\id 2SA - Dadibi NT [mps] -Papua New Guinea 2001 (DBL 2014) 
\h Profet Samuelgo Po Elalubo Buku Si 
\toc1 Profet Samuelgo Po Elalubo Buku Si 
\toc2 2 Samuel 
\toc3 2 Sam 
\mt1 Profet Samuelgo Po Elalubo Buku Si  
\imt1 Hasia nedebo po  
\ip E bukugo te po pusali te buku 1 Samuelgo po pusai madi nosali pedelai nai dabe po dao. Hasia da te buku si te buku deli elaluai dao. Tiali goli, nosali augwaligo te buku 2 Samuel agaduba tali elalumainogo tagalali. Magi baso meni, te bukude te bidi delide po hauwa pusai baso, te da te king Devit dao. E buku te Devit aga king bidali sogo yali sę po wabo buku dao.  
\ip God te king Devit dali bidai dao. Devit aga te bomai bidi dao, tama agai God mu godolo elama, tama agai te Israel we bidi me godolo mu ebo bidi dao. Agai Godiba homu dąų olama mu elaluai dao, tama te Israel dabego aga godolu mu yai dao. Tiali goli, Devit me tulaluai dao. Agai te aga digi pemene ilabo sę meba me yai dao. Tama nosali profet Natango agai dwai sę dabe ola mabo si, te Devit aga sęgę sela sąnama, homu begeliyu yali.  
\ip Te Israel dabego gedude Devitgo genuai nogi mu elaluali. Te Devit bidama nosali da, te Israel dabe augwali sęgę siyu ebaso da, augwaligo king Devit ma kone palibo dao. Tama augwaligo homu bomo elama, augwali king Devit tiwai me elalumainawe homu ebo dao. Te homu begelama, homu dąų wabo kolesagago te Devitgo Israel hani tomode genuai nogi mu sai dao.  
\c 1  
\s1 Devitgo te Sol isali po odali  
\p
\v 1 Devit te aga ami dabe dali, augwaligo te Amalek dabe dali wąbi hwįani. Augwaligo te Amalek dabe aiyaba elalubo si da, teda augwa te Siklak taunba ma geasa solama, tama si sogo bidali. Te sogo te king Sol isalio.  
\v 2 Tama te sela sogo wabode te gesi ogwa bidi me deli te Siklakba sabolali. Agai te aga ugwa pisilama, tama aga tobolude te tǫ piali, te aga homu dene ebo ola magasiyu tiai. Aga te Devitba pelama, tama kidu sugunama, tama gesabidi tǫba pogulama, Devitba homu dwagi yai ilali. Te bidi te Sol bidali pesage tagalama, asali.  
\v 3 Tama Devitgo agaba te tiwai hanalu wali, “Nage menadu asaliwe?”  
\p Tialima, te ogwa bidigo te po wai, “Te boi bidi dabego te Israel dabe dolobaso, tama ena te bidali pesage taga soyu, tama nageba wi asai dao,” wali.   
\p
\v 4 Tama Devitgo agaba hanalu wali, “Eno homugo nago te hwįani sęde po enabolo pusumainu homu ebao,” wali.  
\p Tama te gesi bidigo te po wali, “Te Israel ami dabe te hwįbaso wi sobadi, tama te Filistia ami dabego te bidi dabe augwali hauwa ela muanio. Tama king Sol dali, te aga ogwa Jonatan me, te augwali si me isalio,” wali.   
\p
\v 5 Tialima, Devitgo agabolo hanalu wali, “Mena tama tilama te Sol de Jonatan si isali, te nago koneaniwe?”   
\p
\v 6 Tama te gesi ogwa bidigo te po wali, “Ena te Gilboa bulu dude bidiyu, tama eno suali, te Solgo aga sesemone te tǫba dodolama, tama aga digi te sesemone enede tialuainu dąų walubo sę eyu tonaluai. Tama me te boi bidi dabe te Sol pąba pabo sę iduali, te karisde dugawali ami dabe, me te hosde dugawali ami bidi dabe, augwaligo te tiwai yali.  
\v 7 Tama Sol begelama, tama ena sulama, te ena i wali. Tama eno te po wali, ‘Awe, genuai bidio,’ wali.  
\v 8 Tama agai enabolo te tama po hanalu wali, ‘Nage mena badu bidi dawe?’ Tama eno te po wai, ‘Ena te Amalek bidi me deli dao,’ walio.  
\v 9 Tialima, agai te tiwai po enabolo wai, ‘Te boi bidi dabego ena doliyu, dwai mu elama, tama pąde ena isainu ebao. Nage polo asu, tama ena silagasao,’ walio.  
\v 10 Eno agai po odobo si da, teda ena aga pąba pelama, tama aga ela muanio, magi baso meni, eno koneani, te aga nogogo tolaluali te sesemone ene tagalu da, te aga tǫba degasa dulubaso da, teda aga mu isaibao wai. Aga isibo si da, teda eno aga tobolude muani te kingo madi me sobadi, te nogode muani nogo mǫ me siyu elama, tama eno sesalio. Genuai bidi, te e doado bage eno nageba mawainu ebao,” te gesi bidigo te po wai. \x * \xo 1:10 \xt 1 Sml 31:1-6; 1 Sto 10:1-6\x*   
\p
\v 11 Devitgo te po odama, tama aga haliga sęgę mu elama, tama aga ugwa pisa yali. Tama aga ami bidi dabego me te tobage deli kolesaga tiwai naga yalio.  
\v 12 Augwaligo te Sol, me Jonatan, me te gasa Israel dabede homu kone paliyu tiali, te augwali Genuai Bidigo hani bage da homu elama, tama augwa te augwalide homu dene ebo gela weyu, tama nai habu selalubadi, te giliga dega sigulali. Magi baso meni, te hwįani madigi te bidi hauwa isai.   
\p
\v 13 Tama Devitgo te gesi ogwa bidiba te tiwai po hanalu wali, “Nage mena badu bulu bidi dawe?”  
\p Tama agai te po wai, “Ena te Amalek bidi deli da, tiali goli polobadu digi eno ayago te Amalek dabego bulu tagalama, Israel tǫ pedaiba gudasa soai dao,” wali.   
\p
\v 14 Tialima, Devitgo agaba ma hanalu wali, “Magi baso yaliwe? Te Genuai Bidigo sa muyu nigilali bidi, te king elibo te nage wi dwasianu me isiąyu yali, agawe?”  
\v 15 Tama Devitgo aga ami bidi me deli i olama, asobo side, tama agabolo te tiwai po walali, “Te bidi ela muao,” wali. Tialima, te Devitgo ami bidigo te bidi te bainat hwągo togolama tama te bidi isalio.  
\v 16 Magi baso meni. Tama Devitgo te Amalek bidibolo tama te po hasia bolo walio, “Te naga digi yali sęgo, te nage isaibao. Naga digi nago te Genuai Bidigo sa muyu nigilali king ela muani po te hanilama pusali dao,” wali.   
\s1 Devitgo te Sol de Jonatan sidehomu dene ebo balia wali  
\p
\v 17 Devitgo te homu dene ebo balia po te Sol de aga ogwa Jonatan side wai dao.  
\v 18 Tama Devitgo te Juda we bidiba te balia po usu somainu ebo po wali. Te baliago nogi te Balia Enesigi poali. Tama augwa te Doloba Pai Bidi Dabego bukude asęani. Devitgo te balia po te tama tiwai wai dao. \x * \xo 1:18 \xt Jos 10:13\x*   
\b  
\q1
\v 19 “Te da Israelgo polaluali bidi dabe  
\q2 te bulu dude isalio.  
\q1 Te dago bomai ami bidi dabe te isali dao.   
\q1
\v 20 Dagego te tiali sę po munu me te Get taunde me,  
\q2 ma te Askelon taun sunumide me pusulamuo.  
\q1 Tiyu, te Filistia dabego we dabego odoyu,  
\q2 tama augwali wiegi yai homu pemene yabuo.  
\q1 Tiyu, te Genuai Bidigo po odisąbo bidigo wegi manigo  
\q2 te augwa bugai haliga mu yabuo.”   
\b  
\q1
\v 21 “Te dago bomai ami bidi dabe  
\q3 te Gilboa bulu dude isalio.  
\q1 Tama te hwįani sabele dabe  
\q3 te bulu du dabede olo munalubo.  
\q1 Tama te Solgo sabele me te olo munalu,  
\q2 tama augwaligo me mubeo.  
\q1 Tama tibaso, eno homugo te hulide  
\q2 tulubo tulubage segeni wę,  
\q2 me tulubage te bulu duba munu ma  
\q3 tulumainu me egobeo.  
\q1 Tama nai me te tǫde munu ma pedalumainu me egobeo.”   
\b  
\q1
\v 22 “Te Jonatango enesigi te nai dwai mu elaluali.  
\q1 Te munu me geda musiąwai.  
\q1 Tama te Solgo bainat hwą te olo me munalubeo. Menio.  
\q1 Te bainat hwągo te bomai ami bidi dabe  
\q2 eliyu, tama te boi bidi dabego kaneme tede  
\q2 pągąnaluai dao.   
\q1
\v 23 Te Israel aga hanigo bidigo te Sol de  
\q2 Jonatan si godolo homu mu eyu yai.  
\q1 Augwali si te wiegi yai bidi mu dao.  
\q1 Te sesemane sogo augwa si bugagia mu  
\q2 kisasa bilama, tama augwa si isali me  
\q3 te kisalubadi isalio.  
\q1 Augwali si te polo asesa mu udayu,  
\q3 te boi bidi dabe pobeasa pali,  
\q1 tama te ba kemodagego te hasa dabe  
\q2 ela tuainu pobebo te aiyaba mu elaluali.  
\q1 Tama augwali sigo bomogo te laiongo  
\q3 bomo aiyaba elaluai dao.”   
\b  
\q1
\v 24 “Dage te Israel we dabe, dagego  
\q2 te Solde homu dene ebo gela waiąo.  
\q1 Agai dageba te sawi yai mama ugwa  
\q3 te gasagi yai mu mani,  
\q2 tama te dage au yabo te tobage  
\q3 gol dabe mawai dao.”   
\b  
\q1
\v 25 “Te bomai ami bidi te hwįbode isalio.  
\q1 Tama Jonatan me isali, tama aga tigi  
\q3 te bulu dude munaluai dao.   
\q1
\v 26 Eno ama, Jonatan, nagede eno homu dene mu ebao.  
\q1 Eno nage godolo mu eyu, tama nago  
\q3 ena me godolo mu yai.  
\q1 Nago godolo ebo homu te bomo mu eyu,  
\q2 tama te wego bidi godolo ebo homu  
\q3 te aiyaba elalualio.   
\q1
\v 27 Te bomai ami bidi dabe te hwįani sogo isiyu,  
\q2 tama te hwįbo genuai bage te dolalio.”  
\b  
\p Devitgo te balia po wai.   
\c 2  
\s1 Devit te Juda dabego king pedelali  
\p
\v 1 Te Sol de Jonatan si isai madi, tama nosali Devitgo Genuai Bidiba te tama po hanalu wali, “Ena pelama, te Juda dabego taun me deliba duagi pelama bidibaso, usu yaibawe?” Tama Genuai Bidigo te po wali, “Nage pao.” Tialima, Devitgo agaba ma hanalu wali, “Te ena mena taunba duagi pelama bidigowe?” Tama Genuai Bidigo agaba te tiwai po wei ponani, “Nage pelama, te Hebron taunba bidigi pao,” wai.   
\p
\v 2 Tama tialima, Devitgo aga we si, te Ahinoam te Jesril bulu we, me te Karmel bulu we Abigel badi selama, tama augwali pelama, te Hebronba bidigi pai. Polobadu u Abigel te Nabalgo we da, tiali goli Nabal isibaso, tama Devitgo aga sali. \x * \xo 2:2 \xt 1 Sml 25:42-43\x*  
\v 3 Devitgo hani bidi te aga sibi dabe dali, augwali te Devit dali pelama, tama augwali te Hebronde bidiyu, tama te Hebron pąde elalubo bulude bidiyu yai.  
\v 4 Tialima, te Juda hani bidi dabe te Hebronba aselama, tama augwaligo te Devit toboluba wel gelama, te augwa king pedalumainu yalio.  
\p Devit te king pedalubo si da, teda agai te tiwai po odali, te Jabes taun bage, te Gilgal tǫ bidi dabego te Sol tigi pubulali po walio. \x * \xo 2:4 \xt 1 Sml 31:11-13\x*  
\v 5 Tama tialima, te aga bidi meba tagala palama, te Jabes dabeba te tama po wagi pomainu yali, “Genuai Bidigo te dage wiegi yai bugagia ilimainao, magi baso meni, dagego wiegi yai homu ebo kolesaga te Solba ola mayu, te duga kingba tiali, tama dagego aga tigi pubulali dao.  
\v 6 Tama megi da, eno homugo te Genuai Bidigo dage bugagia tonalu, tama dage dali sesemane sogo bidimainao. Tama eno me te dageba wiegi yai kolesaga eyu, te dagego wiegi yai kolesaga te Solba yali te wei ponoyu, te tiwai ebo dao.  
\v 7 Mu tama Sol, te dagego king, isalio, tiali goli te Juda hanigo ena te augwa king pedalumainu yai. Tama tibaso, dage bomo elama dolalu, tama dage te magi nai me delide te wi me elamu dao,” wali.   
\s1 Te Israel dabego te Isboset te augwa king sa munama pedelali  
\p
\v 8 Te Filistia dabego te Sol elali sogo, Apner, te Nergo ogwago, te Isboset oda sali, te Solgo ogwa da, tama augwa peyu, te wę Jordan nogelama, tama te taun Mahanaimba sabolai. Apner te Solgo amide te polaluali ofisa bidi dao.  
\v 9 Augwali te Mahanaimde bidalu, tama Apnergo te Isboset te Gileat tǫ, me Aser, me Jesril, me Efraim, me Benjamin, me te Israel tǫ tigidali tǫ gasa badu, te tama bulu bage bidigo king bidi pedalumainu nigilali.  
\v 10 Isbosetgo kibu be bidi sese si, te 40 bidai elalubadi, tama augwaligo aga te king nigilali. Tama aga te king bidali te kibu be si naga bidai. Tiali goli, te Juda hani dabego te Devit wali pelama,  
\v 11 tama aga te augwa king nigilama bidali. Tama aga te Hebron taunde bidali kibu be te 7, te polua a naga, me badu nogo kibisa deli, te tama sogo bidalio.   
\s1 Te Israel dabego te Juda hani dabe dali hwįani  
\p
\v 12 Apner dali te Isbosetgo ami dabe hogodama, augwa te Mahanaim taun taga soyu, tama te Gibeon taunba sabolali.  
\v 13 Tialima, Joap te Devitgo ami bidi dabe dali asiyu, augwali te Gibeon sigi ąį pąba te augwali deliba gesabidi sisinanio. Te Isbosetgo hani te sigi wę sesege e badu bidalu, te Devitgo hani dabe te ąį sesege u badu bidalu yali. Te Joap aga ida te Seruia dao.   
\p
\v 14 Tialima, Apnergo te tiwai po te Joapba hanalu wali, “Te da hwįbo usu si yaibawe? Nago te naga gesi ogwa bidi ami meba tagala palu, tama eno ami bidi meba te tagala palu elama, te augwali dali hwįbo usu somainu inao,” wali. Tama Joapgo te po wali, “Te usu da, dago tama tibo dao.”   
\p
\v 15 Tialima, te Benjamin hanigo te nogo si olama, sągągo si bidi, te Isbosetgo ami bidi dabe, augwali aselama, te Devitgo ami bidi nogo si olama, sągągo si bidi dabe dali te hwįbo ususu si yagasalio. Tama te Devitgo ami bidi deli deligo te Isbosetgo ami bidi deli deli dali tedali hwį hwį palio.  
\v 16 Tama augwali te hwįbo ususu si yali sogo, te deli deli bidigo aga boi bidi te tobolu tola sesa pelama, tama aga boi bidi te tigi me badu te bainat hwągo enani. Tama te bidi sese deli olama, me si me si, te 24 bidi tigidali degasa dulu, tama isalio. Te bidi dabego te tiali pesage bulu nogi poyu, “Te Bainat Dabego Pesage Dao,” wai.  
\v 17 Tama te sogo te genuai wąbi te hani si tomode hodolama, hwįanio. Tama Devitgo hanigo te Apnergo hani, me te Israel hani dabe aiyaba elaluai dao.   
\p
\v 18 Te Devit aga abe Seruiago ogwa sela, te Joap, me Abisai, me Asahel, augwali me te hwįbode bidali. Asahelgo udabo te bulu uni hasago bomo elama, mu udabo te tiwai yai dao.  
\v 19 Tama tialima, te Israel dabe wi tedela pabo side, tama Asahel hogodama, tama te Apner dolo udulama, tama aga pobeasa pali.  
\v 20 Tialima, Apnergo begelama, ma tonobadi, tama te Asahelgo aga pobeasa asobo sę ebo subaso, tama agaba hanalu wali, “Asahel, te nage tama da, agawe?” Tama Asahelgo te po wai, “Awe, ena tama dao.”   
\p
\v 21 Tialima, Apnergo te po wali, “Nago ena me pobeasa aselamuo. Nago te gesi ogwa bidi me deli pobeasa pelama, tama aga pageabi elama, tama agai doado bage dabe sao.” Tiali goli, Asahelgo te Apnergo po me odobeo. Menio. Agai te Apner pobeasa pabo sę idubadi geani.   
\p
\v 22 Tialima, Apnergo agabolo ma wali, “Ena sula tagalao. Nago homugo te eno nage ela mumainu eba, agawe? Tiali goli, te eno nage ela mubaso da, teda ena te nago ama Joap gedude te dwai hale mu yaibao,” wali.   
\p
\v 23 Tiali goli, Asahelgo aga sula me tagalubeo. Tama tialima, Apnergo sesemone ene te tudiba pogolali digi, tama te ene page poa pali tego te Asahel haligade dolama, tama me badu pedelalio. Tama Asahel degasa dulama, tama isalio. Tama te gasa ami bidi dabe te Asahel tigi munalubo pesageba pedelali sogo, te augwali doligi pelama naga tononaluali.   
\p
\v 24 Tiali goli Joap de Abisai sigo Apner pobeasa pali, tama te be pio ebode mu augwali si te bulu du Ama te giliga pedalubo badu te Gia bulu te Gibeonde pabo tǫ wa pai sunumi elalubo te badu pedaiba sabolalio.  
\v 25 Tama augwali sigo suali, te Benjamin hani bidi dabe dali, Apner dali, te dwasianu bulu du bagede deliba ma muna selama, tama hwįainu elaluai.  
\v 26 Te Apnergo augwali si subo si da, agai aba Joapba te tiwai i wali, “Magi yaliwe? Te hwįani siligobe da, agawe? Te kolesagago te daba genuai sęgę maiabo, te nago konesiąyu eba, agawe? Da te deli kaneme dao. Mena sogo te nago te naga bidi dabeba waliyu, te augwaligo da munu me pobeasa pelamuo po waibawe?” wali.   
\p
\v 27 Joapgo te tama wabo po odama, tama agai te tama po wei ponani, “Te Sesemane Sogo Bidada Pabo Godigo nogide, eno mu po nagebolo obao. Nago te tama po me wagi menigi sogo da, te eno hani bidi dabego dage pobeasa pidubadi te do kigamu be posoboba usu nigi pigi dao,” wali.  
\v 28 Joapgo te po ola siminama, tama agai te biugel bu wali, te aga ami bidi dabego te Israel dabe ma pobeasa pidali weyu, paliali. Tama tibaso, te wąbi hwįani silalio.   
\p
\v 29 Apner te aga ami bidi hani dali augwa te bulu tagalama, tama te Jordan odogo malu buluba pali. Tama te hulide augwali te odogo buludu pelama, tama te wę Jordan nogealio. Tama augwali pelama, tama te giliga tomo yagasobadi, te belode augwali te taun Mahanaimba sabolali.   
\p
\v 30 Te Apner aga ami bidi dabe dali pai madi, teda Joapgo aga ami bidi hani dabe sisinama nedali. Tama agai nedalama koneani, te aga ami bidi dabe te 19 bidi isai yalio. Tama Asahel me isai.  
\v 31 Tiali goli, te Devitgo hanigo te Benjamingo hani bidi dabe te 360 bidi elai, te Apnergo hani dabe dao.  
\v 32 Tialima, Joap te aga bidi dabe dali augwa te Asahel tigi sela pelama, te Betlehemba pubaligi pali, te aga ayago gų pageba. Augwaligo aga pubulama da, teda augwali hulide pelama, tama augwali te Hebronba be posobadi sabolalio.   
\c 3  
\nb
\v 1 Te tudi badu nosali side, te Devitgo hanide Solgo hani si tomode te wąbi hwįani sesabi mu elaluali. Tama Devitgo hani te bomo yai mu pedelama, tama augwaligo te Solgo hanigo bomo tamonobo sę mu yalio.   
\s1 Te Devitgo ogwa dabe  
\p
\v 2 Te Devit te Hebronde bidali sogo, agai te ogwa a naga olama, me badu kibisa nogo deli tede ame nani. Augwa nogi dabe te tiwai, te gomunai ogwa aga te Amnon. Te Amnongo ida te Ahinoam, te Jesril bulu we dao.  
\v 3 Te tomo ogwa te Kileap. Te Kileapgo ida te Abigel, te Karmel bulu we. Polobadu Abigel te Nabalgo we da, tiali goli te Nabal isibaso, tama Devitgo aga sali. Te sela wali ogwa te Apsalom. Te Apsalomgo ida te Maka, te king Talmai te Gesur bulu bidigo wegi dao.  
\v 4 Te me si me si wabo ogwa te Adoniya. Te Adoniyago ida te Hagit. Te a naga wali ogwa te Sefatia. Te Sefatiago ida te Abital. Te nogo kibisa ogwa te Itream dao.  
\v 5 Te Itreamgo ida te Ekla. Te tigidali ogomani te Hebronde bidiyu, ame nai dao.   
\s1 Apnergo Devit dali po miai  
\p
\v 6 Te Solgo hani, me te Devitgo hani si tomode hwįbo sę yali sogo, Apner te Solgo hanide genuai bidi pedalubo sę yalio.  
\v 7 Tialima, me sogode Isbosetgo te Apnerbolo te tiwai po kisilama wali, “Nago te eno aya Solgo we me deli dali pagela pialio. Te we aga te Rispa, te Aiago wegi da. Te nago magi baso yaliwe?”   
\p
\v 8 Apnergo te po odama, tama haliga sębę dwai mu elama, tama te po wali, “Nago homugo ena te naga yowi da weyu, wali da, agawe? Tama nago homugo eno te Juda dabe tau sabo sę eba homu eyu wabo, agawe? Menio. Kone palao. Te nago aya, Sol, te king pedelali sogo dąį elama, te megi e sogoba usu niyu, te ena aga wali bilali, tama te aga ama dabe me, abagi dali me, te megi tama me wali bilibao. Tama me, te eno nage te Devitgo selama dolomainu ilibeo. Tiali goli, megi nago te we me deli po enaba kisilibao. Te olo nai naga tiwai dao.  
\v 9-10 Genuai Bidigo te bomai po te Devitba dąų waliyu, agai te Solgo hani dabe sela sąnama tama augwali te Israel king bidilamu da po wai. Tama Genuai Bidigo te po weyu, te agai Devit te Israel me Juda daligo king pedelama, tama Devitgo te tǫ pedai bulu tigidali tonaluaibao, wai. Te Godigo bomai po dąų wali gilama, eno te Devit king pedalumainu tau sisąwani da, teda Godigo ena ela mumainao,” te po wali. \x * \xo 3:9-10 \xt 1 Sml 15:28\x*  
\v 11 Tialima, Isboset te Apnerde wi mu ebaso, tama agai po deli me wabeo.   
\p
\v 12 Tialima, Apnergo Devitba po ola toliyu, te tama po wai, “Dego mu te bulu tǫ pedai tonalueibawe? Eno homugo te nago bomai po me deli ena dali dąų walubaso da, teda eno nage tau siyu, tama te tigidali Israel hani we bidi te nago hani we bidi naga pedelaibao,” te po ola tolali.   
\p
\v 13 Tialima, Devitgo Apnerba te tiwai po ola tolali, “Te nago po wiegi yai dao. Tiali goli, eno homugo te nago sę me deli bolo hasia ebaso da, tama eno te tobage bomai po nage dali dąų waibao. Te sę te tama tiwai. Nago te Mikal, te Solgo wegi, selama, tama aga te enaba ma odasa asao. Te nago tama tisąbaso da, teda nage eno me sugobeo,” wali.  
\v 14 Tama nosali Devitgo te Isbosetba po ola toliyu, tama po wai, “Eno homugo te nago eno we, Mikal, te enaba ma tagala palao. Eno aga te Filistia dabe te bidi sese a naga 100 bidigo gasa tigi waligo abelali. Tama aga te eno we mu tama dao,” wali. \x * \xo 3:14 \xt 1 Sml 18:27\x*   
\p
\v 15 Isbosetgo te po odolama, tama agai te bidi meba te aga bidi Paltielba tagala palama, tama te Mikal sigi pali, te bidi Laisgo ogwa dao.  
\v 16 Tiali goli, te Mikal augwaligo te Devitba ma odasa soabo sogo, Paltiel te Mikal wali peyu, gela wabo sę ela pali. Tialima, augwali te taun Bahunimba sabalubo si, tama Apnergo te Paltielbolo walali, “Nage te naga buluba ma geasa pao,” wai. Tialima, Paltielgo te po odama, tama aga ma geasa palio.   
\p
\v 17 Te augwali Devitba pisąbadi, Apner te Israel polalubo hetman dabeba pelama, tama augwaliba te tiwai po wai, “Odao,” wali. “Hauwa sogo weyu, dagego te Devit duga king pedalumainu homu godolo ebo homu yai dao.  
\v 18 Tialima, megi da, te aga king pedalumainu ebo sogo dao. Dagego te Genuai Bidigo wali po homu kone palao. Agai te tama po wai, ‘Devit te eno sę bidi, tama te eno agabolo te eno we bidi, Israel dabe, te Filistia dabego nogode me, te gasa boi bidi dabe nogode dali, te ma dobola sabo sę mawaiba,’ po wai dao,” Apnergo augwalibolo te po wali.   
\p
\v 19 Tama Apnergo te Benjamingo hani dabe dali me po miani. Tama nosali aga te Hebronba pelama, te Devitba te Benjamingo hani dabego me te Israel dabego yainogo yali sę po te Devitbolo wagi pali.  
\v 20 Tialima, Apnergo te we Mikal selama, tama aga bidi dabe te bidi sese deli bidi dali pelama, te Devit bidibo bulu Hebronba sabolali, tama Devitgo genuai naa te augwaliba ula mani.  
\v 21 Tama nosali Apnergo Devitbolo te tama po wai, “Te ena pelama, tama te Israel tigidali odasa aselama, tama augwali te nage dologode bidabo bomai po dąų walumainu yaibao. Tama nage te tigidali bulu tǫ pedai king bidi pedalu, te nago godolo ebo sę tiwai yagameo,” wali. Tama Devitgo te aga hani dabeba hanilibo po wali, te augwaligo Apnerbolo te dwai sę me elamu da po wai. Tama nosali agai te Apner tagala palama, tama Apner bugagia ma soalio.   
\s1 Joapgo Apner ela muani  
\p
\v 22 Apner te Hebronde osogo bidali sogo, te Joap dali, te Devitgo ami bidi dabe dali, augwali te sogo tede bidisąwai. Augwali te boi bidi dabeba hwįgi pai. Tama dwasianu bidama gana, nosali Devitgo te Apner tagala palama pai madi, te Joapgo hanigo te hwįbode sali hauwa doado dali augwali te Hebronba sabolali.  
\v 23 Tama Joapgo te tama po odali, te Apner, te bidi Nergo ogwa, aga te king Devit suagasali po wai. Tama Devitgo te bidi dabeba habu seliyu, augwaligo te Apner me elamu da po olama, tama Devitgo aga tagala palai.  
\v 24 Tama tialima, Joap pelama, te king sugi pelama, tama agabolo te tiwai po wali, “Augwaligo te tama po walio, Apnergo nage suagasu aselama, tama nago aga olo mu pomainu tagala palali po walio. Magi baso nago tama tialiwe? Nago te kolesaga yali te dolo ebeo.  
\v 25 Te nago Apnergo kolesaga konesiąyu, te tama tiali da, agawe? Aga asali, te agai tibo po naga nageba ola magasali, te nage tau sagasu me ebeo. Menio. Aga asali, te nage pabo bulu tigidali te menaba pabo me, te nago sę ebo tigidali me, te bugagia sula sainu naga yali, te nageba ma aselama, hwįagasainu yali dao,” wai.   
\p
\v 26 Joapgo te po ola silama da, teda aga te Devit tagalama, palio. Tama agai bidi meba tagala palama, te Apner pali wali pobeasa peyu, te agaba hanalu omainu elama, te ma geasa asomainu yai. Tama te bidi dabe te Apner pidubadi, te ulu wę nogi te Sira teba sabolama, tama augwaligo aga ma odasa asai. Tiali goli, Devitgo te Joapgo yali sę te agai me konebeo.  
\v 27 Te Apner aselama, te Hebronba sabolali sogo, Joapgo aga sela pelama, te taun genuai sunumi elalubo pąba doligi pelama, tama aga dali te geme po miainu ebo tiwai gilama yai. Tiali goli, augwali si te sunumide dolaluali sogo, Joapgo te aga pęwadage hwą ge selama, tama Apner te haligade enani, tama Apner isalio. Joapgo Apner elali, te Asahel isali te wei ponani, te Joapgo ama dao.   
\p
\v 28 Nosali augwaligo te sę yali po te Devitba wabo si, tama agai te po wali, “Genuai Bidigo koneani, te eno yali sęde te Apner me isibeo. Tama eno we bidi tigidaligo me, te sęde augwali magi sę me egobeo. Menio. Te Joap agaduba deligo yali sę naga dao.  
\v 29 Tama Genuai Bidigo agade me te we wai sibi tigidalide homu kone palama yaibao, tama aga wąį te nosali pedalubode me, tama Genuai Bidigo te augwaliba dene mawaibao. Eno homugo te Joapgo hani bidi sibi deli delide te tobage gasi nogi gonoria me, oiyabe gasi me, ma augwali te we dabego sę naga emainu me, ma te boi bidi dabego augwali te hwįbo side ela mumainu homu ebo me, ma augwali te sesemane sogo nai nasi eyu, te nai sǫą pomainu homu ebao,” Devitgo te po wai.  
\v 30 Apnergo te Asahel elali, te Joap de Abisai sigo ama, te polobadu te Gibeonde hwįani digi da. Tama tibaso, augwali sigo te augwa si ama isali te wei ponoyu, tama augwali sigo te Apner ela muani.   
\s1 Augwaligo te Apner tigi pubulali  
\p
\v 31-32 Devitgo te Joapbolo me te Joap aga hani dabebolo te tiwai po wali, “Dagego te duga ugwa dabe pisilama, tama homu dene ebo ugwa gudao,” wai. “Tama te pubulabo madiba peyu, dage aga tigi polasa biliyu, dagego Apnerde te homu dene ebo gela wao.” Te Apnergo hani bage augwaligo Apner te Hebronde pubulali. Tama augwaligo te Apnergo tigi tolama, te gų pageba pubaligi pabo sogo, king Devit te augwali pabo wali pai. Tama Devit dali, te we bidi tigidali te gų page pąde dolalu, tama tigidaligo gela bomo elama mu walio.  
\v 33 Tama Devitgo Apnerde homu dene ebo balia te tama wali,  
\b  
\q1 “Apner te esela me pisąwai bidi.  
\q3 Magi baso aga te tiwai isali dawe?   
\q1
\v 34 Augwaligo te aga nogo sągą me dubeo.  
\q1 Augwaligo aga tibo po weyu, usu selama,  
\q2 te aga elali, te nai wi sabo bidi  
\q3 raskol dabego ebo tiwai yalio.”  
\b  
\p Devitgo te balia po ola silama, tama tigidali we bidi dabego te Apnerde gela ma wai.   
\p
\v 35 Te silibo si nosali, te we bidi dabego Devitbolo weyu, te aga nai tuao wali. Tiali goli, aga hagela homu elama, tama aga bomai po dąų weyu, te tama po wai, “Ena te nai munu me tusiąbadi, te giliga dega sigulaibao. Tiali goli, eno homugo te giliga dega sigi pisąbadi, te eno nai tubaso da, teda Godigo ena ela mumainao,” Devitgo te po wali.   
\p
\v 36 Te we bidi dabego kingo te po wabo odobo si da, augwali haliga te wiegi yai pemene mu yali. Tiali goli, te sę deligo naga augwali wiegi yai homu pemene me ilibeo. Menio. Augwa te kingo ebo kolesaga tigidalide te wiegi yai homu pemene yai dao.  
\v 37 Tama te Devitgo we bidigo me, te Israel we bidigo me, te sę dabe te king Devitgo te sogode ebo sulama, tama augwa te tama koneani, te kingo te Nergo ogwa Apner ela muani bidi dali te deli homu me ebe homu yali.   
\p
\v 38 Tama kingo te aga ofisa dabebolo te tiwai po wali, “Odiąo. Te e sogode da Israelgo bomai bidi mu me deli te isali dao.  
\v 39 Te mu tama, Godigo ena sa munama, tama ena te king pedelali. Tiali goli, eno digi eno te Seruiago ogwa sigo yali dwai kolesaga wei ponabo bomo menio. Augwali si te bomo elalubao. God Genuai Bidigo digi te augwaliba dene mayu, te augwa yali dwai kolesaga usu niyu tiaibao,” king Devitgo te po wali.   
\c 4  
\s1 Bidi sigo te Isboset ela muai  
\p
\v 1 Te Solgo ogwa Isbosetgo te tama po odali, augwaligo te Apner te Hebronde ela muani po odali, aga te wi dwai mu elama, tama te tigidali Israel dabe dwai noma mu sai.  
\v 2 Te Isbosetgo ofisa bidi sigo te boi bidi dabe dali hwįgi pabode tonalubo bidi si bidali. Augwa si nogi Bana me Rekap, tama augwali si te Rimongo ogwa si. Rimon te Berot taun bidi me deli da. Te bidi si te Benjamingo hani, magi baso meni, te bidi dabe augwa te Berot taun te Benjamin hanigo taun me deli tiwai nigilai.  
\v 3 Te Berot taun bulu bidi hani bage mu te wi pelama, tama megi da augwali te bulu Gitaimde bidiba, te augwa page bulu me menio wai.   
\p
\v 4 Jonatan, te Solgo ogwago, te ogwa me deli elaluali, aga nogi te Mefiboset. Te Sol me Jonatan isali sogo, te Jesril dabego te Jonatango hani sibiba po ola tolali. Te sogo te Mefibosetgo kibu be a naga elaluali. Augwa te po odobo si da, teda te Mefiboset tonaluali wego te Mefiboset ąųwą selama, wi pali. Tiali goli, aga asesa polo mu udawali digi, tama Mefiboset tulaluama, tama dolama, te sągą dwai pedelali. \x * \xo 4:4 \xt 2 Sml 9:3\x*   
\p
\v 5 Me sogo deli sogode, te ama nami si te Rekap me Bana te Isbosetgo beba pelama, te augwali si giliga tomo yagasobode te agai beba sabolali. Te sogode te Isboset te toma neyu, te aga be habu badu pila mudai.  
\v 6-7 Tama augwali si te wit sainu ebo tiwai gilama eyu, te be tomoba pali. Tiali goli, augwali si te Isbosetgo be habu tomoba pelama, tama aga te bet saide pila mubo suai. Tama augwali sigo aga haligade te hwą gego enama, tama aga ela muani. Tialima, augwali sigo aga mage togolama, tama aga tobolu te augwali si susiąwani bidi dabeba sela pali. Augwali si te hulide te Jordan wę odogo maludu pelama, tama te do da  
\v 8 augwali te Hebronba sabolali. Tama augwali sigo te Isboset tobolu sela peyu, te king Devitba tama agabolo waseligi pai. Tama augwali sigo te tama po kingbolo wali, “King o, suao! Te e da Isbosetgo tobolu da, te naga boi bidi, Solgo ogwa da. Polobadu te Solgo nage elainu usu sesa bilali, tama tialima, te Genuai Bidigo nage tau siyu, te Sol dali, te aga hani ogomani dabe daligo te dwai sę yali kolesaga wei ponani da,” te po wai.   
\p
\v 9 Tiali goli, Devitgo augwali siba te tiwai po wei ponani, “Te Sesemane Sogo Bidibo Genuai Bidigo aga ena te dolabo te tobage sę dabe ma dobola sali. Tama aga nogide, eno dagebolo te tiwai mu po obao.  
\v 10 Te ena Siklakde bidali sogo, te bidi me deli ena bidiboba sabolama, tama te Sol isali po wagasali. Tama agai homugo te eno agai pode wiegi yai homu pemene yaibao homu yali. Tiali goli, menio. Eno te ami bidi dabebolo olama, te augwaligo te bidi aga pageabi elama, tama aga ela muani. Te tiwai yali te agai te po sela asalide te agabolo te eno mone mabo te tiwai yai dao. \x * \xo 4:10 \xt 2 Sml 1:1-16\x*  
\v 11 Tama megi dage sigo te bidi me deli te aga bede pila munubadi, te odolali mu ela muanio. Dage si te dwai bidi si mu. Tama dage sigo homugo te dage si eno gogolama, bidaiba homu eyu, yali da, agawe? Mu menio. Te eno dage sigo dwai kolesaga yali sę wei ponoyu, tama eno dage sigo bidabo ula me mu sia somainu yaibao,” Devitgo te po wali.   
\p
\v 12 Tialima, Devitgo te aga ami bidi dabeba te usu da po weyu, te Rekap de Bana si ela muao po wai. Tama te ami bidi dabego augwali si ela munama, te togolama, peselama, tama augwa nogo sągą gugudama, tama augwa tigi te Hebron pąde elaluali sigi ąį pąde walali. Tiali goli, te ami bidi dabego te Isbosetgo tobolu selama, tama te Apner pubulali gų page te Hebron bulude pubulai dao.   
\c 5  
\s1 Devit te Israel me Juda dali side king pedelali  
\r (1 Sto 11:1-9; 14:1-7)  
\p
\v 1 Te sę dabe elama nosali badu, te tigidali Israel hanigo te Devit Hebronba suagasali. Tama augwa te tama po Devitba wai, “Da tigidali te deli kaneme dao.  
\v 2 Polobadu, Sol te king bidali sogo, tialima naga digi te da Israel ami bidi dabe tonalu, tama augwali te hwįbo madiba odasa peyu yai. Tama Genuai Bidigo nageba weyu, te aga we bidi dabe da tonalubo bidi nage pedelama, tama nage dago king pedelaiba po wai dao,” augwaligo te po wai.   
\p
\v 3 Tama nosali, te tigidali Israel polalubo tobolu bidi dabe aselama, te king Devit bidibo madi te Hebronba sisinagasali. Tama agai te God gedude te bomai po me deli augwali dali dąų wali. Tama augwaligo aga toboluba te wel gelama, te aga Israel king pedalumainu sa muyu nigilali.  
\v 4 Devitgo kibu be te bidi sese deli olama, nogo si, te 30 kibu be elalubadi, tama aga te king pedelali. Tama aga te king sęde bidibadi, te kibu be bidi sese si, te 40 kibu be bidai dao.  
\v 5 Devit te Hebronde king bidibadi, te kibu be 7 olama, te polua nogo a naga olama, me deli tede bidali. Tama aga te Jerusalemde king bidali kibu be te 33 kibu be tama te Israel me Juda dabe dali tonalubo king bidi bidai dao. \x * \xo 5:5 \xt 1 Kin 2:11; 1 Sto 3:4; 29:27\x*   
\p
\v 6 Me sogo deli sogo king Devit te aga ami bidi dali te Jerusalem taun sainu hwįgi pali. Jerusalem te Jebus dabego augwa page bulu da. Te Jebus dabego homugo Devitgo te augwaligo taun sabo usu egobe da homu yai, tama tiyu, augwa te tiwai posobo po Devitba wali, “Dage te dago taun tomoba asainu ebaso, te usu me egobeo. Te gedu widai bidigo me, te sągą dwai bidi dabego, te augwaligo dage asabo sunumi panibaso, te usu yaibao,” wali. \x * \xo 5:6 \xt Jos 15:63; Tob 1:21\x*  
\v 7 Tiali goli, augwaligo po te geda muani, magi baso meni, Devit dali, te aga ami bidi dabe dali, hwįgi pelama, tama te bomai masigigo bagulai obo elaluali taun salio. Te taun nogi Saion, te Jerusalem bulu me badu pedai dao. Tiali goli, nosali te we bidi dabego te tiwai nogi polali, Devitgo Taun da wali.  
\v 8 Tama Devitgo te taun me sisąbadi, hasia bolo agai te aga ami bidi dabebolo te tiwai po wai, “Dago te taun sainogo da, teda da te Jebus dabe augwa hanu tomoba asobo wę dedage nigalidu geme paibao,” wai. “Tama dago te dedage wali pidu genama, tama da te taun tomoba sabolaibao. Tama dago te u gedu widai bidi dabe dali, me te sągą dwai bidi dabe dali hwįaibao. Eno te tobage bidi wei eyu, godolo me ebeo,” wali. Megi da, Devitgo te wali po homude kone elaluama, tama augwa te tiwai po weyu yai, “Te gedu widai bidi me sągą dwai bidi dabe te genuai bidi kingo be tomoba munu me pelamu da,” po wabo dao.   
\p
\v 9 Tama nosali, Devit te Saionba bidigi pelama, tama te taunba te tiwai nogi mawai, Te Devitgo Taun da wali. Tama Devitgo te po wali, tama te sę bidi dabego te taun bagulama, be dabe sę yao po wai. Augwaligo te be dabe sę ebo gagalu, te tǫgo pągąnani bulu me deli odogode te be dabe sę yani.  
\v 10 God, te Tigidali Bomo Elalubo Genuai Bidi, te Devit dali bidali, tama tibaso Devit te bomai king sesemane sogo pedalubo sę iduai dao.   
\p
\v 11 Te king Hiram te Tair taun bidigo te polalubo bidi meba te Devitba tagala palali. Tama agai te wiegi yai ni bǫ tigi dabe me, te be sę ebo kamda bidi me, te masigide sę ebo koneai bidi dabe augwali tagala palama, te king Devitgo genuai be sę emainu yai.  
\v 12 Devitgo te nai dabe te doado bage te agaba sabalubo te tiwai aga sulama, tama koneani, te Genuai Bidigo aga te king mu pedalumainu yai. Tama agai te tama koneani, te Genuai Bidigo te aga we bidi tau sabo homu yali homu yai, tama tiyu, Genuai Bidigo te Israel bulu tǫ pedai te bugagia mu pedalumainu ilibo sę yai dao.   
\p
\v 13 Te Devit Hebronde bidali tagalama, te Jerusalemba aselama, bidagasali sogo, agai te we meba ma siyu, tama agai te we hani si meba ma sai. Tama aga te we dabego te ogomani me wegi mani meba te Jerusalemde bidu ame nani.  
\v 14 Te ogwa dabego nogi te e tiwai elaluali, Samua, me Sobap, me Natan, me Solomon,  
\v 15 me Iphar, me Elisua, me Nefek, me Jafia,  
\v 16 me Elisama, me Eliada, me Elifelet. Te Devitgo ogwa dabego nogi dao.   
\s1 Devitgo te Filistia dabe dali hwįnama, te augwali aiyaba elaluali  
\r (1 Sto 14:8-17)  
\p
\v 17 Te Filistia dabego te tama po odoyu, te Israel dabego te Devit te augwa king bidi nigilali po odobaso, tama te Filistia dabe hogodama, te hwįgi pelama, aga sainu yai. Tiali goli, Devitgo augwaligo te sę yabo koneama, te geme duala sigi pabo bomai pesageba dulama, tede bididuai.  
\v 18 Tama te Filistia dabe aselama, augwali te bulu pesage Refaim odogoba sabolama, tama augwali tede bidaluai.  
\v 19 Tialima, Devitgo Genuai Bidiba te tama po hanalu wali, “Nago homugo eno te Filistia dabeba hwįgi pomainu homu ebawe? Tama ena pobaso da, teda nago ena tau siyu, te augwali aiyaba elalumainu yaibawe?” Tama Genuai Bidigo te tama po agaba wei ponani, “Awe, nage pao. Te augwali nage nogoba eno munama, tama te nago augwali aiyaba mu elalueibao,” wali.   
\p
\v 20 Tialima, Devitgo te Filistia dabe augwaliba hwįgi pelama, tama augwali aiyaba elaluai. Tama agai te tama po wai, “Genuai Bidi te wę bomo asobo tiwai elama, tama eno boi bidi hani dabe pedelama togolali.” Tama tiyu, augwaligo te bulu nogi te tiwai nogi yali, Te Genuai Bidigo Te Hani Togolai Dao.  
\v 21 Te Filistia dabe wi peyu, te augwa tibo god dabe taga pali. Tama Devit dali te aga ami bidi dabego te doado bage selasa palio.   
\p
\v 22 Tiali goli, nosali te Filistia dabe ma geasa aselama, te Refaim bulu odogode bidali.  
\v 23 Tama Devitgo Genuai Bidiba hanalu, te po wali, “Te eno magi yagawe?” Tama Genuai Bidigo te po wei ponoyu, te tiwai po wai, “Dagego augwaliba hwįgi pao, tiali goli dage augwali bidibo dolo si me pelamuo. Dage te augwali tudi badu pelama, tama te ni balsam sili dolalubo pesage badu pelama, te hwįabo sisi elaluiąo,” wali.  
\v 24 “Tama dagego te ni dabe ugwadu daide te hauwa bidi bilibo kilikili wabo tiwai odaibao. Tialima, dagego koneama, ena digi ena te dage Filistia dabe dali hwįgi pabodu te ena polasa paibao. Dagego te tiwai sę ebo po odobo si da, teda dage udayu, te augwaliba hwįgi piąo,” wali.  
\v 25 Tialima, Devitgo te Genuai Bidigo po odama, tama te Israel dabego te Filistia dabe pobeasa pelama, tama augwali dolali, te Geba taunde gagalasa pali, te Geser taunba usu nigi palio.   
\c 6  
\s1 Augwa te Dąų Wali Bomai Po Muani Halobage te Jerusalemba sesai  
\r (1 Sto 13:1-14; 15:25–16:6, 43)  
\p
\v 1 Devitgo te hwįbo bugagia mu koneani bidi dabe ma sisinani. Te Israel ami dabego namba te umabo mu, 30,000 usu nama elaluai.  
\v 2 Tama Devitgo augwali te Juda tǫde elalubo taun Balaba sela pelama, te Godigo Dąų Wali Bomai Po Muani Halobage sigi painu yali. Te halobage augwa nogi eyu, Te Tigidali Bomo Elalubo Genuai Bidigo Halobage da wali. Te halobagede te ensel bidi noma si te ugadu daide elaluali, tama te king bidigo Genuai Bidigo duabo sia tiwai dao. \x * \xo 6:2 \xt Sai 25:22\x*  
\v 3 Tialima, te Devit aga ami dabe dali te Bala taunba sabolama, tama augwali te Abinadapgo dwasianu bulu dude elalubo beba pai. Tama augwa te halobage selama, tama te gesi karis me deliba munama, te augwali dali sela painu yali. Usa me Ahio, te Abinadapgo ogwa sigo, te augwali pabo sogo te karis nogogo dodolubo sę ela piduai. \x * \xo 6:3 \xt 1 Sml 7:1-2\x*  
\v 4 Ahio te karis asobodu te polasa pali.  
\v 5 Tama Devit dali, te tigidali Israel dali, te karis dali peyu, tama augwa te tęąbi po me weyu, te musik wabo sę me yali, te Genuai Bidigo nogi ugwaba siyu tialio. Augwa te ni wuligo nigai habidi, me gita eliyu, tama te haniani musik wabo sę dali yalio.   
\p
\v 6 Tialima, augwali te bidi me deligo tǫ pedaiba sabolali, te bidi Nakon, te augwa te nai wit selama, tama te bo sela sąbo pesageba sabolali. Tama tede te karis kegebo bulmakau dabego te Godigo halobage te hogobeasa dulainu yai. Tama tibaso, Usago nogo mugi pelama, tama te halobage tola sali.  
\v 7 Tama Genuai Bidigo te Usa dali wado eyu, sębę mu yali, magi baso meni, Usago homugo te halobage olo nai da homu eyu, tama agai nogogo tuali. Tama Godigo aga elalima, tama aga te Godigo halobage dolo pąde isalio.   
\p
\v 8 Devitgo te Genuai Bidigo Usade ebo te sę sulama, tama Devitgo sębę homu eyu, wado yali. Tama augwa te pesage nogi eyu, Godigo Te Usa Dene Mani Pesage da wali. Tama megi me te bulu bage bidigo te tiwai nogi udubo dao. \f + \fr 6:8 \ft Te megi e wabo po te da megi bidibo bidide po weyu me wabeo. Menio. Agai te wali po te e buku asęani bidi bidali sogode wali po te wali dao.\f*   
\p
\v 9 Tama megi da, Devitgo te tama po wali, “Magi elama tama, te Genuai Bidigo Dąų Wali Bomai Po Muani Halobage ena dali pelama, bidigi pogowe?” wali.  
\v 10 Tama tibaso, Devitgo te halobage te Devitgo taunba sela pabo hagela homu yali, te Jerusalem, tama aga te Jerusalemba pabo sunumi tagalama, tama te halobage te Get taun bidi me deli, te Obetidomgo beba sela pali.  
\v 11 Tama halobage te Obetidomgo bede munalubadi, te polua sela bidai. Tama te sogo Genuai Bidigo te Obetidom dali te aga hani sibi tigidali te wiegi yai bugagia ilali. \x * \xo 6:11 \xt 1 Sto 26:4-5\x*   
\p
\v 12 Tama nosali, king Devitgo te tama po odali, Genuai Bidigo te Obetidom dali te aga hani sibi me tigidali doado bage te wiegi yai bugagia ilibo po wali, magi baso meni, te halobage augwali dali munaluai. Tama tialima, Devit te Obetidomgo beba pelama, te Godigo halobage te Jerusalemba selasa asainu yai. Tama te we bidi dabe augwa homu wiegi yai pemene mu yai.  
\v 13 Tialima, te bidi dabego te halobage tolama, soabo gagalali. Augwaligo soabo gagalama, dwasianu gana pelama, tama augwali doligi pelama, tama Devitgo te Genuai Bidiba ofa yali. Agai te bulmakau omai me deli dali, te nisali sabi omai bulmakau me deli dali, ofa yalio. Te ofa ebo silama, tama augwali ma pabo gagalalio.  
\v 14 Devitgo te prisgo bebo ugwa me deli gudali, te augwa sawi yai name ugwago nigai. Tama aga tęąbi eyu, tama sasa mano pali, te Genuai Bidigo nogi ugwaba siyu tiai dao.  
\v 15 Tama te tama kolesaga yaligo te Devit dali te tigidali Israelgo te Genuai Bidigo Dąų Wali Bomai Po Muani Halobage te Jerusalemba selasa soali. Augwa wiegi yai homu pemene eyu, tama i weyu, tama te bu wabo nai biugel dali pomono pai dao.   
\p
\v 16 Te halobage augwa te Devitgo taun tomoba sela asali sogo, Mikal, te Solgo wegi, te sigi be windodu aba tonalubadi, tama augwali suali. Tama agai te aga bidi suali, te king Devit, te tęąbi eyu, te sasa mano bilu, te Genuai Bidigo nogi ugwaba sali. Tama Mikalgo Devitgo te tama tebo kolesaga te aga hagela homu yai, tama aga haliga dwai aga dali yalio.   
\p
\v 17 Tialima, augwa te halobage te Devitgo augwa te halobage muainu sę yani ugwa be me deli tomoba te halobage muani. Tama aga te siago tigidali domainu ulubo ofa me, te Genuai Bidi dali deli haliga pedalubo ofa me, yalio.  
\v 18 Augwa te ofa ela silibo si da, teda Devitgo te we bidi dabeba te tiwai po wai, “Te Tigidali Bomo Elalubo Genuai Bidigo te dage wiegi yai bugagia ilimainu yao,” wali.  
\v 19 Tama Devitgo te we bidi tigidali nai mani. Te tigidali we me bidi deli deligo te bret deli me, augwa te siade ulai sipsip kibu mi me, te augwa te siade olali wain wai duani me, te augwa salio. Augwa te selama da, teda augwa pesageba digi ma geasa peyu yai.   
\p
\v 20 Tama Devit aga beba ma pelama, te aga hani sibi wiegi yai ilimainu, te Godiba hanalugi peyu pali. Tama Mikal te bedu buluba dia solama, tama aga dali deliba gesabidi ilama, tama agai te po wali, “Ae, te Israel kingo te aga genuai nogi ola mayu, tama te bugagia sasa mano pali. Tama aga ofisa dabego olo sę ebo we dabego gedude te aga hale gagolobo sę ebo sumainu yalio. Nago te tama tiali, te homu kolesaga meni yai bidigo ebo tiwai yali dao,” te we Mikalgo te po wali. \x * \xo 6:20 \xt 1 Sto 16:43\x*   
\p
\v 21 Tama Devitgo te tiwai po wei ponani, “Eno te sasa mano peyu, te tęąbi yali da, te Genuai Bidigo nogi ugwaba siyu yai. Agai ena sa munama nigilali, te nago aya me hani sibi te hasegeliyu, tama tiali, tama agai ena aga te hani bage dabego tobolu bidi nigilali, te Israel dabede. Tama eno aga genuai nogi mayu, tęąbi mu iduaibao.  
\v 22 Tama ena digi ena nogi aiyaba mu elaluama, tama ena gedude te olo bage tiwai pedalumainu yaibao. Tiali goli, megi nago te po wabo olo sę ebo we dabe, augwaligo te genuai nogi enaba mawaibao,” Devitgo te po wai.  
\v 23 Tama Mikal, Solgo wegi, te aga wai me ame nisąbadi, te aga isibo sogoba usu nani.   
\c 7  
\s1 Profet Natango Godigo te Devit dali dąų wali bomai po te Devitbolo pusa mawai  
\r (1 Sto 17:1-15)  
\p
\v 1 King Devit aga bede bidiyu, tama bugagia dulaluali, magi baso meni, Genuai Bidigo te boi bidi dabego te Israel dabeba hwįagasomainu me ilibeo.  
\v 2 Tama kingo profet Natanbolo te tiwai po wali, “Ena te augwaligo te ni bǫgo sęwai wiegi yai genuai be me delide bidibao, tiali goli te Godigo Dąų Wali Bomai Po Muani Halobage te ugwa bede naga munalubao. Te dolo meni da, homu ebao,” wali.   
\p
\v 3 Tialima, profet Natango te tiwai po Devitba wali, “Genuai Bidi nage dali bidibao, tama tiyu, nago magi sę me deli yainogo homu ebaso da, nago te sę naga yao,” wali.   
\p
\v 4 Tiali goli, te sogo hulide Genuai Bidigo Natanbolo te tiwai po wali,  
\v 5 “Eno sę bidi Devitba nage pelama, tama eno te po agabolo pusa magi pao. Te po wao, ‘Devit, nage te bidi eno sa muyu, eno te be sę emainu yali bidi nage menio.  
\v 6 Ena te genuai bede munu me bidibeo. Menio. Te Israel dabe eno te Isip dabede dobola selama, te augwali ma odasa asali sogo, ena te ugwa bede naga bidali. Tama te tigidali pedai badu ena peyu, asu yali, ena te ugwa bede naga bidiyu ebo dao.  
\v 7 Ena te dage Israel dabe dali te bulu pedai hauwa badu bilali, tama eno te dage tonalumainu nigilali te tobolu bidi dabe me delibolo eno te tiwai po me hanalu, te tama tiwai po me wasiąwai, “Magi baso te nago eno be me deli te ni bǫgo me sę ebe dawe?” eno te po wabe,’ te po Devitbolo wao,” Genuai Bidigo Natanbolo te po wai.   
\p
\v 8 Tama God Genuai Bidigo te po Natanbolo ma weyu, tama po wali, “Te eno sę bidi, Devitbolo, te tiwai po wao,” wali. “‘Ena, Te Tigidali Bomo Elalubo Genuai Bidi, eno nage te sipsip tonalubo sę ebo bidi bidibadi selama, tama eno nage sa muyu, te eno hani bage bidi, te Israel dabego tobolu bidi pedalumainu yai dao.  
\v 9 Ena te nage dali bidiyu, te nage pabo tigidali tǫ pedaide te ena bilai dao. Tama eno te nago boi bidi dabe aiyaba elalu yai dao. Tama eno nageba te genuai nogi mawainu yali, te gasa bulu tǫ pedai te bulu tonalubo bomai bidi tiwai pedalumainu yai.  
\v 10-11 Eno dage Israel dabego tǫ me deli sa muani, te ena we bidi dabe, tama eno dage te duga bulu tǫ pedaide bugagia bidimainu ilali. Tama te dwai boi bidi dabego dage me doloyu me egobeo. Polobadu digi te boi bidi dabego dage dolali. Te wąį nǫų dabego te tǫ sagasobo gagalali sogo, tama te eno dagego tobolu bidi nigilama mani sogo, te boi bidi dabego dage dolobo sę iduali. Tiali goli, megi da, te eno augwali paniama, tama te augwaligo nage me, te nago bulu tǫ me, te me dologobeo. Tama eno nago hani bidi bidimainu elama, tama augwaligo te nago wąį nǫų wai dabe te ame nomainu yaibao.’”   
\p
\v 12 “‘Te nage isibode te augwaligo nage pubalubo sogo, teda te eno nago ogwa me deli te king pedalumainu ilama, tama aga te bomai king pedelama, tama eno te magi nai me deligo aga aiyaba elalumainu me egobeo.  
\v 13 Te kingo naga te eno be sę emainu yaibao, te eno we bidi dabe augwali ena pąba asomainu emainao. Tama te eno aga hani bidi dabede naga te sesemane bidada pabo sogo king bidi pedalumainu ilaibao.  
\v 14 Tama ena te aga aya bidiyu, tama aga te eno wai bidiyu yaibao. Te agai dwai kolesaga ebo sogo, te eno agaba dene mabo sę eyu, te ayago aga waibolo ebo sę tiwai yaibao. \x * \xo 7:14 \xt 2 Ko 6:18; Hib 1:5\x*  
\v 15 Tiali goli, eno aga godolo mu eyu, te olo tau sabo wiegi yai kolesaga agaba sesemane sogo yaibao. Te eno aga tudiba me musiąyu, te eno te Solba yali sę tiwai eyu, te eno aga sela sąwani sogo, tama te nago agai bidali pesage sali gilama te tiwai me egobeo.  
\v 16 Te nago hani da, te me sia sogobeo. Tama eno te nago hani bidi dabede te king sesemane sogo pedalumainu ilaibao,’ nago te po Devitbolo pusigi pao,” God Genuai Bidigo te po Natanbolo wali.   
\p
\v 17 Tama Natango Genuai Bidigo te wali po dabe odama da, teda tama aga pelama, te Genuai Bidigo te agaba ola mani po dabe tigidali te Devitba wagi palio.   
\s1 Devitgo gedu haluasa po Genuai Bidiba wali  
\r (1 Sto 17:16-27)  
\p
\v 18 King Devitgo Godigo te wali po dabe oda silama da, teda aga te Genuai Bidigo ugwa be tomoba pelama, tama te Genuai Bidigo geduba duagi pelama, tama te tiwai gedu haluasa po wali, “Tigidali Nai Tonalubo God, Genuai Bidi, nago wiegi yai kolesaga hauwa enaba yali. Tiali goli, ena dali, te ena hani sibi dabe, da de dawe? Da te nogi meni yai bage naga dao. Da wiegi yai baso tama nago te tiwai sę me ebeo.  
\v 19 Tigidali Nai Tonalubo God, Genuai Bidi, nago te wiegi yai kolesaga dabe enabolo yali te usu meni da homu elama, tama megi nago gasa kolesaga yabo sę po enabolo ma walio. Nago te eno wąį nǫų hani dabeba yabo sę po te enabolo pusali. Genuai Bidi, ena olo bidi gagawai da. Tiali goli, nago enabolo te nago yabo sę dabe po ola manio. Nago te da we bidi dali te tiwai kolesaga ebo dawe?”   
\p
\v 20 “Tama tialima, Tigidali Nai Tonalubo Genuai Bidi, te eno mena po me nageba wagawe? Ena naga sę bidi, tama nago ena koneanio.  
\v 21 Te nago te genuai sę dabe te naga homugo digi yali. Tama megi te nago enabolo te po pusa mani, te naga kolesaga digi ena ola mani.”   
\p
\v 22 “Tigidali Nai Tonalubo God, Genuai Bidi, nage te polalubo bidi mu bidibao! Te nage tiwai me elalubeo. Nage deli te God mu bidibo, te dago nǫų wąį dabego pedauwalide odali po tiwai odobo dao.  
\v 23 Nago da Israel te Isip dabe nogode kalabus bidibadi ma dobola selama, tama nago da te naga we bidi hani pedalumainu ilali. Tama te gasa we bidi hani te naga we bidi hani bidi da Israel tiwai me bidibawe? Mu menio. Tama nago te tobage wiegi yai genuai sę te da tau siyu, te nago we bidi da te bulu tǫ pedaiba sabolali sogo, te tobage sę dabe yai. Nago te gasa we bidi dabe ela gudulu sela sąnama, tama nago augwaligo tibo god dabe doliyu elama, tama dago augwaligo bulu tǫ sagasali. Tama tialima, te tigidali bulu tǫ pedaide bidali we bidi dabego te nageba genuai nogi mawai dao.  
\v 24 Genuai Bidi, nago da Israel hani we bidi dabe te naga hani we bidi mu pedelama, tama da te tiwai sesemane sogo bidaibao. Tama Genuai Bidi naga digi nage te dago God pedelai dao.”   
\p
\v 25 “God, Genuai Bidi, ena te naga sę bidi, megi eno homugo nago enabolo me te eno haniba dąų walali po te tiwai sę pedaliyu, tama nago te tiwai sę sesemane sogo iduao.  
\v 26 Tama te we bidi dabego nago te tebo sę ebo dabe sulama, tama sesemane sogo augwaligo nage genuai nogi mayu yaibao. Tama augwa te po weyu, ‘Te Tigidali Bomo Elalubo Genuai Bidi te Israel dabego God da,’ po waibao. Tama nago te eno hani bidi dabede naga te sesemane sogo king bidi pedalumainu ilaibao.”   
\p
\v 27 “Genuai Bidi, nage te tigidali bomo elalubo, tama nage te da Israel dabego God. Tama nago enabolo te tama po pusali, nago te eno wąį nǫų hani bidi dabe te bomo sesemane sogo elaluaiba wali. Tama ena, te naga sę bidi, eno te nageba gedu haluasa po wabo wi me egobeo.  
\v 28 Tigidali Nai Tonalubo God, Genuai Bidi, naga digi nage te God, tama nago te po dąų weyu, te yaibao po wali wiegi yai sę tigidali te sę ebo da. Tama nago te wiegi yai sę yabo po ena nago sę bidi dali dąų wali.  
\v 29 Tama eno homugo te nago dąų wali po te homu kone palu, tama nago te eno hani dabe wiegi yai bugagia ilao. Tama te augwali sesemane sogo nage dologode bugagia bidimainu yao. Magi baso meni, Tigidali Nai Tonalubo God, ena naga sę bidi naga bidali goli, nago te tobage wiegi yai sę sesemane ilabo po te eno wąį nǫų dabe dali dąų wabo po wai dao,” Devitgo te po wali.   
\c 8  
\s1 Devitgo te boi bidi dabe aiyaba elaluali  
\r (1 Sto 18:1-17)  
\p
\v 1 Me sogo deli sogo nosali, Devit dali aga ami dabe daligo te Filistia dabe dali wąbi hodolama, hwįani. Augwaligo te Filistia dabe aiyaba elaluali, tama tibaso te Filistia dabego te Israel dabe munu ma tonalubeo.   
\p
\v 2 Tama nosali Devit dali, te aga ami bidi dabe dali pelama, te Moap dabe dali boi hwįgi pelama, tama augwali aiyaba elaluali. Tama agai te Moap dabe te wasilama, te tǫde pimainu ilali. Tama agai te bono baklain me deli selama, tama augwali usu sali. Te bidi dabe te polaluali dąį elalubode bidali me, te si wali dąį ilalide bidali bidi dabebolo, agai te augwali isimaina po wai. Tiali goli te sela wali dąį ilalide bidali bidi dabe, agai te augwali sula tagalalu bidimainu yali. Tama agai te tiwai sę ela pidubadi, te wasilali hani siligi paboba usu nigi pali. Tama te ela musiąwai Moap dabe aga dologode bidiyu, tama agaba te takis mawai.   
\p
\v 3 Tama nosali, Devit dali, te aga ami bidi dali, augwa te Soba tǫ kingba boi hwįgi pali, aga te Hadateser, te Rehopgo ogwa dao. Soba bulu tǫ te Siria hani bage me deligo tǫ pedai elaluai. Te sogo Hadatesergo aga ami bidi dabe selama, tama te wę Yufretis pedai badu pidubo sę elama, te boi bidi dali hwįainu yali, te aga tǫ pedai ma sainu yali. Tama Devitgo hanigo augwali sisinama,  
\v 4 tama te hwįnama, te augwali aiyaba elaluali. Tama Devitgo te Hadatesergo ami bidi dabe hauwa sai. Agai te ami bidi te bidi sese hauwa, 20,000 sali, tama te hosde dualama hwįbo ami dabe te 1,700 bidi sobadi yai. Tama me, Devitgo te hwįbo side te karis dabe kegabo hos dabe te bidi sese a naga, 100 sali. Tiali goli, Devitgo te gasa hos dabego sągą gabulu kigibili dabe dolama, tama augwali te bomo elama bilabo usu meni yai.   
\p
\v 5 Te sogo te Damaskus bulude bidali Siria dabe, augwali hogodama, te king Hadateser dali hwįbo tau sigi pali. Tiali goli, Devit dali, aga ami bidi dabego dali, te Siria ami bidi dabe te bidi sese umabo, te 22,000 bidi ela muani.  
\v 6 Tama Devit aga ami bidi meba te Siria dabego bulu tǫ pedaide muna muna pelama, te augwaligo wąbi ma hwįdali weyu, te tonalumainu muani. Tama te Siria dabe te Devitgo dologode bidiyu, tama augwaligo agaba takis mone mani. Te tigidali bulu tǫ pedaiba Devitgo boi hwįgi pabo side, te Genuai Bidigo aga tau siyu, tama aga ugwaba dįą holali.   
\p
\v 7 Tama Devitgo te Hadatesergo ofisa dabego te golgo nigai hwįbo sabele tolasa asobo suali. Tama agai te wiegi yai sabele dabe selama, tama te sabele dabe te Jerusalemba selasa palio.  
\v 8 Tama me, agai te Beta taunde, me Berotai taun side te bras umabo hauwa sali, te Hadatesergo taun si dao.   
\p
\v 9 Te Hamat bulu tǫ king Toigo te tama tiwai po odali, Devitgo te Hadatesergo ami bidi dabe aiyaba elaluali po odalio.  
\v 10 Tama tialima, Toigo aga ogwa tagala palali, Joram, te king Devitba pelama, te wiegi yai homu iliyu, siade da po wagi peyu, tama Devitgo te Hadateser aiyaba elaluali te wiegi yai homu pemene ilibo po wagi pomainogo tagala palai. Te Devitgo te Hadateser aiyaba elalualide te king Toi aga wiegi yai homu pemene yai, magi baso meni, te hauwa sogo Hadatesergo te Toi dali boi bidi iduali. Tialima, Joram te Devitba aselama, tama agaba te wiegi yai homu ilibo nai dabe magasali, te augwa te silvago, me golgo, me brasgo nigai dao.   
\p
\v 11 Devitgo te wiegi yai homu eyu magasobo nai dabe selama, tama God Genuai Bidiba sa munani. Te agai gasa boi bidi dabe aiyaba elaluama, te sali gol me silvade te tobage kolesaga yali tiwai gilama yalio.  
\v 12 Agai te silva me gol dabe te Idom dabede, me Moapde, me Amon dabede, me Filistia dabede, me Amalek dabede te nai dabe sali, tama te Soba hanu tǫ te king Hadateserde te me sai dao. Agai te tobage sali nai dabe tigidalide te Godigo nai dao po olama, Godiba maduali.   
\p
\v 13 Tama nosali, Devit dali, te aga ami bidi dabe dali pelama, te Tamu Hauwa Elalubo Odogo Bulude bidibo Idom bage dali hwįgi pali. Tama augwaligo te Idom bidi dabe te bidi sese umabo, te 18,000 bidi ela muani. Te bidi dabego te hwįani po odama, tama augwa te Devitba genuai nogi mu mawai dao. \f + \fr 8:13 \ft Tib 60 Tobolu pode\f*  
\v 14 Tama Devitgo te aga ami hani bidi meba te Idom bulu tǫ pedaide munama, te Idom dabe tonalumainu yali. Tama te Idom dabe aga dologode bidai. Te Devit pelama, hwįgi pabo bulu tǫ pedai tigidalide, te Genuai Bidigo aga tau siyu, tama aga ugwaba dįą holali.   
\p
\v 15 Devitgo te Israel tǫ pedai tigidali badu tonalu, tama agai wiegi yai doloba pai kolesaga te tigidali we bidi dali yalio.  
\v 16 Joap, te Devit aga abe Seruiago ogwa, te ami dabego polalubo ofisa bidi bidali. Tama Jehosafat, te Ahilutgo ogwa, te polalubo kuskus sę bidi bidiyu, tama te gavman dabego sę ebo buku dabe tonalubo sę bidi bidali.  
\v 17 Tama Sadok dali Ahimelek, augwali si te pris bidi bidali. Sadok te Ahitupgo ogwa. Tama Ahimelek te Abiatargo ogwa dao. Tama Seraia aga te kingo kuskus sę ebo bidi bidai.  
\v 18 Tama Benaia, te Jehoiadago ogwa, tego te king Devit tonalubo ami bidi dabe te augwa tonalubo sę yali, te augwali Keret me Pelet hani dabe da. Tama te Devitgo ogwa dabe te pris bidi bidai dao.   
\c 9  
\s1 Devitgo te Mefiboset bugagia wiegi yai ilali  
\p
\v 1 Devitgo te tama po te bidi dabebolo hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilainu homu yali, te Jonatango wiegi yai kolesaga enaba yali te wei ponainu tiaibao,” wali. \x * \xo 9:1 \xt 1 Sml 20:15-17\x*  
\v 2 Te sogo te Solgo hani sibide te sę ebo bidi me deli bidali, aga nogi te Siba. Tialima, augwaligo aga i olama, aga te king sugi somainu yali. Aga te kingba sabalubo si, tama te kingo agaba te tama po hanalu wali, “Nage te Siba da, agawe?” Tama aga te tama po wai, “Awe, ena tama dao.”  
\v 3 Tama te kingo agaba ma hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilaibao, te eno Godiba bomai po dąų wali gilama tiainu obao,” wali.  
\p Tialima, Sibago Devitba po walali, “Te Jonatango ogwa me deli bidibadi goli, te aga sągą penelama, dwai bidibao,” po wali. \x * \xo 9:3 \xt 2 Sml 4:4\x*  
\v 4 Tama kingo te po wali, “Aga menade bidibowe?” Tama Sibago agabolo te po wai, “Aga te taun hanu Lodebarde bidibao, te Amielgo ogwa, Makirgo bede bidibao,” po wali.   
\p
\v 5 Kingo te tama po odama, tama agai te bidi meba tagala palama, te Jonatango ogwa odasa asomainu yai.  
\v 6 Te bidi aga nogi te Mefiboset dao. Aga te Jonatango ogwa, tama te king Solgo ogwago wai, te aga nǫų wąį dao. Te aga sabalubo sogode, teda aga kidu sugunugulama, tama aga gesabidi tǫba pogulama, te Devitgo nogi ugwaba siyu tama tiali. Tama Devitgo agabolo te tama po wali, “Mefiboset, siade dao.” Tama Mefibosetgo te tama po wali, “King o, ena naga sę bidi naga dao.”   
\p
\v 7 Tama Devitgo te tama po wali, “Nage wi munu me elamuo. Eno nago aya Jonatan te homu kone me elalubadi geani, tama tiyu, eno te wiegi yai kolesaga nageba yabo homu ebao. Te eno nageba te nago nǫų wąį Solgo tǫ tigidali te nageba mawaibao. Tama tigidali sogo nage te enaba naga aselama, nai tuagasu yagameo,” wali.   
\p
\v 8 Tama Mefibosetgo gesabidi te tǫba ma pogulama, te po wai, “King, magi baso nago te tiwai wiegi yai kolesaga enabolo yainogo obawe? Ena te olo nai tobage naga, te isali yowi me deli te tiwai dao,” wali.   
\p
\v 9 Mefiboset pai madigi, tialima te kingo Siba i olama, asobo side tama agabolo te tama po wali, “Te naga genuai bidi Solgo tigidali tǫ dali doado bage me, tama agai hani sibi bage me, megi eno te Mefibosetgo nogoba manio, te Solgo nǫų wąį dao.  
\v 10 Tama tibaso, nage dali, te naga ogwa dabe me, te naga sę ebo bidi dabe me, te tǫde gi buluiąo. Tama dagego te gide inayu tau yai nai selama, tama selasa asiąo. Tama tiyu da, te Solgo hani sibi te augwa nai elalueibao. Tiali goli, Mefiboset aga da te ena dali sesemane sogo nai tuagasu daibao,” Devitgo te po wali.  
\p Te bidi Sibago ogwa te 15 elaluyu, me te sę bidi dabe te bidi sese tama elaluali.  
\v 11 Tialima, Sibago te tiwai po Devitba wali, “King o, te nago wali po tiwai gilama te tigidali sę eno yaibao,” wali. Te sę dabe elama, nosali Mefiboset te king Devit dali nai tugi peyu yali, te king aga ogwa me deli tiwai mu gagawai dao.  
\v 12 Mefibosetgo ogwa me deli te ogwa bidi bidali, aga nogi te Mika. Te sogo te Sibago hani sibi bage bidi me we, te Mefibosetgo tǫde sę iduali.  
\v 13 Tiali goli, Mefiboset te Jerusalemde bidali, magi baso meni, tigidali sogo bidibo dononama, te aga king Devitgo bede nai tudali. Te Mefibosetgo sągą si te penelama, dwai elaluai dao.   
\c 10  
\s1 Devitgo te Amon dabe me, Siria dabe me, aiyaba elaluali  
\r (1 Sto 19:1-19)  
\p
\v 1 Nahas, te Amon dabego king bidi, te isibaso, tama aga ogwa, Hanun, te king pedelali.  
\v 2 Tama Devitgo te tama po wali, “Eno te wiegi yai kolesaga Hanunba yaiba,” wali, “te aga aya, Nahasgo, te enabolo yali kolesaga tiwai gilama yaiba,” wali. Tama tiyu, Devitgo te bidi meba tagala palama, te Hanunba homu dene ebo po wagi pomainu yali. Tiali goli, augwali te buluba sabalubo side,  
\v 3 te Amon bulu tǫ pedai tobolu bidi dabego te augwa kingba te tama tiwai po wali, “Nago homugo Devitgo te bidi dabego te nago ayabolo homu dene eyu, te genuai nogi magasu asali da, homu eyu teba, agawe? Mu menio. Agai augwali tagala palali, te dago hanu taun te bugagia sula selama, tama nosali te aga ami bidi dabe dali aselama, te da dolagasainu yalio,” tama po wali.  
\v 4 Hanungo te po odama, tama agai te Devitgo hani bidi dabe pageabi elama, tama augwaligo penane nisi me badu togolama, tama me badu te elalubadi, tagalali. Tama agai te augwaligo bobage gudali ugwa te togolama, pęwadage mu igulali, te gasa bidi dabego augwaligo tigi habu mi sumainu ebo tiwai ilama, tama agai augwali te augwa buluba tagala palalio.   
\p
\v 5 Tiali goli, te bidi dabe augwa te hale mu ebaso, tama augwa buluba ma pabo te augwa hagela homu yali. Te Devitgo haniba te Hanungo te tama kolesaga yali po odama da, teda agai te bidi dabeba te tama po ola tolali, “Dage te Jerusalemba polo asabo homu kelekele me elamuo. Menio. Dage te Jerikode bidilama, te dagego penane nisi ma holobo si, tama nosali dage asiąo,” wali.   
\p
\v 6 Te Amon dabe augwa koneani, augwa te tiali kolesagade te Devitgo haliga sębe mu ilabo sę yali homu yai. Tama tiyu, te Devit augwali dali hwįagaselama, augwali aiyaba elaluidali homu eyu, augwa te bidi meba te Siria tǫba tagala palama, te Betrehop bulu bidi dabe me, Soba bulu bidi dabe, augwali dali te bomai po dąų walali. Tama te bulu side te ami bidi umabo mu, te 20,000 bidi tagala palu, te Amon dabe dali hwįbode tau sagasomainu tialio. Tama te Amon dabego te Top bulu bidi dabe dali me te bomai po dąų walama, te ami bidi umabo mu, te 12,000 bidi sainu tiali. Tama te Amon dabego te Maka bulu king bidi dali me bomai po dąų walama, te augwali te Devit dali hwįbode tau sabo ami bidi dabe umabo, te 1,000 bidi me abelama, salio.   
\p
\v 7 Te Devitgo te Amon dabego te tama tiwai eyu, te ami bidi dabe sisinibo po odolama, tama agai te Joap dali, te Israel ami bidi dabe tigidali dali tagala palu, te augwaliba boi hwįgi pomainu yali.  
\v 8 Tialima, te Amon dabe te augwa genuai hanu taun, te Raba, te masigigo bagulali obo te tomoba pabo sunumi elalubo pąde te sisinama dolaluali. Tama te Siria dabe me, te Top dabe me, te Maka dabe augwali te kala sili elalubo pesagede wasilama, sisinama bidaluali. Tama tigidaligo te Israel dabe dali hwįainu sisi elalualio.   
\p
\v 9 Joapgo te boi bidi dabe sulama, tama agai koneani, te Israel dabeba augwaligo te si badu bugasa hwįaiba homu yali. Tama tibaso, agai te Israel wiegi yai bomai ami bidi meba nidigili pelama, tama augwali te kala silide bidalubo ami bidi hani dabe bidalubo pąde te augwali wasilali. Tama aga digi te augwali tonaluali.  
\v 10 Tama agai aga ama, Abisai, nigilama, te agai gasa ami bidi dabe tonalumainu nigilali, tama Abisaigo augwali te Amon dabe bidalubo pąde wasilali.  
\v 11 Tialima, Joapgo Abisaibolo te tama po walali, “Te hwįbo hodolama hwįbo sogo, tama nago suali, te Siria dabego da aiyaba elaluabo homu ebaso da, teda dage asu, da tau sagasao. Ma, te Amon dabego dage aiyaba elalueinu ebaso da, teda dago dage tau sagasaiba,” wali.  
\v 12 “Dage wi me elamuo. Dago dena hani bidi me te Godigo dabolo mani hanude homu kone palama, tama dago bomo elama, hwįąo. Tama Genuai Bidigo aga homu wali pelama, tama aga te godolo ebo homu tiwai emainu yao,” Joapgo te aga ama Abisaibolo te po wai.   
\p
\v 13 Tialima, Joap te aga ami bidi dabe dali pelama, te boi hwįgi pobadi, tama te Siria dabe wi pela walio.  
\v 14 Tama te Amon dabego te Siria dabe wi pabo subo sogo, augwali me te Abisaigo hanide wi peyu, tama te augwa taun bagulali obo tomoba pelama, geme duala sigi pali. Tialima, Joapgo te Amon dabe tagalama, te aga ami bidi dabe selama, te Jerusalemba ma geasa palio.   
\p
\v 15 Te Siria dabe augwali te hwįanide te suali, te usu meni yani tiwai yali, tama tialima, augwa ami bidi dabe tigidali i olama, sisinagasalio.  
\v 16 Tama te Soba bulu king bidi Hadatesergo te bidi meba tagala palama, te giliga pedalubo madi, te wę Yufretis elalubo badu bidalubo, te Siria bulu bidi dabe sigi pomainu elama, tama augwali sisinagasali. Tigidali te bulu Helamba sisinama, tama Sobak, te king Hadatesergo polalubo ofisa bidigo, te augwali tonalualio.   
\p
\v 17 Devitgo te Siria dabe te Helamba sisinibo sę ebo po odobaso, tama aga hogodama, te Israel ami bidi dabe tigidali sisinama, tama augwa pelama, te wę Jordan nogelama, tama pelama, te bulu Helamba sabolai. Tama te Siria dabe deliba wasilama, nani bidiyu, tama augwa te Israel dabeba boi hwįbo hodolama, hwįanio.  
\v 18 Tiali goli, te Israel dabego hwįbo te bomo mu elama, tama te Siria dabe augwali pogasa peyu, te augwa bidiboba ma palio. Tama Devit te aga ami bidi dabe daligo te karisde dolalua peyu hwįbo ami bidi dabe te bidi sese hauwa, 700 bidi elali, tama te hosde dualasa peyu hwįbo ami bidi dabe te bidi sese umabo mu, te 40,000 bidi ela muani. Tama augwa te Sobak me elali, te Siria dabe augwa polaluali ofisa bidi, tama aga te hwįani pesagede dolo tede tama isai dao.  
\v 19 Te king Hadatesergo dologode bidali king mebago te tiwai ebo si, te Israel dabego augwali aiyaba elalubo sulama, tama augwa te Israel dabe dali nogo menama, tama augwali dologode bidalio. Tama te Siria dabe te Israel dabede wi mu elama, tama tibaso, augwaligo te Amon dabe tau ma me sabeo.   
\c 11  
\s1 Devitgo te Uriago we dali penane sę yali  
\p
\v 1 Te tigidali deli deli kibu bede, te kedau ebo silainu ebo sogo, te king dabego te augwa boi bidi dabe dali boi hwįyu yai. Tialima, te Devitgo te Siria dabe aiyaba elaluali te kibu bede nosali badu, tama te kedau ebo silainu ebo sogo, Devitgo te Joap dali, te aga ofisa dabe me, te Israel ami bage tigidali dali, te Amon dabe dali boi hwįgi pomainu tagala palali. Augwa te boi hwįgi pelama, tama te Amon dabe aiyaba elaluama, tama te taun hanu Raba bagulali. Tiali goli, Devit digi te hwįbo madiba me pisąwai. Aga te Jerusalemde bidai. \x * \xo 11:1 \xt 1 Sto 20:1\x*   
\p
\v 2 Me sogo deli be pio ebode Devit godege pilama, tama pio mu ebadi, aga te betde pila muani tagalama, hogodaluali. Te aga be te pedu daide te toma nabo pesage elaluai. Tama tialima, aga teba ugwaba holama, tama tede toma neyu bilali. Aga te aba tonono bilibadi, tama agai te we me deli gasa bede wę paudubo suali. Tama te we te gasa sawi yai we muo.  
\v 3 Tialima, Devitgo te niwai we mu yaliwe, te mu koneai sainu, te bidi me deli tagala palali. Tama agai te tama koneani, te we aga te Batseba bidibo suali, te Eliamgo wegi, tama aga te Uriago we dao, te Hit hani bidi me deli dao.  
\v 4 Tama Devitgo te bidi meba ma tagala palama, te we Batseba odasa asomainu yali. Te sogo te Batseba aga te poluago elali gasi te silibaso, tama aga te wiegi yai ma pedalubo kolesaga wali pai. Tialima aga te Devitba aselama, tama Devitgo te we aga dali pagela piai. Tama nosali Batseba te aga beba ma pai.  
\v 5 Tama bidama gana nosali, Batseba aga haliga ebo si koneama, tama aga Devitba po ola tolali.   
\p
\v 6 Devitgo te tama sę ebo konebaso, tama agai po me deli Joapba ola toliyu, te tiwai po wai, “Eno homugo nago Hit hani bidi, Uria, te enaba tagala palomainu homu ebao,” wali. Tama Joapgo Uria te Devitba tagala palali.  
\v 7 Uria te aselama, te Devit pageba sabalubo si, tama Devitgo te tama po agaba hanalu wali, “Joap te aga ami bidi dabe dali bugagia bidibawe, ma meniwe? Tama te boi hwįbo mena tama tebawe? Da te ugwaba dia holabo homu ebowe, ma meniwe?” Tama Uriago te sę ebo po dabe te agaba pusali.  
\v 8 Devitgo Uriabolo tama po wai, “Wiegi yai mu dao. Eno odalio. Megi nage te naga beba pelama, tama wę payu, toma nao.” Tialima Uriago te king tagalama, buluba dia soali. Tama nosali Devitgo te bidi me deli tagala palama, te wiegi yai homu ilibo nai te Uriaba selasa pali.  
\v 9 Tiali goli, Uria te beba me pabeo. Aga te king tonalubo bidi dabe dali piali, te kingo be sunumi pąde piai.   
\p
\v 10 Augwaligo Devitba waliyu, te Uria aga beba me pabeo po wali. Tama tibaso, Devitgo agaba walaligi pali, “Nago te naga be bobage sogo taga pai dao. Magi baso te nage naga beba pabewe?” wali.   
\p
\v 11 Tialima, Uriago te tama po wei ponani, “Te Israel ami dabe, me Juda ami dabe, te hwįbo pesagede te ugwa bede naga me bidalubao, tama te Dąų Wali Bomai Po Muani Halobage te augwali dali munalubao. Tama Joap, te eno genuai bidi, te bidibo pesagede te ofisa dabe dali bididubao. Te ena naga te ena beba pelama, tama te nai sela tuyu, te wę tuyu, tama te ena we dali pagela piyu ebo, te eno homugo te dwai da homu ebao. Eno mu po tama obao, eno te tama kolesaga me egobeo. Ma eno te tiwai eyu da, teda Genuai Bidi Godigo ena ela mumainao,” te po wali.   
\p
\v 12 Tama tialima, Devitgo te tama po wali, “Te usu dao, megi nage ede bidao, tama do te nage eno ma tagala palaibao.” Tialima, Uria te Jerusalemde bidalio. Tama do te be pio ebadi,  
\v 13 Devitgo te Uria i olama, te aga dali te nai me wę tuagasomainu elama, tama agai te Uria gęǫ page ilali. Tiali goli, te sogo hulide me Uria te aga bede me pibeo. Menio, te aga ugwade digi banuama, tama te king tonalubo bagego be habude pialio.   
\p
\v 14 Tama kigamu digi Devitgo te pas me deli Joapba asęnama, tama Uriaba menama, tama aga te hwįbo pesageba ma tagala palalio. Tama Devitgo agabolo waliyu, te pas Joapba mao wai.  
\v 15 Devitgo te paside asęani po te tiwai po wali, “Te Uria dali, te polalubo ofisa hani dali, te hwįbo bomo ebo madiba muao,” po wali. “Tama dage tigidali te tudiba ma kilasa peyu, tama te boi bidi dabego te Uria ela mumainu yao,” po walio.   
\p
\v 16 Joap dali, te ami bidi dabe, augwa te Raba taun hanu sainu hwįbo sę idubadi geai. Tama Joapgo te pas sali sogo, teda agai te Uria te Amon dabego hwįbo sę bomo mu ebo madiba muanio.  
\v 17 Tama te Amon dabe ami bidi te taun hanu buluba dia solama, tama te Joapgo ami dabe dali hwįani. Tama te hwįanide, te Devitgo ofisa bidi meba isali. Uria aga te ofisa dabe dali isali bidi me deli te aga dao.  
\v 18 Tama nosali, Joapgo te boi hwįani digi te sę yali po te Devitba po ola tolali.  
\v 19 Tama Joapgo te hwįani po sela soainogo ebo bidiba te tama po walali, “Nago te hwįyu suali sę po tigidali te kingba wagi pao,” wai.  
\v 20 “Tama eno homugo te kingo te tiwai wado po waiba homu yali, ‘Magi baso dage te taun hanu bagulali obo pąba hwįgi pai dawe?’ te po waibao. ‘Dagego koneanio, te boi bidi dabe te bagulali masigi obo daide bidiyu, tama augwaligo dage enabo usu elalubo dao.  
\v 21 Te polobadu te Abimelekde yali sę te dagego homude gegeda pai elaluai dawe? Abimelek, te Gideongo ogwa, te taun hanu Tebes obo bagulali pąde dolalubadi, tama we me deli te masigi obo daide dolalu, tama genuai masigi aba sąnama, tama aga ela muani. Tama tialima, magi baso dage te bagulali obo pąba pai dawe?’ Te kingo tama po nageba obaso da, teda nago agaba te tama po wao, ‘Nago sę bidi, Uria te Hit bidi, te ofisa dabe dali isali bidi me deli dao,’ tama po wao,” Joapgo te po wai. \x * \xo 11:21 \xt Tob 9:53\x*   
\p
\v 22 Tama tialima, te Devitba po sela pabo bidi te pelama, tama agaba te po pusigi pai dao.  
\v 23 Agai te tama wai, “Te boi bidi dabego hwįbo bomo mu ebaso, tama augwa te taun hanu tomode bidali te buluba dįą solama, tama da dali te pepeli deliba aselama, hwįani. Tiali goli, dago te hwįbo bomo mu ebaso, tama augwali ma pogosa pelama, te taun hanu tomoba pabo sunumi pąba dąį igi palio.  
\v 24 Tiali goli, te Amon ami bidi dabe meba te bagulali obo daide bidiyu, tama augwa te enesigigo enama, tama nago ofisa bidi meba dolama, tama isalio. Nago sę bidi Uria te Hit bidi, aga te ofisa dabe dali isali bidi me deli dao,” te po wali.   
\p
\v 25 Devitgo te po agabolo wali, “Nage ma geasa pelama, tama te po Joapbolo pusa mao, te aga bomo elama hwįmainu ebo po. ‘Joap, nage te sęde te haliga sęgę me elamuo, magi baso meni, te mena bidi aga te hwįbode isabo, te aga me konegobeo. Nago te Amon dabe dali hwįbo sę bomo elama, tama augwali aiyaba elaluama, tama te taun hanu mu dola silao,’ te Joapgo homu dąų omainogo te po agabolo pusao,” Devitgo te po wali.   
\p
\v 26 Tama nosali, Batsebago te aga bidi isali po odobaso, tama aga homu dene ebo gela te aga bidide wai dao.  
\v 27 Te homu dene yali sogo silibo side da, teda Devitgo augwaliba te Batseba te kingo beba odasa asao po wai. Tama Devitgo aga sali, tama nosali Batsebago te Devitgo wai ogwa me deli ame nani. Tiali goli, Genuai Bidigo Devitgo te sę yalide te aga homu godolo eyu, wei me ebeo.   
\c 12  
\s1 Natango te Devitgo dwai sę yali po pusali  
\p
\v 1 Te Genuai Bidigo te profet Natan Devitba tagala palama, tama Natango te tiwai po Devitbolo wai, “Te bidi me si te taun hanu me delide bidali. Me deligo te mone me doado bage hauwa elaluyu, tama gasa me bidi te magi nai meniama, tama dwasianu doado bage naga elaluai. \f + \fr 12:1 \ft Tib 51 Tobolu pode\f*  
\v 2 Te mone hauwa elalubo bidigo te bulmakau me sipsip hauwa umabo elaluali.  
\v 3 Tiali goli, te magi doado bage meni yani bidigo te dwasianu sipsip kibu so me deli naga elaluali. Aga te sipsip abelama, te bugagia tonaluai. Tama te sipsip aga bede bidiyu, tama te bidi aga wai dabe dali te genuai pedelama bidali. Tama aga tubo nai kakali te sipsipba mayu, tama te sipsipgo aga wę tubo kapde wę tumainu eyu yali, tama te sipsip te bidi aga hagawiade piyu yai. Tama tiyu, te sipsip te aga wegi tiwai mu pedelali.”   
\p
\v 4 “Tiali goli, me sogo deli te mone hauwa elalubo bidi aga abagi aselama, te aga beba sabolagasali. Tialima, te mone bidigo te aga sipsipgo digi me deli elama, tama aga abagi ula maiabo homu me ebeo. Menio. Aga pelama, te magi doado bage meni yai bidigo sipsip sigi pelama, te elama, tama ulama, te aga abagigo tumainu yalio.”   
\p
\v 5 Devitgo Natango te wali po odolama da, teda Devit aga haliga sębe dwai mu te mone hauwa elalubo bidi dali eyu, tama po wali, “Te Genuai Bidigo nogide, eno mu po tama obao, te tobage kolesaga yali bidi te aga dwai bidi mu dao. Te augwaligo aga ela muabo sunumi te wiegi yai mu tama nigali dao.  
\v 6 Tama agai te magi nai doado bage meni yai bidibolo te sipsip me si me si te wei ponao wagi dao, magi baso meni, agai dwai kolesaga mu elama, tama te bidide homu dene dwasianu me ebeo,” wali.   
\p
\v 7 Tialima, Natango te tama po Devitbolo walali, “Te mone hauwa elalubo bidi wali, te nage tama dao! Tama God, te Israel dabe dago Genuai Bidigo, te tama tiwai po nagede elalubao, ‘Eno nage tau saligo, tama nage Solgo me dolobeo. Tama eno nage te Israel king bidi pedalumainu nigilali.  
\v 8 Tama eno te king Solgo be me, we dabe me, te doado bage dabe nageba menama, tama nage te Israel me Juda king pedalumainu ilali. Te nai dabe nage usu meni baso da, teda eno nage umabo nai doado bage madubadi geai dao.  
\v 9 Magi baso nago ena Genuai Bidigo po te olo nai da homu eyu, te po sela sąnama, tama nago te dwai kolesaga yaliwe? Nago Uria te Amon dabego nogode ela mumainu elama, tama nago aga we salio.  
\v 10 Tialima, bugagia odao. Nago eno po sela sąwanima, tama nago te Uriago we sali. Tama tialima, tigidali sogo nosali te bidi dabe mebago te nago hani sibi wąį bǫų dabe meba ela mubo sę yaibao.  
\v 11 Ena Genuai Bidi, eno tama po wali, te eno te tiwai iliyu, te naga hani sibi meba bidigo digi te genuai sęgę nageba mawaibao. Tama eno te nago we dabe selama, te gasa bidi dabeba mabo, te naga sueibao. Tama aga te augwali te pepeli dilide hania penani sę yaibao. Tama tigidali we bidigo aga te kolesaga ebo sueibao.  
\v 12 Nago dwai kolesaga yali sę te geme pesagede yali. Tiali goli, eno nago te kolesaga yali wei ponoyu, te hanilama, pepeli dilide ebo tama te tigidali Israel dabego sueibao,’ te po Devitbolo pusao, “wali. \x * \xo 12:12 \xt 2 Sml 16:22\x*   
\p
\v 13 Devitgo te po odama, tama aga te po wai, “Eno te Genuai Bidi gedude agade dwai sę yalio.”  
\p Tama Natango te tama po agabolo wei ponani, “Genuai Bidigo nago te dwai sę yali sela sąnama, tama nage me isigobeo.  
\v 14 Tiali goli, naga te dwai kolesagago, te Genuai Bidigo boi bidi dabego te agaba hagoma emainu yali dao. Tama tibaso, nago wai te Batsebago ame nabo si da, te aga isaibao,” wali.  
\v 15 Natango Devitgo te dwai sę yali po pusa silama da, teda aga te aga beba ma begasa pai dao.  
\s1 Devitgo ogwa isalio  
\p Tama nosali, Genuai Bidigo Devit de te Batseba sigo te wai te dwai gasi somainu ilali.  
\v 16 Tama Devitgo gedu haluasa po Godiba weyu, te Godigo te wai usu ma ilimainu tiali. Tama Devit aga osogo nai tubo habu siyu, gisilali. Tama hulide te aga be habuba pelama, te be soiyamede olo bulude pila muani.  
\v 17 Te aga sę ebo bidi monu dabe te agaba pelama, te aga hodolobo usu sabo sę ilali, tiali goli aga me hodalubo hagela homu yai. Tama te aga augwali dali nai tubo me hagela homu yalio.   
\p
\v 18 Te Sadede deli pabo side tama te wai isalio, tama te Devit aga sę ebo bidi dabego te wai isali po te agabolo walabo te augwa wi mu yalio. Augwa hasi digi augwa po mia siyu, te tama po wali, “Te wai isisąbadi, te dago Devitba po waligi pali, tiali goli te agai dago po odabo homu isiąwani. Tama tiyu, megi te dago agabolo te wai isali po walainu ebaso, te usu me egobeo. Tiyu, aga hodalu, te aga digi aga dolabuo,” augwaligo te po mia sali.   
\p
\v 19 Tialima, Devitgo te augwa hasi pomu po ola pabo suali, tama megi da aga koneani, te wai isali homu yalio. Tama agai augwaliba te tama po hanalu wali, “Wai isali da, agawe?”  
\p Tama augwa te po wali, “Awe, aga isalio.”   
\p
\v 20 Devitgo te po odolama, aga te be soiyame degedude pila muani hogodama, tama pelama, wę pagu pali. Tialima, aga tigi te denami ebo wel sandago au ilama, tama tobolu nisi yagago selama, tama gesi ugwa muani. Tama aga te Genuai Bidigo lotu beba pelama, tama Genuai Bidiba lotu po wali. Tama Devit te aga beba ma begasa asobo sogo, agai te aga nai ulubo bidi dabeba hanaluama, tama augwaligo te aga nai meba te pouba togolama, tama aga nai tuai dao.   
\p
\v 21 Te sę bidi dabego Devitgo te tama tebo kolesaga sulama, tama augwa te tama po agabolo wali, “Nago te tama kolesaga ebo magi basowe? Te wai isisąbadi, nago agade gela olama, tama nago te nai tubo habu siyu gisilali. Tiali goli, megi da, aga isibode te nage hogodama, nai tubao. Nago te tebo kolesaga page mena tama dawe?” augwaligo te po hanalu wali.   
\p
\v 22 Tialima, Devitgo te tama po wali, “Ena gela olama, tama nai gisilali te wai isisąbadi, te magi baso meni, eno homugo te Genuai Bidigo olo tau sabo wiegi yai kolesaga enaba eyu, tama te wai isimainu iligobe homu yali.  
\v 23 Tiali goli, megi da, te aga isai digi, tama magi baso te eno nai tubo habu selalueibawe? Te kolesagago te wai ma odasa asomainu eba, agawe? Mu menio. Nosali te ena te aga pali buluba paibao. Tiali goli, te aga enaba ma begasa me asobo usu me egobeo,” wali.   
\s1 Batsebago Solomon ame nani  
\p
\v 24 Devitgo wiegi yai po mobo aga we Batsebabolo mani, te aga homu haliga dąų walu tiali. Tama nosali Devit aga dali pilama, tama nosali Batseba te haliga elama, tama gasa ogwa me ame nani, tama Devitgo aga nogi te Solomon nogi yali. Tama Genuai Bidigo te wai godolo homu mu yai.  
\v 25 Tama tiyu, agai te profet Natan te Devitba tagala palama, te waiba te nogi Jedidia momainu yalio. \f + \fr 12:25 \ft Jedidia. Te nogigo page e tama tiwai, Genuai Bidigo aga godolo mu yai.\f*   
\s1 Devitgo boi hwįnama, te Raba taun hanu salio  
\p
\v 26 Te sogo te Joapgo ami dabego te Raba taun hanude hwįbo sę idubadi geani, te Amon dabe augwa genuai taun dao. Tama agai te taungo tǫ pedai me badu sai.  
\v 27 Tama tibaso, agai Devitba po ola toliyu, te tama po wai, “Eno te Raba taun bidi dabe dali hwįnama, tama eno augwaligo te wę tubo madi te pesage sai dao,” po wali.  
\v 28 “Tama tiyu, nago asesa, te Israelde bidalubo ami bidi sisinama, tama aselama, te Raba taunba hwįagaselama, tama augwali aiyaba elaluama, tama te hanu taun sinao. Tiyu, eno hanigo naga te hanude bidibo bidi aiyaba elalubaso, tama te we bidi dabego genuai nogi enaba maidalio.” Joapgo te po ola tolali.   
\p
\v 29 Tama Devitgo te ami bidi dabe tigidali sisinama, tama augwa te Raba taun hanuba hwįgi pelama, tama te taun hanu sai dao.  
\v 30 Tama Devitgo te kingo madi te Amon dabego king tobolude sai. Te madi augwa te golgo nigai, tama aga sęgę te 35 kilogram tama. Tama augwa te madi te wiegi yai masigi mugo au ilali. Tialima, te Israel dabego te madi selama, tama te Devitgo toboluba muani. Tama Devitgo te taun hanude te mone hauwa, me doado bage sai dao.  
\v 31 Tama agai te Raba taun hanude bidali we bidi tigidali selama, tama augwali te so, me baira, me tamiok hwą, te naigo ebo haniani sęba muani. Tama agai augwali meba te brik nigibo sęba muani. Agai te tobage kolesaga tiwai naga te gasa taun hanu te Amon bulu tǫ pedaide bidalubo bage bidi dabeba te tiwai yai. Tama nosali, Devit te aga ami bidi dabe tigidali dali augwa te Jerusalemba ma geasa soalio.   
\c 13  
\s1 Amnongo dwai kolesaga te Tamarba yali  
\p
\v 1 Apsalom te Devitgo ogwago abe te gasa sawi yai mu me deli bidali, aga nogi te Tamar. Tama Amnon, te Devitgo gasa ogwa mego, te Tamar godolo mu elama,  
\v 2 tama aga pesa mu yai. Tiali goli, Tamar te bidi me deli dali me pagela pisąwai, tama augwa te habu seliyu, te bidi me deli aga pąba me pelamuo po wai. Tama tiyu, Amnongo koneani, aga te Tamar pąba pelama, tolasainu yabo usu meni yai, tama Amnon aga te Tamarde wei mu eyu, godolo mu elama, te aga gasi sai.   
\p
\v 3 Tiali goli, Amnon aga abagi me deli elaluali, aga nogi te Jonadap. Aga te Samago ogwa, te Devit aga ama, tama aga te gasagi yai tedali te haniani sunumi gegelama konea pabo homu kolesaga elaluali.  
\v 4 Tialima, Jonadapgo Amnonbolo te tama po wali, “Te kingo ogwao, magi yaliwe? Tigidali sogo eno nage te wiegi yai homu pemene eyu bidibo me subeo. Magi baso nage haliga sęgę elalubawe?” wali.  
\p Tama Amnongo te tama po agaba wei ponani, “Eno homu pesa mu te Tamarde ebao, te Apsalomgo abe, te eno amago abe dao,” wali.   
\p
\v 5 Tialima, Jonadapgo Amnonba te tama po wali, “Nage te gasi ebo tiwai elama, te naga betba pila mugi pao. Tama naga ayago nage suagasobo sogo da, teda nago te tama tiwai po agabolo walao, ‘Eno homugo te nago eno abe Tamar te enaba tagala palama, te eno gesabidiba te nai ulagasomainu yao. Tama aga te nai ulali silibo si, te aga digi enaba magasomainu yaibao.’ Nago te king tibo po ola mayu, te tama po obaso da, teda agai te Tamar nageba tagala palaibao.” Jonadapgo te po wali.  
\v 6 Tama Amnongo te Jonadapgo po wali pai. Aga te tibo gasi elama, tama te aga betba pila mugi pali.  
\p King Devitgo te aga ogwa, Amnon, te gasi elalubo po odobaso, tama aga te Amnongo beba pelama, aga sugi pali. Tama Amnongo agabolo te tama po wali, “Ena gasi elalubo, tama eno homugo nago eno abe Tamar te tagala palama, tama te pusu yai kek meba enaba ula magasomainu homu yali. Tama aga digi te nai enaba magasomainu yaibao,” te tama po wai.   
\p
\v 7 Tamar te king Devitgo bede bidali, tama tibaso Devitgo te tama po agaba ola tolali, “Eno homugo nage te Amnongo beba pelama, te agaba nai meba ula momainu homu ebao,” wali.  
\v 8 Tialima, Tamargo te Devitgo po odolama, tama te Amnongo beba pelama, tama te Amnon aga betde pila mudubo suai. Tama Tamargo te plaua meba selama, tama te kek dabe nigilama, tama te praipande ulubadi, tama Amnongo aga tonalu dalio.  
\v 9 Agai ula silibo si da, tialima aga plet pouba gelama, te Amnongo tumainu yali, tiali goli Amnon aga te nai tubo hagela homu yai. Aga te tama po wai, “Tigidali bidi buluba piąo,” wali. Te bidi dabe augwa te po odolama, tama augwa te be tagalama, tama palio.  
\v 10 Megi da, Amnongo Tamarbolo te tama po wali, “Te kek dabe eno betba selasa asao, tama nago digi ena mobaso, te eno tueibao,” wali. Tialima, Tamargo te kek dabe selama, te aga sela pali.  
\v 11 Tiali goli, Tamargo te kek dabe agaba magi pabo si da, teda Amnongo aga pageabi eyu, tama po wali, “Abeo, eno homugo te nage ena dali pimainu homu ebao,” wali.   
\p
\v 12 Tiali goli, Tamargo hagela homu ebaso, tama aga po bomo eyu, te tama po wali, “Menio, nago ena te tobage dwai kolesaga yaboba me kekegio,” wali. “Da Israelgo te tobage kolesaga me ebo menio.  
\v 13 Nago te tama tobage kolesaga eyu da, teda ena hale dwai mu elama, tama ena te we bidi dabe gedude munu ma biligobeo. Tama nage me, te gasa Israel dabego nage aiyaba elalu, tama nage mu dolaibao. Nago te kolesaga megi me elamuo. Te kingba hanaluyu bolo ebaso, te wiegi yai yaibao. Te nago ena sainu ebo homu te agai nage me paligobeo,” Tamargo te po wali.  
\v 14 Tiali goli, Amnongo te Tamargo wali po me odobeo. Amnongo bomo mu eyu, te Tamar aga kekelama, tama te dwai sę agade yalio.   
\p
\v 15 Te Amnongo aga dali pilama da, teda megi da, agai te Tamar wei elama, godolo homu me ebeo. Polobadu agai te Tamar wei eyu, godolo mu yali, tiali goli megi da, agai te Tamar wei homu me isiąma, tama agade te haliga dwai mu elalu dalio. Tama tiyu, aga po bomo elama, Tamarba weyu, “Nage pao,” wali. “Nage ede me bidamuo,” wali.   
\p
\v 16 Tiali goli, Tamargo agaba te tama po wei ponai, “Ama, homu deneo, nage te tobage kolesaga igio. Te nago ena megi sela sąyu da, te genuai sęgę mu elama, tama nago enaba te yali dwai sę te aiyaba elalueibao,” wali.  
\p Tiali goli, Amnongo te Tamargo po odobo te aga hagela homu mu yai.  
\v 17 Tama tialima, aga sę bidi i olama, te tama po wali, “Te we asesa polo tama te buluba ela gudulao,” po wai. “Te eno aga ma subo te ena hagela mu ebao. Te aga ela gudulama tama sunumi paliąo,” wali.  
\v 18 Tialima, te sę bidigo Tamar sela sąyu, tama te sunumi paliali.  
\p Te kingo wegi dabego kolesaga te tama tiwai yai. Te augwali bidigo sisąbadi, te wegi ogwa we bidibo sogo, augwa te bobobage nogo yai sawi yai ugwa me deli muyu ebo dao. Tama Tamargo te tobage bobage nogo ugwa te aga Amnonba asali sogo muani.  
\v 19 Tiali goli, Amnongo te Tamar sela sąbo si da, Tamar pelama, te sia keli aga toboluba munama, tama te ugwa pisawali, te aga homu sęgę me homu dene ebo ola mayu, te tama tiali. Tama aga nogo te aga toboluba munama, tama bomonama gela weyu tama soalio.   
\p
\v 20 Nosali, Apsalomgo te aga abe Tamar te gela ola asobo sulama, te agabolo hanalu wali, “Magi yaliwe? Te naga abe Amnongo te dwai sę nageba yali da homu ebe da, agawe? Tagalao, te nage homu sęgę kuna me elamuo, magi baso meni, te naga abe naga dao. Tiali goli, nago te Amnongo yali kolesaga te bidi me deliba me pusulamuo,” wali. Tama Tamar te Apsalomgo beba pelama, tama aga dali bidali. Tiali goli, Tamar te homu sęgę dali me mu sesemane sogo elalu bididualio.   
\p
\v 21 Tama Devitgo Amnongo te kolesaga yali po odoyu, agai te wado po dwai mu walio.  
\v 22 Tama Apsalomgo me te Amnon dali haliga sębę mu elama, tama aga godolo me ebeo, magi baso meni, Amnongo te dwai kolesaga agai abeba yali, Tamarba. Tama tiyu, Apsalomgo te mena sę yabo po deli me te Amnon dali po munu me ma mibeo.   
\s1 Apsalomgo te Amnon ela muabo sunumi gegali  
\p
\v 23 Te nosali kibu be si bidama da, teda te sę bidi dabego te Apsalomgo sipsip nisi togobo sę te Balhasor bulude yali. Te bulu te Efraim hanigo tǫ pedai pąde elaluali. Tama Apsalomgo te kingo ogomani tigidali i olama, augwali te buluba sisinagasomainu yali.  
\v 24 Apsalom te king Devitba pelama, tama agabolo te tama po wali, “King o, te bidi dabe augwali te eno sipsip nisi togobo sę ebaso, tama eno homugo te genuai nai daa tueinu ebao. Te nage dali, naga ofisa dabe augwali dali, dage te eno genuai nai daa tuboba asabo usu yaibawe?”   
\p
\v 25 Tama kingo te tama po wei ponani, “Ogwao, menio. Da me pogobeo. Te da tigidali peyu da, teda nago da tonalubo sę eyu, te gesebo sę dene mu yabuo.” Tiali goli, Apsalomgo bomo eyu, te kingba hanalu wali, tama kingo bomo eyu, pabo hagela homu yai. Tama kingo te tama po wali, “Apsalom, te nage da pao.”   
\p
\v 26 Tiali goli, Apsalomgo te po wai, “Tialima, te nage pogobe da wida, te nago gomunai ogwa Amnon pomainu ebo usu egowe?” Tama kingo agaba hanalu wali, “Magi eyu te nago aga pomainu obawe?”  
\v 27 Tiali goli, Apsalomgo te Devitba bomo elama mu hanalu obaso, tama nosali Devitgo te Amnonde usu da weyu, te aga gasa ogomani dabe me te Apsalom dali pomainu yalio.   
\p
\v 28 Te Apsalomgo Devit taga soyu, te Balhasor buluba ma soabo sogo, agai te aga sę bidi dabeba te tama po walali, “Te nai daa tubo sogo, dagego te Amnon bugagia tonaluao. Te aga gęǫ page ebo sogo, teda eno dagebolo olama, tama dagego aga ela muiyagameo. Dage wi me elamuo, magi baso meni, ena digi eno te aga ela mua po obao. Tama dagego aga ela muyu naga yao, tama dage munu me wia selamuo.”  
\v 29 Tialima, te sę bidi dabego te Apsalomgo po wali peyu, tama te nai daa tubo sogo augwaligo te Amnon ela muai dao. Te kingo gasa ogomanigo te tama tebo sulama, tama augwali te augwa donkiba ąųą sigulama, tama wi soai dao.   
\p
\v 30 Te augwali sunumidu aseladubadi, te bidi meba polasa pelama, tama Devitba te tama po wai, “Apsalomgo te nago ogomani tigidali ela muani, tama deli me bidibeo.”  
\v 31 Kingo te po wabo odolama, tama aga haliga dwai midigi selama, tama agai te aga ugwa pisilama, tama tǫba pigulali. Tama aga ofisa dabe me te tobage kolesaga naga yalio.   
\p
\v 32 Tiali goli, Jonadap, te Samago ogwa, te Devitgo ama, agai Devitba te tama po walali, “King o, nago te poba homu munu me mugio. Augwaligo te nago ogwa dabe tigidali me ela mubeo. Menio. Augwaligo te Amnon deli naga elali. Te page te tama telaluali. Polobadu Amnongo te dwai kolesaga Tamarba yali, te Apsalomgo abe da, tama tiyu, Apsalomgo te dwai kolesaga wei ponabo homu elalu, sesemane sogo te homu kone palaludu genama, tama te Amnon ela muanio. Eno koneanio, Apsalomgo te homu elalubo, magi baso meni, eno aga gesabidi te be hulia si tiwai elalubo suali.  
\v 33 King, augwaligo te po da, te po wali asobo tiwai ebao. Te nago gasa ogwa tigidali te bidalubao. Amnon deli naga isai dao,” te po wali.   
\p
\v 34-38 Te Jonadap Devit dali po midubadi, te hanu tonalubo ami bidi me deligo te Horonaim badu asobo sunumiba tonobadi, tama agai te bidi hauwa te bulu du badu dulubo suali. Tialima, aga te kingba pelama, te tama po wai, “Eno te bidi meba bulu dudu aiyaba dulubo suali, te Horonaim badu asobo sunumi badu asali,” wali. Tama tialima, Jonadapgo Devitba te po wali, “Te tama dao. Te nago ogwa dabe asobao, te eno nageba wali po tiwai gilama ebo,” wali. Jonadapgo po ola silibo side, teda polo tama mu, te Devitgo ogomani te tomoba asiyu, tama augwa te gela wabo gagalali. Tama Devit dali aga ofisa dabe me te gela geninama augwali dali walio. \f + \fr 13:34-38 \ft Talmai aga te Apsalomgo wąį aya dao. Te 2 Sml 3:3, tede te po elalubo suao.\f* \x * \xo 13:34-38 \xt 2 Sml 3:3\x*  
\s1 Apsalom wi pai  
\p Apsalomgo te Amnon ela mubo si da, teda aga te Gesur bulu tǫ pedaiba wi pelama, tama aga te Talmai dali bidai, te Amihutgo ogwa dao. Talmai aga te Gesur bulu tǫ pedai tonalubo king bidai, tama Apsalom te Gesur tǫ pedaide bidibadi, kibu be sela bidai. Tama tigidali side Devitgo te Amnon isalide homu dene iduali.  
\v 39 Tiali goli, nosali, aga te Amnonde homu dene yai sia sabo side, tama aga te Apsalomde homu dene ebaso, te aga ma asomainu homu yai dao.   
\c 14  
\s1 Joapgo te Apsalom ma asomainu yabo sunumi gegali po  
\p
\v 1 Joap, te Seruiago ogwago, te king Devitgo te aga ogwa, Absalom, te ma suabo homu godolo ebo te koneani.  
\v 2 Tama tialima, Joapgo te bidi me deli te Tekoa buluba pomainu tagala palama, te we me deli agaba sela asomainu yai. Te wego homu kolesaga wiegi yai elaluali. Te we sabalubo side da, tama Joapgo te tama te webolo wali, “Eno homugo nago e tama temainu, nage te haliga sęgę mu elalu, tama nage te bidi me deli isai homu dene tiwai elaluao. Nago te homu dene ebo ugwa gudama, tama nago tobolu nisi te tobolu yaga me selamuo. Nago naga digi te bidi me deli isaide te bobage sogo homu dene elaluali, te tama tiwai pedelao,” wali.  
\v 3 “Tialima, nage te kingba dolo pelama, tama eno nageba te mawainu ebo po dabe pusao,” wali. Tama Joapgo agai te kingba pusumainu yabo po meba agaba mani. Tialima, te wego te Joapgo agaba wali sę po tigidali te ola silama, tama nosali aga te kingba pai.   
\p
\v 4 Aga te king gesabidide te tǫba degasa dulama, te kingba genuai nogi mayu tiali. Tama wego te tama po wali, “Te king o, eno homugo te nago ena tau somainu homu ebao.”   
\p
\v 5 Tama kingo agaba hanalu wali, “Nago magi sęgę elalubawe?”  
\p Tama wego te tama po wali, “King o, ena bidi isai dao.  
\v 6 Polobadu eno ogwa si elaluali, tiali goli me sogo deli sogo augwa si te gide bidali, tama augwa si te magi nai me delide wado po olama, tama augwa si hwįani. Te augwa si hwįbo togolabo bidi meni yani, tama te ogwa me deligo bomo mu elama, tama aga ama ela muani.  
\v 7 Tama te ena bidigo hanigo te ena dali wado genuai elama, tama augwa te tama po weyu, eno te bidibo ogwa selama, tama te augwaliba tagala palao olama, tama augwa te bomai po wali peyu, tama aga ela muainu yali, te agai elali ama wei siyu, te aga ela muainu yali. Tiali goli, eno te augwaligo po wali pigi sogo da, teda eno wai me deli bidigi menio. Te eno sia dage me deli dwasianu elalubo tiwai ebadi, tama augwaligo te sia me sula sawainu ebo tiwai yali. Te augwaligo tama tiyu da, teda eno bidigo hani me te eno bidigo nogi dali te sia sigi dao,” te wego te po wali.   
\p
\v 8 Kingo te po odolama, tama agai te weba te tama po wai, “Tagalao, nago moni homu me elamuo. Naga beba ma geasa pao, tama nago te sęgę eno dodolaibao,” wali.   
\p
\v 9 Tiali goli, wego te tama po kingba wai, “King, te nago eno te sęgę dodolabo te tobage sunumi te mena tama gegibaso da, teda nago te sę yali page te enaba me, eno hani sibiba dali, asomainu yaibao. Tiali goli, nage dali te naga hani sibide me, te sę po meni yaibao,” wali.   
\p
\v 10 Tama kingo agaba te tama po walai, “Te bidi me deligo nageba dwai sę ilaiba po obaso da, teda nago aga enaba odasa asao. Tama tiyu da, te agai nageba sęgę me magobeo,” wali.   
\p
\v 11 Tiali goli, te wego po wadoliyu, te tiwai po ma wali, “King, eno homugo nago te naga Genuai Bidi Godigo nogide po bomo elama omainu homu ebao, tama augwaligo eno e gasa ogwa te ela mumainu homu me egobeo. Menio. Te mu tama, te deli kanemego te aga ama ela mumainu yabo bomai po muani te elaluali, tiali goli, nago agai te tama temainu elama, tama eno te wai ela mumainu me elamuo,” wali.  
\p Tama Devitgo te tama po wali, “Te Sesemane Sogo Bidibo Genuai Bidigo nogide, eno mu po nageba obao, augwaligo te nago ogwaba te magi sę deli me egobeo,” wali.   
\p
\v 12 Tama te wego agabolo te tama po wai, “King, te eno nageba po me deli ma omainu yabo te usu da wagowe?”  
\p Tama Devitgo te po wai, “Te usu da, nago po wao.”   
\p
\v 13 Tialima, megi da, te wego po hanilama te Devitba walali, “Magi baso naga digi nago te tobage dwai kolesaga te Godigo we bidi dabeba yai dawe? Naga digi nago te naga ogwa sela sąyu, ela gudulama, tama nago aga ma asomainu ebeo. Tama tialima, megi nago enaba te mani pogo, naga digi naga sęgę elalubo po ilali dao.  
\v 14 Dago koneani, da tigidali te isaibao, tama te da bidabo ula ma sainu ebo te usu me egobeo. Te wę tǫba gealuali, te dago ma sainu ebo te usu isiąbo, te tobage tiwai ebao. Tiali goli, Godigo te bidigo bidibo ula te olo dali sela sąwainu ebaso, usu me egobeo. Menio. Te bidi me deli agade te digibulu bidibaso da, agai te bidi te aga pąba ma odasa asabo sunumi gegibo dao.  
\v 15 King o, te bidi dabego nageba te dwai sę yaiba po obaso, tama ena augwalide wi elama, tama ena nageba asalio. Eno homugo te eno nageba hanalu obaso da, te nago ena tau sabo sunumi gegaibao homu yai dao.  
\v 16 Eno homugo te ena me, eno ogwa dali dolobo bidi te nago gogologobe da homu yali. Te agai tama tiyu da, teda te Godigo aga we bidi dabe daba mani tǫde te da si te tǫde ma bidainu ebo te usu egobe da, homu yai dao.  
\v 17 Tama tiyu, eno homugo te nago ena tau sabo bomai po dąų walobaso, tama ena bugagia bidaio. Eno genuai bidi, nage da te Godigo mobo bidi ensel tiwai eyu, tama nago te mena wiegi yai kolesaga me, te dwai kolesaga ebo me, te nago koneani. Tama God, te naga Genuai Bidi, te nage dali bidimainao,” te wego te po wali.   
\p
\v 18 Kingo odama, tama agai te weba te tama po wai, “Wiegi yai dao. Tiali goli, megi da, eno hanalubo po me deli elalubao, tama eno homugo te nago mu po enaba wei ponainu homu ebao.”  
\p Tama wego te po wali, “Tialima, king, nago enaba hanalu wao,” wali.   
\p
\v 19 Tialima, Devitgo agaba te tama po hanalu wali, “Te Joapgo nage tagala palobaso, te nago te po wagasu asali da, agawe?”  
\p Tama wego te tama po wali, “King o, te ugwaba mu da, eno nago te hanalubo po me ela soyu, tama eno po geme me dualugobeo. Awe, te mu dao, te nago ofisa bidi Joapgo ena tagala palu, tama aga digi te megi eno nageba pusali po tigidali te enabolo ola mawai dao.  
\v 20 Tiali goli, agai odolali me wabeo. Menio. Agai te Apsalomgo te sęgę silabo homu elama, tama po wali. Tiali goli, king, nago te wiegi yai homu kolesaga koneani hauwa elalubao, te Godigo mobo bidi ensel tiwai elalu, tama nago te tǫde pedalubo sę tigidali konebo dao,” wali.   
\p
\v 21 Te we pai madigi, tama nosali kingo te Joap i olama asobo si, tama agai te tama po Joapbolo wali. “Odao. Eno nago homu wali peyu, usu da po wali. Tama tialima, nage pelama, te Apsalom sigi pelama, tama aga odasa asao,” wali.   
\p
\v 22 Joapgo te po odolama, tama aga te king gesabidiba te tǫba degasa dulama, te kingba genuai nogi mayu tialio. Tama agai te tama po wai, “O king, Godigo wiegi yai sę nageba yao. Megi da, eno koneani, nago enaba wiegi yai homu pemene ebao, magi baso meni, nago eno hanalu wali pode usu da po walio,” wali.   
\p
\v 23 Tialima, Joap hogodolama, te Gesurba pelama, tama Apsalom te Jerusalemba ma odasa asai.  
\v 24 Tiali goli, kingo te tama po wali, “Apsalom te aga bede digi bidimainu emainao. Aga aselama, te ena me suagaselamuo,” wali. Tialima, Apsalom te aga bede digi bidiyu, tama aga te king gesabidiba me sabaligi pabeo.   
\s1 Devitgo te Apsalomgo yali dwai sę sela sąyu, tagalali  
\p
\v 25 Apsalom te gasa sawi yai bidi mu, tama aga tigide te keni keni yali masalu deli me elalusiąwani. Te Israel bidi me deli te Apsalomgo gesabidi sawi yai tiwai me elalusiąwai, tama te Israel augwa te aga suabo homu elama, te wiegi yai homu pemene mu yai dao.  
\v 26 Te aga tobolu nisi hauwa elalu, tama te tobolu nisi bobage holama, te sęgę yai. Tama aga te tigidali kibu bede te deli sogo togoyu iduai. Tama agai te togali tobolu nisi augwa te sęgę dagala subadi, te aga sęgę te dagala suali te kilogram si usu igulali, te kingo skel tiwai yai dao.  
\v 27 Tama Apsalom te we sali, tama te ogwa sela elaluai, te wegi deli, aga nogi te Tamar. Tamar te gasa sawi yai we mu dao.   
\p
\v 28 Te Apsalom te Jerusalemde kibu be si bidali, tiali goli te kibu be si tomode aga te king sugi pabo usu me ebeo.  
\v 29 Tama tiyu, Apsalomgo te Joapba hanaluama, te aga kingba tagala palomainu homu yali, tiali goli Apsalomgo te Joapba po ola tolobo sogo, Joapgo te Apsalom suagasabo homu me isąwai. Tialima, te si sogo weyu, agai te Joapba po ma ola tolali, tiali goli Joap aga me asisąwai.  
\v 30 Tialima, Apsalom te hagela ebaso, tama te aga sę bidi dabeba te tama po wai, “Joapgo bali nedu du gi te eno gi pąde elalubao. Eno homugo dage pelama, te agai nedu du bali gi te siago ulugi piąo,” wai. Te sę bidi dabego te po odama, tama pelama, Joapgo te bali nedu du gi te siago ulugi pai.   
\p
\v 31 Tama te sę bidi dabego te sę yali kolesaga po te Joapgo odolama, tama aga te Apsalomgo beba pelama, te agaba hanalugi pai, “Magi baso nago sę bidi dabego te eno nedu du gi siago ulali dawe?”   
\p
\v 32 Tama Apsalomgo te tama po wei ponani, “Eno nageba po ola toliyu, te nago ena suagasao wali, tiali goli nage asisąwai. Eno homugo nago te eno po selama, te kingba wagi pomainu homu yai. Eno po te tama tiwai. Te magi baso dagego ena te Gesurde bidibadi selama, te Jerusalemba ma odasa asali, te page eno konemainu yali. Te ena Gesurde me bididugi sogo da, teda wiegi yai mu igi dao. Tialima, megi da, eno homugo nage te kingba pelama, agabolo hanalugi pao, te agai te eno aga sugi pabo te usu da po wagowe? Tama agai homugo te eno dwai sę yai da homu ebaso da, teda aga ena ela mumainu yaibao,” wali.   
\p
\v 33 Tialima, Joap te kingba pelama, tama agaba te Apsalomgo wali po dabe wagi pali. Kingo odolama, tama agai te bidi meba tagala palama, te Apsalom sigi pelama asomainu yai. Apsalom aselama, te king gesabidiba te tǫba degasa dulali, te kingba genuai nogi mayu tiali. Tama kingo aga nono nanio.   
\c 15  
\s1 Apsalomgo te king Devit sela sąyabo sunumi gegali  
\p
\v 1 Tiali goli nosali, Apsalomgo te wiegi yai karis me deli me, te hos meba me selama, tama te aga meba me painogo ebo sogo, aga te karisde dualasa peyu, te polasa pabo bidi te bidi sese si olama, nogo si, te 50 bidi me salio.  
\v 2 Tigidali side aga te kigamu digi mu hogodama, tama pelama, te hanu tomoba soabo sunumi pąba dolalugi piduali. Tama bidi me deligo te aga abagi dali wado po olama, tama te kingo dodolomainu asobo sogo da, teda te Apsalomgo aga i olama asobo si, tama agaba te tama po hanalu wali, “Nage mena bulu bidi dawe?” Tama te bidigo te aga te mena hani Israeldu asali po te agabolo weyu yai dao.  
\v 3 Tialima, Apsalomgo te sęgęgo page koneama tama da, te Apsalomgo agaba te tama po weyu yai, “Odao, te nago po dolo mu da,” weyu yali. “Tiali goli, hobede ya, kingo te nago po dagalumainu ebo bidi me nigilibeo,” tama po wali.  
\v 4 Tama Apsalomgo te bidiba te tama po weyu yai, “Eno homugo ena digi ena te po odobo jas bidi bidabo homu godolo ebao. Te ena tama te bidigi sogo da, teda eno te sęgę elalubo bidi dabego po dagaligi baso, tama te augwaligo po te eno bugagia dodoligi dao,” wali.   
\p
\v 5 Tama me, te bidi me deligo te Apsalom sulama, tama agaba kidu sugunagasu, te agaba genuai nogi magasubaso da, teda Apsalomgo te bidigo te tama temainu eyu gogoliyu, me sula tagalobeo. Menio. Te Apsalomgo aga pagea siyu, nono nani.  
\v 6 Tama Apsalomgo te bidi dabe augwa sęgę te kingba dodolainu asobo side, te tama naga tialio. Tama te kolesagago, Apsalomgo te Israel bidi dabego homu kekelama, tama augwaligo aga godolo homu yai.  
\v 7 Te kibu be me si me si te bidama da, tama Apsalomgo te king Devitba te tama po wagi pali, “King o, te eno bomai po me deli te Genuai Bidide dąų walali po usu nigi peyu, tama nago ena te Hebronba pomainu yao homu yaibawe?  
\v 8 Magi baso meni, te ena te Gesur te Siria tǫ pedaide bidali sogo, eno te tama bomai po Genuai Bidiba dąų walali, te Genuai Bidigo ena te Jerusalemba ma odasa pabo sogo da, teda eno te agaba lotu waibao po wai,” Apsalomgo te po wali.   
\p
\v 9 Tialima, kingo agaba te po wai, “Nage te nagame yai homu dali pao,” wali.  
\p Tama tialima, Apsalomgo te Jerusalem tagalama, tama te Hebronba pai dao.  
\v 10 Tiali goli, agai te tigidali Israel hani mebabolo te po sela pabo bidi meba tagala palali. Tama augwaliba te tama po wai, “Te dagego te biugel bu wabo odobo si da, teda dagego te tama i waiąo, ‘Apsalom te Hebronde king pedelama, bidiba,’ po wao,” wali.  
\v 11 Te aga Hebronba pabo sogo, Apsalomgo te Jerusalem bidi dabe te bidi sese nogo si, 200 bidi dabeba hanalu, te aga dali pinao po wai. Tiali goli, te bidi dabego te Apsalomgo elalubo homu kolesaga page te mu konesiąwai. Augwa te aga wali odolali tama palio.  
\v 12 Augwa pelama, te Hebronba sabolama, tama Apsalomgo te ofa me yai. Tama aga te ofa yali sogo, agai te taun hanu Giloba te bidi meba tagala palama, te Ahitofel sela asomainu yai. Ahitofel aga te king Devitba wiegi yai homu kolesaga mabo bidi dabede te bidi aga me deli dao. Tama aga te Gilo, te aga hanu tagasu, tama Apsalomba asai. Megi da, te Apsalom wali pabo bidigo namba te genuai pedaliyu, tama augwali te bomai hani mu pedelalio.   
\s1 Devit te Jerusalem tagalama, wi pali  
\p
\v 13 Bidi me deli asu, tama king Devitba te tama po wali, “Megi da, te Israel hani bidi tigidali te Apsalomba wali painu sisi elalubao,” wali.  
\v 14 Devitgo te odolama, tama agai te aga dali Jerusalemde bidibo ofisa dabe te sisinama, tama augwaliba te tama po wai, “Dago te Jerusalem polo tagalama, tama polo wi pinao. Tiyu, Apsalomgo da tigidali elabuo. Da polo asesa pinao. Te tama tisąyu da, teda te Apsalomgo hani polo asiyu, te hanu dolama, tama te hanude we bidi tigidali elaibao,” Devitgo te po wali.   
\p
\v 15 Tialima, te kingo ofisa dabego te tama po wei ponani, “King o, te nago mena sę yainogo ebo, dago te nage wali pabo naga te sisi elalubao,” wali.   
\p
\v 16 Tama tialima, te king dali, te aga we wai dabe me, te aga ofisa dabe me, augwa te Jerusalem hanu tagalama, palio. Tiali goli, aga te namba tu wali te nogo si wali we hani te bidimainu yali, te kingo be tonalumainu tiai dao.  
\v 17 Te king aga hani dali peyu, tama te Jerusalem taga painu yali sogo, augwali te hanu sesege dage badu mu elalubo be pąba doligi pali.  
\v 18 Tama king dolaludubadi, tama te ofisa dabe nogo sągą sąyu, tama polasa peyu, te king tonalubo ami bidi hani dabe dali pela wali, te augwali te hani Keret me Pelet hani dabe tama. Tama te Get hanu ami bidi tigidali te 600 bidi me te augwa nogo sągą sąsą pelayu, palio. Polobadu te 600 ami bidi dabe te Get hanude Devit dali bidai, tama augwa te aga wali asali.   
\p
\v 19 Tama kingo te tama po Itaibolo wai, te Get hanu ami bidi augwa polalubo bidibolo, te tama po wai, “Magi baso nage te da dali painogowe? Nage te ma geasa pelama, tama te king Apsalom dali bidigi pao,” wai. “Magi baso meni, nage te gasa badu bidi dao, tama nage eba bidagasali, te naga bulu tǫ pedai digibulu taga soyu, bidagasai dao.  
\v 20 Nage ede te pęwadage sogo naga bidali, tama tiyu, eno homugo nago te bidibo bulu tagalumainu ilama, tama da dali bilimainu me iligobeo. Da te bulu wau subigila bilalubo bidi tiwai bilaluaibao. Te nago naga hani selama, tama dage ma geasa peyu da, te wiegi yai dao. Tama eno homugo te Genuai Bidigo nage bugagia wiegi yai ilama, tama nage sesemane sogo tonalumainu homu ebao,” Devitgo te po wali.   
\p
\v 21 Tiali goli, Itaigo Devitba te tama po wai, “Te Sesemane Sogo Bidibo Genuai Bidigo nogide, eno mu po tama obao, te ena sesemane sogo nage dali bidada paibao,” wali. “Tama nage mena buluba pobaso, te ena nage dali paibao. Tama augwaligo te nage ela mubaso da, teda augwa ena me ela mumainu yaibao,” Itaigo te po wali.   
\p
\v 22 Megi da, Devitgo agaba te po wai, “Te usu da, dage ena dali pogǫǫ.” Tama tibaso, Itai me, aga ami bidi dabe me, te augwa we wai puluba dali, augwa te gasa hani wali palio.   
\p
\v 23 Te Devit aga hani dali augwa te Jerusalem taga pabo sogo, te tigidali we bidi gela umabo sę elama, mu dwai homu dene ebo gela wai. Tama king te aga hani dali te wę Kidron nogelama, tama te bulu kemi tǫ wa pai bulu pedaiba poloba pelawali.  
\v 24 Te Devit doligi pelama, tama te we bidi dabe paboba tonani sogo, te pris Sadok me, Abiatar me, tama te Livai dabe me bidalubo suali. Te Livai dabego te Dąų Wali Bomai Po Munalubo Halobage te tolasa aselama, tama te tǫba aiya mubo suai. Tama te pris Abiatargo te ofa ebo sę ela pidubadi, te we bidi augwa te Jerusalem hanu taga pabo sogoba usu nanio.   
\p
\v 25 Tama kingo Sadokbolo te tama po wai, “Te Dąų Wali Bomai Po Muani Halobage te hanuba ma sela pao,” wai. “Te Genuai Bidigo enaba wiegi yai homu pemene eyu da, teda agai ena te ma odasa aselama, tama eno te Dąų Wali Bomai Po Munalubo Halobage me, te aga bidibo ugwa be me, te eno sueibao.  
\v 26 Tiali goli, agai enade wiegi yai homu pemene isiąbaso da, teda tagalao. Te agai mena sę enade yainogo homu yali da, aga te sę emainu yaibao,” Devitgo Sadokbolo te po wali.   
\p
\v 27 Tama Devitgo te po ma naga te Sadokba weyu, te tama po wai, “Nage te nosali pedalubo sę koneani bidi dawe, ma meniwe? Eno e tama po obao. Nago te naga ogwa, Ahimas, me Jonatan, te Abiatargo ogwa sobadi elama, tama dage te taunba te duga wiegi yai nagame yai homu pemene dali ma geasa piąo,” wali.  
\v 28 “Ena te kemi tǫ wa pai buluba pelama, ena te wę nogebo pesageba sabalubo sogo da, teda te Jerusalemde pedelali sę po te dagego ola tolobo po odainu, te dage tonalu te sogoba usu naibao,” wali.  
\v 29 Tialima, Sadok de Abiatar dali sigo te Dąų Wali Bomai Po Muani Halobage te ma sela pelama, tama augwa te Jerusalemde bidali.   
\p
\v 30 Tama king Devit te homu sęgę mu ebaso, tama aga sągą nadoba su dia sanama, tama ugwa namego aga tobolu mesegaluali. Tama aga gela umabo sę elama mu weyu, tama peyu, te sunumidu wali palio. Te ugwaba holobo sunumi te Oliv bulu du bolama pabo sunumi elaluali. Tama aga dali pali we bidi tigidali, augwali me te augwa tobolu mesega selama, tama augwa gela wabo sę ela peyu, tama palio.  
\v 31 Tama augwali pelabadi, te sogo Devitgo te tama po odali, “Ahitofel pelama, te Apsalom aga hani dali tau sigi pai da,” po walio. Tialima, Devitgo te tama gedu haluasa po wali, “Genuai Bidio, nago te Ahitofelgo wabo po te tedali gasagi yai omainu ilama, te mu geda mumainu ilao,” wali.   
\p
\v 32 Augwali te bulu duba holama, tama augwa te Genuai Bidiba lotu wabo pesageba sabaligi palio. Augwa teba sabalubo si da, teda te Devitgo abagi me deligo te aga dali deliba gesabi ununama, tama aga dali painu yali. Te bidi aga nogi Husai, tama aga te Arka bulu bidi dao. Agai te aga ugwa pisilama, tama aga tobolude tǫ piali, te aga Devitde genuai homu dene ebo ola mayu, te tiwai yai dao.  
\v 33 Devitgo aga sulama, tama agabolo te tama po wai, “Te nage ena dali asainogo da, teda nago dabolo te nage dago tonalubo sę dene mawainu ebao.  
\v 34 Tiali goli, te nago ena tau sabo homu ebaso da, teda te wiegi yai da, te nage te Jerusalem moni hanu tomoba ma pelama, tama nago te Apsalom subaso da, teda nago agabolo te tama po wao, ‘King, polobadu eno te wiegi yai homu ilibo kolesaga te nago ayabolo mabo sę yai. Tama megi da, ena te nago sę bidi me deli tiwai bidaio,’ te tama wao. Te nago te tiwai ebaso da, teda nago te Apsalomba mawainu ebo homu kolesagago te Ahitofelgo agaba mani homu kolesaga te aiyaba elalueibao.  
\v 35 Odao, te pris si, Sadok me, Abiatar si me, te Jerusalemde bidiba,” po wai. “Tama nago te kingo bede tigidali odali po te augwali siba waibao.  
\v 36 Tama Ahimas, te Sadokgo ogwa, te Jonatan dali, te Abiatargo ogwa, augwali si me te augwa si aya dali bidibao. Te mena po nago odali, teda nago augwali siba wagi pobaso, tama augwali sigo te enaba te po wagasomainu yaibao,” Devitgo Husaibolo te po wai.  
\v 37 Tialima, Husai, te Devitgo abagigo te Devitgo po wali pelama, tama te Jerusalemba ma geasa palio. Te aga pelama, te Jerusalemba sabaligi pabo sogo, te Apsalom me te hanuba sabolagasalio.   
\c 16  
\s1 Sibago Devit te sunumide deliba gesabidi ununani  
\p
\v 1 Devitgo te Husai dali po mia silama da, teda aga te bulu du bagede bidali tagalama, tama dwasianu pabo gana yali. Tama Siba, te Mefibosetgo sę bidi, te asu, agaba gesabidi ununani. Sibago te 200 bret me, te augwaligo olali te duani wain wai te 100 me sobadi, te ni fik wai duani te 100 me, te meme tigiwali delide te augwa wain wę tede tabiai elaluali. Tama aga te nai dabe te donki siba munama, tama Devitba selasa asai. \x * \xo 16:1 \xt 2 Sml 9:9-10\x*  
\v 2 Tama Devitgo agaba hanalu wali, “Magi baso nago te nai dabe sesaliwe?”  
\p Tialima, Sibago te tama po wei ponani, “Te e donki dabe te nago sibi dabego dugulasa bilabo donki dabe dao. Tama te bret, me te nedu du, te nago hanigo tumainu ebo nai da. Tama te wain wę da, augwa te kemi tǫ wa paide bilalu, tama augwa tigi te hagela ebaso tumainu yabo wę dao,” Sibago te po wali.   
\p
\v 3 Tama kingo te tama po wai, “Wiegi yai mu dao. Tiali goli, eno koneainu yai, te naga tonalubo bidi, Mefiboset, aga menade bidibawe?”  
\p Tama Sibago te po wai, “Aga te Jerusalemde me bididubao, magi baso meni, aga te homu ebao, megi te Israel dabego aga te king pedalumainu nigilama, tama agai te Israel dabe tonalu, te aga wąį nǫų, te king Solgo, yali tiwai gilama yaibao,” wali.  
\v 4 King Devitgo te tama po odolama, tama aga te Sibabolo te tama po wai, “Mu da, agawe? Tialima, megi eno te Mefibosetgo doado bage tigidali te nageba mawaibao,” wali.  
\p Tialima, Sibago Devitba te tama po wali, “Ei, king, ena te nago olo sę ebo bidi tiwai me deli dao. Tama eno homugo te eno ebo sę tigidaligo te nago homu wiegi yai pemene ilaibao,” wali.   
\s1 Simeigo Devitba po dwai wali  
\p
\v 5 Devitgo te Siba dali po miani silibo si da, teda Devit te aga hani dabe dali te Bahurim buluba pali. Augwali te pesageba sabalubo sogo, te Solgo hani bidi me deli te buluba dįą aselama, te Devit dali deli gesabidi ununani. Aga nogi te Simei, tama aga te Gerago ogwa da. Simeigo te wado po wabo sę eyu, tama dwai po Devitba weyu, tama asidualio.  
\v 6 Te Simei te Devit me aga ofisa dabe augwali pąba asali sogo, agai te masigi meba augwaliba sąwani. Agai te hauwa we bidide me, te Devit tonalubo ami bidi dabede me, te wi me isąyu, augwali te Devit dali peyu, tama Devit te augwali tomode bidai. Te aga wi me ebeo. Menio.  
\v 7 Simeigo Devitba te dwai po te tama wai, “Nage gedao! Nage te bidi ela mubo bidi dao! Nage dwai bidi, nage gedao!  
\v 8 Nago te Sol sela sąnama, tama aga bidali pesage hasegelama, tama king pedelali. Tama nago te Solgo hani bidide te bidi hauwa ela muani. Tama tibaso, megi God Genuai Bidigo nago te dwai kolesaga yali wei ponobao. Tama Genuai Bidigo nage hasegelama, tama naga ogwa Apsalom te Israel king pedalumainu nigilaibao. Nage te bidi elibo bidi yai baso, tama tiyu, Godigo nage te dolobao,” te bidi Simeigo te po wai.   
\p
\v 9 Tama Abisai, te Seruiago ogwago, te Devitba te tama po wali, “King, magi baso te dwai yowigo nageba te dwai po wali gogola tagalaliwe? Te eno aga dogoni togomainu ilao,” wali.   
\p
\v 10 Tiali goli, kingo Abisaibolo me, te aga ama Joapba me, te tama po wai, “Te dage sigo sę me menio. Te aga gogola tagalao. Te Genuai Bidigo te bidiba po walobaso, te agai enaba te dwai po waibaso da, teda dego agaba hanalu waibawe, ‘Magi baso nago te tobage po obawe?’”  
\v 11 Tama Devitgo te Abisaibolo me te gasa ofisa dabeba te tama po wai, “Odao. Te ena ogwago digi ena ela muabo homu eyu da, teda magi baso da te e Benjamin hani bidigo enaba te wado po wabode te da midigi sobawe? Genuai Bidigo digi agaba obaso, te enaba dwai po omainu homu yali bogo, tama tibaso, aga te po omainu gogola tagalao.  
\v 12 Genuai Bidigo te eno ebo dwai kolesaga koneama, tama Genuai Bidigo te homu eyu, te agai enaba te dwai po wali dabe hasegelama, tama aga te wiegi yai sę enaba yaibawe? Te dago sueibao,” wali.   
\p
\v 13 Devitgo te tama po ola silama da, tama aga dali, te aga hani bidi dabe dali, palio. Augwa te wali pali sunumi, te bulu du pąba pabo sunumi elaluali. Tama Simei te bulu du ugwadu soyu, tama Devitba dwai po wabo sę eyu, tama agaba te masigi me tǫ dulu sąbo sę yai dao.  
\v 14 Tiali goli, king dali te ami bidi dabe, me te aga we bidi dabe te pelama, tama augwa te painogo yali buluba sabolalio. Augwali pali te bomo mu yai, tama tibaso, augwa tede toma nanio.   
\s1 Apsalom te Jerusalemba sabolali  
\p
\v 15 Te Apsalom dali, te gasa Israel dabe tigidali me, te Jerusalemba sabolali. Tama Ahitofel te Apsalom dali asai.  
\v 16 Tama nosali, Husai, te Devitgo abagi, pali, te Apsalom dali deliba gesabidi si ununama, tama agai Apsalomba i weyu, te tama po wali, “King o, nage te sesabi gana elama, bidagameo!”   
\p
\v 17 Apsalomgo te po odama, tama aga Husaiba te tama po wai, “Ei, nage te Devitgo wiegi yai abagi me deli dao. Magi baso nage te aga dali pabewe? Te kolesaga te abagi kolesaga ebo wiegi yai da, agawe?”   
\p
\v 18 Tialima, Husaigo Apsalomba te tama po wai, “Menio. Te Genuai Bidigo dali, te e bidalubo we bidi dabe me, te tigidali gasa Israel dabe daligo te king me deli nigilibaso da, teda ena te aga dologoba pelama, tama aga dali bidaibao.  
\v 19 Tama ena te nago sę bidi bidisąyu da, teda ena dego sę bidi bidigi pagawe? Polobadu eno te nago ayago sę yali, tama megi da, te aga ogwa, nago sę yaibao,” te po wai.   
\p
\v 20 Tialima, Apsalomgo Ahitofelbolo te tama po wai, “Megi da, te dagego enabolo waiąo. Te eno magi yagawe?”   
\p
\v 21 Tama Ahitofelgo te po wali, “Nage pelama, te naga ayago si wali we hani dali pigi pao, agai te kingo be tonalumainu taga pai. Te nago tama tiyu da, teda te tigidali Israel we bidi hanigo te tama koneaibao, nago te naga aya dali boi bidi ebo tiwai mu pedelaibao. Tama tiyu, te megi nage wali painu ebo we bidi tigidaligo, augwa te nage wali pabo bomo mu yaibao,” wali.  
\v 22 Ahitofelgo te tama po wali, tialima augwa te kingo be ugwadu daiba te bidi meba tagala palama, tama augwa te ugwa be me deli sę yani. Tama tigidali we bidigo gedude Apsalom te ugwa be tomoba pai. Tama augwa te aga ayago si wali we dabe sibi hani odasa aselama, te Apsalomgo augwali deli deli dali pagela pimainu yai dao. \x * \xo 16:22 \xt 2 Sml 12:11-12\x*  
\v 23 Te bidi dabe augwa te Ahitofelgo po odali sogo, augwa te homu eyu, te po te Godigo digi pusai po wali te homu elama, tama augwa wali mu palio. Hasia bolo Devitgo te Ahitofelgo po tigidali wali pali, tama megi me Apsalomgo wali pabo homu yalio.   
\c 17  
\s1 Husaigo Apsalom tibo po ola mani  
\p
\v 1 Nosali gana dwasianu, Ahitofelgo te tama po Apsalomba wai, “Te nago usu da obaso, te eno te bidi sese hauwa, te 12,000 bidi selama, tama megi hulide te ena dali te bidi dabe dago te Devit pali wali pomainu ilaibao,” te po wai.  
\v 2 “Megi da, aga poma peyu, tama haliga sęgę elalubadi, te eno aga dali hwįgi paibao. Te aga dwai noma siyu, tama aga hani bidi dabe wi pabo si da, tama eno te king deli naga ela muaibao,” po wali.  
\v 3 “Tama eno agai hani bidi tigidali te eno nageba ma odasa asaibao. Te augwali te we me deli te megi tamadi sai wego tama aga bidide dwai haliga sębę ebaso, te wi pabo tiwai yali, tiali goli nosali te aga bidiba ma asobo tiwai gilama emainu yaibao. Te nago homugo te Devit wali pali we bidi te nageba ma odasa asomainu ebo homu elalubao. Tama tiyu, nago te Devit ela mumainu homu elama, tama te we bidi dabe bugagia bidimainu homu elalubao,” wali.  
\v 4 Apsalom dali, te Israel dabego tonalubo bidi dabe daligo te po odama, tama augwa homugo te wiegi yai homu mu da homu yali.   
\p
\v 5 Tama Apsalomgo te tama po wai, “Te Husai me i olama, te aga homude elalubo po pusagaselama, te dago odaibao,” wali. Tialima, augwa aga i olama, asali.  
\v 6 Husai asobo si da, tama Apsalomgo te Ahitofelgo wali po tigidali te agabolo walali. Apsalomgo agaba te tama po olama da, teda Apsalomgo te Husaiba hanalu wali, “Te homu dago wali pobaso, te usu egowe, ma meniwe? Te meniyu da, teda nago te dabolo te mena sę yabo po te nago dabolo walao,” wali.   
\p
\v 7 Husaigo te tama po Apsalomba wei ponani, “Te megi Ahitofelgo nageba te mani homu kolesaga te wiegi yai me ebeo.  
\v 8 Nago koneani, naga aya, Devit, te aga ami bidi dabe dali, augwali te hwįbo bomai bidi dabe dao. Augwali te haliga sębę dwai mu elama tama bidibao, te so hasa beago te aga wai dabe tigidali te bidigo wi sela paide te haliga sębę ebo tiwai elalubao. Te nago ayago te hwįbo kolesaga mu koneani, tama tibaso, aga te we bidi dali hulide piainu eyu, te usu me egobeo.  
\v 9 Te megi da, aga te bulu du genuai tǫ dedagede, ma gasa pedai badu me, te geme dualalubo homu ebao. Tama te megi dago hwįgi pobaso, tama augwaligo te dago ami bidi meba elibaso da, teda te we bidi dabego te sę yali po odoyu, tama augwa te tama po waibao, ‘Te Apsalomgo hani te dwai sę yabo sogoba mu gegali da,’ po wabuo.  
\v 10 Tama nago te gasa ami bidi dabego te tama po odama, tama te wi dwai mu eyu, te augwa digi te hwįbo bomai bidi elalu, tama augwa te laion tiwai gilama te bomai bage dolalu, te tagala weyu godolo meni yani. Te Israel bage tigidaligo koneani, te nago aya te polalubo ami bidi mu, tama agai bidi dabego te bomonama mu hwįbo dao,” wali.   
\p
\v 11 “Tialima, eno homu da te tama tiwai, nago te Israel bulu tǫ pedai tigidali badu te tigidali bidi i olama, tama augwali sisinama, tama augwali umabo mu pedelama, te tamu ąį masigi kemi tiwai pedalumainu emainao. Tialima, te naga digi polasa peyu, tama dagego te Devit dali hwįgi piąo,” wai.  
\v 12 “Te dago Devit gegi pelama, te dago menade te aga dali deliba gesabidi unulubaso da, teda dago agai haniba te hwįbo sę umabo mu ilaibao. Te augwaligo da palibaso, te usu me egobe, te hulide tǫba dulubo segene wę te bidigo palibo usu isiąbo tiwai gilama yaibao. Tama dago te Devit dali, te aga hani dali tigidali elama, tama me deli te me bidigobeo.  
\v 13 Tiali goli, te aga hanu me deli tomoba wi pobaso da, teda da Israel ami bidi dabego te baklain bono selama, tama te bono dabe te hanu bagulali obode gebelama, tama te hanu te odogo buluba kekelama, tama te tigidali dolaibao. Tama te hanu bagulali masigi te dwasianu elalumainu me egobeo. Mu menio.” Husaigo te po wali.   
\p
\v 14 Husaigo po ola siminibo si da, teda Apsalom dali, te tigidali Israel dabe daligo te tama po wai, “Te Husaigo homu kolesaga te wiegi yai mu elama, tama te Ahitofelgo homu kolesaga te aiyaba elalualio,” te po wai. Genuai Bidigo te augwaligo homu te Husaigo homu kolesaga wali pomainu ilali, magi baso meni, Genuai Bidigo te Apsalom dolabo homu dola sai elaluai. Te mu tama, te Ahitofelgo homu te wiegi yai po wali, tiali goli Genuai Bidigo augwaligo te homu kolesaga wali pomainu me ilibeo.   
\s1 Devit te Jordan wę pedai u badu palio  
\p
\v 15 Te po minama nosali, Husai pelama, te pris Sadok me Abiatar siba te po waligi peyu, te agai Apsalomba me, te Israel dabe tobolu bidi dabeba dali mani po te wagi pali. Tama agai augwali siba te Ahitofelgo yali homu kolesagade po me wai.  
\v 16 Tama agai te tama po wali, “Te dage sigo te po asesa, te Devitba ola toliąo. Te tama po agabolo wao, ‘King, megi nage te Jordan wę nogeabo bulu pąde me pigio,’ po wao. ‘Nago te wę asesa nogelama, tama te wę u badu pedaiba polo pao. Tiyu, augwali aselama, te nage me, naga hani dali, tigidali ela muabuo,’ dage sigo te po Devitba ola tolao,” Husaigo te po wali.   
\p
\v 17 Jonatan de Ahimas si te Jerusalem obo bogo badu te wę Enrogelde tonalu, bididuali. Augwali si te pris sigo ogwa dao. Te augwali te hanu tomoba soabo te we bidi dabego augwali si suidali homu eyu te hagela yali, tama augwa si te bulu badu geme dualaluali. Tama te sę ebo we me deligo te hanu tomode ebo sę po te augwali siba wagi peyu yali, tama augwali pelama, te po te Devitba wagi peyu yai dao.  
\v 18 Tiali goli, te sogo te gesi ogwa bidi me deligo augwali si sulama, tama te Apsalombolo wagi pali. Tama augwali si asesa polo te Bahurim bulu bidi me deligo beba palio. Te bidigo be pąde te wę ulu me deli elaluali, tama Jonatan dali Ahimas si te tǫ dedage tomoba pelama, geme dualaluali.  
\v 19 Tama te bidigo wego te name ugwa me deli selama, tama te wę ulu dedage dalalubo te mesegelali. Tama agai te wit meba selama, tama te ugwa daide ugwadu muna muna palio. Te augwali geme dualalubo, te bidi dabego konesiąmainu ebo tiwai ilalio.   
\p
\v 20 Nosali, te Apsalomgo bidi mebago te augwali si soali wali aselama, pedalagasu, tama te weba te tama po hanalu wali, “Ahimas me Jonatan si menade bidibawe?”  
\p Tama wego te tama po wali, “Augwali si te wę nogelama, palio.” Tialima, te bidi dabego te Jonatan de Ahimas si gegegi pali, tiali goli augwaligo te augwali si me subeo. Tama tibaso, te Apsalomgo tagala palali bidi dabe augwa te Jerusalemba ma geasa palio.  
\v 21 Te ofisa dabe augwa ma geasa pai madigi, Ahimas de Jonatan si te tǫ dedagede dualaluali tagalama, tama buluba teda soalio. Tama augwali si te hogodama, te Devit bidibo madiba palio. Tama augwali sigo agaba te tama po wai, “Nage ede me bidilamuo. Nago te naga hani tigidali selama, tama asesa, tama te wę nogelama, te u badu pedaiba pao,” wali. Tama nosali, augwali sigo te Ahitofelgo aga dolainu wali po tigidali te Devitba walali.  
\v 22 Devitgo te po wabo oda selama da, teda polo tama mu te aga hani selama, tama augwa te wę Jordan nogelama, u badu palio. Tama be posobode, tigidali pela silalio. Te me deli tede me bidibeo.   
\p
\v 23 Ahitofelgo te Apsalomgo agai po wali pabo susiąbaso da, tama aga donkiba duagi pelama, tama aga hanuba digi ma geasa pai. Tama aga pelama, te aga we waigo tigidali doado bage me, te aga bisnis me, te tigidali dodolama, tama nosali aga digi te aga ba bonoba walama, tama isalio. Tama aga hani sibi dabego te aga tigi selama, tama aga ayago gų pageba pubaligi palio.   
\p
\v 24 Tialima, Apsalom dali, te Israel ami bidi dabe dali, te hogodama, Devit pali wali pobeali. Tiali goli, Apsalom te Jordan wę nogebo sogo, Devit te aga hani bidi dabe dali te hanu taun Mahanaimba sabolalio.  
\v 25 Apsalomgo te Amasago te Joapgo pesage selama, te aga ami dabego polalubo ofisa bidi nigilali. Amasa te Jetergo ogwa dao. Jeter te Ismael hani bidi me deli, tama agai te we Abigel sali, te Nahasgo wegi da. Tama Seruia, te Joapgo ida, aga te Abigelgo ama dao.  
\v 26 Tialima, Apsalom te Israel dabe dali te Gileat bulu tǫ pedaiba sabolama, tama tede te bidabo pesage nigalio.   
\p
\v 27 Tama Devit te Mahanaimba sabaligi pabo sogo, te bidi selago agaba gesabidi deliba unulagasali. Te augwa nogi te tama. Sobi, te Nahasgo ogwa. Sobi te Raba hanu bidi, te Amon bulu tǫ pedai bidi dao. Tama Makir, te Amielgo ogwa dao. Makir aga te Lodebar hanu bidi da. Tama Barsilai, te Rogelim hani bidi, te Gileat bulu tǫ pedai bidi dao.  
\v 28-29 Augwaligo te plet, me sospen, te tǫgo nigai sene, me te bet dabe, te tama nai meba seselama, te Devitba me te aga hani bidi dabeba mawainu sela asai. Tama augwaligo te nai me meba sesali, te wit me, bali me, plaua me, tama augwa te siade ulai wit me, tama gasa tobage tagabi si me, hani me, te bulmakau ame pę me, tama te bulmakau ame pęgo nigai nai sis me, te tama nai sesela magasalio. Tama augwa te sipsip meba me sesali. Augwa koneani, Devit te aga hani dabe dali te wa pai bulu te bobage sunumidu aselawali homu yali, tama te tialigo te Devitgo hani te nasi ilama, tama dogoni wa palama, tama augwali tigi te bomo kimi mu meni yani homu yai. Tama tibaso, augwaligo te nai dabe augwaliba sesali, augwa te nai tumainu elama, tama bomo ma somainu, tama tiai dao.   
\c 18  
\s1 Joapgo Apsalom ela muai  
\p
\v 1 King Devitgo aga ami bidi dabe sisinama, tama te 1,000 bidi hani, me te 100 bidi hani tonaluabo ofisa dabe nidigili pai.  
\v 2 Tama agai aga ami bugulama, te genuai hani sela nigilama, tama Joapgo te hani me deli tonalu, tama Abisai, te Joapgo amago, te hani me deli tonalu, tama te Get bulu bidi Itaigo te hani me deli tonalu yali. Tama Devitgo aga hani ami bidi dabeba te tama wai, “Te ena digi ena me te hwįboba dage dali paibao,” wali.   
\p
\v 3 Tiali goli, augwaligo te tama po agabolo wai, “Menio. Nage da dali me pogobeo. Te boi hwįbode da tigidali wi sobaso da, teda augwaligo dade te homu kone me egobeo. Te augwaligo da hani me badu togwa selama, elibaso da, tede me te augwaligo homu kone me egobeo. Tiali goli, nage da dali pai madi, tama augwaligo nage elibaso da, teda augwaligo te da hani 10,000 bidi elimainu ebo tiwai yaibao. Tama tiyu, dago homugo nage te taunde bidibaso, te wiegi yai yaiba homu ebao. Tama da te bidi, me hwįbo doado bage, sǫą pobaso da, teda nago da tau selama, tolomainu yaibao,” wali.   
\p
\v 4 Tama kingo po wei ponoyu, te tama wai, “Te usu dao, eno te dagego homu wali pabo homu elalubao.” Tama Devit te taun bagulali genuai obo pąde dolalu, tama agai te ami hani dabe te nogo sągą sąyu, te mas ela peyu, te buluba soabo suai. Te ami bidi dabe te 1,000 bidi hanidu, me 100 bidi hanidu wasiasa soalio.  
\v 5 Tama Devitgo te Joapba, me Abisaiba, me Itaibolo te tama bomai po mawai, “Dagego ena homu kone palama, tama dagego te gesi ogwa bidi Apsalomba te wiegi yai homu elama, olo tau sabo homu te bidiba yao,” te po wai. Tama Devitgo te ofisa bidi selabolo wabo po te ami bidi dabego me odali.   
\p
\v 6 Te Devitgo ami bidi dabe pelama, te Israel dabe daliba gesabidi deliba ununani, te augwali Apsalomgo ami bidi dabeba te augwali deliba gesabidi ununanio. Tama augwaligo augwali dali te Efraimgo busi bulude hwįanio.  
\v 7-8 Augwali hwį hwį pelama, tama te Devitgo ami bidi dabego te Israel dabe aiyaba elaluama, tama augwali mu dolali. Te hwįbo genuai pelama, tama augwa te bulu tǫ pedai tigidali badu hwį hwį pela walio. Tama bidi hauwa te bulu tomode esela pelama, tama augwali isila pai. Tama tialima, te buside isali bidi dabego nambago te hwįbode isali bidi dabego namba te aiyaba elalualio. Te hwįani sogo tomode isali ami bidi dabego namba te umabo bidi sese, te 20,000 bidi tama isai dao.   
\p
\v 9 Te Apsalom te donkide dualasa peyu, tama donki te genuai ni kali te ni me elalubo dologodu pobadi, tama Apsalomgo bobage tobolu nisi te ni nologo tomode habela selama, dąų wali. Tama te donki udayu, tama Apsalom tede walaluai. Apsalomgo te Devitgo ami bidi meba te agaba gesabidi unulubaso, te sogo aga wi pobadi, te tama sę agaba pedelai dao.  
\v 10 Tama te ami bidi dabe augwali me deligo te Apsalom sulama, tama agai te tama po Joapba waligi pali, “Megi da, eno Apsalom te ni me deli te ni kali nologode walalubo sualio,” po wai.   
\p
\v 11 Tama Joapgo te tama po agabolo wali, “Mu tama, nago aga sualiwe? Tialima, magi baso nago te aga polo ela muai meniwe? Te nago aga ela mugi sogo da, teda eno nagebolo te mone 100 kina me, te kukulu me deli me, te nageba magi dao,” wali.   
\p
\v 12 Tiali goli, te bidigo Joapbolo te tama po wai, “Tagalao, nago enaba te mone silvago te 10,000 kina mobaso da, teda eno magi sę me deli te kingo ogwa dali me egobeo,” wali. “Magi baso meni, da tigidaligo te kingo po nageba me, Abisai me, Itaiba me, te tama po mabo odai, ‘Dagego ena homu kone palama, tama te gesi ogwa bidi Apsalomba olo tau sabo wiegi yai kolesaga yao,’ po wai dao.  
\v 13 Tama eno kingo te po wali sela sąyu, tama Apsalom ela mubaso da, teda kingo eno te sę yali po odaibao. Magi baso meni, kingo te tigidali sę pedelali po odobo dao. Tama kingo ena po tų ela mobaso da, eno koneani, te nago ena tau me sogobeo,” wali.   
\p
\v 14 Tama Joapgo te tama po wei ponai, “Te tagalao, ena nage dali po mibo hagela ebao,” wali. Tialima, Joapgo te sesemone ene sela selama, tama te Apsalom walalubo ni elalubo madiba palio. Te Apsalom isisąbadi, tama Joapgo aga te enego enani, tama te enego aga homu hobolu dude dolalio.  
\v 15 Tama nosali, te Joap agai ene sela bilibo ami bidi nogo si bidi, augwali te Apsalom pąba udada aselama, tama aga ela muai.   
\p
\v 16 Apsalom isaide, teda Joapgo te ami bidi me delibolo te biugel bu wao po olama, te Devitgo ami bidi augwa te hwįbo tagalumainu yai. Tialima, Devitgo hanigo odolama, tama augwa te Israel dabe taga soyu, ma geasa asali.  
\v 17 Tama augwa te Apsalomgo tigi selama, tama te buside genuai tǫ dedage me deliba aiyaba sąwani. Tama augwa te masigi hauwa selama, tama aga tigi daiba ugwadu te masigi sąnama, tama augwa te masigi pesage holali te genuai pedelai. Tama te Israel dabe wi pelayu, te augwa bulu deli deliba ma tedela palio.   
\p
\v 18 Polobadu, te Apsalom bidibo ula elalu bidali sogo, agai te bobage masigi genuai me deli selama, tama te Kingo Odogo Bulude dodolali, te aga nogi sa mubo tiwai ilali. Tama agai te tama wai, “Te ena bidali pesage hasegelama bidabo wai meni baso, tama te Israel dabego ena homu kone palabo ogwa meni yani,” homu elama, te tama kolesaga yai. Tama tialima, Apsalom aga nogi digi te masigiba mawai elaluai. Tama megi me te we bidi dabego te masigi nogi weyu, te tama po obao, “Te Apsalomgo masigi da,” wabo dao. \f + \fr 18:18 \ft Te megi e elalubo po, te da e bidalubo bidi dabede po olama me wabeo. Menio. Agai te wali po te e buku asęani sogo bidali bidi dabede te tama po olama, walio.\f*   
\s1 Augwaligo Devitba te Apsalom isali po walali  
\p
\v 19 Te Apsalom isai madi nosali, Ahimas, te Sadokgo ogwago, te Joapbolo te tama po wai, “Te nago ena te kingba udulama pomainu elama, tama te wiegi yai po agaba magi pomainu eyu, te Genuai Bidigo aga boi bidi dabego bomo te togwa sąwani po wagi pomainu yabo, te usu da po waibawe?” te po wali.   
\p
\v 20 Tiali goli, Joapgo agaba te tama po wai, “Menio, megi nago te kingba wiegi yai po me sela pomainu me egobeo. Te me sogo gasa sogo nosali nage pomainu ebo homu usu yaibao. Tiali goli, megi da, menio, magi baso meni, te aga ogwa isai dao,” wali.  
\v 21 Tama Sudan bulu bidi me deli bidali, tama aga te kingo sę bidi da. Tama Joapgo agaba te tama po wai, “Nage udada pelama, nago te suali sę dabe po te kingba waligi pao,” po wai. Tialima, te sę bidigo Joapba te mage basigulama, tama nosali te aga udada palio.   
\p
\v 22 Tiali goli, Ahimasgo Joapba po bomo elama, te tama po wai, “Te enaba magi sę pedalubaso, me te tagalao, eno homugo nago ena te Sudan bidi pali wali peyu, tama ena me te kingba paio,” wali.  
\p Tama Joapgo agaba te tama wai, “Gesi ogwa bidi, magi baso nage painogowe? Te nago mena wiegi yai nai me sogobeo.”   
\p
\v 23 Tiali goli Ahimasgo po ma wali, “Te enade magi sę pedalubaso, teda tagalao, ena paio,” wai.  
\p Tama Joapgo te tama po wali, “Usu da, nage pao,” wali. Tama Ahimas te Jordan malu tǫ dolo elalubo badu te udada pelama, tama te Sudan bidi asobo badu te aga polasa saboligi pai dao.   
\p
\v 24 Te sogo Devit te hanu obo bagulali genuai obo pąde dugulaludali. Tialima, te hanuba asobo bage tonalubo bidi pelama, te bagulali obo sunumi pąde ugwadu daiba dolagasali. Agai digibulu tonono pobadi, tama te bidi deli naga udada asobo suai.  
\v 25 Tama te tonalubo bidigo te kingba i weyu, te tama po wai, “Te bidi me deli udada asobao,” wali.  
\p Tama kingo te tama po wai, “Te bidi me deli naga asobaso da, teda agai te wiegi yai po sela asiyu tebao.” Tama te tonalubo bidigo te bidi te hanu pąba udada asobo suai.   
\p
\v 26 Tama nosali te tonalubo bidigo te gasa bidi me udada asobo sulama, tama agai te sunumi tonalubo bidiba i weyu, tama agaba te tama po wai, “Suao, te gasa bidi me udada asobao,” wali.  
\p Tama kingo te tama po wai, “Te bidigo me te wiegi yai po sela asiyu ebadi bogo dao.”   
\p
\v 27 Tama te tonalubo bidigo te tama po ma weyu te po wai, “Eno te polasa udada asobo bidi te Ahimas, te Sadokgo ogwa, subo tiwai ebao,” wali.  
\p Tama kingo te tama po wai, “Ahimas te wiegi yai bidi, tama agai te wiegi yai po sela asoba homu ebao.”   
\p
\v 28 Tialima, Ahimas te pąba asiyu, tama aga te kingba i weyu, te tama po wai, “Da te bugagia bidibao.” Tama aga te kingba sabolama, tama te tobolu tǫba basigulama, tama aga te po wai, “King, nage eno genuai bidi da, dago te dena Genuai Bidi God nogi ugwaba sinao. Te augwaligo nage dali hwįnama, te nage sela sąwainu yali, tiali goli Genuai Bidigo augwali te dago nogoba munama, tama dago augwali aiyaba elalualio,” wali.   
\p
\v 29 Tama kingo Ahimasbolo te tama po hanalu wai, “Te eno ogwa, Apsalom, aga me te bugagia bidibawe, ma meniwe?”  
\p Tialima, Ahimasgo agabolo te tama po wai, “King, eno te bidi hauwa sisinama, tama genuai po dagą weyu ebadi, te eno sulama tama te Joapgo ena te nago sę bidi dali tagala palali. Tiali goli te augwaligo mena sę ebo te eno me konebeo,” wali.   
\p
\v 30 Tialima, kingo te tama po agabolo wali, “Nage u badu dolalugi pao.” Tama Ahimasgo te king taga soyu, u badu dolalugi soali.   
\p
\v 31 Tialima, polo tama te Sudan bidi te sabolagaselama, tama kingba te tama po wai, “King, nage eno genuai bidi da, eno nageba maiabo wiegi yai po sela asali elalubao. Te nage dali hwįnama te nage sela sąwainu yali bidi dabe da, tiali goli te sogode megi te Genuai Bidigo nage tau selama, tama augwaligo magi dwai sę nage dali ma egobeo,” te po wai.   
\p
\v 32 Kingo odolama, tama te po wai, “Te eno ogwa, Apsalom, aga te bugagia bidibawe, ma meniwe?” Tama te Sudan bidigo po wei ponoyu, te tama po wai, “King o, eno homugo te tobage sę te gesi ogwa bidiba me pedalumainu homu eyu, te nago boi bidi tigidaliba me, te nage dali hwįainu eyu, te nageba dwai sę yainu ebo bage dabeba me, pedalumainu homu ebo dao,” wali.   
\p
\v 33 Kingo te po odolama, tama aga haliga dwai mu elama, tama aga hogodasa peyu, te obo bagulali sunumi te elalubo pąde daiba te be habu tomoba pelama, tama aga gela udali. Tama aga ugwaba holiyu, te tama tiwai i wali, “Te eno ogwa, Apsalom o. Eno ogwao, eno ogwa, Apsalom. Te eno nage hasegeliyu, te ena isigi sogo da, te wiegi yai mu igi dao. O Apsalom, eno wai o, eno wai o!”   
\c 19  
\s1 Joapgo bomai po Devitba mawai  
\p
\v 1 Tama nosali bidi mebago Joapbolo te tama po wali, “Devitgo te Apsalomde homu dene mu ebaso, tama gela wabo sę idubao,” wali.  
\v 2 Tama te sogo te Devitgo ami bidi dabego te tama tiwai po odali, te king Devitgo te aga ogwa Apsalomde homu dene ebo gela udubo po odobaso, tama augwa te hwįanide te wiegi yai homu pemene yali tiwai ma ebeo. Menio, augwa haliga sęgę elaluali.  
\v 3 Tama te ami bidi dabe augwa te hanuba ma begasa asiyu, te dua dua mu asiyu, te hwįbo side wi aselabo ami bidi dabe tiwai elama, tama genuai hale dali elasa asasawai dao.  
\v 4 Tama te sogo te kingo aga gesabidi halua selama, tama homu dene ebo sę ebaso, te bomonama i weyu, te tama po wai, “O eno wainu, Apsalom. O Apsalom, eno wai, eno waio.” Te tama po wai.   
\p
\v 5 Tialima, Joap te kingo beba pelama, tama agaba te tama po wai, “Odao. Megi nago te naga ami bidi tigidali te dwai hale mu ilibo sę yalio. Te sogode naga te bidi dabego nage tau salio. Tama nage dali, te nago we wai, me te nago si wali we hani dabe dali, te dage tigidali me dolobeo.  
\v 6 Tiali goli, nago te nage wei eyu godolo ebo bidi dabe te nago godolo ebo meni, tama nago te nage godolo meni sabo bidi dabe, te nago augwali godolo ebo da. Te nago kolesagade dabolo te tama tiwai dolo ola mani, nago homugo te naga ofisa dabe, me ami dabe te olo nai tiwai da homu ebao. Tama eno koneani, te Apsalom bidibadi, tama da tigidali isigi sogo da, teda tego nago homu wiegi yai pemene iligi dao,” Joapgo te po wali.   
\p
\v 7 “Tialima, odao. Nage hogodasa pelama, te ami bidi dabe wiegi yai homu pemene ilabo po migi pao,” wali. “Te Genuai Bidigo nogide, eno mu po tama obao, te nago tama tisąyu da, teda te sogo hulide te tigidaligo nage taga pobaso, tama nage sęgę genuai mu saibao. Tama te sęgęgo te nage gesi ogwa bidide bidibadi nageba te pedelali tigidali sęgę te aiyaba elaluama, tama megi e sogoba usu nagasaibao,” wali.   
\p
\v 8 Joapgo po ola simanobo si da, teda king Devit hogodasa pelama, te taun hanuba pabo sunumi pąba duagi pai. Tama aga ami bidi dabego tama po odali, te king aselama, te taun hanuba soabo sunumi pąba duayagaselama, tede bidibo po odai. Tama tibaso, te ami bidi dabe pelama, aga dali hodobo bidigi pai.  
\s1 Te Juda dabego Devit ma asomainu hanalu wali  
\p Te tigidali Israel dabe wi pelayu, te augwa bidali deli deli buluba ma pela silalio.  
\v 9 Tama te tigidali Israel hani we bidi augwa hasi tomode digi te konila po wai. Tama mebago te tama po wali, “King Devitgo te da tau selama, tama te Filistia dabego, me te gasa boi bidi dabego te da me dolobeo. Tiali goli, aga te Apsalomde wi peyu, tama dago bulu tǫ pedai taga pai dao.  
\v 10 Dago te Apsalom te dago king bidi pedalumainu nigilali, tiali goli augwa te hwįnama, tama augwaligo te aga ela muai dao. Tialima, magi baso te da olo tama bidiyu, tama dago te king Devit ma oda sigi pisąma ebawe?” Augwaligo te po wali.   
\p
\v 11 Bidi mebago te Israel dabego te wabo po te Devitba walali, tama tibaso, king Devitgo po te pris Sadokba me te pris Abiatarbolo ola tolu, te tama po wai. “Eno homugo dagego eno po Juda bage tobolu bidi dabeba pusumainu homu ebao. Ena ede bidiyu, tama te Israel dabego wabo po eno odali. Tialima, magi baso dage Juda bagego te Israel hani dabego te polasa enaba hanalu, te ena eno beba ma asomainu ebo po omainu sula tagalu gogolobawe?  
\v 12 Da tigidali te deli kaneme dao. Tama tiyu, magi baso dagego te gasa bidi dabe te dageba poligi somainu elama, tama ena ma odasa asomainu ebo po omainu ebo dawe?”  
\v 13 Tama me Devitgo te pris siba po waliyu, te tama po Amasaba omainu yai, “Dadi si te deli kaneme dao. Eno nago te Joapgo pesage selama, tama eno ami dabego polalubo ofisa bidi nigilaibao. Te eno tama tisąbaso da, teda Godigo ena ela mumainu yaibao,” wali.   
\p
\v 14 Tialima, Devitgo te wali pogo te Juda bidi dabe tigidaligo homu kekebaso, tama augwaligo agaba te tama po ola tolali, “Dago homugo te nage naga hani dabe dali, dage tigidali te Jerusalemba ma asomainu homu ebao,” wai.  
\v 15 Tialima, Devit dali, aga hani dabe te hogodama, palima, tama te wę Jordanba sabolali. Te Juda bidi dabego Devit te wę Jordan nogebo sogo, te Devit dali gesabidi deliba unulabo homu yai. Tama tiyu, augwali pelama, tama te wę Jordan pąde te bulu Gilgalba tonalugi pai dao.  
\v 16 Tama Simei, te Gerago ogwa, aga te Benjamingo hani bidi, tama aga te bulu Bahurimdu asai, aga te Juda dabe dali polo asesa, te Devit dali deliba gesabidi unulainu asai. \x * \xo 19:16 \xt 2 Sml 16:5-13\x*  
\v 17 Tama te Benjamingo hani bidi 1,000 te aga dali asai. Tama me, Siba, te Solgo hani sibi dabego sę bidi me, te aga ogwa dabe te 15 ogomani, me te aga sę bidi te bidi sese deli badi, tama augwa bolo asesa pelama, te king Devit asisąbadi, te wę Jordanba polasa sabolai.  
\v 18 Tama augwa te kingo we wai hani sibi dabe te wędu edaba nogebo te tau sainu yali. Tama augwa te tigidali sę yali te kingo homugo emainu ebo sę naga te augwaligo yalio.  
\s1 Devitgo olo tau sabo homu ebo wiegi yai kolesaga te Simeiba yai  
\p Te king aga wę nogeainu sisi ebo sogo, tama Simei aga aselama, te aga gesabidi te king pąde te tǫba pǫgulali.  
\v 19 Tama Simeigo te tama po kingba wali, “O, genuai bidi, eno homugo te nago eno yali dwai sę tagalumainu homu ebao. Tama nago te Jerusalem taga soyu sobadi, te eno nageba yali dwai sę te nago homude munu ma homu kone palamuo,” wali. “Eno homugo nago eno te dwai kolesaga yalide te homu kone palobo te tigidali mu tagalumainu homu ebao.  
\v 20 King o, eno koneani, eno dwai sę yali, tama tiyu, te gasa not pedai badu bidibo hani te tudiba togolama, te ena bolo polasa aselama, tama ena genuai bidi, te eno nage dali gesabidi deliba ununainu, te ena nage tiąba asai dao,” te bidi Simeigo te po wali.   
\p
\v 21 Tiali goli, Abisai, te Devitgo abe Seruiago ogwago, te tama po wai, “Te Simei isimaina ebo homu te wiegi yai da homu yai. Magi baso meni, agai te Genuai Bidigo nigilali kingba po dwai walio,” wali.   
\p
\v 22 Tiali goli, Devitgo te Abisaide, te aga ama Joap dali siba te tama po wai, “Te dage sigo sę menio,” wali. “Dage si te Seruiago ogwa si da, magi baso megi dage sigo enaba boi bidi yabo homu ebawe? Megi eno koneani, ena te tigidali Israelgo king bidibao, tama te tobage sogo, dago te Israel bidi deli me ela mugobeo. Mu menio!”  
\v 23 Tama kingo bomai po te Simeiba weyu, aga nogo guni sisu weyu, te tama po wai, “Eno mu po nagebolo obao, augwaligo nage me ela mugobeo,” wali.   
\s1 Devitgo olo tau sabo wiegi yai homu ebo kolesaga Mefibosetba yai  
\p
\v 24 Tama Mefiboset, te Solgo ogwago ogwa, te wai, aga me aselama, te king dali deliba gesabidi ununani. Te Devitgo te Jerusalem taga soali sogo gagalasa, tama te king ma asobo sogoba usu nagasu, te Mefiboset te aga sągą wę me telasiąbadi, tama aga penane nisi me togosiąma, tama aga ugwa me wę me telayu isiąbadi te Devit Jerusalemba ma asobo sogoba usu nanio. \x * \xo 19:24 \xt 2 Sml 9:1-13; 16:1-4\x*  
\v 25 Mefibosetgo te Jerusalem taga soyu, tama aselama, te kingba sabolai. Tialima, kingo agaba te tama po hanalu wai, “Mefiboset, magi baso te nage ena dali wi pabewe?” te po wai.   
\p
\v 26 Tama Mefibosetgo te tama po wei ponai, “Eno genuai bidi, nago koneani, ena sągą dwai elalubao. Tama te sogo nago te Jerusalem taga pali sogo, te eno augwaliba weyu, te eno donki dodolao po wali, te donkiba ena duagulama, te ena nage dali painogo yai. Tiali goli, ena sę bidigo ena tibo po ola mawai dao.  
\v 27 Tama aga nage wali peyu, tama ena nogi te aiyaba elalubo tibo po walio. Tiali goli, genuai bidi, nage te Genuai Bidigo mobo bidi ensel tiwai dao. Tama nago mena wiegi yai sę enaba yabo te wiegi yai da homu eyu da, nago te sę naga tama yao.  
\v 28 Nago te eno ayago hani we bidi tigidali eligi da. Tiali goli nago olo tau sabo wiegi yai homu ebo kolesaga enaba eyu, tama nago ena te nago bede sesemane sogo nai tuagasomainu ilali. Tama tibaso, te eno nageba te gasa nai me ma enaba mao olama, me hanalugobeo,” Mefibosetgo te po wali.   
\p
\v 29 Tama kingo te po wai, “Te usu da, te po ma wagio. Eno homude te tama tiali, nage me Siba dage sigo te duga wąį Solgo tǫ dobayu, te bugulama, te me badu nago siyu, te me badu agai siyu emainu, te tama homu yalio,” wali.   
\p
\v 30 Tiali goli, Mefibosetgo kingba te tama po wai, “Te Sibago tigidali somainu yaibao. Eno tede homu si me ebeo. Eno homugo te nage bugagia bidimaina homu yali, tama te nage ma asali dao.”   
\p
\v 31 Tama Barsilai te Gileat bulu bidigo te Rogelim tǫ tagalama, tama te wę Jordanba dulama, te king dali te kingo te wę nogebo sogo bidali. \x * \xo 19:31 \xt 2 Sml 17:27-29\x*  
\v 32 Barsilaigo kibu be te bidi sese me si me si, te 80 kibu be bidai elaluai, tama aga monu dabe mu yai. Agai te mone doado bage hauwa elaluai, tama agai te king Devit tonalu, tama te Devit dali, aga hani dabe dali, augwali te hanu Mahanaimde bidali sogo nai geseyu bidai dao.  
\v 33 Tama kingo agabolo te tama po wai, “Nage ena dali te Jerusalemba aselama, te eno nage tonalueibao,” po wai.   
\p
\v 34 Tiali goli, Barsilaigo te tama po wei ponai, “Genuai bidio, te kibu be hauwa isiąbadi, te ena isabo homu ebao. Tama tibaso, ena te nage dali te Jerusalemba painu wabo te usu meni baso, te tagalao.  
\v 35 Odao, eno kibu be te bidi sese me si me si, 80 kibu be megi elalubao, tama eno te mena nai me deli te wiegi yai, ma meni, te eno konebeo. Tama eno te nai me wę me tubaso da, eno te naigo pusu te odobowe, ma meni, te eno konebeo. Tama eno olo te wiegi yai meni baso, tama te we bidi dabego balia po wabo dogoni te eno odabo usu meni yaibao. Tama tibaso, magi baso te ena nage dali pelama, te nageba sęgę momainuwe?  
\v 36 Tama king, magi baso nago te wiegi yai kolesaga mu enaba yabo homu ebawe? Menio. Eno homugo te wę Jordan nogelama, tama ena nage dali dwasianu pelama gana, tama eno nage tama taga soyu, te ena ma soabo homu ebao.  
\v 37 Ae, nago ena te ena buluba ma pomainu elama, tama ena te ena aya de ida si muani pesage te gų pagede nosali pubulumainu yaibao. Tiali goli, eno ogwa, Kimham, te bidibao. Tama aga te nage dali pomainu yaibao. Tama nago aga mena sęgo tau sabo homu eyu da, teda te tama naga tiao,” Barsilaigo te po wali.   
\p
\v 38 Tama kingo po wei ponoyu, te tama po wai, “Wiegi yai dao. Kimham te ena dali pomainu yaibao. Tama nago homugo eno mena sę agade emainu homu ebaso da, teda te tama naga eno te sę yaibao. Te nago enaba te mena sę emainu hanalu wali da, teda tagala, te sę eno yaibao,” Devitgo Barsilaibolo te po wali.   
\p
\v 39 Tialima, king me aga hani we bidi dabe te wę Jordan nogelama, u badu tugi pali. Tama kingo te Barsilaiba te gesabidi nono nenama, tama Godiba hanalu, te Barsilai wiegi yai ilimainu yali. Tama Barsilai te aga buluba ma geasa palio.  
\v 40 Tialima, king te hanu Gilgalba pali, tama Kimham aga dali pai. Tama te Juda ami bidi tigidali dali, te Israel ami bidi hani me badu me, te king dali pela wali.   
\s1 Te Israel dabe me, Juda me, augwa hasi konila po wai  
\p
\v 41 Devit te Gilgalde bidibadi, tama te Israel bidi tigidali asama, tama agaba te tama po wai, “Genuai bidio, magi baso dago ama dede, te Juda dabego, te da Israel dabede te po geme dualama, te augwa digi te nage dali, te nago we wai dabe me, te nago ami bidi dabe daligo te wę Jordan nogemainu, te odasa asaliwe?”   
\p
\v 42 Te Juda bidi tigidaligo te po odolama, tama augwa po wei ponoyu, te tama po wai, “King aga te da deli hani elalubaso, tama tiyu, dago te tama kolesaga yali. Tialima, magi baso dagego daba hale sębę ebawe? Kingo te dago nai me abelama, tama agai te nai me deli te dabolo me mabeo,” wali.   
\p
\v 43 Tama te Israel bidi dabego po wei ponoyu, te tama po wai, “Te bidi me deli king pedalubaso da, teda aga te dago tǫ pedai tonalubo king bidaibao. Tama te bulu tǫ pedai tomode, te da Israel te nogo si hani elalubao, tama dage Juda bagego hani te deli naga elalubao. Mu tama, Devit te dagego hanidu king bidibao, tama da nogo si hanigo te dage aiyaba elaluali. Tama tiyu, magi baso dagego da begela dolobawe? Dagego bugagia homu kone palao, dago digi te king edaba odasa asabo te homu kolesaga yabo page te dade elalubao,” wali. Tiali goli, te Juda dabego konila po te bomonama mu olama, tama te Israel dabego po aiyaba elaluai dao.   
\c 20  
\s1 Sebago te king aiyaba elaluainu yai  
\p
\v 1 Te sogo te bidi dwai me deli te Israel dabe tomode bidali, aga nogi Seba. Aga te Bikrigo ogwa, tama aga te Benjamingo hani bidi. Sebago te biugel bu weyu, te i olama, te tama po wali, “Te Devit tagalao, da te agai hani menio. Da te Jesigo ogwago hani bidi menio. Dago aga wali me pelamuo. Ae, te da Israel bidi tigidali, dena buluba ma pelainao,” po wai. \x * \xo 20:1 \xt 1 Kin 12:16; 2 Sto 10:16\x*  
\v 2 Tialima, te Israel dabego te tama po odolama, tama tigidaligo te Devit tagalama, tama Seba dali palio. Tiali goli, te Juda bidi dabe da, te Devit dologode bidiyu, tama augwa aga wali pabo bage bidibo dąį te Jordan wę sunumi tedu pelama, te Jerusalemba usu nama elaluai.   
\p
\v 3 Augwali te Jerusalemba sabolama, tama Devit aga te king bidibo beba pelama, tama te si wali nogo si we hani, te aga kingo be tonalumainu taga pali we dabe sali. Tama agai augwali te gasa beba munama, tama augwali tonaluabo bidi meba nigilali. Tama agai te bidi hani mebago augwali tonalu, te augwali nai mayu yabo bidi dabe meba nigilali, tiali goli agai te polobadu yali tiwai gilama te aga augwali dali ma pagelama pigi pabeo. Tama sesemane sogo augwa te bede naga bidaludubadi, te augwa isibo sogoba usu nani. Te we dabe augwali wilawe we dabe bidalubo tiwai yai. \x * \xo 20:3 \xt 2 Sml 16:22\x*   
\p
\v 4 Nosali kingo Amasabolo te tama po wai, “Nage pelama, te Juda bidi dabe i olama, tama augwali sisinama, tama do ma duba dage tigidali aselama, enaba sabolao,” wai.  
\v 5 Tialima, Amasa pelama, augwali i wagi pali, tiali goli agai te kingo bodolu mani sogo edelama, me asobeo.  
\v 6 Amasa te polo ma asisąbaso, tama kingo Abisaiba te tama po wai, “Apsalomgo te daba genuai sęgę mawai, tiali goli megi Seba, te Bikrigo ogwago, te genuai sęgę dabolo ma manio. Tama tibaso, nago eno ami bidi dabe selama, tama aga pobegi pelama, tama aga pageabi igi pao. Tiyu, Seba te aga hani dabe dali pelama, te bomai obo bagulai tomoba pelama, bidigi pai madi, tama dago aga sainu ebo usu egobeo,” wali.  
\v 7 Tama tialima, Abisaigo te Joapgo ami bidi dabe selama, tama te king tonalubo ami bidi me sali, te augwali Keret me Pelet dabe, tama te tigidali hwįbo bomai bidi me, tama augwa te Jerusalem tagalama, tama pelama, te Seba pobegi pai.   
\p
\v 8 Augwali te Gibeon moni masigi elalubo teba sabolali, tama Amasa te augwali dali deliba gesabidi ununani. Joapgo te hwįbo nai munasa pai, tama agai te aga kukulude te bainat hwą ge gedelai. Te bainat te aga bulalubo be tomode bulaluai, tiali goli Joap te Amasa pąba pabo sogode, te bainat te tǫba dialuali.  
\v 9 Tama Joapgo te tama po Amasa dali wali, “Siade da, ama, nage bugagia bidibawe?” Tama aga Amasago penane nisi te dolo nogogo tola selama, tama agai te aga dali nono nainogo ebo tiwai gilama yalio.  
\v 10 Tama Joapgo te bainat hwą me deli te pobase nogode tolaluali, tiali goli Amasago te bainat hwą subeo. Tama Joapgo Amasago haligade te hwągo enama, tama agai haliga tigidali dįąsa soyu, te tǫba tulaluama, tama polo tama aga isai. Tama tibaso, Joapgo te hwągo aga ma enebeo. Joapgo te Amasa ela munama da, teda aga dali, te aga ama Abisai, augwali sigo te Seba pobeasa palio.   
\p
\v 11 Tama te Joapgo ami bidi me deli te Amasago tigi pąde dolalu, te i weyu, te tama po wali, “Te Joap me Devit godolo homu ebo bidi dabego, te augwali Joap wali piąo,” walio.  
\v 12 Tiali goli, te kanemego Amasa tigidali mu halua sali, tama te tigi te sunumi tomode munaluali. Tama te tigidali ami asela wali, augwaligo te tigi sulama, tama augwali ma pabeo. Te Joapgo ami bidigo te augwali me soasiąbaso, teda agai te tigi te sunumi sesegeba kekasa pelama, tama te tigi te ugwago mesegelalio.  
\v 13 Te Amasago tigi te sunumide ma munalusiąbaso, tama te tigidali ami bidi te Joap wali pelama, tama te Seba pobeasa palio.   
\p
\v 14 Seba pelama, te tigidali Israel dabego tǫ pelama, te siminigi pali te tǫ sesegeba mu sabolama, tama aga te hanu Abel Betmaka teba sabolali. Tama te Beri hani tigidali te aga dali muna selama, tama aga wali peyu, te hanu tomoba palio.  
\v 15 Te Joapgo ami bidi dabego odali, te Seba te hanu tomode bidibo po odai, tama tialima augwali aselama, te hanu bobegelali obo pąde te tǫ pesage holama, te augwa te hanude hwįainogo yalio. Tama augwaligo te obo pąde te dedage dogali, te masigi obo degasa dulumainu yai.  
\v 16 Tiali goli, te wiegi yai homu yai we me deli te hanude bidai, tama agai te Joapgo haniba te i weyu te tama po wali, “Ae! Dagego odiąo! Te Joap asa po walao. Eno agade po elalubao.”  
\v 17 Tialima, Joap te pąba pelama, tama te wego agaba hanalu wali, “Nage te Joap dawe?”  
\p Tama Joapgo te po wai, “Awe, te ena tama dao.”  
\p Tama wego agabolo te po walali, “Genuai bidio, eno po me deli elalubao. Tama eno homugo nago eno te poba bugagia olo mumainu homu ebao.”  
\p Tialima, Joapgo te po wai, “Te usu dao. Eno nago po odaibao.”   
\p
\v 18 Tama wego Joapba te tama po wai, “Polobadu augwaligo te tama po wai, ‘Te nago homude po me elalubaso da, nage te hanu Abelba pao,’ wai. Augwa te dena bulu Abelba aselama, tama te Abel dabego augwa te homu sęgę elalubo dodoliyu yai dao.  
\v 19 Odao. Te dago hanu te Israel bulu tǫ pedaide te polalubo hanu me deli dao. Dago te hwįbo sę dabe me isiąwai. Dago te dena king naga mu wali peyu ebao. Tiali goli, megi nago te hanu dolainu ebao. Magi baso nago te Genuai Bidigo nai te dolainu ebawe?” wali.   
\p
\v 20 Tama Joapgo te po wai, “Eno te hanu doliyu, te silabo homu me elalubeo.  
\v 21 Mu menio. Dago te bidi me deli naga sagasu asali, aga nogi te Seba, te Bikrigo ogwa. Aga te Efraimgo pesage te bulu dude bidi dao. Te bidigo te bidi dabego homu hodolobaso, te king Devit aiyaba elaluainu yai. Dago homugo dagego te bidi Seba naga daba mobaso tama, teda dago te dagego hanu tagalama, paibao,” Joapgo te po wai.  
\p Tama te wego Joapbolo te tama po wai, “Mu tama obao, dago te bidi ela munama, tama agai tobolu naga te obo buluba sąbo, te nago sueibao,” wali.   
\p
\v 22 Tama tialima, te we te hanude bidibo bidi dabeba pelama, tama agai homude sela pali po te augwaliba pusali. Augwaligo te agai po wali pelama, tama augwaligo te Sebago tobolu mage togogi pelama, tama aga tobolu selama, tama Joapba te tobolu buluba dinani. Tialima, Joapgo te biugel bu obaso, tama aga ami dabe te hanu taga soyu, tama augwa buluba ma palio. Tama Joap te king Devit bidibo madi, te Jerusalemba ma pai.   
\s1 Te Devitgo ofisa dabe  
\p
\v 23 Joap te ami dabego polalubo ofisa bidi, tama te Israel bulu tǫde tigidali ami tonalubo bidi dao. Tama Benaia, te Jehoiadago ogwago, te king tonalubo ami bidi dabe tonalubo bidi bidai, te augwali Kelet me Pelet dabe dao.  
\v 24 Tama te kingo te bidi mebabolo te agai sę yao po wabo sogo da, teda Adoniramgo te hani bidi dabe tonalu yai. Tama Jehosafat, te Ahilutgo ogwa, aga te king Devitgo ebo sę tigidali po te asębo bidi bidali.  
\v 25 Tama Seva aga te kingo kuskus sę ebo bidi bidai. Tama Sadok me Abiatar te pris sę ebo bidi si bidai,  
\v 26 tama Jair hani bidi Ira, aga me te Devitgo pris bidi bidai dao.   
\c 21  
\s1 Te Gibeon dabego te Solgo dwai sę yali wei ponani  
\p
\v 1 Te Devit king bidali sogo, te nasi ebo sogo me deli pedelama, tama te Israel dabe me, Juda me, te nai sǫą pelama, te nai sili bididubadi, te kibu be sela bidai. Tama tibaso, Devitgo Genuai Bidiba te tebo sę ebo page hanalu wali, tama Genuai Bidigo agaba te po wai, “Te sę ebo page te tama telalubao. King Solgo te Gibeon dabe ela muani, tama te dwai sę yali page te aga hanide elalubao,” wai.   
\p
\v 2 Tialima, Devitgo te Gibeon dabe i olama, asali. Te Gibeon dabe augwali te Israel we bidi menio. Augwali te Amor hani bage da. Te gasa Amor dabe te hagawai, tama te dwasianu hani naga bidai. Polobadu mu te Israel dabego te bomai po mu dąų weyu, te Gibeon dabe augwaligo me dologobeo po wai. Tiali goli, king Solgo bomo eyu, te Israel de Juda si naga te Israel tǫde bidimainu yai. Tama tiyu, Solgo te Gibeon dabe silimainu tiai dao. \x * \xo 21:2 \xt Jos 9:3-15\x*  
\v 3 Megi da, te Gibeon dabego Devit suagasobaso, tama agai augwaliba te tama po wai, “Eno homugo dago dageba te dwai sę yali dodolainu ebao, tama dagego te Genuai Bidiba hanaluama, te aga we bidi hani dabolo wiegi yai sę emainu yao. Dagego homugo eno magi sęgo te dwai sę yali dodolumainu homu ebawe?” Devitgo te Gibeon bage te po hanalu wali.   
\p
\v 4 Tama te Gibeon dabego Devitba po wei ponoyu, te tama po wai, “Te sęgę te da dali, te Solgo hani sibi dali tomode elalubo sęgę, te sia somainu ebaso, te usu me egobeo, te nago dabolo te gol me silva mawainu ebaso, te tagalao. Tama me, dago nageba hanalu, te gasa Israel bidi dabe ela muao po me obaso, me te usu egobeo.”  
\p Tama Devitgo te po wai, “Tama dagego homugo te eno magi sę dageba emainu homu ebawe?”   
\p
\v 5 Tama augwaligo kingba po wei ponoyu, te po wai, “Solgo te da dolama, tama da tigidali silimainu homu yali, te da hani me deli te Israelgo tǫde me bididali homu yai dao.  
\v 6 Tama tibaso, dago homugo te nago dabolo te Solgo hani sibigo bidi te a naga olama, me si, te tama bidi dabolo momainu homu ebao. Tama dago augwali te bulu Gibeaba sela paibao, magi baso meni, Gibea te Solgo page bulu dao, te king te Genuai Bidigo nigilali. Tama te God Genuai Bidigo gedude te dago augwali te niba walama, tama augwali isimainu yaibao,” te Gibeon bagego te po wai.  
\p Tama Devitgo augwaliba te tama po wai, “Tialima, te eno augwali dageba mawaibao,” wai.  
\v 7 Te Genuai Bidigo nogide, Devitgo te Solgo ogwa Jonatan dali te bomai po dąų wali, tama megi da, agai te dąų wali bomai po te homu kone ma palali. Tama tiyu, agai te Mefiboset sabeo, te Jonatango ogwa, tama te Solgo wąį, tama te Gibeon dabeba mabeo. Menio. \x * \xo 21:7 \xt 1 Sml 20:15-17; 2 Sml 9:1-7\x*  
\v 8 Agai te Armoni, me gasa Mefiboset, te si sali. Augwali si te Sol de Rispa sigo ogwa, te Aiago wegi dao. Rispa aga te Solgo si wali we hanide te we me deli da. Tama Devitgo te Merapgo ogwa a naga me sali, te Solgo wegigo wai. Merap te bidi Adrielgo sai, te Barsilaigo ogwa te Mehola bulu bidigo selama, tama augwali sigo te a naga ogomani ame nai.  
\v 9 Devitgo te bidi dabe te Gibeon dabeba menama, tama te Gibeon dabego augwali sela holiyu, te bulu duba holama, tama te Genuai Bidigo gedude augwaligo te a naga olama, me si, te tama bidi dali te niba walama, tama tigidali isalio. Te sę pedelali, te bali gi nedu du sabo sogo sisi elalubadi, tiali tama te bidi dabe augwa te rais bali wai sabo gagalalio.   
\p
\v 10 Tialima, Rispa, te isali bidi sigo ida, aga te poloba badi ugwa meba selama, tama te bulu duba ugwa holali. Tama aga te sela holali badi ugwa dabego te dwasianu ugwa be tiwai gana te masigi tǫ bulude kekelama sę yani. Tama aga te bidi dabego tigi tonaludubadi, te polua meba bidali, te tulubage te tǫba ma tulubo sogo, te nogo a naga, me badu si, te tama bidigo tigi dili te tulubagego telamainu ebo sogoba usu numainu tonalualio. Rispago te bidi dabego tigi te giligade me hulide te bugagia tonaluai, tiyu te ba dabego me te bulu hasa dabego augwali tigi tuagasidali weyu, tama tiai dao.  
\v 11 Nosali Devitgo te Rispa, te Aiago wegigo yali sę po odama,  
\v 12 tama Devit te Jabes bidi dabego hanu te Gileat tǫ pedaiba pelama, te Sol de Jonatan sigo tigi dili dabe sigi pali, te Solgo ogwa dao. Polobadu te Filistia dabego te Sol me Jonatan si te Gilboa bulu dude elama, tama augwali sigo tigi selama, te deliba sisinibo hanu te Betsanba waligi pali. Tama nosali te Jabes dabe te Betsan hanuba pelama, tama augwali sigo tigi wi selama, tolasa soai dao.  
\v 13 Tialima, megi da, Devitgo te po aga sę bidi dabeba olama, tama augwaligo te Sol de Jonatan sigo dili dabe sela palio. Tama augwaligo te a naga olama, me si, te Gibeon dabego elali bidi dabego dili dabe me sisinama, salio.  
\v 14 Tama augwali te Benjamin hanigo tǫ te hanu Selaba pelama, tama augwaligo te Solgo dili me, Jonatango dili dali, te Solgo aya Kis muani gų pagede pubulali. Augwaligo te kingo wali po gilama, te tigidali sę ela silai. Tama te elama nosali badu, te Godiba gedu haluasa po wabo bidi dabego te augwa bulu tǫ pedai bugagia ilabo gedu haluasa po wali, tama Godigo augwaligo te gedu haluasa po wabo odai.   
\s1 Te Israel dabego te Filistia moni moni bidi dabe dali hwįani  
\r (1 Sto 20:4-8)  
\p
\v 15 Te Filistia dabe de Israel dabe si tomode te hwįbo ma hodolali, tama Devit te aga ami bidi dabe dali aiyaba dulama, tama te Filistia dabe dali hwįani. Augwali te boi hwį hwį pelama, tama Devit te bomo kimi meni baso, tama ma hwįabo ąǫ ebeo.  
\v 16 Tama te Filistia bidi me deli, aga nogi te Isbibenop, agai te Devit ela muainu yali. Isbibenop te moni moni bidi dabede te bidi me deli aga da. Te agai ene tobolu bobage, augwaligo te brasgo nigai, tama te brasgo sęgę te sela olama, me badu pedai, te tri hap kilogram usu tama. Tama Isbibenopgo te gesi bainat me te kukulude gedelai elaluai.  
\v 17 Tiali goli, Abisai, te Devitgo abe Seruiago ogwago, te Filistia bidi sulama, tama aga aselama, te Devit tau sagasali. Tama Abisaigo te Filistia bidi dali hwįnama, tama aga ela muai. Tama te Devitgo ami bidi dabe aselama, tama Devitba bomai po weyu, te tama po wai, “Te dago boi hwįgi pabo sogo, nage da dali munu me aselamuo,” wali. “Nage te da Israelba te ula mabo lam sole tiwai elalubao, tama nago te lam sole ula sula sawainu me elamuo,” te po wai.   
\p
\v 18 Nosali te Israel dabego te Filistia dabe dali ma hwįani. Te sogo augwali te bulu Gopde hwįani. Tama Israel bidi me deli, aga nogi Sibekai, te Husa bulu bidi, agai te moni moni bidi dabede te bidi me deli ela muani, aga nogi te Saf dao.   
\p
\v 19 Tama gasa sogo ma, te Israel dabego te Filistia dabe dali te bulu Gopde hwįani. Tama Elhanan, te Jareoregim te Betlehem bulu bidigo ogwago te Get hanu bidi Goliat ela muani. Te Goliatgo enego bobobage te ugwa hobolo masin ba te genuai tiwai dao.   
\p
\v 20 Tama nosali ma, te Get hanude gasa boi hwįbo ma hodolali. Tama te moni moni genuai bidi dabego te bidi me deli bidali, tama aga te dili bobage bidi mu tama. Te aga nogo dani deli delide te nogo a naga, me badu nogo kibisa deli tama elaluai, tama aga sągą dabe me te tiwai naga elaluali. Aga nogo sągą dani te bidi sese deli olama, me si me si elaluai.  
\v 21 Te bidigo te dwai posobo po Israel dabeba wali, tama te Jonatan, te Samago ogwa, te Devitgo amago, te aga ela muai.  
\v 22 Te me si me si te Filistia dabe augwa te Get hanu moni moni genuai hani bidi dabe tedu asali. Tiali goli, Devit dali, te aga ami dabego dali, te augwali ela muanio.   
\c 22  
\s1 Devit te Godigo aga tau sobaso, te wiegi yai homu pemene yai  
\r (Tib 18)  
\p
\v 1 Te Genuai Bidigo Devit te Solgo nogode, me te tigidali gasa boi bidi dabego nogode, te ma dobola sobaso, tialima Devitgo te balia gagalama weyu, te Genuai Bidiba balia wali.  
\v 2 Te baliade te tama po wali,  
\b  
\q1 “Genuai Bidi te eno bomai obo dao.  
\q1 Aga te ena geme sesalubo masigi tiwai,  
\q2 tama agai ena te boi bidi dabego  
\q3 nogode ma sai dao.   
\q1
\v 3 God te genuai masigi tiwai, te ena agaba pelama,  
\q2 te boi bidi dabede geme duala  
\q2 sigi pabo masigi tiwai elalubao.  
\q1 Genuai Bidi te eno sabele tiwai elalu,  
\q2 tama ena te boi bidi dabede  
\q3 geme dualalubo tiwai ebao.  
\q1 Agai te ena ma dobola selama,  
\q2 tama ena tonalubo bomo elalubao.  
\q1 Aga te bomai obo, tama ena dualalubo pesage da.  
\q1 Genuai Bidi, nago ena tau mabo bidi,  
\q2 tama ena dolainu ebo sogo tama  
\q3 nago ena ma dobola sabo dao.   
\q1
\v 4 Eno Genuai Bidiba gedu haluasa  
\q2 po obaso, tama agai ena tau sali.  
\q1 Tama te boi bidi dabego ena dolainu yali usu ebeo.  
\q1 Dago te Genuai Bidigo nogi ugwaba sao!”   
\b  
\q1
\v 5 “Te isabogo te ena pąde gegali,  
\q2 te wę si genuai pedaliyu, tama ena haluainu yai.   
\q1
\v 6 Te isabogo ena pąde tola selama,  
\q2 tama ena te gų pageba painu yali.  
\q1 Te umben wago ena tola selama,  
\q2 tama ena te wi pabo usu isiąbo tiwai yalio.   
\q1
\v 7 Ena haliga sęgę dwai mu ebaso,  
\q2 tama ena gela weyu, Genuai Bidiba i wali.  
\q1 Eno ena Godiba i weyu, te agai ena tau somainu yai.  
\q2 Aga te aga bede bidiyu,  
\q2 tama agai eno gela wabo odali.  
\q1 Tama agai eno gedu haluasa po waboba olo muai.”   
\b  
\q1
\v 8 “Tialima, Genuai Bidigo te eno  
\q3 boi bidi dabeba wado yali.  
\q1 Tama tiyu, agai te tǫ mali dwai mu ilibaso,  
\q2 tama te bulu du dabe me dagalu  
\q3 te aiyǫge page mu yalio.   
\q1
\v 9 Te Genuai Bidigo gunide hano pedelali.  
\q1 Tama aga pedauwalide sia pedelama,  
\q3 tama nai hauwa ulali.  
\q1 Tama agai te sia dage eneyu, tedela palali.   
\q1
\v 10 Agai te dagalu dalama, aiyaba dulai.  
\q1 Tama husugu yai pǫ te aga sągą dologode elalubao.   
\q1
\v 11 Te mobo bidi ensel me deligo aga tolama,  
\q2 tama bola asobo tiwai yaibao.  
\q1 Tama te Genuai Bidi te walide bidiyu,  
\q2 tama bomonama, asesa asobo  
\q3 tiwai gilama ebo dao.   
\q1
\v 12 Agai te be hulia sabo  
\q2 te aga ugwa be tiwai pedalumainu ilali,  
\q2 tama te tulubagego husugu haowago  
\q3 aga mesegelali.   
\q1
\v 13 Tiali goli, agai te bulu ula tigidali ilali,  
\q2 tama te sia dage te uladu te buluba teda soali.   
\q1
\v 14 Genuai Bidi ugwadu bidiyu,  
\q2 tama genuai po dagą mu weyu,  
\q3 te pǫ kulukulu wabo tiwai yali.  
\q1 Te Ugwadu Mu Bidibo Godigo te aga po pusali.   
\q1
\v 15 Agai te pǫgo ula be sele te aga ene tiwai pedelali,  
\q2 tama agai te boi bidi dabe enebaso,  
\q3 tama augwa wi tedela pai dao.   
\q1
\v 16 Genuai Bidigo te boi bidi dabeba wado po olama,  
\q1 tama aga haliga sębę te bomai waligo  
\q3 augwali sela sąbo tiwai yali.  
\q1 Tama aga haliga sębęgo te tamu ąį  
\q2 te tigidali sula sąbo tiwai eyu,  
\q1 tama te tǫ dąų walali nai dabe te hanilama pedelalio.”   
\b  
\q1
\v 17 “Genuai Bidi te ugwadu bidiyu,  
\q2 tama te nogo aiyaba munama,  
\q3 tama ena ma dobola sali.  
\q1 Te genuai sigo ena mesegelali,  
\q2 tiali goli agai ena ugwaba kekasa holali.   
\q1
\v 18 Te eno boi bidi dabe augwaligo bomo mu ebaso,  
\q2 tama eno augwali aiyaba elaluainu  
\q3 ebo usu meni yai.  
\q1 Tiali goli, Genuai Bidigo ena te augwali  
\q3 nogode ma dobola sali.   
\q1
\v 19 Te enade sęgę elalubo sogo  
\q3 augwaligo enaba hwįagasali.  
\q1 Tiali goli, Genuai Bidigo ena tonaluali.   
\q1
\v 20 Agai ena tau sobaso, tama ena bugagia bidai.  
\q1 Agai ena godolo mu ebaso, tama agai ena ma sai dao.”   
\b  
\q1
\v 21 “Eno te doloba pai kolesaga wali pobaso,  
\q2 tama tiyu, Genuai Bidigo  
\q2 te wiegi yai nai hauwa enaba mawai.  
\q1 Eno te dwai sę me deli isiąbaso,  
\q2 tama Godigo ena wiegi yai bugagia ilai dao.   
\q1
\v 22 Eno te Genuai Bidigo bomai po bugagia wali pali.  
\q1 Eno te ena God tudiba munama,  
\q2 tama dwai kolesaga me ebeo.   
\q1
\v 23 Eno te agai bomai po wali peyu,  
\q2 tama eno agai po te tudiba me mubeo.   
\q1
\v 24 Eno dwai sę yali me deli elalubeo.  
\q1 Eno te ena bilibo te bugagia tonaluali,  
\q2 tiyu eno dwai sę me deli idali weyu tama tiali.   
\q1
\v 25 Tama tiyu, Genuai Bidigo eno doloba pai kolesaga  
\q2 te homu kone palama, tama agai wiegi yai kolesaga  
\q3 enaba wei ponani,  
\q2 magi baso meni, ena te aga gedude  
\q2 magi dwai sę isąyu, te wiegi yai mu bidali.”   
\b  
\q1
\v 26 “Genuai Bidi, te bidi mego nage me tagalisiąbaso da,  
\q2 teda nago aga me tagalugobeo.  
\q1 Te bidigo doloba pai kolesaga eyu,  
\q2 tama dwai sę me elalusiąbaso da,  
\q2 teda nago agaba te doloba pai  
\q3 kolesaga naga wei ponobo dao.   
\q1
\v 27 Te bidi me deligo te wiegi yai  
\q3 kolesaga wali peyu da,  
\q2 teda nago agaba te nago wiegi yai  
\q3 kolesaga ola mobao.  
\q1 Tiali goli, bidigo te dwai kolesaga wali pobaso da,  
\q2 teda nago agaba dwai kolesaga wei ponaibao.   
\q1
\v 28 Nago te augwa digi augwa aiyaba  
\q3 elalubo we bidi ma sabo da.  
\q1 Tiali goli, nago te hagoma ebo  
\q2 we bidi dabe aiyaba elalubo dao.”   
\b  
\q1
\v 29 “Genuai Bidi, nago digi naga te enade ula da,  
\q2 tama nago enade te be hulia sai  
\q3 elalubo te sela sąbo dao.   
\q1
\v 30 God, te nago ena tau sobaso da,  
\q2 teda eno te genuai boi bidi hani  
\q3 te aiyaba elalubaso, te usu yaibao.  
\q1 Tama nago ena dąų walobaso da,  
\q2 eno te hanu genuai obo bolobaso, te usu yaibao.   
\q1
\v 31 Te Godigo kolesaga wiegi yai mu  
\q2 elama, tama tigidali dolo mu elalubao.  
\q1 Tama agai po te mu po naga wabo da.  
\q1 Genuai Bidi te hwįbo sabele tiwai elama,  
\q2 tama agai te agaba pabo bidi tigidali bugagia tonalu,  
\q2 tama augwali te boi bidi dabede  
\q3 geme wi dualalubo dao.”   
\b  
\q1
\v 32 “Genuai Bidi naga te God mu da.  
\q1 Agaduba deligo naga da,  
\q2 te genuai masigigo bagualubo tiwai elalubao.   
\q1
\v 33 God aga te ena geme duala sabo  
\q3 bomai pesage elalubo.  
\q1 Agai ena bilabo sunumi te wiegi yai nigali.   
\q1
\v 34 Agai ena bugagia bilimainu ilali,  
\q2 te bulu uni hasa te bulu du bagede  
\q3 bilibo tiwai eyu, tama ena tulaluabo  
\q3 te usu me egobeo. \x * \xo 22:34 \xt Hab 3:19\x*   
\q1
\v 35 Agai ena te hwįbo ola mani,  
\q2 tama eno nogo bomo ilali.  
\q1 Tama eno augwaligo te brasgo nigali  
\q2 enesigi te balibi kegeyu, enebo usu yaibao.   
\q1
\v 36 Genuai Bidi, nago ena te boi bidi dabego nogode  
\q3 ma dobola sali.  
\q1 Nago enabolo te naga sabele mobaso,  
\q2 tama ena tede geme duala sai.  
\q1 Nago ena tau sobaso, tama eno genuai nogi  
\q2 te we bidi dabe gedude elaluali.   
\q1
\v 37 Nago enaba wiegi yai sunumi mobaso,  
\q2 tama eno sągą te bedege me ebeo.  
\q1 Ena pobadi, te ena me tula mubeo.”   
\b  
\q1
\v 38 “Eno te boi bidi dabe  
\q2 pobeasa pelama, tama augwali dolali.  
\q1 Eno augwali dwai dene mu menama, dolama,  
\q3 tama eno augwali tigidali silalio.   
\q1
\v 39 Eno augwali tigidali enama, tama augwali tulaluali.  
\q1 Augwali te eno sągą pąde pila muani,  
\q3 tama augwali ma hodalubeo.   
\q1
\v 40 Nago te hwįbo bomo enaba mani.  
\q1 Tama nago te boi bidi dabe eno nogoba mawai,  
\q3 tama eno augwali aiyaba elaluai.   
\q1
\v 41 Nago te boi bidi dabe enade wi pomainu ilali,  
\q2 tama eno te ena godolo isiąbo  
\q2 bidi dabe te eno augwali ela silalio.   
\q1
\v 42 Augwaligo te augwali tau sabo bidi meba gegali,  
\q2 tiali goli bidi me bidibeo.  
\q1 Tama augwaligo Genuai Bidi nageba gela wali,  
\q2 tiali goli te nago augwaligo gedu  
\q3 haluasa po wali te me odobeo.   
\q1
\v 43 Eno te augwali mu dolama,  
\q2 tama augwali te tǫ hogomu tiwai pedelali.  
\q1 Eno augwali agalama,  
\q2 tama augwali aiyaba elaluali,  
\q2 te ena pu elalubo nagame yai tǫ  
\q2 elalubo sunumidu pabo tiwai yali.”   
\b  
\q1
\v 44 “Te ena we bidi dabego enaba  
\q2 boi bidi ebo sogo, nago ena tau sobaso,  
\q3 tama augwaligo ena me dolobeo.  
\q1 Tama nago ena te gasa we bidi  
\q3 tonalubo bidi me bidimainu ilali.  
\q1 Te eno augwali konesiąwani we bidi,  
\q2 megi augwali te ena dologode bidibao.   
\q1
\v 45 Te gasa bulu tǫ pedai we bidi  
\q2 dabego enade wi elama,  
\q3 tama enaba kidu sugunagasali.  
\q1 Augwaligo eno genuai nogide po odama,  
\q2 tama polo tama augwali ena dologoba pali.   
\q1
\v 46 Augwa bomo haga wali,  
\q2 tama augwa bomai hanu tagalama,  
\q2 tama augwali didibili dali enaba asai.”   
\b  
\q1
\v 47 “Genuai Bidi sesemane sogo bidibao!  
\q1 Aga te genuai masigigo ena bobegelalubo tiwai yali,  
\q3 tama dago aga nogi ugwaba sao.  
\q1 Godigo ena tau siyu, tama ena ma sali,  
\q2 tama dago aga genuai nogi ugwaba sao.   
\q1
\v 48 Godigo te eno boi bidi dabego  
\q3 dwai kolesaga wei ponani.  
\q1 Tama agai te gasa hani bage te ena dologoba muani.   
\q1
\v 49 Tama agai ena te boi bidi dabego  
\q3 nogode ma dobola sai.  
\q1 Genuai Bidi, nago enaba  
\q2 te we bidi dabego gedude genuai nogi manio.  
\q1 Nago ena tau sobaso, tama te hwįbo  
\q3 bidi dabego ena me ela mubeo.   
\q1
\v 50 Tama tibaso, te gasa we bidi hani  
\q2 tomode te eno nago nogi ugwaba saibao.  
\q1 Tama eno nago nogi ugwaba sabo balia obao.” \x * \xo 22:50 \xt Rom 15:9\x*   
\b  
\q1
\v 51 “Genuai Bidigo ena Devit te king  
\q3 pedalumainu nigilali.  
\q1 Tama sesemane sogo eno te boi  
\q2 bidi dabe aiyaba mu elalumainu ilali.  
\q1 Sesemane sogo agai ena godolo mu eyu,  
\q2 tama agai eno hani nosali pedalubo bage me  
\q3 te godolo homu yaibao.”   
\c 23  
\s1 Devitgo po silagasu wabo po  
\q1
\v 1 Te e da te Devitgo po silagasu pusali po.  
\q1 “Ena Devit, te Jesigo ogwa, eno te tama po wai.  
\q1 Te Jekopgo Godigo ena te king nigilama, te ena bidibao,  
\q2 tama agai enabolo te we bidi gedude  
\q3 genuai nogi mawai.  
\q1 Tama eno te Israel dabego wabo  
\q3 wiegi yai balia hauwa asęani.  
\q1 Eno te tama po obao.”   
\q1
\v 2 “Te Genuai Bidigo Mobo Bidigo eno  
\q3 pedauwalide te po pusali.  
\q1 Eno te dagebolo wabo po te agai enabolo pusa mani.   
\q1
\v 3 Te da Israel dabego God te genuai masigi tiwai elama,  
\q3 tama da bobegelalubao.  
\q1 Agai enabolo te tama po wai,  
\q2 ‘Te king God dologode bidiyu,  
\q2 tama te we bidi doloba pai  
\q3 kolesagade tonalubaso da,   
\q1
\v 4 teda te we bidi dabego agaba  
\q2 wiegi yai homu pemene eyu,  
\q3 augwa te kigamude giliga bugagia naniyu,  
\q2 tama te pǫgo te ula mesegelisiąbaso,  
\q2 te wiegi yai homu pemene ebo tiwai yaibao.  
\q1 Tama te tulubage nosali silibo side,  
\q2 te giligago te nosa ula ilali.’ Eno te po wai.”   
\b  
\q1
\v 5 “Tama Godigo te eno hani sibi  
\q2 bomo ilama, bidimainu ilali, magi baso meni,  
\q2 agai te bomai po me deli te ena dali dąų wali,  
\q2 tama agai te dąų wali po te togolama,  
\q2 me ma bologobeo. Menio.  
\q1 Teda te dąų wali po te sesemane sogo elalueibao.  
\q1 Te eno godolo ebo nai tigidali, te Godigo ena mawaibao.  
\q1 Tama agai te ena te sesemane sogo  
\q3 ugwaba ela holomainu ilali.   
\q1
\v 6 Tiali goli, te dwai bidi dabe augwali  
\q2 te sesani yai bono elalubo tiwai yali,  
\q3 te bidi dabego sela sąwaibao.  
\q1 Te bidi mego te tobage sesane yai bono  
\q2 te nogode tolalubaso, te usu me egobeo.   
\q1
\v 7 Te bidi mego te bono sela sąwainu da,  
\q2 agai te ain dage me, te ene sigi me selama,  
\q2 tama te bono dabe elalubo pesagede  
\q3 te deliba sisinama, tama augwali te siaba ulao.  
\q1 Tama augwali tigidali te sia saibao.”  
\p Te da te Devitgo po silagasu pusali po dao.   
\s1 Te genuai nogi elaluali te bomai ami bidi dabego nogi e dao  
\r (1 Sto 11:10-47)  
\p
\v 8 Te Devitgo bomai ami bidi dabego nogi te tama elaluali. Josep Basebet te Takemon hani bidi, aga te nogi elalubo hwįbo bidi selago polalubo ofisa bidi dao. Me sogo deli te Josep Basebetgo te sesemone tolalu, tama te 800 boi bidi dali hwįnama, tama agai tigidali ela muai.   
\p
\v 9 Eleasar, te Dodogo ogwa, aga te sela wali genuai nogi elaluali ami bidi dabede te si wali polalubo bidi me deli dao. Aga te Ahohi hani bidi dao. Me sogo deli Eleasar te Devit dali bidai, tama te Israel dabego te Filistia dabe te hwįabo madiba sisinibo suali. Tama te Israel dabego te Filistia dabeba te hwįainu diana sali, tiali goli te Filistia dabe asobaso, te Israel ibaba habu bulu kilasa pai.  
\v 10 Eleasar aga deli naga te bomo elama dolalu, tama te Filistia dabe ela mubo sę yalio. Tama aga nogo tobalu elama, tama aga nogo te ge hwą poude holalu tolalubo tagalobeo. Te sogo Genuai Bidigo te Filistia dabe aiyaba mu elalualio. Tama nosali, te Israel dabe te Eleasarba ma begasa asali, tiali aga te Filistia dabe ela muani augwaligo suali. Tama sę me deli naga elaluali. Te isali Filistia bidi dabego hwįani doado bage sabo sę elaluali.   
\p
\v 11 Sama, te Agigo ogwa, te Harar bulu bidi, aga te genuai nogi elalubo bidi dabede te sela wali bidi aga da. Me sogo deli te Filistia dabe te Lehi buluba sisinagasai, te bidi dabego tągabi bulai gi me deli pąde elaluai. Tama te Israel dabego augwali bidalubo sulama tama wi pai.  
\v 12 Tiali goli, Sama te wi elama, me kilasa pabeo. Menio. Aga te gi tomode dolalu, te Filistia dabe dali bomonama hwįani, augwaligo te tǫ sidali weyu te tama tialio. Tama agai te Filistia dabe ela muani, tama te tiali kolesagago te Genuai Bidigo te Filistia dabe aiyaba mu elaluai dao.   
\p
\v 13 Te Devitgo ami bidi dabego tobolu bidi meba elaluali, tama augwa te hani dabe nogi poyu, te 30 bomai ami bidi dabe da po wali. Tama me sogo deli Devit te genuai tǫ dedage te Adulam bulu dude bidibadi, tama te 30 wali bomai ami bidi dabede te ami bidi me selago te Devit aga sugi pali. Te nai inilama tau yai sabo sogo tama tiali. Tama te sogo me te Filistia ami bidi meba te Refaim bulu odogoba dulama, tama augwa bidibo pesage tede nigilama bidali.  
\v 14 Te sogo Devit te bomai geme dualalubo pesagede bidali, tama te Filistia ami dabego te Betlehem hanu salio.  
\v 15 Tama Devitgo te Betlehemde elalubo wiegi yai węba ma homu kone palama, te tama po wai, “Homu dene mu ebao,” wali, “te Betlehem hanu sunumi pąde elalubo ulu wę meba tugi sogo da, teda ena wiegi yai homu pemene mu igi dao,” wali.  
\v 16 Te bomai ami bidi selago te tama po wabo odama, tama augwali hogodama, palio. Te Filistia dabego te Betlehem hanu tonalubo te wi homu me isiąma tagalali, te bidi selago augwali dega palama, tama augwali pelama, Devitgo te po wali ulu wę tugi pai. Tama augwa te wę selasa aselama, te Devitba magasali. Tiali goli, aga te wę tuabo homu me ebeo. Menio. Agai selama, tama Genuai Bidiba te ofa tiwai eyu, gelali.  
\v 17 Tama agai te tama po wai, “Genuai Bidi, eno te wę me tugobeo. Te eno tubaso da, teda eno te bidi dabego kaneme tubo ąǫ yaibao, magi baso meni, te augwali te wę sigi painu pali sogo, te isibogo augwali mu gegali digi tama dao,” wali. Tama tiyu, Devitgo te wę me tubeo.   
\s1 Te sę me deli te bomai ami bidi selago te tama sę yai dao.  
\p
\v 18 Abisai, aga te 30 bomai ami bidi dabego polalubo ofisa bidi da wali. Aga te Joapgo ama, tama augwa si ida te Seruia dao, te we da te Devitgo abe dao. Me sogo deli sogode Abisaigo te aga sesemone tulama, tama te 300 boi bidi dali hwįnama, tama tigidali ela muai. Tama aga te sela ami bidi dabego sali genuai nogi tobage te agai me salio.  
\v 19 Agai te genuai namba mu siyu, tama te genuai nogi elalu, te augwaligo polalubo bidi dabe bidali te agai augwali ela soali. Tiali goli, aga digi aga te ami bidi selade te aga deli me kisalubeo.   
\p
\v 20 Tama Benaia, te Jehoiada te Kapsel hanu bidigo ogwa, aga me te bomai ami bidi me deli dao. Tama hauwa sogo agai te boi bidi dabe dali bomonama, hwįani. Me sogo deli agai te Moap dabe bomai ami bidi si ela muani. Tama me sogo deli sogode te talua ge tulubage te tǫba tulubo side, Benaia te genuai tǫ dedage me deli aiyaba dulama, tama te bomai hasa laion me deli ela muani.  
\v 21 Tama gasa sogo agai te Isip moni dobo dwai bidi me deli ela muani. Te bidigo te sesemone tolaluali, tiali goli Benaiago te ni dage selama, tama aga pąba pelama, tama aga dali hwįani. Tama Benaiago te bidigo sesemone nogode dobola selama, tama aga te sesemonego aga ma enema, ela muai.  
\v 22 Benaiago te bomai sę dabe yali, tama tiyu, agai te ami bidi selago te genuai nogi elalubo te tobage genuai nogi agai me salio.  
\v 23 Agai te sali genuai nogigo te gasa bidi sese olama, nogo si ami bidi dabego te sali genuai nogi te aiyaba elaluali, tiali goli aga te genuai nogi elalubo ami bidi selade te aga deli me kisalubeo. Devitgo te Benaiago te king tonalubo ami bidi dabe tonalumainu nigilali.   
\p
\v 24 Te e da te bidi sese olama, nogo si te bomai ami bidi dabe nogi te tama tiwai.  
\p Asahel, te Joapgo ama, Elhanan, te Dodogo ogwa, te Betlehem hanu bidi,  
\v 25 Sama de Elika si, te Harot bulu bidi si da,  
\v 26 Heles, te Pelet hanu bidi, Ira, te Ikesgo ogwa, te Tekoa hanu bidi,  
\v 27 Abieser te Anatot hanu bidi, Mebunai te Husa bulu bidi da,  
\v 28 Salmon te Ahohi hanu bidi, Maharai te Netofa hanu bidi,  
\v 29 Helep, te Banago ogwa, te Netofa hanu bidi, Itai, te Ribaigo ogwa da, te Benjamingo hanigo tǫ te Gibea hanu bidi,  
\v 30 Benaia te Piraton hanu bidi, Hidai te Gas bulu du te odogo bulu pąde bidi da,  
\v 31 Abialbon te Araba hanu bidi, Asmavet te Bahurim bulu bidi,  
\v 32 Eliaba te Salbon hanu bidi, Jasengo ogwa dabe, Jonatan,  
\v 33 Sama te Harar bulu bidi, Ahiam, te Sarargo ogwa, te Harar bulu bidi,  
\v 34 Elifelet, te Ahasbaigo ogwa, te Maka bulu tǫ pedai bidi, Eliam, te Ahitofelgo ogwa, te Gilo bulu bidi  
\v 35 Hesro te Karmel hanu bidi, Parai te Arap bulu bidi,  
\v 36 Igal, te Soba hanu bidi Natango ogwa, Bani te Gat hani bidi,  
\v 37 Selek te Amon bulu tǫ pedai bidi, Naharai te Berot hanu bidi, aga te Joapgo hwįbo sesemone ene dabe tolasa bilali bidi dao,   
\p
\v 38 Ira me Garep si te Itra hani bidi da,  
\v 39 Uria te Hit hani bidi da. Te ami bidi dabego namba te bidi sese deli olama, nogo si olama, a naga me badu si, te tigidali usu nama te 37 ami bidi dabe dao.   
\c 24  
\s1 Devitgo te we bidi dabe augwali nedali  
\r (1 Sto 21:1-27)  
\p
\v 1 Me sogo deli sogo ma Genuai Bidigo te Israel dabeba wado elama, tama agai te Devitba homu kolesaga menama, te Devitgo augwaliba te sęgę sesemainu yai. Genuai Bidigo Devitba te tama po wai, “Nage pelama, te Israel me Juda we bidi augwali nedegi pao,” wai.  
\v 2 Tialima, Devitgo Joapba te tama po wai, te aga ami bidi dabego polalubo ofisa bidi dabeba me te tama po wali, “Nago naga ofisa bidi dabe selama, tama pelama, te dago hani Israel we bidi tigidali nedegi pao,” wai. “Dage te bulu tǫ pedai tigidaliba pelama, te Dan hanu te not tǫ pedai badu, me te saut tǫ pedai, te Berseba hanu pedai badu usu nigi pelama, tama augwali nedao,” wai. “Eno te we bidi dabego namba koneainu obao,” wali.   
\p
\v 3 Tiali goli, Joapgo te tama po kingba wei ponani, “King, eno homu te God, te nago Genuai Bidigo, te we bidigo namba te ugwaba mu holomainu ilama, tama augwali te umabo hauwa we bidi mu pedalumainu yao. Tama eno homugo te nage bidibadi, te pedalubo nago sumainu homu ebao. Tiali goli, te we bidi nedebo sę te dago sę meni, tama tiyu magi baso nago te dwai kolesaga yabo homu ebawe?” wali.   
\p
\v 4 Tiali goli, kingo bomo eyu, te Joap aga ofisa dabe daligo te po wali pao wai. Tama tibaso, augwa te king taga peyu, tama augwa pelama, te Israel hani bage nedegi palio.  
\v 5 Tialima, augwa te wę Jordan nogelama, tama augwa te Aroerba sabolali, te hanu te Gatgo hanigo tǫ te odogo malu tomode elaluali. Tama augwa bidigi pali pesage te hanu tǫ te saut pedai badu nigilama bidali. Tama nosali augwa te Aroer tagalama peyu, tama te not tǫ pedai badu pelama, tama te hanu Jaserba sabolai dao.  
\v 6 Nosali ma augwa te Jaser taga peyu pelama, te Gileat bulu tǫba pali, te Tatimhotsi te tǫ pedai badu palio. Tialima, augwa te badu bidali tagalama, tama augwali te bulu Danjanba sabolali, tama augwa baguasa pelama, tama te Saidon bulu, te giliga dega sigulubo pedai badu, teba sabolali.  
\v 7 Tama augwali te saut tǫ pedai badu ma begasa aselama, tama te Tair hanuba pedelagasali, te hanu te bobegelali masigi obo te bomai mu elaluali. Tama nosali augwa te Tair hanu tagalama, tama augwa hogodama, te Hivi dabego me Kenan dabego hanu tigidaliba pali. Tama nosali mu augwali te Juda tǫ pedai saut badu te Berseba buluba sabolali.   
\p
\v 8 Augwa te tigidali bulu tǫ pedai bila usu nama, tama augwa te moni hanu Jerusalemba ma asai. Augwali te bulu tigidali usu nama bilali, te polua a naga olama, me si me si, te 9 polua me te Sadede sela tama usu nama bilali.  
\v 9 Te augwali sabolali sogode, tama Joap pelama, te bilali po tigidali te kingba waligi pali, “Israelde te ami sę yabo bidi te bidi sese umabo mu, te 800,000 bidi elaluali, tama te Judade te umabo bidi sese mu te 500,000 bidi elaluali,” Joapgo Devitbolo te po wali.   
\p
\v 10 Nosali Devit aga te yali sęde homu sęgę ebaso, tama aga Genuai Bidiba gedu haluasa po weyu, te tama po wai, “Ena te homu mu puna peyu, tama eno te bidi dabe nedalio. Tama eno te tiali kolesagade te eno dwai sę mu yali. Tiali goli, Genuai Bidi, eno nageba hanalu obao, eno te yali sęgę te nago sela sąyao,” wali.   
\p
\v 11-12 Tiali goli, te side digi tama, Genuai Bidigo Gatba te po walali, te Devitgo profet bidi, te agai te tama po Devitba wagi pomainu yai. “Ena Genuai Bidi, eno po dolo obao, eno te sunumi sela nageba mobao, tama naga digi te augwali selade te me deli sa muao. Tama mena sunumi nago nigilali, te naga eno wali peyu, tama nageba te sę pedalumainu ilaibao,” wali. Te nosali badu kigamude Devit hodalubo si da, tama te  
\v 13 Gatgo aga sugi pali, tama te Genuai Bidigo po agaba pusali. Tama agai Devitba te tama po hanalu wali, “Genuai Bidigo homugo te nago te sela pode te po me deli nago te dąį ilao. Nago homugo te genuai nasi elalubadi, te kibu be a naga olama, me si, te tama bidabo homu usu yaibawe? Ma, nago homugo te boi bidi dabego dageba hwįagasomainu homu elama, tama dage augwalide wi pelama, te polua sela bidibaso te usu egowe? Ma, nago homugo te nago bulu tǫ pedai we bidiba te dwai gasi te sela sogo pedalumainu ebaso, te nago homugo usu yaibawe? Nago homu kone bugagia palama da, te nago homugo wei ebo po te enabolo obaso da, tama eno nago te po selama, te Genuai Bidiba ma begasa paibao,” te profet bidi Gatgo te po wali.   
\p
\v 14 Tialima, Devitgo Gatba te tama po wali, “Nago enabolo te wali pode te ena homu sęgę mu ebao. Tama tibaso, Genuai Bidigo digi te agai mena sę te dabolo yabo homu ebo te sę emainu yao, magi baso meni, aga te olo tau sabo wiegi yai kolesaga sesemane sogo ebo God dao. Tiali goli, te eno homugo te boi bidi dabego da dolomainu ebo te eno homugo usu meni yai,” wali.   
\p
\v 15 Tama tialima, Genuai Bidigo te dwai gasi te Israel dabeba tagala palali, te sogo kigamu digi gagalama, tama agai te dąį ilali bodoluba usu nigi pali. Tama te bidi sese umabo bidi mu, te 70,000 we bidi isali, te tigidali bulu tǫ pedai te Dan hanu te not tǫ pedaiba dąį igi pelama, tama te hanu te saut te Berseba, te tama bulu tǫ pedaiba te gasi usu nigi palio.  
\v 16 Tama te we bidi dolobo sę ebo mobo bidi ensel, aga te Jerusalemba sabolama, tama te Jerusalem dolainu sisi elaluali. Tiali goli, Genuai Bidigo te dwai sę te we bidiba pedalubo sęde te homu dene yali. Tama aga homu hasegelama, tama te mobo bidi enselba te tama po wai, “Tagalao, te usu dao,” wai. Te sogo te mobo bidi ensel te augwa te wit nai ge siyu, tama te bo wali dabe sela sąbo pesage me deli pąde te dolaluali. Te tǫ pedai te Arauna, te Jebus hani bidi me deligo tǫ elaluali.   
\p
\v 17 Devitgo te mobo bidi ensel sulama, tama agai Genuai Bidiba te tama po wai, “Eno naga tama eno te dwai sę yali, tama eno dwai sę genuai yalio. Tiali goli, te we bidi dabe augwali, augwa te mena dwai sę ebaso, tama nago augwaliba te dene maniwe? Nago te ena me, ena we wai, dabolo naga te dene magi sogo da, usu igi tama dao,” wali.  
\v 18 Tama te sogode naga te profet Gatgo te Devit sugi pelama, tama agaba te tama po wai, “Tama nage te Jebus hani bidi Araunago te nai wit sabo madi, te pesage te bulu duba ugwa holama, tama nago te Genuai Bidigo alta me deli nigao,” te po wai.  
\v 19 Tialima, Devitgo te Genuai Bidigo po wali pali, te Gatgo agabolo po wali gilama, tama aga te nai wit sabo pesageba palio.  
\v 20 Tama Arauna te sę ebo pesagede bidiyu, tama aiyaba tonono ebadi, tama te king me aga ofisa dabe dali augwali te agaba asobo suali. Tama aga te augwali dali deliba gesabidi unulama, tama aga te king pąba kidu sugunigi pelama, tama te tobolu basi gulama, te kingba genuai nogi mayu tama tialio.  
\v 21 Tama aga te tama po wai, “King, magi baso nago ena suagasu asaliwe?”  
\p Tama Devitgo po wei ponoyu, te tama po wai, “Te eno homugo megi te nago te wit nai sabo pesage tǫ abelabo homu ebao,” wali. “Eno te Genuai Bidigo alta te pesagede nigabo homu yali, tama te we bidiba pedelali te genuai gasi silimainu yaibao,” wali.   
\p
\v 22 Tialima, Araunago Devitba te tama po wai, “King, nago eno te tǫ abelainu wabo, te eno homugo tagala homu ebao. Te nago tama sao. Tama nago te ofa yabo te gasa nai me sainu da, te sao. Nago te ofa eyu, te tigidali siago domainu ulabo te bulmakau dabe me sao,” po wai. “Tama nago te wit bo paulubo ni name me, te bulmakau sigo sę emainogo magede poliali ni nami me selama, tama nago te sia nogonama, tama te ofa ebo nai te siaba ulao,” te po wali.  
\v 23 “King, te tigidali doado bage te eno nageba mobao.” Tama Araunago te po ma weyu, te tama po wai, “Eno homugo te God, nago Genuai Bidigo, te nago agaba ofa ebode te wiegi yai homu pemene emainogo yao.”   
\p
\v 24 Tiali goli, kingo agaba te tama po wai, “Te eno ena digi te sę dene isiąwai nai te eno olo selama, te Genuai Bidiba te ofa tiwai eyu magobeo. Tama tibaso, eno nago te doado bage abelaibao,” wali. Tialima, Devitgo te tǫ pedai me, te bulmakau dabe dali, te silva mone bidi sese te 500 kinago abelali.  
\v 25 Tama Devitgo te Genuai Bidigo alta me deli te pesagede nigilama, tama te siago tigidali dabo ofa me, te God dali deli homu pedalubo ofa me, yalio. Tama nosali, Genuai Bidigo te bidi dabego augwa bulu tǫ pedai te bugagia wiegi yai emainu, te gedu haluasa po wabo odali. Tama agai te Israelde elaluali te gasi silalio.