\id LAM - Dadibi NT [mps] -Papua New Guinea 2001 (DBL 2014) 
\h Te We Bidi Dabego Jerusalem Hagede Gela Wali 
\toc1 Te We Bidi Dabego Jerusalem Hagede Gela Wali 
\toc2 Te We Bidi Dabego Jerusalem Hagede Gela Wali 
\toc3 Gel 
\mt1 Te We Bidi Dabego Jerusalem Hagede Gela Wali  
\imt1 Hasia Nedebo Po  
\ip Bidi me deligo e buku te Babilon dabego te taun Jerusalem dolali sogo asęai dao. Tama te we bidi augwaligo augwa wiegi yai taun hobede genuai mu yai dao. Hasia te taun Jerusalem me Godigo tempel be tede elaluai dao, aga da te God, aga te Israel hani dali aga dali bidiba wabo piksa tiwai elaluai dao. Tama te Jerusalem dolali sogo da, te Israel dabego te Genuai Bidide homu dąų wali dwasianu tula pai dao, tama augwaligo homu kolesaga dolali. Tama tibaso, augwali gela olama, hobede hauwa mu yali. Te e bukude deli deli dąįde te we bidigo hobedai gela balia Jerusalemde wali, te balia po dao. Te Juda hani augwaligo te genuai sęgę augwaliba pedelali, te sogo ma kone paliyu, augwaligo te balia po weyu ebo dao.  
\ip E buku tomode te gasa po me elalubao. Te Juda bagego koneani, te Jerusalem dolali sę te page elaluali. Te page e dao, augwaligo augwa God Genuai Bidi tudiba muyu, tama haniani tibo god dabeba lotu po weyu, dwai kolesaga hauwa mu eyu yai dao. Tama koneama, augwali mebago ge neyu, augwa homu begeleyu, da ma dobola sao po weyu bidai dao. Tama te Dąį 3 te ves 21de gagalama, te ves 26ba sabolama, te ves dabede e tobage po elalubao, God da, te we bidi godolo mu ebo God da, tama “agai te kolesaga munu me siligobeo. Menio. Te agai te kolesaga tigidali bubugade gesi noma pedalubo tiwai ebo dao.”  
\c 1  
\s1 Jerusalem hanu te genuai sęgę elalubo wilawe we tiwai bidibao  
\q1
\v 1 Jerusalem da, hobede mu dao,  
\q2 aga te yǫya pai we me deli tiwai bidibao.  
\q1 Polobadu da, agai we bidi hauwa mu elaluai dao.  
\q1 Tiali goli, tegoba, megi da, aga olo mu te elalubao.  
\q1 Awe, polobadu agai gasa tǫ kantri dabe we bidi tomode  
\q2 genuai nogi elaluai da.  
\q1 Tiali goli, megi da, aga sęgę genuai elalubao,  
\q2 te wilawe we me tiwai dao.  
\q1 Polobadu aga te polalubo kwin we tiwai bidama,  
\q2 agai provins hauwa tonaluai dao.  
\q1 Tiali goli, megi da, te boi bidi dabego aga aiyaba  
\q2 elaluama,  
\q2 tama aga olo sę ebo we tiwai te bidibao.   
\q1
\v 2 Polobadu da, tigidali kantri dabego aga abagi wai  
\q2 dao,  
\q2 tiali goli megi da, te gasa kantri mego agade hobede  
\q2 me ebeo.  
\q1 Te abagi dabego aga dali ili po olama,  
\q2 tama augwali agai boi bidi pedelali.  
\q1 Tialima, tigidali sogo hulide Jerusalemgo gela dwai mu  
\q2 weyu idubo,  
\q2 mu tama agai gela gųgai nabogedu aiyaba tulalubo  
\q2 dao.   
\q1
\v 3 Te boi bidi dabe augwaligo te Jerusalem pąde bidali  
\q1 Juda dabe dali dwai sę elama, augwali dene manio.  
\q1 Tama megi da, augwaligo te Juda dabe gasa kantriba  
\q2 kalabus elama, odasa palio.  
\q1 Te kantri Juda te meba Israel hani isąwai kantri tomode  
\q2 elalubo dao,  
\q2 tiali goli agai bugagia dulalubo meni dao.  
\q1 Te boi bidi dabego aga pobeasa pelama,  
\q3 aga bagua sai elaluai dao.  
\q1 Tiali goli, aga wi pabo usu meni yai dao.  
\q1 Tama augwaligo aga pageabi yai dao.   
\q1
\v 4 Te taun Saionba pabo sunumi dabe olo elaluyu,  
\q2 hobedai gela oduali.  
\q1 Magi baso meni, te augwalide te genuai lotu wabo  
\q2 genuai sogo dabede te bidi dabe me augwalidu te  
\q2 moni lotu be tempelba me soayu isąma ebaso.  
\q1 Te taun tomoba pabo sunumi dabe olo elalua pali.  
\q1 Tama te pris dabe augwali homu sęgę mu elama,  
\q2 te bidigo dene sobaso gela wabo tiwai elama gela  
\q2 wabo.  
\q1 Te Saion bulu gesi wegi mani sęgę genuai mu tolobao,  
\q2 tama augwaligo te tempel bede balia po me wabo  
\q2 menio.  
\q1 Tama me te taun Saion aga me te dwai dene mu siyu  
\q2 elalubao.   
\b  
\q1
\v 5 Te boi bidi dabego ugwa ela holobaso,  
\q2 augwaligo Jerusalem tonalubo dao.  
\q1 Tama augwaligo magi naide moni homu me ebo meni.  
\q1 Magi baso meni.  
\q1 Te Jerusalem dabego augwalibolo sęgę maiabo usu  
\q2 isąbaso.  
\q1 Jerusalemgo Genuai Bidi tudi ola mayu,  
\q2 tama dwai sę hauwa mu yali.  
\q1 Tama tibaso, Genuai Bidigo agai  
\q2 te genuai dene tolomainu tagalali.  
\q1 Tama te boi bidi dabego te Jerusalemgo wai bǫų dabe  
\q2 te hwįbode selama, kalabus elama, tigidali digibulu  
\q3 buluba dabe kalabus elama, odasa pali.   
\q1
\v 6 Saiongo polobadu elaluali genuai nogi polo tulaluai  
\q2 dao.  
\q1 Tama agai tobolu bidi dabe te boi bidi dabede wi  
\q2 painogo eyu,  
\q3 augwaligo bomo sia sali,  
\q2 te nai tusiąwai bulu hasa dabego  
\q2 augwali dili bomo kilabo tiwai yalio.   
\q1
\v 7 Megi da, te Jerusalem dolai elalubadi,  
\q2 aga we bidi dabe digibulu sese mu tama usu nama,  
\q2 wau bilibo dao.  
\q1 Tama agai polobadu mu munolua asali wiegi wiegi yai  
\q2 nai dabeba homu kone ma palobo dao.  
\q1 Te boi bidi dabego Jerusalem we bidi sali sogo,  
\q2 te meba gasa hanigo aga me tau sai menio.  
\q1 Tama te boi bidi dabego aga dolobo suali,  
\q2 tama augwali gisugu dwai mu wali.  
\q1 Awe, aga tulalubaso, augwaligo kęnę po wali.   
\q1
\v 8 Jerusalemgo dwai dwai sę hauwa yai madi,  
\q2 tama te dwai sę ebogo aga te dwai meda yai nai  
\q2 pedelali.  
\q1 Polobadu da, te gasa hanigo agabolo genuai nogi mawai  
\q2 dao.  
\q1 Tiali goli, megi da, augwaligo agai hale sulama,  
\q2 tama augwaligo agabolo posobo po weyu,  
\q2 gisugu mabo dao.  
\q1 Tama te Jerusalem hale eyu,  
\q2 aga gesabidi duala selama, genuai dene ebaso,  
\q2 hwąwa wabo tiwai yali.   
\q1
\v 9 Polobadu aga dwai kolesaga te pepeli dilide mu  
\q2 elaluai dao.  
\q1 Tiali goli, agai aga dolabo homu kone me ebeo.  
\q1 Tama tialigo aga mu dolama, mu dolali,  
\q2 tama bidi mego aga hobede eyu,  
\q2 tau sabo me egobeo.  
\q1 Tama Jerusalem agai e tama tiwai po i obao,  
\q1 “Genuai Bidi, eno e sęgę suao.  
\q1 Te boi bidi dabego ena aiyaba mu elalualio.  
\q1 Tama augwaligo ena dolalide wiegi yai homu pemene  
\q2 elama,  
\q3 gana pali dao,” wabo.   
\q1
\v 10 Polobadu te God Genuai Bidi te habu selebo po  
\q2 weyu,  
\q2 te Israel hani isąwai bage te moni lotu be tempel  
\q3 tomoba pelamuo po wai dao.  
\q1 Tiali goli, te Jerusalem we bidigo suali,  
\q2 te tobage boi bidi dabe te bomo yai po boliyu,  
\q3 augwali tomoba pelama,  
\q2 tama tede elaluali wiegi wiegi yai nai dabe sese  
\q2 tama wi salio.   
\q1
\v 11 Te Jerusalem we bidi augwali nasi genuai mu ebaso,  
\q2 tama augwali nai gegebo bomai sę mu te ebao,  
\q2 tama augwali hwąwa dwai mu obao.  
\q1 Augwa tigi bomo ma sainu eyu,  
\q2 augwaligo augwa wiegi wiegi yai nai dabego  
\q2 te dobu si ebo sę eyu, te nai sela tubo dao.  
\q1 Tama Jerusalemgo i weyu, te po obao,  
\q1 “Genuai Bidi, sulama, koneao, ena dwai bidu,  
\q2 te olo nai tiwai naga bidibao,” wabo.   
\b  
\q1
\v 12 Jerusalemgo aga pąde elalubo sunumide soabo we  
\q2 bidi dabeba i wabo sę ebao.  
\q1 Agai te po obao. “Suiąo,  
\q3 ena genuai sęgę genuai mu elama,  
\q2 tama Genuai Bidi agai ena dene genuai mu manio,  
\q2 te aga sębę moni posolo tiwai mu yali sogode.  
\q1 Te polobadu te bidigo te tobage dene me sai meni yali  
\q2 bogo,  
\q2 tiali goli, dagego homugo te olo nai da weyu ebao.   
\q1
\v 13 Genuai Bidigo isi tagala palama,  
\q2 tama eno dili isi ulama,  
\q3 tama eno bomo tamunanio.  
\q1 Agai ena hagani wa gebelai digi, ena tola sali.  
\q1 Tama agai ena sąna palali digi, ena tudiba degali.  
\q1 Tama agai ena mu tama tagalali digi,  
\q2 tigidali sogo ena dene dwai mu doliyu ebao.   
\q1
\v 14 Genuai Bidigo digi eno yali dwai sę sese sisinama,  
\q2 tama agai dąų olama, kęnama,  
\q2 tama agai eno magede kęnani.  
\q1 Tama te dwai sę dabe sęgę mu elama,  
\q2 eno bomo sese mu silalio.  
\q1 Tama Genuai Bidigo ena boi bidigo nogoba muani,  
\q2 tama eno augwali dali hwįabo bomo menio.   
\q1
\v 15 Genuai Bidigo eno bomai ami bidi dabeba tudi ola  
\q2 manio.  
\q1 Agai ami i olama, ena dali hwįagasomainu elama,  
\q2 tama eno gesi bidi dabe dolalio.  
\q1 Genuai Bidigo kantri Juda we bidi dabe aiyaba agayalio,  
\q2 te bidi dabego wain wę nigainu,  
\q2 te wain du agabo masigi poude te wain agabo tiwai  
\q2 yalio.   
\q1
\v 16 Te tialigo eno gela uga selama,  
\q3 aiyaba dulumainu ilali.  
\q1 Tama ena dali hobede elama,  
\q2 tama ena ma dili ilabo bidi menio.  
\q1 Te boi bidi dabego ena aiyaba polo elaluai madi.  
\q1 Tama tibaso, eno wai puluba augwali  
\q3 dodolama mu bidibao,” Jerusalemgo te po obao.   
\b  
\q1
\v 17 Saiongo bidi mebago aga tau somainu homu eyu,  
\q3 aga nogo balalubao, tiali goli, te bidi aselama,  
\q3 aga dali hobede eyu, tau siyu me yagasobeo.  
\q1 Genuai Bidigo boi bidi dabe tigidali bulu badu i olama,  
\q2 tama te Israel hani dali hwįagasali.  
\q1 Tama te boi bidi dabego te Jerusalem te dwai damua  
\q2 pai pesage tiwai mu tonobo ąǫ yali.   
\q1
\v 18 Tiali goli, Jerusalemgo te po wali,  
\q1 “Genuai Bidigo ena dali te yali kolesaga te dolo mu dao.  
\q1 Magi baso meni.  
\q2 Eno agai po sela sąwai dao.  
\q1 Tega, dage tigidali kantri we bidi,  
\q2 dagego eno te po odiąo.  
\q1 Eno te genuai sęgę tolali suao.  
\q1 Te boi bidi dabe augwaligo eno gesi bidi  
\q2 me gesi wegi dabe selama,  
\q1 tama augwali digibulu tǫ kantri dabeba mu kalabus igi  
\q2 palio.   
\q1
\v 19 Eno abagi dabego ena tau somainu i wai dao.  
\q1 Tiali goli, augwali eno boi bidi pedelalio.  
\q1 Eno pris dabe, me tobolu bidi dabe,  
\q2 augwali nasi genuai mu yali.  
\q1 Tama augwali bugagia bidabo tubo nai gegebo bomai  
\q2 sę mu yalio.  
\q1 Tiali goli, augwali nai meniama,  
\q2 tama augwali eno sunumi dabede isai dao.”   
\b  
\q1
\v 20 “Genuai Bidi, ena suao.  
\q1 Ena genuai sęgę mu selama,  
\q2 tama ena dolama mu bidibao.  
\q1 Tama eno homu dwai mu elalubao.  
\q1 Magi baso meni, eno hagoma genuai mu elama,  
\q2 tama nago po sese tama sela sąwai dao.  
\q1 Te boi bidi dabe augwaligo eno we bidi dabe  
\q2 eno sunumi dabede ela wiala silalio.  
\q1 Tama me te bede bidaluali we bidi augwali nasi eyu,  
\q3 gasi me eyu, isai dao.   
\q1
\v 21 Te meba gasa we bidi hanigo eno ena te dene ebaso,  
\q2 gela wabo po odali.  
\q1 Tiali goli, ena dali hobede yabo bidi meni yai.  
\q1 Te eno boi bidi dabego nago enabolo te mani te genuai  
\q2 sęgę po odali.  
\q1 Tama augwaligo nago te yali sędę augwali wiegi yai  
\q2 homu pemene genuai mu ebao.  
\q1 Polobadu nago enabolo dwai dene maiabo bodolu muai  
\q2 dao.  
\q1 Tama te bodolu polo pedelalio.  
\q1 Tiali goli, megi da, eno homugo nago eno boi bidi  
\q2 dabeba me deli tiwai kolesaga me yao.   
\q1
\v 22 Nago eno yali dwai sę kone palama,  
\q2 tama nago ena dene manio.  
\q1 Tama tialima, nago megi da, te boi bidi dabego dwai  
\q3 kolesaga koneama,  
\q2 tama nago ena dali yali te kolesaga tiwai elama,  
\q2 tama nago te boi bidi dabe dene mao. Magi baso  
\q2 meni.  
\q1 Ena gela dwai odubao, tama eno bomo tamunaluyu,  
\q3 didibili elama, tulolueibao.”   
\c 2  
\s1 Genuai Bidigo Jerusalem dolama, dene mani  
\q1
\v 1 Hobede mu dao,  
\q2 te wiegi yai taun Saion.  
\q1 Genuai Bidigo aga dali sębę genuai mu yali.  
\q1 Tama agai sębę da, te hulia sai haowago taun mesega  
\q2 sai tiwai dao.  
\q1 Polobadu da, te Jerusalem te kantri Israel bagego  
\q2 gawe ebo wiegi yai taun elaluama, tama megi da,  
\q2 agai te Jerusalem aiyaba elaluama,  
\q2 aga olo pobele bage tiwai elalubao.  
\q1 Mu tama Genuai Bidigo te taun Jerusalem dolobo sogo,  
\q2 agai aga tempel be te taunde elalubao olama,  
\q2 homu kone me ebeo.  
\q1 Menio. Agai taun sese tama mu dolalio.   
\q1
\v 2 Genuai Bidi agai te Israel dabe hobede me ebeo.  
\q2 Menio.  
\q1 Agai augwaligo be nani sese tama dolali.  
\q1 Agai augwali dali sębę elama,  
\q2 tama agai wiegi yai kantri Judago  
\q2 bomai taun dabe aluama, tagalalio.  
\q1 Agai te kantri me, aga tobolu bidi dabe dali,  
\q2 sese tama dolalio,  
\q2 tama augwali hale dwai mu yalio.   
\q1
\v 3 Genuai Bidi aga sębę dwai mu elama,  
\q2 tama agai Israel dabego bomo aluama, tagalali.  
\q1 Tialima, te boi bidi dabe asali sogo,  
\q2 agai te Israel dabe tau me sabeo. Menio.  
\q1 Agai Israel mu dolalio, te isigo tigidali nai dabe dela  
\q2 silibo tiwai yalio.   
\q1
\v 4 Agai te wiegi yai taun Saion dali boi bidi elama,  
\q2 tama agai aga we bidi enainu enesigi balibiba  
\q2 tulalubo tiwai yali.  
\q1 Awe, aga bomogo aga digi te Jerusalemgo gawe yai  
\q3 we bidi sese tama ela silalio.  
\q1 Agai sębę te posolai isi tiwai elalu,  
\q2 agai te isi te taun Jerusalemba muani, bidigo wę  
\q2 gelebo tiwai yali.   
\q1
\v 5 Genuai Bidigo Israel dabe dali boi bidi homu elama,  
\q2 tama augwaligo kantri mu dolama, tagalalio.  
\q1 Awe, agai bomai taun dabe doliyu,  
\q2 me augwaligo te wiegi yai bomai  
\q2 be dabe aluama, tagaliyu yalio.  
\q1 Te tigidali Juda bulu sese tamade agai te we bidi homu  
\q2 sęgę emainu mu ilama,  
\q2 tama augwali gela geninama mu uduali.   
\b  
\q1
\v 6 Genuai Bidigo aga tempel be mu dolama, mu tagalali,  
\q1 te bidigo te gi be dolama, hųgila tagalabo tiwai tama  
\q2 yalio.  
\q1 Agai te Israel dabe augwali teba pelama,  
\q2 tama agaba augwaligo lotu po wagi pabo digi  
\q2 dolama, tagalalio.  
\q1 Tama te tiali kolesagago te Genuai Bidigo te lotu po  
\q2 wabo genuai sogo, me Sabat, si tama silalio.  
\q1 Tama te we bidi, augwali te Jerusalemde bidali we bidi,  
\q2 augwaligo agaba te lotu wabo sogo dabe ma lotu  
\q2 weyu ebeo.  
\q1 Genuai Bidigo te king me, pris dabe dali,  
\q3 agai sębę genuai mu yalio,  
\q2 tama agai augwali augwa sęde sela sąwanio.   
\q1
\v 7 Genuai Bidigo te aga tempel be,  
\q2 me tede elaluali ofa maiabo altaba tudi mu ola mani.  
\q1 Agai te boi bidi dabego te Jerusalem taun siyu,  
\q2 me agai tempel be hųgiyu emainu sula tagalalio.  
\q1 Tama me te boi bidi dabe augwali te Genuai Bidigo  
\q2 tempel be tomoba pelama,  
\q2 tama augwaligo te be tomode subigila hae me po  
\q2 dabe wali.  
\q1 Polobadu dago tede wiegi yai homu eyu,  
\q1 Godiba lotu po wedu geai goli,  
\q2 megi da, augwaligo hae bomonama wedu geai.  
\q1 Magi baso meni, augwaligo te be sai dao.   
\q1
\v 8 Genuai Bidigo te genuai wiegi yai taun Saiongo  
\q2 masigigo nigai boma pai obo aluama,  
\q2 tagalabo homu yalio.  
\q1 Agai te obo bugagia mu usu sai, te obo dolai hagede.  
\q1 Tama agai te sę ebode gagamua sabeo.  
\q1 Agai te tigidali badu te obo dabe dali,  
\q3 te bobobage taua be dabe dali,  
\q3 te sese tama mu dolama, tagalali,  
\q2 tama sese tama mu dolama, mu elalubao.   
\q1
\v 9 Tama agai te obogo sunumi dabe hųginama, sąnama  
\q2 tagaliyu,  
\q2 me te sunumi palibo ain dili mimia sąnama,  
\q2 tagaliyu yalio.  
\q1 Tama te dolali nai dabe augwali tǫde munalubadi,  
\q2 te dwai olo masigi hogomu dabego augwali  
\q2 mesegelama elalubao.  
\q1 Te boi bidi dabe augwaligo te king aga tobolu bidi dabe  
\q2 dali selama,  
\q2 tama augwali gasa kantriba kalabus elama, odasa  
\q2 pali.  
\q1 Te pris dabe augwaligo te we bidibolo te Godigo bomai  
\q2 po me ola mabo meni.  
\q1 Me te profet sibigo te nade subo nai tiwai ma susiąyu,  
\q2 tama augwaligo Genuai Bidigo po ma sabo menio.   
\q1
\v 10 Te Saion monu dabe, augwali olo dali tǫde dulaluyu,  
\q1 tama augwali pedauwali pania selama, bidalubao.  
\q1 Augwaligo augwa tobolude tǫ hogomu munama,  
\q2 tama augwaligo hobede side gudubo ugwa gudama  
\q2 bidibao.  
\q1 Tama te Jerusalemde gesi wegi mane augwali  
\q2 homu sęgę mu elama,  
\q1 tama augwaligo tobolu tǫba basi gulama, elalubao.   
\b  
\q1
\v 11 Eno te Jerusalemde pedelali nai dabe homu kone  
\q2 palama,  
\q2 tama ena gela waligo eno gedu dene mu ebao.  
\q1 Eno te hobedai we bidi dolama elalubo sulama,  
\q2 ena gasa homu dwai mu ebo dao.  
\q1 Eno homu dene dwai mu yalio.  
\q1 Magi baso meni, eno suali,  
\q2 te nai tusiąwai wai puluba dali,  
\q2 wai bǫų dabe dali suali.  
\q1 Augwaligo bomo kimi meniama,  
\q2 tama didibili elama,  
\q1 te Jerusalem sunumi dabede tuloluama,  
\q2 munalua pabo sualio.   
\q1
\v 12 Te wai bǫų dabe augwali nasi ebaso,  
\q2 augwa idabolo nai me ąį momainu gela weyu ebao.  
\q1 Augwali te taun sunumi dabede subigila tuloluama,  
\q3 munalua pabo suali,  
\q2 te ami bidi dabe te boide sili wąbi dolama,  
\q2 munalua pabo tiwai elalualio.  
\q1 Tama augwa ida dabego te wai bǫų dabe nogo daide  
\q3 muna sabo si da,  
\q2 te wai bǫų dabe augwaligo bidibo ula sia salio.   
\b  
\q1
\v 13 Jerusalem, eno nage hobede mu dwalio.  
\q1 O Jerusalem, te meba taun dabe nago te sali dene tiwai  
\q2 me sai menio.  
\q1 Tialima, eno mena po mu olama,  
\q2 nago homu dąų walaibawe?  
\q1 Nage dolali, te ene genuai mu tomoba pali tiwai yalio,  
\q2 te tamu ąį ge te aiyana mu dulali tiwai yalio.  
\q1 Tama nage dego wiegi yai ma pedelemainu egowe?  
\q1 Woo, bidi menio.   
\q1
\v 14 Te nago profet sibigo te nade subo nai tiwai suali  
\q2 po olama,  
\q2 tama augwaligo nage dali ili po naga walio.  
\q1 Tama augwaligo nage ili po ola mayu,  
\q2 augwaligo nago yali dwai sę hanilai menio.  
\q1 Te nage tau selama, te dwai sę tagalama,  
\q2 tama nage bugagia bidimainu tau me sabeo. Menio.  
\q1 Augwaligo Godigo po pusubode ili po walio.  
\q1 Tama augwaligo pogo nage kegasa bilama, mu tagalalio.   
\q1
\v 15 O Jerusalem, te Israel hani isąwai we bidi augwali  
\q2 tedu ela soyu,  
\q2 augwaligo nage dolali elalubao sualio.  
\q1 Tama augwali noma siyu, nogo hogwayu,  
\q2 tobolu pęyu, kęnę po ola mayu, e tama po obao,  
\q1 “Te taun tama te bidi dabego te wiegi yai sawi yai taun  
\q2 dao,” wali, “te taun te da, agawe?  
\q1 Te taun tama te tigidali tǫ kantri we bidigo gawe yai  
\q2 taun da, agawe?”  
\q1 Augwaligo te tobage hale ilibo po wabo dao.   
\q1
\v 16 Te naga boi bidi dabego nagede kęnę po weyu,  
\q2 posobo po wabo dao.  
\q1 Augwali gisugu dwai mu weyu, e tama tiwai po obao,  
\q1 “Dago bomogo mu dao, dago te taun mu dolama,  
\q2 tagalali dao.  
\q1 Te taun Jerusalem dolali dao, dago.  
\q1 Tega! Dago te si tonaluali, megi da,  
\q2 te si polo megi pedelali dao,”  
\q2 boi bidi augwaligo te tobage po wabo.   
\q1
\v 17 Te Genuai Bidigo polobadu mu te yainogo yali  
\q3 te sę polo megi yali dao.  
\q1 Polobadu mu Genuai Bidigo te po wai dao,  
\q2 te Israel dabego agai po sela sąbaso da,  
\q2 teda agai Jerusalem dolaibao po wai dao.  
\q1 Tama tialima, megi nage hobede me ebeo,  
\q1 Jerusalem, agai nage aiyaba polo elaluali dao.  
\q1 Agai nago boi bidi dabe bomo mu ilama,  
\q2 tama augwaligo nage aiyaba elalumainu ilali dao.  
\q1 Tama augwaligo nage dolalide wiegi yai  
\q2 homu pemene elama, gana pali dao.   
\q1
\v 18 Te nago we bidi augwaligo Genuai Bidigo  
\q2 augwali tau somainogo hwą te waiyąo.  
\b  
\q1 Hobedai, Jerusalem,  
\q2 nage hulide me giligade gela genina mu elama,  
\q2 tama nago gela uga te ąį sabo tulubo tiwai emainao.  
\q1 Nage hodo me doligio. Nage gela wabo sę naga idu  
\q2 geao.   
\q1
\v 19 Hulide nage hauwa sogo mu hodalu,  
\q2 tama Genuai Bidiba gela hwą wao.  
\q1 Nago agabolo gedu haluasa po bomonama weyu,  
\q2 te nago sęgę agabolo pusuyu,  
\q1 me nago homu sęgę po agabolo pusao.  
\q1 Magi baso menio, naga wai bǫų dabe  
\q3 augwali nasi elama,  
\q2 tama augwali bomo kimi isibaso,  
\q2 augwali te naga sunumi dabe  
\q3 sesegede te dedege pabo dao.  
\q1 Tialima, nago nogo ugwaba selama,  
\q2 tama Genuai Bidibolo augwali  
\q3 hobede emainu hanalu wao.   
\b  
\q1
\v 20 Jerusalemgo e tama gedu haluasa po wali,  
\q1 “Genuai Bidi, nago te naga hani digi muba  
\q2 te yali te dene mabo sę suao.  
\q1 Te we dabe sibi augwaligo augwa wai bǫų dabe  
\q2 godolo mu eyu, negeyu yai dao.  
\q1 Tiali goli, megi da, augwaligo augwa  
\q2 te wai bǫų dabego tigi tubao.  
\q1 Tama te boi bidi dabe augwali naga digi  
\q3 tempel be tomoba pelama,  
\q2 tama tede augwaligo naga pris dabe,  
\q2 me profet bidi dabe, ela silali dao.   
\q1
\v 21 Te boi bidi dabego augwa moni ge hwągo  
\q2 te gesi wegi ogwa me, monu dabe me, ela silalio.  
\q1 Awe, augwaligo te we sasiąwai gesi  
\q1 bidi dabe dali, te bidigo sasiąwai gesi  
\q3 we dabe dali te ela muani.  
\q1 Tama augwaligo tigi dabe eno sunumi  
\q2 dabede subigila wilalua pabo.  
\q1 Genuai Bidi, nago eno  
\q2 te we bidi dabe dali sębę mu yalio.  
\q1 Tama nago augwali dali hobede me ebeo. Menio.  
\q1 Nago augwali elama, isilai dao.   
\q1
\v 22 Nage sębę mu elama, tama nago te boi bidi dabe  
\q3 tigidali badu i olama, tama augwali aselama,  
\q3 ena dali dwai sę yali dao.  
\q1 Tama boi bidi dabe hauwa mu asai dao,  
\q2 te we bidi dabe te lotu wabo  
\q3 genuai sogo asobo tiwai yalio.  
\q1 Tialima, boi bidi dabego eno we bidi sese ela silali,  
\q2 tama eno we bidi me deli wi sana peyu,  
\q2 te augwaliba pedelali sę po pusabo bidi mu menio.  
\q1 Eno ena we bidi godolo mu yai dao,  
\q2 tama eno augwali bugagia mu tonaluai dao.  
\q1 Tiali goli, megi da,  
\q2 te boi bidi dabego augwali megi mu silalio.”  
\q1 Te Jerusalem hanugo te gedu haluasa po wali.   
\c 3  
\s1 Eno homu begelama, Genuai Bidigo eno sęgę dabe silibo tonalubao  
\q1
\v 1 Ena e po asębo bidi, eno te dene tolobo kolesaga  
\q2 konebo dao.  
\q1 Genuai Bidigo ena dali sębę yalio,  
\q2 tama ena dene manio.  
\q1 Tama eno genuai dene mu tolalio.   
\q1
\v 2 Agai ena mu hulia sai sunumidu mu pomainu ilalio.   
\q1
\v 3 Tama tigidali sogo agai ena deli naga dene madu  
\q2 gebo dao.   
\b  
\q1
\v 4 Te agai ena elai tiwai elama,  
\q2 tama eno dili dabe tigidali mu togwa pelama,  
\q1 tama eno tigi aboga sai.   
\q1
\v 5 Agai enabolo haniani sęgę mayu,  
\q3 dene mayu elama,  
\q3 tama te nai dabego ena bagua selama, kalabus  
\q3 ilalio.   
\q1
\v 6 Agai ena hulia sai madi bidimainu ilalio,  
\q2 te polobadu mu isai bidi dabe tiwai mu tama tiali.   
\b  
\q1
\v 7 Agai ena polo kalabus ilali,  
\q2 tama ena wi pabo usu egobeo.  
\q1 Te agai eno nogo sągą te sęgę yai sen bonogo kęai tiwai  
\q2 elama,  
\q2 tama ena bilabo usu menio.   
\q1
\v 8 Eno i olama, Genuai Bidibolo ena tau sao po olama,  
\q3 hanalubo dao.  
\q1 Tiali goli, agai eno gedu haluasa po  
\q2 waboba olo saganama, odobo menio.   
\q1
\v 9 Te tigidali badu ena painu yali madi,  
\q2 agai polo palia sesa bilalio.  
\q1 Te genuai masigi sunumide paliai tiwai  
\q2 ąǫ yalio, te ena pabo sunumide.   
\b  
\q1
\v 10 Genuai Bidigo ena dolainu tonaluali,  
\q2 te bulu hasa bea me laion sigo  
\q2 te hasa dabe soabo tonaluyu, dualalubo tiwai yalio.   
\q1
\v 11 Genuai Bidigo eno sunumi tagalomainu elama,  
\q2 tama agai ena dolalio,  
\q1 te laion de bea sigo hasa pobeasa peyu,  
\q1 te hasago tigi togola tagalobo tiwai yalio.  
\q1 Tama tialigo ena dolama mu bidibao.   
\q1
\v 12 Genuai Bidigo aga ene enesigiba  
\q2 tulama, tama ena enani.   
\q1
\v 13 Tama agai ena haligade genuai mu enani,  
\q2 agai te ene dabego.   
\q1
\v 14 Megi da, eno we bidi hani tigidali  
\q3 augwali gisugu dwai mu olama,  
\q2 tama ena kęnę mayu, balia po wabo dao.  
\q1 Awe, kigamu me, giligade me, pio me,  
\q2 tigidali sogo balia po wabo dao.   
\q1
\v 15 Agai ena sęgę hauwa mu mani,  
\q2 tama ena mu pągąna palio.  
\q1 Te agai ena dene dali sęgę dali si mayu,  
\q2 ena pągąnobo tiwai mu yalio,  
\q2 te ha ebo ąį sigo pągąnobo tiwai yalio.   
\q1
\v 16 Agai ena dali dene mabo sę mu yalio.  
\q1 Te agai eno tobolu tǫba aiya tųbo tiwai elama,  
\q2 eno kele degela tagalobo tiwai yalio.   
\q1
\v 17 Eno homu nagame elama,  
\q2 wiegi yai homu elama me bidibeo.  
\q1 Tama eno bugagia bidibo kolesaga te gegeda palalio.   
\q1
\v 18 Tama tibaso, eno te Genuai Bidigo  
\q2 ena tau somainogo tonalubo sę ebo, te usugobeo.  
\q1 Tama ena tǫde bobobage sogo bidigobeo, te homu ebao.   
\b  
\q1
\v 19 Ena te subigila wau bilibo bidi tiwai bidiyu,  
\q2 tama eno ena genuai sęgę dabe kone ebao.  
\q1 Tama tego enabolo dene mobao,  
\q2 te dwai ha ebo ąį tuai dene tiwai ebao.   
\q1
\v 20 Tigidali sogo eno te sę dabeba kone ebo digi,  
\q2 eno homu sęgę mu ebao.   
\q1
\v 21 Tiali goli, eno gasa nai me homu kone yali,  
\q2 tama tialigo te tibogo eno Genuai Bidigo  
\q2 ena tau somainu bomo elama, mu tonalubao.  
\q1 Te nai dabe da e dao.   
\q1
\v 22 Tigidali sogo Genuai Bidigo da  
\q3 homu dene eyu, tau sabo sę elama,  
\q2 tama agai daba homugo kęą peyu,  
\q3 da godolo mu ebo dao.  
\q1 Tama agai te kolesaga munu me siligobeo.   
\q1
\v 23 Menio. Te agai te kolesaga tigidali bubugade gesi  
\q2 noma pedalobo tiwai ebo dao.  
\q1 Genuai Bidi, nago te homugo kęą pabo kolesaga  
\q2 da dali tigidali sogo ebo dao.  
\q1 Nago te kolesaga te wiegi yai mu dao.   
\q1
\v 24 Eno homugo eno meba nai dabede  
\q2 moni homu igi homu ebao.  
\q1 Genuai Bidi deli tama ena usu dao.  
\q1 Tama tibaso, eno agai ena tau somainu  
\q2 bomo elama, tonalubao.   
\b  
\q1
\v 25 Genuai Bidigo te aga gegelama,  
\q2 tama agai augwali tau somainu tonalubo we bidi  
\q2 dali wiegi yai sę ebo dao.   
\q1
\v 26 Te we bidi augwali dua bidiyu,  
\q2 Genuai Bidigo augwali te boi bidi dabego nogode  
\q2 ma oda somainu tonalubo kolesaga eyu da,  
\q2 te wiegi yai dao.   
\q1
\v 27 Tama me ma, te bidi dabe augwali gesi bidide  
\q3 gagalama,  
\q2 te kolesaga ebo eyu da, te usu dao.   
\b  
\q1
\v 28 Te Genuai Bidigo te bidi me delibolo sęgę  
\q2 mabode da,  
\q2 teda te bidi agaduba bidigi pelama,  
\q3 penane pania sai elaluao.   
\q1
\v 29 Teda Godigo aga tau sabo homu yali bogo.  
\q1 Tama tiyu, agai aga digi aiyaba  
\q2 elaluama, tama tonaluao.   
\q1
\v 30 Te bidi dabego aga nabo gede  
\q3 nogo sawaligo elebaso da,  
\q1 tama aga dali dwai po waiyu ebaso da,  
\q2 teda agai augwaligo te tama  
\q3 sę emainu sula tagalamainao.   
\q1
\v 31 Genuai Bidigo aga tigidali sogo  
\q3 tudi ola magobeo.   
\q1
\v 32 Agai te bidi dabebolo sęgę mabo dao,  
\q2 tiali goli nosali agai augwali hobede ebo dao.  
\q1 Magi baso meni, aga da, te we bidi godolo mu ebo God  
\q2 dao.   
\q1
\v 33 Tama agai augwali dene me sęgę mabode  
\q2 agai wiegi yai homu me ebo menio.   
\q1
\v 34-36 Tama tibaso, bidigo te da kalabuside bidibo Juda  
\q2 bage dali dwai sę ebaso da,  
\q2 teda Genuai Bidigo te koneaibao.  
\q1 Ma, bidigo te Ugwadu Mu Bidibo God dali hagoma eyu,  
\q2 tama gasa bidi dali doloba pai kolesaga isąbaso da,  
\q2 teda Godigo te sę ebo bidi sugobe da, agawe?  
\q1 Ma, bidigo te po tų ebo kolesaga doloyu,  
\q3 gasa bidiba dene mobaso da,  
\q2 teda Genuai Bidigo tede hagela homu mu yaibao.   
\b  
\q1
\v 37 Te Genuai Bidigo usu da hasia wasiąyu da,  
\q2 teda bidigo magi sę pedalumainu ebo usugobeo.   
\q1
\v 38 Te Ugwadu Mu Bidibo Godigo naga te we bidi  
\q2 bugagia bidimainu ebo dao,  
\q3 ma augwali te genuai sęgę somainu ebo dao.   
\q1
\v 39 Tama tibaso, bidi me bididubadi,  
\q2 te Godigo agai yali dwai sę wei ponoyu,  
\q2 dene mobaso da,  
\q2 teda te bidigo Godibolo wado po olamuo.   
\b  
\q1
\v 40 Dago dena kolesaga, me dena bilibo  
\q2 kolesaga dagalama, bugagia suao.  
\q1 Tama dago dwai kolesaga tagalama,  
\q2 tama da Godiba ma aselainao.   
\q1
\v 41 Te dago te Ugwadu Mu Bidibo Genuai Bidiba gedu  
\q2 haluasa po wabo si,  
\q2 dago dena homu ugwadu daide naga elaluyu,  
\q2 gedu haluasa po wagimio.  
\q1 Tama dago e tiwai po wao,   
\q1
\v 42 “Dago nage dali hagoma elama,  
\q2 tama dago sęgę sai dao.  
\q1 Tama nago dago sęgę sela sąsiąyu,  
\q2 tama da te nago gedude dwagi yai ma pedalubeo.   
\q1
\v 43 Nago da dali sębę dwai mu elama,  
\q2 tama nago da dali hobede me yai menio. Menio.  
\q1 Nago da pobeasa pelama, tama nago da elama, isilai dao.   
\q1
\v 44 Nago da dali sębę elama,  
\q2 tama nago naga olo palia sai dao.  
\q1 Te nago naga digi te genuai pǫgo halua selama,  
\q2 tama dago gedu haluasa po wabo  
\q3 nage pageba sabolabo  
\q2 usu emainogo tiwai me yai menio.   
\q1
\v 45 Nago da aiyaba elaluai dao.  
\q1 Tama te meba Israel hani isąwai gasa hanigo da te olo  
\q2 dwai nai tonobo tiwai elama,  
\q3 meda mu yai dao.   
\q1
\v 46 Dago boi bidi dabe tigidaligo da  
\q2 posobo po hauwa wai dao.   
\q1
\v 47 Te boi bidi dabego da elama, te da wi elama,  
\q2 me da tulalumainu yabo nai dabe ilalio.  
\q1 Tama da sese tama dolama, tagalainu yali.”  
\q1 Dago te tobage gedu haluasa po wainao.   
\b  
\q1
\v 48 Eno te hobedai we bidi dolama elalubo sulama,  
\q2 tama ena hobede mu elama,  
\q2 tama ena gela waligo gela ųga tǫba tulalubo dao.   
\q1
\v 49 Eno gela wabo togogobeo.  
\q1 Tama tiyu, gela ųga sesemane sogo aiyaba dulaibao,  
\q2 te sula sisąma soabo ąį tiwai yaibao.   
\q1
\v 50 Ena gela odubadi, te Genuai Bidigo aba tonama,  
\q2 tama da homu kone eboba usu naibao.   
\q1
\v 51 Eno ena taun we dabe augwali  
\q3 dwai mu bidibo suali.  
\q1 Tialima, ena homu sęgę genuai mu ebao.   
\b  
\q1
\v 52 Te bidi mebago ena dali olo dali  
\q3 boi bidi homu elama,  
\q2 tama ena olo dali elama, isilainu yali.  
\q1 Tama augwaligo ena bidigo ba pobeasa pabo tiwai yai.   
\q1
\v 53 Te augwaligo ena te genuai tǫ dedageba sąnama,  
\q2 tama ena dedagede bidibadi masigi ugwadu sąbo  
\q2 tiwai yali,  
\q3 te ena ela muainu.   
\q1
\v 54 Tama me te genuai ąįgo ena mesegelama,  
\q2 tama eno homugo ena poma peyu isigowe homu  
\q2 yali.   
\q1
\v 55 Genuai Bidi, ena dolama mu bidiyu,  
\q2 tama ena isai bidigo bulude bidibo  
\q3 tiwai bidibo ąǫ yali.  
\q1 Tama nago ena tau somainu, eno nage i wali.   
\q1
\v 56 Eno e tama po olama, i wali,  
\q1 “O Genuai Bidi, nago eno gela wabo  
\q2 odao, nago olo pania sigio,” wali.  
\q1 Tama nago eno te i wabo po odai dao.   
\q1
\v 57 Tama nage ena pageba aselama,  
\q2 tama nago enabolo “Wi igio,” po wai dao.   
\q1
\v 58 Genuai Bidi, nago ena tau selama,  
\q2 tama nago te eno boi bidi dabe aiyaba elaluai dao.  
\q1 Nago ena augwaligo nogode ma oda selama,  
\q2 tama ena bugagia bidibao.   
\q1
\v 59 Genuai Bidi, nago te bidi dabego  
\q2 ena dolobo sę ebo nago suai dao.  
\q1 Tama tibaso, nago augwaliba po tų elama,  
\q2 nago ena tau selama,  
\q2 te bage augwali aiyaba elalubo sę yao.   
\q1
\v 60-61 Genuai Bidi, nago koneani,  
\q2 augwaligo ena dali boi bidi homu genuai mu ebao.  
\q1 Augwaligo ena dali haniani dwai kolesaga  
\q2 geme yabo homu hauwa ebao,  
\q2 tama me augwaligo ena dali dwai po te obao.   
\q1
\v 62 Tigidali bubugade augwali po minama, posolu weyu,  
\q2 ena dolabo po gegeyu ebao.   
\q1
\v 63 Suao! Te augwaligo sę elama,  
\q2 tama augwali toma tubo sogo da,  
\q1 augwaligo ena posobo balia po wabo dao.   
\q1
\v 64 Genuai Bidi, nago augwaligo  
\q3 te dwai kolesaga koneama,  
\q2 tama augwa te dwai kolesaga dolo ma wei ponao.   
\q1
\v 65 Nago augwaligo homu kolesaga dolama,  
\q2 i ola mabo po olama,  
\q2 tama augwali sese tama dolao.   
\q1
\v 66 Nago augwali dali sębę elama,  
\q2 tama augwali sese pobeasa pelama,  
\q2 tama augwali sese tama mu silao,  
\q3 te augwali e tǫde deli me bidigobeo.   
\c 4  
\s1 Te Jerusalem dabe augwali te boi bidi dabego augwali dali boi hwįani sogo dwai sogo mu suali  
\q1
\v 1-2 Hobede mu dao.  
\q1 Te Saion we bidi dolama elalubao.  
\q1 Polobadu augwali te sawi yai gol tiwai  
\q2 sawi yai mu elaluai dao.  
\q1 Tiali goli, te gol dabe augwali ula me isąma,  
\q2 megi da dolama mu elalubao.  
\q1 Polobadu da, te Genuai Bidigo genuai be tempel  
\q3 augwaligo te wiegi yai masigi dabego nigilama  
\q3 elaluai dao.  
\q1 Tiali goli, augwali megi da hagayali dao,  
\q2 te masigi dabe subigila tulaluama,  
\q2 te tigidali taun sunumi dabede munalua pabo dao.  
\q1 Megi da, te we bidi augwali nogi ma elalubeo.  
\q1 Augwali te dwai pobele bage sene dage te bidi dabego  
\q2 nigai,  
\q2 te sene dage tiwai dao.   
\b  
\q1
\v 3 Te uni yowi dabe augwali wiegi yai hasa dabe menio.  
\q1 Tiali goli, augwaligo augwa wai bǫų dabe koneama,  
\q2 tama augwaligo augwa wai bǫų dabe ame mabo dao.  
\q1 Tiali goli, eno we bidi hani augwaligo te uni yowigo  
\q2 ebo tiwai wiegi yai kolesaga ebo menio.  
\q1 Menio. Augwaligo te nai meni yai wa pai bulude bidibo  
\q2 genuai bago ebo kolesaga tiwai ebo dao.  
\q1 Te bago subigila ge sasagano bilama, tagalobo dao.  
\q1 Te tiwai me eno we bidi augwaligo augwa wai bǫų dabe  
\q3 hobede homu me ebo menio.  
\q1 Menio. Augwaligo augwali tudi ola mabo dao.   
\q1
\v 4 Te dwasianu wai bǫų dabe augwali tuabo ame menio.  
\q1 Tama augwaligo dogoni dolama, mu aloa pabo dao.  
\q1 Te wai bǫų dabe augwali biliyu,  
\q2 te we bidigo augwali nai momainu  
\q3 biliyu, hanalua bilalio.  
\q1 Tiali goli, te bidi mego augwali nai me mabeo.   
\q1
\v 5 Megi da, te moni bidi dabe me te nai sǫą palio.  
\q1 Polobadu da, augwali nai wiegi wiegi yai nai dabe  
\q3 hauwa elaluai dao.  
\q1 Tiali goli, megi augwali nasi elama,  
\q2 augwali subigila te taun sunumi dabede isila peyu  
\q2 yalio.  
\q1 Polobadu augwaligo nai dabe hauwa mu elaluyu,  
\q2 tama augwaligo wiegi wiegi yai au ebo nai dabe  
\q2 gudiyu yai dao.  
\q1 Tiali goli, augwali megi da,  
\q2 nai mu menia pelama, tama megi da,  
\q2 augwali te dwai pobele bage sabo pesagede nai te  
\q2 gegebao.   
\b  
\q1
\v 6 Te Jerusalem dabe, eno we bidi,  
\q2 augwaligo dwai sę yalide sali  
\q3 sęgęgo te Sodom we bidigo sęgę edelalio.  
\q2 Tama tibaso, Genuai Bidigo Jerusalem dabebolo  
\q2 dene genuai mu te mani dao.  
\q1 Tiali goli, Genuai Bidigo te Sodom dabe dolali sogo da,  
\q2 te taun agai deli sogo mu tama te taun dolai dao.  
\q1 Tama te boi bidi dabego megi te Jerusalem dabe dali  
\q2 ebo tiwai te Sodom dabe dali yai menio. \x * \xo 4:6 \xt Gag 19:24\x*   
\q1
\v 7 Polobadu te Jerusalem dabego tobolu bidi dabe  
\q2 augwali bugagia bidiyu,  
\q2 augwaligo tigi wiegi yai mu elaluai dao.  
\q1 Augwali bomai bidi dabe mu dao,  
\q2 tama augwaligo tigiwali te wiegi yai homugo dąų  
\q2 wabo masigi tiwai ula elalubo ąǫ yai dao.   
\q1
\v 8 Tiali goli megi da, augwaligo tigi dolama,  
\q2 tama meda mu yalio.  
\q1 Tama augwali te sunumi dabede bilibo sogo da,  
\q2 te bidi dabego augwali tonobo konebeo.  
\q1 Augwali dili pulu hą elama,  
\q2 tama augwaligo tigi wa pai mu elaluali.   
\q1
\v 9 Te boi hwįbode isali bidi dabe augwali godolagi mu  
\q2 elama,  
\q2 te nai habuge yai bidi dabe aiyaba elalualio.  
\q1 Magi baso meni, augwali polo isalio.  
\q1 Tiali goli, gasa bidi hani augwali nasi mu elama,  
\q2 tama sęgę bobobage sogo tolama,  
\q2 tama augwali dili pulu hą elama, tama augwali  
\q2 isalio.   
\q1
\v 10 Te augwa wai godolo homu yai ida dabe augwaligo  
\q2 augwa wai bǫų dabe isibo sogo da,  
\q1 te ida dabego te wai bǫų dabego  
\q2 tigi selama, augwaligo ulama tualio.  
\q1 Te tobage kolesaga te eno hobedai we bidi augwaliba  
\q2 te boi bidigo te boi hwįani sogo te sę pedelai dao.\x * \xo 4:10 \xt Bom 28:57; Ese 5:10\x*   
\b  
\q1
\v 11 Genuai Bidigo te Saion dali haliga sębę dwai mu  
\q2 yalio.  
\q1 Tama tibaso, agai aga dene genuai mu manio,  
\q2 bidigo ąį te tǫba gelebo tiwai yali.  
\q1 Te agai te Saion isi tulama,  
\q2 tama te taun sese dela silibo tiwai yalio.   
\q1
\v 12 Te gasa tǫ pedai kantrigo king dabe,  
\q2 me te haniani tǫde we bidigo homugo  
\q2 te boi bidi dabego te Jerusalem aiyaba elaluama,  
\q2 tama te taun sogobe homu yai dao.   
\q1
\v 13 Tiali goli, Godigo te boi bidi dabe tagala palama,  
\q2 te Jerusalem dolai dao.  
\q2 Magi baso meni.  
\q1 Te profet dabe, me pris dabe, augwaligo dwai sę elama,  
\q2 tama augwaligo te Jerusalemde  
\q3 dwai sę meni yai we bidi ela mubaso tiai dao.   
\q1
\v 14 Te we bidigo kaneme te pris dabego ugwade,  
\q2 me profet bidi dabego ugwade dagana sai tiwai  
\q2 elama,  
\q2 tama Godigo gedude te pris dabe dali,  
\q2 profet dabe dali, augwali meda yai tiwai dao.  
\q1 Tama augwaligo genuai sęgę mu salio.  
\q1 Megi da, te pris dabe, me te profet dabe,  
\q2 augwali te sunumi dabede popolo palio.  
\q1 Tama tibaso, te we bidi augwali  
\q2 te bage augwali pageba pabo hagela yalio.   
\q1
\v 15 Te we bidi dabego augwali  
\q2 hai mayu elama, tiwai po wali,  
\q1 “Dage gedao. Dage polo meda yali dao,  
\q2 tama dage da pąba asigio.  
\q2 Dage gediąo,” wali.  
\q1 Tama tibaso, te pris dabe me profet dabe  
\q3 augwali gasa kantriba wi peyu,  
\q2 te olo wau bilibo bage tiwai bidali.  
\q1 Tiali goli, te kantri we bidigo te bidi dabe augwali  
\q2 te kantride bidimainu sula tagalobeo.   
\q1
\v 16 Genuai Bidi aga digi augwali  
\q3 subigila pomainu sela sąwani,  
\q2 tama agai augwali homu kone me ebeo,  
\q2 te pris dabe, me tobolu bidi dabe,  
\q2 augwali te we bidigo gedude genuai nogi me  
\q2 elalubeo.   
\b  
\q1
\v 17 Dago tonaluama, tama dago te gasa tǫ kantri bidi  
\q2 hani me deligo da ma oda sagasomainu tonaluali.  
\q1 Dago te sunumi dabeba gedu tonono ela bilibadi,  
\q2 tama dago gedu dene yali.  
\q1 Tiali goli, dago olo dali tonalualio.  
\q2 Augwali me asobeo. Augwaligo da tau sabo menio.   
\q1
\v 18 Te boi bidi dabego da dolainu no munalubaso,  
\q2 tama da te sunumi dabede bilibo usu me ebeo.  
\q1 Te da dolabo sogo te polo pedelalio.  
\q1 Tama tibaso, da sese tama mu dola silalio.   
\q1
\v 19 Da wi pobadi, tama te boi bidi dabego da pobeasa  
\q2 asalio.  
\q1 Awe, augwali bomonama mu,  
\q2 te ba kemodagego te hasa ela sainu bogo  
\q2 pobeasa aiyaba tulalubo tiwai yalio.  
\q1 Augwaligo da bulu du dabedu pobeasa bilama,  
\q2 tama augwali te nai meni yai wa pai bulude  
\q2 dualaluyu, da tonalualio.  
\q1 Te da asobo suainu,  
\q2 tama augwaligo da tola siyu, ela palio.   
\q1
\v 20 Tama augwaligo da bugagia bidimainu tonaluyu,  
\q2 da tau sali bidi me augwaligo tola salio.  
\q1 Te da te Genuai Bidigo sa muani te king dao.  
\q1 Dago homugo da te king dologode bidiyu,  
\q2 tama da bugagia bidiyu yaiba homu yali,  
\q1 te meba gasa kantri dabe ebo gilama bidigowe  
\q2 homu yalio.   
\b  
\q1
\v 21 Kantri Idom, megi nage Usgo tǫde bidibao.  
\q1 Megi da, nage gisugu dwai olama,  
\q2 tama nage Saion dolaibaso,  
\q2 wiegi yai homu pemene megi yao.  
\q1 Genuai Bidigo sębę te wain wę kapu deli tiwai dao.  
\q1 Tama agai te Saiongo te kapude tumainu ilalio.  
\q1 Tiali goli, agai nagebolo nosali me maiwaibao.  
\q1 Tama nage dolama mu polaibao.  
\q1 Tama nago naga tigide ugwa peda sąnama,  
\q2 tama nage hale genuai mu yaibao.   
\q1
\v 22 Saion, nago sęgę saibaso, Genuai Bidigo nago sęgę  
\q3 wei ponani dao.  
\q1 Tialima, agai nago kalabus yali silaibao.  
\q1 Te nago we bidi kalabus yali pįsigina sąwaibao.  
\q1 Tiali goli, Idom, Genuai Bidigo nago  
\q2 yali dwai sęde sali sęgę haninaibao,  
\q2 tama agai nage me dene mawaibao,  
\q3 te sęgę wei ponoyu.   
\c 5  
\s1 Te Jerusalem dabe augwaligo Genuai Bidigo augwali tau somainu hanalu wali  
\q1
\v 1 Genuai Bidi, nago dabolo  
\q2 te dwai nai pedelali kone elama,  
\q2 tama nago da hobede yagameo.  
\q1 Suao, da dolama mu bidiyu,  
\q2 tama da meba we bidi hanigo gedude  
\q3 da hale dwai mu te ebao.   
\q1
\v 2 Dago tǫ te gasa kantri bidi dabego nogode te elalubao.  
\q1 Tama augwali dago be dabede bidibao.   
\q1
\v 3 Da olo mu bidibao,  
\q2 te tiana wai bǫų dabe tiwai bidibao.  
\q1 Me, te we dabe te wilawe we tiwai bidibao.   
\q1
\v 4 Polobadu da, te isi dabe me te ąį dabe  
\q2 te dena nai dabe elalualio.  
\q1 Tiali goli, megi da, dago te ąį me isi sainogo da,  
\q2 teda dago abeliyu naga ebao.   
\q1
\v 5 Te boi bidi dabe augwaligo da selebo genuai mu ebao,  
\q2 bidigo aga sę yabo donki ma kamel selebo tiwai  
\q2 ebao.  
\q1 Tama da tigi hagela dwai mu ebao.  
\q1 Tiali goli, augwaligo da toma tumainu sula me tagalobeo.   
\q1
\v 6 Da nai mu sǫą palio.  
\q1 Tama tibaso, dago te Isip dabebolo me Asiria dabebolo  
\q2 da tau somainu hanalu walio.   
\b  
\q1
\v 7 Dago wąį dabe augwaligo polobadu te dwai sę yai  
\q2 digi, augwali polo isila palio.  
\q1 Tama megi da, da augwaligo dagede da sęgę tolobao.   
\q1
\v 8 Te Babilon dabego olo sę bagego da tonalubao,  
\q2 tama da augwaligo nogode ma dobola sabo bidi  
\q2 menio.   
\q1
\v 9 Da dolabo bidi dabe, augwali dago kantride bida bida  
\q2 pobao.  
\q1 Tama da nai gegegi painu pabode da,  
\q2 augwaligo da ela muainu tonalubo dao.   
\q1
\v 10 Da nasi genuai mu ebao, tama da  
\q2 posolo dwai mu ebao.  
\q1 Tama dago tigi posolo te stov posolo ebo tiwai mu ebao.   
\q1
\v 11 Te Saion bulu dude digi,  
\q3 me te Juda dabego taun dabede,  
\q2 te boi bidi dabe augwaligo dago we dabe,  
\q2 me dago wegi mani dabe kegelama,  
\q2 tama augwaligo penani sę dabe yalio.   
\q1
\v 12 Augwaligo dago tobolu bidi dabe selama,  
\q2 tama augwali pobila walalio.  
\q1 Tama augwaligo dago monu dabe dali  
\q2 me augwaligo wiegi yai kolesaga me ebeo.   
\q1
\v 13 Augwaligo dago gesi bidi dabego  
\q2 wit gosegebo sę bomai sę emainu eyu,  
\q2 me te ogomane dabego genuai isi pobi genuai elama,  
\q3 tolomainu ilalio.   
\q1
\v 14 Megi da, te genuai bidi dabe augwali te taun genuai  
\q2 sunumi dabe pąde me dualalubeo.  
\q1 Tama te gesi bidi dabego te gita gagali ma ebeo.   
\q1
\v 15 Dago wiegi yai homu pemene yali sia salio.  
\q1 Dago te tęąbi wabo kolesaga hasegelama,  
\q2 megi dago hobedai gela naga obao.   
\q1
\v 16 Dago genuai nogi polo tulalualio,  
\q2 te dago gawe yali nai dabe dolai dao.  
\q1 Da hobede mu yao.  
\q1 Magi baso meni, dago yali dwai sęde sali sęgę dwai yalio.   
\b  
\q1
\v 17-18 Dago homu te Saion bulu du te dolali dao,  
\q2 homu yali.  
\q1 Tama te bulu uni yowigo bulu pedelali dao, homu yalio.  
\q1 Tama dago dwai homu mu elama,  
\q2 tama da gela wali madi dago gedu dene mu yalio.   
\b  
\q1
\v 19 Tiali goli, Genuai Bidi, nage sesemane sogo king  
\q3 bidada pidu bidibao.   
\q1
\v 20 Tialima, nago da magi baso tudi ola menama,  
\q2 tama da magi baso sesemane sogo gegeda pobawe?   
\q1
\v 21-22 Genuai Bidi, nago da tudi ola menama,  
\q2 tama nago da dali sębę genuai mu yalio.  
\q1 Tiali goli, da nage pageba ma asaio.  
\q1 Tama tialima, nago da ma odasa asao.  
\q1 Tama nago da polobadu bugagia bidali tiwai ma  
\q2 bidimainu ilao.