\id DAN - Dadibi NT [mps] -Papua New Guinea 2001 (DBL 2014) 
\h Danielgo Buku 
\toc1 Danielgo Buku 
\toc2 Daniel 
\toc3 Dan 
\mt1 Danielgo Buku  
\imt1 Hasia nedebo po  
\ip Danielgo bukude te 6 po dabe elaluyu, me te na yali po me si me si elalubao. Te Juda dabe augwali genuai sęgę elaluyu bidibadi, te sogo bidigo e buku Daniel asęai dao, dago te homu ebo dao. Te buku da, te we bidigo Godigo augwali tau siyu, tama augwali dali dagana selama elalubo, augwaligo wiegi yai konemainogo yali. Tama nosali Godigo augwaligo sęgę sela sąna silama, tama augwali wiegi yai bidimainu ilaibao. Te Danielgo bukude bugai si elalubao.  
\ip (1) Dąį 1-6 te Daniel me aga abagi dede augwalide po elalubao. Hauwa sogo te boi bidi dabego augwali dali dwai sę yainogo yali. Tiali goli, augwaligo Godiba homu dąų olama, tama augwaligo doloba pai kolesaga naga yali, tama te boi bidi dabego augwali dali yainogo yali sę te augwaligo yabo usu ebeo.  
\ip (2) Te Dąį 7-12 te Danielgo nade suali nai po elalubao. Te sogo te gasa Godigo po odisąwai kantri dabe bomo elama mu bidali. Tama augwaligo Godigo we bidi mu silabo tonobo ąǫ yali. Tiali goli, te na yaligo ola mani, te Godigo aga we bidi tau selama, te kantri dabego bomo sia sąyabo homu yali. Tama nosali Godigo we bidi wiegi yai mu bidaibao.  
\c 1  
\ms1 Te Danielba me, aga abagi selaba dali pedelali sę dabe yali po  
\mr (Dąį 1–6)  
\s1 Te Juda dabego ogwa bidi meba te king Nebukatnesargo bede bidali  
\p
\v 1 Te Jehoiakim te Juda dabego tuni bidi king pedelai, tama kibu be sela bidai madigi, tialima Nebukatnesar te Babilon bulu kingo te Jerusalemba hwįagasainu aselama, tama agai ami bidigo te taun tigidali bagulali. \x * \xo 1:1 \xt 2 Kin 24:1; 2 Sto 36:5-7\x*  
\v 2 Godigo te Nebukatnesargo te Jehoiakim me te Juda we bidi hauwa somainu elama, tama te Godigo bede muani wiegi yai nai, te kap, me plet pou dabe meba salio. Tama agai te aga tibo godigo beba digibulu sela pali, te be te tǫ pedai Sinarde elaluali, te Babilon hanude digi dao.   
\p
\v 3 Tama king Nebukatnesargo te Aspenasbolo walali, te aga bede sę ebo bidi dabego polalubo ofisa bidi dao, te Juda tomode te gesi ogwa bidi meba somainu yabo po wali. Agai te king Jehoiakimgo hani sibi, me te polalubo genuai bidi dabego hani sibi, te tomode gesi ogwa bidi dabe sao po wai dao.  
\v 4 Agai te gesi ogwa bidi dabe te wiegi yai gesabidi, me tigi wiegi yai yai naga sao po wali. Tama te tigi me badu dolali te me sigio, tama te wiegi yai kolesaga hauwa koneama, tama te wiegi yai skul olama, te kolesaga polo konea pabo bidi dabe naga sao, wali. Tama tiyu, augwaligo te kingo bede sę ebaso, usu yaibao. Tama Aspenasgo digi te augwaliba te nedebo me asębo sę te Babilon pode ola mayu, tama te Babilon bagego polobadu asęani wiegi yai kolesaga tigidali me ola momainogo yai dao. \x * \xo 1:4 \xt 2 Kin 20:17-18; 24:10-16; 2 Sto 36:10; Ais 39:7-8\x*  
\v 5 Tama kingo te tiwai po me wali, te tigidali side augwaligo te kingo bede nai sabo bidi dabego ebo kolesaga tiwai eyu, te nai me wain wę tumainu yaibao wali. Augwali te skul sabo te kibu be selade waibao, tama nosali augwali te kingo sę bidi pedelaibao, wai dao.   
\p
\v 6 Te Juda hani gesi ogwa bidi dabe tomode te Aspenasgo te bidi me si me si sai elaluai. Augwa nogi e tiwai, Daniel, me Hanania, me Misael, me Asaria dao.  
\v 7 Tama Aspenasgo gesi noma nogi augwaliba mawai. Agai te Danielgo nogi te Beltesasar polali, te Hananiago nogi te Satrak poali, tama Misael agai te Mesak poali, tama Asaria nogi te Abetnego poai dao.   
\p
\v 8 Danielgo te kingo bede te nai me wain wę te augwaligo mabo nai tubo te aga hagela yali. Te kingo bede elalubo tobage nai dabe, te Godigo Juda dabeba habu selai. Tama tiyu, Daniel aga te mabo nai me wę tuabo hagela homu yali, tiyu aga te God gedude meda idali homu yai. Tialima, agai te polalubo ofisa bidi Aspenasba hanalu wali, te augwaligo agaba te gasa tobage nai mobaso usu egowe po hanalu wai dao.  
\v 9 Tama Godigo te Aspenasgo te Daniel homu dene emainu ilali,  
\v 10 tiali goli Aspenasgo Danielba te tiwai po wali, “Ena te kingde wi ebao, magi baso meni, agai te dagego tuabo nai me wę te sa muani. Tama dage tigi nomona selama, tama te dagego te duga dali asali gesi bidi dabego tigi tiwai tobage pedalisąbaso da, teda te king bidigo po olama, augwaligo ena ela muaibao,” wali.   
\p
\v 11 Aspenasgo te Daniel, me Hanania, me Misael, me Asaria, te me si me si bage tonaluabo bidi me deli nigilali. Tama Danielgo te tonalubo bidiba te tiwai po wagi pali,  
\v 12 “Nago da e tiwai usu sao. Dabolo te gide sabo tubo nai doanai dabe naga mao,” wali, “tama tuabo kedau yai wę mayu iduao,” po wali, “te nogo si sogoba usu nagasao,” te po wai.  
\v 13 “Tialima, nosali te nogo si wali side, te gasa gesi bidi dabe te kingo be tomode nai tuali bidi dabe sulama, te da me suagameo, tama te nago koneaibao, te dago tigi te augwaligo tigi tiwai wiegi yai pedalugowe, ma meniwe? Te sulama, tama nosali nago mena sę dabolo yabo homu ebaso da, teda te po menio, nago te sę yagameo,” wali.  
\v 14 Te tonalubo bidigo te Danielgo pode usu da po olama, tama agai te Danielgo wali po tiwai gilama te sę yai dao.   
\p
\v 15 Tialima, te nogo si wali sogo te silama, tama te bage tonalubo bidigo te augwali tigi wiegi yai mu pedalubo sulama, tama augwaligo tigi te mu boma pelama, te kingo bede nai tumainu te sa muani gesi bidi dabego tigi mu edelai sualio.  
\v 16 Tama tibaso, te tonalubo bidigo te Daniel dali, te aga abagi sela bageba dali, te kingo wiegi wiegi yai nai te augwaliba me mabeo. Agai te doanai, te nai dabe naga augwaliba mawai dao.   
\p
\v 17 Tama Godigo wiegi yai konebo homu kolesaga te Danielba me, te aga abagi sela daliba menama, tama augwaligo koneani kolesaga te genuai mu elalu, te bukude elalubo po dabe me te mu konea pelama elaluai, tama augwaligo gasa nai dabe konebo kolesaga hauwa mu elaluali. Tama me, te Godigo Danielba te na ebo page dabe pusa mabo konebo kolesaga wiegi yai mani.   
\p
\v 18 Te tigidali gesi bidi te kibu be sela te skul wabo silali, te king Nebukatnesargo dąį ilali gilama yali, tama te Aspenasgo augwali te kingba odasa pepela yali.  
\v 19 Tama te kingo augwali dali po mibo sogo, te agai te tiwai suali, te Daniel, me Hanania, me Misael, me Asaria, te bagego koneani kolesagago te gasa gesi bidi dabego koneani kolesaga aiyaba elaluai. Tama agai augwali te kingo sę yabo bidi pedalumainu ilalio.  
\v 20 Kingo augwaliba te tobage hauwa naide po hanalu obadi, te agai te tiwai suali, te augwaligo koneani kolesagago te tigidali aga tonalubo tǫ pedaide bidali kolesaga koneani bidi dabe aiyaba mu elaluai suali. Te kolesaga koneani bidi dabego kolesaga dali, te Juda me si me si bidigo koneani kolesaga dali usu mu isiąbo ąǫ isąwai dao.   
\p
\v 21 Danielgo te king bidigo aga nogoba muani sę bobobage sogo yalio. Aga te sę idubadi, te gasa tuni bidi nogi te Sairus te Babilon king bidi pedelali sogoba usu nai dao.   
\c 2  
\s1 Nebukatnesargo na yali  
\p
\v 1 Te me deli sogo hulide te si wabo kibu bede te Nebukatnesar king bidibadi, agai na yai. Te na yaligo te aga haliga sęgę mu ilama, tama aga piabo ąǫ ma ebeo.  
\v 2 Tama tibaso, agai po te gedugo tonama konebo bidi dabeba me, te pobi wabo bidi dabeba me, te dagalu hǫ dabe suyu nosali pedelabo sę konebo kolesaga koneai elalubo bidi dabe, te augwaliba po ola tolali. Augwali aselama, te agai na yali po page pusagasomainu yalio. Te augwali aselama, kingo geduba dolagasobo sogo,  
\v 3 agai te tiwai po augwaliba weyu yai, “Eno na yalio, tama te na yaligo ena homu sęgę tama elalubao,” wai. “Tama tibaso, eno te na yali page koneainu ebao,” wai.   
\p
\v 4 Tama augwaligo te kingba po wei ponoyu, te Aram pogo begelama, te tiwai po wai, “King o, eno homugo nage te sesemane sogo sesabi elama, bugagia bidagameo. Te nago dabolo te nago nade suali nai po bolo pusao,” wali, “tama dago te na page nageba pusa mawaibao,” te po wai dao.   
\p
\v 5 Tama kingo te bidi dabe augwaliba te tiwai po wai, “Eno mu po dageba obao, te dagego enaba te eno nade suai nai dabede po pusisąyu, tama te na yali page enaba te dagego pusa masiąbo usu isiąbaso da, teda te eno ena ami bidi dabeba walama, te dagego tigi tologolama, dolama, tama dage isimainu yaibao,” wali. “Tama augwaligo dagego be dolama, te olo nai kakali hogomu tiwai pedelaibao,” te po wai.  
\v 6 “Tiali goli, te dagego enabolo te eno nade suali nai dabe dali, te na yali page dali si pusa mobaso da, teda eno dageba te doado bage hauwa mayu, tama eno dagego nogi genuai pedalubo sę ilaibao. Tialima, megi da, dagego enabolo te eno na yali po page pusa maiyąo,” te po wali.   
\p
\v 7 Tama augwaligo kingba te po ma wai, “Nago te nade suali nai po bolo dabolo pusa mao,” po wai, “tama dago te page pusaibao,” wali.   
\p
\v 8 Tama kingo te po wali, “Eno te dagego tibo po wabo koneanio. Te dagego gesege gana eyu, te sesabi yaibao, magi baso meni, te dagego homugo eno te u wali po hasegelaibao homu yali. Tiali goli, te usu me egobeo.  
\v 9 Te dagego enabolo te eno nade suali naide po wasiąbaso da, dage tigidali te deli dolobo sę tobagego naga te dage dolaibao. Dage tigidaligo deli homu elama, te eno homu hasegelibo usu egowe weyu, te dagego ena tibo po ola mobao. Tialima, te eno nade suali nai po te enabolo waiąo. Dagego tama tibaso da, teda eno koneaibao, te dagego te na yali po page dali pusubo usu yaibao,” te po wai.   
\p
\v 10 Te bidi dabego te kingo po wabo odolama, tama augwaligo te tiwai po wei ponani, “King, te nago dabolo te yao po wabo sę hanalubo po wali, te tǫde bidi me deligo nagebolo te po nageba obaso, te usu egobeo. King, te bidi osola subo bidi, me te gasa kolesaga koneai bidi dabeba me, te genuai bomai king bidigo te tobage hanalubo po polobadu munu me hanalu wai menio.  
\v 11 King, te nago dabolo hanalu wali nai po da kone tųą palio, tama te bidi me deligo yainogo ebaso, usu me egobeo. Te god dabego naga usu yaibao. Tama te god dabe te bidi dali me bidibeo,” wali.   
\p
\v 12 Kingo te po odolama, te aga sębę eyu, agai wado po dwai mu wali. Tama agai te ami bidi dabeba po ola tolama, te augwaligo te Babilonde te po page koneai bidi tigidali ela silaibao, wali.  
\v 13 Tama te kolesaga konea pai bidi dabe ela muao wabo po augwaligo ola tolama, tama augwali meba pelama, te Daniel me, aga abagi dabe sela dali, te augwali me ela muainu yali.   
\s1 Godigo te na page Danielbolo ola mawai  
\p
\v 14 Tialima, Ariok, te kingo ami bidi dabede te polalubo ofisa bidi, te hodolama peyu, te Babilonde kolesaga konea pai bidi dabe ela mugi painu yai. Tama Danielgo te homu kone bugagia palama, te Ariok dali miabo po sunumi dodolali.  
\v 15 Tama agai Ariokba te tiwai po hanalu wali, “Magi baso kingo te sesena pai bidi tiwai eyu, tama bomai po weyu, te kolesaga po page konea pai bidi dabe ela muaiba po waliwe?” Tama Ariokgo Danielba te tama sę pedelali po wai.  
\v 16 Tama Daniel te kingba polo pelama, tama agabolo hanalugi pelama, agai te po page koneani bidi dabe te polo asesa ela mugio olama, tama agai te na yali po page pusaibao po wai dao.   
\p
\v 17 Kingo te pode usu da po obaso, tama Daniel aga beba ma begasa pelama, tama aga abagi selabolo te po walali, te Hanania, me Misael, me Asaria, te tama sę pedelali po wali.  
\v 18 Tama agai augwaliba te tiwai po wai, “Dago te dagalude bidibo Godiba gedu haluasa po wainao, te Godigo olo tau mabo wiegi yai kolesagago te dabolo te geme dualali nai page ola momainu elama, tama da te gasa po page koneani bidi te Babilon bulu bidi dabe dali isidali weyu, te dago tama tinao,” wai.  
\v 19 Tialima, te sogo hulide naga, te Daniel aga na tiwai ebadi, tama Godigo Danielba te kingo na yali page ola mawai. Tama Danielgo te po wei ponoyu, tama te Godigo nogi ugwaba siyu,  
\v 20 tama te tiwai po wai, “God, eno nago nogi sesemane sogo ugwaba saibao. Tigidali bomo me koneani kolesaga te nagede naga elalubao.  
\v 21 Nago te giliga side, me tulubage side te tonalubao, tama nago digi te bidi dabe king pedalumainu elama, tama nago te king dabe augwa sęde sela sąyu ebo dao. Tama nago te wiegi yai konebo homu kolesaga te we bidi dabeba mabo dao.  
\v 22 Te nai hauwa geme dualalubo te bidi dabego konesiąwai. Tiali goli, God, nago te nai dabe te bidi mebabolo ola mabo dao. Te nanobo ula te nagede elalubao, tama nago te be hulia side elalubo nai te konea pai dao.  
\v 23 Te eno wąį nǫų dabego God, eno nageba gedu haluasa po weyu, usu da olama, te nage nogi ugwaba sobao. Magi baso meni, nago enabolo te konebo kolesaga me te bomo enaba mawai, tama nago eno gedu haluasa po wabo odolama, tama enabolo te dago nageba hanalu wali nai ola mawai. Tama nago dabolo te dago te kingba aga nade pusabo po meba mawai dao,” Danielgo te gedu haluasa po wai.   
\s1 Danielgo te na yali po page kingba pusali  
\p
\v 24 Daniel te Ariokba pali, te bidi te kingo nogo tų dąį ilama, te Babilon po page koneai bidi dabe elimainu yali bidi da, tama Danielgo agaba te tama po wai, “Nago te po page koneai bidi dabe munu me eligio,” wai. “Nago ena te kingba sela pao, tama eno agaba te na yali po olama, tama te na yali page agaba pusaibao,” wali.   
\p
\v 25 Tialima, polo asesa Ariokgo te Daniel kingba sela pelama, tama agabolo te po walali, “Eno te dago te augwaligo page bulude sesali Juda bidi me deli gegalio, tama agai nageba te na yali po page pusa mabo usu yaibao,” wali.   
\p
\v 26 Tama kingo Danielba hanalu wali, “Beltesasar, te nago enabolo te eno na yali po weyu, tama te na yali po page pusubaso usu mu yaibawe?” te po wai.   
\p
\v 27 Tialima, Danielgo kingba te tama po wai, “King o, te kolesaga page koneai bidi me deligo te geme dualali nai page po pusainu ebaso, usu me egobeo, te gedugo tonama konebo bidi dabe me, te pobi wabo bidi dabe me, augwali usu me egobeo.  
\v 28 Tiali goli, te dagalude bidibo God deli elalubao, tama agai te geme dualalubo nai page hania hanilaibao. King, Godigo nageba te nosali pedelabo nai dabede te na nagebolo ola manio. Megi da, te eno nageba te nago na yali po waibao.  
\v 29 King, nage pilamubadi, tama nago te nosali pedelabo sęde homugo kone paluyu, tama te nade Godigo nageba te nosali pedelabo nai dabe ola mani. Te God, te geme dualalubo nai dabe hanilibo God dao, tama agai nageba te nai dabe pedelaibao olama, te ola mani dao.  
\v 30 Tama te Godigo enabolo te geme dualaluali nai ola mawai. Te eno koneani kolesaga genuai da homu eyu, tama eno te gasa kolesaga koneani bidi dabe aiyaba elaluali da, te homu me egobeo. Menio. Godigo te sę enaba ola mobaso, te nago na yali po page te nago konemainogo ebo dao,” wali.   
\p
\v 31 “King, te nago nade te moni dobo dwai bidi me deli piksa noma suyu, bididuali. Tama te nai te bomo elama, te ula mu yai. Nago sulama, te nage wi dwai mu yai.  
\v 32 Augwaligo aga tobolu te wiegi yai golgo nigai, te ula mu elaluali. Te hagawia me te aga nogo si augwaligo te silvago nigai, tama aga tabi me sągą tele si te brasgo nigai.  
\v 33 Te aga sągą pąno me sugu mi te aingo nigali, tiali goli te aiyadu sągą sawali si te ain me tǫgo dali nigai.  
\v 34 Nago te piksa nomaba tonaludubadi, tama masigi me deli aga digi te bulu dudu gebu aluasa dulu, te piksa sągą augwaligo te tǫgo me aingo nigali pedai badu elali. Tama te sągą si dwasianu mimia pelama, kakali nigilali. Bidigo te masigigo te dolobo sę me ebeo.  
\v 35 Tama te tigidali ain, me tǫ, me bras, me silva, me gol, tigidali te pepeda pelama, tama te wit tigiwali bo te dago sela sąbo tiwai pedelali. Tama te waligo te kakali hogomu selasa pelama, tama te dwasianu hogomu dabe me elalubeo. Tiali goli, te piksa noma elali masigi, te genuai bulu du pedelama, tama te tǫ pedai tigidali mesega salio,” wali.   
\p
\v 36 “King, te tama na nago suali. Tialima, megi da, eno nageba te na yali po page pusaibao.  
\v 37 King, nage te polasa mu polalubao, tama nago te tigidali gasa king aiyaba elaluai. Te dagalude bidibo Godigo agai nage sa munama, tama agai nageba te genuai bomo, me genuai nogi mawai dao.  
\v 38 Agai nago te tigidali tǫde bidibo we bidi hani, me tigidali hasa sibi, me ba sibi, te tonalumainu ebo bidi nigali. Te nade te augwaligo te tobolu golgo nigali tiwai, te nage digi dao.  
\v 39 Te nage tudi badu gasa king bidi hani pedelaibao, tiali goli te augwaligo bomo te nago bomo tiwai me egobeo. Tama nosali te sela wabo king bidi hani pedalubo sogo, te tigidali tǫ pedai tonalueibao. Te king hani te bras tiwai dao.  
\v 40 Nosali te me si me si wabo king bidi hani pedelaibao. Agai bomo te aingo bomo tiwai yaibao. Aingo te tigidali nai elibo si, te kakali mu elama, te hogomu tiwai ebo dao. Tialima, te tiwai te king hanigo te kantri bulu tǫ pedai te tigidali mu dolama siliyu, te polobadu yali king bidi hani ela silaibao.  
\v 41 Te nago nade te tiwai suali, te naigo sągą sawali me sągą ge dabe augwaligo te tǫ de ain si taluama, nigali. Te page te tiwai. Te kingo tonaluali we bidi te pepeda pelama, te hani si pedelaibao. Tiali goli, te hani si te bomo elaludaibao. Ain te tǫ dali sągą side elaluali, tama te da te tiwai ola mawai, augwaligo bomo tigidali te polo tama me siligobeo.  
\v 42 Te sągą ge dabe augwaligo te ain me tǫgo nigali te tiwai ola mawai, te king bidi hani me badu te aingo bomo tiwai elalueibao, tiali goli te gasa pedai badu te tǫgo dwasianu bomo naga tiwai me elalueibao.  
\v 43 Augwaligo te piksa sągą nigainogo te ain me tǫ dali taluama, nigali. Te page te tiwai dao. Te king dabego homugo te pepeda pali hani dabe ma sisinabo homu elama, tama te augwaligo te gasa king dabego wegi dabe sabo homu elama, tama tiaibao. Tiali goli, te augwali deliba bugagia me dagana sogobeo, magi baso meni, ain te tǫ dali bugagia me dagana sabo menio,” wali.   
\p
\v 44 “Tama te king dabe bidalubadi, te Godigo te we bidi tonalubo bomo te tomo hodolama, tama te tonalubo bomo te sesemane bidada peyu, bidada paibao. Te gasa king dabego te Godigo tonalubo bomo te elalueinu ebaso, usu me egobeo, te gasa bagego te bomo me sogobeo. Tiali digi, te agai da te augwali aiyaba elaluama, tama te gasa king dabe mu dola silama, tama agai tonalubo bomo te sesemane elaluaibao.  
\v 45 Nago suali, te masigi olodali aluasa dulu te tulaluama, tama te piksa augwaligo te ain, me bras, me tǫ, silva, gol, te tama naigo nigali piksa elibo suai. Te masigi te Godigo bomo tiwai nigali. Te Godigo genuai nogi elalubao, agai nageba te nosali pedelabo nai dabede sę ola mawai. Te nade nago te suali nai dabede te sę te eno nagebolo wali po gilama te tiwai sę dolo mu pedelaibao,” Danielgo te po wai.   
\s1 Kingo Danielba genuai nogi mawai  
\p
\v 46 King Nebukatnesargo te Danielgo po odolama, tialima agai Daniel pąba kidu sugunama, tama te po weyu, te augwa tibo godiba ofa ebo tiwai me te denami ebo nai me te Danielba ofa yao po wali.  
\v 47 Tama kingo Danielba te tama po wali, “Mu tama dao, nago Godigo te gasa god tigidali aiyaba elaluai. Aga te tigidali kingo Genuai Bidi, tama agai te geme dualali nai page ola mabo bidi dao. Megi eno te koneai, magi baso meni, nago te geme dualaluali na page te hania hanilalio,” wali.   
\p
\v 48 Tama kingo Daniel dąį ilama, te Babilon Provinsde polalubo tuni bidi nigali, tama aga te kingba wiegi yai homu mabo bidi tigidali tonalubo bos bidi nigilali. Tama me te kingo te wiegi yai homu pemene ilibo nai hauwa te Danielba menama, tama Daniel genuai nogi elaluai dao.  
\v 49 Kingo te Danielgo po wali pelama, tama te Satrak, me Mesak, me Abetnego, te augwali sa munama, te Babilon Provins tǫ pedai tonalubo sę mawai. Tama Daniel aga digi te kingo bede bidalio.   
\c 3  
\s1 Nebukatnesargo we bidibolo bidi piksaba lotu po wao po wali  
\p
\v 1 Nebukatnesargo te po obaso, tama augwaligo te bidi piksa noma me deli te golgo nigai, te aga bobobage usu sali, te 27 mita teba usu nani, tama aga genuai usu nama usu sali, te 3 mita. Tama augwaligo te piksa te dolo tǫ pesage augwaligo te nogi Dura nogi yai, te Babilon Provins tǫ pedaide dodolai dao.  
\v 2 Kingo te po weyu, te aga gavman ofisa tigidali te piksa noma gudainogo eyu, sisinagasao wai. Tialima, te hetman dabe me, tama te polalubo tuni bidi, me si wabo tuni bidi, me te mone tonalubo bidi dabe, me te jas bidi dabe, tama te tǫ pedaide gasa ofisa dabe me, te augwali sisinagasai. Tama kingo augwaliba weyu, augwaligo te golgo nigali piksaba lotu waiyąo po walio.  
\v 3 Tama te po obaso, te tigidali gavman genuai bidi te piksa elalubo pesageba sisinama, te lotu wainogo yalio, augwali tede dodolali.   
\p
\v 4 Tama te gavmango po pusubo bidi me deligo te i bomo elama weyu, te tiwai wali, “Dage tigidali bulu tǫ pedai kantri we bidi me, te tigidali hani me, te po haniani wabo we bidi dabe dao.  
\v 5 Dagego te biugel bolo hasia bu wabo odaibao, tama nosali augwaligo te gasa tobage musik hauwa waibao. Tialima, dagego te musik wabo odobaso da, te dagego kidu sugunama, tama te king Nebukatnesargo dodolali piksa teba lotu waiyąo.  
\v 6 Te bidi me deligo te piksaba kidu sugunama, lotu po wasiąbaso da, teda polo tama dago aga selama, tama aga te genuai stov sia posolo mu elalubo te tomoba aiya sąwaibao,” te gavmango po pusubo bidigo te po wali.   
\p
\v 7 Tama augwaligo te musik wabo odobo sogo, te tigidali bulu tǫ pedai kantri bidi dabe, me te tigidali hani, me te tigidali haniani po wabo we bidi dabe, augwa te kidu sugunama, tama te piksaba lotu wali, king Nebukatnesargo dodolali piksaba lotu po wai dao.   
\s1 Augwaligo te Juda bidi sela po tų ilali  
\p
\v 8 Kingo te tama po wai, tigidali bidigo te piksaba lotu waiyąo po wali, tialima te Babilon bidi meba te kingba aselama, tama te Juda bidi sela po tų ilagasai.  
\v 9 Augwaligo kingba te tiwai po walio, “Genuai bidi, nage sesemane sogo bugagia bidagameo.  
\v 10 King o, nago bomo yai po te tiwai ilali, te augwaligo musik wabo sogo, tigidali we bidigo te kidu sugunama, tama nago te dodolali piksaba lotu po waiyąo po wai.  
\v 11 Tama bidi me deligo te muani bomai po wali me pisąbaso da, teda nago aga te genuai sia daboba aiyaba sąwaibao po wali.  
\v 12 Tiali goli, te Juda bidi sela, Satrak, me Mesak, me Abetnego, nago augwali sa munama, te Babilon tonalumainu yali bage, augwaligo te nago po sela sąwai. Augwaligo te nago god dabeba lotu me wasiąwai, tama me nago te dodolali piksaba kidu sugunama, lotu me wabeo,” wali.   
\p
\v 13 Kingo te tama po odolama, tama aga wado po dwai mu olama, tama te po weyu, augwaligo te bidi sela agaba odasa asao wai.  
\v 14 Te sela bidi sabalubo sogode, kingo augwaliba te tama po hanalu wai, “Satrak, me Mesak, me Abetnego, augwaligo te po weyu, dagego te eno godiba lotu po me wasiąyu, tama me dagego eno te dodolali piksaba kidu sugunubeo po wali. Te mu da, agawe?  
\v 15 Tialima, dagego te musik odobo sogo, dagego kidu sugunama, tama te piksaba lotu waiyąo. Tama dagego te tiwai isąbaso da, megi naga tama eno te bidi dabeba walama, tama augwaligo dage te genuai sia daboba sąmainogo yaibao. Tama dagego homugo te dage tau sabo god me deli elaluba homu eba, agawe?” kingo te po wai.   
\p
\v 16 Tialima, Satrak, me Mesak, me Abetnego, te bagego te po wali, “King, te nago da selade yainu ebo sęde te dago magi po me menio.  
\v 17 Dago lotu po te God muba wabo dao. Dago te God agai da tau sabo usu elalu, te nago bomo, me te siago bomo geda mubaso da, teda te Godigo sę dao,” wali.  
\v 18 “Tiali goli, agai da tau sisąbaso da, te tagalao, dago te nago god dabeba lotu po me wagobeo, tama me dago nago te dodolali gol piksaba me kidu sugunugobeo,” augwali selago te po wai dao.   
\s1 Augwaligo te Satrak, me Mesak, me Abetnego te siaba sąwai  
\p
\v 19 Nebukatnesargo haliga sębę te Satrak, me Mesak, me Abetnego, te bageba eyu, tama agai guni buyu, gedu me gesabidi me pęgo sela pali. Tama agai te aga sę bidi dabeba olama, te sia nogonama, te bogoli mu dwai pedalumainu ilao wali. Polobadu augwaligo sia nogani posolo ebo te tiwai posolo yai me pedalubeo, te genuai mu.  
\v 20 Tama agai te bomai ami bidi dabeba walama, te Satrak, me Mesak, me Abetnego te nogo sągą baklaingo dunama, te siaba sąyao po wali.  
\v 21 Tama tialima, te bidi sela te augwa gudalubo ugwa dali kęnama, tama augwali te genuai siaba sąwai dao.  
\v 22 Kingo te po obaso, tama augwaligo te sia nogani te posolo genuai mu pedelali, tama te ami bidi dabego te Juda bidi sela pelama, te siaba sągi pali sogo, te siago te ami bidi dabe delama, te augwali isai dao.  
\v 23 Tama tialima, te Satrak, me Mesak, me Abetnego te sia tomoba tulaluai, tama augwaligo te augwali kęnani bono baklain, te kęnani tiwai tama elaluai.   
\p
\v 24 Nebukatnesargo te augwali tama tebo sulama, tama polo tama agai dwai midigi selama, dolugulali. Tama agai bolo te wiegi yai homu kolesaga ola mabo bidi dabeba hanalu wali, “Dago te bidi sela nogo sągą dųnama, te siaba sąwani, ma meniwe?” Tama augwaligo agabolo te po wai, “Awe, genuai bidi, dago te tama tiwai dao.”  
\v 25 Tialima, agai te po wali, “Magi elama tama eno suali, te bidi me si me si te sia tomode bilibowe? Tama te dago augwali kęnani baklain bono, te augwali tigide elalubo ma me subeo. Tama siago me augwali me dabeo. Tama te me si me si wali bidi te god me deli tonobo ąǫ ebao,” te po wai.   
\s1 Siago te Satrak, me Mesak, me Abetnego, te me dabeo  
\p
\v 26 Tama Nebukatnesar te stov sia nogani pąba pelama, tama i wai, “Satrak, me Mesak, me Abetnego, dage te Ugwade Mu Bidibo Godigo sę bidi dabe dao, dage buluba dią soao.” Tialima, polo tama augwali buluba dią asalio.  
\v 27 Tama te kingo genuai bidi dabe, augwali te pąba pąba aselama, te siago disąwani Juda bidi sela suagasalio. Tama augwaligo te tiwai suali, te siago augwa tobolu nisi me, te augwa gudali ugwa me, te siago disąwai, tama te sia hano kugumini me te augwali tigide me elalubeo.   
\p
\v 28 Tama kingo te po wai, “Da tigidaligo te Satrak, me Mesak, me Abetnego, te augwaligo God nogi ugwaba sinao,” wali. “Agai te aga mobo bidi ensel tagala palama, tama te agaba lotu weyu, te konealubo homu dąų wabo bidi sela tau sali. Augwaligo te eno bomo yai po sela sąyu, te augwali isabo wi me ebeo. Tama augwaligo gasa godiba lotu me wabeo. Menio. Augwaligo te augwa Godiba digi naga lotu wai dao.  
\v 29 Te niwai god me deligo te aga we bidi tau siyu, te Satrak, me Mesak, me Abetnego, te augwa Godigo yali tiwai me egobeo. Tama megi eno te po wainu ebao. Te bidi dabego te Godiba posobo po wabo te habu mu dao. Te mena bulu kantri tǫ bidi dabego, me te mena hani bidi, ma te mena tobage po wabo bidi hani, augwaligo te tama tiwai po obaso da, teda eno te augwali tigi tologolama, miminama, te augwali isaibao. Tama eno te augwaligo be me te pobele bage tiwai pedalumainu ilaibao,” wali.   
\p
\v 30 Kingo po ola silama da, teda agai te Satrak, me Mesak, me Abetnego, te augwali sela bageba te gesi sę te Babilon bulu tǫ pedaide mawai, te augwaligo polobadu yali sę mu edelama mu yali.   
\c 4  
\s1 Nebukatnesargo si wali na yali  
\p
\v 1 Te King Nebukatnesargo po te tigidali bulu tǫ pedai we bidi dabeba me, te tigidali haniba me, te tigidali haniani po wabo bidi haniba te po ola tolali. Agai po te tiwai, “Dage tigidali bugagia bidaluiąo,” walio.  
\v 2 “Megi ena dwagi yai homu eyu, tama eno dageba te Ugwadu Mu Bidibo Godigo enaba ola mani bomo yai sę dali, te bidi noma sabo genuai sę dabede po obao,” wali.   
\q1
\v 3 “Godigo te tobage genuai sę ebo mu  
\q2 dabolo ola mawaibao.  
\q1 Tama aga digi te boma pai mu elalubao.  
\q1 Aga te king sesemane bidada pidu, bidibo dao.  
\q1 Agai te tigidali nai tonalubo sę  
\q2 te sesemane sogo elalua pidu, mu elalua paibao.”   
\p
\v 4 “Ena Nebukatnesar, eno te tigidali nai sulama, tama eno sę dabe sese te wiegi yai pedalubaso, tama ena wiegi yai pemene elama, te ena bede bidai dao.  
\v 5 Tiali goli, me sogo deli sogo hulide eno na elama, tama ena wi dwai mu yalio. Ena te eno bet saide pila mubadi, tama te eno homude suali nai dabe augwaligo ena wi dwai mu ilalio.  
\v 6 Tama tibaso, eno te tigidali Babilonde te po page koneai bidi dabe asiąo olama, enabolo te na yali page pusagasiąo po wali.  
\v 7 Tama te tobage po page koneai bidi dabe dali, te pobi wabo bage dali, te tama bidi dabe tigidali asalio. Eno augwaliba te na yali po walali, tiali goli augwaligo te na yali po page pusabo usu meni yai dao.  
\v 8 Nosali Daniel asai. Eno agaba te nogi Beltesasar polama mawai, te nogi te eno god nogi dao. Te bomai god dabego te homu kolesaga Danielba mawai baso, tama tialima, eno na yali po te agabolo walio. Eno agaba te tama po wai,  
\v 9 ‘Beltesasar, te kolesaga koneai bidi dabego tobolu bidio, eno koneani, te bomai god dabego nageba te homu kolesaga menama, tama te magi nai me deli nagede geme dualalubeo. Tialima, eno na yali po megi odama, tama nago te nade yali po page pusao,’ wali.”   
\p
\v 10 “Eno agabolo te po wali, ‘Ena piali sogo, eno na te tiwai yali. Eno suali, te tigidali bulu tǫ tomode te bobobage ni me deli dolalubo suali.  
\v 11 Te genuai pedelama, tama te ni bobage holali tobolu te dagaluba usu nu giluainu yali, te tigidali bulu tǫ pedai bidi tigidaligo sumainu ebo tiwai yai.  
\v 12 Te nigo te wiegi yai yabe elalu, tama te nai hauwa walali, tama te tigidali bidigo, me hasa sibigo te tuabo usu elaluai. Te bulu uni hasa sibi dabe aselama, te ni dologoba toma tuagasu yagasai, tama te ba dabego aga nologode be nigali, tama te tobage tigidali nai sibigo te aga du tuagasalio.  
\v 13 Eno te na yali homu kone paludubadi, tama eno suali, te mobo bidi ensel me deli te dagaludu dulubo suai, te mobo bidi ensel dabede te nai dabe tonalubo ensel me deli dao.  
\v 14 Agai i bomonama weyu, te tiwai po wali, “Te ni degemainu, te gelao,” wali. “Tama te aga nologo dabe togwao, tama te yabe dabe selama, subigila tedela palao,” wai. “Te ni dologode bidibo kibu hasa sibi dabe sela sąyu, te ni nologode dugulalubo ba sibi dabe te sela sąyao.  
\v 15 Tiali goli, te aga page da, te nosai elalubo tǫ tomode elalumainu yao, tama te genuai ring ain me bras te me deli selama, tama te aga pageba muao. Te hulide tulubage segeni ebo te aga daiba tulalumainu elama, tama aga te kibu hasa dabego te tuabo nosai gegebo tiwai emainao.  
\v 16 Agai te bidi dabego homu kolesaga ebo tiwai ma egobeo, tiali goli aga homu kolesaga te kibu hasa sibi dabego homu kolesaga tiwai elalua pidubadi, te kibu be 7 bidaibao,” wali.  
\v 17 “Te nai dabe tonalubo mobo bidi ensel dabe, augwaligo te nai dabe pedalumainao po obaso, te tigidali bidigo konemainu yali, te Ugwadu Bidibo God Mugo te tigidali we bidi tonalubo dao. Te agai homugo digi te bidi dabe king pedalumainu sa mubo da, te genuai nogi elalubo bidi me, te olo bidi tama me, te tagalao, te agai digi sa mubo dao.” Te ensel mobo bidigo te po wai,’ eno te po Danielba wali.  
\v 18 Tama eno Danielba te tiwai po ma wali, ‘Eno nageba te eno na yali po wai dao. Megi da, Beltesasar, nago enabolo eno te na yali po page pusao, magi baso meni, te eno po page koneai bidi me deligo enabolo te po wainu ebaso, te usu ebeo. Nage naga usu da, magi baso meni, te bomai god dabego te nageba homu kolesaga mawai dao,’ eno Danielbolo te po wali,” Nebukatnesargo te po wai dao.   
\s1 Danielgo te na page pusali  
\p
\v 19 Danielgo te na page koneai, tama agai te homu si eyu, tama te kingba pusabo wiegi yai homu pemene isąwani. Tama aga te po polo wei ponebeo. Tiali goli, kingo agaba te po wai, “Beltesasar, tama nago homugo te na elalumaina homu elama, tama te na yali pagede nago haliga sęgę emainu egio,” wali. Tialima, Beltesasargo te po wai, “King o, eno homude te nade yali sę nageba pedalubo te eno hagela homu yai. Eno homugo te nago boi bidi dabe augwaliba naga pedalumainu homu yai dao.  
\v 20 Nago te genuai ni me deli suali. Te aga tobolu te dagaluba mu usu nu gulali, tama tǫde bidi tigidaligo suali.  
\v 21 Te agai yabe te wiegi yai dabe naga elaluai, tama te nigo du wai te hauwa elaluali, te tigidali bidigo me hasa dabego te tuabo usu elaluai. Te bulu uni hasa dabe te ni dologoba toma nagasali, tama te ba dabego te aga te ni nologoba be sęnama bidai dao.  
\v 22 King o, te ni da, te nage tama dao. Nago genuai nogi mu te we bidi tigidaligo gedude elalubao, tama nago bomogo te tigidali bulu tǫ habu usu nama tonalubo dao,” wali.   
\p
\v 23 “Tama nago suali, te nai dabe tonalubo ensel mobo bidi me deli te dagaludu dulama, te po wali, ‘Te ni gelama, dolao,’ wali, ‘tiali goli, te tǫde page te nosai dabe elalubo page tomode elalumainu sula tagalao. Tama te genuai ring ain me bras deli selama, tama te aga pageba muao,’ wali. ‘Te hulide tulubage segeni ebo te aga daiba ugwadu tuluyu, tama kibu hasa dabe dali te kibu be 7 tama bidimainu ilao,’ te ensel mobo bidigo nagebolo te po wali.”   
\p
\v 24 “King, te na yali page te tiwai. Te Ugwadu Bidibo God Mugo te nageba pedelabo naide po wali dao.  
\v 25 Nago te we bidi dabe bidibo pesage tagalama, tama nage pelama, te uni hasa dabe dali bidigi paibao. Nage te kibu bulmakau dabego nosai dabe tubo tiwai eyu, tama nage bulude piaibao, tama te hulide tulubage segeni tulubo te nageba idubadi, te kibu be 7, teba usu nigi paibao. Nage te tiwai bididubadi, te nago te tiwai te Ugwadu Mu Bidibo Godigo te tigidali we bidi tonalubo homu konebo teba usu nigi pabo teba usu naibao. Te aga homugo digi, agai te bidi dabe te king pedalumainu ebo dao.  
\v 26 Nago odali, te enselgo te ni page te tǫde elalumainao wali. Te wali po page te tiwai. Te God deligo naga te tigidali tǫde nai tonalubo da, te tama tiwai bugagia konebo sogo da, teda nage te king ma pedalaibao.  
\v 27 Tama eno homugo te megi eno nagebolo wabo po tiwai yao. Nago te sęgę munu ma sigio,” wai. “Nago te doloba pai kolesaga naga yao, tama nago te olo tau sabo wiegi yai homu te magi nai sǫą pabo we bidi dabeba yao. Dago konebeo, te nago te tama tibaso da, teda nage te bugagia bidiyu, tama nago ebo sę tigidali te wiegi yai naga pedalaibao, te nago nade suali sę nageba asogobeo,” Danielgo king bidibolo te po wai.   
\p
\v 28 Tama nosali, te tigidali wali sę te king Nebukatnesarba te Danielgo wali tiwai gilama pedelai dao.  
\v 29 Te polua nogo si olama, sągągo si, te 12 polua silibo si da, tialima te me sogo deli sogo te king aga te be mabo nigalidu te Babilon bede te daide bidali.  
\v 30 Tama agai te tama po wali, “Iya, Babilon te genuai taun mu, tama te polalubo mu da. Te ena king bidi ede bidimainu eyu, te eno bomogo digi, eno te taun hodolali, te eno genuai bomo me genuai nogi te tigidali hani we bidiba ola mani dao,” kingo te po wai.   
\p
\v 31 Agai te po odubadi, tama agai po me deli te dagaludu asobo odali. Te po e tiwai wali, “King Nebukatnesar, nago eno po odao. Te nago te haniani bulu tonalubo genuai bomo, megi tama te eno nago nogode sela sąwaibao.  
\v 32 Tama te augwaligo nage sela sąnama, tama nage te we bidi dabe dali munu ma bidigobeo. Te nage bulu uni hasa dabe dali naga bidaibao. Nago te kibu bulmakau dabego nai tubo tiwai ela bilidubadi, te kibu be a naga olama, me nogo badu si yaibao. Te nage te tiwai bididubadi, ‘Te Ugwadu Mu Bidibo Godigo te tigidali we bidi tonalubo da,’ te tiwai homu konebo sogo usu naibao. ‘Te God aga homugo digi, agai te bidi dabe te king pedalumainu ebo dao,’ nago te homu yaibao.” King bidigo te po wabo odali.   
\p
\v 33 Tama polo mu te sę dabe te king Nebukatnesarba te enselgo wali po tiwai gilama pedelali. Augwaligo aga te we bidi dabe tomodu sela sąnama, tama aga te kibu bulmakau dabe tiwai gilama te nosai tuduai dao. Te hulide tulubage segeni ebo te aga tigi daiba tulali. Tama aga tobolu nisi te ba aiwai nisi bobage ebo tiwai pedelali, tama aga nogo dani bobage te bago dani bobage tiwai pedelalio.   
\s1 Nebukatnesargo te God nogi ugwaba salio  
\p
\v 34 “Te kibu be a naga me si wali silibo sogo da, ena Nebukatnesar, eno te dagaluba ugwa tonaluama, tama eno homu kolesaga te wiegi yai ma pedelai. Tama eno wiegi yai homu pemene te Ugwadu Bidibo Godiba mu yalio. Te sesemane bidada pidu bidibo God, tama eno aga nogi ugwaba mu siyu, kekene nanio. Tama eno te tama po wai,  
\q2 ‘God te king sesemane sogo bidada peyu, bidibo dao.   
\q1
\v 35 Agai suali, te tǫde bidi dabe te olo nai tiwai yali.  
\q1 Te dagalude ensel mobo bidi dabe, me tǫde bidi dabe,  
\q2 te aga dologode bidiyu,  
\q2 tama agai augwali tonalubao.  
\q1 Te agai magi sę me deli yainu ebo sogo,  
\q3 te niwai bidi me deligo te paligobeo.  
\q1 Tama te niwai bidi mego agaba te tama po me hanalu,  
\q2 “Nago magi yainu ebawe?” te po me wagobeo.’  
\q1 Eno te po wai.”   
\p
\v 36 “Eno te po wali sogo da, teda polo tama te eno homu wiegi yai ma pedelama, tama eno te ena genuai nogi ma sali, tama te polobadu eno te tonaluali bulu tǫ kantri tonaluabo bomo ma sai. Te enaba wiegi yai homu kolesaga mabo bidi dabe, me te ena genuai bidi dabe, augwali te ena dali ma bidagasalio. Tama ena te king ma bidiyu, tama ena nogi genuai mu elaluali, te eno polobadu elaluali te genuai nogi aiyaba elaluai dao.  
\v 37 Megi da, ena Nebukatnesar, eno wiegi yai homu pemene te dagalude kingba eyu, tama eno aga nogi ugwaba siyu, tama agaba genuai nogi mawai. Tigidali sę agai ebo te wiegi yai pedelama, tama doloba pai naga yali, tama agai te bidi dabego augwa nogi augwa digi ugwaba sainu ebo bidi dabe te aiyaba elalubo dao,” king Nebukatnesargo te po wali.   
\c 5  
\s1 King Belsasargo te genuai nai da tuali  
\p
\v 1 Te Belsasar Babilonde king bidali sogo, agai genuai nai da me deli tuali. Agai te aga gegunai bidi dabe te nai tuboba asomainu i olama, tama augwali aga dali te wain ąį tuali, te kingo wiegi yai genuai be tomode. Te sisinani gegunai bidi dabe nedali namba, te tiwai, te 1,000 bidi dabe dao.  
\v 2 Augwali te wę tudubadi, tama Belsasargo te aga sę bidi dabeba walama, te gol kap dabe, me silva me selama, sesao wali. Te kap dabe te aga wąį Nebukatnesargo te Godigo be, te moni lotu be tempel te Jerusalemde selama, tama te Babilonba selasa asai. Kingo homugo aga dali, te gegunai bidi dabe me, te aga we mu dabe dali, me te i badu daganalubo si wali we hani dabe dali, augwali te kapudu wain wę tuainu yai.  
\v 3 Tialima, te sę ebo bidi dabego te kap dabe seselama, tama tigidali bidi me we dabe augwaligo te kapde wę tualio.  
\v 4 Augwaligo te wain wę tuduladu, tama augwaligo te gol, me silva, me bras, me ain, me ni, me masigi, te nai dabego nigali god dabe augwaligo te nogi ugwaba sabo sę yali.   
\p
\v 5 Tialima, polo tama bidi me deligo nogo te be habu togwa sali pai tede pedelama, tama te nogogo nogo ge me deligo te pai ugwadu tede po asębo sę yali. Te badu te lam sole ula genuai ebadi, tama kingo te nogo gego asębo te hania mu sualio.  
\v 6 King te wi mu yali, tama aga gesabidi te hasegelama, tedela yai pedelali, tama aga bomo me silali, tama aga tigi dili dabe te mumunu eyu, didibili yalio.  
\v 7 Agai te bidi dabe augwaliba te i bomo elama weyu, augwaligo te sę ebo page konea pelama, te osabo bidi dabe, me te po page kolesaga koneai bidi dabe te sę pedalubaso, te augwali i wali, te augwali asomainu yai. Augwali asobo si da, teda kingo augwaliba te tama po wali, “Te bidi me deligo te po nedelama, tama enaba te po page pusubaso da, teda eno agaba te kingo mubo mama yai name ugwa muaibao. Tama eno te sen gol aga mageba domonama, tama aga genuai nogi elaluaibao,” wali. “Tama aga te eno gavmande te sela wali ofisa bidi pedelaibao,” wai.   
\p
\v 8 Kingo te po aga te po page koneai bidi tigidaliba wali, tiali goli niwai bidi me deligo te be paide asęani po me nedesiąwai. Tama te augwali me deligo kingba te asęani po page me wabeo.  
\v 9 Tialima, king Belsasar te wi dwai mu elama, tama aga gesabidi te tedela mu hasegeligi palio. Tama te gegunai bidi dabe te moni homu mu yai, magi baso meni, te augwaligo magi sę deli me yabo usu me isąwanio.   
\p
\v 10 Te king dali, aga genuai bidi dabe daligo posolu wali. Te kingo idago te posolu wabo odama, tama aga te nai tubo be habu tomoba pali. Tama agai te po wali, “King, nage te sesemane sogo bugagia bidagameo. Te sę ebogo te nage homu poma peyu, tama nago gesabidi tedela eyu, nago haliga te dwai me emainu iligio.  
\v 11 Odao. Te nago bulu tǫde te bidi me deli bidibao, tama te bomai god dabego agaba te wiegi yai homu kolesaga mawai. Te naga wąį king bidali sogo, agai te bidigo te wiegi yai homu kolesaga koneai elalubo suali, tama agai koneani kolesaga te genuai mu, te god dabego koneani kolesagaba usu nani. Tama nago wąį, king Nebukatnesargo, aga te bidi osabo tama aga te gasa kolesaga koneani bidi dabego tobolu bidi nigilama bidali. Te naga wąįgo te tama tiali,  
\v 12 magi baso meni, te bidigo koneani kolesaga te tedali gasagi yai mu elalu, tama agai te na ebo page dabe, me te po begelama wabo po me, tama te geme dualali po page me, pusuyu yali. Tama nago te bidi Danielba po ola tolao, king Nebukatnesargo aga nogi te Beltesasar poali, tama agaba hanalugi pelama, te aga aselama, te nageba te be habu paide elalubo asęani po page pusagasomainogo yao,” te king aga idago te po wai.   
\s1 Danielgo te be habu paide elaluali po page pusalio  
\p
\v 13 Tama tialima, augwaligo Daniel te tomoba sela aselama, tama aga te king pąba doligi pali. Tama kingo agabolo te tama po wai, “Nage Daniel, nage te Juda bidi me deli da, agawe? Nage te eno wąį king Nebukatnesargo polobadu sela asali hani bidi me deli da homu ebao.  
\v 14 Eno te tiwai odali, te god dabego nageba wiegi yai homu kolesaga menama, tama nago koneani kolesaga te genuai elalubao wali.  
\v 15 Eno te po page koneai bidi dabe i olama, te be habu paide elalubo po nedagaselama, te enabolo page pusao wali, tiali goli augwali usu me isąwai.  
\v 16 Tiali goli, eno odali, te nago da te tobage po page koneama, tama te geme dualali po tiwai me te nago konebo dao, wali. Tialima, nago te po page nedabo usu elama, tama enabolo nago te po page pusubaso da, teda eno nageba te kingo mubo mama yai ugwa name munama, tama eno nago mageba te sen gol munama, te nago nogi genuai elalueibao. Tama nage te eno gavmande te sela wabo ofisa bidi pedalumainu nigilaibao,” te po king Belsasargo wali.   
\p
\v 17 Tialima, Danielgo te tama po wei ponama, te po wali, “Tagalao, eno nagede te wiegi yai nai me deli me sogobeo. Te nago homugo wei homu ebaso da, teda nago gasa bidiba mao. Tiali goli, king, megi da, eno te po nedama, tama nagebolo te po page pusaibao.”   
\p
\v 18 “Odao. Te Ugwadu Mu Bidibo Godigo te nago wąį Nebukatnesar te bomai genuai king pedalumainu ilali. Tama agai genuai nogi elalu, te ugwanu egulama, tama ugwadu daide mu elaluai dao.  
\v 19 Agai bomo genuai mu elaluali, tama teyu te tigidali bulu tǫ kantri we bidi dabe, me te tigidali hani, me te tigidali haniani po wabo hani bidi dabe te agade wi mu elama, tama augwali didibili yai. Te agai bidi me deli ela muabo homu eyu da, agai elai dao. Tama te bidi me deli aga bidibo ula elalumainu homu eyu da, agai te bidimainu sula tagalali. Te agai bidi me deligo nogi ugwaba sabo homu ebaso da, agai te tama tiali. Te agai aiyaba elalu, te bidi me deli dolainu homu ebaso da, teda agai te tama tiai dao.  
\v 20 Tiali goli, nago wąįgo homugo te aga umabo ugwanu mu da homu elama, tama aga hagoma eyu, haniani dobo kolesaga subigila ebaso, tama Godigo aga sela sąnama, tama aga te king me bidibeo, tama aga genuai nogi elaluali te tulaluai dao.  
\v 21 Godigo agai homu kolesaga te kibu hasa dabego homu kolesaga tiwai pedalumainu ilali, tama te we bidi dabego aga sela sąwani. Tama aga te bulu uni yowi donki dabe dali bidigi pelama, tama aga te bulmakau dabego nosai tubo tiwai yaligia agai me tuali. Tama hulide tulubage segeni aga tigiba tulaluai. Tama nosali agai te tiwai koneani, te Ugwadu Mu Bidibo Godigo te tigidali we bidi tonalubo king bage tonalubo dao homu yalio. Te God agai homugo digi, agai te bidi dabe king pedalumainu ebo dao, te nago ayago aya king Nebukatnesargo te tiwai konea sai dao,” Danielgo te po wai.   
\p
\v 22 “Te Belsasar, nage te Nebukatnesargo wąį ogwa, tama nago te yali sę dabe koneai. Tiali goli, naga digi naga aiyaba elalubeo. Menio.  
\v 23 Nago naga digi naga nogi ugwaba sabo homu elama, tama dagalude Genuai Bidigo nogi aiyaba elaluabo homu yai. Nago te sę bidi dabeba olama, tama augwaligo te nago wąįgo te Godigo bede sela asali kap dabe seselama, tama nage dali, te naga genuai bidi dabe dali, me te nago we mu dabe dali, me te nago si wali hani we dabe dali, dage tigidaligo wain ąį te kapde tuali. Tama dagego te bidi dabego te gol, me silva, me bras, me ain, me ni, me masigi, te tama nai dabego nigali tibo god dabego nogi ugwaba salio. Te god dabego te tonono me bilisąyu, tama po me odisąma, tama te magi sę me konesiąwai. God deligo naga te nago bidibo ula, me nago ebo sę tigidali te tonalubao. Tiali goli, nago agai nogi ugwaba me sabeo.  
\v 24 Tama tibaso, Godigo te nogo tagala palama, te be paide po asęagasali.”   
\p
\v 25 “Te asęani po te tiwai, ‘Nedao, Nedao, Dagalao, Pepedao.’  
\v 26 Tama te ‘Nedao’ wali po page te tiwai, Godigo nage te king bidabo nisu naga sogo te nedalio. Megi nago silibo side dao.  
\v 27 Tama te ‘Dagalao’ wali po page te tiwai, Godigo nago kolesaga dagalalio, tama te ola mayu dagalali, te nago wiegi yai kolesaga me elalubeo.  
\v 28 Tama te ‘Pedao’ wali po page, te tiwai, Godigo te nago tonaluali tǫ kantri pedelama, tama me badu te Midia dabeba doba yali, te me badu Persiaba doba yalio,” Danielgo te po wali.   
\p
\v 29 King Belsasargo te po odolama, tialima agai te bidi dabeba walama, te mama yai ugwa name te Danielba munama, tama te sen gol aga mageba muao, wali. Tama kingo Daniel te gavman ofisa bidi te sela wabo bidi nigilali.   
\p
\v 30 Tialima, te sogo hulide naga tama, te Midia dabe aselama, te Belsasar ela muagasali, te Babilon king dao.  
\v 31 Tama Darius te Midia tǫ pedai bidi te king pedelama, tama te bulu tǫ kantri tonaluai. Dariusgo kibu be te bidi sese sela, te me si, 62 kibu be elalubadi, te sogo aga te Babilon king pedelama, bidai dao.   
\c 6  
\s1 Augwaligo Daniel te laion dabe bidibo dedageba tula palali  
\p
\v 1 Darius te king pedelama da, teda agai te 120 ofisa bidi nigilama, te augwaligo agai bulu tǫ pedai kantri dabe tonalumainu yalio.  
\v 2 Tama agai Daniel me, gasa bidi si dali, te sela bidigo te ofisa dabe tonalumainu yali, me te kingo sę bidi dabego sę tonalumainu yai dao, te aga gavmango mone te olodali hagaidali weyu yali.  
\v 3 Kingo suali, te Danielgo sę wiegi yai mu eyu, te ofisa dabego sę, me te aga dali deli sę ebo bidi sigo sę ebo te augwali agai aiyaba elaluali. Tama tibaso, kingo homugo agai Daniel te tigidali bulu tǫde te polalubo ofisa bidi nigilabo homu yalio.  
\v 4 Tama tibaso, te gasa ofisa dabe me, te aga dali deli sę yali bidi sigo me, te tama homu yali, te hagela homu yai. Tama te augwaligo Danielgo te dwai sę meba ebo te sunumi gegebo sę yali, te augwaligo aga po tų ilainu tialio. Tiali goli, augwaligo te dwai sę me deli ebo gegebo usu isąwani, magi baso meni, Daniel te doloba pai bidi, tama agai sę te wiegi yai naga yai. Agai te tibo po me wasiąyu, te dolo isąwai kolesaga me ebeo.  
\v 5 Tialima, augwa haside digi po miyu, te tiwai po wali, “Dago te Danielgo sę ebode te dwai sę ebo kolesaga gegebo usu egobeo, te dago aga po tų ilainu. Dago te aga Godibolo agai lotu wabo kolesagade suinao, tama te dago aga po tų ilabo sunumi gegebo homu ebo dao,” augwaligo te po wali.   
\p
\v 6 Tama augwaligo te king sugi pelama, agabolo te po wali, “King Darius, nage bugagia sesemane sogo bidagameo,” wali.  
\v 7 “Da tigidali ofisa te bulu tǫ kantride nago sę ebao, da te polalubo gavman ofisa dabe, me tigidali gasa ofisa, dago te po mia selama, te bomo yai po me deli muagameo wai. Dago homugo nago te we bidi dabeba te tiwai po omainu homu yai, te bidi sese deli olama, nogo si, te 30 dei wabo side usu nama, bidi me deligo te god me deliba, ma te bidi me deliba, gedu haluasa po me olamuo. Menio. Augwaligo te nageba naga gedu haluasa po omainao. Te mena bidi me deligo te po bolobaso da, teda nago aga te moni hasa laion dabe bidibo tǫ dedageba sąyu, tula palagameo wai dao.  
\v 8 Tialima, king, nago te bidi dabeba walama, te bomo yai po te pepaba asęao olama, tama te nago nogi me asęao, te muani po dąų waliyu tiao, tama te tigidali we bidigo wali pomainu yaibao. Te bomai po te da Midia me Persia bagego bomai po me deli pedalaibao, tama te bidi me deligo hasegelimainu ebaso, usu me egobeo,” augwaligo te po wai.  
\v 9 Te po odobaso, tama king Dariusgo te bidi dabego te po asęao wali, tama agai te aga nogi te pepade asęai dao.   
\p
\v 10 Tama Danielgo te po dąų walali po odobo sogo, aga te aga beba hogodasa palio. Tama aga te ugwa badu elaluali be habu dai badu holama, tama te windo pąde kidu sugunama, te Jerusalemba tonono yalio. Tama agai te sesemane sogo gedu haluasa po weyu, te nage usu da po te Godiba wabo tiwai yali. Agai te deli deli sogo bubugade te gedu haluasa po sela sogo weyu yai dao.  
\v 11 Tialima, nosali te Daniel po tų ilainu yali te ofisa dabe, augwa hasi po mia selama, tama augwali te Danielgo beba polo pai, tama augwaligo te aga Godiba gedu haluasa po wabo suai.  
\v 12 Tama subaso, augwali kingba pelama, te tiwai po wali, “King o, nago te tama po wali, te 30 dei, te tama side te tigidali we bidigo nageba lotu po waiyąo po wai. Tama te augwaligo god me deliba, ma gasa bidiba, te lotu po obaso da, teda nago augwali te laion bidibo tǫ dedageba tula palaibao wai,” augwaligo kingbolo te po wai.  
\p Tama kingo te po wai, “Te dolo po dao. Te muani po te boma pai mu elama, te hasegelabo usu isąwai, magi baso meni, te da Midia me Persia dabego dąų walali po dao,” te po wai.   
\p
\v 13 Tialima, augwaligo kingba te tiwai po wai, “Daniel, te Juda hani bidi me deli, agai te nago po sela sąnama, tama nago te muani po wali me pabeo. Sesemane sogo agai te aga Godiba gedu haluasa po te sela sogo te deli bubugade weyu ebo dao,” te po wai.  
\v 14 Kingo te po odama, tama aga haliga sęgę mu ebaso, tama te Daniel tau sabo sunumi gegebo sę yalio. Aga homude te Daniel tau sabo sunumi gegebo sę bomo mu idubadi, te giliga dega sigulali, tiali goli aga te sunumi me deli gegebeo.   
\p
\v 15 Te be pio igi pabode, te ofisa dabe te kingba ma begasa aselama, tama agabolo te tiwai po wagasali, “King, nago te da Midia me Persia dago ebo kolesaga koneani. Te kingo te po me deli dąų walai ebaso da, te dąų wali po me hasegeligobeo,” wali.  
\v 16 Tialima, kingo te gasa bidi dabebolo te Daniel sao po olama, tama aga te laion dabe bidibo tǫ dedageba tula palali. Tama agai Danielba te tiwai po wai, “Eno homugo te nago konealubo homu dąų mu olama, agaba sesemane sogo te lotu po udubo Godigo, agai nage tau somainao,” te po wai dao.   
\p
\v 17 Augwaligo Daniel te tǫ dedageba tula palama, tama augwaligo te genuai sawali masigi me deli selama, tama te dedage pania palali. Tama king dali, te ofisa dabego dali, te augwa nogode elaluali ringo dąį te masigide ilama muani, te bidi dabego te Daniel tau siyu, te magi sę me idali weyu, te habu selali.  
\v 18 Nosali king te aga beba ma pali. Tama te sogo hulide aga te nai me tusiąma tama agai te we bidi dabe i olama, aga wiegi yai homu pemene ilagasomainu me ebeo. Tama me, te aga godege piabo ąǫ me ebeo. Mu menio.   
\p
\v 19 Te kigamu digi mu king te hodaluama, te tǫ dedageba polo palio.  
\v 20 Te siligi pelama da, teda aga haliga sęgę mu elama, tama te tiwai i wali, “Daniel, nage te sesemane sogo bidibo Godigo sę bidi, odao. Nago te wali pelama, te agaba sesemane sogo lotu udubo God, agai te laion dabego pedauwali paniama, te nage gąų kelama tubewe, ma meniwe?” te po wai.   
\p
\v 21 Tama Daniel te tǫ dedage tomode bidiyu, tama te tiwai po wei ponani, “King, eno homugo nage sesemane sogo sesabi elama bidao.  
\v 22 Godigo te aga mobo bidi ensel tagala palama, tama te laion dabe pedauwali paniama, tama augwaligo ena me dolobeo. Agai koneani, eno magi dwai sę me isiąwai, tama eno dwai kolesaga nageba me ebeo. Tama tibaso, agai ena tonalubo dao,” Danielgo te po wali.   
\p
\v 23 King te wiegi yai homu pemene umabo mu eyu, tama te bidi dabeba weyu, te Daniel te tǫ dedagedu ugwaba kegao po wali. Augwaligo aga kegelama da, tama augwaligo te tiwai suali, te aga tigi me dolisiąwai elaluali, magi baso meni, agai konealubo po te Godiba dąų mu wai dao.   
\p
\v 24 Tialima, kingo te Daniel po tų ilali bidi dabe augwali sao po olama, tama te augwali dali, te augwa we wai dabe dali, augwali te laion bidibo tǫ dedageba tula palalio. Augwali te tǫba tulalusiąbadi, te laion dabe posoga palama, tama augwali daboa sigulama, tama augwali tigi pepeda tulama, te mu dolai dao.   
\p
\v 25 Tama nosali king Dariusgo te tigidali bulu tǫ pedai we bidi dabe, me te tigidali haniba, me tigidali haniani po wabo hani we bidi te pas asęna tolalio. Agai te tama po wai, “Dage tigidali te bugagia bidiąo,” wali.  
\v 26 “Dage eno bulu tǫ pedai kantri dabe we bidi dabeo, eno te po odiąo. Dage tigidaligo genuai nogi te Danielgo Godiba menama, tama te God dologoba pelama bidao. Te God te sesemane sogo bidada pobao. Aga te king sesemane sogo bidada pidu, bidada paibao, tama aga te we bidi tonalubo bomo te me siligobeo.  
\v 27 Agai te we bidi dabe dolainu ebo sogo te augwali ma sabo dao. Tama agai te tobage te genuai bomai sę te dagalude me tǫde ebao. Te Godigo te Daniel tonalu, tama te laion dabego aga me dolobeo,” te po wai dao.   
\p
\v 28 Tama te Darius king bidali sogo, me te Sairus te Persia king bidali sogo me, Daniel te moni nogi yai genuai bidi mu pedelama, bidai dao.   
\c 7  
\ms1 Danielgo te aga na dabe yali po pusali  
\mr (Dąį 7–12)  
\s1 Danielgo nade te hasa me si me si sualio  
\p
\v 1 Te hasia mu wabo kibu bede te Belsasar te king Babilonde bidali, ena Daniel eno te na ebo tiwai nai te hulide suali. Tama eno te na yali po te buku me delide asęani. Na te tiwai dao.  
\v 2 Wali te tigidali badu asiyu, tama te genuai tamu ąį dini hodolali.  
\v 3 Tama gasagi gasagi yai moni hasa te kibu tiwai dabe me si me si te tamu ąį bikside pedelai. \x * \xo 7:3 \xt Ped 13:1; 17:8\x*  
\v 4 Hasia pedelali te laion yowi tiwai, tama te genuai ba kemodagego bogo tiwai elaluali. Eno tonono ebadi, tama eno suali, augwaligo aga bogo sela sąnama, tama augwaligo aga te bidi yaligia sągą sigo dodolobo suali. Tama augwa te bidigo homu kolesaga tiwai agaba mawai.   
\p
\v 5 Tialima, eno suali, te si wali te kibu tiwai hasa te aga pilamubo suali, tama te genuai hasa me deli te nogi augwa te bea wali. Agai te gasa hasa me deligo punali dili sela te aga pedauwalide habilaluali. Tama te po me deli agade pedalu, te tiwai po wali, “Iya, tegoba, holaluao, te mi hauwa tulama, nago tabi pągąyao,” wai.   
\p
\v 6 Eno me tonono ebadi, tama eno gasa genuai hasa te uni pusi te nogi lepat tiwai suali. Te naigo bogo te me si me si aga tudide elaluali, tama aga tobolu te me si me si elaluali. Tama augwaligo agabolo te tigidali nai tonaluabo bomo mawai, te eno suali. \x * \xo 7:6 \xt Ped 13:2\x*   
\p
\v 7 Eno te sogo hulide ma tonono ela bilibadi, tama eno te me si me si wali te hasa suali. Iya, aga gesabidi te mu dwai elama, tama aga bomo genuai mu elaluai, tama ena agade wi dwai mu yalio. Agai genuai ain kele elalu, tama agai te tigidali bage tulama, dolobo sę mu yai. Tama nosali aga agalama, tama mimia sabo kakali tulaluali. Te kibu tiwai moni hasa te gasa eno suali hasa dabe tobage tiwai meni, magi baso meni, aga tobolude te nogo si gąų elaluali. \x * \xo 7:7 \xt Ped 12:3; 13:1\x*  
\v 8 Eno te gąų dabede homu kone paluyu ebadi, gedu dolo mu ponama, te nogo si gąųba tonalubadi, tama eno te dwasianu gąų me deli te augwali tomode pedalubo suali. Te gesi pedelali gąųgo te polasa elaluali gąų sela guda sąwai. Tama te gesi gąų te komgo te bidi gedu ge dali, pedauwali dali, si elaluai. Tama aga hagoma eyu, te aga digi aga nogi ugwaba sabo po wabo eno odalio. \x * \xo 7:8 \xt Ped 13:5-6\x*   
\s1 Danielgo te sesemane sogo bidada peyu, bidada pabo bidide na yali  
\p
\v 9 Tama nade eno suali, augwaligo te king duayabo sia sai meba sela aselama, muagasai. Tama te Polobadu Polobadu Bidada Aselama, te Megi Me Bidada Peyu, Bidada Pabo Bidi aselama, te duabo sia kingde dugayagasobo suali. Agai gudali ugwa dabe te nala nisi poai mu yai, tama agai tobolu nisi te tedela mu, te meda meni yai kibu sipsip nisi tiwai yai. Tama te dugabo sia king te wil dabe elaluali, tama te dugabo sia sai tigidali badu te isi bogoli genuai elama, \x * \xo 7:9 \xt Ped 1:14; 20:4\x*  
\v 10 tama besela palalio. Te bidi sese umabo mu, te hauwa tausen we bidigo te Bidigo sę yali, tama te umabo hauwa milion we bidi aga pąde dolaluali. Tama mebago te buku dabe dagalama, te po tų kot hodolainu yai. \x * \xo 7:10 \xt Ped 5:11; 20:12\x*   
\p
\v 11 Eno tonono ebadi, tama eno odali, te me si me si wali te dwasianu kom gąų hasago te aga digi aga nogi ugwaba sabo sę yali. Tama eno suali, augwaligo te me si me si wali hasa elama, tama aga tigi te siaba sąwani, tama siago te aga gąų kom dali tigidali dela silalio.  
\v 12 Tama te bidali hasa sela, augwa bomo te augwaligo silama, tama te nai dabe te augwaligo tonalumainu ma sula tagalobeo. Tiali goli, te augwaligo te augwali polo me elisąwai. Augwaligo te augwali dwasianu sogo gogolama, bidimainu sula tagalalio.   
\p
\v 13 Eno te hulide yali nade, eno te bidi me deli te da tǫde bidi tiwai tobage suali. Aga te dagalu pǫ dabe tomode bidiyu, tama ena pąba asali. Tama augwaligo aga te Polobadu Polobadu Bidada Aselama, te Megi Me Bidada Peyu, Bidada Pabo Bidiba sela palio. \f + \fr 7:13 \ft Te Aram pogo te po “te bidi me deli te da tǫde bidi tiwai tobage,” te po begelama, tama “Godigo Bidi Mu” wabo. Te nosali Jisas aga te tǫde bidali sogo, aga te tama po agade digi wai dao.\f* \x * \xo 7:13 \xt Mat 24:30; 26:64; Mak 13:26; 14:62; Luk 21:27; Ped 1:7, 13; 14:14\x*  
\v 14 Te Polobadu Polobadu Mu Bidali Bidigo digi aga te king pedalumainu elama, tama agaba te bomo me genuai nogi mawai. Tama aga te sesemane sogo bidada pabo te bomo elalua pabo king bidiyu, tama aga king sę ebo te munu me sia sogobeo. Tama te tigidali bulu tǫ kantri we bidi me, tigidali hani bidi me, tigidali haniani po wabo hani bulu bidi, te aga dologode naga bidaibao. \x * \xo 7:14 \xt Ped 11:15\x*   
\s1 Te Danielgo suali naide po page pusali  
\p
\v 15 Eno te nai dabe te nade sulama, tama ena midigi mu selama, tama homu hauwa dogia palio.  
\v 16 Tialima, ena te sia king pąde dolalubo bidi dabe me deliba pelama, tama eno agaba hanalu, te na yali po page pusao wali. Tama agai enabolo te tama po wai,  
\v 17 “Te genuai hasa me si me si tego dąį ilali, te bomai bulu tǫ kantri pedai me si me si pedelaibao,” po wali.  
\v 18 “Tiali goli, nosali te Ugwadu Mu Bidibo Godigo we bidi augwali te king dabe tiwai pedelama, tama augwali te sesemane sogo bidada peyu, bidibo tiwai gilama yaibao,” te sia king pąde dolalubo bidigo enabolo te po wai. \x * \xo 7:18 \xt Ped 22:5\x*   
\p
\v 19 Eno te po odobo si da, tama eno te me si me si wali hasa te kuna mu ma koneabo homu yali. Aga te gasa hasa dabede te tedali gasagi yai ebaso, tama ena agade wi dwai mu yali. Agai ain kele genuai elalu, tama te aga sągąde dani dabe te bras tiwai elaluai. Tama agai te nai hauwa aluama, tama tuyu, tama te tigidali kakali agalama, te tudulaluali.  
\v 20 Tama me eno te nogo si kom gąų te tobolude elaluali, te kuna mu ma koneabo homu yai, tama te dwasianu nosali pedelali kom te gąųgo te polasa elaluali gąų sela guda sąwani. Te kom gąųgo te gedu me pedauwali elalu, tama genuai po dagą mu weyu, tama aga digi aga nogi ugwaba sali. Eno te dwasianu kom gąų suali sogo, tama ena wi dwai mu yai. Eno te kom gąųde wi ebo tiwai yaligia te gasa kom gąų dabede me tebeo.  
\v 21 Tama te na yalide, eno suali, te kom gąųgo te Godigo we bidi dabe dali hwįnama, tama augwali dolobo sę ebo sualio. \x * \xo 7:21 \xt Ped 13:7\x*  
\v 22 Tama te Polobadu Polobadu Digi Bidali Bidi pedelama, tama te kom gąų dali kot po tų elama, te tama po wali, komgo te dwai sę genuai te Ugwadu Mu Bidibo Godigo we bidide yali dao. \f + \fr 7:22 \ft Te po page te Hibru pode kuna konesiąwai. Bidi mebago homude te po tama tiwai da homu yali, “Te Ugwade Bidibo Godigo ugwaba ela holali,” homu yai. Tama bidi mebago homude te po te tiwai da homu yai, “Bidigo te Ugwade Mu Bidibo Godigo we bidiba te bomo menama, augwaligo te po tų kot ebo sę tonalumainu yali,” te homu yai.\f* Tama te Godigo we bidi te king tiwai pedalabo sogo te usu niyu te pedalubao wali. \x * \xo 7:22 \xt Ped 20:4\x*   
\p
\v 23 Eno te bidiba eno te koneainu yali nai dabede po hanaluama, tama agai enabolo te tama tiwai po wali, “Te na yali po page te e tiwai dao. Te me si me si wali hasa, te e tiwai, te me si me si wali tǫ kantri pedai tama elalueibao, tama aga te gasa tigidali bulu tǫ kantride te gasagi yai tedali me elalueibao. Agai te tigidali gasa bulu tǫ kantri aiyaba elaluama, tama augwali agalama, tama augwali silimainu yaibao.  
\v 24 Te kom nogo si te nogo si king augwali te bulu tǫ kantride digi pedelaibao. Nosali te gasa king pedaliyu, tama aga te polasa pedelali king dabego kolesaga tiwai egobeo, te tedali gasagi yai yaibao. Agai te king sela sela sąwaibao. \x * \xo 7:24 \xt Ped 17:12\x*  
\v 25 Tama agai te Ugwadu Mu Bidibo Godiba po dwai mu olama, tama aga we bidi dabe aiyaba elalueibao. Tama agai te lotu pode bomai po hasegeliyu, te genuai side wabo te hasegelaibao. Tama agai te Godigo we bidi tonaludubadi, te kibu be sela olama, te kibu be me badu pedaiba usu nigi paibao,” wai. \f + \fr 7:25 \ft Te Hibru pogo te vesgo po page kuna konesiąwai. Bidi mebago homugo te kibu be sela me hap tede po wali homu yai. Tama meba bidigo homugo te geme dualali po da homu eyu, tama nisu sogo te sęgę silabo te kuna mu konebeo, wai.\f* \x * \xo 7:25 \xt Ped 12:14; 13:5-6\x*  
\v 26 “Aga te sogo bodolu silibaso, tama Godigo te po tų kot hodolama, tama agai te kingo bomo silama, tama aga mu dolaibao,” wali.  
\v 27 “Tama te Ugwade Mu Bidibo Godigo te tigidali tǫde kingo genuai nogi me bomo te aga we bidi dabeba mawaibao. Tama augwali te sesemane sogo king bidada peyu, bidada paibao. Tama tigidali bulu tǫ kantri we bidi dabe te Godigo we bidi dologode bidiyu, tama augwaligo po wali paibao,” walio. \x * \xo 7:27 \xt Ped 20:4; 22:5\x*   
\p
\v 28 Te eno nade suali po tigidali te tama dao. Ena Daniel, ena wi dwai mu elama, tama eno gesabidi te hasegelama, tedela yali. Tama eno te nai dabede homu kone palobo homu mu yalio. \f + \fr 7:28 \ft Te augwaligo Aram pogo asęani po ede silalio. Tama augwaligo te Dąį 8de gagalama, te Dąį 12 teba usu nama, augwaligo te Hibru pogo asęani.\f*   
\c 8  
\s1 Te Danielgo nade te sipsip me meme suali  
\p
\v 1 Te sela kibu be wabode te Belsasar king bidali side, eno te gasa nai te nade subo ąǫ yalio.  
\v 2 Te nade polo tama ena pelama, te bulu tǫ pedai provins Elamba sabolama, tama ena te genuai taun Susa tomode dolaluali. Te taun te masigigo nigai genuai boma pai obo elaluali. Ena te moni ąį gamia nogi Ulai pąde dolaluai.  
\v 3 Ena tonalubadi, te omai sipsip me deli te wę pąde dolalubo suali. Agai te gąų si elaluali. Te podolali kom gąų te bobobage yai elaluali, tiali goli te si wali kom gąų te polasa pedelali kom gąų nosali badu pedelai, tama te bobobage mu dao.  
\v 4 Eno suali, te omai sipsipgo tobolu gąų aiyaba basi gulama, tama udulama peyu, te agai gąų komgo hudula palu ela palio. Aga te giliga degasa dulubo badu pali, tama te not badu me, saut badu me palio. Te niwai hasa me deligo aga paliabo usu me isąwai, tama te me deli agade wi painu ebo usu meni yai. Aga te sę dabe te aga homugo digi eyu, tama te boma pai mu pedelali.   
\p
\v 5 Eno te yali sę pagede homu kone pidubadi, tama eno suali, te omai meme me deli te giliga dega sabo badu bidali tagalama, polo asobo suai. Aga udabo te umaboba pai mu asiyu, tama agai nogo sągągo te tǫ me dįąbe. Agai kom gąų te moni dobo dwai me deli naga te aga gedu page si badu tomode elaluai.  
\v 6 Eno te wę pąde dolalubo suali sipsip te memego subo si da, teda te meme sębę eyu, te bomonama udabo bomo mu elama, te sipsip bidibo madi palio.  
\v 7 Tama agai te sipsip dali hwįbo eno suali. Te memego wado mu dwai eyu, tama nogo sągą dili bomo dede pelama, tama dolo udayu, tama te omai sipsipba hudula paligi pali, tama agai gąų kom si togwa sąwani. Te omai sipsipgo aga degelabo bomo meni yani, tama te memego aga te tǫba aiya daboasa sąnama, tama aga dolagila mu agaga pali. Tama te magi nai me deligo te sipsip tau sabo usu me ebeo.   
\p
\v 8 Tialima, nosali te memego hagoma umabo mu eyu, tama aga bomo ola mawai. Tiali goli, te aga bomo genuai mu pedalubo sogo, agai gąų kom te togwa palio. Tama te togwa pali kom elaluali pesagede te gasa kom me si me si pedelali. Te me si me si kom te moni dobo dwai mu yali. Te kom me deligo te not badu tonalubo tiwai yali, tama gasa mego te saut badu tonalubo tiwai yali, tama gasa mego te giliga pedalubo madiba tonalu, tama gasa mego te giliga dega sabo badu tonalu yalio.  
\v 9 Tama gesi kom dwasianu te ni honu pedalubo tiwai eyu, te me si me si elaluali kom tomodu pedelali. Te gesi komgo bomo te genuai pedelai. Tama agai te saut badu, me giliga pedalubo badu, me te Godigo aga we bidiba te wiegi yai mani tǫde bidali we bidi dabe augwali aiyaba elalualio.  
\v 10 Te kom te boma pai mu pedelama, tama te hǫ dabe dali hwįani. Te hǫ dabego hwįani te dagalude ami bidi dabego hwįbo tiwai yali. Tama komgo te hǫ dabe meba te tǫba aiya tula palama, tama augwali agayalio. \x * \xo 8:10 \xt Ped 12:4\x*  
\v 11 Tama te komgo te dagalu ami king me aiyaba elalueinu usu sali. Agai te kingba ofa ebo kolesaga te silimainu elama, tama agai te we bidigo te kingba lotu wabo be dolalio.  
\v 12 Te we bidi dabego dwai kolesaga ebaso, tama te komgo te dagalude ami bidi dabe aiyaba elaluabo bomo selama, tama te tigidali side ofa ebo kolesaga silainogo yali. Te Godigo po da, te mu po naga wali, tiali goli, te komgo te po begela dolali, te we bidi dabego wali pomainu me idali weyu tama tialio. Tama me, tigidali sę te komgo yainu homu yali, te agai eyu naga yali.   
\p
\v 13 Tama eno odali, te ensel mobo bidi me deligo po wabo odali, tama gasa ensel bidigo te tiwai po agaba hanalu wali, “Megi dago te subo dwai nai dabe, nisu sogo augwali siligowe? Nisu sogo mu te we bidi dabego te Godiba ofa ebo ma gagalama eyu, tama nisu sogo te tigidali nai mu dolobo dwai kolesaga silaibawe? Nisu sogo te komgo bomo silama, tama agai munu ma te lotu wabo be me, te dagalude ami bidi dabe te agai sągągo agalu, te ma dologobewe?”  
\v 14 Tama te po miani enselgo, agai te tama po ena dali wali, “Te dwai sę ebo nai te elaludubadi, te umabo sogo, te 2,300, te sogoba usu naibao,” wali. \f + \fr 8:14 \ft Te Hibru pogo namba 2,300 elalubao wali. Te deli deli sogo bubugade usu nama, te dąį ilai baso da, teda agai te 2,300 side po olama dolo wali. Tiali goli, agai te tigidali side te kigamude me piode te ofa yabo bodolu mubaso da, teda agai te 1,150 po olama naga te po wali dao.\f* “Te tama bidibo side dabe te augwaligo ofa dabe te augwa polobadu yali tiwai te kigamu me pio me egobeo. Te side tama silama da, teda augwaligo te Godigo be ma dodolama, tama te ofa dabe ma yaibao,” po wali.   
\p
\v 15 Ena te Daniel, eno te yali naba tonaluabo homu idubadi, tama eno te na page gegabo homu bomo yali. Tama polo tama te eno bidi me deli te ena pąde dolalubo suali. \f + \fr 8:15 \ft Te bidi aga te ensel Gebriel naga da, te ves 16 me 17 tede suao. Tiali goli, Danielgo homugo aga te gasa bidi deli tonobo tiwai yalio.\f*   
\s1 Ensel Gebrielgo te na page po pusali  
\p
\v 16 Tama eno te bidi me deligo i wabo te ąį gamia Ulai tomode i weyu, te tama po wabo eno odali, “Ensel Gebriel, nago te Danielgo suali sę po page pusao,” wali. \x * \xo 8:16 \xt Luk 1:19, 26\x*  
\v 17 Tialima, Gebriel te ena pąba dolagasali, tama ena agade wi dwai mu elama, tama ena degasa dulama, tama eno gesabidi te tǫba aiya pogulai. Tama Gebrielgo enabolo te tama tiwai po wali, “Nage olo bidi tama da,” wali, “tiali goli, eno homugo nago te na page konemainu ebao. Te nade yali sę te tigidali dagalu dali, tǫ dali si silabo sogo pąde te pedalubo sę po te elaluali dao,” po wai.  
\v 18 Agai po odubadi yaide, ena gedu gęǫ page elama, tama ena tǫba mu degasa dulali. Tiali goli, agai ena nogo tola selama, te ena ugwaba sagolama, tama ena dolugulai.  
\v 19 Tama agai te po wai, “Eno nagebolo te Godigo haliga sębę yali silainu ebo sogo te pedelabo sę dabede po wainu ebao,” wali, “te Godigo dagalu de tǫde muani nai dabe silainu ebo bodolu muani sogo pąde te tama tiaibao. Te tiali sę dabe nago te nade suali sę tiwai mu pedelaibao,” wali.   
\p
\v 20 “Nago te omai sipsip me deligo te gąų kom si elalubo suali. Te bulu tǫ kantri si, Midia me Persia sigo king bidi side po wai dao.  
\v 21 Tama nago te meme suali, te bulu tǫ kantri Grikde dąį iliyu wali, tama te aga gedu page si badu tomode elaluali te moni bage kom dolaluali, te Grik dabego hasia polalubo king bidi te da, wali.  
\v 22 Nago te moni bage kom togwa pabo suali, tama aga te pesagede gasa gesi kom me si me si pedelali. Te page e tiwai dao. Te kantri Grik te peda pelama, te gesi kantri me si me si pedelaibao. Tiali goli, te kantri bulu peda pisąbadi, te bomo elaluali, te tiwai gilama nosali me elalugobeo,” wali.   
\p
\v 23 “Te bulu tǫ kantri dabe te tulaluainu ebo sogo, te augwali we bidigo dwai sęgę sabo sę mu pedalubaso, teda te sogo naga, te king me deli pedelaibao. Aga te bidi dwai mu dao. Aga te hagoma ebo bidi, tama tibo po wabo bidi dao.  
\v 24 Aga te bomai pedaliyu, tama te nai hauwa dolaibao wali, tiali goli te aga bomo digi egobeo. Tama agai homugo yainu ebo sę, te mu eyu naga yaibao. Agai te bomai bidi dabe doliyu, tama te Godigo we bidi dabe dolaibao.  
\v 25 Agai te we bidi dabe tibo po ola mabo sę ebo tomoba mu pabo bidi pedelama, tama aga te tibo po homu hauwa dogia pabo kolesaga tigidali te ugwanu mu igulaibao. Tama aga haligade digi, aga te polalubo bidi mu da homu yaibao. Te we bidi dabego homude augwali te bugagia bidiba homu yaibao, tiali goli te polo tama mu te aga homu hogodalu, te augwali hauwa dolaibao. Aga te hagoma eyu, te tigidali king aiyaba elaluali, te genuai King God dali hwįabo homu yaibao. Tama te sogo te mena bidi mego te aga me dologobeo, tiali goli te aga dolaibao.  
\v 26 Eno te pio ma kigamu ebo sę elalubo te na yali po page pusali. Te suali nai dabe te pedelaibao. Tiali goli, nago te na yali po gasa we bidi dabeba me pusugio, magi baso meni, te sę dabe te polo tama me pedalugobeo,” te genuai ensel bidi Gebrielgo enabolo te po wai.   
\p
\v 27 Eno te po oda selama, tama ena haliga sęgę mu yali, tama meba sogode ena gasi tiwai yali. Gasi silama da, te ena hogodama, tama ena te king Belsasargo mani sęba ma palio. Tama te nade eno homu hauwa ebo sę yali, tiali goli eno te na page kuna koneabo usu meni yanio.   
\c 9  
\s1 Danielgo gedu haluasa po weyu, Godigo te Israel dabe tau somainu yai  
\p
\v 1 Darius, te Serksisgo ogwa, aga te bulu tǫ kantri Midia bidi dao, tama aga te kantri Babilonde king pedelali.  
\v 2 Te hasia kibu bede aga te king bidali, ena Daniel, eno te Godigo buku dabe nededuali. Tama eno te Genuai Bidigo te profet Jeremaiaba mani pode homu kone palali. Agai te po weyu, te Jerusalem dolama elalubadi, te kibu be bidi sese sela olama, te nogo si, te 70 yiaba usu naibao walio. \x * \xo 9:2 \xt Jer 25:11; 29:10\x*  
\v 3 Tialima, eno gedu haluasa po te God Genuai Bidiba wabo gagalali. Eno haliga hobede mu yali, tama eno nai munu me tusiąma, tama eno te homu dene ebo ugwa bea selama, tama sia keli eno tigide muani. Ena te tiwai bidiyu, tama eno gedu haluasa po bomonama te Genuai Bidiba wali.  
\v 4 Tama eno te Israel we bidi dabego sęgę te Godiba pusali, eno Genuai Bidi da. Eno te tama po wali, “God, Genuai Bidi, nage polalubao, tama dago nago nogi ugwaba sobao. Sesemane sogo nago te naga da dali dąų walali po wali pai. Tama eyu, sesemane sogo te nage godolo elama, tama nago po wali pabo we bidi dabe te nago augwali godolo mu ebo dao,” wali.   
\p
\v 5 “Da te dwai we bidi mu dao. Dago te sęgę sabo sę eyu, dwai sę nageba yai. Dago nago po sela sąyu, tama dago te nago dabolo yao wali te wiegi yai doloba pai kolesaga me isiąwai.  
\v 6 Dago te nago sę bidi dabego po odisąwai, te augwali profet dabe. Augwaligo te nago po te king dabeba me, tobolu bidi dabeba me, te bulali wąį dabe me, te da tigidali we bidi dabeba te po pusali.  
\v 7 Genuai Bidi, naga duba deligo naga te doloba pai kolesaga ebo God da, tiali goli te dena dwai kolesagago te hale genuai da tigidali Israelba sela asali. Tagala, da Judia tǫde bidibadi, ma Jerusalemde bidibadio, ma tigidali buluba te nago da tagala paliyu ela bilibo da, te dago nago po me sela sąbaso, nago da tagala palai dao. Tama megi te dwai halego da mesegelai dao.”   
\p
\v 8 “Genuai Bidi, te dago king dabego me, tobolu bidi dabe me, dago wąį nǫų dabego dwai kolesaga elama, tama nageba dwai sęgę yai sę dabe nagebolo yai dao.  
\v 9 Dago nago po sela sąwani, tiali goli nage te olo mu tau mabo wiegi yai kolesaga elalubo God, tama nago dago dwai sę yali sęgę sela sąbo dao.  
\v 10 God, Genuai Bidi, dago nago po odisąma, tama dago te nago homugo dago wali pomainu homu yali kolesaga te wali pisąwai, te nago dabolo te profet dabego pedauwalide wali po tiwai gilama, te nago sę bidi dabe dao.  
\v 11 Te bomai po dabe te Moses te nago sę bidigo dabolo mayu, nago bomai po te tiwai wali, dago te bomai po bugagia wali pisąbaso da, te nago dwai sę daba yaibao po wali. Tiali goli, da tigidali Israelgo nago te bomai po togoyu bolama, tama dago nago po odisąbo homu yalio. Dago dwai sę nageba ebaso, tama nago te wali po gilama te dabolo dwai dene mabo sę yai dao.  
\v 12 Nago te sę yaibao wali gilama tama te sę nago te dabolo me, dago tobolu bidi dabeba me yali. Nago te Jerusalemba te dwai sę mu elama, tama mu dolali. Te gasa taun me deli te Jerusalem taun dolali tiwai munu me ebeo.  
\v 13 Nago te Mosesgo bomai po tomode wali po gilama dago te sęgę tigidali sali. Tiali goli, megi me dago te sęgę sabo kolesaga me tagalisiąma, tama dago nageba hanalu, te dabolo bugai haliga yabo po me hanalusiąwai, tama dago nago mu po wali me pisąwai.  
\v 14 God, dago Genuai Bidi, nago te dago yali dwai sę wei ponainu sisi elama tonaluali. Tama megi da, te sę nago yalio, magi baso meni, nage te doloba pai kolesaga naga ebo God dao. Tiali goli, dago te nago po me odobeo.”   
\p
\v 15 “God, te dago Genuai Bidi, te nago bomo te dabolo ola mayu, te da te bulu Isip kantride kalabus sę yali sogo, te nago da sela asali. Tama megi me, te gasa bulu tǫ kantri we bidi dabego nago te yali bomai sęde homu kone palama, tama augwaligo nageba genuai nogi mawai. Mu tama, dago dwai sę elama, tama dago dwai kolesaga hauwa yai dao.  
\v 16 Tama nago dago dwai sę, me dwai kolesaga dabe te dago wąį nǫų dabego me ebo sulama, tama nago dabolo dwai dene sabo menama, tama te taun Jerusalem dolali. Tama te Jerusalem pąde elaluali bulu tǫ kantri we bidi tigidali, augwaligo te Jerusalemba me, te nago we bidi dabolo me, posobo po weyu, gisugu mabo po wali. Tiali goli, megi te dago homugo te nago wado po te Jerusalemba munu ma wagi homu yali, magi baso meni, te nago taun da, tama te naga bulu dude digi ugwadu elalubao. Te polobadu nago da tau sabo wiegi yai sę hauwa yali, tama dago homugo nago te tiwai ma emainu homu ebo dao.  
\v 17 God, te eno gedu haluasa po me hanalubo po odao. Eno homugo te naga genuai nogide homu kone palama, tama te augwaligo dolali be te nago ma dodolabo homu yao.  
\v 18 God, te dago gela wabo odama, tama da suao. Te dade elalubo sęgę, me te naga taunde elalubo sęgę, suao. Da te doloba pai we bidigo tama dago nageba hanalubeo. Menio. Dago koneani, nage te homu dene eyu, olo tau sabo wiegi yai kolesaga elalubo God, tama tiyu dago nageba hanalu obao.  
\v 19 Genuai Bidi, dago gedu haluasa po wabo odama, tama dago sęgę sela sąyao. Genuai Bidi, dago wabo po polo odama, te da tau sao. Te taun Jerusalem dali, te we bidi dabe dali, te naga dao. Tama tiyu, te nago me tonalugio. Te naga genuai nogide homu kone palama, te da polo tau sao,” eno te tama gedu haluasa po wai.   
\s1 Ensel Gebrielgo te profet Jeremaiago wali po page pusalio  
\p
\v 20 Ena Daniel, eno gedu haluasa po odubadi, tama ena sęgę, me eno we bidi dabego sęgę, te hania pusubo sę yali, te Israel dabe dao. Tama eno Godiba hanalu wali, ena Genuai Bidi, te aga be te bulu dude ma sę emainu yali.  
\v 21 Eno gedu haluasa po odubadi, tama te ensel Gebriel, eno te hasia yali nade suali, te aga bola dulu, te ena bidibo pesageba asali. Tama te sogo, te dago polobadu iduali te pio ofa ebo sogo dao. \x * \xo 9:21 \xt Luk 1:19, 26\x*  
\v 22 Agai eno homu ula tega sawainu, tama agai te tama po wali, “Daniel, ena te nage homu ula tegelainu asalio, te nago wiegi yai homu kolesaga hauwa elalueibao.  
\v 23 Daniel, Godigo nage godolo mu ebao. Tama nago gedu haluasa po wabo gagalubo sogo, agai te po me deli pusali, te eno nageba magasu asali. Megi te nago olo bugagia munaluao, tama eno nago te nedali po page pusaibao,” ensel bidi Gebrielgo te po wai.   
\p
\v 24 “Godigo dąį ilali te 70 taims 7 kibu be dabe silibo si, te agai nago we bidi dabe dali, me Jerusalem te wiegi yai ma ilabo po wali, tama aga taun dao. \f + \fr 9:24 \ft Profet Jeremaiago te tama po wai, te Israel bulu kantri tǫ dwai elaludubadi, te kibu be bidi sese sela olama, nogo si, te 70 yia bidaibao wali. Tiali goli, te vesde wali po te ensel mobo bidi Gebrielgo e tama po wai, te bidi sese sela olama, nogo si wabo te “70 kibu be,” te 70 kibu be po olama, te po dolo wabeo wali, te “Sarere 70” po da olama walio. Bidi hauwago te tama homu yali, “te Sarere” po wali te Hibru pode te kibu be a naga olama, me si, te tama olama dąį ilali. Tama tiyu, te 70 Sarere tede te 70 taims eyu da, te kibu be a naga me si teba ma te kibu be 490 dao. Tiali goli, bidi mebago te homu yali, te Hibru pogo te Sarere dabede te po dolo wali da, te homu yai. Tama te gasa bidi dabego homugo te nosali badu pedelabo nai dabede te olo po begelibo po naga wali homu yai, tama te dolo sogo mu me dąį ilibe homu yai dao.\f* Agai te tigidali we bidigo sęgę sela sąnama, tama augwa yali dwai kolesaga tigidali siminaibao. Tama agai te sesemane bidada pabo sogo pedalumainu ilaibao. Tama aga te Gasagi Yai Tedali Mu pesage me deli nigilaibao. \f + \fr 9:24 \ft Bidi mebago homugo dago te po begelina homu yali, “Te agaduba tedali habu selai bulu mu elalueibao,” te kolesagade, te “God aga digi te bidi me deli dąį ilaibao, te bidigo te wiegi yai doloba pai kolesaga yabo bidi dao.”\f* Godigo te sę dabe te nade wali sę me, te profet dabego wali po me, te usu nagasu, te tama yai dao.  
\v 25 Nago odama, te tiwai koneao, te Jerusalem taun ma gagalama nigaibao wabo po pedalubo sogo, te 7 taims 7-pela yia, te tama kibu be siliyu bolo yaibao, tialima te Godigo Sa Muani Genuai Bidi, aga te sabolaibao. Te augwaligo te Jerusalem dali, te taun tomode sunumi dabe, me te taun bagulali genuai masigi obo dabe, te ma nigaibao. \f + \fr 9:25 \ft Bidi mebago homugo dago te vesde wali po te e tiwai begelinao homu yalio, “Nago odama, te tama koneao, te Jerusalem ma nigaibao weyu, te po ma pedalubo sogo da, te 7 taims 7 kibu be olama, te 62 taims te 7 kibu be te silibo si da, teda te Genuai Bidi Godigo Dąį Ilali Bidi pedelaibao. Te sogo tomode augwaligo te Jerusalem taun ma nigiyu, te taun tomode sunumi dabe me nigiyu, tama te taun bagulali genuai gamia dali te dodolama nigaibao. Tiali goli, te kibu be dabede te sęgę yabo sogo dao.”\f* Tama te Jerusalem elalubadi te 62 taims 7-pela yia, teba usu naibao, tiali goli te kibu be dabede te sęgę elalubo sogo dao.  
\v 26 Te 62 taims 7-pela yia wali, te silibo si da, teda augwaligo te Godigo Sa Munama Nigilali Genuai Bidi ela mubaso, tama aga nai deli me elalugobeo. Tama te bomai king me deligo genuai ami hani aselama, tama Jerusalem me Godigo be dali dolaibao. Te hwįnama dolobo sę me te genuai wę asiyu, te pobele bage daseasa soabo tiwai yaibao. Tama te genuai boi hwįbo te elalua pidubadi, te tigidali nai sia sabo sogoba usu nama, tama tigidali nai te Godigo wali po gilama te dolaibao.  
\v 27 Te kingo te dąų wabo bomai po te hauwa we bidi dali eyu, te agai po augwaligo wali pomainu yaibao. Tama te dąų wali po kontrak te elalua pidubadi, te kibu be a naga olama, me si teba usu naibao. Tama nosali te sela kibu be, me te kibu be pedai me badu siminigi pabo si da, teda agai te we bidi dabego te Godiba ebo tobage ofa tigidali te paliaibao. Tama te king bidi agai te dwai nai mu me deli te Godigo be pedu daide ugwadu munama, tama te doado bage me nai dabe dolabo dwai nai tede munaluyu, te Godigo te king dolabo sogo bodoluba usu nagasaibao,” ensel Gebrielgo te po wai dao. \f + \fr 9:27 \ft Te Hibru pogo te ves 27de wali po te kuna konesiąwai, tama bidi mebago te po gasa kolesagago begelibo sę yali.\f* \x * \xo 9:27 \xt Dan 11:31; Mat 24:15\x*   
\c 10  
\s1 Danielgo na te wę Taigris sesegede suali  
\p
\v 1 Te sela wabo kibu bede te Sairus te Persia king bidali side, Godigo po me deli te Danielba mawai, agai gasa nogi te Beltesasar dao. Tama te genuai dwai sogo mu pedelaibao wali, te mu po dao. Te po te na ebo tiwai agaba pedelali, tama agai te na suali sogo, agai te po page koneai.   
\p
\v 2 Te sela wabo kibu bede Sairus te king bidali side, ena Daniel, eno te haliga sęgę dwai mu elama, tama eno te gela naga wabo sę idu, te Sarere selaba usu nani.  
\v 3 Te Sarere selade, eno te wiegi yai nai me tusiąyu, ma te wiegi yai nai hasa me deli te me tubeo. Eno te wain wę tusiąma, tama eno tobolu nisi dwasianu me dodolobeo.  
\v 4 Tialima, te namba wan polua te deli polua te dei 24de, te kibu be, ena te genuai wę Taigris sesegede dolaluai.  
\v 5 Eno te ugwaba tonobadi, tama eno te bidi me deli te nami ugwa wiegi yai beali bidi suali, tama augwaligo te wiegi yai golgo nigali kukulu muai.  
\v 6 Aga tigi te ula mu yali, te wiegi yai sawi yai masigi me deli te ula mu yai tiwai. Aga gesabidi te dagalude elalubo be sele ula tiwai eyu, tama agai gedu te sole ula tiwai yali. Agai nogo me sągą te ula mu yali, te augwaligo te brasgo nigali nai bugagia penai ula ebo tiwai yai. Tama eno odali, agai wabo po te genuai mu, te genuai we bidi hani dabego po wabo tiwai yalio. \x * \xo 10:6 \xt Ped 1:13-15; 2:18; 19:12\x*   
\p
\v 7 Ena deligo naga eno te nai te nade subo tiwai yai. Te ena dali bidali bidi dabe augwaligo te magi nai deli me subeo, tiali goli augwali wi dwai mu elama, tama augwali wi pelama, duala sigi pai.  
\v 8 Tama ena duba deli naga bidiyu, tama eno te nai suali te gasagi yai sę tedali mu yai. Eno te nai te nade subo tiwai elama, tama eno bomo tigidali te sia selama, te eno gesabi te mu gasa me hasegelai.  
\v 9 Tialima, eno te bidigo po wabo odali, tama eno agai dogonide po wabo odobo sogo, eno gedu gęǫ page elama, tama ena te tǫba degasa dulama, te ena isai bidi tiwai elama, tama ena gesabi tǫba ponama, pila muai.  
\v 10 Tama eno odobadi, te bidi me deligo nogogo ena nogo tulama, te ena ugwaba hodolali, tama eno nogo me sągą si te tǫde poąluyu, dolaluali. Tiali goli, ena wi edubadi, tama ena didibili idualio.   
\p
\v 11 Tialima, te bidigo enabolo te tama po wali, “Daniel, Godigo nage godolo mu ebao,” wali. “Nage hodaluama, te eno nageba wainu ebo poba te nago olo bugagia muao. Godigo digi ena tagala palobaso, tama ena nageba asali,” te po wai. Agai po ola simanobo si, tama ena dolugulali, tiali goli ena didibili me idualio.  
\v 12 Tama agai po ma weyu, te tama po wai, “Daniel, nage wi igio. Te nago gagalu, te naga digi naga aiyaba elaluama, te Godigo nageba yabo sę koneainu tiali sogo, Godigo nago te gedu haluasa po wabo odama, tama ena tagala palai dao.  
\v 13 Ena polo asainu homu yai, tiali goli te bulu tǫ kantri Persia tonalubo dwai enselgo te ena geąlubadi, te dei tolaluai. Agai te tama tiali, tama te polalubo ensel me deli, Maikel, te ena tau sagasu asainu yali, magi baso meni, agai te enaduba deli naga te bulu tǫ kantri Persia king dabe dali bidibo suali, tama ena tau sabo bidi me meni yai. \x * \xo 10:13 \xt Ped 12:7\x*  
\v 14 Ena nageba te po wagasiyu asali, te nago we bidiba te tigidali nai sibi sia sabo sogo te pąde te sę pedelaiba po wagasalio. Nago suali, meba nai te sogo pedelali, tiali goli megi eno nageba te gasa sę nosali pedelabo po ola magasali,” agai te po wai.   
\p
\v 15 Agai te po wabo sogo, eno te tǫba tonono elama, tama eno pedauwali pania sai dao.  
\v 16 Tialima, te bidi te da tǫde bidi tiwai da, agai te aga nogo te eno pedauwaliba muai. Tama eno pedauwali dagayu, tama eno agaba te tiwai po wali, “Genuai bidi, eno te na sulama, tama ena wi dwai mu elama, tama eno bomo tigidali silalio.  
\v 17 Tama tiyu, eno magi po nageba waibawe? Ena te sę bidi me deli te genuai bidigo gedude dolalubo tiwai ebao. Eno bomo meni baso, tama eno po wabo mobo meni yai,” eno te po wai.  
\v 18 Tialima, te bidigo ena ma tola selama, te ena bomo pedelali.  
\v 19 Tama agai enabolo te tiwai po wai, “Godigo nage godolo mu ebaso, tama nago haliga nagame igulama bidao, tama nage wi me igio. Nage bomo elama, dolaluao,” wali.  
\p Agai po ola siminama, tama eno bomo genuaiba mu eyu, te agabolo te po wali, “Genuai bidi, megi nago enaba te nai dabede po wao, magi baso meni, nago ena bomo ilali dao.”  
\v 20-21 Tama agai te po wali, “Nago koneani, magi baso ena nageba asaliwe? Ena asali, eno te Mu Po Wabo Bukude Asęani Po meba pusagasu ula tegelagasalio. Tiali goli, eno sesabi elama me bidigobeo. Te ena polo ma pelama, tama te bulu tǫ kantri Persia tonalubo dwai ensel dali hwįgi paibao. Tama te hwįbo silibo si da, te bulu tǫ kantri Grik tonalubo dwai ensel sabolaibao. Te de me deligo ena tau me sabe, Maikel, te dage Israel dabe tonalubo ensel, te agai deligo naga ena tau sabo dao,” te po wai. \x * \xo 10:20-21 \xt Ped 12:7\x*   
\c 11  
\p
\v 1 “Magi baso meni, te hasia kibu bede mu Darius, te bulu tǫ kantri Midia bidi, te aga te Babilon king bidali side, eno te Maikel tau sali.” Te bidi tiwai bidi te po enabolo tama wali.   
\s1 Te Isip king dabe, me Siria king dabe, augwa hasi boi hwįbo sę yaibao wali po  
\p
\v 2 Tialima, te bidigo po ma weyu, agai enaba te tiwai po wali, “Daniel, odao. Eno te nageba po wainu ebo sę dabe, te mu tama pedelaibao. Te king sela me ma pedelama, tama te bulu tǫ kantri Persia tonalueibao. Tama nosali te king me deli ma pedelaibao. Te me si me si wabo kingo te mone me doado bage hauwa elalueibao, te Persiade bidibo gasa king dabe aiyaba elalueibao. Tama agai bomo te genuai pedalubo sogo, agai doado bage hauwa elalueibao, agai te tigidali Grikba haliga dwai yabo sę ilama, tama te augwaligo agaba hwįabo homu ilaibao.  
\v 3 Nosali te gasa bomai king me deli pedelama, te agai te bulu tǫ kantri hauwa, me te we bidi hauwa tonalueibao. Tama mena sę agai homugo yainu homu yali sę, te sę agai eyu naga yaibao,” wai.  
\v 4 “Tiali goli, aga bomo te genuai pedalubo sogo da, teda agai tonaluali bulu tǫ kantri te peda pelama, tama te kantri bulu tǫ me si me si pedelaibao, tama aga wai te ogwa dabego digi te bulu tǫ kantri me tonalubo sę egobeo. Menio. Te gasa bidi dabego augwali tonalueibao,” wali, “tiali goli, augwaligo bomo te bomai kingo bomo tiwai si me elalusiąwaibao,” wali.   
\p
\v 5 “Te sogo te saut badu bidali te bulu tǫ kantri king, te Isip tǫ da, te bomo elalueibao. \f + \fr 11:5 \ft Te Hibru pogo te kantri si nogi te tiwai, te Isip me Siria te augwaligo nogi dolo nogi ebeo. Menio. Augwaligo te tama po wai, “te not badu kantri tǫ,” me “saut badu kantri tǫ da,” te tama wali. Tiali goli, te Dąį 11, ves hauwade, te tiwai suali, “te not badu kantri,” wali, te kantri Siria dolo po walio, te kantri tǫ te Israel tǫ not pedai badu elaluali. Tama te “saut kantri” wabo, te Isip kantri po dolo wali, te kantri tǫ te Israel tǫ saut badu elaluali. Tiali goli, te Dąį 11 silagasu wali pode bidi mebago te tama homu yali, te bukude wali pogo te bulu Isip de Siria side te po ma wabe homu yalio. Menio. Agai te gasa kantri bulu po olama wali homu yalio.\f* Tiali goli agai polaluali ami ofisa bidi me deli te gasa bulu tǫ kantri te not badu king pedelaibao. Tama agai bomo te genuai mu elama, tama te Isip kingo bomo aiyaba elalueibao. Tama te ofisago tonalubo bulu tǫ kantri te genuai mu pedalugulaibao.  
\v 6 Te kibu be mebade nosali te Isip kingo te agai wegi te bulu tǫ kantri not badu bidibo kingo somainu mawaibao, te kantri te Siria dao. Te tama tiali, te bulu tǫ kantri si te bugagia bidainu yaibao. Tiali goli, te wego bomo te sesabi sogo elama bidibeo, tama aga bidigo bomo me te silaibao. Te augwaligo te we ela muyu, te aga dali pali hani me eleyu, tama aga aya me, aga bidi me elaibao. \f + \fr 11:6 \ft Hibru pogo te vesde wali po kuna konebe homu yai. Meba bidigo homugo te vesde wali po te wego waide po wali homu yali, tama te aga ayade te po wabe homu yalio.\f*  
\v 7 Nosali dwasianu bidama gana, te we aga dali deli kaneme bidi me deli te Isip bulu tǫ kantri king pedelaibao. Tama te king pelama, te Siria tǫ kingo ami bidi dabe dali hwįgi pelama, tama te taun bomai obo banis elalubo tomoba pelama, tama te Siria dabe dali hwįnama, te augwali aiyaba elalueibao.  
\v 8 Agai te augwaligo tibo god dabego piksa dali, te tibo god augwa wiegi yai doado bage dabe dali, tigidali saibao, te augwaligo gol me silvago nigali. Tama agai te tigidali nai doado bage te Isipba sela paibao. Te hwįsąbadi kibu be meba bidaibao,  
\v 9 tama nosali te Siria king te Isipba pelama, te Isip dabe dali hwįaibao. Tama aga bulu tǫ kantriba ma geasa paibao,” agai te po wai.   
\p
\v 10 Tama po ma weyu, agai te po wai, “Te Siria kingo ogwa dabego te ami hauwa umabo selama, te sisinagaselama, te augwaligo hwįabo sisi yaibao. Tama polo tama te kingo ogwa dabe me deligo te ami dabe selama, te augwali asesa polo pelama, te bulu hauwa aiyaba elalu, te wę genuai asobo tiwai yaibao. Tama augwaligo te bomai obo banis elalubo taunba hwįgi paibao, te Isip kingo tonalubo bulu tǫba pelama, hwįgi paibao.  
\v 11 Tialima, te Isip kingo te wado ebo homu sębę genuai mu elalu, te aga pelama, te Siria kingba hwįgi pelama, tama agai te genuai ami aiyaba elaluama, tama augwali kalabus yaibao,” wali.  
\v 12 “Agai te hwįanide te aga wiegi yai homu pemene yaibao. Agai te ami bidi hauwa umabo mu elaibao, tiali goli agai te yali bomo tiwai te sesabi elama gana me elalugobeo,” wali.   
\p
\v 13 “Siria kingo te genuai ami hani mu sisinaibao, te polobadu hwįgi pali ami dabego namba te aiyaba elalueibao. Tama nosali kibu be mebade, agai te genuai bomai ami selama, te augwaligo te Isip king dali hwįgi paibao. Tama augwa te hwįgi pabo sogo, te augwa te nai hauwa dali sela paibao.  
\v 14 Te sogo te bidi hauwa te Isip king dali boi bidi yaibao. Tama te Daniel, nago hanide te hwįbo bidi mebago te nai me deligo po te nade wabo po tiwai odaibao. Tama augwaligo te Isip dabeba hwįyu, te nade wali po te mu pedalumainu yaibao. Tiali goli, augwali te hwįbo side menia saibao.  
\v 15 Tama te Siria tǫ king te aga ami dabe dali aselama, te bomai taun me deli bagulama, te augwaligo hwįnama, te taun saibao. Tama te Isip ami dabego te munu me ma hwįgobeo. Te augwa wiegi yai bomai ami dabego me te bomo meni yaibao.  
\v 16 Tama te Siria tǫ kingo te magi sę yainu, te aga homugo digi ebaso, te mena bidigo aga me paligobeo. Agai te Godigo aga we bidi dabeba te wiegi yai mani tǫ saibao, tama agai te nai dabe dolobo sę yaibao,” wali.   
\p
\v 17 “Nosali te Siria kingo aga ami dabe tigidali umabo mu selama, te Isip bulu tǫ kantriba hwįgi pabo homu yaibao. Agai te wiegi yai sę meba yabo homu elama, tama agai te tama tiaibao. Tama me, agai te aga wegi te Isip kingba tagala palama, somainu yaibao. Agai te tama tebo sunumide te Isip kantri bulu tǫ aiyaba elaluabo usu yaibao homu yaibao. Tiali goli, agai te tama homu yali te geda mueibao, tama te nai me deli agai me sogobeo.  
\v 18 Tama nosali agai te tamu ąį sesegede elalubo bulu tǫ kantri dabeba hwįgi pelama, te agai hauwa bulu tǫ kantri aiyaba elalueibao,” wali. “Tiali goli, te gasa bulu tǫ kantri ofisa me deligo te aga hagoma kolesaga silimainu yaibao, tama te hagoma kolesagago aga digi aga mu dolaibao.  
\v 19 Tama te Siria king te aga bulu tǫ kantriba ma geasa pelama, tama te bomai obo banis elalubo taunde bidaibao. Tiali goli, aga te tulalu dolama, tama te bidi dabego aga munu ma me sugobeo.  
\v 20 Tialima, te gasa kingo agai bidali pesage selama, tama agai te takis mone sabo bidi me deli tagala palaibao, te takis mone somainogo. Magi baso meni, agai homugo te agai te king bidi bididubadi, agai te wiegi yai doado bage elalueibao homu yaibao. Tiali goli, te king te Pęwadage sogo naga tama bidama, tama te aga isaibao. Agai te hwįbode me isigobeo, tama me te mena bidigo te wado po aga dali olama, te aga me ela mugobeo. Tama te bidi dabego te magi pagede mu aga isali, te page me konegobeo,” wali.   
\s1 Te king dwai mu me deli te kantri Siriade pedelaibao  
\p
\v 21 Tama te bidi te da tǫde bidi tiwaigo te enaba po ma wali, Danielba, te tama po wali, “Nosali te gasa Siria king pedelaibao, tama aga te dwai bidi mu yaibao. Te bidi aga te king pedelabo bidi tiwai ąǫ isąwaibao, tiali goli polo tama te aga pedelama, tama te haniani homu bega sabo po me tibo po weyu yaibao, tama aga digi te Siria king bidimainu ilaibao,” wai.  
\v 22 “Te genuai ami hanigo hwįagasali te tagalao, agai te augwali aiyaba elaluama, tama augwali mu silaibao. Tama me, agai te Godigo we bidigo hetpris aiyaba elalueibao.  
\v 23-24 Te agai bulu tǫ kantri te dwasianu yali, tiali goli agai te bulu tǫ kantri bidi meba dali te tibo po dąų walama, te agai homugo te augwali dali bugagia bidabo homu yainu ebo tiwai yaibao. Tiali goli, te agai augwaligo hwįabo homu meni yai elalubadi, te agai polo tama augwali dali hwįaibao. Tama tebo kolesagade te aga bomai king pedelaibao. Te agai augwali dali te hwįani bulu tǫ kantri dabe, te mone doado bage me hauwa elalubo bulu tǫ kantri dali hwįaibao. Tama agai te hwįnama sali wiegi yai nai dabe te aga abagi solo dabeba dobawaibao. Te aga wąį nǫų dabego te tobage kolesaga polobadu isąwai. Agai te boi hwįabo homu elama, tama te bomai obo banis elalubo taun sainu tiaibao, tama meba saibao. Tiali goli, agai te tobage kolesaga te pęwadage sogo naga yaibao.”   
\p
\v 25 “Te kingo te Isip kingde wi me egobeo. Tama tiyu, agai te genuai ami me deli sisinama, te Isip dabe dali hwįaibao. Tama te Isip kingo te genuai bomai ami selama, tama augwaligo me te Siria king dali hwįabo sisi elaluali. Tiali goli, Isip kingo ugwaba ela me hologobeo, magi baso meni, te bidi mebago aga geanabo po minama, tama aga tibo po mu ola mawaibao.  
\v 26 Te aga ofisa dabego digi te aga dolaibao. Tama te Siria dabego agai ami dabe mu dolama, tama te bidi sese hauwa tausen ami ela mueibao.  
\v 27 Tama nosali te king augwa si te deliba dugulama, nai tueibao. Tiali goli, te augwa si homu te dwai elalu, te augwa si po dogia pabo po te pedauwalidu weyu, te augwali siba digi tibo po waibao. Tama augwali sigo te yainu homu yali sę te me egobeo. Magi baso meni, te Godigo te sę emainu sa muani sogo bodolu te pedalisąbadi digi ebao.  
\v 28 Tama te Siria kingo te agai hwįyu sali doado bage tigidali selama, tama te aga bulu tǫ kantriba ma paibao. Agai te Godigo lotu po wabo we bidi augwali dolabo homu bomo yaibao. Tama agai yabo homu yali sę tigidali te agai eyu naga yaibao, tama nosali aga te aga bulu tǫ kantriba ma paibao,” te po wai dao.   
\p
\v 29 “Te Godigo sa muani sogo, te Siria king te Isipba pelama, te Isip dabe dali ma hwįgi paibao, tiali goli agai te polobadu augwali aiyaba elaluali tiwai gilama me egobeo.  
\v 30 Tama te giliga degasa dulubo badu bidi dabe te Isipba gebadu aselama, tama aga dali hwįbaso, tama aga wi yaibao. Tama agai te wado po dwai mu olama, ma begasa peyu, tama agai te Godiba lotu wabo we bidi dabe dolaibao. Agai te God tudiba mubo bidi dabe dali dwagi yai sę yaibao.  
\v 31 Te agai ami bidi mebago te Godigo be te God gedude meda ilaibao. Tama te Israel dabego te Godiba tigidali sogo ofa ebo te habu selaibao, tama augwaligo te dwai nai mu te Godigo be tomode dodolai elalueibao,” te po wai. \x * \xo 11:31 \xt Dan 9:27; 12:11; Mat 24:15; Mak 13:14\x*  
\v 32 “Tama kingo te God tudiba mubo bidi dabe bega sabo po olama, tama te augwaligo aga wali paibao. Tiali goli, te God dologoba mu pelama bidali we bidi da, teda augwali te bomonama dolalu, te king bidigo po wali pogobeo.  
\v 33 Te Israel dabe augwa polalubo bidi dabego te koneani kolesaga wiegi yai elaluai, tama augwaligo tau siyu, te we bidi hauwa dodolu, tama augwaliba te wiegi yai homu kolesaga mawaibao. Tiali goli, te boi bidi dabego te polalubo bidi dabe meba te bainatgo elama, te meba siaba ulama, isaibao. Tama augwaligo te polalubo bidi dabego doado bage meba wi selama, tama te polalubo bidi meba kalabus yaibao. Tiali goli, augwaligo te tebo kolesaga te bobobage sogo sesabi gana elama me egobeo.  
\v 34 Te boi bidi dabego te Israel polalubo bidi dabe elebo sogo, te bidi mebago te polalubo bidi dabe tau saibao. Tiali goli, te augwali hauwago te augwade digi tau sabo homu elalu, te polalubo bidi dabe tau sabo sę yaibao.  
\v 35 Te boi bidi dabego te polalubo bidi meba dolaibao,” wali, “tiali goli, augwaligo te sęgęgo te gasa polalubo bidi meba dąų waliyu, te doloba pai kolesaga emainu yali, tama te augwali God gedude magi meda isąwai mu pedelaibao. Te tobage kolesaga te me siligobeo. Te tama elalua pidubadi, te Godigo te tigidali nai sia sabo bodolu muani siba usu naibao,” wali.   
\p
\v 36 “Te kingo te mena sę dabe te aga homugo digi yaibao. Aga te hagoma eyu, te aga digi aga nogi ugwaba siyu, e tama po waibao, ‘Eno te tigidali god elalualio,’ te po waibao. Tama agai te tobage posobo po dabe te Ugwadu Bidibo Godigo nogi aiyaba elalu, tama waibao. Agai te tama tobage kolesaga ela pidubadi, te Godigo haliga sębę yaliba usu naibao, magi baso meni, Godigo agai te yaibao homu yali sę tigidali ebo dao. \x * \xo 11:36 \xt 2 Te 2:3-4; Ped 13:5-6\x*  
\v 37 Te kingo te aga wąį nǫų dabego tibo god te wei elama, godolo me eyu egobeo, tama te tibo god te we dabego wei elama godolo ebo god dabe me, te godolo meni yaibao. Tama agai te tigidali god tudiba muaibao, magi baso meni, aga homugo te aga polalu, te augwali aiyaba elaluali homu yaibao.  
\v 38 Te agai te genuai nogi te tibo god me deliba naga mayu, te bomai obo banis elalubo hanu tonalubo god da homu yaibao. Te kingo wąį nǫų dabego polobadu te godiba lotu me wasiąwai. Tiali goli, te kingo te silva, me gol, me te sawi yai masigi, tama te gasa wiegi yai nai dabe te godiba te ofa tiwai elama, mawaibao.  
\v 39 Tama agai te bomai obo banis elalubo taun sigi painu hwįgi pabo sogo, agai te gasa tedali hanigo godiba hanalu, te aga tau somainu yaibao. Tama aga te bidi dabe augwaligo king bidimainu godolo ebo bidi dabeba te genuai nogi mawaibao. Tama agai augwali te polalubo bidi dabe pedalumainu elama, te tǫ dage augwaliba mawaibao, te agai augwalide te aga tau sali wei ponobo tiwai yaibao,” wali.   
\p
\v 40 “Te tigidali dagalude me tǫde nai sia sabo sogo da, teda te saut tǫ badu te Isip kingo te Siria bulu tǫ te not badu bidali king dali hwį yagasaibao. Te polo tama te Siria tǫ kingo te hwįbo nai karis dabe, me hos, me te hwįbo sip dabe selama, tama asesa polo pelama, te Isip king dali te bomo elama, hwįgi painu yaibao. Agai te bulu tǫ kantri hauwa te ąį genuai asobo tiwai elama, aiyaba elalueibao.  
\v 41 Te ami dabe te Godigo aga we bidiba mawainu yali wiegi yai tǫba sabolaibao, tama augwaligo te genuai hani we bidi ela mueibao. Tiali goli, te amigo te bulu tǫ kantri Idom, me Moap, me te genuai bulu tǫ kantri Amon, te badu me sogobeo.  
\v 42 Te kingo te bulu tǫ kantri hauwa aiyaba elalu, me te Isip tǫ kantri bugagia sula tagalu elalumainu me egobeo. Menio.  
\v 43 Agai te gol, me silva, me te gasa wiegi yai doado bage dabe te Isip dabego genuai monego abelibo nai dabe saibao. Tama te bulu tǫ kantri Libia me Itiopia sigo te aga tau saibao.  
\v 44 Tiali goli, nosali te bidi dabego agaba te giliga pedalubo badu, me te not badu te nai dabe agaba pedelabo po obaso, tama te pogo aga wi ilaibao. Tama aga haliga dwai mu elama, te hwįbo bomo mu igi pelama, tama te we bidi hani hauwa mu silaibao,” walio.  
\v 45 “Tama agai te aga genuai ugwa be sę yaibao, te genuai tamu ąį Mediterenian edaba togoliyu, te Godigo polalubo bulu du ugwaba togoliyu elama, tomode agai te genuai wiegi yai name ugwa be dabe sę yaibao. Tiali goli, te aga dolama, tama te mena bidi me deligo aga tau me sogobeo,” te bidi te da tǫde bidi tiwaigo te po wai.   
\c 12  
\s1 Sabi simanobo sogo wabo po  
\p
\v 1 Tama te bidi te da tǫde bidi tiwai, agai te Danielba te tama po ma wali, “Te sogo te polalubo ensel Maikel te pedelaibao, te dage Israel dabe tonalubo ensel dao. Te sogo te genuai sęgę mu pedelaibao. Polobadu te tobage sęgę tiwai te bulu tǫ kantri me delide pedalubeo. Te sęgę pedalubo sogo, teda te Godigo dage te Israel we bidi tigidali dobola ma saibao, augwali nogi te agai bukude elalualio, tama te augwali bugagia bidaibao. \x * \xo 12:1 \xt Mat 24:21; Mak 13:19; Ped 7:14; 12:7\x*  
\v 2 Tama Godigo te genuai hani isali we bidi ma hodolaibao. Meba augwaligo te sesemane sogo bidada peyu, bidada pabo wiegi yai ula saibao. Tiali goli, mebago te hale genuai mu elaluyu, tama augwali te sesemane sogo bidada peyu, bidada paibao. \x * \xo 12:2 \xt Mat 25:46; Jon 5:29\x*  
\v 3 Te wiegi yai kolesaga koneai elaluai bidi dabe, te augwalide ula ebo te dagalu ula mu te hulide ebo tiwai yaibao. Augwaligo te we bidi hauwa te doloba pai kolesaga wali pomainu dodolali, tama augwa ula te sesemane elalu, te hǫ ula tiwai yaibao.  
\v 4 Tialima, megi da, Daniel, nago te po dabe elalubo buku te haluao. Tama nago dąį tede muao, te bidi dabego te buku habu seliyu, tama tiao. Te buku te halualudubadi, te tigidali dagalude me tǫde nai silibo si te pąba usu naibao. Tama we bidi hauwago te po page koneainu, iba soyu, eda soyu eyu, sę dene mu yaibao. Tiali goli, te augwali usu me egobeo,” te bidigo te po wali. \f + \fr 12:4 \ft Amos 8:12 tede te tiwai po naga elalubao. Tiali goli, te Hibru pogo te page kuna konebeo. Mebago te homu yali, te po e tiwai wali homu yali, “Te we bidi hauwa te tigidali tǫ habu usu nama bilaibao, tama augwaligo te gasa tobage sę hauwa koneainogo yaibao.”\f* \x * \xo 12:4 \xt Ped 22:10\x*   
\p
\v 5 Nosali ena, Daniel, eno te gasa bidi si te wę sanede dolalubo suali. Me deli te ena dolalubo badu dolaluai, tama me deli te wę u badu dolalualio.  
\v 6 Te dolaluali bidi si te bidi me deligo te wiegi yai nami ugwa belama, te wę tomo daide ugwadu dolaluali bidibolo te po walio. Agai te tiwai po wai, “Nisu sogo mu te gasa tobage noma sabo sę dabe pedelama, te mu siligowe?”  
\v 7 Tialima, te wiegi yai nami ugwa beali bidigo, agai te aga nogo si dali te dagaluba nogo tų elalu, tama agai te tama po wali, “Te Sesemane Sogo Bidibo Godigo nogide, eno mu po obao, te gasagi yai pedelali te tobage nai dabe te elalua pidu, te kibu be sela olama, me kibu be pedaiba usu naibao. Tama te Godigo we bidigo bomo te mu sia sigi pabo sogo, te augwali mu dolobaso da, teda te sę dabe me te sia saibao,” wali. \f + \fr 12:7 \ft Te Hibru pogo te vesde wali po kuna konebeo. Meba bidigo homugo te homu yai, agai te kibu be sela olama, me kibu be peda sigi pali homu yali. Tama meba bidigo homu te agai po geme dualama weyu, tama te nisu sogo te sęgę pedeliyu siligowe, te dago kuna konegobeo.\f* \x * \xo 12:7 \xt Ped 10:5; 12:14\x*   
\p
\v 8 Eno agai te po wabo odali, tiali goli eno kuna mu bugagia konebeo. Tama eno agaba te tama po hanalu wali, “Tiali goli, genuai bidio, te sę dabe te magi elama silaibawe?”   
\p
\v 9 Tiali goli, agai po wei ponoyu, te tiwai po wali, “Daniel, nage pao. Magi baso meni, te buku te halualio, te ma dagabo te habu selali, magi baso meni, te po page te geme dualaludubadi, te dagalu me tǫ silibo sogoba usu naibao,” wali.  
\v 10 “Te sęgę dabe pedelali te hauwa we bidi dąų waliyu, te doloba pai kolesaga emainu yai, tama augwa te magi meda meni yai wiegi yai mu te God geduba pedalumainu yaibao. Tama te wiegi yai homu kolesaga koneai elaluali we bidi, te augwaligo naga te sę dabe page koneaibao. Tiali goli, te dwai we bidi dabego te sę page koneainu ebaso, usu me egobeo, tama te augwaligo dwai kolesaga hauwa mu ebo sę yaibao,” wali. \x * \xo 12:10 \xt Ped 22:11\x*   
\p
\v 11 “Te boi bidi dabego te Israel dabeba te Godibolo tigidali sogo ofa ebo kolesaga tagala weyu, tama augwa te doado bage me nai dabe dolabo dwai nai mu te Godigo be tomode dodolobo side gagalama, tama te 1,290 bodolu sogo wali te siligi pomainao,” walio. \x * \xo 12:11 \xt Dan 9:27; 11:31; Mat 24:15; Mak 13:14\x*  
\v 12 “Tama te we bidi bomo elalu bidibaso, tama te God tonalu, te 1,335 bodolu sogode usu nama te siligi pabo side, augwa wiegi yai homu pemene emainao.  
\v 13 Tama Daniel, megi nage te bomo elama dolalu, te dagalu me tǫ silibo siba usu nao. Te nage isaibao, tiali goli nosali te nage ma hodaluama, tama te tigidali nai siligi pabo side, te Godigo nageba sa muani nai dabe saibao,” te wiegi yai name ugwa beali bidigo te po wali.