\id REV - Migabac NT; 9 Sep 2011 1st draft 
\h Miyegengkeicne 
\toc1 Yesule Miyegengkeicne Yoanedi Kwelengkewec 
\toc2 Miyegengkeicne 
\toc3 Miye 
\mt2 Yesule  
\mt1 Miyegengkeicne  
\mt2 Yoanedi Kwelengkewec  
\is1 Mimi-yegeng yowa  
\ip Yoane ye Yesule siduc edocebame Roma gamangti balu Patmos nucka lobong muc-macka ingucne gawec. Ngic-ngigac gocne wosaelu yanguc ngagegaing, Yoane yogo ye Yesule mic-tengteng. Dameng iwa Roma gamangti Yesule habu ngaba aiyelelu doicka locebaibong.  
\ip Yesu homackacni gboliyelu honocmengka feme hifa 65 ngama ingucne motome, Yoane Patmos nucka gaemewa Yesudi gungka ingucne fikecnolu yowa edolu wiyac lobewa fikedaicte, yogolec soc holelu mime yegengkewec. Nga wiyac lobewa fikedaicte, yogo yele dongewa biyachac fikeme nganiwec. Ilec yowa gocne ye biyac fikeicne ingucne kwelengkewec. Aime wiyac fikebong nganicebawec, yogo damengngineng alingka mi balaibegaing mecne. Wiyac ngani-ngagec ailu hibi yagowa kwelengkewec. I yangucte, Yesule habu basanangebame Yesuholec taocke-galu umacka mi wawedaingkale, hibi yago kwelengkewec. Umac monic, yogo gamangti mime damongngineng ye wapong ingucne afeedabiyeng, ye sawang yowa inguc kwelengkewec. Aime Yesu ye wac feicne badaicte. Ailu Wapongti yele ngaba nga Satang ewalicebame sowalebong yeicne aling bamadicebame yeholec gadaingte, siduc yogo kwelengkewec.  
\ip Aime noine, Wapongte siduc-mimi ngic yenge wiyac lobewa fikedaicte, yogolec yowa kwelengkeibong, dameng iwa wafebong nebocinele fungine yegenabenang mi fikegac. Aime siducngineng noine fikedaicte, dameng yogowabac yegenabenang aidaicte. Ailu hibi yagowa wiyac homacne yengele dzaleine 7 me dzaleine 12 fagac. I yangucte, dzaleine 7 nga 12te fungine yogo soc holelu wiyac bucbuchac fagac me wiyac moto-motoine motogac.  
\ip Yowa homacnele fungine yogo Wapongte Hibi Esecne iwa yowa kwelengkeicne fagachac. Yogolec bageina hibi wacngineng nga fengngine fagac.  
\is1 Yowa yago hibi nebocina fagac  
\io1 1:1–8 Molic-molic yowa  
\io1 1:9–20 Yesudi gungka ingucne Yoane fikecnowec  
\io1 2:1—3:22 Yesule habu 7 yengele yowa  
\io1 4:1—5:14 Wiyac honocmengka nganiwec  
\io1 6:1—8:1 Umac 7 hibiwa fagac, yogo himongka fikedaingte  
\io1 8:2—11:19 Angelo 7 yenge kpeng 7 fitobong himongka nga sawawa umac fikedaingte  
\io1 12:1—13:18 Satang nga yele bole-ngic yaeckang yenge himongka yegena fikelu gadaingte  
\io1 14:1—15:8 Wiyac haicine monic-monic nganilu ngagewec  
\io1 16:1–21 Angelo 7 yenge pele 7 sotingkebong Wapongte aalicte ameine himongka fikedaicte  
\io1 17:1—18:24 Wapongti Babilon basowaledaicte  
\io1 19:1—20:15 Yesudi kwesilu ngabaine Satangkolec wenagulu dac kiwec ingucne iwa lodaicte  
\io1 21:1—22:5 Honocmeng nga himong ailu Yerusalem gbolicne  
\io1 22:6–21 Yesu nga Yoane yekele baba-sanangte yowa nga sawang-yowa  
\c 1  
\s1 Yoanedi wiyac nganiwec yogo miwec  
\p
\v 1 Yowa yago \w Yesu\w* \w Kristodi|lemma="Kristo"\w* mime yegengkegac. Yele kwelec kwekwe ngic-ngigacfocine yenge wiyac biyac fikenale edalicebadaicte, yogo Wapongti Yesu lacnowec. Ailu \w angeloine|lemma="Angelo"\w* monic saleme yedi yowa maaineholec mime yegengkeme kwelec kwekwe ngicine \w Yoane\w*, na hocne yowa yogo edocnuwec.\x - \xo 1:1 \xt Dan 2:28-30,45-47; Miye 22:6\x*  
\v 2 Edocnulu Wapongte yowa nga Yesu Kristole siduc mime yegengkeme nani wiyac naneuc dongenedi ngani-ngagec aiiba, yogo sasawa mibe yegengkegac.  
\v 3 Dameng bangkalegacte monicti Wapongte siduc-yowa yago wafe-ngagec aiyelegac, ye kwele-angackolec aigac. Aime ngic-ngigac yenge yowa yagowa kwelengkeicne fagac, yogo ngagelu balaibegaing, yenge inguchac kwele-angackolec aigaing.\x - \xo 1:3 \xt Miye 22:7,10\x*   
\s1 Yesule habu yengele yowa  
\p
\v 4 Na Yoanedi Asia prowins kwelina Yesule habu 7 gagaing, ngengele hibi yago kwelengkegabac. Wapong gawec nga gagac ailu gacgu kwesinowagac, ye ngictaule ngiye-ngiyewa ngiyegac. Nga \w asu\w* 7\f + \fr 1:4 \ft Ngic gocne yengi yanguc ngagegaing, asu 7 yogo Tili Asu wacine monic. Nga ngic gocne yengi yanguc ngagegaing, asu 7 yogo angelo me angelo ingucne wiyac gocne.\f* yenge yele emewa gagaing, yengelacni kwele-madic nga kwele-mogungtowadi ngengeholec fadaic.\x - \xo 1:4 \xt Dan 7:9-14; Wah 3:14-15; Miye 3:1; 4:5\x*  
\v 5 Aime Yesu Kristo yelacni inguchac fadaic. Ye yowa balaibe-balaibele widec ngic noine. Ye molickenolelu homackacni gboliyelu fangkelu fikewec. Ailu himongte \w ngictau\w* yengele damongngineng. Ailu ye nongileng kweleinedi angac ngagelu sacinedi \w bikickacni|lemma="Bikic"\w* bamoctocnubawec.\x - \xo 1:5 \xt Kol 1:18; Mige 89:27,37\x*  
\v 6 Bamoctocnubalu \w ngani-damongte|lemma="Ngani-damong"\w* habu bacnubalu yeicneholec alingnubawec. Alingnubame nongileng yele Wapong Mamacinele \w depec-baba ngic\w* ingucne ailu mimiteng bole balu gagabeleng, yogolec inguc aiwec. Yela wac feicne nga tapili yogo moto-motoine mikac fafegidaic, yogo foinac.\x - \xo 1:6 \xt Dan 7:18; Wah 19:6; 1Pi 2:9; Miye 5:10; 20:6\x*   
\q1
\v 7 Nganining, ye kaguwa kwelina kwesime ngic-ngigac sasawa yenge dongenginengti nganidaingte. Aime socina sangaladi kwembalackeibong, ngic yogo yenge dongenginengti ye inguchac nganidaingte.  
\q1 Aime himong fengnginang fengnginangsoc ngic-ngigac sasawa yenge ye ngagesilu kwele-sowac sugucnehac ailu hiyadaingte. Oc, yogo fikedaicte, yogo foinac.\x - \xo 1:7 \xt Dan 7:13; Sek 12:10; Mat 24:30; Yoa 19:34-37; 1Tes 4:17\x*   
\p
\v 8 Sugucne Wapongti yanguc migac, “Ye gawec nga gagac ailu gacgu kwesinowagac, yogo naneuctihac. Na Tapilitowa Fileine, na ‘A’ nga ‘Y’, yogo molic-molicine iwacni moto-motoine.”\f + \fr 1:8 \ft Grik yowawa ye yanguc miwec, “Naneuctihac Alfa nga Omega.” Alfa yogo Grik yowa nenggacinele hibi molic-molicine nga Omega yogo moto-motoine. “A” yogo migabac yowa nenggacinele molic-molicine nga “Y” yogo moto-motoine.\f*\x - \xo 1:8 \xt Miye 21:6; 22:13\x*   
\s1 Kristo nganiwec  
\p
\v 9 Na Yoanedi Wapongte yowale nga Yesule mibe yegengkewecte ailu Patmos nucka gaiba. Na ngengele \w ngic hae-gbangineng|lemma="ngic hae-gba"\w*, ngenge nga na nongileng momoc Yesuholec wetackelu doic nga Wapongte ngani-damong bagacgu tatakic mikac sanangne gagabeleng.  
\v 10 Sugucnele hadeng\f + \fr 1:10 \ft Sonda wacine monic yogo Sugucnele hadeng. Gocne yengi ngagebong, yogo Sugucnele hadeng monic lobewa fikedaicte.\f* monicka Asudi nala bole bame, lobena yowa-malac monic sugucnehac kpeng ucine ingucne ngagebe\x - \xo 1:10 \xt Wah 19:16\x*  
\v 11 yedi yanguc miwec, \wj “Ga wiyac nganigic, yogo hibiwa kwelengkec. Kwelengkelu Yesule habu yenge taon 7, yogo Efesas nga Simina ailu Pegamum nga Taiataira ailu Sadis nga Filadelfia ailu Laodisea, ga hibi yogo yengela loengka hikeme nganibong lolickena.”\wj*\x - \xo 1:11 \xt Dan 7:10\x* \fig Himongte Iluc #3|alt="Asia church map" src="GPS_Seven Churches Migabac.tif" size="col" loc="1:9-11" copy="Wycliffe" ref="1:11" \fig*   
\p
\v 12 Inguc mime yowa-malac yogo ngagelu nganinogale hefaliyeiba. Hefaliyelu nganibe hifa yenge higengineng 7 edelu domaibong. Hige 7 yogo goldi baicne ingucnedi domabong nganiiba.\x - \xo 1:12 \xt Sek 4:2,10\x*  
\v 13 Nganicebabe yengele hewackacni monicti \w Ngicte Madecte|lemma="Ngicte Madec"\w* silic ingucne domawec. Ye ngakpiine dalicne holeme susucinedi higeine someckeicne, nga mondacina umbika goldi baicne yogodi hefeicne fawec.\f + \fr 1:13 \ft Depec-baba ngic yenge ngakpi ingucne holelu gaibong.\f*\x - \xo 1:13 \xt Dan 7:13; 10:5\x*  
\v 14 Ye hodoc-luweine nga hodoc-dowecine kwalac-kwalac yogo lama dowecine suweicne nga kaguwa wenacti kweme kwalackegac ingucne\f + \fr 1:14 \ft Grik yowawa “Mac tilowa wiyac kwalac-kwalac kaguwa kwelinacni mac ingucne wacaigac,” inguc kwelengkeicne fagac.\f* ailu dongeine yogo dac-ubilang ingucne.\x - \xo 1:14 \xt Esek 43:2; Dan 7:9; 10:6; Miye 2:18; 19:12; 14:2\x*  
\v 15 Aime aen sasacne dacka lobebong latac-latacineholec aicaigac, ye higeine yogo ingucne aiwec. Aime yowa-malacine yogo misa dundung bocyac yengele ucngineng ingucne aiwec.  
\v 16 Ye mole-foleinapecti asocmeng 7 bacebalu domawec. Aime micinacni hudu-babale fitec micine nga lobeine yogo micineholectihac ofelu wawec. Haic-mesuine yogo wenac-dongeine tapiliineholec ofecaigac, yogo ingucne aiwec.\x - \xo 1:16 \xt Dan 12:3; Yes 11:4; 49:2; Hib 4:12; Miye 2:12; 19:15\x*   
\p
\v 17 Aime ye nganilu higeine emeina wawelu homaicne ingucne fabe, yedi mole-foleinedi nale feiwa lolu yanguc miwec, \wj “Ga mi hangocguna, na molic-molicine nga moto-motoine.\wj*\x - \xo 1:17 \xt Dan 7:15; 10:9-12; Yes 44:6; 48:12; Miye 2:8; 22:13\x*  
\v 18 \wj Nganigic, na gaganeholec gagabac. Na homaiba ailu hatacmac gbolicne gagabac. Ailu ngagegic, na moto-motoine mikac gaibadi gagabachac, homac nga \+w Wangec-mac|lemma="Wangec-mac"\+w* yekele ki balu gagabac.\wj*   
\p
\v 19 \wj “Ilec ga wiyac nganigic yogo kwelengkec. Yogo wiyac yakumac fagac ailu lobewa fikedaicte, yogolec kwelengkec.\wj*  
\v 20 \wj Asocmeng 7 mole-folenedi bacebagabac. Ailu hifa higengineng 7 goldi baicne nganigic, yogolec ngage-ngage sangkeicne yanguc fagac. Asocmeng 7 yenge Yesule habu 7, yengele angelo.\wj*\f + \fr 1:20 \ft Grik yowawa angelo yogolec fungine yaeckang heuckeicne, yogo angelo me salecebaicne. Angelo yago fagac, yogo angelo monicti me ngic monicti yogo mi mime yegengkeicne.\f* \wj Nga hifa higengineng 7 yenge Yesule habu 7 aigaing.”\wj*\x - \xo 1:20 \xt Dan 2:28-30; 12:1-3\x*   
\c 2  
\s1 Efesas habu  
\p
\v 1 \wj “Ga Yesule habu Efesas iwa gagaing, yengele \+w angelola|lemma="Angelo"\+w* yowa yago kwelengkec.”\wj*  
\pi1 \wj “Ngic asocmeng 7 mole-foleinedi bacaigac. Ailu hifa higenginengkolec 7 goldi baicne yengele hewacka lolickecaigac, yedi Efesas iwa ngengele\wj*\f + \fr 2:1 \ft Yesule habu 7, yengele angelola kwelengkeyelewec. Gocne yengi yanguc ngagegaing, angelo yogo ngicbenang yengele damong. Ailu ye damongte ngagelu Grik yowawa “ga” milu kwelengkewec. Aimebac yowa sasawa yogo Yesule habu yengele aibaba nga yowa, yogo damongte yowa sugu miyac. Ilec ailu Grik yowawa “ga” bafaliyelu “ngenge” kwelengkegabeleng.\f* \wj yanguc migac,\wj*\x - \xo 2:1 \xt Miye 1:16\x*  
\v 2 \wj ‘Na ngengele aibabangineng nga doic-bolengineng ailu sanangne domacaigabiyeng, yogo ngageyackegabac. Ailu ngenge ngic-ngigac sowacne yengele mi aingelecaigac, yogo ngagegabac. Ngic gocne yenge yengileng \+w salecebaicne\+w* micaigaing. Ailubac yenge salecebaicne mi aigaing, ngenge yenge lokwesac aiyeleebongka yenge kwesac-ngic, yogo biyac yegengkeibong.\wj*\x - \xo 2:2 \xt 1Yoa 4:1\x*  
\v 3 \wj Ngenge tatakic mikac sanangne domacaigabiyeng. Aime nale wacte ailu umac bocyac balu tapilingineng mi wawec.’ ”\wj*   
\pi1
\v 4 \wj “Aime molickelu kwele-angacnginengte aibaba yogo hegileibong, yogolec ngagebe mi madickegac.\wj*  
\v 5 \wj Ngenge esecne gagangineng wenucka hegilelu waweibong, yogolec ngage-ngage bole badabiyeng. Ailu \+w kwelengineng hefaliyeme|lemma="Kwele-hefaliyec"\+w* aibabangineng molickelu wenuc ailu gaibong, yogo aidabiyeng. Inguc mi ailu kwelengineng mi hefaliyedabiyengtewa, na ngengela kwesilu hifangineng higeineholec macinacni baickedacte.\wj*\x - \xo 2:5 \xt Miye 3:3\x*  
\v 6 \wj Ngenge aibabangineng madicnebac yanguc, ngenge Nikolas habu\wj*\f + \fr 2:6 \ft Nikolas nga ngic-ngigac yele yowa balaibelu yanguc ngageibong, siduc-gbong alang bacnocaigaing, nga selo-boic aibaba aicaigaing, aibaba ingucne umacine mikac nalic ainoga.\f* \wj yengele aibaba yogo kwelenginengti hegilecaigaing, na inguchac yogo kweledi hegilecaigabac.”\wj*   
\pi1
\v 7 \wj “Monic hedeckolec ye \+w Asudi|lemma="Asu"\+w* Yesule habufocine yowa edocebagac, yogo aneng ngagedaic. Nga monic ye hudu welu gbelong aidaicte, ye gagale yoc Wapongte mac madicnebenang iwa domagac, yogowacni noine nalic lacnobe nodaicte.”\wj*\x - \xo 2:7 \xt Yes 6:9-10; Esek 3:27; Fike 2:9; Miye 22:2,19\x*   
\s1 Simina habu  
\p
\v 8 \wj “Ga Yesule habu Simina iwa gagaing, yengele angelola yowa yago kwelengkec.”\wj*  
\pi1 \wj “Ngic molic-molic nga moto-motoine, ye homalu gboliyewec gagac, yedi Simina iwa ngengele yanguc migac,\wj*  
\v 9 \wj Ngenge doic ngagelu socte wiyacka waweweine gagabiyeng, yogo ngageyackegabac. Ailu sifu kwelele wiyacka wakegabiyeng. Ngic misulec aigelecaigaing, yenge yengileng \+w Yuda ngic-ngigac\+w* milubac Yuda ngic-ngigac noine mi ailu \+w Satangte|lemma="Satang"\+w* \+w kpakpaduc mac\+w* aigaing, na yogo inguchac ngagegabac.\wj*\x - \xo 2:9 \xt 2Kor 11:14-15; Miye 3:9\x*  
\v 10 \wj Ngenge doic ngagenogale mi hangocngebadaic. Aleng Sugucnengineng ye lokwesacka locngebanale ngageme, ngengelacni gocne muc-macka locngebabong, ngenge hadeng 10te kwelina doickolec gadaingte. Aime ngenge nale yowa balaibelu sanangne galu homaebongka, gagale maaine sil ingucne ngeledacte.”\wj*\x - \xo 2:10 \xt Dan 1:12-15; 2Tim 4:8; Yak 1:12\x*   
\pi1
\v 11 \wj “Monic hedeckolec ye Asudi Yesule habufocine yowa edocebagac, yogo aneng ngagedaic. Nga monic ye hudu welu gbelong aidaicte, ye homac alecine yaeckangti nalic mi basowaledaicte.”\wj*\x - \xo 2:11 \xt Miye 20:14; 21:8\x*   
\s1 Pegamum habu  
\p
\v 12 \wj “Ga Yesule habu Pegamum iwa gagaing, yengele angelola yowa yago kwelengkec.”\wj*  
\pi1 \wj “Ngic hudu-babale fitec micine nga lobeine yogo micineholechac balu domagac, yedi Pegamum iwa ngengele yanguc migac,\wj*  
\v 13 \wj ‘Satangti ngictaule ngiye-ngiyewa ngiyegac, ngenge taon iwa gagabiyeng, yogo ngagegabac. Ailu Satangti gagac, iwa Antipas ye nale yowa sanangne mime yegengkeme balaibelu game, ye wehomaibong. Aime ngengele hewackacni Antipas wehomaibong. Aime ngenge sifu ngagesingnulu nale wac sanangne balu gaibong. Ailu wacne mi bisockeibong.’ ”\wj*\x - \xo 2:13 \xt Mige 89:37; Yes 43:10-12\x*   
\pi1
\v 14 \wj “Aibaba gocne ngengela fagac, yogolec ngagebe mi madickegac. Ngic-ngigac gocne ngengeholec gacaigaing, yenge Balamte wewedu-yowa balaibecaigaing. Yedi \+w Israel\+w* alingfocine okac ingucne lome waweningte Balak weducnowec. I yangucte, yenge siduc-gbongte \+w depecte sic|lemma="Depec"\+w* nolu selo-boic bole\wj*\f + \fr 2:14 \ft Dameng gocna, yogo ngic-ngigac yenge selo-boic aibaba aigaing. Nga dameng gocna yogo Wapong nga siduc-gbong me wapong kwesacine yeke momoc alang bacepagaing, yogo selo-boic aibabale silic ingucne.\f* \wj banogale inguc aiwec.\wj*\x - \xo 2:14 \xt Him 22:5-25:3; 31:16; 2Pi 2:15\x*  
\v 15 \wj Ingucne gocne yenge Nikolas habule wewedu-yowa balaibecaigaing, yenge inguchac ngengeholec gagaing.\wj*  
\v 16 \wj Ilec ailu kwelengineng hefaliyena. Inguc mi aidabiyengtewa, na ngengela biyacbenang fudacte ailu hudu-babale fitec micna fagac yogodi wecebadacte.”\wj*\x - \xo 2:16 \xt Him 31:8; Yos 13:22; Miye 3:11\x*   
\pi1
\v 17 \wj “Monic hedeckolec ye Asudi Yesule habufocine yowa edocebagac, yogo aneng ngagedaic. Nga monic ye hudu welu gbelong aidaicte, ye nani \+w mana nosing|lemma="mana"\+w* sangkeicne yogo lacnodacte. Ailu posa monic kwalac-kwalacka wac gbolicne monic kwelengkeicne fagac, yogo lacnodacte. Wac yogo monicti mi ngagedaicte, ngic posa nalacni badaicte, yedi sugu ngagedaicte.”\wj*\x - \xo 2:17 \xt Wah 16:4,14-15,33-34; Yoa 6:48-50; Yes 62:2\x*   
\s1 Taiataira habu  
\p
\v 18 \wj “Ga Yesule habu Taiataira iwa gagaing, yengele angelola yowa yago kwelengkec.”\wj*  
\pi1 \wj “\+w Wapongte Madec\+w* ye dongeine dac-ubilang ingucne. Ailu aen sasacne dacka lobebong latac-latacine aicaigac, higeine yogo ingucne, yedi Taiataira iwa ngengele yanguc migac.\wj*\x - \xo 2:18 \xt Dan 3:23-25; 10:6; Miye 1:14-15\x*  
\v 19 \wj ‘Na aibabangineng nga kwelenginengti ngic-ngigac yengele angacngebacaigac, yogo ngagegabac. Aime ngage-ngagesingngineng sanangkeme galu tatakic mikac bolewa baficebacaigabiyeng, yogo ngageyackegabac. Ailu aibabangineng yakumacti esecne molickelu aibaba ailu gaibong yogo ewaligac.’ ”\wj*   
\pi1
\v 20 \wj “Aime sifu ngigac wacine Yesebel, ye yeicne \+w siduc-mimi ngigac|lemma="Siduc-mimi ngic"\+w* micaigac. Ye wewedu bole kwesacine bagacgu selo-boic aibaba nga siduc-gbongte depecte sic nolu, yefe iwa nale kwelec kwekwe ngic-ngigacfocne bacebalu gawec. Aime ngenge yogo mi kpatalacnolu gacaigabiyengte ngagebe mi madickegac.\wj*\f + \fr 2:20 \ft Ngigac siduc-yowa miwec, yele aibaba yogo ngictau Ahab ngigacine Yesebelle aibaba ingucne aiwec. Yedi siduc-gbong nga hefec-dinac aibaba gocne bakwesilu Israel ngic-ngigac bacebame siduc-gbong afeelu gaibong.\f*\x - \xo 2:20 \xt 1Ngt 16:31; 2Ngt 9:22\x*  
\v 21 \wj Ye nani kweleine hefaliyenale dameng lacnoiba. Aime ye kweleine hefaliyeme selo-boic aibabaine hegilenale mi aicnogac.”\wj*   
\pi1
\v 22 \wj “Ngagegaing, ngigac ye huc aicnome mapicina fanale lodacte. Aime ngic-ngigac weni yengi yeholec wetackelu selo-boic aibaba aicaigaing, yenge yele aibaba yogo hegilelu kwelengineng mi hefaliyedaingtewa, doic umacnehacbenang ngagedaingte.\wj*  
\v 23 \wj Aime na yele adu-madecfocine hucti wecebabe homadaingte. Inguc aibe Yesule habu sasawadi yanguc ngage-motodaingte, na ngage-ngagewa nga kwelewa ngani-wosaec ngic. Na ngenge filesoc filesoc aibabanginengte silicka ameine badungeledacte.\wj*\x - \xo 2:23 \xt Mige 7:9; Yer 17:10; Miye 20:12-13\x*  
\v 24-25 \wj Aime Taiataira habuwa ngic-ngigac tofaine gagaing, ngenge Yesebelle wewedu nga Satangte ngage-ngage gbolongne migaing, yogo mi baibong. Ngenge yanguc edocngebagabac, wiyac fangelegac, ngenge yogo sanangne balu gadaing. Aime yogolec feiwa umac monic mi taockedacte. Aime yogo balu gabong na fudacte.”\wj*\x - \xo 2:24-25 \xt Miye 3:11\x*   
\pi1
\v 26-27 \wj “Monic ye hudu welu gbelong aidaicte ailu nale aibaba sanangne balu game dameng motodaicte, yele yanguc migabac, Na Mamacnelacni bole-yowa tapiliineholec balu himongne himongne yengele Sugucne gagabac. Aime silicine ingucnehac ngic gbelong aidaictewa, himongne himongne yengele sugucne ganogale bolele hibi nga tapili lacnodacte.\wj*  
\q1 \wj ‘Aime ye ngictaule yasu aenti baicne yogo balu damongebalu gadaicte. Ailu ngicti hebec kwouckecaigaing, silicine ingucnehac gocne kwoucebadaicte.’\wj* \rq (Mige 2:9) \rq*   
\m
\v 28 \wj Ailu na ubiyacte asocmeng yogo inguchac lacnodacte.\wj*\x - \xo 2:28 \xt Him 24:14-20; Miye 22:16; 2Pi 1:19\x*  
\v 29 \wj Monic hedeckolec ye Asudi Yesule habufocine yowa edocebagac, yogo aneng ngagedaic.”\wj*   
\c 3  
\s1 Sadis habu  
\p
\v 1 \wj “Ga Yesule habu Sadis iwa gagaing, yengele \+w angelola|lemma="Angelo"\+w* yowa yago kwelengkec.”\wj*  
\pi1 \wj “Ngic Wapongte \+w asu|lemma="Asu"\+w* 7 nga asocmeng 7 balu domagac, yedi Sadis iwa ngengele yanguc migac, ‘Na aibabangineng ngageyackegabac. Ngenge gagaholec gagabiyeng edocngebacaigaing. Ailu sifu ngenge homaicne silic gagabiyeng.\wj*\x - \xo 3:1 \xt Miye 1:4,16\x*  
\v 2 \wj Ilec ailu ngenge yeucnagulu deboc-gboli gadaing! Aibabangineng tofaine homanogale ailu fagac, yogo bamadickelu basanangkening. I yangucte, ngenge aibabangineng ngani-motogabac. Aimebac Wapongnele ngani-nganiwa nalic mi aigac.\wj*  
\v 3 \wj Yowa molickelu ngengela kwesime ngagelu baibong, yogo ngagesilu balaibedabiyeng. Ailu \+w kwelengineng hefaliyedabiyeng|lemma="Kwele-hefaliyec"\+w*. Inguc ailu ngenge deboc-gboli mi gadaingtewa, na hise-baba ngic ingucne ngengela fudacte. Ailu ma damengka fulu webating aingeledacte, yogo nalic mi ngagedaingte.’ ”\wj*\x - \xo 3:3 \xt Mat 24:43-44; Miye 2:5; 16:15; 1Tim 5:2\x*   
\pi1
\v 4 \wj “Aime ngengele alingkacni ngic-ngigac efecnemacti sugu aibabanginengti ngakpi-kpoluc ingucne babong wonongkolec mi aiwec. Na nganibe andoine aigaingte yenge ngakpi-kpoluc kwalacne holelu naholec momoc hike-kwesic aidabelengte.\wj*\x - \xo 3:4 \xt Yud 23\x*  
\v 5 \wj Inguc ailu monic ye hudu welu gbelong aidaicte, ye ngakpi-kpoluc kwalacne holedaicte. Aime na yele wac Gagale hibiwacni nalic mi baickedacte. Ailu yele wac yogo Mamacne nga angelofocine yengele haicka mibe yegengkedaicte.\wj*\x - \xo 3:5 \xt Dan 12:1; Wah 32:32-33; Mat 10:32; Luk 10:2; 12:8\x*  
\v 6 \wj Monic hedeckolec ye Asudi Yesule habufocine yowa edocebagac, yogo aneng ngagedaic.”\wj*   
\s1 Filadelfia habu  
\p
\v 7 \wj “Ga Yesule habu Filadelfia iwa gagaing, yengele angelola yowa yago kwelengkec.”\wj*  
\pi1 \wj “Gbagbacne nga yowa noinele fileine, yedi \+w Dawidile|lemma="Dawidi"\+w* ki balu gagac. Ye nu laliyeme monicti nalic mi holedaicte. Ailu nu holeme monicti nalic mi laliyedaicte. Aime yedi Filadelfia iwa ngengele yanguc migac,\wj*\x - \xo 3:7 \xt Yes 22:22\x*  
\v 8 \wj ‘Na aibabangineng ngageyackegabac. I yangucte, ngenge tapili-wawa gaibong ailu sifu nale yowa balaibelu wacne mi hegileibong. Ilec ngagegaing, nu monic ngengele haicka laliyengelebe, monicti yogo nalic mi holedaicte.’ ”\wj*\x - \xo 3:8 \xt 1Kor 16:9\x*   
\pi1
\v 9 \wj “Aime ngagegaing, ngic gocne yenge \+w Satangte|lemma="Satang"\+w* \+w kpakpaduc mackacni|lemma="Kpakpaduc mac"\+w*, yenge yengileng kwesac ailu \+w Yuda ngic-ngigac\+w* micaigaing. Ailu yenge Yuda ngic-ngigac noine mi aigaing, miyac. Aime na kwelenedi ngengele angac ngagegabac, yogo yengi ngage-motoningte aiyelebe, yenge ngengele higewa fulu ketadi holelu alang bangeledaingte.\wj*\x - \xo 3:9 \xt Miye 2:9; Yes 45:14; 49:23; 60:14\x*  
\v 10 \wj Ngenge tatakic mikac sanangne ganingte edocngebaiba, yogo noine balu gaibongte ailu lokwesac damengka mi febong na bacngebabe wasecne aidaingte. Lokwesac yogo himongtowa yagowa bucbuchac ngic-ngigac yengela fikenale miicne fagac.”\wj*\x - \xo 3:10 \xt Luk 21:19; 2Tim 2:12\x*   
\pi1
\v 11 \wj “Na biyac fudacte. Ilec ngenge sil badabiyengte, yogo monicti mi banale wiyac fangelegac, ngenge yogo sanangne balu gadaing.\wj*  
\v 12 \wj Monic ye hudu welu gbelong aidaicte, ye nani gunungkebe Wapongnele \+w Ibu-mac\+w* kwelinele bosing sanangne aidaicte. Ailu ye Ibu-mac yogo hatacmac mi hegiledaicte. Aime na Wapongnele wac ailu Wapongnele taon sugucnele wacine, nga neicne wacne gbolicne, wac habackang yogo yele feiwa kwelengkedacte. Taon sugucne yogo Wapongnele taon, yogo Yerusalem gbolicne ailu yogo honocmengkacni nale Wapongtacni wadaicte.”\wj*\x - \xo 3:12 \xt Yes 62:2; 65:15; Esek 48:35; Miye 14:1; 21:2\x*   
\pi1
\v 13 \wj “Monic hedeckolec ye Asudi Yesule habufocine yowa edocebagac, yogo aneng ngagedaic.”\wj*   
\s1 Laodisea habu  
\p
\v 14 \wj “Ga Yesule habu Laodisea iwa gagaing, yengele angelola yowa yago kwelengkec.”\wj*  
\pi1 \wj “Ngic wacine Noine, ye Wapongte yowa balaibecaigac. Ailu yowa noine yogolec widec aigac. Ye Wapongti wiyac sasawa mime fikeibong, yogolec fungine gagac, yedi hocne yowa yago Laodisea iwa ngengele yanguc migac,\wj*\x - \xo 3:14 \xt Yes 43:10-12; 65:16\x*  
\v 15 \wj ‘Na aibabangineng ngageyackegabac. Ngenge dacine me mogungne mi gagabiyeng. Ngenge dacine sugu me mogungne sugu gaebongkabac angac ngagedaba.\wj*\x - \xo 3:15 \xt Rom 12:11\x*  
\v 16 \wj Aime ngengebac dacine me mogungne mi gagabiyeng. Ngenge hewacnginac dac-dacine gagaingte ailu micnacni mengucngebanogale aigabac.\wj*\f + \fr 3:16 \ft Taon iwa misa dongeine faibong. Misa gocne yenge dacine aime ngic-ngigac hikelu lowalu madickeibong. Nga misa gocne yenge mogungne aime ngic-ngigac hikelu balu nolu sanangkeibong. Ilec ailu dacine nga mogungne yeke momoc madicne aigaic. Nga wiyac dac-dacine yogo madicneine mi fagac.\f*  
\v 17 \wj Nonge moneng-mafatowanonggengkolec ailu wiyac monicte mi kpungkelu gagabeleng, ngengilengte inguc milu sifu kwele-umactowaholec gagabiyeng. Ailu ngic-ngigac yenge ngengele kwele-sowac ngagegaing. Ailu waweweine nga donge-pisic ailu senggang gagabiyeng, yogo mi ngagegabiyeng.\wj*\x - \xo 3:17 \xt Hos 12:8; 1Kor 4:8; Luk 12:21\x*  
\v 18 \wj Ilec yanguc edocngebagabac, kwelele mafatowaholec ainogale nalacni gol dacti lobeicne fuli badabiyeng.\wj*\f + \fr 3:18 \ft Dacti gol yafoine lobeyackeme wosaeme gol noine sugu badamecte. Gol yogo kwelele wiyac madicnebenang yogolec soc holeicne.\f* \wj Ailu senggang gameineholec mi ganingte ngakpi-kpoluc kwalac-kwalac balu ngakpi-kpoluckolec aidabiyeng. Ailu dongengineng hilanogale donge suwe-suwele helocti dongengineng suwenogale nalacni fuli badabiyeng.’ ”\wj*\x - \xo 3:18 \xt Yes 55:1; Miye 4:4\x*   
\pi1
\v 19 \wj “Na ngic-ngigac weni yengele kwelenedi angac ngageyelecaigabac, yenge ngelengebalu edocebalu webating aiyelecaigabac. Ilec sanangkelu kwelengineng hefaliyena.\wj*\x - \xo 3:19 \xt Ynn 3:11-12; 1Kor 11:32; Hib 12:6; Miye 2:5\x*  
\v 20 \wj Ngagegaing, na nuwa domalu kpong-kpong holelu gagabac. Holelu gabe monicti nale yowa-malacnele hedec lolu ngagelu nu laliyeneleme, na yela febe noke momoc ngiyelu nosing momoc nodabelecte.”\wj*\x - \xo 3:20 \xt Yoa 14:23\x*   
\pi1
\v 21 \wj “Na hudu welu gbelong ailu febe Mamacneholec yele ngictaule ngiye-ngiyewa ngiyecaigabelec. Silicine ingucnehac monicti hudu welu gbelong aidaicte, ye nani ngictaule ngiye-ngiyene lacnobe noke momoc ngiyedabelecte.\wj*  
\v 22 \wj Monic hedeckolec ye Asudi Yesule habufocine yowa edocebagac, yogo aneng ngagedaic.”\wj*   
\c 4  
\s1 Honocmengte mimi-madic  
\p
\v 1 Inguc mime na honocmengka nu monic laliyeicne nganiiba. Hei, yowa esecne kpeng ucine ingucne yowa-malac monic edocnume ngageiba, yedi yanguc miwec, \wj “Ga yawa ofenong. Yagolec lobeina ma pasi fikedaicte, yogo edalicgudacte.”\wj*\x - \xo 4:1 \xt Dan 2:28-29; 7:9; Wah 19:16-19; Miye 1:1,10\x*  
\v 2 Hei, inguc mime iwahac \w Asudi|lemma="Asu"\w* nala bole bame nganibe honocmengka ngictaule ngiye-ngiye loicne iwa monicti yogolec feina ngiyewec.\x - \xo 4:2 \xt Yes 6:1\x*  
\v 3 Yele angoc yogo posa basufaleicne, yogo posa sasacne nga posa hunga, yeke ingucne. Ailu hulilic monic posa hedonggboli ingucne, yogodi ngictaule ngiye-ngiyewa lolickelu fawec.\x - \xo 4:3 \xt Esek 1:26,28\x*\f + \fr 4:3 \ft Posa wacngineng yogo yanguc, yaspa, kanelian, nga emeral.\f*   
\p
\v 4 Ailu ngictaule ngiye-ngiye ngiyeme ngictaule ngiye-ngiye gocne, dzalengineng 24, yenge ngictaule mac ngiye-ngiye yogo lolickelu ngiyecaigaing. Ngiye-ngiye yogolec feina damong 24 ingucti ngiyecaigaing. Damong yenge ngakpingineng kwalac-kwalac holelu hodocngineng feina ngictaule \w duu\w* goldi baicne holelu ngiyecaigaing.\x - \xo 4:4 \xt Dan 7:10; Miye 3:18\x*  
\v 5 Inguc nganicebabe pilatac bame gbululung ucine sugucnehacti ngictaule ngiye-ngiyewacni fikewec. Ngictaule ngiye-ngiyele haicka hifa 7 lobecaigaing, yogo Wapongte asu 7.\x - \xo 4:5 \xt Esek 1:13; Sek 4:2; Miye 1:4; 8:5; 11:19; 16:18\x*  
\v 6 Aime ngictaule ngiye-ngiyele haicka wiyac monic kiwec sugucne ingucne galasdi baicne, galas yogo wonongngine mikac nganiiba.  
\p Aime ngictaule ngiye-ngiyewa neboc nga neboc 4, iwa wiyac gaganginengkolec 4 yengi hewalingkelu domacaigaing. Yenge emengineng nga lobengineng sasawa yogo dongedi wakeyackeicne.\x - \xo 4:6 \xt Dan 7:2-3; Esek 1:5-10,22; 10:14\x*  
\v 7 Wiyac gagaineholec molic-molic, yele ngani-nganiine laion ingucne. Aime yele lobeina, wiyac gagaineholec monic ye bulumaka ngicne tapiliineholec ingucne. Aime yele lobeina wiyac gagaineholec monic, ye haic-mesuine ngani-nganiine ngic ingucne. Aime moto-motoina wiyac gagaineholec monic, ye hikic sugucnedi filalangkecaigac, ingucne aiwec.  
\v 8 Wiyac gaganginengkolec 4 yenge filesoc filesoc kwenggelengngineng 6. Ailu socngineng sasawa yogo dongedi saweyackeicne. Ailu kwenggelengngineng bageina yogo inguchac dongeholec. Ailu yenge hadeng nga debocsoc ngiye-ngagec mikac yanguc milu gacaigaing,  
\q1 “Sugucne Wapong Tapilitowa Fileine,  
\q1 Ye gbagbacnedi, gbagbacne, ailu gbagbacne.  
\q1 Ye gawec nga gagac ailu gacgu kwesinowagac.”\x - \xo 4:8 \xt Yes 6:2,3; Esek 1:18; 10:12\x*   
\m
\v 9 Aime ngictaule mac ngiye-ngiyeina ngiyecaigac, ye \w gaga-sanang\w* gaginowagac. Aime wiyac gaganginengkolec yenge yele wac bafelu alang bacnolu kwele-madic micaigaing. Inguc micaigaingka,\x - \xo 4:9 \xt Dan 4:34; 12:7\x*  
\v 10 ye ngictaule ngiye-ngiyeina ngiyecaigac, ailu gaga-sanang gaginowagac, damong 24 yenge yele higewa ketadi holecaigaing. Holelu ye afeelu ngictaule duungineng bamoctolu ngictaule ngiye-ngiyeinele emeina wickebong wame yanguc migaing,\x - \xo 4:10 \xt Miye 7:10,15; 19:4\x*   
\q1
\v 11 “Ga Sugucne ailu Wapongnonggeng.  
\q1 Gagi wiyac sasawa miyengka fikeyackelu gaganginengkolec fagaing.  
\q1 Gageuc ngagelu inguc bafuwayackeingte, ga andoine. Ilec ailu wac feicne nga alang-baba ailu tapili sasawa badamecte.”\x - \xo 4:11 \xt Dan 4:35-37\x*   
\c 5  
\s1 Hibi kpadidiweicne  
\p
\v 1 Wapong ngictaule ngiye-ngiyeina ngiyecaigac, ye \w hibi kpadidiweicne\w* monic mole-foleina balu ngiyegac. Aime hibi yogo kwelina nga lobina kweleng kwelengkeicne fagac. Aime iwa yoc sopiyaine 7 ingucnedi bakatackelu kpakpatalac aka loicne nganiiba.\x - \xo 5:1 \xt Dan 7:10; 12:9; Yes 29:11; Esek 2:9-10\x*  
\v 2 Na \w angelo\w* monic tapiliineholec nganibe yedi malac sugucnehac yanguc aukwelu wackewec, “Hibiwa yoc sopiyainedi aka lolu bakatackeicne yogo madi nalic baickelu bafilamenale silicine ngagegac?”  
\v 3 Wackeme basackebong honocmengka me himongka me himong bageina monicti hibi kpadidiweicne yogo nalic mi bafilamedaicte, me kweleng yogo ngani-nganilesoc mi fagac.  
\v 4 Aime monicti hibi yogo bafilamelu nganinogalesoc nalic mi aiwecte ailu, kwelene sowaleme hiyaiba.\x - \xo 5:4 \xt Dan 7:15\x*  
\v 5 Hiyabe damongfocngineng yengelacni monicti yanguc edocnuwec, “Ngagegic, ga mi hiyanong! \w Yuda\w* yengelacni laion yogo, ye \w Dawidi\w* ngambofocine yengele fikesaweckacni gidec, yedi gbelong aiwec. Ilec ailu ye hibi kpadidiweicne yele aka 7 bakatackeicne, yogo nalic baickelu bafilamedaicte.”\x - \xo 5:5 \xt Dan 7:13-14,16; Fike 49:9; Yes 11:1,10; Miye 22:16\x*   
\s1 Lama madecine  
\p
\v 6 Inguc mime yanguc nganiiba. Ngictaule ngiye-ngiye nga wiyac gaganginengkolec 4, ailu damong 24 yengele hewacka \w Lama madecine|lemma="Lama"\w* monic domawec, ailu ye webong homaicne ingucne aiwec gagac. Lama madecine yogo ye begicine 7 ailu dongeine 7. Dongeine yogo Wapongte \w asu|lemma="Asu"\w* 7, yenge Wapongti himongka salecebame gagaing.\x - \xo 5:6 \xt Sek 4:10; Yes 53:7; Yoa 1:36; Miye 13:8\x*  
\v 7 Yedi hocne lelu ngictaule ngiye-ngiyewa ngiyewec, yele mole-foleinacni hibi kpadidiweicne yogo bawec.  
\v 8 Hibi yogo balu domame, wiyac gaganginengkolec 4 nga damong 24 yenge yele haicka ketadi holeibong. Damong sasawadi gita mucine homacne, ailu pele goldi baicne yogo filesoc balu domaibong. Pele yogowa marasing hoine madicne fawec. Fame marasing hasockolec pelewacni ofewec, yogo Wapongte bingec yengele mimilocngineng, yogodi pelengineng wakeyackeicnedi ofelu fawec.\x - \xo 5:8 \xt Miye 8:3-4; Mige 141:2\x*\fig Gita mucine homacne ingucti fagaing|alt="harp" src="BK00175B.TIF" size="col" loc="5:6-8" copy="Horace Knowles revised by Louise Bass © The British & Foreign Bible Society, 1994." ref="5:8" \fig*   
\s1 Lama madecine afeeibong  
\p
\v 9 Aime yenge gee monic gbolicne yanguc holeibong.  
\q1 “Gagi hibi kpadidiweicne yogo nalic balu aka bakatackeicne yogo baickedamecte.  
\q1 I yangucte, ngic yengi wecgubong gagi sacgonedi ngic-ngigacfocgone fuli bacebaing.  
\q1 Ailu ga himong fengnginang fengnginangsoc ngic-ngigac, nga yowane yowane, ailu soc haicine monic-monic, nga himongne himongne ngic-ngigac sasawa, yengelacni moniyang moniyang fuli bacebang Wapongte aling ailu gagaing.\x - \xo 5:9 \xt Mige 33:3; 40:3; 96:1; 98:1\x*   
\q1
\v 10 Fuli bacebang Wapongte \w ngani-damongte|lemma="Ngani-damong"\w* alingka gadaingte.  
\q1 Ailu yenge \w depec-baba ngic\w* ingucne ailu Wapong kwelec kwecnodaingte.  
\q1 Aling yogo yengi himongne himongne yengele damong aidaingte.”\x - \xo 5:10 \xt Dan 7:18,22,27; Wah 19:6; Yes 61:6; Miye 1:6; 20:6\x*   
\p
\v 11 Na dongene lokeme nganibe angelo bocyac yengele dzalengineng yogo 100 milion ewaligac. Ailu taosen nga taosen hatacmac feina taockegaing. Yengi ngictaule ngiye-ngiye nga wiyac gaganginengkolec, ailu damong 24 hewalingebabong, yowa-malacngineng ngageiba.\x - \xo 5:11 \xt Dan 7:10; Hib 12:22\x*  
\v 12 Yengi sanangne wackelu aukwelu yanguc miibong,  
\q1 “Lama madecine wehomaicne,  
\q1 Yedi damongte tapili nga woc-wiyactowa ailu ngage-ngage-motoc, nga tapili ailu alang-baba, nga wac feicne ailu mimi-madic yogo nalic lacnobong badaicte.”\x - \xo 5:12 \xt 1Ngsi 29:11-12\x*   
\m
\v 13 Aime wiyac sasawa Wapongti mime fikeyackeibong, yenge honocmengka nga himongka ailu himong bageina nga kiwecka, yengele kweliwa wiyac sasawa gagaing, yenge yowa yanguc mibong ngageiba.  
\q1 “Ye ngictaule mac ngiye-ngiyeina ngiyegac nga Lama madecine,  
\q1 Yekela mimi-madic nga alang-baba, ailu wac feicne nga tapili moto-motoine mikac fafegidaic.”   
\m
\v 14 Inguc mibong wiyac gaganginengkolec 4 yengi “yogo foinac” miibong. Aime damong 24 yenge ketadi holecnolu yeke afeecepaibong.\x - \xo 5:14 \xt Dan 7:27\x*   
\c 6  
\s1 Yoc sopiyainedi aka bakatackeicne baickewec  
\p
\v 1 Na nganibe \w Lama madecinedi|lemma="Lama"\w* kpakpatalac aka 7 bakatackeicne fawec, yogo molic-molic moniyang hibiwacni baickewec. Aime wiyac gaganginengkolec 4 yengelacni monicti yowa-malacine gbululung ucine ingucnedi wackelu aukwelu yanguc mime ngageiba, “Ga welec!”\x - \xo 6:1 \xt Miye 4:6; 5:1\x*  
\v 2 Hei, inguc mime na hilalu becosic kwalac-kwalac monic nganiiba. Aime yele feiwa wiyac monicti lebeineholec ngiyewec. Monicti ngictaule \w duu\w* monic lacnowec. Aime ye holelu becosicka hikelu huduwa ewalicebalu gbelong ainogale aiwec.\x - \xo 6:2 \xt Sek 1:8; 6:1-6\x*   
\p
\v 3 Aime Lama madecinedi aka bakatackeicne monic hatacmac baickewec, iwa ngagebe wiyac gagaineholec monicti yanguc miwec, “Ga welec!”  
\v 4 Inguc mime becosic monic sasacnedi kwesiwec. Yele feiwa wiyac monic ngiyewec, monicti wiyac gocne lacnowec. Ye kwele-mogung baic-baicte tapili ailu himongne himongne ngic-ngigac yengungtihac wehomacnaguningte tapili yogo lacnowec. Ailu monicti hudu-babale fitec sugucne monic lacnowec.\x - \xo 6:4 \xt Esek 21:9-15\x*   
\p
\v 5 Aime Lama madecinedi aka bakatackeicne monic baickeme alecine habackang aiwec. Baickeme wiyac gagaineholec 3 yedi yanguc mime ngageiba, “Ga welec!” Hei, inguc mime becosic saec-saec monic nganiiba. Aime wiyac monic yele feiwa ngiyewec, ye sigel monic moleina balu ngiyewec.\fig Sigel monic|alt="a scale" src="HK00156B.TIF" size="col" loc="6:5-6" copy="Horace Knowles © The British & Foreign Bible Society, 1954, 1967, 1972, 1995." ref="6:5" \fig*  
\v 6 Aime wiyac gaganginengkolec 4, yengele hewackacni yowa-malac ingucne monicti yanguc mime ngageiba, “Nosing lolocte dameng aime wit lita moniyangte fuli, yogo sugucnehac hadeng moniyangte bole-fuli aigac. Nga bali lita habackang, yogo hadeng moniyangte bole-fuli aigac. Aime ga heloc nga \w waing\w* mi basowaledamec.”\f + \fr 6:6 \ft Grik yowawa moneng monic wacine denarius kwelengkeicne. Yoanele damengka moneng yogo moniyangti hadeng moniyangte fuli aiwec. Bali yogo padi ingucne nosing monic.\f*   
\p
\v 7 Lama madecinedi aka bakatackeicne monic baickeme alecine 4 aiwec. Baickeme ngagebe wiyac gagaineholec 4 yedi yanguc miwec, “Ga welec!”  
\v 8 Hei, inguc mime becosic dagec-dagec monic nganiiba. Aime wiyac yele feiwa ngiyewec, wacine Homac. Ye wiyac monic wacine \w Wangec-mac|lemma="Wangec-mac"\w*, ye mengockeme kwesiiboc. Kwesilu yeki himongtowa habu 4 iwacni heuckelu iwa nebocine yogo yeki hudu-babale fitec nga loloc ailu huc nga himongte kate-sic bacebaboc kwesidaingte. Kwesilu wiyac yogo yengi ngic-ngigac wecebabong homadaingte, yogolec tapili yeke yeteicne.\x - \xo 6:8 \xt Yer 15:1-3; Esek 5:12,17; 14:21\x*   
\p
\v 9 Aime Lama madecinedi aka bakatackeicne monic baickeme alecine 5 aiwec. Baickeme iwa yanguc nganiiba. Ngic-ngigac Wapongte yowa bagalu mibong yegengkeme wecebabong homaibong, yengele ilucfocngineng \w alata\w* bageina ngiyeibong.  
\v 10 Yenge iwa ngiyelu dacineholec aukwelu yanguc wackeibong, “Oc, Sugucnenonggeng, ga gbagbacne gaga nga yowa noinele fileine. Ga ameine badu-badule dameng badaliwelu sacnonggengte bikic yogolec ngagelu ngic himongka galu wecnubaibong, yenge ma damengka mimoctocebalu bikicnginengte ameine yeledamecte?”\x - \xo 6:10 \xt Dan 8:13; Mige 78:10\x*   
\p
\v 11 Inguc mibong ngakpi dalicne kwalacne filesoc yelelu yanguc edocebawec, “Gocne yengi ngenge wecngebabong homaibong, silicine ingucnehac kwelec kwekwe agofocngineng, yenge \w ngic hae-gbafocngineng|lemma="ngic hae-gba"\w* aigaing, yenge momochac wecebabong homadaingte. Homabong dzalengineng ngageibawa feholeme motodaicte. Ilec ngenge kpisicnemac hatacmac ngiye-ngagedaing.”\x - \xo 6:11 \xt Miye 7:9,13; 19:14\x*   
\p
\v 12 Aime ye aka bakatackeicne monic baickeme alecine 6 aiwec. Baickeme nganibe memeya sugucnehac bame wenac-dongeine saeckewec, yogo kwele-sowacte ngakpi saecne ingucne aiwec. Aime tamacne ye bucbuchac sac ingucne aiwec.\x - \xo 6:12 \xt Yes 13:10-13; Esek 32:6-8; Mat 24:29; Sale 2:20; Miye 8:12; 11:13; 16:18\x*  
\v 13 Aime gbelong sugucnedi welu \w fik yoc\w* hucine manggangne yockacni wemolongkeme wacaigaing, silicine ingucnehac asocmeng sawawa fagaing, yenge himongka molongkelu waibong.\x - \xo 6:13 \xt Yes 34:4\x*  
\v 14 Wabong ngicti hibi kpadidiwecaigaing, silicine ingucnehac sawa ye kpadidiwelu miyac aiwec. Miyac aime tiki nga nuc sasawadi mac ngiye-ngiyengineng hegileyackeibong.\x - \xo 6:14 \xt Miye 16:20\x*   
\p
\v 15 Inguc aime himongte \w ngictau\w* nga ngic sugucne ailu hudu-baba ngic yengele damong. Nga ngic mafatowanginengkolec ailu ngic sanangne, nga kwelec kwekwe aling sugucnefocngineng yengele bagewa gaibong, ailu ngic-ngigac ngic monicte bagewa mi gaibong. Yenge sasawadi hikelu henebe kwelina, nga posa sugucne sugucne bagenginang sangkeyackeibong.\x - \xo 6:15 \xt Yes 2:10,19,21; 34:12\x*  
\v 16 Sangkelu yengi tiki nga posa yanguc edocebaibong, “Ngenge feinonggang walu Wapongti ngictaule ngiye-ngiyewa ngiyegac, yele haicka nga Lama madecinele aalicte ameine iwacni somecnubadabiyeng.\x - \xo 6:16 \xt Luk 23:30\x*  
\v 17 I yangucte, yekele aalicte amenginecte damengtowa biyac kwesigacte, madi sanangkelu domadaicte? Monicti nalic mi domadaicte!”\x - \xo 6:17 \xt Yol 2:11; Mal 3:2\x*   
\c 7  
\s1 Ngic dzalengineng 144 taosen  
\p
\v 1 Inguc nganibe motome \w angelo\w* 4 nganicebaiba. Yenge himongtowa yagolec unggulucine 4, iwa domaibong. Aime nganicebabe yenge himongte gbelong 4 balu sebilelu domaibong, gbelong yogo yenge himongka me kiwecka me yocka nalic mi wedaingte.\x - \xo 7:1 \xt Yer 49:36; Dan 7:2\x*   
\p
\v 2 Aime angelo 4 yenge himong nga kiwec basowalecepaningte tapili yeleicne. Aime na angelo monic nganiiba. Ye Wapong gagaineholec yele akale maa bagalu wenac ofe-ofeinacni kwesiwec. Yedi angelo 4 yenge wacebalu yanguc miwec,  
\v 3 “Ngenge himong me kiwec me yoc biyac mi basowalecebadabiyeng. Nonge Wapongnonggengte kwelec kwekwefocine yengele meiwa akale maa loyelebeng wasecne aibong ibac ngenge wiyac sasawa basowalecebadabiyeng.”\x - \xo 7:3 \xt Esek 9:4,6; Miye 9:4; Wah 28:36\x*  
\v 4 Aime ngic yengele meiwa akale maaholec, yengele dzalengineng 144 taosen mibong ngageiba. Akale maaholec yogo yenge \w Israel\w* madecfocine 12 yengele habuwacni.\x - \xo 7:4 \xt Miye 14:1,3\x*  
\v 5 Yengele meiwa akale maaholec yengele dzalengineng yanguc,  
\li1 \w Yudale|lemma="Yuda"\w* fikesaweckacni 12 taosen,  
\li1 Rubente fikesaweckacni 12 taosen,  
\li1 Gatle fikesaweckacni 12 taosen.   
\li1
\v 6 Asele fikesaweckacni 12 taosen,  
\li1 Nafatalile fikesaweckacni 12 taosen,  
\li1 Manasele fikesaweckacni 12 taosen.   
\li1
\v 7 Simeonte fikesaweckacni 12 taosen,  
\li1 \w Liwaile|lemma="Liwai"\w* fikesaweckacni 12 taosen,  
\li1 Isakale fikesaweckacni 12 taosen.   
\li1
\v 8 Sebulunte fikesaweckacni 12 taosen,  
\li1 \w Yosefele|lemma="Yosefe"\w* fikesaweckacni 12 taosen, nga  
\li1 \w Benyaminte|lemma="Benyamin"\w* fikesaweckacni 12 taosen.   
\s1 Habu sugucnedi Wapong afeeibong  
\p
\v 9 Hei, inguc nganibe motome habutowabenang nganicebaiba. Aime yengele dzalengineng yogo monicti nalic mi wafedaicte. Ngic-ngigac nganicebaiba, yenge himongne himongne yogowacni, nga himong fengnginang fengnginangsoc ngic-ngigac ailu soc haicine monic-monic, nga yowane yowane, yengelacni. Ailu yenge ngakpingineng dalicne kwalac-kwalac holelu molenginang kponggeng leso balu ngictaule ngiye-ngiyewa nga \w Lama madecinele|lemma="Lama"\w* haicka domaibong.  
\v 10 Domalu yanguc milu sugucnehac aukwelu wackeibong,  
\q1 “Wapongnonggeng ngictaule ngiye-ngiyewa ngiyegac, ailu Lama madecine, ngekele tapiliwa baficnubaboc wasecne gagabeleng.”\x - \xo 7:10 \xt Miye 4:10\x*   
\m
\v 11 Inguc mibong angelo sasawadi domalu ngictaule ngiye-ngiye nga damong 24 ailu wiyac gaganginengkolec 4 hewalingebaibong. Angelo yenge ngictaule ngiye-ngiyele haicka wafalu ketadi holecnolu haicngineng heluluckelu Wapong afeeibong.  
\v 12 Afeelu yanguc miibong,  
\q1 “Foinac, mimi-madic nga wac feicne, ailu ngage-ngage-motoc nga kwele-madic ailu alang-baba nga damongte tapili ailu tapilitowa yogo sasawa Wapongnonggengte aigac.  
\q1 Yogo damengsoc damengsoc damengngine moto-motoine mikac fafegidaic, yogo foinac.”\x - \xo 7:12 \xt Miye 5:12\x*   
\s1 Doic sugucnebenang motowec  
\p
\v 13 Inguc mibong, damong yengelacni monicti yanguc uwanelewec, “Ngic-ngigac ngakpingineng dalicnedi kwalac-kwalac yago, yenge weni yengi ailu yenge wenuwacni kwesigaing?”   
\p
\v 14 Uwaneleme ameine yanguc edoiba, “Sugucnene, gageuc ngagegic.”  
\p Inguc mibe yedi yanguc edocnuwec, “Ngic-ngigac yago yenge doic sugucnebenang yogowacni kwesilu ngakpingineng dalicne Lama madecinele sacti suwebong kwalac-kwalac aigac.\x - \xo 7:14 \xt Dan 12:1; Mat 24:21\x*  
\v 15 Ilec ailu yenge deboc hadeng Wapongte \w Ibu-mac\w* kwelina ngictaule ngiye-ngiyele haicka domalu ye afeelu kwelec kwecnolu gagaing. Babong Sugucne ngictaule ngiye-ngiyewa ngiyegac, ye yengeholec galu kpoluc-faleine yengele feiwa lome ngiyedaicte.\x - \xo 7:15 \xt Wah 19:6,10; Esek 37:26-28\x*  
\v 16 Aime yenge nosingte hatacmac mi homadaingte. Ailu misale mi aiyeledaicte. Ailu wenac me wiyac gocnedi socngineng hatacmac mi kweme malawedaingte.\x - \xo 7:16 \xt Yes 49:10\x*  
\v 17 I yangucte, Lama madecine ngictaule ngiye-ngiyele hewacka domagac, yedi damongebalu gagale misa dongeina mengocebalu hikeme nodaingte. Aime Wapongti donge-misangineng sasawa suweyackedaicte.”\x - \xo 7:17 \xt Mige 23:1-2; Yes 25:8; Miye 21:4\x*   
\c 8  
\s1 Aka bakatackeicne moto-motoine baickewec  
\p
\v 1 Lama madecinedi aka bakatackeicne moto-motoine baickeme alecine 7 aiwec. Baickeme iwa honocmengka 30 minit ngama ingucne hendolong mikac ningbenang kwelu fawec.\x - \xo 8:1 \xt Hab 2:20; Sek 2:13; Sef 1:7\x*   
\p
\v 2 Ning kweme \w angelo\w* 7 Wapongte haicka domacaigaing, monicti yenge kpeng 7 yeleme nganicebaiba.   
\p
\v 3 Aime angelo monicti pele goldi baicne yogo bakwesilu \w alata\w* emeina lelu domawec. Domame monicti marasing hoine madicne bocyac lacnowec. Lacnome yogodi Wapongte bingec sasawa yengele mimilockolec kpatulelu alata goldi baicne ngictaule ngiye-ngiye emeina domawec, iwa lolu hasoc holewec.\x - \xo 8:3 \xt Miye 5:8; 6:9-11; Wah 30:1-3\x*  
\v 4 Ye inguc aime yele molewacni hasoc hoine madicnedi Wapongte bingec yengele mimilockolec kpatulelu Wapongta fewec.  
\v 5 Feme angelo ye alatawacni dac balu peleina kweme haulu wakeme himongka wickeme sotingkelu wawec. Wame gbululung holeme uc sugucnehac fikewec. Ailu pilatac bame memeya bawec.\x - \xo 8:5 \xt Dep 16:12; Wah 19:16-19; Miye 11:19; 16:18\x*   
\s1 Angelo 4 yenge kpengnginengkolec  
\p
\v 6 Bame angelo 7 kpengnginengkolec yenge kpeng fitonogale efeckeibong.  
\v 7 Efeckebong angelo molic-molic yedi kpeng fitome mac hucine sanangkeicne\f + \fr 8:7 \ft Himong mogungna mac hucine sawawa mogungkelu posa ingucne sanangkelu wacaigaing.\f* nga dac sackolec kpatulelu himongka wickeme sotingkelu wawec. Wame himongtowa habu sugucne yogowacni habackang heuckelu iwacni nebocine lobewec. Ailu yoc sasawa himongtowa yogolec feina domagaing, yenge habu sugucne yengelacni habackang yogowacni heuckelu iwacni nebocine lobewec. Ailu kpinding sasawa dacti lobeyackewec.\x - \xo 8:7 \xt Wah 9:23-26; Esek 5:2; 38:22; Yol 2:30\x*   
\p
\v 8 Aime yele lobeina angelo 2 yedi kpeng fitome monicti tiki sugucne dacineholec ingucnedi kiwecka wickeme wame kiwec habu sugucne yogowacni habackang heuckelu iwacni nebocine sac aiwec.  
\v 9 Aime kiwecka sic gaganginengkolec gagaing, habu sugucne yogowacni habackang heuckelu iwacni nebocine homayackeibong. Ailu wage aling sugucne yogowacni habackang heuckelu iwacni nebocine sowalelu miyac aiibong.   
\p
\v 10 Aime yele lobeina angelo 3 yedi kpeng fitome sawawacni asocmeng sugucne monic hifa ingucne lobelu motolu wawec. Wame misa sugucne nga misa dongeine yenge habu sugucne yogowacni habackang heuckelu iwacni nebocinele feina holewec.  
\v 11 Asocmeng yogo wacine Hobecine. Aime misa habu sugucne yogowacni habackang heuckelu iwacni nebocine yogo hobecine aiwec. Aime misa hobecine aiwecte ailu ngic-ngigac bocyacti nolu homaibong.\x - \xo 8:11 \xt Wah 7:20-25; Yer 9:15\x*   
\p
\v 12 Aime angelo 4 yedi kpeng fitowec. Fitome wenac nga tamacne ailu asocmeng yengele angocte tapili yogo aling habackang heuckelu iwacni nebocine kundung kwenale baickewec. Baickeme hadengte dameng yogowacni habackang heuckelu iwacni nebocinedi mi angoleibong. Aime deboc ye inguchac aiwec.\x - \xo 8:12 \xt Wah 10:21-23; Esek 32:7; Miye 6:12-13\x*   
\p
\v 13 Aime nganibe hikic monic sawa hewacka wileng filalangkeme yowa-malacine ngageiba. Yowa yogo sugucnehac wackelu yanguc miwec, “Mee, mee, mee, angelo habackang yenge kpeng fitobong ucngineng sugucnehac hiyabong yowale umac habackang ngagedaingte. Ilec ngic-ngigac himongka gagaing, ngenge medecngebadaic.”\x - \xo 8:13 \xt Miye 9:12; 11:14\x*   
\c 9  
\s1 Angelo 5 yedi kpeng fitowec  
\p
\v 1 \w Angelo\w* 5 yedi kpeng fitome na asocmeng monic honocmengkacni walu himongka holewec yogo nganiiba. Nganibe monicti long sugucnebenang hauyackeicne, yogolec yefeinele ki asocmeng lacnowec.\x - \xo 9:1 \xt Luk 10:18; Miye 20:1\x*  
\v 2 Lacnome yedi ki yogo balu long sugucnebenang yogo bamoctowec. Bamoctome dacti bole lobeme hasoc sugucnehac fecaigac, hasoc silicine ingucnedi longkacni ofewec. Long iwacni hasoc ofelu wenac nga sawa hedicepame kundung kweiboc.\x - \xo 9:2 \xt Fike 19:28; Yol 2:2,10; Wah 10:12-15\x*  
\v 3 Aime hasockacni ipowa ofelu himongka waibong. Wabong monicti himongte wame-wame yengele tapili ingucne yenge yelelu  
\v 4 yanguc edocebawec, “Ngenge kpinding nga wiyac sasawa hekengngineng sabaineholec fagaing, ailu yoc mi basowalecebadabiyeng. Ngenge ngic-ngigac Wapongte akale maa yengele meiwa mi balu gagaing, yenge sugu basowalecebadabiyeng.\x - \xo 9:4 \xt Miye 7:3\x*  
\v 5 Ngenge tamacne 5 iwa doic sugu yeledaing. Ailubac yenge mi homadaing.” Aime wame-wamedi hicebame doic ngagecaigaing, doic ingucne aidaicte.  
\v 6 Dameng iwa ngic-ngigac yenge homanogale homac basackelu aibibiyedaingte. Ailu homanogale aiyeledaicte. Aimebac homacti yenge hegilecebadaicte.\x - \xo 9:6 \xt Yop 3:21; Yer 8:3\x*   
\p
\v 7 Aime ipowa yenge ngani-nganingineng hudu-babale becosic yenge ingucne. Hodocnginang \w duu\w* goldi baicne ingucne ngiyewec. Nga haic-mesungineng yogo ngic-ngigac yengele haic-mesu ingucne.\x - \xo 9:7 \xt Yol 2:4\x*  
\v 8 Aime hodoc-dowecngineng yogo ngigac yengele ingucne. Ailu mic-luwengineng yogo laion yengele mic-luwe ingucne.\x - \xo 9:8 \xt Yol 1:6\x*  
\v 9 Ailu maleku holeibong, yogo aenti ngakpi ingucne baicne. Aime kwenggelengngineng ucine yogo becosic bocyacti hudule gasackelu keleta fuluckelu ucineholec hikecaigaing ingucne.\fig Becosic yenge keleta fuluckelu gasackegaing|alt="horses and chariots" src="HK00191B.TIF" size="col" loc="9:7-11" copy="Horace Knowles © The British & Foreign Bible Society, 1954, 1967, 1972, 1995." ref="9:9" \fig*\x - \xo 9:9 \xt Yol 2:5\x*  
\v 10 Ailu gicngineng micineholec yogo wame-wame gicngineng ingucne aiwec. Aime yenge ngic-ngigac basowalecebanogale tapilingineng yogo tamacne 5 yogolecsoc fadaicte. Aime tapilingineng yogo gicnginang ngiyewec.  
\v 11 Long sugucnebenang, yogolec angelodi\f + \fr 9:11 \ft Satang ye angelo monic. Ilec ye angelo yogo mecne. Ailu 9:1 iwa asocmeng monic wawec, yogo ye mecne.\f* yengele \w ngictaungineng|lemma="ngictau"\w* gawec. Yele wacine yogo \w Hibru yowawa|lemma="Hibru"\w* Abadon, nga Grik yowawa Apolion.\f + \fr 9:11 \ft Apolion wac yogolec fungine yogo, ye kindololo ngic.\f* \x - \xo 9:11 \xt Wah 12:23\x*   
\p
\v 12 Mee, yowale umac molic-molic yogo motogac. Ngagegaing, yogolec lobeina, yowale umac yaeckangti kwesidabiyecte.   
\s1 Angelo 6 yedi kpeng fitowec  
\p
\v 13 Aime angelo 6 yedi kpeng fitome Wapongte haicka \w alata\w* goldi baicne, yogolec unggulucina begic 4, yengelacni mic-yowa monic ngageiba.  
\v 14 Ngagebe yedi angelo 6 kpengineholec yanguc edowec, “Angelo 4 Yufretis misa sugucne mecina witicebabong domagaing, yenge lukecebanong.”  
\v 15 Angelo 4 yenge ngic-ngigac habu sugucne yogowacni habackang heuckelu iwacni nebocine wehomacebanogale efeckeibong. Efeckebong dameng nga hadeng ailu tamacne nga hifa-dameng yogolec efeckelu gabong yedi lukecebawec.\x - \xo 9:15 \xt Miye 8:7-12\x*  
\v 16 Aime yengeholec hudu-baba ngic becosic feina ngiyeibong, yengele dzalengineng 200 milion mibong ngageiba.   
\p
\v 17 Aime gungka ingucne dongene lokeme nganibe hudu-baba ngic becosicnginengkolec yengele silicngineng yanguc nganiiba. Yenge ngakpingineng aenti baicne yogo hibine sasacne dac ingucne ailu sowac-sowac nga dagec-dagec, yogo posa wacine salfa ingucne. Nga becosicte hodoc yogo laion ingucne. Aime micnginangkocni dac nga hasoc ailu \w salfa-posadi|lemma="Salfa-posa"\w* ofelu hikeibong.\x - \xo 9:17 \xt Fike 19:24,28; Esek 38:22\x*  
\v 18 Doic habackang, dac nga hasoc ailu salfa-posa ubilangineholec, yenge becosic micnginangkocni ofelu ngic-ngigac habu sugucne yogowacni habackang heuckelu iwacni nebocine wehomacebaibong.  
\v 19 Tapili yogo becosic micnginang nga gicnginang ngiyewec. Aime gicngineng yogo yenge hema ingucne hodocnginengkolec. Ailu yenge yogodi wiyac haicine monic-monic basowalecaigaing.   
\p
\v 20 Aime ngic-ngigac nebocine doic yogodi mi wehomacebaibong, yenge moledi aibaba gocne balu gaibong, aibabangineng yogolec \w kwelengineng mi hefaliyeibong|lemma="Kwele-hefaliyec"\w*. I yangucte, yenge \w aleng\w* nga siduc-gbong yogo gol, siliwa, kopa, nga posa, ailu yocti baicne alang bayelelu afeebaningte aibaba yogo mi hegileibong. Siduc-gbong yogo molenginengti baicne. Ailu siduc-gbong ingucne yenge wiyac monic mi nganidaingte. Nga hedecnginengti yowa monic mi ngagedaingte. Ailu higenginengti nalic mi edelu hikedaingte.\x - \xo 9:20 \xt Miye 16:9,11; Mige 115:4-7; 135:15-17; Dan 5:23\x*  
\v 21 Aime ngic-ngigac yogo yengi ngic-ngigac gocne wecebabong homaibong. Ailu hefec nga mosoc aibaba, ailu selo-boic aibaba nga hise aibaba, yogo sasawa bagalu kwele-hefaliyec monic mi aiibong.   
\c 10  
\s1 Angelo monic nga hibi kpadidiweicne  
\p
\v 1 Aime na \w angelo\w* tapiliineholec monic nganibe honocmengkacni wawec. Ye kaguwadi ebeckeicne. Aime hodocina hulilic ngiyewec. Nga haic-mesuine yogo wenac-dongeine ingucne ailu higekecine yeke bosing ingucne dac-ubilangkolec.\x - \xo 10:1 \xt Miye 5:2-3; Esek 1:26-28\x*  
\v 2 Ailu ye hibi kpisicne monic kpadidiweicne yogo biyac bafilameicne moleina balu domawec. Domalu hige foleine yogo kiwecka nga kanaine yogo himongka lowec.  
\v 3 Lolu laionti aukwecaigac, silicine ingucnehac dacineholec aukwewec.  
\p Aukweme gbululung 7 yenge mic ucnginengkolec yowa miibong.\x - \xo 10:3 \xt Mige 29\x*  
\v 4 Inguc mibong kwelengkenogale aibe, honocmengkacni mic-yowa monicti yanguc milu edocnume ngageiba, “Gbululung 7 yowa migaing yogo mi kwelengkec. Yogo ngage-ngagegona loengka fadaic.”\x - \xo 10:4 \xt Dan 12:4,9\x*   
\p
\v 5 Inguc mime angelo biyachac nganiiba, yedi kiwecka nga himongka domalu mole-foleine honocmengka haic bafangkewec.\x - \xo 10:5 \xt Yef 32:40; Dan 12:7\x*  
\v 6 Bafangkelu mimipang sanangne yanguc miwec, “Sugucne gagac nga gaginowagac, yedi mime sawa nga himong ailu kiwec nga yengele kwelinginang wiyac sasawa fagaing, yogo fikeyackeibong. Na yele wac wackelu yowane basanangkelu yanguc migabac, ‘Ye wangec hatacmac mi aidaicte.’  
\v 7 Wapongti kwelec kwekwefocine, yenge \w siduc-mimi ngicfocine|lemma="Siduc-mimi ngic"\w* gagaing, yenge yeicne ngage-ngage sangkeicne yogo biyachac mime yegengkeyelewec. Aime angelo 7 yedi kpeng fitonogale aidaicte, dameng yogowa ngage-ngage sangkeicne yogo noine fikeme motodaicte.”\x - \xo 10:7 \xt Amo 3:7\x*   
\p
\v 8 Aime molickelu mic-yowa honocmengkacni ngageiba, yedi hatacmac milu yanguc edocnuwec, “Ga lelu angelo kiwecka nga himongka domagac, yele molewacni hibi bafilameicne, yogo badamec.”  
\v 9 Inguc mime na angelola lelu hibi kpisicne bafilameicne yogo nelenale edoiba.  
\p Edobe yedi yanguc miwec, “Ga balu noc. Aime yogodi micgona begec misaine ingucne angacine aidaicte. Nga gobegona haumebac gobe hihi aigeledaicte.”\x - \xo 10:9 \xt Esek 2:8-3:3\x*   
\p
\v 10 Inguc mime na angelole molewacni hibi kpisicne bafilameicne yogo balu nobe micnabac begec misaine ingucne angacine aiwec. Nga gobena haumebac gobe hihi aineleme  
\v 11 yanguc edocnuibong, “Ga ngic-ngigac soc haicine monic-monic, nga himongne himongne, ailu yowane yowane, nga \w ngictau\w* bocyac yengela wiyac fikedaicte, yogolec Wapongte siduc-yowa\f + \fr 10:11 \ft Wapongte siduc-yowa yogo hibi kpisicne bafilameicne iwa fawec. Yowa yogo angacine nga gobe hihiineholec momoc aidaicte.\f* hatacmac midamec.”   
\c 11  
\s1 Ngic yaeckang yeki yowa miboc yegengkewec  
\p
\v 1 Aime monicti kpetele maa monic yogo kumicnang muc ingucne nelelu yanguc edocnuwec, “Ga fangkelu Wapongte \w Ibu-mac\w* nga \w alatale|lemma="Alata"\w* maa balu ngic-ngigac yogowa Wapong afeecaigaing, yengele dzalengineng momoc badamec.\x - \xo 11:1 \xt Esek 40:3; Sek 2:1-2\x*  
\v 2 Ailu Ibu-macte sobeng odaineholec fagac, yogo \w Israel yengele alingkacni miyac\w* yenge yeleicne. Ilec ailu ga sobeng yogolec maaine mi badamec. Yengi tamacne 42le kwelina taon gbagbacne\f + \fr 11:2 \ft Ibu-mac Yerusalem iwa domawecte taon gbagbacne wackeibong.\f* yogo edesockelu basowaledaingte.\x - \xo 11:2 \xt Luk 21:24; Miye 13:5\x*  
\v 3 Dameng iwahac na wideckecne tapili yetebe yeki kwele-sowacte ngakpi holelu hadeng 1 taosen 260le\f + \fr 11:3 \ft Hadeng 1 taosen 260 yogo tamacne 42 aigac. Nga tamacne 42 yogo hifa habackang nga nebocine aigac.\f* kwelina nale siduc-yowa midabiyecte.”  
\v 4 Yeke \w oliwa\w* yoc yaeckang, nga Sugucne himongtowa bafuwawec, yele haicka hifa higeineholec yaeckang ingucne domagabiyec.\x - \xo 11:4 \xt Sek 4:2-3,11-14; Miye 1:20; Yef 19:15\x*  
\v 5 Ngic gocne yengi yeke basowalecepanogale ngagedaingtewa, dacti yekele mickacni ofelu ngabafocnginec lobecebame homadaingte. Ailu hatacmac mibe, monicti yeke basowalecepanogale ngagedaictewa, ye inguc hocne homadaic.\x - \xo 11:5 \xt 2Sm 22:9; Mige 97:3\x*  
\v 6 Wideckecne yeke yowa-siduc milu gaboc sawawa wileng hedickeme mac monic mi kwedaicte, yeke bole-yowa yogo tapiliineholec balu gagaic. Ailu yeke yekuhuctihac miboc misadi hefaliyelu sac ainale bole-yowa tapiliineholec balu gagaic. Ailu yeke yekilec angacte doic haicine monic-monic himongka loyelenicte bole-yowa tapiliineholec ingucnehac balu gagaic.\x - \xo 11:6 \xt 1Ngt 17:1; Wah 7:17-20; 1Sm 4:8\x*   
\p
\v 7 Aime yeke fungine miboc yegengkeme edocebayackeboc motome, hudu-baba-sicti long sugucnebenang, yogolec kwelinacni ofelu yekeholec wenagulu yeke huduwa ewalicepalu wehomacepadaicte.\x - \xo 11:7 \xt Dan 7:7,21; Miye 12:17; 13:7; 17:8\x*  
\v 8 Wehomacepalu kponggbongnginec yogo taon yefeina locepame fadabiyecte. Taon sugucne yogolec wacine nangeng yowa holelu \w Sodom\w* nga \w Isip\w* micaigaing. Aime mac iwa hocne Sugucnenonggeng \w malicpongka webong|lemma="Malicpong"\w* homawec.\x - \xo 11:8 \xt Luk 13:34\x*  
\v 9 Aime hadeng habackang nga hadeng monic nebocine yogowa ngic-ngigac soc haicine monic-monic, nga himong fengnginang fengnginangsoc ngic-ngigac. Ailu yowane yowane nga himongne himongne ngic-ngigac yenge yekele kponggbong nganilu longepadaingkale, kpatalayeledaingte.\x - \xo 11:9 \xt Mige 79:2-3\x*  
\v 10 Kpatalayelebong ngic-ngigac himongte wiyacka wetackelu gagaing, yenge sasawadi angac nga kwele-madic ngagelu kwele-madicte woc-wiyac gocne lanagudaingte. \w Siduc-mimi ngic\w* yaeckang yeke ngic-ngigac yogo doicka locebaibocte inguc aiyetedaingte.   
\p
\v 11 Aime hadeng habackang nga hadeng monic nebocine motome, gagale \w asudi|lemma="Tili Asu"\w* Wapongtacni kwesilu yekela haume yeke hatacmac fangkelu domaiboc. Domaboc nganicepalu yenge damuebame hangoc sugucnehac aiibong.\x - \xo 11:11 \xt Esek 37:5,10\x*  
\v 12 Aime honocmengkacni yowa-malac monic yanguc edocepame ngageiboc, “Ngeke yawa ofenic!” Inguc mime ngabafocnginec yenge yeke nganicepabong kaguwa kwelina honocmengka feiboc.\x - \xo 11:12 \xt 2Ngt 2:11\x*   
\p
\v 13 Feiboc dameng iwahac memeya sugucnehac bame taon yogolec nebocine 10 iwacni nebocine moniyang siyeckewec. Memeya sugucne bawec, yogolec kwelinacni ngic-ngigac dzalengineng 7 taosen yenge homaibong. Homabong ngic-ngigac nebocine yenge hangocebame Wapong honocmengka gagac, yele wac bafeibong.\x - \xo 11:13 \xt Esek 38:19; Miye 6:12; 16:18; Dan 4:34\x*  
\v 14 Mee, yowale umac alecine yaeckang yogo motogac. Yanguc ngagedaing, yogolec lobeina, yowale umac moniyangti sugu fagac, yogo biyac fikedaicte.\x - \xo 11:14 \xt Miye 9:12\x*   
\s1 Angelo 7 yedi kpengine fitowec  
\p
\v 15 Aime \w angelo\w* 7 yedi kpeng fitome honocmengkacni yowa-malac sugucne yanguc miibong,  
\q1 “Yakumac Sugucnenonggeng nga \w Kristo\w* bawosaeicne, yeki himongtowale \w ngani-damong\w* yogo balu damongkelu gagaic.  
\q1 Ailu Sugucnenonggengti ngictau gagac ailu gaginowagac.”\x - \xo 11:15 \xt Wah 15:18; Mige 10:16; Dan 2:44; 7:14\x*   
\m
\v 16 Inguc mibong damong 24 Wapongte emewa ngictaule ngiye-ngiyenginang ngiyecaigaing, yenge ketadi holecnolu haicngineng heluluckelu Wapong afeeibong.  
\v 17 Afeelu yanguc miibong,  
\q1 “Sugucne Wapong Tapilitowa Fileine, nonge kwele-madic edocgugabeleng.  
\q1 Ga biyachac gaing, ailu ga yakumac gagichac.  
\q1 Gageicne tapilitowa balu yakumac ngictau bole balu gagic.   
\q1
\v 18 Ngic-ngigac himongne himongne gagaing, yenge aalic ngagebong, gale aalicte ameinele damengtibac yanguctihac kwesilu gagac.  
\q1 Gagi ngic-ngigac homaibong yenge wosaecebalu mimoctocebadamecte.  
\q1 Ailu kwelec kwekwefocgone yenge gale siduc-mimi ngic, gageicne bingec ngic-ngigacfocgone, sugucne nga kpisicnedi gale wacgone alang bagelecaigaing, yenge aibabanginengte ameine yeledamecte.  
\q1 Aime ngic-ngigac gocne yengi himongtowale ngic-ngigac nga wiyac sasawa basowalecaigaing, gagi yenge basowalecebadamecte.”\x - \xo 11:18 \xt Mige 110:5; Rom 2:5; Miye 20:11-13; Mige 115:13\x*   
\m
\v 19 Aime honocmengka Wapongte Ibu-mac nuine laliyeibong. Ailu yele \w dodoficte|lemma="Dodofic"\w* katapa dongenginengti nganiibong. Nganibong pilatac bame gbululung nga uc sugucnehac holeibong. Aime memeya bame mac hucine sanangkeicne yogo sugucnehac waibong.\f + \fr 11:19 \ft Himong mogungna mac hucine sawawa mogungkelu posa ingucne sanangkelu wacaigaing.\f*\x - \xo 11:19 \xt Hib 9:4; Miye 8:5; 15:5; 16:21\x*   
\c 12  
\s1 Ngigac nga hematowa  
\p
\v 1 Aime maa monic sugucnehac sawawa yanguc fikewec. Ngigac monic ngiyewec, ye wenacti ngakpi ingucne aicnowec. Nga higeinele bagewa tamacne ngiyewec. Aime hodocina asocmeng 12 yengi ngictaule \w duu\w* ingucne ngiyeibong.\x - \xo 12:1 \xt Fike 37:9-11\x*  
\v 2 Ye gobeholec, aime kogoc fikenale gado hime aukwewec.\x - \xo 12:2 \xt Mika 4:10\x*   
\p
\v 3 Aime maa monic sawawa fikewec. Hei, hematowa sasacne ingucne monic sugucnebenang ngiyewec. Ye hodocine 7 nga begicine 10. Ailu ye hodocina ngictaule \w duu\w* 7 holelu ngiyewec.\x - \xo 12:3 \xt Dan 7:7; Esek 29:3\x*  
\v 4 Ngiyelu ye gicinedi sawawale asocmeng habu sugucne yogowacni habackang heuckelu iwacni nebocine pelengkelu himongka wicebawec. Aime ngigac yogo kogoc banale aime hematowa ye kogoc yogo gbokenale ngagelu ngigac yele haicka domawec.\x - \xo 12:4 \xt Dan 8:10\x*  
\v 5 Domame ngigac ye madec monic bawec. Bame yele gboli yogo biyacbenang Wapongta balu feibong. Bafelu yele ngictaule ngiye-ngiyewa lobong fawec. Aime madec yogo, ye himongne himongne ngic-ngigac aen yasudi damongebadaicte.\x - \xo 12:5 \xt Yes 7:14; 66:7; Mige 2:9; Miye 19:15\x*  
\v 6 Aime ngigac ye himong kisiwa misaine mikacka hangoc hikewec. Hikeme yengi ye hadeng 1 taosen 260le kwelina noba-nosing lacnolu ngani-damong aicnodaingte. Wapongti yele mac ngiye-ngiye iwa biyachac bamockewec.   
\s1 Maikel nga hematowa  
\p
\v 7 Aime honocmengka hudu sugucne fikewec. Iwa yanguc fikewec, Maikel nga \w angelofocine|lemma="Angelo"\w* yenge hematowa yeholec wenagulu hematowa nga angelofocine yenge hudu ameine bafaliyeibong.\x - \xo 12:7 \xt Yud 9; Dan 12:1\x*  
\v 8 Ailu tapilingineng mikac aime yengi hatacmac honocmengka gagale sawaine monic mi fawec.\f + \fr 12:8 \ft Dan 2:35\f*  
\v 9 Aime hematowa ye hema esecne, yele wac monic Aleng Sugucnengineng nga \w Satang\w*, ye nga angelofocine wicebabong himongka waibong. Yedi himongtowawa ngic-ngigac sasawa kwesacka mengocebame yenge ye balaibecaigaing.\x - \xo 12:9 \xt Fike 3:1,14; Luk 10:18; 22:31; Miye 20:2\x*  
\v 10 Aime yowa-malac sugucne monic honocmengka yanguc mime ngageiba,  
\q1 “Wasecne ainogale dameng nga tapili ailu \w ngani-damong\w* yogolec fileine Wapong, yogo yakumac noine fikegac.  
\q1 Aime \w Kristo\w* bawosaewec, yedi yakumac yogolec bole-yowa tapiliineholec balu gagac.  
\q1 \w Ngic hae-gbafocnonggeng|lemma="ngic hae-gba"\w* yowawa locebacaigac, yedi Wapongnonggengte haicka deboc hadeng yowawa locebalu game ye biyachac honocmengkacni wickebong wawec.\x - \xo 12:10 \xt Yop 1:11; Sek 3:1\x*   
\q1
\v 11 Ngic hae-gbafocnonggeng yenge \w Lama madecinele|lemma="Lama"\w* sac nga Sugucnele yowa mibong yegengkewecte gbelong ailu Aleng Sugucnengineng huduwa ewaliibong.  
\q1 Ailu yengileng kwelenginengti gaganginengte ngagebong feicne mi aime homacte mi hangocebawec.   
\q1
\v 12 Honocmeng nga aling honocmengka gacaigaing, ngenge wiyac honocmengka fikewecte ailu beliyedaing.  
\q1 Aimebac, mee, himongka nga kiwecka gagaing, ngenge medecngebadaic.  
\q1 I yangucte, Aleng Sugucnengineng ye ngengela kwesigac.  
\q1 Ailu damengngine bangkaleme ngagegacte ailu kwele-dackolec aalickegac.”\x - \xo 12:12 \xt Yes 44:23; 49:13\x*   
\m
\v 13 Yenge hematowa himongka wickebong wawec, ye yogo ngani-motolu ngigac kogoc gobeelu madec bawec, ye yebiyewec.  
\v 14 Yebiyeme ngigac ye hemale haickacni hangoc hikelu himong kisiwa misaine mikacka hikenale aime, monicti ngigac yogo hikictowa kwegecine lacnome filalangkelu hikewec. Mac yogo yele mac ngiye-ngiye iwa biyachac bamockewec, yogowa hikewec. Ye iwa hifa 3 nga hifa monic nebocine dameng inguc ngiyeme yengi ye ngani-damong aicnolu nosing lacnodaingte.\x - \xo 12:14 \xt Dan 7:25; 12:7; Wah 19:4; Yef 32:10-12\x*  
\v 15 Lacnobong hemadi ye yebiyelu lumong ingucne banale micinacni misa mengume misa ingucne walu hikewec.  
\v 16 Hikeme himongti ngigac bafickelu micine angkeme, hematowadi misa micinacni mengume wame, himongti misa yogo gbokewec.  
\v 17 Gbokeme hematowa ye ngigac yele aalic ngagewec. Ngagelu hike ngigac yele adu-madecfocine Wapongte ung-yowa balaibelu gacaigaing, ailu \w Yesu\w* Kristole siduc yogo mibong yegengkeme balaibecaigaing, yenge hudu sugucnedi wecebanale hikewec.\x - \xo 12:17 \xt Miye 11:7\x*  
\v 18 Ailu ye kiwec mecina dingongka domawec.   
\c 13  
\s1 Hudu-baba-sic monic kiweckacni ofewec  
\p
\v 1 Aime nganibe kiweckacni hudu-baba-sic monic ofewec. Ye begicine 10 nga hodocine 7, aime begicine yogolec feina ngictaule \w duu\w* 10 ngiyeibong. Aime hodoc yogo yengele feinginang Wapong fecnogac, yogolec wac haicine monic-monic kwelengkeicne fawec.\x - \xo 13:1 \xt Miye 12:3; 17:3,7-12\x*  
\v 2 Aime sic yogolec socine yogo kate-ngiyaungtowale soc ingucne aiwec. Nga micine yogo laionte mic ingucne. Ailu higeine yogo beya ingucne fingacine dalicne.\fig Kate-ngiyaung, laion, nga beya yenge sugucne ailu sanangne. Yenge sic wehomalu nocaigaing|alt="leopard, bear, lion" src="Rev13-2.TIF" size="col" loc="13:1-2" copy="SIL" ref="13:2" \fig*  
\p Aime hematowa ye bole-yowa tapiliineholec ailu ngictaule ngiye-ngiyeine yogo ngic-ngigac bocyac damongebanale hudu-baba-sic bole-hibi yogo lacnowec.\x - \xo 13:2 \xt Dan 7:4-6\x*  
\v 3 Aime hudu-baba-sic yogo hodocine monic lofocineholec nganiiba. Hodocine yogo webong waictowaineholec ailu homaicne ingucne aiwec. Ailubac yogo wisiyewec. Aime himongne himongne ngic-ngigac bocyacti hudu-baba-sic yogo nganilu kwatackelu ye balaibeibong.\x - \xo 13:3 \xt Fike 3:15; Miye 17:8\x*  
\v 4 Balaibebong hematowa ye hudu-baba-sicti ngic-ngigac damongebanale bole-yowa tapiliineholec lacnowecte ailu hematowa afeeibong. Ailu yenge hudu-baba-sic momoc afeelu yanguc miibong, “Madi ye ingucne aidaicte? Ailu madi yeholec hudu nalic wedaicte?”   
\p
\v 5 Tapili lacnome ye kosa aukwelu Wapong misulec aicnowec. Aime tapili yogo lacnome, ye tamacne 42le kwelina Wapong ye ngagecno-ngiyeme ngic-ngigac damongebanale bole-yowa nga tapili balu gawec.\x - \xo 13:5 \xt Dan 7:8,25; 11:36; Miye 11:2\x*  
\v 6 Ailu ye micine angkelu Wapong misulec aicnolu Wapong wacine nga macine ailu aling honocmengka gagaing, yenge misulec aiyelewec.\x - \xo 13:6 \xt Dan 8:11\x*  
\v 7 Inguc aiyeleme Wapongti ngagecno-ngiyeme ye Wapongte bingec yengela hudu welu yenge huduwa ewalicebalu gbelong aidaicte. Ailu ye himong fengnginang fengnginangsoc ngic-ngigac, nga soc haicine monic-monic, ailu yowane yowane, nga himongne himongne ngic-ngigac, yenge damongebanale bole-yowa tapiliineholec lacnowec.\x - \xo 13:7 \xt Dan 7:23; Miye 11:7\x*  
\v 8 Inguc lacnome ngic-ngigac himongka gagaing, yengele wacngineng Gagale hibiwa mi fagac, yenge sasawa hudu-baba-sic afeedaingte. Gagale hibi yogo \w Lama madecine|lemma="Lama"\w* webong homawec, yele hibi. Ailu himong bafuwawec, dameng yogowa ngic-ngigacfocine wacngineng kwelengkeicne fawec.\x - \xo 13:8 \xt Dan 12:1-2; Mige 69:28; Miye 17:8; 20:12,15; 21:27\x*  
\v 9 Monic hedeckolec gagacti yowa yago aneng ngagedaic.   
\q1
\v 10 Monic balu muc-macka lonogale mibong, ye muc-macka hikedaic.  
\q1 Monic hudu-babale fitecti wehomanogale milu, ye webong homadaic.  
\m Ilec Wapongte bingec yenge tatakic mikac doickolec wangec galu ngage-ngagesingkolec gadabiyeng.\x - \xo 13:10 \xt Yer 15:2; 43:11; Miye 14:12\x*   
\s1 Hudu-baba-sic monic ye himongkacni ofewec  
\p
\v 11 Inguc aime nganibe hudu-baba-sic monic himongkacni ofewec. Ye begicine yaeckang, yogo lamale ingucne. Ailu hematowale yowa ingucne miwec.\x - \xo 13:11 \xt Dan 7:17; 8:3\x*  
\v 12 Inguc milu yedi hudu-baba-sic kiweckacni molickelu ofewec, ye bafickenale yele bole-yowa tapiliineholec sasawa balu gawec. Ailu himongka ngic-ngigac gagaing, yenge aiyeleme hudu-baba-sic kiweckacni ofewec, ye afeeibong. Ye biyac homawec, inguc ngageibong. Aimebac waicine biyachac wisiyewec.  
\v 13 Aime hudu-baba-sic himongkacni ofewec, yedi pasile maaine sugucnehac balu gawec. Monic yanguc fikewec, ngic-ngigac yengele haicka sawawacni dac himongka wawec.\x - \xo 13:13 \xt Mat 24:24; 1Ngt 18:24-39; Miye 19:20\x*  
\v 14 Ailu kiweckacni ofewec, ye bafickelu pasile maaine bawecte ailu ngic-ngigac himongka gagaing, yenge kwesacka mengocebame ye balaibelu gaibong. Ailu ngic-ngigac himongka gagaing, yenge edocebame hudu-baba-sic ye hudu-babale fitecti esecne biyachac webong homaicne ingucne gawec, yele iluc monic balu alang bacnoningte edocebawec.\x - \xo 13:14 \xt Dan 8:25; Yes 27:1\x*   
\p
\v 15 Babong hudu-baba-sic himongkacni ofewec, yedi hudu-baba-sic kiweckacni yele ilucine yogo asu lacnonale tapili lacnowec. Lacnome iluc yogodi yowa mimi aiwec. Aime ngic-ngigac sasawa yenge iluc yogo mi afeedaingte, yogo yenge wehomacebanale tapili balu gawec.  
\v 16 Balu game hudu-baba-sic himongkacni ofewec, yedi ngic-ngigac sasawa sugucne nga kpisicne, mafaholec nga mafa mikac, kwelec kwekwe ngic sugucnefocngineng yengele bagewa gagaing. Nga ngic-ngigac ngic monicte bagewa mi gagaing, yenge sasawadi maa monic mole-folenginang me meinginang balu ganingte yoingebalu yelewec.\x - \xo 13:16 \xt Miye 14:9-11; 16:2; 20:4\x*  
\v 17 Inguc aime ngic monicti hudu-baba-sic kiweckacni ofewec, yele wacine me dzalewa wacine, yogolec maaine mi balu gagacka, ye wiyac monic fuli nalic mi badaicte, me mi saledaicte.  
\v 18 Hudu-baba-sicte dzale yogo ngic monicte dzale, yogo 666. Aime monic ngage-ngageholecti wacinele dzale yogo wafelu maainele fungine ngage-motodaic.   
\c 14  
\s1 Lama madecine nga ngicfocine 144 taosen  
\p
\v 1 Hei, na \w Lama madecine|lemma="Lama"\w* nganibe ye \w Sion\w* tikiwa ngic 144 taosen yengeholec domawec. Ngic domaibong, yenge Lama madecinele wac nga Mamacinele wac yengele meiwa kwelengkeicnedi domaibong.  
\v 2 Aime honocmengkacni uc monic misa dundung sugucne yele uc ingucne aiwec. Yogo gbululung sugucnehac holecaigacte uc ingucne ngageiba. Ailu yogo gita wewe ngic yengi gita mucngineng homacne webong ucine fikecaigac, yogo ingucne ngageiba.\x - \xo 14:2 \xt Miye 1:15; 19:6\x*  
\v 3 Aime ngictaule ngiye-ngiyewa nga wiyac gaganginengkolec 4 ailu damong yengele haicka domalu gee gbolicne monic holeibong. Holebong ngic 144 taosen himongkacni biyachac fuli bacebaicne, yenge sugudi gee yogo nalic ngagelu holedaingte.\x - \xo 14:3 \xt Yes 35:10; 42:10; Miye 5:9; 7:4\x*  
\v 4 Ngic yogo yenge ngigac yengeholec monic mi faicne. Ailu wonongngineng mikac gbagbacnebenang gaibong. Yenge Lama madecinedi mac wenuwa hikecaigac, iwa ye balaibecaigaing. Lama madecinedi himongte ngic-ngigac yengele hewackacni fuli bacebame yenge Wapong nga yeicne molic-molic alingfocine aiibong.  
\v 5 Ailu yenge micnginengti yowa kwesacine monic mi miibong, yenge gbagbacne nga sowacnengineng mikac gaibong.   
\s1 Angelo habackang  
\p
\v 6 Na \w angelo\w* monic nganiiba, ye sawa hewacka falockelu hikewec. Hikelu \w Siduc Madicne\w* fafeginowagac, yogo ngic-ngigac himongka gagaing, yenge milu edocebame yegengkenale balu gagac. Bagalu himongne himongne ngic-ngigac, nga himong fengnginang fengnginangsoc ngic-ngigac, ailu yowane yowane, nga soc haicine monic-monic, yengela  
\v 7 yowa sugucnehac wackelu edocebalu yanguc miwec, “Ngenge Wapongte hangocngebame alang bacnolu wacine bafedabiyeng. Wapong ye ngengele aibaba wosaelu mimoctodaicte, yogolec dameng biyac bangkale welegacte ngenge sawa nga himong ailu kiwec nga misa dongeine bafuwacebawec, ye afeedaing.”   
\p
\v 8 Inguc mime angelo 2 yedi ye balaibe welelu yanguc miwec, “\w Babilon\w* taontowa\f + \fr 14:8 \ft Taon yogolec ngic-ngigac yenge habu moniyang gaibongte ailu ngigac monic ingucne “ye” kwelengkewec.\f* ye waweicne hocne, Babilon yogo biyac waweicne fagac. Yedi hocne selo-boic aibabaine angacineholec, yogo \w waing\w* misa ingucne himongne himongne ngic-ngigac sasawa gumecebame nowackeibong.”\x - \xo 14:8 \xt Yes 21:9; Dan 4:30; Yer 51:7,8; Miye 17:2; 18:2,3\x*   
\p
\v 9 Inguc mime angelo 3 yedi yeke balaibecepalu kwesilu yowa-malac sugucnehac yanguc miwec, “Monic ye hudu-baba-sic nga ilucine afeecaigac, ailu yele maa yeicne meiwa me moleina balu gagacka,\x - \xo 14:9 \xt Miye 13:12-17\x*  
\v 10 ye yeicne Wapongte kwele-dacte waing misa nodaicte. Waing yogo sanangnebenang misaholec mi lalickeicne, ye aalicte kwenocte kap iwa sotingkeme hauicne ngiyegac. Aime Wapong yeicne angelofocine ailu Lama madecine, yengele haicka dac nga \w salfa-posa\w* ubilangineholec yogolec kwelina doictowa ngagedaicte.\x - \xo 14:10 \xt Fike 19:24; Mige 75:8; Yes 51:17,22; Yer 25:15-16; Esek 38:22; Miye 16:19; 20:10; 21:8\x*  
\v 11 Aime ngic-ngigac hudu-baba-sic nga ilucine ketadi holecnolu afeelu gaibong. Ailu yele wacte maa baibong. Ngic-ngigac yogo yenge dacka doictowa ngagebong yogolec hasocti damengsoc moto-motoine mikac ofelu hasocebalu game yenge deboc hadeng kwele-mogung monic mi bafuwadaingte.”\x - \xo 14:11 \xt Yes 34:10\x*  
\v 12 Inguc aime Wapongte bingec yenge Wapongte ung-yowa balaibelu \w Yesu\w* ngagesingkelu gagaing, yenge tatakic mikac sanangne gadabiyeng.\x - \xo 14:12 \xt Miye 13:10\x*   
\p
\v 13 Aime honocmengkacni yowa-malac monic yanguc fikelu edocnuwec, “Ga hibiwa yanguc kwelengkec, ‘Yakumacbac molickelu ngic-ngigac Sugucneholec wetackelu homagaing, yenge kwele-angackolec.’ ”  
\p Inguc mime \w Asudi|lemma="Asu"\w* yanguc miwec, “Oc, aibabangineng madicne ngagesilu bacebame yenge doic-bolewacni ngiye-ngagedaingte.”   
\s1 Himongtowawa noine babale dameng  
\p
\v 14 Hei, na kaguwa monic kwalac-kwalac nganiiba. Nganibe yogolec feina ngic monic silicine \w ngicte madec\w* ingucne ngiyewec. Ye hodocina ngictaule \w duu\w* monic goldi baicne holelu moleina noine-wewele fitec monic micineholec balu ngiyewec.\x - \xo 14:14 \xt Dan 7:13\x*  
\v 15 Balu ngiyeme angelo monicti \w Ibu-mackacni|lemma="Ibu-mac"\w* walu ngic kaguwa feina ngiyewec, ye sugucnehac wackelu yanguc edowec, “Himongte nosing noine houweme wewele dameng biyac kwesigacte ailu, ga noine-wewele fitecgonedi balu noine welu banong.”  
\v 16 Inguc mime ngic kaguwa feina ngiyewec, yedi noine-wewele fitecinedi himongka ngosockelu himongte nosing noine welu bawec.   
\p
\v 17 Weme angelo monic honocmengte Ibu-mackacni wawec, ye inguchac noine-wewele fitec monic micineholec balu ngiyewec.  
\v 18 Aime angelo monic ye dac damongkenale bole-yowa nga tapili balu gawec, yedi \w alatawacni|lemma="Alata"\w* kwesiwec. Kwesilu yowa-malac sugucnehac wackelu angelo monic noine-wewele fitec micineholec balu ngiyewec, ye yanguc edowec, “Himongka \w waing noine|lemma="waing"\w* biyac houweyackegac. Ilec ga noine-wewele fitecgone micineholecti waing noine welockelu kpaduckeyackec.”\x - \xo 14:18 \xt Yol 3:13\x*   
\p
\v 19 Wackeme angelo yogodi noine-wewele fitecinedi himongka ngosockelu himongte waing noine helockelu kpaducebalu Wapongte kwele-dacte \w waing hesoc-hesocte|lemma="Waing"\w* posatowa sugucna wicebame faibong.  
\v 20 Fabong waing hesoc-hesocte posatowa taon lobina domawecti hesocebawec. Aime waing hesoc-hesocte posatowa iwacni sac walu sugulelu fangkewec, yogo becosic yengele ube oiyalu fame himong 300 kilomitalesoc hikelu wakewec.\f + \fr 14:20 \ft 300 kilomita yogo Finschhafenkocni hikegacgu Goroka, dalicne yogolecsoc. Ye stadia 1 taosen 600 kwelengkewec. Stadia moniyang yogo 185 mita ingucne aigac.\f*\x - \xo 14:20 \xt Yes 63:2-3; Miye 19:15\x*   
\c 15  
\s1 Angelo 7 peleholec  
\p
\v 1 Na honocmengka maa monic feicne damuineholec fikeme nganiiba. Nganibe \w angelo\w* 7 yenge doic 7 moto-motoine balu domaibong. Doic 7 yogo fikeemewa Wapongte kwele-dac motoyackedaicte.  
\v 2 Na wiyac monic kiwec ingucne galasdi baicne dackolec lalickeicne ingucne nganiiba. Nganibe ngic-ngigac yenge hudu-baba-sic nga ilucine ailu dzalewa wacine alang mi bacnolu huduwa ewalicebalu gbelong aiibong, yenge nganicebaiba. Yenge Wapongti gita mucine homacne biyachac yelewec, yogo kiwec feina balu domaibong.  
\v 3 Ailu yenge Wapongte kwelec kwekwe ngic \w Moses\w* nga \w Lama madecine|lemma="Lama"\w*, yekele gee yanguc milu holeibong,  
\q1 “Sugucne Wapong Tapilitowa Fileine, aibabagone yogo feicne nga damuineholec.  
\q1 Ailu ga himongne himongne yengele \w ngictau\w*. Gale yefe yogo dondonne nga noine.\x - \xo 15:3 \xt Yef 32:4; Wah 15:1; Mige 139:14; 145:17\x*   
\q1
\v 4 Sugucne ga sugu gbagbacne. Ilec ailu madi mi hangockeme wacgone mi bafedaicte?  
\q1 Ailu gale pasi dondonne yogo yegena fikewecte ailu, himongne himongne ngic-ngigac sasawa yenge kwesilu gale haicka ketadi holelu afegudaingte.”\x - \xo 15:4 \xt Yer 10:6-7; Mige 86:9-10; 98:2\x*   
\m
\v 5 Inguc holebong motome nganibe honocmengka Wapongte \w Ibu-macka|lemma="Ibu-mac"\w* dodofic katapale \w kpoluc-fale\w* yogolec nuine laliyeibong.\x - \xo 15:5 \xt Wah 38:21\x*  
\v 6 Laliyebong angelo 7 yenge doic 7 balu domaibong, yenge ngakpi-kpoluc kwalacne kpoluc madicnebenang yogo angocineholec holelu umbika goldi baicne yogodi mondacngineng hefelu Ibu-mackacni waibong.  
\v 7 Wabong wiyac gaganginengkolec 4 yengelacni monicti angelo 7 yenge pele 7 yelewec. Pele yogo goldi baicne ailu Wapong gagac nga gaginowagac, yele kwele-dacti iwa wakeicne fawec.\x - \xo 15:7 \xt Yes 51:17,22\x*  
\v 8 Fame Wapongte hibi-angoc nga tapili, yogolec hasocti Ibu-mac kweline wakewec. Dameng iwa monicti Ibu-mac yogolec kwelina nalic mi fedaicte. Aime angelo 7 yengele doic 7 yogo sasawa motoyackeme Ibu-macka hatacmac fedaingte.\x - \xo 15:8 \xt Esek 10:2-4; 1Ngt 8:10-11; 2Ngsi 5:13-14; Yes 6:4\x*   
\c 16  
\s1 Wapong kwele-dacinele pele  
\p
\v 1 Na \w Ibu-mackacni|lemma="Ibu-mac"\w* yowa-malac monic sugucnehac ngagebe yedi \w angelo\w* 7 yanguc edocebawec, “Ngenge hikelu Wapongte kwele-dacti pele 7 wakeicne yogo himongka sotingkebong hauna.”\x - \xo 16:1 \xt Yes 66:6; Yer 10:25; Esek 14:19\x*  
\v 2 Inguc mime angelo molic-molic yedi hikelu pele yogo sotingkeme himongka hauwec. Haume ngic-ngigac hudu-baba-sicte maaine balu gaibong, nga ilucine afeelu gaibong, yenge waic-sanang sowacne doicineholecti fikeyelewec.\x - \xo 16:2 \xt Wah 9:10; Miye 13:12-17\x*   
\p
\v 3 Aime angelo 2 yedi pele sotingkeme kiwecka hauwec. Haume kiwec hefaliyelu ngic homaicnele sac ingucne aiwec. Aime wiyac sasawa gaganginengkolec kiwecka gaibong, yogo homayackeibong.\x - \xo 16:3 \xt Wah 7:17-21\x*   
\p
\v 4 Homabong angelo 3 yedi pele sotingkeme misa sugucna nga misa dongeina haume misa yogo sasawadi sac aiyackeibong.  
\v 5 Aime angelo 3 ye misa fileine aigac, yedi ngagebe yanguc miwec,  
\q1 “Sugucne gbagbacne fileine, ga biyachac gaing ailu yakumac gagic.  
\q1 Ga pasigone yogo dondonne.  
\q1 Ailu wiyac sasawa yago yowawa locebaing.   
\q1
\v 6 I yangucte, wiyac yogo yengi geicne bingec ngic-ngigacfocgone nga \w siduc-mimi ngic\w* wecebabong yengele sac sotingkelu wawec.  
\q1 Ilec ailu gagi sac misawacni noningte gumecebaengka nobong amengineng yogo dondonne aigac.”\x - \xo 16:6 \xt Yes 49:26; Mige 79:3\x*   
\m
\v 7 Inguc mime ngagebe \w alatadi|lemma="Alata"\w* yanguc miwec,  
\q1 “Oc, Sugucne Wapong Tapilitowa Fileine, ga ngic-ngigac wosaecebalu yefe dondonna nga noina balaibelu aibabangineng mimoctocaigic.”\x - \xo 16:7 \xt Yef 32:4; Mige 19:9; Miye 15:3\x*   
\p
\v 8 Aime angelo 4 yedi pele sotingkeme wenacte feiwa haume wenac ye dacineholec ailu ngic-ngigac lobecebanale tapili bawec.  
\v 9 Balu dacine sugucnehacbenang ailu lobecebawec. Aime sifu ngic-ngigac yenge \w kwelengineng mi hefaliyeibong|lemma="Kwele-hefaliyec"\w*. Yenge doic 7 yogolec fileine Wapong, yele wac feicne mi bafelu misulec aicnoibong.\x - \xo 16:9 \xt Miye 9:20-21\x*   
\p
\v 10 Aime angelo 5 yedi pele sotingkeme hudu-baba-sicte mac ngictaule ngiye-ngiyewa haume yele \w ngani-damong\w* yogo kundung kwewec. Ailu ngic-ngigac yenge doic sugucnehac ngageibongte ailu mamang hiduibong.\x - \xo 16:10 \xt Wah 10:22; Yes 8:21-22; Mige 79:5,10\x*  
\v 11 Ailu yenge doic nga waic socnginang fikewec. Yogolec ailu honocmengte Wapong misulec aicnoibong. Ailu aibabangineng yogolec kwelengineng mi hefaliyeibong.   
\p
\v 12 Aime angelo 6 yedi pele sotingkeme Yufretis misa sugucna hauwec. Haume \w ngictau\w* wenac ofe-ofeinacni yengele yefe fikenale misa yogo dikewec.\x - \xo 16:12 \xt Fike 15:18; Yes 11:15\x*  
\v 13 Dikeme nganibe hematowa nga hudu-baba-sic ailu \w siduc-mimi ngic\w* kwesacine,\f + \fr 16:13 \ft Hudu-baba-sic himongkacni ofewec, yele siduc yogo Miyegengkeicne 13:11-15 iwa fagac. Yedi hocne siduc-mimi ngic kwesacine aigac. Miyegengkeicne 19:20 iwa yegena aidaicte. Ye hudu-baba-sic molickelu kiweckacni ofewec, ye bafickecaigac.\f* yengele mickacni asu habackang silicngineng wabolac ingucne wonongnginengkolecti ofelu waibong.\x - \xo 16:13 \xt Wah 8:3-7; Sek 12:3-4\x*   
\p
\v 14 Asu yogo yenge \w aleng\w* sowacnebenang. Ailu pasile maaine bacaigaing. Wapong Tapilitowa Fileine, yedi ngic-ngigac wosaecebanale bole badaicte. Dameng yogolec ailu aleng yenge himong sasawale ngictau yengela hikelu Wapongkolec hudu weningte kpaducebaibong.\x - \xo 16:14 \xt Miye 19:19\x*   
\p
\v 15 Aime monicti miwec,  
\q1 \wj “Ngagegaing, na hise-baba ngic ingucne kwesidacte. Kwesibe monic ye deboc-gboli galu ngakpi-kpolucine damongkelu game ngic-ngigac yengi senggangngine mi nganidaingte. Aime mi gameedaicte, ngic ingucne ye kwele-angackolec.”\wj*\x - \xo 16:15 \xt Mat 24:43-44; Miye 3:3\x*   
\p
\v 16 Aime aleng yengi himong monic \w Hibru yowawa|lemma="Hibru"\w* wacine Amagedon, iwa ngictau kpaducebaibong.\x - \xo 16:16 \xt Sek 12:11\x*   
\p
\v 17 Kpaducebabong angelo 7 yedi pele sotingkeme sawawa haume Ibu-mackacni yowa-malac sugucnehac ngictaule ngiye-ngiyewacni welelu miwec, “Wapongte kwele-dac biyac miyac aigac.”  
\v 18 Inguc mime pilatac bame gbululung holeme uc fikewec, aime memeya sugucnehac bawec. Aime ngic-ngigac himongka esecne gaibong, dameng iwa memeya sugucnehac nga feicnebenang ingucne monic mi bawec.\x - \xo 16:18 \xt Wah 19:16-18; Dan 12:1-2; Miye 4:5; 8:5\x*  
\v 19 Memeya balu \w Babilon\w* taon sugucne bauckeme habackang aiwec. Ailu himongne himongne ngic-ngigac yengele taon bocyac sowaleibong. Sowalebong Wapongti Babilon taonte ngic-ngigac yengele ngagesilu kwenocte kap iwa kwele-dacte \w waing\w* aalicineholec yogo yelewec.\x - \xo 16:19 \xt Miye 14:10\x*  
\v 20 Aime nuc sasawa yenge hikelu sangkeyackeibong. Aime ngic-ngigac yenge tiki basackelu monic mi nganiibong.\x - \xo 16:20 \xt Miye 6:14\x*  
\v 21 Aime sawawacni mac hucine sanangkeicnedi walu ngic-ngigac feinginang holeme yenge doic sugucnehac ngageibong. Mac hucine moniyang moniyangte umacine yogo 40 kilo-lesoc aiwec. Aime ngic-ngigac yenge doic sugucnebenang ngagelu Wapong misulec aicnoibong.\x - \xo 16:21 \xt Wah 9:23-24; Esek 38:19-22; Miye 11:19\x*   
\c 17  
\s1 Yefe-ngigacti ameine bawec  
\p
\v 1 \w Angelo\w* 7 yenge pele 7 balu gaibong, yengelacni monicti nala kwesilu naholec yowa mingagec ailu yanguc miwec, “Yefe-ngigac sugucne ye misa bocyac yengele feinginang ngiyegac, Wapongti aibabainele ameine lacnodaicte. Ga weleng yogo edalicgudacte.\x - \xo 17:1 \xt Yer 51:12-13\x*  
\v 2 Himongte \w ngictau\w* yenge yeholec selo-boic aibaba aiibong. Aime yele selo-boic aibabale \w waing\w* misadi ngic-ngigac himongka gagaing, yengele kwele nga ngage-ngage bame sifuweicne.”\x - \xo 17:2 \xt Yes 23:17; Yer 51:7; Miye 14:8\x*   
\p
\v 3 Aime angelodi \w Asule|lemma="Asu"\w* tapiliwa bacnume himong kisiwa misaine mikacka hikeiba. Hikelu nganibe ngigac ye hudu-baba-sic monic sasacne, yele feiwa ngiyewec. Aime hudu-baba-sic ye hodocine 7 nga begicine 10. Ailu ye socine sasawa yogo Wapong fecnogac, wac ingucnedi wakeyackeicne.\x - \xo 17:3 \xt Yes 21:1-2; Miye 13:1\x*  
\v 4 Ngigac yogo ye ngakpi-kpolucine mondo-sasac nga giweng, ailu gol nga posa basufaleicne, ailu kwanang fuline sugucnehac latac-latacine holelu ngiyewec. Ailu ye kwenocte kap monic goldi baicne, iwa selo-boic aibabaine wonongkolec nga wiyac sowacnebenang memenguinedi wakeyackeicne yogo moleina balu ngiyewec.\x - \xo 17:4 \xt Yer 51:7-8; Miye 18:16\x*  
\v 5 Ailu yele meiwa wac monic sangkeicne yogo kwelengkeicne fawec. Wac yogo yanguc, \w Babilon\w* taon sugucne yogo wiyac sowacnebenang memenguinedi fikelu himongte yefe-ngigac yengele nenggacngineng aigac.\x - \xo 17:5 \xt Dan 4:9,30\x*   
\p
\v 6 Aime ngigac nganiiba, yedi Wapongte bingec yenge \w Yesule|lemma="Yesu"\w* yowa-siduc mibong yegengkewec, yenge wehomacebaibong, yengele sac nolu kweleine sifuwewec. Aime na ye nganilu kwatatacke-benangkeiba.\x - \xo 17:6 \xt Dan 4:17; Miye 18:24; 19:2\x*  
\v 7 Kwatackebe angelodi yanguc edocnuwec, “Ga omale kwatackegic? Na ngigac nga hudu-baba-sic hodocine 7 ailu begicine 10 yedi ngigac yogo atickelu gacaigac, yekele ngage-ngage sangkeicnele fungine yogo edocgudacte.\x - \xo 17:7 \xt Miye 13:1\x*  
\v 8 Ga hudu-baba-sic nganigic ye biyachac gawec nga yakumac mi gagac. Ye long sugucnebenang iwacni ofedaicte. Ailu ye sowalenale hikedaicte. Aime ngic-ngigac himongka gagaing, yengele wacngineng Gagale hibiwa mi kwelengkeicne fawec, yogo Wapongti himong bafuwawec, iwacni fike-ofewec. Yenge hudu-baba-sic esecne biyachac gawec, nga yakumac mi gagac, ailu kwesilu gadaicte, aimebac yenge nganilu kwatackedaingte.\x - \xo 17:8 \xt Dan 12:1; Miye 11:7; 13:7\x*   
\p
\v 9 “Ngage-ngage-motoc nga ngage-ngage ileckeicne yanguc balu ganoga. Hodoc 7 yogo tiki 7 aigac. Aime ngigac yedi tiki yogo yengele feinginang ngiyegac.\x - \xo 17:9 \xt Dan 12:10\x*  
\v 10 Aime hodoc yogo yenge inguchac ngictau 7. Yengelacni 5 yenge biyachac waweibong. Aime moniyangtibac ngiyegac. Nga monic yebac mi kwesigachac. Ye kwesilubac dameng kpisicnemac ngiyedaicte.  
\v 11 Hudu-baba-sic biyachac gawec nga yakumac mi gagac, ye inguchac ngictau yogo yengela taockeme dzalengineng 8 aigaing. Ailu agongineng monic ye hocne 7 yengela taockelu sowalenale hikedaicte.   
\p
\v 12 “Begicine 10 nganigic, yogo ngictau 10 himongte \w ngani-damongngineng|lemma="Ngani-damong"\w* mi baibonghac, yengebac dameng moniyangtesoc inguc hudu-baba-sickolec ngictau bole banogale bole-yowa tapiliineholec badaingte.\x - \xo 17:12 \xt Dan 7:7,24\x*  
\v 13 Yenge ngage-ngage moniyang sugu bagalu bole-yowa tapilinginengkolec yogo hudu-baba-sic lacnobong yedi tapili yogo balu gadaicte.  
\v 14 Aime yenge \w Lama madecineholec|lemma="Lama"\w* wenagulu yedi huduwa ewalicebalu gbelong aidaicte. I yangucte, Lama madecine ye sugucne yengele Sugucne, nga ngictau yengele Ngictau. Aime ngic-ngigac biyachac bawosaecebalu wacebawec, yenge Lama madecinele yowa balaibecaigaing, yenge yeholec gadaingte.”\x - \xo 17:14 \xt Dan 7:21\x*   
\p
\v 15 Aime angelodi yanguc edocnuwec, “Ngic-ngigac soc haicine monic-monic, nga habutowa, ailu himongne himongne ngic-ngigac, nga yowane yowane ngic-ngigac, yenge misa bocyac ingucne. Yogo nganime yefe-ngigacti yengele feinginang ngiyewec.  
\v 16 Ga hudu-baba-sicte begic 10 nganiing, yogo yenge hudu-baba-sickolec wetackelu yefe-ngigac lobe holecnolu wiyacine badaingte. Aime ye mocbenang senggang ngiyedaicte. Ngiyeme yenge ngigac yele biuc nolu yeicne wickebong dacti lobedaicte.\x - \xo 17:16 \xt Esek 23:25-29; Miye 18:8\x*  
\v 17 Wapongti kwelenginang ngage-ngage yogo yelewecte, yenge ngage-ngage moniyang ailu ngictau bolele tapilingineng yogo hudu-baba-sic lacnodaingte. Lacnolu yenge hudu-baba-sicte yowa balaibe galu Wapongti yowa biyachac ngageme faweckasoc balaibelu bole aling sasawa bagacgubong Wapongte ngage-ngage fawec, yogo motodaicte.  
\v 18 Aime ngigac nganiing yogo, ye taontowa sugucnele soc holeibong. Taon yogo himongte ngictau yengele damong ailu ye ngictau bolele tapili balu gagac.”   
\c 18  
\s1 Babilon sugucne  
\p
\v 1 Yogolec lobeina nganibe \w angelo\w* monic bole-yowa tapilitowaineholec balu ngiyewec, ye honocmengkacni wame yele hibi-angocti himong bame angolewec.\x - \xo 18:1 \xt Esek 43:2\x*  
\v 2 Angoleme yowa-malactowaine tapiliineholecti yanguc wackewec,  
\q1 “\w Babilon\w*\f + \fr 18:2 \ft Fengngine iwa Babilonte siduc fagac. Ilec taon yogolec ngic-ngigac yenge habu moniyang gaibongte ailu ngigac ingucne “ye” nga “ga” kwelengkewec.\f* taontowa ye waweicne hocne, Babilon yogo biyac waweicne fagac.  
\q1 Waweme \w aleng\w* yengele mac-himong nga \w aleng wonongnginengkolec|lemma="Aleng wonongkolec"\w* sasawa ailu nango sic sasawa sowacnebenang wonongnginengkolec, yengele mac-himong aiwec fagac.\x - \xo 18:2 \xt Miye 14:8; Yes 13:21; 21:9; 34:10-14; Yer 50:39; 51:9\x*   
\q1
\v 3 Yele selo-boic aibabaine yogo angacineholec \w waing\w* misa ingucne himongne himongne ngic-ngigac sasawa yengi noibong.  
\q1 Himongte \w ngictau\w* yenge yeholec selo-boic aibaba aiibong.  
\q1 Ailu Babilon yele tapili nga mafatowainele angacte ailu himongte ngic-ngigac yenge woc-wiyac salecaigaing, yenge mafatowanginengkolec aiibong.”   
\m
\v 4 Aime ngagebe honocmengkacni yowa-malac monic yanguc miwec,  
\q1 “Ngic-ngigacfocne, ngenge yeholec \w bikickolec|lemma="Bikic"\w* mi ainingte, nga bikicte ameinele doic yeholec mi ngageningte ngenge ye hegilelu hikening.\x - \xo 18:4 \xt Yes 48:20; Yer 50:8; 51:6,45; 2Kor 6:17\x*   
\q1
\v 5 Ye bikic yogo balu kpaduckelu hole feme honocmengka fegac. Aime Wapong ye aibaba sowacne yogo ngagesilu gagac.\x - \xo 18:5 \xt Fike 11:5-9; 18:20-21; Yer 51:9\x*   
\q1
\v 6 Aime yedi aibabaine sowacne aingelewec, yogolec ameine inguchac bafaliyecnolu aibabaine aingelewec ingucnehac feicnehac ailu lacnodaing.  
\q1 Aime ye pele kwelina misa kweme haume lalickelu yelewec, iwa oma wiyacti ngiyewec, yogo ngagelu ngengi feicnehac lalickecnolu lacnodaing.\x - \xo 18:6 \xt Mige 137:8; Yer 50:15,29; 2Tim 1:6\x*   
\q1
\v 7 Inguc aime ye yeicne socine bafelu mafa nga gaga angacineholec balu gawec, yogolec silicina doic nga kwele-sowac lacnodaing.  
\q1 I yangucte, ye kweleina yanguc ngagecaigac, ‘Na hosec miyac, na ngigac-tau.  
\q1 Ilec kwele-sowac nalic mi ngagedacte.’\x - \xo 18:7 \xt Yes 47:7-9\x*   
\q1
\v 8 Ilec ailu hadeng moniyangte kwelina homac nga kwele-sowac ailu nosingte lolocti molickecnome yele feiwa doic ingucne fikeme ngigac ye dacti lobedaicte.  
\q1 I yangucte, Sugucne Wapong ye tapiliineholecti, yele pasi wosaelu sowacnele ameine mimoctodaicte.”\x - \xo 18:8 \xt Miye 17:16\x*   
\m
\v 9 “Aime himongte ngictau yenge ngigac yeholec selo-boic aibaba aiibong. Ailu mafa nga gaga angacineholec balu gaibong. Ngictau yogo yenge dac yogolec hasocine nganilu yele hisonggong nga kwele-sowac ngagedaingte.\x - \xo 18:9 \xt Esek 26:16-18; 27:30-35\x*  
\v 10 Yenge yele doicte hangocebame dalickabenang domalu yanguc midaingte,  
\q1 ‘Ga dameng bangkacnele kwelina molickelu yowawa locguwecte ameine biyac welegac.  
\q1 Ilec ailu, Babilon, ga taon sugucne nga tapiligoneholec, gale kwele-sowac sugucnehac aigelegabeleng.’   
\m
\v 11 Aime himongte ngic-ngigac yenge woc-wiyac salecaigaing, yogo monicti mafangineng hatacmac fuli mi badaicte. Ilec yele ailu hisonggong nga kwele-sowac ngagedaingte.\x - \xo 18:11 \xt Esek 27:36\x*  
\v 12 Mafa gocne, yogo gol nga siliwa ailu posa basufaleicne, ailu kwanang fuline sugucnehac. Ailu \w kpoluc hodocineholec madicnebenang|lemma="Kpoluc madicnebenang"\w* hibine mondo-sasac nga giweng, ailu siliga ingucne madicne. Aime yoc sasawa hoine madicne ailu wiyac sasawa elefante begicti baicne, \fig Elefan nga begicine yogo sugucnebenang|alt="elephant and his tusks are very big" src="67_Rev18.12_DH-ElephantTusks.tif" size="col" loc="18:10-13" copy="Gordon Thompson © 2012 Wycliffe Bible Translators Inc." ref="18:12" \fig*ailu wiyac haicine monic-monic yoc sanangne fuline sugucnehacti baicne. Ailu kopadi nga aenti baicne, ailu posa basufaleicne ailu hibine madicne wiyac sasawa yogodi baicne.\x - \xo 18:12 \xt Esek 27:12,13,22\x*  
\v 13 Yogo wiyac monic mosoi yoc ingucne nga gime-aniyang wiyac ingucne ailu wiyac hasoc hoine madicneholec nga tokic hoine madicne. Nga yoc misainedi baicne yogo hasoc hoine madicne, ailu waing misa nga oliwa helocine, ailu flawa madicne nga wit hucine.\f + \fr 18:13 \ft Mosoi yoc ingucne yogo wacine sinamon, yogo nosing gocna lobong angacineholec aidaicte. Tokic wacine yogo mira, nga yoc misaine wacine yogo frangkinsens.\f* Bulumaka nga \w lama\w* ailu becosic nga keleta. Aime ngic-ngigac bacebabong kwelec kwekwe gaibong, yenge yogo mafa ingucne salecebanogale bacebaibong.   
\p
\v 14 “Ilec ailu ngic-ngigac woc-wiyac salecaigaing, yenge yanguc midaingte, ‘Gale soc-kwelegonedi wiyac noinele aicnolu gawec, yogo hegilecguwec. Aime wiyac sasawa madicne hibi-angocineholec, yogo galacni biyac hikeyackewec. Aime wiyac ingucnehac hatacmac mi bafuwadamecte.’   
\p
\v 15 “Inguc aime ngic-ngigac yenge woc-wiyac salecaigaing, yenge yefe-ngigacti baficebalu wiyac sasawa yago yelacni fuli balu mafatowanginengkolec aiibong. Yenge yele doicte hangocebame dalickabenang domalu hisonggong nga kwele-sowac ngagedaingte.\x - \xo 18:15 \xt Esek 27:31,36\x*  
\v 16 Ailu yanguc midaingte,  
\q1 ‘Taontowa, gale kwele-sowac sugucnehac aigelegabeleng.  
\q1 Ga ngakpi-kpoluc madicnebenang mondo-sasac nga giweng, ailu gol nga posa basufaleicne fuline sugucnehac, ailu kwanang fuline sugucnehac, yogodi loicne inguc fawec.\x - \xo 18:16 \xt Miye 17:4\x*   
\q1
\v 17 Yogo dameng bangkacnele kwelina mafatowa sasawa dacti lobeyackeme miyac aiyackewec.’  
\m Ailu wage bacaigaing damong sasawa nga yengele bagewa galu wagewa bole bacaigaing, ailu kiwecka hike-kwesic aicaigaing. Ailu ngic-ngigac sasawa kiwecka sic bacaigaing, yenge sasawa dalicka domadaingte.\x - \xo 18:17 \xt Yes 23:14; Esek 27:27-29\x*  
\v 18 Domabong ye dacti lobeme hasocine nganilu yanguc milu wackedaingte, ‘Taon esecne nga yakumac fagac, taontowa ingucne monic mi fagac, yogo miyac.’\x - \xo 18:18 \xt Esek 27:32\x*  
\v 19 Yenge hodocnginang lube wickelu hisonggong ailu wackelu kwele-sowac ngagelu yanguc midaingte,  
\q1 ‘Ye dameng bangkacnele kwelina dacti lobeyackeme miyac aiwec.  
\q1 Ilec taontowa, gale kwele-sowac sugucnehac aigelegabeleng. Aime ngic-ngigac sasawa wagenginengkolec kiwecka hikecaigaing, yenge yelacni mafatowanginengkolec aiibong.’   
\m
\v 20 Wapongti ngengele ameine yele feiwa lowecte ailu, honocmengka gagaing, nga Wapongte bingec ailu \w salecebaicne\w* nga Wapongte \w siduc-mimi ngic\w*, ngenge yele ameinele ailu beliyedaing.”\x - \xo 18:20 \xt Yes 44:23; Yef 32:43; Yer 51:48\x*   
\p
\v 21 Aime angelo tapiliineholec monic, yedi balinga sugucne monic balu wickeme kiwecka haume yanguc miwec,  
\q1 “Yenge Babilon taontowa dacineholec inguc wickebong haume hatacmac nalic mi bafuwadaingte.\x - \xo 18:21 \xt Yer 51:63-64; Esek 26:21\x*   
\q1
\v 22 Wickebong gita mucine homacne wewe, nga gee hole-hole ailu muluc fito-fito, nga kpeng fito-fito, yogo yenge gale kweliwa hatacmac nalic mi ngagedaingte.  
\q1 Ailu mole-hibi haicine monic-monic yogolec bole-ngic, yenge gale kweliwa hatacmac nalic mi gadaingte.  
\q1 Aime posadi flawa wesockecaigaing, yogolec ucine gale kweliwa hatacmac nalic mi ngagedaingte.\x - \xo 18:22 \xt Yes 24:8; Esek 26:13\x*   
\q1
\v 23 Gale kweliwa hifa angocine hatacmac nalic mi kweme angoledaicte.  
\q1 Aime ngic-ngigac banagunogale aiboc, yekele kwele-madicte aukwecaigaing, ucine ingucne gale kweliwa hatacmac nalic mi ngagedaingte.  
\q1 I yangucte, gale ngic-ngigac yenge woc-wiyac salecaigaing, yenge himongte ngic-ngigac sugucne gaibong.  
\q1 Nga ga mosoc aibabagone sowacnedi himongne himongne yogolec ngic-ngigac sasawa kwele basifuc aiyeleing.\x - \xo 18:23 \xt Yer 7:34; 16:9; 25:10; Yes 23:8-9\x*   
\q1
\v 24 Ailu taontowa yogolec kwelina Wapongte siduc-mimi ngic nga Wapongte bingec ailu ngic-ngigac sasawa himongka wecebabong homaibong, yengele sacngineng bafuwaibong.”\x - \xo 18:24 \xt Yer 51:49; Miye 17:6\x*   
\c 19  
\s1 Haleluya, Wapong mitengkegabiyeng  
\p
\v 1 Yogolec lobeina honocmengka aling sugucnebenangti yowa-malac ingucne ngagebe yanguc miibong,  
\q1 “Haleluya,\f + \fr 19:1 \ft “Haleluya” yogo Hibru yowa. Yogolec fungine yanguc, Wapong mitengkegabeleng.\f* bikicte ameine bame wasecne aigabeleng.  
\q1 Ilec bole nga wac feicne ailu tapili, yogodi Wapongnonggengte aigac.\x - \xo 19:1 \xt Mige 104:35\x*   
\q1
\v 2 I yangucte, ye ngic-ngigac yowangineng wosaelu yefe dondonna nga noina balaibelu aibabangineng mimoctocaigac.  
\q1 Ailu ye yefe-ngigac sugucne selo-boic aibabainedi himongtowa basowalewec, yele aibaba wosaelu Wapongte kwelec kwekwefocine wehomacebaibongte ailu yengele sacnginengte ameine ye lacnowec.”\x - \xo 19:2 \xt Mige 19:9; 2Ngt 9:7; Yef 32:43; Miye 6:10\x*   
\m
\v 3 Ailu yenge hatacmac yanguc miibong,  
\q1 “Haleluya, yefe-ngigacte hasoc yogo moto-motoine mikac fafeginowagac.”\x - \xo 19:3 \xt Yes 34:9-10\x*   
\m
\v 4 Inguc mibong damong 24 nga wiyac gaganginengkolec 4, yenge ketadi holecnolu Wapong ngictaule ngiye-ngiyewa ngiyegac, ye afeelu yanguc miibong,  
\q1 “Yogo foinac, haleluya.”\x - \xo 19:4 \xt Mige 106:48\x*   
\m
\v 5 Inguc mibong yowa-malac monic ngictaule ngiye-ngiyewacni yanguc miwec,  
\q1 “Wapong kwelec kwekwefocine, wac feicneholec nga waweweine gagaing, ngenge alang bacnocaigaing, ngenge Wapong mitengkening.”   
\s1 Lama madecinele baba-tumang  
\p
\v 6 Inguc mime yowa-malac monic ngageiba, yogo ngic-ngigac aling sugucnehac yengele yowa-malac ingucne aiwec. Yogo misa dundung sugucne yele ucine, nga gbululung sugucnele ucine ingucnedi yanguc miibong,  
\q1 “Haleluya, Sugucne Wapongnonggeng Tapilitowa Fileinedi ngictau ailu damongnubagac.\x - \xo 19:6 \xt Mige 95:10; Yes 52:7; Miye 14:2\x*   
\q1
\v 7 \w Lama madecinele|lemma="Lama"\w* baba-tumang dameng kwesime ngigacinedi\f + \fr 19:7 \ft “Ngigac” yogo Yesule habu yengele milu kwelengkewec. Monic 2 Korin 11:2 yogowa kwelengkeicne.\f* biyac efeckegacte ailu, yele kwele-madic ngagelu beliyelu Lama madecinele wac bafedabeleng.\x - \xo 19:7 \xt Yes 61:10; Miye 21:2\x*   
\q1
\v 8 Inguc ailu ngigacine \w ngakpi-kpolucine madicnebenang|lemma="Kpoluc madicnebenang"\w* \w gbagbacne\w* nga hibi-angocineholec holenale Wapongti lacnowec.”  
\m Ngakpi-kpolucine madicnebenang yogo Wapongte bingec yengele aibaba dondonne.   
\p
\v 9 Inguc mime angelodi yanguc edocnuwec, “Ga hibiwa yanguc kwelengkec, Lama madecinele baba-tumangte fatawa wacebaicne, yenge kwele-angackolec.” Inguc milu yanguc miwec, “Yowa yago Wapongte yowa noine.”\x - \xo 19:9 \xt Mat 22:2-3\x*   
\p
\v 10 Inguc mime na angelo yele higewa ketadi holecnolu afeenogale aiiba. Aime yedi yanguc edocnuwec, “Inguc mi ainong! Na ga nga \w ngic hae-gbafocgone|lemma="ngic hae-gba"\w* \w Yesule|lemma="Yesu"\w* yowa yogo mibong yegengkeme balu gagaing, ngengele kwelec kwekwe ngic agongineng. Siduc-mimi yengele yowale kwele-ngage-ngage yogo Yesule yowa miyegengkeicne hocne. Ilec ailu ga Wapong afeenong.”\x - \xo 19:10 \xt Sale 10:25,26; Miye 22:8-9\x*   
\s1 Becosic lalacne  
\p
\v 11 Inguc mime honocmeng angkeme nganiiba. Hei, na nganibe ngic monic becosic monic lalacnele feiwa ngiyewec. Aime ngic ngiyewec, yele wacine yanguc, Yowaine Balaibecaigac, ailu Yowa Noine micaigac. Ailu ye pasi dondonne yogowa ngic-ngigac yowawa locebalu huduwa wecebacaigac.\x - \xo 19:11 \xt Miye 1:5; 6:2; Mige 96:13; Yes 11:4\x*  
\v 12 Ye dongeine yogo dac-ubilang ingucne, nga hodocina ngictaule \w duu\w* bocyac holewec. Ailu socina wacine monic kwelengkeicne, yogo monicti nalic mi ngagedaicte, yeuc sugu ngagegac.\x - \xo 19:12 \xt Dan 10:6; Miye 1:14; 2:17\x*  
\v 13 Ailu ye ngakpi dalicne monic sacka kpomuluckeicne holewec. Ngic yele wacine yogo Wapongte Yowa.\x - \xo 19:13 \xt Yes 63:1-3; Yoa 1:1,14\x*  
\v 14 Aime honocmengte hudu-baba ngic aling yenge ye balaibeibong, yengele becosicngineng yogo lalacne. Ailu ngakpingineng ngani-nganiine madicnebenangti lalacne nga gbagbacne.  
\v 15 Aime micinacni hudu-baba fitec monic micineholec ofelu wawec, ye yogodi himongne himongne ngic-ngigac wecebadaicte. Ailu ye ngictaule aen yasudi ngic-ngigac sanangne damongebadaicte. Ailu Wapong Tapilitowa Fileine yele kwele-dac aalicineholec, yogo waing noine hesoc-hesocte aibaba ingucne. Aime ngic yogo yedi waing noine hesocebadaicte.\fig Ngic ye waing noine hesockeme misaine wagac|alt="winepress" src="SIL-G085.tif" size="col" loc="19:11-16" copy="SIL" ref="19:15" \fig*\x - \xo 19:15 \xt Yes 11:4; 49:2; Mige 2:9; Miye 1:16; 14:20\x*  
\v 16 Kpolucina nga ponggaina wac monic yanguc kwelengkeicne fawec, “\w Ngictau\w* yengele Ngictau, nga sugucne yengele Sugucne.”\x - \xo 19:16 \xt Miye 17:14\x*   
\p
\v 17 Aime nganibe \w angelo\w* monicti wenac feina domalu yowa-malacine sugucnehac wackelu nango sasawa sawa hewacka filalangkecaigaing, yenge yanguc edocebawec, “Welening! Ngenge kpaduckelu Wapongte nosingtowa sugucna kwesining.\x - \xo 19:17 \xt Esek 39:17-20\x*  
\v 18 Kwesilu ngictau nga hudu-baba ngic yengele damong, ailu ngic tapilinginengkolec, ailu becosic nga ngic-ngigac yengele feiwa ngiyegaing. Ailu ngic-ngigac ngic monicte bagewa mi gagaing, nga kwelec kwekwe sugucnefocngineng yengele bagewa gagaing, ailu wac feicne nga waweweine, yengele soc-biucngineng nocebaning.”   
\p
\v 19 Aime na hudu-baba-sic nga himongte ngictau yenge hudu-baba ngicfocnginengkolec nganicebaiba. Nganicebabe yenge ngic becosic feina ngiyewec, ye nga hudu-baba alingfocine yengeholec hudu wenaguningte kpaduckeibong.  
\v 20 Aime \w siduc-mimi ngic kwesacinedi|lemma="Siduc-mimi ngic"\w* hudu-baba-sicte haicka pasile maaine balu gawec. Ailu ngic-ngigac hudu-baba-sicte maa bayackeibong. Ailu yele ilucine afeelu gaibong, yenge yedi kwele basifuc aiyelewec. Aime ngic becosicka ngiyewec nga alingfocine yengi hudu-baba-sic nga siduc-mimi ngic kwesacine yeke bacepalu, dac nga \w salfadi|lemma="Salfa-posa"\w* lobelu kiwec ingucne ailu fagac, yogolec kwelina gbolicne wicepabong hauiboc.\x - \xo 19:20 \xt Esek 38:22; Dan 7:11; Miye 13:12-17; 20:10\x*  
\v 21 Aime becosic feina ngiyewec, yele mickacni hudu-babale fitec ofelu wawec, yogodi himongte ngictaule hudu-baba ngic sasawa wecebame homaibong. Homabong nango sasawa yengi kwesilu soc-biucngineng nolu gebecebawec.   
\c 20  
\s1 Aleng Sugucnengineng muc-macka loibong  
\p
\v 1 Aime \w angelo\w* monic nganiiba. Nganibe ye long sugucnebenang, yogolec ki nga sentowa monic moleina balu honocmengkacni wawec.\x - \xo 20:1 \xt Miye 9:1\x*  
\v 2 Walu hematowa, ye hema esecne, wacine monic Aleng Sugucnengineng, ailu \w Satang\w*, ye balu hifa 1 taosentesoc ngiyenale senti hefewec.\x - \xo 20:2 \xt Fike 3:1; Miye 12:9\x*  
\v 3 Aime himongne himongne ngic-ngigac hatacmac mi kwesacebanale hefelu long sugucnebenang, iwa wickeme haume nu holecnolu aka lowec. Aime ye hifa 1 taosen game motome, ye hatacmac lukecnome dameng bangkacnemac mucine mikac gadaicte.   
\p
\v 4 Aime na ngictaule ngiye-ngiye bocyac nganiiba. Aime ngictaule ngiye-ngiye yogolec feina ngic-ngigac ngiyeibong, yenge ngic-ngigac yowawa locebaningte bole-yowa yeleicne. Ailu habu monic yengela yanguc nganiiba, hudu-baba-sic nga ilucine mi afeelu gaibong. Ailu yele maa yengele meiwa nga molenginang mi baibong. Yenge \w Yesu\w* ngagesingkelu siducine milu gaibong. Ailu Wapongte yowa mibong yegengkewec. Inguc ailu gabong ngic yengi ubengineng welockeibong, yengele ilucfocngineng nganicebaiba. Nganicebabe yenge sasawadi gboliyelu hifa 1 taosentesoc \w Kristoholec|lemma="Kristo"\w* galu ngic-ngigac damongebaibong.\x - \xo 20:4 \xt Dan 7:9,22,27; 1Kor 6:2; Miye 13:17\x*  
\v 5 Yogodi homackacni gboliyelu fangke-fangke yogolec molic-molicine aigac. Aime gocne homaibong, yenge mi gboliyelu fangkebong hifa 1 taosen motome fangkedaingte.   
\p
\v 6 Aime Sugucnedi ngic-ngigac molic-molic homackacni gboliyelu fangke-fangke iwa balu taocebadaicte, yenge Wapongte bingec nga kwele-angackolec. Aime homac alecine yaeckangti yenge nalic mi bacebadaicte, yenge Wapong nga Kristole \w depec-baba ngic\w* ingucne mimiteng bole bagalu hifa 1 taosen yeholec ngic-ngigac damongebadaingte.\x - \xo 20:6 \xt Miye 1:6\x*   
\s1 Aleng Sugucnengineng basowale-benangkeibong  
\p
\v 7 Aime hifa 1 taosen motome Satang muc-mackacni lukecnodaicte.  
\v 8 Lukecnome, ye hikelu himongne himongne ngic-ngigac kwesacka mengocebame ngic-ngigac himongtowa yogolec mecine 4 iwa gagaing. Himong yogo wacnginec Gok nga Magok, yogowacni ngic-ngigac yenge hudu weningte kpatulecebadaicte. Yogo yengele dzalengineng kiwec mecina dingong fagac ingucne.\x - \xo 20:8 \xt Esek 38:2,9,15-16\x*  
\v 9 Kpatulecebame yenge himongne himongne hikelu Wapongte bingec yenge taonka gagaing, yengele kweleinedi angackecaigac, taon iwa hikelu hewalingkelu domaibong. Domabong honocmengkacni dacti walu hudu-baba ngic lobecebayackewec.\x - \xo 20:9 \xt 2Ngt 1:10\x*  
\v 10 Lobecebayackeme Aleng Sugucnengineng ye ngic-ngigac kwesacebawec, ye dac nga \w salfadi|lemma="Salfa-posa"\w* lobelu kiwec ingucne ailu fagac, yogowa wickebong hauwec. Aime hudu-baba-sic nga \w siduc-mimi ngic\w* kwesacine, yeke iwa momochac galu deboc hadeng doic ngagedaingte ailu ngagenowagaing, yogo moto-motoine mikac.\x - \xo 20:10 \xt Mige 11:6; Miye 19:20; 21:8\x*   
\s1 Wowosae dameng fikedaicte  
\p
\v 11 Aime ngictaule ngiye-ngiyetowa kwalac-kwalac monic sugucnehac nganiiba. Aime ye mac ngiye-ngiye yogolec feina ngiyewec, ye momoc nganiiba. Yele haicka himong nga sawa yeke hikeboc miyac aime macnginec sawaine sugu fawec.  
\v 12 Aime ngic-ngigac feicne nga waweweine biyachac homaibong yenge nganicebaiba. Nganicebabe yenge Wapongte haicka domabong ye hibi gocne bacebalu bafilamewec. Ailu hibi monic wacine Gagale hibi yogo momoc balu bafilamewec. Aime hibi gocne iwa ngic-ngigac homaibong yengele aibabanginengte kwelengkeicne fagac. Aime ye iwa nganilu aibabangineng mimoctowec.\x - \xo 20:12 \xt Dan 7:9-10; Mat 25:31-46; Sale 17:31; 2Kor 5:10; Miye 13:8\x*  
\v 13 Aime kiwecka homalu hauibong gagaing, yenge kiwecti hegilecebame ofeibong. Yenge homac nga \w Wangec-macka|lemma="Wangec-mac"\w* homaibong gagaing, yeke inguchac yenge hegilecebaboc ofeibong. Inguc ailu ngic-ngigac filesoc filesoc aibabanginengtesocka mimoctocebawec.\x - \xo 20:13 \xt Rom 2:6; 1Pi 1:17; Miye 2:23; 22:12\x*  
\v 14 Mimoctocebalu homac nga Wangec-mac yeke nga ngic-ngigacfocnginec momochac dac lobelu kiwec ingucne ailu fagac, yogowa wicebame hauibong. Yogodi homac alecine yaeckang aigac.  
\v 15 Ailu ngic-ngigac wacngineng Gagale hibiwa mi kwelengkeicne fagac, yenge dac lobelu kiwec ingucne ailu fagac, yogowa wicebame hauibong.\x - \xo 20:15 \xt Dan 12:1-2\x*   
\c 21  
\s1 Himong nga sawa gbolicne  
\p
\v 1 Aime na sawa nga himong gbolicne nganicepaiba. Aime himong nga sawa esecne faiboc, yeke miyac aiiboc. Aime kiwec ye hatacmac mi fadaicte.\x - \xo 21:1 \xt Yes 65:17; 2Pi 3:13\x*  
\v 2 Na taon gbagbacne, yogo Yerusalem gbolicne nganibe Wapongtacni honocmengkacni wawec. Wame ngigacti ngaweineholec molewa babac ainogale efeckecaigac, ngani-nganiine yogo ingucne ngawe-bingecinele ailu leso babong ngani-nganiine madicnebenang ailu ngiyewec.\x - \xo 21:2 \xt Yes 52:1; 61:10; Hib 11:16; 12:22; Miye 3:12\x*   
\p
\v 3 Ngiyeme na yowa-malac monic ngictaule ngiye-ngiyewacni ngagebe yanguc miwec, “Ngagegaing, Wapongte \w kpoluc-faledi|lemma="Kpoluc-fale"\w* ngic-ngigac yengeholec game yenge yele aling aidaingte. Ailu Wapong yeuctihac yengeholec galu Wapongngineng gadaicte.\x - \xo 21:3 \xt Dep 26:11-12; Esek 37:27; Sek 2:10-11; 2Kor 6:16\x*  
\v 4 Ailu yedi donge-misangineng sasawa dongenginangkocni suweyackedaicte. Aime homac nga kwele-sowacte hisonggong, ailu doic yenge hatacmac mi fadaingte. Wiyac esecne faibong, yogo biyac miyac aiyackeibong.”\x - \xo 21:4 \xt Yes 25:8; 35:10; 65:19; Miye 7:17\x*   
\p
\v 5 Aime Sugucne ngictaule ngiye-ngiyewa ngiyewec, yedi yanguc miwec, “Ngagegaing, na wiyac sasawa babe gbolicne fikeyackegac.” Inguc milu edocnuwec, “Ga yowa yogo kwelengkec. I yangucte, yowa yago noine, aime ngic-ngigac yenge yogo nalic ngagepangkegaing.”\x - \xo 21:5 \xt 2Kor 5:17\x*  
\v 6 Milu hatacmac yanguc edocnuwec, “Yogo biyac motogac. Na ‘A’ nga ‘Y’, yogo molic-molicine iwacni moto-motoine. Ngic-ngigac monicti misale aicnome, ye misa dongeinacni gagale misa moc nonale lacnodacte.\x - \xo 21:6 \xt Yes 49:10; 55:1; Yer 2:13; Yoa 7:37; Miye 1:8,17; 22:17\x*  
\v 7 Monicti hudu welu gbelong aidaicte, ye wiyac sasawa yago mole-damoc bame, nani yele Wapong aibe yedi madecne aidaicte.\x - \xo 21:7 \xt 2Sm 7:14; Mige 89:26-27\x*  
\v 8 Aime ngic-ngigac hangocebacaigac, nga ngage-ngagesingngineng mikac. Ailu aibabangineng sowacne wonongkolec nga ngic-wewe. Ailu selo-boic ngic, nga hefec nga mosoc bacaigaing. Ailu siduc-gbong alang bacnocaigaing, nga kwesac ngic-ngigac. Ngic-ngigac sasawa ingucne yengebac dac nga \w salfadi|lemma="Salfa-posa"\w* lobelu kiwec ingucne ailu fagac, yogowa hauyackedaingte. Yogo homac alecine yaeckang aigac.”\x - \xo 21:8 \xt Mat 25:41; Hib 10:38-39; Miye 20:15; 22:15\x*   
\s1 Yerusalem gbolicne  
\p
\v 9 Aime \w angelo\w* 7 yenge pele 7 yogo doic 7 moto-motoinedi wakeyackeicne yogo balu domaibong, yengelacni monicti nala welelu yanguc miwec, “Ga welec. Aime nani \w Lama madecinele|lemma="Lama"\w* ngigac-bingecine edalicgudacte, ye yele ngigac.”  
\v 10 Inguc mime \w Asule|lemma="Asu"\w* tapiliwa bacnume tiki sugucne nga dalicne, yogolec feina felu Wapongtacni taon gbagbacne Yerusalem, honocmengkacni wame edalicnuwec.\x - \xo 21:10 \xt Esek 40:2\x*  
\v 11 Taon yogo ye Wapongte tapili nga hibi-angockolec. Yogo posa basufaleicne fuline sugucnehac posa sasacne ingucne wonong mikac, ailu latac-latacineholec.\x - \xo 21:11 \xt Yes 58:8; 60:1-2,19\x*  
\v 12 Ailu odaine posadi baicne, yogo sugucnedi dalicne bafeicne. Ailu nuine 12 domagaing, aime nuina angelo 12 domagaing. Ailu nuina \w Israel\w* fikesaweckacni 12 yengele wacngineng inguchac kwelengkeicne domagaing.\x - \xo 21:12 \xt Esek 48:30-35\x*  
\v 13 Aime wenac ofecaigacka haic nu habackang, notka haic nu habackang, nga sautka haic nu habackang, ailu wenac haucaigacka haic nu habackang domagaing.  
\v 14 Taon sugucnele oda yogo posa yogolec fungine 12. Aime fungine 12 iwa Lama madecinele \w salecebaicne\w* 12 yengele wacngineng kwelengkeicne domagac.   
\p
\v 15 Aime angelo naholec mingagec aiibec, yedi taontowa sugucne nga nuine ailu oda posadi baicne, yogolec maaine banogale kpetele maa monic yasu goldi baicne balu domawec.\x - \xo 21:15 \xt Esek 40:3; Miye 11:1\x*  
\v 16 Badomame taontowa sugucne yogolec fungine 4. Ailu mecine sasawa yengele maangineng andohac aiibong. Aime angelodi maa babale yasudi maaine bame maaine yogo 12 taosen stadia\f + \fr 21:16 \ft 12 taosen stadia yogo Vanimohocni hikegacgu Honiara yogolecsoc, yogo 2 taosen 220 kilomita ngama ingucne. Stadia moniyang yogo mita 185 ingucne aigac.\f* aiwec. Nga mecine ailu feinale dalicnele maaine yogo moniyang aiiboc.  
\v 17 Ye oda adecne yogolec bangkacnele maaine yogo bame 144 kubit aiwec.\f + \fr 21:17 \ft 144 kubit yogo 65 mita ngama ingucne. 12 taims 12 yogo 144 aigac.\f* Maa yogo ngic-ngigac yengi bacaigaing, aime angelo yengele maa yogohac aigac.  
\v 18 Oda yogo posa sasacnedi baicne. Nga taontowa sugucne yogo golbenangti baicne, yogo galas ingucne latac-latacine aigac.\x - \xo 21:18 \xt Yes 54:11-12\x*  
\v 19 Aime taon sugucnele oda fungina posa basufaleicnedi loyackeicne, posa yogo sasawa fuline sugucnehac, ingucnedi lesoine loicne. Fungine molic-molic iwa  
\li1 posa sasacnedi loicne, lobeina, iwa  
\li1 posa sowac-sowacti loicne,  
\li1 3 iwa posa kwalacne, nga  
\li1 4 iwa posa hedonggboli.  
\v 20 Ailu  
\li1 5 iwa posa hibine medeng-medeng nga kwalac-kwalac ingucne,  
\li1 6 iwa posa sasacne monic,  
\li1 7 iwa posa dagec-dagec,  
\li1 8 iwa posa hedonggboli ingucne monic, nga  
\li1 9 iwa posa dagec-dagec ingucne monic. Ailu  
\li1 10 iwa posa hedonggboli haicine monic,  
\li1 11 iwa posa sowac-sowacti dagecne pung-pung kweicne, nga  
\li1 12 iwa posa mondo-sasac.  
\m Posa hibine ingucnedi locebaicne doma­gaing.\f + \fr 21:20 \ft Posa wacngineng yogo yanguc, 1-yaspa, 2-safaya, 3-kalsedoni, 4-emeral, 5-sadoniks, 6-kanelian, 7-krisolait, 8-beril, 9-topas, 10-krisopres, 11-yasint, 12-ametist. Ilucngineng yogo hafac 481 yogowa fagac.\f*  
\v 21 Yogowa kwanang hucine sugucnehac 12 ingucti nu 12 iwa domagaing. Aime nu filesoc filesocka hucine moniyang moniyangti baicne. Ailu taon sugucnele yefe yogo golbenangti baicne, yogo galas ingucne bageina nalic nganinoga.   
\p
\v 22 Aime taon yogolec kwelina \w Ibu-mac\w* monic mi nganiiba. I yangucte, Sugucne Wapong Tapilitowa Fileine nga Lama madecine yeki sugu Ibu-mac aigaic.  
\v 23 Aime Wapongte tapili nga hibi-angocti taontowa sugucne yogo bame angolegac, aime Lama madecinedi hifaine aigac. Ilec taontowa iwa wenac nga tamacne yekele angoc mi ngagesigaing.\x - \xo 21:23 \xt Yes 60:19-20; Miye 22:5\x*  
\v 24-25 Aime kundung ye iwa mi fadaicte, ilec hadengsoc taon nuine nalic mi holedaingte. Aime himongne himongne ngic-ngigac yenge taonte angocka lec-welec aidaingte. Aime himongte \w ngictau\w* yenge wiyacngineng wac feicneholec balu felu iwa ibu ingucne lodaingte.\x - \xo 21:24-25 \xt Yes 60:3,5,11\x*  
\v 26 Lobong himongne himongne ngic-ngigac yenge wiyacngineng alang-babaineholec nga wac feicneholec balu yogolec kwelina fedaingte.  
\v 27 Ailu wiyac monic wonongkolec nga ngic-ngigac aibabangineng sowacnebenang memenguine, ailu kwesacnginengkolec, yenge taontowa yogolec kwelina nalic mi fedaingte, miyac. Ngic-ngigac wacngineng Lama madecinele Gagale hibiwa kwelengkeicne fagac, yengi sugu fedaingte.\x - \xo 21:27 \xt Yes 52:1; Esek 44:9; 1Kor 6:9-10\x*   
\c 22  
\s1 Gagale misa  
\p
\v 1 Aime angelodi misa monic gagaineholec edalicnuwec. Misa yogo latac-latacine ailu Wapong nga \w Lama madecine|lemma="Lama"\w* yekele ngictaule ngiye-ngiyewacni ofelu\x - \xo 22:1 \xt Esek 47:1\x*  
\v 2 taontowale yefe sugucnele hewacka hikelu fagac. Fame mecine neboc nga neboc iwa gagale yoc domagaic, yeke hifasoc noine aiboc alecine 12 aicaigac. Yeke tamacnesoc noineholec aicaigaic. Ailu yoc yekele hekengnginecti himongne himongne ngic-ngigac bamadicebanoga.\x - \xo 22:2 \xt Fike 2:9; Esek 47:12; Yol 3:18; Sek 14:8\x*  
\v 3 Aime monicti Wapongte aalicte bagewa hatacmac mi gadaicte, miyac. Wapong nga Lama madecine yekele ngictaule ngiye-ngiye sugudi taon iwa ngiyeme kwelec kwekwefocine yenge ye afeelu kwelec kwecnodaingte.\x - \xo 22:3 \xt Sek 14:11\x*  
\v 4 Yenge yele haic-mesuine nganidaingte, aime ye wacine yengele meiwa kwelengkeme fadaicte.\x - \xo 22:4 \xt Mat 5:8; Miye 3:12\x*  
\v 5 Iwa kundung hatacmac mi aidaicte, nga hifa me wenacte angoc yogo mi ngagesidaingte. I yangucte, Sugucne Wapongte angocti angoledaicte. Aime ngic-ngigac yenge ngictaule bole badaingte, yogo dameng moto-motoine mikac balu gadaingte.\x - \xo 22:5 \xt Dan 7:18,27; Miye 5:10; 20:6; 21:23,25\x*   
\p
\v 6 Aime yanguc edocnuwec, “Yowa yago noine, aime ngic-ngigac yenge yogo nalic ngagepangkegaing. Aime Sugucne ye \w siduc-mimi ngic\w* yengele kwele-ngage-ngagenginengte Wapong, ye kwelec kwekwefocine wiyac biyac fikedaicte, yogo nganiningte ailu \w angeloine|lemma="Angelo"\w* salewec.”\x - \xo 22:6 \xt Miye 1:1\x*   
\s1 Yesu kwesidaicte  
\p
\v 7 \wj “Ngagegaing, na biyac kwesidacte! Monic ye siduc-mimi ngic yele yowa hibi yagowa kwelengkeicne fagac, yogo balu madicne balaibelu gadaicte, ye kwele-angackolec.”\wj*\x - \xo 22:7 \xt Miye 1:3\x*   
\p
\v 8 Na \w Yoanedi|lemma="Yoane"\w* wiyac yogo ngani-ngagec aiiba. Aime nganibe motome angelo wiyac edalicnuwec, yele higewa ketadi holecnolu afeenogale aibe\x - \xo 22:8 \xt Miye 19:10\x*  
\v 9 yedi yanguc edocnuwec, “Inguc mi ainong. Na ga nga siduc-mimi \w ngic hae-gbafocgone|lemma="ngic hae-gba"\w*, yenge ailu ngic-ngigac hibi yagolec yowa madicne balu balaibelu gacaigaing, ngengele kwelec kwekwe agongineng. Ga Wapong afeenong!   
\p
\v 10 “Dameng bangkalegacte ailu ga hibi yagolec siduc-yowa yogo aka mi lolu hegileng fadaic, miyac. Ga miyengka yegengkedaic.\x - \xo 22:10 \xt Dan 12:4\x*  
\v 11 Monic ye aibaba sowacne aicaigac, ye aibaba yogohac balu gadaic. Nga wonongkolec gagac, ye ingucnehac gadaic.\f + \fr 22:11 \ft Aibaba sowacne ingucnedi mi madickegac. Aimebac monicti kwele-hefaliyecte mi aigac, ye aibaba ingucne bagacgu dacka haudaicte.\f* Aime aibaba dondonne aicaigac, ye dondonnehac aidaic. Ailu Wapongte bingec gagac, ye Wapongte bingec gadaic.”\x - \xo 22:11 \xt Dan 12:10; Esek 3:27\x*   
\p
\v 12-13 \wj “Ngagegaing, na ‘A’ nga ‘Y’, molic-molic nga lobe, ailu molic-molicine iwacni moto-motoine. Na biyac kwesilu ngic-ngigac filesoc filesoc aibabanginengte ameine yelenogale balu kwesidacte.\wj*\x - \xo 22:12-13 \xt Yes 40:10; 44:6; Yer 17:10; Miye 1:8,17; 21:6; 2:23\x*  
\v 14 \wj Balu kwesibe ngic-ngigac ngakpingineng dalicne suweicne, yenge kwele-angackolec. I yangucte, yenge gagale yoc noine noningte tapili yeleicne, ailu taon nuina yefe nalic fedaingte.\wj*\x - \xo 22:14 \xt Fike 2:9; 3:22\x*  
\v 15 \wj Aime ngic-ngigac hoda ingucne aibabangineng wonongkolec gagaing, nga hefec nga mosoc bacaigaing, ailu selo-boic aling nga ngic wecebacaigaing. Nga siduc-gbong alang bayelecaigaing, ailu sasawadi kwesac-aibabale angac ngagelu kwesac aicaigaing, yengebac taon lobina gadaingte.\wj*  
\v 16 \wj Na \+w Yesudi|lemma="Yesu"\+w* angelone salebe yedi yowa yago nale habufocne ngengela mime yegengkengelenale kwesiwec. Na \+w Dawidilacni|lemma="Dawidi"\+w* gidec, nga ngamboine, ailu ubiyacte asocmeng hibi-angocineholec, na yogo hocne.”\wj*\x - \xo 22:16 \xt Him 24:17; Yes 11:1,10; Rom 1:3; Miye 2:28; 5:5\x*   
\p
\v 17 \w Asu\w* nga Lama madecinele ngigac-bingecine yeki “Ga welec” migabiyec. Ailu monic ye yowa yogo ngagedaicte, ye “Ga welec” midaic. Aime monic ye misale aicnocaigac, ye kwesilu gagale misa fuline mikac moc balu nodaic.\x - \xo 22:17 \xt Yes 55:1; Miye 21:6\x*   
\s1 Yowa moto-motoine  
\p
\v 18 Aime ngic-ngigac hibi yagolec siduc-yowa ngagegaing, ngengele sawang-yowa milu yanguc migabac, “Monicti yowa yago fagac, iwahac yowa monic taockedaictewa, Wapongti hibi yagowa doicte kwelengkeicne fagac, ye iwa taockedaicte.\x - \xo 22:18 \xt Yef 4:2; 12:32\x*  
\v 19 Ailu monicti siduc-yowa yago fagac, iwacni yowa monic baickedaictewa, Wapongti gagale yockacni noine nebocine ye mi lacnodaicte. Ailu taon gbagbacnele hibi yagowa kwelengkeicne fagac, iwa nalic mi fedaicte.”  
\v 20 Aime wiyac yagolec mime yegengkengelegac, yedi yanguc migac, \wj “Noine, na biyac kwesidacte.”\wj*  
\p Yogo foinac. Oc, Sugucne Yesu, ga welec.\x - \xo 22:20 \xt Miye 2:16\x*   
\p
\v 21 Sugucnenonggeng Yesule kwele-madicti Wapongte bingec sasawa ngengela fadaic. Yogo foinac.