\id SNG - Dadibi NT [mps] -Papua New Guinea 2001 (DBL 2014) 
\h Solomongo Balia Po 
\toc1 Solomongo Balia Po 
\toc2 Solomon 
\toc3 Sol 
\mt1 Solomongo Balia Po  
\imt1 Hasia nedebo tau sabo po  
\ip Te e buku augwaligo balia po tiwai asęani, tiali goli te buku yabe deli delide te balia wabode te we bidi augwaligo pusali po elalubao. Te me badu buku yabede te bidi me deligo aga godolo yali we delegelama balia po weyu, te me badu pedai buku yabede te wego te bidigo wali po wei ponama wali. Te augwali sigo pusali pode te wiegi yai haniani po begelama pusali po pągąnąlubao, te augwaligo hania hanilama ola mani te genuai pemene bidigo we dali ebo, me wego bidi dali pemene ebo me hanilama ola manio.  
\ip Te gasa Baibel buku dabe hauwade, te Godigo po pusali bidi profet dabe dali, te gasa bidi dabego me, te tiwai po begelama pusuyu, te Israel dabe augwali te Godigo we tiwai da po wali. Tama tialima, te Israel dabego te bukude te tiwai po nedebo sogo, augwaligo te homu yali, agai Godigo wiegi yai kolesaga dabolo ola mani homu yalio, magi baso meni, agai te Israel dabe augwali godolo mu eyu, te augwaligo me God godolo mu yali. Te Godigo po wali pabo we bidi mebago te buku sulama, te Kraisgo aga wali pabo we bidi godolo ebo po begelama pusali tiwai yali, me te Krais aga wali pabo we bidigo te Krais aga godolo ebo dao.  
\ip Te buku nogi Tigidali Nai Gagalama Nigali Side, te bukude, tede Godigo bidi dali, we dali nigilama, te augwali si bonogo kęnebo tiwai mu ilali (te bukude 2:24, tede te po elalubo suao). Te bukude wali pogo te po dąų walali, te dabolo te tiwai me ola mani, te Godigo wiegi yai bidi ma we nagebolo mobaso, Godigo te olo mabo wiegi yai sęde nago wiegi yai pemene mu yao, te po wai dao.  
\c 1  
\p
\v 1 Te e bukude asęani elalubo balia po te wiegi yai balia da, te balia pogo te tigidali balia po aiyaba elalualio. Solomon aga digi te balia po asęai dao. \x * \xo 1:1 \xt 1 Kin 4:32\x*   
\ms1 Hasia wabo balia po  
\s1 Gesi ogwa we wegigo te tiwai balia po wali  
\q1
\v 2 Hauwa sogo nago ena nono nani,  
\q2 tama eno homugo nago te tiwai sę ebo  
\q2 genuagia mu emainu homu ebao.  
\q1 Nago ena godolo elama, te nage enade mu isibao.  
\q1 Te polalubo nai mu da, tama te wiegi yai wain ąįgo  
\q3 pusu aiyaba elalubo dao.   
\q1
\v 3 Nago tigi denami wiegi yai ebao.  
\q1 Eno nago nogi odolama, te ena wiegi yai pemene ebao,  
\q2 te eno denami ebo sandade wiegi yai  
\q3 pemene ebo tiwai yali.  
\q1 Te we dabe sibi augwaligo nage godolo mu ebo dao.   
\q1
\v 4 Nago ena selama, da udayu pinao.  
\q1 Nage eno king bidi tiwai, te nago ena selama,  
\q3 te nago be habuba pinao.  
\q1 Te da si pemene yaibao.  
\q1 Nago ena godolo mu ebaso, tama da pemene mu ebao.  
\q1 Dago wiegi yai pemene ebogo te bidi dabego  
\q2 wain ąįde pemene homu ebo aiyaba elalubo dao.  
\q1 Nage uganu mu elalubao.  
\q1 Tibaso, tigidali we dabe nagede mu tulalubo dao.   
\q1
\v 5 Dage Jerusalem we dabego, odao.  
\q1 Eno tigi husugu yali,  
\q2 tiali goli ena sawi yai pai mu da.  
\q1 Eno tigi husugu yali,  
\q2 te Kedar dabego wa pai bulude  
\q2 te sel ugwa be dabe husugu yai tiwai dao.  
\q1 Tiali goli, ena gasa sawi yai mu,  
\q2 te sawi yai name ugwa dabe  
\q2 te king Solomongo bede walalubo tiwai dao.   
\q1
\v 6 Mu tama, eno tigi husugu yali,  
\q2 tiali goli dagego homugo ena  
\q2 te olo sę ebo we tiwai da homu elamuo.  
\q1 Giliga ena tigide dolama,  
\q2 tama eno tigi te tiwai pedelali.  
\q1 Te eno abe dedego ena dali wado po obaso,  
\q2 tama ena te wain gi dabe tonalugi pabo sę idualio.  
\q1 Tama tialigo eno tigi ena digi bugagia tonalusąwani.   
\q1
\v 7 Nage wiegi yai abagi da, eno nage godolo mu ebao.  
\q1 Te nago naga sipsip kibu dabe menaba odasa paibawe?  
\q1 Te augwali mena badu pedaiba pelama,  
\q2 te tuabo wiegi yai nosai gegegi paibawe?  
\q1 Te genuai giliga nanobode augwali menaba  
\q2 tiwai madi duala sigi pogowe?  
\q1 Nago enabolo obaso da,  
\q2 te eno nage gegebo sę dene me egobeo.  
\q1 Te nago enabolo wasiąbaso da,  
\q2 teda eno nage eno te gasa sipsip  
\q2 tonalubo bidi dabe tomode gegebo sę eyu da,  
\q2 augwaligo ena te penani ebo we da homu yaibao.   
\s1 Gesi ogwa bidigo balia po te tiwai wali  
\q1
\v 8 Eno abagio, nage gasa sawi yai we mu da.  
\q1 Te nago ena suabo homu ebaso da,  
\q2 teda nago te sipsip dabego sągą pasalu wali poanao.  
\q1 Nago wali pobaso da,  
\q2 teda naga meme dabego tuabo  
\q2 wiegi yai nosai elalubo sueibao.  
\q1 Te nosai te sipsip tonalubo bidi dabego  
\q2 sel ugwa be pąde elalubao.   
\q1
\v 9 Ae, nage eno sawi yai abagi da,  
\q2 nago au yali wiegi yai da,  
\q3 te Isip king bidigo karis dabe  
\q2 kekebo hos kibu dabe au yali tiwai dao.   
\q1
\v 10 Nago tobolu niside gedelali au dobagego  
\q2 te nago gesabidi ula ilali.  
\q1 Tama nago magede domoani wiegi yai beli dabego  
\q2 te nago magede ula mu elalubao.   
\q1
\v 11 Tialima, dago te golgo au dobage meba nigiyu,  
\q2 te gasa au dobage dabe te silvago nigibadi elama,  
\q2 tama dago nagebolo mawaibao.   
\s1 Gesi ogwa we wegigo balia po te tiwai wali  
\q1
\v 12 Eno king bidi aga betide pila muyu,  
\q2 tama agai eno au yali wiegi yai  
\q3 sanda denami odobao.   
\q1
\v 13 Eno abagi, eno godolo mu ebao,  
\q2 pauda me deli wiegi yai denami ebo tiwai ebaso,  
\q2 te ena baude ugadu pila mubao.   
\q1
\v 14 Tama aga te wiegi yai denami ebo  
\q2 plaua dabe tiwai elalubaso,  
\q2 te Engedi wain gi dabe pedalubo tiwai ebo dao.   
\s1 Gesi ogwa bidigo balia po te tiwai wali  
\q1
\v 15 Nage gasa sawi yai we mu bidibaso,  
\q2 eno nage godolo mu ebao.  
\q1 Tama nago me nago ena godolo eyu,  
\q2 te nago ena dali gedu ebao.   
\s1 Gesi wegi ogwa wego balia po te tiwai wali  
\q1
\v 16 Eno abagi, nage wiegi yai mu bidibao.  
\q1 Nago sawi yali gasa ugadu mu igulalio,  
\q2 tama eno nage wiegi yai pemene mu ebao.  
\q1 Te wiegi yai nosai te da sigo pibo bet sai tiwai elalubao.   
\q1
\v 17 Te sida ni dabe te nologo dabe me  
\q2 te dago be tobolu mubo pilo me  
\q3 walawala ni tiwai elalubao.  
\q1 Tama te ni pain dabe te bego pedu ni tiwai dao.   
\c 2  
\q1
\v 1 Tialima, ena te bulude elalubo plaua me deli tiwai  
\q2 te Saron tǫ malu bulude pedelali.  
\q1 Tama ena te sawi yai plaua tiwai,  
\q2 te odogo bulu te bulu du dabe  
\q3 tomode elalubo dao.   
\s1 Gesi ogwa bidigo balia po te tiwai wali  
\q1
\v 2 Eno abagi wali we te gasa we dabe tomode bidali,  
\q2 te plaua te sesane elalubo nosai  
\q3 tomode elalubo tiwai yali.   
\s1 Ogwa we wegigo balia po te tiwai wali  
\q1
\v 3 Eno abagi te gasa gesi bidi dabe tomode bidibao,  
\q2 te wiegi yai nai du walai ni me deli  
\q2 te gasa buside elalubo olo ni dabe  
\q3 tomode elalubo tiwai ebao.  
\q1 Te genuai giliga nanobo side, ena te ni dologo madi  
\q2 dugulaluabo homu godolo ebo dao.  
\q1 Te ni du walali wiegi yai mu elalubaso,  
\q2 te eno pedauwalide pusu mu ebo dao.   
\q1
\v 4 Agai ena te genuai nai da tubo madi  
\q2 sela pali, te agai genuai beba pali.  
\q1 Agai ena godolo mu ebo dao,  
\q2 te eno agaba wiegi yai homu pemene ebo dao,  
\q2 eno te nai da tuali be au ilali  
\q2 name ugwade wiegi yai  
\q3 pemene ebo tiwai gilama yalio.   
\q1
\v 5 Eno abagi wali bidi, eno nage godolo homu ebao,  
\q2 tama eno dili kimi isalio.  
\q1 Te bageo, dagego te nedu du wai dabe ena maiyąo,  
\q2 tama te wain du wai dabe augwaligo olali elaluali.  
\q1 Te eno tulama, te ena bomo saibao.   
\q1
\v 6 Eno abagi wali bidigo agai pobase nogo  
\q2 eno tobolu dologoba aiyadu muani.  
\q1 Tama agai dolo nogogo, agai eno tigi tola salio.   
\q1
\v 7 Te Jerusalem we dabe, dagego te homu ebao,  
\q2 te wiegi yai bulu uni hasade homu eyu,  
\q2 te bomai po ena dali dąų walali homu elama,  
\q2 te dagego da sigo homu hodolo sę me elamuo.  
\q1 Te dena si sę digi dao.   
\ms1 Si wabo balia po  
\s1 Ogwa we wegigo balia po te tiwai wali  
\q1
\v 8 Edao! Eno abagi wali bidi enaba asobao.  
\q1 Suao! Aga sasa mano dulu  
\q2 te bulu dabedu ugaba udada asobao,  
\q2 tama eno aga dogonidu wabo po odalio.   
\q1
\v 9 Aga te umagia mu uda wali,  
\q2 te bomai bulu uni hasa me deli udabo tiwai yali.  
\q1 Aga aselama da,  
\q2 te be bulu badu dolagaselama,  
\q2 te be dedage windodu tomoba tonanio.   
\q1
\v 10 Tama agai ena dali e po wali.  
\s1 Te ogwa bidigo balia po te tiwai wali  
\q1 “Eno abagi we sawi yai we mu, nage buluba teda asao,  
\q2 te nage ena wali asao.   
\q1
\v 11 Nage te tulubagede wi me elamuo.  
\q1 Te tulubage be yali sogo silalio.   
\q1
\v 12 Megi da, tigidali badu plaua dabe pedela silalio,  
\q2 te balia po wabo sogo pedelali.  
\q1 Te ba hi dabego bulude balia po ola pabo sę ebao.   
\q1
\v 13 Te ni kaya du walobo gagalali.  
\q1 Te buside tigidali bonogo duduli pedelama,  
\q2 tama te plaua dabego wiegi yai denami ebao.  
\q1 Eno sawia pai we abagi mu, nage buluba teda asao,  
\q2 tama nage ena dali asao.   
\q1
\v 14 Nago naga be tomode bidali,  
\q2 te ba te bulu du dwai madi dedage  
\q1 dwasianu tomode geme dualalubo tiwai elaluali.  
\q1 Te buluba dįą soao,  
\q2 te eno nago sawi yai gesabidi sulama,  
\q2 tama nago wiegi yai dogonigo  
\q3 po wabo eno odaibao.   
\q1
\v 15 Te dwasianu bulu uni yowi dabe  
\q2 nogo pageabi elama, tola sao.  
\q1 Tiyu, augwali dago gi tomoba aselama,  
\q2 te wain ni duduli walobo plaua dolidalio,” wali.   
\s1 Gesi wegigo balia po te tiwai wali  
\q1
\v 16 Te abagi eno bidi da, tama ena agai we da.  
\q1 Agai te aga meme kibu dabe  
\q2 te sawi yai plaua dabe tomoba sela pelama,  
\q2 tama augwali te nosai tubo sę ebo dao.   
\q1
\v 17 Te agai augwali tonalubadi,  
\q2 te giliga dega siguluboba usu nama,  
\q2 te bulu kedau ebo dao.  
\q1 Eno wiegi yai abagi,  
\q2 eno homugo nage polo ma asomainu homu ebao,  
\q2 te wiegi yai bulu uni hasa me deli  
\q2 te genuai bulu duba uga udada asobo tiwai ebo dao.   
\c 3  
\q1
\v 1 Tigidali sogo hulide ena godege pibo sogo,  
\q2 eno te godolo ebo abagide na naga ebo dao.  
\q1 Te eno nade aga tigidali habude gegali,  
\q2 tiali goli eno aga me subeo.   
\q1
\v 2 Te nade ena hodaluama, te ena taun tomode biliyu,  
\q2 te eno aga gegeyu ebo dao.  
\q1 Ena te taun pedai habu tigidali badu bilibo dao.  
\q1 Tama eno te godolo mu ebo abagi gegebo sę ebo dao,  
\q2 tiali goli, eno aga dali deliba gesabidi me unulubeo.   
\q1
\v 3 Te taun tonalubo bidi dabego augwa bilibo sę eyu,  
\q3 augwaligo ena suali.  
\q1 Te eno augwaliba hanalu wali,  
\q1 “Dagego eno abagi sualiwe, ma meniwe?”   
\q1
\v 4 Eno augwali tagalama, ena pobadi,  
\q2 te polo mu tama eno ena abagi suali.  
\q1 Ena aga pageba pelama, eno aga pagea selama,  
\q2 te agai ena taga pidali homu eyu, eno hagela yali.  
\q1 Eno aga ena idago beba odasa pelama,  
\q2 tama da si te eno idago be habu tomoba palio,  
\q2 te eno te na te tiwai ebo dao.   
\q1
\v 5 Te Jerusalem we dabe, dagego te wiegi yai  
\q3 bulu uni hasa dabede homu kone palama,  
\q3 te bomai po dąų wai baso da,  
\q2 teda dagego da sigo haliga hodoligio.  
\q1 Te sę dena side digi elalubao.   
\ms1 Sela wabo balia po  
\s1 Gesi wegigo balia po te tiwai wali  
\q1
\v 6 Magi naigo te wa pai bulude  
\q3 bidali tagalama, asaliwe?  
\q1 Augwaligo te denami wiegi yai ebo tobage plaua dabe  
\q3 ulubo sogo pedalubo hano tiwai nai pedelali.  
\q1 Te aga denami ebo te bisnis bidi dabego  
\q2 te mone sabo paudago denami ebo tiwai yali.   
\q1
\v 7 Suao. Te wiegi yai dugabo sia sai  
\q2 me deli te bidi dabego tolasa asali.  
\q1 Tama Solomon aga digi tede dugawali.  
\q1 Te bidi sese sela 60 ami bidi dabe aga dali asali.  
\q1 Augwali te bomai ami dabe da,  
\q2 te Israel ami dabe dao.   
\q1
\v 8 Tigidaligo hauwa sogo polobadu boi hwįani.  
\q1 Tama augwaligo te bainatgo hwįbo mu konea pai.  
\q1 Tigidali deli deligo augwa bainat tola sesa asalio.  
\q1 Te augwaligo sisi elalu tonaluali,  
\q2 tiyu te boi bidi dabe hulide aselama,  
\q3 hwįagasidali weyu tialio.   
\q1
\v 9 Augwaligo te tǫ kantri Lebanonde  
\q3 wiegi yai ni dabe selama,  
\q2 tama te kingo dugabo sia sai nigali,  
\q3 te dwasianu be me deli tiwai.   
\q1
\v 10 Augwaligo te sia nigabo ni tigi te silvago nigali,  
\q2 tama aga kekabo bono te golgo nigali.  
\q1 Te dugabo pesage, augwaligo  
\q2 te kingo mama yai name ugwago mesegelali.  
\q1 Te Jerusalem we dabe augwaligo  
\q2 te sia bugagia au ilalio.  
\q1 Augwaligo kingo te sę ebo godolo mu yai dao.   
\q1
\v 11 Dage Jerusalem we dabe, dage aselama,  
\q2 king Solomon suagasao.  
\q1 Te kingo mubo madi agai tobolude muani elalubao.  
\q1 Te king Solomon aga we sabo side  
\q2 aga idago te madi aga toboluba muani.  
\q1 Tama te tiali side aga wiegi yai pemene  
\q3 umabogi mu yai dao.   
\c 4  
\s1 Gesi ogwa bidigo balia po te tiwai wali  
\q1
\v 1 Eno we abagi, nage gasa sawi yai dao.  
\q1 Nago te name ugwa pedai tobolude bea selama,  
\q2 te nago gesabidi geme dualiyu tiali,  
\q2 tialima nago gedu eno suali ula yali, magi baso meni,  
\q2 nago ena godolo mu ebaso tiali.  
\q1 Nago gesabidi badu hauwagasali tobolu nisi da,  
\q2 te kibu meme hani me deligo  
\q3 wiegi yai pemene ebo tiwai eyu,  
\q2 te Gileat bulude te dwasianu bulu du dabedu  
\q2 aiyaba sasa mano dulubo tiwai ebo dao.   
\q1
\v 2 Nago kele tedela mu yali,  
\q2 te tedela sipsip tigi wali augwaligo tigi nisi poalama,  
\q2 te augwali megi tama ąį telawai tiwai yali.  
\q1 Nago kele deli me degebeo. Menio.  
\q1 Tigidali bugagia elalubao.   
\q1
\v 3 Nago pedauwali te mama name ugwa tiwai mu yali.  
\q1 Nago pedauwali te gasa sawia pai mu da.  
\q1 Te name ugwago nago gesabidi  
\q2 sesela sali, tiali goli eno nago  
\q2 gesabidi ula elalubo suali.   
\q1
\v 4 Nago dogoni te gasa sawi yai mu,  
\q3 te king Devitgo uganu sę yani  
\q2 wiegi yai bobobage be taua tiwai dao.  
\q1 Te nago magede domane sawi yai beli da,  
\q2 te ami bidi dabe hauwago sabele dabe tiwai  
\q2 te uganu mu sę yani bobobage be tauade  
\q2 paide wawalo pali tiwai elalubao.   
\q1
\v 5 Nago ame si da, te wiegi yai bulu uni hasa sigo  
\q2 te plaua dabe tomode nosai tudubo tiwai elalubao.   
\q1
\v 6 Nage te denami ebo wiegi yai nai dabego  
\q2 te bulu du me delide pągąnąlubo tiwai dao.  
\q1 Tama ena te bulu duba bidigi pelama bididubadi,  
\q2 te giliga dega sigulama, te bulu kedau ebo sogoba  
\q3 usu naibao.   
\q1
\v 7 Eno abagi, nage gasa sawia pai mu da.  
\q1 Te nago tigide masalu deli me elalubeo.   
\b  
\q1
\v 8 Eno we o, nage ena dali asobaso,  
\q2 da sigo te Lebanon bulu du dabe  
\q3 tagalama, da si pinao.  
\q1 Nago te bulu du Amana, me te bulu du Senir,  
\q2 me te bulu du Hermon tagalama,  
\q3 te nage aiyaba dulao.  
\q1 Te laion dabe, me gasa bulu uni hasa dabe  
\q2 te bulu du dabede bidibao.   
\q1
\v 9 Nage eno we, te nage eno hobolu du mu da.  
\q1 Nago ena dwasianu naga suali,  
\q2 te nago eno hobolu du togalualio.  
\q1 Eno nago magede domoani beli sulama,  
\q2 tama ena nagede mu tulaluali.   
\q1
\v 10 Nage da eno we,  
\q2 te nage eno hobolu du mu da,  
\q3 nago ena godolo mu ebaso,  
\q2 te ena wiegi yai pemene mu ebao.  
\q1 Nago te godolo homu ebo pusu mu ebao,  
\q2 tama te wain ąįgo pusu aiyaba elaluali.  
\q1 Te nago au yali sanda denamigo  
\q2 te tobage wiegi yai pauda dabego  
\q3 denami aiyaba mu elaluali.   
\q1
\v 11 Nage eno wiegi yai we da,  
\q2 nago po eno olode odobo pusu mu ebao,  
\q2 te hani pusu pedauwali ebo tiwai yali.  
\q1 Nago wabo po wiegi yai ebao, te tubo ame pę tiwai da.  
\q1 Nago gudali ugwa dabe wiegi yai denami elalubao,  
\q1 te Lebanonde bulu du dabego denami ebo tiwai yali.   
\b  
\q1
\v 12 Eno we, nage eno hobolu du mu da.  
\q1 Nage te obo baguai gi me deli tiwai elalubao,  
\q2 tama te tomoba niwai bidi me pisąwani.  
\q1 Nage te ulu wę me deli tiwai  
\q2 te gi tomode elalubao.   
\q1
\v 13-14 Nage te wiegi wiegi yai ni du dabe  
\q2 te wiegi yai gide elalubo tiwai da.  
\q1 Te ni mebade wiegi yai nai elalu,  
\q2 te meba nedu dude wiegi yai denami elalubao.  
\q1 Mebago te wiegi yai sanda nigiyu,  
\q2 te mebago naiba munama, pusu ilaibao.  
\q1 Mebago te tobage au dogia pabo nai dabe nigibadi,  
\q2 te mebago wiegi yai denami hano  
\q3 ilibo pauda nigaibao.   
\q1
\v 15 Nage te ulu ąį pągąnama, te buluba gelama,  
\q2 tama peyu, te giba ąį mabo tiwai ebao.  
\q1 Nage te dwasianu ąį gomo dabe tiwai  
\q2 te Lebanon bulu dude ulu pedelama,  
\q2 tama te giba aiya dulubo tiwai ebo dao.   
\s1 Gesi wegigo balia po te tiwai wali  
\q1
\v 16 Not badu wali, nage asao.  
\q3 Saut badu wali, nage aselama,  
\q3 eno gi waligo mesega sagasobaso,  
\q2 te tigidali pesage te gi habu  
\q2 te wiegi yai denamigo pągąną saibao.  
\q1 Tama eno te godolo mu ebo abagite aga giba aselama,  
\q2 tama te wiegi yai nedu du dabe tuagasomainao.   
\c 5  
\s1 Gesi ogwa bidigo balia po tama wali  
\q1
\v 1 Eno we, nage eno hobolu du mu da,  
\q2 ena te ena giba asalio.  
\q1 Tama eno te wiegi yai denami ebo nai dabe sisinagasali.  
\q1 Eno te wiegi yai pusu yai nai hani tuali.  
\q1 Te eno ame pę me wain dali tuali.  
\s1 Te we dabe augwaligo balia po tama wali  
\q1 Dage si abagi wali wiegi yai mu da,  
\q2 dage si nai me ąį tuao, dage si mu pągąną pao.   
\ms1 Me si me si wabo balia po  
\s1 Gesi wegigo balia po te tiwai wali  
\q1
\v 2 Te hulide ena godege pila mudu digi,  
\q2 tialima, eno homu kone palobo sę iduali.  
\q1 Te eno nade suali, te eno bidigo eno be  
\q3 sunumiba bebego udalio.  
\s1 Gesi ogwa bidigo balia te tiwai wali  
\q1 Eno we da, te eno hobolu du mu dao,  
\q2 nago be sunumi dalama,  
\q3 ena tomoba asabo nigilao.  
\q1 Te hulide segeni ąį te eno tobolu niside  
\q3 pągąwai elalubao.   
\s1 Gesi wegigo balia po te tiwai wali  
\q1
\v 3 Eno ena gudali ugwa peda muani,  
\q2 tama eno te ugwa ma gudubo hagela ebao.  
\q1 Eno ena sągą ąį telawali,  
\q2 te ena hogodama biliyu,  
\q2 te sągą meda ma ilibo te ena hagela ebuo.   
\q1
\v 4 Tialima, eno abagi wali bidigo  
\q2 te sunumide daganama,  
\q3 uga siyu, edaba tola siyu ebo nai  
\q2 handelba nogo tola sagasida wabo eno odama,  
\q2 tama eno haliga hogodalu,  
\q2 te eno wiegi yai homu pemene yalio.   
\q1
\v 5 Ena hodalu, sunumi dawainu yali.  
\q1 Eno nogo te sunumide daganani uga tola siyu,  
\q2 eda tola siyu ebo nai  
\q3 handelba nogo diąbadi,  
\q2 tama ena nogode elaluali  
\q2 te sandago te sunumide daganani nai  
\q3 handelde te sanda dagana sali.   
\q1
\v 6 Eno ena abagi sunumi dalali.  
\q1 Tiali goli, aga pai yalio, tama eno aga subeo.  
\q1 Eno agai wali pode homu kone palama,  
\q2 tama eno haliga dwai mu yalio.  
\q1 Te eno aga gegebo sę yali,  
\q2 tiali goli eno aga me subeo.  
\q1 Eno aga i wali, tiali goli agai eno i weyu  
\q3 me ponobeo.   
\q1
\v 7 Te taun bagulali moni obo tonalubo  
\q2 bidigo ena suali.  
\q1 Te augwaligo ena elama, te eno tigi dolama,  
\q2 tama augwaligo eno bulali ugwa saket sali.   
\b  
\q1
\v 8 Te Jerusalem we dabe,  
\q2 te dagego eno abagi wali bidi subaso da,  
\q2 dagego te tiwai po dąų walama, agabolo wao,  
\q2 eno aga homu godolo mu elama,  
\q3 te eno nogo sągą dili  
\q2 kimi meni yai elalubo po walao.   
\s1 Te we dabe augwaligo balia po te tiwai  
\q1
\v 9 Nage gasa sawi yai we,  
\q2 tama nago tigidali we aiyaba elalualio.  
\q1 Nago te bidi aga mena tobage bidi dawe?  
\q1 Te da gasa we dabego bidi aiyaba elaluali homu ebaso,  
\q2 tama nago homugo dago  
\q3 te tiwai po dąų omainogo ebawe?   
\s1 Gesi wegigo balia po te tiwai wali  
\q1
\v 10 Eno abagi wali bidi te aga bomai bidi mu da,  
\q1 te agai gesabidi gasa sawia pai mu da,  
\q2 tama te tǫde bidi nedabo usu isiąbo  
\q3 te hauwa tausen bidi mu aiyaba elaluai dao.   
\q1
\v 11 Agai gesabidi ula te gol tiwai.  
\q1 Agai tobolu nisi te husugu yai mu,  
\q2 te husugu bago tigi nisi tiwai elalubo.   
\q1
\v 12 Agai gedu begelebo sę umabo mu iduali,  
\q2 te ąį pauwai ba te ąį sesegede  
\q3 tolalubo tiwai gilama yai.   
\q1
\v 13 Te agai naboge badu tobolu nisi te wiegi yai,  
\q1 te gide wiegi yai denami yai plaua dabe  
\q2 elalubo tiwai yalio.  
\q1 Agai pedauwali te sawi yai plaua tiwai elaluali.  
\q1 Agai wabo po wiegi yai mu ebaso,  
\q2 te denami ebo wiegi yai sanda tiwai elalualio.   
\q1
\v 14 Agai nogo te wiegi yai mu tama.  
\q1 Tama agai te gasa tedali au gasagi yai  
\q2 ring dabe te aga nogo dani au ilama muani.  
\q1 Agai tigi tedela mu yai,  
\q2 te tigi ula umabo mu yalio.  
\q1 Tama agai kukulu augwaligo te sisi dugusu yai  
\q2 te gasa au tedali yai masigigo au ilalio.   
\q1
\v 15 Agai sągą si augwaligo te wiegi yai  
\q2 tedela yai masigigo nigali pos si tiwai elama,  
\q2 tama te mu udula pai gol  
\q2 pedai si elalubo pedai badu dolaluali.  
\q1 Te noma yai polalubo mu  
\q2 te ni sida wiegi yai dabe tiwai,  
\q2 me te Lebanon genuai bulu du dabe  
\q3 elalubo tiwai yalio.   
\q1
\v 16 Agai ena dali naboge si dilibo sogo da,  
\q2 eno te pusu umagi mu yalio.  
\q1 Agai tigi pedai tigidali badu  
\q2 usu nama, te wiegi yai naga yali.  
\q1 Dage Jerusalem we dabe,  
\q2 eno bidi da te tama tiwai tobage bidi me dao.   
\c 6  
\s1 Te we dabe sibigo balia po te tiwai wali  
\q1
\v 1 Nage gasa sawi yai we, tama nago tigidali we  
\q2 aiyaba elaluali.  
\q1 Nago abagi wali bidi mena paliwe?  
\q2 Dago nage tau selama, aga gegaibao.  
\q1 Tiali goli, aga mena sunumidu wali paliwe?   
\s1 Gesi wegigo balia po te tiwai wali  
\q1
\v 2 Eno abagi wali bidi aga giba pali.  
\q1 Te gide te wiegi yai denami ebo nai dabe pągąnąlubao.  
\q1 Te aga meme dabego te nosai dabe tubo sę eyu,  
\q2 tama agai te au sawia pai plaua dabe  
\q3 sisinibo sę eyu ebao.   
\q1
\v 3 Te aga eno bidi da, tama ena agai we dao.  
\q1 Agai aga meme kibu dabe  
\q2 te sawi wiegi yai plaua dabe tomoba sela pelama,  
\q2 tama te meme dabe augwa te nosai  
\q3 tubo sę eyu bidibao.   
\ms1 A naga wali balia po  
\s1 Gesi bidigo balia po te tiwai wali  
\q1
\v 4 Eno abagi, nage gasa sawi yai mu da,  
\q2 te wiegi yai taun si Tirsa me Jerusalem tiwai da.  
\q1 Eno suali, nage gasa sawi yai mu yaibaso,  
\q2 tama eno homu dąų wali,  
\q2 te bidigo te ami bidi genuai hani  
\q3 te ugwa plak dali asobo subaso,  
\q2 agai gedu tede dąų wabo tiwai yali.   
\q1
\v 5 Eno homugo nago enaba tonogi homu yali.  
\q1 Nago enaba tonobaso da,  
\q2 te ena nagede mu tulalubo dao.  
\q1 Nago gesabidiba hauwagasai elalubo tobolu nisi  
\q2 te kibu meme hani wiegi yai pemene eyu,  
\q2 te Gileat bulu du dabedu aiyaba  
\q3 sasa mano dulubo tiwai ebao.   
\q1
\v 6 Nago kele dabe tedela mu yali,  
\q3 te augwaligo megi tama ąį paluai tedela  
\q3 sipsipgo tigi nisi tiwai yali.  
\q1 Nago kele deli me degebeo. Menio.  
\q1 Tigidali bugagia mu elalubo dao.   
\q1
\v 7 Name ugwago nago gesabidi mesega sali goli,  
\q1 tialima eno nago gesabidi ula ebo suali.   
\b  
\q1
\v 8 Kingo we hauwa elalubao.  
\q1 Bidi sese sela 60 we te kwin bidibao,  
\q2 te tudi badu si wali daganaluali we dabe  
\q2 te bidi sese me si me si 80 bidibao.  
\q1 Agai te gasa gesi we dabe hauwa me elalubao.   
\q1
\v 9 Tiali goli, ena da, eno abagi deli naga elalubao.  
\q1 Aga te polalubo mu bidibaso,  
\q2 tama eno aga godolo mu ebao.  
\q1 Aga idago aga deli naga ame neyu,  
\q2 tama agade wiegi yai pemene eyu,  
\q2 tama aga godolo mu ebo dao.  
\q1 Tigidali gesi wegigo aga sulama,  
\q2 te augwaligo aga nogi ugaba sali.  
\q1 Te kwin we dabego,  
\q2 me te kingo gasa we dabego te balia po weyu,  
\q2 te agaba wiegi yai pemene yali.   
\q1
\v 10 Dego mu enaba tononalubo dawe?  
\q1 Agai gesabidi te giliga pedelainu ebo tiwai elama,  
\q1 te giliga ula genuai nanobo tiwai eyu,  
\q2 tama agai gesabidi mu udula pali,  
\q3 te polua ula tiwai yali.  
\q1 Eno aga sulama, tama eno homu dąų wali,  
\q3 te bidigo genuai ami hani  
\q2 te augwa plak dali asobaso sulama ebo tiwai yalio.   
\q1
\v 11 Ena dulama, tama ena te du wiegi yai  
\q3 walobo ni dabe elalubo giba asali.  
\q1 Ena asali, te gesi kulubi dabe te ni dabede te bulu  
\q2 odogode holobo sueinogo asali.  
\q1 Eno te ni waingo gesi kulubi dabe,  
\q2 me te nai du walali wiegi yai elalubo  
\q3 te eno sueinu yali.   
\q1
\v 12 Eno abagi we, eno nage sulama, ena noma sali.  
\q1 Eno kone palali, ena te genuai bidi mu  
\q2 deligo karisde bidibo tiwai yalio.   
\s1 Te we dabego balia po te tiwai wali  
\q1
\v 13 Sulam we, ma asao, ma asao.  
\q1 Dago nage suainogo, nage geasa ma asao.  
\s1 Gesi wegigo balia po te tiwai wali  
\q1 Te eno bidi dabe gedude bebegelibo danis ebo,  
\q2 te magi baso dagego ena suabo homu ebawe?   
\c 7  
\s1 Gesi bidigo balia po te tiwai wali  
\q1
\v 1 Eno abagi we, nage te kwin we  
\q2 me deli tiwai mu polalubao.  
\q1 Nago sągą nadoba bulali,  
\q2 tama nago sągą meda meni yai mu elalubao.  
\q1 Nago sągą te sawia pai mu da, te piksa noma me deli  
\q2 te kolesaga konea pai bidigo te masigi togolama,  
\q2 nigali piksa noma tiwai mu yali.   
\q1
\v 2 Nago mosogobe te kap tiwai  
\q2 te wain pągąwai pusu yai  
\q2 pauda dali taluai tiwai yali.  
\q1 Nago pamene si te gasa sawi yai mu  
\q2 te wit me deli pesage holali tiwai,  
\q2 augwaligo te sawia pai plaua dagego  
\q3 au ilali tiwai dao.   
\q1
\v 3 Nago ame si te wiegi yai bulu uni hasa si tiwai da,  
\q2 augwa idago augwali si deli sogo ame nani.   
\q1
\v 4 Nago dogoni magete tedela yai taua me deli tiwai.  
\q1 Nago gedu te genuai taun Hesbon sunumi pąde elalubo  
\q2 dwasianu sigi ąį ge tiwai yali.  
\q1 Nago guni wiegi yai mu tama,  
\q2 te Lebanon tonalubo bidi dabego taua tiwai,  
\q2 te augwaligo Damaskus pedai badu tonalubo dao.   
\q1
\v 5 Nago tobolu ugaba mu igulali,  
\q2 te Karmel bulu du tiwai.  
\q1 Nago tobolu nisi udula pali,  
\q2 te kingo sawia pai name ugwa tiwai yali.  
\q1 Tama te tobolu nisigo te king tulaluabo sę mu ilibo dao.   
\q1
\v 6 Eno abagi we, nage gasa sawi yai we mu da.  
\q1 Eno nage godolo mu ebao,  
\q2 te nago tigidali naigo ena pemene ilibo dao.   
\q1
\v 7 Nage wiegi yai mu te doloba pai ni kokonas tiwai.  
\q1 Te nago ame te aga du dabe tiwai da.   
\q1
\v 8 Ena te kokonas nidu ugaba holama,  
\q2 te nai aga du saibao.  
\q1 Eno nago ame suali, te du hauwa walai wain  
\q2 nologo elalubo tiwai yali.   
\q1
\v 9 Eno nago pedauwali denami odali,  
\q2 te wiegi yai nedu du laulau denami ebo tiwai.  
\q1 Nago ena dali nono nani,  
\q2 te wain ąį pusu mu ebo tiwai yali.  
\s1 Gesi wegigo balia po te tiwai wali  
\q1 Awe, eno abagi wali bidi,  
\q2 eno te wain nage mawaibao.  
\q1 Te godege pibo sogo me  
\q2 te tobage wain wiegi yai ebo da.   
\q1
\v 10 Ena te ena abagi wali bidigo we da,  
\q2 te agai ena godolo mu ebo dao.   
\q1
\v 11 Eno abagi wali bidi, nage ena dali asao.  
\q1 Tama da te dwasianu bulu dabeba bidigi pinao.   
\q1
\v 12 Te kigamu digi mu te da hogodasa peyu,  
\q2 te wain ni dabe sueibao.  
\q1 Te augwali kulubi pedelama,  
\q2 te augwa yabe diligi naniwe,  
\q3 ma meniwe, te homu ebao.  
\q1 Tama dago te nai du wiegi yai walobo ni dabe sueibao.  
\q1 Te augwa plaua dabe diligi naniwe, ma meni yaliwe?  
\q1 Da te wain gide bidalu,  
\q2 te eno te tiwai nagebolo ola mobaso,  
\q2 te eno nage godolo mu eba homu yagameo.   
\q1
\v 13 Eno abagio, eno te wiegi wiegi yai  
\q2 ni du wai naga selama,  
\q2 te be sunumi pąde muai elaluali,  
\q2 te nago tumainogo yali.  
\q1 Meba eno polobadu sali, tama meba megi naga eno sali.  
\q1 Tama dago te wiegi yai bono dabe denami ebaso,  
\q2 te dago godolo ebo homu hodolomainu ebao.   
\c 8  
\q1
\v 1 Te eno idago nage ame neyu,  
\q2 te nage ame manigi sogo da, te wiegi yai igi da.  
\q1 Te tiwai ebaso da, teda eno nage te genuai sunumide  
\q3 deliba gesabidi unulubo sogo,  
\q2 eno nage dali nono nobaso,  
\q3 te niwai bidi me deligo  
\q2 tede dwai homu me ebo usugobeo.   
\q1
\v 2 Te eno nage selama,  
\q2 te dena si idago beba pobaso usu da,  
\q2 tama nago ena bugagia ola magameo.  
\q1 Te eno wain selama, eno te wiegi yai wain nedu dugo  
\q2 te gasa pusu yai pauda dali taluama,  
\q3 nage mawaibao.   
\q1
\v 3 Nago pobase nogo eno tobolu dologo badu muao.  
\q1 Tama nago dolo nogogo, te nago eno tigi tola sao.   
\q1
\v 4 Te Jerusalem we dabe, dagego bomai po ena dali  
\q3 dąų walobaso da,  
\q2 te dagego da sigo haliga hodolobo po me olamuo.  
\q1 Te sę dena side digi elalubao.   
\ms1 Te nogo kibisa deli wabo balia po  
\s1 Te we dabego balia po te tiwai wali  
\q1
\v 5 Te wa pai bulude bidali tagalama  
\q2 asali, te mena we dawe?  
\q1 Agai aga abagi wali bidi nogo tolasa, augwa si asobao.  
\s1 Gesi bidigo balia po te tiwai wali  
\q1 Da te ni laulau tįwai madi dologode bidalu,  
\q2 tama eno nage hodolali.  
\q1 Naga idago nage te ni dologode ame nai dao.   
\s1 Gesi wegigo balia po te tiwai wali  
\q1
\v 6 Nago ena deli naga godolo homu yao,  
\q2 te nago gasa we godolo homu me elamuo.  
\q1 Nago nogogo te gasa we nogo me me diągio.  
\q1 Nago ena naga nogo diąyąo.  
\q1 Magi baso meni.  
\q1 Eno godolo homu ebo nagede bomo mu eyu,  
\q2 tama eno haliga nagede bomonama hogodu,  
\q2 te isibogo bomogo bidi aiyaba elalubo tiwai ebao.  
\q1 Eno godolo homu ebo, te umabo digi mu yali,  
\q2 te isi bogoli dabo genuai mu ebo tiwai ebao.   
\q1
\v 7 Aįgo te tobage isi sula sawainu ebaso, usu me egobeo.  
\q1 Te bidi me deligo aga mone tigidali te  
\q2 wego aga godolo emaina homu elama mobaso da,  
\q2 te aga nai mu meniama,  
\q2 tama te wego aga dwai mu bidabo sę ilaibao.   
\s1 Te gesi wegi aga ama dabego balia po te tiwai walio  
\q1
\v 8 Dago ama dwasianu weginu bidibaso,  
\q2 te aga ame pedalubeo.  
\q1 Te aga genuai ebo si da, te dago mena sę agade egowe,  
\q2 te gesi ogwa bidi me deligo aga saiba homu ebawe?   
\q1
\v 9 Te ama bugagia bidu, te taun bagulali obo tiwai  
\q3 elalubaso da,  
\q2 teda dago te taua silva te bagulali obode nigaibao.  
\q1 Tialima, aga te taun sunumi tiwai elalubaso da,  
\q2 teda dago aga te dila pai  
\q3 ni sida ni namego paliaibao.   
\s1 Gesi wegigo balia po te tiwai wali  
\q1
\v 10 Ena te obo me deli tiwai da,  
\q2 tama eno ame te taua si tiwai da.  
\q1 Eno abagi wali bidigo  
\q2 te tiwai tama koneani,  
\q2 te ena aga dali bidali sogo  
\q3 ena bugagia mu bidu,  
\q2 te eno haliga dua tegaluama bidalio.   
\s1 Gesi bidigo balia po te tiwai wali  
\q1
\v 11 King Solomongo wain gi  
\q2 te bulu Balhamonde elaluali.  
\q1 Te bidi dabe augwaligo te gi sę yabo homu ebaso da,  
\q2 te mone hauwa tausen te umabo 1,000 kina silva  
\q2 te kingbolo mobaso usu dao.   
\q1
\v 12 Solomongo aga te mone 1,000 kina somainao.  
\q1 Tama te gi sę ebo bidi dabego  
\q2 te mone bidi sese nogo si 200 kina somainao.  
\q1 Tialima, eno augwalide moni homu hauwa me ebeo.  
\q1 Ena da, te ena wain gi elalubao.   
\q1
\v 13 Eno abagi, nage gide bidibaso,  
\q2 eno homugo nago po omainu homu ebao,  
\q2 tama eno hai namu dabego te nago dogonigo po  
\q3 wabo odomainao wali.   
\s1 Gesi wegigo balia po te tiwai wali  
\q1
\v 14 Eno wiegi yai abagi da,  
\q2 eno homugo nage polo ma asomainu homu yali,  
\q1 te wiegi yai bulu uni hasa me deli tiwai  
\q2 te bulu du dabeba eda udada holu,  
\q1 te wiegi yai nai dabe denami pągąną  
\q3 pabo tiwai ebo dao.