\id ZEC - Dadibi NT [mps] -Papua New Guinea 2001 (DBL 2014) 
\h Profet Sekaraiago Po Asęai Buku 
\toc1 Profet Sekaraiago Po Asęai Buku 
\toc2 Sekaraia 
\toc3 Sek 
\mt1 Profet Sekaraiago Po Asęai Buku  
\imt1 Hasia nedabo po  
\ip Profet Sekaraia aga te profet Hagai dali deli sę ebo bidi dao. Agai bomai homugo me te Juda we bidigo te Godigo tempel be ma sęnama tama doloba pai kolesaga yai we bidi ma pedalomainu homu yalio. Sekaraiago me augwali dali Godigo wiegi yai kolesaga yaibao po augwalibolo pusa mani, te wiegi yai sogo pedelaibao po pusali  
\ip Te profet po dago te Dąį 1-8de te elalubo po te buku Esekiel me Danielde suali po tiwai si dao. Sekaraia agai nade subo sę dabe tiwai suali, tama haniani po page begelama pusai po dabe tede elaluali.  
\ip Te Dąį 9-14 tede te nosali pedalabo nai dabe po elalubo. Teda te Godigo tigidali we bidigo kolesaga osola subo sogo tiaibao, me Godigo agai sę emainu bidi me tagala palobode. Te meba po begelama wali po te nosali Jisasgo yali sę dabe po dolo si kadu walio.  
\c 1  
\ms1 Sekaraia agai nade subo nai dabe tiwai suali  
\mr (Dąį 1–6)  
\s1 Genuai Bidigo te po wali, aga we bidi augwali agaba ma asomainao po wali  
\p
\v 1 Te king Darius aga kantri Persiade king bidali sogo, te aga king bidibadi kibu be namba 2 wabode, te 8 poluade, God Genuai Bidigo e po te profet Sekaraiabolo mani. Te Sekaraia aga te Berekiago ogwa dao, te Berekia te Idogo ogwa dao. \x * \xo 1:1 \xt Esr 4:24–5:1; 6:14\x*   
\p
\v 2 Genuai Bidi Aga Tigidali Bomo Elalubo Bidigo Sekaraiabolo aga we bidibolo e tama po pusao po wali, “Ena Genuai Bidi, polobadu eno dagego wąį dabe dali sębę mu yai dao.  
\v 3 Tiali goli megi da, eno dagebolo e tama po e walobao, dage enaba geasa ma asiąo, tama eno dage tau sagasaibao.  
\v 4 Dagego duga wąį dabego yali sę tiwai igimio. Te eno poloba profet dabego augwalibolo te dwai kolesagaba tudi ola mao po obadi, augwaligo te dwai kolesagaba tudi ola mawai menio. Tiali goli augwaligo eno po odai menio.  
\v 5 Megi da, dagego wąį dabe polo isila pai dao, tama te profet dabe augwali me isai dao.  
\v 6 Tiali goli eno po te profet sibi dabego pedauwalidu eno pedelaibao wali te sę dabe duga wąį dabeba polo pedelai dao. Augwaligo eno augwalibolo mani te po wali pai menio. Tama tialigo augwali te dolali dao. Tama nosali augwali homu begelama augwaligo e tama po wai dao, ‘God, Tigidali Bomo Elalubo Genuai Bidi, agai dabolo wali gilama tama agai dabolo dene mawai dao. Te dena dagede tama dao,’ augwaligo te po wali,” God Genuai Bidigo te po wai.   
\s1 Profetgo hos dabe te na subo nai tiwai suali  
\p
\v 7 Te Darius aga king bidibadi namba 2 kibu be wabode, te namba 11 poluago namba 24 deide, te polua augwaligo polua nogi Sebat wabo poluade, Genuai Bidigo po enabolo mani.  
\v 8 Te hulide eno nai me nade subo nai tiwai me suali. Tama eno Genuai Bidigo ensel bidi kaneme hosde dualasa asobo suali. Te hos te bulu odogo mede ni tomode dolalubo suali. Tama meba hos dabe aga tudi badu dolalubo suali. Te hos dabe meba te kaneme hos, meba te nala hos, meba hos dabe te popoi pai hos dabe suali. Tama te ensel dabe te hos dabede dualalubo suali. \x * \xo 1:8 \xt Ped 6:2, 4\x*  
\v 9 Tialima eno te namba wan enselbolo e tama po hanalu wali, “Te nai page mena tama dawe?” po hanalu wali. Tama ensel bidigo e tama po wali, “Eno nagebolo te na yali po page pusaibao.”  
\v 10 Tama enselgo po genina ma weyu e tama po wali, “Genuai Bidigo te ensel dabe taga pelama, te tigidali tǫ dabe bugagia susa biligi pomainu taga palai dao,” wali.   
\p
\v 11 Tama te ensel dabego te namba wan enselbolo e tama po walali, “Da tigidali tǫde bilalio. Tama dago tigidali we bidi augwali sęgę menia suali, tama augwali bugagia naga bidibo suali,” wali.  
\v 12 Tialima te polalubo enselgo te po wali, “Tigidali Bomo Elalubo Genuai Bidi, nago te kibu be 70 usu nama nago te Jerusalem we bidi dali me te Juda hanigo taunde bidibo we bidi dabe dali sębę yai dao. Nisu mu nago augwali dali homu dene eyu tau ma saibawe?” tama wali.   
\p
\v 13 Tama Genuai Bidigo wiegi yai po te ensel bidigo homu nagame elama dua bidabo po wei ponani.  
\v 14 Tama te ensel bidigo enabolo Tigidali Bomo Elalubo Genuai Bidigo po te pusa mao po wali. Godigo te po wali, “Eno genuai homu dene mu te Jerusalem we bidi dabeba ebao, te eno genuai taun dao, tama eno augwaliba homu kone kone hauwa mu ebao.  
\v 15 Polobadu ena we bidi dali sębę dwasianu yai dao, tama gasa hani bidi dabebolo augwali dene magasao po wai dao. Tialima augwali aselama, tama augwaligo eno we bidi dwasianu gana me dolobeo. Menio. Augwaligo te magi edelama, tama augwali mu tama mu dolama tagalalio. Tama tede megi te kantri dabe augwali bugagia bidiyu augwali sęgę meni yai goli, eno augwali dali sębę dwai mu ebao.  
\v 16 Tialima, eno megi Jerusalemba ma aselama, tama eno agai we bidi dabe dali hobede homu ma yainu ebao. Tama augwaligo eno be ma sę eyu, me augwaligo taun Jerusalem ma dodoliyu yaibao,” te Tigidali Bomo Elalubo Genuai Bidigo te po wali.   
\p
\v 17 Tama ensel bidigo enabolo gasa me po me e tama pusao po walali, “Tigidali Bomo Elalubo Genuai Bidigo te po wali, te tigidali nai dabe agai taunde pągąna yaibao po wali, tama te we bidi wiagila mu bidimainu yaibao po wali. Tama agai Jerusalem aga taun mu tiwai ma magi ilaibao po wali. Tama agai te Jerusalem we bidi homu tegaluama bugagia bidimainu ilaibao,” wali.   
\s1 Sekaraiago kau kibugo tobolu gąų suali  
\p
\v 18 Eno nade subo nai tiwai ma suali, tama eno kau kibugo tobolu gąų me si me si elalubo suali.  
\v 19 Tama te ensel ena dali po wali bidi asobo si, eno agabolo e tama po hanalu wali, “Eno te suali nai page mena tama nai dawe?” wali. Tama agai te po wei ponoyu, te po wali, “Te gąų dabe te Juda me Israel me Jerusalem dolali te kantri dabe te magi iyu te yali dao,” tama wali.   
\p
\v 20 Tama Genuai Bidigo enabolo me si me si sę bidi hama tolalubadi asobo ola mani.  
\v 21 Tama eno agabolo hanalu wali, “Te bidi dabe augwali te magi yabo bidi dawe?” Tama agai te po wali, “Augwali te asobo da, te Juda dabe dolama gasa kantri dabeba besela sąyani, te kantri dabe wi ilama tama augwaligo bomo tamunabo bidi te asobao,” wali.   
\c 2  
\s1 Sekaraiago nai dabe usu nigo usu sabo bono string suali  
\p
\v 1 Eno nade nai subo tiwai elama, tama eno bidi mego usu ni bono nogo tolalubo suali.  
\v 2 Tama eno agabolo e tama po hanalu wali, “Nage mena pobawe?” Tama agai po wei ponoyu, te po wali, “Ena pabo da te Jerusalem usu nigo usu sainu pobao, te eno agai bobobage yali koneyu, me genuai iyu yali koneainu te usu ni bonogo usu sainu pobao,” wali.   
\p
\v 3 Tama eno suali, ena dali te po waduali ensel aga ugwanu gana pabo suali, tama gasa ensel me agaba hodola sagasali.  
\v 4 Tialima namba wan enselgo namba tu enselbolo e tama po walali, “Nage te usu sabo bono string tolalubo te bidi pageba usayao, tama agabolo e tama po walao, ‘Te Jerusalemde te we bidi hauwa bidiyu, me kau kibu hauwa bidiyu yaibao. Tama te pesage genuai mu elama, tama augwaligo taun obo bagulabo usu me egobeo.  
\v 5 Tama Genuai Bidigo te po wai dao, aga te isi tiwai pedalama, tama aga te taun bagulai obo tiwai te Jerusalem bagualuaibao, tama agai te taun tonaluaibao. Tama aga Jerusalemde bidaibao, tama agai genuai ula me bomo pepeli diliba haninaibao,’ te po te usu sabo bono string tolalubo bidiba walao,” te enselgo te po walali.   
\s1 Godigo Juda dabe augwa page buluba ma i wali  
\p
\v 6-7 Te Genuai Bidi aga we bidi dabebolo e tama po walali, “Asiąo. Eno dage tigidali badude elalubo buluba pomainu dobola palai dao. Dage meba te saut badu peyu, meba te giliga pedalubo baduba peyu, tama meba te giliga degasa pabo baduba peyu yali. Tialima, dage mebago megi da te not badu elalubo te taun Babilon wi tagalama, Jerusalem taunba polo ma asiąo,” wali.   
\p
\v 8 Tialima, Tigidali Bomo Elalubo Genuai Bidi aga te God aga genuai bomo ulade bidibo bidi dao. Agai aga we bidi dololali te kantri dabe homu kone ebao. Tama agai Jerusalem bagebolo e tama po walali, “Tialima bidi me deligo nage dolainu ebaso da, teda aga digi aga ma dolaibao.  
\v 9 Tialima dagego eno we bidi dolobaso da, teda ena digi dage dali hwįaibao. Tama te we bidi polobadu dagego augwali dagego kalabus sę yali da, te augwa digi dage dolaibao,” wali. Tama te sę dabe pedalobo sogo te we bidi tigidaligo e tama koneaibao, Tigidali Bomo Elalubo Genuai Bidi aga digi ena tagala palama, eno agai po pusagasai yabo homu koneaibao.   
\p
\v 10 Tama Genuai Bidigo po ma weyu e tama po wali, “Dage Jerusalem we bidi, dage wiegi yai homu pemene eyu, tęąbi po wao. Magi baso meni, ena asobao, tama ena dage tomode bidaibao,” wali.  
\v 11 “Tama te sogo kantri hauwa we bidi augwali Genuai Bidiba aselama, tama augwali eno we bidi bidaibao. Tama ena dage tomode bidaibao, tama dagego koneaibao, ena aga digi dage tomoba taga palama, dage tomode bidibo koneaibao.  
\v 12 Tama te Juda dabe augwali God aga te kantride bidaibao, tama augwali Godigo gedude wiegi yai we bidi mu bidaibao. Tama agai Jerusalem godolo mu eyu, tiwai meba taun dabe godolo egobeo, tama agai Jerusalem da aga hanu mu da tama waibao.” Genuai Bidigo te po wai.   
\p
\v 13 Genuai Bidi aga bulu mu tagalama, tama aga daba asaibao. Tialima, da tigidali tǫ pedaide bidibo we bidi pedauwali pani selama tama tonaluinao.   
\c 3  
\s1 Profet bidigo het pris nade subo nai tiwai suali  
\p
\v 1 Te nade subo nai tiwai elama, Genuai Bidigo tobolu bidi pris Josua enabolo ola mani. Josua aga Genuai Bidigo ensel bidi pąde dolalubo suali. Tama dwai haubo bidi Satan te Josuago dolo nogo badu dolaluali, tama agai po tų ela mawainu kegaluali. \x * \xo 3:1 \xt Esr 5:2; Ped 12:10\x*  
\v 2 Tama Genuai Bidigo Satanbolo e tama po walali, “Satan, eno nagebolo obao, nago po deli me olamo dao. Eno Jerusalem godolo mu ebao, tama eno nagebolo penane pania sao po te obao. Eno te bidi Josua ma salio. Te bidi mego te isi dage dolidali iside selama, agade te isi sula selama, te isi dage nogogo tolalubo tiwai, te aga dolidali weyu eno te bidi Josua te tama ma dobola salio,” wali. \x * \xo 3:2 \xt Jut 9\x*  
\v 3 Te Josuago ugwa dabe sese meda mu elama, tama aga te ensel pagede dolaluali.  
\v 4 Tialima te enselgo meba ensel dabebolo waliyu, e tama tiwai po walali, “Te bidi tigide elalubo dwai ugwa dabe sela sąyao,” wali. Tama agai Josuabolo e tama po walali, “Odao. Eno nago dwai sę sęgę me nago te dwai meda yai ugwa dabe sela sąwani dao. Tama megi da, eno nagebolo wiegi yai gesi ugwa dabe mawaibao.” Te ensel me deligo te po wali.  
\v 5 Tama eno te po wali, “Te augwaligo wiegi yai tedela name ugwa augwaligo me selama, Josuago tobolude hadi tiwai baguligi sogo da, teda wiegi yai igi dao.” Tama augwaligo eno wali po gilama tama tiali. Genuai Bidigo ensel pąde dolaluali, tama meba ensel dabego Josua gesi ugwa dabe guduludali.   
\p
\v 6 Tialima enselgo Josuabolo e tama po walali,  
\v 7 “Te Tigidali Bomo Elalubo Genuai Bidigo te po wali, ‘Tialima ma nago eno bomai po tigidali wali pelama, tama nago eno nagebolo mani sę tigidali eyu da, teda eno nage sa muyu, nago eno be tonalubo sę me te tigidali lotu wabo nai dabe tonalubo sę me idumainu sula tagalaibao. Tama eno nage ena pageba asomainu sula tagalaibao, te ensel dabego ebo gilama yaibao.  
\v 8 Polalubo pris Josua, odao, me dage meba pris dabe me dagego me odao, dage te nosali pedalabo wiegi yai nai te magi tiwai me dage dao. Odao. Eno ena sę bidi odasa asaibao. Agai nogi da e dao, Ni Abu. \x * \xo 3:8 \xt Jer 23:5; 33:15; Sek 6:12\x*  
\v 9 Megi da, eno masigi me gedu a naga olama si, te 7 yai te masigi selama, Josua pąde muaibao. Tama eno te masigide po me asęaibao. Tama deli sogo tama eno ena kantri we bidigo sęgę sela sąwaibao.  
\v 10 Tama te bubuga pedalobaso da, teda dage deli deli duga abagi dabe i olama, dage dali bidagasomainu yagameo. Tama dage duga wain gi dabede dulaluyu, me duga fik ni dologode dulaluyu yagameo. Tama dage tigidali homu nagame elama, tama bugagia mu bidiagameo,’ Genuai Bidigo te po wali,” ensel bidigo enabolo te Genuai Bidigo po tama pusali. \x * \xo 3:10 \xt Mai 4:4\x*   
\c 4  
\s1 Profetgo te 7 lam sole suali  
\p
\v 1 Ena dali hasia te po wali te ensel bidi aga ma aselama, ena augwaligo te godege piai bidi hodolo ąǫ yagasali.  
\v 2 Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao.  
\v 3 Tama ni oliv si te gol lam ni dage pąde dolaluali, te me badu me badu me elalubao,” eno te po wali. \x * \xo 4:3 \xt Ped 11:4\x*   
\p
\v 4 Eno sulama tama eno enselbolo e tama po hanalu wali, “Genuai Bidi, eno te suali nai page magi nai mu dawe?”  
\v 5 Tama agai enabolo e tama po walali, “Nago konebe, agawe?” Tama eno te po wali, “Genuai Bidi, eno konebeo.”   
\s1 Godigo Serubabel dali po dąų walali  
\p
\v 6 Tama tialima enselgo enabolo Genuai Bidigo te po te polalubo gavman bidi Serubabelbolo pusa mao po wali. Genuai Bidigo te po wali, “Nago naga bomogo o naga ami dabego bomogo te sę dabe ebo usu egobeo. Menio. Eno Mobo Bidi Spiritgo bomo nage dali bidaibao, tama te bomo deligo naga nago te sę yaibao. \x * \xo 4:6 \xt Esr 5:2\x*  
\v 7 Tialima, genuai nai dabe te bulu du tiwaigo nago sunumi palia sobaso da, teda eno tigidali sela sąwaibao. Tama nago eno be ma sę yaibao. Tama nago namba wan masigi aga pesagede mubo si da, teda te we bidigo hai bomona weyu e tama po waibao, ‘Te da, wiegi yai be mu dao,’ augwaligo te po waibao,” wali.   
\p
\v 8 Tialima Genuai Bidigo enabolo gasa po me pusa mani.  
\v 9 Agai te po wali, “Serubabelgo eno be sę yabo digi tǫ polo dodolai dao, tama aga digi polo sę yaibao. Tama eno be sęa silibo si da, teda eno we bidi tigidaligo ena digi nage augwaliba taga palai yabao homugo koneaibao.  
\v 10 Augwaligo sę polo siligi pisąma ebo suali, tama tibaso augwali homu sęgę yali. Tiali goli augwaligo Serubabelgo te be sę dodolabo ain yai string tolama, tama eno be sę gagalobo sulama, tama augwali wiegi yai homu pemene mu yaibao,” wali. \x * \xo 4:10 \xt Ped 5:6\x*  
\s1 Ensel bidigo Sekaraiabolo te lam me te ni oliv po page pusa mani  
\p Tama ensel bidigo enabolo e tama po wali, “Te nogo a naga olama me badu nogo si, te 7 lam te Genuai Bidigo gedu magi iliyu te yali dao. Agai tigidali tǫ sese tama subo dao,” wali.  
\v 11 Tama eno agabolo hanalu wali, “Te ni oliv te lam si dali badu si bogo badu dolaluali, ma te page mena tama dawe? \x * \xo 4:11 \xt Ped 11:4\x*  
\v 12 Tama te ni oliv nologo si te gol paip pąde munalubo te page magi nai dawe, me te oliv nigo wel te paip si tomoba geasa dulubao, te page mena tama dawe?” wali.   
\p
\v 13 Tama agai enabolo e tama po hanalu wali, “Nago konebe, agawe?” Tama eno te po wali, “Genuai Bidi, eno konebeo.”  
\v 14 Tialima agai te po wali, “Te da, te Genuai Bidigo bidi si tigidali tǫde genuai bidi si te tǫde agai sę emainu magi ilai bidi si tiwai dao, te augwali si tobolude wel gelama, magi ilai bidi si tiwai dao, te agai sę emainogo,” te ensel bidigo te po wali.   
\c 5  
\s1 Profet bidigo buku me bola pabo suali  
\p
\v 1 Tama eno ma tonobadi yaide, eno buku me bola pabo suali.  
\v 2 Tama ensel bidigo enabolo e tama po wali, “Nago magi nai subawe?” Tama eno te po wali, “Eno buku me bola pabo subao. Tama te buku bobobage te 10 mita usu nama, me agai genuai te 5 mita usu nama,” wali.   
\p
\v 3 Tama agai enabolo e tama po walali, “Godigo te po wali, Juda bulude bidibo we bidi sese tama dene saibao po wali. Tama agai te po te buku elalubao. Tama te buku me badu bogo badu te po asęai elalubao, Godigo te kantride bidibo nai wi sabo bidi dabe sese sela sąwaibao po obao. Me ma, te buku me badu bogo badu te po asęani, augwaligo tibo po weyu mu tamao obao te bidi dabe sela sąwaibao wabo po wai te elalubao.  
\v 4 Tigidali Bomo Elalubo Genuai Bidigo te po wali, agai te dwai bidi dolabo po toloyu, tama agai te nai wi siyu me tibo po weyu ebo bidi dabego be tomoba po ola tolaibao. Tama te po te bidi dabe augwa be tomode elaluyu, tama te bidi dabe dola silaibao,” wali.   
\s1 Profet bidigo te we me deli te basket wade bidibo suali  
\p
\v 5 Te ensel aga me pedelama, tama agai enabolo e tama po me walali, “Suao. Gasa nai me te asobao.”  
\v 6 Tama eno agabolo hanalu wali, “Te magi nai dawe?” Tama agai te po wali, “Te da, basket wa me dao, tama te basket wa te dagego kantri we bidi dabego homu godolo ebo dwai sę dabe magi elama te dao,” wali.   
\p
\v 7 Te basket po augwaligo aingo nigai dao. Eno tonalubadi augwaligo te basket po dabo suali, tama eno suali, te basketde we me tomode dualalubo suali.  
\v 8 Tama ensel bidigo te po wali, “Te we da, te tigidali dwai kolesaga page tiwai piksa dao,” wali. Agai po ola silama, tama agai te we aiyaba ma pogolama, tama te basket po paliali.  
\v 9 Eno ugwaba tonobadi yaide, eno we me si te genuai bago bogo tiwai elama, tama augwali si ena bidibo madi bola asobo suali. Tama augwali sigo te basket wa ugaba selama, sigiba bola pabo suali.   
\p
\v 10 Eno te nai sulama, tama eno te enselbolo e tama po hanalu wali, “Augwali sigo te basket wa menaba sela pabowe?”  
\v 11 Tama ensel bidigo enabolo te po walali, “Augwali sigo te kantri Babiloniaba sela pelama, tama augwaligo tede genuai lotu be sę yainu te sela pobao. Augwali sigo te basket wa te be tomode muaibao. Tama te Babilonia we bidi dabego te basketba lotu po waibao,” wali.   
\c 6  
\s1 Profet bidigo karis me si me si suali  
\p
\v 1 Tama nosali eno ma tonobadi yaide, hwįbo nai karis me si me si te bulu du si bras tomode pedelama edaba udabo suali.  
\v 2 Te bedeba hos dabego te namba wan karis kegebo suali. Tama sisi yai hos kibu dabego si wabo karis kegebo suali. \x * \xo 6:2 \xt Ped 6:4, 5\x*  
\v 3 Tama nala hos dabego sela wabo karis kegebo suali. Tama te dodobolo pai hos dabego te me si me si wabo karis kegebo suali. \x * \xo 6:3 \xt Ped 6:2\x*  
\v 4 Tama eno te ensel bidibolo e tama po hanalu wali, “Genuai Bidi, te karis dabe page te magi nai dawe?”   
\p
\v 5 Tama ensel bidigo te po wali, “Te me si me si karis te me si me si haniani wali magiyu te yali dao. Megi tama augwali tigidali tǫde tonalubo Genuai Bidi page tagalama, augwali te asali dao,” wali. \x * \xo 6:5 \xt Ped 7:1\x*  
\v 6 Te sisi hos kibu dabego kegebo te karis da, te not badu elalubo kantriba te pobao. Tama me te nala hos dabego kegebo te karis, te giliga dega saboba te pobao. Tama te dodobolo pai hos dabego kegebo te karis te sautba te pobao suali.  
\v 7 Te dodobolo pai hos dabe sabolobo si da, augwali polo pelama, te kantri dabe bugagia tonaluainu te ebao. Tama ensel bidigo te po wali, “Te usu dao, dage piagameo.” Tialima augwali udulama pali.  
\v 8 Tama te ensel bidigo enabolo i weyu te po wali, “Te notba pali te hos dabego tebogo te Genuai Bidigo homu kedau iligi palio,” wali.   
\s1 Godigo Sekaraiabolo Josua te king bidi tobolu madi gudulao po walali  
\p
\v 9 Te Genuai Bidigo enabolo po me deli mayu, e tama po wali,  
\v 10 “Te me si me si bidi, Heldai, me Tobiya, me Jedaia, te Sefaniago ogwa Josaia, te Babilon tagalama, augwali Jerusalemba polo asali dao. Megi tama nago augwaligo sesali wiegi yai maiabo nai dabe selama, tama nage Josaiago beba pao.  
\v 11 Tialima augwaligo nagebolo te mani te silva me gol selama, tama nago kingo hadi me deli geselao. Tama nago te hadi sela pelama, tama nago het pris Josuago toboluba buligi pao, te Jehosadakgo ogwa dao.  
\v 12 Tama nago agabolo e tama po walao, ‘Tigidali Bomo Elalubo Genuai Bidigo te po wali, Te Bidi Ni Abu wabo bidi aga bidibo pesagede wiegi yai mu pedelaibao. Tama agai eno be ma sę yaibao. \x * \xo 6:12 \xt Jer 23:5; 33:15; Sek 3:8\x*  
\v 13 Agai digi eno be sęnama, tama aga genuai nogi mu elaluaibao, te kingo nogi tiwai mu elaluaibao. Tama agai aga we bidi tonaluaibao. Tama te pris aga sia kingde dualaluaibao. Tama agai te prisgo yabo sęde dali te kingo yabo sęde dali si homu nagame elama bidiyu, te sę si bugagia mu yaibao,’ te po Josaiabolo pusao,” Genuai Bidigo enabolo te po wali.  
\v 14 Tama te king hadi da, te Genuai Bidigo be tomode munaluaibao. Tama te we bidigo te hadi sulama, tama augwaligo te Heldai, me Tobiya, me Jedaia, me te Sefaniago ogwa Josaiago yali wiegi yai kolesaga kone palama te koneyu yaibao, te kegeda pogobeo.   
\p
\v 15 Te digibulu bidali bidi dabe augwali aselama, augwali tau selama, Genuai Bidigo be sę ebo tau sagasaibao. Tama augwaligo sęna silibo si da, teda dagego e tama koneaibao, Tigidali Bomo Elalubo Genuai Bidigo ena taga palama, ena dage dali bidiba, te homu koneaibao. Tialima, dagego God Genuai Bidigo po sese tama bugagia wali peyu da, teda te nai dabe sese tama mu pedelaibao.   
\c 7  
\ms1 Godigo sęgę yali si hasegelama, wiegi yai homu pemene ebo si pedelemainu ilaibao  
\mr (Dąį 7–8)  
\s1 Godigo te nai gisilainu tibo po olama habu selebo pode wado po wali  
\p
\v 1 Te Darius king bidibadi te kibu be me si me si wabo, te kibu bede te namba 9 poluago namba 4 deide, te polua Kislev wabo, Genuai Bidigo po me deli enabolo mani.   
\p
\v 2 Tama te Betel we bidigo te Sareser me Regemelek me bidi meba ebadi augwaligo Tigidali Bomo Elalubo Genuai Bidigo beba tagala palali. Augwali pali da, Genuai Bidigo augwali dali wiegi yai sę emainu gedu haluasa po wagi pomai tagala palali.  
\v 3 Tama augwaligo te pris dabe me profet bidi dabebolo e tama tiwai po hanalu wainu pali, “Genuai Bidigo be dolai elalubadi kibu be hauwa mu pali dao. Tama dago agaba me gela udubao. Tama dago tigidali a naga poluade nai habu selama gisilabo po bodolu muyu yalio. Tialima dago me tama tiduaiba, agawe?”   
\p
\v 4 Tialima, Tigidali Bomo Elalubo Genuai Bidigo enabolo te po walali,  
\v 5 “Nago te kantri we bidi dabe me augwaligo pris bidi dabebolo e tama po walao, ‘Mu tamao, te kibu be 70 edubadi te tigidali 5 poluade me te 7 poluade dagego nai dabe habu selama, hobedai gela weyu yai dao. Tiali goli dagego te enade homu kone paliyu, te eno nogi ugwaba sabo kolesaga me yai menio. Mu menio.  
\v 6 Tama me ma, dagego nai tubo sogo da, teda dagego duga tabi pągąnabo nai naga tuyu ebo dao,’ te po augwalibolo wao,” Genuai Bidigo te po walali.   
\p
\v 7 Polobadu Genuai Bidigo te deli tiwai po naga te profet sibigo pedauwalidu pusai dao, te we bidi dabebolo. Agai te po te Jerusalem wiegi yai elaluyu, wiegi yai nai dabe hauwa elalubadi agai te po mawai dao. Tama te sogo te we bidi hauwa te Jerusalem pągąna peyu, me te Jerusalem bogo badu elaluali taun dabede, me te saut badu taun dabede me we bidi pągąyu, me giliga dega sabo badu te dwasianu bulu du dabede me te we bidi hauwa pągąyu yai dao.   
\s1 Genuai Bidigo Sekaraiabolo Juda dabego kalabus sę yali po page pusa mani  
\p
\v 8 Te Genuai Bidigo Sekaraiabolo po me pusa mayu, e tama tiwai po wali,  
\v 9 “Polobadu eno te po ena we bidibolo mawai dao, ‘Te po tų ebo sogo te dagego tigidali wiegi yai doloba pai kolesaga naga iyąo. Tama dagego duga deli hani dabe dali hobede homu iyąo, tama augwali tau sabo sę yao.  
\v 10 Dagego bidi isai wilawe we dabe dali dwai sę me elamo dao. Me dagego wai puluba augwa aya isai wai dabe dali me dwai sę me elamo dao, te digibulu bidi dage dali bidagasali te we bidi dabe dali me dagego dwai sę me elamo dao, me te nai dabe habuge yai we bidi dali me dwai kolesaga elamo dao. Tama dagego duga deli hani bidi dabe dolainu homu elamo dao,’ eno te po mawai dao,” Genuai Bidigo enabolo wali.   
\p
\v 11 “Tiali goli te we bidi augwali tobolu gagea pelama, augwaligo po odabo homu hagela yali. Augwaligo augwa homu kolesaga dąų ola selama,  
\v 12 tama augwaligo homu masigi dila pabo tiwai yalio. Augwaligo Genuai Bidi ena Tigidali Bomo Elalubo Bidigo bomai po dali haniani po odobo hagela yalio. Eno Spirit Mobo Bidigo te profet sibigo pedauwalidu eno te po augwalibolo polobadu tolai dao. Tiali goli te we bidigo te po wali pabeo. Tama tibaso, eno sębę dwai mu yalio.  
\v 13 Tama eno augwaligo gedu haluasa po wabo odai menio. Magi baso meni, augwaligo eno po odisąma ebaso.  
\v 14 Tialima eno augwali te genuai waligo te nai dabe sela sąbo tiwai elama, tama eno augwali gasa kantri dabeba sela sąyu, tedela palai dao. Tama augwaligo dwai kolesaga ebogo te wiegi yai tǫ te dwai tǫ tiwai pedelali. Tama tede bidi me deli tede bidibeo,” Genuai Bidigo te po wali.   
\c 8  
\s1 Genuai Bidigo te Jerusalem wiegi yai bugagia ma ilabo po dąų walali  
\p
\v 1 Te Tigidali Bomo Elalubo Genuai Bidigo po te Sekaraiabolo mawai.  
\v 2 Godigo te po wali, “Eno te Jerusalem dabe godolo mu ebaso, tama eno augwali tau sabo homu ebao. Eno augwali godolo mu elama, te augwaligo boi bidi dabede eno haliga sębę ebo dao.  
\v 3 Te ena ma aselama, ena te Jerusalemde bidaibao, te eno taun mu da. Tama Jerusalem, te Genuai Bidi te Tigidali Bomo Elalubo Bidigo bulu du da, te augwaligo nogi eyu Te Genuai Bidigo Tedali Gasagi Yai Bulu da waibao. Te gasa hani we bidi augwaligo te eno we bidi dabe sulama, te augwaligo tama po waibao, ‘Suao, te Jerusalem augwaligo Genuai Bidi wali mu pabo dao,’ te tama po waibao.  
\v 4 Te wąbi hwįbo me te sęgę dabe te taunde me pedalisąbadi, tama te we bidi dabe monu dabe mu pedelama, te dono dabe tolama bilalueibao. Tama augwali te taun pedai tigidali badu dugulalu toma nabo sę yaibao.  
\v 5 Tama te dwasianu wai puluba dabe te taunde pągąna pelama bidalu, tama augwali e gagali eladu bidalueibao,” Genuai Bidigo te po wali.   
\p
\v 6 Te Tigidali Bomo Elalubo Genuai Bidigo e po me wali, “Te me bidibo we bidi dabe augwali te dwasianu hani naga bidibao, tama augwaligo homugo eno te po wali sę dabe pedalugobe da homu yali bogo. Tiali goli ena Genuai Bidi Tigidali Bomo Elalubo Bidigo, eno te tiwai homu me egobeo. Menio. Eno tigidali sę ebo usu yaibao.  
\v 7-8 Te boi bidi dabego eno we bidi dabe augwali selama, te giliga pedalubo badu me te giliga dega sigulubo badu te tǫ kantri dabeba bidigi palali. Tama eno te we bidi dabe ma sigi pelama, te augwali ma odasa aselama, te augwali Jerusalemba ma bidagasaibao. Te augwali eno we bidi dabe bidalu, te ena augwaligo God bidaibao. Te augwali eno doloba pai kolesagago sesemane sogo tonalueibao,” wali.   
\p
\v 9 Te Tigidali Bomo Elalubo Genuai Bidigo e po me wali, “Dage dilibi budulama, sę bomo yao. Te eno be sę hodolobo sogo, te eno po pusubo bidi profet dabego eno po pusali. Augwaligo pedauwalide wali po homu kone palao. Tialima, megi me te tobage deli po naga odobao.  
\v 10 Te profet bidi dabego po pusisąbadi yali sogo, te bidi dabe augwaligo te sę yabo bidi dabe abeliyu, ma te sę yabo kibu dabe me abelebo usu isąwai elaluali. Tama me eno augwa abagi hasi boi bidi ilibo sę ilama, te augwali bugagia bidabo usu meni yai elaluai dao.  
\v 11 Tialima megi da, eno gasa tobage kolesaga te bidalubo dwasianu hani we bidi dali yaibao wali.  
\v 12 Te eno augwali haliga dua tegaluama bidibo sę ilama, te augwa wai gi dabe bulumainu yaibao. Te tulubage hauwa tulama, te augwaligo wain ni du dabe walama, te nai dabe me wiegi yai holaibao. Eno te tigidali wiegi yai sę te dwasianu bidibo hani pedali dali yaibao.  
\v 13 Dage Juda dabe me Israel dabego, odao. Polobadu te gasa hani dabego te dage dolobo sulama, tama augwaligo augwa boi bidi dabeba te tiwai po walali, ‘Dago homugo te dage mu dolomainao homu ebao. Te Juda dabe me Israel dabe dolali tiwai emainogo homu ebao.’ Tialima megi da, eno dage Juda me Israel dabe dobola ma selama, te dageba wiegi yai sę yaibao. Te gasa hani dabego dageba te tama tebo sę ebo sulama, te augwaligo augwa abagi dabeba te tama po walaibao, ‘Dago homugo dage te Juda dabe me Israel dabe bugagia bidibo tiwai gilama emainogo homu ebao,’ waibao. Tibaso dage wi me elamuo, dage bomo elama naga dolalubo usu dao,” Genuai Bidigo te po wali.   
\p
\v 14 Tigidali Bomo Elalubo Genuai Bidigo te tama po wali, “Polobadu dagego wąį nǫų dabego ena haliga sębę yabo sę ilibaso, te eno augwaliba dwai dene mabo homu elama, te eno homu me hasegelibeo. Menio. Eno augwali dolobo sę naga yai dao.  
\v 15 Tiali goli megi da, eno te Jerusalem dabe me Juda dabe te wiegi yai bugagia ilabo homu ebao. Tibaso dage te bomo elalu, dolaluao,” te po wali.  
\v 16 “Tama dagego e tobage kolesaga dabe iyąo. Dage tigidaligo te mu po naga gasa bidi dabe dali waiyąo. Tama dagego po te po tų kotde te mu po naga weyu, bugagia dodolobaso da, te po silaibao. \x * \xo 8:16 \xt Ef 4:25\x*  
\v 17 Dagego dwai sę ebo kolesaga te gasa we bidi dabe augwaliba yabo homu me elamuo. Te dage po tų kotde dologi pabo sogo, dagego te tibo po munu me pusulamuo. Eno te tibo po wabo kolesaga, me te po tų kot po geme dualubo kolesaga, me te wado po weyu hwįbo kolesaga ebo te eno godolo mu me ebo meni dao,” wali.   
\p
\v 18 Tama Genuai Bidi Tigidali Bomo Elalubo Bidigo gasa po me ena Sekaraiabolo mawai dao.  
\v 19 Agai te tama po wai, “Dagego me sogo side te polua me si me si 4 poluade, me te polua a nagade, me te polua a naga me si 7 poluade, me te nogo si poluade te nai tubo osogo habu selali, te dageba pedelali sęgę homu kone paliyu tiali. Tiali goli, te sęgę dabe kone palobo genuai side hasegelama, te tigidali Juda dabego wiegi yai homu pemene yabo si pedelaibao. Tialima dagego te mu po wabo godolo homu elama, te gasa we bidi dabe dali bugagia tegaluama bidibo kolesaga yao,” te po wai dao.   
\p
\v 20 Genuai Bidi Tigidali Bomo Elalubo Bidigo po me weyu, te tiwai po wali, “Nosali genuai taun hauwa we bidi dabe te Jerusalemba aselawaibao.  
\v 21 Te taun me delide bidali we bidi dabe augwaligo te gasa taun we bidi augwaliba te tiwai po walaibao, ‘Da te Jerusalemba pelama, te Genuai Bidi Te Tigidali Bomo Elalubo Bidiba lotu wagi pelama, te agabolo hanalu, te dabolo wiegi yai sę bugagia ilao po wagi pobao. Dage da dali asiąo,’ waibao.  
\v 22 Te genuai bomai tǫ kantri hauwa we bidi dabe te Genuai Bidi Tigidali Bomo Elalubo Bidiba lotu wagasu, te Jerusalemba asaibao, tama agabolo hanalu, te augwaliba me wiegi yai sę bugagia yao po waibao.  
\v 23 Te sogo te nogo si bidi, te haniani po wabo bage, te digibulu dabedu asama, te Juda bidi me deli pageabi elama tolalu, tama augwaligo te tiwai po waibao, ‘Dago te tiwai odali, te God dage dali bidibao wali. Tibaso, da me dage Juda bage dali deli hani pedelaibao homu ebao,’ te po waibao,” Genuai Bidigo te po wali.   
\c 9  
\ms1 Genuai Bidigo te gasagi yai sę dabe pedelabo sę ilama, te aga we bidi dabe tau saibao  
\mr (Dąį 9–14)  
\s1 Godigo te gasa hani dabe te tǫ kantriba dwai dene mabo sę ilaibao  
\p
\v 1 Te Genuai Bidigo po enabolo mayu, te tama wali. Te tigidali tǫ kantri we bidi dabe augwali te Genuai Bidi dologode naga bidiyu, te Israel hani dabe bidalubo tiwai yaibao. Genuai Bidigo te tǫ pedai Hadrak me te taun Damaskus, \x * \xo 9:1 \xt Ais 17:1-3; Jer 49:23-27; Amo 1:3-5\x*  
\v 2 me Hamat tonalubo sę yaibao, te tǫ pedai Hadrak distrik pąde elaluali. Tama agai te taun Tair me taun Saidon te tonalubao. Te Tair dabe me Saidon dabego augwaligo te kolesaga koneani bidi dabe hauwa elaluali digi goli, te Genuai Bidigo augwali me tonalueibao wai dao.  
\v 3 Tair te bomai taun pedelali te augwaligo dila pai masigi banisgo te taun bagulali. Tama augwaligo te hauwa silva me gol sisinani, tama te silva me gol te augwaligo gedude olo nai tiwai elaluali.  
\v 4 Tiali goli Genuai Bidigo augwaligo te nai doado bage tigidali dagala sąwaibao. Genuai Bidigo Tair dabego te nai dabe te tamu ąįba sąwaibao, tama te boi bidi dabego te taun siago ulama, te tigidali mu dolaibao. \x * \xo 9:4 \xt Ais 23:1-18; Ese 26:1–28:26; Jol 3:4-8; Amo 1:9-10; Mat 11:21-22; Luk 10:13-14\x*   
\b  
\q1
\v 5 Tama te Askelon we bidi dabe augwaligo  
\q2 te tiwai sę tede pedalubo dabe sulama  
\q3 tama augwali wi yali.  
\q1 Tama augwali me dolama,  
\q2 tama nosali augwaligo bulude te bidi dabe meni yai.  
\q1 Te gasa bulu bidi dabego me te genuai sęgę augwaliba  
\q2 pedalubo sulama,  
\q2 te augwaligo king bidi isaibao.  
\q1 Te Ekron bulu bidi dabego sulama,  
\q2 te sęgę tiwai augwali me saibao.  
\q1 Augwaligo homugo te Tair dabego  
\q2 augwali tau saiba homu yaibao.  
\q1 Tiali goli, menio. Te augwali mu hagawaibao.   
\q1
\v 6 Te gasa gasa hani augwali  
\q2 te taun Asdotba bidagasaibao,  
\q2 tibaso augwali deliba taluabo usu meni yai.  
\q1 Tama Genuai Bidigo te po obao,  
\q2 “Te Filistia dabe augwali hagoma ebo  
\q2 bidi dabe yai baso,  
\q2 tibaso eno augwali aiyaba mu elaluaibao.   
\q1
\v 7 Te Filistia dabe me badu me bidalubo hani pedai,  
\q2 te augwali eno hani we bidi pedelaibao,  
\q2 tama augwali te dwasianu hani we bidi tiwai  
\q3 te Juda hani tomode bidaibao.  
\q1 Tama te Ekron dabe augwali  
\q3 eno hani we bidi pedelaibao,  
\q2 te Jebus dabe augwaligo polobadu yali tiwai. \f + \fr 9:7 \ft Te Jebus dabe, hasia bolo te augwali hani dabe te Jerusalem bulu page bidi dabe dao. Nosali te Devitgo te taun Jerusalem sali sogo, te Jebus hani dabe te Israel dabe dali hodobo bidali. Te tiwai po te Jos Dąį 15:63 tede elalubao.\f*  
\q1 Tialima augwaligo te kibu hasa mi  
\q3 kaneme dali elalubo me tusiąma,  
\q2 te gasa nai dabe me te Juda dabego  
\q2 tusiąma habu selali nai dabe me tugobeo,”  
\q2 Genuai Bidigo te po wali.\x * \xo 9:7 \xt Ais 14:29-31; Jer 47:1-7; Ese 25:15-17; Jol 3:4-8; Amo 1:6-8; Sef 2:4-7\x*   
\b  
\p
\v 8 “Te eno ena tǫ kantri tonalu, eno te tǫba te ami bidi dabe uga peyu, eda asu ebo sę munu ma egobeo. Te boi bidi dabego eno we bidi dabe aiyaba elaluama, te augwaliba dwai sę ebo eno me gogolama sula tagalogobeo, magi baso meni, eno suali, te we bidi dabe augwali dene sabo suai dao.” Genuai Bidigo te po me wai.   
\s1 King bidi asaibao  
\p
\v 9 Dage Saion taun Jerusalem we bidi dabeo, dage homu pemene umagia mu eyu, hae wao. Suiąo. Dagego king te asobao. Te agai bidi dabe aiyaba elaluali genuai nogi elalubao. Tiali goli, agai nogi aga digi ugala me sabeo. Menio. Aga te nogi meni yai bidi asobo tiwai eyu, aga te donki kibu me deli daide ugadu dugulasa asaibao. Aga te ogwa bidi donki kibude dugulasa asaibao wali. \x * \xo 9:9 \xt Mat 21:5; Jon 12:15\x*   
\p
\v 10 Genuai Bidigo po ma weyu, te po wali, “Eno te boi hwįbo karis dabe me hos kibu dabe sela sąnama, tama augwali te Israel dabe bidibo tomode munu me elalugobeo. Tama augwaligo te hwįbo ene dabe te tigidali eno dolaibao. Te dagego kingo te tigidali tǫ kantride te boi hwįbo kolesaga tagalama, te deli haliga elama bidimainogo ilaibao, tama agai te genuai tǫ pedai badu bidibo we bidi tigidali tonalueibao. Te tǫ te genuai tamu ąį dage badu gagalasa pelama, te digibulu mu elalubo tamu ąįba mu usu nigi paibao. Te me te genuai ąį Yufretisde gagalasa pali, te u badu pedai digibulu mu usu nigi paibao,” Genuai Bidigo te po wali. \x * \xo 9:10 \xt Tib 72:8\x*   
\s1 Godigo aga we bidi dabe bidabo page ma dodolaibao  
\p
\v 11 Te Genuai Bidigo te tiwai po wali, “Eno dąų wabo po kontrak me deli dage Juda dali yali. Te wąį nǫų dabego te ofa yabo kibu dabe elama, te kaneme gealuali. Tialima, te gelali kanemego te da dali dąų wali po kontrak dąų walali. Tama tibaso, eno dage te gasa tǫ kantride kalabus sę ebo tagalomainogo ilaibao. Te kalabus sę dwai mu yali, te dage genuai tǫ dedage tomoba munama bidibo tiwai elalu, te dage tuabo ąį menia sali tiwai elaluai dao.  
\v 12 Dagego koneani, te Genuai Bidigo dage tau saibao, tibaso dage te duga page buluba ma aselama, te dage bugagia bidaibao. Dage te sęgę genuai tolali, tiali goli eno te tiwai po obao, eno dage wiegi yai bugagia ilama, tama eno te ebo wiegi yai kolesagago te sęgę aiyaba mu elalueibao.  
\v 13 Te Juda dabe augwali eno te enesigi tolalubo tiwai eyu, tama te Israel dabe augwali te eno enesigide ene daganalubo tiwai elalueibao, tama te Jerusalem bidi dabe augwali da te hwą ge bainat gelalubo tiwai elalu, tama eno te Grik dabe dali boi hwįaibao,” te po wali.   
\p
\v 14 Te Genuai Bidi aga we bidi augwali daiba ugadu hanilama pedelaibao, tama agai enesigi kekelama togolaibao, te agai enani ene dabe te be selego ula ebo tiwai yaibao. Tama God Genuai Bidigo te bu wabo nai biugel bu wabo si, te aga bomonama soyu, te aga bidali pesage saut badu tagalama, te wali dali tulubage si tomodu asaibao.  
\v 15 Tama Genuai Bidi Tigidali Bomo Elalubo Bidigo te aga we bidi tudi badu tonalu posolalueibao, tama augwaligo augwa boi bidi dabe ela silaibao. Te boi hwįbo side te augwaligo i wabo te bomai ąį tuai bidigo i hae wabo tiwai eyu, tama augwaligo te boi bidi dabe ela mueibao. Te boi bidi dabego kaneme te augwaligo te ofa yainu te poude tabilama te altaba gealubo tiwai yaibao.   
\p
\v 16 Te tama tibo side Genuai Bidigo aga we bidi dabe augwali ma dobola saibao, te kibu sipsip tonalubo bidigo te aga sipsip dabe te hasa laiongo elama dolainu ebadi te ma dobola sabo tiwai ebao. Tama augwali dwagi yai mu agai tǫde bidiyu, te gasa sawi yai bugagia ula mu yai masigi te kingo tobolu madide elalubo tiwai yaibao.  
\v 17 Te tǫ da, wiegi yai mu elalueibao. Tama te gesi wegi ogwa dabego te wit nai me wain hauwa elalueibao, tama augwali te genuai hani te bomai we bidi mu pedelaibao.   
\c 10  
\s1 Godigo aga we bidi dabe augwali ma sabo bomai po dąų wali  
\p
\v 1 Te gide nai dabe pedalubo sogo dagego te Genuai Bidiba hanaluyu, te agai tulubage tagala palomainu emainao. Genuai Bidigo te pǫ hauwa dabe tagala palama, te tulubage tulumainu ilibaso, tama te nai dabe pedelama holobo dao.  
\v 2 Te bidi dabe augwaligo te augwa bede munalubo tibo god dabeba me, te mena sę page konea pabo bidi dabeba me hanalu te nosali mena sę dabe pedelabo po omainu ebo dao. Tiali goli, augwaligo tibo po wei ponoyu, te dwai po augwaliba wabo dao. Bidi mebago te na yali po page pusali, te augwaligo me dage tibo po ola mobao. Augwaligo te tama po weyu, te dage nagame yai homu saibao po wabo, tiali goli te menio. Te haliga sęgę me elaludalio. Tama tialima, te we bidi dabe tedela palama, te hagawai sipsip kibu wai tiwai yali. Augwa polalubo tuni bidi meni baso, tama augwali sęgę elaluai dao. \x * \xo 10:2 \xt Mat 9:36; Mak 6:34\x*   
\p
\v 3 Genuai Bidigo te po wali, “Te gasa tǫ pedai kantri bidi dabego eno we bidi dabe augwali tonalubo te eno hagela eyu haliga sębę ebao. Te eno augwaliba dwai dene mabo sę yaibao. Te Juda we bidi dabe augwali te eno we bidi dabe dao. Te ena Tigidali Bomo Elalubo Genuai Bidi, ena digi te eno augwali bugagia tonalueibao, te bidi mego aga kibu sipsip hani tonalubo tiwai gilama yaibao. Te Juda dabe da, te hwįbo bomai hos kibu tiwai pedelaibao.  
\v 4 Tama te Juda hani augwaligo digi te tuni bidi king dabe me polalubo bidi dabe pedalu, te ami polalubo kepten bidi dabe me pedalu yaibao.  
\v 5 Tama tibaso, te Juda dabego te boi bidi dabe aiyaba elalubo sę eyu, te ami bidi dabego te taun sunumi dabede te tǫ pude te boi bidi aiyaba agabo tiwai yaibao. Te Genuai Bidi augwali dali bidibaso, te augwaligo hwįbo bomo eyu, te hos kibude dugayali boi bidi dabe me augwali aiyaba elaluboba usu naibao,” wali   
\p
\v 6 “Te eno Juda we bidi augwali te bomai we bidi pedalumainu ilama, tama eno te Israel we bidi dabe ma dobola somainu yaibao. Eno augwali hobede mu ebaso, tama eno te tigidali we bidi ma selama, te augwa page buluba ma odasa asaibao. Te eno augwali sela sąsiąwai we bidi bidibo tiwai elama, te augwali bugagia bidalueibao. Magi baso meni, ena God te augwaligo Genuai Bidi dao. Tama tiyu, eno augwaligo gedu haluasa po wabo odaibao.  
\v 7 Te Israel we bidi dabe augwali te bomai ami bidi dabe tiwai pedalubaso, te augwali te wain ąį tubo bidi dabego homu pemene ebo tiwai yaibao. Te augwaligo nosali ame nabo wai dabego te wiegi yai sę Genuai Bidigo augwa bulai wąį dabede yali sę homu kone ma palama, te wiegi yai homu pemene mu yaibao,” wali.   
\p
\v 8 “Te eno ena we bidi dabe augwali tigidali i ola bilama, te augwali sisinaibao. Te eno augwali ma dobola selama, te augwali polobadu bidali tiwai gilama hauwa mu pedelaibao.  
\v 9 Mu tamao, eno augwali gasa tǫ kantriba gugula palama, teba bidigi pomainu ilali. Augwali te digibulude bidaluali, tiali goli augwaligo ena homu kone palobo sę me gegeda palogobeo. Te hani dabe augwa wai puluba dabe dali te augwali bugagia mu bidama, te tigidali deliba sisinama, te augwa page buluba ma asaibao.  
\v 10 Te Isip tǫde me Asiria bulu tǫde bidali we bidi augwali, te eno augwali ma odasa aselama, te augwa bulu tǫba ma bidagasaibao. Eno te tǫ dąį kidilama, tama augwaligo te Gileat tǫ pedai me te Lebanongo tǫ pedai me sigi pomainogo yaibao. Tama te we bidi dabe hauwa mu te tǫde pągąnalueibao.  
\v 11 Te eno augwali augwa page bulu muba ma odasa asaibao. Te Isip dabe me Asiria dabego te augwali asabo sunumi te moni ąį biksigo panibo tiwai ebaso da, teda eno augwali hani si aiyaba elalueibao. Te Isip dabego bomo menia selama, tama genuai pabo ąį Nail sula sabo tiwai yaibao. Tama eno te Asiria dabego genuai bomo aiyaba elalueibao.  
\v 12 Te eno we bidi dabe augwali te bomai we bidi dabe pedalumainu ilaibao. Tama augwali ena dologode bidiyu, te eno po wali peyu bilibo sę yaibao. Ena Genuai Bidigo eno te po wai dao,” wali.   
\c 11  
\s1 Te king dwai dabe te dolali ni tiwai dao  
\p
\v 1 Dage Lebanon, dagego da te isi aselama te dagego ni sida dabe ulagasomainogo sula tagalao.  
\v 2 Te ni sida dabe delali dao. Te ni dabego genuai nogi elaluali, augwali dolalio. Tialima dage te wiegi yai ni wuli dabe, dagego gela waiyąo. Augwaligo moni genuai bulu busi togwalualio. Tialima dage Basan bulu boma pai ni kali dabe, dagego me gela waiyąo.  
\v 3 Te king haliga sęgę mu ebaso augwali gela obao, magi baso meni, te augwaligo bomo me genuai nogi elaluali silalio. Dagego te king dabego i dwagila wabo odao. Augwali te hasa laion dabego ebo sę tiwai yali, augwaligo te wę Jordan sesegede te hasa laion geme duala siduali genuai busi togobaso te dwai hwą wabo tiwai obao.   
\s1 Godigo po weyu, te tobage tonalubo bidi side po wali  
\p
\v 4 God ena Genuai Bidigo enabolo te tama po walali, “Nago sę te sipsip kibu dabe tonalubo bidigo ebo sę tiwai yao,” wali. “Te sipsip kibu dabe aga aya dabego te sipsip dabe ela tueinu ebo dao.  
\v 5 Te sipsip kibu aga aya dabego te sipsip kibu dabe ela munama, te tama homu yaibao, ‘Dago dwai kolesaga ebe da,’ te homu ebo dao. Augwaligo te kibu migo mone selama, tama augwaligo te po wabo dao, ‘Te Genuai Bidigo nogi ugwaba sinao. Da te mone bidi pedelalio.’ Te sipsip kibu dabe tonalubo bidi dabego me te augwaligo sipsip kibu dabe elebo homu dene me ebo menio,” wali.   
\p
\v 6 Genuai Bidigo te tama po wai, “Te eno te tǫde we bidi dabe homu dene me egobeo. Te ena digi eno te tigidali deli deli te augwali te augwa kingo nogoba mueibao. Tama te king dabego augwali dolaibao, te sipsip kibu dabe aga ayago te sipsip kibu elebo tiwai yaibao. Te kingo augwali dolobo sogo da, teda eno augwali me tau sogobeo,” te po wai dao.   
\p
\v 7 Tama tialima ena te sipsip dabe meba tonalubo bidi pedelali, te magi nai doado bage meni ebo bidi dabego te ela tuabo sipsip kibu dabe da. Tama eno te sipsip kibu dabe tonaluali bidi dabego te kibu ososalo biliyu tolasa bilali dono si eno sali. Te dono me nogi, eno te tiwai nogi polali, te Olo Mu Tau Sabo Homu Ebo dono da, tama dono me nogi te tiwai nogi yali te Deli Madi Sisinibo nogi polali. Tama eno te dono si tolalu, te sipsip kibu hani dabe tonalua bilalio.  
\v 8 Tialima te ena dali sę ebo abagi selago enaba godolo homu isąbaso, tama eno augwali sela te polua deli tomode sela sąna silalio.  
\v 9 Tama eno te hani sipsipbolo te tama po walali, “Ena dage tonalubo bidi munu ma bidigobeo,” wali. “Te isabo sipsip dabe augwaligo dąį ilali, te augwali isimainu yaibao. Tama augwaligo te dolabo dąį ilali sipsip dabe da, augwali te dolomainu yao. Te meba mugai bidaluali hani yai baso da, teda augwa digi augwa dolobo sę emainao, tama tialima te augwali mu sia saibao,” wali.  
\v 10 Tama eno te Olo Mu Tau Sabo nogi poali dono selama, te dono eno togwalio, tama tiyu te eno gasa tǫ pedai kantri dabe dali dąų walali po togwai dao.  
\v 11 Tialima te dąų walali po te sogode mu silalio.  
\p Tama te doado bage nai dabe sǫą pali bidi dabego, eno te tiwai sę ebo augwaligo sulama, te tiwai augwaligo koneyu, te Genuai Bidigo po augwaliba mani da homu yali, te eno yali sęde te tiwai sę eba homu yai dao.  
\v 12 Te eno augwaliba te tiwai po walio, “Te dagego mone enabolo maiabo homu ebaso da, teda mao. Te meni baso, tagalao. Duga homugo dao.” Tialima augwaligo enabolo te mone ge bidi sese deli, gasa nogo si, te 30 silva naga mawai.   
\p
\v 13 Te bidi dabe augwaligo ena te dwai sę bidi da homu ebaso, tama augwaligo ena te dwasianu mone naga manio. Te Genuai Bidigo enabolo te tiwai po walali, “Nago te mone te tǫgo sospen sęnę nigibo bidibolo mao,” wali. Tialima eno te mone Genuai Bidigo beba sela pelama, tama eno te mone te tǫgo sospen nigibo bidibolo mawai dao. \x * \xo 11:13 \xt Mat 27:9-10\x*  
\v 14 Tialima nosali eno te si wali dono togwali, te dono nogi eno te tiwai nogi yali te Deliba Sisinibo dono nogi polali, tama te Juda me Israel si tomode pedelama, te hani si me pedelai dao.   
\p
\v 15 Tama Genuai Bidigo enabolo te tiwai po walali, “Nage te kibu sipsip tonalubo bidi ma pedelao,” wali, “tiali goli megi da, nage te sipsip kibu tonalubo dwai bidi mu tiwai pedelao.  
\v 16 Magi baso meni, eno te ena hani we bidi dabe tonaluabo bidi me deli muani, augwali te sipsip hani dabe tiwai dao. Tiali goli te tonalubo bidigo te sipsip kibu dabe dolainu ebadi tau me sabeo, tama agai te hagabo kibu sipsip dabe gegeyu i ola bilibo sę me ebeo, tama agai te sipsip dabe keni yai sįsįbo sę me isąwai, tama agai te bugagia bidibo hani sipsip dabe nai mayu me ebeo. Menio. Aga digi te nisali kibu elama mi dabe tubo sę idu, te tigidali tula silibo sę yali, te augwaligo nogo sągą dani dabe dali tula siliboba usu nanio.  
\v 17 Tialima te tonalubo dwai bidi dolomainao, magi baso meni, agai aga hani sipsip tonalubo tagalali. Te boi bidi dabego agaba boi hwįagaselama te agai bomo tigidali aiyaba mu tamunaibao. Tialima agai nogo kimi bomo isilama, tama agai dolo nogo badu gedu te mu halua somainao,” Genuai Bidigo te po wai dao.   
\c 12  
\s1 Nosali Godigo Jerusalem ma saibao wali  
\p
\v 1 Te e po da, te Genuai Bidigo po da, aga te dagalu genuai kegelalma, me te tǫ dodolama nigali God dao, tama agai te we bidi dabe augwaliba bidibo ula mabo da. Agai po te Israel dabeba mayu, te tama wali,  
\v 2 “Eno te Jerusalem te kap wain me deli tiwai pedalumainu ilaibao. Tama te Jerusalem pąde elalubo tǫ kantrigo aga dolainu ebaso, te tǫ kantri augwali te kapde wain ąį tuai bidi dabe te gęǫ page dwagila mu ebo tiwai pedelaibao. Te augwaligo Jerusalemba boi hwįgi pabo side, te augwali pelama, te bagulali obo banis taun bagua sigi pelama, tama augwaligo te Juda dabego gasa taun dabe tigidali me bagua sela silaibao.  
\v 3 Te tama tiabo sogo pedalubaso da, teda eno te Jerusalem te sęgę yai masigi me deli mu tiwai ilaibao. Te tigidali bulu tǫ kantri bidi dabe te Jerusalem dali boi hwįainu teba sisinagasaibao, tiali goli augwa digi dolaibao, bidigo te moni sęgąį masigi ugaba sagulubo tiwai gilama mu yaibao.  
\v 4 Te sogode eno te boi bidi dabego hos kibu dabe wi ilama, tama te hos kibude dugawali bidi dabe te homu kolesaga umuna palaibao. Eno te Juda dabe tonalueibao, tiali goli eno te boi bidi dabego hos kibu dabe gedu wilaibao.  
\v 5 Tama te Juda dabego augwa polalubo bidi dabego te tama tebo sę ebo sulama, augwa homu tomode te tiwai po waibao, ‘Awe, God, te Tigidali Bomo Elalubo Genuai Bidi, agai Jerusalemde bidibo aga we bidi dabeba bomo mawai dao,’ Juda dabego te po waibao,” Genuai Bidigo te po wali.   
\p
\v 6 “Te sogo eno ilama, tama te Juda dabe polalubo bidi dabe te kalade te genuai isi bogoli dala sabo tiwai pedalu, ma te wa pai wit gide isi bogoli ula pedalubo tiwai yaibao. Tama augwaligo te augwali pąde elalubo bulu tǫ kantri bidi hani tigidali ela silaibao, tiali goli Jerusalem taun te aga elaluali pesagede tama elalueibao,” Genuai Bidigo te po wai dao.   
\p
\v 7 “Ena Genuai Bidigo te eno bomo mobaso, te Juda ami bidi dabego bomo bolo ugwa mu igulama, te augwa boi bidi aiyaba ilaibao, tama augwaligo genuai nogi saibao. Tama tibaso, te Devitde bulali wąį nǫų hani dabe me te Jerusalem we bidi dabego badi te gasa Juda we bidi tigidaligo genuai nogi aiyaba me elaluamo dao, te tiwai si naga elalueibao.  
\v 8 Te tebo sogode Genuai Bidigo te Jerusalemde bidibo we bidi te obogo bagulubo tiwai yaibao, te boi hwįbo side mubo sabelego te tigi bea sabo tiwai gilama yaibao. Te eno augwali dąų walobaso, te boi hwįabo bomo meni yani bidi dabego me, augwali te polobadu bidali bidi king Devit tiwai bomai bidi pedelaibao. Tama te Devitgo bulali wąį nǫų dabe te nosali pedalubo hani bage te augwa polalubo bidi bidaibao, te Genuai Bidigo mobo bidi ensel tiwai, ma God aga tiwai digi bidibo tiwai yaibao.  
\v 9 Tama te sogode eno te Jerusalem dali boi hwįainu yali te tigidali bulu tǫ kantri eno dolaibao,” Genuai Bidigo te po wai dao.   
\s1 Augwaligo te bidi enego enai baso, nosali augwali hobede ebo gela waibao  
\p
\v 10 Te Genuai Bidigo po geninama ma weyu te po wali, “Te eno te Devitgo bulali wąį nǫų hani dabego me te Jerusalem we bidi dabe augwaligo te homu dene eyu tau sabo kolesaga dali, te gedu haluasa po wabo kolesaga me, te si wali pomainu ilaibao. Te eno dwasianu naga egobeo. Tama augwaligo te augwa digi enego enama isali bidiba tononalu, te augwaligo aga gela usu mayu, te bidigo deli digi wai isaide dwai homu dene ebo gela wabo tiwai yaibao. Te augwaligo agade gela dwagila mu weyu, te bidigo aga gomunai ogwa deli isaide gela wabo tiwai yaibao. \x * \xo 12:10 \xt Jon 19:37; Ped 1:7\x*  
\v 11-14 Te sogode te Jerusalemde genuai gela u mu waibao, te bidi dabego te tǫ malu dolo bulu te Megido pesagede te tibo god Hadatrimon dolaide te homu dene eyu gela usu mabo tiwai yaibao. \f + \fr 12:11-14 \ft Te kolesaga page konea silali bidigo homugo te nogi Hadatrimon page te tibo god me deli da homu yali. Te we bidi augwaligo lotu po agaba wali, augwaligo homude kone palali te aga te tigidali kibu be deli delide te deli sa muani sogo naga isibo dao, tama augwaligo agaba gela umagia mu wali. Tama nosali, augwaligo homude te aga bidibo ula ma sidu gebo dao homu ebo dao.\f* Te augwali ayago togwali hani sibi deli delide te augwa homu dene ebo gela waibao. Te Devitgo bulali wąį nǫų hani bidi dabe me, te Natango bulali wąį hani dabe me, te Livaigo bulali hani wąį nǫų dabe me, te Simeigo bulali hani wąį nǫų dabe me, te gasa hanigo bulali wąį nǫų hani dabe tigidali me, te gela usu tigidaligo mawaibao. Te bulali wąį hani deli deli te deliba sisinama, te bidi dabe gasa badu bidiyu, te we dabe sibi tedali badu bidalu, tama tigidaligo homu dene ebo gela usu mawaibao, te augwaligo enani bidide,” Genuai Bidigo te po wai.   
\c 13  
\p
\v 1 “Te tiwai sę pedalubo si da, teda eno ulu ąį me deli munama elalueibao. Te Devitgo bulai wąį nǫų dabe me te Jerusalem we bidi dabe augwaligo te tibo god dabeba lotu olama, te sęgę hauwa sali. Tibaso, te ąįgo augwaligo te dwai sę yali sęgę tigidali sela sąwainogo yaibao,” Genuai Bidigo te po wai.   
\s1 Te tibo profet dabe silaibao  
\p
\v 2 Te Tigidali Bomo Elalubo Genuai Bidigo geninama ma weyu, te po wali, “Te sogo eno te eno we bidi hanigo tǫde tibo god dabe sela sąwaibao, tama te bidi dabego augwali homu kone mu ma palogobeo. Tama eno te tibo profet dabe me sela sąwaibao. Tama eno te we bidi dabego dwai homu kolesaga elalubo sela sąnama, tama augwaligo te tibo god dabe godolo homu munu ma egobeo.  
\v 3 Te bidi me deligo tibo po ola mayu, te profet po obaso da, teda aga aya idago digi aga waibolo te tiwai po walao, ‘Naga digi nago tibo po pusubao,’ po wao. ‘Te Genuai Bidigo po me wabeo. Tibaso, nage isao,’ po wao. Te bidigo te tiwai tibo profet po pusubaso da, teda aga aya idago digi te hwą gego aga enama isilao.  
\v 4 Te sogo te profet po wabo bidi me deligo te aga na dabe yaide digi te homu pemene eyu, ma te profetgo gudubo ugwa gudulama te profetgo ebo kolesaga tiwai eyu, te we bidi tibo po ola mayu me tegobeo. Menio.  
\v 5 Te agai tama po weyu, ‘Ena profet menio,’ po waibao. ‘Ena te gi sę naga ebo bidi dao. Ena te bidi me deligo olo sę ebo bidi dao,’ tama po waibao.  
\v 6 Te bidi me deligo te tiwai po agaba hanalu, ‘Nage magi ilama te nago hagawiade hwą dolaliwe?’ tialima agai tibo po weyu, te tiwai po waibao, ‘Ena te ena abagi me deligo bede te hwągo dolai da,’ po waibao,” Genuai Bidigo te po wai. \f + \fr 13:6 \ft Te tobage bidi mebago te profet pedelabo homu ebo bidigo te hwą ge selama, te augwa tigi wale togobo kolesaga wali pali. Te tiwai po te buku 1 Kin 18:28 tede te po elalubao. Tama te bidi dabego aga tigi hagawiade te hwą ge dolali masalu elalubaso sulama, augwaligo te tiwai koneani, te aga profet me deli da homu yali. Tiali goli agai tibo po weyu, te menio po wali.\f*   
\s1 Godigo te sipsip tonalubo bidide po wali  
\p
\v 7 Te Tigidali Bomo Elalubo Genuai Bidigo te tiwai po wali, “Bainat hwą, nage hodaluama, tama eno tonalubo sę ebo bidi dali hwįao, te bidi ena pąde bidibo bidi yali goli. Aga ela mubaso da, teda te sipsip dabe wi tedela sąwaibao. Te tama tiwai naga eno te ena we bidi dabe dali boi hwįaibao. \x * \xo 13:7 \xt Mat 26:31; Mak 14:27\x*  
\v 8 Tama eno te bulu tǫ kantri we bidi dabe tigidali te hani sela bugulama, te hani si ela silaibao.  
\v 9 Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.   
\c 14  
\s1 Te boi bidi dabego te Jerusalemba boi hwį yaibao wali  
\p
\v 1 Te Godigo genuai bodolu si te pedelaibao. Tama te bodolu side te boi bidi dabe aselama, te dage Jerusalemgo mone dabe me doado bage sagasaibao. Te duga digi tononalubadi digi te augwaligo augwa hasi te doado bage dobola saibao.  
\v 2 Te Genuai Bidigo digi te tigidali bulu tǫ kantri ami bidi dabe sela aselama, te augwaligo dage Jerusalem dali boi hwįmainogo yaibao. Te augwaligo Jerusalem dabe aiyaba elaluama, tama augwaligo bede elaluali doado bage tigidali saibao, tama augwaligo te we dabeba me dwai kolesaga yaibao. Te we bidi hani dabe me badu bugai te augwaligo selama, te gasa bulu tǫ kantriba kalabus iligi pali, tama te hani me badu bugai te Jerusalemde bidaibao.  
\v 3 Tama Genuai Bidigo te bulu tǫ kantriba boi hwįgi paibao, te agai hwįbo sogo te ebo kolesaga tiwaigo te boi hwįaibao wali.  
\v 4 Te sęgę pedalubo sogo Genuai Bidi te bulu du Oliv pąde te Jerusalem giliga pedalubo badu dolaluaibao. Tama te bulu du Oliv si badu pedasa pelama, tama genuai bulu odogo te tomode elaluaibao. Te bulu du me badu pedai te bugasa te not badu peyu, te me badu pedai te saut badu pedasa paibao.  
\v 5 Te dage Jerusalem bage te bulu odogo kilasa pali te bulu Asalba dąį usu nigi peyu wi paibao. Te dage asesa polo tama wi peyu, te dage bulali wąį nǫų hani dabe te Juda king Usia bidali sogo te genuai tǫ mali yainu ebaso wi pelawali tiwai gilama yaibao.  
\p Tama te bodolu side God, eno Genuai Bidigo, te aga mobo bidi ensel tigidali selama, te nageba asaibao po wai dao.  
\v 6 Tama te ula te giliga nanobo sogode naga me pedalubeo. Menio.  
\v 7 Te be hulibo sogo pedalubo side, te ula da me tama te ula naga elaludaibao. Tama tialima, te giliga nanobo sogo me be hulibo sogo me elalugobeo. Genuai Bidi deligo naga te sę nisu sogo pedelabo te agai naga konealubao.   
\p
\v 8 Te sogo te wiegi yai ąį te Jerusalemde pedelama te soaibao. Te ąį me badu bugai te sigi ąį Detsiba peyu, te bugai me badu te genuai tamu ąį nogi Mediterenianba paibao. Te soabo ąį te tulubage tulubo sogo me te giliga nanobo sogo soaibao. Te ąį me sula sogobeo wali. \x * \xo 14:8 \xt Ese 47:1; Jon 7:38; Ped 22:1\x*  
\v 9 Tama Genuai Bidi te tigidali bulu tǫ kantrigo king bidaibao. Tama tigidali we bidigo aga deliba naga lotu weyu, tama augwaligo aga nogi ebo nogi te e nogi deli naga nogi yaibao.   
\p
\v 10 Te Jerusalem pąde elalubo tǫ da, te doloba pai tǫ malu pedelaibao, te taun Geba te not badu gagalasa te pali, te taun Rimon te Jerusalem te sautba usu naibao. Te Jerusalem taun naga te bulu du me deli ugadu daide elalueibao. Te Jerusalem bagulali obo banis te polobadu elaluali tiwai dąįba usu naibao. Te Benjamingo taun sunumide gagalasa pelama, te Dagebadu Sunumiba te dąį usu naibao, te pesagede polobadu sunumi deli elaluali. Tama te dąį Hananelgo Tauade gagalasa pali, te kingo wain nigali pesageba usu nigi paibao.  
\v 11 Tama te Jerusalem we bidi dabe bugagia bidaibao, te magi nai me deligo augwali munu me ma dologobeo. \x * \xo 14:11 \xt Ped 22:3\x*   
\p
\v 12 Te Genuai Bidigo dwai gasi me deli te Jerusalemba boi hwįani bulu tǫ kantri tigidali bidi dabe augwaliba te gasi pedalomainu ilaibao. Te gasi e tiwai da. Te bidi dabe bididubadi digi te augwaligo tigi wali me gedu me hamena me te damueibao.  
\v 13 Tama Genuai Bidigo te hani bidi dabe wi ilibaso, te kolesaga umuna saibao. Tama tialima, te bidi dabego te augwali pąde bidali bidi dabe pageabi elama ela mueibao.  
\v 14 Tama te Juda bidi hani dabego te Jerusalem tau selama, te boi hwįaibao, te Jerusalem we bidi dabe dolidali weyu tama tiaibao. Tama augwaligo te bulu tǫ kantri bidi dabego doado bage hauwa mu saibao, te gol me silva me ugwa dabe, tama nai dabe saibao.  
\v 15 Tama te boi bidi dabe elali gasi dwai mu te boi bidi dabego pesageba te augwaligo hos dabede, me kamel dabeba, me donki dabeba te gasi pedelaibao.   
\s1 Te tigidali bulu tǫ kantri we bidi augwaligo te Genuai Bidiba te lotu waibao  
\p
\v 16 Te Juda dabe augwaligo te boi bidi aiyaba elalubo si da, teda te boi bidi dabego hani dabe bugai bidalubo bage te Jerusalemba tigidali kibu bede asiduaibao. Tigidali Bomo Elalubo Genuai Bidi te augwaligo king bidibaso, te augwaligo agaba naga lotu waibao, te Juda hani me Israel hani isąwai bage. Tama te augwaligo Osogo Bidabo Tolu Yabe Bede Te Genuai Bodolu Side wali pelama bidaibao. \x * \xo 14:16 \xt Prs 23:39-43\x*  
\v 17 Te bulu tǫ kantri me deli te we bidi augwaligo te Tigidali Bomo Elalubo Genuai Bidi, te kingba lotu wagi pabo hagela homu ebaso da, teda te tulubage augwaligo tǫba me tulugobeo.  
\v 18 Te Isip dabe augwaligo te Tolu Yabe Bede Osogo Bidibo Genuai Bodolu Muani Side te Jerusalemde lotu wabo hagela homu ebaso da, teda te deli tigi poai gasi te Genuai Bidigo te pisąbo homu meni yani te bidi dabeba tagala palali, te gasi Isipba me pedelaibao.  
\v 19 Te tiwai genuai side lotu augwaligo wasiąwani da, te Isip dabe me gasa bulu tǫ kantri bidi dabeba me te deli tigi poai dene saibao wai dao.   
\p
\v 20 Te sogo augwaligo te tama homu eyu, te tigidali nai Genuai Bidigo nai naga da homu elama, te dwasianu nai belo te hos dabego magede domoani naiba usu nama yaibao. Tama te po me deli augwaligo te belode te tiwai asęani elaluaibao, “Te nai da Genuai Bidigo dao,” teda asęna elalueibao. Te olo sospen sęnę dabe tama me te Genuai Bidigo bede munaluali nai baso da, teda Genuai Bidigo nai mu pedelaibao, te ofa ebo kaneme gelebo genuai pou dis dabe tiwai yai baso te Genuai Bidigo dao.  
\v 21 Tama te olo sospen dabe te Jerusalem dabe me Juda dabego be tigidalide munalubaso da, te nai augwali me te Genuai Bidigo nai pedelaibao. Nosali te bidi mego te sospen dabe te Genuai Bidigo beba sela pelama, te we bidi dabego ofa yabo kibu mi ulumainogo abelao po me wagi pogobeo. Menio. Te we bidi dabego augwa sospen dabe digi sesaibao, magi baso meni, tigidali sospen te Genuai Bidigo nai mu elalueibao homu eyu po waibao.