\id 1TH - Mian NT [mpt] -Papua New Guinea 1986 (DBL 2014) \h 1 Tesalonaika \toc1 Fole Tesalonaika bib seli futano mikiktemo dola omfubenebiobe. \toc2 1 Tesalonaika \toc3 1 Tes \mt1 1 Tesalonaika \mt2 Fole Tesalonaika bib seli futano mikiktemo dola omfubenebiobe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 20 ese mak blimanota Fole Kolin bib ye bianeta futan olo dolaneta Yesuse bainobo galin nakaia unangai Tesalonaika bibo blibi omfubenebiobe. Sino Fole monea Tesalonaika bib ye bianea Yesuse wengo omkeimabea nakaia unangai maki Yesuse bainobo geiba o dafa ota Yuda naka maki bainobo galin nakaia unanga eli kukub misiam omkayemib kesoa Fole deibenea bebianea okok kem wat okok kem wat binea monea Kolin bib ye bieta Timotie monea esu unanea Yudai teniba Yesuse bainobo galin nakaia unanga eli kukub misiamo omkayebibo weng sango baabasea wenteneta i futan olo dola omfubenea dosbal mana bianeta eka Yesuse imin tlamabeo weng sang osa baabe nanebiobe. \io1 \it 1:1 \it* Mikiktem wengobe. \io1 \it 1:2–3:13 \it* Gode gangobo galin osa eka e niniino dobtouleb nin osa o wengobe. \io1 \it 4:1-12 \it* Yesuse bainobo galin nakaia unangai namino wengobe. \io1 \it 4:13–5:11 \it* Klaiste imin tlamabeo wengobe. \io1 \it 5:12-22 \it* Yesuse bainobo galin nakaia unangai namino wengobe. \io1 \it 5:23-28 \it* Mubiang wengobe. \c 1 \p \v 1 Ae bainobo galin nakaia unangai Tesalonaika bib ye blib ibo Fol nesa Sailas esa Timoti esa nita ib futan olo dola omfubenomabbiobe. Ibo nib Aye God esa nib Sume Yesus Klaist esa i meletanobe. Gode ibo daabenea bobol tem ayamo omyeko! \s1 Tesalonaika bib seli bainobo galino sbalma binibbiobe. \p \v 2 Ni amitie Gode nganha bianoba God kobo bainobo galin nakaia unangai Tesalonaika bib seli daabeneba i bainobo galino sbal maine ge oha bianoba Gode gangobo gabuobe. \v 3 Ni amitie Aye Gode oha bianoba Tesalonaika bib seli bainobo galino sbal maniba Yesus esa eka nakaia unangai e bainobo gabib isa gobe bianiba bainobo galin naka mak unang maki daaye bianiba i bobol temo fumbianiba Sume Yesus Klaiste imin tlamabebo ge fumbianiba waisa bliobo ge ohabuobe. \v 4-5 Nekwal ibo ni Yesuse dowan weng ayamo ibo omkaye binobbuo weng olo besababe. Weng olo titilsa kesoa ibo kla wentibbiobe. Gode Hob eta weng olo ib bobol temo omabbebeneta ibo baaniba Weng olo motonobo geibbiobe. Ibo inaibbuo nibo tekein kebuobe, Gode ibo gobenea funanea I ne meletan aine ge baanea dlakanebiobe. Ibo tekein kebiobe, ni okok olo nabianoba ibo daayebobo watemibbiobe. \p \v 6 Ibo ni Sume kukubo nabobo yateniba ibsa makob nini nabob inabiobe. Ibo Gode wengo wenteniba Yesuse bainobo gabib o dafa ota naka maki tenibta ibo enin sumo omkaye binabib otane ibo Gode wengo wentebib kesoa Gode Hobe daabenea seinin bobol temo omkayebebe. \v 7 Ibo ina bianiba Yesuse bainobo galin nakaia unangai Masedonia betan ye blib isa eka Glik betan ye blib isa kukub ayamo aleye bianiba \v 8 eka Gode wengo omkaye biam bliba i wentiba eka bib mak betan mako blib isa i alukum ibo Yesuse bainobo gabibo weng sango alukum wentibbio kesoa ni ib bainobo galino wengo imino mo baabenomabbiobabe. \v 9 Niminbabe, sino ni ib bibamo biob dimo ni kukub ayam nabeiba nakaia unanga eli wateniba baaniba Bainobo galin nakaia unangai Tesalonaika bibo blibi i god dim omino deiboniba i bobol temo Gode oman bianiba Gode okoko klabianiba Gode moton amit ninobo gabianiba \v 10 e miine abilim danea imin tlamabeo waisa binabiobo gabiba ni wentebuobe. Gode miine Yesuse kaanea e imin dofaanea hananebue nibo daabenea sinanomo Gode nakaia unangai kukub misiamo wafu binib biamuei dosuananea enin sumo omyamabe otane nibo mo dosuananamabebabe. Niminbabe, Yesuse nibo daayebebe. \c 2 \s1 Fole Tesalonaika bib ye okok kebisebe. \p \v 1 Ni nekwal ibo tekein kebiobe, sino ni monoba ibsu ye bianoba daaye bianoba Gode wengo omkayeboba ibo Yesuse bainobo geibbio kesoa ni okok olo yamo balinobiobe. \v 2 Ibo tekein kebib yotabe, sino ni Filibai bib ye biobo Filibai bib seli enin sum osa dim omin weng osa omkayebiba ni Filibai bibo deibonoba tenoba Tesalonaika bib ye tlanoba Gode wengo omkeimabobo, Gode titilo omkayebea ni mo tosianim blim sbalma bianoba Gode dowan weng ayamo omkayeboba naka mak unang maki Gode wengo gobueim blim keibi ni enino omkayebib otane ni mo tosianin blimobe. Ni sbalma bianoba Gode wengo omkeima binobbiobe. \v 3 Ni weng olo ibo omkayebobo bain wengobe. Ni dim weng osa bobol wayemin weng osa mo oye bianoba eka kukub misiam osa mo naye biam biobbabe. \v 4 Gode funanea Naka eli bobol tem funino ayamobo, i ne wengo naka mak unang maki kla omkayemine gene kesoa e ni dlakanea e dowan wengo ayamo omyebua weng olo ni omkaye binabuobe. Ni weng olo omkayebobo ni mo funanobta Nakaia unangai funaniba I ayamobo geine ge funanomobbabe. Ni funanoba Gode funanea I ayamobo geneko ge fumboba Gode emaye ni bobol tem funino tekein kebebe. \v 5 Ibo tekein kebiobe, sino ni ibsu tlobo ni ibo men weng men wengo mo oye bianoba eka ib inamin namino bobolo mo waye biam nim blimobe. Ni ibo mo baabenobta Ib inamin namino ni mo doyine ge baabenaim blimobe. Gode tekein kebebe, ni wengo bainobe. \v 6 Ni ibo mo baabenobta Ibsa naka mak isa ni niniino dotouleb nine galin weng osa mo baabeim blimobe. \v 7 Ni Yesuse okok dlasanin naka kesoa ni baabenoba Ibo ni daabeine ge baabenomob osa ayam otane ni inamin wengo mo baabeim blimobe. Ni ibo bekebe biobo ni kukubo fiab bianoba makob unangi meme gwabi fiab beteng kima binabib inaye binobbiobe. \v 8 Ni inanoba ibo kla gobe bianoba Gode dowan weng ayamo ibo omkaye bianoba daaye binobbuo ni fumbianoba Ni tengo mo yemone ge fumbinobbiobe. \p \v 9 Nekwal ibo tekein kebiobe, sino ni ibo bekebe bianoba Gode dowan weng ayamo omkaye binobbuo dimo ni funanoba Ib imeno doyine genamin wengo mo baanomobe ge funanoba ni okoko sbalma bianoba kwin tebo boman tebo dimo ni amitie okok kebianoba ninimi ye dlo wembinobbiobe. \p \v 10 Ibsa God esa tekein kebiobe, ni sino bainobo galin nakaia unanga ibo bekebe bianoba ni kukubo nabinobbuo hengmino blim ayam molotobe. Ibsa Gode esa ni kukubo wateniba tekein kebiobe, ni kukubo ayamobe. \v 11 Ibo tekein kebiobe, sino ni makob naka make e miine kimanamabe inanoba elekiem olokiem ibo kima bianoba \v 12 am mak bomanomo am mak bomanomo ni weng ayamo sbalma omkaye bianoba baabenoba Ibo kukubo ayam wafueiba Gode yatenea seinye bianea bobol ayamo omyeko! Gode ibo dlakanea baabenea Ibo ne wengo wentemibo ne dleb monia ne bib daia ayam aniba makob ne ulab anomabiobo genebio kesoa ibo e wengo sbalma wente bianibte ge oye binabuobe. \s1 I bainobo galino sbalma binibbiobe. \p \v 13 Eka ni Gode weng olo inanoba ibo omkayebobo ibo wenteniba funaniba Weng olo nakai wengbabo bain Gode wengobo geibbio kesoa ib bobol tem funino molotobe. Ibo inaniba bainobo geiba Gode weng olo ibo daabenoa ib bainobo galino omsbal mabenoa ni ib kukub olo naibo fumbianoba Am mak bomanomo am mak bomanomo Gode oha bianoba i kukub olo ayam kesoa ni seinyebuobo ge oha binobbiobe. \v 14 Nekwal ibo makob Yesus Klaiste bainobo galin naka unangi Yudia betan ye blibi ulabobe. Ib bibam seli ibo enin sumo omkayebibo makob Yuda nakai Yesuse bainobo galini enin sumo omkaye binibbio inayebiobe. \v 15 Sinanggwano Yuda nakai Gode weng omkeimalin nakai yebinibbua i molobsel isa inaniba Yesus Sume ananibbuo memalo i ni enin sumo omkayebibo Gode i kukubo mo gobo biebabe. I naka maki alukum i makaabe. \v 16 Niminbabe, ni Gode wengo bib mak bib mak seli omkaye bianoba baabenoba Ibo Yesuse wengo wentib mole Gode ibo hengmino temo blibo dotlanamabebo gabob wengo watanomo gabib otane i mo inaim blimobe. Ina otane i amitie hengmino hengabiba i hengmino sum anoa memalo Gode atlihamino i dimo tam tebiobe. \p \v 17 Yudai ni kululaiba monoba bib mak ye bianoba ib kibio ni mo yatemin blim biob otane ni ib tebo imen teb keyebua yatemomo gabianoba ni amitie ib bobolo fumbuobe. \v 18 Ni imin monoba ibsu natlomo gabianoba am mak bomanomo am mak bomanomo ne natlang gabi otane Gululame wata binabebe. \v 19 Sinanoa nib Sume Yesuse imin tlea ni tenoba e kibi kaba sin ye manomobo ni nimin dlomabbione? Ni inamin namino fatnamin ota dlonobta seinomabbione? Ni inamin namino dlo alebanomabbu olo ibtabe. \v 20 Ni ibo dlonoba Yesuse alebanoba baabanoba Ni okoko olota nanobbiobo ge baabanomabbio kesoa ni seimbuobe. \c 3 \s1 Timotie Tesalonaika bib seli bainobo galino dosbal masebe. \p \v 1 Ni inabob kesoa Sailase ni dabo ib bobolo funanoba Ni i wengo wentomo geob kesoa ni dabo Atens bib ye bianoba Timoti eta dabanoba monea Tesalonaika bib unanea i wengo wenteko genoba dabanoba natlebiobe. \v 2 Timotie ni ningobe. Ete nite nanoba Gode okoko klabianoba Klaiste wengo omkeima binabuobe. Ni dabo e dabanoba monea ibsu natlanea Gode wengo ibo omyenea ib bainobo galino omsbal mabenebiobe. \v 3 Ibo Yesuse wengo wenteniba bainobo gabib o dafa ota nakai Yesuse wengo mo gobo blibbai ibo enin sumo omkayemib kesoa ni Timotie dabanoba monea ib bainobo galino omsbal manebua ibo Yesuse wengo mo deibueim blim sbalma wafu bliobe. Ibo tekein kebiobe, Gode emaye nibo dlakanea funanea I Yesuse bainobo gabib o dafa ota naka maki enin sumo omkayebiobo genebiobe. \v 4 Sino ni ibo bekebe biob dimo baabenoba Sinanomo naka maki ibo enin sumo omyomabiobo ge baabenobbuo kukub olo tam tlebua ibo tekein kebiobe. \v 5 Ne ib bobolo fumbiania ne bobol tem daako tekanebua I Yesuse bainobo geibbuo memalo i bainobo galino sma wafu blib bleka? Gululame i men weng men weng oyemsea i e wengo wenteniba Yesuse wengo deibueibbueso gabianea tekabibe. Sino ni ibo bekebe biobo ni bumolok bianoba Yesuse dowan weng ayamo omkeimaboba ibo wente binibbuo memalo ibo weng olo sma wafu bliba bleka deibueibbuo? Ne mo tekein kebibabe, ne ib wengo mo wentim blimobe. Ne ib bobolo funai kesoa ne Timotie dabaia monea imin daabeneko genia dabaia ibsu natlebiobe. \s1 Fole Tesalonaika bib seli wengo wentenea seinye binebiobe. \p \v 6 Memalo Timotie ibo deibenea ib dowan weng ayam olo ometnea imin tenea baabenea I Yesuse bainobo galino sma ye sbal maniba nakaia unangai gobe bianiba ib dab ib bobolo sma fumbianiba ib dabo yatemomo gabibo makob ib dabo naniba I yatemomo gabib inaniba isa ibo yatenamin teb yebobo gesea \v 7 ni dabo wentenoba seinyebuobe. Naka maki teniba kukub misiam osa enin sum osa ni omkayebib otane ni mo simambobbabe. Niminbabe, ibo Yesuse wengo sma wafu blib kesoa ni seinyebuobe. \v 8 Ibo inaniba amitie Yesuse bainobo galino sbalma blib mole ni seinye bianoba ni bobolo ayam funomabbiobe. \v 9 Ni ib bainobo galino fumbianoba Gode nganha bianoba I Yesuse bainobo galino sbalma wafu bliba ni seinyebobo, ayamobo gabuobe. \v 10 Ni kwinomo bomanomo dimo amitie Gode oha bianoba Kobo ni dletneba monoba Tesalonaika bib seli yatenoba eka i bainobo galino menube biamo imin omsbal mabenanomo ge ohabuobe. \s1 Fole Gode baabanea Kobo nemetneba Tesalonaika bib sel isu unano gambisebe. \p \v 11 Nib Aye God esa eka nib Sume Yesus esa i ni deibo klaubeiba ni imin ibsu natlomo! \v 12 Sume ibo daabenea bainobo galin nakaia unangai gobeniba eka naka mak unang mak isa kla gobe naniba ib gobenin kukubo sum anoa makob ni ibo gobe biob inaine! \v 13 Aye Gode inanea ib bobol tem funino omsbal mabenebua sinanomo Yesus Sum esa e meletan isa tlaibo ibo e kibi kaba sin ye maniba e yatemnea baanea Naka eli kining ayamobo geneko! \c 4 \s1 Gode kukubo enamin ota gobo biebe. \p \v 1 Nekwal ibo ni weng mako baabenomabbiobe. Sino ni ibo bekebe biob dimo ni kukub ayamo ibo alebenoba baabenoba Ibo kukub olo wafueib mole Gode seinyemabebo genoba ibo wenteniba kukub ayamo wafu bliobe. Memalo Yesuse wengo ni omye kesoa ni weng olo baabenoba Ibo kukub ayam olo sbalma wafueine ge baabenoba wafu blib olo kla wafueine! \p \v 2 Yesus Sume ni sbal wengo omya ni e okoko klabianoba weng olo baabenobbiobe. \v 3 Gode ibo baabenea Ibo amitie kukub ayam ota wafuniba taman kukub olo mo wafunimibe gabebe. \v 4-5 Ib isak temo nakai wanibta alelwali dlom gib mole ib bobol tem funino ayam fumbianiba alelwali dliba Gode ibo yatemnea funanea I kukubo ayamobo geneko! Ibo unangi bobolo mo wayebota makob nakai Gode wengo mo wafunim blimi naniba unangi bobolo wayebo inamibe! \v 6 Ibo ib nekwali kukub misiamo mo omyaibe! Ibo i alelwali taman deibo mo dlet nimibe! Sino ni sbal wengo ibo baabenoba Ibo kukub misiam olo wafunib mole Gode ibo yemde dlanamabebo ge baabenobbiobe. \v 7 Gode nibo dlakanebuo e mo baabeneta Ibo taman kukubo wafueine geim blimobe. E baabenea Ibo kukub ayam ota wafueine ge baabenebiobe. \v 8 Ni weng olo omkayebobo naka maki baaniba Weng olo motonbabo geib mole i weng olo naka ita baabenobobo genomabib otane i weng olo Gode e Hobe ibo dobyebu eta baabanomabiobe. \p \v 9 Ne ibo bainobo galin naka mak unang maki gobeine genamin wengo imino mo baanita dolanimibabe. Niminbabe, ibo tekein kebiobe, Gode emaye inangge baabenebiobe. \v 10 Ibo Yesuse bainobo galin nakaia unangai Masedonia betan ye blibi gobe blibo memalo ni ibo baabenomabbuo Ib gobenin kukubo sbalma bliobo genomabbiobe. \v 11 Ibo ib imen wemin okoko ibmaye okok kebianibte! Ibo naka maki mo baabenibta Ib okoko inaine inaine gabianibta oyemibe! Ibo kimanin kukubo mo wafunimibe! Ilib okoko bobolob fumbianiba makob sino ni baabenobbio inaniba ilib okoko olob okok kebianibte! Ibo mo ina bianibta kikamin kukubo mo wafunimibe! \v 12 Ibo inaniba ibmaye imen wemin okoko klamib mole bainobo galin nakabai yateniba funaniba Naka eli ayamobo genomabiobe. Eka ibo ib nekwali mo baabenibta Ni imeno mo oyine genimibe! \s1 Sume imin te dletnea abilim unomabbiobe. \p \v 13 Ne nekwal ibo ni funanoba Ib isak temo bainobo galin naka mak unang maki kulilabiba ib bobol tem daako ilum omkayebua halin bianiba makob nakaia unangai Gode bainobo galinbai naniba i nekwali kaanimibo i funaniba I amitie kaaniba alang namaibobo geniba mebinabib yo ibo mo inamibe ge fumbuobe. \v 14 Niminbabe, sino Yesuse kaanea Gode imin dofaanea hananebio kesoa nibo tekein kebuobe, sinanoa Yesuse imin tlang gameo dimo bainobo galin nakaia unangai kulila binabibi Gode imin dohaanea hananiba Yesus etem na tlomabiobe. \p \v 15 Yesus Sume e wengo ni alebenebuo ibo baabenomabbiobe. Sinanoa Yesuse imin tlang gameo afen bianoba e bainobo gabob naka unang nibo bainobo galin nakaia unangai kulilabibi mo gaisenobta abilimo sino nibo mo unomabbiobabe. \v 16 Am olo dimo Sume abilim ut danea tebianea weng sumo ngananabea eka abiseli komok mak esa weng sum nganananabea Gode bigule obana bianea Gode bainobo galin nakaia unangai kulila binabibi sin dohaanea hana tlibta eka \v 17 omit ole sma afen bianoba bainobo gabob nibo tem nanoba beboba Sume tebe nanoba ayung tem ut tetenanoba minoba utnoba abilim uto amit nomabbiobe. \v 18 Nibo inanomabbio kesota ibo weng olo ib nekwali omkayebiba i wente bianiba bobol ayam fumbibte getabe. \c 5 \s1 Nibo sin klanoba Sume tlamabeo waisa bianoba hembobte! \p \v 1 Nekwal ibo wentine! Amo fatnamin dim ota Yesuse imin tlamabene? Yesuse tlamabe amo e mo baaim blim kesoa ne weng olo mo dolanamabibabe. Niminbabe, ibo tekein kebiobe, \v 2 Sume tlang gameo makob ibalanoa ayok henin nakae inamin namino ayok dlang gameo nakaia unangai mo tekein keim blim keiba dlonabe inaminobe. \v 3 Sume tlang gameo nakaia unangai bainobo gabibbai obianiba Memalo am ayam dim kesoa ni ayam biobobo gan monibta inamin namin misiamo hebmamsab i dimo makob unango amunsa bu otane o mene dofanamabo amo o mo tekein keim blim biam binoa dofanang gamo dimo hebmamsab enin kino watenoa dofanabo inaniba i enin sumo hebmamsab i dimo tam tloa enin kino watemomabiobe. \v 4 Nekwal ibo ib bobol temo mo mililanabo inaim blim keblib kesoa Sume tenamin amo tloa hebmamsab tlameo ibo mo dlou unanibta makob ayok henin nakae tanea naka make am tam temsea amo gosake atemnea dlou unamabe inanomabibbabe. \v 5 Yesuse bainobo galin nakaia unanga ibo ib bobol tem funino makob ayal inamin kesoa ibo Sume tlamabeo waisa bliobe. Nibo nib bobol tem funino mo mililanabo inanomobe! \v 6 Nibo mo aala unanobta makob bainobo galinba naka unangi naniba aala blib inanomobe! Nibo Yesuse tlamabe amo bobolo fumbianoba e deibo waisa henomo! \v 7 Nibo tekein kebuobe, nakai aala unom gaibo kwinota aala binabiobe. Eka nakai aay misiamo dowom gaib osa kwinota dowonibta gabam tol temo mima fubenota weng namin namin binabiobe. I ina binabib otane nibo mo inanomobe! \v 8 I ina binabib otane nib bobol tem funin ole makob ayalo ulabobe. Nibo bobol tem ayam ota fumbianoba makob nakai awao genom gaibo klemo wafuniba hat kabao otabbana bliba makaai ano binaiba tenoa o dim wandibina binabo inanomo! Yesuse bainobo gabob nibo bainobo galin naka mak unang maki gobe bianoba Gode nibo hengmin temo biobo dotlanea dletnea abilim unomabbio amo waiso bioba Gululame kukub misiamo omkayemeo nibo gobenin kukub osa eka Gode tlamabe amo waisonin kukub osa makob awa genalin nakai naniba klemo wafuniba hat kabao otabbana bliba ano binaib tenoa wandi bina binabo inanoba kukub olo wafunomo! \v 9 Gode nibo dlakanebuo e mo funaneta Ne dlakania yemano geneta dlakaim blimobe. E funanea Ne dlakaia i hengmin temo blibo Sume Yesus Klaiste dotlaneko ge baaneta dlakanebio kesoa nibo amit nomabbiobe. \v 10 Yesus Sume atdimo kaanea nibo daabenebio kesoa sinanomo e imin tlang gameo afen biob nibte eka kulila binabib item eka Yesus etem nanoba ulanoba abilim unomabbiobe. \v 11 Inanomabbio kesoa ib sinwalo weng olo obianiba daabesese bianiba ib bainobo galino omsbal sambianiba makob memalo nabib inamine! \s1 Mubiang wengobe. \p \v 12 Ni weng olo ibo baabenomabbuo inaminobe. Nakai Sume dlakanebue ile ib komokwalobe. I ibo bekebe bianiba Gode wengo ibo omkaye bianiba aleyebib kesoa ibo naka eli daaye bianiba \v 13 ibo ib komokwali okok ayam olo watemaibo obianiba Naka eli ayamobo ge oye bianiba gobe bianibtane! Bainobo galin naka unang ibo ib sinwalo mo dosuanasese nimibe! Ibo ib bobol tem funino makob aine! \p \v 14 Ni weng mako ibo baabenomabbiobe. Ibo nakai okoko deiboniba bisiab blibi baabeniba Ibo okok kemine ge baabeine! Eka tosianin naka isa weng ayamo omkaye bianiba daayemine! Eka nakai bobol tem funino ayamo mo sbalma wafueim blim blib isa daayemine! Ibo inamibo nakaia unangai i mo dosuanimibe! \p \v 15 Ibo inabiba naka maki kukub misiamo ibo omyib mole ibo i kukub misiamo mo yang kenimibe! Ibo amitie ib sinwalo gobesese bianiba kukub ayam wafu bianiba eka naka mak unang maki alukum daaye bianiba kukub ayam ota aleyemine! \p \v 16 Ibo amitie seimbianiba \v 17 amitie Gode nganhamine! \v 18 Yesus Klaiste ibo daabenea e meletan aibbio kesoa kukub misiam osa kukub ayam osa ib dimo tam tlamo osa eka i kukub misiamo ibo omyaib osa ibo amitie Gode baabaniba Keb kimanin kukubo ayamobo gabiba Gode ibo seinyemeko! \p \v 19 Gode Hobe okoko klameo ibo mo watamibe! \v 20 Eka Gode weng omkeimalin nakai i wengo omkeimamibo ibo weng dobo wengo mo oyemibe! \v 21 Naka maki ibo aleyemibo ibo kla fumbianiba Wengo yo misiamobe eka yota ayamobe gabianibte! Ibo ina bianiba temiba wengo ayam ano mole yota wafu bianiba namine! \v 22 Ibo weng misiam osa kukub misiam osa mo namibe! \p \v 23 Gode bobol tem ayamo nibo omkaye binabe nakae emaye daabenea ib bobol tem funin osa afen smik osa dam osa alukum ayam aniba kining anabiba Sume Yesuse imin tlameo yatemnea baabenea Naka eli nemiobo geneko \v 24 Gode ibo dlakanea ibo e meletan aibbuo e kukubo molot kesoa e daabenea ayam anomabiobe. \p \v 25 Nekwal ibo ni beten keye bianiba daaye bianiba \v 26 ibo Yesuse bainobo galin naka mak unang maki tlaibo heitdayemine! \p \v 27 Ne Nib Sume kin dimo weng olo baabenamabio, ibo ni futan olo kla kieiba Yesuse bainobo galin nakaia unangai alukum wentine! \p \v 28 Sume Yesus Klaiste ibo daayemeko! Ne wengo bayotabe. Fol neta ib futano dola omfubenamabibe.