\id JAS Migabac NT; first draft March 2010 
\h Yakobos 
\toc1 Yakobos Yedi Hibi Kwelengkewec 
\toc2 Yakobos 
\toc3 Yak 
\mt1 Yakobos  
\mt2 Yedi Hibi Kwelengkewec  
\is1 Mimi-yegeng yowa  
\ip Yakobos, ye Yesule gbaine, ye Yesule habu Yerusalem iwa gaibong, yengele micne monic. Yesu homalu homackacni gboliyelu fangkeme hifa 20 ngama ingucne motome, yedi hibi yago kwelengkelu Yesule habu gocne yengela saleme hikewec. Ngic-ngigac ngage-ngagesingkolec, yenge aibaba wenuc aicaigaing, yogolec kwelengkeyelewec.  
\is1 Yowa yago hibi nebocina fagac  
\io1 1:1 Wenac-madic yowa  
\io1 1:2–18 Umac haicine monic-monic  
\io1 1:19–27 Wapongte yowa sugu ngagebeng mi madickegac, yogo balaibedabeleng  
\io1 2:1–13 Ngic-ngigac nganicebalu aibaba silicine moniyang aiyeledabeleng  
\io1 2:14–26 Aibaba yogodi ngage-ngagesing edaligac  
\io1 3:1–18 Micnonggeng damongkelu yowa madicne sugu midabeleng  
\io1 4:1—5:6 Yefe sowacne ewalilu Wapongte aibaba balaibedabeleng  
\io1 5:7–20 Aibaba madicna sanangkelu domadabeleng  
\c 1  
\s1 Wenac-madic yowa  
\p
\v 1 Na Yakobos, Wapong nga Sugucne \w Yesu\w* \w Kristo\w* yekele kwelec kwekwe gagabac. Na hibi yago kwelengkelu Israel ngesa-ngambofocngineng 12 himongne himongne ngic-ngigac sasawa singsalolong kwelu gagaing, nale wenac-madic ngengela lobe fugac.\x - \xo 1:1 \xt Mat 13:55; Gal 1:19; Sale 15:23; 1Pi 1:1\x*   
\s1 Umac haicine monic-monic  
\p
\v 2 \w Ngic hae-gbafocne|lemma="ngic hae-gba"\w*, lokwesac nga umac haicine monic-monic fikengeledaicte, wiyac yogo sasawa belic-belicineholec, ngenge inguc ngagedaing.\x - \xo 1:2 \xt Rom 5:3-5\x*  
\v 3 Ngenge yanguc ngagegaing, ngage-ngagesingngineng lokwesacka lobong yogodi basanangngebame ngic-ngigac sanangne aidaingte.\x - \xo 1:3 \xt 1Pi 1:7\x*  
\v 4 Ailu ngenge tatakic mikac sanangne galu bolengineng bucbuchac badaingte. Bamoctolu sugule-benangkelu, wiyac monicte kauc nalic mi badaingte.   
\s1 Wapongtacni ngage-ngage-motoc  
\p
\v 5 Wapong ye pakeng-yowa mi micaigac. Ye angacka galu ngic-ngigac ngage-ngage bocyac yelecaigac. Ilec ngengele hewackacni ngic me ngigac monicti ngage-ngage-motocine lome songtoleme, ye Wapong milockelu uwacnome lacnodaicte.\x - \xo 1:5 \xt Ynn 2:3-6\x*  
\v 6 Aime ye uwacnolu milockenogale milu, iwabac ngageboc mikac ngagesingkelu milockedaing. Monic ye ngageboc aidaicte, ye kiwecte dibong ingucne, gbelongti yogo ewalilu lec-welec aime kosa wecaigac.  
\v 7 Ngic-ngigac ingucne yenge, Sugucnelacni wiyac monic nalic badabelengte, inguc mi ngagesidaing.  
\v 8 Ngic-ngigac ingucne yenge himongte gaga nga Wapongte gaga momochac balaibelu yengileng yefe sasawa yogo ngagebockolec gagaing.   
\s1 Ngic feicne waicne  
\p
\v 9 Ngic hae-gbanonggeng monic ye waweweine gacaigac, Wapongti yele ngageme feicne aigac, ye yogolec angac ngagedaic.  
\v 10 Aime ngic monic moneng-mafaineholec, Wapongti yele ngageme waweweine aigacte ye angac ngagedaic. Daling aliinedi kpinding kwelina siyeckelu molongkelu miyac aicaigac, ngic yogo ye ingucnehac miyac aidaicte.\x - \xo 1:10 \xt Yes 40:6-7\x*  
\v 11 Aime ubiyacte wenac dacineholecti ofelu kpinding kweme sokuwelu aliine silicine madicne molongkeme miyac aidaicte. Nga ngic moneng-mafaholecti wiyac bafuwanale boletowa bacaigac, ye silicine ingucnehac molongkelu miyac aidaicte.   
\p
\v 12 Monic lokwesacka sanangne domalu umac badaicte, ye kwele-angackolec. Aime ngic-ngigac Wapong kwelenginengti angac ngagelu aicnocaigaing, yenge gaga-sanang yelenale mipangkewec. Monic ye lokwesacka sanangkelu gagac, ye yogo hocne badaicte.  
\v 13 Bikicte lokwesacti ngic monic fikecnome, ye yanguc mi midaic, “Wapongti lokwesacka locnugac.”  
\p I yangucte, wiyac sowacnedi Wapong nalic mi fuluckedaicte. Nga Wapongti ngic monic bikicte lokwesacka inguchac mi lodaicte, miyac.  
\v 14 Ngic yengileng angacti lokwesacka filesoc locebadaicte. Ailu yengileng angacti bacebame kwesac ngage-ngage ngagelu aibaba haicine monic-monic ainogale angac ngagedaingte.  
\v 15 Aime angac sowacnedi gobeelu madec monic badaicte, ye wacine \w bikic\w*. Aime bikicti sugulelu homac bafuwadaicte.   
\p
\v 16 Ngic hae-gbafocne kwelenedi ngengele angac ngagegabac, ngenge kwesacngebabong yanguc mi ngagedaing, Wapongti bikicte lokwesacka locnubagac.  
\v 17 Wapong ye angoc sawawa fagac yogolec Mamac. Ailu yela kundung monic mi fagac, miyac. Yela angoc fawecti fagac, nga faginowagac. Aime wilengkacni wiyac madicne nga dondonne sasawa salenoleme wacaigaing, yogo kwele-madicineholec inguc nolelu gagac.  
\v 18 Wapong ye angacinele ailu yowa noina gobeelu bacnubame yele adu-madecfocine fikeibeng gagabeleng. Yedi mime wiyac sasawa himongka fikeyackewec, yogolec hodocine hole-hole ainangte inguc ainolewec.\f + \fr 1:18 \ft Noba-nosing gbolicnacni hodocine holecaigabeleng, yogo ingucnehac ainangte edocnubawec.\f*\x - \xo 1:18 \xt Yoa 1:13\x*   
\s1 Yowa ngagelu balaibenoga  
\p
\v 19 Ngic hae-gbafocne kwelenedi ngengele angac ngagegabac, ngenge yanguc ngagening, yowa monic mibong kwesime ngenge biyac hedec lodabiyeng. Lolu yowa yogolec ameine biyac mi midabiyeng, me aalic biyac mi ngagedaing.  
\v 20 Wapongte haicka ngicte aalicti aibaba dondonne mi kwefickedaicte, miyac.\x - \xo 1:20 \xt Ngag 7:9\x*  
\v 21 Ilec ailu ngenge aibaba wonongkolec nga sisipilic aibaba ingucne bocyac fagac, yogo sasawa baickeyackedaing. Ailu ngenge ulucne gacgubong yowa kwelenginang duweicne, yogolec tapilidi kwele-asungineng bikicte ameine bame wasecne aidaingte. Yowa yogo hefoledaing.\x - \xo 1:21 \xt Kol 3:8; 1Pi 2:1\x*   
\p
\v 22 Ngenge Wapongte yowa hedecti sugu mi ngagedaing. Ngenge yowaine ngagelu balaibedaingte, yogodibac madickedaicte. Inguc mi aidaingtewa, ngenge ngengileng kwesac ainagulu ngagebong ngic madicne gagabeleng ingucne aidaicte.\x - \xo 1:22 \xt Mat 7:26; Rom 2:13\x*  
\v 23 Monic ye Wapongte yowa moc sugu ngagelu yogo mi balaibedaictewa, ye ngicti yeicne haic-mesuine iluc nganicka nganicaigac, yogo ingucne.  
\v 24 Ye ilucine nganilu gacgu iwahac yeicne ngani-nganiine weningucne, yogo biyac ngigeckedaicte.  
\v 25 Wapongte \w yefe-yowa\w* dondonne, yogodi muckacni lukecnubacaigac. Aime monicti yefe-yowa yogo ngani-ngagec aigacgu mi ngigeckeme aibabaine balu gadaicte, ye kwele-angackolec aidaicte.\x - \xo 1:25 \xt Rom 8:2; Yak 2:12\x*   
\s1 Alang-baba noine  
\p
\v 26 Monic ye yeuctihac yanguc ngagedaicte, Na Wapong alang bacnolu gagabac, inguc milu beluine mi damongkedaictewa, yele alang-baba yogodi yefe lilome babaficine mi aidaicte. Ye yeicne kweleina kwesac aidaicte hocne.\x - \xo 1:26 \xt Mige 141:3\x*  
\v 27 Aime Wapong Mamacnonggeng yele haicka alang-babale aibaba \w gbagbacne\w*, nga wonong mikac, yogolec silicine yanguc. Himongtowa yagolec angac lobe holecnolu, wonong mikac galu buwenac nga ngigac-hosec umacka gagaing, yenge ngani-damong aiyeledabeleng. Yogodi Wapongte alang-baba madicne.   
\c 2  
\s1 Aibaba silicine moniyang  
\p
\v 1 \w Ngic hae-gbafocne|lemma="ngic hae-gba"\w*, Sugucnenonggeng \w Yesu\w* \w Kristo\w* ye tapili nga wac feicneholec gagac. Ailu ye ngagesingkegaing, ngenge ngic feicne waicne nganicebalu aibabanginengte silicka mi aiyeledaing.\x - \xo 2:1 \xt Sale 10:34; Yak 2:9\x*  
\v 2 I yangucte, ngic monicti ngengele \w kpakpaduc macka|lemma="Kpakpaduc mac"\w* fedaicte. Ye ling goldi baicne, ailu ngakpi hibine madicne holelu kwesidaicte. Aime dameng iwahac ngic monic waweweine ye inguchac ngakpiine esecne wonongkolec holelu kwesidaicte.  
\v 3 Inguc kwesiboc ngenge ngic ngakpiine hibine madicne holegac, ye nganilu yele midaingte, “Agone, ga yawa wele ngiye-ngiye madicna ngiyec.” Inguc milu ngic waweweine yelebac yanguc midaingte, “Ga edi hikelu domac,” me “Ga emena hige ede-edena wangiyenong.”  
\v 4 Inguc aidaingtewa, ngenge ngengileng silicngineng ngani-motolu yefe sowacna ngic-ngigac agofocngineng wosaecebadaingte, me? Yogo mi madickedaicte.   
\p
\v 5 Ngic hae-gbafocne ngengele angac ngagegabac, ngenge ngagening. Ngic-ngigac himongtowa yagowa waweweine gagaing, yenge ngage-ngagesing feicneholec aidaingte. Ailu \w ngani-damongte|lemma="Ngani-damong"\w* mole-damoc badaingte. Wapongti inguc ngagelu bawosaecebawec, me? Oc. Ngic-ngigac kweledi Wapongte angac ngagelu aicnocaigaing, yogo yengi ainingte mipangkewec.\x - \xo 2:5 \xt 1Kor 1:26-28\x*  
\v 6 Nga ngengebac ngic-ngigac waweweine game bafuwayelecaigaing. Aime ngic mafatowanginengkolec yengi hocne basowalecngebalu yowawa locngebacaigaing, me? Oc, aime omale yenge sugu alang bacebacaigaing?  
\v 7 Yesule wac madicne molickelu feinginang fewec. Aime moneng-mafanginengkolec yengi hocne wac yogo milu sulecaigaing, me? Oc, yenge inguc aicaigaing.   
\s1 Ngageboc mikac gaga  
\p
\v 8 Aime Wapongte hibiwa \w yefe-yowa\w* yanguc kwelengkeicne fagac,  
\q1 “Gageicne aigelecaigac, silicine ingucnehac ngic-ngigac gale emewa gagaing, yengele kwelegonedi ago aiyelelu angac ngageyelelu gadamec.” \rq (Dep 19:18) \rq*  
\m Ngenge ngani-damongte yefe-yowa yogo foinac balaibecaigaingka, aibaba madicne aigaing.\x - \xo 2:8 \xt Mat 19:19; Gal 5:14\x*  
\v 9 Ailu ngenge ngic feicne waicne nganicebalu aibabanginengte silicka aiyelegaingka \w bikic\w* bafuwadaingte. Aime yefe-yowadi bikicngineng mime yegengkeme yefe-yowa wewe ngic, inguc wacngebadaicte.\x - \xo 2:9 \xt Yef 1:17\x*  
\v 10 I yangucte, monic ye yefe-yowa sasawa balaibeyackelu, hewacine moniyang sugu hegiledaicte, ye hewacine sasawa yogolec ameine badaicte.\x - \xo 2:10 \xt Mat 5:19\x*  
\v 11 I yanguc, Wapongti yanguc miwec fagac,  
\q1 “Ga selo-boic mi aidamec.”  
\m Ailu hatacmac yanguc,  
\q1 “Ga ngic-ngigac mi wehomacebadamec.” \rq (Wah 20:13-14; Yef 5:17-18) \rq*  
\m Aime selo-boic mi ailu ngic wehomadamectewa, yefe-yowa wewe ngic biyac ailu gagic.\x - \xo 2:11 \xt Rom 13:9\x*  
\v 12 Wapongte yefe-yowadi muckacni lukecnubagac. Ailu yedi yefe-yowa yogo balaibelu aibabanonggeng wosaedaicte. Ilec ngenge inguchac yefe-yowa yogo yowanginang nga aibabanginang balaibedaing.\x - \xo 2:12 \xt Gal 6:2; Yak 1:25; 1Pi 2:16\x*  
\v 13 Monic ye ngic-ngigac kwele-sowac mi aiyelecaigac, ye yowawa lobong dameng iwa kwele-sowac mikac mimoctodaicte. Aime monic ye kwele-sowackolec gacaigacti yowawa domalu gbelong aidaicte.\x - \xo 2:13 \xt Mat 5:7; 18:32-35\x*   
\s1 Ngage-ngagesingkolec gaga  
\p
\v 14 Ngic hae-gbafocne, ngic monicti midaicte, “Na ngage-ngagesingkolec gagabac.” Inguc milu aibabaine madicne mi facnogacka, ngage-ngagesingngine yogolec noine mi bafuwadaicte. Aime ngage-ngagesing ingucnedi umackacni nalic bamoctodaicte, me? Yogo miyac. Ilec ailu ye wasecne mi aidaicte.  
\v 15 Ngic hae-gba me adu-seng yengelacni monic, ye gagaina oma ngakpi-kpoluc holedaicte? Ailu hadengsoc nosing nonogale kpungkeme,\x - \xo 2:15 \xt 1Yoa 3:17\x*  
\v 16 ngengelacni monicti yele yanguc midaicte, “Ga kwele-mogungkolec galu gbelong ngakpigone holelu nosing nogebec aidamec.” Ye micti sugu inguc milu socte wiyacka kpungkegac, yogo mi lacnodaictewa, wiyac madicne noine fikedaicte, me? Yogo miyac.  
\v 17 Inguc aime ngage-ngagesingine aibabaine mikac fagac, yogo noine mikac, homaicne.   
\p
\v 18 Aime monicti yanguc midaicte, “Ga ngage-ngagesinggoneholec gagic. Nga nabac aibabane madicne balu gagabac.” Ngage-ngagesinggone aibabaine mikac, yogo edalicnungka nganilubac, aibabane edalicgube ngage-ngagesingne nalic nganidamecte.\x - \xo 2:18 \xt Gal 5:6\x*  
\v 19 Wapong ye moniyang sugu gagac, yogo biyac ngagesingkedamecte, yogodi madicne. Aimebac yogo sugu nalic mi aigac. \w Aleng\w* yenge inguchac yogo ngagesingkelu hangocebame dengdengebacaigac.\f + \fr 2:19 \ft Aleng yenge moc ngagesingkecaigaing, aibabangineng madicne monic mi fagac. Ilec ngage-ngagesingngineng yogo noine mikac.\f*  
\v 20 Nga gabac ngage-ngagesingkolec galu aibabagone mikac gagic, yogo noine monic mi bafuwadamecte, miyac. Ga ngic ngage-ngagegone mikac ingucne, yogolec silicine ngage-motodamec.   
\p
\v 21 Molickelu nongileng ngambononggeng \w Abraham\w* ye madecine \w Aisak\w* depec hocne milu \w alatawa|lemma="Alata"\w* lome, Wapongti yele ngage-ngagesing yogo aibabaineholec nganilu ngic dondonne wackewec.\x - \xo 2:21 \xt Fike 22:9-12\x*  
\v 22 Aime yele ngage-ngagesing nga aibabaine, yeke baficnagulu yekilec momochac bole baiboc. Aime aibabainedi ngage-ngagesinginele bole bamoctome sugulewec, yogo ngani-motogic.\x - \xo 2:22 \xt Hib 11:17-18\x*  
\v 23 Aime yogodi noine aigac. Nga Wapongte hibidi edalicnubalu yanguc migac,  
\q1 “Abraham ye Wapong ngagesingkewecte ailu, ye ngic dondonne wackewec.” \rq (Fike 15:6) \rq*  
\m Ailu yele yanguc migac, “Ye Wapong agoine.”\x - \xo 2:23 \xt 2Ngsi 20:7; Yes 41:8\x*  
\v 24 Ilec ailu Wapongti ngic monic aibabainele ailu ye ngic dondonne wackedaicte, yogo ngage-ngagesingka sugu miyac, ngenge yogo ngani-motogaing.   
\p
\v 25 Aime silicine ingucnehac Wapongti yefe-ngigac Rahap aibabainele ailu dondonne wackewec, me? Oc, yedi ngic salecepabong kwesiboc macka locepawec. Locepalu monicka yefe salecepame hikeiboc.\x - \xo 2:25 \xt Yos 2:1-21; Hib 11:31\x*  
\v 26 Soc asuine mikac, yogo homaicne. Aime silicine ingucnehac ngage-ngagesing aibabaine mikac, yogo ingucnehac homaicne.   
\c 3  
\s1 Mic-yowanonggeng  
\p
\v 1 \w Ngic hae-gbafocne|lemma="ngic hae-gba"\w*, ngengelacni bocyacti Wapongte yowale wewedu ainingte mi ngagesidaing. Wapongti ngic-ngigac yowawa locebadaicte, dameng iwa wewedu bolenonggengte funginenonggeng sugucnehac wosaelu yowanonggeng mimoctodaicte.  
\v 2 Nongileng sasawadi dameng bocyac bikicka wawegabeleng. Aime monic ye yeicne yowa damongkelu bikic mi bafuwadaictewa, ye sugule-benangkelu socine ingucnehac damongkenale mi kpungkedaicte.  
\v 3 Aime becosic yenge yowanonggeng ngagelu balaibeningte, micnginang aen kpisicne lobeng aente ailu socngineng bucbuchac ngage-ngagengineng balaibedaicte.  
\v 4 Ailu lac-wage kiwecka gagaing, yogo inguchac ngagegaing. Yenge wiyac sugucnebenang, aime gbelong sanangnedi bacebame lac-wage damong ye puli hakicinedi weme lac-wagetowa yogo yele mole balaibedaicte. \fig Lac-wage puli balaibecaigac|alt="Sailing-ship follows the paddle" src="GT00133.tif" size="col" copy="Gordon Thompson © 2012 Wycliffe Bible Translators Inc." ref="3:4" \fig*   
\p
\v 5 Aime belu ye inguchac socnonggang wiyac kpisicne aigac. Ailu sifu yowatowa milu socnonggeng bafedaicte. Aime ngagegaing, dac kpisicne hakicti molickelu lobeme yoc-kate sugucnebenang lobecaigac.  
\v 6 Belunonggeng yogo dac ingucne, yogodi hocne socnonggengte wiyac sasawa ewalicebalu sowacnele nenggacine aicaigac. Aime dac-sanangti belunonggeng lome lobeme, belunonggengti socnonggeng sasawa bame wonong aime gaganonggeng sasawa yogo dacka lome lobedaicte.\x - \xo 3:6 \xt Mat 12:36-37; 15:11,18-19\x*  
\v 7 Bec-sic nga nango, ailu hema nga kiwecka sic haicine monic-monic fayackegaing, yenge esecne nga yakumac yowa weduyelelu damongebagabeleng.  
\v 8 Aime sifu monic ye beluine nalic mi damongkecaigac, belu yogo ngiye-ngagecine mikac sowacne balu game homacte marasingti yela wakecaigac.\x - \xo 3:8 \xt Rom 3:13\x*   
\p
\v 9 Nongileng belunonggengti Sugucne Mamacnonggeng mitengkecaigabeleng, aime belunonggeng yogodi hocne ngic-ngigac Wapongte silic bacebaicne, yenge sawecebacaigabeleng.  
\v 10 Mic-sabang moniyang yogowacni mimi-madic yowa nga sawec-yowa momochac wacaigac. Ngic hae-gbafocne, yogodi mi madickegac.  
\v 11 Misa dongeine moniyang iwacnihac, misa sawecne nga hobecine momochac nalic wadabiyecte, me? Yogo miyac.  
\v 12 Ngic hae-gbafocne, fik yocti \w oliwa\w* hucine nalic badaicte, me \w waing mucka|lemma="waing"\w* fik hucine nalic fikedaicte, me? Yogo miyac. Silicine ingucnehac kiweckolec misa nalic mi filanoga.   
\s1 Ngage-ngage-motoc noine  
\p
\v 13 Ngengelacni monicti ngage-ngage-motoc nga ngage-ngageine ileckeicne balu gadaictewa, ye ngage-ngage-motoc iwacni ulucne galu aibabaine madicne edalicngebadaicte.  
\v 14 Aimebac ngenge kwelenginang hasowac ngabaholec ailu ngengileng sugu doficnagudaingtewa, ngengileng socngineng bafelu kwesacka galu yowa noinele yowa kwekwe mi aidaing.  
\v 15 Ngage-ngage-motoc kwesacine ingucne yogolec fungine honocmengkacni miyac, yogobac himongkacni, ailu kwele esecne nga aleng yengele bole.  
\v 16 Ngenge kwelenginang hasowac ngabaholec ailu ngengileng sugu doficnagudaingtewa, ngenge yuwenackolec ingucnehac galu, aibaba sowacne haicine monic-monic aigacgu siyeckelu gadaingte.  
\v 17 Ngage-ngage-motoc wilengkacni wacaigac, yogodi molickelu ngage-ngage gbagbacne lolu, hatacmac kwele-mogung nga aibaba ulucne bafuwagac. Ailu kwelewa bawagac, ailu kwele-sowackolec, nga noine madicne, ailu angasosoc aigac, ailu kwesac-yowa mi fagac.  
\v 18 Ngic-ngigac kwele-mogung gagale bole bacaigaing, yenge kwele-mogung wasecne duwebong gaga dondonnele noine fikeyeledaicte.\x - \xo 3:18 \xt Mat 5:9; Hib 12:11\x*   
\c 4  
\s1 Ngenge kwelengineng hefaliyedaing  
\p
\v 1 Hewacnginang hudu nga ngaba yogo wenuwacni kwesilu kpafengngebagac? Ngani-angac fagac, yogo kwelenginangkocni, me? Oc, iwacni kwelenginang yuwenac aicaigaing.\x - \xo 4:1 \xt Rom 7:23\x*  
\v 2 Ngenge andac ailu wiyac mi bacaigaing. Ilec ailu ngic wehomalu hasowac ngagelu wiyac nalic mi babong fikedaicte. Ailu ngenge ngelec-ngelec nga yuwenac aicaigaing. Ailu ngenge mimilocngineng mikac gagaingte wiyac madicne nalic mi badaingte.  
\v 3 Ngengebac wiyac banogale milockelu yanguc ngagesicaigaing, Socte ngani-angacka moneng-mafanonggeng nalic wickedabelengte. Inguc ngagelu ngenge kosa milockelu yogolec noine monic mi badaingte.   
\p
\v 4 Ngic-ngigac selo-boic ingucne aicaigaing, ngenge yanguc mi ngagegaing, me? Monic ye himongtowa yagolec gaga yogolec agoine aicaigac, ye Wapong lobe holecnodaicte. Ilec monic ye himongtowa yagolec gagale ago ainogale aigac, ye Wapongte ngabale aling aigac.\x - \xo 4:4 \xt Rom 8:7; 1Yoa 2:15\x*  
\v 5 Wapongte hibiwa yowa yanguc fagac, Ye asunonggeng nongileng kwelewa lome ngiyegac. Ilec nongileng yele aling ganangte bocyac aicnolu gagac. Ngenge yele aalic bafuwadaingkale, ye mi hegiledaing.\f + \fr 4:5 \ft Wapongte hibile ngage-ngage ngic yenge yogolec yowa yanguc ngagegaing, Yakobos ye Wapongte hibiwacni yowa gocne yago ingucne kpatulecebalu migac, Wahikeicne 20:5; 34:14; Sekariya 8:2\f* Yowa yogo moc mi kwelengkeicne fagac, yogo ngagegaing, me?  
\v 6 Aimebac ye kwele-madic sugucne ewalilu ainolegac, yogolec hocne Wapongte hibidi yanguc migac,  
\q1 “Wapongti ngic soc bafefe gagaing, yengele takickeme ngaba aigac. Nga soc-kwelengineng bawalu gagaing, yenge kwele-madic aiyelelu gagac.” \rq (Ynn 3:34) \rq*\x - \xo 4:6 \xt 1Pi 5:5\x*   
\m
\v 7 Ilec ngenge Wapongte bagewa gadaing. Ilec ailu Aleng Sugucnenginengte yowa kwelu lobe holecnodaing. Inguc aiyebongka ye hegilecngebalu hikedaicte.\x - \xo 4:7 \xt Efs 6:12\x*  
\v 8 Ailu ngenge Wapongte emewa ledaing. Inguc leebongka ye inguchac ngengele emewa weledaicte. \w Bikic-baba|lemma="Bikic"\w* ngic, ngenge molengineng suwedaing. Nga ngic-ngigac kwele-yaeckolec gagaing, ngenge kwelengineng suwe-bamadic aibong \w gbagbacne\w* aina.\x - \xo 4:8 \xt Sek 1:3; Mal 3:7; Yes 1:16\x*  
\v 9 Ngenge ube-hobec nga kwele-sowac ngagelu hii-songgong aidaing. Ailu gougouholec gagaing, ngenge hefaliyelu maguc-maguc aidaing. Nga belic-belicka gagaing, ngenge hefaliyelu kwele-umackolec aidaing.  
\v 10 Ngenge Sugucnele haicka bawacnagudaing. Inguc aibong yedi wacngineng bafedaicte.\x - \xo 4:10 \xt Yop 5:11; 1Pi 5:6\x*   
\s1 Ngenge ngengung mi wosaecnagudaing  
\p
\v 11 \w Ngic hae-gbafocne|lemma="ngic hae-gba"\w*, ngenge ngengung mi misowalecnagudaing. Monic ye ngic hae-gbaine misowaledaicte, me aibabaine wosaelu misowaledaictewa, ye \w yefe-yowa\w* misowalelu wosaegac. Ailu yefe-yowa wosaelu bawagicka, ga yefe-yowa mi balaibecaigic, miyac. Gagibac yefe-yowale wowosae-ngic ailu gagic.  
\v 12 Yefe-yowale wowosae-ngic, ye yefe-yowa kwelengkewec, ye moniyangti sugu gagac. Ailu yedi hocne nalic bikicte ameine bame wasecne aidaingte, me basowalecngebame miyac aidaingte, ye yogolec tapili facnogac. Ga monic emegona gagac, ye wosaecte tapili yogo madi gelewec? Monic mi geleicne, miyac.\x - \xo 4:12 \xt Rom 2:1; 14:4\x*   
\s1 Soc bafefe ngic  
\p
\v 13 Gocne yenge yanguc migaing, “Nonge yakumac me saeme taon iwa me taon monicka hikelu hifa moniyangte kwelina iwa galu woc-wiyac fuli balu salelu hiye-monengnonggeng hatacmac bafuwadabelengte.” Ngic-ngigac bole ingucne nalic bacaigaing. Aime sifu ngengele yanguc mibe ngagening.\x - \xo 4:13 \xt Luk 12:18-20\x*  
\v 14 “Ngenge saemele gaganginengte silic wenuc aidaicte, yogo monic mi ngagegaing. Gagangineng yogo hasoc ingucne, dameng kpisicnemac ofelu miyac aidaicte.”\x - \xo 4:14 \xt Ynn 27:1; Mige 39:5,11\x*  
\v 15 Ngenge yanguc mibong madickedaicte, “Sugucnedi ngageme madickedaictewa, nonge gacgu bole yogo me yogo badabelengte.”  
\v 16 Aime ngenge ngage-ngagengineng yogo feicne ngagelu socngineng bafelu micaigaing. Yowa ingucne yogo aibaba sowacnebenang aigac.  
\v 17 Ilec ngagegaing, monic ye aibabaine madicne ainale ngage-ngage-motoc facnogac. Ailu yogo sifu hegiledaicte, ye \w bikickolec|lemma="Bikic"\w* aidaicte.\x - \xo 4:17 \xt Luk 12:47\x*   
\c 5  
\s1 Ngic-ngigac moneng-mafanginengkolec  
\p
\v 1 Ngic-ngigac moneng-mafanginengkolec, ngenge ngagening, umac sugucnedi ngengela fikelu basowalecngebadaicte. Ilec ailu, ngenge aukwelu hiyaning.  
\v 2 Ngenge woc-wiyacngineng musungkelu miyac aidaicte. Ailu ngakpi-kpolucngineng yogo une-kwadacdangti nome miyac aidaicte.\x - \xo 5:2 \xt Mat 6:19\x*  
\v 3 Hufengti gol nga siliwangineng badaicte. Ailu hufeng yogodi siduc-mimi ngic ailu funginengineng mime yegengkedaicte. Aime woc-wiyacnginengti socnginang dac ingucne lobecngebadaicte. Ngenge dameng moto-motoina hocne moneng-mafangineng bakpaduc aibong, yogodi inguc fikengeledaicte.  
\v 4 Ngagegaing, bole-ngicfocngineng yenge nosing ngengileng bolenginangkocni noine fuluckelu ngeleibong. Ngelebong ngenge bole-fuli mi yeleibong. Aime fuli yogodi hiyalu gagac. Aime bole-ngic yenge nosing noine kpaduckeibong, yenge inguchac hiyabong Sugucne Tapilitowa Fileine, yele hedecka biyac haume ngagewec.\x - \xo 5:4 \xt Yef 24:14-15\x*  
\v 5 Ngenge himongka galu socte angac balaibeibong. Balaibebong moneng-mafanginengti gaganginang wakewec. Aime Wapongti ngic-ngigac wehomacebanale damengngine bangkaleemewa, ngengebac nogebec ailu gagainghac.\x - \xo 5:5 \xt Luk 16:25\x*  
\v 6 Ngenge ngic dondonne yowawa lolu mimoctolu webong homawec. Aimebac ye ngaba monic mi balu gawec.   
\s1 Yesu kwesidaicte  
\p
\v 7 \w Ngic hae-gbafocne|lemma="ngic hae-gba"\w*, ngenge ilec tatakic mikac wangec gaebongka Sugucne kwesidaic. Aime ngagegaing, nosing-bole filefocine yengi nosingngineng duwebong mac kweme yengi nosingngineng himongkacni sugulenale tatakic mikac noinele damengte wangec gacaigaing.\x - \xo 5:7 \xt Yef 11:14; Yer 5:24\x*  
\v 8 Aime Sugucnele kwesi-kwesi dameng biyac bangkale welegacte ailu, ngenge inguchac kwelengineng basanangkelu tatakic mikac wangec gadabiyeng.\x - \xo 5:8 \xt Rom 13:11-12; 1Pi 4:7\x*   
\p
\v 9 Ngic hae-gbafocne, ngagegaing. Wowosae-ngic ye nu lobina biyac kwesilu domagac. Ngenge yowawa wawedaingkale, ngengungtihac yowa kwekwe mi ainagudaing.  
\v 10 \w Siduc-mimi ngic\w* molickelu Sugucnele wacka yowa milu gaibong, yenge tatakic mikac umac balu ulucne gaibong. Ngic hae-gbafocne, ngenge yengele silic ingucnehac balaibelu inguc aidaing.  
\v 11 Ngagegaing, ngic-ngigac tatakic mikac gaibong, yengele ngagebeng kwele-angackolec aiwec. Aime ngenge Yople yowa-siduc biyac ngageibong. Ye umacka sanangne tatakic mikac gawecte ailu, Sugucnedi yela pasi madicne bawec. Sugucnedi kwele-sowac sugucnehac, nga ngageboc mikac aibabaine ingucne aicaigac.\x - \xo 5:11 \xt Wah 34:6; Yop 1:21-22; 2:10; Mige 103:8\x*   
\s1 Yowa sanangkenale mi minoga  
\p
\v 12 Aime ngic hae-gbafocne, yowa noine monic yanguc, ngenge yowangineng sanangkenale wiyac monic wackelu mi mibong sanangkedaic. Ngenge honocmeng me himong wackelu yowangineng mibong mi sanangkedaic. Ailu wiyac sugucne monic wackelu inguchac mi mibong sanangkedaic. Ngenge galu yowawa wawedaingkale, “foinac” yogo foinac. Nga “miyac” yogo miyac, inguc sugu midaing.\x - \xo 5:12 \xt Mat 5:34-37\x*   
\s1 Ngage-ngagesingkolec milockenoga  
\p
\v 13 Ngengelacni ngic me ngigac monicti umac gocne fikecnodaictewa, ye milockedaic. Ailu monicti belic-belicka gadaictewa, ye mimiteng gee holedaic.  
\v 14 Aime ngengelacni monicti huc aicnodaictewa, Yesule habu damong wacebame yengi yele ailu Sugucnele wacka helocti hosocnolu milockedaing.\x - \xo 5:14 \xt Mrk 6:13\x*  
\v 15 Inguc aibong mimiloc ngage-ngagesingkolec, yogodi huckolec ye bamadickedaicte. Ailu Sugucnedi bafickeme fangkedaicte. Aime ye \w bikickolec|lemma="Bikic"\w* aigacka, Sugucnedi bikicine hegileme miyac aiyackedaicte.\x - \xo 5:15 \xt Mrk 16:18\x*  
\v 16 Ilec ailu ngenge madickenogale bikicngineng ngengungtihac mifickeyackelu mimilocti baficnagudaing. Monic ye dondonnedi milockedaicte, yogodi wiyac tapiliineholec ailu babaficineholec aidaicte.  
\v 17 \w Elaiya\w* ye ngicbenang nongileng ingucnedi mac mi kwenale milockeme mac mi kweme hifa habackang nga nebocine aiwec.\x - \xo 5:17 \xt 1Ngt 17:1; 18:1\x*  
\v 18 Ailu ye hatacmac milockeme sawawacni mac kweme himongti nosing hatacmac kwefickeme fikewec.\x - \xo 5:18 \xt 1Ngt 18:42-45\x*   
\s1 Yefe lilonoga  
\p
\v 19 Ngic hae-gbafocne, ngengelacni monicti yowa noinele yefe lilolu kosa hikedaictewa, monicti ye bafickeme ye hatacmac hefaliyedaicte.\x - \xo 5:19 \xt Gal 6:1\x*  
\v 20 Ailu ye yanguc ngagedaic, ye ngic \w bikickolec|lemma="Bikic"\w* bafickeme sowacnele yefewacni hefaliyegac, ye ngic yele kwele-asuine homackacni bamoctocnome, bikicine bocyac miyac aidaicte.\x - \xo 5:20 \xt Ynn 10:12; 1Pi 4:8\x*