\id NAM - Dadibi NT [mps] -Papua New Guinea 2001 (DBL 2014) 
\h Profet Nahumgo Buku 
\toc1 Profet Nahumgo Buku 
\toc2 Nahum 
\toc3 Nah 
\mt1 Profet Nahumgo Buku  
\imt1 Hasia nedebo po  
\ip Dago te profet Nahum bidi dali kolesaga page dago kuna konebeo. Te e buku agai asęani te homu pemene ebo po tiwai agai asęani dao. Magi baso meni, genuai hanu Ninive dolai baso. Ninive te kantri Asiriago genuai hanu dao. Asiria te bomai kantri mu me deli dao. Tialima te agai ami bidigo te gasa meba hanu dabe hauwa mu dolai dao. Tama te hanigo naga te kantri Israel te not badu dolama, tama te Israel we bidi odasa pelama, gasa buluba dabe bidigi pali. Tialima te boi bidi dabego te taun Ninive dolalio po Israel dabe augwaligo odobo si, augwali homu pemene genuai mu yali. Profet Nahumgo te po wali, God aga digi te sę te Ninive hanude pedalumainu yali dao, te augwali dene mawainogo. Magi baso meni, augwaligo homu gana pelama, tama augwaligo dwai kolesaga hauwa mu yai dao.  
\c 1  
\ms1 Genuai Bidigo haliga sębę te genuai taun Niniveba yali  
\p
\v 1 Godigo te genuai taun Ninivede po te profet Nahumbolo te nai nade subo tiwai ebo sogo te sęgę yai po mawai. Profet Nahum aga te Elkos bulu bidi dao. \x * \xo 1:1 \xt Ais 10:5-34; 14:24-27; Sef 2:13-15\x*   
\p
\v 2 Genuai Bidi naga te God dao, te agai te gasa god aga tiwai pedalumainu me egobeo. Te agai po sela sąbo bidi dabe agai koneanio. Genuai Bidigo te haliga sębę augwaliba eyu, te dwai dene augwaliba mu mabo dao.  
\v 3 Genuai Bidigo asesa wado po me wagobeo. Tiali goli, aga te bomo yai elalubao, te sesemane sogo agai te dwai sę ebo bidi dabeba te dene mawaibao. Te Genuai Bidi gasaba me deli pabo sogo da, te genuai wali me tulubage pedelaibao, te pǫ dabe te agai sągą dologode te pobele bage hogomu tiwai pedalubo dao.  
\v 4 Te agai tamu ąįba wado ilibaso da, teda te tamu ąį sula saibao. Tama agai te wę dabe me sula somainu ilaibao. Te agai tama po obaso, te wiegi yai nosai me gi me te nai yabe dabe sasia paibao. Te Basan badu gi dabe me, te Karmel bulu dude te nedu du walobo ni dabe me, te Lebanon bulu du dabede elalubo plauwa dabe me, te tagalao, tigidali te sasia pabo dao.  
\v 5 Tigidali bulu du te Genuai Bidigo gesabidide mumunu elama, te olo wę tiwai me pedelali. Te Genuai Bidi sabalubo sogo tǫ te mumunu yai, te tigidali we bidi me mumunu elama gęo page ebo dao, wali.  
\v 6 Te aga haliga sębę ebo sogo da, de mu te bugagia bidaibawe? Te de aga me dologobe dawe? Mu menio. Agai te we bidi dabeba wado eyu, te agai gedu te sia bogoli tiwai penelą pelama, te masigi dabe pepeda pelama, te hogomu pobele bage pedalubo dao.   
\p
\v 7 Genuai Bidi agai wiegi yai kolesaga da dali ebao. Aga te aga we bidi dabe te sęgę sabo sogo geme duala sabo tiwąį madi tiwai elalu, tama te agaba pabo we bidi dabe tau sabo dao.  
\v 8 Te genuai ąį asobo tiwai elama, tama aga boi bidi dabe te Ninive bage te aiyaba mu elaluama, tama te agai po sela sąbo bidi dabe te ela muyu yaibao.   
\p
\v 9 Dage boi bidi dabe, dagego te Genuai Bidiba magi dwai sę yabo po mianiwe? Dua dao, agai te dage tigidali silimainu yaibao. Te bidi me deligo si sogo hagoma ebaso usu egobeo. Mu menio.  
\v 10 Dage te bomai wę tuyu gęo page mu yali bage tiwai dao, dage dwai madi bidibao. Agai dage tigidali silaibao wali, te siago te sesani yai nosai me kala wa pai te isi tula palobo tiwai yaibao.   
\p
\v 11 Dage Ninive bidi dabe me deligo te dwai homu kolesaga elalu, tama agai te Genuai Bidiba dwai sę yabo po mianio.  
\v 12 Tialima Genuai Bidigo aga we bidi dabe, te Juda dabeba, te tama po wai, “Te Asiria dabe te bomai bidi dabe te genuai abagi hani elalubao, tiali goli te augwali eno dolama te augwali mu silaibao. Eno we bidi Juda dabe, eno dageba genuai sęgę muani, tialima eno te munu me ma tegobeo. Mu menio.  
\v 13 Te Asiria dabego dage tonaluali, tiali goli megi da, te eno augwaligo bomo aiyaba elaluama, tama te augwaligo dage kalabus ma egobeo,” wali.   
\p
\v 14 Tialima Genuai Bidigo te tiwai bomai po te Asiria dabeba wali, “Te dage hanigo wąį nǫų me pedalugobeo,” wali. “Te eno dagego lotu bede elalubo tibo god dabe, te nigo me kapago nigali noma piksa te tigidali dolaibao,” wali. “Te eno dagego gų page sisilaibao. Tama dage munu ma me bidigobeo. Magi baso meni, dage te dwai bidi mu dao,” wai.   
\p
\v 15 Suao. Bidi me deli te bulu du sunumi dabedu asiyu, te wiegi yai po selasa asobao. Aga asobo te hwįani silali po pusagasu asobao. Tialima te Juda we bidi dabe, dage te genuai side sisinama, te Godiba lotu weyu, tama agabolo dagego te mawaiba po dąų wali nai maiąo. Tama te bidi dwai dabego te dagego tǫ somainu ma egobeo. Godigo augwali dolai dao. \x * \xo 1:15 \xt Ais 52:7\x*   
\c 2  
\p
\v 1-2 Te boi bidi dabego te Israel dabe dolama, tama augwaligo te wiegi yai nai doado bage tigidali sela palio, tiali goli megi Genuai Bidigo homugo te Israelgo genuai nogi ma ilaibao, te polobadu tiwai yaibao.  
\s1 Ninive dolalio  
\p Te Ninive dabe, te boi bidi dabego dageba boi hwįagasai dao. Te dage dolabo bidi dabe asalio. Te duga ami bidi dabe te taungo genuai obode tonalumainu muao! Te sunumi dabede tonaluao! Dage te bomo elama dolalu, te hwįabo sisi elaluao!  
\v 3 Te boi bidi dabego sabele te mama yai tolalu, te au yali au te mama yai ugwa dabe munama, te augwaligo dage dali boi hwįagasobao. Augwali te hwįainu udayu, te augwa karis dabe te sia ula tiwai elasa asali, te sesemone ene dabe augwa te ni wiligo nigali, augwa te wele siyu tęąbi ebao.  
\v 4 Te karis dabe te sunumi dabedu te taunba asiyu, te udabo diluagi mu elama, tama te sisinibo pesageba ugwaba udayu, edaba udayu ebao. Augwaligo ula te sole udalobo tiwai eyu, tama te be sele ebo tiwai polo polo ebao.  
\v 5 Te ofisa dabego te po olama, te ami bage augwali asesa polo mu pali madi te masigigo augwali sągąde dolobao. Te boi bidi dabe te masigigo nigai genuai obo elaluboba udulama, te obo aluabo masin dualigi pobao.  
\v 6 Te masingo te wę pąde elaluali sunumi aluama te sunumi dala palio. Tialima te kingo bede bidali we bidi tigidali augwali wi mu dwai ebao.  
\v 7 Te boi bidi dabego te Asiria king bidi dolalumainu ilali. Tama augwaligo kwingo gudubo ugwa peda sąnama, tama kalabusiba odasa pali. Tama te kwingo sę ebo we dabe te dwai haliga eyu gela obao. Augwa te homu dene mu ebaso, te augwa hagawiaba nogo elebao.   
\p
\v 8 Te we bidi dabe te Ninive taun buluba wi tedela sąwani, te wę palialuali dalubaso te wę pabo tiwai ebao. Te ofisa dabe augwaligo i bomonama weyu, te tiwai obao, “Dolaluiąo! Dolaluiąo! Wi pigimio!” wabo. Tiali goli te me deli doligi pelama, te ma geasa me pabeo. Menio. Tigidali wi naga pela silibao.   
\p
\v 9 Te boi bidi dabe augwa hasiba digi te po obao, “Ae, tegobao, te tigidali silva me gol tigidali sao,” po obao. “Magi baso meni, te augwaligo taunde te wiegi wiegi yai sawi yai nai pągąnaluai dao,” wabo.   
\p
\v 10 Te taun Ninive mu dolalio, te bidi dabego tagalama wi tedela pali. Tama taun te pobele bage yai olo tǫ mu elaluai. Te we bidi dabe wi dwai mu elama, te augwali nogo sągą didibili ebao. Augwa bomo kimi te isalio, tama augwa gedu te tedela dwai mu yai dao.  
\v 11-12 Hasia te genuai taun bomo mu elalu, te laion dabego be dabe tiwai elaluali, tiali goli megi da, menio. Polobadu Ninive te bomai ogwa bidi laion bugagia bidiyu, aga nai tuabo madi tiwai elaluali, te laion so me wai puluba te geme dualalu, te boi bidi dabego augwali dolomainu me ebeo. Te hasa elibo laiongo te hasa dabe te dwasianu aga kakali minama, aga so me wai dabe augwaliba mani. Aga beba te hasa pągąna palali. Tiali goli megi da, aga be mena elalubawe? Te be dolai dao.   
\p
\v 13 Tigidali Bomo Elalubo Genuai Bidigo te Ninive dabeba te tiwai po wali, “Ena digi ena dagego boi bidi dao,” wali. “Te eno dagego karis dabe tigidali siago ulaibao,” wali. “Te dagego ami bidi dabe te hwįbaso isaibao. Te dagego gasa bagego nai sali tigidali te ena ma saibao,” wai. “Te gasa bulu tǫ kantri we bidi dabego te dagego po sela pelama, augwaliba wagi pomainu tagala palali bidi dabego pedauwalidu wabo po te augwaligo me odogobeo,” te po wai.   
\c 3  
\p
\v 1 Hobede ya! Te Ninive we bidi dabego tibo po umabo mu weyu, te bidi dabe hauwa mu ela muani. Te augwaligo te gasa hanigo wiegi yai nai doado bage hauwa bomonama selama, te Ninive taun pągąnai. Tama tialima te Godigo augwali tigidali dolaibao wai.  
\v 2 Te wip bįgo te hos dabe tudi badu elibo kidagalo wabo odaibao, te hosgo sągą me karis wil te sunumidu pabode kidagalo wabo dao. Tama te hwįbo karis te sunumi masigide sasa mano soabo odaibao.  
\v 3 Te boi hwįabo bidi dabe te hosde dualama, te udada asiyu, te augwa bainat hwą me sesemone te dula gegemane ela asobo tiwai yaibao. Tialima augwaligo te bidi hauwa ela munama, te augwa tigi dabe pesage holaibao, te bidigo nedabo usu me egobeo. Te soabo bidi dabe augwaligo te isali bidi dabe tigi daide agaga soaibao wali.   
\p
\v 4 Te Ninive taun te penani we tiwai yali, tama aga te dwai dene mu salio. Aga gesabidi te sawi yai mu elalubaso, agai te bidi dabe homu bega sabo sę ilali. Agai te we bidi hani dabego homu kekelama te agaba augwali pobaso, te agai augwali kalabus sę emainu ilalio.  
\v 5 Te Tigidali Bomo Elalubo Genuai Bidigo te po wali, “Ninive, nageba eno dwai dene ilaibao, nage penani we, te eno nago ugwa dabe pepeda sąnama, te nage tigi olo elalu, te ugwa meniama, tama te we bidi hanigo nage subaso, te nage hale saibao.  
\v 6 Te eno nage mu begela dolama, tama nage te dwai kugumini yai naigo haluaibao. Te tigidali bulu tǫ pedai kantri we bidi dabego nage sulama, wi yaibao.  
\v 7 Tigidaligo nage subaso, te habu bulu kilasa paibao. Augwa te po waibao, ‘Suao! Ninive dolalio. Te bidi me deligo agade homu dene mu egobeo. Te bidi me deligo aga tau sabo wiegi yai po wabo homu me egobeo,’ augwaligo te po waibao,” Genuai Bidigo te po wai dao.   
\p
\v 8 Ninive, nago homugo nago bomogo te Tebes, te Isipgo genuai taungo bomo edelaibao homu eba, agawe? Agai me te genuai ąį me deli te aga obo banis tiwai elaluali wali. Te ąį te wę Nail dao.  
\v 9 Tebesgo te bulu tǫ kantri Isip me Itiopia tonaluali, te gasa bulu tǫ kantri me deligo agai bomo aiyaba me elalubeo. Te tǫ kantri Libiago te agaba hwįbode kisa selama, hai namu wai elaluali.  
\v 10 Tiali goli te boi bidi dabego te Tebes dabe aiyaba elaluama, te augwali sela pelama, kalabus igi pali. Augwaligo te wai dabe elama, augwali te tigidali sunumi tunu magede isasa palio. Tama augwaligo te Tebes genuai bidi dabe te sengo nogo duani, te augwa hasi dobola selama, te augwali sela palio.   
\p
\v 11 Dage Ninive dabe, dage me te Isip dabe yali tiwai pedelaibao. Dage te bomai ąį tulama gęo page ebo bidi tiwai eyu, te dagego homu kolesaga te umuna pelama, te dage tulalueibao. Te dage duga boi bidi dabede wi painu yaibao.  
\v 12 Tama te boi bidi dabego te dagego bomai taun sainu sinabo sę me egobeo. Menio. Te bomai taun dabe te ni kaya fik tau yai tiwai elalubao. Te bidi me deligo te niba pemebaso da, te nai tau dabe te aga pedauwaliba dolo tudulalueibao.  
\v 13 Dagego ami bidi dabe te we dabe tiwai naga dao, tialima te mena ami bidi me deligo bomonama te boi bidi dali hwįnama, te augwali me sela sągobeo. Te siago te dagego taun bomai sunumi dabe nigali te bomai bǫ nami dabe daibao wai.  
\v 14 Dage Ninive dabe, te tuabo ąį te taunba sela asao, te boi bidi dabego te taun obo bagua sainu ebo te sisi elalu tonaluagameo. Te mama yai tǫ dagego sigi pelama, te agayu, pu aiyana palama, te bokisba munama, te brik nigaibao. Tama dagego te brik te hanu obode dąų waligi pao, wali.  
\v 15 Tialima te me usu egobeo. Te boi bidi dabe aselama, te dage dali te duga taun dali siago ulama, te dage isaibao. Te dage tigidali silaibao, te nai dabe te kuli mano dabego silibo tiwai yaibao.  
\p Polobadu dage te kuli mano tiwai pedelai dao.  
\v 16 Te bisnis bidi dagego hauwa mu elaluama, te dagalude hǫ dabego namba aiyaba elaluali. Tiali goli megi te tigidali pela silalio, te kuli mano dabego bogo diniga palama, bola pabo tiwai yai dao.  
\v 17 Te dagego tobolu bidi dabe deliba sisiniyu, te genuai hani kuli mano tiwai te kedau ebo sogo te masigigo nigai obo banisde te kuli mano dabe sisinibo tiwai yali. Tiali goli te giliga nanobo sogo te augwali bola peyu, te augwali menaba paliwe te bidi me deligo me konegobeo.   
\p
\v 18 Te Asiria genuai king, nago odao, wali. Te nago polalubo bidi dabe me genuai bidi dabe te isalio. Te boi bidi dabego nago we bidi dabe sela sąnama, subigila te bulu duba tedela palama, tama augwali te augwa buluba ma sela asabo bidi deli te meni yanio.  
\v 19 Te nago keni dabe pedela somainu yabo marasin deli me elalubeo. Mu menio. Polobadu te nago augwaliba yali dwai kolesagade te bidi me deli wi painu ebaso usu ebeo. Tialima tigidali bidigo te nage dolali po sabilibo odolama, augwali te wiegi yai homu pemene mu elama, nogo elaibao.