\id TIT - Migabac NT; 9 Sep 2011 1st draft 
\h Titus 
\toc1 Poldi Titusle Hibi Kwelengkewec 
\toc2 Titus 
\toc3 Tit 
\mt2 Poldi  
\mt1 Titusle  
\mt2 Hibi Kwelengkewec  
\is1 Mimi-yegeng yowa  
\ip Titus ye Grik ngic. Poldi Yesule Siduc Madicne edome ngagesingkeme yeholec lolickelu bole balu gaiboc. Pol ye Titus saleme alecine yaeckang Korin taonka hikelu bole bawec (2 Korin 7:6-7; 8:6,16). Yogolec lobeina Krit nucka lome hikelu Yesule Habu iwa damongebalu gawec.  
\ip Pol ye molickelu Roma iwa muc-macka ngiyegacgu hegile haulu hikewec. Yesu homackacni gboliyelu honocmengka feme hifa 34 ngama ingucne motome, Poldi hibi yago Titusle kwelengkelu lome fuwec. Wewedu kwesacine gocne yengele sawang-yowa edowec. Ailu Yesule habu wenuc madicne damongebalu damongfocngineng bawosaecebame yengele aibaba madickenale kwelengkeyelewec.  
\is1 Yowa yago hibi nebocina fagac  
\io1 1:1–4 Wenac-madic yowa  
\io1 1:5–16 Yesule habu damong yengele aibaba  
\io1 2:1—3:11 Yesule habu kwelina habu gocne yengele aibaba madicne  
\io1 3:2–15 Yowa moto-motoine  
\c 1  
\s1 Hibile molic-molic yowa  
\p
\v 1 Na Pol, Wapongte kwelec kwekwe ngic nga \w Yesu\w* \w Kristole|lemma="Kristo"\w* \w salecebaicne\w*. Wapongte ngic-ngigac bawosaecebaicne yengi yele pasi nga yefe noine ngagesingkelu ngage-motoningte locnuwec.  
\v 2 Yowa yogodi \w gaga-sanang\w* bafuwadaicte, yogolec wangec gagabeleng. I yangucte, Wapongta kwesac monic mi fagac. Molickelu wiyac sasawa mi fikeibongkacnihac yedi gaga-sanang banangte yowa mipangkewec.\x - \xo 1:2 \xt Kol 1:27\x*  
\v 3 Aime yeicne damengngine kwesime yowaine dondonne ngic-ngigac yeleme mibong yegengkewec. Yogo minogale Wapongti bikicte ameine \w Asa bacnubawec|lemma="Asa-baba ngic"\w*, yedi edocnulu neleme damongkegabac.  
\v 4 Titus, ga naholec ngage-ngagesing moniyang ngagesingkelu madecnebenang aigic, na hibi yago gala logabac. Wapong Mamac nga Asa-baba ngicnonggeng Kristo Yesu, yekele kwele-madic nga kwele-mogungtowadi gaholec fadaic.\x - \xo 1:4 \xt 2Kor 8:23; Gal 2:3; 2Tim 4:10; Rom 1:7\x*   
\s1 Bole-yowa  
\p
\v 5 Bole nebocine fawec, yogo bamoctocte ngagelu Krit nucka hegilecgube ngiyeing. Ailu bole aling edalicguiba, yogo balaibelu taon falegacsoc, iwa hikelu Yesule habu damong bawosaecebalu bole-yowa yeledamec.  
\v 6 Ngic monic ye kpokpolic mikac gacaigac, ailu ngigacine moniyang sugu gagac. Ailu ye adu-madecfocine ngage-ngagesingkolec gagaing. Ailu adu-madecfocine yenge aibaba kosaine me mansanang gaga, yowa-siducngineng ingucne monic mi fikecaigac. Ngic ingucne ye damong nalic aidaicte.\x - \xo 1:6 \xt 1Tim 3:2-7; 2Tim 2:24-26\x*  
\v 7 I yangucte, Yesule habu damong ye Wapongte wiyac damongkedaicte. Ilec kpokpolic mikac gadaic. Ailu ye yeicnele ngageme feicne mi aidaic. Ailu ye ngic dacine mi aidaic. Ye waing misa nolu kweleine mi sifuwedaic. Ye kindololoine mikac ailu ye hasowacka hiye-moneng banogale mi gadaic.  
\v 8 Yebac ngic-ngigac macka hefolecebadaic. Ailu aibaba madicne yogolec angac ngagedaic. Gagaine madicne damongkedaic. Ailu dondonne nga gbagbacne galu aibabaine nga angacine damongnagudaic.  
\v 9 Aime yowa ngage-ngagepangkolec edocebalu weduyeleibeng, yowa yogo sanangne balu gadaic. Ngic ingucne ye yanguc nalic aidaic, ngic-ngigac yefe dondonne weduyelelu kwelengineng kwefangkedaic. Aime gocne yengi yowanonggeng kwecaigaing, yenge ngelengebalu edocebadaic.   
\s1 Wewedu kwesacine  
\p
\v 10 I yangucte, mansanang ngic-ngigac bocyacti gagaing. Yenge yowa babaficine mikac moc micaigaing. Ailu ngic-ngigac kwesac aiyelecaigaing. Aime Yuda ngic \w soc tofangineng helockeicne|lemma="Soc tofaine helockegac"\w*, yengi hocne aibaba ingucne ailu gacaigaing.  
\v 11 Yenge moneng-mafatowa kwesacka bafuwanogale yowa mimi-sifucineholec edocebalu weduyelegaing. Inguc aiyelebong golowac gocne sasawadi siyeckelu sowalegaing. Ilec ailu ngic ingucne yengele mic-yowangineng kpatalayeledabiyeng.\x - \xo 1:11 \xt 1Pi 5:2; 2Tim 3:5-6\x*  
\v 12 Krit ngic yengilangkocni yengele \w siduc-mimi ngic\w* monicti yengileng yanguc miwec, “Krit ngic yenge damengsoc damengsoc kwesac aicaigaing. Ailu nosing nolu gebecebame oyong galu kate-sic sowacne ingucne gagaing.”  
\v 13 Yele yowa yogo noine. Ilec yenge ngage-ngagesingngineng bamadickeng madickenale ung-yowa sanangne ngelengkelu edocebadamec.\x - \xo 1:13 \xt 2Tim 4:2\x*  
\v 14 Ailu \w Yuda ngic-ngigac\w* yenge siduc esecne gocne milu ung-yowa ngickacni basanangkelu yowa noine hegilelu lobe holecnocaigaing. Yenge yowa ingucne mi ngagesiningte, yogo sanangnehac ngelengkelu edocebadamec.\x - \xo 1:14 \xt 1Tim 4:7\x*   
\p
\v 15 I yangucte, ngic-ngigac \w gbagbacne\w* gagaing, yengele gagawa nosing nga woc-wiyacngineng gbagbacne fagac. Aime ngic-ngigac gocne biyachac wonongkolec ailu ngage-ngagesingngineng mikac gagaing, yengele ngage-ngage-motoc nga kwele ngage-ngagengineng momochac wonongkolec aigac. Ailu wiyacngineng gbagbacne monic mi fagac.\f + \fr 1:15 \ft Poldi yanguc miwec, nosing nonole aka monic mi fagac. Aime gocne yengibac yanguc miibong, nosing gocne yogo akaineholec. Mareko 7:19, Roma 14, nga Depec-baba 11-15 yogolec fungine nga ngage-ngage iwa kwelengkeicne fagac.\f*  
\v 16 Yenge Wapong ngagegabeleng, yogo micnginengti sugu mibong yegengkecaigac. Nga aibabanginengtibac ye lobe holecnogaing. Aibabangineng sowacne yogo memenguine aigac. Aling yogo yenge yowa wegaing. Ailu aibaba madicne monic nalic mi aidaingte.\x - \xo 1:16 \xt 1Yoa 1:6; 2:4\x*   
\c 2  
\s1 Ngic-ngigac yengele yowa  
\p
\v 1 Aime gageicne Wapongte yowa madicne nga dondonne fagac, yogo balaibelu weduyeledamec.  
\v 2 I yangucte, mamac yenge mogungne galu damongnagulu aibabanginengti alang-baba ailu gadabiyeng. Ailu yenge ngage-ngagesingngineng damongkelu ngic-ngigac yengele kwelenginengti angac ngageyelelu tatakic mikac sanangne gadabiyeng.   
\p
\v 3 Aime nenggac yenge inguchac ngic-ngigac Wapongte ngage-ngage balaibecaigaing, yengele silic ingucne aibabanginengte alingka gadabiyeng. Ailu yenge ngic-ngigac gocne kwesac-yowa mi edocebadabiyeng. Ailu \w waing\w* misa bocyac nolu, yogolec umacka mi gadabiyeng. Wiyac madicne fagac, yenge yogo ngic-ngigac weduyeledabiyeng. Aibaba ingucne yogo weduyeledamec.\x - \xo 2:3 \xt 1Tim 3:11\x*  
\v 4 Ilec nenggac yengi ngigac-adu ngawefocnginengkolec yenge yanguc weduyeledabiyeng. Yenge ngawefocngineng nga adu-madecfocngineng yenge kwelenginengti angac ngageyelelu  
\v 5 damongnagulu gbagbacne gadabiyeng. Ailu yenge mac-bolengineng balu madicne galu ngawefocngineng yengele yowa ngagedabiyeng. Inguc aibong monicti Wapongte yowa nalic mi milu suledaicte.\x - \xo 2:5 \xt Efs 5:22\x*   
\p
\v 6 Ga soc-gboli ngic inguchac damongnaguningte ngage-ngagengineng kwefangkelu edocebadamec.  
\v 7 Ailu wiyac sasawa yogowa, gageuc galu aibabagone silicine madicne aiyengka balaibecgudabiyeng. Ga wewedu-yowagone yogo alang-babaineholec ailu yowa noineholec weduyelenong.\x - \xo 2:7 \xt 1Tim 4:12\x*  
\v 8 Aime ngabafocgone yenge gale yowa sowacne monic nalic mi miningte ailu gameebanale, ngic-ngigac yowa noine babaficineholec edocebalu gadamec. Nongele yowa kwekwe ingucne nalic mi aidaingte.\x - \xo 2:8 \xt 1Pi 2:15\x*   
\s1 Kwelec kwekwe ngic  
\p
\v 9 Kwelec kwekwe ngic-ngigac sugucnefocngineng yengeholec gagaing, yenge sugucnefocngineng yengele yowa sasawa balaibedabiyeng. I yangucte, sugucnefocngineng yengi ngageyelebong madickenale bolengineng balu sugucnefocngineng yengele yowa ameine mi bafaliyedaing.\x - \xo 2:9 \xt 1Tim 6:1\x*  
\v 10 Yenge sugucnefocngineng yengelacni wiyac monic hise mi badaing, miyac. Yenge bole sasawa bagacgu yowa balaibe-balaibele ngic-ngigac madicne aidaing. Ga inguc weduyeledamec. Ailu yenge aibaba ingucne aibong, Wapongti \w bikicte ameine|lemma="Asa-baba ngic"\w* Asa bacnubawec, yele wewedu-yowa yogo ngic-ngigac yenge yowa madicneineholec ngagedaingte.   
\s1 Kristole wangec gagabeleng  
\p
\v 11 I yangucte, Wapongte kwele-madicti ngic-ngigac sasawa yengela fikelu yegengkeme bikickacni wasecne ainingte kwele-madic bafuwayelewec.  
\v 12-13 \w Yesu\w* \w Kristo\w*, ye Wapong feicnetowa nga Asa-baba ngicnonggeng, yedi tapili nga hibi-angocka kwesilu fikelu yegengkedaicte. Ilec ailu wangec galu kwele-angacka gagabeleng. Inguc gaebengka Wapongte kwele-madicti yefe wedunoleme yanguctihac himongtowa yagolec aibaba nga angac lobe holecnodabeleng. Inguc ailu gaganonggeng damongnagulu yefe dondonne balaibelu Wapong alang bacnolu gadabeleng.\x - \xo 2:12-13 \xt 1Yoa 2:16\x*  
\v 14 Aime Yesu Kristodi \w yefe-yowa\w* wewele muckacni lukecnubanale, yeuctihac ngabafocine yengele molewa lonaguwec. Ailu suwecnubame nongileng yeicne ngic-ngigac ailu bole madicne mamang hidulu banangte aibaba yogo ainolewec.\x - \xo 2:14 \xt Gal 1:4; Wah 19:5; Yef 4:20; 7:6; Esek 37:23; 1Pi 2:9\x*   
\p
\v 15 Ga yowane yogo balu kwelengineng kwefangkelu ngelengkelu edocebadamec. Ga yowa sasawa yogo tapili geleicne, yogolec silicina edocebadamec. Aime monicti gale ngageme wawaine mi aidaic.\x - \xo 2:15 \xt 1Tim 4:12\x*   
\c 3  
\s1 Ung-yowa  
\p
\v 1 Ga yowa yanguc hole-gboliyelu edocebadamec, ngic-ngigac yenge gamangfocngineng nga damongfocngineng yengele yowa ngagelu balaibelu bole madicne banogale damengsoc efeckelu gadabiyeng.\x - \xo 3:1 \xt Rom 13:1-7; 1Pi 2:13-14\x*  
\v 2 Ailu yenge monic misulec mi aicnodaing. Yenge kwele-mogungkolec ulucne galu ngic-ngigac sasawa yengele umac ngage-motolu kwele-madic aibaba aiyeledabiyeng.  
\v 3 I yangucte, nongileng inguchac molickelu ngage-ngage-motoc mikac galu yowa kwebeng gocne yengi kwesacka mengocnubabong yefe liloibeng. Aime sisipilic aibaba nga angac haicine monic-monic yogodi hefecnubawec. Nongileng kwele-dacka gocne yengele hasowac ngagelu gaibeng. Ailu kweledi wicnubabong ingucnehac wicebaibeng.\x - \xo 3:3 \xt 1Kor 6:11; Efs 2:2; 5:8\x*  
\v 4 Aime sifu Wapong \w Asa-baba ngicnonggeng|lemma="Asa-baba ngic"\w*, yele baba-madicine nga aibaba madicne yegena fikelu yegengkewec.  
\v 5 Dameng iwa yedi suwecnubame \w Tili Asudi|lemma="Tili Asu"\w* bole bame fike-fike gbolicne fikeibeng. Ye nongilengti bole dondonne baibengte ailu mi bamadicnubawec. Ye nongileng kwele-sowac ngagelu bamadicnubame wasecne aiibeng.\x - \xo 3:5 \xt 2Tim 1:9; Efs 5:26\x*  
\v 6 Aime yedi Asa-baba ngicnonggeng \w Yesu\w* \w Kristo\w* yele ailu Tili Asu umacnehac sotingkenolewec.\x - \xo 3:6 \xt Sale 2:17-18\x*  
\v 7 Sotingkenolelu kwele-madicinele ailu dondonne wacnubame gagabeleng. Inguc galu mole-damocnonggeng yogo gaga moto-motoine mikac, yogo banangte ngagesilu wangec gagabeleng.  
\v 8 Yowa yogo nalic ngagepangkegabeleng.  
\p Ilec yowa yogo tapiliineholec edocebalu weduyelecte ngagegabac. Inguc aiyengka ngic-ngigac Wapong ngagesingkelu gagaing, yenge aibaba madicne yogo wosaelu ainingte bocyac aiyeledaic. Bole ingucne yogo madicne ailu ngic-ngigac yengele babaficngineng aigac.  
\v 9 Aimebac ngic-ngigac gocne yenge yowa silicine madicne miyac yowanginengti fec-wacineholec micaigaing. Ailu ngesa-ngambo yengele fikesawecte fung kwelu yefe-yowale yowa gocne fagac, yogolec yowanginengti fec-wac aime ngaba aicaigaing. Ga yowa ingucne ngagelu lobe holecnolu hegiledamec. Yowa ingucne yogo babaficine mikac nga yogodi noine monic mi bafuwadaicte.\x - \xo 3:9 \xt 2Tim 2:14,16\x*  
\v 10 Gulu-kwouc ngic monicti kwesime dameng moniyang ung-yowa edoengka mi ngageme, edong alecine yaeckang aidaic. Aime yowagone mi ngagemebac hegileng yeicnac gadaic.\x - \xo 3:10 \xt Mat 18:15-17\x*  
\v 11 Ngic ingucne ye yefe lilolu \w bikic\w* bafuwalu yeuctihac yowawa lonagulu mimoctocnagugac.   
\s1 Yowa moto-motoine  
\p
\v 12 Na Atemas me Tikikus gala salebe fume ga nala Nikopolis taonka sanangkelu biyac kwesidamec. Na tilo-gbelong damengka iwa ganogale biyachac ngagesiiba.\x - \xo 3:12 \xt Efs 6:21-22; Kol 4:7-8\x*  
\v 13 Apolos nga gamangte yefe-yowale ngic wacine Senas, yeke yefele wiyac monicte mi kpungkenicte, ga babafic sanangnehac aiyetelu salecepang hikedabiyec.\x - \xo 3:13 \xt Sale 18:24; 1Kor 3:5-6; 16:12\x*  
\v 14 Aime ngic-ngigacfocnonggeng socte gagale noine mi bafuwadaingkale, yenge inguchac ngic-ngigac umacngineng nganilu aibaba madicne ailu baficebaningte yefe weduyeleng ngagedaing.\x - \xo 3:14 \xt Efs 4:28\x*  
\v 15 Ngic-ngigac naholec gagabeleng, yengi wenac-madicngineng gala lobong fugac. Aime ngic-ngigac Wapong ngagesingkelu nongele kwele-angac ngagegaing, yenge nongele wenac-madicnonggeng edocebanong.  
\p Kwele-madicti sasawa ngengela fadaic. Yogo foinac.