\id MIC - Dadibi NT [mps] -Papua New Guinea 2001 (DBL 2014) 
\h Profet Maikago Buku 
\toc1 Profet Maikago Buku 
\toc2 Maika 
\toc3 Mai 
\mt1 Profet Maikago Buku  
\imt1 Hasia nedebo po  
\ip Te profet bidi Maikago agai po te Aisaiago po pusali tiwai side naga te po pusai dao. Tiali goli, Aisaia aga te Jerusalem bidi dao, tama agai te genuai bidi dabebolo po pusa mawai dao. Profet Maika aga te Juda dabego dwasianu hanu me delidu asai dao. Agai te we bidi dabebolo e tiwai po walai dao. Godigo augwalibolo dene mawaibao po walali. Magi baso meni, augwaligo Godiba tudi ola menama, tama augwaligo tigidali wiegi yai kolesaga dabe tagalai baso. Te Maikago wali profet po tomode te wiegi yai dąų wali promis po me badu me tomode elaluali. Agai e tama po wali, nosali Godigo aga we bidi dabe dali wiegi yai sę mu yaibao po wali. Agai Devitgo hani tomode bidi me deli sa munama, tama agai augwali wiegi yai kolesaga elama, augwali doloba pai kolesaga elama, tonaluaibao wali. Te Maikago po me deli te meba gasa profet bagego pusali po page po tiwai mu dao. Te po e tiwai dao: “Genuai Bidigo dabolo wiegi yai kolesaga po pusa mawai dao. Agai homugo dago te tiwai kolesaga wali pomainu homu yali. Dago doloba pai kolesaga wali pelama, tama gasa bidi dabe godolo mu yao. Tama dago dena homu kolesaga aiyaba elaluama, tama dena God dali homu deli elama bidao. Tama aga deli naga wali pao.” Te po te buku Maika, Dąį 6:8, tede te elalubao.  
\c 1  
\p
\v 1 Te Jotan, Ahas, me Hesekia, te bidi deli deli te Judade king bida bida piduali sogo, Genuai Bidigo te po Maikabolo mawai, te taun Moreset bidi me deli dao. Genuai Bidigo Maikabolo te Samaria me Jerusalemde nosali pedelabo sę dabe po wai dao. \x * \xo 1:1 \xt 2 Kin 15:32-38; 16:1-20; 18:1–20:21; 2 Sto 27:1-7; 28:1-27; 29:1–32:33\x*   
\s1 Godigo te Samaria me Jerusalemde dwai dene ilaibao wali po  
\q1
\v 2 Dage tigidali we bidi hani, te po odiąo.  
\q1 Dage te tǫde bidibo bidi tigidali,  
\q2 te Godigo poba olo muiyąo.  
\q1 God Genuai Bidigo dage po tų ilaibao. Dagego odao.  
\q1 Genuai Bidi aga be te dagalude bidiyu, te po walio.   
\q1
\v 3 Genuai Bidigo te aga wiegi yai bulu digi te tagalama,  
\q2 te asabo homu ebao.  
\q1 Aga dulama, te bulu du padode daidu bilagasaibao, wai.   
\q1
\v 4 Tama te bulu du dabe te aga sągą  
\q2 dologode ąį tiwai pedelaibao,  
\q2 te ula ebo nai kandel te ula eyu,  
\q2 te aga ili te wę pedalubo tiwai yaibao.  
\q1 Te bulu du dabe te odogo malu tǫ pesageba te gea paliyu,  
\q2 te bulu dudu wę sąbo samanobo tiwai yaibao.   
\q1
\v 5 Te tigidali sę pedelaibao, magi baso meni,  
\q2 te Israel dabego dwai sę eyu,  
\q3 te Godigo po sela sąwani.  
\q1 Te hagoma ebo kolesaga te Israelde elaluali,  
\q2 te sę page dego dawe?  
\q1 Te Samaria dabede naga dao.  
\q1 Te Juda tibo godiba lotu po wali kolesaga,  
\q2 te sę page dego dolai dawe?  
\q1 Te page Jerusalem dabede naga elaluai dao.   
\b  
\q1
\v 6 Tialima, Genuai Bidigo te po wai,  
\q2 “Te eno Samaria taun dolama,  
\q2 te pepeli dilide te pobele bage du  
\q3 holobo tiwai yaibao.  
\q1 Tama te ni wain du kulubi bulubo pesage pedelaibao.  
\q1 Te aga be dabe tigidali eno elama, dolaibao,” wali,  
\q2 “tialima, eno te be dabego masigi kakali hogomu,  
\q2 te odogo pesageba gea palaibao,” walio.   
\q1
\v 7 “Te eno te tibo god dabego noma haluama,  
\q2 te siaba sąwaibao,” wai.  
\q1 “Tialima, te god dabe te pobele bage hogomu pesage  
\q3 holobo naga tiwai pedelaibao.  
\q1 Te Samaria dabego te God tudiba munama,  
\q2 tama augwa te tibo godiba lotu po wai,  
\q3 te wego aga bidi tagalama,  
\q2 te subigila penani ela bilibo tiwai yali.  
\q1 Tialima, te meba hani aselama,  
\q2 te Samaria aiyaba elaluama,  
\q2 te Samaria dabego te dwai sę yalide sali doado bage  
\q3 gasa tǫ kantriba sela pelama,  
\q2 te doado bage te augwa tibo godiba  
\q2 magi paibao,” wai.   
\b  
\q2
\v 8 Tialima, Maikago te po wali,  
\q3 “Te sę dabe pedelaibao,  
\q2 tama tiyu, ena te haliga hobede eyu, gela waibao.  
\q1 Te eno sągą nadoba su me musiąma,  
\q2 te eno dwai pisila pai nami ugwa naga  
\q3 gudaibao,” wai.  
\q1 “Te eno homu dene eyu gela wabo,  
\q2 te yowigo goo wabo tiwai weyu,  
\q2 te haliga homu dene elama,  
\q2 te i wabo te ebigo dwai hwa wabo  
\q3 gilama yaibao,” po wai.   
\q1
\v 9 “Magi baso meni, te Samaria dabego  
\q2 keni pedela sabeo.  
\q1 Tama pąde Juda dabe me te tobage keni saibao,” wali.  
\q1 “Tama Jerusalem digi, te eno we bidi dabego pesage,  
\q2 te dwasianu sogo naga tama te me dolaibao,” wai.   
\s1 Te boi bidi dabe Jerusalem pąba asali  
\q1
\v 10 Dagego te Get dabebolo olamuo,  
\q2 te dago boi bidi dabe,  
\q2 te Godigo da dolali po wagimio.  
\q1 Te augwaligo dage gela wabo  
\q2 te augwaligo sumainu me elamuo.  
\q1 Dage te Bet Leafra we bidi, \f + \fr 1:10 \ft Te taun Bet Leafra dali, te gasa taun dabede wali po te ves 10-15 tede elalubao, augwali te Jerusalem pąde elaluali. Te boi bidi dabego te Jerusalemba hwįgi painu ebaso, augwali bolo polasa te taun dabeba pedaliyu yaibao.\f*  
\q2 dage te haliga sęgę mu elama,  
\q2 gela weyu, te duga tigide pu muiyąo.   
\q1
\v 11 Dage te Safir we bidi, dage hale elama,  
\q2 te pisila pai ugwa gudama,  
\q2 te gasa tǫ kantriba te kalabus igi pabo tiwai yao.  
\q1 Te Sanan dabe wi dwai mu elama,  
\q2 te augwa taun tagalama,  
\q2 te buluba me teda soagobeo.  
\q1 Dagego te Betesel we bidi dabe gela wabo odobaso da,  
\q2 te dagego koneagameo,  
\q2 te badu te geme duala sigi pabo pesage me elalubeo.   
\q1
\v 12 Te Marot we bidi dabe haliga sęgę elama,  
\q2 te bidi mebago augwali tau sagasobo  
\q3 tonalueibao, magi baso meni,  
\q2 te pąde Genuai Bidigo te Jerusalem dolaibao.   
\q1
\v 13 Dage te Lakis taun we bidi dabe,  
\q3 dagego te karis dabe selama,  
\q3 te udabo mu koneai hos dabeba gebelama,  
\q3 te wi pomainao.  
\q1 Magi baso meni,  
\q2 dagego te Israel dabego dwai kolesaga ebo wali pali,  
\q2 tialima dagego te Jerusalem tulalumainu yali dao.   
\q1
\v 14 Dage Juda dabe, dagego te taun Moreset Get  
\q2 homu dene iyąo,  
\q2 magi baso meni, te gasa hanigo selama,  
\q2 te dagego taun da ma wagobeo.  
\q1 Tama te Aksip we bidi dabego te Israel  
\q3 king dabe tau me sogobeo.   
\q1
\v 15 Dage te Maresa we bidi,  
\q2 te Genuai Bidigo dage te boi  
\q3 bidi dabego nogoba munama,  
\q2 te dagego taun augwaligo saibao.  
\q1 Tama te Israel polaluali tobolu bidi dabe  
\q2 te Adulam masigi ola beba  
\q2 geme wi duala sigi peyu, ela paibao.   
\q1
\v 16 Te boi bidi dabego te dagego homu godolo mu ebo  
\q2 wai dabe selama, te selasa paibao.  
\q1 Tialima, te duga wai dabede homu dene ebo gela weyu,  
\q2 tama te tobolu nisi tigidali poala sąnama,  
\q2 te tobolu wane kikili ilao.   
\c 2  
\s1 Godigo te augwaliba dwai sę ilali bidi dabe dolaibao wali  
\q1
\v 1 Te dage dwai kolesaga yabo homu ebo bidi,  
\q2 te hobede ya, te dage dolaibao!  
\q1 Dage te hulide godege me pisąma,  
\q3 dagego te dwai kolesaga yabo homu naga eyu,  
\q2 te kigamu mu dage hodaluama, te sę ebo dao,  
\q2 magi baso meni, dagego te sunumi gegali dao.   
\q1
\v 2 Te dagego bidi me deligo gi sabo homu pesą eyu,  
\q2 dagego bomonama te siyu naga yaibao.  
\q1 Dagego te be sabo homu pesą ebaso da,  
\q2 dagego te siyu naga ebo dao.  
\q1 Dagego te tibo sę ebo kolesaga elama,  
\q2 te gasa bidi dabego be me,  
\q2 te augwa wąį nǫųde sali tǫ me, wi sabo dao.   
\q1
\v 3 Tialima, Genuai Bidigo te po obao,  
\q2 “Odiąo. Eno dage dolabo homu ebao,  
\q3 te wi pabo usu me egobeo.  
\q1 Te dage hagoma elama bilainu ebaso, usu me egobeo,  
\q2 magi baso meni, te dwai sogo mugo dage gegaibao.   
\q1
\v 4 Te dwai sę dabe pedalubo sogo da,  
\q2 te bidi dabego dage dolali po mimi pelama,  
\q2 te dageba posobo po waibao.  
\q1 Tama augwaligo te tibo homu dene eyu,  
\q2 te tiwai tibo gela wabo weyu, balia po waibao,  
\q2 ‘Da mu dolali dao.  
\q1 Genuai Bidigo dago tǫ salio.  
\q1 Agai te tǫ te da kalabus yali bidi dabeba  
\q3 dobayu, mawai dao.’  
\q1 Augwaligo te po waibao,” Genuai Bidigo te po obao.   
\q1
\v 5 Tialima, nosali augwaligo te tǫ  
\q2 te Genuai Bidigo we bidi dabeba ma mabo sogo,  
\q2 dagego hanigo te me badu pedai deli me sogobeo.   
\b  
\q1
\v 6 Te we bidi dabego enabolo wali,  
\q1 “Maika, nago te tobage olo po dabolo me magio,” wali.  
\q1 “Nago te tobage sę po me migio.  
\q1 Godigo da aiyaba elaluyu, te da hale me egobeo,” wali.   
\q1
\v 7 Dage Israel dabe, dage Jekopgo hani bage da,  
\q2 dagego te tobage po obao, agawe?  
\q1 Dagego homugo te Genuai Bidigo dage dali  
\q2 homu sębę eyu,  
\q2 agai dageba magi dwai sę deli me egobeo oba,  
\q2 agawe?  
\b  
\q1 Genuai Bidigo dage dali e po elalubao,  
\q1 “Eno te nagame yai po dua digi te  
\q2 doloba pai bidi dabeba waibao,  
\q3 eno augwali me dolobo menio.   
\q1
\v 8 Tiali goli, odiąo.  
\q1 Duga digi ilama, tama eno hani te ena dali boi bidi  
\q3 pedalubao.  
\q1 Te bidi dabe augwa boi hwįani te ugwa ela holai,  
\q2 te ma aselama,  
\q2 beba bugagia dugulaluagasobo homu yai.  
\q1 Tiali goli, dagego augwaligo kedau side  
\q3 gudubo ugwa wi sabo dao.   
\q1
\v 9 Dagego te eno hani dabego wilawe we dabe te augwa  
\q3 godolo homu ebo bede ela gudulai.  
\q1 Te dagego eno te augwaligo wai dabeba mani  
\q2 wiegi yai nogi te doloyu,  
\q3 te wai dabe dwai bidibo dao.   
\q1
\v 10 Dage hogodasa pao.  
\q1 Te toma nabo pesage menio,” wali.  
\q1 “Dagego te dwai kolesaga eyu,  
\q2 te eno gedude dage dwai mu pedalubaso,  
\q2 tialima eno te dage dwai ilama, mu dolaibao,” wai.   
\q1
\v 11 “Te profet me deli aselama,  
\q2 te tiwai tibo po wagasiyu,  
\q1 ‘Eno te profetgo wabo po tiwai weyu,  
\q2 te dagego wain hauwa elalu,  
\q2 te bomai wę me elalueibao,’ po obaso da,  
\q2 te we bidi dabego te tiwai profet godolo yaibao,”  
\q3 Genuai Bidigo te po wai.   
\s1 Godigo agai we bidi hani nosali ma saibao  
\q1
\v 12 Te Genuai Bidigo po ma weyu, te po wali,  
\q2 “Tialima, nosali eno te dage te sogo me bidibo  
\q2 tigidali Israel we bidi sisinani elalueibao.  
\q1 Te eno dage ma sisiniyu,  
\q2 te sipsip tonalubo bidigo te sipsip dabe  
\q2 te oboba ma sela asobo tiwai gilama yaibao,” wali.  
\q1 “Tama te we bidi hauwa dagego tǫde pągąnalueibao,  
\q2 te sipsip dabe te wiegi yai nosai tubo madi  
\q2 pągąnalubo tiwai yaibao,” wali.   
\q1
\v 13 “Godigo te aga we bidi kalabuside  
\q2 bidali tagala palama, te augwali buluba dinaibao.  
\q1 Augwaligo te taun obo aluama, te buluba teda soaibao,  
\q2 te augwa king da, te Genuai Bidi digi da,  
\q2 te augwali asobodu polasa paibao,”  
\q2 Genuai Bidigo te po wai dao.   
\c 3  
\s1 Maikago te Israel dabe tobolu bidi dabeba wado ilali  
\q1
\v 1 Te Jekop hani polalubo bidi dabe,  
\q2 dage Israel tobolu bidi dabe, odiąo.  
\q1 Dagego te doloba pai kolesaga  
\q3 godolo elama, yabo sę elalubao,   
\q1
\v 2 tiali goli dagego te dwai kolesaga godolo mu elama,  
\q2 te doloba pai kolesaga godolo homu me ebeo.  
\q1 Dagego te kolesaga dabego te dagego eno we bidi dabe  
\q3 bidibadi digi, te tigi wali dagala sabo tiwai ebao.  
\q1 Te dagego augwaligo tigi mi togobo tiwai elama,   
\q1
\v 3 tama dagego te tigidali tualio.  
\q1 Te dagego augwaligo tigi wali sela sąbo tiwai eyu,  
\q2 te augwaligo dili togobo tiwai elama,  
\q1 tama dagego te augwali mi te hwą gego todogolama,  
\q2 te sene sospende bubo tiwai yalio.   
\q1
\v 4 Nosali me sogo si te pedalubo side tama,  
\q3 dage te Genuai Bidiba gela waibao,  
\q2 tiali goli agai te dagego gela wabo me odogobeo.  
\q1 Agai te dagego gedu haluasa po wabo me  
\q2 odisąwaibao, magi baso meni,  
\q3 dagego te dwai kolesaga yalio.   
\b  
\q1
\v 5 Te tibo profet mebago te bidi dabego augwaligo  
\q3 mone momainu, te dąų wabo po waibao,  
\q2 te augwa wiegi yai sogo elalubaso tibo dao,  
\q2 tiali goli te augwaligo te augwali tibo po ola mawai.  
\q1 Tialima, te augwaligo augwali mone masiąbaso da,  
\q2 teda te profet dabego augwali wi iliyu,  
\q2 te boi bidi dabego augwali dali  
\q3 hwįagasaibao po waibao.  
\q1 Tama tibaso, Genuai Bidigo te tiwai po  
\q2 te profet dabeba obao,   
\q2
\v 6 “Dagego eno we bidi dabe tibo po ola mobaso,  
\q2 tialima megi da, dagego te profetgo te nade sabo po  
\q3 tiwai munu me ma sogobeo,” wali,  
\q2 “tama te nosali pedelaibao wabo nai po  
\q3 te dagego me wagobeo.  
\q1 Te dagego bodolu sogo megi silainu ebao.  
\q1 Te giliga iba dega sigulama,  
\q2 te be hulia sabogo dage mesega sabo  
\q3 tiwai gilama ebao,” walio.   
\q1
\v 7 “Tama te mena sę dabe te nosali pedelaibao po pusali  
\q3 profet dabe, te augwali hale elama,  
\q2 te augwali dwai haliga yaibao, magi baso meni,  
\q1 Godigo te augwaligo gedu haluasa po wabo me odisąma,  
\q2 te pedelao wali nai dabe pedalumainu  
\q3 me isąbaso, te tama tiai dao.”  
\q1 Genuai Bidigo te po obao.   
\b  
\q1
\v 8 Tiali goli, ena Maika da,  
\q2 te Genuai Bidigo Mobo Bidigo enabolo  
\q3 te bomo mobaso,  
\q2 tama eno homu kolesagade  
\q2 te doloba pai kolesaga yali.  
\q1 Te agai eno haliga dąų waliyu,  
\q2 te Israel dabe augwaliba te augwa sęgę  
\q3 tigidali pusa mabo po hanilibo dao.   
\q1
\v 9 Dage Israel tobolu bidi dabego odiąo.  
\q1 Dagego te doloba pai kolesaga godolo homu meni isąwai.  
\q1 Dagego te wiegi yai kolesaga  
\q2 te dwai kolesaga pedalumainu ilibo dao.   
\q1
\v 10 Dagego te we bidi dabe elibo kolesaga,  
\q2 me te tobage dolo isąwai kolesaga dabe yali,  
\q2 tama te kolesagade dagego homugo  
\q2 te Jerusalem we bidi dabe, te Godigo taunde,  
\q2 te bomai hani pedalubao homu ebo dao.   
\q1
\v 11 Te taun bidi dabego  
\q2 te tobolu bidi dabe homu bega sabo sę eyu,  
\q2 te augwaliba mone mayu,  
\q2 te augwa haniani dwai kolesaga emainu ebo dao.  
\q1 Te pris dabego te mone naga sainogo  
\q2 te Godigo bomai po page pusubo dao.  
\q1 Tialima, te profet dabego te mone sabo homu eyu,  
\q2 te geme dualali po pusali.  
\q1 Tigidaligo te tiwai eyu, augwa te po wali,  
\q1 “Genuai Bidi te da dali bidibao,” walio.  
\q1 “Tialima, te magi nai me deligo da me  
\q3 dologobeo,” wabo dao.   
\b  
\q1
\v 12 Tialima, te tobolu bidi dabe me, pris me profet,  
\q2 te duga yali sęde naga  
\q2 te Godigo Jerusalem dolaibao wali.  
\q1 Te Jerusalem tigidali nai doado bage te dolama,  
\q2 tama te pobele bage hogomu pesage  
\q3 holobo tiwai yaibao wali.  
\q1 Tama Saion te olo tǫ pedelama,  
\q2 te bidi dabego tede te gi nai bulaibao wali.  
\q1 Tama te bulu dude te dasu nosai pedelaibao,  
\q2 te Godigo be elalubo madi tiaibao wai dao. \x * \xo 3:12 \xt Jer 26:18\x*   
\c 4  
\s1 Genuai Bidi te tigidali we bidigo king bidaibao wai  
\q1
\v 1 Te me sogo si deli te nosali pedalubo side te bulu du,  
\q2 te Genuai Bidigo be elaluali madi, te daide mu elalu,  
\q2 te gasa bulu du tigidali aiyaba elalueibao wai.  
\q1 Tama we bidi hani hauwa teba sisinagasaibao.   
\q1
\v 2 Tialima, augwa te po waibao,  
\q2 “Asiąo, da te Saion bulu duba holinao,  
\q3 te Genuai Bidigo bulu du dao.  
\q1 Da te Israelgo Godigo beba pelama,  
\q3 te agai dago emainu homu ebo kolesaga  
\q3 ola momainao,  
\q2 tialima te aga digi sa muani sunumidu da bilaibao.”  
\q1 Augwaligo te po waibao.  
\q1 Te magi eyu, augwaligo te tama po waibawe,  
\q2 Jerusalem da, te Genuai Bidigo agai bomai po  
\q3 te we bidi dabe ola mayu,  
\q2 te agai po augwaliba pusa mabo pesage dao.   
\q1
\v 3 Genuai Bidigo te tigidali kantri  
\q2 we bidi hanigo po tų ebo dodolama,  
\q2 te augwa deliba bugagia bidimainu yaibao.  
\q1 Te agai te digibulu elalubo bomai tǫ kantri me,  
\q2 te Israel pąde elalubo tǫ kantri dali,  
\q2 te po tų dodolobo po miaibao.  
\q2 Tama te augwa moni bainat hwą dabe siade ulama,  
\q2 hamago haluama, te gi tǫ elibo ain tama nigilaibao.  
\q1 Me te augwa kapago nigai sesemone ene hamago  
\q2 haluama,  
\q2 te wain bono gi sę yabo hwą ge tama nigaibao.  
\q1 Tama tigidali we bidi hani augwa hasi  
\q2 te munu me ma hwįsąma,  
\q2 te hwįainu usu siyu ma egobeo. \x * \xo 4:3 \xt Jol 3:10\x*   
\q1
\v 4 Tama tigidali bidi deli deli te augwa wain bono gi,  
\q3 me ni fik kaya gi pąde bugagia bidalu,  
\q2 te mena bidi me deligo augwali  
\q3 wi ilabo sę me iligobeo.  
\q1 Te Tigidali Bomo Elalubo Genuai Bidigo  
\q2 te po dąų waliyu, wai dao. \x * \xo 4:4 \xt Sek 3:10\x*   
\q1
\v 5 Te tigidali hani bulu bage deli deli  
\q2 augwa te tibo godiba lotu weyu,  
\q3 te augwali wali pabo dao.  
\q1 Awe, tiali goli, te da Israelgo te lotu Godiba waibao,  
\q2 te dago sesemane bidada peyu,  
\q3 bidada pabo Genuai Bidi da,  
\q2 te aga deli naga wali pabo dao.   
\s1 Te Israel dabe augwa page buluba ma asaibao  
\q1
\v 6 Genuai Bidigo te po wai,  
\q2 “Te eno augwali dwai dene menama,  
\q2 te gasa bulu tǫ kantriba  
\q2 te kalabus sę emainu tagala palali we bidi dabe,  
\q2 te nosali, te bodolu mani sogo pedalubo si,  
\q2 te augwali eno ma deliba sisinaibao,” te po wai.   
\q1
\v 7 “Te hani bidi te dwasianu naga dao,  
\q2 te augwali te augwa page bulu digibulu bidali,  
\q2 te bilabo usu meni yani,  
\q1 tiali goli te eno ma gagalama,  
\q2 te augwali bomai hani we bidi  
\q3 pedalumainu ilaibao,” wali.  
\q1 “Tialima, ena te augwa king te Saion bulu dude  
\q3 sesemane bidada peyu, bidada paibao,” wai dao.   
\q1
\v 8 Taun Jerusalem, God nagede bidiyu,  
\q2 te naga we bidi dabe tonalubao,  
\q2 te kibu sipsip page bidigo  
\q3 te sipsip dabe tonalubo tiwai ebao.  
\q1 Tialima, nosali nage te polalubo taun pedaliyu,  
\q2 te hasia polasa tǫ kantri elaluali tiwai  
\q2 ma pedelaibao.   
\q1
\v 9 Jerusalem, magi baso nage gela genuai obawe?  
\q1 Magi baso nage te wego wai ame nainu  
\q2 tudi eliyu, tigi dene ebo tiwai ebawe?  
\q1 Nago king meni da, agawe?  
\q1 Nago kolesaga page koneai bidi dabe  
\q2 isila pai da, agawe?   
\b  
\q1
\v 10 Tialima, dage Israel we bidi dabe,  
\q3 dage i hai weyu, gela weyu,  
\q2 tama te wego wai tega painu te tigi dene ebaso,  
\q2 subigila bebegeli bilibo tiwai yao.  
\q1 Magi baso meni, megi dage te taun tagalama,  
\q2 te kala elalubo pesagede bididuaibao.  
\q1 Te dage augwaligo te Babilonba sela paibao.  
\q1 Tiali goli, nosali Genuai Bidigo dage  
\q2 te boi bidi dabego nogode ma dobola saibao wali.   
\q1
\v 11 Megi da, te boi bidi hauwago  
\q2 te dage dali hwįainu sisinanio.  
\q1 Augwaligo posobo po te tiwai obao,  
\q1 “Tegobao, dago te Jerusalem mu dolama,  
\q2 tama suao, aga te tiwai naga me  
\q3 elalua pomainu yaibao,” obao.   
\q1
\v 12 Tiali goli, te hani bidi dabego  
\q2 te Genuai Bidigo homu kolesaga konesąwai.  
\q1 Te Genuai Bidigo augwali sisinama,  
\q2 te augwaliba dwai dene maiabo  
\q2 te augwaligo konesiąma wali,  
\q1 te bidigo te bo elalubo wit sisinama, te agaga pelama,  
\q2 te wit nai ge sainu ebo tiwai gilama yaibao.   
\b  
\q1
\v 13 Genuai Bidigo te po wali,  
\q1 “Dage Jerusalem we bidi dabe, dage pelama,  
\q2 te duga boi bidi dabeba dwai dene magi piąo.  
\q1 Te eno dage te bulmakau me deligo te gąų ain,  
\q2 me sągą bras te bomo elalubo tiwai  
\q3 pedalumainu ilaibao,” wali.  
\q1 “Tialima, dagego te we bidi hani hauwa agamainu yaibao.  
\q1 Te boi bidi dabego te hwįyu sali tigidali nai doado bage,  
\q2 te dagego selama, enaba mawaibao,  
\q2 te tigidali tǫde Genuai Bidi dao,” te po wai.   
\c 5  
\q1
\v 1 Dage Jerusalem dabe, hodaluao,  
\q2 te tigidali ami selama, sisinagasao.  
\q1 Te boi bidi dabego da bagua salio.  
\q1 Augwaligo te Israel tuni bidi nabogede te donogo eliyu,  
\q3 aga te genuai hale ebo ilaibao.   
\s1 Godigo te tobolu bidi me deli te Betlehemde pedalumainu yaibao  
\q1
\v 2 Genuai Bidigo te tiwai po wali,  
\q2 “Betlehem Efrata, te tigidali Juda taun tomode  
\q3 nage te dwasianu taun mu elalubao.  
\q1 Tiali goli, nagede te genuai tuni bidi me deli pedelama,  
\q2 tama agai te Israel hani tonaluabo bidi dao.  
\q1 Te polobadu mu aga hasia wąį monu nǫų  
\q2 me deli pedelali,  
\q2 tama aga hani bidi me bidibao,” te po wai.\x * \xo 5:2 \xt Mat 2:6; Jon 7:42\x*   
\b  
\q1
\v 3 Tialima, Genuai Bidigo aga we bidi dabe digi  
\q2 te boi bidi dabego nogode bidimainu ilama,  
\q2 te Godigo we me deli sa mubo sogoba usu niyu,  
\q2 te ogwa me deli ame naibao.  
\q1 Tialima, te sogo te bidigo abagi dabe augwali te gasa  
\q2 bulu tǫ kantride kalabus sę igi pali bidi dabe,  
\q2 te augwali ma aselama,  
\q2 te augwa hani dali deliba ma sisinagasaibao.   
\q1
\v 4 Te tobolu bidi pedalubo si da,  
\q2 te aga we bidi dabe aga tonalueibao,  
\q2 te God, aga Genuai Bidigo bomode  
\q3 me genuai nogide te tama tiaibao.  
\q1 Tama te we bidi dabe bugagia bidaibao, magi baso meni,  
\q2 te tigidali bulu tǫ kantri dabede bidalubo bidi hani  
\q3 dabego te agai bomo koneaibao.   
\q1
\v 5 Tama aga digi te nagame yai haliga ebo  
\q3 homu te tigidali we bidiba mayu,  
\q2 tama te boi bidi homu ebo kolesaga  
\q3 te munu ma me pedalugobeo.  
\s1 Godigo te aga we bidi dabe tau siyu, te boi bidi dabeba dwai dene mawaibao  
\q1 Te Asiria dabe dago tǫba asobo sogo,  
\q2 te dago taun bagulali masigi obo dabe aluama,  
\q2 dago te ami dabe tonaluabo bomai  
\q2 polalubo bidi dabe hauwa tagala palama,  
\q2 augwaligo te boi bidi dabe dali hwįmainu yaibao.   
\q1
\v 6 Te augwaligo Asiria dabe dali hwįbo bomo mu elama,  
\q2 te moni bobobage bainat hwągo  
\q3 te augwali aiyaba elaluama,  
\q2 te augwa bulu tǫ kantri nogi Nimrot te saibao. \f + \fr 5:6 \ft Polobadu mu te bidi me deli nogi Nimrot agai te hanu nogi Ninive gagalai dao, te Asiria kantrigo genuai polalubo hanu dao. Tama tialima, me sogo augwaligo te Asiria kantrigo si wabo nogi te Nimrot wabo dao. Te buku Gag, Dąį 10:8-12, tede elalubo po nedao.\f*  
\q1 Tama tebogo te Betlehemde pedelali genuai tuni bidigo  
\q2 da te Asiria bagego nogode ma dobola saibao.\x * \xo 5:6 \xt Gag 10:8-11\x*  
\q1 Te Asiria bage dago tǫ dąį bolama,  
\q2 hwįagasobo sogo, agai tama tiaibao.   
\q1
\v 7 Tama te Israel hani meba te boi bidi dabego me  
\q2 dolisąwai bage,  
\q2 augwali te gasa hani hauwa tau sabo  
\q3 bidi pedelaibao,  
\q2 te Genuai Bidigo te hulide tulubage segeni wę te  
\q2 nosaiba tulumainu tagala palobo tiwai eyu,  
\q2 te olo tulubagego te ni dabe  
\q3 wiegi yai pedalumainu ebo tiwai yaibao.  
\q1 Tama augwaligo te sę te Genuai Bidigo  
\q3 bomode naga yaibao,  
\q2 te augwaduba bomogo digi te tegobeo.   
\q1
\v 8 Te Israel hani te gasa hani tomode bidiyu,  
\q2 te laiongo buside te hasa sibi  
\q3 ela tueinu gegebo sę tiwai eyu,  
\q2 ma te sipsip obode ela tueinu ebo tiwai yaibao.  
\q1 Aga te sipsip dabe tomoba pelama,  
\q2 te augwali daiba samonama,  
\q2 te augwali gąųgo subigila tologa sąsąbo tiwai eyu,  
\q2 tama te sipsip dabe tau sabo bidi  
\q3 me deli meni ebo ąǫ yaibao.   
\q1
\v 9 Te tiwai naga dage Israel dabego  
\q2 te dagego boi bidi tigidali aiyaba elaluama,  
\q2 te augwali mu silaibao.  
\q1 Tama augwali posoyu,  
\q2 dagego duga wele si ugwaba saibao.   
\b  
\q1
\v 10 Genuai Bidigo te Israel dabeba te po wali,  
\q2 “Te sogo eno te hwįbo doado bage dolaibao,” wali.  
\q1 “Te boi hwįabo hos dabe eno sela sąnama,  
\q2 te karis dabe dolaibao,” wai dao.   
\q1
\v 11 “Te eno dagego taun dabe dali,  
\q2 te taun bagulali masigi obo dabe tigidali dolama,  
\q2 tama dage tede geme duala sainu ebo  
\q3 usu me egobeo,” wai dao.   
\q1
\v 12 “Te eno dagego tibo pobi wabo nai me,  
\q3 sisi tomage tigidali sela sąyu,  
\q2 tama eno dagego te sogo nigibo bidi,  
\q2 te dabe te munu ma me elalumainu,  
\q2 me egobeo,” wali.   
\q1
\v 13 “Te eno te tigidali kapago nigai tibo god,  
\q2 me te lotu wabo masigi pos tigidali sela sąwaibao.  
\q1 Tama te duga digi nigali nai dabeba  
\q2 munu ma lotu omainu me egobeo,” wali.   
\q1
\v 14 “Te eno te god we Aserago noma elalubo pos dabe  
\q2 guda sąnama,  
\q2 te duga bidali pesagede sela sąnama,  
\q2 te dagego taun dabe eno dolaibao,” wai dao.   
\q1
\v 15 “Te eno haliga sębę mu elama,  
\q2 tama te eno po sela sąbo haniani we bidi hanigo  
\q2 te hagoma ebo kolesaga eno wei ponaibao,” po wai dao.   
\c 6  
\s1 Genuai Bidigo Israel po tų ilali po  
\q1
\v 1 Genuai Bidigo te Israel po tų ilibo dagego odiąo.  
\q1 Genuai Bidi, nage aselama, augwali po tų yagasao,  
\q2 tama te bulu du dabe te po tų ebo odobo jas bidiyu,  
\q2 tama augwaligo te nago po dagalaibao.   
\q1
\v 2 Dage te bulu du dabe, dage te tǫ page dąų waliyu,  
\q2 te tǫ sesemane bidada pidu, bidada pabo nai dabe,  
\q2 dagego te Genuai Bidigo po tų ebo odiąo.  
\q1 Magi baso meni.  
\q1 Genuai Bidigo aga we bidide po olama, waibao.  
\q1 Agai po te Israel dabeba kisilama waibao.   
\q1
\v 3 Tialima, Genuai Bidigo te tiwai po obao,  
\q2 “Eno we bidi dabeo,  
\q3 eno mena dwai sę dageba yaliwe?  
\q1 Eno mena sę elama, dageba sęgę maniwe?  
\q1 Ae, tegoba, dagego enaba po wei ponao,” te po obao.   
\q1
\v 4 “Eno tama te eno dage kalabus togolama,  
\q3 te dage Isipde selama, te dage odasa asali.  
\q1 Tama eno te Moses nigilali, me Aron, me Miriam me,  
\q2 te tama bage polasa peyu,  
\q3 te dage sunumi ola mawai dao.\x * \xo 6:4 \xt Sai 4:10-16; 12:50-51; 15:20\x*   
\q1
\v 5 Eno we bidi dabeo,  
\q2 te dwai sę te polobadu Balak te Moap  
\q3 kingo te dageba dwai sę yainu yali,  
\q2 te homugo koneao,” wali.  
\q1 “Te Balam, te Beorgo ogwago wali po,  
\q2 te Balakbolo wei ponani po, te homu kone ma palao.  
\q1 Tama eno yali genuai sę tigidali me te homu koneao,  
\q2 te bulu Sitim dagego tagalama,  
\q3 te bulu Gilgalba sobadi, te sę yali.  
\q1 Dagego te eno sę yali dabe koneao,  
\q2 tialima, te eno dage tau siyu yali sę dabe,  
\q2 te dagego ma koneao,” God Genuai Bidigo te po  
\q2 megi obao. \x * \xo 6:5 \xt Nam 22:2–24:25; Jos 3:1–4:19\x*   
\s1 Genuai Bidigo te kolesaga dabe te bidi dabego emainu homu ebao  
\q1
\v 6 Te ena te dagalude Genuai Bidi Godiba  
\q2 lotu wainu asobo sogo da,  
\q2 teda eno mena nai sesaibawe?  
\q1 Eno aga gesbidide kidu sugunama,  
\q2 eno magi maiabo nai elaluaibawe?  
\q1 Te eno wiegi yai bulmakau wai mu selama,  
\q2 te siaba ulugi pabo ofa yaibawe?  
\q1 Ma, eno te kibu be me deli elalubo  
\q2 dwagi yai kau kibu wai dabe sesiyu,  
\q1 tama siago dela silibo ofa mobaso da,  
\q2 teda te usugowe, ma meniwe?   
\q1
\v 7 Eno te hauwa umabo tausen tausen  
\q3 sipsip omai sela asiyu,  
\q2 ma te eno wel botol hauwa umabo  
\q3 mu tausen sela asobaso da,  
\q2 teda Genuai Bidigo wiegi yai homu  
\q3 pemene egowe, ma meniwe?  
\q1 Ma, te ena gomunai ogwa elama,  
\q2 te Godigo eno dwai sęgę sela sąmainu  
\q3 ofa ebaso, te usu egowe? Menio!  
\q1 Eno homugo yali sę dabe sela sąwainogo eyu,  
\q2 eno te ena tigigo sali wai te ofa mawaibawe?  
\q2 Menio!   
\q1
\v 8 Genuai Bidigo dabolo te wiegi yai  
\q3 kolesaga yabo po walio.  
\q1 Tama agai homugo dago te tiwai kolesaga  
\q2 naga emainu yai.  
\q1 Dago te doloba pai kolesaga wali pao,  
\q2 te gasa bidi dabe homu dene eyu, tau sao,  
\q2 te dena homu kolesaga digi tegaluama,  
\q2 te dena God dali deli haliga elama bidiyu,  
\q2 tama aga wali pabo usu dao.   
\p
\v 9 Te dago Genuai Bidiba wi homu ebo,  
\q2 te wiegi yai homu kolesaga dao.  
\b  
\q1 Genuai Bidigo te Jerusalemba i weyu, te tama po wai,  
\q1 “Dage te taunde bidibo we bidi dabe, dagego odiąo,  
\q2 te dage dene mabo bomo elalubo bidigo  
\q2 wabo po sao,” wai dao.   
\q1
\v 10 “Te dwai sęgę sai bidigo bede  
\q2 te wiegi yai sawi yai nai hauwa elaluali,  
\q2 augwa te tibo sę ebo kolesagade augwaligo salio.  
\q1 Augwaligo maketde te nai dabe dolo si me dagalisąbaso,  
\q2 eno te dwai kolesaga hagela homu mu ebao,” wali.   
\q1
\v 11 “Eno te tibo sę eyu, te skel dagalubo sę ebo bidi  
\q2 dabego dwai sęgę me sela sągobeo,” wali.   
\q1
\v 12 “Te Jerusalemde bidibo mone hauwa elalubo  
\q2 bidi dabego te magi nai meni yai bidi dabego  
\q3 doado bage anoma elama, sali.  
\q1 Te dage tigidali te tibo po wabo bidi naga dao,” wali.   
\q1
\v 13 “Tama tialima, megi da, eno dagego te dwai sę ebo  
\q2 sęgęde homu kone palama,  
\q2 tama eno dage dolobo sę gagalama  
\q3 yaibao,” po wai dao.   
\q1
\v 14 “Te dage nai tuyu da yaibao,  
\q2 tiali goli, dage nai sili bidaibao,  
\q2 dagego tabi habuge yaibao.  
\q1 Tigidali nai dagego selama, te beba sisinani,  
\q2 te bugagia me munalugobeo.  
\q1 Te nai me deli bugagia elalubaso da,  
\q2 teda eno te boi bidi dabego hwįagasomainu elama,  
\q2 te augwali dolaibao.   
\q1
\v 15 Tama tibaso, te gi sę dagego yaibao,  
\q2 tiali goli, tede nai dagego me sogobeo.  
\q1 Te oliv wel sabo sę dagego yaibao,  
\q2 tiali goli dagego tigide me piligobeo.  
\q1 Te wain dagego nigaibao,  
\q2 tiali goli te wain wę dagego me tugobeo.   
\q1
\v 16 Dagego te king Omrigo dwai kolesaga wali pali,  
\q2 me aga ogwa king Ahapgo kolesaga me wali pai.  
\q1 Dagego augwali sigo polobadu  
\q2 te yali tobage kolesaga tiwai yali,  
\q2 tialima te eno dage dolaibao, te gasa bidi hani  
\q2 bagego dage tudiba muaibao.  
\q1 Te tigidali bulu pedaide bidibo hani bidigo  
\q2 te dageba gesabidi tuluga selama,  
\q2 tama dwai posobo po waibao,” wai dao.\x * \xo 6:16 \xt 1 Kin 16:23-34; 21:25-26\x*   
\c 7  
\s1 Israelgo dwai kolesaga yali po  
\q1
\v 1 Hobede ya, ena dwai mu bidibao.  
\q1 Ena te nasi ebo bidi tiwai elama,  
\q2 te tuabo wiegi yai nedu du me deli gegebeo.  
\q1 Te tigidali wain ni du me, ni kaya fik du me,  
\q3 augwa te tigidali sela silalio.   
\q1
\v 2 Te po digi wabo po page e dao.  
\q2 Te dago bulu tǫ kantride te doloba pai bidi  
\q3 me deli me bidibeo,  
\q2 te bidi me deligo te God wali me pabo meni.  
\q2 Mu menio.  
\q1 Tigidali bidigo te gasa bidi ela muabo  
\q3 sunumi naga gegebo dao.  
\q1 Te tigidaligo augwa abagi dabeba boi bidi ebo sę  
\q2 ebo dao.   
\q1
\v 3 Augwaligo te dwai sę ebo kolesaga mu koneani.  
\q1 Te ofisa dabego me jas dabego te bidi dabeba i weyu,  
\q2 te augwaliba te mone menama,  
\q3 te po tų dolainu ebo dao.  
\q1 Augwaligo deli homu ebo dao.  
\q1 Te genuai nogi elalubo bidi dabego te jas dabeba  
\q2 te homu wei godolo ebo po obaso,  
\q2 te po tų doloyu, te jas dabego te bidi dabego  
\q2 wabo po wali peyu ebo dao.   
\q1
\v 4 Te gasa bidi dabe mebago homugo te augwali  
\q2 wiegi yai doloba pai kolesaga ebo bidi da,  
\q2 te homu yali, Godigo suali,  
\q3 augwali te dwai bidi dabe da wali.  
\q1 Augwali te dwai nosai tiwai,  
\q3 te sesani elalubo bono tiwai yali.  
\q1 Te bodolu si pedalubo sogo,  
\q2 te Godigo aga we bidi dabeba  
\q2 te dwai dene ilaibao homu yali,  
\q2 te agai te profet dabego pedauwalide  
\q3 dąų wali po tiwai gilama yaibao.  
\q1 Godigo tama tibao,  
\q2 te augwa homu kolesaga kone tųą palama,  
\q2 te augwali umuna paibao.   
\q1
\v 5-6 Awe, te sogo te ogwa dabego  
\q2 te augwa aya dabeba posobo po dwai weyu,  
\q2 te wegi dabego augwa ida dabego  
\q3 po sela sąyu yaibao.  
\q1 Te bidigo sali we dabego te augwa  
\q2 auwa dabe dali konila po weyu yaibao.  
\q1 Te bidi aga we wai dali te boi bidi pedelaibao.  
\q1 Tibaso, nago te naga abagigo wabo po me,  
\q2 hai namugo po me, te osola suao, dua dao.  
\q1 Tama nago te naga we dali wabo po tigidali me,  
\q2 te bugagia tonalu te yao. \x * \xo 7:5-6 \xt Mat 10:35-36; Luk 12:53\x*   
\q1
\v 7 Tialima, ena da, ena digi dwagi yai homu eyu,  
\q2 eno konealubo homu Genuai Bidiba dąų walio.  
\q1 Te Godigo eno gedu haluasa po wabo odama,  
\q2 tama eno te eno God agai ena  
\q3 tau sagasobo tonalubo dao.   
\s1 Genuai Bidigo aga we bidi dabe ma saibao  
\q1
\v 8 Te dago boi bidi dabego te dabolo posobo po  
\q2 omainu me ilamuo.  
\q1 Mu tama, da tulaluali, tiali goli, te da ma hodaluaibao.  
\q1 Da be hulia side megi bidibao,  
\q2 tiali goli te Genuai Bidigo ula dabolo mawaibao.   
\q1
\v 9 Dago dwai sęgę sabo sę te Genuai Bidigo gedude yali,  
\q2 tialima te dwasianu sogo naga tama  
\q2 te Genuai Bidigo haliga sębę elama,  
\q3 te dabolo dene mabo sę yaibao.  
\q1 Tiali goli, agai da tau saibao, tama te gasa bidi dabego  
\q3 da dali yali dwai sę agai dodolaibao.  
\q1 Te hulia side agai da selama, te da ulaba odasa asaibao.  
\q1 Te da bidibadi digi, te agai da boi bidi dabego nogode  
\q3 ma saibao,  
\q2 tama dago agai ebo doloba pai kolesaga sueibao.   
\q1
\v 10 Polobadu te boi bidi dabego  
\q2 dabolo te tiwai posobo po wali,  
\q2 “God, duga Genuai Bidi, menade bidibawe?” wali.  
\q1 Tiali goli, nosali te Genuai Bidigo da tau sabo  
\q2 augwa sulama, te augwali hale dwai mu saibao.  
\q1 Te Genuai Bidigo augwali aiyaba elaluama,  
\q2 te augwaligo te tǫ pu aiyana pai,  
\q2 te bidi dabego sągągo agabo tiwai ebo sueibao.   
\b  
\q1
\v 11 Dage te Jerusalem we bidi dabe,  
\q2 te sogo bodolu si pedalubo si da,  
\q2 te dagego te taun bagulubo masigi obo sę  
\q2 ma yabo bodolu si pedelaibao.  
\q1 Tama te sogo augwaligo te taun sesege badu  
\q2 te ibaba tegasa peyu, te genuai igi paibao.   
\q1
\v 12 Tama nago we bidi te gasa tǫ kantride kalabus  
\q2 igi pali, te augwali ma asaibao.  
\q1 Augwali te wę Yufretis pedai badu te tǫ kantri Asiria,  
\q2 te giliga pedalubo badu asaibao.  
\q1 Te augwali Isip te saut badu asaibao.  
\q1 Tama augwali te tigidali habude  
\q2 te digibulu bidali te asiyu,  
\q2 te tǫ kantri te nambis badu elaluai,  
\q2 te genuai tamu ąį, me te bulu du pesage dabede  
\q3 bidali tagalama, asaibao.   
\q1
\v 13 Tiali goli,  
\q2 te tǫ kantri dabe te olo masigi kemi tǫ  
\q3 pesage pedelaibao,  
\q2 magi baso meni, tede bidali we bidi dabego  
\q3 te dwai kolesaga hauwa yalio.   
\s1 Genuai Bidi, nago te Israel hobede yao  
\q1
\v 14 Genuai Bidi, naga digi te naga dąų olama,  
\q2 sa muani we bidi dabe te naga tonalubo bidi bidao.  
\q1 Augwali te moni genuai dulu te wiegi yai tǫ elalubo  
\q2 bulu du dabe bagede bidibao,  
\q2 tama te gi bulabo wiegi yai tǫ me aiyadu elalubao.  
\q1 Tialima, nago augwaliba te wiegi yai tǫ elalubo madiba  
\q2 te gi bulugi pomainu yao,  
\q2 te Basan me Gileatde, te polobadu yali tiwai yao.   
\b  
\q1
\v 15 Genuai Bidigo te po wei ponoyu, te po wai,  
\q2 “Te eno dage tau siyu, te bomai sę meba yaibao,  
\q2 te dagego sueibao, te eno dage Isipde selama,  
\q2 odasa asiyu yali sę tiwai yaibao,” po wai.   
\q1
\v 16 “Te gasa hani bage augwaligo te bomo elalubao,  
\q2 tialima te augwaligo eno bomo sulama,  
\q3 te augwali dwai noma saibao.  
\q1 Te augwali wi elama,  
\q2 te augwa nogogo pedauwali pania siyu,  
\q3 me olo si pania saibao,” wali.   
\q1
\v 17 “Te augwali eno gedude tǫba degasa dulama,  
\q2 te tabi bulu gigi paibao,  
\q2 te hasamani haliga bulu pabo tiwai yaibao.  
\q1 Te augwali wi elama, noma siyu,  
\q2 te augwali geme duala sali pesage tagalama,  
\q2 te pepeli deliba teda aselama,  
\q2 te dagego Genuai Bidi God enaba asaibao,” wali.   
\b  
\q1
\v 18 Genuai Bidi, te god me deli nage tiwai me menio.  
\q1 Nago te naga we bidi dabe, te augwali kalabus igi peyu,  
\q3 meba ma asali bage, te augwaligo sęgę nago  
\q3 sela sądubadi gebao.  
\q1 Nago wado po wabo homu sębę  
\q3 te sesemane me elaludubeo.  
\q1 Menio. Sesemane sogo nago wiegi yai pemene eyu,  
\q3 te da godolo mu eyu, tau sabo dao.   
\q1
\v 19 Te nago olo mu tau sabo wiegi yai kolesaga dabolo  
\q2 ma yaibao.  
\q1 Te nago dago sęgę aiyaba elalu,  
\q2 te magi nai me deli nago sągągo agabo tiwai ebao,  
\q2 tama te sęgę nago te tamu ąį ge  
\q3 aiyanu mu dulaliba te sąwaibao.   
\q1
\v 20 Te nago naga po tigidali wali pelama,  
\q2 te nago da Israel dabeba te olo mu  
\q3 tau sabo wiegi yai kolesaga yaibao,  
\q2 te Abrahamgo wąį nǫų hani,  
\q2 te nago we bidi dabe dao.  
\q1 Te nago polobadu dago wąį nǫų dabebolo  
\q2 te dąų walali po tigidali te mu usu nubo dao.