\id LEV - Dadibi NT [mps] -Papua New Guinea 2001 (DBL 2014) 
\h Pris Sę Ebo Bomai Po 
\toc1 Pris Sę Ebo Bomai Po 
\toc2 Pris Sę Ebo Bomai Po 
\toc3 Lev 
\mt1 Pris Sę Ebo Bomai Po  
\imt1 Polasa wabo tau sabo po  
\ip Te bukude te Livai dabe sę ebo po wali, te hani bidigo digi te pris sę emainogo dąį ilama, te Israel hani dabe lotu wabo tonalumainogo yalio. Te bukude te haniani bomai po elalubao, te pris hani dabego te Israel dabe lotu wabo pedai badu bidibo page bugagia tonalubo kolesaga yabo po wali. Tialima, te po hauwa me elalubao, te we bidi dabe bidibo page dodoliyu, te augwali lotu wabo tau siyu, te genuai side lotu wabo bodolu muani bugagia wali pomainogo yai dao.  
\ip Te bomai po page dabe e tama dao. God te tedali gasa wiegi yai mu dao. Agai te wiegi yai doloba pai kolesaga naga yaibao, tama tibaso agai te Israel hani dodolobo sę eyu, te augwa bidibo page bugagia tonaluyu, te aga pąde bidimainogo yai. Te bukude te polasa mu wabo po te dao. Godigo digi te wiegi yai doloba pai kolesaga elalubaso, te da aga dali deliba sisinama, te agai homu godolo yabo kolesaga yagameo.  
\ip Te Israel hani gesi ogwa bidi dabego te Godigo po nedama koneainogo ebo sogo, te pris sę ebo buku te Dąį 16 tede gagalama, te Dąį 27 teba nedali. Te dąį saptade te we bidi dabe te doloba pai kolesaga dabe naga wali pomainogo dodolobo po hauwa elalubao. Nosali Jisasgo me te po me deli pedai badu ma pusali. Te bomo yai po elalubo Dąį 19:18, tede elalubao, “Nago te abagi dabe godolo mu yao, te naga digi naga godolo ebo tiwai yao.” Te po te we bidi dabe hauwa augwaligo koneai dao.  
\c 1  
\ms1 Te ofa ebo bomo yai po dabe  
\mr (Dąį 1–7)  
\p
\v 1 Genuai Bidi aga Ugwa Be tomode bididu, te Moses asao olama i walima, te agabolo te po wai,  
\v 2 “Te Israel we bidiba e tiwai po wao,” wali, “‘Te dage bidi me deligo te Genuai Bidiba ofa me deli selasa asainogo ebaso da, teda agai te kibu bulmakau me deli, ma kibu sipsip me deli, ma meme kibu me deli, te sela asobo usu dao,’ tama po wao,” wali.   
\s1 Te isiba tigidali ulama dabo ofa dabe yabo po  
\p
\v 3 Tama Genuai Bidigo Mosesbolo ma walama, te Israel dabebolo e tiwai po walao po wali, “‘Te bidi me deligo te isiba tigidali ulama dabo ofa ebo bulmakau sesebaso da, teda agai te bulmakau omai wiegi yai mu sao, te aga tigide keni keni pobolo meni yai sesao. Te bidigo homugo te Genuai Bidigo agaba bugai haliga emaina homu eyu da, teda agai te tiwai ofa tama yao. Agai te Godigo Ugwa Be sunumi badu te bulmakau selasa aselama,  
\v 4 tama te bulmakau toboluba nogo muao, teda te bulmakau te bidi hasegelama tama te bidigo sęgę dabe sela sąyu, Godigo te ofade bugai haliga yaibao.  
\v 5 Tama te Genuai Bidigo gedude, te bidigo te bulmakau elao, tama te pris dabe, te Arongo hani dabego, te bulmakau kaneme Genuai Bidiba ofa yao. Augwali te Ugwa Be sunumi pąbadu elalubo alta badu pelama, te kaneme te alta sabi dage me si me si te badu sąyao,’” wali.  
\v 6 “‘Tama nosali te bidigo te bulmakau tigi wali dagalama, te aga mi dabe tologao.  
\v 7-9 Te kau aga haliga me sągą ąį bugagia tela yao. Te pris dabego te altaba isi dabe munama, te isi udulao. Te augwaligo te kau tobolu me, ili me tigidali mi dage te isiba muao, te isigo tigidali dela silimainogo ilama, te keli hogomu naga elalueibao. Tama Genuai Bidigo te ofa denami ebo odama, te aga godolo homu elama bugai haliga yaibao.’”   
\p
\v 10 “‘Bidi me deligo te ofa yabo sipsip ma meme sesebaso, agai te omai sipsip ma omai meme wiegi yai mu sesemainao, te keni kenigo aga tigi dolisąwai sela pao.  
\v 11 Tama te Genuai Bidigo gedude agai te sipsip ma meme te not badu altade elao. Tama te pris dabego te sipsip ma meme kaneme selama, te alta dage me si me si pedai badu sąyao,’” po wai dao.  
\v 12-13 “‘Tialima te bidigo te kibu mi togolama, te kibu haliga me sągą bugagia ąį tedelama, te pris me deligo te tobolu me ili me te kibu pedai tigidali te alta siaba muao. Te prisgo Genuai Bidiba te ofa menama, te isigo tigidali dela silimainogo elama, te keli hogomu naga elalumainogo yao. Tama Genuai Bidigo te ofa ulubo denami ebo odama, te agai homu godolo elama, teba bugai haliga eyu yaibao.’”   
\p
\v 14 “‘Te bidi me deligo te Genuai Bidiba ofa yabo ba me deli sesainogo eyu da, teda te tobage ba me deli sela asao, te ba nogi balus, ma ba hi te tobage ba prisba sela asao,’” wai dao.  
\v 15 “‘Tama prisgo te ba hi altaba sela pelama, te aga ba dogoni pobegelama isaibao. Te agai te ba hi tobolu togolama, te tobolu te alta saiba ulao. Te ba hi kaneme te alta bogo badu gegeli pao.  
\v 16 Agai te ba hi nisi poabadi, te ba dogoni nai mubo tibu me te selama, te giliga pedalu badu alta te keli mubo badu muao.  
\v 17 Nosali prisgo te ba hi bogode tola selama, te aga tigi togwao, tialima te bogo mu togwa sągio. Agai te isigo tigidali domainogo yao, te keli naga elalumainogo ilao. Agai te tiwai ebaso da, teda Genuai Bidigo te ba ofa yali denami ebo odama, te aga homu godolo elama, te bugai haliga eyu yaibao,’” wali.   
\c 2  
\s1 Te wit ulubo ofa dabe yabo po  
\p
\v 1 Tama Godigo Mosesbolo walama, te Israel dabebolo e tiwai po walao po wali, “Te bidi me deligo te Genuai Bidiba te wit ofa yabo homu ebaso da, teda agai te wit wale bo sela sąnama, te aga nai ge naga selama, te wiegi yai plaua mu nigilama, te plaua sela asao. Tama agai te ni oliv wel te plauaba gelama, tama te wiegi yai denami ebo pauda me te plaua ugwadu daiba munama,  
\v 2 te Arongo hani dabe, te pris dabeba sela pao. Te pris me deligo nogo te plauaba munama, te plaua dali wel dali si te dwasianu pedai siyu, tama te denami pedalubo pauda tigidali me selama, te altaba ulao. Te dwasianu plauago tigidali plaua te bidigo Genuai Bidiba dąį ilibo ofa mu ebo ofa tiwai dao. Te wit ulubo ofa denami Genuai Bidigo odama, te agai godolo homu elama, bugai haliga yaibao.  
\v 3 Te me badu elaluali plaua te pris dabego dao. Te plaua te pris dabego witde sali te bidi dabego Genuai Bidiba ofa yali nai, tama te pris sę isąwai bidigo sabo te habu mu yai dao,” wali.   
\p
\v 4 “Dagego te nai ulubo be nogi aven tede te bret ulama, te Genuai Bidiba ofa yabo bret dage saiba wida, teda te bret dagego te yis dali nigilamuo. Dagego te plaua selama, te oliv ni wel dali taluama nigao, te dagego bret nigilama ofa yao. Te dagego bret nigibo hagela homu ebaso da, teda dagego te bisket naga nigilama, te ni oliv welgo piligilao.  
\v 5 Dagego te ofa yabo plaua praipende praim eyu da, dagego te yis meni yai wiegi yai plaua mu siyąo. Te dagego te ni oliv wel te plaua dali talu bolo elama, te praim yao.  
\v 6 Te dagego te plaua dwasianu dwasianu miminama teba wel gelama, te Genuai Bidiba ofa yao,” te po wai.  
\v 7 “Te dagego ofa yabo bret nigilama, te genuai sospen senede dagego ulainogo da, teda dagego wiegi yai plaua mu te yis meni yai selama, te ni oliv wel dali belegelama ulao,” wali.  
\v 8 “Ulama, silama da, teda dagego te bret ma plaua te ofa tiwai Genuai Bidiba selasa pelama, te pris me deliba mao. Tama prisgo te altaba sela paibao,” wai.  
\v 9 “Nosali prisgo te dwasianu pedai bret ma plaua te dagego Genuai Bidiba ofa yali nai tigidali dąį ebo ofa mao, agai te alta siaba ulaibao. Tialima Genuai Bidigo te ofa denami ebo odama, te agai godolo eyu, bugai haliga mu yaibao,” wai dao.  
\v 10 “Te bret ma plaua me, badu elaluali da, te pris dabe augwa nai dao. Te bret ma plaua te pris dabe augwa tueinu saibao, te Genuai Bidiba ofa yali nai. Tialima, te pris sę isąwai olo bidi dabede te habu mu selai dao.”   
\p
\v 11 “Dagego ofa ebo bret ma plauaba te yis munama, te Genuai Bidiba me selasa pigio, magi baso meni, te yis ma hani te ofa dabeba musįama, te Genuai Bidiba ofa mayu, te siaba ulubo ofa, te habu mu selai dao,” wai.   
\p
\v 12 “Dagego te yis ma hani te hasia polasa gide sabo wit dali munama, te Genuai Bidiba ofa igi peyu selasa pao. Te usu dao,” wali. “Tiali goli te yis ma hani elalubo nai yai baso da, teda dagego te Genuai Bidiba wiegi yai denami iliyu, isiba domainogo ulubo altaba me ulamo dao.  
\v 13 Te dagego wit ulubo ofa ebo side tigidali sogo tamu muao, magi baso meni, tamugo dagego te God dali dąų walali bomai po dąį ebo tiwai ebao. Te dagego te duga God dali dąų wali bomai po gegeda pidali weyu, te tigidali ofade dagego tamu naga mudao. Dagego te ofa me delide tamu mubo me gegeda paligio. Mu menio,” wali.   
\p
\v 14 “Te dagego gide polasa ina yani wit selama, te Genuai Bidiba ofa yainogo da, teda dagego te nai ulubo madi avende bolo ulama, te mimia sanama, te dwasianu kakali ilama, nosali te Genuai Bidiba selasa pabo usu dao.  
\v 15 Te wit ulubo ofade dagego te oliv wel me te wiegi yai denami ebo pauda me muao,” te po wali.  
\v 16 “Tama prisgo te wit pedai dwasianu me wel me selama, te wiegi yai denami pedalubo pauda te tigidali selama, te dagego ofa dąį ilama te ulao. Te Genuai Bidibolo mabo ofa eyu isiba ulubo nai dao.”   
\c 3  
\s1 God dali deli haliga ebo ofa yabo po  
\p
\v 1 Te Godigo Mosesbolo walama, te Israel dabebolo te tiwai po wao po wai, “Te bidi me deligo Genuai Bidi dali deli haliga ebo ofa yainogo, te agai kibu bulmakau ofa yainogo ebaso da, teda agai te kau kibu omai ma so kau kibu te wiegi yai mu aga tigide dwai keni kenigo dolisąwai selama, ofa ebaso, usu dao.  
\v 2 Te Godigo te Israel dabe dali deliba sisinibo Ugwa Be sunumiba asama, tama te bidigo nogo te kibu kau toboluba muyu bolo elama, te nosali agai te ela muao. Te pris dabe, augwali te Arongo hani dabe, augwaligo te alta bogo me si me si badu te kau kibu kaneme sąsągą bilao.  
\v 3 Te bidigo te kau kibu delage me badu selama te Genuai Bidiba mayu te pris dabego ofa tiwai ulumainao. Agai te haligade ili dabe sao,  
\v 4 tama te si wabo kibu homu dali te ili me te polalubo dini homu te wiegi yai me badu sao. Agai te namba wan homu me te namba tu homu si dali te sobadi yao.  
\v 5 Tama pris dabego te nai dabe te altaba siaba tigidali ulama dela silibo ofa dali ulao. Tama Genuai Bidigo te ofa ebo denami odama te aga godolo elama bugai haliga tede yaibao,” wali.   
\p
\v 6 “Te bidi me deligo te sipsip kibu ma meme kibu selama, te Genuai Bidi dali deli haliga ebo ofa yabo homu ebaso da, teda agai te omai kibu sipsip ma so kibu sipsip, ma te meme kibu omai ma so kibu meme somainao. Tiali goli, agai te kibu sipsip ma kibu meme te wiegi yai mu te keni kenigo tigi me dolisąwai sobaso da, te usu dao.  
\v 7 Te bidigo te sipsip kibu wai me deli ofa yai hagede eyu da, teda agai Genuai Bidigo gedude selasa asao.  
\v 8 Tama agai nogo te sipsip kibu toboluba muyu bolo elama, tama nosali agai sipsip kibu te Godigo Ugwa Be gesabidi badu pąde ela mubaso usu dao. Tama pris dabego te kibu kaneme te alta bogo me si me si badu sąsągą bilao,” po wai dao.  
\v 9 “Silama da, teda te bidigo te kibu sipsip delage me badu selama, te Genuai Bidiba mao, te pris dabego te ofa tiwai ulaibao. Agai te sipsip ili tigidali me, te danu badu elalubo genuai ili me sobadi yao. Agai te danu te tudi dili pageba mu togogiluao. Tama agai te haligade ili elalubo tigidali sao.  
\v 10 Tama agai te si wabo hobuludu te ili dali sobadi, te sipsipgo wiegi yai te namba wan wabo homu lewa me sao. Te namba wan lewa homu, me namba tu homu lewa dali tama sabo usu dao.  
\v 11 Tama prisgo te nai dabe te alta sai daiba ulao, te Genuai Bidiba ofa tiwai dao.”   
\p
\v 12 “Bidi me deligo te kibu meme ofa yainogo eyu da, agai te Genuai Bidigo geduba selasa pao,” wali.  
\v 13 “Tama agai te meme kibu toboluba nogo muyu bolo elama, tama agai te meme kibu te Genuai Bidigo Be sunumi pąde ela muao. Tialima, te pris dabego te kibu kaneme te alta bogo me si me si badu sąsągą bilao,” po wai.  
\v 14 “Te bidigo te kibu meme delage meba selama, te Genuai Bidiba mao, te pris dabego ofa tiwai emainao. Agai te haligade elalubo ili dabe tigidali sao,  
\v 15 te namba tu homu lewa dali te ili dabe me te namba wan homu lewa wiegi yai me sao. Agai te namba wan homu lewa me namba tu homu lewa dali sobaso, te usu dao.  
\v 16 Tialima, prisgo te nai dabe selama, te alta sia daiba munama, te ofa tiwai yao, te Genuai Bidigo homu godolo elama, bugai homu yaibao. Te ili tigidali Genuai Bidigo naga dao.  
\v 17 Te dage Israelgo te kibu ili ma kaneme munu me tugio. Habu mu dao. Dage me te nosali pedalubo hani wąį dabego te bomai po sesemane wali pidubadi geao. Te dage menaba bidigi pali bulude me te bomai po tagaligio, dagego te bomai po wali pao,” te po wai dao.   
\c 4  
\s1 Te sęgę dabe sela sąbo ofa yabo po  
\p
\v 1 Genuai Bidigo Mosesbolo walali,  
\v 2 te Israel we bidi dabebolo te tiwai po walomainogo yali, “Te bidi me we me deligo te bugagia homu kone palisąma, te Genuai Bidigo bomai po bolobaso da, teda agai sęgę sobao. Tama tibaso, aga te sęgę sela sąbo ofa ebaso usu dao.”   
\s1 Hetprisgo sęgę sela sąbo ofa yabo po  
\p
\v 3 Te Mosesgo po ma weyu, te tama po wali, “Te hetprisgo digi sęgę sali da, aga te tiali kolesaga dagede te tigidali we bidiba te sęgę ilibao. Tialima, aga te ogwa bidi kau kibu omai wiegi yai mu te tigide keni kenigo dolisąwai me deli sao. Te agai Genuai Bidiba ofa eyu, aga sęgę sela sąmainao.  
\v 4 Agai te kau kibu te Godigo Ugwa Be sunumiba sela pelama, te kau kibu toboluba nogo muyu bolo elama da, nosali agai te Genuai Bidigo gedude ela mubaso da, usu dao.  
\v 5 Tama nosali hetprisgo te kau kibu kaneme selama, te Godigo Ugwa Be tomoba pobaso usu dao.  
\v 6 Te agai nogo tų deli te kanemeba munama, te danide elalubo kaneme te Tedali Gasagi Yai Mu Be Habuba te tede walobo genuai nami ugwa pąba sągąyao, tama Genuai Bidigo te tiwai są ebo sueibao. Agai te tama tiwai sę ebo te a naga olama si sogo usu nama tama yao.  
\v 7 Tama aga te wiegi yai denami ebo hano holobo ofa ebo alta te Genuai Bidigo geduba Ugwa Be tomoba pao. Tama agai te kau kibu kaneme meba te kau kibu gąų kom me si me si tiwai alta me si me si dage badu teba mumainao. Te kau kibu kaneme me badu tigidali elalubaso da, te agai Ugwa Be sunumi badu alta buluba sela solama, te augwaligo ofa ulubo madi, te alta ulubo dogwa saliba te kaneme gelao,” wali.   
\p
\v 8 “Nosali agai te bulmakau haligade elalubo ili delegabe tigidali sobadi yao,  
\v 9 te namba tu lewa dali te ili dabe me, te namba wan lewago wiegi yai te dali sao. Agai te namba wan lewa me namba tu lewa si dali sabo usu dao.  
\v 10 Tama prisgo te kibu ili dabe te ofa ulubo altaba ulama, te isigo tigidali dela silama, te keli hogomu naga elalueibao. Agai te bulmakau ili ulama, te deli haliga pedalumainogo ebo tiwai tobage ofa emainao,” wai.  
\v 11 “Tiali goli agai te bulmakau tigi wali me kibu mi badi, te tobolu, me sągą si, me nogo si, te haliga tomode ili delegabe me selama,  
\v 12 tama bulu badu peyu, te augwa te keli sągi soabo pesageba sela pao. Te pesage te Godigo gedude magi meda meni yai wiegi yai elalubao. Tama agai te sia nogonama, te kibu tigidali te isiba ulama, dela silama, te keli naga elalumainogo yao,” wali.   
\s1 Tigidali we bidigo sęgę sela sąbo ofa yabo po  
\p
\v 13 Genuai Bidigo Mosesbolo walama, te Israel dabeba te tiwai po omainogo wai, “Te Israel we bidi tigidali te homu kone bugagia me palisąma, te augwaligo Genuai Bidigo bomai po bolobaso da, teda augwaligo sęgę sali dao. Te augwaligo sęgę sali te augwaligo me konesiąwai goli, augwa te yali kolesaga augwa dagede te sęgę sai dao.  
\v 14 Te nosali augwa te yali sęgę konebaso da, teda augwa te ogwa bidi bulmakau me deli selama, augwa te sęgę sela sąmainogo ofa iyąo. Augwaligo te ofa te Godigo Ugwa Be sunumiba sela pomainu yao.  
\v 15 Tama te Genuai Bidigo gedude te Israel hetman tobolu bidi dabego nogo te bulmakau toboluba munama, te nosali augwaligo te bulmakau ela mumainao.  
\v 16 Tama hetprisgo te bulmakau kaneme meba te Ugwa Be tomoba sela pao.  
\v 17 Tama agai nogo dani deli te kanemeba munama, tama te nogo danide elalubo kaneme te pąde elalubo genuai nami ugwa te Tedali Gasagi Yai Mu Be Habu seselalubo teba sąbaso, te Genuai Bidigo sueibao. Agai te a naga olama, si sogo te tama sę ebaso, usu dao.  
\v 18 Tama agai te kau kibu kaneme meba te me si me si wali kom gąų te alta wiegi yai denami hano holobo te Genuai Bidigo gedu badu mubaso, usu yaibao. Te kau kibu kaneme tigidali me badu elalubadi ebaso da, agai te Ugwa Be sunumi bulu badu te augwaligo ofa ulubo badu sela solama, te alta aiyadu dogwali madiba gelao,” wali.  
\v 19 “Nosali agai te bulmakau ili tigidali selama, te alta siaba ulao,” po wali.  
\v 20 “Hetprisgo te deli tigi poąį kolesaga te bulmakaude yao, te agai aga sęgę sela sąyu ofa yali bulmakaude yali kolesaga tiwai ebaso usu yaibao. Te tiwai naga hetprisgo te tigidali we bidigo sęgę sela sąbo kolesaga eyu, tama tibaso da, teda Godigo augwaligo sęgę me sela sąwaibao,” wai dao.  
\v 21 “Nosali agai te kau kibu delage selama, te pesage bulu badu sela solama, te isiba ulao, te aga digi sęgę sela sąyu, te bulmakau ofa yali tiwai ebaso usu yaibao. Tigidali we bidigo te kau kibu ofa tama ebo, te augwa sęgę sela sąyu ebao,” wali.   
\s1 Te tobolu bidi dabego sęgę sela sąbo ofa yabo po  
\p
\v 22 Genuai Bidigo Mosesbolo waliyu, te Israel dabeba te tiwai po omainogo yali, “Te tobolu bidi me deligo te homu kone bugagia me palisąma, agai Genuai Bidi Godigo bomai po bolobaso da, teda sęgę saibao, te aga ebo kolesaga dagede te sęgę sobao.  
\v 23 Te nosali agai te sęgę konebaso da, teda agai te wiegi yai meme kibu omai me deli sao, te keni kenigo aga tigi me dolisąwai, te ofa yagasu selasa asao,” po wai dao.  
\v 24 “Te Genuai Bidigo gedude agai te meme toboluba bolo nogo munama, tama nosali agai te kibu dabe elama, te isiba ulama domainu ofa ebo pesagede te meme kibu elimainao. Te meme kibugo aga sęgę sela sąbo ofa ebo dao.  
\v 25 Tama prisgo nogo dani deli te meme kibu kanemeba munama, te alta kom me si me siba te dwasianu kaneme munana pao. Te elalubo kaneme yai baso da, agai selama, te alta aiyaba dogwa sali dedageba gealuao.  
\v 26 Tama agai te meme ili altaba ulao. Prisgo te meme kibu elama, te meme ili me te deli haliga pedalumainu ebo ofa tobage tiwai ebaso usu yaibao. Te tiwai naga prisgo te hetman tobolu bidigo sęgę sela sąbo kolesaga eyu, ofa yao, te Godigo agai sęgę sela sąmainao,” te po wai.   
\s1 Te we bidi dabego sęgę sela sąbo ofa yabo po  
\p
\v 27 Te Genuai Bidigo Mosesbolo te po waliyu te Israel dabeba e tiwai po pusao wai, “Te we bidi augwali me deligo te bugagia homu konesiąma, te Genuai Bidigo bomai po bolobaso da, teda agai te sęgę sali, te aga dagede te kolesaga ebo dao.  
\v 28 Tialima, nosali aga homugo te sę koneagasu te aga sęgę sela sąbo ofa yaibao. Te aga pris ma tobolu bidi te meni baso da, teda agai te meme kibu so te dwai keni kenigo tigi me dolisąwai wiegi yai mu me deli selama, te ofa yabo sela pobaso usu dao.  
\v 29 Te agai meme kibu toboluba bolo nogo munama da, te nosali agai te siago tigidali dabo ofa ebo pesageba sela pelama, ela mubaso usu dao.  
\v 30 Tama prisgo nogo dani me deli te meme kanemeba munama, te dwasianu kaneme te alta gąų me si me si teba muao. Tama te kaneme meba elalubadi yaibaso da, te selama, te alta pagede aiyaba gealuao,” wai.  
\v 31 “Tama agai te meme kibu ili tigidali te altaba ulao. Prisgo te meme ilide te deli haliga pedalubo ofa ebo tobage kolesaga tiwaigo te ofa yao. Tama agai ili te altade ulao, te Genuai Bidigo te ofa ebo denami godolo yaibao. Te tiwai naga te prisgo te bidi ma wego sęgę sela sąbo ofa ebo kolesaga ebaso da, te Godigo agai sęgę sela sąwaibao.” \x * \xo 4:31 \xt Nam 15:27-28\x*   
\p
\v 32 “Te bidi me deligo aga sęgę sela sąyabo ofa yabo sipsip kibu sela asobaso da, agai te so kibu sipsip keni kenigo tigi dolisąwai wiegi yai mu sela asiyu, te usu mu dao.  
\v 33 Agai te kibu sipsip toboluba bolo nogo mumainogo elama, te nosali agai te kibu sipsip elainogo da, te isigo tigidali mu dela silibo ofa ebo pesagede elama, te ofa ebo usu dao.  
\v 34 Nosali prisgo nogo dani deli te sipsip kanemeba munama, tama kaneme dwasianu te alta gąų me si me si elaluboba muao. Te me badu elaluali kaneme agai selama, te ofa ebo alta dedageba gelao,” wai dao.  
\v 35 “Tama agai te sipsip kibu ili te altaba ulao. Prisgo te deli homu naga pedalumainu te ebo tobage ofa ebo tiwai gilama, te sipsip ili ofa eyu te tiwai tama yao. Tama agai te ili altade gasa ofa dali eyu, te augwaligo isigo tigidali domainogo te ulama, Genuai Bidiba mabo ofa tiwai yao. Te tiwai naga prisgo te bidigo sęgę sela sąbo ofa ilao, te Godigo agai sęgę sela sąwaibao,” wali.   
\c 5  
\s1 Te tobage sęgę meba sela sąbo ofa yabo po  
\p
\v 1 Te Genuai Bidigo Mosesbolo waliyu, te Israel dabebolo te tiwai po omainu yai, “Te augwaligo bidi me deliba hanaluyu, te po tų kotba pelama, te agai gasa bidigo sę suali po hanilabo po weyu, ma te agai gasa bidigo wabo po odali, tiali goli te bidigo te sę yali po hanilisąbaso da, teda aga te aga dagede te sę Godigo gedude geda muani dao.”   
\p
\v 2 “Ma te bidi me deligo homu kone bugagia me palisąma, te Godigo te po weyu te wiegi yai meni da po wali nai me deliba nogogo diąyu ebaso da, teda te bidi te Godigo gedude meda yai pedalubao. Tama te hasa sibi te Godigo wiegi yai meni da po wali da, te aga isilama, aga tigi te tǫde munalubadi, tama te bidigo te hasa tigiba bugagia tonosiąma diąyagasobaso da, teda bidi te meda pedalubao. Te aga yali sę konebo sogo da, teda aga te yali sę dagede sęgę elalubo dao,” wali.   
\p
\v 3 “Ma, te bidi me deligo te homugo bugagia konesiąma, te bidi me deli, me we me deli tigide pedelali sęde nogogo diąyu elama, te Godigo gedude meda elalubaso da, teda te bidi God gedude meda yai pedalubao. Te aga yali kolesaga aga koneagasobo sogo, aga yali sę dagede te sęgę elalubo dao.”   
\p
\v 4 “Ma, bidi me deligo bugagia homu konesiąma, te nai me delide mu po dao po ugwaba obaso da, teda agai Godigo gedude dwai sę ebao. Te aga yali sę konebo sogo da, teda aga yali sę dagede te sęgę sabo dao,” wali.   
\p
\v 5 “Te bidi me deligo te tobage dobo sę tiwai ebaso da, teda aga yali sę dagede geda mubaso, te sę yali po hanilama pusao.  
\v 6 Tama agai te sipsip so kibu deli, ma meme kibu so deli selama, te Genuai Bidiba selasa asama, te aga yali sęgę sela sąbo ofa tiwai yagasao. Tama prisgo te kibugo te bidigo sęgę sela sąyu ofa ilibaso da, Godigo agai sęgę sela sąwaibao.”   
\p
\v 7 “Te bidi me aga dagede te mone sǫą pelama, agai te sipsip ma meme abelabo mone meni baso da, agai te ba hi si selama, te aga yali sę sela sąwainu Genuai Bidiba selasa asao. Te ba hi me deligo te sęgę sela sąbo ofa tiwai eyu, me deligo te siaba tigidali ulama, te dela silibo ofa eyu yao,” wai.  
\v 8 “Tama agai te ba hi si te prisba sela pelama, te prisgo te ba hi mego te sęgę sela sąbo ofa tiwai yao. Prisgo te ba hi mage togwa sąnama, te tobolu sela sągio.  
\v 9 Tama agai te kaneme dwasianu selama, te alta bogo badu sąsągą bilao, te gasa me badu kaneme te alta dogwa sali madiba gealuao. Te ba hi te sęgę sela sąbo ofa dao.  
\v 10 Nosali prisgo te me elalubo ba higo te isigo tigidali dela silibo ofa yao. Agai te tobage ebo ofago bomai po wali pao. Te tiwai naga prisgo te bidigo sęgę sela sąbo ofa ebaso da, teda Godigo agai sęgę sela sąwaibao,” wali.   
\p
\v 11 “Te bidi me aga dagede aga te mone mu sǫą pelama, agai te ba hi si abelabo mone usu isąbaso da, teda agai te kilogram deli yai wiegi yai plaua selama, selasa asao. Tiali goli, agai te oliv wel me, te wiegi yai denami hano ilibo pauda me, te plauaba te wit ofa ebo tiwai me igio, magi baso meni, te plaua te sęgę sela sąbo ofa tiwai ebo dao.  
\v 12 Tama agai te plaua prisba sela pelama, te prisgo te plaua dwasianu nogode selama, te plaua tigidali te Genuai Bidiba ofa ilali dąį tiwai yaibao. Tama prisgo te dwasianu plaua te ofa ebo nai dabe dali te altaba ulao. Te plaua te sęgę sela sąbo ofa dao.  
\v 13 Tama tialima, prisgo te bidigo sęgę sela sąbo ofa ebaso da, teda Godigo agai sęgę sela sąbo dao. Te plaua me badu munalubadi yaibaso da, te prisgo plaua dao, te wit ulubo plaua ofa tiwai ebao,” wali.   
\s1 Te dwai sę dabe dodolobo ofa ebo po  
\p
\v 14 Genuai Bidigo Mosesbolo waliyu, te Israel dabeba te tiwai po omainogo yali,  
\v 15 “Te bidi me deligo Genuai Bidiba te nai dabe me maiabo homu yai te agai homu kone ebo gegeda pobaso da, teda agai sęgę me elalubao. Tialima, te bidigo te Genuai Bidiba te masiąwani nai wei ponoyu, te aga yali sę silimainu ofa mao. Te prisgo agabolo walama, te wiegi yai sipsip omai kibu me deli sao, te keni kenigo aga tigi me dolisąwai, selasa asao. Tama prisgo te bidigo sela asabo sipsipde mone namba dąį ilaibao. Tama bidigo te tiwai sipsip me deli selama, te prisba selasa asao,” te po wai.  
\v 16 “Te mone me doado bage hasia Genuai Bidiba masiąwani nai, megi agai mayu, te agai gasa dali ugwadu daganama mao. Te agai negeli a naga elalubaso da, teda agai a naga me deli ugwadu daganama, wei ponao, te negeli elaluali dodoliyu tama tiao. Agai te prisba mao. Te prisgo te bidigo sela asali sipsip selama, tama prisgo te bidigo aga sęgę sela sąbaso da, teda Godigo agai sęgę sela sąwaibao,” wai dao.   
\p
\v 17 “Te bidi me deligo bugagia homu kone palisąma, te Genuai Bidigo bomai po me deli bolobaso da, aga dagede te Godigo gedude dwai sę yali sęgę elalubao.  
\v 18 Tialima, agai te ofa me deli prisba sela pelama, te dwai sę yali sela sąyu isilao. Prisgo agabolo weyu, te wiegi yai sipsip omai me deli somainu yao, te keni kenigo aga tigi me dolisąwai, sela asao. Te sipsip sesali bidiba te mone namba dąį ilao. Tama te bidigo te sipsip kibu tiwai me deli selama, te prisba sesao. Tama prisgo te bidigo sęgę sela sąyu ofa elama, tama Godigo agai sęgę sela sąwaibao.  
\v 19 Te aga yali sę dagede, te Genuai Bidi gedude agai sęgę elalubao. Tama tibaso, te sipsip ofa ilao,” te po wai dao.   
\c 6  
\p
\v 1 Genuai Bidigo Mosesbolo po waliyu, te tiwai po Israel dabeba omainogo yali,  
\v 2 “Te bidi me deligo aga abagigo doado bage bugagia tolaluainu selama, tama agai te nai doado bage ma maiabo homu isąbaso da, teda agai sęgę sobao. Te agai abagigo nai wi sobaso, ma agai augwali tibo po ola menama, te agai doado bage anoma elama sobaso me,  
\v 3 ma agai gasa bidigo hagawai nai sulama, te tibo po weyu, ‘Mu po obao, eno me subeo,’ obaso da, teda aga sęgę sabo dao.  
\v 4-5 Bidigo te tobage kolesaga dabe ebaso, te sęgę ebao, te agai nai wi sabo kolesaga me tibo po wabo kolesaga ebaso, te doado bage wei ponao. Te aga yali kolesaga silimainogo ofa ebo sogo da, teda agai te doado bage aga ayabolo te nai tigidali wei ponao. Te agai 5 nai saibaso da, teda agai te 6 te tama nai wei ponobaso usu dao.  
\v 6 Te sipsip omai me deli agai te prisba sela pelama, te aga yali kolesaga sia somainogo te Genuai Bidiba ofa eyu dola palobo sę yao. Prisgo agabolo walama, te wiegi yai sipsip mu sao po wao, te keni kenigo aga tigi me dolisąwai selama sesao. Tama hasia bolo prisgo te bidigo sesebo sipsip abelabo mone nogiyu dąį ilao. Tama bidigo te sipsip tiwai te prisba selasa asao.  
\v 7 Tama prisgo te bidigo sęgę sela sąyu, te Genuai Bidiba ofa ebaso, tama Godigo agai sęgę sela sąwaibao,” po wai dao. \x * \xo 6:7 \xt Nam 5:5-8\x*   
\s1 Siago tigidali domainu ulubo ofa po  
\p
\v 8 Genuai Bidigo Mosesbolo te tiwai po wali,  
\v 9 “Nago te siaba tigidali ulubo ofa ebo bomai po te Aron aga ogomani dabe daliba te po walao. Augwaligo te ofa ebo nai te altaba ulama, te isigo dedubadi, te be posoboba usu nao. Te sia bogoli idubadi, te sula somainu me elamu dao.  
\v 10 Nosali prisgo te pęwadage trausis te augwa wiegi yai nami ugwago nigai trausis gudama, tama te bobage tagalalubo ugwa me munama, te aga altaba pelama, te keli sao, te ili yai ofa elalubo madi, te alta pąde tǫba gealuao,” po wai dao.  
\v 11 “Nosali aga gudali ugwa hasegelama, te sia dali keli selama, te pesage nigali buluba sela solama, te eno gedude meda meni yai pesage me deliba muao.  
\v 12 Tama te altade nogani sia sesemane didumainao, te munu me sula sągio. Tigidali side kigamu prisgo te sia nogonama, tama agai te ofa yabo kibu hasa dabe selama, te siago tigidali domainogo siaba ulaibao. Te deli haliga pedalubo ofa yabo kibu ili selama, tama te siaba uluyu yao.  
\v 13 Sesemane sogo te altade sia ula idumainao. Dagego te sia sula somainogo me elamu dao,” wali.   
\s1 Te wit ulubo ofa dabe po  
\p
\v 14 Te Genuai Bidigo Mosesbolo te po walima, te Israel dabeba te tiwai po omainu yali, “Te wit ulubo ofago bomai po e tiwai. Te Arongo hanigo pris me deligo te ena Genuai Bidiba te wit ulubo ofa mao, te alta pąde yao.  
\v 15 Tama prisgo te dwasianu plaua te augwaligo wel muai sobadi, te ofa wiegi yai denami ilabo pauda tigidali sao,” wali. “Tama agai te tigidali te alta siaba tigidali ulao. Te dwasianu ofago te tigidali ofa dąį ilibao, te enaba augwaligo mobao. Tama eno te ofa denami odama, eno godolo homu elama, bugai homu yaibao,” wali.  
\v 16 “Te plaua me badu munalubaso da, te pris dabego tuiyąo. Augwaligo te plaua selama, te yis meni yai bret nigilama, te augwaligo eno Ugwa Be mesalode tuiyąo.  
\v 17 Augwaligo te plaua dali te yis dali taluama te bret ulamuo. Augwali odolali ulao, magi baso meni, te plaua te eno nai mu tama, te sęgę sela sąbo ofa tiwai, me te bidigo yali dwai sę silimainogo ebo ofa tiwai ebao. Tama eno te plaua dabe te prisba dąį ilali. Te ofa ebo naigo te augwa me badu somainogo ebo dao.  
\v 18 Tama te Arongo hani pris bidi dabego te bret tumainao. Augwaligo te ebo ofade te Israel dabego enaba ofa ebo nai dabego somainao. Sesemane sesemane sogo nosali, te Arongo hani bidi dabego te ofa ebo nai me badu munalubo te augwaligo somainao. Tiali goli, te gasa bidigo diąwani ma te nai me deli te tuabo ofaba dagana sobaso da, teda te bidi ma te nai te habu mu selama elalueibao,” wali.   
\p
\v 19 Genuai Bidigo Mosesbolo te tama po wali,  
\v 20 “Te Arongo hani pris dabego te augwali gesi sogo mu hasia te pris sę sabo side, augwaligo te ofa me deli yao,” po wai. “Te bidi me deli augwaligo pris pedalumainogo augwaligo te ni oliv wel aga toboluba geleyu ebo side da, teda agai ofa enabolo yao. Agai te kilogram deli yai wiegi yai plaua deli sao, te wit ulubo ofa tiwai usu nama yao, te pedai me badu kigamu ofa eyu te me badu pedai te giliga dega sigulubadi yao.  
\v 21 Agai te plaua dali ni oliv wel dali begelama, te praipende bugagia ulao. Nosali agai pepedama, te enabolo mao, Genuai Bidiba. Tama eno te ofa ebo denami odama, te eno godolo elama, bugai homu yaibao.  
\v 22 Nosali nosali te Arongo hani bidi dabe augwali te hetpris pedelaibao, teda augwaligo te tobage ofa enaba yao. Te augwaligo te siaba tigidali domainu ulubo ofa emainu elama, te keli naga elalumainao.  
\v 23 Te pris dabego te augwa digi sesali te wit ulubo ofa dwasianu me tugio. Augwa te siago tigidali domainu sula tagalao weyu yaibao,” wali.   
\s1 Te sęgę sela sąbo ofa dabe po  
\p
\v 24 Genuai Bidigo Mosesbolo te tiwai po wali,  
\v 25 “Nago te Aron aga ogomani dabe daliba te sęgę sela sąbo ofago bomai po walao. Te bomai po e tiwai dao. Augwaligo te sęgę sela sąyąbo ofa yabo kibu dabe te eno gedude elibaso, te usu yaibao. Augwaligo te kibu elama, te ofa eyu, tigidali siaba ulama dela pabo pesagede te kibu elao. Te eno ofa tedali mu ebao, te habu mu selibo dao.  
\v 26 Prisgo te sęgę sela sąbo ofa yali, agai digi te kibu mi eno Ugwa Be mesalode tumainao.  
\v 27 Te pris nogi elalusąbo bidigo, ma te magi nai me deligo te ofa ebo kibude diąbaso da, teda te nai me ma te bidi te eno nai mu tama pedalumainu elama, te habu selalumainao. Te kibu kaneme te name ugwa me deliba tulalubaso da, dagego te name ugwa eno Ugwa Be obo tomode ąį telayao,” wali.  
\v 28 “Te prisgo te meme mi te tǫgo nigali sospen senede ulubaso da, teda nosali agai te sospen sene aluao. Tialima, agai te brasgo nigai sospende ulali da, teda nosali agai te sospen ąįgo tedelama, bugagia holobo naigo brasim yao.  
\v 29 Mena pris hani bidi dabego homu godolu eyu, agai te ofa ebo kibu mi tuainu eyu da, te aga tumainao, magi baso meni, te tobage ofa te eno nai mu dao.  
\v 30 Tiali goli, te hetprisgo te ofa ebo kibu kaneme me badu selama, te eno Ugwa Be tomoba pelama, te sęgę sela sąbo sę ebaso da, teda te pris dabego te ofa ebo nai kibu mi me tulamuo. Augwaligo te isiba tigidali ulama, dela silama, te keli naga elalumainao,” te po wai dao.   
\c 7  
\s1 Dobo sę dabe yali silimainu ebo ofa dabe po  
\p
\v 1 Te Godigo Mosesbolo walama, te Israel dabeba e tiwai po walomainogo yali, “Te dobo sę yali silimainogo ebo ofa dabe te Godiba dolo mu ebao, te habu mu selibao. Te ofa dabe ebo bomai po e tiwai dao.  
\v 2 Augwaligo te ofa yabo sipsip dabe elainogo da, augwa te sipsip dabe elama, te ofa eyu, te isiba tigidali ulama, dela silibo pesagede te sę yao. Tama augwa te sipsip kaneme te alta bogo me si me si te badu sąsągą bilao,” po wali.  
\v 3 “Augwaligo te sipsip kibu ili selama, te altade Godiba ofa ilao. Augwaligo te kibugo nisali danu sobadi, te kibu haliga tigidali bealubo te ili delegabe me sao,” te po wai.  
\v 4 “Tama augwa te hobuludu si dali, tede daganalubo ili me sobadi yao, te sipsipgo polalubo dini homu me deli sao. Augwa te polalubo dini homu me deli siyu, te si wabo homu hobuludu si me sao.  
\v 5 Tama prisgo te kibu ili tigidali te alta siaba ulao, augwa te Genuai Bidiba mabo ofa tiwai ebao. Te sipsip ofa ebogo te augwa yali dobo kolesaga silimainu ebo dao.  
\v 6 Te pris hani dabe mena bidigo tuabo homu godolo ebaso, aga te ofa yali sipsip mi tumainao. Te Godiba dolo ofa tama ebao, agai te pris dabebolo dąį ilali. Tama tialima, augwa te Godigo sel Ugwa Be obo tomode tubaso usu dao,” wali.   
\p
\v 7 “Te dwai sęgę sela sąbo ofago bomai po me, te dobo kolesaga silimainogo ebo ofago bomai po me, te si te augwa bomai po dedeli naga elalubao. Tibaso, prisgo te kibugo ofa ebo side te tobage ofa si yaibao, aga digi te ofa ebo bulmakau mi ma sipsip mi somainu ebo dao.  
\v 8 Te prisgo te isigo tigidali dela silibo ofa me deli te kibu dabego ebo sogo da, teda aga digi te kibugo tigi wali somainu yaibao.  
\v 9 Te tiwai tama naga te prisgo te augwa wit te moni nai ulubo be nogi aven ma sospende, me praipende ulai wit te ofa ebaso da, aga digi te sela tubo usu dao.  
\v 10 Te tigidali ulusiąwai witgo ofa ebaso, te augwaligo ni oliv wel dali taluali, te tigidali Arongo hani prisgo dao. Te olo plauago ofa yali nai me, te me prisgo saibao. Augwaligo te pris deli deli usu nama, tama te nai dobola sao,” te po wai.   
\s1 Te God dali deli haliga pedalubo ofa dabe ebo po  
\p
\v 11 Te Godigo Mosesbolo walama, te Israel dabebolo te tiwai po walomainogo yali, “Te God dali deli haliga pedelabo ofa ebo bomai po, e tiwai elalubo dao.  
\v 12 Te bidi me deligo Godiba buba hwi wabo homu eyu, agai te deli haliga pedelabo ofa yainu eyu da, agai te hasa dali te bret pedai dage agai yis meni yai plauago nigai, tego ofa yao. Agai te ni oliv wel dali taluali plauago nigai bretgo te ofa yao. Te agai te tama tiabo homu me ebaso da, aga te bisket dabe te oliv ni welgo pilai, tego ofa yao. Te meni baso da, agai te wiegi yai plaua dali, te ni oliv wel dali taluama, tama skon nigai, tego ofa ebaso usu dao.  
\v 13 Tama me agai te yis elalubo bret me badu pedai dage selama, tama te Genuai Bidi dali deli haliga pedalubo ofa yabo usu yaibao,” te po wali.  
\v 14 “Agai te ofa yabo haniani bret deli deli pedai dage me deli selama, te Genuai Bidiba mao. Te prisgo te kibugo kaneme selama, te alta bogo badu sąwai te pris bidigo te bret pedai dage dabe somainao.  
\v 15 Te bidigo ofa ebo side augwaligo te kibu mi me badu elaluali tigidali tuao. Augwaligo te nosali kigamude tueibao olama, te kibu mi me elalumainu sula tagalamu dao,” wali.   
\p
\v 16 “Te bidi me deligo deli haliga pedelabo ofa yabo homu yai, te aga Godiba po dąų wali usu nainogo, ma te aga homu godolo ebaso, te ofa Godiba olo dali mobaso da, teda augwa te ofa yali kibu mi te bidigo ofa ebo side tubadi, te nosali me tubo usu dao.  
\v 17 Tama te si wali side augwa te nai tula silisąma, te sela wabo sogoba usu nubaso da, teda augwaligo te isiba ulama, te isigo tigidali dela silaibao,” wai dao.  
\v 18 “Augwaligo te sela wabo side te kibu mi tubaso da, teda Godigo te bidigo ofa ebo me sogobeo. Menio. Te Godigo te homu yaibao, te agai ofa te dwai kugumini yai da homu yaibao. Tama niwai bidigo te kibu mi tubaso da, te agai dagede dobo sę ebao, te sęgę elalubao,” wali.   
\p
\v 19 “Te deli haliga pedalubo ofa ebo kibu mi te Godigo gedude wiegi yai isąwai naide diąnalubaso da, teda augwaligo te kibu mi munu me tulamuo. Menio. Augwaligo te nai mi dabe tigidali isiba ulama, te isigo mu dela silimainao.”  
\p “Te Godigo gedude meda meni yai wiegi yai we bidi augwaligo te deli haliga pedalubo ofa ebo kibu mi tubaso da, te usu dao.  
\v 20 Tiali goli, bidi me deli wiegi yai pedalisąbadi agai te ofa ebo mi tubaso da, teda aga te Genuai Bidigo we bidi hani tomode me bidigobeo,” wai dao.  
\v 21 “Te Godigo gedude wiegi yai me isąwani naiba nogo diąwani bidi, tagalao, agai te wiegi yai isąwai meda yai naiba nogo diąwani, ma te bidigo tigide pedalubo naiba diąwai baso, ma te wego tigide pedalubo naiba nogo diąnama, tama nosali agai te ofa yali kibu mi tubaso da, teda aga te Genuai Bidigo we bidi hani tomode me bidigobeo,” po wai dao.   
\s1 Te Israel dabego te kibu hasa dabego kaneme tugobe olama, habu mu selali  
\p
\v 22 Genuai Bidigo Mosesbolo walama,  
\v 23 te po te Israel we bidi dabeba mao wai. Genuai Bidigo e tiwai po wali, “Dagego te kibu bulmakau me sipsip meme ili me tugio,” po wai dao.  
\v 24 “Te bulmakau me deli aga digi odolali isaibaso, te ili dagego me tugio. Te me bulu uni hasago te kau kibu ela mueibaso me, dagego kau kibu ili me tugio. Tialima, dagego te kibu ili selama, gasa sę yao. Te usu dao.  
\v 25 Te augwaligo Genuai Bidiba ofa ebo kau kibu ili te bidi me deligo tubaso da, teda aga te Genuai Bidigo we bidi hani tomode me bidigobe dao,” wali.  
\v 26 “Dage Israel, dage te mena bulu pedaide bidibo we bidi, dagego munu me te kibu hasa me ba dabe te kaneme dali me tulamu dao. Te kolesaga ebo habu mu selibao.  
\v 27 Bidigo ma wego te dąų wali bomai po bolobaso da, teda aga te Genuai Bidigo hani tomode munu me bidigobeo,” wali. \x * \xo 7:27 \xt Gag 9:4; Prs 17:10-14; 19:26; Bom 12:16, 23; 15:23\x*   
\s1 Te ofa ebo kibu mi pedai dage augwaligo te pris dabe mao wali po  
\p
\v 28 Te Genuai Bidigo Mosesbolo waliyu,  
\v 29 te Israel we bidiba te po momainogo yali. Agai te tiwai po wai, “Bidigo te deli haliga pedelabo ofa sela aselama, agai te kibu pedai te Genuai Bidiba dolo dąį ilao, te aga ofa te dao,” wai dao.  
\v 30 “Te bidi aga digi te Genuai Bidiba ofa yabo nai kibu sesemainao. Te Genuai Bidiba maiabo kibu pedai dage e tiwai sesao, te kibu ili me kibu baugo mi tama dao. Tama te bidigo Genuai Bidiba ofa e tiwai ilao. Agai te kibu bau mi te nogo tolaluyu, te Genuai Bidigo gedude iba oba hogabo sę yao.  
\v 31 Tama nosali prisgo te alta siade te kibu ili ulao, tialima te pris augwa te kibu bau sao, te augwa tuabo nai dao.  
\v 32 Te kibugo dolo sągą dagego prisba mao, te olo dali maiabo nai dao. Te pedai badu te deli haliga pedelabo ofa eyu,  
\v 33 te prisgo te kibu kaneme me ili tego ofa ebo dao. Tama te ebo pris bidigo te dolo sągą somainao.  
\v 34 Genuai Bidigo digi te kibu bau me dolo sągą dage Israel we bidide selama, tama te kibu pedai dage si te pris dabeba mawai, te augwali Arongo hani dabe dao. Tama tialima, sesemane sogo nosali te pris dabego te ofa ebo nai pedai dage somainogo yao.  
\v 35 Te hasa pedai dage Genuai Bidigo digi sali, te dage we bidi dabego agaba ofa ebo nai dao. Te Genuai Bidigo te hasa pedai dage te Aron aga ogomani dabe daliba dąį ilama, te side agai augwali te pris sęba munama bidai dao.  
\v 36 Te side naga tama Genuai Bidigo te Israel augwaliba walama, augwaligo te ofa yali kibu pedai dage te pris dabe augwaliba mao po wali. Tama augwaligo te bomai po sesemane sesemane sogo wali pidubadi geąo,” te po wai dao.   
\p
\v 37 Te tigidali po te siaba tigidali ulama dela silibo ofa dabego bomai po, te wit ulubo ofa dabe me, te sęgę sela sąbo ofa dabe me, te dobo kolesaga augwa dagede yali silimainu ebo ofa me, te bidi pris pedalumainogo ofa ebo me, te God dali deli haliga pedalubo ofa me, te tama ofa dabego bomai po dao.  
\v 38 Genuai Bidigo te bomai po dabe te Israel dabe te masigi kemi tǫ wa pai bulude bidali sogo, te bulu du Sainaide Mosesbolo te bomai po mawai. Te Godigo te Israel we bidi augwaliba te ofa yao po wali side, agai te bomai po dabe augwaliba mawai dao.   
\c 8  
\ms1 Pris sę Aron aga ogwa dabe daligo yali  
\mr (Dąį 8–10)  
\s1 Godigo pris dabe dąį ilali  
\r (Sai 29:1-37)  
\p
\v 1 Te Genuai Bidigo Mosesbolo e tiwai po wai dao,  
\v 2 “Te Aron me aga ogwa dabe dali selama, te eno sel Ugwa Be sunumiba pao. Te pris dabego gudubo ugwa me, te sęde augwali dąį ilibo wel me somainu elama, tama te bulmakau omai me deli, me sipsip omai si, te sęgę sela sąyu ofa yabo nai selama, te basket wa me delide te yis meni yai bret pągąnama, tama te nai dabe me te sel Ugwa Beba selasa pao,” wali.  
\v 3 “Tama nosali tigidali we bidi te sel Ugwa Beba asomainu i wao,” wali.   
\p
\v 4 Tialima, Mosesgo Genuai Bidigo po odama, te tama sę yali. Tama tigidali we bidi sisinagasali.  
\v 5 Tama Mosesgo augwaliba walali, “Eno megi e yainogo ebo sę da, te Genuai Bidigo enabolo te sę yao po polobadu obaso ebao.”  
\v 6 Tialima, Mosesgo Aron aga ogwa dabe dali selama, te we bidi augwali geduba dodolagaselama, tama agai augwali ąįgo paluali.  
\v 7 Tama agai te holobo ugwa Aronba bolo gudulali. Tama agai te bobage name ugwa te Aron tabidu belali. Tama Mosesgo bobage aiyaba tagalalubo ugwa te genuai name ugwa Aronba gudulama, te welia kukulu au yai selama, te genuai ugwago te Aron tabidu soani kekalio.  
\v 8 Tama agai te dwasianu name ugwa Arongo hagawiade kekelama, tama te Godigo homu kolesaga konebo masigi si muani, te ugwa agebele poketde muai elaluai dao.  
\v 9 Tama agai bobage ugwa me deli te Arongo tobolude bagulama kęnani. Tama agai te dwasianu nai medal gol selama, Aron te Godigo bidi mu da olama dąį ilu, te ugwa name Arongo gesabidide ugwadu daganani. Mosesgo te sę dabe te Genuai Bidigo agabolo po wali gilama yai dao.   
\p
\v 10 Nosali Mosesgo te Godigo nai dabe dąį ilainogo te wel selama, te Godigo sel Ugwa Bede pilibadi, te be tomode elalubo nai tigidali me pilali. Tama te tiali kolesagade te nai doado bage dabe te Genuai Bidigo nai dolo da weyu, tama tiali dao.  
\v 11 Tama agai te wel habu selama, te nogo a naga olama, me badu nogo si sogo te altaba sąwani, te altade sę yabo doado bage me, te wę paubo moni genuai disba me agai tebolba tama tialio. Te tiali kolesagade agai te nai dabe te Genuai Bidigo nai mu da weyu dąį iliyu tiai dao.  
\v 12 Tama agai wel ąį dwasianu te Aron toboluba gelali, te tiali kolesagade te Aron te Genuai Bidigo pris mu tiwai da olama dąį ilai dao.  
\v 13 Nosali Mosesgo te Arongo ogwa dabe sela asama, augwaliba te holobo ugwa gudulama, tama agai te bobage name ugwa pedai te kukulu tiwai augwaliba belama, te augwali tobolude name ugwa kęnani, te Genuai Bidigo wali po tiwai gilama yai dao.   
\p
\v 14 Te silama da, tialima Mosesgo te bulmakau omai te bidi augwaligo te sęgę sela sąbo ofa yainu sela asali, te Aron aga ogwa dabe daligo te bulmakau toboluba nogo mumainao wali.  
\v 15 Tama nosali Mosesgo te kau kibu elama, te aga kaneme salio. Agai te kaneme dwasianu te nogo dani delide selama, te alta bogo me si me si badu te komde muna muna pali. Te kolesagade agai te alta God gedude wiegi yai tedali mu pedalumainu ilai dao. Nosali te elaluali kaneme tigidali selama te alta aiyaba dogwa saliba gelali, te tama kolesagade te alta te Godigo mu da olama, habu seliyu, te dąį tiwai ebao te po wali.  
\v 16 Tama Mosesgo te kibu kau haliga bealubo kibu ili delegabe tigidali sobadi, te hasia polalubo dini homu te wiegi yai sobadi, te si wali homugo si siyu, te ili dali selama, tama agai te nai dabe altade ulama, te keli naga elalu yai dao.   
\p
\v 17 Tama agai te kibu kau pedai dage me badu dali, te wali me, kibu mi me, te haliga me, tigidali selama, te pesage nigali buluba sela soali. Tama agai te sia nogonama, te kau kibu ulama, te siago tigidali dela silai. Agai te Genuai Bidigo agabolo wali po gilama tama sę yai dao.   
\p
\v 18 Nosali Mosesgo te sipsip kibu omai si elaluali te me deli agai sela asali. Te isigo tigidali dela silabo ofa yabo sipsip dao. Tialima, Aron aga ogwa dabe daligo te sipsip toboluba nogo muai dao.  
\v 19 Tama nosali Mosesgo te sipsip ela munama, te sipsip kaneme selama te alta pedai me si me si badu sąsągą bilai dao.  
\v 20-21 Agai te kaneme sąsągą bila silibo si da, teda agai te sipsip kibu sikilama, te haliga bono dabe me, te kibu sipsip sągą si me ąį telawali. Te nosali agai te kibu tobolu me ili me te sipsip kibu delage tigidali selama, te altaba munama, te tigidali siaba ulama, te keli naga elalueibao. Agai te Genuai Bidigo po wali gilama yali. Te siago tigidali dabo ofa ebo sipsip te sipsip ofa ebaso, te Genuai Bidigo te denami odama, te bugai haliga eyu yai dao.   
\p
\v 22 Tialima, Mosesgo gasa kibu sipsip omai sela asali, te bidi pris sę emainogo dąį eliyu ofa ebo sipsip. Te Aron aga ogwa dabe dali augwaligo te sipsip toboluba nogo muai.  
\v 23 Tama nosali Mosesgo te kibu sipsip elama, te dwasianu kaneme selama, te Arongo dolo olo aiyaba muani, te dolo nogode te a wabo nogo danide, me te dolo sągągo te a wabo sągą danide pilibadi yai dao.  
\v 24 Nosali agai te Arongo ogwa dabe sela aselama, te dwasianu kaneme te augwaligo dolo olo badu aiyaba muani, me te dolo nogo te a wabo nogo danide mubadi, te dolo sągą te a wali sągą danide muyu yali. Tama agai te me badu elaluali kaneme selama, te alta bogo me si me si badu sąsągą bilai dao.   
\p
\v 25 Nosali agai te kibu sipsip ili salio. Agai te nisa pai kibu danu me sali, te haligade bealubo kibu ili delegabe sobadi, te polalubo dini homu wiegi yai sobadi, te si wabo te kibu homugo si siyu te ili dali sali, te sipsipgo dolo sągą me sai dao.  
\v 26 Nosali Moses te yis meni yai bret pągąnalubo basket te augwaligo Genuai Bidiba mabo bret munalubo madi pelama, tama agai augwaligo te yis dali ulisąwai bret sali, te augwa plauago nigai bret me deli te oliv wel dali begelali, me te bisket me deli sobadi yali. Tama agai te nai dabe te kibu ili me kibu dolo sągą te nai si daiba muai.  
\v 27 Mosesgo te nai dabe te Aron dali aga ogwa dabe daligo nogoba muani, tama augwaligo nogogo te nai tolaluyu, te Genuai Bidigo gedude te nogo edaba ugwaba hoga walio.  
\v 28 Tama nosali Mosesgo te nai dabe augwalide ma selama, tama te siago tigidali dabo ofa ulubo alta kibu sipsip daiba te muani, tama te nai tigidali mu te isiba ulama, dela silali. Te nai dabego te pris nigali bidi dąį ebo ofa elama, te denami ebo Genuai Bidigo odoyu, godolo eyu, bugai haliga yai dao.  
\v 29 Tialima, Mosesgo te ofa yabo sipsip kibu bau selama, te nogode tolaluyu, ugwa eda te Genuai Bidigo gedude tama yalio. Te sipsip pedaigo te augwa pris dąį ebo ofa yali, te kibu mi Moses aga digi tumainu yai. Mosesgo te Genuai Bidigo agabolo wali po gilama te sę tigidali ela silai.   
\p
\v 30 Te Mosesgo wel habu dwasianu selama, te gesi pris dąį ilainu sali, te agai alta bogo badu sąsągą bilabo kaneme sali. Tama agai te kaneme me wel te Aron dali aga ogwa dabe daliba me augwaligo ugwaba me segene sągąwani. Te tama tiali kolesagade Mosesgo te Aron dali, aga ogwa dabeba dali te me augwa ugwaba me dąį ilama, te Genuai Bidigo mu dao wali.   
\p
\v 31 Nosali Mosesgo Aron dali aga ogwa dabeba me te tama po wali, “Eno dagebolo te kibu mi te Godigo sel Ugwa Be sunumiba sela pelama, te posolo ąįde ulama, te basketde munalubo bret dali tuao wali. Te basketde te pris dąį ilibo ofa ebo bisket me bret elalubao,” po wai.  
\v 32 “Te dage tuali tabi baso da, teda te me badu munalubo kibu mi me bret, dagego te siaba ulama, te siago tigidali dela silimainao,” wali.  
\v 33 “Dage te Godigo sel Ugwa Be sunumide bidaludubadi te nogo a naga olama, me badu nogo si wagi solama sogo bidao. Te dage pris sęba muani sogo 7 sogo elalueibao. Tama tibaso, dagego me tagaligio, te sogoba usu nama silimainao.  
\v 34 Genuai Bidigo digi dabolo walama, te dagego sęgę sela sąyu, te tigidali sę emainogo yai. Te megi da dago te sę yali dao.  
\v 35 Dage te sel Ugwa Be sunumide te giligade me hulide bidalubadi, te a naga olama, me si sogo usu nao, tama dagego te Genuai Bidigo dagebolo yao wali sę tigidali yao. Genuai Bidigo enabolo tama tiwai po wai. Tiyu, dagego agai po sela sąbaso, te dage isabuo wai dao.”  
\v 36 Te Mosesgo pedauwalide naga Genuai Bidigo Aron dali aga ogwa dabeba me te sę yabo po walama, tama augwaligo te tiwai sę yai dao.   
\c 9  
\s1 Arongo ofa meba yali po  
\p
\v 1 Te dei 7, te tama side augwaligo Aron dali aga ogwa dabe te pris sęba muna silibo sę ela silali. Te 8 wabo side Mosesgo te Aron dali aga ogwa dabe dali i obadi, te Israel tobolu bidi dabe me sisinagasao olama, i walio.  
\v 2 Augwali agaba sisinagasobo si da, Mosesgo Aronbolo te tiwai po wai, “Te ogwa bidi bulmakau omai me deli sobadi, te omai sipsip kibu me deli sao, augwali si te keni kenigo tigi me dolisąwai dabe tama sao. Tama nago te kibu si Genuai Bidiba ofa yao. Te kibu kaugo te sęgę sela sąbo ofa ebadi, te sipsip kibugo te isiba tigidali ulama dela silibo ofa yao,” te po wai.  
\v 3 “Tama nago te Israel we bidi dabeba waliyu, te sęgę sela sąyabo meme kibu omai deli sesao po wao. Te kibu be deli yai omai kau kibu me deli sobadi, te kibu be deli yai sipsip kibu me deli sobadi elama, te isigo tigidali dabo ofa yaibao. Augwaligo te wiegi yai kibu naga sao, te keni kenigo augwa tigi me dolisąwai naga sabo usu dao.  
\v 4 Tama te we bidi augwaligo te omai bulmakau me deli sobadi, te omai sipsip kibu me deli sobadi elama, te deli haliga yabo ofa yaibao. Augwaligo te kibu si Genuai Bidiba ofa emainao, te wit ulubo ofa augwaligo te oliv wel dali taluali. Te megi tama side Genuai Bidi augwali geduba pedalubaso da, teda hasia bolo te ofa augwaligo yao wao,” wali.   
\p
\v 5 Tialima, Aron dali te we bidi augwali pelama, te Mosesgo augwalibolo sigi pao po wali nai dabe selama, tama augwaligo te Godigo sel Ugwa Be pąba selasa asali. Te tigidali we bidi te Genuai Bidiba lotu wainogo te sel Ugwa Be pąba sisinagasalio.  
\v 6 Tama Mosesgo augwaliba te tiwai po wali, “Genuai Bidigo te po wali, dagego te ofa ebaso da, te Godigo moni bomai ula te dageba pedalumainu yaibao,” wali.  
\v 7 Tama nosali Mosesgo Aronbolo te po walali, “Nage te altaba pelama, te sęgę sela sąbo ofa me yao. Nago te naga sęgę dali, te we bidi dabego sęgę sela sąbo ofa dali, si tama yao. Nosali, te tigidali we bidigo sesali ofa selama, te augwa sęgę sela sąbo ofa yao, te Genuai Bidigo po wali gilama te sę yao,” wali. \x * \xo 9:7 \xt Hib 7:27\x*   
\p
\v 8 Tialima, Aron te altaba pelama, te ogwa bidi kau kibu omai elali, te aga digi aga sęgę sela sąmainu yalio.  
\v 9 Te aga ogwa dabego te kibu kaneme selama, agabolo mani, tama agai nogo dani te kanemeba holama, te dwasianu kaneme te gąų me si me si te alta dage me si me si badu teba muai. Tama agai te me badu munaluali kaneme selama, te alta aiya dogwa saliba gealuali.  
\v 10 Tama nosali Arongo te kau kibu ili tigidali sobadi, te haliga bealubo delegabe, me te si wabo homugo si siyu, tama te altaba ulai dao, te Genuai Bidigo Mosesbolo po wali gilama yai dao.  
\v 11 Tama agai te kibu mi tigidali me kibu tigi wali te we bidi bidibo madi bulu badu nogani isiba ulama, te isigo tigidali dela silai dao.   
\p
\v 12 Arongo te silibo si da, teda agai te isiba tigidali ulama dabo ofa yabo kibu elali. Tama aga ogwa dabego te kibu kaneme selama, agabolo mani, tama agai te kaneme te alta bogo me si me si badu sąsągą pai dao.  
\v 13 Te augwaligo te kibu tobolu dali, te kibu me badu delage pedai me tigidali agabolo menama, tama te tigidali te isigo tigidali dela silibo altaba ulalio.  
\v 14 Agai te kibu tabi haliga bono dabe ąį telawali, te kibu sągą si me. Tama agai te me badu pedai tigidali te isiba tigidali ulubo ofa daiba munama, te isigo mu dela silai dao.   
\p
\v 15 Nosali Arongo te we bidi augwaligo ofa dabe selama, te Genuai Bidiba ofa ilali. Te we bidi dabe augwa sęgę sela sąwainu sesali kibu meme agai salio. Agai ela munama, tego ofa yali, te agai aga sęgę sela sąyu, te ofa yali kibude yali sę tiwai te ofade tama tialio.  
\v 16-17 Te we bidi augwaligo te isiba tigidali ulabo ofa yainu sesali kibu si dabede te me deli agai sali, te ofago bomai pode wali po tiwai gilama, te augwaligo tigidali sogo kigamude ofa eyu yai. Tama agai te plaua selama, te wit ulubo ofa yali. Agai te dwasianu plaua nogogo selama, te plaua te isigo dela silibo ofa ebo altaba ulali.  
\v 18 Nosali Arongo te we bidi dabego Genuai Bidi dali deli haliga pedalubo ofa yainu sesali kau kibu me sipsip elali. Te kibu sigo kaneme aga ogwa dabego selama, te agabolo mani, tama agai te kaneme te alta bogo me si me si badu sąsągą bilai dao. \x * \xo 9:18 \xt Prs 3:1-11\x*  
\v 19 Tama Arongo te nisai sipsip kibu danu sobadi, te kibu sigo te ili sali. Agai te haliga bealubo delegabe me te si wabo homugo si siyu, te polalubo deli wabo dini homu wiegi yai deli sai dao.  
\v 20 Tialima, augwaligo te nai dabe te kibu si bauba munama, te tigidali altaba sela pali. Tama Arongo te kibu ili tigidali te altaba ulai dao.  
\v 21 Tama agai te kibu kau me sipsip bau, me kibu dolo sągą me agai nogode tolaluyu, te Genuai Bidigo gedude iba eda hoga yali, te Mosesgo po wali gilama yai dao.   
\p
\v 22 Arongo te ofa dabe ela silama da, teda agai nogo si te we bidi dabeba ugwa selama, te po weyu, te Godigo augwali wiegi yai ilao wali. Nosali agai te alta tagalama, aiyaba dulalio. \x * \xo 9:22 \xt Nam 6:22-26\x*  
\v 23 Te Moses de Aron si te Godigo sel Ugwa Be tomoba pai. Te augwali si buluba teda soabo sogo augwa si te po weyu, te augwa homugo te Godigo wiegi yai sę te tigidali we bidiba yao po wali, tama Godigo genuai ula hania haninama pedelama, te we bidi augwaligo suai dao.  
\v 24 Te polo tama mu Genuai Bidigo isi te altaba tagala palama, tama isigo te siago tigidali mu dela silibo ofa dali te kibu ili tigidali me polo dela silai. Te we bidi dabego te sę ebo sulama, te augwa bomonama i weyu, te augwa gesabidi tǫba pǫgulama, te Genuai Bidiba lotu po wai dao.   
\c 10  
\s1 Nadap de Abihu sigo dwai sę yali po  
\p
\v 1 Te sogo Nadap dali Abihu, te Arongo ogwa si, te augwa si plet digi selama, te wiegi yai denami ebo pauda ulali. Tama augwa si te sia dage me pauda te wiegi yai denami hano ebo te plet pou dabeba munama, tama augwali sigo te isi te Genuai Bidiba te ofa eyu sela pali. Tiali goli, Genuai Bidigo augwali sibolo te tiwai isi sesao po me wabeo. Tama te sia te Godigo nai da wasiąyu, te Godigo homu godolo me ebeo.  
\v 2 Te polo mu tama Genuai Bidigo te isi tagala palama, augwali si ulama, te augwali si Genuai Bidi gedude isai dao.  
\v 3 Tama Mosesgo Aronbolo te po wai, “Polobadu Genuai Bidigo te tiwai po wali, ‘Te eno sę eyu pąba asobo bidi dabe, ena te olo bidi tiwai meni augwaligo te tiwai koneabo elalubao, ena God mu dao. Augwaligo te tama homu bugagia konebaso da, teda eno genuai bomo me ula te we bidi augwaliba ola mawaibao.’ Agai te tama po wai, tiali goli te bidi sigo te po wali me pisąbaso, tama Genuai Bidigo augwali si dolali,” Mosesgo te po wai. Tama Arongo te tiali po odama, agai po me wabeo.   
\p
\v 4 Te Mosesgo Misael me Elsafan i obaso augwali si asali. Augwali si te Usielgo ogwa si, te Arongo aya sabi bidi dao. Mosesgo augwali siba te tiwai po wali, “Dage sigo te duga si amago tigi sagasao, te Godigo sel Ugwa Be tagalama, augwali si te Godigo pesagede buluba sela peyu, pubaligi pao,” te po wali.  
\v 5 Tialima, te bidi si pelama, te isali bidi si selama, te bidibo pesage tagalama, buluba soali, te Mosesgo wali po tiwai gilama yali. Tiali goli, augwali sigo te isali bidigo gudali ugwa me peda sąbeo. Menio. Augwali si ugwa dali te tigi tolasa palio.   
\p
\v 6 Megi da Mosesgo po Aronba mayu, te aga gasa ogwa sibolo te po wali, Eleasar dali Itamar si. Agai augwaliba te tiwai po wali, “Dagego te isali bidi side homu dene ebo kolesaga wali me pigio. Te dagego tobolu nisi yaga tigidali side sao. Te dagego olo elalumainogo me elamuo. Te dagego homu dene ebo dąį iliyu, te duga ugwa me pisągio. Dagego te homu dene ebo kolesaga wali pobaso da, teda Genuai Bidigo dage tigidali ela silama, te Genuai Bidigo te da Israel we bidi tigidaliba wado po dwai mu waibao. Te gasa Israel dabe, te duga deli hani, te Genuai Bidigo isi tagala palama, te elali bidi side augwali gasa Israel dabego naga homu dene emainao.  
\v 7 Dagego te Godigo sel Ugwa Be me tagaligio. Dage te buluba sobaso da, te dage isaibao, magi baso meni, eno te Genuai Bidigo wel dageba muani, tama dage te Genuai Bidigo bidi dolo mu bidibao,” wali. Tialima, augwaligo te Mosesgo po odama, augwaligo te tama tiwai yai dao.   
\s1 Te pris dabego te po wali pomainogo ebo bomai po me badu  
\p
\v 8 Genuai Bidigo Aronba te tiwai po wali,  
\v 9 “Te nage me nago ogwa dabego te bomai ąį wain me bia tulama, dage eno sel Ugwa Be tomoba me pelamuo. Te habu mu dao. Te dagego sel Ugwa Be tomode sę yabo sogo ąį tulama, te Ugwa Be tomoba pobaso da, te dage isaibao. Te dagego bulai wąį nǫų dabe nosali pedalubo hani, augwaligo me te bomai po wali pomainao.  
\v 10 Te dagego bomai ąį tusąbaso da, teda dagego bugagia dagaliyu, te mena nai eno nai ma te olo we bidigo nai mena elalubo bugagia dagalaibao. Te dagego eno gedude mena nai te meda menisąyu, te mena nai meda elalubo te bugagia mu dagalaibao.  
\v 11 Tama dagego te Israel we bidi te bomai po tigidali eno dagebolo te Mosesgo pedauwalide mabo te ola mobaso usu yaibao,” te po wai.   
\p
\v 12 Tama Mosesgo Aron dali aga bidibo ogwa si daliba te po wali, Eleasar me Itamar. Agai te tama po wali, “Dagego te me badu pedai plaua te wit ulubo ofago te Genuai Bidiba ofa yali me badu munalubo sao. Tama te plauago, dagego te yis meni yai bret nigao. Tama dagego te alta pąde te bret tuiyąo, magi baso meni, te nai te olo nai menio, te God aga ofago digi dagebolo mabo dao.  
\v 13 Dagego te bret te Godigo sel Ugwa Be obo tomode bididu tuiyąo. Te witgo ebo ofa pedai tigidali te duga dali te duga hani ogwa dabego dali me dao. Dagego te we bidigo Genuai Bidiba ofa yali plauago siyąo. Genuai Bidigo enabolo te sęde po walai dao,” wali. \x * \xo 10:13 \xt Prs 6:14-18\x*  
\v 14 “Te dage dali, te duga we bidi hanigo dali, te kibu bau me kibu dolo sągą te deli haliga pedaliyu ofa yali nai siyąo. Te kibu bau augwa te Genuai Bidigo gedude nogo tolaluyu, ugwa eda ebo dao. Te pesage me deli God gedude wiegi yai me elalubaso da, teda dage te me badu pelama, te kibu dage tuiyąo. Godigo te ofa yali kibu mi te dage me duga ogwa dabe dali tumainogo mawai dao.  
\v 15 Te we bidigo te ofa yabo ili me te kibu kau me sipsip sągą me bau te sela asobaso, te dagego nogo tulaluyu, te Genuai Bidi gedude iba eda yao. Tama nosali dagego te ili alta isiba ulao. Tiali goli, dagego te kibu sągą me kibu bau selama, tuiyąo. Sesemane sogo te kibu pedai dage si dage dali, duga wai dabe daligo nai siyąo. Genuai Bidigo te tama po wai dao,” wali. \x * \xo 10:15 \xt Prs 7:30-34\x*   
\p
\v 16 Nosali Mosesgo augwaliba po bomonama weyu, te tiwai po wali, “Dagego te sęgę sela sąbo ofa ebo memede mena sę yaliwe?” Tialima, augwaligo te po agabolo wali, “Dago te isiba sese ulama, dela silalio.” Tialima, Mosesgo te po odama, tama agai te Eleasar me Itamar augwali siba wado po wai. Tama agai te po wai,  
\v 17 “Magi baso dage te Godigo sel Ugwa Be tomode bidama, te sęgę sela sąwani kibu tubewe? Te God aga ofa me deli da olama, sa muyu, te agai dageba menama, te dagego te we bidi dabego yali sęgę sela sąmainogo ebo ofa dao. \x * \xo 10:17 \xt Prs 6:24-26\x*  
\v 18 Dagego te ofa yali kibu kaneme te Tedali Gasagi Yai Be Habuba me sela pisąwai, tama tialima, magi baso dagego te kibu dage te eno dagebolo wali po gilama te Tedali Gasagi Yai Be Habude tuai meniwe?”   
\p
\v 19 Tialima, Arongo Mosesbolo te tiwai po wai, “Odao. Megi tama naga te we bidi dabego te augwa sęgę sela sąyabo ofa te Genuai Bidiba mayu, te augwaligo te isiba tigidali ulama dabo ofa yabo sesalio. Tiali goli, te dwai sę enaba pedelai dao. Tialima, te megi tama eno te sęgę sela sąbo ofa ebo kibu mi tubaso da, teda Genuai Bidigo homugo te ebaso godolo yaiba, agawe? Eno homugo te menio,” wali.  
\v 20 Mosesgo te wabo odama, tama agai te Arongo po wiegi yai da homu yali. Tama aga haliga dua nagame igulama bidalio.   
\c 11  
\ms1 Te Godigo gedude wiegi yai meda meni yai nai me meda yai nai dabe po  
\mr (Dąį 11–15)  
\s1 Te me badu hasa sibi dabe Israel dabego tuagameo wali, me badu habu selali  
\r (Bom 14:3-21)  
\p
\v 1 Te Genuai Bidigo Moses de Aron sibolo walama,  
\v 2 te Israel dabeba te tiwai po omainogo yali, “Dagego e tobage tǫde bidibo hasa sibi naga tuagameo,” wali.  
\v 3 “Te nogo sągą age si elalubo hasa sibi dabe naga, te augwaligo kibu bulmakaugo nosai tutudubo tiwai ebo dao.  
\v 4-6 Tiali goli dagego te kamel kibu, me rabit, me te masigi gabalode bidibo bolo gesia, te me tulamuo. Te hasa dabego te kaugo nosai tubo tiwai ebo dao, tiali goli augwaligo nogo sągą te age si elalubeo. Tama tiyu, dagego homugo augwali te eno gedude wiegi yai meni da homu elama, te dagego habu sao.  
\v 7 Tama te kibu mu me dagego tugio. Te nogo sągą dani age si elalubo, tiali goli agai te kibu kaugo nosai tubo tiwai gilama ebo meni. Tama tiyu, dagego homugo kibu mu te dwai nai da homu eyu habu selao.  
\v 8 Dagego te tobage hasa sibi me tugio, te augwali isali sogo te dagego augwali tigiba nogo me mugio, magi baso meni, augwali eno gedude wiegi yai me ebeo,” wali.   
\p
\v 9 “Dagego te tobage sųgų tigidali te tigide pobolo yai me bogo elalubo, te tiwai sųgų tuagameo, te olo ąį dabede ma tamu ąįde bidibo sųgų dabe, te usu dao.  
\v 10 Tialima, tigidali sųgų me te dwasianu nai tigidali te tamu ąįde bidibo, me olo ąį dabede bidibo, te tigi pobolo me bogo meni yai, dagego homugo augwali dwali homu yao.  
\v 11 Tama eyu, dagego me tugimio, te augwali isai elalubadi te dagego nogogo me diągio. Te habu mu dao.  
\v 12 Ma odao. Dagego te bogo meni yai sųgų me te tigide pobolo isąwai sųgų te węde bidibo me tugio. Te nai dabe dagego habu selao,” wali.   
\p
\v 13-19 “Te tobage ba meba dageba habu selibao, te dagego me tugio. Dagego te nai tigidali dwali homu yao. Te e tobage ba dabe, te tobage genuai me dwasianu ba kemodage, te tobage tigidali ba kemodage hani hulide bilibo ba me, te ba gaugau, me te kebi dabe, te kanai dabe, me te sągą dili bobage yai ba me, te tobage ba hopou, me te komoran wabo ba pato, me te dwasianu bogwą, me genuai bogwą, te dagego habu sao. Te nai tigidali dagego tubo habu selao.  
\v 20 Te sągą si me nogo si me bogo elalubo nai tigidali, te augwali wiegi yai nai meni, te habu sabo usu dao.  
\v 21 Te sągągo sasa mano pabo, te tobage nai yaibaso da, teda dagego tuabo usu yaibao.  
\v 22 Tama dagego te tobage kuli mano tigidali tubaso usu yaibao, te genuai me dwasianu dabe te tuagameo. Te tama dao.  
\v 23 Te gasa nai tigidali te nogo si sągą si te bogo me elalubaso da, teda augwali dagego te dwai nai da te homu elama, habu sao,” wali.   
\p
\v 24 “Te me badu gasa tobage hasago me te dage eno gedude meda pedalubo sę yaibao. Te bidi me deli te isai hasago tigi diąwai baso da,  
\v 25 ma agai gasaba me tolasa pai baso da, teda te bidi eno gedude meda pedelama, te bididubadi be pioba mu usu naibao. Tama te hasa tolali bidigo ugwa me ąį telayao,” te po wai dao.  
\v 26 “Te sągąde age elalubo tobage hasa dabego, te sągą dani age si elalusiąyu, ma te bulmakaugo nosai tubo tiwai isąbo hasa dabe, te hasa hani dabe dagego te wiegi yai nai meni da, te homu yao.  
\v 27 Te tobage tigidali hasa te sągąde dani elalubaso, te wiegi yai hasa menio. Dage te tobage hasa isai tigi me diąwai baso da, teda dage eno gedude meda pedelama, tama dage tiwai bididubadi te giliga dega sigulaibao,” Genuai Bidigo te po wai.   
\p
\v 28 “Bidigo te tobage hasa tigi gasaba me tolasa peyu da, agai ugwa ąį telayao, tiali goli aga meda elaludubadi te giliga dega sigulaibao. Te tobage hasa dabego dage meda ilibo dao,” wali.   
\p
\v 29-30 “Te tobage hasa hani me habu selali, te bolo gesia dabe me tǫde bolo me, te dwasianu yogwa dabe me genuai yogai dabe, te habu saibao.  
\v 31 Eno te hasa dabe dageba habu selibao, te augwali isai madi dagego augwali tigi diąbaso da, te dage meda pedelama, te elaludubadi giliga dega siguluboba usu naibao.  
\v 32 Tama te hasa dabe me deli isilama, te nai me deli daiba tulaluei baso da, te nai eno gedude meda pedalubao. Te naigo tigi te augwaligo nigo nigai nai, me name ugwaba, me kau kibu waliba, me beg daiba tulaluei baso, te aga mena sę elalubaso da, te tagalao, te augwali meda pedelaibao. Tama tiyu, te dagego ąį telayao, tialima te nai dabego meda elalubadi te giliga dega sigulubo sogoba usu naibao,” te po wai dao.  
\v 33 “Tama te hasago tigi te tǫgo nigai sospen tomoba tulaluei baso da, teda te sospende elaluali nai tigidali te meda pedelaibao. Tama dagego te sospen sene alua sąyao.  
\v 34 Te nai meba pąde munalubadi te sospen ąį teba gelai baso da, teda te nai me meda pedelaibao. Te sospende elaluali ąį te doyu, meda yali dao.  
\v 35 Te hasa sibi te mena naiba me tulalubaso te tagalao, te nai te meda ilaibao. Te augwa tǫgo nigai stov ma aven me deli yaibaso, te me dagego aluao.  
\v 36 Tialima, te hasa me te ulu pedalubo ąįba me te olo tǫde pedalubo ąįba ma te tank ąįba tulaluei baso da, teda te ąį meda pedalugobeo. Menio. Tiali goli, te mena gasa nai te hasa tigide keąlubaso da, te meda elama, dwali dao.  
\v 37 Te hasa sibi me deli te isama, te dagego bulainogo ebo nai waiba tulaluei baso da, te usu dao, magi baso meni, te nai wai meda ilibeo, aga te wiegi yai elalubao.  
\v 38 Tiali goli, te nai wai te ąįde munalubadi, te hasago tigi daiba tulaluei baso da, teda te nai wai dabe te eno gedude meda pedalubaso, te habu selabo usu dao,” wali.   
\p
\v 39 “Te eno dagebolo te tuao wali hasa dabe tuabo homu ebaso, te usu yaibao. Te hasa sibi hani me deli te odolali me isai madi, te bidi me we me deli teba nogo diąwani da, te bidi ma we eno gedude meda pedelaibao. Te tiwai agade elalubadi, te sia ge dega siguluboba usu naibao,” te po wai dao.  
\v 40 “Tama bidi me deligo te hasa mi tubaso, ma agai te hasa tolai baso da, teda agai ugwa ąį telayao. Tialima, aga digi te meda elalubadi te sia ge dega sigi paboba mu usu naibao,” wali.   
\p
\v 41 “Dagego te dwasianu hasa dabe me, ma te tǫba tedela pabo binatang me tulamuo. Augwali te dwai nai da, dagego te homu yao.  
\v 42 Te haligago bulu bilibo tobage hasa dabe, ma te nogo sągągo bilibo hasa, ma te sągą hauwa elalubo hasa me, te dagego me tugio. Augwali te wiegi yai nai dabe meni, te habu sao.  
\v 43 Dagego te hasa sibide deli me tugio. Te dagego tubaso da, te eno gedude dage meda mu pedelaibao,” po wai.  
\v 44 “Ena Genuai Bidi, ena duga God dao. Tama tiyu, te duga digi dage enabolo mayu, te dolo isąbo kolesaga tagaluyu, te doloba pai kolesaga wali peyu, te meda meni yai wiegi yai tedali mu bidao. Magi baso meni, ena digi ena te magi meda meni yai wiegi yai tedali bidiyu, eno te wiegi yai kolesaga me doloba pai sę mu ebo dao. Tama te tǫde bilalubo dwasianu hasa dabe me tugimio. Tiyu, dage eno gedude meda pedelabuo. \x * \xo 11:44 \xt Prs 19:2; 1 Pi 1:16\x*  
\v 45 Ena Genuai Bidigo, eno dage te Isipde selama, odasa asali, te ena dagego God bidainogo yali. Tialima, dage te tedali gasagi yai mu bidu, te wiegi yai doloba pai kolesaga naga wali piyąo, magi baso meni, ena digi ena te tedali gasagi yai mu bidiyu, te eno kolesaga wiegi yai doloba pai mu elalubo dao,” wali.   
\p
\v 46 “Te dagego megi sali te bomai pode elalubo po, agai te tobage hasa sibi me te ba dabe, te węde bidibo sųgų dabe, te dwasianu hasa sibi tigidali, te tǫde bilalubo binatang, te nai sibide bomai po wali dao.  
\v 47 Tama dagego bugagia dagaliyu, te mena meda meni yai nai, me te mena naigo dage eno gedude meda pedelabo te bugagia dagaliąo. Te dagego tuabo hasa sibi dabe bugagia konebadi, dagego tusiąma habu sabo hasa sibi me konebadi tama yao,” Genuai Bidigo te Moses dali Aron dali sibolo te po wai.   
\c 12  
\s1 Te wego wai ame nani nosali badu aga wiegi yai meda meni yai ma pedelabo kolesaga ebo po  
\p
\v 1 Genuai Bidigo Mosesbolo te tiwai po wali,  
\v 2 “Nago te Israel we bidibolo walao, te we me deli haliga elama, te aga wai ogwa ame nobaso da, teda aga eno gedude meda elalubao, te we poluago elibo gasi ebo sogo te tiwai elalubao, te aga meda elalubadi te nogo a naga olama me badu nogo si wabo sogo bidaibao.  
\v 3 Tama te 8 wabo side, augwaligo te waigo gasa tigi wali togwao. \x * \xo 12:3 \xt Gag 17:12; Luk 2:21\x*  
\v 4 Te we te 33 sogo bidama, te aga wiegi yai meda meni yai ma pedelaibao, magi baso meni, te aga wai ame nani sogo te aga tigide elaluali kaneme tagalalio. Agai te Godiba mani nai da olama, habu selali nai me deli nogo diąsiąbadi te eno dąį ilali sogoba usu nao. Tama aga te eno sel Ugwa Be obo tomoba pisąbadi, te aga meda meni yai wiegi yai pedalubo sogoba usu nao,” po wai dao.   
\p
\v 5 “Te wego wegi ame nabo sogo, aga eno gedude wiegi yai ebeo, te we sibigo poluago elibo gasi ebo sogo tiwai ebao, te aga Sarere si, te 14 dei usu nama meda elalueibao. Tama te we aga bidibadi, te 66 dei ma bidama da, te aga meda meni yai dwagi yai ma pedelaibao, magi baso meni, agai kaneme tagalai dao.”   
\p
\v 6 “Te tama sogo te we dabe sibi meda meniyu, wiegi yai ma pedalubo si da, teda te wego te kibu be deli yai sipsip kibu sao, te siaba tigidali ulabo ofa yaibao, te augwaligo te ba hi wabo, te ba me deli, te sęgę sela sąyu ofa yabo ba sao. Agai te ofa yabo nai si te eno sel Ugwa Be sunumiba selasa pobaso, usu dao.  
\v 7 Tama prisgo te wego te sesali ba hi me kibu sipsip selama, te Genuai Bidi, enaba ofa ebaso da, te we te meda meniama, te wiegi yai pedelaibao. Tama te kanemego te we meda me elalumainogo me egobeo. Megi da aga eno gedude wiegi yai yalio. Te wai ogwa ma wegi ame nabo wego te bomai po wali pao,” te po wai dao.   
\p
\v 8 “Tialima, te wego mone sǫą pelama, te aga sipsip kibu wai abelabo mone usu meni baso da, teda agai te ba hi sesao. Te ba hi me deligo te isiba tigidali ulubo ofa eyu, te me gasa bago te sęgę sela sąbo ofa yaibao. Te prisgo te ba hi si ofa eyu, te we wiegi yai pedelaibao, tama te we eno gedude wiegi yai pedelaibao,” te po wai dao. \x * \xo 12:8 \xt Luk 2:24\x*   
\c 13  
\s1 Te augwali keni elalubo sogo emainu yabo kolesaga po  
\p
\v 1 Te Genuai Bidigo Moses de Aron sibolo te tama po wai,  
\v 2 “Te bidi me deli ma we te tigide keni ma dili keni pedalubaso, ma tigide magi sę me deli pedalubaso, tama te sęgo tonobo te oiyabe gasi tiwai pedelabo homu tiwai ebaso da, teda augwaligo te bidi ma we te Aronba me aga hani prisba odasa pao,” wali.  
\v 3 “Tama te prisgo te sę bugagia osolama, te agai suali madi te tigi nisi tedela elama, te keni tigi tomoba paibaso da, teda te oiyabe gasi dolo tama ebao. Te prisgo te bidi suali sogo da, agai te tama po wao, ‘Te bidigo tigi wiegi yai me elalubeo,’ po wabo dao.  
\v 4 Tialima, te dąį tedela yai pedelama, te prisgo suali keni te tigi tomoba pisąma, te tigi nisi tedela pedalisąbaso da, teda prisgo te bidi agaduba te be me deliba munama elalubadi, te Sarere deli, a naga me si sogo, usu nama bidimainao.  
\v 5 Te 7 wabo side, prisgo te dąį yai elaluali ma osola suao, tama agai homugo te tiwai naga tama me elalubaso, te genuai pedalisąbaso da, teda te bidi agaduba te be me deliba munama bididubadi, te 7 sogoba usu nao,” te po wai.  
\v 6 “Te Sarere si silibaso da, teda prisgo te bidi ma sulama, te nai genuai pedalisąma silainogo ebaso da, teda te bidi olo keni da homu yao. Tialima, prisgo agabolo walama, ‘Nage God gedude wiegi yai da,’ po wao. Te bidi aga ugwa wę tedelama, te aga wiegi yai mu pedalumainao,” te po wai.  
\v 7 “Te tudi badu nosali, te keni ma pedalubaso da, teda te bidigo pris ma sugi pao.  
\v 8 Tama prisgo te bidi bugagia sumainao, tama te keni genuai pedalubaso da, teda te bidigo oiyabe gasi elalueibao. Te prisgo agabolo te tiwai po waibao, ‘Nage wiegi yai me ebeo.’”   
\p
\v 9 “Te bidi me deli bomai keni elalubaso, te augwaligo aga te prisba odasa pao,” wali.  
\v 10 “Te bidi te prisgo bugagia osa yao. Te keni tedela eyu, te tigi nisi tedela pedelama, tama te kenide keni bole pągąną pobaso da,  
\v 11 teda te bidi te oiyabe gasi dolo elalubao. \f + \fr 13:11 \ft Te Hibru dabe augwaligo te tobage gasi hauwade te nogi naga wali, “Oiyabe gasi da,” wali dao. Te wabo po te megi dago elalubo subo te oiyabe gasi delide po naga po weyu me wabeo.\f* Tama prisgo te bidiba te tiwai po wao, ‘Nage wiegi yai me ebeo.’ Prisgo koneani, te bidi wiegi yai ebeo, tama tiyu, te bidi agaduba deli bidimainogo me elamu dao.  
\v 12 Tama te gasi genuai mu pedelama, te bidigo tigi tigidali usu nubaso da,  
\v 13 teda prisgo te bidigo tigi bugagia osa yao. Te prisgo suali digi te gasigo te bidigo tigi tigidali usu nama, te tigi tigidali tedela ebaso da, agai te bidibolo te tama po wao, ‘Nage Godigo gedude wiegi yai yalio.’ Te bidi wiegi yai mu yai dao.  
\v 14 Tiali goli, nosali te keni ulu podilama, te tomode elalubo mi hanilibaso da, teda te bidi wiegi yai mu me ebe dao.  
\v 15 Prisgo te keni ma sulama, agai suali keni te tiwai ulu podilaibaso, agai te bidibolo walao, ‘Nage wiegi yai ebeo.’ Te keni elalubo bidi te keni ulu podilama, te keni tomode mi elalubo bidi da, aga eno gedude wiegi yai me egobeo. Te tobage keni te dwai mu dao.  
\v 16 Tialima nosali, te keni pedela selama, tigi tedela pedalubaso da, teda te bidi te prisba ma pomainao,” wali.  
\v 17 “Te prisgo te bidi bugagia ma sulama, agai suali te keni pedela selama, te tigi tedela yaibaso da, teda te bidi eno gedude wiegi yai yalio. Te prisgo agabolo te tiwai po walao, ‘Nage wiegi yai mu yai dao,’ po wao,” wali.   
\p
\v 18 “Te bidi me deli tigide dili keni elama, te keni pedela selama,  
\v 19 tama nosali dili keni yali madi du elama, tedela pedalubaso, ma tigi mama yai me tedela dali elalubaso da, teda te bidi prisba pao,” wali.  
\v 20 “Tama prisgo te bidi dili keni yali pesage bugagia suao. Te keni dwasianu tomoba pelama, te badu tigi nisi te tedela pedelai baso da, teda prisgo te bidibolo te tiwai po walao, ‘Nage God gedude wiegi yai ebeo.’ Te gasi te dili keni pedela sali pesagede pedelali da, te dwai nai mu dao.  
\v 21 Tiali goli, prisgo te tigi sulama, agai te tigi nisi tedela isąwai sulama, te keni tigi wali tomoba pisąwai, agai te usu ma yabo tiwai tonobo homu ebaso da, teda prisgo agaduba munama bidibadi, te Sarere deli bidama, te nogo a naga olama, te me badu nogo si wagi solama sogo usu nama bidao.  
\v 22 Te nosali te 7 wabo sogo te nai genuai pedalubaso da, teda te dwai nai mu da, te prisgo bidibolo te tama po walao, ‘Nage te God gedude wiegi yai ebeo,’ po wao.  
\v 23 Tiali goli, te tigide dąį ilali te tiwai me tama elaludu, te genuai pedalisąbaso da, teda te dili kenigo dila pali tigi wali te masalu pedela salio, te tama dao. Tama te prisgo te bidibolo te tiwai po wao, ‘Nage te God gedude wiegi yai yali dao,’” wali.   
\p
\v 24 “Te isigo bidi me deli tigi dai madi, te keni mama yai ma tedela yai te pedalubaso da,  
\v 25 teda prisgo te keni bugagia osola suao. Te keni tedela yali madi te kenide tigi nisi pedelama, te siago ulali madi keni tomoba paibaso da, teda te keni dwai nai mu dao. Tibaso, prisgo te bidibolo te tama po wao, ‘Nage God gedude wiegi yai ebeo,’ po wao.  
\v 26 Te keni elalubo madi tigi nisi te tedela yai pedalisąma, te keni tomoba pisąma, te suali madi pedela sabo homu tiwai ebaso da, teda prisgo te bidi agaduba munama bidibadi, te 7 wabo sogo usu nama bidimainao.  
\v 27 Te 7 wabo side te prisgo aga ma osola suao. Te keni genuai pedelai baso, te keni dwai mu dao. Te prisgo agabolo te tiwai po walao, ‘Nage dwagi yai me ebeo,’ te po wao.  
\v 28 Tiali goli, te keni me tama elalubaso, te genuai pedalisąbaso da, teda te tigide isigo ulali madi masalu naga elalubao. Tialima, prisgo te bidibolo te po walao, ‘Nage God gedude wiegi yai dao,’” wali.   
\p
\v 29 “Te bidi me deli ma we buluba keni keni te tobolude pedalubaso, ma penanede keni ebaso da,  
\v 30 teda prisgo te buluba keni bugagia suao. Te prisgo homugo te keni keni tigi tomoba pali homu elama, te agai suali te buluba keni yali pesagede te tigi nisi hauwa elalu, te tigi nisi sęwa yaibaso da, teda prisgo koneama, te buluba keni keni dwai nai mu da homu yaibao. Agai te po te bidibolo walao, ‘Nage God gedude wiegi yai ebeo,’ wao.  
\v 31 Tiali goli, prisgo aga subo sogo, te agai suali te buluba keni kenigo tigi wali tomoba sela pabeo, te buluba keni elaluali madi tigi nisi wiegi yai me pedalisąwai, tialima agai te bidi agaduba munama, te Sarere deli bidimainao,” te po wai.  
\v 32 “Te 7 wali side me tama elalubaso da, prisgo te bidigo tigi ma osola suao. Te buluba keni me tama elaluyu, te genuai pedalisąma, te prisgo homugo te tigi tomoba pogobe homu eyu, tama te badu sęwa yai tigi nisi pedalisąbaso da,  
\v 33 teda te bidi aga tobolu nisi me penani nisi tigidali poayao, tiali goli te keni elalubo madi poagio. Te nosali prisgo te bidi agaduba tedali bididubadi, te nogo a naga olama, me badu nogo si wagi solama sogo ma bidimainao.  
\v 34 Tama te 7 wabo sogode prisgo te bidigo keni keni ma suao. Te keni keni te tama tiwai me elalu, te genuai me isąyu, tama prisgo homugo te keni tigi tomoba pabe homu eyu da, te agai te bidibolo te tiwai po wao, ‘Nage God gedude wiegi yai yalio.’ Tialima, te bidigo ugwa ąį telabaso, te wiegi yai ebo dao.  
\v 35 ‘Nage wiegi yai yalio,’ te prisgo te po wali sogo tudi badu nosali te habo keni genuai pedelai baso da,  
\v 36 teda te prisgo aga ma osola suao. Te habo keni genuai pedelai baso da, teda prisgo te tiwai koneao, te bidi wiegi yai ebeo homu yao, tama agai te sęwa yali nisi munu me gegegio,” wali.  
\v 37 “Tialima, te prisgo aga suali madi, te habo keni te tiwai me elaluabo homu eyu, te genuai pedalugobe homu elama, tama te keni yali madi wiegi yai tigi nisi pedalubaso da, teda te habo keni silalio. Tialima, prisgo agabolo te tama po walao, ‘Nage God gedude wiegi yai yalio.’”   
\p
\v 38 “Te bidi ma we me deligo tigide tedela yai nai meba pedelai elalubaso da,  
\v 39 teda prisgo te tigide dąį elalubo bugagia suao. Te dąį elalubo te olo tedela elaluyu, te ula mu meni baso da, teda te dąį olo tama te tigide pedelali homu yao. Tama tialima, te bidi eno gedude wiegi yai yali dao,” wali.   
\p
\v 40 “Te bidigo tobolu nisi meniama wane paibaso da, teda aga eno gedude meda elalubeo. Menio. Aga wiegi yai bidi dao.  
\v 41 Te tobolu nisi tomo bulude naga, te wane pai bidi yai baso da, teda te bidi aga eno gedude meda meni yai wiegi yai bidi dao.  
\v 42 Tiali goli, te wane pai bidi tobolude te keni pedelama, te kenigo au te mama yai me tedela elalubaso da, teda te keni dwai mu dao.  
\v 43 Te prisgo bugagia osola suao. Te kenigo au te mama yai ma tedela yai elalu, te oiyabe yai bidigo keni tiwai elalubaso da,  
\v 44 teda te tobolu wanede keni te dwai nai mu dao, te prisgo agabolo te tiwai po wao, ‘Nage Godigo gedude wiegi yai ebeo.’”   
\p
\v 45 “Bidi me delide te tobage keni elalubaso, agai te pisila pai ugwa munama, te tobolu nisi yaga sigio. Tama aga nogogo pedauwali pania selama, te tiwai i wao, ‘Ena dwagi yai menio. Ena dwagi yai menio,’ te tama po wao.  
\v 46 Sesemane sogo te tobage keni elalubo bidi, aga eno gedude wiegi yai me ebeo. Agai te aga abagi dabe tagalama, te bidibo pesage bulu badu tedali bidao,” te po wai dao.   
\s1 Bomo yai pode te nai dabego ugwa doado bage dolobo po wai  
\p
\v 47-48 Genuai Bidigo po ma weyu, te Moses de Aron sibolo te tama po walio, “Me sogo te nai mebago te ugwa dolobo sę eyu, te gudubo ugwa dabede, me name ugwade, me augwa te sipsip nisigo nigali, ma te wiegi yai hobigo nigali, te bulmakau tigi walide pedaliyu, te tobage naigo nigali naide pedaliyu yaibao,” wali.  
\v 49 “Tama te nai te ni yano tigi poai, ma mama yai pedalubaso da, teda augwaligo te ugwa dabe prisba waselama, ola magasao,” te po wai.  
\v 50 “Te prisgo selama, bugagia sulama, te nai gasa, badu munama, te nogo a naga olama me badu nogo si sogo elalumainao.  
\v 51 Te 7 wabo side te agai ma suao, tama te ugwade genuai pedelaibaso da, teda te oiyabe gasi tiwai ebao, tama te ugwa ma kau wali te eno gedude wiegi yai egobe dao.  
\v 52 Tama prisgo te ugwa isiba ulao. Te oiyabe pedalubo tiwai yali nai, te isiba ulama, mu siago dela silimainao,” wali.   
\p
\v 53 “Tiali goli, prisgo te nai suali te tiwai tama me elaluyu, te ugwade genuai pedalisąbaso da,  
\v 54 teda agai augwalibolo olama, te ugwa wę tela yao olama, te munalubadi te 7 wabo sogoba usu nao.  
\v 55 Nosali agai ma suao, te oiyabe tiwai yali te au me tama elaludubaso, te ugwa menade te nai pedelali madi elalu, te nai elaluali pesagede me genuai pedalisąbaso da, tagalao, te eno gedude wiegi yai me egobeo. Tialima, prisgo te ugwa isiba ulao.  
\v 56 Tialima, augwaligo ąį telawai madi te prisgo ma suali madi, te oiyabe tiwai yali nai silainu ebaso da, teda agai te ugwa pedai te nai pedelali madi togwa sąyu, te tigi wali me peda sąyao, te dolali naga sela sąyao.  
\v 57 Tialima, nosali te ugwa me kau tigi wali dolali nai ma pedalubaso da, teda te ugwa aga ayago ma kau wali me te isiba ulao, te mu dela silimainao,” wali.  
\v 58 “Tialima, agai te ugwa me kau wali ąį telabo sogo, te oiyabe tiwai nai menia sobaso da, teda agai si sogo ąį tedelama, te ugwa eno gedude wiegi yai mu pedelaibao,” wali.   
\p
\v 59 “Te tobage naigo te gasa tobage nai dolo bomai po elaluali, te ugwa ma te name ugwa augwa te wiegi yai hobigo nigali, ma te sipsip nisigo nigali, te tigidali nai augwa te kau waligo nigali nai. Te bomai pode te nai dabe te eno gedude wiegi yai yali, ma wiegi yai isąwani te bomai po wai dao,” wali.   
\c 14  
\s1 Te oiyabe gasi sia sabo side wiegi yai pedalubo kolesaga po  
\p
\v 1 Te Genuai Bidigo Mosesbolo te tiwai po wai,  
\v 2 “Te mena bidide oiyabe gasi elalubaso, te sę yabo bomai po e dao. Te aga gasi silama, te aga eno gedude wiegi yai pedelainogo ebaso da, teda augwaligo te prisba tede po wagi pao. \x * \xo 14:2 \xt Mat 8:4; Mak 1:44; Luk 5:14; 17:14\x*  
\v 3 Tialima, pris te we bidi bidibo pesage tagalama, buluba solama, te oiyabe gasi sai bidi tedali bidibo madiba peyu, tama te aga tigi bugagia osola suao. Te oiyabe gasi mu silai baso da,  
\v 4 teda prisgo augwalibolo olama, te eno gedude wiegi yai ba si bidibadi sesao,” wali, “te ni sida dwasianu dage sobadi, te mama yai dila pai hobi me sesao, te ni hisop nologo me selasa asao,” wai dao.  
\v 5 “Te prisgo augwaliba walama, te tǫgo nigai sospen selama, te dwasianu wę asobo madi te ąį tulama sesao. Tialima, nosali augwaligo te ba si wali bago me deli selama, te tǫgo nigai sospen ugwadu tolaluama, te ela munama, te kaneme sospen seneba dulaibao.  
\v 6 Te prisgo gasa ba me ni sida dage, te mama yai hobi string me, ni hisop me, te selama, te kaneme yai ąįba munama, te ugwaba polo ma sao.  
\v 7 Tama elama, agai te kaneme dwasianu te nogo a naga olama, te me badu nogo si wagi soabode te eno gedude dwagi yai pedelabo bidi tigiba sąsągą bilao. Tama prisgo agabolo te tiwai po walao, ‘Megi da nage God gedude wiegi yai pedelalio.’ Tama prisgo te bidibo ba selama, te buluba solama, te aga bola pomainogo yaibao.  
\v 8 Te bidi aga wiegi yai pedelainogo eyu da, te aga ugwa ąį tedelama, te tobolu nisi togolama, te aga tigi me te aga ąį pauwao. Agai tama tibaso da, teda aga eno gedude wiegi yai pedelaibao. Tama aga te bidibo pesageba pagameo, tiali goli aga ugwa bede bulu, badu bidibadi a naga me si sogo usu nama te usu dao.  
\v 9 Te nogo a naga si wabo side te aga tobolu nisi me penani nisi tigidali ma togwao, te gedu nisi me, te aga tigide gasa tigi nisi elalubo tigidali mu poayao. Te aga ugwa me ąį telayu, te aga me ąį pauwao, teda aga eno gedude wiegi yai magi meda meni yai pedelaibao,” wali.   
\p
\v 10 “Te 8 wabo side agai te sipsip omai wai si selama, te sipsip kibu so me deli kibu be deli yai sobadi yao. Augwali te dwai keni kenigo me dolisąwai wiegi yai mu sao. Tama agai te plaua sęgę kilogram sela yali wiegi yai sao, agai te oliv wel dali taluali, te wit ofa ulubo ofa tiwai eyu, te oliv kap wel si me sao,” wali.  
\v 11 “Tama agai te kibu sipsip dabe te plaua nai me eno sel Ugwa Beba sela pao, te pris me deligo aga wiegi yai pedalumainogo tau saibao. Tialima, prisgo te bidi te aga ofa yabo nai dabe dali te ena Genuai Bidi eno sel Ugwa Be sunumiba selasa pao,” wai dao.  
\v 12 “Megi da prisgo te sipsip sigo te me deli selama, agai te oliv wel dali te dwai są yali isilibo ofa tiwai yao. Hasia bolo agai te nai dabe nogogo tulama, te eno gedude hogayu, iba eda yao,” po wai.  
\v 13 “Tama nosali prisgo te sipsip wai te pesagede elao, augwaligo te sęgę sela sąyu, te bulmakau dabe elama, ofa ebo pesage, te isigo tigidali dela silimainu ofa ebo digi dao. Prisgo tama tiao, magi baso meni, te dwai sę silimainu ebo ofa tiwai te sęgę sela sąbo ofa tiwai ebao. Te ena dolo mu ebo sę ena God, eno te sipsip mi te pris dabebolo mawai dao.  
\v 14 Nosali prisgo te sipsipgo kaneme dwasianu selama, te meda sela sąnama, wiegi yai pedelainu ebo bidigo dolo nogo olo badu muao, te dolo nogo a danide me mubadi, te bidigo dolo sągą a danide me muao,” wali.  
\v 15 “Tama prisgo te oliv wel dwasianu selama, te aga pobase nogoba gelama, te wel nogo diąyao.  
\v 16 Tama agai dolo nogo dani me deli te welba munama, te wel a naga si sogo sąsągą bilibaso da, te ena Genuai Bidi, eno aga sueibao.  
\v 17 Nosali prisgo te aga nogode elaluali dwasianu wel selama, te wiegi yai pedalumainu ebo bidigo dolo nogo badu oloba muao, te genuai a nogo danide elalubo kanemeba me muyu, te bidigo a sągą danide elalubo me mubadi yao.  
\v 18 Te wel me badu prisgo nogode elalubo agai te bidi toboluba muao. Te tebo kolesagade agai te bidi eno gedude wiegi yai pedalubo sę ilibo dao,” wali.   
\p
\v 19 “Te silama da, teda prisgo te sęgę sela sąbo ofa ebaso da, te bidi eno gedude wiegi yai mu pedelaibao. Te nosali agai te isigo tigidali mu dela silibo ofa yao,” te po wai dao.  
\v 20 “Tama agai te ofa ebo kibu dali te wit ulubo ofa dali te altade yao. Te kolesagade prisgo te bidi sęgę sela sąbo ofa ebao, tama te bidi eno gedude meda meniama, wiegi yai mu pedelai dao,” te po wai dao.   
\p
\v 21 “Te bidi magi nai mu meniama, te aga wiegi yai pedelabo ofa yabo nai dabe abelabo mone meni baso da, teda agai te omai sipsip wai deli naga sesao. Te kibu sipsipgo te aga dwai sę yali silimainu yaibao. Te nosali prisgo nogogo tolaluyu, te iba eda eno gedude tama tiao. Tama te bidigo te kilogram deli yai wiegi yai plaua somainao, tama te oliv wel dali taluama te wit ulubo ofa yao. Te agai oliv wel kap si sesemainao,” wali.  
\v 22 “Tama agai augwaligo te nogi hi wabo tobage ba si sesao, te ofa yabo, magi baso meni, agai te sipsip hauwa abelabo usu ebeo. Te ba hi me deligo te dwai sęgę sela sąyu, te me deligo te isiba ulama tigidali dela silibo ofa yaibao,” te po wai dao.  
\v 23 “Te augwaligo aga te wiegi yai pedalumainu sę ebo side, te 8 wabo side, agai te kibu doado bage te prisba sela peyu, te Genuai Bidi eno sel Ugwa Be sunumiba selasa asobaso da, teda eno sueibao,” wali.  
\v 24 “Tialima, prisgo te sipsip me oliv wel saibao, te nogogo tulama, te eno gedude iba eda yao.  
\v 25 Tama prisgo te sipsip wai elama, te dwai sę yali silimainogo ofa yaibao. Agai te ofa ebo nai kaneme dwasianu selama, te wiegi yai pedelainu ebo bidigo dolo nogo olo badu pilao, te agai dolo nogo a danide me pilibadi, te bidigo dolo sągą a danide me pilao,” wai dao.  
\v 26 “Te prisgo oliv wel dwasianu selama, te aga pobase nogode gealuama, te wel nogo tuwao.  
\v 27 Te agai dolo nogo dani te welba munama, te wel nogo a naga si sogo sąsągą pobaso da, te ena Genuai Bidi, eno sueibao.  
\v 28 Nosali prisgo te dwasianu wel ąį te hasia agai te dwasianu kaneme muani pesagede muao. Agai te bidigo dolo olo badu mumainao, te dolo a nogo danide me muyu, te agai dolo sągą a danide me muao.  
\v 29 Te nogode elalubo wel tigidali te prisgo te wiegi yai pedelainu ebo bidigo tobolude pilao, te kolesagade prisgo te bidigo sęgę sela sąbo ofa ebao.  
\v 30 Tama prisgo te ba hi si te bidigo sela asali te salio, te ofa yabo dao.  
\v 31 Agai te ba higo te sęgę sela sąbo ofa tiwai eyu, te gasa bago te isiba tigidali ulama dabo ofa yaibao. Agai te wit ulubo ofa dali te ba hi si dali ofa yao. Te kolesagade prisgo te bidigo sęgę sela sąbo sę eyu, eno gedude wiegi yai pedalubo sę tama yaibao.  
\v 32 Te bomai po te oiyabe gasi yali bidigo gasi sia somainu ebo bomai po, tiali goli te aga mone sǫą pobaso, te agai te bomai pode sesao wali nai tigidali sela pabo usu isąbaso, te aga eno gedude wiegi yai emainogo te tiwai ofa ebo dao,” wali.   
\s1 Te be dolobo nai bede pedalubo po  
\p
\v 33 Te Genuai Bidigo Moses de Aron dali sibolo te tiwai po wali,  
\v 34 “Nosali dage te tǫ kantri Kenanba bidigi paibao, te eno dageba mawainogo homu ebo bulu, te dagego tǫ mu sesemane elalueibao. Tama dage te Kenan tǫba sabolama bidibo sogo, te eno nai me deli te oiyabe pedalubo tiwai elama, te dagego masigigo nigai be mebade pedelama, te be dolobo sę ilaibao.  
\v 35 Te be aga ayago suali, te tama sę elalubaso, aga te prisba pelama, agabolo te tiwai po walao, ‘Eno suali, te oiyabe tiwai nai me deli eno beba pedelama, te eno be dolainu homu ebao.’  
\v 36 Prisgo te tiwai po odobaso da, teda agai te be page bidibolo walama, te be tomode doado bage tigidali selama, te buluba sela soao. Te bidigo tama tisąwani da, te pris aselama, agabolo te tiwai po walaibao, ‘Te bede tigidali doado bage te God gedude dwalio olama, te nagebolo habu selaibao.’ Tialima, bidigo te bede doado bage tigidali buluba sela soai digi yai baso da, teda pris te be tomoba pelama, te be sumainogo yao,” po wai.  
\v 37 “Agai te be paiyali daga masigi dabe dolobo nai te bugagia osola suao. Te agai suali madi te ni yabe tiwai nai ma mama yai naigo te amamogo tubo tiwai te be daga paiyali masigi dabede dwasianu dodogo paibaso, tama agai homugo te naigo te be daga dodogo pelama, tomoba mu paibaso da,  
\v 38 teda pris te buluba dią solama, te po walao, ‘Te bede bidisąma, habu selama, te nogo a naga olama, me badu nogo si sogo olo elalumainao.’  
\v 39 Te 7 wabo side pris aselama, te be ma suagasao. Te nai te be paiyali daga masigi dabede genuai mu pedelaibaso da,  
\v 40 teda prisgo augwalibolo walama, te dwai nai elalubo masigi dabe sela sąnama, te taun bulu, badu sąyao te eno gedude dwai nai sela sąbo pesageba sela sąyao.  
\v 41 Augwaligo tama tilama da, teda augwaligo te masigi mesegelali simen tigidali te be tomode elalubo sela sąyao. Tama augwaligo te taun buluba sela solama, te dwai meda yai nai sąbo pesageba naga sąyao.  
\v 42 Tama augwaligo te gesi masigi dabe selama, te poloba elaluali masigi hasegelama, te be daga masigi te pedai badu ma nigao. Te augwaligo gesi simen selama, te be daga nigali tigidali ma haluao,” wali.   
\p
\v 43 “Te oiyabe tiwai nai te be obo dagade ma pedaliyu, te sę yali tudi, badu te nai ma pedalubaso da,  
\v 44 teda pris te beba ma pelama, bugagia suao. Te nai genuai pedelama, te be dolabo homu ebaso da, teda te be eno gedude dwali dao.  
\v 45 Tibaso, te be augwaligo hųgilama, te tigidali masigi me, ni me, simen me, sela sąyao. Tama augwa te taun bulu badu sela soao, te augwa eno gedude meda yai doado bage sela sąbo pesageba pelama, mugi pao,” te po wai dao.   
\p
\v 46 “Te be habu selali elalubadi, te be tomoba bidi me deli pobaso da, te bidi eno gedude meda pedelama, aga te tiwai bididubadi te giliga iba dega sigulaibao,” wali.  
\v 47 “Te bidi me deli te tomode godege piali ma nai tubaso da, teda aga ugwa ąį telayao,” wali.   
\p
\v 48 “Tialima, prisgo te be suagasobo sogo da, teda agai suali, te be wiegi yai elaluyu, te nai ma pedalisąbaso, te agai te tiwai po augwaliba walao, ‘Te be Godigo gedude wiegi yai elalubao.’ Magi baso meni, te oiyabe tiwai naigo te be dolali, te munu ma elalubeo.  
\v 49 Te be eno gedude wiegi yai pedalubo kolesaga e tiwai elalubao. Prisgo te ba hi si sobadi, te ni sida dwasianu dagenu siyu, te mama hobi string dagenu sobadi, te ni hisop nologo sobadi yao.  
\v 50 Tama augwaligo te tǫgo nigai sospen selama, te dwasianu asobo ąįba pelama, te ąį tulama sesao. Te prisgo ba hi me deli selama, te sospen ugwadu tolaluyu elama, te kaneme sospenba dulaibao,” wali.  
\v 51 “Nosali agai te ni sida dagenu me siyu, te ni hisop nologo me siyu, te mama hobi string me sobadi, te bidibo ba hi selama, te kaneme elalubo ąįba munama, te polo ma kega sao. Tama agai te kaneme elalubo ąį te a naga si sogo te beba sągąyao.  
\v 52 Prisgo tama tilama, te be eno gedude wiegi yai pedelaibao.  
\v 53 Tama agai te bidibo ba bidibadi te taun buluba te kala elalubo pesage buluba bola pomainogo tagala palama, bola pomainu yao. Te kolesaga te bego dwai meda elalubo sia selama, te be eno gedude wiegi yai ma pedalubo tiwai ebo dao,” wali.   
\p
\v 54-56 “Te bomai pode te tama po wali, te oiyabe gasi yai we bidi, me te habo keni keni yai we bidi, me te keni ebo me dili keni ebo, me te masalu tigide pedalubo po me walio, te ugwa doado bage, me be dolobo te bomai pode te po wali.  
\v 57 Te bomai pogo te dagebolo ola mayu, te mena nai te meda yai nai, ma te mena nai te wiegi yai eno gedude pedalubo, te bomai pogo page ola mabo po dao,” te po wai dao.   
\c 15  
\s1 Te tigide te tobage meda meba pedalubo bomai po  
\p
\v 1 Te Genuai Bidigo Moses de Aron sibolo te tiwai po walali,  
\v 2 “Nago te Israel bidi dabebolo walao, te bidi me deligo gasade keni dį pedalubaso, te keni dįgo aga eno gedude meda ilibao.  
\v 3 Te keni dį ebogo te ąį bole tiwai gasade pedalubaso, ma te naigo bomogo te poi tabo sunumi pania sobaso da, teda te bidi eno gedude meda elalubao.  
\v 4 E tiwai elalubao. Te dugulalubo bet sai me pibo bet sai me tigidali te meda pedelaibao. Te aga dugabo sia sai tigidali me te meda ela silaibao.  
\v 5-6 Mena bidigo te bidigo pibo betba nogo mubaso, ma te bidi dugabo sia saiba dugabaso da, teda aga ugwa digi wę telayu, te aga me ąį paugi pao, tiali goli te agade meda elaludubadi te be pio mu igi paibao.  
\v 7 Te mena bidi me wego te tobage gasi elalubo bidigo tigiba nogo mubaso, te aga ugwa digi ąį telayu, te aga wę me paugi pao, te meda agade elaludubadi te giliga iba dega sigulaibao.  
\v 8 Te gasi elalubo bidi agai te eno gedude wiegi yai elalubo bidi me deliba pesą sąbaso da, teda te gasa bidi me te meda pedalubao, te agai ugwa me ąį telayu, ąį me paugi pao, te meda agade elalubadi te giliga iba dega sigulaibao,” te po wai dao.  
\v 9 “Te tobage gasi elalubo bidi te hosde dugabo nai satelba dugabaso da, teda te nai meda pedalubao.  
\v 10 Te bidi me deligo te bidi dugayali nai satelba nogo muani da, aga me meda ilama, te tiwai me bididubadi te giliga iba dega sigulaibao. Te nai bidi me deligo sela pobaso me, nosali bidi teba dugabaso da, teda aga ugwa ąį tedelama, te ąį paugi pao, te meda agade elaludubadi te sia ge iba dega sigulaibao.  
\v 11 Te gasi elalubo bidi, te agai nogo ąį bolo telasiąma, te agai nogo gasa bidiba mubaso da, teda te gasa bidi agai ugwa ąį tedelama, te ąį paugi pao, te aga meda elaludubadi te sia ge iba dega sigulaibao,” wai dao.  
\v 12 “Te gasi elalubo bidigo agai nogo te tǫgo nigai sospenba mubaso da, teda augwaligo te sospen aluao. Te agai augwaligo te nigo nigai pou disba nogo mubaso da, teda augwaligo te pou dis bugagia ąį telayao,” wali.   
\p
\v 13 “Te bidigo gasi usu ma ebaso da, teda aga te a naga me si sogo bolo bidilama, te aga wiegi yai ma pedelaibao. Te Sarere silibaso da, teda aga ugwa ąį telayao, te pelama, ąį me deliba paugi pao, te aga eno gedude wiegi yai pedelaibao,” wali.  
\v 14 “Te 8 wabo side agai te tobage ba hi si seselama, te ena Genuai Bidi geduba dolagasao, te eno sel Ugwa Be sunumiba aselama, te ba hi si prisba magasao.  
\v 15 Tama prisgo te ba hi me deligo te sęgę sela sąbo ofa tiwai eyu, te gasa ba mego te isiba tigidali ulama dela silibo ofa yaibao. Te tebo kolesagade agai te gasi silai bidi tau selama, te bidi eno gedude wiegi yai pedelaibao,” wali.   
\p
\v 16 “Te bidi me deli piali madi aga gasade olo dali gawa gealueibaso da, teda aga meda pedelali, te aga tigi tigidali ąį pauwao, te aga meda elalubadi te giliga dega sigulaibao.  
\v 17 Te bidigo tigide ąį te ugwade tulalueibaso, ma nami ugwade, ma te bulmakau waligo nigali nai dabede tulalueibaso da, teda te nai dabe meda yaibaso te ąį telawaibao, te nai dabe meda elalubadi te giliga dega sigulaibao,” wali.  
\v 18 “Te bidigo we dali pagela pibaso da, te augwali side meda pedelaibao. Te augwali si gagali ela silama da, te augwa si ąį paugi pao, te augwali side meda elalubadi te giliga dega sigulaibao,” te po wai.   
\p
\v 19 “Te we me deli poluago elibo gasi sabo side, te aga meda pedelama elalubadi, te Sarere deliba usu naibao. Bidi ma wego te weba nogo mubaso da, teda augwaliba te meda dagana selama elalubadi, te sia ge iba dega sigulaibao,” wali.  
\v 20 “Te we pibo bet sai me tigidali te aga dugabo sai me tigidali, te tigidali meda ela silaibao,” wai dao.  
\v 21-22 “Mena bidi ma wego te betba nogo muani, ma aga duabo naiba me nogo mubaso da, te meda agade pedelaibao. Te aga ugwa digi ąį telagi pelama, ąį me paugi pao, te meda agade elalubadi sia ge iba dega sigulaibao.  
\v 23 Te pibo ugwa sitbet, ma mena nai te we dulaluali te tagalao, te bidigo ma wego teba nogo mubaso da, te meda agade elalubadi, te be pio mu igi paibao.  
\v 24 Te bidi me deligo te we poluago elai gasi elalubo sogo te we dali pagela pibaso da, teda bidigo te wego meda selama, te bidi meda elalubadi Sarere deli bidaibao. Te mena bet te bidi pibo madi me meda elalueibao,” wali.   
\p
\v 25 “Te we aga tigide kaneme elalu, te meba sogoba usu niyu, te poluago elibo gasi agade isąbadi, ma te poluago elibo gasiba wadolama, te kaneme idubadi, te meba sogoba usu nubaso da, teda agade te meda elalubadi te silibo sogoba usu naibao. Te wego bulu be gasigo kolesagade te tama tebo dao.  
\v 26 Te aga mena betde piali ma mena sia saide dulaluali me, te tagalao, te bet doado bage meda pedalubo dao,” te po wai.  
\v 27 “Te bidi ma we me deligo te naiba nogo mubaso da, te meda agade pedelali. Te aga ugwa ąį tedelama, te ąį paugi pao. Te meda agade elalubadi te sia ge dega sigulaibao.  
\v 28 Te wego tigide pedelali kaneme wa pabo si da, te aga Sarere deli bidilama, te aga eno gedude meda meniama, wiegi yai pedalubo dao.  
\v 29 Te a naga me sela wabo side agai te tobage ba hi si selama, te eno sel Ugwa Be sunumiba sela pelama, te prisba mao.  
\v 30 Tama prisgo te ba higo te sęgę sela sąbo ofa tiwai me eyu, te gasa me bago te isiba tigidali ulama, dela silibo ofa emainao. Te kolesagade agai te we eno gedude wiegi yai pedalumainu usu ilibo dao,” wai dao.   
\p
\v 31 “Dage sigo bomai po te Israel dabeba menama, te augwali eno gedude meda elalubo sogo dua dao, bugagia koneao. Eno sel Ugwa Be augwali tomode elalubao, te augwali meda elalubaso da, teda te be tomoba augwali me pelamuo. Tiyu, augwaligo te sel Ugwa Be meda ilidalio. Te sel Ugwa Be augwaligo meda ilibaso da, teda eno augwali ela mueibao,” wali.   
\p
\v 32 Te bomai pode te tama po wali, te bidigo gasade tedela yai kaneme pedalubo, me odolali gasade ąį gealubo, me te naigo aga meda ilibao.  
\v 33 Tama te we tigide poluago elibo gasi ebo po me, te bidi ma we tigide te aga naide tedela kaneme pedalubaso, te bidigo aga we dali pibo po te me te meda elalubao po wai dao.   
\c 16  
\ms1 Godigo genuai bodolu muani, te Godigo te we bidi dabego sęgę sela sąwainogo  
\mr (Dąį 16)  
\s1 Hetprisgo te we bidi dabego sęgę sela sąbo ofa emainao  
\p
\v 1 Polobadu Arongo ogwa sigo te Genuai Bidiba ofa igi pali te agai augwali sibolo te ofa yabo po wasiąbadi, tibaso augwali si isalio. Te tilama, nosali Genuai Bidigo Mosesbolo te tiwai po wali,  
\v 2 “Nago naga ama Aronbolo walao, sesemane sogo aga te Tedali Gasagi Yai Mu Be Habu te genuai dąį togwali tudi badu tomoba me pelamu dao. Tialima, ena digi dąį ilibo sogo, aga tomoba pagameo. Magi baso meni, ena te pǫ me deli tomode bidama, te ena hanilagasu, te sęgę sela sąbo Dąų Wali Bomai Po Elalubo Halobage daiba pedalubo dao. Te aga olo dali te be habu tomoba pobaso da, teda aga isaibao. \x * \xo 16:2 \xt Hib 6:19\x*  
\v 3 Aron te Tedali Gasagi Yai Mu Be Habu tomoba pabo sogo, agai e tama timainao. Hasia bolo agai te sęgę sela sąbo ofa yabo ogwa bidi bulmakau omai me deli sela pao, te agai omai kibu sipsip me deli te isiba tigidali ulama, dela silabo ofa yabo te me sela pao,” wali. \x * \xo 16:3 \xt Hib 9:7\x*   
\p
\v 4 “Tama agai prisgo te tobage gasa ugwa gudaibao. Agai te bobage aiyaba tagalalubo ugwa gudama, te pęwadage trausis ugwa me muani, te ugwa nami agai haligade kukulu tiwai kekelama, te nami ugwa me deli te toboludu madi tiwai munama, kekaluao. Te tedela ugwa dabe naga muao. Ena digi te prisgo gudabo ugwa dabe dąį ilali. Tama tibaso, Aron aga ąį bolo paluama, nosali te ugwa doado bage mubaso usu dao,” wali.   
\p
\v 5 “Te Israel we bidi augwaligo te sęgę sela sąyabo meme omai si sobadi, te omai sipsip deli isiba tigidali ulabo me selama, te Aronbolo mao.  
\v 6 Tama Arongo te omai bulmakau aga digi sela asali te aga sęgę me aga we wai pulubago sęgę dali sela sąyabo ofa yainogo eyu, tama te eno geduba osogo muao,” te po wali.  
\v 7 “Nosali agai te meme omai si selama, te si selasa pelama, te ena Genuai Bidi eno sel Ugwa Be sunumiba dolagasobaso, eno sueibao,” wali.  
\v 8 “Te agai masigi si sao, me masigi deli e tiwai po elalueibao, ‘Te Genuai Bidigo da,’ te gasa masigide e tiwai po elalueibao, ‘Te Asaselgo dao.’ \f + \fr 16:8 \ft Te po page Hibru pogo kuna page konebeo. Bidi mebago homugo te Asasel te Satango nogi ma dwai haubo mobo bidigo nogi da, te homu yai. Mebago homugo te dwai haubo bidi bidibo wa pai pesage me deli da homu elama, te mebago homugo te page e tiwai elalubo homu yali, “Te gasa pedai me deliba tagala palobo pesage dao,” wali.\f* Te masigi si agai geme dualama, te deli deli guda selama, te ena Genuai Bidigo meme me deli dąį iliyu, te me deli Asasel dąį ilao,” te po wai dao.  
\v 9 “Tama Arongo enabolo te dąį ilali meme selama, te we bidi dabego sęgę sela sąbo ofa tiwai yao.  
\v 10 Tialima, agai te Asaselba dąį ilali meme me eligio. Menio. Arongo eno geduba sesao. Tama te bidi meni yai buluba agai te Asaselbolo tagala palao, tama tiyu da, te memego te we bidi augwaligo sęgę sela pabo tiwai yaibao,” wali.   
\p
\v 11 “Arongo te sęgę sela sąbo ofa yabo homu ebo sogo, agai te kolesaga wali pao. Hasia bolo agai te omai bulmakau seselama, te ela munama, te aga sęgę me aga we wai pulubago sęgę sela sąbo ofa yao,” po wali.  
\v 12-13 “Nosali agai ain sospen me deli selama, te altaba pelama, te sia dage sospenba bulama, te Tedali Gasagi Yai Mu Be Habuba selasa pao. Te wiegi yai denami ebo pauda agai nogo sigo sabua selama, te sela pelama, te sospende elalubo siaba mugi pao, te eno sueibao. Te paudago hanogo te sęgę sela sąbo pesage te Dąų Wali Bomai Po Elalubo Halobage mesega saibao. Te tiwai ebaso da, Arongo te sęgę sela sąbo pesage sugobeo. Tiyu, agai subaso, te eno aga ela muidali weyu tama tiaibao.  
\v 14 Tama agai te bulmakau kaneme me badu selama, te kaneme nogoba holama, te kaneme te sęgę sela sąbo pesage daiba ugwadu sąyao. Agai te kaneme nogo danide ma selama, te kaneme nogo a naga si sogo te Dąų Wali Bomai Po Halobage gesabidiba sąyao,” po wali.   
\p
\v 15 “Nosali agai te we bidi dabego sęgę sela sąbo ofa yabo kibu meme ela muao. Tama agai te meme kaneme te Ugwa Be Tedali Gasagi Yai Mu Be Habu tomoba sela pelama, te dwasianu me badu te sęgę sela sąbo pesageba sąyao. Te agai dwasianu meba te Dąų Wali Bomai Po Elalubo Halobage gesabidiba sąyao. Agai te bulmakau kanemego yali sę tiwai yao,” wai. \x * \xo 16:15 \xt Hib 9:12\x*  
\v 16 “Te kolesagade agai te Tedali Gasagi Yai Mu Be Habu eno gedude wiegi yai pedelaibao. Magi baso meni, te Israel we bidigo hagoma eyu, eno po sela sąnama, te dwai sę hauwa eyu, te kolesagago te Tedali Gasagi Yai Mu Be Habu meda ilibo dao. Eno sel Ugwa Be te Israel dabe tomode elaluyu, te augwaligo dwai kolesagago te sel Ugwa Be eno gedude meda pedalubao. Tibaso, Arongo te kaneme dwasianu selama, te tobage sę te sel Ugwa Beba me yao, te agai te Tedali Gasagi Yai Mu Be Habude yali sę tiwai elama, te sel Ugwa Be wiegi yai ma pedelaibao.  
\v 17 Arongo aga sęgę dali, aga we wai pulubago sęgę dali sela sąbo ofa eyu, te Israel we bidi tigidaligo sęgę sela sąbo ofa yao. Aga te Tedali Gasagi Yai Mu Be Habu mu tomoba pabo sogo, te bidi me deli eno sel Ugwa Be tomoba me pisąbadi, te Aron buluba ma dią soaboba usu naibao. Te habu mu dao,” wali.  
\v 18-19 “Nosali agai te Tedali Gasagi Yai Mu Be Habu tagalama, buluba dią solama, te isiba tigidali domainu ulubo ofa ebo altaba pao. Te Israel dabego dwai sęgo te alta eno gedude meda ilali. Tibaso, Arongo te alta wiegi yai pedalumainu ilao. Agai te bulmakau kaneme dwasianu siyu, te meme kaneme siyu elama, te alta bogo me si me si elalubo madi te kom me si me side pibili pao. Tama agai nogo dani te kanemeba munama, te kaneme a naga me si sogo te altaba sąyao. Te kolesagade agai te alta wiegi yai pedalumainu ilaibao, tama te alta eno sę delide naga elalumainu sula tagalao,” te po wai dao.   
\s1 Memego te Israel augwaligo sęgę selasa pabo po  
\p
\v 20 Genuai Bidigo po e tiwai ma wali, “Te Arongo te Tedali Gasagi Yai Mu Be Habude yali sę tigidali badi, te sel Ugwa Be badu yali sę tigidali mu sia somainu elama, te alta wiegi yai pedalumainu yai baso da, teda agai te meme, te Asaselba sa muani meme, te enabolo selasa asao,” po wali.  
\v 21 “Te meme tede bidibadi te Arongo nogo si te meme toboluba munama, Arongo te Israel we bidi dabego yali dwai sę, me dwai kolesaga tigidali, me hagoma kolesaga hanilama pusao. Te kolesagade agai te sęgę tigidali te meme toboluba mueibao. Nosali te meme agai te sa muani bidi me deliba menama, tama te bidigo te tǫ wa pai buluba te meme kibu sela pelama, teba tagaligi paibao.  
\v 22 Tama te memego te Israel dabe augwaligo sęgę tigidali tolama, te bidi meni yai habu me deliba tagaligi pabo dao,” te po wai dao.   
\p
\v 23 “Te sę silama da, teda Aron eno sel Ugwa Be tomoba pelama, tama aga te Tedali Gasagi Yai Mu Be Habu tomoba painogo gudali ugwa dabe peda mugi pao. Tama agai te ugwa te sel Ugwa Be tomode elalumainogo yao. \x * \xo 16:23 \xt Ese 44:19\x*  
\v 24 Tama aga te sel Ugwa Be obo tomoba ąį paugi pao, tama aga te sel Ugwa Be tomoba ma pelama, te ugwa gudama, te hetprisgo gudubo ugwa au yao. Nosali aga te buluba teda solama, te isigo tigidali dela silibo ofa si yao, me ofa agade eyu, me te tigidali we bidide yao. Te ofago aga sęgę sela sąbo ofa eyu, te we bidi augwaligo sęgę sela sąbo ofa me yao,” te po wali.  
\v 25 “Te agai augwaligo sęgę sela sąbo ofa yali kibu ili te siaba ulao.  
\v 26 Te meme kibu te tǫ wa pai buluba sela pelama, tagaligi pali bidi, agai ugwa ąį tedelama, te aga tigi bolo ąį pauwao, tama nosali aga te bidibo pesage tomoba ma asomainao,” te po wai dao.  
\v 27 “Tama augwaligo te sęgę sela sąyabo ofa yabo kibu bulmakau me meme sesao, te hasia bolo prisgo te kibu sigo kaneme te Tedali Gasagi Yai Mu Be Habu tomoba sela pelama, te aga sęgę sela sąyu, te we bidi dabego sęgę me sela sąmainu tama tiali. Augwaligo te kibu si te bidibo pesage bulu badu sela pelama, te isiba ulama, te sia keli naga elalumainogo yao. Te bidi me deligo te kibu wali me mi me haliga di te isiba ulama, te mu deli silimainogo yaibao. \x * \xo 16:27 \xt Hib 13:11\x*  
\v 28 Nosali te bidigo ugwa ąį tedelama, te aga tigi me ąį paluama, te aga bidibo pesageba ma asomainao,” wai dao.   
\s1 Te Godigo te we bidi augwaligo sęgę sela sąbo genuai side yabo kolesaga po  
\p
\v 29 Genuai Bidigo po e tiwai ma wali, “Dagego te bomai po sesemane sogo wali piduao. Te polua a naga olama, me badu nogo si wabo polua, te dei 10de, dage tigidali Israel dali te gasa hani dage dali bidibo we bidi, dage te nai tubo habu selama, te wiegi yai pemene ebo sę me habu selao, tama dagego sę tagalama, te dage toma tuao.  
\v 30 Magi baso meni, te side naga te prisgo dagego sęgę sela sąbo ofa yaibao, tama dage eno gedude wiegi yai ma pedelaibao.  
\v 31 Te side te eno genuai side dolo dao. Te dagego tigidali pemene ebo sę te side habu selama, te dage toma nao. Dagego sę munu me elamuo. Te habu mu dao. Te bomai po dagego sesemane sogo wali piduao.  
\v 32 Mena prisgo dage te duga ayago yali sę sabo dąį ilali bidi, agai naga te we bidi dabego sęgę sela sąbo sę emainu yao. Hasia bolo hetprisgo gudubo tedela ugwa te aga tigide muao.  
\v 33 Te nosali agai te sęgę sela sąbo ofa ebaso da, teda te Tedali Gasagi Yai Mu Be Habu tigidali badu, me sel Ugwa Be me, alta me, te pris dabe me, te Israel we bidi tigidali, te eno gedude wiegi yai ma pedalumainogo yaibao,” te po wai dao.  
\v 34 “Augwaligo te bomai po sesemane sesemane sogo wali pidubadi geao. Hetprisgo te tobage ofa te tigidali kibu bede deli sogo yao, te Israel we bidigo sęgę sela sąyu tiao, te augwali eno gedude wiegi yai pedalumainu ebao,” wali.  
\p Genuai Bidigo te po Mosesbolo mobaso, te po tigidali Mosesgo wali pai dao. \x * \xo 16:34 \xt Prs 23:26-32; Nam 29:7-11\x*   
\c 17  
\ms1 Godigo te Israel dabego wali pabo wiegi yai kolesaga po pusali  
\mr (Dąį 17–27)  
\s1 Te ofa dabe ebo pesage deli naga elalubao  
\p
\v 1 Te Genuai Bidigo Mosesbolo po walama,  
\v 2 te Aronbolo po weyu, agai te agai ogwa dabeba me te Israel we bidi tigidaliba walomainogo yali. Genuai Bidigo te tiwai po wai, “Eno te bomai po dabe dageba mobao.  
\v 3 Te dage Israel bidigo te kibu tuabo homu ebaso, dagego te kau, me sipsip, me meme me deli selama, te bidibo pesage tomode me bulu badu ela mubaso da,  
\v 4 teda dagego eno sel Ugwa Be sunumiba selasa aselama, te enabolo ofa tiwai mao, te nosali duga selama, tuagameo. Te dagego kibu elama, te kaneme gelama, te dagego enaba ofa me isąbaso da, teda dagego te bidi ela muani tiwai ebaso, te dagego dwai sę eno gedude elalueibao. Tibaso, dage eno hani tomode bidibo sela sąwaibao.  
\v 5 Te po page e tiwai dao. Polobadu dage Israel dabego te kibu elama, te bidibo pesage bulu, badu ofa yali, tiali goli megi da, dagego te kibu elibaso, te prisba selasa pao, te eno sel Ugwa Be sunumiba pelama, te ena dali deli haliga pedalubo ofa yao.  
\v 6 Te prisgo te kibugo kaneme selama, te sel Ugwa Be sunumi pąde elalubo te alta bogo baduba sąwaibao. Tama agai te ofa yabo kibu ili te ofa eyu, altaba ulubaso, te ena Genuai Bidi, eno denami odama, te eno homu godolo eyu, tede eno bugai haliga ebo dao.  
\v 7 Dage Israelgo te bulu haubo bidi dabeba kibu elama, ofa ebo sę munu ma elamuo. \f + \fr 17:7 \ft Bidi mebago homugo te wali po te tobage bulu kauwa bidi te kibu meme tonobo ąǫ ebo dao wali.\f* Dagego te tiwai elama, te dagego ena tagaliyu, te tibo godiba homu kęą pali. Sesemane sogo dage hanigo te eno sel Ugwa Beba te kibu ofa tiwai siyu idu geao,” wali.   
\p
\v 8-9 “Te nago te tiwai po augwaliba walao, te dage Israel bidi me deli, ma te dage dali bidibo gasa hani bidi me deligo, te isiba tigidali ulubo ofa me te agai gasa tobage ofa yabo homu ebaso da, teda agai te kibu eno sel Ugwa Beba sela aselama, ofa yao. Te meni baso da, te ena Genuai Bidi, eno hani we bidide aga sela sąyu, gudulaibao,” wali.   
\s1 Kanemego naga sęgę sela sąbao, tibaso te kaneme tubo habu selali  
\p
\v 10 “Dagego te kibu elibo sogo, dagego aga dogoni togolama, te kaneme tigidali aiyaba pomainao. Te dage Israel bidi me deli, ma dage dali bidibo gasa hanigo te kibu mi kaneme elalubadi tubaso da, teda ena Genuai Bidi eno agaba boi bidi eyu, te aga eno hani we bidide sela sąwaibao. \x * \xo 17:10 \xt Gag 9:4; Prs 7:26-27; 19:26; Bom 12:16, 23; 15:23\x*  
\v 11 Kanemego tigidali bidiba bidibo ula mayu, te kibuba mobao. Tibaso, eno te po dagebolo obao. Prisgo te ofa ebo kaneme altaba gelibao, te dage we bidigo sęgę dabe sela sąyu, kanemego te bidibo ula page elalubao, te kaneme deligo naga dage we bidi dabego sęgę sela sąbo dao. \x * \xo 17:11 \xt Hib 9:22\x*  
\v 12 Tama tibaso, eno dage Israel dabebolo obao, te dage me deligo, ma te dage dali bidibo gasa hani bidi me deligo te kibu mi kaneme elalubadi me tugio. Te habu mu dao,” wai dao.   
\p
\v 13 “Te dage Israel bidi me deligo, ma te gasa hani bidi me deligo aga te hasa gegegi pelama, agai te uni meme me deli, ma ba me deli, te eno dagebolo tugio wasiąwai nai enai baso da, teda agai te naigo kaneme gelama, te kaneme tǫgo haluao.  
\v 14 Magi baso meni, te tigidali bidigo bidibo ula me te hasago bidibo ula te aga kanemede naga elalubao. Te pagede naga eno dage Israel we bidibolo waliyu, dagego te kibu mi kaneme elalubadi tugio po obao. Bidigo te kibu mi kaneme elalubadi tubaso da, teda aga te eno we bidi hanide sela sąwaibao,” te po wai dao.   
\p
\v 15 “Tialima, te kibu me deli olo dali isali, me uni hasago te hasa ela muai, nosali dage hanide digi te bidi ma we me deligo te hasa mi tubaso da, teda aga eno gedude meda pedalubao. Tialima, aga ugwa ąį tedelama, te aga digi me ąį paugi pao, te meda agade elalubadi giliga dega sigulaibao. Giliga iba dega sigulai baso da, teda aga dwagi yai ma pedalubo dao.  
\v 16 Te agai tigi me ugwa ąį telayu, pauyu isąbaso, te sę page agade digi elalubao, te aga yali kolesagade te sęgę aga tolobo dao,” te po wai.   
\c 18  
\s1 Bidi me we augwa deli kanemede we sabo kolesaga ebo habu selali  
\p
\v 1 Genuai Bidigo Mosesbolo walama,  
\v 2 te agai po Israel dabebolo omainogo yali. Agai te tiwai po wali, “Ena Genuai Bidi, ena dagego God dao.  
\v 3 Te mu tama, dage Isipde bidaluyu, tialima dagego te Isip dabego kolesaga wali pigio. Te megi eno dage Kenan tǫba odasa painogo ebao, tialima dagego te Kenan dabego kolesaga wali pelamuo. Dagego te augwaligo tama tiao wabo po dabe wali me pelamo dao.  
\v 4 Odao, dagego eno bomai po deli naga wali pao, tama eno dagebolo yao po wabo sę deli naga tigidali yao. Ena Genuai Bidi, ena duga Godgo eno te po dagebolo mobao.  
\v 5 Dagego te tigidali kolesaga me tigidali bomai po eno godolo yabo sę me eno dagebolo mobao. Te dagego tama sę eyu da, te dagego bidibo ula elalueibao. Ena Genuai Bidi, ena duga God, eno te po obao,” wali. \x * \xo 18:5 \xt Neh 9:29; Ese 18:9; 20:11-13; Luk 10:28; Rom 10:5; Gal 3:12\x*   
\p
\v 6 “Ena Genuai Bidi, eno te po obao. Nago te naga deli hanide we me deli sabo homu elama, nago aga gedu eyu, aga dali gagali me igio. Te tobage kolesaga habu mu selibao.  
\v 7 Nago naga ida mu dali gagali ebo sę igio. Nago te tiwai sę ebaso da, te nago naga aya hale ilibo sę mu ebao. Te naga ame nani ida mu dali gagali ebo sę habu mu selibao,” te po wali.  
\v 8 “Nago naga ayago gasa we dabe, te nago paba dabe, te dali gagali ebo sę me elamuo. Te nago tama tibaso da, teda nago naga ayabolo dwai hale mu ilibo sę ebo dao. \x * \xo 18:8 \xt Prs 20:11; Bom 22:30; 27:20\x*  
\v 9 Nago naga abe mu dali dobo sę ebo gagali eyu, ma gasa ayago wegi me ida dali te dobo sę ebo gagali me igio. Te idago ayago bede ame naibaso, ma gasa bede ame naibaso, tagalao, te naga abe dao, te nago aga dali dobo gagali ebo sę me elamo dao. \x * \xo 18:9 \xt Prs 20:17; Bom 27:22\x*  
\v 10 Nago naga wegigo wegi, ma naga ogwago wegi dali te dobo sę ebo gagali me igio. Te kolesagade nage hale dwai mu ilaibao.  
\v 11 Nago naga pabago wegi dali te penani sę ebo gagali igio. Te naga ayago wai dao, tibaso te nago abe elalubao. Te aga nago we da olama sabo sę te habu mu dao.  
\v 12 Nago te naga ayago abe dali penani igio, magi baso meni, te ayago deli kaneme dao.  
\v 13 Nago te naga idago ama dali dwai penani sę ebo kolesaga igio, magi baso meni, te naga idago deli kaneme elalubao.  
\v 14 Nago te naga aya sabi bidigo we dali penani sę me elamuo, magi baso meni, te we te nago ida sabi we elalubao. Te naga aga dali pibaso da, teda nago te nago aya sabi bidi hale dwai mu ilibo sę ebo dao. \x * \xo 18:14 \xt Prs 20:19-20\x*  
\v 15 Nago te naga ogwago we dali penani sę igio. Magi baso meni, te nago we menio, teyu te nago aga dali penani ebo sę habu mu dao. \x * \xo 18:15 \xt Prs 20:12\x*  
\v 16 Nago naga amago we dali penani igio. Te nago aga dali pibaso da, teda nago ama hale dwai mu ilibo sę ebo dao. \x * \xo 18:16 \xt Prs 20:21\x*  
\v 17 Te nago we me deli sali, te wego gasa bidide wegi ame naibaso da, teda nago te wai ma sigio, ma agai wegi me sigio. Te nago wego ogwago wegi me, te nago me somainu elamo dao,” wali.  
\p “Magi baso meni, te we dabe te nago wego deli kaneme elalubao. Te nago augwaliba dwai sę ebaso da, teda nago te hale genuai ebo kolesaga ebao. \x * \xo 18:17 \xt Prs 20:14; Bom 27:23\x*  
\v 18 Nago naga wego ama nago sigio, te nago we bidibadi sigio. Tiyu, nago augwa si wado yabo sę ilabuo. Te kolesaga dolo ebeo,” te po wai dao.   
\p
\v 19 “Nago te we poluago elai gasi sai elalubadi te penani igio, magi baso meni, te sogo aga wiegi yai me elalubeo. \x * \xo 18:19 \xt Prs 20:18\x*  
\v 20 Nago naga abagigo we dali penani me igio. Nago tama tibaso da, teda nage eno gedude meda pedelaibao,” wali. \x * \xo 18:20 \xt Prs 20:10\x*   
\p
\v 21 “Odao, ena duga Genuai Bidi eno dagebolo te duga wai dabe elama, te isiba ulama, te tibo god Molekba ofa ebo habu selama, te po eno dageba bomai po obao. Tiyu, dagego eno nogi aiyaba elaluidalio, te dagego God dao,” wali. \x * \xo 18:21 \xt Prs 20:1-5\x*   
\p
\v 22 “Te bidi duga hasigo te gasa bidi tągio. Te dwai kolesaga mu ebao, te eno homude godolo me egobeo. \x * \xo 18:22 \xt Prs 20:13\x*  
\v 23 Bidi dagego te so hasa kibu sibi me te tągio, te we dagego te hasa sibigo dage tąmainogo sula tagaligio. Te kolesagade dage eno gedude meda pedelaibao. Te tebo kolesaga dwai nai mu dao,” wai dao. \x * \xo 18:23 \xt Sai 22:19; Prs 20:15-16; Bom 27:21\x*   
\p
\v 24 “Dagego te dwai kolesaga dabe me elamuo. Te sę dagego eyu da, teda dage eno gedude meda pedelaibao. Te ena Genuai Bidigo po odisąwai hani bidi dabe te Kenan tǫde bidaluyu, augwaligo te tobage dwai kolesaga dabe elama, te augwali meda mu pedelalio. Te megi eno augwali ela gudulubo sę ebao, te dagego augwaligo tǫ somainogo ebo dao.  
\v 25 Te augwali dwai kolesagade te tǫ digi meda pedelali. Te augwaligo tǫba eno dwai dene mabo sę elama, tama te tǫgo te Genuai Bidigo po odisąwai hani bage te bugubo tiwai eyu, te augwali Kenan tǫde munu ma bidalugobeo.  
\v 26 Tialima, dage da, dagego eno dagebolo te mani bomai po tigidali wali pao. Dage te Israel we bidi dali, te gasa hani dage dali bidalubo hanigo dali, te Genuai Bidigo po odisąbo bidi dabego ebo kolesaga tiwai igio, magi baso meni, te kolesaga dwai kugumini mu ebaso, te eno godolo homu menio.  
\v 27 Dagego koneani, te Godigo po odisąwai hani dabe te tǫde polasa bidali, augwaligo te kugumini yai kolesaga yali. Tibaso, te tǫ eno gedude meda yai dao.  
\v 28 Tiyu, dagego me tama tidalio. Te tama sę dagego eyu da, teda te tǫgo digi dage sela sąwaibao, te ena Genuai Bidigo po odisąwai hani dabe polasa bidali bage sela sąwani tiwai gilama dage me tiabuo.  
\v 29 Te dage Israel mena bidi ma wego te tobage dwai sę ebaso da, teda eno aga te eno hani we bidi tomode bidali sela sąwaibao,” te po wali.   
\p
\v 30 Genuai Bidigo te tama po wai, “Te eno dagebolo mabo po te dagego wali pao. Dagego te tǫde polasa bidali hani bidi dabego yali dwai kugumini yai kolesaga wali me pelamuo. Te dagego tama tibaso da, tiyu dage eno gedude meda pedelabuo. Odao, ena Genuai Bidi, ena duga God, eno te po wai dao,” wali.   
\c 19  
\s1 Te Godigo godolo yabo tobage kolesaga dabe Israel dabe wali pao wali  
\p
\v 1 Genuai Bidigo Mosesbolo te po walama,  
\v 2 te Israel we bidibolo te tiwai po omainogo yali, “Dage wiegi yai mu tedali mu bidiyu, te eno godolo yabo wiegi yai doloba pai kolesaga wali pao. Magi baso meni, ena God, dagego Genuai Bidi, ena tedali wiegi yai mu elalu, eno kolesaga wiegi yai doloba pai mu elalubo dao. \x * \xo 19:2 \xt Prs 11:44-45; 1 Pi 1:16\x*  
\v 3 Dage deli deligo duga ida aya dologode bidu, te augwaligo po wali pao. Dagego te olo toma nabo sogo, te Sabat side, sę me igio, dage olo toma naga tuyu, bidao. Ena Genuai Bidi, ena duga God, eno te po wai dao,” wali. \x * \xo 19:3 \xt Sai 20:8, 12; Bom 5:12, 16\x*   
\p
\v 4 “Dagego te tibo godiba lotu weyu, ena me tagaligio. Te dagego olo dali te olo nai aingo te lotu wabo tibo god nigilama, teba lotu me wagio. Te habu mu dao. Ena Genuai Bidi, ena dagego God, eno te po wai dao.” \x * \xo 19:4 \xt Sai 20:23; 34:17; Prs 26:1; Bom 17:2-5\x*   
\p
\v 5 “Te dagego ena dali deli haliga pedelabo ofa ebo sogo, dagego eno dagebolo mani bomai po wali pelama, te ofa yao. Dagego te tama ebaso da, teda eno dagego ofa ebo godolo yaibao.  
\v 6 Dagego te ofa yali kibu mi te kibu elali side ma te nosali side tuiyąo. Te kibu mi munalubadi te sela sogo wabo siba sabalobaso da, teda dagego te isiba ulama, te keli naga elalumainao.  
\v 7 Te bidi me deligo te sela wabo side elaluali kibu mi tubaso da, teda te kolesaga eno gedude dwalio, tama eno te ebo ofa godolo homu me egobeo,” wali.  
\v 8 “Mena bidigo te sela wali sogoba usu nani munaluali kibu mi tuali bidi da, te ena mani nai digi agai dwai ilibao, te aga yali sę dagede sęgę elalubao. Tama tialima, eno we bidi hanide aga sela sąwaibao,” wali.   
\p
\v 9 “Te dagego duga gide nai inawai tau yai togobo sogo, dagego te gi sesege homu badu elalubo nai togolama sigio. Te gi tomode nai dagego sabo sogo, te nai meba ela soabaso da, teda dage ma geasa peyu te nai ma sigio. Tede tama elalumainogo sula tagalao.  
\v 10 Te dagego te wain tau inayani sela silibo sogo, dage te wain giba si sogo ma pelama, te hasia susiąma tagalali nedu du wain ma sigi pigio. Te tǫba tudulaluai munalubo wain du dagego me sigio. Dagego te nai dabe tagalama elalu, te magi nai meni yai bidi dabego, ma te gasa hani dage dali bidibo, te hani augwali somainao. Ena Genuai Bidi, ena duga Godigo, eno te tiwai po obao,” wai dao. \x * \xo 19:10 \xt Prs 23:22; Bom 24:19-22\x*   
\p
\v 11 “Dagego gasa bidigo nai dabe wi me sigio, te dagego gasa bidiba tibo po wagio, te agai nai anoma elama sainogo tigio. Te dagego gasa bidiba tibo po ola magio. \x * \xo 19:11 \xt Sai 20:15, 16; Bom 5:19, 20\x*  
\v 12 Te dagego bidi me deliba bomai po dąų walu, ena nogide te po dąų walai baso da, teda dagego te bomai po olo dali dąų walama, aga tibo po ola magio. Dagego duga te dąų wali bomai po wali pisąbaso da, teda dagego eno nogi aiyaba elalubao. Ena Genuai Bidigo, eno te po wai dao. \x * \xo 19:12 \xt Sai 20:7; Bom 5:11; Mat 5:33\x*  
\v 13 Dagego gasa bidi me doloyu, te agai nai dabe wi me sigio. Te dagego bidi me deliba sę mawai baso da, teda dagego agai sę te ela silibo side te abelebo mone mao, te sogo piode. Dagego te mone tolalubadi be huliama te kigamude me magio,” wai. \x * \xo 19:13 \xt Bom 24:14-15\x*  
\v 14 “Dagego te olo degai we bidi augwaliba te po dwai me wagio, ‘Godigo dage dolabo sę elalubao.’ Dagego te gedu widai bage habela muabo bono gaga te sunumide me mugio. Dage ena Godide wi yao, duga Genuai Bidi dao,” wali. \x * \xo 19:14 \xt Bom 27:18\x*   
\p
\v 15 “Te dagego po tų odobo si da, teda dagego te po tųde doloba pai kolesaga naga yao. Te dagego po bugagia dodolao. Dagego te magi nai meni yai bidi dabe tau siyu, te augwaligo po tų ebode ugwaba ela holomainogo elamuo. Me ma, dage te nogi yai bidide wi eyu, te augwali tau selama, te po tųde ela holomainogo elamo dao. \x * \xo 19:15 \xt Sai 23:6-8; Bom 16:19\x*  
\v 16 Duga abagi dabeba kisa sigi pelama biliyu, te gasa bidiba posobo po wagio. Te augwaligo bidi me deligo te genuai sęgę sai madi po tų ilibaso, te dagego aga po tųde tau sabo homu eyu da, teda dagego tau sao. Tiyu, dage pedauwali panialubaso, te po tųgo aga ela muao po wabuo. Eno homugo dagego tama tiwai yao, magi baso meni, ena duga Genuai Bidi dao,” wai dao.   
\p
\v 17 “Te nago abagi me deligo nageba dobo sę yai baso da, teda nago homude aga dali sesemane sogo wado po udugio. Nago aga dali po dodolobaso da, te po isaibao. Tiyu, nago me agai yali kolesagade homu kone paludu, te nago me dwai sęgę me deli sabuo. \x * \xo 19:17 \xt Mat 18:13\x*  
\v 18 Te naga abagi me deligo nageba dwai sę ebo te nago wei me ponogio, te nago sesemane sogo aga dali wado po me udugio. Nago gasa we bidi dabe godolo mu yao, te naga digi naga godolo ebo tiwai yao. Ena Genuai Bidigo eno te po obao.” \x * \xo 19:18 \xt Mat 5:43; 19:19; 22:39; Mak 12:31; Luk 10:27; Rom 13:9; Gal 5:14; Jer 2:8\x*   
\p
\v 19 “Dagego eno bomai po dabe wali piyąo. Dagego te kibu hasa sibi si augwa hasi omai sę elama, te wai ame nomainogo sula tagaligio. Tama dagego te tobage nai wai hani si te gi delide buligio. Tama dagego augwaligo te olo hobigo hobolai nami ugwa dali te sipsip nisigo nigai hobigo hobolai ugwa te me gudugio. Te kolesaga ebo habu dao,” wai dao. \x * \xo 19:19 \xt Bom 22:9-11\x*   
\p
\v 20 “Te bidi me deligo aga olo sę ebo we te agai gasa bidiba maiabo po dąų wali, tialima te gasa bidigo abelesąwai. Tama te we tonalubo bidigo te we dali dobo sę gagali yai baso da, teda dagego augwali si te po tų kotba odasa piyąo. Tiali goli, te dagego augwali si ela mugio, magi baso meni, te we te tonalubo bidigo olo sę ebo we dao.  
\v 21 Tama te tonalubo bidigo te sipsip kibu omai me deli selama, te eno sel Ugwa Be sunumiba pao. Agai te sipsip ena Genuai Bidiba ofa elama, te dwai sę dodoliyu, te agade elalubo sęgę silimainao.  
\v 22 Tama prisgo te bidigo sęgę sela sąbo ofa yao. Te eno sulama, eno te sęgę sela sąwaibao,” wali.   
\p
\v 23 “Dage te Kenan tǫba pabo sogo dagego te tobage du walobo ni du dabe bulubaso da, teda dagego te kibu be selade te bulali ni du tusiąma te habu selao.  
\v 24 Te kibu be me si me si wabode, dagego te ni du wai tigidali te ena Genuai Bidiba mao, te dagego enaba wiegi yai pemene eyu puba hwi wabo ola mabo tiwai ebao.  
\v 25 Tialima, te a naga wabo kibu bede te ni du walobo nai duga tuao. Eno te po dagego wali pobaso da, teda dagego ni du wai hauwa umabo walaibao. Odao, ena God, dagego Genuai Bidi, eno te po obao.”   
\p
\v 26 “Dagego te kaneme elalubo kibu mi tugio. Te dagego haniani pobi wabo sę me te kebele aubo sę me igio. \x * \xo 19:26 \xt Gag 9:4; Prs 7:26-27; 17:10-14; Bom 12:16, 23; 15:23; 18:10\x*  
\v 27 Te dagego tobolu nisi te dagego olo pąde togogimio, te dagego penani nisi togolama pęwadage iligimio.  
\v 28 Te dagego tigide todogo pelama masalu ebo sę iligio. Te bidi isaide, ma we isaide homu dene eyu, duga tigi togobo sę igio. Ena Genuai Bidigo eno dagebolo te kolesaga dabe ebo habu mu selibao,” wali. \x * \xo 19:28 \xt Prs 21:5; Bom 14:1\x*   
\p
\v 29 “Dagego te Godigo po odisąwai bidi dabego ebo kolesaga tiwai eyu, te duga wegi dabe te penanide sǫbo we dabe tiwai pedalumainu elamuo. Tiyu, dagego te tiwai sę eyu, te ena tagaluyu, te dage te tibo godide gone tuą peyu, haniani dwai sę yabuo. Te dagego bulu tigidalide te dwai kolesaga pągąna pidalio.” \x * \xo 19:29 \xt Bom 23:17\x*   
\p
\v 30 “Dagego te olo toma neyu bidibo sogo, te Sabat side, sę munu me igio. Dagego te we bidi dabe aselama, te enaba lotu po wagasobo sel Ugwa Be godolo mu yao. Ena Genuai Bidi, eno dagebolo wai dao,” wali. \x * \xo 19:30 \xt Prs 26:2\x*   
\p
\v 31 “Te dagego wiegi yai homu kolesaga sabo homu ebaso da, teda pelama, te isali bidi dabego noma bidi dali po mibo bidi dabeba me hanalugi pigio, te noma bidide homu kolesaga selama, dageba momainogo igio. Te dagego tama sę ebaso da, te dage eno gedude meda pedelaibao. Ena Genuai Bidi, ena duga God, eno te po wai dao.” \x * \xo 19:31 \xt Bom 18:11; 1 Sml 28:3; 2 Kin 23:4; Ais 8:19\x*   
\p
\v 32 “Dage te monu dabe dologoba pelama, augwaligo po wali peyu, te augwaliba wiegi yai sę yao. Te dage ena dologoba aselama bidao, te dagego God dao. Ena Genuai Bidi, eno te po wai dao,” wali.   
\p
\v 33 “Dagego te gasa hani bidi te dagego tǫde bidibo hani bidi augwaliba dwai sę elamo dao.  
\v 34 Dagego wiegi yai kolesaga naga augwaliba yao, te duga deli hani te Israel dabeba ebo kolesaga tiwai yao. Te dagego augwali godolo homu mu eyu, te duga digi duga godolo ebo tiwai yao. Dage te Isipde polobadu bidali, tama te tiyu bidigo aga page bulu tagalama, te gasa bulu tǫ kantride bidibo kolesaga dagego koneao. Tama tiyu, dagego te gasa hani dage dali bidibo bage bugagia tonaluao. Ena Genuai Bidi, ena duga God, eno te po wai dao.” \x * \xo 19:34 \xt Sai 22:21; Bom 24:17-18; 27:19\x*   
\p
\v 35 “Te gasa bidigo abelabo nai dabe usu selama, dagalama, te nedebo sogo da, teda dagego aga tibo po ola magobeo.  
\v 36 Menio. Dagego dolo usu selama, dolo dodolama, te nai dabe dolo naga nedao. Ena Genuai Bidi, ena dagego God, te eno dage Isipde selama, te dage odasa asai dao. \x * \xo 19:36 \xt Bom 25:13-16; Prs 20:10; Ese 45:10\x*  
\v 37 Tama tibaso, eno dagebolo mani bomai po tigidali wali pao. Ena Genuai Bidigo, eno te po dagebolo wai dao,” te po wai dao.   
\c 20  
\s1 Godigo te po sela sąbo we bidi dabeba dwai dene mabo sę yaibao  
\p
\v 1 Te Genuai Bidigo Mosesbolo te tiwai po walali,  
\v 2 “Nago Israel we bidi augwaliba te tiwai po wao, te dage Israel me deli, ma dage dali bidibo gasa hani me deli, agai aga wai te tibo god Molekbolo ofa tiwai mobaso da, teda dagego te bidi ela muao. Tigidali we bidigo agaba masigi sąnama, te aga isibo siba usu nao.  
\v 3 Te bidigo wai te Molekba mabo kolesagade, te eno sel Ugwa Be meda ilama, te eno genuai nogi aiyaba mu elalubo sę ebao. Tibaso da, eno te bidiba boi bidi elama, te aga eno we bidi hani tomode bidibo sela sąwaibao.  
\v 4 Tiali goli, te we bidi augwaligo te bidigo kolesaga suali, te augwaligo homude olo nai me tiwai da homu elama, te augwaligo aga me ela musiąbaso da,  
\v 5 teda ena digi eno agaba boi bidi eyu, te aga deli hani bageba me te ena tudiba munama, te Molekba lotu wabo we bidi tigidaliba te tiwai yaibao. Te augwali eno we bidi hanide sela sąwaibao,” wali.   
\p
\v 6 “Te bidi me deli te kebele aubo bidiba pelama, te isali bidi noma bidi dali po mibo sę igi pabo sę ebo bidi yai baso da, teda te bidigo ena tagalama, te Godigo po odisąwai hanigo kolesaga wali pobao. Tibaso, eno agaba boi bidi eyu, te aga eno hani we bidide sela sąwaibao.  
\v 7 Dage te tedali gasagi yai bidu tama sesemane sogo te eno godolo yabo wiegi yai doloba pai kolesagade bilao. Ena Genuai Bidi, ena duga God, eno te wai dao.  
\v 8 Dagego eno bomai po tigidali wali pao, magi baso meni, ena Genuai Bidigo dage eno we bidi wiegi yai pedalumainu sa muai dao,” wali.   
\p
\v 9 “Te bidi me deligo me, o te we me deligo me, te aga ida ayabolo te dwai da te tiwai po weyu, ‘Godigo nage dolomainao,’ obaso da, teda dagego te bidi ma te we ela muao. Bidi ma wego te tobage po wali da, te aga yali sę dagede aga isimainao,” wali. \x * \xo 20:9 \xt Sai 21:17; Mat 15:4; Mak 7:10\x*   
\p
\v 10 “Te bidi me deligo abagi me deligo we penani yai baso da, teda dagego te bidi me te we dali si ela muao. \x * \xo 20:10 \xt Sai 20:14; Prs 18:20; Bom 5:18\x*  
\v 11 Te bidigo te aga ayago we me deli dali penani sę yai baso da, te bidigo aga aya dolobao. Tialima, augwaligo te bidi dali te we dali si ela muao. Augwali sigo dwai sę yali sęgę elalubao, tialima augwali si isimainao. \x * \xo 20:11 \xt Prs 18:8; Bom 22:30; 27:20\x*  
\v 12 Te bidi me deligo aga ogwago we dali penani ebaso da, teda dagego augwali si ela muao. Augwa si deli kanemego te penani yali, tialima augwali sigo dobo sę yali sęgę elalubaso, te augwali si isimainao. \x * \xo 20:12 \xt Prs 18:15\x*  
\v 13 Te bidi mego gasa bidi me penani ebaso, augwali sigo dwai sę genuai mu yalio. Tialima, dagego augwali si ela muao. Augwa si yali sę dagede naga augwa si isibao. \x * \xo 20:13 \xt Prs 18:22\x*  
\v 14 Te bidi me deligo te we me we aga ida dali sabo si da, te dagego augwali sela ela munama, augwa tigi isiba ulao, magi baso meni, augwaligo dwai sę genuai mu yali, tama dagego te tobage kolesaga dage tomode ebo we me bidi te sula tagaligio. \x * \xo 20:14 \xt Prs 18:17; Bom 27:23\x*  
\v 15 Te bidi me deligo te kibu sibi me penani ebo bidi, dagego te bidi ela muyu, te kibu me ela muao.  
\v 16 Te we me deli te hasa sibiba pelama, te hasa sibigo aga penani emainogo ebaso da, dagego te we dali, te hasa dali, ela muao. Augwa si yali sęgęde augwali si isimainao,” wai dao. \x * \xo 20:16 \xt Sai 22:19; Prs 18:23; Bom 27:21\x*   
\p
\v 17 “Bidi me deligo aga abe mu ma sali, ma gasa aya ma idago wegi saibaso, te bidi me wego dwai kolesaga mu yalio. Tialima, tigidali we bidigo gedude dagego augwali siba wado po olama, te augwali si sela sąyu, te augwali si dage dali munu ma bidigio. Te bidi aga abe dali penani yali, tialima aga yali kolesagade sęgę tolomainao. \x * \xo 20:17 \xt Prs 18:9; Bom 27:22\x*  
\v 18 Te bidi me deligo aga we te tigide bulu be gasi sai elalubadi te tąbaso da, teda augwali sigo eno gedude dwai meda yai kolesaga mu yali. Tama dagego augwali si eno we bidi hani tomode sela sąyao,” wali. \x * \xo 20:18 \xt Prs 18:19\x*   
\p
\v 19 “Te bidi me deligo aga ida sabi we dali, ma aga ayago abe dali penani ebaso, te aga deli kanemede te sęgę sobao, te augwa si yali dwai kolesagade sęgę tolomainao.  
\v 20 Te bidi mego aga aya sabi bidigo we dali penani yali da, te bidigo aga aya sabi bidi hale dwai mu ilibao. Tama te bidi me te we augwa si yali sęde sęgę tolao. Te bidigo sobaso da, teda agai te wai dabe ame nabo usu egobeo, me te aya sabi bidigo wego te wai dabe me ame nogobeo. \x * \xo 20:20 \xt Prs 18:12-14\x*  
\v 21 Te bidi mego aga amago we anoma elama sali da, te agai dwai kolesaga mu Genuai Bidi eno gedude ebao, te aga ama hale ilibao. Tibaso, te bidigo me te wego wai me ame nogobeo,” te po wai dao. \x * \xo 20:21 \xt Prs 18:16\x*   
\p
\v 22 “Dagego eno bomai po tigidali me eno po tigidali wali pao. Megi eno dage odasa pabo, te Kenan tǫ te agai dage me bugulisąma, te dage bugagia bidaibao.”   
\p
\v 23 “Te ena Genuai Bidigo po odisąma te Kenan tǫde bidibo bidi dabego kolesaga dagego wali me pigio. Augwaligo te dwai sę yai baso, te eno augwali godolo homu mu ebeo. Te megi da, eno augwali te tǫ kantride sela sąnama, te dagego te tǫ sagameo.  
\v 24 Eno te po dagebolo wai dao, te tǫ da wiegi yai mu, te ili hauwa elalubao, te nai hauwa tede holaibao. Te eno dagebolo menama, te dagego tǫ mu pedelaibao. Ena Genuai Bidi, ena dagego God, te eno dage gasa hani tomode sali, te dage enaduba deligo we bidi naga bidimainogo yai dao.  
\v 25 Tama tialima, dagego te mena kibu hasa ba sibi me bugagia dagaliyu, te wiegi yai tuabo me tusiąma habu sabo me dagalao. Hasa me ba te eno gedude wiegi yai isąwani, te dagego habu sao. Eno te tobage nai dabe te wiegi yai isąwai nai po dagebolo wali, te hasa me ba te dwasianu nai me, tialima te dagego tubaso da, teda dage eno gedude meda mu pedelaibao.  
\v 26 Dagego te dwai kolesaga dabe tagalama, te wiegi yai tedali mu bidiyu, te eno wiegi yai doloba pai kolesaga naga wali pao, magi baso meni, ena digi ena tedali wiegi yai elaluyu, te eno kolesaga tigidali te wiegi yai doloba pai mu elalubao. Te ena Genuai Bidi, eno dage te gasa hani bage tomode sali, te dage ena bage naga elalubao.  
\v 27 Mena bidigo ma wego te isali bidigo noma bidi dali po minama, te augwalide homu kolesaga sabo we bidi yai baso da, aga isimainao. Dagego agaba masigi sąnama, te aga ela muao. Aga yali sę dagede aga isimainao,” te po wai dao.   
\c 21  
\s1 Te pris dabego Godigo godolo yabo kolesaga wali pao  
\p
\v 1 Te Genuai Bidigo Mosesbolo weyu, te Arongo hani pris augwaliba te po mao wali. Agai te tiwai po wali, “Te dage deli kaneme hani me deli isibaso da, teda diligi peyu, dagego te isali bidide homu dene ebo kolesaga wali pigimio. Te kolesagade dage eno gedude meda ilibo sę pedalubo dao.  
\v 2 Tialima, te duga deli kaneme mu isai, te ida, ma aya, ma ogwa, me wegi ma ama,  
\v 3 te abenu mu bidigo sisąwai te aya dali bede bidibadi, te tiwai deli kaneme dabe isibaso da, teda dagego te homu dene ebo kolesagade meda pedalidali homu ebo tagalao, dagego te homu dene ebo kolesaga yagameo.  
\v 4 Tialima, te prisgo wego hanide, te aga wąį me deli isibaso da, teda prisgo te homu dene ebo kolesaga wali me pelamuo. Teyu, aga eno gedude meda pedalidalio,” wali.   
\p
\v 5 “Te dage prisgo homu dene ebo kolesaga wali pabo sogo da, teda dagego tobolu me badu tobolu nisi tigidali togogio, tama te penane nisi togolama pęwadage iligio, tama te homu dene ebo kolesagade duga tigi olo madi togogimio. \x * \xo 21:5 \xt Prs 19:27-28; Bom 14:1\x*  
\v 6 Magi baso meni, te dage pris dabe enaba kęą pai bidi mu bidimainogo sa muai. Ena dagego God, te dagego eno nogi aiyaba me elalugio. Dagego enaba ofa ebo sę dabe elalubao, te ofa dabe te dagego enaba nai mabo tiwai ebao. Tibaso, dagego te dwai kolesaga tigidali tudiba munama, te ena dali naga bilao.  
\v 7 Dage pris eno bidi naga elalubao. Tialima, dagego te penanide bilibo we me sigio, te gasa bidigo penani yai we, ma aga bidigo sela sąwai we me selamo dao.  
\v 8 Te we bidi augwaligo homude dage pris te eno bidi hani dolo da homu emainao, magi baso meni, dagego te ofa ebo nai dabe enabolo mabo dao. Ena digi ena Genuai Bidi. Ena tedali wiegi yai elaluyu, ena te wiegi yai doloba pai kolesaga naga ebo God bidibao. Eno ena we bidi dabe tedali wiegi yai pedalumainu yaibao, te augwaligo wiegi yai doloba pai kolesaga naga wali pabo dao,” wai dao.   
\p
\v 9 “Te dage prisgo wegi me deligo te penani ebo we pedelama, te meda yai kolesaga wali pabo si da, agai aga aya hale mu ilibao. Tibaso, te we bidi dabego aga ela munama, tama aga tigi isiba ulao,” wali.   
\p
\v 10 “Hetprisgo aga sęde te nogi yai namba sali, te augwaligo aga toboluba wel gelebo sogo, te augwaligo aga te pris sę emainogo sa muai. Tama aga deli hani bage me deli isibaso, te homu dene ebo kolesaga wali pabo sogo, agai tobolu nisi olo elalumainogo igio, aga tobolu yaga bugagia sao. Te agai aga ugwa me pisągio.  
\v 11 Hetpris te isali bidi munalubo beba me pigio. Tiyu, aga eno gedude meda pedelabuo. Te aga aya ida isibaso, tagalao, agai aga digi te homu dene ebo sogo te meda iligio.  
\v 12 Tama aga te eno Ugwa Be tagalama, te bidi tigi munalubo beba pelamuo. Agai tama sę eyu da, agai eno sel Ugwa Be meda pedalubo sę ilaibao. Dagego aga wel pilali, te eno dagebolo mani welgo te aga hetpris pedalumainu sa muai dao, tama tialima aga te isai bidi tigi munalubo beba pigio. Ena Genuai Bidigo eno te po wai dao.  
\v 13 Hetprisgo te bidi dali me pisąwai we sobaso usu dao.  
\v 14 Agai te we, bidi me isiyu taga pai we me sigio, ma we aga bidigo sela sąwai we sigio. Agai te sunumide penani sę ela bilai we, ma we, gasa bidigo penani yai we me sigio. Te tama we dabe augwalide habu sali. Agai te bidi dali me pagela pisąwai we sao, tama agai we te pris augwa hanide naga sao,” te po wai dao.  
\v 15 “Te agai eno te po wali pisąbaso da, teda agai wai dabe eno gedude meda pedelaibao. Ena Genuai Bidi, eno aga ena da olama, sa muani, tama eno aga te hetpris sęba muai dao,” wali.   
\p
\v 16 Genuai Bidigo Mosesbolo ma wali,  
\v 17 “Nago Aronba te tiwai po wao, te bidi me deli nago hanide pedalubaso, ma nosali te aga tigi dwasianu dolai baso, te bidigo enabolo mabo nai ofa me elamo dao.  
\v 18 Tigidali bidi augwali tigi dwasianu dolai baso, augwaligo enaba ofa me elamuo. Eno te tiwai tobage pris bidi dabede po obao, te gedu widai bidi dabe, ma sągą dwai bidi, ma gesabidi dwai bidi, ma te idago aga ame nani sogo te nogo sągą pęwadage elama gagea paibaso,  
\v 19 ma bidi sągą ma nogo dolali,  
\v 20 ma bidi tudi sugąsi bidi, ma pęwadage bidi mu yai baso, ma gedu dwai bidi, ma tigi dolali bidi yai baso, ma bidi aga domo dolai bidi, te tama tiwai bidi dabego pris sę eyu, enaba ofa nai me magio.  
\v 21 Awe, te nago hanide bidai bidi me deli, te aga tigi dwasianu dolai elalubaso, agai te we bidigo mabo te tobage ofa dabe enaba me elamuo. Te habu mu dao.  
\v 22 Tialima, dagego enaba te ofa ebo kibu me gasa nai ofa ebo dabe te agai tumainao. Eno dage prisbolo menama tumainogo ebo ofa nai dabe te agai me sela tumainao.  
\v 23 Tiali goli, aga te Tedali Gasagi Yai Mu Be Habu genuai ugwa munalubo be habu pąba me pigio, aga te alta pageba me pelamuo. Tiyu, te wiegi yai nai dabe agai eno gedude meda ilidalio. Magi baso meni, ena digi ena Genuai Bidi, tama eno te nai dabe dąį eyu, sa muani, ena sę digi emainogo yali.” Genuai Bidigo te tama po wai dao.   
\p
\v 24 Tama Mosesgo te tigidali po Aronbolo weyu, te aga ogwa dabeba me walio, te Israel we bidi tigidaliba me te po wai dao.   
\c 22  
\s1 Te Godigo ofa dabe digi dao  
\p
\v 1 Genuai Bidigo Mosesbolo te tiwai po wali,  
\v 2 “Te Aron dali, aga ogwa dabeba dali, te tama po walao. Bugagia kone palao, te Israel we bidi dabego ofa dabe da, te ena nai mu dao. Tialima, dagego te ofa dabe bugagia tonaluao. Te meni baso da, teda dagego eno genuai nogi aiyaba muyu dolaibao. Ena Genuai Bidigo eno te po obao.  
\v 3 Te dage pris hanide bidi me deli te eno gedude meda pedalubaso da, teda aga te Israel dabego enabolo mabo ofa ebo nai pąba pabo habu mu selibao. Aga te pąba pali da, teda eno aga sela sąyu, te aga pris sę munu ma egobeo. Dagego te bomai po sesemane sesemane sogo wali piduao. Ena Genuai Bidigo, eno te po wai dao.”   
\p
\v 4-5 “Te dage pris hani bidi me deli te oiyabe gasi elaluyu, ma aga tigide te bomai keni elama, te keni dį tigide pedalubaso da, teda aga eno gedude meda pedelama, te enaba ofa ebo nai dabe tusąbadi, te aga usu ma ebo sogoba usu nao. Te tama kolesagade aga meda pedelai baso, te ofa ebo nai dabe me agai tulamuo, te isai bidi tigide elaluali nai agai me diąwai baso, ma agai gasade gawa ąį pedalubaso, ma agai te wiegi yai isąwai meda yai hasaba nogo mueibaso, ma agai eno gedude meda elalubo bidiba kisa sigi paibaso da, teda te tiwai bidigo eno ofa nai me tulamo dao.  
\v 6 Mena pris te tiwai meda pedalubaso, te meda agade elalubadi te giliga dega sigulaibao. Te aga ąį bolo bugagia paluama, te augwaligo enabolo ofa mabo kibu mi dabe tuagameo. Te wę pausąbaso, te agai me tugobe dao.  
\v 7 Te giliga dega sigulai baso da, teda aga wiegi yai ma pedelali, te agai Genuai Bidi eno te ofa nai dabe tumainao, magi baso meni, te dage prisgo nai dao.  
\v 8 Agai te odolali isali kibugo mi yai baso me tulamuo, te bulu uni hasago ela muai dao, te me tugio. Te agai tubaso da, te aga eno gedude meda pedalubao. Ena Genuai Bidigo, eno te po obao.  
\v 9 Dage prisgo eno dagebolo mabo bomai po tigidali wali pao. Te dagego eno po sela sąbaso da, teda dagego dobo sę elama, te sęgę elalubaso, te eno dage ela mueibao. Ena Genuai Bidi, eno dage pris ena hani bage mu te sa muai, teyu eno te po wabo dao,” wali.   
\p
\v 10 “Bidi ma we te dage pris hanide, te augwa naga te we bidi augwaligo ena mabo ofa ebo nai tuao. Te gasa bidigo me tugio. Te pris dali osogo bidibo bidi, ma aga sę bidi, augwaligo me tugio. Te habu mu dao.  
\v 11 Tialima, pris me deligo abelali olo sę ebo bidi dabe, ma olo sę ebo we dabe, te augwali aga dali bidali, te augwa wai dabe, te aga idago te prisgo bede ame nani, te augwaligo da te prisgo sabo tobage nai dabe somainao.  
\v 12 Te pris me deligo wegi te pris sę isąbo bidigo sai baso da, teda te wego eno te ofa ebo nai dabe me tulamo dao.  
\v 13 Tialima, te wego bidi isama, te we aga olo bidibadi, ma aga bidigo sela sąnama olo bidibadi, te wai meni badi, te we aga ayago beba ma pelama, bidibadi yai baso da, teda aga te prisgo tubo nai tuao, te aga ayago tubao. Tiali goli, bidi ma we te prisgo hani isąwaigo me tugobeo. Te habu dao,” wai dao.   
\p
\v 14 “Te bidi me deli dage pris hani isąwai, te aga bugagia homu kone palisąma, te agai enabolo ofa mabo nai me badu dage tueibaso da, teda agai prisgo te nai wei ponao. Te agai a naga nai dage saibaso da, teda aga a naga me deli wei ponomainao.  
\v 15 Tialima, te pris dabego bugagia tonaluao, te olo we bidi augwaligo enaba ofa mabo nai te me tugio,” te po wai dao.  
\v 16 “Te dage prisgo te olo bidi me deligo tumainogo yali da, teda te bidigo dwai sę yali, tama agai te nai wei te pris dabeba wei ponao. Magi baso meni, ena Genuai Bidigo eno te ofa sa munama, te ena da weyu, habu selai dao.” Te po wali.   
\p
\v 17 Tama Genuai Bidigo Mosesbolo te tama po wali,  
\v 18 “Nago te po Aronba me aga ogwa dabeba menama, te Israel we bidi tigidaliba wao. Te dage Israel bidi me deli, ma te dage dali bidibo gasa hani bidi me deli, agai te isiba tigidali ulama dabo ofa me deli sela asiyu, te agai enaba dąų wali po me deli usu nainogo, ma aga homugo digi naga sela asobaso da,  
\v 19 teda agai bulmakau omai me deli, ma sipsip omai, ma meme omai ofa emainao. Tialima, dagego te keni kenigo tigi dolai kibugo ofa me elamuo. Dagego tama teyu da, eno te godolo homu me egobe dao.  
\v 20 Bugagia odao. Te dagego kibu tigi dwasianu dwai gana yaigo ofa ebaso da, teda eno godolo me egobeo. \x * \xo 22:20 \xt Bom 17:1\x*  
\v 21 Te bidi me deligo ena Genuai Bidi dali deli) haliga ebo ofa mabo sogo, te agai ena dali dąų wali po usu niyu, mabo ofa yaibaso, te tagalao, te aga homugo digi ebo ofa yaibaso da, teda agai wiegi yai bulmakau ma sipsip te keni kenigo aga tigi me dolisąwai sesao. Te agai tama tibaso da, teda eno agai ofa mabo godolo homu yaibao.  
\v 22 Dagego te gedu widai kibu, ma sągą dwai, ma tigi dolai, ma bomai keni elalubo, ma tigi gesigo togai, ma buluba yai kibu yaibaso, enabolo ofa me elamuo. Dagego te tobage tigi poąį kibu te eno altade ofa elamo dao.  
\v 23 Te dagego ofa me deli duga homugo digi ebaso da, teda dagego te kibu nogo sągą kikasi pęwadage ma gagea pai selama, te sę ebaso usu yaibao. Tialima, dagego te tobage kibu tiwai selama, te dagego enaba dąų wali bomai po me deli usu nabo ofa yainu da, te tiwai sę me elamuo. Te habu dao.  
\v 24 Te kibu domo dolai baso, ma augwaligo togali ma pedali, ma augwaligo domo diasąwai baso, dagego te tobage kibu enabolo ofa me igio. Dagego te kibu dabe te tobage kolesagade te duga tǫ kantride doligio. Te habu dao.  
\v 25 Dagego te tobage kibu dabe te gasa bulu tǫ kantride bidi nogode selama, te ofa me elamuo. Te tiwai kibu dabe eno gedude wiegi yai menio. Eno te tobage ofa homu godolo me egobeo. Mu menio,” wali.   
\p
\v 26 Te Genuai Bidigo te tiwai po Mosesbolo wali,  
\v 27 “Te bulmakau, me sipsip, me meme te wai ame nabo sogo da, teda te wai dabe aga ida dali te a naga me si sogo bidiyu bolo yao. Te nosali badu, dagego ofa ebo homu eyu da, te altaba sela pelama, ofa yagameo, eno dagego te ofa godolo homu ebo dao.  
\v 28 Tiali goli, te deli sogo naga dagego te bulmakau, ma sipsip, ma meme te augwa wai dabe elama, te ida me wai selama, te ofa igio. Te habu dao.  
\v 29 Te dagego ena Genuai Bidiba buba hwi wabo ofa me deli ebaso da, teda dagego te ofa ebo bomai po wali pao, teda eno dagego ebo ofa godolo yaibao.  
\v 30 Te be ulade naga dagego ofa eyu, dagego te ofa ebo kibu mi tuao. Te me sogo kigamu nosali tueiba olama, te dagego elalumainogo igio. Te tebo sę habu mu selibao. Ena Genuai Bidigo eno te po wai dao,” wali.   
\p
\v 31 “Odao. Dagego Genuai Bidi eno bomai po tigidali wali pao.  
\v 32 Dagego eno genuai nogi aiyaba muyu me doligio. Dage tigidali Israel we bidi te ena dologode bidao, magi baso meni, ena wiegi yai doloba pai mu elalubao. Ena digi ena Genuai Bidi, te eno dage wiegi yai doloba pai we bidi pedalumainogo ebo dao.  
\v 33 Ena dagego God bidainogo, te dage eno Isipde selama, odasa asali. Ena Genuai Bidigo, eno tama tiai dao,” wali.   
\c 23  
\s1 Lotu wabo genuai side po dabe  
\p
\v 1 Te Genuai Bidigo Mosesbolo e tama po wali,  
\v 2 “Te Israel we bidi dabebolo te genuai lotu wabo side eno augwaliba bodolu muyu dąį ilai dao po walao. Dage sisinama, e tama side lotu waiyąo.  
\v 3 Dagego sę yabo side te a naga me deli sogo elalubao. Tialima, te Sabat side da, te toma nabo side naga elalubao, te dagego sę me igio. Dage sisinama, lotu waiyąo. Te Sabat side dage menade bidali tagalao, dagego te ena Genuai Bidigo bodolu muani side da homu yao. \x * \xo 23:3 \xt Sai 20:8-10; 23:12; 31:15; 34:21; 35:2; Bom 5:12-14\x*  
\v 4 Megi da, eno dagebolo te genuai sogo dąį ilali po walainogo ebao. Te tigidali kibu bede dage te sogo sisinama lotu wao,” wali.   
\s1 Godigo te Israel dabe bugagia bidimainu sula tagalali, me bo disąwai bret tuabo genuai side homu kone palobo side po dao  
\r (Nam 28:16-25)  
\p
\v 5 Te Genuai Bidigo e tiwai po wali, “Dagego Godigo Da te Isipde Bugagia Bidimainu Sula Tagalali Genuai Side, te Pasova Side homu kone palama, dąį ilao. Te genuai side te hasia wabo polua, dei 14, tede gagalao, te giliga dega sigulubo sogo, te deli sogo bubugade usu nama bidao. \x * \xo 23:5 \xt Sai 12:1-13; Bom 16:1-2\x*  
\v 6 Te polua dei 15 wabode, te Bo Disąwai Bret Tubo Genuai Side elalubao. Tama dagego te bo disąwai yis meni yai bret tudubadi, te Sarere deliba usu nao.  
\v 7 Te Sarere hasia side dage lotu wainogo sisinao, te dagego duga sę me elamo dao.  
\v 8 Dagego ena Genuai Bidiba te kibu me nai ula mabo ofa deli deli bubugade idubadi, te Sarere deliba usu nao. Te nogo a naga me si wabo side dage ma sisinama, lotu wao, te side dagego sę munu me elamo dao,” wali. \x * \xo 23:8 \xt Sai 12:14-20; 23:15; 34:18; Bom 16:3-8\x*   
\s1 Te gide polasa ina yali tau yali nai ofa ebo po  
\p
\v 9 Te Genuai Bidigo Mosesbolo te tiwai po ma wali,  
\v 10 “Te Israel we bidi augwaliba te tiwai ma wao. Te dage eno mawainogo ebo tǫba bidigi pabo sogo, te nosali dagego duga gide te wit tau inawai sabo sogo da, teda te tigidali kibu bede te polasa duani wit selama, dagego te pris dabeba selasa pao.  
\v 11 Tama prisgo te wit duani nogode tolaluyu, te eno gedude uga eda elama, te eno dagebolo usu da waibao. Prisgo te Sabat side tudi badu nosali ofa ebaso usu dao.  
\v 12 Tama dagego te wit ofa ebo sogo, dagego te sipsip wai kibu be deli yai ofa yao, te wiegi yai mu, te keni kenigo tigi me dolisąwai ofa yao. Te sipsip te isiba tigidali ulubo ofa yao.  
\v 13 Dagego te wiegi yai plaua me badu dage sao, te aga sęgę 2 kilogram, te oliv wel dali taluama, te wit ulubo ofa yao. Te isiba tigidali ulama dabo ofa dali ofa ilao, eno te ofa ebo denami godolo yaibao. Tama dagego te lita deli wain selama, te ofa si dali ofa yao.  
\v 14 Tialima, dagego te hasia duani wit te duga God, enaba sela asisąbadi, dagego te gide sabo gesi wit tugio. Te dagego sela aselama da, teda duga tuagameo. Dagego te wit ge disąwai nai tuao, ma duga isiba uluyu yao, ma dagego plaua nigilama, te bret ulama tuao. Dagego te ofago bomai po wali peyu, te duga wąį nosali, me nosali pedalubo bage, augwaligo me wali pomainao,” wali.   
\s1 Te gide nai sabo sogo genuai pemene ebo side po  
\r (Nam 28:26-31)  
\p
\v 15 Te Genuai Bidigo po te tiwai ma wali, “Te ena Genuai Bidiba, dagego te duani wit magasobo side te nosali badu nedebo gagalobo te Sarere a naga me si dao.  
\v 16 Te 50 wabo side, te a naga olama si wali Sarere silibo si nosali badu, dagego te wit gasa gesi ofa enabolo mao. \f + \fr 23:16 \ft Te Israel dabego augwa genuai side te Grik pogo nogi eyu, Pentikos Side dao, wabo. Te Grik pode te nogi Pentikos wali, te tobage po pąde si elalubao, “Dei namba 50” wabo dao. Te tiwai po te Tpi 2:1 tede elalubo suao.\f*  
\v 17 Te we bidi wai augwali deli delide bret si seselama, enabolo te gesi wit ofa mabo tiwai yao. Dagego te sęgę kilogram si yai plaua si te bret deli deli nigabo usu selama, te yis dali taluama ulao, te Genuai Bidi, enaba te bret ofa yao. Te prisgo nogo tolaluyu, eno gedude iba eda yao.  
\v 18 Te dagego gasa nai te bret dali ofa yao. Dagego te kibu sipsip wai te kibu be deli yai a naga me si ofa yao, te ogwa bidi bulmakau me deli, te omai sipsip si sobadi te ofa yao. Dagego te kenigo aga tigi dolali kibu me sigio. Te wiegi yai kibu naga sao. Te dagego enaba te isiba tigidali domainu ulubo ofa tiwai yao, te wit me wain meba te ofa dali muao, te dagego tigidali sogo ebo tiwai yao. Te ofago wiegi yai denami ebaso, ena Genuai Bidigo, eno godolo mu ebo dao.  
\v 19 Dagego te omai kibu meme me deli selama, te sęgę sela sąbo ofa yao, te kibu be deli yai omai sipsip wai si me selama, te deli haliga pedelabo ofa yao.  
\v 20 Prisgo te polasa tau inawai witgo nigai bret me te sipsip si selama, nogode tolaluyu, iba eda eno gedude yao, te ofa tiwai ebao. Te ofa dabe te ena nai mu elalubaso, eno te pris augwaliba mawaibao.  
\v 21 Dagego te ofa ebo side dage sisinama, lotu wao. Dagego duga sę dabe te side me elamuo. Te duga wąį nǫų dabe te nosali nosali pedelama, te menade bidibaso, tigidaligo te bomai po sesemane wali pidubadi geao,” te po wai dao. \x * \xo 23:21 \xt Sai 23:16; 34:22; Bom 16:9-12\x*   
\p
\v 22 “Te dagego duga gide te wit tau inawani sabo sogo, dagego te gi sesege badu mu gagalama sigimio. Dagego te gi tomode nai sabo sogo, te me badu nai dagego ela soeibaso da, teda dage te si sogo ma pelama sigi pigio. Te elalumainogo elama, te nai meni yai bidi dabego me te gasa bulu bidi dage dali bidibo bidi, augwaligo te nai somainao. Ena Genuai Bidi, ena dagego Godigo, eno te tama po wai dao.” \x * \xo 23:22 \xt Prs 19:9-10; Bom 24:19-22\x*   
\s1 Biugel bu wabo genuai side po  
\r (Nam 29:1-6)  
\p
\v 23 Genuai Bidigo Mosesbolo te tiwai po wali,  
\v 24 “Te Israel we bidibolo te tiwai po walao. Te 7 polua dei 1, dage toma nao. Te duga genuai side me deli dao, te dagego bu wabo nai biugel bu olama, te dage sisinagaselama, lotu wao.  
\v 25 Tama te side dagego duga sę me elamuo. Menio. Dage te altaba pelama, enaba ofa mao,” te po wai dao.   
\s1 Godigo te we bidi augwaligo sęgę sela sąwani genuai side po  
\r (Nam 29:7-11)  
\p
\v 26 Te Genuai Bidigo Mosesbolo wali,  
\v 27 “Te 7 polua dei 10de Te We Bidi Augwaligo Sęgę Sela Sąbo Genuai Side dąį ilali. Te side dagego nai tubo me wiegi yai pemene ebo sę tigidali habu selao. Te dage lotu wainogo sisinama, te ofa me deli enaba sesao.” Te po wai dao.  
\v 28 “Te side dagego sę me igio, magi baso meni, te side prisgo te sęgę sela sąbo ofa yaibao. Prisgo te ofa ebaso, ena God, dagego Genuai Bidi, te eno dagego sęgę tigidali sela sąwaibao.  
\v 29 Bidi me deligo te side nai tuali da, te aga eno we bidi hanide sela sąwaibao.  
\v 30 Bidi me deligo te side sę ebaso da, teda ena digi ena aga ela mueibao.  
\v 31 Odao. Eno po ma obao, dagego te side sę me deli igio. Dagego sesemane sogo te bomai po wali piduao. Te dagego wąį nǫų nosali nosali pedelama, menade bidibaso me, augwaligo me wali pomainao,” te po wai dao.  
\v 32 “Dage te side bugagia toma nao. Te gagalobo side te dei 9 wabode gagalaibao, te giliga dega sigi pabo sogo, te dei 10 wabode te sia ge dega sigi paboba usu naibao. Te side usu nama tigidali, dage nai tubo me wiegi yai pemene tigidali ebo habu mu selao,” wali. \x * \xo 23:32 \xt Prs 16:29-34\x*   
\s1 Te tolu yabe bede bidibo genuai side po  
\r (Nam 29:12-40)  
\p
\v 33 Genuai Bidigo Mosesbolo walama, Israel dabeba te po mao wali.  
\v 34 Agai te tiwai po wali, “Te 7 polua 15 dei wabode, te namba 1 dei te genuai side te we bidi augwaligo te dwasianu be te ni nologo selama sę ebo side elalubao, te bede bididubadi te a naga si sogo Sarere deliba usu nama, ena homu kone palao.  
\v 35 Te Sarere hasia wabo side, dage sisinama, lotu wao, te dagego duga sę me elamo dao.  
\v 36 Dagego enaba te Sarere usu nama ofa tigidali side yao. Te 8 wabo side, dage ma sisinama, lotu weyu, te dagego ofa yao. Te dei 8 wabo side da, te lotu wabo side naga dao, te dagego sę me igio,” te po wai. \x * \xo 23:36 \xt Bom 16:13-15\x*   
\p
\v 37 “Te side dabe da te ena Genuai Bidigo dąį ilali side, te dage lotuba sisinama, ena ofa yao. Te dagego isiba tigidali ulubo ofa eyu, te wit ulubo ofa, me wain ąį gelebo, me gasa ofa me yao. Tama dagego te ofa deli deli te aga bodolu muani side dolo iyąo.  
\v 38 Dagego te tigidali side bodolu wali peyu, te enaba lotu weyu, toma nabo Sabat side tigidali me tiao. Dagego te ofa dabe eyu, te dagego enabolo gasa mabo nai me mao, te dąų yali po usu nubo ofa dabe, me te duga homugo digi enabolo mabo ofa me maiyąo,” wali.   
\p
\v 39 “Te 7 polua 15 dei wabo side, te dagego tau yali nai sela aselama nosali, dagego te nogo a naga olama. me si wabo genuai si te osogo bidabo bede bidiyu, te ena Genuai Bidiba homu kone palao. Te hasia wabo dei me dei 8 wabo side, dage toma nabo side sę tagalama, bidao.  
\v 40 Te namba wan dei wabo side dagego wiegi yai nai mu meba dagego te tubo ni dude sao. Tama dagego te ni det nologo me te yabe hauwa elalubo ni nologo me sao. Tama dage wiegi yai pemene idubadi, te nogo a naga me si wabo siba te eno gedude tama yao, Genuai Bidi, dagego God dao.  
\v 41 Tigidali kibu bede te 7 wabo poluade te dagego enaba muani genuai bodolu te 7 sogo elalueibao. Te duga wąį nǫų nosali nosali pedalubo bagego te bomai po wali pao.  
\v 42 Dage tigidali Israel we bidi te dwasianu tolu yabe bede te a naga me si sogo bidao.  
\v 43 Dagego tama tibaso da, te wąį nǫų nosali pedalubo hani dabe, augwaligo sulama koneyu, te eno dage te tǫ kantri Isipde selama, te dage odasa asali homu yaibao, tama te sogo eno dage te tobage bede bidali tiwai yali. Ena Genuai Bidi, ena duga God, eno te po wai dao,” wali. \x * \xo 23:43 \xt Sai 23:16; 34:22\x*   
\p
\v 44 Mosesgo te po odama, agai te Israel augwaliba olama, te tigidali genuai bodolu side te Godigo nogi ugwaba sao po wai dao.   
\c 24  
\s1 Te Godigo sel Ugwa Bede te lam sole dabe tonalubo kolesaga ebo po  
\r (Sai 27:20-21)  
\p
\v 1 Genuai Bidigo Mosesbolo te tiwai po wali,  
\v 2 “Te Israel tigidaliba walama. augwaligo te wiegi yai ni oliv wel te eno sel Ugwa Be tomode munalubo lamba muabo wel sesao. Te pris dagego tigidali hulide lam sole udaludaibao,” te po wai.  
\v 3 “Arongo te lam sole dabe pio ebode mu udulama. te tigidali hulide te lam ula elaludu. te sogo kigamuba usu naibao. Te lam dabe te genuai walali ugwa dąį togali bulu.badu edade elalu. te Dąų Wali Bomai Po Munalubo Halobage te Tedali Gasagi Yai Mu Be Habu tomode munalubo ena Genuai Bidi, eno sueibao. Eno te bomai po dagebolo mani, te dage me duga hani nosali pedalubo hanigo me te bomai po sesemane wali pao.  
\v 4 Arongo te ni dagede elalubo lam sole bugagia tonaluao, te bugagia tonaluyu, te lam ula sula sabuo, te augwali ula elalubo eno sueibao,” wali.   
\s1 Bret augwaligo Godiba mawai  
\p
\v 5 Genuai Bidigo Mosesbolo te po ma weyu, te tiwai wali, “Nago te sęgę 12 kilogram elalubo wiegi yai plaua selama, te plauago 12 bret nigao. Te sęgę deli deli dobolama, te bret deli deli nigao.  
\v 6 Nosali te bret dabe te tebolba muao, augwa te ni akasgo me wiegi yai golgo nigali, te Genuai Bidi ena gedude e munalueibao. Te bret nani si wasilao, te bret a naga me deli te nani deli deli wasilao. \x * \xo 24:6 \xt Sai 25:30\x*  
\v 7 Te wiegi yai denami pedalubo pauda meba dali te bret nani si dali muao, te nosali augwaligo te pauda enabolo ofa yao, te bret hasegeliyu, tama yao.  
\v 8 Te tigidali Sabatde te pris augwaligo te bret tebolba mubaso eno sueibao. Sesemane sogo te Israel augwaligo te kolesaga wali pao. Tede te po dąų wabo kontrak me deli eno augwali dali ebao.  
\v 9 Te bret te Aron dali aga hani pris dabe daligo nai elalueibao. Augwaligo te bret eno sel Ugwa Be obo tomode tuao, magi baso meni, te we bidi augwaligo enaba ofa yali nai dage dao. Te ena nai digi, te eno pris dabeba mawaibao.” Godigo te po Mosesbolo mawai dao. \x * \xo 24:9 \xt Mat 12:4; Mak 2:26; Luk 6:4\x*   
\s1 Godigo te bidigo dwai sę yali wei ponobo kolesaga po  
\p
\v 10-11 Bidi me deli bidali, aga aya Isip bidi, aga ida Israel we me deli. Ida nogi, te Selomit, Selomit te Dirigo wegi, te Dango hani. Te Selomitgo ogwa te bidibo pesagede bidiyu, te Israel bidi me deli dali hwįani. Augwa si hwįbo sę eyu, te Selomitgo ogwago te Genuai Bidigo nogide agabolo po dwai wali. Tama augwaligo aga Mosesba sela palio.  
\v 12 Tama Mosesgo aga kalabusiba munama, te Genuai Bidigo te bidiba mena sę yabo po te agabolo wabo tonaluali.   
\p
\v 13 Tialima, Genuai Bidigo Mosesbolo po walali,  
\v 14 “Te bidi selama, te bidibo pesage buluba pao. Agai enabolo po dwai po wabo odali bidi tigidali, augwaligo nogo aga toboluba muao. Augwaligo tama tebo, te we bidi augwaliba ola mayu, te bidigo dwai sę yalio, te sęgę agade elalubao. Te tigidali we bidigo agaba masigi sąnama, te aga isibo siba usu nao.  
\v 15 Nosali nago Israel augwaliba te po walao, ‘Te bidi me deligo enaba po dwai wali da, aga yali dwai sęgę elalubaso, te aga yali sęgo sęgę tolalubo dao.  
\v 16 Agai te dwai po wabo sogo ena Genuai Bidi nogi ebaso da, teda aga isimainao. Te Israel bidi mu me, te Israel tomode bidibo gasa hani dabe me, tagalao. Te bidigo ena nogi te tiwai nogi ebaso da, teda tigidali we bidigo agaba masigi sąnama, aga isiboba usu nao,’ te po wao,” wali.   
\p
\v 17 “‘Te gasa bidi ma we ela mubo bidi yai baso da, teda dagego aga me ela muao. \x * \xo 24:17 \xt Sai 21:12\x*  
\v 18 Bidigo gasa bidi mego bulmakau ela mubaso da, te agai gasa bulmakau te bidiba wei ponao. Te tobage dwai sę ebo dodolobo kolesaga e tiwai. Bidigo gasa bidigo kibu elali, agai te tobage tiwai naga agaba wei ponao.’”   
\p
\v 19 “‘Te bidi mego gasa bidigo tigi dolobaso da, teda dagego deli tigi poai sę agaba wei ponao.  
\v 20 Te agai gasa bidigo dili togai baso, dagego aga dili me togao. Te agai gasa bidigo gedu dolali, dagego agai gedu me dolao. Te agai gasa bidigo kele degai baso da, teda dagego agai kele me degao. Bidigo mena sęgo te gasa bidi dolai baso, dagego te tobage deli kolesaga naga agaba wei ponao. \x * \xo 24:20 \xt Sai 21:23-25; Bom 19:21; Mat 5:38\x*  
\v 21 Bidigo gasa bidigo kibu ela muani da, agai te bidiba deli tigi tobage naigo wei ponao. Tiali goli, bidigo gasa bidi me ela muani da, dagego te bidi aga digi ela munama, wei ponao.  
\v 22 Eno te bomai po deli dage Israelba me dage tomode bidibo gasa haniba me dąį mubao. Ena Genuai Bidi, ena dagego God dao, eno dagebolo te po wai dao,’” wali. \x * \xo 24:22 \xt Nam 15:16\x*   
\p
\v 23 Mosesgo te po dabe Israel we bidi augwaliba pusula silama da, te nosali augwaligo te Godiba po dwai wali bidi selasa, te bidibo pesage buluba odasa pali. Te augwaligo agaba masigi sąnama, aga ela muani. Te kolesaga yali te Israel augwaligo te Genuai Bidigo Mosesba mani po wali peyu yai dao.   
\c 25  
\s1 Te kibu be nogo a naga olama, me badu nogo sigo bomai po dabe  
\r (Bom 15:1-11)  
\p
\v 1 Moses te Sainai bulu dude bidibadi,  
\v 2 Genuai Bidigo agabolo te Israel augwaliba maiabo po pusali. Genuai Bidigo te tiwai po walio, “Te dagebolo eno mawainogo ebo tǫba dage bidigi pabo sogo da, teda te a naga me si wali kibu be te kibu be me delide dagego nai me bulugio. Dagego te tǫ olo elalumainogo yao. Tǫ toma nomainao, te dage Sabat side toma nabo tiwai emainao. Dagego te tiwai ebo te eno kibu be da olama, dąį eyu yao.  
\v 3 Te kibu be me sela me selade dagego te duga tǫde mena tobage nai bulao, te wain nologo dabe togolama, te gide nai sao.  
\v 4 Tiali goli, te 7 wabo kibu be me delide dagego te tǫ toma neyu, olo elalumainao. Te kibu be dagego eno kibu be da olama, sa muao. Dagego nai me bulisąma, te ni wain nologo me togolamo dao.  
\v 5 Te nai wit pedelama olo dali elalubaso da, teda dagego te nai wai me selama, nai mubo beba me sisinigio. Te ni wainde te age holobaso da, teda dagego te wain nigainogo me sigio. Tigidali sula tagalama elalumainao, magi baso meni, te kibu bede tǫ bugagia toma nomainao.  
\v 6 Te kibu bede dagego tǫde nai odolali pedelali, te tuyu naga yao. Te nai sisinibo beba sisiniyu, ma wain nigibo sę me egobeo. Dage me, olo sę ebo bidi me, olo sę ebo we me, gasa sę bidi dabe me, te dage dali bidibo gasa hani we bidi dabe, duga tuiyąo.  
\v 7 Te bulmakau, sipsip, meme dabe, te bulu uni kibu hasa dabego me tumainao,” te po wai dao. \x * \xo 25:7 \xt Sai 23:10-11\x*   
\s1 Te nai dabe wei ma begelebo kibu be  
\p
\v 8 Genuai Bidigo po ma weyu, te tiwai po wali, “Te a naga me si sogo dagego te kibu be 7 te tama nedao, te kibu be bidi sese si a naga me si me si, te 49 kibu beba usu naibao.  
\v 9 Te kibu be 49 wabo side, te 7 polua dei 10 wabo sogo, dagego bidi meba tagala palama, te duga tǫ kantri pedaiba te bu wabo nai biugel bu wagi pomainao. Te side te God eno genuai side, eno te We Bidi Augwaligo Sęgę Sela Sąyabo Side mu dao.  
\v 10 Te kibu be te 50 gagalobo, te side dagego bu wabo nai biugel bu wao, te eno kibu bede dolo ebao. Te dagego tigidali we bidi augwaliba hanilama weyu, te augwa sęgę silama, te augwa bugagia bidaibao po wao. Te kibu bede, te gasa bidigo tǫ abelali bidi dabe, augwaligo te tǫ aga aya muba, me ma tǫ aga ayago deli haniba te wei ponao. Te olo sę ebo bidi dabe me olo sę ebo we dabe bidali, augwa te sę yali tagalama, te augwa deli hani sibiba ma pelama bidao.  
\v 11 Te kibu be 50 obaso, te kibu bede da, tigidali we bidi pemene elama, bugagia bidalubo kibu be pedelaibao. Te kibu bede duga tǫde nai me bulugio, tama dagego te wit dabe togolama me sisinigio. Te dagego wain du selama, te wain ąį me nigilamo dao.  
\v 12 Magi baso meni, dagego te kibu be tigidalide ena Genuai Bidigo kibu be naga da, te homu yao. Te dagego duga tǫde olo pedalubo nai sela tuao, te tama. Dagego te gasa nai dabe me tulamo dao,” te po wai dao.   
\p
\v 13 “Te kibu bede dage bidi dabego tǫ gasa bidiba mani, dagego te tǫ duga ma sao.  
\v 14-15 Te gasa bidi dagego tǫ abelemainogo mabo sogo, dagego koneao, te nisu naga kibu bede te nai tigidali wei ma mabo, te nisu naga sogo agai te bulali nai tau yali sabo me elalubo. Agai bugagia abelemainao, te tǫde mone usu nama dolo sao.  
\v 16 Te kibu be hauwa yabo elalubaso da, teda mone ugwaba holao. Tialima, te kibu be hauwa egobe da weyu da, te mone aiya dulao, magi baso meni, agai te tǫ mu abelegobeo. Menio. Te tigidali kibu bede te tǫ agai nogode elalu, agai te tǫde sabo nai abelebo dao.  
\v 17 Dagego te abagi me deli tibo po ola magio, te tǫ abelabo monede. Menio. Dagego enade wi yao, dagego God dao, te doloba pai kolesaga naga yao. Ena Genuai Bidigo te tiwai po obao,” wali.   
\s1 Godigo agai po wali pabo we bidi augwali bugagia tonalueibao  
\p
\v 18 Genuai Bidigo po ma weyu, te tama po wai, “Dagego eno po tigidali bugagia wali peyu, eno bomai po me tigidali wali pao. Te dagego tama tibaso da, teda eno dage mawainogo ebo tǫde sesemane bugagia bidaibao.  
\v 19 Te nai hauwa te tǫde pedelama, te dagego nai hauwa sesemane sogo tudaibao. Tama dage te tǫde bugagia bidaibao.  
\v 20 Tama teyu, dagego te tiwai po waidalio, ‘Te a naga si wabo kibu bede dago te nai me bulisąma, te odolali tau yali nai naga sisinaibao,’ wagio. ‘Te tama tebo dago habu selai baso da, teda dago magi nai mu te kibu bede tueibawe?’  
\v 21 Tagalao, dage moni homu si me igio. Ena Genuai Bidi, te 6 wabo kibu bede eno te tǫ wiegi yai bugagia mu ilaibao, te dagego te nai tudubadi kibu be selaba usu naibao.  
\v 22 Te 8 wabo kibu bede dagego bulubo nai da, te kibu be a naga me delide sali nai tudubadi geaibao. Te dage nai usu elalubadi, te gesi tamadi bulali nai sabo bodoluba usu naibao,” te po wai dao.   
\s1 Augwaligo sali tǫ wei ma mabo sę dabe yali  
\p
\v 23 Genuai Bidigo te tiwai po ma wali, “Te gasa bidigo dagego tǫ abelai baso, agai sesemane sogo mu tonaludugio. Magi baso meni, te duga tǫ mu elalubeo. Te ena Genuai Bidigo tǫ elalubao, te eno dage Israel bidimainogo yali, te bidi dabego augwa tǫde te gasa tǫ kantri bidi dabe osogo bida wabo tiwai yai dao,” wali.   
\p
\v 24 “Te dage bidi me deligo te duga bage gasa bidigo tǫ abelebaso da, teda agai te tiwai bugagia kone palao, te nosali tǫ aga ayago ma abelemainogo ebaso da, teda aga abelemainao.  
\v 25 Te duga abagi me deli magi nai doado bage meni baso, te agai mone meba sabo homu elama, te gasa bidigo aga tǫ abelemainogo ebaso da, teda aga deli kanemego dolo tonalubo sę eyu aga tau sabo sę yao, \f + \fr 25:25 \ft Te Hibru dabego augwa bomai pode, te bidi me deli sęgę sobaso da, teda aga deli kaneme bidigo te aga tudi badu posolalubo sę eyu, aga tau sao. Genuai sę te deli kanemego yao, te sęgę elalubo bidigo tǫ ma abelebo sę, te tǫ te aga deli kaneme hanide elalueibao. Te Rut 3:12-13 me 4:1-6; Jer 32:6-12, tede te po elalubao, suao. Te buku Aisaiade te tiwai po begelama wali, God aga da te we bidi dabe tudi badu posolalubo sę elalu, te augwali tau sabo bidi mu bidibo dao. Te Ais 43:14 me 44:6; 44:24, te po tede elalubo suao.\f* agai te tǫ ma abelama te agaba ma mao.  
\v 26 Tialima, te aga tau sabo deli kaneme meni yai baso, aga digi ma abelemainao. Te nosali aga mone hauwa elalubaso da, teda aga te tǫ ma abelao.  
\v 27 Agai nedali te nisu naga kibu be elalubaso, te nai dabe ma wei mabo kibu be gegabo sogo, te kibu be dabede agai nisu naga nai pedelabo te nedao. Tama agai te nai usu nabo mone usu selama, te aga tǫ polobadu abelali bidibolo mao, tama aga tǫ ma sabo usu dao.  
\v 28 Tialima, te aga mone sǫą pelama, tama aga te tǫ ma abelabo usu meni yai baso da, teda te tǫ abelali bidi aga nogode elalubadi, te nai dabe page bidiba ma mabo sogoba ma usu numainao. Te kibu beba pedalubo sogo, te tǫ abelali bidigo te tǫ aga page bidiba ma dolo mabo usu dao,” wali.   
\p
\v 29 “Te taun obo tomode elalubo bidigo be, te bidi me deligo abelai baso da, teda te be aga ayago te kibu be deli bididubadi, te be page bidigo ma abelabo usu dao.  
\v 30 Te kibu be deli bidai digi agai te be ma abelesąbaso da, teda agai ma abelabo sunumi me elalubeo. Mu menio. Megi da te be te abelali bidi aga be elalueibao, te aga wąį nǫų nosali pedalubo hanigo be pedelaibao. Tama agai te nai dabe wei ma mabo kibu bede ma abelainu ebo usu me egobeo.  
\v 31 Tiali goli, te obo elalusąbo madi elalubo dwasianu be dabe, te dagego homugo augwali te nai bulabo tǫ tiwai da homu yao. Tialima, te be dabe aga ayago ma abelabo usu yaibao, te nai dabe wei ma mabo kibu bede, te abelali bidi dabego te be aga ayabolo wei ponobaso usu dao.  
\v 32 Tialima, te Livai hani da, augwaligo te bomai po wali pelamuo. Te augwa taun obo tomode elalubo be yai baso da, teda augwaligo ma abelemainao,” te po wai.  
\v 33 “Te Livai me deligo aga be bidigo abelemainu yali, te aga ma abelesąbaso da, teda te be abelali bidigo agai te Livai agabolo ma mao, te nai dabe wei ma mabo kibu bede tiao. Magi baso meni, eno dage gasa Israelba tǫ sa muani, tiali goli te Livai hanibolo te tiwai me ebeo. Menio. Eno taun naga augwaliba mani. Tialima, te Livai dabego taunde elalubo be dabe, te Livai hani augwa be mu naga tama sesemane elalubo dao.  
\v 34 Te Livai dabego taun sesege badu elalubo tǫ dabe, te gasa bidigo me abelamuo. Te Livai dabe augwa tǫ sesemane elalueibao,” wali.   
\s1 Te magi nai doado bage meni yai bidi dabe tonalubo kolesaga  
\p
\v 35 Genuai Bidigo po te tiwai ma wali, “Te dagego abagi me deli magi nai meni yai bidi pedelama, te doado bage abelabo mone gegabo sę usu isąbaso da, teda duga digi aga tonaluao, te gasa tǫ kantri bidi dage dali bidagasali bidi tonalubo tiwai yao. Te tiwai ebaso da, te abagi dage dali bidaibao. \x * \xo 25:35 \xt Bom 15:7-8\x*  
\v 36-37 Te agai dagede mone negeli yai baso da, teda agai te mone negeli wei ponobo sogo te dagego gasa ugwadu daganobo mone dali manama, momainogo elamuo. Te agai nai abelainogo ebaso, te dagego mone ugwaba holoyu, te agade gasa mone dali saiba homu igio. Dage Godide wi naga elama, te abagi dage dali bidimainao. \x * \xo 25:36-37 \xt Sai 22:25; Bom 23:19-20\x*  
\v 38 Ena God, duga Genuai Bidi, eno po dagebolo walio. Ena dagego God bidibao homu yai, tibaso eno dage te tǫ kantri Isipde selama, odasa asali, dagebolo te tǫ kantri Kenan mawai hagede yai dao,” wali.   
\p
\v 39 Genuai Bidigo po te tiwai ma wali, “Te abagi me deli magi nai menia sobaso, te aga dagego olo mu sę ebo bidi tiwai abelebaso da, teda dagego aga te olo mu sę ebo bidi sesanobo tiwai elamo dao.  
\v 40 Aga dage dali bidu, te mone sę ebo bidi tiwai bidao, te aga dage dali sę ela pidubadi, te tigidali nai wei ma mabo kibu beba usu nao,” po wai.  
\v 41 “Te wali kibu bede aga me aga we wai dali, te augwaligo dage tagalama, te aga haniba ma pelama, te aga wąį nǫų dabego tǫde bidaibao.  
\v 42 Te page e tiwai elalubao. Polobadu dage Israel te Isipde olo mu sę ebo bidi bidai, eno dage sagaselama, dagego te Isip mu taga soali. Tama tialigo, dage ena Genuai Bidigo olo mu sę ebo bidi ma we pedelali, te dagego me abagi dabe abelama, te augwali olo mu sę ebo bidi sesemane bidaibao homu igio. Te habu mu dao.  
\v 43 Tama tialima, dagego te abagi selebo sę eyu, aga sę dene ilibo sę igio. Menio. Dage enade wi yao, dagego God, te dagego bugagia wiegi yai sę naga agaba yao.  
\v 44 Te dagego olo mu sę yabo sę bidi, me sę ebo we sabo homu ebaso da, teda dage pąde elalubo tǫ kantri dabede sao, augwali te Israel hani bage isąwai.  
\v 45 Tama me dagego te olo mu sę ebo bidi abelai hagede te gasa tǫ kantri bidi dabe dage dali bidibo hanide abelao. Te dagego olo mu sę ebo bidi me olo sę ebo we te augwalide abelabo usu mu dao.  
\v 46 Te dage isibo si da, te duga ogwa dabe augwaligo te olo mu sę ebo bidi ma we dabe somainao. Te augwaligo dagego ogwa dabego sę sesemane sogo idumainao. Tiali goli, te duga abagi dagego digi te olo mu sę ebo bidi pedelai baso da, teda dagego augwali selebo sę igio. Dagego augwalide dua dua yao,” wali. \x * \xo 25:46 \xt Sai 21:2-6; Bom 15:12-18\x*   
\p
\v 47 “Te gasa tǫ kantri bidi dage dali bidagasali bidi te mone bidi pedelali. Te dagego abagi Israel bidi me deli te magi nai meni yai bidi pedelai baso, aga te gasa tǫ kantri bidigo abelemainogo elama, aga te bidigo olo sę ebo bidi bidimainao, ma te bidi aga deli hanigo olo sę ebo bidi bidibaso me usu dao.  
\v 48 Te abagi Israelgo tama tibaso da, teda dagego aga ma abelama sagameo. Aga ama me deligo,  
\v 49 ma aga aya sabi bidigo, ma aga deli kaneme hanigo aga ma abelao. Te aga mone sali usu yai baso da, teda aga digi abelama, te dwai sę olo ebo tagalao,” wali.  
\v 50 “Te bidigo aga abelali bidi dali po minama, te elaluali tigidali kibu be dali te nai wei ma mabo kibu be dali me usu nama nedao. Tialima, te olo sę yali bidi aga tonaluali genuai bidigo te kibu bede te bidigo mone sę yali dąį ilao. Tama te bidi aga digi ma aga deli kaneme bidigo te tobage tiwai monego mu te bidi ma abelebaso usu dao.  
\v 51 Te kibu be hauwa elalubadi yai baso da, teda te bidigo genuai mone te tonalubo genuai bidibolo wei ponama mao.  
\v 52 Te kibu be hauwa bidisąwai te nai wei ma mabo kibu be pedalubaso da, teda agai dwasianu mone te tonalubo bidibolo wei ponao,” te po wai.  
\v 53 “Te tonalubo bidigo koneao, sę bidi te kibu be deli delide te kontrak sę ebo bidi tiwai da weyu, te aga dwagila selebo sę me igio. Agai dua tama naga yao.  
\v 54 Te augwaligo te bidi te kolesaga me delide te ma abelesąbaso da, teda te nai dabe wei ma mabo kibu bede, te tonalubo bidigo te bidi aga we wai dali tagala palama, olo mu bidimainao.  
\v 55 Dagego te dage Israel me deli olo mu sę ebo bidi sesemane bidimainao wagio, magi baso meni, ena Genuai Bidi, ena dagego God, te eno dage Isipde selama, te dage odasa asali. Tama tibaso, dage enade digi te olo mu sę ebo bidi bidimainogo yai dao,” wali.   
\c 26  
\s1 Godigo te agai po bugagia wali pabo we bidi augwali wiegi yai ilaibao  
\r (Bom 7:12-24; 28:1-14)  
\p
\v 1 Genuai Bidigo te po wai, “Dagego te ni dage selama, tego te piksa noma nigigio, ma genuai masigi selama dualiyu, ma te masigi selama, tego babaga pabo sę elama, te tobage nai dabe dagego tibo god da olama, teba lotu wagio. Menio. Dagego ena deliba naga lotu wao, dagego Genuai Bidi dao. \x * \xo 26:1 \xt Sai 20:4; Prs 19:4; Bom 5:8; 16:21-22; 27:1\x*  
\v 2 Dagego te Sabat dabe side sę me igio, eno dageba dąį ilai dao. Dage toma naga nao. Te dagego eno be godolo mu iyąo. Ena Genuai Bidigo eno te po wai dao,” wali.   
\p
\v 3 “Te dagego eno bomai po dabe wali peyu, te eno dagebolo yao po wabo sę dabe ebaso da,  
\v 4 teda eno te tulubage tulubo sogo te tulubage tulumainogo ilaibao. Tama eno dagego tǫde nai wiegi yai mu holomainogo elama, te ni dabego nai hauwa walaibao.  
\v 5 Te dagego nai hauwa mu elalu, te dagego wit tau yali sesa pidubadi, te wain du tau yali sabo sogoba usu naibao. Tama dagego te wain du tau yali sidubadi, te wit wai bulubo sogoba usu naibao. Te dage nai tudumainogo genama, te dage haliga mu pągąwaibao. Te dage bugagia mu duga tǫde dugulalu bidaibao,” wai dao. \x * \xo 26:5 \xt Bom 11:13-15\x*   
\p
\v 6 “Te eno dageba haliga nagame ebo kolesaga menama, te dage bugagia dugulalu, te dage godege pibo sogo magi nai me delide wi me egobeo. Eno dagego tǫde te dwai uni hasa dabe sela sąnama, te boi bidi dabego dage te tǫde bidibadi te boi me hwįgobeo.  
\v 7 Te boi bidi augwaliba dagego hwįbaso da, te dagego augwali pobelama, ela mubaso, te hwįbogo augwali mu dolaibao.  
\v 8 Te dage nogo a naga bidigo te bidi sese a naga 100 boi bidi aiyaba elalueibao, te dage 100 bidigo te bidi sese umabo hauwa 10,000 boi bidi aiyaba elalueibao, tama tigidali boi bidi dolaibao,” te po wai.  
\v 9 “Te eno dage wiegi yai iliyu, dagebolo eno te wai hauwa menama, te dage genuai hani pedalumainogo ilaibao. Te eno polobadu dage dali te dąų wali bomai po kontrak usu naibao.  
\v 10 Te nai dabe dagego te gide polobadu kibu bede sali te elalubadi, te nosali kibu beba ma usu naibao. Te elaluali nai bugai te dagego gesi tau yali nai sabo sogo, te nai dagego sąyu, tama te nai muani pesagede dagego gesi nai mueibao.  
\v 11 Te ena dage tomode bidiyu, te ena be tomode digi bidaibao, te eno dage tudiba me mugobeo.  
\v 12 Te ena dage tomode biliyu, te ena dagego God bidaibao. Te dage eno we bidi dabe bidaibao,” te po wai dao. \x * \xo 26:12 \xt 2 Ko 6:16\x*  
\v 13 “Ena digi ena Genuai Bidi, ena dagego God dao. Polobadu dage te Isipde olo sę ebo bidi bidibaso, eno te kalabus ebo sę togwa sąnama, te dage odasa asai. Eno dage te kalabus yali bidi dabego bogo toga sąwai, te dage kalabus tagalama, te wiegi yai homu pemene eyu asai dao,” wali.   
\s1 Godigo te agai po sela sąbo bidi dabe augwaliba dwai dene mawaibao wali  
\r (Bom 28:15-68)  
\p
\v 14 Genuai Bidigo po te tiwai ma wali, “Te dagego eno po sela sąyu, tama dagego te bomai po dabe sela sąbaso da, teda eno dagebolo te dene mabo sę yaibao,” te po wai.  
\v 15 “Te dagego eno bomai po me eno po dali te tudiba munama, tama eno dage dali te dąų wali bomai kontrak te dagego togwali da,  
\v 16 teda eno dagebolo dene maiabo sę e tiwai yaibao. Polo tama eno dage dwai wi mu ilama, te dage te tobage genuai gasi somainogo ilaibao, te tigi posolo mu ilibo gasi, me te dage gedu widaibao, te dagego tigi me dolaibao. Te dagego gi nai da bulaibao, tiali goli dagego te nai ge me sela tugobeo. Mu menio. Te boi bidi dabego naga sela tueibao.  
\v 17 Te ena digi eno dageba boi bidi yaibao, tama eno te gasa bidi dabego dageba boi hwįagasomainogo elama, te dage aiyaba elalumainogo ilaibao. Tama te bidi dabego dage dali dwai homu mu eyu, augwaligo dage tonalubo sę yaibao. Te boi bidi dabego dage pobeasa asisąbadi goli tagalao, te duga digi odolali wi elama, te wi paibao,” wali.   
\p
\v 18 “Tama eno te kolesaga dabego dageba te dwai dene mabo sę ebaso, te tudi, badu nosali dagego eno po wali me pisąbaso da, teda eno te dwai dene mabo sę dageba mu geninaibao.  
\v 19 Te eno dagego hagoma aiyaba mu elalueibao. Te eno tulubage tulubo paliama, te dagego tǫba tulubage me tulugobeo, te tǫ mu wa pelama, te ain tiwai dila pai pedelaibao.  
\v 20 Te nai dabe te gide dabe me hologobeo, te ni dabego du me walogobeo. Te dagego sę dene yali odolali yaibao,” te po wai dao.   
\p
\v 21 “Te tama sęgę dabe dageba pedalubaso, te dagego hagoma idu, te po me odisąbaso da, teda eno dagego te ebo dwai kolesagade homu kone paludama, te eno dageba dwai dene mabo sę me mu ela pidubadi geaibao.  
\v 22 Eno te bulu uni hasa dabe dage tomoba tagala palama, te augwaligo te wai dabe ela muyu, te bulmakau dabe me ela mueibao. Tama tialima, te dagego tǫ kantri sunumide te bidi dabe me bilalugobeo, te dwasianu hani we bidi naga bidaibao,” wali.   
\p
\v 23 “Eno te tiwai dwai dene mabo sę dageba ebaso, te nosali dagego eno po me odisąma, te dagego enaba hagoma ebo dwai sę me idubaso da,  
\v 24 teda eno digi dagego te ebo sęgęde homu kone palama, te eno dage dwai dene mabo sę genugia mu idubadi, te dage posolo dwai mu yaibao.  
\v 25 Dagego eno dąų wali bomai po kontrak togalio, tama dageba te boi bidi dabego hwįabo sę eno ilaibao. Te dage te genuai taun te bomai obo elalubo tomoba sisinigi pelama, te dage bugagia bidiba homu yaibao, tagalao, te eno dwai genuai gasi dabe dageba tagala palama, te dage we bidi hauwa mu isaibao. Te dage dolobo sogo da, teda eno dage te boi bidi dabe augwali nogoba mawaibao,” te po wai.  
\v 26 “Te eno dagego nai mu sǫą pomainogo yaibao, tama te we dabego augwa iside ulabo nai hauwa meni yaibao, te sia tigi delide nogo si wego nai ulaibao. Te dage tigidaligo te nai dwasianu dwasianu naga selama tueibao, tiali digi te dage nasi me elaludaibao,” Genuai Bidigo te po wai dao.   
\p
\v 27 “Eno te sę dabe yali, te dagego hagoma me idubadi geyu, te eno po ma sela sąbaso da,  
\v 28 teda eno haliga sębę dwai mu eyu, te eno dagego dwai sę ebo umagia mu wei ponodu, te dageba dwai dene mu madubadi geaibao,” wali.  
\v 29 “Te dage nasi dwai mu ebaso, te duga wai te ogwa me wegi dabe te ela tueibao,” te po wai dao.   
\p
\v 30 “Te eno dwai haliga dageba elama, te dagego tibo god dabego lotu be te bulu dude sę yani te eno dolaibao, te wiegi yai denami ebo hano holobo ofa ebo alta eno alueibao. Te eno dage ela munama, te eno dolali te tibo god piksa daiba sąwaibao.  
\v 31 Te eno dagego taun dabe me lotu be dabe dolaibao, tama eno dagego te ebo ofa dabe homu godolo me egobeo.  
\v 32 Te eno dagego tǫ mu dolaibao, te dagego boi bidi dabego te tǫ selama bidibo sogo, te augwa sulama, te dwai noma mu saibao.  
\v 33 Eno digi te boi bidi dabego dageba boi hwįmainogo ilaibao, te eno dage augwaligo te gasa tǫ kantriba tedela palomainogo ilaibao. Te dagego tǫde bidi meniama olo elalu, te taun dabe dolai elalueibao.  
\v 34-35 Tialima, dage te boi bidi dabego tǫde bidalubo sogo, dagego te tǫ dabe olo dali elalu, te toma nedueibao. Polobadu dage te tǫde bidaluyu, tama dagego te 7 wabo kibu bede te tǫ toma nomainu ilibeo, eno dagebolo te tama tiao po wali gilama me ebeo. Tialima, te tǫ olo elalubo sogo aga te bugagia toma tueibao, te sogo tǫgo godolo yaibao,” wali.   
\p
\v 36-37 “Te dage hani dwasianu naga elalu, te boi hwįbo sogo me isigobeo, te dage boi bidi dabego tǫ kantriba bidigi paibao. Te dage eno wi dwai mu ilaibao, te dagego waligo te ni yabe gele gele dwasianu wabo odobaso da, teda dage odolali wi elama, tama te boi bidi dabego pobebaso wi pabo tiwai yaibao. Te boi bidi dabego pobesąbadi digi, te dage odolali wi pelayu, udabogo duga hasi hodola palama, tula munana paibao. Te boi bidi dabego dage dali hwįbaso da, teda dagego augwali dali me hwįgobeo.  
\v 38 Tialima, dage te boi dabego tǫde isila paibao. Te augwaligo tǫgo dage aiyaba mu dalubo tiwai yaibao.  
\v 39 Te dage dwasianu hani dabe te boi bidi augwaligo tǫ kantride bidaibao, te dage deli deli dolama, te dage hani silabo homu yaibao. Magi baso meni, duga digi, me te aya dabe, me wąį nǫų dabego yali sęgęde me duga tigidaligo sęgęde tama tiaibao,” te po wai dao.   
\p
\v 40 “Tiali goli, nosali dage te hani dabe te augwa yali sęgę homu kone palama, te augwaligo enaba pusaibao. Augwaligo te tama po waibao, ‘Dena digi me te sęgę siyu, te wąį nǫų dabego me sęgę salio. Dago hagoma elama, te nago po sela sąwai dao.’  
\v 41 Dagego hagoma ebaso, tialima eno dageba dwai dene menama, tama dage te duga boi bidi dabego tǫ kantriba tagala palali. Tialima, duga hanigo te hagoma ebo tagalobo sogo te augwa digi elaluama, te augwa yali sęgę dwai dene sobaso da,  
\v 42 teda eno te Jekop, me Aisak, me Abraham augwali dali te dąų wali bomai po kontrak homu ma koneaibao, te Kenan tǫ augwa wąį nǫų dabebolo mawaibao po wai dao. \x * \xo 26:42 \xt Gag 17:7-8; 26:3-4; 28:13-14\x*  
\v 43 Tialima, hasia bolo dagego te tǫ tagalai elalueibao, te tǫ odolali elaluama, te bobage sesabi elama, toma neyu elalueibao, te dagego tǫ te olo elalumainogo isąwani te sogoba usu naibao. Te dage sęgę tolama, te dwai dene saibao, magi baso meni, dagego eno bomai po tigidali tudiba munama, te eno po me tigidali sela sąwai dao.  
\v 44 Tiali goli, dage te boi bidi dabego tǫ kantride bidibo sogo, te dage mu tagalisąma, te eno dage tigidali mu me dologobeo. Mu menio. Eno te tiwai egi sogo da, teda eno dage dali te dąų wali bomai po kontrak dąų wali, te siligi da. Tiali goli, ena God, duga Genuai Bidi, eno te tama tiwai kolesaga me egobeo.  
\v 45 Eno dageba homu koneama, eno te dagego wąį nǫų dabe dali dąų wali bomai po kontrak ma homu kone palaibao. Te bidi dabe eno polobadu te tǫ kantri Isipde selama odasa asali, te gasa tǫ kantri we bidi tigidaligo te eno genuai bomo suali. Eno dage sela asali, te Genuai Bidi ena hani bage pedalumainu yali, ena dage Israelgo God bidainogo yai dao,” te po wai dao.   
\p
\v 46 Te po dabe me te bomai po Genuai Bidigo Mosesbolo te Sainai bulu dude mayu dąų walai dao. Tama agai te po weyu, te Israel dabego tigidali wali piyąo wai dao.   
\c 27  
\s1 Te we bidi augwaligo nai meba te Godiba mani te nai dabego bomai po  
\p
\v 1 Genuai Bidigo po Mosesbolo weyu,  
\v 2 te Israel dabebolo te tiwai po walao wali, “Te bidi me deli aga po dąų waliyu, te aga enaba mawaibao, ma gasa bidi me we te enabolo mawaibao wai baso da, teda agai te dąų wali po usu nainogo te monego te bidi ma we hasegelainogo eyu, te mone meba pris bidiba mao,” te po wai.  
\v 3 “Te we bidi dabe ma abelabo dąį ilali mone e tiwai elalubao. Te kibu be 20 dąį elama, te kibu be bidi sese sela 60 igi pali bidi, augwaligo te mone 500 kina tama monego hasegeliyu abelao.  
\v 4 Te wego kibu be bidi sese delide dąį elama te bidi sese selaba dąį igi pali we da, te mone 300 kinago abelao.  
\v 5 Te bidi kibu be a nagade dąį elama te kibu be bidi sese deliba usu nani bidi da, te mone 200 kinago abelao. Te we kibu be a naga dąį elama te kibu be bidi sese deliba usu nani we da, te mone 100 kinago abelao,” te po wai.  
\v 6 “Te wai ogwago polua delidu te kibu be a naga usu nani wai da, te mone 50 kinago hasegeliyu abelao. Te wegi te polua delidu te nogo a naga kibu beba usu nani wegi da te mone 30 kinago abelao,” wali.  
\v 7 “Te kibu be bidi sese sela 60 yali bidi, te 150 kina monego abelao. Te kibu be bidi sese sela 60 yali we da, te 100 kina monego hasegeliyu abelao,” te po wai dao.   
\p
\v 8 “Te tiwai mone muabo po dąų wali bidigo, te aga digi aga ma abelabo mone ma aga abagi abelabo mone me meni baso da, teda te bidi prisba pao. Te prisgo te bidigo mone aiyaba dulama, te prisgo homugo aga muabo homu ebo mone usu nama mueibao,” wali.   
\p
\v 9 “Te bidigo te kibu me deli ena Genuai Bidiba ofa yaibao po dąų wai baso, agai te tobage kibu dabe eno dagebolo ofa yao po wabo kibugo te ofa yao. Te dagego ofa ebo kibu tigidali te eno nai mu dao.  
\v 10 Tama te bidigo te wiegi yai kibu hasegelama, te dwai kibugo ofa igio. Agai te kibu dwai hasegelama, te wiegi yai kibu ofa igio. Tialima, agai hasegelibaso da, teda te kibu si dali si te ena, Genuai Bidigo dao.  
\v 11 Te bidi me agai enabolo te wiegi yai isąwai kibu me deli agai enabolo ofa yabo usu meni baso da, teda agai te prisba selasa pao,” wali.  
\v 12 “Prisgo te kibu wiegi yai yaliwe ma dwaliwe sulama, agai te mone dąį ilaibao. Tama te mone nogi tagalama, gasa mone dąį me iligio.  
\v 13 Te bidigo te kibu ma abelabo homu ebaso da, teda agai te mone meba dali te prisgo dąį ilali mone dali sesao. Te prisgo 5 kina dąį ilibaso da, teda agai te mone 6 kinago abelao. Ma, prisgo te mone 10 kina po obaso da, agai te mone 12 kina mobaso usu dao,” wai dao.   
\p
\v 14 “Te bidi me deligo aga be ena Genuai Bidiba maiabo homu ebaso da, teda prisgo te be wiegi yai ma dwai yabowe naga suao, agai digi te bego mone dąį ilao, te prisgo dąį ilali mone me hasegeligio.  
\v 15 Tama ena Genuai Bidiba te be mani bidigo, te nosali aga be ma abelabo homu ebaso da, teda agai te bego mone usu nama mayu, te gasa me badu dali daganama mao. Te prisgo te bego mone 100 kina dąį ilai baso da, teda te bidigo 120 kina mao. Agai te mone prisba menama, te aga be ma sobaso te usu dao,” wali.   
\p
\v 16 “Te bidi me deligo agai tǫ pedai enaba mobaso da, teda prisgo te nisu naga te nai wai bali te tǫde bulugowe naga te osola suao. Te augwaligo te sęgę bidi sese deli 20 kilogram bali bulabo tǫ usu yai baso da, teda te tǫgo mone 100 kina usu dao.  
\v 17 Tama agai enabolo te mani tǫ te nai dabe wei ma ponabo kibu be yagasobode te hasia wabo kibu bede mobaso da, teda te mone te tiwai elalumainao, te me hasegelamo dao.  
\v 18 Tialima, agai enabolo mabo tǫ te kibu be meba nosali wabo te genuai kibu be wabo sogo mobaso da, teda prisgo nisu naga kibu be elalubadi yai baso te nedao, te nai dabe wei ma ponabo kibu be nisu naga elalubo koneainogo tiao, tama agai te tǫgo mone aiyaba togaibao.  
\v 19 Te tǫ enabolo te mani bidi, te aga tǫ ma abelainogo ebaso da, teda agai te monego abelemainao. Te mone prisgo 100 kina dąį ilai baso da, teda te bidigo 120 kina mao. Agai te mone prisba menama, te aga tǫ ma somainogo emainao.  
\v 20 Te hasia bolo agai te tǫ ena Genuai Bidiba abelesąma, tama agai te tǫ gasa bidiba mawai baso da, teda nosali aga digi ma abelainogo ebaso, usu me egobe dao.  
\v 21 Tama te nai dabe wei ma ponobo kibu be pedalubo sogo, teda te tǫ abelali bidigo enabolo ma mao. Tama te tǫ ena tǫ sesemane sogo elalua paibao, te we bidi augwalide habu selaibao. Te eno pris augwaliba naga mawaibao,” te po walio.   
\p
\v 22 “Te tǫ me deli bidigo abelai, te aga wąį nǫų dabego tǫ menio, agai te tǫ ena Genuai Bidiba mobaso da,  
\v 23 teda te nai dabe wei ma mabo te nisu naga kibu be elalubowe naga te prisgo neda suao. Tama agai mena tama kibu be elalubo usu nama te tǫde mone dąį ilao, te side naga dolo te bidigo te prisgo tǫba mone mao. Tama te mone da ena Genuai Bidigo nai dao.  
\v 24 Tialima, te nai dabe wei ma ponobo kibu bede, te tǫ sali bidigo te tǫ aga ayaba wei ponama dolo mao,” wali.   
\p
\v 25 “Dagego te eno megi po wali tigidali naigo mone dolo neda suao,” te po wai.   
\p
\v 26 “Te dagego ofa me deli enaba maiabo homu ebaso da, teda dagego te tigidali kibu me gasa nai dabego te podolali nai dabe me sigio, magi baso meni, te eno nai da po walio. Tagalao, te bulmakau ma sipsipgo te gomunai wai dabe, tigidali te eno dao.  
\v 27 Tialima, te kibugo gomunai wai dabe te kibu dabego eno gedude me wiegi yai meni baso da, teda duga ma abelagameo. Te prisgo 10 kina dąį ilibaso da, teda dagego agabolo 12 kina mao. Tama bidigo te kibu me abelesąbo homu ebaso da, teda prisgo gasa bidigo abelemainogo elama, te prisgo dąį ilali mone usu nama abelao.”   
\p
\v 28 “Tialima, te bidi me deligo te nai me deli ena Genuai Bidi dolo dąį mu ilali naigo, te gasa sę me igio olama, habu selai baso da, teda agai te nai gasa bidigo abelemainogo me igio, te aga digi me te pris dabede ma abelamuo. Te tagalao, agai bidi me deli, ma we me deli, ma kibu me deli, ma te aga wąį nǫų dabede sali tǫ me deli yai baso da, teda sesemane sogo te ena Genuai Bidigo nai naga elalueibao.” Te po wali. \x * \xo 27:28 \xt Nam 18:14\x*  
\v 29 “Odao. Te agai bidi ma we enabolo sa muyu dąį ilai baso tagalao, teda agai ma abelainu ebo usu egobeo. Mu meni. Dagego te tiwai mani bidi ma we ela muyu naga yao.”   
\p
\v 30 “Te gide pedalubo nai tigidali, te nai wit wai ma ni du wai da, dagego te nogo si badu dobolama, te me deli badu ena Genuai Bidiba mao. Te nogo si wali nai dagego tubo habu mu selaibao. Te enaduba deligo nai naga dao. \x * \xo 27:30 \xt Nam 18:21; Bom 14:22-29\x*  
\v 31 Te bidi me deligo te naigo meba abelainogo ebaso da, teda agai abelemainao. Te naide mone 5 kina yai baso da, teda agai 6 kinago hasegeliyu abelama, te pris dabeba mao.  
\v 32 Te nogo si bulmakau me sipsip dabe elalubaso, te me deli eno dao. Dagego te kibu dabe tigidali wasilama, te augwali nedelama, tama te nogo si wali tigidali enabolo mao.  
\v 33 Te nogo si wali kibu wiegi yai ma dwai baso me tagalao, dagego me hasegeligio. Tialima, dagego hasegelibaso da, teda te nogo si wali kibu dali te hasegelali dali saibao, te si dali si eno nai dao, te dagego ma abelamo dao,” wali.   
\p
\v 34 Te po dabe dali te bomai po me Genuai Bidigo Mosesbolo te Sainai bulu dude mawai. Tama agai te po weyu, te Israel dabe augwaligo tigidali wali piyąo po wai dao.