\id EPH - Dadibi NT [mps] -Papua New Guinea 2001 (DBL 2014) 
\h Polgo Efesus Dabeba Pas Asęani 
\toc1 Polgo Efesus Dabeba Pas Asęani 
\toc2 Efesus 
\toc3 Ef 
\mt1 Polgo Efesus Dabeba Pas Asęani  
\imt1 Hasia nedebo tau sabo po  
\ip Te boi bidi dabe augwaligo Pol dali dwai homu eyu, tama aga kalabus beba muani, te moni hanu Romde. Tama agai te Kraisgo po wali pabo we bidi hani meba tau somainogo eyu, tama Polgo augwalibolo pas dabe asęna tolali. Tama tiyu agai pas me deli te bidi Filemon agabolo asęna tolali. Te pas me deli me te Kolosi hanuba tolali. Tama te tudi badu Polgo e pas asęnama, tama te bidi Tikikus aga nogoba muyu, tama Tikikusgo e pas te Efesus moni hanuba sela pali. Te Efesus moni tǫ tomode bidali Kraisgo po wali pali hani bage augwaligo me e pas nosali selama tama nedali.  
\ip E pas tomode Polgo genuai po sela ola mani. Hasia agai te Kraisde wali, aga da te tǫde bidibo we bidi ma dobola sabo wiegi yai bidi mu dao. Tama gasa po te Krais wali pabo we bidi augwalide wali. Augwali haniani gasagi gasagi yai we bidi dao, tiali goli augwali me te dedeli hani naga elalubao, augwali te Kraisgo tigi dao. Tama te tudi badu Polgo te Efesus bagebolo te doloba pai kolesaga eyu bugagia bidabo tau sabo po ola mayu asęani.  
\ip Te pas asęani homu kolesagago page e tiwai dao, Godigo homude te tigidali elalubo nai te bidi Kraisba sisinabo homu yali, te tigidali dagalude nai me tǫde nai me, tama Kraid aga te tigidali naigo polalubo tobolu bidi bidaibao. Te Dąį 1:10 tede te tama po elalubao. Tama Godigo digi agade homu kęą pabo we bidi homu hodolabo homu yali, te augwali Krais dali mu usu selama, tama augwali haliga delide bidimainu yaibao.  
\c 1  
\s1 Godigo Kraisde te da te gesi noma we bidi dabe ilibo sę yai dao  
\r (Dąį 1–3)  
\p
\v 1 Ena Pol da, ena Krais Jisasgo po pusigi pabo bidi dao. Tama God aga homugo ena te po wagi pabo sę emainogo eyu, agai ena te sęba muai dao. Tama eno e pas Godigo we bidi dagebolo eno asęna tolobao, dage Efesus bulu bidi hani, dage Krais Jisas wali pabo we bidi hani mu dao.  
\v 2 Tama eno homugo dago Aya God dali, dago Genuai Bidi Jisas Krais dali te augwali sigo dagebolo olo tau siyu, dage haliga nagame eyu bidao.   
\s1 Godigo Kraisde wiegi yai homu ilibo sę da dali yai dao  
\p
\v 3 Dago Godibolo usu da po weyu, agai nogi ugwaba sao. Aga dago Genuai Bidi Jisas Kraisgo Aya dao, agai God dao. Tama da te Krais dali wadolama, tama te da we bidigo gedugo susiąbo bomo elalubo naide, te tobage naide Godigo wiegi yai homu ilibo sę tigidali da dali yai dao. Agai te dago homu noma bidi tau somainogo eyu te wiegi yai homu ilibo sę yai dao.  
\v 4 Tama Godigo tǫ nigisiąbadi, agai da Krais dali wadolainu, da sa muai dao. Te sę page e dao: Godigo homugo da aga gedude dwai sę isiąwai we bidi, agai gedude doloba pai we bidi bidimainogo eyu agai da sa muai dao.  
\v 5 Tama God agai da dali wiegi yai homu eyu, da godolo mu ebaso, tama agai polobadu digi te agai da sa muyu, da te Jisas Kraisgo yali sęgo da ma selama, tama da God aga wai puluba bidimainogo yai dao. Tama te sę God aga homugo digi da godolo eyu tiwai dao.  
\v 6 Tama Godigo aga ogwa Jisasde dwagi yai homu eyu, tama da aga ogwade wadolo baso, tama agai da dali wiegi yai homu ilibo sę yai dao. Tama God agai da olo mu tau siyu agai te genuai sę ebaso, te dago God aga ula yai bomo elalubo nogi ugwaba sao.  
\v 7 Te Krais aga ni pedaide isilama, tama agai kanemego te da dąų wali nai pisigina sąwai, tama megi da olo mu bidibo dao. Te po page e dao, te Jisasgo kanemede te God agai dago yali dwai dwai sęgę tigidali te mu sela sąwai dao. Godigo da dali yali olo tau sabo kolesaga te dwasianu menio, agai te kolesaga umabo mu da dali yai. \x * \xo 1:7 \xt Kol 1:14\x*  
\v 8-9 Tama tiyu, God agai te dwagi yai homu kolesaga eyu, tama agai te tigidali naide mu konea silibaso, tama agai polobadu mu yali homu aga wali peyu, agai dabolo te bidibolo polobadu ola masiąwai po ola mawai. Tama te po dabolo ola masiąbadi, God aga homu te Krais agai eno homu wali peyu, te agai te sę yaibao, Godigo polobadu mu te homu yai.  
\v 10 Tama te sę e tama dao, God agai tigidali nai dodolo piduainu, agai bodolu mani sogo asobo si, te tigidali dagalude elalubo nai me, te tigidali tǫde elalubo nai me, te Kraisba tigidali nai deliba sisinaibao. Tama te sogo Krais aga tigidali naigo tobolu bidi bidaibao.  
\v 11 Ao, te God agaduba agai te nosali pedalabo sęde homu bugagia konea pelama, tama agai homugo magi sę yainogo ebo sę, te sę tigidali mu pedalobo dao. Tama agai te homu kolesaga wali peyu, tama polobadu agai da Juda dabe sa muai. Tama aga homugo da Juda dabe da aga hani we bidi mu bidimainogo agai da Krais dali wadolali. God agai te sęde hasia mu konea pelama, tama tiwai dao.  
\v 12 Tama hasia te gasa we bidi augwaligo te kolesaga isiąbadi da Juda we bidi dena homu tigidali te Godigo sa muani nosali asaibao wali bidi Krais te bidiba dena homu muani. Tama dena homu tigidali agaba munama, tama dwagi yai homu eyu, da aga ma asobo bugagia tonaluai dao. Tama da te tobage sę hasia ebo bidi dabe dago Godigo ula yai bomo elalubo nogi ugwaba sao.  
\v 13 Te dage me, dage Juda hani isiąwai we bidi, te mu po pusubo dagego odai, te Godigo wiegi yai pogo dage ma sabo po dao. Tama dagego te po odama, tama dagego konealubo po Kraisde dąų wai dao. Tama dage Krais dali wadolama bidibaso, tama God agai dage hagea siyu, sa mumainogo tama aga Mobo Bidi dagebolo mawai. Polobadu agai po weyu, te Mobo Bidi dabolo mawaibao po aga homugo wai dao.  
\v 14 Polobadu Godigo aga we bidi dali wiegi yai kolesaga yabo po wai dao. Tama megi agai dabolo aga Mobo Bidi manigo da, teda agai tebogo dago konebo dao, te agai da sa muani, te agai polobadu wali po tiwai nosali mu pedalaibao. Agai aga Mobo Bidi dabolo mobaso, te nosali te Godigo aga sa muani we bidi mu selama, tama augwali aga dali hodobo mu olo bidaibao, te me dago hania konebao, tede dago homu si ebo menio. Tama tibaso, dago Godigo ula yai bomo elalubo nogi ugwaba sao.   
\s1 Godigo Efesus hanibolo koneabo kolesaga momainogo Polgo hanalubo po wai  
\p
\v 15 Te Godigo te tobage wiegi yai sę dabolo ebaso, eno agabolo usu da po wabo dao. Eno odali, dagego konealubo po Genuai Bidi Jisasde dąų wali po me, tama dagego augwali dali wiegi yai homu eyu, te Kraisgo po odobo we bidi tigidali godolo ebo po me, te po si eno odali.  
\v 16 Tama tibaso, dagego tebo po eno odoyu, sesemane sogo eno Godibolo usu da po weyu agai dage tau somainogo po wabo dao. Dage eno homugo gegeda peyu me tagalobo menio. Tigidali sogo God dali eno po wabo si, dage tau somainogo eno dagego nogi me eno wabo dao.  
\v 17 Tama God da dago Genuai Bidi Jisas Krais aga God da, te dago genuai nogi mu elalubo Aya dao. Tama eno aga dali po weyu, eno homugo agai aga Mobo Bidi dagebolo mao. Tama menama, tama te Mobo Bidi agai dage wiegi yai homu kolesaga menama, tama agai God dagebolo waselaibao, te dagego God aga bugagia kuna konea silimainogo tiaibao.  
\v 18 Te eno homugo agai wiegi yai ula yai pogo dage homude ula momainogo yaibao. God agai dage i wali, te dagego agai te da mu ma sabo sogo tonalumainogo agai dage i wai dao. Tama Godigo Mobo Bidi agai dagego homude te wiegi yai ula yai po ola mayu, tama dagego te da mu ma sabo sogo tonalubo sę page gisiga koneyu, tama wiegi yai homu ebadi dagego te sogo asobo tonaluaibao. Tama God agai aga we bidi dali wiegi yai kolesaga nosali yaibao po weyu, te po dąų wai dao. Tama tibaso, dagego te kolesaga page wiegi yai mu dao konemainogo, eno God hanaludu gebo dao, agai te dagebolo te dage dali nosali yabo kolesaga page gisiga ola mao.  
\v 19-20 Tama eno God dali po weyu, eno po me deli dage tau somainogo wabo dao. Eno homugo te Godigo agai bomo dagebolo ola menama tama dagego te bomo bugagia koneaibao. Te bomo dwasianu meni. Tama agai bomo te bidigo usu nigo usu sobaso, te usu egobeo, te bomo genuai mu elalubo. Tialima God agai te bomogo da Kraisde konealubo po dąų wali we bidi da tomode tau siyu sę ebo dao. Tama te da tomode sę ebo bomo naga eyu, tama Godigo Krais te gų pagede ma hodoloyu, tama aga dolo nogo badu munama, tama megi aga God dali hodobo dagalude bidibao. \x * \xo 1:19-20 \xt Tib 110:1\x*  
\v 21 Tama megi Krais aga ugwadu mu bidalubao, tigidali tobolu bidi, tigidali polalubo bidi me, tigidali bomai bidi, tigidali nogi elalubo bidi me, tǫde me, dagalude me, Krais agai augwali tigidali aiyaba elaluama, aga ugwadu mu bidibo, te nosali me tama tiwaibao.  
\v 22 Tama Godigo tigidali nai mu Krais dologoba muai, tama Krais aga te nai dabe tonaluabo bidi nigilama, tama Godigo po wali pabo we bidi genuai tobolu bidi nigilai. \x * \xo 1:22 \xt Tib 8:6\x*  
\v 23 Tama aga te tobolu bidi bidiyu tama Godigo po wali pabo we bidi hani aga tigi tiwai bidiyu, tama te hani te Krais agai te sę yao obaso, te po wali pabo dao. Te tigidali bulude elalubo habuge yai nai tigidali te Krais aga da te nai tigidali simanobo page bidi dao. Tama te Kraisgo po wali pabo we bidi hani augwaligo Krais te tigi sese ilibo dao. \x * \xo 1:23 \xt Kol 1:18\x*   
\c 2  
\s1 Da isai bidi tiwai elalubadi Godigo da Krais dali ma hodolai  
\p
\v 1 Te dage, polobadu dagego dwai kolesaga elama, te tų geda mubaso, tama dage isai bidi tiwai elaluai dao. Isai bidi agai Godigo wabo po odosiąbo gilama, tama dagego me Godigo po odobe.  
\v 2 Tama te sogo dage e tǫde bidibo we bidigo ebo dwai kolesaga wali bilaluai dao. Tama tiyu, dagego te dwai haubo noma tobolu bidigo kolesaga wali pai dao. Agai te dagalude bidibo dwai haubo noma bage tonalubo dao, tama megi me agai te Godigo po sela sąbo we bidigo homu kolesaga tonalubo dao.  
\v 3 Tama da me, da tigidali polobadu te hani tiwai bidaluali. Dago tigigo tǫde ebo dwai dwai kolesaga wali peyu, tama dago tigide pusu yabo kolesaga ela piduai. Dago homude pusu yabo kolesaga me dago ela piduai. Tama te kolesaga edubadi, Godigo da dali sębę eduai, agai te gasa we bidi tigidali dali sębę iduali tiwai. Tama God agai da eligi sogo da, teda te dolo egi dao, po meni.  
\v 4-5 Mu tama, dago yali dwai kolesagago da ela munama, tama da isai bidi tiwai bidibo ąǫ eyu bidai. Tama da te tiwai bidaluai goli, Godigo da dali dwagi yai homu elama, tama da godolo genuai mu yali. Tama tibaso, agai da dali homu dene genuai mu eyu, da tau sabo homu mu yai. Tama eyu, agai da Kraisba wadolama, da ma hodolai, te da ma bidimainogo yai. Tama tiyu, te Godigo da olo mu tau sabo wiegi yai kolesagago naga agai dage ma dobola sai dao. \x * \xo 2:4-5 \xt Kol 2:13\x*  
\v 6 Tama Godigo da Krais Jisas dali wadolama, tama agai Krais dali da dali ma hodolai, te da isai bidi tiwai bidibo ąǫ ebo silalio, dago tomode ogwa wai gesi noma ma pedalai. Tama da te Krais dali te dagalude bidiyu dago agai we bidi tonalubo sę meba emainogo te God agai da ma hodolai tiwai yai.  
\v 7 Agai te sę da dali magi baso yaliwe? Woo, agai da dali dwagi yai homu eyu, da godolo mu ebaso, tama agai Krais Jisas tagala palali, da tau somainogo yai. Agai da olo tau sali, te dago abelegobeo. Tama agai da olo tau sali kolesaga te mu genuai mu tama dao, te we bidi tigidali augwaligo kuna konemainogo, tigidali sogo nosali, te Godigo da Krais dali ma hodolali.  
\v 8 Tama tiyu, Godigo da olo tau sabo kolesaga naga tego dage tau selama, dage Satango nogode ma sali dao. Tama dagego te Krais hagede te konealubo po duga homu dąų olama, tama God agai dage tau siyu ma sali dao. Te dagego bomogo me ebeo. Te menio. Te God agai dage olo tau sai dao.  
\v 9 Niwai bidi aga digi bomogo te wiegi yai kolesaga eyu, aga digi nogi ugwaba sidali weyu, tama Godigo da olo tau sai dao.  
\v 10 Tama God aga digi agai da gesi noma ma nigilai. Agai da Krais Jisas dali wadolama, tama da tǫde bidibo sogo tigidali dago we bidi tau sabo sę naga ela bilimainogo eyu, agai da gesi noma ma nigilai. Tama dago te we bidi tau sabo sę yabo te sę agai polobadu sisi yai.   
\s1 Krais agai te bidi hani si deliba sisinai  
\p
\v 11 Te God agai dage olo tau selama, tama Satango nogode ma siyu, tama dagego yabo wiegi yai sę sisi yai. Tama tibaso, dagego duga polobadu bidali kolesaga ma konea palao. Dage da te Juda hani isiąwai ame nani we bidi hani dao. Da Juda hani bidi dago ge hwągo dena tigiwali togobo dao, te da Godigo hani da olama waselemainogo ebo dao. Tama te Juda hani bidi dabe augwaligo dage hagede bo olama, “Te God konesiąbaso augwaligo augwa tigiwali togosiąwani bidi dabe dao,” te po dagede wabo dao. Tiali goli te tigiwali togobo sę te bidigo nogogo aga tigi daide naga ebo sę dao, te genuai sę menio.   
\p
\v 12 Tama polobadu dage te tiwai bidibadi, te dagego Krais aga de dawe, te dagego konebeo. Dage te Israel bidi hani bulu badu bidaluai, te dage God agai hagea sai we bidi hani meni. Te God agai te da Israel we bidi dali dwagi yai sę nosali yabo po olama, tama dabolo polobadu mu pusai dao. Tama te pogo bomo te Godigo dena wąįbolo mu dąų wali po te dao. Tiali goli Godigo dage Israel hani isiąwai we bidi dali te tobage tau sabo dąų wali po wabeo. Tama dage tǫde bidibadi dage dwagi yai homu eyu, te Godigo dage dali wiegi yai sę yabo sogo tonaluai menio. Tama dagego God konesiąwai bidai dao.   
\p
\v 13 Polobadu dage te God digibulu bidai dao, pąde meni. Tiali goli te Godigo sa muani tagala palali bidi Krais aga ni pedaide isilama, tama aga kanemego dage te Krais Jisasde wadolama, tama megi agai dage God pąba bidagasomainogo yai dao, dage te Juda dabe tiwai bidimainogo yai.  
\v 14 Magi baso meni. Krais aga digi te boi piabo tų nigai dao. Polobadu da Juda bidi hani dali dage Juda hani isiąwai bidi hani dali gasagi yai tedali bidaluai. Tama tiyu, te bidi hani si augwa hasi te boi bidi homu eyu bidaluai. Tama te bidi hani si tomode te dąį tiwai elaluai. Tama Krais aga ni pedaide isilama tama te tiwai eyu aga tigigo te hani si tomode elaluali dąį te agai hųgialio. Tama hugilama, tama agai da hani si deliba sisinama, deli hani tiwai nigilai, te megi te boi bidi homu mu silai dao.  
\v 15 Magi baso meni. Agai te Juda dabego bomo yai po silali, te bomai po te dąį tiwai polobadu elaluali. Awe, agai te homu yali, ‘Te eno te bidi hani si deliba sisinama, tama te gesi noma bidi hani deli nigilaibao, tama augwali enade wadolaibao,’ te homu yai. Tama te homu eyu, agai te Juda dabego bomo yai pogo ebo sę agai mu silali. Tama megi te dwasianu bomo yai po me, te genuai bomo yai po me, te augwali tigidali megi sę elalubo menio. \x * \xo 2:15 \xt Kol 2:14\x*  
\v 16 Tama tiyu, agai te da Juda bage dali dage Juda hani isiąwai bage dali tomode yali boi bidi homu agai ela silimainogo eyu te aga te ni pedaide isali. Tama aga te ni pedaide isilama, tama agai te bidi hani si deliba sisinama, wadolama, tama tigi deli tiwai nigilama, tama agai te wadolali hani we bidi God pageba ma sesali. \x * \xo 2:16 \xt Kol 1:20\x*  
\v 17 Tama Krais aga asama, tama agai te wiegi yai gesi po, te boi piabo po agai da tigidalibolo pusagasali. Te dage God digibulu bidali Juda hani isiąwai bage dali, te da God pąde bidali Juda bidi hani dali si, te da tigidalibolo agai te boi piabo po ola magasali. \x * \xo 2:17 \xt Ais 57:19\x*  
\v 18 Eno te po magi baso obawe? Te Krais agai te da hani si tau sabo sę ebaso, Godigo Mobo Bidi aga da tigidalide hodobo bidiyu, tama da gedu haluasa po wabo si te God dago Aya agai dago wabo po odaibao.  
\v 19 Te Krais agai te tobage genuai sę tigidali ebaso, megi dage Juda hani isiąwai we bidi te dage gasa bulu we bidi menio, osogo bidagasai bage me menio. Woo, megi dage Godigo we bidi hani tomoba mu asai dao, te bidi hani dage mu wadolai dao, te augwali dali hodobo kaneme deli dao.  
\v 20 Tama eno te be sę ebo po pagede te po digi po begelama te po megi obao. Te Krais aga digi aga te be dąų wabo page ni tiwai dao. Tama agai tagala palali bidi dabe augwaligo dagebolo pusali po me, te Godigo po ola mabo bidi augwaligo dagebolo ola mani po me, te wiegi yai po te be kau ni dabe tiwai dao. Tama dage da, te be kele ni dabe tiwai dao, te be dąų wabo page ni dali te be kau ni dali si tede dage bugagia dąų olama elalubao.  
\v 21 Tama Krais aga digi agai te be sę ebo ni tigidali wadolama, tama te be genuai mu pedalobo dao. Tama tiyu, te be gasagi yai tedali be elaluaibao, te dago Genuai Bidigo aga hagea sai be.  
\v 22 Dage me Kraisde mu dąų olama, tama Krais agai dage dali te gasa we bidi dali te deliba munama, tama Godigo Mobo Bidigo bidabo madigi nigibo dao.   
\c 3  
\s1 Pol agai Godigo wiegi yai po gasa hanibolo pusubo sę yai  
\p
\v 1 Te Godigo te da bidi hani si deliba wadolobaso, te ena Pol ena digi eno Godibolo hanalubo po wabo dao. Tama eno te dage Juda bidi hani isiąwai we bidi tau sainogo eno Krais Jisasgo po ola bilaluali. Tama eno te sę ebaso, te Juda dabe augwaligo tede dwai homu eyu tama te Rom gavman bidi dabe augwaligo ena nogo si dunama, kalabus beba muani. Tama megi ena tede bidiyu, te eno Godibolo hanalubo po wabo dao, te dage tau somainogo ebo dao.   
\p
\v 2 Dagego polo odai, te Godigo wiegi yai homu elama, olo tau sabo te kolesaga agai enabolo mani, te eno te dage tau somainogo yai. Eno homu dagego agai ena dali te sę yali po odalio.  
\v 3 Te Godigo yabo kolesaga po te po polobadu geme dualaluali. Tama te po God agai enabolo ola mani, te agai yabo kolesaga page eno hania konemainogo yai. Tama Godigo tede ena hania ola mani kolesaga eno megi tama pęwadage asęani pogo dagebolo pusali.  
\v 4 Tama dagego eno te asęani po nedeyu da, teda dagego te bugagia koneaibao, te eno homu kolesaga te hania ula eyu, tama te Krais agai yabo sę po, te polobadu geme dualaluali po, te po page eno hania konea pai, te dagego koneaibao.  
\v 5 Tama te tigidali sogo polobadu Godigo te geme dualali po hania me haninai menio. Tiali goli megi Godigo Mobo Bidi agai te po page te God aga po wagi pabo bidi dabe dali, te Godigo po ola mabo bidi dali sibolo te geme dualaluali po haninama ola mawai.  
\v 6 Te dualaluali po page e dao: dage Juda hani isiąwai bidi hani dagego Godigo wiegi yai gesi po odama, dagego homu kolesaga tigidali te poba munama, tama dage te Juda hani dali wadolama tama da dali deli hani bidibao. Tama tibaso, da te megi e tiwai dao: polobadu Godigo agai te Kraisba augwa homu begi pabo Juda dabe dali dwagi yai sę hauwa yaibao po dąų walali. Tama megi Kraisgo yali sęde Godigo te tobage dwagi yai sę te Juda hani isiąwai bage dali me yaibao, te augwa homu agaba begi pali we bidi augwali dali agai te tiwai mu yaibao. \x * \xo 3:6 \xt Kol 1:26-27\x*  
\v 7 Te God agai wiegi yai po eno pusigi pomainogo ena te sęba muai dao. Tama agai te olo tau sabo wiegi yai sę enabolo eyu, tama agai bomo me enabolo mani, te ena dąų olama eno te sę emainogo tebo dao.  
\v 8 Tama Kraisgo we bidi tomode te eno nogi augwali tigidali dologode elaluali goli, God agai enabolo olo tau sabo kolesaga eyu, tama agai ena te wiegi yai po pusubo sę gasa we bidi, te Juda hani isiąwai we bidi augwalibolo te po pusumainogo ena te sęba muai. Tama te wiegi yai po page hagede eno augwalibolo te tobage po pusubo dao, te Krais agai da dali ebo olo tau sabo kolesaga te moni genuai mu, tama bidigo te kolesaga konemainogo eyu gegebo usu egobeo.  
\v 9 Tama te tigidali nai nigai God, te hasia mu agai homude aga nosali yabo kolesaga dualai. Tama te homu kolesaga tigidali sogo polobadu aga homude dualaluai. Tama megi agai homu kolesagade dualaluali yabo sę po page eno haninama te tigidali we bidibolo pusumainogo agai enabolo te wiegi yai po pusubo sę mawai.  
\v 10 Tama polobadu agai homude yabo sę dualaluai. Tiali goli megi agai te agai po wali pabo we bidibolo haninama ola mani. Te gasa we bidi me augwaligo te Godigo po wali pabo we bidigo pedauwalidu te po odama tama Krais wali peyu tama aga hani bage pedalomainogo eyu, agai aga po haninama ola mani. Tama tebogo augwaligo te Godigo wiegi yai sę ebo kolesaga te dagalude bidibo ensel mobo bidi tobolu bidi dali, te polalubo bidi dabe augwalibolo te wiegi yai ebo kolesaga page waselemainogo yai. Tama te wiegi yai kolesaga page te ensel mobo bidi dabebolo tama waselama, tama augwaligo Godigo haniani sę ebode wiegi yai homu kolesaga mu elalubo te augwaligo hania koneaibao.  
\v 11 Polobadu digi dago Genuai Bidi Krais Jisasgo sęde Godigo te wiegi yai homu kolesaga eyu tama tiaibao homu yai. Tama megi agai te yali homu kolesaga wali pelama te sę yali dao.  
\v 12 Tama dago Krais agai te wiegi yai sę ebo suyu, tama dago homu kolesaga tigidali agaba muyu, tama aga dali wadolobaso, tama wi esiąyu, homu si esiąyu, tama da God pąba olo pabo da.  
\v 13 Tama tiyu dago konebao, te dago hanalu wabo po te Godigo odaibao. Tama tibaso, megi eno te po dagebolo obao, tama dagego odao: tama eno dage tau siyu te dene sabode, te dagego homu kolesaga tede bomo kimi menia pigimio. Menio. Te eno e sę ebode dagebolo genuai nogi mawaibao.   
\s1 Te Efesus hani tau somainogo, Pol agai Godibolo tau sao po wali  
\p
\v 14 Te Godigo agai homugo da Juda bidi hani dali te dage Juda hani isiąwai bidi hani dali te si deliba wadolama te hani deli tiwai elama bidimainu yali. Tama te hani si deliba wadolabo homu yali te homu Godigo polobadu osogo dualaluali. Tama polobadu Godigo dualaluali po page megi eno homude konebaso da, teda eno kidu sugunama God Ayabolo hanalobo dao.  
\v 15 Tama da tigidali dagalude me tǫde bidibo we bidi hani da wiegi yai bomo dali bidabo ula me te God Aya aga nogode sabo dao.  
\v 16 Tama tibaso eno gedu haluasa po e tama wabo dao: “Aya God, nago naga we bidi dali wiegi yai sę yabo homu umabo mu elalubo dao. Tama tiyu, eno homugo nago te Efesus hani we bidi dali dwagi yai sę eyu, tama nago Mobo Bidi agai nago bomo meba selama, tama agai augwalibolo te bomo mao, augwaligo homu bomo ilimainogo, te Mobo Bidigo bomogo augwali dąų mu walomainogo tama tiao,” eno God dali te tobage hanalu wabo po wabo dao.  
\v 17 Eno homugo dagego Kraisde konealubo po dąų obaso da, teda te Kraisgo dage tau siyu dage homude wiegi yai kolesaga ola mayu bidaibao. Tama dagego God dali we bidi dali wiegi yai homu eyu godolo ebo kolesaga bugagia emainogo eyu, tama agai dage te sęde tau somainogo eno God dali hanalu wabo po wabo dao. Tama eno homugo dagego te God dali we bidi dali godolo ebo kolesagade te dage dolaluao, te ni pedali tǫde dąų olama te ni dąų weyu dolalubo tiwai yaibao.  
\v 18 Tama tiyu da, te dage me, te Godigo we bidi tigidali me, te dage tigidaligo bomo selama, te Krais agai dage wiegi yai homu eyu godolo mu ebo kolesaga dagego bugagia mu koneaibao. Tama agai tebo kolesaga te genuai mu dao, te bidigo pobesa pabo usu egobeo.  
\v 19 Awe, Kraisgo te dage we bidi godolo mu ebo kolesaga tigidali te bidigo kuna bugagia kone palasiąbo kolesaga digi, te eno homugo dagego te kolesaga bugagia mu koneao. Tama dagego tama tiyu da, teda dagego ebo kolesaga tigidali te God agai ebo wiegi yai kolesaga naga tiwai pedalobao. Tama eno dagede te homu ebaso, tama eno God dali dage tau sabo po wabo dao.  
\v 20 Te dago Godigo nogi ugwaba mu sinao. Tama agai te wiegi yai kolesaga ebo bomogo da we bidi tomode genuai sę ebo dao. Te sę ebo bomogo te da Godibolo hanaluyu gedu haluasa po wabo me, te dago homude ebo kolesaga te tigidali agai aiyaba elaluyu, tama agai wiegi yai kolesagade sę ebo te genuai mu ebo dao.  
\v 21 Te dwasianu sę menio. Tama tibaso, da God agai po wali pabo we bidi, da Krais Jisasde wadolai we bidi hani dago Godigo genuai wiegi yai nogi ugwaba siyu, te tigidali bidada pabo sogode me, te tigidali sogo te tiwai wiegi yai kolesaga me mu ela pidubadi geao. Te tebo kolesaga me tagaligio. Te mu po dao.   
\c 4  
\ms1 Da Kraisgo tigide dagana sai elalubao, tama dago Godigo kolesagade digi wali pinao  
\mr (Dąį 4–6)  
\s1 Da Godigo po wali pabo we bidi te Kraisde wadolama, tama da deli tigi tiwai dao  
\p
\v 1 Te God agai dage Kraisde wadolomainogo agai dage Juda hani isąwai we bidi i obaso, te eno dagebolo homu hodolobo po megi obao. Tama ena Genuai Bidi Krais agai sęba munama, tama eno te sę eyu, tama augwaligo ena kalabus beba muai goli, eno bomo eyu dagebolo e homu hodolobo mobo mabo po obao. Te dage agai we bidi hani tomoba asomainogo Godigo dage i wali. Tama te sogo agai dage aga usu ni ola mani. Tama dagego agai wali po bugagia wali peyu, te usu niba dolo mu kadu wao. Dagego aga tama wali peyu da, te usu mu dao.  
\v 2 Dagego tama kolesaga wali peyu, duga digi duga nogi ugwaba sisiąma, tama imila pai we bidi mu bidiąo. Tama bidigo dage dali dwai kolesaga ebaso da, te dagego te sę emainu sulama tona tagalao, wei sigimio. Tama tiyu, dagego duga abagi dabe dali wiegi yai homu elama godolo mu yao, tama augwaligo mabo sęgę te dagego tolao. \x * \xo 4:2 \xt Kol 3:12-13\x*  
\v 3 Tama Godigo Mobo Bidi agai dage homu kęnai we bidi dabe nigilibaso, te kolesagago agai dage te bonogo kebo tiwai elama tama dage deli hani tiwai mu bidibo dao. Tama tibaso da, dage bomo elama sę dene eyu te deli hani kolesaga dąų ola selama bidao.  
\v 4 Tama da Godigo po wali pabo we bidi da tigidali deli tigi tiwai elalubo, tama te Godigo Mobo Bidi me te deli naga bidibo dao. Tama tiwai elalubaso, Genuai Bidi agai da i wali sogo te sogo te po wai, “Te ena ma asobode homu konea paluyu, tama dage ena tonaluao,” te po deli naga dao.  
\v 5 Tama dago Genuai Bidi deli naga elalubao, tama Kraisde dago konealubo po deli naga elalubao, te baptais sabo kolesaga me te page deli digi naga elalubo dao.  
\v 6 Tama te God me deli digi naga bidibo, te da tigidali tǫde hani bidi dabe dago Aya deli aga dao. Tama agai tigidali bidi aiyaba elaluama tama agai nogi dali bomo dali te ugwadu mu elalubao, tama tiyu agai sę tigidali we bidi tomode eyu, tama tigidali bidi tomode bidibo dao.   
\p
\v 7 Te Krais agai da deliba sisinama, tama agai da deli tigi tiwai nigilai goli, tama agai da usu selama, nedama, tama aga homu wali peyu agai da deli delibolo haniani sę yabo homu kolesaga agai dabolo dobawai dao.  
\v 8 Tama polobadu augwaligo Godigo po bukude te Krais agai yabo sęde e tobage po asęani,  
\q1 “Agai te genuai boi bidi hani nogo dunama,  
\q1 kalabuside muainu dagalu sigiba mu sela holai dao.  
\q1 Tama tilama agai wiegi yai nai dabe bidi dabebolo  
\q1 olo mani,” \x * \xo 4:8 \xt Tib 68:18\x*  
\m te po augwaligo polobadu asęani.  
\v 9 Tama te “dagalu sigiba mu holai” po magi baso waliwe? Woo, te page e dao, hasia bolo aga aiyaba mu dulai dao, e tǫba sabolama, tama tǫ tomoba aga dulai dao.  
\v 10 Tama hasia dulali bidi, aga me te nosali ugwaba holali bidi dao. Aga holali, te dagaluba holai, tama te dagalu ela soali, te sigiba mu holali, agai te tigidali bulude elalubo sese isąwai nai tigidali te ma siminainogo aga holali.  
\v 11 Tama aga digi agai naga agai te wiegi yai nai dabe bidi dabebolo e tiwai olo mawai: te agai meba bidi augwalibolo Godigo po sela pelama pusigi pabo sę yabo bidi nigilai. Bidi me badubolo agai wabo po ola mabo bidi te sęba muai. Bidi meba augwaligo Godigo wiegi yai po pusa mabo sę yabo bidi nigilai. Tama me badu bidibolo te Godigo we bidi hani tonalubo sę dali te Godigo po ola mabo sę dali emainu agai te sę augwalibolo mawai dao.  
\v 12 Tama agai dabolo te haniani wiegi yai sę yabo homu kolesaga magi baso dobabo dawe? Te Godigo we bidi hani augwaligo we bidi tau sabo sę ebode bugagia sisi elama bidimainogo agai tebo dao, te Kraisba augwa homu tigidali muai we bidi hani augwali Krais aga tigi tiwai bidiyu, augwali geninama eyu bomo siyu bugagia bidimainogo agai te dwagi yai sę yabo homu kolesaga dabolo tama dobabo dao.  
\v 13 Tama tiyu, tama we bidi tau sabo wiegi yai sę dago me ela pidubadi geyu da, teda da tigidaligo bomo yai homu Kraisde dąų wabo sę deli homu kolesaga naga mu eyu, tama dago Godigo Ogwa bugagia konea silimainogo tiyu dago deli homu kolesaga naga agade mu yaibao. Tama tiyu, te da Godigo hani we bidi mu pedalaibao. Tama tiyu, da Godide wiegi yai kolesaga ebo we bidi mu te Krais aga tiwai mu elama bidaibao. Tama aga dago usu ni mu tiwai da, agai usu niba dolo pedaliyu da, teda da aga dali usu mu yaibao.  
\v 14 Tama da Godigo hani we bidi mu bugagia pedalama, tama te Godigo pode da te homu subigila pabo wai puluba tiwai ma bidigobeo. Te eno po digi po me megi obao. Te geba, te geba moni sigi ąįdu pobadi, wali asiyu te ąį dini me te bomo yai wali me augwali sigo te geba subigila bega sąyu sela sąbo dao. Tama te tiwai bidi muma sabo tibo po wabo bidi augwaligo ili po weyu, tama bidi hauwa augwaligo homu polo tulalubo dao. Tama tiyu, te bidi muma sabo bidi augwaligo te we bidi te gasa dwai sę ebo tuba kegebo dao. Tiali goli, da Godigo hani we bidi mu bugagia pedalama bidibaso, tama te bidi muma sabo dwai bidi dabe augwaligo wabo tibo pogo da tulalugobeo.  
\v 15 Te menio. Da Godigo we bidi hani tomode dena abagi dabe augwali dali wiegi yai kolesaga eyu godolo mu elama, tama Godide mu po naga wao. Tama tiyu, tama da te tobage wiegi yai sę idubadi, tama da Kraisde mu dąų waibao. Aga te dago tigigo tobolu bidi aga deli dao.  
\v 16 Tama aga te dago tobolu bidiyu, tama da agai tigi tiwai bidibaso, teda agai da nogo sągą gedu tigide elalubo te tigidali agai tonalubo dao. Tama aga da tigidali tonalubaso, tama da tigidali bugagia deli tigiba wadolama, tama te dili dabe wadolobo nai augwaligo te tigi deliba bugagia dąų wabo dao. Tama dago tigi deli badu sę ebo augwa hasi tau sabo sę ebo si, tama te tebo kolesaga te tigigo ebo wiegi yai kolesaga genuai eyu, tama te wiegi yai kolesaga eyu godolo mu ebaso da, tama te tigi genuai bomo selama wiegi yai mu pedalobo dao. \x * \xo 4:16 \xt Kol 2:19\x*   
\s1 Godigo po wali pabo we bidigo wiegi yai gesi kolesaga wali pao  
\p
\v 17 Tama tibaso, eno po me deli dage dali wainu obao. Te ena da Genuai Bidigo po wabo bidi bidibaso, dage tau somainogo eno te po bomo elama obao. Odiąo. Dagego te Godigo po odisąbo bidi dabego ebo kolesaga munu me ma wali pelamo dao. Augwaligo homu kolesaga da te olo habuge naide naga te homu ebo dao.  
\v 18 Tama tiyu augwaligo homu kolesaga dwai eyu, be hulia sabo tiwai ebo dao, augwaligo ebo homu te kedu meni yai homu kolesaga dao. Tama te Godigo mabo bidada pabo ula augwaligo sogobeo. Magi baso meni. Augwaligo bomo elama konebo hagela homu eyu, tama augwali munu me konesiąyu bidibo dao.  
\v 19 Augwaligo te haniani dwai dwai kolesaga ebo tomoba mu peyu tama augwaligo homu mu hodaloyu tama dwai meda yai haniani kolesaga mu ebo dao. Sesemane sogo augwaligo te sę yaio homu ebo dao. Tama tiyu tama augwali hale munu me ebo menio.  
\v 20 Tialima, dagego te tobage dwai sę emainogo gasa bidi dabe augwaligo te Krais aga kolesaga page dagebolo ola mabeo. Te tiwai si menio.  
\v 21 Tama augwaligo dagebolo agade po olama, tama dagego mu odali. Tama dage Jisasde wadolama, tama augwaligo agade mu po dagebolo ola mani dao.  
\v 22 Te mu po da wali po e tiwai dao: polobadu dagego duga dwai dwai sę yabo homu kolesagade biliyu bidai dao. Tama te sogo te dwai homu kolesagago dage tonaluyu, tama dagebolo te dwai dwai sę yao po weyu yai. Tama tiyu, te dagego te dwai sę ebode godolo emainogo tama te dwai sę yabo homu kolesagago tibo po weyu, dagego homu hodolai dao, tama dage te dwai sę ebo tųdu pai dao. Tama te dwai sę ebogo te dwai sę yabo homu kolesaga doloyu yai. Tialima megi dagego te polobadu yai dwai homu kolesaga mu sela sąyao. \x * \xo 4:22 \xt Kol 3:9\x*  
\v 23 Tama tilama, dagego homu kolesaga dali mobo dali wiegi yai gesi mu ma pedalama bidiąo.  
\v 24 Tama dagego dwai meda yai kolesaga ebo tagalama, tama dagego wiegi yai gesi kolesaga eyu tama dage te gesi noma bidi tiwai pedalao, te aga tigi wę paluai bidigo aga gesi ugwa gudubogia tiwai yao. Tama dage te gesi noma bidi tiwai pedaloyu, tama God aga digi agai te dage gesi noma bidi nigali, tama dage God aga homu kolesaga tiwai mu pedalainogo nigali. Tama tibaso, gasa we bidi augwaligo dagego Godigo po odoyu bidibo sumainogo te dagego bugagia bidiąo. Tama tiyu, dage gasa we bidide te wiegi yai dolo mu kolesaga naga eyu, tama God agade te dagego aga pabo tųdu naga peyu yao, aga gedude doloba pai we bidi mu bidiąo. \x * \xo 4:24 \xt Kol 3:10; Gag 1:26\x*   
\p
\v 25 Te God agai dage te gesi noma we bidi nigaligo da, teda dagego dwai tibo po wabo kolesaga tagalama tama munu me egimio. Te menio. Tama dage tigidaligo duga hasi tomode mu po naga wao. Magi baso meni. Dagego koneani, da tigidali te deli tigide naga wadolama bidibo dao. \x * \xo 4:25 \xt Sek 8:16\x*  
\v 26 Tama me sogo dagego homu sębę eyu da, teda dua dao, te dagego sębę ebo homugo dage te dwai sę ebo kolesaga tomoba kekeidali weyu. Tama te giliga piode dega sigi pisiabadi te homu sębę polo tagalama silao. \x * \xo 4:26 \xt Tib 4:4\x*  
\v 27 Dagego tisiąwani da, te sębę me elalubadi, tea te dwai haubo noma bidi dabe augwaligo tobolu bidi tebolo te dagego sunumi dalaibao, agai dage dwai sę tomoba kegaibao.  
\v 28 Tama te polobadu nai wi sidu geai bidi agai te nai wi sabo sę tagalama silao. Megi aga digi doloba pai sę yao. Tama agai aga digi nai sabo sę aga nogogo digi eyu, tama aga digi tau siyu, te nai meni yai we bidi me tau siyu yao.  
\v 29 Tama dagego dwai meda yai po me wagio. Menio. Dwagi yai po naga weyu, te bomo kimi meni yai we bidi augwali bomo somainu te bomo mabo po wabo usu dao. Tama tiyu, dagego te Godigo olo tau mabo wiegi yai kolesaga te dagego po odobo we bidibolo tama mao.  
\v 30 Tialima dagego tisiąwani da, dwai meda yai po weyu da, teda dagego te Godigo Mobo Bidi dwai homu dene mu ilaibao. Tama te dwali dao. Te Godigo Mobo Bidi aga wiegi yai tedali mu dao. Tama God agai dage ma dobola sai hagede te dage hagea siyu sa mumainogo eyu agai dagebolo aga Mobo Bidi mawai dao. Tama te Godigo Mobo Bidi dage dali bidibaso, dagego mu konebao, te God agai dage olo mu bidabo bidi nigilabo sogo te nosali mu pedalaibao. Tama tibaso, dwai po weyu aga dwai homu dene mu iligio.  
\v 31 Tama dagego boi bidi homu ebo me, te wado po weyu tama homu sębę ebo me, te genuai po daga wabo me, te posobo po me, te moni dwai homu ebo me, te tigidali dwai kolesaga ebo tagaliyu sela sąyao.  
\v 32 Te tobage dwai kolesaga munu me egimio. Te menio. Tama dagego duga ama dede dali deli homu eyu dwagi yai tau sabo sę yao. Tama duga hasi dali homu dene eyu, augwali godolo mu yao. Tama duga hasigo dwai sę dagebolo ebaso da, teda dage sębę egio, te dagego augwali godolo mu eyu augwaligo yali dwai sę sela sąyao. Te Krais agai dage tau selama tama Godigo dagego yali dwai sę sęgę sela sąwai dao. Te tiwai kolesaga dagego me tiao. \x * \xo 4:32 \xt Kol 3:13\x*   
\c 5  
\s1 Da wiegi yai kolesaga ebo ulade bilao  
\p
\v 1 Te God agai dage godolo mu eyu dage aga wai puluba nigaligo da, teda dagego agai ebo kolesaga tiwai wali bugagia pao.  
\v 2 Tama tiyu, dagego duga hasi godolo mu ebo kolesaga eyu, tama dagego yabo sę tigidali ebo si te kolesagago dage tonalumainogo, te Kraisgo da godolo eyu wiegi yai homu ebo tiwai gilama. Agai da godolo eyu, tama aga digi aga bidabo ula da hagede tagalama, tama augwaligo aga isilali. Tama tiyu, agai aga tigi te Godibolo olo mani, te polobadu bidali bagego Godibolo mani wiegi yai denami ebo nai mani tiwai yai dao. Tama te sęde God aga Kraisde dwagi yai homu ebo dao. \x * \xo 5:2 \xt Sai 29:18; Tib 40:6\x*   
\p
\v 3 Te God agai dage aga hani we bidi nigaligo da, teda te penani ebo kolesaga me, te dwai dwai meda yai kolesaga me, te mena gasa bidigo nai pesa eyu godolo ebo kolesaga tigidali, te tebo dwai kolesagago ebo sę dwasianu munu me dage tomode te pedalamuo. Gasa we bidi dabe augwaligo dagego te tobage dwai kolesaga yali po waidali weyu, tama dagego doloba peyu bidiąo.  
\v 4 Dagego dwai meda yai po me, te homu kolesaga meni yai bagego wabo po me, te dwai gagali po wabo me, te po dabe dagego wagio. Te tebo kolesaga usu egobeo. Menio. God agai dage tau sobaso, tama dagego agabolo usu da wabo po weyu da, teda te po usu dao, te tobage po wao.  
\v 5 Dagego gisiga mu koneao, te penani ebo bidi me, te dwai dwai meda yai kolesaga ebo bidi me, te mena gasa bidigo nai godolo eyu pesa ebo bidi me, te tobage dwai sę ebo bidi dabe augwali Krais dali God dali sigo tonalubo we bidi hani tomoba munu me pogobeo. Tama te nai godolo eyu pesa ebo kolesaga, te kolesaga da te tibo godibolo lotu po wabo sę tiwai dao, te naiba te bidigo aga homu tigidali muani.   
\p
\v 6 Dage bugagia dua dao. Tiyu dage te gasa bidigo agai dage te dwai kolesaga tomoba kekainogo ebaso da, agai wabo kedu meni yai po wali pelamuo. Te eno tamadi wali dwai kolesaga ebode te Godigo agai po sela sąbo bidi dabe dali sębę yaibao.  
\v 7 Tama tibaso, dage augwali dali kisa selama tama te hai namu tiwai si elamo dao.  
\v 8 Te polobadu dage dwai kolesaga ebode biliyu tama dage be hulia side bidibo tiwai yai dao. Tiali goli megi dage te Genuai Bidide wadolama, tama agai dage wiegi yai ulaba munama bidibao. Tama tibaso, dagego wiegi yai kolesaga naga eyu dage te ula yai we bidi tiwai bidiąo.  
\v 9 Tama te gide bulali nai bugagia holama, tama geninama walobo gilama tama te tiwai me te ulago agai te tigidali dwagi yai kolesaga ebo me, te doloba pai kolesaga me, te homu mu sai wiegi yai kolesaga, te tigidali hania bugagia ugwaba hanilama pedalobo dao.  
\v 10 Tama te ula yai we bidi bidiyu, dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao.  
\v 11 Tama dagego te dwai kolesagade biliyu hulia side bidibo bidi dabe augwali dali hai namu olama augwaligo te ebo kolesaga egio. Te tiwai kolesaga ebogo te nai dwagi yai me walogobeo. Menio. Te kolesaga da te hulia sai kolesaga dao. Te egimio. Te kolesaga ebo page dagego hania bugagia ugwaba haninama pedalao, tigidali we bidi augwalibolo ola mao.  
\v 12 Me ma, eno augwaligo geme dualama ebo dwai meda yai kolesaga po pusugobeo. Menio. Eno augwaligo te tobage dwai dwai kolesaga ebode po wagi sogo da, teda eno pedauwali sęgę eyu hale naga egi dao. Magi baso meni, te dwai dwai sę ebo po pusainogo ebo te usu menio. Eno dage dali te sęde po mibo hagalabo.  
\v 13 Tiali goli, tigidali ebo kolesaga te ulaba sela mubo si, teda te kolesaga page tigidali hania haninama elaluaibao. Tama te haniani nai tigidali, te ula elalubo tiwai yaibao.  
\v 14 Tama tialigo da, te po me elalubao:  
\q1 “Nage pila mubo bidi, hodaloao, tama nage te gų  
\q1 pagede ma hodaloama, tama Krais agai wiegi yai  
\q1 ula nage mawaibao.”   
\p
\v 15 Tama tibaso, dagego duga bilibo bugagia tonaluyu bilao. Dage bilibo te kolesaga meni yai bidi tiwai biligio. Menio. Dage bilibo te kolesaga koneai we bidi bilibo tiwai bilao. Tama tiyu dagego wiegi yai kolesaga naga yao.  
\v 16 Tama megi da, te we bidi hauwa augwaligo dwai sę ebo sogo dao. Tialima, megi da, te dage Godigo kolesagade bilibo sogo dao. Tama tibaso, te dwagi yai sę yabo sogo dagego olo gesegeliyu tagaligimio. \x * \xo 5:16 \xt Kol 4:5\x*  
\v 17 Tama dage te kolesaga meni yai we bidi tiwai biligio. Te menio. Dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao.   
\p
\v 18 Te dage te bomo yai ąį hauwa tulama te polobo bidi tiwai egimio. Menio. Te tebo kolesagago dageba daganama dolainogo ebo dao. Dagego God agai wiegi yai Mobo Bidigo dageba daganama tonalumainao, te dage bugagia bidimainogo yao.  
\v 19 Tama tiyu, dagego duga hasi duga ama dedego noma bidi mobo dąų omainogo, dagego haniani dwagi yai balia po wao. Tama te lotu balia wabo buku nogi Sam, te bukude elalubo Godigo nogi ugwaba sabo po me, te Jisasgo nogi ugwaba sabo tęąbi po me, te po tama duga ama dedebolo wao. Tama tiyu, bomo eyu te dago Genuai Bidibolo me aga nogi ugwaba sabo balia po dali lotu tęąbi po dali wao.  
\v 20 Tama te tigidali sogo te dageba pedalobo tigidali sęde te dagego God Aya dali usu da po wao. Te dage te dago Genuai Bidi Jisas Kraisde wadolobaso, God dali usu da po wao. \x * \xo 5:20 \xt Kol 3:16-17\x*   
\s1 Polgo te we sabo sęde da bugagia dodolobo po wali  
\p
\v 21 Te bidi Krais agai genuai nogi mu elaluama, tama dagego duga digi aga dologoba muani obaso, duga hasi dali duga ama dede dologode bidao.  
\v 22 Tama tiyu, te we dabe sibi deli deli dagego duga bidigo po bugagia wali peyu, te dagego te Genuai Bidi Kraisgo po wali pabo tiwai gilama te duga bidigo wabo po wali pao, augwali dologode bidiąo. \x * \xo 5:22 \xt Kol 3:18; 1 Pi 3:1\x*  
\v 23 Tama Krais aga te aga po wali pabo we bidide tobolu bidi bidibo gilama, tama bidi me aga wede tobolu bidi bidibo dao. Te agai po wali pabo we bidi te agai tigi tiwai, tama Krais aga digi augwali ma dobola sabo bidi dao.  
\v 24 Tama tibaso agai po wali pabo we bidi te Krais aga dologode bidibo gilama, te tiwai dage we dabego me tama naga tiyu, sesemane sogo dagego duga bidigo po bugagia wali peyu duga bidi dologode bidao.   
\p
\v 25 Tama bidi dabe deli deli, dagego duga we dabe dali abagi dao homu eyu, godolo mu yao, te Kraisgo aga po wali pabo we bidi godolo mu yaligia tiwai yao. Agai da godolo mu eyu, aga bidabo ula tagalama da tau siyu aga te ni pedaide elama isai dao. Tama agai da dali godolo eyu tau sabo homu tiwai dagego duga we dali tama naga tiao. \x * \xo 5:25 \xt Kol 3:19; 1 Pi 3:7\x*  
\v 26 Tama Krais agai tama tiali te aga po wali pabo we bidi hani agai augwali Godibolo mawainogo agai augwali ąį telawali te meda meni yai pedaliyu, tama agai pogo me augwali tedali gasagi yai nigilali.  
\v 27 Tama Krais agai homugo aga po wali pabo we bidi agai gedude augwali te wiegi yai mu pedalomainu yali. Tama augwali te husugwa sai me, bedogola sai me, te tiwai elaluidali weyu, tama augwaligo te magi dwai sę me esiąyu wiegi yai kolesaga naga eyu bugagia mu bidimainao. Te homu Kraisgo aga po wali pabo we bidi dali yai.  
\v 28 Tama dage bidi dabego duga we dabe augwali dali wiegi yai kolesaga eyu, augwali godolo yao, te dagego duga digi duga tigi dali wiegi yai homu eyu godolo ebogia yao. Aga we godolo ebo bidi, te aga digi aga godolo ebo dao.  
\v 29 Dago koneai, te bidi mego aga digi aga tigi dali boi bidi homu ebo meni. Te menio. Agai aga tigi nai mayu, bugagia tonalubo dao, te Kraisgo aga po wali pabo we bidi dali ebo gilama.  
\v 30 Da te nogo, sągą, gedu te nai dabe te Kraisgo tigi dagi tiwai dao.  
\v 31 Tama te Godigo po asęai bukude te po me deli wai, “Tama tibaso, te bidigo aga ida aya taga soyu, tama aga we dali dagana selama, deli tigi gagawai pedalobo dao.” \x * \xo 5:31 \xt Gag 2:24\x*  
\v 32 E po tomode te genuai geme po digi po page tede elalubo. Tama ena digi eno homugo te Krais dali aga we bidi dali po page hanilibao.  
\v 33 Tiali digi agai dage deli deli bidi dali me te po wali, “Nago naga tigi dali dwagi yai homu eyu godolo mu ebogia, nago naga we dali dwagi yai homu eyu, godolo mu yao.” Me ma, we dabe dagego duga bidigo nogi ugwaba selama augwali dologode bidao.   
\c 6  
\s1 Te bidi Polgo ida aya me wai dabe dali po wali  
\p
\v 1 Dage wai dabe dagego te Genuai Bidigo po wali pobaso, te ida ayago wabo po wali pao. Te tama tebo kolesaga te dolo dao. \x * \xo 6:1 \xt Kol 3:20\x*  
\v 2-3 Te Godigo po weyu, tama Mosesgo bukude asęani po tiwai, “Te duga aya idago po wali pao. Tama te po mobo te wali peyu da, tama dage bugagia mu bidiyu, e tǫde hauwa sogo bideibao,” te po wai. Tama Godigo te po bomo eyu, dąų walai. Agai te mobo po hauwa weyu, te e po dali te dąų wali po hasia wadolali. \x * \xo 6:2-3 \xt Sai 20:12; Bom 5:16\x*   
\p
\v 4 Tama dage aya dede dagego duga wai dabe homu hodolama augwali sębę emainogo elamuo. Menio. Dagego te Genuai Bidigo po wali peyu, tama augwali bugagia tonaluyu, tama agai po augwali ola mao. \x * \xo 6:4 \xt Kol 3:21\x*   
\s1 Te bidi Polgo te olo sę ebo bidi dabe dali, te sę tonalubo bidi dabe dali augwali side po wali  
\p
\v 5 Dage olo sę ebo bidi dabe, dagego duga sę ebo tonalubo bidide wi eyu, augwaligo po wali peyu augwali dologode bidao. Tama tiyu, homu mu eyu, dage deli deligo te homu yao, ‘Eno yabo sę te Krais tobade yaibao.’  
\v 6 Tama te homu eyu duga sę yao. Dagego sę ebo tonalubo bidigo dagede dwagi yai homu emainogo augwaligo dage tonalubadi naga dagego sę bugagia egio. Te menio. Te homu mu eyu, te dage Krais agai olo sę ebo bidi dabe bidiyu, tama Godigo homu kolesaga wali peyu bidao.  
\v 7 Tama dagego dwagi yai homu eyu, sę yao. Te sę te bidide naga ebo menio. Te menio. Te dagego duga sę te Genuai Bidi Krais agade yao.  
\v 8 Dagego koneani, bidi me deligo dwagi yai sę eyu da, Genuai Bidigo dwagi yai nai mawaibao. Agai te olo sę ebo bidi dali me, te gasa bidigo sę isiabo bidi dali me te sę naga yaibao. \x * \xo 6:8 \xt Kol 3:22-25\x*   
\p
\v 9 Dage te olo sę ebo bage mu abelai bidi dabe, dagego odao. Dagego augwaligo sę ebo tonaluyu, dagego me Godigo homu kolesaga wali peyu te tiwai kolesaga naga augwali dali yao. Dagego augwali wi ilibo kolesaga tagalao. Dagego koneani, te Genuai Bidi aga dagalude bidibo, tama aga da te augwali olo sę ebo bidigo Genuai Bidi me, te dagego Genuai Bidi me bidibao. Tama agai tigidali we bidi deli usu nigo naga usu sabo dao. \x * \xo 6:9 \xt Bom 10:17; Kol 3:25; Kol 4:1\x*   
\s1 Godigo we bidi te enesigi bidi tiwai dao  
\p
\v 10 Te eno po silagasu wabo po e dao: dage te Genuai Bidi Krais agade wadoloyu, tama dagego agai genuai bomo meba siyu, tama dage bomo eyu bidao.  
\v 11 Tama eno dagebolo hwįbo po digi po begelama megi obao. God agai dagebolo te duga tigi duala sabo nai mobao. Tama dagego bomo eyu, te dwai haubo noma bidi Satango geme dualama ebo dwai kolesaga tigidali te aiyaba elaluyu, dage bugagia dolalumainogo eyu, tama dagego te tigi duala sabo nai tigidali selama tigide muao.  
\v 12 Magi baso menio. Te da Krais wali pabo we bidi hani, dago te dwai sę ebo kolesaga dali hwįyu tama dago e tǫde bidibo bidi dali hwįbo meni. Dago te dwai sę ebo kolesaga dali hwįbadi, tama dago te dwai haubo noma bidi ugwadu te dagalude bidibo bage dali me hwįbo dao. Augwali da te megi hulia side dwai sę ebo tobolu bidi dabe me, te polalubo bidi dabe me, te we bidi tonalubo dwai noma bidi dabe dao.  
\v 13 Tama tibaso, Godigo dagebolo mabo tigi duala sabo nai megi duga tigide muao. Tama tiyu, te augwaligo dage dali dwai sę ebo sogo pedalobo si, te dage bomo elama augwali dali hwįdu gelama, tama aiyaba elaluama, tama dage bomo yai bidi mu me dolaluaibao, wi pogobeo.   
\p
\v 14 Awe, dage e tama tiwai dola selama dolaluao. Dagego Godigo mu po te duga kugulu tiwai gudulama, tama bugagia dąų olama, tama te doloba pai wiegi yai kolesaga ebo te dagego duga hagawia sesela sabo nai tiwai abiao. \x * \xo 6:14 \xt Ais 11:5; 59:17\x*  
\v 15 Tama te enesigi bidi agai te hwįabo sisi elama, tama sągąde mubo nai nadoba mubo dao. Tama te tiwai dagego te Godigo dwagi yai gesi po mu konealubo kolesaga bugagia dolasa elaluao, God agai gasa bidi dali dwagi yai homu yabo po. \x * \xo 6:15 \xt Ais 52:7\x*  
\v 16 Tama enesigi bidi agai aga sabele abibo tiwai tama dagego Godide konealubo po tigidali sogo abilasa bilao. Tama tiyu, te sabelego te boi bidigo sia dage ponai ene dabe sela sąwaibao. Te boi bidi nogi te Satan dao.  
\v 17 Te Godigo dage polo ma dobola sai dao. Te homu ebo kolesaga te kapago nigai tobolu madi tiwai selama, tobolude muao. Tama dagego te Mobo Bidigo bobobage poa pai hwą ge tiwai te Godigo te bukude asęani po bugagia odama, sao. \x * \xo 6:17 \xt Ais 59:17\x*  
\v 18 Tama tiyu, tigidali sogo dagego po God dali wao, agai dage tau somainu yai. Tama te Godigo Mobo Bidi agai dage bomo mayu, tego Godibolo po wao. Te sę yainu, dage pila mugimio, hodaluao, nolǫ isiąbo ąǫ egimio. Te sę munu me tagaligio. Tigidali sogo dagego gedu haluasa po Godigo we bidi tau somainu wao.  
\v 19 Dagego po Godigo ena me tau somainu wao. Eno homugo dagego po e tama omainogo obao: God agai eno pedauwalide po mumainogo, tama eno te wi ebo homu aiyaba kęna sigulumainu, tama te Godigo wiegi yai pogo geme dualali po page bugagia pusumainu agabolo po wao.  
\v 20 Ena da te Godigo dwagi yai po pusubo bidi. Tama te tebo pode te ena kalabuside bidibao. Tama tibaso, ena te wi ebo homu aiyaba kęna sigulumainu tama ena te bomo elama te Godigo wiegi yai po pusumainu dagego God hanalu wabo po wao.   
\s1 Te bidi Polgo Godiba hanalu te augwaliba wiegi yai sę emainu augwali tobalobo po wali  
\p
\v 21 Te bidi Tikikus aga te dago ama mu tiwai, tama aga te Genuai Bidigo dwagi yai sę ebo bidi dao. Tama agai te eno ebo sę po tigidali dagebolo pusagasomainu te bidi eno megi aga dage bidibo digi tagala palobao.  
\v 22 Tama eno aga dage bidibo digi tagala paliyu, da ede mena tama bidibo wenama tama agai pusaibao, dagego homu dąų walomainu tama yaibao.   
\p
\v 23 Te eno ama dedeo, eno homugo dago Aya God me, dago Genuai Bidi Jisas Krais me, augwali sigo dagego homu dua nagame ilao, tama augwaligo dagebolo te godolo mu ebo kolesaga me, te konealubo po dąų wabo kolesaga me mao, te eno homugo.  
\v 24 Te eno homugo me, Godigo agai olo tau mabo kolesaga te dago Genuai Bidi Jisas Krais godolo mu eyu aga me tagalisąbo we bidi dabe tebolo te olo tau mabo kolesaga mao. Tama dao. Ena da, Pol da.