, Alla la kititɛɛ tɔrɔya kɔnin. Mɔɔ mɛn silan, Alla la kaninteya dafanin tɛ wo fari rɔ. 
\v 19 Alla le fɔlɔ ka an kanin. Wo le kosɔn, an fanan ye a ni an badenma ɲenematɔmɔninilu kaninna. 
\v 20 Ni mɔɔ mɛn ka a fɔ ko a ye Alla kaninna, ka a tɛrɛn a badenma ɲenematɔmɔnin gboman a yɛ, wo tii ye wuyafɔla le ri, baa a ɲa ye a badenma ɲenematɔmɔnin mɛn na, ni a tɛ wo kaninna, a ti se Alla kaninna, a ɲa tɛ wo mɛn na. 
\v 21 Alla ka jamarili mɛn fɔ an yɛ, wo le ɲin: a ka a fɔ ko ni mɔɔ mɛn ye Alla kaninna, fo wo tii ye a badenma ɲenematɔmɔnin fanan kanin.
\c 5
\s Ai ye la Alla la sereya la
\p
\v 1 Ni mɔɔ mɛnilu bɛɛ lara a la ko Isa le Ɲenematɔmɔnin di, woilu bɛɛ ye Alla denilu le ri. Ni mɔɔ mɛnilu ka Fa Alla kanin, woilu ri a denilu fanan kanin. 
\v 2 Ni an ka Alla kanin ka a la jamariliilu labato, an di a lɔn wo rɔ ko an ye a denilu kaninna. 
\v 3 Wo rɔ, Alla kanin ye le; i ye a la jamarili bɛɛ labato. Woilu kɛ fanan ma gbɛlɛn an ma. 
\v 4 Mɔɔ mɛnilu ye Alla denilu ri, woilu bɛɛ ye sela dunuɲa la. Mɛn da nɔ sɔrɔn dunuɲa ma, wo ye an na lemɛniya ri. 
\v 5 A ye di? Yon ye sela dunuɲa la? Mɔɔ si ti sela dunuɲa la fo mɛn lani a la ko Isa ye Alla Dencɛ le ri.
\p
\v 6 Isa Ɲenematɔmɔnin de nara ji ni jeli fɛ. A ma na ji gbansan fɛ de! A nara ji ni jeli fɛ. Nii Sɛniman ye sereya bɔla ko tuɲa le wo ri, baa ale le tuɲatii ri. 
\v 7 Sere sawa ye ye: 
\v 8 mɛn ye Nii Sɛniman ni ji ni jeli le ri. Wo sawa bɛɛ bɛnni kan kelen ma. 
\v 9 Mɔɔilu ye sereya mɛn fɔla, an di la a la ko wo ye tuɲa ri. Kɔni Alla ye sereya mɛn fɔla, wo ka bon mɔɔilu ta ri. Alla ka sereya mɛn fɔ, wo le ɲin: a kumara a Dencɛ la ko rɔ. 
\v 10 Ni mɔɔ mɛn lemɛniyara Alla Dencɛ ma, wo tii ra sɔn Alla la sereya wo ma ka wo lamara a jusu rɔ. Kɔni ni mɔɔ mɛn ma la Alla la kuma la, wo tii ra Alla kɛ wuyafɔla ri, baa Alla ka sereya mɛn fɔ a Dencɛ la ko rɔ, wo tii ma la wo la. 
\v 11 Alla ka sereya mɛn fɔ, wo le ɲin: a ka a fɔ ko a ra ɲenemaya banbali di an ma, ko ɲenemaya wo ye sɔrɔnna a Dencɛ le fɛ. 
\v 12 Mɔɔ mɛn sidini Alla Dencɛ ma, ɲenemaya banbali ye wo tii bolo. Kɔni mɔɔ mɛn sidini tɛ Alla Dencɛ ma, ɲenemaya banbali tɛ wo tii bolo.
\s Jii mɛn ye lemɛniya mɔɔilu bolo
\p
\v 13 N ye sɛbɛ ɲin nawala ai ma, ai mɛnilu lemɛniyani Alla Dencɛ ma, sa ai ri a lɔn ko ɲenemaya banbali ye ai bolo. 
\v 14 An lani a la fewu ko ni an ka Alla sawo la ko si si tara a la, a ri an na tarali wo mɛn. 
\v 15 Ikomin an ka a lɔn ko a ye an na taralilu mɛnna, an ka a lɔn fanan ko an da ko si si tara a la, a ye wo dila an ma.
\p
\v 16 Hakɛ do ye ye, mɛn tɛ mɔɔ lawala saya ma. Ni ai do ka a badenma ɲenematɔmɔnin yen hakɛ su wo kɛla, a ye Alla tara wo yɛ. Alla ri tarali wo mira ka ɲenemaya jɛrɛ jɛrɛ di a ma. Mɛnilu la julumun ti nala ii lawala saya ma, n kan ye woilu le ma. Kɔni julumun do ye ye, mɛn di mɔɔ lawa saya ma. N ma a fɔ ko ai ye Alla tara wo tii yɛ. 
\v 17 Telenbaliya ko bɛɛ ye julumun de ri. Kɔni julumun do ye ye, mɛn tɛ kɛla mɔɔ sa kun di.
\p
\v 18 An ka a lɔn ko mɔɔ mɔɔ kɛra Alla den di, wo tii tɛ tola hakɛ kɛla, baa Alla Dencɛ ye wo tii lakandanna. Wo rɔ, Ko Juu Tii ti se ko kɛla a la.
\p
\v 19 An ka a lɔn ko an ye Alla ta le ri, kɔni dunuɲa mɔɔilu bɛɛ ye Ko Juu Tii fanka le kɔrɔ.
\p
\v 20 An ka a lɔn fanan ko Alla Dencɛ nara ka hankili di an ma, sa an di Alla jɛrɛ jɛrɛ lɔn. An sidini Alla jɛrɛ jɛrɛ ma, baa an sidini a Dencɛ Isa Ɲenematɔmɔnin ma. Ale le Alla jɛrɛ jɛrɛ ri. Ale le fanan ye ɲenemaya banbali dila mɔɔilu ma.
\p
\v 21 N na den mɛsɛnilu, ai ye mataa joo koilu ma.