\id TIT - Mian NT [mpt] -Papua New Guinea 1986 (DBL 2014) \h Taitas \toc1 Fole futan olo dolanea Taitase omfubasebe. \toc2 Taitas \toc3 Tai \mt1 Taitas \mt2 Fole futan olo dolanea Taitase omfubasebe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 35 ese mak blimanota Fole futan olo dolaneta Taitase omfubanebiobe. Taitas ele Glikobe. Am mak dimo e Fole bekeba haabinabe otane yo dimo e aa ubile niniino Klit ye bianea Yesuse bainobo galin nakaia unangai kima bieta Fole futan olo dolanea Taitase omfubanea bainobo galin nakaia unangai kimanin kukubo hekmel wengo omanea Kla inanebta kimanale ge baabanebiobe. Weng olo makob 1 Timotio ulabobe. \io1 \it 1:1-4 \it* Mikiktem wengobe. \io1 \it 1:5-16 \it* Bainobo galin nakaia unangai kimanin nakai wengobe. \io1 \it 2:1-15 \it* Yesuse bainobo galin nakaia unangai kukubo namino wengobe. \io1 \it 3:1-11 \it* Fole Taitase tekein kemin wengo baabasebe. \io1 \it 3:12-15 \it* Mubiang wengobe. \c 1 \p \v 1-4 Ae Taitas kobo ne Fol neta keb futan olo dola omfubkenamabibe. Nib dabo Yesus Klaiste bainobo gabuobe. Sino ne Yesus Klaiste wengo kobo omkake bia bainobo genebbio kesoa kobo makob ne miinobe. Ne keb futan olo dola omfubkenamabibe. Ne Gode okok naka eka Klaiste okok namasanin naka na netabe. Ne Yesus Klaiste wengo nakaia unangai omkayebi kesoa nakaia unangai Gode dlakanebuei e weng olo wente bianiba bainobo geniba Gode moton wengo kla tekein keniba sbalma wafunomabiobe. Sinanggwano Gode dabal ele mo klaim blim bio dimo e moton wengo baanea Ne nakaia unangai ne bainobo genimibi dleb ut daya amit nomabiobo genebio e wengo dimbabe. E wengo amitie bain weng obinabebe. Ne weng olo nakaia unangai aleyebi kesoa i weng olo tekein keniba Yesuse imin tenea dleb utnea abilim ut danea amit nomabibo waiso bliobe. Sinanggwano Gode amo kinea yo dim ota ne moton wengo omyano genebuo amo yo tlo kesoa yo dimo e moton wengo naka maki omkayebea i omeb moniba naka mak unang maki omkayebiba wente binibbiobe. Eka Gode nibo hengmino temo biobo dotlanebio nakae e weng olo nesa omnenea baatnenea Kobo ne weng olo naka mak unang maki omkayemale ge baatnene biobe. Nib Aye God esa eka nibo hengmino temo biobo dotlanebio nakae Yesus Klaist esa kobo daake bianiba bobol ayam omkakemine! \s1 Taitase Klit bib ye bianea Gode okoko okok kebisebe. \p \v 5 Ne weng olo kobo baabkenamabio sino ne baabkenia Kobo Klit bib ele bianeba bainobo galin nakaia unangai bib olo seli daaye bianeba Gode kukub ayamo aleye bianeba eka ne okoko okok kemdenia atosino deibo unamabio klana bianeba eka bainobo galin nakaia unangai Klit betano bib mak bib mako blibi i kimanin nakai dlakaneba i bainobo galin nakaia unangai kima tlaine ge baabke tlibio weng ota ne imin baabkenamabibe. Kobo ne weng olo kla fumbianeba bainobo galin nakaia unangai kimanin nakai dlanale! \v 6 Bainobo galin nakaia unangai kimanin nakae kukubo inaminobe. E kukub ayam wafu bia nakaia unangai e kukubo ateniba funaniba E kukubo ayamobo ge funaine! Eka e alelwali asuo mo dlamene, olokiem olota omeko! E meme isa Yesus Klaiste bainobo geine! E memei kukub ayamo kla wafu bianibte! I ili bobol tem funino mo wafu bianibta i awok aloki wengo mo omdibiyemibe! Kobo nakai kukub ayamo wafu blib ita dlanebta bainobo galin nakaia unangai maki kimaine! \v 7 Nakai Gode okoko okok kebianiba Gode bainobo galin nakaia unangai kimanib mole i kukub ayam wafu bliba nakaia unangai i kukubo yateniba baaniba I kukubo ayamobo gabibte! I mo funanibta Ni nakaia unangai kimanin naka sumobo ge funimibe! Eka i alo mo tliaubenomone! I aay misiamo mo dowonibta gabam tol temo mima fubenota weng namin namin nimibe! Eka i awao mo genalaibe! Eka i monio bobolo mo fumbianibta Naka mak unang maki dim baabenoba Monio oisenomo ge funimibe! \v 8 Naka mak unang maki i bibo tlib mole i imeno doyine! I bobol temo klayam fumbianiba kukub ayam ota wafueine! I Gode hekmel wengo kla wafu bianiba okok kebianiba kukub misiamo i bobol temo funaib mole baaniba Yeye, ni kukub olo mo gobo biobbabo geniba kukub ayam ota wafueine! \v 9 Ni Yesuse weng moloto i omkaye binobbio i nekek ge wafu bianiba isak weng molot olo naka mak unang maki aleyebiba bain weng olo nakaia unangai bobol temo daabenoko! Eka i weng molot olo naka mak unang maki weng moloto mo wentaobbabo geniba weng omdibibibi omkayebiba i wenteniba tekein keniba Ni kukubo misiamobo geine! \s1 Nakaia unangai homoni Klit betan ye blibi dim omin wengo obinibbiobe. \p \v 10 Ibo nakaia unangai weng moloto alebeine! Niminbabe, naka homon unang homoni Gode wengo omdibi bianiba maki baaniba Nakai Yesuse okoko okok kebib mole i aalo waketoumine ge obianiba i Gode wengo wentemino deiboniba wengo mitmakam blim ota obianiba eka dim weng ota obiam bliba naka mak unang maki i dim omin weng olo wente bianiba bainobo gabiobe. \v 11 I Monio oisenomo ge fumbib kesoa i naka mak unang maki dim omin wengo aleyebiobe. I weng misiam olo aleyebiba naka mak unang mak isa i meletan isa i weng misiam olo wenteniba isa bobol tem misiam fumbiobe. Kobo dim omin naka eli baabeneba Weng olo deibueine ge baabenale! \v 12 Sinanggwano Klit naka make Klit betan ye bia nakaia unangai oha bianiba E naka gang kesoa e wengo motonobo ge ohabiba e baanea Klit teni amitie dim omin weng ota obianiba eka bobol tem misiam fumbiam bianiba kukub misiamo makob eil halebi kukub ota wafu bianiba okoko deiboniba bisiabala bianiba imen homono wembiobo genebiobe. \v 13 E weng olo bainobe. Kobo Klit teni sbal weng oye bianeba weng misiam olo deibueine ge oyebeba i bobol tem ayam ota fumbianiba Yesus Klaiste bainobo geine! \v 14 Eka i Yudai faninwali dim omin weng sango imaye ili bobol tem funaniba obib osa eka naka maki Gode wengo omdibi bianiba baaniba Ibo ni kukub olota namine gabib osa deibueine! \v 15 Naka maki i bobol tem funino ayam bianiba Gode bobolo fumbibi baaniba Inamin namino dabalim olo buo alukum ayamobo, o awembabo gabiobe. Eka maki Yesuse mo bainobo gabibbai i bobol tem funino misiam kesoa i baaniba Inamin namino alukum misiamobo gabib kesoa i bobol tem funino misiamobe. I hengmino hengabibo mo tekein kebibbabe. \v 16 Naka misiam eli baaniba Ni Gode wengo wafu biobobo gabib otane i Gode kukubo mo wafu blibba kesoa nibo yatenoba tekein kebuobe. I wengo dim obiobe. I Gode wengo mo wafu blibbabe. I Gode wengo omdibihabib kesoa e i kukubo mo gobo biebabe. Naka eli Gode wengo mo wentim blim kesoa i kukub ayamo mo wafunomabibbabe. \c 2 \s1 Weng ayam ota amitie wafu nine! \p \v 1 Ina otane kobole ni Gode weng ayamo alebkenobbuo weng ota naka mak unang maki aleyemale! \v 2 Kobo hangkalebminwali baabeneba Ibo aay misiamo mo dowonibta weng namin namin nimibe! Ibo kukub ayam ota wafu bliba naka mak unang maki yateniba baaniba I naka ayamobo ge oyebiba ibo bobol tem funin ayam osa kukub ayam osa kla wafu bianiba ib bainobo galino sbal maniba naka mak unang maki gobe bliba eka naka mak unang maki teniba ibo enino omkayemibo ib bainobo galino sbal maine ge baabenale! \p \v 3 Eka konokmonwal isa baabeneba Ibo Gode bobolo fumbianiba e kukubo kla wafueine! Ibo naka mak unang maki weng dobo wengo mo oye bianiba eka aay misiamo mo wembiam nimibe! Ibo unang maki kukub ayam ota aleyemine ge baabeneba \v 4 eka isak unangi souwali imaksai baabeniba Ibo ib imakwal isa meme isa kla gobe bianiba \v 5 ib bobol tem funin ayam osa kukub ayam osa kla wafueine! Ibo bobol tem misiamo mo funanibta Ni imakwali deibenoba naka elita taman deib dletnine ge fumbianibta mo inamibe! Ibo ib amo okoko kla okok kebianiba eka naka mak unang maki daaye bianiba ib imakwali wengo kla wente biam bliba naka mak unang maki ib kukubo nabibo yateniba Gode weng dobo wengo ohamino deibueine ge baabeine! \p \v 6 Eka kobo naka tembali baabeneba Ib bobol tem funin osa ib kukub osa kla kimaine ge baabenale! \v 7 Eka Taitas kobole kukub ayamo sbalma wafu bieba i keb kukub nabebo kateniba isa kukub ayamo yota wafueine! Kobo Gode kukubo i aleyemabebo bain weng ota i aleyemale! Dim wengo mo oyemebe! \v 8 Kobo bain wengo naka mak unang maki omkayebebo amitie oyemale! Kobo inamebo naka mak unang maki mo oke bianibta E weng olo misiamobo ge okemomabibbabe. Kobo inameb mole nakaia unangai keb weng olo omkayebebo weng dobo weng okebibi aalo waisenamabobe. Niminbabe, i tekein keniba nib wengo molot kesoa i weng misiamo imino mo baabenomabibbabe. \p \v 9 Kobo nakai moni okokba besa okok keyemin nakai baabeneba Ibo ib kimanin nakai wengo kla wenteye bianiba okoko kla okok kebiba i ibo seinyemine! Ibo ib kimanini weng misiamo mo oye bianiba \v 10 i afobeingo ayoko mo henye biam nimibe! Ibo ib kimanini okoko amitie kla okok kebiba i ibo oye bianiba I naka molotobo, i Gode wengo wente bianiba okoko kla okok kebib kesoa nib hengmino temo dotlanebio nakae Gode wengo ayamobo ge omine ge baabenale! \p \v 11 Gode nakaia unangai daabenano gene kesoa e miine Yesus Klaiste dabanea daakenea dabalim ele tlanea at dimo kaanea nibo hengmin temo blibo dotlabenebio kesoa nibo amit nomabbiobe. Nibo yo tekein kebuobe. \v 12 Sino nibo Gode wengo omdibi bianoba dabalim olo kukub misiam ota wafu biob otane memalo Gode nibo daabenea kukub ayamo alebene kesoa nibo kukub misiam olo deibonobbiobe. Memalo nibo bobol tem funin ayam osa kukub ayam osa ota wafu bianoba Gode bobolo fumbianoba e wengo wafu biobobe. \v 13 Nibo ina bianoba nib Sume Gode tlamabeo waisa biobobe. Am olo dim ota nib hengmino temo dotlanebio nakae Yesus Klaiste e titilo ayal inamin tubuein kenebua tlea nakaia unangai atemomabiobe. \v 14 Sino e abilim ut bie dimo e funanea Ne daatnia atdimo kaania nakaia unangai hengmino walubenano genea daakenea atdimo kaanea nib hengmino walubenebio kesoa nibo kukub misiamo deibonoba bobol ayam fumbianoba e naka an e unang an nabianoba E kukub ayamo kla wafunomo gabuobe. \p \v 15 Kobo weng olo nakaia unangai omkayemale! Kobo bainobo galin nakaia unangai kimanin naka kesoa i sbal weng oye bianeba Ibo kukub misiamo deiboniba kukub ayam ota wafunine! Ibo ne weng olo mo omdibimibe ge baabenale! \c 3 \s1 Bainobo galini kukubo wengobe. \p \v 1 Kobo bainobo galin nakaia unangai keb bibo blibi weng olo imin baabeneba Ibo ib kiabwal isa eka bib mak bib mako komokwal isa i wengo kla wenteye bianiba wafu bianiba ib okoko ayam okok kebianiba i daayemine! \v 2 Ibo naka mak unang maki weng dobo wengo mo oye bianiba eka dleb weng osa mo oye biam nimibe! Ibo nakaia unangai alukum weng fiab omkaye bianiba daaye biam bianiba kukub ayam ota omkayemine ge baabenale! \p \v 3 Sino nibo Yesus Klaiste wengo mo wente bianoba wafu nim blim binobbio dimo nibo bobol tem misiam fumbinobbiobe. Nibo inaboba kukub misiam ota nibo yafubua Gode wengo omdibiha bianoba dim omin weng ota wente bianoba ninib bobol tem funin misiam ota wafu bianoba kukub misiam ota nabinobbiobe. Nibo naka mak unang maki kukub misiam omkayemomo gabianoba i inamin namino bobolo wayebua nibo i mo gobenim blim kenoba eka isak nibo mo gobenim blim kesib binobbiobe. \v 4 Ina otane nibo hengmino temo biobo dotlanebio nakae Gode nibo gobenea dohalilanea nibo hengmino temo biobo dotlanebiobe. \v 5 E nibo kukub ayam wafu biobta yateneta nibo hengmino temo biobo dotlanebua bleka? Yeye. E ele bobol tem ye dohalilaneta nibo hengmino temo biobo dotlanebiobe. E nibo daaye bianea bobol tem funin ayamo omyenea eka e Hobe bobol tem funin ayamo memao omyenanebio kesoa nibo kukub ayam wafu binabuobe. \v 6 Yesus Klaiste nibo daabenea nibo hengmino temo biobo dotlanea Gode Hobe nibo dobyebio kesoa e nibo kla daaye binabebe. \v 7 Yesus Klaiste nibo daabenea nibo hengmino temo biobo dotlanebio kesoa nibo Gode yatenea baabenea Ne kin dimo ibo hengmino blimobo, ibo ne baka bianiba amit nomabiobo ge baabenamabe amo waiso biobobe. \p \v 8 Ne weng ele baabei olo bain baabeiobe. Ne bobol temo fumbio Kobo weng olo nakaia unangai sbal weng oyemale gabi kesoa kobo weng olo Gode bainobo galin nakaia unangai oyebeba i weng olo wente bianiba i bobol temo ayam ota fumbianiba okoko ayam ota okok kemine! Ne weng olo kobo baabkenamabio ayamobe. Nakaia unangai weng olo wentemib mole o i daayemabobe. \p \v 9 Kobo naka mak unang maki wengo mitmakam blimo mo oye bianebta dleb wengo mo oyemebe! Eka kobo Yuda ni faninwali besa weng sango mo wafu nemebe! Kobo Yuda nakai hekmel wengo dleb wengo mo oyemebe! Weng olo nakaia unangai mo daabenomobabe. O i bobol tem funino watwat dabenamabobe. \v 10 Naka make tenea bainobo galin nakaia unangai wengo omkayemsea wenteniba belalananiba maki e wengo bainobo gesib eka maki baaniba E wengo misiamobo gesib bianiba i sbal weng baase baase nib mole kobo naka ele baabaneba Kobo weng olo deibonale ge baabanale! E keb wengo mo wentim blim kene mole kobo imin baabaneba Weng olo deibonale ge baabanale! Kobo imin inaneba baabaneba osa mo wentim blim kene mole kobo temdeibanale! \v 11 Niminbabe, kobo tekein kebeobe, naka ele bobol tem funin ayamo deibonea bobol tem funin misiam ota fumbianeta kukub misiam ota wafu biebe. Kobo e kukubo atem tekein kebianeba E kukubo misiamobo gabeobe. \s1 Mubiang wengobe. \p \v 12 Ne Atemas etia Tikikas etia mak dabaia monea kebsu natlameo dimo kobo hebmamsab teneba Nikobolas bib ele tele! Glol sume tlebianea aaye mousie ha tlemabe kesoa ne Nikobolas bib ele biamabibe. \v 13 Kobo hekmel weng tekein kemin nakae Sinas esa eka Abolos esa i bib mak unomabib kesoa kobo daabeneba imeno oyebta oletnibta unine! \v 14 Ne bobol temo fumbio Yesuse bainobo galin nakaia unangai alukum naka mak unang maki daaye bianiba okoko klayam okok kebianiba i naka mak unang maki inamin namino blim bibe biamo i dokaye biam bianiba okok kebianibte! I besao mo nimibe ge fumbibe. \p \v 15 Nakaia unangai alukum ne baka blibi kobo baabkeniba Ayam biebte ge baabkeibobe. Bainobo galin nakaia unangai kobo baka bianiba ni gobe blibi baabeneba Klayam blibte ge baabenale! Gode ibo alukum daabeneko! Ne wengo bayotabe. Ne Fol neta keb futan olo dola omfubkenamabibe.