\id COL - Dadibi NT [mps] -Papua New Guinea 2001 (DBL 2014) 
\h Polgo Kolosi Dabeba Pas Asęani 
\toc1 Polgo Kolosi Dabeba Pas Asęani 
\toc2 Kolosi 
\toc3 Kol 
\mt1 Polgo Kolosi Dabeba Pas Asęani  
\imt1 Hasia nedebo tau sabo po  
\ip Te hanu nogi Kolosi te Esia moni tǫ tomode elaluali. Pol aga digi te Kolosi hanuba pabe, gasa bidigo Godigo po teba hasia pusugi pai dao. Tama Pol te Rom moni hanu kalabus bede bidibadi tama te bidi Epafras te Kolosi hanu taga soyu, te Romba sabolama tama Pol suagasali. Agai Polbolo te Koloside pedalali sę po pusuyu, tama te we bidi meba te augwa polobadu yali dwai kolesaga tomoba ma painogo ebao wali. Te me te tibo po ola mabo bage augwaligo te we bidibolo te augwa tigi aiyaba elaluabo tibo po ola mobao, te po me Polbolo pusali. Tiali goli te we bidi hauwa augwali Krais bugagia wali pabo dao, te po me Epafrasgo Polbolo pusali. Tama tibaso, Pol dwagi yai homu eyu, tama agai te Kolosi we bidi dali godolo ebaso, agai e tau sabo bomo mabo po asęnama, tama te bidi Tikikusgo augwalibolo sela pomainogo yai. Te si wabo bidi nogi Onesimus, te bidide Polgo po hauwa olama, te bidi Filemonbolo te pas asęyu te tama po wai dao.  
\c 1  
\ms1 Krais aga te tigidali naigo tobolu bidi da, tama te tigidali bidibo ula me te Godigo kolesaga agade pągąnalubao  
\mr (Dąį 1:1–3:4)  
\p
\v 1-2 Ena Pol dao, ena Krais Jisasgo po sela pabo sę bidi dao. God aga homugo digi ena te sęba muani. Tama dago ama Timoti aga ena dali bidibao. Tama eno e pas asęna dagebolo tolobao, dage Kolosi moni hanude bidibo Godigo we bidi hani. Dage da, dago ama dabe, dage Krais dali wadolama tama aga dali homu kęą pai bage dao. Eno homugo dago Aya Godigo olo tau sabo wiegi yai kolesagago dagego homu dua nagame ilama, tama dage bugagia bidimainao.   
\s1 Polgo Godibolo puba hwi po wai  
\p
\v 3 Te God agai dage tau somainogo da sigo gedu haluasa po wabo dao. Tama weyu, tama sesemane sogo te dago Genuai Bidi Jisas Kraisgo Aya Godibolo dago dagede puba hwi po wabo dao.  
\v 4 Magi baso meni, dago odali, te dagego Krais Jisasde konealubo po dąų wali po me, te Godigo we bidi tigidali dali dagego dwagi yai homu eyu godolo ebo kolesaga po me, te po si dago odobaso, dago agabolo puba hwi po wabo dao.  
\v 5 Te mu po, te Godigo gesi wiegi yai po, te po pusubo bidi hasia sogo dage bidibo digi sabolali sogo, te sogo dagego te po odama, tama dagego koneani, te nosali Godigo dage dali dwagi yai sę mu yaibao. Te tama odama, tama dagego tede dwagi yai homu eyu, bugagia tonalubo dao. Dage tama tonalubaso, dagego Kraisde konealubo po dąų olama, tama Godigo we bidi tigidali dali dwagi yai homu eyu godolo ebo kolesaga ebo dao. Tama te Godigo dage dali nosali yabo dwagi yai kolesaga page te Godigo aga bidibo digide bugagia tonalubo dao, te dologobeo.  
\v 6 Tama te gesi wiegi yai po pusubo bidi dabe augwali te tigidali tǫba tedali pelama, tama tede bidibo we bidibolo te po pusama, tama tebogo te we bidi dali dwagi yai sę ebo dao, te ni aga du bugagia walobo tiwai ebo. Te dage tomode me te tiwai yai dao. Hasia dagego te Godigo olo tau sabo wiegi yai kolesaga po odama, tama te kolesagago dage tau selama, tama te kolesaga dagego kuna konebo dao. Tama te sogo gagalama tama megi e sogoba usu nagasama te wiegi yai pogo dage tomode aga du bugagia walobo dao.  
\v 7 Epafras agai te wiegi yai gesi po dage ola menama, tama dagego konea sai. Aga dago deli sęde bidibo dwagi yai bidi dao, tama da sigo aga dali dwagi yai homu ebo dao. Aga te Krais dali homu kęą pai sę ebo bidi dao, tama agai da si te sęde tau sabo dao. \x * \xo 1:7 \xt Kol 4:12; Flm 23\x*  
\v 8 Tama agai da sibolo e po hania hanilai dao, “Te Godigo Mobo Bidigo te Kolosi we bidi tau sobaso, tama augwaligo te Godigo po odobo we bidi tigidali dali dwagi yai homu eyu godolo ebo dao,” te po wai.   
\p
\v 9 Te Godigo po dage tomode te tobage dwagi yai sę yali baso, dago dagede te po odali sogo gagalama tama eduali tama megi usu nagasama tama dago Godibolo po wabo dao. Tama tiyu, dago Godibolo e po hanalu wabo dao, “God, nago te Kolosi we bidi augwalibolo te nago Mobo Bidigo maiabo wiegi yai homu kolesaga tigidali augwalibolo mao. Tama mobaso, augwaligo nago sę yabo homu kolesaga gisiga koneaibao,” dago dagede te po Godibolo wabo dao.  
\v 10 Tama agai te homu kolesaga dagebolo mobaso, teda dagego ebo kolesaga te dago Genuai Bidigo gedude te usu yaibao, tama te kolesaga tigidaligo aga homu dwagi yai ilaibao. Tama dagego haniani dwagi yai sę yaibao, te dwagi yai ni aga du walobo tiwai yaibao. Dagego God koneama tama te konebo sę genuai pedalaibao.  
\v 11 Dago homugo Godigo agai moni ula yai wiegi yai bomo meba selama, tama te bomo dagebolo mao, tama te bomogo dage bomai we bidi ilao. Tama agai dwagi yai bomogo dage bomo elama dolaluyu, tigidali sęgę bugagia tolaluyu, tama dagego boi bidi homu egobeo, dagego augwali wei ponobo homu egobeo.  
\v 12 Tama dagego tama tiyu, dwagi yai homu mu pemene eyu, dago Aya Godibolo puba hwi po wao. Magi baso meni. Te agai tonalubo wiegi yai ula elalubo digi tede agai aga we bidibolo maiabo nai hagea selama munaluali. Tama dagego te hagea sali nai meba somainogo agai dage usu ilai dao.  
\v 13 Da te dwai haubo tobolu bidi Satango dologode te hulia sai bulude bidibadi, God agai da ma dobola selama, tama da bugagia sela pelama, tama aga godolo ebo Ogwago we bidi tonalubo kolesaga dologoba mugi pali.  
\v 14 Agai Ogwago te da dąų wali nai pisigina sąwai dao. Te po page e dao, agai yali sęde Godigo dago yali dwai sę sela sąwai dao. \x * \xo 1:14 \xt Ef 1:7\x*   
\s1 Krais da te tigidali nai tobolu bidi dao  
\p
\v 15 God aga te dago susiąbo bidi goli, Krais te God tiwai mu bidiyu tama bidigo gedugo suali bidi bidai. Aga Godigo hasia ogwa dao, te tigidali nigali naigo nogi agai nogigo aiyaba elalubo dao.  
\v 16 Magi baso meni. Godigo agabolo te sę yao olama, tama agai te dagalude nai tigidali dali, tǫde nai tigidali dali nigai. Agai dago subo nai me dago susiąbo nai te tigidali agai nigai. Te dago gedugo susiąbo dagalude bidibo ensel mobo bidi tonalubo bage dali, te haniani tuni bidi dabe dali, te tobolu bidi dabe dali, te bomo elalubo bidi dabe dali, agai augwali tigidali nigai. Tigidali elalubo naide Godigo agabolo nigao olama, tama agai nigilama, tama te Krais aga nogi ugwaba somainogo eyu bidibo dao, te aga te tigidali naigo peni dao.  
\v 17 Te tigidali nigali nai nigisiąbadi, te sogo aga bolo biduduai dao, tama tigidali nai agai aga bomogo tonaluyu, tama megi bugagia bidiyu tedela pabo menio.  
\v 18 Godigo po odobo we bidi augwali da te Krais aga tigi tiwai dao, tama aga da te aga tigigo tobolu dao. Tama aga da te tigigo bidabo bomo page bidi dao. Aga naga te tigidali naide polalubo bidi bidimainogo eyu, tama aga da te Godigo hasia ogwa da, tama aga hasia mu gų pagede hodaloai bidi dao. \x * \xo 1:18 \xt Ef 1:22-23\x*  
\v 19 Magi baso meni. God aga digi homugo agai homu kolesaga sese te aga ogwago elaluyu, tama ogwa aga tiwai mu bidaibao.  
\v 20 Tama tiyu, God aga digi homugo te aga Ogwago sę ebogo agai te tigidali nai God dali deli homu ma ilaibao, tǫde nai dali dagalude nai tigidali. Aga Ogwago kaneme ni pedaide gelai. Tama tebogo Godigo da dali boi piabo sę yai dao. \x * \xo 1:20 \xt Ef 2:16\x*   
\p
\v 21 Awe, polobadu dagego dwai homu kolesaga eyu, tama dwai sę idubaso, dagego God dali boi bidi homu elama tama dagego aga konebeo, dage digibulu bidai dao.  
\v 22 Tiali goli megi aga Ogwago tǫde bidali tigi isali kolesagago agai dage aga abagi ilai dao. Agai homugo dage tedali mu we bidi, dage bugagia magi sęgę me meniama wiegi yai agai gedude nigiliyu, tama agai dage aga pageba odasa asomainogo agai dage aga abagi dabe ilai dao.  
\v 23 Tialima dage, dagego bomo elama, te Godigo gesi dwagi yai pode homu kęą pai we bidi bidiyu tama dolaluao. Te bugagia sę yai be aga tǫba tuluali ni tigi augwali te tǫde mu dąų obaso, te be peme egobeo. Te tiwai me dagego duga homu agai pode kęą pai we bidi bidao. Dagego polobadu te po odoyu, tama te Godigo dagebolo nosali maiabo naide dagego dwagi yai homu eyu tonalubo gagalali. Megi dage te tonalubo kolesaga tagaligio. Te gesi dwagi yai po augwaligo tigidali tǫde we bidibolo pusigi pai dao, tama ena Pol, ena te gesi dwagi yai po pusubo sę ebo bidi pedalai dao.   
\s1 Godigo geme dualali po waselali  
\p
\v 24 Ena megi e kalabus bede bidiyu tama dene sobao. Tiali goli eno dage tau somainogo eyu, tama te dene sobaso, eno dwagi yai homu ebao. Magi baso menio. Da Godigo po odobo we bidi da, te Krais aga tigi tiwai bidibao. Tama aga tigi tobade te dene tolobo sę me elalubao. Tama eno tigide te dene me sobaso da, teda eno te agai aga tigi tau sabo dene meba toloyu, tama te dene silibo sę eno tama tau sabo dao.  
\v 25 Tama God aga digi ena aga we bidi hanigo sę bidi nigilai dao. Eno dage tau somainogo eyu agai e sę enabolo mani, te Godigo po sese eno gisiga ola mayu, tama we bidi augwaligo te po page kuna konemainogo ebo dao.  
\v 26 Tigidali sogo polobadu te po page tigidali bidi hanigo gedude dulaluai. Tialima megi God agai aga we bidi mubolo te po page hania waselai dao.  
\v 27 Te Godigo homu e dao: agai aga polobadu dulaluai po agai we bidi mu augwalibolo hania hanilaibao. Tama te dulaluali pogo te gasa hani we bidi tigidali tau sabo po dao. Te dulaluali po wiegi yai mu dao, te bomo yai ula umabo elalubo po dao. Te dulaluali po page e dao: Krais aga digi dage deli delide hodobo bidibao, tama aga tama bidibaso dagego Godigo bomo yai ula dali, genuai nogi dali, bomo dali te meba saibao, tama tede dagego dwagi yai homu eyu bugagia tonalubo dao.  
\v 28 Tama tibaso, dago Kraisde po te tigidali bidibolo pusubo dao. Dago homugo tigidali we bidi deli deli augwali Krais dali wadolama, tama bugagia holama, tama wiegi yai we bidi mu bidimainogo eyu, tama dago augwali Godibolo mawaibao, bidigo aga wiegi yai nai ofa te Godibolo mabo tiwai. Tama emainogo dago tigidali wiegi yai homu kolesagago augwali ola mayu, tama dua dao, e pode geda mugio, te tobage po weyu dago tigidali we bidi Kraisde po ola mabo dao.  
\v 29 Tama te sę emainogo eno bomo eyu tama ena sę dene mu ebo dao. Kraisgo enabolo aga genuai bomo menama, tama te bomogo naga eno bomo eyu te sę ebo dao.   
\c 2  
\p
\v 1 Eno homugo dagego tama koneao: eno sę dene eyu, eno dage Kolosi bage dali, te Laodisia hanude bidibo Godigo po odobo we bidi hani dali, te gasa ena gesabidi susiąwai bidi dabe tigidali dali, eno dage dali augwali dali tau sabo sę yai dao.  
\v 2 Magi baso meni. Eno homugo te dage me, augwali me, dage tigidaligo homu kolesaga bomo emainu eyu, tama augwa hasi dwagi yai homu eyu godolo ebo kolesaga ebogo augwali deliba kęą somainogo ebo dao. Tama eno homugo me te augwaligo te Godigo gesi dwagi yai po page sese kuna koneama, tama te konebaso augwaligo tede homu si munu me egobeo. Tama bidiyu, augwali tede te doado bage hauwa elalubo bidi tiwai bugagia bidaibao. Tama tiyu, augwaligo Godigo dualai po page hania koneaibao, te page da te Krais aga digi naga dao.  
\v 3 Aga da te Godigo wiegi yai homu kolesaga dali konebo homu dali si dabolo waselai bidi dao. Te homu kolesaga dali konebo homu dali si polobadu dualalubadi bidai dao, te bidigo umabo wiegi yai doado bage geme dualali tiwai elaluali.   
\p
\v 4 Bidi me deligo dage homu bega somainu ili po ola menama, tama dagego homu polo tulaluidali weyu, eno te po dage Kolosi we bidibolo asęna tolobao. Agai wiegi yai po mu dage ola mani digi, te po ola tagalao.  
\v 5 Magi baso meni. Ena dage dali megi bidibo meni goli, eno homugo dage dali kone palobo dao. Tama dagego Kraisde konealubo po bugagia dąų olama, tama hani deli naga wadoloyu, tama dage homu dila pai we bidi bugagia bidibao. Eno dagede tama konebaso, ena dwagi yai homu pemene ebao.   
\s1 Dago Krais dali kęą selama bidao  
\p
\v 6 Dagego “Awe, Krais Jisas aga dago Genuai Bidi dao,” te po dagego polobadu olama tama aga tama saligo da, teda agai kolesaga eyu aga dali hodobo bidao.  
\v 7 Dagego aga dali wadolama, tama bomo elama aga dali bugagia dąų wao, te ni pedali sele tǫde aba mu peyu dąų olama te ni dąų weyu dolalubo tiwai yao. Tama aga te be dąų wabo tuni ni dali, te be kau ni dali si tiwai dao, tama dage da te be kele ni dabe tiwai elaluyu, tama dage aga dali bugagia dąų weyu bidiąo. Tama tiyu, te bidi Epafrasgo dagebolo ola mani Kraisde konealubo po, te pogo dagebolo bomo momainao, te dagego elalubo bomo genuai usu emainogo yao. Tama bidiyu, tama dagego Godibolo puba hwi po hauwa wao, dagego duga homu te puba hwi pogo pągąnao.   
\p
\v 8 Dage dua dao. Bidi dabe meba augwaligo te tǫde bidigo olo homu kolesaga, te we bidibolo tibo po ola mabo homu kolesaga, augwaligo dagebolo te tobage dwai homu kolesaga ola menama, tama te homu kolesagago dage dąų waidali weyu, dage dua dao. Te tobage homu kolesaga te Kraisgo ola mabeo. Mu menio. Te tobage olo homu kolesaga te bidi dabego polo wąįgo ola mani kolesaga dao, me te tǫ dali dagalu dali si tonalubo dwai genuai mobo bagego ola mani homu kolesaga dao. Te Kraisde sabeo.  
\v 9 Magi baso meni. God aga digi sese mu te Kraisgo tigi tomode bidibo dao, tama Krais aga tiwai mu bidibo dao.  
\v 10 Tama dage aga dali wadolobaso, agai dagebolo te bidabo ula sese mawai dao, tede dage sǫą pogobeo. Krais agai te bomo elaluyu tonalubo sę ebo genuai mobo bidi dabe tigidali aiyaba elaluama, tama aga polalubo bidi dao.   
\p
\v 11 Te me elalubao. Te Juda dabe augwaligo ame nani ogwa tigidali te tigiwali togwai, te Juda hanigo sa augwaligo tigiba tama muani. Tama dage, dage Krais dali wadolobaso, te dagede te Godigo sa mu elalubo dao. Te sa te bidigo nogogo ilali sa meni. Te Kraisgo muani sa dao. Te dagego tigigo dwai sę yabo kolesagago dage dąų wali. Tiali goli Kraisgo te kolesaga pisigina sąyani. Tebogo dageba Kraisgo sa muai dao.  
\v 12 Magi baso meni. Te dagego duga homu begelama tama ąįba dulali sogo, te sogo dage Krais dali hodobo pubulali tiwai yai. Tama te sogo me te dage te ąįdu ma hodaluali sogo, te dage Krais dali hodobo gų pagede ma hodaluali tiwai yai. Aga te isali we bidi tomode osogo bidama tama Godigo aga tedu ma hodolali, agai sę yabo bomogo. Tama dagego te bomode duga homu bugagia dąų obaso, God agai dage me Krais dali hodobo hodolali tiwai yai. \x * \xo 2:12 \xt Rom 6:4\x*  
\v 13 Polobadu dage Juda bidi hani isąwai bage, dagego te Godigo bomo yai po wali pisąyu, dagego te bomo yai po bolama dagego haniani dwai sę iduyu bidai. Tama tibaso dage Godide te isali bidi dabe tiwai bidai dao, dagego aga me konebeo. Tiali goli Godigo dage Krais dali gų pagede ma hodolali tiwai elama, tama bidibo ula menama, tama dage megi bugagia bidibao. Godigo dago yali dwai sę sęgę tigidali mu sela sąwai dao. \x * \xo 2:13 \xt Ef 2:1-5\x*  
\v 14 Dago agai bomo yai po bolama tama dago aga dali dwai genuai negeli elaluali. Te bomo yai asęani pogo da po tų yabo paliali. Tama agai te po tų yao wali po sela sąnama tama te Krais aga te ni pedaide isibogo te bomo yai pogo da po tų yabo sę tigidali silai dao. \x * \xo 2:14 \xt Ef 2:15\x*  
\v 15 Tama te ni pedaide Krais agai aga bomogo te bomo elaluyu tonalubo sę ebo genuai dwai mobo bidi dabego bomo aiyaba elaluama, tama dili eleyu, tama tigidali bidigo gedude te dolali mobo bidi dabe hania waselali.   
\p
\v 16 Krais aga isaligo te da po tų yabo sę silibaso, dagego bidi me deligo dagebolo po weyu dagego tubo naide me, tubo ąįde me te bomo yai po mabo gogolamuo. Te lotu po wabo tedali sa muani sogo dabe dali, te yaluai polua sogode wabo lotu dali, te Sarere deli deli toma tubo sogode me, te sogo tigidalide te bidi me deligo dagebolo bomo yai po mabo gogolamuo. \x * \xo 2:16 \xt Rom 14:1-6\x*  
\v 17 Te tobage bomo yai po tigidali augwaligo sę polobadu elaluali, te dago te nosali asabo bidi asaibao po wabo konemainogo yai. Tama aga asai dao, te Krais dao.  
\v 18 Bidi me deligo agai nade suali nai po weyu, tama dagebolo te po waibao, “Duga digi aiyaba elaluama, ensel mobo bidi dabebolo lotu po wao,” agai te po waibao. Tiali goli agai te tobage po olama, tama dagego homu polo tulaluamuo. Godigo dagebolo nosali maiabo nai hagaidali weyu dagego te bidigo wabo po odogio. Te bidi agai te tǫde homu kolesaga naga eyu, tama hagoma homu genuai eyu aga nogi ugwaba sabo dao. Tiali goli agai po kedu meni yai dao.  
\v 19 Te po wabo bidi agai Krais aga homugo dąų wabo tagalai dao. Krais aga da te tobolu tiwai dao, tama da Godigo po odobo we bidi te tigi tiwai dao. Tama te tobolugo te tigi sese bugagia tonaluyu te dili dabe te kigibiligo deliba bugagia dąų olama, tama nai tulama tama te tigi dwagi yai pedalobo dao. Tama da Godigo po odobo we bidi me te dago tobolu bidi Krais dali tama wadolama, tama Godigo bomo selama da bugagia holobo dao. \x * \xo 2:19 \xt Ef 4:16\x*   
\p
\v 20 Dage Krais dali hodobo isali tiwai yai. Tama tialigo da, teda megi dage te tǫ dali dagalu dali si tonalubo dwai genuai mobo bage dologode me bidibeo. Tama tibaso, magi baso dage tǫde bidi tiwai me bidibawe? Magi baso dagego tǫde bomo yai po dologode bilibawe?  
\v 21 E tobage bomo yai habu selebo po elalubao, “E nai nogogo tugio, u nai tula sugio, te gasa nai nogogo diągio.” Dagego te bomo yai po magi baso odobawe?  
\v 22 Te bomo yai po te naide wabo dao, tiali goli dago te nai tubaso da, te nai mu ela silibo dao. Te tobage bomo yai po dabe, te bidigo naga augwa homugo nigilama tama ola mabo dao.  
\v 23 Mu tama, te tobage tubo naide wabo bomo yai po nigali bidi dabe, augwali gasa we bidigo gedude te mu koneai bage dao. Tiali goli, te meni. Augwaligo bomo elama tama we bidibolo te po wabo dao, “Dagego te ensel mobo bidi dabebolo lotu po wao.” Tama augwaligo tibo po weyu “Ena imilai homu ebo bidi dao,” te po wabo dao. Tama augwaligo te homu ebo dao, “Awe, eno ena tigibolo nai masiąbaso, teda Godigo gedude ena dwagi yai bidi pedalaibao.” Tiali goli augwaligo te bomo yai pode mu geda muani. Te tobage habu selebo kolesaga ebogo augwaligo tigigo bomo elama yainu ebo dwai kolesaga aiyaba elalugobeo. Te menio.   
\c 3  
\ms1 Krais da tomode bidibaso, tama da gesi noma we bidi dabe pedelama bidibao  
\mr (Dąį 3:5–4:18)  
\p
\v 1 Dage Krais dali hodobo gų pagede ma hodaluama tama gesi noma bidabo ula elaluyu bidibao. Tama tialigo da, dagego bomo elama, duga homu te dagalude elalubo naiba muao, tede elalubo nai sabo homu yao. Tede Krais aga tuni bidi duabo saide bidibao, te God aga dolo nogo badu. \x * \xo 3:1 \xt Tib 110:1\x*  
\v 2 Sesemane sogo dagego te Godigo bidibo digide elalubo naide homu dąų wao. Dagego tǫde naiba duga homu mugio.  
\v 3 Magi baso meni. Dage isali ąǫ tiwai yai, tama dagego megi elalubo bidibo ula te Krais dali God pagede geme dulaluyu bidibao.  
\v 4 Krais aga dago bidibo ula page bidi dao. Tama nosali aga e tǫba ma asama hania pedalama, tama dage me aga dali pedalaibao, tama dagego agai ula yai wiegi yai bomo meba elaluaibao.   
\p
\v 5 Dage Kolosi bulude bidibo we bidi, dage Krais dali hodobo gų pagede ma hodaluali ąǫ tiwai ebaso, dagego te duga tigigo ebo dwai kolesaga tigidali isilao, te tǫde kolesaga ebo tagalao. Te tobage kolesaga e dao: dwai penani ebo kolesaga dali, meda yai kolesaga dali, te homu hodolobo dwai sę yabo kolesaga dali, te habu selali nai sabo homu ebo dali, tama doado bage hauwa sainogo godolo ebo kolesaga dali. Te doado bage hauwa sabo kolesaga da, te tibo god selama tama agabolo lotu po weyu aga dologode bidibo kolesaga tiwai dao.  
\v 6 We bidi augwaligo te tobage kolesaga dabe ebaso, te Godigo augwali dali sębę eyu, tama augwalibolo dwai dene mabo sogo mu asaibao.  
\v 7 Polobadu dage te bidi dabe dali bilali, tama dagego te tobage dwai kolesaga tigidali duga digi yai, tama te kolesagago dage aiyaba elaluali.   
\p
\v 8 Tiali goli megi dagego e tobage kolesaga tigidali sela sąyao: boi bidi homu ebo dali, haliga sębę ebo dali, gasa bidi dene mabo homu ebo dali, te nogi posobo dwai po wabo kolesaga dali, tama meda yai po wabo dali, te tigidali sela sąyao.  
\v 9 Dagego duga hasi ama dabe tibo po wabo tagaliąo. Magi baso meni, polobadu dagego tigigo dwai sę yabo kolesaga dologode bidibo dagego tagalalio, tama te tobage dwai kolesaga ebo dagego tagalali. \x * \xo 3:9 \xt Ef 4:22\x*  
\v 10 Tama dagego te gesi noma homu kolesaga selama elalubao. God aga digi te gesi noma bidi nigai, tama dagego aga kuna koneyu, tama aga tiwai mu pedalomainogo, agai dage sesemane sogo tau sabo dao. \x * \xo 3:10 \xt Gag 1:26; Ef 4:24\x*  
\v 11 Tama Godigo tama tibaso, megi aga gedude te we bidi haniani tedali elalubo menio. Te Juda hani isąwai hani dali Juda bidi hani te si tedali gasagi yai meni. Te tigiwali togolama sa elalubo bage dali, te tigiwali togisiąbo bage dali, agai gedude te tedali gasagi yai me menio. Te bulu tomode mu bidibo bidi dabe dali, te bulu yowi tiwai bidibo bage me, te augwaligo sęde dąų olama masigi sisąbo sę ebo bage me, te olo bugagia bidibo we bidi me, Godigo gedude augwali tedali tedali gasagi gasagi yai meni. Te magigo meni. Krais aga digi naga te genuai dao, tama aga te aga we bidi tigidali deli deli tomode bidibao.   
\p
\v 12 Dage da, te Godigo we bidi hani dao. Agai dage dali dwagi yai homu eyu, tama dage godolo ebaso tama dage aga we bidi hani pedalomainogo, agai dage te tigidali we bidi tomodu dią sali. Tama dią sobaso, bidigo aga gesi ugwa dabe gudubo tiwai gilama dagego e dwagi yai kolesaga selama tama yao: dagego we bidi hobede yao, augwalibolo dwagi yai sę naga yao, hagoma homu eyu duga nogi ugwaba sigio. Sesena pai homu egimio, we bidi dali dua dao. Bidigo dage dali dwai sę ebaso da, te dagego sula tagalama sębę polo egimio.  
\v 13 Duga hasi bidi me deligo “Eno ama dwai sę ena dali yali,” te po weyu, tama agai te dwai sę ebaso da, te agai nagame homu eyu aga amago yali dwai sę sęgę sela sąyao. Dago Genuai Bidi Krais agai dagego sęgę sela sąwai dao. Te tiwai gilama duga hasi dagego me abagigo sęgę sela sąyao. \x * \xo 3:13 \xt Ef 4:2, 32\x*  
\v 14 Tama te duga hasi dwagi yai homu eyu godolo ebo kolesaga me te eno megi nogi yali haniani dwagi yai kolesagaba te polalubo kolesaga dąų walao. Te duga hasi dwagi yai homu eyu godolo ebo kolesagago te gasa haniani wiegi yai kolesaga deliba sisinama, tama wiegi yai mu pedalama tama usu niba kadu mu waibao.  
\v 15 Krais agai da dwagi yai homu nagame ilibo kolesaga ebo dao. Tama te kolesagago dagego homu tonalumainao. Magi baso meni. Dage dwagi yai homu nagame eyu bidimainogo God agai dage deli deli i olama tama deliba sisinama, tama dage tigi deli naga tiwai pedalai dao. Tama sesemane sogo dagego Godibolo puba hwi po weyu bidao.  
\v 16 Krais agai ola mani po te wiegi yai po mu naga dao. Tama te po dagego homude bugagia elalumainao. Duga hasi dagego wiegi yai homu kolesagago Kraisgo po ola mayu tama dua dao, e pode geda mugio, te tobage po weyu duga hasi ola mao. Tama tiyu, tama dagego haniani balia po wao, tama te lotu balia wabo buku nogi Tęąbi Po Buku, te bukude elalubo Godigo nogi ugwaba sabo po me, te Kraisgo nogi ugwaba sabo tęąbi po me, te Godigo Mobo Bidigo mabo haniani tęąbi pogo me duga hasi ola mao. Dagego duga homude Godibolo usu da po weyu tama te balia po wao.  
\v 17 Tama tigidali sogo dagego po obadi ma dagego nogogo sę ebadi, te tigidali ebo kolesaga dagego dago Genuai Bidi Jisasgo nogide yao, tama agai dage dali yali sęde dagego dago Aya Godibolo puba hwi po weyu bidao. \x * \xo 3:17 \xt Ef 5:19-20\x*   
\s1 Bede bidibo bagego yabo kolesaga po  
\p
\v 18 Dage bidigo sai we dabe sibi, dage deli deli duga bidi dologode bidiyu agai po odao. Dage dago Genuai Bidi Krais wali pabo we bidibaso tama tiao. \x * \xo 3:18 \xt Ef 5:22; 1 Pi 3:1\x*   
\p
\v 19 We sai bidi dabe, dage deli deligo duga we dali abagi homu eyu aga bugagia tonaluao. Tama sesena pai bidigo kolesaga tiwai naga we dali egio. \x * \xo 3:19 \xt Ef 5:25; 1 Pi 3:7\x*   
\p
\v 20 Wai dabe, dagego duga aya ida sigo wabo nai po tigidali odoyu wali pao. Te dwagi yai kolesaga ebogo te dago Genuai Bidi dwagi yai homu ilibo dao. \x * \xo 3:20 \xt Ef 6:1\x*   
\p
\v 21 Aya dabe, dagego duga wai dabe dali wado po tigidali sogo olamuo, te augwali dwai homu ilibo kolesaga egimio. Dagego augwali dali te tobage kolesaga eyu da, teda augwaligo te sębę sabo homu eyu, tama dwagi yai kolesaga ebo tagalaibao. \x * \xo 3:21 \xt Ef 6:4\x*   
\p
\v 22 Dage sęde dąų olama masigi sisąbo sę ebo bidi dabe, duga tonalubo bidigo po tigidali wali pao. Augwaligo dage dali dwagi yai homu emainu tama augwaligo dage tonalubadi naga dagego duga sę bugagia egimio. Te meni. Tigidali sogo dagego dago Genuai Bidi Krais dali wi eyu aga dologode bidibaso, tama homu mu eyu dagego duga sę bugagia yao.  
\v 23 Tigidali sę dagego ebo, te sę dagego bomo elama yao. Tama dagego duga sę ebadi e homu yao, “Eno e sę ebo, te bidi naga tau siyu ebo menio, te eno e sę ebogo te Genuai Bidi Krais tau sabo dao,” te homu yao.  
\v 24 Tama tiyu dagego koneao, Genuai Bidi agai dage wei ponoyu tama dage aga nai nosali sabo we bidi dabe ilaibao. Te Krais aga da te dagego Genuai Bidi bidi dao, tama dagego sę ebogo aga tau sabo dao.  
\v 25 Tama niwai bidi agai dwai sę ebaso da, teda Godigo aga te yali dwai sęde wei ponaibao. Te nogi elalubo bage da, ma nogi meni yai we bidi da, te magigo meni, Godigo usu ni deligo naga da tigidali usu saibao. \x * \xo 3:25 \xt Bom 10:17; Ef 6:5-9\x*   
\c 4  
\p
\v 1 Dage sę bidi tonalubo bidi, dagego augwali tigidali dali kolesaga deli naga yao, te doloba pai kolesaga naga yao. Koneao, dage me te tonalubo Genuai Bidi elalubao, aga dagalude bidibao. \x * \xo 4:1 \xt Ef 6:9\x*   
\p
\v 2 Dage Kolosi we bidi, dagego Godibolo gedu haluasa po bomo elama oduao, tagaligimio, tama subigila wagimio. Tama tiyu, agabolo puba hwi po wao.  
\v 3 Dagego gedu haluasa po obadi, Godigo da me tau somainogo te po wao, “Aya, nago po, te Kraisde polobadu geme dualali po, te po augwaligo te we bidibolo pusumainogo tų dayao,” dagego te po hanalu wao. Eno gasa we bidibolo agai po pusubaso, augwaligo ena e kalabusiba muai dao.  
\v 4 Tama tibaso, eno agai po page hanilimainogo dagego Godibolo ena tau sao po wao. Agai enabolo te sę mawai dao.   
\p
\v 5 Dage te Godigo obo tomoba asisąwai we bidi dali bidibadi, dagego homugo kone palama tama bugagia bilao, subigila meni. Augwalibolo Godigo po pusubo sunumi dabaso da, teda augwalibolo pusao. \x * \xo 4:5 \xt Ef 5:16\x*  
\v 6 Tama tiyu dagego wabo po sesemane sogo dwagi yai eyu tama augwaligo odai hagede emainu tama pusu yabo po naga wao. Tama bidi mego dage Godigo po pagede po me hanalu obaso da, dagego agabolo bugagia wei ponobo po kuna homu kone palama wei ponao.   
\s1 Polgo te bidi si Tikikus dali Onesimus augwali si te Kolosi haniba tagala palu, siade dao wabo po silagasobo po wai  
\p
\v 7 Tikikus da, te dago aga dali dwagi yai homu eyu godolo ebo ama dao, tama agai dagebolo te enaba pedalali sę po tigidali pusaibao. Agai te ena dali homugo kęą pai bidi dao, tama agai te ena tau sabo dwagi yai sę bidi mu dao, tama da dali deli sę eyu Genuai Bidigo sę ebo bidi dao. \x * \xo 4:7 \xt Tpi 20:4; 2 Ti 4:12\x*  
\v 8 Tikikus agai te da ede bidibo bage te daba pedalali sę po dagebolo omainogo, tama dagego te po odama homu kolesaga bomo emai yainogo eno aga dage bidibo digi tamadi tagala palaibao. \x * \xo 4:8 \xt Ef 6:21-22\x*  
\v 9 Tama Onesimus me aga dali hodobo paibao. Onesimus aga dago dwagi yai homu ebo ama mu dao, te homugo kęą pai bidi dao. Aga Kolosi bidi hani me dao. Tama te bidi Tikikus dali Onesimus sigo da ede bidibo bageba pedalali sę po tigidali dagebolo pusaibao. \x * \xo 4:9 \xt Flm 10-12\x*   
\p
\v 10 Aristarkus, te ena dali Jisasgo sęde kalabus elama bidibo bidi, agai siade dao te po dagebolo e pasgo ola tolobao. Tama Mak, Barnabas aga hai, dage dali agai siade dao te po ola tolobao. Dage bidibo digi aga sabaloyu da, dagego aga bugagia sao, te eno dagebolo polobadu ola tolali po tiwai agade yao. \x * \xo 4:10 \xt Tpi 12:12, 25; 13:13; 15:37-39; 19:29; 27:2; Flm 24\x*  
\v 11 Josua, augwaligo te bidi nogi me Jastas wabo, agai me dagebolo siade dao te po ola tolobao. Aga dali, Aristarkus dali, Mak dali, augwali sela naga te Krais wali pabo Juda bage ede bidiyu tama augwaligo ena dali sę eyu, te Godigo te we bidi tonalubo kolesaga pedalomainogo ebo dao. Te gasa Jisas wali pabo Juda bagego ena te sęde tau sabo meni. Tama te bidi selago ena tau genuai mu sabo dao.   
\p
\v 12 Epafras agai dagebolo siade dao po ola tolobao. Aga me dage hani deli dao, tama aga Krais Jisasgo sę ebo bidi dao. Sesemane sogo agai gedu haluasa po weyu homu dąų olama, tama bomo elama weyu dage tau sabo dao. Agai homugo dage Godigo homu tigidali bugagia wali peyu, tama tede homu si munu me isąyu, tama dage bidi mu pedalama tama bomo elama bugagia dolalumainogo eyu agai gedu haluasa po Godibolo weyu, “Augwali te tiwai pedalomainogo, tau sao,” agai te po wabo dao. \x * \xo 4:12 \xt Kol 1:7; Flm 23\x*  
\v 13 Awe, ena digi eno aga koneama, eno e po agade obao, te agai dage dali, te Laodisia hanu we bidi dali, te Hierapolis hanu we bidi dali, dage tigidali tau somainogo eyu aga sę dene mu ebo dao.   
\p
\v 14 Luk, te dago aga dali dwagi yai homu eyu godolo ebo dokta bidi dao, aga dali Demas augwali sigo dage Kolosi we bidibolo siade dao po ola tolobao. \x * \xo 4:14 \xt 2 Ti 4:10, 11; Flm 24\x*   
\p
\v 15 Dagego eno siade dao wabo po te Laodisia hanude bidibo ama dabe, te Godigo po odobo bage augwalibolo wao. Tama eno te siade dao wabo po te we Nimfa dali, agai beba sisinibo Godigo po odobo we bidi augwalibolo me wao.  
\v 16 Dagego e pas nedelama, tama dagego te Laodisia hanude bidibo Godigo po odobo we bidibolo tolao, augwaligo me e po nedemainogo eyu yao. Tama eno te Laodisia we bidibolo asęna tolali pas po, te dagego me selama nedao.  
\v 17 Tama dagego te bidi Arkipus aga dali e po wao, “Te Genuai Bidigo nago nogoba muani sę sula tagaligio. Nage aga sę ebo bidi bidibaso, te mani sę bugagia silao,” te po Arkipusbolo wao.   
\p
\v 18 Ena Pol da, tama ena digi eno nogogo dagebolo siade dao po asęna tolobao. Dagego ena kalabus bede bidibo te gegeda pigimio.  
\p Eno homugo Godigo olo tau sabo kolesaga dage dali bidao. Te tama dao.