\id EXO - Dadibi NT [mps] -Papua New Guinea 2001 (DBL 2014) 
\h Godigo Aga We Bidi Dabe Boi Bidi Nogode Ma Dobola Sali 
\toc1 Godigo Aga We Bidi Dabe Boi Bidi Nogode Ma Dobola Sali 
\toc2 Godigo Aga We Bidi Dabe Boi Bidi Nogode Ma Dobola Sali 
\toc3 Eks 
\mt1 Godigo Aga We Bidi Dabe Boi Bidi Nogode Ma Dobola Sali  
\imt1 Hasia nedebo tau sabo po  
\ip Te e bukude elalubo po da, te Godigo aga hani Israel dali yali sę po da dali pusubo dao. Tama dago te buku Tigidali Nai Gagalama Nigali Side nedeyu da, te nago e bukude po gegebo bugagia koneaibao. Tialima, nago hasia te buku Tigidali Nai Gagalama Nigali Side tede yali sę po te nago homugo koneao. Te buku, agai pęwadage nogi Page Gagalali, tego po page e buku aga pęwadage nogi Ma Dobola Sali, tede asęai dao.  
\ip Te Israel augwali menibadi, Godigo Abraham aga wali asomainogo i wai, tama Godigo Abraham dali bomo yai po dąų wai, tama te Abrahamgo hani nosali pedaliyu, augwali genuai bomo yai hani bidaibao wai. Te buku Page Gagalalide Abraham dali te sęgę me aga usu sela suyu, aga ogwa Aisak, te Jekop aga wąį dali yali po wai. Hauwa sogo te bidi selago Godigo te augwali dali te bomo yai po Abraham dali dąų wali te mu po waliwe ma tibo po waliwe, te homu yai.  
\ip Godigo gasa bomo yai po me Abraham dali wai. Agai te po wai, “Te Kenan tǫ nago wąį dabe nosali pedalobo hani augwalibolo te tǫ mawaiba,” wai. Tama nosali Jekop te tǫba bidigi pelama, tama agai wai hauwa mu ame nai. Tialima, te Page Gagalali buku silabo sogo te Kenan bulude nasi te sogo genuai mu yai. Tibaso, Jekop aga hani ogomani dali te Kenan tǫ tagalama, Isip buluba bidigi pai. Tama augwali te Isip tǫba pesiąbadi, Kenan tǫde bidali, te sogo bidi meba augwaligo Josep te Jekopgo ogwa odasa pelama, Isip tǫba bidigi pai. Josep te Isip bulude genuai bidi bidibadi, te sogo aga aya, me aga ama dede sęgę sobadi, agai augwali bugagia tonaluyu, tama te sęgęgo augwali dolobeo.  
\ip Josep isai digi, tama te sogo kibu be hauwa te 400 bidai. Tama tialima, te nosali, e buku Ma Dobola Sali tede wali te po mu pedelai. Tama te sogo Jekopgo wąį dabe te hani Isip bulude me bidai. Tama te hanigo gesi nogi te Israel wai. Polobadu Godigo te nogi Israel Jekopbolo mawai, tama augwaligo augwa ayago wąį te nogi sai. Tama meba bidi hani augwaligo Israel hani nogi weyu te po wai, augwali te Hibru hani dao wai.  
\ip Tama augwali te Isip bulude bidali sogo augwali te we bidi hauwa bidai, tama augwali bomo meni yai hani bidai, tama te sogo augwa bulu tali me elaluai menio. Augwali dwai mu bidiyu, tama augwali te Isip hanigo sę ebo olo we bidi bidai.  
\ip Tialima, God agai te Abraham dali dąų wali bomo yai po te agai gegeda palobeo. Menio. Te po agai me konealuai, tama agai te Moses dąį muyu, te Israel we bidi Isip bulu tagalama odasa pomainogo yai. Tialima, hasia God agai gasagi yai bomo yai sę hauwa Isip hani dali elama, tama augwali Israel Isip hanigo bomode bidali tagalama, odasa painogo yai. Te buku Ma Dobola Sali nogi page e tiwai, Godigo aga we bidi hani ma selama, bulu me deli tagalama pai. Tama te nogi te Israel hanigo Isip bulu tagalama, gasa buluba pali te po wai.  
\ip Israel hanigo Isip bulu taga pai, augwali te masigi sane ąį nogolama, tama augwali Sainai bulu duba sabolai. Augwali te Sainai bulu dude bidibadi, Godigo te po augwali dali weyu, “Dage eno we bidi hani mu dao, te eno dage sa mubao,” te po wai. Tama agai bomo yai po hauwa augwalibolo mawai, te Godigo dwagi yai kolesaga augwaligo te kolesaga wali pelama konemainogo yai. Tama Godigo Mosesbolo te po me wai, “Nago te genuai ugwa be me sę yao, tama tede augwaligo Godibolo lotu po weyu, agabolo te dwai sę ebo sela sąyu, nai ula maiabo be sę yao,” wai. Tama augwaligo te Godigo po wali pelama, te ugwa be sę yai. Augwaligo te sę silai, tama Godigo genuai ula te ugwa bede pągąnaluai.  
\ip Tama augwali te bulude bidibadi, Godigo augwali dali bomo yai po wai, te po wali aga polasa peyu, augwali te Kenan tǫ menama, tama augwali te tǫde tigidali sogo mu bidabo tǫ agai augwali mawaibao wai. Tama Israel hani augwali te masigi sane yai buludu pai. Tama augwali pelama, te be sili nigibo digi augwaligo te Godigo ugwa be sę ebo te koneai, tama sesemane sogo God augwali dali bidai. Nago te Josua dali, te tobolu bidi hani meba augwaligo po nago nedeyu da, te nago augwaligo te Kenan tǫ sigi bilama, bidainogo yali, te po koneaibao. Te bukugo nogi tama wai, Godigo we bidi augwaligo sę yali usu mu yai.  
\ip Tama nosali, Israel hani augwa bulude bidibadi, me gasa tǫde bidibadi, te sogo, augwaligo te polobadu Godigo augwali Isip tǫde bidibadi augwa tǫ Kenan te buluba odasa aselama, augwali te Godigo we bidi bidai, tama augwaligo homugo te tiali ma konebo dao. Tama Godigo te buku me badu tede God agai te genuai sę Israel hani dali yali po elalubo dao.  
\ip Ma Dobola Sali te bukude asęani po e tama elalubo dao. Dąį 1 tede gagalama, te Dąį 18 teba siligi pai, te po wai, Godigo Israel hani Isip bulude bidibadi, Sainai bulu duba odasa soali po wai. Dąį 19-24 tede Godigo Israel hani dali bomo yai po weyu, po wai agai po hauwa augwalibolo mawai. Tama God agai nogo si bomo yai po habu po te Dąį 20, te po asęai elalubo. Tama Dąį te 25-40, tede Israel hanigo sę haniani augwaligo te Godigo ugwa be sę eyu yali po asęai elalubo dao.  
\c 1  
\s1 Isip hani augwaligo Israel hani dali dwai sę yai  
\p
\v 1-2 Te Jekop aga ogomani dali augwali hodobo Isip buluba pai. Tama te sogo augwa we wai dabe dali hodobo pai. Jekopgo ogomani nogi tama wai: Ruben, me Simeon, me Livai, me Juda,  
\v 3 me Isakar, me Sebulun, me Benjamin,  
\v 4 me Dan, me Naptali, me Gat, me Aser. \x * \xo 1:4 \xt Gag 46:8-27\x*  
\v 5 Tama agai ogwa me te Josep polasa pelama, Isip buluba polobadu bidigi pai dao. Te sogo te Israel hani, te Jekop aga hani mu, augwali te bidi sese sela olama, nogo si we bidi 70 augwali Isip buluba bidigi pai.  
\v 6 Tama nosali Josep aga ama dede aga hani tigidali augwali te sogo te Isip bulude bidibadi, augwali tigidali isai.  
\v 7 Tiali goli, augwaligo ame nani wai te Israel hani augwaligo wai hauwa ame nai, tama augwali hani hauwa mu te bomai bidi hani pedelai, tama augwaligo te Isip tǫ pedai badu Gosen te pągąna sai. \x * \xo 1:7 \xt Tpi 7:17\x*  
\v 8 Tama nosali gesi tuni bidi me deli pedelama, agai te Isip bidi hani tonaluai. Tama te gesi tuni bidi agai te Josepgo nogi konesiąwai. \x * \xo 1:8 \xt Tpi 7:18\x*  
\v 9 Tama te tuni bidigo aga Isip we bidi hani dali te po wai, “Suiąo, te Israel we bidi hani augwali hauwa mu yai, tama augwaligo bomogo dago bomo aiyaba elaluaibao.  
\v 10 Tama wąbi hwįbaso da, te augwaligo dago boi bidi dali taluama, da dali hwįyu, tama dago bulu tagalama, augwali wi paibao. Tama dago augwali hani hauwa pedalidali weyu, dąų wabo tų gegegaibao,” te Isip gavman polasa tuni bidi agai te po wai. \x * \xo 1:10 \xt Tpi 7:19\x*   
\p
\v 11 Tama te po olama, te Isip hanigo te Israel hanigo bomo kimi isilainogo eyu, tama augwaligo te sę tonalubo bidi dabebolo te sę mawai, tama te bidi dabe augwaligo te Israel hani sę emainogo selai, tama augwali sę dene mu yai. Tama augwaligo te Israel hanibolo genuai hanu me si niga po wai, te hanu me nogi Pitom, me Rameses. Te hanu side te Isip tuni bidigo nai sisinabo madigi te hanu nigai.  
\v 12 Tama te Isip hani augwaligo Israel hani dali dwai sę dene menama, tama augwali mu dolobo sę yai goli, tialima te Israel hani bidi hauwa mu pedaliyu, tama tedela peyu, tama te Isip bulu tǫ pągąna sai. Tama Isip hani augwali te Israel bidi hani sulama, tama dwai homu eyu, augwali wi mu yai.  
\v 13-14 Tama Isip hanigo Israel bidi hanibolo sę dene mawai. Tama Israel hani augwali dodolama mu bidai. Tama te Isip hanigo Israel bidi hanibolo te masigigo be sę ebo, te sę me te gi sę me ya wai, tama augwali sę dene mu yai. Tama augwaligo Israel bidi hani hobede me ebeo. Mu menio.   
\p
\v 15 Tama we si bidali, te we me nogi Sifra, me we nogi Pua, tama te we augwali sigo te Israel te Hibru we dabego wai ame nabo tau sabo sę yai. Tama te Isip tuni bidi agai te we sibolo te po wai,  
\v 16 “Dage sigo te Hibru we me deligo wai ame nobadi tau sabo sogo, tama te wego wai te ogwa ame nobaso da, te wai dage sigo ela muao. Tama te wego wegi ame nobaso da, te wai dage sigo elisiąma tagalao,” wali.   
\p
\v 17 Tama te we si God dali wi elama, tama augwali sigo te tuni bidigo wali po wali pabeo. Tama te we sigo te Israel we dabego ogwa ame nabo elisiąma tagalama elaluai, te we sigo te ogwa ame nabo elebeo.  
\v 18 Tama te Isip tuni bidigo te we si i olama, augwali sibolo te po hanaluyu, te po wai, “Magi baso dage sigo tama tebo dawe? Magi baso dage sigo te Israel wego te ogwa ame nabo sula tagalama elalubo dawe?” wali.   
\p
\v 19 Tama augwali sigo po wei ponoyu, te po wai, “Hibru we augwali te da Isip we dabe tiwai menio. Augwali te bomo yai we dabe weyu, tama augwaligo wai polo mu ame nabo dao. Tama da augwali pąba pedalisiąbadi, augwaligo wai polo ame nai digi da pabo dao,” wali.   
\p
\v 20-21 Tama Godigo te we si dali dwagi yai sę yali. Augwali sigo God dali wi yai, tama agai te we augwali sigo me wai ame nomainogo yai. Tama Israel hani augwali hauwa mu pedaliyu, tama augwali bomo yai bidi hani pedelai.  
\v 22 Tama nosali tuni bidigo Isip we bidibolo te po wai, “Dagego te Hibru hanigo ame nabo wai te ogwa tigidali selama, te moni pabo ąį Nail te ąįba sąya,” wai, “tama te wegi yai baso da, tagalama bidimainao,” wai. \x * \xo 1:22 \xt Tpi 7:19\x*   
\c 2  
\s1 Augwaligo te wai Moses elebeo  
\p
\v 1 Tama te Israel hani tomode, bidi hani me Livai hanigo te me Livai hanigo wegi sai dao, polobadu.  
\v 2 Tama nosali te we haliga elama, tama wai ogwa me deli ame nai. Tama te wego te wai bǫų dwagi yai wai yai baso, geme dualama, tama te wai dualama polua sela bidai. \x * \xo 2:2 \xt Tpi 7:20; Hib 11:23\x*  
\v 3 Tama nosali agai te wai ma dualainogo yali usu meni yai, tama agai te basket wa augwaligo te awi diligo nigai selama, tama mege me siyu, tama te megego te basket wa dedage sebelai. Tama agai te wai te basket wa tomode pilama, sela pai, tama te Nail ąį sesegede te sigi sili elalubo digi te wai dualigi pai, te sigi sili tomode, te ąį daide muai.  
\v 4 Tama te wai aga abe digibulu gana dulaluyu, tama te wai dali magi sę ebowe naga suainogo tonaluai.  
\v 5 Tama aga dolalubadi, te Isip tuni bidigo wegi aga sę we dabe dali te ąįba asai. Tama aga sę we dabe augwali te olo bilalubadi, tama te tuni bidigo wegi ąį paugi pai. Tama te wegi agai te basket wa sigi sili tomode munalubo sulama, tama agai aga sę we me deli tagala palama, tama te wa agabolo sela magasali.  
\v 6 Tama tuni bidigo wegi agai te basket wa dalama suali, te wai bǫų ogwa te wade munalubo suai. Tama agai te wa po dabadi, tama te wai bǫų gela wai, tama te tuni bidigo wegi agai te wai homu dene mu eyu, tama agai te po wai, “Te e wai! Te Hibru hanigo wai dao,” te wegigo te po wai.  
\v 7 Tama te wai aga abe pąba aselama, te tuni bidigo wegibolo hanaluyu, te po wai, “Te eno Hibru we me i wagi pelama, tama e wai ame menama, tama te e wai te wego negebo usu egowe?”   
\p
\v 8 Tama tuni bidigo wegi agai te po wali, “Te usu dao, te nago tama tiao,” wai. Tama te wai aga abego aga ida mu odasa asai.  
\v 9 Tama te wai aga ida asai, tama te tuni bidigo wegigo te webolo te po wai, “Eno te wai nago selama, ame mayu, bugagia tonaluao,” wai, “tama eno nage masigigo abelaibao,” wai. Tama te wai aga idago selama, ame mayu, bugagia tonaluai.   
\p
\v 10 Tama nosali te wai dwasianu genuai gana ebo si, aga idago te wai te tuni bidigo wegibolo magi pai. Tama tuni bidigo wegigo te wai aga wai mu tiwai yai. Tama agai te po wai, “Te eno e wai ąįde munalubadi, tama eno ugwaba sela holai, tama tebo olama. Tama tibaso, eno agai nogi Moses poai,” wali. \f + \fr 2:10 \ft Te Isip pogo te nogi Moses te gasa po wabo dogoni tiwai si pąde dao, te wabo po te “ąįdu ugwaba sela holai,” tama wabo.\f* \x * \xo 2:10 \xt Tpi 7:21\x*   
\s1 Moses Midian buluba wi pai  
\p
\v 11 Tama nosali Moses genuai bidi yai, tama agai te Hibru bidi hani sugi pai, te augwali aga hani bidi, tama abagi dabe dao. Tama agai suali, te augwali Isip tuni bidigo sę ebo dene mu yai. Tama agai suali, te Isip bidi me deligo Hibru bidi me deli ela mubo suai, te Moses aga abagi te Hibru hani. \x * \xo 2:11 \xt Hib 11:24\x*  
\v 12 Tama Moses agai tonono bilali, te bidi me bidibo subeo. Tama agai polo mu te Isip bidi ela muai, tama te bidi te masigi kemide haluai.  
\v 13 Tama te sogo nosali Mosesgo suali, te Hibru bidi me aga si hwįbo suai. Tama Moses agai te wado po olama, hwįani page bidi dali te po wali, “Magi baso nago naga abagi elebawe?”   
\p
\v 14 Tama te bidigo Mosesgo po wei ponoyu, te po wai, “Nage te tobolu bidi, tama dago po dodolobo bidi menio. Tama nago ena elainogo, te nago Isip bidi me ela muani tiwai yainogo obawe?” Tama Mosesgo te bidigo te po wabo odolama, aga wi yai. Tama agai te homu yai, ‘Eno te Isip bidi me elali, te we bidi augwaligo polo koneai,’ te homu yai. \x * \xo 2:14 \xt Tpi 7:23-28\x*   
\p
\v 15 Tama nosali Isip tuni bidigo Mosesgo te sę yali po odolama, tama agai Moses elainogo yai, tama tibaso Moses aga wi digibulu pelama, te Midian buluba bidigi pai. Aga te tǫba sabolama, tama aga te ąį tubo digi te sesegede dulaluai. \x * \xo 2:15 \xt Tpi 7:29; Hib 11:27\x*  
\v 16 Tama te Midian tǫde pris bidi me deli digi bidai, tama agai nogi si, te Ruel, me Jetro. Tama te bidi agai wegi a naga olama me badu nogo si bidai. Tama Moses te ąį ulu tǫ dedagedu asobo digi pąde dulaluai, tama te bidigo wegi dabe te augwa ayago kibu sipsip meme dabe maiabo ąį tuagasu asai.  
\v 17 Tama tialima, gasa sipsip tonalubo bidi hani aselama, tama augwaligo te bidigo wegimani ąį tuagasu asobadi, augwali sela sąnama, “Pao,” wai. Tama Moses agai te wegi dabe tau siyu, tama te bidi dabe augwali sela sąwai. Tama nosali Moses agai te wegi dabego kibu sipsip meme dabe ąį mawai.   
\p
\v 18 Tama nosali te wegi dabe augwa aya Ruel bidibo digi ma pai, tama augwa ayago augwalibolo hanaluyu, te po wali, “Magi elama, dage megi polo ma asobawe?”   
\p
\v 19 Augwaligo po wei ponoyu, te po wali, “Isip bidi me deli agai da tau selama, tama te gasa kibu sipsip tonalubo bidi dabe augwaligo da ela gudulubeo. Tama te bidi agai dago kibu sipsip meme dabe me agai ąį mawai,” wali.   
\p
\v 20 Tama te bidi aga wegi dabebolo hanaluyu, te po wali, “Te bidi menade bidibowe? Tama magi baso dagego aga ude taga soaliwe? Dagego te bidi aga i wagi pelama, tama aga da dali nai tuagasomainao,” wali. Tama te wegi dabe pelama, augwaligo Moses odasa asai.  
\v 21 Tama nosali Jetro agai homugo Moses aga dali bidimainogo yai, tama Mosesgo te usu dao te po wai. Tama Jetro agai wegi Sipora me Moses mawai, tama Mosesgo te wegi sai.  
\v 22 Tama nosali Sipora wai haliga elama, tama ogwa me deli ame nai. Tama Moses agade digi po weyu, te po wali, “Ena gasa bulu tǫ bidi e tǫde bidibao. Tama tibaso, eno te wai nogi Gersom dao obao,” te po wai. \f + \fr 2:22 \ft Te Hibru pogo te wai nogi Gersom wabo dogoni te “Gasa tǫde bidibo” po wabo dogoni tiwai si pąde dao.\f*   
\p
\v 23 Tama kibu be meba bidilama, tama nosali te Isip tuni bidi isai. Tama Isip hani augwaligo Israel hanibolo sę dene mu mawai. Tama Israel hanigo Godigo augwali tau somainogo tigidali sogo Godibolo gela weyu, i wai.  
\v 24 Tama Godigo augwaligo te gela wabo odoyu, tama Godigo te bomo yai po Abraham, me Aisak, me Jekop, augwali dali dąų wali, te agai koneai, tama agai te augwaligo wąįgo wai dabe augwali tau saibao te po wai, polobadu. \x * \xo 2:24 \xt Gag 15:13-14\x*  
\v 25 Tama tibaso, God agai te Israel bidi hani augwali dodolama mu bidibo suai. Tama agai augwali hobede elama, agai augwali tau sabo homu yai.   
\c 3  
\s1 Godigo Moses i wai  
\p
\v 1 Tama nosali me sogo Moses agai te kibu sipsip dabe, me te meme dabe te aga wąį Jetro nai dabe tonaluai, te Jetro aga da te God dali te Midian bage tomode dolalubo pris bidi dao. Tama me sogo deli sogo Mosesgo te kibu sipsip me meme dabe odasa peyu, te wa pai bulu taga peyu, te tǫ pedai me nogi Horep, te bulu du Sainai tede elalubo, teba sabolali, te Godigo bulu du dao.  
\v 2 Tama Genuai Bidigo Ensel Mobo Bidi agaba pedelama, te sia dabo tiwai, te dwasianu ni nologo tomode sia bogoli pedelai. Tama Mosesgo sia te nide dabo suali, tiali goli te siago te ni dela dolobeo.  
\v 3 Tama Moses aga homu hauwa eyu, te po wali, “Te gasagi yai nai mu dao. Tama magi baso mu siago te ni dolobewe? Te ena pąba pelama, te sia dabo nai sugi paibao,” wali.   
\p
\v 4 Genuai Bidi te sia dabo ni tomode bidibadi, te Moses pąba asobo suali, tama Godigo i olama, te po wali, “Moses. Moses.” Te po wali. Tama Mosesgo te po wai, “Magi yaliwe?”  
\v 5 Tama Godigo te po wai, “Nage pąba aselamo dao. Tama nago sągą nadoba dią muao. Magi baso meni, te megi nage dolalubo tǫ te eno tedali gasagi yai tǫ, tama te tǫ eno habu selai tǫ dao.  
\v 6 Tama ena te nago wąį dabego God dao. Ena te Abraham, me Aisak, me Jekop, te bagego God dao.” Mosesgo te po odolama, aga gesabi halua sali, magi basowe, agai te God subo wi ebaso, tiwai dao.   
\p
\v 7 Tama Genuai Bidigo aga dali te po wali, “Eno suali, augwaligo eno we bidi Isip bulude mu dolobao. Tama eno we bidi augwali ena i wabo sę ebao, te augwali dwai tonalubo bidigo nogode ma somainogo yai. Eno te i wabo odoyu, tama eno mu koneani, te augwali dene me te sęgę mu sabo dao.  
\v 8 Tama ena dulai dao, tama te augwali te Isip dabego nogode ma selama, tama augwali te genuai tǫ me deli te tǫ ili hauwa elalubo, te nai bugagia dwagi yai mu holobo tǫba odasa paibao. Te tǫde megi te Kenan bidi hani me, te Hit hani me, te Amor hani me, te Peres, me Hivi, me Jebus, te tama hani augwali te tǫde megi bidibo dao.  
\v 9 Mu tama, eno te Israel hani we bidigo gela odolama, eno suali, te Isip dabe augwaligo dwai kolesaga mu augwali dali ebo dao.  
\v 10 Tama megi eno nage te Isip tuni bidi bidibo digi tagala palama, te tuni bidigo nage sula tagalama, te nago eno we bidi Israel hani augwali te Isip bulu tagalama asomainao,” wali. \x * \xo 3:10 \xt Tpi 7:30-34\x*   
\p
\v 11 Tiali goli, Mosesgo Godibolo te po wali, “Ena magi yai bidi, tama ena te Isip tuni bidiba pobaso da, eno te Israel we bidi te Isip bulu tagalama, odasa asobo usu egowe?”   
\p
\v 12 Tama Godigo te po wali, “Ena nage dali bidibao. Tama megi eno magi nai me deli nagebolo waselama ola mayu, tama nago kuna koneagameo, te ena digi eno nage te Israel we bidi augwalibolo tagala palobao. Te ola mabo sę e tama dao: te nago te we bidi Isip tǫ tagalama, odasa aselama, tama dagego enabolo e bulu dude digi lotu po waibao,” wali.   
\p
\v 13 Tama Mosesgo Godibolo te po wai, “Ena te Israel we bidi augwali bidibo teba pedalobo sogo, te augwalibolo eno te tiwai po waibao, ‘Dago wąį augwaligo Godigo ena tagala palobaso, ena dage bidibo digi asai.’ Tama augwaligo enabolo hanalubaso da, ‘Te aga nogi de dawe?’ obaso da, teda eno mena nogi wabogo augwali dali wei ponogowe?” \x * \xo 3:13 \xt Sai 6:2-3\x*   
\p
\v 14 Tama Godigo te po wali, “Ena Digi Ena Tama Bidibo Dao. Nago te Israel we bidi dali te po wao, ‘Ena Digi Bidibo, \f + \fr 3:14 \ft Te Hibru pogo te po wabo po “Ena Digi Bidibo,” te po wabo dogoni te nogi Yawe wabo dogoni te tiwai si pąde dao.\f* te Godigo nogi dao. Tama agai ena tagala palobaso, tama ena dage bidiboba asai.’ \x * \xo 3:14 \xt Ped 1:4, 8\x*  
\v 15 Nago tama po te Israel we bidi dali weyu, te Yawe Genuai Bidi, aga te dagego wąį dabe augwaligo God, te Abraham, me Aisak, me Jekop, te agai nage tagala palama, tama nage augwali bidibo digi asai dao po wao.” Tama Godigo po Moses dali ma wali, “Eno nogi Genuai Bidi, te eno nogi sesemane bidada pabo sogo, tama nosali pedalobo wąį dabe augwaligo ena nogi tama nogi yaibao.”   
\p
\v 16 “Nage pelama, te Israel tobolu bidi dabe augwali sisinama, te God po augwalibolo wao, ‘Te dagego wąįgo Genuai Bidi, Abraham, me Aisak, me Jekop, te bagego God enaba mu pedelama, dagebolo wabo po ena dali tama wai dao, “Eno suali, te Isip hani augwaligo tigidali dwai kolesaga mu dage dali ebaso, tama eno homu hauwa dage dali ebo dao.  
\v 17 Tama eno te po wali, te eno dage Isip tǫde selama, te bulu bidi dabego dwai sę mu dagebolo ebaso, tama eno dage te Kenan bagego tǫ, me te Hit hani, me te Amor me, Peres me, te Hivi, me Jebus, te hanigo tǫba eno dage odasa painogo ebao. Te dwagi yai tǫ, te ili hauwa elalubo tǫ dao.” ’  
\v 18 Nago te tama po augwali dali weyu da, te augwaligo nago po odolama, wali paibao. Tama nago te Israel bage tobolu bidi dabe selama, tama dage te Isip tuni bidi bidibo teba pelama, agabolo te po wao, ‘Genuai Bidi Yawe aga te da Hibru bagego God dao, te aga da dali deliba sisinai dao. Tama dago nagebolo hanalu wagasali, te nago usu da obaso, te da te bidi meni yai buluba pelama, sela sogo dago Godibolo te ofa igi painogo obao, te dago Genuai Bidi dao,’ tama po wao.  
\v 19 Eno koneani, te eno bomo yai nogogo aga dali bomai sę esiąyu da, teda te Isip tuni bidigo dage tagala paliyu pao, te po hasia bolo wagobeo. Tiali goli, agai dage tagala palomainogo, eno bomo yaibao.  
\v 20 Tama tibaso, eno bidigo isiąwai bomo yai sę haniani te Isip hani augwaligo tǫde eyu, tama eno bomogo te sę augwali dali yaibao. Tama te bomo yai sę dabe elama, nosali te Isip tuni bidi agai dage pomainao, te po waibao.”   
\p
\v 21 “Eno tama ilama, tama te Isip we bidi augwaligo dage dali dwagi yai homu yaibao, tama dagego te Isip tǫ taga soainogo ebode, te dage olo me pogobeo. Menio.  
\v 22 Dagego we tigidali te Isip we dabe augwali bidibo pąba pelama, me te Isip we dabe dagego bede bidibo, tama dagego we dabe sibigo te Isip we dabe sibi hanaluyu, tama te ugwa, me te meba gasa au ebo doado bage gol me silva tama, te nai dabe augwaligo dage mawaibao. Tama dagego te nai duga wai dabe tigide muaibao. Tama dagego te tebo kolesagade te Isip dabego doado bage tigidali siyu, selasa paibao,” Godigo Mosesbolo te po wai. \x * \xo 3:22 \xt Sai 12:35-36\x*   
\c 4  
\s1 Godigo bidigo isiąwai sę yabo bomo Mosesbolo mawai  
\p
\v 1 Tama tialima, Mosesgo Genuai Bidi dali te po wai, “Te Israel hani augwaligo eno wabo po homude dąų wasiąma, tama eno pusubo po te augwali odogobeo. Tama augwaligo te po weyu, ‘Nago tibo po naga obao,’ waibao. ‘Tama Genuai Bidi nageba pedalobeo,’ te po waibao. Te augwaligo tama weyu da, teda eno magi sę egowe?”   
\p
\v 2 Tama Genuai Bidigo Moses dali hanalu wai, “Nago magi nai tolalubawe?” Tama agai te po wai, “Tolasa bilibo dono tolalubo,” po wai.  
\v 3 Tama Genuai Bidigo te po wai, “Te dono tǫba sąyao.” Tama Mosesgo te dono tǫba sąbadi, te hasamani gagawai, tama Mosesgo te hasamani sulama, wi pai.  
\v 4 Tiali goli, Genuai Bidigo Mosesbolo te po wali, “Tagalama, nago nogo aiyaba munama, te danu nogogo touao.” Tama Mosesgo te hasamani nogogo danude touwai, tama te hasamani hasegelama, tama te bilibo dono ma pedelai.   
\p
\v 5 Tama Genuai Bidigo te po wai, “Nage te Israel bageba pabo sogode nago tama tiao, tama augwaligo nago e sę tiwai ebo sulama, nago po homude dąų weyu, mu tama Genuai Bidi ena nageba pedelali da, te homu emainogo nago tama tiao. Tama augwaligo koneyu, te ena augwa wąį dabego God da, ena te bidi Abraham, me Aisak, me Jekop, te bagego God ena nageba pedelai dao,” wali.  
\v 6 Genuai Bidigo Moses dali te po ma wai, “Nago nogo naga ugwa tomoba muao.” Agai te Genuai Bidigo wali po gilama tama tiai, tama agai nogo me teda sai, tama te nogode keni dwai mu, tama te keni tigidali tedela yai.  
\v 7 Tama Genuai Bidigo te po ma wai, “Nago nogo naga ugwa tomoba ma muao.” Te agai tama tiali, tama agai nogo ma teda sali, tama te nogo wiegi yai yali, te aga tigi me badu elalubo tiwai yai.   
\p
\v 8 Tama Genuai Bidigo te po wai, “Te augwaligo homude nago po dąų olama musiąbaso da, te nago hasia ebo bomo yai sę yali augwaligo homu teba dąų wasiąbaso da, te gasa bomo yai sę si nago ebo te augwaligo sulama, tama augwaligo homu nageba muaibao.  
\v 9 Tiali goli, augwaligo te bomo yai sę si ebo sulama, tama augwaligo nago po homuba dąų wasiąbaso da, teda nago te genuai wę Nail meba selama, te tǫba gelao. Tama te wę hasegelama, kaneme pedelaibao,” wali.   
\p
\v 10 Tama Mosesgo Genuai Bidi dali te po wai, “Tama Genuai Bidi, tiali goli polobadu bidi hauwa gedude eno po bugagia wai menio. Tama megi nago ena dali po wali, tialima tego ena te po wabo bidi tiwai egobeo. Eno pedauwali sęgę mu yai, tama eno po bugagia wainogo ebo, te usu egobeo,” wali.   
\p
\v 11 Tama Genuai Bidigo agabolo te po wali, “Niwai bidigo te we bidibolo po wabo pedauwali te mabo dawe? Niwai bidigo te bidi odo dega weyu, te pedauwali paliyu ebo dawe? Tama dego te gedugo tonono bilimainogo eyu, ma te gedu widao po wabo dawe? Ena, Genuai Bidigo naga, eno tama tiwai kolesaga ebo dao.  
\v 12 Megi da, nage pao. Te nago wabo po tigidali te eno tau siyu, tama te nago wabo po nagebolo ola mayu yaibao,” wali.   
\p
\v 13 Tiali goli Mosesgo te po wai, “Genuai Bidi, eno usugobeo. Nago gasa bidi tagala palao.”   
\p
\v 14 Tama Genuai Bidigo Moses dali wado po weyu, te po wai, “Magi basowe? Nago ama genuai bidi Aron te Livai hani bidibao. Eno koneani, te aga da, te po bugagia wabo bidi mu dao. Tama megi naga tama agai nage tiąba asobao, agai nage suyu, wiegi yai homu yaibao.  
\v 15 Nago agabolo te po olama, tama agai te po tigidali pusumainao. Tama eno dage sigo pedauwali tau siyu, tama dage sigo eno po bugagia naga waibao. Tama magi sę dage sigo yainogo ebaso, te sę yao po eno waibao.  
\v 16 Aga te nago pedauwalide po selama, te nago po te we bidibolo mawaibao. Tama agai gedude te nage te God tiwai bidiyu, te nago wabo po agai te we bidibolo pusaibao.  
\v 17 Tama megi da, nago te bilibo dono selama, tama nage pao. Tama nosali nago te donode te bidigo isiąwai bomai sę meba yaibao,” Genuai Bidigo te po wai.   
\s1 Moses Isip tǫba ma pai  
\p
\v 18 Mosesgo po God dali ola silama, tama aga te aga wąį Jetro bidibo teba ma pelama, tama agabolo te po wai, “Eno homugo nago ena te Isip tǫba ma pelama, te eno deli hani sugi painogo ebo, te nago ena pao po wabo te usu da wao. Eno koneama, augwali bidibowe, ma augwali isaliwe, te eno augwali sugi peyu pobao,” wali. Jetro agai te usu da po aga dali wai, “Te usu da, nage pao.”  
\v 19 Tialima, Moses aga pisąbadi, tama Genuai Bidigo agabolo te po wai, “Megi nage te Isip tǫba ma pao, te nage elainogo yali bidi dabe, augwa digi isai dao,” wali.  
\v 20 Tama Moses agai te po wabo odolama, te aga we dali te aga wai si augwali te kibu donki me deliba muai. Tama agai te Godigo dono me selama, tama augwali Isip tǫba ma pabo gagalali.   
\p
\v 21 Tama Genuai Bidigo Moses dali te po wai, “Nosali nage Isip tǫba pedalobode, te nago te bomai sę te Isip tuni bidi gedude yao. Eno nagebolo te bomai sę yabo bomo mobao. Tiali goli, eno te tuni bidide ilama, tama aga te aga homuba masigi sąwai bidi pedelaibao. Tama tibaso, agai te we bidi dabe augwali pao wagobeo.  
\v 22 Nosali nago tuni bidi dali eno po weyu, ‘Te Genuai Bidi agai tiwai po wabo dao, “Israel hani te eno hasia wai, te gomunai ogwa tiwai dao.  
\v 23 Tama eno nagebolo te po wai, ‘Nago te wai tagala palama, enabolo lotu po omainao.’ Tiali goli, nago hagela homu eyu da, te nago hasia wai te ogwa eno ela muaibao,” Genuai Bidigo te po wai,’ nago te po te Isip polasa tuni bidibolo wao.” \x * \xo 4:23 \xt Sai 12:29\x*   
\p
\v 24 Te Moses te Isip tǫba pabo tųde pibadi, tama te toma nabo pesage tede Moses aga gasi selama, tama te gasigo aga ela muainogo yai.  
\v 25 Tama Sipora, te Mosesgo wego, te poa pai masigi selama, tama aga wai te ogwa te gasa tigiwali togolama, Moses sągąba muai. Tama agai te po wai, “Nage eno bidi dao, tiali goli nage kaneme tama sabo bidi dao.”  
\v 26 Tama Genuai Bidigo sulama tagaliyu, tama Moses bidimainogo yai, tama agai aga ela mubeo. Te we Siporago te dąį ilibo tigiwali togwabo kolesaga tede hagela homu eyu, tama agai te po wai, “Kaneme sabo bidi dao.”   
\p
\v 27 Tama Genuai Bidigo Aronbolo te po wai, “Nage te masigi sane yai buluba pelama, Moses dali tede sisinaibao.” Tialima, aga pelama, Moses te Godigo bulu dude sisinama, gesabidi suyu, tama dwagi yai homu eyu, augwa si gesabidide nono nai.  
\v 28 Tama Mosesgo Aronbolo te Genuai Bidigo agabolo wali po tigidali wai, te Genuai Bidigo aga tagala paliyu wali, te po wai. Tama Mosesgo Aronbolo te Genuai Bidigo agabolo te bidigo isiąwai bomai sę yabo po wali, te po me Aron dali wai.   
\p
\v 29 Tama nosali Moses de Aron augwali si te Isip tǫba pelama, tama augwali sigo te Israel tobolu bidi dabe deliba sisinai.  
\v 30 Tama Arongo te Genuai Bidigo Mosesbolo wali po tigidali augwalibolo te po wai, tama te Israel hani olo we bidi dabe me deliba sisinama, tama agai te bidigo isiąwai bomai sę te we bidi augwali gedude yai.  
\v 31 Tama tibaso, augwaligo homu Aronba mu dąų wai. Augwaligo te po tiwai wabo odali, Genuai Bidigo suali, te Isip hani augwaligo te Israel hani dali dwai kolesaga ebaso, agai homu hauwa augwalide ebo dao. Tama te we bidi dabe augwaligo te po odolama, tama augwa tobolu tǫba aiyaba munama, Genuai Bidibolo lotu po wai.   
\c 5  
\s1 Moses de Aron si pelama, Isip tuni bidi sugi pai  
\p
\v 1 Tama nosali Moses de Aron si te Isip polasa tuni bidi bidibo teba pelama, tama te po wai, “Da Israel bagego Genuai Bidi Yawe Godigo te po wai, ‘Eno hani augwali te bidi meni yai bulu, te masigi saneba pelama, enabolo te genuai lotu po weyu, ena nogi ugwaba somainogo, augwali pomainao,’ wali.”   
\p
\v 2 Tiali goli te tuni bidigo te po wai, “Genuai Bidi Yawe de dawe? Magi baso eno agai po odolama, te dage Israel hani pomainogo yaibawe? Eno te Genuai Bidi Yawe konebeo, tama tiyu, eno dage pagameo te po wagobeo,” wali.   
\p
\v 3 Tama augwali sigo te po wali, “Da Hibru bagego God te da si bidibo digi pedelai dao. Da te masigi sane yai buluba sela sogo bidigi painogo homu yai, tama dago Godibolo te ofa mawainogo, te dago Genuai Bidi dao. Tama nago da pao wabo te usu yaibawe? Te dago tama tisąwani da, te agai da genuai gasigo, me te hwįbo sogode, te da mu dolaibao.”   
\p
\v 4 Tama te Isip tuni bidigo Moses de Aron si dali te po wai, “Magi baso dage sigo eno sę ebo te we bidigo tagalomainogo te po obawe? Dage si sęba polo ma pao.  
\v 5 Dage Israel hani hauwa mu pedaliyu, tama da bulu page bidi aiyaba elaluai, tama megi dagego te sę ebo taga painogo obawe?”   
\p
\v 6 Tama te sogo naga te tuni bidigo po me deli te Isip bage dali, te Israel augwa digi te Israel sę ebo bidi tonalubo bidi augwali dali te po wai. Agai te po wai,  
\v 7 “Dagego te wa pai nosa te Israel hanigo te be sę yabo dila pai nai brik nigimainogo magio, te dagego tebo dao. Augwa digi te nosa dabe sigi pomainao.  
\v 8 Tiali goli, augwaligo te sesemane sogo te nigibo tiwai brik naga augwaligo nigimainao. Dagego te namba te pęwadage iligio. Mu menio. Augwali sę hagela ebo we bidi dao. Tama tibaso, augwaligo te po wai, ‘Da pelama, dago Godibolo ofa igi pomainogo emainao.’  
\v 9 Augwalibolo sę hauwa menama, tama augwali sę dene mu yao, tama augwaligo te tiwai tibo po wabo odabo sogo te meni yaibao,” te Isip tuni bidigo te po wai.   
\p
\v 10 Tama te Isip sę tonalubo tobolu bidi dabe, me te Israel sę tonalubo bidi dabe me, augwali te Israel haniba pelama, augwali dali te po wai, “Tuni bidigo te po wai, dago nosa dabe dagebolo sela magasigio wai.  
\v 11 Duga digi pelama, tama te nosa gegegi pao wai, tama dagego te mama tǫgo nigibo nai brik te polobadu nigali tiwai hauwa nigao, tama te nigibo brik namba te aiyaba me dulugio. Te namba te polobadu elaluali tiwai naga tama elalumainao,” te po wai.  
\v 12 Tama te Israel we bidi augwali te tigidali Isip teba tedela pelama, te nosa dabe tigidali sisinai.  
\v 13 Tama te sę tonalubo bidi dabego sę polo yao weyu, augwaligo te po wai, “Dagego deli sę tiwai naga tigidali sogo eyu, te dago nosa dagebolo mobadi yali sę tiwai sę yao.”  
\v 14 Tama te Isip sę tonalubo bidi dabe augwali te Israel augwa digi te sę tonalubo bidi nigilali, te bidi pageba pai. Tama augwaligo te bidi dabe augwali eliyu, te po wai, “Magi baso dagego te brik namba te polobadu nigali tiwai nigibewe?”   
\p
\v 15 Tama tibaso, te Israel sę tonalubo bidi dabe augwali te Isip tuni bidi bidibo teba pelama, aga dali te po wai, “Magi baso nago te tiwai kolesaga da dali ebawe?  
\v 16 Augwaligo nosa dabolo magasobeo, tiali goli augwaligo dabolo te brik nigao te po wedu gebo dao. Tama megi me augwaligo da elai. Te brik namba sǫą pali kolesaga page dago menio. Te kolesaga te Isip bage duga digi te sę yai dao,” te po wai.   
\p
\v 17 Tama te polasa tuni bidigo augwalibolo te po wai, “Dage sę hagela ebo bidi dabe mu dao. Tama tiyu, dagego te po wai, ‘Dago dena Genuai Bidibolo ofa magi pobaso, te dagego da sula tagalao,’ te po wedu gebo dao.  
\v 18 Woo! Dage duga sęba ma pao. Augwaligo nosa dagebolo magasogobeo. Tiali goli, dagego te brik namba augwaligo dagebolo po weyu, te nigao,” te polasa tuni bidigo te po wai.   
\p
\v 19 Tama te Israel sę tonalubo bidi dabe augwaligo te tuni bidigo wabo po odolama, augwaligo te brik namba pęwadage ilisiąyu, tama augwaligo koneani, megi genuai sęgę augwaliba pedelali, te homu yai.  
\v 20 Tama augwaligo te tuni bidi taga sobadi, te sogo augwaligo te Moses de Aron si gesabidi suai. Augwali sigo augwali te be bulu badu asobo tonaluai.  
\v 21 Tama augwaligo te bidi si dali te po wai, “Dena homugo te Genuai Bidi Yawego dage sigo kolesaga osola suao, tama Genuai Bidi agai dage sibolo dene mawaibao, magi basowe, dage sigo te tuni bidi dali, te aga tobolu bidi dabe dali, augwaligo da te dwai nai tiwai mu, te homu ebo dage sigo ilalio. Te tuni bidigo da elemainogo dage sigo tų nigibao,” te po wai.   
\s1 Moses aga homu sęgę eyu, Godibolo gedu haluasa po wai  
\p
\v 22 Tama Moses ma pelama, tama Genuai Bidibolo te po wai, “Genuai Bidi, magi baso nago naga we bidi hanibolo te dene maniwe? Tama magi baso nago ena eba tagala palai dawe?  
\v 23 Te nago po eno te tuni bidibolo wagi pali, tede gagalama dąį megi tama, agai dwai sę augwali Israel we bidi dali ebao. Tama nago augwali tau selama, magi sę me deli ebeo,” Mosesgo Godibolo te po wai.   
\c 6  
\nb
\v 1 Tama Genuai Bidi Yawego Moses dali te po wai, “Megi nago eno te tuni bidi dali ebo sę suaibao. Te eno bomogo yaibao, tama tibaso agai te dage Israel hani gasaba tagala palaibao. Mu tama, te eno aga selebo sę eyu, aga mu doloyu, tama agai dage agai tǫde bidibo sela sąnama, tama dage paibao,” wali.   
\s1 Godigo Moses i ma wai  
\p
\v 2 Godigo Mosesbolo te po wai, “Ena digi ena te Genuai Bidi Yawe dao.  
\v 3 Polobadu kibu be hauwa ena te Abraham, Aisak, Jekop, te bageba pedelali, te augwaligo koneai, ena te Tigidali Bomo Elalubo God dao. Tiali goli, eno te tama po augwali dali wabe, Genuai Bidi Yawe te eno nogi da, te po wagi sogo da, teda te nogi page augwaligo konegi dao. \x * \xo 6:3 \xt Sai 3:13-15\x*  
\v 4 Tama eno bomo yai po augwali dali dąų weyu, te tǫ Kenan augwali mawaibao, te po wai. Augwali te bulude te tǫ page bidi hani bidisiąwai goli, eno te tǫ augwalibolo mabo homu yai.  
\v 5 Te me elalubo, te Isip bidi dabe augwaligo te Israel hani kalabus sę ebo tiwai sę menama yai, tama te Israel hani augwali moni gela wai. Tama megi augwali gela wabo eno odai, tama eno homugo polobadu eno te bomo yai po dąų wali, te eno ma koneai.”   
\p
\v 6 “Tama tibaso, nago te po Israel hani dali wao, ‘God agai te po wai, “Ena digi ena Genuai Bidi Yawe dao. Eno dage te Isip hanigo nogode selama, tama te augwaligo sęgę dagebolo mabo tede me eno selama, tama dage olo mu bidimainogo yaibao. Tama eno bomogo augwali dene mu somainogo menama, tama dage eno genuai bomogo dobola ma saibao.  
\v 7 Te dage selama, tama dage ena we bidi mu pedelama, tama ena te dagego God bidaibao. Nosali dage te Isip bagego kalabus sęde bidali tagalama, tama dage olo mu bidaibao. Tama te sogo dagego mu koneyu, ena te Genuai Bidi da weyu, tama ena dagego God da, te homu yaibao.  
\v 8 Eno dage te tǫ Abraham, Aisak, Jekop, augwali dali bomo yai po dąų weyu, te tǫ mawaibao wai. Tama te tǫ eno dagebolo menama, tama te dagego tǫ mu elaluaibao. Ena da, te Genuai Bidi Yawe dao,” God agai te po wai,’ nago te po augwalibolo pusao,” wali.   
\p
\v 9 Tama Mosesgo te po Israel hani dali wai, tiali goli augwaligo agai po odobeo. Magi basowe, te sę dene yaligo augwali homu aiyaba mu tula palai.   
\p
\v 10 Nosali Genuai Bidigo Moses dali te po wai,  
\v 11 “Nage pelama, te Isip tuni bidibolo te po wagi pelama, te Israel hanigo agai tǫ mu taga pomainao, te po omainao.”  
\v 12 Tiali goli, Mosesgo te po wei ponoyu, te po wai, “Te Israel hani augwaligo eno po odobo menio. Tama tuni bidigo eno po mena tama odogowe? Eno pedauwali sęgę ebao. Eno po te tuni bidi dali bugagia dolo wainogo ebo te usu egobeo.”  
\v 13 Tialima, Genuai Bidigo Moses de Aron si te Israel hani bidibo, teba me, te Isip tuni bidi bidibo digi me, te tagala palali, augwali sigo te Israel hani te Isip tǫ tagalama, augwali odasa asomainogo yai.   
\s1 Moses de Aron sigo hani  
\p
\v 14 Te bidi hani augwali te Moses de Aron sigo hasia wąį dabe te bidi hani nogi e dao. Ruben, te Jekopgo gomunai ogwago wai dabe nogi e dao. Te ogwa me si me si, me nogi Hanok, me Palu, me Hesron, me Karmi. Te Rubengo hani me si me si te hani me si me wąį si tomode te Ruben pedelai.  
\v 15 Simeon, te Jekopgo tomo ogwa, agai wai ogwa te a naga olama me badu nogo deli, gomunai ogwa Jemuel, me Jamin, me Ohat, me Jakin, me Sohar, me Saul. Saul aga ida te Kenan we me deli dao. Simeongo hani a naga me badu nogo deli, te hani tomode Simeon aga wąį pedelai.  
\v 16 Livai, te Jekopgo ogwa me, agai wai ogwa sela, gomunai ogwa Gerson, me tomo ogwa Kohat, sabi ogwa Merari. Tama Livai agai kibu be 137 bidilama, isai.  
\v 17 Gersongo ogwa si ame nai, me ogwa Lipni, me Simei. Te ogwa si wąį te Livaigo hani tomode elaluai.  
\v 18 Kohat agai wai ogwa me si me si, Amram, Ishar, Hebron, Usiel. Tama Kohat kibu be 133 bidilama, isai.  
\v 19 Merarigo wai si, Mali me Musi. Te bidi hani tigidali augwali te Livaigo wai hani augwali dao. \x * \xo 6:19 \xt Nam 3:17-20; 26:57-58; 1 Sto 6:16-19\x*  
\v 20 Amram agai we Jokebet sai, te aga ayago amago wegi, tama Jokebetgo Aron de Moses si ame nai. Tama Amram kibu be 137 bidilama, isai dao.   
\p
\v 21 Ishargo wai sela, Kora, me Nefek, me Sikri.  
\v 22 Usiel agai wai sela, Misael, me Elsafan, me Sitri.  
\v 23 Arongo we Eliseba sai, te Aminadapgo wegi, te Nason aga abe dao. Tama Elisebago wai me si me si ame nai, Nadap, Abihu, Eleasar, me Itamar.  
\v 24 Korago ogwa sela, gomunai ogwa Asir, me Elkana, me Abiasap. Te bage sela augwaligo hani wąį Kora dao.  
\v 25 Eleasar te Arongo ogwa, agai te Putiel te bidigo wegi selama, agai wai te Finias ame nai. Te megi nogi nogi yali bidi hani augwali da te Livai hani sibi deli deli augwaligo tobolu bidi dabe dao.  
\v 26 Nago te bidi hani augwali tomode te Aron de Moses si nogi elalubo suai. Genuai Bidigo te bidi sibolo naga po weyu, te po wai, “Dage sigo te Israel hani dabe augwali te Isip tǫde bidibo tagalama, augwali odasa asao,” te po Genuai Bidigo augwali si dali wai.  
\v 27 Te bidi augwa sigo digi te Isip tuni bidi dali, te Israel hani tagala palaibao, te po wai. Tama te bidi sigo naga te sę yai.   
\s1 Genuai Bidigo po Moses de Aron sibolo mawai  
\p
\v 28-29 Genuai Bidigo Moses dali Isipde po wali sogo, agai te po wai, “Ena digi ena te Genuai Bidi dao. Tigidali po eno nagebolo mabo, te po nago Isip tuni bidi dali wao.”   
\p
\v 30 Tialima, Mosesgo Genuai Bidi dali te po wai, “Nago koneani, ena po wabo bidi menio. Tuni bidigo eno po odogobeo.” Mosesgo te po wai.   
\c 7  
\nb
\v 1 Tama tialima, Genuai Bidigo Moses dali te po wali, “Odao, eno nage te God tiwai te tuni bidigo gedude nigiliyu, tama nago ama Aron, te nagede po sabo bidi tiwai nigilama, tama nago po agai te tuni bidibolo waibao.  
\v 2 Tigidali nai po eno nagebolo wali, te po nago Aron dali wao. Tama agai te po te tuni bidi dali weyu, te agai te Israel hanigo te tuni bidigo tǫ tagalama, pomainao po waibao.  
\v 3 Tiali goli, eno te tuni bidide iliyu, tama aga homu tomoba masigi sąwai bidi pedelaibao, tama agai te Arongo po odogobeo. Tama tibaso, eno genuai bomai sę hauwa te Isip tǫde yaibao. \x * \xo 7:3 \xt Tpi 7:36\x*  
\v 4 Tiali goli, te tobage bomai sę ebadi digi, tama te tuni bidi agai nago po odogobeo. Tama tibaso, eno te Isip tǫ dolama, augwali dene mu somainogo tiaibao. Tama ena polasa peyu, te Israel hani sibi dabe odasa peyu, augwali te eno we bidi hani, tama augwaligo te Isip tǫ mu taga paibao.  
\v 5 Tama eno te Isip hani dali haniani dwai dene mabo, te sogo tama Israel hani odasa peyu, te Isip tǫ taga paibao, tama te sogo Isip hanigo koneyu, te Genuai Bidi Yawe aga digi te Israel hani odasa pabo homu emainogo tama tiwai dao,” wali.   
\p
\v 6 Tama nosali Moses de Aron augwali sigo te Genuai Bidigo wali po wali pelama, te sę tigidali yai.  
\v 7 Te sogo Mosesgo kibu be 80 elalubadi, tama Arongo kibu be 83 elalubadi, augwali sigo te sogo te Isip tuni bidi po miai.   
\s1 Aron peyu tolasa pabo dono  
\p
\v 8 Genuai Bidigo Moses de Aron si dali e tama wai,  
\v 9 “Tuni bidigo dage sibolo te bomai sę meba agai suainogo, te sę yao po wabo si da, te eno dage si tagala palobao, tama Moses nago Aronbolo agai te bilibo dono selama, te tuni bidigo gedude tǫba sąyao. Tama te dono hasamani gagalama pedelaibao,” wali.  
\v 10 Tama tibaso, Moses de Aron augwali si te Genuai Bidigo po wali pelama, te tuni bidi bidibo digi pai. Tama Arongo dono te tuni bidigo gedude, me te aga sę ebo bidi dabe gedude, Mosesgo dono tǫba sąwai, tama te dono hasamani pedelai.  
\v 11 Tuni bidigo te tebo sulama, tama agai te tigidali po page koneai bidi dabe, me te haniani pobi wabo bidi dabe i olama, augwaligo me te pobi po olama, tama Arongo ebo kolesaga tiwai augwaligo me yai.  
\v 12 Augwaligo me augwa dono sąbadi, tama hasamani gagawai, tiali goli Arongo hasamanigo augwaligo hasamani elama tuyu dalai.  
\v 13 Tiali goli, tuni bidi aga homu kolesaga dąų ola sali, te Genuai Bidigo po wali gilama tama tiwai, tama Moses de Aron augwali sigo po odobeo.   
\s1 Dwai nai mu Isip tǫba pedelai  
\p
\v 14 Tama Genuai Bidigo Mosesbolo te po wai, “Tuni bidi agai kolesaga te doyu, mu gagea pai eyu, tama agai te Israel hani pomainao te po wagobeo.  
\v 15 Tama kigamu aga te ąį Nail tede nago aga gesabidi deliba sisinama sueibao. Tama nago te hasamani pedelali dono selama, aga te ąį sesegeba tonalugi pao.  
\v 16 Tama nago tuni bidi dali te po wao, ‘God, da Hibru hanigo Genuai Bidi, agai ena tagala palali, nage te po omainogo, te agai we bidi te bidi meni yai buluba lotu po wagi pomainogo nago augwali tagala palao, te po wagasai. Tiali goli, megi nago te po odao.  
\v 17 Tama megi Genuai Bidigo te po wai, “Nago eno ebo sę sulama, tama nago koneyu, ena digi ena te Genuai Bidi Yawe da, te po nago waibao,” Godigo te po nagebolo obao. Suao, eno donogo te ąįba elebode te ąį kaneme pedelaibao. \x * \xo 7:17 \xt Ped 16:4\x*  
\v 18 Tama te sųgų dabe isilama, dwai kugumini mu yaibao. Tama Isip we bidi augwaligo te ąį tubo usugobeo,’ te po agabolo wao,” Godigo te po Mosesbolo wali.   
\p
\v 19 Tama Genuai Bidigo Mosesbolo te po ma naga weyu, te po wai, “Aronbolo agai dono sao te po olama, tama agai te donogo te genuai ąį, me te tigidali ąį gamia, me te tigidali Isip tǫde elalubo sigi ąį tigidali nago te donogo sa muao. Tama te wę dabe kaneme pedelaibao, tama tigidali Isip te badu te pede poude kaneme naga elaluyu, augwaligo te kaneme ni namego me te botolgo te masigigo nigai me, te kaneme pedelaibao,” Genuai Bidigo Mosesbolo te po wai.  
\v 20 Tama Moses de Aron sigo te Genuai Bidigo augwa si dali wali po wali pelama, te sę yai. Tama te tuni bidi dali, aga sę ebo bage meba dali, augwaligo gedude Arongo dono selama, te Nail moni pabo ąįba elali, tama te ąį tigidali kaneme pedelai.  
\v 21 Tama te Nail ąįde elalubo tigidali sųgų isilama, dwai kugumini mu te ąįde yai. Tama te Isip we bidi augwaligo te wę tuabo usu egobeo. Tama kaneme te Isip tǫ tigidalide elaluai.   
\p
\v 22 Tama te kolesaga page osola subo Isip bidi dabe, augwaligo pobigo te Arongo ebo kolesaga tiwai yai. Tama tuni bidigo augwali sigo po odobe. Menio. Agai kolesaga gagea pai me elaluai, te Genuai Bidigo tama tiaibao te po wai.  
\v 23 Tama tuni bidi aga beba ma pelama, te sogo yali sęde me agai homu midigi siyu hodalobeo.  
\v 24 Tama te Isip hani augwaligo te ąį tuabo usu ebeo, tibaso augwaligo te wę sesegede dedage nigai, te tuabo wę tede sainogo yai.  
\v 25 Tama te wę Nail dwai elalubadi, te a naga olama, me badu nogo si sogo tama bidai.   
\c 8  
\s1 Gedeli dabede po  
\p
\v 1 Tama nosali Genuai Bidigo Moses dali te po wai, “Nage tuni bidi pageba pelama, aga dali eno te po wao. ‘Genuai Bidi Yawe agai te po wai, “Eno we bidi augwali enaba lotu po wagasiyu asomainogo, augwali sula tagalao.  
\v 2 Nago augwali tagala palisiąbaso da, teda eno te gedeli dabe augwali tagala palama, augwali te dagego be tomoba aselama, tama nago tǫde bidibo we bidi augwali dolaibao.  
\v 3 Tama te wę Nail te gedeligo mu pągąna selama, tama augwali te wę tagalama, tama tuni bidi nago genuai be tomoba aselama, tama nago pibo be tų bet saiba asaibao. Tama te gedeli dabe te nago sę ebo bidi dabego be tomoba, me te nago we bidigo beba asaibao. Tama te nai ulubo nai stov tomoba, me te bret nigibo pou tomoba bidagasaibao.  
\v 4 Tama te gedeli dabe augwali posoga palama, nago tigi daiba duayagasu, te nago sę ebo bidi dabeba, me te nago we bidi augwali tigiba duayagasaibao,” Genuai Bidi Yawego te po wai.’ Te po wao,” Genuai Bidigo te po wai. Mosesgo te po tuni bidiba wagasai, tama te tuni bidigo agai po odobeo.   
\p
\v 5 Tama tibaso, Genuai Bidigo Moses dali te po wai, “Aronbolo po olama, te aga nogo dodolama, tama agai dono ugwaba selama, nogogo tuao, tama te wę dabe, me ąį gamia dabe, me te sigi ąį ge, tede te gedeli dabe pedelama, tama te Isip bidi dabego tǫ pągąna somainao,” wali.   
\p
\v 6 Tama Arongo nogo dodolama, tama dono ugwaba selama, tama te wę dabe dąį ilai. Tama te gedeli dabe pedelama, tama Isip bagego tǫ tigidali pągąna sai.  
\v 7 Tiali goli, tuni bidigo po page osola subo bidi dabe augwaligo pobigo me te gedeli ąįde bidali tagalama, hauwa te tǫba pai.   
\p
\v 8 Tama tuni bidigo Moses de Aron si i olama, asobode augwali sibolo te po wai, “Dage sigo Genuai Bidibolo gedu haluasa po olama, agai te gedeli dabe da tigide bidibo sela sąmainao, tama eno nago we bidi pomainogo tagala paliyu, tama augwa Genuai Bidibolo ofa magi pomainogo yaibao,” wali.   
\p
\v 9 Tama Mosesgo te tuni bidibolo po wei ponoyu, te po wali, “Te usu dao, eno gedu haluasa po nage tau siyu waibao. Naga digi te sogo bodolu mobaso, te eno gedu haluasa po nage tau siyu, te nago sę bidi dabe, me te nago we bidi dabe, augwali tau somainogo yaibao. Tama dagego bede bidibo gedeli dabe silama, tama te gedeli dabe augwali te wę Nailde naga bidaibao,” wali.   
\p
\v 10 Tama tuni bidigo te po wai, “Gedu haluasa po do wagameo.” Tama Mosesgo te po wali, “Te eno nago po wabo gilama tama tiaibao, tama nago koneyu, te God tiwai Genuai Bidi Yawe me deli meni yai, te aga dago God dao.  
\v 11 Tama te gedeli dabego nage tagaliyu, te nago sę bidi dabe, me te nago we bidi dabe, augwali tagalama, tama augwali te wę Nailde naga bidaibao,” wali.  
\v 12 Tama Moses de Aron sigo te tuni bidi tagalama, pai. Tama Mosesgo gedu haluasa po Genuai Bidibolo bomonama weyu, agai te tuni bidibolo tagala palali gedeli sela sąmainogo yai.  
\v 13 Tama Genuai Bidigo Mosesgo hanalu wali pode tama tiwai, tama te bede bidali gedeli dabe, me obo tomode bidali, me te gide bidali, te tigidali gedeli isai.  
\v 14 Tama te Isip bidi dabe augwaligo te gedeli dabe deliba sisinama, pesage holai, tama te gedeli dabe damuyu, kugumini dwai mu pedelai.  
\v 15 Tama tuni bidi te gedeli dabe isali sulama, tama agai koneani, te dwai sogo silali. Tama tibaso, agai kolesaga ma doyu, gagea pai, te Genuai Bidigo agade po wali tiwai gilama tiwai, tama agai Moses de Aron sigo po odobeo.   
\s1 Dina dabe  
\p
\v 16 Nosali Genuai Bidigo po Mosesbolo ma weyu, te po wai, “Aronbolo te po olama, agai dono tǫba elama, tama tigidali Isip tǫ hogomugo te dina dabe pedelaibao,” wali.  
\v 17 Tama augwali sigo tama tiwai. Arongo dono selama, tǫba elai, tama tigidali Isip tǫ hogomugo dina pedelama, tama te dina dabego te we bidi dabe, me te hasa dabe, augwali halua selama, tama augwali gąųgo kela tuai.  
\v 18 Tama te pobi page koneai Isip bidi dabe augwaligo te dina pedalomainogo pobi po wali, tiali goli augwaligo usu ebeo. Tama te dina dabego te hasa dabe augwali halua sai.  
\v 19 Tama te pobi po koneai bidi dabe augwaligo tuni bidi dali te po wai, “God aga digi te sę ebao.” Tiali goli, tuni bidigo kolesaga dolama gagea pai, te Genuai Bidigo po tama tiaibao wai, tama agai Moses de Aron sigo po wabo odobeo. \x * \xo 8:19 \xt Luk 11:20\x*   
\s1 Bolia dabe  
\p
\v 20 Genuai Bidigo Moses dali te po wai, “Tama kigamu mu tuni bidi węba asaibao,” wai, “tama aga asobadi nago aga sulama, tama eno po agabolo wao, ‘Genuai Bidi Yawego te po wai, “Eno we bidi lotu po enabolo omainogo pomainao.  
\v 21 Nago augwali tagala palisiąyu da, teda eno te bolia hauwa nageba tagala paliyu, te nago sę bidi dabebolo, me te nago we bidiba me, te bolia tagala palaibao. Tama dagego be me, te dage bidibo tǫ me, te boliago pągąna saibao.  
\v 22 Tiali goli, te bolia dabe pedalobo sogo te Gosen tǫ eno tonaluyu, te eno we bidi bidibo bulu, tama te bolia dabe augwali bidibo badu me pedelama bidigobeo. Te eno tama tebo sogo nago konemainogo te ena digi ena Genuai Bidi Yawe, eno te sę nago tǫde ebao.  
\v 23 Eno te deli tigi tiwai sę eno we bidi dali ebo tiwai te nago we bidi dali tegobeo. Odao, te gasagi yai bomai sę te do pedelaibao,” Genuai Bidi Yawego te po wai,’ tuni bidi dali te po wao,” Genuai Bidigo te po wai.   
\p
\v 24 Tuni bidigo homu kolesaga hasegelebe, tama Genuai Bidi agai tama tiai, te agai po obadi, tama te genuai bolia hani hauwa te tuni bidigo genuai be tomoba asali, tama aga sę bidi dabego beba me asiyu, te Isip we bidi tigidaligo beba pai. Tama te boliago te Isip hani tigidali dolai.   
\p
\v 25 Tama tuni bidigo Moses de Aron si asa olama i wai, tama agai te po wai, “Dage pelama, duga Godibolo te Isip tǫ tomode naga ofa mao.”   
\p
\v 26 Tialima, Mosesgo te po wali, “Dago tama tiyu da, te dolo meni, magi basowe, Isip bage augwaligo te dago Genuai Bidi Godibolo ofa ebo hasa dabe sulama, tama augwaligo da dali dwai homu yaibao. Dago te hasa dabe elama ofa eyu da, te Isip bage augwaligo ofa isąwai nai, tama Isip bage augwaligo te tebo suyu, tama augwali sębę eyu, masigi sąnama, da ela muaibao.  
\v 27 Da pelama, sela sogo te bidi meni yai tǫba dago Godibolo ofa igibu paibao, dago Genuai Bidi Yawe, agai te sę dabolo yao te po wai.”   
\p
\v 28 Tama tuni bidigo te po wai, “Te usu da, eno dage te duga Godibolo ofa magi pomainogo tagala paliyu, te duga Genuai Bidi Yawebolo te bidi meni yai tǫba ofa igi pomainogo, tiali goli dage digibulu gana pelamo dao. Tama dagego ena me tau somainogo gedu haluasa po wao,” wali.   
\p
\v 29 Tama Mosesgo po wei ponoyu, te po wai, “Te eno nage taga pabo sogo te eno Genuai Bidibolo gedu haluasa po weyu, te do agai nago bede te bolia dabe sela sąyu, te nago sę bidigo bede me, te nago we bidi augwaligo bede me tiaibao. Tialima, nago tibo po da ma ola mayu, tama te we bidi augwali te augwa Genuai Bidibolo ofa magi pidali weyu, te tų nago ma paligio.”   
\p
\v 30 Tama Mosesgo te tuni bidi taga peyu, Genuai Bidibolo gedu haluasa po wagi pai.  
\v 31 Tama Genuai Bidigo Mosesgo aga dali hanalu wali te sę yai. Tama tigidali bolia dabego te tuni bidi dali, te aga sę bidi me, te aga we bidi, augwali tagalama, tama te bolia me deli tede me bidibeo.  
\v 32 Te bolia dabe pela silai, tiali goli te tuni bidi aga homu ma hasegelisiąyu, tama agai te Israel we bidi augwali tagala palobeo.   
\c 9  
\s1 Kibu dabe isai  
\p
\v 1 Nosali Genuai Bidigo Mosesbolo te po wai, “Nage pelama, te tuni bidibolo te po agabolo wagi pao, ‘Da Hibru bagego God, Genuai Bidi Yawe, agai te po wai, “Eno we bidi augwaligo enaba lotu po omainogo augwali tagala palao.  
\v 2-3 Nago augwali dąų weyu, tama augwali tagala palisiąbaso da, te eno nage dali, te naga hani dabe dali dene mayu, tama eno genuai gasi te nago tigidali kibu dabeba tagala paliyu, te hos dabe me, te bidi duabo donki dabe me, te kamel, me bulmakau, me sipsip, me meme, te tama bulu badu bidibo nai dabeba eno gasi tagala palaibao.  
\v 4 Tialima, Genuai Bidi Yawe ena digi bugagia eno te Israel hanigo kibu dabe tonaluyu, tama augwaligo kibu dabe me deli isigobeo.” Genuai Bidi Yawego te po wai.’ Nago te po te tuni bidibolo wagi pao,” Genuai Bidigo te po Mosesbolo mawai.   
\p
\v 5 Tama Genuai Bidigo te sę yabo sogo bodolu mayu, tama te po wali, “Do eno te sę yaibao.”  
\v 6 Tama tuni bidigo homu kolesaga hasegelebe, tama Genuai Bidi agai te po wali sę yali, tama Isip bagego bulu badu bidali kibu dabe tigidali isai. Tiali goli, Israel hanigo kibu dabe tigidali te bugagia bidali, tama me deli isibeo.  
\v 7 Tama tuni bidigo aga hani dali hanalu wali, “Te Israel bagego kibu dabe te bugagia bidibowe?” Tama te bidi mebago agabolo te po wai, “Awe. Tigidali bugagia bidibao. Me deli munu me isibeo.” Tiali goli, te tuni bidi homu kolesaga dwai me elaluyu, tama te we bidi augwali me tagala palobeo.   
\s1 Keni dabe pedelali  
\p
\v 8 Tama Genuai Bidigo Moses de Aron si dali te po wali, “Dage si te brik ulubo be me deliba pelama, tama te sia keli meba selama, tama tuni bidi bidibo digi pao. Dage si te tuni bidi bidiboba sabolama, tama Moses nago te keli ugwaba sąyao.  
\v 9 Tama te keli hogomu pedelama, tama Isip tǫ tigidali usu naibao. Tama te keli hogomu bidi tigiba me, te kibu dabe tigiba me tulalubode, te dili keni tiwai pedelama, tama genuai keni pedelaibao,” wali.  
\v 10 Tama augwaligo te keli selama, pelama, te tuni bidi geduba doligi pali, tama Mosesgo te keli ugwaba sąwai. Tama te keligo te dili keni tiwai pedelali, tama te dili keni dabe ulu elama, tama keni te we bidi tigide, me te kibu dabe tigide pedelai. \x * \xo 9:10 \xt Ped 16:2\x*  
\v 11 Tama te pobi page koneai bidi dabe augwaligo te Moses ebo bomo yai sę teba pedelainogo ebo te usu ebe, magi basowe, augwali tigide te dili keni pągąna sali, te Isip we bidi tigide keni yali tiwai, augwali tigide me te keni pedelai.  
\v 12 Tialima, Genuai Bidigo te tuni bidigo homu kolesaga dąų walama, tama te tuni bidigo Moses de Aron sigo po wabo odobeo, te Genuai Bidigo tama po wali gilama tama tiwai.   
\s1 Genuai talua ge tiwai tulubage po  
\p
\v 13 Tama nosali ma, Genuai Bidigo Moses dali te po wali, “Kigamu digi mu nage pelama, tuni bidi agabolo te po weyu, ‘Da Hibru bagego God, Genuai Bidi Yawe, agai te po wali, “Te eno we bidi hani augwali enaba lotu po wagasomainogo tagala palao.  
\v 14 Tama nago te we bidi tagala palisiąbaso da, megi eno nagebolo dali, te nago sę ebo tobolu bidi dabe me, te nago we bidi dali, dageba te dene ilibo sę dabe mu mawaibao. Tama dagego te tigidali tǫ habu badu te bidi me deli, me te tibo god te ena tiwai me bidibo meni, te megi dagego mu bugagia konea saibao. Ena te God mu dao.  
\v 15 Te eno nage dali, naga we bidi dali, dage te eno genuai gasigo dage dolainogo homu igi sogo da, teda dage tigidali mu ela siligi da.  
\v 16 Tiali goli, eno nage hodolama, te tuni bidi nigiliyu, te eno genuai bomo dagebolo ola mayu, tama te we bidigo eno genuai nogi te tigidali tǫba te po pusugi pomainogo tebao. \x * \xo 9:16 \xt Rom 9:17\x*  
\v 17 Tiali goli, nago eno we bidi dali te boi bidi homu eyu, tama nago augwali tagala palobeo.  
\v 18 Tama tibaso, odao. Do e tobage tiwai sogo, te eno moni genuai tulubage, te talua ge tiwai tulubage e tǫba dulumainogo yaibao. Te tiwai tobage talua ge tulubage te Isip tǫba gesi sogo pedalisiąbadi, tama megi sogoba usu nagasai.  
\v 19 Tama te bidi dabe augwalibolo po olama, te kibu bulmakau dabe, me te nago nai gasa badu bidalua pabo nai dabe tigidali selama, te gasa be meba tomoba selasa pao. Meni baso, te eno genuai talua ge tulubage te bidi dabe tigiba, me te bulu badu bidibo kibu dabe tigiba tulama, tama augwali isaibao.” God Genuai Bidigo te po wai,’ dage sigo te po wao,” wali.   
\p
\v 20 Tama te tuni bidigo sę bidi meba augwali te Genuai Bidigo wali pode wi elama, tama augwaligo augwa sę ebo bidi dabe, me te augwa kibu dabe, te augwa be tomoba selama muai.  
\v 21 Tiali goli, bidi meba augwaligo te Genuai Bidigo wali pode wi isąma, tama augwaligo augwa sę bidi, me te kibu dabe dali, augwali bulu badu olo bidai.   
\p
\v 22 Tama Genuai Bidigo Mosesbolo te po wali, “Nago nogo ugwaba selama, tama nago te dagalu usu siyu, tama te talua ge tulubage te Isip tǫ tigidali habu badu tuluyu, te we bidi dali te gide elalubo tigidali naiba tulubage tulaibao.”  
\v 23 Tama Mosesgo dono ugwaba sali, tama Genuai Bidigo dagalu kulukulu omainogo yali, tama dagalude te be sele ebo ula te tǫba dulali, tama te talua ge tulubage tǫba tagala palai. Genuai Bidigo te talua ge tulubage te tigidali Isip tǫba tulumainogo yai.  
\v 24 Tama te talua ge tulubage me mu tutulu pidubadi geai, tama dagalude te be sele ebo ula te sia dabo tiwai eyu, tama te tigidali habuba pidubadi geai. Tama polobadu te Isip bage augwaligo te tiwai talua ge tulubage me subeo. Mu menio. \x * \xo 9:24 \xt Ped 8:7; 16:21\x*  
\v 25 Tama te tulubagego te bidi dabe, me te kibu dabe, me te Isip tǫde bulu badu elaluali nai dabe tigidali dolai. Tama te talua ge tulubagego te gide elaluali nai, me te ni du dabe tigidali pedelama, tigidali mu dolai.  
\v 26 Tiali goli, te Gosen tǫ badu, te Israel bage bidibo digi, te bulu delide digi naga te tobage tulubage menio.   
\p
\v 27 Tama tuni bidigo po ola toloyu, te Moses de Aron si asao, te po wai. Tama augwali si aselama, tama tuni bidigo augwali dali te po wali, “Megi eno dwai sęgę salio. Genuai Bidi Yawego doloba pai kolesaga yai, tiali goli ena dali, te eno we bidi dabe dali, dago dwai kolesaga yalio.  
\v 28 Te talua ge tulubage tulali dali, te dagalu kulukulu wali, te sigo da dolai dao. Tama nago gedu haluasa po Genuai Bidibolo olama, tama agai te nai silibo side, te eno dage pomainogo tagala palaibao. Tama dage e tǫde ma bidimainogo menio,” wali.   
\p
\v 29 Tama Mosesgo te tuni bidi agabolo te po wali, “Te ena te hanu buluba pabo sogo, te eno nogo ugwaba selama, te Genuai Bidibolo gedu haluasa po waibao. Tama te be kulukulu ma wasiąma, tama te talua ge tulubage silaibao. Tama te sogo nago koneyu, te tǫ te Genuai Bidigo tǫ naga da waibao.  
\v 30 Tiali goli, eno koneani, nage dali, te nago sę bidi dabego te Yawe God dali wi isiąyu, te aga Genuai Bidi da te homu menio,” wali.   
\p
\v 31 Te dwasianu ni dabe augwaligo tigi waligo te ugwa hobolobo hobi nigibo nai, me te rais bali dabe mu dolali, magi basowe te rais bali sabo tau sisi yai, tama te dwasianu ni dabe honu megi tama pedalobadi dao.  
\v 32 Te tubo nai wit te digi dolobe, magi basowe, te honu dwasianu pedelai elaluai.   
\p
\v 33 Tama Mosesgo te tuni bidi taga peyu, aga te hanu sesege bulu badu pai. Tama agai nogo ugwaba selama, tama Genuai Bidibolo gedu haluasa po wai. Tama te dagalu kulukulu ma wasiąma, tama te talua ge tulubage me, te olo tulubage me, te tigidali sia sai.  
\v 34 Tama tuni bidigo suali, te dagalu be kulu wasiąyu, tama te talua ge tulubage me, te olo tulubage me, te me te silali, tama te tuni bidi aga dali, te gavman sę ebo bidi dali, augwaligo kolesaga hasegelisiąma, tama augwa homu dąų olama, tama augwaligo dwai sę God dali ma yai.  
\v 35 Mu tama, te tuni bidigo homu dąų olama, tama agai te Israel hani tagala palobe, te Genuai Bidigo te Mosesgo pedauwalide polobadu po weyu, tama tiaibao wai.   
\c 10  
\s1 Kuli mano dabe  
\p
\v 1 Tama nosali Genuai Bidigo Mosesbolo te po wai, “Nago te tuni bidi sugi pao. Eno digi te tuni bidigo homu me, te aga dali gavman sę ebo bidi dabego homu me, te mu dąų ilai, tama eno te bomai sę augwali tomode yaibao.  
\v 2 Tama eno te sę ebaso, te dagego duga wai dabebolo, me te dagego wąįgo wai dabebolo te eno te bomai sę Isip tomode yali po weyu, tama te Isip bage augwalibolo eno te bidigo isiąbo bomai sę eyu, tama augwaligo homu kolesaga aiyaba mu elaluali. Tama dage Israel dabe tigidaligo te sę ebo koneyu, tama ena digi ena te Genuai Bidi Yawe da, te me dagego mu koneaibao,” Genuai Bidigo Mosesbolo te po wai.   
\p
\v 3 Tama Moses de Aron si pelama, te tuni bidi agabolo te po wagi pali, “Da Hibru bagego God, Genuai Bidi Yawe, agai te po wai, ‘Nisu naga sogo nago te po sela sąyu, tama nage ena dologode bidigobewe? Te eno we bidi hani tagala palao, te augwaligo lotu po enaba wagasomainao.  
\v 4 Te nago tama tisąbaso da, teda do eno te kuli mano dabe tagala palama, tama nago tǫba pągąna sagasaibao.  
\v 5 Te augwaligo tigidali habu badu mesega sagaselama, tama nago te tǫ me sugobeo. Tama te nai dabe, me te ni dabe, te talua ge tulubagego dolisiąwani nai, te kuli mano dabe augwaligo te tigidali mu tula silaibao.  
\v 6 Augwali te nago beba, me te nage dali gavman sę ebo bidigo beba me, te nago we bidigo beba me, te kuli mano dabe augwali pągąna saibao. Polobadu wąį dabe me te aya dede bidada asali, te megi tama bidibo sogo te tiwai kuli mano dabe hauwa te dagego tǫba me pedelai menio. Te dwai nai mu dao.’ Godigo te po wai.” Mosesgo te po olama, tama aga begelama, te tuni bidi tagalama, buluba pai.   
\p
\v 7 Tama te tuni bidi aga dali gavman sę ebo bidi dabe augwaligo te tuni bidi dali te po wai, “Odao. Nisu naga sogo dabolo te sęgę mabo bidi da tomode me bidaibawe? Te we bidi dabe naga te augwali te augwa God Genuai Bidibolo lotu wagi peyu pomainao. Nago te Isip tǫ dolali susiąma ebawe?”   
\p
\v 8 Tama augwaligo te Moses de Aron si te tuni bidiba odasa ma asai. Tama tuni bidigo augwali sibolo te po wali, “Dage te duga God Genuai Bidibolo lotu po wagi peyu piąo. Tiali goli, eno koneama te de dede naga mu dage paibawe?”   
\p
\v 9 Tama Mosesgo te tuni bidigo po wei ponoyu, te po wai, “Da tigidali paibao. Te dago gesi bidi dali, te monu dabe me, te wai ogwa me, te wegi me, tama te tigidali sipsip, me te meme, me te tigidali bulmakau dabe, te tigidali sela paibao. Magi basowe, te dago genuai nai daa tuyu, lotu po genuai te dago Genuai Bidibolo weyu yaibao,” wali.   
\p
\v 10 Tiali goli, tuni bidigo te po wai, “Eno te dage dali dagego we wai tigidali dali tagala paligi sogo da, teda eno homugo dagego Genuai Bidi Yawe aga me dage dali pigi da. Tiali goli, te menio, eno dagego te we wai dali tigidali sela pomainogo ebeo. Mu menio. Eno koneani, dagego dwai kolesaga dabolo yainogo ebao.  
\v 11 Tama eno te we wai dabe pomainogo me tagala palogobeo. Te bidi dabe augwali naga pelama, te Genuai Bidiba lotu po wagi peyu pomainao.” Tuni bidigo po ola silama, tama augwaligo Aron de Moses si buluba sela sąwai.   
\p
\v 12 Tama nosali Genuai Bidigo Moses dali te po wali, “Nago nogo ugwaba selama, tama nago te Isip tǫ usu sao, tama te kuli mano dabe tigidali asomainao. Tama te kuli mano augwaligo te ni yabe dabe tigidali te genuai ais tulubagego dolisiąwani nai dabe tigidali tula silimainao,” wali.   
\p
\v 13 Tama Godigo te po obaso, Mosesgo dono ugwaba sali, tama Genuai Bidigo te giliga pedalobo badu te wali te deli sogo giligade aselama, tama be hulia sai. Tama kigamu te waligo te kuli mano dabe selasa asalio.  
\v 14 Tama genuai genuai kuli mano dabe aselama, te Isip tǫ tigidali habu badu mesega sagasai. Polobadu Isip hani augwaligo te tiwai genuai kuli mano hani suai meni, tama nosali augwaligo ma sugobeo.  
\v 15 Tama te kuli mano augwali mu pągąna sagaselama, tama te tǫ tigidali mu mesega sai, tama te tǫ sisi mu yai. Tama te kuli mano augwaligo te tigidali nosa dabe, me te tigidali nedu du wai te genuai ais tulubagego dolisiąwani, te tigidali tula silai. Tama te nide te ni yabe, me te Isip tǫde nosa dabe deli digi me elalubeo. Menio. Augwaligo mu silai. \x * \xo 10:15 \xt Ped 9:2-3\x*  
\v 16 Tama tuni bidigo po polo tagala paliyu, tama Moses de Aron si asao wai. Tama augwali pali, tama agai augwali sibolo te po wai, “Eno dwai sęgę God dali yali, te dagego Genuai Bidi Yawe dali, me dage si dali me, te eno sęgę salio.  
\v 17 Tama dage sigo eno sęgę megi deli sogo digi ma sela sąyao. Tama dage sigo Godiba gedu haluasa po weyu, tama dagego Genuai Bidi agabolo hanaluyu, tama te dwai naigo ena dolainogo ebo te sela sąmainao.”  
\v 18 Tama augwali sigo te tuni bidi taga peyu, tama Mosesgo Genuai Bidiba gedu haluasa po wagi pai.  
\v 19 Tama Genuai Bidigo te wali hasegelama, te bomai wali te sia ge dega sabo badu asomainogo yai. Tama waligo te kuli mano tigidali te mama yai tamu ąįba selasa pai. Tama te Isipde te kuli mano tede me deli bidibeo. Menio.  
\v 20 Tiali goli, Genuai Bidigo te tuni bidigo homu dąų mu ilama, tama tuni bidi te Israel bage augwali tagala palobeo.   
\s1 Genuai be hulia sai  
\p
\v 21 Nosali Genuai Bidigo Moses dali te po wai, “Nago nogo ugwaba sao, tama moni genuai hulia sabogo te Isip tǫ halua saibao. Te be hulia sabo te gasagi yai mu dao. Te bomai nai augwaligo nogogo tuabo usu tiwai dao,” te po wai.  
\v 22 Tama Mosesgo nogo ugwaba sali, tama genuai be hulia selama, tama Isip tǫ tigidali sela sogo be hulia sai elaluai. \x * \xo 10:22 \xt Tib 105:28; Ped 16:10\x*  
\v 23 Tama Isip we bidi augwali te augwa hasi suainogo ebo usu ebeo. Tama tigidali we bidi te sogo augwa be tomode bidai. Augwali buluba soabo usu ebeo. Tiali goli, te Israel bage augwali bidibo digi te be hulia sabeo. Menio.   
\p
\v 24 Tama tuni bidigo Moses i olama, asobode agabolo te po wai, “Dage te duga Genuai Bidibolo lotu po wagi piąo. Tama te we wai augwali duga dali pomainao. Tiali goli, te bulmakau, sipsip dabe augwali te Isipde bidimainao,” te po wai.   
\p
\v 25 Tama Mosesgo po wei ponoyu, te po wai, “Menio. Nago dago God Genuai Bidi Yawebolo ofa yabo nai me sela pomainogo yao.  
\v 26 Tama dago dena kibu dabe me tigidali selama, dago sela odasa paibao. Dago me deli bidibadi taga pogobeo. Dago kibu dabe meba te dago Genuai Bidibolo ofa yabo sa muaibao. Tiali goli, da te lotu po wabo buluba pedelama, tama dago koneama, mena kibu te ofa yainogo te saibao,” wali.   
\p
\v 27 Tiali goli, Genuai Bidigo te tuni bidigo homu dąų olama, tama tuni bidigo augwali tagala palobeo.  
\v 28 Agai Mosesbolo te po wai, “Ao, nage pao! Nage te bulude bidigio, gedao. Nago ena ma sugobeo. Tama nago ena ma suagasiyu da, te deli sogo mu eno nage ela muaibao.”   
\p
\v 29 Mosesgo te po odoyu, te po wai, “Te dolo dao. Eno nage ma sugobeo.”   
\c 11  
\s1 Te gomunai ogwa augwali isaibao  
\p
\v 1 Tama Moses te Isip tuni bidi sugi pesiąbadi, hasia bolo Genuai Bidigo Mosesbolo te po wai, “Eno deli sogo digi me te Isip tuni bidi, aga hani we bidi dali, augwalibolo te eno dene mu ilaibao. Tama tebo si, nosali agai dage tagala palaibao. Tama agai dage dali homu nagame elama, dage tagala palogobeo. Menio. Te agai dage polo mu pao weyu, tama dage te bulude tigidali mu sela sąwaibao.  
\v 2 Tama megi nago te Israel we bidi tigidalibolo te po olama, tama augwali te pąde bidibo Isip haniba pelama, tama augwalibolo te au dobage gol, me te au dobage silva te augwali momainogo hanalugi pao,” wali.  
\v 3 Nosali augwaligo tama tiwai, tama Genuai Bidigo te Israel bage augwalibolo te genuai nogi te Isip we bidi augwaligo gedude menama, tama augwaligo au dobage gol me silva te Israel bage augwalibolo mawai. Mu tama, te gavman sę ebo genuai bidi dabe dali, te Isip olo we bidi dali, augwaligo Moses te genuai bidi mu da, te homu yali, tama tiyu, augwaligo te sę ebo homu yai.  
\v 4 Tama te tuni bidigo te “Nago ena ma sugobeo,” te po olama, tama Mosesgo tuni bidibolo po wei ponoyu, te po wali, “Genuai Bidigo po odao. Agai te po wai, ‘Me sogo be huli tomode ena te Isip tǫ tigidali habuba bilaibao,’ te po wai.  
\v 5 ‘Tama tigidali Isip bagego gomunai ogwa isa silaibao. Tama tuni bidi, nago gomunai ogwade digi gagalaibao. Te wai agai nage hasegelama, te tuni bidi pedelainogo yali, te ogwa isaibao. Tama tigidali gomunai ogwa te isiyu, tama te olo sę ebo we dabego gomunai ogwa me tigidali isaibao, te nogi meni yai we dabe sibi augwaligo te tubo nai wit te masingo agaga pelama te bret nigibo sę ebo dao. Tama te tigidali bulmakau dabego gomunai wai dabe me isaibao.  
\v 6 Tama tigidali Isip tǫ badu bidibo we bidi augwali homu sęgę me elama, tama gela genuai mu waibao. Te tiwai gela te Isipde polobadu me wai meni, tama te gela ma wagobeo.  
\v 7 Tiali goli, eno dwai sę deli me te Israel we bidi augwali dali, me te augwaligo bulmakau nai dabe dali, dwai sę me egobeo,’ Genuai Bidi Yawego te po wai. Tama nago koneama, aga da te Genuai Bidi Yawe da, te homu emainogo yai, agai te deli tigi tiwai kolesaga te Israel bage dali ebe, te dage Isip dabe dali ebo kolesaga tiwai ebo menio.”  
\v 8 Tama Mosesgo te po ma wai, “Tama tuni bidi, nage dali, gavman sę ebo bidi dabe, dage tigidali aselama, tama enaba kidu sugunama, po bomonama weyu, te po waibao, ‘Nage pao. Nage naga we bidi hani dali, polo pao.’ Te sę tigidali pedela silama, tama nosali eno te Isip taga paibao.” Tama Moses sębę mu elama, tama agai te tuni bidi tagala buluba soai.   
\p
\v 9 Te Moses te tuni bidi polobadu sugi pesiąbadi, tama Genuai Bidigo Mosesbolo te po wai, “Tuni bidigo nago po me odogobeo, magi baso meni, te eno bomai sę meba te Isipde ma emainogo tama yaibao,” Genuai Bidigo te po wai.  
\v 10 Tama Moses de Aron sigo bomai sę hauwa deli deli te tuni bidigo gedude yai, tiali goli Godigo aga homu dąų olama, tama te tuni bidigo te Israel bage augwali agai tǫ tagala palobeo.   
\c 12  
\s1 Nai bodolu muani sogo Godigo Israel bage augwali tagaliyu, ela soai  
\p
\v 1 Moses de Aron si Isipde bidibadi, Genuai Bidigo augwali sibolo te po wai,  
\v 2 “Te megi polua te hasia polua te dagego kalenda bukude elaluaibao.  
\v 3 Tama tigidali Israel we bidibolo te po wao, ‘Tama e polua dei nogo si wabode, te deli deli bidigo aga we waide te kibu sipsip wai sa muao, ma aga kibu meme wai me deli sa muao.’  
\v 4 Tama te we bidi wai augwali hani dwasianu eyu, tama augwaligo te nai tula silabo homu isiąbaso da, teda ayago te aga pąde bidibo we bidi wai augwali asa olama, tama te hani augwa si te nai dobola selama tuao. Augwaligo homugo te we bidi wai bidibo usu nama, tama te kibu sipsip mi augwaliba dobayao.  
\v 5 Tama dagego kibu sipsip omai, ma te meme omai, te kibu be deli yai sa muao. Dagego te sipsip meme te tigide keni keni yai me selamo dao.  
\v 6 Augwaligo te kibu dabe bugagia tonaluama, te polua dei 14 wabode, tama pio mu tigidaligo te augwa kibu dabe elao.  
\v 7 Tama augwaligo te kibu dabe kaneme meba selama, tama mena bede te nai tubo te be tųde elalubo ni pos side me, te ugwadu me, te kaneme pipili pao.  
\v 8 Tama te sogo hulide dagego sipsip meme mi dabe siade ulao. Tama dagego te kibu mi dali, te bo disiąwai bret, me te ha yai donai dali tuao.  
\v 9 Tama dagego te kibu mi disiąwai tugio, tama dagego sęnęde ulama tulamuo. Menio. Dagego siade naga ulao. Tama te kibu tobolu me, te nogo sągą me, te tigidali haliga dabe, te kibu sipsip wai, ma meme wai, tigi sese elalubadi tama ulama, te mi tuao.  
\v 10 Dagego te kibu mi meba munalubadi kigamu elamuo. Tama te kibu mi meba kigamu munalubaso da, teda te siaba ulama, tama te siago tigidali dela silimainao.  
\v 11 Dagego te kibu mi tuabo sogo e tama tiao. Gudubo ugwa gudama, tama sągą nadoba mubadi, bilibo dono nogode tola sao. Tama dagego polo te kibu mi tuao, magi basowe, te nai tuali bodolude ena Genuai Bidi Yawe eno dage ela soaibao.” \f + \fr 12:11 \ft Te Hibru pogo te Genuai Bidi Yawe agai augwali tagalama, ela soabo bodolu mani sogo, te sogo nogi Hibru pogo begelama tama Pasova, te tama wabo dao.\f* \x * \xo 12:11 \xt Prs 23:5; Nam 9:1-5; 28:16; Bom 16:1-2\x*   
\p
\v 12 “Tama te sogo hulide tama, ena te Isip tǫ tigidaliba pelama, tama te Isip we bidigo tigidali te gomunai ogwa ela muyu, tama augwaligo kibu dabe me elaibao. Ena digi ena te Genuai Bidi Yawe, tama eno te Isip bage augwaligo tibo god tigidali augwali te bomo meni yai bage mu dao hanilama, ola mawaibao.  
\v 13 Tama dagego te be pilali kaneme te dagego dąį tiwai elaluaibao. Tama eno te Isip bage augwali dene ilibo sogo, eno te kaneme sulama, tama eno dage ela soaibao.”   
\p
\v 14 “Te sę yali sogo, dagego bodolu pedalobode, te dagego genuai lotu po wabo sogo yagasaibao, tama te sogo koneama, ena Genuai Bidi eno te sę yai. Tama dage hani nosali nosali pedalobo bage, augwaligo me te Godigo dage Tagalama Ela Soali Sogo pedalobode te nai tueibao,” wali.   
\s1 Te bo disiąwai nai bret tubo te genuai side dao  
\p
\v 15 Genuai Bidigo po ma weyu, te po wai, “Te nosali bidada peyu, tama dagego te Pasova bret tubosi da, teda dagego te a naga olama, me badu nogo si, te tama side te bo disiąwai nai bret tuao. Te hasia mu dagego bede munalubo te bret bo dabo nai yis tigidali selama, tagalao. Magi baso meni, niwai bidi me deli agai hasia sogo te bo dabo nai yis tudu pelama, te a naga olama, me nogo si usu nigi pobaso da, teda aga dagego te Israel hanide sela sąyao.  
\v 16 Te hasia deli sogo, me te a naga olama, me badu si sogo, dage sisinama, lotu po wao. Dagego te si sogo gasa sę me igio. Dagego duga tubo nai dabe naga dodolao. Te sę ebo naga te usu da.”   
\p
\v 17 “Te hasia deli sogo te a naga olama, me badu si sogo wabode, te sogo digi eno dage hani tigidali te Isip taga peyu odasa paibao. Tama tigidali kibu bede dagego te wali peyu, te Bo Disiąwai Nai Bret Tuali bodolu muao. Tigidali sogo nosali dagego hani augwaligo te sogo te dagego genuai side tiwai dao. \x * \xo 12:17 \xt Sai 23:15; 34:18; Prs 23:6-8; Nam 28:17-25; Bom 16:3-8\x*  
\v 18 Tama dagego te bo disiąwai nai bret te polua dei 14, tede pio tubo gagalama, tama te polua dei 21, te tama te nai tuao.  
\v 19 Tama te 7 sogo elalubadi, te yis dagego bede me munaluamo dao. Tama dage hani bidi me deli, ma te gasa bulu bidi dage dali bidibo bidi, te niwai bidigo te yis elalubo bret te sogo tubaso da, teda te bidi aga te dage Israel hanide sela sąyao.  
\v 20 Odao. Te dage tedali tedali mena bidibo me, te Bo Disiąwai Nai Bret Tubo bodolu mani sogo, tede dagego te bo dabo nai yis tugio. Dagego te bo disiąwai bret naga tuao.” Genuai Bidi Godigo te po wai.   
\s1 Augwaligo nai te Godigo augwali ela soali side tuai  
\p
\v 21 Tama Mosesgo tigidali Israel tobolu bidi dabe i olama asobode, augwalibolo te Israel hanibolo pusabo po weyu, te po wai, “Dage pelama, te ogwa bidi sipsip meme te dage dali duga we wai pulubade sa munama, tama te Godigo dage ela soabo Pasova side te sipsip meme dabe elao.  
\v 22 Tama kaneme te pouba gelama, tama te ni hisop dwasianu nologo selama, tama te kaneme munalubo pouba muao. Tama kaneme dwasianu me badu te be tųde elalubo ni pos side piliyu, tama te tų ugwadu podilali nide me, te kaneme pilao. Tama dage tigidali te be tomode bidiyu, tama buluba me soasiąma, tama kigamu be posaibao.  
\v 23 Tama nosali Genuai Bidi te Isip tǫ habu tigidali teba pelama, te Isip bagego gomunai ogwa dabe elaibao. Tama agai te kaneme dagego be tų sesegede elalubo sulama, tama agai dage ela soyu, tama te ensel mobo bidi dabe augwaligo te be tomoba pelama, dagego gomunai wai dabe elegobeo,” wali. \x * \xo 12:23 \xt Hib 11:28\x*   
\p
\v 24 “Tama dage dali, tama dagego nosali ame nabo bulai wai dabe, augwaligo te tiwai kolesaga tigidali kibu bede yao.  
\v 25 Tama dage te Genuai Bidigo po dąų weyu, dage mawaiba wali te tǫba bidigi pabo sogo me, tama dagego te Godigo dage tagalama ela soali side te nai tuao.  
\v 26 Tama nosali dagego wai dabego dagebolo hanaluyu, te po waibao, ‘Magi po pagede te nai tubo dawe?’  
\v 27 Tama dagego augwalibolo te po wao, ‘Megi da, te Pasova sogo dao. Dago te ofa Genuai Bidibolo ebo, te agai da Israel hani tagalama ela soali bodolu side te sę ebao. Dago te Isip hani augwaligo gomunai ogwa agai elali sogo homugo koneama tiwai. Tiali goli, agai da Israel bagego be tagalama, ela soai, tama dago wai dabe sula tagalama, bugagia bidai.’” Mosesgo te po te tobolu bidi dabebolo wai.  
\p Tama nosali te we bidi augwaligo te po odoyu, tama augwali tobolu aiyaba munama, tama Godibolo lotu po wai.  
\v 28 Tama nosali augwali hodaloama peyu, tama augwaligo te Genuai Bidigo Moses de Aron sibolo wali po wali peyu, te sę igi pai.   
\s1 Te gomunai ogwa dabe isai  
\p
\v 29 Tama huli tomode mu, Genuai Bidigo te Isip dabego gomunai ogwa tigidali ela silai. Agai te tuni bidigo gomunai ogwade elebo gagalama, tama ela pelama, tama te kalabus bidi dabego gomunai ogwa dabeba me usu nigi pai. Tama agai te haniani kibu hani dabego gomunai wai dabe me elai. \x * \xo 12:29 \xt Sai 4:22-23\x*  
\v 30 Tama te sogo hulide naga, te tuni bidi aga dali, gavman sę ebo bidi dabe me, tama te Isip we bidi tigidali, augwali hodaloama, te wai dabe isai suai. Tama Isip tǫ tigidali habu badu tigidali we bidi genuai gela ola pali, magi basowe, tigidali be deli delide wai ogwa isasa pai.   
\s1 Te Israel hani augwaligo te Isip tǫ tagalama soai  
\p
\v 31 Tama te sogo hulide naga tuni bidigo Moses de Aron si i olama, asobode augwali sibolo te po wai, “Dage pao! Dage si dali, te tigidali Israel we bidi, dage polo piąo! Eno hani we bidi taga pao. Dagego enabolo hanalu wali te dagego Genuai Bidi Yawebolo lotu po wagi pao.  
\v 32 Tama te kibu sipsip, me meme, tama te kibu bulmakau me selama, tama te Isip mu tagalama, dagego polobadu wali po tiwai eyu pao. Tama nago gedu haluasa po Godibolo obaso, agai ena dwagi yai ilimainao,” te Isip tuni bidigo augwali sibolo te po wai.   
\p
\v 33 Tama Isip dabe augwaligo te Israel dabe augwaligo te Isip tǫ tagalama, polo pomainogo bomonama yai. Augwaligo te po wai, “Dagego da taga peyu, polo pesiąyu da, teda da tigidali isaibao,” wali.   
\p
\v 34 Tama te Israel dabe augwaligo plaua te yis dali begelisiąbadi te pouba muai. Tama augwaligo te pou name ugwago haluama, tama augwaligo nagede tolasa pai.  
\v 35 Tama Israel hani augwaligo te Isip we bidibolo te gol, me silva, me ugwa dabe, te nai hanalu wai, Mosesgo te po augwalibolo polobadu wai.  
\v 36 Tama Genuai Bidigo te Israel hani augwalibolo genuai nogi te Isip we bidi augwaligo gedude mawai. Tama te Isip dabe augwaligo te Israel hanigo sainogo homu yali nai augwalibolo mawai. Tame te kolesagade Israel hanigo te Isip dabego nai umabo sai. \x * \xo 12:36 \xt Sai 3:21-22\x*   
\p
\v 37 Te Israel bage augwali hogolama peyu, te Rameses hanu tagalama, tama te Sukot hanuba pai. Te sogo te Israel hani bidi te bidi sese hauwa 600,000 mu pali, tiali goli augwaligo te we wai dabe dali nedebeo.  
\v 38 Tama te Israel hani isiąwai we bidi hani hauwa, me te bulmakau, me sipsip, me meme dabe hauwa, te augwali dali pai.  
\v 39 Tama augwaligo bret te yis meni yai plaua te Isipdu sela asali tedali ulai. Augwaligo te yis te plaua dali musiąwai, magi basowe, te Isip dabego augwali polo mu sela sąyu, tama augwaligo te nai sisi yabo sogo meni yai.   
\p
\v 40 Tama te Israel hani augwali Isip tǫde kibu be bidi sese hauwa 430 mu bidai. \x * \xo 12:40 \xt Gag 15:13; Gal 3:17\x*  
\v 41 Tama te sogo mu dolo augwali Isip tǫde bidali kibu be bidi sese hauwa 430 mu bidama, tama Genuai Bidigo Israel hani dabe we bidi augwaligo te Isip tǫ taga soai.  
\v 42 Tama te sogo hulide naga Genuai Bidigo te Israel hani bugagia tonaluai, tama augwali te Isipde selama odasa asai. Tama tibaso, tigidali sogo nosali kibu bede augwali te sogo hulide odasa asali sogo Genuai Bidi homugo koneama, tama bugagia tonaluyu, augwaligo agabolo lotu po wabo dao.   
\s1 Te Pasova naide wabo bomai po  
\p
\v 43 Genuai Bidigo Moses de Aron sibolo te po wai, “Odao, te Pasova nai dabego bomai po e dao. Te Israel hani isiąwai gasa bulu we bidigo te nai tugio.  
\v 44-45 Te augwali dage dali pęwadage sogo naga bidibaso da, ma augwali mone sabo sę eyu da, teda augwaligo te nai sela tugio. Tiali goli, dagego abelama te olo sę ebo bidi pedelali, tama dagego augwali tigiwali togwali, te bage augwaligo te nai tubo usu dao.”   
\p
\v 46 “Te we bidi augwaligo te mi te nai sisi yali bede naga tuao. Augwaligo te nai meba te buluba sela pigio. Tama me te augwaligo te kibu sipsip dili dabe togogio. \x * \xo 12:46 \xt Nam 9:12; Jon 19:36\x*  
\v 47 Tama tigidali Israel hani augwaligo te nai tubo sę ilao.  
\v 48 Tiali goli, tigiwali togosiąwai bidigo te nai tugio. Tama gasa bulu bidi hani me deli te dagego bulu tǫba bidagasai yai baso da, tama te bidi agai te nai sela tuainogo yai, te Genuai Bidi Yawe eno dage tagalama ela soali sogo tubo nai, tama dagego te bidi aga bidi tigidali, me te mena bidi aga dali bidibo bidi dabe, te tigidali augwali tigiwali togwa. Tama nosali te bidi aga hani dali augwaligo te nai tumainao. Tama te bidi aga te dagego bidi me deli tiwai bidaibao.  
\v 49 Tama te gasa bidi hani te Israel hani augwali dali bidagasali bagego te Israel hanigo Pasova nai bomai po tiwai naga wali peyu, dage dali bidao,” wali.   
\p
\v 50 Tama te Israel hani augwaligo te Genuai Bidigo te Moses de Aron sibolo po wali gilama te tiwai sę yai.  
\v 51 Tama te sogo naga Genuai Bidigo te Israel hani tigidali Isipde selama, tama augwali odasa asai.   
\c 13  
\s1 Israel bage augwaligo gomunai ogwa Godibolo mawai  
\p
\v 1 Genuai Bidigo Mosesbolo te po wai,  
\v 2 “Dagego gomunai ogwa tigidali enabolo mao. Dage Israel hanigo gomunai ogwa tigidali, me te dagego tigidali sipsip, meme, bulmakau gomunai omai wai dabe me, te enaba naga mao. Augwali te eno tedali muani nai dao,” wali. \x * \xo 13:2 \xt Nam 3:13; Luk 2:23\x*   
\s1 Te Bo Disiąwai Nai Bret tuali genuai side  
\p
\v 3 Mosesgo te we bidi augwalibolo te po wai, “Dage te Isipde bidali, te kalabus sę ebo bulu dao. Tama aga bomogo digi, Genuai Bidigo dage Isip bulude selama, odasa asai. Tama tibaso, tigidali kibu be dagego agai te tama tiali side homugo koneama, tama dagego te bo dai nai bret dali tugio.  
\v 4 Tama megi dagego te Isip taga sobao, te side e polua delide, augwaligo te nogi Abip wai.  
\v 5 Tama Genuai Bidigo dago wąį dabe dali po dąų olama weyu, te Kenan dabe augwaligo tǫ, me Hit bidi dabe, me te Amor dabe, me te Hivi, me te Jebus dabe, te bidi hani augwaligo tǫ dage mawaibao. Te tǫ wiegi yai mu, tama ili hauwa elalubao. Tama Genuai Bidigo dage te tǫba odasa pabo sogo, dagego te Bo Disiąwai Nai Bret tuali te genuai side tigidali kibu be e Abip nogi wabo poluade te sę wali piąo.  
\v 6 Tama dagego te bo disiąwai nai bret te a naga olama me badu nogo si tama side tuao. Tama a naga olama me badu si sogo, te dagego te genuai nai tuyu, Genuai Bidibolo lotu po wao.  
\v 7 Tama te a naga olama me badu nogo si te side te we bidi augwaligo te bo disiąwai nai bret tulama, tama dagego te yis, me bret te yis elalubadi, te bulude me te dagego tǫde munalubadi elaluamu dao.  
\v 8 Tama te genuai side pedalobo si, dagego duga ogwa te wai dabe augwalibolo te po haninama pusao, ‘Dago te kolesaga tigidali ebo, te Genuai Bidi agai da te Isip tǫde bidibadi, da odasa asali sogo koneagasu, te sę ebo dao.’  
\v 9 Tama dagego kegeda pidali weyu, te tiwai lotu po wabo kolesaga da, te dąį me deli dao, te dagego duga nogode me gesabidide elaluabo dąį ąǫ yaibao. Tama te Genuai Bidigo bomai po te dagego homu kolesaga iliyu, tama po wabo nigilaibao. Magi basowe, Genuai Bidigo bomogo sę elama, tama da Isip tǫde selama, odasa asai dao.  
\v 10 Tama tigidali kibu bede te tiali sogo pedalobode, te sogo dagego te nai tuao,” Mosesgo te po wai.   
\s1 Te gomunai wai ogwa dabe  
\p
\v 11 Te Mosesgo po ma weyu, te po wai, “Genuai Bidigo dage te Kenan dabego tǫba odasa paibao. Tama agai dagebolo me, te dagego waigo wai dabe, te dagego wąį dabe, augwalibolo me te tǫ maiabo po polobadu digi dąų wai dao.  
\v 12 Tama agai te tǫ dageba mabo sogo, tama dagego gomunai ogwa tigidali te dagego Genuai Bidiba mao. Tama tigidali kibu dabego gomunai wai, te me Genuai Bidigo naga dao. \x * \xo 13:12 \xt Luk 2:23\x*  
\v 13 Tiali goli, dagego te sipsip wai me deligo te donki gomunai wai ma dobola abelama, ofa ilao. Tiali goli, dagego te donki ma abelesiąyu da, teda dagego te donki dogoni togwao, isimainao. Tama dagego duga digi te gomunai ogwa wai dabe tigidali ma abelao.”   
\p
\v 14 “Tama nosali dagego ogwa dabego dagebolo te tiwai hanaluyu, te po tiwai waibao, ‘Te kolesaga page mena tama dawe?’ Tama dagego augwalibolo te po wao, ‘Da Isip bulude kalabus sę ebadi, tama Genuai Bidigo bomai sę mu elama, tama da Isip bulude selama, da odasa asai dao.  
\v 15 Tama hasia sogo Isip hani tuni bidigo homu kolesaga hasegelisiąyu, tama da tagala palobeo. Tiali goli, Genuai Bidigo te Isip dabego gomunai ogwa tigidali, me te augwaligo kibu dabe gomunai wai tigidali ela muai. Tama megi dago te kibu dabego gomunai wai te Genuai Bidiba ofa ebo dao. Tama tiali goli, dago te dena gomunai wai ogwa te augwali ma abelebo dao.’ Te po duga ogwa dabebolo wei ponao.  
\v 16 Dago te sę ebo te dago homugo ma koneama, te Genuai Bidigo bomogo aga digi da te Isipde selama, odasa asai. Tama te dago nogode me gesabidide muai nai tiwai, tama dago homu hodolobo sę ebo dao,” Mosesgo te Israel hani we bidibolo te po wai.   
\s1 God te pǫde me siade bidiyu, augwali dali pai  
\p
\v 17 Te Isip tuni bidigo te Israel we bidi hani tagala palai sogo, Godigo augwali te nabis badu te pęwadage tųdu te Filistia tǫ badu odasa pabeo. Magi basowe, Godigo te homu yai, ‘Te Israel hani augwali te pęwadage tųdu odasa peyu da, tama gasa hanigo augwali dali hwįainogo ebo suyu da, teda augwaligo homu hasegelama, te Isipba ma paibao. Tama te Israel hani augwaligo te tama tebo te eno hagela yai.’  
\v 18 Tama tibaso, Godigo augwali te ni meni yai te tǫ wa pai bulu, te badu bagulama soyu, tama augwali te mama yai tamu ąįba pedelai. Augwaligo te boi bidi dali hwįbo nai me tolama pai.   
\p
\v 19 Polobadu Josepgo te Israel hanibolo te po wai, “Nosali ena isama, tama Godigo dage Isipdu te Kenan tǫba ma oda sagasobode, tama dagego eno dili dabe dali selasa pao.” Tama Israel dabe augwaligo bomai po dąų weyu, tama tiaibao wai. Tama Mosesgo te Josepgo dili dabe selama, tolasa pai. \x * \xo 13:19 \xt Gag 50:25; Jos 24:32\x*  
\v 20 Tama Israel hani augwaligo te Sukot hanu tagalama, te masigi sane yai bulu Etam sesegeba pedelai.  
\v 21 Tama siade te Genuai Bidi te genuai bobage pǫ tomode bidali, tama aga polasa peyu, augwali pabo tų ola mawai. Tama hulide aga te genuai bobage sia dabe tomode bidiyu, tama aga polasa peyu, tama augwalibolo te sia ula ilai. Tama tibaso, augwali te siade me, hulide me pabo usu yaibao.  
\v 22 Tama sesemane sogo siade te pǫ te we bidi augwali pobadi te pǫ polasa pali, tama hulide me te sia polasa peyu, ula ela pai.   
\c 14  
\s1 Augwaligo te mama tamu ąį togwai  
\p
\v 1 Te Genuai Bidigo Mosesbolo te po wai,  
\v 2 “Te Israel dabe augwalibolo te po olama, tama augwali ma geasa peyu pelama, tama te tamu ąį sesegede te bulu Pihahirot, tede te bidabo pesage nigao. Te bulu te Mikdol dali, te mama tamu ąį dali, te si tomode elalubao, te Balsefon bulu dolo si dao.  
\v 3 Tama augwali tama tibaso da, teda te Isip tuni bidigo augwali soali gegelama suyu, te po waibao, ‘Te Israel hani augwali te pabo tų susiąma gegede biliyu, te masigi sane yai bulude olo bilama, tama augwaligo te badu tų taga pabo menio,’ tuni bidigo te homu yaibao.  
\v 4 Tama eno te tuni bidigo homu hasegelama, tama agai dage pobeasa asomainogo yaibao. Tiali goli, eno aga te agai ami bidi dabe aiyaba elaluama, tama eno genuai nogi te sę ebode saibao. Tama Isip dabe augwaligo koneama, ena digi ena Genuai Bidi Yawe dao,” Genuai Bidigo te po wai. Tama po obaso, te Israel dabe augwaligo te Genuai Bidigo po odolama, augwali ma geasa pai.   
\p
\v 5 Tama te Isip we bidi dabego te Israel bage augwali wi pali po te tuni bidibolo wai, tama aga dali, te gavman sę ebo ofisa bidi dabe dali, augwaligo homu hasegelama, tama augwaligo te po wai, “Magi baso dago te Israel hani augwali tagala palaliwe? Tama megi da, augwaligo dago sę egobeo. Dago dwai geda mu muai dao,” te po wai.  
\v 6 Augwaligo te po olama, tama tuni bidigo aga kibu hosgo kegela pabo hwįbo nai karis dali, te aga ami dabe augwali sai.  
\v 7 Tama agai te bidi sese hauwa 600 te wiegi yai polasa peyu hwįbo nai karis dabe dali, te ami bagego gasa karis tigidali me, te agai karis tonalubo ofisa dabe augwali me selama, pai.  
\v 8 Tama Israel hani augwaligo koneani, te Isip dabe augwali aiyaba elaluama, tama augwali dwagi yai homu dali pai. Tiali goli, Genuai Bidigo te tuni bidigo homu hasegelama, tama tuni bidigo augwali nosali polo pobeasa asai.  
\v 9 Te Isip ami bidi dabego karis elaluai, tama te ami bidi dabe augwali te hosde duayu, tama ami bidi dabe meba tǫdu pali, tama augwali tigidaligo te Israel hani augwali pobeasa peyu, pai. Tama augwali te Israel bage bidibo pąba pedelai, te mama tamu ąį sesegede, te Pihahirot bulu pąde, te Balsefon bulu dolo si elaluali, tede pedelai.   
\p
\v 10 Tama te Isip tuni bidi aga ami dabe dali, augwali pąba polo asobo te Israel hani augwaligo suai. Tama augwali wi mu eyu, tama Genuai Bidigo augwali tau somainogo i wai.  
\v 11 Tama augwaligo Mosesbolo te po wai, “Magi baso nago da e masigi yai kemi tǫ buluba olo odasa asaliwe? Nago da e olo bulude isimainogo yaliwe? Tama da te Isip tǫde bidibadi isigi sogo da, te usu igi dao. Te Isip bulude elalubo gų page te da usu igi dao.  
\v 12 Dago te Isip taga soasiąbadi, tama dago nagebolo te tiwai sę pedelaiba, te po walio. Tama dago te po wai, ‘Da tagalama, da ede bidimainao, tama da te Isip dabego olo sę bidi bidimainao,’ te po wai. Tama da sę olo mu naga igi dao. Tama tiyu, da e olo masigi naga yai bulude isibo dwaibao.” Augwaligo te po wai.   
\p
\v 13 Tama Mosesgo augwalibolo te po wei ponoyu, te po wai, “Wibo tagalao. Bomonama dolaluyu, tama megi Genuai Bidigo dage tau selama, tigidali sę ebo suaibao. Tama megi dagego te Isip dabe subo, tiali goli nosali dagego augwali munu ma sugobeo.  
\v 14 Odao, Genuai Bidigo dage tau siyu, hwįaibao. Tiali goli, duga digi magi sę me elamuo. Dagego pedauwali dąų naga wao,” wali.   
\p
\v 15 Tama Genuai Bidigo Mosesbolo te po wai, “Magi baso nago ena i wabo sę ebawe? Te Israel dabe augwalibolo te po weyu, augwali pomainao,” te po wai.  
\v 16 “Tama nago dono ugwaba selama, tama te tamu ąį usu sao. Tama te wę si badu peda pelama, tama wa pai tǫ pedelama, tama Israel dabe augwali te tomodu pelama, te u badu pedalomainao.  
\v 17 Tama eno te Isip bage augwaligo homu kolesaga te homu tomoba masigi sąwai bidigo homu tiwai ilama, tama augwaligo dage Israel dabe wali pobasa asaibao. Tama eno te tuni bidi aga karis dabe dali, me te hosde duawali ami bidi dabe tigidali, augwali aiyaba elaluama, tama eno te sę yalide te eno genuai nogi saibao.  
\v 18 Tama eno te Isip dabe aiyaba elalubaso, tama augwaligo homugo ena digi te ena Genuai Bidi Yawe dao,” agai te po wai.   
\p
\v 19 Te Godigo Ensel Mobo Bidi te Israel hani dabe polasa pabo bidi, tama augwali tede tagalama, aga augwali nosali pai. Tama te Israel dabe pabo tedu polasa pabo pǫ, te me geasa te augwali tudi badu ma doligi sai.  
\v 20 Tama te sogo hulide te pǫ te Isip dabe dali, te Israel dabe dali, augwali tomode dąį tiwai elaluai. Tama te pǫgo te Isip dabe augwali bidibo badu te be hulia sai mu elaluai. Tiali goli, te pǫgo te Israel dabe bidibo digi, te badu te ula elaluai. Tama tibaso, te sogo hulide te Isip dabe augwali te Israel hani pąba pabo te usu ebeo.   
\p
\v 21 Tama Mosesgo nogo ugwaba selama, tama tamu ąį hulide usu sai, tama Genuai Bidigo bomai wali te sia ge pedalobo badu asiyu pedelali, tama te waligo te tamu ąį te sia ponobo tiwai edubadi, tama be posai. Tama waligo te tamu ąį ma sela sąbode, tama tamu ąį tomode si peda pai.  
\v 22 Tama tomode tǫ tigidali wa pai, tama Israel dabe augwali tedu uba pai. Tama te tamu ąį si dali si badu te be daga tiwai dolaluai. \x * \xo 14:22 \xt 1 Ko 10:1-2; Hib 11:29\x*   
\p
\v 23 Tama tigidali Isip ami bidi dabe augwaligo te Israel dabe elainogo wali pobasa peyu, augwali me te tamu ąį tomodu pai. Te hos dabe, me te karis, me te hosde dua yali ami bidi dabe, tigidali hodobo pai.  
\v 24 Tama Genuai Bidi te bobage pǫde me te siade bidiyu, tama te be posobo pąde agai te Isip ami bidi aiyaba tonono bilama, tama agai augwaligo homugo kolesaga te polobo bidigo homu tiwai ilama, tama augwali midigi dwai mu yai.  
\v 25 Genuai Bidigo te augwaligo karis nadoba te tǫde dąų ilali, tama te karis dabe bomonama uda wainogo yali usu ebeo. Tama te Isip dabego te po wai, “Odiąo. Te Genuai Bidi Yawe aga hani Israel augwali tau siyu, da dali hwįbao. Da polo wi pinao. Dago augwali polo taga pinao,” wali.   
\p
\v 26 Tama tibaso, Genuai Bidigo Mosesbolo te po wai, “Nago nogo ugwaba selama, te tamu ąį usu sao, tama te ąį ma asiyu, te Isip ami bidi dabe dali, me te karis, me hos dabe me, augwali te ąįgo mesega sagasaibao,” wali.  
\v 27 Tama Mosesgo nogo ugwaba selama, te tamu ąį usu sali, tama be posobode te ąį ma asiyu, tama te polobadu elaluali tiwai ma yai. Tama te Isip dabe augwali wi pabo usu sali, tiali goli augwali usu meni yai, magi basowe, Genuai Bidigo augwali tigidali te tamu wę tomoba popogolo pai.  
\v 28 Tama te Isip tuni bidigo ami bidi dabe augwali te Israel hani wali peyu, te tamu wę tomoba pali bage, te wę ma asiyu, te Isip ami bidi dabe augwali mesega sai. Tama agai te ami dabe tigidali, me te hos, me karis dabe, augwali dali agai te węgo mesegelali, tama deli me bidibeo. Tigidali isai.   
\p
\v 29 Tiali goli, te sę pedalisiąbadi, te Israel dabe augwali te tǫ wai digi pali, tama te wę te be daga u badu me e badu elalubo tiwai yai, tama augwali pelama, te wę u badu hasia sabolai dao.  
\v 30 Tama te sogo Genuai Bidigo te Israel dabe te Isip dabego nogode ma dobola sai, tama Israel dabe augwaligo te Isip isai bidi dabe te wę sesegede munalua pai suai.  
\v 31 Augwaligo te genuai sę Genuai Bidigo eyu, te Isip dabe aiyaba elalubo suai. Tama Israel we bidi augwali wi elama, Genuai Bidi dologode bidiyu, tama augwaligo bomo yai homu agade dąų weyu, tama aga sę bidi Moses dali tiwai.   
\c 15  
\s1 Mosesgo tęąbi po  
\p
\v 1 Tama te sogo Moses dali te Israel dabe augwaligo tęąbi po me deli te Genuai Bidibolo e tiwai tęąbi wali, “Megi te eno Genuai Bidi Yawebolo tęąbi waibao, magi basowe, agai te genuai wąbi mu hwįnama, tama tede genuai wiegi yai nogi sai dao. Agai te hosde duawali bidi dabe dali, te hos dali, augwali te tamu ąį tomoba sąwai. \x * \xo 15:1 \xt Ped 15:3\x*  
\v 2 Genuai Bidigo digi ena bomo ilali, tama eno tęąbigo aga nogi ugwaba saibao. Agai ena ma dobola sali, aga da te eno God mu dao, tama eno aga nogi ugwaba sobao. Tama aga te eno ayago God, tama agai genuai nogide eno tęąbi po waibao. \x * \xo 15:2 \xt Tib 118:14; Ais 12:2\x*  
\v 3 Tama Genuai Bidi aga te boma pai ami bidi mu dao. Genuai Bidi Yawe naga te aga nogi dao.  
\v 4 Agai te Isip tuni bidigo ami bidi dabe dali, te hwįbo nai karis dabe dali, augwali te tamu ąįba sąwai. Tama te tuni bidigo ami bidi dabego polasa pabo bidi kapten te wę tulama, tama te mama tamu węde isai dao.  
\v 5 Genuai węgo augwali mesegai, tama augwali aiyaba mu dulama, te kemi masigi tiwai yai.”   
\p
\v 6 “Genuai Bidi, nago dolo nogogo bomo genuai elalubao, tama agai te boi bidi ągąlama, tama augwali mu mia sąwai.  
\v 7 Te nago genuai bomogo digi nago naga boi bidi augwali aiyaba elaluai. Nago sębę te sia tiwai pedaliyu, tama augwali te wa pai nosa tiwai siago ulai.  
\v 8 Nago te bomai wali hodolai. Tama waligo te wę bo ugwadu ilali, tama wę te obo tiwai dolo dolaluai. Tama aiyadu mu elaluali tamu wę dila pai pedelai.”   
\p
\v 9 “Te boi bidi dabe augwaligo te po wai, ‘Dago augwali pobelama, tama augwali dąų waibao. Tama dago augwaligo wiegi wiegi yai nai dena hanibolo dobola saibao. Tama tigidali nai dago sainogo yali nai te dago siyu naga yaibao. Tama dago augwali dali te poapi ge hwągo hwįnama, tama dena bomogo digi te dago augwali dolaibao.’”   
\p
\v 10 “Tiali goli nago mobo deli sogo naga ponani, tama tamu ąįgo Isip dabe mesega sai. Tama augwali aiyaba tomoba mu te tamu wę tomoba masigi dulubo tiwai yai.”   
\p
\v 11 “Genuai Bidi Yawe, mena gasa god bidibo te nago bomo tiwai dawe? Me deli menio. Nage te polalubo tuni bidi te nage ugwadu tama tigidali wiegi yai tedali mu dao. Tama niwai bidi te nage dali usu tiwai dawe? Me menio. Nago te bidigo isąwai bomai sę eyu, tama genuai sę ebaso, te we bidi augwali nagede wi mu ebo dao.  
\v 12 Nago dolo nogo dodolobode tama tǫ dedage elama, tama te boi bidi dabe augwali te tǫ dedagego dalai.”   
\p
\v 13 “Tama nago da homu dene eyu, tau sabo silisiąbo kolesaga eyu, tama nago da ma selama, tama nage polasa peyu, da odasa pai. Tama nago bomogo digi da pabo dodolama, tama nago da te naga digi bidainogo yali wiegi yai buluba odasa pai.  
\v 14 Tama meba tǫde bidibo bage augwaligo te sę yali po odolama, tama augwali wi mu eyu, tama augwali noma saibao. Tama te Filistia bage augwaligo me te po odolama, wi mu yaibao.  
\v 15 Tama Idom tǫde bidibo genuai bidi augwali wi mu yaibao. Tama Moap bomai bidi dabe augwali didibili mu yaibao. Tama Kenan dabe augwaligo bomo te olo wę ayana pabo tiwai yaibao.  
\v 16 Genuai Bidi, nago genuai bomo augwaligo sulama, tama genuai wigo augwali mesegelama, tama augwaligo magi sę me deli yabo usugobeo. Augwali te ni tigi tiwai, olo naga dolalubadi, tama naga we bidi da ela soala silibo usu yaibao. Genuai Bidi, nago da Isipde ma sela asaligo tama da olo bugagia bidaibao.  
\v 17 Tama nago da odasa asiyu, te da naga bulu dude bugagia dualama bidimainogo yaibao. Tede te naga digi naga be sęwai dao, te bulu nago nogogo digi bugagia dodolama muai dao.  
\v 18 Tama Genuai Bidi nage tuni bidi sesemane sogo bidada paibao.” Moses agai te Genuai Bidi Yawebolo te tęąbi po wai.   
\s1 Miriamgo tęąbi  
\p
\v 19 Te mama tamu ąį te tǫ wa tiwai pedelai tiwaidu tama te Israel dabe pelama, u badu pedelalio. Tiali goli, Isip tuni bidigo ami bidi dabe dali, te hos dali, te karis me, augwali te Israel dabe augwali wali asai, tama Genuai Bidigo te tamu ąį ma asomainogo ilama, tama augwali te węgo mesega sai.  
\v 20 Tama nosali, Genuai Bidigo po pusubo we Miriam, te Aron aga abe, agai te dwasianu kilikili wabo habili tiwai nai musik sali, te tigidali we dabego me te tobage habili tiwai nai musik selama, te Miriam pabo wali pai. Tama augwaligo te musik dabe eliyu, tęąbi eyu, tigi bebege eyu, danis me yai.  
\v 21 Tama Miriamgo tęąbi e tiwai augwalibolo wali, “Genuai Bidibolo tęąbi wao, magi basowe, agai genuai wąbi mu hwįani aiyaba elaluai. Agai te hos dabe dali, te hosde duayali bidi dali, augwali te tamu ąį tomoba sąwai dao.”   
\s1 Ha ebo wę  
\p
\v 22 Nosali Mosesgo Israel dabe augwali te mama tamu wę tagalama odasa pali, tama augwali te wa pai ni meni yai bulu Sur tedu pai. Tama augwali sela sogo te wa pai nai meni yai buludu pai, tama augwaligo wę me subeo.  
\v 23 Tama nosali augwali te ąį me elalubo bulu me Mara teba pedelali, tiali goli te wę dwai ha pedauwalide ebo wę, tama augwaligo te wę tuabo usugobeo. Te Mara nogi page e tiwai, te pedauwalide ha ebo nai dao.  
\v 24 Tama te we bidi augwaligo wado po weyu, tama po hauwa Moses dali weyu, tama augwaligo agabolo te tiwai po hanalu wai, “Te dago magi nai tuguwe?”   
\p
\v 25 Tama tibaso, Mosesgo gedu haluasa po bomonama, Genuai Bidibolo wali, tama Genuai Bidigo aga ni me deli ola mani. Tama Mosesgo selama, te węba sąwai, tama te wę wiegi yai pedelai, tama augwaligo tuabo usu yai.  
\p Te bulude Godigo te Israel bagebolo bomo yai po meba augwaligo te po wali pomainogo mawai, tama me agai augwali usu sela suali, te augwaligo aga wali asobowe naga suainogo yai.  
\v 26 Tama Godigo augwalibolo te po wai, “Dagego eno po bugagia odao, te dagego God Genuai Bidi, tama te sę dabe ena digi te dwagi yai sę da homu ebo, tama dagego eno bomo yai po tigidali wali piąo. Dagego tama tibaso da, teda eno dagebolo te haniani dwai gasi te Isip we bidi augwalibolo yali te tiwai dagebolo me magobeo. Ena digi ena te Genuai Bidi dao. Tama eno naga te dagego gasi dabe usu ma ilibo dao,” wali.   
\p
\v 27 Tama nosali Israel dabe augwali te Elim buluba pedelai. Tama Elimde wę ulu pedalobo dedage nogo si olama sągągo si, tama ni bidi sese sela olama nogo si, 70 ni det elaluai. Tama Israel dabe augwaligo augwa name ugwa be dabe te wę ulu dedage pąde dodolama, bidai.   
\c 16  
\s1 Israel dabe augwaligo tuabo nai mana me, ba me sai  
\p
\v 1 Te Israel hani te Isip taga soalama, tama pelama, tama te bulu Elim tede osogo bidali. Tama te Isip taga soalama, tama polua deli silama, te polua dei 15, te side tigidali Israel hani we bidigo te Elim bulu tagalama, tama te tǫ wa pai nai meni yai bulu nogi Sen tomoba pai. Te bulu te Elim de Sainai te bulu si tomode elaluai.  
\v 2 Tama augwaligo wado po, me te po hauwa te Moses de Aron si dali te bulude wai.  
\v 3 Augwaligo te bidi si dali te po wai, “Dago homugo Genuai Bidigo da Isipde eligi sogo da, usu igi dao. Polobadu da Isipde bidibadi, mena tiwai nai dabe, me hasa mi me, te dago homugo digi sai dao. Tiali goli, dage sigo da e nai meni yai wa pai buluba odasa asai, tama dage sigo homugo da nai sili bidilama, tama da tigidali isimainogo homu yai. Tama da Isipde bidibadi isigi sogo da, te wiegi yai mu igi dao,” wali.   
\p
\v 4 Tama Genuai Bidigo te po Mosesbolo wai, “Eno te bret dagalude tulalubode te dagego siąo. Tama tigidali deli deli side te we bidi augwali pelama, te side tuabo te nai sigi pao. Te eno augwali te kolesagade usu selama, tama augwaligo eno po wali pogowe, te eno koneainogo tiaibao. \x * \xo 16:4 \xt Jon 6:31\x*  
\v 5 Tama te nogo a olama me badu deli te side augwaligo si sogo tuabo nai sisilama, sela muao,” te po wai.   
\p
\v 6 Tama Moses dali Aron sigo te Israel we bidi hani tigidalibolo te po wai, “Tama pio te dagego bugagia koneagameo, Genuai Bidi aga digi dage Isipdu odasa asai dao.  
\v 7 Dagego wado po weyu, po hauwa aga dali wali, te agai odalio. Tama tibaso, kigamu te Genuai Bidigo digi aga bomo de ula dali si dagego sueibao. Da si te olo bidi naga dao. Tama magi pode dagego wado po da si dali obawe?”  
\v 8 Tama Mosesgo po ma wai, “Genuai Bidi aga digi dage te nai mi pio mabode te dagego tuagameo. Tama agai te nai bret kigamu te dagego homugo somainogo mawaibao. Magi basowe, dagego po hauwa aga dali wabo odai. Tiali goli, da si te olo nai tiwai dao. Dagego wado po te Genuai Bidi dali naga obao.”   
\p
\v 9 Tama Mosesgo Aronbolo te po wai, “Augwalibolo e po pusao, ‘Genuai Bidigo te dage tigidali we bidigo wado po wabo odalio. Tama tibaso, dage tigidali aselama, te Genuai Bidi pąba dolagasao,’ te po wao.”   
\p
\v 10 Tama Arongo te po augwalibolo wali, tama te sogo agai po odubadi, augwaligo te masigi kemi yai buluba tonono pai, tama polo tama Godigo genuai ula de bomo dali si, te augwali polasa pabo bobage pǫ tedu pedelai.   
\p
\v 11 Tama Genuai Bidigo Mosesbolo te po wai,  
\v 12 “Eno te Israel dabe augwaligo wado po wali po odalio. Tama te po augwalibolo wao, te pio mu augwaligo te nai mi tuyu, tama kigamu augwaligo te bret te augwa homugo sela tuao. Augwaligo te nai sela tuyu, tama augwaligo te tiwai koneyu, ena Genuai Bidi Yawe, ena digi ena te augwaligo God da, te augwaligo konemainao,” wali.   
\p
\v 13 Tama pio dwasianu ba hani hauwa augwali bidibo pesageba pągąna sagasai. Tama me te kigamu te hulide tulubage segeni yali ąį te augwali bidibo pesage nosa pąde elaluai.  
\v 14 Tama te wę wa paide, augwaligo suali, te dwasianu nai hauwa te tǫde munaluali, te ni yabe dabe pepeda pabo tiwai yai.  
\v 15 Tama Israel dabe augwaligo te nai suali, tama augwaligo konebeo. Tama augwaligo augwa hasibolo digi hanaluyu, te tiwai po wai, “Te magi nai dawe?” Tama Mosesgo augwalibolo te po wai, “Te bret Genuai Bidigo digi dagego tuabo nai mobao. \x * \xo 16:15 \xt 1 Ko 10:3\x*  
\v 16 Tama Genuai Bidigo tama po wai, ‘Dage deli deligo duga we wai dabe dali usu sisinao. Dagego te lita si sabo sene deli delide te duga ugwa bede bidibo we bidi wai puluba usu nama sao,’ wali.”   
\p
\v 17 Tama Israel dabe augwaligo tama tiwai, tiali goli mebago hauwa sali, tama mebago dwasianu naga sai.  
\v 18 Tama augwaligo te nai dagala subo sogo, te nai hauwa sali bidi dabego, te sene usu menio. Tama te dwasianu naga sali bidi dabego, te augwaligo nai habuge ebeo. Tama tigidaligo te nai tulama, tama augwali tabi pągąnama, tama augwali nasi me ebeo. \x * \xo 16:18 \xt 2 Ko 8:15\x*   
\p
\v 19 Tama Mosesgo augwalibolo te po wai, “Dagego nai meba te do tuaiba olama, me munamo dao.”  
\v 20 Tiali goli, mebago Mosesgo po odisiąma, wali pabe, tama augwaligo nai meba nosali side tuainogo muai. Tiali goli, kigamu dwasianu kigi dabe te naiba pągąna selama, tama kugumini dwai pedelai. Tama Mosesgo augwali dali wado yai.   
\p
\v 21 Tama te we bidi augwaligo tigidali sogo kigamu te nai augwa sabo usu tama sai. Tama giliga nanobo sogode, te sisąma tǫde munaluali nai, te wę tiwai pedelama, odolali sia sai.  
\v 22 Tama te namba 6 dei augwaligo nai si sogo tuabo usu siyu, te dwasianu sene si te deli deli bidi usu nama sai. Tama Israel tobolu bidi dabe aselama, Mosesbolo te sę yali po wagasai.  
\v 23 Tama Mosesgo augwalibolo te po wai, “Genuai Bidigo te po wai, do te olo bidibo side dao. Te Sabat side, tama te Genuai Bidigo olo bidibo side. Tama megi te dagego nai meba siade ulai wida, teda dagego uluiąo, tama meba te dagego sene ulainogo wida, teda te sene ulao. Tama te me badu munalubaso da, teda te do ulabo munalumainao,” te po wai. \x * \xo 16:23 \xt Sai 20:8-11\x*   
\p
\v 24 Tama augwaligo Mosesgo po wali pelama, te sogo nai meba ula tuali, tama augwaligo ulusiąwani nai meba te nosali side ulainogo muai. Tama do kigamu augwaligo suai, te nai damua pisąma, tama dwasianu kigi dabe me pedalobeo.  
\v 25 Tama te side Mosesgo te po wai, “Megi te Sabat side, te side olo bidiyu, genuai nogi Genuai Bidibolo mabode, tama megi dagego nai te dage bidibo pesage tǫde me gegegobeo. Tama dagego te do munaluali tubo nai megi tuagameo.  
\v 26 Tama te tigidali Sarere te a naga olama me deli tede, dagego te nai saibao. Tama a naga olama me badu nogo si, te side te olo bidibo side, tama te side te tǫde nai me munalugobeo,” wali.   
\p
\v 27 Tama agai te po wai goli, te nogo a olama me badu si te olo bidibo Sabat side te we bidi meba nai sigi peyu pai, tiali goli augwali odolali gegai. Nai me munalubeo.  
\v 28 Tama Genuai Bidigo Mosesbolo te po wai, “Nisu sogo dagego te dwai kolesaga ebo tagalama, tama dagego eno bomo yai po wali paibawe?  
\v 29 Bugagia odao, Genuai Bidi eno dagebolo te olo bidabo side te mobao. Tama tibaso, te dwasianu Sarere eno dagebolo eno te deli sogode te si sogo tuabo nai mawaibao. Tama, te nogo a naga olama nogo me si wabo side tigidali we bidi te ugwa bede bidiąo. Te bidi me deligo me, te wego me, te aga bidibo obo bolama, te buluba me pelamo dao.”  
\v 30 Tama te po obaso, nosali augwali te a naga olama me badu nogo si te side olo bidai.   
\p
\v 31 Tama Israel we bidi augwaligo te tǫ daide sali nai nogi mana wai. \f + \fr 16:31 \ft Te Hibru pogo te nai nogi mana te tiwai page elalubao, “Te magi nai dawe?”\f* Te nai mana dwasianu ge tedela yai, te nedu du me deli tiwai. Tama te nai pusu, te bisket hani mege dali gelama nigai tubo pusu tiwai yai. \x * \xo 16:31 \xt Nam 11:7-8\x*  
\v 32 Tama Mosesgo augwalibolo te po wai, “Genuai Bidigo te po wai, dago te tǫgo nigai dwasianu sene selama, te nai mana tede munama, te dago wąį te wai dabe augwalide muao. Nosali augwaligo te Genuai Bidigo da te nai meni yai bulude mani nai sumainu, te agai da Isip tagalama odasa asai dao,” wali.   
\p
\v 33 Tama Mosesgo te po Aronbolo wai, “Te tǫgo nigai sene me deli selama, tede te nai mana pągąnama, tama te sene te Genuai Bidigo gedude muao, tama te nosali ame nabo hani wai dabe augwaligo te sulama, konemainao.” \x * \xo 16:33 \xt Hib 9:4\x*   
\p
\v 34 Tama Arongo te mana muani sene te bomo yai po munalubo halobage eda badu muani, te Genuai Bidigo Mosesbolo wali po gilama tama tiwai.  
\v 35 Tama Israel dabe augwaligo te nai mana te kibu be bidi sese side 40 tuai. Tama te kibu be bidi sese si silama, tama nosali augwali te bulu tǫ Kenan teba pedelama, tama augwali te tǫde bidiyu, gi sę yai. \x * \xo 16:35 \xt Jos 5:12\x*  
\v 36 (Tama te mana nai senede muani sogo, augwaligo sene gasa tobage tiwai si elaluai. Te me sene deli te dwasianu usu tama, tama gasa te dwasianu sene nogo si usu yabo tiwai elaluai. Tama Arongo te tobage dwasianu sene te nai mana pągąnama, te Genuai Bidigo gedude muani.)   
\c 17  
\s1 Augwaligo wę masigide sai  
\r (Nam 20:1-13)  
\p
\v 1 Tigidali Israel we bidigo te wa pai bulu Sen tagalai. Genuai Bidigo te po obaso da, teda augwaligo te bidali bulu me tagalama, tama gasa buluba pelama, bidigi pidu geai. Tama nosali augwali te bulu Refidim teba pedelama, tede te bidabo pesage nigai, tiali goli te bulude te tuabo wę menio.  
\v 2 Tama tibaso, te we bidi augwaligo wado po Moses dali wai. Tama augwaligo te po wai, “Da wę mao. Da tuaibao.” Tama Mosesgo augwaligo po wei ponoyu, te po wai, “Magi baso dagego wado po ena dali obawe? Dagego homugo aga usu siyu, Genuai Bidigo bomo dagebolo ma ola momainogo ebawe?”   
\p
\v 3 Tiali goli, te we bidi augwali te wę nogonego mu isabo ąǫ ebaso, tama augwaligo po hauwa Moses dali wai. Augwaligo te po wali, “Magi baso nago da Isipde selama, da odasa asai dawe? Nago homugo da dali, te dago wai dabe me, te dago kibu dabe me, da wę menia selama, tama da isimainogo ebawe?”   
\p
\v 4 Tama tibaso, Mosesgo gedu haluasa po bomonama Genuai Bidiba te tiwai wai, “Te we bidi augwaligo masigi sąnama, tama ena ela muainogo ebao. Tama eno magi sę augwalibolo egowe?”   
\p
\v 5 Tama Genuai Bidigo Mosesbolo te po wai, “Te Israel tobolu bidi dabe meba selama, tama dage polasa peyu, te we bidi augwali nosali asomainao. Tama dage pabo sogo, te dono polobadu nago te wę Nailba elali, te dono me sela pao.  
\v 6 Tama ena te moni genuai masigi me deli daide ugwadu te bulu du Horep, tede ena dolaluaibao. Tama nage pąba aselama, te donogo te masigiba elama, tama wę te masigide pedelama, tama te we bidi dabego tumainao,” te po wai. (Te bulu du nogi Horep te gasa nogi me elalubao, te Sainai bulu du dao.) Tama te Israel tobolu bidi dabe augwaligo Mosesgo te tiwai sę ebadi, tama te masigide wę pedelama asobo suai.  
\v 7 Tama te bulu nogi augwaligo Masa wai, te nogi page “Usu sai,” tama me nogi Meriba, te nogi page “Wado po wai.” Magi basowe, Israel augwaligo wado eyu, tama augwaligo te po wai, “Genuai Bidi da dali bidibowe, ma meniwe?” Tama te dwai kolesagade augwaligo te Genuai Bidigo bomogo ebo sę usu sai. \x * \xo 17:7 \xt Nam 20:2-13\x*   
\s1 Israel dabe augwaligo Amalek dabe dali hwįai  
\p
\v 8 Tama nosali Amalek hani bidi dabe aselama, Israel dabe te Refidim bulude bidibadi hwįagasai.  
\v 9 Tama Mosesgo bidi me deli Josuabolo po weyu, te po wai, “Nago dago bidi meba usu selama, tama do dagego te Amalek dabe dali hwįgi pao. Tiali goli, ena da, te dwasianu bulu du bagede dolaluyu, tama Godigo enabolo te sela bilao wali dono te eno nogogo tolaluaibao,” wali.   
\p
\v 10 Tama Josuago te bidi dabe meba selama, te Amalek hani bidi dabe dali hwįgi pali, te Mosesgo agabolo te po wali gilama tama tiwai. Tama Moses dali, te Aron, me te Hur, augwali sela te dwasianu bulu duba holai.  
\v 11 Tama Mosesgo nogo ugwaba sabo sogo, te Israel ami dabego te Amalek dabe aiyaba elaluai. Tiali goli, agai nogo aiyaba elalubo sogo, te Amalek dabego te Israel ami dabe aiyaba elaluyu yai.  
\v 12 Tama nosali Mosesgo nogo dene eyu, boma pobaso, tama agai nogo ugwaba ma sabo usugobeo. Tama Aron de Hur sigo masigi me deli selama, tǫba munama, tama Moses te masigide dulaluai. Tama augwali si Moses pąde u badu, me e badu dolaluyu, tama augwali sigo te Mosesgo nogo ugwaba selama, tolaluai. Augwali sigo tolalubadi, sia ge dega sigi pai.  
\v 13 Tama Josua dali Israel dabe augwaligo te Amalek dabe augwali aiyaba elaluama, tama augwali mu dolai.   
\p
\v 14 Tama nosali Genuai Bidigo Mosesbolo te po wai, “Te po te buku me delide asęnama, te we bidi augwaligo homude konealumainao. Te po e tiwai, ‘Genuai Bidi eno te Amalek dabe mu silaibao silama, tama te we bidi dabego homugo augwali munu me ma konegobeo.’ Tama nago te po Josuabolo me mao,” te po wali. \x * \xo 17:14 \xt Bom 25:17-19; 1 Sml 15:2-9\x*   
\p
\v 15 Genuai Bidigo po wai digi, tama Mosesgo te Genuai Bidibolo nai ula maiabo alta sai me deli nigilama, tama te alta sai yali nogi e tiwai wai, “Genuai Bidi aga eno te nide walama, ugwaba sabo plak ugwa tiwai dao.”  
\v 16 Tama Mosesgo te poali nogide te po wai, “Te ugwaba sagalobo plak ugwa tiwai eyu, tama eno ena nogo si ugwaba selama, tama Genuai Bidi aga bidibo digi teba gedu haluasa po te hwįbode wai dao. Magi basowe, Genuai Bidi agai sesemane sogo te Amalek hani bidi dabe dali hwįaibao,” Mosesgo te po wai.   
\c 18  
\s1 Jetro aselama, Moses suagasai  
\p
\v 1 Jetro aga te Midian dabego pris bidi, tama Mosesgo wąį, aga we aga aya. Tama agai Godigo tigidali sę Moses dali, me te Israel dabe dali me yali po odai. Tama me agai te Genuai Bidigo aga we bidi Israel dabe te Isipde bidibadi dobolama, odasa soainogo yali kolesaga, te po me odai.  
\v 2-3 Tama Jetro aselama, Moses suagasai. Polobadu Mosesgo we Sipora te aga aya pageba ma osogo tagala palai. Tama megi da, Jetrogo te Moses we Sipora dali, aga ogwa si badi, augwali odasa aselama, aga bidibo digi pedelai. Te wai sigo nogi e tiwai, Gersom, me Elieser. Polobadu Mosesgo te po wai dao, “Ena gasa badu bidi, tama ena gasa tǫde bidibao.” Tama agai gomunai ogwa nogi e tiwai nogi yai, Gersom dao. \f + \fr 18:2-3 \ft Te Hibru pogo te wai nogi Gersom wabo dogoni te “Gasa tǫde bidibo,” po wabo dogoni tiwai si pąde dao.\f* \x * \xo 18:2-3 \xt Sai 2:21-22; Tpi 7:29\x*  
\v 4 Tama nosali agai te po wai, “Eno ayago God agai ena tau selama, tama Isip tuni bidigo ena ela mubeo.” Tama tiyu, agai tomo ogwa nogi Elieser po wai. \f + \fr 18:4 \ft Te Hibru pogo te wai nogi Elieser te page elalubao, te “Eno God aga ena tau sabo bidi dao.”\f*   
\p
\v 5 Tama Jetro te Mosesgo we dali, te aga ogwa si me, augwali aselama, te masigi kemi bulu te Godigo bulu du pąba sabolali, te Mosesgo pesage nigilama bidibo digi dao.  
\v 6 Tama Jetrogo po Mosesbolo ola toloyu, te po wai, “Ena Jetro, te naga wąį dali, te naga we me, te naga ogwa si me, da asobao.”   
\p
\v 7 Tama Mosesgo te po odama, tama agai Jetro tiąba tųdu pai. Tama Mosesgo mage basi gulama, tama nosali agai aga sebedi usai. Tama augwa si bidabo po dabe olama, tama nosali augwali Mosesgo ugwa be tomoba pai.  
\v 8 Tama Mosesgo Jetro dali te Genuai Bidigo Isip tuni bidi dali yali sę po tigidali wali, me te Isip we bidi dabe dali me, te Israel dabe tau selama tiai. Tama agai Jetro dali me te dwai sogo te sęgę te tųde augwaliba pedelali po wali, tama Genuai Bidigo augwali tau selama bugagia bidai.   
\p
\v 9 Tama Jetrogo te wiegi yai sę Genuai Bidigo te Israel dabe augwali te Isip dabego nogode ma sainogo yali po odolama, tama aga wiegi yai homu mu yai.  
\v 10 Tama agai te po wai, “Genuai Bidi Yawego nogi ugwaba sao. Agai dage te tuni bidigo nogode me, te Isip we bidi dabe augwaligo nogode me, te dage ma sai. Agai aga we bidi dage tau selama, tama dage te dwai kalabus sęde bidali tagalai dao.  
\v 11 Tama megi eno koneani, Genuai Bidigo te gasa god dabe tigidali aiyaba elaluali, magi basowe, te Isip dabe augwaligo hagoma homu eyu, tama augwaligo dwai sę dagebolo yai baso, tama Genuai Bidi agai dage augwaligo nogode ma dobola sali.” Te po wai.  
\v 12 Tama Jetrogo ofa yabo nai me deli sela asali, te siaba tigidali ulama, tama Godibolo mawai. Tama agai meba gasa ofa me te Godibolo yai. Tama Aron dali, te tigidali Israel genuai bidi dabe me aselama, tama Moses aga wąį dali te Godigo gedude nai tuai.   
\s1 Augwaligo po dodolobo bidi meba sa muani  
\r (Bom 1:9-18)  
\p
\v 13 Te nai tula silama, tama te sogo nosali Moses dualama, te Israel we bidi augwaligo po tų odai. Tama we bidi hauwa Moses bidibo digi kigamu aselama, tama bidada pidubadi, pio mu igi pai.  
\v 14 Jetrogo Mosesgo te sę dabe eyu, te we bidi dabe augwali tau sabo sulama, tama agai Mosesbolo te tiwai po wai, “Tegoba. Nago te we bidi tau sabo sę hauwa mu ebao. Magi baso nagaduba deligo naga nago te po tų odobo sę dabe ebo dawe? Suao, tigidali we bidi kigamu nage dali po wainogo asali, tama augwali dolayu, tonalubadi, be pio ebao. Magi baso nago tama tibawe?” wali.   
\p
\v 15 Tama Mosesgo agabolo te po wai, “Te we bidi dabe augwaligo te mena sę te Godigo augwaligo emainogo ebo sę te koneainogo tiwai. Tama tiyu, augwali ena bidibo digi asobo dao.  
\v 16 Tama me sogo bidi me aga si magi nai me delide wado ebo sogo, te bidi si ena bidiboba aselama, tama eno augwali sigo po dagalama, tama te po isilaibao. Tama augwaligo wado ebo page tede eno augwalibolo te Godigo bomai po ola mabo dao,” wali.   
\p
\v 17 Tama Jetrogo agabolo te po wai, “Moses, nago te sę ebo te wiegi yai tų wali pabeo.  
\v 18 Te sę genuai mu dao. Nagaduba deligo naga ebo usugobeo. Nago naga te sę eyu da, teda nago tigi hagela mu eyu, tama te we bidi augwali me hagela yaibao.  
\v 19 Eno po megi odao. Eno wiegi yai tų me deli te nago sę yabo po nagebolo eno te po waibao. Nago te po odoyu da, te God nage dali bidaibao. Tama nage te we bidi augwaligo polalubo bidi te Godigo gedude te augwaligo hwįabo po weyu, wado po wabo dabe, te po nago agaba sela pabo bidi bidiyu da, teda usu yaibao.  
\v 20 Tama nago augwalibolo te Godigo bomai po tigidali ola mayu, tama augwaligo wali pabo tų me, te sesemane sogo te sę yabo kolesaga, te po augwalibolo wao.  
\v 21 Tiali goli, me nago te po page koneai bidi meba sa munama, tama augwaligo te we bidi tonaluabo bidi bidimainao. Tama mebago te we bidi bidi sese hauwa 1,000 mu tonaluyu, tama meba bidigo te bidi sese a naga 100 we bidi tonaluyu, tama mebago te 50 we bidi tonaluyu, tama mebago te nogo si we bidi naga tonalumainao. Nago te God dologode bidibo bidi dabe augwali sa munama, tama te tiwai bidi dago homu augwaliba dąų olama, tama meba bidi dabego dwai sę yali te monego augwali abelainogo ebo usugobeo.  
\v 22 Tama te bidi dabe augwali te we bidigo po dodolobo bidi pedelemainao. Augwa digi te dwasianu po dabe te po tųde dodolomainao. Tiali goli, augwaligo genuai sę yali po tų te nageba sela aselama, te nago te po dodolomainogo yaibao. Tama augwaligo nage tau siyu, tama te sęgę ebo sę toloyu, tama nago sę dene kuna egobeo.  
\v 23 Te sę dabe eno nagebolo yao olama po wali, te Godigo digi te sę nago emainogo homu yai. Tama nago eno po wali peyu da, teda te sęgę nage tigi hagela iligobeo. Tama dagego te we bidigo yali sę, me te we bidigo po dodolama, tama augwali homu dua nagame elama, tama augwa buluba ma pelawaibao,” Moses aga wąįgo te po wai.   
\p
\v 24 Tialima Mosesgo te wiegi yai po Jetrogo wabo po odolama, tama tiwai.  
\v 25 Tama agai te Israel dabe augwali tomode te po page koneai bidi dabe augwali sa munama, tama augwaligo te bidi sese hauwa 1,000 we bidi, me te we bidi 100, we te 50, we te 10 we bidi meba tama tonaluabo bidi nigilai.  
\v 26 Tama sesemane sogo augwaligo te po tų odobo sę tonaluai. Augwa digi te dwasianu sę yali sęgę dabe dodolali, tiali goli augwaligo genuai sęgę yai sę yali te Moses pageba pelama, tama aga digi te sęgę dabe dodolai.   
\p
\v 27 Te po dabe dodolobo sę tama dodolama, tama nosali Mosesgo aga wąį nogo menama, tama Jetro aga bulu tǫ pedaiba ma pai.   
\c 19  
\s1 Israel dabe augwali aselama, Sainai bulu duba bidagasai  
\p
\v 1-2 Te Israel dabe augwaligo te bulu Refidim tagalama, ma soali. Tama solama, tama augwaligo te bulu Isip taga soali sogo gagalama nedeyu, tama polua si mu silama, te polua sela wabo te dei delide, te sogo naga augwali te nai meni yai wa pai bulu Sainaiba sabolai. Tama augwali bidabo pesage te bulu du Sainai pąde nigai.  
\v 3 Tama Moses te bulu duba God dali po miainogo holai.  
\p Tama Genuai Bidi bulu dude bidiyu, Moses i olama, agabolo te Israel dabe augwalibolo maiabo po meba wali, te hani dabe te Jekopgo wąį dabe dao.  
\v 4 Genuai Bidigo te po wai, “Dagego eno yali sę te Isipde suai dao. Tama eno dage te ba kemodagego te aga gesi noma gǫų te bogo ugwadu daide sela soabo tiwai elama, tama dage eno e buluba odasa aselama, tama megi dage ena dali bidibao.  
\v 5 Tama dagego megi eno bomai po dąų olama, tama eno po mu wali peyu da, teda dage eno gasagi yai tedali we bidi hani pedelaibao. Tigidali tǫ me, tigidali we bidi me, te eno naga, tiali goli eno dage sa munama, hagea siyu, tama dage ena we bidi mu bidaibao. \x * \xo 19:5 \xt Bom 4:20; 7:6; 14:2; 26:18; Tai 2:14\x*  
\v 6 Tama dage eno te pris sę ebo tuni we bidi hani bidibo tiwai yaibao. Tama dage te eno tedali we bidi mu bidaibao.” Genuai Bidigo Mosesbolo te po te we bidi dabe augwalibolo mao wai. \x * \xo 19:6 \xt Ped 1:6; 5:10; 1 Pi 2:9\x*   
\p
\v 7 Tama Mosesgo te bulu du tagalama, tama pelama, te Israel dabe genuai bidi nigilali bage augwali sisinama, tama Genuai Bidigo agabolo te bulu dude wali po tigidali augwalibolo wai.  
\v 8 Tama tigidali we bidigo te po wai, “Dago te sę dabe tigidali te Genuai Bidigo po wali gilama te sę yaibao.” Tama Mosesgo te we bidigo po te Genuai Bidibolo wagi pai.   
\p
\v 9 Tama Genuai Bidigo Mosesbolo te po wai, “Odao, te genuai husugu yai pǫde bidilama, tama ena nageba asiyu, tama te we bidi augwaligo te eno nage dali po mibo odolama, tama sesemane sogo augwaligo nago poba homu dąų omainao.” Tama Mosesgo Genuai Bidibolo te we bidi augwaligo wali po wai.   
\p
\v 10 Tama Genuai Bidigo Mosesbolo te po wai, “Nago te we bidi augwalibolo te po wagi pelama, megi de do si te augwaligo homu kolesaga me dodolama, tama ugwa wę tedelama, tama augwaligo enaba lotu po wainogo sisilaluao.  
\v 11 Augwaligo do digi sisi yao. Te duba sogo ena dulama, tama ena te Sainai bulu dude bidibadi, tama te we bidi augwaligo ena sumainogo yaibao.  
\v 12 Nago dąį mubogo te bulu du bagulama, tama te we bidi augwali te dąį tomoba pigimio. Tama augwalibolo te po olama, tama augwali bugagia dua bidiyu, tama augwaligo te dąį bolama, tomoba pelama, te bulu duba hologio. Tama augwali te bulu du pąba pigio. Tama niwai bidi me deligo te dąį bolobaso da, augwaligo aga ela muao.  
\v 13 Tialima, augwaligo aga elebo sogo augwaligo nogogo aga eligio. Te augwaligo masigi sąnama eliyu, me te enigo aga enao. Te bidigo, me ma te kibugo te dąį bolobaso da, teda dagego aga te kolesaga elama elao. Te dage deli sogo te bulu duba holabo sogo elalubao. Tama te sogo dagego te bu wabo nai nogi biugel te bu wai da obaso da, teda dage piąo,” Genuai Bidigo te po wali. \x * \xo 19:13 \xt Hib 12:18-20\x*   
\p
\v 14 Tama Mosesgo te bulu du tagalama, dulama, tama te we bidi augwalibolo te lotu po wabo sisi iyąo te po wai. Tama augwaligo agai po wali pelama, augwa ugwa dabe wę telawai.  
\v 15 Tama Mosesgo augwalibolo te po wali, “Dagego do digi sisi ela muao. Tama megi e side gagalama, do tama te sogo dage we dabe dali me pilamo dao,” wali.   
\p
\v 16 Tama bidama, te sela sogo wabo side kigamu, te genuai pǫ te bulu dude pedelali, tama te pǫ kulukulu olama, tama be sele ula pepeda pelama, tama bu wabo nai biugel gela genuai mu wai. Tama te bulu du sesegede pesage nigali we bidi dabe tigidali wi mu elama, tama augwali tigi didibili yai. \x * \xo 19:16 \xt Ped 4:5\x*  
\v 17 Tama Mosesgo augwali odasa te be mesalo buluba pelama, tama augwali te bulu du sesegede God dali deliba sisinai hagede dolalugi pai.  
\v 18 Tama Genuai Bidi te sia tomode bidilama dulali, tama te Sainai bulu duba bidagasali, tama genuai hanogo te bulu du tigidali mu mesega sai. Tama ugwaba holali hano te genuai sia mu dabo hano holobo tiwai mu yai, tama tǫ mali genuai mu te bulu dude pedelai. \x * \xo 19:18 \xt Bom 4:11-12\x*  
\v 19 Tama te bu wabo nai biugel gela wabo genuai eyu, tama genuai mu pedelai. Tama Mosesgo po Godibolo olama, tama Godigo pedauwalidu agai po wei ponobo odainogo yai.   
\p
\v 20 Tama Genuai Bidi dulama, te Sainai bulu du bagede bidiyu, tama agai Moses te bulu duba ugwa holomainogo aga i wai. Tama Moses te bulu duba ugwa holai.  
\v 21 Tama Genuai Bidigo te po agabolo wai, “Nage aiyaba dulama, tama te bomo yai po tigidali we bidibolo magi pao, tama augwaligo te dąį bolama, tama ena me suagasigio. Augwaligo te dąį boloyu da, teda we bidi hauwa isaibao.  
\v 22 Te pris dabe augwali ena pąba asobo bage, augwali me te augwaligo homu kolesaga dwai meda elalubo dabe geselama, tama augwali eno gedude wiegi yai pedelao. Ma, te kolesaga isąyu da, teda eno augwali dene ilaibao,” wali.   
\p
\v 23 Tama Mosesgo te po Genuai Bidibolo wai, “Te we bidi dabe augwali edaba me hologobeo, magi basowe, naga digi nago bomai po dabolo mawai. Tama da te bulu du sesegede bobegelama, tama dąį muai, tama dago te bulu du habu selebao,” te po wai.   
\p
\v 24 Tama tialima, Genuai Bidigo agabolo te po wai, “Te usu da, nage aba dulama, tama Aron aga selama, tama nage dali edaba holao. Tiali goli, te pris dabe, me te we bidi dali, augwaligo te dąį muani bolama, ena pąba me edaba holamo da po wao. Ma, augwaligo te dąį boloyu da, teda augwali eno dene ilaibao,” wali.   
\p
\v 25 Tama Mosesgo te po wabo odama, tama aga te we bidi dabe bidibo digi dulama, tama Genuai Bidigo agabolo mani po tigidali augwalibolo pusai.   
\c 20  
\s1 Godigo bomo yai habu po nogo si  
\r (Bom 5:1-21)  
\p
\v 1 Godigo te po wai,  
\v 2 “Ena digi ena Genuai Bidi Yawe, ena dagego God dao. Eno dage Isipde sali, te bulude kalabus sę ebadi, tama eno dage selama, odasa asai.”   
\p
\v 3 “Nago ena deli naga wali asao. Nago te tibo god me wali pelamo dao.”   
\p
\v 4 “Nago tibo god me nigigio, tama nago te dagalude me, te tǫde me, ma te wę tomode elalubo naigo me, te tǫ dologode elalubo naigo te gasa nai piksa noma me deli munu me nigilamo dao.  
\v 5 Nago te tibo godiba, me te noma bidiba kidu sugunama, lotu me wagimio, magi basowe, ena Genuai Bidi Yawe te ena nago God, tama ena te tibo godigo hasegelemainogo ebo usu me egobeo. Mu menio. Tede eno hagela homu mu ebo dao. Tama ena hagela mu homu ebo we bidi dabe, augwaligo te naide magi sę yai elalubaso, te eno augwali dene iliyu, tama augwaligo wai hani sela, me me si me si nosali pedelabo hani, augwalibolo me te mabo dene tiwai ilaibao. \x * \xo 20:5 \xt Sai 34:17; Prs 19:4; 26:1; Bom 4:15-18; 27:15\x*  
\v 6 Tiali goli, ena godolo homu elama, tama eno bomai po tigidali wali pabo we bidi bidibaso, teda eno augwali me godolo eyu, te augwaligo wai dabe hauwa 1,000 mu nosali pedalobo hani me, te eno augwali dali wiegi yai homu eyu, augwali eno godolo mu yaibao, tama te kolesaga ebo siligobeo.” \x * \xo 20:6 \xt Sai 34:6-7; Nam 14:18; Bom 7:9-10\x*   
\p
\v 7 “Nago eno nogi God dwai odolali nogi egio, te nago Genuai Bidi dao. Magi baso meni, ena nogi olo nogi ebo we bidi te eno augwali dene ilaibao.” \x * \xo 20:7 \xt Prs 19:12\x*   
\p
\v 8 “Nago te Sabat side bugagia homugo koneama, te eno bodolu muani side dao. Te side te gasagi yai tedali elalumainao. \x * \xo 20:8 \xt Sai 16:23-30; 31:12-14\x*  
\v 9 Nago te Sarere deli tomode te sę ebo side te nogo a naga olama me badu nogo kibisa deli, te tama sogo sę ebo si elalubao.  
\v 10 Tialima, te a naga olama me badu nogo si wali, te me deli sogo te nago Genuai Bidi, God eno side dao. Te olo bidibo Sabat side nago sę me igio, tama nago ogwa dabe me, wegi dabe me, sę ebo we bidi dabe me, te nago sę ebo kibu dabe me, te nage dali bidibo gasa bulu tǫ bidi dabe me, dage tigidaligo te side sę me igimio. \x * \xo 20:10 \xt Sai 23:12; 31:15; 34:21; 35:2; Prs 23:3\x*  
\v 11 Nago te tama tiao, te magi baso meni, te a naga olama me badu nogo kibisa deli sogo naga Genuai Bidi eno te tǫ dagalu, me te tamu ąį, me te tigidali elalubo nai nigai. Tiali goli, te a naga olama me badu nogo si wali, te me deli sogo eno olo bidiyu, toma tuai dao. Tama tibaso, Genuai Bidi eno te Sabat side te gasagi yai side te me tedali mu ilai. Tama te side te eno bodolu dolo mu dao.” \x * \xo 20:11 \xt Gag 2:1-3; Sai 31:17\x*   
\p
\v 12 “Nago naga aya ida dologode bidama, tama augwaligo po wali pao. Nago tama tiyu da, te nage polo me isigobeo. Menio, te nage hauwa sogo te tǫde bidimainogo te God eno nago Genuai Bidi eno nage mawainogo homu ebo tǫde bidagameo.” \f + \fr 20:12 \ft [Bom 27:16; Mat 15:4; 19:19; Mk 7:10; 10:19; Lu 18:20; Ef 6:2, 3]\f*   
\p
\v 13 “Nago we bidi ela mugio.” \f + \fr 20:13 \ft [Gag 9:6; Prs 24:17; Mat 5:21; 19:18; Mk 10:19; Lu 18:20; Ro 13:9; Je 2:11]\f*   
\p
\v 14 “Nago bidigo sai we dali, me ma te we sai bidi dali, me dwai sę me igio.” \f + \fr 20:14 \ft [Prs 20:10; Mat 5:27; 19:18; Mk 10:19; Lu 18:20; Ro 13:9; Je 2:11]\f*   
\p
\v 15 “Nago nai wi sigio.” \f + \fr 20:15 \ft [Prs 20:10; Mat 5:27; 19:18; Mk 10:19; Lu 18:20; Ro 13:9; Je 2:11] [Prs 19:11; Mat 19:18; Mk 10:19; Lu 18:20; Ro 13:9]\f*   
\p
\v 16 “Nago tibo po olama, tama gasa we bidi olo po tų ela magio.” \f + \fr 20:16 \ft [Sai 23:1; Mat 19:18; Mk 10:19; Lu 18:20]\f*   
\p
\v 17 “Nago gasa bidigo be sulama, pesą eyu, godolo igio. Tama nago gasa bidigo we dali gedu igio. Tama aga sę ebo bidi, me te sę ebo we, me te bulmakau, me bidi duabo donki, me te agai tigidali gasa nai dabe me, te nago godolo eyu, sabo homu me igio.” \x * \xo 20:17 \xt Rom 7:7; 13:9\x*   
\s1 Te we bidi augwali Godide wi yai  
\r (Bom 5:22-23)  
\p
\v 18 Te we bidi augwaligo te pǫ kulukulu wabo, me te bu wabo nai biugel gela wabo me odai. Tama augwaligo te be sele te pǫ ula ebo ugwaba peyu, eda asiyu eyu, tama genuai hano te bulu dude pedalobo sulama, tama augwali wi mu yai. Tama augwali kilasa ma pelama, te bulu du digibulu gana dolalugi pai.  
\v 19 Tama augwaligo Mosesbolo te po wai, “Nago digi te po dabolo wabo, te dago te po odaibao. Tiyu Godigo po dabolo wabo si, te da isidalio,” wali. \x * \xo 20:19 \xt Hib 12:18-19\x*   
\p
\v 20 Tama Mosesgo augwalibolo te po wai, “Dage wibo, tagalao. Godigo dage usu naga sagasiyu asali, te dage aga dologoba pelama bidiyu, tama dagego dwai sę ma idali weyu, tiwai sę yai.”   
\p
\v 21 Tiali goli, te we bidi dabe augwali digibulu digi dolalubadi, Moses agaduba deli naga te genuai husugu yai pǫ pąba, te God bidibo digi pai.   
\s1 Alta nigibo bomai po dabe wai  
\p
\v 22 Tama Genuai Bidigo po Mosesbolo olama, tama agai te Israel dabe augwalibolo te po omainogo yai. Tama Genuai Bidigo te po wai, “Dagego koneani te tiwai, te ena dagalude bidiyu, te eno po dage dali miai dao.  
\v 23 Odiąo, dagego te tibo god dabe te gol me silvago nigilama, tama te nai dabeba lotu po me wagio. Dagego ena delibolo naga lotu po wao.  
\v 24 Tama dagego tǫ meba selama, tama eno alta nigao. Tama te altade dagego te sipsip dabe me, bulmakau me, te tigidali siaba ulama, siago dabo te ofa dali, te we bidi augwaligo ena dali dedeli homu yabo te ofa me yao. Tama dagego te tigidali bulude te dagego enabolo lotu omainogo, eno te sa mubo bulude dagego tama tibaso da, te ena aselama, dage bugagia wiegi yai mu ilaibao.  
\v 25 Dagego masigigo te alta me deli nigiyu da, teda dagego te bidigo togwali masigi sigio. Magi baso meni, dagego te sę yai ain tulgo te masigi togoyu da, tama te tiwai masigigo eno sę ebo te dolo egobeo. \x * \xo 20:25 \xt Bom 27:5-7; Jos 8:31\x*  
\v 26 Tama dagego te ugwadu daide te alta nigigio, te dagego ofa yainogo ugwaba holabo togobili nigigio. Tiyu yaide, dage te togobilidu ugwaba holobadi, tama augwaligo dagego hale hanialubo suidalio,” te po wai.   
\c 21  
\s1 Te olo sę ebo bidi tonaluyu negebo kolesaga po  
\r (Bom 15:12-18)  
\p
\v 1 Tama Genuai Bidigo po me wadolama weyu, te po wai, “Nago te po tų dodolabo bomai po te Israel we bidi augwalibolo mao.  
\v 2 Bidi me deligo te olo sę yabo bidi me deli te duga Israel hanide me abelebaso da, teda agai te bidigo sę te kibu be 6 kibu bede te sę yaibao. Tama te kibu be 7 wabo, te kibu be delide te aga pomainogo tagala palao. Tama hasia agai mone meba mobaso, te sigio. Mu menio. Aga olo mu pomainao.  
\v 3 Tama aga te we sisąbadi te sę ebo bidi pedelai baso da, teda agaduba deli naga pomainao. Tiali goli, hasia aga we bolo selama asai yai baso da, teda agai te sę ebo taga pabo sogo, te aga we dali sela pomainao.  
\v 4 Tama te bidi aga dali sę yali bidigo we menama, tama te wego wai dabe ame nai baso da, tama te we me, te wai dabe dali, augwali te aga sę yali bidi dali bidaibao. Tama bidi naga aga te sę yali tagalaibao.  
\v 5-6 Tiali goli, te sę bidigo te po weyu, ‘Eno ena genuai bidi godolo mu yali, tama ena we me wai dabe godolo elama, tama eno augwali taga pabo hagela homu ebao,’ te po obaso da, teda aga genuai bidigo aga te po tų dodolabo beba selasa pao. Tama te sę ebo bidi te be tųde elalubo pos nide dolalubadi, tama aga genuai bidigo te nel selama, te sę bidigo olo podolama, dedage nigilao. Tama aga te genuai bidigo sę olo ebo bidi bidada pelama, tama aga isiyu, te sę tagalaibao.” \x * \xo 21:5-6 \xt Prs 25:39-46\x*   
\p
\v 7 “Tama bidi me deligo masigi dabe sabo homu eyu, tama aga wegi muyu, Israel hani gasa bidigo te wegi abelebaso da, tama te kibu be 7 wabo kibu bede te genuai bidigo te we tagala palagio, tama agai te sę bidi dali hasia yali tiwai kolesaga naga yai.  
\v 8 Tama te bidigo te we te olo sę yabo we tiwai abelebaso da, tama hasia agai homugo te we sainogo yai, tiali goli nosali agai te we sabo homu isąyu da, teda te we aga ayago ma abelama, somainao. Te bidigo te we dali te doloba pai kolesaga ebe, tama agai te we te gasa bulu bidigo abelemainogo elamo dao.  
\v 9 Tama agai te we aga ogwabolo mawainogo homu eyu da, teda agai wiegi yai sę aga dali ilama, te aga wegi dali ebo kolesaga tiwai gilama te we dali me tama tiao.  
\v 10 Tama te genuai bidigo gasa we siyu da, teda agai te hasia sali te olo sę ebo we te bugagia tonaluao. Agai te we nai mayu, te ugwa me mayu elama, tama aga te we dali piyu, te agai polobadu yali tiwai gilama yao.  
\v 11 Tama agai te tobage sę sela te we dali isąyu da, teda agai te we pomainogo tagala palama, tama te wego agabolo te mone meba magio,” wali.   
\s1 Hwįbode dodolobo bomai po dabe  
\p
\v 12 “Bidi me deligo gasa bidi bomonama elai digi, tama te bidi isai baso da, teda dagego te bidi elali te bidi aga me ela muao. \x * \xo 21:12 \xt Prs 24:17\x*  
\v 13 Tiali goli, agai homugo te bidi mu ela muabo homu isąyu da, tiali goli agai geda muyu naga te bidi elama, nosali aga isimainogo yai, tama te bidi elali bidi aga wi pomainao, te bidigi wi pabo buluba, te eno dagebolo sa muaibao, tama tede aga bugagia bidaibao. \x * \xo 21:13 \xt Nam 35:10-34; Bom 19:1-13; Jos 20:1-9\x*  
\v 14 Tiali goli, bidi me deli agai gasa bidi dali sębę eyu, aga ela muabo homu ebaso da, tama nosali agai tama tiyu da, teda dagego aga digi ela muao. Te aga eno nai ulubo alta teba aselama, bugagia bidabo homu ebo tagaliyu, te dagego aga selasa pelama, aga ela muao.”   
\p
\v 15 “Mena bidigo aga aya, ma aga ida si elebaso da, teda dagego te bidi aga ela muao.”   
\p
\v 16 “Tama bidi me deligo aga abagi me deli wi selama, tama aga sę ebo bidi bidimainogo yai, ma agai gasa bidigo te bidi abelemainogo eyu da, teda dagego te tiwai kolesaga ebo bidi ma suyu, dąų olama eyu, tama aga ela muao.” \x * \xo 21:16 \xt Bom 24:7\x*   
\p
\v 17 “Niwai bidigo aga aya de ida si dali wado po weyu, dwai dolabo bomai po wabo bidi, teda te bidi aga dagego ela muao.” \x * \xo 21:17 \xt Prs 20:9; Mat 15:4; Mak 7:10\x*   
\p
\v 18-19 “Bidi me aga si wado po olama, tama bidi me deligo nogo sugunama, tama gasa bidi me elali, me ma masigi selama elali, tiali goli agai te bidi aga mu ela musiąyu da, teda dagego te bidigo yali dwai sę wei ponogio. Tama elama, tigi dolai bidi aga te betide pila munama, tama nosali aga dono tulama, be bulu badu bilibaso, teda te elali bidigo te mone wei agabolo mao. Te monego agai sę te tigidali sogo isąwani te usu nao. Tama te bidi elali bidi aga te bidi bugagia tonaluama tama, tama aga tigi usu ma ebo si te usu dao.”   
\p
\v 20 “Tama bidi me deligo wąbi selama, tama aga sę ebo bidi me, te aga sę ebo we me elama, tama aga te elali sogo dolo isibaso da, teda dagego te genuai bidi agabolo te dene mu ilao.  
\v 21 Tialima, te bidi ma te we te deli sogo, me ma si sogo bidilama, tama nosali aga isibaso da, teda dagego te aga genuai bidibolo dene iligio. Magi basowe, sę ebo bidi, ma te sę ebo we, te bidigo digi te aga sę dao, te abelai mone te olo hagawai baso, te aga sęgę dao.”   
\p
\v 22 “Tama bidi meba wąbi hwįyu, tama bidi me deligo te wai tabi elalubo we elali, tama te wai dolama, te wego te wai polo ame nani, tiali goli te wai ame nani ida te dolisiąbaso da, teda te we elali bidigo te we page bidigo wabo po odama, tama agai te dwai sę yali dodoluyu wei begelama, te mone mao. Tiali goli, po tų ebode te mone sabo po usu da po weyu bolo elama, tama nosali te we aga bidigo te mone sao.  
\v 23 Tiali goli, we ma aga wai tigi dolai baso da, teda dagego te bidibolo me te tiwai kolesaga naga wei ponao. Ma, te we isai yai baso da, teda dagego te we elali bidi aga ela muao.  
\v 24 Tama te gedu, me ma te kele, me te nogo sągą dolai baso da, teda te tiwai kolesaga naga te aga dali wei ponao. \x * \xo 21:24 \xt Prs 24:19-20; Bom 19:21; Mat 5:38\x*  
\v 25 Tama me ma, agai te we siago, me ma te we tigi dolama, te keni me te keloago elai baso da, teda dagego te bidibolo te tiwai sę naga yao.”   
\p
\v 26 “Tama bidi me deligo aga sę ebo bidi ma te aga sę ebo we te geduba elama, tama te gedu dolobaso da, teda aga te bidigo sę bidi ma, te sę ebo we ma, te sęde bidigio. Te bidigo te genuai bidi taga pao, te aga gedu dolali dali wei si ponao.  
\v 27 Tama agai te sę ebo bidi me te sę ebo we me te elali digi, tama aga kele degebaso da, teda agai te sę ebo aga tagalao, te aga kele degali dali wei si yao.”   
\s1 Bulmakaugo ebo kolesaga dodolabo po wai  
\p
\v 28 “Tama bulmakaugo te bidi me deli, ma te we me, te agai gąųgo ela mubaso da, teda te bulmakau dagego ela muao. Tiali goli, dagego te bulmakaugo mi tugio. Tama dagego te bulmakau aga aya po tų ela magio.  
\v 29 Tiali goli, te bulmakaugo te we bidi augwali te gąųgo eniyu ebaso, tama te we bidi augwaligo po bomonama te bulmakau page bidi dali wali digi, tama te bulmakau page bidigo te obo isąbaso da, teda dagego te tiwai kolesaga yao. Tama te bulmakaugo bidi me deli, ma te we me, ela mubaso da, teda dagego te bulmakau ela muyu, tama te bulmakau page bidi me ela muao.  
\v 30 Tiali goli, po tų ebode te po obaso da, agai te isali bidi ma te we te aga hanibolo te bulmakaugo dwai sę yali me te aga dali te si ma abelama, tama te mone aga hanibolo mao. Tama tibo si, te aga isigobeo. Agai aga digi bidibo ula ma abelemainao.  
\v 31 Tama te bulmakaugo te wai puluba, te ogwa me, te wegi me, elebaso da, teda te tiwai bomo yai po naga dagego wali piąo.  
\v 32 Tama te bulmakaugo te sę ebo bidi ma te sę ebo we elebaso da, teda te kibu page bidigo te monego K300, te sę bidi ma te sę we te aga genuai bidibolo te mone menama, tama dagego masigi sąnama te bulmakau ela muao.”   
\p
\v 33 “Tama bidi me deligo te tǫ dedage haluali nai sela sąwani, ma agai genuai tǫ dedage nigilama halusiąwai, tama bulmakau me deli, ma te bidi duabo donki, te dedageba tulaluama isibaso da,  
\v 34 teda te tǫ dedage nigali bidigo te kibu page bidi abelao. Tama te isali kibu aga somainao.”   
\p
\v 35 “Tama bidi me deligo bulmakaugo te gasa bidigo bulmakau ela mubaso da, teda te bidi si me bidigo te bidibo bulmakau te gasa bidigo abelemainogo elama, tama te bidi augwa si te mone selama, tama te isali bulmakau mi, te augwa si dobola sao.  
\v 36 Tiali goli, te bulmakaugo hwįbo bulmakau yai baso, te kibu page bidigo obo bugagia isąwai yai baso da, teda agai gasa bulmakau te isali bulmakau page bidibolo wei ponao. Tiali goli, agai te isali bulmakau te bidi aga somainao,” wali.   
\c 22  
\s1 Dwai kolesaga yali dodolabo bomai po dabe  
\p
\v 1 Tama Genuai Bidigo po dage wadolama weyu, te po wai, “Tama bidi me deligo te bulmakau, me ma te sipsip me te wi selama ela muyu, me ma agai te gasa bidigo abelemainogo yai baso da, teda dagego te kibu page bidibolo te nai wi sali bidi agai te bulmakau a naga sobadi, te sipsip me si me si sobadi elama, wei ponomainao.  
\v 2-4 Tama agai dolo ponomainao. Tiali goli, agai wei ponabo bulmakau me sipsip te meni baso da, te aga dagego te olo sę ebo bidi tiwai te gasa bidigo abelemainogo elama, tama te mone dagego selama, agai te wi sali kibu wei ponao. Tama agai te wi sali bulmakau, me sipsip, ma te bidi duabo donki, te nai dabe te agade elalubaso da, teda agai te nai si te aga te dwai sę yali wei ponao.”  
\p “Tama nai wi sabo bidi me deligo be hulide te be daga aluama, tama gasa bidigo aga dąų olama, tama aga ela mubaso da, teda te nai wi sali bidi ela muani bidi aga te sęgę menio. Tiali goli, agai aga te siade ela muyu da, te agai bidi ela mubo sęgę elalubao.”   
\p
\v 5 “Tama bidi me deligo aga bulmakau dabe tedela pelama, tama aga tǫde, ma te aga wain bono du gide nai tumainogo yai, tama augwaligo agai dąį bolama, tama gasa bidigo giba nai tugi pai yai baso da, teda te bulmakau page bidigo te aga gide wiegi yai nai me, te wain bono du me, te gi page bidibolo wei ponao.”   
\p
\v 6 “Tama bidigo aga tǫde te kala siago ulai digi, tama te sia genuai pedelama, tama te dąį bolama, gasa bidigo gide elalubo te tubo nai wit, me ma te wit augwaligo togolama tama pesage holai elaluai, tama te siago dobaso da, teda te sia ulali bidigo te siago dali nai tigidali wei ponao.”   
\p
\v 7 “Tama bidi me deligo aga doado bage meba, ma aga mone dabe te aga abagibolo menama, tama agai bugagia munalumainogo homu yai. Tama nai wi sabo bidi me deli asiyu, te nai dabe wi sai, tama nosali augwaligo aga gegelama subaso da, te nai wi sali bidigo te nai si si naga tigidali te mone sali wei ponao.  
\v 8 Tiali goli, augwaligo te nai wi sali bidi gegabo usu isąbaso da, teda te nai tonaluali bidi dagego selama, te eno geduba te po tų dodolobo bidi dabe bidibo digi pao. Tama agai te po weyu, ‘Mu tama, eno te nai wi me sabeo,’ te po wao.  
\v 9 Tama tigidali sogo bidigo po aga abagi dali te nai bulmakau, me te bidi duabo donki, me ma te sipsip, me te ugwa dabe, me gasa nai dabe hagawali po elaluai, tama te bidi augwali sigo te po weyu, ‘Te nai ena naga da,’ obaso da, teda te bidi si eno geduba te po tų dodolobo bidi dabe bidibo digi selasa pao. Tama te tibo po wabo bidi te eno aga sa mubaso da, teda te bidigo te nai si si naga te aga abagibolo wei ponaibao.”   
\p
\v 10 “Tama bidi me deligo te bidi duabo donki, me te bulmakau, me ma te sipsip, ma gasa kibu dabe meba te aga abagibolo menama, tama agai tolalumainogo yai, tama te kibu dabe me dolo baso, me ma isiyu, me ma boi bidigo hwįyu selasa peyu da, tama bidigo te nai me susiąyu da,  
\v 11 teda te bidi augwali si te po tų dodolobo digi pelama, tama Genuai Bidi eno gedude te abagigo te po wao, ‘Mu tama, eno agai nai doliyu, ma te kibu me te eno wi me sabeo.’ Tama kibu page bidigo agai te po wabo usu da weyu, tama te abagigo agai te hagawali kibu dabe wei ponogobeo.  
\v 12 Tiali goli, meba bidigo te abagigo tolalubo nai kibu dabe wi sobaso da, teda te kibu page bidibolo te abagigo te monego wei ponao.  
\v 13 Tama te uni hasago elai baso da, teda te abagigo te kibu elama tuali, te me badu dage te aga abagibolo waselainogo sela pao. Tama agai te uni hasago elali bulmakau wei te monego ponogobeo.”   
\p
\v 14 “Tama bidi me deligo aga abagigo te sę yabo bulmakau me deli osogo abelama, sę emainogo yai, tama te bulmakau page bidi te sogo tede bidisiąbadi, tama te bulmakau doliyu, ma isiyu me ebaso da, teda te abagigo te kibu page bidi abelao.  
\v 15 Tiali goli, te bulmakau page bidi aga te abagi dali bidibadi, tama te bulmakau dolobaso da, teda abagigo te abelegio. Tama abagi agai hasia nagebolo mone menama, tama te bulmakau sę yainogo sai digi, tama te bulmakau dolobaso da, teda agai abelegio, magi basowe, agai te hasia mani mone te usu dao,” wali.   
\s1 Te bomo yai po meba  
\p
\v 16 “Tama bidi me deligo te gesi wegi te bidibolo noma po wasiąwai wegi, tama te bidi dali pisąbadi, tama bidigo te wegi nogo tubaso da, teda agai te we abeleyu, aga ayabolo mone menama, tama agai te we sao.  
\v 17 Tama te we aga ayago te bidigo te we sabo hagela homu ebaso da, te usu dao. Tiali goli, agai te we aga aya te augwaligo bidi dali pisąwai we abelebo mone usugo abelao.” \x * \xo 22:17 \xt Bom 22:28-29\x*   
\p
\v 18 “Dagego te pobi nigibo we dabe ela muao.” \x * \xo 22:18 \xt Bom 18:10-11\x*   
\p
\v 19 “Dagego te bulmakau so kibu tąbo bidi ela mubadi, tama omai kibugo te we aga tąmainogo ebo te we ela muao.” \x * \xo 22:19 \xt Prs 18:23; 20:15-16; Bom 27:21\x*   
\p
\v 20 “Tama te we bidi augwaligo ena Genuai Bidiba naga ofa yao. Tama me deligo te tibo godiba ofa ebaso da, te dagego aga ela muao.” \x * \xo 22:20 \xt Bom 17:2-7\x*   
\p
\v 21 “Dagego te gasa bulu tǫ bidi aselama, dage dali bidibo bidi aga dali haniani dwai kolesaga eyu, ma te sęgę agaba mugimio. Magi basowe, polobadu dage te aga tiwai te Isip tǫde bidai dao.”   
\p
\v 22 “Dagego te aga bidi isai we dali te dwai kolesaga eyu, ma te wai puluba, augwa aya ida isai tiana wai dabe dali me te kolesaga igio. \x * \xo 22:22 \xt Sai 23:9; Prs 19:33-34; Bom 24:17-18; 27:19\x*  
\v 23 Tama dagego augwali dolobaso, tama eno augwali tau somainogo tama augwaligo gela enabolo obaso da, te eno augwaligo gela wabo mu odaibao.  
\v 24 Tama eno sębę eyu, tama te boi bidi dabego dage dali hwįmainogo ilama, tama dage elemainogo yaibao. Tama dagego we dabe te bidi meni eyu, tama te dagego wai dabe augwaligo aya meni yaibao.”   
\p
\v 25 “Tama eno we bidi augwali mone mu menia sobaso, tama augwaligo dage dali negeli sobaso da, teda dagego te mone sabo bisnis sę ebo bidigo negeli mabo tiwai igio. Tama augwaligo te negeli sali wei ponobo sogo, te dagego gasa mone dali daganama, sigio. Mu menio. \x * \xo 22:25 \xt Prs 25:35-38; Bom 15:7-11; 23:19-20\x*  
\v 26 Tama dage dali te negeli sabo bidigo agai te negeli sali wei begelainogo te agai holobo ugwa te sa mubo tiwai eyu, dagebolo mubaso da, teda dagego te sia ge dega sisąbadi, te sogo naga te ugwa agabolo ma mao.  
\v 27 Magi basowe, agai te ugwa deli naga elaluali, te aga hulide kedau idali weyu, tigi bea sabo ugwa dao. Te ugwa nago tolalubaso da, te aga tigi magi naigo halua selama pigowe? Te eno aga tau somainogo, agai gedu haluasa po enabolo obaso da, te eno agai gedu haluasa po wabo odaibao, magi basowe, eno tigidali we bidi olo tau sabo homu kolesaga mabo dao.” \x * \xo 22:27 \xt Bom 24:10-13\x*   
\p
\v 28 “Tama dagego dwai po God enabolo me wasiąma, tama dagego te dwai po te we bidi augwaligo tobolu bidibolo dagego te Godigo aga dolomainogo, te dwai po me wagio.” \x * \xo 22:28 \xt Tpi 23:5\x*   
\p
\v 29 “Tama hasia dagego te gide pedalobo te wit, me bono du wain, me tubo wel, me te oliv ni du dabe me, te selama, enabolo te ofa tiwai mabo te hagela igio.”  
\p “Tama dagego gomunai wai te ogwa te dagego enabolo mao.  
\v 30 Tama dagego te bulmakau de sipsip sigo gomunai wai te enabolo ofa yao. Tama te bulmakaugo wai, me te sipsipgo wai ame nenama, te nogo a naga olama me badu si sogo te aga ida dali hasia bidimainogo elama, tama te nogo a naga olama me badu sela wali, te me deli sogode dagego te kibu wai elama, enabolo ofa ilao.”   
\p
\v 31 “Dage te eno tedali gasagi yai we bidi hani dao, tama tibaso, dagego te uni hasa dabe augwaligo te bulude ela muai kibu te nai mi dagego me tugio. Dagego te nai te yowi dabego naga tumainogo mao,” te po wai. \x * \xo 22:31 \xt Prs 17:15\x*   
\c 23  
\s1 Augwaligo doloba pai kolesaga yao  
\p
\v 1 Tama Mosesgo Genuai Bidigo po pusuyu, te tiwai po wai, “Tama dagego te magi nai po me deli pedelali te po odoyu, tama te mu po meni homu eyu da, teda dagego te sę yali po subigila ola biligio. Tama bidigo te dwai kolesaga ebaso da, teda dagego aga tau siyu, te po tų ebode tibo po wagio. \x * \xo 23:1 \xt Sai 20:16; Prs 19:11-12; Bom 5:20\x*  
\v 2 Tama bidi hauwa augwaligo te dwai kolesaga ebaso da, teda augwaligo te ebo kolesaga wali pigio. Ma, augwaligo te po tų ebode augwaligo tibo po weyu, te po tų dodolobo sę doloyu eyu da, teda augwali dali deli homu eyu, augwaligo te ebo kolesaga me wali pigimio.  
\v 3 Tama bidi mebago te magi nai meni yai bidi po tų ela mainogo, tama augwaligo dage te sę ebo suali tiwai po omainogo dage i obaso da, dagego te magi nai meni yai bidi tau siyu, te po mesegelama tibo po wagio.” \x * \xo 23:3 \xt Prs 19:15\x*   
\p
\v 4 “Tama dagego duga boi bidigo te bidi dualasa pabo donki, ma bulmakau te obo tagalama wi pai yai subaso da, teda dagego selama, te bidi agabolo ma magibao.  
\v 5 Tama dagego boi bidigo te donki, ma te bulmakau te walu dali tula muai elalubaso da, dagego te boi bidi tau selama, aga ma hodolao. Dagego aga te tǫde pila mumainogo tagaligio.” \x * \xo 23:5 \xt Bom 22:1-4\x*   
\p
\v 6 “Tama te magi nai meni yai bidigo magi nai me delide po tų yagasobaso da, dagego agai po tų ebo mesegelama, aiyaba elalugio.  
\v 7 Dagego gasa bidi tibo pode po tų ela magio. Tama doloba pai bidi agai dwai kolesaga me isąbadi, tama augwaligo aga po tų olo mu ilibaso da, teda dagego aga ela mugio. Magi basowe, te tiwai dwai kolesaga ebo bidi eno aga po tų ilama, tama aga hagawaibao.”   
\p
\v 8 “Tama bidigo dage homu bega siyu, te po tų ebode tibo po omainogo te mone mobaso da, dagego te mone sigio. Magi basowe, te tiwai kolesagago te wiegi yai bidigo homu te tibo po wabo bidi tiwai pedelama, tama te dwai kolesaga isąwai bidigo po tų ebo aiyaba mesegelaibao.” \x * \xo 23:8 \xt Prs 19:15; Bom 16:19\x*   
\p
\v 9 “Dagego bulude bidibo gasa bulu bidi dali dagego dwai kolesaga me igio, magi basowe, polobadu dage te Isipde bidibadi, te aga tǫ mude bidisąbo we bidi ebo kolesaga te dagego bugagia koneai dao.” \x * \xo 23:9 \xt Sai 22:21; Prs 19:33-34; Bom 24:17-18; 27:19\x*   
\s1 Kibu be a naga olama, nogo me badu si tama me olo bidibo side  
\p
\v 10 “Dagego gide nai bulama tuyu, tama te kibu be a naga olama nogo me badu deli, te kibu bede te nai bulama siyu, beba sisinao.  
\v 11 Tiali goli, te kibu be 7 wabo, te kibu be me delide dagego nai bulisąma, te tǫ toma tuyu, olo elalumainao, tama dagego te tǫde olo pedalobo nai sigio. Tama te wain gide me, te ni du oliv gide me, dagego te tiwai kolesaga naga yao. Tama te magi nai meni yai bidi dabe augwaligo naga te gide olo holobo nai siyu, tama te magi nai meni yai bidi dabego sisąma tagalali nai me badu, te uni hasa dabego tula silimainao.” \x * \xo 23:11 \xt Prs 25:1-7\x*   
\p
\v 12 “Tama tigidali Sarere dagego sę te nogo a naga olama me deli, te tama sogo dagego sę eyu, tama te a naga olama nogo me badu si wali, te me deli sogo dagego sę igio. Tama tiyu da, te donki dabe, me te bulmakau, me te sę ebo bidi dabe, me te sę ebo we dabe, me te dage dali bidibo gasa bulu bidi augwali me, te toma tuyu, tama bomo ma saibao.” \x * \xo 23:12 \xt Sai 20:9-11; 31:15; 34:21; 35:2; Prs 23:3; Bom 5:13-14\x*   
\p
\v 13 “Tama dagego eno te mabo po tigidali bugagia odolama, wali pao. Tama dagego tibo godibolo te gedu haluasa po me wagio. Tama dagego augwaligo nogi me wagio. Habu mu dao,” te po wali.   
\s1 Sela sogo genuai lotu wabo side  
\r (Sai 34:18-26; Bom 16:1-17)  
\p
\v 14 “Tama deli deli kibu bede sela sogo dagego genuai lotu enaba wabo bodolu muao.  
\v 15 Tama dagego te Bo Disiąwai Nai Bret te genuai side te me bodolu munama, tama sisinama, lotu po wainogo, te eno wali po gilama tiwai yao. Tama dagego te bo disiąwai nai bret te a naga olama nogo me badu si, te tama sogo polua nogi Abip, te sogode te nai tuabo bodolu muai dao. Magi basowe, te poluade naga dagego te bulu Isip taga soai. Tama dagego enaba lotu po wagasainogo da, dagego te ofa yabo nai deli me selasa asiąo.” \x * \xo 23:15 \xt Sai 12:14-20; Prs 23:6-8; Nam 28:17-25\x*   
\p
\v 16 “Tama dagego te wit tau yali gagalama hasia bolo nai sabo sogo, tama dagego enabolo usu da po weyu, tama wiegi yai homu te nai tuyu yabo, te sogo genuai bodolu muao.” \x * \xo 23:16 \xt Prs 23:15-21, 39-43; Nam 28:26-31\x*  
\p “Tama dagego te genuai side te poluade te nedu du tau ebo sogo, te me bodolu muiąo. Tama te sogo dagego te wain gide te wain du siyu, osogo bidabo dwasianu be sęnama, tama te bede bidiyu, te wain me, oliv ni du dabe me, te gide siąo.”   
\p
\v 17 “Ena God, dagego Genuai Bidi, tama eno te kibu be deli delide sela sogo lotu wabo bodolu muani, tama te tigidali bidi dage aselama, enaba lotu po te sogo wagasiąo.”   
\p
\v 18 “Dagego te kibu sipsip me bulmakau enaba ofa ebo sogo, dagego te bo dai yis elalubo bret dali ofa igio. Tama dagego te ofa ebo kibu ili dabe tigidali te siaba ulama, tama dagego te nosali kigamu ofa yabo me tagalama elalumainogo igio.”   
\p
\v 19 “Tama dagego te polasa mu tau yali wiegi yai nai mu te gasa nai elalubadi, te nai dagego Genuai Bidi God eno beba sela pao.” \x * \xo 23:19 \xt Bom 26:2; Sai 34:26; Bom 14:21\x*  
\p “Dagego te meme ame pę te seneba munama, tama te memego digi wai elama, aga tigi mi te seneba munama, ulama tugio.”   
\s1 Godigo po meba augwaliba mayu, tama po dąų wai  
\p
\v 20 “Odiąo, te eno sę ebo Ensel Mobo Bidi tagala palama, polasa peyu, tama dage tųdu pabode tonalua paibao. Tama agai te dage eno mawainogo sisi yai elaluali te bulu tǫba odasa peyu, teba sabolaibao.  
\v 21 Tama dua dao, dagego agai po bugagia odolama wali pao. Dagego agai po sela sągio, magi basowe, ena digi ena aga dali mu bidiyu, tama agai te po sela sąbo we bidigo dwai kolesaga te sela sągobeo.  
\v 22 Tialima, dagego agai po wali pelama, tama eno te po wali sę tiwai tigidali ebaso da, te eno dagego boi bidi dabe augwali dali hwįnama, tama te dage dene mabo homu ebo bage me, te eno augwali aiyaba elaluaibao.  
\v 23 Eno sę ebo Ensel Mobo Bidi agai te dagego polasa pabo bidi pedelama, tama dage te Amor dabe, me te Hit dabe, me Peres, me te Kenan dabe, me te Hivi dabe, me te Jebus dabe, te hani augwaligo tǫba dage odasa pelama, tama eno augwali hani mu ela silaibao.  
\v 24 Dagego augwaligo tibo godiba kidu sugunama, lotu wagio. Tama dagego augwaligo lotu wabo te kolesaga sigio. Dagego augwaligo te tibo god dolama, tama augwaligo te lotu wabo masigi dabe pepedela sąyao.  
\v 25 Tama dagego lotu po enaba naga wao. Ena God, dagego Genuai Bidi dao. Dagego tama tiyu da, te eno dage wiegi yai iliyu, tama dage nai me te wę me mayu, tama dage gasi dabe me tigidali sela sąwaibao.  
\v 26 Tama eno te wai haliga elalubo we dabego wai bugagia ame nomainogo yaibao. Tama eno te bidigo sai wego tabi dąų me walogobeo, te tigidaligo wai ame nomainogo yaibao. Tama dage polo me isigobeo. Menio. Te eno dage tigidali e tǫde bobobage sogo bida waibao.”   
\p
\v 27 “Tama ena dage pabo digi polasa peyu, tama eno te boi bidi dabe augwaliba wi genuai ilama, tama eno augwali homu didibili ilaibao. Tama eno augwali dagede wi ilama pomainogo yaibao.  
\v 28 Tama eno te bidi gąų kelebo nai nenemo dabe polasa tagala palama, dage nosali asobadi, tama augwaligo te Hivi dabe me, te Kenan dabe me, te Hit dabe me, te hani augwali sela sąmainogo yaibao.  
\v 29 Tiali goli, eno augwali te kibu be delide naga sela sągobeo. Eno tama tiyu da, te tǫ olo elalubo digi te bulu uni hasa dabe hauwa tede pedelama, tama dage dolidalio.  
\v 30 Te eno boi bidi dabe augwali dua dua digi sela sąyu, tama dage hauwa pedelama, tama dagego te tǫ tigidali usu na silao.”   
\p
\v 31 “Tama eno dagego tǫ dąį e tiwai ilaibao, te wę sanede, te mama tamu ąį badu, te Akaba tǫ te badu pelama, te tǫ tomode elalubo genuai tamu ąį Mediterenian teba sabolama, tama genuai wę Yufretis te badu peyu, te masigi kemi elalubo badu teba te dąį sabolaibao. Tama eno bomo dageba menama, tama te tǫde bidibo hani augwali aiyaba elaluama, tama dage te tǫ tomoba peyu, augwali sela sąwaibao.  
\v 32 Tama dagego augwali dali po dąų weyu, me ma augwaligo tibo god dali me te tiwai kolesaga igio.  
\v 33 Dagego augwali te dagego tǫde bidimainogo sula tagaligio. Tama tiyu, augwaligo dage dwai kolesaga tomoba kegeyu, tama enabolo sęgę ilidalio. Tama dagego augwaligo tibo godiba lotu weyu da, te dage tulaluama, tama mu dolaibao,” wali.   
\c 24  
\s1 Bomai po dąų wali dąį  
\p
\v 1 Genuai Bidigo Mosesbolo te po wai, “Eno homugo nage dali, te Aron, me Nadap, me Abihu, me te Israel dabe genuai bidi, te bidi sese sela olama nogo si bidi dabe, dage ena bidibo te bulu duba ugwa holomainogo yaibao. Tama dage digibulu gana dolaluyu, tama tǫba basi gulama, tama enaba lotu wagameo.  
\v 2 Tama Moses, nage deli naga ena pąba asagameo. Tama gasa te Israel genuai bidi dabe augwali te pąba me asisąma, tama te olo we bidi augwali me te nage dali aselamo dao,” wali.   
\p
\v 3 Tama Moses pelama, te Genuai Bidigo bomai po tigidali te we bidi augwalibolo pusigi pai. Tama tigidaligo te po odolama, tama augwaligo pedauwali deliba munama, tama te po wai, “Dago te Genuai Bidigo po wali te sę tigidali yaibao.”  
\v 4 Tama Mosesgo Genuai Bidigo bomai po tigidali asęai. Tama nosali side aga kigamu mu hodaluama, tama alta me deli te bulu du sesegede nigilama, tama te alta pąde agai te masigi nogo si olama sągągo si dodaluali, te Israel hani nogo si olama sągągo si te dąį ilai.  
\v 5 Tama nosali agai gesi bidi meba tagala palama, tama augwaligo te ofa dabe te Genuai Bidibolo igi pomainogo tagala palai. Augwaligo te siago tigidali dabo ofa eyu, tama te bulmakau dabe elama, tama God dali deli homu elama bidabo ofa dabe yai.  
\v 6 Tama augwaligo te ofa ebadi, tama Mosesgo te ofa yai bulmakau dabego kaneme selama, tama dobolama, meba te pouba muyu, tama te kaneme meba munalubo te agai selama, te altaba sąwai.  
\v 7 Tama agai te bomo yai po dąų wai elalubo buku selama, te Genuai Bidigo po te bukude elalubo te we bidi augwalibolo nedai. Augwaligo odolama, tama augwaligo te po wai, “Dago te Genuai Bidigo po tigidali odoyu, dolo wali paibao,” wali.   
\p
\v 8 Tama Mosesgo te poude muani kaneme selama, te we bidi dabeba te kaneme segeni sąsąga pali. Tama agai te po wai, “Te kanemego Genuai Bidi agai dage dali dąų wali bomo yai po dąų walai dao. Tama te bomo yai po dabe te dąų wali po page dao.” \x * \xo 24:8 \xt Mat 26:28; Mak 14:24; Luk 22:20; 1 Ko 11:25; Hib 9:19-20; 10:29\x*   
\p
\v 9 Tama nosali Moses, me Aron, me Nadap, me Abihu, me te Israel dabe genuai bidi, te bidi sese sela olama nogo si tama, augwali te bulu duba holai.  
\v 10 Tama augwaligo Israel dabego God suai. Tama agai sągą dologode genuai sisi yai nai me deli, te be sai tiwai nai elaluai, tama te dagalu ula tiwai mu elaluai.  
\v 11 Mu tama, augwaligo God suai, tiali goli agai augwali dolobeo. Tama nosali augwaligo nai te bulude tuai.   
\s1 Moses Sainai bulu duba holai  
\p
\v 12 Nosali Genuai Bidigo Mosesbolo te po wai, “Nage bulu duba ma holama, tama ena pąba bidagasao. Eno bomo yai po meba te masigi sawali side asęaibao. Tama eno te masigi si nagebolo menama, tama nago te bomo yai po te we bidibolo ola magameo,” wali.   
\p
\v 13 Tama tibaso, Moses aga sę bidi Josua dali, augwali si sisi elama, te Godigo bulu duba holainogo yai.  
\v 14 Tama hasia sogo Mosesgo te Israel dabe genuai bidi augwalibolo te po wai, “Dage te be sęnama, bidibo pesagede bidiyu, tama da si ma asobo tonaluyu bidao. Aron de Hur si dage dali bidaibao. Tama bidi mebago po gasa bidi dali wabo elalubaso da, teda augwali te bidi si pageba pelama, tama te bidi sigo te po dodolomainao.” Te po wai.   
\p
\v 15 Mosesgo te po ola silama, tama aga te Sainai bulu duba holali, tama pǫgo te bulu du halua sai.  
\v 16-17 Tama Godigo genuai ula te bulu duba dulai. Tama Israel dabe augwaligo te Genuai Bidigo te ula te bulu dude te genuai sia ula ebo tiwai suai. Tama pǫgo te bulu du halualubadi, te nogo a naga olama me badu nogo deli sogo yai. Tama te a naga olama me badu si wali, te me deli sogo te Genuai Bidi te pǫ tomode bidiyu, Moses asomainogo i wai.  
\v 18 Tama Moses te pǫ tomoba pelama, tama te bulu du ugwaba mu holai. Tama aga te bulu dude te bidi sese si 40 te tama sogo bidai. \x * \xo 24:18 \xt Bom 9:9\x*   
\c 25  
\s1 Godigo ugwa bede muabo nai dabe po wali  
\r (Sai 35:4-9)  
\p
\v 1 Tama Genuai Bidigo Mosesbolo te po wai,  
\v 2 “Te Israel dabe augwalibolo po olama, tama augwaligo nai dabe selama, enabolo ofa momainao. Te we bidi augwaligo mena ofa nai mawainogo homu ebaso, te usu da, te nago sao.  
\v 3 Nago e tobage tiwai nai dabe augwali dali sao, te kapa gol, me silva, me bras,  
\v 4 me te sipsip nisigo nigai hobi dabe, meba sisi yai, meba mama yai, tama te wiegi yai au yai name ugwa me, te gasa ugwa augwaligo meme nisigo nigai me,  
\v 5 te sipsip omaigo wali te augwaligo mama pengo pilai me, tama wiegi yai hasa sikau wali tamu ąįde elalubo me, te me badu ni akas, te tama nai dabe sao.  
\v 6 Tama te lam sole udulabo oliv ni du wel me, te wel dali begelabo pauda me, te eno nai dabe dąį ilabo nai, tama te pauda wiegi yai denami elalubo te hano dali yabo nai me sao.  
\v 7 Tama haniani bomai masigi, te mone hauwago abelabo masigi tiwai, te pris dabe tobolu bidi aga ugwade belabo ugwa, me te aga bobobage gudubo ugwade te hagawia badu muabo, te sao.  
\v 8 Tama te we bidi augwalibolo te po olama, tama te ofa mani naigo augwaligo te eno ugwa be me deli sęnama, te wiegi yai tedali bede ena augwali dali tomode bidaibao.  
\v 9 Tama dagego te ugwa be me, te be tomode munalubo nai tigidali me, te dolo bugagia nigimainogo eyu, tama eno te piksa noma nagebolo hasia ola mawaibao.”   
\s1 Bomo yai po muabo halobage  
\r (Sai 37:1-9)  
\p
\v 10 “Tama dagego halobage me deli te akas ni namego nigao, tama te halobage bobobage nigabo usu ni te 110 sentamita, te genuai te 66 sentamita, tama ugwadu usu ni te 66 sentamita, te tama tiwai nigao.  
\v 11 Tama dagego wiegi yai kapa gol te augwaligo siade ulama, pobele bage sela sąwai selama, tama golgo te halobage bulu badu me, tomode me haluama, tama bobobage gol dage me deli te halobage sesegede bagulama kęąo.  
\v 12 Tama te halobage tolabo ring me si me si te golgo nigilama, tama te dwasianu halobage dolalubo sągąde kęąo. Tama me si me sągą side kęyu, me si me sągą side kęyu yao.  
\v 13 Tama dagego te ni akas pedai si dulama, te halobage tolabo te ni pedai si te golgo haluao.  
\v 14 Tama te ni pedai si te ring tomoba te me badu muyu, me badu muyu elama, te halobage tolasa pomainogo eyu, tama tiao.  
\v 15 Tama te ni dage si sesemane sogo te ringde elalumainao. Tama dagego te gudulamo dao.  
\v 16 Tama nosali eno nage te bomo yai po elalubo masigi sawali si mawaibao, tama nago te masigi si te halobage tomoba muao,” wali.   
\p
\v 17 “Tama dagego te halobage po paliabo nai te wiegi yai kapa golgo nigao, te bobobage nigabo usu ni te 110 sentamita, tama te genuai usu ni te 66 sentamita dao. Te halobage da, te we bidigo dwai sęgę sali sela sąbo digi dao. \x * \xo 25:17 \xt Rom 3:25\x*  
\v 18 Tama dagego te gol meba selama, tama te hamago elama, tama te ensel mobo bidi noma si te golgo nigao.  
\v 19 Tama me deli te halobage dolo nogo badu te halobage po paliabo nai elalubo digi te dolalumainogo eyu, tama me deli te pobase nogo badu dolalumainogo muao. Dagego te gol dage me deli selama, te halobage paliabo nai nigilama, tama aga te mobo bidi si me nigao. Tiali goli, dagego te nai sela nigilamuo, menio. Tigidali nigibo nai te deli nai tiwai naga nigao.  
\v 20 Tama te mobo bidi si te we bidi dabego dwai sę yali sęgę sela sąbo digi dolaluyu, tama mego gesabidigo me gesabidiba tiwai tonaluyu, tama augwali sigo aba te halobageba me tonalumainao. Tama augwali sigo bogo dinigina pai elaluyu, tama te halobage te tama dualumainao.  
\v 21 Tama nagebolo eno te bomo yai po elalubo masigi sawali si menama, tama nago te masigi si te halobage tomoba munama, tama te halobage po paliao.  
\v 22 Tama ena nage dali te dwai sęgę sela sąbo buluba sisinaibao. Tama ena te mobo bidi si daidu tomode ugwadu bidiyu, tama nage dali da si deliba sisinama, tama eno te bomo yai po tigidali nagebolo pusaibao. Tama nago te bomo yai po te Israel we bidi dabe augwalibolo menama, tama augwaligo wali pomainao,” wali.   
\s1 Augwaligo Godibolo maiabo bretgo tebol po wali  
\p
\v 23 “Tama dagego te ni akasgo te tebol sai me deli nigao, te bobobage usu ni te 88 sentamita, te genuai usu ni te 44 sentamita, tama te ugwadu daidu te usu ni 66 sentamita dao.  
\v 24 Tama te tebol sai te wiegi yai golgo haluama, tama bobobage golgo te tebol sesege badu bagulama, dąų wao.  
\v 25 Tama dagego te gol genuai ilibo te 8 sentamita ilama, tama dwasianu gol dagego te tebol sesege badu tigidali te obo bogegelao.  
\v 26 Tama dagego te tebol tolabo nai ring me si me si te golgo nigilama, tama te tebol sągą me si me si te badu kęąo.  
\v 27 Tama te ring dabe te tebol pąde ugwadu daide munaluaibao.  
\v 28 Tama dagego te ni akas si te tebol tolabo ni dulama, tama te ni si te golgo haluao.  
\v 29 Tama te wain ofa yabo genuai pou dabe, me te dwasianu pou dabe, me kap, me te botol me nigao. Dagego te nai dabe te wiegi yai golgo naga nigao.  
\v 30 Tama sesemane sogo dagego enabolo maiabo bret te tebolba naga munama, tama eno gedude munaluaibao,” wali. \x * \xo 25:30 \xt Prs 24:5-8\x*   
\s1 Te sole dabe tolalubo nai  
\r (Sai 37:17-24)  
\p
\v 31 “Dagego te lam sole dabe muabo nai me deli te wiegi yai golgo nigao. Tama te gol hamago elama, te lam dabe tolalubo nai dolaluabo pesage nigilama, tama dono nigilama, te lam nogo dabe muabo digi nigao. Tama te golgo naga aga au yabo ni duduli noma meba nigao. Tama te tigidali nigibo te deli tigi tiwai naga nigao.  
\v 32 Te lam donogo nogo te a naga olama nogo me badu deli elalubo, te me sela te me badu muyu, te me sela te me badu muyu yao.  
\v 33 Tama tigidali nogo deli delide usu nama, te ni duduli noma sela elaluyu, te ni amongo nigai tonobo tiwai yaibao.  
\v 34 Tama te lam dono aga digi me te tiwai yao. Tama te ni duduli noma me si me si te amon ni aga duduli tiwai dao.  
\v 35 Tama te ni duduli yabe dwasianu dabe te lam dono nogo si si dologode naga nigao.  
\v 36 Te dagego hama selama, te gol haluama, tama te nai dabe tigidali te deli nai tiwai naga nigao.  
\v 37 Tama dagego te lam a naga olama me badu nogo si nigilama, tama augwali te lam tolalubo naiba muao. Tama augwali te bugagia wasilama, augwaligo ula te ugwa be tomoba pomainao.  
\v 38 Tama te lamde mubo hobi dodolobo nai me, te pou me, te nai dabe te wiegi yai golgo naga nigao.  
\v 39 Dagego te wiegi yai genuai sęgę elalubo te 35 kilogram golgo te lam tolalubo nai te nai dabe nigao.  
\v 40 Dagego te nai nigibo sogo, dagego dua bugagia te piksa noma eno nagebolo e bulu dude ola mani, te dolo wali pelama, te nai dabe nigao,” Genuai Bidigo te po Mosesbolo wai. \x * \xo 25:40 \xt Tpi 7:44; Hib 8:5\x*   
\c 26  
\s1 Godigo ugwa be  
\r (Sai 36:8-38)  
\p
\v 1 Genuai Bidigo po me ma weyu, Mosesbolo te po wai, “Dagego enabolo lotu po waiabo ugwa be te nogo si wiegi yai name ugwa te sisi yai, me te mama yai, te augwaligo hobigo au ilai ugwago nigao. Tama hobi selama, te ensel mobo bidi piksa noma dabe te name ugwade hobolama nigao. Te name ugwa te hobigo wiegi yai au ebo sę mu koneai bidi, agai te tobage au ebo sę emainao.  
\v 2 Tama tigidali te name ugwa te dedeli au yai tiwai naga nogo si nigao. Te ugwa dabe bobobage te 12 mita, tama te genuai usu sabo te 2 mita dao.  
\v 3 Tama a naga name ugwa dali bogo badu hobolama, tama te genuai moni bage kilasa pelama, tama gasa name ugwa te tiwai a naga hobolao.  
\v 4 Tama te genuai name ugwa side wadolabo sisi ugwade te ring meba nigao. Tama te ring dabe te genuai ugwa si sesegede kękę pao.  
\v 5 Tama hasia te name ugwade te ring bidi sese si olama nogo si te sesegede bebe peyu, te gasa bidi sese si olama nogo si me te si wali name ugwa sesegede kęąo.  
\v 6 Tama dagego te bidi sese si olama nogo si huk te genuai ugwa si dali tama te deli ugwa tiwai naga pedelemainogo, bebe pabo te golgo nigao.”   
\p
\v 7 “Tama nosali dagego te genuai name ugwa deli te eno ugwa be haluabo nigao. Tama te name ugwa dage te nogo si olama sągągo deli augwaligo te kibu meme nisigo nigao.  
\v 8 Te tigidali badu te deli tigi tiwai naga nigao. Bobobage usu ni sabo te 13 mita tama, te genuai usu ni sabo te 2 mita dao.  
\v 9 Tama a naga me badu dali hobolama, te bobobage ugwa deli tiwai naga pedelama, tama me sela me sela badu dali hobolama, tama te bobobage ugwa tiwai deli pedelaibao. Tama te me sela me sela wali te ugwa sigo pedelama, te ugwa be sunumi badu haluabo, te tama walolomainao.  
\v 10 Tama te bidi sese si olama nogo si ring te hasia ugwa sesegede kęnama, me te bidi si olama nogo si ring te ugwa si wali ugwade kęąo.  
\v 11 Tama dagego te bidi sese si olama nogo si huk bras nigilama, tama te huk dabe te ringba munama, te genuai ugwa si dali si bebe pelama, te deli ugwa tiwai naga elaluaibao.  
\v 12 Tama te usu sabo nai 1 mita te genuai ugwa te olo munalubo digi dagego te eno ugwa be tudi badude halalumainogo sula tagalao.  
\v 13 Tama te bobobage halubo ugwago te ugwa be bogo badu side bobobage aiya elaluama, te 50 sentamita me badu elaluyu, te me badu elaluyu yaibao. Tama tebogo te ugwa be tigidali mu halua sabo usu yaibao.  
\v 14 Tama te meme nisigo nigai genuai name ugwa, te nai ugwadu muabo gasa haluabo nai me si ma nigao. Me deli te omai sipsip wali te augwaligo mama pengo pilai tego nigao. Tama me deli te tamu ąįde bidibo hasa nogi sikau, te dabego waligo te ugwadu haluabo te nigao.”   
\p
\v 15 “Tama dagego te ugwa be daga dolaluabo ni name dabe te ni akasgo nigao.  
\v 16 Te tigidali ni name deli deligo usu sabo te 4 mita, tama te ni name genuai usu sabo te deli deli te 66 sentamita dao.  
\v 17 Tama dagego te ni name dabe dolaluama, tama pagede dulama, te pęwadage sągą si si dula dula pelama, tama dagego tigidali ni name te tiwai naga nigao.  
\v 18 Tama dagego te tobage ni name bidi sese deli usu nabo te lotu ugwa be me bogo badu dolalumainogo eyu nigao.  
\v 19 Tama dagego te kapa silva selama, tama te gelali ni page tiwai nai te bidi sese si te dedage elalubo te ni name sągą bulabo digi nigao. Te page nai si si te ni name deli deli dologode munaluyu, te tigidali daga ni name page dąų elalumainao.  
\v 20-21 Tama dagego te tiwai naga te be gasa bogo badu me tama tiao. Te bidi sese daga ni name nigiyu, te bidi sese si silva te ni name page dąų wabo nai dabe nigilama, te silva pedai si te ni name deli delide muao.  
\v 22 Tama te be daga ni name te me sela me sela te ugwa be tudi badu, te sia ge dega sigi pabo badu, teba mumainogo nigao.  
\v 23 Tama te badu kona side te ni name si si nigiyu, tama dabelim yao. Te tama nigao.  
\v 24 Tama te be dili habu badu te kona ni name si pagede wadolama, tama tigidali ugwaba wadodolo holao. Tama dagego te si dali si habu badu tama tiao.  
\v 25 Tama te tudi badu te daga ni name te a naga olama nogo me badu sela elaluaibao. Tama nogo si olama nogo a naga tama me badu deli te silva te ni name page dąų wabo nai si usu nama, te deli deli usu dao.”   
\p
\v 26-29 “Tama dagego te ni akas selama, tama te ni name tuabo bobobage ni meba nigao. Tama te bobobage ni dabe te ugwa be daga dolalubo ni namede dąų omainogo eyu, tama te wiegi yai kapa golgo te genuai ring dabe nigiyu, munalubo kęąo. Tama te dolalubo ni name tigidali me, te bobobage ni name tuabo ni dabe me, te nigo nigali nai tigidali te golgo haluao. Tama elama, tama te bobobage ni a naga tego te be me bogo badu dolalubo ni name dabede te ring dabego dąų wao. Tama bobobage ni meba te ni name ugwadu muyu, meba te ni name aiya badu muyu yao. Tama meba me tomode muyu, tama te be tudi badu gagalama, tama asama, tama te be gesabi baduba sabolaibao. Tama te be u bogo badu me te bobage ni namego tama naga tiao. Tama te be tudi badu daga, te sia ge dega sigi pabo badu, tede me te bobage ni te dolalubo ni name dabego ringba bulama, tama dąų walao.”   
\p
\v 30 “Tama nosali dagego te lotu wabo ugwa be nigibo nai dabe silama, tama te be dodolobadi, te eno nagebolo e bulu dude ola mani te piksa subo tiwai yao.”   
\p
\v 31 “Tama dagego te ugwa be tomode walabo name ugwa gasa au wiegi yai genuai nigao. Tama te wiegi yai tedela yai hobi dabe siyu, te sipsip nisigo nigai sisi yai hobi dabe me siyu, tama te sipsip nisigo nigai mama yai hobi dabe me siyu yao, tama tego te wiegi yai name ugwa me deli nigao. Tama dagego gasa haniani wiegi yai hobi dabego te ensel mobo bidi noma bugagia mu te ugwade hobolao.  
\v 32 Tialima, te ni akas selama, te pos ni me si me si nigao. Tama te pos dabe te golgo haluama, tama te pos dabe te silvago nigai page me si me si tede bulao. Tama te gol huk meba nigilama, tama te ugwa dabe dąų elalumainogo te posde kękę piąo, tede walomainao.  
\v 33 Tialima, tama te ugwa te huk dabeba walama, te bomo yai po dąų wai po asęai masigi sawali si elalubo halobage, te nai te walobo name ugwa tudi badu muao. Tama te ugwago te lotu wabo be tomode dąį tiwai togolama, tama be habu si elaluaibao. Te sunumi pąde te polalubo be habu nogi wabo te Tedali Gasagi Yai Be Habu dao, te name ugwa dąį tudi badu te habu te Tedali Gasagi Yai Mu Be Habu dao. \x * \xo 26:33 \xt Hib 6:19; 9:3-5\x*  
\v 34 Tama te bomo yai dąų wali po elalubo masigi sawali si elalubo halobage, aga te Tedali Gasagi Yai Mu Be Habu te be habu badu te halobage munama, tama te halobage po paliabo nai te halobageba muao, te dwai kolesaga yali sęgę sela sąbo madigi dao.  
\v 35 Tama tebol sai te gasa be habude muao, te nogi Tedali Gasagi Yai Be Habu dao, te ugwa be daga pąde, te sia ge pedalubo sesege pobase nogo badu muao. Tama ula ebo sole te gasa badu te be daga pąde muao, te tebol sai dolo si muao.”   
\p
\v 36 “Tama dagego te wiegi yai genuai au yai name ugwa te ugwa be tų bagulabo nigao. Tama te wiegi yai au yai hobolama, te e tiwai hobi, te sis hobi me, te mama yai hobi me, te augwaligo sipsip nisigo nigai dao.  
\v 37 Tama te ni akas selama, tama a naga pos nigilama, te golgo haluao. Tama te pos dabede te huk gol kęnama, te ugwa walabode dao. Tama te page nai a naga te kapa brasgo nigao, dedage elalubo te pos dabe bulabo digi dao,” wali.   
\c 27  
\s1 Augwaligo alta sai niga wai  
\r (Sai 38:1-7)  
\p
\v 1 Tama Genuai Bidigo po ma naga weyu, te po wai, “Dagego te ni akas selama, te alta sai nigao, te moni halobage tiwai pąde dao. Te tigidali bogo sesege badu te deli tigi gagawai naga nigilao, te usu ni 2 mita 30 sentamita, tama te daide ugwadu usu sabo me ma te usu ni 1 mita 30 sentamita, tama usu nama nigao.  
\v 2 Tama te kibu bulmakau gąų tiwai nai me si me si te ni akasgo nigilama, tama deli deli dage badu dąų walama, tama te alta tigidali te brasgo mesegelao, te aga deli tigi naga elaluaibao.  
\v 3 Tama bras selama, te sia keli sabo pou me, te dwasianu savol me, pou me, te ofa hasa mi dodolobo age yai ną me, tama te sia dage sela pabo plet nigibadi yao.  
\v 4 Tama dagego te moni bras sawali selama, tama polola polola pelama, tama te tama pololai bras sawali te alta halobage tomoba muao. Magi baso meni, aga ugwadu daide augwaligo te sia nogelama, tama te ofa mabo nai te siago udubadi, tama te keli aiyaba tuloluaibao. Tama bagua si nai deli deli te bras sawali nai habu badu munama, tolabo madi muabo nai te brasgo nigao.  
\v 5 Tama te alta halobage tomode te tigidali habu badude te aiya badudu usu siyu, ugwaba asiyu, tama tomode mu te dwasianu sai nigiyu, tede dąų wao. Tama te moni pololai bras sawali, aga te dwasianu sai dabe ugwadu daide munaluaibao, te alta halobage tomode.  
\v 6 Tama dagego te ni akas dage si selama, tama dulama, tama te dono si brasgo haluao.  
\v 7 Tama dagego te alta tolasa painogo ebo sogo, te baguali dedageba te ni dono si munama, tama tolao.  
\v 8 Dagego ni name selama, te alta te halobage tiwai nigao, tiali goli dagego te ni name te halobage habu pagede musiąma, te dedage elalumainogo yao. Dagego te eno nagebolo te bulu dude ola mani piksa te tiwai nigao,” tama po wali.   
\s1 Godigo ugwa be bagulali obo po wali  
\r (Sai 38:9-20)  
\p
\v 9 “Dagego te genuai gasagi yai ugwa obo ebogo te lotu ugwa be mesalo bagulao. Bobage nigibo usu sabo te 44 mita, te wiegi yai bobage ugwago obo tiwai bagulubo te me badu bogo badu nigilao.  
\v 10 Tama te wiegi yai bobage obo ugwa walomainogo eyu, tama te kapa bras selama, tama pos te bidi sese deli nigao. Te pos dabe bulabo page dabe me te brasgo nigao. Tama te wiegi yai kapa silva selama, tama bobage dono dabe nigiyu, tama huk dabe hauwa nigiyu yao. Tama te pos dabe si si dolaluyu, tama pos me si tomode ugwadu te dono me deli dąų wao. Tama te donode te huk meba munama, tama te ugwa obo te huk dabede tama walao.  
\v 11 Tama hasia te nigali tiwai naga, te me badu bogo badu obo bagulubo te tiwai nigao.”   
\p
\v 12 “Tama te sia ge dega sabo badu obo, te ugwa me deli te bobage usu sabo te 22 mita te usu nama nigao. Tama pos nogo si badi, te pos page dąų walabo bras nai, te me nogo si te pos dodolabo madi dedage elalumainogo nigilao.  
\v 13 Tama te sia ge pedalubo badu obo te tų elalubo madi, te usu sabo me te 22 mita dao.  
\v 14-15 Te bobage ugwa walabo madi, te aga bobage usu nama, te 6 mita 90 sentamita, te tų si dali si badu dao. Te ugwa deli delide te pos sela te bras page dolalubo madi wawalo pao.  
\v 16 Te tų dolo gasa wiegi yai name ugwa walao, te aga te 9 mita usu dao. Tama aga haniani te sipsip kibu nisigo nigai, husugu hobigo, me mama yai hobigo au ilama, hobolao. Tama dagego te pos me si me si te brasgo nigali pagede dodolama, tama te posde te bobage wiegi yai ugwa wawalo pao.  
\v 17 Tama dagego te obo pos si si te ba silva dabego tigidali dąų walao. Tama te bisigi gąų dabe te silvago nigilama, tama te pos dabe te ba silva kęnao. Tama bras selama, te pos dabe dodolabo madi nigao.  
\v 18 Tama te obogo bobage usu nama, te 44 mita, te aga genuai usu ni te 22 mita, tama te ugwadu usu sabo te si 2 mita me 20 sentamita dao. Tama dagego wiegi yai tedela yai ugwa te obo bagulabo selama, nigao. Tama dagego te bras selama, te obo pos dabe dodolabo madi nigilao.  
\v 19 Dagego te bras naga selama, te ugwa bede sę yabo tigidali nai te brasgo nigao. Te ugwa be dali, aga mesalo obo dali si tuloluidali weyu, te bono dabe te augwali side gebelama, tama bobobage nil dabe tǫba enama, tama te bono dabe te nil dabeba gebelao. Tama dagego te bobobage nil dabe te brasgo naga nigao.” Genuai Bidigo te po wai.   
\s1 Te sole dabe tonalubo kolesaga ebo po wali  
\r (Prs 24:1-4)  
\p
\v 20 “Nago te Israel we bidi augwalibolo te po olama, augwaligo te wiegi yai oliv ni dude sabo wel te lamde muabo sela asa wao, tama te lamgo ula te tigidali sogo elaluaibao.  
\v 21 Tama Aron aga ogomani dali, augwaligo te lam sole tolalubo nai eno ugwa be tomoba sela peyu, dodolomainao, te walali ugwa e badu me bogo badu, te bomo yai po elalubo halobage te ugwa tudi badu munalubao. Te ugwa bede ena te we bidi dali sisinabo be dao. Tama tigidali sogo Aron aga hani bagego wel te lamde munama, tama te lam ula ena bidibo madi ula elaluaibao, tama pio gagalama, kigamuba usu nigi paibao. Dage Israel dabe dali, dagego te nosali pedalobo wai dabe dali, augwaligo te eno te lamde wali bomo yai po sesemane sogo tolalua peyu, bidada paibao.”   
\c 28  
\s1 Pris dabego gudubo ugwa po wali  
\r (Sai 39:1-7)  
\p
\v 1 Genuai Bidigo po ma wadolama weyu, e tiwai po wai, “Moses, nosali nage ma peyu, nago naga ama Aron aga ogwa dabe dali augwali i wao, Nadap, me Abihu, me Eleasar, me Itamar, augwali asomainao. Tama nago augwali te Israel bage tomode selama, tama augwali eno pris bidi pedalomainogo yao.  
\v 2 Tama Aron prisgo gudabo ugwa wiegi yai tedali nigibadi, tama aga au ilama, tama gasagi yai pedelama, tama aga nogi te Israel we bidi gedude elalumainao.  
\v 3 Tama eno homu kolesaga menama, te ugwa me gasa haniani nai nigao wali, te bidi augwali i olama, tama augwalibolo po olama, tama augwaligo te Aron pris pedalobo sogo muabo ugwa nigimainao. Tama agai enade pris sę yaibao.  
\v 4 Tama augwalibolo olama, te Arongo hagawiade muabo dwasianu ugwa dage deli au ilama, hobolao po wao. Tama augwaligo au yai ugwa me deli hobolobadi, me bobage ugwa deli badi, me te au ilai holobo ugwa, me tobolude bagulabo ugwa badi, me kukulu deli tama hobolao. Augwaligo te tedali gasagi yai ugwa dabe te Aron pris dali, te aga ogwa dabe, augwaligo me te ena tiwai pris sę emainogo yabo ugwa dabe nigao.  
\v 5 Te sę bidi dabe augwaligo te husugu hobi, me mama yai hobi, augwaligo te kibu sipsip nisigo nigai, tama gol hobi me, tama wiegi yai name ugwago te ugwa dabe nigimainogo yao.”   
\p
\v 6 “Tama augwaligo te husugu hobi, me mama hobi te augwaligo sipsip nisigo nigali, me te gol hobi selama, tama wiegi yai ugwago hobolama, bugagia au ilao. Te tobage sę ebo mu koneai bidigo naga te sę yao.  
\v 7 Tama augwaligo te ugwa daide ugwadu te ugwa dąų olaluabo kukulu si hobolao, tama kukulu te nagiba bolama, tama te tudiba abebolabo usu nama hobolao.  
\v 8 Tama augwaligo te sisi hobi, me mama hobi selama, augwaligo te sipsip nisigo nigai, tama wiegi yai ugwa dage sobadi elama, te mǫ tiwai kukulu nigao. Tama augwaligo te kukulu te ugwa sesegede kęnama, tama te ugwa dage aga tiwai elaluaibao.  
\v 9 Tama augwaligo nogi ebo wiegi yai masigi konilian si selama, te Jekopgo ogwa dabe nogo si olama sągągo si nogi mumainogo yao.  
\v 10 Tama gomunai ogwade hasia gagalama, tama te nogo si olama sągą si te sabi ogwaba te nogi mubo siminigi pao. Augwaligo te 6 nogi te me masigide mubadi, te 6 nogi te gasa masigi mede mubadi yao.  
\v 11 Nago te masigide asębo po togobo koneai bidi me delibolo te sę menama, tama agai Jekopgo ogwa dabe nogi te masigi side asęmainao. Tama dagego te gol selama, te masigi si dąų olama tolaluabo au ilabo dwasianu nai si nigao.  
\v 12 Tama te masigi si te nagide bolai elalubo kukulu siba kęnama, tama te Israel hani augwali dąį yai tiwai elaluaibao. Tama Arongo augwali nogi te aga nagide tolasa bilibaso, tama Genuai Bidi eno sulama, tama eno bidi hani te eno homugo augwali sesemane sogo kone palaibao.  
\v 13-14 Augwaligo te au yai nai dwasianu si te golgo nigibadi, tama te haliga si me golgo nigao. Augwaligo gol te dwasianu waia tiwai nigilama, tama te haliga nigibo kolesaga tiwaigo nigilama, tama te haliga si te au ilali golba kęnao.”   
\s1 Hagawiade mubo dwasianu ugwa  
\r (Sai 39:8-21)  
\p
\v 15 “Dagego te het prisgo hagawiade muabo dwasianu ugwa me deli nigao. Te nai da, te Godigo homu kolesaga koneainogo tiaibao. Tama dagego te tiwai nai naga augwaligo te het prisgo dwasianu ugwa dagede au ilali tiwai selama, nigao.  
\v 16 Tama dagego te dwasianu ugwa bobage ilibo usu sabo te 44 sentamita, tama aga genuai usu sabo te 22 sentamita dao. Tama bugagia tomode pobelama, te genuai agebele tiwai pobelama, tama tigidali badu me te tiwai dąį naga elaluaibao.  
\v 17-20 Tama dagego te me si me si nama hani bomai wiegi yai masigi te ugwade wasilama, kęnao. Tama hasia polalubo hani masigi augwaligo nogi wabo te rubi, me topas, me ganet, tama kęnao. Tama te hani side te masigi emeral, me sapaia, me daimon, te tama kęnao. Tama te kęnabo hani sela masigi tekois, me aget, me ametis dao. Tama te kęnabo masigi hani me si me si te beril, me konilian, me jaspa dao. Tama dagego tigidali deli deli masigide te golgo au tiwai dwasianu ilama, tama nosali te masigi dabe ugwago kęnao.  
\v 21 Tama te nogo si olama sągągo si wali te tigidali masigi deli delide dagego te Jekopgo ogwa nogi deli deli te duga Israel hani tigidali dąį ela siyu, nogi asęsę pao.”   
\p
\v 22 “Tama dagego wiegi yai gol selama, tama haliga si te hagawiade ugwa tolaluabo haliga si nigao.  
\v 23 Tama te ring gol si nigilama, tama te habu si badu te hagawiade muani ugwa daide ugwadu muao,  
\v 24 tama te haliga si te ring side kęnao.  
\v 25 Tama dagego gasa te haliga gol si sesegede kęnama, te au ilali gol side tama gol au ilali te kukulugo te het prisgo ugwa tolalumainogo kęnao.  
\v 26 Tialima, tama dagego te ring gol me si ma nigilama, tama aiyadu habadu te ugwa elalubo madi hagawia badu te ugwa tudi pąbadu kęnao.  
\v 27 Tama dagego te ring gol me si ma nigilama, tama te si te kukulugo te ugwa tolalubo madi kęnao, te gasa wiegi yai kukulu te tabi mǫgo bagulali madi pąde, te nai kęnao.  
\v 28 Tama sisi yai string hobi selama, te hagawiade elalubo genuai ugwade ring kęnama, tama tiyu da, te hagawiade elalubo ugwa te mǫ tiwai kukulude dąų ola somainogo elama, tama te hagawiade muani ugwa te munu me peda pogobeo.”   
\p
\v 29 “Tama Aron te Tedali Gasagi Yai Be Habuba pabo sogo, agai te Israel hani tigidali nogi elalubo te dwasianu ugwa te aga hagawiade munama, sela pomainao. Tama ena Genuai Bidi, eno te ena hani bidi dabe augwali sulama, tama eno augwali sesemane sogo homugo kone palaibao.  
\v 30 Tama te masigi si te Godigo homu kolesaga somainogo te hagawia badu muani ugwa agebele tomode munama, tama Aron te Tedali Gasagi Yai Be Habu tomoba pabo sogo, ena Genuai Bidi ena agade bidibao, aga te masigi si dali tolasa pomainogo yaibao. Sesemane sogo agai te hagawiade te muani ugwa sela asomainao, te agai eno Genuai Bidigo magi sę te Israel dabe dali yainogo ebo te agai konemai hagede yaibao,” wali. \x * \xo 28:30 \xt Nam 27:21; Esr 2:63; Neh 7:65\x*   
\s1 Prisgo gasa ugwa dabe po wali  
\r (Sai 39:22-37)  
\p
\v 31 “Te bobage ugwa te name ugwa dali kęnama, te dagego sisi hobi augwaligo te sipsip nisigo nigai naga selama, te ugwa nigao.  
\v 32 Dagego te tobolu muabo madi dedage nigilama, tama dwasianu ugwa dage me deligo te dedage bagulama, tama te sesegede te dedage bomo yai pedelama, tama dedage genuai peda pabuo.  
\v 33-34 Tama sisi hobi, me haniani mama yai hobi te augwaligo sipsip nisigo nigai, tama nai mebago te ni pomigranet wai tiwai nigao. Te ni wai du dabe te prisgo ugwa sese aiyadu hobolama, tama golgo nigai belo deli deli te ni pomigranet du dabe tomo tomode hobolama walalumainogo yao.  
\v 35 Tama Arongo te bobage ugwa munama, te pris sę emainao. Tama aga ena te bidibo pąba te Tedali Gasagi Yai Be Habuba aselama, tama te buluba ma teda pabo sogo, te we bidigo te belo gela wabo odomainao. Ma, agai te bobobage ugwa gudasiąbaso da, teda eno aga ela muidalio.”   
\p
\v 36 “Tama dagego te wiegi yai gol me deli selama, te ula ilibo nai medal me deli nigilama, tama e tiwai po te naide asęao, ‘Te Genuai Bidigo Tedali Gasagi Yai Nai da,’ te po asęao.  
\v 37 Tama sisi hobi selama, tama te gol nai tobolude muani ugwade kęnama, tama te het prisgo gesabidide ugwadu munalumainogo yao.  
\v 38 Sesemane sogo Arongo te medal tobolude elalubo ugwa muao. Tama tibaso da, ena Genuai Bidi eno te Israel dabego enabolo mabo ofa ebo nai te eno saibao. Ma, augwaligo te ofa ebo kolesaga mebago geda mubaso da, teda, Arongo te tebo augwaligo dwai sę sęgę tolomainogo yaibao.”   
\p
\v 39 “Dagego wiegi yai hobi selama, te holobo ugwa hobolao. Tama Arongo tobolude muabo ugwa wiegi yai nigilama, tama ugwa dage selama, tama mǫ tiwai kukulu nigilama, tama tede wiegi yai au ilama hobolao.”   
\p
\v 40 “Tama dagego te holobo ugwa dabe, me te kukulu te mǫ tiwai, tama te tobolude muabo ugwa me, te Arongo ogwa dabe tigi munama, tama wiegi yai au mu ilama, tama te we bidi augwaligo gedude te Arongo ogwa dabe te nogi elaluyu, tama gasagi yai pedalomainogo tama tiao.  
\v 41 Tama Moses, nago te ugwa dabe te naga ama Aron dali, aga ogomani dali, augwalibolo muao. Tama te ni oliv wel augwaliba gelama, te augwali pris dabe da olama, sa munama, tama te pris sę enabolo augwaligo emainao.”   
\p
\v 42 “Tama augwaligo gudabo pęwadage ugwa belibo trausis te wiegi yai ugwago hobolama mao, te augwali tigi hale te bulu ulaba hania gagolama pedabuo.  
\v 43 Tama Aron aga ogomani dali augwaligo te tiwai belibo trausis munama, te augwali alta pąba te Tedali Gasagi Yai Be Habu tomoba pelama, te pris sę ebo sogo, ma gasa sogo te augwali eno ugwa be tomoba painogo te ugwa belibo trausis munama, asomainao. Ma, te tobage sę augwaligo me isąma, te augwali tigi olo eno bidibo madi asobaso da, teda augwali dwai sę yali homu eyu, te eno augwali ela muaibao. Sesemane bidada pabo sogo Aron me, aga wąį dabe nosali pedalobo bage, augwaligo te bomo yai po wali pao,” Genuai Bidigo te po wai.   
\c 29  
\s1 Pris dabe sa mubo kolesaga po wali  
\r (Prs 8:1-36)  
\p
\v 1 Genuai Bidigo po ma weyu, te po wai, “Megi eno nagebolo nago te Aron dali, aga ogomani me, augwali te pris dabe pedalomainogo yabo sę po waibao. Te kibu bulmakau omai wai me deli badi, te sipsip omai si, te keni kenigo augwali tigi dolisiąwai dabe sao.  
\v 2 Tama te witgo plaua hasia polali mu, te sao. Nago te plauade te yis me mugio. Tama te plaua meba selama, te bret nigibadi, tama te plaua meba selama, tama te ni oliv wel dali taluama, te bret nigao. Tama plaua meba selama, tama te bisket meba nigibadi elama, tama augwalide te oliv wel pilao.  
\v 3 Tama te bret, me te bisket dabe te bonou wa me deliba munama, tama nago te bulmakau omai, me te sipsip omai si te ofa ilibo sogo te enabolo mao.  
\v 4 Tama Aron dali, aga ogomani augwali dali, te eno lotu ugwa beba odasa aselama, augwali wę paluao.  
\v 5 Nago augwali wę paluama silibo si, teda te pris ugwa dabe te Aronba muao. Holobo ugwa mubadi, tama bobage gudubo ugwa me muyu, tama dwasianu hagawiade mubo ugwa me te agabolo gudulama, tama te wiegi yai kukulugo agaba kęnao.  
\v 6 Tama ugwa te aga tobolude bagulama, tama te po elalubo medal gol te nai sao, te Genuai Bidigo nai dao, tama te tobolude muani ugwade kęnao.  
\v 7 Tama wel selama, te pris nigilali bidi dabe sa muabo wel, tama aga tobolude te wel gelama, aga te sęde sa muao.  
\v 8 Nago Aron sa muna silibo si, teda agai ogomani odasa aselama, tama augwaliba te hobolo ugwa muao,  
\v 9 tama augwali tabide te kukulu bagulama, tama augwali tobolude ugwa dage dabe kęnao. Nago tama tiwai sę te Aron aga ogomani dali augwali te pris dabe nigiliyu, tama tiao. Tama te bidi dabe augwali dali, te augwa wąį ogomani nosali pedalubo bage, augwali hanigo naga te pris sę sesemane sogo ela paibao,” wali.   
\p
\v 10 “Tama Moses nago te ofa yabo bulmakau te Deliba Sisinabo lotu ugwa be tų pąba sela aselama, tama Aron dali, aga ogwa dabe dali, augwaligo nogo te bulmakau toboluba mumainao.  
\v 11 Tama eno gedude nago te bulmakau te ugwa be tų pąde elagameo.  
\v 12 Tama te bulmakau kaneme meba nago nogo danigo selama, tama te alta gąų dabeba muao. Tama te tigidali kaneme elalubadi te alta pagede gelao.  
\v 13 Tialima, nosali te tabide ili tigidali sobadi, te wiegi yai homu, me te dwasianu dini homu si te ili dali elalubadi selama, tama te tigidali altade ulama, te enabolo ofa ebo tiwai ilao.  
\v 14 Tiali goli, te bulmakau mi, me wali, me te di tabi tomode elalubo, te olo madi bulu badu siago domainogo ulao. Te bulmakau da, te augwaligo dwai sę yali sela sąbo ofa yaibao.”   
\p
\v 15 “Tama nago te ofa yabo sipsip omai gomunai wai sao. Tama Aron dali, aga ogomani dali, augwaligo nogo te sipsip toboluba mumainao.  
\v 16 Tialima, te sipsip elama, tama te kaneme selama, te alta me si me si bogo badu sąyao.  
\v 17 Tama nago te sipsip todogo pelama, tama te sągą si wę telabadi, te haliga dabe me tilama, tama tigidali te sipsip tobolu daiba ugwadu manao.  
\v 18 Tama tigidali te altaba munama, te ofa tiwai yao. Tama ena Genuai Bidi eno homu pemene wiegi yai te ofa elama, siago dabo denami ebo te eno homu pemene wiegi yai yaibao.” \x * \xo 29:18 \xt Ef 5:2; Fil 4:18\x*   
\p
\v 19 “Tama nago te si wali sipsip selama, tama Aron aga ogomani dali augwaligo nogo te sipsip tobolu daiba ugwadu mumainao,” Genuai Bidigo Mosesbolo te po wai.  
\v 20 “Tialima nago te sipsip kibu elama, tama aga te kaneme dwasianu selama, tama Aron aga ogomani dali augwaligo dolo olo sabi badu te kaneme muao, tama augwali te kaneme dolo a nogo danide mubadi, te dolo a sągą dani badu muyu yao. Tama te poude munalubo kaneme tigidali te alta me si me si bogo badu sąsą pao.  
\v 21 Nosali nago te altade munalubo kaneme meba, me te pris sa muabo wel sobadi elama, tama Aronba me agai gudali ugwaba segeni sąsąyu, tama aga ogomaniba me augwaligo gudali ugwaba segeni sąsąyu yao. Nago tama tiali da, teda Aron aga ogomani dali augwaligo gudali ugwa me, te tigidali augwali eno bage deli naga dao.”   
\p
\v 22 “Tama nago te sipsip me togolama, tama te sipsip ili tigidali te pris bage augwali sa munama, tama ofa ilabo nai sao. Te nisali danu, me te haliga mesegelali delegabe ili, me te wiegi yai te sipsip kibu homu sobadi, te homu me si tede ili elalubo, tama dolo sągą badu te tele mi, te me sao.  
\v 23 Tama te tudi badu augwaligo enabolo te bo disiąwai yis meni yai bret ofa ilali nai, nago te deli deli haniani bret dabe sao, me deli augwaligo te oliv wel dali ulali, tama gasa augwaligo te oliv wel me te bisket dali me ulubeo.  
\v 24 Tialima, te kibu mi, me te bret te Aron aga ogomani dali augwalibolo menama, tama augwaligo te ofa ilibo sę eyu, te ena gedude augwaligo te nai dabe ugwaba sidu geyu yaibao.  
\v 25 Tama augwaligo nogode munalubo te nai selama, tama te alta daiba ugwadu munama, te ofa ebo dabo siago tigidali domainao. Tama ena Genuai Bidi, eno te ofa ebo denami wiegi yai ebo te eno godolo mu yaibao.  
\v 26 Tama nago te Aron te pris sęde sa mumainogo elali sipsip kibu aga bau te nago nogogo tulama, tama sela bilibo, te eno gedude tama tiao. Tama te kibu bau te naga tuagameo.”   
\p
\v 27 “Tama dagego te pris sa muabo sogo pedalubode, dagego te kibu bau, me te sipsip sągą tele mi selama, nago te pris sa muyu, ofa iliyu, tama nogogo tulama, eno gedude sabilao. Tama nosali te mi te pris dabe augwalibolo mao.  
\v 28 Tigidali sogo Israel dabe augwaligo te kibu sipsip te ena dali deli homu pedelainu enabolo ofa mao, augwaligo te kibu bau, me te dolo sągą badu tele mi selama, tama te pris dabe augwalibolo mao. Te Israel dabe augwaligo te tiwai mabo ena Genuai Bidibolo momainao.”   
\p
\v 29 “Te Aron isibo side da, teda augwaligo agai te pris sę yali ugwa dabe te aga ogomanibolo mao. Tama Aron aga hani bidi augwali te pris sę emainogo sa mubo sogo, te ugwa mumainogo yao.  
\v 30 Tama te Arongo ogwago te aga aya Arongo het pris sę yali tiwai selama bidainogo ebo sogo, agai te a naga olama nogo me badu si sogo usu nama, te ugwa mubo usu selama, te ugwa mumainao. Tama te a naga olama me si sogo aga eno te Deliba Sisinabo ugwa be obo tomoba pelama, tama te Tedali Gasagi Yai Be Habu tomoba peyu, te sę emainogo yao.”   
\p
\v 31 “Tama nago te Aron aga ogomani dali augwali te pris sę emainogo sa mubo sogo, nago te ofa ilali te sipsip mi selama, tama senede munama, tama te ugwa be obo bagulali tomode ulao.  
\v 32 Tama pris dabe augwaligo te mi dali, te bret me te basket wade munalubadi selama, tama eno Deliba Sisinabo Ugwa Be tųde dulaluyu, tuao.  
\v 33 Augwaligo augwa dwai sę yali sela sąyu ofa ilali nai te augwa ma tumainogo yao, te augwali te pris bidi dabe da olama, sa mubo sogo te tiwai yao. Te pris dabe augwaligo naga te nai tuyu, tama te we bidi augwaligo te nai me tugobeo. Menio. Te augwalide habu mu selao, te tedali mu gasagi yai nai naga dao.  
\v 34 Tama te kibu mi me bret meba munalubadi te kigamuba sabalobaso da, teda te nai augwaligo me tugio. Te kibu mu habu selao, te tedali gasagi yai mu dao, tama augwaligo te siaba ulama, tama siago tigidali dela silimainao.”   
\p
\v 35 “Nago te Aron aga ogomani dali augwali te pris sa mubo sę iliyu, tama eno nagebolo wali po gilama te a naga me te si sogo te sę dolo yao.  
\v 36 Tama tigidali sogo nago te bulmakau me deli selama, te dwai sę yali sęgę sela sąyu, ofa ilao. Tama te ofa ebogo te eno alta te wiegi yai eno gedude ilao. Tama te ni oliv wel te eno altaba sa muyu gelao, te eno nai naga dao.  
\v 37 Nago te altaba te tiwai sę ilibo te 7 tama sogo te sę yao. Tama te alta te eno nai mu da weyu, te eno habu mu selaibao. Tama bidi me deligo nogogo me dįayu, ma magi nai me deligo te alta sai ugwadu daiba muyu da, te nai da, te tedali gasagi yai nai naga dao, te eno nai naga dao.”   
\s1 Tigidali sogo ofa iduabo po wali  
\r (Nam 28:1-8)  
\p
\v 38 “Tigidali sogo dagego te kibu sipsip wai si te kibu be deli yai elalubadi, tama te altaba munama, ofa yao.  
\v 39 Tama sipsip me deli te kigamu ofa eyu, tama gasa sipsip me te pio mu ofa yao.  
\v 40 Tama te sęgę deli yai plaua te witgo nigai dali, te sęgę deli yai oliv wel dali begelama, te hasia sipsip me deli dali ofa ilao. Tama me, dagego te sęgę deli yai wain ąį dali te ofa tiwai elama, te gelao.  
\v 41 Tama dagego te gasa sipsip me deli te pio ofa yao. Te deli tigi poai plaua me, te oliv wel me, te wain ąį me selama, tama te kigamu yali ofa tiwai gilama yao. Te tubo naigo ofa ebo dagego te nai ena Genuai Bidibolo mobao, tama te siago deyu, tama wiegi yai denami ebo te eno godolo ebo dao.  
\v 42 Te siago tigidali domainogo ulubo ofa te dagego sesemane sogo te ofa nosali yao, te eno Deliba Sisinabo Ugwa Be tų pąde tigidali sogo te ofa ebo, te eno sueibao.  
\v 43 Tama eno genuai ula te ugwa beba pedaliyu, tama te badu digi te eno bulu elaluyu, tama tedali gasagi yai bulu tama nigilaibao. Tede me ena te Israel we bidi dali deliba sisinaibao.”   
\p
\v 44 “Tama tibaso, te Deliba Sisinabo Ugwa Bede alta si da, te eno nai da weyu, te eno sa muaibao. Tama eno te Aron aga ogomani dali augwali sa munama, augwali te pris sę tiwai emainogo yaibao.  
\v 45 Tama ena dage Israel dabe tomode bidiyu, tama ena dagego God bidaibao.  
\v 46 Tama dagego ena bugagia koneama, ena Genuai Bidi da weyu, ena duga God dao, tama eno naga dage te Isip tǫde selama, tama eba odasa asai. Tama tiyu, ena dage tomode bidaibao. Ena digi, ena God, dagego Genuai Bidi dao,” te po wai.   
\c 30  
\s1 Denami ebo pauda ulubo alta po wali  
\r (Sai 37:25-28)  
\p
\v 1 Tama Godigo po ma weyu, te po wai, “Dagego te ni akas selama, tama alta me deli nigilama, te denami ilabo nai pauda ulubo alta tama nigao.  
\v 2 Te alta bobage usu sabo te 45 sentamita, tama aga genuai te tiwai te 45 sentamita, tama te ugwadu usu sabo te 90 sentamita dao. Tama dagego te bulmakau gąų tiwai me si me si te alta dononama, ugwadu muabo te nai dulao.  
\v 3 Tama te me si me si habu badu mesegelama, tama ugwadu me, tama aga gąųde me, te wiegi yai golgo haluyu, tama bobage golgo te alta bobegelama, obo tiwai nigiyu, kęnao.  
\v 4 Tama te ni munama, te alta tolabo madi te alta me badu gaga nigiyu, me badu te gaga nigibadi yao. Tama te gaga nigali nai si te aiyadu te alta bobegelali gol pąde dagego te sesegede kęnao.  
\v 5 Tama te ni akas dage si selama, te alta tolabo nai dulama, tama te nai si te golgo mesegelao.  
\v 6 Tialima, te ugwa be tomode te genuai walobo ugwa dąį te bomo yai po dualali halobage, te dąį ugwa e badu te alta muao, te dwai sę ebo sęgę sela sąbo madi ugwadu pąde, te halobage munalubo digio. Tama te sęgę sela sąbo madi te eno dage sisinaibao.”   
\p
\v 7 “Te tigidali sogo kigamu Aron aselama, te lam sole sisi yagasaibao, tama te tiagasobo sogo agai te pusu wiegi yai ebo pauda meba te altaba denami elainogo ulao.  
\v 8 Tama agai te tiwai naga te pio te lam sole domonagasu asobo sogo tiao. Dagego te ofa ena Genuai Bidibolo tigidali sogo nosali me te tiwai ofa elalua pao.  
\v 9 Dagego te gasagi yai nai dabe te altade ofa igio. Te haniani denami ilibo pauda me te eno dagebolo habu selali nai, te kibu, me wit, me wain ąį, te tama nai me e altade ofa igimio.  
\v 10 Tigidali kibu bede deli sogo Arongo te alta wiegi yai ilibo te sę eno gedude yao. Te tiwai sę yainogo da, dagego te sęgę sela sąyu te ofa ilali kaneme me badu sobadi, tama te nigilali alta gąų dabeba muao. Dagego te tebo sę te tigidali kibu bede yao. Tama tiyu, te alta te habu mu seliyu, tedali gasagi yai elaluaibao. Te Genuai Bidi eno nai naga da waibao.”   
\s1 Genuai Bidigo lotu ugwa bede takis mone po  
\p
\v 11 Nosali Genuai Bidigo po Mosesbolo weyu, te po wai,  
\v 12 “Nago te Israel bidi nogi selama, tama te bukude asębo sogo, tigidali bidi deli deligo mone meba enabolo mao. Ma, meni baso da, teda genuai gasi dwai mu pedelama, te sogo augwali dolaibao.  
\v 13 Tigidali bidi dabe augwali nogi sali bage, augwaligo te mone ge a naga te enabolo te ofa tiwai mao. \x * \xo 30:13 \xt Sai 38:25-26; Mat 17:24\x*  
\v 14 Augwaligo te tigidali bidigo kibu be te 20de gagalama, te kibu be ugwaba holali bidi dabe nogi selama, tama tigidaligo te mone enabolo mao.  
\v 15 Te mone bidigo te agai mone hauwa me menamuo, te magi nai meni yai bidigo te dwasianu mone me mayu me igio. Tigidaligo te mone ge a naga, te tama naga enabolo mao, te tama tiyu augwa yali sęgę abeleyu da, teda augwali me isigobeo.  
\v 16 Te monego da, te eno lotu ugwa bede elalubo nai te dobaso da, te nai te monego gasa abelama, dodolabo mone dao. Te augwa bidibo ula abelabo mone eno te mone sulama, tama eno homu augwaliba muyu, tama augwali tonaluaibao.”   
\s1 Te pou augwaligo te brasgo nigali po  
\p
\v 17 Tama Genuai Bidigo Mosesbolo te po wai,  
\v 18 “Dagego te bras meba selama, tama te genuai pou me deli nigibadi, te pou muabo page me nigao. Tama te altade te ugwa be si tomode te tǫba te pou munama, tama te poude te wę pągąnao. \x * \xo 30:18 \xt Sai 38:8\x*  
\v 19 Tama Aron aga ogomani dali augwali nogo sągą te węde telamainogo yao.  
\v 20 Te augwali eno ugwa be tomoba painogo, me ma te altade te siago ulubo ofa dabe me yabo homu eyu da, teda augwaligo nogo sągą bolo hasia ąįgo tedelama, tama eno beba asobaso da, teda augwali me isigobeo.  
\v 21 Mu tama, augwali isidali weyu, augwa nogo sągą ąįgo tedelao. Augwali dali, augwa nosali ame nabo wai dabe dali, augwaligo te bomai po sesemane sogo wali peyu, bidimainao,” wali. Te pris dabe sa mubo wel po wali   
\p
\v 22 Tama Genuai Bidigo po Mosesbolo ma weyu, te po wai,  
\v 23 “Megi nago te wiegi wiegi yai denami ebo nai dabe sao. Hasia bolo te denami ebo nai sanda mea sao, te nai sęgę te 6 kilo te elalubao. Tama te sinamon pauda meba te wiegi yai denami elalubo, te aga te 3 kilo, tama te tobage wiegi yai denami ebo awi dili badi, te aga sęgę me te 3 kilo dao.  
\v 24 Tama te ni kasia waligo nigai pauda meba sao, te aga sęgę 6 kilo dao. Tama te oliv wel sęgę 4 lita elalubo te nai dabeba gelama,  
\v 25 tama te sanda nigibo sę mu koneai bidigo ebo sę tiwai eyu, te nai dabe bugagia taluama, te sanda tiwai pedelemainao. Te nai dabe da, te eno nai sa muabo nai elaluaibao.”   
\p
\v 26 “Tama nago te wel dwasianu selama, tama eno dage dali Deliba Sisinabo Ugwa Beba dwasianu geliyu, te bomai po munalubo halobageba gelibadi,  
\v 27 tama te bret muabo tebol, me te tebolde munalubo nai dabeba me gelao, tama te lam dabe tolalubo nai, me aga nai dabeba badi, tama te denami ilibo altaba me gelao,  
\v 28 tama te tigidali siaba uluyu ofa ebo alta me, te aga nai dabeba dali, te wę paubo pou me, te aga pageba me, te tiwai naga yao.  
\v 29 Nago te nai dabe te eno tedali gasagi yai nai dabe mu da olama, tama te we bidi augwalibolo habu mu selao. Ma, bidi me deligo, me ma wego, me ma magi nai dabego te naiba dįya idali weyu, te me habu seliyu, gasagi yai tedali pedelama, tama te eno nai naga dao.”   
\p
\v 30 “Tialima, nosali te wel selama, tama dwasianu te Aronba, me te aga ogomani, augwaliba gelama, tama augwali pris pedelama, tama eno sę emainogo sa muao.  
\v 31 Tama nago te Israel we bidi augwalibolo e tiwai po wao, ‘Dage dali, te duga hani nosali nosali pedalubo bage, dagego te wel selama, tama te dago Genuai Bidigo nai naga da olama, sa muao.  
\v 32 Dagego te wel te olo bidi dabeba geligimio. Tama dagego te deli tigi poai wel nigigio. Te Godigo tedali gasagi yai nai naga da weyu, tama dagebolo habu selibao.  
\v 33 Ma, te bidi me deligo te deli tigi poai wel nigilama, te pris meni yai olo bidi mebabolo te wel gelibaso da, teda te bidi aga te Godigo we bidi hani bidibo tomode me bidigobeo,’ te po pusao,” wali.   
\s1 Denami ebo pauda po wali  
\p
\v 34 Tialima, Genuai Bidigo Mosesbolo po ma weyu, te po wai, “Megi eno homugo dagego te wiegi yai denami yabo pauda meba nigiyąo. Te pauda te deli tigi poai dabe naga usu nama, elalumainao. Te pauda mea badi, te augwaligo te lalaigo nigai nai dabe badi, tama te bomai nai te galbanum pauda kanemego nigai me, te ni balsam kanemego nigali, te nai dabe tama sao.  
\v 35 Tama te nai dabe sesa pelama, tama te denami yabo nai pauda bugagia taluama nigao, te wiegi yai denami ilibo nai nigibo bidigo sę ebo tiwai yao. Tama tamu dwasianu te pauda denami wiegi yai tedali gasagi yai ilimainogo, te tamu muao.  
\v 36 Te nai meba te pauda tiwai mu pedelemainogo, bugagia te nai me badu haluao, tama te ugwa be tomoba eno gedude sela pelama, tama te bomai po munalubo halobage pąde muao, te ena dage dali deliba sisinabo madi. Te denami ebo nai pauda te tedali gasagi yai nai mu dao, te olo nai mu menio.  
\v 37 Tama dagego duga nai da, te homu elama, tama te tiwai nai munu me nigilamuo. Te Genuai Bidi eno nai naga dao, te tama homu naga yao.  
\v 38 Ma, bidi me deli aga homugo naga agai te denami ebo nai sanda tiwai me deli odainogo nigali da, teda te bidi aga te eno we bidi hani tomode me bidigobeo,” wali. \x * \xo 30:38 \xt Sai 37:29\x*   
\c 31  
\s1 Te ugwa bede mubo nai dabe nigibo koneai bidi po  
\r (Sai 35:30–36:1)  
\p
\v 1 Tama Genuai Bidigo Mosesbolo e tiwai po wai,  
\v 2 “Odao, eno te bidi Besalel sa muani, te Urigo ogwa, tama te Hurgo wąįgo ogwa, te Juda hani bidi,  
\v 3-4 tama agabolo eno homu kolesaga te bomo mawai. Tama eno agabolo te wiegi wiegi yai nai gol, me silva, me bras nigabo wiegi yai homu kolesaga mawai dao.  
\v 5 Tama eno agabolo te gasagi yai bomai masigi dabe togolama te duliyu, tama te ni namede, me te nide, me haniani nai togolama dulumainogo te homu kolesaga mawai, tama te ugwa be au ilibo gasa tigidali haniani sę emainogo yaibao.  
\v 6 Tama me te Oholiap te eno sa muani, te Ahisamakgo ogwa, tama te Dango hani, tama aga te Besalel dali te sę emainogo yaibao. Tama eno genuai wiegi yai homu kolesaga te gasa bidi dabe mebabolo menama, tama augwaligo eno te po weyu nigao wali nai nigimainogo te usu yaibao.  
\v 7 Augwaligo te eno ugwa be sę ebadi, te bomai po muabo halobage nigibadi, te aga paliabo nai da te sęgę sela sąbo madi tiwai me, te tigidali ugwa bede muabo nai dabe nigagameo.  
\v 8 Tama augwaligo te tebol sai dali, tebolde muabo aga doado bage dali nigibadi, tama te lam tolalubo nai dali, te nai aga doado bage, te me nigaibao. Augwaligo te lam sole tolalubo nai te wiegi yai golgo naga nigibadi yao, te aga dali elalubo nai dabe me. Tama augwaligo te denami ilibo alta me nigagameo.  
\v 9 Tama augwaligo te siago tigidali domainogo te ofa eyu, te ulabo madi te alta nigiyu, tama aga doado bage me, tama te nogo sągą ąį telayabo pou nigibadi, tama te pou muabo page me nigaibao.  
\v 10 Tama augwaligo Aron aga ogomani dali augwaligo gudabo ugwa te wiegi yai mu hobolama, nigagameo, te bage augwaligo te ugwa gudama pris sę yaibao.  
\v 11 Tama augwaligo eno nai dabe sa muabo wel nigiyu, tama te Tedali Gasagi Yai Be Habu badu wiegi yai denami iliyu ulabo pauda nigaibao. Augwaligo te nai dabe te eno nagebolo wali po tiwai gilama tama te nai dabe nigimainao,” wali.   
\s1 Toma tuyu olo bidibo side, te Sabat side da wali  
\p
\v 12-13 Tialima, Genuai Bidigo Mosesbolo te po olama, te Israel we bidibolo te po omainogo yai, “Te Sabat side te olo bidiyu, toma nabo side dao, tama te Sabat side sesemane sogo dage eno po odolama, olo bidiyu, toma nao. Te Sabat side eno dagebolo te sa mubo tiwai megi mayu, tama nosali me tigidali sogo tama naga tiao. Tama tebo sę dagego konemainogo, te ena digi ena dagego Genuai Bidi dao, tama eno dage te tedali gasagi yai we bidi hani pedalomainogo ebo dao.  
\v 14 Te toma tubo side te Genuai Bidi eno side dao, tama tiyu, dage te sogo toma tuyu, olo bidao. Ma, bidi me deli aga te sogo sę yali da, agai te eno bomo yai po sela sąbao, tama te bidi dagego aga ela muao.  
\v 15 Te tigidali Sarere dagego sę yabo side te 6, te tama side sę yao, tiali goli te dei 7, te me deli sogo da, te eno olo bidibo sogo, tama te olo bidiyu, toma nabo genuai side dao. Dagego te olo bidibo side sę ebo bidi dabe tigidali ela muao. \x * \xo 31:15 \xt Sai 20:8-11; 23:12; 34:21; 35:2; Prs 23:3; Bom 5:12-14\x*  
\v 16 Dage Israel bage te sogo toma nao, magi baso meni, te polobadu te po dąų wai elaluai, dagego po dąų olama, te wali paibao wai dao. Tama tibaso, nosali dagego tama tidi pao.  
\v 17 Te side te po dąų wabo tiwai elama, te ena tomode me te dage Israel bage dali te po sesemane sogo elalua paibao. Magi baso meni, ena Genuai Bidi eno te dagalu de tǫ si nigali, te 6 te tama sogo nigilama, tama te 7 wali, te me deli sogo eno te sę tigidali tagalama, tama ena toma tuyu, olo bidai dao.” \x * \xo 31:17 \xt Sai 20:11\x*   
\p
\v 18 Te Godigo po te Sainai bulu dude Moses dali wali sogo, agai te masigi name si te bomo yai po God aga digi nogogo asęai, te Mosesbolo mawai dao.   
\c 32  
\s1 Augwaligo bulmakau wai te golgo nigali  
\r (Bom 9:6-29)  
\p
\v 1 Te Moses te Sainai bulu duba holama, tama bobage sogo bidali, tama aga gesege mu yali, tama aga polo me asobeo. Tama te we bidi augwali te Aron pageba sisinigi pelama, agabolo te po wai, “Te magi nai te bidi Mosesba pedelali, te dago konebeo, te bidigo da te Isipde selama, tama da odasa eba asai. Tama nago god me deli nigilama, tama pabodu polasa peyu, tama da tųdu odasa pomainogo yaibao.” Augwaligo te po wai. \x * \xo 32:1 \xt Tpi 7:40\x*   
\p
\v 2 Tialima, Arongo augwalibolo te po wai, “Dagego duga we dabego olode walalubo gol, me duga wai dabego olode walalubo gol me sesa pelama, tama selasa aselama, enabolo magasao.”  
\v 3 Arongo te po obaso, te we bidi dabe augwa olode walaluali gol dabe pepede pelama, tama sela aselama, agabolo magasai.  
\v 4 Tama agai augwaligo te olode au yali gol dabe selama, tama ulama, tama te ąį tiwai pedelai. Tama agai te tǫde dedage me deli augwaligo te bulmakau noma tiwai nigilama, tama te ąį tiwai pedelai gol teba gelama, tama te bulmakau tiwai pedelai. Tama agai hwą ge selama, te golgo nigai bulmakau noma bugagia dodolai. Tama nosali te we bidi augwaligo te po wai, “Odiąo! Te nai aga da Israel bagego god dao. Agai da Isipde selama, tama da odasa eba asai dao,” wali. \x * \xo 32:4 \xt Tpi 7:41\x*   
\p
\v 5 Arongo te tebo sulama, tama agai te bulmakau pąde te alta sai me deli nigai. Tama agai te po wai, “Do da, dago Genuai Bidibolo genuai nogi mayu, genuai nai tueibao.”  
\v 6 Tialima, te sogo nosali kigamu mu, te we bidi dabe augwaligo te ofa eyu, te siaba ulabo kibu bulmakau dabe sela asali. Tama augwaligo homu kolesaga deliba naga muainogo te ofa yabo kibu sipsip dabe me sela asai. Tama augwaligo te nai tuyu, te bomai wę tuyu elama, tama nosali te bidi dabe augwali pelama, te we dabe dali gagali igi pai. \x * \xo 32:6 \xt 1 Ko 10:7\x*   
\p
\v 7 Tama Genuai Bidigo Mosesbolo te po wai, “Nage polo e bulu dude bidali tagalama, aba dulao. Te naga Isipde odasa asali we bidi dabe augwaligo dwai kolesaga hauwa megi ebao.  
\v 8 Tama eno po weyu, augwalibolo te wali pao wali tų polo geda munama, tama augwaligo te bulmakau wai te golgo nigilama, tama agabolo lotu po weyu, tama agabolo ofa ilibao. Tama augwaligo te po wai, ‘Odao,’ wali, ‘te aga dago god dao. Agai da Isipde selama, odasa asai dao.’ Te po megi obao.  
\v 9 Tama ena God eno te we bidi augwali eno koneanio. Augwali da, te hagoma mu ebo we bidi dao.  
\v 10 Te eno augwali dali sębę mu elama, tama eno augwali mu dolaibao. Tama nago ena me togolamuo, mu menio. Tama nosali eno nage me, te naga hani ogomani dali, augwaligo te Israel bage hasegelama, tama genuai we bidi hani mu pedelaibao.” Te po wai.   
\p
\v 11 Tiali goli, Mosesgo te Genuai Bidigo homu bea sainu, agai bomonama gedu haluasa po aga Genuai Bidi Godibolo e tiwai po wai, “Genuai Bidio, tiyu nago sębęgo naga we bidi augwali dolomainogo sula tagalamuo. Nago te we bidi augwali te Isipde te nago naga genuai bomogo digi te augwali selama, odasa asai dao.  
\v 12 Ma, nago te tiwai kolesaga augwalibolo ebaso da, teda te Isip dabego te po waibao, ‘Godigo aga we bidi augwali dali dwai homu yai. Tama tibaso, augwali agai te Isipde selama, tama augwali odasa asali, te augwali te bulu dude mu dola silama, tama tigidali ela muani da,’ te po wabuo. Tiali goli, Genuai Bidi, tagalao. Tama nago te sębę yali homu te nago tagalama, tama nago homu kolesaga hasegelama, tama te we bidi augwali nago me dolamu dao.” Mosesgo te po wai.   
\p
\v 13 “Nago naga sę bidi Abraham, me Aisak, me Jekop, te homugo koneao. Tama nago te bomo yai po augwali dali dąų wali po, te homude koneao. Nago bomo yai po dąų mu weyu, e tiwai po wai, ‘Eno mu po obao, eno te dagego wąį nǫų dabe te dagebolo hauwa mu, te hǫ tiwai dageba mawaibao. Tama eno po dąų weyu, te eno dagebolo mawaiba wali te tǫ, teda te tǫ te eno duga wąį nǫų dabe augwaliba mawaibao. Tama augwali sesemane sogo mu te tǫde bidada paibao,’ nago te po wai.” \x * \xo 32:13 \xt Gag 17:8; 22:16-17\x*  
\v 14 Tama Mosesgo te tiwai gedu haluasa po obaso, tama Genuai Bidi aga homu ma hasegelama, tama aga te we bidi dolainu yali nai te aga we bidiba me tagala palobeo. \x * \xo 32:14 \xt Nam 14:13-19\x*   
\p
\v 15 Tialima, Moses te bulu dude bidali tagalama, tama aba duliyu, te Godigo bomo yai po asęani te masigi pedai si sela dulai. Godigo po te masigi si te si dali si badu te po asęai dao.  
\v 16 Godigo digi te masigi si nigilama, tama te masigi side te bomo yai po asęani, te bugagia ma dodolama todogo pai.   
\p
\v 17 Tama Josua te Sainai bulu dude a badu gana Moses asobo tonaluyu bidali. Tama Moses teba dulama, tama augwali si aba pidubadi, tama Josua agai te we bidi dabe augwaligo te i wabo po daga agai odai. Tama agai Mosesbolo e tiwai po wai, “Ae, Moses! Eno te we bidi bidibo madi te wąbi hwįyu kulukulu wabo odalio.”   
\p
\v 18 Tiali goli, Mosesgo te po wai, “Menio. Te bidigo wąbi hwįbo te aiyaba elaluyu, i wabo te tiwai me ebeo. Ma, te wąbi hwįbode te bidi dabe aiyaba elalubaso, te gela wabo tiwai menio. Eno te tęąbi wabo dogoni naga odobao,” wali.   
\p
\v 19 Tama Moses te we bidi bidibo pesage pąba sabolama suali, te bulmakau gol, me te we bidi augwali tęąbi idubo suali, tialima tama aga sębę mu yai. Tama agai te tolasa asali te masigi si, agai te bulu du pageba sąnama, tama te masigi si pepeda pai.  
\v 20 Tama Mosesgo augwaligo te nigali bulmakau selama, tama siaba ulai. Tama te gol ąį tiwai pedelama, tama nosali kedau elama, dila saide, agai te hamago haluama, te olo pauda tiwai pedelai. Tama agai te pauda gol te pabo ąįba sąwai. Tama sąsą bila silama, tama Mosesgo te tiwai ilama, te Israel dabe augwaligo te ąį tumainogo yalio.  
\v 21 Tama agai Aronbolo te po hanalu wai, “Te e we bidi augwaligo magi sę nagebolo ebaso, tama nago augwaligo te dwai kolesaga mu emainogo sula tagalaliwe?”   
\p
\v 22 Tialima, Arongo po wei ponoyu, te po wai, “Genuai bidio, nago ena dali sębę igio. Nago te we bidi hani augwaligo ebo kolesaga koneai dao. Augwaligo dwai kolesaga yainogo bomo mu ebo dao.  
\v 23 Tama augwaligo enabolo e tiwai po wai, ‘Dago te bidi Mosesba magi nai pedelali, te dago konebeo, te bidigo da Isipde selama, tama da eba odasa asai. Tama da te pabo tųde polasa pabo god me deli nago nigao.’  
\v 24 Eno odolama, tama eno te gol olode elalubo we bidibolo te po olama, tama augwaligo te gol pedelama, enabolo mao wai. Tialima, augwaligo enabolo mawai, tama eno te gol te siaba ulalio. Tama polo te bulmakau wai aga digi odolali pedelalio,” Arongo te po wai.   
\p
\v 25 Mosesgo koneani, te we bidi augwaligo dwai kolesaga subigila emainogo yali, tama Arongo augwali dąų wabo usu ebeo, te homu yali. Tama agai te homu yai, tiyu augwa boi bidi dabego augwali sulama, tama posobo po me gisugu maidali, te homu yai.  
\v 26 Tama tibaso, Moses pelama, te obo tųba doligi pelama, tama te tiwai i wai, “Te mena bidigo te Genuai Bidi wali paiba wida, teda te bage te ena bidibo madi asao.” Tialima, te Livai hani bidi tigidali augwali aselama, aga pąba dolagasai.   
\p
\v 27 Tama agai augwalibolo te po wai, “God, te da Israel bagego Genuai Bidigo te po wai, ‘Dage tigidaligo te bobage ge hwą selama, tama te u bidi dabe bidibo madi te pesageba pelama, tama te tibo god wali pabo bidi dabe ela muao, te ama, me te abagi dabe, te dage dali pąde bidibo bage, te dao,” wali.  
\v 28 Tama te Livai dabe augwaligo te Mosesgo wali po selama, te tiwai sę yai. Tama te sogo naga augwaligo te bidi sese umabo bidi dabe, 3,000 mu ela muai dao.  
\v 29 Tama Mosesgo te Livai dabe augwalibolo te po wai, “Megi dagego te bidi dabe augwali ela muani, te wai dabe me, te duga ama dede dabe, augwali meba da, te duga wai dabe, ama dede dabe, tiali digi augwaligo dwai sę ebaso, dagego augwali ela muani. Tama dagego te kolesaga yaligo naga, dage te Genuai Bidigo pris dabe tau sabo bage pedelaibao. Tama tiyu, megi Genuai Bidigo wiegi yai sę dagebolo ilaibao,” wali.   
\p
\v 30 Tama nosali sogo Mosesgo te we bidi augwalibolo te po wai, “Dagego te yali sęgę, te Genuai Bidi bidibo madi te bulu duba ma holama, tama eno agabolo te dagego sęgę sela sągowe naga, te eno agabolo hanalua sueibao,” wali.  
\v 31 Tialima, Moses te bulu duba ugwa holama, tama Genuai Bidibolo te tiwai po wai, “Homu dene mu ebao. Te e we bidi augwaligo te genuai sęgę sabo sę mu yalio. Augwaligo te tibo god me deli nigilama, tama augwaligo lotu po agaba wai dao.  
\v 32 Tiali goli, megi eno nagebolo hanalu obao, te nago homugo augwaligo sęgę sela sąyąbo homu ebaso da, teda nago augwaligo sęgę sela sąyao. Ma, nago hagela homu ebaso da, teda eno nagebolo te po hanalu waibao, te nago naga we bidi augwali nogi asęai elalubo bukude te eno nogi asęai elalubo, te deli naga te sela sąyagameo.” Te po wai. \x * \xo 32:32 \xt Tib 69:28; Ped 3:5\x*   
\p
\v 33 Tiali goli, Genuai Bidigo Mosesbolo te po wai, “Menio. Eno te dwai sę yali we bidi augwaligo nogi naga te eno sela sąwaibao.  
\v 34 Tialima, megi nage pelama, tama te we bidi augwali selama, tama eno nagebolo te po wali te buluba pao. Odao, eno Ensel Mobo Bidigo dage te pabo tųdu odasa paibao. Tiali goli, nosali da, te dene mabo sogo ena asiyu, tama te dwai sę yali we bidi augwali eno dene mu ilaibao,” Genuai Bidigo te po wai.   
\p
\v 35 Tialima, Genuai Bidigo nosali genuai gasi dwai me deli te bidi dabego dwai sę yali wei ponoyu, tama te gasi augwaliba tagala palai. Magi baso meni, augwaligo po bomo yai Aronbolo olama, tama agai te bulmakau wai te golgo nigai dao.   
\c 33  
\s1 Genuai Bidigo te Israel dabebolo po weyu, te Sainai bulu du taga pao po wai  
\p
\v 1 Megi da, Genuai Bidigo Mosesbolo e tiwai po wai, “Nage dali, te nago Isipde odasa asali we bidi me, dagego e bulu taga peyu, tama eno dagebolo po dąų weyu, dagebolo te mawaibao wali, te buluba piąo. Polobadu eno Abrahambolo, me Aisak dali, me Jekop dali, te tiwai po wai, ‘Tama eno te tǫ te duga hani wąį nǫų dabe augwalibolo mawaibao,’ wai dao. \x * \xo 33:1 \xt Gag 12:7; 26:3; 28:13\x*  
\v 2 Tama eno ensel mobo bidi me deli te dage pabo madi polasa tagalama, tama eno te Kenan hani, me Amor, me Hit, me Peres, me Hivi, me Jebus, te hani augwali eno sela sągi paibao.  
\v 3 Tama dage te wiegi wiegi yai haniani nai holobo madi, te ili elalubo wiegi yai tǫba bidigi paibao. Tiali goli, ena digi te ena dage dali me pogobeo, magi baso meni, te dage hagoma ebo we bidi dabe dao. Tiyu, te ena dage dali peyu da, te dage eno te tųde dolabuo,” wali.   
\p
\v 4 Tama Mosesgo te we bidi augwalibolo te Genuai Bidigo te bomai po mobaso, tama augwaligo homu sęgę elama, tama augwaligo te wiegi yai au te tigide me mubeo.  
\v 5 Tama Genuai Bidigo po Mosesgo te Israel we bidi augwalibolo omainogo te po wai, “Dage te hagoma ebo we bidi dabe mu dao. Te ena dage dali pobaso da, teda eno dage dolabuo. Te ena dage dali pęwadage sogo naga bidagasali goli, te eno dage tigidali dolabuo. Tialima, odiąo, te dagego tigide elalubo ring gol te nai dabe tigidali peda sąwai madi, tama eno mena tiwai kolesaga dagebolo yabo te eno homugo bugagia konemainogo yaibao.” Te po wai.  
\v 6 Tama augwaligo te Sainai bulu du taga pabo sogo, augwaligo te tigide muani te au dobage te me mubeo.   
\s1 Godigo ugwa be po  
\p
\v 7 Tigidali sogo te Israel dabe augwali pelama, te bidigi pabo madi, tama augwa ugwa be sę eyu yai, tama Mosesgo me ugwa be me deli selama, tama augwaligo te be sę ebo pesage te bulu badu te dwasianu digibulu gana te ugwa be sę eyu yai. Tama agai te ugwa be nogi te tiwai nogi poai, te God Dali Sisinibo Ugwa Be da wai. Tama dego te Genuai Bidigo homu kolesaga te koneainogo da, teda aga te ugwa beba paibao.  
\v 8 Tama Moses te ugwa beba pabo sogo da, te tigidali we bidi augwa ugwa bede bidiyu, tama augwali hodaluama, tama augwa ugwa be tųde dolaluyu, tama Moses te ugwa be tomoba pabo suai dao.  
\v 9 Tama Moses te ugwa be tomoba pai madigi, tama te pǫ aselama, te ugwa be tų pąba dolagasai. Tama Genuai Bidi te pǫ tomode bidiyu, tama Moses dali po miai dao.  
\v 10 Tama te Israel we bidi augwali te augwa ugwa be tųde dolaluyu, tama te pǫ te ugwa be pąde bidibaso da, teda augwali tobolu basi gulama, tama lotu po Godibolo wai dao.  
\v 11 Tama Genuai Bidigo Moses dali po miani, te bidigo aga abagi dali po mibo tiwai gilama yai. Augwa si te po ola silama, tama Moses aga te bidibo pesageba ma asiyu yai. Tiali goli, Mosesgo sę ebo ogwa bidi, te Josua, te Nungo ogwa, aga te tomode me bididuai. Agai te Sisinibo Ugwa Be munu me taga pisąwai dao.   
\s1 Genuai Bidigo dąų wali po  
\p
\v 12 Mosesgo e tiwai po Genuai Bidibolo wai, “Nago enabolo te e we bidi augwali te augwa tǫba odasa pao, te po wai. Tiali goli, nago enabolo te mena bidigo ena tau somainu yabo bidi te ena dali me pao wabo po, te nago me wabeo. Tama nago te po wai, ‘Eno nage bugagia koneani, tama nage eno godolo ebo da,’ wai.  
\v 13 Tama nago ena godolo eba wida, teda eno homugo nago enabolo te nago homu kolesaga ola menama, tama eno nage bugagia konemainu, tama sesemane sogo eno te nago godolo yabo kolesaga naga yaibao. Tama eno homugo me te naga digi sa muani we bidi te nago homugo ma konemainogo, te homu eno ebo dao.”   
\p
\v 14 Tama Genuai Bidigo te po wai, “Ena digi nage dali hodobo peyu, tama nagebolo wiegi yai homu nagame ebo kolesaga mawaibao.”   
\p
\v 15 Tialima, Mosesgo Genuai Bidibolo te po ma wai, “Te naga digi te da dali pisąwani da, teda nago da ede bidali te taga pomainogo te me tigio.  
\v 16 Ma, nage da dali pisąwani da, te gasa bidi hani augwaligo mena tama te nago ena me, te naga we bidi dabe dali, godolo ebo te koneaibawe? Tiali goli, nage da dali pobaso da, teda te gasa bidi hani augwaligo koneama, te da we bidi te gasa we bidi hani tigidali tiwai meni, da te gasagi yai bage mu da waibao,” wali.   
\p
\v 17 Tialima, Genuai Bidigo Mosesbolo te po wai, “Eno te nago wali po selama, te sę yaibao. Magi baso meni, eno nage godolo eyu, tama eno nage bugagia koneai dao.”   
\p
\v 18 Tama Mosesgo Genuai Bidibolo e tiwai po wai, “Eno homugo nago genuai ula ebo gesabi enabolo waselao.”   
\p
\v 19 Tama Genuai Bidigo Mosesbolo po wei ponoyu, te po wai, “Eno nagebolo te eno wiegi yai ula tigidali ola mawaibao. Tama eno nogi nagebolo pusuyu, eno e tiwai po waibao, ‘Ena Genuai Bidi dao.’ Odao, te eno olo tau siyu mabo wiegi yai kolesaga eyu, tama eno bidi me delide homu dene eyu, tau sobaso da, teda eno te sę eyu naga ebo dao. \x * \xo 33:19 \xt Rom 9:15\x*  
\v 20 Tiali goli, nago ena gesabi me sugobeo, magi baso meni, te bidi me deligo eno gesabi subaso da, teda aga isaibao.  
\v 21 Suao, te genuai masigi me dedeli ena pąde elalubao. Tama nage te masigi daiba ugwadu dolugulao.  
\v 22 Tama eno gesabigo genuai ula te nage pąba asobo side, eno nage te masigi dudulawi me deli tomoba munama, tama nage eno nogogo mesegelama elalubadi, ena ela soaibao.  
\v 23 Tama nosali eno dagala sąbosi, tama nago ena tudi badu naga sumainogo yaibao. Tiali goli, nago ena gesabi me sulamuo,” te po wai.   
\c 34  
\s1 Mosesgo bomai po si sogo ma sali  
\r (Bom 10:1-5)  
\p
\v 1 Nosali Genuai Bidigo po Mosesbolo weyu, te po wai, “Nago te masigi dage si togolama, tama bugagia dodolama, tama nago te sąnama toga pali masigi sawali, te tiwai si ma emainao. Tama eno te hasia polobadu togolama asęani tiwai po naga ma asęaibao.  
\v 2 Tama nago te masigi si dodola munama, tama do kigamu nage te bulu duba holama, tama ena dali da si deliba sisinaibao.  
\v 3 Te bidi me deli nage dali me asomainogo menio. Eno homugo te gasa bidi te e bulu duba asela bidagasobo, te eno homu hagela ebo. Tigidali aiyade naga bidalumainao. Tama te sipsip bulmakau dabe me te bulu du pąba aselama, te nosa dabe munu me tuagaselamu dao.”   
\p
\v 4 Tialima, tama Mosesgo te masigi pedai si te polasa togali te tiwai elama, tama agai te masigi sawali si te Sainai bulu duba kigamu digi mu tolasa holali, te Genuai Bidigo agabolo wali po selama, tama tiwai sę yai dao.  
\v 5 Tama Genuai Bidi te pǫ tomode bidama, tama dulama, tama Moses dali te bulu duba ugwadu dolagaselama, tama aga digi, aga Genuai Bidi nogi page po pusagasai.  
\v 6 Tama aga te Moses pąba pelama ela soali, tama i weyu, te po wai, “Ena Genuai Bidi, ena Genuai Bidi dao. Ena God, tama ena te olo tau siyu mabo wiegi yai kolesaga badi, te homu dene ebo page bidi dao. Tama eno sębę polo me egobeo. Eno tigidali we bidi godolo mu elama, tama eno ena wali po tigidali wali pabo dao.  
\v 7 Te eno we bidi hani hauwa godolo iduyu, tama te eno po dąų wali tiwai gilama, tama eno augwaligo hagoma ebo haniani dwai kolesaga te sela sąbo dao. Tiali goli, te dwai sę ebo bidi dabebolo eno dene ilaibao. Tama eno augwaligo wai dabebolo me, tama augwaligo nosali pedalobo wąį te wai dabebolo me, tama te sela, me te me si me si haniba te tiwai dene mabo sę naga augwaliba pedelaibao,” wali. \x * \xo 34:7 \xt Sai 20:5-6; Nam 14:18; Bom 5:9-10; 7:9-10\x*   
\p
\v 8 Tama Godigo po ola silibo si, tama polo Moses te tǫba degasa dulama, tama Godibolo lotu po wai dao.  
\v 9 Tama Mosesgo te po wai, “Genuai Bidi, nago ena godolo mu ebo da wida, teda eno homugo nage da dali pomainogo homu ebao. Te mu tama, te e we bidi augwaligo hagoma eyu, dwai kolesaga ebo dao, tiali goli eno homugo te dago tigidali dwai kolesaga ebo me, tama dago sęgę me, te sela sąnama, tama da selama, tama naga we bidi tiwai mu bidimainogo te homu eno ebo dao,” Mosesgo te po wai.   
\s1 Godigo te we bidi augwali dali te po dąų ma wali po  
\r (Sai 23:14-19; Bom 7:1-5; 16:1-17)  
\p
\v 10 Tama Genuai Bidigo Mosesbolo te po wai, “Megi eno bomai po dąų dage Israel dabe dali yainogo ebao. Te nago we bidi augwali gedude te eno genuai bomai sę te eno gasa tigidali we bidi hani dali polobadu me isąwai te sę yaibao. Tama tigidali gasa we bidigo te ena Genuai Bidigo dage eno tau siyu, haniani sę ebo te augwaligo sulama, tama augwali homu hauwa elama, tama noma saibao.  
\v 11 Tama megi eno dagebolo te mawainogo ebo bomai po tigidali te dagego odoyu, wali piąo. Ena te dage pabo madi te ena polasa pelama, tama eno te Amor dabe badi, te Kenan dabe me, te Hit dabe me, te Peres dabe me, te Hivi dabe badi, te Jebus, te hani dabe augwali eno sela sągi paibao.  
\v 12 Tama dua bugagia, te dagego megi painogo ebo te bulu tǫde bidibo bidi dabe dali te abagi nami bidabo bomai po munu me dąų wagimio. Tiyu, augwaligo ebo kolesagaba dage kekelama, tama dage tulaluama, tama dage tigidali dolabuo.  
\v 13 Menio. Dagego augwaligo te lotu wabo nai dabe dolao. Te alta dabe, me te pos masigi dabe te pepedelama, tama augwaligo tibo god we Asera piksa te ni dagede elalubo, te togolama sąyao.” \x * \xo 34:13 \xt Bom 16:21\x*   
\p
\v 14 “Ena Genuai Bidi, tama dagego ena deliba naga lotu po wao. Dagego te tibo godiba lotu po me wagimio. Magi baso meni, te tibo god me deligo ena bidibo hasegelainogo ebaso, te eno aga me gogologobeo. Tede ena sębę mu yaibao.  
\v 15 Dagego te bulu tǫde bidibo bage augwali dali te abagi nami bidabo bomai po dąų munu me olamuo. Augwaligo te tibo godiba lotu wabo dao. Tama dagego augwali dali te bomai po dąų obaso da, teda augwaligo dagebolo te augwali dali deliba sisinabo po hanaluama, tama dagego te augwaligo tibo godiba ofa ilali te kibu me te nai dabe tuaibao.  
\v 16 Tama tiyu, dage Israel gesi bidi dabego te gasa hani gesi wegi mani sabuo. Te dagego tama tiali da, teda te we dabego te augwa bidi kekelama, tama te bidi dabe augwaligo ena tagalama, tama te tibo god dabeba lotu waibao. Te eno gedude te kolesaga te penani ela bilibo kolesaga tiwai yaibao.”   
\p
\v 17 “Dagego te tibo god dabe te aingo nigilama, tama augwaliba lotu po me wagimio. Te habu mu dao.”   
\p
\v 18 “Dagego te Bo Disiąwai Nai Bret te tubo sogo te genuai side te homugo me gegeda pigimio. Dagego polua Abipde te Isip taga soali, tama tigidali kibu bede dagego te yis meni yai bret te poluade, te a naga olama nogo me badu si, te tama sogo naga tuyu, te eno dagebolo polobadu wali gilama tama tiao.” \x * \xo 34:18 \xt Sai 12:14-20; Prs 23:6-8; Nam 28:16-25\x*   
\p
\v 19 “Te dagego tigidali gomunai ogwa, me te dagego bulmakau sipsip dabe te gomunai wai omai dabe me, te enabolo naga mao. \x * \xo 34:19 \xt Sai 13:2\x*  
\v 20 Tiali goli, dagego homugo te duga te bidi duabo donki kibu gomunai wai ma abela homu ebaso da, teda duga sipsip wai me deli selama, te donki hasegelama, tama sipsip wai ofa yao. Tama dagego ma abelesiąwani da, teda dagego te donki mage togwao. Tama me te duga gomunai ogwa tigidali te ma abelao.”  
\p “Te dagego enaba lotu po wagasabo homu ebaso da, te dagego ofa yabo nai deli digi sela asao, olo asigio.” \x * \xo 34:20 \xt Sai 13:13\x*   
\p
\v 21 “Tama tigidali Sarere te dagego sę yabo side te a naga olama nogo kibisa, te tama sogo naga sę yabo sogo te elalubao, tiali goli te 7 wali, te me deli sogo te sę me egio, te habu selai. Te gide tǫ elabo sogo, ma te nai inayu tau yai nai sisinibo sogo elalubaso da, dagego te olo bidibo side te sę me igimio.” \x * \xo 34:21 \xt Sai 20:9-10; 23:12; 31:15; 35:2; Prs 23:3; Bom 5:13-14\x*   
\p
\v 22 “Dagego homu wiegi yai pemene te genuai side te inawai nai siyu, te wiegi yai homu pemene yali side te dagego homu koneama, te side te wit hasia inawai te sali side dao. Tama me te poluade te ni du inayu tau yai sali side, dage te dwasianu tolu yabe dabe bede genuai sogo bidali side, te dagego homugo ma koneao. \x * \xo 34:22 \xt Prs 23:15-21, 39-43; Nam 28:26-31\x*  
\v 23 Tama deli kibu bede sela sogo, dage bidi tigidaligo ena Tigidali Nai Tonalubo God bidibo madi aselama, lotu po wagasao, te duga Israel duga Genuai Bidi dao.  
\v 24 Nosali da, eno dagego tǫde megi te bidibo we bidi hani augwali sela sąnama, tama dagego tǫ dąį genuai ilaibao. Tama dagego enabolo lotu wagasobo sogo, te tigidali kibu bede sela sogo naga te lotu po weyu, tama dagego tama tibadi, te boi bidigo dagego tǫ sainogo homu me egobeo.”   
\p
\v 25 “Dagego te kibu sipsip, meme, bulmakau dabe te enabolo ofa ilibo sogo, dagego te yis elalubo bret te dali te enabolo ofa me elamuo. Tama dagego te Godigo dage Ela Soali Side te bodolu koneama, tama dagego te ofa eyu elali sipsip mi tigidali te dagego me tula silisąbaso da, teda dagego te nai dage dabe te kigamu tuaiba homu elama me mugimio.” \x * \xo 34:25 \xt Sai 12:10\x*   
\p
\v 26 “Te tigidali kibu bede dagego gide te polasa ina yani wiegi yai nai te Genuai Bidi eno beba sela asao.” \x * \xo 34:26 \xt Bom 24:21; 26:2\x*  
\p “Dagego te kibu meme ame pę te seneba pęgęnama, tama te meme digi wai te ąįgo me ulainogo me igimio.”   
\p
\v 27 Tama Genuai Bidigo Mosesbolo e tiwai po wai, “Nago te po dabe te buku me delide asęao, magi baso meni, te tigidali po nage dali, me te Israel dabe augwali dali, te po dąų wali page e dao.”  
\v 28 Tama Moses te Genuai Bidi dali te bulu dude te bidi sese si, 40 sogo bidai. Tama agai nai deli me, ąį me, te me tubeo. Mu menio. Tama Genuai Bidigo te bomai po te Mosesgo te sela holali masigi side asęai. Te po te Godigo bomo yai nogo si po dabe dao.   
\s1 Mosesgo gesabi ula mu yai  
\p
\v 29 Tama Mosesgo te bulu du tagalama dulali sogo, agai te bomai po elalubo masigi si me te sela dulali. Agai te Genuai Bidi dali po mianigo, tama Mosesgo gesabi ula mu yai. Tiali goli, aga digi te tiwai ula yali, te agai me konebeo.  
\v 30 Aron dali te we bidi augwaligo te Moses gesabi ula yai sulama, tama augwali wi elama, tama augwali aga pąba me pai menio.  
\v 31 Tiali goli, Mosesgo augwali i obaso, tama Aron dali, te Israel tobolu bidi dabe dali, augwali aga pageba pelama, tama Mosesgo augwali dali po wai dao.  
\v 32 Tama nosali, te gasa Israel bage meba tigidali te aga pąba pelama, tama Mosesgo augwali tigidalibolo dali te Genuai Bidigo agabolo te Sainai bulu dude mani bomai po, te augwali tigidaliba te po wai dao.  
\v 33 Mosesgo te po augwalibolo ola silibo si, teda aga te ugwa pedai selama, tama aga gesabi geme duala siyu yai dao.  
\v 34 Tiali goli, Moses te lotu ugwa be tomoba te Genuai Bidi dali po miainogo pabo sogo, agai te gesabi dualaluali te ugwa pedai sela sąnama, tama buluba ma asiyu, te gesabi halusiąma asai. Aga te bedu buluba asobo si da, teda te we bidi augwalibolo te Genuai Bidigo agabolo wali po tigidali te augwalibolo wai dao.  
\v 35 Tama te we bidi augwaligo te Moses gesabi ula ebo suai. Mosesgo augwalibolo te po ola silibo si da, teda aga gesabi ma haluama, tama aga te Genuai Bidi dali po ma migi painogo ebo sogo da, agai te ugwa pedai ma sela sąnama, te Genuai Bidi dali po migi pabo dao. \x * \xo 34:35 \xt 2 Ko 3:7-16\x*   
\c 35  
\s1 Te olo bidiyu toma nabo side te bomo yai po dabe po  
\p
\v 1 Mosesgo te tigidali Israel we bidi i olama, asobode augwalibolo e tiwai po wai, “Genuai Bidigo te po wali, dagego te e bomai po wali piąo, te po wai dao.  
\v 2 Te Sarere dagego sę yabo side te 6 sogo te sę yabo side te elalubao. Tiali goli, te 7 wali, te me deli sogo te olo bidiyu, toma naga niąo, tama te sę idali weyu, habu mu selao, magi baso meni, te Genuai Bidigo side dolo dao. Te side te bidigo, ma te wego, te sę ebaso da, teda dagego aga ela muao. \x * \xo 35:2 \xt Sai 20:8-11; 23:12; 31:15; 34:21; Prs 23:3; Bom 5:12-14\x*  
\v 3 Te dwasianu sę dagego bede te sia udulabo sę elalubaso, te me habu selai dao, te olo bidiyu toma nabo side dao.” Te po wai.   
\s1 Te we bidi dabego nai dabe te ugwa beba Godibolo mani  
\p
\v 4-5 Nosali Mosesgo te Israel dabe augwalibolo e tiwai po wai, “Genuai Bidigo te po wai, megi dagego nai meba agabolo mao. Te agabolo nai mawainogo ebo we bidi, augwaligo e tiwai nai dabe sela asomainogo yao, te gol, me silva, me bras,  
\v 6 tama te gasa au wiegi yai name ugwa badi, te sisi yai, me te mama yai sipsip nisi, tama te augwaligo te meme nisigo nigai ugwa badi, tama te nai dabe sela asa wai.  
\v 7 Tama augwaligo te omai sipsip wali te mama pengo pilai, te sela asomainao. Tama augwaligo te wiegi yai hasa nogi sikau wali, te tamu ąįde elalubo, te wali me, te ni akas dage dabe, te sela asobadi,  
\v 8 tama te lam wel me, te wel dali taluabo denami ebo haniani nai me sela asiąo. Te taluali wel da, te Godigo nai dabe sa mubo wel dao. Tama wiegi yai denami ebo pauda, te denami ilabo nai dao, te me sela asomainogo yao.  
\v 9 Tama augwaligo te wiegi yai masigi meba sela asiyu, te ugwa aulubo nai, tama te het pris bidi hagawiade muabo dwasianu masigi muai ugwa dage, teba muabo masigi dabe, te me sela asomainogo yao,” Mosesgo Genuai Bidigo po tama pusali.   
\s1 Te ugwa be te nai dabe po  
\p
\v 10 “Dage tomode te nai dabe nigibo koneai bidi dabe augwali bidibo, tama te bage aselama, te Genuai Bidigo dagebolo niga wali nai dabe tigidali nigao.  
\v 11 Tama te ugwa be sę badi, tama te haluabo nai dabe me nigiyu, tama te bisigi dabe te obo ni dili me, te obo eyu te pipili pabo ni dabe me, te tigi ni pos bras dali, te pos page dąų walabo halobage, te nai dabe nigao.  
\v 12 Tama augwaligo te bomai po muabo halobage nigibadi, tama augwaligo te halobage tolabo ni togobadi, tama augwaligo te gol selama, te sęgę sela sąyąbo madi te pesage nigiyu, tama augwaligo te bomai po muani halobage haluabo name ugwa nigibadi yao.  
\v 13 Tama augwaligo te tebol nigiyu, te aga tede muabo nai dabe me nigibadi, tama te tebol tolabo ni dulubadi, tama augwaligo te God gedude te tebolde muabo bret me niga po wai.  
\v 14 Tama augwaligo te lam muabo nai, me te aga nai dabe dali nigao. Tama augwaligo te ula yabo lam dabe me, te wel me nigao.”   
\p
\v 15 “Tama augwaligo te denami ebo nai pauda ulabo alta nigiyu, tama te alta tolabo ni me togwao. Tama augwaligo te Genuai Bidigo nai da olama, te sa muabo wel me nigiyu, tama wiegi yai denami yabo pauda me nigao. Tama te ugwa be tųde walabo name ugwa me nigao.  
\v 16 Tama augwaligo te ofa yabo te alta nigibadi, tama alta tomoba mubo pololai moni bras nai, te bras nai dage nigiyu, te alta tolabo ni dage si me, te altade muabo nai dabe tigidali me nigao. Tama te ąį pauabo genuai pou me, te aga muabo page me, nigibadi yao.  
\v 17 Tama augwaligo te ugwa be bagulali te obode muabo ugwa nigibadi, tama te obo tigi ni pos dabe nigibadi, te tigi ni pos page dąų walabo halobage me nigao. Tama augwaligo te obo bagulali madi tųde muabo name ugwa me nigao.  
\v 18 Tama augwaligo te ugwa be kęabo te bono dabe nigibadi, te obo kęabo me te tǫde enebo bobobage nil bras, te haliga bono bomonabo nai dabe badi, tama nigao.  
\v 19 Tama augwaligo te Aron aga ogomani dali augwaligo te Tedali Gasagi Yai Be Habuba augwali te pris sę igi pabo sogo muabo ugwa, te gasa wiegi yai mu nigao.”   
\s1 Te we bidi augwaligo Godiba maiabo nai dabe selasa asali  
\p
\v 20 Tialima, tama tigidali Israel we bidigo Moses tagalama, tama palio.  
\v 21 Tama Mosesgo wali pogo te Israel we bidi hauwa augwali homude enebaso, tama augwaligo te Mosesgo wali po tiwai gilama te sę yainogo yali. Tama augwaligo nai dabe te Genuai Bidiba sela pelama, agai ugwa be sę emainogo yai. Tama augwaligo te lotu wabo nai dabe tigidali me, tama te ugwa bede sę yabo tigidali nai dabe badi, te pris dabego gudabo ugwa nigibo nai dabe tigidali sela pai.  
\v 22 Tama tigidali we bidigo homugo, te augwaligo e tobage haniani au dobage dabe sela pali, gudubo ugwade walobo pin me, olode walobo ring me, nogode mubo ring me, magede domobo beli me, tama golgo haniani doado bage sela pai. Tama te we bidi dabe augwaligo te doado bage te Genuai Bidibolo te ofa tiwai elama, mu mawai dao.  
\v 23 Tama meba we bidigo te gasa au wiegi yai ugwa, me te sisi yai, ma te mama yai sipsip nisigo, me te meme nisigo, me te omai sipsip wali te augwaligo mama pengo pilai badi, te tamu ąįde elalubo wiegi yai hasa sikau wali badi, te tama doado bage elaluali, te augwaligo te nai dabe sela asai dao.  
\v 24 Tama tigidali we bidigo te silva me bras elaluali, te augwaligo sela aselama, tama Genuai Bidi magasai. Tama te ni akas elaluali bidi dabego te ugwa be sę yabo ni sela asai.   
\p
\v 25 Tama te hobi gudubo koneani tigidali we, augwaligo te sisi yai me mama yai sipsip nisi selama, te hobi gudai. Tama augwaligo te wiegi yai ugwa nigabo te tedela yai hobi nigai. Tama augwaligo te hobi dabe dali, te wiegi yai tedela yai name ugwa me, selasa asai.  
\v 26 Tama te meme nisigo te hobi gudubo bugagia koneai we dabe mebago, te hobi augwaligo bugagia gudai dao.  
\v 27 Tama te tobolu bidi dabe augwaligo wiegi wiegi yai masigi te ugwaba, me te het pris bidigo hagawiade mubo ugwa, me te aga magede mubo ugwade muabo masigi dabe selasa asai.  
\v 28 Tama augwaligo te gasa tigi, me tedali yai pauda, me wel, me sanda te wel nigilama, te Genuai Bidigo naiba sa muyu nigabo nai, me te lam dabeba muabo nai, me te denami emainogo munama nigabo nai dabe selasa asalio.  
\v 29 Tigidali Israel we bidigo Genuai Bidibolo nai maiabo homu yali bage, augwaligo dwagi yai homu eyu, te Genuai Bidigo sę te Mosesbolo yao wali, te sę yainogo, te nai dabe olo sela asai.   
\s1 Te Godigo ugwa be sę yabo bidi dabe po wali  
\p
\v 30 Mosesgo te Israel dabe augwalibolo e tiwai po wai, “Genuai Bidigo te Besalel sa muani, te Urigo ogwa, tama Hur te aga wąį, te Juda hani dao.  
\v 31 Tama Genuai Bidi Godigo digi aga noma bidi te agabolo mani, tama agai homu kolesaga wiegi yai elaluyu, tama tigidali haniani sę ebo kolesaga wiegi yai koneai elaluai.  
\v 32 Tama agai homude bugagia koneama, tama te gol, me silva, me bras, te nai dabego te sę emainogo yai.  
\v 33 Tama agai te wiegi yai au yabo masigi togobo me, te ni dulama te todogo pabo sę me, te gasa au yabo nai meba togobo dabe me, te tigidali agai koneai.  
\v 34 Tama Genuai Bidigo wiegi yai kolesaga te Besalel de Oholiap, te bidi sibolo mawai, te Oholiap aga te Ahisamakgo ogwa, te Dango hani dao. Tama augwali sigo te gasa bidi dabego te sę dabe emainogo ola mabo te usu yaibao.  
\v 35 Genuai Bidigo te bidi si te haniani sę yabo homu kolesaga mawai dao, te masigi togobo sę, me te gasagi yai au yai piksa noma nigibo sę me, te wiegi yai gasa au yai ugwa hobolobo sę me, te hobigo au ebo sę me, te augwaligo sisi yai me mama yai sipsip nisigo augwaligo nigai. Augwali sigo te tigidali nai me, te piksa noma dabe me augwaligo nigainogo ebo, te augwali sigo te sę dabe me ebo te usu yaibao,” Mosesgo te po wai.   
\c 36  
\p
\v 1 Te Mosesgo po ma weyu, te po me wai, “Genuai Bidigo wiegi yai homu kolesaga te Besalel de Oholiap, te bidi sibolo dali, te tigidali sę ebo koneani bidi dabebolo dali, te sę emainogo eyu mani, tama augwaligo te Godigo ugwa be sę yabo nai tigidali nigibo te usu yaibao. Tama te bidi dabego naga te tigidali nai dabe te Genuai Bidigo po wali gilama te sę yainogo yao.”   
\s1 Te we bidi augwaligo doado bage hauwa sela asai  
\p
\v 2 Tama nosali Mosesgo Besalel me, Oholiap badi, i weyu, tama te Genuai Bidigo wiegi yai homu kolesaga mani bidi augwali tigidali i wai. Tama te sę ebo godolo homu ebo bidi dabe augwali asali, tama Mosesgo augwalibolo te sę gagalama yao, te po wai dao.  
\v 3 Tama Mosesgo te bidi dabe augwalibolo te Godigo ugwa be sę emainogo te Israel dabego sisinani nai tigidali te augwalibolo mawai. Tama tigidali sogo kigamu te Israel we bidi augwaligo te Godibolo te ofa tiwai maiabo nai dabe selasa pabo sę idu geai.  
\v 4 Tama tibaso, te ugwa be sę ebo bidi dabe augwaligo te nai dabe sela asobo sulama, tama augwa ebo sę tagalama,  
\v 5 tama aselama, Mosesbolo e tiwai po wagasali, “Te we bidi augwaligo te doado bage hauwa sela asali. Te tigidali sę yabo nai dabe te usu yali, te Genuai Bidigo dabolo te sę emainogo wali po gilama. Tama te doado bage meba hauwa te olo munaluaibao,” augwaligo te po wai.  
\v 6 Tialima, te tiwai Mosesgo te tigidali we bidi bidibo madi po ola tolai, “Dage we bidigo te Godigo ugwa be sę yabo nai dabe me sela aselamuo.” Augwaligo te po odama, tama te nai dabe augwaligo me sela pabeo.  
\v 7 Te we bidi dabego sela asali tigidali nai dabego te ugwa be sę yabo te usu elama, te dąį ela pelama, tama meba olo munaluai dao.   
\s1 Augwaligo te Godigo ugwa be sę yani  
\p
\v 8 Te tigidali sę bidigo te sę ebo mu koneama, tama augwaligo te Godigo ugwa be sę yai. Augwaligo te ugwa be sę yani, te genuai ugwa name nogo sigo sę yai. Augwaligo te gasa wiegi yai ugwa selama, tama augwaligo te mama yai, me sisi yai hobigo te name ugwa au ilai, te hobi te augwaligo sipsip nisigo nigai. Tama te sę mu koneai bidi augwaligo te mobo bidi ensel noma te tigidali ugwade hobobolo pai dao.  
\v 9 Te ugwa deli deli bobage usu sali, te 12 mita, te aga genuai usu nama te si tama 2 mita, tama tigidali ugwa te deli tigi poai naga dao.  
\v 10 Augwaligo te a naga ugwa dali te bobage iliyu, tama te gasa a naga bobage ugwa te tiwai naga elama hobolai dao.  
\v 11 Tama augwaligo te ring meba te husugu ugwago nigilama, tama tego te genuai bobage ugwa siba wadolainogo hobolai.  
\v 12 Te augwaligo 50 ring te hasia ugwa me dedeli sesegede kęnani, tama te tiwai naga augwaligo me si wali te ugwa sesegede kęnai dao.  
\v 13 Tama augwaligo te 50 huk gol nigilama, tama te genuai ugwa si dali te huk dabego dąų olama, tama deli ugwa poai naga pedelai dao.   
\p
\v 14 Tama augwaligo te ugwa be haluabo genuai ugwa me dedeli nigai. Augwaligo te ugwa 11 nigali, te augwaligo meme nisigo nigai dao.  
\v 15 Te ugwa deli deli bobage usu sali, te 13 mita, tama te genuai dabe usu nama, te si tama 2 mita, te tigidali usu sali te deli tigi poai naga yai.  
\v 16 Augwaligo te nogo a naga ugwa dali hobolali, te bobage ugwa dedeli pedelai. Tama augwaligo te ugwa 11de te gilama tiwai naga yai dao.  
\v 17 Tama augwaligo te 50 ring ugwa te hasia ugwa sesegede mubadi, te me ugwade te 50 te gasa me ugwa sesegede kęnai.  
\v 18 Tama augwaligo te 50 te huk bras te ugwa si dali kęnabo te nigilai. Tama te ugwa si te genuai deli tiwai naga pedelai.  
\v 19 Nosali augwaligo te ugwa be haluabo gasa nai me te augwaligo mama yai pengo pilai te omai sipsip waligo nigai. Tama nosali me augwaligo te sela wabo te be haluabo nai te tamu ąįde elalubo hasa nogi sikau waligo nigai. Te si haluali madi ugwadu muainogo nigai.   
\p
\v 20 Augwaligo te ugwa be daga ni name te ni akasgo nigai dao.  
\v 21 Te ni name tigidali bobage usu sali, te 4 mita, tama te ni name genuai usu sali usu ni te 66 sentamita dao.  
\v 22 Augwaligo te ni name dabe dwasianu bobage gana togolama, te be dili ni te page nai tomode dąų walomainogo yai. Tama augwaligo tigidali ni name te tiwai naga nigali.  
\v 23-24 Tama augwaligo te ni name dabe te bidi sese deli te tǫ sesege badu muabo nigibadi, tama te silva page halobage te bidi sese si te augwaligo te dodolabo ni name nigilama, tama te halobage si te ni name deli deli dologode te ni name page dąų walama, elalumainogo yai.  
\v 25 Tama augwaligo te tǫ sesege me badu te bidi sese dodolabo ni name nigali,  
\v 26 tama augwaligo te bidi sese si silva halobage nigilama, te ni name page dabe dąų walomainogo yai.  
\v 27 Tama augwaligo te dodolabo ni name me sela me sela te be tudi badu, te ugwa be te sia ge dega sigi pabo badu nigali.  
\v 28 Tama augwaligo te ni nami si te ugwa be tudi badu te dage badu nigali.  
\v 29 Augwaligo te be dage si aiyadu ugwaba digigo dąų wawalo holai. Augwaligo te tiwai sę te si dali si dage badu te tiwai yali.  
\v 30 Tama te be tudi badu muani ni name te 8 badi, tama te 8 ni name dabe page dąų walabo silva halobage dabe elaluali. Te silva halobage si te tigidali dodolabo ni name deli deli dologode elalua muani.   
\p
\v 31-32 Tama augwaligo te obo tuabo bobage ni meba te ni akasgo nigai. Augwaligo te tǫ sese me badu te obo tuabo ni nogo a naga nigibadi, te obo me badu sese badu tuabo ni a naga nigiyu, te sia ge dega sigi pabo tudi badu obo tuabo ni a naga nigiyu yai.  
\v 33 Te ni name dabe tomode dąų walama tuabo ni dabe, augwaligo te be dolo usu nama bobage togai dao.  
\v 34 Tama augwaligo te be daga ni name dabe te golgo haluama, tama tigidali ni name deli delide te ring gol meba kęnama, te bobage ni dabego te be daga ni dabe kęani dąų walali. Tama augwaligo te ni name dabe me te golgo haluai dao.   
\p
\v 35 Tama augwaligo te ugwa be tomode walabo dąį te gasa wiegi yai genuai ugwa me deli nigai. Tama augwaligo te sisi yai, me mama yai sipsip nisigo nigai hobigo te ugwa au ilai. Tama te sę mu koneai bidigo te mobo bidi ensel piksa noma te ugwade hobobolo pai dao.  
\v 36 Tama augwaligo te genuai dąį ugwa walabo pos me si me si te ni akasgo nigai. Tama augwaligo te pos dabe te golgo haluama, tama te ugwa walabo gol huk dabe te posba muai. Tama augwaligo te silva page dąų walabo halobage me si me si te pos dabe dodolabo madi nigai.  
\v 37 Tama augwaligo gasa wiegi yai genuai ugwa te ugwa be tųde muabo nigai. Tama augwaligo te gasagi yai hobi dabego bugagia au ilama, tama augwaligo te au yabo sisi yai hobi, me te mama yai hobi te sipsip nisigo nigai dao.  
\v 38 Tama augwaligo a naga pos nigilama, tama augwalide te huk dabe kęnama, tama te ugwa dabe walabo madi tama tiwai nigilai. Tama augwaligo te gol selama, te pos toboluba halubadi, tama te posba wadolabo ba dabe me tiai. Tama augwaligo a naga halobage bras, te pos dabe dodolabo madi te me nigai dao.   
\c 37  
\s1 Augwaligo te bomai po muabo halobage nigali  
\p
\v 1 Te Besalel dali sę ebo bidi dabe augwaligo te bomai po muabo halobage te ni akasgo nigali, te aga bobage usu nama nedali, te 110 sentamita, tama aga genuai yali usu nama, te 66 sentamita, tama aga ugwadu me te usu nama, te tiwai naga te 66 sentamita naga tama nigalio.  
\v 2 Tama augwaligo te halobage te wiegi yai golgo te tomo badu me, te bulu badu me haluama, tama augwaligo bobage gol me deligo te halobage sesege badu bagulai.  
\v 3 Tama te ring gol me si me si te halobage tolabo nigali, tama te ring dabe te sągą me si me si tede kęnani, te me si me badu kęniyu, te me si te me badu kęniyu yai.  
\v 4 Tama augwaligo te bomai po muani halobage tolabo ni dage si te ni akasgo dulama, tama te ni si te golgo haluai.  
\v 5 Tama te ni dage si te ring dedage siba me badu me, me badu me palama muani, te halobage tolainogo tiwai.   
\p
\v 6 Tama augwaligo te halobage po paliabo nai te wiegi yai golgo nigai, aga te dwai sę yali sęgę sela sąbo pesage dao. Te aga bobage usu nama usu sali, te 110 sentamita, tama aga genuai yali usu sali, te 66 sentamita tama nigai.  
\v 7 Tama augwaligo te gol selama, tama te hamago haluama, tama mobo bidi ensel si nigai. Te mobo bidi ensel si te halobage po paliabo nai nigali si badu dolaluai.  
\v 8 Tama te mobo bidi ensel si te me deli te dolo nogo badu dolaluyu, te me deli te pobase nogo badu dolaluyu yali. Augwaligo te mobo bidi ensel si nigibadi, tama te halobage po paliabo nai te deli nai tigi tiwai naga nigai.  
\v 9 Te mobo bidi ensel augwa siba digi ma tonononaluyu, tama aba te halobageba me tonononaluyu, tama augwali sigo bogo te dinigąluyu, tama te halobage po paliabo nai geme dualama elaluai.   
\s1 Augwaligo te bretgo tebol nigai  
\p
\v 10 Tama augwaligo tebol sai te ni akasgo nigali, tama bobage usu nama usu ni sali, te 88 sentamita, tama aga genuai usu sali, te 44 sentamita, tama ugwadu usu sali, te 66 sentamita, te tama tiai.  
\v 11 Tama te tebol augwaligo te wiegi yai golgo haluama, tama bobage golgo te sesege badu bagulai.  
\v 12 Tama te gol dage me augwaligo te ugwadu dai tigidali sesege badu kęnani, tama aga genuai usu sali, te 8 sentamita teba sabolali. Tama augwaligo te dwasianu golgo te tebol ugwadu dai sesege tigidali bagulama au yai dao.  
\v 13 Tama augwaligo ring gol me si me si nigilama, tama te tebol dage dabe me si me si te tebol sągą dabede kęnai dao.  
\v 14 Tama te ni tolaluali ring dabe te tebol tolobo nai augwaligo te sesegede pąde ugwadu daiba muai.  
\v 15 Tama augwaligo te tebol tolabo ni dage si te ni akasgo nigai, te si te golgo haluai.  
\v 16 Tama augwaligo te tebolde muabo pou me te doado bage dabe te wiegi yai golgo nigai. Te wain ąį ofa ilibo pou dabe, tama te plet dabe me, te kap dabe, me botol, te nai dabe tama te ofa yabo nai dao, tama augwaligo te nai dabe te wiegi yai golgo naga nigai.   
\s1 Augwaligo te lam sole dabe tolaluabo nai nigai  
\p
\v 17 Tialima, augwaligo te wiegi yai golgo te lam sole dabe tolaluabo nai nigai. Tama augwaligo te gol hamago haluama, tama te lam dodolabo madi te pesage nigilama, tama lam nogo dabe muabo digi te lam tolalubo nai elaluai. Tama augwaligo te ni duduli dabe te golgo nigilama, te lam tolaluabo nai au ilai. Augwaligo te deli tigi tiwai nai naga tigidali nigai dao.  
\v 18 Te lam tolaluabo naigo nogo ageali, te me sela me sela elaluali, te me sela me badu elaluyu, tama me sela te me badu elaluyu yai.  
\v 19 Augwaligo te tigidali nogo age deli deli te ni duduli sela, te ni amon duduli tiwaigo au ilai dao.  
\v 20 Tama augwaligo te lam tolaluabo nai au ilali, te ni duduli me si me sigo au ilai, tama te ni amon ni duduli tiwai tonobo ąǫ yalio.  
\v 21 Tama augwaligo te dwasianu ni duduli yabe dabe te lam ageali si si dologode nidigili pai dao.  
\v 22 Augwaligo te wiegi yai gol naga me dedeli selama, tama augwaligo te dabe nigilama, tama deli nai tiwai naga mu pedelai.  
\v 23 Tama augwaligo te gol nogo a naga olama me si lam genagi nigilama, tama selama, te lam tolaluabo naiba muainogo nigali, tama te lam genagi deli deliba muabo hobi, me te plet meba badi, te tama nai nigai dao.  
\v 24 Augwaligo te sęgę te 35 kilo elalubo te wiegi yai golgo te lam tolaluabo nai, me te aga muabo nai dabe tigidali nigai dao.   
\s1 Augwaligo te denami ebo nai ulabo alta nigali  
\p
\v 25 Augwaligo te ni akas selama, tama te denami ebo pauda ulabo alta nigai. Te tigidali sesege badu te deli tigi poai yali, te 45 sentamita usu naga tiwai, tama ugwadu usu sali te 90 sentamita dąį yali. Te altade te tiwai nai te bulmakau gąų me si me si augwaligo dulama, tama te deli deli te alta kele ni dagede muai.  
\v 26 Tama augwaligo te nai me si me si ugwadu bogo badu haluama, tama te gąų me si me si me te golgo haluai. Tama augwaligo te bobobage golgo te tigidali sesege bobegelama paliai.  
\v 27 Tama me badude augwaligo te ni palabo madi te ring si golgo nigali, te alta tolabo madi nigilama, tama gasa badu me tama tiali, tama augwaligo te ring me si me si te alta ugwadu sesegede muai.  
\v 28 Tama te alta ni palabo ni dage si augwaligo te ni akasgo nigilama, tama te ni si te golgo haluai.   
\s1 Augwaligo te wel me, denami ebo pauda me nigai  
\p
\v 29 Tama augwaligo te wel nigilama, te Genuai Bidigo nai dabe da olama sa muabo wel dao, tama te begelali, te sanda tiwai dolo mu yai. Tama augwaligo te wiegi yai paudago te wiegi yai denami yabo nai nigali, tama augwaligo bugagia taluai dao. \x * \xo 37:29 \xt Sai 30:22-38\x*   
\c 38  
\s1 Augwaligo te ofa ebo nai dabe ulabo alta nigali  
\p
\v 1 Te Besalel dali, te sę ebo bidi dabe dali, augwaligo te ni akas selama, te ofa ebo nai dabe ulabo alta sai nigai. Te alta sesegede te tigidali te deli tigi poai naga yali, te 2 mita 20 sentamita te usu tama yali, tama ugwadu usu sali, te 1 mita 30 sentamita, te tiwai usu sai dao.  
\v 2 Tama augwaligo te bulmakau gąų tiwai nai me si me si habu badu te ugwadu, te tiwai nai me si me si dulama, tama te gąų dabe te altade mu dąų wai. Tama te alta tigidali augwaligo te brasgo haluai dao.  
\v 3 Tama augwaligo te bras selama, te sia munama tolabo plet dabe badi, te dwasianu savol dabe me, te pou dabe badi, te age age yai na dabe me, tama te sia nogani keli sabo pou dabe, te tama nai dabe tigidali nigai.  
\v 4 Tama augwaligo te bras selama, tama te moni sawali bras nigiyu, polola polola pelama, tama te nai nigilama, tama te nai te alta halobage tomode elalumainogo eyu, muani.  
\v 5 Tama augwaligo te ring bras me si me si nigilama, tama te alta dage me si me si dage badu kęnai. Te ring dabe te ni munama, te alta tolabo digi nigai dao.  
\v 6 Tama augwaligo te alta tolabo te ni akas si dulama, tama brasgo haluai dao.  
\v 7 Tama augwaligo te ringba te alta si dali si badu muai. Te alta te augwaligo ni namego nigai halobage tiwai yali, tiali goli aga pagede te ni name meni yai.   
\s1 Augwaligo te ąį pauabo genuai pou nigai  
\p
\v 8 Tialima, te Godigo ugwa be tų mabode sę ebo we dabe augwaligo te bras Besalelbolo mawai. Te bras te augwa gesabi subo dula dabe tiwai. Tama te sę ebo bidi dabego te bras selama, tama te wę pauabo genuai pou me deli nigibadi, te pou muabo page me deli nigibadi yai dao. \x * \xo 38:8 \xt Sai 30:18\x*   
\s1 Te Godigo ugwa be bobegelali obo po  
\p
\v 9 Augwaligo te Godigo ugwa be bagulabo obo ugwa nigali. Te sesege bogo badu bobobage usu sali, te 44 mita te usu tiwai.  
\v 10 Tama augwaligo te bras selama, te bidi sese pos nigibadi, te pos dabe page dodolabo halobage te bidi sese nigali, tama augwaligo te huk dabe, me te ba dabe te silva dabego nigai.  
\v 11 Tama augwaligo te deli tigi poai naga te me sesege badu nigai dao.   
\p
\v 12 Tama te sia ge dulubo badu te name ugwa me deli walai elaluali, te ugwago bobage usu sali, te 22 mita elaluai, tama nogo si pos bras badi, te me nogo si te pos page dodolabo te halobage bras dabe elaluai. Tama te posde kęnabo dabe me, te ba me, te nai dabe augwaligo te silvago nigai.  
\v 13 Tama te giliga pedalu badu obo me te usu sali, 22 mita yai. Tų te obo badu elaluai.  
\v 14 Te obo me deli te sesege badu te tų sesegede te ugwa me deli walai elaluali, te ugwa aga bobage usu sali te 6 mita ma 60 sentamita usu sali tiwai yali, tama pos sela elaluali, me sela te pos dodolabo halobage nigai elaluai.  
\v 15 Tama augwaligo te deli tigi poai nai naga te gasa tų sesege obo badu nigai dao.  
\v 16 Augwaligo te gasa wiegi yai ugwa tigidali naga te obode walabo nigai.  
\v 17 Augwaligo te bras selama, tama te pos dabe page dodolabo halobage nigali. Tama augwaligo te silva selama, te huk dabe nigali, tama te pos dabe kęabo ba te nigai. Tama augwaligo te pos tobolude te silvago naga haluai. Tama te tigidali obo pos dabe augwaligo te ba silvago naga wadolai dao.   
\p
\v 18 Tama augwaligo te obo tųde muabo ugwa wiegi yai mu nigai. Tama augwaligo te ugwade au ilibo nai hobolali, te haniani hobigo, tama te husugu sipsipgo, me te mama yai sipsip nisigo nigai hobigo hobolai. Te ugwago bobage usu sali, te 9 mita tama yali. Tama te ugwa ugwadu dai badu usu sali, te 2 mita 20 sentamita yali, te obo bagulali ugwa te tiwai nigai.  
\v 19 Tama augwaligo te bras halobage me si me side dolalubo te pos me si me side te ugwa walai. Tama te huk dabe me, te pos tobolu haluali nai me, te posba wadolali ba dabe me, te augwaligo silvago naga nigai.  
\v 20 Tama augwaligo te bras selama, tama te tǫba enebo bobage nil dabe nigai, te bomonama kekelama tama te ugwa be dolaluabo bono dąų waliyu, tama te ugwa be bobegelali obo dąų waliyu yainogo tiwai dao.   
\s1 Augwaligo Godigo ugwa bede sę yabo haniani kapa sali  
\p
\v 21 Tama augwaligo te tigidali nai nigali gol, me silva, me bras nedali, augwaligo te tobage wiegi yai kapago nigali nai te Genuai Bidigo ugwa bede muani nai dao. Te ugwa be da, te Godigo nogo si bomai po elalubo masigi pedai si elalubo be dao. Tama Mosesgo digi te Livai dabe augwalibolo te nai nedao po olama, tama augwaligo nedelama, tama nisu naga gol elaluali te augwaligo asęani. Itama, te pris Arongo ogwago te Livai dabego te sę ebo tonaluai dao.  
\v 22 Tama Besalel, te Urigo ogwa, tama Uri te Hurgo ogwa, te Juda hani dao. Tialima, Besalelgo te Genuai Bidigo Mosesbolo wali po gilama te tigidali nai nigibo sę yalio.  
\v 23 Tama Oholiap te Ahisamakgo ogwa, te Dango hani bidi dao. Te Oholiapgo te wiegi yai masigide asębo po togobo sę konebadi, tama agai te haniani gasa nai dabe nigibo sę me koneai. Tama agai te haniani gasa hobi dabego te au ilibo sę me koneyu, te sisi yai hobi, me te mama yai hobi, te tobage sipsip nisigo nigai hobigo te au dabe ilibo sę koneai dao. Agai te Besalel dologode bidiyu, aga tau sali.  
\v 24 Augwaligo te we bidigo te Godigo ugwa be sę emainogo sela asali nai dabe te tigidali gol nedai, tama te nai dabego aga sęgę da te e tiwai, te 1,000 kilo usu dao.   
\p
\v 25-26 Tama augwaligo te silva nedali, tama te naigo sęgę te tiwai, te bidi sese hauwa, te 3,430 kilo sęgę yai. Te silva te bukude augwa nogi asęna elaluali bidi dabego sela asai. Te bidi dabego kibu be te bidi sese delidu ugwaba holali bage, augwali deli deligo te silva monego te mone ge a naga muani. Te bidi dabe te bidi sese hauwa mu, te 603,550, te tama bidi te mone muna muna pai dao. \x * \xo 38:25-26 \xt Sai 30:11-16; Mat 17:24\x*  
\v 27 Tama augwaligo te silvade sęgę 3,400 kilo yali, te Godigo ugwa be dili te dąų walabo nai nigali, tama te pos dabe page dodolabo halobage me, te Tedali Gasagi Yai Be Habu me, te Tedali Gasagi Yai Mu Be Habu me, te madi si te dualabo madi nai nigai. Te bidi sese a naga te 100 halobage elaluai. Te silva dage halobage deli deligo sęgę te 34 kilogram elaluai dao.  
\v 28 Tama me badu te munaluali silvago sęgę te 30 kilo usu tama elaluai. Tama te munaluali silvago augwaligo te huk nigilama, tama te pos dabede wadolama, tama te pos dabe ugwadu haluainogo tiwai sę yai dao.   
\p
\v 29 Te augwaligo Genuai Bidiba mani tigidali brasgo sęgę te bidi sese hauwa mu, 2,425 kilogram igi pai dao.  
\v 30 Tama augwaligo te bras selama, tama te pos dabe dodolabo halobage nigali, tama te Godigo ugwa be tųde muainogo yali nai me, tama alta dali te alta tomoba muani pololai sawali bras, te nai dali elaluali, tama te altade sę yabo nai dabe tigidali nigai dao.  
\v 31 Tama augwaligo te ugwa be bobegelabo te pos bulabo halobage dabe, me te obo bagulali madi tų nigabo nai dabe nigai. Tama augwaligo te tǫba enabo bobage nil dabe, te ugwa be bomonama kekalumainogo dąų walobo nai nigiyu, tama te ugwa be bobegelabo nai me nigai dao.   
\c 39  
\s1 Augwaligo te pris dabego gudabo ugwa dabe nigai  
\p
\v 1 Augwaligo te sisi yai sipsip nisi, me mama yai sipsip nisigo nigali hobi te augwaligo selama, tama te gasa wiegi yai ugwa te pris dabe augwaligo gudabo ugwa au ilama, te pris dabe augwaligo te Tedali Gasagi Yai Be Habu, te be habuba pelama, te pris sę ebo sogo te ugwa muani. Tama augwaligo te Genuai Bidigo Mosesbolo wali po gilama te Arongo pris sę eyu muabo ugwa nigai dao.  
\v 2 Augwaligo te wiegi yai ugwago te tobolu bidi pris gudabo wiegi yai ugwa nigilama, tama augwaligo te gol hobigo au ilama, tama te sisi sipsip nisigo, me mama sipsip nisigo nigai.  
\v 3 Augwaligo te gol hamago haluama, tama te pepa yabe tiwai pedelai. Tama te gol te hwą gego bugagia pedama, tama hobi tiwai te golgo nigali. Tama augwaligo te ugwa hobolo dwasianu gol hobi tiwai dali, te gasa haniani hobi dabe dali gelali, tama sisi hobigo me mama hobigo badi, tama togolama hobolai, te tobage sę mu koneai bidigo ebo sę tiwai naga tama yai.  
\v 4 Tama augwaligo te nagede abebolabo kukulu si te ugwago nigilama, tama ugwago digi ma hobolai.  
\v 5 Tama augwaligo wiegi yai ugwa pedai selama, tama te sesegedu bagulabo kukulu, te haliga tiwai kukulu te ugwago nigai. Tama augwaligo te gasa haniani hobi dabe selama, tama tede au ilali, te Genuai Bidigo Mosesbolo wali po gilama te tiwai sę yai dao.  
\v 6 Tama augwaligo te masigi konilian si te sisi ela munama, tama Jekopgo ogwa 12 te augwali nogi te masigi side asęnama togwali. Tama te masigi si augwaligo te dwasianu golde kęnanio.  
\v 7 Tama augwaligo te masigi name si te nagede muani te ugwago nigali kukulude kęnani, te Genuai Bidigo Mosesbolo wali po gilama tama tiai. Tama te masigi sigo te Israel hani 12 te hani sa muai dao, te Genuai Bidigo augwalide sesemane sogo homugo kone palomainogo eyu yali.   
\s1 Augwaligo te hagawiade muabo dwasianu ugwa nigai  
\p
\v 8 Tama augwaligo te hagawiade muabo ugwa te tobolu bidi prisgo gasa ugwa te tiwaigo naga nigai, te tobage sę ebo koneai bidigo ebo tiwai naga nigai. Augwaligo te ugwa te golgo nigai hobigo me, te gasa haniani hobigo me, tama au ilama, nigalio.  
\v 9 Tama augwaligo te ugwa bobage yali me, te genuai me, te bugagia tomode sugunama, te usususi yali te nedali, 22 sentamita teba sabolai.  
\v 10 Tama augwaligo te gasa wiegi yai masigi hani me si me si kęnani. Te hasia polali hani augwaligo te masigi hani rubi, me topas, me ganet, te tama masigi bolo podolama kęnai.  
\v 11 Tama te hani side augwaligo te masigi emeral, me sapaia, me daimon, te tama masigi dabe kęnai.  
\v 12 Tama te hani me sela te masigi tekois, me aget, me ametis, te tama hani masigi augwaligo kęnani.  
\v 13 Tama te hani me si me side te augwaligo te masigi hani beril, me konilian, me jaspa, te tama masigi augwaligo kęnani. Augwaligo te deli deli masigide te dwasianu gol au ilabo dąų walobo nai muani, tama nosali augwaligo te masigi dabe te ugwa daide, kęnai dao.  
\v 14 Te tigidali masigi nogo si olama sągą me badu si, te masigi deli delide augwaligo te Jekopgo ogwa nogi deli deli asęsę pali, te tigidali Israel hani sa muyu, tiai dao.   
\p
\v 15 Tama augwaligo te wiegi yai golgo te sen si nigali, te hagawiade muabo ugwa dąų olama, tolalumainogo tama tiwai dao.  
\v 16 Tama augwaligo te au ilibo gol si nigibadi, te ring gol si me nigai. Tama te ring si te hagawiade muabo ugwa dage si badu te nai muai.  
\v 17 Tama augwaligo te sen gol deli deligo sabi te ring sigo kęnai dao.  
\v 18 Tama augwaligo sen gol deli deligo gasa sabi te au yai gol sigo kęani, tama augwaligo te au yali nai te ugwa tolalubo kukulude kęnai dao.  
\v 19 Tama augwaligo te ring me si ma nigilama, tama te sabi si dabe aiyadu te hagawiade dąų wali, te genuai ugwa pąde te kęnai dao.  
\v 20 Tama augwaligo te ring me si ma nigali, tama te kukulugo te ugwa kęalubo madi kęniyu, te gasa wiegi yai kukulugo te tabi bagulali pąde kęai.  
\v 21 Tama augwaligo sisi yai string bono sobadi, tama te ring si te hagawiade elalubo ugwa te ring si sobadi elama, te genuai ugwaba kęai. Tama te hagawiade muani ugwa te kukulude dąų olama, tama me tulaluidali weyu dąų wai. Augwaligo te Genuai Bidigo Mosesbolo po walali gilama wali peyu, te tiwai sę yalio.   
\s1 Augwaligo te pris dabego gasa ugwa dabe nigali  
\p
\v 22 Tama augwaligo husugu hobi selama, tama te bobage gudubo ugwa te holobo ugwa dali daganama hobolalio.  
\v 23 Tama augwaligo te tobolu muabo madi sesege badu te dedage dąų olama hobolali, te ugwa dedage peda pelama, genuai me idali weyu.  
\v 24-26 Tama augwaligo gasa haniani hobi dabe selama, tama nai meba te ni pomigranet du tiwai hobolai. Tama augwaligo dwasianu belo te wiegi yai golgo nigai. Tama augwaligo te ni pomigranet du me, te belo me, te tobolu bidi prisgo gudabo ugwa aiyadu sabide walama hobolai. Augwaligo te deli deli gol belo te ni pomigranet du dabe tomo tomode te walalumainogo hobolama walai. Augwaligo te tiwai sę te Genuai Bidigo Mosesbolo po wali gilama tama tiai dao.   
\p
\v 27-29 Augwaligo te Arongo holobo ugwa me, te agai ogomanigo holobo ugwa me nigibadi, tama te tobolude bagulabo ugwa pedai dabe me, tama te pęwadage belibo trausis dabe me, tama te mǫ tiwai kukulu dabe me, te tama nai nigai. Te augwaligo wiegi yai name ugwa selama, tama te nai dabe nigai. Tama augwaligo gasa haniani hobi selama, tama te mǫ tiwai nigali kukulude hobolama, wiegi yai au ilali, te Genuai Bidigo Mosesbolo po wali gilama wali peyu, te tiwai sę yai.  
\v 30 Tama augwaligo te medal te wiegi yai golgo nigali, tego te het pris bidi te Genuai Bidigo bidi da olama sa muani. Augwaligo po me deli agade asęyu te tiwai po wai, “Te Genuai Bidigo Tedali Gasagi Yai Nai da.” Te po wai.  
\v 31 Tama augwaligo husugu yai hobi bono selama, tama augwaligo te tobolude muani ugwade te medal kęnani, te Genuai Bidigo Mosesbolo wali po tiwai gilama tama tiwai sę yai dao.   
\s1 Tigidali sę silali po  
\p
\v 32 Tama te ugwa be sę yali tigidali silai. Tama te Israel dabe augwaligo te Genuai Bidigo te Mosesbolo po wali gilama te tigidali nai nigalio.  
\v 33 Tama augwaligo te nai dabe te Moses bidiboba sela pai. Augwaligo te ugwa be dali, te aga doado bage dabe badi, tama sela pali, tama te huk dabe me, te be daga ni name dabe me, tama te ni name tuabo ni dabe me, te pos dabe me, tama te ni name dodolabo halobage dabe, te tama nai dabe sela pali,  
\v 34 tama te ugwa be haluabo genuai nai augwaligo te omai sipsip waligo nigali, tama te haluabo nai me augwaligo te tamu ąįde elalubo hasa sikau waligo nigali, tama te Tedali Gasagi Yai Mu Be Habu te geme dualabo genuai ugwa walobo nigibadi yalio.  
\v 35 Tama augwaligo te dąų walali bomai po muani halobage me, te aga sęgę sela sąbo madi te po paliabo nai dali elalubo me sela asai. Tama te halobage tolobo ni si me sela asobadi yali,  
\v 36 tama te tebol me, te tebolde mubo doado bage dali, tama te God gedude te tebolde mubo te bret me, te augwaligo sela pai dao.   
\p
\v 37 Tama augwaligo te wiegi yai golgo nigai te lam dabe tolalubo nai me, te aga doado bage dali me, te lamde muabo wel dabe dali, sela peyu,  
\v 38 te alta gol me sela pai. Tama augwaligo te Godigo nai sa muainogo te wel sela pali, tama denami ilibo pauda me, tama te ugwa be tųde mubo ugwa me sela palio.  
\v 39 Tama augwaligo te brasgo nigai alta me, te pololai sawali bras te alta halobage tomoba muabo nai, te dali sela pai, tama te alta tolobo ni dabe me, tama te tigidali altade nai dabe badi, tama te wę paubo pou me, te aga page dali, sela pali.  
\v 40 Tama augwaligo te ugwa be bobegelabo obo ugwa dabe badi, te pos dabe dali, tama te pos dodolabo halobage me, te obo tųde muabo ugwa me, te obo dąų walabo bono dabe dali, te tǫba enabo bobobage nil dabe, te bono bomonobo nai dabe badi, tama nai dabe sela pai. Augwaligo te ugwa be tomode sę yabo nai dabe tigidali sela pai.  
\v 41 Tama te pris dabego te Tedali Gasagi Yai Be Habu tomoba pelama, te pris sę eyu, te gudabo wiegi wiegi yai ugwa dabe, te me augwaligo sela pai. Te ugwa dabe te Godigo te pris Aron aga ogomani dabe dali augwaligo naga te ugwa gudama, te pris sę emainogo sa munama, te tedali gasagi yai ugwa dabe elalumainao wali.   
\p
\v 42 Te Israel dabe augwaligo te tigidali sę yali, te Genuai Bidigo Mosesbolo wali pode naga te tiwai gilama sę yai dao.  
\v 43 Tialima, Mosesgo augwaligo te nigali nai tigidali bugagia tonono bilama, osola sulama, tama agai koneani, te Genuai Bidigo agabolo po weyu, te nigao wali nai te tigidali te tiwai naga nigai. Agai sulama, tama agai augwalibolo te po wai, “Genuai Bidigo wiegi yai sę bugagia mu dagego te sę yalio. Tama tibaso, eno homugo agai dage dali dwagi yai sę emainao,” Mosesgo te po wai.   
\c 40  
\s1 Augwaligo te ugwa be sęnama, te Godigo be da olama, sa muani  
\p
\v 1 Tama Genuai Bidigo Mosesbolo te po wai,  
\v 2 “Odao, te hasia nanobo polua, te dei deli wabode, te dagego eno ugwa be sę yao.  
\v 3 Tama dagego te bomo yai po nogo si elalubo te halobage selama, tama te ugwa be tomoba munama, tama te halobage dualiyu, te genuai name ugwa walao.  
\v 4 Tama te tebol tomoba sela pelama, tama te nai dabe ugwadu daiba manao. Tama te lam dabe tolalubo nai sela aselama, tama te lam dabe te aga nogoba muao.  
\v 5 Tama te denami ebo pauda ulubo alta gol te bomo yai po haluali ugwa te sesege e bulu badu pąde muao. Tama te ugwa be tųde ugwa walao.  
\v 6 Tama te ofa dabe yabo genuai alta te ugwa obo tų pąde muao, te mesalode.  
\v 7 Tama te wę pauabo genuai pou te mesalode muao, te ugwa be de te alta si tomode, te ąį pągąnama, muao.  
\v 8 Tama te ugwa be bagulubo obo te dodolobadi, tama te genuai ugwa te obo tųde walobadi yao.”   
\p
\v 9 “Tialima, nosali te wel selama, te eno nai dabe sa muyu, tama te ugwa beba geliyu, te tomode munalubo nai dabe tigidaliba gelao. Te tiwai naga te dagego eno nai naga tigidali da sa muyu, tama tedali gasagi yai mu elalumainao.  
\v 10 Tama te bras altaba te wel geliyu, tama te sę yabo nai tigidaliba tiyu, tama te alta me te Genuai Bidigo nai naga dao homu eyu, tedali gasagi yai nai elalumainao.  
\v 11 Tama te tiwai naga te wę paubo genuai pouba me tiyu, tama aga te pageba me, tama te me te eno nai dao.”   
\p
\v 12 “Nosali nago te Aron aga ogomani augwali dali te ugwa be tųba sela pelama, tama augwali tede wę paumainao.  
\v 13 Tama te tobolu bidi pris ugwa te Aron tigiba muyu, te wel agaba sa muyu gelibadi, tama agai te eno te pris sę tiwai emainogo tiwai yao.  
\v 14 Tama nosali nago aga ogomani augwali me te pąba sela aselama, tama te pris au dobage augwali tigiba muao.  
\v 15 Tama augwali te welgo mumuyu, te nago augwa aya sa muani gilama tiao, tama augwa enade te pris sę emainogo yao. Nago augwali te tiwai te welgo sa muao, tama nosali augwa digi, me te augwa hani dali, augwa te pris sę sesemane bidada pabo sogo te sę ela pomainao.” Genuai Bidigo te po wai dao.  
\v 16 Tialima, Mosesgo te po odama, tama Genuai Bidigo agabolo te po wali te tigidali sę yai dao.   
\p
\v 17 Tama te hasia polua deli, te dei deli wabode, te kibu be side te augwaligo te Isip bulu taga soali, te bodolu nosali pedalobo sogo, augwaligo te Godigo ugwa be sę eyu yai dao.  
\v 18 Te augwaligo te ni name dabe bulabo te halobage dabe selama, te tǫba munama, tama te be daga ni name dabe te halobage tomoba bulai, tama te ni name te ni name tuabo bobobage ni dabe munama, tama te genuai ugwa walabo te pos dabe bulai.  
\v 19 Tama augwaligo te genuai ugwa te ugwa be pedu dili ugwadu munama, tama te halubo nai sela selago te ugwa be haluali, te Genuai Bidigo te Mosesbolo wali po gilama te tiwai sę yalio.   
\p
\v 20 Tama augwaligo te Godigo bomai po asęai masigi pedai si selama, tama te masigi si te dąų wali bomai po muabo halobage tomoba muai. Tama augwaligo te ni dage si te halobage tolabo madi nigilali dedage me si me siba muani, tama te halobage po paliabo nai, te da te sęgę sela sąbo madi, te halobage daiba ugwadu muai dao.  
\v 21 Tama te halobage te ugwa be tomoba munama, tama te halobage aga digi be habu elalumainogo eyu, augwaligo te moni wiegi yai dąį ilibo name ugwa walama, te halobage te Tedali Gasagi Yai Mu Be Habu tama elaluali. Augwaligo te tiwai sę yali, te Genuai Bidigo Mosesbolo po wali gilama tama tiai dao.   
\p
\v 22 Tama augwaligo te tebol te dąį ilibo ugwa e badu muyu, te Tedali Gasagi Yai Be Habu me badu tomoba muanio.  
\v 23 Tama augwaligo te bret selama, te Genuai Bidigo gedude te tebolba muai, te Genuai Bidigo Mosesbolo po wali gilama te tiwai sę yai.   
\p
\v 24 Tama te lam dabe tolalubo wiegi yai nai te me badu te tebol dolo si muanio, te Tedali Gasagi Yai Be Habu tomode.  
\v 25 Tama augwaligo te lam dabe te lam dabe tolaluabo nai te nogo age yaliba muani, tama te lam dabe te Genuai Bidi gedude udulali. Augwaligo te tiwai sę yali, te Genuai Bidigo Mosesbolo po wali gilama te tiwai sę yai.   
\p
\v 26 Tama augwaligo te alta gol te Tedali Gasagi Yai Be Habu tomoba muyu, te dąį ilibo wiegi yai name ugwa e badu muyu, tama muani.  
\v 27 Tama te altade augwaligo te denami ebo nai pauda ulali, te Genuai Bidigo po Mosesbolo wali gilama tama tiai.  
\v 28 Tama augwaligo te ugwa be tųde te genuai name ugwa walai dao.   
\p
\v 29 Tama nosali augwaligo te ofa ebo moni alta te ugwa be tų pąde muani. Tama te altade augwaligo te siago domainu tigidali ulubo kibu bulmakau me, te wit me, augwaligo ofa yali, te Genuai Bidigo Moses dali po wali gilama tama tiai dao.   
\p
\v 30 Tama augwaligo te wę pauabo genuai pou te alta de te ugwa be si tomode te ąį pągąnama muai dao.  
\v 31 Tialima, nosali Moses me, Aron me, te Aron aga ogomani me, augwali nogo sągą te ąįde telawai dao.  
\v 32 Te augwali te Godigo ugwa be tomoba me te altaba painogo, augwaligo hasia bolo nogo sągą ąįgo tedelama, pai. Augwaligo te Genuai Bidigo Mosesbolo po wali gilama tiai.   
\p
\v 33 Tama augwaligo te ugwa be dali, te alta me, bagulabo obo dodolama, tama augwaligo te obo tųde me te ugwa walali. Tama Moses dali, te bidi dabe me, augwaligo te tigidali sę yali, tama te ugwa be sę yani te sę tigidali silai.   
\s1 Te pǫ Godigo ugwa be ugwadu elaluai  
\p
\v 34 Tama te ugwa be sę silibo si, teda Genuai Bidigo pǫgo te ugwa be mesega sagaselama, tama aga genuai bomo yai ulago te be pągąna sai dao. \x * \xo 40:34 \xt 1 Kin 8:10-11; Ais 6:4; Ese 43:4-5; Ped 15:8\x*  
\v 35 Tama tiyu, Moses te ugwa be tomoba pabo te usu me ebe, magi baso meni, te Genuai Bidigo pǫ me, te ula me, te ugwa bede elaluyu, tama te be pągąna sai dao.   
\p
\v 36 Tama nosali te pǫgo te Godigo ugwa be taga pabo sogo da, teda te Israel dabe augwa tigidali doado bage selama, tama te pǫ pabo wali pai dao.  
\v 37 Tiali goli, te pǫ me te ugwa be ugwadu me bidibaso da, teda augwaligo te bulu me taga pabeo. Augwaligo suali, te pǫgo te ugwa be taga pabosi, teda augwali me hogodolama, tama te pǫ wali peyu yai dao.  
\v 38 Te Genuai Bidi bidibo pǫ te ugwa be ugwadu tigidali sogo bidai. Te siade augwaligo te pǫ suali, tama hulide te pǫde sia elalubo suai. Te ela asali sę tiwai tama me ela pidubadi, te Genuai Bidigo augwali mawainogo yali te tǫ pedaiba augwali sabolama bidigi pai dao.