\id 2CO - Dadibi NT [mps] -Papua New Guinea 2001 (DBL 2014) 
\h Polgo Korin Dabeba Si Wabo Pas Asęani 
\toc1 Polgo Korin Dabeba Si Wabo Pas Asęani 
\toc2 2 Korin 
\toc3 2 Ko 
\mt1 Polgo Korin Dabeba Si Wabo Pas Asęani  
\imt1 Hasia nedebo tau sabo po  
\ip Te Korin moni hanude te Kraisgo po wali pabo we bidi hani dabe elaluali. Tama te tibo po ola mabo bidi dabe augwaligo ili po weyu tama te hani dabe bidibo tomoba pali. Te bagego augwa tibo po te Korin we bidibolo ola mobadi tama augwaligo Polde haniani dwai posobo po weyu, te aga te Godigo po sela pabo bidi mu menio wai. Tama te bidi Pol gasa digibulu bulude bidibadi agai te posobo po wabo kolesaga ebo po odolama, tama te tibo po ola mabo bagego te Korin we bidi dabego te Krais wali pabo kolesaga dolidali weyu, tama agai e tau sabo po asęna tolali. Aga da te Kraisgo sę ebo bidi mu da weyu, tama agai te sę ebode te boi bidi dabego nogode sali dene dali sęgę dali te tigidali te Polgo augwaliba ola mobao. Aga te Korin buluba ma asaibao wali.  
\ip Tama te sogo te Judia tǫ pedaide bidibo te Godigo po wali pabo bage augwali dwagila bidibaso, tama te bidi Pol aga hani bage dali mone sisilama, te augwali magi painu yali. Tama te buku Dąį 8 me 9de, te bidi Polgo te bulu Korin bidi dabe haliga hodolobo po weyu, te sęba mone maiabo po wai dao. Te te bidi Polgo silagasu asęani pasde te e tama po wali, te tibo po sela pabo bidi aposel dabe aselama te bulu Korinde bidiyu, tama augwaligo te bidi Polgo nogi aiyaba elalubo sę eyu, tama agai te Godigo po sela pabo sę emainu te tagala palali bidi nogi aposel sę ebo nogi dolama begela tagalali. Te po wai dao.  
\c 1  
\ms1 Polgo po hanilama weyu, te Godigo tagala palali bidi aposel dabeba sę mani po wali  
\mr (Dąį 1–7)  
\p
\v 1 Ena Pol dao, ena te Krais Jisasgo sę ebo tagala palai bidi dao. God aga homugo digi tama Godigo ena te aga sę ebo bidi muai. Ena dali, te dago ama Timoti da sigo pas te dage Godigo po odoyu te Korin moni hanude bidibo we bidi dagebolo e pas asęna tolobao, te moni Grik tǫ pedai tigidali badu bidalubo te Godigo we bidi tigidalibolo eno e pas asęna tolobao.  
\v 2 Eno homugo te dago Aya God dali, te Genuai Bidi Jisas Krais daligo, te olo mu da tau siyu mabo wiegi yai kolesagago te dagego homu nagame ilama bidiąo.   
\s1 Polgo te Godigo aga tau sobaso gedu haluasa po weyu usu da wai  
\p
\v 3 Dago agabolo puba hwi po weyu, tama God nogi ugwaba sao, aga te God tama dago Genuai Bidi Jisas Kraisgo Aya dao. Aga te dago Aya, tama aga te hobede eyu tau sabo page bidi dao. Aga te tigidali sęgę elalubo bidigo homu nagame ilibo God dao.  
\v 4 Te tigidali dene mabo sęgę daba pedalobo agai te dago homu nagame ilibo dao. Magi basowe? Agai da homu nagame ilibo kolesagago naga dago te haniani sęgę elalubo bidi dabe augwali homu nagame ilimainogo eyu, te Godigo da homu nagame bugagia ilibo dao.  
\v 5 Magi baso meni, te Kraisgo tolali genuai dene, te dago me te tiwai naga tolobao. Tama tiali goli, te sogo me te Kraisgo genuai homu nagamego da pągąnai dao, te nagame ilibo kolesaga te dene tiwai si pedalobo dao.  
\v 6 Te da sęgę tolobaso da, te dagego homu nagame iliyu tiaibao, tama Godigo dage ma somainogo ebao. Tama Godigo dago homu nagame ilibaso da, te dagego homu me nagame ilimainogo ebao. Te dage bomo elama dolaluyu, tama dago tolobo dene tiwai tolobaso da, teda Godigo dage homu nagame ilaibao.  
\v 7 Tama homu si isąyu, dago homugo koneani, te dage bomo elama dolalueibao. Dago koneai, dage da dali dene tolobao, tama tibaso te dage da dali te homu nagame ebo kolesaga me selama bidaibao.   
\p
\v 8 Ama dedeo, te dago homugo te moni tǫ pedai Esia tede te sęgę daba pedalali te dagego koneaibao. Te genuai sęgę mugo da aiyaba elaluama, tama dago bomo aiyaba mu elaluali. Tama tiyu, tama dago homugo te da isabo homu yali dao.  
\v 9 Mu po da wali, te da homu sęgę ebo te po tų ebo bidi jasgo te da isimainao po wali tiwai elama bidali. Te sęgę dabe te tiwai magi baso pedalaliwe? Te dena bomogo usu yabo homu idali weyu te sęgę daba pedalali. Dago te Godigo bomoba homu tialumainogo yai, te agai te isai bidi dabe augwali hodolobo bidi dao.  
\v 10 Te Esia tǫde dwai nai mugo da ela muainogo yali, tiali goli Godigo tede da ma dobola sai. Tama megi me te agai da ma sidu gebo dao. Tama tibaso, dago dena homu te tobage sę ebo God agaba dąų weyu, tama dago homu e tiwai ebo dao, sesemane sogo te dwai naigo da dolainogo ebadi, te agai da ma selama, tama da bugagia bidaibao.  
\v 11 Tama dagego tede Godibolo hanalu wabo po wabogo da tau sao. Tama tiyu te Godigo te we bidi hauwago aga hanalu wabo po tama odama, tama agai da tau saibao. Tama we bidi hauwago te agai da tau sali sęba homu koneama, tama Godibolo usu da po agai te yali dwagi yai sęde waibao.   
\s1 Pol aga sę yabo homu hasegelama, te Korin dabe tibo po ola mayabo homu me ebeo  
\p
\v 12 Dago wiegi yai homu pemene ebo sę e kolesaga delide ebo dao: dago homugo hanilama po pusuyu da, te magi dwai sę isąbo te wiegi yai kolesaga me tama te Godigo da mabo te meda isąwai homu kolesagade bilibo po pusubao. Te e tǫde bidigo koneani kolesaga te dago wali pabeo. Menio. Te Godigo olo mayu tau sabo wiegi yai kolesagago naga da tau selama, tama da te tiwai kolesagade bilibao. Tama da te kolesagade te tigidali bidi tomode bilibo dao. Tama dageba dago te kolesaga me mu ela pidu geai dao.  
\v 13-14 Dago gasa po me dageba asęna tolobeo. Menio. Te po dagego nedama tama page koneabo po naga asębao. Tama megi dagego da gisiga konesiąyu, mesela naga koneai goli, dena homugo te dagego nosali da kuna koneaibao homu yai. Tama tiyu, te Genuai Bidi ma asobo sogo te dago dagede wiegi yai homu pemene ebogia, te dagego da dali wiegi yai homu pemene yagameo, te tiwai si naga yaibao.   
\p
\v 15 Tama dagego enade te dwagi yai abagi homu ebo kolesaga tede eno homu si isąbaso, tama polobadu eno po weyu, te eno homugo hasia dage bidibo madibolo pelama, tama duga wiegi yai homu si sogo yagameo po wai.  
\v 16 Eno homugo hasia ena dage bidibo madibolo pabo homu yali, tama eno dage tagalama, tama ena te Masedonia genuai tǫ pedai teba paibao wali, tama eno te Masedonia tǫ tagalama, te ena dage bidiboba ma asaibao wai. Tama eno homugo dagego ena te Judia tǫba tagala palomainogo yai dao.  
\v 17 Tiali goli, te dageba pabo tų paliali, te ena dageba asobe. Magi basowe? Eno e tama tiabo po wai, tiali goli eno po subigila hasegelali homu elama tama eno po olo wali dawe? Ma, eno te yaibao wali sę isąbaso da, te eno e tǫde bidigo olo po wabo tiwai elama, tama ena te homu mu isąwai bidi dawe? Mu menio.  
\v 18 God da, te homu mu ebo bidi dao, tama aga da dali homu kęą pai bidi dao, tama agai dabolo te du walisiąbo po pusubo meni. Tama tialigo da, te dago dagebolo pusali po me te page si elaluali po meni. Polobadu eno dagebolo te ena dageba asaibao po wai. Tama homu mu naga eyu eno te po wai. Tiali goli eno gasa sę elalubaso, ena dageba ma asobo usube.  
\v 19 Ena me Sailas me Timoti, dago dage tomode pusali po, te Godigo Ogwa Jisas Krais agade te po pusali. Tama Krais aga subigila hasegelebo menio, aga da te aga homu polo subigila hasegelebo bidi meni. Agai aga dąų walali po togogobeo, aga yaibao wali sę te aga mu yaibao.  
\v 20 Te Godigo dąų wali po hauwa elalubao, tama Kraisde naga te dąų walali po tigidali mu usu nagasai dao. Tama tibaso, dago Godigo po odama, tama Kraisgo nogide naga dago te po weyu, “Awe, mu dao,” te pode olama, tama dago Godigo nogi ugwaba sabo dao.  
\v 21 Tama Godigo digi da dali dage dali bomo ilama, tama da Krais dali homugo kęą pai we bidi bidibao. Tama agai digi da dią selama tama sęba me muai dao.  
\v 22 Agai aga dąį iliyu daba sa muani, tama dago homuba Tedali Mobo Bidi mawai. Godigo te da dali gasa wiegi yai sę nosali yabo homu eyu, tama te Mobo Bidi hasia dabolo mani, tama dago te koneao wai: mu tama agai te tigidali wiegi yai sę da dali mu yaibao.   
\s1 Pol te augwali bidibo madi te Korinba polo me pabeo wai  
\p
\v 23 Te eno te polobadu asęna tolali pasgo te dageba asobode tibo po wai yaibaso da, teda Godigo eno te tibo po wali te hania haninagameo. Tiali goli, menio. Eno mu po naga obao. Te eno sęgę dageba mabo te eno hagela homu yali, tama tiyu te ena dage bidibo madi polo me te Korin buluba ma asobe dao.  
\v 24 Te dagego Kraisde konealubo po dąų olama, agaba homu tialubo te dago tonalubo tiwai me egobeo. Menio. Te agaba tialubo kolesagade dage bomo elama dolalubao. Tama dago sę dage dali eyu te dagego wiegi yai homu pemene ebo te pedalomainogo tebo dao.   
\c 2  
\p
\v 1 Tama tibaso, ena homugo digi eno te po wai: ‘Te eno hasia asęna tolali pas te Korin bagego selama, tama augwali homu sęgę eyu bidali. Te ena augwali pageba pelama, tama augwaligo ebo kolesagade te augwaligo dwai sę yali po olama, tama augwali homu sęgę ma ilibo te eno hagela ebao,’ eno dage dali te homu yai dao.  
\v 2 Magi baso meni. Te eno dagebolo homu sęgę mayu da, teda dego te eno homu wiegi yai pemene iligowe? Te eno dage homu sęgę ilai digi da, teda ena wiegi yai homu pemene ilabo bidi menigi da.  
\v 3 Dage we bidigo te wiegi yai homu pemene enabolo mabo bage dao. Tama ena dage pageba pelama, te eno homu sęgę sidali weyu, te delide naga polobadu eno te pas asęna tolama tama dagego sali. Eno dage tigidalide te tiwai homugo koneai: te eno nai me delide te wiegi yai homu pemene ebaso da, teda dage tigidaligo me wiegi yai homu pemene teba ebo dao.  
\v 4 Mu dao, polobadu eno pas dageba asęna tolali, te sogo eno homu sęgę genuai badi, dene dali elaluali, tama ena gela hauwa dali weyu bidali. Eno te pas asęna tolali te eno dageba homu sęgę mawainogo ebeo. Menio. Eno te pas polobadu asęani te dagego ena konemainogo yali, eno dage dali dwagi yai homu eyu godolo ebo kolesaga te genuai mu dao.   
\s1 Augwaligo te dwai penani sę yali bidigo yali dwai sę sela sąyao wai  
\p
\v 5 Te dage tomode polobadu dwai penani sę eyu homu sęgę ilali bidigo, agai te homu sęgę enabolo naga me mabeo. Menio. Agai te homu sęgę meba te dage tigidaliba manio. Eno te po bomo elama wabo te ena hagela ebaso, tama eno te po wai, “Meba dao.”  
\v 6 Te dagego eno hasia asęna tolali pas po nedeyu, tama dagego eno po wali peyu te bidi buluba sąyu yali. Tama aga dali te sę ebogo te dwai dene te dage hauwa bidigo te bidi agaba wei ponani, te tibogo aga usu ilai, te bidigo ge neyu homu begelai dao.  
\v 7 Tama tibaso, dagego gasa kolesaga me megi iyąo. Te dagego agai sęgę sela sąnama, tama aga homu nagame ilao. Tiyu genuai homu sęgę mugo te bidi aiyaba mu elaluabuo.  
\v 8 Tama tibaso, eno homugo dagego te duga ebo dwagi yai homu eyu godolo ebo homu te agabolo bugagia ola mao.  
\v 9 Polobadu eno te pas asęna tolali, te dage eno usu naga sai. Eno koneainogo yali, dagego te tigidali naide eno po wali pogowe naga suainogo yai dao.  
\v 10 Tama dagego bidi me deligo sęgę sela sąbaso da, teda eno me eno tagalaibao. Awe, te eno sela sąbo gasa bidigo yali sę sęgę elaluyu da, te eno Krais gedude te sęgę sela sąbao, te dage tobade tau siyu tiaibao.  
\v 11 Eno te dago aga sęgę sela sąbo homu yali, tiyu Satango da tibo po ola menama tama da aiyaba elaluidali weyu tiaibao. Dago agai te we bidi dolabo dwai homu kolesaga koneai dao.   
\s1 Pol aga te bidi Taitus suabo homu eyu, aga homu sęgę eyu te bulu Troasde bidali po  
\p
\v 12 Polobadu gana ena pelama te Troas hanuba pedalama, te gesi wiegi yai po Kraisde pusainogo yali, tama Genuai Bidigo te po pusubo tų dalalio.  
\v 13 Tiali goli eno te moni homu tagalama, te homu nagame me elalubeo. Magi baso meni, te eno ama Taitus aga dage bidiboba pelama bidali, tiali goli aga ma asama eno aga me subeo. Tama tibaso, eno te Troas bage augwali tagalama, te Taitus gegegi peyu, tama ena asama te Masedonia moni tǫ pedaiba sabolai dao.   
\s1 Te Godigo bomode te tagala palali bidi dabego te hwįbo bomo aiyaba elaluai  
\p
\v 14 Tiali goli te Masedonia tǫde eno Taitus sulama, tama agai dagede dwagi yai po olama, megi eno usu da weyu Godibolo po odu gebao. Sesemane sogo agai da tau selama, tama dago Kraisgo bomode te wąbi hwįani usu yai. Tama dago sę ebode te Godigo po pusali, tama te bidi dabe augwaligo Krais konea sabo dao. Te koneani kolesaga te pusu ebo nai tiwai denami te tigidali habuba pabo tiwai ebao.  
\v 15 Mu tama, dena digi te pusu yai denami ebo nai te Kraisgo selama tama Godibolo mabo tiwai dao. Te denami te Godigo augwali ma sabo tų tomode bidibo we bidi dabe augwaliba me, tama te bidi dolabo tų tomode bidibo we bidi dabe augwaliba me te denami pedalobo dao.  
\v 16 Te bidi dolabo tų tomode bidibo hanigo te odobo denami te isabo denami odobo dao, tama augwali te isabo madi pedalaibao. Tama te Godigo augwali ma sabo tų tomode bidibo hanigo te odobo denami te bidibo ula sabo denami odobo dao, tama agai te bidibo ula augwaliba pedalomainogo yaibao. Te sęde Godigo da tau sisąyu tama dago te sę ebo usu egowe? Mu menio. Tialima aga da tau mu sabo dao.  
\v 17 Tiali goli, da te bidi hauwa augwali tiwai me ebeo, augwali tedali tedela pelama, te Godigo pode masigi sabo bisnis sę tiwai me ebo, te tiwai dago egobeo. Menio. Dago te sę Godide sali, tama dago te Godigo sęde tibo po subigila me wagobeo. Menio. Dago sę dolasa mu tigidali ela pobao. Da te Krais dali wadolama, tama homu mu naga eyu, tama God gedude dago agai po te we bidi dabebolo pusubo dao.   
\c 3  
\s1 Te Godigo gesi dąų wali po sę yabo bidi po  
\p
\v 1 Eno te da bidi sigo ebo sęde te tobage po asębaso, tama dago megi ma gagalama te dena nogi ugwaba ma sainogo ebawe? Menio. Gasa bidi dabe, te dagebolo tibo po ola mabo bage, augwali dageba asiyu tama pas dagebolo mani. Augwali gasa bulude bidibadi, tama augwaligo te bulu page bidi dabebolo te tobage po wai, “Te Korin bagego da koneyu, da dali dwagi yai homu emainogo eyu, tama dagego augwalibolo tolabo pas asęyu dago nogoba muao,” te po olama, tama te tobage pas dageba tolasa asai. Me ma, augwaligo dage tagaliyu gasaba pai hagede, augwaligo homugo dagego me te tobage augwali tau sabo pas asęąo wai. Te bagego te augwa nogi ugwaba sabo kolesaga ebo dao. Tiali goli ena dali Timoti da sigo te tobage tau sabo pas mao po dagebolo wabeo. Menio.  
\v 2 Eno te asęna tolobo pasde po digi po dwasianu begeleyu tama obao. Te da bidi si te Godigo po pusubo sę ebo bidi mu dao po wabo pas, te pas te dage we bidi dao. Tama dage te dena homude asęai tiwai elalubao. Te pas nedebo sę tiwai eyu tama tigidali bidi augwaligo dage suyu, tama da sigo dage dali yali sę page augwaligo haninama hania konebo dao.  
\v 3 Dage haninama te dage te Kraisdu asai pas tiwai me deli bidibao. Te da sigo yali sęde Kraisgo te pas asęai. Agai te asębo medabugo sisi ąį selama tama me asębeo. Menio. Agai te bidibo ula elalubo Godigo Mobo Bidigo asęai. Agai te sawali yai masigi daide me asębeo. Menio. Agai te we bidigo homude asęai dao. \x * \xo 3:3 \xt Sai 24:12; Jer 31:33; Ese 11:19; 36:26\x*   
\p
\v 4 Da Kraisde wadolama tama Godiba homu tialubaso, dena homu si isąyu dago dagede yali sęde te tobage po wabo dao.  
\v 5 Mu tama, dena digi te sę ebo usu egobeo, tama tiyu dena digi dago te magi sę me deli yaibao po me wagobeo. Menio. God deligo naga te dago sę emainogo ebo usu ilibo dao.  
\v 6 Magi baso meni, aga digi da usu ilama, tama da te agai da tau somainogo eyu gesi noma dąų wali pogo sę ebo bidi bidibao. Te gesi noma da tau somainogo eyu dąų wali po te hasia asęani bomai po tego nai me egobeo. Menio. Te Godigo Mobo Bidigo nai dao. Magi baso meni. Te hasia asęani bomai pogo te bidi ela mubo dao, tiali goli te Godigo Mobo Bidigo bidibo ula te bidibolo mabo dao. \x * \xo 3:6 \xt Jer 31:31\x*   
\p
\v 7-9 Te Godigo te we bidi dali polobadu yali sę dali, te agai megi ebo gesi sę dali, te sę side dago homugo kone paluyu dagalinao. Polobadu Godigo te bomo yai pogo po te sawali yai masigi daide asęai. Tama te bomo yai pogo ebo sęgo te we bidi dabe augwali isaboba pedalaibao. Te bomo yai pogo sę te da we bidi po tų ilama, tama da sęgę sai bage dao hania hanilabo sę dao. Tiali goli te sę te Godigo wiegi yai bomo yai ula dali pedalali. Tama Mosesgo gesabidi ula mu ebaso, tama Israel dabe wi eyu, augwaligo aga gesabidiba tonabo usu me ebeo. Te bomo yai pogo sę tidubadi te sę ebode te bomo yai ula elaluali. Tiali goli nosali te bomo yai ula silalio. Tama megi, megi Godigo sę ebogo te we bidi augwalibolo aga Tedali Mobo Bidi mabo dao. Megi Godigo wiegi yai gesi po pusubo sę ebode te bidi dabe augwali doloba pai nogi nogi yaibao, te sęde Godigo bomo yai ula te umabo mu elalubo dao. \x * \xo 3:7-9 \xt Sai 34:29\x*  
\v 10 Tama te bomai pogo sę ebo ula polobadu sali, te tiwai ula megi meni yanio. Magi baso meni, te nosali pedalali gasa sęgo aga aiyaba mu elaluama, tama genuai ula mu elalubo dao.  
\v 11 Magi baso meni. Te osogo elaluali sę aga te bomo yai ula elalualigo da, teda te Godigo Mobo Bidigo te we bidibolo maiabo gesi wiegi yai po sę, te sę sesemane sogo elalubao, te sę aga Godigo bomo yai ula umabo mu elalubo dao.   
\p
\v 12 Awe, te Godigo te we bidi doloba pai nogi nogi yabo po pusubo sę, te sęgo bomo yai ulago te Mosesgo mani bomo yai pogo ula aiyaba mu elalubo dao. Dago te sęde te homu eyu tama dwagi yai homu ebaso, da wi me egobeo. Menio. Bomo eyu dago po hanilama pusudubao.  
\v 13 Dago te Mosesgo yali kolesaga tiwai me ebo meni. Agai aga gesabidi te ugwa namigo mesegeleyu palia sidu geai, tama te Israel dabe augwaligo te aga gesabide elalubo ula sula painogo ebo munu me suidali weyu idu geai. \x * \xo 3:13 \xt Sai 34:33\x*  
\v 14 Tiali goli te Israel dabe augwaligo homu mu puna peyu, kone tuą pali. Tama tigidali sogo augwaligo te Godigo te we bidi tau sabo poloba dąų wali po naga te bukude nedeyu iduai, te ugwa nami tiwai me augwa homude elalubadi, te megi e sogoba usu nagasoba. Menio. Te Krais delide naga Godigo te homu mesegaluali ugwa nami dagala sąbo dao.  
\v 15 Awe, tigidali sogo te Israel dabe augwaligo te Mosesgo asęani po nedeyu ebo, te ugwa namigo augwaligo homu mesegaluali tiwai elalubao, te megi e sogoba usu nagasobao. Tama te nedebo po page augwaligo kuna konebo menio.  
\v 16 Tiali goli, bidigo homu Genuai Bidiba ma begelegi pobaso da, teda agai te bidi aga homu mesegaluali ugwa nami dagala sąbo dao.  
\v 17 Te pode, te Genuai Bidi wali, te da aga te Godigo Tedali Mobo Bidi dao. Tama Genuai Bidigo Mobo te bidi me deli dali bidiyu da, teda te nai me deligo te bidi me kęąlugobeo. Menio. Aga olo mu bidibo dao.  
\v 18 Tama da tigidali, da te nai me deligo da gesabidi me au palialubeo. Tama Genuai Bidigo wiegi yai bomo yai ula daba asiyu, tama da te gesabidi subo ąį dula tiwai pedalama te ula te bidi dabe augwaliba pobao, tama augwaligo subo dao. Sesemane sogo dago ula umabo mu sabo, tama da hasegeleyu tama Genuai Bidi aga noma tiwai pedalobo dao. Genuai Bidi aga te Mobo, tama agai te tiwai kolesaga da dali ebo dao, tama te bomo yai ula te genilama mu ela pabo dao.   
\c 4  
\s1 Godigo po sela pabo bidi augwali te tǫgo nigai sene tiwai  
\p
\v 1 Godigo da homu dene eyu tau selama, tama te agai gesi dąų wali po pusubo sę dabolo mawai. Tama tialigo da, teda te sęde da bomo kimi isąyu me egobeo, te sę tagalabo homu me egobeo.  
\v 2 Menio. Dago te geme dualama hale ebo kolesaga te tudiba muanio. Te tibo po wabo kolesagade da me bilibeo. Tama dago Godigo po me hasegelegobeo. Menio. Dago mu po hanilama mu pusubo da, tama tigidali bidi deli deli augwa homugo dago pusubo po mu po dao konemainogo ebo dao, tama augwa dago ebo sę God gedude konemainogo ebo dao.  
\v 3 Tiali goli te dago pusubo gesi wiegi yai po, te po te geme duala sobaso da, teda te hagayabo we bidi dabe augwaligo gedude naga te po te geme dualubao.  
\v 4 Magi baso meni. Te e tǫde tibo god Satan agai te Kraisgo poba augwa homu begi pisąbo bidi dabe augwaligo homu kone tuą palali. Magi baso meni, Krais aga da te God tiwai mu dao, tama agai dabolo Godigo noma mu hanilibo dao. Tama te Kraisgo genuai bomo yai ula waselabo wiegi yai gesi po, te po te giliga nanobo tiwai dao. Tiali goli te hagayabo we bidi augwaligo te pogo nanobo ula suidali weyu, Satan agai augwaligo homu kone puna palama tuą palali.  
\v 5 Dago denade po te we bidibolo me pusugobeo. Mu menio. Dago e tiwai po pusubo dao: “Te Krais Jisas aga dago Genuai Bidi dao, tama Jisas tobade da te dagego sę ebo bidi bidibao,” te tiwai po pusubo dao.  
\v 6 Magi baso meni, e tiwai dao. Polobadu mu Godigo te po wai, “Te be hulia sai madi ula pedalomainao,” wai. Tama te po wali God aga ula digi da dali bidibao, tama da homu ula mu ilibo. Te ula e dao: dago te Godigo bomo yai ula te Krais gesabidide elalubo koneai dao. \x * \xo 4:6 \xt Gag 1:3\x*   
\p
\v 7 Tiali goli ena dali, te ena dali deli sę ebo bidi dabe dali, dena te bomo yai ulade po pusubo wiegi yai sę elalubo, te tǫgo nigai olo sene tomode elalubo tiwai ebao, te dena isibo tigide naga elalubo dao. Te tigidali bidigo konemainogo ebao, te Kraisde wiegi yai gesi po pusubo sę ebo wiegi yai genuai bomo mu, te Godigo bomo naga dao. Te dago menio.  
\v 8 Edao. E tiwai dao, te tigidali badu te bidi dabego dabolo te sęgę madu gebo dao, tiali goli tego da mu dolobeo. Te hauwa sogo dago dena pabo tų hania konebo menio, tiali goli tigidali sogo dena tų me elalubo dao, te mu dąų wabeo. Tama tibaso da Godigo sęde bomo kimi munu me isibo menio.  
\v 9 Te boi bidi dabe augwaligo dwai sę da dali yainogo da pobesa bilidu gebo dao, tiali goli Godigo da me tagalobeo. Augwaligo da elama tulaluidu gebo dao, tiali goli da mu me dolobeo.  
\v 10-11 Polobadu te gasa bidi dabe augwaligo Jisas aiyaba elalubo homu eyu, tama agabolo dene menama tama aga isali. Tama te tiwai me te boi bidi dabe augwaligo dabolo sęgę megi mayu, tama dene me mayu, tama da hauwa sogo pąde isali, te Jisas tobade. Tialima dago Jisasgo bomo selama tama aga sę eyu, te gasa bage augwaligo te suyu konebo dao, te gų pagede ma hodolali bidi Jisasgo da isabo tigide bidibo bage tau siyu, tama dago agai sę tama ebo dao. Augwaligo da dali tama homu ebo dao.  
\v 12 Tama tibaso, te e tiwai dao: te isabo sę te dade hauwa sogo idubao. Tiali goli dago Kraisgo bomo elaluyu, tama agai gesi wiegi yai po pusubo sę ebaso, tama dagego te bidabo ula bugagia siyu tama bidada peyu, bidada paibao.   
\p
\v 13 Awe, te isabo sę enade hauwa sogo idubao. Tiali goli dago Godigo po pusubo sę tagalobeo. Magi baso meni. Polobadu te Godigo po bukude bidi me deligo te po wai, “Eno Godiba homu elalubaso, eno po hanilama pusai,” te po asęani. Tama dago me te tobage homu eyu, dago Kraisba homu elalubaso, tama dago te Godigo gesi wiegi yai po te we bidibolo me hanilama pusubo dao. \x * \xo 4:13 \xt Tib 116:10\x*  
\v 14 Dago homu si isąyu tama mu koneanio, Godigo dago Genuai Bidi Jisas hodolali, tama agai da me Jisas dali hodolama, tama da dali dage dali aga pąba odasa paibao, te da tigidali aga gesabidiba pedalaibao.  
\v 15 Magi baso meni. Te tigidali sęgę te da Godigo po pusubo bidi dabeba pedalali, te dage tau somainogo tama yai. Nosali Godigo olo mu tau mani wiegi yai kolesaga te we bidi umaboba ela pelama, tama genilama augwaligo usu da po umabo mu Godibolo waibao, tama aga nogi ugwaba mu saibao.   
\p
\v 16 Dago te homugo konebaso, tama da Godigo sęde bomo kimi munu me isibo menio. Te mu tama, dago tigi dolainogo ebo dao. Tiali goli magigo meni, dago homu dali noma dali si te tigidali deli deli sogo gesi ma pedaliyu ebo dao.  
\v 17 Te e tiwai: te da Godigo po pusubo bidi dabe, te dabolo pedalubo sęgę te dwasianu dao, tama te pęwadage sogo naga osogo elaluaibao. Tama da e tǫde bidibadi te sęgę tolobaso, nosali dagalude dago te sesemane sogo bugagia bidada peyu, bidada pabo wiegi yai nai mu saibao. Tama te dagalude bugagia bidabo te wiegi yai sęgo te dago megi elalubo dwasianu sęgę aiyaba mu elaluaibao, te wiegi yai mu naga yaibao.  
\v 18 Magi baso meni. Dago te gedugo e tǫde subo nai dabeba dago tonǫlǫ me ebo meni. Te menio. Dago koneani, dago gedugo subo nai, te pęwadage sogo naga elaluaibao. Tama dago gedugo te susiąbo nai, te sesemane sogo bidada peyu, bidada paibao. Tama tibaso, te tobage naiba naga dago dena gedugo tonǫlǫ ebo dao.   
\c 5  
\s1 Dago gedugo susiąbo nai tonalubadi bilibo dao  
\p
\v 1 Dago te daba pedalobo haniani sęgę tede moni homu me ebo menio. Magi baso meni. Dago te tiwai koneanio: te da e tǫde megi elalubo tigi da, te dena osogo bidabo be tiwai dao, te nami ugwa be tiwai dao. Tama te osogo bidabo be hųgibaso da, teda Godigo da maiabo be me deli elalubao. Te be bidigo nogogo me sę ebeo. Te dagalude elalubo, tama te be sesemane sogo elalua peyu, elalua paibao, te be gamonaibao.  
\v 2 Megi da e tǫde tigi elalubadi, te haniani sęgę toloyu, tama dago te hagela homu eyu me sogo gela weyu bidibao. Magi baso meni. Dago dena te dagalude elalubo be, te dago gesi tigi, tego te da tigi te gudubo ugwago mesega sabo tiwai emainu godolo ebo dao.  
\v 3 Dago tigide te gudali da, teda da tigi bolu olo tiwai me bidibo augwaligo sugobeo.  
\v 4 Awe, da e osogo bidabo ugwa bede me bidaludu, tama da sęgę siyu gela weyu bidibao. Te dago poloba tigi tagalainogo homu eyu me wabeo. Menio. Dago homugo dago gesi tigi mubode, te gesi ugwa tiwai elama, teda te isibo tigi te aga bidibo ula somainogo ebo dao.  
\v 5 Godigo digi dago te gamonabo tigi somainogo dabolo sisi ilai dao. Tama agai Tedali Mobo Bidi dabolo mani. Te Godigo me badu nai dabolo nosali mawainogo te agai hasia podolali nai te Tedali Mobo Bidi dabolo mani, tama dago e tama koneai: mu tama te agai tigidali nai dabolo maiabo homu yai, tama mu mawaibao.   
\p
\v 6 Tama tego dago homu sesemane sogo dąų waliyu ebao. Dago tede bomo elalubao. Dago koneani, megi te dago tigi te dena bidibo be tiwai elalubao. Tama megi e sogo da ede me bididubadi, da Genuai Bidigo bulude aga dali me bidibeo.  
\v 7 Menio. Tama megi da e tǫde bididubadi, dago dena homu tigidali agaba muyu tama aga dali bilibo dao. Dago gedugo aga susiąbadi tama tibo dao.  
\v 8 Tiali digi, dago homu sesemane sogo dąų waliyu elama dago bomo elalubao. Dago homugo e elalubo tigi tagalama tama Genuai Bidi dali hodobo bugagia mu bidigi pabo homu godolo ebo dao.  
\v 9 Tama da dena tigide me bididubadi, ma tigi tagalama gasaba bidigi pai, te magigo menio. Sesemane sogo dago homu bomo elama, te Genuai Bidigo godolo yabo kolesaga tigidali naga inao homu ebo dao.  
\v 10 Magi baso meni. Dago koneani, da tigidali te Kraisgo po tųde hania hanilama pedalaibao. Tama da megi e bidibo tigi dali bidiyu tama wiegi yai kolesaga ebaso, ma dago dwai kolesaga eyu me yali da, teda da tigidali deli deli te dena yali kolesagade usu nama tama dago te tiwai saibao. \x * \xo 5:10 \xt Rom 14:10\x*   
\s1 Dago te we bidi dabego God dali deli homu ilibo sę yabo po elalubao po wali  
\p
\v 11 Te da tigidali te moni po tųde pedalaibao homu ebaso, da Genuai Bidide wi eyu, tama te bidi dabe augwaligo te da Godigo po sela pabo bidi dabe mu dao te hania konemainogo eyu, dago augwalibolo homu bega sabo po weyu bidibao. Godigo da gisiga koneani. Tama eno homu te dage me, dage deli deli duga te dwai sę dali dwagi yai sę dali dagalabo homugo ena hania koneai, te ena homu mu eyu te Godigo sę ebo bidi bidibao.  
\v 12 Te dagego homugo da wiegi yai bidi da homu emainogo, dena digi dena nogi ugwaba siyu te po me wabeo. Menio. Dage tomode bidi meba hagoma homu eyu, augwa nogide naga olo wiegi yai homu pemene ebo bidi dabe bidibao, augwa ebo kolesagade wiegi yai homu pemene me isąbo bage dao. Tama bidiyu, augwaligo da Godigo po sela pabo bagede nogi posobo po wabo dao. Tama te ena te homu mu eyu Godigo sę ebo bidi bidibao po, dago te po asęna tolali, te u tobage bidigo gedude dagego da dali wiegi yai homu pemene emainogo ebao. Dago homugo dagego te bidi dabego wabo ena nogi posobo po te po wei ponabo usu yaibao homu yali.  
\v 13 Eno te Godigo sę bomo ebadi, tama gasa bidi dabe augwaligo ena dene mabo dao. Tama ena dali boi bidi homu ebo bage augwaligo te sę sulama tama “Te bidi Pol aga polobo bidi mu dao,” augwaligo enade te po obao. Te usu dao, eno Godigo sę me yaibao. Me ma, da Godigo sę ebo bage, da homu dolo elaluyu bidibaso, teda tama bidiyu, dena sę eyu, tama tebogo dage tau sabo da, te dage tobade te sę ebo dao.  
\v 14 Magi baso meni. Te Kraisgo da dali dwagi yai homu eyu godolo ebogo, tebogo naga da homu hodolama tama dago Godigo sę ebo dao. Magi baso meni, dago homugo bugagia kone palama, tama te tiwai homu koneanio: bidi deligo da tigidali hasegelama tama da tobade aga isalio, tama tede da tigidali isai tiwai yai dao.  
\v 15 Tama agai da tigidali hasegelama isalio, te agai tama tibaso, da bidibo ula dali bidibo we bidi dago dena digi homu koneama munu me biligobeo. Menio. Te da tobade hasegeleyu isama tama ma hodaluali bidi, te dago aga homu naga wali peyu tama aga sę eyu bilao.   
\p
\v 16 Tama tibaso, megi dena digi te poloba te tǫde bidi dabego ebo homu kolesaga wali me pisąma tama bidi me deligo kolesaga me dagalogobeo. Mu tama, polobadu dago te tǫde poloba homu kolesaga wali peyu tama Krais dagaloyu tiwai. Tiali goli megi dago aga te dagalabo kolesagade me dagalobeo.  
\v 17 Tama tibaso niwai bidi Kraisba wadolobo si da, teda Godigo aga gesi noma bidi mu ilama pedalaibao. Bugagia odao. Megi te bidigo ebo poloba kolesaga tigidali silalio, tama gesi kolesaga pedalai dao.  
\v 18 God aga digi te tigidali hasegelebo sę page bidi dao. Polobadu da agade boi bidi bidali, tiali goli Kraisgo yali sęde Godigo da aga dali deli homu ilama, tama da aga abagi hani pedalai. Tama agai te sę dabolo mani, te aga tau selama te aga dali boi bidi homu ebo bidi dabe augwaligo aga dali abagi homu pedalomainogo ilibo sę dabolo mani.  
\v 19 Dago pusubo po e tama tiwai: God agai te Kraisgo yali sęgo te tigidali we bidigo te boi bidi sę ebo kolesaga tagalama, tama aga dali abagi homu pedalomainogo yai. Agai te augwaligo yali dwai sęde homu kone ma ebeo. Tama agai dabolo te boi bidi dabe aga dali abagi homu ilabo po pusubo sę dabolo mawai dao.  
\v 20 Tama tibaso, dago te Kraisgo pedauwalide po selama tama agai po pusubao. Te tiwai God aga digi te tigidali bidi dago pedauwaligo i obao. Dago Kraisde digi te po tigidali we bidibolo pusubao, tama dago te tiwai po augwalibolo obao, “Te dagego boi bidi homu ebo kolesaga tagalama, God dali abagi homu ebo kolesaga mu yao,” dago te po pusubo dao.  
\v 21 Te bidi Krais agai dwai sę me isąwai, tiali goli da tobade Godigo dago dwai sę yali sęgę tigidali agaba sisinama, tama aga te dwai sęgę sai bidi tiwai mu pedalai. Agai tama tiali te da Kraisde wadolomainogo yali, tama agai bomogo da te Godigo gedude doloba pai we bidi pedalomainogo yai dao.   
\c 6  
\s1 Godigo po sela pabo bidi dabe augwali te sęde sęgę hauwa tolali po  
\p
\v 1 Dago sę God dali eyu tama dago te tiwai po bomo elama dagebolo obao: dagego te Godigo olo mani wiegi yai tau sabo kolesaga salio, tiyu dagego agai te olo mu mani wiegi yai tau sabo kolesaga tagalabuo, te kolesagago agai sę dage tomode bugagia emainao.  
\v 2 Magi baso meni. Polobadu Godigo aga we bidi hanibolo te po wai dao,  
\q1 “Te eno bodolu mani wiegi yai sogo, eno nago po  
\q1 odai dao. Tama te bidi dabe augwali ma dobola sabo  
\q1 sogode, eno nage tau sali.” \x * \xo 6:2 \xt Ais 49:8\x*  
\m Odao! Megi naga te bodolu mani wiegi yai sogo. Megi e sogo naga te Godigo da ma dobola sabo sogo dao. Tama tibaso, dagego agai olo mabo wiegi yai tau sabo kolesaga sula tagaligimio.   
\p
\v 3 Dago homugo te bidi dabe augwaligo dwai po te dago ebo sęba me badi te tama po waidali homu elama, tama augwaligo Godigo po tudiba muidali weyu, dago te bidi dabe augwali sągąde magi nai me deligo enama tulaluabo sę me egobeo.  
\v 4 Menio. Da Godigo sę ebo bidi bidiyu, tama tede sesemane sogo dago wiegi yai kolesaga ebogo tigidali bidibolo dago ola mayu, te tiwai ebao: te haniani sęgę daba pedalubaso, tama dwai naigo da dolobadi me, tama te dabolo pedalobo dwai sogo tego da dąų obadi, te da bomo elama mu dolalubo dao. Tama tibaso, tigidali bidigo konebo dao, te da Godigo sę ebo bidi dabe mu dao.  
\v 5 Bidi dabe augwaligo da elama tama da kalabus iliyu yai. Te boi bidi dabe augwaligo da pobesa bilama tama moni po dagą weyu, po dwai i olama dabolo wai. Da moni sę dene mu yali. Da hauwa sogo bugagia godege me pisąwai. Tama da nai sili bidiyu yai dao. \x * \xo 6:5 \xt Tpi 16:23\x*  
\v 6 Dago meda isąwai wiegi yai kolesaga eyu, tama Godigo pode dago wiegi yai homu kolesaga elaluyu kuna koneai dao. Bidi dabego dabolo dene mani goli, dago wado po polo me wasiąbo. Dago te bidi tau siyu, augwalibolo wiegi yai kolesaga ilibo dao. Dago te Tedali Mobo Bidigo bomo elalubao. Dago dena homu mu eyu, te dwagi yai homu eyu godolo ebo kolesaga te bidi dabe augwalibolo ebo, te pedauwalide naga te kolesaga ebode me wabo meni. Tama dago te tobage kolesaga ebadi, gasa bidi dabe augwaligo koneagameo, da te Godigo sę ebo bage mu dao.  
\v 7 Dago mu po pusubo dao. Dago dena sę Godigo bomode ebo dao. Dago doloba pai kolesaga ebo dao, tama tebogo te wąbi hwįbo nai te dolo nogode me, pobase nogo me elalubo tiwai elama, tama tede dago wąbi hwįbo dao.  
\v 8 Tama bidi mebago dago nogi ugwaba sabo dao, tama bidi mebago da nogi aiyaba elaluyu ebo dao. Mebago posobo po dwai dabolo wabo, tama mebago gasa bidi dabe augwalibolo te dago wiegi yai kolesaga ebo po pusubo dao. Boi bidi dabe augwaligo da tibo po weyu, te we bidi dwai sę tomoba kegebo bidi da homu ebo dao, tiali goli menio, dago mu po naga wabo dao.  
\v 9 Te we bidi mebago gedude te da nogi meni yai bage da, da koneabo bidi meni ebo tiwai ebo dao, tiali goli bidi hauwago da koneani. Da te isainogo ebo bidi tiwai ebo dao, tiali goli meni, da bidibo ula dali me bididubo dao. Te Godigo da dodoloyu te keloago elebo tiwai ebo, tiali goli agai da me ela mubeo.  
\v 10 Da Godigo sę ebo bidi dabe, da te homu sęgę mu hauwa sogo ebo dao, tiali goli te magigo meni, sesemane sogo dago homu pemene wiegi yai ebo dao. Da te magi nai meni yai bidi tiwai bidibo dao, tiali goli tagala, dago te mu wiegi yai nai hauwa we bidi hauwabolo mabo dao. Da te bidigo gedude te magi nai deli me meni yai tiwai ebo dao, tiali goli te meni, dago tigidali nai mu elalubo dao. Tama tebogo te tigidali we bidibolo hania ola mabo dao, da te Godigo sę ebo bidi dabe mu dao.   
\p
\v 11 Dage Korin bulu we bidi dabe, dagebolo dago dena homu hania hanilama dagebolo megi tama wai dao. Dago dage dali dwagi yai homu eyu godolo mu ebo kolesaga te genuai mu dao.  
\v 12 Dago dena homu dagede me palia sabeo. Menio. Dago dage godolo mu ebao. Tiali goli duga digi duga homu da dali palia selama, tama da deli homude me bidibeo.  
\v 13 Megi eno dagebolo wabo po te ayago aga waibolo po mobo mayu wabo po tiwai obao: dabolo te kolesaga wei ponoyu, dagego me da dali dwagi yai homu eyu, da godolo mu genuai yao.   
\s1 Da te Godigo be tiwai elalubao, tiyu Godigo po wali pisąbo bage dali kisasa biligio wali po  
\p
\v 14 Te Godigo po wali pisąwai bage augwali te tedali gasagi yai, tama dage augwali dali kisasa bilama tama augwaligo ebo kolesaga tau me selamuo. Menio. Magi ilama tama te doloba pai kolesaga dali, te bomai po sela sąbo kolesaga dali, te si dali abagi omainu yaibawe? Menio. Mena tama te ula te be hulia sai dali deliba sisinimainogo yaibawe? Te usu egobeo.  
\v 15 Ma, te Krais te Satan dali deli homu elama bidibo da, agawe? Te Kraisde konealubo po dąų wali bidi dali, te konealubo po dąų wasiąwani bidi dali, te augwali sigo deli homu tolaluaibawe? Mu menio.  
\v 16 Mena tama dago te Godigo wiegi yai be dali, te bulu haubo bidigo dali si te deli madi sisinaibawe? Te tiwai me egobeo. Dagego koneani, da digi, da te bidibo ula elalubo Godigo bidabo be tiwai dao, te polobadu Godigo te tiwai po wai,  
\q1 “Te ena augwali dali bidiyu, tama augwali tomode  
\q1 bilaibao. Tama ena augwaligo God bidiyu, tama  
\q1 augwali eno we bidi bidaibao.” \x * \xo 6:16 \xt 1 Ko 3:16; 6:19\x*   
\m
\v 17 Tama Genuai Bidigo te aga we bidigo te dwai sę ebo bage tagalamainogo eyu po ma wai,  
\q1 “Tama tibaso, dagego augwali tagalama, tama gasa  
\q1 madi bidigi pao, tedali mu bidao. Tama dagego  
\q1 te augwaligo dwai sę yabo meda yai nai munu  
\q1 me tolamuo. Tama ena digi eno dage saibao.\x * \xo 6:17 \xt Ais 52:11\x*  
\v 18 Tama ena dagego Aya bidiyu, tama  
\q1 dage eno wai ogwa me wegi me bidaibao, Genuai  
\q1 Bidi tigidali bomo page bidi, agai te po wai dao.”\x * \xo 6:18 \xt 2 Sml 7:14; 1 Sto 17:13; Ais 43:6; Jer 31:9\x*   
\c 7  
\p
\v 1 Eno ama dede muo, dago te Godigo te da dali dąų wali po dabe tama salio. Tama tibaso, dago dena tigide me homu elalubo meda tigidali sela sąnama tama wiegi yai tedali bidinao. Tama dago Godide wi elama, tama wiegi yai doloba pai kolesaga mu naga sesemane sogo wali pinao.   
\s1 Polgo te Korin bulu bidi dabe dali wiegi yai homu pemene mu yali po  
\p
\v 2 Dagego da dali dwagi yai homu eyu da godolo mu genuai yao. Magi baso meni. Dago bidi me delibolo dwai sę me ilibeo. Dage deli me dolosiąwai. Te dago bidi me deli tibo po ola menama, agai nai anoma elama me sisąwai.  
\v 3 Eno dagebolo te tiwai po kisiliyu me wabeo. Magi baso meni. Eno tama tiwai po polobadu walio: dago dage dali dwagi yai homu eyu godolo mu ebao, tama dage isibo si da, teda da me dage dali isabo homu yaibao. Tama dage bidibo ula elaluyu bidibaso da, teda da te bidibo ulade dage dali bidabo homu yaibao.  
\v 4 Eno dagede homu si ebo meni. Eno homu pemene wiegi yai dagebolo ebao. Te tigidali dabolo pedalobo sęgęde, te eno homugo dage koneama, tama tede ena homu dua nagame mu ilama bidibo, tama eno homu wiegi yai pemene mu elalubo dao.   
\p
\v 5 Magi baso meni. Polobadu da aselama te Masedonia tǫba sabolali, tama tede me da tigi dwasianu toma me nabeo. Menio. Te haniani sęgę daba pedalai. Dago po konila te Godigo po odisąbo bidi dabe dali wali, tama da homude wi yali.  
\v 6 Tiali goli God da, te sęgę elalubo bidigo homu dua nagame ilibo bidi dao. Agai te Taitus da bidibo madi asobogo agai da wiegi yai homu nagame ilai dao.  
\v 7 Taitus te da bidibo digi sabalobode, tede naga te Godigo da wiegi yai homu nagame me ilibeo. Menio. Dagego Taitusgo homu nagame ilibaso, tama agai te po sela asali, tama tede me Godigo dago homu nagame ilama bomo mani. Taitusgo te dagego da suabo homu godolo mu eyu, tama dagego enade homu dene eyu gela wabo po dabolo pusali, tama dagego ena dali deli homu elama bidabo homu ebo po me wali. Tama eno homu pemene wiegi yai hauwa mu eyu bidibao.   
\p
\v 8 Eno koneani, eno asęna tolali pasgo dagebolo dene mani, tiali goli tede eno ge nabo meni. Mu tama, polobadu hasia bolo eno tede ge nani, tiali goli megi da menio. Eno koneani, te pasgo dagebolo homu sęgę mani, tiali goli te pęwadage sogo naga yalio.  
\v 9 Taitusgo po dabolo pusubaso, megi eno homu pemene wiegi yai ebao. Eno dage homu sęgę yalide wiegi yai homu pemene me ebeo. Menio. Eno te homu sęgęgo dage homu begelali, tede eno wiegi yai homu pemene ebao. Eno koneani, dagego duga homu begelemainogo eyu, Godigo digi te homu sęgę dageba pedalomainogo ilali. Tama tibaso, dago pogo dage dwasianu me dolobeo, te eno asęani pogo dage te tiwai tau sai dao.  
\v 10 Homu sęgę ilibo te Godigo nigilibo, tebogo da bidi dabe dago dwai sę yalide ge neyu tama homu begelemainogo ebo dao, tama te kolesagade Godigo da ma saibao. Tama dago te homu begelebo kolesagade te ge negobeo, te dwagi yai naga dao. Tiali goli te tǫde bidi dabe augwaligo homu sęgę ebo kolesagago, tede te isibo sę pedalobo dao.  
\v 11 Dagego bugagia homu koneao. Te homu sęgę Godigo dagebolo mani, tego agai te haniani wiegi yai kolesaga dagebolo pedalomainogo yali. Agai dage asesa selama, tama dage hogodolama duga po dodolomainogo yali. Agai dage hodolama te dwai penani sę yali bidi wado ilama, tama dage Godide wi yaibao. Dagego homugo da suabo homu elama tama gela weyu, tama dagego te dwai penani sę yali bidi dodolobo sę bomo elama yabo homu yai. Te dage tomode te bidi me deligo dwai penani sę yali, tede te tigidali badude dagego ebo kolesaga te po dodoloyu yali. Dagego kolesaga tama tiwai hania hanilama pedalai dao. Tama tiyu, te dagego te bidigo yali dwai sęde megi sęgę me elalubo menio.   
\p
\v 12 Te mu tama, polobadu eno te pas dagebolo asęna tolali. Tiali goli eno te bidi me deligo dwai sę yali te homu elama te po me asębeo. Tama eno gasa bidi homu me ebe, te agabolo dwai sę yali bidi me homugo konebeo. Eno homugo augwali siba naga homu elama te po polobadu asęna me tolobeo. Menio. Eno te dagego kolesaga hanilama pedalomainogo yali, tama God gedude duga bugagia konemainogo yai: dagego da godolo mu yalio. Tede me tama eno te polobadu pas dagebolo asęna tolali.  
\v 13 Dagego te kolesagago da homu nagame ilama dua bidai.  
\p Tama dago homu nagame naga me ebeo. Menio. Dago homu wiegi yai pemene yai. Magi baso meni. Dage tigidaligo te Taitusgo homu noma toma nabo nigilali, tama aga wiegi yai homu pemene yalio. Dago te sulama, tama da wiegi yai homu pemene mu idubadi bidali.  
\v 14 Polobadu eno dage nogi te Taitus gesabidide ugwaba sali, tama megi eno te pode ena hale me sabeo. Menio. Tigidali po dago dagede wabo po, te mu po naga wai dao. Tama tiwai naga eyu, dago dage nogi te Taitus gesabidide ugwaba sali, tama te eno dagede agabolo pusali po me hanilama pedalali, te mu po naga dao.  
\v 15 Taitus aga dage bidibo madi pedalobaso, tama dage wi elama didibili eyu, tama dagego aga siyu geseali, tama dage tigidaligo agai po wali pai. Agai megi te homu me konedu tama agai dage dali dwagi yai homu eyu godolo mu ebo homu genuai pedalobo dao.  
\v 16 Megi eno homugo mu konebo, eno dage dali homu si ebo meni, te dagego tigidali kolesaga dolo mu ebaso, eno homu dageba tia pabo te usu dao.   
\c 8  
\ms1 Te Korin dabe augwaligo te mone me doado bage sisi elama, te Godigo po odobo we bidi te Judia tǫde bidigo bage tau sinao po wali  
\mr (Dąį 8–9)  
\s1 Te Godigo po odobo we bidi augwaligo ama dede tau sao po  
\p
\v 1 Ama dedeo, te Godigo po odobo we bidi hani dabe te Masedonia moni tǫ tomode te haniani bulude elalubao. Tama dago homugo dagego koneao, te Godigo olo tau sabo wiegi yai kolesagago augwali tomode yali sę, te dagego koneao. E tiwai dao.  
\v 2 Genuai sęgę augwaliba pedalama, tama tego augwali homu usu sabo sę mu yali. Tama te sogo augwali magi nai meni yai mu bidali. Tiali goli magigo meni homu elama, augwaligo wiegi yai homu pemene genuai mu dali elaluali. Tama tiyu, augwaligo te gasa Godigo po odobo we bidi tau sabo homu mu genuai elama, tama augwaligo masigi hauwa sisinai dao.  
\v 3 Eno koneama tama eno po hanilama obao: augwaligo augwa digi homu kolesaga wali pelama tama te masigi muani. Augwaligo maiabo nai usu selama, tama te tiwai augwaligo mawai. Awe, augwaligo te maiabo masigi aiyaba elaluama tama umabo mu madu geai.  
\v 4 Augwaligo te dago usu da po omainogo bomo mu elama augwaligo me te Godigo po odobo gasa we bidi dabe dali hodobo augwaligo augwa masigigo te Godigo Juda we bidi olo tau sabo sę yaio po bomonama wali. \x * \xo 8:4 \xt Rom 15:26\x*  
\v 5 Polobadu dago augwalide tama tiwai homu yali, ‘Te augwaligo mone meba mawaibao,’ wai. Tiali goli augwaligo te tiwai naga me ebeo. Menio. Hasia bolo augwa bolo augwa digi te dago Genuai Bidibolo menama, tama augwaligo te Godigo homu wali pelama, tama augwa digi dabolo me mawai dao. Tama elama tama augwaligo augwa tau sabo masigi me mawai dao.  
\v 6 Polobadu Taitusgo te Juda bage olo tau sabo wiegi yai kolesaga ebo sę dage tomode hodolali. Tama te Masedonia we bidi augwaligo genuai olo tau sabo sę ebaso, dago bomo eyu agai dage tau siyu, tama dagego duga tau sabo sę silimainogo ebao.  
\v 7 Te tigidali sęde dagego kolesaga wiegi yai mu ebo dao. Dagego homude Kraisde konealubo po dąų olama, tama dagego te konealubo po hanilama pusubo sę bomo ebo dao. Dagego kolesaga hauwa koneama, tama dagego Godigo sę yabo homu mu hodaluali. Dagego da dali dwagi yai homu eyu godolo ebo kolesaga, tede me dagego bugagia mu yali dao. Tialima te tiwai naga megi dagego te gasa we bidi olo tau sabo wiegi yai kolesaga ebo sę me bugagia mu yao.   
\p
\v 8 E tau sabo sęde eno bomai po dagebolo me mabo meni. Te menio. Eno dagebolo te meba bidi dabe augwaligo te wiegi yai sę yabo homu hodaluali po obao, tama te kolesagade eno dagego ama dabe dali dwagi yai homu eyu godolo ebo kolesaga usu sobao. Te dago koneainogo, te dagego te we bidi godolo ebo kolesaga te nai mu dao.  
\v 9 Magi baso meni. Dagego te dago Genuai Bidi Jisas Kraisgo olo tau sabo wiegi yai kolesaga ebo sę koneai. Aga God dali hodobo bidiyu, tama genuai nogi dali, bomo yai ula dali si umabo elalubadi, tiali goli agai dage tau somainogo eyu tama aga magi nai meni yai bidi pedalali. Tama aga te magi nai meni yai bidi tiwai pedalaligo te dagebolo te God dali bidiyu bomo yai ula umabo sabo tų dawai dao.   
\p
\v 10 Te tau siyu maiabo masigi, tede eno yali homu megi eno dagebolo pusubao: te hasia bidali kibu bede dagego te sę yabo homu godolo naga hasia yai dao, tama te Masedonia tǫde bidibo we bidi augwaligo nosali te sę yabo homu yai.  
\v 11 Teda te sę megi tama dagego ela sili yao. Polobadu dagego te sę yabo godolo polo yali, tama tiwai yali gilama megi me dagego te sę polo silao, te duga nai usu nama te mone gego tiao.  
\v 12 Magi baso meni. Te bidigo godolo mu elama nai maiabo homu ebaso da, teda Godigo te kolesaga godolo mu yaibao. Godigo te bidigo elalubo nai tigidalide homu koneama, tama agai kolesaga tede dagalaibao. Agai te aga elalusiąbo naide me dagalogobeo.   
\p
\v 13 Te Juda bage tau siyu, tama dagego duga mone hauwa mayu, tama augwali bugagia bidiyu, tiali goli dage sǫą peyu emainogo eno te homu ebeo. Te menio. Eno homugo dage bidibo tigidali ususu si naga elama bidimainogo homu ebo dao.  
\v 14 Megi e sogo dagego nai hauwago te nai sǫą pali we bidi usu numainogo yaibao. Tama nosali me sogo dage nai sǫą pelama tama te Juda dabe augwaligo nai hauwa elalubaso da, teda augwaligo naigo dage usu numainogo yao, eno te homu ebao. Te kolesagade te dage dali augwali dali si tiwai usu yaibao.   
\p
\v 15 Te bukude wali po e tiwai dao,  
\q1 “Te bidigo te tubo nai nogi mana hauwa sali bidi,  
\q1 te hauwa me meni yani. Tama te nai dwasianu sali  
\q1 bidigo, te aga te nai me sǫą pabeo.” \x * \xo 8:15 \xt Sai 16:18\x*   
\s1 Te sę ebo bidi meba augwali te Korin buluba sabolaibao po wai  
\p
\v 16 Eno Godibolo po weyu usu da po obao, agai te bidi Taitusgo homu hodolobaso, tama agai dago homu tiwai ebao. Agai me dage tau sabo homu godolo mu ebo dao.  
\v 17 Magi baso meni. Agai dago Korin buluba pao wali po wali pali. Tiali goli aga me te sę yabo homu godolo mu ebaso, tama aga digi aga homugo dage bidibo madi asabo homu ebao.  
\v 18 Tama dago ama me deli aga dali hodobo tagala palaibao. Te tigidali bulude te Godigo po odobo we bidide te ama agai Godigo gesi wiegi yai po pusubo sę ebo nogi elalubao.  
\v 19 Tama te tiwai naga me ebeo. Menio. Te haniani bulude bidibo Godigo po odobo we bidi augwaligo te aga sa munama, te aga da dali Jerusalem hanuba biliyu, te olo tau sabo wiegi yai kolesaga tau sabo sę emainogo yai. Dago te Genuai Bidi nogi ugwaba siyu te sę ebao, tama te bidi dabe augwali ola menalama augwaligo konemainogo yali, te dago te tau sabo sę yabo homu mu ebao.   
\p
\v 20 Dago te olo mabo genuai nai tonalubo kolesaga ebode te bidi me deligo dwai po da dali weyu, “Polgo te Juda bagebolo olo mu maiabo masigi meba buga salio,” te tobage po waidali weyu dago homu yai. Tama tiyu dago te ama dali tagala palobao.  
\v 21 Dago wiegi yai dolo kolesaga yabo homu ebo, te dago Genuai Bidigo gedude naga te kolesaga me egobeo. Menio. Te e tǫde bidi dabego gedude dali te kolesaga ebo dao. \x * \xo 8:21 \xt Prs 3:4\x*   
\p
\v 22 Tama tibaso, dago dena ama me deli augwali si dali hodobo tagala palobao. Hauwa sogo dago aga haniani sęde usu sali, tama agai sę bomo elama ebo dago suali. Megi agai homugo te dagego wiegi yai kolesaga naga ebo homu bomo ebaso, tama agai te sę yabo homu bomo ebao.  
\v 23 Te Taitusde dagego konemainogo ebao: aga tama ena dali deli sęde dage tau sabo sę ebao. Tama dago ama si aga dali hodobo pabo bage, te dagego konemainogo yai: augwali si te Godigo po odobo we bidigo sa muani tagala palali bidi bidibao, tama augwa sęde te Kraisgo nogi ugwaba sabo dao.  
\v 24 Teda dagego duga dwagi yai homu eyu godolo mu ebo kolesaga te bidi dabe augwalibolo ola maiąo. Tama te Godigo po odobo we bidi dabe augwaligo dagego te kolesaga ebo mu konemainogo elama, tama dagego sęde dago dagede wiegi yai homu pemene ebo page me augwaligo konemainogo tiao.   
\c 9  
\s1 Godigo po odobo te Korinde bidibo we bidi augwaligo te Godigo po odobo we bidi me badu olo mabo tau sabo nai po wali  
\p
\v 1 Te Godigo we bidi Juda bage augwali tau siyu olo mabo nai te dagego koneanio. Tama eno tede bobage po me asęgobeo.  
\v 2 Eno koneani, dagego te sę yabo homu hodaluali, tama sesemane sogo eno dage nogi te Masedonia bulu bidi dabe augwali gesabidide ugwaba sabo dao. Eno dagede te tiwai po augwalibolo wabo dao, “Te polobadu bidali kibu bede te Akaia genuai tǫde bidibo we bidi dabe augwaligo te masigi mabo tau sabo sę gagalainogo sisi yalio.” Tama augwaligo dagego te sęde bomo ebo po odolama, tama tede te Masedonia bidi dabe me hauwa homu hodolalio.  
\v 3 Tiali goli dago te wabo pode te duga nogi ugwaba siyu, te olo po tiwai pedali weyu, eno te ama dede augwali dageba hasia tagala palobao. Te eno homugo te dagego duga maiabo nai sisi elama bidao, te eno te Masedonia bagebolo wali po gilama tiwai yao.  
\v 4 Dago homu si meni, te dagego maiabo nai sisi yali elalubo homu ebao. Tiali goli eno te homu yali, te Masedonia bidi dabe meba augwali ena dali nosali asiyu tama suyu, te dage sisi isąwai ebaso, tama tiyu, da tede hale siyu, tama dage dali me genuai hale mu yabuo.  
\v 5 Tama tibaso, eno homugo eno ama dede augwali bolo te dage bidibo madi aselama polasa sabalomainogo eno augwalibolo te po obao, tama dagego te olo tau selama tolaibao wali nai te augwaligo hasia bolo sisi ilao. Tama te ena me nosali sabalobo si, te olo tau siyu mabo nai te olo mu mayu sisi ebo tiwai elama, tama te nai dago dagede anoma elama sabo tiwai me egobeo.   
\p
\v 6 Dagego homugo te bugagia koneao: nai yogo homu eyu dwasianu nai bulubo bidigo, te agai nai dwasianu naga nosali saibao. Tama te nai hauwa bulali bidigo, te agai nai hauwa saibao.  
\v 7 Dage tigidali deli deligo te Juda bage tau mabo monede duga digi duga bugagia homugo hasia kone palama, tama te homu kolesaga tiwai wali naga peyu mone mao. Tiyu bidi me deligo mabo naide homu sęgę elama, tama agai homugo bidi dabego bomo ebaso, tama te kolesagade naga agai te nai mani homu me ilamuo. Menio. Agai digi aga homu hasia dodolama, tama te tiwai naga mao. Magi baso meni. Godigo te bidigo wiegi yai homu pemene elama nai mabo kolesaga ebo bidi, te tobage bidi Godigo godolo ebo dao.  
\v 8 Tama Godigo olo mabo nai tigidali te dagebolo mabo usu mu eyu, tama dage mu pągąnaluaibao. Tama tigidali sogo dage tigidali nai usu mu elama, tama dagego tigidali wiegi yai sę yabo nai hauwa elaluaibao.  
\v 9 Te Godigo po bukude te nai mayu tau sabo kolesaga ebo bidi dali po wali, te po e dao,  
\q1 “Te bidigo nai hauwa te magi nai meni yai we  
\q1 bidibolo mani, te bidigo nai wai sąnama bulala pabo  
\q1 tiwai yalio. Te agai doloba pai kolesaga sesemane  
\q1 sogo elaluaibao.” \x * \xo 9:9 \xt Tib 112:9\x*   
\m
\v 10 Godigo nai wai te bidibolo bulumainogo menama, tama tigidali bidibolo tubo nai menama tama augwaligo tubo dao. Teda Godigo dage usu nama te nai dabe mayu, tama dagego te gasa Godigo po odobo we bidibolo tau sabo kolesaga genuai mu ilaibao. Tama dagego doloba pai kolesaga umabo mu pedaludaibao, te bidigo nai wai bulai digi tama nosali te nai umabo mu walobo tiwai iduaibao. \x * \xo 9:10 \xt Ais 55:10\x*  
\v 11 Tama dagego nai hauwa elaluaibao, tama dagego homu mu naga eyu, nai hauwa te ama dede augwalibolo tigidali sogo mabo usu yaibao. Tama dago sęde dagego te olo tau siyu mabo naide te ama dede augwaligo te Godibolo usu da po waibao.  
\v 12 Awe, dagego te tiwai sęgo te Godigo we bidi tau siyu, te kolesagade dagego te augwali sǫą pali nai usu nubo sę yaibao. Tama te tiwai kolesaga naga me egobeo. Menio. Dagego te tebo kolesaga ebaso, te augwaligo dwagi yai homu eyu, Godibolo usu da po hauwa waibao.  
\v 13 Dagego te ama dede tau sabo sę ebode, tede te dagego kolesaga hanilama pedalaibao. Te ama dede augwaligo koneama, dagego te Godigo po bugagia wali pelama tama Kraisgo wiegi yai gesi po we bidi gedude hania hanilai dao. Tama dagego homu mu naga eyu, olo mabo nai genuai augwalibolo mabo me, te gasa bidi dabebolo me mabo sueibao. Tama eyu augwaligo Godigo nogi ugwaba saibao.  
\v 14 Te Godigo olo mabo wiegi yai kolesaga genuai mu dagede elalubo, te augwaligo koneaibao. Tama tiyu augwaligo dage godolo elama, tama augwaligo Godibolo po weyu, te agai te olo tau sabo wiegi yai kolesaga dagebolo mobaso, augwaligo agabolo puba hwi po waibao.  
\v 15 Godigo dabolo te olo mani nai, te genuai mu egi pali, tama tede te dwagi yai po tigidali dago pusubo usu me egobeo. Dago Godibolo te olo mabo naide puba hwi po wao.   
\c 10  
\ms1 Bidi mebago po dwai Polba wali tama te Korin dabego agaba dwai haliga ilabo sę yali, tiyu Polgo te Korin dabe augwali homu dodolobo po wali  
\mr (Dąį 10–13)  
\s1 Polgo aga nogide posobo po wali bagebolo po wei ponai po  
\p
\v 1 Te dage tomode bidi mebago po kisila ena dali weyu te po wai, “Pol aga da dali bidiyu, tama aga digi aga aiyaba elaluali, tiali goli aga digibulu bidibo sogo te agai po bomai asęna toloyu da dali wabo dao,” te po wali. Tiali goli ena Pol eno homugo te dagego Kraisgo homu kolesaga hasia bolo kone palao, te aga digi aga homu aiyaba elaluama tama te bidi dabe augwali dali nagame yai kolesaga yai, tama eno me te tobage homu eyu, dagebolo e mobo mabo po megi obao.  
\v 2 Eno e tama tiwai po dagebolo obao: nosali ena dageba pedalobo si, teda dage dua dao, tiyu eno dagebolo sesena pai po mayabuo. Tiali goli eno homugo eno po te bidi mebago da te tǫde kolesagade biliba homu ebo bidi dabe augwalibolo hanilama bomo elama te sesena pai po pusabo homu ebao.  
\v 3 Mu tama, da te we bidi tomode e tǫde bidibo dao, tiali goli Godigo pode boi bidi homu ebo bidi dabe dali hwįbode dago te tǫde bidigo wąbi hwįbo tiwai me ebo meni.  
\v 4 Tigidali wąbi hwįbo nai dabe dago tolalubo, te tǫde nai tiwai me elalubeo. Menio. Te Godigo bomo elalubao, te boi bidigo bomai obo alubo usu yaibao.  
\v 5 Dago augwaligo da dali konila po wabo page pedeyu, tama augwaligo wabo po aiyaba mu elalubo dao. Tama tigidali kolesaga ugwadu mu dolaluyu tama te God koneainogo homu ebo bidi dabego tų palialubo, te me dago hųgibo dao. Tama da tigidali bidigo homu kolesaga dago kalabus ilama, te Kraisgo homu kolesaga wali pomainogo ebo dao.  
\v 6 Tama da sisi elama dage tonalubao. Te da dagego bidibo digi sabolama, tama dagego dago po tigidali wali pobaso da, teda dago te dage tomode bidibo te po sela sąbo bidi augwalide po tų dodolama tama augwali tigidalibolo dwai dene wei ponaibao.   
\p
\v 7 Dagego te duga gedude elalubo nai bugagia suiyąo. Te dage tomode bidi me deli aga homu aga digi te Kraisgo bidi bidiyu da, teda aga digi homu kone ma palama tama aga te tiwai koneaibao, aga digi te Kraisgo bidi da homu yali da, teda da me te Kraisgo bidi bidibao, da aga dali tiwai si mu dao.  
\v 8 Magi baso meni. Dago Genuai Bidigo dabolo te sę emainogo te genuai nogi dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo. Tama eno dena te sęde dena nogi ugwaba mu sali goli, tede ena hale me sogobeo, te dolo dao, dago dena sę bugagia yaibao.  
\v 9 Tiali goli dagego eno asęna tolobo pasgo te dage olo wi ilibo homu ebo te eno hagela homu ebao. Dagego te tama egimio.  
\v 10 Mu tama, bidi meba augwaligo enade tama tiwai po obao, “Awe, te agai asęna tolobo pasde sęgę yai po elaluyu, tama bomo elalubo po me elalubo dao. Tiali goli aga digi sabalobo si tama dago aga digi suyu bomo meni yani, tama agai po te olo nai tiwai dao.” Te tama po wabo dao.  
\v 11 Te po wabo bidi dabe, augwaligo e tama tiwai homu bugagia kone palao: da digibulu bidiyu tama dago pas naga asęnama dagebolo tolobo po, te po dali, te da asama dage dali bidiyu ebo kolesaga dali, te si tiwai si mu yaibao, te tedali gasagi yai menio.   
\p
\v 12 Te dago dena digi dali te augwali digi augwa nogi ugwaba sabo bidi dabe dali si dago osola sulama, tama da augwali tiwai si da po wagobeo. Te po wabo dago hagela homu ebao. Magi baso meni. Te bidi dabego augwaligo ebo kolesagago naga te augwa kolesaga usu sabo dao. Me deligo aga ebo kolesaga te gasa bidi mego ebo kolesagade usu sabo sę ebo dao. Te tama tebo bidi dabe, augwaligo bugagia konesiąbaso, wiegi yai koneai kolesaga me elalubo menio.  
\v 13 Tiali goli da dali, God agai te dago sę yabo madi sesegede dąį ilali. Te dąį ilama, tama dage Korin bulude bidibo we bidi dage te dąį tomode bidibao. Tama dago ebo sęde dago dena sali dąį edelama tama dago dena nogi ugwaba me sogobeo.  
\v 14 Tama dage te dąį tomode bidaligo da, teda da pologi solama tama Kraisde wiegi yai gesi po dageba sela asali sogo, te sogo dago dena sę yabo madi dąį mu edelebeo.  
\v 15 Dago te Godigo mawai dąį bolama, tama te gasa bidi dabe augwaligo yali sęde te dago dena digi dena nogi ugwaba me sabo meni. Te menio. Dago homugo te tiwai bomo ebo dao: te dagego duga homu tigidali Kraisba mubo kolesaga bomo yai pedalobo si, tama dago sę genuai dage tomode pedalomainogo eyu, te dena dage tomode Godigo sę yabo dąį usu nama tama te genuai mu pedalaibao.  
\v 16 Tama tiyu, dago dage tagalama, tama te Kraisde wiegi yai gesi po te dage u badu elalubo me badu tǫde bidibo we bidibolo sela pabo usu yaibao. Te elama, tama dago gasa bidigo te gasa dąį ilali tǫ tomode yali sęde te dago nogi olo ugwaba me sogobeo.   
\p
\v 17 Awe, te meni. Te Godigo po bukude po me deli e tiwai elalubao, “Te nogi ugwaba sabo homu ebo bidi, agai te dago Genuai Bidigo yali sęde po weyu, tama Genuai Bidigo nogi naga ugwaba sao,” te po asęani. \x * \xo 10:17 \xt Jer 9:24\x*  
\v 18 Magi baso meni. Dago koneani, te bidi aga digi aga nogi ugwaba sabo, te bidi aga nogi te God gedude me elalugobeo. Mu menio. Te dago Genuai Bidigo bidi me deligo nogi ugwaba siyu, te dwagi yai bidi da obaso da, te bidi naga nogi mu elaluaibao.   
\c 11  
\s1 Polgo te tibo po sela pabo bidigo po hanilama pusali  
\p
\v 1 Te dageba nosali asali bidi dabe augwaligo augwa digi augwa nogi ugwaba siyu, tama homu kolesaga meni yani po wali goli, dagego augwali tede tagalao wabeo. Tama tibaso, eno homugo dagego ena me gogolama, tama eno te homu kolesaga meni yai po dwasianu waio. Awe, dagego ena gogolao.  
\v 2 Te gasa bidi dabe augwaligo te dagego Krais wali pabo kolesaga dolidali weyu, eno augwalide dwai homu ebo dao, te Godigo augwalide dwai homu ebo tiwai gilama. Magi baso meni. Bidigo aga penani sę munu me isąwai wiegi yai bidibo gesi wegi noma te bidi delibolo naga mabo tiwai, te eno dage te bidi deligo naga somainogo eyu sa muanio. Eno dage Kraisbolo maiabo homu ebo dao.  
\v 3 Tiali goli ena wi ebao. Dago koneani, te dwai hasamani tiwai bidibo bidi Satan agai tibo po wabo mu koneani homu elama, tama polobadu agai te we Iv dago auwa tibo po ola menama tama aga tulaluali. Te dagego tiwai me dage, te dageba tamadi asali bagego po odolama, te tiwai kolesaga dageba pedalobuo. Tiyu, dagego homu mu eyu Krais dali naga wadolama tama wali pabo wiegi yai kolesaga tagalidali homu eno ebao. Ena tede wi ebo dao. \x * \xo 11:3 \xt Gag 3:1-5, 13\x*  
\v 4 Magi baso meni. Te bidi meba augwali dage pageba pedalama, tama Jisasde gasagi yai po pusubao, augwaligo wabo po te dago te Jisade pusubo po tiwai me wabo meni, te gasagi yai tedali dao. Tama te kolesagade dagego te gasagi yai mobo sabo, te dagego polobadu sali te Tedali Mobo Bidi tiwai meni. Tama dagego gasagi yai po augwalidu odobao, te dagego dade sali te wiegi yai gesi po tiwai meni, te gasagi yai tedali dao. Te bidi me deligo te tobage kolesaga dage tomode me ebaso da, teda dagego dwagi yai homu eyu, agai te tobage kolesaga emainogo gogolobo dao. Tiali goli te dolo menio.  
\v 5 Te bage augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo te homu ebo dao. Odao. Eno homu augwaligo ena te dwasianu sę me delide aiyaba elalubo menio.  
\v 6 Mu tama, eno te Grik dabego po bugagia pusubo kolesaga te me konesiąwani, tiali goli te magigo menio, eno te Kraisde homu kolesaga me sǫą pabeo. Mu menio. Tigidali sę ebode dago dagebolo hania ola mawai dao, dago Kraisde kuna mu konebo dao.   
\p
\v 7 Dagego koneani, eno te Godigo wiegi yai gesi po dagebolo ola mani sogo, tede eno masigi me sabeo. Te kolesagade ena digi ena aiyaba elaluama te dage ugwaba siyu yai. Magi yaliwe? Dagego homu eno te yali kolesagade te ena sęgę sali, agawe?  
\v 8 Eno masigi dabe te gasa bulude bidibo Godigo po odobo we bidi mebade sali, te ena dagede sę emainogo eyu augwaligo ena tama tau sai. Te kolesagade te eno augwaligo nai anoma elama olo sabo tiwai yai dao.  
\v 9 Ena dage dali polobadu bidali sogo ena nai me sǫą pali, te sogo eno dagede bidi me deli dali aga nai anoma eyu sęgę me mabeo. Menio. Te ama dede dabe augwaligo te Masedonia tǫ tagalama tama Korin hanuba pedaliyu, augwaligo ena sǫą pali nai usu nani. Tama tigidali nai eno bugagia tonaluama, tama dagego duga masigigo ena tau sabode eno dwasianu sęgę dagebolo me mabeo. Tama sesemane sogo eno te tiwai bugagia tonaluaibao. \x * \xo 11:9 \xt Fil 4:15-18\x*  
\v 10 Te Kraisgo mu po enade elalubao. Tama tibaso, eno tibo po wasiąbo, e mu po naga obao, te tigidali Akaia moni tǫ badu te bidi me deligo te eno dagede masigi sisąbo kolesagade ena nogi ugwaba sabo te bidi mego tų palibo usu me egobeo.  
\v 11 Magi baso eno tama obawe? Eno te dagego masigi sisąbo kolesaga ebogo te eno dage dali dwagi yai homu isąyu godolo mu isąyu bidibo te waselebo dawe? Menio. Eno dage dali dwagi yai homu eyu godolo ebo kolesaga ebo, te Godigo koneai dao.   
\p
\v 12 Meba bidi augwaligo homugo eno me te eno ebo sęde dagede masigi sao, augwaligo te masigi dagede sabo tiwai yao, augwaligo te homu ebao. Magi baso meni, augwaligo homugo eno te tiwai eyu da, teda augwali da tiwai si bidibaso, augwa digi augwa nogi ugwaba sabo tų elaluaibao. Tiali goli menio, eno te dagego masigi sisąyu te tų palibo sę augwaliba ebao. Tama eno tiwai sę naga me iduaibao.  
\v 13 Magi baso meni. Te tobage sę ebo bidi dabe augwali te Godigo po sela pabo bidi dabe mu menio, augwali te tibo po wabo sę ebo bidi dabe naga bidibao. Augwaligo augwa kolesaga hasegelama, tama tigigo naga augwali te Kraisgo po sela pabo bidi dabe tiwai bidibao, we bidigo gedude.  
\v 14 Tama dage tede moni midigi me selamuo. Dago koneani, Satango digi aga tigi hasegelama, tama tigigo naga aga te dwai sę isąwai wiegi yai ensel mobo bidi tiwai pedalobo dao.  
\v 15 Tama tibaso, aga sę ebo bidi dabe augwaligo me te augwa kolesaga tibo hasegelama, tama te bidi dabe augwali gedude te augwali doloba pai kolesagade sę ebo bidi dabe tiwai pedalobaso da, teda da tede moni midigi me selamuo. Nosali augwali te augwa sę yali usu nama tiwai dwai dene mu saibao.   
\s1 Pol te Godigo po sela pabo sęde dene hauwa tolali  
\p
\v 16 Hasia eno po wali, tama megi eno po ma obao, bidi mego ena te konesiąwai bidi da te homu munu me elamuo. Tiali goli, dagego homu ena te homu kolesaga meni yai bidi da homu ebaso da, teda dagego ena gogoliąo, tama ena me ena nogi ugwaba dwasianu sainogo yaibao, te homu kolesaga meni yai bidi tiwai.  
\v 17 Eno dago Genuai Bidigo homu kolesaga wali pelama, eno e po me wabeo. Menio. Eno po te konesiąwai bidigo po wabo tiwai eyu, tama ena nogi ugwaba sabo bomo ena digi ebo dao.  
\v 18 Bidi hauwa augwaligo te tǫde kolesaga wali pelama, tama augwa nogi augwa digi ugwaba sabo dao. Tama eno me te kolesaga osogo wali pelama, tama ena digi ena nogi ugwaba sabo po dwasianu obao.  
\v 19 Dagego te eno te tobage kolesaga ebo sę ilali. Magi baso meni. Dagego wiegi yai koneani kolesaga elalubao, tama dagego te konesiąwai bidi gogola sula tagalabo homu godolo elama, te konesiąwai bidigo po dagebolo momainogo yali!  
\v 20 Awe, te bidigo dage te aga dologoba mubaso, ma agai dagego nai tigidali silibaso, ma agai dage dali hagoma ebaso, ma agai dage gesabidide elibaso da, teda agai tama temainogo te dagego gogolobo dao, po meni!  
\v 21 Mu tama, augwaligo te tebo kolesagade dago te sę yabo bomo me elalubeo! Tama eno te kolesaga igi sogo da, teda eno sęgę siyu tama hale egi da.  
\p Megi eno po te aga digi nogi ugwaba sabo po wabo kolesaga meni yai bidigo po tiwai obao, te bidi mebago augwa ebo kolesaga po te bomo elama pusubaso da, teda eno me eno bomo elama tama augwali aiyaba elaluabo po pusaibao.  
\v 22 Augwali te Hibru dabe da wida, teda ena me te Hibru bidi dao. Augwali te Israel hani bidi dabe da, agawe? Teda, ena me ena te Israel hani bidi da. Augwali te Abrahamgo bulai wai hani da, agawe? Teda, ena me ena te Abrahamgo bulai wai hani bidi mu dao.  
\v 23 Augwali te Kraisgo sę ebo bidi dabe da wida, agawe? Megi eno po te aga digi nogi ugwaba sabo kolesaga meni yai polobo bidigo po tiwai mu obao. Eno augwali te Kraisgo sęde aiyaba mu elaluali. Te sę dene idu gealigo eno edelama ugwanu igulali. Te eno Kraisde po pusubaso, te boi bidi dabego ena kalabus beba hauwa sogo muani. Tede eno te tibo po ola mabo bidi dabe ela holai dao. Te boi bidi dabe augwaligo ena hauwa sogo mu elali, bidigo nedebo usu egobeo, tede eno e bage augwali aiyaba mu elaluali. Hauwa sogo ena pąde isabo tiwai yai. \x * \xo 11:23 \xt Tpi 16:23\x*  
\v 24 E tiwai yai. Te a naga sogo Juda dabe augwaligo ena te dwai kibu waligo nigai bigo elali, te nedali te bidi sese deli olama, nogo si olama, nogo me badu a naga me si me si, te 39 tama sogo dąį egi pai. A naga sogo te tiwai ena elali. \x * \xo 11:24 \xt Bom 25:3\x*  
\v 25 Te sela sogo te Rom dabego ena keloago elali. Deli sogo te Juda dabe augwaligo ena ela mumainogo eyu masigi sąnama ena elali. Sela sogo moni geba sip dabe doloyu, ena te tamu ąįde hagawai. Tama tiyu, sip me deli tama dolali sogo te deli sogo hulide me giligade ena te tamu ąį daide bidali. \x * \xo 11:25 \xt Tpi 14:19; 16:22\x*  
\v 26 Te hauwa sogo ena digibulu tųdu bilali. Ena te pabo ąį hauwade hagawainogo yali. Ena te tųdu bilibo bidi elebo aga nai wi sabo dwai bidi dabe augwaligo nogode dolainogo yali. Te eno hani bage, te Juda hani dabe augwaligo me ena dolainogo homu yali, tama Juda hani isąwai bidi dabe augwaligo me ena dolainogo homu yai. Ena te haniani hanude dolainogo yali, tama te bidi meni yai bulude me ena dolainogo yai. Ena te tamu ąįde dolainogo yai. Ena te tibo po wabo abagi dede dabe augwaligo nogode me elainogo yai dao. \x * \xo 11:26 \xt Tpi 9:23; 14:5\x*  
\v 27 Eno sę dene haniani mu yalio. Hauwa sogo ena hulide sę eyu, tama ena godege me pibe. Ena nai sili bidali, tama ena ąį nogonego sali. Hauwa sogo eno nai gisilali. Ena kedaugo me siyu, tama ena ugwa me meni yai bidai dao.  
\v 28 Tama te naga me ebeo. Menio. Te tigidali deli deli sogo eno te haniani bulude bidibo Godigo po odobo we bidi tigidali tonalubo sę eyu, tama tede genuai sęgę mu enabolo mubo dao.  
\v 29 Te bidi me deli bomo meni ebawe? Teda, ena me te bomo meni yai tiwai bidaibao. Te bidi me deli te dwai sęba tulaluai dawe? Teda, eno te aga te dwai sę tomoba kegali bidi dali dwai homu mu yaibao. Awe, tigidali haniani sę ebode eno te dagebolo tibo po ola mabo bage augwali eno aiyaba elalubo dao.   
\p
\v 30 Te gasa tų me meniama, tama ena nogi ena digi ugwaba sobaso da, teda eno te ena bomo meni da po olama, tama tede ena homu pemene yaibao.  
\v 31 God, te God tama dago Genuai Bidi Jisasgo Aya, dago sesemane sogo aga nogi ugwaba siyu tama bidada peyu bidada pomainao. Agai koneani, eno tibo po te enaba pedalali sęde me wagobeo.  
\v 32 Te polobadu eno Godigo sę edubadi, me sogo ena te Damaskus moni hanude bidibadi, te tobolu bidi me deli aga te tuni bidi Aretas dologode bidali. Tama te tobolu bidi agai te Damaskus hanu buluba pabo tųde tonalubo bidi muani. Agai ena selama kalabus ilainogo yali.  
\v 33 Tiali goli meba ama dede augwaligo ena moni basket wade munama, tama te hanu genuai masigigo nigai bobage obo te windodu augwaligo ena buluba aba bonogo tagalama, tama ena buluba dilama teda soali. Tama ena te tobolu bidi nogode muani tagalama, tama ena sana pelama wi pai dao. Te sogo te sęde ena bomo meni yai bidi mu bidali. Tialima Godigo ena tau sali. \x * \xo 11:33 \xt Tpi 9:23-25\x*   
\c 12  
\s1 Te nade subo sę dabe tiwai gilama eyu, te Godigo po hauwa Polbolo ola mani  
\p
\v 1 Te gasa bidi dabe augwaligo eno nogi dolobo po dage dali olama, tama dagego ena tau sabo po wei ponosiąbaso, ena digi ena nogi ugwaba sobao. Te gasa tų me elalubeo. Mu tama, te kolesagago da tau me sisąbo usu me isąwani. Tiali goli tagalama, te dago Genuai Bidigo enabolo te ną yali me, te geme dualali po meba mani, tede eno po megi waibao.  
\v 2 Ena te Kraisgo bidi bidiyu, tama kibu be nogo si olama sągągo me si me si polobadu Godigo ena te dagalu sela wali sigi mu teba ugwaba sela holali. Te ena teba pobadi ena tigi dali bidaliwe, ma ena tigi tagalama te eno noma bidi naga teba paliwe, te eno me konebeo. Godigo naga koneanio.  
\v 3-4 Tama Godigo ena te Paradais teba sela holali. Te ena tigi dali bidaliwe, ma eno tigi tagalama eno noma bidi naga teba paliwe, te eno me konebeo. Godigo koneani. Tede eno te bidigo me pusubo usu isiąbo tobage po odama, tama te po bidigo me pusidali weyu habu selali dao.  
\v 5 Godigo ena dali te yali kolesaga, tede eno homu pemene yaibao. Tiali goli ena digi ena nogi ugwaba me sogobe. Ena bomo meni yani po ena olama, tama tede naga ena nogi ugwaba sabo dao.  
\v 6 Mu tama, ena digi ena nogi ugwaba sigi sogo da, teda ena konesiąwai bidi tiwai me egi menigi dao. Menio. Te eno mu po naga wagi da. Tiali goli ena digi ena nogi ugwaba me sogobeo. Magi baso meni, eno homugo te bidi me deligo te po odolama tama agai homugo ena te wiegi yai bidi mu da homu idali. Eno homugo dagego eno ebo kolesaga sulama, tama dagego eno Godigo po pusubo po odolama, tama te si naga osola sulama, tama dagego tiwai homu dolo enaba emainogo ebo dao.   
\s1 Te sesani tiwai naigo Pol tigiba enani  
\p
\v 7 Te po hauwa Godigo enabolo te dagalude ola mani, te genuai wiegi yai nai mu dao. Tama tede ena digi ena ugwaba sabo te Godigo godolo me ebe, tama agai te dene mabo sesani ena tigiba enebo nai tiwai nai me deli enabolo mani. Te dene mabo nai te Satango sę ebo bidi tiwai dao, te ena elidumainogo ebao. Te ena aiyaba elaluama tama te eno te dagalude suali naide ena digi ena ugwaba me sidali olama tibo dao.  
\v 8 Sela sogo eno dago Genuai Bidibolo hanaluyu po wali, te dene mabo nai agai enade sela sąmainogo yai.  
\v 9 Tiali goli agai te po enabolo wai, “Woo, te eno olo tau sabo wiegi yai kolesaga nagede usu yai elalubao. Magi baso meni, te bomo meni yai bidide eno bomo hania mu pedalobo dao,” Genuai Bidigo te po wai. Tama ena bomo meni yai da te homu sęgę munu me egobeo. Menio. Ena wiegi yai homu pemene mu tede ebo dao, te Kraisgo bomo enade elalumainogo ebao.  
\v 10 Tama tibaso, Krais tobade ena bomo meniama, tama te bidi dabego enade nogi dwai posobo po weyu, enabolo dwai sę ilama, tama haniani sęgęgo ena siyu, tama bidi dabe augwaligo ena doloyu dwai sogo enaba pedalobaso da, teda eno wiegi yai homu tede ebo dao. Awe, te ena digi bomo meni ebo sogo, te sogo naga eno homu Kraisba tialuyu, tama aga bomo eno sabo dao.   
\p
\v 11 Te eno te ena digi nogi ugwaba sali po tamadi weyu, te eno te kolesaga meni yai bidi tiwai yali. Tiali goli dage, dagego ena hodolobaso tama eno te po wali. Te duga digi eno nogi ugwaba sigi sogo da, te doloba pai kolesaga egi da. Tiali goli tama me tibeo. Mu tama, ena te olo nai tiwai dao. Tama te gasa bidi dabe augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo augwa sęde te homu ebo dao. Tiali goli ena dali augwali dali si usu siyu da, teda augwaligo ena te dwasianu sę me delide ena aiyaba elalugobeo. Mu menio.  
\v 12 Ena dage tomode bidibadi, te gasa bagego enabolo mani sęgę tigidali eno bugagia toloyu, tama dage tomode sę hauwa elama, tama ena da, te Godigo po sela pabo bidi mu da ola mabo bomai sę eno nogode pedalali. Te e dao: te haniani bidigo isąwai bomai sę dage tomode pedalali, te Godigo sę sa munama, tama bidi dodola midigi selama, tama Godigo bomo sumainogo yalio.  
\v 13 Eno te deli tiwai kolesaga te gasa Godigo po odobo we bidi hanibolo yali, te dagebolo yali tiwai sę yali. Eno dage tau sabo sę mede sǫą mu pabeo. Deli sęde naga eno dage dali te gasa Godigo po odobo we bidi hani dali tiwai si ebe. Augwaligo augwa masigigo ena tau sali goli, eno digi dagebolo duga masigigo ena tau sao po munu me wabeo. Tede dagego homu eno sęgę sali homu eyu da, eno homugo dagego te eno sali sęgę sela sąyao! Tiali goli eno koneani, eno tede sęgę me sabeo.   
\p
\v 14 Megi ena sela sogo dage bidibo madi asabo sisi ebao, tama dagego nai eno anoma eyu sainogo tama dagego duga masigigo ena tau sao po me wagobeo. Te menio. Odao, eno dagego nai me sogobeo. Menio. Eno dage naga sabo homu ebao, eno dage Kraisbolo momainogo ebao. Dagego koneani, te wai dabe augwaligo te nai dabe gegebo sę elama te aya de ida si tau sabo sę me egobeo. Menio. Te aya ida augwaligo naga te wai dabe augwali tau sabo sę yaibao. Tama ena da dagego aya tiwai dao.  
\v 15 Tama dwagi yai homu eyu, dage tobade eno ena nai tigidali maiabo homu elama, tama ena bidibo ula me maiabo homu ebao, te dage tau sabo homu ebao. Eno dage dali dwagi yai homu eyu godolo mu ebo kolesaga genuai mu ebaso, tama te dagego magi baso ena dali homugo dwasianu naga kone palobowe?   
\p
\v 16 Tiali goli dage tomode meba augwaligo enade te tiwai po waibao, “Mu tama, agai digi dago masigi hania hanilama me sabe, tiali goli agai te po bebegelebo bidi tibo sę ela mabo bidi, tama te tibo po wabo kolesagago agai te da muma menama, tama gasa bagego nogode te dago masigi sai dao,” augwaligo te po wai.  
\v 17 Tialima, eno bidi meba dageba tagala palidu geai. Magi yaliwe? Te augwali me deli augwali nogode eno tibo po olama tama dagego nai anoma elama me sai da, agawe? Te menio.  
\v 18 Eno te Taitus hodolama, tama aga dage bidibo madi asali, tama eno te gasa ama me deli aga dali hodobo tagala palali. Tama te Taitusgo ili po olama dagego nai anoma elama me saliwe? Menio. Ma dagego homu te ena dali Taitus si da te Tedali Mobo Bidi deligo bomode naga me bidibo meni, dagego da si dali te homu ebawe? Da si te tų delide naga me bilibo meni, dagego te homu ebawe? Edao. Dagego te tobage homu da si dali eyu da, teda duga homu hasegelao, te da sigo ebo kolesagade bugagia homugo koneao.   
\p
\v 19 Dagego eno tamadi asęani po tigidali tede homugo kone palama, tama tede dagego e tiwai homu idubadi bogo, ‘Te wali pogo te Pol agai aga nogi tau sabo sę naga ebao.’ Tiali goli te mu menio. Dagego da dali po tų eyu, tama dena yali sę osola suabo bidi dabe meni. Abagi mu dede, da Krais dali wadolama tama Godigo gedude dolalubadi, dago te po tigidali dagebolo asęna tolobao. Tama tiyu dage tau somainogo eyu dago te po dagebolo asęna tolobao.  
\v 20 Eno e homu ebao: ena dageba asama, tama dagego ebo kolesaga sulama te eno suainogo homu yali tiwai we bidi me bidibo sugobe homu yaibao, dagego gasagi yai kolesaga ebo eno sueibao. Tama tiyu, eno te dagego ebo kolesaga subaso, tama eno dage dali dodolobo sę ebo tede dagego hagela homu yaibao. Polobadu eno dage dali sę hauwa yali, tiali goli megi ena wi dwasianu eyu homu si dagede ebao. Eno homu ena dageba asama, tama eno dage tomode duga hasi e tiwai haniani dwai kolesaga ebo eno sueibao: konila po wabo me, te amabolo aga elalubo naide dwai homu ebo me, tama sębę elama wado po wabo me, tama nai yogo kolesaga ebo me, dwai nogi posobo po wabo me, bidi geme posobo po wabo me, te hagoma ebo me, te Godigo po odobo we bidi hani pedaloyu dolobo kolesaga me, te tobage dwai kolesaga ebo eno dage tomode te sueibao, eno te homu ebao.  
\v 21 Eno e homu me ebao, ena dage bidiboba ma asobo si tama ena God agai ena te dagego gesabidide aiyaba elaluaibao. Tiyu eno dage hauwade gela waibao. Magi baso meni, te we bidi polobadu augwaligo te dwai sę yali te tagalama tama homu begelama, tama te meda yai kolesaga me, te penani ebo kolesaga me, te hale isąbo dwai dwai sę subigila ebo kolesaga, te augwaligo polobadu yali te dwai kolesaga tudiba me mube. Tama tede eno dage dali yabo sęde homu eyu tama homu sęgę elalubao.   
\c 13  
\s1 Te Korin dabe augwa konealubo po bugagia tonalu dua dao wali po  
\p
\v 1 Megi ena dage bidibo madi sela sogo wagisu te asainogo ebao. Tama asama, eno dage tomode po tų eyu, tama bidi me deli ma we me deli agai naga gasa we bidide po kisilibo te usu egobeo. Godigo po bukude elalubo po me deli wali peyu dago te po tų dodolaibao, te po e dao: “Te bidi si ma bidi sela te pedauwali deli poba muani wida, teda te po bomo elalubaso, tama te tobage pogo naga te po tų dodolobo usu yaibao,” te po asęani. \x * \xo 13:1 \xt Bom 17:6; 19:15\x*  
\v 2 Te polobadu dwai sę yali we bidi dabe augwali me, te gasa bidi dabe dage tigidalibolo me, te ena si sogo wagisu dage dali bidagasali sogo te eno yabo kolesaga po dage dali wali. Tama megi me ena digibulu bidiyu, eno te tiwai po dagebolo ma obao: te ena dage bidibo madi ma asobo si, teda eno te dwai sę yai we bidi dabe augwali eno olo me gogologobeo, eno augwalibolo sęgę mawaibao.  
\v 3 Dagego enade e tiwai homu ebao, ‘Te Kraisgo Polgo pedauwalidu dabolo po wabo meni dawe, ma po wabo dawe?’ Te homu dagego enade yaligo da, teda dagego hania bugagia konemainogo eyu eno te bagebolo augwa sali sęgę mawaibao. Te Krais dage dali bomo kimi me isiyu me egobeo. Menio. Agai dagede sę bomo mu ebo dao.  
\v 4 Magi baso meni. Polobadu agai aga digi bomo meni yai bidi tiwai ilama tama bidibadi, tama augwaligo aga ni pedaide elali goli, Godigo bomogo megi aga bidibo ulade ma bideibao. Tama da aga dali wadolama, tama da me bomo meni yani tiwai bidibao. Tiali goli Godigo bomogo da aga dali bidibo ulade bidibao. Tama dago te bomo dage tomoba hanilaibao.   
\p
\v 5 Dagego sesemane sogo duga digi duga homu usu sela suyu, te duga homu tigidali Kraisba munama agaba homu tialubowe, ma meni yani, te bugagia koneao. Duga digi duga dagalao. Te bidi Jisas Krais dagego homude bidibo te dagego konebewe? Te meni wida, teda dage usu selama, te usu niba kadu wabeo.  
\v 6 Tama eno homugo dagego konebo te Godigo sę ebode da te usu niba kadu waibao homu dagego ebo dao.  
\v 7 Tama Godigo dage tau siyu, tama dagego dwai kolesaga me deli isąmainogo eyu, dago agabolo hanalu wabo po wabo dao. Dago magi baso te tiwai ebo dawe? Te dage wiegi yai we bidi bidibaso, dago dena sę dage dali bugagia yali, te homu emainogo eyu, te dago Godibolo te po hanalu wabo dawe? Woo, te menio. Dena homugo te dagego doloba pai kolesaga yao. Tama tiyu, tama da dageba asama te duga ebo kolesagade po meni baso, tama dago dage dali po tų ebogo dena bomo ola mabo tų meni eyu da, te usu da, magigo meni.  
\v 8 Dagego koneani, dago te mu po aiyaba elaluainogo ebo usu me egobeo. Menio. Dago te mu po naga wabo sę tau sabo naga usu yaibao. Tama tiyu, dagego wiegi yai kolesaga naga eyu da, teda dago dage dali po me wagobeo.  
\v 9 Tama dago dage dali po tų isąyu tama tede Godigo da mani bomo waselabo tų meni baso, bidi mebago da bomo meni yai bage da te homu yaibao. Te usu da, po meni. Dagego dwai sę me isąyu tama Godigo po bugagia wali peyu tama tede bomo elalubaso, da wiegi yai homu pemene yaibao. Tama dago Godibolo sesemane sogo hanalu wabo po weyu, dago homugo agai dage tigidali dodolama tama dage agai po odobo bomai we bidi mu pedaloyu, agai we bidi mu naga bidaibao.  
\v 10 Megi ena digibulu bidiyu, tama eno te dagebolo po asęna tolali, te pagede naga dao: te ena dage dali bidagasobo sogo tama sesena pai bidi tiwai eyu, eno dage te dago Genuai Bidigo enabolo mani sę yabo bomogo eno dage selebo sę idalio. Agai dena yabo sęde te bomo dali, genuai nogi dali si dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo.   
\s1 Po silagasu wabo po  
\p
\v 11 Eno ama dedeo, megi eno po paliama, tama eno dage tao po obao. Dagego duga ebo kolesaga dodolama, tama Godigo po odobo bomai we bidi mu pedalobo kolesaga yao. Dagego eno dage tau sabo po odiąo. Dagego te deli tigi poai deli homu naga elama, nagame yai bidao. Tama God da, te we bidi dali dwagi yai homu eyu godolo kolesaga ebo dali, te homu nagame ilibo kolesaga ebo dali si ebo God, aga te dage dali bidaibao.   
\p
\v 12 Te da Godigo we bidigo kolesagade, dage tigidali deli deligo te ama dede, abe dede dali wiegi yai homu elama augwali nogo mao.  
\v 13 Ede bidibo Godigo we bidi tigidali augwaligo dagebolo wiegi yai homu elama siade da po ola tolobao.   
\p
\v 14 Eno homugo dago Genuai Bidi Jisas Kraisgo olo tau sabo wiegi yai kolesaga dali, tama Godigo dage dali dwagi yai homu eyu godolo ebo kolesaga dali, tama Tedali Mobo Bidi dage tigidaligo homude abagi tiwai bidibo kolesaga dali, te kolesaga sela dage tigidali dali hodobo mu bidao.