\id EZK - Dadibi NT [mps] -Papua New Guinea 2001 (DBL 2014) 
\h Profet Esekielgo Po Asęai Buku 
\toc1 Profet Esekielgo Po Asęai Buku 
\toc2 Esekiel 
\toc3 Ese 
\mt1 Profet Esekielgo Po Asęai Buku  
\imt1 Hasia nedebo po dao  
\ip Esekiel aga te pris bidi me deli da, tama aga te profet bidi te boi bidi dabego te taun Jerusalem dolali sogo bidali. Aga te boi bidi dabego te Babilonba kalabus sela pali hani we bidi dali bidali, tama agai te profet po te hani siba pusubo sę yalio. Gasa hani me da, te Juda dabe aga dali te Babilonde bidali, tama gasa me da te Jerusalemde bidalubadi taga pali hani we bidi augwali dao.  
\ip Te me badu habu badu Esekielgo te dua dao wabo bomai po mayu, te Godigo te Juda hani dabeba dene mabo sę yaibao wali. Te me badu pedai badu agai te tiwai po wali, Godigo te Juda hani dabe dene mani hani we bidi augwaligo ebo kolesaga dagalama, tama agai te hani augwaliba sęgę mawaibao wali. Te gasa me badu wali po, Esekielgo te tiwai po walio, Godigo te we bidi dabe augwali haliga nagame ilama bidaibao. Agai te tama po wali, te wiegi yai sogo Godigo te nosali pedelaibao po olama walio. Te Israel dabe augwa tǫ pedai kantri ma hodolama, tama Godigo gesi be elalueibao po wai dao.  
\ip Te Babilonde bidali Juda dabe augwaligo homu hauwa yalio. Augwali te Godigo taunde bidibe da homu yali, te augwali Godigo tempel be digibulu bidalio. Tama tiyu, augwaligo konebeo, te God augwali dali bidibowe, ma meniwe, te augwaligo konebeo. Esekielgo po te augwaliba pusulama, te augwaligo konealubo homu dąų walobo po weyu, augwaliba te tiwai po ola mayu, te God augwali dali bidibao wali. Tama agai te deli deli we bidi augwali homu hodolama te wiegi yai kolesaga naga yao po walio.  
\ip Hauwa sogo Godigo Esekielbolo po mayu, te nade ebo sę tiwai yali, tama Esekielgo agai te nade suali sę po dabe augwaliba pusali po dabe te hania mu koneama, te dago odobo homu pemene yali, tiali goli meba po te kuna mu konesiąbaso, te po page koneainu sinabo sę dene dwasianu eyu yai dao.  
\c 1  
\ms1 Godigo profet sę Esekielbolo mawai  
\mr (Dąį 1–3)  
\s1 Esekielgo Godigo sia king sualio  
\p
\v 1 Ena Esekiel, ena te Juda dabe dali te wę Kebar pąde bidai, te Babilon tǫ kantri pedaide. Te Babilon dabe augwaligo da kalabus elama, tama da te augwa page bulu tǫba sela pai dao, polobadu. Tama te nanobo me si me si wabo polua, dei a naga wabo side, te kibu be bidi sese deli olama, nogo si wabo 30 yiade, te dagalu buga pabo side eno te nade ebo tiwai te God sualio. \x * \xo 1:1 \xt Ped 19:11\x*  
\v 2 Te sę pedelali, te Babilon dabe te Juda tǫ kantriba pelama, te hwįagaselama, te Jerusalem king bidi Jehoiakin augwa tǫ kantriba kalabus igi pomainu selasa pabo kibu be a naga nosali elalubo sogo te sę pedelai dao. \x * \xo 1:2 \xt 2 Kin 24:10-16; 2 Sto 36:9-10\x*  
\v 3 Ena Esekiel, ena te pris Busigo ogwa da, ena te tǫ kantri Babilonde bidali, te ąį Kebar pąde da, tama enaba te Godigo po wabo eno odama, te Godigo bomo enaba asida walio.   
\p
\v 4 Eno ugwaba tonobadi, eno te genuai wali me haowa te not badu asobo suali, te be sele hauwa dali asobo suali. Te genuai ulago te haowa mu bagua selama, tama te ula te isi dabo tiwai bomo umagi mu yali, tama te haowago ula tomode te tigidaliba usu te brasgo ula ebo tiwai yalio.  
\v 5 Te genuai wali me haowa si tomode eno te bidi tiwai nai me si me si elalubo suali. Augwaligo tigi te bidigo tigi tiwai elaluali, \x * \xo 1:5 \xt Ped 4:6\x*  
\v 6 tiali goli te tigidali deli delide te gesabidi me si me si badi, te bogo me si me si elaluali.  
\v 7 Augwali sągą te doloba pai elaluali, te augwaligo sągą dani te gesi kibu bulmakaugo sągą dani tiwai si elaluali. Te augwaligo sągąde ula ebo te umabo mu eyu, te bras augwaligo meda holali gegemane tiwai yalio.  
\v 8 Te tigidali bogo deli deli dologode te bidigo nogo ąbo tiwai elaluali. Te augwaligo bogo te tama tiwai elaluai.  
\v 9 Tigidali deli deligo augwa bogo si diniginani, te deli deligo bogo sabigo te gasa mego mego bogo sabiba pomono pelama, tama augwali te halobage me deli tiwai te nogo habu me si me si pedelai. Te augwali gasaba me painogo ebo sogo da, augwa te tama tiwai naga elalubadi palio. Augwa tigi begelibo sę eyu me ebeo.   
\p
\v 10 Tigidali deli deligo te tobage gesabidi me si me si elaluali. Te edaba begelama elalubo badu te bidigo gesabidi elaluali, te dolo nogo badu gesabidi te hasa nogi laiongo gesabidi tiwai yali. Te pobase nogo badu gesabidi te kibu bulmakau omai gesabidi tiwai elaluali, te tudi badu gesabidi te genuai ba kemodage gesabidi tiwai yalio. \x * \xo 1:10 \xt Ese 10:14; Ped 4:7\x*  
\v 11 Te augwa gesabidigo kolesaga te tama da. Tigidaligo augwa bogo si diliginama, te deli deligo bogo te gasa mego mego bogo sabiba pomono palio. Te augwa gasa bogo me sigo, te augwa tigi mesega salio.  
\v 12 Tigidali deli deligo gesabidi te me si me si gesabidigo te me si me si pedaiba tononaluali. Tama augwali deli homu naga elalubaso, augwali gasaba me painogo da, te augwaligo gesabidi gasaba me begeligobeo. Augwali paboba naga tama paibao.  
\v 13 Te nai dabego kolesaga te tama elalubao. \x * \xo 1:13 \xt Ped 4:5\x*  
\p Eno suali, te nai dabego ula te isi ula me sole tiwai ula te bidi tiwai nai me si me si tomode iba peyu, eda asu yali. Tama te sia bogoli genuai pedelama, te be sele ula te isi pedelama, te pepeda pabo sę ela palio.  
\v 14 Tama te me si me si bidi tiwai nai dabe te polo asesa iba peyu, eda asu yalio, te be selego ula tiwai yai dao.   
\p
\v 15 Eno te bidi tiwai nai dabe subo sę elama, te eno suali, tigidali deli deligo te tǫde augwa sągą pąde te wil me deli dolalubo suai dao.  
\v 16 Te tigidali wil deli tigi poai naga elalu, te ula umagia mu yali, te sęwa yai tedali gasagi yai masigi mu tiwai yalio. Te wil tigidali deli deligo te gasa gasa wil te augwa tomode elalu, te gasa tononalua palio.  
\v 17 Tama tialima, te wil dabe te tigidali me si me si pedai badu te iba soyu, eda soyu emainu ebo dao.  
\v 18 Eno suali, te wil dabe moni dobo dwai mu yai baso, ena wi yalio. Te wil tigidali deli deli sabi badu te tononalubo gedu hauwa mu elalualio. \x * \xo 1:18 \xt Ped 4:8\x*  
\v 19 Te bidi tiwai nai dabe iba soyu, eda soyu ebo sogo da, teda te wil dabe me augwali dali iba soyu, eda asiyu yali. Tama te nai dabego te tǫ tagalama, ugwaba holobo si da, teda te wil dabe me ugwaba holoyu yalio.  
\v 20 Te nai dabe augwa menaba pabo deli homu ebaso da, teda augwali pelawaibao. Tama te wil dabe me augwali dali paibao, magi baso meni, te me si me si nai dabego me, te wil dabego me te deli homu naga elalubo dao.  
\v 21 Te nai dabe augwali gasa me pabo homu ebaso da, teda te wil dabe me paibao. Tama te nai dabe te me badu pedaide bidibaso da, teda te wil dabe doligi pai elalueibao. Te nai dabe augwali hogodama, ugwaba holobaso da, teda te wil dabego me tama tiaibao, magi baso meni, te me si me si nai dabe dali te wil dabe dali augwaligo deli homu naga elalubo dao. \x * \xo 1:21 \xt Ese 10:9-13\x*   
\p
\v 22 Tama eno suali, te dagalu ugwadu tede te genuai dąį tiwai elalubo suali. Eno suali, te nai ula mu yali, te wiegi yai dula tiwai elalubaso, ena wi yali. Te nai te bidi tiwai nai me si me si te nai daide ugwadu munalubo suali. \x * \xo 1:22 \xt Ped 4:6\x*  
\v 23 Te me si me si nai dabe te genuai bagua sai nai dologode elaluali, te augwaligo bogo si diligina palalio. Te me deli deligo bogo sabi badu ununulu palio. Te augwa tigi dabego digi te augwa bogo sigo mesega salio.  
\v 24-25 Te augwali bola pabo sogo eno odali, te augwaligo bogo kulukulu wali, te tamu ąį genuai ąį dini holama, degasa dulu bugusu wabo tiwai yali, tama te genuai ami bidi hanigo pesagede bidu posolu dala sabo tiwai yalio. Te augwaligo bogo u wabo te Tigidali Bomo Elalubo Godigo i wabo tiwai yalio. Te augwali me badu pedai badu doligi pelama, te augwa bogo bea sali. Tialima megi da, te bagua sai naide ugwadu daide te bidigo po wabo odai. \x * \xo 1:24-25 \xt Ped 1:4-15; 19:6\x*   
\p
\v 26 Te bagua sai nai daide ugadu te nai me deli king dugabo sia sai tiwai augwaligo te gasa tedali sisi dagalu tiwai masigigo nigai elalualio. Tama bidi te dugabo sia kingde dugulalubo tiwai elaluai. \x * \xo 1:26 \xt Ese 10:1; Ped 4:2-3\x*  
\v 27 Te bidigo tigi ugwadu te bras pedai me deli ula te tomode elalubo tiwai yali. Te tigi pedai aiyadu te sia ula tiwai yali. Te genuai ulago aga bagulai elaluali. \x * \xo 1:27 \xt Ese 8:2\x*  
\v 28 Tama te ula te dagalude unigi bidi elalubo tigi poai tiwai hauwa elaluali. Te ula ebo eno suali, te ula te God agade digi genuai ula asobo tiwai yai dao.   
\c 2  
\s1 Godigo Esekiel te profet pedalumainogo dąį ilalio  
\p
\v 1 Eno te tama tebo sulama, ena kidu sugunama, te gesabidi tǫba pǫgulali. Tama eno odali, Godigo enabolo te tiwai po wali, “Tǫde bidio, nage hogodao. Eno po nage dali wainogo ebao,” wali.  
\v 2 Te Godigo enaba te po wabo sogo, te agai Mobo Noma Bidi enaba aselama, te ena hodolobaso, ena dolugulali. Tama eno odali, Godigo enabolo te tiwai po ma wabo odalio,  
\v 3 “Tǫde bidio, megi eno nage te Israel dabe augwaliba tagala palaibao, te augwali eno po sela sąyu, hagoma eyu, te ena tudiba mubo we bidi dabe da. Augwali te augwa wąį nǫų dabego hagoma ebo tiwai yai bidi dabe dao.  
\v 4 Augwa tobolu dili dagana sigi pelama, te augwaligo eno po me odobeo. Megi da, eno te nage augwaliba pomaina homu elama, te eno po augwaliba magi pao. Te augwaliba te tiwai po walao, ‘Te e da Tigidali Bomo Elalubo Godigo po digi eno dageba obao.’  
\v 5 Te augwaligo nago po odobaso, ma odisąbaso da, te tagalao, teda te hagoma ebo hani we bidigo te tiwai konemainao, te eno profet bidi me deli augwali dali bidiba homu yaibao,” te po wai dao.   
\p
\v 6 “Tialima nage, te tǫde bidi, nage augwalide wi elama, te augwaligo nageba wabo pode nage wi me igio. Te augwaligo nago po aiyaba elaluama, nage begela dolaibao. Te nage augwali tomode bidiyu, te tiwai dwai haliga yaibao, nage te dwai sesane elalubo bono sili tomode bidibo tiwai yaibao. Ma, nage te dwai marasin elalubo hwą dabe tomode bidibo tiwai elalueibao. Tiali digi tagalao, nage augwalide wi eyu, te augwaligo pode me wi igio. Menio.  
\v 7 Nago koneani, augwali te hagoma bidi naga elalubao. Te augwaligo nago po odisąbadi goli, tagalao, te eno nageba mabo po tigidali te nago augwaliba walao,” te po wai.   
\p
\v 8 “Tǫde bidi, eno te po bugagia odao. Te gasa Israel bidi dabego ebo tiwai nago hagoma elamuo. Nago pedauwali diliginama, eno nageba te mabo nai nago tuao,” wali.  
\v 9 Agai te po ola silama da, teda eno te nogo me deligo te buku me deli ena pąde tolalubo sualio.  
\v 10 Te buku te pepa me deli tiwai augwaligo te bebe pelama, te kęąį elaluai. Tialima, nogo te buku diliginama, tama eno suali, te bukude te si badu po asęai elaluali. Te bidi dabe augwali te haliga sęgę eyu, dwai gela weyu, homu dene ebo tęąbi ebo po dabe augwaligo asęai elalubo suali. Te tobage po te pepade asęani pągąnalualio. \x * \xo 2:10 \xt Ped 5:1\x*   
\c 3  
\nb
\v 1 Te Godigo enabolo te tiwai po wali, “Tǫde bidio, nago te buku tuao. Tama nosali nage pelama, te bukude po te Israel we bidi augwaliba pusugi pao,” wai dao.  
\v 2 Tialima, eno pedauwali a olama, agai te buku enabolo mawai dao.  
\v 3 Tama agai te tiwai po wali, “Tǫde bidio, megi eno nagebolo te mabo buku nago tuao. Nago haliga tego pągąnao,” wali. Te eno tuali, te eno pusu mu yali, te ganima bunu ge pusu ebo tiwai yalio. \x * \xo 3:3 \xt Ped 10:9-10\x*   
\p
\v 4 Nosali Godigo enabolo te tiwai po wali, “Tǫde bidio, nage te Israel we bidi augwaliba pelama, te eno nagebolo pusali po tigidali pusao.  
\v 5 Eno nage te haniani gasa gasa po wabo we bidi haniba me nage tagala palobeo. Menio. Eno nage te Israel we bidi augwali naga bidiboba tagala palobao.  
\v 6 Te eno nage te genuai genuai tǫ pedai kantri te nago konesiąwai we bidi hani augwaliba nage eno tagala paligi sogo da, teda te tǫ pedai kantri we bidi augwaligo nago po wali pigi dao.  
\v 7 Tiali digi, te Israel dabego da, me tegobeo. Te augwali me deligo nago po wali me pogobeo. Augwaligo te eno wabo po digi me odisąwaibao, te magi elama augwaligo nago po odaibawe? Magi baso meni, augwaligo tobolu te masigi dila pai tiwai elalu, te tigidaligo po naga sela sąbo bidi dao.  
\v 8 Tiali goli, megi te eno nago homu kolesaga te augwaligo homu kolesaga dila pai elalubo tiwai ilama, te nage augwalide didibili homu me egobeo.  
\v 9 Te eno nage te masigi daimon dila pai tiwai pedalomainu yaibao, te nago bomogo te augwaligo bomo aiyaba elalueibao. Te nage augwalide wi elama, didibili me igio. Menio. Augwali te po sela sąbo bidi dabe naga dao,” te po wali.   
\p
\v 10 Te Godigo gasa po me weyu, te tiwai wali, “Tǫde bidio, te eno nageba wainogo ebo po tigidaliba olo bugagia muao, te nago po me deli homugo me gegeda pelamu dao.  
\v 11 Tialima, nage te nage abagi dabe te boi bidi dabego Babilonba sela asali bageba pelama, tama nago te tigidali po ena Genuai Bidi, eno nageba mani po te nago pusao. Te nago augwaliba te tama po wao, ‘Te po God aga po digi dao.’ Nago eno po augwaliba mao, te augwaligo olo bugagia munama odobaso, ma menisąbaso, te tagalao, te nago eno po augwaliba pusa mao.” Te po wali.   
\p
\v 12 Nosali Godigo Mobo Noma Bidigo ena ugaba sagoasa holali. Te ena tudi badu, te pedauwali me delidu te tiwai i bomonama wabo odali, “Genuai ula me bomo te dagalude bidibo Genuai Bidi elalubao. Te aga nogi ugaba sao,” walio.  
\v 13 Te me si me si nai te bidi tiwai te bola pabo gagalali, te deli deligo bogo sabi ununulu pelama, te mego bogo sabigo mego bogo sabi badu elali, tama eno te gosege wabo odali. Tama eno te wil kidagalo wabo odalio. Te tigidaligo te kidagalo wabo genuai mu pedalama, te genuai wali u wabo tiwai pedelai dao.  
\v 14 Tama Godigo Mobo Noma Bidigo ena ugaba sagoa selama, te ena tolasa palio. Te Godigo genuai bomo enaba pedelama, te ena dwai dene ebaso, ena sębę eyu palio.  
\v 15 Te Godigo Mobo Noma Bidigo ena te taun me nogi Telabipba odasa pali, te ąį Kebar pąde da, te Israel augwali te taunde kalabus bidali. Eno te suali nai dabego ena haliga sęgę dwai mu ilibaso, ena te taunde dugulalu bididualio, tama eno te magi sę me deli yabo bomo meni baso bididubadi, te Sarere deli, te a naga olama, si sogo tama bidai dao.   
\s1 Godigo Esekiel te Israel dabe tonalubo bidi dąį ilalio  
\r (Ese 33:1-9)  
\p
\v 16 Te a naga olama, si, te Sarere deli tiwai wali sogo silibo si da, teda Godigo po enabolo ma mawai dao.  
\v 17 Agai te tiwai po enabolo wali, “Tǫde bidio, eno nage te Israel dabe tonalubo bidi pedalumainu ilalio. Te eno augwaliba pusabo bomai po elalubaso da, teda eno nageba munama, te nago augwaliba pusagameo.  
\v 18 Te eno suali, bidi me deligo dwai kolesaga ebaso, eno te po weyu, aga isimainao po obaso da, teda nago te dwai kolesaga yali bidi agabolo pusao. Nago agabolo waliyu, te aga homugo ebo kolesaga hasegelibaso, te aga me hagagobeo. Te nago agabolo walisąbaso da, teda aga sęgę te tiwai naga elalubadi, te aga isaibao. Tialima, te eno gedude da, te aga isabo page nagede elalubaso te aga isali dao.  
\v 19 Tialima, nago te dwai sę yali bidi agabolo te po pusao, tama aga te dwai kolesaga tagalisąbaso da, teda te dwai kolesagago aga dolama, te aga isaibao. Tiali goli, te page nagede me elalubeo, tiyu nage me isigobeo,” wali.   
\p
\v 20 “Te eno magi usu sabo sę me deli te wiegi yai bidiba pedalumai hagede sula tagalabaso, tama agai te doloba pai kolesaga tagalama, te dwai kolesaga ebaso da, teda te tebo sogo nago te bidibolo te dwai kolesaga ebo tagala po walao. Te nago agaba wasiąbaso da, teda aga dolama isaibao. Eno agai polobadu te yali wiegi yai kolesagade homu kone me palogobeo. Menio. Te eno agai megi te ebo dwai kolesaga sulama, te eno aga dolomainu sula tagalobaso, te aga dolama isaibao. Tialima, eno gedude te aga isabo page te nagede elalubaso aga isali dao.  
\v 21 Tialima, nago te wiegi yai bidi me deliba te po bomonama, te dwai sę igio po obadi, tama agai te po wali pelama, te dwai sę me isąbaso da, teda aga me isigobeo. Te nage me nage bugagia bidaibao.” Godigo te po enabolo wali.   
\s1 Godigo Esekiel te pedauwali paniai  
\p
\v 22 Ena te bulude bididubadi, tama te Genuai Bidigo bomo enaba asida walio. Tama agai enabolo te tama po wali, “Nage hogodama, nage te odogo buluba pao,” wali. “Nage teba sabalobo si da, teda eno po nage dali waibao.”  
\v 23 Tialima, ena hogodama, ena te odogo bulu pali, tama te badu eno te Godigo genuai ula pedalubo suali, eno te wę Kebar pąde suali sę tiwai yalio. Tama tibaso, eno gesabidi te tǫba pǫgulai dao.  
\v 24 Tialima, te Godigo Mobo Noma Bidi enaba aselama, ena hodolobaso, ena dologulali. Tama Genuai Bidigo enabolo te tiwai po wali, “Tǫde bidio, naga buluba pelama, te naga be tomoba bula sigi pelama, te sunumi paliao,” wali.  
\v 25 “Tama nosali bidi mebago te dila pai haliga seselama, tama tego nage kęnaibao. Tama nago te be tagalama, te we bidi dabe augwali sugi painu ebo usu me egobe dao.  
\v 26 Te eno nago pedauwali pania somainogo ilama, tama te po sela sąbo bidi dabeba te nago po bomo elama, augwaliba me weyu, augwaligo te dwai kolesaga tagalao po bomo elama me wagobeo.  
\v 27 Tiali digi me sogo eno homugo nago eno po te we bidi dabe augwaliba pusumainogo ebo sogo da, teda te eno nago po wabo usu ilaibao. Te nago augwaliba te tama waibao, ‘Te po da, te Genuai Bidi God aga po da.’ Te nago po augwaliba pusubo si da, te mebago nago po odaibao. Tiali digi, mebago nage tudiba mueibao, magi baso meni, augwali te po sela sąbo we bidi dabe naga bidibao,” te po walio.   
\c 4  
\ms1 Esekielgo te Jerusalem dolabo po pusali  
\mr (Dąį 4–24)  
\s1 Te boi bidi dabe augwaligo Jerusalem dolaibao po wai  
\p
\v 1 Te Godigo te tiwai tama po wali, “Tǫde bidio, nago te brik me deli sigi pelama, te tǫba munama, te Jerusalem piksa noma tiwai te daide ugadu todogo pao,” wai dao.  
\v 2 “Tama te brik pąde, nago te amigo te taun me deli bagua selama, te we bidi augwali dali boi hwįnama, te taun sainu eyu, te tigidali sę yabo nai piksa nigibo tiwai yao. Te tǫ te taun obo pąde te tǫ du tiwai me nigao, te ami bidi dabe augwa te daiba bugagia dolugulama, boi hwįabo pesage tiwai piksa nigao. Te ami dabego bidabo pesage te taun pąde nigibadi, te taun aluabo masin dabe piksa me nigao,” wali.  
\v 3 “Nigila silama da, teda te aingo nigai nai ulubo pou me deli selama, te nage dali te brik dali tomode ugaba dodolama, te obo dodolao. Tama nago te taunba tonaluao. Te Israel we bidi augwaligo nago te tebo sę sulama, te augwaligo konemainao, nosali te ami bidi dabe asama, te Jerusalem aiyaba elalueibao,” wali.   
\p
\v 4-5 “Nosali nage te naga pobase nogo badu pigusao, te nago naga we bidi Israel augwaligo sęgę ebo koneaibao. Nage pilamubadi, te 390 dei te sogoba usu naibao. Te 390 dei wali, te 390 yia dąį ilama obao, te tama kibu bede usu nama, te Israel tǫ kantri we bidi augwa yali sęde sęgę tolaibao,” po walio.  
\v 6 “Te nago silibo sogo da, teda nage te naga dolo nogo badu te 40 dei piao. Tama nago te naga we bidi Juda tǫ kantri dabego sęgę pedalubo koneao. Te 40 dei wali, te kibu be 40 yiade te Juda dabe augwa yali dwai sęde sęgę tolaibao,” te po olama, wai dao.   
\p
\v 7 “Te nage pila mubo sogo da, teda nago te boi bidi dabego te Jerusalem sainu ebo piksa nomaba tonaluao. Tama nago te hwįabo sisi elalubo tiwai elalu, te nago te tiwai po wao, ‘Te taun da dolaibao,’ wao.  
\v 8 Te nago tigi te eno haligago kęnama, te nago tigi begelainu ebaso usu egobeo. Nage te tiwai tama me pila mudubadi, te eno nage dąį ilali sogoba usu nubaso da, te usu dao.”   
\p
\v 9 “Megi da, nago te wit meba sobadi, te rais bali me, te tobage tęgabi si me sobadi elama, te wit tiwai nai si me sao. Te nai tigidali deliba sisinama, te belegelama, bret nigao. Nago te tobage bret naga pibo badu munama tudubadi, te 390 dei wali sogoba usu nubo sogoba usu naibao,” te po walio.  
\v 10 “Nago te tiwai 200 gram tobage bret te deli deli sogo tudao, te wali nago edelamu dao.  
\v 11 Te nago ąį tuabo me dąį elalueibao. Nago te ąį kap delide deli deli sogo tuao.  
\v 12 Tama nago te bidigo di selama, elaluao. Tama te di wa pabo si da, teda nago selama, te nago isi tiwai elaluyu, tego te bret ulao. Tama nago te tama sę ebo te we bidi augwaligo sumainao,” wali.   
\p
\v 13 Te Genuai Bidigo po te tiwai ma walio. “Nago te tama tebo kolesaga te Israel dabego yabo kolesaga dąį ilibao. Nosali eno te boi bidi dabe te Jerusalemba hwįgi pomainu sula tagalaibao, tama te Israel dabe augwali te gasa tǫ kantriba sela paibao. Tama augwali te tǫ kantri dabede bidalu, augwaligo te eno gedude dwagi yai isąwai meda yai nai dabe tueibao,” Genuai Bidigo te po wali.  
\v 14 Ena Esekiel eno te tama po odama, eno te tiwai po wei ponani, “God Genuai Bidi, hobede mu ebao. Eno te tama kolesaga munu me ebeo. Mu menio. Eno digi eno meda yai sę nago gedude me ebeo. Te ena dwasianu ogwade bidali sogo, te eno te kibu aga digi isai kibu me, ma hasa mi, te uni hasa dabego ela muani tusiąbadi, te megi bidibo sogoba usu nagasobao. Te bomo yai pode habu seleyu, te nago gedude meda yai nai, te tiwai nai deli eno me tubeo,” eno te po wali.  
\v 15 Godigo te po wabo odama, te po wali, “Te nago tama homu ebaso da, teda nago bret te bidigo di olali iside te nai ulugobeo. Menio. Nago te kibu bulmakau dide naga ulagameo,” te po wai dao.   
\p
\v 16 Te Godigo po ma weyu, te tiwai po wali, “Tǫde bidio, eno te Jerusalem dabe te nai mu sǫą pabo sę ilaibao. Tama te we bidi augwali dwai midigi selama, te sęde haliga sęgę mu yaibao. Tama te we bidi dabe augwa te nai me wę bugagia dagalaibao, te augwaligo deli deli side tuabo nai dagalobo sę eyu, tama yaibao.  
\v 17 Awe, te augwali nai me wę mu sǫą paibao, tibaso te augwali haliga sęgę dwai mu yaibao. Augwali te dwai sę ebo bidi naga da, tibaso te eno augwaligo nai sǫą palaibao, tibaso augwali mu nomona selama, dili pulu hania mu pedelaibao,” te po wai dao.   
\c 5  
\s1 Esekielgo aga tobolu nisi togali  
\p
\v 1 Godigo te tama po ma walio, “Tǫde bidio, nage pelama, te bainat hwą poa pai mu me deligo te nago penane nisi poayao, me tobolu nisi tigidali poayao. Tilama, nago te penane nisi me tobolu nisi te skelba muao, te dobolama, sela badu dagala muao,” walio.  
\v 2 “Eno nage te pila muao wali sogo tigidali silibaso da, teda nage hodolaluao. Te tama tebo sę ebogo te we bidi augwaliba te tiwai ola mawaibao, te boi bidi dabego te Jerusalem sagasali tiwai ebao. Nage hodalubo si da, teda nago te tobolu nisi me penane nisi hasia me badu te Jerusalem dąį ilali brik daide munama, nago te nisi dabe isi ulao. Te nago si wali pedai tobolu nisi selama, tama te brik baguasa bilama, nago te bainat hwągo te penane nisi me tobolu nisi togwa sąsą pao. Tama te sela wali tobolu me penane nisi selama, te sąsąyao, tama waligo sela paibao. Tama eno te bainat hwą selama, te sąwani tobolu me penane nisi pobeasa paibao.  
\v 3 Tiali goli, te nago dwasianu tobolu nisi me penane nisi elalumainao, te nago naga ugwa sabi badu munama, te kęnao.  
\v 4 Tialima, nago te kęnani nisi deli deli selama, te isiba sąnama, te siago domainao. Tama nosali te isi genuai deyu, te Israel tigidali daibao,” wali.   
\p
\v 5 Te God Genuai Bidigo enabolo te tiwai po wali, “Nago te Jerusalem taun suao. Eno aga selama, te tigidali tǫ pedai kantri tomode mu munama elaluali, tama genuai nogi elaluali.  
\v 6 Tialima, te Jerusalem dabego eno po sela sąnama, te augwali dwai we bidi mu pedelalio. Te Jerusalem dabe augwaligo yali dwai kolesagago te gasa tǫ kantri we bidi augwaligo ebo dwai kolesaga te aiyaba mu elaluali. Te Jerusalem augwaligo eno po me eno bomai po dabe te tudiba mu muanio.  
\v 7 Tibaso, eno augwaliba te tama tiwai po wainogo ebao, ‘Dage Jerusalem dabego odao. Ena God Genuai Bidi, eno dagede po elalubao. Dagego eno po odisąma, te dagego eno bomai po dabe sela sąnama, te dage pąde bidibo tǫ kantri pedaigo ebo dwai kolesaga wali pai dao. Tialima, te dagego hagoma kolesaga hauwa elama, tama dagego dwai kolesagago te dage pąde bidibo tǫ kantri dabego dwai kolesaga aiyaba elaluai dao.  
\v 8 Tama tialima, ena God Genuai Bidi, eno te tiwai po dageba obao, eno dageba wiegi yai homu pemene me ebeo. Menio. Eno dageba boi bidi ebao. Tama dage eno te tigidali tǫde we bidi gedude po tų ilaibao.  
\v 9 Dagego eno godolo isąbo kolesaga hauwa yalio, te tama tibaso, te eno dageba polobadu isąwani kolesagago te eno dageba dwai dene mu mawaibao. Te tudi badu nosali, eno te tobage dwai dene mabo sę ma egobeo.  
\v 10 Te eno dwai dene dageba mabo sogo da, te aya ida mebago te augwa digi wai dabe elama tueibao, me te wai dabe mebago te augwa aya ida ela tubadi yaibao. Te eno dwai dene mabo sęgę dageba ebaso, te dage hauwa isaibao. Te me badu bidibaso da, teda eno augwali te gasa bulu tǫ pedai tigidaliba tedela palaibao,’ eno te tiwai po waingo ebao,” Genuai Bidigo te po wali. \x * \xo 5:10 \xt Gel 4:10\x*   
\p
\v 11 Tama po ma weyu, agai te po wai, “Eno augwalibolo te po obao, ‘Ena God Genuai Bidi, ena sesemane sogo bidada paibao, eno po dolo dagebolo obao, te eno dage mu dolaibao. Magi baso meni, dagego te tibo god dabego dwai piksa noma dabe elaluyu, dwai kugumini ebo kolesaga hauwa elama, tama tebo kolesagago te eno gedude dagego eno be meda mu ilai dao. Tama tiyu, te eno dage olo tau sabo wiegi yai kolesaga eyu, te hobede me egobeo. Te eno dageba dwai sęgę mabo sę eyu, te bidigo tobolu nisi tigidali togolama poala sąwani tiwai yaibao.  
\v 12 Te eno dage hani sela dobawaibao. Te polalubo hanide te nai sili mu bidu, te gasi genuai saibao, tama augwali te taun tomode isaibao. Tama te si wali hani, te boi bidi dabego te taun bulu badu te bainat hwągo ela wialaibao. Te sela wali hani we bidi, te augwali eno te tigidali bulu tǫ pedaiba ela gudulama, tedela palaibao. Te eno boi bidi dabe tagala palama, te pobeasa pelama, te augwali ela mueibao.  
\v 13 Te tama tebo kolesagade te eno sębę genuai eyu, te haliga sębę yali kolesaga silaibao. Te tigidali sę pedalubo sogo da, teda dagego eno te wali po homude kone palagasu, te dagego koneaibao, ena Genuai Bidi, te tibo god me deligo ena hasegelemainogo me ebo menio.  
\v 14 Dage dolobo si da, teda te dage pąde elalubo tǫ kantri pedai we bidi augwaligo dage te tama tebo sę sulama, te augwaligo te tama po waibao, “Suao. Augwali dwagila mu dolalio. Genuai Bidigo te augwaligo dwai kolesaga ebo sulama, te agai augwali dolali dao,” augwaligo te po waibao.’ Eno te po obao,” Genuai Bidigo te po walio.   
\p
\v 15 “Ena Genuai Bidi, eno te po obao. Eno dageba dwai haliga sębę mu elama, te eno dageba dwai sęgę umagia mu yaibao. Tama dage pąde bidalubo tigidali we bidigo te dage te tama tebo sulama, te augwali homu hauwa elama, te wi dwai mu yaibao. Te augwaligo dage begela dolobo posobo po obaso, te dage hale yaibao.  
\v 16 Te we bidi augwali eno te nai sǫą palobo sę mu elama, te dage nai nasi mu yaibao. Tama dage te sęgę sabo dene ebo te enesigigo te ene dageba enama, te dage dolobo tiwai yaibao.  
\v 17 Tama me, eno te bulu uni hasa dageba tagala palama, te augwaligo dagego wai dabe ela mueibao. Te eno dageba gasi dwai pedelabo sę ilaibao. Te eno dageba boi bidi tagala palama, hwįagaselama, te dage ela mueibao. Ena Genuai Bidi, eno te po wai dao,” wali. \x * \xo 5:17 \xt Ped 6:8\x*   
\c 6  
\s1 Genuai Bidigo te tibo god wali pabo we bidi augwaliba wado ilali po  
\p
\v 1 Genuai Bidigo enabolo te tama po wai,  
\v 2 “Tǫde bidio, nago te Israel dabe augwaligo bulu du dabeba tonono eyu, te eno po augwaliba pusao.  
\v 3 Te Israel dabe augwaligo bulu du dabe, me odogo bulu dabeba te tama po wao, augwaligo te ena God Genuai Bidigo, eno augwaliba wainogo ebo po odiąo po wao. Eno te boi bidi dabe tagala palama, te Israel dabe augwaligo te tibo godiba lotu wagi pabo bulu du dabe dolaibao.  
\v 4-5 Te boi bidi dabe augwaligo te kibu dabe ofa ebo alta tigidali, me te wiegi yai denami ilibo ofa ebo alta me tigidali dolaibao. Tama augwaligo te Israel we bidi hauwa ela munama, te augwali tigi dabe te augwa te tibo god dabego piksa noma elalubo pąba sąsąwaibao. Tama te augwali dili dabe augwa te alta tǫde pąde wilalua paibao,” te po wai dao.  
\v 6 Agai po ma weyu, te po wai, “Te boi bidi dabe augwaligo te Israel tǫ kantri taun tigidali dolobadi, te tibo godiba lotu wabo pesage tigidali me dolaibao. Augwaligo te dagego alta tigidali dolama, te duga gedude meda yai mu elalueibao. Te augwaligo te dagego tibo godigo piksa noma dabe mu dola silama, te wiegi yai denami ebo pauda ulubo pesage dabe aluama, besela sąwaibao. Tama te Israel dabego yali dwai kolesaga tigidali te sia saibao,” po wali.  
\v 7 “Te boi bidi dabe te Israel tǫ kantri pedai tigidaliba pelama, te we bidi hauwa ela mueibao. Tama te gasa Israel dabego te tama tebo sę bugagia te tiwai koneyu, ena digi ena te Genuai Bidi dao po waibao,” wali.   
\p
\v 8 “Tiali goli, te boi bidi dabego te we bidi tigidali ela mumainogo me egobeo. Me badu we bidi bidalubadi, te eno gasa tǫ kantriba ela gudulama, tedela palaibao.  
\v 9 Augwali te digibulu bulude bidibo sogo augwaligo ena homu kone palaibao, tama augwa te tiwai koneaibao, te augwaligo tibo godiba gedu eyu, te wali pali kolesagago ena haliga sęgę mu ilama, tama ena augwaligo mu tagalalio. Tama augwa te yali dwai kugumini yai kolesagade hale dwai mu eyu, tama tiai sę yai dao.  
\v 10 Tama augwa te tiwai tama koneagasu, ena digi ena augwa Genuai Bidi bidibadi konesiąma iduai yabo po waibao. Tama augwa te tiwai koneama, eno megi e wabo bomai po, te olo po me ola tagalu wabe da homu yaibao,” te po walio.   
\p
\v 11 Tama God Genuai Bidigo te tama tiwai po enabolo ma walio, “Nogo hogwayu, te haliga sęgę ebo iliyu, te tiwai po wao, ‘Hobede mu ebao, te Israel augwaligo dwai kolesaga hauwa mu yalio,’ te po wao. Awe, augwaligo te tobage kolesaga ebaso, tama tiyu, te boi bidi dabe aselama, augwali ela muagasaibao. Tama te nasigo me gasigo augwali dolaibao.  
\v 12 Te tigidali isimainu yaibao. Te boi bidi dabego augwali ela muagasaibao. Tiali goli, te me badu digibulu bidali da, augwali te gasi selama isaibao. Te we bidi me badu bidalubadi yai baso da, te augwali me te nai mu sǫą pelama, te nasi elama isaibao. Te tebo kolesaga ebogo te eno haliga sębę yali mu usu naibao.  
\v 13 Te boi bidi dabego te Israel dabe augwaligo tigi te augwa tibo god dabe me te alta dabe pąba sąsąwaibao, tama te lotu wabo pesageba me, te bulu du dabe daide me, te tigidali genuai ni dabe dologoba me, te augwa tibo god dabeba te ofa dabe ula mabo pesage tigidaliba te augwali isasa pali bidi dabego tigi sąsą paibao. Te sogo te tigidali Israel dabego koneama, ena digi ena Genuai Bidi bidibao po waibao.  
\v 14 Awe, te eno augwaligo tǫ kantri pedai mu dolaibao. Te eno augwaligo tǫ pedai tigidali te olo bulu pesage tiwai pedalubo yaibao, te tǫ wa pai bulu Diplatde gagalaibao. Eno te Israel dabe bidibo bulu pesage deli me sula tagalogobeo. Menio. Te eno tigidali dolama, te tigidali olo bulu pesage naga elalueibao. Tialima, te we bidi tigidaligo bugagia koneama, ena digi ena Genuai Bidi mu bidibo yabo po omainu yai dao,” te po wai.   
\c 7  
\s1 Godigo te Israel dabe augwali silimainu yalio  
\p
\v 1 Genuai Bidigo enabolo te tiwai po wali,  
\v 2 “Tǫde bidio, ena God Genuai Bidi, eno te tiwai po Israel augwalide elalubao. Te e side da, te tigidali Israelgo bodolu sia sabo side elalubao, te augwaligo tǫ pedai tigidali badu te tama tiaibao.  
\v 3 Dage Israelgo, odiąo. Te dąį yali bodolu pedelalio. Eno haliga sębę dwai mu elalubo, te megi eno dwai dene dageba pedalubo sę ilaibao. Dagego te tama dwai kolesaga ebaso, tama tialima, megi eno dage po tų ilaibao. Te eno dagego dwai kugumini yai kolesaga dabe te dolo dageba wei ponaibao,” wai dao.  
\v 4 “Te eno dage bugagia bidimainu me sula tagalogobeo. Te eno dagede olo mu tau sabo wiegi yai kolesaga me egobeo. Menio. Dagego te dwai kolesaga dabe ebaso, tialima te eno dageba dwai dwai dene mabo sę yaibao. Tama dagego te tiwai bugagia konemainu ebao, te ena digi ena Genuai Bidi da waibao,” te po wali.   
\p
\v 5 God Genuai Bidigo te tiwai po wali, “Te gasa tobage dolobo sę mu dageba pedelaibao. Tama te dolobo sęgo te dage tigidali silabo sę pedelaibao.  
\v 6 Megi da, te dage dolabo bodolu side te pąba pedelalio. Te sogo pedalubo si da, te pąde mu tama pedelaibao.  
\v 7 Dage Israel tǫ kantri we bidi dabego odiąo. Te dage dolabo si te sabi badu pąba pedelalio, te dage dolaibao. Te dage te bulu du dabeba sisinama, te wiegi yai pemene eyu lotu wali tiwai ma egobeo. Menio. Te dage megi da sisinama wi umagia naga eyu, wabo pabo bidi tiwai yaibao,” walio.   
\p
\v 8 “Eno haliga sębę dwai mu dageba ebao, bidigo wę gelebo tiwai yaibao, tama tibaso megi da eno dageba te dwai tigi dene mabo sę te eno haliga sębę ebo usu nama yaibao. Dagego te dwai kolesaga ebaso, te dage eno po tų ilaibao. Eno te dagego dwai kugumini yai kolesaga ebo dolo wei ponaibao.  
\v 9 Te dage eno gogolama, bugagia bidimainu me sula tagalogobeo. Te eno olo mu tau mabo wiegi yai kolesaga dageba me egobeo. Menio. Dagego te tama dwai kolesaga ebaso, te eno dwai sęgę mabo dene dageba mawaibao. Tama dagego te tiwai bugagia konemai hagede ebao, ena digi ena Genuai Bidi, te eno tama eno te dwai sęgę mabo sę dageba tagala palobo dao,” te po wali.   
\p
\v 10 Tama Genuai Bidigo po enabolo ma weyu, te tama po wali, “Te dolabo genuai sę pedelabo bodolu pąba yagasalio. Sesemane sogo te Israel dabe augwa abagi dabe dali dwai sę idualio. Tama augwaligo te hagoma ebo kolesaga ebo sę bomo yai dao.  
\v 11 Tama augwaligo te dwai kolesaga genuai mu pedelai. Tialima, eno te augwali tigidali ela silaibao, te dwai kolesaga yali bage tigidali dolaibao. Te eno augwaligo nogi aiyaba elaluama, tama augwaligo gana pai nai dabe dolama, tama augwaligo te dwai kolesaga dabe ma egobeo,” wali.   
\p
\v 12 “Te dolabo sogo pąde yagasalio. Te sogo te nai doado bage abelebo bidi dabe augwaligo homu pemene me egio, te nai doado bage maketde mubo bidi dabego me haliga sęgę me elamuo, magi baso menio, eno te sęgę mabo sę te tigidali bageba yaibao.  
\v 13 Te bidi mego te gasa bidi me deligo agaba te nai me deli abelemainogo yali bidi, aga te sesabi elama, bobobage sogo bidali goli, te tagalao, agai te nai wei ma sainu ebo usu egobeo. Magi baso meni, eno te tiwai po wai dao, eno te tigidali bidi dolaibao, te eno po me hasegelegobeo. Tigidaligo dwai kolesaga ebaso, tialima tigidali te dolaibao.  
\v 14 Augwaligo te hwįabo sisi ebo biugel bu obaso, te tigidali ami bidi dabe sisi ebo da. Tiali goli, te bidi me deli hwįgi pogobeo, magi baso meni, eno te hani tigidaliba haliga sębę elama, te augwali eno wi dwai mu ilai dao,” te po walio.   
\s1 Godigo te Israel augwaliba te sęgę mabo sę yabo po wali  
\p
\v 15 Genuai Bidigo po ma weyu, te tiwai wali, “Boi bidi dabego te Jerusalem bagua salio. Te taun bulu badu bidali we bidi dabe augwali te boi bidi dabego bobobage hwągo ela mueibao. Te taun moni obo tomode bidali we bidi augwali da, te augwali nai menia selama, te haniani gasi selama, te augwali isaibao.  
\v 16 Te me badu usu yali da, te augwali bulu duba wi pelawaibao. Tama te tigidali wi pali we bidigo te augwa yali dwai kolesagade homu kone palama, te augwa haliga sęgę elama, dwai gela waibao, tama augwaligo gela wabo te odogo bulude bidibo ba dabego gela tiwai pedelaibao.  
\v 17 Te augwaligo nogo bomo kimi meniama, te augwaligo sągą didibili dogia paibao.  
\v 18 Tama augwa te homu dene ebo ugwa dabe gudama, te augwali didibili umagi mu yaibao. Tama te tigidali te hale ebaso, te augwa tobolu nisi poala sąwaibao.  
\v 19 Tama augwa te gol me silva dabe te olo nai pobele bage tiwai te sunumiba sąsąwaibao, magi baso meni, te Genuai Bidigo haliga sębę augwaliba pedalubo sogo te gol me silvago augwali tau sogobe homu yaibao. Augwaligo te gol me silva tuabo usu egobeo, tama me te gol me silvago te magi sę me delide augwali tau me sogobe homu yai. Augwaligo te gol me silva gedugo suali godolo ebaso, te kolesagade augwali kekebaso, te augwaligo dwai sę yali dao.  
\v 20 Polobadu augwaligo te gol me silvago nigali au dobage elalu, tama augwa te naide gana pai mu bidaluai dao. Tama augwaligo te gol me silva selama, tama te haniani tibo god dabe piksa noma nigali. Te kolesaga eno godolo homu mu meni baso, tama tialima megi da, eno te gol me silva dabe te augwa gedude dwai nai tiwai mu pedalumainu yai dao,” wali.   
\p
\v 21 Te Genuai Bidigo po te tiwai ma wali, “Eno te bidi dwai dabe mu hodolama, te augwaligo augwa tǫ kantri pedai tagalama asu, te Israel dabego nai doado bage wi saibao. Te augwaligo sela pelama, tede augwa dwai sę haniani yaibao.  
\v 22 Te augwali eno te wiegi yai genuai be tomoba pomainogo sula tagalama, tama eno gedude te be dwai meda pedalubo sę ilaibao. Te augwali eno me paligobeo. Mu menio,” wali.   
\p
\v 23 “Te Israel we bidi augwaligo subigila sę yali. Te augwa tǫ kantri tigidali pedai badu augwaligo te gasa we bidi dabeba dwai sę eyu, te hauwa we bidi ela muani. Tama tialima, te augwali kęnabo sen dabe nigibo sogo da po wai dao.  
\v 24 Tama tialima, eno Genuai Bidigo po odisąbo hani bidi dabe sesaibao, augwali te bidi dwai mu dabe, tama augwali te Israel tǫ kantriba aselama, te Israel dabe augwa be dabede sela sąnama, te be dabe saibao. Tama augwaligo te Israel dabego lotu wabo pesage dabe dolaibao. Te Israel bomai bidi dabe augwali te wi naga elama, te augwaligo hagoma me ma egobeo.  
\v 25 Te dwai sogo mu te Israel augwaliba asaibao. Te augwa haliga nagame elama bidabo homu godolo yaibao, tiali goli augwaligo te tiwai ebaso usu egobeo. Mu meni yaibao.  
\v 26 Te dolobo sę haniani augwaliba pedaludu geaibao, tama augwaliba te dwai nai dabe hauwa pedelabo po odu geaibao. Tialima, augwali wi ebaso, augwali te geme nosali pedelabo sę po pusubo bidi profet dabeba pelama, tama augwaliba hanalu te eno homude ebo yabo sę po hanilabo po koneai hagede yaibao, tiali goli te eno po augwaliba me magobeo. Te pris dabego augwali ola mabo po meni yaibao, te tobolu bidi dabe augwaligo te wiegi yai homu kolesaga augwaliba maiabo meni yaibao.  
\v 27 Tama augwa king da, te haliga sęgę elama, te aga homu kolesaga da te tigidali dolaibao. Tama te we bidi augwali da wi elama, noma saibao. Eno augwaligo ebo dwai kolesaga tigidalide homu kone palama, te eno augwaliba dwai sęgę mabo dene mawaibao. Te augwaligo gasa we bidi dabe po tų ilali kolesaga tiwaigo te eno augwali po tų ilaibao. Te tiwai augwaligo bugagia konemai hagede yaibao, ena digi ena Genuai Bidigo te sę yai dao,” te po obao.   
\c 8  
\s1 Israel augwaligo Godigo bede dwai kolesaga yali  
\p
\v 1 Te 6 wabo kibu bede da te Babilon tǫ kantride kalabus bidali sogo, te polua 6 wabo, te dei namba 5 wabo side, ena te ena bede dugulalu bididubadi, te Juda tobolu bidi dabe ena dali dugayagaselama bidali. Te da bidaludubadi, te God Genuai Bidigo bomo enaba asalio.  
\v 2 Te nade subo tiwai nai me deli eno ugaba tonono ebadi, tama te bidi tiwai naigo te ula isi dabo ula tiwai suali. Te aga tigi aiya badu te isi ula ebo tiwai yali. Te tigi ugaba te bras pedai augwaligo te meda hola sąwai gegemane yai ula tiwai yalio. \x * \xo 8:2 \xt Ese 1:27\x*  
\v 3 Eno te aga nogo tiwai suali, agai te nogo debelama te ena tobulu nisi tola selama, ugwaba kegai dao. Tama te nade subo tiwai yali nai dabe, te Godigo Mobo Bidigo ena ugwaba mu sagoasa holama, ena te Jerusalemba sela palio. Tama agai ena te Godigo beba odasa pali, tama ena te be bagulali obo te not badu elalubo sunumi tomode doligi pali. Te pesagede te Israel augwaligo te tibo god piksa noma dodolai elaluai, tama Godigo haliga sębę dwai mu te naide yai dao.   
\p
\v 4 Te da Israelgo Godigo genuai ula eno suali. Ena te wę Kebar pąde bidali sogo eno te suali tiwai tobage ula yalio. \x * \xo 8:4 \xt Ese 1:28\x*  
\v 5 Tama Godigo enabolo te tiwai po wali, “Tǫde bidio, nago te not badu pedaiba tonono bilao,” wali. Tialima, eno tonono bilibadi, tama eno te tibo god piksa noma suali, te sunumi pąde elalubo alta pąde dolalubo sualio. Tama Godigo haliga sębę dwai mu te dwai nai dali yai dao.   
\p
\v 6 Godigo enabolo te tiwai po walio, “Tǫde bidio, nago te Israel we bidi augwaligo dwai kolesaga ebo suao. Te tebo kolesagade augwaligo ena te eno bede ela gudulama, te ena augwalide digibulu bidabo sę ilibao. Te nosali nago augwaligo te gasa dwai kolesaga mu ebo sueibao, te nago megi subo dwai kolesaga te aiyaba mu elalueibao,” te po wai dao.   
\p
\v 7 Godigo po ola simanobo si da, teda agai ena selama, te Godigo be obo bagulali te bulu badu solama, tama agai ena te genuai sunumi oboba odasa pali. Tama agai enabolo te obode elaluali dedage me deli ola manio.  
\v 8 Godigo enabolo te tama po wali, “Tǫde bidio, nago te obo aluama, te dedage genuai pedalubo sę ilao.” Tialima, eno aluama suali, te sunumi me deli elalualio.  
\v 9 Godigo te tiwai po enabolo walio, “Nage te tomoba pelama, augwaligo te dwai kugumini yai kolesaga ebo suao,” te po wai.  
\v 10 Agai po ola siminibo si da, teda ena te be habu me deli tomoba pelama, te eno tonaludalio. Iya, eno te hasamani dabe piksa noma, me te God gedude meda yai gasa tobage hasa dabe augwali te obo tigidali habude pągąnalubo sualio. Tama te Israel dabego lotu wabo tibo god piksa noma dabe me elalubo suai dao.  
\v 11 Te Israel tobolu bidi dabe augwali te 70 bage te be habude bidibo suali, tama Jasania, te Safango ogwa, te augwali bidibo tomode aga deli bidali. Tigidaligo te wiegi yai denami ebo pauda ulubo plet pou tolalubadi, eno suali, te hano ugaba holali. Tama te bidi dabe augwaligo te piksa noma dabeba lotu udalio.  
\v 12 Te Godigo enabolo te tiwai po wali, “Suao,” wali. “Te Israel tobolu bidi dabe augwali geme dualalu, te dwai kolesaga ebao. Tigidali augwa te be daga habude te dwai piksa noma haniani elalubo madi aselama, augwa te lotu obao. Augwa po waibao, ‘Genuai Bidigo da me sugobeo. Menio. Agai dago tǫ kantri tagalalio, tama agai da homu kone me ebeo.’ Augwaligo tama po olama, tama augwa te dwai kolesaga yai dao,” wali.   
\p
\v 13 Te Genuai Bidigo enabolo te tama po ma wali, “Te megi nago subo augwaligo gasa dwai kolesaga mu eyu, te megi nago suali dwai kolesaga aiyaba elalueibao,” te tama po wai dao.  
\v 14 Tialima, agai ena selama, te Godigo be bagulali obo sunumi elalubo te not badu pali. Tama te we mebago augwa tibo god agai enabolo ola mawai, aga nogi Tamus, te isali homu elama, te augwa agade homu dene ebo gela walio.  
\v 15 Godigo enabolo te tiwai po wali, “Tǫde bidio, nago te suali, agawe? Tialima, megi da, nago suali te gasa dwai kolesaga dabe mu ebogo te nago megi suali dwai kolesaga aiyaba mu elalueibao,” wali.  
\v 16 Tialima, agai ena te aga be sunumi dolo pąba sela palio. Te pesagede, te alta me sunumi si tomode, te 25 bidi bidali. Augwaligo te be tudiba ilama, te giliga pedaluboba tonalualio. Te augwa bogoli sugunama, te gesabidi tǫba pǫgulama, te giliga geba lotu wabo sę eyu tama yalio.   
\p
\v 17 Tialima, Genuai Bidigo te tiwai po enabolo wali, “Tǫde bidio, nago te sę ebo suali da, agawe? Te Juda we bidi augwaligo te dwai kolesaga dabe mu eyu, te augwaligo te tigidali Israel habu badu gasa we bidi augwaliba boi ebo kolesaga ebao. Tibaso, eno augwaliba haliga sębę yali. Tiali goli, augwaligo te kolesaga olo nai da homu elama, te augwa dwai sę umabo sę elama mu ebao. Augwali eno be pąba aselama, te megi nago subo dwai kolesaga yali. Te bidi dabego ena te olo nai tiwai da homu elama, tama augwa te dwai kugumini yai kolesaga yalio. Tialima, odao. Augwaligo ebo dwai kolesagade eno haliga sębę dwai mu ebo dao.  
\v 18 Tibaso, eno augwaliba dwai dene umagia mabo sę eyu, te eno haliga sębę yaliba usu naibao. Te eno augwali bugagia bidimainu me sula tagalogobeo. Te eno olo mu tau sabo wiegi yai kolesaga te augwaliba me egobeo. Te eno augwali tau somainu i bomonama obadi goli, tialima eno te augwaligo gedu haluasa po wabo me odogobeo,” te po wai dao.   
\c 9  
\s1 Godigo Jerusalemba dwai dene mawai  
\p
\v 1 Godigo ena dali wali po silama da, agai bomonama i weyu, te tama wali, “Te taunde bidaluali we bidi dabe elibo sę yabo bidi dabe, dage asiąo. Te bainat hwą dabe dali sesao,” po wai.  
\v 2 Te polo mu tama, te not badu te Godigo be obo bagulali badu te bidi nogo a naga, me deli te tomoba asalio. Tigidaligo te bainat hwą, me te bidi elabo gasa nai dabe sela asali. Te gasa bidi me augwali dali asali. Aga te wiegi yai ugwa bea selama, tama aga dwasianu gamugi dage te kukulude kęą salio. Te asęabo doado bage te gamugi dage tomode elaluali. Te tigidali bidi aselama, augwaligo te brasgo nigali alta sai pąba dolagasalio.   
\p
\v 3 Tialima, te Israelgo Godigo genuai ulago te bidi tiwai me si me si nai tagalama, te ula hogodasa pelama, te Godigo be sunumi pąba palio. Tama Genuai Bidigo te wiegi yai ugwa elalubo bidi i olama,  
\v 4 tama agabolo te tama i walio, “Nage te Jerusalem taun pedai tigidaliba pelama, te augwa abagi dabego te taun tomode dwai kolesaga ebaso, te dwai haliga eyu, te moni homu ebo we bidi tigidalide nago te augwali gesabidide te dąį muna muna pao,” po walio. \x * \xo 9:4 \xt Ped 7:3; 9:4; 14:1\x*   
\p
\v 5 Tialima, eno odali, Godigo te bainat hwą tolalubo bidi a naga, me deli bageba te tama po wabo odali, “Dagego aga wali pelama, te tigidali we bidi ela muao. Dagego te me delide te olo tau mabo wiegi yai kolesaga eyu, me sula tagalama me bidimainu elamu dao.  
\v 6 Tigidali monu dabe ela muao, te tigidali gesi ogwa bidi me, gesi wegi ogwa we me ela mubadi yao, te ida dabe, te wai puluba me, tigidali mu elao. Tiali goli, dagego te eno augwali gesabidide dąį ilali bidi ma we me deli, te munu me elamuo. Te eno bede bidibo bidi dabe augwali bolo hasia ela muao,” wali. Tama tialima, augwaligo te sę gagalama, hasia augwaligo te Godigo be pąde bidibo tobolu bidi dabe ela muai dao.  
\v 7 Tama Godigo te nogo a naga me deli te bidi dabebolo te tama po wali, “Te eno be bagulali obo tomode bidibo bidi tigidali ela muao,” po wali. “Te tama tibaso da, eno be ena gedude meda yai mu pedelaibao. Te sę silama da, teda dage te taunde bilaluama, te tigidali we bidi ela muao. Ae, dagego sę iyąo,” te po wali.  
\p Tialima, augwali pelawalio.  
\v 8 Tama augwaligo te we bidi elala pali sogo, ena deli naga te Godigo be pąde bidai. Te eno kidu sugunama, te eno gesabidi tǫba pogulama, te eno i te tiwai wali, “God Genuai Bidio, nago te Jerusalem we bidi augwaliba wado po genuai mu ebao, bidigo wę gelebo tiwai ebao. Te tiwai homu ebaso, tama te Israelde bidalubo we bidi tigidali silaiba homu eyu eba, agawe?”  
\v 9 Tama Godigo te tiwai po wei ponani, “Te Israel me Juda we bidi dabe augwaligo dwai sę hauwa mu elama, te augwaligo yali sę page genuai mu elalubao. Augwaligo tǫ kantri te eno augwali tagalali da homu elama, te eno augwali homu kone munu ma ebe homu eyu, te augwali eno sube homu yali. Tama tiyu, augwa te dwai kolesaga hauwa mu ebaso, te Jerusalem we bidi ela mubadi, te gasa tǫ kantri pedai bage me tigidali ela muai dao.  
\v 10 Tama tibaso, eno augwalide te homu dene elama tau sabo kolesaga eyu, te eno augwali me deli gogola sula me tagalogobeo. Menio. Te augwaligo gasa bidi dabe augwaliba yali dwai kolesaga tiwai te eno augwaliba me yaibao,” te po wai dao.  
\v 11 Genuai Bidigo po ola silibo si da, teda eno suali, te wiegi yai nami ugwa elalubo bidi ma aselama, te Genuai Bidiba te tiwai po wali, “Eno te nago enabolo mani sę siminani dao,” te po wai dao.   
\c 10  
\s1 Te Godigo genuai ulago te Godigo be taga soali  
\p
\v 1 Tama eno te dagalu ugwadu tede te genuai dąį tiwai nai ma suali, tama te bidi tiwali nai me si me si te dąį dologode elalubo eno suali. Tama te ugwadu dąįgo ugwadu daide eno te bidi dugulalubo nai sia king me deli augwaligo te sisi dagalu masigi te gasa sawi yai mugo nigai sualio. \x * \xo 10:1 \xt Ese 1:26; Ped 4:2\x*  
\v 2 Tama Godigo te wiegi yai nami ugwa bea sali bidibolo te tiwai po walali, “Nage te bidi tiwai nai me si me sigo elalubo te wil me si me si tomodu pelama, nago nogo sigo te sia meba selama, nage pelama, te taunba sąsą biligi pao,” wali. \x * \xo 10:2 \xt Ped 8:5\x*  
\p Godigo wali po silibaso da, teda eno suali, te bidi te me si me si nai dabe dologo badu palio.  
\v 3 Augwali te saut badu te Godigo bede dolaluali. Tama te genuai haowa me deligo te Godigo be bagulali obo pedai badu tigidali mesega selama, elaluai dao.  
\v 4 Tialima, Godigo genuai ulago te me si me si bidi tiwai nai taga soyu, te be sunumi pąba dolagasalio. Tama Godigo te genuai ulago te be bagulali obo tigidali una selama, te ula umabo mu elaluai dao.  
\v 5 Te bidi tiwai nai dabego bogo dabego pala pala wabo bomo yali, te genuai obo badu bidali we bidi augwaligo te augwali odobo usu yalio. Tama te pala pala wali, te Tigidali Bomo Elalubo Godigo i wabo tiwai yalio.   
\p
\v 6 Tama Godigo te wiegi yai nami ugwa bea sali elalubo bidiba te tama po waliyu, te pelama, isi meba sigi pao wali sogo da, teda te bidi pelama, te wil tiwai nai me deli pąba doligi palio.  
\v 7 Te me si me si wali bidi tiwai nai dabe me deligo te augwali tomode elalubo isiba nogo munama, agai te isi meba selama, te bidigo nogo siba muanio. Tama te bidigo te isi selama, palio.  
\v 8 Eno te me si me si nai dabe suali, te bidi nogo ąbo tiwai te augwa bogo dologode elaluai suai dao.  
\v 9 Tama eno suali, te me si me si nai dabe pąde te wil deli delide elalua palio. Tama te me si me si wil dabede te ula umabo te sęwa yai tedali sawi yai masigide tama elalubo suai dao.  
\v 10 Tigidali deli deli wil te deli tigi poai elalu, te gasa tomode me elalubo wilgo te gasaba me tononaluali.  
\v 11 Tibaso, te tigidali wil te tigidali pedai iba peyu, eda asu yali. Te bidi tiwai me si me si nai te menaba pabo homu yali da, teda augwali te peyu naga yalio, te augwali begeleyu me ebeo.  
\v 12 Te bidi tiwai me si me si nai dabego tigi, me tudi, me nogo, me bogo dabe, te tigidali te augwa wil dabego me, te tonobo gedu hauwa elaluali. \x * \xo 10:12 \xt Ped 4:8\x*  
\v 13 Augwaligo te wil dabe nogi te tiwai polali eno odali, “Te bebege ebo wil dabe da,” po walio. \x * \xo 10:13 \xt Ese 1:15-21\x*   
\p
\v 14 Te tigidali me si me si nai deli deligo te me si me si gesabidi tobage elaluali. Te polalubo gesabidi te ensel me deli gesabidi tiwai yali, te si wali te bidigo gesabidi tiwai elaluali. Te sela wali te hasa laiongo gesabidi tiwai, te me si me si wali gesabidi te ba kemodagego gesabidi tiwai yai dao. \x * \xo 10:14 \xt Ese 1:10; Ped 4:7\x*  
\v 15 Eno te megi suali me si me si nai dabe augwali, te me si me si nai dabe polobadu eno te wę Kebar pąde suali. Augwali hogodasa pabo sogo,  
\v 16-17 te wil dabe augwa dali palio. Te me si me si nai olo dolalubo si da, te wil dabe me olo dolalueibao. Te me si me si nai ugaba bola holobo sogo da, te wil dabe me augwa dali ugaba paibao, magi baso meni, te me si me si nai dabego te wil dabe tonalubo dao.   
\p
\v 18 Tialima, te Godigo genuai ulago te Godigo be sunumi tagalama, te ma geasa pelama, te bidi tiwai me si me si nai daide ugadu bidalio.  
\v 19 Eno tonalubadi, te me si me si nai dabe augwa bogo diniginama, te ugaba bola holali. Te me si me si wil augwa dali palio. Augwali te giliga pedalubo badu te Godigo be bagulali obo sunumi pąba dolalugi pali. Te Godigo genuai ula augwali daide ugadu elalualio.  
\v 20 Eno koneani, eno te nai dabe suali, tialima augwali te Israelgo God dologode te ąį Kebar pąde bidali. Te megi da, eno koneanio, te nai dabe augwali te Godigo mobo ensel tobage me deli dao.   
\p
\v 21 Tigidali deli deli mobo enselgo gesabidi me si me si elalu, bogo me si me si elalualio. Te nai me deli te bidigo nogo ąbo tiwai te augwa bogo dologo deli delide elaluai.  
\v 22 Ena te ąį Kebar pąde bidali sogo polobadu eno te mobo bidi ensel dabe suali. Te eno megi ma suali, te augwali polobadu elaluali gesabidi tiwai yalio. Te me si me si mobo bidi ensel dabe te augwali me badu deli painu ebo sogo, augwali peyu naga yaibao. Augwa tigi begeleyu me egobeo.   
\c 11  
\s1 Te Israel dabe augwali yali sę pagede te augwali dolaibao  
\p
\v 1 Te tudi badu nosali da, te Godigo Mobo Noma Bidigo ena ugaba sagoa selama, tama ena te sia asobo badu te Godigo be bagulali obo sunumiba odasa pali. Tama eno suali, te 25 bidi te sunumi pąde bidali. Eno augwali sulama, eno koneani, te bidi dabe bidibo tomode te bidi si te Israel augwaligo polalubo bidi bidali bidi si da. Augwali si nogi da te Jasania, te Asurgo ogwa, me te Pelatia, te Benaiago ogwa dao.   
\p
\v 2 Tama Godigo te tiwai po enabolo wali, “Tǫde bidio, te bidi dabe augwaligo dwai kolesaga yabo sunumi nigabo homu ebao. Tama augwaligo te we bidi dabeba te geda muai mobo mabo po mabo dao.  
\v 3 Augwaligo te tiwai po wabo dao, ‘Da te wiegi yai we bidi da, tialima dago te be dabe sęnama, te dena e taunde bugagia dugulalu, te wiegi yai kibu mi sene tomode elalubo tiwai yalio.’ Augwaligo te tama po wabo dao.  
\v 4 Tialima, tǫde bidio, nago te tama po wao, augwali te wiegi yai we bidi dabe meni, tibaso te augwali dolaibao,” wali.   
\p
\v 5 Genuai Bidigo Mobo Noma Bidi enaba bomonama pedelali, tama Genuai Bidigo enabolo te po manio, “Dage Israel we bidi dabe, eno te dagego mobo mabo po wabo odali. Me eno dagego te elalubo homude te dagego yabo sę tigidali koneai dao.  
\v 6 Dagego te taunde we bidi hauwa ela muani, te augwaligo tigi dabe te sunumi tigidalide pągąna sai dao,” wali.   
\p
\v 7 “Tama tibaso, ena God Genuai Bidi, eno dageba te tiwai po obao. Mu tama, te e taun te sene me deli tiwai da, tiali goli dage te wiegi yai kibu mi tiwai elalubeo. Menio. Te wiegi yai mi da, te dagego ela muai we bidi dabe tama dao. Tama dage da, te eno dage te taun bulu badu ela gudulaibao.  
\v 8 Eno koneani, dage te boi bidi dabede, me te bainat hwąde dali wi ebao. Tialima, ena God Genuai Bidigo, eno po dolo dageba obao, eno te augwaligo dage elagasomainogo tagala palaibao,” wali.  
\v 9 “Te eno dage te taun buluba sela pelama, tama dage te gasa tǫ kantri bidi dabego nogoba menama, te augwaligo dage dolaibao. Te tama kolesagade eno te dwai dene dagebolo mawaibao.  
\v 10 Te augwaligo dage te duga tǫ dąįde digi ela mueibao. Te tiwai ebaso, dagego koneama, ena digi ena Genuai Bidi omainu tiaibao.  
\v 11 Dage te senede elalubo wiegi yai kibu mi tiwai elalubeo. Menio. Te eno dage ela gudulama, tama dage te duga tǫ dąįde digi ela muaibao,” po wali.  
\v 12 “Eno te tama tiwai ebo dagego bugagia konemainu ebao, ena digi ena Genuai Bidi da. Dagego te yali kolesagago te hania hanilai dao, dagego ena me konebeo. Dagego eno bomai po bolama, te eno po dagego wali me pabeo. Dagego te gasa tǫ kantri dabe augwaligo bomai po dologoba pelama, te augwali dologode naga dage bidibao,” wali.   
\p
\v 13 Eno Godigo te po pusubo sę ebadi, tama eno te polalubo bidi Pelatia isibo suali. Tialima, eno kidu sugunama, te tǫba gesabidi pǫgulama, tama eno i te tama po wali, “God Genuai Bidio, magi yaliwe? Nago homugo te Israel bidi tigidali silaiba homu eyu eba, agawe?” Eno te po hanalu wali.   
\s1 Godigo bomai po dąų olama, te Israel dabe augwa tǫ kantriba ma odasa paibao wali  
\p
\v 14 Genuai Bidigo enabolo te tiwai po wali,  
\v 15 “Tǫde bidio, te Jerusalemde bidalubo Israel dabego te nagede me, te nago we wai dabede homu koneama, te bulude kalabus bidibo gasa Israel dabe augwalide te homu eyu, augwaligo te tiwai po wali, ‘Genuai Bidigo augwali ela gudulama, tama augwali te digibulu buluba pelama, bidigi palio. Genuai Bidi augwali dali me bidibeo. Menio. Agai e tǫ dabolo mawai.’ Te Jerusalemde me bidibo bage augwaligo te tiwai po wali,  
\v 16 tialima, nago augwaliba te tiwai po walao,” walio, “‘Ena Genuai Bidigo, ena digi eno te dagego abagi dabe te gasa tǫ kantriba besela palali. Mu tama, te pęwadage sogo augwali kalabuside bidali, te enaba dolo augwaligo lotu wabo be meni yai. Tialima, ena digi ena augwali dali bidali, tialima augwaligo enaba lotu udubo usu igi dao,’ nago te po augwalibolo pusao,” wali.   
\p
\v 17 “Tǫde bidio, nago eno po te nage dali kalabuside bidibo abagi dabe augwaliba pusao. Ena God Genuai Bidi, eno te dage tedela palama bidibo tǫ pedai kantride bidalubo te eno ma selama, te eno dage te duga tǫ kantriba ma odasa aselama, tama te tǫ kantri pedai dugaba ma mawaibao.  
\v 18 Te dage ma asobo sogo, teda dagego te tibo god tigidali sela sąbadi, te tǫde elaluali dwai kugumini yai gasa nai tigidali sela sąyagameo.  
\v 19 Tama eno gesi homu kolesaga me gesi homu dageba mawaibao. Polobadu dagego tobolu te masigi dila pai tiwai elaluali. Te elalubo homu kolesaga eno sela sąnama, te eno gesi wiegi yai homu kolesaga dageba mawaibao. Tama eyu, dagego enade te homu si ma egobeo, te duga homugo enaba kęą peyu bidaibao.  
\v 20 Tialima, dagego te eno bomai po, me eno po dali te dagego bugagia wali paibao. Tama dage eno we bidi hani dabe dolo mu pedelebaso da, teda ena dagego God bidaibao. \x * \xo 11:20 \xt Ese 36:26-28\x*  
\v 21 Tiali goli, eno te dwai dene mabo sę ebo kolesaga te tibo godiba lotu olama, te dwai kugumini ebo kolesaga wali pabo we bidi augwaliba te tama sę yaibao. Ena God Genuai Bidi, eno te po wai dao,” wali.   
\s1 Godigo genuai ulago te Jerusalem taga palio  
\p
\v 22 Te tudi badu nosali, te bidi tiwai me si me si nai dabe te bola pabo gagalali, te wil dabe augwa dali palio. Te Israelgo Godigo genuai ula augwalide ugadu elaluai dao.  
\v 23 Tialima, Godigo ulago te Jerusalem taun tagalama, te bulu du elalubo badu te giliga asobo badu te bulu duba pai. \x * \xo 11:23 \xt Ese 43:2-5\x*  
\v 24 Tialima, te nade ebo sę tiwai nai te Godigo Mobo Noma Bidigo ena ugaba sagoa selama, tama ena odasa, te Israel dabe kalabus bidibo pesage te bulu Babilonba ma sela asali. Tama te na silalio.  
\v 25 Tama te tigidali sę Genuai Bidigo enabolo ola mani po tigidali te eno augwaliba pusai dao, Esekielgo te po walio.   
\c 12  
\s1 Esekielgo te bidi kalabus igi pabo sę ebo kolesaga yali  
\p
\v 1 Genuai Bidigo enabolo te tama po wali,  
\v 2 “Tǫde bidio, te abagi dabe augwali megi nage dali bidibo bage, augwali te hagoma elama, po sela sąbo bidi dabe da. Augwaligo gedu elalubadi, tiali goli te augwaligo bugagia me tonogobeo. Augwaligo olo elalubadi digi, tiali digi augwa bugagia me odobeo, magi baso meni, augwali te hagoma elama, po sela sąbo bidi dabe bidibaso tebo dao. \x * \xo 12:2 \xt Ais 6:9-10; Jer 5:21; Mak 8:18\x*  
\v 3 Tialima, megi da, tǫde bidio, nago doado bage sisi ilama, te bidi aga bidali page bulu tagalama, te digibulu buluba kalabus igibu pabo tiwai yao. Te nage be hulia sisąbadi pabo gagalama pobaso, te tigidali we bidigo nage sueibao. Eno homugo nago te sę ebo page te augwaligo konemainu ebao. Tialima, augwali te hagoma ebo bidi dabe da, tama augwaligo te sę ebo page konegobe, eno te homu ebo dao.  
\v 4-6 Te giliga nanalubadi te nago doado bage dodolao, te tiwai ebaso augwaligo nage sueibao, augwaligo tononalubadi, teda nago te naga be paialide dedage dogolama, tama te dedagedu te naga doado bage selasa buluba teda soao. Te be pio mu ebadi, te nago doado bage te nagede tolasa te bidibo pesage tagalao, te nage digibuluba kalabus painu ebo tiwai yao. Tama nago ebo sę dabe te we bidi augwaligo sumainu yao. Nage pabo sogo da, naga gesabidi mesega selama, te nago sunumi susąbo tiwai yao. Nago te tama tebo sę dabe ebogo, te we bidi augwaligo homu hodolobo sę ebo dao,” wali.   
\p
\v 7 Genuai Bidigo po ola simini baso da, teda eno agai enabolo te po wali tiwai sę yali. Te siade eno doado bage dodolali, tama te be pio mu ebo side te eno be paialide te dedage dogali. Eno te nai me deli tolalu te dedage dogobeo. Menio. Eno nogogo naga sę yali. Tialima, ena te dogali dedagedu buluba dįą soalio. Tama te be huliainu ebo sogo, eno ena doado bage selama, te nąba munama, tolasa palio. Tama te we bidi augwaligo eno tama tebo suai dao.   
\p
\v 8 Te kigamu Genuai Bidigo enabolo te tiwai po walali,  
\v 9 “Tǫde bidio, te hagoma ebo Israel we bidi augwaligo nagebolo nago te yali sę po page nageba me hanaluba, agawe?  
\v 10 Tialima, nago te God Genuai Bidigo po augwaliba mao. Eno te kingba dali, te Jerusalemde bidalubo we bidi dabeba pedelabo sę po elalubao.  
\v 11 Nago te nage dali bidalubo we bidi dabe augwaliba te tama po walao. Nago te tiali sę page te Jerusalem dabeba pedelabo piksa begelama, ela mabo sę yali. Boi bidi dabe te Jerusalemba pelama, te augwali selama, te augwali gasa tǫ kantriba odasa pelama, te kalabus bidi dabe pedelabo sę tiwai page ola mani dao.  
\v 12 Tama te hulide te Juda king bidi aga doado bage dabe selama, wi paibao. Tama te bidi dabego te taun bagulali obo badu te king bidi te taundu buluba dįą soabo obo dedage dogaibao. Te aga gesabidi mesega selama, te aga pabo sunumi naga sulama paibao.” Te po wai dao.  
\v 13 “Tiali goli, eno ba bono gaga kekelama, tama king tego tola saibao. Tialima, eno aga te Babilon taunba sela paibao, tiali goli agai e bulu gesabidi me sugobeo. Aga te Babilonde bididubadi aga isibo sogoba usu naibao. \x * \xo 12:13 \xt 2 Kin 25:7; Jer 52:11\x*  
\v 14 Te eno aga dali bidali bidi tigidali ela gudulama, te augwali tedela paibao, te aga ami polalubo ofisa dabe, me aga tonaluali ami bidi dabe me, te aga gasa ami bidi dabe me. Eno te boi bidi dabe tagala palama, te augwali pobeasa pelama, te augwali ela muna muna pelawaibao,” po wai dao.   
\p
\v 15-16 “Tialima, te hwįbogo me, nasigo me, gasigo me, te Juda tigidali me isila siminigobeo. Menio. Te eno dwasianu hani bidimainu sula tagalama, te augwali eno gasa tǫ kantriba tagala palaibao. Augwa te tiwai tama konemainu yaibao, ena digi ena Genuai Bidi da. Tama te Juda dabego augwa te yali dwai kolesaga po te gasa hani dabeba po mimi paibao. Tama me, te eno tama augwaliba te dwai dene mani po te gasa hani augwaliba pusaibao. Te hani augwaligo me odama, te tiwai augwaligo me bugagia koneama, ena digi ena te Genuai Bidi da omainao,” wali.   
\s1 Esekiel midigi yai  
\p
\v 17 Tialima, nosali Genuai Bidigo enabolo te tama po walali,  
\v 18 “Tǫde bidio, nage te nai tuyu, ąį tuyu ebo sogo nage midigi yao, tama nago te nage wi dwai mu ebo tiwai mu yao.  
\v 19 Te nago naga abagi dabeba te tiwai po walao, ena God Genuai Bidi, eno te Jerusalemde bidalubo we bidi dabe augwalide pedelabo sę po obao. Te we bidi augwaligo te augwa abagi dabeba sesemane sogo dwai sę ebao. Tama tialima, te dwai sę ebo bidi dabe augwali te nai me wę tubo sę ebadi, te augwali wi dwai mu elama, midigi saibao, magi baso meni, te boi bidi dabego hwįagaselama, te augwaligo doado bage tigidali te tǫ kantride elalubo da selama saibao.  
\v 20 Tama augwaligo te taun dabe mu dolama, te tǫ kantri olo pesage tiwai pedelaibao. Te tebo sogo te Israel dabego te tiwai koneama, ena digi ena Genuai Bidi da, augwa te po waibao,” wali.   
\s1 Te sesabi isąbadi, te pąde sogo te profetgo po mu pedelaibao  
\p
\v 21 Genuai Bidigo enabolo te tama po wali,  
\v 22 “Tǫde bidio, te Israel dabego sesemane sogo wabo po me deli elalubao wali. Te po e tiwai da, ‘Te profet dabego te po weyu, te nai dabe pedelaibao wali. Tialima, te kibu be hauwa palima, te dago subo augwaligo te wali po mu po menio, geda mubao,’ wali. Tialima, eno te Israel dabego wabo po eno godolo me egobeo.  
\v 23 Megi nago God Genuai Bidi, eno po augwaliba mao. Te eno augwaligo te wabo po tigidali tagalomainu elama, augwaligo te tama po ma omainu me egobeo. Nago te po hasegeleyu, augwaliba te gesi po me deli mao. Gesi po e tiwai wali, ‘Te profet dabego po weyu, te nai dabe pedelabo po wali. Te megi da, augwaligo po mu pedelaibao,’ wai dao.”   
\p
\v 24 “Megi da, te Israelde bidalubo profet dabe augwaligo te nade subo tiwai wabo te tibo po obao, te augwaligo we bidi tibo po ola mabo po pusubao. Tialima, eno te kolesaga ebo mu siminaibao,” te po wai.  
\v 25 “Te ena God Genuai Bidi, ena digi eno te Israel dabeba te po menama, tama eno te po wali sę dabe polo tama pedelaibao. Dage hagoma ebo bidigo, odiąo. Te dage bidibo sogo, eno te sę dabe yaibao. Ena God Genuai Bidi, eno te po wai dao,” wali.   
\p
\v 26 Te Genuai Bidigo enabolo te tama po ma wali,  
\v 27 “Tode bidio, te Israel dabego te tama po wai, ‘Esekielgo te nade subo nai tiwai sulama, tama agai te nai dabe pedelabo po pusali. Tialima, agai te po wali nai dabe, augwali te me pedalubeo. Menio. Augwali te nosali mu pedelai dao.’ Augwaligo te po wai.  
\v 28 Tialima, ena God Genuai Bidi, eno te Israel dabe augwaligo po te tiwai wei ponaibao,” wali, “‘Te eno ma tonalubo sę me egobeo. Eno dageba te po wali nai augwali megi naga eno te sę yaibao.’ Ena God Genuai Bidigo, eno te po wai dao,” wali.   
\c 13  
\s1 Godigo tibo profet dabe augwaliba wado po wali  
\p
\v 1 Genuai Bidigo enabolo te tiwai po wali,  
\v 2 “Tǫde bidio, nago te Israelgo profet dabe wado ilao. Te profet augwaligo te nosali nai dabe pedelabo po obao. Tiali goli, augwaligo tibo po obao. Te po augwa homude nigilama wali. Nago augwaliba te po walama, te augwaligo ena Genuai Bidi eno poba naga olo bugagia muao wao.  
\v 3 Ena God Genuai Bidi, eno te po obao. Te wabo pabo po wabo tiwai ebo profet dabe te dolaibao. Augwaligo te nade subo nai tiwai me sugobeo. Menio. Augwaligo te pusubo po dabe, te augwa homude digi augwaligo nigilama, pusai dao.  
\v 4 Dage Israel dabego odiąo. Dagego te profet dabe te uni yowi dabe te dolali taun me delide bilalu wabo po tiwai po obao wali.  
\v 5 Augwaligo te taun bagulali obo alula pai elalubo te bugagia tonalusiąma, tama te obo ma nigibo sę egobeo. Tialima, ena Genuai Bidi, eno dwai dene maiabo sę dageba pedalubo sogo, tama eno te boi bidi dabe tagala palobo sogo da, teda dage Israel te boi hwįbode bomonama me dolalugobeo.” Te po wai.  
\v 6 “Te profet dabe augwaligo ną ebo mu menio, te nai dabe pedelaibao po augwaligo obaso da, te tibo naga waibao. Augwaligo te tama po weyu, ‘Dago te Genuai Bidigo po pusubao,’ wali. Tiali goli, eno augwaliba te po me mabeo. Tialima, magi elama augwaligo te homu eyu, te augwaligo po mu pedalugowe homu yaliwe?”   
\p
\v 7 “Megi eno te tiwai po dage profet dabeba obao, dagego te po weyu, dagego te nade subo nai tiwai suali po olama, tama dagego te nai dabe pedelaiba po obao. Tialima, dagego te wabo mu po me wabeo. Te tibo po naga obao. Dagego te we bidi augwaliba te tiwai po waliyu, ‘Te e po da, Genuai Bidigo po obao,’ wali, tialima ena God, eno po me deli dageba me mabeo.  
\v 8 Tama tibaso, megi ena God Genuai Bidi eno dage profetba te tama po obao, dagego te we bidi augwaliba tibo po ola mobaso, te eno dageba wabo po ebo homu genuai elalubao.  
\v 9 Megi da, te we bidi augwaliba tibo po ola mabo profet dabe dageba eno dwai dene mabo sę yaibao. Te eno we bidi dabe augwali deliba sisinibo sogo, dage augwali dali me bidigobeo. Tama dagego nogi te tigidali Israel we bidigo nogi elalubo bukude me elalugobeo. Eno dage ela gudulama, tama dage te Israel tǫ kantri pedaiba ma begasa asogobeo. Te tiwai ebo dagego bugagia koneama, ena digi ena God Genuai Bidi da po waibao,” wali.   
\p
\v 10 “Dage eno we bidi dabe tibo po ola mani tibo profet bidi dabe da. Dagego te tama po augwaliba walali, ‘Tigidali nai bugagia elalubao.’ Tiali goli, te tama me telalubeo. Tigidali nai bugagia me elalubeo. Te eno we bidi augwaligo dwai sę eyu, te augwaligo bomo meni yai obo te masigigo nigai tiwai yali. Te nosali dage profet dabe aselayu, dagego augwalibolo te ‘Dagego dwai sę yali,’ te po wasiąwai dao. Tede dagego te tedela yai pen te dwai obode pilama, tama te obo tonobo gasa sawi yai ebaso, te augwaliba dagego tama po walali, te obo boma pai elalubao wali. \x * \xo 13:10 \xt Jer 6:14; 8:11\x*  
\v 11 Tialima, megi eno dage profet dabeba te tama po walobao, te obo da, alua paibao. Eno te genuai tulubage tagala palama, te ais talua ge tulubage te oboba tulama, te bomai waligo te obo degelebaso,  
\v 12 tama te obo toga pelama, tulalueibao. Tama tigidali we bidigo dageba te tama po waibao, ‘Te dila pai obo da, agawe? Mu menio. Dagego te tedela yai pen pilaligo naga da tibo po ola mani dao,’ te we bidi dabego te po waibao,” wali.   
\p
\v 13 “Tama tibaso, ena God Genuai Bidi, eno te tama po obao. Eno haliga sębę dwai mu elama, eno te genuai tulubage, me te talua ge ais tulubage, me bomai wali tagala palama, te obo dolomainu yaibao.  
\v 14 Tama eno te dage profet bagego te obode pilali pen tigidali aluama, dolaibao. Tama te obo dolaluali madi te pesage olo elalueibao. Te obo alubo sogo, te dageba degasa dulama, te dage tigidali ela mueibao. Tama dage tigidaligo te tama tebo sę ebo te bugagia konemainu yali, ena digi ena Genuai Bidi dao,” wali.   
\p
\v 15 “Dage Israel we bidi dabeba eno haliga sębę dwai mu ebao, tama eno te obo dolama, tama te obode pen pilali profet dabeba dwai dene mawaibao. Tebogo te eno haliga sębę usu naibao. Tialima, eno te tama po dageba walobao, te obo dolali, tama te pen pilali profet dabe, augwali me dolaibao.  
\v 16 Te profet dabego te Jerusalemba te tama po wali, tigidali nai bugagia elalubao, te megi te boi pibo sogo dao, te po walio. Tialima, te sogo te tigidali nai bugagia me elalugobeo. Tibaso, eno augwali dolaibao. Ena God Genuai Bidigo, eno te po wai dao,” wali.   
\s1 Godigo te pobi po wabo we dabe augwaliba wado ilibo po wai  
\p
\v 17 Genuai Bidigo te tama po wali, “Tǫde bidio, nago te Israel we dabeba wado ilao, augwaligo te nosali pedelabo nai dabede po obao. Magi baso meni, te po da, augwa homude digi koliasa wabo dao.  
\v 18 Ena God Genuai Bidi, eno po te we dabede elalubao. Eno po te tiwai, ‘Dage we dwai dabe, te dage dolaibao. Dagego te yesi bubo sęgo te nogo mo ebo tiwai elama, te we augwali nogoba mubao. Tama dagego te yesi bubo ugwa hobolama, te augwali toboluba mubao. Augwaligo te nai dabe mubo te gasa we bidi augwali tonaluabo bomo somainu ebo dao. Dage we dabego dugade digi naga homu koneama, tama dagego we bidi dolobo dao. Dagego homugo te wiegi yai kolesaga da homu eba, agawe?’ te po wao,” wali.   
\p
\v 19 “Dagego tibo po weyu, te we bidi augwaliba waliyu, dago te Godigo po pusubao po wali. Tiali goli, menio. Dagego eno nogi aiyaba elaluyu ebao. Dagego yesi bubo sę ebo kolesagade te we bidi meba ela muyu, te meba tau sobao. Te bidi meba eno homugo augwali isigobe da homu yali, te bidi dabe dagego ela mubao. Te eno homugo meba isimaina homu yali bidi dabe, te dagego augwali tau sobaso, te augwali bugagia bidali. Tama te we bidi augwaligo dagego te tama tebo kolesaga godolo ebao. Augwaligo dage te bret delagego abelebaso, me te dwasianu sasabi rais baligo abelebo si da, tama te kolesaga dagego yai dao,” wali.   
\p
\v 20 “Tama tibaso, ena God Genuai Bidi, eno te po obao, dagego te we bidi augwali tonaluabo te yesi bubo mobo nigibo sę ebo dabe te eno homugo hagela elama, godolo me ebeo. Dagego te sę tonaluabo we bidi dabe gegebao, te bulu tomode te bidi dabego ba gegebo tiwai ebao. Te dagego nogode eno te mo dabe todoga sąnama, dagego te yesi bubo kolesaga me egobeo. Tama dagego te tonaluali we bidi dabe, augwali te dage dologode munu me bidigobeo.  
\v 21 Tama te yesi bubo ugwa dabe dagego tobolude kęąlubo, te tigidali eno peda sąwaibao. Te dagego bomo eno we bidide elaluali tagalomainu elama da, te dagego augwali tonalubo sę munu ma egobeo. Tama dagego te tiwai sę ebo bugagia koneama, ena digi ena Genuai Bidi da po waiyąo,” wali.   
\p
\v 22 “Dagego te tibo po hauwa weyu, te dagego wiegi yai bidi dabego homu kolesaga dolobao. Tama dagego te dwai bidi dabe tau sobaso, te augwaligo dwai kolesaga ebo me tagalobeo. Te augwaligo dwai kolesaga tagalobaso da, teda augwali bugagia bidigi dao.  
\v 23 Tama tibaso, dagego te we bidi augwali tibo po ola mabo po te tiwai weyu, dagego te nąde subo tiwai nai suali po me wagobeo. Eno te ena we bidi dabe augwali dagego nogode ma selama, tama augwali te dagego bomo dologode munu ma bidigobeo. Tama dagego te tiwai tama bugagia koneama, ena digi ena Genuai Bidi da po omainu ebao,” te po wai.   
\c 14  
\s1 Godigo te tibo god dabeba lotu wabo bidi dabe godolo homu me egobeo  
\p
\v 1 Te Israel tobolu bidi dabe mebago te homu sęgę me deli elaluali. Tibaso, augwali ena pąba duayagaselama, enabolo hanalu, te Genuai Bidigo mena homu elalubo, te hania koneainu yai dao.  
\v 2 Tialima, Genuai Bidigo enabolo te tama po wali,  
\v 3 “Tǫde bidio, te bidi dabe augwaligo te tibo god dabeba sesemane homu kone elama, te augwaligo sęgę genuai pedelali. Tialima, augwaligo te tibo god dabe homu godola pelama, te augwali tagalabo homu me ebeo. Tialima, augwali odolali naga asali. Eno augwaligo hanalubo po wei me ponogobeo,” te po wali.   
\p
\v 4 “Augwaligo te kolesaga ebaso, megi nago ena God Genuai Bidigo e po te tobolu bidi augwaliba mao. Te Israel bidi me deligo te tibo god dabeba naga homu kone elama, tama agai te sęgę page elalubo kolesaga tagalobo homu isąbadi, te aga profet me deliba aselama, te eno homu kolesaga koneainu enaba hanalu wagasobaso da, teda eno po agade elalubao. Te agai tibo god hauwaba lotu wabo eno homugo te koneama, te eno homu kolesaga mu te agaba ola mawaibao,” po wai dao.  
\v 5 “Te Israel dabe augwaligo eno homu kolesaga mu konebo si da, augwaligo te tibo god dabeba homu konebo homu ebo tagalama, te augwaligo ena deliba naga homu konealuaibao. Augwaligo tama timainu eno megi e po obao.”   
\p
\v 6 “Tama tialima, eno homugo nago te Israel dabe augwaliba te tama po walao. Ena God, Genuai Bidi, eno dagego te tibo god dabe wali pabo te eno hagela homu mu ebao. Tialima, dagego ge neyu, te dwai nai dabe tagalama, tama dage enaba ma begasa asiąo,” wali.   
\p
\v 7 “Te dage Israel bidi me deligo, ma te dage dali bidagasali gasa tǫ kantri bidi me deligo me, agai ena tudiba munama, te tibo god dabeba naga homu kone elama, tama aga sęgę sali sę page tagalabo homu isąbadi, te nosali aga pelama, te profet me deliba eno homu kolesaga koneainu hanalugi pobaso da, teda ena Genuai Bidigo eno homu kolesaga mu ola mawaibao,” po wali.  
\v 8 “Te eno agade boi bidi elama, te eno hani we bidide aga ela gudulaibao. Tama dage Israelgo eno te sę agaba ebo sulama, tama dagego te po waibao, ‘Genuai Bidigo te tiwai sę aga tudiba mubo bidi daba yalio.’ Eno te tiwai sę ebo si da, teda dagego te tiwai bugagia koneaibao, ena digi ena Genuai Bidi da po waibao” wali.   
\p
\v 9 “Te tobage bidi me deligo te profet homu bega sabo po obaso, te profetgo po me deli agaba pusa mawai baso da, teda te sę page e tiwai, ena digi eno te profet bidigo homu kone tuą palobaso, agai te po pusubao. Tama te profet bidibolo eno dwai dene menama, te eno hani we bidide aga ela gudulaibao,” te tiwai po wali.  
\v 10 “Eno te deli tigi poąi dwai dene mabo sę te profetba eyu, te profetba pali bidiba me te tiwai dene mabo dwai sę yaibao,” te po wai dao.  
\v 11 “Eno te tama tiwai sę ebogo te dage Israelgo sunumi palibao, te dagego ena tudiba munu me musiąma, te dagego sęgę sabo sę me isąma, tama dage eno gedude meda yai me pedalugobeo. Te dage eno we bidi dolo pedelama, te ena dagego God bidaibao. Ena God Genuai Bidigo eno te po wai dao,” wali.   
\s1 Godigo tigidali deli deli bidigo dwai sęgę sabo subo dao  
\p
\v 12 Genuai Bidigo enabolo te tama po wali,  
\v 13 “Tǫde bidio, te tǫ kantri me deli we bidi dabego te sęgę selama, te augwaligo haliga enaba mu musiąbaso da, teda eno te tǫ kantriba dwai dene mayu, te eno augwali nai sǫą pabo sę mu ilaibao. Te eno tigidali we bidi dabe, me te hasa sibi te nasi dwai mu ebo sę ilama, te augwali isaibao.  
\v 14 Te Noa, me Danel, me Jop, te wiegi yai bidi sela te tǫ kantride bidigi sogo da, te tagalao, eno te sela bidide homu kone elama te dwai sę ebo we bidi augwaliba eno olo tau mabo wiegi yai kolesaga me igi menio. Menio. Te doloba pai bidi sela naga bugagia bidimainu eno sula tagalaibao, tama te we bidi augwali da isimainao homu igi dao. Ena God Genuai Bidigo eno te tama po wai dao.” \f + \fr 14:14 \ft Te Noago po te buku Gag Dąį 6-9 tede elalubao, te Jopgo po te Jop aga bukude elalubao. Te Baibel bukude te bidi Danelgo yali sę po dabe asęani me elalubeo.\f*   
\p
\v 15 “Ma, eno te bulu uni hasa dabe te tǫ kantriba tagala palama, te we bidi dabe augwali ela mumainu yaibao. Tama te badu pabo homu yali bidi meni yaibao,” te po wai.  
\v 16 “Tama te Noa, me Danel, me Jop te tǫ kantride bidigi sogo da, te tagalao, eno te sela bidide homu kone palama te olo mu tau mabo wiegi yai kolesaga te dwai sę ebo we bidi dabeba me egobeo. Te bidi selago augwa wai dabe digi tau me sigi menigi dao. Menio. Eno te sela bidi naga sula tagalama, bugagia bidaibao, te we bidi augwali da, isimainao. Tama te tǫ da, olo bulu pesage elalu, te genuai dulu bulu elalueibao. Ena God Genuai Bidi, ena te sesemane sogo bidada paibao, tama eno te po da mu po wabo dao,” wali.   
\p
\v 17 “Ma, eno boi bidi dabe te tǫ kantriba hwįgi pomainu tagala palama, tama augwaligo te we bidi dabe mu ela siminama, te hasa dali elaiba,” wai dao.  
\v 18 “Tama te Noa, me Danel, me Jop te tǫ kantride bidibadi goli, tagalao, te augwali selago augwa wai dabe digi tau me sogobeo. Eno te bidi sela naga bugagia bidimainu sula tagalu, te we bidi augwali da isaibao. Ena God Genuai Bidi, ena da sesemane sogo bidada paibao, tama eno te wabo da mu dao,” te po wai.   
\p
\v 19 “Ma, eno te dwai gasi te tǫ kantriba tagala palama, te eno haliga sębę yali usu nainu, te we bidi dabe me, te bulu hasa dabe dali elabo homu ebao.  
\v 20 Tialima, tagala, te Noa me Danel me Jop te tǫ kantride bidibadi, te bidi selago augwa wai dabe digi tau me sogobeo. Menio. Te wiegi yai bidi sela naga bugagia bidimainu yaibao. Ena God Genuai Bidi, ena sesemane sogo bidibao, tama eno te wabo po te mu po dao.”   
\p
\v 21 “Tialima, ena God Genuai Bidi, eno tama po obao. Eno te tobage dwai nai me si me si tigidali te Jerusalemba tagala palama, te Jerusalemba dwai dene mabo sę elama, te augwali mu dolomainu ilaibao. Te boi bidi dabe eno augwaliba hwįgi pomainu tagala palama, te eno augwali nai sǫą palobo sę mu ilama, tama eno te bulu uni hasa dabego augwali elemainu tagala palaibao, tama eno te dwai gasi augwaliba tagala palaibao. Te tama tebo kolesagade eno te we bidi dabe augwali me, te hasa dabe dali, ela silaibao,” te po wai dao. \x * \xo 14:21 \xt Ped 6:8\x*  
\v 22 “Tialima, te sogo te dolisąwani Jerusalem bage meba, te boi bidi dabego augwali te dage bidibo buluba odasa asaibao. Tama augwali dage dali bidibo sogo, te dagego augwaligo dwai kolesaga ebo bugagia osola suao. Te dagego augwalide hobede me egobeo. Menio. Te dagego koneama, te Jerusalem augwaligo kolesaga dwai mu ebaso, te eno augwali dolai yabo, te homu dagego yaibao,” wai dao.  
\v 23 “Dagego te tiwai tama koneama, eno odolali augwali me dolobeo. Menio. Te eno augwalide yali sę page mu elalubao. Ena God Genuai Bidi, eno te po wai dao,” wali.   
\c 15  
\s1 Godigo te ni wainde po begelama wali  
\p
\v 1 Genuai Bidigo enabolo te tama po wali,  
\v 2 “Tǫde bidio, te wain bono ni wiegi yai me elalusiąwai, te gasa ni dabe tiwai ebeo.  
\v 3 Te bidigo te wain bono ni delage selama, te magi nai me deli nigainu ebaso, usu egobeo. Awe, te wa walabo bonomai nigibo te usu egobeo.  
\v 4 Te sia naga nogąbo wiegi yai yaibao. Te isigo te wain ni deli te si dali badu delama, te aga tomo badu dwasianu isi dali da, teda dego mu te nai me deli nigibaso usu yaibawe?  
\v 5 Te isigo disąbadi, te ni wain dwai elaluali. Te isigo dabo si da, te ni dwai mu pedelai dao,” wali.   
\p
\v 6 “Tialima, ena God Genuai Bidi, eno tama po obao. Te wain ni da, te gasa buside elalubo ni dabe wiegi yai tiwai elalubeo. Tama tialima, eno aga te isi sabo homu naga elama, sa muai. Tama eno e tobage deli tigi poai tiwai kolesaga te Jerusalem taun we bidi augwaliba yai dao.  
\v 7 Eno augwaliba boi bidi elama, dwai dene mawaibao. Mu tama, te hasia siago augwali ulusiąwani, tiali goli megi gasa isi dabogo te augwali mu ulaibao. Te eno augwaliba dwai dene mena silama da, tialima nage dali, te Israel nage dali bidibo bage, te dagego te tiwai bugagia koneaibao, ena digi ena Genuai Bidi dao.  
\v 8 Te Jerusalem dabe augwaligo enaba haliga mu mubeo, tibaso eno augwaligo tǫ te olo pesage tiwai pedalumainu yaibao. Ena God Genuai Bidi, eno te po wai dao,” wali.   
\c 16  
\s1 Jerusalem te bidigo sai wego bidi tagalobo tiwai ebao  
\p
\v 1 Genuai Bidigo enabolo te tama po ma walio,  
\v 2 “Tǫde bidio, nago te Jerusalem dabeba po dolo weyu, te augwaligo dwai kolesaga haniani augwa digi ebaso, te po augwaliba bugagia walao.  
\v 3 Eno po da e tiwai, Jerusalem, ena God Genuai Bidigo, eno po nagede elalubao. Nage te we me deli tiwai. Nago aya ida te dwai kolesaga wali pabo hani dabedu asali. Nago aya te Amor hani dabe da, tama nago ida te Hit hani dabe da. Tama naga nage te Kenan tǫde ame nai dao.  
\v 4 Te idago nage ame nani sogo augwaligo nage mosogobe togobeo. Te augwaligo nage ąį telabe, ma nago tigide tamu mubeo. Te nage augwaligo ugwa namego belama mubeo.  
\v 5 Te mena bidi me deligo nagede dwasianu hobede elama, te tama sę dabe nagede me ebeo. Nage pedelali sogo, augwaligo nage godolo isąma, augwaligo nage te kala dasuba sąwai dao.”   
\p
\v 6 “Tialima, te ena asu, eno nage suali. Eno suali, te kanemego nage mesegasa elaludu, te nage uga begelu, eda begelu iduali. Eno homugo nage isidali te homu elama, te eno tama po wali, ‘Nage bugagia bidali da,  
\v 7 te genuai pedelama, te sawi wiegi yai plaua tiwai yao.’ Tialima, nage genuai pedelama, te boma pai elalu, te nage gasa wiegi yai sawi yai wegi pedelalio. Te nage ame elama, aguli nisi holai. Tiali digi nage habu olo bidai dao,” wali.   
\p
\v 8 “Tialima, te sogo ena ma aselama, tama eno nage te bidigo sabo usu yai elalubo suali. Tialima, eno nageba dilapi holobo ugwa saket bulama, te nage tigi mesegelali. Te ena God Genuai Bidi, te eno bomai po nage dali olama, te eno nage sabo po dąų olama, te nage eno we pedelai dao.”   
\p
\v 9 “Eno ąį selama, te nage tigide elalubo kaneme ąį telawali. Tama eno nago tigiba te oliv wel muani.  
\v 10 Tama eno nage te gasa sawi yai te haniani au dogia pai ugwa augwaligo hobigo au yai ugwago te eno nage au ilalio. Tama eno nage te wiegi yai su te nadoba dabe mawai. Tama eno nage toboluba te wiegi yai ugwa nami muani. Tama eno nagebolo te gasa sawi yai dila pai holobo ugwa saket me deli mawai dao  
\v 11 Tama eno te tobage wiegi yai au dobage dabe nagebolo mawai. Eno nagebolo te nogode holabo nogo mo dabe mayu, te magede domabo beli dabe me mawai dao.  
\v 12 Tama eno nage te gunide me olode walabo ring mani, tama wiegi yai sawi yai tobolu madi, te kwin wego madi tiwai mawai dao.  
\v 13 Tama nago au yabo gol me silva hauwa elaluali. Tama nago te wiegi yai sawi yai ugwa dabe augwaligo te hobigo hobolama nigali ugwago nageba au ilama muani. Tama augwa te wiegi yai plaua mugo nigai bret eno nage mawai. Tama eno nage te pusu ebo bunu ge hani me te oliv ni du mani. Te nai dabe nago tuali. Tama nage te gasa sawi wiegi yai mu pedelama, nage te nogi yai we kwin pedelai dao.  
\v 14 Tama te tigidali bulu tǫ pedai we bidi augwaligo te tama po odali, nage te gasa sawi yai we deli mu pedelali. Nage polalubo we mu da, magi baso meni, ena God Genuai Bidigo, eno nage au ilai dao.”   
\p
\v 15 “Tialima, nage sawi yai mu da, nago te tama homu yali. Tigidali bidigo nage godolo yai. Tialima, nage hagoma eyu, nago pemene elama, te nageba asali tigidali bidi dali pagela piali dao.  
\v 16 Te nago naga ugwa dabe meba selama, tama nago te tibo godiba lotu wabo pesage dabe au ilalio. Te kolesagade nago te bidi dabego homu bega selama, tama augwali nage dali te pesage dabeba piagasali. Te tobage kolesaga dwai mu yai dao.  
\v 17 Eno naga au yao olama mani te silva me gol nago te selama, tama nago te bidi piksa noma dabe nigilama, tama nago augwali dali penani sę ebo kolesaga ebao wali.  
\v 18 Tama te au hauwa dogia pai elalubo ugwa name nago te selama, tama nago te piksa noma dabe au ilali. Tama nago te oliv wel me, te wiegi yai denami ebo hano ilibo pauda me sali, te nage eno mani, tama nago te piksa noma dabeba ofa yai dao.  
\v 19 Eno te wiegi yai nai nage mani, te wiegi yai plaua mu tiwai, te oliv wel me, te pusu nai bunu ge hani me mani. Tialima, nago te nai dabe da selama, tama te tibo god dabe piksa nomaba ofa ilali, te augwali homu bega sabo sę yali. Tama Jerusalem nago te kolesaga ela pidu, me ela pai dao.”   
\p
\v 20 “Nago te wai dabe ame nani, tiali goli nosali nago te ena God Genuai Bidi eno te wai dabe selama, te nago augwali ela munama, te tibo god dabeba ofa yalio. Nago koneao, nago penani ebo kolesaga te wiegi yai me ebeo. Tialima, te kolesaga usu meni da, nago te homu elama,  
\v 21 tama nage te we dwai mu pedelabo homu yali. Tialima, nago eno wai dabe ela munama, tama augwali te tibo god dabeba ofa tiwai yali dao.  
\v 22 Nago te penani sę ebo kolesaga me, te dwai kugumini yai kolesaga wali peyu ebao, tama nage te dwasianu wai bǫųde elalubadi, te nageba pedelali sęgę po, te eno nageba mani po nago homu kone palisąwani. Te sogo nage te habu olo mu elalu, te kanemego nage mesega sai elaludu, te nage tǫde bulude uga bebege, eda bebege iduai dao.” Genuai Bidigo te po wai.   
\s1 Jerusalem penani we mu tiwai pedelali  
\p
\v 23 Genuai Bidigo po te tama ma wali, “Ena God Genuai Bidigo, eno te tiwai po nageba walobao, nage mu dolaibao. Nago te dwai sę tigidali yaligo da,  
\v 24 teda nosali nage te tigidali sunumidu pelama, te tibo god dabeba lotu wabo pesage dabe me te penani ebo kolesaga yabo pesage dabe nigaibao po wai dao.  
\v 25 Nago homugo nage sawi yai we da homu elama, tama te bidi me deli te sunumidu asobo nago subaso da, teda nago aga i olama, nage dali piagasali. Tama nago penani ebo kolesaga umabogia mu pedaludu geai dao.  
\v 26 Isip dabe, te augwali pąde bidali bidi dabe, augwali te haliga hogodalubo bidi dabe mu da, tama nago augwali nage dali pagela piagasomainu yalio. Nago ena hagela sębę ilibo sę eyu, te nago penani sę yali kolesaga te umabogia mu ela palio.”   
\p
\v 27 “Tialima, polobadu eno dwai dene nageba menama, te eno nageba mani wiegi yai nai hauwa sela sąwani. Tama te Filistia dabego nageba dwai sę yagasomainu eno nage sula tagalai. Augwaligo nage homu godolo mu isąma, tama nago dwai kolesaga tigidali ebaso, te augwaligo nagede haliga dwai yalio,” wali.   
\p
\v 28 “Te bidi dabe nage dali piagasali, te augwaligo nago godolo ebo homuba usu nusiąbaso, tama nago penani sę ebo kolesaga te Asiria bidi dabe dali yali. Tialima, augwaligo me nago godolo ebo homuba me usu nubeo homu yali.  
\v 29 Tibaso, nage te Babilon bidi dabego penani we pedelali, te augwali mone sabo bisnis sę ebo bidi dabe da. Tiali digi, augwaligo me te nago wei ebo homuba me usu nubeo.”   
\p
\v 30 “Tialima, ena God Genuai Bidigo, eno po nagede elaluali. Nago naga te homu godolo ebo wali pidu, tama nage te hale menisąbo we me deli tiwai pedelai dao.  
\v 31 Te tigidali sunumide nago te tibo god dabeba lotu wabo pesage nigiyu, te penani ebo kolesaga ebao. Tialima, nage da, te gasa penani we dabego ebo kolesaga tiwai ebeo. Menio. Nago te kolesaga ebadi, tiali goli nago augwaligo te sabo mone tiwai me sabo homu ebeo.  
\v 32 Nage da, te tiwai we me deligo aga bidi tagalama, te gasa bidi dabeba penani igi pabo we tiwai ebo dao.  
\v 33 Tigidali penani ebo wego mone saibao. Tialima, nago me tebeo. Nago te tigidali badu bidiba te wiegi yai homu ilibo nai tiwai mayu, te nage dali piagasomainu homu bega sabo sę ebo dao.  
\v 34 Nage gasagi yai tedali penani we mu da. Te bidi me deligo nage homu bega sabo sę ebaso, nage te penani we pedalubeo. Tama nago te mone me siyu ebeo. Menio. Nago mone augwaliba mobao. Awe, nage tedali gasagi yai mu dao,” te po wai.   
\s1 Godigo Jerusalemba dwai dene mabo sę ilaibao wali  
\p
\v 35-36 Genuai Bidigo po ma weyu, te tama po wali, “Jerusalem, nage penani we da, ena God Genuai Bidigo po odao. Nago naga ugwa dabe pepeda sąnama, tama naga digi naga tigi te godolo ebo tigidali bidiba mobao. Tama nago te kugumini ebo kolesaga wali peyu, te tibo god dabeba lotu obao. Te nago naga wai dabe ela munama, te tibo god dabeba ofa tiwai mabo dao.  
\v 37 Tialima, eno te nago godolo yali abagi augwali me, nago godolo isąwani me tagalao, te tigidali eno deliba sisinaibao. Te eno augwali odasa aselama, te augwaligo nage bagua sagasaibao. Tialima, eno nago ugwa peda sąnama, te nage habu olo elalubo augwaligo sueibao.  
\v 38 Nago te penani kolesaga ebo we tiwai bidiyu, tama nago te we bidi meba ela muani. Tama tibaso, eno nago yali dwai sę dagalama, tama tede sębę posolo mu eyu, nage dolo mu wei ponoyu, dwai dene mawaibao.  
\v 39 Naga te abagi dabego nageba dwai sę ilibo eno sula tagalaibao. Tama augwaligo nago te tibo godiba lotu weyu, te aga dali penani kolesaga ebo pesage dabe aluaibao. Te augwaligo nago ugwa dabe, me beli, me ring te au dobage pepeda sąnama, te nage habu olo elaluaibao.”   
\p
\v 40 “Te abagi dabego te we bidi dabe homu hodolobaso, te augwaligo nageba masigi sąyagaselama, tama augwaligo te bainat hwą selama, te nago tigi dwasianu denegene mimiaibao.  
\v 41 Tama te abagi dabego nago be dabe isi ulaibao. Tama te we hauwago nageba te ebo sę augwaligo sueibao. Nago te dwai kolesaga ebo eno mu silimai hagede ebaso, tama nago te bidi dabe nage dali piagasomainu homu bega sabo sę me egobeo.  
\v 42 Tialima, te tama tebo kolesagade te eno wado genuai ebo po me eno haliga sębę ebo silaibao. Te ena dua digi bidaibao. Te eno nageba wado po me haliga dwai munu ma egobeo, te po wai dao.  
\v 43 Te nage gesi wegi elalubo sogo eno wiegi yai sę nagebolo yali. Tialima, te nago homu kone gegeda palama, nago te tobage dwai kolesaga dabe ebao. Tibaso, eno wado po nagebolo wali, te ena God Genuai Bidi, te eno nago dwai sę tigidali wei ponoyu, te nageba dwai dene mu ilaibao. Nago dwai kolesaga hauwa yalio. Magi baso nago te penani yabo homu kolesaga me elalubo dawe?” te po wai.   
\s1 Wegigo te idago kolesaga wali paibao po wali  
\p
\v 44 Genuai Bidigo po te tiwai ma wali, “Jerusalem, nosali te we bidi dabe augwaligo nage sulama, te tama po waibao, ‘Wegigo te aga idago kolesaga wali pabo dao,’ waibao.  
\v 45 Mu tamao, nago kolesaga te naga idago, me naga ama dabego kolesaga tiwai tobage ebao. Augwaligo augwa bidi dabe me, augwa wai puluba dabe dali homu godolo me isąwai. Nago ida te Hit hani we me deli da, nago aya te Amor hani bidi dao,” wali.   
\p
\v 46 “Te Samaria taun te not badu elaluali, te nago ama genuai we me deli tiwai da. Te aga pagede elaluali bulu dabe augwali te aga wegi dabe tiwai yali. Tama te taun Sodom polobadu te saut badu elaluali, te nago abe gesi ogwa bidi tiwai da. Tama te aga pąde elaluali bulu dabe te aga wegi dabe tiwai dao.  
\v 47 Polobadu te wegi ama nami sigo dwai kolesaga mu yali, tama nago augwali sigo te kolesaga wali pali. Tiali goli, tego nago godolo ebo homuba usu nubeo. Menio. Te sesabi menisąbadi, te pąde sogo te nago kolesaga te dwai mu umagi elama, tama te wegi ama nami sigo yali dwai kolesaga aiyaba elaluai dao.”   
\p
\v 48 “Ena God Genuai Bidi, ena sesemane sogo bidaibao, eno te tama tiwai po dolo dageba obao. Nago ama Sodom, te aga wai dabe dali, augwaligo te nago naga wai dabego dali ebo kolesaga tiwai me ebeo.  
\v 49 Aga te aga wai dabe dali augwaligo te nai hauwa elalubaso, te augwa bugagia dugulalu te me hwįbeo, tibaso augwali te hagoma elama, te augwaligo nai sǫą pali bidi dabe bugagia tonalubeo.  
\v 50 Augwali te hagoma elama, te augwaligo tobolu te masigi dila pai tiwai elalu, tama augwaligo te eno godolo menisąbo sę yali. Eno augwaligo te kolesaga ebo sulama, te eno augwali dolai dao,” wali.   
\p
\v 51 “Samariago me te nago ebo kolesaga tiwai te dwai sę hauwa me ebeo. Te nago dwai kugumini yai kolesaga mu ebogo te nago ama dabego ebo dwai kolesaga te aiyaba elalubao. Eno te dage selago dwai kolesaga ebo subao, te tonobo nago kolesaga naga te dwai mu ebaso, tama naga ama dabego dwai kolesaga da, te olo bage tiwai ebao.  
\v 52 Nage hale umagi mu yao, magi baso meni, te eno nago kolesaga dali, te naga ama sigo kolesaga me dagalobo sogo, eno suali, nago kolesaga te dwai mu eyu, te nago ama dabe augwali te sęgę meni yai we dabe tiwai pedelali. Tialima, megi da, naga te hale ebo kolesaga yali sęgęde te sęgę tolobaso, te nage dwai haliga yagameo,” wali.   
\s1 Godigo wiegi yai sę te Sodom dali Samaria siba yaibao  
\p
\v 53 Genuai Bidigo po ma weyu, te tiwai po wali, “Jerusalem, megi da, Sodom me Samaria te augwa si wai dabe dali dolali elaluai. Tialima, eno naga te ama si tau selama, te augwali si bugagia bidaibao. Te nage eno dolaibao, tiali goli nosali nage me eno tau selama, te augwali dali bugagia bidaibao.  
\v 54 Tama naga te yali dwai kolesaga dabede nage hale ebo sę yaibao. Te ama sigo nage sulama, tama augwali sigo te homu elama, augwaligo sęgę te genuai ebe homu yaibao, te po waibao.  
\v 55 Te eno augwali talu si tau selama, te augwa polobadu bidali tiwai bugagia ma bidaibao, te nage naga wai dabe dali, dage bugagia bidaibao.  
\v 56 Te nage eno dolisąwani sogo, nago hagoma elama, nage te wiegi yai we da homu yai, tama nago Sodom te we dwai mu da homu yai dao.  
\v 57 Tialima, megi da, nago dwai kolesaga te hanilama, hania pedelai. Tama te gasa hani we bidi augwaligo nage gisugu mani, te nago Sodom gisugu mani tiwai yali. Te Siria me Filistia we dabego, me te nage pąde bidali gasa hani dabego, augwaligo te nage magi nai meni yai we da augwa te homu eyu, te augwaligo posobo po nage dolo wai dao.  
\v 58 Te tama kolesagade ena Genuai Bidigo te eno naga te penani ebo kolesaga, me te tobage gasa dwai kolesaga ebo sęgę te naga tolomainu yai dao,” po wali.   
\s1 Te Godigo gesi dąų wali bomai po te sesemane sogo elalua pidu, elalua paibao wali  
\p
\v 59 Genuai Bidigo po ma weyu, te tama po wali, “Jerusalem, ena God Genuai Bidi, eno nageba maiabo gasa po me elalubao. Te nage gesi ogwa bidi bidali sogo, te eno nage dali dąų wali bomai po wali paibao po wai. Tiali, nago te dąų wali po olo nai da homu elama, te nago bolalio. Tialima, eno nago te yali dwai kolesaga wei dolo ponani.  
\v 60 Tialima, eno digi nago te bolali bomai po dąų wali te eno homu kone me gegeda palogobeo. Tialima, eno gesi bomai po nage dali dąų walama, tama te dąų wali gesi bomai po te sesemane elalua paibao,” wali.  
\v 61 “Tama eno te we ama nani si te nageba ma asobo sę ilaibao, tama eno augwali si te naga wegi si dolo tiwai pedelaibao. Mu tamao, eno te yainogo ebo kolesaga te dąų wali bomai pode elalubeo, tiali te ena digi homugo yaibao. Eno te tama tebo sogo, te nago naga yali dwai kolesaga haniani te homu kone paligisu, te nage hale umagi mu yai dao,” po wai.  
\v 62 “Eno te gesi bomai po nage dali dąų walobaso, te nago te tiwai bugagia koneaibao, ena digi ena Genuai Bidi da po waibao.  
\v 63 Tama eno nago te yali dwai kolesaga dabe sela sąnama, tama tede homu kone ma palogobeo. Tiali digi, te nago te nago yali dwai kolesagade ma kone paliyu, hale dwai mu ebaso, te nago po me deli wagobeo. Ena God Genuai Bidi, eno te po wai dao.”   
\c 17  
\s1 Te bono me delide, me te ba kemodage side Genuai Bidigo po digi po begelama wali  
\p
\v 1 Genuai Bidigo enabolo te tama po wali,  
\v 2 “Tǫde bidio, eno homugo te po me deli begelama, te nago te Israel dabeba po digi po pusumainu homu ebao,” wali.  
\v 3 “Ena God Genuai Bidigo po te augwaliba mao. Te moni dobo dwai ba kemodage me deli bidali, aga boma pai bogo da, te bobobage mu elama, te aga nisi da, te dodobolo pai hauwa elalu, te sawi yai mu da. Aga te Lebanon bulu du dabeba bola pelama, tama agai te dwagi yai ni sida tobolu bubu me deli toga sigi palio.  
\v 4 Tialima, agai te ni tobolu te mone sabo bisnis sę ebo bidi dabego bulu tǫ kantriba tolasa pelama, tama agai te magi nai dobu si ebo bidi dabego taun me deliba buligi pai dao.  
\v 5 Tama aga te tǫ kantri Israelba bola pelama, te hogodo nai me deli sigi palio. Tama agai te nai wai te tǫ ili hauwa elalubo digi bulali. Tama te badu te ni genuai holabo ąį mabo wę hauwa elaluai.  
\v 6 Tialima, te nai genuai bono pedelama, te aga nologo tigidali te bobobage mu pedelali. Te ni nologo tigidali te ba kemodage bidibo pesageba gealu tononaluai. Te aga pedali dabe te tǫ tomoba mu dulalio. Tama te bono nologo me yabe hauwa elaluai dao,” wali.   
\p
\v 7 “Tiali goli, te gasa moni dobo dwai ba kemodage me bidali. Agai me te boma pai bogo bobobage elalu, te nisi hauwa elaluali. Megi da, te bonogo aga te bidali tǫ hagela mu ebaso, te aga pedali dabe me nologo dabe te gasa ba kemodage bidibo badu begeligi soabo sę ilali. Te bonogo te gasa ba kemodagego aga ąį hauwa mawaiba homu yalio.  
\v 8 Tialima, te bono hasia elaluali tǫ da, te wiegi yai mu da. Te ąį me ili hauwa elalubo tǫde da, te bono wiegi yai holama, te nologo hauwa pedelama, te ni du hauwa walama, te polalubo ni mu pedalumainu eyu, te hasia ba kemodagego aga tede bulai dao.”   
\p
\v 9 “Tialima, ena God Genuai Bidi, eno hanalubo po me deli te tiwai elalubao, te bono bugagia elalu, te genuai pedalubo da, agawe? Menio. Te hasia ba kemodagego wado ebo homu elama, te bono pedali dali gudulama, agai te du dabe sela sąnama, te gesi pedalubo honu dabe te siago boga sabo sę ilaibao. Bomo meni yai bidigo, ma dwasianu hanigo naga, augwaligo gudubaso, usu yaibao. Tama tialima, te bomai ba kemodagego te gudubo sę dene me egobeo,” wai.  
\v 10 “Te bono wiegi yai tǫde elaluali, tiali goli aga bugagia elalu, te genuai holabo usu ebeo. Te posola pai wali te sia ge asobo badu asama, te bono aiyaba elalubaso, tama te bono aga elaluali pesagede sasia paibao,” te po walio.   
\s1 Te begelali po page e dao  
\p
\v 11 Te Genuai Bidigo po enabolo te tiwai ma wali,  
\v 12 “Te po sela sąnama, hagoma ebo bidi dabeba hanalu wao, augwaligo te po page koneaniwe, ma meniwe? Te po page e tiwai da. Babilon king te Jerusalemba aselama, tama agai te Juda king dali, te ami ofisa bidi dabe dali selama, te Babilonba kalabus sela pai dao. Aga da te hasia asali ba kemodage tiwai dao.  
\v 13 Aga te tǫ kantri Judade bidali sogo, te Babilon kingo te dąų walobo po me deli te Juda king aga hani bage me deli dali te po dąų wali. Agai tama po wali, te bidi Juda gesi king bidi pedalumainao wai. Te Juda king da, te bono tiwai dao. Agai te gesi kingba bomai po dąų waliyu, aga te aga dologode bidaibao wali. Te Babilon king aga tǫ kantriba ma pali sogo, agai te Juda dabe genuai polalubo bidi dabe aga dali sela pai dao.  
\v 14 Te Babilon king bidigo tama po wali, te gesi kingo te dąų wali bomai po wali pisąma, te aga tǫ kantri bomai ma pedalubo sę elama, te Babilon dali ma boi hwįainu ebaso da, teda Babilon kingo te genuai bidi dabe dolaibao.  
\v 15 Tialima, te Juda kingo agai dąų walali bomai po wali pabeo. Agai te Isipba po ola tolama, te hos dabe me te genuai ami bidi hani dabe aselama, aga tau sagasao wali. Te Isip king bidi da, te si wabo ba kemodage tiwai dao. Tialima, te king aga bugagia bidaiba homu elama yali da, agawe? Menio. Agai te Babilon kingo po sela sąbaso, tialima te Babilon king aselama, te agabolo dwai dene mawaibao,” wali. \x * \xo 17:15 \xt 2 Kin 24:15-20; 2 Sto 36:10-13\x*   
\p
\v 16 “Ena God Genuai Bidi, ena sesemane sogo bidibo da, eno po dolo tama obao, te Juda king da, Babilon tǫ kantriba kalabus igi pelama, tede bidibadi, aga isaibao,” wali. “Te page te tiwai elalubao. Te Babilon kingo aga te king pedelao obaso pedelali, tialima agai te dąų wali bomai pode hagela homu eyu, te po sela sąyu, te agai te Babilon king dąų wali bomai po bolai dao.  
\v 17 Tialima, te Babilon ami bidi dabe asama, te hwįbo nai hauwa nigilama, te Jerusalem bagua sabo tǫ du holaibao. Tama augwaligo te Jerusalem dabe dali boi hwįnama, te we bidi hauwa ela mueibao. Te sogo, te Isip kingo bomai ami bidi dabe, augwaligo te Juda king tau sabo usu meni yaibao.  
\v 18 Te Juda kingo te eno nogi weyu, te Babilon kingba nogo mayu elama, tama agai po dąų walali. Tama agai te Babilon king dali dąų walali po, te bomai po bolaligo te aga dene saibao. Tialima, aga bugagia bidabo usu meni yaibao,” te po wali.   
\p
\v 19 “Ena God Genuai Bidi, ena sesemane sogo bidibao, eno mu po tama obao, eno te Juda kingba dwai dene mawaibao. Agai te po dąų wali sogo agai eno nogide bomai po dąų weyu, te dąų wali po wali paibao wali, tiali goli agai wali pabeo.  
\v 20 Tama tialima, eno aga tola sabo ba bono gaga mueibao. Tola selama, te aga eno Babilonba sela pelama, te agabolo dwai dene mawaibao, magi baso meni, agai ena dali dąų walali bomai po wali pabeo.  
\v 21 Te boi bidi dabego te aga hani ami bidi dabe augwa geme duala sigi pabo pesage dolaibao. Te isisąwani ami bidi dabe, augwali te gasa pedai tigidaliba wi tedela paibao. Tama dage Israelgo te tama sę ebo bugagia koneama, ena Genuai Bidigo digi, eno wali me po da te homu yaibao,” te po wali.   
\s1 Godigo te Israel dabe tau sabo bomai po dąų walio  
\p
\v 22-23 God Genuai Bidigo te tama po wali, “Ena digi te bobobage ni sida honu me deli toga saibao. Tama eno te Israel bulu du uganu igulai bulu dude bulaibao, te Israelde elalubo gasa bulu du tigidali aiyaba elaluai bulu du da. Tama te ni genuai holaibao. Te agai nologo bobobage elama, tede te wai du walaibao. Te aga polalubo ni sida mu pedelaibao. Te haniani ba dabe te ni tiwąį madi aga nologoba geme duala sagasaibao. Tama augwa be dabe te ni nologo dabede sę yaibao.  
\v 24 Tama te tǫde elalubo ni dabe tigidaligo te tiwai bugagia konemainu yaibao, ena Genuai Bidi, eno te bobobage ni gela mubo dao, me eno te dwasianu ni dabe bobobage pedalumainu ilibo dao. Eno te yabe elalubo ni dabe sasia palobo sę ilibo dao. Me te sasia pali ni dabe da, te augwali yabe ma holobo sę ilibo dao. Ena Genuai Bidi, eno te po walio, tama eno te wali po gilama te tigidali sę ela silaibao,” wali.   
\c 18  
\s1 Godigo tigidali bidi deli deligo kolesaga subo dao  
\p
\v 1 Genuai Bidigo enabolo te po pusao po walali,  
\v 2 “Dage Israelgo godolo ebo po begelama wabo po me deli e tiwai da, ‘Te aya idago te tau isąwai ni wain du tubo da. Tiali goli, te augwaligo wai dabego pedauwalide ha ebo da.’ Magi baso dagego te tobage po wabo dawe? \x * \xo 18:2 \xt Jer 31:29\x*  
\v 3 Ena God Genuai Bidi, ena sesemane sogo bidaibao, eno mu po dagebolo obao, eno dagego te wabo po mu tagalabo sę ilaibao,” wali.  
\v 4 “Te aya idago bidibo ula tigidali, me te wai dabego bidibo ula eno nogode naga elalubao. Tama tibaso, te bidi deligo te sęgę sabo dwai sę ebaso, te bidi naga isaibao,” te po wai.   
\p
\v 5 “Te wiegi yai bidi me deli elalu, te aga kolesaga doloba pai mu elalubaso da, teda te bidi bugagia mu bidaibao.  
\v 6 Te tobage bidigo te Israel dabego tibo god dabeba lotu me wasiąma, tama agai augwaligo te tibo godiba ofa tiwai elama mabo nai dabe me tugobeo. Tama agai te gasa bidigo we penani me isiąma, tama agai te we poluago elali gasi ebo sogo te we dali me pigobeo.  
\v 7 Agai gasa bidi dabeba dwai sę ilama, te augwaligo nai dabe wi sabeo. Te gasa bidi dabego agaba negeli ilama, te agai we ponabo usu nama augwaligo mani nai, agai te nai dabe tolalubo sę mu egobeo. Menio. Agai te agaba negeli ilali bidi dabeba ma mabo dao. Agai te nasi ebo bidi dabe nai mayu, te ugwa meni yani bidi dabeba te ugwa mabo dao.  
\v 8 Te abagi me delibolo agai negeli ilibo sogo, te negeli wei ponobaso da, teda agai te gasa ugadu daganobo mone dali me sogobeo. Te agai po tų odobo sogo, agai doloba pai kolesaga naga eyu, tama agai te po tųba asali bidi dabe dali po bugagia dodolobo dao.  
\v 9 Tama agai te eno po tigidali bugagia wali pelama, te eno bomai po me wali peyu, te doloba pai kolesaga naga yaibao. Te tobage bidi te doloba pai bidi da, tialima mu tama, aga bugagia bidaibao. Ena God Genuai Bidi, eno tama po obao,” walio. \x * \xo 18:9 \xt Prs 18:5\x*   
\p
\v 10-11 “Tama te tiwai bidigo ogwa me deli elalu, te ogwa genuai pedelama, te agai nai wi dabe siyu, te bidi dabe ela muyu, ma tobage dwai kolesaga me deli te aga ayago isąwani sę me ebaso da, teda aga isimainao. Te ogwago te augwaligo tibo god dabeba ofa yali nai dabe tubo dao, te agai gasa bidi dabego we dabe penani ebo dao.  
\v 12 Agai te magi nai doado bage meni yai bidi dabeba dwai dwai sę eyu, te agai nai wi siyu, tama te gasa bidi dabego agabolo mani nai dabe dąų olama tolalu, te augwaligo mani negeli ponabo dąįba usu nubo tiwai yali. Tama agai te tibo god dabeba lotu weyu, tama te lotu wabo pesagede te tobage dwai kolesaga dabe mu eyu ebo dao.  
\v 13 Tama aga abagi dabego te negeli wei ponobo sogo, agai te gasa ugadu daganobo mone dali sabo dao. Te tobage bidi da, te bugagia bidaibao homu eba, agawe? Mu menio. Agai te yali kolesaga dabe eno godolo homu mu isąbaso, te aga isimainao,” wali. “Te aga yali kolesaga pagede te aga isaibao po wai dao,” wali.   
\p
\v 14 “Tama te tomo bidigo te ogwa me deli ame nani, te wai genuai pedelama, te aga ayago yali dwai kolesaga tigidali suali goli, aga ogwago te kolesaga wali pisąbaso da, teda aga bugagia bidaibao.  
\v 15 Te tobage bidigo te Israel dabego tibo god dabeba lotu wagobeo, tama agai augwaligo te tibo god dabeba ofa yali nai dabe me tugobeo. Agai te gasa bidi dabego we dali penani me isąma,  
\v 16 te gasa bidi dabe dolobo sę isąyu, te gasa bidi dabego nai dabe wi siyu me ebo meni. Agai te bidi dabego wei ponabo usu nama nai deli me sabeo. Agai te nasi ebo bidi dabe nai mayu, te ugwa dabe meni yani bidi dabe te ugwa dabe mayu ebo dao,” wali.  
\v 17 “Agai te magi nai meni yai bidi dabe dolobo sę me isąyu, tama agai te abagi dabede te wei ponobo mone gasa dali ugadu daganama me sabo menio. Agai eno tigidali bomai po, me eno gasa po dali wali pobaso, te tobage bidi te bugagia bidaibao. Mu tama, aga ayago te dwai sę hauwa yali, tiali goli wai da, te ayago yali dwai sęgęde me isigobeo.  
\v 18 Aga ayago te gasa we bidi dabeba dwai sę eyu, te anoma bomonama eyu, te augwaligo nai siyu, te tobage dwai kolesaga dabe yali. Tialima, aya aga yali sę dagede te aga isimainao,” wali.   
\p
\v 19 “Tiali goli, dage Israelgo enabolo te tama po hanalu wali, ‘Magi baso ogwago te aga ayago sęgę tolabo usu egobe da po obawe?’ Tialima, eno dagego po te tiwai wei ponobao. Te ogwago doloba pai kolesaga eyu, te eno bomai po tigidali wali pobaso da, teda aga bugagia bidaibao.  
\v 20 Te sęgę sali bidi, te aga naga isaibao. Te ayago sęgę sai baso da, teda te ogwago mena dwai sę me isąwani, tama agai te ayago yali sęgę tolabo usu munu me egobeo. Te ogwago dwai sę ebaso da, teda ayago te magi dwai sę me isąbaso, te ogwago sęgę agai me tologobeo. Doloba pai bidigo te aga yali doloba pai kolesagade te wiegi yai mone sabo tiwai eyu, te dwai sę ebo bidigo te aga yali dwai kolesagade sęgę tolobo dao,” wali. \x * \xo 18:20 \xt Bom 24:16\x*   
\p
\v 21 “Tiali goli, te dwai bidi me deligo aga dwai sę yali tagalama, te agai eno bomai po wali peyu, te doloba pai kolesaga naga ebaso da, teda mu tama, aga tede me isigobeo. Menio. Aga bugagia bidaibao.  
\v 22 Te agai polobadu yali dwai sę eno homu kone ma palogobeo. Megi da, agai doloba pai kolesaga ebaso, te aga bugagia bidaibao.  
\v 23 Ena God Genuai Bidi, eno dageba hanalu wabo homu yali, te dwai bidi me deli isibo sogo eno homu pemene eba homu dagego eba, agawe? Mu menio. Te bidi me deligo aga dwai sę ebo tagalama, bugagia bidibaso, tede eno wiegi yai pemene yaibao,” wali.   
\p
\v 24 “Tiali goli, te doloba pai bidi me deligo te doloba pai kolesaga tagalama, te tobage eno godolo menisąbo dwai dwai kolesaga eyu, te dwai bidi dabego ebo kolesaga tiwai ebaso da, teda aga bugagia bidaiba homu ebo da, agawe? Mu menio. Te eno agai wiegi yai kolesaga yalide homu kone munu ma palogobeo. Agai te enaba homugo kęą pai kolesaga togolama, tama ena tudiba munama, te dwai sę yali, tibaso te aga isimainao,” wai dao.  
\v 25 “Tiali goli, dagego te tama po obao, ‘Genuai Bidigo ebo te kolesaga, te dolo menio,’ wali. Tialima, dage Israelgo, eno po wabo bugagia odao. Dagego homude eno kolesaga te dolo meni da homu eba, agawe? Menio. Te dagego ebo kolesaga da, te dolo me ebe dao.  
\v 26 Te doloba pai bidigo te doloba pai kolesaga yali tagalama, te dwai kolesaga ebaso da, teda aga te yali dwai kolesaga pagede te aga isabo elalubao.  
\v 27 Ma, te dwai sę yali bidi aga te yali dwai kolesaga tagalu, te doloba pai kolesaga ebaso da, teda aga me isigobeo. Menio. Te aga bugagia bidaibao.  
\v 28 Agai koneanio, te agai kolesaga wiegi yai isąbaso, tibaso aga te dwai kolesaga tagalama, te wiegi yai kolesaga wali pali. Tiali da, te aga me isigobeo. Menio. Aga bugagia bidaibao.  
\v 29 Tiali goli, eno te kolesaga wali pobaso, te dage Israelgo te po obao, eno kolesaga dolo meni po wali. Dagego eno kolesaga dolo meni da homu eba, agawe? Menio. Dagego kolesaga naga te dolo ebe dao,” wali.   
\p
\v 30 “Megi da, ena God Genuai Bidi, eno dage Israelde po elalubao. Te eno dage po tų ilibo sogo te dage deli deligo kolesaga eno dagalaibao. Tama tibaso, dage homu begelama, ge neyu, dagego te ebo dwai kolesaga tigidali tagalao. Te dagego tama tibaso da, teda duga te yali dwai kolesagago dage me dologobeo.  
\v 31 Magi baso dage Israel isainu ebawe? Te dagego ebo dwai kolesaga tigidali te dagego tagaliąo, te dagego poloba meda haliga elalubo kolesaga hasegelama, te dagego gesi noma haliga, me gesi noma mobo bidi sao.  
\v 32 Ena God Genuai Bidi, eno te bidi me deli, ma we, ma wai, te isibaso eno homu pemene me ebeo. Tama tibaso, dagego te ge neyu, dwai sę tagalama, te haliga begelama, te dage bugagia bidiąo,” te po walio.   
\c 19  
\s1 Esekielgo hobede ebo balia yali  
\p
\v 1 Godigo po enabolo walali, te Israel king side homu dene ebo e balia po wao po wali.   
\q1
\v 2 “Nago ida te wiegi yai hasa laion sou mu da.  
\q1 Aga te hasa laion omai dabe tomode bidu,  
\q2 tama agai aga wai dabe negelama,  
\q3 te augwali genuai pedelalio.   
\q1
\v 3 Aga ogwa me deli te wiegi yai  
\q3 ogwa bidi laion pedelali.  
\q1 Idago agabolo te hasa gegebo kolesaga ola mani,  
\q2 tama nosali aga te bidi ela tubo hasa laion pedelalio.   
\q1
\v 4 Te tǫ kantri bidi dabe hauwago  
\q2 te hasa laiongo ebo kolesaga po odali.  
\q1 Augwaligo te tǫ dedage dogagaselama,  
\q2 tama laion te tǫ dedageba tulaluali.  
\q1 Augwaligo agai penane dilide  
\q2 te gąų yai nai huk munama,  
\q2 tama aga te tǫ kantri Isipba kekasa palio.”   
\b  
\q1
\v 5 “Te aga idago aga ma asobo tonaluali sesabi mu yali,  
\q2 tiali goli te wai ma begasa me  
\q3 asisąbaso, aga homu sęgę yali.  
\q1 Tialima, agai gasa ogwa me dąį ilali,  
\q2 tama aga me te wiegi yai boma pai  
\q3 hasa laion tiwai pedelali.   
\q1
\v 6 Aga genuai pedelama  
\q2 te aga gasa hasa laion dabe dali uda wali,  
\q2 tama idago agabolo te hasa gegebo  
\q3 kolesaga ola mani,  
\q2 tama nosali aga te bidi ela tubo hasa  
\q3 laion pedelai dao.   
\q1
\v 7 Agai augwaligo te bomai be dabe koneama,  
\q2 tama aga pelama, te boi bidi dabego  
\q3 taun dabe dolali.  
\q1 Agai i hae umagia bomonama mu obaso,  
\q2 te tigidali we bidi wi yai dao.   
\q1
\v 8 Te tigidali pąde elaluali tǫ kantri pedai  
\q2 bidi dabego te hasa laion dali boi hwįagasali.  
\q1 Augwaligo te ba bono mubo wa munama, aga tola salio.   
\q1
\v 9 Augwaligo agai penane dilide te gąų yai  
\q3 huk munama, te aga kekasa pali.  
\q1 Augwaligo aga te halobage me delide kalabus elama,  
\q2 tama augwaligo aga te Babilon kingba odasa pali.  
\q1 Augwaligo aga te bomai kalabusiba muani,  
\q2 te aga te Israel bulu du dabeba wi ma  
\q3 painu ebo usu egobeo.  
\q1 Tama te we bidi dabe augwaligo  
\q3 agai i wabo ma odogobeo.”   
\b  
\q1
\v 10 “Dage si, duga ida aga te wain ni tiwai  
\q3 augwaligo te ąį sesege pąde bulali.  
\q1 Tama te ni genuai pedelama,  
\q2 tama nologo hauwa elama, te nai du hauwa walali.   
\q1
\v 11 Te ni nologo dabe boma pelama,  
\q2 tama augwaligo te nologogo  
\q2 te kingo tolasa bilibo dono nigibaso, usu yaibao.  
\q1 Te ni bobage mu holama,  
\q2 te pąde dagalu diągulainu yali.  
\q1 Tigidali we bidigo suali, aga bobage mu holali,  
\q2 te nologo me yabe hauwa elaluai dao.   
\q1
\v 12 Tiali goli, te bidi dabego wado po weyu,  
\q2 aga maga gudulama, te aga tǫba degelai.  
\q1 Te giliga asobo badu te posolai wali aselama,  
\q2 te agai wai dabe tigidali boga pai.  
\q1 Te bidi dabego te ni nologo tigidali tologolama,  
\q2 tama te ni nologo dabe sasia pali  
\q3 te augwaligo isiba ulai dao.   
\q1
\v 13 Tama augwaligo te ni te wa pai buluba  
\q3 mu sela pelama,  
\q2 tama augwaligo te ąį meni yai tǫde bulalio.   
\q1
\v 14 Isi te ni pedelama, te ni nologo tigidali  
\q3 dobadi, te ni wai du dabe me dalio.  
\q1 Tama te bomai nologo me elalusiąwai,  
\q2 te kingo tolasa bilibo dono tiwai  
\q3 pedelabo ni nologo tiwai me pedalubeo.  
\q2 E po da, te homu dene ebo balia po da. Te balia po  
\q1 augwaligo hauwa sogo odu geaibao,” wali.   
\c 20  
\s1 Israel dabe augwaligo God wali me pabeo wali  
\p
\v 1 Da te Babilonde bidibadi te kibu be 7 wabode, tama te kibu bede, te polua a naga, te dei nogo si wabode, te Israel tobolu bidi dabe augwali ena Esekiel pageba duayagasali. Augwaligo homude po me deli elalubaso, te augwaligo enaba hanaluama, te Genuai Bidigo homu mena tama elalubo page koneainu yai dao.  
\v 2 Tialima, Genuai Bidigo enabolo te tama po walio,  
\v 3 “Tǫde bidio, nago eno e po te Israel tobolu bidi dabe augwaliba mao. ‘Ena God, Genuai Bidi, eno dage tobolu bidiba te tama po obao. Dagego eno homu mena tama elalubo koneainu asali po oba, agawe? Ena te Sesemane Bidibo God da, eno po dolo dagebolo obao, dage odolali naga asalio. Eno dagego hanalubo po deli wei me ponogobeo. Ena God Genuai Bidi, eno te po wai dao.’ Te po augwalibolo mao,” wali.   
\p
\v 4 “Tǫde bidio, nago augwali po tų ilaibawe? Awe, eno homugo nago te bidi dabe po tų ilao. Te augwa wąį nǫų dabego dwai kugumini yai kolesaga yali ma homu kone palao, nago te po augwaliba walao.  
\v 5 Augwaliba tama po wao, ‘Ena God Genuai Bidi, dage Israel dabe ena hani we bidi dabe pedalumainu dąį ilali sogo, te eno duga wąį nǫų dabe dali dila pai bomai po dąų wali. Augwali te Isipde bidibadi, ena digi ena augwaliba ola menama, te eno tama po wai, “Ena digi ena God, dagego Genuai Bidi dao,” te po wai dao.  
\v 6 Tama te sogo eno dila pai bomai po augwali dali dąų olama, te augwali eno Isipde selama, te eno augwaliba maiabo te dąį ilali tǫba odasa asali. Te tǫ te polalubo sawi yai tǫ mu elaluali, te gasa badu tǫ pedai tigidali aiyaba elaluali. Te tǫgo ili hauwa elalu, te nai wiegi yai mu holai dao. \x * \xo 20:6 \xt Sai 6:2-8\x*  
\v 7 Te eno augwaliba te tama po wali, tigidaliba te tama po wali, tigidali deli deligo te augwaligo godolo mu ebo te Isipgo tibo god dabe sela sąyao wai. Eno te po augwaliba waliyu, augwaligo te dwai nai dabeba lotu weyu, te ena God, augwa Genuai Bidi, eno gedude augwa digi meda ilibao wali.  
\v 8 Eno augwaliba te tama po walali, tiali goli te bidi me deli mego te po me odobeo. Menio. Tigidaligo eno po sela sąyu, tama augwaligo te Isip dabego tibo god dabe sela sąbeo. Tama tibaso, te augwali Isipde bidali sogo te eno haliga sębę dwai mu augwaliba eyu, te pąde eno haliga sębę yali usu nama, augwaliba te dwai dene magi dao.  
\v 9 Tialima, eno te sę isąwani, magi baso meni, tego eno nogi aiyaba elaluidali weyu yali. Eno te Israel augwaliba te tama bomo yai po dąų walama, te eno augwali eno Isipde selama, odasa asaibao wali. Tama eno te dąų wabo bomai po te gasa hani we bidi gedude dąų wali, te Israel augwali tomode bidali. Eno te dąų wali bomai po wali pisąbaso da, teda ena digi ena nogi te augwaligo gedude aiyaba elalueibao,’ te po wao,” wali.   
\p
\v 10 “Tama tibaso, eno te Israel dabe te Isipde selama, te tǫ wa pai buluba odasa asai dao.  
\v 11 Te eno po augwaliba mayu, te eno bomai po augwali ola mawai. Te bugagia bidabo homu ebo we bidi dabe da, augwaligo te bomai po wali peyu, bugagia bidaibao.  
\v 12 Tama eno te Sabat side bodolu muani, te eno po dąų walobo dąį tiwai augwali dali yali. Augwali te side toma neyu, tama augwa te tiwai konemainu yali, ena Genuai Bidigo eno augwali ena wiegi yai we bidi dabe pedalubo sę yalio. \x * \xo 20:12 \xt Sai 31:13-17\x*  
\v 13 Tiali goli, te masigi tǫ wa pai bulude me, augwaligo eno po sela sąwani. Augwaligo eno po wali pabo hagela homu elama, te augwaligo eno bomo yai po dabe sela sąwani, te bomo yai po dabe augwaligo wali peyu, te augwali bugagia bidimainu yali. Tama te Sabat side bomo yai po mu augwaligo bolalio. Tama tibaso, haliga sębę dwai mu augwaliba elama, te pąde eno augwali te masigi tǫ wa pai bulude dwai dene menama, te augwali tigidali dolainu yai digi dao. \x * \xo 20:13 \xt Prs 18:5\x*  
\v 14 Tialima, eno te tiwai sę isąwani, magi baso meni, te tama sęgo eno ena nogi te gasa hani dabe gedude aiyaba elalueiba homu yali. Eno te Israel dabe augwali te Isipde selama, odasa asobo augwaligo suali, tialima eno te Israel dabe me dolobeo.  
\v 15 Tialima, Israel dabe augwali te masigi tǫ wa pai bulude bidali sogo, te eno po bomo yai augwaliba weyu, eno augwali dąį ilali, te wiegi yai sawi yai tǫba augwali odasa pabo usu mu me egobeo wali. Te polalubo tǫ mu te tǫ ili hauwa mu elalu, te gasa tǫ dabe aiyaba mu elaluai dao,” te po wai. \x * \xo 20:15 \xt Nam 14:26-35\x*  
\v 16 “Eno te po page e tiwai da, augwaligo eno po wali pabo homu me ebeo. Menio. Augwaligo te augwa tibo god dabeba naga lotu wabo homu yali. Tialima, augwaligo eno bomo yai po bolobo sę eyu, tama te Sabat side bodolu muani bomo yai po me sela sąyu yai dao.”   
\p
\v 17 “Tiali goli, eno augwali homu dene me ebaso, te augwali masigi tǫ wa pai bulude bidali sogo te eno augwali mu sia somainogo ebeo.  
\v 18 Tialima, eno te augwa hani wai dabeba te tama po walali, ‘Dagego te duga aya dabego yali dwai kolesaga wali peyu, tama dagego te augwaligo tibo god dabeba lotu weyu, te duga digi eno gedude meda pedalubo sę elamu dao.  
\v 19 Ena digi ena God, duga Genuai Bidi da, tama eno tigidali po, me eno bomo yai po dali bugagia wali pao,’ te po walio.  
\v 20 ‘Dagego te haniani Sabat bodolu side bugagia homu kone palama, te gasagi yai tedali sogo da homu eyu, te eno bodolu side tiwai mu dąį ilao. Te bodolu side te eno dage dali bomai po dąų walobo dąį tiwai yali. Dage te bodolu side toma neyu, tama dagego te tiwai bugagia koneama, ena digi ena God, dagego Genuai Bidi da,’ eno te po wai dao,” wali.   
\p
\v 21 “Eno te tiwai po augwaliba wali, tiali goli te we bidi hanigo me ena dali hagoma yali. Te augwaligo eno po wali me pisąma, te augwaligo eno bomo yai po dabe bolali, te bomo yai po dabe te augwaligo wali pigi sogo da, te augwali bugagia bidigi da. Tama augwaligo te Sabat side bomo yai po mu bolali. Tialima, eno haliga sębę dwai mu augwaliba elama, te pąde eno dwai dene menama, te augwali tigidali mu dolabo homu yai dao.  
\v 22 Tiali goli, eno tama tebeo, magi baso meni, te tiwai eyu da, te gasa hani we bidi dabego gedude te eno nogi aiyaba elaluidali homu yali. Te hani dabego eno te Israel dabe Isip tǫ kantride selama, odasa asobo suali, tibaso eno te Israel dabe dolainu yali homu hagela yai.  
\v 23 Tialima, eno te tiwai po bomonama wali, te eno augwali sela sąnama, te tǫ pedai tigidaliba tedela palaibao walio. \x * \xo 20:23 \xt Prs 26:33\x*  
\v 24 Eno te po wali, magi baso meni, augwaligo eno po sela sąwani. Tama augwaligo te Sabat side bomo yai po, me gasa bomai po dabe dali bolama, tama augwaligo te augwa wąį nǫų dabego tibo god dabeba lotu wabo homu bomonama mu yali,” wali.   
\p
\v 25 “Tama me, eno gasa tobage po me te dwai bomai po meba augwaliba mani, te bomai pogo augwali tau selama, bugagia me bidigobeo wali.  
\v 26 Te eno augwa te tibo god dabeba ofa emainu sula tagalu, te augwa eno gedude meda pedalubo sę ilali. Te augwa gomunai ogwa dabe te tibo godiba ofa tiwai yainu te elebo eno sula tagalali. Te augwa tama sę emainu eno sula tagalali, magi baso meni, augwa te tebo kolesagade te augwa dwai noma siyu, hagela mu yabo sę eno digi ilali. Te augwa te tiwai bugagia koneama, ena digi ena Genuai Bidi da omainu yai dao,” wali.   
\s1 Godigo te Israel dabego te agai po wali pisąbo kolesaga tagalomainu ilali  
\p
\v 27 Genuai Bidigo po te tiwai ma wali, “Tǫde bidio, eno homugo nago eno po te Israel dabeba momainu yali. Te po e tiwai dao, ‘Ena God Genuai Bidi, eno po dage Israelde elalubao. Te duga wąį nǫų dabego gasa dwai kolesaga me eyu, te augwaligo eno po sela sąnama, te eno nogi aiyaba mu elaluali. Te kolesaga te tiwai dao.  
\v 28 Te eno augwali mawaibao olama po dąų wali tǫba te augwali odasa asali sogo, augwaligo te genuai ni dabe te genuai bulu du dabe sulama, te augwaligo te homu eyu, te tibo god dabeba lotu wabo pesage dabe wiegi yai elaluba homu yali. Tama augwaligo te hasa dabe me wain dabe hauwa seselama, augwaligo ofa yali, te tiali kolesagade augwaligo ena haliga sębę dwai mu ilai dao.  
\v 29 Tialima, eno te tiwai augwaliba hanalu wali, “Magi baso dage te bulu du ugaba mu pelama, te tibo god dabeba lotu wagulubawe?” Tialima, te Israel dabego te lotu wabo pesage dabe augwaligo te tiwai nogi yali, “Te uganu elalubo pesage mu dao,” augwaligo te po walio,’ eno po te Israel dabeba mao,” wali.   
\p
\v 30 “Megi da, dage Israelde eno po elalubao. Dagego te duga wąį nǫų dabego tibo god dabe wali pobao. Magi baso dagego augwaligo te dwai kolesaga wali pabo dawe?  
\v 31 Dagego te tibo god dabeba ofa ebo sę me idubao. Dagego me te duga wai dabe elama, augwaliba ofa ebo dao. Te tebo kolesagade dage eno gedude meda yai mu pedelebao. Tialima, dage Israel hale dwasianu me isąma, te eno mena homu elalubo te hania koneainu dage enaba asobo sę idubao. Tiali goli, dage odolali asobao. Ena God Genuai Bidi, ena sesemane sogo bidaibao, eno po dolo mu megi dagebolo obao, eno dagego hanalu wali po deli wei me ponogobeo,” wali.   
\p
\v 32 “Dage te gasa tǫ kantri we bidi dabe tiwai mu pedelabo homu godolo eyu, te bagego te ni dabeba me masigi dabeba lotu obao. Tialima, eno dage te tiwai pedalumainu me egobeo. Mu menio.  
\v 33 Ena God Genuai Bidi, ena sesemane sogo bidaibao, eno dageba te tiwai po bomonama obao. Eno dagede haliga sębę eyu, ena digi ena dagego king pedelama, te eno dageba dwai dene mayu, te dage eno bomonama umagia tonalueibao.  
\v 34 Megi dage te tǫ kantri hauwade te kalabus bidada pobao, tialima eno dage te bulu dabede bidali ma oda selama, te deliba sisinaibao. Te eno haliga sębę ebo bomo dali, te eno dageba dene mabo kolesaga dali dageba pedalubo koneagameo.  
\v 35 Dage te sisinabo pesage da, te masigi kemi wa pai bulu da, aga nogi e tiwai elaluali, ‘Te Tigidali We Bidi Hanigo Wa Pai Bulu Pesage dao.’ Tama tede eno dage te duga yali dwai kolesagade po tų ilaibao,  
\v 36 te eno duga wąį nǫų dabe te masigi kemi tǫ wa pai bulu du Sainaide bidali sogo, te augwali eno po tų ela mani tiwai yaibao. Ena God Genuai Bidi, eno tama po wai dao,” wali.   
\p
\v 37 “Tama te bulude te dagego eno bomo yai dąų wali po wali pomainogo yaibao. Te eno dage deli deligo kolesaga dagalaibao.  
\v 38 Tama eno te hagoma ebo bidi dabe me, te dwai sęgę elalubo bidi dabe me sela sąnama, te augwali dage tomode munu ma bidimainu me egobeo. Te eno dage Israel tigidali te kalabus bidali bulude selama, dage te po tų ebo madi odasa asaibao, tiali goli te hagoma eyu dwai sę ebo bidi dabe, augwali Israelgo te tǫba me pogobeo. Eno te tiwai ebaso, te dagego bugagia koneama, ena digi ena Genuai Bidi da waibao,” wali.   
\p
\v 39 “Te dage Israel hani da, ena, God Genuai Bidi, eno te tama po te dageba obao, te dagego homu godolo ebo wida, dagego duga te tibo god dabe wali pao. Tegobao, te dagego godolo yali homu simina ela siminao. Tiali goli, dagego te tiwai ebaso da, teda nosali dagego eno po odoyu, mu wali paibao. Dagego te duga tibo god dabeba ofa eyu, eno nogi da aiyaba munu me elalugobe dao,” wali.   
\p
\v 40 “Magi baso meni. Te ena God Genuai Bidi, eno tama po obao. Te po tų yali tudi badu, dage eno we bidi te Israel eno tǫba ma pelama, te dage tigidaligo enaba te genuai tedali gasagi yai bulu dude digi lotu obaso, te eno dageba wiegi yai homu pemene yaibao. Te dagego enaba wiegi yai homu eyu, polasa inayai wiegi yai ofa yabo nai dabe selasa aselama, te dagego enabolo maiagameo,” te po wai dao.   
\p
\v 41 “Te dage bidali tǫ kantri dabede eno dage selama, tama dage ena te bulu duba odasa asobo sogo da, teda eno bugai haliga pemene dageba eyu, te eno wiegi yai ofa ebo denami ebaso pemene homu ebo tiwai yaibao. Te gasa hani bagego eno te tama sę dageba ebo sulama, te tiwai augwaligo koneyu, eno kolesaga te dolo mu ebao po waibao.  
\v 42 Te eno duga wąį nǫų dabeba mawaiba olama, te bomo yai po dąų wali tǫde dage te dugulalubo sogo da, teda dagego te tiwai bugagia koneaibao, ena digi ena Genuai Bidi da po waibao.  
\v 43 Tama dagego duga te tobage dwai kugumini yai kolesaga dabe eyu, dage te eno gedude meda pedelali teba homu kone palaibao. Tama duga te yali dwai kolesaga dabede dage hale mu yaibao.  
\v 44 Dagego te tiwai bugagia koneaibao, eno dagego te dwai kolesaga yali sę pagede wei ponobo sę dolo me ebeo. Menio. Eno ena wiegi yai nogide homu kone palama, te eno dageba wiegi yai sę mu yali. Tama dagego te tiwai bugagia koneaibao, ena digi ena Genuai Bidi da. Ena God Genuai Bidigo, eno te po wai dao,” wali.   
\s1 Isi te saut badu pedelaibao wali  
\p
\v 45 Genuai Bidigo enabolo te tiwai po walio,  
\v 46 “Tǫde bidio, eno homugo nago te saut pedai badu tonalu, nago te tǫ kantri dali, te buluba me, wado ilao,” po wai.  
\v 47 “Nago te buluba po walu, te Genuai Bidi, ena Godigo poba olo bugagia muao po walao. Eno po e tiwai, ‘Odao. Eno isi nogobao, te siago nago ni tigidali daibao, te sasia pai dabe, ma sasisąwai me, tagalao. Te mena nai me deligo te isi sula sawainu ebo usu egobeo. Te isi dabo te saut badu gagalama, te not badu pedaiba usu nigi pelama, te isigo tigidali we bidigo tigi posolo yaibao.  
\v 48 Tigidaligo te tiwai ebo koneama, ena Genuai Bidi, eno te isi nogali, te mena bidi me deligo te isi sula sąwainu ebo usu me egobeo,’ te po wao,” te po wai dao.  
\v 49 Genuai Bidigo po ola simanobo si da, tialima eno te tama po wei ponani, “Hobede ya, God Genuai Bidio, eno te po augwalibolo pusubo si, magi yaibawe? Tigidali we bidigo eno te tobage begelama pusubo po odobo hagela ebo dao.” Ena Esekiel eno te po wali.   
\c 21  
\s1 Godigo Israel dabe agai bainat hwągo elaibao wali  
\p
\v 1 Genuai Bidigo enabolo te tiwai po wali,  
\v 2 “Tǫde bidio, nago te giliga degasa pabo badu te Jerusalemba tonama, te Israel we bidi augwali po tų ilibo po weyu, augwali te dwai sę ebo we bidi da po wao. Tama me augwaligo te tibo god dabeba lotu wabo pesage dabe eno godolo homu me egobe dao, te po me wao.  
\v 3 Ena Genuai Bidigo te po augwaliba mao, ‘Ena dage Israelgo boi bidi pedaliyu, te eno bainat hwą aga bulubo bedu selama, te dage tigidali elaibao, te dage dwai we bidi, ma dage dwagi yai we bidi, te eno me sula tagalogobeo.  
\v 4 Te eno bainat hwągo dage enama, dage tigidali ela mueibao, te saut badu gagalasa, te not badu pedaiba usu nugi paibao.  
\v 5 Tama tigidali we bidi te tiwai koneagameo, ena Genuai Bidigo digi, eno ena bainat hwą selama, tama eno te bainat hwą aga bulubo beba ma bulugobeo. Menio. Te eno dage dene mayu, ela silaibao,’ eno te po nago augwalibolo pusao,” Genuai Bidigo enabolo te po wai.   
\p
\v 6 Genuai Bidigo po wadolama, te tiwai wali, “Tǫde bidio, nage te pepeli diliba pelama, te bomonama, hwąwa wao, te nago homu hobolu du alua pabo tiwai yao, te tigidali bidigo sumainao.  
\v 7 Te augwaligo nage hanalu magi baso nago te tiwai hwąwa obawe po obaso da, teda nago augwaliba te tiwai po walao, ‘Genuai sęgę mu pedelainu ebaso, te ena hwąwa obao,’ po wao. ‘Te sogo dage wi dwai mu eyu, te dagego sągą didibili elama, te dage bomo mu meni yaibao. Te dwai sogo megi da pedelainu ebao. Te Genuai Bidi Godigo po dao.’ Nago augwalibolo te po wao,” wali.   
\p
\v 8 Tialima, Genuai Bidigo enabolo te tiwai po ma wali,  
\v 9 “Tǫde bidio, megi eno nagebolo te po digi po begelama ela mani po pusao. Ena Genuai Bidi, eno tama po obao. Bainat hwą me deli elalubao. Augwaligo te hwą elego bugagia dulama, te meda bugagia holali.  
\v 10 Te hwą poa pai mu pedelali, te gegemani ula emainu augwaligo meda holali, te dagalu ula tiwai yali. Dage eno we bidi dabe, dagego homugo te dage bugagia bidaiba homu eyu, te wiegi yai pemene eba, agawe? Mu menio. Eno dila pai po dageba mani, tiali goli dagego hagoma ebo sę me iduai dao.  
\v 11 Megi tama augwaligo te bainat hwą meda holobao, te agai bidi elabo sisi elalueibao. Augwaligo te elego dulama, meda hola silai elalubao, tialima augwaligo te we bidi dabe elabo bidi nogoba muaiba.  
\v 12 Tǫde bidio, nago i hae weyu, hobede ebo gela wao, magi baso meni, te bainat hwągo te Israel dabe polalubo bidi dabe eleyu, te eno we bidi dabe dali elaibao. Nago gela weyu, te bidigo hobede mu yabo kolesaga yao.  
\v 13 Megi da, eno ena we bidi dabe usu sabo sę mu yaibao. Te augwaligo augwa dwai sę ebo kolesaga me tagalisąbaso da, teda ena God Genuai Bidi, eno po dolo obao, te tigidali sę augwaliba pedelaiba,” po walio.   
\p
\v 14 “Tǫde bidio, eno po te tiwai pusao. Nago nogo bada elu, megi da te bainat hwągo te we bidi dabe elebo gagalobao. Te bainat hwągo augwali pobelama, te hauwa elebo dao.  
\v 15 Te bainat hwągo te taun sunumi tigidalide tonalu, te we bidi dabe wi ilama, te hauwa ela mubao. Te bainat hwą gegemani umagi mu eyu, te dagalu be sele ula tiwai eyu, te bidi dabe ela muabo sisi elaluai dao.  
\v 16 Nage bainat hwą, nage te tigidali badu pelama, te we bidi dabe ela muao.  
\v 17 Te eno digi me, eno nogo bada elama, te eno haliga sębę yali usu naibao. Ena Genuai Bidigo eno tama po wai dao,” wali.   
\s1 Babilon kingo te Jerusalemba boi hwį yagasaibao wali  
\p
\v 18 Genuai Bidigo enabolo po weyu, te tama po wai dao,  
\v 19-20 “Tǫde bidio, nago te tǫ kantri me deliba asabo sunumi dąį ilao, te bulu me delide te sunumi tunu mage si badu pedasa palio. Te Raba teba pabo sunumi me deli elaluaibao, te Amon dabego genuai taun da. Te sunumi me deli te Jerusalemba pabo elaluaibao, te masigigo nigai bomai obo elalubo taun, te tǫ Juda kantrigo genuai taun da. Tialima, nago te sunumi age side te koneabo po asęao. Te Raba taunba pabo sunumidu te gasa dąį ilibo po asęyu, te Jerusalem taunba pabo sunumidu te gasa dąį ebo po asęao. Te Babilon king aga ami bidi dabego dali te bainat hwą selama, tama augwaligo te sunumi wali asu, tama te sunumi mage siba sabolaibao.  
\v 21 Tama kingo aga te mena sunumidu pabo konesiąwai, tibaso agai te hanilibo sę ebo kolesaga yaibao. Hasia bolo agai te ene beledide elaluali ene dabe memenege ilaibao. Gasa enego te Raba taunba nogo tų eyu, te gasa ene mego te Jerusalem taunba nogo tų iliyu, te kingo deli naga sabo homu yaibao. Te aga tibo god dabeba me hanalu olama, tama nosali agai te elali kibu hasago homu hobolu duba bugagia tonaluama, te augwa ofa yainu elali hasa dao.  
\v 22 Tialima, kingo te dolo nogo badu sali enego, te taun Jerusalem dąį eyu, nogo tų ilaibao, tama agai te tiwai koneyu, augwaligo te Jerusalem taunba boi hwįgi paiba homu yaibao. Tama augwali te Jerusalemba dolo pelama, te taun bagulali sunumi aluabo masin dabe nigilama, augwali peyu, te we bidi dabe elainu yaibao. Te masin nigali simanobo si da, teda te ami dabego i hae bomonama weyu, te taun sunumi alumainu te masin pogolobo sę yaibao. Augwaligo te obode tǫ du holama, te Jerusalem bagulama, te moni hanude bidibo bage dali haniani hwįbo kolesaga yaibao,” wali.   
\p
\v 23 “Nago te po Israel dabeba pusaibao, tiali goli augwaligo te po da te tibo po oba homu elama, te Babilon kingo augwaliba boi hwįagasogobe da homu yaibao, magi baso meni, augwali te aga dologode bidabo bomo yai po dąų wai da, te homu yali. Tialima, augwaligo dwai kolesaga hauwa ebaso, te king asama, augwali kalabus yagasomainu eno sula tagalaibao. Te aga asobo augwaligo subo sogo da, teda augwa te tiwai koneaibao, augwa digi yali sę dage te dwai sę pedaluba homu yaibao,” te po wali.   
\p
\v 24 “Tialima, dage Israelde, ena God Genuai Bidigo eno po dagede elalubao. Sesemane sogo dagego dwai sę ebaso, te eno dagego te ebo kolesagade homu kone me gegeda palobeo. Tigidali bidigo dagego dwai sę ebo koneani, magi baso meni, dagego te kolesaga bulu ulade hanilama ebao. Dage dwai sę ebo sęgę genuai elalubaso, tialima eno te boi bidi dabego boi hwįagasomainu sula tagalama, te dage kalabus emainu yaibao,” wali.   
\p
\v 25 “Israel king, nago eno po sela sąyu, dwai kolesaga mu ebo bidi da. Te eno nago ebo dwai sę tigidali wei ponabo sogo megi pedelalio.  
\v 26 Ena God Genuai Bidi, eno te po obao, nage te king munu me bidilamuo. Tialima, nago te kingo madi me, te tobolude bagulali ugwa nami me, peda muao. Megi da, eno te tigidali nai hasegelebo sę ebao. Te olo bidali bidi dabe te genuai bidi pedalu, te genuai bidi bidali bidi da, te olo bidali bidi tiwai pedelaibao.  
\v 27 Te dwai mu dolai elalubao! Te bidi dabego polobadu susąwani kolesagade, te Jerusalem mu dolaibao. E bulu pesage olo tama elalubadi, te bidi me deli asobo sogoba usu naibao. Eno te bidi sa munama, agai te Jerusalem tonalumainogo, eno te taun agabolo mawaibao,” wali.   
\s1 Godigo te Amon dabe dolaibao wali po  
\p
\v 28 Genuai Bidigo po ma weyu, te tama wali, “Tǫde bidio, eno homugo nago po me deli te Amon dabe pusao homu ebao, te augwaligo Israel dabeba dwai po wabo bidi dabe da. Ena God Genuai Bidigo eno te tama po augwaliba obao. Augwaligo eno bainat hwą meda bugagia mu holama, te gegemani ula gasagi yai eyu, te dula gegemani ula tiwai yali. Tama agai te bidi elabo sisi elalubao,” wai dao.  
\v 29 “Dage Amon dabego te nade subo nai tiwai sulama, tama dagego te tama po pusali, dagego digi te bainat hwą nogo tolama, te eno po sela sąyu dwai kolesaga ebo bidi dabe elaiba wali. Tialima, te yali na tigidali, me te profet po wali, te tibo po naga po walio. Te mu da, te bidi dabego yali dwai sę wei ponabo sogo te pedelalio, tialima te sę dagego me egobe dao,” wali.   
\p
\v 30 “Nebukatnesar, nago te bainat aga bulali beba ma bulao. Te eno dage te duga page bulude digi dolo po tų ilaibao.  
\v 31 Eno dagede haliga sębę ebaso, te dage eno dolaibao, te genuai isi bogoligo te kala isi dala sabo tiwai yaibao. Tama eno te bidi dabe dolobo koneai bidi dabe tagala palama, te augwali aselama, dageba dwai dene magasaibao. Te bidi dabego te gasa bidi dabeba dwai kolesaga ebo godolo mu ebo dao.  
\v 32 Tama dage te isigo sia ulama, te dela silibo tiwai yaibao. Dagego kaneme te duga tǫde digi gelaibao. Te mena bidi deligo dage homu kone ma palogobeo. Ena Genuai Bidi, eno te po wai dao,” te po wali. \x * \xo 21:32 \xt Jer 49:1-6; Ese 25:1-7; Amo 1:3-15; Sef 2:8-11\x*   
\c 22  
\s1 Jerusalem dabego dwai sę hauwa yali  
\p
\v 1 Genuai Bidigo enabolo te tiwai po wali,  
\v 2 “Tǫde bidio, eno homugo nago te Jerusalem we bidi po tų ila homu ebao. Augwaligo te bidi hauwa ela muani. Nago augwa te yali dwai kugumini yai kolesagade augwali po tų ilagameo po wao.  
\v 3 Eno po te tiwai obao, ‘Ena God Genuai Bidi, eno dage Israelde po elalubao. Dagego duga we bidi digi hauwa ela muani. Te dagego te tibo god dabeba lotu weyu, te duga digi eno gedude meda yai mu pedalubao. Tialima, te dage dolabo sogo pąba yagasai dao.  
\v 4 Dagego te dwai kolesaga dabe yaligo, te dagede sęgę elalubao. Tialima, dwasianu sogo naga elalubao, tama dage dolaibao. Te pagede naga tama, te gasa hani we bidi dabego dage gisugu mayu, te dageba posobo po omainu te eno sula tagalaibao.  
\v 5 Te gasa hani te digibulu bidibo, me pąde bidibo bage dabe, augwaligo koneani, dage te tobage dwai kolesaga ebo we bidi da homu eyu, te augwaligo dageba posobo po waibao,’ te po augwalibolo wao,” wali.   
\p
\v 6 “‘Te Israel polalubo bidi dabe, augwali tigidaligo te augwa bomode tigidali sę ebo usu da homu yali. Tiyu, augwaligo te bidi dabe ela mubo sę yai dao.  
\v 7 Te Jerusalem taunde mena bidi me deligo te aga aya idago po dologoba me pabeo. Te dage dali bidibo gasa tǫ kantri bidi dabeba dagego dwai sę ebao. Te wilawe we dabeba te dagego dwai sę yali, te tiana wai dabeba me te tiwai dwai sę ebo dao. \x * \xo 22:7 \xt Sai 20:12; 22:21-22; Bom 5:16; 24:17\x*  
\v 8 Dagego te homu eyu, enaba te lotu wabo nai dabe te olo nai da homu ebao. Tama me, dagego te Sabat bodolu muani side bomo yai po mu bolobo dao. \x * \xo 22:8 \xt Prs 19:30; 26:2\x*  
\v 9 Dage bidi mebago tibo po gasa bidi dabeba kisilama weyu, te po tųde augwali isimaina po omainu tebao. Te meba te tibo god dabeba lotu wabo pesageba pelama, te ofa ebo kibu mi dabe tubo da. Te mebago te lotu wabo pesagede penani sę ebo dao.  
\v 10 Mebago te augwa ayago we dali pagela piali. Te meba bidi dabego te augwa we dabe te poluago elali gasi elalubadi bomo elama, pagela piai dao.  
\v 11 Te mebago gasa bidigo we dali penani eyu, te mebago hale isiąyu, augwa ogwago we dabe dali pagela piyu yali, te mebago augwa ayago wegi dali pagela pialio. \x * \xo 22:11 \xt Prs 18:7-20\x*  
\v 12 Te mebago augwa abagi dabe ela muabo mone sabo dao. Te mebago augwa abagi dabego te negeli ilali wei augwaliba ponobo sogo te gasa ugwadu daganobo mone dali sabo dao. Te mebago augwa abagi dabe wi ilibo sę elama, te augwaligo mone kekebo sę yalio. Dagego te ena God Genuai Bidi homu kone isąma, kegeda pali da,’ te po augwalibolo wao,” wali. \x * \xo 22:12 \xt Sai 22:25; 23:8; Prs 25:36-37; Bom 16:19; 23:19\x*   
\p
\v 13 “‘Eno wado po te dage nai wi sabo bidi dabeba, me te gasa bidi ela mubo bidi dabe, dageba eno wado ilaibao. Tialima, eno nogo bada bomonama eleyu, te eno dwai dene dageba mawaibao.  
\v 14 Te sogo dage wi dwai mu eyu, te dage dili elama, me dolalugobeo. Mu menio. Ena Genuai Bidi, eno te ena wali po tiwai gilama yaibao.  
\v 15 Te dage eno tigidali tǫ kantri pedaiba tagala palaibao. Tama eno dagego duga te dwai kolesaga tigidali tagalomainu ilaibao.  
\v 16 Dagego te ebo kolesagago te duga nogi aiyaba elalubaso, tama te tiwai dagego bugagia koneyu, ena digi ena Genuai Bidi da po wagameo,’ nago te po te we bidibolo pusao,” Genuai Bidigo te po wali.   
\s1 Godigo haliga sębę te genuai sia dabo tiwai yali  
\p
\v 17 Genuai Bidigo te tiwai po enabolo ma weyu, te tama wali,  
\v 18 “Tǫde bidio, te Israel we bidi dabe augwali eno hagela mu ebao. Te bidi dabego te kapa nogi silva elalubo masigide te silva sainu eyu, te genuai isiba ulama, te dwai hogomu sela sąbo dao. Te Israel we bidi dabe augwali te sela sąbo dwai nai naga tiwai dao, eno gedude. Bidi dabe augwaligo te tiwai pobele bage hogomu selama, sąyu naga ebo dao.  
\v 19 Tialima, dage Israel, te ena God Genuai Bidigo e po odiąo. Dage da, te bidi dabego te silva isiba ulama, te pobele bage hogomu tiwai ebao. Tialima, eno dage tigidali te Jerusalemba odasa pelama, te dwai dene dageba mawaibao.  
\v 20 Eno haliga sębę da, te genuai isi dabo tiwai ebao. Te dage eno ulaibao, te bidi dabego te masigi dabe genuai isiba ulama, te silva sainu ebo tiwai ebao. Augwaligo te isi ponobaso, te isi bogoli umagi posolo yai mu pedelama, tama silva te ąį tiwai pedalubo dao. Tama eno dageba te tiwai yaibao.  
\v 21 Mu tamao, eno dageba haliga sębę ebao. Tialima, dage eno te Jerusalemba sisinama, te dageba dwai dene ilaibao. Eno haliga sębę te genuai isi dabo tiwai pedelama, te dage mu ulaibao.  
\v 22 Te dagego eno bomo asobo hania mu sueibao. Te sogo dagego te tiwai bugagia koneyu, ena digi eno dageba dwai dene mabo dao,” Genuai Bidigo te po wali.   
\s1 Te Israel polalubo bidi dabego dwai kolesaga yali  
\p
\v 23 Genuai Bidigo po ma wadolama, te tiwai po wali,  
\v 24 “Tǫde bidio, nago te Israel dabeba te po walao, augwaligo dwai kolesaga hauwa eyu, te augwaligo tǫ eno gedude meda pedelali. Tialima, eno haliga sębę dwai mu augwaliba eyu, eno te tulubage paliama, te kalaba tulubage me paliama, te dene mabo sę augwaliba mobao.  
\v 25 Te profet dabego dwai kolesaga po mia selama, augwali te laion dabego te hasa ela munama, te hasa dili tologa tuyu i wabo tiwai yali. Te bidi dabego te augwa abagi dabe hauwa ela munama, tama augwa te abagi dabego mone me doado bage sali. Tama te isali bidi dabego we dabe sibi, augwaduba odolo bidibao.  
\v 26 Te pris dabego eno bomai po bolama, tama augwaligo homugo enaba te lotu wabo nai te olo nai tiwai da homu yali. Augwaligo te tobage deli kolesaga eno nai dabeba eyu, te augwaligo eno nai da weyu, sa musiąwai naiba ebo kolesaga tiwai yalio. Tama eno gedude te mena nai dabe te meda meni yai, me te mena nai dabe te meda yai da, te po te we bidi dabeba bugagia me ola mabo meni. Tama tiyu, augwaligo te Sabat side bomo yai po me wali pabo meni. Tama augwaligo te tama tebo kolesaga tigidalide te ena nogi aiyaba elaluai dao,” wali. \x * \xo 22:26 \xt Prs 10:10\x*   
\p
\v 27 “Te gegunai bidi dabe augwali te bulu uni yowi dabe tiwai eyu, te hasa elama, te tologolama tubo sę tiwai yali. Te gegunai bidi dabe augwaligo te mone me doado bage hauwa sabo homu eyu, te bidi dabe augwali ela munama, te augwaligo doado bage sabo dao.  
\v 28 Te we bidi dabe augwaligo dwai kolesaga ebaso, te profet dabego wado po augwaliba wabeo. Menio. Augwa te tama po wabo dao, te we bidi dabego wiegi yai kolesaga naga ebao wabo. Te wabo pogo te we bidi dabego dwai sę ebo geme dualubo dao. Te profet augwali da, te dila pisąwai obo nide te tedela yai pen pilibo bidi dabe tiwai elama, te bidi dabego te dila pai obo da homu emainu yalio. Augwaligo na dabe yali, te tibo na naga yali, augwaligo te pedelaiba po wali nai dabe, te me pedalubeo. Te profet dabego te po weyu, te God Genuai Bidi eno po pusabao wali, tiali goli eno po me deli augwaliba me mabeo.  
\v 29 Te bidi dabego augwa abagi dabe wi ilama, te augwaligo mone doado bage bisigi elama sabo dao. Te augwaligo nai dabe me wi siyu ebo dao. Augwaligo te magi nai meni yai bidi dabe, me gasa tǫ kantri bidi dabe te Israelba bidagasali bidi me, augwali dolobo sę dwai mu ebo dao,” wali.   
\p
\v 30 “Te eno po pusulama, te we bidi dabe enaba ma odasa asabo bidi deli me eno gegebo usu sali. Tialima, eno gegebo sę ela pali, menio. Te tobage bidi bidigi sogo da, aga te taun dolainu asobo boi bidi dabe asobo sunumi paligi da, te taun bagulali obo tiwai pedaligi da. Tama aga te obo alua pali badu dolalu, te boi bidi dabe taun tomoba asainu ebo sogo, te hwįbo bidi tiwai pedaligi da. Ena digi eno te Israelgo boi bidi tiwai pedelali, te eno augwaligo tǫ kantri dolainu yali, tiali goli te tobage bidi bidigi sogo da, eno tama sę igi menio. Tialima, eno te tiwai bidi me subeo. Mu menio.  
\v 31 Tialima, eno augwalide haliga sębę ebaso, te augwali eno mu dolainu ebao, te isi dage kalaba munama, dala sabo tiwai yaibao. Te eno augwa yali dwai kolesaga dolo mu wei ponaibao. Ena God Genuai Bidi, eno te po wai dao,” wali.   
\c 23  
\s1 We sigo penani ela bilali po  
\p
\v 1 Genuai Bidi te tama po enabolo walio,  
\v 2 “Tǫde bidio, polobadu we si bidali. Augwaligo ida deli naga elaluali.  
\v 3 Te augwali wegi ogwa we elalubadi, augwali si te Isipde bidali. Te bidi dabego augwali sigo tigide gagali eyu, augwali si dali penani elama, augwali si te penani we pedelalio.  
\v 4 Te gomunai wegi nogi Ohola, te Samariade po kisilama wali, te Israel tǫ not badu kantrigo genuai taun da. Te tomo wegi nogi da, Oholiba, te Jerusalemde po kisilama walio, te Juda tǫ kantride saut badu elalubo genuai taun dao,” wali.  
\p “Tialima, eno te wegi si sali, te augwali sigo eno wai dabe ame nanio.  
\v 5 Ohola aga eno we da, tiali goli agai penani ebo kolesaga eyu, te agai te Asiria dabe dali gedu elama, te augwali agai abagi dabe pedelalio.  
\v 6 Te abagi dabe augwali te gegunai Asiria gavman bidi dabe da, augwali te ami polalubo ofisa bidi dabe augwaligo te wiegi yai husugu ugwa gudali. Te sawi yai ami dabe augwa te hosde dugulama boi hwįani. Ohola agai te gesi ogwa bidi dabe sulama, te aga haliga hogodasa holalio.  
\v 7 Tama aga te polalubo Asiria bidi dabego penani we pedelali. Tama agai augwaligo te tibo god dabe lotu wabo sę yali, tama aga eno gedude meda yai mu pedelai dao.  
\v 8 Agai te penani sę te aga Isipde bidu, te gesi ogwa bidide bidali sogo yali tiwai yali. Te sogo te bidi dabego aga ame tolama, te gagali eyu, aga penani elama, te augwa homu godolo yali te silalio.  
\v 9 Agai te dwai kolesaga Asiria dabe dali yali, te agai godolo mu yali abagi dabe mu da. Tama eno te Asiria dabe aselama, aga dolagasomainu ilai dao.  
\v 10 Te augwaligo agai ugwa peda sąnama, te aga habu olo mu bidali. Tama augwaligo Ohola te bainat hwągo ela munama, te agai wai naga tigidali sali. Te we dabe sibigo te tiwai sę te we Oholaba pedelali po mibo odama, tama augwa te po wali, ‘Agai te aga yali dwai kolesagade sęgę tolobo sę yai dao.’ Augwaligo te po wali.”   
\p
\v 11 “Te tomo wegi Oholibago te sęgę dabe te Oholaba pedalubo suali, tiali goli agai tede homu kone palobeo. Menio. Agai te penani sę ebo bomo umagi mu eyu, tama agai te Oholago yali dwai kolesaga aiyaba elaluai dao.  
\v 12 Oholibago me te Asiria gegunai bidi dabe me, ofisa dabe dali gedu eyu yai. Tigidali te sawi yai gesi ogwa bidi, tama te wiegi yai ugwa gudai au elalu, tama augwali hwįbo hos kibu dabede dugulama hwįani. Tama Oholibago haliga augwalide hogodama, te aga augwali dali pagela pidu geai dao.  
\v 13 Eno suali, agai aga amago yali kolesaga tobage yalio. Augwali sigo kolesaga te meda yai mu yai dao,” wali.   
\p
\v 14 “Tiali goli, Oholibago dwai kolesaga yali te umabogi mu yalio. Agai te Babilon gegunai bidi dabego piksa noma suali. Te bidi dabego te piksa te bagulali be dagade te mama yai pengo pilalio.  
\v 15 Te piksa dabe da, te gegunai bidi dabego te kukulu gudama, te augwaligo wiegi yai au yai ugwa dabe selama, te augwa tobolude bagulali. Oholibago te Babilon ami polalubo ofisa dabe piksa suali, te gasa sawi yai mu ebaso,  
\v 16 te aga haliga augwalide mu hogodaluali. Tibaso, agai te Babilonba po ola tolama, te aga dali piagasomainu augwaliba hanalu wai dao.  
\v 17 Tialima, augwali asama, aga dali pagela pilama, tama te augwa godolo yali homu silalio, tama augwaligo Oholiba te meda mu ilali. Augwaligo te tama sę ela pidu ela pali, te nosali agai augwalide hagela mu yai dao.  
\v 18 Oholiba aga te we dwai mu da. Agai dwai kolesaga te hania hanilama ebaso, tigidali bidigo koneani, aga te penani we da homu yalio. Te eno agade hagela mu yali, te eno agai ama hagela homu yali tiwai yalio.  
\v 19 Tiali digi, aga penani yali kolesaga genuai eyu, umabo mu yalio. Aga te Isipde bidu te penani yali te sogoba homu kone palama ebo tiwai yai dao.  
\v 20 Tede polobadu bididubadi aga te Isip bidi dabede haliga hogodali. Te augwaligo nai da, te kibu donkigo nai tiwai genuai elalu, te augwaligo tigi ąį te umagia mu pedalu, te kibu hosgo ąį tiwai yalio,” wali.   
\p
\v 21 “Augwali te tiwai bidibaso, Oholiba, nago te nage Isipde te gesi wegide bidali sogo yali kolesaga tobage yabo homu godolo ebao. Te sogo te bidi dabego nago ame tolama, te gagali eyu, te nage dali pagela pidu geai dao,” Genuai Bidigo te po wali.   
\s1 Godigo Oholiba dolabo po wali  
\p
\v 22 Genuai Bidigo po te tiwai ma wali, “Oholiba, nago te tobage dwai kolesaga ebaso da, teda ena God Genuai Bidi, eno po nage dali elalubao. Eno koneani, nago naga te abagi dabe nosali hagela homu yali, tiali digi augwaligo te nagede wado yabo sę eno ilibaso, te augwali tigidali badu asama, nageba dwai sę yagasaibao.  
\v 23 Eno te gegunai gavman bidi dabe dali, te ami polalubo ofisa dabe dali te bulu tǫ kantri Babilonde, me Kaldia, me te Pekot hani dabe, me Soa, me Koa, me Asiria, te tama bulu bidi dabe selama, tama augwali te kibu hos dabede dugulama, te augwali eno odasa asaibao. Polobadu nago te bidi dabe te ogwa bidide bidibo suali, te gasa sawi yai mu bidibaso, te nago augwalide gedu yai dao.  
\v 24 Tiali goli, megi da, augwa te not badu tǫ pedai bidali taga soyu, te nage dali boi hwį yagasaibao. Augwali te genuai ami hani dabe dali asu, te augwa hwįbo karis dabe me, te walu doado bage tolobo karis dabe dali asaibao. Augwa te hwįbo doado bage me selama, te hwįbo kapa madi munama, te sabele dabe dali, awa dabe dali tolasa asu, te augwaligo nage bagua sagasaibao. Te augwaligo nage aiyaba elalubo sę eno ilama, te augwaligo nage te augwa kolesagade digi po tų elama, te augwaligo nageba dwai dene mawaibao.  
\v 25 Nago ena tudiba mubaso, te eno nage dali wado po wali. Tialima, te bidi dabego nageba dwai sę mu yabo sę eno ilaibao. Te augwaligo nago guni me olo togolama, te nago wai dabe me saibao. Te nago tǫ kantride me badu bidali we bidi dabe, te bidi dabego augwali te bainat hwągo ela muyu, ma te augwali isiba ulaibao.  
\v 26 Te bidi dabe augwaligo nago ugwa pepeda sąnama, te nago wiegi yai beli me nogode muani ring dabe saibao.  
\v 27 Eno te sę dabe ebaso, te nago penani sę ebo kolesaga munu ma isąma, te nage Isipde bidu yali gagalasa, te tiwai megi e sogoba usu naga nagasalio. Te nago naga te tibo god dabeba lotu munu ma wasiąyu, tama nago te Isip dabeba homu kone ma egobe dao,” wali.   
\p
\v 28 “Magi baso meni. Ena God Genuai Bidi, eno te tama po nagebolo obao, te nago godolo isąma hagela homu yali bidi dabe, te nageba dwai dene mabo sę yagasomainu eno tamadi tama sula tagalaibao.  
\v 29 Te bidi dabego nage godolo isąwai, te bidi dabe augwaligo nago doado bage tigidali saibao. Te nage olo mu bidaibao, te penani we aga bolu olo bidibadi te bidi dabego aga subo tiwai ebao. Nago penani dwai kolesaga hauwa ebaso,  
\v 30 tama nageba te sęgę dabe pedelaibao. Nago te gasa tǫ kantri dabego tibo god dabe tigidali wali peyu, te naga digi eno gedude meda ilali, te penani we aga yali kolesagago meda ilibo tiwai yalio.  
\v 31 Nago naga amago dwai kolesaga ebo wali pobaso, te eno nageba dwai dene mabo te agabolo mani dwai dene tiwai mawaibao,” walio.   
\p
\v 32 “Ena God Genuai Bidigo te tama po obao, Oholiba, te eno nageba dwai dene mu mawaibao, te naga amabolo mani dwai dene tiwai tobage nageba me mawaibao,” te po wai. “Te eno nage te bomai wain ąį te genuai kabude tumainu ebo tiwai ilama, te nage wabo pabo bidi tiwai yaibao. Te gasa hani we bidi tigidaligo nage sulama, te nage gisugu mayu, te nageba dwai posobo po waibao.  
\v 33 Te wain ąį eno te Samaria mani tobage wain tiwai da, te naga nagebolo mawaibao. Nago tulama, te nage gęǫ page eyu, te nage haliga sęgę eyu, te wi dwai mu elama, te nage dolaibao.  
\v 34 Ena God Genuai Bidigo eno po dolo obao, nago tulama, te wain mu siminama, tama te kabu nago aluama, te aga pepedai me badu selama, te naga digi naga ame togaibao,” wai dao.   
\p
\v 35 “Ena God Genuai Bidigo eno te tiwai po nagebolo obao, nago ena homu konebo tagalama, te ena tudiba munama, te tobage dwai kolesaga dabe mu yali. Tibaso, naga te yali dwai penani kolesaga dabede sęgę tolao,” wali.   
\s1 Godigo te dwai we si dolabo po walio  
\p
\v 36 Tialima, Genuai Bidigo enabolo te tama po wali, “Tǫde bidio, eno homugo nago te Ohola me Oholiba sigo dwai kugumini yai kolesaga yalide dagalama, tama po tų ilao,” wali.  
\v 37 “Augwali si te penani we da, te bidi me ela muai dao. Augwali sigo te tibo god dabe dali penani tiwai yali. Augwali sigo eno wai dabe ame nani, tiali digi augwali sigo augwali elama, te tibo god dabeba ofa eyu yalio.  
\v 38 Te kolesaga naga me ebeo. Menio. Augwali sigo te tiwai gasa dwai kolesaga me yali. Augwali sigo eno be te eno gedude meda mu ilali. Te augwali sigo te Sabat bodolu muani side bomai po bolali, te eno bodolu muani side digi mu dao.  
\v 39 Augwali sigo te wai dabe te tibo god dabeba ofa ela silama da, teda augwali si te sogo naga hogodasa aselama, te eno beba lotu wagasali. Te tiali kolesagago augwali sigo eno be meda mu ilalio. Augwali sigo te kolesaga dwai mu eno bede digi yai dao,” wali.   
\p
\v 40 “Te augwali sigo gasa dwai kolesaga mu me yali. Augwali sigo te digibulu bulu bidi dabeba po ola tolama, hanaluama, augwali asao wali. Tialima, augwaligo te po odama, te augwali asali. Te we si ąį paluama, te gedu au ilibo pen pilama, te beli dabe me nogode ring dabe muanio.  
\v 41 Te augwali sigo bet me deli au ilama, tede dugulalu, tama augwali sigo te tobage wiegi yai nai dabe te bet pąde elalubo tebolo sai me deliba muani. Tama augwali sigo te eno augwali siba mani te wiegi yai denami ilibo hano ebo pauda me, te oliv wel me, augwali sigo te tebolo saiba muanio.  
\v 42 Augwaligo te tǫ wa pai bulude bidali bidi dabe hauwa selama, te augwali odasa aselama, tama te we si dali augwaligo nai da tuali. Te augwa wiegi yai pemene eyu, i hae subigila wali. Te bidi dabego te we sigo nogoba ring muyu, te augwali sigo toboluba te kwin wego madi muanio.  
\v 43 Eno sulama, eno te homu yali, te sesabi mu elama, te we sigo bidi tagalobo kolesaga elama, te megi da augwali si te penani we pedelama, tama te bidi dabe augwali siba naga pai dao.  
\v 44 Augwaligo te Ohola me Oholiba siba penani sę igi piduali, te penani we si da po wai dao.  
\v 45 Augwali sigo te sali bidi dali bidali tagalobo kolesaga eyu, bidi dabe ela muani, tibaso te doloba pai bidi dabego augwali po tų ilama, te tama po weyu, te augwali si isimainao,” po wai dao.   
\p
\v 46 “Tialima, ena God Genuai Bidi, eno te tiwai po obao. Te genuai hani bidi i olama, te we si penani yagasomainao. Te augwaligo augwali si wi dwai mu ilabo sę elama, te augwa te augwali sigo doado bage bisigi elama, sainu yaibao.  
\v 47 Te augwaligo te we siba masigi sąnama, te augwali si bainat hwągo enama, te augwali si isaibao. Te augwali sigo wai dabe augwaligo ela munama, te augwali sigo be tigidali isigo domainao,” wai dao.  
\v 48 “Te tiali kolesagade eno te tǫ kantride penani yali kolesaga mu sela sąwaibao, tama tigidali wego eno te sę ebo sulama, augwa te tiwai konemainu yaibao, te we sigo penani kolesaga yali tiwai sę te augwaligo munu me egobe dao waibao.  
\v 49 Dage ama nami we sigo, odao. Dage sigo penani sę hauwa eyu, tama dage sigo te tibo god dabeba lotu po wali. Tibaso, eno te dwai dene dage siba mawaibao. Te tiwai dage sigo bugagia koneao, ena digi ena God Genuai Bidi, eno te po wabo dao.” Te po wali.   
\c 24  
\s1 Jerusalem te sene me deli tiwai da  
\p
\v 1 Te kibu be 9 da te kalabuside bidali, te dei 10 wabode, te 10 poluade, te bidali kibu bede, \f + \fr 24:1 \ft Te dago megi elalubo kalendade, te deli wabo poluago 15 dei, te kibu be 588 te Krais e tǫde ame nisiąbadi bidali sogo dao wali.\f* Genuai Bidigo enabolo te tiwai po wali,  
\v 2 “Tǫde bidio, te side naga gagalasa, te Babilon kingo te Jerusalem bagulubo sę yali. Tialima, nago te side te Israel dabego koneyu, te nago po te mu po yabo te po wabo dei asęao,” wali. \x * \xo 24:2 \xt 2 Kin 25:1; Jer 52:4\x*  
\v 3 “Nago te Israel hagoma bidi dabeba nago te po digi po begelama, augwaliba pusao. Te God Genuai Bidi eno po da e tiwai, ‘Nai ulubo bidi, nago sospen te isiba ugadu munama, te sospenba ąį tabilao.  
\v 4-5 Te sipsip me deli wiegi yai mu me deli selama, elama, te togao. Te agai polalubo mi me badu sao, te wiegi yai na mi, me sągą mi da, te wiegi yai dili dabe selama, te sospenba tigidali buao. Te dili dabe te mi dologode munama, te kibu mi me dili dabe bugagia posolo ąįba ulao,’ eno te tiwai po asęao,” wai.   
\p
\v 6 “Ena God Genuai Bidi, eno te po obao. Jerusalem taun te brasgo nigai sene me deli tiwai elalu, te aga tomode meda mu elaluali, te bidi dabego aga wiegi yai pedalumainu yabo usu egobeo. Te senede kibu mi pedai tigidali, me kibu dili me teda muao, te senede deli me elalusiąwai. Magi baso meni. Te Jerusalem dabego gasa bidi dabe ela muani, tialima te augwali mu dolaibao,” wali.  
\v 7 “Augwaligo te augwa dwai kolesagade homu kone me tųą pabeo. Menio. Augwaligo hanilama, bulu ulade yali. Te augwaligo te bidi dabe elama, te kaneme te masigi elalubo pesage daide gealu tiwai yali. Augwaligo kaneme te tǫba gealumainu me ebeo, te tǫgo geme dualumaina wabeo.  
\v 8 Tiali digi, ena eno te masigi elalubo pesagede augwaligo kaneme gealumainu ilali, te eno sumainu yali. Te eno augwaligo yali dwai sęde homu kone palama, te augwaliba eno haliga sębę eyu, te eno augwaliba dwai dene mawaibao,” wali.   
\p
\v 9 “Tialima, ena God Genuai Bidi, eno te tama po obao, eno te kaneme pągąnalubo taun mu dolaibao. Te taun ulabo isi ena digi pesage holaibao.  
\v 10 Isi hauwa pesage holama, te sia nogolama, ula ilao. Te sene posolo ąį kulukulu olala pidu genama, wa pelama, te kibu mi dabe me dili te isigo mu tigidali dela pelama, te senede mu silao.  
\v 11 Tialima, te bras sene te iside ulalumainu elama, te posolo hobulu mu yai pedalumainao. Te sene meda mu yali, te eno homugo te isigo te dila pai pobele bage hogomu silimainu elama, te sene wiegi yai meda meni yai ma pedalumainu yao.  
\v 12 Tiali goli, ena odolali sę dene yali. Isigo te pobele bage dela silabo usu meni yai dao.  
\v 13 Dage Jerusalem, te yaba yali po wali page te dagego dwai meda yai kolesagade dąį elasa walio. Eno dagego dwai kolesaga sela sąbo usu sali, tiali goli dagego hagela yali. Dage meda dali bidabo homu naga yali. Tialima, te ena haliga sębę ebaso, te eno dageba dwai dene mabo sę ebaso, te eno dageba dwai dene mabo sę mu yaibao. Tama dage te meda dali me tama bidaludubadi, te eno haliga sębę yali silibo sogoba usu naibao,” wai dao.  
\v 14 “Ena Genuai Bidi, eno mu po obao, te dage eno dolaibao. Te dagego meda yai kolesaga ebode te tigidali eno homu kone ebo gegeda palogobeo. Te dage eno homu dene me isąma, te eno dageba olo mu tau sabo wiegi yai kolesaga me egobeo. Mu menio. Te eno dage po tų ilama, te dagego yali dwai kolesaga tigidali dolo wei ponaibao. Ena God Genuai Bidi, eno te po wai dao,” wali.   
\s1 Profet Esekielgo we isali  
\p
\v 15 Genuai Bidigo enabolo te tama po wali,  
\v 16 “Tǫde bidio, eno koneani, nago naga we godolo homu mu yai, tiali goli te polo tama eno te we dagala selama, te nage olo bidaibao. Tiali goli, nago agade gela weyu, te hobede ebo balia me olamu dao,” wali.  
\v 17 “Nago haligade naga hwąwa wao. Te bidi dabego nage odomainu me ilamuo. Tama nago te isai bidi dabede hobede ebo kolesaga dabe tiwai me elamuo. Te nago tobolude mubo ugwa name belama, te sągąde nadoba gudao, te naga sesemane sogo au ebo tiwai yao. Te nago pedauwali panigio. Te abagi dabego hobede ebo kolesaga wali peyu, te nageba nai sela asobo sę tiwai nago me elamuo dao.” Genuai Bidigo enabolo te po wali.   
\p
\v 18 Te kigamu te we bidi dabe dali eno po miani, te pio eno we isalio. Te do tama kigamude, eno te Genuai Bidigo enabolo po wali sę dabe yai dao.  
\v 19 Te we bidi augwaligo ena sulama, te augwaligo enabolo te tiwai hanalu wali, “Magi baso nago te homu dene ebo kolesaga wali pabewe? Te nago magi nai me deli dabolo ola maiabo homu eyu eba, agawe?” te po wali.   
\p
\v 20 Tama tibaso, eno augwaliba te tama po wei ponani, “God Genuai Bidigo enabolo waliyu,  
\v 21 te dage Israelba te po pusao wali, Godigo te tama po wali, ‘Dagego God eno moni tempel bede wiegi yai homu pemene eyu, tama dagego te po weyu, te bomai dila pai be mu da, wali. Tama te be dagego godolo mu ebao. Tiali goli, eno te be dolaibao. Te dage hani wai dabe te Jerusalemde me bidalubo te boi hwįnama dolaibao.  
\v 22 Tialima, te Esekielgo yali kolesaga tobage te dagego me yaibao. Te dagego duga pedauwali me panigobeo. Tama te duga abagi dabego te hobede ebo kolesaga eyu, te dageba nai dabe sela asobo sę dagego iligobeo.  
\v 23 Te dagego ugwa tobolude belama, te sągąde nadoba bulama, paibao. Dagego te isali we bidide homu dene elama, gela wabo homu eyu tigobeo. Magi baso meni, te dagego duga digi yali sęgęde homu kone hauwa tųą pelama, te dagego tigi dabe te nomona saibao. Tama dagego duga haside digi hwąwa weyu tiaibao.  
\v 24 Esekiel te dagego dąį tiwai ilali, magi baso meni, dagego me agai te yali kolesaga tobage naga yaibao. Te tigidali sę pedalubo si da, dagego te tiwai tama koneagameo, ena digi ena Genuai Bidi dao.’ Godigo te po dagebolo pusao po wai dao,” eno te po wai.   
\p
\v 25 Te Genuai Bidigo po enabolo weyu, te tama po ma wali, “Tǫde bidio, eno be augwaligo be tomode elaluali, tialima te augwali bomo elama, dolalueiba, te homu augwaligo yali. Augwaligo te be godolo homu elama, tede wiegi yai pemene eyu, teba sesemane homu kone elaluali. Tiali goli, eno ena te be dolama, tama eno augwaligo wai dabe ela muaibao,” te po wai dao.  
\v 26 “Eno te tama sę ebo sogo, te bidi me deli te Jerusalemdu wi aselama, te sę dabe pedelali po nageba walagasaibao.  
\v 27 Te bubugade naga, te eno nago pedauwali usu ma ilama, te nage pedauwali pania sai munu me elalugobeo. Tialima, te nageba po sela asali bidi dali te nago po ma miaibao. Te Israel augwaligo sueibao, te nago po ma obaso, te Israel dabego te tiwai koneama, ena digi ena Genuai Bidi bidibo dao,” po wai dao.   
\c 25  
\ms1 Esekielgo te gasa tǫ kantri dabe dolabo po pusali  
\mr (Dąį 25–32)  
\s1 Godigo te Amon dabe dolaibao  
\p
\v 1 Genuai Bidigo enabolo te tama po wali,  
\v 2 “Tǫde bidio, nago te Amon dabego tǫba tonao, te augwali dolabo po wao.  
\v 3 Augwaliba te tama po walao, ‘Dage Amon dabego ena God Genuai Bidigo poba bugagia olo muao. Dagego eno be dolali, me te boi bidi dabego te Israel dabego tǫ dolali me, dagego suali, te Juda dabe selama, te digibulu buluba kalabus igi pali. Tama dagego te sę dabe ebo sulama, tega weyu, wiegi yai homu pemene eyu, dili elebo kolesaga yai dao.  
\v 4 Tialima, eno te bidi hani me deli te giliga asobo badu asomainu ilama, te augwaligo dage dali boi hwįagaselama, te dagego tǫ saibao. Te augwaligo sel ugwa be dabe te dagego tǫde sę elama, tede bidaibao. Te augwaligo nai dagego tǫde sela tuyu, te dagego bulmakau ame pę dabe sela tuyu yaibao.  
\v 5 Te eno taun Raba, te dagego genuai taun, te dolama, te kibu kamel dabego nosai tubo pesage pedelaibao. Te tǫ kantri Amon te kibu sipsip dabego obo dabe nigibo pesage pedelaibao. Tama dagego te tiwai koneyu, ena digi ena Genuai Bidi mu da po wagameo,’ te po te Amon bagebolo wao,” te po wali.   
\p
\v 6 “‘Te eno te sę dage dali magi baso yaibawe? Te ena God Genuai Bidigo te tama po obao. Eno koneani, dagego te Israel dabe godolo homu meni isąwani, te Israel tǫ kantri dolali sogo, dage wiegi yai pemene elama, nogo bada eliyu, wele siyu, kęnę wai dao.  
\v 7 Dagego te tama kolesaga yali, tibaso te eno dageba dwai dene momainogo te gasa hanigo dage sagasomainu elama, te dageba dwai dene momainu yali. Te eno dage dolobo sę mu elama, tama dage te tǫ kantri me deli bidibo tiwai me egobeo. Te tiwai dagego bugagia koneyu, ena digi ena Genuai Bidi da po waiagameo,’ te po te Amon we bidiba pusao,” Genuai Bidigo enabolo te po wai dao. \x * \xo 25:7 \xt Jer 49:1-6; Ese 21:28-32; Amo 1:13-15; Sef 2:8-11\x*   
\s1 Godigo po weyu, te Moap kantri dolaibao wali  
\p
\v 8 Genuai Bidigo po ma weyu, te tama po wai, “Ena God Genuai Bidi, eno po obao, te Moap dabe me Seir dabe, augwaligo te homu yali, te Juda dabe te gasa hani bidi dabe tiwai si da homu yai dao.  
\v 9 Tialima, eno te boi bidi dabe aselama, te tǫ kantri dąį pąde elalubo te Moap dabego bomai taunba hwįagasomainu yaibao. Te augwaligo te wiegi yai taun dabe dolaibao, te taun Bet Jesimot, me taun Balmeon, me taun Kiriataim dao.  
\v 10 Te boi bidi dabe te giliga asobo badu asama, te Moap dabeba me, Amon dabeba dali siba boi hwįnama, te augwali aiyaba elaluama, te augwaligo tǫ saibao. Tama te Amon dabe te tǫ kantri pedai tiwai me deli ma bidigobeo.  
\v 11 Awe, eno te dwai dene mabo sę te Moap dabeba ebaso, tama augwa te tiwai bugagia koneama, ena digi ena Genuai Bidi mu da po omainu yaibao,” wali. \x * \xo 25:11 \xt Ais 15:1–16:14; 25:10-12; Jer 48:1-47; Amo 2:1-3; Sef 2:8-11\x*   
\s1 Godigo po weyu, Idom tǫ kantri dolaiba wali  
\p
\v 12 Genuai Bidigo te tama po wali, “Ena God Genuai Bidi, eno po obao, Idom dabego dwai kolesaga mu te Juda dabeba wei ponani, tialima te Idom dabego yali dwai sę te genuai mu igi pai dao.  
\v 13 Te eno megi te po obao, eno te Idom dabeba dwai dene umabo mu menama, te tigidali we bidi ela munama, te augwa kibu sibi dabe tigidali me elaibao, te not badu te distrik Temande gagalama peyu, te saut badu te taun Dedanba usu naibao. Te tǫ kantri Idom olo mu elaluaibao.  
\v 14 Eno te Idom dabego dwai kolesaga wei ponabo homu yali, tibaso te eno ena we bidi augwali te Israel dabe, te augwali elali boi hwįgi pomainu tagala palaibao. Te kolesagade te Idom dabego eno haliga sębę genuai ebo koneaibao. Tialima, te Idom dabego te tiwai bugagia koneaibao, ena digi eno augwaligo dwai sę yali wei ponobao homu yaibao. Ena God Genuai Bidi eno te po wai dao.” \x * \xo 25:14 \xt Ais 34:5-17; 63:1-6; Jer 49:7-22; Ese 35:1-15; Amo 1:11-12; Oba 1-14; Mal 1:2-5\x*   
\s1 Godigo po weyu, te Filistia dabe dolaibao wali  
\p
\v 15 Genuai Bidigo po ma weyu, te tama po wali, “Ena God Genuai Bidi, eno te po obao, te bobobage sogo te Filistia dabego te Israel dabe godolo homu me isiąma, te augwaliba boi bidi ebo sę yalio. Te Filistia dabe augwaligo dwai sę wei ponobo sę umabo mu eyu, te augwali mu dolai dao.  
\v 16 Tibaso, megi da, eno te po obao, eno te Filistia dabe augwaliba dwai dene mabo sę mu elama, tama eno te nambisde bidibo we bidi tigidali mu silabo sę yaibao.   
\p
\v 17 Eno haliga sębę dwai mu augwalide elama, tama augwaligo yali dwai kolesaga tigidali dolo wei ponaibao. Tama augwaligo te tiwai bugagia koneama, ena digi ena Genuai Bidi dao,” te po wai dao. \x * \xo 25:17 \xt Ais 14:29-31; Jer 47:1-7; Jol 3:4-8; Amo 1:6-8; Sef 2:4-7; Sek 9:5-7\x*   
\c 26  
\s1 Godigo po weyu, te Tair taun dolaibao wali  
\p
\v 1 Te da Babilon tǫde kalabuside bidibadi te kibu be 11 wabode, tama te poluade deli wabo side, Genuai Bidigo enabolo te tiwai po pusalio,  
\v 2 “Tǫde bidio, eno te tamu ąį tomode elalubo tǫde elalubo taun Tair we bidide po elalubao, te tǫ te tamu ąį sesege pąde elalubao. Te Tair taunde bidibo we bidigo homu pemene eyu, e tiwai i hae obao, ‘Jerusalem dolobaso, te gasa tǫ kantri bidi dabe teba pelama, te mone sabo bisnis sę yali te ma igi pabo usu me egobeo. Megi da, te augwali aselama, da dali naga te nai dabe dobu si ebo bisnis sę yagasaibao, tama tiyu dago doado bage hauwa saibao,’ po wabo dao, te Tair we bidi.”   
\p
\v 3 “Tama tibaso, megi God, ena Genuai Bidi, eno te po obao, ena dage Tair hanu bidi dabego boi bidi pedelaibao. Te eno bidi hani hauwa odasa aselama, dage dali boi hwįagasomainogo yaibao, te tamu ąį genuai pepeda pelama, dini gisigilibo tiwai yaibao.  
\v 4 Tama te augwaligo dagego taun bagulali bomai masigigo nigali obo dolama, tama augwaligo te obo bagulali bobobage be taua dabe tigidali pepedama, aiyaba tudulaibao. Tama eno dagego taunde elalubo tǫ dabe tigidali sela sąnama, tama masigi bulu naga olo tede elalueibao.  
\v 5 Tama te sųgų sabo sę ebo bidi dabe aselama, te ąį tomode elalubo masigi bulude sųgų sabo wa dinigina munama, te giligago te wa omainogo yaibao. Te ena God Genuai Bidigo po obao. Te gasa hani bidi dabego dage sagaselama, te dageba dwai sę mu yaibao.  
\v 6 Tama te boi bidi dabe aselama, te genuai bulu te taun dabe bidalubo we bidi dabe ela mueibao, te taun Tair elalubo pąde bulu dabede bidibo we bidi me ela mueibao, te nambisde bidibo bage. Tama dage Tair hani, dagego bugagia te tiwai page kone peyu, ena Genuai Bidigo digi eno te tama sę eba homu yaibao,” wali.   
\p
\v 7 “Magi baso meni. Ena God Genuai Bidi, eno te tama po obao. Eno te bomai king me deli odasa asaibao, te king Nebukatnesar te tǫ pedai Babilon king dao, tama agai te gasa tǫ pedai kantri dabego king dabe tonalubo dao. Tama agai dage Tair dabe dali boi hwįaibao. Te aga not badu pedaide bidali tagalama, te genuai ami hani dabe dali aselayu, tama te boi hwįbo nai kibu hos dabe, me karis dabe dali asiyu, te kibu hos dabede dugulama boi hwįbo ami hani bidi dabe dali asaibao.  
\v 8 Tama augwali aselama, te nago nambisde elalubo taun bidi hani dabe dali hwįagaselama, te taun dabe dolaibao. Tama te tamu ąį tomode elalubo tǫba aselama, augwaligo te taun Tairgo obo bulu badu te tǫ du holama, te dagego taun tomoba hwįainogo tiwaibao. Tama augwa awa dabe te augwa seselalubo obo tiwai elalu, te augwaligo hwįaibao.  
\v 9 Tama augwaligo genuai masin selama, tama te taun bagulali obo pepedelama tulaibao. Tama te ain tigi dage selama, te bagulali obo aluama, pebedama mueibao.  
\v 10-11 Tama te ami bidi dabe te kibu hos dabede, me te kibu hosgo kekebo nai karis dabede dugulama, te taun bagulali obo sunumi dabedu tomoba paibao. Te augwaligo genuai kulukulu wabo sę eyu, te bagulali obo mumunu yaibao. Augwaligo te kibu hos dabe te taun sunumi dabe tigidalidu udabaso, te tǫ hogomu genuai pedelama, te taun tomode be dabe halueibao. Tama te ami bidi dabego te bainat hwą nogo tulama, te taunde we bidi tigidali ela mueibao. Tama augwaligo te taunde dila pai pos dabe tologolama, te tǫba sąwaibao.  
\v 12 Te boi bidi dabe augwaligo te dagego mone dabe me doado bage tigidali sobadi, tama dagego mone sabo bisnis sę ebo nai dabe tigidali saibao. Tama augwaligo te taun bagulali obo dabe aluama, te dagego wiegi wiegi yai be dabe mu dolaibao. Tama augwaligo te masigi dabe me, ni dabe me, tǫ dabe me, tigidali selama, te tamu ąįba sąwaibao.  
\v 13 Tama dagego te tęąbi po wabo me, te gita elebo sę ebo me, te ma egobeo. \x * \xo 26:13 \xt Ped 18:22\x*  
\v 14 Te eno dagego bulu tǫde te masigi dabe naga elalumainu yaibao. Tama te sųgų gegebo sę ebo bidi dabego te sųgų hagane togobo wa te masigiba manama, te wa dabe giligago omainogo tiaibao. Tama bidi dabego te taun ma nigainu ebaso, usu egobeo. Magi baso meni. Ena God Genuai Bidi, eno te po wai dao,” wali.   
\p
\v 15 “Ena God Genuai Bidi, eno te Tair dabeba te tama po obao. Te boi bidi dabego dagego taun dabe dolobo sogo, te gasa taun te tamu ąį pąde bidalubo we bidi dabego te ami bidi dabego te tama kulukulu wabo odaibao. Tama te ami bidi dabe augwaligo dage te taunde elama, tama te tigi selai bagego hwąwa wabo genuai mu pedelama, tama te gela u wabo te gasa taunde bidibo bage augwaligo odaibao. Tama te we bidi dabe augwali wi eyu, dwai noma mu saibao.  
\v 16 Tama te tigidali tǫ pedai kantri te tamu ąį pąde bidibo king bidi dabego dagede te pedalubo sę dabe sulama, wi dwai mu eyu, te augwa king sę eyu, te dugulalubo sia sai tagalama, aiyaba duagulu, tama augwa te king sę eyu gudubo sawi yai ugwa dabe pepeda sąnama, tama olo te tǫba duagulama, tama didibili eyu bidaibao.  
\v 17 Tama augwali te king dabego te dagego taun dolali sęde te e tiwai hobede ebo balia po waibao, ‘Hobede mu da, genuai nogi yai taun, nage dolalio. Te taun nago we bidi dabe te tamu ąįba asai, te polobadu augwaligo sip hauwa elalu, te augwali tamu ąįde sę yali polalubo hani dabe bidali. Tama te tamu ąį pąde bidalubo taun we bidi dabe, te augwali nago taun we bidide wi dwai mu yali. Tiali goli, megi da, nago sip dabe iba soyu, eda asiyu eyu, te bisnis sę iduali munu ma egobe dao.  
\v 18 Magi baso meni, te side naga nage dolalio, tama te tamu ąį tomo bulude bidalubo we bidi dabego sulama, tama augwali wi dwai umagi mu eyu, tama didibili ebao,’ augwaligo te balia po waibao,” wali. \x * \xo 26:18 \xt Ped 18:9-10\x*   
\p
\v 19 “Ena God Genuai Bidi, eno te tama po obao. Tair, te eno nage te olo bulu pesage nigilaibao, te bidi meni yai taun tiwai elalueibao. Tama eno nage te genuai tamu ąįgo mesegelama, te nage aiyadu dologode mu bidimainu yaibao.  
\v 20 Te sogo eno nage te isai bidi dabego bulu pesageba tagala palaibao, tama nage te polobadu bidi dabe dali bidaibao. Te eno nage te tǫ dologode te dolali taun dabe dali sesemane sogo bidimainogo yaibao. Tama nagede te bidi dabe bidimainogo me egobeo. Tama nage te tǫde wiegi yai taun ma pedelama bidainogo ebaso, te usu munu ma egobeo.  
\v 21 Te eno nage mu dola silama, tama gasa we bidi hanigo nage sulama, wi emainu yaibao. Te eno nage mu silimainogo ilama, tama te we bidi dabe augwaligo nage sueinu gegebo sogo da, te augwaligo nage me sugobeo. Ena God Genuai Bidi, eno te tama po wai dao,” wali. \x * \xo 26:21 \xt Ped 18:21\x*   
\c 27  
\s1 Te taun Tair dolaide Esekiel gela wali  
\p
\v 1 Genuai Bidigo te tiwai po enabolo wai,  
\v 2 “Tǫde bidio, Tair taun dolaibao, tama tibaso, nage gela weyu, tama hobede ebo balia po wao.  
\v 3 Te taun tamu ąį pąde elalu, te tamu ąį pąde elalua pabo tǫ pedai kantri dabe dali te mone me doado bage dobu si eyu, bisnis sę iduali. Ena God Genuai Bidi, eno homugo nago te balia po agaba pusao homu ebao,” wali.  
\b  
\q1 “Tair, nago te tama po weyu,  
\q2 nage te wiegi yai sawi yai polalubo  
\q3 taun mu da homu ebo dao.   
\q1
\v 4 Te taun nigibo bidi dabego,  
\q2 te augwaligo nage te wiegi yai sip mu  
\q3 tiwai pedalumainu ilali,  
\q1 tama te tamu ąį te nago bidibo pesage tiwai elaluali.   
\q1
\v 5 Augwaligo te ni pain te bulu du  
\q2 Hermonde selama, tama te sip nigai.  
\q1 Tama augwaligo te wiegi yai ni sida  
\q2 te Lebanon tǫde selama,  
\q2 tama te name ugwa walobo ni  
\q3 te bobobage dulai dao.   
\q1
\v 6 Tama augwaligo te ni kali te bulu Basande selama,  
\q3 te ąį togobo habesege dabe nigai.  
\q1 Tama augwaligo te sip aiyaba mubo  
\q2 soiyame ni te tobage wiegi yai ni  
\q2 me deli te bulu Saiprusde selama, nigali.  
\q1 Tama augwaligo te genuai kibu nogi  
\q3 elefango genuai kele dabe selama,  
\q2 te sip aiyaba sabo soiyame saidu au ilali.   
\q1
\v 7 Tama augwaligo te gasa sawi yai name  
\q2 ugwa pedai te bulu Isipde selama,  
\q3 tego te waligo pogolabo sel nigai.  
\q1 Te name ugwa pedai te haniani augo  
\q2 dodobolo pai selama, te sel nigai.  
\q1 Te sel te sipde walobo ugwa plak tiwai muani.  
\q1 Tama augwaligo te husugu yai me mama  
\q2 yai name ugwa te bulu Saiprusde selama,  
\q2 te sip guni tolasa pabo bidi dulalubo  
\q3 madi seselalumainu muani.   
\q1
\v 8-9 Tama te sip tomode sę eyu,  
\q3 habesege togobo bidi dabe,  
\q2 augwali te bulu Saidon taun bidi dabe,  
\q3 me te bulu Arvat taun bidi dabe da.  
\q1 Tama me badu te taun Biblos bidi dabe  
\q2 te sip tomode sę eyu,  
\q2 te sip aiyaba paliali ni name agebeledu  
\q2 te ąį sip tomoba holobaso te sebelebo sę eyu yai.  
\q1 Taun Tair, te sipba po kisilama wali,  
\q2 te taun Tair nageba digi po olama walio.  
\q1 Te nago kolesaga koneai bidi dabe te sip tomode  
\q3 tau sabo ebo bidi dabe tiwai da.  
\q1 Te gasa tǫ kantri sip dabe tigidali nageba asali,  
\q2 tama te sipde sę yai bidi dabe te taun  
\q3 tomoba pelama,  
\q1 te doado bage nago stua dabede abeleyu yai dao.   
\q1
\v 10 Te tǫ kantri Persia, me Lidia,  
\q2 me Libia bulu bidi hani dabe,  
\q2 augwali te nago ami bidi dabe bidali.  
\q1 Tama augwaligo te hwįbo sabele dabe,  
\q2 me tobolude mubo kapago nigai madi dabe me,  
\q2 te nago taun bagulali obode walali.  
\q1 Te hani dabe augwaligo te boi hwįnama,  
\q3 nage tau sabo sę eyu,  
\q2 te nago genuai nogi somainu yai dao.   
\q1
\v 11 Te taun Arvat ami bidi dabe augwali  
\q2 te nago taun obo bagulali obode dolalu,  
\q2 tama augwaligo te boi bidi dabe asobo  
\q3 suainu tonaluali.  
\q1 Tama te taun Gamat ami dabe  
\q2 te obo bobobage nigali taua dabe tede dolalu,  
\q2 te boi bidi dabe asobo suainu, no bidibo.  
\q1 Tama augwaligo hwįbo sabele dabe  
\q3 te nago obode walali.  
\q1 Te hani dabe augwaligo naga nage tau sobaso,  
\q2 te nage wiegi yai sawi yai taun mu pedelai dao.”  
\p Genuai Bidigo enabolo te tama balia po te taun Tairbolo wao, wali.   
\p
\v 12 “Tair, te nago mone sabo bisnis sę te bulu tǫ kantri Spen dali yali. Tama augwaligo nagebolo te silva, me ain, me kapa, me soda, te tama nai mani, te augwaligo nagede te nai hauwa sainogo tiai dao.  
\v 13 Tama nago mone sabo bisnis sę te kantri tǫ pedai Grik dali, me Tubal, me Mesek, te tama bulu dabede bisnis sę yali, tama nago nai dabe augwaliba mayu yali, te olo mu sę yabo bidi dabe me, te tobage gasa nai dabe me, te hanigo te brasgo nigali nai dabe mayu yai dao.  
\v 14 Tama nago mone sabo bisnis sę te taun Togarma dali yali. Nago nai doado bage augwaliba mayu, te nago te hos dabe, me donki dabe, me te boi hwįbo hos dabe dobu si eyu yai.  
\v 15 Tama te taun Dedan bidi dabego me te nage dali mone sabo bisnis sę yali. Tama te tamu ąį pąde bidibo bulu tǫ kantri bidi dabe hauwago te mone sabo bisnis sę ebaso, tama augwaligo nageba te elefango kele dabe mayu, te augwaligo nageba nago doado bage sainu te husugu yai ni ebonigo dobu si yalio.  
\v 16 Tama te bulu Siria we bidi dabe, augwaligo nageba te wiegi yai mama yai name ugwa dabe mayu, te augwaligo haniani au yai hobolai name ugwa dabe mayu yali, tama te wiegi yai tedela yai name ugwa dabe me, te haniani au ilai mobadi, te haniani gasagi yai dila pai masigi dabe me mayu yali, te augwaligo nagede doado bage hauwa sainogo tama tiai dao,” wali.   
\p
\v 17 “Tama Tair. te Juda me Israel dabego nageba te wit hauwa mayu, te pusu nai hani, me te ni oliv wel, me te tobage gasagi yai marasin, me gasa nai dabe mobadi yali, te augwaligo nagede sabo nai dobu si abeleyu, tama tiai dao.  
\v 18 Te taun Damaskus bidi dabego te mone sabo bisnis sę nage dali eyu, te augwaligo wain ąį dabe nageba mani, te augwaligo te taun Helbonde sali, tama te sipsip nisi dabe augwaligo te bulu Saharde sai dao.  
\v 19 Te bulu Wedan, me Grik, te hani dabego me, te hani Usal hani dabego me, te mone sabo bisnis sę nage dali yali. Augwaligo te ain, me sanda te tobage ni me deligo nigai wel, me te tobage nai nogi awi diligo nigai te wiegi yai denami ebo nai, te tama nai dabe sesali, te augwaligo nage dali dobu si ebo hauwa sainu tama yali.  
\v 20 Te Dedango hani bagego nagebolo te hos dabe tudi dilide dugabo nai satel dologode munama dugayabo ugwa blanket dabe mani, te nago augwali maiabo nai dabe dali dobu si eyu tiali.”   
\p
\v 21 “Te bulu kantri Arebia bidi dabego me, te tǫ kantri Kedar tobolu bidi dabego me, te augwaligo nagebolo te kibu sipsip wai dabe me, te omai kibu sipsip me, te meme kibu dabe me mobadi yali, te augwaligo nago mabo nai dabe sabo homu eyu, tama tiai dao.  
\v 22 Te bulu Sebade bisnis sę ebo bidi dabe me, te taun bulu Rama bidi dabego me, te gol me, te wiegi yai denami ebo tobage nai nogi pauda me, te wiegi yai sawi yai masigi dabe me sesali, te nage dali dobu si eyu, nago mabo nai dabe sabo eyu, tama sę yai dao.  
\v 23 Te taun Haran, me Kane, me Iden, te tama bulu bidi dabego me, te kantri Seba me, Asur me, Kilmat me, te tama bulude te mone sabo bisnis sę ebo bidi dabego nage dali te mone sabo bisnis sę yai dao.  
\v 24 Tama augwaligo sesali nai dabe te sawi wiegi yai ugwa dabe me, te sisi yai name ugwa me, te augwaligo wiegi yai au ilama hobolai name ugwa dabe me, te tobage wiegi yai dila pai haliga bono, me te tobage au hauwa yai ugwa blanket dabe, me te be soiyameba salobo dodobolo pai somo ugwa dabe augwaligo sesali. Te tobage blanket dabe au wiegi yai hauwa elaluali. Tama augwaligo te nai dabe nagebolo mayu, te nago nai doado bage dabe augwaligo siyu yainogo te tiwai dobu si yalio.  
\v 25 Te genuai sip dabego te nago walu dabe gasa bulu tǫ kantriba sela peyu yalio,” wali.  
\p “Tama naga digi nage te genuai sip me delide te doado bage hauwa pągąnalubo tiwai nagede elaluai dao.  
\v 26 Tama te wę habesege bomo elama togobo bidi dabego te ąį bomonama togobaso, te nage genuai tamu ąį tomoba tugi pali. Tiali goli, bomai wali pedaliyu, tama nage dolaibao.  
\v 27 Tama nago mone tigidali me, au doado bage me, te tigidali sip guni tubo tau sabo bidi me, te sip tomode sę ebo kamda bidi me, te tigidali bisnis sę ebo bidi me, te nago ami bidi tigidali me, te nage dali bidali gasa bidi tigidali, augwali me nage dolali side te tamu ąįde hagawaibao.  
\v 28 Tama te sip guni tubo bidi dabego i dwagila mu i waibao, tama augwali dolobo sę yali te tǫ mumunu yali sęgo te tamu ąį sane nambis me mumunu yaibao,” wali.   
\p
\v 29 “Tama tialima, te gasa sip te sip tugi pabo madi tugi pelama, tama te sip guni tubo bidi dabe me, te sip tomode sę ebo bidi dabe dali, augwa sip dabe tagalama, tama augwali tigidali pelama, te tamu ąį saneba doligi paibao.  
\v 30 Te tigidaligo nagede haliga hobede eyu, dwai gela nagede waibao. Tama augwa te homu dene ebo kolesaga wali peyu, te augwa tobolude pu pilama, tama kelide pila muyu, tama te kelide ugwa begelu, eda begeleyu iduaibao.  
\v 31 Tama augwa tobulu nisi poala sąnama, te wane ilaibao. Tama augwa te homu dene ebo side mubo ugwa gudama, te augwali dwai haliga mu eyu, te gela oladu bidaibao.  
\v 32 Tama augwa te bidi isaide wabo balia po waibao. Tama augwaligo e tiwai balia po waibao,  
\b  
\q1 ‘Tair, te taun me deli  
\q2 te nage dolali tiwai gilama me ebeo.  
\q1 Nage te tamu ąį tomode elaluali,   
\q1
\v 33 tama nago naga walu doado bage  
\q2 te gasa tǫ pedai kantriba te tamu ąįdu tolali.  
\q1 Te we bidi dabe augwaligo te nai dabe  
\q3 doado bage siyu,  
\q2 te augwa wiegi yai homu pemene yalio.  
\q1 Te king dabe augwaligo mone sabo  
\q3 bisnis sę nago te naide yali,  
\q2 tama augwali te mone sabo bidi mu tiwai pedelali.   
\q1
\v 34 Tiali goli, megi da, nage te tamu ąįde dolobao.  
\q1 Tama nage te tamu ąį tomoba mu dulali.  
\q1 Te nagede bidali bidi tigidali,  
\q2 me te nago doado bage walu dabe dali,  
\q3 tigidali te ąįde hagawai dao.’  
\b  
\q1 Augwaligo te tiwai balia po waibao.   
\b  
\q1
\v 35 ‘Te tamu ąį pąde bidibo taun we bidi dabe,  
\q2 augwaligo nage dolali po odama,  
\q3 te augwali dwai noma mu salio.  
\q1 Tama augwaligo king dabe me wi umagi mu eyu,  
\q2 te augwaligo gesabidi gasagi yai mu hasegelali.   
\q1
\v 36 Nage dwagila mu dolali,  
\q2 tama nage te tǫde mu ma bidigobeo.  
\q1 Tama nage te tigidali mone sabo  
\q3 bisnis sę ebo te tigidali tǫ pedaide  
\q3 bidibo bidigo nage sulama, te augwali wi mu eyu,  
\q2 tama augwaligo te homu yaibao,  
\q1 “Tiyu, te tiwai sę daba me pedalidali,”  
\q2 homu yaibao,’ augwaligo te balia po waibao.”\x * \xo 27:36 \xt Ped 18:11-19\x*   
\c 28  
\s1 Godigo te po wali, Tair bulu king dolaibao po wali  
\p
\v 1 Genuai Bidigo enabolo te po wali,  
\v 2 “Tǫde bidi, eno homugo nago Tair kingbolo ena God Genuai Bidigo eno po aga dali pusainogo ebo po pusigi pao. Eno po e dao.  
\b  
\q1 Tair king bidi, nago naga nogi ugwaba siyu,  
\q2 te po wali, nage god me deli dao, wali.  
\q1 Tama nago bulu te god dabego bulu  
\q2 yali gilama tamu ąį tomode elalubao.  
\q1 Mu tama, nago te po wali,  
\q2 tiali goli, nage god menio, nage olo bidi dao.   
\q1
\v 3 Awe, nago homugo nago wiegi yai homugo  
\q1 Danelgo wiegi yai homu kolesaga edelai  
\q3 da homu te ebao.  
\q1 Tama nago homugo tigidali geme dualali po dabe  
\q3 nago koneaiba homu te ebao.   
\q1
\v 4 Te nago genuai homu kolesagago  
\q2 naga mone bidi pedaliyu,  
\q2 me nago gol me silva hauwa mu  
\q3 elaluyu, te homu ebao.   
\q1
\v 5 Tama nago wiegi yai bisnis sę elama,  
\q2 tama nago tede mone hauwa nago salio.  
\q1 Tama tibaso, nago naga te mone dabe  
\q3 me te nai hauwade homu elama,  
\q2 tama nago hagoma genuai mu ebao,” wali.   
\b  
\p
\v 6 “Tama tialima, ena God Genuai Bidi, eno nagebolo megi e obao.  
\b  
\q1 Nago hagoma eyu, nago homugo nago homu kolesaga  
\q2 te god dabego homu kolesaga  
\q3 tiwai dao homu te ebao.   
\q1
\v 7 Tama tibaso, eno te homu dene  
\q2 isąbo boi bidi dabe dwai mu teba tagala palama,  
\q2 tama nage dali boi hwįmainogo yaibao.  
\q1 Tama augwaligo nago naga homu kolesagago sali  
\q2 wiegi wiegi yai nai dabe tigidali dolagasaibao.  
\q1 Awe, nago gawebo nai dabe sese augwaligo dolaibao.   
\q1
\v 8 Tama augwaligo nage dolama, mu tagalama,  
\q2 tama nage naga bulude elama  
\q3 muaibao, te tamu ąį tomode.  
\q1 Tama nage aiyaba isai bidigo buluba aiyaba dulaibao.   
\q1
\v 9 Te augwaligo nage elainogo ebode  
\q2 nago augwalibolo po weyu,  
\q1 ‘Te ena god me da,’ nago te po waiba homu eba, agawe?  
\q1 Mu menio.  
\q1 Te nago koneaibao, nage olo bidi yabo homu yaibao.  
\q1 Tama nage te gasa tǫ kantridu asali  
\q2 bidi dabego nogode elalubadi,  
\q3 nage god menio homu yaibao.   
\q1
\v 10 Te boi bidi dabego nage dolama,  
\q2 tama nage dwai olo nai meni yai bidi  
\q3 tiwai isibo ąǫ yaibao.  
\q1 Ena God Genuai Bidi, eno po polo wali.”   
\p
\v 11 Tama God Genuai Bidigo enabolo po genina ma weyu, te po wali,  
\v 12 “Tǫde bidi, nago te Tair king bidide hobedai balia po olama, tama agabolo e tama po wao.  
\b  
\q1 ‘Tair bulu king bidi, ena God Genuai Bidigo  
\q3 po nago odao.  
\q1 Polobadu nage wiegi yai bidi mu bidiyu,  
\q2 tama nago tigidali bidi aiyaba elaluama bidai dao.  
\q1 Tama nago homu kolesaga genuai mu elama,  
\q2 tama nage tonobo sawi mu yai dao.   
\q1
\v 13 Te nage te Iden gide bidai bidi tiwai  
\q2 ąǫ yai dao, te Godigo wiegi yai gi.  
\q1 Tama nage te wiegi yai sawi yai masigigo au yai dao,  
\q2 te augwaligo te masigi daganabo  
\q3 nai dabe te golgo nigai.  
\q1 Te masigi dabe e dao,  
\q2 rubi, me topas, me daimon, me beril,  
\q2 me kanilian, me jaspa, me sapaia,  
\q3 me emeral, me ganet dao.  
\q1 Te nai dabe tigidali eno dodolagalali,  
\q2 te nage eno te tǫde pedalobode somainogo eyu.   
\q1
\v 14 King, eno nage tonalubo ensel bidi  
\q2 tiwai sa muai dao, tama nage dolaluyu,  
\q2 tama naga bogo dinigalu dolaluai dao.  
\q1 Tama nage eno bulu dude bidiyu,  
\q2 tama nage sawi yai udula pai masigi  
\q3 tomode bilai dao.   
\q1
\v 15 Te eno nage tǫde pedelemainu yali sogo da,  
\q2 nago kolesaga te dwagi yai mu yali,  
\q2 tama nago nai mede me geda mubeo.  
\q1 Tiali goli, nago nosali dwai kolesaga elama,  
\q2 tama nago eno gedude sęgę elaluali.   
\q1
\v 16 Nago bisnis sę bulu hauwaba yali.  
\q1 Tama nago te we bidi dabe dali hwįnama,  
\q2 tama nago bisnis sę tau somainogo yali,  
\q2 tama nago sęgę sali.  
\q1 Mu tama, nage tonalubo ensel bidi tiwai dao,  
\q2 tiali goli nage eno gedude meda mu yai pedelai dao.  
\q1 Tama eno nage sela sąnama,  
\q2 tama nago eno bulu du taga soali.  
\q1 Tama nage te udula pai masigi tomode ma me bidibeo.   
\q1
\v 17 Nago homugo tiali,  
\q2 nago gesabidi sawi yai mu dao homu yali,  
\q2 tama nago hagoma mu elama,  
\q2 tama naga nogi ugwaba salio.  
\q1 Nago genuai homu kolesaga elaluali,  
\q2 tama nago homugo te homu kolesagago  
\q2 te genuai nogi sabo dao homu yali.  
\q1 Tiali, te po page delide naga tama  
\q3 eno nage aiyaba te tǫba sąwai dao,  
\q2 te gasa meba king dabego nage sulama,  
\q2 tama augwaligo nage gisugu dwai mu  
\q3 momainogo yali.’   
\q1
\v 18 ‘Tair bulu king bidi, nago te bisnis sę yali sogo,  
\q2 te nago dwai kolesaga hauwa mu yalio,  
\q2 tama nago te sęgęgo te lotu be dabe  
\q3 dwai meda yai mu pedelalio.  
\q1 Tama tibaso, eno te isi te taun tomode  
\q3 pedelemainu elama, tama sese ula silali,  
\q2 tama te isi sisi dulu keli hali naga te elaluali.  
\q1 Tama gasa tigidali bidi hanigo suali.   
\q1
\v 19 Nage dolama, mu dolai elalubadi,  
\q3 nage tǫde munu me ma bidigobeo.  
\q1 Tama tigidali we bidigo  
\q2 te dwai sę dabe nagede pedelali po odama,  
\q2 tama augwali noma dwai mu salio.’  
\b  
\p Nago te po te Tair king bidibolo pusao,” Genuai Bidigo enabolo te po wai.   
\s1 Godigo te po wali, taun Saidon dolaibao wali  
\p
\v 20 Genuai Bidigo enabolo te po wali,  
\v 21 “Tǫde bidi, nago te taun Saidonba ugwa tonama, tama te po wao, te aga dolaibao po wao.  
\v 22 Nago te Saidon dabebolo God Genuai Bidi eno augwalibolo yabo po pusao. Augwalibolo walao, ena God, eno augwali dali boi bidi homu elama, tama eno augwalibolo eno tedali gasagi yai kolesaga augwalibolo ola mawaibao. Tama augwaligo enabolo genuai nogi mawaibao. Tama gasa hani dabe mebago eno te Saidon dabebolo yabo te kolesaga augwaligo sulama, tama augwaligo eno bomo koneaibao. Tama te sogo naga te Saidon dabe augwaligo koneaibao, ena deli naga ena Genuai Bidi dao homu yaibao.  
\v 23 Te eno augwaliba genuai gasi dwai tagala palaibao. Tama eno tigidali badu boi bidi dabe hogodolama, tama augwali dali hwįnama, tama augwaligo we bidi hauwa ela silimainu yaibao. Tama te Saidon dabego kaneme dabe te taun sunumi dabedu kegelo soaibao. Tama te Saidon dabego bugagia mu koneama koneaibao, ena deli naga ena Genuai Bidi dao homu yaibao,” wali.   
\s1 Godigo Israel dabe dali wiegi yai sę yaibao  
\p
\v 24 “Ena Genuai Bidi, eno po genina ma weyu, te po obao. Te bidi hani dabe augwali Israel dabe pąde bidalubo bidi dabego Israel dabe dali boi bidi mu elama, tama augwali dali dwai sę mu yali, te sesane yai bonogo bidi tigide enebo tiwai yali. Tiali goli, augwaligo te kolesaga nosali ma elamo dao. Tama te sogo te Israel dabe augwaligo koneaibao, ena deli naga ena God Genuai Bidi dao homu yaibao,” wali.   
\p
\v 25 “Ena God Genuai Bidi, eno te po obao. Te eno wiegi yai doloba pai kolesaga te Israel dabe tomode ola mobaso, tama gasa hani bidi dabego sueibao. Te sogo eno te Israel dabe augwali eno te gasa gasa buluba sela sąwani bage deli deli ma oda selama, ma odasa asaibao, tama eno augwa kantriba ma odasa asaibao. Tama augwali augwa tǫde mu tama mu bidaibao, te eno Jekopbolo mani, te tǫ dao, eno sę bidibolo.  
\v 26 Tama augwali bugagia bidiyu, augwa be dabe sę eyu, augwa wain gi buluyu yaibao. Tama eno gasa hani bidi dabebolo eno dene mawaibao, te augwaligo te Israel dabe dali dwai sę yali bage. Tama te sogo te Israel dabe augwali bugagia bidiyu, tama augwaligo e tama koneaibao, ena deli naga God augwaligo Genuai Bidi dao homu yaibao,” te po wai. \x * \xo 28:26 \xt Jol 3:4-8; Sek 9:1-2; Mat 11:21-22; Luk 10:13-14\x*   
\c 29  
\s1 Godigo te po wali, kantri Isip dolaibao po wali  
\p
\v 1 Te da kalabus bulude bidibadi te kibu be nogo si, te 10 wabode, te polua nogo si, te 12 deide, Genuai Bidigo enabolo te po wali,  
\v 2 “Tǫde bidi, nago Isip king bidiba ugwaba tonao, tama te po wao, ena God eno aga dali, aga Isip we bidi dabe dali sese dolaibao po wao.  
\v 3 Nago te God Genuai Bidi eno po agabolo pusuyu, te po walao,  
\b  
\q1 ‘Isip king bidi, ena nago boi bidi pedalobao.  
\q1 Nage te pukpuk me genuai deli  
\q2 te Isip dabego wę dabede pila mubo tiwai dao.  
\q1 Nago te po wabo dao.  
\q1 Nago naga digi naga ma geselai dao olama,  
\q2 tama te ąį Nail te naga ąį dao wabo dao.   
\q1
\v 4 Tama tialima, eno huk nago penanede munama,  
\q2 tama te sųgų dabe nago abolode  
\q3 dagana somainu yaibao.  
\q1 Tama eno nage kegelama,  
\q2 tama te sųgų dabe dali dage ąį tagalama,  
\q3 dage buluba soaibao.   
\q1
\v 5 Tama eno nage te sųgų dabe dali dage selama,  
\q3 te wa pai bulu besela sąwaibao.  
\q1 Tama nago tigi te tǫde pila mubadi,  
\q2 tama nago tigi pubulabo bidi meni yaibao.  
\q1 Tama eno te bulu hasa dabe,  
\q2 me ba dabego nago tigi tumainogo sula tagalaibao.   
\q1
\v 6 Tama tialima, dage Isip dabego koneagameo,  
\q2 ena deli naga ena God Genuai Bidi dao  
\q3 homu yagameo.’  
\q1 Te po te Isip king bidibolo wao,” wali.  
\b  
\p “Te po me agabolo pusao, ‘Te Israel dabego homugo tiai da, dage Isip dabego augwali tau sogowe homu yai da, te boi hwįbode. Tiali goli, dagego augwali me tau sai menio. King, te Israel dabe augwaligo homugo tiali, nage te nogo tolasa pabo bomai dono tiwai dao homu yali. Tiali goli, menio. \x * \xo 29:6 \xt Ais 36:6\x*  
\v 7 Te augwaligo nage nogo tola selama, bilainogo ebode da, nage te sigi dili tiwai bomo togwa pelama, bidigo punali badu enebo tiwai yali. Augwaligo nage dąų olama touwali, tiali goli nage togwa pali, tama augwali tula munama, augwaligo tudi dolali. Tiyu, nago augwali tau sabeo.  
\v 8 Tama tibaso, ena God Genuai Bidi eno te po obao. Te eno boi bidi dabego dage Isip dabe dali boi hwįagasomainu odasa asaibao. Tama augwaligo te we bidi eleyu, me hasa dabe eleyu yaibao.  
\v 9 Tama te kantri Isip dolama, tama te kantri te olo tǫ bulu mu elaluaibao. Tialima, dagego bugagia mu e tama koneaibao, ena deli naga ena Genuai Bidi dao homu yaibao,’ te po agabolo wao,” wali.  
\p “‘King, nago te po wai dao, naga digi te wę Nail nigilai dao po wai dao. Tama nago te po wali, te naga ąį dao, wali.  
\v 10 Te po te dwai mu dao. Tama tialima, ena nago boi bidi me te ąį Nailgo boi bidi pedalibao. Tama eno tigidali Isip bulu badu olo tǫ mu pedalomainu ilaibao. Te taun Mikdol not badu gagalama, tama pelama, taun Aswan te saut badu usu nigi paibao, te Sudan tǫ dąį pąba usu nigi paibao.  
\v 11 Tama te kibu be 40, bidi sese si kibu bede, te nai dabe me deli te kantri Isip tomode me elalugobeo. Tama tede bidi ma hasa dabe tede me biligobeo.  
\v 12 Tama eno e kantri Isip geninama mu dolaibao. Te Isip taun dabe, me te tǫ sese dali, mu dwai dolai elalueibao, te gasa dolali tǫ dali taun dabe dali aiyaba elalueibao. Tama eno te Isip dabego taun dabe mu dolama tagalama, tama augwali kibu te bidi sese si kibu be mu tiwai tama me bidaibao. Tama eno te Isip dabe augwali augwa kantride sela sąwaibao, tama augwali gasa hani we bidi tomode bida bida paibao,’ agabolo te po wao,” wali.   
\p
\v 13 “‘Ena God Genuai Bidi, eno te po wali dao. Tama te 40 kibu be silibo si, teda eno te Isip dabe augwali eno sela sąnama pali te kantride ma oda saibao, tama augwali augwa bulu tǫ muba ma odasa asaibao.  
\v 14 Te augwali asela silama da, teda augwali u badu te saut badu te Isip dabego tǫde bidaibao. Tama Isip bulu te polobadu bomai kantri bidali tiwai ma bidigobeo.  
\v 15 Te eno augwali olo nai tiwai ilama, tama augwaligo polobadu te tobolu gagea pelama, meba kantri dabe tonaluali yali gilama me egobeo. Augwaligo te gasa tǫ pedai kantri tonaluabo bomo me elalugobeo.  
\v 16 Tama te Israel dabe augwaligo te sę te Isip dabede pedelali sę suaibao, tama augwaligo koneaibao, augwaligo te Isip dabego augwali tau sao walide augwaligo sęgę sali koneaibao. Tama te Israel dabe augwaligo te kolesaga ma egobeo. Tama te Israel dabe augwaligo e tama bugagia koneaibao, ena deli naga ena God Genuai Bidi da homu yaibao.’ Esekiel, nago te po te Isip king bidibolo wao,” Genuai Bidigo te po wai.   
\s1 King Nebukatnesargo Isip bulu aiyaba elaluaibao  
\p
\v 17 Te deli wabo polua, te deli wabo dei te da kalabuside bidibadi kibu be 27 wabode, Genuai Bidigo enabolo e tama po walali.  
\v 18 “Tǫde bidi, odao. King Nebukatnesar aga ami bidi dabe dali, augwaligo te taun Tair dali boi hwįbo sę te yali. Kingo aga ami bidi dabebolo sęgai hwįbo nai dabe tolomainu ilama, tama te tialigo augwali tobolu wane ilama, tama augwaligo nage wali dagala palio. Tiali goli, king aga ami dali augwali olodali bomai sę yali. Augwaligo te hwįbode augwaligo wiegi yai nai me siyu ebeo.  
\v 19 Tama tialima, megi da, God Genuai Bidi eno te po obao. Eno te Isip dabego tǫ te king Nebukatnesarbolo mawaibao. Agai dolama, tama Isip dabego mone dali, doado bage dali sese sela paibao, te aga ami bidi dabego bomai sę yali pe tiwai saibao.  
\v 20 Te eno Isip agabolo, me aga ami dabe, augwalibolo mawaibao. Te augwa bomai sę yali te pe tiwai saibao. Magi baso meni, te boi augwaligo hwįanide te eno sę dao. Te da God Genuai Bidi eno po dao,” wali.   
\p
\v 21 “Tama te sę pedalobo sogo da, teda eno Israel dabego bomo ma pedalumainu ilaibao. Tama tǫde bidi, ena nago Israel tomode po bomonama omainu ilaibao. Tama augwaligo bugagia koneaibao, ena deli naga te Genuai Bidi dao homu yaibao,” te po wali.   
\c 30  
\s1 Genuai Bidigo Isip bulu dolaibao  
\p
\v 1 Genuai Bidigo enabolo e tama po walali,  
\v 2 “Tǫde bidi, eno homugo nago ena God Genuai Bidigo po pusumainu homu ebao. Nage gela bomonama mu olama, tama hobede mu dao e po wao,  
\v 3 ‘Pąde tama dwai sogo pedelaibao. Te da, te Genuai Bidigo tigidali we bidibolo dene mabo sogo pedelaibao. Te da te pǫ pedalobo genuai sogo yaibao, tama te sogo te we bidi hauwa dolobo sogo pedelaibao.  
\v 4 Tama te sogo te boi bidi dabego te Isip dabe dali boi hwį yagasaibao. Tama genuai sęgę te Sudan we bidiba pedelaibao, te Isip saut badu elalubo distrik dao. Te boi bidi dabego Isip we bidi hauwa elama, isila silama, tama te kantri dolama, tama Isip dabego mone me doado bage selama, tama augwa kantriba selasa paibao,’ te po wao,” wali.   
\p
\v 5 “Tama te hwįbode me Isip amigo abelali bage, te Sudan hani ami bidi hauwa, me Lidia, me Libia, me Kup, me gasa hani bidi me, augwali te hwįbode te Isip bage dali isaibao,” wali.   
\p
\v 6 “Tama ena Genuai Bidi eno po genina ma weyu, te po obao,  
\b  
\q1 ‘Te u not badu taun Mikdoldu gagalama,  
\q2 tama taun Aswan te saut badu elalubo  
\q3 buluba usu nigi paibao,  
\q2 te boi bidi dabego te Isip dabe tau siyu,  
\q2 hwįbo bidi dabe sese tama ela silaibao.  
\q1 Te Isip dabe augwaligo augwa bomode  
\q2 wiegi yai homu pemene mu ebo dao.  
\q1 Tiali goli, te bomo te mu tama sia saibao.  
\q1 Te da God Genuai Bidi eno po dao.   
\q1
\v 7 Te eno Isip dabego tǫ dolaibao,  
\q2 te dolobo sę genuai mu yaibao,  
\q2 tama eno agai taun dabe mu dolaibao.   
\q1
\v 8 Te eno Isip dabego nai dabe sese tama isi ulama,  
\q2 tama te Isip dabe tau sabo sę ebo  
\q3 bidi dabe me dolaibao.  
\q1 Tama te Isip dabe augwaligo e tama bugagia koneaibao,  
\q2 ena deli naga ena Genuai Bidi te yaba  
\q3 homu yaibao,’ te po obao,” wali.   
\b  
\p
\v 9 “Te Sudan dabe augwali bugagia bidiyu, augwaligo homugo magi sę me augwalide pedalogobe homu te ebao. Tiali goli, eno te Isip bulu dolobode, teda eno te bidi dabe Sudanba te geba sipdu pomainu tagala palaibao. Augwali te Nail ąį daide te sipdu pelama, tama augwaligo te we bidibolo eno te Isip dabe dali yali sę po pusaibao. Tama te Sudan dabe augwali noma dwai mu saibao. Te tamadi tama eno te te tama tiaibao,” wali.   
\b  
\q1
\v 10 “Ena God Genuai Bidi,  
\q2 eno po genina ma weyu, te po obao,  
\q2 te eno te king Nebukatnesar aga  
\q3 ami dali augwali aselama,  
\q2 augwali Isip dabego mone me tigidali nai dabe  
\q2 somainu sula tagalaibao.   
\q1
\v 11 Te Babilon dabe augwali te bidi hani dwai mu dao,  
\q3 te homu dene isąbo bage dao.  
\q1 Tama augwali aselama, tama Isip  
\q3 mu tama dolagasaibao.  
\q1 Te augwaligo augwali te bainat hwągo elama,  
\q2 tama isai bidi dabego tigi te Isip bulu  
\q3 tǫde mu pągąna paibao.   
\q1
\v 12 Tama eno te wę Nail sula somainogo ilaibao.  
\q1 Tama eno gasa kantri bidi dabego  
\q3 Isip bulu sese dolomainu ilaibao.  
\q1 Tama bidi dwai dabego augwaligo  
\q3 te Isip dabego tǫ saibao.  
\q1 Te da Genuai Bidi eno po dao.”   
\b  
\p
\v 13 “Ena Genuai Bidi eno po genina ma weyu, te po wali. Te eno te taun Memfis te Isip bulude te tibo god dabe piksa noma sese tama mu silaibao. Te eno Isip dabego king sela sąnama, tama Isip dabego king meni emainu yaibao. Tama eno te Isip dabe augwali wi dwai mu emainu ilaibao.  
\v 14-16 Tama Isip bulu sese tama isi ula silaibao. Tama eno u saut badu te Isip bulude te olo bulu pedalomainu yaibao. Tama taun Soan te not badu te bulu sese tama isi ula silaibao. Tama te boi bidi dabego te taun Tebes bagulali obo aluama, tagalaibao. Tama we bidi hauwa elama, silaibao. Eno taun Pelusium sębę ebao, te da te Isip dabego bomai taun dao, tama eno aga dene genuai menama, tama augwali sęgę me dene genuai mu saibao. Tama eno Memfis dabebolo sęgę sesemane sogo dene mawaibao.  
\v 17 Tama te boi bidi dabe augwaligo te taun Heliopolis me Bubastis taun gesi bidi dabe sese tama ela silaibao. Tama augwaligo te taun side we bidi dabe sese nogo bono dunama, tama gasa kantriba kalabus igi paibao.  
\v 18 Te Isip dabe augwa bomode augwali gana peyu yai da. Tiali goli, eno augwaligo bomo sese silimainu yaibao. Tama te sogo naga te taun Tapanesde hulia saibao. Tama genuai pǫgo te Isip bulu tigidali tama mesega saibao. Tama te boi bidi dabego te Isip bulude tigidali taunde we bidi dabe selama, tama augwali gasa kantriba kalabus igi peyu, odasa paibao.  
\v 19 Tialima, te tama kolesagago eno Isip dabe dene mawaibao. Tama augwaligo e tama bugagia koneaibao, ena deli naga te Genuai Bidi te yabao olama koneaibao.” Genuai Bidigo te po wali.   
\s1 Isip king bidigo bomo sia sali  
\p
\v 20 Te hasia wabo poluade, te dei namba 7de, te kibu be 11 wabo, te kibu bede da kalabuside bidibadi Genuai Bidigo enabolo te po walali,  
\v 21 “Tǫde bidi, eno Isip bulu king bidigo nogo aboai dao. Tama bidi mego agai nogo pobilibeo, me te ni name munama, kębeo. Te nogo bomo ma elama, tama te bainat ma nogo tulama hwįmainu me ebeo.  
\v 22 Tama tialima, God Genuai Bidi eno e po te obao, eno Isip king bidi dali boi bidi te ebao. Tama eno agai nogo si tama togolama tagalaibao, te hasia aboai nogo dali, te wiegi yai nogo dali tama togwa paibao. Tama te bainat agai nogode honoga pelama, tulaluaibao.  
\v 23 Tama eno te Isip we bidi dabe tedela palama, te gasa kantri dabeba sela sąwaibao.  
\v 24 Tama tialima, eno Babilon king bidigo nogo si bomo ilama, tama ena bainat hwą te agai nogoba muaibao. Tiali goli, eno Isip king bidigo nogo si tama togwa sąwaibao, tama aga genuai dene mu saibao. Tama Babilon king bidigo gedude aga hwąwa dwai mu waibao, te bidi me isainogo wabo tiwai yaibao.  
\v 25 Mu tamao, eno agai bomo sela sąnama, tama eno Babilon king bidigo bomo emainu ilaibao. Eno ena bainat te Babilon kingbolo mawaibao, tama agai Isip bidi dabe elama isilaibao. Tama te sogo te Isip dabe augwaligo bugagia koneaibao, ena deli naga ena Genuai Bidi da olama, koneaibao.  
\v 26 Tama eno te Isip dabe sela sąnama, tama augwali te tedela pelama, augwali te gasa kantri dabeba subigila bidigi paibao. Tama te sogo augwaligo bugagia koneaibao, ena deli te Genuai Bidi dao, te koneaibao,” wali.   
\c 31  
\s1 Godigo te po wali, Asiria king bidi te wiegi yai ni sida tiwai dao po wali  
\p
\v 1 Te namba 11 wabo kibu bede da kalabuside bidali kibu bede, te sela wabo poluago deli wabo deide, Genuai Bidigo enabolo te po walali,  
\v 2 “Tǫde bidio, eno homugo nago eno po te Isip king bidi dali, aga we bidi dabe dali, augwalibolo eno po pusumainu ebao. Te po da, e dao,  
\b  
\q1 ‘Dage Isip dabe, dage bomai bidi hani mu dao.  
\q1 De mu dagego elalubo bomai bomo tiwai elalubowe?   
\q1
\v 3 Te Asiria dabede homu kone palao.  
\q1 Augwali te kantri Lebanonde elalubo  
\q2 te bobobage ni bǫ o sida tiwai  
\q3 bomonama mu dolaluai dao.  
\q1 Te nigo te wiegi yai bobobage  
\q2 nologo dabe elaluyu, me agai dologode  
\q3 wiegi yai kedau elaluyu yai dao.  
\q1 Te ni bǫ te bobobage mu elama,  
\q2 tama meba ni dabe aiyaba elaluai elaluali.   
\q1
\v 4 Tama tǫ tomode elaluali węgo  
\q2 te ni sida genuai mu holomainu ilali.  
\q1 Te wę te tǫ daide ugwadu pedaliyu,  
\q2 tama te ni page pąde te ąį biliyu yali,  
\q2 tama tilama nosali te ąį te gasa meba ni dabeba pali.   
\q1
\v 5 Te wę hauwa mu elaluyu,  
\q2 tama te ni genuai mu holali,  
\q2 tama gasa meba ni dabe aiyaba elaluali.  
\q1 Tama agai nologo dabe genuai mu elama,  
\q3 tama bobobage mu yali.   
\q1
\v 6 Tama te haniani ba dabe augwaligo  
\q2 augwa be te ni nologoba sę yagasai dao.  
\q1 Tama me te bulu hasa dabe augwali  
\q2 te ni nologo dologoba bidagaselama,  
\q2 tama augwaligo augwa gǫų  
\q3 te ni nologo dologode sai da.  
\q1 Tama tigidali kantri we bidi augwali  
\q3 te ni dologoba duayagasiyu yai dao.   
\q1
\v 7 Te mu tama dao, te ni da,  
\q3 te polalubo sawi yai mu dao.  
\q1 Agai te bobobage nologo mu elalubao,  
\q2 tama agai pedali te tǫ dologode  
\q3 elalubo węba dulubo dao.   
\q1
\v 8 Te eno gi Idende te ni tiwai wiegi yai ni me elalubeo.  
\q1 Agai te tigidali te gide sida ni tiwai me edelai elalubeo.  
\q1 Tama te ni sidago nologogo te ni paingo nologo  
\q3 aiyaba elaluai elalubao,  
\q2 me te eno gide meba gasa ni dabe  
\q3 aiyaba elaluai elalubao. \x * \xo 31:8 \xt Gag 2:9\x*   
\q1
\v 9 Ena digi te ni nologo hauwa holomainu ilama,  
\q2 tama aga wiegi yai ni holomainu ilai dao.  
\q1 Tama tialima, eno te gi Idende  
\q2 tigidali ni dabe augwaligo te ni pęsą yalio,’  
\q1 te po pusao,” wali.   
\b  
\p
\v 10 “‘Te bobobage ni sida bǫ, te Asiria tǫ kantri da, agai hagoma dogia pelama, tama aga tobolu gagea pabo sę ebo genuai mu yai dao. Magi baso meni, aga ugwanu bobobage mu holama, meba ni dabe aiyaba elaluai baso. Tialima, megi God Genuai Bidi, eno agade pedelali nai dabe po pusaibao.  
\v 11 Eno aga tudi ola mawai dao. Tama eno aga gasa bomai king mego nogoba mani. Tama te kingo te ni agai yali dwai kolesaga wei ponoyu, dene mawai dao.  
\v 12 Tama homu dene isąbo bidi hani dwai mu dabe mu aselama, tama te ni bǫ gelama, tǫba degelama, tama olo tǫde elalumainu yali. Tama agai nologo dabe da, te bulu du dabeba, me malu buluba, me bulu bubiabi togoaluai madi totogaluai dao. Tama te we bidi hani augwali polobadu te ni nologode polobadu duala sagasiyu yali, te bage augwaligo tagalama, subigila pepelawai dao.  
\v 13 Te ni tǫde pila mubadi, te ba dabe aselama, tama agaba ma duayagasai dao. Tama te bulu hasa dabe auwali me aselama, tama te ni nologo page te ni tigiba teba bidagasai dao.  
\v 14 Tama tibaso, nosali da, eno te ni tiwai bobobage me holomainu sula tagalogobeo. Te augwaligo wę hauwa sobadi me tagalao, augwali ugwanu bobobage me hologobeo. Menio. Augwali sese isimainu yaibao. Te bidi dabe yali gilama tama augwali te isai bidi dabego buluba aiyaba dulaibao,’ te po te Isip bageba pusao,” Genuai Bidigo enabolo te po wali.   
\p
\v 15 “‘Ena God Genuai Bidi, eno te po obao. Tama te ni isilama, tama te isai bidigo buluba polo pai digi da, te da eno te tǫ dologode wę dabego aga hobede emainu ilama, tama aga mesega somainu yaibao, tama eno te wę dabe paliama, tama augwali ugwaba tǫba ma holomainu egobeo. Tama tiyu, te ąį dabe hauwa sula siyu yai dao. Tama eno te Lebanon bulu du dabede be hulia siyu emainu yali. Tama meba gasa ni dabego te nide hobede elama, tama augwali me sasia pai dao.  
\v 16 Te eno te ni te isai bidi dabego buluba polo sąwai madi da, aga moni busugu wabo odama, teda tigidali kantri tǫ mobodo yai dao. Tama te me gasa wiegi wiegi yai ni dabe te isai bidigo bulude polo bidali ni dabe, augwaligo te ni dolai sulama, tama augwali me wiegi yai homu dwasianu yai dao. Te augwali te ąį hauwa sali ni dabe, augwali Iden gi ni dabe dao, me augwali te kantri Lebanonde wiegi wiegi yai ni dabe me dao.  
\v 17 Te ni bǫ o sida nologo dologode dualalu yali bidi dabe augwali me, te ni tau siyu yali te bidi dabe dali, augwali te ni dali te isai bidi dabego buluba pai. Tama augwali te boi bidi dabego bainat hwągo elai bidi dabe dali bidaibao,’ te po pusao,” wali.   
\p
\v 18 “‘Te Isip king, aga we bidi umabo mu dali, augwali te ni bǫ sida tiwai dao. Te Iden gide te ni bobobage wiegi yai te ni tiwai me holai menio. Tiali goli, megi da, te ni aga te Iden gide ni tiwai pedelama, tama aga te isibo bidigo buluba aiyaba dulaibao. Tama aga te wiegi yai kolesaga wali pisąbo bidi dabego bidi hani dali bidaibao, me te boi bidi dabego boide elali bidi dabe dali bidaibao, te gų pagede.’ Ena God Genuai Bidi, eno po polo wali dao,” wali.   
\c 32  
\s1 Isip king dolaibao  
\p
\v 1 Te hasia wabo dei, te namba 12 polua, te namba 12 kibu bede da kalabuside bidali sogo, Genuai Bidigo enabolo e tama po walali,  
\v 2 “Tǫde bidi, nago Isip king bidide hobedai gela weyu, e tama balia po wao,  
\q1 ‘King, nago homugo nage te meba kantri tomode  
\q2 te boma pai laion yowi da homu ebo dao.  
\q1 Tiali goli, menio.  
\q1 Nage te moni pukpuk me deli te węde bidiyu,  
\q2 sągą subigila sąyu ebode wę dunugu  
\q3 ilibo pukpuk tiwai dao.   
\q1
\v 3 Tama tialima, ena God Genuai Bidi  
\q2 eno e tama po e obao,  
\q2 te eno we bidi hani hauwa mu odasa asaibao.  
\q1 Tama eno tola sabo wa nageba sąnama,  
\q2 tama nage tola saibao,  
\q2 tama augwaligo nage wę kemi saneba ugwaba  
\q2 kegasa asaibao.   
\q1
\v 4 Tama nage eno tǫba ugwa sana palaibao,  
\q3 awe, te pepeli diliba muaibao.  
\q1 Tama eno tigidali ba dabe,  
\q2 me eno tigidali bulu tǫde hasa dabe odasa aselama,  
\q3 nage tumainogo yaibao.  
\q1 Tama augwaligo haliga mu pągąna paibao.   
\q1
\v 5 Tama eno nago te tigi meba selama,  
\q2 tama bulu duba sąnama,  
\q2 tama nago te mi dabe me dili dabego  
\q2 te odogo malu bulu me pągąna paibao.   
\q1
\v 6 Tama eno nago kaneme digibuluba gea palaibao.  
\q1 Tama te kaneme agai tigidali ąį dabe usu elama,  
\q2 tama tigidali bulu du dabe mesega sigi peyu yaibao.  
\q1 Tama te odogo malu bulu dabe  
\q2 te nago tigi migo pągąna mu paibao.   
\q1
\v 7 Te eno nage silibo sogo da,  
\q2 teda eno dagalu halua selama,  
\q2 tama tigidali hǫ dabego ula sula somainogo yaibao.  
\q1 Tama me eno te pǫgo te giliga mesega  
\q3 somainu elama,  
\q2 tama te giliga ula munu ma me egobeo.  
\q1 Tama te polua me ula me egobeo. \x * \xo 32:7 \xt Ais 13:10; Mat 24:29; Mak 13:24-25; Luk 21:25; Ped 6:12-13; 8:12\x*   
\q1
\v 8 Awe, eno tigidali dagalude ula dabe geme dualaibao.  
\q1 Tama nago kantri mu hulia saibao.’  
\q1 Te da God Genuai Bidi eno po dao,” wali.   
\q1
\v 9 “‘Te we bidi hauwago eno nage polo dolali po odama,  
\q2 tama augwali wi dwai mu yaibao.  
\q1 Tama te po da, te kantri dabe nago  
\q2 susiąma yali te bulu dabeba usu nigi paibao.   
\q1
\v 10 Te nage eno bainat hwągo dolobo sogo,  
\q2 te king dabe, me te tigidali kantri  
\q3 we bidi dabego sulama,  
\q2 tama augwali wi dwai mu selama, didibili elama,  
\q3 tama augwali noma mu saibao.  
\q1 Awe, te sogo tama te king dabego te homu yaibao,  
\q2 tiyu Godigo da dali te tiwai sę da dali  
\q3 idali homu yaibao.’”   
\q1
\v 11 “Te po wao, ‘Isip king, ena God Genuai Bidi,  
\q3 eno te tama po wali dao.  
\q1 Te Babilon kingo nage dali hwį yagasaibao.   
\q1
\v 12 Te eno te dwai kantrigo  
\q2 te homu dene isiąbo ami bidi dabe  
\q3 dwai mugo nago we bidi dabe  
\q3 sese ela silagasomainu yaibao.  
\q1 Tama augwaligo dage Isip dabego  
\q2 wiegi yai homu gana pabo  
\q2 te nai dabe tigidali mu dolagasaibao.   
\q1
\v 13 Tama eno nago tigidali kau kibu dabe  
\q2 augwali tigidali wę tubo pesagede ela silaibao.  
\q1 Tama te bidi me kau kibu te ąįde biliyu,  
\q3 te ąį dunugu ilabo ma meni yaibao.   
\q1
\v 14 Tama tialima, eno te tigidali ąį dabe  
\q3 wiegi yai elaluyu,  
\q2 tama bugagia soayu ilaibao.  
\q1 Te God Genuai Bidi eno po dao.   
\q1
\v 15 Te eno nago we bidi ela silama,  
\q2 tama nago kantride tigidali nai dabe  
\q3 sela sąna silai madi da,  
\q2 teda te kantri te olo tǫ mu pedalaibao,  
\q2 tama da, dage Isip dabego bugagia koneaibao,  
\q2 ena deli naga ena Genuai Bidi dao homu yaibao.’  
\q1 Te tama balia po pusao,” wali.   
\p
\v 16 “Tama te gasa kantri we sibigo augwaligo te hobedai balia po waibao, augwaligo te dage Isip dabe homu dene eyu, gela wabode te balia po waibao. Ena God Genuai Bidi eno po polo wali dao,” te po wali.   
\s1 Te isai bidigo bulude bidibo we bidi dabe  
\p
\v 17 Te da kalabus te Babilon bulude bidibadi, kibu be namba 12 wabo sogo, te namba 15 deide, te namba 12 poluade, te kibu bede God Genuai Bidigo enabolo e tama po walali.  
\v 18 “Tǫde bidi, nago hobedai gela te genuai Isip we bidi hanide wao. Tama nago augwali te meba gasa bomai kantri we bidi dabe bidibo pesageba, te isai bidigo buluba talua sigi pomainu nago tagala palao.  
\v 19 Te Isip dabebolo e tama po walao. ‘Dagego homugo dagego ugwaba ela holama, tama dagego gasa we bidi aiyaba elaluai dao homu eba, agawe? Mu menio. Polo tama dage te gasa hani bidi dabe, te dwai kolesaga ebo we bidi hanigo bidi dabe bidalubo isai bidigo buluba bidigi piąo, te wiegi yai kolesaga wali pisąbo bidi hani dali bidigi piąo,’ te po te Isip dabebolo wao,” te po wali.   
\p
\v 20 “Tǫde bidio, bainat hwą te Isip tǫde ami bidi dabe polo elabo dola muai elalubao. Augwali isimainu sula tagalama, tama augwali te gasa hani meba te boide isali bage dali bidigi pomainu yao.  
\v 21 Te isai bidi dabego bulude da, te boi hwįbode genuai nogi yai bidi dabego te Isip dabe, me augwali sali bidi dabe subode augwali wiegi yai homu yaibao. Augwali te buluba aiyaba dulama, tama augwaligo te Isip dabeba hae weyu, e tama po waibao, ‘Te wiegi yai kolesaga wali pisąma ebo hanigo bidi dabe, te augwali e buluba dulama, tama augwali e bulude te bidibao. Te boi bidi dabego augwali elama, isilai dao,’ te gų pagede bidibo bagego augwalide te po waibao,” wali.   
\p
\v 22 “Kantri Asiria aga ami bidi dabego gų page dali te bulude te elalubao. Te boi bidi dabego augwali boide ela silai dao.  
\v 23 Tama augwaligo gų page te bulu aiya badu mu elalubao. Tama Asiria kantri aga gų page te tomode, te Asiria dabe augwali isisąma ebadi da, augwaligo hauwa we bidi wi mu emainu ilai dao,” wali.   
\p
\v 24-25 “Tama kantri Elam me te bulude naga te elalubao, me te ami bidi dabe te boide isali bidi dabego pesage badu te elalubao. Tama te Elam kantri ami bidi dabego gų pagego te kantri Elam bagua sai elalubao. Te boi bidi dabego te ami bidi dabe boide elai dao. Te Elam dabego wiegi yai kolesaga wali me pai menio. Tama me ma, augwali isisąma ebadi da, augwaligo we bidi hauwa wi emainu ilai dao. Tiali goli, augwali megi da, isai bidi dabego buluba bidigi pali. Tama tibaso, augwali hale dwai mu ebao,” wali.   
\p
\v 26 “Te kantri Mesek me kantri Tubal si, me augwa ami bidi dabe dali, te buluba naga bidigi pali. Tama te kantri sigo gų page te ami bidi dabego gų page tomode elalubao. Te boi bidi dabego augwali ela silai dao. Te kantri Mesek me Tubal sigo te wiegi yai kolesaga me yai menio. Tama me ma, augwali isisąma isąbadi, augwaligo kantri hauwa wi emainu ilai dao.  
\v 27 Te bidi dabego te ami bidi dabe augwali te dwai bidi dabe pubalobo tiwai tama pubalai dao. Augwaligo te polobadu bidali genuai nogi yai ami bidi dabe pubalobo tiwai kolesagago pubulai menio. Augwaligo te nogi yai polobadu bidali bage pubaluyu, augwaligo augwa bainat augwa tobolu dologode muyu yai dao. Te Mesek me Tubal dabe augwali augwa dagede augwali isalio. Magi baso meni. Te augwali bidibadi, augwaligo te we bidi hauwa wi mu iliyu yai dao,” wali.   
\p
\v 28 “Tama kantri Isip me dolama, tama aga me te boi bidi dabego elali bidi dabe tomoba bidigi paibao. Te bidi dabe augwali te dwagi yai kolesaga isąwai bidi hanigo bidi dabe dao,” wali.   
\p
\v 29 “Tama kantri Idom me te isai bidigo bulude te bidibao. Aga te aga king dabe, me augwa tobolu bidi dabe dali te bidibao. Polobadu te Idom dabe augwali bomai ami bidi dabe mu bidai dao. Tiali goli, megi da, augwali isilama, tama augwali te hwįbode boi bidi dabego ela muai bidi dabe dali teba bidigi paibao. Te bidi dabe augwali te wiegi yai kolesaga wali pisąma yai bidi hanigo bidi dabe dao,” wali.   
\p
\v 30 “Tama u not badu king dabe me te bulude te bidibao. Tama me te Saidon dabe me augwali dali te bidibao. Polobadu augwali bomai bidi hani bidiyu, augwaligo bidi hani hauwa wi ilai dao. Tiali goli, megi da, augwali polo isila pelama, augwali hale dwai mu ebao. Magi baso meni. Augwali te buluba bidi meba dali bidigi pali, te boi bidi dabego boide elai bidi dabe dali bidigi pali. Te bidi dabe augwali te wiegi yai kolesaga wali pisąma yai bidi hani bidi dabe dao. Augwaligo me te isai bidi buluba aiyaba dulali bidi dabego sali hale tiwai naga salio,” wali.   
\p
\v 31 “Te Isip king bidi aga ami bidi dabe dali, augwali te buluba dulubo sogo da, teda agai me te meba hani te hasia bidali bage bidibo suaibao. Tama agai homu dwasianu wiegi yai elama, tama aga hale genuai ganama egobeo, te aga ami dabe dali, te boi bidi dabego augwali elai bidi dabe dao. Te da God Genuai Bidi eno po dao.  
\v 32 Ena digi te Isip king bidi aga ami dali augwali hodolama, tama augwaligo we bidi hauwa wi dwai mu emainu ilai dao. Tiali goli, megi da, boi bidi dabego Isip dabe augwali boide elama, tama augwali te isai bidi dabego buluba bidigi paibao. Tama augwali te boi bidi dabego boide elai bidi dabe dali isai bidigo buluba bidigi paibao. Te bidi dabe augwali te wiegi yai kolesaga wali pisąbo bidi hanigo bidi dabe dao. Ena God Genuai Bidi eno po polo wali dao.” Te po wali.   
\c 33  
\ms1 Godigo te Israel dabe augwali bugagia ma bidimainu ilaibao  
\mr (Dąį 33–37)  
\s1 Godigo Esekiel te bidi tonalubo bidi nigilali  
\r (Ese 3:16-21)  
\p
\v 1 Genuai Bidigo enabolo e tama po wali,  
\v 2 “Tǫde bidio, nago naga hani bage, te Israel bage dali, te Juda we bidi dali si, augwalibolo te bidi tonalubo bidigo ebo sę po pusa mao. Te eno boi bidi dabe me te kantri me dali hwįmainu taga palobaso da, teda te kantri we bidigo augwa tonaluabo bidi me deli sa mubo dao.  
\v 3 Tama te tonalubo bidigo boi bidi dabe asobo sulama da, teda agai te biugel bu wabo dao, te we bidibolo boi asobao olama mayu, te po wabo dao.  
\v 4-5 Tama tialima, te bidi me deligo te biugel bu wabo odama, tama aga wi pelama, tama duala sabo pesage gegegi pisąma yai digi, tama te boi bidi dabego aga elama isilali da, teda te bidi aga dagede aga isai dao. Magi baso meni. Ma, aga duala sigi pigi sogo da, teda aga me isigi menio.  
\v 6 Tiali goli, te tonalubo bidigo te biugel bu wasiąma yali da, teda te boi bidi dabego te we bidi sese tama ela silaibao. Te mu tama goli da, te we bidi augwaligo dwai sęgę elama, isali goli dao. Tiali goli, eno gedude da, te tonalubo bidi dabego geda muanigo da, te augwali te isali dao. Tama eno aga dali te po tų yaibao,” wali.   
\p
\v 7 “Tǫde bidio, eno nage Israel dabe tonalubo bidi nigilibao. Te eno bomai po augwalibolo pusabo po elalubaso da, teda eno nagebolo menama, tama nago augwalibolo pusa magameo.  
\v 8 Tialima, eno bidi mego dwai kolesaga ebo subaso da, tama eno aga isaibao obaso da, teda nago agabolo pusao. Nago agabolo agai homu kolesaga, me agai ebo kolesaga hasegeleyu yao po wao. Tialima, nago agabolo wasiąma yali da, teda agai sęgę me tama elaluaibao, tama aga isaibao. Tiali goli, eno gedude da, teda nago dagede aga isaibao.  
\v 9 Tiali goli, nago te sęgę sabo bidibolo po walai digi, tama agai te dwai kolesaga tagalisąma ebaso da, teda te dwai kolesagago aga dolama, tama aga isaibao. Tiali goli, nago te sę yalide sęgę me sogobeo, tama nage me isigobeo,” wali.   
\s1 Genuai Bidigo homugo dwai kolesaga ebo bidi isibo hagela homu yali  
\p
\v 10 Genuai Bidigo enabolo po geninama ma weyu, e tama po wali, “Tǫde bidi, nago eno te po te Israel we bidibolo pusa mao, ‘Dagego e tama po wabo dao, “Dago sęgę hauwa sabo da,” po wali, “tama tialima, da homu sęgę genuai mu ebao,” po wali, “tama dago tigi dili pulu ha mu ebao, mena tama tiyu, da bugagia bidigowe?” Dagego te po wabo dao.’  
\v 11 Te Israel dabebolo e tama po walao, ‘Ena God Genuai Bidi, ena tigidali sogo bidibo dao, tama mu tama dao, te dwai kolesaga ebo bidi dabe isibaso, eno tede wiegi yai homu pemene egobe dao. Menio. Eno te dwai kolesaga dabeba tudi ola menama bidibo bidi dabeba eno wiegi yai homu pemene ebo dao. Dage Israel dabego odao. Ma begasa asao. Dagego duga ebo dwai kolesagaba tudi ola menama, tama dage enaba ma asiąo. Magi baso dagego isabo sę idu gebawe?’ Nago augwalibolo te po wao,” wali.   
\p
\v 12 “Tǫde bidi, nago te naga hani Israel dabebolo walao, ‘Tialima, te doloba pai bidi mego dwai sę ebaso da, teda agai polobadu yali doloba pai kolesaga aga me bugagia bidimainu tau me sogobeo. Tialima, bidi me dwai sę iduai bidigo dwai kolesaga tagalama, wiegi yai kolesaga ebaso da, teda agai aga yali dwai kolesagaba tudi ola mayu te ebao. Teda eno aga dologobeo. Tama tialima, te doloba pai bidi me deligo dwai sę ebo gagalobaso da, teda eno agai yali doloba pai kolesaga koneama, tama eno aga bugagia bidimainu me sula tagalogobeo. Menio.  
\v 13 Eno te doloba pai bidi dabebolo augwali bugagia bidaibao po wabo dao. Tiali goli, bidi mego homugo agai yali wiegi yai kolesagago aga tau saibao olama, tama agai doloba pai kolesaga tagalama, tama agai dwai sęgę sabo sę eyu da, teda God eno agai polobadu te yali doloba pai kolesaga kone me egobeo. Menio. Megi aga dwai kolesaga yai baso da, teda aga isimainao.  
\v 14 Tama eno bidi dwai dabebolo augwali isimainao po wabo dao. Tiali goli, te dwai kolesaga ebo bidigo aga yali dwai kolesagaba tudi ola menama, tama agai doloba pai kolesaga naga idu baso da,  
\v 15 teda aga munu me isigobeo. Tialima, te bidi agai te bidi me delibolo agai te negeli yali te tonalubo nai ma wei mobaso, o agai wi sali nai ma wei ponobaso, me agai eno tigidali bomai po wali pelama, tama agai dwai kolesaga isąma eyu da, teda te bidi munu me isigobeo. Menio. Aga bugagia mu bidaibao.  
\v 16 Tialima, eno agai polobadu yali dwai kolesaga kone me palogobeo. Megi da, agai doloba pai kolesaga ebaso da, teda aga bugagia bidaibao.’ Te po augwalibolo pusao,” wali.   
\p
\v 17 “Tiali goli, tǫde bidio, naga abagi dabego te po wabo dao, Genuai Bidi eno kolesaga dolo menio po wabo dao. Tiali goli, menio, te Israel dabe augwa kolesaga te dolo menio.  
\v 18 Tialima, te doloba pai bidigo aga te doloba pai kolesaga tagalama, tama dwai kolesaga ebaso da, teda aga isaibao.  
\v 19 Me ma, te dwai kolesaga ebo bidi me deligo aga yali dwai kolesaga tudi ola menama, tama agai doloba pai wiegi yai kolesaga wali peyu da, teda aga bugagia bidaibao.  
\v 20 Tiali goli, dage Israel dabego te po wabo dao, Genuai Bidi eno kolesaga dolo meni po wabo dao. Teda odao. Nosali eno dage po tų elama, tama dagego kolesaga osola sulama, tama dage deli deligo ebo kolesaga dagalaibao,” Genuai Bidigo enabolo te po wai.   
\s1 Jerusalem dolalio  
\p
\v 21-22 Te da kalabuside bidibadi kibu be namba 12 wabode, tama te dei namba 4, te namba 10 poluade, te sogo pio te eno Genuai Bidigo bomo ena tigiba asobo gagama yali. Tama te sogo kigamu Genuai Bidigo eno pedauwali ma usu ilama, tama eno po ma wabo usu ilali. \f + \fr 33:21-22 \ft Te Esekiel Dąį 3:26 tede elalubo po suao. Te polobadu sogo gagalasa, tama e sogoba usu nama, Esekiel aga te po wabo usu isiąyu, aga hamena begelai bidi bididuai.\f* Tama elama, tama bidi me deli aselama, tama enabolo te po wali, “Jerusalem polo dolalio,” te po wali. Te boi bidi dabego te Jerusalem hanu dolobo sulama, tama te bidi aga ena bidibo madi asali. \x * \xo 33:21-22 \xt 2 Kin 25:3-10; Jer 39:2-8; 52:4-14\x*   
\s1 Te we bidi kantri Israelde bididuali we bidigo dwai kolesaga yalio  
\p
\v 23 Genuai Bidigo enabolo e tama po wali,  
\v 24 “Tǫde bidio, Israel dabego taun polo dolalio. Tiali goli, te we bidi te taunde me bidibao. Augwaligo e tama po wabo dao, ‘Abraham aga te bidi deli goli dao, tama Godigo te tǫ tigidali tama agabolo mawai dao. Tiali goli, megi da, dago we bidi hauwa te elalubao. Tama tilama, Godigo te tǫ mu tama dabolo mawai yali bogo.’ Augwaligo te po wabo dao.  
\v 25 Tama tibaso, megi da eno homugo nago te po augwalibolo pusa mao. Ena God Genuai Bidi eno te po e obao. Dagego dwai kolesaga hauwa ebo dao. Te dagego te hasa dabe tuainogo elebo sogo, dagego kaneme dabe sela sąbo menio. Me, dagego tibo god dabeba lotu po weyu ebo dao. Me, dagego bidi dabe ela muyu ebo dao. Mena tibaso dagego te tǫ saiba homu ebawe?  
\v 26 Tigidali sogo dagego subigila hwįyu ebo dao. Tama me, dagego dwai damua pai kolesaga dabe ebo dao, me dagego duga abagi sologo we dabe dali penani sę eyu ebo dao. Dagego homugo mena tama tiyu, dagego te tǫ saiba homu ebawe? Dagego usu munu ma me egobeo,” wali.   
\p
\v 27 “Tialima, eno homugo nago ena God Genuai Bidigo po augwalibolo pusa mao. Ena God dao, tama ena tigidali sogo bidibo dao, tama eno mu po e tama obao. Te boi bidi dabego te dolai taunde bidalubo we bidi sese tama ela silagasaibao. Tama me, te bulu hasa dabego te taunde bidisąma, olo bulu badu bidalubo we bidi elama, tuagasaibao. Tama me, te dualaluabo pesage wiegi yai digi duala sali we bidi, me masigi dudulawede duala sali we bidi, augwali genuai gasi mu selama, isaibao.  
\v 28 Tama eno te tǫ dolama, tama te tǫ olo tǫ mu pedelaibao. Te Israel dabe augwaligo augwa bomode mu gana pabo dao. Tiali goli, eno augwaligo te bomo mu silaibao. Tama te Israel dabego bulu du te dwai bulu dasu mu pedelaibao, tama te bidi dabe augwali tede bilibo hagela yaibao.  
\v 29 Te augwaligo te dwai damua pai kolesaga ebaso da, eno te we bidigo bulu tǫ te olo bulu tiwai pedelemainu ilaibao. Te tiwai ilibo si da, teda augwaligo e tama bugagia koneaibao, ena deli naga te Genuai Bidi te yabo homu yaibao,” wali.   
\s1 Te we bidi augwaligo te profetgo po wali pabeo  
\p
\v 30 Genuai Bidigo enabolo e tama po wali, “Tǫde bidio, te naga abagi dede augwali te taun obo pąde sisinibo sogo, me augwa be sunumi pąde sisinibo sogo augwaligo nage koneama, augwaligo e tama po wabo dao. ‘Polo pinao, da pelama, Genuai Bidigo mena po aga profet bidibolo megi maniwe odigi pinao,’ wabo dao.  
\v 31 Tama tialima, eno we bidi augwali nago po odainu sisinagasobo dao. Awe, augwali nago gesabidide dualama, nago po odobo dao. Tiali goli, augwaligo olodali tama odobo dao. Augwaligo te po wali pabo menio. Augwaligo te timainao po wabo dao. Tiali goli augwaligo te mone hauwa sabo homu naga ebo dao.  
\v 32 Augwaligo nago po odabo homu ebao, te bidigo gita eleyu, te wiegi yai musik wabo tiwai odabo homu ebo dao. Tama me, te bidigo wiegi yai dogoni elaluyu, tama bidigo we godolo eyu, te wiegi yai balia po wabo odabo homu ebo tiwai ebo dao, augwaligo nago po tigidali tama odobo dao. Tiali goli, augwaligo dwasianu wali me pabo menio.  
\v 33 Tiali goli, mu tama, nosali nago wali po sese tama mu pedalaibao. Tama te sogo augwaligo koneaibao, te nago te pusali po dabe, te eno po mu te yabao homu yaibao.” Genuai Bidigo te po wali.   
\c 34  
\s1 Godigo Israel dabego tobolu bidi dabe po tų yali  
\p
\v 1 Genuai Bidigo enabolo e tama po walali,  
\v 2 “Tǫde bidio, nago te Israel dabe tobolu bidi dabe po tų ela mayu, nago e tama po wao, ‘Dage Israel dabego tobolu bidi dabeo, odiąo. Ena God Genuai Bidi, eno po dage dali elalubao. Dage dolaibao. Te Israel dabe augwali da, te sipsip kibu dabe tiwai dao, tama dage da, te sipsip tonalubo sę elalubo bidi dabe tiwai dao. Tiali goli, dagego duga naga ma tonaluyu ebo dao, tama dagego te sipsip dabe tonalubo menio.  
\v 3 Dagego te sipsip ame pę tuyu, te augwaligo sipsip kibu nisigo nigai gudubo ugwa gudubo dao, tama dagego wiegi yai tumona pai sipsip kibu elama, te ili dali mi dali tubo dao. Tiali goli, dagego te sipsip kibu tonalubo menio.  
\v 4 Dagego te bomo meni yai sipsip dabe tau sabo menio. Tama me dagego te gasi yai sipsip dabe usu ilibo menio, me dagego te tigi selai sipsip kibu dabe keni dagego sįsįbo menio. Tama me dagego te hagawai sipsip gegegi pelama, tama dagego augwali ma oda sabo menio. Te dagego bomogo da, dagego augwali dali selebo sę eyu, tama sesanobo bidigo ebo kolesaga tiwai ebo dao.  
\v 5 Te sipsip dabe augwali tonalubo bidi meniama, augwali augwa digi subigila bilibo tiwai ebo dao. Tama te bulu hasa dabego augwali elama tubo dao. \x * \xo 34:5 \xt Nam 27:17; 2 Sto 18:16; Mat 9:36; Mak 6:34\x*  
\v 6 Eno sipsip kibu dabe augwali te bulu du dabeba wi pobao, tama augwali tigidali tǫba tigidali polo pepelawalio. Tama augwali gegabo bidi meni yanio. Mu menio.’ Te po augwalibolo pusao,” Genuai Bidigo enabolo te po wai.   
\p
\v 7 “Te po me pusao, ‘Tialima dage te tonalubo bidi dabe, dagego Genuai Bidi eno po odao.  
\v 8 Ena God Genuai Bidi, eno tigidali sogo bidibo dao, tama eno po mu tama e obao, eno sipsip kibu dabe augwali bugagia tonaluabo bidi menio. Tama tibaso, te bulu hasa dabego te sipsip kibu dabe ela wialama, augwali tuali dao. Tama te eno sipsip kibu tonalumainu sa muani bidi dabe augwaligo te hagawali sipsip dabe gegebeo. Augwaligo augwa naga ma tonalubo sę eyu, tama augwali te sipsip dabe tonalubeo.  
\v 9 Tama tibaso, dage tonalubo bidi dabe, dagego eno po odiąo.  
\v 10 Ena God Genuai Bidi, eno po te obao, eno dage dali boi bidi te ebao, tama eno dagede te po tų yaibao. Tama ena sipsip kibu dabe dagego nogode ma dobola selama, tama dage augwali tonalubo bidi me bidigobeo. Eno dage tonalubo bidi dabego duga digi duga ma tonalubo kolesaga silaibao. Te eno ena sipsip kibu dabe ma selama, tama dagego tuabo sipsip kibu meni yaibao,’ te po pusao,” Genuai Bidigo te po wali.   
\s1 Genuai Bidi aga digi aga te wiegi yai sipsip kibu tonalubo bidi dao  
\p
\v 11 “‘Ena God Genuai Bidi, eno te po te obao, te ena digi ena sipsip dabe gegelama, tama augwali ma oda selama, tama ena digi augwali bugagia tonaluaibao.  
\v 12 Te eno te sipsip tonalubo bidigo te sipsip kibu tonalubo tiwai elama, tama eno te sipsip dabe subigila pali dabe gegaibao. Te eno sipsip kibu dabe augwali te genuai pǫ elama, hulia sali sogo augwali subigila tedela pai dao. Tiali goli, ena pelama, tama eno augwali pali pesageba tigidali gegegi paibao.  
\v 13 Te eno augwali gasa kantriba ma oda sigi pelama, tama augwali te kantri Israelba ma odasa asaibao, te augwa tǫ mu dao. Tama augwali tigidali sogo bulu du dabede bidiyu, me wę pąde bidiyu yaibao.  
\v 14 Tama augwali Israel dabego bulu du dabede bidiyu, te wiegi yai nosai dabe tuyu bidaibao.  
\v 15 Tama ena digi te ena sipsip tonalubo bidi bidaibao, tama eno augwali toma tuabo bulu wiegi yai madi odasa paibao. Te da God Genuai Bidi eno po dao.  
\v 16 Tialima, sipsip kibu meba hagabaso da, teda eno augwali gegegi pelama, tama eno augwali ma oda saibao. Ma, te sipsip dabe meba subigila pepelawai baso da, teda eno augwali gegegi oda sigi paibao. Tama meba dolama, keni elalubaso da, teda eno augwaligo keni sisaibao. Tama meba augwali gasi elalubaso da, te eno augwaligo gasi usu ma ilaibao. Tiali goli, eno te tumona pai boma pai sipsip dabe dolaibao. Magi baso meni, eno sipsip dabe tonalubo doloba pai kolesaga naga ebo dao,’ eno te po te tobolu bidi dabebolo obao,” wali.   
\p
\v 17 “‘Tialima megi dage eno sipsip hani, ena God Genuai Bidi, eno dagebolo e tama po e obao, eno dage deli deligo kolesaga osola suyu, tama dagalaibao, te dage meba te omai sipsip tiwai dao, meba te meme tiwai dao.  
\v 18 Dage mebago wiegi yai nosai hauwa tulama, tama dagego tabi pągąna pabo dao. Tama dagego te meba elalubo nosai dabe subigila agalama, tagalobo dao. Tama me dagego wiegi yai ąį subaso da, dagego tuyu ebo dao, tama nosali dage te ąįde subigila bilama, tama te wę dunugu ilainu ebo dao.  
\v 19 Tama eno meba sipsip dabego dagego te agayu yali nosai, me te dunugu iliyu yali ąį tuyu ebo dao. Dagego te kolesaga dolo menio.’ Te po pusao,” God Genuai Bidigo te po wai.   
\p
\v 20 “‘Tama dagego ebo kolesaga dolo meni baso, God Genuai Bidi eno te po obao, te ena digi dagego tumona pai me boma pai sipsip, me bomo meni yai sipsip dabego kolesaga dagala sueibao.  
\v 21 Dage bomai sipsip dabego te bomo meni yai sipsip dabe gąųgo elama, buluba sela sąbo dao. Me dagego duga tigigo augwali pogolobo peyu, tama augwali bogoba pomainu ilibo dao. Tama dagego augwali eno sipsip hanide sela sąwai dao.  
\v 22 Tiali goli, eno ena te sipsip hani dabe ma oda selama, tama eno augwaliba te dwai nai dabe augwaliba ma asomainu sula tagalogobeo. Tama eno ena sipsip dabego kolesaga osola sulama, tama wiegi yai sipsip dabe meba muyu, me dwai sipsip dabe meba muyu yaibao.  
\v 23 Tama eno ena sę bidi Devitgo hanide bidi me deli sa munama, tama aga eno sipsip dabe tonaluabo bidi nigilama, tama agai eno sipsip dabe augwali bugagia tonalumainu yaibao. \x * \xo 34:23 \xt Ped 7:17\x*  
\v 24 Tama ena Genuai Bidi da, augwaligo God bidaibao, tama te Devitgo hani bidi te augwaligo king bidaibao. Te da God Genuai Bidi eno po dao. \x * \xo 34:24 \xt Ese 37:24\x*  
\v 25 Tama eno augwali dali deli homu eyu, augwali dali bidabo po dąų walaibao, te augwali bugagia bidimainu. Tama eno te sipsip dabe elebo te bulu hasa dabe tigidali badu sela sąnama, tama augwali te bulude munu me ma bidigobeo. Tama tibaso, te sipsip dabego te wa pai tǫ dali, te ni sili elalubo bulu dali si te sipsip dabe bidabo bulu wiegi yai tiwai elaluaibao,’ eno te po obao” wali.   
\p
\v 26 “‘Tama eno te bulude wiegi yai sę iliyu, me eno bulu du bagualubo tǫ wiegi yai ilaibao. Tama tulubage side da, eno te tǫba tulubage hauwa te tǫba tulumainu yaibao, tama te tulubagego te tǫ wiegi yai mu pedelemainu ilaibao.  
\v 27 Tama te ni dabe te du walobo ni dabe augwaligo du dabe hauwa mu walaibao. Tama nai dabe hauwa gide holaibao. Tama eno ena we bidi te boi bidi dabego nogode ma dobola saibao, te boi bidi dabego augwali dąų olama, augwali kalabus ilali pesagede ma oda saibao, tama eno augwali ma odasa asaibao. Tama augwali augwa tǫde bugagia mu bidaibao. Tama augwaligo bugagia mu koneaibao, ena deli naga ena Genuai Bidi te yabao homu yaibao.  
\v 28 Tama te gasa kantri haiden bidi dabego augwali dali dwai sę munu me ma egobeo. Tama te bulu hasa dabego augwali munu me ma ela tugobeo. Te we bidi augwali bugagia bidibadi, te gasa we bidigo augwali wi me iligobeo, te meni yaibao.  
\v 29 Tama eno augwaligo tǫ ili hauwa emainu ilama, tama nai dabe hauwa tede holomainu ilaibao. Tama augwaligo kantri nai habuge me egobeo. Tama te gasa meba kantri we bidigo koneaibao, te kantride nai hauwa elalubao olama, tama augwaligo te posobo po me wagobeo.  
\v 30 Tama te Israel dabe augwaligo e tama bugagia koneaibao, ena God Genuai Bidi, ena augwali dali bidiyu, tama augwali eno we bidi hani bidaibao. Te da God Genuai Bidi eno po dao.  
\v 31 Dage eno we bidi, dage eno sipsip kibu tiwai dao, tama dage ena tǫde bidiyu, tama eno dagebolo nai mabo dao. Tama ena dagego God bidibao, Genuai Bidi eno po polo wali.’ Te po augwalibolo pusao,” God Genuai Bidigo te po wali.   
\c 35  
\s1 Godigo Idom dabe dolaibao  
\p
\v 1 Genuai Bidigo enabolo te po walali,  
\v 2 “Tǫde bidio, nago kantri Idomba tonama, tama nago te po wao, te kantri Idom dolaibao po wao.  
\v 3 Nago kantri Idombolo e tama po wao, ‘Ena God Genuai Bidi, eno dage Idom dabego bulu du dabe dali boi bidi homu ebao,’ po walao. ‘Te eno dage dali bomonama eyu, dolama, tagalama, tama dagego tǫ olo tǫ tiwai pedalumainu ilaibao.  
\v 4 Tama eno dagego taun dabe dolaibao, tama dagego tǫ dwai olo elaluaibao. Tama tiyu, dagego koneaibao, ena deli naga ena Genuai Bidi yabao homu koneaibao.’ Te po wao,” wali.   
\p
\v 5 “Te po me augwalibolo wao, ‘Polobadu mu dage Idom dabego Israel dabe dali boi bidi elaluai dao, me eno te Israel dabe dolali sogo, me eno te boi bidi dabe tagala palama, augwali dali hwįagasali sogo me, dagego te Israel dali boi bidi elaluai dao. Te sogo asali boi bidi dabe dage Idom bagego tau selama, te Israel dabe elama, isilai dao.  
\v 6 Tama tibaso, ena tigidali sogo bidibo God eno mu po mu e obao. Te boi bidi dabego dage elama, isilaibao. Te augwaligo dage munu me ma geda mugobeo. Dagego bidi dabe ela mubo kolesaga ebode hagela homu ebeo. Tialima, boi bidi dabego dage ela mubo kolesagade gagamua sogobeo.  
\v 7 Te eno te kantri Idom we bidi sese ela silama, tama te kantri Idom te olo bulu mu pedalaibao.  
\v 8 Te eno te boi bidi dabego dage Idom dabe elemainu ilaibao, tama dagego tigi dabego te bulu du dabe, me odogo malu dabe mesega siyu yaibao.  
\v 9 Te eno dagego kantri olo bulu elalumainu ilama, tama te tiwai tigidali sogo tama elalua paibao. Tama dagego taun dabede bidi munu me ma bidigobeo. Tama tiyu, dagego e tama bugagia koneaibao, ena deli naga ena Genuai Bidi dao homu yaibao.’ Te po me pusao,” wali.   
\p
\v 10 “‘Dage Idom dabe, dagego ena God Genuai Bidi eno te kantri si Israel de Judade bidiba homu me yai menio, te augwali eno we bidi dao. Megi da, dagego te po wali dao, dagego augwali hani sigo tǫ saibao po te wali dao.  
\v 11 Tama tibaso, ena God Genuai Bidi, ena tigidali sogo bidibo da, tama eno mu po tama dage dali obao, eno dagego dwai kolesaga wei ponaibao. Dagego Israel dabe godolo munu ma me ebeo, tama dagego augwali dali sębę elama, tama dage augwali dali haliga dwai mu yai dao. Tama tialima, eno dagego te augwali dali yali dwai kolesaga wei dolo ponaibao. Tama te Israel dabe augwaligo ena bugagia mu koneaibao.  
\v 12 Tama dage Idom dabego e tama bugagia koneaibao, ena Genuai Bidigo dage Idom dabego Israel tǫba dwai po e tama wabo odali da homu yaibao, “Te Israel dabego bulu du dabe polo dolai dao. Tama megi da, da Idom bage dago te tǫ kantri selama, tonaluaibao.” Dagego te po wabo eno odali.  
\v 13 Dage Idom dabego ena dali hagoma elama, tama dagego ena posobo po olama, tama dagego ena dali dwai po wai dao. Tama eno dagego te po odai dao.  
\v 14 Tialima, ena God Genuai Bidi eno te po e obao, eno dage sese tama mu dolama, tama gasa meba kantri we bidigo sulama, tama augwali wiegi yai homu pemene yaibao.  
\v 15 Dagego te eno we bidi Israel dabe dolobode dage wiegi yai homu pemene yai dao. Tialima, eno dage Idom dabeba me deli tiwai sę naga elama, dage Idom dabe me dolaibao. Tama te bulu du Seir, me te gasa bulu dabe te kantride elalubo bulu dabe te olo bulu mu pedelaibao. Tama te Israel dabe augwaligo e tama bugagia koneaibao, ena deli naga ena Genuai Bidi dao homu yaibao.’ Te po te Idom bagebolo wao,” Genuai Bidigo enabolo te po wali. \x * \xo 35:15 \xt Ais 34:5-17; 63:1-6; Jer 49:7-22; Ese 25:12-14; Amo 1:11-12; Oba 1-14; Mal 1:2-5\x*   
\c 36  
\s1 Godigo Israel dabe dali wiegi yai sę yaibao  
\p
\v 1 Genuai Bidigo ena dali e tama po wali, “Tǫde bidio, nago te Israel dabego bulu du dabebolo eno augwalibolo wainogo ebo te poba bugagia olo saganama odao po walao.  
\v 2 Ena God Genuai Bidi, eno e tama po wainu ebao. Te Israel dabe augwaligo boi bidi dabego e tama po wai dao, ‘Wiegi yai mu dao. Megi da, te genuai bulu du dabe dago bulu du dao,’ wai.”   
\p
\v 3 “Tama tialima, nago ena God Genuai Bidigo e po pusao, ‘Te gasa hani bidigo dage Israel dabe dali hwįagasai dao. Tama te kantri tigidali badu mu tama dolama, tama te dagego kantri sai dao. Tama augwaligo te kantri Israel dwai po walama, tama augwaligo posobo po walai dao.  
\v 4 Tama tialima, dage Israel dabego bulu du dabe, me malu bulu dabe, dagego ena God Genuai Bidigo po odao. Tama me dage dolali taun dabe, me te meba gasa te kantride bulu dabe, dagego me odao, te dage boi bidi dabego dolali bulu dabe, dagego odao.’ Te po pusao,” wali.  
\p “‘Eno koneani, te dage pąde elalubo kantri bidi dabego dage dali dwai sę elama, tama dage dali posobo po wai dao.  
\v 5 Tama tialima, God ena Genuai Bidi ena haliga sębę posolo tiwai eyu, eno bomai po te kantri Idomba, me kantri dage pąde elalubo, te kantri dabeba te obao. Augwaligo homugo ena te olo nai dao tiwai homu elama, tama augwaligo eno tǫ sainu homu mu gana pai dao. Magi baso meni. Augwaligo te tǫ me badu te augwaligo kau kibu dabe me sipsip kibugo nosai tede tumainao homu yali.  
\v 6 Tama tialima, tǫde bidi, nago eno e tama po pusa mao. “Dage te Israel tǫde elalubo bulu du dabe, me odogo malu bulu dabe, dagego odiąo. Ena God Genuai Bidi, eno te meba gasa kantri dabe dali sębę dwai mu ebao. Magi baso meni, augwaligo dage dali hale yabo po wai dao.  
\v 7 Tialima, ena God Genuai Bidi, eno mu po mu te obao, eno te kantri dabe aiyaba elaluama, tama augwali hale ilaibao.  
\v 8 Tiali goli, te ni dabe te dagego bulu du dabede ma holaibao. Tama augwaligo yabe hauwa solama, tama augwali du hauwa walaibao. Dwasianu sogo mu tama, eno we bidi dage Israel dabe dage te kantri Israelba ma asaibao. Tama dagego te wiegi yai ni du dabe tuaibao.  
\v 9 Eno dage bulu du dabe dali wiegi yai sę yaibao. Tama tialima, eno te Israel dabe augwaligo dagede gi dabe ma emainu yaibao.  
\v 10 Tama eno Israel we bidi hauwa mu pedelemainu ilama, tama augwali dagede bidimainu yaibao. Tama augwaligo te taun dabe ma geseleyu, me te boi bidi dabego dolali bulu dabe ma dodoliyu yaibao.  
\v 11 Tama te we bidi dabe me dagede bidibo hasa dabe hauwa mu pedelaibao. Tama te we bidi tigidali pesage badu polobadu bidali yali gilama yaibao, tama eno dage dali wiegi yai kolesaga mu yaibao. Tama te kolesagago da, eno polobadu yali kolesaga edelama mu yaibao. Tama dagego bugagia mu koneaibao, ena deli naga ena Genuai Bidi dao homu yaibao.  
\v 12 Tama eno ena we bidi Israel dage bulu du dabede bugagia bidimainu yaibao. Tama dage augwaligo tǫ elaluaibao, tama augwaligo te tǫ augwa wai dabebolo nosali mawaibao. Tama dagego te Israel dabego wai bǫų dabe munu me ma dologobeo.” Te tama po te bulu du dabe dali, me odogo malu bulu dabebolo tama pusao,’ ena Genuai Bidi eno te po obao,” wali.   
\p
\v 13 “Ena God Genuai Bidi, eno te po te obao. Te we bidigo te po wabo dao, ‘Dago kantri tǫgo te bidi dabe siliyu, me te wai bǫų dabe doliyu ebo dao,’ po wabo dao.  
\v 14 Augwaligo te tama po obao, tiali goli, ena God Genuai Bidi eno te po obao, dage bulu du dabego Israel dabe dali dwai sę ma elamo dao.  
\v 15 Tama te gasa meba hani bidigo posobo po olama, tama dage Israel dabego bulu du hale me iligobeo. Tama dage bulu du dabego eno we bidi dwai sęde me tulalumainu iliyu me egobeo. Ena God Genuai Bidi, eno po polo walio,” te po wai.   
\s1 Godigo Israel we bidi gesi we bidi pedelemainu ilaibao  
\p
\v 16 Genuai Bidigo enabolo po ma weyu, e tama po wali,  
\v 17 “Tǫde bidi, te Israel dabe augwa tǫde polobadu bidali sogo augwaligo dwai kolesaga meda yai mu yai dao, tama augwaligo te tǫ dolai dao. Tama augwali eno gedude meda yai mu bidai dao, te we me aga poluago elai we tiwai ąǫ yai dao.  
\v 18 Augwaligo bidi hauwa mu elai dao. Tama augwaligo tibo god dabeba lotu olama, tama tebogo augwaligo kantri Israel eno gedude meda dwai mu pedelai dao. Tama tibaso, eno augwali dali sębę genuai mu elama, tama eno augwali dene genuai mu mawai dao,  
\v 19 te augwaligo tigidali dwai kolesaga dabe wei ponainu. Tama eno augwali gasa kantri dabeba sela sąwai dao.  
\v 20 Te gasa meba hanigo Israel dabe augwali tomode dwai mu bidalubo suali. Tama te tialigo eno nogi aiyaba elalualio. Tama te hani augwaligo homugo ena olo nai dao homu yalio, tama augwaligo te po wabo dao, ‘Te Israel dabe augwali te Genuai Bidigo hani dao. Magi baso augwaligo agai tǫ taga soaliwe? Te agai augwali tau sabo usu isąbaso yali, agawe?’  
\v 21 Eno te po dabe te Israel dabe pali bulu tigidalide wabo eno odali. Tama eno homugo tiali tiyu, te hani augwaligo eno nogi aiyaba elaluidalio,” wali.   
\p
\v 22 “Tama tibaso, eno homugo Esekiel, nago eno te po Israel dabebolo pusa mao, ‘Ena God Genuai Bidi, eno po te tama te wali dao. Te gasa meba hanigo dage augwali tomode bidibo sulama, tama augwaligo eno nogi aiyaba elaluali. Tama tialima, eno te megi yainogo ebo sę dabe te eno dage Israel dabe kone palama, me yainu ebeo. Eno dage tobade te sę egobeo. Menio. Eno ena genuai nogiba kone palama, tama eno nogi tobade eno te sę yaibao.  
\v 23 Tama tialima, eno te gasa meba hani e tama kolesaga ola mawaibao. Te eno kolesaga wiegi yai doloba pai mu dao olama, ola mawaibao. Tama augwaligo enabolo genuai nogi mawaibao. Dage Israel dabego dagede te hani bidigo megi eno nogi aiyaba elalubao. Tiali goli, eno dage tau sabo sę bomai mu ebo si da, te gasa meba hanigo sulama, tama augwaligo te e tama koneaibao, ena tedali gasagi yai dao, tama eno kolesaga wiegi yai doloba pai te yabao olama, koneaibao. Tama augwaligo e tama bugagia koneaibao, ena deli naga te Genuai Bidi dao homu yaibao. Te da God Genuai Bidi eno po dao.’ Esekiel, nago te po pusao,” wali.   
\p
\v 24 “Nago te eno po me augwalibolo pusao, ‘Eno dage dali yabo sę po da, e dao. Eno dage te bidibo te kantri sese tamade oda selama, tama dage duga tǫ muba ma odasa asaibao.  
\v 25 Tama eno wiegi yai meda meni yai ąį selama, dage tigiba gelaibao, te dage eno gedude wiegi yai ma pedalomainu. Awe, eno dagego dwai damua pai kolesaga, me dagego tibo god dabe me sela sąwaibao, tama dage eno gedude wiegi yai pedelaibao.  
\v 26 Tama eno dagebolo gesi kolesaga me gesi homu mawaibao, te eno poba begi pabo homu kolesaga dao. Polobadu dagego tobolu te masigi tiwai dila pai dao. Tiali goli, eno te dwai homu kolesaga sela sąnama, tama eno dagebolo gesi homu kolesaga mawaibao.  
\v 27 Tama eno dagebolo ena mobo bidi dagebolo mawaibao, tama aga dagego homude bidaibao. Tama eno dage homu hogodolama, tama dagego eno bomai po, me eno gasa po wali bugagia pomainu ilaibao.  
\v 28 Tama dage eno duga wąį dabebolo mani te tǫde bidaibao. Tama dage ena we bidi dolo mu pedelaibao, tama ena dagego God mu bidaibao. \x * \xo 36:28 \xt Ese 11:19-20\x*  
\v 29-30 Tama eno dage tau selama, tama dagego dwai meda yai kolesaga munu ma me egobeo. Tama eno dagego gide dabe nai dabe hauwa holomainu ilaibao. Tama te ni du walobo ni dabego te ni du dabe hauwa mu walaibao. Tama tiyu, dage nai me habuge me egobeo. Tama tibaso, gasa meba hanigo dage posobo po te nai sǫą pabode me wagobeo.  
\v 31 Tama te sogo da, dagego duga yali te dwai damua pai kolesaga dabe sęgę dabe kone palaibao, me te dagego yali eno godolo mu isąwai sę dabe kone paliyu, tama dage hale genuai mu yaibao.’ Te po me pusao,” wali.   
\p
\v 32 “‘Awe, dage Israel we bidi, dagego God Genuai Bidi eno po bugagia odiąo. Te sę page mu eno yainu ebo sę eno dage tobade egobeo. Menio. Eno homugo ena genuai nogiba kone palama yaibao. Tama eno te sę dabe ebo sogo da, eno homugo dagego duga yali dwai kolesaga kone palama, tama dage hale dwai mu yaibao.’ Te po wao.”   
\p
\v 33 “E po me augwalibolo pusao, ‘Ena God Genuai Bidi, eno po genina ma weyu, e tama po obao. Te eno dagego sęgę sela sąnama, tama dage eno gedude wiegi yai pedalubo sogo da, teda eno dage sula tagalama, tama dagego duga taun dabe, me duga bulu dabe bugagia ma dodolomainu ilaibao. Te boi bidi dabego dolali hanu dabe ma dodolama, tama dage te taun dabede ma bidaibao.  
\v 34 Te bidi dabe dagego tǫde biliyu ebo dao, tama augwaligo dagego gi dabe dasu hola pai suyu ebo dao. Tiali goli, eno dagego te gi dabe ma emainu sula tagalaibao.  
\v 35 Tama te gasa hani bidi dabe augwaligo e tama po waibao, “Polobadu te tǫ dasu hola pai goli dao. Tiali goli, megi da, te gi Iden yali gilama wiegi yai mu te ilai yabo. Tama polobadu da, te taun dabe da dolama mu elaluai dao. Tiali goli, megi da, te Israel dabe augwaligo sę ma elama, tama augwaligo deli deli taun bagulama bomai obo te ma gesela silai dao. Tama te we bidi te taunde ma te bidibao.” Augwaligo te po waibao.  
\v 36 Tama dage Israel dabe duga tǫde ma bidibo sogo da, te meba gasa hani dage pąde bidibo bidi dabe auwaligo e tama bugagia koneaibao, ena Genuai Bidi ena digi te dolali taun ma nigiyu, me eno te dasu dwai mu holai gi ma eyu yai dao. Ena Genuai Bidi eno te sę yabo po dąų walaio, tama eno te tama sę yaibao.’ Te po tigidali nago te Israel bagebolo pusao,” Genuai Bidigo enabolo te po wai.   
\p
\v 37 “Ena God Genuai Bidi eno te po obao. Te Israel dabe augwaligo enabolo te augwa we bidi hauwa ilao po hanalubo sogo da, teda eno augwaligo te gedu haluasa po wabo me odaibao.  
\v 38 Te augwali hauwa pedelaibao, te sipsip kibu dabe augwaligo te genuai sogo me eno augwalibolo sa muani te sogo te ofa yainu sesebo, te sipsip kibu hauwa tiwai yaibao. Tama te Israel dabe augwa ma te nigali te taun dabede bidigo pągąna paibao. Tama te sę dabe pedalobo sogo da, teda augwaligo e tama koneaibao, ena deli naga ena Genuai Bidi dao homu yaibao,” wali.   
\c 37  
\s1 Esekielgo bidi dili dabe hauwa mu suali  
\p
\v 1 Genuai Bidigo bomo enaba aselama, tama Genuai Bidigo Mobo Bidigo ena oda selama, tama ena odasa pelama, odogo malu bulu mede bidi dili dabe kisu delalubo madi odasa pali.  
\v 2 Tama agai ena te bulu odogode odasa bilibadi suali da, eno bidi dili dabe hauwa mu suali. Tama tigidali dili dabe mu wa pai elalubo suali.  
\v 3 Tama Genuai Bidigo enabolo te po wali, “Tǫde bidi, nago homugo te bidi dili dabego we bidi mu ma gagabo usu yaibawe, ma meniwe?” Tiali goli, eno te po wali, “God Genuai Bidi, nagaduba deli naga koneanio, eno da, menio,” wali.   
\p
\v 4 Tama Genuai Bidigo enabolo te po wali, “Eno homugo nago eno po te dili dabebolo pusao. Te dili dabebolo e tama po pusao, ‘Dage dili mu wa pai dabe, dagego Genuai Bidi eno po odao.  
\v 5 Ena God Genuai Bidi, eno te po e obao, eno dagebolo bidibo mobo menama, tama dage we bidi ma pedelaibao.  
\v 6 Awe, eno dage kigibili ma mayu, me tigi mi dabe ma mayu elama, tama dage tigi waligo ma halua saibao. Tama eno dagebolo bidibo mobo menama, tama dage bidibo ula selama, tama dage ma bidaibao. Tama tiyu, dagego bugagia mu koneaibao, ena deli naga ena Genuai Bidi dao homu yaibao.’ Te po te dili dabeba pusao,” agai enabolo wali.   
\p
\v 7 Tama tibaso, eno Genuai Bidigo enabolo pusao wali po tiwai tama pusali. Eno te po pusubo sę idubadi, tama eno kilikili wabo odali. Te da te dili sibi kidagalo wabo po odali. Tama eno tonalubadi, te dili aga digi pąba kigigili pabo suali, te aga elaluali pesageba ma pabo suali, tama augwali bidi mu ma pedalobo suali.  
\v 8 Tama eno suali, te tigi kigibili me tigi mi dabe te diliba ma wadoa selama, tama tigi wali ma halua sagaselama, tama augwali we bidi tiwai ma pedalobo suali, tiali goli augwaligo mobo kegebo subeo.   
\p
\v 9 Tama nosali Genuai Bidigo enabolo te po wali “Tǫde bidi, nago eno po te walibolo e tama po pusao, ‘Godigo te po wali, wali, nage tigidali badu aselama, tama nago te boi bidigo elai bidi dabe te mobo mao, tama augwali bidibo mobo ma somainu yao.’ Te po wao,” wali.  
\v 10 Tialima, eno Genuai Bidigo te po pusali, tama te wali te bidi tigiba dabe asali, tama augwali sese tama bidibo mobo selama, tama augwali sese tama hodalubo suali. Augwali te genuai ami bidi hani tiwai mu elaluali. \x * \xo 37:10 \xt Ped 11:11\x*   
\p
\v 11 Tialima, Genuai Bidigo enabolo te po wali, “Tǫde bidi, te kalabuside megi bidibo Israel dabe tigidali augwali da, te bidi dili dabe wa pai tiwai dao, tama augwaligo te po wabo dao, ‘Te dago dili dabe mu wa pai dao, tama bugagia munu ma me bidigobeo. Tama da mu tama mu hagawaibao.’ Augwaligo po da te tama goli dao.  
\v 12 Tiali goli, eno homugo nago eno po augwalibolo pusulama, tama augwalibolo e tama po augwalibolo pusao, te ena Genuai Bidigo po, ena God Genuai Bidi, eno dagego gų page tų dalama, tama dage buluba odasa aselama, tama dage kantri Israelba ma odasa paibao, te duga tǫ mu dao.  
\v 13 Tama eno dage gų pagede hodolobo sogo da, teda dage eno we bidigo e tama bugagia koneaibao, ena deli naga ena Genuai Bidi dao homu yaibao.  
\v 14 Tama eno dagebolo eno mobo bidi dagebolo menama, tama dage bidibo ula saibao. Tama eno dage duga tǫ muba ma odasa paibao, tama dage tede bugagia bidaibao. Tama eno te sę ebo sogo da, dagego e tama bugagia koneaibao, te da ena po mu dao homu elama, tama eno ena po dąų walali gilama yali. Ena Genuai Bidi eno po polo wali. Te po te Israel dabebolo pusao,” wali.   
\s1 Israel dabe augwali kantri deli mu pedelaibao  
\p
\v 15 Genuai Bidigo enabolo te po wali,  
\v 16 “Tǫde bidi, nago ni dage me deli sigi pelama, tama nago te po ugwadu daide asęao, ‘Te Juda hanigo ni dage, me te meba Israel hani we bidigo ni dage dali augwali deliba elalubao.’ Tama tialima, nago te ni dage me deli selama, tama nago te po tede asęao, ‘Te Josep hanigo ni dage, me te Efraim hanigo ni dage dali, me Israel hani mebago ni dage dali deliba elalubao.’ Te si wali ni dagede te po asęao,” wali.   
\p
\v 17 “Nago asęna silama da, teda nago te ni dage sabi si deliba waloluyu, teda te ni dage si te deli ni gagawaibao, nago nogode.  
\v 18 Tama naga abagi dedego nago te sę yali page po hanalubo sogo da,  
\v 19 teda nago augwalibolo e tama po walao, ‘Ena God Genuai Bidi eno obao, eno te Josepgo ni dage, te ni dage te Efraim hani, me te meba Israel hanigo ni me da, eno te ni me Juda hanigo ni dage si selama, deliba walolaibao. Tama eno te ni dage si te eno nogode ni dage deli elaluaibao.’ Te po wao,” wali.   
\p
\v 20 “Tǫde bidi, nago te po asęani ni dage si nogo tola sao, tama te we bidigo sumainu ugwaba sao.  
\v 21 Tialima, nago augwalibolo e tama po walao, ‘Ena God Genuai Bidi, eno te po obao, eno te tigidali Israel dabe augwali te bidibo te tigidali kantri dabede oda selama, sisinama, tama augwali augwa tǫ muba eno odasa paibao.  
\v 22 Tama tialima, eno augwali kantri deli te tǫde pedelemainu ilaibao, te Israel dabego bulu dabede. Tama augwali king deligo augwali tigidali tonaluaibao. Tama augwali bugulama, king bidi si elalubo kantri si munu me ma bidigobeo.  
\v 23 Tama augwaligo tibo god dabeba ma lotu po weyu, me dwai damua pai kolesaga wali peyu, me dwai sęgę sabo kolesaga wali me peyu me egobeo. Tama tiyu, augwali eno gedude meda yai me pedalogobeo. Augwali me habu badu bidi augwaligo sęgę saibaso, tagalao, eno augwali tau selama, tama augwali wiegi yai pedalaibao. Tama augwali eno we bidi bidaibao, tama ena augwaligo God bidaibao.  
\v 24 Tama eno sę bidi Devitgo hani bidi me deli augwaligo king bidaibao. Tama aga deli naga augwaligo tonalubo bidi bidaibao. Tama augwaligo eno bomai po me, eno gasa po wali peyu yaibao. \x * \xo 37:24 \xt Ese 34:24\x*  
\v 25 Tama dage hani bidi dabe tigidali sogo polobadu duga wąį dabe bidali te tǫde bidada paibao. Te da, te eno ena sę bidi Jekopbolo mani te tǫ dao. Tama Devitgo hani bidi me deli augwaligo tomode king tigidali sogo bida bida peyu bidaibao.  
\v 26 Tama eno augwali dali kontrak po dąų walama, tama augwali tigidali sogo bugagia bida bida peyu bidaibao. Tama eno augwali augwa tǫde bidimainu sula tagalama, tama augwali we bidi hani genuai hauwa mu pedelaibao. Tama eno be augwali tomode tigidali sogo mu elalua paibao.  
\v 27 Tama eno bidibo madi augwali dali bidaibao. Tama ena augwaligo God bidaibao, tama augwali eno we bidi bidaibao. \x * \xo 37:27 \xt 2 Ko 6:16; Ped 21:3\x*  
\v 28 Te eno be Israel dabe augwali tomode sesemane elalubo sogo da, teda gasa hani we bidigo sumainu yaibao. Tama augwaligo e tama bugagia koneaibao, ena Genuai Bidi, eno te Israel dabe augwali ena we bidi mu ilali kolesaga augwaligo sueibao.’ Te po te we bidibolo pusao,” God Genuai Bidigo te po wali.   
\c 38  
\ms1 King Gokde wali po  
\mr (Dąį 38–39)  
\s1 Genuai Bidigo king Gok dali po elaluali  
\p
\v 1 Genuai Bidigo enabolo e tama po walio,  
\v 2 “Tǫde bidi, eno homugo nago te Gokba tonao, te tǫ Magok bidi dao, te kantri Mesek me kantri Tubal sigo polalubo king dao. Nago te Gok dolaibao po wao. \x * \xo 38:2 \xt Ped 20:8\x*  
\v 3 Nago agabolo e tama po wao, ‘Gok, Mesek me Tubalogo polalubo king, odao, ena God Genuai Bidi, eno nage dali boi bidi ebao.  
\v 4 Te eno nage begelama, tama nago te saut badu edaba tonaibao. Tama eno nago penane dilide huk gebelama, tama nage dali, naga ami hani hauwa dali, eno edaba eba kegaibao. Nago ami bidi umabo tigidaligo hwįbo ugwa gudiyu, me ni nami awa dabe dali, me sabele dabe dali toliyu, me bainat hwą dabe nogo tuyu ebo dao, tama augwali hos dabede duabo dao.  
\v 5 Te kantri hauwago ami bidi geninama nage dali bidiba. Te kantri Persia, me kantri Sudan, me Libia ami bidi dabe nage dali te bidibao. Tama augwali sesego te hwįabo kapa madi gudiyu, me hwįabo ni nami sabele toliyu yaibao.  
\v 6 Tama me te kantri Gomer me taun Togarma ami bidi dabe me nage dali te bidibao. Te taun Togarma te u badu not badu digibulu bulu badu mu elalubao.  
\v 7 King Gok, nago hwįabo kegaluao. Me nago te tonalubo te ami dabe augwaligo me te hwįabo kegalumainao. Tama nago te polalubo bidi pedaliyu, augwali bugagia tonaluao.  
\v 8 Nago kibu be hauwa tonaluyu bolo yao. Te Israel hani eno augwali polobadu te haniani gasa tǫ kantri dabeba sela sąwai dao. Tama augwali tede kalabus te kibu be hauwa bididubadi, te augwa page bulu tǫ te dwai dolai elaluai dao. Tiali toli, eno augwali ma odasa aselama, tama augwali Israel bulude elalubo bulu du dabede bugagia te bidibao. Te we bidi augwaligo te augwa kantride nai dabe tigidali bugagia dodolama, tama augwali bugagia dulalubao. Tama te nosali kibu be hauwa silama, tama eno nage te kantriba hwįgi pomainu tagala palaibao.  
\v 9 Tama eno nage naga ami bidi dabe, me gasa kantri hauwago ami bidi dabe, dage te we bidi dabe dali hwįmainu eno dage tagala palobo sogo, teda dage te genuai wali me tulubage tiwai elama, dagego augwaligo tǫ te pǫgo mesega sabo tiwai yaibao.’ Nago te po te king bidi Gokbolo pusao,” wali.   
\p
\v 10 “E po me pusao, ‘Ena God Genuai Bidi eno te po obao. Gok, te nago augwali dali hwįgi pabo sogo da, teda homu hogodama, tama augwaligo nai nai dabe sabo homu mu yaibao.  
\v 11 Te nago homugo tiaibao, te hani augwaligo hwįsama eyu, me augwaligo magi dwai sę ebeo homu yaibao. Tama augwaligo taun dabe obogo bagua sai me elalubeo, te genuai sunumi paliabo nai me elalubeo. Me te augwali seselalubo nai dabe menio, te homu yaibao. Tama tialima, nago homugo augwali dali hwįgi pabo homu yaibao,  
\v 12 tama augwaligo wiegi yai nai dabe sabo homu yaibao. Te we bidi augwali gasa bulu tagalama, tama augwali ma aselama, tama augwa te taun dabe ma geselai dao. Tama augwaligo kau kibu hauwa elaluyu, me sipsip kibu hauwa elaluyu ebao, me haniani nai dabe hauwa tama elalubao. Tama augwaligo kantri te tigidali tǫde kantri dabe tomode mu te elalubao.  
\v 13 Tama te sogo te kantri Seba me Dedan hani, me te kantri Spen taun bisnis bidi dabe augwaligo dage asobo sulama, tama augwaligo dagebolo hanaluyu, te po waibao, “Te nago naga ami hauwa sisinama, tama augwali dali hwįnama, augwaligo wiegi yai nai dabe hauwa sainogo yai da, agawe? Tama dago homugo dagego gol me silva hauwa saibawe, me augwaligo kau kibu, me te meba nai dabe hauwa sainogo homu eba, agawe? Te wiegi yai mu dao,” augwaligo te po nagebolo hanalu waibao.’ Te po king Gokbolo wao,” te po wali.   
\p
\v 14 “Tama tialima, tǫde bidi, nago eno po te king Gokbolo pusa mao. Eno po da e dao, ‘King Gok, odao. Te God Genuai Bidi eno we bidi augwali augwa tǫde bugagia bidibo sogo da, teda nago te koneaibao.  
\v 15 Tama nage naga genuai ami hani dali, dage duga kantri u not badu tagalama, tama dagego te we bidi augwali dali hwį yagasaibao. Te ami bidi dabe augwali kantri hauwadu asaibao. Tama augwali sese tama augwali hosde dualama, tama augwali nage dali asaibao. Augwali umabo mu asaibao, bidigo augwali nedebaso, usu me egobeo.  
\v 16 Te eno dage ena we bidi te Israel we bidi dabe dali hwįgi pomainu tagala palaibao. Tama augwaligo dagego te tǫ te pǫgo mesega sabo tiwai ebo augwaligo sueibao. King Gok, nosali sogode nago te sę dabe emainogo eno nage hodolaibao, te gasa hani dabego sulama, konemainogo, te ena tedali gasagi yai bidiyu, tama eno kolesaga te wiegi yai mu elama, tama doloba pai mu dao olama konemainu. Tama augwaligo ena bugagia mu koneaibao.  
\v 17 Ena God Genuai Bidi, eno po te ena sę bidi dabebolo polobadu mu mawai dao, te augwali te Israel dabego profet dabe dao. Tama kibu be hauwade augwaligo po pusuyu, e tama po wai dao, nosali God eno te bidi me seselama, tama te Israel dabe dali hwįmainu yaibao. King Gok, te bidi te nage tama dao.’ Te po te king Gokde pusao,” Genuai Bidigo enabolo te po wai.   
\s1 Genuai Bidigo king Gok dene mawaibao  
\p
\v 18 “Ena God Genuai Bidi, eno te po obao. Te king Gokgo te Israel dabego tǫba aselama, hwįagasobo si, teda eno te Gok dali, te aga dali asali bage dali, augwali dali sębę dwai mu yaibao.  
\v 19-20 Tama eno sębę genuai mu pedelaibao, te posolai sia dabo tiwai yaibao. Tama Gokgo te Israel dabe dali hwįbode, ena te Israel dabego tǫba asaibao, tama te tǫ mali dwai genuai mu yaibao. Tama tialima, tigidali sųgų dabe, me ba dabe, me bulu hasa dabe, me bidigo negebo haniani hasa dabe, me te tigidali tǫde bilibo gasa nai dabe, me te tigidali tǫde bidibo we bidi dabe, tigidali wi elama, noma dwai mu saibao. Tama te bulu du dabe alua paibao. Tama me te sao pado bulu dabe te degaibao. Tama te tigidali taun obo dabe hųgia pelama, tama degaibao.  
\v 21 Tialima, ena God Genuai Bidi, eno te po obao, te eno te Israel dabego bulu du bulude dabe te eno genuai wąbi hwįmainogo ilaibao, te king Gok dolainogo. Te aga ami bidi dabe augwali te augwa hasi ma hwįnama, tama augwa hasi ma ela wialaibao.  
\v 22 Tama eno agaba haniani gasi pedalomainu iliyu, me boi agaba pedalomainu eyu yaibao, te agabolo dene mayu tama tiaibao. Te eno te tulubage, me talua ge tulubage, me posolai masigi te isi dabo te gea paliyu yaibao, tama te nai dabe aga tigiba tulaluyu, me aga dali asali ami bidi dabe tigiba me tulalueibao, me te aga dali asali haniani kantri bidi dabeba tulalueibao.  
\v 23 Tialima, eno te tebo kolesagago tigidali we bidibolo eno genuai bomo ola mayu, me eno kolesaga wiegi yai me doloba pai kolesaga mu ola mawaibao. Tama augwaligo ena mu konea paibao, ena tedali gasagi yai mu dao, te koneaibao. Tama augwaligo bugagia mu konea paibao, ena deli ena Genuai Bidi dao homu yaibao,” wali.   
\c 39  
\s1 Genuai Bidigo Gok aiyaba elaluaibao  
\p
\v 1 God Genuai Bidigo po geninama ma weyu, e tama po wali. “Tǫde bidi, nago eno po te Gokbolo pusao Tama agabolo e tama po walao, ‘King Gok, nage te kantri Mesek me Tubal bidi dabego polalubo king dao, tama eno nage dali boi bidi homu ebao.  
\v 2 Te eno nage begelama, tama nago edaba te sautba begelaibao, tama eno nage kegaibao. Tama eno nage naga kantri u not badu mu tagalamainu elama, tama nage eno te Israel dabego bulu du buluba odasa aselama, tama nago Israel dabe dali hwįmainu ilaibao.  
\v 3 Tama eno nago enesigi te pobase nogo badu tuali te nogoba eno elama, tama te enesigi tulalueibao. Tama eno nago dolo nogo badu tuali ene dabeba elebo si, te ene dabe me tulalueibao.  
\v 4-5 Tama nage me, nage dali asali ami dabe, te haniani kantridu nage dali asali bage me, dage sese tama te Israel dabego bulude bulu dude isaibao. Tama dagego tigi dabe te pepeli dili tǫde olo munalua paibao. Tama te ba kemodage dabe, me bulu hasa dabego dagego tigi dabe tuagasaibao. Te da God Genuai Bidi eno po dao.’ Te po king Godbolo pusao,” wali.   
\p
\v 6 “E po me agabolo pusao. ‘Tama eno isi te tǫ Magok bulude pedalumainu ilaibao, me te tamu ąį pąde dua bidibo we bidi tigiba me te isi pedalumainu yaibao. Tama te hani augwaligo te tama bugagia koneaibao, ena deli ena Genuai Bidi dao homu yaibao.  
\v 7 Te sę dabe eno ena we bidi Israel dabe dali yainogo ebo te sę dabe da, te augwaligo gasa we bidi hanigo eno wiegi yai nogi konemainu ola mawaibao. Tama augwaligo eno genuai nogi munu me aiyaba elalugobeo. Tama augwaligo e tama bugagia koneaibao, ena deli ena Genuai Bidi, tama ena te Israel dabe dali bidiba homu yaibao. Tama ena te tedali gasagi yai da, te eno kolesaga te wiegi yai doloba pai mu dao, augwaligo te homu yaibao.’ Te po me pusao,” wali.   
\p
\v 8 “‘Ena God Genuai Bidi, eno te po obao. Mu tamao, te sogo mu pedalaibao. Tama eno wali sę dabe sese tama eno te sogo yaibao.  
\v 9 Tama te Israel we bidi dabe augwaligo augwa taun dabe tagalama, tama augwaligo te boi bidi dabego hwįbo nai dabe tǫde subigila tagalai wilalua pabo nai dabe sigi paibao. Te augwaligo te sabele dabe me te awa dabe siyu, me enesigi siyu, me ene dabe siyu, me hwįbo wąbi dage dabe siyu, me te bobobage sesemone dabe siyu yaibao. Tama augwaligo te nai dabe sisinama, tama augwaligo te isi pulu dabe ulubo tiwai yaibao. Tama tiyu, augwaligo ulabo isi te kibu be nogo a naga olama, me badu nogo si, te 7 kibu bede nogabo isi usu elaluaibao,  
\v 10 tama te kibu be a naga olama, me badu nogo si te kibu bede augwaligo buside o kala sili bulude isi gegebo sę meni yaibao. Menio. Te augwaligo te hwįbo nai dabe naga augwaligo isi ulubo sę eyu yaibao. Tama te kolesagago da, te Israel dabe augwaligo augwa boi bidi dabe augwaligo dwai kolesaga wei ponaibao. Te boi bidi dabego Israel dabe doado bage dabe wi sai, tama megi da, te Israel dabego te boi bidi dabego nai dabe saibao. Te da, God Genuai Bidi eno po dao,’ nago te po te bidi Gokbolo pusao,” wali.   
\s1 Gokgo ami bidi dabego gų page  
\p
\v 11 “Ena Genuai Bidi eno po genina ma weyu, e po obao. ‘Te sę dabe tigidali pedalobo sogo da, teda eno te kantri Israelde te king Gok aga ami dabe dali augwali pubulabo gų page tǫ deli me sa muaibao. Te gų page da, te Osogo Bidagasali Bidi Dabego Odogo Malu Bulude elaluaiba, te u badu te giliga asobo badu te tamu ąį Detsi te sigi ąį badu. Tama te we bidi augwali te badu munu me ma biligobeo. Magi baso meni. Te Gokgo ami bidi dabego gų page te bulu badu mu pągąna paibao. Tama augwaligo te odogo malu bulu nogi e tama nogi nogi yaiba, Gokgo Ami Bidi Dabego Odogo Malu Bulu dao waibao.  
\v 12 Tama te Israel dabe augwaligo te Gokgo ami bidi dabego tigi pubalobo sę idubadi, te 7 polua bidaibao. Tialima, augwaligo augwali polo pubala silibo si, teda augwaligo tǫ eno gedude wiegi yai ma yaibao.  
\v 13 Te Israel dabe sese tamago te sę yaibao. Tama bidi dabego enaba genuai nogi mabo sogo da, teda augwali te sę yali bidi dabebolo me genuai nogi mawaibao. Te da God Genuai Bidi eno po dao.  
\v 14 Tama te a naga olama, si, te 7 polua silibode da, te Israel dabe augwaligo bidi dabe sa munama, tama augwali tigidali Israel tǫba pelama, tama te bidi dili dabe me munalubo gege biligi paibao. Tama augwaligo te dili dabe pubalaibao, te tǫ wiegi yai pedalomainu.  
\v 15 Tama te bidi dabe augwali biligi pelama, te bidi dili dabe elalubo subaso da, te bidi dabe augwaligo te dili elalubo pąde sa munagaliyu yaibao. Tama gasa bidi dabe mebago te dili dabe sagaselama, tama augwaligo te Gokgo Ami Bidi Dabego Odogo Malu Buluba pubaligi paibao.  
\v 16 Augwaligo te dabe sese pubala silibo si, teda Israel dabego tǫ sese tama wiegi yai ma pedelaibao. Tama taun me deli te gų page pąde elaluaibao. Tama augwaligo te taun nogi e tama nogi yaibao, Genuai Ami Bidi Hani nogi yaibao.’ Eno te po obao,” wali.   
\p
\v 17 “Ena God Genuai Bidi eno te po me obao. Tǫde bidi, eno homugo nago e tǫde ba dabe me bulu hasa dabe asomainu i ola kegelao. Eno e po augwalibolo pusao, ‘Dage te Israel dabego bulu du buluba dabe sisinagaselama, tama dagego eno dagebolo ofa nai mawainu ebo te ofa nai tuagameo. Te eno dagebolo tuabo mi hauwa mayu, me tuabo kaneme hauwa mu mayu yaibao.  
\v 18 Te dagego te king hauwago bomai ami bidi dabego tigi mi me kaneme hauwa tuyu yaibao, te bidi dabego mi dabe te Basan bulude sabo wiegi yai tumona pai genuai sipsip kibu, me meme kibu, me kau kibu ofa ebo mi tiwai tueibao.  
\v 19 Te eno te ami dabe te ofa tiwai elebo si da, dage te ba dabe me bulu hasa dabe dagego te tigi ili dabe tudubadi genama, dagego tabi pągąbo tagalama, tama augwaligo kaneme tudu pelama, dage polobo bidi tiwai ebo si tagalaibao.  
\v 20 Awe, eno dagego genuai nai da mu mawaibao. Tama dagego te hos dabego tigi dabe tuyu, me te hosde duabo ami bidi dabego tigi, me te hwįbo bomai bidi dabego tigi me tuyu yaibao. Tama dagego tabi mu pągąna paibao.’ Te da God Genuai Bidi eno po dao.” \x * \xo 39:20 \xt Ped 19:17-18\x*   
\s1 Genuai Bidigo Israel dabe ma oda saibao  
\p
\v 21 Genuai Bidigo po bomonama ma weyu, te po wali, “Te eno te we bidi tigidali augwa dwai dwai kolesaga wei ponoyu, augwali dene mawaibao. Eno te tama tibo sogo da, teda augwaligo eno genuai bomo sulama, tama augwaligo enabolo genuai nogi mawaibao.  
\v 22 Tama tialima, te sogo me, nosali bidibo tigidali sogo me, te Israel dabe augwaligo te tama bugagia koneaibao, ena deli ena Genuai Bidi, tama ena augwa God dao waibao.  
\v 23 Tama gasa tǫ kantride bidibo we bidi hani bidi eno te Israel dabe dali yali sę page mu koneaibao. Te eno te Israel dabe digibulu buluba kalabus sę emainu tagala palali sogo, eno te tama tiai dao. Magi baso meni, te Israel dabe augwaligo eno po sela sąnama, sęgę sobaso tiai dao. Tama tialima, eno augwalibolo tudi ola mawai dao. Tama te boi bidi dabego augwali aiyaba elaluama, tama augwali sese ela isila silimainu sula tagalai dao.  
\v 24 Eno augwaliba tudi ola menama, tama augwaligo dwai meda yai sę dabe elama, sęgę sę dabe yali wei ponoyu, tama tiai dao, augwa dagede,” wali.   
\p
\v 25 “Ena God Genuai Bidi, eno te po obao, eno te Israel dabe dene polo mawai dao. Tama tialima, eno megi augwali ma homu dene ma yaibao. Tama bidi mego eno genuai nogi aiyaba elalubo usu me egobeo.  
\v 26 Te augwali augwa tǫde bugagia bidiyu, tama bidi mego augwali wi ma ilisąma ebaso da, teda augwaligo augwa polobadu yali dwai kolesagaba kone palama, tama augwali hale dwai mu yaibao.  
\v 27 Eno augwali augwa boi bidi dabego kantride selama, tama augwali augwa kantri muba ma odasa asaibao. Tama te gasa hani bidi dabego eno te Israel dabe dali yali sę sulama, tama augwaligo e tama koneaibao, te ena tedali gasagi yai dao, tama eno kolesaga wiegi yai doloba pai mu augwaligo suaibao.  
\v 28 Tama te Israel dabego eno augwali dali yali sę kone palaibao. Te augwaligo eno augwali gasa kantriba kalabus igi pomainu tagala palali, me augwali augwa kantriba ma odasa asali kone paliyu yaibao. Tama augwaligo e tama bugagia koneaibao, ena deli ena Genuai Bidi augwaligo God dao homu yaibao.  
\v 29 Tama eno ena mobo bidi augwalibolo mawaibao. Tama eno augwali tudi munu me ma ola magobeo. Ena God Genuai Bidi, eno te tama po te wali dao,” te po wali.   
\c 40  
\ms1 Godigo Esekielbolo nosali Israel bulude pedelabo wiegi yai nai dabe ola mani  
\mr (Dąį 40–48)  
\s1 Genuai Bidigo Esekiel Jerusalemba odasa pali  
\p
\v 1 Te da kalabuside bidibadi kibu be 25 wabode, tama te kibu bede te dei namba 10 wabo sogo eno Genuai Bidigo bomo enaba asobo gagama yali. Te da te boi bidi dabego te taun Jerusalem selama, 14 kibu be polo pai nosali badu dao. Tama te sogo tama Genuai Bidigo ena tolasa pali.  
\v 2 Tama te nade ebo sę dabe tiwai elama, Godigo ena tolasa pelama, Israel dabego tǫba odasa pelama, tama bulu du ugwanu mu yai bulu duba me tagaligi pali. Tama eno u sautba tonobadi, eno be dabe elalubo suali, tama te ma te taun me elalubo tiwai subo ąǫ yali. \x * \xo 40:2 \xt Ped 21:10\x*  
\v 3 Tama Godigo ena pąba odasa pali, tama eno bidi me bidibo suali, tama aga te bras ula tiwai ebo suali. Te bidi te taun obo sunumide dolaluali, tama agai te bobobage nai usu sabo haliga bono elaluyu, me te gasa nai usu sabo ni tolaluyu, dolalubo suali. \x * \xo 40:3 \xt Ped 11:1; 21:15\x*   
\p
\v 4 Tialima, te bidigo enabolo e tama po walali, “Tǫde bidi, eno nagebolo waselainu ebo nai dabeba bugagia mu tonaluao. Me nago odainu ebo poba bugagia olo saganama odao. Magi baso meni. Godigo nage odasa asali, te nagebolo eno te nai dabe ola momainu, tama nosali nago Israel dabebolo eno te pusa mani po pusao,” te bidigo enabolo te po wali.   
\s1 Esekielgo giliga asobo badu elalubo obo sunumi suali  
\p
\v 5 Eno Godigo tempel be suali, tama masigigo nigai genuai obogo te be bagulai suali. Tama te bidigo te usu ni sabo eno suali. Te usu ni bobobage te 3 mita usu nama elaluali. Tama agai te Godigo be bagulali genuai obo usu sali. Tama te obo bobobage ugwaba te 3 mita usu nama elaluyu, me ugwade edasi dedawali te 3 mita usu nama elaluali.  
\v 6 Tama te obogo bobobage sunumi sela elaluali. Tama te deli deli sunumi u badude te be habu dabe si badu elalua peyu, tama elaluali. Tama bidi dabe augwali Godigo beba painogo da, augwali te be habu elalubo sunumi me delidu peyu yao. Tama be sunumi tagalama, saboligi pao. Te deli deli sunumide te ugwa holoyu, eda asiyu yabo togobili te elalubao. Tialima, te usu ni elalubo bidi aga te giliga asobo badu elalubo obo sunumi badu pali. Tama te bidi aga te sunumi togobilidu ugwaba holoyu, agai te obo sunumi ugwanu dedawali usu nigo usu sesa holali. Tama dąį te usu ni da, te 3 mita usu nama elaluali. Te hasia wali sunumi dąį te 3 mita usu nama tama elaluali.  
\v 7 Te be te sunumigo talua sai elaluali. Te be sunumide te u badu me e badu te tonalubo bidi bidabo be habu dabe me elaluali. Tama bilabo sunumi bobobage te tomode elaluali. Tama te bidigo te be habu genuai me bobobage usu nigo usu sabo suali. Tama augwali sese tama deli dąį yai naga elalubo suali, te 3 mita usu nama naga, tama agai tama te be habu tomode ugwanu edanu dedawali te usu nigo usu sali. Te be habu todogo pali tomode tama te dagago genuai dąį te 2 mita me hap mita elalua pali. Te pesage te genuai be habuba deli ugwa peyu, eda asiyu ebo pesage deli tama naga dao. Tialima, te bidi aga pelama, te be habu sunumiba saboligi pali. Tama agai te sunumi sabi badu daga ugwanu edanu dedawali te usu ni sabo suali. Tama te badu te daga dąį te 3 mita usu nama elaluali.  
\v 8-9 Tama aga te genuai be habuba pelama, tama agai te be habu usu nigo usu sabo suali. Te be habu genuai dąį te 4 mita usu nama elaluali. Te be habu u badu te gasa sunumi me elaluali. Te sunumi te Godigo beba pabo sunumi elaluali. Tama te bidigo te be habugo sunumi sabi badu daga usu nigo usu sigi pali. Tama agai dąį te wan mita usu nama elaluali.   
\p
\v 10 Te be tonalubo bidi dabe bidibo be habu dabe da, te 6 tama elaluali, te genuai sunumi bogo badu elalubo be habu dabe. Te me badu sela, me badu sela elaluali. Tama tigidali be habu dabe deli usu ni naga elaluali.  
\v 11 Tama nosali te bidi aga genuai sunumi dedawaliba pelama, tama agai te pesage usu nigo usu sesa bilali. Te sunumi dedawali te 6 olama hap mita tama usu nama naga elaluali. Tiali goli, augwaligo te be sunumi dabo si da, teda te dąį pąba 5 mita tamaba usu nigi pali.  
\v 12 Tama te tonalubo bidi dabego be habu gesabidi badu te pęwadage be daga ugwaba bobobage te 50 sentimita elaluyu, me ugwade eda si dedawali me te 50 sentimita tama usu nama tama elaluali. Tama te be habugo bobobage me genuai yali me te deli mita naga elaluali, te 3 mita tama naga elalua pali.  
\v 13 Tialima, te bidi aga te tonalubo bidi me deligo be habu tomoba pelama, tama usu nigo usu siyu yali. Agai te be habu tudi badu dagade gagalama, tama pelama, te soabo sunumi ela solama, gasa dolo si be habu tudi badu dagaba pelama, te usu nigi pali. Tama te tiwai usu selama, te usu te 12 mita olama hap mita yali. Te da te bego genuai dąį namba dao.  
\v 14 Tama nosali te bidigo te dedawali sabide elalubo genuai be habu usu nigo usu sigi pali. Te be habu aga bobobage da, te 10 mita usu nama dao. Te genuai be habu u badu te sunumi te Godigo be bagulai genuai sisinibo pesageba pabo sunumi dao.  
\v 15 Te genuai sunumi bulu badu gagalama, tama te dedawali usu selama, tama te sabi badu elalubo sunumiba usu nigi pelama, te usu te 25 mita usu nama dao.  
\v 16 Te tigidali be habu si si tomode te windo elalua pali. Tama te tonalubo bidi dabego be habu tudi badu daga elalua pabo, te daga dabede me te windo dabe elalua pali. Tama augwaligo te ni det noma te be dagade te windo pąde elalua pali.   
\s1 Esekiel agai genuai sisinibo pesage te obo tomode suali  
\p
\v 17 Tama tialima, te bidigo ena oda selama, tama da sigo te be habu tagalama, tama te obo tomode genuai sisinibo pesage te Godigo be bagulama tomode elalubo, teba pesageba pali. Tama eno 30 be habu te sisinibo pesagede bogo badu elalua pabo suali, te sisinibo pesage bogo badu selade naga. Tama augwali te masigigo nigai genuai oboba ugwa mu dagana sai elaluali. Tama te be habu dabe gesabidi badude augwaligo masigi du dabe wasilama, tama bilibo pesage nigai suali, agai te pedu elalubo suali. Te bilibo pesage te tigidali be habu gesabidi badu naga elalua pabo suali.  
\v 18 Te bilibo pesage aiyadu elalubadi, te Godigo be bagulai sisinibo pesage te ugwadu tama elaluali.  
\v 19 Te sisinibo pesage obogo te gasa obo me bagulai. Te da te namba 2 obo te Godigo tempel be bagulai obo mu dao. Te namba 2 obo tomode te gasa sisinibo pesage me elaluali. Tama te sisinibo pesage te ugwanu ganama elaluali. Te namba 2 obo te giliga asobo badu, te sunumi me deli elaluali. Tama te bidigo te obo si agebele tomode elaluali tǫ usu nigo usu sali. Agai te genuai obo sunumide gagalama, tama pelama, tama te namba 2 obo sunumiba saboligi pali. Tama te tǫ mita te 50 mita usu nama tama dąį yali.  
\s1 Esekiel agai u not badu obo sunumi suali  
\p Tama tialima, te bidi aga u not badu pali,  
\v 20 tama agai te not badu elaluali be obo sunumi usu nigo usu sali.  
\v 21-22 Te tomo habu dabe te giliga asobo badu genuai obo tomode te be habu dabe tiwai mu dao. Tama tialima, te sunumi genuai dąį te 12 mita hap usu nama dao. Tama te sunumi dedawali bobobage da, te 25 mita usu nama dao. Tama te sunumi togobili te agalama ugwaba te genuai obo tomoba pabo te a naga olama, si, te 7 te bede elalubao.  
\v 23 Te u badu not badu te Godigo be bagulali namba 2 genuai obode, te sunumi me deli elalubo. Te da te giliga asobo badu te sunumi tiwai si mu dao. Tialima, te bidigo te sunumi si agebele tomode te tǫ usu nigo usu sali. Te agai te giliga asobo badu yali kolesaga tiwai tama yali. Tama te tǫ dąį me te 50 mita usu nama tama elaluali.   
\s1 Esekielgo u saut badu elalubo obo badu sunumi suali  
\p
\v 24-26 Tialima, te bidigo ena u saut badu odasa pali. Tama dadi si te obo sunumide beba sabolali. Te genuai obo sunumiba tama agai te be usu nigo te be usu sali. Te be habu dabe te deli tiwai si naga elalua pali, te gasa me be si tiwai yali gilama naga elaluali. Tama tialima, te be bobobage te 25 mita elaluali, tama te aga genuai da, te 12 mita olama hap mita tama elaluali. Tama te sunumide te ugwa genuai be habuba holobo togobili te a naga olama si, te 7 agabo madi elaluali.  
\v 27 Tama te e saut badu me te 7 namba 2 obo badu te sunumi me deli elaluali. Tama te bidigo agai giliga asobo badu te yali kolesaga tiwai te obo sunumi si tomo agebele tǫ usu nigo usu sali. Tama te tǫ dąį te 50 mita usu nama tama elaluali.   
\s1 Esekiel agai namba 2 obo sunumi suali  
\p
\v 28 Tama tialima, te bidigo ena te namba 2 obo sunumi elalubo madi odasa pali, te saut badu. Tama dadi si te sunumidu tomoba pelama, te sisinibo pesage, te Godigo tempel be gesabidi badu elalubo, te pesageba saboligi pali. Tama te namba 2 obo sunumide me be elaluali. Te bidigo te saut badu te sunumi usu nigo usu sali, tama te be habu dabe sese tama te gasa genuai be habu te usu sali tiwai si tama naga elaluali.  
\v 29 Te tempel be tonalubo bidi dabego be habu dabe me, te genuai be habu me, te be habu tomode daga dabe sese tama te gasa meba be habu usu sali usu ni tiwai naga elaluali. Tama te sunumi dedawali bede me te windo dabe me elaluali. Tama te dedawali bobobage magi te 25 mita usu nama elaluyu, me ugwanu edanu dedawali te 12 mita olama hap mita elaluali.  
\v 30 Tama te be tomode te genuai be habu te si dali si badu elaluali. Tama te be habu bobobage te usu ni te 12 mita olama, ugwadu hap mita dao. Tama te be genuai ugwanu dedawali da, te 2 mita olama hap mita dao.  
\v 31 Te bede genuai be habu aga gesabidi te genuai sisinibo pesage badu elalubao. Tama te tempel be tonalubo bidi dabego be habu dabe te Godigo tempel be pąde elaluali. Tama te ni detgo piksa dabe te windo dabe pąde elalua pali. Tama te be sunumi te a naga olama sela, te 8 agabo togobili ni aiyaba te genuai sisinibo pesageba dulubo digi elaluali.  
\v 32-34 Tialima, te bidigo ena te giliga asobo badu te namba 2 obo tomode elalubo sisinibo pesageba teba odasa pali. Me te tonalubo bidi dabego be habu te Godigo be gesabidi badu pąde elaluali. Tama agai te namba 2 obo badu elaluali be sunumi usu nigo usu sali. Tama te be habu dabe, me te tigidali nai dabe te meba be habu dabe usu ni sali tiwai naga elaluali. Te bego genuai be habu te genuai sisinibo pesage pąde elaluali. Tama te tonalubo bidi dabego be habu dabe te Godigo be pąde tama elaluali, te Godigo be gesabidiba polobadu. Tama te ni detgo piksa noma te windo pąde dabe elalua pabo suali. Tama te be togobili te a naga olama sela, te 8 aiyaba te genuai sisinibo pesageba dulubo digi elalubo suali.   
\p
\v 35-37 Tialima, te bidigo ena oda selama, tama not badu te namba 2 obo sunumi beba odasa pali. Tama agai te be usu nigo usu sali. Tama te be habu dabe usu sali, te gasa meba be habu dabe tiwai si naga elalua pali. Tama tede te ni detgo piksa noma te piksa tama elaluali. Tama te tonalubo bidi dabego be habu dabe te Godigo be pąde elaluali. Tama te be sunumi togobili te aiyaba genuai sisinibo pesageba dulubo madi te togobili ni te a naga olama sela elaluali.   
\s1 Esekiel agai te ofa nai dabe dodolobo pesage suali  
\p
\v 38 Te not badu te bede te gasa be habu me elaluali. Te be habu te genuai be habu sesege badu elaluali. Tama te be habugo sunumi te genuai be habu dedawali sunumi badu elaluali. Tama te be habude augwaligo te iside mu dela silabo ofa yabo hasa dabego mi ąįgo telabo digi dao.  
\v 39 Te genuai be dedawali bogo badu si badu te tebol sai elaluali. Te me si u badu elaluyu, me si te me badu polo badu elaluali. Tama te tebol sai dabede augwaligo te iside mu dela silabo ofa yabo kibu eleyu, me sęgę sela sąyabo ofa yabo kibu eleyu, me sęgę dabe dodolabo ofa yabo kibu dabe tama eleyu ebo tebol dabe dao.  
\v 40 Te bulu badu te genuai be habude te genuai be habu muba pabo te togobili pagede te me si me si tebol tede munaluali. Te tebol me si te togobili elalubo badu elaluyu, me si te u badu elaluyu yali.  
\v 41 Tialima, te ofa ebo kibu dabe elebo tebol te a naga olama sela, te 8 tebol elaluali. Te me si me si te genuai be tomode elaluali, tama me si me si te bulu badu elaluali.  
\v 42 Tama gasa me si me si tebol me elaluali, te augwaligo masigigo nigai. Te tebol dabe ugwaba dąį te 50 sentimita dao. Tama agai bobobage elama, genuai te usu ni da, te 75 sentimita dao. Tama te tebol daide augwaligo te sese dela ulubo ofa yabo kibu dabe elebo kągo hwą dabe tede munalubo dao.  
\v 43 Augwaligo te be habu dagade te genuai huk dabe munama bagulai elaluali. Te huk bobobage usu ni te 7 hap sentimita dao. Tama augwaligo te ofa ebo kibu mi dabe te tebolde muyu ebo dao.   
\s1 Esekiel agai pris dabego be habu suali  
\p
\v 44 Tialima, te bidigo ena te namba 2 obo tomode elalubo te bidi dabe sisinibo pesageba odasa pali, te Godigo tempel be gesabidi badu. Tama eno te balia po wabo bidi dabego be habu si suali. Te be habu me te not badu be sunumiba polo badu elaluali, tama u sautba tonoyu ebo suali. Tama me be habu te saut badu obo sunumi be sesegede elaluali, tama u notba tonoyu ebo elaluali.   
\p
\v 45 Tama te bidigo enabolo e tama po walali, “Te not badu te elalubo be habu te Godigo be tomode sę ebo bidi dabego be habu dao. Tama te saut badu elalubo be habu te altade  
\v 46 sę ebo bidi dabego be habu dao,” wali. “Te tigidali pris dabe te Sadok hani wai, tama augwali te Livai hani dao. Te Sadok hani pris bidi dabe naga te Genuai Bidi pageba paibao, agai sę yainogo,” te po wali.   
\s1 Augwali Godigo tempel beba sabolali  
\p
\v 47 Tama tialima, te bidigo Godigo be gesabidi badu sisinibo pesage badu usu nigo usu sali. Tama te sisinibo pesage tigidali badu te deli tiwai dąį naga elaluali, te 50 mita usu nama naga elaluali. Tama te alta te Godigo tempel be gesabidi badu te sisinibo pesage tomode elaluali.  
\v 48 Te usu ni tolalubo bidi agai ena te Godigo be sunumidu odasa pelama, tama dadi si te be mabo tiwai habuba me pali. Agai te be sunumi ugwanu edanu dedawali te usu nigo usu sali. Te sunumigo bobobage tama te dąį te 2 mita olama, hap mita elaluali. Tama agai te sunumigo genuai te usu nigo usu sali, tama agai magi te 7 mita usu nama elaluali. Tama te dwasianu daga te be habu badu elaluali te daga usu ni da, te mita deli olama, hap mita yali.  
\v 49 Te sunumi dedawaligo bobobage te 10 mita elaluali. Tama agai genuai te 5 mita olama, hap mita elaluali. Tama te sunumide togobili elaluyu, tama aiyaba te sisinibo pesageba dulubo togobili elaluali. Tama te togobili bogo badu si dali si badu te genuai pos si dolaluali.   
\c 41  
\p
\v 1 Te Tedali Gasagi Yai Be Habu te be mabo tiwai be habu tudi badu elalubo. Tama te bidigo ena te Tedali Gasagi Yai Be Habu sunumiba odasa pali. Agai te sunumi usu nigo usu sali. Tama te sunumi sesegede te obo ugwanu dedawali te 3 mita elaluali.  
\v 2 Tama te sunumi aga te dedawali te 5 mita elaluali. Tama me te obo dage te bugai te sunumi habu badu gagalama, te me habuba te 2 mita me hap mita elaluali. Tama te obo dage me te be sunumi me badu pedai badu te usu ni si te tiwai si naga yali. Tama agai te Tedali Gasagi Yai Be Habu usu nigo usu sali. Tama te be habu te bobobage te 20 mita usu nama elaluyu, me te be habu genuai te 10 mita usu nama elaluali.   
\p
\v 3 Tialima, nosali aga te Tedali Gasagi Yai Be Habu tudi badu te gasa be habu sunumi me deliba pali. Tama agai te be sunumi usu nigo usu sali. Te sunumi sesege badu obo ugwanu dedawali te wan mita elaluali. Tama te be sunumi mu da, te 3 mita usu nama elaluali. Tama te be sunumidu te obo te sunumidu gagalama, te be habuba te 3 mita olama, hap mita elaluali. Te obo me badu sunumi sesege badu te deli tiwai dąį naga elaluali.   
\p
\v 4 Tialima, agai te be habu usu nigo usu sali. Tama te be habu tigidali pedai badu te deli tiwai dąį naga elaluali, te 10 mita usu nama naga tama elaluali. Tama agai enabolo e tama po wali, “E da te Tedali Gasagi Yai Mu Be Habu mu dao,” wali.   
\s1 Esekiel agai te Godigo tempel be sesegede elalubo be habu dabe susa pali  
\p
\v 5-6 Te Godigo tempel bede te Tedali Gasagi Yai Be Habu, me te Tedali Gasagi Yai Mu Be Habu, augwali si te dwasianu dwasianu be habu dabego bagua sai mu elaluali. Tama te usu ni tolalubo bidigo te be habu tomode elalua pabo obo dabe genuai yali usu nigo usu siyu, me Tedali Gasagi Yai Be Habu, me Tedali Gasagi Yai Mu Be Habu te usu nigo usu sali. Te daga dabe aiya badu te dąį te 3 mita usu nama elaluali. Tiali goli, te habu tomode me te daga tomode te dąį te deli tiwai si menio. Magi baso meni. Augwaligo te be daga bulu badu te habu sugunani si daganani. Tama te be habu dabe te sai yali selade wasilama elaluali. Te aiyadu be habu lain te aiyadu tǫde elaluali. Tama me te tomo ugwadu be habu dabe te tomo menename ni daide elaluali. Tama te menename ni te hasia manani kau ni daide elaluali. Tama te ugwadu daide te be sai ni te si wabo manani kau ni daide elaluali. Augwaligo te tobage kolesagago nigai elaluali. Magi baso meni. Augwaligo Godigo be dagade dedage nigibo hagela ebaso, te soiyame ni aiyadu be saiba muainogo. Tigidali be saide te be habu 30 elaluai. Tama aiyadu be habu dabe te 2 mita usu nama elaluali.  
\v 7 Te tomode be habu dabego te 2 mita genuai edelama elaluali. Tama ugwadu be habu dąį dabego tomode be habu dabe edelai elaluali. Tama te be tomoba holobo togobili me, te ugwaba holobo me, te togobili elaluali.   
\p
\v 8-11 Te Godigo be obo genuai me te habu u badu elaluali. Te obo dedawali da, te 2 mita usu nama elaluali. Tama te obode te sunumi si te bidi dabe ugwa eda yabo elaluali. Te sunumi me te saut badu elaluyu, me te not badu elaluyu yali. Tama eno suali, te bilibo pesage te Godigo be bagulama elalubo suali. Te ugwaba genuai yali da te 2 mita olama, hap mita elaluali. Te ugwadu te bilibo te be sai te ugwaba te Godigo be habu dąį tiwai elaluali. Tama te dąį da te 3 mita usu nama elaluali. Tama te bilibo pesage aiyadu te olo pesage me elaluali, te Godigo be bagulama elaluali. Tama agai genuai usu yai te 10 mita elaluali. Te olo tǫ elalubo digi te be dabe meba te bogode elaluali.   
\s1 Godigo be usu sai  
\p
\v 12 Te giliga dega sabo badu te Godigo be tudi badu genuai be me deli elaluali. Tama agai edaba te Godigo be bagulama elalubo te olo pesage o tǫ elalubo digi edaba tonaluali. Te be bobobage te 45 mita usu nama elaluali. Tama te be ugwanu edanu dedawali te genuai te 35 mita usu nama elaluali. Tama te be daga dedawali da, te 2 mita olama, hap mita elaluali.  
\v 13 Tialima, te be tagalama, te bidigo Godigo tempel be bobobage usu nigo usu sali. Tama te dąį te 50 mita usu nama elaluali. Tama nosali agai te olo tǫ, me te giliga pabo badu te be dali si agai usu nigo usu sali. Agai Godigo tempel be tudi badu gagalama, tama te be tudi badu tagaligi pali. Te dąį me te 50 mita tama yali.  
\v 14 Tialima, agai Godigo be gesabidiba usu siyu, me olo tǫ dabe u badu elaluali, me e badu elaluali olo tǫ elalubo pesage agai usu nigo usu sali, tama te dąį me te 50 mita usu nama naga elaluali.  
\v 15-16 Tama agai te tempel be tudi badu elalubo be bobobage me te be habu bobobage si u badu me elaluali, te tama usu nigo usu sali. Tama te dąį me te 50 mita naga elaluali.  
\s1 Esekielgo Godigo tempel be tomode be daga tigidali au yali agai suali  
\p Augwaligo te Godigo tempel be sunumi dedawali dali, te Tedali Gasagi Yai Be Habu dali, te Tedali Gasagi Yai Mu Be Habu dali, augwali sela te dodolai masigi dabego nigai dao. Tama te be habu selago tomode elaluali be daga dabe augwaligo te ni namigo dagawani. Me te sunumi pąde elalubo daga dabede, me dwasianu windo dabede, me te be sunumi genuai pesage badu me, te ni namigo daganai elaluali. Te ni nami dabego te daga mesega sai elaluyu, te aiyadu soiyamedu gagalama, tama holama, te windoba usu nigi pali. Tama me te windo halubo ni nami dabe me elaluali.  
\v 17 Augwaligo te Tedali Gasagi Yai Be Habude augwaligo piksa togobadi, me te Tedali Gasagi Yai Mu Be Habu me ugwa badu be habu badu daga, me te be habuba pabo sunumi daga me augwaligo te piksa togwai elaluali.  
\v 18 Tama te piksa dabe te ni det piksa, me te bogo me si me si yai ensel dabe piksa dao. Tama te deli deli ensel bidigo piksa te ni det piksa tomo tomode elalua pali. Te ensel dabego gesabidi si te e tama tiwai si elaluali.  
\v 19 Te me da, te bidigo gesabidi, me te laion yowigo gesabidi elaluali. Tama te piksa sigo te ni det u badu elalubo me e badu elalubo piksaba ugwa tonoyu, edaba tonaluyu yali. Te tiwai tigi poai piksa te tigidali be daga elalubo madi elalua pali,  
\v 20 te be aiyadu gagalama, tama te sunumi ugwadu toboluba tama usu nigi pai elaluali.  
\v 21 Te Tedali Gasagi Yai Be Habu badu te sunumi pos te me si me si badu elaluali. Tama augwali dąį te deli tiwai si naga elalua pali.  
\s1 Genuai Bidi pagede elalubo tebol Esekielgo suali  
\p Te Tedali Gasagi Yai Mu Be Habu pąde augwaligo  
\v 22 ni namigo nigai alta sai elaluali. Te nai ugwa badu dąį te 1 wan mita olama, hap mita elaluali. Te nai dage badu me, bogo badu me, page badu me, augwaligo ni namigo nigai elaluali. Tama te usu ni tolalubo bidigo enabolo e tama po walali, “Te nai da, te Genuai Bidi gesabidide elalubo tebol sai dao,” wali.   
\s1 Godigo be sunumi dabe  
\p
\v 23-24 Te Tedali Gasagi Yai Mu Be Habuba tula pabo sunumi si elaluali. Te be sunumi si deliba ununu pelama, elalua pali. Tama deli deli sunumi te ununama, deli sunumi elalubo tiwai yali. Tama me te Tedali Gasagi Yai Be Habu badu me te deli tiwai be sunumi naga elaluali.  
\v 25 Tama te Tedali Gasagi Yai Be Habu sunumi bulu badude me augwaligo te ni det piksa, me te ensel piksa tiwai si naga togwai elaluali, te be dagade elalua pali piksa tiwai naga elaluali. Te Godigo be tomoba pabo be sunumi bulu badu mabode te be pedu dwasianu deli elaluali. Augwaligo te be pedu te ni namigo nigai.  
\v 26 Tama te be mabo u badu me, e badu me, te dagade te dwasianu windo dabe elalua pali. Tama te be mabo dagade te ni det piksa elaluali, te windo dabe bogo badu side elaluali.   
\c 42  
\s1 Pris bidi dabego be si  
\p
\v 1 Tialima nosali te usu ni tolalubo bidigo ena u not badu odasa pali. Tama da si te genuai sisinibo pesageba saboligi pelama, tama eno u not badu te Godigo be not badu te be me elalubo suali. Te be te Godigo be tudi badu te not badu te genuai be tudi badu pąde elaluali.  
\v 2 Te be sunumi te u not badu gesabidi elaluali. Te be bobobage te 50 mita elaluyu, me agai genuai te 25 mita usu nama elaluali.   
\p
\v 3 Te be tudi te olo tǫ dage te Godigo be bogo badu elaluali, te tǫba dagana sai elaluali. Tama te be gesabidi te genuai sisinibo pesage elalubo, tama ugwaba te bidi bilibo sunumiba ugwaba tonaluali. Tama augwaligo te bede sai sela yai elaluali. Augwaligo namba 2 me namba 3 plua be sai ugwanu tomoba pelama, gana nigai elaluali. Tialima, te bego agabo togobili sela elalubo ąǫ yali.  
\v 4 Tama te bede te bilibo pesage bobobage te namba 3 saide elaluali, te olo tǫ dage pąde. Te bilibo pesage ugwanu dedawali da, te 5 mita usu nama elaluali. Tama te bilibo pesage me te be bagulama pelama, tama u badu te not badu sunumi dabeba saboligi pai elaluali. Tama te bilibo sunumi te 50 sentimita usu nama elaluali.  
\v 5 Te namba 3 be sai te namba 1 wan me namba 2 be sai magi magi genuai usu nama tiwai si menio. Magi baso meni. Augwaligo namba 3 plua sai ugwanu mu nigai dao.  
\v 6 Augwaligo te be sai dabe augwaligo pos saide ugwadu nigai menio. Te meba sisinibo pesagede be dabe tiwai menio. Menio. Te badu tǫ te dwasianu bulu du tiwai dao, tama tialima augwaligo te be sai dabe te tǫde nidigili pai dao. Tama tialigo te namba 2 me namba 3 sai ugwanu mu gana pai elaluali.   
\p
\v 7-8 Te namba 1 be sai usu sali bobobage te 25 mita tama naga usu nama elaluali. Tiali goli, meba be sai dabe te 50 mita usu nama elaluali. Tama augwaligo namba 1 wan be saide augwaligo be daga deli yai elaluali. Te daga bobobage te 25 mita usu nama dao, te namba 1 be sai tiwai mu dao.  
\v 9-10 Te obo tomode bilabo sunumi elaluyu, me te namba wan be saide me tiwai si elaluali, te bilabo pesage. Tialima, bidi te be tomoba painogo da, teda te bidi agai giliga asobo badu aselama, tama aga te bilibo sunumidu aselama, tama te be tomoba pomainao.  
\p Tama u saut badu te Godigo be elalubo pąde te be me deli elaluali. Tama aga me te genuai be Godigo be tudi badu elalubo be pąde elaluali.  
\v 11 Te saut badu te be gesabidi badu te bilibo pesage me deli elaluali. Tama te da te not badu elalubo te bilibo pesage tiwai dao. Tama te be si dąį deli tiwai si tama dao, tama te be sunumi me tigidali nai dabe deli tiwai si naga dao.  
\v 12 Tialima, bidi u saut badu elalubo beba painogo yali da, teda aga giliga pedalubo badu aselama, tama te bilibo sunumi wali pelama, te be tomoba pao, te not badu elalubo be dali tiwai si tama dao.   
\p
\v 13 Tialima, te usu ni tolalubo bidigo ena dali te po wali, “Te be si te Godigo be mu dao, tama tedali gasagi yai mu dao. Te pris dabe augwali te Genuai Bidigo beba augwa sę igi pabo dao. Augwali da te be siba pomainao, tama augwaligo te we bidigo Genuai Bidibolo mani te wiegi yai tedali polalubo ofa yali nai tumainao. Te be si te Genuai Bidigo be si mu dao, augwali tedali gasagi yai mu dao. Tama tialima, te pris dabe augwaligo te we bidigo mani tedali polalubo ofa nai dabe te be side muyu emainao. Te da te wit ulubo ofa, me we bidigo sęgę sela sabo ofa, me dwai kolesaga dodolobo ofa yali, te ofa mubo be si dao,” wali.   
\p
\v 14 Tama agai te po me wali, “Te pris dabe augwali Godigo bede sę yali bidi dabe, augwaligo te be side augwaligo gudubo ugwa hasegelebo ugwa te be side hasegeleyu emainao. Te pris sę yabo gudubo ugwa te Genuai Bidigo nai ugwa dabe naga dao. Tama tiyu, augwaligo pris sę ebo ugwa hasegelama, tama augwaligo meba olo ugwa hasegelama, gudumainao. Tama elama, augwali te be si teda solama, genuai sisinibo pesageba pomainao, te da te olo we bidigo pesage dao,” te usu ni tolalubo bidigo te po wali.   
\s1 Bidigo Godigo be bagulali obo usu nigo usu sali  
\p
\v 15 Te bidigo Godigo tempel be dali, me te genuai obo tomode elaluali te nai dabe sese tama usu nigo usu sali. Tama agai ena te giliga asobo badu te genuai obo sunumi badu odasa pelama, tama te genuai obo usu nigo usu sigi pali.  
\v 16 Agai te usu ni selama, tama agai te badu te obo usu nigo usu sali, te giliga asobo badu. Tama agai usu sali te 250 mita usu nama elaluali.  
\v 17-19 Tama nosali agai not badu obo usu nigo usu siyu, me saut badu, me giliga dega sabo badu obo usu nigo usu siyu yali. Tama augwali deli deligo dąį te 250 mita usu nama naga elalua pali.  
\v 20 Te Genuai Bidigo tempel be bagulali obo te me si me si bogo badu elaluali. Tama te dąį tigidali bogo badu te deli tiwai si naga yali, te 250 mita usu nama naga yai yali. Te genuai obo te Genuai Bidigo tedali gasagi yai nai dabe dali, te olo nai dabe dali si tomode dąį elalubo obo dao. Te Godigo tedali gasagi yai nai dabe te obo tomode elaluyu, tama te olo nai dabe bulu badu elaluyu elaluali.   
\c 43  
\s1 Genuai Bidi aga beba ma asali  
\p
\v 1 Te haniani nai usu sali bidigo ena te giliga asobo badu obo sunumiba odasa pali.  
\v 2 Tama eno Israel dabego Godigo moni ula elalubo suali. Tama te ula te giliga asobo badu asobo suali. Tama te ula pedalobo si da, eno agai po wabo dogoni te genuai tamu ąį kulukulu wabo tiwai tama eno odali. Tama Godigo ulago tǫ ula genuai mu yali. \x * \xo 43:2 \xt Ese 10:3-4, 18-19; 11:22-23\x*  
\v 3 Tama te sę yali eno nade megi ebo eno subo ąǫ yali. Te da te eno polobadu suali te na yali te na tiwai mu ma yali, te aga te Jerusalem dolainu asali sogo, tama te eno te Babilon bulu ąį Kebarde polobadu suali na tiwai ma suali. Eno te ula sulama, tama eno bogoli sugunama, tama eno gesabidi tǫba pogulama elaluali.  
\v 4 Tama Genuai Bidigo te ula te giliga asobo badu te sunumiba dula pelama, tama Genuai Bidi Godigo be tomoba dula pali.   
\p
\v 5 Tialima, Genuai Bidigo Mobo Bidigo ena ugwa daboa selama, tama ena odasa, te dwasianu sisinibo pesage Godigo be gesabidi badu te sisinibo pesageba odasa pali. Tama eno Genuai Bidigo boma pai ulago te be pągąna pai suali.  
\v 6 Tama te bidi ena pagede me dolalubadi, eno po me te Godigo be tomode po wabo odali.  
\v 7-8 Te da te Genuai Bidigo pedauwalidu po wali. Tama agai enabolo e tama po walali “Tǫde bidio, eno sia king te be tomode te elalubao. Tama te pesage da, te we bidi augwali aselama, enaba lotu wagasabo madi dao. Ena tigidali sogo ede bidada paibao, te ena we bidi Israel dabe tomode. Tama nosali Israel dabe, me augwa king dabe, augwaligo nosali eno wiegi yai nogi aiyaba munu ma me elalugobeo. Polobadu te we bidi dali, te king bidi dabe dali, augwaligo ena tagalama, te tibo god dabeba lotu po odu geai dao, we bidigo dwai penane sę ebo tiwai yali. Tiali goli, megi da, te augwaligo te tibo godiba lotu po te ugwanu elalubo madide me weyu egobeo. Tama te king dabe augwaligo eno tempel be pąde mu augwaligo be me ma sę yagasiyu me egobeo. Polobadu augwaligo be te tama elaluai dao, tama te king dabe augwali augwa bede isibo sogo augwaligo eno be meda iliyu yai dao. Tama me augwaligo dwai damua pai kolesaga eyu, augwaligo eno nogi aiyaba elaluyu yai dao. Tama tibaso, eno augwali dali sębę elama, tama augwali dolai dao.  
\v 9 Megi da, te Israel dabe augwaligo tibo godiba lotu me wabo tagalao. Tama augwaligo augwa king eno be pąde isimainu sula tagalamo dao. Tialima, augwaligo eno po wali peyu da, teda ena augwali dali tigidali sogo mu bidaibao,” te po wali.   
\p
\v 10 Genuai Bidigo ena dali po genina ma weyu, e tama po wali, “Tǫde bidio. Nago Israel dabebolo po weyu, ‘Godigo tempel be e tiwai elalubo eno suali,’ te po olama, tama nago te tigidali suali naide po pusao. Tama augwaligo te be te tiwai elalubo bugagia konemainu eyu, tama augwaligo augwa yali dwai kolesagade hale dwai mu emainu yao.  
\v 11 Augwali hale eyu da, teda nago augwalibolo eno bede tigidali be habude, me te doado bage dabede po augwalibolo wao. Augwalibolo tigidali te nai dabe magi po weyu, me te sunumi dabe muabo pesage ola mayu, me te be sę ebo kolesaga sese ola mayu yao. Tama augwalibolo te be tomode sę yabo bomai po dabe ola mao. Augwaligo te be te nago suali tiwai dolo mu sę yainogo eyu, me augwaligo te bede elalubo bomai po dabe bugagia wali pomainu eyu, nago te po sese te bukude asęnama, augwali mao.”   
\p
\v 12 “Eno bego bomai po da e dao. Te be da, te aga pesage te bulu dude tama elalueibao. Tama te be mesalo bagulama elalubo te tǫ te eno tǫ mu elaluaibao, tedali gasagi yai mu elaluaibao. Te eno bego hage yai bomai po dao,” wali.   
\s1 Te alta sai usu sai  
\p
\v 13 Genuai Bidigo po genina ma weyu, te po wali, “Te alta dabego dąį dabe da, te e tama dao. Te wę gamiago e alta bagulai elaluali. Te wę gamia aiyanu dulali te 50 sentimita usu nama dao. Tama aga genuai yali me te 50 sentimita usu nama tama dao. Te wę gamia te dwasianu obogo bogo badu bagulai elaluali. Te obo ugwaba bobobage te 25 sentimita usu nama dao. Te alta dabe nigibo magi te ugwaba mu holai dao. Augwali te e tama tiwai dao.  
\v 14-15 Altago bugai sela elalubao. Te aiya badu bugai badu te wan mita usu nama tama dao. Tama tomode te dąį ugwaba holobo te dąį te 2 mita usu nama dao. Tama dage ugwa badu te ofa ebo nai dabe ulabo alta sai dao. Te ugwanu holali te 2 mita usu nama dao.”  
\p “Te tomo tigi genuai me bobobage yali, te aiyadu bobobage me genuai tiwai si menio. Magi baso meni. Tomo tigi te tomoba te 50 sentimita usu tomoba ugwa pai dao, te aga tigidali bogo badu. Tama ugwa badu tigi te uganu mu genina 50 sentimita usu nama mu pai dao. Te tigidali bogo badu usu nama, tama te alta ugwadu saide te me si me si dage badu da, te kau kibu gąų tiwai nai te dolalubao.  
\v 16 Te alta ugwadu daide te genuai yali me, bobobage yali me, te deli tiwai dąį naga yali, te 6 mita usu.  
\v 17 Tama te alta tomode te genuai yali me, bobobage yali me, te deli dąį usu nama naga dao, te 7 mita usu. Tama te alta tomo tigi bogo badu te dwasianu obo dolaluali. Te obo ugwaba bobobage te 25 sentimita usu nama dao. Te obo te alta tomo tigide te bagulali te ąį gamia bogo badu elalubao. Tama te gamia te genuai te 50 sentimita usu nama dao. Tama te giliga asobo badu te alta daiba ugwa holobo te togobili me deli elalubao,” wali. \x * \xo 43:17 \xt Sai 27:1-2; 2 Sto 4:1\x*   
\s1 Augwaligo alta te Godigo nai dao olama, sa muani  
\p
\v 18 Genuai Bidigo enabolo e tama po wali, “Tǫde bidi, nago ena God Genuai Bidigo po odao. Augwaligo te alta nigibo sę silibo si da, tama augwaligo tede te sese delabo ofa yainu, tama te hasa kaneme dabe te daiba sąbo si da, teda nago e tama bomai po wali pao.  
\v 19 Nago kau kibu omai me deli selama, tama Sadok hani pris dabebolo mao. Ena God Genuai Bidi eno te po obao. Te Livai hani bidi dabego naga augwali deli naga ena pageba aselama, tama augwali eno sę emainao. Tialima, te pris dabe augwaligo naga te kau kibu elama, tama augwaligo naga te sęgę sela sąbo ofa uluyu emainao.  
\v 20 Tama nago te kau kibugo kaneme meba selama, tama te altago gąų me si me side munama, tama me alta me si me si dage badu tomode, me te dwasianu obo te alta tomode bagulali tede mubadi yao. Tama nago te ebo kolesagago te altago meda sela sąyu, tama te alta eno gedude wiegi yai pedalaibao.  
\v 21 Tama nago te kau kibu tigi mi selama, tama nago augwaligo te sa muani te pesagede ulao, te eno tempel be bulu badu elalubo, te pesage.  
\v 22 Tama pilama, nosali te si wabo sogo da, te sogo da, teda nago meme kibu omai kenigo agai tigi me dolisąwai selama, tama sęgę sela sąbo ofa yao. Tama nago te meme kibugo kaneme selama, tama nago kau kibu kanemego yali te kolesaga tiwai ma yao, te alta meda sela somainu yao.  
\v 23 Nago te sę polo elama da, teda nago gesi kau kibu omai me deli, me sipsip kibu omai me deli te kenigo augwaligo tigi me dolisąma yai selama,  
\v 24 tama nago augwali si ena pageba sesao. Tama te pris dabe augwaligo tamu te ela muani kibu si tigi miba nogogo telala pelama, tama augwaligo isigo mu dela silibo ofa ulumainao.  
\v 25 Tama te sogo gagalama, te dei namba 7 wabo sogoba usu nama, nago te meme omai me deli sesao, te sęgę sela sąyabo ofa tiwai. Tama me kau kibu omai, me sipsip kibu omai deli me te isigo mu dela silabo ofa tiwai sesao. Nago wiegi yai hasa dabe naga sesao, te keni dabego augwaligo tigi dabe me dolisąma yai dabe sesao.  
\v 26 Te a naga olama si sogo te pris dabego te tobage ofa idubadi geaibao, te alta meda sela sąyu, te eno gedude wiegi yai pedalobo siba usu naibao. Tialima, augwaligo te ebo kolesagago te alta te eno mu dao olama, augwaligo sa muaibao.  
\v 27 Tama te Sarere silibo si da, teda te alta aga sę yabo polo kegalubao. Tama te dei namba 8de te pris dabe augwaligo dage Israel dabego ofa ebo gagalomainao. Augwaligo te isigo mu dela silibo ofa eyu, me ena dali haliga deli ebo ofa eyu emainao. Tama augwaligo te tama tibode da, teda eno dage dali wiegi yai haliga yaibao. Ena God Genuai Bidi, eno po polo wali dao,” te po wali. \x * \xo 43:27 \xt Sai 29:35-37\x*   
\c 44  
\s1 Giliga asobo badu sunumi palialuaibao  
\p
\v 1 Tama te bidigo ena te lotu be tempelgo te giliga asobo badu genuai sunumiba ma odasa pali. Tama eno sunumi paliai elalubo suali.  
\v 2 Tama Genuai Bidigo ena dali e tama po wali, “Te sunumi palialuama, tama bidigo dabo usu me egobeo. Tama bidi me deli te sunumidu tula asobo usu me egobeo. Magi baso meni. Ena God Genuai Bidi, dage Israel dabego Genuai Bidi, te sunumidu tula asai sunumi dao. Tialima, te sunumi tigidali sogo me palialuaibao.  
\v 3 Tama king deli digi agaduba naga te be sunumi elalubo dolo naga asomainao. Tama aga eno gedude te ofa nai tumainao. Tama aga te sunumidu tula aselama, tama aga te be sunumidu buluba ma tula pomainao,” wali.   
\s1 Godigo we bidi naga aga te be tomoba tula pomainao  
\p
\v 4 Tialima, te bidigo ena odasa, te not badu te obo badu sunumidu odasa pelama, tama te Godigo be gesabidi badu doligi pali. Tama eno Genuai Bidi Godigo ulago te aga be pągąna sai suali. Tama tibaso, eno bogoli sugunama, tama eno gesabidi tǫba elama basi giluali.  
\v 5 Tama Genuai Bidigo enabolo e tama po walali, “Tǫde bidio, nago eno nagebolo ola mawainu ebo te nai dabe bugagia tonaluao. Tama eno nagebolo wainogo ebo te po bugagia odao. Eno nagebolo te eno tempel bego bomai po, me te bego kolesaga po nagebolo pusaibao, eno te bego po dabe. Bidi meba augwali te eno tempel be tomoba pabo te usu yaibao, tiali goli gasa meba eno habu mu selai dao. Tama eno tede po wainu ebao, tama nago te po waboba bugagia olo saganama odao,” wali.   
\p
\v 6 “Nago te hagoma ebo Israel we bidibolo e tama po walao. Ena God Genuai Bidi, eno te po dage Israel dabe dali te elalubao. Dagego te dwai damua pai te kolesaga yali mu tagalao. Dagego te dwai damua pai kolesaga elama, tama dagego e dwai kolesaga me yali dao,  
\v 7 dagego te gasa meba kantri bidi hani dabe eno be tomoba asomainu sula tagalai dao. Te dagego te kibu ili me kaneme ofa eyu, te eno nai mu dao olama, ulubo sogo tama tiai dao. Te Israel hani isąwai bulu badu bage, augwaligo augwa tigi hale ebo nai togisąwai bidi dabe dao. Tama augwaligo ena homugo me konebo menio. Augwali eno be tomoba aselama, tama augwaligo eno gedude te be meda ilai dao. Dagego te dwai damua pai kolesaga tama yaligo dao, teda dagego eno dąų walali po hųgia sąwai dao.  
\v 8 Tama elama, dagego duga digi eno bede sę yai menio. Menio. Dagego te Israel hani isąwai bulu badu bidi dabego dagego sę emainogo sula tagalai dao,” wali.   
\p
\v 9 “Ena God Genuai Bidi eno te po obao. Te gasa meba kantri bidi dabe augwali te augwa hale ebo nai wali togisąwai bulu badu bage dao. Tama augwaligo enaba homu dąų me wabo bage menio. Te bage augwali eno tedali gasagi yai beba me tula pelamo dao. Augwali Israel dabe tomode bidai me tagalao. Augwali te be tomoba me pogobeo,” wali.   
\s1 Te Livai dabe augwali pris sę igio  
\p
\v 10-14 Genuai Bidigo enabolo e tama po walali, “Te Israel dabe augwaligo ena tudi ola mani sogo te Livai dabe augwaligo ena tagalama, tama augwaligo tibo god dabeba lotu po wai dao. Tama augwaligo te we bidi te tibo god dabeba lotu omainu tau sai dao. Tama te kolesagago te we bidigo homu hogodolama, tama augwali dwai kolesaga yai dao. Tama tialima, ena God Genuai Bidi eno mu po mu e obao, eno te Livai dabe dene mawaibao, augwaligo te dene dali sęgę dali tolaibao. Megi eno te Livai dabe augwali pris sę emainu me sula tagalogobeo. Augwali ena pageba me, ma eno tedali gasagi yai nai mu dabe pageba augwali asomainu me sula tagalogobeo. Eno augwali pris sę idali weyu habu selebao. Tama augwaligo augwa damua pai kolesagade hale dwai mu yaibao. Tiali goli, eno augwali eno tempel be sunumi dabe tonalubo sę emainu sa muaibao. Tama me te tempel be tomode meba sę dabe emainu sa muaibao. Tama me augwaligo isigo mu dela silabo ofa yabo hasa dabe eleyu, me te we bidi dabego sesebo ofa ebo nai dabe meba augwaligo eleyu emainao. Tama augwaligo we bidi lotu wabode tau siyu emainao,” te po wali.   
\s1 Pris bidi dabego sę po  
\p
\v 15 “Ena God Genuai Bidi eno e tama po e obao. Te gasa Livai hani bagego te eno pris sę me egobeo. Tiali goli, te Sadok hani Livai dabego naga te pris sę emainao. Te Israel dabe augwaligo ena tudi ola mani sogo, te hani deligo naga eno be tomode sę dolo idu geai dao. Tialima, megi da, te Sadok hani deli naga ena pąba asiyu, me eno sę dabe eyu, me hasa ili dabe me kaneme dabe seselama, tama enaba ofa yagasiyu emainao.  
\v 16 Te Sadok dabe augwali naga ena be tomoba asiyu, me eno tebol pąba asiyu, me eno sę eyu, me eno nai dabe tonalubo sę eyu emainao.  
\v 17 Te pris dabe augwali eno namba 2 obo tomoba eno be bagulali obo tomoba pabo si da, augwaligo te pris ugwa wiegi yai name ugwago nigai ugwa gudumainao. Te augwali te obo tomode bidibo sogo augwaligo te sipsip kibu nisigo nigai ugwa guda magio, te habu selai dao.  
\v 18 Augwaligo trausis, me name ugwa tobolude gudubo gudumainao, te augwaligo wiegi yai name ugwago nigai. Tiali goli, augwaligo kukulu gudamo dao. Tiyu posologo augwaligo tigi dolabuo. \x * \xo 44:18 \xt Sai 28:39-43; Prs 16:4\x*  
\v 19 Tama augwaligo te pesage tagalama, tama augwali genuai we bidi sisinibo pesageba painu da, teda augwaligo eno bede sę yainu, te gudubo ugwa dinama, tama gasa olo ugwa guduyu emainao. Tama augwaligo te ugwa dabe te Tedali Gasagi Yai Be Habu pąde elalubo be habu side dinama mumainao. Magi baso meni, te we bidi augwali te prisgo te ugwa dabe pąba asama, te we bidi tede dene sidali weyu tama tiao,” wali. \x * \xo 44:19 \xt Prs 16:23\x*   
\p
\v 20 “Te pris dabe augwali augwa tobolu nisi togobo sogo augwaligo tobolu nisi sese togwa sąnama, tama augwaligo tobolu wane diliba nigilamo dao. Me ma, augwaligo tobolu nisi bobobage mu holomainao sula tagalamu dao. \x * \xo 44:20 \xt Prs 21:5\x*  
\v 21 Te pris dabe augwali namba 2 obo tomoba painu peyu, augwaligo wain ąį tulamu dao. Te eno tempel be bagulali obo tomoba painu te wain tulamu dao. \x * \xo 44:21 \xt Prs 10:9\x*  
\v 22 Tama me pris bidi dabego te we aga bidigo sela sąwai we selamu dao. Augwaligo te we bidi dali pisąma yai deli naga somainu yao, ma augwaligo te pris bidi me isai bidigo we siyu tama emainao. Tiali goli, augwali gasa olo bidi dabe isai bidigo we me somainu elamuo,” wali. \x * \xo 44:22 \xt Prs 21:7, 13-14\x*   
\p
\v 23 “Te pris dabe augwaligo te we bidibolo mena nai dabe eno gedude te tedali gasagi yai meda meni yai nai mu augwalibolo ola mayu, me mena nai dabe eno gedude te olo da wabo nai dabe augwalibolo ola mayu yao. Tama me augwaligo mena nai eno gedude meda yai augwalibolo ola mao. \x * \xo 44:23 \xt Prs 10:10\x*  
\v 24 Te we bidigo nai me delide wado po weyu ebaso da, teda te we bidi augwaligo po te pris bidi dabe augwali tomode bidiyu eno bomai po wali peyu, augwaligo po osola sumainao. Te pris dabe augwaligo eno bodolu muani genuai sogo dabe augwaligo te bomai po wali peyu emainao. Te eno lotu wabo sogo bodolu muani bugagia wali peyu emainao. Tama me te pris dabe augwaligo Sabatde bugagia koneama, tama te sogo te eno si mu dao olama, sa mumainao,” te po wali.   
\p
\v 25 “Te pris bidi dabe augwali te isai bidi pageba pigio. Tialima, augwali pąba pali da, teda augwali eno gedude meda yai pedelaibao. Tiali goli, augwa deli kaneme bidi me isali da, te aga aya, ma ida, ma wai bǫų, ma ama, ma abe bidigo sisąma yai isibaso da, teda te deli kaneme bidi aga te isai bidi pageba pomainao. Tiali te ebo kolesagago augwali eno gedude meda yai pedelaibao. \x * \xo 44:25 \xt Prs 21:1-4\x*  
\v 26 Tialima nosali augwaligo te wiegi yai ma pedalobo kolesaga wali pelama ma yao. Tama te pris bidi me ma wiegi yai ma pedelai yai baso da, teda aga a naga olama si, 7 sogo bolo ma tonalumainao.  
\v 27 Tama nosali aga te eno be bagulali namba 2 obo tomoba pomainao, te eno Tedali Gasagi Yai Be Habude sę emainu. Tiali goli, agai bolo hasia aga sęgę sela sąyabo ofa bolo deli me emainao. Tama nosali agai eno tempel be tomode sę emainao. Te da God Genuai Bidi eno po dao,” wali.   
\p
\v 28 “Te pris dabe augwali te meba hani dabego yali gilama te kantri Israel tomode tǫ dage me sogobeo. Menio. Ena da, te augwaligo wiegi yai nai dabe augwaligo tigidali sogo tolaluainu sabo nai dabe tiwai dao. \x * \xo 44:28 \xt Nam 18:20\x*  
\v 29 Te pris dabe augwaligo te we bidigo mabo wit ulubo ofa tuyu, me sęgę sela sąwainu ulubo ofa me tuyu, me dwai kolesaga geda muani dodolobo ofa tuyu emainao. Tama augwaligo te we bidigo eno nai mu dao olama, sa muani te nai dabe me tuyu emainao.  
\v 30 Te we bidigo te gide hasia inayali nai dabe te pris dabebolo magasomainao. Me te pris dabego meba tedali gasagi yai nai dabe te we bidigo ena magasabo, te nai dabe me augwali tumainao. Tama te we bidigo bret ulubo sogo da, augwaligo hasia ulali te bret selama, tama te pris dabebolo te ofa tiwai momainao. Tialima, te we bidi augwaligo te tama tiali da, teda eno augwaligo be me we wai dabe dali wiegi yai sę eyu yaibao,” wali. \x * \xo 44:30 \xt Nam 18:8-19\x*   
\p
\v 31 “Tiali goli, te ba o hasa dabe me olodali isiyu, ma te bulu hasago me ela muai baso me, te pris dabe augwaligo te ba o hasa dabego mi tulamu dao,” Genuai Bidigo te po wai. \x * \xo 44:31 \xt Prs 22:8\x*   
\c 45  
\s1 Te Israel dabe augwaligo Genuai Bidigo tǫ pedai me deli sa mumainao  
\p
\v 1 Genuai Bidigo po ena dali genina ma weyu, e tama po wali. “Te dage kantri Israelba ma peyu, tama deli deli haniba tǫ dobabo sogo da, teda dagego ena Genuai Bidibolo tǫ genuai pedai me dąį ilao. Te tǫ bobobage te 12 kilomita usu nama, me genuai yali te 10 kilomita usu nama dąį ilao. Tama te tǫ pedai te eno tedali gasagi yai tǫ dao.  
\v 2 Tama dagego eno te tǫ tomode deli me dąį yao, te eno tempel be tede sę yabo digi. Te tǫ me si me si bogo badu te deli tiwai usu naga emainao, te 250 mita usu nama. Tama dagego te tempel be sę yabo pedai tǫ bagulali tǫ me dąį ilao. Tama agai genuai te 25 mita usu nama magi yao. Tama te namba 2 tǫ pedai te olo tǫ elaluaibao.  
\v 3-5 Tialima, dagego eno pedai genuai si pedao, tama te si te deli usu tiwai si naga emainao. Tama te tǫ bobobage si te deli deli te 12 kilomita usu nama, me genuai yali te si te 5 kilomita usu nama dąį emainao. Te tǫ pedai te me te pris dabego tǫ dao. Te ena be elalubo pesage te tǫ dao. Te pris dabe augwali ena pąba asobo dao, augwali eno be tomode sę yainogo, augwaligo augwa be te tǫde sę emainao, te eno augwali dąį ilali te eno tǫde. Tama te tǫ pedai te ena obode dao. Te da te ena tǫ mu dao. Tama te tǫ te tedali gasagi yai mu dao. Tama eno tǫgo namba 2 pedai te eno Livai dabego tǫ dąį ilibao. Te Livai dabe augwaligo eno tempel bede sę meba ebo dao. Tama augwaligo augwa taun tede nigimainao, te tǫ pedaide,” wali.   
\p
\v 6 “Dagego pris dabego tǫ bogo badu gasa tǫ me ma dąį ilao. Te tǫ bobobage te 12 kilomita usu nama dąį iliyu, me agai genuai te 2 olama, hap kilomita usu siyu yao. Te tǫ da, te tigidali Israel we bidi dabego tǫ dao. Te augwaligo genuai taun te tǫde nigimainao,” Genuai Bidigo te po wali.   
\s1 Godigo kingo tǫ sa muani  
\p
\v 7 Genuai Bidigo po genina ma weyu, e tama po wali, “Dagego kingo tǫ pedai si dąį iliąo. Te hasia wabo tǫ pedai te giliga asobo badu elaluaibao. Te eno tǫ me dagego genuai taun bogo badu tǫ bogode tama pelama, te giliga asobo badu tama usu nigi paibao, te kantri sabi simanigi paliba usu nigi paibao. Tama si wabo pedai te giliga dega sabo badu elaluaibao. Te eno tǫ me genuai taun pedai bogo badu, tama te kingo tǫ pedai sigo te kantri mesegela saibao. Te giliga asobo badu gagalama, tama te giliga dega sabo kantriba tama usu nigi paibao. Te tǫ pedai te deli deli Israel hani dabego augwa we bidi dobabo tǫ pedai dao.  
\v 8 King aga tǫ tali elaluaibao, tama agai te we bidi dali dwai sę me egobeo, te king dabe augwalibolo eno polobadu mani king dabego yali gilama, tama agai Israel dabego tǫ sidali weyu,” wali.   
\p
\v 9 “Ena God Genuai Bidi eno te tama po wali. Dage Israel dabego tobolu bidi dabego dwai kolesaga tagaliąo. Dagego we bidi dabe dali bomonama dwai sę elama, tama dagego augwali aiyaba elaluai dao. Tama tialima, dagego te dwai kolesaga dabe tagalama, tama dagego doloba pai kolesaga naga dolo iyąo. Tama dagego eno we bidi augwa tǫde sela sąbo kolesaga tagalao. Ena God Genuai Bidi, eno te tama po wali dao,” wali.   
\s1 Te Israel dabe augwaligo tigidali nai dolo dobola somainao  
\p
\v 10 Genuai Bidigo po genina ma weyu, e tama po wali, “Dage Israel dabego tigidali nai dabe dolo tiwai si naga dobola siąo. \x * \xo 45:10 \xt Prs 19:36\x*  
\v 11 Efa te wa pai nai dabe skel ebo nai dao, tama bat te ąį dabe skel ebo nai dao. Tama te efa me bat si te deli tiwai usu si naga elaluyu emainao. Tialima, nogo si efa te homa nogi wabo usu sabo nai me deli usu nama dao. Tama te nogo si bat te homa ma kor usu nama dao. Homa te tigidali haniani nai dabe skel ebo nai dao.  
\v 12 Te nai nai dabego sęgę skel ebo skel da, e tama da. Te 20 gera te skel deli usu nama dao. Me te 60 sekel te mina deli usu nama dao,” wali.   
\p
\v 13 “Te dagego te nai dabe enabolo ofa tiwai sesebo sogo da, dagego te tama nai dabe skel eyu yao. Dagego tigidali 60 kilo wit me bali bugwai deli ofa eyu yao.  
\v 14 Tama me dagego 100 lita ni oliv du wel bugwai deli ofa eyu yao.  
\v 15 Tama me dagego te tigidali 200 sipsip kibugo dagego wę hauwa elalubo tǫde nosai tubo te sipsip bugwai, me deli dagego ofa eyu yao. Dagego te nai dabe te wit ulubo ofa yainu, me isigo mu dela silabo ofa yabo nai, me ena dali haliga deli yabo ofa yabo nai tama seseyu yao. Dagego te ofa eyu da, teda eno dage Israel dabe sesego sęgę sela sąwaibao. Te da God Genuai Bidi eno po dao,” wali.   
\p
\v 16 “Tigidali we bidigo te ofa yabo nai dabe tigidali tama Israel dabego king pageba sesiąo.  
\v 17 Tama kingo te sesali naigo te isigo sese dela silibo ofa mayu, me wit ulubo ofa mayu, me wain gelebo ofa mayu yao. Kingo te ofa dabe te genuai sogo dabe, te gesi polua nanibo sogo, me Sabat side, me gasa meba genuai bodolu muani sogo eno Israel dabe augwalibolo mani, te si pedalobaso augwaligo te ofa yabo nai dabe seseyu yao. Tama me, agai Israel we bidigo sęgę sela sąyabo ofa me mayu emainao. Te da te sęgę sela sąbo ofa dabe, me wit ulubo ofa dabe, me isigo sese dela silibo ofa, me ena dali deli haliga ebo ofa mayu yao,” te po wali.   
\s1 Te lotu po wabo genuai sogo  
\p
\v 18 “Ena God Genuai Bidi, eno e tama po obao, te hasia wabo dei te hasia wabo poluade nago te gesi kau kibu omai agai tigi kenigo me dolisąma yai selama, ofa yagasao. Te ofa ebo te eno tempel be te eno gedude wiegi yai pedelemainu yaibao.  
\v 19 Tama pris bidigo te sęgę sela sąbo te ofa ebo te kau kibu kaneme selama, tama eno tempel be ni posde pilaibao. Te eno be sunumi si badu elalubo pos nide, me te alta me si me si te dage badu piliyu, me te eno be bagulali te si wabo obo sunumi te pos ni dabede piliyu tama yao.  
\v 20 Tama nago deli tiwai kolesaga naga te hasia wabo poluago te 7 wabo deide nago te tiwai kolesaga naga yao. Tialima, bidi mebago augwa kolesaga bugagia homu kone palisąma, tama augwaligo sęgę saibaso da, ma augwaligo augwa sęgę sali konesiąwai baso da, teda te augwaligo te kolesagago eno be meda ilibo dao. Tama te ofago eno be wiegi yai ma pedelaibao,” wali.   
\p
\v 21 “Te hasia wabo poluago 14 deide da, dagego Godigo Israel Dabe Augwali Olo Bugagia Bidimainu Sula Tagalali Sogo dąį ilao, te Pasova bodolu muani sogo dao. Tama a naga olama, si sogo bididubadi, dagego te yis musiąwai bret tuiąo. \x * \xo 45:21 \xt Sai 12:1-20; Nam 28:16-25\x*  
\v 22 Te genuai sogo dabego hasia wabo deide da, dagego kingo te kau kibu omai me deli te pris dabebolo menama, tama te kingo me te tigidali we bidigo sęgę sela sąbo ofa emainao.  
\v 23 Tama te Yis Meni Yai Bret tubo sogo da, te Sarere me deli dao, te kingo ena Genuai Bidibolo agai a naga olama, si kau kibu omai, me a naga olama, si sipsip kibu omai mayu emainao, te isigo sese dela silibo ofa tiwai dao. Agai wiegi yai hasa dabe naga somainao. Te hasa dabe augwaligo tigiwali te kenigo me dolisąma yai sao. Tama me tigidali sogo kingo meme kibu omai te sęgę sela sąbo ofa tiwai eyu yao,” te po wai.   
\p
\v 24 “Tama me kingo 14 kilogram wiegi yai plaua, me 3 lita oliv wel te deli deli kau kibu me sipsip kibu dabe dali mayu yao. Tama te pris bidigo te kau kibu o sipsip kibu ofa ebo sogo, agai te plaua me, wel me ofa eyu emainao,” wali.   
\p
\v 25 “Te Osogo Bidabo Bede Bidibo Genuai Sogo te 7 wabo poluago 15 deide gagalama, tama a naga olama, si sogo tama bidaibao. Tama te sogo te king agai te Yis Meni Yai Bret tubo sogo sesebo ofa tiwai mu sesemainao. Te tigidali sogo agai deli namba tiwai kau kibu me sipsip kibu ofa yabo sesemainao, te isigo sese dela silabo ofa, me te sęgę sela sąyabo meme kibu deli. Tama agai deli tiwai skel yai witgo nigai plaua me, oliv wel me sesao, te ofa yabo,” God Genuai Bidigo te po wali. \x * \xo 45:25 \xt Prs 23:33-36; Nam 29:12-38\x*   
\c 46  
\s1 Godigo kingo yabo ofa po wali  
\p
\v 1 “Ena God Genuai Bidi eno te po obao. Te tigidali wikde te giliga asobo badu te namba 2 obo sunumi te a naga olama, deli, te 6 tama sogo te sę ebo sogo te be sunumi palialumainao. Tiali goli, augwali te sunumi te Sabat side, me gesi poluago genuai sogo naga dayu emainao.  
\v 2 Tialima, te lotu po wabo sogo te king aga eno obo tomoba tula asomainao. Tama king aga genuai sisinibo pesage tagalama, tama aga te giliga asobo badu te si wabo obo sunumi tomoba pomainao. Tama aga sunumi pąde dolaluyu, tama agai altaba ugwaba tonomainao. Tama te pris dabe augwaligo kingo sesali te nai dabe ofa emainao. Te da te isigo sese dela silabo ofa, me homu ena dali deliba yabo ofa dabe dao. Tama king aga bogoli sugunama, tama agai mage basi giluama, tama enaba lotu po omainao. Tama nosali agai te pesage tagalama, tama genuai sisinibo pesageba pomainao. Tiali goli, te pris dabe augwaligo te sunumi dalalubadi, be pioba usu nigi pomainao, tama piode ma paliao.  
\v 3 Tama te lotu wabo genuai sogo dabe te we bidi augwali te bede sisinibo pesage genuai te si wabo obo bulu badu sisalumainao, te eno gesabidide. Tama augwali bogoli sugunama, enaba lotu omainao,” wali.   
\p
\v 4 “Te tigidali sogo Sabatde kingo a naga olama, deli, 6 sipsip kibu wai, me sipsip kibu omai te isigo mu dela silabo ofa eyu emainao. Agai te sipsip kibu dabe te augwaligo tigiwali kenigo me dolisąma yai te wiegi yai kibu naga sao.  
\v 5 Agai te 14 kilogram wiegi yai plaua te sipsip kibu omai dali seseyu emainao. Tama me agai te sipsip kibu gǫų dabe dali aga homugo plaua sesemainao. Tama agai te plaua sesali tiwai skel te oliv wel me sesemainao. Tialima, agai 14 kilogram plaua seseyu da, teda agai 3 lita oliv wel dali sesemainao,” wali.   
\p
\v 6 “Te gesi poluago genuai sogo te king agai te e tama ofa yabo nai dabe naga seseyu emainao. Te kau kibu omai deli, me a naga olama, deli, 6 sipsip kibu gǫų, me sipsip kibu omai deli tama seseyu emainao. Agai te hasa dabe te keni dabego augwaligo tigiwali dabe me dolisąma yai seseyu emainao.  
\v 7 Agai te 14 kilogram wiegi yai plaua te kau kibu omai dali seseyu, me 14 kilogram plaua wiegi yai te sipsip kibu omai dali sesemainao. Tama me agai aga homugo plaua te sipsip kibu gǫų dabe dali sesemainao. Tama agai te sesebo plaua skel usu te oliv wel me agai sesemainao. Skel da e tama dao. Ma, agai 14 kilogram plaua seseyu da, teda agai 3 lita oliv wel seseyu emainao.  
\v 8 Te king agai enaba lotu po wainu da, teda aga te genuai sisinibo pesage tagalama, tama aga te giliga asobo badu be sunumi namba 2 obo badu tomoba pomainao. Tama pelama, te sunumi pąba bidigi pomainao. Tama agai lotu ola silama da, teda aga te asali te sunumidu ma teda solama, tama aga te genuai sisinibo pesageba ma asomainao,” wali.   
\p
\v 9 “Te we bidi augwali ena Genuai Bidiba augwaligo te lotu wabo sogo naga lotu wagasiyu yaibao. Tialima, augwali u not badu genuai obo sunumi badu tomoba asai baso da, teda augwali lotu ola silama, tama augwali u saut badu te genuai obo sunumi badu buluba ma pomainao. Tialima, augwali saut badu obo sunumi badu tomoba aselama, lotu wagasai baso da, teda augwali te not badu te obo sunumidu buluba ma somainao. Augwali augwa te asali sunumidu deli naga augwali ma pelamo, menio. Augwaligo te obo gasa sunumidu taga pao.  
\v 10 King aga eno obo tomoba te we bidi tomoba tula pabo sogo tula peyu emainao. Tama agai te we bidigo te obo taga soabode, agai me taga somainao.  
\v 11 Te lotu po wabo sogo dabe da, te we bidi augwaligo ofa nai mawainogo da, augwaligo 14 kilogram wiegi yai plaua te kau kibu omai deli deli dali mayu, me te sipsip kibu omai deli deli dali te 14 kilogram wiegi yai plaua dali mayu emainao. Tama augwaligo augwa homugo plaua meba selama, tama augwaligo te sipsip kibu gǫų dabe dali sesemainao. Tama augwaligo te sesebo plaua skel usu nama, te oliv wel me tama sesemainao. Te skel da e tama dao. Ma, augwaligo 14 kilogram plaua sesaibaso da, teda augwaligo 3 lita oliv wel seseyu emainao,” wali.   
\p
\v 12 “Tialima, king aga homugo ena Genuai Bidiba ofa yabo nai dabe sesebaso da, te isigo dela silabo ofa, ma ena dali homu deli yabo ofa yabo nai seseyu da, teda te pris bidi dabe augwaligo te giliga asobo badu te si wabo obo sunumi badu sunumi dayao. Tama king aga te pris dabego agai ofa ebode te obo sunumide bidimainao, te agai te Sabat side ebo tiwai tama yao. Agai lotu ola silibo si da, aga te be taga solama, tama te pris dabe augwaligo te sunumi ma palimainao,” wali.   
\s1 Godigo tigidali bubuga side ofa dabe po wali  
\p
\v 13 Genuai Bidigo po genina ma weyu, e tama po wali, “Tigidali sogo kigamu dagego sipsip kibu gǫų deli agai tigi kenigo me dolisąma yai, tama agai kibu be deli yai tama seseyu yao. Tama dagego ena Genuai Bidibolo te siago mu dela silibo ofa mayu yao. Dagego te tama tobage ofa tigidali be posobo sogo eyu yao.  
\v 14 Tama me ma dagego tigidali sogo kigamu dagego wit ulubo ofa te siago mu dela silabo ofa dali uluyu yao. Dagego 2 kilogram plaua selama, tama 1 lita oliv wel dali begelao, te wit ulubo ofa yainu. Te tigidali sogo kigamu ofa ebo bomai po te tigidali sogo nosali me ma elalua paibao.  
\v 15 Tigidali sogo kigamu dagego sipsip kibu gǫų, me plaua, me oliv wel seseyu yao, te siago sese dela silabo ofa tiwai tama,” te po wai.   
\s1 King bidigo tǫ po  
\p
\v 16 “Ena God Genuai Bidi, eno e tama po obao. Tialima king aga ogwa me delibolo aga tǫ me togwa mani da, teda te tǫ te wai aga tǫ elaluyu, tama aga hani we wai tǫ nosali me elaluaibao.  
\v 17 Tiali goli, kingo agai tǫ meba aga sę bidibolo me mani da, teda te tǫ kibu be 50 wabode te tǫ king aga tǫ ma gagawaibao. Te kibu be da, te nai dabe ma wei ponobo kibu be dao. Te tǫ te king aga wai puluba dali augwa tǫ dao. Te king aga hani mu augwali te tǫ aya mu dao. \x * \xo 46:17 \xt Prs 25:10\x*  
\v 18 Tama me ma king agai te we bidigo tǫ wi me selamu dao. Tialima, agai aga wai puluba bolo tǫ pedai me mawainu da, te agai aga tǫ pedai mu naga momainao. Tama tiyu da, eno we bidi augwa tǫ elaluyu, tama augwali tǫ sǫą pai me elalugobeo,” God Genuai Bidigo te po wai.   
\s1 Esekiel agai ofa ulubo pesage dabe suali  
\p
\v 19 Te bidi agai ena odasa, te pris dabego be gesabidi badu bilibo sunumiba odasa pali, te Godigo tempel be not badu. Tama te bilibo pesage te pelama, te tǫ dage me te giliga dega sabo badu elalubo suali.  
\v 20 Te bidigo enabolo e tama tiwai po walali, “Te da, te pris dabe aselama, tama te kibu mi senede uluyu yabo digi dao, te sęgę sela sąyu, me dwai kolesaga dodolabo ofa nai uluyu yabo pesage dao. Tama augwaligo wit ulubo plaua ofa siyu elama, tama augwaligo tede ulaibao. Te pris dabe augwaligo te ofa te genuai sisinibo pesageba sela pigio. Tiyu, augwaligo te ofa maiabo naigo te we bidi dolidali weyu,” wali.   
\p
\v 21 Tialima, te bidigo ena te tempel be bulu badu elalubo te bidi sisinibo pesage genuaiba odasa pali. Tama dadi si te sisinibo pesage me si me si dage badu odasa pali. Tama eno te dage badu deli deli badu te tǫ dage elalubo suali.  
\v 22 Tama te tǫ dage te deli tiwai usu ni naga elaluali, te bobobage te 20 mita usu nama, me genuai yali te 15 mita usu nama dao.  
\v 23 Tama te tǫ me si me si deli delide te masigigo nigai sai bagulai elaluali. Tama te sai dologode te sia nogobo pesage dabe elaluali.  
\v 24 Tialima, te bidigo enabolo e tama tiwai po walali, “Te Godigo tempel bede sę ebo bidi dabe augwali te kibu mi ulubo te pesage dabeba te we bidigo ofa yabo nai sesebo teba ulugi pomainao,” wali.   
\c 47  
\s1 Węgo Godigo be tagalama pali  
\p
\v 1 Tialima, te bidigo ena Godigo tempel be polalubo sunumiba ma odasa asali. Tama eno te ąį te sunumi dologodu pedelama, tama giliga asoboba geasa pabo suali. Magi baso meni. Godigo be giliga pedaloboba gesabidi tonalubo suali. Tama te ąį te sunumi saut badu pedelama, tama te ąį te saut badu te alta sesegedu peyu, te alta edelebo suali. \x * \xo 47:1 \xt Sek 14:8; Jon 7:38; Ped 22:1\x*  
\v 2 Tialima, te bidigo ena te u badu not badu elalubo sunumi elaluboba da si pali. Tama da si Godigo be bagulali genuai obo bulu badu pali. Da si biligi pelama, tama da si giliga asobo badu sunumiba saboligi pali. Tama eno te ąį te saut badu te sunumi dologode pedelama, tama pabo suali.  
\v 3 Tama te bidigo aga usu sabo haliga bono selama, tama te ąį wali peyu, usu sesa pelama, te 500 mita usu nigi pali. Tama agai enabolo ąį nogeao po wali. Tialima, eno ąį nogelama, tama te ąį ugwanu eno sągą aiyadu sągą sawali bogoli dąį yali.  
\v 4 Tialima, agai te ąį wali 500 mita ma pali, tama agai enabolo te ąį ma nogeao po wali. Tialima, eno te ąį nogeali. Tama te ąį gebo delama, tama eno bogoli ugwadu dąį igiluali, te ena sągąde. Tama agai te ąį 500 mita ma pali. Tama te ąį tede eno tigi tomoba ugwa holama, tomo dąį yali.  
\v 5 Tama agai te węį dulu ma dulama, tama 500 mita ma pali. Tama te wę gebo dąį elalubaso, tama ena nogeabo usu meni yani. Te pesagedu te bidi dabe wę paluama, nogeabo usu elaluali.  
\v 6 Te bidigo enabolo e tama po walali, “Tǫde bidi, nago te sę yali dabe po sula silaliwe?” Agai po ola silibo si, da si te ąį dulu ugwaba ma holali.   
\p
\v 7 Te da si ma geasa pabo sogo eno te ąį u badu me, e badu me, te ni dabe hauwa dolalua pabo suali.  
\v 8 Tama agai enabolo e tama po walali, “Te ąį te giliga asobo badu pelama, tama Jordan ąį odogo malu badu pelama, tama sigi ąį Detsiba dolo pabo dao. Megi da, sigi ąį Detsi tamu hauwa elalubao. Tiali goli, te ąįgo te sigi ąį wiegi yai ma ilaibao.  
\v 9 Tigidali haniani ąį hasa dabe te ąį pabo pesagedu tama bidaibao. Tama te ąįde sųgų hauwa mu bidaibao. Magi baso meni. Te ąįgo sigi ąį Detsigo tamu ąį wiegi yai ilaibao. Tama te ąį pabo pesage tigidali badu da, te tigidali nai dabe holoyu naga yaibao.  
\v 10 Te sųgų sabo sę ebo bidi dabego te sigi ąį Detsi kemi sane badu dolaluyu, sųgų sabo wa te ąįba sąnama, tama sųgų saibao, te bulu Eneklaimdu gagalama, pelama, bulu Engediba usu nigi paibao. Tama augwaligo sųgų sabo sę siliyu, augwa wa dabe ąį kemi sanede muaibao, te wa dabe te kemi sanede omainogo. Te Detsi ąįde elalubo haniani sųgų dabe te Mediterenian tamu ąįde bidibo sųgų tiwai mu bidaibao.  
\v 11 Tiali goli, te sele pu ąį dabego ąį dabe te sigi ąį pąde elalua pabo te ąį dabe wiegi yai me egobeo. Menio. Te pu ąį dabe te tamu sabo ąį tiwai elaluaibao.  
\v 12 Tama te Godigo tempel bedu pedelali ąį bogo si badu te wiegi yai ni du walobo ni holaibo. Te ni yabe dabe te me sasi egobeo. Tama augwaligo gesi noma nai tigidali poluade waliyu yaibao. Magi baso meni. Te ąį te Godigo bedu asobo ąį da, tama te ąį pagede elalubo ni dabe sa weyu, tama tiaibao. Te bidi dabego te ni du tuaibao, tama te ni yabe dabe selama, tama augwa haniani gasi dabe usu iliyu yainu saibao,” te bidigo te po wai.   
\s1 Te kantri Israelgo tǫ dąį dabe  
\p
\v 13-14 God Genuai Bidigo e tama po wali, “Eno dage Israel dabego wąį dabe dali bomai po mu dąų walai dao. Te eno dagebolo te Israel tǫ dagebolo menama, tama te tǫ dagego tǫ tigidali sogo elaluaibao. Dagego te tǫ dage Israel hani nogo si olama, sągą me badu si haniba dobola siąo. Tigidali wąį hanigo te tǫ pedai deli badu siyu yaibao. Tiali goli, Josepgo hanigo da, te tǫ pedai si badu saibao. Te tǫ dąį da, e tama dao,” wali.   
\p
\v 15-16 “Te u not badu te tǫ dąį te genuai tamu ąį Meditereniande gagalama, tama pelama, giliga asobo badu te taun Hetlon usu nigi pelama, tama taun Hamat me taun Sedatba pabo sunumiba usu nigi pelama, tama ma pelama, taun Berota me taun Sibraim usu nigi pabo dao. Te Sibraim te tǫ pedai Damaskus me tǫ pedai Hamat si tomode elalubo dąįde elalubao. Tama dagego tǫ dąį pelama, taun Tikonba usu nigi pali dao. Te taun te distrik Hauran tǫde dąį dao.  
\v 17 Tialima, te kantri Israel tǫ dąį te genuai tamu ąį Mediterenian badu gagalama, pelama, taun Enon usu nigi pali dao. Te not badu tǫ dąį te dąį te saut badu te Damaskus me Hamat tǫ dąįde elalubao,” wali.   
\p
\v 18 “Tama giliga asobo badu tǫ dąį te Damaskus taun me distrik Hauran tǫdu pelama, Jordan ąį dulu pelama, tama saut badu Israel dabego tǫdu me distrik Gileat tǫdu pali dao. Tama pelama, sautba saboligi pelama, te sigi ąį Detsiba usu nigi pali,” wali.   
\p
\v 19 “Tama me te saut badu tǫ dąį te taun Tamardu gagalama, tama giliga degebo badu tama peyu, te ąį elalubo bulu du peyu, te bulu augwaligo Kades Meriba wabo buluba usu nigi pali. Tama obanu gana holama, tama ąį dulu holama, Isip dabego dąįdu pelama, genuai tamu ąį Mediterenianba usu nigi pali dao.”   
\p
\v 20 “Tama giliga dega sabo badu tǫ dąį te not badu pelama, tama genuai tamu ąį Mediterenian kemi sanedu pelama, tama u not badu te dąį gagalali pesageba usu nigi pali,” wali.   
\p
\v 21 “Dagego te dąį dabe tomode elalubo tǫ duga deli deli hani dabeba dobola siąo.  
\v 22 Tama te deli deli hanigo tǫ te augwa wai dabe nosali pedalobo bagego tǫ elaluaibao. Tama dagego tǫ dąį elama, dobayu da, teda dagego gasa hani bidi dabe augwa we dabe dage dali bidiyu, wai ame nani bagego tǫ me dąį elama maiąo. Dagego homugo e tama tiao, te bidi dabe augwali te Israel dabe naga dao olama, tama augwaliba me te tǫ togwa maiąo.  
\v 23 Te deli deli Israel hanigo augwa dali bidibo gasa hani bidi dage dali bidibo bage tǫ togwa maiąo. Te da, God Genuai Bidi eno po dao,” te po wai.   
\c 48  
\s1 Augwaligo te not badu tǫ Israel haniba dobola sali  
\p
\v 1 Genuai Bidigo po genina ma weyu, e tama po wali, “Te kantri Israel tǫ dąį te genuai tamu ąį Mediterenian kemi sane pąde te not badu gagalaibao. Tama giliga asobo badu pelama, taun Hetlonba tama peyu, tama te taun Hamatba pabo sunumi toboluba tama paibao. Tama te dąį pelama, te Damaskus usu nigi peyu, me Hamatba usu nigi peyu yaibao. Tama dąį pelama, taun Enonba usu nigi paibao. Tama Damaskus hanudu peyu, Hamatba usu nigi paibao. Te Dan hanigo te not badu tǫ saibao. Te kantri dąį sabi badu augwaligo tǫ dąį te kantri dąį dagedu tama gagalama, te giliga asobo badu gagalama, pelama. tama a badu giliga dega saboba aselama, tama genuai tamu ąį Mediterenianba usu nigi paibao.  
\v 2-7 Te Aser hanigo te saut badu te Dan hanigo tǫ badu saibao. Te Naptali hanigo te Aser hanigo tǫ saut badu saibao. Te Manase hanigo te Naptali hanigo tǫ saut badu tǫ saibao. Tama te Efraim hanigo te Manase hanigo tǫ saut badu tǫ saibao. Tama te Ruben hanigo te Efraim hanigo tǫ saut badu saibao. Tama me Ruben hanigo tǫ saut badu te Juda hanigo saibao. Te tigidali hanigo tǫ dąį te giliga asobo badu gagalama, pelama, genuai tamu ąį kemi sane Mediterenian nambisba usu nigi peyu yaibao,” Genuai Bidigo te po wali.   
\s1 Godigo genuai tǫ pedai kantri tomode elalubo po wali  
\r (Ese 45:1-8)  
\p
\v 8 Genuai Bidigo po genina ma weyu, e tama po wali, “Te tǫ pedai te Juda hanigo tǫ saut badu elalubo tǫ te gasa sę me elalubao, te tedali gasagi yai tǫ dao. Te tǫ genuai dąį te not badude gagalama, saut badu usu nigi peyu, te 12 olama, hap kilomita usu nama dao. Tama te tǫ te kantri dąįdu gagalali, te giliga asobo badu gagalama, tama pelama, genuai tamu ąį Mediterenian nambis kemi sanedu tama pali dao. Te deli deli Israel hanigo tǫ dąį tiwai tama dao. Tama Genuai Bidi eno tempel be te tǫ pedaide elaluaibao,” wali.   
\p
\v 9-10 “Te tǫ tomode dagego eno tǫ mu deli me dąį iyąo. Te tǫ u not badu me saut badu te bobobage dao. Tama te si dali si badu te deli tiwai dąį naga elalumainao, te 12 kilomita usu nama elalumainao. Tama me badu bogo badu si badu me, te deli dąį tiwai si naga elalumainao, te 5 kilomita usu nama. Te da, te pris dabego tǫ dao. Tama Genuai Bidi eno tempel be te tǫ tomode mu elaluaibao.  
\v 11 Te tǫ tedali gasagi yai mu dao. Tama te tǫ te Sadok hanigo pris bidi dabego tǫ dao. Te Israel dabe augwaligo ena tudi ola mani sogo, polobadu mu, te sogo te Sadok hanigo augwali wali pai menio. Te Livai dabego yali tiwai me yai menio. Menio. Te pris dabe augwaligo ena wali mu pelama, tama augwaligo eno sę mu yai dao.  
\v 12 Tama tibaso, eno ena te tǫ pedai te pris hanibolo te mobao. Te wiegi yai nai presen tiwai te olo mobao. Tama augwaligo te tǫ te tedali gasagi yai mu dao,” wali.   
\p
\v 13 “Te Livai dabe augwali te pris dabego tǫ pedai me badu bogo badu saibao. Te tǫ bobobage dąį te 12 kilomita olama, hap kilomita usu nama, tama te tǫ genuai dedawali te 5 kilomita usu nama dao.  
\v 14 Te tǫ dabe dagego eno tǫ dąį yali te wiegi yai polalubo tǫ mu dao, tama tedali gasagi yai mu dao. Tama tialima, te pris dabe, ma Livai dabe augwaligo te tǫ te gasa hani mebago te tǫ mayu o abelemainu me sula tagalama dao,” wali.  
\p “Tama te pris bidi dabe tǫ bogo me badu dagego tǫ pedai me  
\v 15 dąį iyąo. Te tǫ bobobage te 12 kilomita olama, hap dao. Tama te tǫ genuai te 2 kilomita olama, hap kilomita dao. Te da, te we bidi augwaligo tǫ dao, tama te we bidi augwaligo genuai taun tede nigaibao, te tǫde. Tama augwaligo augwa be te tǫde sę eyu emainao. Tama me badu bugai te olo tǫ elaluaibao.  
\v 16 Te taun me si me si bogo badu te obogo bagulai elaluaibao, tama tigidali bogo badu deli tiwai dąį naga elaluali, te 2,250 mita usu nama elaluaibao.  
\v 17 Tama te taun te olo tǫgo te taun bagua sai elalumainao. Tama te tǫ genuai te 125 mita usu nama elalumainao.  
\v 18-19 Augwaligo augwa taun te we bidigo tǫde nigimainao. Tama tiyu, te taungo te tǫ tomode togwai elaluaibao. Me badu pedai te giliga asobo badu elaluyu, me badu pedai te giliga dega sabo badu elaluaibao. Te tǫ pedai si te taun we bidigo gi tede eyu emainao. Te tǫ pedai si bobobage te deli tiwai si naga dao, te 5 kilomita naga dao. Te tigidali Israel hani we bidi augwali te taunba sę yagasiyu da, augwaligo te tǫde gi eyu emainao,” wali.   
\p
\v 20 “Te we bidigo tǫ, me eno tǫ pedai te pris dabe me Livai dabe augwali bidibo, te tǫ te genuai tǫ tiwai me pedelali. Te tǫ dąį me si me si badu te deli dąį tiwai naga dao, te 12 kilomita olama, hap kilomita usu nama naga dao.  
\v 21-22 Eno tǫ me, te we bidigo tǫ te genuai tǫ tomode te elalubao. Te da eno gasa sę me yainogo dąį yai dao. Tama tǫ me badu pedai badu elaluyu, me badu pedai badu elaluyu, te ebao. Te da, te kingo tǫ dao. Tǫ pedai me deli te giliga asobo badu te elalubao. Te da te eno tǫ dąį bogo badu gagalama, pelama, giliga asobo badu te kantri dąį badu dąį igi pali dao. Tama me badu tǫ pedai te giliga dega sabo badu te elalubao. Te da eno tǫ bogo badu gagalama, pelama, genuai tamu ąį Mediterenian nambis sesegeba tama usu nigi pali. Tama tialima, te we bidigo tǫ, me eno tǫ si te kingo tǫ tomode mu elalubo. Te eno tǫ me badu te eno be elalubo, tama te tǫ me badu bogo te eno Livai dabebolo dąį ilai dao. Tama te we bidigo tǫ te genuai taun te elalubo badu dao. Te Juda dabego tǫ te kingo tǫ not badu te elalubao. Tama Benjamin hanigo tǫ saut badu te elalubao,” te po wai.   
\s1 Augwaligo Israel hanigo tǫ gasa hanibolo doba yali  
\p
\v 23-27 Genuai Bidigo po genina ma weyu, e tama tiwai po wali, “Te Israel hani mebago tǫ e tama dao. Te Benjamin hanigo tǫ te gasagi yai sę elalubo tǫ saut badu saibao. Tama Simeon hanigo tǫ te Benjamin hanigo tǫ saut badu saibao. Tama Isakar hanigo tǫ te Simeon hanigo tǫ saut badu saibao. Tama te Sebulun hanigo tǫ te Isakar hanigo tǫ saut badu saibao. Tama Gat hanigo te Sebulun hanigo tǫ saut badu tǫ saibao. Te tigidali hanigo tǫ dąį te giliga asobo badu gagalama, tama pelama, genuai tamu ąį Mediterenian nambis kemi saneba usu nigi peyu yaibao.  
\v 28 Te Gat hanigo tǫ dage badu te kantri dąį dao, te Gat hanigo tǫ saut badu. Tama te taun Tamardu gagalama, pelama, te giliga dega sabo badu tama peyu, te ąį elalubo odogo bulu augwaligo Kades Meriba wabo buluba usu nigi pali. Tama ugwanu dwasianu holama, tama te ąį dulu te Isip dabego bulu dąįdu pelama, genuai tamu ąį Mediterenianba usu nigi pali.  
\v 29 Dagego ena God Genuai Bidi eno po wali piąo. Te dagego te tǫ Israel hani duga hasi dobola sabo side tama tiao. Te Israel hani deli deli duga hasi dobola sabode tama tiao,” Genuai Bidigo te po wali.   
\s1 Godigo genuai taun dabe sunumi po wali  
\p
\v 30-34 Genuai Bidigo po genina ma weyu, e tama po wali, “Te genuai taun bagulali obo sunumi nogo si olama si sunumi elaluaibao. Te deli deli obo bogo badu te sunumi sela sela elalua paibao. Te deli deli sunumi dabede te Israel hani deli deli wąįgo nogi elalua paibao. Te sunumi nogi Ruben elaluyu, me nogi Juda, me nogi Livai elalubo sunumi sela te not badu elalua paibao. Tama te sunumi nogi Josep, me nogi Benjamin, me nogi Dan elalubo te sunumi sela te giliga asobo badu elaluaibao. Tama me nogi Simeon elalubo sunumi, me nogi Isakar, me nogi Sebulun elalubo sunumi sela te saut badu elaluaibao. Tama me nogi Gat, me nogi Aser, me nogi Naptali elalubo sunumi sela te giliga dega sabo badu elaluaibao. Te obo deli deli badu te obo bobobage te 2,250 mita usu tama elaluaibao. \x * \xo 48:30-34 \xt Ped 21:12-13\x*  
\v 35 Tialima, te taun sese bagua sali obo te bobobage dąį te 9,000 mita usu nama dao. Tigidali sogo augwaligo te taun nogi e tama nogi eyu yaibao, ‘Genuai Bidi ede bidibao,’ te nogi waibao,” Genuai Bidigo te po wai.