\id MRK - Dadibi NT [mps] -Papua New Guinea 2001 (DBL 2014) 
\h Dwagi Yai Gesi Po Makgo Asęani 
\toc1 Dwagi Yai Gesi Po Makgo Asęani 
\toc2 Mak 
\toc3 Mak 
\mt1 Dwagi Yai Gesi Po Makgo Asęani  
\imt1 Hasia nedebo tau sabo po  
\ip pi Te bidi Mak aga te Juda hani bidi da, tama agai te Jisas Kraisde po asęnama, tama te Juda hani isiąwai Grik po wabo we bidi dabebolo mani. Jisasgo agade digi te nogi poai, “Ena Godigo Bidi Mu dao,” te po wai, tama agai te we bidigo yali dwai sę sęgę sela sąmainogo asali. Agai te we bidide elaluali dwai haubo noma sela sąbo bomode me, te agai ola mani pode me, te we bidigo sali sęgę sela sąbode me, tede dago Jisasgo bomo hania konea sabo dao. Makgo te Jisasgo yali sęde po hauwa pusali, tiali goli agai te Jisasgo te we bidi dabe aga po ola mani sęde po hauwa me wabeo. Te hasia bolo Makgo te baptais mani bidi Jongo po pusali, tama te Jisas aga baptais selama pobadi te Satango aga usu sali po me pusali. Nosali dago suali, te haniani sęgę dabe tolali we bidi dabe augwalide Jisasgo olo mu homu dene eyu tau sabo sę eyu, tama agai augwali po ola mani. Te hasia bolo aga wali pali bidi dabego Jisasgo yali sę page kuna konesiąbaso, te dua dua augwaligo agade konea sabo sę yai dao. Te bidi dabego me te Jisasde boi bidi pedalubo sę eyu, tama augwaligo agaba sęgę hauwa mani. Tama te silagasu agai asęani buku pedaide, te Makgo te po weyu, te Jisas isilama, ma hodaluali po walio.  
\c 1  
\s1 Te we bidi baptais mani bidi Jongo po pusali  
\r (Mat 3:1-12; Luk 3:1-9, 15-17; Jon 1:19-28)  
\p
\v 1 E po da te Jisasde gesi dwagi yai po dao. Jisas da, te Godigo te we bidi tau sainu dąį ilai bidi Krais da, te God aga ogwa dao.  
\v 2 Te gesi dwagi yai po pusubo sę e tiwai hasia bolo pedelai elaluali. Godigo agai Kraisde wali po te Godigo po pusa mabo profet bidi Aisaiabolo polobadu mu pusali. Tama Godigo agabolo po olama, tama te profet bidi Aisaiago Godigo po te bukude asęai. Te bukude asęani po tomode Godigo aga ogwabolo te po wai, “Edao. Eno po sela pabo bidi tagala palama, tama aga nage pabo badu poligi soaibao. Agai te nago pabo tų sisi yaibao,” te po wai. \x * \xo 1:2 \xt Mal 3:1\x*  
\v 3 Godigo te polasa pabo bidide te po me wai, “Bidi meni yai bulude aga i bomonama weyu, te po waibao, ‘Te dago Genuai Bidi aga pabo tų sisi eiyąo, te agai dage tonalubo sę yabo sunumi bugagia dodolao,’ te polasa pabo bidigo te po waibao,” Godigo te po olama, tama bidi me deligo te po bukude asęani. \x * \xo 1:3 \xt Ais 40:3\x*   
\p
\v 4 Te po polobadu obaso, te gesi dwagi yai po pusubo sę te tiwai nosali gagalali, te we bidi baptais mabo bidi Jon dią holali side. Tama te bidi meni yai bulude pedelama bididu, tama Jongo e po te agaba asali we bidibolo pupusu pai, “Te dagego duga yali dwai sęde ge neyu tama homu begeleąo, te Godigo dagego dwai sęde sali sęgę wei ponogobeo, sela sąwaibao, te eno dage węgo baptais mawaibao,” Jongo te po wai.  
\v 5 Tama te Judia tǫ pedai provinsde bidali we bidi dabe umabo mu Jon pageba sisinigi pai, te Jerusalem moni hanu we bidi dabe umabo me agaba asali. Tama augwali deli deligo augwa dwai sę yali sęgę hania hanilama, tama te po wai, “Eno dwai sę dabe yai dao.” Tama tibadi Jongo augwali te Jordan pabo ąįde baptais mani.  
\v 6 Tama Jongo gudubo ugwa te moni kibu kamel nisigo nigai dao, tama aga tabide te kibu wali kukulu gudai. Tama aga te bulu tomode bidibo kuli mano me hanamu dali si tuyu bidai dao.  
\v 7 Tama agai po bomo elama pusuyu, te po wai, “Te ena tudi badu asobo bidi me deligo, tama agai bomogo te eno bomo aiyaba elaluaibao. Ena wiegi yai bidi weyu, tama ena aga sę ebo bidi bidiyu, ena duagulama te eno agai sągą nadoba bono me pisagagobeo.  
\v 8 Eno dage węgo naga baptais mani dao. Tiali goli agai dagebolo Godigo Tedali Mobo Bidi dobawaibao, dage dali bidimainu tama tiaibao,” Jongo te we bidi dabebolo te po wai.   
\s1 Jongo Jisas baptais mani  
\r (Mat 3:13-17; Luk 3:21-22)  
\p
\v 9 Te side Jisas te Nasaret dwasianu hanu te Galili tǫde bidali taga soyu asali. Tama Jongo aga te Jordan pabo ąį tomode baptais mani.  
\v 10 Tama polo aga te we tagasu, te bulu wę sesegeba doligulubadi, tama agai te dagalu dala pabo suali, tama te Godigo Tedali Mobo Bidi te ba hi tiwai gagalasa agaba dulali.  
\v 11 Tama te dagalude pedauwali me delidu bomonama i weyu, te po wai, “Nage eno Ogwa dao. Eno nage godolo mu ebao. Eno homu nagede wiegi yai ebo dao,” te po wai. \x * \xo 1:11 \xt Gag 22:2; Tib 2:7; Ais 42:1; Mat 3:17; 12:18; Mak 9:7; Luk 3:22\x*   
\s1 Satango Jisas usu sali  
\r (Mat 4:1-11; Luk 4:1-13)  
\p
\v 12 Tama te po ola silama, tama polo te Godigo Tedali Mobo Bidigo bomonama te Jisas bidi meni yai buluba polo tagala palai.  
\v 13 Tama aga te bidi meni yai bulude bididubadi, te bidi sese si sogo bidali, tama te usu sabo dwai mobo bidi Satan asama, tama sesemane sogo aga usu sagasali, Jisasgo dwai sę emainogo tama usu sali. Tama Jisas te bulu hasa dabe dali bidali. Tama Godigo dagalude sę ebo ensel mobo bidi dabego aga tau sali.   
\s1 Jisasgo sę ebo te Galili tǫde gagalali  
\r (Mat 4:12-17; Luk 4:14-15)  
\p
\v 14 Te Jongo te gavman bidi Herotbolo “Dwai sę egio” po obaso, te Herot sębę eyu, tama agai Jon kalabusiba muani. Tama te sogo Jisas te Galili moni tǫ pedai tomoba pelama, tama Galili tǫde biliyu, agai Godigo gesi dwagi yai po pusa mena mena bilai, te po wai,  
\v 15 “Te megi da, te bodolu sogo mu pedalubao. Te Godigo te we bidi mu tonalubo sogo pąba yagasalio. Tama tibaso, dagego duga yali dwai sęde ge neyu, tama homu begelama, tama duga homu te gesi dwagi yai poba begi pao,” Jisasgo te we bidi dabebolo te po pususu bilai dao.   
\s1 Jisasgo bidi me si me si aga wali asiąo wali  
\r (Mat 4:18-22; Luk 5:1-11)  
\p
\v 16 Te Jisas te Galili sigi ąį sane sesegedu pobadi, tama agai te Saimon aga ama Andru dali si suali. Augwali si te sigi węba te sųgų hagani togobo wa sąbo sę iduai. Augwali sigo te sųgų sabo sęde te mone sabo bisnis sę eyu bidai.  
\v 17 Tama Jisasgo augwali sibolo te po wai, “Dage si ena wali asiąo, tama eno dage sibolo te bidi sabo sę ola mawaibao, te sali bidi dabe ena wali asomainogo yaibao,” te po wai.  
\v 18 Tama polo te augwa si te sųgų hagani togobo wa tagalama, tama Jisas aga wali pai.  
\v 19 Aga dwasianu ma pelama gana, tama agai Jems suali, te bidi Sebedigo ogwa, te aga ama Jon dali bidibo suai. Augwali si me te augwa gebade bididu, te sųgų sabo hagani togobo wa dodolobo sę idubadi suali.  
\v 20 Tama agai augwali si polo i olama, tama augwali sigo te augwa si aya Sebedi te gebade te aga sę bidi dabe dali bidibadi taga peyu, tama augwali si te Jisas wali pali.   
\s1 Jisasgo te dwai haubo noma bidi te bidi me delide sela sąwani  
\r (Luk 4:31-37)  
\p
\v 21 Te Jisas dali, aga bidi me si me si dali, augwali te Kaperneam hanuba pelama, tama teba sabolali. Tama te Sabat sogo dwasianu Sarere Jisas te Juda dabego bomo yai po ola mabo be tomoba polo pelama, tama agai po te we bidi augwalibolo ola mani.  
\v 22 Tama augwaligo agai po odama, tama augwali moni noma siyu, tama midigi sai. Magi baso meni. Agai augwali te Juda dabego bomai po koneani bidi dabego kolesaga ola mabo tiwai gilama me ebeo. Menio. Agai augwali te nogi dali bomo dali si elalubo bidigo kolesaga ola mabo tiwai mu yai.   
\p
\v 23 Te sogo bidi me deli te augwaligo bomai po odobo lotu be tomode bididuali, tama agade te dwai haubo noma bidi elaluali. Agai bomonama i weyu, te po wali,  
\v 24 “Te Nasaret hanu bidi Jisas, nago da dwai mobo dabebolo mena sę yainogo asaliwe? Te nago da dolainogo homu eyu, asai dawe? Eno nage koneani, nage te Godigo gasagi yai tedali wiegi yai bidi dao,” te po wai.   
\p
\v 25 Tiali goli Jisasgo te dwai mobobolo te po wai, “Nago pedauwali pania selama, tama te bidi nago taga soayu, buluba soao,” te po wai.  
\v 26 Tama te dwai mobogo te bidigo tigi omagia mu didibili ilai, tama i wabogo po dagą genuai mu olama, tama te bidi taga palio.   
\p
\v 27 Tama tigidali we bidi augwali noma siyu, tama augwa hasi tomode digi po miani, “Te e da mena sę dawe? Te gasagi yai gesi ola mabo po dao,” te po wai. “Te bidigo bomo elalubaso, tama agai te dwai haubo noma bidi dabeba po pusubaso, tama augwaligo agai po odali,” te po wai.  
\v 28 Tama agai yali sę po Galili tǫ pedaiba polo pelama, te we bidi tigidaligo odali.   
\s1 Jisasgo te Pitago wego ida usu ilali  
\r (Mat 8:14-15; Luk 4:38-39)  
\p
\v 29 Te bidi Jisasgo te dwai mobo bidi sela sąnama, tama te Juda dabego bomai po odobo lotu be taga pelama, tama te Saimon dali Andru dali sigo be tomoba pali. Tama Jems me Jon augwali si me hodobo pali.  
\v 30 Tama Saimon aga au te be tomode te pibo be saide pila muai, te tigi posolo gasi elaluali. Tama te we gasi elalubo po augwaligo te Jisasbolo polo wali.  
\v 31 Te po olama, tama Jisas agaba pelama, tama aga nogo tola sigi pelama, hodolali. Tama te tigi posolo gasi agade elaluali tagalama, tama te wego augwali nai sisi ilibo sę yai.   
\s1 Jisasgo te we bidi hauwa usu ilali  
\r (Mat 8:16-17; Luk 4:40-41)  
\p
\v 32 Te be pio eyu, giliga dega sigilubode, te we bidi augwaligo te gasi yai we bidi dabe me, te dwai haubo noma bidi elalubo we bidi dabe te augwaligo agaba selasa asai.  
\v 33 Tama te hanude bidaluali we bidi tigidali augwali te be sunumi pąba sisinani.  
\v 34 Tama agai te gasi haniani elaluali we bidi hauwa usu ma ilili pali. Tama agai te dwai haubo noma bidi hauwa elaluali te sela sąwani. Tama te sę ebadi, te dwai haubo noma bagego aga Godigo Ogwa da konebaso, augwaligo tede po waidali weyu, agai augwalibolo habu selibo po bomonama wai.   
\s1 Jisas te Galili Provins tǫde sę ela bilali  
\r (Luk 4:42-44)  
\p
\v 35 Te sogo kigamu digi mu aga hodaluama, tama agaduba buluba dią solama, tama te bidi meni yai madiba me pelama, aga Godibolo po wainogo yai.  
\v 36 Tama nosali, Jisasgo Godibolo po me odubadi, tama Saimon dali aga abagi solo me augwaligo Jisas gege pai.  
\v 37 Augwaligo aga gegela sulama, tama augwaligo te po wali, “Te tigidali we bidi augwaligo nage gegainogo ebo dao,” te po wai.  
\v 38 Tama agai augwaliba te po wali, “Te tagalama, te da meba te gasa pąde elalubo buluba pinao. Eno po augwaliba me pusainogo. Te sęde naga ena asai dao,” te po wai.  
\v 39 Tama olama, aga te Galili tǫ pedai tigidaliba pelama, tama agai te wiegi yai po te augwaligo bomai po odobo lotu be dabe tomode pusuyu, tama agai te dwai haubo noma bidi dabe sela sąyu yai.   
\s1 Jisasgo te oiyabe gasi yai bidi me deli wiegi yai ilali  
\r (Mat 8:1-4; Luk 5:12-16)  
\p
\v 40 Te oiyabe gasi yai bidi me deli agaba asama, bomonama hanalu wagasali. Aga kidu sugunagasama, tama Jisasbolo te po wai, “Te nago homugo usu dao wida, teda nago ena wiegi yai ma ilama, tama ena te meda meni yai tiwai ma bidaibao,” te bidigo te po wai.  
\v 41 Tama Jisasgo aga homu dene mu ebaso, tama agaba nogo munama diąyu, tama agabolo te po wai, “Awe, eno homugo nage gasi usu ilaibao. Tama nage wiegi yai pedalao, te meda meni yai bidi bidao,” te po wai.  
\v 42 Tama megi naga tama te oiyabe gasigo agade elaluali taga palio, tama aga wiegi yai pedelali.  
\v 43 Tama Jisasgo te bidi tagala palobadi agabolo po bomonama weyu, te po wai,  
\v 44 “Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Tama tilama, tama polobadu Mosesgo wali po gilama Godibolo nai ofa yao. Tama tiyu, te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai. \x * \xo 1:44 \xt Prs 14:1-32\x*   
\p
\v 45 Tiali goli te bidigo Jisasgo agaba wali po wali pisąma, agai te sę yali po tigidali we bidi dabeba subigila pususu bilali, te tigidali hanuba pususu bila silali. Tama tibaso, te we bidi umabo augwali agaba asidali weyu, Jisas aga te hanu dabe tomoba hania pabo usu ebeo. Menio. Aga te hanu bulu badu naga bidali, te bidi meni yai madi naga bidai. Tama te tǫ pedai tigidali habu badu we bidi dabe te aga bidibo madi naga asiyu yai.   
\c 2  
\s1 Jisasgo te nogo sągą dwai bidi me deli usu ma ilali  
\r (Mat 9:1-8; Luk 5:17-26)  
\p
\v 1 Te meba sogo hododolama bidali silama da, tama aga te Kaperneam hanuba ma pai. Tama Kaperneam hanuba sabolama, tama te we bidi augwaligo aga te bede bidibo po odali.  
\v 2 Tama we bidi hauwa sisinama, tama te be pągąna salio. Tama bulu badu te be sunumi pąde te agebele olo me elalubeo. Tama agai te gesi dwagi yai po augwaliba pusubo sę yali.  
\v 3 Tama pusubadi, augwaligo gasi yai bidi me deli agaba selasa asai. Te bidigo nogo sągą dili me te tigidali mu penelai. Tama bidi me si me si augwaligo te gasi yai bidi tolasa asai.  
\v 4 Te we bidigo te be tomode bidabo pesage mu pągąna selama, mu pena sai baso, tama augwaligo te gasi yai bidi aga te Jisas pąba sela asabo usu isąwai. Tama augwali te be ugwadu daiba holama, tama augwaligo te Jisas bidibo madi badu te be dąį dawali. Augwaligo te dalama, tama augwaligo te gasi yai bidi pila mubo bono wa dali selama, te aiyaba tagalaluama mugulali.  
\v 5 Tama Jisasgo augwali sulama koneani, augwaligo agaba augwa homu tigidali muyu, tama agaba homugo tialubo bidi dabe dao, te agai koneani. Tama tibaso, agai te gasi yai bidibolo te po wai, “Eno ogwa, eno nago yali dwai sę sela sąwanio,” wali.   
\p
\v 6 Te Juda dabego bomo yai po page koneai bidi dabe meba augwali tede dulalu bidaluali, tama augwa homude augwaligo te tiwai homu yai,  
\v 7 ‘Magi baso te bidigo agai te tiwai po wabowe? Agai te Godiba posobo po obao. Te mena bidi me deligo te bidigo dwai sęgę me sela sągobeo. Te God agaduba sę naga dao,’ augwaligo te homu yali.   
\p
\v 8 Te Jisas aga homude polo koneani, augwaligo te homu augwa homude elaluali. Tama agai te po augwaliba wali, “Magi baso dagego te tobage homu te duga homude elalubawe?  
\v 9 Te eno pogo bomo elalubo te dagego hania konemainogo eyu, eno mena po waibawe? Eno e bidibolo te po wabo si, ‘Nago dwai sę eno sela sąwani,’ teda eno po bomo elalubo dagego hania konegobeo. Tiali goli eno e bidibolo po olama, tama aga hodaluama, agai aga pibo somo selama bilibaso da, teda eno pogo bomo elalubo te dagego mu koneaibao.  
\v 10 Ena da, te Godigo Bidi Mu da, tama eno homugo dagego konemainogo, eno e tǫde bomo elalubao, te we bidi dabego dwai sęgę sela sąyabo usu yabo elalubo. Dagego suiąo,” te po wai. Tama begelama, agai te nogo sągą dili isai bidibolo te po wali,  
\v 11 “Eno nagebolo obao, nage doligulama, tama naga pibo somo selama, tama naga beba pao,” te po wali.  
\v 12 Tama te bidi hodaluama, tama te tigidali we bidi gedude aga pibo somo polo selama, tama palio. Tama tibaso tigidali we bidi augwali noma mu siyu, midigi sai. Tama augwaligo God nogi ugwaba siyu, tama augwaligo te po wali, “Polobadu dago te tobage tiwai sę ebo me susiąwai dao,” te po wai.   
\s1 Jisasgo Livai i wali  
\r (Mat 9:9-13; Luk 5:27-32)  
\p
\v 13 Te Jisas te Galili sigi wę saniba ma biligi pai. Tama genuai hani we bidi agaba asobaso, tama agai te Godigo wiegi yai po augwaliba pusa mawai.  
\v 14 Tama aga pobadi, tama te bidi nogi Livai suali, te Alfiusgo ogwa, aga te maket takis mone sabo bede dulalubadi. Tama Jisasgo agabolo te po wali, “Nage ena wali asao,” wali. Tama aga hogodama, aga wali palio.   
\p
\v 15 Tama nosali Jisas me, aga wali pabo bidi dabe me, augwali te Livaigo beba duagi pelama, nai tuali. Tama te takis mone sabo bidi hauwa me te dwai sęgę sai bidi hauwa augwali Jisas dali me aga wali pabo bidi dabe dali hodobo dugulama nai tuali. Te tobage tiwai bidi hauwa augwali sesemane sogo te Jisas wali bilaluai.  
\v 16 Te Juda bidi dabe tomode te hani me deli nogi Farisi hani elaluali. Tama Farisi bage meba augwali te Mosesgo bomo yai po page koneai bidi dabe, augwaligo suali, te Jisasgo te dwai sęgę sai bidi dabe dali, me te takis mone sabo bidi dabe dali, nai tubo suali. Tama augwaligo aga wali pabo bidi dabebolo wali, “Magi baso agai te takis mone sabo bidi dabe dali, me te dwai sęgę sai bidi dabe dali nai tubawe?” te po wai.  
\v 17 Jisasgo te po wabo odobaso, tama agai te po te Farisi dabebolo wali, “Te gasi meni yai bidi dabe augwali te munamuna mabo bidi pageba pogobeo. Menio. Te gasi yai bidi naga te munamuna mabo bidiba paibao. Ena asali, eno te doloba pai bidi dabe i wainogo me asobeo. Ena asali te eno dwai sęgę sai bidi dabe i wainogo te ena asai dao,” Jisasgo te po wai.   
\s1 Tubo nai osogo gisilibo kolesaga po  
\r (Mat 9:14-17; Luk 5:33-39)  
\p
\v 18 Te we bidi baptais mani bidi Jon wali pali bidi dabego me te Farisi dabe augwaligo me te tubo nai osogo gisilibo kolesaga wali pali. Tama bidi meba aselama, Jisasba wagasiyu, te po wali, “Te Jon wali pabo bidi dabego me, te Farisi wali pabo bidi dabego badi, te nai osogo gisilibo kolesaga ebo dao. Magi baso te nage wali bilibo bidi dabe augwaligo me te nai osogo gisilibo meniwe?” wali.  
\v 19 Tama Jisasgo po digi po begeleyu, tama te po augwalibolo wali, “Te we kębo bidi me deligo abagi dabe te we sainogo ebadi tama te bidi augwali dali bidibadi te nai osogo gisilibo usu egowe? Menio. Te we sabo bidi augwali dali bidibadi, te sogo te augwaligo te nai osogo gisilibo te usu me egobeo.  
\v 20 Tiali goli nosali gasa bidi dabego te we kębo bidi bomonama odasa pabo si, teda te sogo aga abagi augwali homu dene eyu, tama augwaligo osogo te nai habu selaibao. Tama ena e tǫde bididubadi eno bidi dabe augwaligo nai osogo gisiligobeo,” Jisasgo te po wai.   
\s1 Polobadu sę dali gesi sę dali deliba talua palamuo po wali  
\p
\v 21 Te sogo Jisasgo gasa po digi po me begeleyu, te po wai, “Bidigo te gesi ugwa pedai selama, te poloba badi ugwa pedai dali me hobologobeo. Te agai te tiwai ebo si da, teda te dedage hobolali ugwa pedaigo te badi ugwa ma dedage ilaibao. Te gesigo te poloba badi ugwa pisilama, tama dedage genuai ma pedalaibao.  
\v 22 Tama me, te bidi mego te gesi wain ąį te poloba badia pai kibu meme waligo nigai botol teba tabigobeo. Ma agai tama tiyu da, teda nosali te wain wę genuai bo delama, tama te meme wali botol peda peyu, tama te wain wę tǫba olo gea peyu, tama te meme wali me doyu hagawaibao. Tama tibaso, augwaligo te gesi wain ąį te gesi meme wali botolba tabibo dao, tama te si dali si te bugagia munalubo dao,” Jisasgo augwalibolo te po wai.   
\s1 Te Sabat sogode sę ebo habu selebo po  
\r (Mat 12:1-8; Luk 6:1-5)  
\p
\v 23 Te Juda dabego Sabat sogo me delide Jisas te wit gi tomodu soai. Tama aga wali pabo bidi dabe aga dali soali, tama augwali nasi baso, tama augwaligo te nai wit meba selama, tama te ge tuali. \x * \xo 2:23 \xt Bom 23:25\x*  
\v 24 Tama Farisi dabe meba tede bidali. Augwaligo te tebo sę sulama, tama Jisasbolo te po wali, “Suao. Magi baso augwaligo te Sabat side habu selali sę bolaliwe?”  
\v 25 Tama Jisasgo augwalibolo te po wali, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi eyu bidali.  
\v 26 Te sogo te bidi nogi Abiatar te genuai tobolu pris bidi bidibadi, tama Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao wai, te bomo yai pode. Tiali goli te bret augwaligo me tuali digi Godigo gedude dwai sę ebeo. Dagego te asęani po nedebewe?” \x * \xo 2:26 \xt 1 Sml 21:1-6\x*  
\v 27 Tama Jisasgo te po augwalibolo wai, “Godigo te bidi muani te Sabat sogo tau somainogo me mubeo. Menio. Agai te Sabat sogo muani te bidi tau somainogo muai dao.  
\v 28 Ena da, te Godigo Bidi Mu da. Ena da, te Sabat sogode te genuai bidi dao. Tama tibaso, bidigo Sabatde mena sę yagameo, te eno waibao,” Jisasgo te po wai.   
\c 3  
\s1 Te Sabat sogode Jisasgo te nogo penelai bidi usu ma ilali  
\r (Mat 12:9-14; Luk 6:6-11)  
\p
\v 1 Te me sogo Sabatde Jisas te bomai po odobo lotu be tomoba ma pali. Tama bidi me deli bididuali, te aga nogo me deli dwai elaluai. Te aga nogo penelama, te wa pai tiwai elaluai.  
\v 2 Tama augwaligo Jisasba tonaluali. Augwaligo koneainogo, agai te bidi te Sabatde te wiegi yai ilibowe, ma meni ebowe naga sueinogo yai. Augwaligo te Jisasgo te sę ebode te po tų ilainogo homu yali.  
\v 3 Tama Jisasgo te nogo penelali bidibolo te po wai, “Nage eba asao, te we bidi gesabidide dolaluagasao.”  
\v 4 Aga pąba asama, tama Jisasgo augwalibolo te po wai, “Te eno dagebolo hanalu obao, te dago te Sabat sogo te wiegi yai kolesaga yabo homu yaibawe, ma dago dwai kolesaga yaibawe? Dago te Sabat sogo te bidi dabe bugagia bidimainu tau sabo sę yaibawe, ma dago te bidi ela mumainogo eyu yaibawe? Dago bomo yai pogo tede magi po elalubawe?” Tiali goli augwali sagia siyu, po me wabeo.  
\v 5 Tama agai augwaliba tonono bilama, tama augwaligo te nogo dwai bidi homu dene esiąbaso, aga sębę yali. Tama agai augwaligo tabi dagana sabo sulama, tama aga tede homu sęgę yali. Tama agai po te bidibolo wali, “Nage nogo debelao.” Tibaso, aga nogo debelali, tama nogo wiegi yai ma pedalali.  
\v 6 Tama te Farisi dabego te tebo sulama, tama polo te augwali hogodosa pelama, tama augwali te Herodion hani dali deliba sisinigi pali. Augwali tigidaligo po miyu, tama Jisas elabo po miani.   
\s1 We bidi hani hauwa mu augwali te sigi ąį sane pąba sisinani  
\p
\v 7 Te Jisas dali aga wali pabo bidi dabe augwali te bidali bulu tagalama, tama augwali te Galili sigi ąį saneba pali. Tama te genuai hani we bidi augwali aga wali asali. Augwali te Galili tǫ we bidi me, te Judia tǫ me,  
\v 8 te Jerusalem moni hanu me, te Idumea tǫ we bidi dabe me, te Jordan pabo ąį pedai u badu bidibo we bidi me, te moni hanu si Tair dali Saidon side bidibo we bidi, te genuai hani we bidi dabe augwaligo te Jisasgo ebo sę po odama, tama augwali agaba asali.  
\v 9 Tama Jisasgo aga wali pabo bidi dabebolo te po wai, “Te genuai we bidi hani mu bidalubao. Tiyu augwaligo ena gea sidali, dagego te moni geba me deli dodolama muao. Ena teba holama, tama bugagia bidaibao,” agai te po wali.  
\v 10 Magi baso meni. Agai te gasi yai we bidi hauwa wiegi yai ma ilali, tama tibaso te gasa gasi yai we bidi dabego agaba bomonama kęą sai elaluai. Augwaligo agaba nogo muainogo homu yai.  
\v 11 Te dwai haubo noma bidi elaluali bidi dabego aga subaso da, teda augwaligo agaba kidu sugunama, tama augwali i bomonama weyu te po wali, “Nage Godigo Ogwa dao,” wali.  
\v 12 Tiali goli agai po bomonama augwaliba wali, augwaligo te aga nogi hanilama munu me wagio wai.   
\s1 Jisasgo aga po sela pabo bidi nogo si olama sągągo si bidi sa muani  
\r (Mat 10:1-4; Luk 6:12-16)  
\p
\v 13 Jisas te bulu du daiba holai. Agai te bidi meba sa muainogo yai. Tama agai te bidi dabe i olama, tama augwali agaba asali.  
\v 14 Tama agai nogo si olama sągągo si bidi sa munama, te augwali aga dali bidimainu yai. Agai augwali te wiegi yai po pusigi pomainogo tagala palabo homu elama,  
\v 15 tama agai augwalibolo te dwai haubo noma bidi sela sąbo bomo mawainogo yai.  
\v 16 Agai te nogo si olama sągągo si sa muani bidi dabego nogi e dao: te me Saimon, Jisasgo agabolo gasa nogi Pita mawai.  
\v 17 Tama Jems, te Sebedigo ogwa, te aga ama Jon dali, te agai gasa nogi Boanerges mani. Te nogigo page te e tama tiwai dao: te be kulukulu wabo dagalugo ogwa dao wali.  
\v 18 Tama gasa sa muani bidi dabego nogi Andru, me Filip, me Bartolomyu, me Matyu, me Tomas, me Jems te Alfiusgo ogwa, me Tadius, me Saimon te Kenan tǫ bidi,  
\v 19 tama Judas te Keriot bulu bidi, te bidigo nosali te Jisas dali boi ebo bidi dabego nogoba muai dao.   
\s1 Augwaligo Jisasbolo tibo po kisilali  
\r (Mat 12:24-32; Luk 11:14-23; 12:10)  
\p
\v 20 Jisas te beba pai. Tama te genuai we bidi hani augwali ma sisinani, tama te Jisas aga wali pabo bidi dabe dali augwaligo te we bidi tau sabo sę hauwa elalubaso, augwali te nai tuabo sogo meni yani.  
\v 21 Te Jisas aga deli kaneme bage augwaligo te po odama, tama augwaligo aga sagasainogo asai. Magi baso meni, te olo we bidi dabego “Aga te wabo palio” po wabo augwaligo odali.   
\p
\v 22 Te Juda dabego bomai po page koneani bidi dabe augwali te Jerusalemde bidaluali tama meba edaba dulama, tama augwaligo Jisasde te po wai, “Te dwai haubo noma bidi dabego tobolu bidi nogi Belsebul, tego Jisasde dagana siyu bididubao. Tama te Belsebulgo agabolo mani bomogo Jisasgo te dwai haubo noma bidi dabe sela sąbo dao,” augwaligo te po wai.   
\p
\v 23 Tama te po obaso, Jisasgo augwali aga pąba asomainogo i olama, tama agai te po meba habu sugunama te po begelama wali. Agai te po wai, “Te magi ilama tama te Satango te Satan aga digi te sela sąwainogo ebo usu yaibawe? Woo, te Satango aga digi me sela sagobeo.  
\v 24 Te genuai tǫde bidi me deligo bomo tomode bidibo bidi dabe augwa hasi te hani si bugulama tama hwįbaso da, teda te bomo elaluali te usu me elalugobeo, te moni hani tulaluaibao.  
\v 25 Tama te deli bede bidaluali bidi hani te augwa hasi bugulama, tama augwali hwįbaso da, teda te bede bidali bage te bomo elama me bidigobeo, te pebeda paibao.  
\v 26 Tama te tiwai me, te Satan agaba digi boi bidi elama, tama aga hani te peda siyu da, teda aga bomo elama bidabo te usu me elalugobeo. Menio. Te aga sia saibao.  
\v 27 Me ma, te bidi me deli aga olo tama te bomai bidi me deligo beba pelama, tama agai nai selama dobawainogo ebo te usu me egobeo. Menio. Agai te bomai bidibolo hasia te nogo sągą duaibao. Agai tama tilama, tama agai te bidigo bede elaluali doado bage tigidali dobola selama selasa paibao,” wali.   
\p
\v 28 Tama Jisasgo te po olama, po me weyu agai te po wai, “Eno mu po dagebolo obao. Te we bidigo magi magi dwai sę ebo, ma augwaligo magi dwai posobo po Godibolo wabo, te tigidali dwai dwai kolesaga te God agai sela sąbo bomogo sela sąbo usu mu yaibao.  
\v 29 Tiali goli bidigo dwai posobo po te Godigo Tedali Mobo Bidi dali obaso da, teda Godigo agai te sęgę me sela sąsiąma elaludu, te megi me nosali me te munu me sela sągobeo. Menio. Te sęgę agade me tama elalua pidu pidubadi geaibao,” Jisasgo augwalibolo te tama po wai.  
\v 30 Magi baso meni. Augwaligo aga dali te po wai, “Te agade dwai haubo noma bidi elalubao,” wali.   
\s1 Te Jisasgo ida dali te ama dede dabe dalide po  
\r (Mat 12:46-50; Luk 8:19-21)  
\p
\v 31 Te po wabo silama, tama te sogo te Jisasgo ida me ama dede dabe dali augwali sabolali. Augwali te be bulu badu dodolalu, tama augwaligo po agaba ola tolali. Augwaligo homugo te aga augwaliba asomainu homu yai.  
\v 32 Tama genuai we bidi hani duada solama, te aga bagulama tomode bidibaso, tama augwaligo te po agabolo wali, “Odao, te naga ida me ama dede badi, te augwali bulu badu bidaluagaselama, te augwaligo nage i obao,” wali.   
\p
\v 33 Tama agai te po wei augwaliba ponani, “De dede te eno ida me ama me dawe?”  
\v 34 Agai te aga bagulama duada pali we bidiba tonono bilama, tama agai te po wai, “Te eno ida dede, ama dede dabe ena dali bidalubo suiąo,” wai.  
\v 35 “Te bidigo te Godigo homu kolesaga wali pabo bidi bidibaso da, aga te eno ama abe me ida dao,” Jisasgo te po wai.   
\c 4  
\s1 Bidigo te giba nai wai tedela palali po  
\r (Mat 13:1-9; Luk 8:4-8)  
\p
\v 1 Te nosali me sogo Jisasgo te we bidi augwali te Galili sigi wę sane pąde po ola mabo sę ebo ma gagalali. Tama genuai we bidi hani mu te augwali agaba sisinagasali. Tama aga te geba me deliba holama, tama tede dulaluai. Tama geba te sigi we tomode elaluali. Tama tigidali we bidi augwali te we sane pąde duada pelama bidaluai.  
\v 2 Tama agai ola mani po hauwa te po habu sugunama, te begelebo pogo naga augwali dali wali. Agai e tama tiwai po augwaliba mawai.  
\v 3 “Dagego odiąo! Te bidi me deli pelama, te giba nai wai tedelalo biligi pai.  
\v 4 Agai tedelalo palio, tama te nai wai ge meba te sunumide tudulaluali. Tama ba dabe asiyu, te nai wai ge tuali.  
\v 5 Tama meba nai wai te masigi elalubo badu tudulaluali, tama te tǫ hauwa meni yai madi. Te tǫ aiyanu igilusiąwai madi weyu, tama te nai wai polo holai.  
\v 6 Tiali goli giliga ugwadu naniyu, tama te giligago ulali. Tama te wit nai aga sele meniama, tama tigidali wa pelama, tama sasia pelama isali.  
\v 7 Tama meba nai wai te sesani bono elalubo tomoba tudulaluai. Tama te sesani bono me holama te mesegelali, tama agai nai me walobeo.  
\v 8 Tiali goli te nai wai meba te wiegi yai tǫ ili yai madiba tudulaluama, tama genuai holama, tama nai du walai. Mebago ge dwasianu te 30 walali, mebago te 60 walali, tama mebago geninama mu tama te 100 walalio.”  
\v 9 Tama agai te po me augwalibolo wali, “Te olo elalubo bidi agai te po odiąo,” te po wai.   
\s1 Jisasgo po digi po begelebo sę page po  
\r (Mat 13:10-17; Luk 8:9-10)  
\p
\v 10 Te nosali te we bidi hauwa aga dali menibadi, Jisas agaduba naga bididuali, tama aga wali pabo bidi nogo si olama sągągo si badi, te meba Jisas aga dali bidalubo bidi dabe dali, augwaligo agabolo te begelama wali po pagede hanalu wali.  
\v 11 Tama agai te po augwalibolo wai, “Godigo dagebolo te agai te we bidi dabe tonalubo sę page geme dualaluali po page te dagebolo ola mawai dao. Tiali goli te Godigo po odisąma bulu badu bidibo bidi dabe augwaligo da, te eno pusubo po te po digi po begelama, tama wabogo naga te po odobo dao. Te po page augwaligo odobo menio.  
\v 12 Te Godigo po bukude te gasa we bidide polobadu asęani po, te po page te megi bidalubo we bidide elalubao, te e tiwai dao:  
\q1 ‘Te augwaligo tonono bilibadi, tiali goli te augwaligo  
\q1 te subo nai page hania konegobeo. Te augwaligo  
\q1 po odobadi, tiali goli te po page augwaligo me  
\q1 konesiąwani. Tama augwaligo konegi sogo da, teda  
\q1 augwaligo homu begeleyu, tama Godigo augwaligo  
\q1 dwai sę yali sęgę sela sągi da,’ \x * \xo 4:12 \xt Ais 6:9-10\x*  
\m te po polobadu asęani,” Jisasgo te po wai.   
\s1 Te nai waide po page begelama wali po  
\r (Mat 13:18-23; Luk 8:11-15)  
\p
\v 13 Tama Jisasgo augwalibolo te po hanalu wai, “Dagego te eno po digi po begelama wali po page me konebe dawe? Tama tiyu da, teda dagego mena tama te begelama wabo po page tigidali koneaibawe?  
\v 14 Te bidigo nai wai bulai po wali agai te Godigo po haniani we bidibolo pusuyu te bulali tiwai dao.  
\v 15 Te sunumide tudulaluali po wali te Godigo po odali we bidi hani dabe, tama te sogo naga Satan asama, te Godigo augwali homude bulali po dagala sąwai.  
\v 16 Tama meba we bidi augwali te masigi elaluali tǫba tudulaluali nai wai tiwai yai. Augwaligo Godigo po odama, tama polo augwali kolesaga sali, tama augwali tede wiegi yai homu pemene yali.  
\v 17 Tiali goli augwaligo sele te dąų me olalubeo. Augwali te dwasianu sogo naga elaluali. Te nosali Godigo po aiyaba elaluainogo ebo bidi mebago te we bidi augwaliba sęgę dali dene dali mobaso da, teda augwaligo te po wali pabo kolesaga tagalaibao.  
\v 18 Tama meba we bidi augwali te sesani yai bono elalubo tomoba tudulaluali nai wai tiwai yai. Te hani augwaligo te Godigo po odali,  
\v 19 tiali goli augwaligo homu hauwa te tǫde naide elama, tama augwaligo te mone hauwa sisinabo homu elama, tama haniani doado bagede godola pelama pesa yali. Te doado bage dabede homu ebogo te Godigo po mesegelama, tama tebo we bidi hani augwali te nai du me walisiąwai.  
\v 20 Tiali goli meba we bidi augwali te wiegi yai tǫba tudulaluali nai wai tiwai gilama yai. Te augwaligo Godigo po odama, tama augwaligo selama tama tolaluali, tama augwaligo nai du walali. Mebago te ge dwasianu walu, te mebago hauwa walu, te mebago geninama mu tama waliyu yalio,” Jisasgo te po wai.   
\s1 Te ulade po digi po begelali po  
\r (Luk 8:16-18)  
\p
\v 21 Tama agai te po me augwalibolo wai, “Te bidigo lam sole domonama bogoli ebadi tama sela asama, te baket dologoba ma te pibo sai bet dologoba te mubo dawe? Menio. Agai te tebol sai daiba mubo dao.  
\v 22 Te tigidali geme dualaluali nai nosali te hania haninama pedalaibao. Tama bidigo te mesegaluali tigidali nai, nosali te ulaba hanilama pedalaibao.  
\v 23 Te olo elalubo bidi agai eno te po odiąo!”   
\p
\v 24 Tama agai te po me augwalibolo wai, “Te dagego odali po, tede dagego bugagia kone palao! Te dagego bidi dabebolo te mabo nai usu nama, te usu si naga dageba wei ponaibao. Tama agai meba ma wadolama te dageba mawaibao.  
\v 25 Te bidi me deligo nai tolalubo bidi, te Godigo agabolo geninama ma mawaibao. Tiali goli, te bidi me deligo dwasianu nai naga me elalubo bidi da, teda agai te elalubo nai, te hagawaibao,” Jisasgo te po augwalibolo wai.   
\s1 Te nai wai holobo po begelama wali  
\p
\v 26 Tama agai te po me wai, “Te Godigo we bidi tonalubo sę tomoba pabo tų te e tiwai dao, te bidi me deligo te nai wai tǫba tedelalo pabo tiwai dao.  
\v 27 Tama tigidali sogo be hulibo usu nama te bidi godege piduali, tama be posobode aga hogodama bilidu yai. Tama te tedelalo pali nai wai holama, tama mena tama genuai ebo me, te bidi agai me konebeo.  
\v 28 Te tǫ aga digi sę ebaso tama te nai wai holama, tama nosali te nai wai du walaibao. Hasia bolo te nai honu pedalama, tama nosali te nai tobolu tomode te nai genuai pedalaibao.  
\v 29 Tama nosali te nai genuai elama te nai inabo si da, teda te bidigo te hwą ge dali sę yaibao. Te nai sabo sogo bodolu te pedalali dao,” Jisasgo te po wai. \x * \xo 4:29 \xt Jol 3:13\x*   
\s1 Te mastet nai waide po begelama wali po  
\r (Mat 13:31-32; Luk 13:18-19)  
\p
\v 30 Tama Jisasgo te po wali, “Dago te Godigo we bidi tonalubo sę te mena tama usu saibawe? Tama dago tede mena usu sabo po begelama waibawe?  
\v 31 Te tiwai nai wai me deli te nogi dago te mastet wabo. Te nai mastet wai ge da te e tǫde gasa tigidali elalubo nai wai ge tiwai me elalubeo. Menio. Te dwasianunu mu tama. Bidigo te nai wai ge te tǫba bulaibao.  
\v 32 Bidigo te mastet nai wai ge bulama, tama holama tama genuai igulama, tama te kaya te tobage tigidali ni aiyaba elaluaibao. Te aga nologo genuai igulama, tama te ni nologode te ba dabe te tįwąi madi dologoba duayagasu yaibao,” Jisasgo te po wai.   
\p
\v 33 Jisasgo te we bidi augwalibolo te po digi po hauwa begelama, te tama tiwai agai po pusali, te augwaligo homu kolesagaba muabo usu po naga wai dao.  
\v 34 Agai te po te we bidi augwalibolo hanilama me pusubeo. Menio. Agai te po begelama naga pusali. Tama aga te wali pabo bidi dabe naga aga dali bidibadi, agai te po page tigidali hanilama augwali dali pusuyu yai dao.   
\s1 Jisasgo po obaso, tama genuai wali sia sali  
\r (Mat 8:23-27; Luk 8:22-25)  
\p
\v 35 Tama te silama te sogo digi te be pio ebode, agai te aga wali pabo bidi dabebolo weyu, te po wai, “Da te sigi ąį u badu pedai badu pinao,” po wai.  
\v 36 Tama augwaligo te genuai we bidi hani bidaludubadi taga peyu, te augwali Jisas dugulaluali gebaba holama, tama augwaligo aga dali selama pali. Tama gasa bidi dabe augwali meba gasa geba dabe me tedu augwali dali pai.  
\v 37 Tama augwali te sigi ąį tomodu pobadi, te moni genuai wali me deli hogodama, tama wę dini te geba tomoba asali, tama te geba te węba hoa sigulama, te węgo geba pągąna sainogo yai.  
\v 38 Tama Jisas te geba dugi badu bidali, tama aga tobolu te geba dugiba munama, godege pila muani. Augwaligo aga hodoligi pelama, tama augwaligo te po wai, “Tisa po ola mabo bidio, te pąde da węba hoa selama hagainogo ebao, tama nago homugo te kone palobewe?”  
\v 39 Tama Jisas hodasa holama, tama te waliba wado po obadi, tama wębolo po weyu te po wali, “Megi da, usu dao. Nage sia sao! Nage megi tama silama isao!” Tama wali kekasa peyu, tama te wę me dwasianu memenege munu me ebeo.  
\v 40 Tama agai aga wali pabo bidi dabebolo te po wai, “Magi baso dage te tiwai wi ebawe? Te dagego enade te konealubo po dąų weyu enaba duga homu me tialubo meniwe?” te po wai.  
\v 41 Tiali goli augwali wi dwai mu elama, tama augwa hasi tomode po mia siyu, te po wali, “Te bidi aga niwai bidi, tama te wali de wę dali sigo agai po odaliwe?” te po wai.   
\c 5  
\r (Mat 8:28-34; Luk 8:26-39)  
\p
\v 1 Te Jisas dali aga bidi dabe dali augwali te gebadu pelama, tama te sigi wę u badu pedai badu te Gerasa dabego tǫba sabolali.  
\v 2 Agai te geba taga soai madi, tama polo te wabo pabo dwai haubo elalubo bidi me deli te Jisas tiąba asali. Te bidi te gų page hauwa elalubo tǫde subigila biliduai bidi tama asali.  
\v 3 Aga te gų pagede pilala bilai. Tama te bidi me deligo aga dąų wabo te usu me isąwai. Te sengo me usu me ebeo.  
\v 4 Te hauwa sogo augwaligo te hankapgo me sengo nogo sągą duyu yali. Tiali goli agai te hankap me sen me togwa sąwani. Agai te moni bomo mu eyu, tama bidi mego aga tuainu ebo te usu me isąwai.  
\v 5 Te sesemane sogo giligade me hulide me aga te gų pagede me bulu dude bidada biliduai. Tama agai i dwai olama, tama aga tigi te aga digi masigigo tologobo sę iduai.   
\p
\v 6 Te agai Jisas te digibulu bidibadi digi sulama, tama aga udada asama, tama aga pageba kidu sugunagasali.  
\v 7 Agai bomo elama mu i weyu, te po wai, “Jisas, nage ugwade bidibo Godigo ogwa mu, nago magi sę enade yainogo ebawe? Eno te Godigo nogide nagebolo hanalu obao, nago te dene enabolo me magio,” te po wai.  
\v 8 Magi baso meni, te Jisasgo agabolo wali, “Nage dwai haubo noma bidi, nago te bidide bidibo taga pao,” wali.   
\p
\v 9 Tama Jisasgo agabolo hanalu wali, “Nago nogi dewe?” Tama agai te po wai, “Ena nogi Ami dao. Magi baso meni, da hani genuai hauwa dao.”  
\v 10 Tama agai Jisasbolo i bomo elama weyu, Jisasgo te dwai haubo noma bidi dabe te moni tǫde munu me sela sągio po widu geai.  
\v 11 Te genuai kibu hani sibi dabe augwali te dwasianu bulu du pąde nai tuduladu bidaludai.  
\v 12 Tama te dwai haubo noma bidi dabe augwaligo te bomonama i weyu, Jisasbolo te po wali, “Nago da te kibu dabe tomoba tagala palao,” te po wai.  
\v 13 Tama Jisasgo augwali teba pao olama usu da wai. Tama te dwai haubo noma bidi dabe augwaligo te bidi taga peyu, tama augwali te kibu dabe tomoba bula sigi pali. Tama te kibu hani dabe bomonama mu udada pelama, tama te dwai bulu sau pado me deliba samonani. Te tigidali kibu umabo mu te bidi sese hauwa 2,000 dao. Tama augwali te sigi ąįba tulaluama, tama augwali te wę tulama poma peyu isila silai dao.   
\p
\v 14 Te kibu tononaluali bidi wi pelama, tama augwaligo po te hanuba me tede elalubo bulu dabeba sela pali. Tama te we bidi augwali te sę ebo suagasali.  
\v 15 Augwali te Jisas bidiboba sabolama, tama augwaligo suali, te dwai haubo noma bidi hauwa polobadu agade bidali bidi, te bidi Jisas dali bidibo augwaligo suali. Megi da, aga ugwa gudama, tama aga homu kolesaga peda pelama, tama aga bugagia dualaludali. Tama te we bidi augwaligo te sulama, tama augwali wi yai.  
\v 16 Tama te bidi dabe te Jisasgo yali sę suali bage, augwaligo te hanudu tamadi asali we bidibolo te bidide pedalali sę po pususu pali, polobadu te dwai haubo noma bidi agade bidai. Tama augwaligo te kibu dabede yali sę po me pusali.  
\v 17 Tama tibaso, te we bidigo bomonama weyu, te Jisas augwaligo bulude bidibo tagalama, te gasaba pao wai.   
\p
\v 18 Tialima, Jisas te gebaba holobadi, tama polobadu te dwai haubo noma bidi sela sąwani bidi, agai te tiwai po Jisasba hanalu wali, “Ena nage dali paio,” wali.  
\v 19 Tiali goli Jisasgo hagela homu yali. Agai agabolo te po wali, “Nage naga beba me naga deli hani bidibo madiba pao. Tama nago te tigidali sę Genuai Bidigo nagede yali sę po pusugi peyu, tama agai nage homu dene eyu tau sali po me pusao,” Jisasgo te po wai.  
\v 20 Tama tibaso te bidi pelama, tama agai te sę yali po te hanu nogo si elalubo tǫ pedai badu te Jisasgo agade yali sę po tigidali pususu bilali. Tama tigidali we bidi augwali homu hauwa eyu noma sali.   
\s1 Te isali wegi dali gasi yai we dali side po  
\r (Mat 9:18-26; Luk 8:40-56)  
\p
\v 21 Te Jisas te gebadu peyu, te sigi ąį ma nogeali. Aga te wę u badu pedai badu tugi pali, tama genuai we bidi hani augwali aselama agaba sisinagasali. Tama Jisas aga te sigi ąį sane pąde bidali.  
\v 22 Te Juda dabego bomai po odobo lotu be tonalubo tobolu bidi me deli asali, aga nogi te Jairus. Agai te Jisas sulama, tama aga sągą pąba basi gulama kidu sugunagasali.  
\v 23 Tama agai bomonama agabolo te tiwai po hanalu wali, “Te eno dwasianu wegi te pąde isabo homu yai. Nago agaba nogo muagaselama, tama aga usu ma igulama bidimainogo obao,” te bidi Jairusgo te po wai.   
\p
\v 24 Tama Jisas aga dali hodobo pali. Tama genuai we bidi hani augwali aga wali pali, tama aga pabo madi te augwali mu pena sali.  
\v 25 Tama we me deli bididuali, tama aga tigide kaneme sesemane sogo idubadi, tama te kibu be nogo si olama sągągo si bidai.  
\v 26 Te hauwa dokta bidigo te hauwa sogo agaba dene madubo sę iduali, tama te wego aga mone tigidali te augwaliba mena silali. Tiali goli agai gasi te dwasianu usu me ebeo. Menio.  
\v 27 Te wego te Jisasgo ebo sę po odai. Tama aga aselama, tama aga te genuai we bidi hauwa bidalubo tomode bididuai. Aga te Jisas pabo wali nosali asidu, tama agai ugwa sabi badu diąna asiduai.  
\v 28 Agai te tiwai homu eyu te po wali, ‘Te eno nogo agai ugwa sabi badu naga diąbaso da, te ena usu ma yaibao,’ agai te homu yai.  
\v 29 Tama te deli sogo naga, te aga kaneme yali te togwa siyu tama wa sali, tama aga tigide te gasi pela silali homu yai.   
\p
\v 30 Tama polo Jisasgo koneani, te meba bomo agade taga pabo koneani. Tama tibaso aga begelama, te we bidi dabebolo te po wali, “Dego eno ugwaba nogogo diąyaniwe?”   
\p
\v 31 Tama aga wali pabo bidi dabego agabolo te po wali, “Nago suao, te genuai we bidi hani te nage pąde pena sali dao. Tama magi baso nago te po weyu, ‘Dego eno ugwaba nogogo diąbo’ po obawe?”   
\p
\v 32 Tama dego te tialiwe nama, Jisasgo te we bidi tomode tonono bilali.  
\v 33 Tama te wego te sę agade pedelali koneama, tama aga wi eyu didibili dali yali. Tama tiyu aga asama, Jisas pąba kidu sugunagasama, tama te tigidali sę agade yali po te hanilama pusali.  
\v 34 Tama Jisasgo agabolo te po wai, “Eno wegi, te naga enade konealubo po dąų weyu, enaba homu tialubo kolesaga ebogo te nage usu ma ilali dao. Nage pao, tama naga homu nagame wiegi yai elaluao. Nago gasi silimainogo yai,” te po wai.   
\p
\v 35 Jisasgo te po odubadi, tama te bomai po odobo lotu be tonalubo tobolu bidigo bede bidibo bidi dabe meba aselawali. Augwaligo te po wali, “Te nago wegi isalio. Magi baso nago te sę dene yabo po te po ola mabo tisa bidibolo obawe?”   
\p
\v 36 Tiali goli Jisasgo augwaligo te wabo poba olo me musiąma, odola tagalali. Agai te bidi Jairusbolo te po wali, “Nage wi egio. Nago enade konealubo po naga dąų weyu naga homu enaba tialuama bidao,” te po wai.  
\v 37 Tama agai te we bidi dabe augwali habu selama, te augwali aga dali me pelamuo wali. Pita me Jems me Jon, te Jems aga ama, te augwali sela naga aga dali pali.  
\v 38 Augwali te tobolu bidi Jairus aga beba sabolama, tama Jisasgo suali, augwaligo te genuai po kulukulu wabo suali. Augwali te homu dene ebaso dwai gela mu oladuali.  
\v 39 Tama aga te be tomoba pelama, tama augwalibolo te po wali, “Magi baso dagego te genuai po kulukulu weyu, te gela weyu ebawe? Te wai te aga mu isibeo. Aga te godege naga piali dao,” agai te po wai.   
\p
\v 40 Tiali goli augwaligo aga gisugu mani. Tama tibaso agai te be tomode bidali tigidali we bidi buluba gudula silali. Tama agai te wai aga aya de ida dali si naga selama, tama aga wali pabo bidi sela sobadi elama, tama augwali te isali wai munalubo madi te be habu tomoba pali.  
\v 41 Tama agai te wegi nogo tolalu, tama agabolo weyu, te po wali, “Talita kumi.” Te po begelama tama dena pogo te po page e tiwai dao, “Dwasianu wegi, eno nagebolo obao, nage hodaluao,” wali.   
\p
\v 42 Tama polo te dwasianu wegi hodaluama tama soali. Agai kibu be 12 elaluai. Tama augwaligo te sę ebo sulama, tama midigi siyu noma mu salio.  
\v 43 Tama Jisasgo po bomonama augwalibolo weyu, te po wai, “Dagego te sę ebo suali po te bidi me delibolo munu me olamuo.” Tama agai augwalibolo weyu, te nai meba selama te dwasianu wegibolo maiąo po wai.   
\c 6  
\s1 Te Nasaret dabe augwaligo te Jisas tudiba muani  
\r (Mat 13:53-58; Luk 4:16-30)  
\p
\v 1 Te silama tama Jisas te bulude bidali tagalama, te aga page bulu Nasaret hanu teba pali. Tama aga wali pabo bidi dabe augwali aga wali pai.  
\v 2 Te Sabat sogo aga te bomai po odobo lotu be tomoba pelama, tama te we bidi augwalibolo te Godigo po pusa mani. Tama augwali hauwago agai po odolama, tama augwali dwai noma siyu midigi sali. Augwaligo te po wali, “Te bidigo te ola mani po menade saliwe? Te agade koneani elalubo kolesaga, te menagiai kolesaga dawe? Mena tama tilama agai te bomai sę ebowe?  
\v 3 Te bidi aga te be sę ebo kamda bidi naga dao, te dago koneani. Aga te we Mariago ogwa, tama aga ama dede da te Jems, me Josep, me Judas, me Saimon, te tama bagego ama gomunai bidi dao. Te aga abe dabe da dali ede bidibao.” Augwaligo te tiwai po olama, tama augwaligo aga dali dwai homu ela mani.   
\p
\v 4 Tama Jisasgo augwalibolo te po wali, “Te Godigo po pusubo profet bidigo nogi tigidali bulude elalubao. Tiali goli te aga page bulude me, te aga deli kaneme hanide me, te aga be mude me, te aga nogi meni yaibao,” te po wai.  
\v 5 Tama agai te bomai sę me deli te bulude me egobeo. Agai nogo te gasi bidi si selaba naga munama tama augwali wiegi yai ma ilali.  
\v 6 Tama te we bidi augwaligo agade konealubo po dąų wasiąyu, tama augwa homu agaba tialusiąbaso, te aga noma siyu midigi sali.  
\s1 Jisasgo aga bidi dabebolo sę mani  
\r (Mat 10:5-15; Luk 9:1-6)  
\p Te Jisasgo te Nasaret hanu tagalama, tama aga te bulu pedai dabeba biligi pelama, tama agai te Godigo po te we bidi dabe augwalibolo ola mena mena bilai dao.  
\v 7 Tama agai te aga wali pabo bidi nogo si olama sągągo si bidi dabe i olama asali, tama agai augwali bidi si si tagala palali. Agai te dwai haubo noma bidi sela sąyabo bomo te augwalibolo mawai.  
\v 8 Tama agai te po augwalibolo wai, te bilibo dono augwaligo tolasa bilao wali, tiali goli augwali te biligi pabo sogo gasa doado bage dali me sabiligio wali. Augwaligo te bret me sabiligio wali. Te wa brasbel me augwaligo me sigio po wali, tama augwaligo gudali ugwa agebelede te mone bulama me sela pelamuo. Menio.  
\v 9 Augwaligo te sągą nadoba mumainogo yao wali, tiali goli augwaligo te holobo ugwa si munamuo wali.  
\v 10 Tama agai augwalibolo te po me wali, “Te dage bulu me deliba sabolama tama te be me deli tomoba pobaso da, teda dage te be tomode naga bidiąo, te gasa gasa beba pigimio. Tama nosali dagego te be tagalama te dage piąo.  
\v 11 Tama te meba bulude te augwaligo dage te augwa beba dage sela pisąma, tama augwaligo dagego po odisąyu ebaso da, teda dagego te bulu taga peyu, tama te dagego sągąde elalubo pobele bage sela sąyao. Tama tiyu augwaligo te augwa dage dali yali dwai kolesaga homugo kone palomainao,” agai te po wai.   
\p
\v 12 Tama tibaso te po sela pabo sę bidi dabe si si pelama, tama augwaligo te tiwai po te we bidi dabebolo haniani bulude pusali, “Dagego duga dwai sę tagalao, tede ge neyu duga homu kolesaga begeleąo,” te tobage po wali.  
\v 13 Tama me augwaligo te dwai haubo noma bidi hauwa sela sanama, tama augwaligo te hauwa gasi yai bidi tigide wel munama tama augwali usu ma iliyu yai dao.   
\s1 Te we bidi baptais mani bidi Jon isali po  
\r (Mat 14:1-12; 9:7-9)  
\p
\v 14 Tama megi da, te gavman tuni bidi Herot agai te sę ebo po dabe odali, magi baso meni, te tigidali tǫ pedaide te Jisasgo nogi usu elalualio. Te meba we bidi augwaligo te po Jisasde wali, “Te we bidi baptais mani bidi Jon aga te gų pagede ma hodalualio, te aga Jisas dao. Tama tibaso te genuai bomo aga nogode pedalubao,” te po wai.  
\v 15 Tama meba augwaligo te po wali, “Woo, te meni. Jisas da, te aga te polobadu bidali profet bidi Elaija dao.” Tama mebago te po wali, “Aga te profet dao, te polobadu Godigo po pusubo sę ela bilali profet dabe tiwai dao.”   
\p
\v 16 Tama te gavman tuni bidi Herotgo te wabo po odama, tama agai te po wai, “Polobadu eno bidi me tagala palama, tama agai Jon dogoni togolama tama aga isai dao. Tiali goli megi da, aga ma hodaluali dao,” te po wali.  
\v 17-19 Polobadu Herot aga ama Filip me bidibadi, te Herotgo Filipgo we nogi Herodias dagala sai. Tama tibaso Jongo hauwa sogo te Herotbolo te po wai, “Nago te naga amago we sali, te dolo me ebeo,” wali. Tama te we Herodias agai homu dwai mu te Jon dali elama, tama aga ela muabo homu yali, tiali goli agai te tiabo sę usu ebeo. Herotgo te bidi meba tagala palama, tama augwaligo te Jon pageabi elama, tama te kalabus bede aga te sengo kęani. Tiali goli agai Jon ela mubeo.  
\v 20 Magi baso meni, Herot aga te Jonde wi yai. Agai koneani, Jon aga te wiegi yai tama doloba pai bidi bidali. Tama agai te aga bugagia tonaluali. Agai te Jongo pusubo po odama, tama aga homu hauwa elama, tama aga homu sęgę iduali. Tiali goli agai te agai po odobo te godolo mu yai.   
\p
\v 21 Nosali te we Herodiasgo te tiwai sunumi elalubo pedalali. Herot aga idago aga ame nani side pedalubaso, te agai genuai nai ulaiba wali. Agai te nai da tueinu ebo te aga dali gavman sęde tau sabo bidi dabe dali tueinogo yali, tama te polalubo ami tuni bidi me, te Galili tǫde bidalubo genuai bidi dabe dali te nai da tueinogo yai.  
\v 22 Tama te we Herodias aga wegi aga te nai tubo madi tomoba aselama, tęąbi yagasali. Tama Herot dali te aga dali nai tuali bidi dabe me, augwali godolo mu yali. Tama Herotgo te gesi wegibolo weyu, te po wai, “Nago magi nai saiwe? Nago enabolo po obaso, te eno nagebolo mu mawaibao,” te po wai.  
\v 23 Tama Herotgo agai po dąų wabo po bomonama weyu, agai agabolo te po wai, “Mu tama dao, nago mena nai po enabolo hanalu wali, te eno nage mawaibao. Te nago eno te we bidi tonalubo te bomo tomode togolama, te nage mao po obaso da, teda eno nage mawaibao,” agai te gesi wegibolo te po wali.   
\p
\v 24 Tama te wegi buluba solama, tama aga idabolo hanalugi soali, “Te eno mena nai sai po wagawe?” Tama aga idago te po wai, “Nago te we bidi baptais mani bidi Jongo tobolu sabo po wao,” te po wali.   
\p
\v 25 Tialima, te gesi wegi polo ma te tuni bidi pageba ma asama, tama te po agabolo wali, “Megi naga tama eno homugo nago te baptais mani bidi Jongo tobolu te pou me delide munama, tama nago enabolo mao,” wai.   
\p
\v 26 Agai te tama po obaso, tama te tuni bidigo homu sęgę mu yalio. Tiali goli agai homude te agai mu po da dąų wali te aga dali hodobo te duada pelama nai tudu pabo bidi dabe gesabidide wali po, te pode homugo kone palali. Tama agai te wegigo po sela sągobeo homu yalio.  
\v 27 Tialima, polo tama te tuni bidi Herot agai te ami bidi me deli tagala palama, te Jongo tobolu togogi pelama sela asomainogo yali. Te ami bidi te kalabus beba pelama, tama Jongo tobolu mage togwai.  
\v 28 Tama agai te Jongo tobolu togwali te pou me delide munama, tama selasa aselama, tama te gesi wegibolo magasali. Tama te wegigo aga idabolo mawai.  
\v 29 Te Jon aga wali pabo bidi dabego te wabo po odama, tama augwaligo aga tigi sagaselama, tama augwaligo te gų pageba pubaligi pai.   
\s1 Jisasgo bidi dabe umabo 5,000 bidi nai mani  
\r (Mat 14:13-21; Luk 9:10-17; Jon 6:1-13)  
\p
\v 30 Te Jisasgo tagala palali po sela pali sę bidi dabe augwaligo sę silama, tama ma begasa aselama, tama augwali Jisas dali deliba sisinani. Tama augwaligo te egi pali sę po miani, tama tigidali po augwaligo te we bidibolo ola mani po wai.  
\v 31 Te we bidi hauwa eda asiyu, ugwa soyu yali, tama Jisas dali aga wali pabo bidi dabe dali augwaligo te we bidi tau sabo sę ebaso, augwali nai tuyu toma nabo sogo meni yani. Tama tibaso Jisas aga wali pabo bidi dabebolo te po wali, “Ae, tegobao, dena naga te bidi meni yaiba me deli pelama, tama dage toma dwasianu tuiagameo,” te po wai.  
\v 32 Tama augwali te geba selama, tama augwali te sigi ąį daidu te bidi meni yai habu me deli badu pali. Augwa naga palio.   
\p
\v 33 Tiali goli te we bidi hauwago augwali pabo suali, tama augwaligo te augwali koneani. Tama tigidali hanu we bidi augwali teba pedai badu tǫdu udada pelama, tama augwali te Jisas pali sunumi te badu polasa pedaligi palio.  
\v 34 Tama Jisas te gebadu pelama, te wę pedai badu tugi pelama, tama agai te we bidi hauwa bidalubo suali. Tama agai augwali homu dene genuai mu yali. Augwali te sipsip kibu tonalubo bidi meni yai tiwai bidaluali. Tama tibaso agai gagalama, te wiegi yai po hauwa augwaliba ola mawai. \x * \xo 6:34 \xt Nam 27:17; 1 Kin 22:17; 2 Sto 18:16; Ese 34:5; Sek 10:2; Mat 9:36\x*  
\v 35 Te giliga dega sigulainogo yali, tama te Jisas aga wali pabo bidi dabe te agaba aselama, tama augwaligo te po wai, “Te ede da, te bidi meni yai madi tama te giliga dega sigulainogo ebao.  
\v 36 Nago te we bidi augwali tagala palao. Augwali peyu, te be nani dabeba pomainao, tama augwa tuabo nai abelegi pomainogo tagala palao,” te po wali.   
\p
\v 37 Jisasgo augwaliba te po wei ponani, “Duga digi te augwali nai maiąo.” Tama augwaligo agabolo te po wali, “Te nago homugo dago te bidi sese a naga 200 kina monego dago te bret abelegi pomainogo eyu obawe?”  
\v 38 Tama agai augwalibolo te po wali, “Dagego nisu naga bret munalubowe? Dage pelama sugi piąo.” Augwaligo sula selama, tama augwaligo te po wai, “Dago te bret a naga, me te sųgų si te tama elalubao.”  
\v 39 Tama agai augwalibolo te po wali, “Tigidali augwali te wiegi yai nosaide wasisi pelama, duada piąo wao,” te po wali.  
\v 40 Tama te we bidi tigidali augwali duada pali, tama te wasisi pelama, duada pali hani me badu te bidi sese a naga 100 bidi duada pobadi, te meba duada pali hanide te bidi si olama nogo si 50 bidi bidada pali.  
\v 41 Tama agai te a naga bret dali te sųgų si me sali. Tama agai te dagaluba tonaludama, tama puba hwi po Godibolo walio. Tama agai te bret pebedama, tama te aga wali pabo bidi dabebolo menama, tama augwaligo te we bidiba dobaba pali. Tama te sųgų si me tologolama, tama te tigidali we bidiba dobaba palio.  
\v 42 Tama tigidali augwali te nai tudu pali te usu mu yalio.  
\v 43 Tama te bret me sųgų te me badu tigidali munalua pali, te augwaligo sisinama, tama te bonou wa basket te nogo si olama sągągo si pągąwani.  
\v 44 Te bret me sųgų tuali bidi dabe, augwali te bidi sese umabo te 5,000 bidi dao.   
\s1 Jisas te sigi ąį daidu pali  
\r (Mat 14:22-33; Jon 6:16-21)  
\p
\v 45 Te nai mabo sę silama, tama Jisasgo aga wali pabo bidi dabe augwali te asesa piąo olama, te augwali polo te gebaba holomainogo elama, tama augwali te aga asabo badu te sigi ąį pedai badu polasa te Betsaida buluba piąo wali. Agaduba digi te we bidi dabe augwa beba tagala palu pomainogo yai.  
\v 46 Agai te we bidi augwali tagala palama, tama aga te bulu du bageba ugwa holai. Aga tede agaduba bididubadi te Godibolo po wainogo tiali.  
\v 47 Te be pio ebode te geba te sigi ąį tomode elaluali, tama Jisas agaduba te tǫde me bididuai.  
\v 48 Tama agai suali, te waligo augwali degelainogo ebaso, tama augwali te wę togobo sę dene mu yai. Te be posabo pąde, teda Jisas te sigi ąį daidu augwali bidiboba pali. Agai te augwali ela soainogo yai.  
\v 49 Tiali goli te aga wali pabo bidi dabe augwaligo aga te sigi ąį daidu asobo sulama, tama augwaligo homugo aga te isi bidi me deli da te homu yai. Tama augwali homu dwai noma sabo i dali walio.  
\v 50 Magi baso meni, tigidali augwaligo aga sulama, tama augwali wi mu yai.  
\p Tama polo Jisasgo augwalibolo weyu te po wai, “Dage homu tegaluiąo, bomo elama bidiąo. Te ena tama dao. Dage wi egimio,” te po wai.  
\v 51 Tama aga te gebaba holama, tama augwali dali bidibo si, tama te moni wali asali sia salio. Tama augwali midigi eyu noma mu selama, tama augwaligo homu hauwa yalio.  
\v 52 Magi baso meni. Te Jisasgo te we bidi hauwa tebolo bret dabe dobawali sę page tede augwaligo bugagia homu kone me palobeo. Menio. Augwa homu me hulialuama tama usu ebe.   
\s1 Jisasgo te Genesaretde gasi bidi hauwa wiegi yai ma ilali  
\r (Mat 14:34-36)  
\p
\v 53 Te silama, tama augwali te sigi ąį nogolama, tama augwali te Genesaret pedai badu tugi pali, tama augwaligo te geba tede gebelali.  
\v 54 Augwaligo te geba taga sobadi, tama polo te we bidi dabe augwaligo te Jisas sulama, tama aga konea palio.  
\v 55 Tama te bidi dabe udada pelama, te pąde elalubo tigidali bulu dabeba tedela pali. Tama tigidali bagego te Jisas bidibo po odama, augwaligo te gasi yai bidi dabe te gologobe wade munama, tama augwaligo te augwali tolama tama aga pageba tolasa pelawali.  
\v 56 Tama tigidali bulude me te tigidali hanude me te tigidali tǫ pedaide te Jisas sabaligi pabo digi, augwaligo te gasi yai we bidi dabe sela asama, te maket ebo pesage tomoba muagasiyu yai. Te augwaligo i bomo elama Jisasbolo weyu, tama te gasi yai we bidi dabego te agai ugwaba nogogo diąmainogo gogoliyu sula tagala wali. Tama tigidali gasi bidi dabego te agai ugwaba nogo munama, te augwali tigidali wiegi yai elama, usu ma ela pai dao.   
\c 7  
\s1 Bidi mebago Godigo kolesaga tudiba muani  
\r (Mat 15:1-9)  
\p
\v 1 Te meba Farisi hani bage meba dali, te Juda dabego bomai po page koneai bidi dabe meba dali, augwaligo te mone hanu Jerusalem taga soyu, te augwali Jisas bidibo madiba sisinagasai.  
\v 2 Tama augwaligo te aga wali pabo bidi dabe mebago nai tubo suali, te augwaligo nogo bolo hasia węgo te nogo habuba mu tugulama telasiąma te nai sela tuali.  
\v 3 Te Farisi dabego me te tigidali Juda dabe augwaligo te augwa wąį nǫų dabego polobadu yali kolesaga wali pelama, tama augwali te nogo ąį hasia nogo habuba usu nama telasiąbadi da, te augwaligo nai tusiąwai dao.  
\v 4 Te augwali te Juda hani isąwai bagego maket elaluboba pelama ma asiyu, tama augwaligo nogo wę telasiąbadi da, te augwaligo nai me tuai menio. Tama augwaligo te wąį nǫųde sali gasa kolesaga hauwa me wali peyu yai. Augwaligo te wę tubo kap me, sene me, genuai pou me, te pibo bet sai me wę telayu yai dao.   
\p
\v 5 Tama tibaso te Farisi dabe me te Juda dabego bomai po page koneai bidi dabe augwaligo te Jisasbolo hanalu wali, “Magi baso te nage wali pabo bidi dabe augwaligo te dago wąį nǫų dabe augwaligo kolesaga wali pabo meniwe? Te augwaligo dago nogo wę telabo kolesaga isąma, tama nogo meda elalubadi nai tubo dao,” te po wai.   
\p
\v 6 Tama Jisasgo augwalibolo te po wai, “Te polobadu bidali profet bidi Aisaia agai dagede te po meba dolo mu weyu, tama te dage ili po wabo bidi dabe da wai. Agai te e tama tiwai po polobadu asęani,  
\q1 ‘Godigo te po wai, “Te hani bidi augwaligo eno  
\q1 nogi te pedauwaligo ugwaba sabo dao, tiali goli  
\q1 augwaligo homu te enade digibulu elalubo dao.   
\q1
\v 7 Augwaligo enade olo dali lotu po weyu ebo  
\q1 dao. Magi baso meni, augwaligo te bidigo nigali  
\q1 bomai po naga ola mayu te po wali, ‘Te e da Godigo  
\q1 po dao’ wai,” ’  
\m Aisaiago te po asęani.” \x * \xo 7:7 \xt Ais 29:13\x*   
\p
\v 8 “Tama dagego te Godigo bomai po tagalama, tama dagego te bidi dabego ola mabo po naga dąų olama tolalubo dao,” Jisasgo te Farisi bage dali te Juda dabego bomai po page koneani bage me augwalibolo wai.   
\p
\v 9 Tama agai augwalibolo te po me wali, “Dagego te Godigo bomai po tagalabo bugagia koneama, tama duga digi ebo kolesaga wali pabo dao.  
\v 10 E tiwai dao. Polobadu Mosesgo te bomo yai po pusali, ‘Nago te naga aya idago po wali pao,’ wai, tama me po wali, ‘Bidigo dwai po te aga aya idabolo wabo bidi te aga isimainao,’ te po si Mosesgo ola mani. \x * \xo 7:10 \xt Sai 20:12; 21:17; Prs 20:9; Bom 5:16\x*  
\v 11 Tiali goli dagego te po si tagalama, dagego e tiwai po dabolo ola mabo da, te bidi me deligo aga aya ma ida tau sabo mone ma doado bage elalubadi, tiali goli agai te po augwali sibolo waibao, ‘Te e mone da, te eno Godiba mawainogo sa muani elalubao’ po obaso da,  
\v 12 teda agai te aga ida bugagia wiegi yai ilibo sę te tama tagaliyu da, te usu dao, dagego te tobage po ola mabo dao.  
\v 13 Tama naga tiyu, tama dagego te duga wąį nǫųde sali kolesaga wali pelama, tama dagego te Godigo po dolobo ąǫ ebo dao. Tama dagego te tobage tiwai kolesaga hauwa ebao,” Jisasgo te po wai.   
\s1 Te bidi meda ilibo naide po wai  
\r (Mat 15:10-20)  
\p
\v 14 Tama Jisasgo te we bidi augwali i ma olama, tama agai te po augwalibolo wali, “Dage tigidaligo eno po odama tama homugo konea sao!  
\v 15 Te bidi me delide te nai bulu badu elaluali tama te nai aga tomoba pelama, tama te naigo te bidi meda ilibo te usu me egobeo. Menio. Te bidi tomode elaluali nai dabe te buluba soyu, tama tego naga te bidi dwai meda ilaibao.  
\v 16 [Te olo elalubo bidigo agai te po odiąo.”]   
\p
\v 17 Agai te we bidi bidalubadi taga peyu, te aga beba pai. Tama aga wali pabo bidi dabego agabolo te begelama wali po digi po page hanalu wali.  
\v 18 Tama agai te po augwalibolo wali, “Dage me te homu kolesaga meni eyu, obawe? Te dagego konebewe? Te tigidali bulu badu elaluali nai te bidi tomoba pelama, tego te bidi dwai meda ilibo usu egobeo.  
\v 19 Magi baso meni, te tiwai naigo te bidi homu tomoba mu pogobeo. Menio. Te haliga tomoba peyu, tama te di tabo sunumidu naga pelama, tama nosali te di beba paibao,” agai te po wai. Te pode Jisasgo te tigidali haniani tubo nai te wiegi yai da, te habu selebo menio, te po wai.   
\p
\v 20 Tama agai te po me wai, “Te dwai nai te bidi tomode elaluama tama buluba asobo, tego te bidi meda ilibo dao.  
\v 21 Te bidi tomode, te homu kolesaga tomode pedalubo nai dabe te e tiwai: te dwai homu kolesaga dabe, te penani ebo kolesaga, me te nai wi sabo kolesaga me, te bidi ela mubo kolesaga me,  
\v 22 te we sabo dolobo kolesaga me, te mena nai sainu homu hogodama pesa dalobo kolesaga me, te haniani dwai dwai kolesaga me, te tibo po weyu te hagoma ebo kolesaga, me te bidi nogi posobo po wabo kolesaga ebo, me te hagoma homu elama te esela pabo bidigo kolesaga tiwai eyu ebo dao.  
\v 23 Te tobage tigidali dwai kolesaga te bidi tomode elaluali te buluba asiyu, tama te bidi meda ilibo dao,” Jisasgo te we bidi dabebolo te po wai.   
\s1 Te Fonisia hani wede po  
\r (Mat 15:21-28)  
\p
\v 24 Te Jisas hogodama tama aga te bidali bulu taga soali, tama te Tair hanu pedaiba pai. Aga te be me deli tomoba pali, tama aga tede bidibo te bidi me deligo aga koneidali homu yali. Tiali goli aga geme duala sainogo ebo te usu me egobeo.  
\v 25 Menio. Te we me deligo aga bidibo po odali. Te we aga wegi elaluali, tama te dwai haubo noma bidi te wegide bidai. Tama te we aga polo tama asama, te Jisas sągą pąba kidu sugunagasali.  
\v 26 Te we aga te Juda hani isąwai we da, aga te Fonisia hani we, te Siria moni tǫde elalubo bulu da. Agai te Jisasba i weyu, te agai wegide elalubo dwai haubo noma bidi sela sąyao wai.  
\v 27 Tiali goli Jisasgo agabolo po wei ponoyu, te Juda hani dali te Juda hani isąwai bage me te side po digi po begelama tama te po wai, “Dago te wai dabebolo te hasia nai mao. Tiyu dago te wai dabego nai sela tuyu tama te yowi dabeba te nai sąyabuo,” te po wai.   
\p
\v 28 Tiali goli te wego agabolo po wei ponoyu, te po wali, “Genuai Bidi, nago te mu po obao. Tiali goli te yowi dabego te wai dabego nai kagali te tebol sai dologoba tulalubo nai sela tubo dao,” te wego te po wai.   
\p
\v 29 Tama Jisasgo agabolo te po wali, “Nago te tiwai po obaso da, teda nage ma geasa pagameo. Te dwai haubogo nago wegi dąų elaluali te taga palio,” te po wai.  
\v 30 Tama te we aga beba ma geasa pelama, tama aga wai te bet saide pila mubo suali, tama mu tama, te dwai haubogo dąų elaluali te taga pai sualio.   
\s1 Jisasgo te olo degai bidi wiegi yai ma ilali  
\p
\v 31 Te silama, megi da Jisas ma hogodama, tama te Tair tǫ pedaide bidali tagalama, tama te Saidon bulu tomodu pai. Tama aga te hanu nogo si elalubo genuai tǫ tedu pelama gana, tama te sigi ąį Galili pąba sabolali.  
\v 32 Tama augwaligo bidi me deli agaba selasa asali, te aga olo degebadi te hamena begelebadi yai elaluai. Tama augwaligo Jisasba hanalu te bidiba nogo diąyao po wai.  
\v 33 Tama tibaso, Jisasgo aga selasa pelama, tama te we bidi taga soali, tama augwaduba si naga bidigi pali. Tama Jisasgo nogo dani te bidigo oloba munama, tama pesa sąnama, tama te pesa nogo daniba muyu, te bidigo hamenaba muanio.  
\v 34 Tama agai te dagaluba tonaludu, tama mobo bomonama ponani, te aga homude gela wabo tiwai elama, tama agai agabolo weyu te po wai, “Efata!” po wai. Te tiwai wali, “Nago olo dala pao,” wai.  
\v 35 Tama te bidigo olo degai elaluali te dala pali, tama aga te hamena panialuali nai te polo taga pali, tama aga po bugagia wai.  
\v 36 Tama Jisasgo augwaliba habu seleyu, bomonama wali, augwaligo te sę yali po te bidi me delibolo munu me wagio po wai. Agai bomonama augwali habu selali, tiali goli menio, augwaligo bomo mu elama, te po pususu palio.  
\v 37 Tama te sę yali po odali we bidi tigidali augwali midigi siyu, tama noma mu sali, tama augwaligo te po wai, “Tigidali sę agai ebo, te agai wiegi yai sę naga ebo dao. Agai te olo degai bidi me, te bidigo po odomainogo iliyu, tama te pedauwali pania sai bidigo po ma omainogo eyu yai dao,” te we bidi dabego te po wai.   
\c 8  
\s1 Jisasgo te we bidi hauwa umabo 4,000 nai mani  
\r (Mat 15:32-39)  
\p
\v 1 Te silama, tama nosali me sogo te genuai we bidi hani ma sisinani, tama augwali tuabo nai tula silama tama nai meni yai. Tama tibaso, Jisasgo aga wali pabo bidi dabe i olama asobo si, tama agai augwalibolo te po wali,  
\v 2 “Eno te e bidalubo we bidi augwalide homu dene ebao. Augwali ena dali sela sogo bidalio, tama megi augwali nai meni yai dao.  
\v 3 Tama augwali nai sili bidai elalubadi te eno augwali te augwa beba pomainu tagala palali da, teda augwali tomode pobadi te gedu te gęǫ page elama, te augwali sunumiba tulaluaibao. Meba augwali te digibulu asiyu asalio,” te po wai.   
\p
\v 4 Tama aga wali pabo bidi dabego agabolo te po wei ponoyu, te po wai, “Te ede da, te bidi meni yai madi bidibao. Tama dago menade te bret tubo nai selama, te we bidi augwali mawaibawe?” Te po wai.   
\p
\v 5 Jisasgo augwaliba hanalu wali, “Dagego nisu naga bret munalubowe?” Tama augwaligo te po wali, “Te a naga olama me badu si munalubo,” wai.  
\v 6 Tama agai te we bidi augwalibolo olama, tama augwali te tǫba duada pao wali. Tama agai te a naga olama me badu si bret selama, tama agai Godiba puba hwi olama, tama te nai pebedama, tama aga te wali pabo bidi dabebolo menama, te augwaligo dobaba pomainogo yali. Tama augwaligo te we bidiba dobaba palio.  
\v 7 Tama augwaligo te dwasianu sųgų si sela me elaluali. Tama agai te me selama, te Godiba puba hwi olama, tama aga wali pabo bidi dabebolo te me dobayao po wai, tama augwaligo te me dobaba pali.  
\v 8 Nosali te we bidi augwali te nai tula silama usu ebaso, tama aga wali pabo bidi augwaligo te elalubo nai meba dwasianu delage sisinama, tama te bonou wa basket te nogo a naga me si tede bulama pągąwani.  
\v 9 Te nai tuali we bidi augwali bidi sese hauwa umabo 4,000 bidi usu tama. Tama Jisasgo augwali pomainu tagala palalio.  
\v 10 Tama elama, polo aga te aga wali pabo bidi dabe dali te gebaba holama, tama augwali te Dalmanuta te badu pedaiba pai.   
\s1 Te Farisi meba augwaligo te bomai sę ebo suainogo yai  
\r (Mat 16:1-4)  
\p
\v 11 Te Farisi dabe meba augwali aselama, tama augwaligo te Jisas dali te wado po tiwai weyu konila po wai. Augwaligo te Jisasbolo bomai sę me deli yao po wali. Augwaligo aga te usu sabo sę senayu naga yai.  
\v 12 Jisasgo aga homu noma bidide sęgę ebo ąǫ ebaso, tama agai te po wai, “Magi baso te we bidi hanigo e sogode te bomai sę yao obawe? Eno mu po dagebolo obe dao, te e sogode te bidalubo bidi dabego suabo bomai sę me deli eno me egobeo. Mu menio!” wali.  
\v 13 Tama agai te Farisi bidi dabe augwali tede bidaludubadi taga peyu, tama aga te gebaba ma holama, tama te sigi ąį pedai u badu pabo gagalali.   
\s1 Jisasgo te nai yisde po digi po begelama wai  
\r (Mat 16:5-12)  
\p
\v 14 Tama te Jisas wali pabo bidi dabe augwaligo te homu gegeda peyu, tama augwaligo te tubo nai bret meba dali sela asisąwai. Augwaligo te bret deli digi naga te gebade augwaligo munaluai.  
\v 15 Tama Jisasgo po bomo elama augwaliba weyu, te po wai, “Dage bugagia tonaluiąo! Dage te Farisi dabego yisde me te gavman tuni bidi Herotgo yisde te dage dua dao!” te po wai.   
\p
\v 16 Tama augwa digi augwa hasi po mia siyu, te po wai, “Dago te bret meni baso, tama agai te po da dali obao,” te po wali.  
\v 17 Jisasgo koneama, tama agai augwalibolo te po wali, “Magi baso dagego te tiwai po duga hasi mibawe, ‘Dago te bret menio,’ te magi baso obawe? Te dagego homude kone palai elalubo meniwe? Te dage homu kolesaga meni yai elalubawe? Te dagego homu puna paliwe?  
\v 18 Dagego gedu elalubo, tama dagego te nai subo meni da, agawe? Dagego olo elalubao, tama dagego te po odobo meni da, agawe? Dagego homugo te bretde gegeda palai dawe? \x * \xo 8:18 \xt Jer 5:21; Ese 12:2; Mak 4:12\x*  
\v 19 Eno te a naga bret te bidi sese hauwa umabo 5,000 bidi te nai pebedama mani sogo, dagego te nisu naga bonou wa basket te me badu munaluali bretgo pągąwai dawe?” Tama augwaligo te po wai, “Te nogo si olama sągągo si da,” wali.  
\v 20 “Tama eno te bidi sese hauwa umabo te 4,000 bidi te nai bret te bidi meni yai bulude pebedama mani sogo, dagego te nisu naga bonou wa basket te me badu munaluali naigo pągąnai dawe?” Tama augwaligo te po wai, “Te a naga olama me badu si dao,” te po wai.  
\v 21 Tama agai augwalibolo te po wai, “Tama dagego me konesiąma ebawe?”   
\s1 Jisasgo te gedu widai bidi wiegi yai ilali  
\p
\v 22 Tama augwali te Betsaida hanu teba sabolali. Tama te we bidi augwaligo bidi me deli te agaba selasa asali, te aga gedu widai. Tama augwaligo Jisasbolo weyu, te bidiba nogo muao po walio.  
\v 23 Tialima, Jisasgo te gedu widai bidigo nogo tola selama, tama agai aga te buluba odasa soali. Tama agai te bidi geduba pesa sąnama, tama aga geduba te nogo ugwadu munama, tama agabolo hanalu wali, “Nago te nai me deli subowe, ma meniwe?”  
\v 24 Tama te bidigo tonono bilama, tama agai te po wai, “Awe, eno te bidi meba suali. Eno augwali te ni tiwai suali, tama augwali bilaluali,” te po wai.  
\v 25 Tama Jisasgo nogo aga geduba ma muai. Tama te bidigo bomo elama tonono bilali, tama agai gedu wiegi yai pedelama, tama aga tigidali nai hania sula silai.  
\v 26 Tama Jisasgo te bidi aga te aga beba tagala palu, tama te po wai, “Nage te bidi dabe bidibo be nani tomoba ma pigio, naga beba dolo pao,” te po wai.   
\s1 Pitago Jisas aga te Krais da po haninani po  
\r (Mat 16:13-20; Luk 9:18-21)  
\p
\v 27 Te Jisas aga te aga wali pabo bidi dabe dali hogodama, tama augwali te tǫ pedai Sisaria Filipai teba pali. Tama te sunumidu peladu te agai aga wali pabo bidi dabe augwaliba hanalu, te po wali, “Te we bidi dabe augwaligo ena de nogi ebo dawe?”   
\p
\v 28 Tama augwaligo agabolo te po wai, “Te meba augwaligo nage te we bidi baptais mani bidi Jon nogi ebao. Tama mebago nage te polobadu bidali bidi Elaija nogi ebao. Tama mebago te po weyu, nage te Godigo po pusali polobadu bidali profet bidi me deli da po obao.”  
\v 29 Tama Jisasgo te augwalibolo hanalu wali, “Duga digi te ena de nogi ebo dawe?” Tama Pitago agabolo po wei ponoyu, te po wai, “Nage Krais dao, e we bidi tau somainu Godigo nage sa muyu asaiba wali bidi dao,” te po wai.  
\v 30 Tama agai augwali habu seleyu, te augwaligo bidi me delibolo olamu da po wai.   
\s1 Jisasgo te aga isąma ma hodaluaibao po wali  
\r (Mat 16:21-28; Luk 9:22-27)  
\p
\v 31 Te Jisas agai te aga wali pabo bidi dabe augwalibolo te tiwai po ola mabo gagalali, “Te Godigo Bidi Mu te aga dene hauwa tolomainu yaibao, tama te Juda dabego tobolu bidi dabe, me te genuai pris bidi dabe, me te Juda dabego bomai po page koneai bidi dabe augwaligo te aga tudiba munama, tama aga ela muaibao. Te nosali sela sogo bidama te aga ma hodaluaibao,” te po wai.  
\v 32 Agai te po augwalibolo hania haninama wai. Tama tibaso, Pitago Jisas te sesege badu odasa solama, tama aga dali te tobage po wagio po wali.  
\v 33 Tiali goli Jisasgo begelama, tama aga wali pabo bidi dabeba tononalu, tama agai Pitabolo wado iliyu, te po wai, “Satan, nage ena tudi badu soao! Nago te Godigo homu kolesaga wali me pabo menio. Te meni. Nago te tǫde bidigo ebo homu kolesaga naga te wali pobao,” te po wai.   
\p
\v 34 Tama agai te we bidi agaba asomainu i weyu, te aga dali wali pabo bidi dabe me asomainu yai. Tama aselama, tama agai augwalibolo te po wai, “Te bidi me deligo ena wali asainogo da, te aga digi aga aiyaba elaluama, tama agai e homu yao, aga ena wali pobadi aga dene sobaso da, teda te usu da, te homu ebo bidigo agai aga ni pedai tolasa pabo tiwai eyu, aga ena wali asao.  
\v 35 Magi baso meni, te bidi me deligo aga digi aga bidabo ula bugagia tonalubo homu ebaso da, te aga bidabo ula te hagawaibao. Tiali goli te bidigo enade te Godigo wiegi yai gesi pode te homu kone palama, tama aga bidabo ula tagalu da, te aga bidabo ula mu saibao.  
\v 36 Te bidigo te tigidali tǫde doado bage siyu, te aga digi aga bidibo ula tagaluyu da, teda te bidigo genuai wiegi yai nai tama saliwe? Te meni.  
\v 37 Te bidigo mena mone mayu, te aga bidabo ula dobola siyu ma abelaibawe? Te menio.  
\v 38 Tama te megi e sogo tǫde bidibo we bidi dabe augwali da, te aga bidi taga soayu penani ebo we tiwai da, augwaligo Godigo po taga soali, tama haniani dwai sę ebo dao. Te bidi augwali bidalubo tomode bidiyu, tama agai enade me te eno ola mabo pode me hale eyu ebaso da, teda nosali ena te Godigo Bidi Mu, ena me te bidide hale eyu aga nogi geme dualaluaibao, te eno ena Ayago genuai bomo yai ula dali, te wiegi yai tedali ensel mobo bidi dabe dali e tǫba ma asobo sogo tama tiaibao,” Jisasgo te po wai.   
\c 9  
\p
\v 1 Te po silama, tama agai augwalibolo te po wai, “Eno mu po dagebolo obao, te ede dolalubo bidi dabe meba te augwali me isisąbadi, tama te Godigo te we bidi tonalubo sę te aga bomo dali pedalubo augwaligo sueibao,” agai te po wai.   
\s1 Jisasgo tigi te gasagi yai hasegelali  
\r (Mat 17:1-13; Luk 9:28-36)  
\p
\v 2 Nosali te Sarere deli bidai madi, Jisasgo Pita me Jems me Jon selama, tama agai augwali te ugwanu holai bulu du me deli te bageba odasa holali. Tama augwa naga tede bidaluali. Tama augwali gedude Jisasgo tigi hasegelama, tama aga gasagi yai pedalai.  
\v 3 Tama agai ugwade te dula gegemani ebo tiwai pedalali, tama te nala nisi tedela tiwai mu yai. Te tǫde bidi me deligo ugwa te tiwai gilama pedalubo usu me egobeo.  
\v 4 Tama te polobadu bidali bidi si Elaija dali Moses dali si pedalama, tama augwali sigo te Jisas dali po mibo te augwaligo suali.  
\v 5 Pitago te sulama, tama agai Jisasbolo weyu, te po wai, “Tisa, po ola mabo bidi, da ede bidibo, te wiegi yai ebao. Dago te bola yano be sela sę yainogo, te me deli nago, te me deli Mosesgo, te me deli Elaijago dao,” Pitago te po wai.  
\v 6 Magi baso meni, te augwali wi mu ebaso, te agai mena po wagawe weyu, te Pitago konesiąma te homu yai.   
\p
\v 7 Tama te dagalu pǫ me deli pedelama, te augwali mesega sagasali. Tama te pǫ tomodu te pedauwali me delidu te po waida wai, “E bidi da, te eno Ogwa da, eno aga godolo mu ebao. Dagego agai po odiąo,” wai.  
\v 8 Tama polo tama, te augwaligo tonono bilali, tama augwaligo te gasa bidi me si te subeo, polo pali. Te Jisas agaduba deli naga te augwali dali bidibo suali.   
\p
\v 9 Augwali te bulu dude bidali tagalama tama aiyaba dudulayu, tama Jisasgo augwali habu seleyu, te tiwai po wai, “Te dagego suali sę, te dagego bidi me delibolo munu me wasiąma, te ena Godigo Bidi Mu te gų page tagalama ma hodalobo sogoba usu naibao,” wali.   
\p
\v 10 Tama tibaso te po augwa homuba dąų ola selama, tama augwa hasi digi te e tama po miani, “Te gų page tagalama ma hodaluaiba po wali, te mena sę dawe?” te po miani.  
\v 11 Tama augwaligo agabolo hanalu wali, “Magi baso te bomai po page koneani bidi dabe augwaligo te po weyu, te hasia bolo te Elaija asaibao, tama nosali naga te Godigo tagala palabo bidi asaibao, te po magi baso wabo dawe?” augwaligo te po hanalu wali. \x * \xo 9:11 \xt Mal 4:5; Mat 11:14\x*  
\v 12-13 Tama Jisasgo augwalibolo te po wali, “Awe, mu tama, te Elaija bolo hasia asama, tama te Godigo tagala palabo bidi asobode te tigidali nai ma dodolagasomainu yaibao. Awe, eno dagebolo obao, Elaija te asalio. Tama te bidi dabe augwa homugo digi wali peyu, augwaligo dwai sę aga dali yali, te Godigo po bukude polobadu asęani po tiwai gilama yai dao. Tiali goli te Godigo po bukude te ena Godigo Bidi Mude magi po tede elalubawe? Te po e tiwai dao, ena te dene hauwa toloyu, tama te bidi dabego ena tudiba muaibao,” Jisasgo te po wai.   
\s1 Te ogwa esela pabo sę ilibo dwai haubo noma bidide po wali  
\r (Mat 17:14-21; Luk 9:37-43)  
\p
\v 14 Augwali pelama, tama te bulu du pageba dulama, te wali pabo bidi dabe meba bidalubo madi sabalubadi, tama te genuai we bidi hani te augwaliba sisinai elalubo suai. Tama te Juda dabego bomai po page koneani bidi dabe meba augwaligo te wado po konila po augwali dali oduai.  
\v 15 Te po odobo we bidi tigidali augwaligo te Jisas asobo sulama, tama polo te augwali midigi siyu te noma sali. Augwali te aga pageba udada pelama, tama augwaligo siade da po aga dali wali.  
\v 16 Tama agai te aga wali pabo bidi dabebolo hanalu wali, “Dagego te konila po wabo te bomai po page koneani bage dali te mena pode obawe?” te po wai.   
\p
\v 17 Tama te we bidi hani tomode bidali bidi me deli agai te po Jisasbolo wei ponoyu, te po wai, “Tisa, po ola mabo bidi, te eno ogwade te pedauwali panialubo dwai haubo noma bidi me deli elalubaso, tama eno aga te nageba odasa asai.  
\v 18 Te hauwa sogo te dwai haubogo aga dąų olaluyu, tama agai aga te tǫba sądubao. Tama aga pedauwalide te pesa dini pedaliyu, tama aga kele penane dagana selama, tama aga tigi te tigidali boma peyu didila pai. Tama eno te nage wali pabo bidi dabebolo te dwai haubo sela sąyao po hanalu wali, tiali goli te augwaligo usu ebeo.” Te bidigo te po wai.   
\p
\v 19 Jisasgo te po odama, tama agai te we bidi augwalibolo wai, “Te dage hani we bidigo enade konealubo po dąų olama, duga homu enaba tialubo menio! Nisu naga sogo ena dage dali me bididuaibawe? Nisu naga sogo te eno dagego sęgę tolomainogo ebawe? Dagego te ogwa enaba odasa asao,” wali.  
\v 20 Tama augwaligo te ogwa agaba odasa pali. Te dwai haubogo Jisas sulama, tama polo te ogwa degelainu mu yali, tama te wai te tǫba degasa dulama, tama hogogo bele pelama, tama te dini pesa me deli te aga pedauwalidu pedalali.  
\v 21 Tama Jisasgo aga ayabolo hanalu wali, “Nisu naga sogo aga te tiwai elaluai dawe?” Tama agai te po wai, “Te aga dwasianu elalubadi te tama tiai elaluai dao.  
\v 22 Tama hauwa sogo te dwai haubogo aga te siaba sąyu, te węba sąyu yai, tama aga ela muabo homu yai. Tiali goli te nago usu ilabo homu yaiba wida, teda nago da homu dene elama, tama da tau sao!” wali.   
\p
\v 23 Jisasgo agabolo te po wali, “Awe, mu da, te nago enade te po wali, ‘Nago usu yaiba wida,’ nago te po wali. Tiali goli te tiwai meni. Te nago enade konealubo po dąų olama, tama nago homu enaba tialubo usu elalu da, te nago tigidali nai sabo te usu yaibao.”  
\v 24 Tama polo te ogwa aga ayago i weyu, te po wai, “Eno nagede konealubo po dąų wali, tiali goli tede ena te habuge tiwai yai! Nago ena tau sao!”  
\v 25 Jisasgo te genuai we bidi hani augwali sisinagasobo suali. Tama tibaso agai te dwai haubo bidiba wado iliyu, te po wali, “Nage te pedauwali pania sai, me nage te olo degai haubo bidi, eno nagebolo obe dao, nago te ogwa taga pao! Tama nage aga tomode munu ma bidilamu dao,” te po wai.  
\v 26 Tama te dwai haubogo te dwai i weyu, tama agai te ogwa degelai sedu genama, tama te dwai haubogo te aga taga peyu tama palio. Tama te ogwa te isai bidi tiwai munaluali. Tama bidi hauwa augwaligo te po weyu, “Aga te isali dao,” wai.  
\v 27 Tiali goli Jisasgo aga nogo tola selama, tama aga hodolobaso, tama aga doligulalio.   
\p
\v 28 Nosali Jisas te be tomoba pelama, tama te aga wali pabo bidi dabe naga bidalubadi tama augwaligo agabolo hanalu wali, “Magi baso dago te dwai haubo sela sąwainu yali te usu meni yaniwe?”  
\v 29 Tama agai te po augwalibolo wai, “Te Godibolo gedu haluasa po wabogo naga te tobage dwai haubo noma bage sela sąbo te usu yaibao. Te gasa sę ebogo da, te usu me egobeo,” te po wai.   
\s1 Jisasgo te aga isąma ma hodaluaiba po te si sogo wali  
\r (Mat 17:22-23; Luk 9:43-45)  
\p
\v 30 Augwaligo te bidali bulu taga peyu, tama augwali te Galili tǫ tomoba pali. Tama Jisasgo te aga menade bidibo, te we bidi augwaligo aga koneidali homu yai.  
\v 31 Magi baso meni, agai te aga wali pabo bidi dabe ola mabo sę yainogo yai. Tama agai augwalibolo te po wai, “Te augwaligo ena Godigo Bidi Mu te bidi dabego nogoba muaibao. Tama augwaligo ena ela muaibao. Augwaligo ena ela munama, tialima sela sogo bidama nosali te ena ma hodaluaibao,” te po wai.  
\v 32 Tiali goli augwaligo te po page konesiąwai. Tama augwaligo agabolo hanalu wabo wi yalio.   
\s1 De aga genuai bidi bidigowe po  
\r (Mat 18:1-5; Luk 9:46-48)  
\p
\v 33 Tialima, augwali te Kaperneam hanuba sabolali. Augwali te be tomoba pela siali madi, tama Jisasgo aga wali pabo bidi dabeba hanaluyu, te po wai, “Te da asobadi, te sunumide dagego duga hasi mena po miai dawe?”  
\v 34 Tiali goli augwaligo po me wabeo. Magi baso meni, te sunumide augwaligo te augwali tomode de polalubo bidi bidaibawe te po miai.  
\v 35 Tama aga duagulama, tama te wali pabo bidi nogo si olama sągągo si bidi i wai. Tama agai augwalibolo te po wai, “Te bidi me deli aga te polalubo bidi bidabo homu ebaso da, teda aga te nosali sabi badu mu bidama, te tigidali bidi tau sabo sę ebo bidi tiwai bidao,” wai.  
\v 36 Te po olama, tama agai te dwasianu wai me deli selama, tama aga te augwali tomode dolalumainogo ilali. Tama agai aga nogo tolasa, tama augwalibolo te po wai,  
\v 37 “Te bidigo eno nogide homu kone palama, tama te tiwai dwasianu ogwa wai me deli tau sobaso da, te agai ena tau sobao. Tama ena tau sabo bidi, agai te ena naga tau me siyu me ebeo. Menio. Agai te eno Aya me tau sobao, agai ena tagala palobaso te ena asai dao,” Jisasgo te po wai.   
\s1 Te da dali boi bidi isiąbo bidi, te aga dago abagi da  
\r (Luk 9:49-50)  
\p
\v 38 Te aga wali pabo bidi me deli, aga nogi Jon, tego agabolo weyu, te po wai, “Tisa, po ola mabo bidi, te bidi me deligo nago nogide te dwai haubo noma bidi sela sąbo sę ebo dago suali. Tiali goli aga te da wali me asobeo. Tama tibaso, dago aga habu selali,” te po wai.  
\v 39 Jisasgo agabolo te po wai, “Dagego te aga habu me selamuo. Te bidi me deli agai eno nogide te bomai sę me ebaso da, teda agai polo tama te eno nogi posobo po me wainogo me egobeo.  
\v 40 Te dade boi bidi homu me isiąbo bidi da, aga te dago abagi dao.  
\v 41 Te bidi me deligo dage sulama, tama agai te homu elama, ‘Eno te Kraisgo bidi dabe tau saiba’ homu elama, tama agai te kapde wę dage mobaso da, teda eno mu po dagebolo obao, te bidigo nosali sabo wiegi yai nai da, te me hagagobeo,” Jisasgo te po wai.   
\s1 Te dwai sę tomoba gegebo kolesaga po  
\r (Mat 18:6-9; Luk 17:1-2)  
\p
\v 42 Te Jisasgo po me weyu, te ola mabo po wai, “Te bidi me deligo e tiwai wai pulubago enaba homu begagaselama, te konealubo po dąų olalubadi, te aga dwai sęba tulalumainu iligi sogo da, teda te tebo bidigo dwai sęgę mu sigi da. Tama aga te tiwai dwai sę te wai dali idali weyu, te bidi dabe augwaligo te bidigo magede moni sęgę yai masigi te bonogo kęnama, tama aga te tamu ąį moni ge tomoba sela sąyu aga tede isigi sogo da, teda te usigi dao. Te sę agaba pedaligi sogo da, aga te wai dali dwai sę isiąma tama moni dene sigi menigi da.  
\v 43 Tama tibaso, dage deli delide e tiwai dao. Te nago nogogo te nage dwai sęba tulalumainu ilibaso da, te nago te nogo aga togolama sela sąyao. Teda nago nogo deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago nogo si me elaludu da, tama augwaligo dwai sę eyu, nage te genuai dene mu siyu bidada pabo te isisąbo sia dabo madi teba peyu da, te dwai mu dao.  
\v 44 [Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo.]  
\v 45 Tama naga sągągo te nage dwai sęba tulalumainu ilibaso da, nago te sągą aga togwama sela sąyao. Teda nago sągą te deli badu naga elaluyu, tama nago te dwai sę isiąbo te nago te bidabo ula mu saibao, te usu dao. Tiali goli nago sągą te si elaludu da, tama augwaligo dwai sę eyu nage te genuai dene mu siyu bidada pabo te isisąbo sia dabo madi teba peyu da, te dwai mu dao.  
\v 46 [Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo.]  
\v 47 Ma, nago gedugo nage te dwai sęba tulalumainu ilibaso da, te nago aga gudama sąyao. Teda nago gedu deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago gedu si me elaludu da, tama augwaligo nage dwai sęba tulalumainu iliyu da, augwaligo nage te dwai isisąbo sia dabo madi saoba sąwaibao, te dwai mu dao.  
\v 48 Te bulude te dwasianu kigi dabe te augwali tigide bidalu te augwali me isisąma, tama te sia dabo te me sula sogobeo,” Jisasgo te po wai. \x * \xo 9:48 \xt Ais 66:24\x*   
\p
\v 49 Te agai po me weyu, te po wai, “Te bidi mego tamu aga tubo naide mubo tiwai gilama, Godigo te we bidi dabeba te dabo sia mawaibao.  
\v 50 Tamu te wiegi yai nai dao. Tiali goli, te tamu te halia pobaso da, teda dagego mena tiwai ilama tama te tama ha ma elalugowe? Te usu egobeo. Te tamude elalubo tubo nai te pusu tiwai gilama, tama dage bugagia bidiąo, duga hasi nagamea homu eyu tama bugagia bidiąo,” Jisasgo te po wali.   
\c 10  
\s1 Jisasgo te we sabo sę togobo kolesagade po wai  
\r (Mat 19:1-12; Luk 16:18)  
\p
\v 1 Te Jisas hogodama, te bidali bulu taga peyu, tama aga te Judia provins tǫ pedai badu te pabo ąį Jordan pedai u badu pai. Tama we bidi hauwa agaba ma sisinagasali. Tama agai te aga ebo kolesaga wali peyu, tama Godigo po te augwalibolo ola mawai.  
\v 2 Tama te po ola mobadi, te Farisi dabe meba agaba aselama, tama augwaligo usu sinayani. Augwaligo te po wali, “Te da Juda dabego bomai pode te bidigo aga we sela sąbode, te usu da wali elalubowe, ma meniwe?”  
\v 3 Jisasgo augwaliba po wei ponoyu, te po wai, “Mosesgo mena bomai po dagebolo mawai dawe?”  
\v 4 Augwaligo te po wali, “Moses agai te po wai, bidigo we sabo togobo nogi pepa asęnama, tama te we sela sąwainu eyu da, te usu da po wai dao.” \x * \xo 10:4 \xt Bom 24:1-4; Mat 5:31\x*   
\p
\v 5 Tiali goli Jisasgo augwalibolo te po wai, “Te dagego hagoma ebaso, tama Mosesgo te tobage bomai po dagebolo polobadu asęai dao.  
\v 6 Tiali goli polobadu mu, hasia bolo te Godigo tigidali nai nigali sogo, agai te bidi me we augwali si nigai dao. \x * \xo 10:6 \xt Gag 1:27; 5:2\x*  
\v 7 Tama tibaso, megi bidigo te aga aya de ida si tagalama, tama aga we dali kęą pelama bidaibao.  
\v 8 Tama tiyu, augwali si tigi te deli mu naga pedelaibao. Tama tibaso, augwali si te tedali bidu tedali bidu yali tiwai gilama ma elalugobeo. Menio. Augwali si tigi te dedeli mu tiwai naga bidaibao.  
\v 9 Tama tibaso, te Godigo tama kęnani nai, te bidigo me togolamu dao,” Jisasgo te po wai.   
\p
\v 10 Te po olama, nosali augwali te be tomoba ma geasa pelama, tama aga wali pabo bidi dabego agabolo te wali pode hanalu wali.  
\v 11 Agai te po augwalibolo wali, “Te bidi me deligo aga we tagalu, tama gasa we sobaso da, te bidigo aga hasia sali we doloyu tama penani ebo kolesaga yai dao.  
\v 12 Te tiwai me, te we me deligo aga bidi tagalu, tama gasa bidi dali pobaso da, te we agai te penani ebo kolesaga yai dao,” Jisasgo te po wai. \x * \xo 10:12 \xt Mat 5:32; 1 Ko 7:10-11\x*   
\s1 Jisasgo te dwasianu wai puluba augwali te wiegi yai po mani  
\r (Mat 19:13-15; Luk 18:15-17)  
\p
\v 13 Te we bidi meba augwaligo te augwa dwasianu wai puluba meba te agaba odasa asali. Augwaligo homugo te agai nogo augwaliba muyu, te augwaliba dwagi yai sę pedalabo po omainu homu yai. Tiali goli te aga wali pabo bidi dabego augwaliba wado ilali.  
\v 14 Jisasgo te tebo sulama, tama agai homu dwai yai. Agai augwalibolo te po wai, “Dagego te dwasianu wai puluba augwali enaba asomainu emainao. Dagego augwali panigimio. Te Godigo bomo dologoba peyu tede bidabo we bidi, augwaligo homu kolesaga te e wai pulubago homu kolesaga tiwai si dao.  
\v 15 Eno mu po dagebolo obe dao, te bidi me deli aga te dwasianu wai puluba tiwai gagayu, te God bidibo madi tomoba pabo homu me isiąwani bidi, aga te tomoba painu ebo usu me egobeo. Mu menio,” te po wai.  
\v 16 Tama olama, tama agai nogogo te wai puluba tolalu, tama augwali deli deliba nogo ugwadu munama, tama augwaliba te wiegi yai mobo mawai.   
\s1 Doado bage hauwa elalubo bidide po  
\r (Mat 19:16-30; Luk 18:18-30)  
\p
\v 17 Te Jisas hogodama tama ma pobadi, tama bidi me deli udada asama, tama agaba kidu sugunagaselama, tama agabolo hanalu, “Te po ola mabo wiegi yai tisa bidio, te eno magi ilama tama eno te bidabo ula selama, bugagia sesemane sogo bidada peyu bidada pogowe?” Te po wai.  
\v 18 Jisasgo agabolo te po wai, “Magi baso nago ena wiegi yai da nogi obawe? God agaduba deli naga te wiegi yai dao.  
\v 19 Nago te bomai po koneanio: ‘Nago te bidi ela mugio. Nago te penani sę egio. Nago nai wi sigio. Nago gasa bidibolo tibo po me olamuo. Nago tibo pode gasa bidigo doado bage anoma elama sigio. Nago te naga aya de ida sigo po wali pao,’ te bomai po dabe nago koneanio, te wali pao,” Jisasgo te po wai. \x * \xo 10:19 \xt Sai 20:12-16; Bom 5:16-20\x*   
\p
\v 20 Tama te bidigo Jisasbolo weyu, te po wai, “Tisa, po ola mabo bidi, te ena wai bǫųde digi gagalasa megi e sogoba usu nagasali, eno te bomai po tigidali wali pai dao.”  
\v 21 Jisasgo agaba tonaludama, tama aga dali dwagi yai homu eyu godolo mu yai. Agai agabolo te po wai, “Nage te nai me deli digi habuge yai elalubao. Nage pelama, te nago doado bage tigidali munama, tama nago tede mone selama, tama te magi nai meni yai bidi dabeba dobayao. Tama tiyu da, te nago wiegi yai nai mu te Godigo bidibo madide elaluaibao. Tama nage ena wali asao,” te po wali.  
\v 22 Te bidigo te po odama, tama aga gesabidi hulia selama, tama aga homu sęgę ebaso, tama aga pai. Magi baso meni, te agai doado bage hauwa elalubaso te homu yai.   
\p
\v 23 Te bidi taga pelama, tama Jisasgo aga wali pabo bidiba tonono bilama tama te po wai, “Te doado bage hauwa elalubo bidi dabe augwali te God bidibo madi tomoba pabo te sinabo sę yaibao,” te po wai.  
\v 24 Tama aga wali pabo bidi dabe te pode midigi siyu noma sai. Tiali goli Jisasgo po wei augwalibolo ma ponoyu, te po wai, “Te eno ogomani dabe, te God bidibo madi tomoba painu ebo bidi, aga te sinabo sę dene yaibao.  
\v 25 Te moni kibu kamel te ugwa hobolobo medabu agebele tomodu dula painu da, aga te sinabo sę dene me isiąma te doado bage hauwa elalubo bidi te Godigo bidibo digi tomoba painu sinabo sę ebo tiwai gilama me egobeo,” te po wai.  
\v 26 Tiali goli te aga wali pabo bidi dabe augwali te pode homu midigi mu selama, tama augwa hasi po mia siyu te po wali, “Te tiwai elalubaso da, teda de te Godigo aga ma dobola somainogo usu yaibawe?”  
\v 27 Tama Jisasgo augwaliba dolo ponama tonalu, te po wai, “Te we bidi dabe augwa digi tede augwali usu egobe, tiali goli God agai da, te usu yaibao. Godigo te tigidali sę yainu ebo usu dao.”   
\p
\v 28 Tama Pitago po me deli Jisasbolo weyu, te po wai, “Suao, da nage wali pabo bidi dabe, dago te tigidali doado bage tagalama, tama da nage wali bilibao,” te po wai.   
\p
\v 29 Jisasgo te po wai, “Eno mu po dagebolo obao, tigidali bidigo enade homu kone palu, tama te Godigo wiegi yai gesi pode me koneama, tama te be, ma ama, me abe, me ida, me aya, me wai, me gi, te tigidali nai taga peyu da,  
\v 30 teda Godigo augwaliba te tobage nai te 100 nedama tama wei ponaibao. Tama augwali te tǫde bidalubo sogo teda augwaligo be hauwa siyu, te ama me hauwa siyu, te abe me hauwa sobadi, te ida me hauwa sobadi, te wai puluba me hauwa siyu, te gi me hauwa sobadi yaibao. Tama te bidi mebago te dwai kolesaga hauwa augwaliba yaibao. Tama te nosali bidabo sogo augwali te sesemane bugagia bidada peyu, bidada pabo ula me saibao.  
\v 31 Tiali goli te sogo te megi polali bidi dabe hauwa mu augwali nosali tudi badu yaibao. Tama te megi tudi badu yali bidi dabe hauwa augwali poligi soaibao,” Jisasgo te po wai.   
\s1 Sela sogo wali Jisasgo aga isibode po wali  
\r (Mat 20:17-19; Luk 18:31-34)  
\p
\v 32 Augwali te sunumidu pelayu, tama augwali te Jerusalem moni hanuba pabo homu yai. Te Jisas poligi pelama pali. Tama aga wali pabo bidi dabe augwali homu hauwa yai. Tama augwali wali asali we bidi, augwali wi yali. Jisasgo aga wali pabo bidi te nogo si olama sągągo si te augwali tedali ma selama, tama agaba pedelabo sę po te po augwaliba wabo gagalali.  
\v 33 Agai te po wali, “Odiąo, megi da te Jerusalem hanuba paibao. Tama da teba sabolama, tama bidi me deligo ena Godigo Bidi Mu te genuai pris bidibolo me, te Juda dabego bomai po page koneai bidi dabe augwaligo nogoba muaibao. Tama augwaligo ena po tų ilibo sę elama, tama ena ela muabo po minama dąų waibao. Tama augwaligo ena te Juda hani isąwai bidi dabeba mawaibao.  
\v 34 Tama te bage augwaligo posobo po enaba weyu, tama enaba pesa sąyu, te ena subigila eliyu elama, tama ena ela muaibao. Tama sela sogo ena te gų pagede bidama, tama nosali ena Godigo Bidi Mu ena ma hodaluaibao,” Jisasgo te po wai.   
\s1 Jems de Jon augwali si te genuai bidi bidabo homu yali  
\r (Mat 20:20-28)  
\p
\v 35 Te bidi Sebedigo ogwa si, Jems me Jon, augwali si te Jisasba aselama, te po agabolo wai, “Tisa bidi, da sigo te magi nai po deli nagebolo hanalu waibao, tama da sigo homugo nago te sę da sibolo emainu homu ebao.”  
\v 36 Tama agai augwali sibolo te po wai, “Dage sigo homugo eno mena sę dage sibolo emainogowe?”  
\v 37 Augwali sigo agabolo te po wali, “Nosali te nage genuai tuni bidi pedalubo side, da sigo homugo te da si me deli te nago dolo nogo badu dugayu, te me nago pobase nogo badu dugayu emainu te homu yai dao,” te po wai.  
\v 38 Tiali goli Jisasgo te aga tamadi tama dene sabode me, te aga isibo side yabo sę po, te side agai po digi po begelama, weyu, tama augwali sibolo te po wali, “Dage sigo te enabolo hanalubo naide po te dage sigo bugagia konesiąma te obao. Te dage sigo eno tamadi e ąį tuainu ebo kap tede te dage sigo homugo tuabo te usu dawe? Ma, te dage sigo eno megi sainu ebo baptais te dage sigo me te sabo homu usu dawe?”   
\p
\v 39 Tama augwali sigo agabolo te po wai, “Te da si usu yaibao,” wai. Jisasgo augwali sibolo te po wai, “Mu dao, te megi eno ąį tubo kapde te dage sigo me tueibao. Te megi eno baptais sabo, te dage sigo me saibao.  
\v 40 Tiali goli de te eno dolo nogode ma pobase nogode duayabo sę, te sę eno me egobeo. Menio. Godigo digi te duabo sia sai te bidi mebabolo mawainu agai sisi ilai elalubao,” Jisasgo te po wali.   
\p
\v 41 Te wali pabo bidi dabe nogo si bage augwaligo te tiali po odama, tama augwaligo te Jems de Jon si dali dwai homu mu yai dao.  
\v 42 Tiali goli Jisasgo augwali i olama asobo si, tama agai augwalibolo te po wai, “Dagego koneani, te Juda hani isąwai we bidi hani tomode te augwa tobolu bidi dabego augwali aiyaba elaluabo bomo hauwa elalubao, tama augwa genuai bidi dabego te augwali bomo elama mu tonalubo dao.  
\v 43 Tiali goli te kolesaga dage tomode munu me elalugobeo. Menio. Te bidi aga te dage tomode genuai bidi bidabo homu eyu da, te aga dagego sę ebo bidi tiwai bidao.  
\v 44 Tama bidi te polalubo bidi bidabo homu eyu da, teda aga te tigidali bidigo sę ebo nogi meni yai bidi tiwai bidao.  
\v 45 Magi baso meni, te ena Godigo Bidi Mu tama, tama ena me te bidigo ena tau sabo sę emainu me asobeo. Menio. Ena asali, te eno augwali tau sabo sę yainu asai, tama eno bidibo ulago digi te hauwa we bidi ma abelagasai dao,” Jisasgo te po wai.   
\s1 Te Jeriko hanu gedu widai bidi po  
\r (Mat 20:29-34; Luk 18:35-43)  
\p
\v 46 Te Jisas dali, aga wali pabo bidi dabe dali, augwali te Jerusalemba pabo tųdu pobadi, tama augwali te Jeriko hanuba sabolali. Tama agai te Jeriko tagalama pali. Tama aga wali pabo bidi dabe, te genuai we bidi hani dali, augwali aga dali pali. Tama bidi me nogi Bartimeus, te Timeus aga ogwa, aga te sunumi bogo sese badu dulaludai. Aga te gedu widai, tama te sunumidu soabo we bidi dabe augwalibolo te mone ge me doado bage momainu i udubo sę iduai.  
\v 47 Agai te Nasaret bidi Jisas asobo po odama, tama agai i wabo gagalama bomonama wai, “Jisas, nage te Devitgo Ogwa dao, nago ena homu dene eyu tau sao!” te po wai.  
\v 48 Te bidi hauwa augwaligo aga wado iliyu, te po wali, “Nago pedauwali pania sao,” wai. Tiali goli agai po dagą genuai olama i wali, “Devitgo Ogwa, nago ena homu dene eyu tau sao!”   
\p
\v 49 Tama Jisas dolagaselama, tama te po wai, “Te aga i olama asomainao.” Tama augwaligo te gedu widai bidi i olama, tama augwaligo agabolo te po wai, “Nago haliga bomo emainao. Nage hodaluao. Agai nage i obao.”  
\v 50 Tialima, aga genuai holobo ugwa peda sąnama, tama polo doligulama, tama Jisas bidiboba pali.  
\v 51 Tama Jisasgo agabolo te po wali, “Nago homugo te eno magi sę nagebolo emainuwe?” Tama te gedu widai bidigo agabolo te po wai, “Tisa bidi, te ena gedu ma pedelimainu elama, bulu ula ma suainogo yai.”  
\v 52 Tama Jisasgo agabolo te po wai, “Nage piduao. Te naga enade konealubo po dąų olama, naga homu enaba tialubo kolesaga ebogo te nage wiegi yai ma ilibao.” Te tama polo te aga gedu usu elama, tama aga bulu ula ma suali. Tama agai te Jisas dali te sunumidu wali pai.   
\c 11  
\s1 Jisas te Jerusalem tomoba tuni bidi tiwai pedalama pali  
\r (Mat 21:1-11; Luk 19:28-40; Jon 12:12-19)  
\p
\v 1 Augwali te Jerusalem moni hanu pąba sabolama, tama augwali te Betfage me Betani te be nani siba sabolali, te oliv ni sili elalubo bulu du nogi Oliv te pąde elaluai. Tama sabolama, tama Jisasgo aga wali pabo bidi si tagala palu,  
\v 2 tama augwali sibolo te po wai, “Dage si te e pąde elalubo te be naniba piąo. Dage si te be nani tomoba pabode, tama polo dage sigo te megi tama holobo gesi kibu donki me deli augwaligo te haliga bonogo gebelai elalubo sueibao. Te bidi me deli tede dualasa bilisiąwai elaluaibao. Te aga gebelali haliga bono pedalama, sela asao.  
\v 3 Tama bidi me deligo dage sibolo te po weyu, ‘Magi baso dage sigo te sę ebawe?’ obaso da, teda dage sigo te po waiyąo, ‘Te Genuai Bidigo agade te sę elalubo, tama agai te aga polo ma tagala palaibao’ po waiyąo,” Jisasgo augwali sibolo te po wai.   
\p
\v 4 Te po obaso, augwali pai, tama augwali sigo te gesi ogwa bidi donki me deli suali, augwaligo te be me deli te sunumi pąde bulu badu gebelama elaluai. Tama augwali pelama, te haliga gebelai elalubo bono pedali.  
\v 5 Tama te pąde dolaluali bidi meba augwaligo te po augwali sibolo wai, “Dage sigo magi baso te ogwa bidi donki kibu haliga pedebawe?”  
\v 6 Tama augwali sigo te Jisasgo wali po tiwai gilama augwalibolo wali. Tama augwali sibolo te donki sela pao olama, augwaligo usu da po wai.  
\v 7 Tialima, augwali sigo te ogwa bidi donki Jisasba sela asali. Tama augwali sigo te augwa bulubo ugwa te donki tudi daiba pasugulama, tama te daide Jisas duayali.  
\v 8 Tama bidi hauwa augwaligo te augwa holobo ugwa dabe te sunumide wawa sili pai. Tama meba augwali te giba pelama, tama te yabe hauwa elalubo ni nologo togolama, tama te sunumiba muna muna pali, aga soabo sunumi au iliyu tama yali.  
\v 9 Tama te polasa pabo we bidi augwaligo me, te nosali asobo we bidi augwaligo me, te augwaligo bomo elama i wali, “Te Godigo nogi ugwaba mu sinao! Godigo te Genuai Bidigo nogide asali bidi te wiegi yai bugagia ilao! \x * \xo 11:9 \xt Tib 118:25, 26\x*  
\v 10 Godigo megi te asobo bomo te wiegi yai ilao, te dago wąį nǫų te Devitgo bomo dao. Te Ugwade Mu Bidibo Godigo nogi ugwaba sao!” augwaligo te po bomo elama weyu bilali.   
\p
\v 11 Tama te tiwai eyu, Jisas te Jerusalem tomoba sabolama, tama te Moni Lotu Be tempel tomoba pelama, tama tede elalubo tigidali nai tonono bila silalio. Tiali goli te giliga dega sigulai. Tama tibaso, aga wali pabo bidi nogo si olama sągągo si bidi dabe dali augwali te Betani be naniba pigi pai.   
\s1 Jisasgo te Moni Lotu Be tempel bede te bisnis sę iduali bidi dabe ela gudulali  
\r (Mat 21:18-19)  
\p
\v 12 Te nosali sogode augwaligo te bulu Betani tagalama, tama Jerusalemba ma asobadi, tama Jisas aga nasi yali.  
\v 13 Agai te ni kaya me deli te dwasianu digibulu gana dolalu, tama yabe te hauwa elalubo suali. Aga te ni pąba pelama, te du meba walai elalubowe naga gegainu yai. Tama aga te ni pageba sabolali, tiali goli tede te nai du walai elalubo me deli subeo. Menio. Te yabe naga elaluali. Magi baso meni, te ni fikgo du walobo sogo pedalubeo.  
\v 14 Tama Jisasgo te niba te po wai, “Nago te du munu me walamuo. Mu menio,” te po wai. Tama aga wali pabo bidi dabe augwaligo te po wabo odai.   
\p
\v 15 Augwali ma pelama, te Jerusalemba ma sabolali. Tama Jisas te Moni Lotu Be tempel be tomoba pelama, tama te be tomode bisnis sę ebo bidi dabe sela sąyu, ela gudulubo sę gagalali. Agai te mone ge dobu si ebo bidi dabego tebol sai gea palobadi, te ba dabe dobu si ebo bidi dabego duabo sai dali gelibadi yai.  
\v 16 Tama augwalibolo agai te tobage nai dabe tolasa biliyu, te tempel Be tomodu bilibo po te augwaliba habu selali.  
\v 17 Tama agai augwalibolo te po ola mani, “Te Godigo po bukude te asęani pode e tiwai po Godigo wai po elalubao, ‘Eno be da, te tigidali we bidi hanigo te enabolo gedu haluasa po omainu ebo be da’ po wai. Tiali goli dagego te geme nai wi sabo bagego be pedalubo tiwai gilama ilibao,” Jisasgo te po wai. \x * \xo 11:17 \xt Ais 56:7; Jer 7:11\x*   
\p
\v 18 Te genuai pris dabe dali, te Juda dabego bomai po page koneai bidi dabe dali, augwaligo te sę ebo po odama, tama augwaligo aga ela muabo sunumi gegebo sę gagalali. Augwali agade wi yali. Magi baso meni, te tigidali we bidi augwali te agai ola mani pode te midigi eyu noma mu sai.  
\v 19 Tama te be pio ebode Jisas dali, te aga wali pabo bidi dabe badi, te augwaligo te Jerusalem tagalama palio.   
\s1 Te kaya nide konea sali po  
\r (Mat 21:20-22)  
\p
\v 20 Te nosali sogode te kigamu mu augwali Jerusalemba ma pobadi, tama augwaligo te ni kaya sasia pai suali. Te yabe me te ni pedali dali tigidali te sasia pali.  
\v 21 Pitago tede homugo ma kone palama, tama agai te po wai, “Tisa bidi, suao. Te do sogode nago te ni kaya dolaiba po wai. Megi te aga sasia pali dao,” Pitago te po wai.   
\p
\v 22 Tama Jisasgo augwaliba po wei ponoyu, te po wai, “Te dagego Godiba konealubo po dąų olama, tama duga homu agaba tialubaso da,  
\v 23 teda dagego te bulu dubolo po weyu, ‘Nage hogodama, tama nage te tamu ąįba samonao,’ te po wagameo. Tama homu si me isąyu, tama duga homude Godide konealubo po dąų naga olama, te po weyu, ‘Eno te wali po te mu po pedalaibao,’ te homu mu eyu da, teda dagego te bulu dude wali po gilama te sę mu pedalaibao.  
\v 24 Tama tibaso, eno dagebolo obe dao, dagego te nai me deli sainogo te Godibolo po weyu, te naide hanalu wabo po wabo side, tama dagego homude te Godide konealubo po dąų olama tama te homu eyu da, ‘Awe, mu da, dago te nai saibao,’ te sę te dagego wali po tiwai gilama pedalaibao.  
\v 25 Tama dage doligulama gedu haluasa po wabo sogo, tama te duga Aya dagalude bidibo bidi agai te dagego dwai sę yali sela sąwainogo eyu, tama dagego te bidi me deligo te dagebolo dwai sę ilali te homu kone palobaso da, teda dagego te bidigo dwai sę yali te sela sąyao.  
\v 26 [Tiali goli te dagego gasa bidigo dwai sę sela sasiąbaso da, teda duga Aya dagalude bidibo bidi agai te dagego dwai sę te me sela sagobeo.”] Jisasgo augwalibolo te po wai.   
\s1 Jisasgo aga sę yabo bomo menade saliwe?  
\r (Mat 21:23-27; Luk 20:1-8)  
\p
\v 27 Tama augwali te Jerusalemba ma sabolai. Jisas te Moni Lotu Be tempel tomode bilibadi, tama te genuai pris bidi dabe dali, te Juda dabego bomai po page koneai bidi dabe dali, te tobolu bidi dabe me, augwali te agaba asali.  
\v 28 Augwaligo agabolo te po wai, “Nago magi bomo elalu, tama nago te sę dabe ebawe? Tama dego te bomo nageba menama, tama nagebolo weyu, te sę yao po waliwe?”  
\v 29 Jisasgo augwalibolo te po wali, “Eno me te eno magi nai po me deli te dagebolo hanalu wabo homu ebao. Tama dagego eno po wei ponobaso da, teda eno me te eno magi bomo elalu, eno te sę dabe ebo po dagebolo waibao.  
\v 30 Te Jongo te we bidi baptais mani sę, dagego homugo te dagalude nai da homu ebowe, ma te bidigo sę naga te homu ebawe? Dagego te po enabolo wei ponao.”   
\p
\v 31 Tama te tobolu bidi dabe augwa digi augwa hasi po miani, “Dago te mena pogo agai po wei ponaibawe? Dago te po weyu, ‘Te dagalude nai da’ po obaso da, teda agai te po waibao, ‘Magi baso dagego homu aga poba begi pabewe?’ te po waibao.  
\v 32 Tama dago te po obadi, ‘Te bidigo nai naga da’ po obaso da, teda te po usu meni yaibao,” wali. Magi baso meni, augwali te we bidide wi yai. Tigidali we bidigo homugo te Jon da, te Godigo po pusubo profet bidi da, te homu yai.  
\v 33 Tama tibaso, te tobolu bage augwaligo Jisasba po wei ponoyu, te po wai, “Dago konebeo.” Tama Jisasgo augwalibolo te po wai, “Eno me te eno magi bomo elalu, te eno te sę dabe ebo po te dagebolo eno me wagobeo,” wali.   
\c 12  
\s1 Te bono du gi tonalubo bagede po digi po begelama wali po  
\r (Mat 21:33-46; Luk 20:9-19)  
\p
\v 1 Tama Jisasgo te po meba begelama, te Juda dabego genuai bagebolo wai. Agai te po wali, “Te bidi me deli agai te bono du wain gi bulama, tama obogo bagulali. Tama agai te wain bono du ąį sabo agabo madi nigilama, tama te gi tonaluabo bidigo bobage sigi be me deli sę yani. Tama agai te gi te bisnis sę yainogo ebo bidi dabe mebago nogoba muai. Tama aga digi te aga digibulu bulu habuba palio.  
\v 2 Te nosali aga te bodolu sogo pedalubaso, teda agai te sę bidi me deli te wain gide sę ebo bidi dabe bidalubo madiba tagala palai. Agai homugo te gide nai meba te agaba momainu yai.  
\v 3 Tama augwaligo te sę bidi pageabi elama, tama aga dodolagia elama, tama aga olo ma tagala palalio.  
\v 4 Tama te gi page bidi agai gasa sę bidi me te augwaliba tagala palali. Tama augwaligo aga tobolude gagai ilama, tama agaba dwai sę ilali.  
\v 5 Tama agai sę bidi me dedeli ma tagala palai. Tama augwaligo te bidi aga ela muai. Tama agai sę bidi hauwa mu ma tagala palai. Tama augwaligo meba olo eliyu, tama meba te augwaligo ela muyu yali.  
\v 6 Tama agai bidi deli mu ma elalualio. Te aga ogwa, agai godolo mu yai. Nosali mu agai te ogwa te wain gi sę ebo bidi dabe bidalubo digi ma tagala palali. Agai te tiwai homu yai, ‘Te augwaligo eno ogwago po odaiba’ homu yai.  
\v 7 Tiali goli te gide sę yali bidi dabego augwa hasi tomode po mia siyu, augwaligo te po wai, ‘Te e bidigo te aga ayago doado bage tigidali nosali saibao. Te bageo, dago te aga ela muinao. Tama dena digi te gi tolaluaibao,’ te po wai.  
\v 8 Tama olama, te augwaligo aga selama, ela muai. Tama augwaligo aga tigi te gi sesege bulu badu sąwani.”   
\p
\v 9 “Tialima, te wain gi page bidi agai magi yaibawe? Te aga aselama, tama te gide sę yali bidi dabe te augwali ela muaibao. Tama agai te gi te gasa bidi meba augwaligo nogoba mawaibao.  
\v 10 Dagego te Godigo po bukude asęani po me deli dagego nedebewe? Agai e tiwai po wali dao:  
\q1 Te sę bidi dabego sela sąwani masigi, megi da aga  
\q1 te be polalubo kele ni tiwai dąų elalubo masigi  
\q1 pedalai elalubao.  
\v 11 Genuai Bidigo digi te sę  
\q1 pedalumainu ilali, tama dago sulama, te wiegi yai  
\q1 mu yai.’ \x * \xo 12:11 \xt Tib 118:22-23\x*  
\p Dagego te po polobadu nedebewe?” Jisasgo te po wali.   
\b  
\q1
\v 12 Te Juda dabego tobolu bidi dabe augwaligo Jisas  
\q1 pageabi elama tuainu yali, tiali goli augwali te we  
\q1 bidide wi yai. Augwaligo koneani, Jisasgo te po digi  
\q1 po begelama, te augwali tobolu bagede wai. Tama  
\q1 augwaligo aga taga peyu, tama augwali palio.   
\s1 Te gavmanibolo takis mabo sęde po  
\r (Mat 22:15-22; Luk 20:20-26)  
\p
\v 13 Tama nosali te Juda dabego tobolu bidi dabe augwaligo te Farisi meba dali, te Herot wali pali bidi meba me augwali tagala palama, te augwali Jisas bidiboba pali. Augwaligo te Jisas usu sabo po meba wainogo yai.  
\v 14 Augwali aselama, tama augwaligo agabolo te po wai, “Tisa, po ola mabo bidi, dago koneani, nage mu po wabo bidi dao. Tama nago homugo te bidi delide homu naga me egobeo. Nago te nogi yai bidi dali gasa po me tedali weyu, te nogi meni yani bidi dali gasa po me tedali weyu me egobeo. Menio. Nago te mu pode naga te Godigo kolesaga te we bidi augwali ola mayu ebao. Nago mena homu ebawe? Te dago takis te Rom gavman tuni bidi mu Sisar agabolo mobaso, tebogo dago te Godigo bomai po bolobowe, ma meniwe? Dago mawaibawe, ma dago magobewe?” Augwaligo te po wai.   
\p
\v 15 Tiali goli Jisasgo augwaligo te tibo po wabo te agai koneama, tama agai augwalibolo te po wai, “Magi baso dagego ena usu sobawe? Te mone ge me deli sela aselama, eno sueibao,” te po wai.  
\v 16 Tama augwaligo te mone ge me deli sela asali. Tama agai augwalibolo hanalu wali, “Te e mone gede elalubo noma me te asęani nogi te dego dawe?” Tama augwaligo te po wai, “Te gavman tuni bidi Sisargo dao.”  
\v 17 Tama Jisasgo augwalibolo te po wei ponani, “Te Sisar gavmanigo nai, te dagego Sisarbolo maiąo. Tama Godigo nai, te dagego Godibolo maiąo,” wali. Tama augwali te pode noma mu sali.   
\s1 Te bidi isąma ma hodalobo po  
\r (Mat 22:23-33; Luk 20:27-40)  
\p
\v 18 Megi da te Sadyusi hani bidi meba augwali te Jisasba asali. Te hani augwaligo te homu yai, te isali bidi ma hodalogobeo wai. Tama augwaligo agabolo hanalu wagasali.  
\v 19 “Tisa, po ola mabo bidi, Mosesgo te po me deli asęyu, dabolo te tiwai bomo yai po wai: te bidi me deli isąma, tama agai wai meni yani, tiali goli aga we te bididubaso da, teda te bidi aga amago te we selama, tama aga isali ama tau siyu, te wai ame nomainogo yao, te Mosesgo dabolo te bomai po mawai dao.  
\v 20 Tialima, te ama a naga olama me badu si bidai. Te gomunai bidigo we sali, tama nosali aga isali, tama wai me ame nisiąwai.  
\v 21 Tialima, tomo bidigo te we sali, tama aga me isai, tama wai me ame nisiąwai. Tama te tudi badu bidigo me tiwai yai.  
\v 22 Te tiwai naga ela pidubadi, tama te a naga olama me badu si ama dabe tigidaligo te we sesa pali goli, te wai me ame nisąma, tama augwali isila pai. Tama nosali mu, te we me isali.  
\v 23 Tialima nosali te isai we bidi dabe ma hodalobode, te sogo te we aga te dego we mu bidigowe? Nago koneani, te bidi a naga olama me badu si bidi dabego te we te augwaligo selama bidai,” te Sadyusi bagego te po wai.   
\p
\v 24 Tama Jisasgo augwalibolo te po wai, “Dagego te Godigo po bukude elalubo po page me konebeo. Tama te Godigo bomo me dagego konebeo. Tama tibaso, dagego te we bidi ma hodalobode wabo po geda muyu obao.  
\v 25 Te isai bidi dabe te gų page tagalama ma hodalobo sogode, te isai we bidi augwali te bidigo we ma siyu me egobeo. Menio. Te augwali te dagalude bidalubo ensel mobo bidi dabe bidalubo tiwai gilama bidaluaibao.  
\v 26 Tiali goli te isai bidi dabe ma hodaluaiba po wabo, te dagego te Mosesgo asęani bukude te dwasianu nide sia dali po wali te po nedebo meniwe? Te wali pode Godigo te po Mosesbolo te polobadu isali bidi dabede wai, ‘Ena te Abrahamgo God, me Aisakgo God, me Jekopgo God te dao,’ te po wai.  
\v 27 Tama te po page e dao, ma te bidi dabe selago mobo noma isigi sogo da, teda God da augwaligo God me menigi da. Tiali goli te tiwai elalubeo. Menio. Aga da, te bidibo ula elalu bidalubo bidi dabego God dao. Te dagego po te mu geda muanio,” Jisasgo te Sadyusi bidi dabebolo te po wai.   
\s1 Godigo hasia polalubo bomai po  
\r (Mat 22:34-40; Luk 10:25-28)  
\p
\v 28 Te Juda dabego bomai po page ola mabo bidi me deli aga asama, tama agai te augwa hasi konila po wabo odali. Tama agai odobadi, te Jisasgo wiegi yai po augwaliba wei ponobo po odali. Tama agai Jisasbolo hanalu wali, “Mena bomai po agai te tigidali bomai po aiyaba elaluama, tama te polalubo dawe?”   
\p
\v 29 Jisasgo po wei ponoyu, agabolo te po wai, “Te polalubo bomai po te e dao:  
\q1 ‘Dage Israel hani we bidi, dagego odiąo! Genuai  
\q1 Bidi, dago God, aga deli digi naga te dago Genuai  
\q1 Bidi dao.  
\v 30 Tama nago te Genuai Bidi godolo  
\q1 mu yao, te nago God dao, te nago homu tigidaligo  
\q1 me, te nago noma bidi tigidaligo me, te nago homu  
\q1 kolesaga tigidaligo me, te nago bomo tigidaligo me  
\q1 te aga godolo mu yao.’ \x * \xo 12:30 \xt Bom 6:4-5\x*   
\q1
\v 31 Tama te si wabo bomai po te e dao:  
\q1 ‘Nago gasa bidi godolo eyu, te nago naga godolo  
\q1 ebo tiwai gilama yao.’  
\m Te gasa bomai po te genuai elama, tama te bomai po si te aiyaba me elaluai me elalubeo,” Jisasgo te po wai.   
\p
\v 32 Tama te bomai po page ola mabo bidi agai te tiwai po Jisasbolo wai, “Tisa, po ola mabo bidi, nago po te wiegi yai. Mu dao, God agaduba deli naga te Genuai Bidi, tama gasa bidi me bidibeo.  
\v 33 Dago aga godolo mu ebo, te tigidali homugo me, te tigidali kolesagago me, te tigidali dago bomogo tama tiao. Tama dago gasa bidi godolo yainu te denade godolo ebo tiwai gilama yao. Dago te bomai po si wali pali da, teda te kolesagago te dago te Godibolo siaba tigidali te hasa ulubo ofa ilibo te tigidali aiyaba elaluama, tama te gasa ebo ofa tigidali me te aiyaba elalua silaibao,” te bidigo te po wai. \x * \xo 12:33 \xt Hos 6:6\x*   
\p
\v 34 Jisasgo te bidigo po wei ponobo po odali, te wiegi yai kolesaga koneai bidigo po wabo tiwai gilama yali, tama Jisasgo agabolo te po wali, “Nage te God dologoba pabo te nagede digibulu me elalubeo,” te po wai.  
\p Te sogo gagalama tama tigidali bidi dabe augwaligo usu sabo po meba te Jisasbolo hanalu wabo te augwali wi yai dao.   
\s1 Jisasgo te Krais po augwaliba hanalu wali  
\r (Mat 22:41-46; Luk 20:41-44)  
\p
\v 35 Jisas te Moni Lotu Be tempel tomoba pelama bidiyu, tama te we bidi dabe augwaliba po ola mabo sę yai. Tama ebadi, agai te po hanalu wali, “Magi baso te Juda dabego bomai po page ola mabo bidi dabego te po wabo, te Krais, Godigo te we bidi tau somainu dąį ilali bidi, te aga te Devitgo ogwa da po magi baso wabo dawe?  
\v 36 Te polobadu Godigo Tedali Mobo Bidigo te Devitbolo te homu kolesaga mobaso, tama Devitgo digi te po wai,  
\q1 ‘Genuai Bidi agai te eno Genuai Bidibolo te tiwai po  
\q1 wai dao: “Nage eno dolo nogo badu duayagasao, te  
\q1 nosali te eno nago boi bidi dabe aiyaba elaluama,  
\q1 tama augwali nago dologoba muabo sogo usu  
\q1 nagasaibao,” te po wai.’   
\m
\v 37 Devitgo digi aga te Genuai Bidi nogi yali. Tama tibaso, te mena tama te Genuai Bidi aga te Devitgo bulai wai pedalaibawe?” Jisasgo te po wai.  
\s1 Te bomai po koneai tisa dabego kolesagade dua dao po wai  
\r (Mat 23:1-36; Luk 20:45-47)  
\p Te genuai we bidi hani augwaligo te Jisasgo ola mani po odoyu, wiegi yai homu pemene yai.  
\v 38 Tama Jisasgo augwali ola mayu, tama agai te po wai, “Dage te bomai po page koneai bidi dabe dua dao. Augwali te bobage gudubo ugwa belama pabo homu godolo ebo dao. Te we bidi sisinibo pesagede te we bidi augwalibolo te siade da wabo te augwaligo godolo naga ebo dao.  
\v 39 Augwali te bomai po ola mabo lotu bede te we bidi gesabidi badu te polalubo ni namide duayabo godolo ebo dao, tama te genuai nai da tubo sogode te augwali te polalubo ni namide duayabo homu godolo ebo dao.  
\v 40 Augwaligo te augwa bidi isai we dabe tibo po weyu, tama augwaligo be dabe wi siyu ebo dao. Tama te ebo kolesaga mesegelainogo eyu, tama augwaligo tibo gedu haluasa po bobage weyu ebo dao. Te Godigo po tų ebo sogode te bidi dabe augwaligo genuai sęgę mu saibao,” Jisasgo te po wai.   
\s1 Doado bage meni yai wilawe we agai Godiba ofa mani  
\r (Luk 21:1-4)  
\p
\v 41 Jisas te Moni Lotu Be tempel tomode bidiyu, tama aga te Godibolo ofa maiabo mone ge mubo halobage pąde dulaluai. Tama agai te we bidi dabego te halobageba mone ge tulagasobo suali. Tama doado bage hauwa elalubo bidi dabego masigi hauwa tulagasu yai.  
\v 42 Tama aga bidi isai wilawe we, te doado bage meni yai we me deli, aga aselama, tama te dwasianu nogeai mone ge si te halobage tomoba bulagasali, te mama yai dwasianunu masigi si naga dao.  
\v 43 Tama Jisasgo aga wali pabo bidi asomainu i olama, tama augwalibolo agai te po wai, “Eno mu po dagebolo obao, te aga bidi isai wilawe we, te doado bage meni yai wego, agai te mone ge muani, te tialigo te tigidali we bidigo te halobageba mone muani mone te aiyaba elalualio.  
\v 44 Magi baso meni, te tigidali we bidi augwaligo te mone ge hauwa elalu, tama augwaligo meba naga te halobageba muani. Tiali goli te we aga te mu menia sai digi, tama agai aga mone tigidali te halobageba muani, tama aga nai me badu abela tuabo te mu meni dao,” Jisasgo te po wai.   
\c 13  
\s1 Te tigidali nai silabo sogo asobo po  
\r (Mat 24:1-2; Luk 21:5-6)  
\p
\v 1 Jisasgo te Moni Lotu Be tempel tagalama sobadi, tama aga wali pabo bidi me deligo agabolo te po wali, “Tisa, po ola mabo bidi, te e Moni Lotu Be tempelde elalubo genuai genuai masigi me te masigigo nigali wiegi wiegi yai be dabe elalubao suao,” te po wali.  
\v 2 Tama Jisasgo agabolo te tiwai po wei ponani, “Nago te elalubo genuai be dabe suyu, obe dawe? Te nosali augwaligo te masigi me daide te gasa masigi manalubo te gogoloyu me sula tagalogobeo. Menio. Te augwali tigidali pebedama, aiyaba sąsąwaibao,” te po wai.   
\p
\v 3 Tama nosali Jisas te Oliv bulu dude dualalu, tama te Moni Lotu be tempel u badu pedaide elalubo suali. Tama Pita, me Jems, me Jon, me Andru, te augwali naga agaba aselawali. Tama augwaligo agabolo hanalu wali,  
\v 4 “Nago dabolo wao, nisu sogo te sęgę te Moni Lotu Be tempelba pedalugowe? Mena dąį bolo hasia pedalubo si, tama dago koneai elalubadi, megi da te sę dabe te pąde pedalaiba homu elalugowe?”   
\p
\v 5 Tama Jisasgo po augwaliba pusa mayu, te po wai, “Dage dua dao. Tiyu te bidi me deligo dage ili po ola mayabuo.  
\v 6 Te bidi dabe hauwa augwali aselayu, tama ena nogi ilama, tama augwaligo te po waibao, ‘Ena digi ena te bidi dao.’ Tama augwaligo te we bidi hauwa tibo po ola mawaibao.  
\v 7 Tama me, nosali dagego te boi hwįabo kulukulu wabo po me, te boi hwįabo po sabilibo po me odobaso da, teda dage asesa polo tama noma siyu, midigi munu me elamuo. Te sę dabe pedaliyu da yaibao, tiali goli te dagalu de tǫ si silabo sogo bodolu te me elaluaibao.  
\v 8 Te bidi hani me deligo te gasa bidi hani me dali wąbi hwįaibao. Tama me tuni bidi hani me deligo te gasa tuni bidi mego hani bidi dali te wąbi hwįaibao. Te me badu pedai badu te tǫ mali eyu, tama augwali nasi genuai elaluaibao. Te sę ebo te wego hasia wai ame nainu dene pedalubo tiwai gilama te hasia pedalaibao.”   
\p
\v 9 “Duga digi te bugagia tonaluiąo. Te augwaligo dage te augwa kaunsilba po tų ela mawaibao. Tama augwaligo dage te Juda dabego bomai po odobo lotu be tomode elaibao. Te augwaligo ena nogi aiyaba elaluabo homu elama, tama augwaligo dage te gavmaniba me te tuni bidi gesabidiba dodolaibao. Tama tebode te dagego te Godigo gesi wiegi yai po te augwaliba pusa mao.  
\v 10 Te tigidali tǫde bidibo hani bidigo te Godigo gesi wiegi yai po pusubo bidigo po hasia odoyu bolo yaibao.  
\v 11 Tama augwaligo dage nogo tulama, tama dage te po tųba odasa pabo sogo, dage wi eyu te homu me elamuo, ‘Te dago te po tųde mena po wagowe?’ Menio. Tigidali po Godigo dagebolo te sogode digi menama, te dagego pusumainu yaibao. Magi baso meni, te duga digi te po me pusugobeo. Menio. Te Godigo Tedali Mobo bidi agai te po pusaibao.  
\v 12 Tama tobage sę pedalubo sogo te bidi dabego augwa ama dabe te boi bidi dabego nogoba munama, te augwali ela mumainu yaibao. Tama te aya dabego me te ogomani augwali te boi bidi nogoba muyu, te tama tiaibao. Tama te ogwa me wegi me augwaligo me te augwa aya ida dabe te boi bidi nogoba munama, tama augwali ela mumainu yaibao.  
\v 13 Tama tigidali bidi dabe augwaligo dage dali dwai homu mu yaibao. Eno nogi dagede elalubaso, tama augwaligo te tiwai kolesaga yaibao. Tiali goli te mena bidigo bomo elama dolaludubadi te dagalu de tǫ dali si siligi pabo sogoba usu nagasali bidi, te aga da, Godigo ma dobola saibao,” Jisasgo te po wai.   
\p
\v 14 “Tama te bulu dolabo dwai dwai nai mu dagego sueibao. Aga da, te habu selai elalubo bulu te badu doligi soaibao.” (Te po nedebo bidi agai homude bugagia kone palao.) “Tama te sę ebo sogode te Judia tǫ pedai badu bidibo we bidi augwali te bulu duba wi pelawaibao. \x * \xo 13:14 \xt Dan 9:27; 11:31; 12:11\x*  
\v 15 Tama te aga be daide ugwadu bidibo bidi aga te aiyaba dulama, te be tomoba doado bage sigulainu ebo te usu munu me egobeo, aga olo naga wi pao.  
\v 16 Tama te sogo aga gide bidibo bidi, aga begasa pelama, te kedaude gudubo ugwa me beba sigi pelamuo, te aga olo naga wi pao.  
\v 17 Te haliga elalubo we dabe, me te sogo wai ame mabo we dabe, te augwali hobede mu dao!  
\v 18 Tama dagego te Godibolo gedu haluasa po waiyąo, te sę dabe te moni kedau sogode pedelabuo.  
\v 19 Magi baso meni, te sogode te genuai sęgę mu elaluaibao. Te Godigo tigidali nai nigali sogo gagalasa, te megi e sogoba usu nagasu, te tiwai sęgę te polobadu me pedalisiąwai. Tama nosali me te tiwai sęgę meni yaibao. \x * \xo 13:19 \xt Dan 12:1; Ped 7:14\x*  
\v 20 Tama Genuai Bidigo te sogo bodolu te hagana selama, pęwadage iligi menigi da, teda te tigidali we bidi hagagi dao. Tiali goli agai te sa muyu dąį ilali we bidi augwalide homu kone palama elaluali. Tama tibaso agai te bodolu sogo pęwadage sogo ilama elalubo dao.”   
\p
\v 21 “Te sogode, te bidi me deligo dagebolo weyu, ‘Suao, te Krais ede bidibao,’ ma ‘Suao, aga ude bidibao,’ te po obaso da, dagego te pode homu dąų me olamuo.  
\v 22 Magi baso meni, te bidi meba te sogo aselama, tama tibo po weyu, te tiwai po waibao, ‘Ena Krais da,’ ma ‘Ena te Godigo po pusubo profet bidi me deli dao,’ tama augwaligo te bidigo susiąwai bomai sę eyu, tama gasagi gasagi yai sę dabe yaibao. Mu tama, te augwali usu yali homu ebogo da, teda augwaligo te Godigo augwali sa muyu dąį ilali we bidi tibo po ola menama, tama augwali tulalumainu yaibao.  
\v 23 Tama tiyu dage dua dao. Te sę me pedalisiąbadi eno te tigidali sę yabo po te dagebolo wai dao,” Jisasgo te po wai.   
\s1 Nosali te Godigo Bidi Mu asaibao  
\r (Mat 24:29-31; Luk 21:25-28)  
\p
\v 24 Jisasgo po me weyu, te po wai, “Tiali goli te genuai sęgę hasia bolo ela silama, tama te sogode te giliga ge hulia selama, tama te polua me ula isiąma, \x * \xo 13:24 \xt Ais 13:10; Ese 32:7; Jol 2:10, 31; 3:15; Ped 6:12\x*  
\v 25 tama te dagaludu hǫ dabe tudulaluaibao. Te dagalude elalubo bomai nai tigidali te mumunu yaibao.  
\v 26 Tama te tebo sogode teda augwaligo te Godigo Bidi Mu te dagalu tomodu te pǫ me deli daide ugwadu dualasa asobo sueibao, te aga genuai bomo me genuai wiegi yai ula elalubadi te asaibao. \x * \xo 13:26 \xt Dan 7:13; Ped 1:7\x*  
\v 27 Tama te sogo te aga ensel mobo bidi dabe augwali tagala palama, tama augwaligo te aga sainu sa muani we bidi augwali sisinigiluaibao. Te agai te tigidali tǫ pedai badu sesa biligiluama, te dagalu de tǫ dali si ununani te sesege tigidali habuba mu usu nama augwali sisinaibao,” Jisasgo te po wai.   
\p
\v 28 Tama agai po me weyu, te po wai, “Dagego te ni kayade kolesaga konea sao. Te ni aga nologo ąį elalu, tama te gesi yabe hogonu pedalubo sogo, dagego koneani, te poi pibo sogo wiegi yai giliga nanobo sogo pedelainu ebo, te homu ebo dao.  
\v 29 Te tiwai gilama naga, nosali dagego te suali te sę pedalubaso, teda dagego koneaibao, te ena ma asobo sogo te pąba yagaselama, tama te sunumide elalubao.  
\v 30 Eno mu po dagebolo obe dao: te megi e sogode bidalubo we bidi dabe augwali me isisąbadi, tama te sę tigidali pedalubo sueibao.  
\v 31 Te dagalu de tǫ dali si da, te mu sia saibao, tiali goli eno po da, te munu me hagayu, te sia siyu me egobeo. Te me elalua paibao,” agai te po wai.   
\s1 Te bidi me deligo Krais asabo sogode te bodolu me konebeo  
\r (Mat 24:36-44)  
\p
\v 32 Te Jisasgo po ma weyu, te po wai, “Tiali goli te bidi me deligo te asabo sogode te bodolu me konegobeo. Te dagalude ensel mobo bidi dabe augwaligo me te me konebeo. Te Godigo Ogwago me agai me konebeo. God Ayago naga agai te asabo sogo bodolu koneai elalubao.  
\v 33 Dage dua dao. Dagego tonalu bidiąo. Te nisu sogo pedalabo te dagego me konebe dao.  
\v 34 E tiwai elaluaibao. Te bidi me deligo te aga be tagalama, te gasaba pelama biligi pali. Hasia bolo agai te sę ebo bidi dabebolo te agai doado bage tolaluabo po wali, tama agai te sę bidi deli deli augwalibolo te sę dobayali. Tama agai te be sunumi tonaluabo bidibolo te po wali, agai te sunumi bugagia tonaluao po wai.  
\v 35 Tama te dagego me te tiwai gilama bugagia tonaluiąo. Te be page bidi aga nisu sogo asabo te dagego konebe. Te aga pio asogowe, ma huli tomode asabo me, ma te be posainuba po obadi me, ma te kigamu asabo me, te dagego konebe dao.  
\v 36 Tiyu aga te deli sogo naga mu polo tama asiyu, te dage pila mubadi aga asidali weyu, tama dage tonaluyu bidiąo.  
\v 37 Eno dagebolo te mabo po, te po eno tigidali we bidibolo obao, dage tigidaligo te bugagia tonaluao!” Jisasgo aga wali pabo bidi me si me si augwalibolo te po wai.   
\c 14  
\s1 Te tobolu bidi dabe augwaligo te Jisas ela muabo po wai  
\r (Mat 26:1-5; Luk 22:1-2; Jon 11:45-53)  
\p
\v 1 Te sogo te Juda dabego olo bidiyu, te bo disąwai bret nai tuabo sogo nogi Pasova, te tuabo side te pedelabo bodolu si elaluali. Tama te genuai pris dabego me te bomai po page koneai bidi dabe augwaligo te po wai, “Mena tama tilama, te dago Jisas geme pageabi elama, tama aga ela muaibawe?” \x * \xo 14:1 \xt Sai 12:1-27\x*  
\v 2 Augwaligo te po miyu, tama te po me wai, “Dago te tiwai sę te olo bidibo Pasova side me egobeo. Tiyu te we bidi augwaligo wąbi hwįabo sę hodolabuo,” te po wai.   
\s1 Wego Jisas toboluba te denami ebo nai sanda gelali  
\r (Mat 26:6-13; Jon 12:1-8)  
\p
\v 3 Te Jisas hogodama, te Betani be nani teba te oiyabe gasi sai bidi nogi Saimongo beba pali. Aga te tebol saide duagi pelama, tama nai tuyu bidibadi, tama we me deli asali, tama agai te gasa sawi yai botol masigide te wiegi yai denami ebo nai sanda elaluali, te nai abelabo mone te genuai mu dao. Tama agai te botol dalama, tama te denami yai sanda te Jisas toboluba gelali.  
\v 4 Tiali goli meba te bidaluali bidi, augwaligo homu dwai yali. Augwa hasi po mia siyu, te tiwai po wai, “Magi baso te wiegi yai denami ebo sanda olo dali hagamainu ebowe?  
\v 5 Dago te nai te bidi dabego abelemainogo egi sogo da, teda dago te mone te 300 kina sigi sogo da, tama te doado bage meni yai we bidi dabe augwaliba magi dao.” Tama te homu elama, augwaligo te webolo wado po wali.   
\p
\v 6 Tiali goli Jisasgo te po wai, “Dagego te we sęgę mabo tagalao. Magi baso dagego agabolo sęgę mobawe? Te agai wiegi yai kolesaga enabolo ebao.  
\v 7 Sesemane sogo te doado bage meni yai bidi dabe te augwali dage dali bididuaibao. Tigidali sogo dagego augwali tau siduabo homu idubaso da, teda tų elaluaibao. Tiali goli te ena da, te dage dali sesemane sogo me bidigobeo.  
\v 8 Te wego yabo homu yali sę, te agai te sę yalio. Agai ena tigiba te denami wel muani te ena gų pageba mumainogo sisi iliyu yai.  
\v 9 Eno mu po dagebolo obao, te tigidali tǫ pedaide augwaligo te Godigo gesi wiegi yai po pusubo sę ela pabode, te augwaligo e wego te yali sęde po mimi peyu, tama augwali tede homu kone palaibao,” Jisasgo te po wai.   
\s1 Judasgo Jisas te boi bidi dabego nogoba maiabo po dąų wai  
\r (Mat 26:14-16; Luk 22:3-6)  
\p
\v 10 Te wego te sanda nai Jisasgo toboluba gelali sogo, te sogo te 12 wali pabo bidi me deli, te Judas te Keriot bulu bidi, aga te genuai pris dabe augwali bidibo digi pai. Agai te Jisas augwali nogoba mawainu yai.  
\v 11 Augwaligo te wabo po odama, te augwali wiegi yai homu pemene yai. Tama augwaligo agabolo te masigi meba maiabo po dąų wai. Tama Judasgo te me sogo te Jisas augwali nogoba muabo sunumi me deli gegebo sę ebo te sogo gagalali.   
\s1 Jisas aga wali pabo bidi dabe augwali dali te Pasova nai tuali  
\r (Mat 26:17-25; Luk 22:7-14, 21-23; Jon 13:21-30)  
\p
\v 12 Te Juda dabego te yis meni yai bo disąwai bret nai tuabo si pedalali. Tama te polasa gagalobo sogode augwaligo te Pasova nai tuabo sipsip kibu wai eliyu ebo dao. Tama Jisas aga wali pabo bidi dabego Jisasbolo po weyu, te po wai, “Nago homugo dago te tubo nai menaba sisi iligi pelama, tama nago te Pasova nai tuaibawe?”  
\v 13 Tialima, Jisasgo te augwali si naga tagala palu, tama augwali sibolo te po wai, “Dage si te Jerusalem hanu tomoba piąo. Tama te sene wę tulama sela asobo bidi me deligo dage si te sunumide sueibao. Dage sigo aga wali piąo.  
\v 14 Aga te be me deli tomoba pabo si da, teda dage sigo te be page bidi agabolo te tiwai po waiyąo, ‘Te Tisa, po ola mabo bidi, agai te po wali, “Te eno ena wali pabo bidi dabe dali te Pasova nai tuabo madi te be habu nigilali te menade elalubowe?” te po wao.  
\v 15 Tama agai dage sibolo te ugwadu sigide elalubo te be habu ola mawaibao, tede te tebol sai me, duabo sai me te sisi ilai elaluaibao. Dage sigo da tuabo nai te be habude sisi ilao,” Jisasgo te po wai.   
\p
\v 16 Tialima, te wali pabo bidi si palio. Augwali si te hanuba sabolama, tama augwali sigo te Jisasgo augwali sibolo wali po tiwai gilama yai. Tama augwali sigo te tuabo nai Pasova sisi ilali.  
\v 17 Te sogo be pio ebode Jisas aga wali pabo bidi dabe dali aselawai.  
\v 18 Augwali te tebol saide dudulaluyu tama nai tutuladu, tama Jisasgo te po wai, “Eno mu po dagebolo obao, te dage tomode bidi me deli agai ena te ena dali boi bidi ebo bidi dabe augwaligo nogoba mawaibao. Te ena dali megi nai tubo bidi me deligo tama tiaibao,” te po wai.   
\p
\v 19 Te wali pabo bidi dabe augwali homu sęgę elama, tama augwali deli deligo aga hanalua pabo gagalali, “Te enawe?” te po wai.  
\v 20 Jisasgo augwalibolo te po wai, “Te dage nogo si olama sągągo si bage te me dedeli tomode dao. Te ena dali te nogo talua te pou tomoba muyu, tubo nai sabo bidi te dao.  
\v 21 Awe, mu tama, te Godigo Bidi Mu aga isaibao, te agade te tiwai po te Godigo po bukude asęani po tiwai isaibao. Tiali goli te Godigo Bidi Mu te boi bidi dabe nogoba muani bidi da, te aga hobedagia mu ebao! Te bidi aga idago aga me ame nagi menigi da, te usu egi da, aga bugagia bidigi da,” Jisasgo te po wai.   
\s1 Jisasgo te komunion nai augwalibolo mani  
\r (Mat 26:26-30; Luk 22:14-20; 1 Ko 11:23-25)  
\p
\v 22 Augwali te Pasova nai tutuladubadi, tama Jisasgo te bret me deli selama, tama Godiba puba hwi olama, tama pebedama, tama augwalibolo mani. Tama agai te po wai, “Dagego sela tuao. Te eno tigi dao.”  
\v 23 Tama agai te wain wę tabiali kap me deli selama, tama Godiba puba hwi olama, tama augwalibolo mani. Tama augwali tigidaligo tede wain ąį tudu pela silali.  
\v 24 Tama agai augwalibolo te po wai, “Te da, te eno kaneme dao, tama te kanemego te Godigo aga we bidi tau somainogo eyu mani po te dąų walobao. Eno te kaneme gelebogo te we bidi hauwa umabo mu tau saibao. \x * \xo 14:24 \xt Sai 24:8; Jer 31:31-34\x*  
\v 25 Eno mu po dagebolo obao, eno te wain du kaneme ąį munu ma tusiąbadi te eno gesi ąį te Godigo we bidi tonalubo madide tubo sogoba usu nigi paibao,” Jisasgo te po wai.   
\p
\v 26 Tama augwaligo te Godigo nogi ugwaba sabo tęąbi po me deli olama, tama augwali te be tagaluyu, tama Jerusalem hanu bulu badu pelama, tama te Oliv bulu duba pelawai.   
\s1 Jisasgo te Pitago aga tudiba muaibao po wai  
\r (Mat 26:31-35; Luk 22:31-34; Jon 13:36-38)  
\p
\v 27 Te Jisasgo augwalibolo te po wai, “Te dage tigidaligo ena taga peyu, tama wi paibao. Magi baso meni. Te Godigo po bukude elalubo po me deli tiwai dao, te Godigo wali po e dao, ‘Eno te kibu sipsip tonaluali bidi elibaso, tama te sipsip dabe wi tedela paibao,’ te po wai dao. \x * \xo 14:27 \xt Sek 13:7\x*  
\v 28 Tiali goli ena te gų pagede ma hodaluama, tama dage asomainu ena polasa te Galili tǫ pedai teba paibao,” Jisasgo te po wai.   
\p
\v 29 Pitago agabolo te po wai, “Te e bidi tigidali augwaligo nage taga peyu wi pobaso da, tagalao, magigo meni, te eno nage taga pogobeo,” te po wai.  
\v 30 Tama Jisasgo agabolo te po wai, “Eno mu po nagebolo obao, megi e sogo hulide, te ba kakaruk po si sogo wasiąbadi, tama nago ena konebeo po te sela sogo waibao.” wali.  
\v 31 Tiali goli Pitago po bomo elama mu weyu, “Tagalao, te ena nage dali isibaso, te usu dao. Tiali goli eno te nage konebeo po munu me wagobeo. Mu menio!” Tama Jisas wali pabo bidi dabe tigidali augwaligo me te tiwai po naga ola pai.   
\s1 Jisasgo te Getsemani gide Godibolo gedu haluasa po wai  
\r (Mat 26:36-46; Luk 22:39-46)  
\p
\v 32 Te augwali peyu, tama te gi me deliba sabolali, te gi bulu nogi Getsemani. Tama Jisasgo aga wali pabo bidi dabe augwalibolo te po wai, “Dage ede bidaluiąo. Ena God dali po wagi painu homu ebao.”  
\v 33 Tama agai te Pita, me Jems, me Jon, te bage sela selama, tama augwali aga dali pali. Megi da, te aga homu moni sęgę eyu, tama aga kone palu te aga dwai homu mu yai.  
\v 34 Tama agai augwalibolo te po wai, “Te eno homu sęgę mu eyu, te pąde ena isabo homu ebao. Dage ede bidaludu tama bugagia tonaluao,” wali.   
\p
\v 35 Tama aga dwasianu pelama gana, tama tǫba basi gulama, tama agai gedu haluasa po wai. Te Godigo usu da wida, te dwai denego aga te sogo ela somainu homu yai.  
\v 36 Agai te po wali, “Aya, nago te tigidali sę ebo usu dao. Eno homugo nago enaba megi te pedalainu ebo te dene dagala samainu homu ebao. Tiali goli nago te eno homu wali me pelamuo. Menio. Nago te naga homu wali naga pao,” Jisasgo te po wai.   
\p
\v 37 Tama aga ma geasa pelama, tama te wali pabo bidi dabe pila mubo suali. Tama agai Pitabolo te po wai, “Saimon, nage pila mudubawe? Nago te bodolu pąde yagasobo te tonaluabo te usu esiąyu egobe dawe?”  
\v 38 Tama agai te augwali selabolo te po wai, “Dagego bugagia tonaludu, gedu haluasa po waiyąo. Tiyu te dage usu sabo naigo te dage gege asabuo. Mu tama, duga noma bidi dabe te dwagi yai sę yabo homu ebo dao. Tiali goli duga tigigo bomo sǫą pobao,” agai te po wai.   
\p
\v 39 Tama aga ma pelama, gedu haluasa po wagi pai. Te aga hasia gedu haluasa po wali tiwai ma wali, te gedu haluasa po tiwai naga Godibolo ma weyu yai dao.  
\v 40 Tama aga ma aselama suali, te aga wali pabo bidi dabe augwali godege pila mubo suai. Te augwaligo gedu sęgę mu elaluai. Tama augwaligo agabolo te mena po agabolo wainogo yabo te augwaligo me konebeo.   
\p
\v 41 Jisasgo te sela sogo aga Ayabolo po wagi peyu yali silama, ma aselama, tama agai augwalibolo te po wai, “Dage pila mudu tama toma nedu edubawe? Tama dao! Suao, megi da bidi me deligo te ena Godigo Bidi Mu te dwai sęgę sai bidi dabego nogoba muaibao.  
\v 42 Dage hodaluama, tama da pinao. Suiąo, te boi bidigo nogoba ena mawainogo ebo bidi te augwali aga dali asai dao,” Jisasgo te po wai.   
\s1 Augwaligo Jisas nogo tuali  
\r (Mat 26:47-56; Luk 22:47-53; Jon 18:3-12)  
\p
\v 43 Jisasgo po odubadi, tama polo te Judas, te wali pabo bidi 12 te augwali me deli, aga asai. Te genuai bidi hani aga dali asai, tama augwaligo te poa pai hwą bobage hwą ge bainat me sesemone wąbi me te tolasa asai. Te genuai pris dabego me, te Juda dabego bomai po page koneai bidi dabego me, te Juda dabe tobolu bidi dabe badi, te augwaligo te tagala palobaso te augwali Judas dali asai.  
\v 44 Tama te Jisas augwali nogoba maiabo bidi agai te dąį me deli augwali mawaibao po weyu, te po wai, “Te eno bidi me deliba kisa sigi pelama nono naibao. Te bidi aga te Jisas dao. Dagego aga pageabi elama tulama, tama aga bugagia amua elama, tama aga selasa piąo,” wai.   
\p
\v 45 Tialima, Judas aga sabolama, tama Jisasba polo pelama, tama te po wai, “Tisa, po ola mabo bidi,” te po wai. Tama agai Jisasba kisa sagaselama, nono nai.  
\v 46 Tama tibaso, augwaligo nogo Jisasba munama, tama aga pageabi yai.  
\v 47 Tiali goli te Jisas wali pabo bidi dabe pąde te dolaluali bidi me deli, agai te aga elaluali bobage ge hwą kega selama, tama te tobolu pris bidigo sę ebo bidi elama, tama aga olo togolama, tama tǫba tulaluali.  
\v 48 Tama Jisasgo te asali bidi dabebolo te po wai, “Dagego ena sagasu, tama dagego te poa pai bobage hwą me sesemone wąbi me tolasa asali, te dagego nai wi sai bidi me deli sagasobo tiwai gilama yainu te yali da, agawe? Magi basowe?  
\v 49 Tigidali sogode te ena dage dali te Moni Lotu Be tempel tomode dulalu, tama eno te Godigo po dagebolo ola mawai, tama dagego ena nogo tulama pageabi me ebeo. Tiali goli dagego enade megi ebo sę ebogo te Godigo po bukude elalubo po meba te mu pedalumainu ebao,” Jisasgo te po wai.   
\p
\v 50 Tama aga wali pabo bidi dabe tigidali augwaligo aga taga peyu, tama augwali wi pelawai.  
\v 51 Tama gesi bidi me deli te Jisas wali asudai, tama agai tigide te tedela yai nami ugwa naga gudasa asiduai. Tama augwaligo aga pageabi elama tuali.  
\v 52 Tiali goli aga te tedela nami ugwa taga peyu, tama aga tigi olo naga elalubadi te aga wi pai.   
\s1 Augwaligo Jisas te kaunsilgo gedude po tų ilali  
\r (Mat 26:57-68; Luk 22:54-55, 63-71; Jon 18:13-14, 19-24)  
\p
\v 53 Tama augwaligo Jisas te tobolu bidi prisgo beba odasa pai. Tama tigidali genuai pris me te Juda dabego tobolu bidi dabe me te augwa bomai po page koneai bidi dabe, te augwali aselama, te beba sisinagasali.  
\v 54 Tama Pita te Jisas pabo wali pali, tiali goli aga te dwasianu digibulu gana bidai. Aga te tobolu pris bidigo be bagulali obo tomoba pai. Tama aga te enesigi bidi dabe dali dualalu, te augwaligo kedau nainu nogani siade te aga tigi kedau neduali.  
\v 55 Tama te genuai pris dabego me te tigidali kaunsil dabe augwali te bidi dabe meba i olama asobo side, te augwaligo te Jisasgo yali kolesaga po pusumainu yai. Augwaligo te aga ela muabo homu ebaso, tama te dwai sę yali sunumi me deli te gegali. Tiali goli te augwaligo agai dwai sę yali te me gegebeo.  
\v 56 Te bidi dabe hauwa augwaligo agade te tibo po kisilali, tiali goli augwaligo po te tiwai si me ebeo.  
\v 57 Tama te bidi meba augwali doligulama, tama tibo po te Jisasba kisilama weyu, te po wai,  
\v 58 “Dago odali, agai te tiwai po wai, ‘Te eno digi eno te bidi dabego nogogo sę yani te Moni Lotu Be tempel te aluaibao. Tama nosali te be eno te sela sogode gasa dodolama sę yaibao, tiali goli te be te nogogo me sę egobeo,’ agai te po wabo dago odalio,” augwaligo te po wai.  
\v 59 Tiali goli augwaligo te wali po te me geda muyu, tama te po tiwai si me ebeo. Bidi mego pusali po te gasagi yai tedali dwasianu yai, tama gasa bidigo po me tedali gasagi yai po wai, te tiwai si meni. Te usu ebeo.   
\p
\v 60 Tama te tuni bidi pris mu te tomode dolaluyu, tama Jisasbolo hanalu wali, “Nago te po deli me wei begelesiąma ebawe? Te nageba kisilama wabo pode te nago magi ebawe?”  
\v 61 Tiali goli Jisas aga pedauwali panialu, tama te agabolo po me deli wei me ponobeo. Te tuni bidi pris bidigo agaba ma hanalu wali, “Nage Krais, te magi dwai sę deli me isiąwai te Godigo Ogwa dawe, ma meniwe?”  
\v 62 Tama Jisasgo te po wai, “Te ena tama dao. Tama nosali dagego te Godigo Bidi Mu te Tigidali Bomo Elalubo Godigo dolo nogode dualama asobo dagego sueibao. Tama aga te dagalu tomodu te pǫ me deli daidu dualasa asaibao,” wali.   
\p
\v 63 Tama Jisasgo te po wabode te tuni bidi pris bidi sębę eyu, tama aga gudaluali ugwa pisila sąyu, tama te po wai, “Dago te gasa bidigo e bidigo yali sęde po wabo me odogobeo. Te tagalao.  
\v 64 Dagego odalio, agai te Godiba posobo po wai. Dagego mena homu ebawe?” Tama augwali tigidaligo te tiwai po Jisasde wai, “Agai dwai sę yai elalubaso, tama aga isimainao.”  
\v 65 Megi da augwali mebago gagalama, te aga pesa sąyu yai. Tama augwaligo te nami ugwa pedaigo te aga gedu paniama, tama augwaligo aga elama, tama augwaligo te po wai, “Nago te haniani sęde koneai profet bidi tiwai eyu tama po wao. Dego nage elaliwe?” Tama te ami bidi dabego aga selama, tama aga subigila dodolama elali.   
\s1 Pitago te po wali, “Eno Jisas konebeo,” wai  
\r (Mat 26:69-75; Luk 22:56-62; Jon 18:15-18, 25-27)  
\p
\v 66 Pita te aiyadu bidali, te be bagulali obo tomode bididuai. Tama te tuni bidi pris bidigo sę ebo we me deli asali.  
\v 67 Tama te we agai te Pita aga te siade tigi kedau nedubo suali. Tama te sę ebo wego te aga dolo ponama tonalu, tama te po wai, “Nage me, nage te Nasaret bulu bidi Jisas dali bidai dao.”  
\v 68 Tiali goli Pitago po weyu, menio te tiwai po wai, “Eno nago te wabo po eno me konebeo.” Tama aga te be obo sunumi pą badu buluba doligi soali. Tama ba kakaruk po me deli wai.   
\p
\v 69 Tama tede me te sę ebo wego aga ma sulama, tama agai te pąde dodolalubo bidi dabe dali po ma weyu, te po wai, “Te e bidi da, aga te Jisas wali pabo bidi me deli dao.”  
\v 70 Tiali goli Pitago po ma weyu, “Menio,” wali. Nosali dwasianu bidama gana, te aga pąde dodolaluali bidi dabe augwaligo te po ma Pitabolo wai, “Mu tamao, nage te augwali hani bidi dao. Nage te Galili bulu bidi naga dao,” te po wai.  
\v 71 Tialima, megi da Pitago po bomonama weyu, te po wai, “Te eno megi te mu po naga wasiąyu da, teda Godigo ena elimainao. Eno dagego te po wabo bidi me konebeo.”  
\v 72 Tama polo te ba kakaruk hwa si sogo wai. Tama Pitago te Jisasgo agabolo wali po te homugo ma kone palali, “Te ba kakaruk po si sogo wasiąbadi, tama nago po sela sogo wagi soyu, nago ena konebeo po waibao,” wai. Tama Pita aga dwai gela mu wai.   
\c 15  
\s1 Te Rom gavman tuni bidi Pailat agai Jisas osola suali  
\r (Mat 27:1-2, 11-14; Luk 23:1-5; Jon 18:28-38)  
\p
\v 1 Te kigamu mu te genuai pris dabe dali, te tobolu bidi dabe me, te bomai po page koneai bidi dabe me, te tigidali kaunsil dabe badi, te augwaligo po me deli miani. Tama augwaligo Jisas te bonogo nogo si dunama, tama augwaligo aga selama, tama aga te Rom gavman polalubo tuni bidi Pailat agabolo mawai dao.  
\v 2 Tama Pailatgo agabolo hanalu wali, “Nage te Juda dabego tuni bidi da, agawe?” Jisasgo po wei ponani, “Naga digi nago te tiwai po obao.”  
\v 3 Tama te genuai pris bidi dabe augwaligo agaba te po hauwa kisilama wali.  
\v 4 Tama tibaso, Pailatgo agaba ma hanalu wali, “Nago te po me deli wei me ponosiąma, ebawe? Odao, augwaligo te po hauwa nageba kisilama obao,” te po wai.  
\v 5 Tiali goli Jisasgo te po deli wei me ponobeo. Tama tibaso, te Pailat aga noma mu sali.   
\p
\v 6 Te tigidali kibu bede te Juda dabego te Pasova olo bidiyu toma nabo side, te gavman bidi Pailat agai te kalabus bidi me deli te olo tagala palu yai. Te Juda we bidi augwa digi te bidi me deli nogi nogi ilama tagala palumainu i obaso da, teda Pailatgo te bidi augwaliba tagala palu yai.  
\v 7 Tama te sogo te bidi me deli te kalabuside bidai, te aga nogi Barabas. Aga te gavman bidi dabe dali wąbi hwįai bidi dabe augwali dali kalabus yai bidai. Te hani augwaligo te wąbi hwįnama, tama augwaligo te bidi meba ela muai.  
\v 8 Tialima, te we bidi augwali sabalu, tama augwaligo te Pailatba i waliyu, te agai polobadu te augwalibolo ebo tiwai te emainu i wai.  
\v 9 Tama Pailatgo po wei augwaliba ponoyu, te po wai, “Te dagego homugo eno te dage Juda dabego tuni bidi Jisas te dageba tagala palumainu homu ebawe?”  
\v 10 Magi baso meni. Agai koneani, te genuai pris bidi dabego te homu dwai Jisas dali naga elama, tama augwaligo aga te po tųba odasa asai.   
\p
\v 11 Tiali goli te genuai pris bidi dabego te we bidi dabe augwaligo homu hodoloyu, te augwaligo Pailatba i waliyu, te Barabas augwaliba tagala palao po wai.  
\v 12 Tama Pailatgo po augwaliba ma wali, “Tama dage te Juda dabego tuni bidi nogi ebo, eno te bidi aga magi yaibawe?”  
\v 13 Augwaligo te i ma wai, “Aga te ni pedaide elao!”  
\v 14 Tama Pailatgo augwalibolo te po wai, “Magi basowe? Agai magi dwai sę yaliwe?” Tiali goli te we bidi augwaligo po dagą weyu i bomonama wai, “Te aga ni pedaide elao,” wali.  
\v 15 Tama Pailatgo homugo te we bidi augwaligo aga dali dwagi yai homu emainao homu yali. Tama tibaso agai te kalabus bidi Barabas te augwaliba tagala palali. Tama agai Jisas te ami bidi dabe augwali nogoba menama, te augwaligo aga dene mayu, dwai bigo eliyu elama, tama aga te ni pedaide elimainu yai.   
\s1 Te Rom ami bidi dabe augwaligo Jisasba te dwai posobo po wai  
\r (Mat 27:27-31; Jon 19:2-3)  
\p
\v 16 Te Rom ami bidi dabe augwaligo Jisas te gavman bidi Pailatgo be obo bagulali tomoba odasa pelama, tama te be mesalode augwaligo te tigidali ami bidi dabe asomainu i wai.  
\v 17 Augwaligo te mama yai nami ugwa me deli selama, te Jisasba gudulali. Tama augwaligo te sesani yai bono me deligo te madi nigilama, tama augwaligo te Jisas toboluba muai.  
\v 18 Tama augwali hodalu, doligulama, tama agaba nogo dodoloyu, te po wai, “Giligade dao, te Juda dabego tuni bidi dao!”  
\v 19 Tama augwaligo aga toboluba te wawi yai sigi dili me deligo elali. Tama augwaligo agaba pesa sąwai. Tama augwaligo kidu sugunu gulama, tama augwaligo tibo po naga weyu, te aga genuai bidibolo ebo kolesaga tiwai yali.  
\v 20 Augwaligo te gisugu mabo sę me te dwai posobo po dabe aga dali ola silibo si da, teda augwaligo agaba te gudulali mama ugwa te augwa peda selama, tama augwaligo aga ugwa te agaba ma gudulali. Tama augwaligo aga te ni pedaiba walainu selasa palio.   
\s1 Augwaligo Jisas te ni pedaide walali  
\r (Mat 27:32-44; Luk 23:26-43; Jon 19:17-27)  
\p
\v 21 Bidi me deli, Saimon te Sairini bulu bidi, te Aleksander me Rufus sigo aya, aga aselama, tama te Jerusalem hanu tomoba painu soali. Tama te ami bidi dabe augwaligo agade bomo eyu, agai te Jisas elabo ni pedai te agai tolao wai. Tama agai te ni pedai tolasa pabo gagalali.  
\v 22 Tama peyu, augwaligo Jisas te bulu du me deli teba sela pali, te aga nogi Golgota. Te nogi page te e tiwai dao, te tobolu dili tiwai bulu du dao.  
\v 23 Augwaligo te Jisasbolo te wain ąį dali taluali marasin ąį mawainu yai, te aga tigi dene silabo marasin tiwai elalubao. Tiali goli agai me tubeo.  
\v 24 Tialima, augwaligo aga te ni pedaide ela daganama, tama te ami bidi dabe augwaligo te agai gudali ugwa tigidali te augwa dobola sai. Augwaligo te satu gagali elama, dego te mena ugwa te dąį elama sainu tiali.  
\v 25 Te giliga ula dąį ebo kigamu tama, te augwaligo aga te ni pedaide daganama walali.  
\v 26 Tama te ni pedaide ugwadu te augwaligo aga po tų ilali po asęai. Augwaligo e tiwai po asęai dao, “Te Juda dabego tuni bidi dao,” te po asęnama te ni pedaide elaluali.  
\v 27 Te Jisas walali ni pedai pąde augwaligo te nai wi sai te dwai sę yai bidi augwali si te gasa ni pedai side walali. Augwaligo te bidi me aga te dolo nogo badu waliyu, tama me agai pobase nogo badu waliyu yai.  
\v 28 [Tama tialima te Godigo po bukude asęani po me deli te mu pedalai. Te e tiwai po wai dao, “Augwaligo aga dali te dwai bidi dabe dali nedali.”]   
\p
\v 29 Tama te augwali eda soyu, ugwa peyu ebo we bidi augwaligo dwai posobo po agabolo weyu yai. Augwaligo tobolu pemeyu, tama po wai, “Ia, nago te Moni Lotu Be tempel aluama tama te sela sogo naga ma sę yaiba wali bidi dao. Behede! \x * \xo 15:29 \xt Tib 22:7; 109:25; Mak 14:58; Jon 2:19\x*  
\v 30 Megi da, naga digi naga tau sao. Nage te ni pedaide daganalubo tagalama, tama nage aiyaba dulao,” te po wali.  
\v 31 Te genuai pris bidi dabe dali te Juda dabego bomai po page koneai bidi dabe, augwaligo me te dwai posobo po wai. Augwaligo te augwa hasi tomode digi te tiwai po wai, “Agai te gasa we bidi dabe tau sali, tiali goli aga digi aga tau sabo usu ebe.  
\v 32 Te bidi Krais wabo, te da Israel dabego tuni bidi, aga te ni pedaide daganalubo tagalama tama te tǫba aiya dulubaso, tama dago sulama, tama dago agade konealubo po dąų waibao,” genuai bage augwaligo te po wai. Te bidi si augwaligo te Jisas pąde te ni pedaide walali, te bidi me deligo me te dwai posobo po agabolo wai.   
\s1 Jisas isalio  
\r (Mat 27:45-56; Luk 23:44-49; Jon 19:28-30)  
\p
\v 33 Te nai tubo belo wabo giliga tomode, te tigidali tǫ badu be huli si ela selama, te giliga dega sigi painu ebo teba usu nani.  
\v 34 Tama te giliga dega sainu ebode te Jisasgo po dagą bomonama weyu, te po wai, “Eloi, Eloi, lama sabaktani?” E tiwai po wai, “Eno God, eno God, magi baso nago ena tagalubawe?”  
\v 35 Tama te pąde dodolaluali bidi meba augwaligo te po odama, tama augwaligo te po wali, “Odiąo, agai te Elaija i obao.”  
\v 36 Tama bidi me deli udada pelama, tama te wawi yai bola tiwai nai selama, tama te nai te olo wain ąį te naiba gelama, tama te sigi dili me delide munama, tama Jisas agabolo te tumainu ugwaba mawai. Tama te bidigo te po wai, “Meo, dago suyu bolo yaibao. Te bidi Elaija asama, aga te tǫba aiya sela dulaiba homu egowe, ma meni egowe?” te po wai.   
\p
\v 37 Tama Jisasgo po dagą bomonama mu olama, tama aga isalio.   
\p
\v 38 Te sogo naga tama te Moni Lotu Be tempel tomode dąį tiwai walalobo genuai nami ugwa, te ugwa te ugadu pedasa dulali te aiyaba sabolali, tama te moni nami ugwa pedai si pedelai.  
\v 39 Tama te ami bidi dabe augwa genuai bidi aga te Jisas pąde dolalubadi aga te tiwai elama isibo suali. Tama agai te po wai, “Mu tama, te bidi aga te Godigo Ogwa dao.”   
\p
\v 40 Te we dabe meba me te digibulu gana dwasianu dodolalu, tama augwaligo me tononaluali. Te augwali tomode bidali we me deli te Makdala moni tǫ we Maria dao. Tama we me deli te Maria, te nogi sabi si wali, te bidi Jems me Joses tega sigo ida. Te bidi Jems aga nogi me Gesi Bidi dao. Tama we me deli aga te Salome dao.  
\v 41 Polobadu Jisas te Galili tǫde bidibadi, tama te we dabe augwali aga wali biliyu, tama aga tau sai. Tama te gasa we dabe hauwa me bidali, augwali te moni hanu Jerusalemba Jisas dali asai dao.   
\s1 Augwaligo Jisas pubulali  
\r (Mat 27:57-61; Luk 23:50-56; Jon 19:38-42)  
\p
\v 42 Te be pio ebode te Arimatea tǫ bidi nogi Josep aga asali. Aga te Juda dabego genuai kaunsil hani bidi me deli, tama agai nogi wiegi yai elaluali. Agai me te Godigo we bidi tonaluabo sogo asobo tonaluyu bidali.  
\v 43 Do tama da wabo side te Sabat sogo pedelabo elalubaso, tama megi pio te haniani nai sisi ebo sogo elaluali. Tama tibaso Josep aga te Pailat bidibo be tomoba pelama, te aga gesabidiba doligi pelama, tama aga wi me ebeo. Menio. Agai te Jisasgo tigi sabo po agabolo hanalu wali.  
\v 44 Te pode Pailat aga noma sali, tama te po wai, “Aga polo isai dawe?” Tama agai te ami polalubo bidi kepten i olama asobo side, tama agabolo hanalu wali, “Te Jisas isaliwe, ma meniwe?”  
\v 45 Agai te ami tuni bidi keptengo po odama, teda agai Josepbolo te po wai, agai te tigi somainao.  
\v 46 Tama Josepgo te tedela moni nami ugwa abelama, tama agai Jisas tigi te ni pedaide daganaluali te aiyaba sela dulai. Tama agai aga te tedela ugwago bebe pelama, tama aga te gų page me deli tomoba muai. Augwaligo te gų page te genuai ola be masigi tomode nigai. Tama Josepgo te moni masigi me deli hogogo bele pelama, tama te ola be gų page dedage elalubo te paniai.  
\v 47 Te Maria Makdala tǫ we me te gasa we Maria dali, te Josesgo ida, augwali sigo tononaluali, tama augwaligo te Jisas mubo pesage augwali sigo suali.   
\c 16  
\s1 Jisas ma hodaluali  
\r (Mat 28:1-8; Luk 24:1-12; Jon 20:1-10)  
\p
\v 1 Sabat sogo bidama silai madi, tama Maria te Makdala tǫ we, te gasa Maria dali, aga da te bidi Jems aga ida, tama te gasa we nogi Salome, te we sela augwaligo te wel me te gasa wiegi yai denami ebo nai me abelai. Augwaligo te Jisas tigiba piligi pabo homu yai, aga tigi polo daumua pidali weyu tama yai.  
\v 2 Te kigamu mu te wik polasa gagalobo sogo augwali te gų pageba pai.  
\v 3-4 Tama pobadi augwa hasi po mia siyu, te po wai, “Dego da tau selama, tama te gų page paniani masigi hogogo bele pogowe?” Magi baso meni, te masigi te genuai bage mu dao. Tama pąba sabolama, tama augwaligo tonono pobadi, tama augwaligo suali, te gų page paniani masigi te me elalubeo. Menio. Bidi me deligo te masigi hogogo bele pai.  
\v 5 Augwali te gų page tomoba pobadi, tama augwaligo te gesi ogwa bidi me deli te dolo nogo badu dualalubo suai. Aga te bobage tedela ugwa gudai elaluai. Tama augwali noma siyu midigi siyu wi yali.  
\v 6 Tama agai augwalibolo te po wai, “Dage midigi siyu noma me selamuo. Eno koneani, dage asali te Nasaret bidi Jisas gegagasali, aga augwaligo te ni pedaide walali. Aga hodalualio! Aga te ede me bidibeo! Te augwaligo aga muani pesage te elalubo suiąo.  
\v 7 Tiali goli dagego te aga wali pali bidi dabebolo wagi piąo, tama Pitabolo wao, ‘Jisas aga te dage asabo madi te Galili tǫba polasa pobao. Te agai polobadu wali po tiwai gilama, te dagego aga te Galili tǫde sueibao,’” agai te po wai.   
\p
\v 8 Tama te we dabe augwali te gų page tomoba pali te buluba solama, tama augwaligo te gų page tagalama wi soai. Augwali didibili elama, tama augwali homu te midigi siyu dwai noma sali. Tama augwaligo te bidi me deli dali te po deli me wabe, magi baso meni, te augwali wi yai.   
\s1 Maria te Makdala tǫ we agai Jisas suali  
\r (Mat 28:9-10; Jon 20:11-18)  
\p
\v 9 [Jisas te kigamu mu te sę polasa gagalobo sogo tede hodaluali. Tama aga hasia te Makdala bulu we Mariaba pedelai. Te we polobadu Jisasgo te dwai haubo noma bidi te nogo a naga olama me badu si elalubadi sela sąwani te we dao.  
\v 10 Te we Maria agai Jisas sulama, tama aga pelama, te Jisas dali wali bilali bidi dabebolo te aga suali po wagi pai. Te bidi dabe augwali homu sęgę elama, tama augwali gela weyu bidaludai.  
\v 11 Maria agai te po augwalibolo wai, “Jisas aga te bidibo ula elalu bidibo tama eno sualio.” Tama augwaligo te po odama, tama augwaligo homu te poba dąų me wabeo.   
\s1 Te wali pali bidi sigo Jisas te sunumide suali  
\r (Luk 24:13-35)  
\p
\v 12 Tama nosali te wali pali bidi sigo te moni hanu Jerusalem tagalama, tama te sunumidu pai. Tama Jisas te gasagi yai hasegelama, tama augwali siba pedaligi pai.  
\v 13 Tama augwali sigo aga sula koneama, tama augwaligo te po te gasa wali pali bidi dabeba pusugi pai. Tiali goli augwaligo te augwali sigo wali poba homu dąų me wabeo.   
\s1 Jisasgo augwalibolo te Godigo po pusugi pabo sę mani  
\r (Mat 28:16-20; Luk 24:36-49; Jon 20:19-23)  
\p
\v 14 Nosali badu te wali pali bidi dabe nogo si olama sągągo deli te augwali dugulama nai tubadi, tama Jisas te augwaliba pedalai. Te augwaligo agai wali poba augwa homu dąų me wasiąbaso, tama agai augwaliba wado ilali. Magi baso meni, augwaligo olo te palialu, tama te we bidi augwaligo suali, aga te ma hodaloai yali po wabo te augwaligo homu teba dąų me wabeo.  
\v 15 Tama agai po augwaliba weyu, te po wai, “Dage te tigidali tǫ habu pedaiba pelama, tama te enade gesi wiegi yai po te tigidali we bidiba pusa mao.  
\v 16 Te enade konealubo po dąų olama, tama aga homu enaba tialuyu tama te baptais sabo bidi, aga te Godigo ma dobola selama, tama aga bidi da waibao. Tiali goli te enade te konealubo po dąų me wasiąwani bidi, aga te po tų ebo sogode hagawaibao.  
\v 17 Godigo te bomai sę meba te enade homu dąų wabo bidi dabego nogode pedalumainu ilaibao. Te eno nogide augwaligo te dwai haubo noma bidi dabe sela sąbo sę yaibao, tama augwaligo te bidi dabego odisąwai gesi noma po te pusuyu yaibao.  
\v 18 Te augwaligo augwa nogo te bidi gąų kelebo dwai hasamaniba mubaso, ma te konesiąbadi augwaligo te bidi isibo nai tubaso da, teda te hasamanigo me te isibo naigo me augwali dologobeo. Tama augwaligo nogo te gasi sai we bidiba mubo si da, tama te gasi sai bidi dabe usu ma yaibao,” Jisasgo te po wai.   
\s1 Godigo Jisas selama te dagaluba pai  
\r (Luk 24:50-53; Tpi 1:9-11)  
\p
\v 19 Genuai Bidi Jisas agai po augwaliba pusa silama, tama Godigo aga selasa te dagaluba holai. Tama megi da, aga te Godigo dolo nogo badude dualalu bidibao. \x * \xo 16:19 \xt Tpi 1:9-11\x*  
\v 20 Tama te wali pabo bidi dabe augwali pelama, tama augwaliba te ola mani po te tigidali tǫ pedai badu pelama, te po pususu biligi pai dao. Tama Genuai Bidi te augwali dali sę eyu, tama te augwaligo nogode te haniani bomai sę ebogo agai hania hanilali, te augwaligo ola mabo po te mu po naga dao.]