\id COL - Mian NT [mpt] -Papua New Guinea 1986 (DBL 2014) \h Kolosi \toc1 Fole futan olo dolanea Kolosi bib seli omfubesebe. \toc2 Kolosi \toc3 Kol \mt1 Kolosi \mt2 Fole futan olo dolanea Kolosi bib seli omfubesebe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 32 ese mak blimanota Fole Lom bib ye klabutam bianeta futan olo dolaneta Tikikase Onisimase i dabo omyeta omeb monibta Yesuse bainobo galin nakaia unangai Kolosi bibo blibi omyibbiobe. Fole futan olo dola omfubenebuo mitmakamo inaminobe. E Gode wengo omkeimabe o dafa ota klabutam bieta Ebaflase monea esu unanea baabanea Naka maki Gode wengo omkayebuobo geniba dim oyebiobo ge baabasea wenteneta futan olo dola omfubenebiobe. I dim omin wengo omkeimalino enaminobe. I baaniba Nibo Gode elekiem ele niniino olota mo dobtouleb nomobe, abiseli niniin osa dotouleb nomo ge obianiba eka mak ole obianiba Yesuse Gode ulabbabo, e abiseli ulabobo ge obiam bianiba eka mak ole Imena kulanao mako awemobo hala bianoba aalo waketou biam bianobte ge obiam nabibta Fole wenteneta futan olo dola omfubeneta i dim omin wengo omkeimabibo omkeimabenebiobe. \io1 \it 1:1-8 \it* Mikiktem wengobe. \io1 \it 1:9–2:19 \it* Klaiste kukubo nabinebuo wengobe. \io1 \it 2:20–4:6 \it* Nakaia unangai Klaiste bainobo geniba mema naka unang ambibi wengobe. \io1 \it 4:7-18 \it* Mubiang wengobe. \c 1 \p \v 1-2 Ae bainobo galin nakaia unangai Kolosi bibo blib ibo Fol ne nib neke Timotie ni dum bianobta ne futan olo ibo dola omfubenamabibe. Bainobo galin nakaia unangai Kolosi bib ye blib ibo ibte Yesus Klaist ete naniba ib bobol temo makob aniba ib bainobo galino sbalma blib kesoa ibo emibe. Gode ne nemfakanea baatnenea Kobo Yesus Klaiste okok kamasanin naka nale ge baatnenebio kesoa ne Yesus Klaiste okok namasanin nakabe. Nib Aye Gode ibo daaye bianea bobol ayam omkayemeko! \s1 Fole Gode gangobo gesebe. \p \v 3 Ni ibo beteno daayemobo nib Sume Yesus Klaiste Aye Gode Gangobo ge ohabuobe. \v 4 Niminbabe, ni wentoba naka maki baabeniba Bainobo galin nakaia unangai Kolosi bibo blibi Yesus Klaiste bainobo gabianiba bainobo galin naka mak unang maki alukum kla gobesese bliobo gesiba wentenobta inabuobe. \v 5-7 Ebaflase Timotie ni dum ni nek ayamobe. E okok osa ni okok osa makobobe. E Klaiste okoko mo deibueim blimobe. E amitie okok kebebe. Sino ni ibsuo mo natlomabbioba kesoa Ebaflase ni alango dokonea monea ibsu natlanea Gode daayebe wengo ibo omkayebea ibo wente bianiba bainobo geibbiobe. Gode daayebe weng olo bainobe. O enaminobe. Gode baanea Yesus Klaiste sinanomo ibo dletnea utniba ne bib am uto amit nomabiobo genebio ibo waiso blib kesoa ib bainobo galino sbal maniba naka mak unang maki kla gobe bianiba daayebiobe. Bib mak bib mako nakaia unangai Klaiste dowan wengo wente bianiba bainobo geniba kukub ayamo wafu blibo Kolosi bibo blib ibsa inaniba Gode daayebe wengo mikiktemo wenteniba o mitmakamo tekein keib dimo ibo bainobo geniba kukub ayamo wafu tlibbiobe. \v 8 Gode Hobe ibo kla gobe bianea daayebea eka ibsak naka mak unang maki kla gobe bianiba daayebiobe. Ebaflase ib weng sang olo ni baabenebio kesoa ni Gode baabanoba Kobo gang nanebta i daayebeobo ge ohabuobe. \s1 Fole Gode oha bianea Kobo Kolosi bib seli daabenale ge oha binebiobe. \p \v 9 Ni ib weng sang olo wentob dim ye kilonoba Gode amitie nganha bianoba Kobo Kolosi bib sel eli daabeneba i keb wengo oye bianeba Ibo kukubo olota namine gabebo i kla tekein keine ge oha binabuobe. Gode tekein kemino dot sumobe. E tekein kemino dabalim sel nakaia unangai tekein kemino ulabbabe. Ni Gode baabanoba Keb Hobe i daaye bianea keb bobol tem funino i alebenea i tekein kemin osa makob kleb tekein kemino ulab aine ge ohabuobe. \v 10 Ibo inanimibo Sume ibo baabenea Kukub olota namine gabe wengo kla wente bianiba e kukubo kla wafu bliba e ibo seinyemabebe. Ibo inamibo inamin namin kukub ayamo nabianiba Gode bobol tem funino tekein kenaniba ib tekein kemino sum anamabobe. \v 11 Gode titilo dot sumobe. Ni Gode baabanoba Keb titil olo i omyeba i bainobo galino sbal maniba inamin namin kukub misiamo i dimo tam tlemo i bainobo galino mo deibonimibe! I bobol temo seimbianiba sbal maine ge ohabuobe. \v 12 Ibo amitie Aye Gode nganha bianiba Kobo gang nanebta ni hengmino temo biobo dotlanebbiobo ge oha bianibte! Sino Gode baanea Ne sinanomo bainobo galin nakaia unangai dleb monia ne bibo daia amit nomabiobo genebua binea e inanea ibo hengmino temo blibo dotlanebio kesoa e bainobo galin nakaia unanga ibo e kin dimo naka molot unang molotobe. Sinanomo e ibo dlonea eka bainobo galin naka mak unang maki alukum dlonanea dleb monea e bib ayam ye danea amit nomabib kesoa ibo E gangobo ge oha bianiba seinine! \v 13 Nibo hengmino tem tab bioba Gululame nibo kima bie otane Gode nibo Gululam esuo dotlanea dlonea e miine Yesus Klaiste kla goba bie nakae dlalebua e nibo kima biebe. \v 14 Yesus Klaiste e ileme singanea nib hengmino walubene kesoa Gode nib hengmino omtlabenebiobe. Sinanomo Gode nib hengmino molo mo yang kenea dlaneta aseinin bibo mo unaobbabe. \s1 Klaiste kukub osa eka e okok osa otabe. \p \v 15 Nakaia unanga nibo Gode mo atemin blimobe. Yesus Klaiste makob Gode ulabobe. Nakaia unangai maki Yesus Klaiste atemibbua e weng sango nibo baabeibbio kesoa nibo Gode tekein kebuobe. Sinanggwano Gode abil esa dabal esa eka inamin namino dabalim olo buosa eka inamin namino abilim uto buosa e mo klaim blim bie dimo Klaiste bianea inamin namin olo alukum kima binebiobe. \v 16 Niminbabe, sinanggwano Gode Yesuse baabanea Kobo inamin namino klanale ge baabanea e klanebiobe. Inamin namino dabalim olo buosa eka inamin namino abilim uto buosa eka inamin namino nakaia unangai watemebib osa eka inamin namino nakaia unangai mo watemebibba osa eka abisel isa i komokwal isa eka inamin namin hob isa i komokwal isa i alukum i dumta klaibbiobe. Gode funanea Inamin namino alukum Yesuse niniino dobtouleb noko ge funane kesoa e okok olo omalea klanebiobe. \v 17 Dabal esa eka inamin namino dabal ele dimo buosa eka abil esa eka inamin namino abilim uto buosa o mo tam tlim blim buo dimo Klaiste binebiobe. E inamin namino alukum dabalim olo buosa abilim uto buosa klanebua kla kima bie kesoa o klayam, olo alang ye biobe. \v 18 Bainobo galin nakaia unanga ibo makob e damobe. Eka ele makob ib gabam kesoa e ibo kima biebe. E nibo afen smike dobonoba amit nomabbuo mitobe. E kaanea Gode sin dofaanea hananebio kesoa sinanomo esa inanea nakaia unanga nibo dohaanea hananomabbiobe. E inanea inamin namin afet osa nakaia unanga isa alukum gaisenebiobe. \v 19 Gode baanea Klaiste makob nene ulab kesoa e afetbabe. E kukub nabe osa e bobol tem fumbe osa makob nemio ulab kesoa ne seinhabibo genebiobe. \v 20 Sino inamin namino dabalim olo buosa abilim uto buosa Gode makaa bio kesoa Gode funanea Ni afin anomo genea e Yesus Klaiste dabanea daakenea atdimo kaanea e ileme singanea nib hengmino walubenea God esa nakaia unanga isa inamin namino dabalim olo buosa abilim uto buosa o makaa bu otane e hanea dleb tetenanea baanea I Gode afin aibobo genebiobe. \v 21 Ibole sino bobol tem misiam fumbianiba kukub misiam wafuna blib kesoa ibo Gode mo gobanim blimobe. Ibo makaa binibbio otane \v 22 memalo Gode e miine dabanea daakenea atdimo kaanea nib hengmino walubenebio kesoa Gode ibo imino mo makaalabenemebabe. Yesuse inanebio kesoa sinanomo e ibo dleb utnea Gode bib ayam ut danea Gode kin dimo ibo kining aniba hengmin blimanomabiobe. Yesuse inabenemeo Gode ibo mo baabeneta Ib kukubo misiamobo genamabebabe. \v 23 Ibo ib bainobo galino sbalma blib mole Klaiste inabenamabebe. Gode dowan weng ayamo baanoa Ibo Yesus Klaiste bainobo geib mole e dletnea moniba Gode bib ayamo amit nomabiobo genobio waisanomabiobe. Ibo sino weng olo wenteniba funaniba Bainobo, Gode inabenebiobo geniba bainobo geibbio kesoa ib bainobo galino sbalma bianiba inamin namin kukub misiamo ib dimo tam tlamo ibo tosianino deiboniba ib bainobo galino sbal maine! Bainobo galin nakaia unangai homoni moniba bib mak bib mako alukum Gode dowan wengo nakaia unangai omkayebiba Gode Fol nesa nemanea monia e dowan wengo nakaia unangai bib mak bib mako blibi omkayebibe. \s1 Fole Kolosi bib seli bainobo galin nakaia unangai daaye binebiobe. \p \v 24 Yesus Klaiste nakaia unangai e bainobo gabibi daayebe o dafa ota e enin kino watemebiobe. Ibo makob Yesuse damo ulabobe. Nesa inania Klaiste okoko okok kebiania ibo daayebi o dafa ota ne enin kino watemebi kesoa ne seimbibe. Naka mak unang mak isa inaniba Klaiste okoko okok kebianiba e bainobo galin nakaia unangai daayebiba eka naka mak unang maki teniba i enino omkayemomabib otane sinanomo enin olo blimanamabobe. \v 25 Gode ne baatnenea Kobo ne bainobo galin nakaia unangai daaye bianeba ne wengo i alukum omkayemale ge baatnenebio kesoa ne e wengo alukum ibo omkayebibe. \v 26 Sino Gode wengo atosino ayok bua nakaia unangai alukum e weng olo mo wentim blim binibbi otane memalo e weng olo alukum keim anoa e bainobo galin nakaia unangai e weng olo wentebiobe. \v 27 Gode funanea Ne bainobo galin nakaia unangai ne ayok wengo alebenano ge funanea e weng olo i omkeimabenea baabenea Yudaba nakaia unangai ne wengo wenteniba ne naka unang aine ge baabenebiobe. Gode weng ayok olo enaminobe. Yudaba nakaia unanga ibo Klaiste ib bobol tem wat biebe. Sinanomo e nakaia unangai dletnea monea Gode bib ye danea nomabib kesoa ibo am olo waiso bianiba seimbiobe. \v 28 Ni Klaiste wengo nakaia unangai bib mak bib mako blibi omkayebob kesoa Gode bobol tem funin ayamo ni omkayebea ni e wengo nakaia unangai omkaye bianoba i kukub misiamo nabibo aleye bianoba baabenoba Ibo Klaiste wengo bainobo genimibo e ib kukub misiamo omtlabenamabebo ge oyebuobe. Ni funanoba Ni i dleb monoba God esu danoba e yatenea funanea I Klaiste wengo tekein keniba i bainobo galino sbal maniba ite Klaist ete naniba makob aibobo ge funaneko genobta Yesus Klaiste wengo i omkayebuobe. \v 29 Nesa inangge funanita ne okoko sbalma biania okok kebibe. Ne nene titilo okok olo mo okok kebibabe. Klaiste emaye e titil beselibo omkanebeta ne e okok olo okok kebibe. \c 2 \s1 Ibo dim wengo tlemo mo wentemibe! \p \v 1 Ne funania Ne weng olo ibo baabenimio kla tekein keine geiobe. Ne okoko sbalma biania ibsa eka Leodisia bib seli bainobo galin nakaia unanga isa eka bainobo galin nakaia unangai bib mak bib mako blibi i sino ne mo natemim blim isa daayebibe. \v 2 Ne okoko inania sbalma biania ibo daayebi kesoa ibo sbal maniba bobol ayam fumbianiba ib sinwalo ib bobol temo makob aniba maki gobeniba daabesese bianiba Gode wengo sino ayok binobio weng olo kla wenteniba tekein keine ge fumbibe. Weng ayok olo Yesus Klaist emaye ele weng sangobe. \v 3 Nakaia unangai imalo Gode wengo mitmakamo mo tekein kebibba otane Yesus Klaiste elekiem eleta inamin namino alukum tekein kebe kesoa ibo e bainobo geniba e doboniba ib bobol temo dababbaib mole e ibo Gode wengo mitmakamo kla alebenea tekein kenomabiobe. \v 4 Ne ibo baabenia Gode tekein kemino Klaiste elekiem eleta tekein kebebo ge baabeibio kesoa naka mak unang maki men weng men wengo baabenimibo ibo i wengo mo wentenibta Gode wengo mo deibonimibe! \v 5 Ne ibsuo mo bliba otane ne ib bobolo amitie fumbibe. Ibo Yesus Klaiste bainobo galino sbal maniba ib sinwalo ib bobol tem funino makob am blib kesoa ne seinyebibe. \s1 Ibo Klaist emi kesoa ibo e kukubo amitie wafunine! \p \v 6 Ibo sino Yesus Klaiste wengo wenteniba baaniba Bainobo Yesus Klaiste nib Sumobo geibbio kesoa ibte ete naniba ib bobol tem funino makob aniba ibo e kukub ota kla wafueine! \v 7 Sino Ebaflase Yesus Klaiste wengo ibo alebenebio kesoa ibo makob aso kimkimo dabal tem daak unanoa nekek genoa geigebio inaniba ibo Yesus Klaiste wengo kla wafuniba sbal maine! Ibo Yesus Klaiste wengo kla wente bianiba ele weng baaneme iwat inamine! Ibo inamib mole ib bainobo galino sbal manomabiobe. Ibo amitie Gode gangobo ge oha bianibte! \v 8 Naka maki bobol temo funaniba I Yesus Klaiste wengo deibueine ge fumbib kesoa i dim omin wengo mitmakam blim ota ibo omkayebiobe. I weng olo dabalim nakai wengobe. O Gode wengbabe. I ili faninwali hekmel weng osa eka bekeli hekmel weng osa ota ibo omkaye bianibta baabenibta Ibo weng olota wafu nine ge oyebiobe. Weng olo ili wengobe. Olo Yesus Klaiste wengba kesoa ibo i weng olo mo wenteyemibe! \v 9 Klaiste nakane dimo Gode e titil osa e bobol tem funin osa e omalea i dumo makob aibbio kesoa Klaiste wengo olota bainobe. \v 10 Klaiste abiseli komokwal isa hob misiami komokwal isa alukum gaisenebiobe. Ibo ibte Klaist ete naniba ib bobol temo makob am blib kesoa ibo Gode kukub ota wafu bianiba naka molot unang molot an bliobe. \v 11 Yuda ni memei naka teni aalo wetlabenomobo baanoba Memalo i God emiobo gabinabob otane kukub olo besabe. I aalo olo bobol ota fumbianiba i aalo waketoubiobe. Otane ibole Klaiste tenaniba makob an blib kesoa ibo aalo bobolo mo fumbibbabe. Ibole Sume ib bobol temo hengmino omtlabenebuo bobol ota fumbib kesoa ni tekein kebuobe. Ibo God emiobe. \v 12 Ibo Yesus Klaiste atdimo kaanea Gode titilo e imin dofaanea hana tlebuo bainobo geiba aayo fuelabeibbu olo makob ibo kaaniba Yesus Klaiste tena dolbueibbiobe. Eka mak osa ibo aayo fuelabeibbu olo makob ibo Klaiste tenaniba imin hana tlibbiobe. Ibo inaib kesoa Gode bobol tem funino ayam ota ibo omyebua memalo ibo e bobol tem funin ayam olo amitie wafu bliobe. \v 13 Sino ibo bobol tem misiam fumbianiba hengmino amitie henga binibbiobe. Ina otane Gode amo yo dimo ib hengmino omtlabenea bobol tem funin ayamo omye kesoa ibo Klaist ete naniba ib bobol tem funino makob aniba makob nakai kaaniba imin hana tenabib inaibbiobe. \v 14 E inanea nib hengmino omtlabenebiobe. Sino ibo Gode hekmel wengo mo wafueim blim blib dimo ibo hengmino henga binibbiobe. Gode ibo hengmino hengabibo watenea e buk temo dolanebua denea Klaiste atdimo kaanamabe dimo, olo makob Gode nib hengmino hengabob olo weng sango dolanebuo omonea Yesus yebbaka atdimo dlasanea silo biki wananea kaanobiobe. Kukub olo makob Klaiste atdimo kaanea hengmino titil osa blimanobiobe. Gode nib hengmino molo mo yang keneta kot kebenemebabe. \v 15 Klaiste inanea atdimo kaanea imin hana tlebuo e hob misiam isa i komokwal isa dlabbune kesoa i titil blimaniba nakaia unangai homoni kin dimo aal genam binibbiobe. \s1 Ibo Klaiste okoko bobol ota funine! \p \v 16 Gode inanea nib hengmino omtlabenebio kesoa ibo naka maki mo deibeibta dim wengo mo baabenibta Inamin imena aayao awemobo ibo inamin ota doweine! Eka Gode singkalin am bomanomo dim osa eka alimo mema welabbanomo dim osa eka Yudai singkalin am bomanomo dim osa ibo kukubo yota naine, eka yole mo nanimibe! Ibo kukub olo naib mole henganomabiobo gabianiba oyemibo ibo i wengo mo wentaibe! \v 17 Hekmel weng ole makob Klaiste klulobe. O okok ole Klaiste tlamabeo o deib ota klaubanota tlebiobe. Inamin kesoa hekmel wengo mitmakam ole Klaist etabe. \v 18 Ibo Yesus Klaiste kukubo wafu blibo mo baleisonimibe! Naka maki ibo baabeniba Ni damo temobo dam olo ni alebenoa baanoa Ibo ib niniino omabbuniba abiseli niniin ota dotouleb nine ge baabenobo geib mole ibo i weng olo mo wentaibe! I Gode kukubo mo tekein kebibbabe. I ili tak ngambianiba ili bobol tem funin ota wafu bianibta weng olo baabenomabib kesoa i weng olo mitmakam blimobe. Ibo i weng olo mo wentubenibta Yesus Klaiste kukubo mo baleisonimibe! \v 19 I Yesus Klaiste kukubo klao mo wafu blibbabe. I Klaiste deibaniba sesa wat blib kesoa ibo i wengo mo wentaibe! Nibole makob Yesus Klaiste damobe. E makob nib gabam kesoa e nibo kima biebe. Gode nibo daabenea nibte Klaist ete nanoba nib bobol tem funino makob an biob olo makob naka tene damanamabe inanoba nibsa nib bainobo galino damanoba sbal manomabbiobe. \p \v 20-21 Klaiste atdimo kaanebuo makob bainobo galin nakaia unanga ib tena kaaibbio kesoa Gululam esa hob misiam isa ibo imino mo kimanomabibbabe. Ina otane ibo hekmel wengo olota wafunib mole Gululam esa hob misiam isa i titilo ibo kimanamabobe. Inamin kesoa ibo nimin kenibta dabalim naka eli wengo wenteyebibe? I weng olo Gode wengbabe. I ili bobol tem funin ota ibo oye bianiba Ibo Yudai hekmel weng ota wafuniba imen olo mo wafu olaibe, eka olole mo dowonaibe, eka olole mo melebonimibe gabianiba oyebib kesoa ibo i wengo mo wenteyemibe! \v 22 Nakai inamin namin imeno dowonaibo blimanamabobe. I baaniba Ibo imen olo mo dowonaibe ge baabeibbio yole nakai bobol tem funin ota baabeibbiobe. Olo Gode bobol tem funinbabe. \v 23 Nakai abiseli niniino dotouleb blibi obianiba Ni niniino omabbunoba abiseli niniin ota dotouleb biob kesoa ni nini tako mo ngambobbabo gabianiba eka kukub afet osa nabianiba i damo enino omkawebib kesoa naka maki yateniba baaniba Naka eli hekmel weng ayam ota wafu bianiba i niniino omabbu bliobo ge oyebiobe. I inabib otane kukub olo i mo daabenota i bobol temo kukub misiamo mo deibonomabibbabe. \c 3 \s1 Ib bobol tem funino makob Klaiste bobol tem funino ulab aine! \p \v 1 Gode Klaiste imin dofaanea hana tlebuo, olo makob bainobo galin nakaia unanga ibsa yebbaka dohaanea imin hana tlibbua memalo ibo mema naka unang amblib kesoa ibo inamin namino dabalim ele bu olo bobolo mo wayemone! Ibo inamin namino abilim ut buo bobol ota wayemoko! Abilim uto Yesus Klaiste Gode kweile kweitale kikib ye toumbianea nakaia unanga isa eka inamin namin osa alukum kima biebe. \v 2 Ibo inamin namino dabalim ele bu olo bobolo mo funimibe! Ibo inamin namino abilim ut buo bobol ota funine! \v 3 Niminbabe, ib bobol tem funin ole dabalim olo bobol tem funinobe. Klaiste atdimo kaanea ib bobol tem funino sino wananea blimanobiobe. Ib bobol tem funino sin ole deiboniba ibtem Klaist etem naniba ib bobol temo makob aiba eka Klaist esa God etem naniba i bobol temo makob anaibbio kesoa e ib bobol temo kima biebe. \v 4 Nibo nib bobol tem funino nibmalo mo kima biobbabe. Klaist eta kimabe bie kesoa sinanoa e imin tenea dabalim ele tlameo ibo teniba esu ye mieiba e titilo ayal inamin einobuo omyentlanea naka mak unang maki yatemomabiobe. \s1 Ibo bobol tem misiamo funino deibueine! \p \v 5 Sinanomo Gode ibo e titilo ayal inamin einobuo omyamabe kesoa ibo dabalim olo inamin namin kukubo bobolo mo wayemone! Kukub olo inaminobe. Unang taman hengamin kukub osa eka taman bobol funin kukub osa eka unang maki yatenoba taman deib dleb denobtabo ge funin kukub osa eka inamin namino bobolo wayemin kukub osa ibo mo namibe! Nakaia unangai inamin namino bobolo wayemo mole inamin namin olota i godu benoa i God motone deibanomabiobe. \v 6 Nakaia unangai kukub misiam olo wafu blibi Gode wengo omdibihabib kesoa e i alo tliaubanoa i kukub misiam olo nabibo molo yang kenea enino omyamabebe. \v 7 Ibo sino Yesus Klaiste mo bainobo geim blim binibbio dimo ibsa kukub misiam olo wafu binibbiobe. \p \v 8 Ina otane memalo ibo Yesus Klaiste bainobo gabib kesoa ibo naka mak unang maki dosuanin kukub osa atliyemin kukub osa eka funyatememin kukub osa eka weng dobo weng omin kukub osa eka weng misiam omin kukub osa alukum deibueine! \v 9-10 Ibo ib sinwalo maki dimo mo baabesese nimibe! Memalo ibo bobol tem misiamo sino fumbinibbuo deiboniba ib bobol tem funino mema kukub ota wafu blib kesoa ibo kukub misiam olo mo wafu nimibe! Gode ibo klanebio nakae bobol tem funino memao ibo omyenea daaye bianea am obba ye bomanomo bomanomo yo dimo Klaiste kukubo ibo amitie aleyebe kesoa ibo makob Gode ele ulab bianiba e bobol tem funino tekein kebiobe. \v 11 Inamin kesoa Yesus Klaiste bainobo galin nakaia unanga nibo makobobe. Nibo obianoba ibo Yudabo gese eka Ibo Yudababo gese nin kukub osa eka mak ibo aalo waketoubiobo gese eka mak ibo aalo mo waketoubibbabo gesenin kukub osa eka mak ibo weng afetobo gese eka mak ibo sesa nakabo gese nin kukub osa eka mak ibo okok nakabo gese eka mak ibo kimanin nakabo gese nin kukub osa mo wafunomobe! Niminbabe, Yesus Klaiste nakaia unanga nib bobol temo alukum bibe bie kesoa nibte ete nanoba nib bobol temo makob ambiobobe. \p \v 12 Gode ibo dlakanea Nemiobo genebio kesoa ibo emibe. E ibo kla gobe bie kesoa ibsa inaniba naka mak unang maki dohalim bianiba daaye bianiba weng fiab omkaye bianibte! Ibo ilib tako mo ngam bianibta Ni niniin sumobo galaibe! Eka kukub misiamo ib dimo tam tlamo osa ibo alo mo tliaubenomone! \v 13 Ib isak temo nakae waneta naka make e dimo kukub misiamo nabane mole e mo yang kenemene! E deibanea e neke kukub olo nabaneo bobolo funino dokobanoa deibaneko! Sum esa inanea nibo kukub misiamo nabobo bobolo funino dokobanoa deibenebio kesoa ibsa inaniba naka mak unang maki hengmino bobolo funino dokobenoa deibueine! \v 14 Ibo kukub ayam olo alukum nabianiba naka mak unang mak isa kla gobe bianiba daayemine! Naka mak unang maki gobesesenin kukub olo dot ayamobe. Kukub olo kukub afeto gaisonobiobe. Ibo naka mak unang maki kla gobe nib mole ib sinwal ib bobol temo makob anomabiobe. Ibo inaib mole ib sinwalo mo dosuanasese nomabibbabe. \v 15 Klaiste ibo bobol tem fiab omkayebe kesoa ibo Klaiste bobol tem fiab omkayebe olo deibueiba ibo kimanoko! Niminbabe, Gode ibo dlakanea baabenea Ibo nemi kesoa ne bobol tem fiab omyamabibo, ibo bobol tem fiab bianiba ib sinwalo mo dosuanasese nimibe, ib bobol tem funino makob aine genebio kesoa ibo e weng olo wente bianiba Gode gangobo ge ohamine! \v 16 Ibo Klaiste wengo kla wente bianiba ib bobol tem daako omabba bianiba fumbianibte! Ibo inamib mole e wengo kla tekein keniba ib sinwalo alebesese bianiba dlo klasese nomabiobe. Ibo e wengo kla fumbianiba Gode gangobo gabianiba komok sume Debite Gode buk temo anso dolanebu osa eka lotu kemin ans osa eka Gode Hobe anso ibo omkayebe osa ngambiam nine! \v 17 Ibo ilib bobol tem funino mo wafu bianibta okok osa weng osa ilib bobol temo mo namibe! Ibo weng osa okok osa namibo ibo Yesus Sume bobolo fumbianibta namine! Yesuse ibo daabenebio kesoa ibo ib Aye Gode baabaniba Kobo gang nanebta Yesuse dobyebta atdimo kaaneta ni daabenebiobo ge ohamine! \s1 Awok aaleb kamwal isa eka i meme isa i wengobe. \p \v 18 Alelwal ibo nib Sume Yesus Klaiste bainobo geibbio kesoa ibo ib imakwali wengo kla wenteye bianiba ili weng baanimib iwat namine! Ibo inamibo Sume kin dimo ib kukub olo nabibo ayamobe. \v 19 Eka imakwal ibsak ib alelwali dleb wengo mo oye bianibta dosuanimibe! Kla gobe bianiba kima nine! \p \v 20 Meme ibsa ibo Yesus Klaiste bainobo gabib kesoa ibo ib biem ay kamwali wengo kla wenteye bianiba ili weng baanimib iwat namine! Ibo inamib mole Sume ib kukubo yatenea seinyemabebe. \v 21 Aaleb kamwal ibo ib memei mo dolbianibta dosuan bianibta atliyemino mo omkayemibe! Ibo inayemib mole i bobol tem abilo wafu bianiba i kukub ayamo mo wafunomabibbabe. \s1 Okok naka isa i kimanin naka isa i wengobe. \p \v 22 Eka okok naka ibo ib kimanin nakai wengo kla wenteye bianiba ili weng baanimib iwat nabianiba okoko sbalma okok kemine! Ibo okoko tengo mo yebota fumbianibta Ni kimanin nakai kin dimo sbalma okok keboba i ni seinyemine gabianiba okok kebiba kimanin nakai deibe haanimibo okoko deiboniba besa bliba kimanin nakai imin tesiba yateniba yota okok kebuobo galin kukubo mo wafu nimibe! Ibo Sume Yesus Klaiste kla goba bianiba ib kimanin nakai okoko sbalma okok kemine! Ibo inamib mole Sume ib kukub olo watenea seinyemabebe. \v 23 Ibo inamin namin okoko okok kemibo ibo mo funanibta Ni okok olo naboba naka mak unang maki ni yateniba seinyemine galin bobol temo mo funimibe! Ib bobol tem ole Sume ni okoko watenea seinyemeko galin bobol tem ota fumbianiba ib bobol temo klayam bianiba okoko sbalma okok kemine! \v 24 Ibo Sume Yesus Klaiste bobolo fumbianiba okok kebib kesoa ibo tekein kebiobe, sino e baanea Sinanomo ne inamin namin ayamo ne bainobo galin nakaia unangai doyamabibo genebio kesoa e bain inanea ibo okoko ayam okok kebinib biamo molo yang kenea doyamabebe. \v 25 Eka nakaia unangai kukub misiamo nabib ile Gode i kukub misiamo yang kenea enin kino omyamabebe. Gode nib kukubo klanang gameo e mo funaneta Ne kimanin naka ele e kukub misiamo molo yang kenamino deibania okok naka eta e kukub misiamo molo yang kenano ge funanemebabe. E funanea I makob kesoa ne i kukub misiamo molo makob yang kenano ge funanamabebe. \c 4 \p \v 1 Kimanin naka ibo ib kimanin nakae abilim ut bianea ib kukubo nabibo watemeyebe kesoa ibsak inaniba ib okok nakai kla kima bianiba kukub ayam omkayemine! \s1 Ibo Gode amit nganha bianibte! \p \v 2 Ibo amitie Gode nganha bianibte! Ibo Gode nganhamibo bobol tem afeto mo funimibe! Gode bobolo olota fumbianiba gangobo ge ohamine! \v 3 Ibo Gode nganhamibo ni bobol osa fumbianiba Gode baabaniba Kobo Folwali daaye bianeba i deibo klaubeneba moniba bib mak bib mako haabianiba Yesus Klaiste wengo sino ayok binabo otane memalo kobo alebenebbuo, weng olo nakaia unangai omkayemine ge ohamine! Ne sino Yesus Klaiste wengo nakaia unangai omkayebio dafa ota nakaia unangai teniba ne ge nemeb teniba klabutam ele daibbiobe. \v 4 Gode baatnenea Kobo ne weng olo nakaia unangai kla omkayemale ge baatnenebio kesoa ibo Gode baabaniba Kobo Fole daahabeba e keb wengo omkeimabea nakaia unangai weng olo kla tekein keine ge ohamine! \v 5 Ibo amitie bainobo galinba nakaia unangai kukub ayamo nayemine! Ibo i inayemib mole isa bainobo genomabiobe. Ibo tengo mo yebota i kukub ayamo nayemino deibenimibe! \v 6 Nakaia unanga ib sital dimo wengo klayamo olota obiba naka mak unang maki Gode tal walin wengo kil baabenimibo ibo i wengo ayam yang kebeine! \s1 Fole Tikikas esa Onisimas esa i dlanea moniba Kolosi bib onsiobe. \p \v 7 Ne nib neke Tikikase ne kla goba bli kesoa ne dabaia monea ibsu natlanea ne okok osa eka ne bli osa o weng sango baabenamabebe. E Sume okok naka ayam kesoa ete nite nanoba Sume okoko okok kebuobe. \v 8 Ne e baabania Kobo moneba Kolosi bib seli nibo biobo weng sango baabeneba i nib weng sango wenteniba bobol ayam funaine ge baabania dabaia natlamabebe. \v 9 Tikikase natlamabeo ib bibam sake Onisimas esa baka natlamabebe. Esa nib Sume okoko amitie okok kebe kesoa esa nib nekobe. Nibo e kla goba biobobe. Esa Tikikase i dabo teniba ni okok osa eka ni biob osa o weng sango ibo baabenomabiobe. \s1 Folwali Kolosi bib seli Klayam blibte ge baabesiobe. \p \v 10 Alistakase ne bakanea klabutam bie esa eka Banabase ninge Mak esa i dabo ibo Klayam blibte ge baabeibobe. Sino ne ibo futano dola omfubenia baabenia Make tenea ibsu tlameo ibo e kukub ayam omaline ge baabeibio kesoa e tlameo inabaine! \v 11 Eka naka make niniino Yesus Yastas esa Klayam blibte ge baabenebe. Naka asumatna eli Yuda nakabe. I Yesuse bainobo gabiba ite nete nanoba Gode wengo nakaia unangai omkaye bianoba baabenoba Ibo Yesuse bainobo geiba Gode ibo kimaneko ge oye binabuobe. Yudai bainobo galin nakaia unangai maki mo inanibta ne mo daanebibbabe. Yudai asumatna elita kla daanebibta Gode wengo naka mak unang maki omkaye binabuobe. \v 12 Ilib bibam sake Ebaflas esa Ibo klayam blibte ge baabenebe. Esa Yesus Klaiste okoko okok kebebe. E Gode amitie nganha bianea God kobo Kolosi bib seli bainobo galin nakaia unangai daayebeba i bainobo galino sbalma bianiba keb wengo kla wente bianiba kleb weng baanemeb iwat namine ge oha binabebe. \v 13 Ne Ebaflase okoko nabeo tekein kebi kesoa baabenamabibe, e okoko sbal okok kebianea ibsa Leodisia bib sel isa Hilabolis bib sel isa daaye binabebe. \v 14 Dokta Luke ni goba biob nakae Dimase i dabo Ibo klayam blibte ge baabeibobe. \v 15 Ibo Leodisia bib seli bainobo galin nakaia unanga isa eka Nimfa osa eka bainobo galin nakaia unangai teniba o amo mina bianiba Gode niniino dobtouleb blib isa baabeniba Fole baanea Ibo klayam blibte genebo ge baabeine! \p \v 16 Ibo ne weng olo kiniba wentaibo Leodisia bib seli bainobo galin nakaia unanga isa omfubeiba kiniba tekein keine! Eka ne futano Leodisia bib seli bainobo galin nakaia unangai dola omfubeibuo ibsak omfubeiba kiniba tekein keine! \p \v 17 Ibo Akibase baabaniba Kobo Sume okoko omklebio mo deibonemebe, alukum klaneba blimanoko ge baabaine! \p \v 18 Ne wengo sin ewile om daake dai olole ne besa weng obita naka mak eta dolam daakelane otane Klayam blibte genamin weng olole nemaye nene kweilo tubunita dolanamabibe. Ne inania dola omfubeia ibo wateniba tekein keniba Bainobo Fol eta futan olo dola omfubenebo geine genitabe. Ibo ne klabutam ele blio ne bobolo mo dokobenomone! Gode ibo daayemeko! Ne wengo bayotabe. Fol neta ib futan olo dola omfubenamabibe.