\id ZEP - Dadibi NT [mps] -Papua New Guinea 2001 (DBL 2014) 
\h Profet Sefanaiago Po Asęai Buku 
\toc1 Profet Sefanaiago Po Asęai Buku 
\toc2 Sefanaia 
\toc3 Sef 
\mt1 Profet Sefanaiago Po Asęai Buku  
\imt1 Hasia nedabo po  
\ip Sefanaia agai profet po polobadu gana pusai dao, te king Josaiago te Juda dabego dwai kolesaga augwaligo augwa lotu wabode dodolali sogo pusai dao. (2 Kin Dąį 22 me 23de suao.) Sefanaia agai Juda hanibolo agai augwaligo te dolo meni yai kolesaga tagala po walai dao. Tialima meni yani da, teda Godigo genuai sęgę augwaliba tagala palaibao.  
\ip Sefanaiago te po me pusali, te meba kantri we bidi dabego Juda dabe dali boi bidi yali we bidibolo me dene mawaibao po wali. Jerusalem me dolaibao. Tiali goli, te we bidi, augwali homu begelama, tama augwali doloba pai kolesaga wali pai we bidi augwali da bugagia bidaibao. Tama nosali te Jerusalem bugagia ma pedelaibao, tama te doloba pai we bidi augwali tede bidaibao.  
\c 1  
\ms1 Genuai Bidigo bubuga pedelaibao  
\mr (Dąį 1–3)  
\s1 Te Genuai Bidigo bubugade agai te we bidi po tų ela mawaibao  
\p
\v 1 Te Josaia, te Emongo ogwa, aga te Juda hani we bidigo king bidali sogo, te sogo Genuai Bidi Godigo e po Sefanaiabolo pusa mawai dao. Sefanaia aga te king Hesekia hani kanemede pedelai bidi dao. Kusi te Sefanaiago aya dao, tama Gedalia te Kusigo aya dao, tama Amaria te Gedaliago aya dao, tama Hesekia te Amariago aya dao. \x * \xo 1:1 \xt 2 Kin 22:1–23:30; 2 Sto 34:1–35:27\x*   
\p
\v 2 Te Genuai Bidigo Sefanaiabolo e tama tiwai po walalio, “Eno tigidali tǫde elalubo nai dabe mu dolaio.  
\v 3 Te da, te tigidali bidi dabe, me hasa dabe, me ba dabe, me sųgų dabe, sese tama dao. Tama eno te we bidi tigidali dwai sę emainu ebo nai dabe sese tama silaibao. Te eno tigidali tǫde we bidi sese tama dola silaibao, tama deli me bidigobeo. Ena Genuai Bidi, eno po polo walio.”   
\p
\v 4 “Eno te Juda tǫ pedai we bidi, me Jerusalem hanu we bidi dene mawaibao. Tama teyu, eno te tibo god Balba lotu wabo nai dabe sese tama doliyu, me Balgo tigidali pris dabe sese tama doliyu yaibao. Tama te we bidi dabego augwali munu me ma homu kone egobeo.  
\v 5 Te eno te we bidi augwali augwa wiegi yai dolaba pai be peduba pelama, tama augwaligo te polua, me giliga, me hǫ dabeba lotu wabo we bidi me dolaibao. Mu tama, we bidi hauwa augwaligo enaba lotu po weyu, e tama po wabo, ‘Mu tamao, dago Genuai Bidi wali pobao,’ po wabo dao. Tiali goli, augwaligo tibo god Molekba lotu wagi peyu, me augwaligo te po ‘Te mu tama,’ po wabo dao, ‘dago god Molek wali pobao,’ po wabo dao. Tialima, eno augwali dolaibao.  
\v 6 Te we bidi augwaligo ena tudi ola menama, tama ena wali me asisąma iyu, tama enabolo augwali dodolomainu hanalubo menio. Te eno te we bidi augwali me dolaibao,” Genuai Bidigo te po wai.   
\p
\v 7 Tigidali Nai Tonalubo Genuai Bidi Godigo bubuga pąba polo yagasalio. Tialima, dage aga pageba aselama, tama pedauwali pania selama elaluao. Genuai Bidigo aga we bidi elabo dola selama elalubao, te bidi dabego ofa ebo hasa dabe elebo tiwai yaibao. Tama agai meba bidi dabe i wali, te agai ebo sę dabe suagasomainu. Tama agai augwalibolo agai gedude wiegi yai pedalobo kolesaga emainu yao po wali.   
\p
\v 8 Genuai Bidigo e tama po wali, “Te eno ena te we bidi ela wialobo bubugade, te eno te kingo ofisa dabe dene mayu, me te kingo wai ogwa dabebolo, me te bulu badu dwai kolesaga wali pabo bidi sese tama dene mena silaibao.  
\v 9 Te eno te we bidi augwali te bulu badu we bidigo lotu wabo tiwai ebo we bidi, me nai wi siyu, me bidi ela muyu ebo we bidi sese dene mayu, me te nai wi sai nai dabego augwa genuai bidigo be pągąniyu ebo bidi dabebolo dene mawaibao,” wali.   
\p
\v 10 Genuai Bidigo te po wali, “Te bubugade dagego te we bidi augwali te Jerusalem sunumi obo pąde dolalubo suaibao. Augwaligo te Sųgųgo Sunumi wabo, tede tama dagego augwali gela wabo po odaibao. Te dagego te Jerusalemgo Niu Taun we bidigo gela odaibao. Tama dagego mage nai me bulu dude bomonama mu kulukulu wabo odaibao.  
\v 11 Te dage te taunde odogo malu bulude bidiyu, te po dabe odobaso da, teda dage gela waibao. Magi baso meni, dagego duga tigidali bisnis bidi dabe isai subaso,” te po wai.   
\p
\v 12 “Tama te sogo eno lam selama, tama ena Jerusalem tomoba pelama, tama eno te bidi dabe eno kolesaga godolo isąma ebo bidi dabe bugagia gegegi paibao. Augwaligo homu augwa digi tigidali sę yaibao homu ebao. Tiali goli, menio. Augwaligo te po wali, ‘God da, olo bidibo dao,’ po wali. ‘Agai wiegi yai bidi dabe tau selama, tama agai dwai bidi dabebolo dwai pe mabeo. Tialima, aga tagalao,’ wali. Tialima, eno te bidi dabe augwali dolaibao.  
\v 13 Te boi bidi dabego te bage augwaligo nai dabe wi saibao, tama augwaligo be dabe dolaibao. Augwaligo gesi be dabe sę yai goli, augwali te be dabede bidigobeo. Te augwaligo ni wain bulaiba, tiali goli augwaligo te ni du sogobeo, tama augwaligo te wain wę me geselegobeo,” Genuai Bidigo te po wai.   
\p
\v 14 Genuai Bidigo agai po tų yabo te bubuga te pąde dao, tama te sogo pąde polo pedelaibao. Te dwai bubugade da, te bomai ami bidi dabe tagalao, augwali me wi dwai mu elama, tama gela geninama mu waibao.  
\v 15 Tama te sogo Genuai Bidigo moni sębę pebeli diliba mu pedelaibao, tama te we bidigo homu sęgę elama, tama augwaligo homu dwai yaibao, tama te nai dabe sese tama dola silaibao. Tama te pǫ dabego giliga halua siyu, te dwai tį be elama, tama geninama mu hulia saibao.  
\v 16 Tama te bubugade te biugel bu weyu, me te ami bidi dabego hae weyu yaibao, te augwaligo te bomai obo elalubo taun obo aluyu, me te tonalubo bidi wasman dabego bobobage be dabe aluyu yaibao.   
\p
\v 17 Genuai Bidigo e tama po wali, “Te tǫde we bidi dabego ena Genuai Bidi dali dwai sę yalio. Tama tibaso, eno haniani dwai dene augwalide pedelemainu ilama, tama augwali te gedu widai bidi dabego sunumi gege bilibo tiwai bilaibao, tiali goli te wi pabo tų menio. Tama augwaligo kaneme te wę tiwai gelama, tama augwali isaibao. Tama augwaligo tigi dabe te tǫde te yowi di danamu pabo tiwai damuaibao,” Genuai Bidigo te po wai.   
\p
\v 18 Tama te bubugade Genuai Bidigo sębę hania haninama, mu suaibao. Tama augwaligo silva me gol dabego augwali tau me sogobeo. Mu menio. Genuai Bidigo sębę te dwai isi tiwai pedelama, tama tigidali tǫ dela silaibao. Tama deli sogo tama agai tǫde we bidi sese tama mu silaibao.   
\c 2  
\s1 We bidi augwaligo homu kolesaga begelemainu yao  
\p
\v 1 Dage e kantri we bidi, dage deliba sisinao. Dagego duga dwai kolesagade dage hale dwasianu me ebo menio. Dagego homu bugagia kone palama, tama te dwai kolesagade hale iyąo.  
\v 2 Tiyu, Godigo aga homu sębę haniniyu, dage deli sogo tama te plaua sasia pabo tiwai elama dolidali weyu iyąo. Tiyu, Genuai Bidigo sę yagasiyu, dage isi ulubo tiwai elama ulidali weyu iyąo.   
\p
\v 3 Dage we bidi hamaga isąnama Genuai Bidigo po sela sąsiama ebo we bidi, dage agaba asiąo. Dagego duga digi aiyaba elaluama, tama doloba pai kolesaga naga iyąo. Tialima, dagego te tama tiyu da, teda Genuai Bidigo sębę elama, tama te dwai pe te dwai we bidi dabebolo wei ponobo sogo dage da dologobeo.   
\s1 Genuai Bidigo Juda bulu pąde elalubo kantri dabe dolaibao  
\p
\v 4 Te Genuai Bidigo te kantri Filistia dolobo sogo, te taun Gasade bidi deli me bidigobeo. Me te taun Askelonde me bidi meni yaibao. Te boi bidi dabego taun Asdot we bidi sese tama deli be posobo sogo sela sąwaibao, tama augwaligo te taun Ekron we bidi me sela sąwaibao.   
\p
\v 5 Tega, dage Kenan tǫde bidibo Filistia dabe, nambisde bidibo Keret bage, dage me dolaibao! Genuai Bidigo dage po tų ela mawai dao. Tama agai dage dolama, tama bidi deli me bidigobeo.  
\v 6 Dagego tǫ dage te tamu ąį sabide te elalubao, teda te olo kala bulu pedelaibao. Tama te sipsip tonalubo bidi dabego tede dwasianu be dabe me sipsip obo te pesagede sę eyu yaibao.  
\v 7 Tama te dwasianu Juda hani augwali dolisąma yali, te bage augwaligo dagego tǫ saibao. Tama augwaligo sipsip kibu dabego tede nai tulama, tama te Juda dabe augwali te Askelon taun bede piyu yaibao. Tama God augwa Genuai Bidi, augwa Juda dabego Genuai Bidi augwali dali bidiyu, tama agai augwali augwa kantride bugagia bidimainu ilaibao. \x * \xo 2:7 \xt Ais 14:29-31; Jer 47:1-7; Ese 25:15-17; Jol 3:4-8; Amo 1:6-8; Sek 9:5-7\x*   
\p
\v 8 Genuai Bidi Tigidali Bomo Elalubo Bidigo te tama po wali, “Te kantri Moap me kantri Amon bidi dabego eno we bidi posobo po olama, tama eno we bidi dali dwai po wabo eno polo odalio. Tama augwaligo hae olama, te po wali, ‘Augwaligo tǫ dago saibao,’ po wali.  
\v 9 Mu tamao, ena Tigidali Bomo Elalubo Genuai Bidi ena bidalubao. Ena Israel dabego God, eno mu po weyu, te dąų obao. Te Moap dabe, me Amon dabe, augwali te taun Sodom de Gomora si dolali tiwai tama yaibao. Tama hae naga holama, tama augwaligo tǫ mesega saibao. Tama tamu sabo dedage dabe naga pedelama, tama te bulu dolama, te tama elaluaibao. Eno hani augwali me bidali da, te bidi dabe augwaligo augwali dali hwįnama, tama augwaligo nai dabe kegelama saibao, tama augwaligo tǫ me saibao,” te po wai. \x * \xo 2:9 \xt Gag 19:24\x*   
\p
\v 10 Te tama tiwai sę te Godigo te Moap dabe me Amon dabe dali me dene mawaibao. Magi baso meni. Augwaligo hamaga elama, tobolu gagea peyu ebo dao. Tama augwaligo Genuai Bidi Tigidali Bomo Elalubo Bidigo we bidi dabe dali dwai po wabo dao.  
\v 11 Genuai Bidigo augwali wi dwai mu emainu ilaibao. Te agai te tigidali kantri dabego tibo god dabe olo nai pedelemainu ilaibao. Tama tigidali tǫ we bidi augwali augwa kantride bidiyu, Genuai Bidiba naga lotu po weyu yaibao. \x * \xo 2:11 \xt Ais 15:1–16:14; 25:10-12; Jer 48:1-47; 49:1-6; Ese 21:28-32; 25:1-11; Amo 1:13-15\x*   
\p
\v 12 Dage kantri Kus we bidi, Genuai Bidigo dage boide ela muna silaibao. \f + \fr 2:12 \ft Te tǫ kantri nogi augwaligo polobadu wali Kus, megi dago te nogi Sudan wabo dao.\f* \x * \xo 2:12 \xt Ais 18:1-7\x*   
\p
\v 13 Tama aga bomogo naga Genuai Bidigo te kantri Asiria we bidi dola silaibao. Te kantri te not badu te elalubao. Tama agai augwaligo genuai taun Ninive dolaibao. Tama te taun te olo nai meni yai olo tǫ wa pai bulu elaluaibao, tama bidi te bulude me bidigobeo.  
\v 14 Te kau kibu dabe, me sipsip kibu dabe, me meme kibu dabe, me bulu hasa dabe naga, augwali teba piagasiyu yaibao. Magi baso meni, te boi bidi dabego te wiegi yai ni bǫ name dabe dadalama, buluba sąsąwaibao. Tama te hulide bilalobo ba dabe augwali te bede bidaibao. Tama augwali te windo dabede dualama, te augwa po weyu yaibao.   
\p
\v 15 Te Ninive dabe augwaligo homugo augwali bomai bage dao homu elama, tama augwaligo homu augwali bidi dabego me dologobeo homu ebao. Tama tiyu, augwali wiegi yai homu pemene ebao. Tama augwaligo homugo augwaligo taun te hasia polalubo taun dao homu ebao, te tigidali kantri tomode. Tiali goli, mu menio. Te dwai nai dabe te Ninivede pedelaibao. Tama te bulu dolama, tama elaluaibao. Tama te bulu te bulu hasa dabego bulu gagawaibao. Te bidi dabe sese augwali te pąba pabo bage augwaligo posobo po weyu, eda ma kila siyu yaibao. \x * \xo 2:15 \xt Ais 10:5-34; 14:24-27; Nah 1:1–3:19\x*   
\c 3  
\s1 Genuai Bidigo Jerusalem dabego sęgę sela sąwani  
\p
\v 1 Jerusalem, hobede ya, nage dolaibao, nago kolesaga Genuai Bidigo gedude dwai damua pai mu yalio. Nagede bidibo we bidi dabe augwaligo agai po sela sąbo dao. Tama augwaligo augwa hasi deli hani dali dwai sę ebo dao.  
\v 2 Augwaligo bidi dabego po odisąwai, awe, augwaligo Genuai Bidigo po me odai menio. Tama augwaligo Genuai Bidigo augwali dodolomainu homu ebo hagela yai dao. Tama augwaligo agaba homu dąų olama, tama augwaligo Genuai Bidigo augwali tau somainu me hanalu wai menio.  
\v 3 Te Jerusalem genuai bidi dabe augwaligo te olo we bidi dali dwai kolesaga ebode augwali te bulu laion sibi nasi ebaso bomona dagą wabo tiwai ebo dao. Tama te po tų odobo bidi dabe, augwali te uni yowi nasi genuai ebo tiwai iyu ebo dao. Tama augwaligo te hasa tulama, silama, tama augwaligo do tuabo dili me mubeo.  
\v 4 Te profet dabe augwaligo augwa sę subigila eyu, bugagia ebo meni, tama augwaligo te bidi dabe augwali dolomainu ili po naga ola mayu ebo dao. Tama te pris dabe augwaligo te Godigo tedali gasagi yai be habu dabede dwai sę eyu ebo dao. Tama augwaligo Godigo bomai po hasegelama tagalali, te augwa digi augwa ma tau somainu.   
\p
\v 5 Tiali goli, Genuai Bidi Jerusalemde me bididuali. Agai doloba pai kolesaga naga ebo dao. Te agai dolo isąwai kolesaga da agai me ebo menio. Mu menio. Te tigidali sogo bubugade agai te we bidi dabe dali doloba pai po tų naga ebo dao. Agai te sę tagalobo menio. Tiali goli, te taunde bidibo dwai bidi dabego te dolo meni yai kolesaga naga ebo dao. Tama augwali tede hale dwasianu me ebeo. Mu menio.   
\p
\v 6 Genuai Bidigo e tama po obao, “Eno meba kantri dabe mu silama, te Juda hani isąwai bage, tama augwaligo genuai taun dabe dolama tagalai dao. Tama te bomai obo dabe me, be dabe me, te boi bidi tonaluyu no munalubo te sigide elalubo be dabe dolama, tagalai elalubao. Tama te bidi dabe augwali te taun sunumidu tomodu bidi dabe me bilibeo. Magi baso meni. Bidi deli me bidisąma ebaso.  
\v 7 Eno homugo te eno we bidi dabe augwaligo eno te kolesaga sulama, tama augwali ena dologode bidigowe homu yali, tama eno augwali dodolomainu sula tagalogowe homu yali. Tialima, augwaligo eno augwalibolo polobadu ola mani nai dabe bugagia koneyu da, teda eno augwali me dologobeo. Me eno augwaliba dwai dene magi menigi da. Tiali goli, augwaligo eno ola mani po odobeo. Menio. Deli sogo tama augwali hogodama, tama augwaligo bomonama, augwa polobadu yali dwai kolesaga edelama mu yalio,” te po obao.   
\p
\v 8 Tialima, Genuai Bidigo aga wali asobo we bidibolo e tama po walali, “Dage homu hauwa igimio. Dagego eno te tigidali kantri we bidi po tų ela mabo te sogo deli naga tonaluiagameo. Magi baso meni. Eno augwali dali sębę elama, tama eno augwali deliba sisinagasomai elama, homu polo dąų olama, tama eno augwali dene mawaibao. Tama eno sębę te isi bogoli tiwai elama, tama eno tigidali tǫ dabe mu dolaibao,” wali.   
\p
\v 9 “Tama te sogo eno tigidali kantride we bidigo homu kolesaga hasesegele paibao. Augwaligo homu kolesaga gesi ma elama, tama augwaligo ena deliba naga gedu haluasa po weyu yaibao. Tama augwali homu deli naga elama, tama augwaligo eno po wali asaibao.  
\v 10 Tama eno we bidi dabe augwali eno te digibulu kantri Kusba sela sąwani we bidi dabe, me gasa meba kantriba tagala palali, te we bidi augwaligo ena ofa dabe yabo nai sesaibao.  
\v 11 Eno ede bidibo we bidi, te mu tama dao, dagego eno po mu tama sela sąwai dao. Tiali goli, eno te sę dabe pedelemainu ebo sogo da, teda dagego duga yali kolesagade hale me egobeo dao. Magi baso meni. Eno dagego te bidi dabe augwali te hamaga elama, gagea peyu yali bidi dabe sela sąwaibao. Tama dage Jerusalemde eno bulu dude bidaibao. Tama dagego tede ena dali hamaga ma eyu egobeo.  
\v 12 Tama te we bidi augwali eno Jerusalemde bidimainu sula tagalaibao. Augwaligo nai dabe hauwa meniama, tama augwaligo augwa aiyaba elaluama elaluaibao. Tama augwali enaba aselama, tama augwali tau somainu enabolo hanalu waibao.  
\v 13 Te Israel hani dwasianu augwali me bidibao, augwaligo gasa bidi dabe dali dwai kolesaga me egobeo. Tama augwaligo ili po olama, tama augwa abagi dabe ili po wabo sę me egobeo. Te augwali wiegila bidibo sę naga elaluaibao. Tama augwali wi ilabo bidi meni yaibao,” Genuai Bidigo te po wai. \x * \xo 3:13 \xt Ped 14:5\x*   
\s1 Wiegi yai homu pemene ebo balia po me deli  
\q1
\v 14 Dage Israel dabe, dage i olama,  
\q2 homu pemene ebo balia po waiąo.  
\q1 Dage Saionde bidibo bage, dwagi yai homu eyu,  
\q3 tęąbi po waiąo.  
\q1 Dage Jerusalem dabe, dage wiegi yai homu elama,  
\q3 homu pemene geninama mu iyąo.   
\q1
\v 15 Magi baso meni.  
\q1 Genuai Bidigo te po wai dao,  
\q2 agai dage dene mawaibao po wai dao,  
\q2 tiali goli megi da, dagego dene sabo usu eyu silama,  
\q3 agai te po tagalali dao.  
\q1 Agai dagego boi bidi dabe sese sela sąwani dao.  
\q1 Genuai Bidi da, aga Israel dabego king dao,  
\q2 tama aga dage dali bidibao.  
\q1 Tialima, dage nai me delide munu ma wi igimio.   
\q1
\v 16 Nosali bubuga me deli pedelaibao,  
\q2 tama te bubugade augwaligo Jerusalem dabe  
\q3 te tama po waibao,  
\q1 “Dage Jerusalem we bidi dabe,  
\q3 magi naide wi me elamo dao,  
\q2 tama dage olo dali noma sigio.   
\q1
\v 17 God, duga Genuai Bidi, aga dage dali bidibao.  
\q1 Agai bomogo dage tau selama,  
\q2 tama dagego te boide dagego tobolu ela holali dao.  
\q1 Genuai Bidi aga dagede wiegi yai homu pemene elama,  
\q2 tama balia po waibao,  
\q2 te we bidigo lotu wabo genuai sogo ebo tiwai yaibao.  
\q1 Agai dage godolo mu ebao,  
\q2 tama agai po deli me wagobeo,”  
\q3 augwaligo te tobage po waibao.   
\q1
\v 18 Genuai Bidigo po genina ma weyu, e tama po wali,  
\q2 “Eno dage Jerusalem dabe dene mawai dao,  
\q2 tama dagego te nai da tuyu lotu wabo genuai sogo  
\q2 te kolesaga dabe wali me pabo usu me ebeo.  
\q1 Dagego enabolo te haniani moni da tubo dali lotu po  
\q2 wabo sogo ebo kolesaga ebo usu me ebeo.  
\q1 Tama te tialigo dage hale geninama mu emainu ilalio.  
\q1 Tiali goli megi da, dagego hale eno silaibao.   
\q1
\v 19 Suao, te sogo bubugade eno dage dali dwai sę elama,  
\q2 dage aiyaba elaluali te boi bidi dabe dene mawaibao.  
\q1 Dage meba Israel dabe gasa kantri dabeba  
\q2 subigila pelama, tama gasa kantride bidibao,  
\q2 te sipsip kibu hani subigila pelama,  
\q3 augwaligo sągą dola tagalali bage  
\q3 tiwai yali gilama yali da.  
\q1 Tiali goli, eno augwali duga bulu tǫba mu  
\q3 ma odasa asaibao.  
\q1 Megi da, dage meba hanigo gedude te hale mu te ebao.  
\q1 Tiali goli, eno te hale silama,  
\q2 tama dagebolo genuai nogi mawaibao.  
\q1 Tama digibulu tǫ we bidigo dagego nogi ugwaba saibao.   
\q1
\v 20 Te asobo bubugade,  
\q2 eno dage te tigidali pesagede bidalubo te pesagede  
\q3 ma oda saibao,  
\q2 tama eno dage duga bulu muba ma odasa asaibao.  
\q1 Tama me eno dage genuai nogi menama,  
\q2 tama tigidali tǫde we bidigo dagego nogi ugwaba  
\q2 saibao. Tama te sogo eno dagego sę wiegi yai  
\q2 pedelemainu ilama,  
\q2 tama dage wiegila bidibo elaluaibao.  
\q1 Dagego te sę pedelebo te duga gedugo mu sueibao.  
\q1 Ena Genuai Bidi, eno po polo walio,” tama wali.