\id 2TI - Dadibi NT [mps] -Papua New Guinea 2001 (DBL 2014) 
\h Polgo Si Wali Pas Timotiba Asęani 
\toc1 Polgo Si Wali Pas Timotiba Asęani 
\toc2 2 Timoti 
\toc3 2 Ti 
\mt1 Polgo Si Wali Pas Timotiba Asęani  
\imt1 Hasia nedebo tau sabo po  
\ip Te Pol te Rom moni hanude kalabus bidibadi agai e pas te gesi pasto bidi Timoti agaba asęna tolali. Polgo koneani, te Efesus hanude te boi bidi dabe augwaligo te Kraisgo po wali pabo we bidi dabebolo mabo dene dali, sęgę dali te genuai mu nosali pedalaibao. Tama agai me koneani, te Kraisgo po wali pabo we bidi hani tomode te tibo po ola mabo bage pedaluyu, tama te gasa we bidigo dwagi yai kolesaga ebo dolobo sę yaibao. Tama koneyu, tama Polgo te Timoti homu hodolobo tau sabo po asęani, te Timotigo te aga te we bidi tonalubo sę bugagia emainogo yai. Tama Polgo homugo te Timoti aga Romba asao, te po wali. Magi baso meni, Polgo koneani, aga digi isabo sogo pąba yagasai dao.  
\c 1  
\ms1 Te bidi Timotigo sę bomo elama ebaso, te sę bidi mu nogi te God gedude elalueibao  
\mr (Dąį 1–4)  
\p
\v 1 Ena Pol dao, ena Krais Jisasgo po sela pabo sę bidi dao. God aga homugo digi ena te sęba muani. Da te Krais Jisas dali wadolobaso da, teda Godigo te bidibo ula dabolo mawaibao. Agai te ula mabo po mu dąų walali. Tama agai ena te po we bidibolo pusigi pomainogo agai ena tagala palai dao.  
\v 2 Timoti, eno nage dali dwagi yai homu eyu godolo ebo dao, nage eno ogwa mu tiwai dao, tama eno e pas nagebolo asęna tolobao. Eno homugo God Aya dali, dago Genuai Bidi Krais Jisas dali sigo, te olo tau sabo wiegi yai kolesagago te nage homu dene eyu tau selama, tama nago homu dua nagame ilama bidimainao.   
\s1 Dago te Godigo po dali hale me elamuo  
\p
\v 3 Te eno wąį dabego Godigo kolesaga wali pali, te tiwai naga gilama eno me wali pobao. Tama eno te dwai sę dali dwagi yai sę dali dagalabo homugo kone paluyu, eno te ebo kolesaga te dolo mu ebo homu ebao. Tama eno gedu haluasa po wabo, te eno hulide me giligade me obao, sesemane sogo te eno nage homugo koneama te Godibolo buba hwi weyu, te nage usu da po agabolo wabo dao.  
\v 4 Te eno nage Efesus bulude tagalali sogo te nago homu dene ebaso nago gedude ąį gelali. Tama tede eno homu ebaso, tama eno homugo eno dwagi yai homu pemene yainogo eyu, eno nage suabo homu godolo mu ebao.  
\v 5 Eno te nago Kraisde konealubo po naga homugo dąų mu wali kolesagaba homu kone palama, te nago te tibo menio. Te tobage konealubo po tiwai hasia te naga auwa mosi Loisgo me, te naga ida Yunisgo konealubo po dąų wabo kolesaga me te tiwai elaluai. Tama eno mu koneani, homu si meni, te tiwai konealubo po te nagede me elalubo dao. \x * \xo 1:5 \xt Tpi 16:1\x*  
\v 6 Tama tibaso eno nago homu hodolabo po megi nagebolo obao. Te Godigo nagebolo te nago yabo sę me, te sę yabo bomo dali, homu kolesaga dali si te nagebolo olo mawai dao. Tama te nagebolo mani nai te nago homugo kone palao. Polobadu eno nogo nago toboluba mubaso tama nago te nai sai. Megi nago te sali nai ma hodolobo sę yao, te bidigo sia bogoli genuai emainu ponobo tiwai ilao.  
\v 7 Magi baso meni, te Godigo da te wi ebo bage bidimainu aga Mobo Bidi dabolo me mabeo. Menio. Agai Mobo Bidigo dabolo te bomo hauwa me, te dena ama dede dali dwagi yai homu eyu godolo ebo kolesaga me, te dena digi bugagia tonaluabo bomo me, te dabolo momainogo eyu, Godigo aga Mobo Bidi dabolo mani.   
\p
\v 8 Tama tibaso, nago te dago Genuai Bidi Jisas da, te Godigo sa muani te we bidi tau somainogo tagala palali bidi Krais dao, te po te we bidibolo pusubo te hale me egio. Tama eno te po we bidi meba augwalibolo pusubaso, augwaligo ena kalabusiba muani. Tiali goli nago enade me hale me elamuo. Menio. Nago bomo te Godide selama, tama ena dali te Kraisde wiegi yai gesi po pusubo sęde sęgę tolao.  
\v 9 Godigo da ma dobola selama, tama da aga we bidi mu bidimainu agai da i wali. Agai te dago dwagi yai kolesaga ebaso, te homu elama tama i me wabeo. Menio. Te aga homugo digi te agai da olo mu tau sabo dwagi yai kolesaga elama tama da i wali. Polobadu mu, Godigo te tǫ dali dagalu dali nigisiąbadi, tama te Krais Jisasgo yabo sęde koneama agai te olo mu tau sabo wiegi yai kolesaga dabolo mawai dao.  
\v 10 Tama megi e sogo Krais Jisas, te da ma sali bidi, aga te hanilama pedalalio. Tama tedu te Godigo olo mu tau sabo wiegi yai kolesaga te hania pedalali. Krais Jisasgo te isibo kolesagago bomo togolama, tama te agai ola mani gesi wiegi yai pogo te dwagi yai bidibo ula dali, te dolosiąbo gamonabo kolesaga dali te si pedalama, tama te ulaba munama elalubao.   
\p
\v 11 Godigo te wiegi yai gesi po pusubo sęba ena mubaso, tama ena te po pusubo bidi bidiyu, tama ena te Godigo sęba tagala palali sę ebo po ola mabo tisa bidi dao.  
\v 12 Tama tiyu, ena kalabus bidi megi bidiyu, tama te sęgę eno tolobao. Tiali goli, ena tede hale me egobeo. Menio. Ena da, te eno Godiba homu tia pai bidi da weyu, te aga eno konebaso hale egobeo. Tama eno koneani, agai ena nogoba te muani sę te agai mu tonaluyu, tama te sesemane sogo bugagia bidada peyu, te genuai bodolu pedalubo sogoba usu nigi pabo aga usu yaibao, te sę hagagobeo.  
\v 13 Te doloba pai tau sabo po nago eno pedauwalide odali. Te odali po te usu ni tiwai elaluyu, tama te po bugagia wali pao. Tama tiyu, nago konealubo po Krais Jisasba bomo elama dąų weyu, tama aga dali wadolama, tama God dali, we bidi dali dwagi yai homu eyu godolo mu eyu bidao.  
\v 14 Nago te Godigo nagebolo mani dwagi yai po te nago bugagia tonaluao. Tama Godigo Tedali Mobo Bidi te da tomode bidiyu, agai nage te sęde tau saibao.   
\p
\v 15 Timoti, nago koneani, te Esia genuai tǫde bidibo Godigo po odobo bidi augwali tigidaligo ena tagalai dao. Te augwali tomode te bidi si Figelus me Hermogenes si dali, te augwaligo me ena tagalai dao.  
\v 16 Eno homugo te Genuai Bidi Godigo te bidi Onesiforus aga we wai puluba dali homu dene eyu tau sao. Te hauwa sogo Onesiforusgo eno homu dwagi yai bugagia ilai. Tama aga ena kalabus yalide hale me ebeo. Menio.  
\v 17 Aga te e moni hanu Romba asama, tama ena gegagasobo sę dene iduama, tama nosali agai ena sualio.  
\v 18 Te genuai po tų yabo sogode eno homugo te Genuai Bidigo Onesiforus homu dene eyu tau sao. Tama te bidi agai ena te Efesus bulude hauwa sogo tau sali, te naga digi bugagia naga koneai dao.   
\c 2  
\s1 Nage te Krais Jisasgo wiegi yai ami bidi bidao  
\p
\v 1 Timoti, eno ogwa, naga digi sesemane sogo nago te Krais Jisasgo olo mu tau sabo dwagi yai kolesagago te nage bomo momainao.  
\v 2 Tama tiyu, te nago eno pedauwalide odali po, te po te bidi hauwa gedude pusali po tigidali nago odali. Tama te po naga nago te Godigo poba homu kęą pai bidi dabe, augwaligo nogoba te po bugagia muao, te augwaligo me usu elama tama te po gasa Godigo poba homu kęą pai bidi dabebolo nosali ola momainu yao.   
\p
\v 3 Da Godigo po odobo we bidi te da te ami bidi hani tiwai dao, tama Krais Jisas aga da te dago tuni bidi dao. Nage te agai dwagi yai sę ebo ami bidi bididu, tama da gasa ami sę ebo bidi dabe dali hodobo te sęgę dali dene tolobo sę yao.  
\v 4 Te ami sę eyu bidibo bidigo agai te gasa haniani sę dali eyu me egobeo. Menio. Te aga tonalubo genuai ami bidigo agai ebo sęde dwagi yai homu emainu eyu, agai te ami bidigo sę naga ebo dao.  
\v 5 Te bidi geanainu udabo bidi, agai te udabo bomai po bugagia dolo wali pao. Ma te meni eyu da, teda agai te udabo bidigo ugaba ela holobo nogi sabo namba me sogobeo.  
\v 6 Te sę dene elama gi bulama tonalubo bidi da, aga te gasa bidi dabego te gide nai polasa sisąbadi te polasa nai sabo bidi dao.  
\v 7 Timoti, nago eno te wali po digi po begelali po sela homude kone palao. Te Genuai Bidigo nage homu ula ilibaso, tama te po page tigidali nago koneaibao.   
\p
\v 8 Sesemane sogo nago te Jisas Krais homugo koneao. Aga te isąma, te isali bidi bidibo digidu ma hodaluali. Aga te polobadu tuni bidi Devitgo hani bidi bidai. Te eno te Godigo gesi dwagi yai po wabo si, te Krais aga te bidi Devitgo bulai wai dao, te po me eno pusubo dao.  
\v 9 Eno te gesi dwagi yai po pusubaso, tama tede naga te bidi augwaligo ena te gavmango bomo yai po bolali dwai bidi da homu elama, tama augwaligo haniani sęgę enabolo mani. Awe, augwaligo ena kalabusiba me muani. Tiali goli te Godigo po da, augwaligo te kalabusiba me mugobeo, te usu egobeo.  
\v 10 Tama tibaso, eno ena homu dąų walama, tama eno te sęgę tigidali tolobode bomo elama dolalubo dao. Eno te Godigo aga sa muani we bidi tau sainu ebo dao. Eno homugo te Krais Jisasgo yali sęgo te Godigo augwali ma dobola selama, tama dagalude bugagia mu bidada peyu, bidada pomainu ebo dao.  
\v 11 E po eno megi obao te mu po dao, tama bidigo aga homu teba tialubaso, te aga tulalugobeo:  
\q1 “Te mu tama, da Krais dali wadolama tama aga dali  
\q1 isali tiwai yaligo da, teda da me aga dali bidibo  
\q1 ulade bidaibao.   
\q1
\v 12 Te da tigidali sęgę tolobode bomo elama dolaluali  
\q1 da, teda da aga dali tuni bidi me bidaibao.  
\q1 Te dago aga tudiba mubaso da, teda agai me da  
\q1 tudiba muaibao. \x * \xo 2:12 \xt Mat 10:33; Luk 12:9\x*   
\q1
\v 13 Te dago te Kraisba homu begi pabo kolesaga  
\q1 tagaliyu da, teda agai aga doloba pai kolesaga  
\q1 tagalogobeo.  
\q1 Agai te aga doloba pai kolesaga te munu me  
\q1 hasegelegobeo. Mu menio.”   
\s1 Te sę bidi mu nogi te Godigo gedude elaluainogo eyu, te bidi Timotigo sę bomo elama yao wali  
\p
\v 14 Sesemane sogo nago te nago tonalubo we bidi augwali homu te eno megi wali pogo hodolao. Tama God gedude nago augwalibolo te haniani olo pode konila po olamuo po bomo elama wao. Te olo pode konila po wabo kolesagago te bidi me deli tau sabo usu me egobeo. Menio. Te tobage po odobo bidi dabe te doloyu naga ebo dao.  
\v 15 Tialima, te genuai pabo tų bugagia dolo mu nigibo bidi tiwai gilama eyu, tama nago te Godigo mu po dolo augwalibolo ola mao. Tama tiyu, nago naga sęde hale idali weyu, te Godigo nago ebo sęde “Te usu mu dao,” omainogo eyu, tama nago bomo elama, nago sę bugagia yao.  
\v 16 Te kedu meni yai olo po, te Godigo kolesaga wali pisąbo olo po, te tobage po wabo nago ela soao, augwali dali po migio. Te tobage po mibogo te bidi dabego te Godigo kolesaga tagalabo kolesaga genuai ilibo dao.  
\v 17 Te tobage olo po ola mabo bagego po te dwai keni tiwai elama, tama te genuai mu pedaliyu, tama tigi mi tųdu pabo keni tiwai yaibao. Te tobage po ola mabo bidi si te Himeneus de Filetus si dao.  
\v 18 Te bidi si augwaligo te Godigo mu pode geda munama tama tagalali. Tama tiyu, augwaligo te we bidibolo te po ola mabo dao, “Da ma hodaloai dao, tama da isibo si dago tigi nosali ma hodalogobeo.” Te pogo augwaligo te we bidi mebago Kraisde dąų wali konealubo po dolobo dao.  
\v 19 Tiali goli Godigo mu po te bidigo dolobo usu egobeo. Te bomai be tuni ni pos tiwai bulalio, tama te dolalubao, te be peme egobeo. Tama te tuni ni posde hagea siyu asęani po te tiwai elalubao, “Genuai Bidigo aga we bidi digi bugagia koneani.” Tama te po me asęani elalubo, “Te Genuai Bidi nogi nogi eyu ‘Ena aga bidi dao’ po wabo tigidali bidi, augwaligo te dolo isiąwai kolesaga tudiba muao,” te po asęani elalubao.   
\p
\v 20 Te doado bage hauwa elalubo bidigo bede te haniani plet pou elalubo dao. Te plet pou meba augwaligo te wiegi yai kapa si gol me silva, te sigo nigali. Tama te nogi elalubo sogo augwaligo nai tuenu augwaligo te wiegi yai nai naga te tobage wiegi yai pou dabeba mubo dao. Te pou dabe te gasagi yai tedali dao. Tama plet pou meba augwaligo nigo nigali me, tama meba augwaligo te mama tǫgo nigali me elalubao. Te tobage olo pougo te olo sę naga elalubao.  
\v 21 Tama bidi dabe augwali te pou dabe tiwai dao. Bidi me deligo te olo po ola mabo bage tagalama, tama aga te meda meni yai bidali da, teda aga te dwagi yai sę mu ebo pou tiwai bidiyu, te aga tedali gasagi yai sę ebo bidi bidaibao. Magi baso meni, aga magi sę me isąwai bugagia bidibaso agai aga Genuai Bidigo sę ebo usu eyu, tama we bidi tau sabo haniani dwagi yai sę tigidali yabo sisi ilaibao.  
\v 22 Nage gesi bidi dao. Te gesi bidigo dwai sę godolo ebo homu kolesaga nageba pedalubo si, te sesemane sogo nage te kolesaga suyu sali siyu wi pao. Tama tiyu nago te doloba pai kolesaga me, te homu mu ebo kolesaga me, te we bidi dali dwagi yai homu eyu godolo mu ebo kolesaga me, te homu nagame eyu we bidi dali bugagia bidibo kolesaga me, te kolesaga tigidali nago pobasa pao. We bidi meba augwali te meda meni yai homu kolesaga elalu tama te Genuai Bidigo nogi nogi eyu, “Da aga we bidi dao,” te po wabo bage dao. Tama nago augwali dali wadoloyu, tama dagego te eno megi tama nogi yali wiegi yai kolesaga pobasa pao.  
\v 23 Tama te kedu meni yai olo pode konila po wabo te nago tudiba muao. Nago koneani, te tobage pogo te konila po wabo homu hodolobo po page elalubao, tama tede te sębę ebo kolesaga pedalobo dao.  
\v 24 Tiali goli te Genuai Bidigo sę ebo bidigo te munu me pogo hwįnamuo. Menio. Agai te tigidali we bidi dali abagi homu eyu dua digi yao. Aga te Godigo po ola mabo sęde usu eyu wiegi yai tisa bidi bidiyu, tama sębę polo eyu polo wei ponosiąbo bidi bidao.  
\v 25 Te agai ola mabo po sela sąbo bidi dabe dali agai te nagamea pai homu naga eyu, augwaligo homu dodolao. Te agai tama tiyu da, teda Godigo augwali tau siyu, tama augwali homu hasegeleyu tama te mu po bugagia koneabo tų elaluaibao.  
\v 26 Polobadu te Satango agai hagani togobo wago augwali sali, te augwaligo agai po wali pomainu yali. Tiali goli augwaligo te mu po koneyu da, teda augwaligo homu hania ma ula eyu, tama augwaligo te Satango hagani togobo wa wi pabo usu yaibao.   
\c 3  
\s1 Te tǫ de dagalu si silibo sogo te bidi dabe augwaligo dwai kolesaga hauwa pedalaibao  
\p
\v 1 Timoti, nago te tiwai tama koneao: te tǫ de dagalu si silibo sogo te pąba yagasobo si te dwai sę ebo bidi dabe augwaligo dwai sę hauwa ebaso, te Godigo po odobo we bidiba te dwai sęgo kekainu sinabo sogo pedelaibao.  
\v 2 Te bidi dabe augwa digi te augwa naga godolo elama, tama augwaligo te mone ge godolo mu yaibao. Te augwa digi augwa nogi ugwaba siyu, tama subigila hagoma eyu, tama posobo po waibao. Te meba augwaligo aya idago po sela sąwaibao. Te augwaligo buba hwi po te Godibolo me, te gasa we bidibolo me wagobeo. Augwaligo Godigo kolesaga tudiba muaibao.  
\v 3 Te augwa deli kanemede ame nani ama dede dabe dali digi te deliba wasia sogobeo. Gasa bidigo augwali dali yali dwai sę te augwaligo sela sąbo homu munu me egobeo, te homu dene me egobeo. Te geme dualama posobo po subigila waibao. Te meba augwaligo augwa tigigo homu me tonalugobeo. Te augwali sębę eyu subigila bidi dabe dolaibao. Tama augwaligo te tigidali dwagi yai kolesaga dali boi bidi nigaibao.  
\v 4 Te augwaligo augwa abagi dabe te boi bidi nogoba muaibao. Te augwaligo augwa ebo kolesaga osola susuąyu tama bomo elama, tama augwa homu naga polo wali paibao. Te augwa homugo digi te augwali genuai bidi da homu yaibao. Te augwaligo te tigigo te haniani godolo ebo homude te wiegi yai homu pemene eyu, tama augwaligo God godolo homu me egobeo.  
\v 5 Te augwaligo te Godigo po odobo we bidi mu tiwai me sogo bilaibao. Tiali goli augwa homu ugwadu daidu naga tama tiyu, tama Godigo augwaligo kolesaga hasegelabo bomo te augwa tudiba mubo dao. Te tama kolesaga ebo bidi dabe augwalide te nage ibaba kisa selama bidamuo.  
\v 6 Te tama tobage bidi dabe meba te augwali dua digi biliyu, tama te wiegi yai homu kolesaga meni yai we dabego be tomoba pelama, tama augwaligo augwali homu te kalabus ilibo dao. Te tobage we dabe augwali te dwai sę hauwa elalu, te augwali homude sęgę elalubao. Tama augwaligo homu te haniani naide hodolama, tama augwa homu subigila hogwaiabo homu eyu, tama tebogo augwali te haniani kolesagaba kegebo dao.  
\v 7 Te we dabe augwaligo sesemane sogo augwaligo te ola mabo po odobo sę ebadi, tiali goli augwaligo te Godigo mu po page koneainu ebo usu egobeo.  
\v 8 Polobadu Janes de Jambres te bidi sigo Moses dali boi bidi yali, tama tiwai yali gilama te megi elalubo bidi dabe augwaligo me te Godigo mu po dali boi bidi ebo dao. Te augwaligo homu kolesaga te dolalio, tama augwaligo Kraisde konealubo po dąų wali te tibo naga ebaso, Godigo augwali buluba sąwai dao. \x * \xo 3:8 \xt Sai 7:11\x*  
\v 9 Tiali goli augwaligo te Godigo mu po dali boi bidi ebo kolesaga te we bidi tomode genuai mu me pedalugobeo. Menio. Te tigidali bidigo augwaligo kolesaga te esela pabo bidi dabego ebo kolesaga tiwai ebo sueibao, te tiwai te polobadu te bidi dabego te bidi Janes de Jambres sigo te esela pabo bidigo ebo kolesaga suali tiwai gilama yaibao.   
\s1 Nago Godigo po dąų ola sao  
\p
\v 10 Te gasa bidi dabe augwaligo te tobage dwai sę eyu bidaibao. Tiali goli nage da, nage ena dali biliyu, tama eno te we bidi dabebolo ola mani po te nago koneai. Tama eno kolesaga page tigidali te me nago koneai. Ena e tǫde bidibo sogo eno bomo elama, tama Godigo sę yabo homu ebo me te nago koneai. Nago ena me koneani, eno konealubo po Godiba dąų olama, tama sesemane sogo eno te gasa we bidi dali sębę polo ebeo, te eno sę augwali dali dua yali dao. Eno augwali dali dwagi yai homu eyu, godolo mu ebo kolesaga eyu, tama augwaligo enabolo mani sęgę menama, tama eno bomo elama bididu te sęgę eno bugagia tolobo dao, te me nago koneai. Eno ebo kolesaga tigidali nago koneama, nago wali pabo dao.  
\v 11 Te bidi dabego dwai kolesaga ena dali ebo tigidali te nago koneani, tama tigidali dene ena te bulu Antiokde me, Aikoniamde me, te Listrade me sai. Te tigidali sęgę augwaligo enabolo menama tama eno te sęgę tolobo nago koneanio. Tiali goli Genuai Bidigo ena tau siyu, tama te sęgę tigidali agai sila palali. \x * \xo 3:11 \xt Tpi 13:14-52; 14:1-7, 8-20\x*  
\v 12 Te mu po dao, tigidali bidi te Krais Jisas dali kęą selama, tama Godigo kolesaga wali pabo bidi, teda te boi bidi dabego dwai sę eyu, sęgę augwalibolo me mawaibao.  
\v 13 Tiali goli te dwai bidi dabego me, te tibo po ola mabo bidi dabego me, te bidi dabe augwaligo ebo dwai sę dwasianu gagalama tama genuai pedalaibao. Tama tiyu, augwaligo te tibo po te gasa we bidibolo ola mobadi, te Satango me augwali tibo po ola maduaibao. Tama augwaligo kolesaga te dwai mu pedaluaibao.  
\v 14 Tiali goli, Timoti, nago da, nago te Godigo mu po odama tama bomo elama nago “Te po mu po dao,” te homu te pode yali dao. Tama megi nago te kolesaga me eyu bididuao. Dago nage te mu po ola mani we bidi nago da bugagia konebo dao.  
\v 15 Tama e me nago koneani, polobadu nage te dwasianu wai bǫų elalubadi tama nago te tedali gasagi yai wiegi yai bukude po konebo sę gagalama sai. Te tedali bukude pogo te dwagi yai homu kolesaga nagebolo mabo usu yali. Tama nago te dwagi yai homu kolesagago eyu, tama konealubo po Krais Jisasba dąų obaso da, teda Godigo nage ma saibao.  
\v 16 Te Godigo Mobo Bidigo digi te tigidali wiegi yai po bukude asęani bidi dabe tau selama, tama augwaligo te po te bukude asęai dao. Tama te dwagi yai kolesaga dabolo ola mabo sę me, tama dena dwai sę denabolo ola mabo sę me, tama da bilibo kolesaga ma dodolobo sę me, tama dabolo te doloba pai kolesaga ola mabo sę me, te sę tigidali ebode te Godigo bukude asęani po usu dao.  
\v 17 Tama tibaso, da Godigo sę ebo bidi tigidali dago te bukude asęani pode te sę yabo bomo dali, te homu kolesaga dali si selama, tama dago tigidali haniani dwagi yai sę yabo usu elama sisi ilimainu ebo dao.   
\c 4  
\s1 Nago Godigo po mu pusao  
\p
\v 1-2 Timoti, te God de Krais Jisas si gedude eno nagebolo e moni sęgę yai po bomo elama wainogo ebao. Krais Jisas agai te tigidali we bidi, te bidibo ula elalubo bidi badi, te isali bidi dabe dali me po tų eyu dagalaibao. Te aga tǫba ma asiyu, tama tigidali bidi geduba pedalama, tama tuni bidi mu bidaibao. Tama tibaso, eno e sęgę yai po bomo elama nagebolo obao, nago Godigo po mu pusao. Tama te po odainu sisi elalubo bidi dabe ebaso, ma augwali sisi elalusiąbaso me, te homu eyu tagalao, te sesemane sogo nago te Kraisgo po bomo elama pusubo sę yao. Nago te augwali homuba te po eniyu, te augwali homu begelemainu te augwali hodolao. Augwaligo dwai sę ebaso, tama nago te pogo te dwai sę tagalabo po augwalibolo pusao. Nago te augwaligo Godigo kolesaga wali pomainu homu hodolao. Tama te tobage haniani sę eyu, sesemane sogo nago augwalide sę dua digi eyu, sębę polo isąyu tama augwali bugagia ola mao.  
\v 3 Magi baso meni, nosali te gasa sogo pedalaibao. Tama te sogo te bidi dabego Godigo mu po ola mabo odobo hagela yaibao. Odogobeo. Menio. Te augwa digi augwa homu kolesaga naga wali peyu, tama augwaligo te po ola mabo tisa bidi hauwa saibao. Augwaligo godolo ebo po odomainogo te bage saibao. Tama te po ola mabo bidi dabe augwaligo te augwali sali we bidi dabebolo Godigo po pusugobeo. Menio. Augwaligo te we bidigo godolo ebo po naga pusaibao. Te we bidi augwaligo olo te dini ebaso, te tibo po ola mabo bidi dabego te augwaligo olo te pogo kieibao.  
\v 4 Tama te we bidi augwaligo te mu po odobo tagaliyu, te tudiba munama, tama te haniani olo namu po waboba olo munama odaibao.  
\v 5 Tiali goli naga digi te polobo bidi tiwai bidisiąyu naga homu sesemane sogo bugagia tonaludao. Tama tiyu nago te sęgę tolao. Nago te bidi dabe augwalibolo te Godigo gesi dwagi yai po pusubo sę yao. Nago te we bidi dabe augwali tau sabo haniani sę elalubaso, te sę nago bugagia mu yao.   
\p
\v 6 Magi baso meni, te ena isąma pabo sogo pąba yagasalio. Nago koneani, te polobadu te bidi dabe augwaligo te wain ąį gelama te Godibolo ofa mabo, te tiwai naga te eno kaneme gelabo sogo pąba yagasali.  
\v 7 Te Kraisde konealubo po dąų wabo bidi te usu si yainogo udabo tiwai sę elalubao. Te usu si yainu ena bugagia udawai dao. Megi da te dąį ilaliba ena mu sabolalio. Eno Kraisde konealubo po homugo dąų mu wai dao, te eno munu me tagalobeo.  
\v 8 Megi da te udabo dąį ilaliba pedalali bidigo genuai nogi yai namba te sisi elama ena tonalubao. Te genuai nogi sabo namba te tiwai yaibao: te Genuai Bidigo ena te doloba pai bidi nogi poaibao. Genuai Bidi aga te doloba pai po tų ebo bidi jas, tama te genuai sogo pedalubode agai te doloba pai bidi nogi enabolo mawaibao. Tama agai enaduba delibolo naga te me magobeo. Menio. Te aga hania pedalubo suainu godolo homu ebo bidi dabe tigidalibolo te doloba pai bidi nogi mawaibao.   
\s1 Po silagasu wabo po  
\p
\v 9 Nage asesą tama nage ena bidibo madi polo asao.  
\v 10 Te bidi Demas agai ena taga palio. Agai te megi tǫde elalubo kolesaga godolo mu elama, tama agai ena tagalama te Tesalonaika hanuba pai. Te Kresens aga te Galesia tǫba pobadi yali, tama te bidi Taitus me te Dalmesia tǫba pai dao. \x * \xo 4:10 \xt 2 Ko 8:23; Gal 2:3; Kol 4:14; Tai 1:4; Flm 24\x*  
\v 11 Luk deli naga ena dali bidibao. Nago te Mak selama, tama odasa nage dali asao. Agai te bugagia te sęde ena tau somainu usu yaibao. \x * \xo 4:11 \xt Tpi 12:12, 25; 13:13; 15:37-39; Kol 4:10, 14; Flm 24\x*  
\v 12 Eno te bidi Tikikus te Efesus hanuba tagala palai dao.  
\v 13 Nage enaba asobadi tama nago te eno kedau sogo gudubo bobage ugwa sela asao. Te ugwa eno te Troas hanude tagalali, te bidi Karpus aga bede munalubao. Tama tede muani buku dabe me sao. Tama bugagia dua mu nago te eno sipsip wali dabego nigali te buku dabe sabo te homu munu me gegeda peyu tagalamu dao. \x * \xo 4:13 \xt Tpi 20:6\x*   
\p
\v 14 Te bidi nogi Aleksander, agai mone ge sabo sę da te haniani nai te aga kapago nigibo bidi, te bidi agai enabolo dwai sę mu ilali. Nosali te Genuai Bidigo agabolo te dwai dene wei ponoyu, te aga yali dwai kolesaga usu nama te dene mawaibao. \x * \xo 4:14 \xt Tib 62:12; Rom 2:6\x*  
\v 15 Nage me nage te bidi Aleksanderde dua dao, bugagia tonaluao. Agai bomo mu elama, tama te dago ola mabo po mu aiyaba elaluainu eyu, tede boi bidi homu yai dao.   
\p
\v 16 Te ena ede Rom hanude bidiyu, tama te hasia sogo eno te po tųde te po wei ponani sogo te bidi me deli ena tau sabo po me wagasobeo. Menio. Tigidali bidi augwaligo ena tagalali. Eno homugo te augwaligo te dwai sę te Godigo homu kone me elamuo, wei ponamuo.  
\v 17 Tiali goli Genuai Bidi aga ena dali bidaluyu, tama enabolo bomo mani. Eno te Godigo po sese pusubo te usu mu emainu, tama te agai po odisąwai hani tigidali augwaligo odomainogo eyu, agai bomo enabolo mani. Tama augwali te bidi ela tubo dwai hasa laion tiwai bidiyu, tama augwaligo ena ela muidali weyu Godigo ena tau selama dwagi yai madiba muanio.  
\v 18 Te augwaligo dwai kolesaga tigidali ena dali yainu ebo, tede te Genuai Bidigo ena tau selama, tama agai ena ma sai hagede eyu, tama ena oda selama, te aga bomo elalubo bulu te dagaluba sese muaibao, aga we bidi tonalubo sę ebo madiba. Te genuai nogi me bomo te agade sesemane sogo mu bidada peyu, bidada pomainao. Mu dao.   
\p
\v 19 Nago eno te siade da wali po te we Prisila dali, aga bidi Akwila si dali me, te Onesiforus me te aga we wai puluba augwalibolo te po wao. \x * \xo 4:19 \xt Tpi 18:2\x*  
\v 20 Te bidi Erastus te Korin hanude me bidibao. Tama Trofimus te gasi elalubaso, tama eno aga te Miletus hanude tagalama bidibao.  
\v 21 Nage asesa polo asiyu, tama te kedau eyu dwai wali asobo sogo asisąbadi nage eba polo sabolao.  
\p Te bidi dabe Yubulus me, te Pudens badi, te Linus me, te we nogi Klodia me, augwaligo te siade dao po nagebolo ola tolobao. Te gasa ede bidibo ama dede dabe tigidaligo me te po ola tolobao.   
\p
\v 22 Eno homugo te dago Genuai Bidi te nage dali bidao. Te agai olo mu tau sabo wiegi yai kolesaga te dage dali bidao. Te tama dao.