\id 2TI - Migabac NT; 9 Sep 2011 1st draft 
\h 2 Timoti 
\toc1 Poldi Timotile Hibi Monic Hatacmac Kwelengkewec 
\toc2 2 Timoti 
\toc3 2Tim 
\mt2 Poldi  
\mt1 Timotile  
\mt2 Hibi Monic Hatacmac Kwelengkewec  
\is1 Mimi-yegeng yowa  
\ip Timoti ye Asia prowins iwacni. Mamacine ye Grik ngic, nga nenggacine ye Yuda ngigac. Pol ye Yesule siduc edocebame Timoti ye yogo ngagelu ngagesingkewec. Ngagesingkeme, Pol ye Timoti mamacine ingucne ailu damongkeme yeholec Yesule bole balu gaiboc.  
\ip Pol ye molickelu Roma iwa muc-macka ngiyegacgu hegile haulu hikewec. Timoti Yesule habu Efesas iwa gaibong, yenge baficebanale saleme hikewec. Inguc gacgume Poldi Yesule siduc hatacmac edocebame ngageibong. Inguc mime hatacmac balu Roma iwa muc-macka lobong alecine yaeckang iwa ngiyewec. Ngiyelu yanguc ngagewec, “Yenge wehomacnudaingte mecne.” Ilec Poldi Timoti basanangkeme doicka sanangne domanale hibi yago kwelengkewec. Yesu homackacni gboliyelu honocmengka feme hifa 35 ngama ingucne motome, Poldi hibi yago alecine yaeckang kwelengkelu Timotile lome fuwec.  
\is1 Yowa yago hibi nebocina fagac  
\io1 1:1–2 Wenac-madic yowa  
\io1 1:3–7 Poldi Timoti ngagesingkewecte kwele-madic yowa edowec  
\io1 1:8—2:13 Timoti sanangne domalu bole doicineholec bame madickedaicte  
\io1 2:14–26 Kristole bole-ngic noine, yengele maa  
\io1 3:1–9 Dameng moto-motoina bikicngineng sugulebenangkedaicte  
\io1 3:10—4:5 Timoti boleinele sawang-yowa miwec  
\io1 4:6–18 Pol yele angac nga ngage-ngage  
\io1 4:19–22 Yowa moto-motoine nga wenac-madic yowa  
\c 1  
\s1 Hibile molic-molic yowa  
\p
\v 1 Na Pol, Wapongti ngageneleme \w Kristo\w* \w Yesule|lemma="Yesu"\w* \w salecebaicne\w* aiiba. Aime ngic-ngigac yenge Kristo Yesuholec wetackelu yelacni gaga badaingte, mimipang yowa yogo mibe yegengkeyelenale salecnuwec.  
\v 2 Timoti madecne, na kwelenedi gale angac ngagelu hibi yago logelegabac. Wapong Mamac nga Sugucnenonggeng Kristo Yesu, yekele kwele-madic nga kwele-sowac ailu kwele-mogungtowadi gala fadaic.\x - \xo 1:2 \xt Sale 16:1; 1Tim 1:2\x*   
\s1 Timotile ung-yowa  
\p
\v 3 Ngesa-ngambofocne yenge Wapong afeelu kwelec kwecnoibong, ingucnehac na kwele ngage-ngagene \w gbagbacne\w* galu alang bacnolu kwele-madic micnogabac. Inguc milu deboc nga hadengsoc gale ngagelu milockelu gagabac.\x - \xo 1:3 \xt Sale 23:1\x*  
\v 4 Donge-misagone wame nganiiba, yogo ngagesibe kwelenedi gale aineleme hatacmac nganicgunogale ainelegac. Ailu nganicgulu belic-belic sugucnehac bafuwanogale ngagesigabac.  
\v 5 Ngage-ngagesinggone kwesacine mikac fagac, yogo ngagesibe kwelene madickegac. Ngage-ngagesing yogo hocne molickelu atagone Lois nga nenggacgone Yunis, yekela fawec. Ngage-ngagesing yogo hocne yanguctihac gala fagac, yogo ngage-benangkegabac.\x - \xo 1:5 \xt Sale 16:1\x*   
\p
\v 6 Ilec ailu yanguc edocgugabac, na molickelu molene feigona loiba iwa Wapongti kwele-madicinele tapili monic gelewec, yogo hatacmac hole-gboliyecte ngagesigabac.\x - \xo 1:6 \xt 1Tim 4:14\x*  
\v 7 I yangucte, Wapongti Asu nolewec, yogodi tapili-wawa mi bafuwanolewec, miyac. Ye tapiliholec ganangte ailu kwelenonggengti ngic-ngigac angac ngageyelenangte nga aibaba madicne damongkenangte ailu bafuwanolewec.\x - \xo 1:7 \xt Rom 8:15\x*  
\v 8 Ilec ga game mikac galu Sugucnele yowa-siduc miyengka yegengkeme suguledaic. Aime na yele ailu muc-macka ngiyeibale nale ngageengka gameineholec mi aidaic. Ga inguchac Wapongte tapiliwa \w Siduc Madicnele|lemma="Siduc Madicne"\w* ailu na ingucnehac doic ngagedamec.   
\p
\v 9 Aime wasecne ainangte ngagelu bikicte ameine bame Wapongte bingec ganangte Wapongti wacnubawec. Nongilengti aibaba madicne aibeng inguc mi aiwec, miyac. Ye yeuctihac alingkelu ngageme fawec, yogo biyachacbenang himong nga sawa mi fikeebocka Kristo Yesule madicnele ailu kwele-madic ainolewec.\x - \xo 1:9 \xt Efs 2:8-9; Tit 3:5\x*  
\v 10 Inguc faemewa yakumac hocne \w Asa-baba ngicnonggeng|lemma="Asa-baba ngic"\w* Yesu Kristodi kwesime Wapongte kwele-madic yogo fikelu yegengkewec. Yegengkeme yedi homac baickelu gaga dangke-dangkeine mikac, yogo balu kwesime yegengkeme nganiibeng. Yedi Siduc Madicne noleme gaga-sanangte aibaba ngani-motoibeng.\x - \xo 1:10 \xt Hib 2:14\x*   
\p
\v 11 Ilec Siduc Madicnele ailu yogo mibe yegengkeme ngic-ngigac weduyelelu salecebaicne aibele wacnuwec.\x - \xo 1:11 \xt 1Tim 2:7\x*  
\v 12 Yogolec ailu doic feina gagabac. I yangucte, na ye ngagesingkelu gagabac, ye ngagegabacte nalic mi gamenudaicte. Aime ngage-ngagesingne sanangne yanguc fagac, ye tapiliineholecte gagane yela lobe fagac, yedi yogo damongkelu gaemewa damengngine kwesidaicte.  
\v 13 Na Wapongte yowa ngic-ngigac silicina weduyelecaigabac, gageuc yogo ngagegic. Aime yogolec silicina edocebalu weduyeledamec. Aime Kristo Yesuholec wetackelu ngage-ngagesing nga kwele-angacka galu Wapongte yowa yogo sebilelu balaibedamec.  
\v 14 \w Tili Asu\w* nongileng kwelewa gagac, yedi nenggac ngiyegeleme Wapongti wiyac madicne balu gelewec, yogo damongkeengka fadaic.\x - \xo 1:14 \xt 1Tim 6:20\x*   
\s1 Babafic aling  
\p
\v 15 Ngic Asia prowins iwa gagaing, yenge sasawadi nale takicebame biyachac hegilecnuibong, yogo ngagegic. Figelus nga Hemogenes yeke inguchac hegilecnuiboc.  
\v 16-17 Aime sifu muc-macka ngiyeebewa Onesiforus ye \w Roma\w* taonka kwesilu sanangne basacnulu gacgu bafuwacnuwec. Ailu senti hefecnuibong, yogolec mi gameeme dameng bocyac basanangnume madicne gaiba. Ilec Sugucnedi Onesiforus golowacfocine kwele-sowac aiyeledaic.  
\v 18 Aime Efesas taonka molickelu gaibawa, yedi socne damongkelu bole sugucnebenang bawec, yogo gageuctihac nganilu biyac ngagegic. Ilec Sugucnedi ngagecnolu damengtowaina kwele-sowac aicnodaic.   
\c 2  
\s1 Sugucnele bole-ngic  
\p
\v 1 Ilec ailu madecne, Kristo \w Yesule|lemma="Yesu"\w* kwele-madicti basananggume tapiliholec gadamec.  
\v 2 Ga nga widec ngic-ngigac bocyac ngenge momochac yowane ngageibong. Yowa yogo ngic yefe mi lilocaigaing, edocebaengka damongkedabiyeng. Damongkelu yengi ngic-ngigac nebocine taockelu edocebalu weduyeledaingte.  
\v 3 Aime \w Kristo\w* Yesule hudu-baba ngic madicne ailu naholec doicka galu mi takicgudaic.\x - \xo 2:3 \xt 2Tim 1:8\x*  
\v 4 Hudu-baba ngic bole balu gagaing, yenge hudu-baba sugu ngagegaing. Lobeina bole haicine monic-monic fagac, yogo monic mi badaingte, miyac. Ngic ingucne ye damongngine yeholec yowa milu hefeicne, damong ye ngageme madickenale yele yowa yogo balaibelu bole balu gadaicte.  
\v 5 Aime loling ngic monic ye lolingka gasackelu gbelong aigac. Aimebac lolingte yefe-yowa lilogacte lolingte maaine sil yogo nalic mi badaicte.\x - \xo 2:5 \xt 2Tim 4:7-8\x*  
\v 6 Aime monic ye sanangkelu bole hole-duwec aicaigac, ye molickelu nosingngine badaicte, yogodibac madickedaicte.\x - \xo 2:6 \xt 1Kor 9:7\x*  
\v 7 Na yowa migabac, yogo ngage-ngagegona lolu balu gadamec. Aime ngage-motocte wiyac sasawa Sugucnedi bafuwageledaicte.   
\p
\v 8 Yesu Kristo, \w Dawidile|lemma="Dawidi"\w* fikesaweckacni, ye homackacni gboliyelu fangkewec, ye ngagesilu gadamec. Yele \w Siduc Madicne\w* hocne milu edocebalu gagabac.\x - \xo 2:8 \xt 1Kor 15:4; Rom 1:3\x*  
\v 9 Na yogo milu edocebalu gagabac. Ilec ailu doic ngagelu balu gabe, ngic yengi kindololo ngic muc-macka locebalu hefecaigaing, silicine yogo ingucnehac muc-macka locnulu hefecnuibong. Aime sifu Wapongte yowa yogo muc-macka nalic mi hefedaingte, miyac.\x - \xo 2:9 \xt Efs 3:1,13; Filp 1:12-14\x*  
\v 10 Kristo Yesudi ngic-ngigacfocine bawosaecebaicne bikicte ameine bame, yenge inguchac wasecne ailu \w gaga-sanangte|lemma="Gaga-sanang"\w* hibi-angoc badaing. Ilec ailu na doic sasawa nalic ngagelu sanangne domalu umac yogo bagabac.   
\p
\v 11 Yowa monic yago nalic ngagepangkedabeleng, yogo yanguc fagac,  
\q1 Yeholec homaibeng. Ilec nongileng momoc yeholec inguchac gaga gadabelengte.\x - \xo 2:11 \xt 2Kor 4:11\x*   
\q1
\v 12 Ailu umac balu sanangne gadabelengtewa, yeholec ngictau aidabelengte.  
\q1 Nga ye lobe holecnodabelengtewabac, ye inguchac lobe holecnubadaicte.\x - \xo 2:12 \xt Mat 10:33\x*   
\q1
\v 13 Ailu yowaine mi balaibedabelengtewa, ye sifu yowaine balaibelu gadaicte.  
\q1 I yangucte, yogo yeicne fungine, aime ye yeicne lobe nalic mi holenagudaicte.\x - \xo 2:13 \xt Rom 3:3-4; Tit 1:2\x*   
\s1 Yowangineng fec-wac mi aidaic  
\p
\v 14 Ga yowa kwelengkegabac, yago ngic yogo yenge hole-gboliyelu edocebanong. Aime yenge yowa gocne ngagelu yowanginengti yowa nebocinele funginele mibong fec-wac aidaickale, sawang-yowa yogo sanangnehac Wapongte haicka edocebanong. Yowa fec-wackolec mimi, yogo babaficine mikac. Ngic-ngigac yenge yogo ngagebong yowa yogodi bocyacbenang basowalecebadaicte.\x - \xo 2:14 \xt 1Tim 6:4; Tit 3:9\x*  
\v 15 Wapongte kwelewa madickenale sanangnehac galu bolegone badamec. Ailu yowa noinele fungine dondonne midamec. Inguc ailu Wapongte haicka bole-ngic ganogale mi gamegudaicte.\x - \xo 2:15 \xt 1Tim 4:6\x*  
\v 16 Aime ngic-ngigac himongte siduc nga yowa kosaine micaigaing, yogo lobe holeyelelu gadamec. Ngic-ngigac yowa ingucne mibong yogodi mengocebame Wapong alang mi bacnolu dalicka taockeme taoc hikedaingte.\x - \xo 2:16 \xt 1Tim 4:7\x*  
\v 17 Ailu yenge yowangineng mibong suguleme yogodi waic sanangne ingucne hatacmac sugulelu hikedaicte. Himenaus nga Filetus yeke ngic ingucne yengelacni.\x - \xo 2:17 \xt 1Tim 1:20\x*  
\v 18 Yeke yowa noine hegilelu yefe lilolu micaigaic, “Ngic-ngigac yenge homackacni gboliyelu fangkedaingte, yogo biyachac fikewec.” Inguc milu ngic-ngigac gocne yengele ngage-ngagesing basowalegabiyec.   
\s1 Bolele yowa  
\p
\v 19 Aime sifu Wapongti bosing sanangne lome hauwec domagac, yogo ululung nalic mi aidaicte. Yogowa yowa yanguc kwelengkeicne fagac,  
\q1 “Sugucnedi ngic-ngigacfocine ngagecebagac.” \rq (Him 16:5) \rq*  
\m Ailu monic yanguc,  
\q1 “Ngic-ngigac Sugucnele wac wackecaigaing, yenge aibabangineng sowacne, yogo sasawa hegilelu lobe holecnolu gadabiyeng.”\x - \xo 2:19 \xt Yoa 10:14; 1Kor 8:3\x*   
\p
\v 20 Aime ngic woc-wiyactowaineholec yele macka hebec-kudi haicine monic-monic ngiyegaing. Gocne gol nga siliwadi baicne yogo bolengineng alang-babaineholec aigac. Nga gocne yoc nga gbakitacti baicne yogo bolengineng yafoineholec aigac.  
\v 21 Inguc aime ngic monic ye yeicne wiyac yafoineholec yogowacni suwenagudaicte, ye hebec-kudi alang-babaineholec, yogo ingucne. Ye Wapongte bingec aime Fileinedi bame bole madicne banogale silic aigac.   
\s1 Gaga ulucne  
\p
\v 22 Himongka socte angac soc-gboli yengela facaigac, yogowacni hangoc baicke hikelu dalicka gadamec. Ngic gocne yenge kwelengineng \w gbagbacne\w* galu Sugucnele wac wackecaigaing. Aime yengeholec bole sanangne balu yefe dondonne balaibelu ngage-ngagesingkolec gadamec. Ailu kwelegonedi ngic-ngigac yengele angac ngageyelelu kwele-mogungkolec gadamec.\x - \xo 2:22 \xt 1Tim 6:11\x*  
\v 23 Ga yowa kosaine nga babaficine mikac, yogo hegiledamec. Aibaba yogodi hocne ngaba bafuwame yuwenac fikecaigac, yogo ngagegic.\x - \xo 2:23 \xt 1Tim 4:7\x*  
\v 24 Sugucnele kwelec kwekwe ngic ye yuwenacka mi gadaic. Ye ngic-ngigac sasawa yengeholec ulucne galu wewedu bolele fungine ngagelu ngic-ngigac yengele tatakic mikac gadaic.  
\v 25-26 Aime Aleng Sugucnenginengti suba ingucne ngic-ngigac gocne bacebame, yele angac nga ngage-ngage balaibecaigaing. Yenge Sugucnele kwelec kwekwe ngic yele yowa hedickecaigaing, inguc aibong yedi yengeholec ulucne galu edocebalu weduyeledaic. Inguc aiyeleme Wapongti \w kwelengineng hefaliyeningte|lemma="Kwele-hefaliyec"\w* tapili yeledaicte mecne. Inguc aiyeledaictewabac, yenge kwelengineng ileckeme yowa noine ngage-motolu, Aleng Sugucnenginengte molewacni fotockelu hikeyackedaingte.   
\c 3  
\s1 Dameng moto-motoine  
\p
\v 1 Dameng moto-motoina\f + \fr 3:1 \ft Hibi gocna “dameng moto-motoina” kwelengkelu yanguc ngageibong, Yesu homackacni gboliyelu fangkewec, dameng moto-motoine fungkewec. Ailu ye hatac kwesidaicte, dameng iwa dameng moto-motoine motodaicte.\f* umac haicine monic-monic fikedaicte, yogo ngageng fadaic.\x - \xo 3:1 \xt 1Tim 4:1\x*  
\v 2 I yangucte, dameng iwa ngic-ngigac yenge yengileng angac nga hiye-monengte angac bocyac ngagedaingte. Yenge yengileng wiyacte mibong feicne aime, socngineng bafelu misulec ailu nenggac-mamacfocngineng yengele yowa kwedaingte. Ailu ngic-ngigac wiyac yeledaingte, yengele kwele-madic monic mi ngagedaingte. Aime gaga gbagbacne yogo yengela mi fadaicte.  
\v 3 Aime yenge ngic-ngigac agofocngineng yengele mi angacebadaicte. Ailu ngic-ngigac yengele bikic mi hegiledaingte. Yenge gocne yengele kwesac-yowa milu aibabangineng mi damongkelu wecebalu doic sugucnebenang yelelu aibaba madicne kwelenginengti hegiledaingte.  
\v 4 Yenge mic-heloc aiyelelu mi ngage-motolu aibabangineng moc aidaingte. Ailu socngineng bafelu fefeyac aidaingte. Socte angacti yengele gaganginang suguleme Wapongte angacbac hegiledaingte.  
\v 5 Ailu yenge socti sugu Wapongte gagale silic ingucne gadaingte. Ailu Wapongte tapili nga pasi yogo hegilelu lobe holecnodaingte. Ilec ga yengeholec wetackelu mi gadamec.\x - \xo 3:5 \xt Mat 7:15,21; Tit 1:16\x*   
\p
\v 6-7 Ngigac gocne yenge mic-heloc aibabangineng ailu angacngineng sowacne haicine monic-monic balaibelu gabong \w bikicngineng|lemma="Bikic"\w* umalecaigac. Ailu yenge wewedu-yowa ngagelu gagaing. Nga yowa noinebac nalic mi ngage-motodaingte. Ilec ailu ngic yogo yenge madicne silic ingucne galu mac-boneng hikelu ngigac yogo yowawa mic-heloc aiyelecaigaing.   
\p
\v 8 Aime esecne Yanes nga Yamberes yeke \w Mosesle|lemma="Moses"\w* yowa hedickeiboc, ingucnehac ngic migabac, yenge ngage-ngage kwesacineholec galu yowa noine hedickecaigaing. Ailu ngage-ngagesingte yefe lilogaing.\x - \xo 3:8 \xt Wah 7:11,22; 9:11\x*  
\v 9 Yanes nga Yamberes yekele aibaba kosaine yogo yegena fikeme ngic-ngigac sasawadi yogo nganiibong. Ingucnehac sasawadi ngic yogo yengele aibabangineng kosaine yogo ngani-motodaingte. Aime kwesac-yowangineng yogo hatacmac mi suguledaicte.   
\s1 Salecebaicne yengele silicka ganoga  
\p
\v 10 Aime Timoti, gabac na wiyac wedugeleiba, yogo ngagelu balaibelu gagic. Ailu na aibaba aiiba, nga gaganele yefe loiba, yogo ngagegic. Ailu tatakic mikac ngage-ngagesingkolec galu kwelenedi ngic-ngigac yengele angac ngageyelelu sanangnehac gaiba.  
\v 11 Ailu na Antiok nga Aikoniam ailu Lista taonka gabe weyebic aineleibong, aime umacka nga doicka gaiba. Inguc gaebewa Sugucnedi umac sasawa yogowacni baficnulu gawec, yogo ngagegic.\x - \xo 3:11 \xt Sale 13:14-52; 14:5,8-20\x*  
\v 12 Aime ngic-ngigac sasawa Kristo \w Yesuholec|lemma="Yesu"\w* wetackelu Wapong alang bacnolu ganingte ngagegaing, yenge inguchac weyebic aiyeledaingte.\x - \xo 3:12 \xt Mat 16:24; Yoa 15:20; Sale 14:22\x*  
\v 13 Aime bikic-baba ngic nga kwesac-ngic yenge ngic-ngigac lokwesacka locebacaigaing, yenge sowacnengineng hatacmac sugulelu sanangkeme sowale-benangkedaingte. Ailu yenge yengungtihac kwesac ainagulu gocne inguchac kwesacebabong wawedaingte.   
\s1 Yowa babaficineholec  
\p
\v 14-15 Ngic-ngigac gocne madicne ngageyelecaigic, yenge ga gegecne gaing, dameng iwa Wapong yeicne hibi kwelengkeicne fagac, yogo wedugeleibong. Wedugelebong yowa yogo ngageng ngage-ngagegone baefeckeme Kristo Yesu ngagesingkeng bikicte ameine bame wasecne aiing. Ga yogo ngagepangkelu gadamec. Inguc gaengka yogodi gagagone basanangkedaicte.  
\v 16 Aime yowa Wapongte hibiwa kwelengkeicne fagac, yogo sasawa Wapongti asuine fitome ngicte ngage-ngagewa haume kwelengkeibong. Hibi yogodi yanguc baficnubagac, Wapongte mic-yowadi ngelengnubalu wedunolegac. Ailu bamadicnubalu yefe dondonne balaibenangte damongnubagac.\x - \xo 3:16 \xt Rom 15:4\x*  
\v 17 Inguc aime Wapongte ngic-ngigac yenge bolele ngage-ngage nga tapili yogolec silicina balu bole madicne haicine monic-monic baningte hibi yogo yelewec.   
\c 4  
\s1 Bole sanangne banoga  
\p
\v 1 \w Kristo\w* \w Yesu\w* ye \w ngani-damongngina|lemma="Ngani-damong"\w* fikelu domadaicte, iwa gbolicne nga homaicne wosaecebalu mimoctocebadaicte. Na Yesu nga Wapong yekele haicka sanangnehac edocgugabac.  
\v 2 Ga dameng madicna, me miyac, iwa sifu efeckelu Wapongte yowa milu ngic-ngigac edocebalu mibating aiyeledamec. Ailu tatakic mikac wiyac sasawa ngelengebalu edocebalu weduyelelu basanangebadamec.  
\v 3 Dameng monic kwesidaicte, iwa ngic-ngigac yenge wewedu-yowa dondonne ngagenogale takicebadaicte. Yengebac yengileng angac balaibelu wewedu ngic bocyac kpaducebadaingte. Kpaducebabong yengi ngic-ngigac yengele hedecka yowa angacine aigac, yogo weduyeledaingte.\x - \xo 4:3 \xt 1Tim 4:1\x*  
\v 4 Ailu yenge yowa noine hegilelu lobe holecnodaingte. Ailu siduc esecne nga siduc noine mikac, iwa wetackelu yefe lilodaingte.  
\v 5 Aime gageuc wiyac sasawa damongebaengka umac fikegeleme tatakic mikac sanangne domadamec. Inguc domalu Wapongte Siduc Madicne edocebalu Wapongti bole-yowa gelewec, yogo sasawa balaibelu gadamec.   
\s1 Poldi homanale miwec  
\p
\v 6 Aime homac-damengne biyac welegacte ngic yenge waing Wapongte ibu locaigaing, silicine ingucnehac sacne sotingkeme gaganedi ibu ingucne aidaicte.\x - \xo 4:6 \xt Filp 2:17\x*  
\v 7 Hudu madicne biyac welu bamoctoiba gagabac. Ailu ngic gbelong ainingte gasackecaigaing, silicine ingucnehac sanangnehac gasackelu biyac bamoctoiba gagabac. Ailu ngage-ngagesingne sanangne balu gaiba. Ailu mi wickebe wawec.\x - \xo 4:7 \xt 1Tim 6:12\x*  
\v 8 Yakumacbac gaga dondonnele \w duu\w* nale wangec loicne fagac. Ailu Sugucne ye pasi dondonnele wowosae-ngic, yedi dameng iwa duu yogo neledaicte. Aime yogo na sugu mi neledaicte, miyac. Ngic-ngigac sasawa yenge ye kwesi-kwesi damengngina fikelu yegengkenale kwelenginengti angac ngagegaing, yedi yogo yenge inguchac yeledaicte.\x - \xo 4:8 \xt 1Kor 9:24-25\x*   
\s1 Bole-yowa gocne  
\p
\v 9 Ga kwesinogale sanangkelu nala biyacbenang kwesidamec.  
\v 10 I yangucte, Demas ye dameng yagolecte gagale angac ngagelu biyachac hegilecnulu Tesalonika taonka hikewec. Aime Keresken ye Sugucnele bole banale Galata prowins iwa hikewec. Aime Titus ye inguchac Damatia prowins iwa hikeme\x - \xo 4:10 \xt 2Kor 8:23; Sale 15:37-39; Kol 4:14\x*  
\v 11 Lukadi sugu naholec gagac. Mareko ye bole baficnucaigacte ailu gagi ye bafuwalu mengockeng gaholec kwesidabiyec.  
\v 12 Tikikus ye Efesas salebe hikewec.  
\v 13 Aime funogale milu ngakpine dalicne Toas taonka Kapusle macka hegilebe ngiyewec, yogo nga nale \w hibi kpadidiweicne\w* sasawa iwa locebabe faibong, yogo momoc bacebalu kwesidamec. Ailu hibine lama socina kwelengkeicne fagac, yogo ngagebe wiyac feicne aigacte yogo momoc balu kwesidamec.\f + \fr 4:13 \ft Hibi bocyac yogo papirus hekengnginedi baicne iwa kwelengkelu gaibong. Papirus hekengngine yogo siming hekengngine ingucne sugucnehac. Hibingineng gocne yogo yenge lama me noning socina kwelengkelu gaibong. Socine yogo fuline sugucnehac.\f*\x - \xo 4:13 \xt Sale 20:6\x*   
\s1 Damongnagulu ganoga  
\p
\v 14 Aleksanda ye aen dacka lobelu woc-wiyac bacaigac, yedi umac bocyac bafuwanelewec. Aime Sugucnedi aibabainele ameine baducnodaicte.\x - \xo 4:14 \xt 1Tim 1:20; Mige 62:12; Rom 2:6\x*  
\v 15 Ye dacine inguc ailu yowanonggeng bocyac mife-miwa ailu gawec. Ilec ga ngic yele damong balu gadamec.   
\s1 Pol yowawa loibong  
\p
\v 16 Aime na molickelu Roma iwa yowawa domalu funginene miiba, dameng iwa monicti naholec mi domawec, sasawadi hegilecnuyackeibong. Aime inguc aiibongte yogodi mi baumalecebadaic.  
\v 17 Na Siduc Madicne \w Israel yengele alingkacni miyac\w*, yengela mibe yegengkenale Sugucnedi sifu naholec domalu tapili nelewec. Ailu nale agong holelu nale homac yogo laionte mickacni ingucne baicnuwec.  
\v 18 Ngic yengi umac haicine monic-monic ainelenogale ngagegaing. Aime Sugucnedi yogowacni inguchac baficnume wasecne aibe honocmeng ngani-damongngina locnudaicte. Yela wac feicne moto-motoine mikac fafegidaic, yogo foinac.   
\s1 Wenac-madic  
\p
\v 19 Nale wenac-madic Prisila nga Akwila ailu Onesiforus golowacfocine yengela loengka hikedaic.\x - \xo 4:19 \xt Sale 18:2; 2Tim 1:16-17\x*  
\v 20 Erastus ye Korin iwa gagachac. Nga Tofimus yebac hucti bawecte Miletus taonka hegilebe ngiyewec.\x - \xo 4:20 \xt Sale 19:22; 20:4; Rom 16:23\x*  
\v 21 Aime tilo-gbelong dameng aidaickale, sanangkelu biyac kwesidamec. Yubulusdi wenac-madic gala lome fugac. Ailu Pudens nga Linus ailu Kalaudia nga \w ngic hae-gbafocnonggeng|lemma="ngic hae-gba"\w* sasawa, yenge inguchac wenac-madicngineng gala lobong fugac.   
\p
\v 22 Sugucnedi gale asuholec gadaic. Aime kwele-madicinedi ngengela fadaic. Yogo foinac.