\id 2TI - Mian NT [mpt] -Papua New Guinea 1986 (DBL 2014) \h 2 Timoti \toc1 Fole Timotie futano imin dola omfubasebe. \toc2 2 Timoti \toc3 2 Ti \mt1 2 Timoti \mt2 Fole Timotie futano imin dola omfubasebe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 36 ese mak blimanota Fole imin klabutam bianeta futan olo dolaneta Timotie omfubanebiobe. Yo dimo Fole tekein kenea e kaanamabeo meb tlubano kesoa e futan olo dolanea Timotie omfubanea bainobo galin nakaia unangai kimanin kukubo hekmel wengo omanea kla inanebta Yesuse bainobo galin nakaia unangai Efesas bibo blibi kimanale ge baabanebiobe. \io1 \it 1:1-2 \it* Mikiktem wengobe. \io1 \it 1:3–2:13 \it* Fole Timotie baabanea Keb kukubo ayamobo ge baabaseo wengobe. \io1 \it 2:14–4:5 \it* Fole Timotie tekein kemin wengo baabasebe. \io1 \it 4:6-18 \it* Fole bainobo galin kukubo nabinebuo wengobe. \io1 \it 4:19-22 \it* Mubiang wengobe. \c 1 \p \v 1-2 Ae ne miin Timoti kobo ne Fol neta kobo kla gobke bianita futan olo dola omfubkenamabibe. Ne Yesus Klaiste okok namasanin naka netabe. Gode ne nemfakanea namanea haabiania Yesus Klaiste dowan wengo nakaia unangai omkayebibe. Gode moton wengo baanea Ibo ib bobol tem funin osa makob Yesus Klaiste bobol tem funino ulab animibo amit nomabiobo genebuo wengo ne nakaia unangai omkayebibe. Nib Aye God esa eka nib Sume Yesus Klaist esa i dumo kobo kemhalilaniba daake bianiba bobol ayam omkakemine! \s1 Nibo Gode wengo aalo mo genalaobe! \p \v 3 Ne faninwali Gode kukubo wafu binibbio kesoa nesa wafu blibe. Ne funania Kukub olo nabio molotobo gabibe. Ne kwin tebo dim osa boman tebo dim osa Gode amitie beten keha biania Kobo Timotie daabanale ge ohabibe. Ne keb bobolo fumbi kesoa Gode gangobo gabibe. \v 4 Ne kobo mebinebbuo bobolo funania ne kobo katemnamin teb nebua Ne e atemamo gabi kesoa ne monia katemamio seinamabibe. \v 5 Ne funania Keb bainobo galino dimbabo, motonobo gabibe. Sino keb afoko Lois osa eka keb biemo Yunis osa i hato Yesuse bainobo geniba sbalma binibbio kesoa kebsa inaneba Yesuse bainobo gabianeba sbal mabiebo ne olo tekein kebibe. \v 6 Inamin kesoa ne keb bobol tem funin ayamo omfabkeia kobo Gode titilo omkakebeo bobolo funanale! Sino ne kweilo keb gabamon dim ut kafunia beten kebkeibuo dimo Gode e okok osa e titil osa kobo omklebiobe. Kobo Gode titil olo omklebuo sbalma wafu bianeba e okoko okok kemale! \v 7 Niminbabe, Gode e Hobe nibo dobyebue e nibo tosianin kukubo mo omkayebebabe. E nibo daayebe kesoa nibo sbalma bianoba naka mak unang maki gobe bianoba daaye bianoba nib kukub nabobo nibmaye kla kima biobobe. \p \v 8 Gode Hobe inanebio kesoa kobo nib Sume wengo naka mak unang maki omkayebebo mo tosianemebe! Ne Gode wengo naka mak unang maki omkayebi o dafa ota i klabuto ge nemeb teniba klabutam ele daibbio kesoa kobo mo funanebta E klabutam bie yotabo gabianebta tosianemebe! Kobo nakaia unangai Yesuse dowan weng ayamo omkayebeba naka mak unang maki teniba kobo enino omkakemibo kobo i kukub misiam olo tolo mo tosianemebe! Gode titilo kobo omkakebe kesoa Yesuse dowan weng ayamo nakaia unangai omkayemale! \v 9 Gode nibo hengmino temo biobo dotlanea funanea I ne naka unang aine genea nganabenebiobe. E nibo nganabenebuo nib kukub nabobo mo kibianeta nganabeim blimobe. Yeye. E ele bobol tem funin ota wafu bianea nibo daabenea kukub ayamo omyebiobe. Sinanggwano Gode dabale mo klaim blim bie dimo e funanea Sinanomo Yesus Klaiste dabaia daaknea dabalim daak unea nakaia unangai daabenia kukub ayamo omyamabibo genebiotabe. \v 10 Gode weng olo baanebuo memalo bain inanebio kesoa nibo tekein kebuobe. Yesus Klaiste nibo hengmino temo dotlanebio nakae tlebua nibo daaye binabebe. Klaiste kaanea imin hananebio kesoa nibo kaanamino tolo mo tosiambobbabe. E kaanamino titilo omabbunebio kesoa nibo Klaiste dowan weng ayamo wentenoba bainobo genomobo afen smike dobonoba amit nomabbiobe. \p \v 11 Eka Gode ne baatnenea Kobo ne dowan weng ayam olo nakaia unangai omkaye bianeba weng olo mitmakamo aleyemale ge baatnenea nemanea tenia \v 12 Yesuse dowan weng ayamo nakaia unangai omkayebi o dafa ota naka mak unang maki teniba ne enino omnibbu otane ne olo mo tosiambibabe. Ne naka ele bainobo geba blie kla tekein kebi kesoa ne mo tosiambibabe. E okok olo ne omnenea baatnenea Okok olo kla okok kemale ge baatnenebua e daatne bia okok kebi olo sinanoa e imin tlameo baatnenea Keb okok olo ayamobo ge baatnenamabebe. \v 13 Kobo ne weng molot olo alebkeio kla fumbianeba nakaia unangai aleyemale! Kobo weng olo kla funaneba sbal maneba Yesus Klaiste bainobo geneba esa naka mak isa gobenale! \v 14 Gode e weng moloto kobo omklameo kla kimanale! Gode Hobe nib bobol temo bie daabkenea Gode weng moloto kla kimanale! \p \v 15 Kobo tekein kebeobe, Fiselas esa eka Hemosenis esa eka Esia betano bib mak bib mak sel isa i alukum ne daatnenamino deitne bliobe. \v 16 I ina blib otane Onesifolas ele mo funaneta Fole klabutam biebo geneta tosianim blimobe. E tenea daatnenebio kesoa ne seinhabibe. Ne Gode baabania Kobo Onesifolase meletani dohalilaneba daabenale ge ohabibe. \v 17-18 Kobo tekein kebeobe, sino ne Efesas bibo binibu o dimo Onesifolase tenea kla daatnenebiobe. Eka ne tenia Lom bib ele klabutam blio dim osa e imin hen wat hen wat tenea natemnea daatnenebio kesoa ne Sume baabania Kobo mubiang amo dimo Onesifolase dobhalilaneba daabanale ge ohabibe. \c 2 \s1 Kobo Yesuse bainobo galino sbal manale! \p \v 1 Ne miin Timoti kobo Yesus Klaiste daakebe kesoa sbal manale! \v 2 Ne nakaia unangai kin dimo kobo weng olo alebkeio kobo nakai bainobo galino sbalma blib ita weng olo alebeneba tekein keniba isak weng olo naka mak unang maki aleyemine! \p \v 3 Awa genalin nakai ayami enino tolo mo tosiambibbabe. Kobo Yesus Klaiste okoko okok kebeb kesoa naka maki teniba enino omkakemib mole kobo sbal maneba makob awa genalin nakai ulab aneba Yesus Klaiste okoko okok kemale! Kobo enino tolo mo tosianemebe! \v 4 Awa genalin nakae funanea Ne okoko sbal maia ne komoke natemnea gotneneko genemeo e okoko sbalma bianea okok afeto bobolo mo fumbebabe. \v 5 Nakae gigi unang ge mole e gigi haanin kukubo wafu neko! E mo inaim blim kene mole e mo gigi moneta gaisenamin baan dimo mo unaneta inamin namino mo dlamabebabe. \v 6 Naka make bumolok bianea dango dikilanea dolmanebua damanomo emaye mikiktemo sin uleleb te fu dowoneta imin ota weleleb te funeta naka mak unang maki oyeta dowonomabiobe. \v 7 Ne saa weng ele baabkei olo kla funanale! Sma Sume daabkenea kobo ne weng olo mitmakamo alukum tekein kenamabeobe. \p \v 8 Kobo Yesus Klaiste bobolo funanale! Yesus Klaiste Debite molofeitobe. E kaanea imin hana tlebiobe. Ne Yesus Klaiste dowan weng olo nakaia unangai omkayebi kesoa kobo wenteneba funanale! \v 9 Ne dowan weng olo omkeimabi o dafa ota naka maki teniba enino omneniba makob nakai naka misiami sen sayo gebeniba dleb moniba klabutam danabib inaniba nesa nemeb teniba klabutam ele daibbiotabe. I ne sen saye getneib otane i Gode wengo sen sayo mo gebueim blimobe. \v 10 Naka mak unang maki ne enino omkanebib otane ne bainobo galino sbalma blibe. Niminbabe, ne funania Ne Gode nakaia unangai emi dlakanebuei daaye bia i Yesus Klaiste dowan wengo wenteniba bainobo gabiba Gode i hengmin temo blibo dotlanea dleb utnea e bib ut danea amit nine ge fumbiania i daayebibe. \v 11 Ne weng olo baabkenamabio bainobe. \q1 Nibo Klaiste temna kaanobbio kesoa sinanomo etem nibtem nanoba amit nomabbiobe. \v 12 Naka mak unang maki enino nibo omkayemibo nibo nib bainobo galino sbal manob mole nibo makob Yesus Klaiste nanea komok ambie inanoba nibsa komokwal anomabbiobe. Nibo baanoba Ni Yesuse mo tekein kebobbabo genob biamo sinanomo Yesus esa baanea Ne i mo tekein kebibabo genamabebe. \v 13 Eka nibo baanoba Yesuse dobsileb nomo genomobo nibo mo dobsileb biobbabe. Otane e baanea Ne inamin namino nanamabibo genemeo e bain inanamabebe. E wengo baane biamo mo misimub anomobabe. \s1 Okok naka ayame Gode kin dimo molotobe. \p \v 14 Kobo ne weng ele okebi olo nakaia unangai amitie omkayemale! Eka kobo Gode kin dimo baabeneba Ibo inamin namin wengo baanimibo o wengo mo obianibta baase baase nimibe ge baabenale! Inamin kukubo nakaia unangai mo daabenomobabe. Nakai weng olo wentebib ile i kukub ayamo watwat daayebobe. \v 15 Kobo Gode okoko sbal maneba okok kemeba e keb okoko watemnea baabkenea Keb okoko molotobo ge baabkeneko! Kobo okok olo inamebo Gode kin dimo aalo genalino blimobe. Eka kobo Gode bain wengo mitmakamo kla tekein kebianeba naka mak unang maki omkayemale! \v 16 Kobo Gode wengba weng afeto nakaia unangai omibo mo wentenebta baka omebe! Niminbabe, nakaia unangai weng olo obib ile Gode weng motono deibueiba weng olo dletnoa God esuo mebo deiboniba dot skeim ye unomabiobe. \v 17 Nakaia unangai weng olo obib ile makob nakai yaio weise bianoa welo tam tam binoa sum anoa klolabenabo inanoa weng olo i watwat dabenamabobe. Haimenias esa eka Failitas esa i dabo inamin wengo aleye binabiobe. \v 18 I weng moloto deiboniba dim weng ota obianiba baaniba Bainobo galin nakaia unangai sin kaaniba imin hana tlibbio kesoa imino mo kaanibta hana tlomabibbabo ge obinabiobe. I inamin wengo obiba naka mak unang maki wentebibo weng olo i bainobo galino watwat daayebobe. \v 19 Ina otane Gode moton weng ole sbalobe. Makob sbal amuno nakai tebeloniba gibiba daak unanoa geiowanoa amo fibamino sbal manabo inanoa Gode weng osa sbal mabiobe. Gode weng olo dolanebio baanoa \q1 Sume e nakaia unangai tekein kebebo ge baanoa \b \m eka imin baanoa \q1 Nakaia unangai obianiba Ni Sume bainobo gabuobo gabibi kukub misiamo deiboniba kukub ayamo amit wafueine genobiobe. \b \p \v 20 Am sumo mako buo o tem tamo dis mako walo oleb teniba olaibbiobe. Diso gol klaibbu osa eka silba klaibbu osa ole monio sum waloniba eka diso aso klaibbu osa eka dabalo klaibbu osa ole o monio men walonaniba oleb teniba am olo tem tam olaibbiobe. Diso monio men walibbu ole o okoko menobe. Eka diso monio sum walibbu ota o okoko dot sumobe. \v 21 Nakaia unangai \b \m kukub misiamo deibonimib ile makob diso monio sum walibbuo ulabobe. Nib Sume nakaia unanga eli dlakanea baabenea Ibo kukub ayam wafuniba ne naka an ne unang an naniba ne okoko ayamo olota amitie okok kemine ge baabenamabebe. \v 22 Kobo tembali bobol tem misiamo i bobol temo tlak uneyebua fumbinabibo kukub olo deiboneba kukub ayam ota wafunale! Kobo Gode weng ayamo kla wafu bianeba naka mak unang maki gobe bianeba weng fiabo omkayemale! Naka mak unang maki bobol tem funino ayam bianiba Sume baabaniba Ni daabenale ge ohabib naka unang ita kobo bekebe nale! \v 23 Kobo nakaia unangai bobol tem funin ayamo blim bianiba weng misiam osa dleb weng osa ota obibi mo baka bianebta i wengo mo baka omebe! Kobo tekein kebeobe, i weng olota obianibta atliyemin kukubo omeb tam te kabiobe. \v 24 Eka Sume okok nakae alo mo tliaubanomone! E nakai alukum weng fiab omkaye bianete! E nakaia unangai Sume wengo kla aleyemeko! E naka mak unang maki kukub misiamo omkahamibo e alo mo tliaubanota yang kenemene! \v 25-26 E nakaia unangai e wengo omdibimibi weng fiab omkaye bianea funanea Gululame nakaia unanga eli makob eil halebi imiko yafunabo inanea yafu bie kesoa i e okok ota okok kebib otane Gode daabenemeo i hengmino deiboniba i bobol temo deskiniba omoniba Gode omaniba imaye Gululame kweiban dimo deibaniba meteniba Gode weng motono wentemomabiobo ge fumbianea nakaia unanga eli Gode wengo fiab aleyemeko! \c 3 \s1 Mubiang amo wengobe. \p \v 1 Memalo mubiang am bomabio kesoa kukub misiam homono nakaia unangai dimo tam tlamabobe. Kobo weng olo kla fumbianebte! \v 2 Am olo dimo tlamo naka maki funaniba Ninita ye biobabo gabianiba moni osa gobo bianiba ili tak ngambianiba ili niniino omfufu bianiba God esa naka mak unang mak isa i weng dobo weng oye biam bianiba i biem ay kamwali weng osa omdibiye biam nomabiobe. I inamibo naka mak unang maki naka eli daayemomabib otane i naka mak unang maki mo gangobo genibta Gode niniino dobtouleb nomabibbabe. \v 3 I naka mak unang maki mo dohalim bianibta daayemomabibbabe. I naka mak unang maki dim oye bianiba imalo kukub ayamo mo namomabibbabe. I alo hebmamsab tliyebua naka mak unang maki dosuan bianiba yemomabiobe. I kukub ayamo mo gobonomabibbabe. \v 4 I nekwali dloniba wasi nakai kweiban dimo doka bianiba i bobol tem funin misiamo wafu bianiba funaniba Ni niniino sumobo gabianiba ili kukub nabib ota seinwe bianiba i Gode bobolo mo funomabibbabe. \v 5 I nakaia unangai kin dimo Gode kukubo wafunomabib otane i bobol temo funaniba Gode titilo sumba kesoa e ni mo daabenamabebabo ge funomabiobe. Kobo i bekebe nino deibenale! \v 6 Inamomabib naka eli kukubo inaminobe. Maki moniba naka maki alelwali amo deibe unib biamo isu ye unaniba dim baabesiba unangi bobol tem funin ayamo blimi naka eli wengo wenteniba wafu nabinabiobe. Unangi inabibi hengmin homono hengabib kesoa i bobol tem funino ayamo blimobe. I omomom kukub misiamo bobolo wayebobe. \v 7 Unang eli omomom wengo wentebib otane i Gode wengo klao mo wentebibbabe. \v 8 Makob sinanggwano Yanise Yamblise i dabo naniba Mosese wengo omdibiha binibbio inaniba naka elisa Gode weng baino omdibihabiobe. I bobol tem funino misiamobe. I baaniba Ni Gode kukubo wafu biobobo geniba dim obiobe. \v 9 Otane i kukub misiam olo mo biota sinanomobabe. Sinanomo nakai alukum i kukub misiamo watemubenomabiobe. Makob sinanggwano nakai Yanise Yamblise i dabo naniba i kukub misiamo nabiba watemubeibbio inaniba naka eli kukub osa watemubenomabiobe. \s1 Fole Timotie baabanea Kobo Gode kukubo sbalma wafunale ge baabasebe. \p \v 10-11 Ina otane sino kobo ne baka haabianeba ne wengo nakaia unangai omkayebio wentebbiobe. Kobo ne kukubo tekein kebeobe. Ne amitie kukub ayamo wafu biania Gode okoko ayam okok kebiania ne bainobo galin osa sbalma biania bainobo gabibe. Kobo ne kukubo tekein kebeobe. Ne atlinemin nakababe. Ne naka mak unang maki gobe biania daaye bia eka naka mak unang maki teniba ne enino omkanebiba ne enin kino watemebi otane ne sbal mablibe. Ne sino Antiok bib osa Aikoniam bib osa Listla bib osa blio bib olo seli enin sumo omkane binibbiobe. I ne enin sumo omkane binibbuo dimo nib Sume daatnenea nemsbal manea ne mo kaaim blimobe. \v 12 Nakaia unangai alukum Yesus Klaiste bobolo funaniba Gode kukubo kla wafu nimib isa wasi nakai teniba enino omkayemomabiobe. \v 13 Naka misiam isa eka nakai dim omin wengo isa i nakaia unangai dim weng olo alebeiba i wenteniba bainobo genomabiobe. Eka Gululam esak e dim omin wengo omeb tenea dim omin wengo aleyebib naka eli baabesea i wenteniba bainobo gebenomabiobe. Memalo i kukub misiamo nabib otane sinanomota i kukub misiamo dot sum namomabiobe. \v 14 Otane kobo sino Gode bain wengo wenteneba bainobo genebbio amitie wafunale! Niminbabe, kobo nakaia unangai weng olo alebkeibbuei kukubo tekein kebeobe. \v 15 Eka sinanggwano kobo gwab bieb dimo Gode buk tem wengo wente bineba damaneba eka damaneb dim osa memalo dim olosa Gode buk tem wengo sma ye wentebeobe. Weng olo kobo daabkenoa keb bobol tem funin ayamo omkenoa Yesus Klaiste bainobo genebbuo Gode kobo hengmin temo biebo kemtlanebiobe. \v 16 Nakai weng olo alukum Gode buk temo dolaibbuo Gode Hob eta weng olo omkayebeta dolaibbiobe. Weng olo nakaia unangai alukum daayebobe. Weng olo nakaia unangai daaye bianoa aleyebua i weng moloto tekein kebiobe. Eka o inanoa ili hengmino nabib osa aleyebua i hengmino deiboniba kukub ayamo tekein kenimibo wafunomabiobe. \v 17 Weng olo inanamabo kesoa Gode okok naka nibo e weng olo amitie kibianoba e okoko ayam okok keboba weng olo nibo daaye bianoa titilo omkayebua e okoko klayam okok kemomo! \c 4 \s1 Timoti kobo Gode weng baino omkeimamale! \p \v 1 Yesus Klaiste imin tlameo nakaia unangai afen blib isa eka kaaibbue isa i kukubo klanea nakaia unangai kimanamabebe. Yesus esa God esa i kin dimo ne kobo sbal weng baabkenamabibe. \v 2 Kobo Gode wengo nakaia unangai amitie omkayemale! I kobo seinkemib osa eka i mo seinkemin blim kenimib osa kobo Gode wengo amitie omkayemale! Kobo Gode wengo keim aleyemeba i tekein keniba bainobo geine! Eka nakaia unangai hengmino henganimibo kobo i hengmin kukubo alebeneba i hengmin kukub olo deiboniba Gode kukubo kla wafueine! Eka kobo i amitie weng fiab omkaye bianeba weng olo kla omkayemale! \v 3 Niminbabe, sinanomo nakaia unangai weng motono mo wentomabibbabe. I weng afeto Gode wengbao kla gobo blibo bobolo fumbianiba nakaia unangai weng olo aleyebibi baabeniba Ibo teniba nisu ele tlaniba ib weng olo alebeine ge oyemomabiobe. \v 4 I Gode bain wengo deiboniba faninwali awem wengo oyebib ota wenteniba bainobo genomabiobe. \v 5 Ina otane kobo i kukub misiam olo mo bakanebta namebe! Kobo keb kukub ayam olota namale! Eka nakaia unangai kobo enino omkakemibo kobo sbal maneba Gode kukubo kla wafunale! Kobo Gode wengo amitie omkeima bianeba nakaia unangai omkaye bianeba Gode okok olo omklebuo amitie okok kemale! \p \v 6 Memalo i ne nenaiba kaanamabio amo mebanobe. Ne dabalim olo deibonia Yesus esu unamabio am osa meb tlobe. \v 7 Ne Gode okok olo omnebuo amitie okok kebinabibe. Ne okok olo kla okok kebinabio memalo ye blimanobe. Ne Yesuse okoko mo deibueim blimobe. Ne e kukubo amitie nekek ge wafu binabibe. \v 8 Ne okok olo kla okok kebio blimano kesoa inamin namino dlonamino waiso blibe. Inamin namino dlonamino mitmakamo inaminobe. Sume nibo baabenea Ibo naka molot unang molotobo ge baabenamabebe. E naka molotobe. Sinanomo mubiang amo dimo e nakaia unangai kukubo klanang genea tlameo ne inamin namino donenea baatnenea Kobo naka molotobo ge baatnenamabebe. Eka e inanamabeo ne nenekiemo mo donamebabe. Nakaia unangai alukum Yesuse imin tlamabebo geniba waisa blib isa inamin namin olo doyenea baabenea Ibo naka molot unang molotobo ge baabenamabebe. \s1 Fole wengo mubiango Timotie baabasebe. \p \v 9 Timoti kobo hebmamsab nesu tele! \v 10 Dimas ele dabalim okoko gobonea ne deitnenea monea Tesalonaika bib unebe. Eka Klesens ele monea Galesia bib unea eka Taitas ele monea Dalmesia bib onaiba \v 11 Luk eta elekiem ne beketne biebe. Kobo Make hebmamsab debetneba dab tline! E ayam nanea ne okoko daane binabebe. \v 12 Eka Tikikas ele ne dabaia monea Efesas bib unebe. \v 13 Kobo tlang gaebo utneba Tloas bib uto ne youm teke Kafase am tam daba tlibue dubutnena bianeba eka buk osa oleb na tele! Kobo buko eil aalo klaniba o dimo wengo dolaibbuo mo dokobkenomone! Kla fumbianeba omeb tele! \p \v 14 Aleksandae ain klamin naka ele ne misiam natnenebe. E kukub misiam olo ne nane bine biamo sinanomo Sume yang kenamabebe. \v 15 Kebsa naka ele klanale! E nib weng olo nakaia unangai omkayebobo weng dobo weng owebebe. \v 16 Ne koto mikiktemo kot keibuo dimo nakai ne mo beketne bianibta daatneim blimobe. I alukum deitneiba nenekiem bianita kot keibiobe. Ne Gode baabania Kobo i kukub misiam olo mo yang kenebta yenanemebe ge baabaibiobe. \v 17 Otane Sume ne daatnenea nemsbal mane kesoa ne Yesus Klaiste wengo alukum nakaia unangai Yudabai omkaye bia i e weng olo wentibbiobe. Eka i funaniba Fole ananoba kaaneko ge fumbib otane Sume ne daatnene kesoa i ne mo nenaim blimobe. \v 18 I kukub misiamo nanemibo Sume ne daatnenea nemeb utnea e kimanin bib ut danamabebe. Nibo amitie e niniino dobtouleb nomo! Bainobe. \p \v 19 Kobo Flisila osa Akwila esa eka Onesifolas esa e meletan isa Ayam blibte ge baabenale! \v 20 Ilastas ele sma Kolin bib wat biebe. Eka Tlofimas ele genansea Mailitas bib wat deiba tlibiobe. \v 21 Glol sume tlemabe kesoa kobo mo nemebe! Hebmamsab tele! Yubyulas esa Byudens esa eka Lainas esa eka Klodias esa eka nekwal mak isa alukum Klayam biebte ge baabkeibobe. \p \v 22 Sume keb bobol temo bianea daakemeko! Ne wengo bayotabe. Fol neta keb futan olo dola omfubkenamabibe.