\id 2KI 2K- Dadibi NT [mps] -Papua New Guinea 2001 (DBL 2014) 
\h Te Israel me Juda Hani Sigo Tuni Bidigo Po Elalubo Buku Si 
\toc1 Te Israel me Juda Hani Sigo Tuni Bidigo Po Elalubo Buku Si 
\toc2 Te Israel me Juda Hani Sigo Tuni Bidigo Po Elalubo Buku Si 
\toc3 2 Kin 
\mt1 Te Israel me Juda Hani Sigo Tuni Bidigo Po Elalubo Buku Si  
\imt1 Hasia Nedebo Po  
\ip Te buku 2 Kingo te nosali pedelabo sę dabede po te buku I Kingo pusali po tiwai agai me pusalio. Hasia te buku si te buku deli naga elaluali. Te 2 King bukude te tǫ kantri si Israel king dabede po pusali, te kantri Juda, te saut badu elalu, te tǫ kantri Israel te not badu elalu yalio. Agai te sę dabe pedelama ela pidubadi, te tǫ kantri si te boi bidi dabego nogode dolali po agai pusali sogoba usu nigi palio. Te not badu bidali bidi hani dabe augwali bolo te hasia te bidi hani Asiria dabego nogode dolali, tama te saut badu bidali bidi hani dabe augwali nosali dolali, te bulu tǫ kantri Babilon king Nebukatnesar nogode dene menama, dolai dao.  
\ip E buku da, te 1 King tiwai si, tama agai te kingo dabego yali kolesaga dagalali po pusali. Augwali te God dologode bidaliwe, ma meniwe? Te e bukude ola mani genuai sę da, e tiwai dao. Te sę te Israel hani siba pedelama, tama augwali te boi bidi nogode dolali, te sę yabo page te augwade dali, te augwa king dabede dali elalualio. Te Israel king dabe me, Juda king dabe me, te augwa hani we bidi dabego dali, augwaligo te God dali hagoma mu eyu, te hauwa sogo augwaligo te bomo yai po me, agai gasa po dali, te sela sąwani. Tama tialigo te augwali genuai sęgę gegai dao.  
\ip Te we bidi dabe augwaligo homugo te tama homu elaluali, Jerusalem dali te Godigo be dali elalubaso, te genuai nai mu ola mabo tiwai, te God augwali dali bidibao homu yalio. Tama tibaso, te dwai dene mabo nai me deli augwaliba me pedalugobe da homu elaluali. Tiali goli, e bukude te Jerusalem dolama, te boi bidi dabego te Godigo be aluama, besala sąwani po pusali. Te tama tiali sęgo te Israel we bidi dabe augwaligo homu kolesaga mu dolalio. Te tama tiali sędę, tama nosali augwaligo hauwa bilibo kolesaga, me lotu wabo kolesaga me, augwali te gasagi yai tedali hasegelai dao.  
\c 1  
\ms1 Elaija dali te Elisa sabi name side po elalubo buku  
\mr (Dąį 1:1–8:15)  
\s1 Elaijago te king Ahasia isabo po wai  
\p
\v 1 Tama te nosali te Israel bidigo king bidi Ahap isali, te Moap bage augwaligo homugo te Israel bagego da tonalugobeo homu yai. Tama tibaso, augwaligo te Israel bage augwali sela sąyani.  
\v 2 Me sogo deli te Israel bidigo king bidi te Ahasia aga bede te ugwa badu habu badu bidibadi yaide, tama te be kąų togasa dulunama, tama aga te tǫba tulaluama, tama aga te nogo sągą me, te tigide me genuai mu tama selali. Tama tibaso, agai te me badu po sela pabo bidi dabe te Filistia bulu te moni hanu te Ekronba tagala palali, te augwaligo te Ekron hanude bidibo bidi dabego te augwa tibo god Balsebup hanalugi pao olama, tama te aga ma usu yaibawe, ma meniwe, olama hanalu wai.   
\p
\v 3 Tiali goli, te Genuai Bidigo po sela pabo ensel bidigo te profet bidi Elaija te Tisbe taun hanude bidibadi e tiwai po wali, “Tama nage pelama, te Samaria king bidigo te taun Ekronba tagala palali bidi dabe nago augwali tiąba pelama, tama nago augwalibolo e tiwai po tama wao, ‘Magi baso te dagego homugo Ekron augwaligo tibo god Balsebup hanalugi sobawe?’ wao,” wali. “‘Tialima, Israel bidi dabeo, dage dali God bidibewe?’ wao,” wali, “‘tibaso dage sobawe?’ wao,” wali.  
\v 4 “‘Awe, odao, Genuai Bidi Godigo te e po te king bidi Ahasiabolo waliąo,’” wali, “‘nage ma usu egobeo. Mu menio. Nage tama pila muna muna pedubadi genama, tama isibo bodoluba usu nigi paibao,’ tama po wao,” wali. Elaijago te po odama, tama aga hodaluama peyu, te bidi dabebolo te po wagi pai.   
\p
\v 5 Te bidi dabe augwaligo te Elaijago wabo po odama, te bage augwali te king pageba ma geasa pelama, tama te kingo augwalibolo e tiwai po hanalu wali, “Magi baso te dage polo ma begasa asaliwe?”   
\p
\v 6 Tama augwaligo te kingo wali po wei ponoyu, te e tiwai po wali, “Bidi me deligo te da te tųba tiąba aselama, tama agai dabolo te po wai, ‘Dage me geasa pelama, te Genuai Bidigo po te king bidibolo wagi pao,’ obaso da, ma geai dao,” wali. “Te po e tiwai dao, ‘Magi baso nago te bidi dabe augwali tagala palama, te augwali pelama, te Balsebup hanalugi pa waiwe, te Ekron bidi augwaligo tibo godiba? God Mu Israel bidi dage dali meni baso, nago tama tiwai da, agawe? Mu tamao, nage munu ma gesa solama, ma usu egobeo. Mu menio. Nage tama pila muna muna pedubadi kęnama, te nage isibo bodoluba sabaligi paibao,’ agai dabolo te po wao wali,” augwaligo te king bidibolo te po wali.   
\p
\v 7 Kingo te po odama, tama agai augwalibolo e tiwai po hanalu wali, “Te bidigo dagebolo te po ola mani, aga mena tiwai bidi dawe?”   
\p
\v 8 Tama augwaligo te po wei begelu e tiwai po wali, “Te bidi aga te hasa nisigo nigai bulubo ugwa bulai bidi dao,” wali, “tama aga te hasa usugaligo nigai kukulu gudai bidi dao,” wali. \x * \xo 1:8 \xt Mat 3:4; Mak 1:6\x*  
\p Kingo odama, tama agai te po wai, “Te bidi aga te Godigo po pusubo profet bidi Elaija da,” wali.  
\v 9 Awe, tama te kingo te ami tobolu bidi me deli dali, te bidi sese si olama, nogo si, 50 ami bidi dabe dali, tagala palama, tama augwali pelama, te Elaija odasa asomainu tagala palai. Augwali pelama, te Elaija aga bidibo buluba sabolali, tama te ami tobolu bidi keptengo Elaija te bulu dude dugulalubo suali. Tama te keptengo te Elaijabolo e tiwai po tama wai, “Nage Godigo po pusa mabo bidi da, kingo nage asao wali. Nage eba dulama, tama te king aga sugi pao,” wali.   
\p
\v 10 Tialima, Elaijago e tiwai po wei ponani, “Tialima, mu tama, ena Godigo po pusa mabo bidi da wida,” Elaijago te po wali, “teda eno homugo te dagalude elalubo isi tagala palama, te nage dali, te naga te 50 ami bidi dali, isigo domainao,” wali. Tama te po wabo si, te dagalude elalubo isi polo tulaluama, tama te ami tobolu bidi kepten bidi dali, te aga te 50 ami bidi dali, isigo dela pelama, tama augwali isila pali.   
\p
\v 11 Nosali te kingo gasa me ami kepten bidi dali, te bidi sese si selama, te nogo si, 50 ami bidi dali, te Elaija pageba ma tagala palali. Tama augwali Elaija pageba sabolama, tama kepten bidigo te Elaijabolo e tiwai po wai, “Nage Godigo po pusubo bidi da, kingo te po walio, nage polo dulama, tama nago aga suagasao po wali,” te po wai.   
\p
\v 12 Tama Elaijago agabolo te po wei ponoyu, te po wai, “Tialima, mu tama dao, ena te Godigo po pusa mabo bidi da wida, teda eno homugo te dagalude elalubo isi polo tulaluama, tama te nage dali, te naga 50 ami bidi dali, isigo domainao,” wali. Tama te po wabo si yaide, te Godigo isi polo tagala palama, tama te kepten bidi dali, te 50 ami bidi dali, tama te augwali isigo dali, tama augwali isigo dela pelama, isali. \x * \xo 1:12 \xt Luk 9:54\x*   
\p
\v 13 Tialima, kingo gasa kepten me dali, te 50 ami bidi dali, te Elaija pageba ma tagala palali. Tiali goli, te sela wagi siyu pali kepten, te bidi agai te e tiwai kolesaga yai, aga te Elaija bidibo bulu duba holama, tama aga te Elaija bidibo pąba sabolama, tama te kepten agai te kidu sugunama, Elaija agabolo e tiwai po olama wai, “Godigo po pusa mabo bidio.” Keptengo agai te bomai po weyu, e tiwai po wali, “Nago ena dali, te eno ami bidi dali, te nago ena dali te bugai homu pemene yao,” wai. “Tama nago da doligio,” wali.  
\v 14 “Eno koneanio, te dagalude elalubo isi tulaluama, te kepten si dali, te bidi sese a naga, 100 ami bidi dali, te augwali isigo dai dao.” Keptengo bomai po weyu, te po wai, “Eno homugo nago ena dali, te eno 50 ami bidi dali homu dene eyu, tama da doligio,” wali.   
\p
\v 15 Keptengo po ola silali, tialima te Genuai Bidigo ensel bidigo te Elaijabolo e tiwai po tama ola mawai, “Nage dulama, te kepten bidi dali pao,” wali. “Nage aga sulama, wi egio.” Awe, Elaija hodaluama, tama aga kepten bidi dali te king pageba pai.  
\v 16 Elaija sabaligi pelama, kingbolo te po wai, “Genuai Bidigo e tiwai po tama wai. ‘Nago homugo God Israel bidi dabe dali bidibewe?’ wai, ‘tama tibaso, nago me badu bidi tagala palama, te Balsebup hanalugi pao waliwe, te Ekron dabego tibo god dao. Tama tibaso, nage munu ma usu egobeo. Mu menio. Nage tama pila muna muna pedubadi kęnama, tama nage isigi paibao,’ wali.” Elaijago kingbolo te po ola mawai.   
\p
\v 17 Tama te nosali Ahasia isali, tama te po Elaijago pedauwalidu te Genuai Bidigo po pusali te sogo mu usu nani. Ahasia aga ogwa meni. Tama tibaso, aga ama Joramgo aga ama Ahasiago yali sę selama, te king bidiyu, Israel bidi dabe tonaluyu bidali. Te Joram king nigilama bidibadi, te kibu be si pai, te Jehoramgo, te Jehoram te Jehosafatgo ogwa, tama aga Juda bulu tǫde aga king bidi nigilama, Juda dabe tonaluyu bidai.  
\v 18 E po dabe te king Ahasiago te tigidali te gasa sę yali po, te po gasa buku elalubo, augwaligo te nogi wai, te Israel Bidi Dabe Augwaligo Kingo Yali Sę Po Elalubo Buku dao wali.   
\c 2  
\s1 Godigo Elaija dagaluba sela holali po  
\p
\v 1 Genuai Bidi Godigo homugo te Elaija deli sogo te pobege ebo waligo dagaluba selasa holaiba homu yali. Tama te sę pedalabo elalubadi yaide, te Elaija dali, te Elisa dali, augwali sabi name si te Gilgal bulu tagalama pai.  
\v 2 Tama Elaijago te aga sabi Elisabolo e tiwai po wai, “Nage ede tama bidiyu, tonaluao,” wai. “Magi baso meni, Genuai Bidigo ena Betel buluba pao wai,” wali.  
\p Tiali goli, Elisago e tiwai po wei ponani, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao,” wali. Tama tibaso, te augwali te Betel taunba talua si pai.   
\p
\v 3 Te Betelde te Godigo po pusubo profet bidi hani me badu tede bidai. Tama augwali aselama, te Elisa sabi name si sisinagaselama, tama augwaligo Elisabolo e tiwai po ola mani, “Megi te Genuai Bidi Godigo te naga genuai bidi Elaija selasa paibao,” te tiwai po Elisabolo ola mawai, “te nago koneaniwe, ma meniwe?” wali.  
\p Tama Elisa agai augwalibolo te po wei ponoyu, e tiwai po wai, “Eno me te konea palio. Dagego te nai po me wagio,” wali.   
\p
\v 4 Augwali si te Betel bulude me bidibadi yaide, tama Elaijago te Elisabolo e tiwai po tama wai, “Nage ede tama bidu tonaluao,” wai, “magi baso meni, Genuai Bidigo ena Jeriko pao walio.”  
\p Tialima, Elisago te po wai, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali mu paibao,” wali. Tialima, augwali si te Jeriko taunba talua si pai.  
\v 5 Te me badu te profet hani te Jeriko taunde bidalubo bidi dabe, tama augwali te Elisa pageba aselama, tama augwaligo agabolo e tiwai po tama wali, “Megi te Genuai Bidi Godigo te naga genuai bidi Elaija selasa holaibao,” wali. “Tama nago teda koneaniwe, ma meniwe?”  
\p Tama Elisago augwalibolo te po wei ponoyu, e tiwai po augwalibolo wai, “Eno koneanio,” wali. “Te sę yabo po dagego munu ma wagio,” wali.   
\p
\v 6 Augwali si te Jerikode me bidibadi yaide, tama te Elaijago aga sabi bidi Elisabolo e tiwai po tama wai, “Nage ede tama bidiyu, tonaluao, magi baso meni, Genuai Bidigo enabolo ‘Te nage te Jordan ąįba pao,’ walio.”  
\p Tiali goli, te Elisago te po wai, “Genuai Bidi tigidali sogo bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao.” Tialima, aga sabi dali talua si pai.   
\p
\v 7 Tama bidi sese si olama, te nogo si, 50 profet bidi dabe te sabi name si wali pai. Augwali pelama, te Jordan ąįba sabolama, tama te ąį pąde dolaluali. Tiali goli, te 50 profet bidi dabe te digibulu ganama dolaluali, tama te sabi name si tonaluali.  
\v 8 Tialima, Elaija aga bobobage bulubo ugwa dilama, tama te tomagelama, tama te bulubo ugwago te Jordan ąįba elali. Tama te ąį tomode si bugasa pelama, tama te ąį tomode tǫ dila pai mu elaluali. Tama augwali si tedu pelama, te Jordan ąį uba pedai badu sabolali.   
\p
\v 9 Augwa si peyu, tama te Elaijago te aga sabi Elisabolo e tiwai po tama wai, “Pąde tama megi Genuai Bidigo ena saibao,” wali, “tama eno nage taga paibao. Tama tibaso, nago homugo eno nage magi naigo nagebolo hasia tau sagawe?” wali.  
\p Elisago te po wei ponoyu, e tiwai po tama wai, “Nago te Godigo bomo mu selama, tama nage te profet sę yai dao. Tama eno homugo nago te sę yali bomo ena mao,” wali, “te ayago aga gomunai ogwa umabo nai mabo kolesaga tiwai gilama yao. \f + \fr 2:9 \ft Te Bom 21:17 tede elalubo po suao.\f* Tama eno te nago bidali madigi bidiyu, te usu nama, tama te profet sę yaio,” wali. \x * \xo 2:9 \xt Bom 21:17\x*   
\p
\v 10 Elaijago te po wei ponoyu, e tiwai po tama wai, “Te nai nago enabolo hanalu wali, te eno tama polo nagebolo polo magobeo,” wali. “Tiali goli, Genuai Bidigo ena sela holobo sogo, te sogo nago ena subaso da, teda te sogo nago te bomo sagameo, tama tialima, nago ena pabo sogo susąyu da, teda nago sabo usu egobeo,” wali.   
\p
\v 11 Tama augwali si te po mimi pabo sę ela peyu pali, tibadi yaide, polo tama te isi bogoli te bidi si tomo agebelede isi bogoli pedalali. Te isi tomode augwali sigo tonobadi yaide, te kibu hosgo te ni namego sai yai madigi bidi dugabo karis kegasa asobo suai. Awe, tama tialima, te pobege ebo waligo te bidi Elaija te dagaluba selasa holali.  
\v 12 Elisago te Elaija pabo sulama, tama te Elisago agai i weyu, e tiwai tama wai, “Eno aya, eno aya. Nage bomai bidi mu dao, te Israel bage tau sali bidi mu dao. Tama nage te hauwa hwįbo nai te kibu hos me te karis, nage te tiwai dao,” wali. Elaija te dagaluba polo paide te Elisa agai munu ma sube, tama tibaso, te Elisa aga haligade moni homu sęgę mu eyu, te aga te bobobage bulubo ugwa tomode si peda sąyani. Te page e tiwai, aga homu dene ebo page ola mani. \x * \xo 2:12 \xt 2 Kin 13:14\x*   
\p
\v 13 Te sogo te Elaija Godigo te dagaluba selasa holali sogo, te aga bobobage holobo ugwa te agai te tǫba tula palali. Awe, tama tibaso, Elisa agai te Elaijago te holobo ugwa selama, te Jordan ąįba geasa pelama, tama aga te Jordan ąį sanide dolaluali.  
\v 14 Tama te Elisa agai te Elaijago bobobage holobo ugwa selama, tama agai te Elaijago yali kolesaga tiwai elama, te agai te holobo ugwa selama, te ąįba elali. Tama agai te węba elali sogo agai te po wai, “God, nage Elaijago Genuai Bidio, nage mena bidibawe?” Tama te po obadi yaide, te ąį tomode si buga pali, tama tibo si, te Elisa te ąį tomodu pelama, te ąį u badu pedaiba sabaligi pali.   
\p
\v 15 Te 50 profet bidi dabe te augwali te Jeriko bulude bidibo bidi dabe da, tama augwali te bulude me bidaluali. Te bidali bage magi baso meni, augwaligo homugo te Elisago ebo sę page suainu bidaluali. Tama augwaligo te po wai, “Suao. Te bomo te polobadu te Godigo Elaijabolo mawai bomo dao, te bomo megi te Elisa dali bidibao,” wali. Tama augwali asama, tama aga tiąba aselama, augwaligo kidu sugunama, tama augwaligo tobolu me tǫba naga basilali, tilama augwaligo te Elisa genuai nogi mani.  
\v 16 Tama augwaligo te Elisabolo e tiwai po wai, “Dago hanigo te bidi sese si olama, te nogo si bomai bidi dabe bidibo,” wali. “Tama dago homugo te bomai bidi dabe augwaligo te nago genuai bidi Elaija gegegi pomainao,” wali. “Genuai Bidigo Mobogo aga selasa pelama, tama te aga bulu du me, bulu odogode me, aga tede tagalama, bidi badi bogo,” wali.  
\p Tiali goli, te Elisago augwalibolo te po wai, “O tegio,” wali. “Dagego te bage tagala palama, aga gegegi pigio,” wali.   
\p
\v 17 Tiali goli, te profet bage augwaligo bomo mu yali, tama augwaligo te Elisa aga hanalubo sę bomo mu yali, tama tibaso, Elisa agai homugo te augwali pogobeo olama, agai augwali dąų wagobeo homu elama, tama agai te po wai, “Awe, usu dao,” wali, “dagego te augwali tagala palao,” wali. Tama augwaligo te bidi sese si olama, te nogo si, 50 bidi augwali pelama, tama te Elaija gegedubadi yaide, te sela sogo hodolai, tiali goli augwaligo aga me sube.  
\v 18 Elisa aga te Jerikode bidiyu, tama augwali asobo tonaluali. Tama augwali ma geasa asobo sogo, Elisa agai te profet bagebolo e tiwai po tama wai, “Eno magi po waidawe? Tialima, dagego homugo eno wali po dagego odobeo,” wali.   
\s1 Elisago te ąį ma dwagi yai ma ilali  
\p
\v 19 Elisa te Jeriko taunde me bidibadi yaide, tama te taun bidi dabe augwali aselama, Elisa agabolo e tiwai po wali, “Genuai bidio, nago suao, te e taun te dwagi yai mu dao,” wali. “Tiali goli, wę digi dwagi yai menio. Tama te we dabe augwali wai haliga elalubo sogo augwaligo te wę naga tubo dao,” wali, “tama augwaligo te wai polo ame nabo, tama augwaligo te wai dabe te haligade genuai isąbadi ame nabo dao, tama teyu, augwaligo te wai dabe polo isibo dao,” wali.   
\p
\v 20 Tama te Elisago augwalibolo e tiwai po tama wali, “Dage pelama, te gesi pou dis me deli selama, tama te poude te sol tamu munama, selasa asao,” wali. Awe, tama augwaligo te Elisago wali po wali pelama, tama tiali.  
\v 21 Tama te Elisa aga te ulu ąįba pelama, te ulu ąįba te tamu gelali, tama agai te po wai, “Genuai Bidi Godigo e tiwai po tama wai, ‘Ena Genuai Bidi, eno e wę ma dwagi yai ma ilibao. Tama te e węgo bidi te munu ma isibo sę egobeo, tama te we dabego polobadu yaliga te we dabego wai ame nabode te haligade genuai isąwai augwaligo ame neyu yai, te yali tiwai ma egobeo,’” wali.  
\v 22 Awe, tama te ąį ma dwagi yai pedalali, tama te Elisago wali yali gilama, tama bidada asali yali gilama, tama megi eba usu nagasobao.   
\s1 Te ogomani augwaligo te Elisa posobo po wai  
\p
\v 23 Tama nosali te Elisa Jeriko taun tagalama, tama te Betel buluba pali. Tama te umabo ogomani te taunde bidibo ogomani te taun bulu badu bidalubadi yaide, te augwaligo Elisa soabo suali, tama augwaligo te Elisa posoyu, e tiwai po olama, tama posoyu yai, “E, nage tobolu wane yai bidio, nage gedao,” wali, “nage te pesagede bidigio, nage gedao,” wali.   
\p
\v 24 Elisa aga ma begelama, tama agai te ogomani bomo mu elama tama tonaluyu, agai te augwaliba e tiwai po agai wali, “Eno mu po tama obao, Genuai Bidigo dage dolaibao.” Elisago te po wabo si, te bomo yai genuai uni kibu tiwai kibu sou si nogi bea, te kibu te dwai tǫdi gagawai kibu da, te kibu bea si aselama, te bidi sese si olama, me si, 42 ogomani te kibu sigo ela muna silali, tama te augwali tigi minama mu silai.  
\v 25 Tama Elisago te bulu tagalama, te Karmel bulu duba pai, tama nosali aga te Karmel bulu du tagalama, tama te aga te Samaria buluba ma begasa pai.   
\c 3  
\s1 Israel bage augwaligo te Moap bage dali boi hwįani po  
\p
\v 1 Te Jehosafat te Juda tǫde te king bidi nigila bidiyu, te kibu be 18 wagi solama kibu be pai, te Joram, Ahapgo ogwa, te Joram aga te Israel bage tonaluabo king bidi nigilama bidai, tama aga te Samaria bulude king nigilama bidali, me te kibu be nogo si olama, te sągągo si, 12 kibu be pai.  
\v 2 Joram agai te Genuai Bidi gedude agai dwai kolesaga yali. Tiali goli, agai dwai kolesaga yali, te aga ida dali, te aya dali sigo yali kolesaga tiwai me ebe. Menio. Agai te kolesaga yali te tibo god Bal noma piksa te bede dagana ulali te Joram agai sela sąyani, te polobadu te aga ayago te tibo god Bal noma nigai.  
\v 3 Tialima, Joramgo te dwai kolesaga yali sęgę te king Jeroboamgo yali te sęgę sabo kolesaga te tiwai naga yali, aga te Nebatgo ogwa, te agai yali sęgę te tiwai, augwaligo te yali tiwai sęgę sabo kolesaga naga eyu, te Jeroboamgo agai te Israel augwali kegelama, te augwaligo te tiwai dwai kolesaga emainu Joramgo Israel augwaligo me tiwai kolesaga emainu kegai. Joramgo agai te dwai kolesaga ebo me tagalobe. Mu meni.   
\p
\v 4 King Mesa, te Moap bagego king bidi, te bidi agai te kibu sipsip umabo mu bidali. Tama te Moap hanigo king bidi te Israel hanigo king dologode bidali. Tama teyu, tigidali kibu bede te agai koneama, te kibu sipsip wai te bidi sese umabo te 100,000 selama, te Israel kingbolo te takis mone tiwai mawai. Tama me te agai te kibu sipsip omai kibu te bidi sese umabo mu, te 100,000 aga sa muyu yali. Tama te kibu omai dabe augwaligo nisi me poalama, tama te nisi augwaligo te Israel bagego king bidi pageba toliyu yai.  
\v 5 Tialima, nosali te Israel bidi dabego king bidi te Ahap isali, te Moap hanigo king bidi Mesago te Israel bidi dabego gesi noma king bidi dali hagoma eyu, tama agai takis mone ma mabe.  
\v 6 Awe, tialima te king Joram aga te Samaria polo taga soyu, tama agai te tigidali ami bidi sisinibo sę yali.  
\v 7 Tama Joramgo te Juda bidi dabego king bidi Jehosafatbolo po ola tolali, Judago king o, e tama tiwai dao, “Te Moap bulu king bidigo ena dali hagoma ebo. Tama tibaso, eno homugo eno aga dali hwįgi paibao. Tama nage ena dali paibawe, o ma meniwe?” te po hanalu wali.  
\p Tama Jehosafat agai te po wei ponoyu, e tiwai tama wali, “Ena te nage dali muna selama paibao,” wali, “tialima ena tonalu bidibao, te naga homugo mena sogo pobaso da, teda ena asaibao. Tama te eno ami soldia bidi me, te eno hos kibu me, eno te nage tau sabo dodo bage dola selama bidibao,” wali.  
\v 8 “Tialima, da mena tųdu tama da paibawe?” wali.  
\p Tama Joramgo te po wei ponoyu, e tiwai po tama wai, “Tama da te wa pai buludu te Idom bulu tųdu paibao,” wali.   
\p
\v 9 Awe, tama te king Joram badi, te Juda bidi dabego king bidi badi, me te Idom bidi dabego king bidi badi elama, te augwa ami bidi dabe me selama, tama augwali pali. Tama te tų te bobobage tų mu tama augwali pedubadi yaide, te Sadede deli mu silai, tama teyu te augwaligo wę sia sali. Tama tialima, te ami bidi dabe me, me te walu sela pabo donki kibu dabe me, tama te augwali tuabo wę sia sali.   
\p
\v 10 Tama te king Joram agai e tiwai po tama wai, “Homu dene mu ebao, God Genuai Bidi aga digi da sela king bidi dabe sisinama, tama agai da sela bidi te Moap bidi dabego king bidi nogoba mubo yabao,” wali.   
\p
\v 11 Tialima, te king Jehosafatgo te king Jorambolo hanaluyu, te po wai, “Genuai Bidi Godigo po pusubo profet bidi me deli bidibowe, ma meniwe?” wali. “Tialima, bidibaso da, teda dago agabolo e tiwai po tama wainao, ‘Naga Genuai Bidi Godibolo hanaluama, te dago mena tiwai sę yaibawe?’ wainao, “Jehosafatgo te po wali.  
\p Te king Joramgo sę ebo kiap tobolu bidi me deligo te po wei e tiwai tama ponani, “Elisa, aga te Safatgo ogwa, bidibao. Polobadu aga te profet Elaijago sę ebo bidi bidali,” wali.   
\p
\v 12 Tama te king Jehosafat agai odama, tama agai te po wai, “Elisa aga te Genuai Bidi Godigo sę ebo profet bidi mu dao,” wali. Tama tialima, te king dabe augwaligo te profet Elisa sugi pali.   
\p
\v 13 Elisa agai te Israel bidi dabego king bidi subaso, tama agai te po wai, “Magi baso nage ena pageba asobawe? Nage pao, tama te polobadu naga aya me, te ida me, augwaligo pelama, te hanalugi pali te profet bidi bageba pao,” wali.  
\p Tiali goli, te king Joramgo te po wei ponoyu, e tiwai po tama wali, “Menio. Genuai Bidi aga digi te da sela king bidi dabe sisinama, tama da te Moap hanigo king nogoba muainu ebao,” wali. “Tama tibaso, da nage pageba asai dao,” wali.   
\p
\v 14 Tama te Elisago te Jorambolo e tiwai po tama ola mani, “Ena te Genuai Bidigo sę ebo bidi dao. Aga te tigidali sogo bidada peyu, bidada pabo dao, tama aga tigidali bomo mu elalubo bidi dao. Tama agai nogide eno mu po tama e obao, tama tialima, te Jehosafat nage dali bidigi menigi sogo da, teda eno nage gesabidi sugi menio, ma po me wagi menio. Tiali goli, eno koneanio, Jehosafat aga te dwagi yai bidi mu yai baso, tama eno nago po odobao,” Elisago te po te king bagebolo wai.  
\v 15 “Awe, eno homugo megi te dagego pelama, te gita gagali ebo bidi, me ma te musik gagali ebo konea pai bidi mu me deli odasa asao,” wali.  
\p Awe, tama augwaligo te gita gagali ebo bidi odasa asali, tama te bidigo te gita gagali ebo side, te Genuai Bidi Godigo bomo te Elisaba asali.  
\v 16 Tama Elisago agai po pusuyu, e tiwai po tama wali, “Genuai Bidigo te po wai, polobadu te wę soali silide, te dagego te wę soabo madigi te umabo ąį sabo tǫ dedage nigao wali, tiali goli te megi da, te ąį te sula sali dao, wali.  
\v 17 Tama dagego te kulubage me, te wali me, asobo susiąbadi, tialima te wę te aga soali madigi wę ma soabo suaibao, wali. Tama tialima, dage dali, te duga bulmakau kau kibu me, me te donki kibu me, te dagego te tuabo ąį me mu usu elama, te umabo mu pągąwaibao,” wali.  
\v 18 Tama te Elisago agai po me wadolama pusuyu, e tama wali, “Genuai Bidigo te homu yai, te wę dage mabo sę, te genuai nai menio. Te dwasianu nai dao. Tama tialima, Genuai Bidi agai homugo te gasa sę dagebolo me mawaibao. Te sę tama pedalaibao, te dagego te Moap hani dali boi hwįbode agai dage tau selama, augwali aiyaba elaluaibao, wali.  
\v 19 Tama tilama, te bomai obo elalubo te dwagi yai taun siagameo. Tama dagego te tigidali te dwagi yai ni dabe togolama, tama te tigidali augwaligo te ulu ąį tubo pesage hagalu pelama silao. Tama dagego te masigi selama, tama te augwaligo te gi yabo tǫba sąsąwaibao wali, tama te augwaligo nai wai bulubo usu me egobeo.” Tama te Elisago te po ola silibo si, te king bidi sela te augwaligo te Elisa aga tagalama, augwa pali.   
\p
\v 20 Tama te giliga pedalubo si, te giliga nosali pedalai badi te kigamu digi mu, tama tibo sogo te kigamu denami yai ofa nai te Godidolo ula mabo sogo dao, wę te wa pai ąį gamiadu te Idom tǫ pedai badu aselama, tama te tigidali te augwaligo digawai tǫ dedage dabe te węgo pągąwai dao.   
\p
\v 21 Moap bage augwaligo e tiwai po tama wabo augwaligo odai, te sela king bidi hani aselama, te augwali dali boi hwįagasaibao po wabo odali. Tama tibaso, te augwaligo tigidali bomai bidi te ami nigilama, te boi hwįabo bidi naga i olama, tama augwali sisinagasali. Tama nosali augwali aselama, te Moap tǫ dali, te Idom tǫ pedai dali, te dąį dolo tonaluyu bidaluai, tama augwali dola selama, te boi hwįabo deli naga tonaluai.  
\v 22 Tama te nosali te do kigamu tama, te Moap hani augwali te kigamu digi hodaluai. Tama tialima, te sogo tama te Genuai Bidi Godigo te Israel bagebolo wę mawai. Tama te giliga naniyu, te węba ula ilali, tama augwaligo te węba subo si, te węde te kaneme tiwai mu te mama yai mu elaluali. Tama te Moap bage augwali digibulu bidiyu, tama augwaligo suali.  
\v 23 Tama augwaligo i weyu, e tiwai tama wali, “Tonao! Tialima kaneme naga elalubo suao!” Augwaligo te homu eyu, te po wai, “Te boi bidigo tama te augwa digi te augwali te umabo mu te boi hwįyu, te elali bidi kaneme te e tǫde elalubao,” wali. “Polo pinao. Dago pelama, te augwaligo nai dabe me, me te augwali te bidibo bulu pesage dago sigi pinao!” te po wali.   
\p
\v 24 Awe, te po olama, augwali hodaluama peyu, te Israel bidi bidibo buluba pali. Tialima, augwali pelama, sabaligi pali sogo, te Israel bagego te ami bidi dabe hodaluama, tama augwali dali bomo mu elama, boi hwįai, tama augwali tigidali pobeasa pelama, te augwa bulu tǫ Moapba tagaligi pai. Tama te Israel ami bidi dabego te Moap ami bidi dabe te umabo mu ela muani.  
\v 25 Tama te augwaligo te moni hanu taun mu tama dolali. Tama te Israel bidi dabe augwaligo te Moap hanigo tigidali taun bilama, mu usu nigi pali. Tama augwali te augwaligo gi nai bulabo tǫ dwagi yai me deli elalubo madigi sabalobo sogo, tama te tigidali ami soldia bage augwaligo te masigi selama, tama augwaligo te gi bulabo madigi te masigi sąsą pelama silali, tama te masigigo te tǫ tigidali te tǫ pągąna sela silali. Tama me te augwaligo tubo ulu ąį te ma paliali. Tama te dwagi yai ni dabe augwaligo gelali, tama augwaligo te tigidali taun dola silali. Tama te tialima, te taun me deli digi tagalali, te taun nogi Kirheres, te Moap bage augwaligo moni hanu. Awe, tama te sut katapel ami bidi dabe augwaligo te taun augwaligo bagua sali, tama augwaligo te taun tomoba te masigi selama, enebo sę yali.   
\p
\v 26 Te Moap king bidigo suali, ma te boi bidi dabego te aga pąde tama aiyaba elaluaibao homu ebaso, tialima te king agai te bainat ge hwą tulama, te boi hwįbo konea pai bidi naga te agai sali, te bidi dabe te bidi sese hauwa, te 700 ami bidi sai, tama augwali te taun tagalama, te Idom king bidi pageba painu yai, tiali goli augwaligo usu ebe.  
\v 27 Tama tibaso, te Moap king bidigo te agai godigo aga tau sao homu eyu, te aga te gomunai ogwa selama, aga te waigo te aga isibode te king nigilama, te king sę yaga wali ogwa. Tama te kingo aga te ogwa selama, tama elama, te tibo godiba ofa nai ula mawainogo te wai elali, te ogwa te isiba sese ulama, te ofa tigidali dela pela silali. Te ofa te Moap bage augwa te tibo godiba ula mawai. \f + \fr 3:27 \ft Te Hibru pogo te habu badu bugagia me konebe, meba bidigo te homu yai, te Israel dabe augwali wi eba homu yali. Magi basowe, augwaligo homugo te Moap bagego te tibo godigo augwali dali sębę yaibao homu yali. Tama te bidi me badu bidigo te homu yai, te Israel bage augwali wi yali, te augwa Genuai Bidi God aga digi augwali dali sębę yai, tama agai te dwai nai te augwaligo gedude pedalali. Tama meba bidigo te homu yali, te hani augwaligo te po wai Israel bidi dabe augwa digi te augwaligo haligade sębę dwai mu ebao, te Moap hani king bidigo ebo kolesaga sulama, tama augwaligo te boi hwįabo tagalali.\f* Agai te ofa nai ulali, te taun genuai obo ugwa badu daide ofa nai ulai. Israel bage augwaligo te tama tibo sulama, tama te augwali te sęde dwai homu mu yai. Tama augwali te boi hwįbo tagalama, tama te augwali te augwa buluba ma pai.   
\c 4  
\s1 Elisa agai te wilawe we me deli tau sai po  
\p
\v 1 Me sogo deli te profet bidigo we me deli te Elisa pageba asai. Te we aga bidi isai, tama te we aga olo bidibo wilawe we dao. Awe, agai te Elisabolo e tiwai po tama wai, “Genuai bidi, eno bidi isai dao,” wali. “Naga koneani, aga Genuai Bidi dologode bidada pai dao. Tialima, agai bidi me delide negeli sai, tama megi eno te negeli sali nai wei begelabo mone menio. Tama tialima, te bidi aselama, te eno wai ogwa si selama, tama te ogwa sigo te bidi aga te olo sę ela mabo bidi nigimainu ebo,” wali, “magu meni, te bidigo te negeli mone begelu, te ogwa sigo te bidi aga olo sę ela momainu homu yai,” te wego te po wali.   
\p
\v 2 Elisago te po odama, tama agai te webolo e tiwai po tama ola mani, “Tama eno nage mena tama tau saibawe? Nago magi nai nago bede munalubowe?” wali.  
\p Tama te wego po wei ponoyu, e tiwai po tama wai, “Eno te oliv wel munalubo dwasianu sospen genage deli dao,” wali, “eno bede te gasa nai me menio. Te deli tama dao,” wali.   
\p
\v 3 Tama te Elisa agai te we agabolo e tiwai po agabolo ola mawai, “Nage pelama, te naga abagi dabebolo hanalugi pelama, te augwaligo te nai bula tubo mouwa dage kenage sospen, nage me osogo momainao,” wali. “Tama augwaligo te olo me munalubo mouwa dage kenage augwaligo nage me mobaso da, tama nago umabo mouwa dage kenage sao.  
\v 4 Tama nago te mouwa dage kenage osogo selama, tama te naga be tomoba selasa pelama, tama te tų paliao,” wali. “Tama te nage dali, te naga wai dali si tama bidiyu, tama naga te mouwa dage kenagede munalubo wel te gasa mouwa dage kenageba te wel gelao,” wali. “Te sogo nago te mouwa kenage me deliba gelama te pągąna muai, awe, tama nago te gasa habuba me deli muao,” wai. “Nago te tama naga tidi pedubadi kęnama, tama naga te sali tigidali mouwa dage kenageba te wel gelama, te tigidali mouwa dage kenageba te pągąnoboba usu nigi pao,” wali.   
\p
\v 5 Te wego te po odama silibo si, tama aga pelama, te aga abagi dedego mouwa dage kenage sospen dabe sigi pai, tama aga beba selasa pali. Tama aga dali, te aga ogwa dabe dali, te aga be tomoba bula selama, tama aga te be tų paliali. Tama te aga ogwa si augwaligo te mouwa dage kenage selama, te augwa idabolo magi pabo sę yali. Tama te augwa idago te mouwa dage kenage te wel gelebo sę yali.  
\v 6 Te wego te tigidali mouwa dabe kenage te welgo pągąna silali, tama te agai te aga ogwa me delibolo te e tiwai po tama wai, “Te gasa mouwa dage kenage me sela magasao,” wali.  
\p Tama te ogwago te po wai, “Idao, te tigidali mouwa dage kenage welgo pągąna silalio,” wali. Awe, tama te sogo dolo mu, wel te wego te mouwa dage kenageba wel munu ma pedalobeo. Menio. Te wel asobo silalio.  
\v 7 Awe, tama te wego te profet Elisabolo e tiwai po tama wagi pali, “Eno te tigidali mouwa dage kenage sospen welgo pągąna silalio,” wali.  
\p Tama Elisago agabolo e tiwai po tama wali, “Tama nago te wel selama, te we bidibolo dobolama, mone sao. Tama naga bidigo te negeli sali mone naga te welde sali monego wei begelao. Tiali goli, me badu mone te nagade munaluaibao. Tama te monego te nage dali, te naga ogwa si dali bidiyu, tama naga nai abelama tuagameo,” wali.   
\s1 Te Sunem moni hanude bidibo we me deligo Elisa tonaluali  
\p
\v 8 Me sogo deli Elisa te Sunem hanu taunba pai. Te hanude we me deli bidibo, tama agai te mone me, te haniani doado bage me, umabo mu munalubo we da. Tama te wego te Elisa hanalu wali, “Nage asama, eno beba nai tuagasao,” olama, hanalu wai. Tama tibaso, tigidali sogo Elisa te Sunem hanuba te we bidibo madigi peduali, tama agai te we pageba pelama, te agai bede nai tugi peduai.  
\v 9 Me sogo deli te wego aga bidibolo e tiwai po tama wali, “Eno konea palio, te bidi da dali me sogo me sogo asama, nai tuagasobo bidi, aga te dwagi yai bidi mu da, tama aga te Godigo sę ebo profet bidi mu dao,” wali.  
\v 10 “Tama teyu, eno homugo dago bede te aga piagasabo madigi te be habu badu me deli nigilama, dąį palinao,” wali, “te dago e be pedu badu nigilinao. Tama dago te be habude te piabo bet me, te tama ni name me, te tebol sai me, te lam sole me, me te dugabo ni name me, te nai dabe tigidali te dago aga pibo habu badu te nai dabe dago muguo. Tama te bidi aga asobo sogo, awe, te aga te habude bidimainao.” Awe, tialima, augwaligo te bidi piagasabo habu me deli nigibo sę yali.   
\p
\v 11 Me sogo deli Elisa te Sunem hanu buluba ma geasa asama, tama aga te be peduba ugwaba holama, tama aga pibo habu badu te aga bet saide piali, te dwasianu toma tuyu piai.  
\v 12 Tama aga te toma tuyu, tama aga bidiyu, te Gehasibolo te po wai, aga sę bidi, e tiwai dao, “Tama nage aba dulama, te a we sugi pao, te agai eno piabo be habu nigali. Tama aga asao po wao.” Awe, Gehasigo tama tiali. Tama te we ugwaba holama, tama aga te be pibo pesage habu bulu badu dolaluali.  
\v 13 Tama Elisago Gehasibolo te po wai, “Nage pelama, te webolo e tiwai po tama hanalugi pao, ‘Nago homugo da tau siyu, te sę yali, te magi naigo nage homu pemene ilagawe, te nago da tau siyu, te moni sę dene yali magi naigo begelagawe? Nago homugo te Elisa pelama, te king sugi pomainu homu ebawe? Ma, te ami tonalubo tobolu ofisa bidi me deli tama augwali hanalugi pelama, tama augwaligo dwagi yai nai me deli nage momainuwe?’” Awe, tialima Gehasi pelama, te webolo hanalugi pali, tama te wego te po wei ponoyu, e tiwai po tama wali, “Ena te ena hani dali augwali tomode ena bugagia bidibo dao,” te po wali, “tama eno magi nai me deli godolo ebeo,” wali.   
\p
\v 14 Gehasi aselama, Elisabolo te po wagasali, tama Elisago agabolo e tiwai po tama hanalu wali, “Tiali goli, te we aga da dali te dwagi yai kolesaga ebo te magi naigo wei begelaibawe?”  
\p Tama Gehasigo te po wai, “Te we agai wai menio, tama aga bidi monu dabe mu yalio.”   
\p
\v 15 Awe, tama te Elisago te Gehasibolo te po wai, “Te webolo olama, eba asao,” wali. Tama te Gehasi pelama, te webolo wagi pobaso, tama te we aselama, te be tųba dolagasali.  
\v 16 Tama Elisago te webolo e tiwai po tama wali, “Te nosali kibu bede, megi te polua mude, te nago ogwa me deli ame naibao, tama nago naga nogo tuaibao,” wali.  
\p Tiali goli, te wego te po wei e tiwai po tama ponani, “Mu tama o, genuai bidio, nage Godigo po pusubo bidi dao. Nago enabolo ili po ola magio,” wali.   
\p
\v 17 Tiali goli nosali, te we haliga yali. Tama nosali kibu bede, te polua dolo mu, te wego aga wai ogwa ame nani, te Elisago wali po tiwai gilama yali.  
\v 18 Tama te wai dwasianu genuai yali, tama nosali me badu kibu bede te waigo aga aya te gide bilibo sugi pai. Te bodolu te wit togobo sogo da, tama teyu, te aga aya te aga sę ebo bidi dabe dali te gide bidibadi.  
\v 19 Te waigo augwali sę eyu bidibadi, te augwali tonono bilali, polo tama agai aga ayabolo i weyu, e tiwai wali, “E, aya, eno tobolude dene dwai mu ebo. Dene me elalubo.” Tibaso, aga ayago te aga sę bidi me delibolo wali, “E wai aga ida pageba auwasa pao,” wali.  
\v 20 Tama aga te sę ebo bidigo te wai auwasa peyu, aga ida pageba tagaligi pali. Tama te wai aga ida sągą pagede godege pila mudubadi, te giliga dolo dolagasu, te belo waboba usu nigi pai, tama te wai aga isali.  
\v 21 Awe, tama aga idago te wai tola selama, te Elisa pibo be, te augwa be pedude, te habuba tolasa holama, te bet saiba mugiluama, tama aga ida buluba teda solama, tama tų paliali.  
\v 22 Tama aga bidi i olama asobode, tama aga bidibolo e tiwai po tama wali, “Eno homugo nage pelama, te naga sę ebo bidi me delibolo olama, te kibu donki me deli odasa, ena pageba asao,” wali. “Magi baso, eno homugo ena polo pelama, tama te profet bidi sugi paio, tama ena ma polo asaibao,” wali.   
\p
\v 23 Tama aga bidigo te po wai, “Magi baso nago homugo nage megi tama polo paiwe? Nago homugo te Sabat bodolude sabolagasobo tonalubo meniwe, ma te gesi polua genuai bodolude pedalubo tonalubo meni da, agawe?”  
\p Tama wego te po wali, “Tagalao, ena homugo dao. Nage dua bidao,” wego te po wali.  
\v 24 Te sę ebo bidigo te kibu donki tudide te dugabo sai yai te somo gagawai nai muani, tama we te kibu donkide duga yali. Awe, tama te wego te sę ebo bidibolo e tiwai po tama wali, “Dadi si pabo sogo, nago te kibu donki polo pomainu osalao. Tialima, eno homugo donki kibu dua pomainu da, teda eno nagebolo waibao,” tama po wali.  
\v 25 Tama te we te donki kibude dugulama, tama aga dali, te sę ebo bidi dali, te augwali te Karmel bulu duba pali, te profet Elisa sugi pai. \f + \fr 4:25 \ft Te Karmel bulu du digibulu, te 40 kilomita usu te Karmel bulu du te digibulu, te Sunem taun dali pąde meni.\f* Augwali si digibulu asobadi yaide, tama te Elisago augwali si asobo suai. Tama Elisago Gehasibolo te po wai, aga sę ebo bidibolo, e tiwai po tama wali, “Suao, te Sunem hanude bidibo we te asobao,” wali.  
\v 26 “Nage aga pageba udalama, sugi pao, aga dali te aga bidi me aga wai me bugagia bidibowe, ma meniwe?” Awe, Gehasigo te webolo hanalugi pali, tama te wego e tiwai po wei ponani, “Da bugagia bidibao,” wali.   
\p
\v 27 Tiali goli, te we te bulu duba te Elisa bidibo madigi asama, sabalobo sogode, agai te basi gulama, tama te Elisago sągą tuali. Gehasigo te wego tama tibo sulama, tama agai homugo te we dwasianu digibulu ganama pao olama, dega palali. Tiali goli, Elisago Gehasibolo e tiwai po tama wali, “Tegio, sula tagalao,” wali, “eno koneanio, aga genuai sęgę mu ebaso ebao. Tiali goli, Genuai Bidigo agai te sęgę ebo po enabolo wabeo,” wali.   
\p
\v 28 Tama wego e tiwai po wali, “Genuai bidi, e da naga po dao, tama tiali goli Godigo ena te wai mawai dao. Eno nagebolo hanalubeo. Tiali goli, eno nagebolo te po wai, ‘Nago ena ili po ola magio,’ te po eno nagebolo hasia wai dao.”   
\p
\v 29 Elisago te wego wabo po odama silibo si, tama Elisago aga sę ebo bidi Gehasibolo e tiwai po tama ola mani, “Naga gudubo name ugwa dąų olama, guda selama, tama te eno tolasa bilibo dono selama, tama nage te Sunem hanuba polo pao. Tialima, tomode bidi me deli nago me subaso da, teda nago siade da po olama, nago dolalubo sesabi egio. Tialima, bidi me deligo nage dali siade da po obaso da, teda nago agai te po wei ponogio, taga pao. Nage te wego beba dolo mu pelama, tama eno tolasa bilibo dono te wai gesabidide ugwa badu te eno dono muao,” po wali.   
\p
\v 30 Tialima te wai aga idago tama suali ma, Elisa aga dali pabo homu meni baso, tama agai Elisabolo e tiwai po tama wali, “Genuai Bidi te bidada peyu, bidada pabo dao. Te mu po naga dao. Tama te tiwai gilama, eno mu po tama obao, eno nage taga pogobeo.” Tama tialima, Elisa hodama, te we dali te Sunem hanuba pali.   
\p
\v 31 Te Gehasi polasa pelama, tama te Elisago tolasa bilibo dono te wai gesabidi badu mugi pali, tiali goli magi nai me deli pedalobeo, mu menio. Tama tibaso, Gehasi ma begasa pali. Tama agai te augwali tųde sisinani sogo, agai te Elisabolo e tiwai po tama wai, “Eno te nago te po wali gilama yali, tiali goli te wai hodalobeo,” wali.   
\p
\v 32 Awe, tama augwali te beba sabalobode, tama Elisa aga pibo be habu badu tųde doligi pelama, tama subadi yaide, tama te isali wai agai pibo be habu badu te agai betde munalubo suali.  
\v 33 Awe, aga te pibo be habuba tula pelama, tama tų paliali, tama aga gedu halua selama, po Genuai Bidibolo wali.  
\v 34 Tama aga te bet saiba hola solama, tama aga te wai tigi munalubo madigi aga kidu sugunama, aga tobolu te wai tigiba ugwadu daiba basi gulai, tama Elisa agai e tama tiali, agai pedauwali me, te gedu me, te nogo me, tama te waigo nogo me, pedauwali me, te gedu dabe dali ugwa badu sebedi usubo ąǫ elama, ususu si yai. Elisa agai tama tibode te wai tigi posolo dwasianu yali.  
\v 35 Tama tialima, Elisa te bet saide bidali tagalama, te be tomo habude dwasianu tama bilali. Tama aga ma pelama, te wai bau boalu kidu sugunani. Tama tibo si, te waigo asiga weyu, te nogo a olama, me badu nogo si wagi solama sogo asiga wali, tama te waigo gedu me pedali.   
\p
\v 36 Tama Elisago te aga sę ebo bidi Gehasi i olama, tama agabolo e tiwai po tama wali, “Nage pelama, e wai aga ida asao po wagi pao,” wali. Awe, tama Gehasigo te po odama pai, tama te wego te be peduba ugwa holama, tama te Elisa pibo be habuba tula pali, tama Elisago te webolo e tiwai po tama wai, “Tama nago e wai sela pao,” wali.  
\v 37 Awe, tama te wego kidu sugunama, tama aga tobolu te Elisago sągą page pąde te tǫba te wego tobolu tǫba ponani, tama te Elisabolo genuai nogi mawainu te sę yai, tama nosali aga hodaluama, tama aga wai selasa pai.   
\s1 Elisago te nai dwagi yai ma ilali po  
\p
\v 38 Israel bulude te dwai bodolu sogo me deli pedalali. Tama te we bidi dabe augwaligo tuabo nai mu menia sali. Tama te sogo Elisa aga te Gilgal hanuba tama ma geasa pelama, bidigi pai. Me sogo bodolude deli sogo, me badu profet bidi dabe augwali te Elisa pageba asama, agade skul olama, kolesaga sali. Tama augwali dugulama, tama te Elisago po odoyu bidali. Tama Elisago aga sę ebo bidibolo e tiwai po wai, “Genuai mouwa dage kenage sospen selama, tama te profet bage tuabo nai dali, te keba me, te sup ulao,” wali.  
\v 39 Tama profet bidi me deli pelama, te sup dwanai dali ulabo keba gegegi pai. Tialima, te agai te bulu bobi sulama, agai homugo te dwagi yai tubo bobi da, homu yali. Tama tialima, agai te bulu wel bobi umabo mu sali, tama aga name ugwaba togolama muani madigi, te aga name ugwa mu pągąwai. Tama agai te beba sela asama, tama agai te hwą ge selama, te totogolama, tama te keba sup nai dali ulai.  
\v 40 Te dwanai sup yali nai dali, awe, tama augwaligo te pouba muna muna pali, te profet bidi dabe augwa tumainu. Tiali goli, augwaligo te tubode, te augwaligo pedauwalide sup dwanai ha yali, tama augwaligo Elisabolo i e tiwai tama wali, “Nage Godigo profet bidi dao, te sup dwanai ha dwai mu ebo. Dago tugobeo, da isidalio,” wali. Tama tibaso, augwaligo homugo te nai tugobeo homu yai.   
\p
\v 41 Awe, tama Elisago te po wali, “Te wit siago nigali te o gagawai plaua selasa asao,” wai. Augwaligo selasa pelama, tama Elisago agai te mouwa dage kenageba sąyani, tama te aga sę ebo bidibolo e tiwai po tama wali, “Tama te sup dwanai augwaligo pouba ma muao, tama te profet bagego tumainao.” Tama augwaligo tuali, tama te sup dwanai te augwaligo pedauwalide megi ma ha ebe.   
\s1 Elisago te bidi sese a naga 100 bidi nai mawai po  
\p
\v 42 Nosali me sogo deli, bidi me deli te aga Balsalisa bulu tagalama, tama te Elisa pageba asali. Te sogo te sia gagawai wit togobo sogo, tama nedu bali du gide tau ebo sogo. Tama te hasia sogo augwaligo te nai bali du togwali, augwaligo te dwasianu bret skon nigainu. Tama tibo bodolu sogo, te bidi Elisa pageba asali, te bidi agai te me badu te sia gagawai wit selasa asai, tama te augwaligo te togwali sia gagawai nai witgo nigai bret agai te bidi sese deli tama selama, tama aga begba bulama, sela asai. Tama Elisago te aga sę ebo bidibolo e tiwai po tama wali, “Te nai te profet bidi dabe mao,” wali.   
\p
\v 43 Tiali goli, aga sę ebo bidigo e tiwai po tama wali, “Tialima, e nai dwasianu mu dao,” wai. “Magi elama te e dwasianu naigo te bidi sese a naga, 100 bidi mena tama usu yaibawe?”  
\p Awe, tama Elisago agai po wei ponoyu, e tama po wai, “Po menio, te nai augwali mao,” wali. “Magi basowe, Genuai Bidigo e tiwai po tama wai dao, ‘Tigidaligo te nai tuao, tama te nai me badu me munaluaibao,’” wali.  
\v 44 Tama te sę bidigo te agai profet bage augwali te nai mawai, tama augwaligo te nai tuali. Tama augwaligo tulama, tabi mu pągąna pali, tama me badu me munaluali, Genuai Bidigo wali poba usu nigi pali.   
\c 5  
\s1 Namango oiyabe gasi silali po  
\p
\v 1 Te Naman aga te Siria bulude ami polalubo ofisa tobolu bidi da. Siria bulude bidibo kingo te bidi agade godolo mu elama, tama agai moni homu pemene mu yai, magi baso meni, te bidi Naman aga nogo tų yaide te God Genuai Bidi aga digi te Siria ami bidi dabe augwali tau siyu, tama augwaligo te boi bidi dabe aiyaba elaluali. Naman aga te dwagi yai ami bidi mu, tiali goli aga tigide oiyabe gasi yali.   
\p
\v 2 Me sogo deli Siria ami bidi dabe augwaligo te Israel bidi dabe dali boi hwįgi pai, tama augwaligo te Israelgo wegi ogwa we me deli nogo tulama, augwa buluba odasa soali. Tama te wegi te Namango wego sę ebo we nigilama bidai.  
\v 3 Nosali te Israel wegi ogwa wego te Namango webolo e tiwai po tama wai, “Tialima, te naga bidi aga pelama, te Samaria bulude bidibo profet bidi sugi pobaso da, teda te dwagi yai mu yaibao. Magi baso meni, te profet bidi agai nago bidi te gasi ma usu ilaibao,” wali.   
\p
\v 4 Te Namango te po odama, tama aga pelama, te king agabolo wagi pali, te Israel wegi ogwa wego wali po wagi pai.  
\v 5 Awe, kingo agabolo e tiwai po tama ola mani, “Eno pas me deli asęnama, te Israel bidigo king bidiba tolaibao. Te pas eno nagebolo menama, tama nago sela pelama, agabolo magi pagameo,” wali. Tama kingo pas asęnama, te Namanbolo mawai, tama Namango te 300,000 silva mone sobadi, tama me te gol te sęgę bidi sese sela 60 kilogram gol sobadi, me te nogo si dwagi yai au ebo bulubo ugwa sobadi elama, tama aga hodaluama, te Samaria buluba pai.  
\v 6 Tama te Namango te Siria bidi dabego king bidigo te pas selama, tama agai sela pelama, tama te Israel king bidibolo magi pali. Te pasde e tiwai po wali, “Te pasgo te eno ami sę ebo polalubo ofisa bidigo sęgę po nagebolo konelaibao,” wali. “Naman aga te oiyabe gasi yalio, tama eno homugo te nago aga ma usu ilao,” wali.   
\p
\v 7 Israel kingo te Siria king agai te pas sulama, tama agai te aga holobo ugwa pisą yali. Aga te ugwa pisą yali te aga haligade sębę dwai mu ebo page ola mayu, tama tiwai. Tama agai e tiwai po tama wai, “Magi elama, te Siria king bidigo te po enabolo tolali, eno menagi elama, e bidi oiyabe gasi dodolomainu waliwe? Agai homugo ena God da weyu, tama te bidi dabe bugagia bidibo me, ma te bidi isibo me, te bomo agai homugo eno elalubawe weyu, waliwe, a? Eno koneanio, agai homugo ena dali boi hwįainu tų gegeyu walio, te tama dao,” wali.   
\p
\v 8 Tiali goli Elisa, te Godigo sę ebo profet bidi, agai te kingo te holobo ugwa pisąlama, te haligade sębę ebo po odali. Tama tibaso, Elisago te kingbolo e tiwai po ola tolali, “Magi baso nage haliga sęgę elama, tama naga holobo ugwa pisą yaliwe? Te bidi ena pageba eba tagala palao, tama eno aga e tama ola mawaibao, te Godigo profet bidi me deli te Israelgo bulude bidibao,” wali.  
\v 9 Awe, kingo Namanbolo te po wai, tama Naman aga te kibu hosgo kegebo karis nai Naman aga tede dugulasa pali. Te me badu karis me te bidi aubo hos kibu me aga dali augwali hodobo pali. Tama augwali hodobo tama pelama, te Elisago be tųba sabaligi pali.  
\v 10 Tama Elisago bidi me deli tagala palama, te bidigo Namanbolo e tiwai po tama walali, “Nage te wę Jordan teba pelama, te nogo a olama, me badu nogo si wagi solama sogo, nage tama sogo wę pauao. Tama teyu, nago gasi silaibao, tama naga tigi wiegi yai tigiwali yaibao,” wali.   
\p
\v 11 Namango te po odama, tama agai wado dwai mu yali, tama te Elisago be tagalama pali. Tama agai te po wali, “Eno homugo Elisa aga buluba tią asama, agai ena sumainu homu yaio. Tama agai Godibolo mu gedu haluasa po omainu eyu, aga Genuai Bidi dolo, tama agai nogo ena e gasi oiyabe keni yai tigiba pąba mugi sogo da usu, tama agai te kolesaga egi sogo da, teda ena ma usu egi dao. Tiali goli, menio.  
\v 12 Agai enabolo Jordan wę paugi pao, te po wali. Tiali goli, Damaskus bulude wę si elalubo, te wę si nogi Abana me Farpar, te wę sigo Israel bulude elalubo tigidali wę dabe aiyaba elaluai dao. Tiali te wę dabede tegi sogo da, teda eno oiyabe gasi ma usu egi dao. Tialima, ena bulude bidigi sogo da, tama ena te wę si paubo si, teda eno oiyabe gasi ma usu egi dao.” Namango te po wali, tama agai haligade sębę genuai me elasa peyu, aga pali.   
\p
\v 13 Awe, aga sę ebo bidi dabe augwaligo tama augwali aga pageba aselama, te po wai, “Genuai bidi, tialima profet bidi agai nagebolo tigi dene yabo sę po nagebolo wagi sogo da, dago koneanio, tama nago te sę egi da. Tialima, agai te tiwai po me wabeo. Menio. Tialima, agai nagebolo wę deli pauao po walio,” wali. “Tama tialima, dwagi yai dao, tialima nago agai po wali pelama, nage wę pauagameo,” wali.  
\v 14 Awe, tama Namango augwaligo te wali po odama, tama aga pelama, wę nogo a olama, me badu nogo si wagi solama sogo Jordan węde pauali, Elisago te po wali gilama, tama tibo si agai te oiyabe gasi tigidali sia sali. Tama agai tigiwali te dwagi yai elama, te gesi wai bǫų tigiwali tiwai pedelali. \x * \xo 5:14 \xt Luk 4:27\x*  
\v 15 Tama aga dali, te aga sę ebo bidi dabe dali, augwali hodobo ma geasa peyu, te Elisa pageba sabolali. Te profet te Godigo profet bidi mu. Tama te Namango Elisabolo e tiwai po tama wali, “Mu tamao, megi eno koneanio, e tigidali bulu tǫde god me deli me bidibeo. Israel dagego God, te God deligo tigidali bulu usu elalubao. Tama tialima, Elisa, eno genuai bidi, eno homugo eno nagebolo eno puba hwi wabo nai nagebolo mawaio,” wali.   
\p
\v 16 Tialima, Elisago te po wei ponoyu, te po wali, “Menio. Ena te tigidali sogo bidada pabo Genuai Bidi Godigo sę ebo bidi dao. Tama agai nogide, eno mu po obao, eno nago magi nai me deli munu me deli sogobeo,” wali. Naman agai bomo mu eyu, “Elisa nago eno nagebolo puba hwi wabo nai nago sao,” wali. Tiali goli, Elisa agai hagela ebo, tama agai sogobeo.   
\p
\v 17 Namango te po wai, “Tialima, nago homugo te puba hwi nai enade sogobe wida, awe, teda tagalao. Tialima, eno homugo nago ena sula tagalao, eno te Israel bagego tǫ me eno saio, dwasianu te eno donki kibu sigo tolabo usu nuo, tama ena buluba ma peyu, selasa paio. Te tǫ aiyadu munama, Genuai Bidi dolo denami yai ofa nai ulabo madigi sai yainu, alta ugwa badu te Genuai Bidi dolo denami yai ofa nai ula mabo sę yaio. Tama nosali eno te ofa nai siaba ulama, te siago tigidali ulama, te siago tigidali nai dela pabo ofa nai me, tama te gasa ofa nai me, te genuai mu deliba tama sisinama, ulaio. Tama eno te gasa tibo godiba ofa nai ula magobeo, eno munu ma usu egobeo. Mu menio.  
\v 18 Tiali goli, eno homugo nago eno sęgę koneao, tama Genuai Bidi agai eno te dwai kolesaga yali sęgę sela sąmainao. Te eno king bidi agai te tibo god Rimon godiba lotu po wagi pabo dao. Tama ena aga dali bidibo. Tama da te lotu be tomoba pabo sogo, kingo ena nogo tolasa pabo da. Tama teyu, te agai te tibo god Rimon lotu po weyu, kidu sugunubo dao. Agai ena kegasa pabo dao, tama eno me te eno te tibo god noma elalubo madigi te pąba pelama, eno kidu sugunubo dao. Tama eno homugo te Genuai Bidi God agai eno te sęgę sela sąmaio,” wali.   
\p
\v 19 Tama Elisago te po wai, “Nago haliga sęgę egio,” wali. “Nago haliga tegaluama, tama nage pao,” wali.  
\p Awe, tama te Namango Elisa taga pali. Tialima, Naman digibulu pisąbadi,  
\v 20 tama Gehasi, Elisago sę bidi, aga digi e tiwai po aga homude tama wali, ‘Eno genuai bidigo te Naman olo pabo sula tagalali. Magi baso agai Namango te Naman aga homugo te aga dolo mawainu yali nai sabewe? Genuai Bidi God aga te tigidali sogo bidada pabo dao. Te mu po dao. Tama te tiwai gilama, eno mu po tama obao, tama ena Naman aga pali wali ma udada pelama, tama me badu agai te nai eno saio,’ Gehasigo te homu yai.   
\p
\v 21 Tama aga hodaluama, te Naman pali wali pai. Namango tonobadi yaide, bidi me deli udada asu, te aga wali asobo suali, tama tibaso aga te karis kibu dąų walama, tama aga tǫba dulama, tama te tų tilide dolaluali, tama Gehasi asama, tama aga sisinagasali. Tama Namango Gehasibolo e tama tiwai po hanalu wali, “Magi nai me deli dagede pedalaliwe, a?”   
\p
\v 22 Tama Gehasigo te po wai, “Menio. Da bugagia bidibao. Tiali goli, eno genuai bidigo ena tagala palama, e tiwai po nagebolo tama wagi soao obaso, ena asobao,” wai. “Megi tama bolo te profet gesi bidi si agai beba asalio. Te profet bidi si augwali si te bulu du Efraimde bidibo profet hani dao. Tama agai homugo te nago aga silva mone beg me deli badi, me te dwagi yai bulubo ugwa si ebadi elama, mao wali. Tama Elisa agai te profet bidi dabe augwaliba mawaibao,” wali.   
\p
\v 23 Te po obaso Namango te po wei ponoyu, e tama po wali, “Deli silva beg naga sigio, me silva beg me sao,” wali. Tama agai te Gehasigo sao olama, bomo yali, tama Gehasi agai te po usu dao wali. Tama tialima, Namango te beg side silva muani silva te 60,000 kina mone usu te beg side bulali. Tama me te agai te dwagi yai holobo ugwa si me sela mani, tama agai te nai dabe selama, tama aga te sę ebo bidi sibolo mani, tama agai augwali sibolo te dodobage tolao po wali, tama dage si polasa pao wali, Gehasi aga Elisago beba polasa pali.   
\p
\v 24 Augwaligo te Samaria bulude te Elisago beba sabalobo sogo, Gehasigo te nai dabe tolama, te be tomoba selasa pali. Tama aga te sę ebo bidi si te Naman pageba tagala palali.  
\v 25 Te bidi si paide, tama aga te beba ma pai. Tama Elisago agabolo hanalu wali, “Gehasi, nage mena pai, tama nage asobawe?”  
\p Tama Gehasigo te po wali, “Genuai bidi, ena gasaba me pabeo.”   
\p
\v 26 Tiali goli, Elisago te po agabolo wali, “Menio, nago tibo po wabuo. Nago homugo da, eno nage subewe weyu obawe, a? Eno mobo nage dali bidibadi, tama eno sulali da, te bidi te kibu karisde duga yali tagaluyu, nage pageba asobo sualio,” wali. “Gehasi, megi da, te mone selama, te holobo ugwa me, me te oliv gi me, tama me te wain gi me, tama me te sipsip kibu me, tama me te bulmakau dabe me, tama me te sę bidi dabe me, me te olo sę we dabe me, te abelabo sogo megi menio.  
\v 27 Tiali goli, nago te Naman dali te mone me te haniani dodobage salio,” wali. “Tama tialima, te Namango tigide elaluali oiyabe gasi, megi te nage tigide pedalaibao. Tama nage dali, te naga hani te nosali pedalobo hanide, dage te oiyabe gasi tigidali sogo sesa peduagameo,” wali.  
\p Tama te Gehasigo te Elisa taga pabo sogo, te Gehasi te oiyabe gasi sali. Tama agai tigi usugali tigidali te tedela yai mugo sela pali.   
\c 6  
\s1 Elisago te profet bidi me deli tau selama, te sigi hwą ge ma sai  
\p
\v 1 Elisago te me badu profet hani dali bidiyu, tama augwali tonaluali. Tama me sogo deli te profet bidi dabe augwaligo agabolo e tiwai po tama wali, “Dago te be dwasianu mu dao, tama da usu egobeo.  
\v 2 Nago da tigidali te Jordan węba tama ni togogi pabo usu yaibawe? Tama dago gesi be me sę yaio, dago te be Jordan wę sesegede sę yaibao,” wali.  
\p Tama Elisago te po wai, “Usu dao, dagego be sę yao.”   
\p
\v 3 Tama profet bidi me deligo agabolo e tama hanalu wali, “Mu tamao, genuai bidi, dago homugo nage da dali asao.”  
\p Tama Elisa agai te po wali, “Usu dao, ena dage dali asaibao,” wali.   
\p
\v 4 Awe, tama aga augwali dali pali. Augwali te Jordan węba sabolama, tama te augwaligo te ni gelebo gagalali.  
\v 5 Tama augwali te sę eyu bidali, tama profet bidi me deligo agai sigi hwą ge osaga peyu, te Jordan węba tula pali. Tama te profet bidi agai aga te sigi hwą agai sabo usu ebe, tama agai e tiwai i Elisabolo tama wali, “Genuai bidio, homu dene mu dao, ena gasa bidigo hwą osogo sesalio, tama megi te hwą węba tula palio,” wali.   
\p
\v 6 Tama Elisa, te Godigo profetgo, e tiwai po tama hanalu wali, “Te hwą menade tula paliwe?” Tama profetgo te Elisabolo te hwą tula pali pesage ola mani. Awe, tama Elisago ni nologo dwasianu toga selama, tama te węba sąyani, tama te hwą wędu aiyadu edaba pedalu gulama, ąį daide pilali.  
\v 7 Tama Elisago te po wali, “Megi da, nago te hwą sao,” wali. Tama te profetgo aga dulama, aga nogogo te hwą sali.   
\s1 Elisago te Siria hani ili po ola mawai  
\p
\v 8 Te Siria king bidigo aga ami bidi dali aselama, te Israel bidi dabe augwali dali boi hwįagasainu yai. Tama kingo te aga sę ebo gavman ofisa bidi dabe dali po miai, tama te ofisa bage augwalibolo te kem nigilama, bidabo pesage nigigi pomainu augwalibolo po ola mani.  
\v 9 Tialima, Elisa, te Godigo profet bidigo, agai te Siria bidi dabego kem nigilama bidabo pesage te agai koneai, tama agai te Israel king bidibolo po konelani, tama me te Israel kingbolo te po dali tama wali, “Dage te Siria bage augwali bidibo pesage pąba pigio,” wali. “Tama dage Siria bage augwali bidibo madigi pąba peyu da, teda augwaligo dage dolaibao,” wali.  
\v 10 Tama te Israel king bidigo te po odama, tama te agai te soldia ami bidi meba tagala palama, te ami bidi dabego te Siria bagego kem nigilama bidabo pesage sugi pomainu tagala pali. Tama te Siria bage teba te buluba pedalobo sogo, augwaligo suali, ma te Israelgo ami bidi te pesagede bidibo suai. Tama tibaso, augwaligo kem nigilama bidabo pesage nigibo usu meni. Te tobage kolesaga hauwa sogo mu pedalali.   
\p
\v 11 Tama Siria king bidigo te tobage sę pedalubaso, agai homu kolesaga hauwa sogo mu eyu, moni homu elama bidali. Tama tibaso, agai aga sę ebo gavman ofisa bidi dabe augwali agai i olama, tama augwali asobo si, e tiwai po tama hanalu wali, “Enabolo wao,” wali, “da hani niwai bidi me deligo te Israel hani king bidi tigidali sogo tau siduai dawe?” wali.   
\p
\v 12 Tama aga sę ebo gavman ofisa bidi me deligo te po wei ponoyu, e tama wali, “King, da hani bidi me deligo te Israel king bidi tau me sai menio, mu menio. Tialima, Elisa deli digi dao, te Israel bage augwaligo profet bidi. Te profet bidi agai te tigidali nai dabe, dago homugo yaibao wabo sę dabe me, agai koneama, te aga Israel king bidibolo ola mabo dao. Elisago nago te tigidali po wabo te agai konea palio, naga te pibo be habude bidiyu wabo po me, me nage te geme wabo po me, te Elisago konea palio,” wali.   
\p
\v 13 Tama kingo te aga sę ebo gavman ofisa bidi augwalibolo e tiwai po tama wali, “Dage pelama, te Elisa mena badu pedai badu bidibo wenama, kegegi pao,” wali. “Tama dagego te ami soldia bidi dabe selama, tama dagego te nogo tulama, kegasa asiąo,” wali. Augwaligo tama kegegi pelama, tama Elisa aga te Dotan hanude bidibo sualio.  
\v 14 Tama tibaso, kingo te umabo ami soldia bidi dąį ilama, tama agai te bidi duabo hos kibu me, me te karis kibu dali, tama augwali te Dotan hanuba tagala palali. Tama augwali hulide sabolama, tama te augwaligo te taun bobegela sali.   
\p
\v 15 Tama kigamu hulide mu Elisago sę ebo bidi hodaluama, tama aga buluba teda soali, tama agai subadi yaide, te Siria ami bidi dali, te hos kibu me, me te karis kibu me, tama augwali augwa te nai dabe dali asama, te taun bobegela saiali. Tama aga pelama, tama te Elisabolo e tama po walali, “Genuai bidio, te Siria bidi dabe augwali asama, da nǫ bagua sai yabuo,” wali. “Megi tama dago magi yagawe?” te po hanalu wali.   
\p
\v 16 Tialima, Elisago agabolo te po wali, “Wi egio, tagalao,” wali. “Tialima, mu tama, augwaligo umabo ami bidi bidibo, tiali goli dago me, te da tau sabo hani te genuai mu dao,” wali.  
\v 17 Awe, tama Elisago agai e tama God dolo gedu haluasa po wai, “Genuai Bidi, nago te bidi gedu pedelao, tama agai te eno te po wali bidi hani agai sumainao.” Tama tialima, te Elisago sę ebo bidi te agai gedu te Genuai Bidigo pedelama, tama te sę bidi agai suali, ma te gasa hos kibu me, te karis kibu me, te augwali asama, te Elisa bidibo bulu duba usu na sai yali. Te hos kibu me, me te karis kibu me, te bidi dabe me, augwali te isi bogoli ula gagawai mu tiwai pedelai.   
\p
\v 18 Awe, tama te Siria bidi dabe augwali asama, te Elisa pageabi yai hagede yai. Tama Elisago e tama God dolo gedu haluasa po wali, ““Genuai Bidio, eno homugo nago te Siria hani augwaligo gedu te hulia palama, tama augwaligo bugagia tonalubo usu me igio,” wali. Tama tialima, Genuai Bidigo tama augwaligo gedu hwidilali.   
\p
\v 19 Tama Elisa aga pelama, te Siria bage augwali bidiboba pelama, tama augwalibolo e tama po wali, “Tialima, dage kekede asalio,” wali. “E tų da, tea dage te hanuba pabo dage usu egobeo, te duga homugo soainu yali taunba sabalogobeo. Usu dao. Dage ena wali asiąo, tama eno dage odasa pelama, tama dagego te kegebo sę ebo bidi bidibo madigi sabolagameo,” wali. Awe, tama augwali aga wali pali, tama agai augwali odasa pelama, te Samaria taunba tagaligi pali.   
\p
\v 20 Tama augwali te taun tomoba pela silali, awe, Elisago e tama gedu haluasa po wali, “Genuai Bidi, nago te Siria bage augwali gedu ma pedelama, ma usu ilao,” wali, “tama augwaligo gedugo bugagia usu nama tonomainao.” Tama Genuai Bidigo augwaligo gedu ma usu ilali. Tama augwaligo e tama suali, ma te augwali te Samaria taun tomode bidibo suali.   
\p
\v 21 Te Israel king bidigo sualima, te Siria bidi dabe te taun tomode bidibo sulama, tama agai te Elisabolo e tama hanalu wali, “Genuai bidi, tialima eno augwali elama, isilagawe, a?”   
\p
\v 22 Tiali goli, Elisago te po wali, “Menio. Elegio,” wali. “Tama nago te hwįbo sogo te boi bidi dabe tuao wali, nago augwali me elama, isilibo menio. Tama teyu, nago te hani augwali nago eligio. Menio. Tama dago augwali nai bugagia mao, tama augwali augwa king pageba nosali sabalu,” wali.  
\v 23 Tama tibaso, te Israel king bidigo moni nai mu dodolama, tama te Siria bage augwali mani. Augwaligo te nai dabe me, te ąį dabe me, tula silama, tama agai augwali augwa te Siria king bidi pageba tagala palali. Tama te sogo te Siria bage augwaligo te Israel bage augwali dali munu ma hwįagasobe.   
\s1 Siria bage augwaligo te Samaria taun bobegela sali  
\p
\v 24 Me badu kibu be sia sali, tama te Benhadat, Siriago king bidi, agai te tigidali soldia ami bidi sisinama, tama augwali pelama, tama te Samaria taun bobegela sali, tama augwaligo te Samaria hani bidi dabe dali hwįainu tama tiai.  
\v 25 Tama te sogo te Samaria bage augwali nai menia sai, te nasi ebo bodolude da, tialima te Siria bage augwaligo bobobage sogo mu te taun bobegela selama bidali. Tama Samaria bage augwaligo te nai me te taun tomoba magasobe. Tama tialima, bidi me deli aga homugo te donki kibu tobolu abela tuainu da, teda mone bidi sese sigo abelao wali, 80 kina. Tama tialima, bidi me deli aga 250 gram sęgę ba di tiwai tubo nai ge abelainogo da, teda agai te ni yabe si podolai, te 5 kina, te monego abelemainao.   
\p
\v 26 Me sogo deli te Israel king bidi aga te taun moni masigigo nigai obo banis te ugwadu te daide pai, tama we me deligo aga i weyu, e tama wali, “Eno king, nago ena tau sao,” wali.   
\p
\v 27 Tama kingo e tama po wei ponani, “Tialima, Genuai Bidi Godigo nage tau sabo usu esiąbasowe, tialima eno mena tama nage tau saibawe? Nago homugo eno te sia gagawai nai wit me, me te wain wę, te nai si eno bede me munalubaso, nage tau somainu obawe, a?”  
\v 28 Awe, tama kingo aga hanalu wali, “Nago homugo eno mena tama nage tau somainu obawe?”  
\p Tama te wego te po wei ponoyu, e tama wali, “Ena dali, te e wego aga dali, dadi sigo e tama po olama dąų wai, tama dadi sigo te po wai, hasia eno ogwa bolo elama tuaibao wai, tama nosali dadi sigo te agai wai elama, tuaibao wai.  
\v 29 Tama tialima, dadi sigo te eno wai elama, tama dadi sigo te wai nogelama, tuai dao,” wali. “Tama nosali eno te po wai, ‘Megi da, nago wai te dadi sigo elama, tuinao,’ wali. Tiali goli, agai wai elebeo. Menio. Tama agai aga wai dualigi pali,” te wego te po wali. \x * \xo 6:29 \xt Bom 28:57\x*   
\p
\v 30 Kingo te po odali, tama aga holobo ugwa pisą yali, magi baso, te agai haligade sęgę mu yai. Tama aga te taun obo banis ugwa badu daide dolalua pai, tama me te tigidali we bidi augwaligo te agai homu dene eyu holobo ugwa holama, bilibo tigidali we bidi augwaligo usu nama suali, king agai holobo ugwa dologode kęai elalubo suai.  
\v 31 Tama kingo te po wai, “Elisa aga te dago e sęgę yabo te agai page dao. Megi tama e bubugade eno te agai mage togoluyu, aga tobolu sąwaibao, tama megi aga isaibao,” wali, “tialima, eno homugo te eno tama tisąyu da, teda Godigo agai ena elama, isilimainao.”  
\v 32 Kingo te po tama olama, tama agai te Elisa eligi pao olama, tama agai bidi me deli tagala palali.  
\p Te sogo Elisa aga dali, te Samaria tobolu bidi dabe dali, tama te aga bede te aga dali bidai. Te bidi te kingo tagala palai bidi, te bidi aga sabalisiąbadi, te Elisago e tama po te tobolu bidi dabebolo e tama po ola mawai, “Dago king bidi, aga bidi ela mubo bidi dao. Tama megi agai te bidi me deli ena dogoni togomainu tagala palali dao. Tialima, te sogo te bidi asama sabalobaso da, tama dagego te be tų dąų olama, paiąo,” wali, “tama aga e be tomoba asobo usu egobeo. Tama te nosali te king aga me te bidi wali tama asobao,” wali.   
\p
\v 33 Elisago po odubadi yaide, tama te kingo tagala palali bidi sabolagasobadi yaide, te king bidi tama asama, sabolagasali. Tama kingo \f + \fr 6:33 \ft Te Hibru pogo te “king” po meni, tiali goli te dago homugo te po te kingo te Elisabolo wali te po dao.\f* Elisabolo e tiwai po tama wai, “Genuai Bidi aga digi te bodolu sogo dwai mu da tigide pedalai dao,” wali. “Tama dago agai da nai me deli tau somaio olama, tama magi baso dago aga me tonaluaibawe?” wali.   
\c 7  
\nb
\v 1 Tama te moni nasi ebo sogode Elisago te po wei ponoyu, e tama wali, “Mu tama dao, odao. Genuai Bidigo te po wai, ‘Do tama tibo sogo bodolude, te we bidi dabe augwali te taun sunumi pąde elalubo maket teba peyu, tama augwaligo te 3 kilogram te witgo nigai dwagi yai plaua abeligi paibao, me te 6 kilogram rais bali, te podolai monego abeligi paibao’ tama wali.” Elisago te po wali.   
\p
\v 2 Tama te king tonaluyu tau sabo gavman ofisa bidi me deli aga te king dali asali. Te bidigo te Elisago wali po odali, awe, tama agai te po wei e tama ponani, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego dago nai abelebo me usu egi menigi da,” wali.  
\p Tama Elisago te gavman ofisa bidibolo te po wai, “Mu tama dao, tama nago te nai pedalobo suagameo, tiali goli nago te wit nai dabe munu me tugobeo,” Elisago te po wai.   
\s1 Siria ami bidi dabe augwali wi pai po  
\p
\v 3 Te sogo te bidi me si me si tama bidi tigide te oiyabe gasi yai bidi, te bage te Samaria taun tomoba pabo moni tų te bulu badu te me si me si tama bidi augwali tede bidai. Tama augwa naga po miyu, e tama po wali, “Magi baso da ede naga olo bidiyu, tama te isibo bodolu naga tonalubo wagawe?” te po wali.  
\v 4 “Da pelama, te tuabo nai kegegi pinao,” wali. “Tiali goli, da te Samaria taun tomoba pogobeo. Augwali te tuabo nai meni, tama teyu nasigo da me isaibao, tama me ma te tiali, tama da e pesagede naga bidalu da, teda da me isaibao. Tialima, da te Siria bage bidibo pesageba pinao. Tama tialima, augwaligo da me elebaso da, te usu dao. Tialima, augwaligo da sula tagalama, da bida obaso da, teda usu dao,” augwaligo augwa hasi te po wai.   
\p
\v 5 Tama tialima, te pio mu augwali hodaluama, te Siria bidi hani bidibo pesageba pali. Tama te Siria bage bidibo pesage pąba sabalobo sogo, augwaligo suali, ma te pesagede bidi me deli bidibo sube.  
\v 6-7 Magi baso, tigidali te Siria bage wi pela silai suali. Te pio mu, te Genuai Bidi aga digi te Siria bage augwali wi pomainu genuai po mu kulukulu u wai, te Siria bage augwaligo odama, tama tialima, te genuai hani ami bidi dabe te bidi duabo kibu hos me, me te karis kibu dabe dali, augwali hodobo asai tiwai ąǫ yali. Tama te Siria bage augwaligo te po tama wai, “Tialima, te Israel bage augwaligo te Hit king bidi badi, te Isip king dabe dali, augwaligo abelama, tama te ami bidi dabe augwaligo da dali hwįagasainu wabao,” wali. Siria bagego te po olama, tama te augwali bidali pesage polo tagalama, tama augwali polo tama mu hodaluama, isidali weyu wi pai. Augwaligo te sel ugwa be me, te hos kibu me, me te donki kibu me, augwa naga tede bidibadi taga pai. Tama augwali wi pai, tama augwali peyu, magi nai me deli sela pabe.   
\p
\v 8 Tama te sogo te me si me si tama bidi augwali te Siria bidi dabe bidali pesageba sabaligi pali, augwaligo pelama, te sel ugwa be me deli tomoba pali, tama augwaligo te be tomoba subadi yaide, te Siria bagego tubo nai me, te wain ąį me, te be tomode munalubo suali. Tama augwaligo te nai selama tuyu, te ąį me selama tuyu bidali. Tama nosali augwaligo te silva me, gol me, ma name ugwa me, te Siria bagego doado bage hauwa mu augwaligo selama, tama te tolasa pelama, te gasa madigi me deli dualigi pai. Tama augwali ma aselama, tama augwaligo te me sel ugwa bede muani doado bage dabe me ma sali. Tama augwa ma tolasa pelama, gasa madigi me dualigi pali.  
\v 9 Tama nosali augwa digi augwa tomode po miyu, te e tiwai po tama wali, “Tialima, dago dwagi yai kolesaga ebeo. Megi dago dwagi yai nai mu sualio. Tama da pelama, te tigidali we bidibolo wagi pinao,” wali. “Tialima, dago te pedauwali dąų ola selama bidiyu, tama te be posoboba usu nigi peyu da, teda dago sęgę mu elaluaibao. Polo tama, da megi pelama, tama te kingo sę ebo gavman tobolu ofisa bidi dabe augwalibolo wagi pinao,” wali.   
\p
\v 10 Augwali te hulide tama augwali te Samaria buluba ma geasa pai. Tama te taun tų tonalubo bidi dabe augwali i wagi peyu, e tama wai, “Da te Siria bage bidali pesageba pai dao. Tama dago suali, ma bidi me deli bidibo subeo,” wali, “tama te bidi dabego po wabo dago odobeo,” wai. “Te Siria bage augwali pela silai, tama te augwaligo tigidali doado bage te augwa bidali pesagede taga pela silai yalio,” wali. “Tama te doado bage munalubao. Augwaligo te hos kibu, me te donki kibu, me te gebelali haliga augwaligo te peda palebe yalio,” wali. “Menio. Te kibu dabe te haliga kebealu bidibo, te Siria bage bidali pesagede bidibo sualio. Tama te tubo nai me, te tigidali doado bage me, te sel ugwa bede me munalubo,” tama po wali.   
\p
\v 11 Te taun obo sunumi tonalubo bidi dabe augwaligo te po odali, tama augwaligo i weyu, tama te we bidibolo po olama, tama te po te kingo beba pusugi pao wali.   
\p
\v 12 Huli tomode mu kingo te po odali. Tama aga hodaluama, te aga sę ebo gavman ofisa bidi dabe augwalibolo e tiwai po tama ola mani, “Eno koneanio, te Siria bagego homu kolesaga. Augwaligo koneani, ma dago tuabo nai mu menia sobaso yalio. Tama tibaso, augwaligo te bidali pesage taga pelama, tama augwali te kala dasuba duala sali bogo. Augwaligo te homu yai, tama dago te taun tagalama, buluba pali bogo homu eyu, tama augwaligo homugo da pageabi elama, tama dago te taun augwaligo sainu ebao,” kingo te po wali.   
\p
\v 13 Tama te gavman ofisa bidi me deligo agabolo te po wai, “Tama dago bidi me badu tagala palama, tama augwali pelama, te Siria bage wi pali page te magi nai me pedalubaso wi pai yabo wenama, sugi pomainao,” wali. “Tama tialima, te Siria bage augwaligo te dago e tagala palobo bidi dabe me ela muai baso da, teda usu dao, magi basowe, da tigidali te taun tomode te bidibao, da dolabo me hasia te tolali bidi hani isilali gilama da me tama isilaibao. Tama tialima, dago te me badu bidi dabe augwaligo te e bidibo a naga hos kibu selama, tama augwali pomainao,” wali.   
\p
\v 14 Awe, tama tialima, augwaligo te bidi me badu dąį ilali. Tama te kingo te karis kibu si badi, me te hos kibu badi elama, te bidi dabebolo mani. Tama te bidi dabe tagala palama, tama augwali pali, te magi naigo te Siria bage bidibo pesage gudulali wenama, sugi pai.  
\v 15 Te bidi dabe augwali pelama, kegegi pali bage e tiwai tama suali, te Siria bidi dabe augwa digi wi pai suali. Tama augwali te Siria bidi dabe pali wali pelama, te wę Jordanba sabaligi pali, tama augwaligo te Siria bagego doado bage te name ugwa me, me te hwįbo nai me, me te gasa nai dabe me tama, te Siria bage augwali wi peyu, te doado bage dabe te tų sisiyu tulalua pai suali. Tama tialima, augwali ma geasa pelama, te king bidibolo pusugi pali.   
\p
\v 16 Tama te sogo te we bidi dabego te nai dabe suali po odobo si, augwali polo udulama peyu, te Siria bage bidali pesageba sabolama, tama augwaligo te Siria bagego taga pali nai dabe tigidali sai. Tama augwaligo te o gagawai nai te plaua umabo mu sali, tama me te nai bali me umabo mu sali. Tama tibaso, augwaligo 3 kilogram te sęgę te dwagi yai o gagawai nai plaua, o 6 kilogram sęgę te bret bali, te nai si te maket munama, te mone podolai sabo usu naga muani, te Genuai Bidi Godigo tama tiaibao wali podu wali peyu, tama tiai.  
\v 17 Kingo te aga sę ebo gavman ofisa bidi, te bidi aga te hulide sę ebo konea pai bidi mu, king agai te bidi dąį ilali, te bidi aga pelama, te ami bidi dabego tonalubo madigi te taun moni tųba tonalugi pao wali. Tama te gavman ofisa bidi te taun tų pąde dolalubadi yaide, tama te we bidi dabe augwali te Siria bidi dabe bidali madi soainu soyu, tama te we bidigo udulama soali. Tama te umabo we bidi mu te tų bulu badu udulama asali, tama tialima, te we bidi dabe augwaligo te bidi agabolo hanalubadi yaide, tama aga degasa pai munalubadi yaide, tama te we bidi dabego agaga pedubadi kęnama, te bidi isiboba usu nigi pali. Polobadu te kingo Elisa sugi pali sogo, tama Elisago te agai homugo te nosali yabo sęgę po te agai koneama pusali po, te wali poba usu nigi soyu, te bidi isibo yabao wali. Megi te po te nai walali gilama, te poba mu usu nani dao wali.  
\v 18 Elisago te kingbolo e tiwai po tama polobadu ola mani, “Do e tama tibo bodolu tiwaide, te tigidali we bidi augwali te Samaria taunba pabo tųba naga paibao,” wali, “tama augwaligo te 3 kilogram sęgę yai te dwagi yai o gagawai nai plaua me, me te nogo a olama, te me badu nogo kibisa wagi solama sęgę yai 6 kilogram rais bali te podolai mone usu te augwaligo abelaibao,” Elisago te po polobadu gana wai dao.  
\v 19 Tialima, te gavman sę ebo ofisa bidi megi da mu isali. Agai Elisago po wei ponoyu, e tama po wali, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego nai abelebo usu egi menigi da,” te po wai dao. Awe, tama te Elisago te gavman ofisa bidibolo e tama po wai, “Mu tamao, naga gedugo digi suagameo, te nai te pedalobao, tialima nago da te wit nai nago munu me usu elama te nai tugobeo,” wali.  
\v 20 Tama megi te sęgę te Elisago wali po tiwai gilama te pedalobao wali. Te gavman sę ebo ofisa bidi te taun tomoba pabo tųde dolaluali bidi, tama te we bidi augwali te nai polo sainu te buluba udulama soyu, tama augwaligo te bidi degasa pai munalubadi, tama te we bidigo ugwadu agaga sodu geai madigi, tama te ofisa bidi aga mu isali.   
\c 8  
\s1 Te taun Sunemde bidibo we me deli aga te Israel haniba ma begasa asali po  
\p
\v 1 Polobadu me sogo deli te Elisa pelama, te taun Sunemde bidibo te webolo po ola magi pai dao. Te we te polobadu aga ogwa wai isali we tama, tama Elisago agai te wai ma hodolai. Tama megi Elisa agai te webolo e tama po wali, “Genuai Bidigo te po wai, nosali dago e bulude moni nasi mu pedelaibao, tama te we bidi dabe augwali te nai menibadi, te kibu be nogo a olama, me badu nogo si, te 7 kibu beba usu nigi paibao, wali. Tama tialima, naga wai dabe me, me te naga deli hani me, tama augwali selama, tama nage gasa bulu meba bidigi pelama, tama te nasi ebo kibu be te dwai bodolu siliboba usu nigi pao,” wali. \x * \xo 8:1 \xt 2 Kin 4:8-37\x*  
\v 2 Tama tialima, te wego te Elisago wali podu wali pai, tama te wego te aga hani dali tama augwali pelama, te Filistia buluba bidigi pali, te kibu be nogo a olama, me badu nogo si, 7 kibu be silali.   
\p
\v 3 Te nogo a olama, meba nogo si wagi soabo kibu be silibo si, te we aga hani dali te Israel buluba ma begasa asali. Tama aga pelama, te kingbolo hanalugi pali, magi baso meni, te aga be me te tǫ me ma sa wabo wenama odainu hanalugi pai.  
\v 4 Te we te king pageba pabo sogo, kingo te Gehasi dali po miai, te Elisago sę ebo bidi. Kingo te Gehasibolo e tiwai po tama wai, “Eno homugo nago te Elisago te moni sę yali po ena dali po pusao,” wali.  
\v 5 Tama tialima, Gehasigo te Elisago sę yali po gagalama pusali, polobadu mu te sogo te Elisago te wai bǫų me deli isai te agai ma hodolali. Gehasigo te Elisago te sę yali po pusudubadi yaide, tama te we asama, sabolagasali, te kingbolo aga tǫ me, te be me, aga te tigidali doado bage ma sabo sula tagalaibawe olama, te kingbolo hanalu wagasali.  
\p Gehasigo te we asobo sulama, tama agai te kingbolo e tama po walali, “King, suao. Te isai hodolali wai page we, te dao. Tama te wai tama isai, tama te Elisago ma hodolali wai, te dao.”  
\v 6 Awe, tama kingo te webolo te Elisago te wai hodolali po te webolo hanalu wali, tama te wego king agabolo te sę yali po pusai, tama nosali te kingo te aga sę ebo gavman ofisa bidi me deli i olama, tama te bidi asobode te bidi agabolo e tama po ola mani, “Nago te we tau selama, tama aga te tigidali nai dabe, ma doado bage dabe ma somainao. Tama me te nago te aga mone sabo me tau sao, te mone te aga gide bulali nai dabe usu nama tama mao, te nogo a olama, te me badu nogo si olama kibu bede te gasa bulude bidibadi yai dao,” wali.   
\s1 Te Siria bulude bidali king Benhadat isali po  
\p
\v 7 Me sogo deli Elisa te Damaskus buluba pai, Siria bagego moni hanu taun, te sogo Benhadat, Siria bulude king bidi bidai, tama aga gasi yai. Tama augwaligo te kingbolo e tiwai po tama wai, “Elisa, te Godigo po pusubo profet bidi, aga digibulu aselama, tama aga megi te Damaskus bulude bidibo,” wali.  
\v 8 Awe, tama te kingo Hasaelbolo te po wai, aga sę ebo gavman ofisa bidi me delibolo, e tama po wai, “Tama nago magi nai me deli selasa peyu, te profet bidi sugi pao. Tama nago agabolo e tama po hanalu wao, ‘Nago te Genuai Bidi Godibolo e tama hanalu wao, ena gasi ebo po te sia saibawe, ma meniwe?’ tama po hanalu wao,” wali.   
\p
\v 9 Tama tialima, te Hasaelgo te me badu dwagi yai haniani te kingo doado bage te Damaskusde sai, te bidi sese si 40 kamel kibugo tolabo usu nama tama sai, tama agai te kamel kibuba munama, tama te Elisa pageba selasa pai. Tama aga Elisa pageba sabolama, tama agai Elisabolo e tama po wai, “Genuai bidio, ena te king Benhadatgo sę ebo bidi dao, tama agai ena tagala palu, te po wai, aga gasi ebo sia saibawe, ma meniwe olama, te nagebolo hanalu wagasalio,” te po wai.   
\p
\v 10 Tama Elisago agai te po wei ponoyu, e tama po wai, “Nage pelama, te kingbolo wao, aga gasi da, teda silaibao. Tiali goli, Genuai Bidi Godigo agai enabolo e tama po ola manio, te king aga isaibao po walio,” wali.  
\v 11 Elisago te po tama ola silama, tama agai te Hasael aga bomo mu elama, gedugo tonaluai, tama tibaso, te Hasael aga te moni homu sęgę mu eyu bididubaso, tama Elisa gela mu wali.   
\p
\v 12 Tama te Hasaelgo agabolo hanalu wali, “Genuai bidi, magi baso nage gela obawe?”  
\p Tama Elisago agai te hanalu wali po wei ponoyu, e tama wali, “Eno e gela wabo. Magi baso meni, eno koneani, nosali nago te dwai haniani kolesaga umabo mu te Israel we bidi augwali dali yaibao,” wali. “Nage dali, te naga ami soldia bidi dabe dali, muna siyu, tama augwaligo te bomai obo mu dolama, tama te isi ulaibao. Tama dagego te Israel hanigo ogwa bidi naga dagego elama, isilaibao,” wali. “Tama dagego da te augwali dwasianu wai puluba tola sabo ąǫ elama, tama te tǫba sąbode tama augwali isaibao. Tama dagego te haliga yai we subode, tama dagego te bainat hwą ge selama, tama te we haliga pedaibao,” wali.   
\p
\v 13 Hasaelgo te po odobo si, tama te Elisago po wei ponoyu, e tama wali, “Ena olo bidi dao. Tama te genuai sęgę yai sę eno ma mena tama usu nama yaibawe?” wali. \x * \xo 8:13 \xt 1 Kin 19:15\x*  
\p Awe, tama Elisago agabolo e tama po wai, “Genuai Bidigo enabolo e tama ola mawai dao, nage Siria hani tonaluabo king bidi nigaibao,” wali.   
\p
\v 14 Augwali si te po minama sia sali, tama te Hasael aga te king Benhadat pageba ma geasa pai. Tama kingo agabolo hanalu wali, “Elisago nagebolo mena tama po ola maniwe?” Tama Hasaelgo te po wai, “Agai te po wali, mu tama nago gasi da sia selama, tama nage ma usu yaibao,” wali.  
\v 15 Tiali goli, te nosali te sogo Hasael agai homugo te king elainogo homu yai. Tama tialima, agai te bolo nisi ugwa agai me deli selama, tama te węba mugi pelama, tama agai selasa pelama, te king gesabidiba halua paligi pai. Tama agai bomonama mu dąų olama, halualu tolaluai, magu meni, king aga te mobo sidali weyu tiai. Tama teyu, te king isali. Tama nosali te Hasael aga te Siria hanigo king nigilama bidai.   
\ms1 Israel hani dali, te Juda hani dali si bidada pelama, te Israel hanigo taun bulu te dolobo bodoluba usu nigi pai po  
\mr (Dąį 8:16–17:41)  
\s1 Jehoram te bidi te Juda hanigo king nigilama, bidai  
\r (2 Sto 21:1-20)  
\p
\v 16 Te Joram aga tama bidibadi, te kibu be nogo a naga pai, Joram aga te Ahapgo ogwa, aga Israel king bidi bidai, te Jehoram aga aya te Jehosafat da, aga aya king bidali pesagede selama, tama te Juda hanigo king bidi nigilama bidai.  
\v 17 Agai kibu be te 32, tama kibu be pelama, aga te king nigai. Tama aga te Jerusalemde king bidibadi, te kibu be te 8 yia pai.  
\v 18 Tama agai te Ahapgo wegi sai, Israel hanigo king. Tama teyu, agai te Ahap hani dali te Israel hanigo te me badu king dabego yali te dwai kolesagadu agai wali pali, tama agai te Godigo gedude te dwai kolesaga yaligo te sęgę sai.  
\v 19 Tiali goli, Genuai Bidigo te Juda bagego bulu me dolobe. Magi baso meni, Genuai Bidigo te aga sę ebo bidi bidali koneama, te bidi te Devit, tama te me agai te polobadu po bodolu me te agai muai, te po bodolu e tiwai, te king Devitgo hani me deligo te king bidi nigilama bidaibao wai. Tama teyu, te Devitgo lam sole munu ma sula sogobeo wali. \f + \fr 8:19 \ft Te 1 Kin 11:36, tede elalubo po suao.\f* \x * \xo 8:19 \xt 1 Kin 11:36\x*   
\p
\v 20 Te sogo te Jehoram te Juda hanigo king bidi nigilama, bidali sogo, te Idom hani augwaligo te po sela sąbo kolesaga genuai mu eyu, tama augwali te Juda hanigo king bidi dologode me bidibeo. Mu meni. Augwa digi augwa king dali dąį ilama, tama augwa te kingo augwa tedali tonaluali. \x * \xo 8:20 \xt Gag 27:40\x*  
\v 21 Tama tibaso, te Jehoram agai te ami soldia bidi te karis kibude dolalua peyu, te hąuwa hwįbo koneai bidi naga sali, tama augwali Sair buluba te pedai badu te Idom hani dali hwįgi pali. Tama augwali pelama, te sabaligi pabode, tama te Idom hani augwali asama, tama te bage augwali bobegela sagaselama, tama augwali dali hwįainu tonaluali. Tama te hulide te Jehoram dali, te aga sę ebo gavman ofisa bidi dabe dali, augwaligo te hąuwa hwįabo karis kibu dolaluali, tama augwaligo te bomo mu elama, tama hąuwa hwįnama, te Idom hani sela sąyani. Tiali goli, agai te me badu ami soldia bidi dabe augwaligo te hąuwa hwįsąma, te augwa buluba ma wi pai.  
\v 22 Tama tialima, te Juda dabe augwaligo te Idom hani aiyaba me elalube, tama tialima, te Idom hani augwa digi augwa bulu tonalu bidali, tama bidada asu, megi tama te po asębo bodoluba usu nagasali. Tama te tibo bodolu sogo te Lipna hanude bidibo we bidigo me te po sela sąbo kolesaga eyu, te hagoma yali, tama augwali te Juda hani dologode munu me bidibeo.   
\p
\v 23 Te e po dabe te king Jehoram agai te tigidali te gasa gasa nai sę yali po dao, te po buku me delide elalubao, tama te buku augwaligo nogi eyu, e tama wabo da, Te Juda Dabego King Bidi Dabego Po Elalubo Buku Da wabo dao.  
\v 24 Nosali te king Jehoram isali, tama augwaligo te aga tigi te aga wąį nǫų pubulali gų pagede aga pubulali, te king Devitgo moni hanude. Tama aga ogwa, Ahasia, agai aga ayago yali sę te agai selama, tama aga king bidi nigali.   
\s1 Ahasia aga te Juda hanigo king bidi nigali  
\r (2 Sto 22:1-6)  
\p
\v 25 Te Joram, aga Ahapgo ogwa da, aga kibu be te nogo si olama, te sągą badu si, 12, te Israel bulude king nigilama bidai, te sogo Ahasia, aga aya te Jehoramgo ogwa dao, aga te Juda bulude te king nigilama bidibo gagalali.  
\v 26 Ahasia agai te kibu be te 22 wabode te aga king nigai, tama aga te Jerusalem bulude aga te king nigilama bidiyu, te agai kibu be deli digi silali. Aga ida nogi Atalia, aga aya te king Ahapgo wegi, tama te Ahap aga wąį nǫų te nogi Omri, Omri te Israel bidi dabego polobadu bidali king bidi da.  
\v 27 Te Ahasia aga ida te Ahapgo hanidu asai, tama tialima, Ahasia agai te Ahapgo dwai kolesaga yali tų wali pali, agai tama teyu, te Genuai Bidi gedude te dwai sęgę sabo kolesaga eyu ma bidali, tama te Ahap augwaligo hanigo ebo kolesaga tų wali peyu, te dwai sę yali gilama yali.   
\p
\v 28 Me sogo deli te king Ahasia aga te Joram dali pai, Joram aga te Israel hanigo king da, tama augwali te Hasael dali hwįgi pai, te Hasael te Siria king bidi da. Augwali te Ramot hanu pąde boi hwįai, te moni distrik Gileat, tama te Siria soldia ami bidigo te king Joram pigi enesigigo tama aga enani, tama aga isibe, aga sili enama tagalali.  
\v 29 Awe, tama tialima, Joram aga te boi hwįani tagalama, tama aga pelama, te hanu Jesril te hanude aga bidibadi aga tigi ma usu ebo wenama suainu bidigi pai. Tama aga te Jesril hanude bidibadi yaide, tama te king Ahasiago aga suagasali.   
\c 9  
\s1 Godigo te Jehu te Israel bidi dabego king bidi dąį ilama, king nigilali  
\p
\v 1 Te king Joram aga te Jesril hanude bidibo sogo, te Godigo po pusa mabo profet bidi Elisago te gasa ogwa bidi profet bidi me deli i olama, aga pageba asai, tama agabolo e tama tiwai po wai, “Naga name ugwa bugagia gudama, tama nage e dwasianu botol te oliv wel yai nai sao,” wali. “Tama nage hodolama, te Ramot hanuba, te Gileat tǫ, te moni hanuba pao,” wali.  
\v 2 “Tama nage te Ramot hanuba sabalobo sogo, tama nage pelama, te Jehu kegegi pao,” wali, “Jehu aga te Jehosafatgo ogwa dao, tama te Jehosafat aga wąį nǫų Nimsigo ogwa da. \f + \fr 9:2 \ft Te Jehu aga aya te Juda dabego king bidi bidali te Jehosafat menio, tama agai po te 1 Kin bukude me te Dąį 22, tama 2 Kin bukude me elalubo te Dąį 3. Te meni, te gasa tedali bidi nogi Jehosafat dao.\f* Tama tialima, aga te aga abagi hasi dali augwali deliba bidibaso da, awe, tama tibaso da, teda nago aga selasa, gasa be habu me deliba aga odasa pao.  
\v 3 Awe, tama te botol wel selama, tama te wel aga toboluba geliyu, e tiwai po agabolo wao, ‘Genuai Bidigo aga digi nagebolo te po obaso, aga digi nage te Israel hanigo king bidi bidimainu dąį ilibao,’ tama wao. Tama nago te sę elama silibo si, tama te tų dala salama, nage polo wi pao,” wali.   
\p
\v 4 Elisago te po ola silama, tama te ogwa bidi profet bidi hodaluama, te Ramot hanuba pai.  
\v 5 Tama te aga sabalobo sogo, agai te tonobadi yaide, te Jehu aga dugulalu, te aga gasa ami ofisa bidi dabe dali po miyu bidibo suali. Tama agai e tama po wali, “Ofisa, eno po me deli elalubo.”  
\p Tama te Jehugo agabolo hanalu wali, “Nago te po de dali wabo elalubowe?”  
\p Tama te profetgo te po wai, “Eno po nage dali wabo elalubao.”   
\p
\v 6 Awe, tama tialima, augwali si te be me deli habu tomoba augwali pai, tama te profet bidigo te oliv wel selama, te Jehu toboluba te oliv wel gelaliyu, agabolo e tama po wai, “God, Israel we bidi dena Genuai Bidigo, te po tama wai, ‘Megi eno nage dąį ilibo, te nage Israel we bidigo king bidi nigilibao,’ wali. ‘Tama nago eno te we bidi dabe augwali nago tonaluao. \x * \xo 9:6 \xt 1 Kin 19:16\x*  
\v 7 Tama nago te Ahap hani augwali nago elama isilao, te king nage polobadu te nage gavman ofisa bidi bidai dao. Tama tibo kolesagago eno wei ma dolo te kwin we Jesebel agaba wei ma begelaibao. Te wego polobadu agai te eno profet bidi dabe me, tama me te eno te gasa sę ebo bidi dabe me, ela muai dao.  
\v 8 Tialima, eno te Ahap aga deli hani me te aga hani tigidali dola silaibao. Mu tamao, eno te tigidali bidi te Ahapgo hani te Israel haniba wadolali bidi me, te eno homugo te tigidali silaibao. Tama augwali te ogomani me, o te genuai bidi me, mu silaibao.  
\v 9 Tama eno augwali dali deli kolesaga naga yaibao, tama te polobadu eno te king Jeroboam aga hani dali silali yaligia gagawai yaibao, Jeroboam aga te Nebatgo ogwa da, te king Basago deli hani dao, te Basa aga te Ahiyago ogwa dao.  
\v 10 Tama te Jesebel isibo si, te agai tigi selasa pelama, pubaligi pabo bidi menia saibao. Mu meni. Tama agai tigi te yowi dabego tueibao, te Jesril hanu pąde.’ Genuai Bidigo te po wai.” Te profet bidigo te Genuai Bidigo po Jehubolo pusa silama, tama aga te be tų dala sąnama, tama aga wi pai. \x * \xo 9:10 \xt 1 Kin 21:23\x*   
\p
\v 11 Jehu ma geasa pelama, te gasa gavman ofisa bidi dabe augwali bidiboba sabalobode, te ofisa dabe augwaligo agabolo e tama po hanalu wai, “Magi nai me deli pedalaliwe, a? Magi baso te e wabo pabo bidigo asama, nage suagasaliwe?” wali.  
\p Tama Jehugo te po wei ponoyu, e tama po wai, “Dagego koneanio, te tama tibo bidi dabego augwaligo kolesaga. Augwaligo te po subigilama po wabo dao,” wali.   
\p
\v 12 Tama augwaligo te po wali, “Polo tama, nago da dali wabo po dolo mu wao. Tama nago te ili po olama, te po dualobo tagalao,” wali.  
\p Tama tialima, te Jehugo po dolo mu te ofisa bage dali pusuyu, e tama po wali, “Te bidi asama, enabolo wagasali po e tama po walio, agai ena te Israel hani tonaluabo king bidi dąį ilalio,” wali.   
\p
\v 13 Te ofisa bagego te po odobo si, polo tama augwaligo te bobobage bulubo ugwa dia sasa pelama, tama augwaligo te be togobiliba hagalu pai, tama te Jehu te be togobili ugwa badu mu dolalugi ulali. Tama augwaligo te bu wabo nai biugel selama, te bu weyu, te i weyu, te po wai, “Te Jehu te king nigalio,” po wai.   
\s1 Jehugo te Israel hanigo king bidi Joram ela muai po  
\p
\v 14-15 Jehu te Ramot hanude bidiyu, tama te aga sę ebo gavman ofisa bidi dabe dali po minama, te po dąų walu, te po wai, “King Joram elama, isilaibao,” wali. “Tama te aga bidali pesagede ena king nigilama bidaibao,” wali. Tiali goli, Joram te Jesril hanude me bidali. Magi basowe, aga te Israel hanigo te Siria hanigo king Hasael dali hwįani sogo, Joram aga me tama te ene dolai gasi munalu bidai, tama aga te gasi sana pesiąbadi. Tama tialima, Jehu aga sę ebo gavman ofisa bidi dabe augwali dali e tama po wali, “Tialima, dagego ena dali deli homu eyu da, awe, teda dage bugagia tonaluao, tama bidi me deligo te Ramot hanu tagalama, tama te Jesril hanuba pelama, tama te dena homugo ede yabo sę po te Jesril hanuba pusigi pigio,” wali.  
\v 16 Awe, te Jehu te aga hosgo kegebo karis nai ugwa badu daiba hola pali, tama aga dali, te me badu soldia ami bidi dabe dali, te augwali te Ramot hanu tagalama, tama augwali te Jesril hanuba pai. Te king Joramgo gasi usu esiąbadi pai. Tama tibaso, aga bet saiba pigi ulali, te Jesril hanude. Tama te sogo te Juda hanigo king bidi Ahasia aga te Jesril hanuba te king Joram suagasiyu asai. Tama tialima, aga si talua si te Jesril hanude bidibadi.   
\p
\v 17 Tama te bidi me deli te Jesril hanu genuai masigi obode nigai bobobage sigi be te be tomoba bula selama bidiyu, te digibulu asobo bidi suainu tonalubo dao. Tama te bidigo tonobadi yaide, te king Jehu aga hani dali asobo suali. Tama agai i olama, tama te taun tomode bidibo bidi dabebolo e tama po pusai, “Eno suali, te geninama bidi mu asobo,” wali. Te bidi dabe augwaligo te Jorambolo te taun tonalubo bidigo wali po agabolo wali. Tama Joramgo augwalibolo e tama po wali, “Te ami soldia me delibolo olama, te aga pelama, te hos kibu me deli sigi pao, tama aga tede dugulama, tama aga udulama peyu, tama augwali asobo tomoba tiąba pelama, tama agai augwalibolo e tama po hanalu omainao, ‘Dage dwagi yai homu eyu asaliwe, ma meniwe?’ te po aga hanalugi pao, “te po wali.   
\p
\v 18 Awe, tama tiali, te ami soldia bidi me deli te kibu hosde dugulama, tama aga udada peyu, tama augwaligo te Jehubolo sisinigi pelama, tama agai e tama po wali, “King Joram agai homugo koneaio, dage dwagi yai homu eyu asaliwe, ma meniwe?”  
\p Tama te Jehugo e tama po wei begelali, “Te nago nai menio. Nage da wali naga asao,” wali.  
\p Tialima, Jesrilde bidibo te tonalubo bidigo suali, ma te ami soldia bidi ma begasa asobe, tama tibaso, agai te kingbolo e tama po ola tolali, “Te ami soldia bidi nago tagala palali bidi, te bidi aga te pelama, augwali pageba sabolali. Tiali goli, aga polo ma begasa asobeo,” wali.   
\p
\v 19 Tialima, kingo te gasa ami soldia bidi me tagala palali, tama te ami soldia bidi augwali pageba pedalobo sogo, te ami soldia bidi agai me te king Jehubolo e tama po wali, “King Joram agai homugo koneaio, dage dwagi yai homu eyu asaliwe, ma meniwe?” wali.  
\p Tama Jehu agai te po wei ponoyu, e tama po wai, “Te nago sę menio. Nage da wali asao,” wali.   
\p
\v 20 Te taun tonalubo bidigo te tagala palali ami soldia bidi ma geasa asobo subeo, tama agai te king bidibolo e tama po ola tolali, “Te nago te tagala palali gasa ami soldia bidi, te ami bidi aga me asobeo. Tama eno suali, ma te bidi te karis naide bidibo suali, tama agai te wabo pabo kolesaga homu mu ebao, te Jehu te Nimsigo hani, augwaligo koneama te tiwai kolesaga ebo da, augwaligo te hos kibu augwali bomonama mu udayu, tama te karis gegasa asobao,” wali.   
\p
\v 21 Tama tialima, te king Joramgo te po wali, “Eno karis dodolao,” wali. Awe, tama augwaligo te Joramgo karis dodolama, tama te Joram aga te karisba hola solama, dugawai, tama te king Ahasia aga me te gasa karis meba hola solama dugayali, tama augwali si udulama peyu, te Jehu asobo tomoba tiąba pali. Tama augwali sigo te Jehu te Jesril bidi Nabotgo tǫ pąde asobadi, teba tiąba pai.  
\v 22 Tama te Joramgo Jehu suali, agai te Jehubolo e tama po hanalu wali, “Te dage dwagi yai homu dali asaliwe, ma meniwe?”  
\p Tama te Jehugo te po wei ponoyu, e tama po wali, “Magi yaliwe usu elalubao,” wali, “tialima, naga ida Jesebel, agai te tibo god wali pabo sę eyu, tama te dwai kolesaga eyu, tama te bidi isibo pobi enebo sę ebo dao,” wali. “Naga idago te tama tibo dwai kolesaga ebo sęgę te genuai mu pedalobao,” wali.   
\p
\v 23 Jehugo te wali po te Joramgo odama, tama aga te karis begelama, tama polo wi pai. Tama agai te king Ahasia i weyu, e tama i wali, “Ahasia, te asali bidigo ena aiyaba elaluainu ebao,” wali.   
\p
\v 24 Tialima, te Jehugo aga enesigi polo bomonama kegelama, tama te ene toga peyu, te Joram tudide dolali. Tama te enego aga hobolu dude dolali. Tama te Joram aga te karis daide tulaluama, tama te Joram aga isali.  
\v 25 Tama te Jehugo te Bitkarbolo te po walali, te aga dali bidiyu sę yali gavman ofisa bidi, e tama, “Te Joramgo tigi sagaselama, tama te bidi Nabotgo tǫba sągi pao,” wali, “te Jesril bidi. Te Genuai Bidigo te polobadu king Ahapbolo pusa mani po nago me konealubawe, Joram aga aya? Dadi si te Ahap wali pobao, te dadi sigo karis me tama te Genuai Bidigo te Ahapbolo e tama po wali,  
\v 26 ‘Tialima, te do tama eno suali, ma te bidi dabe augwaligo te nago homugo ebo kolesaga tų wali peyu, tama augwali te Nabot aga wai buluba dali te augwaligo elama isilalio, tama teyu, te ena Genuai Bidi dao, te eno mu po tama obao, tama te nago te Nabot tǫde yali dwai kolesaga te eno nagebolo dolo mu wei begelaibao.’” Tama te Jehugo te Bitkarbolo e tama po ma wali, “Te Joramgo tigi selama, tama te Nabotgo tǫ naga tama sągi pao, te Genuai Bidigo poba usu nigi peyu, tama tiao,” wali. \x * \xo 9:26 \xt 1 Kin 21:19\x*   
\s1 Te Juda hanigo king bidi Ahasia isali po  
\p
\v 27 Te Juda king Ahasiago te Joram isibo suali, tama aga te aga karisde bidibadi yaide, tama tibaso, aga te Bethagan hanu pedai badu wi pai. Tama te Jehu aga ami soldia bidi dabe daligo te Juda king Ahasia pobeai, tama te Jehugo te aga ami soldia bidi dabebolo e tama po wali, “Te king aga me enao,” wali. Awe, tama tialima, te king aga karisde dugula selama, te Gur bulu duba ugwaba udada holobadi yaide, tama augwaligo aga enani, te Ipleam hanu pąde. Tiali goli, te king Ahasia aga wi peyu, te Megido hanu pedai badu wi pai, tama nosali aga isali.  
\v 28 Tama te aga sę ebo gavman ofisa bidi dabe augwaligo te aga tigi sagaselama, tama te karis me deliba munama, tama te Jerusalem buluba selasa pali. Tama augwaligo te augwa wąį nǫų pubalobo gų pageba pubaligi pai, te Devitgo hanude elalubo madigi pubulali.  
\v 29 Joram aga te Israel dabego king bidi bidiyu, tama te nogo si olama, te sągą badu deli wagi soabo kibu be silali sogo, te sogo te king bidi Ahasia aga te Juda hanigo king bidi nigilama, pedelali.   
\s1 Augwaligo te kwin we Jesebel elama isilali  
\p
\v 30 Tama te Jehu aga hani dali augwaligo te king Ahasia pobeasa pelama, tagaligi pai, tama augwali ma te Jesril hanu tųdu ma begasa asai. Tama te kwin we Jesebel te bulu pedai badu bidibo da, tama agai po odali, e tama po wai, Joram isai dao wali. Tama tialima, te kwin we Jesebel aga te gedude me, te aga tobolude me au yai, tama tilama, te kingo sigi be te dwasianu windo tųde dolaluyu, te tųba aiyaba tonaluai.  
\v 31 Tama te Jehu aga te taun te moni tų badu te taun tomoba asai, tama te kwin we Jesebelgo aga dolo i weyu, e tama i wai, “Simri, nage naga genuai bidi ela mubo bidi dao, nage bugagia bidibawe, a?” \f + \fr 9:31 \ft Te Jesebelgo te Jehu nogi weyu te “Simri” wali, magi baso meni, polobadu te Simri, te kingo te sę ebo gavman ofisa bidi deli dao. Te ofisa bidi Simri agai aga te king bidi ela muna isilai dao. Tama tialima, megi te Jehugo me agai te deli tigi poai kolesaga naga yali. Te 1 Kin te Dąį 16:8-20, tede suao.\f*   
\p
\v 32 Jehu agai te po wabo odama, tama agai te beba te dwasianu windo tų elalubo madigi te agai ugwaba tonani, tama agai e tama i wali, “De nage eno haniba asaibawe?” Tama te me badu sę ebo bidi dabe augwali te kingo te bede bidali bidi dabego te Jehugo wabo po odama, tama augwali te bede te dwasianu windo tų badu dolagaselama, tama augwaligo te Jehu agaba aiyaba tonani.  
\v 33 Tama Jehugo augwalibolo e tama po wali, “Te we eba eda sąyao,” wali. Tama augwaligo te Jesebel selama, tama te we aga aba sąwai. Tama agai kanemego dobola sąyu, tama te kanemego tama te bede me te kaneme dagana sali, tama te Jehugo hos kibude me te kaneme dagana sali. Tama Jehugo te hos kibugo me te karisgo me te Jesebel tigidu agaga pali.   
\p
\v 34 Nosali te Jehu aga te kingo be tomoba pelama, te nai tuai. Tama aga nai tuyu, tama te wę tuyu elama, tama agai te bidi dabebolo e tama po augwalibolo wali, “Godigo te po wai dao, te dwai we dolao, wai dao. Tiali goli, te we aga aya te king me deligo wegi dao, tama tialima, dagego te we agai tigi selasa pelama, pubaligi pao,” wali.  
\v 35 Tama augwaligo buluba pelama, tama te wego tigi siyu, pubulainu yali. Tiali goli, augwaligo te wego tigi munalubo sube, menio. Augwaligo te suali, te tobolu dili dali, te nogo sawali dili badi, te sągą sawale dili badi elama munalubo suali.  
\v 36 Tama augwali ma begasa pelama, te Jehubolo te sę yali po pusugi pali, tama agai e tama po pusali, “Te sę te Genuai Bidi God aga sę ebo bidigo pedauwalidu wali podu dolo mu pedalali, te Elaija aga te Tisbe hanude bidali bidi dao. Genuai Bidigo e tama po wai dao, ‘Te kwin we Jesebel isibo sogo, te yowigo agai tigi tueibao,’ wali, ‘te Jesril hanu tǫde tiaibao. \x * \xo 9:36 \xt 1 Kin 21:23\x*  
\v 37 Tama te agai tigi pebeda pai mu, te yowi di gagawai mu te tǫde munalua pabo sueibao, tama tiwai munalua pabo te bidi dabego sueibao, te augwaligo te Jesebel tigi te yaba wabo augwaligo munu me konebe,’ Genuai Bidigo te po polobadu wai dao,” Jehugo te po wai.   
\c 10  
\s1 Augwaligo te Ahapgo hani elali po  
\p
\v 1 Te wai dabe te ogomani naga ebadi elama, te king Ahapgo wąį nǫų ogomani Samaria taunde bidali. Te bidi dabe augwaligo namba te bidi sese sela selama, te ugwadu nogo si bidi selama, 70 bidi bidai. Tama te Jehugo te pas asęnama, tama te Jesril hanu tobolu bidibolo me, te genuai bidi dabe te taun tonalubo bidibolo me, tama me te Ahapgo wąį nǫų ogwa dabe tonalubo genuai bidi dabebolo me, te Jehugo pas asęnama, augwalibolo tolali. \f + \fr 10:1 \ft Te Hibru pogo te po wai, te Jesril hanu dao, wai. Tiali goli, te me badu bidi dabego te polobadu mu te Grik pogo begelai po, tama augwaligo homugo te Samaria hanu nogi te dolo da homu yai.\f* Agai te po e tama po asęani,  
\v 2 “Te Ahapgo ogomani augwali hani dage dali bidibao, tama te dagego te hąuwa hwįbo karis me, te hos kibu me, me te ene me, tama me te hąuwa hwįbo gasa nai me munalubo. Tama dage te taunde bidibo te masigigo nigai bomai obo elalubo. Tama tialima, dagego eno e pas sabo sogo,  
\v 3 dagego te Ahapgo hanigo te augwa tomode te dwagi yai bidi me deli sulama, te bidi aga king dąį ilao. Tama aga te king nigilama bidimainogo eyu, dagego aga tau siyu, tama da dali wąbi hwįnao,” te po asęna tolali.   
\p
\v 4 Te Samaria tobolu bidi badi, te me badu genuai bidi badi, augwaligo te Jehugo te tolali pas selama, tama augwali wi dwai mu eyu, tama augwa hasi te po wali, “Jehugo te king si tama aiyaba elaluali. Tama tialima, mena tama dago aga aiyaba elaluaibawe? Dago aga aiyaba elalubo usu munu ma egobeo,” wali.  
\v 5 Tama tialima, te kingo be tonalubo bidi me, me te taunde polalubo tobolu bidi deli ebadi, te me badu tobolu bidi dabe ebadi, te me badu te Ahapgo hani ogomani tonalubo genuai bidi dabe ebadi elama, augwali tigidaligo te Jehubolo e tama po ola tolali, “Da tigidali te naga sę bidi dabe naga dao, tama dago homugo te nago homu kolesagadu naga wali painu, te da dola selama bidibao. Dago te gasa bidi me deli te king me nigiligobeo. Mu menio. Nago homugo mena tama sę yabo homu ebowe, teda teya naga sę yao,” te po ola tolali.   
\p
\v 6 Awe, tialima, Jehugo te gasa pas me asęnama, tama te bidi dabe augwalibolo e tama po wali, “Tialima, dagego homugo ena wali asainu, tama dage ena dologode bidagameo, tialima, eno homugo dagego te Ahapgo hani ogomani tigidali ela silao,” wali. “Tama te do kigamu e tama tibo sogo, dagego te augwali tobolu naga toga selama, tama te Jesril hanuba muagasao,” wali  
\p Tama te bidi sese sela selama, te ugwadu nogo si bidi te Ahapgo hani ogomani, te Samaria taun bulude bidibo genuai bidi dali augwali te bidalubao, tama te genuai bidi dabe augwaligo te augwali te ola mayu bidali.  
\v 7 Tialima, te genuai bidi dabe augwaligo te Jehugo te pas sali, tama augwaligo te Ahapgo hani ogomani te bidi sese sela olama, te nogo si bidi, te 70, te augwaligo elama, isilali. Tama augwaligo te bage tobolu togolama, tama augwaligo te basket wa dabeba bulama, te Jehubolo tolali, te Jesril hanuba.  
\v 8 Te sogo Jehugo te po odali, te bidi dabego te Ahapgo ogomani tobolu togolama, augwaligo teba muagasali po odali, tama agai te bidi dabebolo e tama po wali, “Augwaligo te bage tobolu pesage te taun tomoba pabo tų sesegede te pąde tobolu pesage si sisinao, tama augwaligo te tobolu dabe munalubadi, te doba tama usu nigi pomainao,” wali.   
\p
\v 9 Do kigamu te giliga asai badi, tama te Jehu hodasa pelama, te taun tomoba asobo tų sesegeba pelama, te tobolu dabe munalubo sugi pai. Umabo we bidi sisinama bidibo sulama, tama Jehu aga doligulama, tama agai augwalibolo e tama po wali, “Ena digi ena homugo te Joram aga eno aiyaba elaluai dao. Tama tialima, eno aga elama, isilai dao. Tama eno koneanio, dagego bidi me ela mubo menio. Tiali goli, te dego mu te hani ela muaniwe? Dago konebeo.  
\v 10 Tiali goli, tego da e tama ola mawai, tigidali po te Genuai Bidigo te Ahapgo hani dali polobadu wai po naga dao, te mu te pedalobo sę naga ebao. Te Godigo sę ebo profet bidi Elaijago pedauwalidu wali te dąų wali poba te megi Genuai Bidi usu na silibao,” wali. \f + \fr 10:10 \ft Te 1 Kin 21:20-24 tede elalubo po suao.\f*  
\v 11 Tama tialima, nosali Jehugo te Ahapgo hani te Jesril taunde bidali deli hani te Jehugo ela silali. Me te aga sę ebo gavman bidi me, me aga dwagi yai hai namu me, tama me te pris bidi dabe me, tama te bage augwali tigidali te Jehugo augwali me deli me bidibo sula tagalobe. Mu meni. \x * \xo 10:11 \xt Hos 1:4\x*   
\s1 Te Jehugo te king Ahasiago te deli hani augwali elama silai  
\p
\v 12 Tialima, te Jehu dali, te aga ami soldia bidi dabe dali, augwaligo te Jesril hanu tagalama, te augwaligo homugo te Samaria hanuba painu homu yali. Tama augwali te tųdu wali pelama, tama augwali te bulu me deliba sabaligi pai, te bulu nogi da Te Kibu Sipsip Tonalubo Bidi Dabego Sisinibo Pesage da.  
\v 13 Tama augwaligo te me badu bidi dabe sulama sisinibo si, tama augwaligo e tama po hanalu wali, “Dage mena pedai badu asaiwe?” Tama augwaligo te po wei ponoyu, e tama po wai, “Da da, te king Ahasiago hani dao,” wali. “Dago homugo te Jesril hanuba sobao, te king Joramgo hani ebadi, te kwin Jesebelgo hani dabe ebadi elama, te augwali dago suainu sobao,” wali.   
\p
\v 14 Jehugo te po odali, tama aga hanibolo e tama po augwalibolo wali, “Te bidi dabe augwali polo tuao.” Tama augwaligo te bidi dabe tigidali tulama, tama augwaligo te bidi dabe te moni maguludawe elalubo madigi te bidi dabe odasa pai. Tama augwaligo te king Ahasiago hani tigidali ela silali, me deli me munu me bidibe. Te augwaligo namba te bidi sese si olama, te ugwadu si tama usu, bidi 42 isali.   
\s1 Jehugo te Ahapgo gasa hani bage tigidali me ela silali po  
\p
\v 15 Te Jehu dali, te aga ami soldia bidi dabe dali, augwaligo te bulu tagalama, tama augwali pobadi yaide, tama augwaligo te bidi me suali, te bidi nogi Jonadap, te bidi te Rekapgo ogwa da. Tama te Jehugo te bidibolo te giligade dao po wali, tama agai agabolo e tama po wali, “Eno homugo te nago ebo homu kolesaga te godolo mu ebo. Tama tialima, nage magi yaliwe, eno e ebo sęde nago bugai homu pemene ebawe, ma meniwe?”  
\p Tama te Jonadapgo te Jehubolo e tama po wai, “Awe, eno nage dali eno deli haliga ebao,” wali.  
\p Tialima, Jehugo te po wai, “Dwagi yai dao. Tama tibaso da, tea nago nogo enaba mao. Dadi si nogo mainao.” Tialima, te Jehugo te Jonadapgo nogo tulama, tama aga te karis daiba agai nogo kegali.  
\v 16 Tama Jehugo agabolo e tama po ola mani, “Nage ena dali asu da, teda nago koneaibao, eno te Genuai Bidi naga wali painu, bomo mu ebao.” Jonadapgo te po usu da homu yali, tama augwali te karisdu augwali te Samariaba pali.  
\v 17 Augwali te Samaria buluba sabolali, tama te Jehugo te bulude te Ahapgo hani gasa me badu te bulude bidali bidi dabe tigidali elama, isilali. Agai te bidi dabe elama, mu silali, tama te tialigo te Genuai Bidigo polobadu te profet Elaijabolo mani te poba usu na silali. \f + \fr 10:17 \ft Te 1 Kin 21:20-24 tede elalubo po suao.\f*   
\s1 Jehugo te tigidali we bidi te tibo god Balba lotu po wabo we bidi dabe elama silali  
\p
\v 18 Tama nosali te Jehugo te Samaria we bidi dabe tigidali i olama, tama “Eba sisinagasiąo,” wali, tama agai augwalibolo e tama po wali, “Polobadu te king Ahapgo te Balba lotu po weyu yai. Tiali goli, eno te Balba lotu po bomo mu yaibao.  
\v 19 Tama tialima, eno homugo dagego te profet bage me, me pris bage me, tama te tigidali we bidi augwaligo te Balba lotu po wabo we bidi me, tama augwali asama, eba sisinagasao,” wali. “Te bede me deli me bidigio,” wali. “Magi baso meni, eno homugo Balba moni denami yai ofa nai ula mawaio. Tialima, bidi me deli asisąbaso da, teda te bidi isaibao,” wali. Jehugo te po wali, te tibo god Bal lotu po wabo we bidi mumua siyu, agai homugo agai te we bidi tigidali ela silainu te po wali.   
\p
\v 20 Tama Jehugo e tama po ma wali, “Dago te me sogo te genuai bodolu deli dąį ilama, tama te Bal lotu po waguo,” wali. Tialima, augwaligo te bodolu deli dąį ilali.  
\v 21 Tama te Jehugo te Israel bidi dabe bidibo buluba te agai po ola todolo pali, tama te Balba lotu po wabo we bidi dabe, augwali asama, sisinagasao wali. “Bidi me deli me te naga bede bidigio,” wali. Tama tialima, te we bidi dabe te Bal lotu po wabo moni lotu beba te tigidali we bidi te be tomoba pelama, te mu pągąna sai.  
\v 22 Augwali te lotu be tomoba bula sela silama bidaluali, tama tialima, te Jehu aga te pelama, te lotu weyu te bulubo ugwa tonalubo bidi pageba pai. Tama agai e tama po agabolo wali, “Tama te bulubo ugwa selama, te Balba lotu po wabo we bidi dabebolo mena mena pao,” wali. Tama te bidigo te Jehugo wali po selama, te ugwa selama, mena mena pali.   
\p
\v 23 Tama nosali te Jehu dali, te Jonadap dali si, Jonadap aga aya te Rekapgo ogwa da, augwali si te lotu be tomoba pali. Tama te Jehugo te we bidibolo e tama po wali, “Dagego te duga hasi bugagia tononu bilama, tama duga digi dagaliąo, magu menio, bidi me deli me, we me deli me, te Genuai Bidi God dolo mu lotu po wabo we bidi me deli da dali bidamuo,” wali. “Te eno homugo da te Bal dolo lotu po wabo we bidi naga da e be tomode bidinao,” wali.  
\v 24 Agai te po tama olama sia sali, tama aga dali, te Jonadap dali si, augwali si te denami yai ofa nai ula mabo madigi te habuba pai. Tama augwaligo te habu badu denami yai ofa nai me, me te gasa ofa nai me, te augwaligo te tibo god Balba te tigidali ofa nai selama, te siaba ula palama, te siago sese tama dela pelama, silibo da. Tama te tigidali we bidi asisąbo sogo Jehu aga te bidi sese te me si me si nama, 80 ami soldia bidi dąį ilama, tama agai augwalibolo e tama po wai, “Dage te lotu be togobe badu bidiyu, te bulu badu tonalu bidao.” Tama agai augwalibolo e tama po wali, “Dagego te tama tiao, te tibo god Balba lotu po wabo we bidi dabe tigidali te hani elama, silao,” wali. “Tialima, te soldia bidi me deligo te hani augwali me deli wi pabo sula tagalobaso da, tea te soldia bidi aga me elama, isilaibao,” wali.   
\p
\v 25 Jehugo te siaba te ulama, te siago sese dela pabo denami yai ofa nai ulubo sę ela silali, tama tilama, te lotu be tomode taga solama, tama aga te ami soldia bidi dali, te aga sę ebo gavman ofisa bidi dabe dalibolo e tama po wali, “Dage te lotu be tomoba pelama, te we bidi dabe tigidali ela muna silao,” wali. “Dagego augwali me badu te wi pabo sula tagaligio,” wali. Te po obaso, te ami soldia bidi dabe augwali te be tomoba pelama, te we bidi dabe tigidali te bainat hwą gego te we bidi dabe elama, silali. Tama nosali tama te we bidi augwaligo tigi selasa pelama, te taun sesege bulu badu pubaligi pai. Tama tilama, augwali ma begasa peyu, te taun tomode te tibo god Bal lotu po wabo beba ma pai.  
\v 26 Tama augwali te lotu po wabo be tomoba pelama, tama augwaligo te bidi dabego lotu po wabo te noma ni dabe sali, tama augwaligo te ni dabe selasa buluba pelama, tama augwaligo te bulude te noma ni dabe isiba ulali.  
\v 27 Tama augwaligo te tibo god Bal noma nigali piksa me, te lotu po wabo be me, te augwaligo mu dolali, tama augwaligo te lotu be te di be mu nigilali, tama te be me tama elalu, bidada asama, megi e po asębo bidi dabe bidali sogoba usu nagasalio.   
\p
\v 28 Tama tilama, te Jehugo te kolesaga eyu, tama te tibo god Bal teba lotu po wabo kolesaga sia sąyani, tama te Israel bage augwaligo te tibo god Balba lotu po munu ma wabe.  
\v 29-30 Tama te Genuai Bidi Godigo te Jehubolo e tama po ola mani, “Nago te ebo homu kolesaga te eno me te tiwai kolesaga tų wali te pobao,” wali, “tama nago te Ahapgo hani dali te tibo sę, tama nago te tibo kolesaga te dwagi yai mu dao. Tama tialima, te nosali te eno homugo te nago hani augwali tomode te bidi me deli te king bidi nigilibo eno sula tagalaibao,” wali. “Tama tidi peyu, te duga ame nabo wai dabe te wąį nǫų te me si me si tama namba haniba nama usu nigi paibao,” wali. Tama tiali goli, nosali te king Jehugo te king Jeroboamgo yali dwai kolesaga wali ma pai, te bidigo te polobadu te Israel hani agai kegelama, te augwaligo te sęgę sabo te dwai kolesaga yali bidi dao, Jeroboam agai te golgo te kibu bulmakau noma si nigilama, tama agai me deli te Betel hanude muani, tama me deli te Dan hanude muani. Tama te Israel hani augwaligo te kibu bulmakau nomaba lotu po obaso, te Jehugo sulama, tagalali. \x * \xo 10:29-30 \xt 1 Kin 12:28-30\x*  
\v 31 Tama me te Jehugo te Israel bidi dabego Genuai Bidi Godigo te tigidali bomai po te agai bugagia bomo elama, wali pabe. Menio. Agai te king Jeroboamgo yali kolesagadu wali pali, te kingo te polobadu agai te Israel hani augwali kegelama, te augwaligo te dwai sęgę ebo kolesaga yai.   
\s1 Jehu isali  
\p
\v 32 Te Jehu aga king bidi nigila bidibo bodolude te Genuai Bidigo te gagalama, te gasa hanigo te Israel hani aiyaba elaluama, te augwaligo tǫ dabe te me badu pedai te boi bidi dabego somainogo sula tagalai. Te Siria hanigo king bidi te aga nogi Hasaelgo te Israel hani dabe dali te boi hwįbo sę yali, magu meni, augwaligo homugo te Israel bagego moni te tigidali te tǫ dabe te augwaligo sainogo te moni boi mu hwįai.  
\v 33 Te tǫ pedai te giliga asobo pedai badu elaluali, te wę Jordan u badu elaluali, tama te king Hasaelgo te Israel hani aiyaba elaluama, tama te tigidali tǫ dabe sali, te taun Aroer tedu gagalama sai. Te wę Arnon pąde te giliga pabo badu gagalama, tama te moni te genuai tobolu hanu si, te hanu si nogi te Gileat me te Basan, te bulu siba usu nigi pali, te giliga asobo badu, te pedai badu, te not, te tǫ dabe te bidi dabego tǫ da, me te Gat agai hanigo tǫ me, te Rubengo hanigo tǫ me da, tama me te Manasego hanigo tǫ me dao. Te hani sela augwaligo tǫ dabe dao.   
\p
\v 34 Te king Jehugo te gasa sę yali po dabe, te gasa bukude elalubo da, augwaligo te buku e tama tiwai nogi wabo da, Te Israel Hanigo King Bidi Dabe Augwalide Po Elalubo Buku dao, wabo da. Te bukude te tigidali king bidi dabego te tigidali bomai sę yali po elalubo buku dao.  
\v 35 Tama te nosali te king Jehu isali, tama augwaligo aga te Samaria bulude pubulali. Tama te aga ogwa Jehoahasgo te aga ayago yali sę eyu, te king nigilama bidali.  
\v 36 Te Jehu te king nigilama bidali kibu be te 28 olama kibu be usu nama kibu be silai.   
\c 11  
\s1 Te we Atalia te Juda bidi dabego te kwin we pedelali  
\r (2 Sto 22:10–23:15)  
\p
\v 1 Te sogo te Atalia, te king Ahasia aga idago, e tama po odali, aga ogwa Ahasia isali po odali. Awe, tama tialima, agai polo tama te ami soldia bidi dabebolo e tama po ola mani, “Dagego te Juda dabego king bidigo hani bidi dabe tigidali ela silao,” wali.  
\v 2 Tiali goli, te ami soldia bidi dabe augwaligo te Joas deli digi elebe, te king Ahasiago ogwa, magi baso meni, Jehoseba, te we Jehoseba aga te king Joramgo wegi, tama te king Ahasiago aga abe, tama Jehosebago te Joas dali te aga tau siyu tonaluabo we me deli dali selama, tama augwali si te augwaligo te pibo somo gagawai nai matres dabe te pibo bet sai dabe mubo madigi te habuba Jehosebago te wai ogwa Joas me te aga tonaluabo we augwali si teba geme dualali. Tama tialima, te Ataliago te Joas ela muabo usu meni.  
\v 3 Tama te Jehoseba agai te ogwa te Joas dualaludubadi, te kibu be nogo a olama, me badu nogo kibisa olama kibu be usu nigi pali, te tama kibu be tomode te Genuai Bidigo tempel be tomode naga geme bididubadi genama, te kibisa nogo kibu beba usu nigi pai. Tama te sogo te Atalia te Juda hanigo kwin we bididuali.   
\p
\v 4 Tiali goli, te Atalia aga te kwin we nigilama bidibadi, te nogo a olama, me badu nogo si, te kibu be bidali, tialima te pris bidi Jehoiadago agai te gavman ofisa bidi dabebolo, te ami soldia bidi te kwin tonalubo soldia bidi me, te kwingo be tonalubo soldia bidi dabe, augwalibolo e tama po ola tolai. Tama agai augwalibolo e tama po wali, “Dage te Genuai Bidigo tempel beba asiąo,” wali. Te po obaso, augwali teba asai, awe, tama te Jehoiada agai te augwali dali te bomai po mu e tama olama, dąų wali. Agai te po me deli augwali dali polali, tama augwaligo te bomai po mu te Genuai Bidigo nogide polama, tama augwaligo te tigidali sę agai augwalibolo e tama sę yao wabo sę po te wali mu paibao wali. Tama nosali agai te Joas odasa asali, Ahasiago ogwa da, tama te asama, augwalibolo ola magasali.  
\v 5-8 Tama te Jehoiada agai augwalibolo e tama po ola mani, “Eno homugo dago te Joas aga king bidi nigilinao,” wali. “Tama teyu, eno homugo dagebolo eno e tama po ola mobao, te dago yabo sę po waibao. Eno koneanio, te ami soldia hani si augwaligo te sę ebo te Sabat bodolu side silama, tama augwali toma tubo dao, tama te gasa hani me deligo te augwaligo hasegeligi pelama, tama augwaligo te sę ma gagalama sę ebo da. Tiali goli, te Sabat bidibo bodoluba sabalobao, eno homugo te dage te sela nani dage tigidali te Genuai Bidigo tempel beba asao, te ami soldia bage augwaligo te Sabat bodolu side sę gagalobo, te ami soldia bage hani te augwaligo te kingo be tonaluyu, tama te me badu bage augwaligo te moni tų, te augwaligo te tų nogi te Sur, te tonalubo bage dao, tama te me badu hani augwaligo te me badu gasa ami soldia bidi dabe dolalubo tudi badu, augwaligo te obo banis moni tų tonalubo ami soldia bidi dabe tudi badu dolaluao. Dage tigidali asama, te Genuai Bidigo tempel beba asama, tama te Joas tonaluagasao. Tigidali ami soldia bidi dabe, dagego te bainat hwą ge tolama, tama te dagego tigidali pedai badu dolalua peyu, te Genuai Bidigo tempel be tomoba ilama, tama te king dali bugagia tonaluao. Tialima, te king aga te bulu me deliba pabo side, te dage meba aga dali hodobo peyu yao, tialima bidi me deli te aga page pąba asobaso da, teda dagego te asobo bidi ela muao,” wali.   
\p
\v 9 Te gavman ofisa bidi dabe augwaligo te pris Jehoiadago te wali po wali peyu, tama te Sabat bodolude augwaligo te sę silali ami soldia bidi dabe augwaligo selama, tama augwali toma tuabo homu ebadi, tama te ami soldia bidi dabe augwali hasegelama, tama augwaligo te sę gagalali, tama augwaligo tigidali te Jehoiada pageba te Genuai Bidigo tempel beba odasa asali.  
\v 10 Te king Devitgo polobadu muani sesemone badi, tama te me badu sabele dabe te Genuai Bidigo tempel be tomode munalubo. Tama te Jehoiada agai te augwaligo te nai dabe selama, te gavman ofisa bagebolo mawai.  
\v 11 Tama tialima, te ami soldia bidi dabe augwali pelama, te Genuai Bidigo tempel be bologobea sali obo tigidali pedai badu augwali dolalua pali. Augwali dolalubo te giliga dega sabo pedai badu gagalama dolalu, te ela pelama, te giliga asobo badu pedai badu usu nigi pali. Tama augwali te Genuai Bidiba nai ula mabo madigi te mabo alta te pedai badu pąde dolaluyu elama, tama augwaligo te bainat hwą ge tolama, tama augwaligo bugagia tonaluali.   
\p
\v 12 Ami soldia bidi dabe dola selama silali, tama tilama, te pris Jehoiadago te Joas odasa te buluba teda aselama, tama agai te Joas tobolude te kingo wiegi yai madi bulali. Tama me agai te Joasbolo te bomai po elalubo buku me deli agabolo mani. Tama nosali augwaligo te oliv wel te Joas agai toboluba gelali, te aga king bidi nigiliyu, te dąį ilama tama tiali. Tama te tigidali we bidi dabe augwaligo bugai homu pemene eyu, tama augwaligo nogo eleyu, e tama tiwai i wali, “Joas, dena homugo nage king bidi bidiyu, te bobobage sogo mu bidagameo,” wali.   
\p
\v 13 Te kwin we Ataliago te ami soldia bidi dabego me, te tigidali we bidi dabego me, augwaligo te i wabo te Ataliago odali, tama aga te aga be tagalama, te aga te Genuai Bidigo tempel beba pelama, te agai suali, ma te we bidi dabe augwali sisinama, bidali.  
\v 14 Aga pelama, sabaligi pali, tama agai te gesi noma king bidi te bobobage pos bras dolalubo madigi pąde dolaluyu bidibo suali, te Genuai Bidigo tempel be gesabidi dolo, e tama tiwai te king bidi dabego au ebo gilama yai. Tama agai suali, ma te ami gavman ofisa bidi me, tama me te biugel selama, te bu wabo bidi me, te augwali te king bidi pagede te pąde bidibo suali. Tama agai me te we bidi dabego augwaligo te pemene ebo sę suali, tama te me badu we bidi dabego te biugel selama, bu wabo suali. Tama tibaso, te Atalia aga bulubo ugwa selama, te pisa yali. Magi baso meni, agai haliga sębę dwai mu yali. Tama agai e tama i wali, “Dage dwai bidi dabe mu dao. Dagego dwai kolesaga mu yalio, tama dagego ena kwin we aiyaba elaluainu yalio,” tama i wali.   
\p
\v 15 Te pris bidi Jehoiada agai homugo te Atalia augwaligo aga te Genuai Bidigo tempel be elalubo pąde augwaligo te Atalia elamuo homu yali. Tama tialima, agai te gavman ofisa bagebolo e tiwai po wali, “Te Atalia tulama, tama agabolo e tama po walao, ‘Nage te ami soldia bidi dabe tomo agebeledu pao,’ wao. Tama te Genuai Bidigo be obo banis buluba teda pelama, tama tialima, te bidi me deli aga wali pobaso da, teda te bidi dagego ela muao,” Jehoiadago te po wai.  
\v 16 Tialima, augwaligo te kwin we te Atalia tulama, tama augwaligo te aga selasa, te kibu hos te kingo be obo banis tomoba pabo tųdu pali. Tama augwaligo aga te tomoba odasa pelama, tama augwaligo te Atalia aga tede ela muani.   
\s1 Te pris Jehoiada agai te we bidi dabe tau selama, augwali te Genuai Bidi naga wali pomainogo yali  
\r (2 Sto 23:16-21)  
\p
\v 17 Te pris bidi Jehoiadago te king Joas dali, te we bidi dabe dali, e tiwai po augwali dali wali, “Tama te dage te Genuai Bidi dali wadolagaselama, te gesi noma bomai pode dąų wagasiąo,” wali, tama augwali te augwali Genuai Bidigo hani we bidi naga bidimainogo yai. Tama me te agai te king dali, te we bidi dabe augwali dali, e tama po wai, tama augwaligo te augwa tomode te gasa bomai po me deli augwa digi dąų wali.  
\v 18 Tama nosali te we bidi dabe augwali te tibo god Balgo lotu beba pelama, tama te lotu be hųgia sąyani. Tama augwaligo te lotu wabo pesage te alta dabe me, tama me te tibo god Bal noma piksa me, pepedelama sąyani. Tama augwaligo te Matan elama isilali, te tibo god Balgo pris bidi, te alta dabe pąde elali. Tialima, te Jehoiada agai te ami soldia bidi dabe me badu te Genuai Bidigo tempel be tonaluabo soldia ami bidi dabe dąį ilali.   
\p
\v 19 Tama tialima, te Jehoiada dali, te ami gavman tobolu bidi ofisa badi, tama me te king tonalubo ami soldia bidi dabe me, tama me te kingo be tonalubo ami soldia bidi dabe me, augwaligo te Genuai Bidigo tempel bedu king Joas oda selama, tama king aga beba tagaligi pali. Tama te tigidali we bidi dabe augwali wali pali. Augwali sabalobo sogo, te Joas aga te augwaligo te tų te Ami Soldia Sunumi nogi wabo tųdu tomoba pelama, tama aga te king dugabo wiegi yai ni pedaide duga yali.  
\v 20 Tama tigidali we bidi dabe augwaligo te bugai homu pemene genuai mu eyu, tama augwali te Jerusalemde augwaligo nagamea pai haliga naga me elama bidali, magi baso meni, soldia bidi dabego te kingo be pąde te kwin we Atalia augwaligo elali.   
\p
\v 21 Joas aga te king nigilama, te king sę sali sogo, te sogo te aga kibu be nogo a olama, me badu nogo si, te 7 kibu be naga elaluali.   
\c 12  
\s1 Joasgo te Genuai Bidigo be ma dodolali po  
\r (2 Sto 24:1-14)  
\p
\v 1 Te Jehu aga te Israel hanigo king bidi nigilama bidibadi, agai kibu be nogo a naga olama, me badu nogogo si olama kibu be pai, te Joas aga te Juda hanigo king bidi nigilama bidali. Tama aga te Jerusalemde king bidi nigilama bidibadi, agai bidi sese si, 40 kibu beba usu nigi pali. Joas aga ida, aga nogi Sibia, te Berseba we dao.  
\v 2 Te Joas aga king bidibo sogo, tama agai Genuai Bidigo gedude te agai dwagi yai doloba pai kolesaga naga yali. Magi baso meni, te polalubo pris bidi Jehoiada agai aga te e tama dwagi yai kolesaga ola mabo sę yali.  
\v 3 Tiali goli, Joas agai te augwaligo tibo god dolo lotu po wabo bulu du pesage me dolobe, tama teyu, te we bidi dabego te lotu po wabo pesageba ugwaba pelama, tama augwaligo te tibo godiba te denami yai ofa nai ula mayu, tama me te dwagi yai denami pedalomainogo ebo te pauda augwaligo uluyu yali.   
\p
\v 4 Tama te Joas agai te pris bage i wali, tama augwali asobo si, tama agai augwalibolo e tama po wali, “Te pris bage dagego te tigidali mone selasa asao, te tigidali we bidi dabego te Genuai Bidigo tempel bede mubo takis mone dao, tama me te bidi dabego te bodolu ponaniba usu numainogo te augwaligo te mabo mone me, \x * \xo 12:4 \xt Sai 30:11-16\x*  
\v 5 tama pris bidi dabego te we bidi dabe augwaligo dagebolo mabo mone dagego bugagia tonaluao. Tama te sogo dagego suali madigi, te Genuai Bidigo tempel be te me badu pedai badu deli dolai baso da, teda dagego te mone selama, tama dagego te tempel be dolali dodolobo bidi abelao,” wali.   
\p
\v 6 Tiali goli, me badu nosali kibu bede, agai te king bidi bidibadi, agai e tama kibu be bidali, te 23 kibu be bidali, te Joasgo suali, ma te pris bage augwaligo te sę me deli ebe, te Genuai Bidigo tempel be dodolobeo.  
\v 7 Tama tibaso, te king Joasgo te polalubo pris Jehoiada dali, te gasa pris bidi dabe dali, augwali asao olama i wali, tama augwali asobo si, tama Joas agai e tama po augwalibolo wali, “Magi baso dagego te Genuai Bidigo tempel be me badu pedai dologa pali dodolisiąma tonalubawe? Tama teyu da, teya dagego te we bidi dabe augwalide te sabo mone te dagego munu ma tonalugio. Menio. Dagego te tonalubo mone te eno bidi me deli eno digi dąį ilama, tama dagego te bidibolo maiyagameo. Tama tilama, te tempel be me badu pedai dologa pali dodolomainao,” po wali.  
\v 8 Te pris bidi dabe augwaligo te Joasgo wali po usu dao wali, tama augwaligo augwa po minama, po me deli dąų weyu, e tama po olama dąų walali, tama augwaligo te we bidi dabe dali mone me sogobeo wali, me te augwaligo te po wali, “Te Genuai Bidigo tempel be dologa pai baso, dodolobo sę me te dago me tonalugobeo,” wali.   
\p
\v 9 Tama nosali Jehoiadago te halobage me deli selama, tama agai te halobagede dedage me deli nigilama, tama gedu ge gagawai nigali. Tama tilama, te halobage te alta pąde muani. Tama te we bidi dabe te tempel be bologobea sali obo tomoba te we bidi dabe augwali aselama, bagula bilibo sogo, tama augwaligo te halobage te alta elalubo madi dolo nogo badu munalubo suali. Te pris bage augwaligo te pabo tųde tonaluali, magi baso meni, augwaligo te we bidi dabego muagasobo mone augwaligo sainogo, tama tilama augwaligo te mone selama, te halobageba bulali.  
\v 10 Tama te pris bidi dabego subo sogo suali, ma te halobage te monego pągąwainogo yali tama tibaso, te pris bage augwaligo te king bidi dali, te tobolu pris bidi dali, te augwali sigo te mone dodolobo kuskus bidi asao olama, po ola tolali. Tama te kuskus bidi augwali si aselama, tama te mone begde bulama, tama sela pelama, tama te mone nedigi pali.  
\v 11 Tama augwaligo neda silama, tama te augwaligo Genuai Bidigo tempel be dologa pali dodolomainogo sę tonalubo bidi dabe augwalibolo te mone menama, tama augwaligo te be sę ebo kamda bidi abelali.  
\v 12 Tama te bidi dabe augwaligo te masigi be sę ebo koneai bidi me, me te masigi togobo koneai bidi me, tama me te ni name me, me te masigi me, te sę yabo doado bage abelebo bidi dabe me tama abelali. Tama me te gasa nai dabe me te nai dabego augwaligo te sę ebo tau sabo da, tama augwaligo te deli monego naga abelebo dao.   
\p
\v 13-14 Te mone augwaligo te Genuai Bidigo bede sabo da, te deli sę naga da, te deligo naga te Genuai Bidigo be dologa pali dodolobo dao. Tama teyu, augwaligo te mone selama, te monego te silvago nigali te dis pou me, me te dwasianu plet pou me, te monego augwaligo abelebo munu me usu egobeo, me te bu wabo nai biugel me, tama me te augwaligo lam sole sula sabo nai me. Tama te me badu te gasa doado bage dabe augwaligo te golgo me, me te silvago me nigali nai dabe me, te nai dabego te Genuai Bidigo tempel be tomode sę ebo nai naga dao. Te nai dabe augwaligo te tempel be ma dodolabo monego abelebeo, te tedali mu dao.  
\v 15 Te sę tonalubo bidi dabe augwaligo te monede me subigila kolesaga elama, augwaligo wi tubo meni, tama teyu, te polalubo tobolu bidi dabe augwaligo te mone tonalubo bidi dabe augwali dali te monego dagego magi sę me yaliwe olama, augwaligo me hanalubeo.  
\v 16 Tiali goli, te we bidi dabe augwaligo te God dolo mu augwa te dwai kolesaga yali sęgę dodoluyu ofa mabo mone me, me te sęgę sela sąbo ofa yali, te tibo mone augwaligo te Genuai Bidigo tempel be dologa pali dodolobo mone mubo halobagede augwaligo te mube. Augwaligo te tobage ofa mone te pris bidi dabe augwalibolo naga dolo mani. \x * \xo 12:16 \xt Prs 7:7\x*   
\s1 Siria hani king bidigo te Juda hani dali boi hwįainogo homu yali po  
\p
\v 17 Te Juda dabego king bidi Joasgo te Genuai Bidigo tempel be dodolabo bidi augwali dąį ila silali, tama te nosali te Siria king bidi Hasael aga ami soldia bidi dabe dali augwali aselama, tama te taun Get hanude boi hwįani. Tama te augwaligo te taun Get bage augwali aiyaba elaluama, tama augwaligo te Get hanu sali. Tama tialima, augwali ma begegi soyu, te Jerusalemba boi hwįgi painu pali.  
\v 18 Tiali goli, te king Joasgo agai te homu yali, ‘Te king Hasaelgo aga ami soldia bage dali aselama, te eno hani dali te e Jerusalem taunba hwįagasigio,’ homu yali. Tama teyu, te Joas agai te king Hasaelbolo te olo mabo doado bage tolali. Tama te Joasgo te aga wąį nǫųgo tigidali doado bage aga naga sai, te king Jehosafatgo doado bage me, tama me te king Jehoramgo doado bage me, tama me te king Ahasiago doado bage me, augwaligo te Genuai Bidiba dąį ilai doado bage dabe da, tama te king Joas agai me te tigidali doado bage te Genuai Bidiba dąį ilali me, tama me te agai te tigidali gol me, te Genuai Bidigo tempel bede te mone mubo habadu muani goli me, me te kingo bede muani gol me agai sali. Tama agai te nai dabe selama, te king Hasaelbolo olo mu te bugai homu pemene iliyu mani. Tama te king Hasaelgo te doado bage dabe sali, tama tibaso, agai te Jerusalem bage dali hwįsąma, sula taga pali.   
\p
\v 19 E te king Joasgo te gasa sę dabe yali po dabe elalubao, te gasa bukude elalubao, te buku augwaligo nogi weyu, Juda Hanigo King Bidi Dabego Yali Sę Po Elalubo Buku dao.  
\v 20-21 Me sogo deli te Joas aga sę ebo gavman ofisa bidi dabe augwaligo te Joas elabo po sisinama, minama dąų wali. Tama augwali me sigo, me nogi Josakar, Simeatgo ogwa da, tama me te Jehosabat, aga te Somergo ogwa da. Tama te augwaligo te Joas aga te Sila buluba aiyaba pabo tųde be me delide bidibadi, augwaligo te Joas elama, isilali. Te be te Jerusalem elalubo pedai badu te bulu odogo elalubo madigi be teba naga maganama be sę eyu yai. Joas aga isali. Tama augwaligo aga te aga wąį nǫųgo gų pageba pubaligi pai, te Devitgo moni hanude, tama te aga ogwa Amasia, agai aga ayago sę yali silide tama te king nigilama, sę yali.   
\c 13  
\s1 Joahas aga te Israel hanigo king bidi nigilali  
\p
\v 1 Te Ahasiago ogwa Joas aga te Juda hanigo king bidi bidiyu, tama kibu be te bidi sese deli olama, te ugwadu nogogo sela kibu be silali. Tama te sogo te Jehugo ogwa Joahas, aga te Israel hanigo king bidi nigilama, bidali. Tama aga te Samaria bulude king bidi nigilama bidali kibu be te 17 kibu be usu nama bidali.  
\v 2 Tama agai te king Jeroboamgo yali dwai kolesaga tiwai te agai me te Genuai Bidi gedude dwai kolesaga yali. Polobadu te king Jeroboamgo te Israel hani kegelama, tama teyu augwaligo te Genuai Bidigo gedude augwaligo dwai sęgę sabo kolesaga yali. Tama tialima, te Joahas agai me te king Jeroboamgo yali gilama deli kolesaga naga yali, tama agai te dwai kolesaga me tagalobe. Mu menio.  
\v 3 Tama tialima, te Genuai Bidigo umabo sogo mu te Israel hani dali wado po weyu yali, tama teyu, agai king Hasaelgo augwali dali boi hwįmainu sula tagalali, te Siria king bidi, tama umabo sogo augwali asama, te Israel hani dali boi hwįagasali, tama te Israel hani augwali aiyaba elaluali. Tama nosali Benhadat, aga te Hasaelgo ogwa, tama te bidi aga Siria hanigo king bidi nigilama bidali, tama agai me te Israel hani dali naga boi hwįyu, tama aiyaba naga elaluali.   
\p
\v 4 Tama tialima, te king Joahas agai te Genuai Bidi dolo gedu haluasa po wali, tama Genuai Bidigo te Joahasgo gedu haluasa wali po odali, magi baso meni, Genuai Bidigo konea pali, te Siria bage augwaligo te Israel bage aiyaba elaluama, mu dolobo sę ebaso.  
\v 5 Tama Genuai Bidigo te Israel bidi dabe tau sabo bidi me deli dąį ilali, tama te bage augwali te bidigo te Siria hanigo nogode ma dobola sali. Tama tialima, te Israel bage augwali augwa bulude bugagia ma bidali, te polobadu bidali gilama ma bugagia bidali.  
\v 6 Tiali goli, augwa te sęgę sabo dwai kolesaga sela sąbe. Te polobadu te king Jeroboamgo hani bidiyu yali gilama, tama te Israel hani augwaligo me augwali wali pabo tagalobeo. Menio. Augwaligo te dwai kolesaga ebo sę me eduali. Tama augwaligo te tibo god te we Asera noma nigilama, te Samaria bulude muani piksa noma, augwaligo munu me sela sąbeo.   
\p
\v 7 Tama te sogo te king Joahas agai te ami soldia bidi umabo mu meni badi, magi basowe, te Siria hani augwaligo te Israel hanigo ami soldia bidi dabe umabo mu ela muai dao. Tigidali sogo te Siria hanigo augwali dolobo sę mu yali, tialima megi te Israel hani augwaligo ami soldia bidi dabe te bidi sese si olama, nogo si, 50 tama bidi dabe naga te hos kibude dugulama, tama boi hwįbo usu elalubo. Tama tialima, augwaligo te boi hwįbo karis nai nogo si naga bidali, me te gasa ami soldia bidi dabe te 10,000 tǫdu pabo ami soldia bidi naga bidali.   
\p
\v 8 Te king Joahasgo agai te gasa sę yali po tigidali dao, te gasa bukude elalubaso, augwaligo te buku nogi e tama wabo da, Te Israel Hanigo King Bidi Dabe Augwaligo Haniani Sę Yali Po Elalubo Buku dao. Te po elalubo buku te kingo te bomai sę yali po tigidali elalubao.  
\v 9 Tama nosali te king Joahas isali, tama augwaligo te Samaria bulude aga pubulali. Tama te aga ogwa Jehoas, tama agai te aga ayago yali sę agai selama, tama king bidi nigilama sę yali.   
\s1 Jehoas aga Israel hanigo king bidi nigilali  
\p
\v 10 Tama te Joas aga Juda hanigo king bidi nigilama bidali, kibu be e tama pai, te 37 kibu be silai, Jehoas, aga te Joahasgo ogwa da, aga te Israel hanigo king bidi nigilama bidali. Tama aga te Samaria bulude king nigilama bidali kibu be e tama pai, te 16 kibu beba usu nigi pali.  
\v 11 Tama agai dwai sęgę sabo dwai kolesaga Genuai Bidigo gedude te king Jeroboamgo yali kolesaga tiwai naga yali. Polobadu te Jeroboamgo te Israel hani kegelama, tama augwaligo te Genuai Bidigo gedude te dwai sęgę sabo kolesaga yali. Tama megi me, te Jehoasgo me agai te Jeroboamgo yali gilama tiwai te dwai sęgę sabo dwai kolesaga deli naga yali. Tama agai te dwai kolesaga me tagalobe. Mu menio.   
\p
\v 12 Te king Jehoasgo te tigidali te haniani sę yali po da, te gasa bukude elalubo dao, augwaligo te buku nogi ebo da, Israel Hanigo King Bidi Dabe Augwaligo Haniani Sę Po Elalubo Buku da wabo dao. Te e bukude te Israel hanigo te Juda hanigo king bidi Amasiago hani dali te boi hwįbode te king Jehoasgo te haniani bomai sę yali po elalubo buku dao.  
\v 13 Tama nosali te king Jehoas isali, tama augwaligo aga te Samaria bulude te Israel hani dabego king bidi isibo side pubalobude gų pagede augwaligo aga pubulali. Tama te gasa Jeroboam te aga sabi bidigo tama aga king nigilama, te king Jehoasgo sę yali silide agai selama, sę yali.   
\s1 Elisa isali po  
\p
\v 14 Te Jehoas aga king nigilama bidibo sogo, Elisa aga monu dabe bidiyu, tama aga gasi sali. Tama te pąde aga isabo ąǫ ebadi yaide, tama te king Jehoas aga pelama, sugi pali. Tama king Jehoasgo Elisa aga sulama, homu dene eyu, tama aga gela wali, tama agai agabolo e tama po wali, “Eno aya, eno aya, nage bomai bidi, nago da Israel tau sai bidi dao, nage da, te boma pai boi hwįbo hos kibu me, te karis nai me tiwai mu dao,” wali. \x * \xo 13:14 \xt 2 Kin 2:12\x*   
\p
\v 15 Tama Elisago agabolo e tama po wali, “Nage pelama, naga enesigi selasa asao,” wali. Tialima, Jehoas aga pelama, tama te enesigi selama, tama magasali.  
\v 16 Tama Elisago agabolo e tama po ola mani, “Te enesigi selama, tama enainu tama te ene enesigi balibiba tulama dolaluao.” Tama te kingo tama tiali, tama te Elisago nogo te kingo nogo ugwadu dai badu agai nogo muani.  
\v 17 Tama Elisago kingbolo e tama po wali, “Megi nago te dwasianu windo tų nage pelama, dagi pelama, tama nago te giliga asoboba tonaluao.” Tama tialima, te king Jehoasgo te enesigi balibi petegelama, tama pelama, aga pelama, te dwasianu windo tų dagi pali. Tama Elisago te kingbolo te po wali, “Tama nago enesigi balibi dolama, tama te pelama ene enigi pao.” Tama te king Jehoasgo agai wali po selama, tama tiali, tama Elisago i wali, “Te ene, te Genuai Bidigo ene dao. Te enego te Siria hani aiyaba elaluaibao. Tama tialima, te sogo te nago Siria hani dali boi hwįbo sogo, te augwa te Afek taunde boi hwįaibao, tama nago augwali mu silaibao,” wali.   
\p
\v 18 Tama Elisago te kingbolo e tama po wai, “Te ene dabe sao,” tama kingo te ene dabe selama, tama te Elisago e tama po wali, “Te ene dabego te tǫba elao,” wali. Tama tibaso, te king Jehoasgo te ene selama, te tǫba sela sogo tǫba elali.  
\v 19 Te profet bidi Elisago sulama, tama agai wado po weyu, tama kingbolo e tama po wali, “Nago homugo te enego a naga sogo, ma a olama, me badu nogo kibisa wagi solama sogo tǫba elai meniwe? Tialima, nago tama tigi sogo da, teda te nago te Siria hani te nago usu mu elama, aiyaba elalugi da. Tiali goli, nago megi da, nago augwali sela sogo naga aiyaba elaluaibao, “wali.   
\p
\v 20 Nosali Elisa aga isali. Tama augwaligo aga tigi selasa pelama, te augwaligo masigigo te isibo bidi muainogo dedage nigali gų pageba pubaligi pali.  
\p Tigidali kibu bede te Moap hani bidi dabe me badu aselama, te Israel hani dabe dolagasali.  
\v 21 Me sogo deli te Israel hanigo te bidi me deli isai bidi te gų pageba pubulainu edubadi, tialima augwaligo suali, ma te Moap hani bidi dabe me badu asobaso, tama augwaligo te isali bidi tigi polo tama augwaligo te Elisa pubulali digi te Elisago dili munalubo madigi augwaligo te isali bidi tigi te gų page dedageba polo subigila munama, tama taga pali, tama augwali wi pela silali. Tama te isali bidigo tigi te Elisago dili munalubo madigi dagana sigi pali, tibaso te isali bidigo mobo bidi aga tigiba ma begasa asobo si, tama te isali bidi ma hoda holali.   
\s1 Siria hani augwaligo te Israel hani dabe dali ma boi hwįani po  
\p
\v 22 Joahasgo tigidali kibu bede, Jehoas aga aya, aga te Israel hanigo king bidi bidali sogo, te king Hasael, aga te Siria bidigo king bidi bidai, tama agai te Israel hani dali boi hwįagaselama, tama augwalibolo sęgę madu geani.  
\v 23 Tiali goli, Genuai Bidigo te Israel hani augwali hobede mu yali, tama tibaso, aga bugai homu pemene augwaliba yali. Agai te polobadu te Abraham dali, te me te Aisak ebadi, me te Jekop ebadi, te bage dali te agai bomai po bodolu selama, dąų waliba gogone peyu tama tiali, tama teyu, agai te Israel bage augwali tau selama, tama agai augwali munu me dolobe. Tama agai homugo te Israel hani sela sąnama, tama augwali te aga gesabidide te augwali digibulu bidigi pabo agai hagela homu yali.   
\p
\v 24 Tama nosali te king Hasael isali, tama te Benhadat, aga ogwago, te aga ayago yali sę selama, tama aga aya bidali silide bidiyu, tama aga te Siria hanigo king bidi nigilama bidali.  
\v 25 Awe, tama te Jehoas, aga te Israel hanigo king bidi dali, tama te aga ami soldia bidi dabe dali, augwaligo te Siria king bidi Benhadat dali, te aga ami soldia bidi dabe dali, augwaligo augwali dali boi hwįgi pali. Tama te king Jehoasgo te king Benhadatgo aga soldia dali aiyaba elalualima, tama augwaligo te Siria hanigo sali taun augwa ma sali, te taun polobadu te Israel hanigo taun te polobadu te king Jehoasgo aya Joahas bidali sogo te Siria hanigo sai taun megi te augwa ma sali. Jehoasgo te king Benhadat aga te sela sogo aga aiyaba elaluali.   
\c 14  
\s1 Te bidi Amasia aga te Juda hanigo king bidi nigilali  
\r (2 Sto 25:1-24)  
\p
\v 1 Jehoas agai te kibu be si pali, aga te Joahasgo ogwa da, aga te Israel hanigo king bidi bidali, Amasia, aga te Joasgo ogwa da, tama aga Juda hanigo king bidi nigilama bidali.  
\v 2 Agai kibu be te 25 kibu be elalubadi, te aga king bidi pedelali, tama aga te king bidi nigilama, te Jerusalemde bidali kibu be e tama da, te 29 kibu beba usu nigi pai da. Aga ida, aga nogi Jehoadin, te we te aga bulu te Jerusalem moni taun bage we dao.  
\v 3 Te king Amasia agai te Genuai Bidigo gedude dwagi yai kolesaga yali, tama tialima aga aya Joas agai tama sę yali, tiali goli agai aga wąį nǫųgo te king Devitgo yali gilama te dwagi yai kolesaga gagawai me ebe, Devit agai yali gilama.  
\v 4 Magi baso meni, te king Amasia agai te augwaligo te tibo godiba lotu po wabo pesage te king Amasiago me dolobeo. Tama tibaso, te tigidali we bidi dabego me sę eyu bidali, te augwaligo te lotu po wabo bulu du pesageba pelama, tama augwaligo te tibo godiba te denami yai ofa nai ula mayu, tama me te wiegi yai hano holama denami ilibo pauda ulubo sę iduali.   
\p
\v 5 Tama te sogo king Amasiago te Juda hanigo bulu bomo mu elama tonaluali, agai tama po wali, “Te eno aya elali gavman ofisa bidi elama, isilao,” wali, tama augwaligo augwali elama, isilali.  
\v 6 Tiali goli, agai te gavman ofisa bidigo wai dabe da me elebe. Menio, tama agai te bidimainu sulama tagalali. Agai Genuai Bidigo bomai po te Mosesgo te polobadu Israel we bidibolo mawai, te bomai po elalubo bukude sulama, wali pali. Te Genuai Bidigo po e tama tiwai, “Tialima, bidi me deligo waigo kolesaga geda mugi sobaso da, teda dagego te wei begelama, te aga ida aya ela mugio. Tama tialima, aga ida ayago kolesaga geda muai baso da, teda dagego te ida aya naga dagego ela muao. Dagego te kolesaga wei ponoyu, te augwaligo wai puluba ela mugio. Bidigo kolesaga dwai ebaso da, te aga deli naga ela muao,” te asęani po te Amasiago wali peyu yali. \x * \xo 14:6 \xt Bom 24:16\x*   
\p
\v 7 Tama me sogo deli te king Amasia dali, te aga ami soldia bidi dabe dali, augwaligo te Idom hani te 10,000 ami bidi dabe dali boi hwįgi pali, te Idom bulu odogo malu te umabo tamu elalubo madi hwįani. Tama augwaligo te Idom hani aiyaba elaluama, tama augwaligo te taun Sela sali. Tama te king Amasiago te taun nogi poali, te taun nogi Joktel. Tama te megi tama e po asębo sogo me, te augwaligo te king Amasiago te gesi nogi poali te nogi naga wabo dao.   
\p
\v 8 Tama te king Amasiago te me badu bidi dabe te king Jehoas pageba tagala palali, te bidi te Israel bagego king bidi da. Te king Jehoas te aga aya te Joahas, te Joahas aga wąį nǫų te king Jehu dao. Tama te tagala palali bidi dabe augwali pelama, te king Jehoas pageba sabolama, tama augwaligo agabolo e tama po ola mani, “Te king Amasiago te agai homugo te Israel bage dage dali hwįaibao walio,” wali.   
\p
\v 9 Tialima, te king Jehoas te po wei ponoyu, Amasiabolo e tama po page po digi po begelama pusali, “Te Lebanon bulude, te sesane yai nosaigo te po ola tolali, te moni ni me delibolo, te ni nogi bǫ, tama agabolo e tama po wali, ‘Eno homugo nago te wegi te eno ogwa me magameo, ma aga si selama, tama bidimaio,’ wali. Tiali goli, nosai te bulu uni hasa me deli te pedai badu biliyu, tama te nosai te uni hasago agayali, tama te nosai agalama dolali.”  
\v 10 Te king Jehoasgo te po digi po begelama pusali, tama agai king Amasiabolo e tama po wadolama pusali, “Eno koneanio, nago te Idom hani augwali dali tama te nago boi hwįnama, tama augwali aiyaba elaluai dao. Tama tialima, te nago bugai homu pemene mu gana peyu, tama nago naga digi naga nogi ugwaba siyu, te wabao,” wali. “Nage genuai nogi sali, te nago te boi hwįanide saliąo,” wali, “tama tialima, megi te nage naga bulude bugagia bidiyu, tama nage bugai homu pemene yao. Tiali goli, te nago da dali boi hwįainogo ebadi, te menio. Naga digi dolabuo, nago tama teyu, te Juda hani augwali me dolabuo,” tama wali.   
\p
\v 11 Tiali goli, te king Amasiago homugo te king Jehoasgo wali po odobe. Tama tibaso, te king Jehoas dali, te Israelgo ami soldia bidi dabe dali, augwali pelama, te moni hanu Betsemesba pai, te Juda hanigo taunba, tama augwaligo te king Amasia dali, te aga ami bidi dabe dali, hwįgi pali.  
\v 12 Tama augwaligo boi hwį hwį pelama, tama te Israel hani ami soldia bidi dagego te Juda ami soldia bidi dabe augwali aiyaba elaluali, tama te Juda dabego ami bidi dabe augwali augwa buluba wi pela silali.  
\v 13 Tama te king Jehoasgo te king Amasia nogo tulama, tama aga hadabu ilali. Tama nosali, te king Jehoas dali, te aga te Israel ami bidi dabe dali, augwaligo te Betsemes hanu tagalama, tama augwali te Jerusalem taunba pali. Tama augwaligo te taun bologobea sali moni masigi obo banis aluali, tama augwaligo te Efraim Pabo Tų badu gagalama, agalu pelama, te tų me nogi te Kona, te tųba usu nigi pali. Tama augwaligo te obo banis aluali bobobage dąį usu, te 200 mita dąį usu tama aluali.  
\v 14 Tama te king Jehoas aga te Jerusalem taun tomoba pelama, tama agai te taun tomode muani gol me, te silva me tigidali sali. Tama te agai te pou dis me, tama me te dwasianu plet pou me, te me badu te Genuai Bidigo tempel bede muani doado bage me, tama me te tigidali doado bage me, te kingo mone mubo madigi te habu badu muani doado bage me, tigidali te agai naga sali. Tama me te Juda hanigo genuai bidi dabe hadabu ilama, tama te Jehoasgo te king Amasiabolo e tama po wali, “Amasia, nago da Israel hani dali ma boi hwįainu homu kone paligio. Tialima, nago tama ma teyu da, teda te eno nago e genuai bidi dabe ela muaibao.” Agai te po tama ola silali, tama agai te genuai bidi dabe dali, te tigidali sali doado bage dali selama, tama te Samaria buluba ma geasa pali.   
\s1 Te king Jehoas isali po  
\p
\v 15 Te king Jehoasgo agai te gasa tigidali sę yali po dao, te gasa bukude elalubo, augwaligo te buku e tama nogi wabo da, Te Israel King Bidi Dabe Augwaligo Yali Sę Po Buku. Tama te bukude po tigidali te bomai sę agai yali po dao, tama agai te boi hwįani, te Israel hani dabe augwaligo te Juda dabego king bidi Amasia dali hwįani po.  
\v 16 Tama nosali te king Jehoas isali, tama augwali aga tigi te Israelgo king bidi pubalubo gų pageba te augwali Samaria buluba pubaligi pali. Tama aga ogwago nogi Jeroboam, tama agai te aga ayago yali sę selama, tama aga king nigilama, te bulude bidali.   
\s1 Te king Amasia isali po  
\r (2 Sto 25:25-28)  
\p
\v 17 Te Israel hanigo te king Jehoas isali, tiali te Juda hanigo king bidi te Amasia aga te 15 yia bidama, tama aga me isali.  
\v 18 Te king Amasiago agai te tigidali gasa sę yali po, te po dabe te gasa bukude elalubo. Augwaligo te buku nogi weyu, e tama wabo da, te Juda Dabego King Bidi Dabego Yali Sę Po Elalubo Buku dao, wabo dao.  
\v 19 Te king Amasia aga te Jerusalemde bidibadi yaide, tama te me badu bidi dabego augwaligo te king Amasia aga ela muabo po minama, dąų wali. Augwaligo te tama tiabo po wali te agai odali, tama tibaso, aga te Lakis hanuba wi pai. Tiali goli, aga te boi bidi dabe augwaligo te me badu bidi dabe tagala palama, tama augwali aga wali pelama, te Lakis taunba sabolama, tama augwaligo te king Amasia ela muani.  
\v 20 Tama augwaligo aga tigi selama, te kibu hosba munama, tama augwaligo te Jerusalem taunba ma selasa asali. Tama augwaligo aga te aga wąį nǫų pubalubo gų pagede augwaligo aga tede pubulai, aga wąį nǫų Devitgo taunde.  
\v 21 Tama te nosali Juda hani augwaligo te gasa bidi me sali, te bidi nogi Usia, agai nogi me te Asaria, tama augwaligo te bidi aga dąį ilama, tama te king bidi nigilali. Te bidigo aga aya Amasiago sę yali pesagede bidiyu, sę yali. Usia agai kibu be te nogo si olama, te sągą a olama, te me badu sągągo kibisa deli wagi solama, te 16 kibu bede aga king bidi nigai.  
\v 22 Tama nosali me badu sogo te aga tudi badu te king bidi nigilali, tama agai boi hwįgi pelama, tama te Elat taun te boi bidi dabego nogode elalubadi ma sali. Tama te taun te me badu pedai badu dolali, te agai me dodolali.   
\s1 Te gasa Jeroboam te bidi te Israel hanigo king bidi nigilali  
\p
\v 23 Te king Amasia te Joasgo ogwa da, tama agai kibu be te 15 kibu be yai, te Juda hanigo king bidi tama kibu be bidali, Jeroboam, Jehoasgo ogwa, aga te Israel hanigo king bidi nigilama, pedelali. Tama aga te Samaria bulude te king bidi nigilama bidiyu, tama te kibu be te bidi sese si olama, te deli, te 41 kibu beba usu nama bidai dao.  
\v 24 Tama agai kolesaga te aga sabi bidi Jeroboamgo yali dwai kolesaga tiwai agai me te Genuai Bidi gedude te dwai kolesaga yali. Polobadu te king Jeroboam te aga sabi bidigo te Israel hani kegelama, tama augwaligo te dwai sęgę sabo kolesaga te Genuai Bidigo gedude dwai mu yali. Tama megi te king nigali sabi bidi te Jeroboamgo me, te hasia king Jeroboamgo yali deli kolesaga tiwai naga te sęgę sabo kolesaga eyu, tama bidali.  
\v 25 Te Jeroboam aga king bidi nigisąbadi, te sogo te boi bidi dabe augwaligo te Israel hanigo umabo tǫ mu te boi bidi dabego sai. Tialima, megi te king nigali Jeroboam agai boi hwįnama, tama te tǫ dabe tigidali ma sali, te tǫ sabo gagalali te not badu te taun Hamat pabo tųdu gagalama, sesa pabogo te saut badu te sigi ąį ge elalubo pesageba usu nigi pali, te ąį nogi Detsi wabo da. Tama te king Jeroboamgo agai te tǫ ma sabo yali kolesagago te Genuai Bidi Godigo wali poba usu nigi pali, Israel hanigo Genuai Bidi. Te tama tiali sę te profet bidi Jonago pedauwalidu wali poba usu nigi pai, te Jona aga aya te Amitaigo ogwa dao. Te profet bidi Jona aga te taun Gathefer bulu bidi deli dao. \x * \xo 14:25 \xt Jna 1:1\x*   
\p
\v 26 Genuai Bidigo suali, ma te Israel hani augwa boi bidi dabego te augwali tigiba genuai sęgę mu mabo sę eyu, tama augwali mu silibo homu ebo koneani. Tama tialima, te deli deli bidi naga bidada pali. Tama me te augwali tau sabo bidi me deli meni.  
\v 27 Tama te Genuai Bidigo te Israel hani augwali mu silaibao po me wai menio, tama augwaligo nogi me tigidali silaibao po me wai menio. Tama teyu, agai te king Jeroboam dąį ilali, Jeroboam aga te Jehoasgo ogwa da, te bidigo bomo elama, te Israel hani te boi bidigo nogode augwali ma somainogo dąį ilai.   
\p
\v 28 Te po te king Jeroboamgo te gasa tigidali haniani sę yali po dao, te po te gasa bukude te elalubao. Te buku augwaligo e tama nogi wabo da, Te Israel Hanigo King Bidi Dabego Yali Sę Po Elalubo Buku dao wabo dao. Te e bukugo te king Jeroboam agai te bomai sę yali po me, me te boi hwįnama te taun Damaskus dali, te taun Hamat dali si ma sali po elalubo buku dao. Polobadu te Juda hani augwaligo te Hamat taun tonaluai dao.  
\v 29 Tama nosali te king Jeroboam isalio, tama aga ogwa te Sekaraiago aga ayago yali sę agai selama, tama aga king nigilama bidai dao.   
\c 15  
\s1 Usia te Juda hanigo king bidi nigilali  
\p
\v 1 Te king Jeroboam aga te Israel hanide te king nigilama bidali kibu be te 27 kibu be silai, tama te sogo Usia, Usia aga te king Amasiago ogwa dao, te Usia aga te Juda hanigo king bidi nigilama bidali. Te Usia aga me nogi Asaria.  
\v 2 Agai kibu be te 16 kibu be silama, aga king bidi nigali, tama aga king bidi nigilama, te Jerusalemde bidali kibu be te 52, tama kibu be usu nigi pai. Aga ida nogi Jekolia. Te we aga bulu te taun Jerusalem bulu we deli da.  
\v 3 Te king Usia agai te Genuai Bidi Godigo gedude agai te dwagi yai kolesaga yali, tialima te aga aya te Amasiago yali kolesaga tiwai gilama yali.  
\v 4 Tiali goli, te king Usia agai te augwaligo te tibo god dolo lotu po wabo bulu du pesage me dolobeo. Tama teyu, te we bidi dabe augwaligo te tibo god dolo te denami yai ofa nai me, tama me te dwagi yai hano holoyu, denami naga pedalumainu ebo pauda ulubo sę me iduali.  
\v 5 Me sogo deli te Genuai Bidigo te king Usia tigide te oiyabe gasi pedalali. Tama te oiyabe gasi te mena tama polo usu elama siligobe. Tama te king Usia aga te king bidi bidibo be tagalama, tama te aga gasa tedali beba pelama, bidigi pali, tama aga ogwa, te Jotamgo, agai te king sę gagawai eyu, tama te king be tonaluyu, tama me te Juda hanigo bulu tonaluyu, tama teyu, te king Usia isiboba usu nigi pai.   
\p
\v 6 E po te king Usiago agai te tigidali gasa sę yali po da, te po te gasa bukude elalubo dao, tama augwaligo te buku e tama nogi ebo da, Juda Hanigo King Bidi Dabego Yali Sę Po Elalubo Buku dao, wabo dao.  
\v 7 Tama te king Usia isibo sogo, tama augwaligo aga tigi sela pelama, te aga wąį nǫų pubalubo gų pageba pubulali, te Devitgo taunde. Tama tialima, te megi aga ogwa, Jotamgo, te aga ayago sę te agai selama, tama aga king mu nigilama, king sę mu yali. \x * \xo 15:7 \xt Ais 6:1\x*   
\s1 Te Sekaraia aga te Israel hanigo king bidi nigilali  
\p
\v 8 Te Usia aga te Juda hanigo king bidi nigilama bidali kibu be te 38 kibu be, te sogo Sekaraia, aga aya te namba 2 king bidi Jeroboamgo ogwa da, te bidigo ogwa Sekaraia aga te Israel hanigo king bidi nigali. Tama aga te Samaria bulude king bidi bidali te polua nogo a olama, me badu nogo kibisa nogo deli wagi solama polua naga bidali.  
\v 9 Tama te king Sekaraiago te Genuai Bidigo gedude agai me dwai kolesaga yali, te aga wąį nǫų dabego yali kolesaga tiwai naga yali. Agai te dwai sęgę sabo dwai kolesaga yali, te hasia king Jeroboamgo yali tiwai naga yali. Polobadu te king Jeroboamgo te Israel hani agai kegelama, te dwai kolesaga eyu, tama te augwaligo Genuai Bidigo gedude te sęgę sabo kolesaga genuai mu yai. Tama te king Sekaraiago agai me te king bidi dabego yali kolesaga tiwai ma yali.   
\p
\v 10 Tama te Salum, aga te Jabesgo ogwa da, Salum dali, te me badu bidi dabe dali, augwali sisinama, tama augwaligo te Sekaraia ela muainogo tų me deli gegali. Tama nosali te Salumgo te tigidali we bidi dabe gesabidide Sekaraia ela muani, tama te Salum aga te king bidi nigilama bidali.  
\v 11-12 Tama agai te kolesagago te Genuai Bidigo te polobadu wali poba usu nigi pali. \f + \fr 15:11-12 \ft Te 2 King 10:30 tede suao.\f* Polobadu Genuai Bidigo te king Jehubolo e tama po wai, “Tama eno te bidi dabe te nago hanigo king bidi naga nidigi peyu, tama te nago me si me si tama nani wąį nǫųba usu nigi pomainu sula tagalaibao.” Te king Sekaraiago te tigidali te gasa haniani sę yali po, te gasa bukude elalubo, te buku augwaligo e tama nogi wabo da, Te Israel Hani King Bidi Dabego Yali Sę Po Elalubo Buku da wabo dao. \x * \xo 15:11-12 \xt 2 Kin 10:30\x*   
\s1 Te bidi Salum te Israel hanigo king bidi nigilali  
\p
\v 13 Te Juda hanigo king bidi Usia agai kibu be te 39 kibu be te king nigilama bidai, tama te sogo Salum, Salum aga te Jabesgo ogwa da, aga te Israel hanigo king bidi nigali. Tama aga te Samaria taunde king sę eyu, polua deli naga bidai.  
\v 14 Tama te sogo te bidi te Menahem, aga aya te Gadigo ogwa, aga te Tirsa hanu tagalama, tama aga te Samaria hanuba pali, tama agai te king Salum ela munama, tama Menahem aga king nigilama bidali.  
\v 15 Te king Salumgo te gasa nai dabede sę yali po, te gasa bukude elalubao, tama augwaligo te buku e tama nogi ebo da, Te Israel King Bidi Dabego Yali Sę Po Elalubo Buku da. Te e bukude elalubo po te king Salumgo kolesaga dali, te gasa bidi dabe daligo te king Sekaraia ela muani po me elalubao.   
\p
\v 16 Tama te sogo te bidi Menahem dali, te aga hani bidi dabe dali, augwaligo te Tirsa hanu tagalama, tama augwali te Samaria hanuba pali, tama augwali te Tipsa hanuba sabolali. Tiali goli, te Tipsa hani bidi dabego te Menahemgo hani bidi dabe te augwaligo taun tomoba soao po wabe. Tama tibaso, te Menahem aga hani dali sisa siyu, tama te Tipsa hani bidi dabe dali boi hwįani. Tama augwaligo boi hwįnama, tama te Menahem aga hani dali augwaligo te Tipsa taun mu dolali. Tama augwaligo te Tipsa taun we bidi me te bulu pedai badu bidada pali we bidi dabe me ela muna muna pali. Tama augwaligo te bulu we te wai haliga yai we naga selama, tama augwaligo te we dabe haliga hwą gego togobo si yaide, tama augwali isai dao.   
\s1 Te Menahem te Israel hanigo king bidi bidali  
\p
\v 17 Te king bidi Usia te Juda hanigo king bidi nigila bidali kibu be bidi sese si pąde, te 39 kibu be pai, tama te sogo Menahem, aga te Gadigo ogwa da, aga te Israel hanigo king bidi nigilama bidali. Tama aga te Samaria bulude king nigila bidali kibu be te nogo si kibu be bidai.  
\v 18 Tama te Genuai Bidigo gedude agai dwai kolesaga mu yali. Tama te hasia king Jeroboamgo yali kolesaga tiwai naga yali. Polobadu te king Jeroboamgo te Israel hani agai kegelama, tama augwaligo te Genuai Bidigo gedude sęgę sai dao. Tama te bidi te Menahemgo me te deli kolesaga naga ela pedu kęnama, tama aga isiboba usu nigi pai.  
\v 19 Tama te bidi Menahem aga king bidi bidibo sogo, te Asiria king bidi nogi Tiklat Pileser, aga asama, te Israel hani dali boi hwįagasali. Te king Tiklat Pilesergo gasa nogi me te Pul. Tama tialima, te Menahemgo e tama doado bage me mone me sali, 3,000,000 mone silva selama, tama te king bidi Tiklat Pileser bidibolo mani, tama te aga abeleyu mawai da, te magu meni, te Israel hani dali nosali agai ma hwįagasidali weyu tama teyu, aga te king Menahem tau siyu, tama te Israel bulude Menahem aga bomai king bidi mu bidimainu yali.  
\v 20 Tama te mone sainu, Menahem agai te tigidali bidi te umabo mone mubo bidi dabe dali te takis mone sali. Tama agai te deli deli te tobage bidigo te 50 kina mone sali,, tama te king Tiklat Pileserbolo mawai. Tama tibaso, te king Tiklat Pilesergo te Israel bulu tagalama, aga pali.   
\p
\v 21 Te king Menahem bidiyu, te agai haniani sę yali po te gasa bukude elalubo, augwaligo te buku e tama nogi ebo da, Israel Hani King Bidi Dabego Yali Sę Po Elalubo Buku da wabo dao.  
\v 22 Te king Menahem isali, tama augwaligo aga pubaligi pali. Tama aga ogwa Pekahiago aga ayago yali sę selama, tama king bidi nigali.   
\s1 Pekahia aga Israel hanigo king bidi bidali  
\p
\v 23 Te king Usia te Juda hanigo king bidi bidibadi, agai kibu be te 50 kibu be pai, tama te sogo Pekahia, aga te king Menahemgo ogwa da, aga te Israel hanigo king bidi nigali. Tama te bidi Pekahia aga te Samaria bulude king sę eyu, kibu be si bidali.  
\v 24 Tama agai te dwai sęgę sabo kolesaga te Genuai Bidigo gedude yali, te hasia king Jeroboamgo yali kolesaga tiwai gilama yali. Polobadu king Jeroboamgo te Israel hani augwali kegelama, tama augwaligo te Genuai Bidi gedude dwai kolesaga eyu, sęgę sali. Tama te megi tama nigali king bidi Pekahiago me te deli kolesaga naga iduali.  
\v 25 Tama te king Pekahia agai boi hwįbo ami gavman tobolu bidi me deli, te bidi agai nogi Peka, te bidi aga aya Remaliago ogwa da, tama te bidi Peka dali, te me badu bidi dabe te moni taun Gileat bulu bidigo te 50 bidi dabe dali, augwali sisinama, tama augwaligo te king Pekahia ela muabo po minama, dąų wali. Te king Pekahia aga te Samaria bulude te king be te bomai daga rum habude bidibadi yaide, tama te bidi dabe augwali te bomai rum habu tomoba pelama, tama augwaligo te king Pekahia ela muani. Tama augwaligo te bidi me si nogi Argop me te Arie, te bidi si me ela muani. Tama te ami tobolu bidi Pekago te king bidi nigilama, sę yali.   
\p
\v 26 Te king Pekahiago te tigidali haniani sę yali po da, te po gasa bukude elalubo, augwaligo te buku e tama nogi ebo da, Israel Hanigo King Bidi Dabego Yali Sę Po Elalubo Buku da wabo dao.   
\s1 Peka te Israel hanigo king bidi nigilali  
\p
\v 27 Te Juda hanigo king bidi Usia aga king bidi bidibadi yaide, te 52 kibu be silama, tama Peka, Remaliago ogwa da, te Peka aga te Israel hanigo king bidi nigilama, bidali. Tama aga te Samaria bulude king nigilama bidali kibu be te bidi sese deli usu nama bidai dao.  
\v 28 Tama te Peka agai te Genuai Bidigo gedude te dwai kolesaga yali, te hasia king Jeroboamgo yali dwai kolesaga tiwai deli naga yali. Polobadu te king Jeroboamgo te Israel hani kegelama, tama augwaligo te Genuai Bidi gedude tama augwaligo dwai kolesaga eyu, sęgę sali. Tama te king Pekago me te deli kolesaga naga yali.   
\p
\v 29 Te bidi Peka king bidibo sogo, te Tiklat Pileser, te Asiria king bidi, augwali asama, te Israel hani dali boi hwįagaselama, tama augwali aiyaba elaluama, tama te Asiria hanigo te taun tigidali sesa pali, me te taun Ijon sali, me te taun Abel Betmaka, tama me te taun Janoa, tama me te taun Kedes, tama me te taun Hasor, tama te genuai distrik Gileat, tama me te moni distrik Galili me, tama te Naptali hanigo tigidali tǫ pedai dabe me, te Asiria hanigo sali. Tama te bulu we bidi dabe augwaligo selama, tama te Asiria digibulu buluba kalabus mugi pali.   
\p
\v 30 Te bidi Jotamgo agai kibu be te bidi sese deli, te bidi king Usiago ogwa da, aga te Juda hanigo king bidi nigilama bidali, te bidi me Hosia, aga aya Elago ogwa da, tama te Hosia dali, te me badu bidi dabe dali sisinama, te king bidi Peka elabo po minama, sunumi kegali, tama nosali te bidi Hosiago te king Peka ela muani. Tama Hosia aga te Israel hanigo king bidi nigilama bidali.  
\v 31 Te king Pekago te tigidali haniani sę yali po te gasa bukude elalubo, augwaligo te buku e tama nogi ebo, Te Israel Hanigo Te King Bidi Dabe Augwaligo Yali Sę Po Elalubo Buku dao.   
\s1 Jotam aga te Juda hanigo king bidi nigilali  
\r (2 Sto 27:1-9)  
\p
\v 32 Peka te Israel hani dali king bidali kibu be si digi mu bidali, Jotam, aga te king Usiago ogwa da, te Jotam aga te Juda hanigo king bidi bidali.  
\v 33 Tama agai kibu be te bidi sese deli olama, ugwadu nogo a naga, te 25 kibu be elaluama, tama aga king bidi nigali. Tama aga te Jerusalem bulude king nigilama bidali kibu be te 16 kibu beba usu nama bidali. Aga ida nogi Jerusa, te we aga aya Sadokgo wegi da.  
\v 34 Tama te Jotamgo agai dwagi yai kolesaga te Genuai Bidi gedude dwagi yai kolesaga yali. Tama te aga aya Usiago yali dwagi yai kolesaga tiwai yali.  
\v 35 Tiali goli, Jotam agai te tibo god dolo lotu po wabo bulu du pesage dolobe. Tama tiyu, te tigidali we bidigo te lotu po wabo pesageba holama, lotu po wabo sę bomo mu eyu, tama augwaligo te pesageba pelama, tama te denami yai ofa nai ula mayu, me te denami yai hano ebo pauda me selama, uluyu iduali. Jotamgo te po obaso, tama augwaligo te Genuai Bidigo tempel be obo tų ma nigao po wali, augwaligo te tų nogi eyu Ugwadu Obo Tų dao. Tama po obaso, augwaligo te sę yali.   
\p
\v 36 Te king Jotamgo te tigidali haniani sę yali po da, te po gasa bukude elalubao, augwaligo e tama nogi wabo, Juda Hanigo King Bidi Dabego Yali Sę Po Elalubo Buku dao.  
\v 37 Jotam te king bidibo sogo, Genuai Bidigo te Resin tagala palali, te Siria king bidi, tama te king Peka, aga te Israel hanigo king da. Aga dali, te augwa si ami bidi dabe dali, augwaligo te hasia sogo mu deli tama te Juda hani dali boi hwįgi pali.  
\v 38 Tama te king Jotam isali, tama augwaligo sela pelama, tama te aga wąį nǫų pubalubo gų pageba pubaligi pali. Te gų page te aga wąį nǫų Devitgo taunde elalubo. Tama Jotam aga ogwa Ahas, Ahas agai te aga ayago yali king sę selama yali, tama aga king bidi nigali.   
\c 16  
\s1 Ahas aga te Juda hanigo king bidi nigali  
\r (2 Sto 28:1-27)  
\p
\v 1 Te king Peka aga te Israel hani dali king sę eyu bidibadi, te 17 kibu be silama, tama te sogo Ahas, aga te king Jotamgo ogwa, tama Ahas aga te Juda hanigo king bidi nigali.  
\v 2 Tama agai kibu be bidi sese deli olama silibo si, tama aga king bidi nigali, tama aga te Jerusalem bulude king nigila bidali kibu be te 16 kibu be pai. Tiali goli, agai aga Genuai Bidi Godigo gedude agai doloba pai kolesaga me ebe, tiali tama aga wąį nǫų Devitgo yali kolesaga tiwai ebe.  
\v 3 Meni. Agai te dwai kolesaga naga yali, te Israel hanigo king bidi dabego yali kolesaga tiwai naga yali. Tama me te agai te dwai kolesaga naga mu yali. Tama tiyu, te aga wai bǫų me elama, te tibo godiba ofa nai tiwai ula mayu, te siaba tigidali mu sese ulali. Tama agai dwai kolesaga mu wali pai polobadu te tǫde bidali Israel hani isąwai we bidigo yali kolesaga wali pali. Tiali goli, Genuai Bidigo augwali sela sąnama, tama te tǫ te Israel hani augwalibolo mani, polobadu. \x * \xo 16:3 \xt Bom 12:31\x*  
\v 4 Tama te king Ahas aga te tibo god dolo lotu po wabo bulu du pesageba piduai. Tama te lotu po wabo pesage te bulu du ugwadu elaluyu, tama me te moni ni page pąde nigilama, elaluyu yai. Tama agai te pesagede agai te ofa nai ula mayu, me te dwagi yai hano ilama, denami ebo pauda siaba ulama, dwagi yai denami yali. \x * \xo 16:4 \xt Ais 7:1\x*   
\p
\v 5 Tama te Siria king bidi Resin dali, te Israel king bidi Peka dali si, tama augwali sigo te augwa si ami soldia bidi dabe augwali sigo selama, te Jerusalem bulu taunba boi baguligi pali, tama te Jerusalem bidi dabe dali augwali boi hwįani. Tiali goli, augwaligo te king Ahas dali, te aga ami bidi dabe dali, augwaligo augwali aiyaba elaluabo usu meni.  
\v 6 Tama te sogo te Siria king bidi Resin aga soldia bidi dabe dali boi hwįnama, tama te taun Elat ma sali. Tama agai te taun selama, te Juda hani te taunde bidali we bidi augwali sela sąyani. Tama agai te Idom hani te taunba asama bidali we bidi dabe da, teda agai sela sąbe. Tama augwali bidada asama, megi tama e po asębo bodoluba usu nagasobao.   
\p
\v 7 Tama te king Resin dali, te Peka dali sigo te taun Jerusalem bulude me bagusa bididuali, tama tibaso, te king Ahasgo te me badu bidi dabe selama, te Asiria king bidi Tiklat Pileser pageba tagala palali, tama agai agabolo e tama po ola mani, “Ena te king Ahas dao, ena te nago sę ebo bidi dao, tama ena nago wai bǫų bidibao. Tama megi te Siria hanigo king dali, te Israel hanigo king bidi badi elama, augwali asama, te ena dali augwaligo boi hwįagasalio,” wali. “Tama tibaso, eno homugo nage asama, te augwali dali boi hwįagasao,” wali, “tama augwaligo da dolidalio.” Te po wai.  
\v 8 Tama te king Ahas agai te Genuai Bidigo tempel bede munalubo gol me, me te silva me, tama me te mone munalubo bede silva me, gol me, me te kingo bede muani nai dabe me selama, tama te agai te nai dabe selama, te Asiria kingba tolali. Magi baso meni, agai homugo te Tiklat Pilesergo te Juda hani tau sao homu eyu, tama te monego abelainu yali.  
\v 9 Tama te king Tiklat Pileser agai te king Ahasgo agabolo wali te po agai odali, tama agai aga ami soldia bidi dabe selama, tama agai te Damaskus taunba pelama, boi hwįgi pelama, tama agai te Siria dabego taun Damaskus sali. Tama te king Tiklat Pileser agai te Siria king Resin ela muani. Tama te we bidi agai augwali digibulu odasa pelama, te taun Kirba kalabus egi pali, te gasa tedali tǫ pedai mude.   
\p
\v 10 Tama nosali te king Ahas aga te Damaskus buluba pelama, te king Tiklat Pileser sugi pali. Tama aga te bulu pedai badu bidibo sogo, agai te taun Damaskus alta elalubo suali. Tama agai te taun alta noma nigilama, tama te alta nigibo haniani kolesaga ebo po asęani. Tama agai te pris bidi Uriabolo te Jerusalemba tolali, tama agai e tama po me ola mayu, tama wali, “Te nomaba tonama, tama nago e alta tiwai me deli nigao,” wali.  
\v 11 Tama te pris bidi Uria agai te king Ahasgo wali po agai odali, tama agai te Damaskus bulude elalubo alta tiwai mu tama nigali, tama te king Ahas aga te Jerusalem buluba asisąbadi yaide, te pris bidi Uriago te alta polo nigila silai.  
\v 12 Tama te sogo te king Ahas te Jerusalemba ma sabolagasali, tama agai te alta sugi pali. Tama agai homugo te ofa nai ulainu homu yali, tama tibaso, aga te moni genuai alta ugwadu daiba holali.  
\v 13 Tama agai te ofa nai te siaba naga ulama, tama tigidali siago dela pela silai. Tama te sia gagawai nai te wit te ofa nai ulali, me te wain wę gelebo ofa yali. Tama te aga hasa kaneme selama, tama te God dali te deli homu ebo ofa yali, tama agai te hasa kaneme te alta daiba segeni sąsąga pali.  
\v 14 Tama te king Ahas agai te gesi alta tede te ofa nai ula mena silali, tama agai te polobadu te ain brasgo nigali alta sela sąnama, tama te gesi nigali alta bogo badu dodolali, te not pedai badu. Hasia te ain brasgo nigali alta sai te gesi alta sai uga togolu te Godigo tempel be tų edaba togolu elama, tomo agebelede te polobadu alta sai dodolali. \x * \xo 16:14 \xt Sai 27:1-2; 2 Sto 4:1\x*   
\p
\v 15 Tama te king Ahasgo te pris bidi Uriabolo e tama po wali, “Tigidali sogo nago te ofa nai ulainu da, teda nago te gesi alta saiba naga pelama, ofa nai ulao. Tigidali sogo te kigamu naga nago te isigo dela pabo ofa nai naga uluyu, me te tigidali sogo te pio naga te sia gagawai nai te witgo naga ofa nai ulao. Tama nago te king bidigo ofa nai ula mayu, tama te tigidali we bidigo ofa nai uluyu yao,” po wali. “Te ofa te tigidali te siaba sese ula palobo ofa nai da, tama me te sia gagawai nai witgo ula mabo ofa nai da. Tama me te nago te gasa ofa ebo te we bidi dabe ofa tama yao,” wali, “te ofa te nago te wain wę gelao. Tama nago te tigidali hasa kaneme selama, te ofa elama, tama te gesi alta saiba segeni sąsąga pao. Tiali goli, te brasgo te nigali te alta sai, te ena naga dao. Te alta sai eno naga dolaluabo page te eno Godibolo hanaluama, tama agai enabolo te tigidali sę eno yabo sę te agai mobogo te eno mobo ola momainao,” te po wali.  
\v 16 Tama te pris bidi Uriago te kingo tigidali po odama, tama tigidali sogo agai wali pali, tama agai wali po wali peyu, e tama sę ela silali.   
\p
\v 17 Tama nosali te king Ahasgo te aga sę ebo bidi dabebolo te po olama, tama augwali Genuai Bidigo tempel be obo banis tomoba pelama, tama augwaligo te wilkar dabe aluali, polobadu te king Solomongo sę ebo bidi dabego te brasgo nigai nai dabe da. Tama augwaligo te wę tubo tank dabe te wilkar ugwadu daide muani tank ąį me sali. Tama me te augwaligo te brasgo nigai bulmakau noma dabe te genuai ąį tubo tank te dologo badu elaluali nai me sali. Tama nosali augwaligo te masigi dabe selama, tama te gesi bet sai yali, te genuai ąį tubo tank muabo bet sai nigali. \f + \fr 16:17 \ft Polobadu te king Solomongo te nai dabe selama, te Godigo tempel be sę yai dao. Tiali goli, te king Ahas agai homugo te bras sabe selama, te gasa sę yainu. Te 1 King 7:23-39, tede suao.\f* \x * \xo 16:17 \xt 1 Kin 7:23-39; 2 Sto 4:2-6\x*  
\v 18 Tama te Genuai Bidigo tempel be togobe badu pąde tama, te king aga dulabo dwasianu be gagawai nai me deli elaluai, augwaligo te nai nigali page e tiwai, te giliga asobo badu paliainu, te Sabat side te madi tiwai nigai nai da, tama megi Ahasgo po obaso, augwaligo te nai hųgiali. Tama augwali te Genuai Bidigo tempel be obo banis tųba te king pabo tųba te augwali pai, tama augwaligo te tųde te dwagi yai au yai nai elaluali me hųgiali, tama te au yai nai te bidi dabego munu me subeo. Tama te king Ahasgo agai te Asiria kingo homu wali painu homu yai, tama agai te tobage sę te tempel bede sę yali.   
\p
\v 19 Te king Ahasgo te gasa haniani sę yali po da, te po gasa bukude elalubo, te augwaligo e tama nogi wabo da, Te Juda Hanigo King Bidi Dabe Augwaligo Yali Sę Po Elalubo Buku da.  
\v 20 Tama nosali te king Ahas isali, tama augwaligo aga te aga wąį nǫų dabe gų pageba te Devitgo taunba pubaligi pali. Tama aga ogwa, te Hesekiago, te aga ayago sę selama, tama aga king bidi nigali. \x * \xo 16:20 \xt Ais 14:28\x*   
\c 17  
\s1 Hosia aga te Israel hanigo king bidi nigali  
\p
\v 1 Te king Ahas aga te Juda hanigo king bidi nigilama bidali kibu be te nogo si olama, te sągągo si, te 12 kibu be silama, tama Hosia, aga te Elago ogwa da, te Hosia aga te Israel hanigo king bidi nigali. Tama aga te Samaria bulude king bidi nigilama bidali kibu be te 9 kibu be pai.  
\v 2 Tama agai te Genuai Bidigo gedude te agai dwai kolesaga yali, tiali goli te agai te dwai kolesaga ebo sę te gasa king dabego yali kolesaga tiwai gilama te agai genuai me ebe.  
\v 3 Tama te Hosia aga king bidibo sogo, te Asiria king bidi nogi Salmaneser, aga asama, tama te Israel hani dali boi hwįagasali. Tama te Asiria hanigo te Israel hani aiyaba elaluali, tama te king Hosiago te po dąų wali, te Asiria king bidi Salmaneser dologode bidiyu, tama te takis mone te tigidali kibu bede mawaibao wali.  
\v 4 Tiali goli, kibu be me delide te king Hosiago te meba bidi dabe te Isip king bidi So pageba tagala palali, tama te king Sogo aga tau somainu hanalu wali. Tama te kibu bede te king Hosiago te takis sabo mone te king Salmaneser pageba me mabe, tama te tigidali kibu be yali tiwai me ebe. Te Asiria king bidi Salmanesergo te Israel hanigo king bidi Hosiago dąų wali po togobo page te agai polo kegelama, polo haninani, tama tibaso, agai te me badu ami soldia bidi dabe tagala palali, tama augwaligo te king Hosia tulama, tama aga kalabus beba muainu yai.   
\s1 Te Asiria hani augwaligo te boi hwįnama, tama te Samaria hani augwali aiyaba elaluali  
\p
\v 5 Tama te nosali te king Hosia augwaligo aga kalabus ilali, tama te king Salmanesergo aga ami soldia bidi dabe selama, tama augwali pelama, te tigidali Israel bidi dabe dali boi hwįgi pai. Augwali pelama, tama te Samaria taun bulu bobegelama, tama augwali boi hwįdubadi yaide, te kibu be selaba usu nigi pali.  
\v 6 Tama te Israel hanigo king bidi Hosia te Israel hani dabe dali king bidi nigilama bidibadi, te agai kibu be te 9 kibu be silama, tama te sogo te Asiria king bidigo te boi hwįnama, te Samaria hani me aiyaba elaluama, tama te taun sali. Tama agai te Israel hani te Asiria buluba selasa pai, tama te me badu bidi dabe te agai te Hala taun bulude bidao wali, tama te me badu bidi dabe agai te Habor wę pąde te distrik Gosan bulude bidao wali, tama me badu bidi dabe te Midia taun bulu tǫde bidao wali.  
\v 7 Te tama sęgę te Israel hani augwali tigide pedalali, magi baso meni, augwaligo te Godigo gedude augwaligo sęgę sabo dwai kolesaga yali, augwa Genuai Bidi. Augwaligo te homu ebe, augwa wąį nǫų dabe te augwali te Isip king bidi nogode ma sali augwaligo te konebe. Meni. Israel hani augwaligo te tibo god dolo lotu po wabo sę yali,  
\v 8 tama augwaligo augwa king bidi dabego dwai kolesaga yalidu wali pabo sę yali. Tama me te polobadu te gasa hani we bidi dabe te tǫde bidali we bidi dabego yali dwai kolesagadu wali peyu yai. Tiali tama, te Genuai Bidigo te hani dabe augwali sela sąnama, tama te tǫ te Israel hani augwalibolo mani.  
\v 9 Te Israel hani dabe augwaligo Genuai Bidigo godolo isąbo haniani dwai kolesaga geme yali. Augwaligo te tigidali genuai boma pai masigigo nigai obo elaluali taun bulu dabede me, te dwasianu bulu dabede me, te augwaligo te tibo god dolo lotu po wabo pesage elalua pali.  
\v 10 Tama augwaligo te kolesaga yali, augwali te bulu duba holama me, tama me te moni ni dologode me tama kolesaga yali, tama augwaligo te masigigo te ni pos tulubo ąǫ elama, tama te tibo god we Asera noma muna muna pali, tama augwaligo te teba lotu po wali. \x * \xo 17:10 \xt 1 Kin 14:23\x*  
\v 11 Tama augwaligo te bulu dude lotu po wabo pesagede tama augwaligo te tǫde polobadu bidali we bidi dabego lotu po weyu yali kolesaga tiwai delidu wali pali, tama augwaligo te dwagi yai hano holama, denami ebo pauda siaba uluyu yai. Te Israel hani dabe augwaligo te haniani dwai kolesaga ebaso, te Genuai Bidi Godigo moni sębę mu yali.  
\v 12 Polobadu Genuai Bidigo augwalibolo e tama po ola mawai, “Dagego te tibo god nomaba dagego te lotu po teba wagio,” po wali. Tiali goli, augwaligo agai te wali po sela sąyani, tama augwaligo te nomaba me lotu po wabo sę yali.  
\v 13 Tama te Genuai Bidigo te profet bidi dabe me te nosali pedalubo sę koneai bidi dabe me augwali te Israel haniba me, me te Juda haniba me tagala palali, tama augwalibolo bomai po e tama wali, “Dagego kolesaga begelama, tama dagego te dwai kolesaga ebo sę tagalama, tama dagego te tigidali bomai po te eno po odama wali pao,” wali. “Te bomai po dabe me te eno te dagego wąį nǫųbolo mawai po dao, tama te po dabe te eno sę ebo bidi dabego eno ola mobaso, augwaligo pedauwalidu pusai dao, te bage te profet bidi dabe dao,” te po wali.   
\p
\v 14 Tiali goli, te Israel hani dabe augwaligo te Godigo po sela sąnama, tama augwaligo God dali hagoma genuai mu yali, tama augwaligo augwa wąį nǫųgo yali kolesagadu wali pai. Te wąį nǫų dabe augwaligo te Godigo po dąų wasiąma, tama augwaligo konealubo homu te God dali kęnama, dąų wai meni, augwa Genuai Bidi dali.  
\v 15 Te Israel hani bidi dabe augwaligo te augwa Genuai Bidi Godigo po tudiba sąnama, tama te bomai po te agai augwa wąį nǫų dabe augwali dali dąų wai po, tama te tigidali bomai po agai augwalibolo mani. Tama augwaligo te po umabo sogo mu sela sąnama, tama augwaligo te tibo godiba lotu po mu weyu, bidali. Te tibo god augwali te God mu menio. Tiali goli, te Israel we bidi dabe augwaligo te tibo god te olo naiba augwaligo lotu po bomo yali. Tama te Israel hani augwa digi augwa te olo bage gagawai mu pedelali, te olo tibo god tiwai. Polobadu te Genuai Bidigo augwalibolo e tama po augwalibolo ola mawai, “Dagego te dage pąde bidibo bidi dabego ebo kolesagadu wali pigio,” wali, tiali goli te Israel hani augwaligo te Genuai Bidigo wali po sela sąnama, tama augwaligo te hanigo yali kolesagadu wali pali.  
\v 16 Tama augwaligo te Godigo bomai po tigidali sela sąyani, augwa Genuai Bidigo po. Tama augwaligo te gol selama, te bulmakau kibu omai si nigilama, tama augwaligo te kibu noma siba lotu po wali. Tama me te tibo god we Asera noma nigaliba lotu po weyu yali. Tama me te augwaligo te dagalu hǫba lotu po wali, tama me te tibo god Balba lotu po weyu yali. \x * \xo 17:16 \xt 1 Kin 12:28\x*  
\v 17 Tama augwa wai bǫų dabe elama, tama augwaligo te wai dabego tigi te siaba munama, augwa tibo godiba te ofa nai tiwai gilama olo mani. Tama augwali me badu te sogo yesi bidi pageba pali, me badu te we bidi dabego te isai we bidigo isi bidi dali po mibo we bidi dabe pageba pali, tama augwaligo te hani augwalibolo augwali tau somainu hanalu wali. Te Israel hani dabe augwaligo deli homu naga yali, tama teyu, augwaligo dwai kolesaga me edu bidali. Tama Genuai Bidigo augwaligo te kolesaga me ebo sulama, tama agai augwalibolo agai wado ela mani. \x * \xo 17:17 \xt Bom 18:10\x*   
\p
\v 18 Tama Genuai Bidigo te Israel hani dabe augwali dali agai sębę genuai mu me eyu, tama agai te Israel hani subo hagela mu yali. Tama tibaso, agai augwali augwa aga dali bidali buludu digibulu mu sela sąyani. Tama te Israel hani bidi dabe me deli te bulude me bidibe. Te Juda hani augwa naga te augwa tǫde bidali.  
\v 19 Tialima, te Juda hani bidi dabe augwaligo me te Godigo bomai podu wali pabe, augwa Genuai Bidi. Mu meni. Augwaligo me te deli kolesaga naga yali, polobadu te Israel hani bidaluyu yali kolesaga tiwaidu me wali pali.  
\v 20 Tama tibaso, Genuai Bidigo te Israel hani we bidi dabe augwali agai tudiba mu sąyani. Tama agai sębę mu eyu, tama agai te boi bidi dabe tagala palama, tama te boi bidi dabego te Israel hani dali boi hwįnama, te Israel bidi dabe me badu ela muyu, ela pali. Tiali goli, te Israel hani bidi dabe augwaligo te dwai kolesaga ebo sę me tagalobe, tama tibaso te Genuai Bidigo hagela mu eyu, tama augwali aga dali me bidisiąmainogo eyu, te agai augwali augwa buludu digibulu mu sela sąnama, bidigi pao wali.   
\p
\v 21 Polobadu Israel hani dali, te Juda hani dali si, augwali te king Devit dologode bidai. Tiali goli, nosali te Genuai Bidigo te Israel hani augwaligo te Juda hani tagalama, augwa tedali bidimainu nigilali. Tama tilama, te Israel hani augwa king tedali dąį ilali, te bidi te Jeroboam, Nebatgo ogwa, te Jeroboam te bidi te Israel hanigo king bidi nigilali. Tiali goli, te king Jeroboamgo te Israel hani augwali kegelama, tama augwaligo Genuai Bidi tagalama, tama augwaligo dwai kolesaga umabo mu eyu, tama genuai sęgę mu sali.  
\v 22 Tama nosali te Israel hanigo me te augwaligo te king Jeroboamgo ebo kolesaga wali pabo sę eyu, tama augwaligo te haniani sęgę sali, te kingo sali sęgę tiwai sali. Augwaligo te sęgę sabo kolesaga me tagalobe. Mu meni.  
\v 23 Tama nosali te Genuai Bidigo augwali hagela mu ebaso, tama augwali aga pąde me bidisiąmainogo eyu, agai augwali te gasa buluba bidigi pomainu digibulu mu sela sąyani. Genuai Bidigo tama tiali, magi baso meni, te Israel hani bidi dabe augwaligo te tigidali po agai te aga sę bidi profet bidi dabego pedauwalidu ola mani podu wali pabe, te profet bidi dabe te aga sę ebo bidi dabe dao. Tama tibaso, te Asiria hani augwali asama, te Israel hani dabe dali boi hwįagaselama, te Israel hani augwali aiyaba elaluali, tama augwali te Asiria buluba odasa pali. Tama augwali te bulude me bidibao. \f + \fr 17:23 \ft Te e po “me bidibao,” te e po megi tama bodolu side asęai po meni. Menio. Te e po polobadu te e buku asęani bidigo po dao.\f* Te gasa hani we bidi dabe augwali asama, te Israel hanigo buluba bidagasali.   
\p
\v 24 Te Asiria king bidigo te taun Babilon we bidi dabe me, me te taun Kuta, tama me te taun Iva we bidi dabe me, tama me te taun Hamat we bidi me, me te taun Sefarvaim we bidi me agai selama, tama te augwali te Samaria bulu taun dabeba odasa pelama, tama te Israel hanigo bulu taunba augwali tatagalo pali. Tama te we bidi augwali te Israel hani we bidigo bulu tǫ selama, mu bidali.  
\v 25 Te gesi noma we bidi dabe augwaligo te Genuai Bidi dolo mu lotu po wabo we bidi dabe meni, tama tialima, Genuai Bidigo te bulu uni yowi laion tagala palama, tama me badu bidi dabe te uni yowi laiongo ela muani.  
\v 26 Tama tialima, te me badu we bidi dabe pelama, te Asiria kingbolo e tama po wagi pali, “Te nago te i Samaria bulu taunba odasa pali hani we bidi dabe, augwaligo te i tǫde godigo bomai po augwaligo konebeo,” wali. “Tama teyu, te godigo te dwai bulu uni yowi tagala palama, tama te we bidi dabe ela mubo sę ebo,” wali.   
\p
\v 27 Tama te kingo te po odobaso, tama te aga sę ebo gavman ofisa bidibolo e tama po ola mani, “Nage pelama, te dago te e Asiria buluba odasa asali pris bidi me deli oda sigi pao,” wali. “Tama te pris bidi aga te Israel bagego Samaria buluba ma tagala palinao, tama aga bidiyu, te we bidi dabe augwali te bulu tǫ page bidi godigo bomai po agai augwali ola momainao,” te po wali.  
\v 28 Tama augwaligo te Israel hanigo pris bidi me deli sali, tama augwaligo aga te Samaria bulu tǫdu tagala palali. Tama aga te taun Betel buluba bidigi pali, tama agai te we bidi dabebolo Genuai Bidi God dolo mu lotu po wabo kolesaga mu ola mani.   
\p
\v 29 Tiali goli, te hani dabe deli deli augwaligo te tibo god noma nigilama, teba wali pabo kolesaga me idu bidali. Tama augwaligo te god noma nigali, te polobadu te Israel hani dabego te lotu po wali pesagede muna muna pai, te bulu du dabede. Tama augwaligo te deli deli hani augwa god deli deli nidigi pelama, tama augwa bidibo taun bulude muna muna pali.  
\v 30 Tama te Babilon hani augwa tali nigali tibo god noma nogi da Sukotbenot, tama me te taun Kuta hanigo tibo god noma nogi e dao, Nergal da, tama me te taun Hamat hanigo tibo god noma nogi e dao, Asima da.  
\v 31 Tama te taun Iva hanigo tibo god noma nigali nogi e dao, Niphas, tama te me nogi Tartak dao. Te Sefarvaim hani augwali te augwa wai bǫų elama, tama augwaligo te ofa nai tiwai gagawai mu te tibo god siba ula mani, tama te god si nogi me nogi Adramelek, tama me nogi Anamelek.  
\v 32 Tama me te Genuai Bidi dolo lotu po mu wabo we bidi dabe augwa digi augwa hani bidi dabe me deli Genuai Bidigo pris bidi me deli dąį ilali. Te pris bidi aga te lotu po wabo bulu du pesagede bidiyu, agai e tama kolesaga yali, te we bidi dabego magasabo hasa dabego te Genuai Bidi dolo ofa nai ula mayu yali.  
\v 33 Tama me te augwaligo Genuai Bidi dolo lotu po mu wabo kolesaga me, tama me te augwa page bulude polobadu bidiyu yali kolesagadu wali peyu, tama augwaligo te augwa tibo god dolo lotu po weyu yali, te tedali kolesaga si talua si yali.   
\p
\v 34 Tama te megi tama me, te hani augwaligo te kolesagadu me wali peyu bidibao. Augwaligo te Genuai Bidi dolo mu lotu po wabo meni, tama augwaligo te agai te bomai po te Jekopgo hanibolo mani po augwaligo wali pabo meni. Jekop te bidi te aga te Genuai Bidigo gasa nogi me poali nogi, te nogi te Israel da. \x * \xo 17:34 \xt Gag 32:28; 35:10\x*  
\v 35 Polobadu te Israel hani dabe augwali dali te Genuai Bidigo te bomai po me deli dąų wali po e tama po dąų wali, “Dagego te tibo godiba lotu po wagio,” wali. “Tama dage te tibo god dologode dage bidigio. Mu menio. Dagego augwalide kidu sugunama, tama ofa nai augwalibolo magimio. \x * \xo 17:35 \xt Sai 20:5; Bom 5:9\x*  
\v 36 Menio. Dagego ena Genuai Bidi deliba naga lotu po wao, tama ena dologode naga bidao. Te eno genuai bomogo naga te eno dage te Isip bulude selama, tama dage eba odasa asai dao. Tama teyu, dagego ena deliba naga kidu sugunama, lotu po weyu, tama te ofa nai ena deliba naga mao,” po wali. \x * \xo 17:36 \xt Bom 6:13\x*  
\v 37 “Dagego te eno asęani tigidali bomai po me, te eno e tobage kolesaga yao wali po dabe me, tama dage dua dua eyu, dagego te po mu wali pao. Dagego te tibo god dolo lotu po wagio.  
\v 38 Tama dagego te eno dage dali te bomai po dąų wali po kegeda paligio, tama tilama, dagego te tibo godiba lotu po wagio.  
\v 39 Menio. Dagego ena Genuai Bidi duga God deliba naga lotu po wao, tama ena dologode naga bidaluao,” wali. “Tialima, dagego tama teyu da, teda te eno dage tau saibao, tama eno dage te boi bidigo nogode ma dobola saibao,” wali.   
\p
\v 40 Genuai Bidigo e tama po wali, tiali goli te we bidi dabego agai te wali po sela sąnama, tama augwaligo te polobadu yali kolesagadu me wali pabo sę iduali.  
\v 41 Te Samaria buluba asama bidagasali hani we bidi dabe, tama augwaligo te Genuai Bidi dolo lotu po weyu, tama me augwa te tibo god dolo lotu po weyu iduali. Tama te megi tama augwa ame nani wai dabego me te polobadu te yali deli kolesagadu naga wali pabo dao, e po asębo sogoba usu nagasali.   
\c 18  
\ms1 Te Juda hanigo bidada asama, te haniani kolesaga eyu, te Juda hanigo te taun bulu dolali po  
\mr (Te Dąį 18–25)  
\s1 Te bidi Hesekia aga Juda hanigo king bidi nigai  
\r (2 Sto 29:1-2; 31:1)  
\p
\v 1 Hosia aga king nigilama bididubadi, te kibu be sela pai, te Hosia aga aya te Elago ogwa da, te bidi aga te Israel hanigo king bidi nigilama bidali, Hesekia, aga aya Ahasgo ogwa, aga te Juda hanigo king bidi nigilali.  
\v 2 Hesekiago agai kibu be bidi sese deli olama, ugwadu nogo a nama kibu be pabo side, te aga king bidi nigai, tama aga te Jerusalem bulude king bidi nigila bidali kibu be te 29 kibu be bidali. Te aga ida nogi Abiya, Abiya aga aya te Sekaraiago wegi da.  
\v 3 Hesekia agai te dwagi yai kolesaga te Genuai Bidigo gedude yali, te aga wąį nǫų king Devitgo yali kolesaga tiwai yali.  
\v 4 Tama te king Hesekia agai te e tama kolesaga yali, te augwaligo te tibo godiba lotu po wabo pesage dolama, tama agai te masigide age ni posde te tibo god noma piksa nigilama daganani masigi pos dabe me hųginama sąyani. Tama me te nigo te tibo god we Asera noma nigilama daganai age ni pos gelama, sąyani. Tama me polobadu Mosesgo te brasgo nigali hasamani te agai selama, augwaligo te hasamani e tama nogi poai, Nehustan, tama te hasamani noma agai te denege minama, sąyani. Magi baso meni, te we bidi dabego te hasamaniba lotu po weyu, te dwagi yai denami emainu hano ebo pauda ulubaso, tiai dao. \x * \xo 18:4 \xt Nam 21:9\x*   
\p
\v 5 Hesekia agai te Genuai Bidiba konealubo homu dąų mu wali, te Israel hanigo God da. Te Juda hani king bidigo Godiba konealubo homu dąų wai king bidi me deli bidai meni, te Hesekiago yali tiwai gilama yai bidi me deli meni yai. Agai te Godiba konealubo homu dąų mu wai, te agai konealubo homugo te hasia king bidi dabe me, te nosali nigabo king bidi dabego konealubo homu me, te king Hesekiago konealubo homugo augwali aiyaba elaluai mu dao.  
\v 6 Aga te Godiba kęa pelama, dąų mu wagi pali. Tama agai te tigidali sogo Genuai Bidi munu me tagalobe. Mu meni. Tama agai tigidali bomai po te Godigo te Mosesbolo mani po tigidali te agai bugagia wali mu pali.  
\v 7 Tama teyu, te Genuai Bidi te king Hesekia dali bidiyu, tama aga tau sali, tama tigidali sę agai yali, te bugagia mu pedalali. Te king Hesekiago homugo te Asiria hani king bidigo te Juda hani augwali tonalubo hagela mu yali, tama tibaso augwali te hanigo dologode ma bidibe.  
\v 8 Tama te king Hesekia aga ami soldia bidi dabe selama, te Filistia bidi dabe dali boi hwįgi pelama, tama te tigidali taunde me, me te bulude te bomai obo bogo badu elalubo bulu dabe me, augwaligo te boi hwįgi pali. Tama augwaligo te Filistia hani aiyaba elalu, ela peyu, tama te taun Gasaba usu nigi peyu, tama te bulu pąde elalubo bulu dabe dali aiyaba elaluama, sali.   
\p
\v 9 Te king Hesekia aga te Juda hanigo king bidi bidibadi, te agai kibu be te me si me si tama kibu be pai, tama te Israel hanigo king bidi Hosia aga te Israel hanigo king bidi bidibadi e tama kibu be yali, te 7 kibu be yali. Aga aya te Ela dao. Tama te kibu bede, te Asiria king bidi Salmanesergo aga ami soldia bidi selama, te Israel hani bidi dabe dali boi hwįagasali. Tama augwaligo te taun Samaria bobegelalu, tama te taun sainu boi hwįani.  
\v 10 Tama augwaligo te taun bobegelalu te boi hwįdubadi yaide, kibu be selaba usu nigi pali, tama te nosali augwaligo te Samaria hani aiyaba elaluama, te Samaria bulu taun sali. Tama te kibu bede da, te king Hesekia agai king bidali kibu be te 6 kibu be ebadi te boi hwįani, tama te Israel hani bidi dabego king bidi Hosia aga king bidali kibu be te 9 tama kibu be wabode te boi hwįani.  
\v 11 Tama te Asiria king bidigo te Israel hani augwali te Asiria buluba odasa pali, tama tede me badu bidi dabe te taun Hala bulude tagalama bidao wali, tama te me badu bidi dabe te Gosan bulu taun pąde te wę Habor te bulude bidao wali, tama me badu bidi dabe augwali te Midia hanigo taun dabe bulu tǫde bidao wali.  
\v 12 Te sęgę te Israel hani augwalide pedalali, magi baso meni, augwaligo te Godigo po sela sąbaso, augwa Genuai Bidi, tama augwaligo te Genuai Bidigo augwali dali te bomai po bodolu selama dąų wali po togolama, tama augwaligo Genuai Bidigo aga sę bidi Mosesbolo mani bomai po me tigidali bolali. Augwaligo te Genuai Bidigo po odobe, tama augwaligo te agai bomai po me wali pabe.   
\s1 Te Asiria hani dabe augwaligo te Jerusalem bulu taun tǫ sainu bomo mu yai  
\r (2 Sto 32:1-19; Ais 36:1-22)  
\p
\v 13 Te Hesekia aga king bidibadi, agai te 14 kibu be silama, tama te Asiria hanigo king bidi Senakerip aga ami soldia bidi dabe dali asama, tama augwaligo te Juda hani dabe dali boi hwįagaselama, tama augwaligo te Juda hani aiyaba elaluama, tama augwaligo te bomai obo yai taun naga sesa pelama, bidali. Tiali goli, te Jerusalem taun bulu digi sabeo.  
\v 14 Te king Senakerip aga te taun Lakis bulude bidali, tama te Hesekiago te kingbolo e tama po ola tolali, “Eno nage dali hagoma eyu, tama eno dwasianu geda muanio. Tiali goli, eno homugo nago ena dali boi hwįbo tagalama, tama nago eno bulu tagalama, pao,” wali. “Tialima, nago tama teyu da, teda eno nagebolo magi nai mawaibawe te nago enabolo hanalubaso.” Tama tibaso, te king Senakeripgo te king Hesekiabolo e tama po wali, “Nago enabolo te 10,000 kilogram silva me sobadi, tama me te 1,000 kilogram gol sobadi elama, enabolo mao,” te po wai.  
\v 15 Tama te po obaso, te king Hesekia agai te Genuai Bidigo tempel bede muani te tigidali silva dabe me, tama me te kingo bede te mone munalubo habu badu muani doado bage me, tigidali agai selama, tama te king Senakeripbolo sese tama mani.   
\p
\v 16 Tama me te agai te Genuai Bidigo tempel be tųde elaluali gol me, tama me te tų sesegede elalubo golgo age ni pos me tama agai tigidali sela sąnama. Polobadu te king Hesekia aga digi te aga sę ebo bidibolo olama, tama te tų sunumi daide te golgo haluali, tama me te pos ni daide golgo haluama dagayani. Tama megi agai te tama muani gol selama, tama te gol dabe te king Senakeripbolo mani.  
\v 17 Tama te king Senakeripgo te gol dabe me, te silva dabe me agai sali, tiali goli agai te ami gavman tobolu ofisa bidi sela dali, te ami soldia bidi umabo dali, tagala palali, tama augwali te Lakis bulu taun tagalama, Jerusalem taun buluba pali. Tama augwali te Jerusalem taunba sabolali, tama augwali te Jerusalem taunba te sigi węgo te ugwadu da Jerusalemba aiyaba kegasa tulali wę pabo gamia, te wę gamia pąde augwali bidaluali. Te wę gamia tų te moni sunumi sesegede te name ugwa nigibo buluba pabo sunumi sesegede pąde elaluali.  
\v 18 Tama te Asiria hanigo te king Hesekiabolo augwaligo po ola tolali, te aga asao olama po wali. Tama tiali goli, agai te aga sę ebo gavman tobolu bidi sela tagala palama, tama augwaligo te Asiria hani sugi pali. Tama agai te tagala palali bidi dabe nogi da, te bidi me te Eliakim, aga aya Hilkiago ogwa da, te bidi agai sę te kingo be tonalubo bidi da, tama me bidi nogi Sepna, te bidigo sę te king bidigo kuskus bidi da, te bidi me nogi Joa, aga aya te Asap, te bidigo ogwa da, te bidigo agai ebo sę te king bidigo agai te tigidali ebo sę po asębo sę ebo bidi dao.   
\p
\v 19 Tama te bidi sela te Asiria hani bidiboba sabalobo sogo, te Asiria ami gavman tobolu bidi me deligo augwali dali e tama bomo yai po wali, “Dage pelama, te king Hesekiabolo te e bomai king bidigo po agabolo pusigi pao, aga te Asiria hanigo king bidi, e tama po wali, ‘Hesekia, nago mena tama tiwai bomo elalubaso ebawe, nago eno bomo dologode bidibeo?  
\v 20 Nago homugo olo po tama wabogo bomo eyu, te wabao, te boi hwįbo da nago aiyaba me elaluaibawe, a? Nago ena dali hagoma ebawe? Naga homugo dego asama, nage tau sagasabo weyu, tama nago ena dali hagoma ebawe?  
\v 21 Eno koneani, nago homugo te Isip haniba tonono eyu, tama nago boi hwįbode augwaligo nage tau saiba. Tiali goli, eno nagebolo obao, te Isip hani augwali da, te da te sigi dili deli toga pai tiwai dao. Tiali tama, nago selama, tama te tolasa bilibo dono tiwai dao, tama tialima, te sigi dage mego naga nogode eneyu, dolaibao. Te Isip hanigo king bidigo agai kolesaga te bomo isąwai sigi dili mu tiwai dao,’ wali. ‘Tama teyu, nago boi hwįbode agai nage usu nama, nage me tau sagasogobeo.  
\v 22 Tiali goli, nago te po weyu da, dage Israel hani dabe dagego konealubo homu Godiba dąų wali da, duga Genuai Bidi, tama te agai dage tau saibao, tiali goli dego me te usu me egobeo. Magi baso meni, Hesekia, nago te aga dolo lotu po wabo pesage me, tama me te ofa nai ulubo sai alta dabe elalua pali bulu dabe dolai dao. Tama nago te Juda hani dabe ebadi, te Jerusalem ebadi elama, tama nago augwali e Jerusalem buluba sisinama, tama deli ofa nai ulubo alta saiba naga sisinama, lotu po wao, wai.’”   
\p
\v 23 “Tama eno kingo gasa po me wali, Hesekia, eno kingo 2,000 hos kibu nage mabo usu yaibao, tialima nago te 2,000 ami soldia bidi kegelama, tama augwali te kibu hosde dugulama, tama augwaligo boi hwįabo. Tiali goli, eno koneani, naga digi naga te namba tiwai ami soldia bidi menio,” te po wali.  
\v 24 “Tama nago homugo te Isip hanigo ami soldia bidi dabe augwaligo te hos kibu me, tama me te karis me, tama te nai dabe nago boi hwįbode tama augwaligo nage tau saibawe? Tiali goli, nage munu me tau sogobeo, tama augwali munu ma asogobeo. Tama teyu, naga bula bomogo eno dwasianu ami soldia hani da me aiyaba elalugobeo.  
\v 25 Nago homugo ena te asali, te ena homugo digi asama, te boi hwįagaselama, nago bulu dolaliwe weyu, a? Mu menio. Genuai Bidi Godigo aga digi enabolo obaso, te ena aselama, te nago te bulu te dolaliąo wali,” te Senakeripgo tagala palali bidi dabego te po wali.   
\p
\v 26 Eliakim tama, me te Sepna ebadi, tama me te Joa, tama te bidi selago te po wabo odali, tama augwaligo te Asiriago ami soldia gavman tobolu bidi dali e tama po wali, “Nago da dali po wainu da, te Siria pogo naga wao,” wali, “magi baso meni, dago te hanigo po koneani dao. Nago te Hibru pogo naga wagio, te taun obo banis daide ugwa badu dolalubo Juda bagego me nago te wabo po odabuo,” wali.   
\p
\v 27 Tiali goli, te ami gavman ofisa bidigo e tama po wei ponani, “Eno kingo ena tagala palama, te eno e wabo po te duga king dali, dage dali sigo naga odomainu ena tagala palobeo. Menio. Te oga taun obo banisde dolalubo bagego me te po odomainao wali. Magi baso meni, tialima te boi hwįbaso da, teda te dago te Jerusalem taun bologobea saibao, tama te dage tigidalide dwai bodolu sogo mu dageba dolo pedalaibao,” wali. “Tama te taun obo banis daide ugwadu oga bidibo bage augwaligo tuabo nai mu menio. Tama augwali te di tuyu, tama te augwa poi ma tuyu, te yaibao,” wali, “te tibo tiwai te dage tama dao,” wali.   
\p
\v 28 Tama te Asiria gavman ofisa bidigo te taun obo ugwadu daide te bidibo bidi dabeba tonama, tama agai te Hibru pogo moni dagą olama weyu, e tama po wali, “Dagego olo bugagia munama, tama te bomai kingo po bugagia odao, aga te Asiria king bidi dao,” wali.  
\v 29 “Agai te tama po wali, ‘Dagego te king Hesekiago agai dage dali ili po wabo po te mu po da homu igimio,’ wali. ‘Te Hesekiago dage tau selama, ena aiyaba me elaluama, dage bugagia me bidigobeo.  
\v 30 Dagego te Hesekiago agai te ili po wabo munu me odogio, tama dagego homugo te Genuai Bidigo dage tau selama, tama te da Asiriago dage aiyaba elalusiąma, tama te taun Jerusalem sogobewe homu eyuwe?  
\v 31 Dagego te king Hesekiago agai wabo po munu me odogio, tama agai po dagego odama, tama dagego ena dali dagego boi hwįagasabo homu egio. Tiali tama, dage bugagia bidabo homu eyu, tama naga te ulu ąį bugagia tuyu, tama duga te ni wain du me tuyu, tama me duga te gide ebo kaya du me bugagia bidiyu tuainu da, teda tea dagego te taun dago sagasobaso da, teda dagego gedugo sula tagalao,’ wali.  
\v 32 ‘Tama dage bugagia bidada pedubadi yaide, tama ena asama, tama dage selama, tama te gasa bulu meba tagalama, te bulu te duga bulu tiwaide bidaibao. Te bulu da, te du tubo ni wain gi me umabo mu ebo dao, tama me te sia gagawai nai wit, te bret nigibo nai gi me te bulude umabo mu elalubao. Tama te ni oliv me, tama me te ganama bunu me te bulude umabo elalubo bulu dao,’ wali. ‘Tialima, dagego eno po wali peyu da, tea dage bugagia bidiyu, tama dage me isigobeo. Tama Hesekiago agai dage ili po ola mayu, e tama po wabo da, Genuai Bidigo dage tau selama, tama da aiyaba elaluaibao wabo po. Tiali goli, dagego homugo agai po mu da olama, dago te boi hwįaibao olama, dagego genuai homugo konealugio,’ te po wali.  
\v 33 ‘Dagego homugo te gasa hani augwaligo godigo augwali tau selama, tama augwaligo da Asiria hani dali boi hwįnama, tama augwaligo da aiyaba elalualiwe, a? Mu menio.  
\v 34 Tama dago te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te hani dabe dali boi hwįgi pabo sogo, augwaligo god mena bidibowe tama augwali tau sabowe? Tama dago te Samaria buluba boi hwįagasali sogo, tama te Samaria hani augwa godigo augwali tau selama, tama augwaligo da Asiria aiyaba elalualiwe? Mu menio.  
\v 35 Dago te umabo bulu bidi dabe dali hwįani, tama te hani augwaligo da te augwa umabo god bidibadi, tiali goli augwaligo te god me deligo augwa te bulu me tau selama, tama dago augwali dali boi hwįani me tagalai menio. Tama tialima, te Jerusalem hani bidi dabe, dagego homugo te duga Genuai Bidigo dage tau saibawe, tama dago dage aiyaba elalubo usu egobewe?’ Eno king bidigo te po dagebolo ola tolai dao,” te Asiria gavman ofisa bidigo te po wai.   
\p
\v 36 Te Asiria gavman ofisa bidigo agai te po wabo silama, tiali goli te taun obo ugwadu daide bidali bidi dabego tama augwaligo sagia siyu, po me deli wei ponobe, magi baso meni, te king Hesekiago augwalibolo te Asiria hani augwaligo te po wei ponogio olama, habu selai baso, tama augwaligo te po wei ponobeo.   
\p
\v 37 Tama tialima, te Asiria gavman ofisa bidigo wali pode te Eliakim, tama me te Sepna, tama me te Joa, te bidi sela augwaligo haliga sęgę mu yali. Tama tibaso, augwa bulubo ugwa pibisayali. Tama augwaligo te Asiria gavman ofisa bidigo wali po tigidali po te king Hesekiabolo pusigi pali.   
\c 19  
\s1 Te king Hesekiago agai sęgę yai po te profet Aisaiabolo pusigi pali  
\r (Ais 37:1-7)  
\p
\v 1 Tama te king Hesekiago te Asiria bagego wali po dabe odali, tama aga homu sęgę mu ebaso, tama aga bulubo ugwa pisila sąwai. Tama agai te homu dene ebo bulubo ugwa bulama, tama aga te Genuai Bidigo tempel be tomoba pali.  
\v 2 Tama te king Hesekiago te kingo be tomode sę ebo bidi Eliakim i wali, te bidi te kingo be tonalubo bidi da, me te bidi Sepna dali, te bidi te kingo kuskus bidi da, tama me te pris sę kibu be hauwa yali bidi dabe dali. Tama agai augwali te profet Aisaia sugi pomainu tagala palali, aga aya Amos da. Tama te bidi dabe me tigidali te homu dene eyu, te tobage ugwa naga bubulu pali.  
\v 3 Tama augwali pelama, te profet bidi Aisaia pageba sabolama, tama augwaligo te profet bidi Aisaiabolo e tama po wali, “Kingo te po wali, ‘Megi e tama side da, teda moni homu sęgę ebo sogo dao,’ wali. ‘Tama te Asiria hani augwaligo dabolo tama te hale yabo po umabo po weyu, posobo po walio. Da te we me deli haliga yai we gagawai dao, tama te wai ame nabo sogo te pedalobao, tiali goli te we te wai ame nabo te bomo menio,’ wali.  
\v 4 ‘Asiria king bidigo aga sę ebo gavman ofisa bidi tagala palali bidigo aselama, dago God dolo agai dwai po mu wagasalio, dena Genuai Bidi dao, aga te tigidali sogo bidada peyu, bidada pabo God dao. Tialima, te aga dolo te dwai po wali aga odali bogo, tama aga digi te po wali bidibolo wei ponoyu, sęgę mawaibao,’ wali. ‘Tama teyu, dago homugo nago te God dolo gedu haluasa po wao, tama agai da dwasianu hani bidibo tau somainao,’ kingo te po wali,” augwaligo te po wai.   
\p
\v 5 Te profet bidi Aisaiago te king Hesekiago ola tolali po odali,  
\v 6 tama te po sela asali bage augwalibolo e tama po wali, “Dage te king pageba ma peyu, tama te Genuai Bidigo e po tama aga dolo pusao. Genuai Bidigo e tama po wai, ‘Nago augwaligo te dwai po wali te pode moni homu elama, nage wi igio,’ wali. ‘Te po wali bidi dabe augwali da, te Asiria king bidigo olo sę ebo bidigo ena dolo te po wali dao.  
\v 7 Magi baso meni, ena Genuai Bidi, eno te Asiria king bidigo homu begela tagalama, tama agai po me deli odobo si, teda agai dage tagalama, aga buluba ma begasa paibao,’ wali. ‘Tama aga te Asiria bulude bidibo sogo, tama eno te me badu bidi homu begelama, augwaligo moni ge hwągo aga ela mumai yaibao,’ Genuai Bidi Godigo te tama wali,” Aisaiago te po wali.   
\s1 Te Asiria hani augwaligo te Jerusalem taun dolabo po ma wali  
\r (Ais 37:8-20)  
\p
\v 8 Te Asiria bulu bidi gavman ofisa bidigo e tama po odali, te king Senakerip te Lakis taun tagalama pali po odali. Tibaso, te ofisa bidi aga te Jerusalem bulu tagalama, tama aga ma begasa pelama, tama te bidi pali page koneainu kegegi pai, kingo te taun Lipna hani dali boi hwįgi pobaso, tama agai aga teba sugi pali.  
\v 9 Te Asiria hani augwaligo boi hwįyu bidali, tama me badu bidi dabe aselama, te king Senakerip e tama po wagasali, “Te Itiopia bulu king bidi Tirhaka aga ami soldia bidi dabe dali, augwali asama, nage dali boi hwįagasobao,” wali. Te king Senakerip agai te po odobaso, tama agai pas asęnama, te me badu bidi nogode munama, tama augwaligo te king Hesekiabolo magi pali, magi baso meni, te agai homugo te taun Jerusalem agai sabo homu eyu, tama tiai dao.  
\v 10 Te king Senakeripgo pasde e tama po wali, “Eno koneanio, te nago konealubo god, te agai te po wai, agai ena sula tagalama, tama eno dage aiyaba elaluama, te Jerusalem taun me sogobe,” wali. “Tiali goli, te ili po dao, tama teyu, nago homugo agai te wali po mu da homu eyu, konealugio,” wali.  
\v 11 “Naga digi naga konea palio, da Asiria hani king bidi dabego ebo kolesaga da, dago te gasa bulu hani bidi dabe dali boi hwįgi pabo kolesaga, dago naga augwali mu dolobo dao. Nago homugo eno te nago bulu dolobe da homu eyuwe, a?  
\v 12 Polobadu eno wąį nǫų dabe augwaligo gasa bulu taun Gosan, me te taun Haran, tama me te taun Resep, tama te hanu dabe dolai dao. Tama augwaligo te Beteden hani augwali te Telasar taunde bidibadi, ela muna silai dao,” wali. “Tama augwaligo god dabego te hani augwali me tau sabeo,” wali, “tama augwali bugagia me bidibe. Mu menio.  
\v 13 Te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te taun bulu hani king bidi dabe augwali me bidiba, agawe? Menio. Dago augwali tigidali ela muna silai dao,” Senakeripgo pasde te po wali.   
\p
\v 14 Te king Hesekiago agai te king Senakeripgo tolali pas agai te bidi dabego nogode agai sali. Agai te pas asęani po neda silama, tama agai te Genuai Bidigo tempel be tomoba selasa pali. Tama agai te pas te Genuai Bidi bidibo pesage pąde muani, tama agai pisaganama, tama bugagia dodolama, muani.  
\v 15 Tama te king Hesekia agai te Genuai Bidi dolo gedu haluasa e po tama wali, “Genuai Bidi, nage da Israel hanigo God, tama nage e bede naga sę ebo ensel mobo bidi si noma si ugwadu daide bidibo dao, tama nage king naga te dugabo ni namede dugulalubao. Nage te nage God mu dao, te nago naga te e tǫde te tigidali bulu hani dabe tonalubo dao. Naga deli naga te tǫ me, te dagalu me, naga naga nigai dao,” te po wali. \x * \xo 19:15 \xt Sai 25:22\x*  
\v 16 “Genuai Bidi, eno homugo nago olo bugagia munama, tama eno gedu haluasa po wabo odao, tama naga te da tigide te dwai nai pedalabo nago bugagia suao,” wali. “Tama eno homugo augwaligo te dwai po wali te nago odao, te king Senakeripgo agai nage dali posobo po wabo, God nage tigidali sogo bidada pabo bidi dao.  
\v 17 Genuai Bidi, dago koneanio, te Asiria king hani augwaligo te umabo we bidi mu tama augwaligo elama, silibo dao, tama augwaligo taun bulu me tama dolobo dao,” wali.  
\v 18 “Tama me te king bidi dabe augwaligo te hani we bidi dabe augwaligo te tibo god noma nigali piksa dabe tigidali selasa pelama, siaba tigidali ulali. Te tibo god dabe da, polo dolobo god dabe da, magi baso meni, te god dabe da, te da tibo god dabe da. Te god dabe da, bidigo digi te ni dabe te masigi dabe selama, te nogogo nigai god naga dao.  
\v 19 God, dago Genuai Bidi, megi tama eno homugo nago da tau selama, te megi te king Senakeripgo nogode nago tama nago da ma dobola sao,” wali. “Tama tiyu, tigidali tǫde hani we bidi dabe augwaligo nage bugagia mu konemainao, nage deli mu God mu dao.” Te king Hesekiago te God dolo gedu haluasa po weyu, e tama po wai dao.   
\s1 Profet bidi Aisaiago te king bidibolo te Godigo po ola mani  
\r (Ais 37:21-38)  
\p
\v 20 Awe, te profet Aisaia, aga aya nogi Amos, te Aisaiago te king Hesekia e tama po ola tolali, “God, Israel hani dena Genuai Bidigo, e tama po walio, agai te nago gedu haluasa po wali te agai odalio.  
\v 21 Tama megi te agai te king Senakerip dali naga po elalubao wali, te Asiria king bidi. Genuai Bidigo e tama po wali, ‘Senakerip, te taun Jerusalemgo te nage dali te gisugu dwai mu weyu, tama nage dali posobo po weyu, tama nage dali dwai bidi mu da olama, tama dwai mu da wabuo,’ wali.  
\v 22 ‘Senakerip, tama nago te posobo po weyu, tama te po dwai weyu, tama te naga digi naga nogi ugwaba siyu, tama teyu, nago hagoma ebao,’ wali, ‘nago homugo nago te tibo sę de dali ebawe? Nago te tama tibo kolesaga ena dali tama tibao, Israel hanigo God, God ena da dwagi yai bidiyu, tama te doloba pai kolesaga naga tigidali sogo ebo dao.  
\v 23 Nago po te naga sę ebo gavman ofisa bidi dabe augwaligo ola menama, tama augwali nago nogi ugwaba mu salio,’ te po wali, ‘tama augwali ena dolo posobo po walio. Senakerip, tama augwaligo pedauwalidu nago e tama po digi po wali, nage te naga te boi hwįbo karis hauwadu dolaluyu, tama nage te Lebanon moni te bulu du tobolu muba holobao, wali. Tama nage te Lebanon bulu te ni dulu tomoba mu tula pobao wali, tama te bulu te bidi bilisąbo madigi pelama, tama nago te ni bǫ dabe te bobobage bobobage ni dabe naga togwao, tama te dwagi dwagi yai ni saipres me togwao wali.  
\v 24 Tama nago me po tama wali, nage te gasa bulu taunba pabo sogo, te nage tubo wę da nage me habuge me ebeo. Te nage te wa pai buluba pabo sogo me, te naga te tǫ togalide me te wę pągąna sai elalua pai dao, tama tiwai wę te naga hani augwaligo tama me te wę tuai dao. Tama tialima, nage te Isip buludu te pobadi me, nago sągągo sula sąwai dao.’”   
\p
\v 25 “‘King Senakerip, nago konebeo, polobadu digi eno nage tama sę emainu dąį ilai dao. Ena digi nagebolo tama bomo menama, tama nago te bomai obo elalua pabo taun dabe dolomainu bomo eno nage mawai dao. Tama nago eno homu kolesagadu wali peyu, tama nago te taun dabe dolama, tama augwali te moni masigi pesage tiwai nigilama, tama te moni pobele bage tiwai pesage holao, eno te homu polobadu elama, tama nago tama tiai dao.  
\v 26 Tama te taunde bidali we bidigo augwali wi dwai mu yali, tama augwaligo homu kolesaga teba dąų mu wali, augwaligo tama teyu, augwa bomo mu sia sali. Augwali e tama tiwai bidaluali, te nosai giliga doloyu, wa pabo tiwai gilama mu tiwai, mu tama augwali bidaluali, te posola pai wali te giliga asobo badu asali. Te nosai te be pedu ugwa badu holai, tama te nosai dabe holala pali, te nosai dabe te nosai te posola pai wali asobo sogo dila pai elalubo nosai menio.’”   
\p
\v 27 “‘Tiali goli, eno nage bugagia mu konea palio. Te eno nago homu kolesaga konea palio, tama me te eno nago homu kolesagago ebo sę eno subo dao, tama te tigidali nage pabo bulude me. Tama me te eno koneani, te nago ena dali sębę mu genuai ebo, te eno koneanio.  
\v 28 Nago ena dali sębę ebo eno sualio, tama te nago te hagoma eyu, wabo po me, tama te kolesaga me eno koneanio, tama te naga digi naga nogi ugwaba sabo. Tama te megi eno nage dali eno bomai po mu obao. Tama eno te huk selama, tama eno te nago guniba muaibao, tama me te eno te ain dage te bidi dabego te kibu hos gunide mubo ain dage eno selama, tama eno te nage pedauwalide munama, dąų walaibao. Tama tilama, te nosali eno nage te naga asali te tųdu te nage eno kegasa paibao,’ God Genuai Bidigo te po wali,” Aisaiago te po ola tolali.   
\p
\v 29 Tama te profet bidi Aisaiago te king Hesekiabolo e tama po me deli ola mani, te king Hesekiago agai te e tama sę ebo sulama, dąį ilimainu, tama te king Hesekia agai te tama sę ebo sulama, tama agai koneagameo, tama te tigidali sę dabe te Genuai Bidigo wali po gilama te Asiria king bidi Senakerip tigide mu pedalama, sęgę saibao. Te profet bidi Aisaiago te po wali, “Tama nago te tama tibo sę ebo subaso da, teda te dąį nago suao. Tama te megi tama bidibo kibu bede me, tama te nosali bidibo kibu bede me, te dagego tuabo nai bulubo usu me egobeo, te boi bidi dabe pąde bidibaso. Tama tialima, dagego te sia gagawai nai wit dabe tama te dagego gide olo dali pedalai nai tiwai duga selama, tuaibao,” wali. “Tiali goli, te sela wabo kibu bede, te dagego gide nai bulama, tama duga nai selama, tuaibao,” wali. “Tama te ni wain me duga bulama, tama duga te ni wain du me duga selama, tama tuaibao, te sela wabo kibu bede.  
\v 30 Tama te Juda hani we bidi augwali, te boi bidi dabego te augwaligo te Juda hani augwali mu dolobo munu me usu egobeo, tama augwali bugagia mu bidaibao, tama augwali hani te umabo mu ma pedalaibao, te sia gagawai nai te wit tiwai te gide bulama, te umabo mu mubo tiwai mu ma pedalaibao,” wali.  
\v 31 “Te boi bidi hani augwaligo te Jerusalemde bidibo tigidali we bidi dabe munu me mu dologobeo. Menio. Te dwasianu hani augwali me bidaibao. Tigidali Bomo Elalubo Genuai Bidigo agai te dila pai homu kolesagago te nai nosali mu pedalaibao homu yali,” Aisaiago te Hesekiabolo te po wali.   
\p
\v 32 Tama agai po me wadolama, tama wali, “Tama te Genuai Bidigo e tama po ma wai, ‘Asiria king bidi dali, te aga ami soldia bidi dabe dali, augwaligo te Jerusalem taun tomoba asobo usu egobeo, tama me te augwaligo te ene me deli te taun tomoba enebo usu egobeo. Te ami soldia hani augwaligo te boi hwįbo awa me deli selasa, tama augwali te taun pąba asobo usu egobeo,’ wali. ‘Tama augwaligo te tǫ selama, te taun obo banis pąde sisiniyu, tedu holomainu ebo usu me egobeo, tama augwali te tǫ tųde dolaluyu, boi hwįabo, te me menio.  
\v 33 Ena Genuai Bidi da, tama eno te Asiria king bidi homu begelama, te tama aga asali tųdu ma begasa paibao. Tama tiyu, aga te e Jerusalem bulu taun tomoba asobo usu me egobeo.  
\v 34 Eno tama tiwaibao, magi baso meni, eno ena genuai nogi tobade, tama me te polobadu eno sę bidi Devit dali po dąų wali po tobade tama tiwaibao.’” Aisaiago te Genuai Bidigo te tama wali po te king Hesekiabolo pusa mani.   
\p
\v 35 Tialima, megi hulide tama, te Genuai Bidigo sę ebo ensel mobo bidi me deli te Asiria hani bidibo pesageba pelama, tama te 185,000 ami soldia bidi elama, isilali. Tama te do kigamu mu te king Senakerip aga hodaluama, te ami soldia bidi dabe isali tigi suali.  
\v 36 Tama tialima, te aga dali, te me badu ami soldia bidi dabe dali, augwali me bidaluali, tama augwali hodaluama, tama augwali te Asiria pabo bulu tųdu ma geasa pali, tama te king Senakerip aga te Nineve taunba bidigi pali.   
\p
\v 37 Tama nosali me sogo deli aga te lotu be tomoba pelama, te Nisrokba lotu po wabo sę edubadi yaide, te Nisrok te aga tibo god da. Tama aga ogwa si, me nogi Adramelek, tama te me wai nogi Sareser da, tama te augwa sigo te ge pedai bainat hwą selama, tama te lotu be tomoba pelama, te augwa si aya king Senakerip elama, isilali. Tama tilama, nosali augwa si te Ararat buluba wi pelama, bidigi pali. Tama tiali, te aga te gasa ogwa me, aga nogi e dao, Esarhadon, aga te ogwago aga ayago te king yali sę selama, tama aga te Asiria king nigilama bidali.   
\c 20  
\s1 Te king Hesekia gasi sobaso, tama te Genuai Bidigo aga tau sali  
\r (Ais 38:1-8; 38:21-22; 2 Sto 32:24-26)  
\p
\v 1 Tama te Asiria hani augwali asama, te Juda hani me dolagasiąbadi, te sogo, te king Hesekia aga moni gasi mu sali, tama pąde aga isabo homu mu yali. Tialima, te profet bidi Aisaia, te Amosgo ogwa, agai te king Hesekia gasi ebo sugi pelama, tama agai e tama po wali, “Genuai Bidigo e tama po wali, ‘Nago te gasi sia sogobeo, tama nage isaibao,’ wali, ‘tama teyu nago te naga bede bidibo we bidi augwalibolo e po wao, tama augwaligo te nago sę dabe dodolinao,’ God Genuai Bidigo te po wai,” Aisaiago te po wali.   
\p
\v 2 Tama te Hesekia agai te wali po odali, tama aga gesabidi te be habu dagaba gegi solama, tama agai e tama gedu haluasa po Genuai Bidibolo wali,  
\v 3 “Genuai Bidi, ena nage wali mu peyu, tama eno nago sę mu yai dao. Tigidali sogo eno nago homu godolo ebo kolesagadu naga wali pai dao,” wali. “Tama teyu, nago te eno te sę yaliba kone palama, tama nago ena isimainogo sula tagaligio.” Tama agai tama gedu haluasa po olama, tama aga gela genuai mu wali.   
\p
\v 4 Tama te profet Aisaia aga te kingo be tagalama, tama aga pali. Tiali goli, aga te kingo te be obo sesege taga pisąbadi yaide, tama Genuai Bidigo agabolo po ma wali,  
\v 5 “Nage ma geasa pelama, te king Hesekia sugi pao, te king te eno hani we bidigo king bidi dao,” wali, “tama agabolo e tama po wao, ena God dao, aga wąį nǫų Devitgo Genuai Bidi, eno agai gedu haluasa po wali eno odalio, tama aga moni gela wabo sualio,” wali. “Tama tibaso, eno aga ma wiegi yai ma ilibao,” wali. “Tama duba te aga te eno lotu beba ma pelama, te ena dolo lotu po waibao,” wali.  
\v 6 “Tama agabolo e tama po wao, ena Genuai Bidi, eno po obao, tama eno aga bidabo kibu be ma bobe ilibao, te e tama kibu be aga ma bidaibao, te nogo si olama, te sągą badu a naga, te 15 kibu me ma bidama, tama nosali aga isaibao,” wali. “Tama teyu, te Asiria king bidigo aga aiyaba elaluama, tama augwaligo te Jerusalem taun somainu eno sula tagalogobeo. Mu menio,” wali. “Eno tama tiwaibao,” wali, “magi baso meni, eno ena genuai nogi ma kone paliyu, tama me te eno polobadu te king Devit dali po me bodolu sali poba kone paliyu, tama tiaibao, te eno sę bidi.” Genuai Bidigo te po Aisaiabolo pusali.   
\p
\v 7 Tama te profet bidi Aisaia pelama, te po mina silama, tama agai te kingo sę ebo bidi dabebolo e tama po ola mani, “Dage pelama, te ni kaya du augwaligo te wa ilali kaya du sigi piąo,” wali. Tama augwaligo te ni du dabe sigi pelama, tama dodolama, tama te king Hesekiago te bomai keniba muani, tama tibo si, te kingo bomai keni pedala selama, tama te moni gasi silali.   
\p
\v 8 Tialima, hasia bolo king Hesekiago Aisaiabolo e tama po hanalu wali, “Genuai Bidigo agai enabolo mena tama tiwai sę ola menama, tama tedu eno koneaibao, eno ma wiegi yai pedalama, tama duba ena nago gedude te tempel beba paibawe?” te po hanalu wali.   
\p
\v 9 Tama te profet bidi Aisaiago agabolo e tama po ola mani, “Genuai Bidigo e tama dąį nagebolo ola mawaibao. Nago te tama dąį sulama, koneagameo. Dago te be posobode te giliga ge soabo me nedebo togobilide suao. Nago homugo te giligago te togobiligo noma polo selasa peyu, te nogo si dąįba usu nigi pabo si, ma nago homugo te togobilide te noma polo ma geasa peyu, te nogo si dąįba usu nigi pabo si?”  
\v 10 Tama te king Hesekiago e tama po wali, “Te tama tibo te usu dao, te giligago te togobili noma polo selasa peyu, te nogo si dąį usu nigi pabo te bomai sę meni. Tama tialima, eno homugo me te togobili noma aga polo tama ma begasa peyu, te nogo si dąįba usu nigi pabo tama emainao,” wali.  
\v 11 Tama tialima, te profet bidi Aisaiago te Genuai Bidi God dolo bomonama mu wali, tama te Genuai Bidi Godigo te togobili noma te giligago polo ma selasama, ma geasa peyu, te nogo si dąįba polo usu nigi pali. Te togobili te polobadu king Ahasgo nigai togobili dao.   
\s1 Te Babilon king bidi Merodakgo agai te me badu bidi te Jerusalem bulu taunba tagala palali  
\r (Ais 39:1-8)  
\p
\v 12 Te Merodak Baladan, Baladango ogwa, aga te Babilon bulu king bidi. Agai te king Hesekia moni gasi yali po odali, tama tibaso, agai te pas me deli asęnama, tama me te agai te olo tau siyu maiabo nai me deli dodolama, tama agai te tagala palobo bidi dabebolo nogode munama tolali, tama augwaligo selasa pelama, te king Hesekiabolo magi pali.  
\v 13 Tama te king Hesekiago te bidi dabego wali po odama silibo si, tama agai te bidi dabe te agai te moni bakstuaba te agai augwali odasa pelama, tama agai te tigidali mone me, tama me te gasa nai dabe me, te nai dabe me tigidali te bidi dabebolo agai augwalibolo wasilali. Tama te augwaligo te agai te mone mubo bede muani te tigidali silva me, me te gol me, te nai dabe tigidali augwaligo sula silali, tama te dwagi yai denami ebo pauda me, tama me te dwagi yai denami ebo sanda wel me, tama me te boi hwįbo nai dabe tigidali me, tama me te agai te bakstuade muani te gasa nai dabe tigidali augwaligo suali. Te king Hesekia agai te nai me deli me dualobe. Mu meni. Tama agai te kingo be obo tomode elalubo nai me, tama me te Jerusalem bulude elalubo nai dabe tigidali te agai augwalibolo ola mena silali.   
\p
\v 14 Tama te Babilon bulu bidi dabe te augwa buluba ma begasa pela silali, tama nosali te profet bidi Aisaia asama, te king Hesekia suagasali, tama agai agabolo e tama po hanalu wali, “Nage pageba te asali bidi dabe, te augwali mena bulu bidi dabe dawe? Tama augwaligo nagebolo magi nai po waliwe?” Tama te king Hesekiago agai agabolo e tama po wei ponani, “Te bidi dabe augwali te digibulu bulu mu, te Babilon bulu bidi dabe asalio,” wali.   
\p
\v 15 Tama te profet bidi Aisaiago te po wali, “Tama augwaligo mena mena nai naga mu te nago obo tomoba pelama, sualiwe?” Tama te king Hesekiago agai te po wei ponoyu, e tama po wali, “Tama eno augwalibolo te eno te tigidali doado bage dabe me dualobeo,” wali, “tama augwalibolo te eno te doado bage tigidali mu ola mena silalio,” wali.   
\p
\v 16 Tialima, te profet bidi Aisaiago te king Hesekiabolo te po wali, “Megi eno nagebolo eno e po obao, Genuai Bidigo po dao.  
\v 17 Genuai Bidigo te po wai, ‘Bodolu me deli nosali pedalaibao,’ wali, ‘tama te Babilon hani augwali asama, tama te kingo bede te mubo doado bage tigidali sagasaibao,’ wali, ‘tama me te tigidali doado bage te naga wąį nǫųgo polobadu te augwaligo te mone te genuai bakstuade sisinama muani doado bage me. Tama augwaligo te doado bage me deli munalubo sula tagalogobeo. Mu menio. Tama augwaligo te tigidali doado bage dabe selasa, te augwa Babilon buluba paibao,’ wali. \x * \xo 20:17 \xt 2 Kin 24:13; 2 Sto 36:10\x*  
\v 18 ‘Tama te augwaligo te nago hanigo tomode te me badu wai dabe selama, tama te wai dabe augwali te Babilon buluba odasa paibao. Tama augwaligo te odasa pabo ogomani te augwali te kibu ebo gilama te sogoli tinama, tama te augwali te Babilon bulu king bidigo bede sę yabo bidi nigilaibao,’ wali.” \x * \xo 20:18 \xt 2 Kin 24:14-15; Dan 1:1-7\x*   
\p
\v 19 Tama te king Hesekiago agai te profet Aisaiago wali po odali, tama agai te profet bidi Aisaiabolo e tama po walali, “Genuai Bidigo po nago enabolo pusa mobao,” wali, “te po te dwagi yai po dao.” Hesekiago te tama po wali, magi baso meni, agai e homu yali, ‘Te ena king bidi me bidibo sogo, te dwai dwai sęgę ebo sę pedalogobeo. Tama da bugagia mu bidaibao, tama te boi me hwįgobeo,’ te homu yali.   
\s1 Te king Hesekia isali po  
\r (2 Sto 32:32-33)  
\p
\v 20 Te king Hesekiago te tigidali haniani sę yali po da, te po gasa bukude elalubo, augwaligo e tama nogi wabo da, Te Juda Hanigo King Bidi Dabego Yali Sę Po Buku dao. Te bukugo te tigidali bomai sę agai yali po, tama te tǫ dulude te bobobage wę asabo wę gamia tų agai nigilama, te Jerusalem taun buluba wę kegasa asai dao. Tama te e bukugo me te po wabo da, te agai ulu wę nigai da wabo dao.  
\v 21 Te king Hesekia isali, tama te aga wai, te Manase, te aga ayago yali sę selama, te aga king bidi nigilama bidali.   
\c 21  
\s1 Manase aga te Juda hanigo king bidi nigilama bidibo sogo  
\r (2 Sto 33:1-20)  
\p
\v 1 Te Manase aga king bidi nigilama bidibo sogo, agai kibu be te nogo si olama, te sągągo si olama, te kibu be elaluama, tama te aga king bidi nigali. Tama aga te Jerusalem taunde te king bidi nigilama bidali kibu be, te 55 kibu be usu nama bidali. Aga ida nogi te dao, Hepsiba dao.  
\v 2 Tama te king Manase agai te dwagi yai kolesagadu me wali pabe. Mu meni. Tama me te agai te tǫde polobadu te bidali bidi dabego yali haniani dwai kolesagadu wali peyu, tama Genuai Bidigo augwali sela sąnama, tama agai te tǫ te Israel hani dabe augwali te tǫ mani. Tama te king Manase agai te hanigo yali kolesagadu wali pali, tama te king Manase agai te Genuai Bidigo gedude dwai kolesaga mu iduali. \x * \xo 21:2 \xt Jer 15:4\x*  
\v 3 Te king Manase agai te dwai haniani kolesaga naga tama yali. Tama agai te tibo god dolo lotu po wabo pesage ma nigibo sę yali, polobadu aga ayago, te king Hesekiago, sela sąyani pesage. Tama agai te tibo god Bal dolo lotu po wabo pesagede agai te alta sai nigibo sę yali. Tama agai te tibo god we nogi Asera noma nigibo sę yali, te polobadu te king Ahapgo yali tiwai, te Israel hanigo king bidi, te agai te sę yai, tama me te agai te dagalude elalubo hǫba lotu po wabo sę iduali.  
\v 4 Tama agai te tiwai sę yali, te Genuai Bidigo tempel be tomode te agai te tibo god dolo lotu po wabo alta sai nigibo sę yalio. Tiali goli, polobadu Genuai Bidigo te bede e tama po wai, “Te Jerusalemde elalubo be, te be te tigidali we bidi dabe augwaligo ena deli dolo naga lotu po wabo be dao,” wai dao. \x * \xo 21:4 \xt 2 Sml 7:13\x*  
\v 5 Tiali goli, te king Manase agai te me badu alta sai te Genuai Bidigo tempel be habude te tigidali we bidi sisinagasabo madigi te pesagede si te be tomode elalubo madigi, te agai te me badu alta sai nigibo sę yali, tama aga te alta saide bidiyu, te hǫ dabeba lotu po wali.  
\v 6 Tama agai te aga ogwa elama, tama agai aga te wai te siaba sese ula palali, te ofa nai ulubo tiwai gilama yali. Tama agai te polobadu isali bidi isi bidigo aga tau somainu i wali, tama agai me te sogo yesi bidi me hanalu wali, tama te bidi dabe augwaligo aga tau somainu, tama agai te haniani kolesaga umabo mu yali. Manase agai te Genuai Bidi gedude sęgę sabo kolesaga genuai mu sęgę sali. Tama agai tama tibo dwai kolesaga ebaso, tama te Genuai Bidigo te king Manase dali sębę genuai mu yali.   
\p
\v 7 Tama te king Manasego agai te tibo god we Asera noma nigali piksa selama, tama agai te Genuai Bidigo tempel be tomode muani, tialima te polobadu te Genuai Bidigo te king Devit dali, te king Solomon dali, augwali sibolo e tama po ola mawai dao, “Te Jerusalemde elalubo tempel be, te be te ena digi te ena te Israel hani dabe augwali tomode eno dąį ilai dao,” wali, “tama tigidali sogo tama augwali eno te beba naga aselama, tama augwaligo ena deliba naga lotu po wabo be dao.  
\v 8 Tama tialima, dage tigidali eno hani we bidi dabe me, me te eno po odama wali pabo we bidi dabe, me te eno bomai po wali pabo we bidi dabe me, Moses, eno sę bidi, agai dagebolo mawai po, tama tiali tama te eno dage munu me sela sągobeo, te tǫ te polobadu te eno duga wąį nǫųbolo mawai tǫ dao, tama te megi te tǫde dage te bidibao,” wali. \x * \xo 21:8 \xt 1 Kin 9:3-5; 2 Sto 7:12-18\x*  
\v 9 Tiali goli, augwaligo te po odama, tama augwaligo wali pabe. Mu meni. Tama te king Manasego te augwali kegelama, tama augwaligo te dwai dwai kolesaga umabo mu yali. Polobadu te tǫde te bidali Israel hani isąwai we bidi dabe augwaligo te dwai dwai kolesaga ebaso, tama Genuai Bidigo augwali te tǫdu sela sąyani. Tama te Juda bagego te dwai dwai kolesagago te polobadu te tǫde bidali dwai bagego yali kolesaga aiyaba elaluali.   
\p
\v 10 Genuai Bidigo te king Manasego te dwai kolesaga ebo sę suali, tama tibaso te Genuai Bidigo te profet bidi dabebolo e tama po augwalibolo ola mani, te profet bidi dabe augwali te aga sę ebo bidi dabe da. Te Genuai Bidigo po e tama da,  
\v 11 “Te king Manase agai te haniani dwai dwai kolesaga mu yali, te polobadu te Amor bagego yali kolesaga aiyaba elaluali. Agai te tibo god noma nigilama, tama agai teba lotu po wali. Tama agai te tibo kolesagago te Juda hani umabo mu agai kegelama, tama augwaligo me ena gedude sęgę sabuo.  
\v 12 Tama tialima, ena God dao, Israel hani duga Genuai Bidi dao, eno po obao, tama eno te Jerusalem bulu me doloyu, tama te Juda hani me mu dolaibao,” wali, “tama te gasa bulu bidi dabe augwaligo te sę yali po odobo sogo, tama augwali midigi genuai mu selama, tama augwali moni homu mu yaibao.  
\v 13 Tama te eno te Jerusalem taun dolabo kolesaga e tiwai dao, eno te Samaria bulu doloyu, te king Ahap aga hani dali doloyu yali deli kolesaga tiwai naga yaibao,” wali. “Tama eno te Jerusalem bulu taun dolama, tama te tigidali we bidi dabe mu dola silaibao, tama tilama, te Jerusalem taun te e tama tiwai elaluaibao, te plet pou wę telawai tiwai gilama, te magi nai mu me te dwasianu pobele bage me meni yai olo mu elaluaibao,” wali.  
\v 14 “Tama tialima, te me badu we bidi dabe tede me bidibaso da, teda augwali te eno munu me tau sogobeo. Mu menio. Tama augwali te eno te boi bidi nogoba muaibao. Tama te boi bidi dabe augwaligo te augwali dolama, tama augwaligo doado bage dabe me wi sela pomainao,” wali.  
\v 15 “Eno tama tiwaibao, magi baso meni, te eno hani we bidi dabe augwaligo eno gedude te dwai sęgę sabo kolesaga te augwa wąį nǫųgo te Isip bulu tagalobo side te sęgę sabo gagalalio, tama augwaligo te deli kolesaga naga me edu bidali. Tama augwaligo te dwai sęgę sabo kolesaga me edu bidibaso, te eno te haliga sębę mu yalio,” God Genuai Bidigo te po wai.   
\p
\v 16 Te king Manasego agai te Juda hani augwali kegelama, tama augwaligo te Genuai Bidi gedude sęgę genuai mu sali. Tama me te agai aga hani we bidi dabe dali boi bidi ebo kolesaga yali. Tama te tigidali Jerusalem bulude te king Manase agai e tama kolesaga yali, te dwai kolesaga isiąwai doloba pai we bidi umabo mu agai ela muna muna pali.   
\p
\v 17 Te king Manase agai te haniani sę yali po, te gasa bukude elalubo, te buku da augwaligo e tama nogi ebo buku dao, Te Juda Hanigo King Bidi Dabego Yali Sę Po Elalubo Buku da, wabo dao. Te e bukude me, te king Manasego sęgę sali sę po ola mabo buku dao.  
\v 18 Tama te king Manase isali, tama augwaligo te aga te kingo be sesegede te obo tomode te tǫ me deli elalubo madigi te king Manase pubulali. Te tǫ te augwaligo e tama nogi wabo, te tǫ te Usago tǫ da. Te aga ogwa, agai nogi te e dao, Emon, tama te bidi agai te bidigo sę yali silide te aga king sę yali.   
\s1 Emon aga te Juda hanigo king bidi nigali  
\r (2 Sto 33:1-25)  
\p
\v 19 Te bidi Emon aga te king bidi nigilibo sogo, agai kibu be te bidi sese deli olama, te ugwadu si, te 22, tama te aga Jerusalem bulude te king nigilama bidali kibu be te si digi mu tama bidai. Te aga idago nogi da, Mesulemet, te aga bulu te taun Jotba bulu bidi Harusgo wegi da.  
\v 20 Tama te king Emon agai me te Genuai Bidi gedude dwai kolesaga yali, te aga ayago yali tiwai yali, te king Manasego yali gilama tiwai kolesaga yali.  
\v 21 Tama agai te aga ayago polobadu yali gilama te tibo godiba lotu po wabo sę yali, tama agai te aga ayago yali dwai kolesagadu dolo mu wali pali.  
\v 22 Agai te God tudiba mu togolali, te aga wąį nǫųgo Genuai Bidi mu, tama agai te Genuai Bidigo godolo ebo kolesagadu wali pabe.   
\p
\v 23 Tama me sogo deli te Emon aga sę ebo gavman ofisa bidi dabe augwali sisinama, tama augwaligo te king Emon ela muabo tų kegeyu, te po miani. Tama nosali augwaligo te aga te kingo be tomoba pelama, ela muani.  
\v 24 Tama nosali te Juda hani we bidi dabego te king Emon elali ofisa bidi dabe me te augwali me ela muanio. Tama augwaligo te bidi te Josaia sali, te king Emongo ogwa da, tama augwaligo te bidi dąį ilama, tama te bidi aga te Juda hani augwaligo king bidi nigilalio.  
\v 25 Te king Emongo te gasa haniani sę yali po da, te gasa bukude elalubo, te buku augwaligo e tama nogi wabo buku da, Te Juda Hanigo King Bidi Dabego Yali Sę Po Elalubo Buku da, wabo dao.  
\v 26 Tama augwaligo te king Emon te Usago tǫde elalubo gų pageba pubaligi pali. Tama aga ogwa Josaiago tama aga ayago king sę yali silide selama, tama king bidi nigilama, sę yali.   
\c 22  
\s1 Te Josaia aga te Juda hanigo king bidi nigilali  
\r (2 Sto 34:1-2)  
\p
\v 1 Te Josaia agai kibu be te nogo a olama, te me badu nogo sela, te 8 kibu be bidama, tama aga te Juda hanigo king bidi nigilali. Tama aga te Jerusalem taun bulude king nigilama, sę eyu bidali kibu be te 31 kibu be usu nama bidai. Aga idago nogi dao, Jedida, te taun Boskat bulu bidi Adaiago wegigo ame nani ogwa dao. \x * \xo 22:1 \xt Jer 3:6\x*  
\v 2 Tama te king Josaia agai te Genuai Bidigo gedude te dwagi yai kolesaga yali. Tama agai te aga wąį nǫų Devitgo yali tiwai dwagi yai kolesaga mu yali, te king Devit, agai te polobadu yali sę. Tama te king Josaia agai te Genuai Bidigo tigidali po agai bomo mu elama, dolo naga wali pali.   
\s1 Augwaligo te Genuai Bidigo bede te Bomai Po elalubo buku suali  
\r (2 Sto 34:8-28)  
\p
\v 3 Tama te king Josaia aga te king bidi sę edubadi yaide, te kibu be te 18 wabo kibu be tomode, tama agai te aga kuskus bidi tagala palali, te bidi nogi Safan, agai te po Genuai Bidigo tempel beba selasa pali. Te bidi Safan, te aga aya Asaliago ogwa da, tama te aga wąį nǫų ogwa te Mesulam. Te king Josaiago te kuskus bidi Safanbolo e tama po ola mani,  
\v 4 “Nago te tobolu pris bidi Hilkia sugi pelama, tama agabolo e tama po wao, te Genuai Bidigo tempel be tųde tonalubo bidi dabe augwaligo te tigidali we bidigo mabo te tigidali mone nedao wao,” wali.  
\v 5 “Tama te Hilkiabolo e tama po walao, tama agai te mone selama, tama te sę tonalubo bidi dabebolo te mone mao,” wali, “tama augwaligo selama, tama te Genuai Bidigo tempel be ma geselao. Tama augwaligo te monego te sę bidi dabe abelama, tama augwaligo te Genuai Bidigo be ma geseleyu, dodolobo sę emainao.  
\v 6 Tama augwaligo te monego naga te be sę ebo kapenda bidi dabe dali, tama me te masigigo te be sę ebo koneai bidi dabe me abelao. Tama me te ni name me, te masigi me, abelao,” wali, “tama te me badu bidi dabe augwaligo te togolama, tama bugagia dodola muna silali selama, tama te Genuai Bidigo tempel be ma geseleyu sę yao.  
\v 7 Eno koneanio, te sę tonalubo bidi dabe augwaligo te ili po olama, te augwaligo te mone wi sabo bidi dabe menio. Tama teyu, te tobolu pris bidi nago homugo augwaligo te monego magi sę egowe weyu, nago augwalibolo hanalugio,” Josaiago te tama po ola tolali.   
\p
\v 8 Tama te kuskus bidi Safan aga pelama, te kingo wali po gilama wali. Tama te pris bidi Hilkiago te po oda silibo si, tama agai te kuskus bidi Safanbolo e tama po wali, “Eno te Genuai Bidigo tempel bede munalubo buku me deli suai dao. Te bukude te Genuai Bidigo Bomai Po elalubao,” wali. Tama te buku te pris bidi Hilkiago te kuskus bidi Safanbolo mani, tama te bidi Safango nedali.  
\v 9 Agai te buku neda silama, tama agai te buku dali agai sela pelama, te king Josaia agabolo e tama po wagi pali, “Naga sę ebo bidi dabe augwaligo te Genuai Bidigo tempel bede muani mone tigidali selama, tama te sę tonalubo bidibolo menama, tama augwaligo te Genuai Bidigo be dodolobo sę emainogo yalio,” wali.  
\v 10 Tama te kuskus bidi Safango agai e tama po ma wali, “King, te tobolu pris bidi Hilkiago te e buku enabolo manio.” Tama agai te buku dinigilama nedali, te kingbolo te po nedali.   
\p
\v 11 Tama te kingo te Godigo te Bomai Po te buku tomode elalubo po odobo si, tama agai haliga sęgę mu eyu, tama aga holobo ugwa pisayali.  
\v 12 Tama agai te pris bidi Hilkia i wali, me te bidi Ahikam, aga te kuskus bidi Safango ogwa da, tama me te bidi te Akbor, aga aya te Mikaiago ogwa da, me te kingo kuskus bidi Safan, tama me te Asaia, te bidi Asaia aga te kingo sę ebo ofisa bidi da. Tama te bidi dabe augwali asela silibo si, augwalibolo e tama po wali,  
\v 13 “Megi te Bomai Po elalubo buku eno salio, Genuai Bidi agai homugo agai da tigidali da e kolesagadu wali pomainu, e tama po hanilama wali. Tiali goli, dago wąį nǫų dabe augwali te e dwagi yai po wali pabeo. Tama tialigo da, teda te Genuai Bidi agai da dali te moni haliga sębę mu yalio. Tiali goli, te megi dago te Genuai Bidigo Bomai Po elalubo buku dago te ma suali dao,” wali, “tama tialima, eno homugo dage pelama, te Genuai Bidibolo hanalugi pelama, tama agai homugo te mena sę te ena dali me, te Juda hani we bidi dabe dali me, me te Jerusalem bulu we bidi dabe dali yabo sę po page gegegi piąo,” wali.   
\p
\v 14 Te bidi dabe augwaligo te kingo po oda silibo si, tama augwali te Jerusalemde te gesi noma taun pedai baduba pelama, tama augwaligo te profet we me deli te gesi noma taunde bidibadi yaide, augwaligo te profet we dali po miani, te wego nogi e dao, Hulda. Hulda aga te Salumgo we da, Salum agai te pris bidi dabego te au dodobage gudubo ugwa mubo habu pesage tonalubo sę ebo bidi da. Salum aga aya te Tikvago ogwa da, tama aga wąį nǫų ogwa te Harhas. Tama te Huldago agai te bidi dabe augwaligo wali po oda silali.  
\v 15 Tama agai e tama po wei ponani, “God, da Israel hanigo Genuai Bidi, agai te po wai, ‘Dage tagala palali bidi pageba ma geasa pao,’ wali, ‘tama agabolo e tama po walao’,  
\v 16 ‘Ena God, Genuai Bidi, tama eno te e buku tomode elalubo Bomai Po wali peyu, tama te Bomai Po te kingo nedebadi yaide, tama te eno te Jerusalem taunde bidibo we bidi dabe dali te taun dali dolaibao.  
\v 17 Te tigidali we bidigo ena tudiba ilama, tama augwaligo te tibo god dabeba ofa nai ula mabo sę ebo dao. Tama augwa te dwai kolesaga ebogo te eno augwali dali eno wado te ebao. Eno sębę genuai mu te Jerusalem dali eyu, tama eno te sębę ebo sę te eno polo sia sogobeo,’ wali.  
\v 18 ‘Tama tialima, te megi te ena God da, te Israel bage duga Genuai Bidi da, eno homugo duga king bidibolo e tama po ola mobao. Tama augwaligo te buku nagebolo neda mabo sogo,  
\v 19 nago koneanio, te magi nai sę eno dagebolo olama, tama te Jerusalem dali, te Jerusalem taunde bidibo we bidi dabe augwali dali yabo sę po, eno e tama po obao, Jerusalem bulu dolaibao, tama te Jerusalem te olo bulu mu elaluaibao. Tama te gasa hani we bidi dabe augwaligo homugo te dwai po te augwa boi bidi dabe dali weyu, augwaligo e tama po waibao, “Dage te Jerusalem taun bulu dolali yali gilama dage me tama dolao,” waibao. Tialima, te king, nago te e tama po odobo sogo tama te nago hani we bidi dabe dali yabo sę po da, nage haliga begelama, tama te eno gedude naga digi aiyaba elaluali. Tama me te naga bulubo ugwa pisalama, tama gela weyu, tama ena i wai dao. Tama teyu, megi ena Genuai Bidi, eno po obao, eno nago i wabo odalio.  
\v 20 Tama te Jerusalem taun bulu dolabo sogo nage dolidali weyu, teda eno sula tagalogobeo. Menio. Nage bugagia mu bidaibao. Tiali goli, nosali nage isibo si, tama augwaligo nage gų pageba pubalobo sogo, teda te eno te Jerusalem taun dolaibao.’ Genuai Bidigo te po wai.” Te profet we Huldago agai te Genuai Bidigo po te bidi dabe augwalibolo mena silali, tama tilama, augwaligo te po te kingbolo pusigi pali.   
\c 23  
\s1 Juda hani augwaligo te Genuai Bidi dologode bidaibao olama, po dąų wali  
\r (2 Sto 34:3-7; 34:29-33)  
\p
\v 1 Tama tialima, te king Josaia agai te tigidali Juda hani tobolu bidi dabe me, me te Jerusalem taunde bidibo tobolu bidi dabe me, agai te augwali asama, sisinagasamainu i wali.  
\v 2 Tama te kingo te pris bidi dabe me, me te profet bidi dabe me, me te Juda hani tigidali we bidi dabe me, tama me te Jerusalem hani we bidi dabe me, augwali te nogi yai bage me, te nogi meni yai bage me, agai augwali deliba te Genuai Bidigo tempel beba sisinani. Augwali sisina silali, tama agai te Genuai Bidigo tempel be tomode ma suali buku, te Dąų Wali Bomai Po elalubo buku agai selama, tama agai te tigidali po te bukude elalubo augwalibolo neda mani.  
\v 3 Te king aga te Genuai Bidigo be mabo dolo elalubo bobobage pos dolalubo madigi aga dolaluali, tama agai te Genuai Bidi dali e tama bomai po dąų wali. Agai te tigidali te bomai po te buku tomode muani po wali paibao wai. Agai te po bodolu selama polali deli homu naga, deli kolesaga naga tigidali bomai po me, me te Genuai Bidi agai po me wali mu paibao. Tama te tigidali we bidi dabego me augwali tigidaligo te bodolu selama, dąų wali po delidu naga wali paibao olama, polali.   
\p
\v 4 Nosali te king Josaiago agai tobolu pris bidi Hilkia dali, te aga dologode sę ebo pris bidi dabe dali sali, tama me badu pris bidi dabe te augwali te Genuai Bidigo tempel be tų tonalubo pris bidi dabe me, tama agai augwalibolo te po wali, “Dage te Genuai Bidigo te be tomoba pelama, tama te tigidali te tibo god Bal me, me te god we Asera me, me te dagalu hǫ dabe, te tobage tibo god dabeba lotu po wabo doado bage dabe tigidali selama, buluba sela sąyao,” wali. Tama tilama, te kingo augwalibolo te po wali, “Te doado bage dabe tigidali selama, tama te buluba tolasa pelama, tama te wę Kidron wę bulu odogoba pelama, te doado bage tigidali sia ulao,” wali. Tigidali doado bage siago dela pela silibo si, tama te augwaligo te keli naga sela pelama, tama te taun Betel buluba pao wai.  
\v 5 Tama te king Josaia agai te tibo godiba te alta saide te ofa nai ula mabo pris bidi dabe sela sąyani. Polobadu te Juda hanigo king bidi dabego dąį ilai bidi dabe da, te pris bidi dabe augwaligo te tibo god dolo lotu po wabo pesagede ofa nai ula momainu dąį ilai pris bidi dabe dao. Tama te lotu po wabo bulu du pesage dabe te Juda hanigo taunde me elaluyu, me te Jerusalem taun pąde me elaluyu yali. Tama me te tibo god Bal me, me te giliga, me te polua, me te dagalu hǫ dabe, te tobage tibo god dabeba ofa nai ula mabo pris bidi dabe me, te agai sela sąyani.  
\v 6 Tama agai te augwaligo te tibo god we Asera noma nigilama, te Genuai Bidigo tempel bede munaluali piksa noma me sela sąyani, tama augwaligo te Jerusalem bulu tagalama, tama te bulu me odogo te wę Kidron elalubo odogoba selasa pai. Tama te augwaligo siaba ulali. Tama te nosali augwaligo te sisi selama, tama augwaligo haluama, te pauda mu dolo nigali. Tama tilama, augwaligo te pauda selasa pelama, te taun Jerusalem bulude te olo we bidi dabe isali te pubulali gų pageba sąsą biligi pali. Magi baso meni, te Aseraba lotu po wabo nai te dwai dwai nai mu da, te ola momainogo tama tiali. \x * \xo 23:6 \xt 2 Kin 21:3; 2 Sto 33:3\x*  
\v 7 Tama te king Josaiago te po wai, tama augwaligo te tigidali we bidi dabe augwaligo te Genuai Bidigo be tomode te penani sę ebo we bidi dabe augwaligo dwasianu be dabe sela sąyao wali. Te be dabe te god we Aserago gudabo name ugwa ebo we dabe sę eyu, bidibo tǫ pedai badu elalubao wali.   
\p
\v 8 Te Juda hanigo bulu tomode te tigidali taun bulude te pris bidi dabego te tibo godiba ofa nai ula mabo bulu du alta sai, te king Josaiago sela sąsą pela silali. Agai te alta dolobo sę te taun Geba te taun te not badu da, te taundu gagalama, te saut badu te taun Bersebaba usu nigi pali. Tama agai te augwaligo te lotu po wabo pesage te tigidali bidi dabe gedude meda mu ilali. Tama agai te pris bidi dabe selama, tama te Jerusalem taunba odasa asali. Tama me te agai te Josuago beba pabo tų pąde dolo elaluali alta sai me dolali. Tama te bidi Josua te aga te Jerusalem taun tonalubo namba wan gavman tobolu bidi deli da. Tama te bidi agai te tų nigali, te pobase nogo badu nigilama, te Jerusalem taun tomoba pabo genuai tų pedai badu nigai.  
\v 9 Te pris bidi dabe, te kingo te Jerusalem taunba odasa asali bidi dabe augwali, augwaligo te Jerusalemde bidibo pris bidi dabe augwali dali sisinama, te nai bret bo dabo yis musiąwai nai tuali. Tiali goli, augwaligo te Genuai Bidigo te tempel bede elalubo alta saide te augwaligo ofa nai me ulubo usu meni.   
\p
\v 10 Te king Josaia agai te augwaligo te lotu wabo pesage nogi te Tofet wabo pesage te agai dolali, te bulu te Hinom bulu odogode elaluai dao, tama te bulu me te bidi dabego gedude meda mu ilali. Tama tibaso, te bidi dabe augwaligo augwa te buluba nosali ma begasa pelama, tama te augwaligo augwa wai bǫų elama, te tibo god Molekba te ofa nai tiwai gilama me augwaligo ula magi pogobe. \x * \xo 23:10 \xt Prs 18:21; Jer 7:31; 19:1-6; 32:35\x*  
\v 11 Polobadu te Juda hanigo king bidi dabe me badugo homugo te giliga te god deli da homu elama, tama augwaligo teba lotu po wali. Tama augwaligo te me badu hos kibu siyu, me te boi hwįabo te karis siyu elama, tama augwaligo te god giligaba dąį ilama, tama augwaligo te doado bage dabe te Genuai Bidigo tempel be obo banis bologobea sai madigi pąde, te tomode te tǫ pedai me delide te doado bage dabe muani. Te tǫ pedai te Natanmelekgo be obo tų pąde elaluai, te kingo sę ebo gavman ofisa bidi me deli. Tama tialima, te king Josaiago te sę yali te hos kibu sela sąyani, tama me te karis dabe selama, tama siaba ula palali.   
\p
\v 12 Tama te kingo be ugwadu te pedu badu rum habu me deli nigai, te habu badu augwaligo e tama nogi wabo da, te King Ahasgo Be Habu Badu da wabo da. Polobadu te Juda hanigo king bidi dabe augwaligo te me badu alta sai te rum habu badu te be pedu doloba pai pedude te alta sai nigali. Tama te king Manasego te alta sai te sisinibo pesage si elalubo madigi te Genuai Bidigo te be obo bologobea sali tomode elaluali. Tialima, te king Josaiago te tigidali alta sai hųgia sąnama, tama te miminama mu, dwasianunu mu ilali. Tama nosali augwali te alta mimina sąyani, te pobele bage selama, tama augwaligo te Kidron wę elalubo odogo buluba sągi pali. \x * \xo 23:12 \xt 2 Kin 21:5; 2 Sto 33:5\x*  
\v 13 Tama te polobadu king Solomongo nigali ofa nai mubo alta sai te giliga asobo pedai badu elaluali alta sai, te king Josaiago dolali, te saut pedai badu te Oliv Bulu Du elalubo bulu du pedai badu elaluai. \f + \fr 23:13 \ft Te pedai badu, te Hibru pogo te bulu du te Oliv, te gasa me nogi te Dolobo Bulu Du da nogi wabo dao. Magi baso meni, te e buku asęani bidigo te e tama homu eyu nogi poai, te bulu dude te dwai nai dabe munalubaso nogi eyu, te Dolobo Bulu Du da wai da. Te pesage te bidi dabe augwaligo gedude te dolama, mu meda mu ilali.\f* Te king Solomongo te nigali alta sai dabe te tibo god we Astarte teba ofa nai ula maiabo alta sai nigai, te Saidon hanigo te dwai we god da, tama me te Moap hanigo te dwai god me nogi da, tama te nogi te Kemos da, me te god Molek, te god te Amon hanigo te dwai god da, tama te tibo dwai god dabe augwali te Genuai Bidigo gedude te dwai olo bage mu tonani. \x * \xo 23:13 \xt 1 Kin 11:7\x*  
\v 14 Tama te king Josaia agai te masigigo te pos nigali me, me te nigo pos nigilama te te tibo god we Asera noma piksa nigilama daganani pos ni dabe togolama, sąyani. Tama agai te isai bidi dili dabe selama, tama lotu po wabo pesagede subigila sąsą pali. \f + \fr 23:14 \ft Te Israel hani bidi dabe augwaligo e tama homu eyu konealuali, te isali bidi dabego dili te dwai te mu da homu eyu, augwaligo wi mu yai. Tama teyu, te king Josaiago te isali bidi dili dabe meba selama, tama te bidi dabe wi eyu, augwali te lotu po wabo pesage digibulu bidada pomainu, te king Josaiago te isali bidi dili dabe selama, teba sąsą pali.\f*   
\p
\v 15 Polobadu te king Jeroboamgo, te Nebatgo ogwa da, tama agai te ofa nai muabo alta sai me deli nigali, tama te lotu po wabo bulu du pesage me deli te taun Betelde nigali. Jeroboam aga te king te polobadu Israel hani kegelama, tama te Genuai Bidi gedude dwai kolesaga haniani elama, sęgę sali. Tialima, megi te king Josaia aga te taun Betel buluba pelama, tama te bidi dabe augwalibolo e tama po ola mani, tama augwaligo te lotu po wabo pesage me dolama, tama te alta sai me hųginama, sąyani. Tama augwaligo te lotu po wabo pesagede te sia dogonama, tama nosali augwaligo te sisi dabe selama, tama augwaligo te haluama, tama te pauda gagawai mu pedalali. Tama me te augwaligo tibo god we Asera noma piksa elalubo pos ni selama, tama augwaligo siaba ulali. \x * \xo 23:15 \xt 1 Kin 12:33\x*  
\v 16 Tama te king Josaia aga dolalu bidama, tama aga begegi soabo sogo, agai te gų page me deli te dwasianu bulu dude elalubo suali. Tama tialima, te agai te aga sę ebo bidi dabebolo te po wali, “Tama dage pelama, te isali bidi dabe dili hodigi pao,” wali. Tama te king Josaiago te isali bidi dili dabe selama, te king Jeroboamgo nigali alta saiba munama, tama siaba ulali, tama te kolesaga yaligo da, te alta sai te tigidali bidi dabe gedude meda mu ilali. Tama tiali kolesagago te Genuai Bidigo te profet bidi me deli pedauwalidu wali pogo te kolesagaba usu nigi pali. \f + \fr 23:16 \ft Te 1 Kin 13:1-2 tede elalubo po suao.\f* \x * \xo 23:16 \xt 1 Kin 13:2\x*  
\v 17 Tama te king Josaiago te dili dabe siaba ula silama, tama agai suali, ma te gasa gų page me elalubo suali. Tama agai augwalibolo hanalu wali, “Te e te gų page dego dawe?” Tama te taun Betel bulu bidi dabego e tama po wei ponani, “Te gų page da, te Juda buludu asali profet bidi gų page dao,” wali, “polobadu te profet bidi aga aselama, te megi nago te e alta saide yali sę po page pusa magasali bidi dao,” wali. \x * \xo 23:17 \xt 1 Kin 13:30-32\x*   
\p
\v 18 Tama te Josaiago augwalibolo e tama po ola mani, “Dagego aga gų pagede te magi sę me deli elamuo,” wali. “Aga gų pagede te aga dili bugagia munalubo sula tagalao,” wali. Tama tialima, augwaligo te profet bidigo dili me sabe, tama me te gasa profet bidi te Samaria buludu asali profet bidi agai dili me sabe.   
\p
\v 19 Polobadu te Israel hani bidi dabego king bidi dabe augwaligo te Samaria bulu taunde te tibo god dolo lotu po wabo bulu du pesage nigigi pali, tama augwaligo te tama tiali kolesagago te Genuai Bidi aga haliga sębę ilali. Tama te megi da, te king Josaia agai te augwaligo te lotu po wali pesage dabe dolali, te agai Betel bulu taunde yali gilama yali.  
\v 20 Tama agai te augwaligo te lotu po wali pesagede te pris bidi dabe tigidali agai oda sali, tama agai augwali te augwa te nigali alta sai dabede te pris bidi dabe augwali ugwa badu munama, tama ela muna muna pali. Tama me te agai isali bidi dabe dili me selama, tama te augwa te nigali altaba munama, tama te sia ulali. Tama agai tama tibo sę silali, tama aga te Jerusalem taun buluba ma begasa pali.   
\s1 Te we bidi dabe augwaligo te Pasova dąį ilali bodolu koneama, augwaligo nai ula tuali  
\r (2 Sto 35:1-19)  
\p
\v 21 Tama nosali te king Josaiago te we bidi dabebolo e tama po ola tolali, “Dago te Pasova nai ula tubo te bodolu kone palao,” wali, “God, dena Genuai Bidi, agai te dago wąį nǫų dabe te Isip bulude augwali bugagia bidimainu sula tagalai bidi dao, tama te augwaligo te e po bodolu selama, dąų wali bukude augwaligo asęani. Da tigidaligo te bukude elalubo tigidali po wali pao,” wali. Tama tialima, te tigidali we bidi dabe augwaligo te kingo wali gilama te po wali pali.  
\v 22 Tama te sese Israel dabego tobolu bidi dabe augwali bidibo sogo te sę ebo kolesaga gagalama, ela asu, te Israel hanigo king bidi dabe me, me te Juda hanigo king bidi dabe bidibo sogoba usu nagasai, te Israel hani we bidi dabe augwaligo te Pasovade wabo bomai po wali bugagia me pabeo, te polobadu te Godigo te Israel hani augwali bugagia bidimainogo Godigo te sula tagalama dąį ilali sogode te augwaligo te nai ulama, tubo bodolu sogo augwaligo bugagia kone palama, wali me pabe.  
\v 23 Tiali goli, te king Josaia aga te king bidi bidibadi, te kibu be te 18 wagi solama kibu be pai, tama augwaligo te bukude muani po bugagia wali pali. Tama augwaligo te Jerusalem bulude te Genuai Bidide kone paleyu, te Pasova bodolu sogo koneama, nai ulama tuali.   
\s1 Te king Josaiago te Juda bulude augwaligo te haniani dwai kolesaga yali agai sela sąyani  
\p
\v 24 Tama te king Josaia agai te isali we bidi dabe noma dali po mibo we bidi dabe me agai augwali sela sąyani, tama me te agai te augwaligo bede munalua pali te tibo dwasianu god dabe agai sela sąsą pali, tama me te augwaligo nogogo nigali god noma me. Tama te Jerusalem bulude elaluali me, tama me te tigidali Juda bulu pedaide me elaluali doado bage me, te bulu badu Genuai Bidi Godibolo lotu po wasiąwai we bidi hani dabego lotu po wabo dwai haniani doado bage dabe buluba tigidali agai buluba sela sąyani. Agai tama tiali, magi baso meni, agai homugo augwaligo te tobolu pris bidi Hilkiago te Genuai Bidigo tempel be tomode munalubo ma suali bukude te Godigo tigidali Bomai Po elalubo podu wali pomainu, tama kolesaga yai.  
\v 25 Josaia aga dwagi yai king bidi mu da. Agai homu kolesaga me mu deli homu kolesaga naga yai, agai te Genuai Bidigo bomo dologodu naga wali pai, tama me te Mosesgo tigidali bomai po me wali pai. Polobadu te king bidi dabe augwali te king Josaia tiwai me bidai meni, tama te nosali me te aga tiwai me bidai meni. Te king Josaia aga deli mugo tigidali king bidi dabe aiyaba elaluai da.   
\p
\v 26 Te king Josaia agai dwagi yai kolesaga umabo mu yali, tiali goli te Genuai Bidigo agai te homu yali, te king Manasego agai te dwai kolesaga yaliba ma agai me kone palali, tama agai haliga sębę genuai mu te Juda hani augwali dali yali, agai te haliga sębę yali te sębę me sia sabe. Mu menio.  
\v 27 Tama tibaso, te Genuai Bidigo te tama po wali, “Tama te deli kolesaga naga te Juda hanigo bulude yaibao,” wali, “te polobadu te eno te Israel hanigo bulude yali tiwai yaibao. Tama eno augwali sela sąnama, tama augwali digibulu mu gudulaibao,” wali. “Magi baso meni, eno augwali tonobo hagela mu ebuo. Tama eno te Jerusalem bulu taun eno tudiba ilaibao, te taun bulu te ena digi ena bulu da olama, dąį ilai dao. Tama eno te we bidi dabe augwali asama, te ena dolo lotu po omainu eno te dąį ilali be, te me eno tudiba ilaibao,” God Genuai Bidigo te po wali.   
\s1 Te king Josaia isali po dao  
\r (2 Sto 35:20–36:1)  
\p
\v 28 Te king Josaiago te agai te gasa sę dabe yali po dao, te po gasa bukude elalubo, augwaligo te buku e tama nogi wabo da, Te Juda Hanigo King Bidi Dabego Yali Sę Po Elalubo Buku da wabo dao.   
\p
\v 29 Te Josaia aga king bidibo sogo, te bidi Neko, te Isip king bidi, agai te aga Isip ami soldia bidi dabe selama, tama augwali te Juda hanigo tǫ ela solama, te Yufretis węba pali, augwali te Asiria hani tau somainu, augwa sigo boi bidi dabe dali boi hwįgi peyu pali. Tama te king Josaiago te boi hwįbo po odali, tama te agai te aga ami soldia bidi dabe selama, tama te augwali pelama, te Isip hani dali boi hwįgi pali. Tama augwaligo te Megido hanu taunde augwaligo te boi hwįani, tama te Isip hanigo te king Josaia elama, isilali.  
\v 30 Tama te Josaiago sę ebo gavman tobolu ofisa bidi dabego te king Josaia tigi selama, te boi hwįbo karis me deliba munama, tama augwaligo te Jerusalem taunba selasa pali. Tama augwaligo te king Josaia tigi selama, te Juda hanigo king bidi dabe pubalobo gų pageba pubaligi pali. Tama tialima, te Juda hani augwaligo te bidi Joahas sali, aga aya te king Josaiago ogwa, tama augwaligo te wel selama, tama aga toboluba te wel gelama, tama aga augwaligo te king bidi nigilama, dąį ilali.   
\s1 Te bidi Joahas aga te Juda hanigo king bidi nigilama bidali  
\r (2 Sto 36:2-4)  
\p
\v 31 Te bidi Joahas aga kibu be te 23 kibu be usu nama, tama augwaligo aga te Juda hanigo king bidi nigilama bidali. Tama aga te Jerusalemde king bidi nigilama bidali, polua sela digi bidai. Aga ida nogi da, Hamutal da, te we aga bulu te Lipna bulu taun bidi Jeremaiago wegi da.  
\v 32 Te bidi Joahas agai te aga wąį nǫųgo yali kolesagadu wali pali, tama teyu, agai te Genuai Bidigo gedude dwai kolesaga genuai mu yali.  
\v 33 Te Isip bulu king bidi Nekogo agai te bidi Joahasgo te king sę yali sela sąyani, tama aga te Hamat bulu taun Ripla taunde aga te hadabu bede bidali, tama te king Joahas aga king bidi nigilama ma bidibe. Tama te king Nekogo te Juda hani dali te agai takis mone sali, te mone te 3,400 kilogram usu silva me sali, me te 34 kilogram gol, tama mone dabe selama, takis mone mani.  
\v 34 Tama te king Nekogo agai te bidi Eliakim sali, te king Josaiago gasa ogwa me da, tama te king Neko agai homugo te bidi Eliakim aga te Juda hanigo king bidi nigilainu yali, te bidigo te aga aya Josaiago king sę yali silide bidiyu, king sę yali. Tama te king Neko agai te bidi Eliakim nogi hasegelama, tama aga nogi Jehoiakim poali. Tama nosali te king Nekogo te Joahas aga te Isip buluba odasa pelama, tama aga te Isip bulude bididubadi yaide, isibo bodoluba usu nigi pali. \x * \xo 23:34 \xt Jer 22:11-12\x*  
\v 35 Tama te king Jehoiakim agai te tigidali we bidi dabe dali, te silva me gol me sali, tama te agai te nai dabe selama, tama te Isip king bidi Nekobolo te takis mone mawai. Te king bidi Jehoiakim agai augwalibolo te po wali, “Dagego te takis mone te duga usu naga sesaibao,” wali. “Te umabo mone mubo bidigo da, teda augwaligo genuai mone muao,” wali, “tama te dwasianu mone munalubo bidigo da, teda te dwasianu mone mao,” wali. Tama tialima, te king Jehoiakimgo te we bidi dabego te muani te silva me, te gol me agai selama, tama te king Nekobolo tolali.   
\s1 Te bidi Jehoiakim aga te Juda hanigo king bidi nigilali  
\r (2 Sto 36:5-8)  
\p
\v 36 Te bidi Jehoiakim aga king bidi nigila bidibo sogo, agai kibu be te bidi sese deli selama, te ugwadu nogo a naga, te 25 kibu be usu bidali. Tama te aga Jerusalemde aga king bidi nigilama bidali kibu be te 11 kibu be usu nama bidai. Aga ida nogi te e da, Sebida, te wegi aga aya te Ruma taun bulu bidi Pedaiago wegi da. \x * \xo 23:36 \xt Jer 22:18-19; 26:1-6; 35:1-19\x*  
\v 37 Te king bidi Jehoiakim agai te aga wąį nǫųgo yali kolesagadu wali peyu, tama agai te dwai sęgę sabo kolesaga te Genuai Bidigo gedude yali.   
\c 24  
\nb
\v 1 Te Jehoiakim aga te Juda hanigo king bidi nigilama bidibo sogo, te Babilon bulu king bidi Nebukatnesargo te aga ami soldia bidi dabe selama, tama te augwaligo te Juda hani dabe dali boi hwįagasali. Tama te augwaligo te king Jehoiakim aga hani dali augwali aiyaba elaluali. Tiali goli, nosali te kibu be sela silibo si, te king Jehoiakim agai homugo te king Nebukatnesargo aga munu me tonalugobe homu yali, tama teyu, te king Jehoiakim aga te king Nebukatnesar dologode munu ma bidibe. \x * \xo 24:1 \xt Jer 25:1-38; Dan 1:1-2\x*  
\v 2 Tama tibaso, Genuai Bidi Godigo te Babilon hani bidi me siyu, me te Siria hani bidi dabe me siyu, tama me te Moap hani bidi dabe me siyu, tama me te Amon hani bidi dabe me siyu elama, tama te king Jehoiakim dali boi hwįnama, tama te Juda hanigo bulu Jerusalem taun dolomainu Genuai Bidigo tagala palali. Genuai Bidigo agai tama tiali sę te agai te profet bagebolo pusa mani poba usu nigi pai, te profet bidi dabe te aga sę ebo bidi dabe da.  
\v 3 Genuai Bidi aga digi te tama tiwai kolesaga te bidi haniba menama, tama tiwai sę yali. Magi baso meni, agai homugo te Juda hani hagela mu eyu, agai homugo te Juda hani augwali te augwa tǫ tagalama, te digibulu sela sąwainu yai. Genuai Bidi agai te king Manasego yali te dwai kolesaga me konealudu, agai tama kolesaga augwalide dolo yali.  
\v 4 Tama me te agai e tama homu koneani, te king Manasego agai te tigidali Jerusalem bulu pedaide te haniani dwai kolesaga isąwai doloba pai we bidi dabe ela muani, tama Genuai Bidi agai homu te king Manasego te dwai kolesaga yali sęgo sali sęgę agai tagalabo homu ebe.   
\p
\v 5 Te king Jehoiakim agai te haniani sę yali po elalubo, te gasa bukude elalubo da, te buku augwaligo e tama nogi ebo da, Te Juda Hanigo King Bidi Dabego Yali Sę Po Elalubo Buku da, wabo dao.  
\v 6 Te king Jehoiakim isali, tama te aga ogwa, Jehoiakingo te aga ayago sę selama, tama aga king bidi nigilama, sę yali.   
\p
\v 7 Megi tama tibo sogo te Babilon kingo te bulu taun tonaluali polobadu te Isip bulu king bidigo te bulu taun tonaluai, tama te Isip bulu dąįde gagalama, te wę Yufretis teba sabaligi pali. Tama teyu, te Isip hani dali te augwa ami soldia bidi dabe augwaligo te gasa buluba me pelama, te boi me hwįgi pabe.   
\s1 Te bidi Jehoiakin aga te Juda hanigo king bidi nigilali  
\r (2 Sto 36:9-10)  
\p
\v 8 Te bidi Jehoiakin agai kibu be te 18 kibu be usu nama bidama, aga te Juda hanigo king bidi nigilali. Tama aga te Jerusalem bulude aga te king bidi nigilama bidali, te polua sela bidai. Aga ida nogi te e dao, te agai nogi Nehusta, te aga aya te Jerusalem bulu bidi Elnatango wegi da.  
\v 9 Te king Jehoiakingo agai te aga ayago yali kolesagadu wali pali, tama agai te Genuai Bidi gedude dwai kolesaga mu yali.   
\p
\v 10 Tama te king Jehoiakin aga te king bidi bidibo sogo, tama te Nebukatnesar aga sę ebo gavman ofisa bidi dabe meba augwaligo te Babilon ami soldia bidi dabe siyu elama, tama te augwali asama, te Jerusalem bulu taun bobegela sagaselama, tama augwaligo te boi hwįnama, te Jerusalem taun sainu yali.  
\v 11 Te Babilon ami soldia bidi dabe augwaligo te Jerusalem bulu taun bologobealudubadi yaide, tama te king Nebukatnesar aga digi aga ami soldia bidi dabe dali aga aselama, bidalubo suali.  
\v 12 Tama te king Jehoiakingo sualima, te king Nebukatnesar aga ami soldia bidi dabe dali asama bidibo suali, tama tialima, te king Jehoiakin ebadi, te aga ida ebadi, tama me te aga gavman ofisa bidi me, me te augwa genuai bidi dabe me, tama me te kingo be tonalubo bidi dabe me, augwali tigidali te taun tagalama, buluba pelama, te king Nebukatnesar dali sisinama, tama augwaligo Nebukatnesarbolo te po wali, “Tama dago homugo te boi ma hwįgobeo,” wali. Tama tialima, te king Nebukatnesargo te king Jehoiakin aga kalabusiba muani. Tama te sę yali sogo, te king Nebukatnesar agai kibu be te 8 kibu be te Babilon bulude king bidai. \x * \xo 24:12 \xt Jer 22:24-30; 24:1-10; 29:1-2\x*  
\v 13 Tama te king Nebukatnesar aga te Genuai Bidigo tempel be tomoba pelama, tama agai te tigidali gol te king Solomongo nigali naide muani gol dabe tigidali sali. Tama me te gasa dwagi yai doado bage te Genuai Bidigo tempel bede muani me, me te kingo bede muani doado bage me, tama tigidali te agai te Babilon buluba selasa pali. Agai te tama tiali sę te Genuai Bidigo polobadu wali poba usu nigi peyu, tama sę yali.  
\v 14 Tama te king Nebukatnesar agai te tigidali te Jerusalem bulude bidali we bidi dabe tigidali me, me te tigidali gavman ofisa bidi dabe me, tama me te boma pai ami soldia bidi dabe me, te we bidi dabe tigidali, te 10,000 usu bidi dabe agai selasa, te Babilon buluba pai. Tama me te agai te tigidali bidi dabe te haniani nai dabe nigibo konea pai bidi naga selama, tama me te ain nigibo konea pai bidi dabe me, agai selasa pali. Tama agai te bidi dabe augwali tigidali te Babilon taun buluba odasa pelama, te kalabus iligi pali. Tama agai e tama tiali, te tigidali te haniani nai dabe mu meni yai bidi dabe naga tagalama, te Juda hani augwa bulude bidibadi taga soali.   
\p
\v 15 Tama te king Nebukatnesargo te king Jehoiakin dali, te aga ida ebadi, me te aga we me, me te aga sę ebo gavman ofisa bidi dabe me, tama me te Juda hanigo genuai bidi dabe me, augwali tigidali te kalabus elama, tama agai augwali te Babilon buluba odasa pali. \x * \xo 24:15 \xt Ese 17:12\x*  
\v 16 Te king Nebukatnesargo agai te tigidali te Juda hanigo bomai ami soldia bidi dabe naga selasa pali, te bidi dabego namba usu te 7,000. Tama me te haniani nai dabe nigibo konea pali bidi me, tama me te haniani nai te ain dabe nigibo konea pai bidi dabe me naga, agai te augwali umabo mu sali. Te bidi dabe augwaligo namba te 1,000 usu da. Te tigidali bidi dabe, tama te bidi dabe augwali te ami soldia bidi dabe nigilama, sę yabo boma pai bidi naga mu.   
\p
\v 17 Te king Nebukatnesar agai homugo te bidi Matania, te bidi te king Jehoiakin aga aya sabi bidi da, te bidi agai te aga amago ogwa Jehoiakin hasegelama, aga te king bidi nigilali. Tama te king Nebukatnesargo te bidi Matania nogi hasegelama, te agai nogi Sedekaia nogi polali. \x * \xo 24:17 \xt Jer 37:1; Ese 17:13\x*   
\s1 Te Babilon bulu bidi dabego te Jerusalem bulu bidi dabe dali boi hwįnama, tama te taun Jerusalem sali  
\r (2 Sto 36:11-21; Jer 52:1-11)  
\p
\v 18 Te bidi Sedekaia agai kibu be te 21 kibu be elalubadi, tama aga te Juda hanigo king bidi nigilali. Tama aga te Jerusalem taunde aga king nigilama bidali kibu be te 11 kibu be bidai. Aga ida nogi da, agai nogi Hamutal, Jeremaiago wegi da, aga aya te taun Lipna bulu bidi da. \x * \xo 24:18 \xt Jer 27:1-22; 28:1-17\x*  
\v 19 Sedekaia agai te king Jehoiakimgo yali kolesagadu wali pali, tama agai te Genuai Bidigo gedude dwai kolesaga mu yali.   
\p
\v 20 Tama te Juda hanigo augwaligo me, te Jerusalem taunde bidibo we bidi dabego me, te haniani dwai kolesaga ebo sęde te Genuai Bidi aga haliga sębę dwai mu yali, tama tibaso, te Genuai Bidigo te we bidi dabe augwaligo gesabidi subo hagela mu eyu, tama agai te we bidi dabe augwali te augwa bulu tǫ tagalama, digibulu bidigi pomainu, mu sela sąyani. \x * \xo 24:20 \xt Ese 17:15\x*   
\c 25  
\p
\v 1 Te king Sedekaia agai homugo te Babilon king bidigo aga tonalubo hagela yali, tama teyu, aga te Babilon hanigo king aga dologode munu ma bidigobe homu yali. Tama tialima, te king Sedekaia agai kibu be te te 9 yia, te ugwadu polua nogo si, te 10 mun, tama te king bidi bidali, tama te nogo si wabo poluade te dei nogo si dei, te Babilon king Nebukatnesargo te agai te tigidali ami soldia bidi dabe selama, tama te Jerusalem bulu taun bologobea sagaselama, tama augwaligo te taun sainogo te boi hwįani. Tama augwaligo te Jerusalem taun bologobea selama, tama augwaligo te tǫ selama, te taun obo pąde munama, tama du ilali, tama augwali teba doligiluama, boi hwįainogo tama tiai dao. \x * \xo 25:1 \xt Jer 21:1-10; 34:1-5; Ese 24:2\x*  
\v 2 Tama augwaligo te taun Jerusalem bologobealudubadi yaide, te kibu be deli selama, te hap yia, te polua nogo a olama, te me badu nogo deli, te 6 mun tama bidali, te kibu bede te Sedekaia aga te king bidi bidali kibu be te 11 yia.  
\v 3 Tama te kibu be tomode te 4 polua, dei 9 wabode, te Jerusalem taunde bidali we bidi dabe te nasi dwai mu yali, magi baso meni, augwaligo tuabo nai sia sali. \f + \fr 25:3 \ft Te Hibru pogo te pedai badu te polua namba meni. Tiali goli, te buku Jer Dąį 52:6, tede te po wali, te sę dabe te me si me si namba wabo poluade pedalai dao.\f*  
\v 4 Tama te sogo te Babilon hanigo te masigigo nigai genuai obo banis te me badu pedai badu deli auluama, te Jerusalem taun tomoba augwali pai. Tialima, te king Sedekaia dali, te Jerusalemde bidibo ami soldia bidi dabe dali, augwaligo homugo wi painu, tama be hulide augwali te kingo giba pabo tųdu peyu, tama te augwaligo te taun tagalama, te obo banis si unulali nogo habu badu te elalubo tųdu augwali pai. Te umabo Babilon hani bidi dabe augwaligo te Jerusalem taun bulu bologobea sabo sę me elalubo suali, tiali goli te Jerusalem taun ami soldia bidi dabe augwali tama te Jerusalem taun tagalama, tama augwali te wę Jordan wę elalubo odogoba pabo tųdu wali pali. \x * \xo 25:4 \xt Ese 33:21\x*  
\v 5 Tiali goli, te Babilon ami soldia bidi dabego te king Sedekaia pobeasa pelama, tama augwaligo aga pageba sabaligi pelama, te Jeriko hanu pąde te tǫ malu pesage elalubo madigi augwaligo aga nogo tuali. Tama tibaso, te king Sedekaiago ami soldia bidi dabego aga tagalama, tama augwali wi pela silali.  
\v 6 Tama tialima, te Babilon hani ami bidi dabego te king Sedekaia nogo bono dunama, tama augwaligo aga te Babilon bulu king bidi pageba odasa pali. Te tama tiali sogo, te Babilon king bidi aga te Ripla hanude bidibadi da. Te king Nebukatnesargo te king Sedekaia sulama, tama te po wali, “Te king Sedekaia, naga digi te kolesaga geda muanigo da, teda te nage dwai dene mu sao,” wali.  
\v 7 Te Babilon hani ami bidi dabego te king Sedekaiago ogwa dabe me oda sali, tama augwaligo te Ripla hanuba augwali odasa asali. Tama te bulude te king Nebukatnesargo te po wai, tama te augwaligo te king Sedekaiago ogwa dabe te augwaligo te augwa aya Sedekaiago gedugo tonalubadi yaide, augwaligo ela muani. Tama te kingo te po wali, tama augwaligo te king Sedekaiago gedu ge si dia sąyani. Tama augwaligo aga nogo sągą dabe te aligabo bonogo dunama, tama te Babilon buluba kalabusiba mugi pali. \x * \xo 25:7 \xt Ese 12:13\x*   
\s1 Te Babilon bulu ami bidi dabe augwaligo te Jerusalem bulu taun dolali  
\r (Jer 52:12-23)  
\p
\v 8 Te Babilon king bidi Nebukatnesar aga te Babilonde king bidi bidibadi, agai kibu be te bidi sese deli pąde, te 19 yia, aga king bidi bidama, tama te nogo a wabo poluago dei te nogo a olama, te me badu nogogo si, te 7 dei, megi e kibu be tomode tama, te king Nebukatnesar te Babilon king bidigo aga sę ebo gavman ofisa bidi me deli, aga te Jerusalem buluba asali. Te bidi Nebusaradan agai te king tonalubo ami soldia bidi dabe tonalubo tobolu bidi dao.  
\v 9 Tama agai te Genuai Bidigo tempel be me, tama me te Juda hanigo king bidigo be me, tama me te Jerusalemde bidibo genuai bidi dabego be dabe tigidali sia tulama, tama siago dela pela silali. Te Babilon hani augwaligo mu te be me tulube. \x * \xo 25:9 \xt 1 Kin 9:8\x*  
\v 10 Tama te Babilon ami soldia bidi dabe tigidali, augwaligo te bidi Nebusaradan dali naga bidai hani naga da, augwaligo te masigi obo togolama, te Jerusalem taun bologobea sali moni masigi obo banis auluali.  
\v 11 Tama te Nebusaradango agai te taun Jerusalem bulude bidali we bidi dabe dali, te gasa hani we bidi dabe dali oda sali, tama augwali te odasa pelama, te Babilon buluba kalabusiba mugi pali. Tama me te Juda hani dabe te boi hwįbo sogo te Jerusalem bulu tagalama, wi peyu, te Babilon hani dabego bidibo pesageba osogo bidigi pali we bidi dabe me, agai te augwali selama, tama agai augwali te Babilon buluba odasa pelama, augwali hadabu iligi pali.  
\v 12 Tialima, me badu Juda hani we bidi dabe augwali te me badu te tigidali doado bage dabe meni yai we bidi dabe, tama te augwali te bidi Nebusaradango augwali tagalama, tama augwali bidaluyu, tama augwaligo te wain gi dabe me, me te gasa gasa gi dabe me augwaligo tonaluali.   
\p
\v 13 Tama te Babilon hani bidi dabe augwaligo te Genuai Bidigo tempel beba pelama, tama augwaligo te brasgo nigali moni pos si me, tama me te bidi dabego te bras selama, nogogo nigali wilkar dabe me, tama te wę tubo dwasianu tank te wilkar ugwadu daide muani nai dabe me tigidali, te augwaligo auluama sąyani, tama augwaligo te tigidali te bras dabe te Babilon buluba selasa pali. \x * \xo 25:13 \xt 1 Kin 7:15-26; 2 Sto 3:15-17; 4:2-5\x*  
\v 14 Tama te Babilon hani bidi dabe augwaligo te nai bulanabo kamugi kenage dage me, tama me te savol me, tama me te lam sole sula sabo nai dabe me, tama me te dwagi yai hanu holoyu, denami ebo pauda ulubo plet pou dabe me, tama me badu te gasa doado bage dabe me, te Genuai Bidigo tempel bede muani te brasgo nigali doado bage dabe tigidali, te augwaligo sela silali. \x * \xo 25:14 \xt 1 Kin 7:45; 2 Sto 4:16\x*  
\v 15 Tama te bidi Nebusaradan agai te bidi dabego te nogogo te gol me te silva selama nigali wiegi yai nai dabe me sali, tama me te sia sabo plet pou me, tama me te ofa nai ulubo te kaneme mubo dis pou dabe me sali.   
\p
\v 16 Polobadu te king Solomongo sę ebo bidi dabego te bras dabe selama nigali bobobage genuai pos side, tama te genuai tank ąį muani me, te dwasianu wilkarde te dwasianu tank wę dabe ugwadu muani. Tama te king Solomongo te po wai, tama augwaligo te doado bage dabe te Genuai Bidigo tempel beba muao wali. Tiali goli, megi te Babilon hani bidi dabe augwaligo te nai dabe auluama, tede muani bras dabe augwaligo sali, tama te brasgo sęgę te bidigo skelim ebo usu me ebe, te hauwa mu elaluali.  
\v 17 Te bidi dabe augwaligo polobadu te brasgo nigali pos si te augwaligo hasia nigali ususi elama naga pos si nigali. Te bobobage yali usu te 8 mita usu. Te augwaligo te pos si toboluba mubo au ebo nai nigali, te dwasianu genuai gagawai, tama te au ebo nai bobobage usu te 1 mita tama te 30 sentimita usu. Tama augwaligo te bras selama, te dwagi yai te au yai nigali, te tiwai te sųgų gegebo wago au yali tiwai mu, me te ni du pomigranet dabe te ni dugo au yali tiwai au yali, te augwaligo te pos side tama augwaligo te au yai nigali. Tama augwaligo te brasgo nigai ni pomigranet du dabe selama, tama te wa umben gege pabo au yali. Tama augwaligo te au yai doado bage selama, tama te brasgo nigai bobobage pos tobolu side tama augwaligo au yai nai munama, tama te pos si tobolude bagulali.   
\s1 Te Juda hani te Babilon buluba kalabus egi pali  
\r (Jer 52:24-27)  
\p
\v 18 Te bidi Nebusaradan, te bidi aga te Babilon bulude polalubo tobolu gavman ofisa bidi deli da, tama agai te tobolu pris bidi Seraia sali, tama me te Sefanaia me sali, te bidi te Seraia tudi badu bidiyu sę ebo bidi da, tama me te gasa pris bidi sela, te bidi sela te Godigo tempel be tų tonalubo bidi sela dao, te bidi selama, agai kalabus ilali.  
\v 19 Tama te Jerusalem bulude bidibo ami soldia tonalubo gavman ofisa bidi me agai sali. Tama me te agai te Juda hanigo king bidi dabe te kolesaga ola mabo bidi dabe te a naga sali. Te bidi hani dabe augwali te Jerusalem bulude bidibadi, te agai te augwali nogo tuali. Tama agai te Juda hani bidi dabego ami soldia bidi dabego tobolu gavman ofisa bidigo kuskus bidi te agai sali, te bidi agai sę te ami soldia bidi nigabo bidi dabe te agai sabo sę ebo bidi da. Tama agai suali, ma te Jerusalem bulude te kuskus bidi tau sabo bidi sese sela bidi bidibo suali, tama agai te bidi dabe me sali.  
\v 20 Tama tialima, te bidi Nebusaradango agai te sali bidi dabe tigidali te Babilon king bidi aga te Ripla hanude bidiboba odasa pali.  
\v 21 Te Hamat hanigo tǫ, te Ripla hanude, tama te kingo te po wai, tama augwaligo te bidi dabe elama, isilao wali. Tama te Babilon hani bidi dabego e tama tiali, tama nosali te augwaligo te gasa Juda hani bidi dabe selasa pelama, te Juda tǫ tagalama, te Babilon buluba hadabu egi pali.   
\s1 Te bidi Gedalia agai te Juda hanigo tǫ tonaluali  
\r (Jer 40:7-9; 41:1-3)  
\p
\v 22 Tama te king Nebukatnesargo agai te Juda bidi Gedalia dąį ilama, tama agai te Babilon hani bidi dabego te Juda hani siyu, te me badu we bidi dabe te Juda hani dabe augwa bulu tǫde me bidibadi taga soali we bidi dabe tonaluao olama, te bidi Gedalia dąį ilali. Gedalia aga aya Ahikamgo ogwa da, tama te aga wąį nǫų bidi te Safan dao.  
\v 23 Te me badu Juda ami gavman ofisa tobolu bidi ebadi, me te Juda hanigo ami soldia bidi dabe augwali, te bidi dabe augwali te gasa bulu mede polobadu bidada pali. Tama augwaligo e tama po odobo sogo, tama te Babilon king bidigo te bidi Gedalia dąį ilama, tama te bidigo te Juda hanigo tǫ tonaluao wali, augwaligo te bidi Gedalia te Mispa bulude bidibo sugi pali. Te gavman ofisa bidi dabe nogi e tama da, me Netaniago ogwa Ismael da, tama me te bidi Johanan, te bidi te Kareago ogwa, tama me te Seraia, te Seraia aga aya Tanhumetgo ogwa da, te bidi aga bulu Netofa, me te Maka tǫ page bidi Jesania da.  
\v 24 Tama te bidi Gedaliago augwali sulama, augwalibolo e tama po wali, nogo guni sisiyu muyu, te po wali, “Mu tama dao, dagego te Babilon hani bidi dabe augwali sulama, dage wi me egio. Mu menio. Dage te e tǫde tama bidiyu, tama te Babilon hanigo king bidi dologode tama bidao, tama tialima dage bugagia mu bidaibao,” wali.   
\p
\v 25 Te bidi Ismael aga te bidi te Netaniago ogwa da, tama te aga wąį nǫų bidi te nogi Elisama da. Tama te bidi aga te Juda hanigo king bidi augwali deli hani bidi dao. Tama tialima, te megi te kibu bede te nogo a olama, te me badu nogogo si me da sigi soabo poluade, te bidi agai te nogo si bidi selama, tama augwali te Mispa buluba asama, tama augwaligo te bidi Gedalia ela muani. Tama augwaligo te bidi aga dali bidali Juda hani bidi dabe me ela muani, tama me te Babilon hani ami soldia bidi dabe me, te bidi Gedalia dali te Mispa bulude bidali ami soldia bidi dabe me, augwali ela muai dao.  
\v 26 Tama tede nosali, te tigidali Juda hani bidi dabe augwali te bulu pedaide bidali bidi dabe, te ami gavman ofisa bidi dabe me, augwali tigidali te Babilon hani bidi dabe sula peyu, wi mu yali. Tama teyu, augwali tigidali te wi pelama, te Isip buluba bidigi pali. \x * \xo 25:26 \xt Jer 43:5-7\x*   
\s1 Te Babilon king bidigo te king Jehoiakin kalabuside bidali te tagala palali  
\r (Jer 52:31-34)  
\p
\v 27 Te Juda hanigo king bidi Jehoiakin aga te Babilon bulude hadabu bede bidali kibu be e tama bidali, te 37 kibu be usu nama bidali, tama te 37 kibu be wabo te Evil Merodak aga te Babilon hanigo king bidi nigali. Tama te kibu bede te polua te nogo si olama, te sągągo si wabo polua, te 27 dei, Evil Merodak agai te king Jehoiakin hobede eyu, tama agai aga te kalabuside bidali tagala palali.  
\v 28 Tama te bidi Evil Merodak agai te king Jehoiakin dali te dwagi yai kolesaga eyu, tama agai agabolo te genuai nogi mayu, tama aga namba mayu yali, tama te tialigo te gasa king bidi dabe te king Jehoiakin aga dali te Babilon bulude kalabus bidali augwaligo namba me aiyaba elaluali.  
\v 29 Tama teyu, te king Jehoiakin agai te kalabus bidigo bulubo ogwa ma bulube. Tama tigidali sogo te Babilon hani king bidi dali nai tuyu bidai, tama aga te nai tuyu bidada pelama, te king Jehoiakin isibo bodoluba usu nigi pali.  
\v 30 Te Babilon king bidigo te po wai, tama te tigidali sogo augwaligo mone me, te tigidali doado bage dabe me, te king bidi Jehoiakin mayu bidali, te bidi Jehoiakin aga bugagia bidimainu. Augwaligo tama tidi peduama, tama te king Jehoiakin isibo bodoluba usu nigi pai dao.