\id 2TH - Dadibi NT [mps] -Papua New Guinea 2001 (DBL 2014) 
\h Polgo Si Wali Pas Tesalonaika Dabeba Asęani 
\toc1 Polgo Si Wali Pas Tesalonaika Dabeba Asęani 
\toc2 2 Tesalonaika 
\toc3 2 Te 
\mt1 Polgo Si Wali Pas Tesalonaika Dabeba Asęani  
\imt1 Hasia nedebo tau sabo po  
\ip Te bidi Pol te Korin moni hanude bidibadi tama agai te hasia wali pas deli te Tesalonaika hani we bidibolo asęna tolali. Tama te pas sela pali bidi nosali ma asama, tama agai Polbolo te Tesalonaika bage tomode pedalali sę po wagasali. Bidi mebago geda muyu, tama te Krais aga polo e tǫba ma asai dao po wali, tama te pogo gasa we bidigo homu dolama, tama augwaligo augwa digi tau sabo sę tagalama olo bidali. Te Tesalonaika hanude bidibo Kraisgo po wali pabo we bidi dabego homude subo te tiwai yali. Te Krais ma asobo sogo mena sę mu pedalugowe tama homu yali. Te bidi mebago te po weyu, te Genuai Bidi asabo sogo te pedelalio tama po obaso, te bidi Pol dali Sailas me Timoti, augwali sela bidigo te hani bage augwaligo homu dodolobo po weyu, te si wali pas asęai dao. Polgo te tiwai po weyu, te sogo pedalube dao, wali. Hasia bolo te we bidi dabego dwai hagoma mu eyu, te tobage dwai kolesaga umagi elama bomo yai mu pedelaibao. Tama te bomo yai po bolama sela sąbo bidi me deli pedelama, tama agai Kraisba boi bidi mu yaibao. Tama te sogo te boi bidi dabego te Kraisgo po wali pabo we bidibolo dene dali sęgę dali si mabo po, te me Polgo odali. Tama tibaso, agai e pas asęyu, tama augwali te sęgę side tau sabo po augwalibolo tolali.  
\c 1  
\ms1 Genuai Bidigo side nosali pedelaibao wali  
\mr (Dąį 1–2)  
\p
\v 1 Pol, me Sailas, Timoti, te dago te po dagebolo asęna tolobao. Dage Godigo po odama wali pabo we bidi, te dage Tesalonaika bulude bidibo we bidi dao. Dage dago Aya God me Genuai Bidi Jisas Kraisde wadolama bidibao.  
\v 2 Aya God dali Jisas Krais Genuai Bidi augwali sigo dage olo tau selama, tama dage haliga nagame ilama bugagia bidao, dago homugo tebo dao.   
\s1 Te Tesalonaika bage te sęgę sabo sogo augwali bomo elama dolalu tulalusiąmainogo Polgo Godibolo gedu haluasa po weyu usu da wai  
\p
\v 3 Dago abagi dabe, sesemane sogo dago Godibolo usu da weyu, dago dagede homu kone palu gedu haluasa po wabo dao. Tama dago Godibolo nage usu da po wabo si, te usu si ebo dao. Magi basowe? God agai dage tau selama, tama dagego Jisasde po konealubo kolesaga mu genuai mu yai dao, tama dage deli deligo dwagi yai homu duga abagi dabe dali ebo dao, tama dagego te kolesaga ebo mę ela pabo dao.  
\v 4 Tama tibaso, dago Godide dwagi yai homu ebo dao. Dagego te dwagi yai kolesaga ebo po dago odobaso, tama da gasa buluba biligi peyu, tama dago digi dagego ebo dwagi yai kolesaga te Godigo po wali pabo we bidi augwalibolo pusuyu, dago dagego nogi ugwaba sabo dao. Gasa bidi augwaligo dage dali dwai kolesaga eyu, tama augwaligo dage eleyu, tama dagebolo sęgę mabo dao, te po dago gasa we bidibolo pusubo dao. Tama dago te po wabo dao, ‘Te Tesalonaika we bidi augwaligo tigide sęgę siyu dene sobadi digi, tama augwaligo bomo elama dolaluyu, konealubo po dąų wabo dao,’ dago te po gasa we bidi dali weyu, dago dagego nogi ugwaba sabo dao.   
\s1 God agai dago ebo kolesaga dolo osola subo dao  
\p
\v 5 Te dagego te ebo kolesagade God agai da hania tama ola mobao, agai dago ebo kolesaga osola subo si, tama agai dolo osola subo dao. Tama dagego te God agai we bidi tonalubo sę tobade te dene dali sęgę dali si sai. Gasa bidi dabe augwaligo dagebolo dene dali sęgę dali si mawai. Tama tibaso, God agai dage dali tama tiyu, tama dage agai we bidi hani tomode bidibo usu yaibao.  
\v 6 God agai dolo kolesaga e tama yaibao. Agai dage dali te dwai sę yali boi bidi dali begelama wei siyu, augwalibolo dwai sę hauwa elama, tigi dene mawaibao.  
\v 7 Tama agai dagego megi te tolobo sęgę sela sąnama, tama dage da dali olo bidiyu, toma tuabo sogo menama bidaibao. Agai tebo sogo Genuai Bidi Jisas aga boma pai ensel mobo bidi dabe dali dagalu tagalama, e tǫba asobo te sogo aga moni sia bogoli dali e tǫba asaibao, we bidigo bulu ulade hania sueibao, te aga asobo sogode.  
\v 8 Tama tiwai aselama, tama te sogo God konebo hagela yali we bidi dali, Genuai Bidi Jisasgo po wali pisąwani bidi dali augwalibolo agai dene mawaibao.  
\v 9 Tama te bidi dabe augwali e tama dene saibao, augwali Genuai Bidi gesabidide digibulu bidaibao, tama agai genuai ula dali bomo dali digibulu bidada peyu, bidada paibao, tama tiyu augwali mu dwai bidaibao.  
\v 10 Te we bidi dabe augwali te Jisas e tǫba asobo side augwali te tiwai mu hagawaibao. Tama agai e tǫba asobo sogode, agai doloba pai mu we bidi augwaligo aga nogi ugwaba mu saibao. Tama konealubo po Jisasde dąų wali we bidi, augwali noma siyu, Jisas dali dwagi yai po waibao. Tama dago Godigo po dage tomode pusulama, tama dagego konealubo po te pode dąų obaso, te dagego me augwali dali Genuai Bidigo nogi te sogo ugwaba saibao.   
\s1 Polgo Tesalonaika bulu we bidi tau somainogo Godibolo gedu haluasa po wai  
\p
\v 11 Te dago te Genuai Bidi aga ma asobo sogode homu eyu, tama tigidali sogo dago Godibolo gedu haluasa po dage tau somainogo wabo dao. Tama Godigo dage polobadu i walide, tama agai homugo dage aga wai puluba gagawaibao, agai te homu elama, i wai dao. Tama megi dago Godibolo usu da weyu gedu haluasa po agai dage tau siyu dage aga wai puluba mu gagawaibao. Dago Godibolo po e tama wabo dao, “God, te Tesalonaika we bidi augwaligo konealubo po nagede dąų weyu, tama augwaligo homugo haniani sę te konealubo po dąų wabo bidi dabego ebo sę tiwai yabo homu eyu, tama augwali dwagi yai we bidi nago gedude bidainogo tebo dao. Tama dago nagebolo po hanaluyu, nago augwali tau siyu, tama augwaligo te sę tigidali emainogo tama augwaligo te sę yabo homu tiwai,” dago te tobage po wabo dao.  
\v 12 Tama dagego te dwagi yai kolesaga ebode dago Genuai Bidi Jisasgo nogi dagego ugwaba saibao. Tama dago God dali Genuai Bidi Jisas Krais dali augwali sigo dwagi yai homu da dali eyu, da olo mu tau mabo homu kolesaga dwagi yai mu eyu, tama Jisasgo dagego nogi me ugwaba saibao.   
\c 2  
\s1 Bomo yai po sela sąbo bidi po  
\p
\v 1 Dago abagi dede, dago Genuai Bidi Jisas Krais aga ma asiyu, tama da aga dali deliba sisiniyu ebo, tebode megi dago dage tau sabo po elalubao. \x * \xo 2:1 \xt 1 Te 4:15-17\x*  
\v 2 Bomo elama, dagebolo te po obao, bidi mego dagebolo te Genuai Bidi asabo bodolu te pedalai dao te po obaso, dagego te wabo po odolama, dage polo homu hauwa eyu, dage homu sęgę egio. Bidi mego na eyu, Jisas ma asai dao po te bidigo odali bogo. Ma, bidi mego aga homugo digi te po waliwe? Ma, augwaligo, ‘Woo, Pol agai te Jisas ma asai dao po pasde asęna tolai dao, dabolo,’ tama me augwaligo waliwe?  
\v 3 Jisas ma asobode augwaligo geda muani po dagego odamuo. Te Jisas ma asobo sogo olo dali tama polo pedalogobeo. Te menio. Te sę pedalainogo hasia bolo bidi hauwa augwaligo dwai sę hauwa elama, tama God nogi gegeda peyu, tudiba mu muaibao. Te bomo yai po sela sąbo dwai sę ebo bidi hasia aga bolo dago gesabidiba pedalaibao. Te bidi Godigo te moni sia bulude nosali mu dola silaibao.  
\v 4 Tama te bidi mu dwai bidi mu dao. Tǫde we bidi augwaligo haniani naibolo lotu po wabo dao. Tama te bidi agai te nai tigidali dali boi bidi elama, tama te bidi aga God tiwai mu yaibao. Tama te bidi aga digi aga nogi ugwaba mu siyu, te tigidali lotu po wabo nai aiyaba elalu dolama, tama te bidi aga Godigo Moni Lotu Be tempel tomode bidiyu, tama agai po weyu te po waibao, “Ena digi ena God dao,” te bomo yai po sela sąbo bidi agai te po waibao. \x * \xo 2:4 \xt Dan 11:36; Ese 28:2\x*   
\p
\v 5 Polobadu ena dage dali Tesalonaika bulude bidibadi yaide, eno dagebolo te sę nosali pedalaibao po wai dao.  
\v 6 Tama te bomo yai po sela sąbo bidi aga asobo tų palialubao. Tama te bidi aga Godigo bodolu mani sogo naga bulu ulaba hania pedalaibao, tama dagego te konebao.  
\v 7 Megi te bomo yai po sela sąbo kolesaga e tǫde geme dulalubo digi, aga sę ebo dao. Tama aga geme dulaluama, tama aga te tų palialuali bidi bogia soabo tonalubao.  
\v 8 Tama te tų palialuali bidi bogia solama, tama te sogo naga te bomo yai po sela sąbo bidi hania bulu ulaba pedalaibao. Tama Genuai Bidi Jisas nosali asama, tama agai te bidi agai po wabo mobogo ela muaibao. Tama Genuai Bidi Jisas aga bomo dali ula dali hania pedalama, asaibao. Tama agai te bomo yai ulago te bomo yai po sela sąwani bidi mu dolaibao. \x * \xo 2:8 \xt Ais 11:4\x*  
\v 9 Tiali goli te bidi pedalama, Jisasgo aga ela musiąbadi, te bidi agai Satango genuai bomo selama, tama agai tigidali me me bomai sę me, bidigo isiąwai sę me, bidigo noma sabo tibo sę me, te sę tigidali te bomo yai po sela sąbo bidigo te sogo yaibao. \x * \xo 2:9 \xt Mat 24:24\x*  
\v 10 Tama agai tigidali ili po wabo dwai kolesaga eyu, agai te hagayabo tųdu pabo bidi dabe dali tibo po waibao. Tama te bidi dabe augwaligo te Godigo mu po dago odaio homu egi sogo da, teda God agai augwali ma sigi da. Tiali goli augwaligo te Godigo mu po odobo hagela yai.  
\v 11 Tama tibaso, Godigo augwaligo homu pesegelaibao, tama augwaligo te tibo po wabo mu po dao omainogo yaibao.  
\v 12 Tama elama, Godigo mu po augwaligo homude dąų wasiąyu, tama dwai sę ebo kolesagade dwagi yai homu mu yai we bidi tigidali augwali Godigo po tųde sęgę mu saibao.   
\s1 Godigo dage sa muyu, dage ma saibao  
\p
\v 13-14 Tiali ma, eno abagi dede, megi dage te tobage we bidi menio. Genuai Bidigo dagebolo dwagi yai homu eyu, dage godolo mu ebo dao. Polobadu mu God agai dage sa muyu, dage ma saibao wai. Tama Godigo Mobo Bidi agai dage habu seliyu, ‘Godigo hani dao’ wai. God agai homugo dago Genuai Bidi Jisas Krais agai genuai ula dali bomo dali agai dage dali nosali dobawaibao. Tama te homu eyu, agai dage i wali, dago agai gesi dwagi yai po dagebolo pusali sogo. Tama dagego te mu po dao wai dao, tama God dali, dage dali sigo te tebo kolesagade Godigo dage ma sai. Tama tibaso, sesemane sogo dago gedu haluasa po weyu, dago Godibolo buba hwi weyu nage usu dao po wabo dao.  
\v 15 Abagi dedeo, God agai dagebolo te dwagi yai sę ebaso, dage bomo elama, dago dagebolo pusali po me, pasde asęani po me, te po tigidali mu dąų olama, tama bugagia bidao.   
\p
\v 16-17 Te dago Aya God agai da dali dwagi yai homu eyu, da godolo mu ebo dao. Tama tiyu, agai da olo mu tau siyu, dago homu kolesaga dwagi yai eyu, sesemane sogo bidada paibao. Tama agai da olo mu tau siyu, tama Godigo da nosali bugagia bidimainogo yaibao, da tonaluyu bidibo dao. Tama dago homugo dago Aya God dali, dago Genuai Bidi Jisas Krais dali, augwali sigo dagego homu kolesaga bomo dąų walomainao, tama dage tau sao, dagego tigidali dwagi yai kolesaga eyu, tama dwagi yai po naga omainogo yao. Dago homugo tama timainogo ebao, tama tibaso dago gedu haluasa po obao.   
\c 3  
\ms1 Tesalonaika hani bage augwaligo te sę ebo hagela ebo bidi dabe dodolobo kolesagade po wali  
\mr (Dąį 3)  
\s1 Dagego Godibolo gedu haluasa po da tau somainogo wao  
\p
\v 1 Abagi dedeo, dago po me deli elalubuo. Te po e dao, dagego Godibolo gedu haluasa po da tau somainogo wao. Tama God agai da tau selama, tama dago Genuai Bidi Jisasgo po te tigidali buluba polo sela pelama, we bidi hauwa augwaligo te po odama, tama Genuai Bidigo nogi genuai emainao. Te pogo dage tomode sę polo yali tiwai gilama gasa bulude emainogo, dagego Godibolo po hanalu wao.  
\v 2 Dagego koneai, bidi hauwa augwaligo Godigo dwagi yai po odoyu, homude dąų wabeo. Tama tibaso, te tobage mu dwai sę ebo bidi dabe augwaligo da Godigo po sela pabo bidi dali dwai sę idali weyu, dagego te sęde me Godibolo gedu haluasa po wao.   
\p
\v 3 Awe, we bidi mebago dwagi yai kolesaga mu ebo menio. Tialima, Genuai Bidi Jisas agai da dali dwagi yai kolesaga naga mu ebo dao. Tama tibaso, da we bidi agade homu dąų olama bidibaso, te usu yaibao. Agai dage bomo menama, tama dage tonaluyu, tama dwai haubo bidi Satan agai dage dali dwai kolesaga me egobeo.  
\v 4 Tama me, Genuai Bidigo da ola menama, tama dago dagede te konebao, tigidali kolesaga dago dagebolo yao te po wali, te sę dagego megi me ebo dao, tama nosali me dagego tama naga tiwai sę yaibao.  
\v 5 Dago homugo Genuai Bidi Jisasgo dagego homu kolesaga dodolomainogo yai. Tama agai te sę dage dali eyu, tama dagego Godigo dage dali dwagi yai homu eyu, godolo mu ebo sę page mu koneaibao. Tama agai dagego homu kolesaga dodolama, tama Krais agai moni sęgę tolaluyu, aga bomo elama dolaluali sę page dagego te me mu koneaibao. Tama koneama, dagego te sę tiwai gilama eyu bidao. Dago dage dali te homu eyu, dago Godibolo gedu haluasa po wabo dao.   
\s1 Godigo po wali pabo we bidi tigidali augwaligo sę yao wai  
\p
\v 6 Abagi dede, dago Genuai Bidi Jisas Kraisgo nogide, dago po bomo elama, dagebolo obao, dagego suali abagi agai tubo nai sabo sę ebo hagelayu, olo bidiyu, tama agai dagego dade sali po wali pisąbaso da, dagego te tobage bidi sula tagalao.  
\v 7 Polobadu da dage dali bidibadi, tama da olo bidai menio. Tama dagego koneai, dagego dago yali kolesaga tiwai gilama tama dagego tama tiao.  
\v 8 Tama da dage dali bidibadi dago dagego nogode tubo nai olo me sabe. Menio. Dago abeleyu naga yai. Dago sę bomo elama, tama siade me hulide me te sę dene hauwa mu eyu, tama dago dagebolo naga sęgę maidali weyu tiwai dao, dage habuge idali weyu.  
\v 9 Da da, dagego tubo nai masiąbo bidi menio. Da da, dagego po ola mabo bidi dabe dao. Tama tibaso, dago dagego nai olo sobaso, te usugi da. Tiali goli, te menio. Dago te tubo nai sabo sę ebo dagego suali. Tama dagego dago yali kolesaga wali pomainogo te sę dago yai dao.  
\v 10 Polobadu da dage dali bidibadi, tama dago e bomo yai po dagebolo maiyu tama wai, niwai bidi sę ebo hagelabo homu eyu sę isiąwani te bidibolo tubo nai magio.   
\p
\v 11 Magi baso dago te po waliwe? Dago odali, dage tomode bidi meba tubo nai sabo sę isiąma olo bidibo po dago odalio. Augwaligo sę me ebo menio, tigidali sogo. Augwali olo biliyu, gasa we bidigo ebo sę suyu, tama augwaligo te po ola bilibo dao. Tama dago augwaligo te dwai sę ebo po odama, tama dago dagebolo te nai magio po ma obao.  
\v 12 Te Genuai Bidi Jisas Krais agai nogigo bomogo dago te tobage sę ebo bidi dabe augwalibolo po mobo mayu, bomo elama te po obao, augwali nagame elama, bugagia bidiyu, sę eyu, tama augwa digi nai sela tumainogo yao.   
\p
\v 13 Eno abagi dede, dage dwagi yai sę ebo bage, dagego dolo dwagi yai kolesaga ebo hagela egimio.  
\v 14 Tama niwai bidi me deligo dago megi asęna tolali po tigidali wali pisąbaso da, te bidi dagego sulama, koneao. Tama dage te bidigo ebo kolesaga sulama, sula tagalao, digibulu bidao. Tama aga yali dwai kolesagade hale emainao, aga homu begelemainogo tama tiao.  
\v 15 Tiali ma, dagego homugo aga dali boi bidi yabo homu egimio. Te menio. Dagego homugo dago abagi dao te homu elama, tama dagego agabolo po mobo ola mao.   
\s1 Po silagasu wabo po  
\p
\v 16 Te Genuai Bidi Jisas aga dwagi yai homu nagame ebo page bidi mu dao. Tama dago homugo sesemane sogo aga digi dage dali bidiyu, tama dage dwagi yai homu nagame emainogo yao. Tama dago homugo haniani sę dagebolo pedalubaso da, teda agai dage dwagi yai homu nagame emainogo yao.   
\p
\v 17 Ena Pol ena digi eno te po dage tao olama, asębao. Te eno tigidali pas asębo silagasu, eno tama po naga asębo dao.   
\p
\v 18 Eno homugo Genuai Bidi Jisas Krais agai da olo mu tau sabo dwagi yai kolesaga dage tigidali dali bidao. Te tama dao.