\id 1JN - Mian NT [mpt] -Papua New Guinea 1986 (DBL 2014) \h 1 Yon \toc1 Yone futan olo mikiktemo dolanebuotabe. \toc2 1 Yon \toc3 1 Yon \mt1 1 Yon \mt2 Yone futan olo mikiktemo dolanebuotabe. \imt1 Tekein kemin wengobe. \ip Yesuse atdimo kaanea imin hananea ulanea abilim unebua bifolo 60 ese mak blimanota Yone futan olo dolaneta Yesuse bainobo galin nakaia unangai omfubenebiobe. Yon ele Yesuse okok aleyemin naka etabe. E nakaia unangai baabenea Ibo Gode kla goba blib inaniba naka mak unang maki kla gobe nine ge baabenea eka weng mak ole naka maki obianiba Dabalim naka ile hengmin gam kesoa Yesuse mo dabalim naka moton aim blimobo ge obiam blib kesota Yone bainobo galin nakaia unanga eli baabeneta I weng olo dim obiobo ge baabe nanebiobe. \io1 \it 1:1-4 \it* Mikiktem wengobe. \io1 \it 1:5–2:29 \it* Ayal esa mililanamin osa o wengobe. \io1 \it 3:1-24 \it* Gode meme isa eka Gululame meme isa i wengobe. \io1 \it 4:1-6 \it* Gode Hob esa hob misiam isa i wengobe. \io1 \it 4:7-21 \it* Gode gobenin kukubo mitmakamobe. \io1 \it 5:1-21 \it* Kukub misiamo gaisonamin wengobe. \c 1 \s1 Yone futan olo dolanea Yesuse bainobo galin nakaia unangai bib mak bib mak ye blibi omfubesebe. \p \v 1 Sinanggwano dabale mo klaim blimo dimo Klaiste binebiobe. E niniin afeto Afen Smik Omkayemin Wengobe. Ni e wengo kla wentenoba eka nini kino atenanobbiobe. Ae, ni e kla ateme bianoba eka ni kweilono melebananobbio kesoa ni e weng sango ibo dola omfubenomabbiobe. \v 2 Naka ele afen smiko mitmakamobe. E Aye Gode tena binabibbua tlea ni atemobbio kesoa ni e afen smiko amit nino weng sango ibo baabenomabbiobe. \v 3 Ni inamin namino wateme binobbu osa eka wente binobbu osa o weng sango memalo ibo baabenomabbiobe. Nisa eka Aye God esa eka e miine Yesus Klaist esa ni bobol temo makob ambiob kesoa ibsa inaniba ib bobol temo makob aine getabe. \v 4 Ni weng olo ibo dola omfubenomabbio kesoa nib seinino sum anoko! \s1 Nibo ayale dim nomo! \p \v 5 Gode ayalobe. Esuo mililanamino blimobe. Weng olo Gode miine ni baabenebua eka nisak ibo baabenomabbiobe. \v 6 Nibo kukub misiam wafunob mole nibo makob mililambio tem tab biob inaminobe. Eka nibo kukub ayam wafunob mole nibo makob ayale dim biob inaminobe. Nibo baanoba Nite God ete nanoba ni bobol temo makob ambiobobo genomob otane nibo sma mililambio tem tab nob mole nib wengo dimobe. Nibo kukubo moloto mo wafubiobbabe. \v 7 Ina otane Gode ayal dim bie inanoba nibsa ayal dim nob mole nibtem bainobo galin nakaia unangai mak item nanoba nib bobol temo makob anoba e miine Yesuse ilemo nib hengmino fubabenoa omtlabenoa nibo kining anomabbiobe. \p \v 8 Nibo baanoba Ni hengmino blimobo genob mole ninib bobol tem funin ota dim obuobe. Weng motono nib bobol temo blimobe. \v 9 Eka nibo nib hengmino omkeimanob mole Gode weng moton omin kesoa e kukub moloto nanea nib hengmin osa eka nib kukub misiam osa alukum omtlabenea kining klayam anomabbiobe. \v 10 Gode baanea Nakaia unangai alukum hengmin gamobo genebio kesoa nibo baanoba Ni hengmino blimobo genob mole weng olo mitmakamo makob nibo baanoba Gode dim omin nakabo ge baabanomabbio kesoa e wengo nib bobol temo mo bibe biobabe. \c 2 \s1 Klaiste nib daayemin nakabe. \p \v 1 Ne meme ibo ne futan olo dola omfubenamabio Ibo hengmino mo hengamibe genita dolanamabibe. Otane naka make hengane mole naka molote Yesus Klaist eta naka ele daabanea e Aye Gode baabanea Ne naka ele hengmino walubaibio kesoa kobo e hengmino omtlabanale ge baabanamabebe. \v 2 Nakaia unanga nibo alukum hengmino hengabob kesoa Gode nibo dosuambe otane Yesus Klaiste funanea Ne i hengmino omtlabenano genea tenea atdimo kaanea e ileme singanea nib hengmino omtlabene kesoa Gode yatenea e mo dosuambebabe. E inanebuo ninibkiem ninib hengmin ota omtlabenano geneta tlim blimobe. E alukum dabalim sel nakaia unanga nib hengmino omtlabenano geneta daak tlebiobe. \p \v 3 Nibo Gode hekmel wengo wafu biob mole nibo tekein kenoba ni bain Gode meletanobo genomabbiobe. \v 4 Naka make baanea Ne Yesuse tekein kebibo geneme otane e Gode hekmel wengo mo wafunim blim kene mole e dim omin nakabe. E Gode moton wengo e bobol temo blimobe. \v 5-6 Ina otane nakae Gode wengo wafu bie naka ele e Gode kla goba biebe. Eka nakae waneta baanea Nete God ete nanoba bobol temo makob biobobo gene mole e kukub ayamo wafunamabeo makob Yesus Klaiste kukub ayamo wafu binebio inaneta wafuneko! Nibo inanob mole nibsa e meletanobe. \s1 Nakae bainobo galin nakaia unangai gobe bie mole e ayale dim wat biebe. \p \v 7 Ne nekwal ibo ne hekmel weng olo ibo dola omfubenamabio mema wengbabe. Ibo sino Klaiste mema bainobo geib dimo hekmel weng olo wenteniba tekein keibbiobe. \v 8 Ina otane mema wengo o isak temo bu olo inaminobe. Ib sinwalo gobesese nine getabe. Klaiste ib sinwalo gobesese nin kukubo wafu blibo nakaia unangai yateme bianiba tekein kebiobe. Niminbabe, mililanamino bliman bliman bebianoa ayal motone tubu tubu bebebe. \p \v 9 Naka make baanea Ne ayal dim blibo geneme otane e bainobo galin naka mak unang maki mo gobeim blim kene mole e sma mililambio tem tab biebe. \v 10 Naka make bainobo galin naka mak unang maki gobe bie mole e ayale dim bia inamin namino dababmanoa hengmino henganamino blimobe. \v 11 Otane naka make bainobo galin naka mak unang maki mo gobeim blim kene mole e sma mililambio tem tab haabianea deibo klao mo watemebebabe. Niminbabe, e mililambio tem tab bia e kino mililubabua mo temebebabe. \v 12 Gode Yesuse nanebuo bobolo funanea o yan ota e ib hengmino omtlabenebio kesoa e ib hengmino bobolo imino mo funemebabe. E inanebio kesoa ne meme ibo ne futan olo ibo dola omfubenamabibe. \v 13 Aywal ibo Klaiste dabale mo klaim blimo dimo binebue tekein kebib kesoa ne futan olo ibo dola omfubenamabibe. Naka tembal ibo Naka Misiame titilo gaisaibbio kesoa ne futan olo dola omfubenamabibe. \p \v 14 Ne meme ibo Aye kla tekein kebib kesoa ne futan olo ibo dola omfubenamabibe. Aywal ibo Klaiste dabale mo klaim blimo dimo binebue tekein kebib kesoa ne futan olo dola omfubenamabibe. Naka tembal ibo sbal mabliba Gode wengo ib bobol temo bibebua ibo Naka Misiame titilo gaisaibbio kesoa ne futan olo ibo dola omfubenamabibe. \s1 Ibo dabalim olo inamin namino mo gobo nimibe! \p \v 15 Ibo dabalim olo inamin namin kukub misiam osa eka inamin namino afet osa o bobolo mo wayemone! Ibo dabalim olo inamin namino bobolo wayebo mole ib bobol temo Aye Gode gobanin kukubo blimobe. \v 16 Dabalim olo kukubo enaminobe. Inamin namin kukub misiamo bobol wayemin osa eka inamin namino kino watenoba bobol wayemin kukub osa eka nakai Ni inamin namino homonobo geniba untak nganin kukub osa kukub olo Aye mo omkayebebabe. Dabalim omiobe. \v 17 Dabal esa eka inamin namino dabal ele dimo bua nakaia unangai bobolo wayebo osa blimanamabo otane Gode naka make baabanea Kobo inamin namino nanale genea nabinabe naka eta amit namabebe. \s1 Gode Dofakamin Naka Dim Omine weng sangobe. \p \v 18 Ne meme ibo dabale blimanamabeo amo meb tlobe. Ibo wentebiba i baaniba Naka make Ne Gode Nemfakamin Nakabo ge obianea dim obinabe nakae tlamabebo geibbuo ibo tekein kebiobe. Sino dim omin nakai homoni teniba baaniba Ni Gode Dlakamin Nakabo geibbio kesoa nibo tekein kebuobe dabale blimanamabeo amo meb tlobe. \v 19 Naka eli Gode Dofakamin Nakae afin am binibbio mole i e bainobo galin naka unang nibo baka biomabib otane i nibo deibe unibbio kesoa nibo tekein kebuobe i Gode Dofakamin Nakae meletanbabe. \p \v 20 Ina otane Klaiste Gode Hobe ibo dobyebio kesoa ibo alukum Gode bain wengo tekein kebiobe. \v 21 Ne futan olo ibo dola omfubenamabio ne mo baanita Ibo Klaiste moton wengo mo tekein kebibbabo genimibabe. Ibo Klaiste moton wengo tekein kebiobe. Moton wengo mo deskinanota dim weng anomoba kesoa ne futan olo ibo dola omfubenamabibe. \p \v 22 Dim omin naka ele wanete? Nakae baanea Yesuse Gode Dofakamin Nakababo geneme naka eta dim omin nakabe. E Gode miine mo bainobo gabeba kesoa e Aye God esa mo bainobo gabebabe. Naka ele Ne Gode Nemfakamin Nakabo ge obianea dim obinabetabe. \v 23 Nakae waneta baanea Gode miine bainbabo gabe naka ele e Aye Gode mo tekein kebebabe. Eka nakae waneta Gode miine bainobo gabe naka ele e Aye God esa tekein kebebe. \s1 Gode Hob eta bain wengo nibo aleyebebe. \p \v 24 Ibo sino Gode wengo wentibbio weng olo mo baleiso nimibe! Kla wafueine! Ibo sino Gode wengo wentibbio amitie wafunib mole ibte Aye God etem e miin etem naniba ib bobol temo amitie makob nomabiobe. \v 25 Sino Klaiste emaye bain wengo baanea Ne afen smike amit nine dobyamabibo genebiobe. \p \v 26 Naka eli ibo dim baabeniba ib bainobo galino watwat dabenom genabib kesoa ne i weng sango ibo futan olo dola omfubenamabibe. \v 27 Ina otane ibole Klaiste Gode Hobe dobyebua e ibo baka bianea aleyebe kesoa ibo naka maki alebeine genamino blimobe. Niminbabe, Gode Hobe ibo inamin namino alukum aleyebeo dimbabe, bainobe. Ibo e wengo wente bianiba Klaist ete naniba bobol temo makob bianibte! \p \v 28 Ae, ne meme ibo ibte Klaist ete naniba bobol temo makob bianibte! Ibo inabib mole Klaiste abilim da tlea nibo atemaobo aalo mo genalomabbiobabe. Nibo funanoba Ni kukubo klayamobo genomabbiobe. \v 29 Ibo tekein kebiobe, Yesuse naka molotobe. Inamin kesoa nakaia unangai kukubo moloto wafu binabib ile Gode melelobe. \c 3 \s1 Nibo Gode melelobe. \p \v 1 Dowe! Aye Gode nibo kla gobe bie kesoa e baanea Ibo ne melelobo gabebe. E nibo inangge oyebe kesoa nibo bain e melelobe. Dabalim nakaia unangai Gode mo tekein kebibba kesoa i Gode melel nibsa mo tekein kebibbabe. \v 2 Ne nekwal ibo memalo nibo Gode melel otane sinanomo nibo fatnamin nomabbione? Malobe. Ina otane sinanoa Klaiste imin tlameo nibo e kla atenoba deskinanoba makob e ulab anomabbiobe. \v 3 Nakaia unangai Yesuse tlamabeo waisa blib naka unangi baaniba Yesuse bain ye tlea ni atemomabbiobo geniba i kukub misiamo deiboniba makob Yesuse kukub ayamo wafu binabe inaniba isa kukub ayam ota wafu bliobe. \p \v 4 Nakae waneta hengmino hengabe mole e Gode hekmel wengo omdibibebe. Niminbabe, hengmin ole Gode hekmel wengo omdibiminobe. \v 5 Ibo tekein kebiobe, Klaiste hengmin blime nakaia unangai hengmino omtlabenang geneta daak tlebiobe. \v 6 Nakaia unangai wanita ite Klaist ete naniba i bobol temo makob biaibi i hengmino mo henga binabibba otane nakae waneta hengmino hengabe naka ele e Klaiste mo tekein kebianea e kukubo mo wafu nabiebabe. \p \v 7 Ne meme ibo naka make tenea ibsu ye tlanea e bobol temo funanea Ne i dim baabeia i kukub ayamo deibueine genea e dim omin wengo baabene mole ibo e wengo mo wentaibe! Nakae waneta kukubo moloto wafu bie mole e naka molotobe. E makob Klaiste ulabobe. \v 8 Sinanggwanosa memalosa Gululame amit ye hengabe kesoa nakae waneta hengmino amit hengabe mole e Gululame meletanobe. Gululame ina binabe kesota Gode miine daak tenea dabalim ele tlanea Naka Misiam ele okoko alukum watwat dabanang geneta daak tlebiobe. \v 9 Nakae waneta Gode miin am bie naka ele hengmino mo hengabebabe. Niminbabe, e Aye Gode mit deib unaneta e hengmino deibo biebe. \v 10 Nibo nakaia unangai kukubo yatemnoba Eli Gode meletanobe eka elile Gululame meletanobe genom gob mole i kukub nabib ota yatemomo! Nakaia unangai wanita kukub ayamo mo wafunamino deibo nabianiba bainobo galin naka mak unang maki mo gobenim blim kenaib mole i Gode meletanbabe. \s1 Nibo Yesuse bainobo galin nakaia unangai gobesese nomo! \p \v 11 Ibo Yesuse nena bainobo geniba weng olo wentem tlibbuo inaminobe. Nibo bainobo galin nakaia unangai gobesese nomo! \v 12 Kene nanebio yo nibo mo inamobe! E Naka Misiame meletan aneta ele ninge ananea kaanebiobe. E nimin keneta e ninge ananeta kaanebue? Niminbabe, e kukubo nabeo misiam anoa eka e ninge kukub ota molot ano kesoa e watemnea atliaubasota ananeta kaanebiobe. \p \v 13 Bainobo galinba nakaia unangai bainobo galin ibo mo gobeim blim keib mole ibo mo bobol hekhek funimibe! \v 14 Nibo nib nekwali bainobo galin nakaia unangai kla gobe biob mole nibo tekein kenoba ni aseinin bib unemin deibe deibanoba afen smik bib deib eta bebuobe genomo! Eka nakae waneta bainobo galin nakaia unangai maki mo gobeim blim kene mole e kaanamin smike sma e bobol temo biba bie kesoa aseinin bib deib eta bebebe. \v 15 Nakae waneta bainobo galin nakaia unangai maki mo gobenim blim kene mole e bobol temo makob naka yemin nakae bobol temsabe. Ibo tekein kebiobe, naka yemin nakae bobol temo afen smike amit nine blimobe. \v 16 Gobenin kukubo inaminobe, Klaiste nib alango dokonea atdimo kaanebio kesoa nibo tekein kebuobe, kukub olo gobenin kukubobe. Nibsa inanoba bainobo galin naka mak unang maki gobe bianoba enino i dimo tlang gamo nibo tosianino deibonoba i alango dokonoba kaanomo! \v 17 Naka make inamin namino homon otane e bainobo galin naka make inamin namino blime mo dobhalila daabaim blim keneme naka ele e Gode mo goba biebabe. \v 18 Ne meme ibo nibo nib nekwali kla gobe bianoba daayemino mo deibonobta besa sital ota obianobta ni gobe biobobo galaobe! Nibo kla gobe bianoba daayemomo! \p \v 19 Nibo tekein kebuobe, nibo inanomobo Gode moton wengo wente bianoba ete nabianoba bobol tem ayam nomabbiobe. \v 20 Otane nibo inamin namino nanobbuo bobolo funanoba bobol ilumo omfubeno mole nibo enangge fumbianoba ni bobol temo tekein kemino men otane Gode tekein kemino sumobo ge fumbianoba bobol ayam nomo! Niminbabe, e inamin namino alukum tekein kebebe. \v 21 Ne nekwal ibo nibo inamin namino nanobbuo bobolo funanomobo nib bobolo ilumo mo omfubeim blim keno mole nibo tekein kebuobe, Gode nib bobol temo kla watemeyebe kesoa nibo funanoba Ni kukubo klayamobo ge funanomabbiobe. \v 22 Nibo Gode wengo wente bianoba e bobol tem funino wafu biob kesoa nibo baabanoba Kobo ni inamin namino mo daabenale genomobo e daaye binabebe. \v 23 Gode nibo oye bianea Ibo ne miine Yesus Klaiste bainobo gabianiba eka Klaiste baanea Ibo bainobo galin nakaia unangai gobesese nine genebuo ina bianiba gobesese nine ge oyebebe. \v 24 Nakai wanita Gode wengo wentebib ile item God etem naniba i bobol temo makob bliobe. Gode e Hobe nibo dobyebio kesoa nibo tekein kebuobe, God etem nibtem nanoba bobol temo makob biobobe. \c 4 \s1 Gode Hob esa hob misiam isa i weng sangobe. \p \v 1 Ne nekwal ibo hobe weng omkeimalin nakai homoni moniba bib mak bib mako haabianiba nakaia unangai baabeniba Hobe ni bekebe biebo gabianiba inamin namin wengo oyemibo ibo weng olo hebmamsabo mo bainobo genimibe! Ibo i wengo naateniba tekein keniba weng olo bain Gode Hobe weng bleka dim omin hobe weng eso geniba moton manibte! \v 2 Gode Hob esa eka dim omin hob isa naatememin kukubo enaminobe. Nakae waneta baanea Yesuse Gode Dofakamin Nakabe, e daak tenea dabalim olo naka nebiobo gene mole eta bain Gode Hobe e bobol temo biba bieta baanamabebe. Weng olo wenteniba tekein keine! \v 3 Ina otane nakae baanea Yesuse Gode Dofakamin Nakababo, e mo daak tenea dabalim olo naka nebiobabo gene mole e hob ele Gode Hobbabe. Hob ele nakae Ne Gode Nemfakamin Nakabo ge obianea dim obinabe hobobe. Sino i baaniba Naka make Ne Gode Nemfakamin Nakabo ge obianea dim obinabe nakae tlamabebo ge baaiba wentibbuo memalo dimo hob ele tenea dabalim ele biebe. \p \v 4 Ne meme ibo Gode meletan kesoa ibo dim weng omkeimalin nakai wengo omabbubeibbiobe. Niminbabe, Hobe ib bobol temo bibe bie e tata kenea hob afete dabalim nakaia unangai bekebe bie gaisanebiobe. \v 5 Dim weng omkeimalin naka eli dabalim olo inamin namino weng sang ota obiba dabalim nakaia unangai i wengo wentebiobe. Niminbabe, i dabalim olo kukub ota wafu bliobe. \v 6 Otane nibole Gode meletanobe. Nakaia unangai Gode tekein kebibi nib wengo wentebib otane nakaia unangai Gode tekein kebibba ile nib wengo mo wentebibbabe. I inabib kesoa nibo tekein kebianoba Ele Hob Moton etabe, eka elele dim omin hob etabe gabianoba tekein kebuobe. \s1 God eta gobenin kukubo mitmakamobe. \p \v 7 Ne nekwal ibo wentine! Gobenin kukubo mit ole God etabe. Inamin kesoa Nibo bainobo galin nakaia unangai gobesese nomo getabe. Nakae waneta naka mak unang maki gobe bie mole e Gode miinobe. E Gode tekein kebebe. \v 8 Nakae waneta naka mak unang maki mo gobeim blim bie mole e God esa mo tekein kebebabe. Niminbabe, God ele gobenin kukubo mitmakamobe. \v 9 Gode funanea Ne nakaia unangai gobenin kukubo alebenano genea e miine yanmakobe dabanea daakenea dabalim ele daak tlebio kesoa nibo e niniin dimo afen smike amit nine dobomabbiobe. \p \v 10 Nibo Gode goba biob ota gobenin kukubo mitmakama bleka? Yeye gobenin kukubo mitmakamo enaminobe. Gode emaye nibo kla gobe bie kesoa e miine dabanea daak tenea dabalim ele tlebiobe. Nibo alukum hengmino hengabob kesoa Gode nibo dosuambe otane e miine Yesuse funanea Ne i hengmino omtlabenano genea tenea atdimo kaanea e ileme singanea nib hengmino omtlabenea Gode Yesuse naneo wateme kesoa e mo dosuambebabe. \p \v 11 Ne nekwal ibo Gode inanebua nibo kla gobe bie kesoa nibsa inanoba naka mak unang maki gobesese nomo getabe. \v 12 Nakaia unangai Gode atemnamini blimobe. Nibo naka mak unang maki gobesese biob mole God etem nibtem nanoba bobol temo makob bioba e gobenino nib bobol temo sibbebenamabobe. \p \v 13 Gode Hobe nibo dobyebio kesoa nibo tekein kebuobe, God etem nibtem nanoba bobol tem makob biobobe. \v 14 Eka Aye Gode e miine dabane tlebu ole e Nakaia unangai hengmino temo blibo alukum dotlanano geneta dabane daak teneta dabalim ele tlebiobe. Nibo Gode inanea Yesuse dabanea daak tlea atemobbio kesoa naka mak unang maki o wengo omkayebuobe. \v 15 Nakae waneta baanea Yesuse Gode miinobo geneme nakae etem God etem naniba i bobol temo makob bliobe. \v 16 I ina blib kesoa nibo tekein kenoba obianoba Bain Gode nibo kla gobe biebo gabuobe. \p God eta gobenin kukubo mitmakamobe. Nakae waneta gobenin kukubo wafu bie mole etem God etem naniba i bobol temo makob bliobe. \v 17 Nibo Gode gobenin kukubo nib bobol temo sibbenobio mole sinanoa Gode nakaia unangai kukubo klanang game dimo nibo Gode kin dimo biaobo funanoba Ni kukubo klayamobo ge funomabbiobe. Niminbabe, nibo dabalim olo bianoba nib kukubo nabobo makob Klaiste kukubo ulab wafu biobobe. \v 18 Nib bobol temo Gode gobenin kukubo sibbebebio mole tosianin kukubo kululabenoa unoa tosianin kukubo blimanamabobe. Tosianin kukubo mitmakamo enaminobe. Naka make henganea e hengmino molo enin kino watemamabeo bobolo funananea tosiambe mole Gode gobenin kukubo e bobol temo blimobe. \p \v 19 Sino Gode nibo gobe binebio kesoa nibsak ina bianoba naka mak unang maki gobe biobobe. \v 20 Naka make baanea Ne Gode goba blibo geneme otane e bainobo galin nakaia unangai mo gobeim blim kene mole e dim obebe. Niminbabe, e bainobo galin nakaia unangai yatemebei mo gobeim blim kesoa e Gode mo atemin blim esa mo goba biebabe. \v 21 Klaiste hekmel weng olo nibo baabenea Nakae waneta Gode goba bie mole e bainobo galin nakaia unangai mak isa gobeneko genebiobe. \c 5 \s1 Dabalim olo kukub misiamo gaisonamin wengobe. \p \v 1 Nake waneta baanea Yesuse bain Gode Dofakamin Nakabo gabe mole e Gode miinobe. Eka waneta aalebe goba bie mole e melel nibsa gobe biebe. \v 2 Inamin kesoa nibo Gode goba bianoba e hekmel wengo wafu biob mole nibo tekein kebuobe, nibo Gode melel isa gobe biobobe. \v 3-4 Nibo Gode goba biob mole nibo e hekmel wengo wafunomabbiobe. Gode melel nibo alukum titilsa kesoa nib bainobo galino sbal manoba dabalim olo inamin namin kukub misiamo deibonoba gaisonobbiobe. Inanobbio kesoa nibo Gode hekmel wengo wafu biobo bumolokbabe. \v 5 Nakae baanea Yesuse bain Gode miinobo gabe nakae dabalim olo inamin namin kukub misiamo gaiso gaiso biebe. \s1 Yesus Klaiste Gode miinobo galin wengobe. \p \v 6 Yesus Klaiste abilim ut danea daak tenea aaye fuelanea eka atdimo kaanea ileme singa nanebua nibo kukubo asu olo watenoba tekein kenoba E bain Gode miinobo gabuobe. E mo daak teneta Aaye eleta fuelanano geneta daak tlim blimobe. E Daak tenia aaye fuelania eka atdimo kaania ileme singananano geneta daak tlebiobe. Eka Hob esa obianea Olo motonobo ge obinabebe. Niminbabe, e moton weng omin Hobobe. \v 7 Nibo kukubo asumatna yo watenoba tekein kebianoba Yesuse bain Gode miinobo gabuobe. Kukub olo enaminobe. \v 8 Hobe kukub osa eka Yesuse aaye fuelanebuo kukub osa eka atdimo kaanea ileme singanebuo kukub osa mito asumatna yo nibo alebenoa tekein kebianoba Yesuse bain Gode miinobo gabuobe. \v 9 Nibo nakai wengo wentebuobe. Gode wengo nakai wengo gaisonobio kesoa e e miine weng sango baabenebuo olota wentemomo! \v 10 Nakae waneta Gode e miine weng sango baabenebio wente bianea baanea Weng olo motonobo geneme nakae e kla tekein kebianea Yesuse bain Gode miinobo gabebe. Ina otane naka make Gode e miine weng sango baabenebio wentenea e mo bainobo geim blim kene mole kukub olo makob e baanea Gode dim omin nakabo genamabebe. \v 11 Weng olo enaminobe. Gode afen smike amit nine nibo dobyebuo o mitmakam ole e miin etabe. \v 12 Nakae waneta Gode miine e bobol temo biba bie mole e afen smike amit nine debebiobe. Eka nakae waneta Gode miine e bobol temo mo biba bieba mole e bobol temo afen smike amit nine blimobe. \s1 Afen smike amit nine wengobe. \p \v 13 Ne futan olo dolania nakaia unangai Gode miine niniin dimo bainobo gabib ibo omfubenamabio inaminobe. Ne funania Ibo tekein keniba ni afen smike amit nine dobobbiobo geine genita futan olo dola omfubenamabibe. \v 14 Nibo Gode baabanoba Kobo ni inamin namin kukubo daabenano gabebo daabenale genomobo e nib wengo wentenea bain inanea daabenamabebe. \v 15 Nibo tekein kebuobe, nib wengo Gode ohabobo wentebe kesoa nibo oha bianoba Kobo ni inamin namin kukubo daabenale gabobo e bain inanea daaye binabebe. \p \v 16 Nakae waneta bainobo galin naka make atemebea e hengmino mako henganeme otane hengmin olo e mo ananota kaanamabeba mole e naka ele beteno daahabea Gode e daabanea afen smike dabaleko! Ne weng ele baabei olo nakaia unangai hengmino hengabib otane o mo yenanoa kaanomabibba o weng ota baabeiobe. Ina otane nakai hengmino olokiemo nanimib ota nakai yenanoa kaanomabiobe. Ne mo baanita hengmino yo hengabib biamo e beteno daayemeko geim blimobe. \v 17 Kukub misiam namino alukum hengmin otane hengmino mako nakai mo yenanota kaanimibbabe. \p \v 18 Nibo tekein kebuobe, Gode memei hengmino amito mo hengabibbabe. Niminbabe, Gode miine i kla kima bie kesoa Naka Misiame i kukub misiamo mo omyamebabe. \p \v 19 Nibo tekein kebuobe, nibo Gode meletan otane Naka Misiame nakaia unangai Gode mo bainobo gabibbai alukum kima biebe. \p \v 20 Eka nibo weng mak osa tekein kebuobe, Gode miine tenea nibo tekein kemino omye kesoa nibo obianoba Gode motonobo gabuobe. Eka nibo afen smike amit nine mitmakame God esa e miine Yesus Klaist esa i baka biobobe. \p \v 21 Ne meme ibo inamin namin kukubo tenoa Gode ib bobol temo bibe bie dobblang kebenomo kesoa ibo kukub olo namino deibueine! Ne wengo bayotabe. Ne Yon neta ib futan olo dola omfubenamabibe.