\id 1TI - Mian NT [mpt] -Papua New Guinea 1986 (DBL 2014) \h 1 Timoti \toc1 Fole futano mikiktemo dolanea Timotie omfubasebe. \toc2 1 Timoti \toc3 1 Ti \mt1 1 Timoti \mt2 Fole futano mikiktemo dolanea Timotie omfubasebe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 35 ese mak blimanota Fole Timotie futan olo dola omfubanebiobe. Timotie awoko Yuda unangobe, eka e aaleb ele Glikobe. Yo dimo e Yesuse bainobo galin nakaia unangai Efesas bibo blibi kima bie kesota Fole futan olo dola omfubaneta Kukub misiamo tam tlebo yo inanebta bainobo galin nakaia unangai kimanale ge baabanebiobe. \io1 \it 1:1-2 \it* Mikiktem wengobe. \io1 \it 1:3–3:16 \it* Yesuse bainobo galin nakaia unangai kukubo namin osa eka i kimanin nakai kukubo namin osa o wengobe. \io1 \it 4:1–6:21 \it* Fole Timotie baabanea Kobo Sume okoko inanebta okok kemale ge baabaseo wengobe. \c 1 \p \v 1-2 Ae Timoti kobo Ne Yesus Klaiste wengo kobo aleke bia tekein keneba bainobo gabeb kesoa kobo makob ne miin motonobe. Ne Fol neta futan olo dola omfubkenamabibe. Ne Yesus Klaiste okok namasanin naka netabe. Niminbabe, Gode nibo hengmino temo biobo dotlanebio esa eka Yesus Klaiste imin tlamabe waisa biob naka esa i baatneniba Ni kobo kemanoba moneba bib mak bib mako haabianeba ni wengo omkeimamale ge baatneibbio naka neta keb futan olo dola omfubkenamabibe. Nib Aye God esa eka nib Sume Yesus Klaist esa i dumo kobo kemhalilaniba daabkeniba bobol ayam omkakemine! \s1 Dim omin nakai teniba ibo dim oyemibo i wengo mo wentaibe! \p \v 3 Weng olo ne sino tenia Masedonia bib ele tlang genia tebiania baabke tlibio yota imin dola omfubkenang genitabe. Ne bobol temo fumbio Kobo imin Efesas bib ye bianeba naka maki nakaia unangai dim omin wengo oyebibi baabeneba Ibo naka mak unang maki dim wengo mo oyemibe ge oyemale! \v 4 Kobo i baabeneba Ibo i faninwali weng sang afeto mo obianibta i inaminobo gabianibta i niniino mo dotouleb nimibe ge baabenale! I faninwali wengo wentaibo baase baase binabib otane weng olo i bobol temo mo daabenota i Gode bainobo genomabibbabe. Olo besa wengobe. \v 5 Ina otane ne funania I kukubo afet ota nabianiba i bobol temo kining aniba fiab bianiba Gode bobolo fumbianiba bainobo geine! I inamib mole i Gode goba bianiba eka i nakaia unanga isa gobeniba daayemomabiobo ge funaiobe. \v 6 Eka mak ile kukub ayam olo ne kobo baabkeibio deiboniba besa weng ota wafu bianiba obiobe. \v 7 I Gode hekmel wengo Mosese dolanebuo aleyemin naka nomo gabianiba baaniba Ni wengo motonobo gabib otane i Gode weng osa ili weng osa mitmakamo klao mo tekein kebianibta obibbabe. \p \v 8 Nibo tekein kebuobe, Gode hekmel wengo Mosese dolanebuo nakaia unangai tekein keniba kla wafueib mole hekmel weng olo ayamobe. \v 9 Gode hekmel wengo naka ayam unang ayami mo omkayemebabe. E nakaia unangai enamin kukubo wafu blib ita omkayebebe. I e hekmel wengo omdibi bianiba eka e wengo mo wente biam blibbabe. I Gode kukubo mo wafueim blim bianiba hengmino henga bianiba e weng dobo weng oha bianiba eka e wengo aben giwe biam bliobe. I awok aalok isa eka naka mak unang mak isa yenaiba kulila biam bliobe. \v 10 I unang taman henga bianiba eka naka maki teniba naka maki taman henga biam eka bib mak seli moniba bib mak seli naka maki ayok doise moniba naka maki waloniba monio boka biam eka dim wengo obiam bliobe. I kukub olo ina bianiba eka kukub misiamo afet osa nabianiba Gode weng ayamo mo wafu nim blim blib kesota Gode hekmel wengo nakaia unanga eli omkayebebe. \v 11 Gode hekmel weng olosa eka Klaiste dowan weng ayamo Gode dot naka ayame ne omnea omonia nakaia unangai omkayebi osa o mitmakamo makobobe. Weng olo nibo kukub ayamo aleyebo kesoa nibo ayam anoba makob Gode ulab anomo! Weng olo dot ayamobe. \s1 Gode Fole daabane kesoa e Gode gangobo gesebe. \p \v 12 Ne nib Sume Yesus Klaiste titilo omnenea ne e okoko okok kebibe. E funanea Fole okok olo sbal manea kla okok kemabebo gene kesoa e ne nemfakanea okok olo omnebio kesoa ne gangobo gabibe. \v 13 Sino ne Yesuse niniino weng dobo weng owe biania eka bainobo galin nakaia unangai kukub misiam omkaye biam biania weng omdibi binibu otane Gode nemhalilanea daatnenebiobe. Niminbabe, o dimo ne Gode kukubo tobtlin bianea Klaiste mo bainobo geim blim biania funania Ne Gode okoko okok kebibo gabi kesota o mitmakam ota Gode nemhalilanea daatnenebiobe. \v 14 Eka Sume Yesus Klaiste kukub ayamo omnenea daatnene kesoa ne e bainobo genia e kla gobania ne bobol temo omam blibe. \p \v 15 Yesus Klaiste funanea Ne daatnia nakaia unangai hengmin tem tab blibo dotlanano ge funaneta daak tlebiobe. Weng olo bainobe. Nakaia unangai weng olo wenteniba bainobo geine! Ne hengmino henga binibuo kukub olo naka mak unang maki hengamin kukubo gaisenobiobe. \v 16 Yesus Klaiste funanea Nakaia unangai kukub misiamo deibueine ge funanea dohalilanea daabenebio kesoa e hengmin homono henga binabi naka ne nemhalilanea daatnenea ne e kukubo wafu blia naka mak unang maki nateniba funaniba Sino Fole naka misiam binebio otane memalo Klaiste daabanea e naka ayam biebo, Klaiste makob e Fole daabanebio inanea nisa daabenea ni hengmin osa omtlabenamabebo genomabiobe. I inaniba e wengo wente bianiba e bainobo genib mole i afen smike doboniba amit nomabiobe. \v 17 E ina binabe kesoa nibo Gode niniino amitie dobtouleb nomo! E komok sum amit ninobe. Nakaia unangai i kino e mo atemin blim otane e kintalinobe. Elekiem eleta God motonobe. Nibo amitie obianoba E ayam, nib Sumobo ge ohamomo! Bainobe. \s1 Fole Timotie baabanea Kobo okoko kla okok kemale ge baabasebe. \p \v 18 Ne miin Timoti kobo ne weng mako baabkenamabibe. Sino Gode e wengo naka maki omkayebea i kobo baabkeniba Timotie Gode okoko kla okok kemabebo ge baabkeibbiobe. Nesa inangge baabkenamabibe. Kobo weng olo fumbianeba Gode okoko sbalma okok kemale! \v 19 Kobo ina bianeba keb bainobo galino sbalma bianeba Gode bobolo funale! Naka mak unang mak ile Gode bobolo mo fumbibbabe. I kukub ayam olo abuk wawem blib kesoa i bainobo galino watwat dabebiobe. \v 20 Haimenias esa Aleksanda esa i inaniba kukub misiam olo nabib kesoa ne Klaiste baabaia Gululame baabanea e i enino omyenea tekein keniba Ni Gode niniino weng dobo weng ohamin olo kukub misiamobo geine genia baabaibiobe. \c 2 \s1 Gode beten kehamin kukubobe. \p \v 1-2 Ne wengo mikiktemo kobo baabkenamabi ole kobo naka mak unang maki baabeneba i nakaia unangai alukum beteno daaye bianiba Gode baabaniba Kobo nakaia unanga isa komok sum isa eka komokwali mak isa alukum daayemale ge oha bianiba Gode gangobo galine! Nibo inamob mole ayam bianoba Gode kukubo wafu bioba naka mak unang maki nib kukubo yateniba funaniba I kukubo ayamobo ge funanomabiobe. \v 3 Ibo Gode nibo hengmino temo biobo dotlanebio nakae inangge ohamibo e seimbianea funanea Kukub olo ayamobo ge funamabebe. \v 4 E bobol temo fumbeo Nakaia unangai hengmino temo blibo ne alukum dotlaia i ne weng moton ota wente bianiba kla tekein keine ge fumbebe. \v 5 Niminbabe, Gode elekiem eleta binabebe. Nakaia unangai hengmino hengabib kesoa Gode makaa blib otane naka make elekiem eleta God esa nakaia unanga isa i isak daak manea baabenea Ibo teniba God esu tline ge baabenea dleb tetenanebiobe. Inanebio nakae niniino Yesus Klaist etabe. \v 6 Amo Gode omfakanea baanea Amo yo dim ota Yesuse dabalimo daak unamabebo genebuo tlo kesoa Yesuse daakenea atdimo kaanea nakaia unangai alukum hengmino walubenebiobe. Nibo Yesuse kukubo nanebuo kukub olo watenoba tekein kenomo! Gode bobol temo fumbeo Nakaia unangai hengmino deibueiba ne i hengmino omtlabeia i nemi aine ge fumbebe. \v 7 E inangge fumbe kesoa ne baatnenea Kobo moneba bib mak bib mak olo nakaia unangai Yudabai ne weng olo omkayemale ge baatnenebiobe. Ne weng olo dimbabe, bainobe. E ne nemanea monia naka mak unang maki Yudabai e moton wengo aleye bia i e weng ayam olo wenteniba bainobo genomabiobe. \p \v 8 Ne bobol temo fumbio bib mak bib mak seli nakai alukum i kweilono tebehaniba beten kebianiba Gode bobolo fumbianiba kining bianiba atliyemina dleb wenga o deiboniba klayam bianiba beten kemine gabibe. \p \v 9 Ne unang ibsa baabenamabi ole ibo youm ayamo waloniba kimibo bayota kibianibte! Ibo mo funanibta Ninita ye biob ese genibta gabamano eito mo kiwe bianiba eka gol osa bukubsan osa ayam ayamo mo kibianiba eka youm ayam ayamo moni sumo homono mo walo kibiam namibe! \v 10 Ina otane unangi Ni Gode wengo wafu biobobo gabib mole okoko ayam okok bianiba naka mak unang maki daabeine! Kukub ayam olo i makob youm ayamo kimomabiobe. \p \v 11-12 Ne unang ibo oye biania Ibo Gode wengo nakai mo aleye bianibta omkayemibe ge oyebibe. Ibo kimik gebianiba nakai Gode wengo ibo omkayebibo wente bianiba weng olo kla funine! \v 13 Niminbabe, Gode Adame sin klaneta Ifo mit klananebio kesotabe. \v 14 Eka Gululame Adame dim omin wengo mo baabaneta bainobo geim blimobe. E Adame alel ota dim omin wengo baabonea o bainobo genota Gode wengo welanobiobe. \v 15 Otane unang ile meme ita yomiobe. I ina bianiba Gode bainobo gabianiba naka mak unang maki gobe bianiba daaye bianiba i bobol temo kining aniba kukubo fiab nimibo Gode i daayemabebe. \c 3 \s1 Bainobo galin nakaia unangai kimanin nakai weng sangobe. \p \v 1 Weng olo bainobe. Nakai bobol temo funaniba Ni Gode bainobo galin nakaia unangai kimanomo gabibo okok olo dot ayamobe. \v 2 Bainobo galin nakaia unangai kimanin nakae e amitie kukub ayamo namea nakaia unangai e kukubo nabeo wateniba funaniba E kukubo ayamobo geine! Eka e alelo olokiem omo bianea e bobol temo klayam fumbianea e kukubo klayam wafu bianetane! Eka bib mak nakai tlaibo e dleb tanea e am tam danea imeno dokaye biam nabianea e aleyemin naka ayam bianete! \v 3 E aay misiamo mo dowoneta weng namin namin nemene! E alo mo tliaubanomone! E naka fiab bianete! Eka e naka maki weng alang wengo mo oyemene! E monio bobolo sumo mo fumbianeta gobonemene! \v 4 E alel osa meme isa i kla kima bianea eka memei kukub ayamo aleyebea memei e wengo kla wafuniba funaniba Ni Aye naka ayamobo ge funine! \v 5 Nakae e alel osa e meme isa klao mo kimain blim kene mole naka ele Gode bainobo galin nakaia unangai klao mo kimanamabebabe. \v 6 Eka nakae Gode mema bainobo geneme e Gode bainobo galin nakaia unangai mo kimanemene! E inane mole e untak ngambianea funanea Ne kimanin naka sumobo genea Gode wengo omdibihamsea Gode baanea E kukubo misiamobo genamabeo makob sino Gululame e bobol temo funanea Ne niniino sum anano gansea Gode baanea Keb kukubo misiamobo genebio inabanamabebe. \v 7 Bainobo galin nakaia unangai kimanin nakae kukub ayam wafu bia naka mak unang maki bainobo gabibbai ateniba e kukubo ayamobo geine! Eka e mo inaim blim kene mole i funaniba E naka misiamobo, e kukub osa misiamobo ge ohabiba e kukub misiamo nabea Gululame naka ele bobol tem funino watwat dabanamabebe. \s1 Bainobo galin nakaia unangai i komokwali wengobe. \p \v 8 Yesuse bainobo gabibi komokwal isa i kukubo makob bainobo galin nakaia unangai kimanin nakai kukubo nabib ina bianiba i bobol ayam fumbiam nabiba nakaia unangai yateniba I kukubo ayamobo gabibte! I dim omin weng osa mo omibe! I aay misiamo mo dowonibta gabam tol temo mimafubenota weng namin namin nimibe! I mo funanibta Ni Gode okoko okok kebob kesoa naka maki monio menganoba oisenomo ge funanimibe! \v 9 Eka i Gode weng ayamo kla fumbianiba funaniba Weng olo bainobo ge funaniba sbal maniba wafueine! \v 10 Mikiktemo ibo i kukub osa i okok osa yatemiba i okoko ayam okok kemib mole ita bainobo galin nakaia unangai komokwal aine! Eka yatemiba i okoko misiam okok kemib mole i mo dlanimibe! \v 11 Eka i alelwal isa kukub ayam wafu bliba naka mak unang maki yateniba I kukubo ayamobo geine! Eka i naka mak unang maki aal asito mo boyemibe! Eka i bobol temo klayam fumbianiba i kukubo klayam wafu bianibtane! I amitie okok ayam okok kemine! \v 12 Bainobo galin nakaia unangai komoke e alelo olokiem omo bianea e alel osa e meme isa eka e okok naka isa kla kimaneko! \v 13 Nakai bainobo galin nakaia unangai komokwal an bianiba okok ayam okok kebib ile naka mak unang maki oye bianiba I kukubo ayamobo ge oye binabiobe. I Yesus Klaiste dowan wengo nakaia unangai omkayemom gaibo i mo tosiambibbabe. Sbal maniba omkayebiobe. \s1 Gode wengo mitmakam otabe. \p \v 14 Ne bobol temo fumbiania Ne hebmamsab monia kebsu natlano gabi otane ne futan olo dola omfubkenamabibe. \v 15 Inanamabi kesoa ne hebmamsabo mo tlim blim keni mole kobo weng olo wateneba Gode meletani kimanin kukubo inaminobe genale genita futan olo dola omfubkenamabibe. Gode meletan ile Gode afen smik sae e bainobo galin naka unangobe. I makob sbal amuno geigebua amo sbalma binabo inaniba i Gode weng motono wafu binabiobe. \v 16 Ne Gode weng olo sbal weng baabkenamabibe. Gode Klaiste wengo nibo omyebua nibo wafu biobo sino weng olo ayok otane Yesuse tenea omkeimanebio weng olo sum kesota ne weng olo baabkenamabibe. \q1 Gode e dabanea daakenea dabalim ele tlanea naka moton aneta nakaia unangai atemibbiobe. Gode Hobe Yesuse dofaanea imin hananea Gode nakaia unangai e alebenea i funaniba Bainobo, e Gode miinobo geibbiobe. Abisel isa atemibbiobe. Eka bainobo galin nakaia unangai moniba bib mak bib mak seli Gode wengo omkayebiba eka Gode wengo monoa nakaia unangai dabale monea dene dene isu osa onon tlanoa nakaia unangai mak isa Gode weng olo wenteniba bainobo gabinibbiobe. Gode Yesuse debeb utnea abilim ut danea bianea inamin namino alukum kima biebe. \c 4 \s1 Dim omin nakai wengobe. \p \v 1 Gode Hobe baanea Sinanomo nakaia unangai maki Yesuse kukubo deiboniba naka mak unang maki dim wengo omkeima bianiba eka hob misiami wengo omkeima biam blibo wenteniba yota wafu nomabiobo genebiobe. \v 2 Dim omin nakaia unanga eli dim omin kukubo nabianiba eka dim omin weng olo omkeima biam binabiobe. I amitie dim omin kukub ota wafu bianiba i bobol temo dim omin bobol tem ota fumbianiba i bobol temo dim baaniba Ni kukub olo nabobo hengminbabo geniba i hengmino hengabibo aalo mo waiseim blimobe. \v 3 Dim omin nakaia unanga eli alelwal bokalino awem omka bianiba eka imen mak osa awem omka biam binabib otane Gode omomom imeno omfube tlanea baanea Nakaia unangai imen olo dlo unaline genebio kesoa nibo Gode weng ayamo tekein kenoba bainobo gabob nibo omomom imeno dlo dowonom gaobo Gode gangobo gabianoba unalomo! \v 4 Nibo tekein kebob yotabe. Gode inamin namino alukum ayam kla tlanebio kesoa nibo mo baanobta Misiamobo geta deibonomobbabe. Nibo Gode baabanoba Kobo klayam naneba imen olo omyebobo ge baabanoba dlo unalomo! \v 5 Niminbabe, Gode wengo baanoa Inamin namin imeno ayamobo genobua eka nibo imeno dowonom gaobo Gode gangobo ge baabanomabbio kesoa Gode kin dimo inamin namin imen olo ayamobe. \s1 Timoti kobo Yesus Klaiste okok naka ayam bianebte! \p \v 6 Kobo weng olo Gode bainobo galin nakaia unangai baabeneb mole kobo Yesus Klaiste okok naka ayamobe. Eka Gode weng ayamo kobo wentebebo fumbianeba kla wafu bieba weng olo kobo daabkenoa keb bainobo galino omsbal mabkenamabo makob kobo imeno dowoneba titil manabeb inabkenamabobe. \v 7 Kobo faninwali weng sango mo funemebe! Weng olo Gode wengbabe, besa wengobe. Kobo Gode kukubo kla tekein keneba olota wafunale! \v 8 Kobo tekein kebeb yotabe. Kobo imen dang okok osa eka okok afet osa sbal maneba okok kemeb mole keb on osa keb dam osa sbal manamabeobe. Kukub olo ayam otane kobo Gode weng osa eka e kukub osa keb bobol temo omabbaneba wafu nemebo kukub olo dot ayamobe. Kukub olo memalo kobo kla daabkenobua sinanomo kobo Gode bibo biamabebo dim osa daabkenamabobe. \p \v 9 Ne weng olo baabkenamabio bainobe. Nakaia unangai wentaibo kla funaniba bainobo geine! \v 10 Nibo Gode okoko sbalma okok kebobo, o mitmakamo makob Gode afen smiksae imin tenea bainobo gabib nakaia unangai dlamabeo waisa biobobe. E Nakaia unangai alukum hengmino temo blibo dotlanano gabe otane nakaia unangai maki e wengo mo wentim blim kesoa mo dlamabebabe. Otane nakaia unangai e wengo wente bianiba bainobo gabibi sinanomo dletnea e bib unamabebe. \p \v 11 Kobo nakaia unangai weng olo omyeneba baabeneba Ibo weng olo wafu nine ge baabenale! \v 12 Kobo tembal kesoa naka mak unang maki baabkeniba E tembal kesoa e bobol tem funino ayambabo geniba weng dobo weng okemibo kobo kukub olo tolobo genale! Ina otane kobo weng ayamo obianeba eka kukub ayamo nabianeba naka mak unang maki gobe bianeba daaye bianeba keb Gode bainobo galino sbal maneba kobo bobol ayam fumbianeba Gode kukubo kla wafu nale! Kobo inameba nakaia unangai kateniba baaniba E kukub ayam nabebo geniba isa keb kukub ayam olo wafueine! \v 13 Memalo kobo ne waitne biamabebo dimo kobo sbal maneba Gode wengo kineba nakaia unangai wentiba omkeimaneba kukub ayamo aleyemale! \v 14 Sino Gode wengo kimanin nakai i kweilono keb gabamon dim ut tebelubkeniba Gode wengo baabkeiba Gode titilo kobo omklea e okoko okok kebinebbio kesoa e okoko klabebo titil olo mo deibonemebe! Kobo titil olo bobolo kla fumbianeba wafunale! \p \v 15 Kobo titil olo wafu bianeba Gode okok olo omklebuo am mak bomanomo am mak bomanomo amitie okok olo okok kebeba nakaia unangai katemniba baaniba E okoko sino ayam ye okok kebinebu otane memalo e okoko dot ayam okok kebebo ge okemine! \v 16 Keb kukub nabeb osa eka nakaia unangai aleyebeb osa kla kimanale! Kobo inamebo keb kukub olo daabkenoa eka nakaia unangai keb wengo wentomabib isa daabenanobua Gode imin tlameo ibo e baka bianiba ayam anomabiobe. \c 5 \s1 Bainobo galini kimanin kukubo weng sangobe. \p \v 1 Kobo hangkalebwali mo dosuanemebe! Kobo weng fiab oye bianeba daaye bianeba makob keb aye daahabeb ina bianeba eka tembal isa weng fiab oye bianiba daaye bianeba makob kleb ningwali daayebeb inayemale! \v 2 Eka kobo konokmonwal isa daaye bianeba makob keb biemo daawebeb inaye bianebte! Kobo souwal isa daaye bianeba makob kleb nengwali daayebeb inaye bianeba keb bobol temo ayam fumbianebte! Keb bobol temo taman bobolo mo funemebe! \p \v 3 Unang maki bainobo gabibi imakwali kaabeibbua ilikiem blib mole bainobo galin nakaia unangai i daaye bianiba kla kimaine! \v 4 Ina otane unangi i meme isa i molobsel isa blib mole i unang eli bobolo kla funaine! I okoko mikiktemo nanomabib ole i aaleb kamwal isa faninsak kamwal isa kla kima bianiba i sino gwab bliba i kima binibbuo gabamo kibeine! Gode kukub olo kla gobo biebe. \v 5 Unangi imakwali kaabeibbua i meme isa molobsel isa eka mikimwal tlemin isa dabwal tlemin isa blim imaye tla tla bianiba blibi i Gode bainobo geniba tab dim osa kwinomo dim osa amitie Gode nganhabiba daayebebe. \v 6 Otane unangi imakwali kaabeibbua ili bobol tem funin ota wafu bianiba Ni inamin namino dlonoba seinomo ge funaniba ili bobol tem funin ota wafu blib mole i afen smiksa otane i makob kaanabibi ulabobe. I Gode kukubo abuk wawem bliobe. \v 7 Kobo bainobo galin nakaia unangai Gode weng olo omkayemeba i kukub ayamo namiba naka mak unang maki i kukubo yatemaibo i mo funanibta i kukubo misiamobo ge funanimibe! \v 8 Bainobo galin nakae e meletani klao mo kimaim blim kenemeo e kukubo misiamobe. Eka nakae e aaleb kamwali mo kimaim blim kene mole e kukubo dot misiamobe. E kukub misiam olo bainobo galinba nakaia unangai kukub misiam osa gaisenamabebe. \p \v 9-10 Kobo unang sosoni daayemang gaebo i niniino homono mo dolabenebta daayemebe! Unangi bifolo homono 60 o blimubenobuei i niniin ota dolabeneba daabenale! I imakwali makob ilita dlo bliba naka mak unang maki baaniba I kukubo ayam nabiobo gabiba i memei kla kima bianiba eka bib mak nakaia unangai imeno okaye bianiba eka bainobo galin nakaia unangai bib mak da tlaibi i skilono fubaye bianiba daaye bianiba eka nakaia unangai gembib biamuei daaye bianiba kukub afet osa ayam nabiba i imakwali kaabeib biamuei niniin ota dolabeneba daabenale! \p \v 11-12 Otane unangi souwali i imakwali kaabeibbuei niniino mo dolabenebta daayemebe! I baaniba Ni besa bianoba Yesus Klaiste okoko amitie okok kemomabbiobo gabib otane sinanomo i funaniba ni imakwali imin dlomo ge funaniba i weng olo baaibbuo deiboniba imakwali imin dlaibo naka mak unang maki baaniba I kukub olo misiamobo genomabiobe. \v 13 Eka i kukub mak osa inabiobe. I bisiabalaniba moniba am mak am mako haabianiba weng misiamo nakaia unangai mo obibba osa eka naka mak unang maki kukub misiamo nanimibo wengo wentaib osa i naka mak unang maki weng olo oye biam nabib kesoa kobo i niniino mo dolabenebta daabenemebe! \v 14 I inamomabib kesoa ne funania Unang souwali imakwali kaabeibbue ile imakwali imin dloniba memei yobianiba i am osa meme isa kla kimanine gabibe. I inaib mole bainobo galinba nakaia unangai nibo mo baabenibta Bainobo galin nakaia unangai kukubo misiam nabiobo ge baabenomabibbabe. \v 15 Unang sosoni maki Yesuse kukub ayamo deiboniba Gululame kukub misiam ota wafu bliobe. \p \v 16 Inamin kesoa Yesuse bainobo gabib nakaia unangai maki i meletan maki konokwal aibbua imakwali kulilubeib mole imaye unang eli kimanine! I mo deibenibta bainobo galin nakaia unangai bumoloko mo omyaibe! I imaye kimaniba eka bainobo galin ile konokwali ninek blim ita kimaine! \s1 Bainobo galin nakaia unangai kimanin nakai wengobe. \p \v 17 Bainobo galin nakaia unanga ibo ib kimanin nakai okoko ayam okok kebib biamo monio sum oyine! Eka ib kimanin nakai Gode wengo nakaia unangai omkaye bianiba aleyebib naka ile i monio dot sum oyine! \v 18 Niminbabe, Gode buk temo baanoa \q1 Eil blumakaui ibo wit dango klabiba i daaye bianiba okok kemibo ibo i sitalo mibo mo dlab bebenimibe! Deibeiba wit sano wembianibte genabianoa \b \m eka weng mak osa baanoa \q1 Nakai okok kebib mole i okoko molo yang keniba monio oyine genanobio \b \m kesoa bainobo galin nakaia unangai kimanin nakai Gode wengo omkeimabibi ibo i okoko molo yang keniba monio oyine! \v 19 Naka make baanea Bainobo galin nakai kimanin nakae kukubo misiam nabebo gene mole kobo e weng olo mo wentaebe! Ina otane nakai asu eka asumatna i baaib mole i weng ota wentene! \v 20 Bainobo galin nakai kimanin naka make hengane mole alukum bainobo galin nakaia unangai kin dim ye kobo dobo klaneba ateniba tosiananiba kukub misiamo namino deibueine! \p \v 21 God esa Yesus Klaist esa abisel isa i kin dimo ne wengo moton baabkenamabibe. Kobo weng olo watemaebo inanale! Kobo keb nineki kla daabeneba eka keb ninekbai klao mo daabeim blim kenamin kukubo mo wafunemebe! Kobo daabenang gaebo alukum makob kimin daabenale! \v 22 Kobo naka make hebmamsabo mo dobonebta bainobo galin nakaia unangai kimanin nakao mo dofanemebe! Mikiktemo e kukubo ateneba e kukubo misiamobe ayamobe genebte! E kukub misiamo nabea kobo dofaneb mole kebsa e kukub misiamo nanamabeb kesoa kobo klanale! Kobo kukub ayamo amitie namale! \p \v 23 Kobo aa motono amito mo unalaebe! Kobo am mak bomanomo am mak bomanomo amitie gembeb kesoa kobo waen aaye gwab ibaneba aa baka wembeba daabkenoa ginino fotebenakebote! \p \v 24 Nakaia unangai hengmino inaminobe. Mak ile keim nabiba naka mak unang maki yatemiba nibo dlo klanabob otane maki hengmin ole ayok nabiobe. Sinanoa mubiang amo dim ota keimanota Gode dlo klanamabebe. \v 25 Eka nakaia unangai kukub ayam namin osa inaminobe. Maki kukub ayamo keim nabiba naka mak unang maki watemeyebiobe. Eka maki kukub ayam ole ayok nabib otane o amito mo ayok bibenomobabe, keim anamabobe. \c 6 \s1 Okok nakai wengobe. \p \v 1 Okok nakai fumbianiba Ni kimanin nakae ayamobo ge funine! I inamiba naka mak unang maki i wengo wenteniba Gode niniin osa eka Gode wengo ni ibo aleyebob osa weng dobo wengo mo baabonimibe! \v 2 Okok nakai bainobo gabiba eka i kimanin naka isa bainobo gabib biamo i mo funanibta E ni dab tlemin yetabo, ni e wengo omdibiha bianobte genibta mo funanimibe! I funaniba E bainobo gabe kesoa ni e goba bianoba e okoko klayam okok kehamomo ge funine! Kobo nakaia unangai kukub olo aleyebeba i kukub olota namine! \s1 Inamin namino homon bokalino wengobe. \p \v 3-4 Nib Sume Yesus Klaiste wengo ayamobe. Nibo weng olo wentebobo o nibo daayebo kesoa nibo Gode kukubo kla wafunomabbiobe. Otane naka make Yesus Klaiste weng ayam olo deibonea weng afet ota alebene mole naka ele untak nganin nakabe. E tekein kemin osa bobol tem funin osa blimobe. E besa wengo alang weng omin kukub ota gobo biebe. E naka mak unang maki kukub olo aleyebea i e weng olo wente bianiba i naka maki kukubo dafao ifam bianiba eka naka maki dosuan bianiba eka awa gembianiba naka maki fun yateme biam bliobe. \v 5 I amitie dleb weng obianiba Gode bain wengo mo wentebibba kesoa i bobol tem funino misiamobe. Eka i funaniba Nibo Gode kukubo wengo wafu bioba e moni sumo misim okayemeko gabiobe. Bobol tem funin olo ayambabe. \p \v 6 Ina otane nakaia unangai funaniba Ni inamin namin ayamo ba ele bibe bio kesoa asitemo bobolo mo wayebobabo geniba i inamin namino bibebuo seinwe bianiba i Gode bobol ota amitie funib mole i bobol tem funin olo ayamobe. I seinomabiobe. \v 7 Niminbabe, sino biemwali nibo domikieibbuo dimo nibo afobeingo mo oleb tlim blimobe. Sinanomo nibo kaanomabbu osa afobeingo mo oleb unomabbiobabe. Inanomabbio kesoa afobeingo nibo daabenamabua bleka? Yeye o mo daabenamobabe. \v 8 Nibo imen osa youm osa bibe bio mole nibo funanoba Nimio baye bibe biobo genomo! Nibo inamin namin afeto bobolo mo fumbianobta o bobolo mo wayemone! \v 9 Ina otane nakai funaniba Ni afobeing osa moni osa homon boka bianobte ge fumbib ile makob eil halebi imeno wembiba imiko dolibeibbua i imeno bobolo funaniba blublu teniba imik tem te gluluowa onsiba yafunabo inaminobe. Naka eli ili bobol tem funin misiam olo fumbib ota sumu benoa ili skil watwat dabenamabobe. \v 10 Monio gobonin kukub ole omomom hengmino mitobe. Naka mak ile i bobol temo monio bokalin bobol tem ota fumbianiba i Yesuse kukubo deiboniba ili skil watwat daniba i bobol temo misiam omkabiobe. \s1 Nibo kukub ayamo sbalma wafunomo! \p \v 11 Ina otane Gode naka kobole kukub misiam olo mo wafunemebe! Kobole kukub molot osa eka Gode kukub osa ota wafunale! Kobo Gode bainobo gabianeba eka naka mak unang maki gobeniba daaye biam nale! Kobo kukub ayam olo mo deibonemebe! Kobo sbal maneba Nakai daabeneba weng fiab omkayemale! \v 12 Kobo Yesus Klaiste bainobo genemebo kobo makob nakai sbal maniba naka maki gaisenoba nita inamin namin ayamo dlomo geniba gigi moniba maki gaisenabib inaneba kebsa sbal maneba kukub misiamo deiboneba kukub ayam ota wafuneba afen smike amit nine dobone! Sino Gode kobo kemfakanea baabkenea Kobo afen smike amit nine doboneba amit namabeobo ge baabkenea kobo naka mak unang maki baabeneba Ne Gode wengo wafu namabibo genebbio kesoa kobo Gode kukubo mo deibonemebe! \v 13 Gode inamin namino alukum klanebu esa eka Yesus Klaiste komoke Fontias Failate Gode wengo omkeimabanebu esa i kin dimo ne wengo kobo baabkenamabi ole \v 14 kobo Gode wengo deibonemebe! Kla wafunale! Kobo inameb mole naka maki mo baanibta Gode wengo misiamobo genimibbabe. Kobo weng olo sbalma wafu bieba Yesus Klaiste imin tleko! \v 15 Yesuse imin tlamabeo amo Gode omakabanebiobe. Am olo dimo Gode Yesus Klaiste imin dabanea tlamabebe. Gode elekiem eleta amit ayam binabebe. Elekiem eleta titilsabe. Elekiem eleta Sum eka komokwali komok sum nabe. \v 16 Nakaia unangai kaanomabib otane e mo kaanemebabe. E bibamo binabeo ayale sume tubu bie kesoa nibo esuo mebo mo monobta e bibamo unanobta ayale atenabobbabe. Sinanggwano nakaia unangai elekiem olokiem isa mo atemim blimobe. Eka memalosa naka mak unang maki e atenamini blimobe. E niniin sum osa e titil sum osa amit nin kesoa nibo e niniino dobtouleb nomo! Bainobe. \s1 Nakai afobeing homoni wengobe. \p \v 17 Nakaia unangai inamin namin afobeing homono bibebuei baabeneba Ibo mo untak ngam bianibta funanibta Ni niniino sumobo ge funimibe! Ibo mo funanibta Afobeing olo nibo daabenoa amit nomabbiobo genimibe! Afobeing olo blimanamabobo, ibo God eta bainobo gebaine! Elekiem eleta nibo daabeneta amit nomabbiobo, elekiem eleta inamin namin ayamo omkayebea seimbuobo ge baabenale! \v 18 Eka weng mak osa imin baabeneba Ibo okoko klayam okok bianiba naka mak unang maki amitie daaye bianiba eka naka mak unang maki afobeingo blimi daaye bianiba inamin namino dokayemine! \v 19 Ibo inamib mole kukub olo makob inamin namino ayamo olminibbua sinanomo olota daabenamabobe. Kukub olo ayamobe. Makob amuno geigenoa amo sbal mabinabo inanoa memalo ibo daabenoa ayam biam biniba sinanomosa Gode tenaniba ayam nomabiobo ge baabenanale! \s1 Keb okoko kla okok kemale! \p \v 20 Timoti kobo Gode okok ele omklebu olo kla kima bianeba okok kemale! Besa wengo Gode wengba osa eka naka maki dim omin wengo baaniba Ibo ni wengo wentemib mole ibo kla tekein kenomabiobo gabib weng osa deibonale! \v 21 Naka maki dim weng olo wenteniba baaniba Ni tekein keminsabo geniba Gode bain wengo deibueibbiobe. Gode kobo daabkeneko! Ne wengo bayotabe. Fol neta keb futano dola omfubkenamabibe.