\id PHP Migabac NT; 1st draft 2010 
\h Filipai 
\toc1 Poldi Filipai Habu Yengele Hibi Kwelengkewec 
\toc2 Filipai 
\toc3 Filp 
\mt2 Poldi  
\mt1 Filipai  
\mt2 Habu Yengele Hibi Kwelengkewec  
\is1 Mimi-yegeng yowa  
\ip Filipai yogo taon sugucne monic Masedonia prowins iwa fagac. Pol ye Yesule siduc mac nga taon fagacsoc minogale mac lolickelu gawec. Ye alecine yaeckang Filipai iwa hikewec (Salecebaicne 16:12-40). Hikelu Yesule siduc milu edocebame iwa Yesule habu fikeibong. Hegile hikelu yogolec lobeina alecine habackang Filipai iwa hatacmac hikelu ngiye-fac aiwec. Ailu Yerusalem hikewec (Salecebaicne 20:6). Yerusalem hikelu game Roma ngic yengi muc-macka loibong. Dameng iwa Roma gamang ye Roma taon nga Israel himong fagaingsoc damongkewec. Ye Roma iwa bahikebong muc-macka iwa ngiyewec (Salecebaicne 21, 28). Muc-macka ngiyelu Timotiholec hibi yago kwelengkelu Epafodaitus lacnoboc bahikelu Yesule habu Filipai gaibong yenge yelewec.  
\ip Soc tofaine helockeicnele aibaba yogolec fungine yanguc, Wapong ye Abraham yanguc milu edowec, “soc tofangineng helockedaing.” Aibaba yogo socte maa yegengkeme Wapongte aling gacaigaing. Ilec ailu Israel aling yenge Abrahamte fikesaweckacni, yenge Wapongte yowa balaibenogale aibaba yogo balaibecaigaing. Yesule damengka Israel ngic-ngigac gocne yenge ngagebong soc tofangineng mi helockeicne yenge Wapongte aling nalic mi gadaingte. Poldi ngage-ngage yogo Filipai 3:2-5 iwa kwelengkewec fagac.  
\is1 Yowa yago hibi nebocina fagac  
\io1 1:1–11 Kwele-madic yowa  
\io1 1:12–30 Polle aibaba yogo yanguc, ye umackolec game Kristodi bafickeme beliyelu gawec  
\io1 2:1–30 Nongileng Kristo ingucne aidabeleng  
\io1 3:1–21 Sawang-yowa gocne miwec  
\io1 4:1–23 Wapongte yowa weduyelewec  
\c 1  
\s1 Hibile molic-molic yowa  
\p
\v 1 Na \w Kristo\w* \w Yesule|lemma="Yesu"\w* kwelec kwekwe ngic Pol, na nga Timoti, noki ngengele hibi yago logabelec. Ngic-ngigac Wapongte bingec Filipai taonka Kristo Yesuholec wetackelu gacaigaing, gocne yengele damongfocngineng, nga gocne yengele mole-baficfocngineng, sasawa ngengela hibi yago logabelec.\x - \xo 1:1 \xt Sale 16:12-40\x*   
\p
\v 2 Mamacnonggeng Wapong nga Sugucnenonggeng Yesu Kristo yekele kwele-madic, nga kwele-mogungtowadi ngengela fadaic.   
\s1 Kwele-madic yowa  
\p
\v 3 Na ngengele ngagesicaigabac, dameng iwa Wapongne kwele-madic edocaigabac.  
\v 4-5 \w Siduc Madicnele|lemma="Siduc Madicne"\w* bole molickelu baofecgubeng yakumac aigac, ngenge naholec bolele aling moniyang ailu gaibeng. Ilec ailu ngengele ngagesilu belic-belicka milockecaigabac.  
\v 6 Ailu yanguc ngagepangkecaigabac, Wapongti bole madicne kwelenginang biyachac molickelu bawec, yogo taockelu balu gagac. Bagacgu Kristo Yesule damengtowa kwesime, iwa boleine yogo bamoctoyackedaicte.\x - \xo 1:6 \xt 1Kor 1:8\x*  
\v 7 Na ngengele inguc ngagelu kwelenedi angacnume gabe dondongkegac. Na muc-macka gagabac, me Siduc Madicnele fungine mibe yegengkegac, me Siduc Madicne basanangkegabac, iwa ngenge sasawadi naholec Wapongte kwele-madicka aling moniyang gagabeleng.   
\p
\v 8 Wapongti yogo foinac widecnume yowa yanguc migabac, Kristo Yesule kwele-sowacti molickeme ngengeholec ganogale angacnugac.   
\p
\v 9-10 Aime aibaba weni yogodi madicne aigac, ngenge yogo nalic wosaeningte yanguc milockecaigabac, ngenge kwele-angacka damongnagulu gadabiyeng. Aime angac yogodi sugulelu ngengele ngage-ngagewa bafickelu kweme haulu gbolongne aime, Wapongte yefe ngage-motodaingte, inguc milockecaigabac. Ngenge inguc ngage-motolu Kristole damengtowa kwesime, gbagbacne nga bikicngineng mikac domadaingte.\x - \xo 1:9-10 \xt 1Tim 5:23\x*  
\v 11 Domaebongka gaga dondonnele noine Yesu Kristole wacka bame wakengeledaicte. Yogodi Wapongte wac feicne nga mimi-madic bafuwadaicte.   
\s1 Muc-macka ngiyeme Kristole siduc sugulewec  
\p
\v 12-13 Aime lebe-ngic ngictaule oda kwelina gaibong, ailu ngic-ngigac sasawa yawa gaibong, yenge sasawadi yanguc biyac ngani-motoibong, ngic yogo ye Kristole ailu muc-macka gagac. Gabe nala pasi fikewecte Siduc Madicnele bole hatacmac basanangkeme sugulewec. \w Ngic hae-gbafocne|lemma="ngic hae-gba"\w*, ngenge yogo ngageningte angacnugac.\f + \fr 1:12-13 \ft Ngictau yele oda kwelina yeicne macine fawec. Ailu ofis haicine monic-monic nga muc-mac, ailu bole alingte mac fayackewec.\f*\x - \xo 1:12-13 \xt Sale 28:30\x*  
\v 14 Muc-macka ngiyegabacte ngic hae-gbafocnonggeng bocyac yenge ngage-ngagengineng Sugucnela lobong sanangkewec. Sanangkeme Wapongte yowa hangoc mikac milu gagaing.   
\p
\v 15-17 Na sanangne domalu Kristole Siduc Madicne edocebalu weduyelenogale Wapongti locnuwec, yenge yogo ngagelu yefe dondonna Kristole siduc kwele-angacka mibong yegengkelu fagac. Habu tofaine yengibac soc bafefe nga ngaba ngage-ngagewa galu Kristole siduc mibong yegengkelu fagac. Milu nale yanguc ngagesigaing, ye muc-macka game Kristole siduc mibeng umac haicine monic-monic bafuwadaicte.  
\v 18 Ailu ngage-ngage kwesacine me ngage-ngage noine Kristole siduc mibong yegengkelu facaigac, yogo ngagebe madickegac. I yangucte, yenge Kristole siduc mibong yegengkegac, yogodi wiyac feicne aigac. Inguc ngagelu yanguctihac beliyegabac. Ailu hatacmac beliyedactehac.  
\v 19 Inguc aibong ngengele mimiloc nga Yesu Kristole \w Asudi|lemma="Asu"\w* bafuwacnugac. Ilec yanguc ngagesigabac, umacne baickeme wasecne aidacte.\x - \xo 1:19 \xt 2Kor 1:11\x*  
\v 20 Aime angacne yanguc fame wangec gagabac, wiyac monicte me monicte ngagebe gameineholec mi aidaicte. Na gadacte me homadacte, socnedi wiyac aidacte yogo Kristo wac sugucne lacnolu gadacte. Ilec mi hangocnugac.   
\p
\v 21 Naneicne gagane yogo Kristo wac feicne lacnolu gagabac, yogo ngagebe madickegac. Aime homadacte iwa yeholec wetackelu gadacte, yogo ngagebe madicke-benangkegac.\x - \xo 1:21 \xt Gal 2:20\x*  
\v 22 Aime sockolec galu bole babe noine bocyac fikedaicte. Ilec wenuc midacte, gagane me homacne, yogo mi ngage-motogabac.  
\v 23 Angac yaeckang ingucnedi fulucnume gagabac. Homalu Kristoholec ganogale bocyac ainelegac, yogodibac wiyac sasawa ewaliyackedaicte.\x - \xo 1:23 \xt 2Kor 5:8\x*  
\v 24 Aimebac ngengele madicnele ailu gagane hatacmac taockelu gadacte.  
\v 25 Yogo yanguc ngagepangkegabac, na ngengeholec galu baficngebabe, ngage-ngagesingngineng sugulelu sanangkeme beliyelu gadaingte.  
\v 26 Aime ngengeholec hatacmac ganogale fube Kristo Yesule ailu belic-belic sugucnehac aidaingte.   
\s1 Weyebic aingeledaingte  
\p
\v 27-28 Na fulu nganicngebadacte, me dalicka galu ngengele yowa-siduc yanguc ngagedacte. Ngenge asungineng moniyang, nga kwelengineng moniyang galu, ngabafocngineng yengele mi hangocngebadaic. Ailu ngenge sanangne domalu yengi Siduc Madicne ngagesingkeningte, bole yogo doicineholec bacaigaing. Inguc fikenale ngenge Kristole Siduc Madicne yogolec silicka gadabiyeng. Aibaba yogodi ngabafocngineng yanguc edalicebadaicte, yenge sowalelu miyac aidaingte. Aimebac ngengele bikicte ameine bame wasecne aidaingte. Wapongti inguc aidaicte.\x - \xo 1:27-28 \xt Efs 4:1; 1Tim 2:12\x*  
\v 29 Ilec ngenge Kristole ailu wiyac yanguc ngelewec, ngenge Kristo ngagesingkeibong ingucnehac, yele ailu ngaba nga doicka locngubaibong, ingucnehac ngelewec.\x - \xo 1:29 \xt Sale 16:19-40\x*  
\v 30 Molickelu doickolec gagale boletowa balu gaiba, yogo dongedi nganiibong. Ailu yakumac balu gagabac yogo ngagegaing, silicine ingucnehac ngenge yakumac balu gagaing.   
\c 2  
\s1 Dongengineng Kristola hiladaing  
\p
\v 1 Ngenge Kristoholec wetackeibong, yogodi basanangngebame Kristole kwele-angacti bakolocngebalu gagac. Ailu \w Tili Asuholec|lemma="Tili Asu"\w* kpatulecngebalu kwele-mogung aingelelu kwele-sowac ngagengelegac.  
\v 2 Ilec ailu hewacnginang ngage-ngage moniyang nga kwele-moniyangka kweledi angac ngagenagudaing. Inguc aibong na beliyelu ngagebe motodaicte.  
\v 3 Ngenge wac sugucne banogale mi aidaing. Ailu soc bafefe mi gadabiyeng. Ngenge aibaba yogo hegilelu socngineng bawacnagulu, ngic-ngigac agofocngineng yengele wac bafelu ngengileng wac bawalu gadabiyeng.\x - \xo 2:3 \xt Gal 5:26\x*  
\v 4 Gageicne woc-wiyac sugu mi damongkedamec, agofocgone yengele woc-wiyac momochac baficebalu damongkedamec.\x - \xo 2:4 \xt 1Kor 10:24\x*   
\p
\v 5 Kristo \w Yesule|lemma="Yesu"\w* pasi nga ngage-ngage fagac, ngenge silicine yanguc ngagedabiyeng.   
\q1
\v 6 Kristo ye Waponghac gawec.  
\q1 Ailu ye Wapongkolec angasoc ganogale mi ngagewec.\x - \xo 2:6 \xt Yoa 1:1-2; 17:5\x*   
\q1
\v 7 Ye yeicne gaga hegilelu kwelec kwekwe ngic aiwec.  
\q1 Ailu ye ngic soc balu ngic silic fikeme nganiibong.\x - \xo 2:7 \xt 2Kor 8:9; Yoa 1:14\x*   
\q1
\v 8 Ye ngic fikelu yeuctihac socine bawalu Wapongte yowa balaibelu gacgu homawec.  
\q1 Homacine yogo \w malicpongka|lemma="Malicpong"\w* homawec.\x - \xo 2:8 \xt Hib 5:8; 12:2\x*   
\q1
\v 9 Ilec ailu Wapongti ye bafelu wac feicnehac lacnolu gunungkewec, wac yogo wac sasawa ewaliyackegac.\x - \xo 2:9 \xt Sale 2:33; Efs 1:20-21; Hib 1:3-4\x*   
\q1
\v 10 Ye inguc aime honocmengka gagaing, nga himongka gagaing, ailu wiyac sasawa gagaing, yenge Yesule wacka socngineng bawacnagulu ketadi holecnoyackening.\x - \xo 2:10 \xt Rom 14:11\x*   
\q1
\v 11 Ailu ngic-ngigac sasawadi Yesu \w Kristo\w* ye Sugucne, inguc mibong yegengkedaic.  
\q1 Inguc aibong wac feicne yogodi Wapong Mamacte ainowagac.\x - \xo 2:11 \xt Rom 10:9\x*   
\s1 Himongka angoc ingucne ganoga  
\p
\v 12 Ilec agofocne kwelenedi ngengele angac ngagegabac, ngenge esecne damengsoc yowane balaibelu gaibong. Yogo ngengele emewa gabe yowane balaibeibong. Ingucnehac yakumac dalicka gabe ngenge yowane balaibelu hangoc ailu dengdengngebame boletowa balu gadabiyeng. Gacgubong damengngine kwesime wasecne aidaingte.  
\v 13 Wapong ye bole aling madicne fikenale kwelenginang bole balu gagac. Inguc balu game ngage-ngagenginengti ye balaibedaingte. Ailu bole yogo baningte tapili ngelelu gagac.   
\p
\v 14 Ilec bole sasawa badabiyengtewa, ngenge tatakic yowa nga yowadi fec-wac mi ainagudabiyeng.  
\v 15 Inguc aidaingtewa, yanguc edalidaingte, Wapongte adu-madec gagaing, ngenge sowacnengineng mikac galu gbagbacne nga dondonne domadabiyeng. Ngenge, ngic-ngigac sowacnebenang nga yefe lilolu gagaing, yengele hewacnginang domalu Wapongte yowa gagaineholec bagalu angoc ingucne himongtowa yagowa kwebong angoledaicte.\x - \xo 2:15 \xt Dan 12:3; Filp 1:10; 2Tim 2:19\x*  
\v 16 Ngenge inguc aibong, Kristole damengtowa kwesime, ngengele ngagebe wiyac feicne aidaicte. Aime yanguc midacte, na moc mi gasackeiba, me bolene baiba yogo noine mikac monic mi aiwec.  
\v 17 Ngenge ngage-ngagesingte bole yogo \w depecte|lemma="Depec"\w* hasoc ingucne balu gagaing. Aime ngabafocne yengi wehomacnulu yogolec feina nale sac sotingkedaingtewa, na sifu yogolec angac ngagelu ngengeholec beliyegabac.\f + \fr 2:17 \ft Wapongti angac ngagenale, Yuda yenge depecngineng madicne feina waing misa sotiyebong haulu gawec. Polle sac silicine ingucnehac sotiyedaicte, ilec beliyewec. Himong kisiwa 15:3-10 iwa wafedaing.\f*  
\v 18 Aime ngenge yefe iwahac angac ngagelu naholec momoc beliyedabeleng.\x - \xo 2:18 \xt Filp 3:1; 4:4\x*   
\s1 Timoti nga Epafodaitus  
\p
\v 19 Sugucne Yesudi ngageme nalic aime, dameng mi daliweme Timoti salebe fudaicte. Ailu ye hefaliyelu ngenge wenuc gagaing, yogolec siduc edocnume kwelene madickedaicte.  
\v 20 I yangucte, ngic monic Timoti ingucne naholec mi gagac, miyac. Ye moniyangti sugu kweleinedi sugucnehac ngengele aicaigac.  
\v 21 Aime ngic-ngigac naholec gagaing, yenge yengileng wiyacte sugu ngagecaigaing. Ailu Yesu Kristole wiyacte monic mi ngagecaigaing.\x - \xo 2:21 \xt 2Tim 4:10\x*  
\v 22 Aime Timoti ye aibabaine madicne, ngenge yogo ngagegaing. Ye madecti mamacineholec bole balu gagac, silicine ingucnehac, naholec \w Siduc Madicnele|lemma="Siduc Madicne"\w* bole baficnume balu gagabelec.  
\v 23 Aime nala yefe wenuc fikedaicte, yogo ngage-motolubac ye biyac salebe funale ngagesigabac.  
\v 24 Ailu Sugucne ngagepangkelu yanguc ngagegabac, naneuc dameng mi daliweme ngengela inguchac fudacte.   
\p
\v 25 Aime ngengi \w salecebaicnengineng|lemma="Salecebaicne"\w* Epafodaitus salebong kwesi domalu kwesingnume, wiyac monicte mi kpungkegabac. Ye naholec bole balu gagac. Ailu naholec galu Sugucnele hudu-baba ngic, ye gbane ingucne ailu gagac. Aime ye salebe ngengela hatacmac funale ngagebe fudaicte.\x - \xo 2:25 \xt Filp 4:18\x*  
\v 26 Ye huc aicnome siducine ngageibong. Ilec ailu ye ngengele ngageboc ailu kweleinedi ngengele aicnolu gagac.  
\v 27 Aime foinac, ye huc aicnome homanogale aiwec. Entacka ye homadecka, na kwele-umac sugucne feina taockeneleme ngagedacka. Ailu ye sugu miyac, Wapongti na momoc kwele-sowac ngagenotelu baficnupawec.  
\v 28 Aime ngengi ye nganilu beliyedaingte. Aime na kwele-sowac mikac ganogale ye salebe ngengela fudaicte, yogo sanangnehac ngagesigabac.  
\v 29 Aime ngenge Sugucneholec wetackeningte ailu, ye kwelenginengti angac ngagecnolu mac holecnolu ye nga ngic ingucne gocne gagaing, yenge alang bayeledaing.  
\v 30 Ailu ngengi baficnuningte kpungkeebongka, yedi kwesilu baficnume Yesu Kristole bolele ailu socine basowalelu homanogale aiwec.   
\c 3  
\s1 Kristoholec gaga  
\p
\v 1 Ilec yanguc taockelu migabac, \w ngic hae-gbafocne|lemma="ngic hae-gba"\w*, ngenge Sugucneholec wetackelu belic-belicka gadabiyeng. Na yowa molickelu kwelengkengeleiba, yogo hatacmac kwelengkengelenogale mi takicnugac, miyac. Ngenge yowa yogodi asa bacngebadaicte.   
\p
\v 2 Ngic aibabangineng hoda ingucne wonongkolec gagaing,\f + \fr 3:2 \ft Israel ngic-ngigac yenge aling gocne bawacebaningte hoda wacebalu gaibong. Siduc yawa Poldi Israel ngic-ngigac gocne hoda wacebawec.\f* yenge aibaba sowacne aicaigaing, ngenge ngic yogo yengele ngani-motolu gadabiyeng. Ngic yogo yenge kwesacngebalu yanguc edocngebacaigaing, “Ngenge soc tofangineng helockedabiyeng.” Ilec ngani-motolu gadabiyeng.  
\v 3 Wapongte Asudi pasi nongilang bame afeelu kwelec kwegabeleng, nongilengti hocne \w soc tofangineng helockeicne|lemma="Soc tofaine helockegac"\w* ingucnehac kwelenonggang ngagesilu aicaigabeleng. Nongileng Kristo \w Yesule|lemma="Yesu"\w* ngagebeng feicne aigac. Ailu socnonggengte maale monic mi ngagepangkegabeleng.\x - \xo 3:3 \xt Rom 2:29\x*   
\p
\v 4 Aime ngage-ngagene yogo aibabana lobe fanale ngagedacka. Aime ngic gocne yenge aibabanginang ngage-ngagengineng lobong facaigac, ingucnehac lobe fadecka midec, na silicine ingucnehac ewalicebalu aidacte.\x - \xo 3:4 \xt 2Kor 11:18\x*  
\v 5 Aime fikebe hadeng 8 aiyemewa soc tofane helockeibong. Na \w Israel\w* alingkacni nga \w Benyaminte|lemma="Benyamin"\w* fikesaweckacni. Na \w Hibru\w* ngicbenang ailu Hibru alingkacni. Ailu \w Farisaio\w* yengeholec Wapongte \w yefe-yowa\w* balaibeiba.\x - \xo 3:5 \xt Luk 1:59; 2Kor 11:22; Sale 23:6\x*  
\v 6 Ailu na yefe-yowa monic mi hegilelu ngic dondonne gaiba. Ailu na Wapongte yefe-yowa basanangkenogale dogbac ailu Yesule habu weyebic aiyelelu gaiba.\x - \xo 3:6 \xt Sale 8:3\x*   
\p
\v 7 Ailu molickelu wiyac bagalu ngagebe yogodi baficnudaicte ingucne aiwec, yogo hocne yakumac \w Kristole|lemma="Kristo"\w* ailu ngagebe wiyac sasawa yogo babaficine mikac aigac.\x - \xo 3:7 \xt Mat 13:44,46\x*  
\v 8 Na Sugucnene Kristo Yesule babafic yogo ngagebe feicnetowa aigac. Ilec ailu esecne galu wiyac sasawa aiiba, yogolec ngagebe babaficine mikac aicaigac. Gagana Kristo banogale ailu, wiyac sasawa ngagebe yafoine aiyackewec, yogo biyac hegileyackeiba.  
\v 9 Wapongte yefe-yowa balaibelu neicne tapiliwa ngic dondonne nalic mi aidacte. Wapongti ngage-ngagesingte yefe yanguc lowec, monic ye Kristo ngagesingkedaicte, ye ngic dondonne aidaicte. Ingucnele ailu Kristoholec wetackebe Wapongti ngic dondonne wacnume madickegabac.\x - \xo 3:9 \xt Rom 3:21-22\x*  
\v 10 Ailu Kristo yeicne nga Wapongte tapili yeuctihac Kristo bagboliyeme homackacni fangkewec, yogo homacnehac ngagenogale ainelegac. Ailu yeholec galu doic ngagelu ye homawec, ingucnehac galu homanogale ngagegabac.\x - \xo 3:10 \xt Rom 6:3-5; 8:17\x*  
\v 11 Inguc aigacgu homackacni gboliyelu fangkenogale ngagesigabac.   
\s1 Gbelong ainogale gasackedamec  
\p
\v 12 Na gagasac bole yogo biyachac bamoctoiba, me biyac ewalilu gbelong aiiba, na inguc mi migabac, miyac. Kristo Yesudi bacnuwec. Ilec ailu yogo banogale gagasac bole balu gagabachac.\x - \xo 3:12 \xt 1Tim 6:12,19\x*  
\v 13 Ngic hae-gbafocne, na gbelong ailu wiyac biyachac baiba, inguc mi ngagesigabac. Ailu bole moniyang yanguc balu gagabac, wiyac biyachac aiiba, yogo hatacmac mi ngagesilu gagabac. Ailu wiyac lobewa fikedaicte, yogo banogale bole sanangne balu gagabac.  
\v 14 Ailu na biyacbenang maawa\f + \fr 3:14 \ft Maa yogo Kristo ingucne ainogale migac.\f* hikelu gbelong ailu wiyac banogale gasackegabac. Yogolec hocne Wapongti wacnuwecte Kristo Yesuholec wetackelu honocmengka gadacte.\x - \xo 3:14 \xt 1Kor 9:24\x*   
\p
\v 15 Aime ngage-ngagesingka biyachac sugulelu sanangkeibeng, nongileng sasawadi inguc gasackenogale ngagesidabeleng. Aime ngage-ngagengineng fulucnagudaingtewa, Wapongti ngage-ngagengineng yogo inguchac bame yegengkengeledaicte.\x - \xo 3:15 \xt 1Kor 2:6\x*  
\v 16 Ailu yowa biyachac ngagelu gaibeng, yogohac balaibelu hikedabeleng.   
\s1 Ngage-ngage madicne  
\p
\v 17 Ngic hae-gbafocne, nani molickengelebe ngenge yogo nganilu silicine ingucnehac balaibecnudabiyeng. Ailu ngic nongele silic balaibecaigaing, ngenge dongengineng yenge nganicebalu balaibedaing.\x - \xo 3:17 \xt 1Kor 4:16\x*  
\v 18 Molickelu dameng bocyac yowa edocngebalu gaiba, yogo yakumac hiyalu donge-misane wame hatacmac edocngebagabac. Ngic bocyac yengi Kristole \w malicpongte|lemma="Malicpong"\w* ngaba ailu gagaing.  
\v 19 Wapongngineng kwesacine, yogodi nosingte gobe ingucne aicaigac. Aime aibabangineng gameineholec, yogodi yengele kwelewa madickecaigac, ailu yengele ngage-ngage yogo himongte gagawa fagac. Ngic ingucne yenge homaebongka gagangineng sowaledaicte.\x - \xo 3:19 \xt Rom 16:18\x*   
\p
\v 20 Aime nongileng wacnonggeng honocmengka fagacte honocmengte aling gagabeleng. Ailu \w Asa-baba ngicnonggeng|lemma="Asa-baba ngic"\w* Sugucne Yesu Kristo honocmengkacni kwesidaicte, yele wangec gagabeleng.\x - \xo 3:20 \xt Efs 2:6,19\x*  
\v 21 Ye wiyac sasawa yeicne bagewa lonale tapili facnogac. Ailu yele tapili yogodi himong-socnonggeng waweweine yogo bafaliyeme yeicne soc ingucne tapili nga hibi-angoctowaineholec aidaicte.\x - \xo 3:21 \xt 1Kor 15:28,43-53\x*   
\c 4  
\s1 Polle mimi-madic  
\p
\v 1 Ilec ailu, \w ngic hae-gbafocne|lemma="ngic hae-gba"\w*, kwelenedi ngengele angacnume nganicngebanogale ainelegac. Ngengi belic-belic bafuwanelebong angacnugac. Ailu agofocne kwele-angackolec, ngenge yogolec ailu Sugucneholec wetackelu sanangne gadabiyeng.\x - \xo 4:1 \xt 2Tim 2:19-20\x*   
\p
\v 2 Yuodia nga Sintike, ngeke Sugucneholec wetacke galu kwele-moniyang ainagunicte, mimiloc yowa sanangne edocngepagabac.  
\v 3 Aime agone, ga naholec bole bacaigicte yanguc edocgugabac, ngigac yaeckang yogo baficepadamec. I yangucte, yeke nga Kelemente, ailu ngic-ngigac nebocine gocne yenge naholec galu \w Siduc Madicnele|lemma="Siduc Madicne"\w* bole balu gagaing, yengele wac Gagale hibiwa fagac.\x - \xo 4:3 \xt Miye 20:15; Luk 10:20\x*   
\s1 Belic-belicka gaga  
\p
\v 4 Ngenge damengsoc Sugucneholec wetacke galu belic-belicka gadabiyeng. Ailu hatacmac migabac, ngenge belic-belicka gadabiyeng.  
\v 5 Sugucne emenonggang gagac. Ngic-ngigac sasawadi nganicngebabong ngenge gaga ulucne ailu gadaing.\x - \xo 4:5 \xt Hib 10:25; Yak 5:8-9\x*  
\v 6 Ngenge wiyac monicte mi medecngebadaic. Ailu ngenge wiyac sasawale aingeleme, Wapong kwele-madicka wackelu uwacnolu milockedaing.\x - \xo 4:6 \xt Mat 6:25-34; Kol 4:2\x*  
\v 7 Inguc aiyebongka Wapongte kwele-mogungti ngage-ngage-motoc sasawa ewaligac, yogodi kwelengineng nga ngage-ngagenginengte asa bame, Kristo \w Yesuholec|lemma="Yesu"\w* wetackelu gadaingte.\x - \xo 4:7 \xt Yes 26:3; Yoa 14:27; Kol 3:15\x*   
\s1 Aibaba gbagbacne  
\p
\v 8 Ngic hae-gbafocne, yowa monic yanguc minogale ngagesigabac. Aibaba noine nga alang-babaholec, nga dondonne ailu gbagbacne, aibaba weni yogodi nganibong angacine aicaigac. Ailu ngagebong madicne aicaigac, ailu aibabangineng madicne, nga mitengngebanogale silic aicaigac, aibaba sasawa ingucnedi ngage-ngagengineng bame wakeyackedaic.  
\v 9 Aime nani ngage-ngage wedungelebe ngageibong, ailu yowa nalacni hedecnginengti ngageibong, ailu dongenginengti nale aibaba nganiibong, ngenge bole yogo bayackedabiyeng. Ngenge inguc aibong kwele-mogungte Wapong ye ngengeholec gadaicte.\x - \xo 4:9 \xt Rom 16:20\x*   
\s1 Filipai yengele kwele-madic yowa  
\p
\v 10 Ngenge hatacmac nale ngagesilu aibabangineng hole-gboliyelu wiyac gocne baficnuningte loneleibong. Ilec Sugucne mitengkelu beliyegabac. Ngenge biyachac molickelu nale ngagesiibong, yogo noine. Ailu baficnuningte yefe monic mi fawecte kpungkelu hegileibong.  
\v 11 Na wiyac gocnele kpungkegabac me balu gagabac, na yogolec mi edocngebacaigabac. Woc-wiyacne fanelegac, yogo sugu balu ngagebe nalic aime gacaigabac. Inguc ganogale ngage-ngage biyachac baiba.  
\v 12 Ailu dameng gocna waweweine gaga, nga dameng gocna moneng-mafaholec gaga, yogo biyachac gaiba. Ailu dameng gocna nosing nogebec ailu gaga, nga dameng gocna nosing homacka gaga, nga wiyac bocyackolec gaga me woc-wiyac mikac gaga, yogo sasawa biyachac galu nganiiba. Gaga ingucne galu ngagebe nalic aime gacaigabac.   
\p
\v 13 Kristodi tapili nelegacte, wiyac sasawa yogo nalic aiyackedacte.\x - \xo 4:13 \xt 2Kor 12:10\x*  
\v 14 Umacka gaebewa ngengi baficnuibong, aibaba yogolec ngagebe madickegac.  
\v 15 Siduc Madicne molickelu edocngebaiba. Ailu Masedonia hegilelu hikeiba, dameng iwa Filipai habu ngengi sugu hiye-moneng baficnuibong, yogo ngagegaing.\x - \xo 4:15 \xt 2Kor 11:9\x*  
\v 16 Aime Tesalonika iwa galu wiyac gocnele heic aibe, ngenge ngagelu dameng gocna inguchac baficnulu lolu gaibong.  
\v 17 Inguc mibe ngengi hatacmac wiyac neleningte milocnubagac, inguc mi ngagedaing. Na ngagebe ngenge ameine madicne lobewa badaingte.   
\p
\v 18 Epafodaitusdi wiyac gocne ngengelacni balu kwesilu nelewec. Aime wiyac monicte mi kpungkelu gagabac, wiyacne bocyac fame gagabac. Aime wiyac neleicne yogodi \w depec\w* hoine madicne ingucne angacine aigac, Wapongti yogo nganime madickegac.  
\v 19 Wapongne ye woc-wiyacine wac feicneholec. Ailu yedi ngenge woc-wiyacte kpungkecaigaing, yogo Kristo Yesule ailu nalic ngeleyackedaicte.  
\v 20 Wapong Mamacnonggeng Yela wac feicne moto-motoine mikac fafegidaic, yogo foinac.   
\s1 Yowa moto-motoine  
\p
\v 21 Ngic-ngigac Wapongte bingec sasawadi Kristo Yesuholec wetackelu gagaing, nongele wenac-madic yogo yengela fugac yogo ngengi edocebadaing. Ngic hae-gbafocnonggeng yawa naholec gagabeleng, yengele wenac-madic inguchac ngengela fugac.  
\v 22 Aime ngic-ngigac Wapongte bingec sasawa yawa gagaing, yengele wenac-madic inguchac ngengela lobong fugac. Ailu aling yogo gocne \w Sisale|lemma="Sisa"\w* macka gagaing, yenge wenac-madicngineng sugucnehac ngengela lobong fugac.   
\p
\v 23 Sugucnenonggeng Yesu \w Kristole|lemma="Kristo"\w* kwele-madicti asunginang fadaic.  
\p Yogo foinac.