\id JOL - Dadibi NT [mps] -Papua New Guinea 2001 (DBL 2014) 
\h Profet Joelgo Buku 
\toc1 Profet Joelgo Buku 
\toc2 Joel 
\toc3 Jol 
\mt1 Profet Joelgo Buku  
\imt1 Hasia nedebo po  
\ip Te e bukude te profet Joelgo pusali po dabe te elalubao. Tiali goli, te po dabede te profet bidi aga te aga mena tiwai bidi dawe te po pusubeo. Teda aga te kantri Persia bomo elama bidali sogo bidai bidi tonobo ąǫ ebao.  
\ip Teda te Israel we bidi dabe augwali te kantri Babilon tagalama, augwali te Juda tǫba ma asali sogo, Joelgo dwai sogo mu deli te kantride pedalubo suali. Te moni giliga posologo te tigidali nai dabe sasilibo suali.  
\ip Tama moni genuai mano sibi aselama, te tubo nai yabe dabe sese tula silibo suali. Joelgo te sę dabe suali, te bidigo Godiba boi bidi homu yainogo ebo bidiba dua dao wabo tiwai suali. Augwaligo augwa dwai kolesaga dabe yaibao. Tiali goli, nosali da, Genuai Bidigo be posobo si asaibao. Teda te Godigo te dwai sogo pedalaibao wali, te be posobo sogo agai te dwai kolesaga yali we bidiba dene mayu, me agai te sogo te wiegi yai kolesaga yali we bidiba wiegi yai kolesaga iyu yaibao wali sogo pedalaibao, te aga kolesaga wali pali we bidiba te wiegi yai sę yaibao.  
\ip Joelgo te we bidi homu begelama, tama Godigo augwali hobede emainao po wali. Dąų walai po genuai deli Joelgo profet po tomode deli elalubao. Te po te Dąį 2:28-32, tede te elalubao. God aga Mobo Bidi te we bidiba tagala palaibao wali. Te monu dabeba, me gesi bidi dabe, sese tama agai Mobo Bidi mawaibao wali. Te Godigo te Mobo Bidi te Jisas wali bilali bidi dabeba tagala palai madi, Pitago te po wali, teda te profet Joelgo profet poba te usu nani dao po wali. Te Tagala Palali 2:1-42 tede suao.  
\c 1  
\s1 Te we bidi dabego nai tigidali doado bage dolobaso, tama augwali gela wai  
\p
\v 1 Te e po da, Genuai Bidigo Joelbolo mawai, te Petuelgo ogwa dao.   
\b  
\q1
\v 2 Dage monu dabe we bidigo, odiąo.  
\q1 Te dage tigidali Judago, odao.  
\q1 Eno dageba megi te pedelali nai po hanalu obao.  
\q1 Te tobage nai te polobadu dage bidali sogo  
\q3 me pedelai dawe?  
\q1 Te duga wąį nǫų bidali sogo me pedelai dawe?  
\q1 Eno homugo te menio.   
\q1
\v 3 Dagego duga wai dabebolo te sę yali po waiąo.  
\q1 Augwaligo te augwa wai dabeba te po omainao,  
\q2 tama te wai dabego te nosali pedalubo  
\q3 haniba omainao.   
\q1
\v 4 Te me si me si te tobage kuli mano hani pedelama,  
\q2 tama te tigidali nai yabe mu silalio.  
\q1 Tama hasia te polasa pali kuli mano hanigo  
\q2 te taga pali nai yabe,  
\q2 te si wali nosali asobo kuli mano hanigo tula silali.  
\q1 Tama te sela wali, me te me si me si wali hani,  
\q2 te hani sigo te tama tiwai naga yali,  
\q3 tama te tigidali nai mu silalio.   
\q1
\v 5 Dage te bomai ąį tulama, gęǫ page ebo  
\q3 bidi dabe, hogodama gela waiąo.  
\q1 Dage te wain wę tubo bidi dabe, dage me gela waiąo,  
\q2 magi baso meni, te kuli mano dabego  
\q2 dagego te gesi wain ąį nigabo bono du  
\q3 tigidali te dolali dao.   
\q1
\v 6 Genuai kuli mano hani te genuai  
\q3 ami hani me deli tiwai yali,  
\q2 te dago tǫ kantri tigidali mu halua sigulali.  
\q1 Augwali bomai mu, te hauwa umabo,  
\q3 te nedabo usu egobeo.  
\q1 Te augwaligo kele te laiongo kele tiwai  
\q3 te mu poa pai dao. \x * \xo 1:6 \xt Ped 9:8\x*   
\q1
\v 7 Augwaligo te dago ni wain dabe dolama,  
\q3 te dago ni kaya fik me tula silali.  
\q1 Augwa te tigidali ni kaya wale me ni  
\q2 nologo tula silama,  
\q3 wa pelama, te tedela yai elaluai dao.   
\b  
\q1
\v 8 Dage we bidi dabe, dage gela waiąo,  
\q2 te gesi wegi aga sainu yali bidi isibaso,  
\q3 te aga gela wabo tiwai iyąo.   
\q1
\v 9 Te nai me wain te God aga beba  
\q3 ofa yabo nai meni yai.  
\q1 Te pris dabe augwa Genuai Bidiba  
\q3 ofa yabo nai meni baso,  
\q2 tibaso te augwali gela obao.   
\q1
\v 10 Te gi dabede nai meniama, olo mu elalubao.  
\q1 Tama tǫ digi me gela obao, magi baso meni,  
\q3 tigidali gide nai dolali,  
\q2 te wain du wai tigidali sasia pelama,  
\q2 te oliv ni dabe me sasia palio.   
\q1
\v 11 Dage te gide sę ebo bidi dabe,  
\q2 dage te homu dene eyu, gela waiąo.  
\q1 Tama dage te wain gide sę ebo bidi dabe,  
\q3 dage gela waiąo.  
\q1 Magi baso meni, tigidali wit, me bali,  
\q3 me tigidali nai dolalio.   
\q1
\v 12 Te ni wain dabe dali,  
\q3 te ni kaya fik dabe me, sasia palio.  
\q1 Tama te gasa tobage du walobo ni dabe tigidali,  
\q2 augwali mu sasia pali.  
\q1 Tialima, te we bidi dabego wiegi yai  
\q2 homu pemene ebo tigidali te sia salio.   
\q1
\v 13 Dage te altaba ofa ebo pris dabe,  
\q2 dagego te homu dene ebo side gudubo  
\q3 ugwa gudama, tama dage gela waiąo.  
\q1 Te hulide dagego te homu dene ebode  
\q3 gudubo ugwa gudama,  
\q2 te Godigo be tomoba pelama, tama gela udubadi,  
\q2 te be posoboba usu nao. Magi baso meni,  
\q2 te dena Godiba ofa yabo nai me wain meni yai dao.   
\q1
\v 14 Dagego te tigidali we bidiba wao,  
\q3 augwa te nai habu selemainao.  
\q1 Tama tigidali we bidi sisinagasomainu i olama,  
\q2 te lotu wagasomainao wali.  
\q1 Te polalubo tobolu bidi, me tigidali Juda we bidi,  
\q2 tama dage te Godigo be tomoba pelama,  
\q2 te dena Genuai Bidi, agaba i waiąo.   
\q1
\v 15 Magi baso meni,  
\q2 te Genuai Bidi asabo side bodolu te pąba yagasalio,  
\q2 tama te bodolu side te Tigidali Bomo Elalubo  
\q2 Godigo te dolabo genuai sę daba tagala palaibao.  
\q1 Hobede da, te side te dwai mu dao. \x * \xo 1:15 \xt Ais 13:6\x*   
\b  
\q1
\v 16 Te nai dabe dolali, te dago magi sę deli me egobeo.  
\q1 Te Godigo beba da paibao,  
\q2 tiali goli dago wiegi yai homu pemene me egobeo.   
\q1
\v 17 Tǫde wę meni yai,  
\q2 tama tiyu, te tǫ tomode nai wai dabe  
\q3 isila pelama, te nai me holobeo.  
\q1 Tialima, te nai mubo be olo elaluama, te dolalio.   
\q1
\v 18 Hobede dao, te bulmakau dabe nasi dwai mu ebaso,  
\q3 te hou weyu, ga walio.  
\q1 Augwali te homu kolesaga meni yani,  
\q2 magi baso meni, te tuabo nosai me elalubeo.  
\q1 Te sipsip hani me nasi eyu, te nomona salio.   
\b  
\q1
\v 19 Genuai Bidio, eno gedu haluasa po bomonama obao,  
\q2 magi baso meni, te tigidali nosai me,  
\q3 ni me, te sasia pelama,  
\q2 te augwali isigo ulali tiwai yali dao.   
\q1
\v 20 Te uni hasa dabego me nageba i obao,  
\q2 magi baso meni, tigidali ąį sula siyu,  
\q3 tigidali nosai me wa pai dao.   
\c 2  
\s1 Te kuli mano dabego yali sę te Genuai Bidigo bodolu side dąį mabo tiwai yalio  
\q1
\v 1 Genuai Bidigo te dwai sę ebo we bidiba dene  
\q2 maiabo bodolu, te pąba megi yagasoba wali.  
\q1 Tialima, dagego te biugel bu weyu,  
\q2 te Godigo bulu dude digi, te Saionde belo dabe elao.  
\q1 Tama te side te tigidali Juda we bidi  
\q3 noma somainao wali.   
\q1
\v 2 Genuai Bidigo te wabo side te be mu hulia saibao,  
\q2 tama te husugu yai pǫgo te dagalu mesega saibao.  
\q1 Te genuai kuli mano hani te ami tiwai elama,  
\q2 te bulu du dabe mesega sagaselama,  
\q2 te kigamu te be posobo asobo tiwai pedelaibao wali.  
\q1 Te polobadu te tiwai sę deli me pedalubeo,  
\q2 tama te tiwai sę me te nosali me pedalugobeo,  
\q3 wai dao.   
\q1
\v 3 Augwaligo te nai yabe me, nosai me, tula silaibao,  
\q2 te kala siago dabo tiwai yaibao.  
\q1 Te augwali te pedalisąwani pesagede digi  
\q2 te wiegi yai te Iden gi tiwai elaluali,  
\q2 tiali goli augwaligo te nai yabe tigidali  
\q3 tula silali pesagede, te bulu tǫ wa pai pedelali.  
\q1 Augwaligo te yabe deli me elalumainu me  
\q2 sula tagalubeo.  
\q1 Augwaligo mu silalio.   
\q1
\v 4 Te kuli mano dabe te boi hwįabo  
\q3 hos dabego udada asobo tiwai ebao.   
\q1
\v 5 Te augwali bulu duba samanobo sogo,  
\q2 augwali te karis masigiba samanu  
\q3 kidagalo wabo tiwai ebao,  
\q2 tama te kala siago deyu,  
\q3 podo podo wabo tiwai ebao.  
\q1 Augwali te genuai ami hanigo  
\q2 te boi hwįainu wasibo tiwai yaibao. \x * \xo 2:5 \xt Ped 9:7-9\x*   
\q1
\v 6 Te augwali pąba asobo sogo,  
\q2 tigidali tǫde bidibo we bidi hani  
\q3 wi dwai mu elama,  
\q2 te augwali bomo mu menia sai dao.   
\q1
\v 7 Te kuli mano dabe te hwįabo bidi dabe  
\q3 udada asobo tiwai elama,  
\q2 augwali te taun bagulali obo banisba holali.  
\q1 Te augwali dolo naga peyu,  
\q2 te ami dabego nogo sągą sąyu,  
\q3 mas ebo tiwai ebo dao.  
\q1 Te augwali gasaba begelama, me tonono me ebeo,   
\q1
\v 8 tama augwa pabo sunumi digi me palia sabeo.  
\q1 Augwa te tigidali obo banis aluama, tomoba pobao,  
\q2 te mena nai me deligo augwali me palibeo.   
\q1
\v 9 Augwali te taun dabeba udada pelama,  
\q2 tama augwa te obo banis bolama,  
\q3 te u badu aiya dulubao.  
\q1 Tama augwali te be dabeba holama,  
\q2 tama te be pola sali dedage windodu  
\q2 te nai wi sabo bidi tiwai elama,  
\q3 te be tomoba pabo dao.   
\q1
\v 10 Augwali pobadi, te tǫ dali, dagalu dali si  
\q3 mumunu yaibao.  
\q1 Tama giliga dali, polua si, te hulia saibao,  
\q2 tama te hǫ ula ma egobeo. \x * \xo 2:10 \xt Ped 8:12\x*   
\q1
\v 11 Genuai Bidigo te aga ami bidi dabeba  
\q3 i bomonama wali,  
\q2 te agai pedauwalide te dagalu  
\q3 kulukulu wabo tiwai yali.  
\q1 Te agai po wali pabo bomai ami hauwa elaluali.  
\q1 Idaya, tegobao!  
\q1 Te Genuai Bidigo bodolu side te dwai mu dao.  
\q1 Tialima, de aga te bugagia bidiyu,  
\q2 te aga me dologobe dawe? \x * \xo 2:11 \xt Ped 6:17\x*   
\s1 Godigo te we bidi dabe te tiwai i weyu, te augwali homu begeliąo wai  
\q1
\v 12 Tialima, Genuai Bidigo te po wai,  
\q1 “Mu dao, te tigidali sę pedelaibao,  
\q2 tiali goli megi dage haliga begelama,  
\q3 enaba ma asiąo,” wai.  
\q1 “Tama duga te nai habu selama,  
\q2 tama haliga hobede elama, gela weyu,  
\q3 enaba ma asiąo.   
\q1
\v 13 Te duga homu dene ebo ola mayu,  
\q2 te dagego ugwa dabe olodali pisagimio.  
\q1 Te duga haligade digi te duga yali  
\q2 dwai sęde homu dene mu yao,”  
\q3 Genuai Bidigo te po wali.  
\q1 Dage te Godiba ma asiyu, te dena Genuai Bidi dao.  
\q1 Agade te olo mu tau sabo wiegi yai pemene ebo  
\q2 homu kolesaga pągąnalubao,  
\q2 te dade wiegi yai sę ebao.  
\q1 Godigo dabolo te dua dua eyu, sębę polo egobeo,  
\q2 te da sesemane sogo godolo mu ebao.  
\q1 Sesemane sogo agai dago dwai sęgę  
\q3 sela sąyabo sisi idu,  
\q2 te dabolo dwai dene ilabo homu ebe dao.   
\q1
\v 14 Dego konegowe?  
\q1 Te dage dena Genuai Bidi Godiba ma asigi sogo da,  
\q2 teda agai homu te ma hasegelama,  
\q2 te dabolo wiegi yai sę eyu,  
\q3 te da nai hauwa magi da.  
\q1 Tama tiyu, te dago te ofa yabo nai hauwa me,  
\q2 te ofa yabo wain me, elalueibao.   
\b  
\q1
\v 15 Dagego te bulu du Saionde te biugel naigo bu wao.  
\q1 Te we bidi dabeba weyu, te augwa nai habu selao,  
\q2 tama dagego augwali sisinama, lotu omainu yao.   
\q1
\v 16 Tigidali we bidi sisinama,  
\q2 te augwali genuai lotu omainu sisinao.  
\q1 Te tigidali monu dabe, mosi dabe me,  
\q3 tigidali wai puluba me,  
\q2 te idago ame tubo dwasianu  
\q3 wai bǫų dabe me, sela asiąo.  
\q1 Te tamadi gesi selama bidibo we bidi dabe me,  
\q2 tigidali we bidi te be tagalama, asiąo wai dao.   
\q1
\v 17 Te pris dabego Genuai Bidigo sę eyu,  
\q2 te aga be sunumi me alta tomode yali,  
\q3 augwa te gela weyu,  
\q2 te gedu haluasa po te tiwai waiąo wali,  
\q1 “Genuai Bidi, nago naga we bidi dabe da  
\q3 homu dene yao,” wao.  
\q1 “Te nago da homu dene isąbaso da,  
\q2 teda te gasa hani we bidi dabego da tudiba muyu,  
\q2 tama daba posobo po te tiwai waibao,  
\q2 ‘Te dagego God mena bidibawe?’ te po waibao.”  
\q1 Te pris dabego te po waiąo.   
\s1 Genuai Bidigo te nai ma holomainu ilali  
\q1
\v 18 Tialima, augwali homu begelibaso,  
\q2 te Genuai Bidigo aga tǫde homu hauwa elama,  
\q2 tama agai te aga we bidi dabeba  
\q3 te olo mu tau sabo wiegi yai homu kolesaga eyu,  
\q3 tau sai dao.   
\q1
\v 19 Agai te po wai, “Megi da, eno dageba te wain me,  
\q2 ni oliv wel me mawaibao, tama dagego  
\q3 hauwa elalueibao.  
\q1 Eno tama tibode te gasa we bidi dabego  
\q2 dage tudiba mubo po munu me ma wagobeo.   
\q1
\v 20 Tialima, eno te kuli mano dabe  
\q2 te not pedaiba gudulaibao,  
\q2 meba te wa pai tǫ bulu pesageba sela sąwaibao.  
\q1 Te hasia mu asali kuli mano hani  
\q3 eno te sigi ąį Detsiba gudulaibao,  
\q2 te nosali asali hani eno te genuai  
\q3 tamu ąį Mediterenianba sela sąwaibao,” wali.  
\q1 “Tama te kuli mano hani tigi te isila pelama,  
\q2 te damubo kugumini yaibao.  
\q1 Eno te tama tebo te augwaligo dageba yali  
\q2 dwai sę tigidali wei ponoyu, tama tiaibao,”  
\q2 Genuai Bidigo te po wai.   
\q1
\v 21 “Tǫ, nage wi me igio.  
\q1 Nage wiegi yai homu pemene elama,  
\q2 te bugai haliga yao, magi baso meni,  
\q2 ena Genuai Bidi, eno te wiegi yai  
\q3 sę hauwa nageba ebo dao.   
\q1
\v 22 Te kibu hasa sibi dabe, dage wi me igimio.  
\q1 Magi baso meni, te nosai ma pedelali.  
\q1 Te ni dabego nai ma walali, te ni kaya fik me,  
\q2 ni wain me, te du hauwa walama elaluali.”   
\b  
\q1
\v 23 “Te Saion we bidi dabe, dage wiegi yai  
\q3 pemene iyąo.  
\q1 Dagego te duga Genuai Bidi ena Godigo  
\q2 dage tau sali sęde wiegi yai pemene yao,” wai.  
\q1 “Eno dageba te tulubage te nai bulabo sogo  
\q3 usu nama mawai,  
\q2 tama dageba te polobadu yali tiwai  
\q3 te tulubage hauwa mawai.   
\q1
\v 24 Te wit bo wali sela sąbo pesagede  
\b  
\q2 te wit ge pągąnalueibao,  
\q2 te wain me ni oliv wel nigibo dedagede,  
\q2 te wain me wel pągąna pelama gelaibao,” wali.   
\q1
\v 25 “Ena digi eno te kuli mano dabe  
\q2 dageba te ami bidi tiwai elama tagala palali.  
\q1 Tama tialima, te dagego nai tigidali te kibu bede  
\q2 te genuai hani kuli mano dabego  
\q2 te tula silali nai tigidali te eno wei pona silaibao,”  
\q3 wai dao.   
\q1
\v 26 “Megi da, te dagego tuabo nai hauwa elalu,  
\q2 te dage mu pągąna paibao.  
\q1 Tama dagego te ena God nogi ugwaba saibao,  
\q2 te duga Genuai Bidi dao,  
\q3 magi baso meni, eno te wiegi yai  
\q3 bomai sę hauwa dageba yalio.  
\q1 Tama te gasa we bidi hanigo  
\q2 te eno we bidi dabe dage hale  
\q3 munu ma ilimainogo me egobeo.   
\q1
\v 27 Tialima, dage Israel,  
\q2 te ena dage dali bidibo te dagego koneaibao,  
\q2 te ena Genuai Bidi, ena naga ena duga God dao.  
\q1 Te gasa hani we bidi dabego te eno we bidi dageba  
\q2 te hale ilabo sę me emainu munu me  
\q3 ma egobeo,” wai.   
\s1 Godigo te aga Mobo Bidi te tigidali we bidi haniba mawaibao wai  
\q1
\v 28 Te Genuai Bidigo po ma weyu,  
\q3 te po wali,  
\q2 “Nosali te eno Mobo Bidi te tigidali  
\q3 we bidiba tagala palaibao,” wali.  
\q1 “Tama te dagego ogwa dabe me, wegigo me,  
\q2 te eno po te profet dabego po pusubo  
\q3 tiwai yaibao,” wali.  
\q1 “Te dage monu dabe bidi dabego te na eyu,  
\q2 te gesi ogwa bidi dabego me te na  
\q3 tiwai yaibao,” wali.   
\q1
\v 29 “Te tama tebo sogo te eno Mobo Bidi  
\q2 te eno sę bidiba, me sę ebo we dabeba  
\q2 tagala palaibao,” walio.   
\s1 Te Genuai Bidigo side bodolu dąį ilali  
\q1
\v 30 Genuai Bidigo po ma weyu, te po wai,  
\q1 “Te eno te e side dąį ilali sogo bodolu  
\q2 te tǫde me dagalude mueibao,” wali.  
\q1 “Te tǫde genuai boi hwįabo si pedalubode,  
\q2 te bidi hauwago kaneme gelaibao.  
\q1 Te sia dabo augwa taunde pedelama,  
\q2 te hano genuai hano ugwaba holaibao,” wali.   
\q1
\v 31 “Tama te dagalude da, te giliga ge be hulia selama,  
\q2 te poluade mama yai pedelama,  
\q3 te bidi kaneme tiwai yaibao.  
\q1 Dagego te nai subo sogo da, te dagego koneyu,  
\q2 te Genuai Bidigo sogo bodolu  
\q3 te pedalubao homu yaibao.  
\q1 Te genuai side te tigidali tǫde we bidi  
\q2 wi mu yaibao. \x * \xo 2:31 \xt Mat 24:29; Mak 13:24-25; Luk 21:25; Ped 6:12-13\x*   
\q1
\v 32 Tialima, niwai we bidi te augwali  
\q3 tau somainu enaba hanalubaso,  
\q2 teda te eno augwali tigidali ma saibao,” wali.  
\q1 “Ena Genuai Bidi da, eno te sęde te tiwai  
\q3 po walio,  
\q2 te Jerusalemde bidibo we bidi meba  
\q3 te me hagagobeo.  
\q1 Te we bidi dabe ena digi te sa munama dąį ilali,  
\q2 te augwali bugagia bidaibao wai dao,” wali.\x * \xo 2:32 \xt Tpi 2:17-21; Rom 10:13\x*   
\c 3  
\s1 Godigo te we bidi sisinama, po tų yaibao wai  
\q1
\v 1 Genuai Bidigo te po wai,  
\q1 “Te sogo, te side, eno te Jerusalem  
\q2 we bidi dabe me,  
\q2 te gasa badu Juda pedai dabe me,  
\q2 augwali te bugagia  
\q3 ma dugulalumainao po waibao.   
\q1
\v 2 Te eno tigidali we bidi hani selama,  
\q2 te odogo malu tǫ pesageba sisinagasali,  
\q2 augwaligo God Te Po Tų Odobo Jas Dao  
\q3 nogi polali tǫba.  
\q1 Te pesagede eno te po tų elama,  
\q2 tama te Israel hani isąwai bage  
\q2 augwaligo te eno we bidi dabeba yali  
\q3 tigidali kolesaga dagalaibao.  
\q1 Te hani dabego eno tǫ pepedama,  
\q2 te augwa hasi dobola sali,  
\q2 tama augwaligo te Israel dabe  
\q2 te gasa bulu tǫ kantriba wi tedela pomainu ilalio.   
\q1
\v 3 Te hani augwa te satu gagali elama,  
\q2 dego te Israel we bidi deli deli  
\q3 sesa pabo te hanilibo sueinu yali.  
\q1 Tama tiyu, augwa te Israel dabego  
\q2 wegi ogwa dabe te maketde munama,  
\q3 augwaligo te mone salio.  
\q1 Tialima, te monego augwa te penani we dabe abeliyu,  
\q3 te wain abeliyu yai dao.”  
\q1 Genuai Bidigo te po wai.   
\p
\v 4 “Dage te Tair me Saidon hani bage, me tigidali Filistia pedai badu me, dagego enaba mena sę yainu ebawe? Dagego homugo eno te dwai sę yalide homu eyu, te wei ponainu eba, agawe? Te dagego tama homu ebaso da, teda eno te polo dageba te wei ponaibao,” wali.  
\v 5 “Dagego te silva me gol sobadi, te gasa sawi yai nai hauwa sela pelama, te dagego tibo godiba lotu wabo beba mugi pai dao,” wali.  
\v 6 “Dagego te Jerusalem we bidi sobadi, te Juda pedai gasa badu me selama, te augwali digibulu mu odasa pelama, te Grik dabego augwali abelai dao.  
\v 7 Tiali goli, megi da, eno augwali ma sela aselama, te dagego augwali tagala palali bulu taga soaibao. Te dagego augwaliba yali tobage kolesaga tiwai te eno dageba yaibao,” wali.  
\v 8 “Te eno te Juda dabego te dagego wai ogwa dabe me wegi somainu ilaibao. Tama te Sabea dabe, te digibulu bidi dabego, te Juda dabeba aselama, te dagego ogwa me, wegi me, abelagaselama, te augwali digibulu sela paibao. Ena Genuai Bidi, eno te po wai dao,” wali. \x * \xo 3:8 \xt Ais 14:29-31; 23:1-18; Jer 47:1-7; Ese 25:15-17; 26:1–28:26; Amo 1:6-8, 9-10; Sef 2:4-7; Sek 9:1-7; Mat 11:21-22; Luk 10:13-14\x*   
\p
\v 9 Godigo Joelbolo weyu, te po te tigidali hani we bidiba wao po wali.  
\b  
\q1 “Dage te boi hwįabo sisi elaluao.  
\q1 Te tigidali ami sisinagasomainu i olama,  
\q3 te hwįgi pao,” walio.   
\q1
\v 10 “Te gi tǫ pedebo genuai ain te bainat  
\q2 tiwai pedalumainu halua,” wali,  
\q2 “me te ni nologo togobo hwą haluama,  
\q2 te sesemone tiwai pedalumainu yao,”  
\q3 wai.  
\q1 “Te bomo meni yai bidi me te hogodama,  
\q3 te hwįbo bidi tiwai yao,” wali. \x * \xo 3:10 \xt Ais 2:4; Mai 4:3\x*   
\q1
\v 11 “Dage bulu tǫ kantri pąde bidibo  
\q2 tigidali hani bage,  
\q2 dage asesa polo te odogo malu tǫ  
\q3 pesageba sisinagasao,” wai.  
\b  
\p Tama Genuai Bidi, eno homugo nago te naga bomai ami bidi dabe te boi bidi dabeba hwįagasomainu tagala palao.   
\q1
\v 12 Godigo te po wai, “Te we bidi  
\q3 hani dabe te sisi elama,  
\q2 te odogo malu tǫba dulao,” wali,  
\q3 “augwaligo te God Te Po Tų Odobo  
\q3 Jas Dao nogi poali tǫba dulao.  
\q1 Ena Genuai Bidi, ena te pesagede dugulalu,  
\q2 te Israel pąde bidibo tigidali gasa hani  
\q3 we bidi te po tų ilaibao,” wai dao.   
\q1
\v 13 “Te hani we bidi dabe te dwai mu dao.  
\q1 Te augwali te bidigo inawai tau yai wit nai  
\q3 togobo tiwai togwao.  
\q1 Te augwali bomonama agawaibao,  
\q2 bidigo te wain wai ge du te sągągo agabo tiwai yao.  
\q1 Te halobage tiwai nai te mu pągąna pelama,  
\q3 te wain ąį buluba gelaibao.  
\q1 Tialima, te hani dabe mu dolaibao,” wai dao.\x * \xo 3:13 \xt Ped 14:14-20; 19:15\x*   
\b  
\q1
\v 14 Te hauwa umabo we bidi te odogo  
\q2 malu buluba sisinama, po tų yaibao.  
\q1 Te dwasianu sogo te Genuai Bidi te buluba  
\q2 pedelabo bodolude te pedelaibao.   
\q1
\v 15 Tama te giliga me polua te hulia siyu,  
\q2 te hǫ dabe me ula ma egobeo.   
\s1 Godigo te aga we bidi tigidali te wiegi yai bugagia ilaibao wai  
\q1
\v 16 Genuai Bidi te Jerusalem te Saion  
\q2 bulu dude bidiyu,  
\q3 te po dagą genuai mu waibao.  
\q1 Agai i wabo te dagalu kulukulu wabo tiwai obaso,  
\q3 te tǫ dali dagalu si mumunu yaibao.  
\q1 Tiali goli, Genuai Bidigo te aga we bidi tigidali tonalu,  
\q3 te augwali me dologobeo. \x * \xo 3:16 \xt Amo 1:2\x*   
\q1
\v 17 Agai te tama po wai,  
\q2 “Te sogo te Israel dagego koneiagameo,  
\q2 ena tama ena God, te duga Genuai Bidi da waibao.  
\q1 Ena te Saionde bidibao, ena bulu du deli digi dao.  
\q1 Te Jerusalem eno te ena taun naga pedelama,  
\q2 te gasa hani dabe augwaligo boi bidi homu eyu,  
\q2 te tomoba ma pogobeo.   
\q1
\v 18 Te sogo wain gi pedalama,  
\q2 te bulu du mesega sigulaibao,  
\q2 te bulmakau hauwa te dwasianu bulu du dabede  
\q3 bidalueibao.  
\q1 Te Juda we bidi dabego wę hauwa elalueibao.  
\q1 Wę me deli te Genuai Bidigo bedu gomo gudama,  
\q2 te Odogo Bulu Tǫ Te Ni Akas Elalubo  
\q3 madiba dulaibao,” wai.   
\b  
\q1
\v 19 “Te Isip dabego tǫ te wa pai bulu pedelaibao,  
\q2 te Idom dabego tǫ da, te olo bulu tiwai pedelama,  
\q2 bidi tede me bidigobeo.  
\q1 Magi baso meni, te hani sigo te Juda dabe  
\q3 dali hwįnama,  
\q2 tama te magi dwai sę isąwai we bidi olodali elali.   
\q1
\v 20-21 Tialima, eno te we bidi elali bidi dabeba  
\q2 te tobage kolesaga yali wei ponama,  
\q3 te augwali elaibao,” wai.  
\q1 “Eno te dwai sę yali bidi deli me gedelegobeo.  
\q1 Tialima, te Jerusalemde sesemane bidibo  
\q2 we bidi dabe me,  
\q2 te Juda gasa badu pedaide bidibo me,  
\q3 ena Genuai Bidi ena te Saion bulu dude bidiyu,  
\q2 te sesemane tonalueibao,” po wai dao.