\id JOS - Dadibi NT [mps] -Papua New Guinea 2001 (DBL 2014) 
\h Hetman Josuago Po Elalubo Buku 
\toc1 Hetman Josuago Po Elalubo Buku 
\toc2 Josua 
\toc3 Jos 
\mt1 Hetman Josuago Po Elalubo Buku  
\imt1 Hasia Nedebo Po  
\ip Te buku Bomai Po tede Mosesgo si wali sogo te Godigo bomo yai po te Israel we bidi dabe augwalibolo ma ola mawai dao. Tama elama, tama Moses isali. Te e bukude te Israel dabego te Kenan moni tǫ sainu yali po dabe wai.  
\ip Te Israel hani dabe augwali te masigi kemi tǫ bulude bagula bilaludubadi, kibu be hauwa yali, te augwali bobage sogo te Godigo augwaliba mawaiba olama sa muani te tǫ sainogo tonalua peyu tama tialio. Tialima megi da, Godigo augwaliba usu da obaso, augwali te tǫ tomoba pali. Josua agai te Moses bidali pesage selama, tama aga te Israel dabe augwaligo polalubo tobolu bidi pedelali. Josuago bukude te Israel dabego yali sę po pusali, te gagalama peyu, te Jordan ąį nogelama pali, te Kenan dabe augwali bidali tǫ sainogo te boi hwįai dao. Te hwįani po hauwa te bukude elalubao. Te boi hwįani po bage te Godigo sa muyu dąį ilali sunumi wali peyu, te buku Bomai Po Dąį 20 tede wali po wali pelama, te tama tiali. God aga digi te augwaligo Aya bidiyu, te augwaligo boi hwįani side aga polasa pabo bidi tiwai elaluali, te agai augwa wąį nǫų dabe dali wali poba mu usu nai hagede tama tiai dao.  
\ip Josuago buku pedai sela elalubao. (1) Te Dąį 1-12de Israel dabe augwaligo te Kenan tǫ sali po elalubao. (2) Te Dąį 13-22de augwaligo te tigidali hani deli deliba te tǫ doba yali po elalubao. (3) Te Dąį 23-24de te Josuago silagasu wabo po obaso, tama te Israel dabe augwaligo te bomo yai po kontrak po ma dąų walalio. Augwaligo te po weyu bidada pabo sesemane sogo God deli naga wali peduaiba po dąų wali, magi baso meni, agai moni genuai bomo hanilama ola mawai dao.  
\ip Te Josuago silagasobo po wali, te Josuago homugo ma koneani te tigidali sę Godigo bomai nogogo yali sę agai te Abrahamde bulali wąį nǫų dabe augwaliba mawaiba wali tǫ saiba wali poba mu usu nai da, te homu yalio. Tama Josuago po hanilama pusuyu, tama wali, “Te dagego Genuai Bidiba lotu wabo homu isąbaso da, teda dagego bugagia homu kone palao. Te dagego deba lotu po waibawe? Tiali goli eno da, ena we wai puluba dali, dago te Genuai Bidiba lotu waibao.” Dąį 24:15de, te po elalubao. Te e bukude genuai koneabo polalubo homu kolesaga te dao.  
\c 1  
\ms1 Te Israel dabe augwaligo te Kenan tǫ sainu sisi elaluali  
\mr (Dąį 1–12)  
\p
\v 1 Te Moses aga te Godigo sę bidi dao. Tama Josua te Nungo ogwa te Moses tau sali bidi dao. Moses isai madi, tama Godigo Josuabolo te tiwai po wai,  
\v 2 “Eno sę bidi Moses isalio. Tialima, nage megi da, sisi yao. Nage dali te Israel we bidi tigidali dage e Jordan wę nogelama, tama eno dage mawainogo ebo te tǫba sabolao.  
\v 3 Eno Mosesbolo te tiwai po dąų walali, te dage soabo tǫ tigidali badu, te eno dagebolo mawaibao wai dao.  
\v 4 Te dagego tǫ sesege badu gagalama, te tiwai elaluaibao. Te olo masigi kemi tǫ elalubo te olo page badu gagalasa, u bulu du Lebanon te olo page meba, teba usu nigi pelama, tama te giliga pedalubo badu te genuai wę Yufretis te badu usu nigi peyu, tama te Hit we bidi hanigo tigidali tǫ pedai badu dąį igi pelama, tama te giliga dega sigi pabo badu te genuai tamu ąį, te badu dąį igi paibao.  
\v 5 Te bidi me deligo te dage aiyaba elalumainu elama, te nage isimainu ebo, te usu me egobeo. Te ena nage dali bidiyu, te ena Moses dali bidali tiwai gilama yaibao. Eno homugo nage me gegeda palogobeo, eno nage munu me taga pogobeo. \x * \xo 1:5 \xt Bom 11:24-25; 31:6, 8; Hib 13:5\x*  
\v 6 Nage bomo elama dolaluyu, tama nage wi me elamuo. Magi baso meni. Te nago te we bidi dabe augwali te eno augwalibolo mawaibao wali te tǫ pedaiba odasa pomainu yaibao, te tiwai eno te po augwa wąįbolo dąų wai dao. \x * \xo 1:6 \xt Bom 31:6, 7, 23\x*  
\v 7 Tama tibaso, nage bomo mu elama dolaluyu, tama nage wi me isiąyu, tama habu bulu me pelamuo. Nago bugagia tonaluyu, tama eno sę bidi Mosesgo nagebolo mani bomai po tigidali mu wali pao. Nago te bomai po me badu dwasianu munu me tagalamuo. Nago te bomo yai po dabe tigidali bugagia wali peyu da, teda te nage mena badu pabo te nage munu me dolomainu me egobe, te nage bugagia naga bidaibao.  
\v 8 Nago te bomai po elalubo bukugo po munu me homugo gegeda pelamuo. Te nago bugagia tonaluyu, tama te bomai pode elalubo tigidali po mu wali pomainogo eyu, nago te giligade me, hulide me, nago te bomai pode bugagia skul elama, konea sao. Te nago tama tiyu da, te nago gasa sę tigidali ebo te wiegi yai naga ilaibao.  
\v 9 Eno nagebolo wai dao. Tama nage bomo elama dolaluyu, tama nage wi munu me isiąyu, tama nage magi nai me delide habu bulu me pelamuo. Magi baso meni, ena God, te nago Genuai Bidi, te ena nage dali te nage pabo tigidali buluba paibao,” te po wali.   
\p
\v 10 Tialima, Josuago te we bidi augwali tonalubo tobolu bidi dabebolo te po wai,  
\v 11 “Dage te we bidi bidibo pesage tomode bagula biliyu, te we bidi augwalibolo te po waiąo, ‘Te duga nai dabe sisinao,’ po wao. ‘Sela sogo naga digi elalubao, tama dagego e Jordan wę nogelama, tama God, duga Genuai Bidigo, dagebolo te mawaibao wali te tǫ dagego saibao,’ tama po wao,” Josuago te po wai.   
\p
\v 12 Tama Josuago te po te Rubengo hanibolo, me Gatgo hanibolo, me te Manasego hani me badubolo me te tiwai po wai,  
\v 13 “Dagego te po bugagia homu kone palao, te tigidali po Mosesgo dagebolo wai dao, aga te Genuai Bidigo sę ebo bidi bidali. Agai te po wali, ‘God, duga Genuai Bidigo, e tǫ dagebolo menama, tama dage tede bidiyu, toma tuabo madi elaluaibao,’ te po wai.  
\v 14 Tialima, dagego e tǫ habu badu dagego selama da, tama duga we wai puluba me, te kibu dabe badi, augwali ede te wę Jordan e badu te Mosesgo mani tǫde tonaluyu bidagameo. Tiali goli, dagego ami bidi dabe da, augwa hwįabo nai dabe dodolama, tama e wę nogelama, te abagi dabe dali augwali polasa pelama, tama augwali tudi badu tonaluyu, te wąbi hwįbo tau somainao.  
\v 15 Te duga Genuai Bidi Godigo e tǫ dagebolo mawai dao. Tama dagego te gasa Israel hani bage duga abagi dede tau siyu, tama agai augwalibolo mabo tǫ sabo sogoba usu nagasu yao. Tama elama, te boi pilama wiegi yai pemene ebo sogo elaluyu, tama augwali me te toma tueibao, te dage megi ebo tiwai gilama yaibao. Tama tiliama, tama nosali dage duga e tǫba ma asomainogo, polobadu te tǫ Mosesgo dagebolo mawai dao, e tǫ te Jordan ąį badu, te giliga pedalubo badu dao,” Josuago te po wai. \x * \xo 1:15 \xt Bom 3:18-20; Jos 22:1-6\x*   
\p
\v 16 Tama tigidaligo Josuabolo po wei ponoyu, te po wai, “Awe,” wali. “Te dago nago dabolo wali po tiwai gilama, te tama tigidali sę dago yaibao. Tama tigidaliba nago da tagala palobaso da, teda da teba paibao.  
\v 17 Te dago nago po tigidali wali peyu, te dago Mosesgo po sesemane sogo wali pali tiwai gilama yaibao. Tama dena homugo te God, naga Genuai Bidi, te nage dali bidiyu, te polobadu Moses dali bidali tiwai gilama bidimainao.  
\v 18 Te bidi me deligo hagoma eyu, nago po sela sąbaso da, te aga isimainu yaibao. Tiali goli, nage da, nage te bomo elama bidiyu, tama nage wi munu me elamu dao!” wali, te we bidi dabego.   
\c 2  
\s1 Josuago te moni hanu Jerikoba te sa pabo bidi si tagala palai  
\p
\v 1 Te Israel dabe augwali te bulu Sitimde bidalubadi, tama Josuago te moni tǫ Kenanba sa pabo bidi si tagala palali, tama agai augwali sibolo te po wai, “Dage si pelama, te moni tǫ Jeriko genuai hanu me, te pąde elalubo tǫ me, bugagia suao.” Tialima, te bidi si te Jeriko hanu tǫba pelama, tama te penani we me deligo beba sabolali, te we aga nogi Rahap. Tama augwali si agai bede bidai. \x * \xo 2:1 \xt Hib 11:31; Jer 2:25\x*   
\p
\v 2 Tama gasa bidi dabe augwaligo te Jeriko tuni bidibolo te tiwai po wai, “Dua dao! Te Israel bidi meba te e sogo hulide te tǫba sa asobo bidi asai dao.”  
\v 3 Tama te tǫde te gavman tuni bidigo te tiwai po odolama, agai te bidi meba tagala palama, te po te Rahapbolo wagi pao wali, “Te nago bede bidibo bidi dabe, augwali te e tǫba sa asai bidi dabe dao! Nago augwali odasa asao,” wali.   
\p
\v 4 Rahapgo te bidi si deli deli geme dualama, tama agai te tuni bidigo po tolagasali bage augwalibolo te po wai, “Mu tamao, bidi meba te eno beba asali. Tiali goli, augwali mena bulu badu asali te eno konebeo.  
\v 5 Te be pio ebode, te bidi dabego te hanu tomoba asobo genuai sunumi palibo sogo, augwali ede bidali ma tagalali. Augwali menaba pali, eno konebe, augwaligo enabolo me wabeo. Tiali goli, dagego augwali wali polo pobaso da, teda dagego augwali gegebo usu yaibao,” te po wai.  
\v 6 Mu tamao, Rahapgo te po wali, tiali goli hasia bolo agai augwali si te aga bidigi beba ugwaba odasa holama, tama agai augwali si te aga te name ugwa nigibo nosai dabe dunama muani, te dologoba geme dualai dao.  
\v 7 Tialima, megi da, te tuni bidigo bage augwaligo te hanu tagalama, tama augwali te sa asali bidi si gegegi peyu pai. Augwaligo gege pali pidubadi genama, te wę Jordan bolabo madi me deliba pabo sunumidu pai. Nosali augwaligo te hanu taga soai madi, te sunumi tonalubo bidi dabego te hanu tomoba pabo genuai sunumi paliali.   
\p
\v 8 Te Israel bidi si godege pisąbadi, tama Rahap te be ugwaba holama,  
\v 9 tama augwali sibolo te po wai, “Eno koneani, Genuai Bidigo e genuai tǫ te dage Israel dabego nogoba mawainogo ebao. Tama eno po dolo mu dage sibolo obao. Da tigidali dagede wi elama, tama da didibili dwai mu ebo.  
\v 10 Magi baso meni, dagego te Isip tǫ taga soali sogo te Genuai Bidigo te Nosai Elaluali Tamu Ąį wai ilali po augwaligo dabolo te po pusai. Tama dago odali, dagego te Amor dabego gavman tuni bidi Sihon de Ok si me, te augwali sigo ami bidi dabe dali, te wę Jordan u badu ela silali po dago odai dao. \x * \xo 2:10 \xt Sai 14:21; Nam 21:21-35\x*  
\v 11 Dago te po odolama, tama da dagede wi mu ebao. Tama megi, da tigidali bomo menio. Magi baso meni, God, dagego Genuai Bidi, aga te dagalu de tǫ sigo God dao.  
\v 12 Tialima, megi da, dage sigo te Genuai Bidigo gedude te dage sigo eno hani bage bugagia tonaluabo po dąų walao, magi baso meni, te eno dage si bugagia tonaluali tiwai gilama yao. Tama dage sigo duga si dąų wali po mu dąų walobo dąį me dedeli enabolo mao.  
\v 13 Tama mayu, dage Israel dabego te eno aya ida badi, te ama, me abe, me te augwa hani bage tigidali munu me ela munamuo! Dage sigo te bidi dabe augwaligo da elemainu sula tagalu munu me tilamu dao!” te we Rahapgo te po wali.   
\p
\v 14 Tialima, te bidi sigo po wei ponoyu, te po wai, “Da sigo po nagebolo dąų mu obao. Tama da sigo te dąų wali po togobaso da, te Godigo da si dolomainu yaibao. Te nago da sigo yali sę po dabe hanilisiąbaso da, teda da sigo te dąų wali po munu me togosiąyu, te nage dali, nago hani bage dali tau saibao, te Genuai Bidigo te genuai tǫ dabolo mabo sogo te tama tiaibao,” te po wai.   
\p
\v 15 Te penani we Rahapgo be te moni hanu bagulali obo dali kisilai elaluai, tama me badu dąį togwali badu te be pola sali windo dedage te obo ugwadu elaluai. Tama Rahapgo te bono baklain te windode kęnama, tama baklain te masigigo nigali bobobage obo bulu badu manama, te bidi sigo te bonodu nogo toda duluyu, aiyaba dulama, te hanu buluba dįą pomainu tama tiai dao.  
\v 16 Tama augwali si tama painu ebadi, tama Rahapgo te po wai, “Dage si te bulu duba geme duala sigi pelama, sela sogo bidao. Tiyu, tuni bidigo bidi dabego dage si gegelama, suabuo. Nosali augwali te Jeriko hanuba ma soai digi, teda duga si buluba ma pao,” wali.   
\p
\v 17 Tama te bidi sigo Rahapbolo te po wai, “Te da sigo nagebolo te yao wabo sę tigidali ela silibaso da, teda da sigo megi nagebolo e dąų wabo po munu me togogobeo.  
\v 18 Tialima, megi nago bugagia odao! Te da Israel dabe e buluba sabalobo sogode, nago te mama yai bono kęnao, megi da si aiyaba e dulubo windode, te da sigo nagebolo e mabo mama yai bono kęnao. Tama nago naga aya ida, me te ama dede dabe, me te naga hani bage tigidali selama, tama augwali nago beba naga sisinao.  
\v 19 Te me deli te bede bidali tagalama, te hanuba pabo sunumidu pobadi, tama augwali ela muani da, teda aga digi te dolabo page yali dao. Te da sigo sę menio. Tiali goli, me deli te be tomode bidibadi dolobaso da, teda te sę yali page da side elaluaibao.  
\v 20 Tiali goli, dua dao! Te nago da sigo e yali sę po pusuyu da, teda da sigo dąų wali po te sia saibao,” wali.   
\p
\v 21 Tama Rahapgo po wei ponani, “Eno dage sigo pode usu da po obao.” Agai te tama po olama, tama agai augwali si tagala palai. Nosali agai te mama yai bono te be windode gebelai.   
\p
\v 22 Tialima, te bidi si te bulu du dabeba sabolama, tama augwali si geme dualaludai. Tama tuni bidigo hani dabe augwaligo te bidi si te sunumidu tigidali bulu badu sela sogo gegedu gegedubadi geai. Tiali goli, augwaligo bidi me deli susiąbaso, tama augwali te moni hanu Jerikoba ma geasa pai.  
\v 23 Nosali te bidi sigo te bulu du dabe tagalama, tama aiyaba dulai, tama augwali si te wę Jordan nogelama, tama te Josua bidibo madi ma sabolama, tama te tigidali sę pedelali po agabolo pusai.  
\v 24 Tama te bidi sigo Josuabolo te po wai, “Mu tamao, Genuai Bidigo te tǫ tigidali da nogoba mawaibao. Awe, te tǫ tolalubo tuni bidi aga we bidi tigidali dade te dwai wi mu ebo dao,” wali.   
\c 3  
\s1 Te Israel dabe augwaligo te Jordan wę nogai  
\p
\v 1 Tama Josua te kigamu digi mu hodaluama, tama aga dali te Israel dabe augwali te bidali pesage te Sitim tagalama, tama augwali te Jordan ąįba sabolai. Tama augwali bidabo pesage tede nigai. Augwaligo te wę Jordan nogobeo.  
\v 2 Te nosali pabo sela sogo elalubadi, te genuai bidi nigali bidi dabe te pesage tomode biliyu,  
\v 3 tama te we bidibolo te tiwai po wai, “Dagego te Livai dabego pris bidi hani dabe augwali pabo subo sogo, tama te dago Genuai Bidi Godigo bomai po dąų wali po muani halobage tolasa pobaso da, teda dage hogodama, te duga tigidali doado bage selama, tama augwali wali piąo.  
\v 4 Tama tiyu, dage pabo sunumi te duga konemainu ebao, magi baso meni, dage te buluba polobadu me sabolisiąwai. Tiali goli, te bomai po dąų olama muani halobage pąba dage munu me pelamuo. Menio. Dage te dwasianu digibulu gana te po dąų wali halobage tolasa pabo wali pao,” te genuai bidi nigali bidi dabego augwalibolo wali.   
\p
\v 5 Tama Josuago te we bidi dabebolo te po wai, “Te duga homu me kolesaga dodolobo sę iliyu, lotu po wao, magi baso meni, do da, te Genuai Bidigo noma sabo bomai sę te dage tomode yaibao,” wali.  
\v 6 Nosali Josuago te pris bidi dabebolo te po wai, “Dagego te bomai po dąų wali halobage te we bidi augwali nosaliba ilama, polasa te halobage tolasa pao,” wai. Te augwaligo tama tiai dao.   
\p
\v 7 Tialima, Genuai Bidigo Josuabolo te po wai, “Megi da, te eno nago nogi ugwaba sabo sę te Israel dabe augwali gedude gagalaibao, te ena nage dali bidibo konemainu, te ena Moses dali bidali tiwai gilama yaibao.  
\v 8 Nago te bomai dąų wali po muani halobage tolobo pris bidi dabebolo te po wao, ‘Dage te Jordan ąį sesegeba sabalubo sogo, dage te wę tomoba doligi pelama, tonaluyu, bidao,’ te po wao,” wali.   
\p
\v 9 Tama megi da, Josuago te Israel dabe augwalibolo te po wai, “Dage te pąba aselama, te Godigo po odao, te dago Genuai Bidi dao.  
\v 10 Megi da, dagego te dena God, te bidibo ula elalubo God, aga te da tomode elalubaso, tama agai te Kenan dabe me, te Hit bage dabe me, te Hivi dabe me, te Peres dabe me, te Girgas me, te Amor me, te Jebus dabe badi, te tama bidi hani dabe te Godigo bomogo sela sąbo te dagego koneaibao. Dagego te Godigo bomo bugagia sula selama, mu konemainu eyu,  
\v 11 te Godigo dąų wali bomai po muani halobage te tolasa polasa peyu, te wę Jordan nogobo sogo te tiwai yaibao.  
\v 12 Tama tibaso, dagego te Israel hani deli delide te deli deli bidi selama, te nogo si olama, sągągo si bidi nigilao.  
\v 13 Te pris bidi dabego te tigidali tǫde Genuai Bidi Godigo te dąų wali po muani halobage tolasa pabode, tama augwaligo sągą te węba agabo sogo, teda te wę tigidali dąų mu ola sigi pelama, tama te wę me soagobeo. Magi baso meni, te ugwadu wę daide te bulu du me dedeli tiwai gilama dolaluaibao,” Josuago te po wali.   
\p
\v 14 Tialima, te we bidi augwali te bidali pesage tagalama, te wę Jordan nogoainu yali. Tama te pris dabego te dąų wali po muani halobage tolama, tama augwali polasa pai.  
\v 15 Te sogo te inawai nai gide sabo sogo, tama te Jordan wę genuai asobo sogo dao. Tiali goli, augwali te wę sesegeba sabolama, tama augwaligo sągą te węba agabo sogo,  
\v 16 te wę togoyu, mu dąų olama, tama te wę ma soabeo. Te wę ugwadu te bobobage bulu du tiwai gilama, te bulu Adamba usu nigi pelama, te wę pesage holai tiwai elaluai, te Saretan hanu me deli pąde yali. Tama te sigi ąį Det Si teba dulubo wę te tigidali sula sai elaluai. Tama te we bidi augwali te wę tomodu pelama, te Jeriko hanu pąba u badu sabolai.  
\v 17 Te Israel dabe augwali te tǫ wa pai madi naga pai. Tama te Genuai Bidigo te dąų wali po muani halobage tolali te pris bidi dabe, augwali te wę Jordan sula sali digi te tǫ dolo tomode dolaluali, te we bidi tigidali te wę nogelama, gasaba u badu sabola silibo usu nigi pomainu yai.   
\c 4  
\s1 Josuago te masigi nogo si olama, sągągo si te Gilgalde pesage holali  
\p
\v 1 Te tigidali Israel dabego te wę Jordan nogola silali sogo, Genuai Bidigo te tiwai po Josuabolo wai,  
\v 2 “Te Israel hani deli delide, te nago bidi deli deli siyu, tama nogo si olama, sągą badu si bidi nigilao,” po wai.  
\v 3 “Tama augwalibolo te po mao, ‘Dagego te pris dabe dolalubo badu te Jordan wę tomode te masigi nogo si olama, sągągo si sao. Tama te masigi dabe dagego te megi hulide bidabo pesage nigibo digi te tolasa asama, muao,’” wai.   
\p
\v 4 Tama po obaso, Josuago te bidi nogo si olama, sągągo si bidi nigilama, tama agai augwali i olama, asobode tama augwalibolo te po wai,  
\v 5 “Dage te Jordan ąįba dulama, tama te dago Genuai Bidi Godigo te dąų wali po muani halobage tolali bidi pris dabe augwali edelao. Dagego te genuai masigi dabe siąo, te Israel hani nogo si olama, sągą badu si usu nama sao. Tama dagego te deli deli masigi te duga nagede munama, tama tolasa asao.  
\v 6 Te masigi dabede te Genuai Bidigo yali sę dabede te we bidi augwaligo homude konealuabo sę dąį tama ilaibao. Tama nosali nosali sogo te duga wąį te nosali ame nabo wai dabego dagebolo te masigi dabe tede magi baso munalubawe po hanalu obaso da,  
\v 7 teda dagego augwalibolo te po waiąo, te Genuai Bidigo dąų wali po muani halobagego te wę Jordan nogali sogo te wę sula sai elalubadi, te masigi dabe sai dao po wainogo tama tiwai. Tama te masigi dabego te Israel dabego homu te sesemane bidada pabo sogo hogodomainogo tama tiao,” wali.   
\p
\v 8 Tialima, te bidi dabego te Josuago po wali gilama tama tiali. Augwali te Jordan wę tomoba pelama, tama te masigi nogo si olama, sągągo si sai, te Genuai Bidigo Josuabolo wali po gilama tiwai. Tama augwaligo te masigi dabe te sogo bidabo pesageba tolasa aselama, muagasai.  
\v 9 Tama Josuago te gasa masigi dabe te nogo si olama, sągą badu si masigi te pris dabego te dąų wali po muani halobage tolaluyu dolaluali madi, te Jordan ąį tomode te sesege badu te masigi dabe dodolai. Tama te masigi dabe me elalubo dao.   
\p
\v 10 Te pris dabe te Jordan ąį tomode me dolaludubadi, te bidi dabego te tigidali sę te Genuai Bidigo me, te Mosesgo me, te Josuabolo po wali sę tigidali ela siligi peyu, usu nigi pai. Te we bidi augwali polo mu te wę u badu sabolai.  
\v 11 Tama nosali augwali sabola silaide, te Genuai Bidigo dąų wali po munalubo halobage tolali pris bidi dabe, augwali me te augwali pela saboligi pelama, tama nosali augwali tudiba ilama, augwali ma poligi pai dao.  
\v 12 Te Rubengo bidi hani dabe me, te Gatgo hani me, te Manasego hani me badu badi, augwaligo te hwįainogo sisi elama, tama augwali polasa peyu, te gasa we bidi dabe augwali tudiba togolama, te Mosesgo augwalibolo wali po tiwai gilama yai.  
\v 13 Te hani selago hwįabo sisi yali bidi hani te bidi sese umabo, 40,000 bidigo te hwįainu sisi yai, tama Genuai Bidigo gedude augwali te doloba pai tǫ odogo malu me deli te hanu Jeriko pąba sabolai.   
\p
\v 14 Te Israel dabego te sogode te Genuai Bidigo augwalibolo yali sę dabe sulama, tama augwaligo te Josua nogi ugwaba sali, augwaligo te Mosesbolo te tigidali sogo te aga nogi ugwaba sidubadi, te aga isiboba usu nagasali tiwai gilama yai dao.   
\p
\v 15 Genuai Bidigo Josuabolo te po wali,  
\v 16 “Te pris dabebolo te dąų wali po tolali bage augwaligo te wę Jordan tagalama, edaba holao po wao,” wali,  
\v 17 tama Josuago te tiwai po augwalibolo wai.  
\v 18 Tama te dąų wali po muani halobage tolali bage te pris dabe te sesegeba sabolai digi, te wę dąų olaluali te gelama, tama aga soali pesagede dolo ma soai dao, genuai mu eyu tama yali.   
\p
\v 19 Te we bidi augwaligo te Jordan wę nogali, te polua delide, te dei nogo si, te sogo te wę nogali, tama augwali bidali pesage te Gilgal, tede te Jeriko hanu pąde te giliga pedalubo badu te pesage nigai dao.  
\v 20 Te Gilgalde Josuago te masigi nogo si olama, sągą badu si masigi te Jordan ąįde te bidi dabego sali masigi tede ugwaba dodolai.  
\v 21 Tama Josuago Israel dabebolo te tiwai po wai, “Nosali, te ame nabo wai dabego te augwa aya dabebolo te tobage po hanalu obaso, te e masigi dabe magi baso ede munalubawe po obaso da,  
\v 22 teda augwaligo augwalibolo te po waiąo, ‘Te Israel dabego te Jordan wę te wę sula sai digi nogali te dąį ilali te dao,’ te po wao.  
\v 23 Magi baso meni, te dago Genuai Bidi Godigo te wę Jordan wai ilali, te dage asobadi polasa soyu tama tiwai, te dage gasa badu sabolomainu usu ilai, te agai te Nosai Elalubo Tamu Ąį wai ilali madi te da nogali tiwai yai dao.  
\v 24 Genuai Bidigo te sę yaligo da, te tigidali tǫ badu bidibo tigidali bidigo te agai bomo konemainu elama, tama dagego duga Genuai Bidi Godibolo sesemane sogo te lotu po omainogo yai dao,” Josuago te po wali.   
\c 5  
\s1 Te Israel bidi dabe tigiwali togolama, te Pasova nai te Gilgalde tuai  
\p
\v 1 Te sia ge dulubo badu te Jordan wę badu, te Amor tǫde bidibo te tigidali tuni bidi dabe badi, te genuai tamu ąį Mediterenian te sesegede te Kenan moni tǫde bidibo tigidali tuni bidi dabego me, augwaligo te Genuai Bidigo te Jordan wę wai ilai digi te da Israel dabego te wę nogali po odali. Tama te da Israel dabe augwali pąba asobaso, te tuni bidi dabe augwali wi dwai mu eyu, tama augwali homu didibili mu yai dao.  
\v 2 Nosali Genuai Bidigo Josuabolo te po wai, “Te masigi hwą ge poa pai meba nigilama, tama te Israel bidi dabego tigiwali pedai togwao, te Israel dabe augwaligo polobadu yali tiwai gilama yao,” te po wai.   
\p
\v 3 Tialima, Josuago te hwą ge dabe nigilama, tama te bidi dabego tigiwali te dwasianu bulu du me deli tede togwali, tama augwaligo te bulu du nogi poyu, te Tigiwali Togobo Bulu Du dao po wai.  
\v 4 Agai te kolesaga yali page, e tiwai. Te Israel dabego te Isip tǫ taga soali sogo, te hwįbo usu yali bidi dabe tigidali, augwali te olo kemi tǫ bulude isila pai dao.  
\v 5 Te tigidali bidigo te Isip bulu taga soali sogo, augwaligo te augwa tigiwali togwai. Tiali goli, te idago te olo kemi tǫ bulude ame nani bidi dabe, augwaligo tigiwali te me togosiąwai.  
\v 6 Te Israel dabe augwali te nai meni yai olo kemi tǫde bilaludubadi, te kibu be bidi sese si 40 yia yai. Te sogo te hwįbo usu yali bidi dabe tigidali te augwali isila pai. Magi baso meni, te augwaligo Genuai Bidigo po wali me pisąbaso, tiwai dao. Te mu tama Genuai Bidigo te wąį dabe augwalibolo po dąų waliyu, agai te tǫ dabolo mawaibao wai. Te tǫ da, te wiegi yai mu dao. Tiali goli, agai te po wai, te po sela sąbo bidi dabe augwaligo me sugubeo, wai. \x * \xo 5:6 \xt Nam 14:28-35\x*  
\v 7 Tiali goli, te augwali bidali pesage hasegelali, te augwaligo ogwa dabe te tigiwali me togosiąwai, te augwali kemi tǫ bulude bilali sogo. Tama megi Josuago te tiwai sę augwalibolo yai.  
\v 8 Augwaligo te tigidali bidigo tigiwali togwa silama, tama te Israel dabe augwali te pesagede bidibadi, te bidi dabe augwaligo keni pedela sabo sogoba usu nagasai.   
\p
\v 9 Nosali Genuai Bidigo Josuabolo te po wai, “Polobadu dage te Isip tǫde olo sę eyu bidai, tama dage hale mu yai. Tiali goli, megi eno dage te hale yali sę te dagala sąbao,” wai. Tama tibaso, te e sogo megi bubugade augwaligo te bulu nogi Gilgal wali, te page e dao, “Dagala sąwai.”   
\p
\v 10 Te Israel dabe augwali te bulu nogi Gilgal te doloba pai tǫ Jerikode bidaluyu, tama te namba wan polua, dei te 14de, tede augwaligo te hulide te Pasova nai tuai dao. \x * \xo 5:10 \xt Sai 12:1-13\x*  
\v 11 Te nosali side te Israel dabego te nai bali me wit te Kenande sai. Augwaligo te bali ulama, te bo disąwai nai bret nigilama, tama augwaligo tuai dao.  
\v 12 Nosali te sogo te nai mana te munu ma dulubeo. Tama te Israel dabego te Kenande elalubo nai naga selama, tubo gagalalio. \x * \xo 5:12 \xt Sai 16:35\x*   
\s1 Josuago te bainat hwą tolaluali bidi dali po wai  
\p
\v 13 Josua te hanu Jeriko pąde bidali sogo, agai bidi me deli te bainat hwą ge tolaluyu, dolalubo suai. Tama Josua aga dwai noma mu selama, tama agaba pelama, tama agabolo hanalu wali, “Nage te dago ami bidi me deli dawe, ma nage te boi bidi me deli dawe?” te po wai.   
\p
\v 14 Te bidigo te po wei ponai, “Ena te ami bidi meni, tama ena te boi menio. Ena te Genuai Bidi Godigo ami kepten bidi dao,” wai. Te Josua aga tobolu te tǫba aiyaba mu pogulama, tama agabolo lotu po weyu, te po wai, “Ena nago sę bidi dao. Nago homugo eno mena sę emainogowe?” te po wai.   
\p
\v 15 Tama Genuai Bidigo ami bidi keptengo Josuabolo te po wai, “Nago naga sągą nadoba dįą sąyao. Magi baso meni, te nage dolalubo tǫ, te gasa wiegi yai tedali mu elalubao.” Tama Josuago te tiwai tama yai.   
\c 6  
\s1 Jeriko hanu dolai  
\p
\v 1 Te Israel dabe augwali te pąba bidagasai elalubaso, tama te Jeriko hanu tomode bidibo bidi dabego te hanu tomoba pabo sunumi tigidali bugagia dąų walali. Te bidi dabe buluba peyu, edaba asu yabo usu me ebeo.  
\v 2 Tiali goli, Genuai Bidigo Josuabolo te po wai, “Bugagia odao! Te eno nagebolo te Jeriko hanu badi, te aga tuni bidi me, te bomai ami bidi dabe me, te eno nago nogoba mawaibao.  
\v 3 Nago naga ami bidi dabe dali te deli sogo te deli bubugade te nogo a naga olama, me badu deli sogo te hanu bagula bilao.  
\v 4 Te nogo a naga me si wabo sogo te pris bidi te dąų wali po muani halobage tolali bage polasa pabo badu te augwali poligi pelama, tama augwaligo te bu wabo nai biugel tolomainu yao, augwaligo te omai kibu sipsip gąų pedelaligo nigai. Tama te nogo a naga me badu si wabo side, nage dali te ami bidi dabe badi tama te hanu bagula nogo a naga olama, me badu si te tama sogo biliyu yao,” wai. “Tama dage te hanu obo sesege badu bagula bilibo sogo, te pris dabego te bu wabo nai biugel te bu ola biliduao.  
\v 5 Te augwaligo te biugel bu wabo te bobobage mu kegasa pabo sogo da, teda dage tigidaligo te i olama, po daga genuai mu wao, tama te po obadi, te hanu bagulali moni masigigo nigali obo masigi te pepeda paibao. Tama tigidali bidi te hanu tomoba dolo pomainao,” wali.   
\p
\v 6 Tialima, Josuago te pris dabe i olama, asobode tama augwalibolo te po wai, “Dagego te dąų wali po muani halobage tolao,” wai. “Tama te pris a naga me badu sigo te biugel tolama, tama te dąų wali po muani halobage tolali bidi dabe asobadi, te augwali poligi pao,” wai dao.  
\v 7 Nosali Josuago te we bidibolo te po wai, “Dage piąo! Dagego te hanu bagulali masigi obo bagula biliyu, tama te ami bidi dabe te Genuai Bidigo dąų wali po muani halobage tolali bidi dabe asobadi te polasa pao.” Te po wai.   
\p
\v 8 Tialima, augwaligo te Josuago wali po tiwai gilama yai. Te pris bidi dabe a naga olama, me badu si te Genuai Bidigo te dąų wali po muani halobage tolali bidi dabe nosali asobadi, te augwali te Genuai Bidigo gedude polasa peyu, te biugel bu ola pai.  
\v 9 Tama ami bidi dabe meba te pris dabe pabo badu polasa peyu, tama meba te dąų wali po muani halobage tolali bidi dabe pabodu nosali pai. Tama augwali pali sogo, te a naga olama me badu si te pris dabego te nai biugel bu olalua pai.  
\v 10 Tiali goli, Josuago te we bidi augwalibolo te po wai, “Te dagego te i me te kilikili me deli munu me wasiąbadi, te eno po dagebolo waboba te usu nigi pao,” wali.  
\v 11 Te agai te pris dabe dali, te Genuai Bidigo bomai po dąų wali po muani halobage tolali bage dali tagala palama, te hanu deli sogo bagulama bilimainogo yai. Te augwali ma geasa aselama, te sogo hulide augwali bidali pesageba ma bidagasai.   
\p
\v 12 Tama Josua te kigamu digi mu hodaluama, tama te pris dabego te dąų wali po muani halobage ma selama, tama tolasa palio.  
\v 13 Tama te a naga olama, me badu si te pris dabego te bu wabo nai biugel te a naga olama, me badu si selama, tama polasa peyu, te bu wabo nai biugel bu ola pai. Tama ami bidi dabe meba te pris pabo badu polasa peyu, te meba nosali asiyu yai.  
\v 14 Augwaligo te tiwai naga te si sogo elama, tama augwa bidali pesageba ma geasa asai. Augwaligo te tama tiwai sę te nogo a naga me deli sogo te tiwai sę yai dao.   
\p
\v 15 Te 7 wabo sogode, te be posobaso, tama augwali hogodaluama, te augwaligo polobadu yali tiwai gilama, augwaligo te hanu bagula bilai. Tiali goli, te bubugade augwaligo te hanu bagula bilali te nogo a naga sogo olama, me badu si, te tama sogo bilai.  
\v 16 Te tama sogo bilali silama, teda te pris dabego te bu wabo nai biugel te bu wabo mu bobobage sesabia pabode tama Josuago te we bidi augwalibolo te po wai, “Te i bomo elama, waiąo! Genuai Bidigo te hanu dagebolo mawai dao!  
\v 17 Dago te hanude elalubo tigidali nai dabe dali dolinao, dago te ofa me deli te Genuai Bidibolo te tigidali mabo tiwai gilama yao. Te penani we Rahap naga, te aga aya ida, aga hani dali, augwali te me ela munamuo, magi baso meni, agai te hanu sa asela suagasomainu tagala palali bidi si geme dualai dao.  
\v 18 Tiali goli, dagego te hanude nai me deli sidali weyu habu sai. Te dagego sali da, teda te dolabo te moni dwai sę te dage Israel dabe bidibo pesagede mu pedelaibao.” Te po wai.  
\v 19 “Te tigidali nai augwaligo te silvago me gol me bras me ain, tego nigali nai dabe, te Genuai Bidigo nai dabe naga dao. Dagego te Genuai Bidigo mone mubo beba naga sela asao,” Josuago te po wai.   
\p
\v 20 Tialima, te pris dabego te bu wabo nai biugel bu wai. Tama te we bidi augwaligo odobo sogo, deli sogo mu tigidaligo te genuai i wabo sogode tama te hanu bagulali obo dabe te gisigasa dulali. Tama tiai digi, nosali te we bidi tigidali te tomoba pelama, tama augwaligo te hanu sai dao. \x * \xo 6:20 \xt Hib 11:30\x*  
\v 21 Augwaligo te tigidali we bidi me, te gesi we bidi me, te monu dabe, mosi dabe me, te bulmakau dabe me, sipsip, donki me, te nai dabe dali augwaligo te moni hwą bainatgo ela silai.   
\p
\v 22 Tialima, hasia bolo Josuago te buluba sa asela suagasali bidi sibolo te po wai dao, “Dage si te penani wego be tomoba pelama, tama aga dali, te aga hani bage dali, augwali te selasa asama, te duga si dąų wali po tiwai gilama yao,” te po wai.  
\v 23 Tialima, te bidi si te be tomoba pelama, tama Rahap dali, te aga aya ida, me ama dede, me te tigidali hani wai puluba, me te augwa sę olo ebo bidi dabe, te augwali selasa aselama, tama augwali sigo te bage augwali te Israel dabe augwali bidibo pesage pąde tagalama, bidaluai.   
\p
\v 24 Tama nosali te Israel dabe augwaligo sia nogolama, tama te hanu me te tomode elaluali nai tigidali te siago dai. Tiali goli, hasiabolo te Israel dabego te gol, me silva, me bras, me ain, tego nigali te nai dabe augwaligo selama, tama deli madi sisinama, te Genuai Bidigo mone mubo be tomoba muai dao.  
\v 25 Tiali goli, Josuago te Rahap me te aga hani bage tigidali bidalumainu sula tagalai, magi baso meni, agai te bidi si Josuago te Jeriko tǫba sa asobo bidi tagala palali sogo, agai te bidi si geme dualai. Tama te we Rahapgo wąį hani dabe te Israelde bidada asali, te megi e po asębo sogo me bidibo dao. \x * \xo 6:25 \xt Hib 11:31\x*   
\p
\v 26 Tialima, Josuago bomai po te we bidi augwalibolo weyu, te tiwai po wai, “Te bidi me deligo e hanu Jeriko ma nigibaso da, teda Genuai Bidigo te bidi dali dwai sę yaibao,” wai. “Tama gasa bidi mego te hanu genuai obo dabe ma nigibaso da, teda aga ogwa gomunai bidi te isaibao. Ma, te tomoba pabo genuai sunumi ma nigibo bidi, te bidigo sabi ogwa bidi te isaibao,” te po wai, Josuago. \x * \xo 6:26 \xt 1 Kin 16:34\x*   
\p
\v 27 Genuai Bidi te Josua dali bidibaso, tama te tǫ dabe badu bidalubo tigidali bidi augwaligo agabolo genuai nogi mawai dao.   
\c 7  
\s1 Akango dwai sęgę sali po  
\p
\v 1 Hasia sogo Genuai Bidigo te po wai, te Israel dabego te dolabo nai dabego te nai me deli munu me selamuo po wai. Tiali goli, te Israel dabego te po sela sąwai, tama bidi me deli aga nogi Akan, te bidigo te nai meba sai. Tama tibaso, Genuai Bidigo sębę mu te Israel dabe dali eyu bidai. Akan te Karmigo ogwa, Karmi te Sapdigo ogwa, Sapdi te Serago ogwa, te Juda hani dabe dao.   
\p
\v 2 Josua te Jerikode bidiyu, tama bidi meba te bulu nogi Ai teba tagala palai, te hanu me deli te giliga pedalubo badu te Betel badu, te Betaven pąde elaluai. Agai augwalibolo te hanu susa biligi pao po wai. Tialima, te bidi dabe augwali pelama, tama tiwai igi pai.   
\p
\v 3 Nosali augwali ma asu, Josuabolo te tiwai po wai, “Nago te tigidali bidi pomainu mu elamuo. Te bidi sese sigo te umabo bidi hauwa mu 2,000, ma te bidi sese sela wabogo te umabo hauwa 3,000 bidi naga pelama, te Ai hanuba hwįgi pomainu tagala palao. Nago te tigidali bidi mu tagala palama, te hwįgi pomainogo me elamuo. Te genuai hanu menio,” te po wai.  
\v 4 Tialima, te Israel ami bidi dabe te bidi sese umabo 3,000 bidi mu pali. Tiali goli, te Ai hanu bidi dabego augwali edaba ma pobeasa asai.  
\v 5 Augwaligo te Israel dabe te hanu tomoba pabo te genuai sunumidu pobeasa pelama, te masigi pepedebo buluba usu nigi pai. Tama augwaligo te bulu duba aiya dulubo te sunumide te bidi te 36 tama bidi usu nama elai. Tama te Israel dabe augwali wi mu elama, tama bomo elama me dolalubeo.   
\p
\v 6 Josua te homu sęgę mu elama, tama aga gudali ugwa pisąwai. Tama aga te Genuai Bidigo bomai dąų wali po halobage munalubo pąba te aga gesabidi te tǫba degasa dulama, munaluai. Tama te Israel dabe tonalubo bidi dabe augwali me te Josua dali tǫba degasa dulama, tama augwali tede bididubadi, te giliga aiyaba dega sigi pai. Augwaligo homu sęgę ebo te sa muyu, te augwa tobolude te tǫ hogomu muanio.  
\v 7 Tama nosali Josuago te po wai, “O God, Genuai Bidio! Magi elama, nago da te Jordan wę e badu odasa asaliwe? Nago da te Amor dabego nogoba menama, da dolomainogo yai dawe? Magi baso da te wę Jordan u badu bidimainu yai meniwe?  
\v 8 O Genuai Bidio, te Israel dabego te boi bidi dabe augwali tudiba ilama, tama augwali wi eyu, ma geasa asalio. Te eno magi po wagawe?  
\v 9 Te Kenan bidi dabego, me te e tǫde bidalubo gasa tigidali we bidi dabego te sę yali po odaibao. Tama tiyu, augwaligo da bobegelama, tama da tigidali elaibao! Tama naga nogi ugwaba sabo sę te nago megi magi elama yaibawe?” Josuago te po wai.   
\p
\v 10 Tialima, Genuai Bidigo Josuabolo te po wai, “Hodaluao! Magi elama nage te tiwai tǫde pila mubawe?  
\v 11 Te Israel dabe augwaligo dwai sę yalio! Hasia eno augwalibolo habu seliyu, te Jeriko hanude elalubo nai dabe me sigio po wai, tiali goli augwaligo eno po sela sąwanio. Tama eno augwalibolo te dolao po wali nai dabe meba te augwaligo salio. Augwaligo te nai dabe wi selama, tama augwaligo tibo sę elama, tama augwaligo te nai dabe te augwa nai dabe tomoba geme dualalio.  
\v 12 Tama tialigo te Israel augwali bomo elama dolalu, te boi bidi dabe dali hwįabo te usu ebeo. Megi da, augwali te boi bidi dabe dali hwįbo wi soai, magi baso meni, te augwali dolomainao! Te dagebolo eno habu selali nai dabe te dagego dolisiąbaso da, teda ena munu me dage dali bidimainogo egobeo,” Genuai Bidigo wali.   
\p
\v 13 “Tialima, hodaluao! Nage pelama, te we bidi dwagi yai ilama, tama augwali ena gesabidiba do asomainu sisi wiegi yai iligi pao. Magi baso meni, ena dagego God te eno po te elalubao, ‘Dage Israel dabe, dagego eno dagebolo te habu selali nai dabe meba salio. Dagego te nai dabe sela sąsiąbaso da, teda dagego te boi bidi dabe aiyaba me elalugobeo.  
\v 14 Tialima, te kigamu digi te dagego hani tigidali deli deli te ena bidibo madi sabolao. Te nai wi sali bidi hani haninimainogo tama tiao. Tama te hani me deli eno sa mubaso da, teda aga te hani bage tigidali deli deli bidi te ena bidiboba pedelao. Tama mena hani bage te eno nogo tų ilibaso da, teda aga hani we wai hani tigidali deli deli te sabola silao.  
\v 15 Tama mena bidigo eno te habu selali nai dabe saibaso da, teda dagego te bidi dali, te aga we wai puluba dabe dali, augwali te isimainu siaba ulama, tama aga tigidali doado bage dali ulaibao. Te bidigo te dwai sę genuai yaligo, tama te Israel dabe augwali hale dwai mu ilai. Tama agai te we bidigo ena dali dąų wali po togolama, bolalio,’ te po augwalibolo pusao,” Genuai Bidigo te po Josuabolo wai.   
\p
\v 16 Tialima, Josua te kigamu digi mu hodaluama, tama te Israel hani tigidali deli deli pedalumainu ilalio. Tama agai te Judago hanibolo hasia mu sa muanio.  
\v 17 Agai te Judade te sibi bage tigidali te odasa asama, tama agai te Serago sibi sa muai. Tama Josuago te Serago hani sibi tigidali deli deli pedela silabo sę yalio. Tama agai te Sapdigo hani bage dolo sa muai.  
\v 18 Tialima, Sapdigo te aga hani tigidalide te bidi deli deli wasilama, tama Josuago te bidi Akan nogo tų ilai. Akan te Karmigo ogwa, tama Karmi te Sapdigo ogwa, tama Sapdi te Serago ogwa, te aga Juda hani dao.   
\p
\v 19 Tama Josuago Akanbolo te po wai, “Ogwao, megi nage te Israel dabe dago Genuai Bidi God gedude dolugulama, tama nago te yali sę po dabe hanilama, hania pusao. Nago enade magi sę me deli munu me dualigio,” wali.   
\p
\v 20 Tialima, Akango te po wai, “Mu tamao, eno dwai sę te Genuai Bidi, da Israel dabego God, agai gedude yalio. Megi nagebolo eno te yali sę po pusubao.  
\v 21 Te dago hwįyu, te Jeriko dabego nai dabe sali sogo, eno te nai dabe tomode te Babilon dabego sawi yai bobobage gudubo ugwa me deli suali, tama te silva sęgę me badu te 2 kilo usu badi, te gol me badu te sęgę deli usu elalubo eno suai. Eno te nai dabe pesa mu ebaso, tama augwali eno sai. Nago te eno ugwa be tomode munalubo gegelama, suagameo. Eno tigidali te tǫba pubulama, tama silva te dologode mu munalubao,” te bidi Akango te po wai.   
\p
\v 22 Tama te po obaso, Josuago te bidi meba tagala palama, augwali udulama, te ugwa beba pai. Tama augwaligo te Akango po wali tiwai gilama te gegali, tama silva te gasa nai dologode mu munalubo suai.  
\v 23 Augwaligo te nai dabe selama, tama te Josua me te Israel bage tigidali bidiboba sela pai. Tama te Genuai Bidigo gedude augwaligo te tǫba muai.   
\p
\v 24 Tialima, Josua dali te Israel dabe tigidaligo te Akan dali, te silva dabe badi, te ugwa me, te gol dage me, tama aga te ogwa dabe me, te aga wegi dabe me sobadi, tama te kibu bulmakau dabe badi, te donki dabe badi, te sipsip dabe me, te aga doado bage tigidali me sai. Augwaligo te tigidali nai dabe te selama, Akor bulu odogoba dulai dao.  
\v 25 Tama Josuago te po wai, “Magi elama nago te genuai sęgę daba sela asai dawe? Tama megi da, te Genuai Bidigo nagebolo me te sęgę mubao!”  
\p Te po ola silama, nosali te tigidali pali we bidigo te Akan aga we wai puluba dali tigidali te masigigo ela silama, tama augwali dali te augwa doado bage dali augwali tigidali te siago dai dao.  
\v 26 Tama augwaligo te masigi dabe hauwa te Akan aga we wai puluba dali augwali tigiba te masigi pesage holai. Tama te masigi pesage holali te e po asębo sogo me elalubao. Tama augwaligo te bulu nogi Akor poali, te sęgę pedelai bulu odogo dao. Augwaligo tama tialigo, tama Genuai Bidigo homu kedau ilai dao.   
\c 8  
\s1 Augwaligo te Ai hanu selama, dolali po  
\p
\v 1 Tialima, Genuai Bidigo Josuabolo te po wai, “Te wi ebo tagalama, tama habu bulu pabo me tagalao! Te ami bidi tigidali nage dali pelama, te Ai dabe dali hwįgi pao. Eno nage tau selama, tama nago te Ai dabego tuni bidi te aiyaba elaluaibao. Tama agai bidi dabe badi, te hanu me, tama agai tǫ me, te eno nago nogoba mawaibao.  
\v 2 Nago te Ai hanude bidibo we bidi me, te augwa tuni bidi me, te mu silao, te nago Jeriko moni hanude te aga tuni bidi dabe dali silali tiwai gilama ilao. Tiali goli, te sogo dagego te tigidali bulmakau me, tama te bulude elalubo nai dabe tigidali sagameo. Megi dagego te hanuba hwįgi painu sisi elaluao. Hasia sogo bolo nago te ami bidi dabe meba tagala palama, te hanu tudi badu geme duala sigi pomainogo tagala palao,” wali.   
\p
\v 3 Tialima, Josua dali te tigidali ami bidi dabe te Ai hanuba hwįgi painu sisi yai. Agai te hwįabo bomai bidi naga dagalama, tama te bidi sese umabo hauwa 30,000 bidi sa munama, tama augwali te hulide tagala palai.  
\v 4 Tama agai te po augwalibolo wai, “Dage pelama, te hanu pąde tudi badu geme duala sigi pao, te nǫ mumainogo tama yao. Tama dagego te hwįabo sisi elaluao.  
\v 5 Tiali goli, ena dali, te eno ami bidi dabe dali, da te hanu dolo asaibao. Tama te Ai hanu bidi dabego te da dali hwįainogo buluba asobaso da, teda dago te hasia sogo yali tiwai gilama te da wi soaibao.  
\v 6 Teda augwaligo da pobeasa asomainu sula tagaliyu, te dago augwali te hanu tagalama, digibulu kegasa soabo usu tiwai yaibao. Augwaligo homugo da te polobadu augwalide wi soali tiwai gilama ebo, te homu yaibao.  
\v 7 Dagego te tiwai ebo subaso da, teda dage te dualaluali pesage tagalama, tama te hanu tomoba pedela sigi pao. God, dago Genuai Bidigo, te hanu dagego nogoba mawaibao.  
\v 8 Dagego te hanu tomoba pedela sigi pabo sogo, dagego te Genuai Bidigo po wali tiwai gilama, te hanu siago ulao. Te eno po da, tama dagego bugagia wali piąo,” wali.   
\p
\v 9 Tialima, Josuago augwali tagala palobaso, tama augwali pelama, te sia ge dega sigi pabo bulu me deli badu geme duala sigi pali, te Ai hanu de te Betel, te bulu si tomoba duala sigi pelama, tama te nǫ muai. Tama augwali tonalu bidali. Tiali goli, Josua te bidibo pesagede te sogo hulide tede bididuai.   
\p
\v 10 Tialima, te kigamu digi mu te Josua hodaluama, tama te ami bidi dabe deliba sisinagasomainogo i wai. Nosali, aga dali, te Israel dabe genuai bidi dabe dali, augwali polasa peyu, tama te ami te Ai hanuba odasa pai dao.  
\v 11 Te Josua dali pali ami bidi dabe augwali te pąba pelama gana, te hanu tomoba pabo genuai sunumi te me badu sesege bogo badu pelama, tama augwali osogo bidabo pesage nigai. Tama te bulu odogo me deli te augwali de te Ai dabe dali te tomode elaluai.  
\v 12 Tama Josuago te bidi sese hauwa umabo 5,000 bidi tiwai usu pąde ami bidi dabe selama, tama augwali te sia dega sigi pabo badu, te hanu Ai de Betel tomo agebele si tomoba pelama, geme duala sigi pomainu tagala palai dao, te do tama yai dao.  
\v 13 Te ami bidi dabego te tama tialio, te genuai ami hanigo bidabo pesage te hanu sese bogo badu pąde nigai. Tama te gasa ami bidi dabe meba te sia ge dulubo badu te nǫ muyu bidali. Tama Josua te hulide te bulu odogode bidalio.   
\p
\v 14 Te Ai hanu tuni bidigo te Josuago ami bidi dabe bidibo suali sogo, kigamu digi mu aga te aga bidi dabe tigidali dali asesa polo te Jordan odogo buluba dulama, te Israel dabe dali hwįainogo yali. Te bulu odogode te augwali polobadu hwįai madi. Tiali goli, te Ai gavman tuni bidigo te nǫ muani hwįbo bidi tudi badu asabo te agai munu me konebeo.  
\v 15 Josua me, te aga ami bidi dabe dali, te augwali tibo digi te augwali te kemi tǫ buluba wi soai.  
\v 16 Tuni bidigo te tama tebo subaso, tama agai te hanude bidibo tigidali bidi dabe i olama, te Israel dabe augwali nǫ bagulagasao wai. Tama augwaligo te Josua pobeasa soabo sę eyu, tama augwaligo te hanu taga soyu, digibulu mu soalio.  
\v 17 Megi da, te Ai hanu dali Betel hanu si ami bidi dabe tigidaligo te Israel dabe pobeasa pelama silai. Tama te hanu tomoba pabo genuai sunumi te olo dalaluali, tama te tonaluabo bidi me meni yanio.   
\p
\v 18 Tialima, Genuai Bidigo Josuabolo te po wai, “Te nago sesemone ene ugwaba selama, tama te Ai hanu usu sao. Megi eno te hanu nage nogoba mawaibao,” wali. Tama Josuago te Genuai Bidigo wali po tiwai gilama yai.  
\v 19 Agai te sesemone ene ugwaba sobaso, tama polo mu, te ami bidi dabe geme dualaluali augwali hogodaluama, tama augwali udada peyu, te hanu tomoba pai. Augwaligo te hanu pedela sigi pelama, tama polo augwaligo te hanu siago ulalio.   
\p
\v 20 Te Ai bidi dabego te hanuba tonono pobadi, augwaligo te hano ugwaba holobo suai. Augwaligo koneani, te augwali geme duala sabo pesage meni isiąyu, te dolabo sęgo augwali me edeligobeo. Magi baso meni, te Israel dabego augwali tibo po olama, tama te masigi tǫ buluba wi pali, megi da te augwali ma begelama, tama augwali dali hwįai.  
\v 21 Josua dali te ami bidi dabe augwaligo suali, te augwa age dabego te hanu selama, tama te siago ulubo suai. Tama tibaso, augwali ma gelama, begasama asiyu, tama te Ai bidi dabe ela mubo sę yai dao.  
\v 22 Tama te hanu tomoba pali te Israel dabe te buluba ma aselama, tama te Israel hani si augwaligo te Ai bidi bagua selama, tama te tigidali augwaligo ela muai. Te me deli wi me pabe, te me deli me bidibeo.  
\v 23 Te Ai hanu tuni bidi deli digi agaduba naga bidai. Tama Israel dabego aga pageabi elama, tama Josua bidibo madi odasa pai.   
\p
\v 24 Te Israel dabe augwaligo te augwa boi bidi dabe tigidali te augwali pobeasa asali, te kemi tǫ bulude ela silai. Nosali augwali te Ai hanuba ma pelama, tama augwaligo te hanu tomode bidali we bidi tigidali ela muai.  
\v 25 Te sogode te Ai hanude bidali tigidali we bidi ela silali, te augwali elali namba te bidi sese umabo mu, te 12,000 dao.  
\v 26 Josua agai sesemone ene te Ai hanuba ponama tolaluali usu nama, tigidali te badu bidali we bidi tigidali isai.  
\v 27 Te Israel dabe augwaligo te bulmakau dabe, me te hanude elaluali doado bage dabe sali, te Genuai Bidigo Josuabolo wali po gilama tama tiai dao.   
\p
\v 28 Josuago te Ai hanu siago ulama mu dolali, te megi tama e po asębo sogo me te tiwai dwai elalubao.  
\v 29 Tama Josuago te Ai tuni bidi te ni me delide walama, tama aga elalubadi te be pio igi pai. Tama pio Josuago po olama, tama te bidi dabego te tigi aiyaba sela dulama, tama augwaligo te hanu tomoba pabo genuai sunumiba sąwai. Tama augwaligo masigi hauwa aga tigi daiba ugwadu pesage holai. Te masigi pesage holali te e po asębo sogo me elalubo dao.   
\s1 Josuago te Mosesgo bomai po te Ebal bulu dude nedali  
\p
\v 30 Te silama, nosali Josuago te Israel dabego Genuai Bidi Godigo alta me deli te Ebal bulu du bagede nigai.  
\v 31 Tama tiyu, agai te Genuai Bidigo sę bidi Mosesgo te Israel dabebolo wali po dolo tigidali wali palio. Mosesgo bomai pode te po wai, “Dagego te alta me deli te masigigo nigao, tiali goli dagego te masigi dabe te ain dage me deligo munu me togolamuo,” wali. Te alta daide te Israel dabego te siaba tigidali ulama dabo te ofa ilali, te siago dali keli naga elaluai. Tama augwaligo te Genuai Bidi dali deli homu ebo ofa yalio. \x * \xo 8:31 \xt Sai 20:25\x*  
\v 32 Te Israel dabe augwaligo tononaluyu dolalubadi, tama Josuago te Mosesgo bomai po te alta nigali masigide asęai. \x * \xo 8:32 \xt Bom 27:2-8\x*  
\v 33 Te tigidali Israel dabe dali te augwa genuai bidi dabe me, te ami dabego ofisa bage me, tama te po tų dodolobo jas dabe me, te augwali dali bidibo gasa bulu bidi dabe dali, tigidali te Genuai Bidigo po dąų wali halobage munalubo tomoba ilama, si dali si badu dolaluai. Te Livai hani pris dabego te bomai po munalubo halobage toloboba augwaligo tononaluai. Me deli badu te we bidi augwali te bulu du Gerisim te badu dolaluyu, tama te we bidi meba augwali gasa bulu du Ebal te badu dolaluyu yai. Moses, Genuai Bidigo sę bidigo, polobadu te bidi dabe augwalibolo weyu, te Genuai Bidigo augwali dali dwagi yai sę emainao po maiabo sogo te tiwai lain si wasiąo po wai dao.   
\p
\v 34 Augwali tama dolalubadi, tama Josuago te Mosesgo te bomai po elaluali bukude asęani po tigidali nedali, agai te Godigo augwalibolo te dwagi yai sę yabo po me, tama te Godigo augwali dolabo po me nedai.  
\v 35 Megi da, Josuago te Mosesgo asęani bomai po tigidali mu nedama, tama tigidali Israel we bidigo odai. Te we dabe sibi me, te wai puluba me, te gasa buludu aselama augwali dali bidibo we bidi, augwaligo me te nedali po odai. \x * \xo 8:35 \xt Bom 11:29; 27:11-14\x*   
\c 9  
\s1 Josua dali te Gibeon bidi dabe dali side po wali  
\p
\v 1 Te Jordan wę sia ge dega sabo badu bidalubo tuni bidi dabe badi, te bulu dude bidalubo tuni bidi dabe badi, te malu bulu dolo bidibo tuni bidi dabego me, tama te nabis ąį sani Mediterenian te badu te Lebanon teba usu nigi pelama bidalubo, te tuni bidi dabe augwali tigidaligo te Israel dabego ebo sę dabe po odada pai. Te Hit tuni bidi dabego badi, te Amor dabe badi, te Kenan dabe badi, te Peres dabego me, te Hivi, me Jebus, te tama tǫde bidalubo tuni bidi dabego te po odai.  
\v 2 Augwaligo te sę ebo po odama, tama augwali sisinama, te Josua dali me te Israel dabe dali hwįainogo yai.   
\p
\v 3 Tama te Gibeon bulu bidi dabego me te Josuago te Jeriko de Ai hanu side yali sę po odama,  
\v 4 tama augwaligo aga gagamu selainu usu sabo po miani. Tama augwaligo te tibo nai dabe selama, te badi waba buluyu, te poloba badi meme waligo nigai botol pepeda pai selama, tama augwaligo ma hobolai. Tama augwaligo te nai dabe te augwa donki daiba ugwadu muai dao.  
\v 5 Tama augwaligo poloba badi ugwa gudubadi, te poloba badi sągą nadoba mubadi yai, tama te wa pai bret dwai mu yai selasa palio.  
\v 6 Tama nosali augwali te Josua bidibo pesage te Gilgal teba sabolama, tama augwaligo agabolo me te Israel bidi dabebolo te tiwai po wai, “Da te digibulu asalio. Te dago dage dali bomai po dąų walama, te da bugagia bidiyu, te me hwįgobeo, menio,” wali.   
\p
\v 7 Tiali goli, te Israel dabego te Gibeondu asali Hivi dabebolo te po wai, “Magi baso dago te po me deli dage dali bomai po dąų omainogowe? Te dage pąde naga bidibo homu ebao,” wali. \x * \xo 9:7 \xt Sai 23:32; 34:12; Bom 7:2\x*   
\p
\v 8 Tiali goli, te Hivi dabego Josuabolo te po wai, “Dago te dagego sę bidi dabego sę ebo tiwai gilama sę yaibao.”  
\p Tialima, Josuago augwalibolo hanalu wali, “Dage mena hani dawe? Tama dage menadu asaliwe?”   
\p
\v 9 Tialima, augwaligo agabolo te tiwai po wai, “Da te digibulu bulu me delidu asali, magi baso meni, dago te dagego Genuai Bidi Godigo genuai nogi elalubo po odalio. Dago te tigidali sę agai te Isip tǫde yali odai dao.  
\v 10 Dago agai te Amor dabego tuni bidi si dali, te wę Jordan te sia ge pedalubo badu yali sę po dabe odai. Augwali si da te Sihon, te Hesbon bulu tuni bidi, me Ok, te Basan tuni bidi dao. Aga te Astarot tede bidai dao.  
\v 11 Tama dena genuai bidi dabego, me te dago tǫde bidalubo tigidali we bidigo dabolo te tiwai po wai, ‘Te dage bilabo me deli te nai meba sisi ilao. Tama dage pelama, te Israel we bidi dabe sisinigi pelama, te po wagi pao, “Da te dagego sę ebo bidi dabe dao. Te dagego da dali te bugagia bidabo bomai po me deli dąų wao.” Te po Israel dabebolo pusigi pao,’ dena hani begego dabolo te po wali.  
\v 12 Te dago tubo nai bret suao. Te dago bidibo bulu taga soyu soali sogo, te bret tamadi tama ulama posolo elaluali. Tiali goli, suao! Te bret dabe te wa pelama, tama dwalio.  
\v 13 Te e meme tigiwali botol dabe te gesi elalubadi, te sogo dago te wain ąį buai. Tiali goli, megi da, suao! Augwali te pepeda pai. Tama dago gudali ugwa dabe me, te sągą nadoba me, te bobobage sunumidu asidubadi dolai dao,” te po wai.   
\p
\v 14 Tama te Israel bidi dabe augwaligo te Hivi dabego elalubo nai dabe suali. Tiali goli, hasia bolo te Genuai Bidi God aga homuba augwaligo me hanalubeo.  
\v 15 Tialima, Josuago augwali nogo menama, tama te Israel dabego augwali munu me eligobeo po olama, te bomai po augwali dali dąų wai. Tama te Israel dabe genuai bidi dabego me te bomai po augwali dali dąų walio.   
\p
\v 16 Augwaligo te bomai po dąų ola sai madi, tama nosali sela sogo bidai digi, te Israel dabego te po wali page gegali, te bidi dabe augwali te digibulu bidi meni, te bulu pąde bidi naga asai yalio.  
\v 17 Tama tibaso, megi da, te Israel dabe augwali hogodama, te gasa badu poloba palio. Augwali pelama, te sela sogo dąį igi pabode, tama augwali te hani dabego hanuba sabolai. Te hanu dabe nogi e dao: Gibeon, Kefira, me Berot, me Kiriat Jearim. Te e tama hanuba augwali sabolai.  
\v 18 Tiali goli, te Israel dabego augwali me elibeo, magi baso meni, te Israel augwa genuai bidi dabego te bomai po te we bidi augwali dali te augwa Genuai Bidi Godigo nogide te po te we bidi dabe dali dąų wai. Tama tiyu, te Israel dabego te augwa genuai bidi dabe augwalibolo te tama tiali pode te wado po naga augwalibolo wai dao.  
\v 19 Tiali goli, te Israel dabe augwa genuai bidi dabego po wei ponoyu, te po wai, “Dago te we bidi dabe augwali dali te dago Genuai Bidi God dali te bomai po dąų walio. Dago megi augwali me dologobeo!  
\v 20 Dago augwali magi baso sula tagaliyu meni, te dago bomai po dąų walalio. Te dago augwali elibaso da, teda Godigo da dolaibao.  
\v 21 Te augwali bidimainu sula tagaliyu, tiali goli augwaligo te dago isi me wę dabe sela mabo sę emainao.” Te genuai bidi dabego te tiwai po naga walai. Te po obaso, te Israel dabego te Gibeon bage elebeo.   
\p
\v 22 Tialima, Josuago te Gibeon dabe i olama asobode, tama augwalibolo agai te po wai, “Magi baso dagego da tibo po ola maniwe? Dagego te dage digibulu me delidu asalio po wali. Tiali goli, dage pąde naga bidibao!  
\v 23 Dagego tibo po waligo da, teda dagebolo Godigo dwai sę ilaibao. Tama tibaso, sesemane sogo dage te eno Godigo lotu beba te isi me wę me sela mabo sę bidi bidagameo,” wali.   
\p
\v 24 Tama te Gibeon dabego te po wai, “Dago e tiwai po odali, te dagego God, Genuai Bidigo, te aga sę bidi Mosesbolo weyu, te tǫ tigidali dagebolo mawaibao po wai, tama dage sabalubo sogo da, teda dagego tede bidibo we bidi tigidali ela siliąo po walio. Tama tibaso, da dwai wi mu dagede ebaso, tama dago te usu sabo po wai dao.  
\v 25 Tiali goli, megi da te nago nogode bidibao. Mena sę nago homude te dwagi yai dolo da homu ebaso, te sę nago dabolo yagameo,” wali.   
\p
\v 26 Tialima, Josuago te Gibeon dabe tau selama, te Israel dabego augwali me ela mubeo.  
\v 27 Tialima, Josuago augwali te Israel dabego isi me wę me sigi pabo sę yabo bidi nigilai. Tama me augwaligo te Genuai Bidigo lotu bede muabo altade me te isi me wę me sesabo bidi dabe nigilai. Tama Gibeon dabego te tigidali te Genuai Bidigo lotu po wabo pesage nigabo madi te tigidali bulude te sę ela bilai dao. Tama te sę eyu, tama megi e po asębo sogoba usu nigi pai dao.   
\c 10  
\s1 Amor dabe augwali te hwįani sęde aiyaba elaluai  
\p
\v 1 Te Adoni Sedek, te Jerusalem tuni bidigo, te Josuago te Ai hanu pedela selama, tama tigidali bidi dolama, tama Ai hanu tuni bidi ela mubadi yai, te agai te Jeriko hanude te aga tuni bidi dali yali sę tiwai gilama yali po odai. Tama agai odali, te Gibeon dabego te Israel dabe dali abagi si olama, nogo menama, tama augwali dali deli madi bidibo po odalio.  
\v 2 Tibaso, aga de te Jerusalem hanude bidali we bidi dabe dali, augwali si wi dwai mu yai, magi baso meni, te Gibeon hanu te genuai hanu elaluali, te gasa genuai tuni bidi elalubo hanu gagawai elaluai. Te genuai hanu digi mu te Ai hanu te aiyaba elaluai elaluali, tama tigidali bidi te hwįbo bomai bidi naga bidai. Tama tibaso, te Jerusalem bidi dabe te augwalide wi umabo mu yalio.  
\v 3 Tialima, Adoni Sedek tuni bidigo po te Hebron tuni bidi Hohambolo po tolobadi, tama Piram te Jarmut hanu tuni bidibolo me, tama Jafia te Lakis hanu tuni bidibolo me, tama Debir te Eklon hanu tuni bidi dali, te augwalibolo po ola tolalio.  
\v 4 Agai te tiwai po wai, “Dagego te eno Gibeon hanu bidi dabe dali hwįbo te dage aselama, tau sagasao, magi baso meni, augwaligo te Josua de te Israel dabe dali sibolo te abagi olama, deliba bidainogo nogo mawai dao,” te po ola tolali.   
\p
\v 5 Te e tama a naga te moni hanu Amor tuni bidi dabe, augwali te Jerusalem hanu tuni bidi, me te Hebron, me Jarmut, me Lakis, me Eklon, te e tama a naga hanu dao. Tama te tuni bidi dabego te augwa ami bidi dabe sisinama, tama augwaligo te Gibeon hanu bobogela sigi pelama, tama augwaligo augwali dali hwįagasai.   
\p
\v 6 Tama tibaso, te Gibeon hanu bidi dabe augwaligo Josua bidibo pesage te Gilgal teba po ola tolai. Augwaligo te po wai, “Te bulu dude bidalubo moni hanu Amor tuni bidi dabe tigidali te augwali deliba sisinama tama augwaligo da dali hwįainogo sabolai dao. Nago te naga sę bidi da munu mu tagalamuo! Nage polo asama, da tau sagasao!” wai.   
\p
\v 7 Josuago te po odama, tama aga ami bidi tigidali dali hogodama, tama te bidali pesage Gilgal te tagalama, tama pelama, augwali tau sigi pai dao. Agai te hwįbo bomai bidi dabe me aga dali pali.  
\v 8 Tialima, Genuai Bidigo Josuabolo te po wai, “Te boi bidi augwalide wi me igio. Eno augwali te nago nogoba manio. Te bidi me deligo dage aiyaba me elalugobeo,” wali.   
\p
\v 9 Tama Josua te aga ami bidi dabe dali augwali hulide pelama, tama te Amor dabe bidalubo madi pedelai. Te Amor dabe augwaligo te hwįabo sisi isiąbadi, tiali goli polo tama, te Israel dabe augwaligo te hwįbo gagalalio.  
\v 10 Te Amor dabego te Israel ami bidi dabe asobo sulama, tama Genuai Bidigo augwali wi ilama, tama augwali homu kolesaga umuna palai. Tama te Israel dabe augwaligo te Amor dabe augwali te Gibeon hanude dolobo sę ilama, tama augwaligo augwali pobeasa duluyu, te bulu du bagua sali te Bethoron teba dulai. Augwaligo te Amor dabe dolobo sę ela pidubadi, te Aseka te bogo badu usu nama, te Makeda teba dąį iligi pai.  
\v 11 Tama te Amor dabe te Israel ami bidi dabede wi pabo sę elayu, tama augwali te Bethoron te bulu baguba me te Aseka teba wi aiyaba palio. Tialima, Genuai Bidigo te moni kedau ilibo talua ge kulubage te masigi tiwai tulumainu ilama, tama te Amor dabe ela muna silai. Te masigi du tiwai talua ge tulubagego ela muani bidi dabego nambago te Israel bidi dabego ela muani bidi te namba aiyaba elaluai dao.   
\p
\v 12 Tama te sogo te Genuai Bidigo te Israel dabe tau selama, tama augwaligo te Amor dabe aiyaba elaluai. Tama Josuago Genuai Bidi dali po miai. Tama te Israel dabe augwaligo gedude agai te po wai,  
\p “Giliga, nage te Gibeon hanu ugwadu dolaluao. Polua, nage te Aijalon bulu odogo ugwadu dolaluao.”  
\p Te po wai dao.  
\v 13 Tama te po obaso, te giliga ge dolalubadi, tama polua aiyaba me dulisąbadi, te Israel dabego te boi bidi dabe aiyaba elalubo siba usu nai. Giliga ge te polo me dega sigi pabeo. Aga te dagalude dolaludubadi, te deli sogo bubuga te tiwai usu nai. Tama augwaligo te sę yali po te Doloba Pai Bidi Dabede Po Wabo Bukude asęai dao. \x * \xo 10:13 \xt 2 Sml 1:18\x*  
\v 14 Te polobadu sogo tede gagalasa, asama, tama megi e po asębo sogoba usu nagasobo, te tiwai sę me deli te me ebeo. Genuai Bidigo te bidi me deligo po odama, tama te Israel dabego hwįbode te agai augwali tau sai dao!   
\p
\v 15 Nosali Josua te ami bidi dabe dali augwali te augwa bidali pesage te Gilgalba ma palio.  
\v 16 Tiali goli, te a naga tuni bidi dabe wi pelama, tama te bulu Makeda tede te masigi ola bede geme dualaludai.  
\v 17 Tama bidi mebago augwali dualalubo sulama, tama augwaligo Josuabolo te augwali dualalubo pesage te po wai.  
\v 18 Tialima, Josuago te po wai, “Te genuai masigi meba hogogobele pelama, tama te ola be dalalubo te paliama, tama te tonaluabo ami bidi meba teba munama te tonaluao,” wai.  
\v 19 “Tiali goli, duga digi tede olo me bidilamuo. Dage te gasa boi bidi dabe wali pelama, tama augwali tudi badu te nosali asali bidi dabe dalibolo hwįgi pao. Dagego augwali te augwa hanuba sabalomainogo sula tagalamuo! Magi baso meni, God, dago Genuai Bidigo, te dagego hwįbo bomo usu elama, te boi bidi dabe aiyaba elaluaibao po wai dao,” wali.   
\p
\v 20 Tialima, Josuago me te Israel dabe augwaligo dali te boi bidi dabe tigidali pąde ela silainu yai. Tiali goli, meba wi peyu, te augwa hanu tomoba geme duala sigi palio, te hanu te genuai bomai obo elaluali.  
\v 21 Nosali Josuago ami bidi dabe tigidali augwali te Makedaba ma geasa asai. Te me dedeli me dolobeo. Tama tibaso, mena bidi me deligo te dwai posobo po te Israel dabebolo me wainogo ebo usu me isiąwai dao.   
\p
\v 22 Nosali Josuago po ma wali, “Te masigi ola be paliali po dala sąnama, tama te a naga tuni bidi te ena bidiboba odasa asao,” te po wai.  
\v 23 Tialima, augwaligo tama tiwai yalio. Te bidi dabe augwaligo te Jerusalem hanu tuni bidi, me te Hebron, me Jarmut, me Lakis, me Eklon, te tama a naga hanu tuni bidi dabe te Josua bidiboba odasa palio.  
\v 24 Augwaligo te augwali te Josua bidiboba odasa aselawai madi, tama agai te Israel dabe tigidali i wali, tama agai te aga dali pali te ami bidi dabego ofisa bidi dabebolo te po wai, “Dage eba aselama, tama dagego sągą te tuni bidi dabego mageba agayao,” wali. Tialima, augwaligo tama tialio.   
\p
\v 25 Nosali Josuago te ofisa bidi dabe augwalibolo te po wai, “Dage wi eyu, tama didibili munu me elamuo, bomonama dolaluao, te dagego nosali augwali dali hwįabo boi bidi dabebolo te Genuai Bidigo te tiwai naga ilaibao,” wali.  
\v 26 Nosali Josuago te tuni bidi dabe elama, tama augwali te ni pedai a nagade walalio. Augwali te nide walalubadi, te sia ge aiyaba dulai dao.  
\v 27 Tama be pio mu ebode, Josuago te bidi dabebolo olama, tama augwaligo te tigi dabe aiyaba sela dulama, tama augwa te dualaluali ola be tomoba sąwai. Tama te ola be augwaligo te moni genuai masigigo paliai. Tama te masigi dabe e po asębo sogode me elalubo dao.   
\p
\v 28 Te sogo naga Josuago te Makeda hanu pedela sigi pelama, tama te hanude bidali tuni bidi pageabi yai. Tama agai te hanude bidali we bidi tigidali ela silai. Te deli me bidibeo. Agai te deli tobage tiwai kolesaga naga te Makeda tuni bidi dali yai, agai te Jeriko hanu tuni bidide yali sę tiwai gilama naga yalio.   
\p
\v 29 Te silama nosali, Josua aga ami bidi dabe dali augwaligo te Makeda hanu tagalama, te Lipna hanuba pelama, tama augwaligo te hanude bidibo bidi dabe augwali dali hwįgi palio.  
\v 30 Tama Genuai Bidigo te Israel dabe augwali tau selama, tama augwaligo te boi bidi dabe augwali aiyaba elaluama, tama te hanu selama, te hanude bidali tuni bidi me pageabi yai. Tama Josuago te hanude bidali bidi tigidali ela silama, tama deli digi me bidibeo. Agai te tuni bidibolo te Jeriko tuni bidibolo yali kolesaga tiwai naga yai dao.   
\p
\v 31 Te silama nosali, Josua aga ami dabe dali augwaligo te Lipna hanu tagalama, tama te Lakis hanuba pali. Augwaligo te hanu bobegelama, tama augwaligo te Lakis hanu bidi dabe dali hwįanio.  
\v 32 Genuai Bidigo te Israel dabe augwali tau selama, tama te si sogo wabode augwaligo te boi bidi dabe aiyaba elaluali. Tama Josuago me deli sula me tagalobeo. Agai tigidali bidi ela muai, agai te Lipna hanude yali tiwai gilama yalio.  
\v 33 Te Horam, te Geser hanu tuni bidi, aga aselama, te Lakis hanu bidi dabe tau sagasai. Tiali goli, Josuago aga me, te aga hani bidi dabe dali, te hwįanigo augwali aiyaba elaluai. Tama Josuago augwali me deli bidimainu me gogola tagalobeo.   
\p
\v 34 Te silama nosali, Josua aga ami bidi dabe dali augwaligo te hanu Lakis tagalama, tama te hanu me nogi Eklonba pai. Augwaligo te hanu bagulama, tama augwaligo te Eklon dabe augwali dali hwįanio.  
\v 35 Augwaligo te hanu te deli sogo bubugade naga salio. Tama Josuago te hanude bidali bidi tigidali ela muani, te agai Lakis hanude yali tiwai gilama yai.   
\p
\v 36 Te silama nosali, Josua aga ami bidi dabe dali augwaligo te Eklon hanu tagalama, tama te Hebron hanuba pai. Tama augwaligo te Hebron hanude bidali bidi dabe dali hwįnama,  
\v 37 tama te hanu sai. Tama augwaligo te tuni bidi eleyu, tama te Hebronde bidali we bidi dali tigidali elebadi, te gasa dwasianu hanu pąde bidaluali bidi dabe dali tigidali elalio. Tama Josuago te Hebron hanu tigidali mu dolali, te agai Eklon hanude yali tiwai gilama yai. Tama te hanu bidi me deli me bidai menio.   
\p
\v 38 Nosali Josua aga ami bidi dabe dali augwali begelama, tama te Debirba pelama, tama augwaligo te Debir dabe dali hwįgi pai.  
\v 39 Augwaligo te hanu dali, te tuni bidi me siyu, tama te gasa pąde elalubo dwasianu hanu dabe me sai. Augwaligo tede bidali bidi dabe tigidali ela muai. Josuago te dedeli kolesaga tiwai naga te Debir hanude bidibo bidi dabebolo me te tuni bidi dali tiali, agai te Hebronde me te Lipna hanu side te augwa tuni bidi dabe dali yali kolesaga tiwai naga yai dao.   
\p
\v 40 Tama elama, tama Josuago te tǫ tigidali badu te hwįanigo aiyaba elaluai. Agai te bulu dude bidali tuni bidi dabe me, te Negev dabe badu tuni bidi dabe me, te tǫ malude bidali tuni bidi dabe me, te bulu du pąde bidali tuni bidi dabe me, te agai augwali aiyaba elaluai. Agai bidi deli me sulama, gogola me tagalobeo. Agai tigidali ela muai. Agai te Israel dabego Genuai Bidi Godigo te agabolo wali po tiwai gilama yalio.  
\v 41 Josuago te giliga bogo badu te Kades Barneade gagalasa, te Gasa te nabis pąba dąį elama bidali bage tigidali aiyaba elaluali, tama te Gosen tǫ elalubo badu tedu dąį elama, te Gibeon badu, te tǫ me bogo badu usu nigi pai dao.  
\v 42 God, te Israel dabego Genuai Bidigo, te augwali tau sobaso, tama augwaligo te tigidali tǫde bidali tuni bidi dabe tigidali augwali aiyaba elaluama, tama augwaligo tǫ te hwįanigo naga sai dao.  
\v 43 Nosali Josua aga ami bidi dabe dali augwali te augwa bidali pesage te Gilgal teba ma pai dao.   
\c 11  
\s1 Jabin aga age dabe dali, augwali te hwįgi pali digi hagawali po  
\p
\v 1 Te bidi dabe augwaligo te Josuago yali tigidali sę po sela bilali po te Hasor tǫ tuni bidi Jabinba sabolali. Tama agai te po te Jobapbolo ola tolali, te Madon hanuba, tama te Simron hanu tuni bidibolo me, te Aksap hanu tuni bidiba me, te po ola tolali.  
\v 2 Tama te tǫ bogo badu te bulu du elalubo badu bidali tuni bidibolo me, tama te Jordan wę odogo malu tǫde, te Kineret, te tǫ bogo badu bidali tuni bidibolo me, tama te dolo elalubo tǫde bidali tuni bidibolo badi, tama te Dor hanude te ąį sane pąde bidali tuni bidibolo badi, te tama hanu tuni bidi dabe augwalibolo te po ola tolalio.  
\v 3 Tama agai te Jordan wę pąde bidaluali te Kenan dabebolo me po ola tolobadi, tama te bulu du bagede bidaluali hani, augwalibolo me wai. Te augwali Amor dabe, me te Hit dabe, me te Peres dabe, me te Jebus dabe, te augwalibolo po tolai. Tama agai te Hivi dabe augwali te Hermon bulu du pąde, te Mispa dabego tǫde bidalubo bage augwalibolo me te po ola tolai dao.  
\v 4 Augwaligo te po odama, tama augwali te augwa ami bidi dabe tigidali augwali dali asai. Tama augwali te bidi hauwa umabo mu elaluali, augwaligo ami bidi dabe te nabis masigi sane usu tiwai. Tama augwaligo hwįbo nai hos me karis hauwa mu elaluai.  
\v 5 Te tuni bidi dabego te augwa ami bidi dabe hauwa sisinama, tama augwali bidabo pesage te sigi ąį Meromde nigilama, te Israel dabe augwali dali hwįainogo yali.   
\p
\v 6 Tialima, Genuai Bidigo Josuabolo te po wai, “Nage augwalide wi munu me elamuo. Do te tobage sogo ebode da, teda eno digi te Israel dabe augwali tau selama, tama augwaligo te boi bidi dabe tigidali ela muaibao. Tama dagego te hos dabe sągą genuai kigibili togolama, tama augwa te karis dabe dali siaba ulao,” wali.   
\p
\v 7 Tama te boi bidi dabego hwįabo sisi isąbadi, tialima polo mu tama Josua dali, aga ami bidi dali, tigidaligo augwali dali te wę Meromde te hwįani.  
\v 8 Tama Genuai Bidigo te Israel dabe augwali tau selama, tama augwaligo te boi bidi dabe aiyaba elaluai. Te Israel dabe augwaligo hwįyu, tama te boi bidi dabe pobeasa peyu, te tǫ bogo badu te genuai bulu Saidon teba usu nama, te Misrefot Maim dąį igi pelama, tama te giliga pedalubo badu, te odogo bulu Mispa, te badu saboligi pali. Augwaligo hwį hwį pali, te boi bidi dabe tigidali siliboba usu nai dao.  
\v 9 Tama Josuago augwaligo hwįbo nai hos sągą genuai kigibili togobadi, te augwaligo karis dabe me siaba ulubadi yali, te Genuai Bidigo agabolo wali gilama tama tiai.   
\p
\v 10 Te silama, nosali Josua ma begasa asiyu, tama te hanu Hasor selama, tama te hanude bidali tuni bidi ela muai. Te sogo te Hasor hanu te tigidali tǫde elaluali hanu dabego te polaluali hanu elaluai.  
\v 11 Te Israel dabe augwaligo te Hasor hanude bidali bidi tigidali ela munama, tama deli me bidibeo. Tama augwaligo te hanu siago ulai dao.   
\p
\v 12 Josuago te tigidali tuni bidi pageabi elama, tama augwaligo hanu tigidali sai. Tama agai te bidi tigidali elibadi yali, te Genuai Bidigo sę yali bidi Mosesgo wali tiwai gilama yalio.  
\v 13 Tiali goli, te Israel dabe augwaligo te bidi dabe augwaligo te dwasianu bulu dude nigali hanu te me siago ulubeo. Josuago te Hasor hanu naga siago ulai dao.  
\v 14 Te Israel dabe augwaligo te hanude tigidali mone, me te tigidali bulmakau me selama, te augwa digi te augwa nai da olama, tolaluai. Tama augwaligo te bidi me deli sula tagalobeo. Te augwaligo tigidali ela silai dao.  
\v 15 Hasia bolo Genuai Bidigo po te aga sę bidi Mosesbolo mawai. Tama Mosesgo te po dabe te Josuabolo menama, tama Josuago te po tigidali wali pai. Josuago tigidali sę yali, te Genuai Bidigo Godigo Mosesbolo wali po tiwai gilama tama tiai.   
\s1 Josuago te tǫ pedai badu tigidali salio  
\p
\v 16 Josuago te tǫ tigidali pedai badu sai. Agai te bulu dude elaluali tigidali bulu me, te tigidali Negev hanu tǫ badu me, te tigidali Gosen bulu badu me, tama te dolo tǫ elaluali bulu me, te Jordan wę odogo bulu elaluali me, tama te malu tǫ bulu me, te nosali nogi yali te Israel dabego bulu du elaluali bulu me, te tigidali Josuago sela silai.  
\v 17-18 Te tǫ dąį te Halak bulu dude gagalali, te Seir pąde, tama pelama, te bulu Balgat te Lebanon odogode elalubo, teba dąį igi pelama, te bulu du Hermon te tǫ bogo badu dao. Josuago te bobobage sogo mu te tuni bidi dabe dali hwįnama, tama agai te tigidali bidi ela silai dao.  
\v 19 Te hanu me deligo te Israel dabe augwali dali nogo menama, tama augwali dali me bidibeo. Gibeon te Hivi dabego page bulu, te bulu deligo te Israel dabe dali nogo mawai. Tigidali te gasa hanu dabe te hwįanigo dolai dao.  
\v 20 Magi baso meni, Genuai Bidigo digi te hani dabe homu hodolubo sę ilama, te Israel hani dali hwįmainogo ilali. Agai homugo te Israel dabego augwali te homu dene eyu, olo tau sabo homu kolesaga wiegi yai yabo homu munu me egobeo. Menio. Te augwaligo tigidali ela silaibao. Augwaligo te Genuai Bidigo te Mosesbolo polobadu mani po wali palio. \x * \xo 11:20 \xt Bom 7:16\x*   
\p
\v 21 Tama te sogo Josua pelama, tama te Anak bidi dabe mu dolai. Augwali te Hebron bulu du bagede me, te Debir bulude me, me te Anap bulude me, te tigidali gasa Juda me Israel dabego bulu du bagede bidaluali. Josuago te bidi dabe tigidali mu ela siyu, te augwaligo tigidali hanu me mu dolai.  
\v 22 Te Anak dabe me dedeli te Israelde me bidibeo. Te dwasianu hani naga te Gasade me, Gatde me, te Asdot, tede bidaluai.  
\v 23 Josuago te moni tǫ pedai tigidali badu sela silali, te Genuai Bidigo Mosesbolo wali gilama te tiwai yali. Tama Josuago te Israel dabe augwalibolo te moni tǫ te augwa page bulu tiwai ilama mawai. Tama te tǫ te tigidali Israel hani deli delibolo dobayali. Tama tilama, te we bidi augwaligo hwįbo sę ebo sogo silama, tama augwaligo hwįbode te toma tuyu bidali.   
\c 12  
\s1 Te hwįnama, Mosesgo aiyaba elaluali tuni bidi dabego nogi  
\p
\v 1 Te Moses isisąbadi, te sogo te Israel dabe augwaligo te boi bidi dabe tigidali tǫde aiyaba elaluama, tama augwaligo te tigidali bulu te Jordan wę pąde te sia ge pedalubo badu te bulu dabe sai. Te tǫ te malu bulu te Arnonde gagalasa, tama pelama, te Jordan tǫ malu dąį igi pelama, tama te Hermon bulu duba usu nigi pai. Hasia bolo te Israel dabego hwįnama, te tuni bidi si aiyaba elaluai. Te augwali si nogi e dao: Sihon, me Ok.  
\v 2 Sihon te Amor dabego genuai tuni bidi, aga te Hesbonde bidai. Te agai tonaluali hanu te Aroer tǫde gagalama, te odogo malu elalubo tǫ Arnon sesege dąį igi pelama, tama te bulu badu dąį elama, tama pelama, te wę Jabokba usu nani. Te wę Jabok te bulu Arnon dabe de te Amon dabe dali sigo dąį elaluai. Te hanu te Gileat hanu pedai badu elaluai.  
\v 3 Tama te Jordan wę tǫ dolo elalubodu te sia ge pedalubo badu sigi ąį tǫ Galili hanu badu dąį gagalasa pelama, te Bet Jesimot te Isai Tamu Ąį dąį igi pelama, tama palio olama, te Pisga bulu du pageba, te tǫ me bogo badu dąį igi pai dao.   
\p
\v 4 Tama te Israel dabe augwaligo te Basan hanu genuai tuni bidi Ok dali boi hwįnama, tama aga aiyaba elaluai. Aga te Refaimgo hani bidi. Polobadu te hani genuai elaluali, tama megi da te augwali dwasianu hani naga elalubo. Ok genuai tuni bidi te bulu Astarot, me Edrei, te bulu side bidai.  
\v 5 Okgo te bulu du Hermon badu me, te Saleka, me te tigidali Basan badu pelama, te Gesur dabe badu, me Maka te sesegeba usu nigi pelama, tama te Gileat badu te tuni bidi Sihongo tolalubo badu sigi pelama, tonalubo dąį yai. \x * \xo 12:5 \xt Nam 21:21-35; Bom 2:26–3:11\x*  
\v 6 Moses dali te Israel dabe augwaligo te boi hwįnama, te tuni bidi si aiyaba elaluai, polobadu. Tama Moses, te Genuai Bidigo sę bidigo, te augwa si tǫ te Rubengo hanibolo mobadi, te Gatgo hani me, te Manasego hani me badubolo mobadi yali. \x * \xo 12:6 \xt Nam 32:33; Bom 3:12\x*   
\s1 Te tuni bidi dabe me te bulu dabe Josuago boi hwįnama, aiyaba elaluali  
\p
\v 7 Josua dali, te Israel dabe dali, augwaligo te Jordan wę te sia ge dega sabo badu te tigidali genuai tǫde bidali tuni bidi tigidali aiyaba elaluali, te Lebanon odogode elalubo bulu Balgat tede gagalasa, te Halak bulu du badu te Idom pąde, teba usu nigi pai. Tama Josuago te tǫ dobolama, tama te Israel hani sibibolo menama, tama megi te augwa page bulu mu gagalama bidibo dao.  
\v 8 Te mani tǫ da, te bulu du dabe elalubo tǫ, te dwasianu bulu du dabe, me te Jordan malu bulu me, tama te Jordan ąį pąde te dwasianu bulu du elalubo me, te olo kemi tǫ bulu elalubo madi me, te Negev bulu te dąį igi pai. Polobadu te Hit hani bage me, te Amor dabe me, te Kenan dabe me, te Peres dabe me, te Hivi dabe me, te Jebus dabe me, augwali tigidali te genuai tǫde bidaluai dao.   
\p
\v 9 Te e nogi da te boi hwįani sogo te aiyaba elaluali tuni bidi dabego hanu nogi e dao: Jeriko, me Ai, te Betel bulu pąde elaluai,  
\v 10 Jerusalem, Hebron,  
\v 11 Jarmut, Lakis,  
\v 12 Eklon, Geser,  
\v 13 Debir, Geder,  
\v 14 Horma, Arat,  
\v 15 Lipna, Adulam,  
\v 16 Makeda, Betel,  
\v 17 Tapua, Hefer,  
\v 18 Afek, Lasaron,  
\v 19 Madon, Hasor,  
\v 20 Simron Meron, Aksap,  
\v 21 Tanak, Megido,  
\v 22 Kedes, Jokneam te moni tǫ pedai Karmelde elaluai,  
\v 23 Dor te nabis sese pąde elaluai, te Goim bulu te Gilgal tǫde elaluali,  
\v 24 tama Tirsa meo. Te tiwai te tigidali tuni bidi te bidi sese olama, nogo si te me badu deli, te tama usu nama tigidali bidiyu, tama Josua dali, te Israel dabe dali si, augwaligo te tuni bidi dabe tigidali aiyaba elaluama, augwaligo tǫ sai dao.   
\c 13  
\ms1 Augwaligo te tǫ te Israel hani deli delibolo dobayali  
\mr (Dąį 13–22)  
\s1 Te bulu dabe augwaligo sisąbadio  
\p
\v 1 Megi da, Josua monu dabe mu yai. Tama Genuai Bidigo agabolo te po wai, “Nage monu dabe yalio. Tiali goli, te bulu hauwa te Israel dabego me sisąbadi elalubao.  
\v 2 Te elalubo bulu dabe te e dao: te tigidali Filistia dabego bulu me, te Gesur dabego bulu tigidali badi,  
\v 3 te tǫ te dwasianu wę Sihor te Isip tǫ sesede elalubo, tedu gagalasa, te palio olama, te Eklon tǫ bogo baduba dąį igi pelama, hasia bolo te Kenan dabe bidaluai madi. Te Filistia dabe tonalubo bidi dabe te bulu Gasade me, te Asdot, me te Askelon, me Gat, me Eklon, me tama te Av dabego moni tǫ te giliga dega sabo bogo badu elalubao.  
\v 4 Te tigidali Kenan, me Meara dabego tigidali elalubo tǫ, te Saidon dabego tǫde augwali bidibao, te tǫ pali te Afekba usu nama, te Amor dabe bidibo sesegeba dąį igi pai.  
\v 5 Te Gebal bulu bidi hani dabego tǫ, te tigidali Lebanon tedu pelama, te sia ge pedalubo badu dąį igi pali, te Balgat sesegede te Hermon bulu du pąde, tedu te bulu du baguali madiba pelama, usu nigi pali, te bulu augwaligo Hamat nogi yai,” wali.   
\p
\v 6 “Tigidali Saidon bage, te augwali te Lebanon, me te Misrefot Maim te bulu du dabe elalubo tomo bulude bidalubo, tigidali te moni pedai hanu tomode bidibao. Te Israel dabe augwali asidubadi, tama eno digi te Saidon bage augwali gudulama, sela sąwaibao. Tama tialima, nago te tǫ usu selama, tama te Israel dabe augwalibolo menama, te augwa tǫ mu gagalama bidaibao. Nago te sę eno nagebolo wabo po tiwai gilama yao. \x * \xo 13:6 \xt Nam 33:54\x*  
\v 7 Tialima, megi da, te tǫ te Israel hani a naga me si me si dabebolo, me te Manasego hani me badubolo me, te tǫ dobolama, teda augwaligo te augwa tǫ mu tiwai selama, bidimainogo obao,” Genuai Bidigo te Josuabolo te po wai.   
\s1 Te Ruben, me Gat, me Manase, te tamago tǫ dao  
\p
\v 8 Te Ruben hanigo, me Gat, me Manasego hani me badugo te Jordan wę te sia ge pedalubo badu te tǫ polobadu sai. Te Moses, Genuai Bidigo sę bidigo, te tǫ augwalibolo mawai dao. \x * \xo 13:8 \xt Nam 32:33; Bom 3:12\x*  
\v 9 Te augwaligo sali tǫ te Arnon odogo tǫ sesegede elalubo bulu nogi Aroer, tedu gagalama, tama te odogo tomode elalubo hanu ela soayu, tama te Medeba dabego dolo elalubo tǫdu pelama, te Dibon tǫba usu nigi palio.  
\v 10 Tama augwaligo te Sihongo hanu tigidali sali, te Amor dabe tuni bidigo hanu sai. Polobadu te Sihon aga digi te Hesbonde bidiyu, tama agai te hanu dabe tolaluali te Amor dabe bidalubo sesege dąį igi pai.  
\v 11 Augwaligo te Gileat dabego tǫ me sali, tama te Gesur, me Maka dabego tǫ me, tama te Hermon bulu du pedai tigidali me, tama te Basandu te Saleka teba usu nigi pelama,  
\v 12 tama te Okgo tonalubo tǫ tigidali sobadi, te aga tuni bidi te Astarot me Edreide bidali sogo. Ok aga te Refaim bage me deli, tama aga te augwaligo sabi siminani dao. Mosesgo te boi hwįnama, te Refaim dabe augwali aiyaba elaluama, tama augwali ela gudulali.  
\v 13 Tiali goli, te Israel dabe augwaligo te Gesur dabe, me te Maka dabe dali te augwali ela gudulube. Augwali te Israel dabe dali hodobo bidada peyu, tama megi e po asębo sogoba usu nagasai.   
\p
\v 14 Tiali goli, Mosesgo te Livai hani te tǫ me masiąwai. Magi baso meni, te Israel we bidi dabego Genuai Bidiba ofa ilabo nai dabe sela asobo si da, te Livai dabego meba sabo dao. Te Genuai Bidigo Mosesbolo wali po gilama yali. \x * \xo 13:14 \xt Bom 18:1\x*   
\p
\v 15 Mosesgo te tǫ pedai me badu deli te Rubengo hani sibi dabe deli delibolo menama, tama te augwa tǫ mu pedelali.  
\v 16 Te augwaligo hanu tǫ pedai te Arnon odogo tǫ sesegede elalubo bulu nogi Aroer tede gagalama, tama te odogo tomode elalubo hanu ela soayu, tama te Medeba dabego dolo elalubo tǫ tigidali tedu pelama,  
\v 17 tama pelama, te Hesbonba sabolama, te tǫ malu dolo tǫde te tigidali hanu elaluali: Dibon, me Bamotbal, me Bet Balmeon,  
\v 18 me Jahas, me Kedemot, Mefat,  
\v 19 me Kiriataim, me Sipma, me Seretsahar, te tama bulu te malu tǫ te dwasianu bulu du ugwadu bagede elaluali,  
\v 20 tama te Betpeor, tama te Pisga bulu du pedai badu me, te Bet Jesimot,  
\v 21 me te gasa tigidali hanu me te tǫ malude elaluali. Tama te Amor dabe tigidali hanu dabe te tuni bidi Sihon deligo tonaluali. Aga te Hesbonde te gavman tuni bidi bidali. Mosesgo te boide hwįnama, tama aga aiyaba elalubadi, tama te Midian dabe tobolu bidi dabe me aiyaba elalubadi yali. Augwali da, te Evi, me Rekem, me Sur, me Hur, me Reba. Tigidali te hanude bidalubadi, tama te gavman tuni bidi Sihongo te augwa bidibo madi tonalumainu sę mani.  
\v 22 Tama Balam, te Beorgo ogwa, tama te bidigo te nosali pedelabo sę po wabo koneai bidi, te Israel dabego aga me ela muani.  
\v 23 Te wę Jordan te Rubengo hani bidibo sesegede elaluali. Tama te hanu me te bulu dabe te Rubengo hani sibi deli deligo te augwa tǫ da olama, sesa pali.   
\p
\v 24 Tama Mosesgo te tǫ te Gatgo hani sibi tigidali deli delibolo doba yali, tama augwa tǫ gagalama bidali.  
\v 25 Jasago tǫ me te Gileat tigidali hanu, tama te Amon dabego tǫ pedai te Aroer teba usu nama, te Amon dabego tǫ tomode elaluali, te giliga ge pedalubo madi, te Raba tǫ pąde elaluali.  
\v 26 Te tǫ te Hesbonde gagalasa, pelama, te Ramatmispe, me Betonim, me te Mahanaim, te pelama, te Lodebar te sesegeba usu nigi pali.  
\v 27 Te Jordan wę tǫ malude elaluali bulu te Betharam, me Betnimra, me Sukot, me Safon, te gavman tuni bidi Sihongo tonaluali tǫ pedai badu, te Hesbon tǫ pedai badu, te Jordan wę te badu gagalasa, te giliga pedalu badu sabolama, tama te sigi ąį Galili tǫ badu dąį igi pelama sai.  
\v 28 Tama te hanu dabe me te bulu dabe, te Gatgo hani sibi te bagego te augwa tǫ da olama, sali.   
\p
\v 29 Tama Mosesgo te Manasego hani sibi dabe deli delibolo te tǫ me badu te augwali bidimainu mani.  
\v 30 Augwaligo sali tǫ te Mahanaimde gagalasa, pelama, tama te Basan pedai tigidali badu sali, te gavman tuni bidi Ok tego polobadu tonaluali hanu Basan da. Tama augwaligo te Jairgo tonaluali hanu te bidi sese sela 60 hanu te Basande tomode elaluali tǫ tigidali sali.  
\v 31 Te tǫ sali te Gileat te badu me sali, tama te Astarot, me Edrei me sigi pali, te gavman bidi Okgo polobadu tonaluali hanu dabe da. Tama Mosesgo te tǫ dabe te Makirgo hani sibi dabe deli delibolo mani, te Manasego ogwa dao.   
\p
\v 32 Te tiwai naga Mosesgo te giliga pedalubo badu tǫ, te Jeriko me Jordan tǫ, te sa muani, te aga Moap dabego te tǫ malude bidibo sogo tiali.  
\v 33 Tiali goli, Mosesgo te Livaigo hanibolo te tǫ me masiąwai. Agai augwalibolo te po wali, “God, te da Israel dabego Genuai Bidi, agade te dagego sę yaibao, tama tibaso te tǫ me badu dagego me sogobeo,” wali. \x * \xo 13:33 \xt Nam 18:20; Bom 18:2\x*   
\c 14  
\s1 Augwaligo te Kenan tǫ dobayali  
\p
\v 1 Te Israel dabego te Kenan tǫ sali. Te pris bidi Eleasar, me Josua te Nungo ogwa, tama tigidali Israel hani tobolu bidi dabego hani sibi deli deli augwalibolo te tǫ dobayali.  
\v 2 Hasia bolo Genuai Bidigo Mosesbolo te po wali gilama eyu, te tobolu bidi dabego te mena hani sibigo te mena tǫ sabo po dodolama, tama te tǫ te a naga olama, me si me si haniba dobayali. Tama augwaligo te tiwai yali. \x * \xo 14:2 \xt Nam 26:52-56; 34:13\x*  
\v 3-4 Tama polobadu Mosesgo te tǫ deli deli pedai badu te hani sibolo mayu, tama gasa Israel hani me badubolo mayu, te Jordan wę te giliga pedalubo badu mobadi yali. Te Josepgo hani wąį dabe te hani si bugali, Manase me Efraim. Tiali goli, Mosesgo te Livai hani dabebolo te tǫ me mabeo. Augwaligo te hanu meba naga sali. Tama te hanude te augwaligo bulmakau me sipsip dabe elaluali, te hanu dabe pąde nosai elalubo digi me augwaligo sali. \x * \xo 14:3-4 \xt Nam 32:33; 34:14-15; Bom 3:12-17\x*  
\v 5 Te Israel dabe augwaligo te tǫ tama dobayali, te Genuai Bidigo Mosesbolo wali gilama tama tiali.   
\s1 Augwaligo Hebron te Kalepbolo mani  
\p
\v 6 Te tǫ dobayabo sogode, te Juda bidi dabe meba te Josua bidibo digi te Gilgalba sabolali. Tama Kalep te Jefunego ogwa, te Kenas bidi, te e tiwai po Josuabolo wali, “Nago koneani, te polobadu Genuai Bidigo te Godigo sę bidi Mosesbolo te po wali, te da sibolo te Kades Barneade wai dao. \x * \xo 14:6 \xt Nam 14:30\x*  
\v 7 Te sogo eno kibu be te bidi sese si, te 40 yia elalubadi, tama Genuai Bidigo sę bidi Mosesgo ena te tǫ Kades Barnea te ena geme sa pabo bidi tagala palali. Tama eno tede suali nai po mu te po eno te Mosesba wagasali. \x * \xo 14:7 \xt Nam 13:1-30\x*  
\v 8 Tiali goli, te ena dali pali bidi dabe augwaligo te we bidi wi ebo sę ilali. Tiali goli, eno te dago Genuai Bidi Godigo po bugagia dolo wali pali.  
\v 9 Tama tibaso, Mosesgo te tiwai po me deli ena dali te sogo dąų wali. Agai te po wai, ‘Nago te God wali bugagia pali, te dago Genuai Bidi da, tama tibaso, nage me, nago ogomani dali, te nage bilali tǫ pedai badu siyu, tama augwaligo te tǫ sesemane sogo elalua pidu, mu elalua paibao,’ te po wai.” \x * \xo 14:9 \xt Nam 14:24\x*   
\p
\v 10 Tama Kalepgo te tiwai po ma weyu, te po wali, “Nago odao. Genuai Bidigo Mosesbolo te tama po olama, tama nosali te Israel dabe augwali te masigi kemi tǫde bilalubadi, tama megi da, te kibu be bidi sese si olama, a naga silalio. Tiali goli, Genuai Bidigo ena tau sobaso, tama ena megi e sogo me bidibao. Tialima, nago ena suao. Eno kibu be te bidi sese me si me si elama, te nogo a naga, te 85 kibu be yalio.  
\v 11 Tiali goli, megi te eno bomo me elalubo, te polobadu ena teba biligi pomainu tagala palali tiwai gilama elalubo. Te ena bomo me elalubadi, tama eno te boi hwįgi pelama, tama tigidali sę eno ela silabo megi me usu dao, te eno polobadu yali gilama elalubo.  
\v 12 Tialima megi da, te Genuai Bidigo enabolo te mawaibao wali te bulu du tǫ pesage te enabolo mao. Te polobadu sogo nago odali, te ena me, te ena dali pali bidi dabe, dago te nai suali po Mosesbolo pusali. Te Anakde moni bidi dabe te bulude bidalubadi, tama dago nagebolo wai. Augwali te genuai obo yai hanude bidalubo po wali. Te Genuai Bidi ena dali bidiyu da, teda te bidi dabe augwali eno ela gudulaiba homu ebao, te agai wali po tiwai gilama yaibao,” Kalepgo te po wai.   
\p
\v 13 Tama Josuago te Kalepgo wali po odama, tama agai te Godigo nage dali dwagi yai sę emainao po te Kalepbolo wali, tama te Hebron hanu agabolo manio, te aga sabo tǫ mu tama dao.  
\v 14 Kalepgo Godigo po bugagia wali pali da, God da te Israel dabego Genuai Bidi dao. Tama Hebron hanu te Kalepgo wąį hanigo tǫ gagalama bidali, te Jefunego ogwa, te Kenas bidi dao.  
\v 15 Polobadu te Hebron hanu nogi te Kiriat Arba nogi yali. Tama Arba te Anak bulude te moni bidi me deli bidai.  
\p Tialima, te tǫ Kalepgo selama, tama te sogo da te bulude wąbi munu ma hwįsąma, bidaluali.   
\c 15  
\s1 Te Juda dabego tǫ sa munama, dobayali  
\p
\v 1 Te Judago hani sibi deli deligo te hanude tǫ sainu, te tiwai po augwaligo po miani: te tǫ dąį pali te Idom tǫ pedai bogo badu saboligi pali, tama pelama, te masigi kemi tǫ te augwaligo Sin nogi yali, te sesege bogo badu mu dąį iligi pali.  
\v 2 Te dąį pali te Isai Tamu Ąį te badu dąį igi pelama,  
\v 3 tama pali te bulu du Akrabim, te bulu nogi Sinba pedaligi pali. Tama Negevdu dąį pali, te Kades Barneaba sabolama, tama Hesron ela soayu, tama pelama, te Adarba sabolali. Tama nosali begelama, te Karkaba sabolama,  
\v 4 tama pelama, te Asmonba sabolama, tama te Isip dąį badu te dwasianu wę wali peyu, tama te wę nogi Mediterenian Tamu Ąį teba dąį igi pali. Te Judago tǫ dąį yali te saut badu siligi pai dao.   
\p
\v 5 Te giliga pedalubo badu dąį te Isai Tamu Ąįde elama, tama pelama, te Jordan pabo wę te Isai Tamu Ąįba sabalobo madiba sabolali. Tama te pedai a badu te badu gagalama, dąį yali,  
\v 6 tama pelama, te Bethokla sabolama, tama pelama, te Betaraba te a badu ma sabolali. Tama palima, te Bohango genuai masigi elalubo teba saboligi pali, te Rubengo ogwa dao.  
\v 7 Tialima, te odogo tǫ Akor tede dąį palima, te Debir teba sabolama, tama nosali te not a badu palima, tama begelalima, te Gilgal teba pali. Te bulu Gilgal tedu te Adumim te malu tǫ bulu du te ogwa badu suali. Tama pidubadi, te wę Ensemes sabolama, tama palima, te Enrogelba dąį igi pali,  
\v 8 tama te Hinomgo ogwago te odogo tǫ tedu wali pelama, te Jebusgo bulu du te a badu sabolali. Te Jerusalem te badu elaluali. Tama dąį pidubadi geanima, te bulu duba sabolali, tama te giliga dega sigi pabo badu te Hinomgo malu elaluali, te badu dąį igi pali. Te dąį yali te Refaim dabego te tǫ odogo sesege badu tede elaluali.  
\v 9 Tama te bulu du bageba holama, tama palima, te Neptoa dabego te ulu węba sabolama, tama te Efrongo hanu dabe pąde te bulu duba pedelama, dąį igi pai. Te pedai badu te dąį begelama, te Bala te badu pali, te gasa nogi me elaluali te Kiriat Jearim dao.  
\v 10 Te Bala te badu te dąį yali te giliga dega sigi pabo badu palima, te Idomgo Bulu Du dabe elaluboba pedelali, tama palima, te bulu du Jearimba sabolali, te gasa nogi me elaluali Kesalon, te not badu tama pelama, te Betsemes teba dulalima, tama peyu, te Timna te bulu taga pali.  
\v 11 Tialima, te dąį te bulu du sao badu te Ekron te not badu wali palima, tama begelalima, te Sikeronba sabolama, tama te Bala bulu du taga peyu, tama te Japnelba sabolali. Tama te dąį pali, te Mediterenian Tamu Ąį teba siligi pai.   
\p
\v 12 Te giliga dega sigi pabo badu te dąį igi pali, te Mediterenian Tamu Ąį sesege te tama dao. Te tǫ dąį ilama, bagulali, te Judago hani bage naga bidabo digi nigilali.   
\s1 Kalepgo te Hebron me Debir si sali  
\p
\v 13 Polobadu Genuai Bidigo te Josuabolo po mayu, te augwaligo Juda dabego hanu tǫ me deli te Kalepbolo mao po wali, te Jefunego ogwabolo. Tialima, Josuago tama tiali. Tama te tǫ pedai Hebron, te Arbago hanu, te Anakgo aya dao.  
\v 14 Kalepgo te Anakgo hani bidi sela ela gudulali, Sesai, me Ahiman, me Talmai. \x * \xo 15:14 \xt Tob 1:20\x*  
\v 15 Nosali Kalepgo te bulu taga peyu, te pelama, te Debirde bidalubo hani bage dali boi hwįgi pali. Polobadu augwaligo te hanu nogi te Kiriat Sefer nogi yali.  
\v 16 Tialima, Kalepgo te po wali, “Te niwai bidigo te Kiriat Sefer teba boi hwįgi pelama, tama te hanude bidibo bage te aiyaba elalubaso da, teda agai te eno wegi Aksa somainogo yaibao,” wali.   
\p
\v 17 Tama Otniel, te Kenasgo ogwa, te Kalepgo amago ogwa, te hanuba hwįgi pelama, te bulu bidi dabe aiyaba elaluama, te hanu sali, tama Kalepgo wegi Aksa te agaba menama, tama agai sali.   
\p
\v 18 Tama te we Otnielba asobadi te sogo, Otnielgo bomo elama, te wego te aga ayabolo te tǫ me deli momainogo hanalu wao po olama, bomo yali. Tama te we te Kalep bidiboba pelama, tama aga donki kibu daide dulaluali tagalama, aiyaba samonani, tama Kalepgo agabolo hanalu wali, “Nago magi nai godolo ebasowe?”   
\p
\v 19 Tialima, wego te po wali, “Eno homugo te nago ena wiegi yai homu yabo nai me deli mao. Nago te Negev hanu tǫ enaba mani, te tǫde wę menio. Tama nago enabolo te ulu wę meba mao,” wali. Tialima, Kalepgo te wę ulu ugwadu elalubo me aiyadu me mani.   
\s1 Te Juda dabego hanu dabe  
\p
\v 20 Te tǫ dabe te Judago ogwa hani sibigo te augwa tǫ da olama, sesa pali.  
\v 21 Te Juda dabego hanu dabe te saut teba polobadu te Idom dabego tǫ sesege pąde elaluali, te hanu dabe augwali nogi te e dao, Kapsel, Eder, Jagur,  
\v 22 Kina, Dimona, Adada,  
\v 23 Kedes, Hasor, Itnan,  
\v 24 Sif, Telem, Bealot,  
\v 25 Hasor, Hadatat, Keriot Hesron, te gasa nogi me Hasor elaluali,  
\v 26 Amam, Sema, Molada,  
\v 27 Hasargada, Hesmon, Betpelet,  
\v 28 Hasarsual, Berseba, Bisiotia,  
\v 29 Bala, Im, Esem,  
\v 30 Eltolat, Kesil, Horma,  
\v 31 Siklak, Matmana, Sansana,  
\v 32 Lebaot, Silhim, Ain, Rimon. Te bidi sese deli olama, te nogo a naga me si me si, te 29, te tama hanu dabe badi, tama te hanu dabe pąde te dwasianu bulu dabe, te Juda hani sibigo elaluali.   
\p
\v 33 Te dwasianu bulu du elalubo tǫde te giliga dega sigi pabo badude, e tama hanu dabe elaluali, te Estaol, Sora, Asna,  
\v 34 Sanoa, Enganim, Tapua, Enam,  
\v 35 Jarmut, Adulam, Soko, Aseka,  
\v 36 Saraim, Aditaim, Gedera, te gasa nogi me Gederotaim, te elaluali. Te nogo si olama, sągągo me si me si hanu badi, te tama tigidali bulu dabe dali te pąde elaluali.   
\p
\v 37 Te e tama hanu dabe me elaluali, te Senan, Hadasa, Mikdalgat,  
\v 38 Dilean, Mispa, Joktel,  
\v 39 Lakis, Boskat, Eklon,  
\v 40 Kabon, Lamon, Kitlis,  
\v 41 Gederot, Betdagon, Nama, Makeda. Te 16 tama hani dali, te pąde elalubo dwasianu bulu dabe dali, te Juda dabego elaluali.   
\p
\v 42 Te e tama hanu dabe me elaluali, Lipna, Eter, Asan,  
\v 43 Ipta, Asna, Nesip,  
\v 44 Keila, Aksip, Maresa, te tama hanu elaluali. Te 9 hanu te dwasianu bulu dabe meba augwali pąde elalua pali.   
\p
\v 45 Te e tama hanu me elaluai, Ekron hanu me te dwasianu bulu dabe dali,  
\v 46 me tama tigidali hanu me bulu te Asdot pąde elaluali, te Ekron me te Mediterenian Tamu Ąį tomode elaluali.  
\v 47 Asdot me Gasa tede te hanu me te bulu dabe dali elaluali, te Isip dwasianu wę sesegede, me te Mediterenian Tamu Ąį te wę si pąde elalua pali.   
\p
\v 48 Te bulu du bagede te e tama hanu dabe elaluali, Samir, Jatir, Soko,  
\v 49 Dana, Kiriat Sefer, te gasa nogi me Debir elaluali,  
\v 50 Anap, Estemo, Anim,  
\v 51 Gosen, Holon, Gilo, te tama hanu elaluai. Te 11 hanu dali, te augwali pąde elalubo dwasianu bulu dabe dali, te Juda dabego elaluai.   
\p
\v 52 Te e tama hanu dabe me elaluali, Arap, Duma, Esan,  
\v 53 Janim, Bet Tapua, Afeka,  
\v 54 Humta, Kiriat Arba, te gasa nogi Hebron wabo, tama Sior, te tama hanu elaluali. Te 9 hanu dabe, me te augwali pąde elalubo dwasianu bulu dabe dali, te Juda dabego elaluali.   
\p
\v 55 Te e tama hanu dabe me elaluai, Maon, Karmel, Sif, Juta,  
\v 56 Jesril, Jokdeam, Sanoa,  
\v 57 Kain, Gibea, Timna, te e tama hanu elaluali. Te nogo si hanu dali, te augwali pąde elalubo dwasianu bulu dabe dali, te Juda hani sibi dabego selama, elaluali.   
\p
\v 58 Te e tama hanu dabe me elaluai, te Halhul, Betsur, Gedor,  
\v 59 Marat, Betanot, Eltekon, te e tama hanu elaluali. Te hanu 6 dali, te augwali pąde elalubo dwasianu bulu dabe dali, elalua pali.   
\p
\v 60 Te e tama moni hanu si elaluali, Kiriat Bal, te gasa nogi wabo me te Kiriat Jearim, me Raba, te moni hanu si elaluai. Te hanu si pąde te dwasianu hanu dabe me elaluali.   
\p
\v 61 Te masigi kemi olo tǫde te e tama bulu elaluali, Betaraba, Midin, Sekaka, elalubadi yali,  
\v 62 Nipsan, me te tǫde tamu elalubo hanu me elaluali, Engedi hanu me elaluali. Te hanu 6 dali, te augwali pąde elalubo dwasianu bulu dabe me, te Juda dabego dobayali.   
\p
\v 63 Tiali goli, te Juda dabego te Jebus dabe te Jerusalemde bidalubo te augwali me sela sąyu, te me ela gudulubeo. Tama tibaso, te Jebus dabe te Juda dabe dali te Jerusalemde bidali, te megi e po asębo sogoba usu nagasali. \x * \xo 15:63 \xt Tob 1:21; 2 Sml 5:6; 1 Sto 11:4\x*   
\c 16  
\s1 Te augwaligo Efraimgo tǫ dąį nigilali  
\p
\v 1 Te augwaligo Josepgo wąį dabego tǫ dąį nigilibo gagalali, te wę Jordan te Jeriko hanu pąde gagalasa pelama, te giliga pedalubo badu te Jeriko wę ulu pedalubo pąba sabolalima, tama te masigi kemi olo tǫ tomoba saboligi pali. Tama dąį tedu pelama, tama te bulu duba sabaligi palima, te Betel buluba dąį igi pali.  
\v 2 Te Beteldu dąį pali te bulu Lusba sabolama, tama palima, te Atarotba dąį igi palima, te Arka bidi dabe bidalubo madi dao.  
\v 3 Nosali te dąį pali, te giliga dega sigi pabo teba pedelama, te Japlet dabe bidiboba sabolali, tama pelama, te Bethoron elalubo te aiyadu te dąį igi pai. Tama tedu te dąį palima, Geserba pelama, tama te Mediterenian Tamu Ąį te pedaligi pali.  
\v 4 Te Josepgo wąį dabe, te Manasego hani me te Efraimgo hani dali, augwaligo te tǫ sali.   
\p
\v 5 Te e da te Efraim hani sibigo tǫ dao. Te augwaligo te giliga pedalubo badu sabo, te Atarot Adar hanude gagalasa pali, tama palima, te Bethoron teba dąį igi pali.  
\v 6 Tama te dąį pali, te Mediterenian Tamu Ąį teba saboligi pali. Mikmetat te augwaligo tǫ pedai te not badu elaluali. Te giliga pedalubo badu dąį te Tanatsilode begelali, tama te bulu taga palima, tama pelama, te Janoa teba saboligi pali.  
\v 7 Tialima, dąį te Janoade tagalalima, te Atarot me Nara te bulu siba dulali. Tama Jerikoba sabolama, tama te Jordan węba simanigi pali.  
\v 8-9 Te Tapuadu dąį pali, te giliga dega sigi paboba sabolama, tama te wę Kanaba pedelama, tama palima, te Mediterenian Tamu Ąį teba sabolali. Te tǫ dabe dali te tigidali hanu elaluali, augwaligo te Efraimgo hani sibigo sabo nai naga dao. Tama te Efraim dabe meba te Manasego hanu dabede bidiyu, tama Manasego bulu tǫ tomode me bidaluali.  
\v 10 Tiali goli, augwaligo te Geserde bidali te Kenan bidi dabe te augwali me ela gudulubeo. Tama te Kenan dabe te Efraim dabe tomode bidaluali. Tama te Efraim dabego te Kenan dabe te augwaligo olo sę ebo bidi tiwai sę emainu yalio. \x * \xo 16:10 \xt Tob 1:29\x*   
\c 17  
\s1 Te Manasego tǫ  
\p
\v 1 Augwaligo te Manasego hani dabego tǫ me deli te dąį ilali, magi baso meni, Manase te Josepgo gomunai ogwa dao. Makir, te Manasego gomunai ogwa da, tama aga te ami bidi me deli da, tama te Gileat tǫgo aya da. Tama augwaligo aga tǫ te Gileat badu, me Basan te badu, te tǫ dąį ilama, bidali.  
\v 2 Tama augwaligo te Manasego gasa hani dabe mebago tǫ dąį ilama, mani, Abieser, me Helek, me Asriel, me Sekem, me Hefer, me Semida, te tama bage tǫ dąį ilali. Te bidi dabe augwali te Manasego wai dabe, tama augwali te augwa hani dabe tomode te augwali tobolu bidi bidali da.   
\p
\v 3 Te Selofehat, te Hefergo ogwa da, tama Hefer te Gileatgo ogwa, tama Gileat te Makirgo ogwa, tama Makir te Manasego ogwa da. Tiali goli, Selofehatgo te wai ogwa me deli ame nabe. Te agai wegi dabe a naga ame nani. Te augwali nogi e dao, Mala, me Noa, me Hokla, me Milka, me Tirsa.  
\v 4 Augwali pelama, te pris bidi Eleasar, me Josua, me te tobolu bidi dabe me sugi pelama, tama augwaligo te po wali, “Genuai Bidigo te Mosesbolo po weyu, te tǫ me deli te dabolo me mao weyu, te dena aya aga ama solobolo mabo tiwai gilama yao po weyu yali.” Te we a nagago te po wai. Tialima, augwaligo te tǫ me te we dabebolo me, te augwa aya aga ama solo bidi dabebolo me, te tǫ mani, te Genuai Bidigo wali po gilama yalio. \x * \xo 17:4 \xt Nam 27:1-7\x*  
\v 5 Tama te Manasego hanigo te nogo si tǫ pedai sali, te augwaligo polobadu te Gileatgo tǫ dali, me te Basan te Jordan wę u badu te giliga pedalubo badu dali sali.  
\v 6 Magi baso meni, augwaligo te Manasego ogwa wegi dali augwalibolo te tǫ mani. Tama augwaligo te Gileatgo tǫ te Manasego gasa hani wąį dabebolo mobadi yai.   
\p
\v 7 Te Manasego tǫ sali te Aserdu gagalasa pelama, te Mikmetat buluba sabolama, tama te Sekem bulu pąba te giliga pedalubo madi sabolali. Tama te dąį te saut te badu te Entapua buluba sabaligi pali.  
\v 8 Te tǫ Tapua te Manasego tǫ dao. Tiali goli, te Tapua hanu te Efraimgo hanigo hanu mu dao, te Manasego tǫ sesege badu mu elaluali.  
\v 9 Tama dąį dulali, te dwasianu wę Kanaba dąį igi pali. Te wę te saut badu elaluali hanu dabe te Efraimgo hanu da. Te hanu dabe te Manasego hanu tǫ tomode elaluai. Tama Manasego tǫ dąį pali, te dwasianu wę te not badu te Mediterenian Tamu Ąį te badu pedaligi pali.  
\v 10 Te Efraimgo pedai badu te saut badu elalu, te Manasego tǫ pedai dąį te not badu elalu yali, tama Mediterenian Tamu Ąį te augwali sigo tǫ dąį si tomode te giliga dega sabo badu elaluai. Tama augwali sigo tǫ dąį te not badu te Asergo tǫ, me te Isakargo tǫ te giliga pedalubo badu elalu yali.   
\p
\v 11 Te Isakar de Aser Israel hani sigo tǫ tomode te Manasego te hanu Betsan dali Ipleam dali si, me te pąde elalubo bulu dabe dali sobadi yali, tama Dor hanu te nabis ąį sane badu elaluali, tama Endor, me Tanak, me Megido, te pąde elaluali bulu dabe dali sai.  
\v 12 Tiali goli, te Manase hani dabe augwaligo te Kenan dabe te hanu me ela gudulubeo. Tama te Kenan dabego homu bomonama eyu, tama tede me bidaludali.  
\v 13 Nosali te Israel dabe bomai bage pedalubode, tama augwaligo te Kenan dabe te augwaligo sę olo ebo bidi pedela silali. Tiali goli, te augwaligo te augwali me sela sąyu, me ela gudulubeo. \x * \xo 17:13 \xt Tob 1:27-28\x*   
\p
\v 14 Nosali te Josepgo wąį dabego Josuabolo te po wali, “Magi baso nago te tǫ pedai deli naga dabolo maniwe? Te da usu ebeo. Magi baso meni, te Genuai Bidigo da dali dwagi yai sę eyu, tama dago hani te genuai pedalumainu ilali, tama da hani hauwa mu pedelalio,” wali.   
\p
\v 15 Tama Josuago te po wei ponani, “Te dage hauwa mu, tama te Efraimgo te bulu dude bidabo te dage usu meni baso da, teda dage te moni ni sili bulu tomoba pelama, tama duga bidabo digi penama, te Peres me Refaim dabego te tǫde bidao,” wali.   
\p
\v 16 Tama te Josepgo wąį dabe augwaligo te po wali, “Te bulu du me te da usu me egobeo. Tiali goli, te Kenan dabe te malu tǫde bidiyu, tama te Betsande te pąde elalubo dwasianu bulu dabe dali, te Jesril malu tǫde me bidibo, augwaligo te boma pai hwįabo nai ain karis dabe elalubao,” wali.   
\p
\v 17 Tialima, Josuago te Efraimgo me Manasego hani sibolo wali, “Te mu tama, dage te hauwa mu tama ebaso, tama dage te bomai hani me deli dao. Te tǫ pedai delide te dage usu egobeo. Tama tibaso, dagego te tǫ meba sagameo.  
\v 18 Te dagego te moni ni sili bulu du elalubo bulu te dagego sagameo. Mu tama, te genuai bulu elalubo, tiali goli te dagego penama, tama te tǫ tigidali saibao. Tede bidalubo Kenan dabego te bomo eyu, tama augwaligo te ain karis dabe elalubao, tiali goli te dagego augwali sela sąyu, ela gudulagameo,” Josuago te po wai.   
\c 18  
\s1 Te Israel dabe augwaligo tǫ usu sali  
\p
\v 1 Te Israel dabe augwaligo boi hwįnama, te tigidali bulu bidi dabe aiyaba elaluama, tama augwa hani tigidali te Siloba sisinani. Tede augwaligo te God dali sisinabo lotu be, te ugwa be, te augwaligo dodolama muai.  
\v 2 Tiali goli, te a naga olama, me badu si hani te augwali tǫ sisąwai.  
\v 3 Tama tibaso, Josuago te Israel dabe augwalibolo wali, “God, te duga wąįgo Genuai Bidigo, te tǫ dagebolo mawai. Dagego magi nai tonaludu, te dagego sabewe?  
\v 4 Te tigidali hani deli delide te bidi sela naga nidigili pao. Tama eno augwali te tigidali tǫ pedai usu nama tagala palama, tama augwa digi te augwa hanigo sabo tǫ dąį iligi paibao. Tama elama, tama augwaligo te tǫde po te ripot te asęaibao. Tama nosali augwali ena bidibo digi ma asaibao.  
\v 5 Augwaligo te tǫ a naga olama, me si te tama pedemainu yaibao. Te Judago hani augwali te saut badu te augwa sali tǫde bidiyu, tama te Josepgo hani augwali te not badu augwaligo sali tǫde bidiyu emainu yaibao.  
\v 6 Tama dagego te a naga olama, me si te tama tǫ suali po te asęnama, tama enaba selasa asao. Nosali eno te Genuai Bidigo gedude te tǫ sabo po dodolobo sę elama, te mena tǫ mu Godigo dagebolo sa mubowe, te koneaibao.  
\v 7 Tiali goli, te Livaigo hani da, te Genuai Bidigo pris sę ebo bage bidaibao, tama augwaligo te dagego tǫ sabo tiwai gilama te tǫ me sogobeo. Tama Gatgo hani me, Rubengo hani me, Manasego hani bage me badu me, augwali te wę Jordan te giliga pedalubo u badu te tǫ polobadu sai dao. Moses te Genuai Bidigo sę bidigo te tǫ augwali mani,” Josuago te po wai.   
\p
\v 8 Josuago te tǫ sugi pelama, te po asęabo bidi dabebolo te e tiwai po wali, “Dage pelama, te tigidali tǫ sulama, tama tǫ po asęnama, tama enaba ma selasa asao. Tama e bulu Silode eno te tǫ sabo po dodolobo sę gagali elama, te mena tǫ te Genuai Bidigo dagego hani deli delibolo mabowe naga koneaibao.” Josuago te po wai. Tialima, te bidi dabego te Josuago po odama, tama augwali pali.  
\v 9 Tama augwali te tigidali tǫ bilama, tama augwaligo te suali po te buku me delide asęani. Augwaligo te tǫ a naga olama, me badu si togwali, tama te hanu dabe nogi me asęani. Nosali augwali te Josua bidibo madi te Siloba ma pali.  
\v 10 Tialima, Josuago te tǫ sabo po dodolobo sę elama, te mena tǫ Genuai Bidigo augwalibolo mabowe naga koneainogo yali. Tama nosali agai te tǫ dobolama, te Israel hani deli deli augwaliba te tǫ mani.   
\s1 Te Benjamin tǫ augwaligo dąį ilali  
\p
\v 11 Te Benjamingo hani sibi deli deligo tǫ te Juda hani me Josep hani si tomode te tǫ dąį ilama, sali.  
\v 12 Te not pedai badu te augwaligo tǫ sabo dąį gagali, te wę Jordande gagalasa pelama, te dwasianu bulu duba holama, te not pedai badu te bulu Jerikoba sabolali. Tama dąį pali, te giliga dega sigi pabo te bulu dude begelalima, te masigi kemi olo tǫ badu te Betaven, teba dąį igi pali.  
\v 13 Tama te dąį pidubadi geani, te saut pedai badu te dwasianu bulu du me Lus teba dąį igi pali, te augwaligo te nogi Betel wali, tama te Atarot Adar teba aiya dulali, te bulu du me deli Bethoron pąde ugwadu elaluali, te saut pedai badu dao.   
\p
\v 14 Tama te dąį gasaba poloba begelali. Te saut badu tagalama, te sia ge degegi pabo badu te bulu du a badu, te saut badu te Bethoron teba sabolali. Tama dąį pali, te hanu Kiriat Bal, te nogi augwaligo Kiriat Jearim wabo, teba pedelali. Te hanu te Juda dabego hanu. Te giliga dega sigi pabo te dąį pedai badu elaluali.   
\p
\v 15 Te saut badu dąį te Kiriat Jearimde gagalasa pelama, te giliga dega sabo badu tugi pelama, te Neptoa dabego ulu wę elalubo madiba sabolali.  
\v 16 Tama te dulali te bulu du dolalubo sesege badu te Hinomgo ogwago tǫ malu elalubo pąba pedelali. Te bulu du te not badu te Refaim dabego malu tǫ sesege badu elaluali. Tama dąį pali te saut badu te Hinomgo tǫ malu bolama, tama te Jebus dabego dwasianu bulu du togolama, tama palima, te Enrogel te pedai badu dąį igi pali.  
\v 17 Tama dąį pali, te not badu te Ensemes sabolama, tama pali, te Gelilot dąį igi pelama, te bulu sesege Adumim pedai badu elaluali. Tama te dąį dulali, te Rubengo ogwa Bohango genuai masigi elaluali madiba sabolali.  
\v 18 Tama te dąį yaligo te dwasianu bulu du dabe bolali, te Betaraba teba sabolama, tama dulalima, te Jordan tǫ maluba sabolali.  
\v 19 Tama dąį pali, te dwasianu bulu du te not badu te Bethokla teba dąį igi pelama, tama te Isai Tamu Ąį te wę Jordan age siba pedelali. Te saut sesege badu dao.   
\p
\v 20 Te giliga pedalubo badu te dąį pali, te wę Jordan wali pali. Te dąį yali te tǫ te Benjamin hani sibi dabego sabo tǫ dao.  
\v 21 Te Benjamingo hanu dabe te e tama elaluali, Jeriko, Bethokla, Emek Kesis,  
\v 22 Betaraba, Semaraim, Betel,  
\v 23 Avim, Para, Ofra,  
\v 24 Kefar Amoni, Opni, Geba, te 12 hanu dabe, te pąde bulu dabe dali elaluali.   
\p
\v 25 Te e tama hanu me elaluali, Gibeon, Rama, Berot,  
\v 26 Mispa, Kefira, Mosa,  
\v 27 Rekem, Irpel, Tarala,  
\v 28 Sela, Haelep, Jebus, te augwaligo Jerusalem nogi yali, Gibea, Kiriat Jearim, te tama hanu elaluali. Te 14 hanu dabe, te pąde bulu dabe dali elaluali. Te tǫ pedai te Benjamingo hanigo sali tǫ me hanu dali, te dao.   
\c 19  
\s1 Te augwaligo Simeongo tǫ sa muani  
\p
\v 1 Te augwaligo si wali tǫ dąį ilali, te Simeongo hani sibi deli deliba mani. Te tǫ pedai te augwaligo te Judago tǫ dąį ilali madi, te tǫ tomode elaluali.  
\v 2 Te tǫ pedaigo sigi pali tǫ te e hanu dabe elaluali, Berseba, aga gasa nogi Seba, te Molada,  
\v 3 Hasarsual, Bala, Esem,  
\v 4 Eltolat, Betul, Horma,  
\v 5 Siklak, Bet Markabot, Hasarsusa,  
\v 6 Bet Lebaot, Saruhen, te tama hanu tǫ sali. Te 13 hanu dabe dali, te pąde bulu dali elaluali.   
\p
\v 7 Te e tama hanu me elaluali, Ain, me Rimon, me Eter, me Asan, tama elaluali. Te hanu me si me si dali, te pąde bulu dabe dali elaluali.  
\v 8 Te Balatber teba dąį igi pali, te gasa nogi wabo Rama tama, te Negev pedai badu elaluali, tama tede elalubo dwasianu bulu dabe elaluali. Te tama tǫ pedai naga te Simeongo hani sibi deli deligo sai dao. \x * \xo 19:8 \xt 1 Sto 4:28-33\x*  
\v 9 Te Simeongo tǫ te Judago tǫ tomode elaluali. Te augwaligo Judago tǫ dąį ilali te genuai mu elaluali. Tama tibaso, te Juda dabego usu da po weyu, tama te tǫ pedai me badu te Simeongo hanigo sali.   
\s1 Te augwaligo Sebulungo tǫ dąį ilama, mani  
\p
\v 10 Te sela wali tǫ augwaligo te Sebulungo hani sibi deli delibolo dąį ilama, mani. Te augwaligo sali tǫ dąį pali, te Sarit dąį igi pali.  
\v 11 Tama dąį pali, te giliga dega sabo badu te Mareal dąį igi pelama, te Dabeset te pąba sabolama, tama te Jokneam pąde elalubo dwasianu wę te giliga pedalubo badu sabolali.  
\v 12 Te Sarit pedai badu, te dąį pali, te Kislot Tabor te giliga pedalubo te sesege badu dąį igi palima, te pelama, Daberat sabolama, tama te Jafia te ugwaba pelama, sabolali.  
\v 13 Tama dąį pidubadi, te giliga pedalubo te dąį igi pelama, te Gathefer me Etkasin, teba sabolama, tama begelalima, te Nea badu te Rimon teba pabo sunumi te dąį igi pai.  
\v 14 Tama te not badu dąį begelali, te Hanaton dąį igi palima, tama te Iptahel tǫ maluba pedelali.  
\v 15 Tama te tǫgo te Katat, me Nahalal, me Simron, me Idala, me Betlehem, te tama hanu sigi pali. Te 12 te tama hanu dali, te pąde bulu dabe dali elaluali.  
\v 16 Te hanu dabe dali, te pąde elaluali bulu dabe dali, te Sebulungo hani sibi deli deligo sali tǫde te pedaide elaluali.   
\s1 Te Isakargo tǫ augwaligo dąį ilali  
\p
\v 17 Te tǫ me si me si wali te augwaligo te Isakar hani sibi deli deliba sa munama mani.  
\v 18 Te tǫ pedaigo te Jesril, Kesulot, Sunem, te tama hanu sali,  
\v 19 Hafaraim, Sion, Anaharat,  
\v 20 Rabit, Kision, Ebes,  
\v 21 Remet, Enganim, Enhada, Betpases, te tama hanu dabe sali.  
\v 22 Tama dąį pali, te Tabor pąba sabolama, tama te Sahasuma, me Betsemes dąį igi pelama, tama pali, te wę Jordanba sabolali. Agai te 16 hanu te tama hanu dali, te bulu pąde elaluali bulu dabe dali sai dao.  
\v 23 Te hanu me bulu dabe dali, te tǫ pedai me te Isakargo hani sibi dabego sali.   
\s1 Te Asergo sabo tǫ augwaligo dąį ilali  
\p
\v 24 Te tǫ pedai a naga wali te augwaligo Asergo hanigo somainogo sa muani.  
\v 25 Te tǫ pedai te Helkat, me Hali, me Beten, me Aksap, te tama hanu sobadi,  
\v 26 tama te Alamelek, me Amat, me Misal, te tama sali. Te giliga dega sabo badu te Karmel me Sihorlipnat te pąba pedelali.  
\v 27 Tama dąį begelali, te giliga pedalubo madi teba sabolali, te Betdagon te dąį igi pelama, tama palima, te Sebulungo tǫ pąba dąį igi pelama, tama te Iptahel te tǫ maludu pelama, te not te Betemek me Neiel sabolali. Tama dąį pidubadi, te not badu te Kabul dąį igi pelama,  
\v 28 tama Ebron, me Rehop, me Hamon, me Kana tama pali, te genuai hanu Saidonba sabolali.  
\v 29 Tama te dąį begelama, te Rama teba pelama, tama te Tairba pedelali, te hanude te dila pai obo masigigo bagulai elaluali. Tama te dąį begelalima, te Hosaba pelama, tama pali, te Mediterenian Tamu Ąį te badu sabolali. Te tǫ pedaigo te Mahalap, me Aksip sobadi,  
\v 30 me Uma, me Afek, me Rehop, te tama tǫ me hanu sobadi yali. Te 22 hanu, te tama hanu badi, te pąde elaluali bulu dabe dali sobadi yali.  
\v 31 Te hanu me, te bulu dabe dali, te tǫ dali te Asergo hani sibi deli deligo sali tǫde elaluali.   
\s1 Te augwaligo Naptaligo tǫ dąį ilali  
\p
\v 32 Te a naga olama, me badu nogo kibisa deli wali tǫ te augwaligo Naptaligo hani sibi deli delibolo dąį ilali.  
\v 33 Te augwaligo dąį eyu, te Helep tagalama, tama te Sananimde elaluali ni ok te dąį igi pelama, tama te Adami Nekep me Japnel dąį igi pelama, tama pali, te Lakum dąį igi pelama, tama te wę Jordanba siligi pali.  
\v 34 Tama dąį pali, te giliga dulubo badu begelama, te Asnot Tabor, me Hukok te dąį igi pelama, tama te Sebulungo tǫ te saut pąbadu sabolama, tama te Asergo tǫ badu, me te giliga dega sabo badu pelama, te Judago tǫ badu dąį igi palima, te giliga pedalubo badu te wę Jordan dąį igi pai.  
\v 35 Te dili yai masigigo nigali obo bagulali elaluali hanu dabe te e dao, Sidim, Ser, Hamat, Rakat, Kineret,  
\v 36 Adama, Rama, Hasor,  
\v 37 Kedes, Edrei, Enhasor,  
\v 38 Yiron, Mikdalel, Horem, Betanat, me Betsemes. Te hanu dabe dali, te gasa hanu dali nedeyu, te 19 tama hanu dali te tama bulu pąde dabe dali elaluali.  
\v 39 Te tama hanu me, te bulu dabe dali, te Naptali hani sibi deli deligo sali tǫde elaluali.   
\s1 Te Dango tǫ augwaligo sa muani  
\p
\v 40 Te a naga olama, me badu nogo si tǫ te augwaligo Dan hani sibi deli delibolo sa muani.  
\v 41 Te tǫ pedaigo te e tama hanu sali, Sora, Estaol, Irsemes,  
\v 42 Salabin, Aijalon, Itla,  
\v 43 Elon, Timna, Ekron,  
\v 44 Elteke, Gibeton, Balat,  
\v 45 Jehut, Beneberak, Gatrimon,  
\v 46 Mejarkon, me Rakon, me te Jopa, te bulu habu badu elaluali.   
\p
\v 47 Nosali te Dango hani dabe bidali tǫde te tǫ page bidi dabego augwali ela gudulai. Tama tibaso, te Dan dabe te Lesem buluba pelama, tama augwali dali boi hwįgi pali. Augwaligo te hanu sainu, te hanude bidali bulu page bidi dabe te tigidali ela silai. Nosali augwaligo te po wali, te tǫ te augwa tǫ dao wali, tama augwali tede bidaluali. Augwaligo te hanu Lesem te nogi hasegelama, tama augwaligo te nogi Dan poali, te augwa wąįgo nogi tiwai mu dolo poali. \x * \xo 19:47 \xt Tob 18:27-29\x*  
\v 48 Te bulude te elaluali hanu, me te pąde elaluali bulu dabe dali, te Dango hani sibi deli deli augwa sali.   
\s1 Te Josuago tǫ augwaligo sa munama, dąį ilali  
\p
\v 49 Te Israel dabe augwaligo te tigidali tǫ sesabela silama, tama augwaligo te tǫ pedai me deli te Josua mani, te aga Nungo ogwa dao.  
\v 50 Josuago te bidi dabe augwalibolo hanaluyu, te Timnat Sera, te Efraimgo bulu du pedai badu mao po wali. Tialima, augwaligo agabolo te hanu mani, te Genuai Bidigo po wali gilama tama tiali. Tama Josuago te hanu ma nigilama, tama aga te hanude bidali.   
\p
\v 51 Te pris Eleasar, me Josua te Nungo ogwa, tama te tigidali deli deli Israel hani sibi tigidalide te augwa genuai bidi deliba sisinama, te augwaligo te tǫ dobabo po dodolobo sę elama, te mena tǫ te Genuai Bidigo augwalibolo mabowe naga koneainogo yali. Te genuai bidi dabego te tiwai sę te Silo bulu pąde, te God dali deli sisinabo ugwa be sunumi pąde tama tiwai sę yai. Tama te tǫ dąį ebo, me te tǫ dobabo sę me, te silalio.   
\c 20  
\s1 Te bidi dabe teba wi pabo hanu dabe  
\p
\v 1 Nosali Genuai Bidigo te tiwai po Josuabolo wali,  
\v 2 “Nago te Israel dabebolo wao, ‘Dagego te bidi dabe teba wi pomainu yabo hanu dabe meba nogo tų ilao, te eno Mosesbolo olama, te dagebolo wali, te tiwai gilama yao.  
\v 3 Magi baso meni, te niwai bidi mego te gasa bidi me ela muai madi, tiali goli aga dali te boi isąma tama tiali, tama bidigo me konebe, te bidi aga digi te gasa bidi me ela mubo digi homu isąma te konebe, teda aga te hanu dabe te me deli teba pomainogo yao, te boi wei ponobo bidigo aga ela muidali weyu yao.  
\v 4 Aga te hanu dabe me deliba wi pelama, tama te po tų yabo madi te hanu genuai sunumi teba pedelama, tama te tobolu bidi dabebolo te sę mena tama yali po te hanilama pusumainogo yao. Nosali te tobolu bidi dabego aga te hanu tomoba pomainogo yaibao, tama augwaligo te aga augwali dali bidabo pesage te bulu menama bidimainogo yaibao.  
\v 5 Tama te wei ponainogo yali bidigo te aga wali pobeasa pelama, te hanuba pedalubaso da, teda tede bidibo bidi dabego te wi asali bidi te aga nogoba elimainogo magobeo. Magi baso meni, agai wado elama, te bidi me elibeo. Menio. Tama agai abagi Israel me deli ela muabo homu ebeo. Tama tibaso, te we bidi augwaligo te wi asali bidi bugagia tonaluaibao.  
\v 6 Tama aga te hanude bididubadi, te aga po tų te tigidali bidi gedude ilibo sogoba usu nao. Tama nosali aga tede bididubadi, tama te sogo bidali te het pris isibo sogoba usu naibao. Teda nosali te aga page bulu ma pabo te usu da, te aga polobadu wi soyu taga soali buluba ma pomainao,’” Genuai Bidigo te we bidibolo pusabo po te Josuabolo wali.   
\p
\v 7 Tama po obaso, te we bidi augwaligo te Kedes hanu te Galili badu, te Naptaligo bulu du elalubo badu dąį ilali, tama te Efraimgo bulu du badu te Sekem hanu dąį ilibadi, tama te hanu Kiriat Arba, te gasa nogi Hebron tama, te Judago bulu du badu elaluai.  
\v 8 Te Jordan wę u badu, te giliga pedalubo badu, te Jeriko te masigi kemi tǫ badu dąį ilali, augwaligo te Rubengo tǫde te Beser hanu tǫ dąį ilali, tama me te Ramot hanu te Gileat bulu te Gatgo tǫ badu, tama me te Golan hanu te Basan bulu tomode, te Manasego tǫ badu elaluai.  
\v 9 Te tama hanu dabe te tigidali Israel dabe geme duala sigi pabo hanu dabe nigilali, te gasa bulu bidi dabe te augwali dali bidali bage me te hanuba naga wi duala sigi pomainogo yali. Tama te bidi me deligo te gasa bidi me elibaso da, tiali goli te agai aga dali boi bidi eyu me elibe, teda aga pelama, te hanude bugagia bidigi pagameo. Tama te bidigo wei ponainu wali pali bidi, agai te bidi me elamuo, tama te bidi te tigidali bidi dabe gedude te po tųba pedalumainogo emai hagede yao. \x * \xo 20:9 \xt Nam 35:6-32; Bom 4:41-43; 19:1-13\x*   
\c 21  
\s1 Te Livai dabego hanu dabe  
\p
\v 1 Te Livaigo hanide te tobolu bidi dabe pelama, te pris bidi Eleasar me, te Josua te Nungo ogwa me, te tigidali Israel hani dabe te tobolu bidi dabe bidibo madi sugi pali.  
\v 2 Augwaligo te bidi dabe te Silo bulu te Kenan dabego tǫba sisinama, tama augwalibolo te tiwai po wali, “Genuai Bidigo bomai po dabolo te Mosesgo pedauwalide mani, te dago digi dena hanu meba sobadi, tama te dago bulmakaugo tuabo te wiegi yai nosai elalubo tǫ saibao wali,” augwaligo te po wai. \x * \xo 21:2 \xt Nam 35:1-8\x*  
\v 3 Tama tibaso, te Israel dabego te Genuai Bidigo po wali pelama, tama augwaligo te hanu dabe me, tama te augwa nosai elalubo dwasianu tǫ dabe badi, te Livai hani dabebolo mani.   
\p
\v 4 Hasia augwaligo te Kohatgo hani sibibolo dąį ilama, tama augwaligo te hanu dabe sai. Te hani pris dabe te augwali te polasa bidali, te pris te wąį Arongo hani dabe, tama augwaligo te Juda hanide me, te Simeon hani me, Benjamin, te hani selade augwaligo te nogo si olama, sągągo sela hanu sali.  
\v 5 Tama te Kohatgo gasa hani augwaligo te nogo si hanu dabe sali, te Efraimgo hanide, me Dango hani, me Manasego hanide te hanu dabe sali.   
\p
\v 6 Te Gersongo hani sibigo te Isakar, me Aser, me Naptali, te hanide te augwaligo te 13, te tama hanu sali, tama te Manasego hani te Basande bidali bagego hanu meba, te Gersongo hani sibigo me sobadi yali.   
\p
\v 7 Te Merari hani sibigo te Ruben, me Gat, me Sebulun, te hani selago hanu te 12 hanu sai.   
\p
\v 8 Te Israel dabe augwaligo te Livai dabe hanu, me te bulmakau dabe bidabo tǫ dąį ilali. Augwaligo te Genuai Bidigo te Mosesgo pedauwalide wali po tiwai gilama te sę yali.   
\p
\v 9-10 Te e nogi da te Juda me Simeon te hani sigo hanu dabe te Kohat hani sibigo te pris sę emainogo te hanu dabe hasia bolo mani. Te bidi dabe augwali te Arongo wąį dabe dao. Te we bidigo augwali bidabo badu bolo te hanu tǫ mani.  
\v 11 Tama augwaligo te hanu Kiriat Arba, te gasa nogi me Hebron elaluali, te augwaliba mani. Tama te polobadu bidali bidi Arba te Anakgo aya dao. Kiriat Arba te bulu du te Judago bulu badu elaluali. Augwaligo te Kohat dabebolo te hanu, me te pąde elaluali tǫ dali, te tama te bulmakau dabego tuabo wiegi yai nosai elaluali dali, te augwalibolo mani.  
\v 12 Tiali goli te we bidi augwaligo te gi sę yabo tǫ me, tama te hanu pąde elaluali bulu dabe dali, te Kalep agabolo polobadu mawai dao. Kalep te Jefunego ogwa dao.   
\p
\v 13 Augwaligo te hanu dabe te pris Arongo wąį dabebolo mani. Te Hebron, te bidi dabe geme duala wi sigi pabo hanu da, me Lipna,  
\v 14 me Jatir, me Estemoa,  
\v 15 me Holon, me Debir,  
\v 16 me Ain, me Juta, me Betsemes, te tama hanu dabe dali te wiegi yai nosai te bulmakaugo tuabo te tǫde elaluai. Te Juda de Simeon hani sigo te 9 hanu augwali mani.   
\p
\v 17 Te Benjamingo hanigo te hanu me si me si augwaliba mani, Gibeon me Geba,  
\v 18 me Anatot, me Almon, te bulmakaugo tuabo nosai elalubo wiegi yai tǫ dali, te augwali mani.  
\v 19 Augwaligo te hanu nogo si olama, sągągo sela hanu dali, te bulmakaugo tuabo wiegi yai nosai elalubo tǫ dabe dali mawai, te pris dabebolo, te augwali Arongo wąį dabe dao.   
\p
\v 20 Te Kohatgo gasa hani mebago te Efraimgo hanide te tǫ me hanu meba sali.  
\v 21 Te bidi dabego te hanu me si me si augwali mani. Sekemde, te bulmakaugo tuabo nosai wiegi yai elaluali te Efraimgo bulu dude, te bidi elali bidi dabe geme wi duala sigi pabo hanu elaluali, me Geser,  
\v 22 me Kipsaim, me Bethoron dali, te wiegi yai nosai bulmakaugo tuabo tǫ dali elaluali.  
\v 23 Tama augwaligo te Kohat dabebolo te Dango hanigo hanu me si me si mani, te Elteke, me Gibeton,  
\v 24 me Aijalon, me Gatrimon dali, te wiegi yai nosai te bulmakau dabego tuabo nosai tǫ dali elaluali.   
\p
\v 25 Te Manasego me badu hanigo te hanu si augwalibolo mani, Tanak, me Gatrimon dali, te bulmakaugo tuabo nosai elalubo wiegi yai tǫ dali mani.  
\v 26 Te hanu nosali sabo Kohatgo hani sibi dabe, augwaligo te hanu nogo si dali, te bulmakaugo tuabo nosai elalubo wiegi yai tǫ dali sali.   
\p
\v 27 Te Livaigo gasa hani sibi te augwali nogi Gerson nogi wali, augwaligo te Manasego hani badu te hanu si sali, Golan te Basan pedai badu, te bidi elali bidi dabe geme wi duala sigi pabo hanu me deli, me te Bestera dali, te bulmakaugo tuabo wiegi yai nosai elalubo tǫ dali sali.  
\v 28 Te Isakargo hanigo te hanu me si me si te augwali mani, te hanu nogi dabe Kision, me Daberat,  
\v 29 me Jarmut, me Enganim, te bulmakaugo tuabo wiegi yai nosai elalubo tǫ dali mani.  
\v 30 Te Asergo hanigo te hanu me si me si te augwali mani, Misal, me Apdon,  
\v 31 me Helkat, me Rehop, te bulmakaugo tuabo nosai elalubo wiegi yai tǫ dali mani.  
\v 32 Te Naptaligo hanigo te hanu sela te Livai hani augwalibolo mani, Kedes te Galili pedai badu, te wiegi yai nosai elalubo badu, tama te da te bidi elali bidi dabe geme wi duala sigi pabo hanu me deli dao, tama me Hamotdor, me Kartan, te kibu bulmakau dabego tuabo nosai wiegi yai elalubo tǫ dali mawai.  
\v 33 Tama elama, tama te Gersongo hani sibi augwaligo te 13 hanu, me te augwali pąde te bulmakaugo tuabo nosai elalubo wiegi yai tǫ dali sali.   
\p
\v 34 Te Livai gasa hani me badu, augwaligo nogi te Merari wali, augwaligo te Sebulungo hanigo hanu me si me si sai, Jokneam, me Karta,  
\v 35 me Dimna, me Nahalal, te bulmakaugo tuabo nosai wiegi yai elalubo tǫ dali sali.  
\v 36 Te Rubengo hani augwaligo te hanu me si me si te augwali mani, Beser, Jahas,  
\v 37 me Kedemot, me Mefat dali, te wiegi yai nosai bulmakaugo tuabo elalubo tǫ dali mani.  
\v 38 Te Gatgo hani augwaligo hanu me si me si te tigidali augwali mani, Ramot te Gileat pedai badu, te hanu da te bidi elali bidi dabe geme dula sigi pabo hanu me deli dao, tama me Mahanaim,  
\v 39 me Hesbon, me Jaser, te wiegi yai nosai te bulmakaugo tuabo elaluali tǫ dali mani.  
\v 40 Te Merarigo hani sibigo te hanu nogo si olama, sągągo si hanu dali te sali.   
\p
\v 41 Te Israel dabe tigidali bidaluali tǫ pedai, te augwaligo te hanu bidi sese si olama, te a naga me sela, te tama hanu 48 dali, te bulmakaugo tuabo wiegi yai nosai elalubo tǫ dali, te Livai hani sibi augwalibolo mani.  
\v 42 Te tigidali hanu deli delide tǫde te bulmakau dabego tubo nosai te pąde elaluali.   
\s1 Te Israel dabe augwaligo tǫ sali  
\p
\v 43 Tialima, Genuai Bidigo te tigidali tǫ pedai te Israel dabe augwaliba mani, te polobadu agai te augwa wąį dabebolo te bomo yai po dąų wali tiwai gilama yali. Tama te Israel dabe augwaligo te bulu tǫ selama, tama augwali tede bidali.  
\v 44 Tama Genuai Bidigo te boi pilama wiegi yai pemene ebo sogo augwalibolo mani, te agai augwa wąį dabe dali dąų wali po tiwai gilama yali. Te haniani boi bidi hani dabe augwali te Israel dabe tigidali badu bidai goli, tama Genuai Bidigo augwali tau siyu, tama augwaligo augwa boi bidi dabe tigidali aiyaba elaluama, tama te boi bidi dabe deli mego te augwali aiyaba elaluainu ebo te usu meni yani.  
\v 45 Genuai Bidigo te tigidali wiegi yai te dąų wali po te Israel bage augwaliba mu usu nama, tama te sę ela silali. Agai wali po me deli munu me tulalubeo.   
\c 22  
\s1 Te wę Jordan pąde alta elaluali  
\p
\v 1 Nosali Josuago te Rubengo hani me, te Gatgo hani me, te Manasego hani me badu me, te augwali i olama, tama augwali deliba sisinagasali.  
\v 2 Tama agai te tiwai po augwalibolo wali, “Dagego te tigidali sę te Moses, te Genuai Bidigo sę bidigo, te dagebolo weyu, te yao po wali sę te tigidali ela silali. Tama dagego eno po tigidali wali pai. \x * \xo 22:2 \xt Nam 32:20-32; Jos 1:12-15\x*  
\v 3 Te tigidali sogo dagego te duga ama dede dabe tau sali, te megi e sogoba usu nani. Te deli sogo me dagego te augwali me tagalubeo. Dagego te Godigo po dabe bugagia wali pali, te dago Genuai Bidi dao.  
\v 4 Megi te God, te dago Genuai Bidigo, te boi pilama wiegi yai pemene ebo sogo te dagego ama dabebolo mayu, te polobadu agai po dąų wali tiwai gilama yali. Tialima, dage te duga beba ma geasa pelama, te tǫ pedai te Jordan wę u badu, polobadu Moses, te Genuai Bidigo sę bidigo, te dagebolo mani.  
\v 5 Tama dagego homu kone bugagia palama, tama te Genuai Bidigo sę bidi te Mosesgo po dabe me te bomai po te dagebolo mani, bugagia wali pao. Te bomai po page e tiwai dao, dagego duga Genuai Bidi God godolo mu iyąo. Tama dagego agai homu kolesaga me, po me, wali pao. Dage te aga dali bidiyu, tama dagego homu kolesaga me bomo tigidali te agaba munama, tama agai sę yao,” agai te po wai.   
\p
\v 6 Tama Josua te wiegi yai po mobo augwali menama, tama agai augwali te Jordan wę boloyu, augwa beba ma pomainu tagala palali.  
\v 7 Mosesgo te Basan tǫ te Manasego hani me badubolo mani, te Jordan wę u badu, te giliga pedalubo badude. Tiali goli, Josuago te Manase hani me badubolo te tǫ mani, tama te gasa Israel hanibolo me, te Jordan wę e badu, te giliga dega sigilubo pedai badu, te tǫ me mani. Te Josuago te hani te augwa buluba ma tagala palali sogo, agai te po mobo augwaliba mayu,  
\v 8 tama agai te po wali, “Dagego te boide sali doado bage hauwa elalubao, tama megi dage duga buluba ma piąo. Dagego te bulmakau hauwa elalubo, me silva, me gol, me bras, me ain, tama ugwa me hauwa elalubao. Tama dagego te boi bidide sali doado bage meba te duga ude bidali abagi dabe mao,” wali.   
\p
\v 9 Tialima, te Rubengo hani bidi dabe, me te Gatgo hani, me te Manasego hani, te augwali te augwa buluba ma soali. Te hanigo te gasa Israel hani dabe te Silo bulu te Kenan dabego tǫde taga soyu, tama augwali te Gileat, te augwa tǫba soali. Augwaligo te tǫ sali te Genuai Bidigo augwalibolo te Mosesgo pedauwalide wali pode tiwai gilama te tǫ polobadu sali.   
\p
\v 10 Augwali Gelilotba sabolali, te Kenan dabego tǫ te Jordan wę sesegede, tama augwaligo te genuai alta me deli te bulu te wę pąde dodolali.  
\v 11 Tama tigidali gasa Israel dabego te tiwai sę yali po odali, “Odiao! Te Ruben dabego, me Gat, me Manase me badu, te tama hani bagego te alta me deli te Gelilot bulu, te Kenan tǫ sesegede, te Jordan wę pąde, te da bidibo pedai badu te alta nigalio,” te po wabo odali.  
\v 12 Augwaligo te po odama, tama tigidali te Silo buluba sisinama, tama augwaligo te hani sela dali boi hwįainogo sisi ilali.  
\v 13 Tialima, te Israel dabe augwaligo te Finias tagala palali, te pris bidi Eleasargo ogwa, te Rubengo hani me, te Gatgo hani me, te Manasego hani badi, te hani sela bidibo madiba te bulu Gileatba pai.  
\v 14 Tama te nogo si tobolu bidi dabe te Finias dali pali. Te bidi dabe augwali tigidali te Israel bidi dabe naga, tama te augwa deli hani sibi tobolu bidi dabe dao.  
\v 15 Augwali te Gileatba sabolama, tama augwaligo te tiwai po te Rubenbolo me, te Gat me, Manase me badu, te hani bage selabolo te po wali,  
\v 16 “Te Genuai Bidigo po odobo we bidi tigidaligo te tiwai po wali, ‘Magi baso dagego te dwai sę dena Godibolo yaliwe? Dagego te Genuai Bidigo po sela sąnama, tama dagego te duga alta te nigalio! Dagego te Genuai Bidi wali pabo ąǫ me ebeo! \x * \xo 22:16 \xt Bom 12:6\x*  
\v 17 Polobadu dago te bulu Peorde te dwai sę yali, tama Genuai Bidigo te gasi tagala palama, tama aga we bidi dolali. Dagego homugo te dwai sę yali te usu ebe homu elama, tama dagego gasa dwai sę me ma yali da, agawe? \x * \xo 22:17 \xt Nam 25:1-9\x*  
\v 18 Magi yaliwe, megi dagego te Genuai Bidi wali pabo hagela homu ebaso yaliwe? Te dagego agai po megi sela sąwani wida, teda do agai da Israel dabe tigidalibolo wado po waibao.  
\v 19 Te dage Genuai Bidigo gedude meda elaluyu, tama dagego tǫde lotu wabo te usu meni ebaso da, teda dage te Genuai Bidigo tǫba asiąo, te agai ugwa be elalubo buluba. Tede Godiba nai ula mabo alta elalubao, te dago Genuai Bidi dao. Tama dagego te da tomode te tǫ meba siagameo. Tiali goli, tiyu, te dagego Genuai Bidigo po sela sąyu, dagego te alta nigali gilama idalio.  
\v 20 Dagego te Akan te Serago bulali wąį ogwa te homugo gegeda palamuo. Te hasia Godigo te Jeriko hanude nai sigio olama, habu selali elalubadi, tama Akango te po sela sąnama, tama te nai meba sali. Tama te tigidali Israel dabego te dwai sę yali sęgę tolali. Te Akango yali dwai sę te Akan aga delide naga me elalubeo. Menio! Te gasa Israel we bidi dabe augwali me dolai dao!’ we bidi tigidaligo wali,” augwaligo te po wai. \x * \xo 22:20 \xt Jos 7:1-26\x*   
\p
\v 21 Tialima, te Rubengo hani, me te Gatgo hani me, te Manasego hani meba me, te augwaligo te hani sibi tobolu bidi augwalibolo te tiwai po wei ponani,  
\v 22 “God te tigidali bomo elalubo! Agaduba deli naga te Genuai Bidi dao! Te dago magi baso te sę yali, te agai koneani. Tama dago homugo te dagego me konemainogo yaibao! Te dago Genuai Bidigo po sela sąnama, tama dago agai bomai po wali pisąwai baso da, teda dagego da te bidibo ula elalu bidimainu me gogolamu dao!  
\v 23 Te dago Genuai Bidigo po sela sąnama, tama dago te dena alta digi nigilama, tama te ofa ebo nai ulai digi, te wit ofa ilabo me, te deli homu ilabo ofa me, te sę yaibaso da, teda Genuai Bidi agai digi da dene ilimainogo yao.  
\v 24 Tiali goli, meniama, dago te sę isąbaso da, magi baso, te da wi eyu, tiyu te nosali dagego wąį dabego te tiwai po weyu, ‘Te magi baso dagego te God, da Israel dabego Genuai Bidibolo lotu po obawe?’ po waibao.  
\v 25 ‘Genuai Bidigo te wę Jordango da dąį tomode muani, tama dage te Ruben me Gat tego hani we bidi dabe, dage te Genuai Bidigo hani meni,’ te po waidalio. Tama tiyu, te dagego wąį dabego te dago wąį dabe paliama, tama augwaligo te Genuai Bidibolo lotu po me wagobeo.”   
\p
\v 26 “Tama tibaso, dago te alta nigali. Te ofa yabo nai dabe, me te gasa tobage ofa, te ofa dabe yabo te me egobeo. Menio!  
\v 27 Te dago hanide dąį me deli, me te dage hanide dąį tama te dago wąį dabe ola mani, te aga ugwa bede dago lotu te Genuai Bidiba naga weyu, tama dago te ofa ebo nai dabe ulubo da, tama te dwai sę ebo ofa, me te deli homu ebo ofa me, te ofa yaibao. Tiyu nosali dagego wąįgo te dago hanibolo te tiwai po waidalio, ‘Dage te Genuai Bidigo hani menio,’ te po waidalio!  
\v 28 Dago te tiwai homu yali, ‘Te tobage posobo po te dabolo me te dago wąį dabebolo wabo side, teda dago te po wainogo, “Suao, te alta dago aya dabego nigali, te dagego alta tobage deli tiwai e elalubao,” omainogo yali. Tama te olo nai dabe me te dwai ofa ebo te tiwai me ebeo. Menio! Te alta da, te dago hani dali, te dage hani dali, te dąį deli naga iliyu hanilama tiwai yali,’ dago te homu yali.  
\v 29 Dago te olo nai, te hasa, me te wit, me te dwai sę ilibo ofa te tiwai me ebeo. Dago te tiwai sę ebo hagela yai. Mu menio. Te dago tama tiyu da, te Genuai Bidigo po sela sąnama, tama tudiba muaibao. Dago te Godigo alta te me hasegelegobeo, te dago Genuai Bidi, te alta aga ugwa be te gedude dolalubao.” Te Ruben, Gat, te Manase bage meba me, te hani selago te po wai.   
\p
\v 30 Te pris bidi Finias te augwa we bidigo genuai dabe dali, te augwali te Israel hani sibi dabego tobolu bidi dao, augwaligo te Rubengo hani me, te Gatgo hani me, Manasego hani, te augwaligo wabo po odama, tama augwali wiegi yai homu pemene yai.  
\v 31 Tialima, Finias, te pris Eleasargo ogwago te Ruben, me Gat, me Manase, te hanibolo te tiwai po wali, “Megi dago koneani, te Genuai Bidi da dali bidibo, magi baso meni, dagego agai po me sela sąbeo. Tama tibaso, Genuai Bidigo da dali wado po me wagobeo,” wali.   
\p
\v 32 Nosali Finias, me te tobolu bidi dabe, augwaligo te Ruben, me Gat, me Manase, te hani augwali te Gileat bulude taga peyu, tama augwali te Kenanba ma pelama, tama te wali po dabe te Israel dabebolo pusigi pali.  
\v 33 Tama te Israel dabego te augwaligo pusagasali pode te augwali wiegi yai homu pemene yai. Augwaligo te God nogi ugwaba siyu, tama augwaligo te Ruben, me Gat, te augwali dali boi hwįgi pabo homu eyu, te augwali bidali tǫ doligi pabo homu yali, te homu kone munu me ebeo.  
\v 34 Tama tialima, te Ruben dabe, me te Gat dabe, te augwaligo te alta nogi poali te “Hania Haninama Pusali,” magi baso meni, augwaligo te po wali, “E altago da tigidalibolo dąį iliyu, hanilama e po oda mabo dao, te Genuai Bidi aga deli naga te God dao,” wai.   
\c 23  
\ms1 Josua isali  
\mr (Dąį 23–24)  
\s1 Josuago po te we bidibolo pusa mani  
\p
\v 1 Te kibu be hauwa bidama, tama Genuai Bidigo te boi pilama wiegi yai pemene ebo sogo te Israel dabebolo mani. Tama augwaligo te bidalua pabo boi bidi dabe dali te boi me hwįbeo. Te megi da, te Josua monu dabe mu yali.  
\v 2 Tialima, agai te Israel dabe tigidali i olama, tama te tobolu bidi dabe me, te genuai bidi dabe me, tama te tonalubo bidi dabe me, te ofisa bidi me, augwali i olama, tama agai augwalibolo te po wali, “Megi da, ena monu dabe yalio.  
\v 3 Dagego digi te tigidali sę te God, dago Genuai Bidigo, te boi bidi hani dali te dage homugo koneama, te sę yali dagego suali. God, te dago Genuai Bidigo, te dagego boi hwįbadi tau sali.  
\v 4 Megi te dagego bugagia odiąo! Te gasa hani dali tama te elalubo tǫ, te eno dagebolo somainogo sa muani. Eno te boi hwįnama aiyaba elaluali hani dali te tiwai naga yali. Tama dagego tǫ te wę Jordan sesege badu gagalasa pali, te giliga pedalubo madi, te Mediterenian Tamu Ąį badu, te giliga dega sigilubo pedai badu dąį igi pali.  
\v 5 God, dago Genuai Bidigo, te boi bidi dabe ela gudulama, tama dagede wi eyu pomainogo ilaibao. Tama te dagego augwaligo tǫ saibao, te Godigo bomo yai po dąų wali tiwai gilama yaibao.”   
\p
\v 6 “Tama dage bomo mu dolaluyu, tama bugagia dua tama elama, tama dagego te tigidali po te Mosesgo asęani bukude elalubo bomai po wali piąo. Dagego te agai po dwasianu me deli tagalamuo.  
\v 7 Tama te dage tomode bidalubo gasa we bidi hani dali deliba me sisinamuo, tama dagego te augwaligo tibo god nogi te me nogilamuo, tama dagego te mu po dąų walainu te augwali nogi me nogi igio. Tama dagego te kidu sugunama, tama te augwaligo tibo godiba lotu po me wagio. Menio!  
\v 8 Tialima, te dagego te Genuai Bidi dali bugagia kęą pelama, tama aga wali peyu, te megi tama dagego te ela asali tiwai gilama yao.”   
\p
\v 9 “Genuai Bidigo te genuai bidi dabe me, te bomai we bidi hani me, sela sąyu ela gudulama, tama mena bidi me deli te aga bomo elama dolalu, te dage me sela sąbeo.  
\v 10 Te dage hani bidi me deligo te umabo bidi mu, te 1,000 bidi dabe te wi pomainu ilibo sę ebaso, te usu yai dao, magi baso meni, God, te dago Genuai Bidigo, te dage tau siyu, augwali dali hwįai dao, te agai polobadu po dąų wali tiwai gilama yaibao. \x * \xo 23:10 \xt Bom 3:22; 32:30\x*  
\v 11 Tama tibaso, dage te duga ebo kolesagade te bugagia dua yao. Dagego te dena Genuai Bidi, God, te godolo mu yao,” wali.   
\p
\v 12 “Tiali goli, dagego te dena God tagaliyu, tama dage te hwįbode isiąwai gasa hani we bidi te dage tomode bidalubo bage dali sisinama, tama dagego augwali dali we si ebaso da,  
\v 13 teda dagego koneani, te Godigo te augwali munu me sela sągobeo. Menio. Te dagego boi bidi mu augwali pedelaibao. Te augwali te dage tulaluabo tǫ dedage tiwai elaluaibao. Tama augwaligo dage te keloago dene mayu, te bidi tudi badu elibo tiwai gilama dene mawaibao, tama te sesanigo bidi gedude enibo tiwai gilama yaibao. Tama te sęgę elalubadi, te dage tigidali te e wiegi yai tǫde polo isaibao, te dena Genuai Bidigo dagebolo mani tǫ.”   
\p
\v 14 “Tialima, megi ena te tǫde bidibo sogo silainogo ebao. Dagego mu koneani, God, te dago Genuai Bidigo, te tigidali wiegi yai nai te po dąų wali nai mena silali. Te agai po dąų wali nai te tigidali pedela silali, te agai wali po me deli munu me tulalubeo.  
\v 15-16 Mu tama, God, te dago Genuai Bidigo, te agai po weyu, te sę yaibao wali te tigidali wiegi yai sę ela silali. Tiali goli, dagebolo te Godigo wali bomai dąų wali po, te dagego boloyu, bugagia wali me pisąyu, tama dagego te tibo godiba lotu weyu, tama dagego te augwaliba kidu sugunubaso da, teda Genuai Bidigo dagebolo wado po weyu, tama agai dageba dene ilama, te dage tigidali agai te mani wiegi yai tǫde polo isimainogo yaibao,” Josuago te po wali.   
\c 24  
\s1 Josuago te Sekemde we bidi dabe dali po miani  
\p
\v 1 Josuago te Israel hani tigidali te Sekemba sisinani, tama nosali agai te tobolu bidi dabe me, te genuai bidi dabe me, te tonalubo bidi dabe me, te augwali tigidali i olama, sisinama, tama augwali te God gedude doligi pali.  
\v 2 Tama Josuago te tiwai po te tigidali we bidibolo wali, “Te Godigo po, te da Israel dabego Genuai Bidigo po, te tiwai obao, ‘Polobadu mu te dagego wąį dabe augwali te wę Yufretis pedai u badu bidali. Tama augwaligo te tibo godiba lotu po wai. Te wąį me deli nogi te Tera, tama aga te Abraham de Nahor sigo aya dao. \x * \xo 24:2 \xt Gag 11:27\x*  
\v 3 Tiali goli, eno te duga wąį Abraham te wę Yufretis u badu elaluali tǫde selama, tama eno aga te Kenan tǫ pedai tigidali badu selasa bilali. Tama eno te agabolo wąį hauwa mani. Eno te ogwa Aisak deli agabolo mani, \x * \xo 24:3 \xt Gag 12:1-9; 21:13\x*  
\v 4 tama eno ogwa si mani, Jekop me Iso, te Aisakbolo mani. Tama eno te bulu du Seir, aga gasa nogi me Idom, te Iso mani, te aga tǫ gagalama bidali. Tiali goli, Jekop me, te aga hani wai dabe dali, augwali te Isipba pali.’” \x * \xo 24:4 \xt Gag 25:24-26; 36:8; 46:1-7; Bom 2:5\x*   
\p
\v 5 “‘Te nosali eno te Moses de Aron si tagala palama, tama eno te dwai nai dabe mugo te Isip dabe mu dolali. Nosali eno dage te Isip taga soyu, tama eba odasa asali.  
\v 6 Eno dagego aya selama, tama te Isip taga soyu asali. Tama te Isip dabego te bomai hwįbo nai karis, me hos me selama, tama dage soali wali pobeasa asali, te augwali te nosai elalubo tamu ąįba sabolali.  
\v 7 Tiali goli, te aya dabe augwali wi elama, tama eno te Israel dabe tigidali augwali tau somainogo te i bomonama mu wali, tama eno te be hulia sabo tiwai te augwalide te Isip ami dabe dali si tomode muani. Tama eno te tamu ąį peda pomainogo ilama, tama te Isip dabe mesega sali. Dagego eno te Isip dabede yali sę te dagego suai dao. Tama nosali dage te kemi tǫ bulude sesabi elama, hauwa sogo mu bidali.’” \x * \xo 24:7 \xt Sai 14:1-31\x*   
\p
\v 8 “‘Nosali eno dage te Amor dabego tǫba te Jordan wę pedai te giliga pedalubo badu odasa pali. Tama augwaligo dage dali hwįani. Tiali goli, eno dage tau selama, tama dagego augwali aiyaba elaluali. Tama dagego augwaligo tǫ sali, magi baso meni, ena polasa peyu, tama eno augwali dolali. \x * \xo 24:8 \xt Nam 21:21-35\x*  
\v 9 Nosali Balak, te Moap dabego tuni bidi Siporgo ogwago, te dage Israel bage dali hwįani. Agai po te Balambolo ola tolali, te Beorgo ogwa, tama agai te po dwai me deli weyu, tama dage dolomainogo hanalu wali.  
\v 10 Tiali goli, eno te Balamgo po odobo hagela homu yali, tama agai te dwagi yai mobo dagebolo maidu geani. Tama eno dage te Balakgo nogode ma dobola sali.’” \x * \xo 24:10 \xt Nam 22:1–24:25\x*   
\p
\v 11 “‘Dage te wę Jordan nogelama, te Jerikoba sabolali. Tama te Jeriko bidi dabego dage dali boi hwįani. Tama te Amor dabe me, te Peres dabe me, te Kenan me, te Hit dabe me, te Girgas me, te Hivi dabe me, te Jebus dabe me, te augwaligo me dage dali boi hwįani. Tiali goli, eno augwali dagego nogoba muani. \x * \xo 24:11 \xt Jos 3:14-17; 6:1-21\x*  
\v 12 Ena dage asobadi polasa peyu, tama eno digi te boi bidi dabe wi ilama, tama augwali sela sąwai dao, tama te tialigo te Amor tuni bidi si wi pomainu ilali. Tiali goli, duga digi te poai hwą ge bainatgo, me te sesemonego te augwali si gudulu baso wi me pabeo. \x * \xo 24:12 \xt Sai 23:28; Bom 7:20\x*  
\v 13 Tama tiyu, eno dagebolo te tǫ me deli te duga digi sę me isąwai digi, te tǫ dagebolo mani. Tama eno dagebolo te dagego me nigisiąwai hanu me mobadi yali. Megi dage te bulu dabede bidaluyu, tama dagego te ni du wain, me te ni oliv me tuyu bidibao. Tiali goli, te duga digi me bulusiąwai dao,’ dago Genuai Bidi God agai te po obao,” Josuago te po wai. \x * \xo 24:13 \xt Bom 6:10-11\x*   
\p
\v 14 Tama Josuago po ma weyu, te po wai, “Tialima, megi da, dagego te Genuai Bidi dologode bidiyu, agaba lotu po weyu, tama sesemane sogo dagego agade sę te dagego bomo tigidali teba munama, sę yao. Dagego te tibo godiba homu kone ebo tagalama, te duga wąį dabego te Mesopotemiade me te Isip pedai badu side bidali sogo augwalibolo te lotu po wali. Dagego te Genuai Bidiba naga lotu po wao.  
\v 15 Tiali goli, dagego te Genuai Bidiba lotu wabo hagela homu ebaso da, teda dagego bugagia homu kone palao. Te dagego lotu po debolo waibawe? Te duga wąįgo te Mesopotemiade te tibo godiba lotu wali te Godiba lotu po waibawe? Ma, te Amor dabego tibo god, te megi te dage te bidibo tǫde te Godiba lotu waibawe? Tiali goli, ena, te ena we wai sibi dali, te dago da te Genuai Bidiba naga lotu po waibao,” Josuago te po wai.   
\p
\v 16 Tama te we bidi augwaligo te tiwai po wei ponoyu, te po wai, “Dago te Genuai Bidi tagalama, te tibo god dabeba lotu munu me wagobeo! Mu menio!  
\v 17 Te Genuai Bidi deli naga te dago God, tama agai te da dali, te dago aya dede dali, te Isip kalabus sęde bidibadi, te da ma dobola selama, odasa asali. Tama dago te agai te ebo bomai sę suali. Te da gasa hani dabego tǫde bilaluali sogo, tama da te mena pabo sogo me, te Godigo da bugagia tonalualigo te da bugagia bidali.  
\v 18 Te da asali sogo, Genuai Bidigo te tigidali hani bage ela gudulubo sę yali, te Amor dabe dali, augwali te e tǫde bidibadi tiali. Tama tibaso, dago me te Genuai Bidiba lotu waibao wali. Aga deli naga te dago God dao,” augwaligo te po wai.   
\p
\v 19 Tialima, Josuago augwalibolo te po wei ponani, “Te dagego homugo te Genuai Bidiba lotu po wabo homu ebawe? Aga te magi dwai sę isiąma, tama agai homugo te dagego tibo godiba lotu wabo hagela homu ebao. Agai homu te tibo god me deligo aga me hasegelegobeo. Te agai dagego sęgę me dwai sę yali te me sela sągobeo.  
\v 20 Tama mu tama, agai polobadu dagebolo wiegi yai sę mu yali, tiali goli te dagego Genuai Bidi tagalama, tama te gasa hanigo tibo Godiba lotu po obaso da, teda Genuai Bidigo po wado po olama, tama agai dage dene ilama, tama agai dage dolaibao,” te po wai.   
\p
\v 21 Tiali goli, te we bidigo Josuabolo te tiwai po wei ponani, “Mu menio! Te sę me egobeo. Te dago Genuai Bidiba naga lotu po waibao.”   
\p
\v 22 Tialima, Josuago augwalibolo te po wali, “Duga digi haninama pusali, tama duga digi te Genuai Bidiba naga lotu po wabo po dąų wali.”  
\p Tama augwaligo te po wali, “Te tama dao! Dago haninama po pusali. Te dena digi dade wali po dao.”   
\p
\v 23 Tama Josuago po ma wali, “Tialima, dagego te gasa hani dabego te tibo god dage tomode bidalubo te dagego sela sąyao. Tama dagego duga homu tigidali te God, te duga Israel dabego Genuai Bidiba muao.”   
\p
\v 24 Tama te we bidi augwaligo Josuabolo te po wali, “Dago te Godiba lotu wainogo, te dago Genuai Bidi, tama aga bomai po naga wali paibao.”   
\p
\v 25 Tialima, te sogo Josuago te we bidi dabe dali po me deli dąų walali. Tama te bulu Sekemde Josuago te bomai po me te po me asęnama, augwalibolo mani, te augwaligo wali pomainogo.  
\v 26 Josuago te po dabe te Godigo bomai po elalubo buku me deli tomode asęani. Nosali agai te masigi me deli selama, tama te ni kali pąde, te Genuai Bidiba lotu po wabo madi pąde te masigi dolaluama, muani.   
\p
\v 27 Tama Josuago te we bidi augwalibolo wali, “Te sesemane sogo dago te masigi subo sogo da, te dago homugo te dago te dąų wali poba homu kone ma palaibao. Te masigigo te Genuai Bidigo dabolo wali po tigidali odali. Te dage homu hodolabo dąį me deli te ilali, te dagego te dena Godigo po munu me sela sąnamu dao,” te po wali.   
\p
\v 28 Nosali Josuago te augwali te augwaligo sabo tǫba ma tagala palali. Tama tigidali te augwa buluba ma pelawali.   
\s1 Josua de Eleasar si isali  
\p
\v 29 Nosali Josua, te Nungo ogwa, te Genuai Bidigo sę bidi, aga isali. Tama aga isali sogo agai kibu be te 110 kibu be yali.  
\v 30 Augwaligo aga te tǫ doba yali sogode agai sali tǫ Timnat Sera tede pubulali. Te bulu te not te bulu du Gas, te Efraimgo bulu du, te pedaide dao. \x * \xo 24:30 \xt Jos 19:49-50\x*   
\p
\v 31 Te Josua bidibadi, te sogo da, te Israel dabego te Genuai Bidiba lotu po uduai. Tama nosali te Josua isai madi me te augwaligo Genuai Bidiba lotu po udali. Augwaligo tama tidubadi, te Genuai Bidigo te Israel dabe tau siyu ebo sę suali te genuai bidi dabe augwali me isali.   
\p
\v 32 Te Josepgo dili te we bidigo Isipdu tolasa asali, te augwaligo te Sekemde pubulali, augwaligo te Jekopgo te mone 100 silvago te Hamorgo ogwa dabe dali polobadu abelali, te tǫde pubulali. Hamor te Sekemgo aya dao. Tama Josepgo hani augwaligo te tǫ sali. \x * \xo 24:32 \xt Gag 33:19; 50:24-25; Sai 13:19; Jon 4:5; Tpi 7:16\x*   
\p
\v 33 Tama Eleasar, te Arongo ogwa, te isibaso, tama augwaligo aga te Gibeade pubulali. Te hanu augwaligo te aga ogwa Finiasbolo mani, tama te Efraimgo bulu du te badu elaluai dao.