\id NEH - Dadibi NT [mps] -Papua New Guinea 2001 (DBL 2014) 
\h Nehemiago Po Asęai Buku 
\toc1 Nehemiago Po Asęai Buku 
\toc2 Nehemia 
\toc3 Neh 
\mt1 Nehemiago Po Asęai Buku  
\imt1 Hasia nedebo po  
\ip Hasia da te Nehemiago buku te Esrago buku dage tiwai elaluali. Tama tialima, e bukugo me te buku 2 Storide wali po wadolama elalubao.  
\ip Te buku Nehemiade te po bugai sela elalubao. (1) Te Persia kingo Nehemia te Juda dabe tonalumainu sa muani. Tama Nehemia aga te Persia tǫ bulude kalabus bidali tagalama, Jerusalemba ma pelama, te Juda dabe hogodolama, te Jerusalem hanu obo sę ma emainogo yali. Tama agai augwali te lotu po wabo sę, me augwali bugagia bidabo sę dabe tau selama, ola mani. (Dąį 1-7) (2) Esrago Godigo bomai po nedebaso, te we bidigo augwa sęgę sela sąyani. (Dąį 8-9) (3) Te Nehemia agai te hanu Jerusalem tonaluali sogo yali sę po dabe meba elalubao. (Dąį 10-13)  
\ip E buku hauwa tomode te Nehemia aga kolesaga po hauwa wai elalubao. Aga te Genuai Bidi dologode elaluyu, tama agaba gedu haluasa po hauwa sogo weyu ebo bidi dao.  
\c 1  
\ms1 Nehemniago te Jerusalem hanugo moni obo ma geselali  
\mr (Dąį 1–7)  
\s1 Te Jerusalem dolali pode te Nehemia haliga sęgę yali po  
\p
\v 1 Te wali po Nehemia, te Hakaliago ogwago, asęani. Te bidi sese deli kibu bede, te 20 yia wabo side, te Artaserksis te king bidali side, tama te polua Kislev, \f + \fr 1:1 \ft Polua Kislev te 9 polua te Israel dabego polua da, tama te tiwai polua te dago polua te Novemba me Disemba, te dao.\f* tede ena Nehemia, ena te gavmango polalubo moni taun, te Susade bidali sogo tama tiai dao.  
\v 2 Tama te sogo Hanani, te eno ama me deli, te hani bage me deli dali, augwa te Juda tǫ taga soyu, tama digibulu aselama, te Susa taunba sabolali. Eno augwali sisinama, tama eno augwaliba te tama po hanalu wali, “Eno te Juda hani dabe meba te kalabus yagasali pesage, e Babilon bulu tagalama, te Jerusalemba ma pali bagede, te po eno koneainogo hanalu obao,” wali. “Te augwali bugagia bidibawe, ma meniwe? Tama te taun Jerusalem me, te bugagia elalubawe, ma meniwe?” Eno te po te bidi si hanalu wali.   
\p
\v 3 Tialima, augwaligo po wei ponoyu, te po wai, “Menio,” wali. “Te hani we bidide genuai sęgę elalubao,” wali. “Tama te Godigo bomai po wali pisąbo hani dabe, te Israel hani isąwai bage, te augwali pąde bidiyu, te augwali dolobo sę ebao. Tama te Jerusalem bagulali moni masigi obo dolali me tama elalubao. Tama te sunumi obo te siago polobadu ulali, te dabe augwali me te tiwai naga elalubao, tama te Jerusalemde bidibo bagego te nigabo homu me ebeo,” wali.   
\p
\v 4 Eno te po odama da, teda ena duagulama, tama ena gela hauwa mu wali. Tama ena haliga sęgę me elaludu, tama si sela sogode eno te nai osogo habu selama, tama eno Godiba gedu haluasa po weyu iduali.  
\v 5 Eno e tiwai gedu haluasa po wali, “God, Genuai Bidi, nage te dagalu tonalubo bomai bidi da, tama da Israel dabe nage dologoba pelama bidibao. Nago te dąų wali bomai po te kontrak me deli da dali yali elalubao, tama dago nage godolo mu elama, tama nago po bugagia mu wali pobaso da, teda nago te dąų walali bomai po kontrak te me tagalisiąma, tama nago da godolo mu ebo dao.  
\v 6 Genuai Bidi, te giligade me hulide eno nageba hanalu, te Israel dabe tau sao obao, te augwali nago sę bidi me sę ebo we dabe dao. Tama tialima, eno homugo nago eno te gedu haluasa po wabo te bugagia odao. Eno te tiwai hania hanilama mu obao, ena dali, te eno wąį dabe dali, dago te dwai sęgę salio. Tama dago naga te sęgę me ebeo. Menio. Te Israel we bidi tigidaligo te sęgę sela silai dao.  
\v 7 Dago dwai kolesaga te nago gedude eyu, tama dago te nago po wali me pabeo. Polobadu nago bomai po te naga sę bidi Mosesgo nogoba mawai, tiali goli dago te bomai po dabe wali me pisąwai dao.”   
\p
\v 8 “Tiali, goli nago te Mosesba mani e tiwai pode te nago homu kone ebo me gegeda paligio, ‘Te dagego ena tudiba mubaso da, teda eno dage e tǫdu sela sąnama, tama dage te gasa tǫ pedaiba tedela palama, bidigi paibao,’ wali. \x * \xo 1:8 \xt Prs 26:33\x*  
\v 9 ‘Tiali goli, dage te bulu tǫ pedaide bidiyu, te enaba homu begelama, tama dage enaba ma aselama, tama eno po wali pobaso da, teda eno dage te bulu me deli te dagego enaba lotu po omainu te sa muani buluba ma odasa asaibao. Te dage digibulu tǫ pedaide tigidalide bidibadi goli, te tagalao, te eno dage te bulu tǫ pedaide selama, ma odasa asaibao,’ nago te po Mosesbolo wali. Genuai Bidi, da te nage pageba ma asali dao, tama tialima, eno nageba hanalu, te nago dąų wali bomai po wali pelama, te da megi tama tau sao po hanalu obao,” walio. \x * \xo 1:9 \xt Bom 30:1-5\x*   
\p
\v 10 “Genuai Bidi, da Israel te nago sę bidi, me sę we tiwai dao. Tama da te nago we bidi dabe mu da. Te nago genuai bomogo nago da te boi bidi dabego nogode polobadu ma salio, tama da mu hagabeo.  
\v 11 Tama da tigidali Israelgo te nageba wiegi yai homu pemene elama, tama nago nogi ugwaba sobao. Tama eno homugo megi nago te tigidali Israelgo gedu haluasa po wabo odomainu homu ebao. Tama me te nago megi eno e gedu haluasa po wabo me odao homu ebao. Tama eno te king sugi pabo si da, teda nago digi te kingo ena homu dene emainu ilama, tama agai ena tau somainu yao.” Eno te gedu haluasa po te ena kingo sę bidi bidali sogo wali. Eno sę te kingo wain ąį tonalubo sę yali, tama te wain wę sela pelama, te kingo tumainu magi pabo sę yai dao.   
\c 2  
\s1 Nehemia te Jerusalemba pali  
\p
\v 1 Te polua me si me si bidama, tama me sogo side deli te king Artaserksis te nai tudubadi, tama eno wain agaba sesali. Tigidali sogo eno te sę iduali te bugai haliga elama, te eno gesabidi wiegi yai pisigina pelama te sę iduali. Tiali goli, te sogode digi eno haliga sęgę mu elama, tama eno gesabidi te wiegi yai me pisigina pabeo.  
\v 2 Tama tibaso, kingo enaba hanalu wali, “Magi baso nage wiegi yai pemene isąbawe? Nage gasi da meni yai, tiali goli nage magi nai me delide haliga sęgę elalubao,” wali. Eno te po odoyu, te ena noma salio,  
\v 3 tama eno te tiwai po kingba wali, “King o, nage te bugagia sesabi elama bidagameo. Awe, ena haliga sęgę mu ebao, magi baso meni, te augwaligo eno wąį nǫų dabe pubulali madi te hanu taun te dolali elalubao, tama siago te bobegelali masigi obode te nigo nigali sunumi me ulali elalubo dao.” Eno te po wai. \x * \xo 2:3 \xt 2 Kin 25:8-10; 2 Sto 36:19; Jer 52:12-14\x*   
\p
\v 4 Kingo te po odolama, tama enabolo te tiwai po hanalu wai, “Megi nago te eno magi sę me deli emainu, agawe?”  
\p Tialima, eno dagalude Godiba gedu haluasa po polo olama,  
\v 5 tama eno kingba te tiwai po wali, “King, te nago enaba bugai haliga ebaso da, teda eno nageba te magi nai po me deli hanalu wainu ebao. Te e tama tiwai. Te nago homu usu eyu da, te nago ena te ena wąį nǫų dabego taun te Juda tǫba pomainu ebaso da, te eno ena abagi dabe dali te taun ma geseliyu nigibo sę tau sigi pomainu ilao,” po wali.   
\p
\v 6 Te eno king dali po mibadi, te aga we te kwin aga pąde dugulaluali. Kingo eno te po odolama, tama po wei ponoyu, te tiwai po wali, “Usu da, nage pao,” wali. “Tiali goli, nage te pęwadage sogo, ma te bobage sogo te Judade bidaibawe? Tama nisu sogo nage ma asaibawe?” Tialima, eno homude elaluali te ena ma asabo sogo po agaba pusalio.  
\v 7 Tama eno te kingba hanalu, te eno te wę Yufretis u pedai badu bidibo gavman bidiba maiabo pas meba mao wali. Te pas dabego augwaliba weyu, te ena augwaligo provinsdu peyu, te Juda tǫ pedaiba pabo usu da wabo pas mao, wai dao.  
\v 8 Tama eno kingba te Asapba te pas me deli asęa mao po hanalu wai, te bidigo te kingo ni sili elalubo tǫ tonaluai. Te pasgo agabolo te po waliyu, te pedabo ni nami meba enabolo mao wabo po pas asęani. Te ni nami dabego te Jerusalem moni masigi obode sunumi dabe nigiyu, te ami bidi dabego te Godigo tempel be tonalu bidabo bomai be obo sunumi, te me nigabo ni nami sao po wabo pas asęai, tama eno be sę yabo ni nami me dao. Tama God ena dali bidiyu, tama ena tau sai, tama tialima, kingo eno te hanalu wali nai dabede te usu da po walio.  
\v 9 Tama kingo te ami ofisa meba nigilibadi, te hosde dugulasa pabo ami hani me deli nigilibadi elama, tama agai te augwali ena dali tagala palama, te ena tonalua pomainu yalio. Tama da hogodama, digibulu mu peyu, te wę Yufretis u pedai badu palio. Tama da pelama, te tǫ pedai gavman bidi dabe bidibo madiba sabolama, tama eno te kingo pas augwaliba mena mena pai.  
\v 10 Tiali goli, Senbalat, te Bethoron taun bidi, me Tobia, te Amon provins ofisa bidi me deli, augwali sigo odali, ena aselama, te Israel we bidi augwali bugagia bidimainogo eyu, ena augwali tau sainu asali po odali. Tama tibaso, augwali sigo haliga dwai mu yalio.   
\p
\v 11 Ena te Jerusalemba sabolama, tialima ena te sela sogo olo toma neyu bidali,  
\v 12-13 tama eno te bidi me deliba te Godigo enaba homu hodolama, te Jerusalemde yao wali sę po me wabeo. Tialima, te be hulia sabo tomo ebo tonaluama, tama ena dali te dwasianu hani bidi naga te hogodama, te da bidali pesage tagalama, tama da pelama, te taun moni masigi obo dolali te sugi pali. Ena naga te donkide dualasa pali, tama te gasa bidi dabe sągągo tǫdu pali. Tama dago te taun te giliga dega sigilubo te obo bagulali sunumi elalubo te badu te taga peyu pali, te augwaligo nogi eyu te Odogo Pesage Badu Sunumi dao wali. Tama da te saut badu peyu, tama te ulu wę edelama pai, augwaligo te nogi weyu, Te Genuai Hasamanigo Ulu Wę da wali, tama da te pelama, te nogi augwaligo te Pobele Bage Sela Sąbo Sunumi te badu sabolai. Te da pedalobo sogo, eno te taun obo aluali te bugagia tonalua pelama, te siago dali obo sunumi te bugagia susa palio.  
\v 14 Nosali da begelama, te not badu te Ulu Wę Sunumi elalubo badu pai, tama te Kingo Dwasianu Sigi Aį Elalubo te badu palio. Te badu, te sunumi paliai baso, tama ena te dugulalubo donki te ma pabo usu me ebeo.  
\v 15 Tama da te Kidron odogoba dulama, tama eno te obo bugagia osa yali. Tama nosali da tede ma begelama, tama da te asali sunumiba ma sabolagasali. Tama da te buluba soali, te sunumiba da ma pedalubo sogo da, te Odogo Pesage Sunumi dao, tialima da te taun tomoba ma pelawali.  
\v 16 Te Jerusalem ofisa bidi me deligo eno te hulide yali sę dabe me konesiąwai, magi baso meni, eno te hanu ma geselebo sę yabo Juda dabe me delibolo te sęde po me wasiąwai. Eno te pris dabeba, me te tobolu bidi dabeba, me te ofisa dabebolo, me te gasa bidi dabebolo dago te sę yaibao po te tigidali Juda dabeba me wasiąwai dao.   
\p
\v 17 Tiali goli, megi da, eno te augwali sisinama, tama eno te po wali, “Dagego koneani, te Jerusalem obo sunumi te dolali elalubao, tama te taun tigidali badu me dolalio. Tama dago sęgę genuai mu elalubao. Tialima, megi da, dago te taun masigi obo ma niginao, tama te kolesagade dago te da dali posobo po wabo bidi dabego pedauwali paniaibao,” wali.  
\v 18 Tama eno augwaliba te Godigo ena tau siyu yali sę po walali. Tama eno augwaliba te kingo wali po tigidali walio. Tialima, augwaligo te tiwai po wei ponani, “Wiegi yai mu dao. Da hogodama, te sę inao.” Augwa te po ola silama da, tama augwali pelama, te sę yabo nai dabe dodola mugi pali.   
\p
\v 19 Tiali goli, Senbalat, me Tobia, me Gesem, te Arap hani bidi me deli, te bagego dago te sę yabo po odali. Tama tibaso, te augwali aselama, tama dabolo te posobo po weyu, te gisugu mayu yalio. Augwaligo te tiwai po wai, “Dagego magi yainu ebawe? Dagego te taun obo ma nigainu eba, agawe? Dagego homugo te dagego tama tiwai elama, tama dage te bomai bage pedelama, tama dagego te king dali hwįaiba weyu teba, agawe?”   
\p
\v 20 Tialima, eno augwaliba te tiwai po wei ponani, “Te dagalude Godigo da tau saibao,” wali. “Da te aga sę bidi da, tama tibaso dago te sę yaibao. Tiali goli, te taun Jerusalem te dagego taun menio. Polobadu dagego wąį nǫų dabe te taunde me bidibeo. Tama tibaso, te sę te dagego sę meni dao,” eno te po wali.   
\c 3  
\s1 Augwaligo te Jerusalem masigi obo ma geseliyu nigai  
\p
\v 1 Tialima, tigidali bidigo te Jerusalem moni masigi obo ma geselebo sę gagalali. Polalubo pris Eliasip dali, te gasa pris dabe dali, augwaligo te obo dage me badu te augwaligo te Kibu Sipsipgo Sunumi nogi poali, te badu te obo nigibo sę yali. Augwaligo te sę silama, tama augwaligo te me badu obo dage sa muyu, te Godigo masigi obo mu da olama, te lotu po wai. Tama nosali augwaligo te sunumi palibo sunumi dabe muani, augwaligo te nogi te Kibu Sipsipgo Sunumi dao wali. Tama augwaligo te obo ugwanu holama nigali te usu nigulali, te Bidi Sese A Naga te 100 Tonalubo Bidi bobobage beba peyu nigali, tama te Hananelgo Tauaba usu nai, te bobobage be mu dao. Augwaligo silama, tama te Godigo obo da olama, te lotu po wali.  
\v 2 Te Jeriko bidi dabe te pris dabe pąde sę eyu, tama augwaligo te obo dage tegelama sę yai. Tama Sakur, te Imrigo ogwa, te bidi meba daligo te obo dage gasa me iba tega sabo sę te Jeriko bidi dabe sę ebo pąde wadolama yalio.   
\p
\v 3 Te Hasenago hanigo te obo sę te Sakurgo hanigo obo sę ebo pąde wadoa selama, te sę yai. Te obo dage te augwaligo nogi eyu, te po wali, Te Sųgų Pisgo Sunumi elalubao wai. Tama augwaligo te ni nami dabe te sunumi sesegede paliama, tama te sunumi aga mubo pesagede muani, tama bomai lok munama, tama te sunumi dąų walobo bobage ain dili muani.  
\v 4 Tama Meremot dali, te gasa bidi dabego dali te obo dage gasa badu te Pisgo Sunumi pąde te obo nigibo sę yai. Meremot te Uriago ogwa, tama te Hakosgo wąį ogwa da. Tama Mesulam dali bidi mebago te obo dage me badu te sę wadolama, te Meremotgo hanigo sę ebo pąde yai. Mesulam aga te Berekiago ogwa, tama te wąį nǫų Mesesabelgo wąį nǫų dao. Tama te Sadok dali, bidi meba dali te obo sę wadolama, te Mesulamgo hani bage sę ebo pąde sę yai. Sadok aga te Banago ogwa dao.  
\v 5 Te Tekoa taun bidi dabego te Sadokgo hanigo sę ebo obo dage pąde wadoasa, te obo sę yalio. Tiali goli, te Tekoa tobolu bidi dabego te obo sę ebo tonalubo bidi dabego wabo po odisąbaso, tama te tobolu bidi dabego te sę me deli ebeo.   
\p
\v 6 Joiada, te Paseago ogwa, dali Mesulam, te Besodeago ogwa da, tama te bidi meba dali te augwaligo te obo dage te Tekoago hanigo sę ebo obo dage pąde wadoa selama, te sę yai. Te obo dage pedai badu te nogi augwaligo te Jesana Sunumi da wabo nogi elaluai. Tama augwaligo te sunumi sesegede te ni nami paliama, tama te pesage agade te sunumi munama, tama bomai lok munama, tama te sunumi dąų walobo bobobage ain dili muai dao.   
\p
\v 7 Melatia te taun Gibeon bidi dali, te Jadon te Merenot taun bidi, tama taun Gibeon bidi dabe, me te Mispa taun bidi dabego me, te obo wadolobo sę ebo te Joiada me Mesulam te bidi sigo hani bagego te obo sę ebo pąde gagalama, ibaba wadolali. Tama te sę ela pali, te wę Yufretis pedai e badu provins polalubo gavman bidigo beba tama tagaligi pali.   
\p
\v 8 Usiel, te Harhaiago ogwa, dali te bidi mebago dali, te obo sę wadolasama eyu, tama te Melatia me Jadon sigo hanigo te obo sę ebo pąde gagalasa yai. Usiel te gasa tobage nai dabe te golgo nigibo bidi dao. Tama te Hanania dali, te bidi mebago dali te Usielgo hanigo sę ebo obo dage pąde wadoasa te sę yai, tama pali te augwaligo gasa Genuai Obo nogi wabo teba unuligi palio. Hanania te wiegi yai denami ebo nai sanda nigibo bidi da wai.  
\v 9 Tama Refaia te Hurgo ogwa dali te bidi meba daligo te masigi obo sę ebo te Hananiago hani sę ebo pąde te sę yali. Refaia te Jerusalem pąde elalubo tǫ pedai badu me deli te polaluali tobolu bidi dao.  
\v 10 Tama Jedaia te Harumapgo ogwa dali te bidi mebago dali, te gasa obo te aga be pąde digi wadolama, te sę yalio. Tama Hatus, te Hasapneago ogwago te obo banis sę ebo te Jedaiago hanigo sę ebo pąde te sę yai dao.   
\p
\v 11 Tama Malkia, te Harimgo ogwa, dali Hasup, te Pahatmoapgo ogwa, te bidi mebago dali te masigi obo dage gasa badu pedai te Hatusgo hanigo sę ebo pąde wadoa selama, te sę yai dao. Tama te augwaligo te Stov Dabe Elalubo Bobobage Be te me nigalio.  
\v 12 Te Salum, te Halohesgo ogwa, dali te bidi meba daligo te obo banis dage gasa wadoasa nigali, tama aga wegi dabego aga te sę ebo tau salio. Te bidi Salum aga te si wali Jerusalem pąde elalubo tǫ pedai tonalubo polalubo bidi dao.   
\p
\v 13 Tama Hanun, te Sanoa taun bidi dabe dali, augwaligo te obo banis te sunumi elaluali madi te augwaligo te nogi wali Te Odogo Pesage Badu Sunumi da walio. Te badu te sę wadoa selama, sę yai. Tama augwaligo te sunumi aga te pesagede muani, tama augwaligo te bomai lok munama, te sunumi palibo bobage ain dili muanio. Tama me augwaligo te obo gasa wadoasa pali, te augwaligo te nogi weyu, te Pobele Bage Sela Sąbo Sunumi da wali, tama te obo banis dąį usu nagasali, te 440 mita dao.   
\p
\v 14 Te Malkia te Rekapgo ogwa dali te bidi mebago dali te sę wadolama, tama te obo te Pobele Bage Sela Sąbo Sunumi pedai badu bobegela selama nigali. Tama augwaligo te sunumi aga muani pesagede munama, tama augwaligo te bomai lok munama, te sunumi palibo bobage ain dili muai. Malkia aga te Bet Hakerem bulu tǫ pedai tonalubo polalubo bidi dao.   
\p
\v 15 Tama Salum, te Kolhesego ogwa, aga te Mispa tǫ pedaide polalubo bidi dao. Aga dali te bidi meba daligo te obo banis wadolama sę eyu, te sunumi nogi augwaligo te Ulu Wę Elalubo Madi Sunumi da walio. Tama augwaligo te ni nami meba selama, tama te sunumi ugwadu daide te be pedu tiwai nigali. Tama te sunumi aga muani pesagede muai, tama bomai lok munama, te sunumi palibo bobage ain dili muani. Tama augwaligo te obo banis dage Te Sela Sigi Aį sesegede wadoa selama nigalio. Te obo banis te polobadu bidali kingo gi pąde elaluai. Tama augwaligo te obo banis sę wadoasa pabo te Devitgo Taunba pabo togobiliba usu nigi pai dao.   
\p
\v 16 Tama Nehemia, te Asbukgo ogwa, aga te distrik Betsur hanude tobolu bidi dao. Tama aga dali aga hani dabe augwaligo te Salumgo hanigo yali obo dagedu wadolama yali. Augwaligo te obo sę ela pelama, te tuni bidi Devit gų pageba saboligi pali. Tama te wę ge te bidi dabego te bomai ami bidi dabego be mesalo pąba tagaligi pali.   
\s1 Te sę tonaluali Livai dabego nogi  
\p
\v 17 Tama te Livai hani bidi dabego te obo banis sę te gasa badu me yali. Te augwali nogi e tiwai dao. Rehum, te Banigo ogwa, dali te gasa Livai dabe daligo te obo banis sę te bidi Nehemiago hanigo sę ebo pąde te wadolama, sę yali. Tama Hasabia, te Keila distrik tǫ pedai badu te polalubo tobolu bidi dao, aga dali te aga tǫ pedaide te gasa Livai dabe daligo te obo banis sę te Rehumgo hani sę ebo pąde sę yali.  
\v 18 Tama Bavai, te Henadatgo ogwa, aga te namba 2 wali Keila distrik tobolu bidi dao. Tama aga dali te gasa Livai dabego dali te obo banis sę te bidi Hasabiago hani sę ebo pąde sę yalio.  
\v 19 Tama Eser, te Jesuago ogwa, aga te Mispa taun tobolu bidi da. Tama aga dali, te gasa Livai dabego dali, te obo banis sę te Bavaigo hani bage sę ebo pąde te sę yai. Tama te obo dage te hwįbo doado bage mubo be pąde elaluai, tama pelama, te nogi augwaligo te Habu Sugunani wabo, te obo dage ponaniba usu nagasai dao.  
\v 20 Tama Baruk, te Sabaigo ogwa, dali te gasa Livai dabego dali te obo banis sę ebo te Esergo hani sę ebo pąde sę wadolama yali. Augwaligo bomo eyu, te obo sę ela pali, te polalubo pris Eliasipgo be sunumi elaluali pąba usu nigi pai dao.  
\v 21 Tama Meremot aga te Uriago ogwa, tama te Hakosgo wąį nǫų da. Tama aga dali, te gasa Livai dabego dali, te obo sę ebo te Eliasipgo be sunumi pąde gagalama pali, tama te be sesegeba usu nigi palio.   
\s1 Te sę tonaluali pris dabego nogi dao  
\p
\v 22 Tama te pris mebago me te obo banis me badu geselali. Te Jerusalem pąde elalubo bulude bidibo pris dabego te obo sę te Meremotgo hani sę ebo pąde te sę wadoasa yalio.  
\v 23 Pris bidi Benjamin me pris Hasup te gasa hani meba daligo te augwa sigo be pąde digi te obo sę gagalama yali. Tama pris Asaria, aga te Maseago ogwa, te aga wąį nǫų Anania dao. Tama aga dali, te gasa hani meba daligo te obo sę te aga be pąde yalio.  
\v 24 Tama pris Binui, te Henadatgo ogwa, dali te hani mebago te obo sę ebo te Asariago be pąde gagalasa ela pali, te obo nogi augwaligo te nogi Habu Sugunani teba usu nigi pai.  
\v 25 Tama pris Palal, te Usaigo ogwa, dali te hani mebago te obo sę te Habu Sugunani tedu gagalasa peyu, te si wali kingo bobobage be taua elalubo madiba usu nani. Te taua te tonalubo wasman dabego be pąde elaluai. Tama Pedaia te Parosgo ogwa dali meba hanigo dali te obo banis gasa badu te Palalgo hanigo sę ebo pąde sę yai.  
\v 26 Augwaligo te obo sę ela pelama, te Wę Sabo Sunumi pageba sabolama, te bidi dabego te Godigo tempel be tonalubo madiba pedelai. Te sunumi me taua te augwaligo nigali masigi obo elalubo badu te giliga dega sigilubo badu elaluali. Te obo dage te Ofel pąde elaluai, te Godigo be tonalubo sę bidi dabe bidibo madi te Jerusalem badu elaluai dao.   
\s1 Te masigi obo sę yali gasa hani bidi dabe nogi dao  
\p
\v 27 Te Tekoa taun bidi dabego te obo banis gasa badu wadolama, te Pedaiago hani sę ebo pąde sę yali. Te si sogo wagisu te obo sę yai. Augwaligo te sę te Godigo tempel be tonalubo taua pąde gagalama, tama augwali sę ela pali. Te Hos Dabego Sunumi elalubo madi te Ofel badu usu nigi pai dao.  
\v 28 Tama te pris hani mebago te obo te gasa badu te Hos Dabego Sunumi elalubo madi te not badu wadolama yai, tama te tigidali deli deligo te masigi obo sę ebo te augwa be pąde digi ela palio.  
\v 29 Tama Sadok, te Imergo ogwa, te hani meba daligo te pris dabe pąde sę eyu, tama te obo ma geselebo sę te Sadokgo be pąde digi wadoasa sę yali. Tama Semaia, te Sekaniago ogwa, dali te hani mebago te obo me badu wadoa selama, te Sadokgo hani pąde sę yalio. Semaia aga te giliga pedalubo badu Godigo tempel be sunumi tonalubo wasman bidi bidai.  
\v 30 Tama Hanania te Selemiago ogwa dali te Hanun, te Salapgo ogwa te a olama, me badu nogo kibisa deli wali ogwa da, tama te gasa hani meba daligo te obo sę ebo te Semaiago hani sę ebo pąde sę yai. Te augwali sigo te si sogo wagisu te obo sę yai. Te Mesulam, te Berekiago ogwa, dali te meba hani daligo te obo wadolama, te Hanania me Hanun te hani sigo sę ebo pąde te sę yali. Augwaligo te obo banis nigibo sę yali, te Mesulamgo be pąde digi te sę yalio.   
\p
\v 31 Malkia te gasa haniani nai dabe te golgo nigibo bidi da. Te Malkia dali, te meba hani daligo te obo sę te Hanungo hani sę ebo pąde te sę yai. Augwaligo te obo ma geselebo sę ela pali, te Godigo tempel be tonalubo sę bidi dabego beba usu nama, tama te bisnis bidi dabego sę ebo madiba usu nigi pai. Te be te Godigo tempel be sunumi pąde elaluali, te nogi augwaligo te Tonalubo Wasman Bidigo Sunumi da wali, tama te obo nogo habu sugunani ugwadu elaluai dao.  
\v 32 Tama te golgo nai nigibo bidi dabe dali te bisnis sę te masigi obo nogo habu badu gagalama ebo madi, me te Sipsipgo Sunumi elalubo madi, teba te obo sę ela pelama, usu nigi pai dao.   
\c 4  
\s1 Nehemiago te boi bidi dabe aiyaba elaluai  
\p
\v 1 Te Senbalatgo te da Judago te moni masigi obo dodolobo sę po odolama, tama agai wado po dwai mu weyu, tama dabolo te posobo po wai,  
\v 2 te aga hai namu dabego gedude te po weyu, tama te Samaria ami bidi dabe gedude me wai. Agai te tama po wai, “Te bomo isąwai dwai hobedagi yai bidi hani te Judago mena sę yainogo ebawe? Augwaligo homugo te augwaligo te taun bagulabo obo ma geselaiba homu eyu eba, agawe? Te augwaligo homugo te Godiba ofa ebogo te be sę ebo te deli sogo naga silaiba homu eyu eba, agawe? Augwaligo te homu eyu, te augwaligo te tomode kakali tibi holali te siago ulali masigi dabe selama te obo banis nigibaso te wiegi yai yaiba weyu eba, agawe?” te po wali.   
\p
\v 3 Te bidi Tobia te Senbalatgo te po wabo sogo te pąde dolaluali. Tama Tobia te tiwai po wali, “Tagalao, te augwa nigimainu ilao. Tiali goli, augwaligo te obo banis bomonama me dulalubaso, usu me egobeo. Te uni yowi me deli te daiba ugwadu samanobaso da, te obo banis tigidali gisigasa dulaibao,” wai.   
\p
\v 4 Bidi mebago te Senbalat me Tobia sigo wali po enabolo wagasali. Tama tibaso, eno e tama gedu haluasa po wali, “God, nago te bidi dabego dabolo wali posobo po nago odalio. Augwaligo da begela dolali, tama tibaso eno homugo te augwaba digi ma dolomainu ilao, tama nago te augwaligo doado bage gasa bidi dabego wi sagasomainu ilama, tama augwali selasa pomainu ilao.  
\v 5 Nago te augwaligo yali dwai sę yali kolesaga me sela sągio, tama nago augwaligo sęgę me sela sągio, magi baso meni, augwaligo te da doloyu, te posobo po hauwa mu te da te masigi obo sę ebo bidi dabebolo walio.”   
\p
\v 6 Tialima, eno te tama gedu haluasa po olama, tama dago sę bomo mu yali, tama te sesabi me isąbadi tama te obo banis ugwaba holama, te tomoba dąį mu usu nigulali. Tama te deli tigi poai te dago siminabo obo banis te usu tama elalualio.   
\p
\v 7 Tialima, Senbalat de Tobia si dali, te Arap dabe, me Amon, me Asdot dabego te tiwai po odali, dago te Jerusalem masigi obo sę bugagia mu ebo wali, tama dago te obo banis te alua degasa dulali te tigidali badu ma nigali po wai. Tama augwaligo te wado po umabo mu olama,  
\v 8 tama augwaligo te da dali hwįagasabo po minama, tama dago sę dolaibao po wai.  
\v 9 Tiali goli, dago te Godiba gedu haluasa po wabo sę eyu, te Godigo da tau somainu yai, tama te giligade me hulide te bidi meba munama, te boi bidi tonalumainu yali, tiyu te augwaligo da dolagasidali weyu tiai dao.  
\v 10 Te meba Judago te tiwai balia po me deli te augwa sę ebo sogo wali balia po te tiwai dao,  
\b  
\q1 “Te dago tolobo doado bage sęgę mu ebao.  
\q1 Tama dago tigi nogo sągą  
\q3 te bomo kimi mu meni ebao.  
\q1 Te kakali masigi hauwa mu dao.  
\q1 Megi da, dago te obo banis sę silabo  
\q3 usu meni dao,” wali.   
\b  
\p
\v 11 Te da boi bidi dabego augwa haside digi te tiwai po obao, “Te da geme geme naga duala sesa pelama, te Juda dabeba pedelaibao. Tama te augwaligo da me sugobeo. Tialima, polo tama te dago augwali tigidali ela munama, tama te augwaligo augwa yali sę me simanogobeo,” wali.  
\v 12 Te boi bidi dabego te tama tiwai wali, tiali goli te da Juda meba te augwali pąde bidali, tama sesemane sogo augwali aselama, te boi bidi dabego da dolabo po wali po te dabolo wagasu yai.  
\v 13 Tama tibaso, eno te sesemone ene me, bainat hwą ge me, enesigi me, te sę ebo tigidali bidiba dobolama mani. Tama eno te augwa hani deli deli bage augwa deli kanemeba deliba sisinigi pelama, bidao po wali. Tama eno augwaliba weyu, te augwali pelama, te obo banis silisąwani te tigidali badu dolalua peyu, te no munalu, tama augwaligo te boi bidi dabe dali boi hwįabo sisi elaluao po wali.  
\v 14 Eno suali, te we bidi wi elama, haliga sęgę elaluai, tama tibaso eno te tobolu bidi dabeba, me ofisa dabeba, me te tigidali we bidiba te tama po wali, “Dage te boi bidi dabede wi me igio,” wali. “Dagego te sę ebo te bugagia homu kone palao, Genuai Bidi te bomai mu da, tama tiyu te tigidali bidi agade wi ebo dao. Tama tialima, odao. Dagego te bomo elama hwįbaso da, teda te dagego abagi dabe me, we wai puluba me, te duga be dabe, te doado bage me, te me dolisąma bugagia elalueibao,” wali.   
\p
\v 15 Nosali te boi bidi dabego te augwaligo yaibao wali sę dabe po te dago odali po te augwaligo koneai. Tama te augwaligo koneama, te Godigo augwaligo sunumi palibaso, tama te augwaligo da me dolobe homu yai. Tialima, te da tigidali Judago te moni masigi obo nigibo gagalama, ma yai dao.  
\v 16 Te sogo dago te sę ebo kolesaga hasegelali. Tama eno te obo banis sę ebo hani tigidaliba weyu, tama meba augwaligo te sę edubadi, tama mebago tonalu, no munaluao wali. Te no munalubo bidi dabego te sesemone ene, me sabele, me enesigi tolalu, tama augwaligo te hwįbode gudubo kapago nigai ugwa bulali. Tama te tobolu bidi dabego te Juda we bidi tigidali tau mu selama,  
\v 17 te obo nigibo sę yai. Tama te bidi dabego te obo nigibo nai dabe tolasa pabo sogo, augwaligo te nai te me badu nogo badu toloyu, tama te gasa nogo badu te hwįabo nai tolaluali.  
\v 18 Tama te sę ebo bidi tigidaligo te bainat hwą ge te augwa kukulude gedelai. Tama te biugel bu wabo sę elalubo bidigo te boi bidi dabe asobo sogo, aga te ena pąde bidai.  
\v 19 Tialima, eno te we bidi dabeba, me te ofisa dabebolo, me te augwa tobolu bidi dabeba te po walali, “Obo banis te bobobage mu elalubao, tama dagego te hauwa pedai badu sę ebao, tama dage hani deli deli te gasa sę ebo hanide digibulu digibulu bidibao,” wai.  
\v 20 “Tama tialima, te boi bidi dabe pedalubo side, te biugel gela weyu, te bu dagego odobaso da, teda boi bidi asalio olama, dage te ena pąba sisinagasao. Tama God, te dago Genuai Bidigo, te dago boi bidi dabe dali hwįaibao.”   
\p
\v 21 Eno te po augwaliba mawai, tama te kigamu digi mu te tigidali side tama te hǫ dabe te dagalude ula eboba usu nigi pabo sogode, te da hani mebago te obo nigibo sę ebadi, te gasa hani mebago te sesemone ene tolalu te tonaluai dao.  
\v 22 Te sogo eno te tigidali bidiba dali, te augwa sę bidi dabe dali, te tiwai po walali, “Te dagego sę te hulide simanobo sogo, dagego te Jerusalem me taga soyu, duga buluba pigio. Menio. Dage te moni obo tomode bidao. Tama te giligade dago sę eyu, te hulide tonalubo dao,” wali.  
\v 23 Tialima, da tigidaligo te tama tialio. Tama te godege pibo side te dago gudubo ugwa me hasegelibeo. Menio. Tama ena dali, te eno hai namu dabe me, te sę bidi dabe me, te ami bidi dabego dali, te ena tigidali side tonaluali, da tigidaligo te sę ebo side gudali ugwa te dago tigide me gudalubadi, tama da piali. Tama tigidali side dago te ene me sesemone tolaluali, tama da te węba pabo sogo me, te dago me tagalobeo. Tama tiyu, sesemane sogo te dago hwįabo sisi elaluai dao.   
\c 5  
\s1 Nehemiago te Juda dabego sęgę dodolai  
\p
\v 1 Nosali te Juda we bidi hauwa mu te doado bage sǫą pobaso, tama augwaligo te augwa abagi hasi dabe dali wado po wabo sę yali.  
\v 2 Mebago te tama po wai, “Dago te wai puluba hauwa elalubao, tama da nai sǫą palio. Tama dago te nai tusiąbaso da, te da isaibao,” wai.  
\v 3 Tama meba umabogo te tama po wai, “Dago te dena abagi dabe meba dali te nai abelabo mone negeli sai. Tama augwaligo te dabolo waliyu, te dago te negeli sali wei ponesiąbaso da, teda augwaligo te dago gi dabe me be me te negeli wei ponoyu saibao,” wai.  
\v 4 Tama hani mebago te tiwai po wali, “Dago me te dena abagi dabede te negeli selama, te kingba takis maiabo mone sai. Tama dago te negeli wei ponesiąbaso da, teda te abagi dabego te dago tǫ me wain gi saibao,” wai.  
\v 5 “Te dena abagi dabego digi, tama augwaligo te sęgę dabolo mawai. Te augwaligo homugo te augwaligo da aiyaba elalueiba homu eba, agawe? Menio. Da tigidali te deli tigi tiwai dao. Tama dago wai puluba dabe me te augwaligo wai puluba tiwai si elalubao. Tiali goli, dago te gasa sunumi me elalubeo. Tama tiyu, dago wai dabe te gasa bidi dabego olo sę ebo bidi pedelama, te dago mone somainu me egobeo. Tama te bidi dabego te dago wegimani selama, te augwaligo olo sę ebo we dabe pedalumainu ilali. Tama me te augwaligo dago tǫ me wain gi sali, tama dago te wai dabe ma sabo sę deli me elalubeo,” augwaligo te po wai.   
\p
\v 6 Eno te we bidi dabego po wabo odobo sogo, eno haliga sębę mu ebaso,  
\v 7 tama eno te sęgę dodolabo sunumi bugagia homu kone palali. Eno koneani, te polalubo bidi dabe me, te ofisa dabego dali, te dwai kolesaga yali, tama eno augwali sisinagasomainu i olama, tama eno augwaliba po bomo elama, augwali dali wali, “Dagego te duga ama hasi dabe aiyaba elaluama, tama augwaliba dwai sę ilalio,” wali.  
\p Tama eno tigidali we bidi augwali sisinagasomainu i olama, te sęgęde po miainu yai. \x * \xo 5:7 \xt Sai 22:25; Prs 25:35-37; Bom 23:19-20\x*  
\v 8 Augwali sisinagasai madi, te eno augwaliba te tiwai po wali, “Dago te dena abagi dabe te Israel hani isąwai bidi dabego abelama, te olo sę ebo bidi bidibaso, te dena ma sainu te mone sisinibo sę dene mu ebo da. Tiali goli, megi dagego te duga abagi dabeba dwai sę iliyu, tama augwaligo te dugago digi te olo sę ebo bidi bidibo tiwai emainu ilali.” Eno te tama po obaso, te polalubo bidi dabe te pedauwali pania selama, te augwaligo po wei ponabo usu meni yai dao.  
\v 9 Tama eno po wadoa selama, te tama po wali, “Dagego kolesaga dolo me ebeo. Dage te God dologoba pelama, tama doloba pai kolesaga sesemane yao. Te dagego te tiwai ebaso da, teda te dago boi bidi dabego me te dago ebo kolesagaba te posobo po me wagobeo.  
\v 10 Ena dali, ena hani me, te eno sę bidi dabego me, te we bidi dabego dade te negeli selama, te nai me mone somainu ilali. Tama da tigidaligo te negeli augwaligo wei ponomainu te profit me somainu i me olamu dao.  
\v 11 Dago augwaligo negeli yali tagalao. Tama augwaligo te mone me wit, ma wain, me te oliv wel, te augwaligo negeli sali nai dabe te wei me ponogobeo. Tama te me wain gi me, oliv gi me, be me dagego te we bidide sali doado bage dabe, te dagego augwaliba ma maiąo, tama dagego te negelide ugwadu manani profit mone me te ma maiąo,” te po wai dao.   
\p
\v 12 Tialima, te polalubo bidi dabego po wei ponoyu, te tama po wai, “Te dago nago wali po gilama te tiwai yaibao. Tama dago te abagi dabego nai dabe te augwaba ma menama, tama dago augwaliba i weyu, te negeli wei ponao po me wagobeo,” wali. Tama tialima, eno te pris dabe asao olama, i wali. Tama eno po bomo elama, te polalubo bidi dabeba weyu, te augwaligo te pris dabego gedude te po dąų waliyu, te augwaligo wali po te bugagia wali pomainu yai. Tialima, augwaligo te po dąų walali.  
\v 13 Tialima, megi da, eno te kukulu tiwai elama gudali te nami ugwa pedai peda sabo side tama te elaluali nai dabe memenege elama, te augwali tulaluali. Tama eno te tobolu bidi dabe augwaliba te tama po wali, “Te dagego te megi tama dąų walali po te dagego wali me pisąbaso da, teda te Godigo dage me memenege ilama, tama te dagego be dabe me tigidali nai te dobola selama, tama dage e nami ugwa tiwai olo mu elalueibao.” Tama tigidaligo te tiwai po wai, “Dwagi yai dao. Godigo te tiwai emainao.” Tama augwaligo te Genuai Bidi nogi ugwaba sali. Tama augwa beba ma pelabo sogo, augwaligo te augwa dąų walali po wali pai dao.   
\s1 Nehemiago aga digi aga naga tau sabo homu me ebeo  
\p
\v 14 Ena te Juda gavman polalubo bidi bidibadi, te kibu be nogo si olama, sągągo si bidali, te Artaserksis te kibu be bidi sese deli te king bidibo side gagalasa, te aga kibu be te 32 yia, teba usu nagasalio. Tama te kibu be dabede ena dali, te eno hani daligo te kingo te namba wan gavman te polalubo bidiba mabo te mone selama, te eno nai me abela tubeo.  
\v 15 Te ena gavman bidi bidisiąbadi, te provinsde polasa gavman bidali bidi dabe, augwaligo te we bidi dabeba genuai sęgę mawai. Augwaligo te we bidi dabede te nai me, wain me, te mone 400 kina anoma elama siyu yali. Tama me te gavman bidigo sę bidi dabego te we bidi dabe augwali aiyaba elalu yai. Tiali goli, ena te God dologode bidiyu, tede homugo kone palobaso, tama tiyu, eno te tiwai kolesaga me ebeo.  
\v 16 Tama eno te tǫ me deli me abelibeo. Menio. Eno te sę bomo mu eyu, tama te Jerusalem masigi obo nigibo bidi dabe tau sali. Tama eno bede sę ebo sę bidi augwaligo me, augwaligo te obo banis nigibo bidi dabe tau sai dao.   
\p
\v 17 Tigidali side te bidi sese hauwa te 150 we bidi eno beba nai tuagasali. Te augwali tobolu bidi dabe dali, te Juda olo we bidi dali, te nai tuagasiyu idualio. Tama te gasa bulu tǫ pedai we bidi dabego da suagasobo sogo da, teda augwali me te eno bede nai tuai dao.  
\v 18 Eno te tiwai po te nai ulubo bidi dabebolo wai, te tigidali nai ulubo sogo augwaligo te bulmakau omai me deli elama ulali, tama te wiegi yai sipsip te a naga olama, me nogo deli uluyu yai, tama te ba kakaruk te hauwa te we bidi dabego tumainu ulali. Tama te nogo si nogo si side te nai ulubo bidi dabego te we bidi dabego tuabo wain wę hauwa mu siąo wali. Te Juda we bidide genuai sęgę elalubo eno koneani, tama tiyu, te kingo enabolo te nai abelabo mone te we bidide sao po obaso, te eno me sabeo. Menio. Eno te nai ena monego digi abelali.   
\p
\v 19 “God, eno nageba hanalu obao, te nago homugo eno te we bidi dabe tau siyu, te wiegi yai sę dabe ebaso, tama nago enade wiegi yai sę ilao,” po walio.   
\c 6  
\s1 Bidi mebago te Nehemia dolabo po miai  
\p
\v 1 Te Senbalat, me Tobia, me Gesem, me te dago boi bidi mebago te po odali, te dago te moni masigi obo ma geselebo sę tigidali silali po odali, tiali goli dago te sunumi musiąbadi dao.  
\v 2 Tama te Senbalat me Gesem sigo te po enabolo ola tolali, tama enabolo hanalu, te augwali si dali te bulu me deliba sisinaibao wali, te odogo bulu nogi Onoba sisinibo da wali. Tiali goli, eno koneai, te augwaligo ena muma sabo po olama, te augwaligo ena dolainogo wabo homu yai.  
\v 3 Tama eno augwali siba te tiwai po te bidi mebago wagi pomainu tagala palali, “Nehemia te genuai sę me deli ebao, tama tiyu agai te sę taga soyu, dage suagasabo usu egobeo. Te aga asobaso da, te sę bidi dabego te sę me egobeo.” Eno te po ola tolali.  
\v 4 Tiali goli, te bidi sigo te wali po tiwai naga te ena dali me si me si sogo wali, tama tigidali sogo eno te po wei ponoyu, te wali po tiwai naga augwali dali wali.   
\p
\v 5 Nosali Senbalatgo enaba po ma ola tolali. Tama te sogo agai asęani pas te halusiąwai. Agai te aga sę bidi me delibolo menama, te enaba tolali.  
\v 6 Te pasde wali po te tiwai, “Ena Senbalat, eno Gesemgo te tiwai po wabo odai, te da pąde bidibo we bidi hani tomode te po me deli sabilibo odali. Tama te sabilibo po te tiwai wai, nage dali, te gasa Juda dabe daligo te king dologode munu ma bidigobeo olama, tama dagego hwįnama, te duga gavman tedali hodolainu yali. Tama te pagede naga dagego te obo banis ma geselebao. Tama nago me te naga digi te king pedalumainu ebo dao.  
\v 7 Tama nago te profet mebabolo walama, augwaligo te tiwai po te Jerusalem tomode pusumainogo yai, ‘Megi da, te da Juda dabe dena digi te king elalubao.’ Eno te sabilibo po page bugagia koneainu ebao, tama tiyu, eno homugo dadi si deliba sisinama, te po dodolainu homu ebao, tiyu king aga digi nagede augwaligo te wali po odabuo,” Senbalatgo te tiwai po asęna tolali.   
\p
\v 8 Tiali goli, eno agai pas wei ponoyu, te tiwai po wali, “Nago te asęani po tigidali, te mu po menio. Te naga digi te po naga homude hodolama wali dao.” Eno te pas asęnama, agaba tolai dao.  
\v 9 Eno koneani, Senbalatgo hani dabe daligo te pogo da wi ilabo po wali homu yai. Augwaligo homugo dago te sę tagalama, tama dago te obo banis sę silisąmainu homu yali. Tiali goli, eno Godiba gedu haluasa po e tiwai wali, “God, te augwaligo wabo po tagalao. Eno homugo nago ena te sę ebode dąų walomainu ebao,” wali.   
\p
\v 10 Nosali ena pelama, te Semaia sugi pali, te Delaiago ogwa, tama wąį nǫų Mehetabelgo wai dao, magi baso meni, aga te gasi elalu, te aga be taga pabo homu isąwani. Tama agai enabolo te tiwai po wali, “Dadi si te Godigo tempel beba peyu, tama te Tedali Gasagi Yai Be Habu tomoba geme duala sigi pinao,” wali. “Tama dago te be sunumi dabe paliaibao, magi baso meni, te boi bidi dabe te megi hulide aselama, nage elaibao,” wali.   
\p
\v 11 Tiali goli, eno agabolo te tiwai po wei ponani, “Ena te wi ebo bidi dabe tiwai elama, tama te wi peyu, te geme me duala sigi pogobeo. Tama ena te wi pelama, te Godigo be tomoba geme me duala sigi pogobeo. Mu menio,” wali.  
\v 12 Nosali te pode eno bugagia homu kone palama, te tiwai eno koneani, Godigo te tama po te Semaiabolo me wabeo. Menio. Eno koneani, Tobia de Senbalat sigo aga abelama, te po ena dali omainogo yali homu yai.  
\v 13 Augwali sigo homugo te Semaiago pogo ena wi ilama, tama ena te Tedali Gasagi Yai Be Habu tomoba pomainu elama, tama te habu selai kolesagade ena sęgę somainu yali. Tama tibaso, te augwaligo eno nogi dolama, tama ena aiyaba elalueinu yai.  
\v 14 Tama tibaso, eno gedu haluasa po wali, “God, nago megi te Tobia de Senbalat sigo enade yali kolesagade homu koneama, te augwali sibolo dwai dene mao. Tama nago te profet we nogi Noadia me homugo koneyu, te gasa profet dabego me te ena wi iliyu, te haniani po wabo dao,” wali.   
\s1 Te masigi obo geselebo sę silali  
\p
\v 15 Te dago te Jerusalem moni masigi obo ma geselali, te 52 dei tama usu nama yali, tama te 25 dei, te polua sogo nogi Elul usu nama, te obo ma geselebo sę silai dao.  
\v 16 Tialima, te dago boi bidi dabe te da pąde bidibo bulu tǫ pedai bidi dabego, dago te obo nigila silali po odali, tama augwaligo koneani, te Godigo digi da tau sobaso, dago te sę yali da homu yai. Tama augwa koneai, te augwaligo dwai kolesaga da dali yainu yai, te geda munama, tama te augwaligo nogi aiyaba tulaluai dao. Tama tibaso, augwali wi yai.   
\p
\v 17-18 Te da Juda dabe tobolu bidi hauwa te Jerusalemde bidalu, tama augwaligo te Tobia tau sabo po dąų walali, magi baso meni, te da bidi mebago wąį ma base dao. Tobiago te Sekaniago wegi sai, te Arago ogwa dao. Tama me Johanan, te Tobiago ogwago, te Mesulamgo wegi sali, te Berekiago ogwa da. Tama dago te obo banis sę geselebo sogo, te tobolu bidi dabe dali, te Tobiago me, te pas hauwa ugwaba, edaba toloduai dao.  
\v 19 Tama te tobolu bidi dabego enabolo te Tobiago wiegi yai kolesaga ebo po pusagasai. Tama augwaligo te Tobiabolo te eno ebo sę po tigidali pusigi peyu yai. Tiali goli, Tobiago te pas hauwa enaba tolali, te ena wi ilibo pas tolai dao.   
\c 7  
\nb
\v 1 Megi da, te masigi obo sę silibaso, tama dago te nigali sunumi dabe te augwa muabo pesagede muani, tama dago te Jerusalem sunumi dabe tonaluabo bidi dabeba te sę mawai. Tama me dago te Godigo nogi ugwaba siyu, te balia po wabo bidi dabeba me te sę mani, tama dago te Livai hani bidi dabeba te sę mawai.  
\v 2 Tama eno te Jerusalem tonaluabo bidi si nigilai. Bidi me deli te Hanani, eno ama da, tama gasa bidi me te nogi Hanania da, te Jerusalemde ami bidi dabego polalubo ofisa bidi da. Hanania aga doloba pai bidi mu, tama te God dologode mu bidai. Agai kolesagago te gasa bidi dabego kolesaga aiyaba elaluai dao.  
\v 3 Tama eno augwali siba te tiwai po wai, “Dage sigo te tonalubo bidi dabego te Jerusalem obo banis sunumi dabe te kigamu digi mu tama te sunumi damainu me ilamuo,” wali. “Augwaligo te giliga bolo ugwaba pedaligi pomainu tonaluyu bolo yao. Tama te tonalubo bidi dabego sę te pio siligi pabode, augwaligo te sunumi paliama, tama te bobage ain munama, te dąų walao. Tama dage sigo te Jerusalem bidi meba nigilama, te tonalubo bidi dabe pedalumainu yao. Tama dage sigo te gasa bidi dabe nigilama, te augwa be pąde digi tonalua pomainu yao.” Eno te po wai.   
\s1 Te Israel dabe te Jerusalemba ma asali bidi namba e dao  
\r (Esr 2:1-70)  
\p
\v 4 Te Jerusalem te genuai taun mu da, tiali goli te we bidi hauwa tede me bidisąwai, tama be me hauwa me elalusiąwai dao.  
\v 5 Tama Godigo ena te homu kolesaga mayu, te we bidi dabe dali, te polalubo bidi dabe me, te ofisa dabe dali, me te tigidali we bidi wai puluba augwaligo nogi te buku me delide asęmainu yai. Eno tama tiainogo homu ebo sogo, tama eno te polasa te Babilon tagalama, te Juda Provinsba ma asali bidi hani dabego nogi elalubo buku me deli suali.  
\v 6 Te kibu be hauwa polobadu te king Nebukatnesargo te Israel we bidi hauwa selama, te Babilonba kalabus mugi pali. Tama nosali hauwa we bidi te Babilon tagalama, tama te Jerusalemba ma asali, te gasa Juda tǫ badu me asai. Tama augwali te augwa wąį nǫų dabego taun tǫba bidagasai dao.  
\v 7 Te augwali te Babilon tagalama ma asali sogo, te augwali odasa asiyu, te polasa asali bidi dabe nogi e tiwai, Serubabel, me Josua, Nehemia, Asaria, Ramia, Nahamani, Mordekai, me Bilsan, Misperet, Bikvai, Nehum, me Bana dao.  
\p Te Israel hani dabego nogi te augwali Jerusalemba me Juda Provinsba ma asai. Tama te bidi hani dabego bidi dabego namba e tiwai dao.  
\v 8 Te Paros hani bidi namba te 2,172 da,  
\v 9 tama te Sefatia hani bidi 372 elaluai,  
\v 10 tama te Ara hani bidi 652 elaluali.  
\v 11 Te Pahatmoap hani augwali te Jesua me Joap hani wąį nǫų dabe da, tama augwali hani bidi te 2,818 bidi elaluai.  
\v 12 Te Elam hani bidi te 1,254 elaluai,  
\v 13 tama te Satu hani bidi te 845 elaluali,  
\v 14 tama te Sakai hani te 760 bidi elaluai.  
\v 15 Te Binui hani te 648 bidi elaluai,  
\v 16 te Bebai hani bidi 628 bidai,  
\v 17 te Asgat hani bidi 2,322 elaluai.  
\v 18 Te Adonikam bidi hani 667 elaluai,  
\v 19 tama Bikvai hani bidi 2,067 bidai,  
\v 20 tama te Adin bidi hani 655 elaluali.  
\v 21 Te Ater bidi hani, te aga gasa nogi me Hesekia, te bidi elaluai,  
\v 22 tama te Hasum bidi hani 328 elaluai,  
\v 23 te Besai hani bidi 324 elaluali.  
\v 24 Te Harip hani 112 bidi bidali,  
\v 25 tama te Gibeon bidi hani 95 bidai dao.   
\p
\v 26 E da te Judago taun nogi hauwa elaluai. Te taun dabe te augwa wąį nǫų te Judaba ma asali bidi dabego taun page bulu dao. Te Betlehem taun me Netofa taun side bidali bidi dabego namba te 188 elaluai,  
\v 27 tama te Anatot taun bidi 128 elaluai,  
\v 28 tama te Bet Asmavet taun bidi te 42 bidali.  
\v 29 Te Kiriat Jearim taun bidi dabe, me Kefira taun, me Berot taun, te bidi 743 elaluali.  
\v 30 Tama te taun Rama me Geba bidi dabe 621 elaluai,  
\v 31 tama te taun Mikmas bidi te 122 bidai.  
\v 32 Te Betel taun me Aį taun bidi te 123 bidalio,  
\v 33 tama te Namba 2 Nebo taun bidi te 52 elaluai.  
\v 34 Tama te Namba 2 Elam taun bidi dabe te 1,254 bidali,  
\v 35 tama te Harim taun bidi 320 bidai,  
\v 36 tama te Jeriko taun bidi 345 bidali.  
\v 37 Te Lot taun bidi, me Hadit taun, me Ono taun bidi dabe te 721 bidai,  
\v 38 tama te Sena taun bidi 3,930 bidai dao.   
\p
\v 39 Te pris hani dabego nogi dali, te Jerusalemba ma asali pris dabego namba dali, te e tiwai dao. Te Jedaia hani, te augwa wąį nǫų te Jesua da, te bidi 973 bidai.  
\v 40 Imer hanigo 1,052 bidi elaluai,  
\v 41 te Pasur hani 1,247 bidai,  
\v 42 tama te Harim hani bidi 1,017 bidai dao.   
\p
\v 43 Te Livai hani dabego nogi dali, te Jerusalemba ma asali Livai dabego namba dali si, e tiwai dao. Jesua me Katmiel hani bidi 74 elaluai. Te bidi sigo wąį nǫų bidi te Hodavia dao.   
\p
\v 44 Te Godigo tempel bede musik wabo bidi dabe, augwali te Asap hani te augwali 148 bidi bidali.  
\v 45 Te Godigo tempel be tonalubo bidi dabe augwali hani te Salum me Ater, Talmon, Akup, Hatita, me Sobai. Te augwali 138 bidi dao.  
\v 46 Te Godigo tempel bede sę ebo sę bidi dabe te Jerusalemba ma asali, augwali te hani Siha, me Hasufa, me Tabaot dao,  
\v 47 me Keros, me Sia, me Padon,  
\v 48 me Lebana, me Hagaba, me Salmai,  
\v 49 te me Hanan, me Gidel, me Gahar,  
\v 50 Reaia, Resin, Nekoda,  
\v 51 me Gasam, Usa, Pasea,  
\v 52 me Besai, Meunim, Nefusesim,  
\v 53 me Bakbuk, Hakufa, Harhur,  
\v 54 me Baslut, Mehida, Harsa,  
\v 55 me Barkos, Sisera, Tema,  
\v 56 me Nesia, Hatifa, te tama hani bidi dabe dao.   
\p
\v 57 Te gasa hani dabe augwali te Solomongo sę ebo bidi nogi yali, augwali me te augwa page buluba ma asai. Augwali te bage dabego hani dabe, Sotai, Soferet, Perida,  
\v 58 me Jala, Darkon, me Gidel,  
\v 59 me Sefatia, me Hatil, Pokeret Hasebaim, me Emon da.  
\v 60 Te Godigo tempel bede sę ebo bidi dabe me, te Solomongo sę bidi dabe dali, te augwa page buluba ma asali bidi, te 392 dao.   
\p
\v 61-62 Te Delaia, Tobia, Nekoda, te hani bidi dabe augwaligo namba te 642 da. Augwali te taun Telmela, me Telharsa, me Kerup, me Adon, Imer bidi dabe da wali. Tiali goli, te bidi selago te augwa wąį nǫųgo nogi te augwa kuna konesiąwai elaluai. Tama tibaso, augwaligo te Israel tobolu bidi dabebolo te augwa hani page bidi dabe nogi bugagia ola maiabo sunumi meni yai, augwali te Israel haniwe, ma meniwe, te konebeo.   
\p
\v 63-64 Te pris hani mebago te augwa wąį nǫų dabe te tigidali pris hani nogi elalubo bukude gegebo sę yali. Tiali goli, augwaligo te augwali nogi elalubo me subeo. Tama tiyu, augwali te pris mu dawe, ma meni, te bugagia ola maiabo sunumi meni yai. Te bidi dabe augwali nogi e tiwai, Hobaia, Hakos, Barsilai. Te polobadu te Barsilai hani wąį nǫų bidigo te gasa Barsilai hanigo te Gileat taun wegi me deli sai. Tama te wąį nǫųgo te aga ayago wąįgo nogi sabi poai. Te hani selago te augwa wąį nǫųgo nogi gegesąwai, tama tibaso te tobolu bidi dabego homugo te augwai olo bidi tiwai da homu elama, tama augwaligo te augwali pris bidi bidimainu me iligobeo wai dao.  
\v 65 Te Juda polalubo gavman bidigo te bidi dabego te Godiba ofa ebo nai tugio olama, habu selali. Agai te po wai, augwa te polalubo pris me pedalubaso da, teda te polalubo prisgo te Godigo homu konea sabo masigi si selama, tama Godigo te bidi dabe te pris bidi sę sogowe, ma meni egowe, te po wabo odaibao wai. \x * \xo 7:65 \xt Sai 28:30; Bom 33:8\x*   
\p
\v 66 Te ma asali tigidali Israel bidi dabego namba e dao, te 42,360 dao.  
\v 67 Tama te sę ebo bidi me sę ebo we augwaligo namba e tiwai, 7,337 dao. Tama te musik elibo koneai bidi dabego namba te 245 elaluai dao.  
\v 68-69 Tama te hos dabe 736, te kamel dabe 435, te donki dabe 6,720, tama te hapkas hos me donki dabe namba te 245 elaluai dao.   
\p
\v 70-72 Te we bidi hauwago mone me doado bage te Godigo tempel be ma sę emainu tau sabo nai mawai. Tama polaluali gavman bidigo te gol mawai, te aga sęgę usu te 8 kilogram yali, tama 50 dis pou gol, me 530 te prisgo mubo wiegi yai ugwa mawai. Tama te deli deli hanigo tobolu bidigo te 168 kilogram sęgę elalubo gol mayu, te 1,250 kilogram silva me mawai. Te gasa we bidi dabego te 168 kilogram sęgę elalubo gol, me 140 sęgę elalubo silva, me 67 te pris dabego gudubo ugwa me mayu yai dao.   
\p
\v 73 Te pris dabe me Livai dabe, te tonalubo bidi me sę bidi, te Godigo tempel bede sę bidi dabe me, te musik wabo bidi dabe, me te gasa Israel we bidi dabe, tigidali pelama, te augwa taun dabeba digi te Juda Provins tǫ pedaiba bidada palio. Tama te polua 7 wabo polua pedalubo sogode, te tigidali we bidi augwa taunba bidada pela silalio. \x * \xo 7:73 \xt 1 Sto 9:2; Neh 11:3\x*   
\c 8  
\ms1 Esrago te we bidigo lotu wabo ma gagalobode augwali tau sali  
\mr (Dąį 8–9)  
\s1 Esrago te Godigo bomai po te we bidi dabeba neda mawai  
\p
\v 1-2 Te polua 7 wagi soabode, te dei deli wabo side, te we bidi dabe aselama, te Jerusalemba sisinagasali, te sisinibo pesage te Wę Sabo Sunumi pąba sisinani. Augwaligo te Esraba hanalu wai, te pris te Godigo bomai po page koneai bidigo, te bomai pogo buku sela asao wali. Te bomai po Godigo te Israel dabeba te Mosesgo nogode mawai. Tialima, Esrago te buku selama, tama te sisinibo pesageba sela pali.  
\v 3 Tama aga dolugulama, te bomai po te we bidiba te kigamu mu nedada pidubadi, te belo giliga tomo yagasobadi, te nai tubo siba usu nigi pai. Tama augwa te Esrago poba olo bugagia muai. Tama te olo bugagia munama, te po selama, koneabo usu ebo wai dabe, augwali me te sisinibo madide bidai dao.   
\p
\v 4 Hasia bolo augwali te bǫ nami selama, te Esrago te bomai po dolalu nedabo pesage me deli nigilai dao. Tama te Esra te pesagede dolaluai. Tama tede agai dolo nogo badu te bidi meba dolaluali, augwali nogi te tiwai, Matitia, Sema, Anaia, me Uria, Hilkia, me Masea. Tama te gasa bidi meba te pobase nogo badu dolaluali, augwa nogi te tiwai, Pedaia, Misael, me Malkia, Hasum, Hasbadana, Sekaraia, me Mesulam dao.   
\p
\v 5 Te Esra dolugulumainu nigali pesage, te dwasianu ugwanu elaluai. Tama aga te bomai po neda mawainu dolugulubo sogo, te tigidali we bidigo aga suabo usu yali. Tama agai te buku dagabo augwaligo subo sogo, te tigidali we bidi dolugulai dao.  
\v 6 Tama Esrago te po wai, “Te Genuai Bidi nogi ugwaba sao. Agai te bomai God mu dao.” Tama tigidali we bidigo augwa nogo ugwaba selama, te tiwai po wali, “Mu da, mu dao,” wai. Tama tigidaligo kidu sugunu gulama, tama augwa tobolu tǫba basi gulama, tama augwa te Genuai Bidiba lotu po wai dao.   
\p
\v 7 Nosali te we bidi hodaluama, ma dologulalio. Tama te Esrago te bomai po augwaliba neda mabo sogo, te Livai mebago te bomai po page pusa mawai. Te Livai dabego nogi te tiwai, Jesua, Bani, Serebia, me Jamin, me Akup, me Sabetai, Hodia, me Masea, Kelita, Asaria, Josabat, me Hanan, Pelaia dao.  
\v 8 Esrago te bomai po te Hibru pogo nedali, tama te Livai dabego te Aram pogo begelama, te we bidi dabego bugagia konemainu yai. Tama te Livai dabego te bomai po page augwaliba pusali.   
\p
\v 9 Te we bidi dabego te bomai pogo wabo po odolama, tama augwali haliga sęgę mu elama, tama augwa gela walio. Tama te polaluali gavman bidi Nehemia, me pris Esra, tama te Livai dabego te we bidi augwaliba te tiwai po wali, “Megi te dago Genuai Bidi Godigo te genuai bodolu muai side dao. Tama tiyu, dagego te homu dene eyu, gela weyu me igio,” wali.  
\v 10 “Tagaliąo, dage te duga beba pelama, te genuai nai daa tugi piąo. Tama dagego te meba nai me, wain me, te nai sǫą pali we bidi dabe maiąo. Megi te Genuai Bidigo side digi da, tama tiyu dagego haliga sęgę me igimio. Menio. Dagego wiegi yai homu pemene te Genuai Bidiba elama, tama agai dage bomo mawaibao,” wali.  
\v 11 Tama te Livai dabe te we bidi augwali tomode biliyu, tama te po augwaliba mayu, te augwali haliga dua nagame elama bidimainu ilali. Augwaligo te tama po augwaliba wali, “Te haliga sęgę ebo tagalao. Megi te Godigo genuai bodolu side me da, tama dagego homu dene me igimio,” wali.  
\v 12 Tama te we bidi augwa beba pelama, tama augwa homu wiegi yai pemene elama, te nai me wę tuyu yai. Tama augwaligo te nai dage te nai sǫą pali we bidi mawai. Megi da, augwaligo te Godigo po page bugagia koneama, tama tiyu augwaligo te sę dabe yai dao.   
\s1 Te osogo tama bulaluyu bidibo bede bidibo genuai sogo dabe  
\p
\v 13 Te nosali me sogo be posobode te deli deli hanigo tobolu bidi dali, te pris me Livai dabego dali, te Esra sugi pali. Augwaligo homugo agai te bomai pogo po page te augwali bugagia ola momainu yai,  
\v 14 Godigo te bomai po te Israel dabebolo te Mosesgo nogode mawai. Tama augwaligo po me deli te bomai pode elalubo suai. Te po e tiwai, te polua a naga olama, me badu si wabo te genuai side pedalubo sogo, te Israel we bidi te osogo bulaluyu bidibo bede bidiąo wai.  
\v 15 Tama augwaligo te tigidali Jerusalem we bidiba me te gasa taunba po ola tolali. Augwaligo te tama po wali, “Dage te bulu duba pelama, te oliv ni nologo me, yabe me, te yogo ma sebedi yabe dabe me sao, tama te gasa yabe hauwa elalubo tobage ni yabe dabe seselama, te osogo bidabo be sę yao. Dagego te bomai pode wali po wali pelama, tama te sę dabe iyąo,” wai. \x * \xo 8:15 \xt Prs 23:33-36, 39-43; Bom 16:13-15\x*  
\v 16 Tialima, te we bidi pelama, te ni nologo sigi pelama, tama sela aselama, te osogo bidabo be dabe sę yani. Mebago te augwa be ugwadu daide digi sę yani, tama mebago te augwa be obo tomode sę yani, te augwa be mesalode, tama mebago te Godigo tempel be obo banis bagulali madi sę yai, tama mebago te Wę Sabo Madi Sunumi pąde te bidi sisinibo madi pąde sę yani, tama te Efraim Sunumi pąde elalubo sisinibo madi sę yani.  
\v 17 Te Babilon tagalama ma asali we bidi tigidali, augwaligo te osogo bidabo be sęnama bidali. Te polobadu mu te Nungo ogwa Josua bidali sogo, te Israel dabego te tobage osogo bidabo be sę yani. Tiali goli, te nosali Josua isai madi, augwaligo te kolesaga tagalama, bidada asali, te megi te sogoba usu nagasai. Tama megi da, te Israel dabego te kolesaga ma hodolama yali. Tama tiyu, tigidali we bidigo homu wiegi yai pemene mu yai dao.   
\p
\v 18 Augwaligo te genuai side te lotu wabo sogo te a naga olama, me badu si, te tama sogo bodolu muani, tama te tigidali side Esrago te bomai po elalubo bukude te Godigo bomai po meba te we bidiba neda mawai. Tama te 7 wabo side tigidali sisinama, tama te genuai side sia sabo lotu po walio, te bomai pode wali po tiwai gilama yai dao.   
\c 9  
\s1 Te we bidi dabego augwa sęgę po pusali  
\p
\v 1 Tama te poluago digi, te dei 24 wabode, te Israel dabe sisinagasai. Tama augwa te nai osogo tubo habu selali, te augwa sęgęde te homu dene ebo tiwai te augwa Godiba ola mayu tiali. Tama augwa te homu dene ebo ugwa dabe gudama, tama augwa toboluba te hogomu dabe muani, te augwa homu dene ola mabo tiwai ilali.  
\v 2 Te we bidi augwaligo te Israel hani isąwai hani bidi dali kisasa bilali kolesaga te tagalali. Tama augwali dolalu, te augwa sęgę me, te augwa wąį nǫų dabego sęgę me pusali.  
\v 3 Tama te sela auade te bidi mebago te augwa Genuai Bidi Godigo bomai po te augwaliba neda mobaso, tama te we bidi dabego olo bugagia muai. Tama nosali, augwaligo te augwa sęgę pusulama, tama Godiba lotu ma udubadi, te sela aua usu nama bidali.  
\v 4 Te Livai meba te po pusubo pesageba dolugulama, tama augwa Genuai Bidi Godiba i bomo elama weyu, tama augwa agaba gedu haluasa po wai. Te Livai dabego nogi te tiwai, Jesua, me Bani, me Katmiel, me Sebania, me Buni, me Serebia, tama gasa Bani, me Kenani dao.  
\v 5 Tama nosali te Livai mebago te we bidi dabeba po weyu, te augwaligo Godiba lotu ma waiąo po wai. Te Livai dabego nogi e tiwai, Jesua, Katmiel, me Bani, me Hasapnea, me Serebia, Hodia, Sebania, me Petahia. Augwaligo te tama po wali, “Dage dolugulama, te dena Genuai Bidi God nogi ugwaba siąo Sesemane bidada pabo sogo sesemane dago te aga nogi ugwaba sao,” wai dao.  
\s1 Sęgę sela sąmainogo gedu haluasa wabo po  
\p Tama augwa te gedu haluasa po wali, “Genuai Bidi, dago te nago genuai nogi ugwaba sainu ebao. Tiali goli, dago te wiegi yai pemene ebo homu te olo nai tiwai ebao. Nago nogi te genuai mu da, tama tiyu dago konebao, dago pemene ebo te nago gedude usu meni ebao.  
\v 6 Nagaduba deli naga nage Genuai Bidi da. Nago te dagalu me, hǫ dabe me, tǫ me, tamu ąį, te tigidali elalubo nai augwali nigai. Tama nago te tigidali naiba te bidabo ula mabo dao. Tama te tigidali dagalude bidibo ensel mobo bidi dabego nageba kidu sugunama, lotu po wabo dao.  
\v 7 God, Genuai Bidi, nago naga te Abram dąį ilama, tama aga te Babilon Provinsde, te taun Ur, tede selama, tama aga odasa asali. Tama nago agai nogi hasegelama, tama te nogi Abraham agaba mawai dao. \x * \xo 9:7 \xt Gag 12:1; 17:5\x*  
\v 8 Nago agai homu haliga tomode suali, te nage naga wali pabo homu bomo yai, tama tibaso nago aga dali te bomai po dąų walali. Tama nago agabolo te po dąų waliyu, te Kenan dabego tǫ, me Hit dabego tǫ, me Amor dabego tǫ, me te Peres dabego tǫ, me Jebus dabego tǫ, me te Girgas dabego tǫ, te maiabo po dąų wai. Tama nago te po wali, te tǫ te aga wąį nǫų dabego tǫ pedalaibao wali. Tama nago naga te dąų wali po me togobeo, magi baso meni, nago kolesaga te doloba pai mu elalubo dao.” \x * \xo 9:8 \xt Gag 15:18-21\x*   
\p
\v 9 “Tama nosali te dago wąį nǫų dabe te Isipde bidali sogo, te Isip dabego augwaliba genuai sęgę mabo nago suali. Tama nosali augwaligo te Isip tagalama, te tamu ąį Retsi teba sabalu, te augwali tau sao olama, te nageba gela wabo nago odalio. \x * \xo 9:9 \xt Sai 3:7; 14:10-12\x*  
\v 10 Nago te Isip king me, ofisa dabe me, te Isip we bidi dali, te augwali aiyaba elaluainu te nago gasagi yai tedali bomai sę me yai. Nago tama tiali, magi baso meni, te Isip dabego naga we bidi dabeba te dwai sę mu ebo nago suai. Te sogo nago naga bomo te tigidali we bidiba ola mawai. Tama augwaligo nageba genuai nogi mena mena asali, te megi e sogoba usu nagasobao. \x * \xo 9:10 \xt Sai 7:8–12:32\x*  
\v 11 Nago po obaso, tama te tamu ąį si badu buga selama, tama tǫ wa pai nigilai, tama te we bidi dabe te tomodu peyu, te u badu pedaiba sabolali. Tama te Isip ami dabego nago we bidi pobeasa asali, tiali goli nago te tamu ąįgo te Isip dabe augwali mesega somainu elama, tama augwali te węba masigi tiwai dulama, te augwali ela silai dao. \x * \xo 9:11 \xt Sai 14:21-29; 15:4-5\x*  
\v 12 Te giligade te ula elalubo sogo nage te pǫ me deli tomode bidiyu, tama te Israel dabe augwali asobo badu te nage polasa pali, tama augwaligo nage wali asali. Tama te be hulia sabode, nage te sia tomode bidiyu, tama nago ulago te augwali pabo sunumi ola mawai dao. \x * \xo 9:12 \xt Sai 13:21-22\x*  
\v 13 Tama augwali te Sainai bulu duba sabalubo sogo, nage te dagalude bidiyu, tama augwaliba po miai. Tama nage aiyaba dulama, nage te bulu dude bidai. Tama nago augwaliba te wiegi yai doloba pai bomai po mawai dao.  
\v 14 Tama nago augwaliba te po waliyu, te Sabat genuai side te bodolu nageba mubo tiwai nigilao po wai. Tama nago te haniani bomai po tigidali te dago wąį nǫų dabeba mayu, te naga sę bidi Moses nogoba muai dao.” \x * \xo 9:14 \xt Sai 19:18–23:33\x*   
\p
\v 15 “Te augwali nasi ebo sogo, te nago te tubo nai dagaludu dulumainu ilama, te augwali tumainogo yali. Tama augwali te wę nogone ebo side, nago te masigide wę pedalumainu elama, te augwali tumainogo ilali. Tama nago augwaliba weyu te augwali mawaibao olama, te po dąų wali tǫ te sagameo wai.” \x * \xo 9:15 \xt Sai 16:4-15; 17:1-7; Bom 1:21\x*   
\p
\v 16 “Tiali goli, dago wąį nǫų dabego te hagoma mu eyu, tama augwa tobolu te dila pelama, tama augwaligo te nago po sela sąwani.  
\v 17 Tama augwaligo nago po wali pabo hagela yali. Te nago augwali tau selama, te bomai sę genuai tigidali yali te augwaligo homu konesiąyu gegeda palali. Tama augwali hagoma mu elama, tama augwa te tobolu bidi me deli nigilama, te augwa kalabus sę yali Isip tǫba ma odasa pomainu yali. Tiali goli, God, nago da tǫde we bidigo sęgę sela sąbo dao. Tama nago da godolo geninama eyu, tama daba wiegi yai sę mu ebo da. Tama nago haliga sębę polo me egobeo. Menio. Nago te olo mu tau sabo wiegi yai homu kolesaga te umabo me elalu, tama tiyu nago dago wąį nǫų dabe tudiba me mubeo.” \x * \xo 9:17 \xt Sai 34:6; Nam 14:1-4, 18; Bom 1:26-33\x*   
\p
\v 18 “Te augwali Sainaide bidali sogo, augwaligo te gol selama, tama te bulmakau piksa nigilama, tama augwaligo te po weyu, te bulmakau augwa god da olama, tama agai augwali te Isipde selama odasa asai da, walio. Tama te kolesagade te augwaligo nago nogi posoyu dolai dao. \x * \xo 9:18 \xt Sai 32:1-4\x*  
\v 19 Augwaligo te tama tiwai yali, tiali goli nago augwali te tǫ wa pai bulude me tagalobe, magi baso meni, nago te olo tau sabo wiegi yai homu kolesaga mu augwaliba yai. Nago te augwali giligaba sunumi ola mabo pǫ te dagala me sabeo, tama nago te augwali be hulia saidu pobadi, te sunumi ola mani sia ula, te me dagala sabeo.  
\v 20 Nago te naga wiegi yai Mobo Noma Bidi te augwaliba mayu, te augwali ola momainogo yai. Tama nago te tubo nai mana me wę augwali menama, te augwali te nai me wę dali tumainu yai.  
\v 21 Augwali te kibu be bidi sese si te tǫ wa pai bulude bilidubadi yali, tama te kibu be tigidalide te nago augwali nai madu bugagia tonaludali. Tama augwaligo gudali ugwa dabe me te me pisila pisąma, tama augwali sągą me dene elama me dabeo.” \x * \xo 9:21 \xt Bom 8:2-4\x*   
\p
\v 22 “Nago te dago wąį nǫų dabego te king Sihon te Hesbon bulu tǫ bidi dali, me tama te king Ok te Basan tǫ pedai bidi si dali hwįmainu ilali. Tama augwaligo te augwali si aiyaba elaluama, tama augwali sigo tǫ salio. Tama te tǫ te augwa genuai tǫ pedai mu pedelai dao. \x * \xo 9:22 \xt Nam 21:21-35\x*  
\v 23 Tama nago augwaliba te wai dabe hauwa mawai, te dagalude elalubo hǫ dabe tiwai pedelali. Tama nago te augwaligo te boi bidi dabe aiyaba elalumainu ilama, tama nago te augwa bulali wąį nǫų dabeba mawainu te po dąų walali tǫ somainogo yai dao. \x * \xo 9:23 \xt Gag 15:5; 22:17; Jos 3:14-17\x*  
\v 24 Tama augwaligo te Kenan hani bidi dabe dali te boi hwįani sogo, nago digi te Kenan dabe aiyaba elalumainu ilama, tama te bulali wąį nǫų dabego te tǫ somainu yali. Tama augwaligo te hani aiyaba elalubo sogo, tama nago te augwa homu kolesaga wali pomainu elama, tama te we bidi dabeba dene mabo sę dwai ilali, tama te Kenan tǫ king dabeba me te dwai mu yai dao. \x * \xo 9:24 \xt Jos 11:23\x*  
\v 25 Tama dago bulali wąį nǫų dabego te boi hwįnama, tama te bomai obo banis elalubo taun siyu, tama te ili hauwa elalubo tǫ sobadi, te doado bage hauwa pągąnalubo be dabe me sali. Tama augwali te bidigo nigai dwasianu sigi ąį dabe sali, tama te wain gi, me oliv ni gi sobadi, tama te wiegi yai nai hauwa elalubo tobage ni dabe me salio. Tama augwali te bulu tǫ pedaiba bidigi pali sogo, augwa te wiegi yai nai hauwa tuyu, te augwa tigi genuai nisali, tama nago wiegi yai nai tigidali augwaliba mawai baso, te augwali homu wiegi yai pemene mu yai dao.” \x * \xo 9:25 \xt Bom 6:10-11\x*   
\p
\v 26 “Tiali goli, te we bidi augwali te hagoma mu elama, tama augwaligo nago po sela sąwai. Tama nago bomo yai poba augwaligo tudi ola mawai. Tama nago te profet bidi dabe augwaliba tagala palali, te augwaligo te nago bomo yai po augwaliba magasu asali, te augwali homu begelama, nageba ma asomainu yai. Tiali goli, augwaligo te profet dabe ela muani. Tama hauwa sogo augwaligo te tiwai kolesaga yali, tama augwaligo nago nogi mu dolai dao. \x * \xo 9:26 \xt Tob 2:11-16\x*  
\v 27 Tama tibaso, nago augwali gogolama sula tagaliyu, te boi bidi dabego augwaliba boi hwįagasomainu elama, tama augwali aiyaba elaluama, tama augwaliba dwai sę ilali. Tiali goli, nosali te bulali wąį nǫų dabego nageba hanalu, te augwali tau sao olama, i wali. Tama nage te dagalude bidiyu, tama augwaligo gela wabo nago odali, tama nago te olo tau sabo wiegi yai kolesaga augwaliba umabo mu elama, tama nago te bidi meba augwaliba tagala palama, te boi bidi dabe sela sąmainogo yai dao.”   
\p
\v 28 “Tiali goli, te augwali bugagia ma dugulalu bidibo sogo, polo tama augwaligo dwai sę ebo kolesaga ma ebaso, tama nago te boi bidi dabego augwali aiyaba elalumainu elama, te augwali tonalubo sę yai. Tama te sogo me augwali homu ma begelama, tama augwaligo nageba hanalu, te augwali tau sao wai. Tama nage te dagalude bidiyu, te augwaligo i wabo odali. Hauwa sogo augwaligo te tiwai kolesaga naga iduali, tiali goli nago wiegi yai homugo olo mu tau sabo kolesaga augwaliba iduali, tama tigidali sogo nago augwali te boi bidi dabego nogode ma dobola sidu geai dao.”   
\p
\v 29 “Nago po bomo elama augwaliba weyu, te nago bomai po wali pomainu yali. Tiali goli, augwaligo hagoma eyu, tama augwaligo nago bomo yai poba tudi ola mawai. Augwaligo koneani, augwaligo te bomo yai po wali pobaso da, te augwali bugagia bidimainu yai. Tiali goli, augwaligo tobolu te dila pelama, tama augwaligo tabi haliga te dagana sali, tama tiyu te augwaligo nago po wali me pisąwai dao. \x * \xo 9:29 \xt Prs 18:5\x*  
\v 30 Te kibu be hauwa nago dua dua tau sabo sę augwaliba eyu, tama augwali homu begeliąo wai. Te nago Mobo Bidigo te po te profet dabeba mawai, tiali goli te wąį nǫų dabego te po odisąwai. Tama tibaso, nago augwali te gasa bulu tǫ pedai bidi dabego nogoba mawai dao. \x * \xo 9:30 \xt 2 Kin 17:13-18; 2 Sto 36:15-16\x*  
\v 31 Tiali goli, nago olo tau sabo wiegi yai homu kolesaga te genuai mu elalubo, tama tiyu nago augwali tudiba me musąma, tama nago augwali mu dolomainu me ebeo. God, nage te olo mu tau sabo wiegi yai homu kolesaga me homu dene ebo page bidi mu da, tama nago da wei eyu, godolo mu ebo dao.”   
\p
\v 32 “Dago God, nago genuai nogi me genuai bomo elalubao. Da tigidali te nago bomo dologode bidibao. Tigidali sogo nago te naga dąų walali bomai po wali pelama, tama nago dabolo te olo mu tau sabo wiegi yai kolesaga ebao. Megi da te genuai sęgę tolai, tama tiyu dago homugo nago da homu koneama tau sao. Polobadu te Asiria king dabego te dago kingba, me tobolu bidi dabeba, me pris, me profet dabeba dwai sę eyu, te dago wąį nǫų dabeba me te tiwai yai. Tama te sęgę dade elalua asidubadi, te megi e sogoba usu nagasobao. \x * \xo 9:32 \xt 2 Kin 15:19, 29; 17:3-6; Esr 4:2, 10\x*  
\v 33 Dago te dwai sę ebo kolesaga ebaso, tama nago te daba dene ilibo sę yali. Tama nago te kolesaga te dolo ebao. Sesemane sogo nago te naga dąų walali bomai po wali peyu, tama nago da tau sali, tiali goli dago hagoma eyu, tama dwai kolesaga haniani ebo dao.”   
\p
\v 34 “Mu tama, te dago wąį nǫų dabe, me king dabe, me tobolu bidi dabe, me pris dabe, augwaligo te nago bomo yai po wali me pisąwai. Te nago bomo yai po augwaliba weyu, te nago po tigidali augwaligo wali pomainu yali, tiali goli te augwaligo te po odobo hagela homu eyu yai dao.  
\v 35 Te dago king bidali sogo, nago te wąį nǫų dabeba wiegi yai sę mu eyu, tama augwaliba wiegi yai nai mawai. Augwali te genuai tǫ pedaide bidalu, tama te tǫ ili umabo hauwa elalubo genuai tǫde bidai. Tiali goli, augwaligo te homu kone palobeo. Menio. Augwaligo te dwai sęgę sabo sę naga iduali, tama augwali homu begelama, te nageba ma asobeo.  
\v 36 Megi da te wiegi yai tǫde ma bidibao, te wiegi yai tǫ nago te da bulali wąį nǫų dabeba mawai. Te wiegi yai ili elalu, tama dago tede nai hauwa siyu yali. Tiali goli, da te gasa hanigo olo sę ebo bidi tiwai bidibo dao.  
\v 37 Dago te dwai sęgę sabo sę yalio, tama tibaso nago te gasa bulu tǫ pedai kingo da tonalumainu yai. Tama augwaligo te dago tǫde pedalubo nai tigidali siyu ebo dao. Te kingo te po obaso da, teda dago dali te dago tonalubo nai kibu dabego me te agai homu wali naga pabo dao. Tama tiyu, dago sęgę genuai mu elalubo dao,” augwaligo te po wali.   
\ms1 Nehemiago te Jerusalem hanu me te Juda bage tonaluali  
\mr (Dąį 10–13)  
\s1 Te we bidi augwaligo te Godigo bomai po wali pabo po minama, dąų walali  
\p
\v 38 Te gedu haluasa po ola silama, da tigidali Israel we bidi da tigidaligo te daba pedalubo sęgęde homugo kone palama, tama dago homu deli elama, tama tialima te Godigo bomo yai po dago wali mu pabo homu eyu, tama te da dąų wabo bomai po me deli asęani. Tama te dago pris dabe dali, te Livai dabe, me tobolu bidi dabe, augwali aselama, tama te kontrak asęani pode augwa dąį ilama, tama te po bomo elama dąų walai dao.   
\c 10  
\nb
\v 1 Hasia polalubo bidigo nogi asęani, te polalubo gavman bidi Nehemia, te Hakaliago ogwa dao. Tama te Nehemia tudi badu nosali, Sedekaia aselama, te nogi asęagasali.  
\v 2 Te Sedekaia tudi badu nosali te pris dabe aselama, nogi asęagasali. Augwali nogi e tama tiwai, Seraia, Asaria, Jeremaia,  
\v 3 me Pasur, Amaria, Malkia,  
\v 4 me Hatus, Sebania, Maluk,  
\v 5 me Harim, Meremot, Obadia,  
\v 6 me Daniel, Gineton, Baruk,  
\v 7 me Mesulam, Abiya, Mijamin,  
\v 8 me Masia, Bilgai, me Semaia dao.   
\p
\v 9 Te pris dabe tudi badu nosali te Livai dabego nogi asęagasali. Augwali nogi e tama tiwai, Jesua, te Asaniago ogwa, tama Binui, te Henadat hani, te Katmiel,  
\v 10 tama Sebania, Hodia, Kelita, Pelaia, Hanan,  
\v 11 me Mika, Rehop, Hasabia,  
\v 12 me Sakur, Serebia, me gasa Sebania,  
\v 13 me Hodia, Bani, me Beninu, te tama dao.   
\p
\v 14 Te Livai dabe tudi badu nosali, te hetman dabego nogi asęagasali. Augwali nogi e tiwai, Paros, Pahatmoap, Elam, me Satu, Bani,  
\v 15 me Buni, Asgat, me Bebai,  
\v 16 me Adoniya, Bikvai, me Adin,  
\v 17 me Ater, Hesekia, me Asur,  
\v 18 me Hodia, me Hasum, Besai,  
\v 19 me Harip, Anatot, Nebai,  
\v 20 me Makpias, Mesulam, me Hesir,  
\v 21 me Mesesabel, me Sadok, Jadua,  
\v 22 me Pelatia, Hanan, Anaia,  
\v 23 me Hosea, Hanania, Hasup,  
\v 24 me Halohes, Pilha, Sobek,  
\v 25 me Rehum, Hasapna, me Masea,  
\v 26 me Ahiya, me gasa Hanan, me Anan,  
\v 27 me Maluk, Harim, me Bana, te tama dao.   
\s1 Te deli homu elama dąų walali po  
\p
\v 28 “Da Israel we bidi dabe dago te po dąų walobo kontrak po asębao. Da te pris dabe, me Livai dabe te Godigo tempel be tonalubo bidi, tama te Godigo bede sę ebo bidi dabe me, te Godigo bede musik wabo bidi dabe, tama te tigidali gasa we bidi dabe me, da tigidaligo te Godigo bomai po wali pelama, tama dago te bulu badu bidi dabe, te Israel hani isąwai bidi, te dago tǫ pedaide bidalubo bidi dali kisasa me biligobeo. Da te dena we dabe dali, tama te dago wai dabego dali me tama te poba olo bugagia munama, te koneainu yali,  
\v 29 da te dena deli kaneme dabe dali, me te dago tobolu bidi dabe dali sisinagaselama, dago bomo yai po dąų waliyu, te dago Godigo bomai po sesemane sogo wali paibao wai. Te bomo yai po te Godigo te dago wąį nǫų dabeba mayu, te aga sę bidi Mosesgo nogoba mawai. Dago Genuai Bidigo te tama po wai, dago te bomo yai po dabe te bugagia wali peyu, te agai po tigidali me wali pao wali. Tama tibaso, dago te po bomai weyu, te dago wali paibao wali, tama dago te bomai po togolobaso da, teda te Godigo da dolomainao.”   
\p
\v 30 “Tama dago te po weyu, te dago bulu tǫ pedai pąde bidalubo Israel hani isąwai bage dago te hani dali we si mu egobeo po wai dao.” \x * \xo 10:30 \xt Sai 34:16; Bom 7:3\x*   
\p
\v 31 “Tama te bulu badu hani bidi dabego te nai wit ma gasa tobage nai te Sabat sogode, ma gasa genuai lotu wabo sogode sesebaso da, teda dago me abeligobeo, wali.”  
\p “Tama te kibu be a naga olama, me badu nogi si, te wabo kibu bede dago te gide nai me bulugobeo, wali. Tama dago te kibu bede te tigidali negeli elalubo siminaibao.” \x * \xo 10:31 \xt Sai 23:10-11; Prs 25:1-7; Bom 15:1-2\x*   
\p
\v 32 “Tama te tigidali kibu bede te da deli deligo te dwasianu pedai dage silva mone menama, te Godigo bede muabo nai dabe abelimainu yaibao wali. \x * \xo 10:32 \xt Sai 30:11-16\x*  
\v 33 Te silvago te bret abelama, te tebolde te God gedude muaibao, tama te tigidali side ofa iduabo wit abelainu yaibao, tama te tigidali side siaba ulama domainu yabo kibu sipsip dabe abelainu yaibao, tama te Sabat side te ofa yabo nai dabe me, tama me te gesi polua side, me te tigidali gasa genuai side te ofa yabo nai dabe abelainu yaibao. Tama silvago te da Israel dabego sęgę sela sąyu ofa yabo nai dabe abelaibao, tama te gasa ofa, me te gasa tigidali nai te Godigo be tomode sę yabo nai dabe dao.”   
\p
\v 34 “Tama da tigidali we bidi, me te pris dabe, me Livai dabe, dago te bomo yai pogo po wali pelama, tama dago te satu gagali elama, te mena mena hani nigilama, te sia sigi pelama, te selasa asiyu, te dena Genuai Bidi te Godiba sela asali ofa dabe ulabo sia sigi pomainu yaibao.”   
\p
\v 35 “Tama te tigidali kibu bede te dago te polasa inayani nai selama, te ni nedu du dabe polasa tau yali selama, te Godiba selasa asaibao, wai.” \x * \xo 10:35 \xt Sai 23:19; 34:26; Bom 26:2\x*   
\p
\v 36 “Tama da tigidaligo te dago gomunai wai te ogwa dabe selama, te pris dabeba odasa paibao, te Godigo beba, tama augwali dolo te Godigo da olama, sa muaibao. Tama dago te tigidali omai bulmakau wai, me sipsip, me meme selasa pelama, te augwali dolo sa munama, Godiba mawaibao. Dago te tiwai ebo te Godigo bomai pode wali po gilama yaibao.” \x * \xo 10:36 \xt Sai 13:2\x*   
\p
\v 37 “Tama te tigidali kibu bede dago te hasia nigali bret nigabo plaua dage selama, te dago gide te polasa tau elama inayani naigo te agaga pali wit dao, tama te wain, me oliv wel, tama te tedali tobage ni wai dabe selama, tama dago te nai dabe te pris dabebolo te Godigo beba mawaibao.” \x * \xo 10:37 \xt Nam 18:21\x*  
\p “Tama te Livai dabego te dago gide holali nai dabe me deli te nogo si walide sagasainu ebo sogo da, teda dago augwaliba mawaibao.  
\v 38 Tama te Aron hanigo pris dabe te augwa Livai dabe dali aselama, te nai dage me deli sagasaibao wai. Tama te Livai dabego te nai te nogo si pedai badu dobolama, tama me dage pedai deli te Godigo nai mubo be habuba mueibao wai dao. \x * \xo 10:38 \xt Nam 18:26\x*  
\v 39 Magi baso meni, te da we bidi me te Livai dabego te hasia podolali tigidali nai te wit me, wain me, te oliv wel me sela aselama, te Godigo nai mubo be habuba muaibao. Tama te dis pou me te be habude munaluai. Tama te Godigo be habu nigilali, tede te pris dabego be habu me, te tonalubo bidi dabego be habu me, te Godigo bede musik wabo bidi dabego be habu me elalua paibao.”  
\p “Tama dago te Godigo be tonalubo sę munu me tagalogobeo. Te dąų wali po te ola silali dao.” Te po da, te dąų wali po mu dao.   
\c 11  
\s1 Te Jerusalem taunde bidali we bidigo nogi dabe  
\p
\v 1 Te sogo te Israel tobolu bidi dabe te Jerusalemde bidali, tama te meba we bidi augwali gasa hanu dabede bidada pali. Tama augwaligo satu gagali yali, te augwa nogo si hani tomode deli deli hani te Jerusalemba bidigi pabo bage sa mumainogo, te Godigo hanu. Tama te gasa hani meba augwali te gasa meba hanu dabede bidada pali.  
\v 2 Tiali goli, te meba we bidi hanigo te augwa homu kolesaga wali pelama, te Jerusalemba bidigi pali, tama te Israel dabego wiegi yai homu pemene augwaliba yalio.  
\v 3 Te gasa Israel hani dabe me, pris dabe me, Livai dabe me, te Godigo bede sę ebo bidi dabe me, tama te king Solomongo sę bidi wąį nǫų hani dabe, augwali te augwa taunde me tǫde digi bidaluai.  
\p Te Juda tǫ provins pedai genuai bidi dabe te Jerusalemba bidagasali bidi dabego nogi e tiwai dao.  
\v 4 Te Juda hanigo tobolu bidi si elaluai, Ataia me Masea. Ataia aga te Usiago ogwa, tama aga bulali wąį nǫų te Sekaraia da. Te Ataia aga gasa me bulali bidi wąį nǫų te tiwai, Amaria, Sefatia, me Mahalalel. Augwali te bulali wąį nǫų bidi Peres da, te Judago ogwa dao. \x * \xo 11:4 \xt Neh 7:73\x*   
\p
\v 5 Masea te Barukgo ogwa da, tama te bulali wąį nǫų bidi da, te Kolhose. Te Maseago gasa bulali wąį nǫų dabe te tiwai, Hasaia, Adaia, me Joiarip, me Sekaraia. Augwali te wąį nǫų Selago wai dabe da, te Judago gasa ogwa me dao.   
\p
\v 6 Te Peresgo hani 468 te bomai bidi naga te Jerusalemde bidai dao.   
\p
\v 7 Te Benjamin hanide te tobolu bidi dabe elaluali, Salu, me Gabai, me Salai, me Joel, me Juda. Salu te Mesulamgo ogwa, tama Joetgo ogwago wai te agai wąį nǫų da. Te Salugo gasa bulali wąį nǫų dabe te tiwai elaluali, Pedaia, me Kolaia, Masea, Itiel, me Jesaia dao.  
\v 8 Tama Gabai de Salai si te Salugo hai name da wali. Tama te Benjamingo we bidi hani tigidali te Jerusalemde bidali namba te tiwai, te 928 dao.  
\v 9 Tama Joel, te Sikrigo ogwa da, aga te Benjamingo hanide polalubo bidi bidali. Tama Juda, te Hasenuago ogwa te Benjamin hani da, aga te si wali Jerusalem pedai tobolu bidi dao.  
\v 10 Te Jerusalemde bidali pris dabego tobolu bidi dabe nogi te tiwai elaluali, Jedaia, te Joiaripgo ogwa, me Jakin dao.  
\v 11 Tama tobolu bidi Seraia, aga te Hilkiago ogwa, tama wąį nǫų Mesulam. Tama te Seraiago wąį nǫų dabe te tiwai, Sadok, me Meraiot, me polalubo pris Ahitup dao.  
\v 12 Te hani bidi te 882 te Godigo tempel be tomode sę yai dao.  
\p Tobolu bidi Adaia aga te Jerohamgo ogwa, tama te wąį nǫų Pelalia da. Tama aga wąį dabe te tiwai, Amsi, me Sekaraia, me Pasur, me Malkia dao.  
\v 13 Te hanide te 242 bidi elaluai.  
\p Tobolu bidi Amasai aga te Asarelgo ogwa, te wąį nǫų Asai. Tama agai wąį nǫų dabe te tiwai, Mesilemot me Imer dao.  
\v 14 Te hanigo te bomai ami bidi te 128 elaluai. Tama te ami bidi dabe augwa tobolu bidi, te Sapdiel, tama aga te genuai nogi elalubo hani sibi bidi me deli dao.   
\p
\v 15 Te Livai hani tobolu bidi dabe te Jerusalemde bidali te tiwai. Polalubo bidi Semaia aga te Hasupgo ogwa, tama te wąį nǫų Asrikam. Tama te Semaiago wąį nǫų bidi si, te Hasabia me Buni dao.  
\v 16 Tama tobolu bidi Sabetai me Josabat sigo te sę dabe te Livai dabego te Godigo tempel be bulu badu ebaso tonaluai.  
\v 17 Tobolu bidi Matania te Mikago ogwa, tama agai wąį te Sapdi. Aga te Asap hani da. Te Godigo bede lotu po wabo sogo, Matania te bidi dabego gedu haluasa po weyu, Godiba usu da wabo tonalubo polaluali bidi dao. Tama tobolu bidi Bakbukiago te Matania te sę ebo tau sali. Tobolu bidi Apda aga te Samuago ogwa, tama aga wąį nǫų Galal. Aga te Jedutungo hani dao.  
\v 18 Te Godigo taun Jerusalemde bidali Livai dabego namba e tiwai, te 284 dao.  
\v 19 Te Godigo tempel be sunumi tonalu, te Jerusalemde bidali tobolu bidi sigo nogi e tiwai, Akup me Talmon. Te hanigo namba te 172 dao.   
\p
\v 20 Te gasa Israel we bidi dabe, me gasa pris, me Livai dabe te Juda gasa taunde bidali, te augwa tǫde digi tama bidai.  
\v 21 Tama te Godigo tempel bede sę ebo bidi dabe te Ofelde bidali, te Jerusalem me badu, tama te bidi Siha me Gispa sigo augwali te sę ebo tonaluai dao.   
\p
\v 22 Usi te Banigo ogwa da, tama wąį nǫų Hasabiago wai. Tama agai te Livai dabe te Jerusalemde tonalu bidali. Usi te Asap hani, tama aga wąį si, me Matania me Mika da. Te Asap hanigo naga te Godigo tempel be tomode te musik elibo sę tonaluai dao.  
\v 23 Kingo te bomo yai po me deli muyu, te mena mena hanigo te tigidali side Godigo be tomode musik elibo sę tonaluabo bidi nidigili pai dao.  
\v 24 Tama Petahia te Mesesabelgo ogwa, te Sera hani sibi, te Juda hani dao. Tama Petahia te Persia bidali te Israel dabe augwa pedauwali deliba munama, te king bidibolo po omainu ebo bidi bidai dao.   
\s1 Te Juda me Benjamin hani sigo taun dabe  
\p
\v 25 Te we bidi hauwa te augwa taun tǫ pąde bidaluai. Te Juda hani bidi meba te taun selade bidali, Kiriat Arba, me Dibon, me Jekapsel, tama te taun pąde elalubo bulu dabede bidalio.  
\v 26 Tama meba te taun Jesua, me Molada, me Betpelet,  
\v 27 me Hasarsual, me Berseba, tama me te Berseba pąde elalubo bulu dabede bidali.  
\v 28 Tama meba te Siklakde bidali, me te Mekonade, me te Mekona pąde elalubo bulu dabede bidai.  
\v 29 Tama meba te Enrimonde bidiyu, me te Sora, me Jarmutde bidai,  
\v 30 me te Sanoa, me Adulam, me te taun pąde elalubo bulu dabede bidai. Tama meba te taun Lakisde bidai, tama augwa te Lakis pąde elalubo tǫde bidai. Tama meba te taun Asekade bidali, tama te pąde elalubo bulu dabede bidai. Tama te Juda dabe te Bersebade bidali, te saut badu, te Berseba tomode elalubo taun tomode bidai, tama te odogo tǫ bulu te Hinom te not badu me bidai dao.   
\p
\v 31 Te Benjamin we bidi hani meba te Geba taun, me Mikmas, me Aija, me Betel, tede bidali, me te Betel taun pąde elalubo bulu dabede bidai.  
\v 32 Tama meba te taun Anatot, me Nop, me Ananiade bidai,  
\v 33 me te taun Hasor, me Rama, me Gitaim,  
\v 34 me te taun Hadit, me Seboim, me Nebalat, te taunde bidali,  
\v 35 te Lot me Ono, te bidi dabego te haniani nai nigibo te odogo tǫ bulu pesage dao.  
\v 36 Tama te tobolu bidi dabego te Juda dabe dali bidibo Livai dabeba te po waliyu, te mebago augwa bidibo page bulu tagalama, te Benjamingo hani dali bidigi piąo wali, tama meba teba bidigi palio.   
\c 12  
\s1 Te pris dabe me Livai dabe augwali nogi dao  
\p
\v 1 Te hauwa pris me Livai augwaligo te Babilon tagalama, tama te Serubabel dali te Jerusalemba ma asali, te Sealtielgo ogwa, tama polalubo pris Josua me asai. Te pris dabego nogi te tiwai, Seraia, me Jeremaia, me Esra,  
\v 2 me Amaria, me Maluk, me Hatus,  
\v 3 me Sekania, me Rehum, me Meremot,  
\v 4 me Ido, Ginetoi, Abiya,  
\v 5 me Mijamin, me Madia, me Bilga,  
\v 6 me Semaia, me Joiarip, me Jedaia,  
\v 7 me Salu, Amok, Hilkia, me Jedaia. Te polalubo pris Josua bidali sogo, te pris dabe augwali te pris dabego tobolu bidi bidai dao.   
\p
\v 8-9 Te Livai dabe ma asali bidi dabego nogi e tiwai, Jesua, me Binui, me Katmiel, me Serebia, me Juda, me Matania, me Bakbukia, me Uno da. Matania te aga ama dabe daligo te Godiba buba hwi weyu, te usu da olama, balia po wabo bidi dabe tonaluai. Tama te hanigo te balia wali dage silibo si da, teda te Bakbukia me Uno dali te augwa si ama dabe, augwaligo te gasa balia po dage wei ponoyu, weyu yai dao.   
\s1 Te polalubo pris Josuago wąį nǫų hani dabe  
\p
\v 10 Josua te Joiakimgo aya, tama Joiakim te Eliasipgo aya, tama Eliasip te Joiadago aya dao.  
\v 11 Tama Joiada te Jonatango aya, tama Jonatan te Jaduago aya dao.   
\s1 Te pris hanigo tobolu bidi dabe  
\p
\v 12 Te Joiakim te pris dabego polalubo bidi bidali sogo, te pris dabe te augwa hanigo digi tobolu bidi bidali, Meraia te Seraia hanigo tobolu bidi, tama te Hanania aga te Jeremaia hanigo tobolu bidi bidai,  
\v 13 tama Mesulam aga te Esrago hani tobolu bidi bidali, tama Jehohanan te Amaria hanigo hetman bidai dao.  
\v 14 Jonatan aga te Maluki hanigo tobolu bidi, me te Josep aga te Sebania hanigo tobolu bidi bidali.  
\v 15 Te Atna aga te Harim hanigo hetman, te Helkai aga te Meraiot hanigo tobolu bidi bidali.  
\v 16 Sekaraia aga te Ido hani tobolu bidi, me Mesulam aga te Gineton hani hetman bidai.  
\v 17 Tama Sikri aga te Abiya hani hetman bidali, te Piltai aga te Miniamin hani me Moadia hani si tobolu bidi bidali.  
\v 18 Samua te Bilga hani hetman, te Jehonatan te Semaia hani hetman bidai,  
\v 19 me Matenai te Joiarip hani hetman, te Usi te Jedaia hanigo tobolu bidi dao.  
\v 20 Kalai te Salai hani hetman, te Eber te Amok hanigo hetman bidali,  
\v 21 tama te Hasabia te Hilkia hanigo hetman, me te Netanel te Jedaia hanigo tobolu bidi bidai dao.   
\p
\v 22-23 Te polalubo pris bidi Eliasip, me Joiada, me Jonatan, me Jadua bidali sogo, augwaligo te pris dabego tobolu bidi dabe nogi te buku me delide asęai. Augwaligo te tama tede asali te king Darius te Persia king pedelali sogoba usu nagasai. Tama augwaligo te Livai dabego tobolu bidi dabe nogi me asęani, tialima te bukude te Juda tǫ pedaide yali sę dabe po dodolama asęai. Tiali goli, augwaligo te tiwai ela asidubadi, te polalubo pris Jonatan bidali sogoba usu nagasai, te Eliasipgo wąį te ogwa, tama nosali augwaligo munu me asębeo.   
\s1 Augwaligo te Livai dabebolo Godigo tempel bede sę manio  
\p
\v 24 Te Israel dabego lotu po odubadi, te God nogi ugwaba siyu, te agaba buba hwi wabo sogo, te Livai dabego te king Devitgo wali po tiwai gilama yali. Devit aga te Godigo po pusubo bidi da. Te Livai hani nani si dolugulama, tama te hani me deligo te balia po ola simanobo si da, teda te gasa hanigo te gasa balia po dage me wei ponoyu wali. Tama Hasabia, me Serebia, me Jesua, te Katmielgo ogwago, te sę tonaluai.   
\p
\v 25 Matania, me Bakbukia, me Obadia, me Mesulam, me Talmon, me Akup, te bagego te Godigo tempel be habude te doado bage mubo madi tonalubo sę elaluali. Te be habu togwali te Godigo be bobegela sali obo sunumi sesegede elaluali.  
\v 26 Tama te Livai dabe te polalubo pris Joiakim bidali sogo bidali, te Josuago ogwa, tama te wąį nǫų Jehosadak, me te polaluali gavman bidi Nehemia, me pris Esra bidali sogo, te Godigo bomai po page bugagia koneai bidi dao.   
\s1 Te obo te Godigo da olama, te lotu po wali  
\p
\v 27 Te Jerusalem hanu moni masigigo nigai obo silali sogo, te tigidali bidi sisinagaselama, te obo te Godigo da olama, sa mubo lotu wali. Tama augwaligo te Livai dabe i weyu, te bidali pedai badu te taga soyu, te augwali dali deliba siginagaselama, te wiegi yai homu pemene elama, te Godiba balia po weyu, usu da wali. Tama augwaligo te tiwai balia po wabo sogo, te Livai mebago te musik weyu elabo kapa plet si tola siąo wai, tama mebago te haniani gita eliyu yalio.  
\v 28-29 Tama te augwali me, te Livai dabego dali, te Godigo bede balia po wali, tama augwa te bulu Netofa, me Betgilgal, me Geba, me Asmavet, me te augwa gasa bulu dabe taga solama, tama augwali te Jerusalemba sisinagasai. Te bulu dabe te Jerusalem pąde elaluai dao.  
\v 30 Hasia bolo te pris dabe me Livai dabe te augwa digi te Godigo gedude magi sę isiąwai wiegi yai mu pedalabo kolesaga wali pali. Tama augwaligo te tiwai tobage kolesaga te we bidiba eyu, me te Jerusalem oboba yai, me te obo sunumi dabeba me, tama tiwai kolesaga naga yai dao.   
\p
\v 31 Ena Nehemia eno te Juda tobolu bidi dabe te obo daiba sisinama, tama eno augwali dobolama, te genuai hani si nigilama, te masigi obo ugwadu daidu biliyu, te taun tigidali badu bagula usu nama biliyu, tama te Godiba usu da olama, te balia po walio. Te polasa pabo hani te dolo nogo badu begasa peyu, te Pobele Bage Sela Sąbo Sunumiba pedelali.  
\v 32 Hosaia dali, te Juda tobolu bidi meba dali, augwaligo te balia po wabo bidi dabe augwali wali bilai dao.  
\v 33-35 Tama te pris meba augwali wali peyu, te biugel bu ola pali. Augwali nogi te tiwai, Asaria, me Esra, me Mesulam, me Juda, me Benjamin, me Semaia, me Jeremaia. Tama Sekaraia te augwali wali pali. Sekaraia te Jonatango ogwa, tama wąį nǫų te Semaia. Tama aga bulali wąį dabe te tiwai, Matania, me Mikaia, me Sakur, me Asap dao.  
\v 36 Tama te Sekaraia aga nogi sabi bidi mebago te aga wali pai. Te augwali nogi te tiwai, Semaia, me Asarel, me Milalai, me Gilalai, me Mai, me Netanel, me Juda, me Hanani. Te hani tigidaligo te balia po wabo haniani nai tolali, te king Devitgo polobadu elali musik tobage tiwai, te Godigo po pusali bidigo, te gagali yali nai tiwai dao.  
\p Tama pris Esra aga te polasa pabo hanide te polalubo bidi dao.  
\v 37 Augwali pali te Wę Ulu Elalubo Sunumiba sabolama, tama augwali te togobilidu ugwaba holama, te Devitgo Taunba sabolali. Tama augwali peyu, te Devitgo genuai be edelama, te giliga pedalubo te taun badu te Wę Tubo Sunumi oboba ma sabolalio.   
\p
\v 38 Tama te si wali Livai hani te pobase nogoba begelama, te obo ugwadu daidu pobaso, te ena augwali wali pai. Tialima, te genuai hani we bidi ena wali asali, tama da pelayu, tama te Taua Stov edelama, tama te Genuai Oboba sabolali.  
\v 39 Tama dago te badu taga soyu, tama peyu, te Efraim Sunumi, me te Jesana Sunumi, me te Pisgo Sunumi, me te Hananel Taua, me te Tonalubo Bidi 100 Bidibo Taua, me te Sipsip Sunumi elaluali me, te ededeli palio. Tama da asiyu, te Godigo tempel be oboba sabolali, te sunumi augwaligo nogi yali te Kalabus Dabego Sunumi Dao wai.  
\v 40 Tama te Livai hani si te Godigo beba sabolama, tama te be tomoba doligi pelama, te Godiba usu da po wabo balia wainogo yai. Te ena wali asali bidi hani te tobolu bidi hani,  
\v 41 me te pris meba badi, augwaligo te bu wabo nai biugel tolaluali, te gasa bidi mebago me tolaluai. Te pris dabego nogi te tiwai, Eliakim, me Masea, me Miniamin, me Mikaia, me Elioenai, me Sekaraia, me Hanania dao.  
\v 42 Te gasa bidi dabego nogi te tiwai, Masea, me Semaia, me Eleasar, me Usi, me Eser. Tama Jesrahiago te balia wali bidi dabe tonaluai, tama tigidaligo te balia po wai dao.  
\v 43 Te side augwaligo te Godiba ofa hauwa eyu, tama augwa wiegi yai pemene genuai elaluali, magi baso meni, Godigo digi augwali te wiegi yai pemene ilali. Tama te we dabe me, wai puluba dabego me wiegi yai pemene yai. Tama te digibulu bidali we bidi, augwaligo te genuai i wabo me pemene ebo po odai dao.   
\s1 Te we bidi dabego te pris dabe me Livai tau sali  
\p
\v 44 Tama te sogo augwaligo te bidi meba nigilama, tama te we bidi dabego te Godiba mabo nai dabe, me te Godigo bede gasa nai doado bage te mubo be habu tonaluabo bidi nigilali. Te habu togwali madi augwaligo te gide polasa inayani nai, me te polasa tau yali nedu du dabe tama, me te we bidi augwaligo nogo si nai buguluyu, te me deli te Godiba mawainu te be habu nigilaliba sisinani. Te bidi dabe te we bidi dabego tǫba pelama, te sigi pabo sę elaluali te bomai pode weyu, te we bidigo te pris dabe me Livai dabeba nai maiąo po wali. Te Juda dabego te bidi dabego te pris dabe me Livai dabe tau sabo bidi nigilali, magi baso meni, te Juda dabego te pris dabeba me Livai dabeba te bugai haliga te augwaligo sęde yai dao.  
\v 45 Te pris me Livai dabego te lotu weyu, te we bidi dabe te Godigo gedude wiegi yai mu pedalabo sę yali, tama te gasa tobage lotu me te Godigo augwaligo emainogo yabo po augwaliba wai. \x * \xo 12:45 \xt 1 Sto 25:1-8; 26:12\x*  
\p Tama te musik wabo bidi dabe, me te Godigo be tonalubo bidi dabego te augwa sę me yali. Augwaligo te po polobadu te king Devit me te aga ogwa, king Solomon sigo, te hani si augwa wąį nǫų dabebolo te sę mawai dao.  
\v 46 Te musik wabo wąį nǫų dabego te wiegi yai pemene ebo balia weyu, te Godiba usu da olama, gedu haluasa po wali, te king Devit me Asap si bidali sogo tiali, te musik wali bidi dao.  
\v 47 Tama megi da, te Serubabel me Nehemia si bidali sogo, tigidali Israel we bidigo te tigidali side te nai sela aselama, te musik wabo bidi dabeba, me te Godigo tempel be sunumi tonalubo bidi dabeba magasali. Tama te we bidi dabego te wiegi yai nai te Livai dabeba mawai, te ofa God agaba digi mabo tiwai yali. Tama Livai dabego te ofa me pedai deli te pris dabeba mawai, te bomo yai po wali po tiwai gilama yalio.   
\c 13  
\s1 Te Israel dabego te Israel hani isąwani bidi dabe dali me kisa sabeo  
\p
\v 1 Te sogo te we bidi dabe sisinagasobaso, tama te Livai dabego te Mosesgo bomai po augwaliba nedali. Tama augwaligo te bomai po nedali pode te tiwai po wali, te Amon dabe me Moap dabe te Godigo we bidi Israel hani tomoba me asogobeo wai.  
\v 2-3 Tama te Israel dabego te bomai po odali sogo, augwaligo te we bidi dabe sela sąwani, te augwa aya ma ida te bulu badu bidi te Israel hani isąwai bidi dao, tama augwaligo te augwali te Israel we bidi hanide bidimainu me ebeo. Te bomai pogo page te tiwai dao. Te Israel dabego te Isip tagalama asali sogo, te Amon dabe me Moap dabe augwaligo te nai me wę me augwali me mabeo. Tama te hanigo te profet Balam abelama, te Godigo Israel dabe dolomainu ebo po omainu yali. Tiali goli, Godigo Balamgo te po omainu me ilibeo. Menio. Balamgo te Godiba augwali wiegi yai bugagia ilabo po wai dao. \x * \xo 13:2-3 \xt Nam 22:1-6; Bom 23:3-5\x*   
\s1 Nehemiago te haniani ebo kolesaga dodolali  
\p
\v 4 Pris Eliasipgo te dago Godigo tempel be doado bage mubo habu tonaluai, tama aga te Amon hani bidi Tobiago hai namu dao.  
\v 5 Eliasipgo Tobia te genuai be habu me delide bidimainu ilali, augwaligo te ofa yabo wit sisinani madi nigilai, tama te wiegi yai denami pedalubo pauda hano elalubo digi, te Godigo bede sę ebo doado bage mubo madi, te we bidigo ofa te pris dabeba mabo me, te nai dabe me wain, me oliv wel, te we bidi dabego Godiba mabo te pesage habu me deli te nigilali. Godigo te nai dabe te Livai dabe, me te musik wabo bidi dabe, me te Godigo be tonalubo bidi, te augwaligo tuabo nai te nigilama, sa muai.  
\v 6 Ena Nehemia, ena te Jerusalemde bidisąbo sogo te sę pedelali, magi baso meni, ena te Persia tǫ pedaiba ma pelama, te sę ebo ripot po te king Artaserksisbolo magi pai. Te sogo aga te Babilonde king bididubadi, te 32 kibu be bidai. Nosali eno te kingba hanalu, ena te Jerusalemba ma pagawe obaso, tama agai ena pao olama, usu da wai.  
\v 7 Tama ena te Jerusalemba ma sabaligi pabo sogo, augwaligo enabolo te tiwai po wali, Eliasipgo te Tobiabolo te genuai be habu te Godigo tempel be obo tomode te mawai da po wali. Agai te yali kolesaga te dwai mu dao wai.  
\v 8 Tama eno wado po dwai mu olama, tama eno te Tobiago tigidali nai doado bage buluba sela sąwai.  
\v 9 Tama eno te pris dabe augwaliba olama, te be habu te augwa ebo kolesaga wali pelama, te Godigo gedude wiegi yai me pedalumainu ilao po wali. Tama eno augwaliba weyu, te Godigo bede sę yabo doado bage te nai tigidali selama, tama te ofa yabo wit, me te wiegi yai denami hano ilibo pauda selama, tama tigidali te be habuba ma muiąo wai dao.   
\p
\v 10 Eno te tiwai me odali, te Livai dabe, me te Godigo bede musik elibo hani dabe, augwa te Jerusalem tagalama, te augwa tǫba ma pali, magi baso meni, te we bidi dabego augwali nai me masiąwai. \x * \xo 13:10 \xt Bom 12:19\x*  
\v 11 Tama tibaso, eno te polalubo bidi dabeba wado po wabo sę ilama, tama eno augwaliba hanalu wali, “Magi baso dagego te Godigo be olodali elalumainu ilaliwe?” Tama eno te Livai dabe, me te Godigo bede musik wabo bidi hani ma odasa aselama, tama eno augwalibolo te sę ma hodolama yao po walio.  
\v 12 Tialima, tigidali Judago te wit, me wain, me oliv wel te bugai pedai me deli te ma gagalama, sela aselama, tama te Godigo nai doado bage mubo be habuba ma muai dao. \x * \xo 13:12 \xt Mal 3:10\x*  
\v 13 Tama eno te pris Selemia, me te po page koneai bidi Sadok nigilali, me Pedaia, te Livai hani me deli, te be habu dabe tonalumainogo yali. Tama eno te augwali tau sabo bidi me deli nigilali, aga nogi te Hanan, te Sakurgo ogwa, tama te wąį nǫų Matania dao. Te gasa bidi dabego te po wali, te bidi dabego te doloba pai kolesaga mu ebaso, tama eno augwali nigilali. Augwaligo te augwa deli sę ebo abagi dabede te nai dobabo sę ebo kolesaga elalubo dao wali.   
\p
\v 14 Tama God, eno homugo nago eno te yali tigidali sę te nago be tonaluali, me te lotu wabo dodolobo sę yali kolesaga, te nago homugo konemainu yai. Eno homugo te eno wiegi yai sę yali po te nago naga bukude sela sągio.   
\p
\v 15 Te sogo eno suali, te meba Juda dabego te nedu du wain agalama, tama te Sabat side wain wę siyu nigali. Tama te gasa Juda dabego te wit nai, me wain, me te wain nedu du wai, me te ni kaya fik, me te gasa tobage nai dabe selama, te donki daiba munama, tama te Jerusalemba sela pabo sę yali. Tama te Sabat side te eno augwaliba bomai po wali, “Te side da wabo sogo te we bidi dabego te nai dabe abelimainu me ilamuo,” po wali. \x * \xo 13:15 \xt Sai 20:8-10; Bom 5:12-14; Jer 17:21-22\x*  
\v 16 Te tamu ąį sesegede elalubo taun Tair bidi meba te Jerusalemba aselama bidai. Tama te Sabat side te hanigo te sųgų pis me gasa nai dabe te Jerusalemba sesali, te da we bidi dabego abelimainu yai.  
\v 17 Tialima, eno te Judade polaluali bidi dabeba wado po weyu, te tama po wali, “Odiąo. Dagego te dwai kolesaga mu ebao. Dagego te Sabat side dao wabo dolama, tama te olo side tiwai me deli pedalubao,” wali.  
\v 18 “Polobadu te wąį nǫų dabego te tobage kolesaga tiwai naga ebaso, tama te Godigo augwaliba dwai dene mayu, tama agai te taun dolali. Tama megi dagego te tobage kolesaga ebaso, tama Godigo da dali wado po mu odubo dao,” wali.   
\p
\v 19 Tama eno po bomo elama, te tiwai po wai. Te Sabat si te tigidali Sadede pedalubo sogo, augwaligo te taunba pabo obo sunumi paliąo, wali. Augwaligo te tiwai sę ebo te Sabat side dolo tiąo, te giliga ibaba dega sigi pabo sogo. Tama te sunumi dabe palialudubadi, te Sabat siligi pabo sogoba usu nao. Tama eno te ena sę bidi mebabolo olama, te sunumi augwaligo bugagia tonalu, tama te bidi dabego te Sabat side te taun tomoba te nai dabe sela asigio olama, paliąo po wai dao.  
\v 20 Te si sela sogo te bidi dabego te tobage nai te we bidi dabego abelimainogo sela aselama, tama augwali te taun obo sesege badu pelama, tama dago te sunumi dabo tonaluai dao.  
\v 21 Eno augwali sulama, tama augwaliba wado po te tiwai wali, “Magi baso dage te obo bulu badu bidagasaliwe? Tegoba, dage piąo. Te dage Sabat side ma asali da, teda eno dwai sę dageba yaibao.” Augwaligo te po odolama, te nosali Sabat side augwali ma asobeo.  
\v 22 Tama nosali eno te Livai dabeba walali, te augwa digi te Godigo gedude wiegi yai pedalabo kolesaga wali pali, tama augwali te wiegi yai elama da, teda augwali pelama, te obo sunumiba tonalugi pelama, te bidi dabego augwa te Sabat side bomai po wali bugagia pomainu yai, te Godigo bodolu side, tama te gasa bidi dabego te taun tomoba nai sela asigio wali.  
\p God, nago te tigidali we bidi godolo mu elama, tama nago olo tau sabo wiegi yai kolesaga te augwaliba ebo dao. Tama tiyu, eno homugo nago eno te gasa wiegi yai kolesaga ebo me te homude koneama, tama nago te olo mu tau sabo wiegi yai kolesaga enaba yao.   
\p
\v 23 Te sogo me eno te tiwai konea pali, te Juda bidi mebago te tǫ Asdot pedai we dabe, me Amon, me Moap we dabe sai.  
\v 24 Tama augwali hani wai mebago te Asdot dabego po koneani. Tama mebago te gasa po koneai. Tiali goli, augwaligo te da Juda dabego po konesiąwai dao.  
\v 25 Tama eno te bidi dabeba wado ilama, tama eno meba elama, tama mebago tobolu nisi guda sąwai. Tama eno te tiwai po augwaliba wali, “Dagego te dwai kolesaga ebaso, tama eno homugo Godigo dage dolainogo yaibao.” Tama eno te bidi dabego te Godigo nogide bomai po dąų walomainu ilali, te augwa dali, te augwa wai dabego me, te gasa bulu tǫ pedai we bidi hani dali we si ebo munu ma elamu dao po wai. \x * \xo 13:25 \xt Sai 34:11-16; Bom 7:1-5\x*  
\v 26 Tama eno augwaliba te tiwai po wai, “Dagego te king Solomongo dwai kolesaga wali pali dao. Polobadu Godigo te king Solomon godolo elama, tama aga te tigidali Israel hanigo king pedalumainu ilali. Tama Solomongo te wiegi yai homu kolesaga koneama sali, tama te gasa bulu tǫ pedai king tigidaligo koneani homu kolesaga tigidali te agai aiyaba elaluali. Tiali goli, agai te bulu badu we dabe, te Israel hani isąwai we meba selama, tama augwaligo agai homu kolesaga hugiabi selama, tama agai te dwai sęgę yai dao. \x * \xo 13:26 \xt 2 Sml 12:24-25; 1 Kin 11:1-8\x*  
\v 27 Dago te dagego ebo te dwai kolesaga wali pelama, tama dago te bulu badu hani we dabe sobaso da, teda dago te Godigo po sela sąwaibao. Dagego homugo dago te tama tiwai emainogo eba, agawe?” wali.   
\p
\v 28 Joiada aga te polalubo pris Eliasipgo ogwa. Tiali goli, te Joiadago ogwa me deligo te gasa bulu tǫ pedai we me salio. Te we te Senbalatgo wegi dao. Tama eno te Joiadago ogwa sela sąnama, tama eno aga te Jerusalemba bidimainogo me ebeo. \x * \xo 13:28 \xt Neh 4:1\x*  
\v 29 Tama tialima, God, nago te pris dabego te yali dwai kolesaga homu koneao. Augwaligo te pris hani te nago gedude meda ilali. Tama nago te pris me Livai hani dabe dali dų walali bomo yai po te augwaligo dolalio.   
\p
\v 30 Te kolesagade eno te bulu badu bage, te Israel hani isąwai bidi dabego te tigidali doado bage da tomode elaluali te sela sąwai. Tama eno te tigidali pris, me Livai hani deli deligo yabo sę dąį nigilali.  
\v 31 Tama te ofa ulabo sia sigi pabo we bidi meba eno sa muani, tama eno te sela asabo sogo bodolu muna muna pali. Tama eno augwaliba te po me weyu, te augwaligo gide polasa tau yali nai, me te polasa tau yali nedu du me selama, tama te ofa tiwai selasa asao po weyu, te sę dodolali. Tama te God, nago eno te yali kolesaga tigidali homu kone palama, tama nago enaba bugai homu ilao.