\id PHP - Mian NT [mpt] -Papua New Guinea 1986 (DBL 2014) \h Filibai \toc1 Fole futano Filibai bib seli dola omfubesebe. \toc2 Filibai \toc3 Fil \mt1 Filibai \mt2 Fole futano Filibai bib seli dola omfubesebe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 32 ese mak blimanota Fole klabutam bianeta futan olo dolaneta Ebaflodaitase omaleta omeb moneta Yesuse bainobo galin nakaia unangai Filibai bib ye blibi omyebiobe. Sino Fole monea Filibai bib ye bianea Gode wengo omkeimabea nakaia unangai maki Yesuse bainobo geibbiotabe. (Abosel 16:11-40) Sinanoa Fole klabutam bieta Yesuse bainobo galin nakaia unangai Filibai bibo blibi monio olminiba Ebaflodaitase olaliba oleb monea Fole olaleta e gangobo geneta futan olo dola omfubenebiobe. Fole klabutam bie dimo e fumbianea Ne Klaiste tena biobabo genea seimbe kesoa e funanea Filibai bib sel isa inangge fumbianiba seinine ge funaneta futan olo dola omfubenebiobe. \io1 \it 1:1-11 \it* Mikiktem wengobe. \io1 \it 1:12-26 \it* Fole kukubo nabinebuo wengobe. \io1 \it 1:27–2:18 \it* Klaiste kukubo nabinebuo wengobe. \io1 \it 2:19-30 \it* Timoti esa Ebaflodaitas esa i weng sangobe. \io1 \it 3:1–4:9 \it* Yesuse bainobo galin nakaia unangai kukubo namino wengobe. \io1 \it 4:10-20 \it* Fole Filibai bib seli Gangobo ge baabenebuo wengobe. \io1 \it 4:21-23 \it* Mubiang wengobe. \c 1 \p \v 1 Fol nesa Timoti esa ni dabo Yesus Klaiste okok nakabe. Ni Yesus Klaiste bainobo galin nakaia unanga ibsa eka ib kimanin naka isa eka ib komokwal isa Filibai bib ye blib ibo ni futan olo dola omfubenomabbiobe. \v 2 Nib Aye God esa eka Sume Yesus Klaist esa i dumo ibo daaye bianiba bobol ayam omkayemine! \s1 Fole Gode gangobo ge baabasebe. \p \v 3 Ne ib bobolo funimio Gode gangobo ge oha binabibe. \v 4 Ne Gode baabania Kobo i daabenale ge oha biania seinbibe. \v 5 Niminbabe, sino ibo Gode wengo nena wentib dim ye kiloniba ne daanem tlibbuo memalosa sma ye daanebiba Ne Yesus Klaiste dowan weng ayamo omkeimabibe. \v 6 Ne tekein kebibe, sino Gode ibo daabenea bainobo geibbio memalosa e sma daaye bianea ib bainobo galino sma ye omsbal sanyebebe. Sinanoa Yesus Klaiste imin daak te dabalim ele tlame dim ota e daayemin kukubo blimanoa deiboneta nibo ayam nomabbiobe. \p \v 7 Ne ib bobolo fumbiania ibo kla gobe blio ayamobe. Niminbabe, ne sino bib mak bib mako haabiania Gode wengo nakaia unangai omkaye biania baabenia Weng olo bainobo ge oye binibuo dimo daane binibbua eka memalo ne klabutam bli olo dim osa ibo ne okok olo daanebib kesoa Gode nib sinwalo daaye bianea kukub ayamo omkayebebe. \v 8 Ne ibo gobe blio makob Yesus Klaiste nibo kla gobe binabe inania ibo kla gobe blibe. Gode tekein kebebe. \p \v 9-10 Ne Gode baabania Kobo i daabeneba i naka mak unang maki kla gobesese bianiba eka i keb bobolo fumbianiba kukub ayam osa kukub misiam osa tekein keine! ge ohabibe. Ibo inaniba kukub misiam osa kukub ayam osa tekein kenimibo kukubo dot ayam ota wafuniba kukub misiamo deibonomabiobe. Ibo inabib biamo Klaiste imin tenea nakaia unangai kukubo klanang game dimo ibo baabenea Ibo naka molot unang molotobo ge baabenamabebe. \v 11 Ibo Yesus Klaiste bainobo gabiba e ibo daayebe kesoa ibo inamin namin kukub ayam ota wafunomabiobe. Ibo amitie kukubo ayam ota wafu bliba nakaia unangai ib kukubo ayamo nabibo yateniba baaniba Gode niniino dot sumobo geniba e niniino dobtouleb nine getabe. \s1 Fole klabutam bie dimo e Gode weng ayamo omkeima bisebe. \p \v 12 Ne nekwal ibo olo tekein keine! Inamin namin kukub misiam olo ne dimo tam tlebo otane Gode weng ayamo mo watatneim blimobe. Ne sma Gode wengo omkayebi kesoa nakaia unangai homoni Gode wengo wenteniba bainobo gabiobe. \v 13 I inabib kesoa Lomo komok sume Sisae awa genalin naka isa eka nakaia unangai maki am olo blib isa i tekein kebiobe. Ne Klaiste okok naka kesoa nakaia unangai ne klabuto ge nemeb teniba klabutam ele daibbiota blibe. \v 14 Ne klabutam bli kesoa Sume bainobo galin naka mak unang maki funaniba Fole klabutam bie otane Sume daahabea e mo tosiambeba kesoa Sume nisa inanea daabenamabebo ge fumbianiba isa mo tosiambibbabe. I sbal maniba Gode wengo naka mak unang maki aleyebiobe. \p \v 15 Naka maki Klaiste wengo naka mak unang maki omkayebib otane i ne okoko bobolo wabesoa i funaniba Ni Fole dobtlanoba nita bainobo galin nakaia unangai kimanomo gabiobe. \v 16 Otane maki bobol tem ayam bianiba Gode wengo nakaia unangai omkayebib ile tekein kebiobe. Gode ne baatnenea Kobo klabutam bianeba ne wengo omkeimamale gene kesoa ne klabutam biania Klaiste wengo omkeima bia i kla gotne bianiba isak Klaiste wengo omkeimabiobe. \v 17 Ina otane naka maki ne okoko bobolo wayebua nemsuambib nakai i Klaiste wengo omkayebib otane i bobol tem funino ayambabe. I funaniba Nakaia unangai ni weng olo wenteniba bainobo geniba ni niniino dotouleb bianiba Fole klabutam bianea e wengo omkeimabeo deibaniba ni weng ota wentemiba e wentenea bobolo ilum omfubanoko ge fumbib kesoa i Klaiste wengo omkeimabiobe. \p \v 18 I inamibo ne bobolo ilumo mo omfutnenomobabe. Ne seinamabibe. Maki Gode bobolo fumbianiba e wengo omkeimabiba eka mak ile ili bobol tem funin ota wafu bianiba Klaiste wengo omkeima biam blib mole nakaia unangai Klaiste weng olo wentomabib kesoa ne seimbibe. \v 19 Ne amitie seinamabibe. Niminbabe, ibo Gode nganha bianiba Fole daabanale gabiba eka Yesus Klaiste e Hobe ne dobnea daatnenea i ne klabuto tileitnenomabib kesoa ne seimbibe. \v 20 Sino ne mo tosianim blim sbalma biania Gode wengo omkeima binibuo memalosa ne mo tosianamabibabe. Ne sbalma biania Gode wengo omkeimamabibe. Ne ina bini biamo sinanomo Yesuse tlameo ne aalo mo genalamibabo ge fumbibe. Ne inanamabi kesoa ne afen biami osa eka kaanimi osa nakaia unangai ne nateniba baaniba Klaiste niniino sumobo geine! \v 21 Ne bobol temo fumbiania Ne afen biania Klaiste okoko okok kemi mole kukub olo ayamobe. Eka ne kaania monia Yesuse bibamo uni mole olo dot ayamobo ge fumbibe. \v 22 Ne sma afen biania nakaia unangai Gode wengo omkaye bia maki bainobo genib mole kukub olo ayamobe. Eka ne kaanimi osa ayamobe. Ne mo tekein kebibabe. Ne afenang gami ne kaanang gami osa ne klao mo tekein kebibabe. \v 23 Ne bobol asusu blibe. Ne kaania monia Klaiste tenanob mole olo dot ayamobe. Ne kaanano gabibe. \v 24 Ina otane ne ibo daayemano ge fumbi kesoa ne afen biania ibo daayemio olo dot ayamobo gabibe. \v 25 Ne tekein kebibe, ne sma afen biania ibo daaye bia ib bainobo galino sbal manomabiobe. Ibo inaniba ib bainobo galino sbal maib mole ibo seinomabiobe. \v 26 Ne inanamabi kesoa ne monia ibsuo natlamio ibo seimbianiba funaniba Yesus Klaist eta dabanea tlebo ge fumbiba nibo Yesus Klaiste niniino dobtouleb nomo getabe. \s1 Filibai bib seli maki Fole tenaniba Gode wengo omkeima binibbiobe. \p \v 27 Inamin namino ne dimo tam tlebo olo ibo o bobolo mo funimibe! Ibole Yesus Klaiste dowan wengo ne aleyebi ota kla wafueine! Kukub olo kukub afeto gaisonobiobe. Inanomabib kesoa ne ibsuo imin natlamio ayamobe. Eka ne ibsuo mo natlim blim kenimio naka maka ye te baatneniba Filibai bib seli bainobo galin nakaia unangai i bainobo galino sbal maniba i okoko makob okok kebianiba eka i bobol tem funino makob aniba fumbianiba Naka mak unang maki Yesus Klaiste dowan wengo wenteniba bainobo geine ge fumbianiba aleyebiobo ge baatnenimib nakai weng ota wentamabibe. \v 28 Ibo Yesuse bainobo gabib kesoa naka mak unang maki kukub misiamo ibo omkayebiobe. Ibo nakaia unanga eli tolo mo tosianimibe! Ibo ib bainobo galino sbal maine! Ibo inanimibo i yateniba funaniba I Gode daabebia i mo tosiambibbabe, i bib ayam bianiba amit nomabiobo, otane nib ole Gode dlanea aseinin bib unomabbiobo ge funanomabib kesoa ibo i tolo mo tosianimibe! Gode ibo daabenea amit nomabiobe. \v 29 Gode ibo dlakanea baabenea Ibo Yesus Klaiste bainobo geine ge baabenea eka weng mak osa baabenea Ibo Yesus Klaiste wengo omkeimamomabibo dafa ota naka maki teniba enino omkayemomabiobo ge baabenebiobe. \v 30 Sino ne Gode wengo nakaia unangai omkayebi kesoa naka mak unang maki Gode wengo mo bainobo gabibbai ne enino omkane binibbua memalosa imin omkanebibo ibo kukub olo tekein kebiobe. Memalo ibsa Gode wengo omkeimabib kesoa i enin olo nib sinwalo omkayebiobe. \c 2 \s1 Ibo ib bobol tem funino makob aine! \p \v 1 Ibo Yesus Klaiste bainobo gabiba e ibo daabenea sbalma bliba bleka? E ibo daabenea sbalma bliobe. E ibo gobe bie kesoa ibo bobol ayam bliobe. Gode Hobe ibo bekebe bia ibo seinbiba bleka? Gode Hobe ibo bekebe bie kesoa ibo seinbiobe. Ibo ib sinwalo dohalila daabesese blib bleka? Ibo inabib kesoa \v 2 ib bobol tem funino makob aniba ib sinwalo maki gobesese bianiba ib okok osa bobol temo makob aniba dait okok kemine! Ibo inanimibo ne seinamabibe. \v 3 Ib okoko sbal okok kemibo mo funanibta Ni inanoba sbal okok kemoba naka mak unang maki yateniba ni niniino dotouleb nine ge funanimibe! Eka ib okok ayamo okok kemibo naka mak unang maki mo baabenibta Ni okoko ayam okok kebuobo genimibe! Eka ibo mo funanibta Naka maki ayam otane nita i gaisenobbiobo ge funanimibe! Ib bobol temo fumbianiba naka mak unang maki ni gaiseibbiobo ge funine! \v 4 Ibo mo funanibta Ninita ye biobabo gabianibta ilib okoko olota mo okok kemibe! Ibo naka mak unang mak isa dohalim bianiba i okoko daayemine! \s1 Gode Yesus Klaiste niniino dobtouleb binebiobe. \p \v 5 Ibo ib bobol tem funino makob Yesus Klaiste bobol tem fumbe inamin fumbianibte! \q1 \v 6 E makob Gode ulab otane e mo funaneta Gode komok sum kesoa nesa komok sumobo ge funaim blimobe. \v 7 E funanea Ne daaknia unango amun tem wat unia nemfanomo ne mo funanita Ne komok sumobo ge funanimibabo gene kesoa e daakenea unango amun tem wat unea dofanoa damanea makob okok nakai ulab anea naka moton am binebiobe. \v 8 E nakaneo ele untako mo nganim blimobe. Gode baabanea I kobo kanaiba kaanale gene kesoa e Ae genea i makob naka misiami inaiba kaanabib inaniba e atdimo dabasaniba silo bikiniba anaiba kaanebiobe. \v 9 E inane kesoa Gode baabanea Kobo Sum aneba inamin namin afeto alukum gaisonebobo ge baabanea eka e niniino Sum ge nganabanebuo e niniin olo niniin afeto gaisonobiobe. \q1 \v 10 E inanebio kesoa abisel isa nakaia unangai abilim ut blib isa dabalim ele blib isa eka nakaia unangai kulilaibbio isa Yesuse niniino wentaibo i dlong dlong golbuaniba e niniino dobtouleb bianiba \v 11 baaniba Yesus Klaiste Sumobo ge baanomabiobe. I inangge baanimibo naka mak unang maki i wengo wenteniba baaniba Aye God esa e niniino Sumobo geniba e niniino dobtouleb nomabiobe. \s1 Nibo makob ayal inamin einomo! \p \v 12 Ne nekwal ibo ne sino ibo baka blio ibo ne wengo wenteniba nene weng baanimi iwat ina binibbiobe. Memalo ne skeim bli kesoa ibo ne wengo kla wente bianiba nene weng baanimi iwat ina bianibte! Ibo Gode wengo kla wafu bianiba funaniba Ni Gode wengo deibonomobo misiamobo ge fumbianiba tosiam bianibte! Ibo Gode wengo wente bianiba e okoko sbalma okok kebiba sinanoa Yesuse imin tlameo ibo dletnea ula abilim unine! \v 13 Gode ibo bekebe bianea bobol tem funino omkayebe kesoa e ibo baabenea Ibo inamin namin yo inaine genemeo ibo e wengo wenteniba goboniba inanomabiobe. Eka e titilo ibo omkayebe kesoa e ibo baabenea Olo naine ge baabenemeo ibo kla inanomabiobe. \v 14 Ibo okoko okok kebib biamo weng omdibimina dleb wenga o deibonibta besa okok bianibte! \v 15-16 Ibo inamib mole Gode meme aniba hengmino blimubenoa kining anomabiobe. Ibo inaib mole God esa eka naka mak unang mak isa ibo mo baabenibta ib kukubo misiamobo ge baabenomabibbabe. Dabalim sel nakaia unangai Gode mo bainobo gabibbai i naka misiam unang misiamobe. I hengminsa kesoa ibo Gode kukub ayamo wafuniba ib kukub ayamo makob ayalo mililam biamo tubunoa bomat genabo inaiba nakaia unangai yatemine! Ibo inabiba Yesuse imin tlameo ne ibo seinyemabibe. Niminbabe, ne tekein kebibe, sino ne ibo baka biania Gode wengo ibo omkaye bia wenteniba bainobo geiba ne okok olo yamo balinobio kesoa sinanomo ne seinamabibe. \v 17 Ne ibo daabe blia ibo Yesuse wengo wente bianiba e okoko okok kebinibbua memalosa okok kebib kesoa ne seinyebibe. Ne ina binibio kesoa nakaia unangai e ananoba kaaneko gabiobe. I ne nenanimib osa ne ibo sma ye seinyemabibe. \v 18 Eka ibsa makob ne sein binabi inaniba seinine! Ibo inaib mole makob ibte nete na seinomabbio inaminobe. \s1 Timotie weng sangobe. \p \v 19 Nib Sume Yesuse Ae gene mole ne Timotie dabaia monea ibsu natlanea yatenea imin tenea ib weng sango ne baatnenemeo ne seinamabibe. \v 20 Elekiem eleta e bobol tem funino makob ne bobol tem funino ulabobe. Ne ibo daayebi kesoa ibo Gode kukubo sbalma wafu nine gabio esa inanea ibo daabenang genabebe. \v 21 Mak ile ili okoko bobol ota fumbianiba i Yesus Klaiste okoko bobolo mo fumbibbabe. \v 22 Eka ibo tekein kebiobe, Timotie Yesuse okoko okok bio e okoko klayam okok biebe. E makob miin aaleb dum keniba okok binabib inanea Timoti ete nete nanoba Gode dowan weng ayamo omkayebuobe. \v 23 Ne kot wengo baatneniba Inanamabeobo geiba wenti mole ne Timotie hebmamsab dabaia monea ibsu natlamabebe. \v 24 Eka ne funania Sume daatnenea i ne klabuto tileitneiba monia ibsu natlamabibo ge funaiobe. \s1 Ebaflodaitase weng sangobe. \p \v 25 Ibo Ebaflodaitase dabaiba ib dowan wengo ometnea tenea ne baatnenea daatnenebiobe. E nib nekobe. Ete nete nanoba okok kebianoba Gode wengo omkeimabuobe. Ne funania Ebaflodaitase dabaia monea ibsu natle mole olo ayamobo ge funai kesoa ne dabaia monea ibsu natlamabebe. \v 26 E ibo yatenamin teb abua ibo wengo wentiba gembebo gesiba ibo bobolo ilum omfubenoa esa weng olo wentenea bobolo ilum omfubabiobe. \v 27 Bainobe, sino e ginino sum gembianea kaanang genabe otane Gode dobhalilanea daabanea ayam anebuo, olo makob Gode nesa daabenebiobe. Niminbabe, sino ne bobolo ilum omfutneno kesoa Gode funanea Ebaflodaitase kaane mole Fole bobolo dot ilum omfubanamabobo genea e Ebaflodaitase ni dabo dohalilanea daabene kesoa e mo kaaim blimobe. E besa ayam anebiobe. \v 28 E inanea ayam anebio kesoa ne hebmamsab dabaia monea ibsu natlea atemaibo ib bobolo ilum omfubebio yo deibueine! Ib bobolo ilum omfubebio yo deibueib mole nesa ne bobol ilumo deibonamabibe. \v 29-30 Ibo meb bianibta ne okok daatnenimibba kesoa ibo Ebaflodaitase dabaiba tenea nesu ele tlanea ne okoko daatnenebiobe. E inanea Yesus Klaiste okoko okok kebianea ginino omonea genam binea kaain kenane kesoa e imin monea ibsu natlameo ibo baabaniba Kobo klayam nanebta Fole okoko daahabi tlebobo ge baabaniba seinhamine! Ete ibte naniba Sume bainobo gabib kesoa ibo makob dab tlemin dikinobe. Naka mak unang maki okoko makob e okoko ulab okok blib isa baabeniba Ib okoko nabib osa ayamobo ge baabeine! \c 3 \s1 Nakaia unangai Klaiste bainobo gabibi naka molot unang molotobe. \p \v 1 Ne nekwal ibo ne weng mako ibo baabenamabibe. Ibo Sume bainobo gabib kesoa e bobolo fumbianiba seinhamine! Sino ne weng olo ibo baabeibio otane ne ibo imin dola omfubenamino tengo mo dubutnebioba kesoa weng olo imin dola omfubenamabibe. Ibo weng olo imin wentaibo ayamobe. O ibo daabenamabobe. \v 2 Ibo klaine! Naka maki ibo dim baabeniba Ib aalo waketoufanimibo ibo Gode meletan anomabiobo ge baabeib mole ibo naka eli wengo mo wentaibe! I kukubo misiamobe. I makob til satili ulabobe. \v 3 Gode Hobe nibo bekebe bianea daayebe kesoa nibo Gode niniino dobtouleb biobobe. E inanea nibo daayebe kesoa nibo tekein kebuobe. Nibo Gode meletanobe. Nibo baanoba Yesus Klaiste naka ayamobo ge oha bianoba e wengo wafu bianoba Gode meletan anobbio kesoa nibo seimbuobe. Nibo mo funanobta Nibo nib aalo waketoumobo kukub olota nibo daabenota Gode meletan anomabbiobo ge funomobbabe. \v 4 Nakai dim omin bobol temo fumbianiba maki funaniba Ni faninwali Gode meletan kesoa nisa Gode meletanobo ge fumbib eka maki fumbianiba Ni okoko klayam okok kebob kesoa ni Gode meletanobo ge fumbiam blib mole i ne kukubo funaine! Ne i gaiseibiobe. \v 5 Ne biemo nemikinobua Sande elekiem blimanea i ne aalo watlatneib kesoa nakaia unangai funaniba E God emiobo geibbiobe. Ne Islel esa e miine Bensamin esa i molofeitobe. Ne faninwali Hiblu ten kesoa nesa Hiblu tenobe. Ne Yudai hekmel wengo alukum wentenia kla wafu bli kesoa ne Felisi nakabe. \v 6 Sino ne Yudai kukubo kla wafu biania fumbiania Ne Yesuse bainobo galin nakaia unangai inai mole Gode ne seinemabebo ge fumbiania monia bib mak bib mako bainobo galin nakaia unangai yebinibiobe. Ne Mosese hekmel wengo kla wafu biania inabi kesoa naka mak unang maki baaniba Fole Mosese hekmel wengo kla wafu biebo ge one binibbiobe. \v 7 Ne sino funania Kukub olo ayamobo ge fumbiania ina binibi otane memalo ne funania Kukub olo besabo ge fumbibe. Niminbabe, ne Klaiste bainobo gabiania funania Ne Yesus Klaiste okok ota okok kemano gabi kesoa ne kukubo afet olo deibonia Yesus Klaiste okoko olota okok kebinabibe. \v 8 Inamin namin weng olo ibo baabei osa eka inamin namino ne sino fumbiania Kukub olo ayamobo ge fumbinibi osa memalo ne funania Kukub olo nibo mo daabenomobabo ge fumbibe. Niminbabe, ne Sume Yesus Klaiste tekein kebio kukub olo dot ayamobe. Kukub olo kukub afeto gaisonobiobe. Ne Yesus Klaiste bainobo genia e bobol tem funin ota wafu bli kesoa inamin namin kukub olo ne sino funania Ayamobo ge fumbinibio ne abuk wawenblibe. Ne Yesus Klaiste bainobo genia e bobol tem funin osa \v 9 ne bobol tem funin osa makob anob mole ne funania Kukub olo dot molotobo genamabibe. Ne mo funanita Ne Mosese hekmel wengo wafu blia Gode natemnea funanea E naka molotobo geneko ge funim blimobe. Ina otane memalo ne Yesus Klaiste bainobo gabia eka Gode ne natemnea baanea E naka molotobo gabebe. \v 10 Ne funania Ne Yesus Klaiste kukubo kla tekein kenia nesa makob e ulab ania Gode titil sumo Klaiste imin dofaanea hananebu olo nesa omeisania eka e enin kino watemebuo nesa inania enin kino watemano gabibe. Ne ina biania funania Ne bobol tem funino makob Yesuse kaanang genea e bobol temo nabanoa kaanebio inatnenoko gabi \v 11 kesoa ne kaanimio Gode ne imin nemfaanea hanania amit namabibe. \s1 Fole baanea Ibo kukub ayamo sbalma wafunine genebiobe. \p \v 12 Ne mo baanita Memalo ne Klaiste kukubo alukum tekein kebi kesoa ne hengmino blimobo, ne naka ayamobo genimibabe. Ina otane Yesus Klaiste ne hengmino temo blio nemtlanea ne emi aibio kesoa ne e wengo wafu biania makob Yesus Klaiste ulab anano genita Klaiste okoko okok kebibe. \v 13 Ne nekwal ibo wentine! Ne mo baanita Ne e wengo kla wentebi kesoa ne naka ayamobo genimiba otane ne okoko okok bli olole ne inamin namin okoko sino okok binibi osa eka inamin namino bobolo fumbinibu osa abuk wawenia ne bobol temo omonia inamin namino ne dimo tam tlamabo yota omuli kesoa ne yo okok ota kla okok blibe. \v 14 Ne dabalim ele biania ne okoko nabia ne kukubo nabia o makob nakaia unangai tlan hamom gaibo dimo naka mak unanga maki Blublu monoba inamin namino gaisonoba inamin namino dlomo geniba blublu moniba gaisoniba inamin namino dlonabib inabibe. Ne kukub olo nabio mitmakamo inaminobe. Yesus Klaiste atdimo kaanea nib hengmino walubenebio kesoa ne Gode okoko sbalma wafu blia sinanomo Gode nemeb utnea e bib ayam ut nemfanea nano genita o okok ota sbalma okok kebibe. \p \v 15 Bainobo galino sbalma blib naka unang ibo ne weng ele baai olo kla wenteniba ib bobol temo makob ne bobol tem funino ulab aine! Ina otane mak ibo ib bobol temo afet fumbib mole God eta ibo bobol tem funin ayamo omyeko! \v 16 Eka Gode bobol tem funin ayamo ibo omyebio kesoa e wengo aleyebe osa eka e bobol tem funino omkayebe osa ibo kla wafueine! \p \v 17 Ne nekwal ibo ib kukubo makob ne kukubo nabi inaniba ibsa kukubo yota wafueine! Naka mak unang maki kukubo makob ne kukubo nabio ulab wafu bianiba nabib ota ibsa yateniba kukubo yota wafueine! \v 18 Naka homon unang homoni i kukubo nabibo Klaiste bainobo galin nakaia unangai kukubo ulabbabe. I kukubo yo nabibo makob i Yesus Klaiste atdimo kaanebuo weng dobo weng ohabiobe. Inabib naka unang eli Yesuse makaabe. Sino am mak bomanomo am mak bomanomo weng olo ne ibo amit inangge oye binabi kesoa memalosa imin baabenang genia melaiobe. \v 19 Nakaia unanga eli Gode bobol tem funino mo wafu blibbabe. Ili bobol tem funin misiam ota wafu bianiba kukub misiamo nabiobe. Inamin namin kukub olo naka mak unang maki nanimibo i aalo waisenabo otane kukub olo nabib ile kla seinwebiobe. I dabalimo inamin namino bobol ota fumbiobe. I inabib kesoa Gode inabib nakaia unanga eli dlanea aseinin bib unomabiobe. \v 20 Otane abilim ole Gode bainobo gabob naka unang nib bibobe. Nibo Sume Yesus Klaiste nib hengmino temo biobo dotlanebio nakae abilimo deibonea daakenea nibo dletnea monoba Gode bibamo unomabbuo dimo waisa biobobe. \v 21 Nib damo klaanamabo otane Yesus Klaiste kaanea imin hananea e damo afet anebio kesoa e damo amit namabebe. E imin tlameo nib damo afet anoba makob e damo ulab anomabbiobe. E titilo sbal kesoa nakaia unanga isa inamin namin afet osa kimanea e titil olo nibo omyea nib damo afet anoba amit nomabbiobe. \c 4 \s1 Ibo ib bobol tem funino makob aniba ayam fumbianiba seinine! \p \v 1 Ne nekwal ibo ib Sume bainobo galino sbalma bianiba sino ne weng olo baabeibuo mo deibonimibe! Ne ibo kla gobe biania ibo yatenamin teb nebobe. Ne Gode wengo ibo omkaye bia ibo wenteniba bainobo geibbio kesoa ne tekein kenia ne okok olo yamo balinobiobo genia seinyebibe. \p \v 2 Ne nengwal ibo Yuodia Sintiki dab ibo wentine! Ibo Sume bainobo gabianiba ibo makob dab tlemin am blib kesoa dleb weng baasesenino deiboniba ib bobol tem funino makob aine! \v 3 Eka ne nek kobo keb okoko okok kebebo makob ne okoko okok kebio ulab okok kebeb kesoa kobo unang asu eli daabeneba i bobol tem funino makob aine! Unang asu elita Klemen ete naka mak unang mak ite nete nanoba sbalma bianoba Gode wengo naka mak unang maki omkaye binobbiobe. Gode nakaia unangai bainobo gabibi i niniino e buk temo dolabenebiobe. Nakaia unanga eli ne daanebibi i niniino buk olo temo bio kesoa i moniba Gode bibo amit nomabiobe. \p \v 4 Sume ibo amitie bekebe bie kesoa ibo amitie seinine! Ne ibo imin baabenia Seinine ge baabeiobe. \p \v 5 Sume imin tlamabeo dimo meb tlo kesoa ibo naka mak unang maki kukubo fiab omkayemine! \v 6 Ibo inamin namino talo mo wamibe! Ibo funaniba Ni inamin namino dlomo geib mole God eta baabaine! Eka ibo funaniba Ni inamin namin olo mo tekein kebobbabo geib mole osa God eta baabaibta alebeneko! Ibo inanimibo gangobo geine! \v 7 Gode ibo bobol ayam omkayebe kesoa ibo inamin namin olo talo mo wamomabibbabe. Naka mak unang maki ibo yateniba funaniba I nimin kenibta yo talo mo wamin blime? ge funanomabib otane i kukub olo mitmakamo klao mo tekein kenomabibbabe. Ibo Yesus Klaiste bainobo galin naka unang kesoa Gode e bobol tem funino ibo omyea ib bobol tem funino molot anomabiobe. \p \v 8 Ne nekwal ibo ne weng mako imin baabenamabibe. Kukubo bain osa kukubo ayam osa kukubo molot osa kukubo kining osa kukub ayamo Gode kin dim osa naka unangi kin dim osa namin ota amitie funine! \v 9 Inamin namin kukubo ne aleyebi osa eka ne nabia natemebib osa yota namine! Ibo inamib mole Gode bobol ayamo nibo omkayebe nakae ibo bekebe namabebe. \s1 Filibai bib seli inamin namino Fole dlaliba e gangobo gesebe. \p \v 10 Ibo memalo ne bobolo imin funaniba daatneib kesoa ne seimbiania Sume niniino dobtouleb blibe. Ne tekein kebibe, sino ibo ne bobolo fumbianiba daatnenomo gabib otane ib deibo blim kesoa deitneibbiota memalo daatneibobe. \v 11 Ne ibo mo baabenita Ne inamin namino blimutnenobo genimibabe. Ne amitie bobol ayamobe. Ne inamin namino blim utnenomo dim osa eka bitne biamo dim osa ne amitie seimbinabibe. \v 12 Ne inamin namino am mak dimo besa bi eka am mak dimo tam tloa bokabi nin kukub olo tekein kebibe. Otane Gode ne amitie daanebe kesoa ne seimbinabibe. Ne inamin namino blim biami bitne biam osa ne seimbibe. Eka ne imen teb nimi eka unalami osa ne amitie seimbinabibe. \v 13 Yesus Klaiste titilo ne omkanebe kesoa ne titilsa biania inamin namin okoko Gode baatnenea Klanale genemeo klabinabibe. \p \v 14 Ina otane memalo ne inamin namino blim blia ibo daatneib kesoa ib kukubo ayamobe. \v 15 Bainobo galin nakaia unangai Filibai bib ye blib ibo olo tekein kebiobe. Sino ne Masedonia betano deibonia monia bib mak bib mako haabiania Gode wengo nakaia unangai omkaye binibio dimo Gode bainobo galin nakaia unangai maki mo inanibta daatnenibta monio onim blimobe. Ina otane ibta inaniba ne daatneibobe. \v 16 Eka ne Tesalonaika bib ye blio ne inamin namino blim blia ibo ne inamin namino dokane bianiba daane binibbiobe. \v 17 Ne mo funanita I inamin namino donine ge funanimiba otane ne funania Ibo inamin namin kukubo ayamo nabibo yamo balinamabobo ge fumbibe. Ibo ne kukub ayam natneib kesoa Gode kukub ayamo ibsa omyamabebe. \v 18 Ibo inamin namin homono dlutneiba Ebaflodaitase dleb tenea donebio kesoa ib kukub olo ayamobe. Memalo ne inamin namino homonobe. Ibo Gode kla goba blib kesoa ibo ne daatneibbiobe. Eka God esa ib kukub olo watenea funanea Ib kukub olo ayamobo ge funanea seinyebebe. \v 19 Eka Gode inamin namino homon kesoa ibo Yesus Klaiste bainobo geniba e okoko okok kemib mole ibo inamin namino blim bibe biamo Gode doyamabebe. \v 20 Nibo amitie nib Aye Gode oha bianoba Keb niniino Sumobo ge ohamomo! Bainobe. \p \v 21 Eka ne Yesus Klaiste bainobo galin nakaia unanga ibo alukum baabenia Klayam blibte ge baabeiobe. Eka bainobo galin nakai ne beketne blib isa ibo baabeniba Klayam blibte ge baabeibobe. \v 22 Eka Gode bainobo galin nakaia unangai bib ele blib isa alukum ibo baabeniba Klayam blibte ge baabeibobe. Eka Gode bainobo galin nakaia unangai Lom bibo komok sume Sisae e okok kemin naka unang isa ibo baabeniba Klayam blibte ge baabeibobe. \p \v 23 Sume Yesus Klaiste ibo daaye bianea bekebeneko! Ne wengo bayotabe. Ne Fol neta ib futan olo dola omfubenamabibe.