\id 2CO - Migabac NT; 9 Sep 2011 1st draft 
\h 2 Korin 
\toc1 Poldi Korin Habu Yengele Hibi Monic Hatacmac Kwelengkewec 
\toc2 2 Korin 
\toc3 2Kor 
\mt2 Poldi  
\mt1 Korin  
\mt2 Habu Yengele Hibi Monic Hatacmac Kwelengkewec  
\is1 Mimi-yegeng yowa  
\ip Korin yogo taon sugucne monic wacineholec fawec. Taon yogo himong monic wacine Akaia me Grik iwa fawec. Roma ngic-ngigac homacne nga Yuda ngic-ngigac gocne iwa gaibong. Ngic-ngigac bocyacti lec-welec ailu lanac-ganac ailu gaibong.  
\ip Molickelu Poldi Korin iwa Yesule Siduc Madicne mime yegengkeme ngic-ngigac gocne yenge Yesu ngagesingkeibong. Ngagesingkelu yogolec lobeina aibaba sowacne aiibongte, Poldi hibi sanangne monic kwelengkeyelelu saleme hikewec. Hikeme balu wafeibong. Ailu gocne kwelengineng hefaliyeibong. Nga gocne yenge yele yowale takicebawec. Ilec ailu hibi yago kwelengkeyelewec. Yesu homackacni gboliye fangkelu honocmengka feme hifa 27 ngama ingucne motome, hibi yago kwelengkewec.  
\ip Dameng gocna Poldi bole-moniyangfocine yengeholecte ngagelu “nongele” milu kwelengkewec. Nga dameng gocna yeicnele sugu ngagelu yowa ingucne “nongele” milu kwelengkewec. Ailu dameng gocna yeicne nga Korin ngic-ngigac yengeholecte ngagelu yowa ingucne “nongele” milu kwelengkewec.  
\is1 Yowa yago hibi nebocina fagac  
\io1 1:1–11 Wenac-madic yowa nga mimitengte yowa  
\io1 1:12—2:13 Korin ngic-ngigac yengi aiibongte ailu Pol ye kwele-umackolec aiwec. Ailu sifu Poldi yengeholec kwele-moniyang ainogale ngagewec  
\io1 2:14—6:10 Polle bole noine yogo yanguc, Wapongti dodofic gbolicne ngic-ngigac yengeholec bawec, yogo mime yegengkewec  
\io1 6:11—7:16 Poldi Korin ngic-ngigac yengele wenuc ngagewec, yogo mime yegengkewec  
\io1 8:1—9:15 Ibu lonogale bamockedaing  
\io1 10:1—12:21 Salecebaicne noine yenge bolengineng maaineholec bagaing, yogo mime yegengkewec  
\io1 13:1–13 Poldi ngage-ngageine nga yowaine sanangne milu wenac-madicine edocebawec  
\c 1  
\s1 Molic-molic yowa  
\p
\v 1 Na Pol, Wapongti bawosaecnume \w Kristo\w* \w Yesule|lemma="Yesu"\w* \w salecebaicne\w* aigabac. Na nga \w ngic hae-gbanonggeng|lemma="ngic hae-gba"\w* Timoti, noki hibi yago Wapongte habu Korin taonka gagabiyeng, ailu Wapongte bingec sasawa Akaia prowinswa gagaing, ngengela logabelec.  
\v 2 Mamacnonggeng Wapong nga Sugucnenonggeng Yesu Kristo, yekele kwele-madic nga kwele-mogungtowadi ngengela fadaic.   
\s1 Wapong ye baba-sanangte fileine  
\p
\v 3 Sugucnenonggeng Yesu Kristo yele Mamac Wapong, ye mimitengineholec. Yedi Mamacnonggeng ailu ye nongileng kweleine sowalecaigac. Ailu ye Wapongnonggeng ailu baba-sanang sasawa, yogolec fileine.\x - \xo 1:3 \xt Rom 15:5\x*  
\v 4 Nonge umackolec gabeng yedi basanangnubacaigac. Yogodi basanangnubame nonge yele baba-sanang balu ngic-ngigac umacnginengkolec yengela hikelu nalic basanangebadabelengte.  
\v 5 Kristo ye doic ngagewec, nonge doic silicine ingucne umacnehac ngagecaigabeleng. Ilec Wapongti Kristole ailu umacnehac basanangnubagac.\x - \xo 1:5 \xt Mige 34:19\x*  
\v 6 Doic ngagecaigabeleng, yefe iwa ngenge basanangngebame wasecne aigaing. Ailu Wapongti basanangnubacaigac, yefe iwa ngenge basanangngebagabeleng. Inguc basanangngebabeng ngenge doicka sanangne domagaing. Ngengele doic nga nongele doic, yogo silicnginec moniyang aigaic.  
\v 7 Nongileng momochac doic ngagecaigabeleng, ingucnehac baba-sanangnonggeng bagabeleng. Yogo noine ngagepangkegabeleng.   
\s1 Homacte alingkacni bamoctocnubawec  
\p
\v 8 Ngic hae-gbafocne, Asia prowinswa nongela umac fikeme doic ngageibeng, ngenge yogolec mi kpungkeningte ngagelu edocngebagabeleng. Umactowadi tapilinonggeng welu bawame nalic mi domalu kwelenonggang yanguc ngageibeng, “Nonge homadabelengte hocne.”\x - \xo 1:8 \xt Sale 19:23; 1Kor 15:32\x*  
\v 9 Aime Wapongti ngic-ngigac homackacni bagboliyecebacaigac, ye ngagepangkenangte yedi homacte alingkacni baicnubawec. Nongele tapili yogo andoine miyac, ye yogo edalicnubanale inguc aiwec.  
\v 10 Wiyac gocnedi wehomacnubanogale aibong yedi baicnubawec. Ailu ye lobewa gacgu ingucnehac homackacni baicnubadaicte. Ailu baicnubanowagac, nonge yele inguc ngagesingkelu wangec gagabeleng.\x - \xo 1:10 \xt 2Tim 4:18\x*  
\v 11 Ailu yogo fikenale ngenge mimilocka baficnubadabiyeng. Aime Wapongti kwele-madicte wiyacine noledaicte, yogo fikeme ngic-ngigac bocyacti yenge yogo nganilu nongele ngagelu Wapong mitengkedaingte.   
\s1 Polle fungine  
\p
\v 12 Ngic-ngigac yengele haicka nga ngengele haicka momochac Wapongte aibaba madicne nga gaga gbagbacne gagabeleng. Ailu kwele ngage-ngagenonggeng mime yegengkeme himong yagowa inguc galu ngagebe feicne aicaigac. Aime kwele esecnele ngage-ngage-motoc balaibelu ngengele hewacka mi gagabeleng, miyac. Wapongte kwele-madicti yefe edalicnubame balaibelu gagabeleng.  
\v 13-14 Yowa kwelengkecaigabeleng, ngenge yogo sasawa wafelu ngage-motogaing. Wiyac kpungke-kpungkeine monic mi kwelengkecaigabeleng. Yanguctihac ngenge nebeyang ngagecnubaibong. Aime na ngagebe lobewa ngengi bucbuchac ngage-motodaingte. I yangucte, ngenge nongele ailu nalic ngagesilu wacnonggeng bafegaing. Aime Sugucnenonggeng Yesule damengka nongi ingucnehac ngengele ngagesilu wacngineng bafedabelengte.   
\s1 Yesule habu Korin iwa mi yugucebawec  
\p
\v 15-16 Na molickelu yogo ngagesilu yanguc ngageiba, na ngengela yefe fulu falockelu Masedonia prowinswa hikedacte. Hikelu hatacmac ngengela hefaliyelu kwesidacte. Kwesibe ngengi baficnulu Yudeya himongka salecnudaingte. Na inguc aidactewa, molickelu ngengela fulu hatacmac hefaliyebe, ngengi nale ailu alecine yaeckang kwele-madic ngagedaingte. Aime sifu inguc mi aiiba.\x - \xo 1:15-16 \xt 1Kor 16:5-6\x*   
\p
\v 17 Na yogo molickelu alingkelu lobeina moc kosa hegileiba, me? Ailu na kwele esecna yefe bolene damongkelu “oc, oc,” milu hefaliyelu “miyac, miyac,” yogo dameng moniyangkahac micaigabac, me? Yogo miyac!  
\v 18 Foinac, Wapong ye yowa mimiine balaibecaigac. Aime nonge ingucnehac yowa edocngebacaigabeleng, iwa “oc” nga “miyac” nalic mi kpatulecepadabelengte.  
\v 19 Ailu na nga Sailas ailu Timoti, nonge Yesu Kristo Wapong yeicne Madecine yogo edocngebalu wedungeleibeng, ye “oc” nga “miyac” mi kpatulewec, miyac. Yela “oc” yowa sugu fagac.\x - \xo 1:19 \xt Sale 18:5\x*  
\v 20 Wapongti wiyac nolenale mipangkewec, ye Madecinele ngagesilu “oc” miwec. Inguc mime Madecinele ailu mimipangngine noine fikewec, ailu fikelu hikedaicte. Fikelu hikeme “yogo foinac” mitengkebeng Wapongti wac feicnehac bagac.\x - \xo 1:20 \xt Miye 3:14\x*  
\v 21 Wapong yeuc ngenge nga nonge momochac bawosaecnubalu Kristola wetacnubame domagabeleng.  
\v 22 I yangucte, yele ainangte \w Tili Asu\w* kwelenonggang lowec. Aime yogodi Wapongte maa aigac.\x - \xo 1:22 \xt Efs 1:13-14; 2Kor 5:5\x*   
\p
\v 23 Aime Korin taonka mi fuiba, yogolec fungine yanguc, na ngengele hewacka yowa sanangnehac midackale ailu, hegilelu mi fuiba. Yowane yogo Wapong yeuctihac widecnucaigac. Na kwesac aigabacka wecnudaic.  
\v 24 Aime ngenge wenuc ngagesingkegaing, yogo mi milu yoingngebalu gagabeleng, miyac. Ngenge Sugucne ngagesingkelu sanangne domalu gagaing. Inguc domalu beliyeningte ngenge nga nonge momochac bole balu gagabeleng.\x - \xo 1:24 \xt 1Pi 5:3\x*   
\c 2  
\p
\v 1 Ilec ngage-ngagenedi yanguc ngagesigabac, na hatacmac kwele-umac bafuwangeledackale ailu, mi fudacte.\x - \xo 2:1 \xt 1Kor 4:21\x*  
\v 2 Na molickelu kwele-umac bafuwangeledactewa, ngengelacni madi belic-belic bafuwaneledaicte? Kwele-umackolec ngengi sugu belic-belic bafuwaneledaingte.  
\v 3 Aime ngengela fube gocne ngengi belic-belic bafuwanelecaigaing, yogolec ngagebe madickegac. Ngenge kwele-umac bafuwangeledackale ailu, hibi monic kwelengkengeleiba. Na ngengele yanguc ngage-benangkegabac, belic-belic nala fadaictewa, ngenge sasawadi beliyedaingte.  
\v 4 Na kwelenedi ngengele aineleme kwele-umac sugucne balu hiyalu hibingineng kwelengkengeleiba, yogodi umac ngelenogale mi kwelengkeiba, miyac. Na kwelenedi ngengele homacnehac angacnugac, yogo ngageningte hibi yogo kwelengkeiba.\x - \xo 2:4 \xt Sale 20:31\x*   
\s1 Monicte bikic hegilenoga  
\p
\v 5 Ngic kwele-umac bafuwawec, ye kwele-umac na sugu mi bafuwanelewec, miyac. Ye ngenge sasawa kwele-umac bafuwangelewec. Yogolec bocyac mi midacte, yogo efecnemac migabac.  
\v 6 Aime ngenge bocyacti ngic yogo bikicinele ailu mibating biyac aicnoibong, yogo sugu andoine. Aime yanguctihac ingucne hatacmac mi aicnodabiyeng.  
\v 7 Ye kwele-umacine sugucnebenang yogoholec galu umacti baumaledaickale, ngenge bikicine hegilelu mibasanang aicnodabiyeng.  
\v 8 Inguc ailu kwele-angacngineng edalilu basanangkedabiyeng, yogo sanangne milu edocngebagabac.  
\v 9 Ngenge sasawadi yowane balaibecaigaing me miyac, yogo ngagenogale hibine kwelengkengeleiba.  
\v 10 Ailu ngenge ngic monicte bikic hegiledaingtewa, nani inguchac yele bikic hegiledacte. Nga nani bikic monic hegileiba, yogo \w Kristole|lemma="Kristo"\w* haicka ngengele ailu yele bikic hegileiba.  
\v 11 Aime \w Satangti|lemma="Satang"\w* kwesacnubame wawedabelengkale, inguc aidabeleng. Ye ngage-ngageine alingkecaigac, yogo ngagegabeleng.\x - \xo 2:11 \xt Luk 22:31\x*   
\p
\v 12 Aime Toas taonka fuiba, dameng iwa Kristole \w Siduc Madicne\w* edocebalu weduyelenogale Sugucnedi yefeine biyac bafuwaneleyec.\x - \xo 2:12 \xt Sale 14:27; 1Kor 16:9\x*  
\v 13 Fulu \w ngic hae-gbane|lemma="ngic hae-gba"\w* Titus basackelu asunedi kwele-mogung mi bafuwame wenac-madic milu locebalu Masedonia prowinswa hikeiba.\x - \xo 2:13 \xt Sale 20:1\x*   
\s1 Salecebaicne yengele bole hoine madicne  
\p
\v 14 Aime Wapongti hudu ewalime nonge Kristoholec wetackelu gabeng bacnubame damengsoc yeicne alingka mengocnubame nganibong yogodi feicne aigac. Inguc aime macsoc hikebeng, Yesule siduc yogo hoine madicne ailu yogodi bolenonggang fikelu hikecaigac. Ilec Wapongte kwele-madic micnogabeleng!  
\v 15-16 Kristoholec wetackelu gabeng hoinonggeng madicne Wapongta fecaigac. Ngic-ngigac wasecne aidaingte, yengele hewacka yogodi hoine madicne gagaineholec ailu gaga yelegac. Nga dac-sanangte yefe balaibecaigaing, yogo yengele hewacka howac hoine fitolu yogodi homac yelegac. Ma ngicti bole yogo nalic badaicte? Ngic Kristoholec wetackelu gagac, yedi sugu nalic badaicte.\x - \xo 2:15-16 \xt Luk 2:34; 2Kor 3:5-6\x*   
\p
\v 17 Ngic homacne yenge hiye-monengtowa bafuwaningte ngagelu Wapongte yowa micaigaing. Nonge yenge ingucne mi aicaigabeleng, miyac. Wapongti salecnubame Kristoholec wetackelu gabeng kwelenonggeng dondonne faemewa Wapongte haicka yele yowa mibeng yegengkecaigac.   
\c 3  
\s1 Poldi bolele fungine miwec  
\p
\v 1 Nonge wacnonggeng hatacmac bafegabeleng, me? Me ngic-ngigac gocne yenge nongele fungine kwelengkebong balu ngelenoga, me hibi ingucne ngengelacni banoga, me? Yogo miyac!\x - \xo 3:1 \xt 2Kor 5:12; Sale 18:27\x*  
\v 2 Ngenge ngengungtihac nongele hibi aigaing. Aime Kristodi hibi yogo kwelenonggeng kwelina biyachac kwelengkewec. Aime ngic-ngigac sasawa yenge hibi yogo wafe-ngagec ailu gacaigaing.\x - \xo 3:2 \xt 1Kor 9:2\x*  
\v 3 Aime nonge ngengela bole babeng ngengi \w Kristole|lemma="Kristo"\w* hibi aigaing, yogo yegena biyachac fikewec. Ailu hibi yogo pen-misainedi mi kwelengkeicne, miyac. Wapong gagaineholec yele \w Asudi|lemma="Asu"\w* hibi yogo kwelengkewec. Ailu ye tafe posadi baicne, iwa mi kwelengkewec, miyac. Yogo tafe ingucne ngic-ngigac kwelenginang kwelengkeicne fagac.\x - \xo 3:3 \xt Wah 24:12; Yer 31:33; Esek 36:26-27\x*   
\s1 Dodofic gbolicne  
\p
\v 4 Kristoholec wetacke galu yanguc ngagesigabeleng, Wapongti boleina locnubalu yogo damongkedaicte.  
\v 5 Ailu nonge yogo ngagelu yanguc nalic mi midabelengte, “Nonge nalic nongungtihac bole yogo banogalesoc aigabeleng.” Miyac. Bole banangte tapili, yogo Wapongtacni kwesicaigac.  
\v 6 Yedi baficnubame \w dodofic\w* gbolicnele mole-bafic gagabeleng. Dodofic yogo posawa kwelengkewec, yogo ingucne miyac. Asudi dodofic yogo kwelenonggang kwelengkewec. Aime yowa yogo posawa kwelengkeicnedi dondonne nalic mi balaibebong homacka locebagac. Aime Asudibac bagboliyecnubagac.\x - \xo 3:6 \xt Yer 31:31; 1Kor 11:25; Yoa 6:63\x*   
\p
\v 7 Wapongti yowa yogolec hibi posawa kwelengkewec, yowa yogodi homac bafuwayelewec. Aime yowa yogo wac feicne angocineholec kwesiwec. \w Mosesle|lemma="Moses"\w* haic-mesudi angoleme \w Israel\w* ngic-ngigac yenge haic-mesuina donge hilaningte aibibiyeibong. Yogolec lobeinabac angoc tapiliine wawec.\x - \xo 3:7 \xt Wah 34:29\x*  
\v 8 Mosesle bole yogo wac feicne angocineholecti molickeweckacni tapiliine wawec. Aime Tili Asule bolele wac feicne angocineholecti wiyac yogo hatacmac ewaligac.  
\v 9 Mosesle boledi yowawa locnubalu sowacnenonggeng mimoctocaigac, yogodi wac feicne angocineholec aiwec. Ailubac Asule bolele yefe bafuwanoleme dondonne aigabeleng, yogolec wac feicne angocineholecti hatacmac feicnehac ailu ewaligac.\x - \xo 3:9 \xt Yef 27:26; Rom 1:17\x*  
\v 10 Inguc aime wac feicne angocineholec gbolicne yogodi, wac feicne angocineholec esecne fawec yele wac bawagac.  
\v 11 Wiyac wac feicne angocineholec esecne kwesiwec, yogolec angocine biyachac wame miyac aiwec, noine. Aime wiyac fafeginowagac, yogolec wac feicne angocineholecti wiyac esecne ingucne hatacmac ewaligac.   
\s1 Sugucnele tapili nga wac feicne  
\p
\v 12 Aime wiyac fafeginowagac, yogo ngagesilu hangoc mikac bole balu wangec gagabeleng.  
\v 13 Moses haic-mesuinele angocine, yogolec tapiliine waemewa, ye yanguc ngagewec, “Israel ngic-ngigac yenge pasi yogo mi nganidaing.” Ilec haic-mesuine kpolucti someckewec. Aime nongibac inguc mi aicaigabeleng, miyac.\x - \xo 3:13 \xt Wah 34:33\x*  
\v 14 Yengele ngage-ngage fongkewec. Aime yanguctihac wewedufocngineng dodofic esecnele yowa wafeyelecaigaing, dameng iwa wiyac kpoluc ingucne sanangne domalu ngage-ngagengineng hedickelu gagac. Aime ngic-ngigac yenge Kristoholec wetackegaingka, wiyac yogo baickeme gagaing.  
\v 15 Oc, yanguctihac wewedufocngineng yenge Mosesle yowa wafeyelebong, wiyac kpoluc ingucne yogodi kwelengineng hedickelu gagac.  
\v 16 Aime monic ye kwele-hefaliyec ailu Sugucneholec wetackegacka, wiyac kpoluc ingucne yogo baickeme miyac aigac.\x - \xo 3:16 \xt Wah 34:34\x*  
\v 17 Sugucne ye Asu, ailu Sugucnele Asudi ngic monickolec game ngic ye mucine mikac gagac.\x - \xo 3:17 \xt Yoa 8:36; Rom 8:2\x*  
\v 18 Aime nongileng sasawa haic-mesunonggeng mi someckelu gabeng, Sugucnele wac feicne angocineholecti dongenonggang iluc nganicka nganicaigabeleng. Silicine ingucne kwelu bafaliyeme ye ingucnehac aicaigabeleng. Aime yele wac feicnedi gaganonggang sugulelu sawegac. Sugucne ye Asu, aime Asudi boleine bame pasi yogo fikegac.   
\c 4  
\s1 Kristo yegena mibong yegengkedaicte  
\p
\v 1 Wapongti kwele-sowac ailu Asule bole yogo nolewec. Ilec ailu tapili-wawa mi aicaigabeleng.  
\v 2 Nonge aibaba sangkeicne gameineholec sasawa biyachac hegileibeng, yogo mic-heloc nalic mi aingeledabelengte. Ailu Wapongte yowa bafac-tafalic ailu nalic mi edocngebadabelengte, miyac. Yowa noine ailu dondonne fikelu yegengkenale, nonge Wapongte haicka yowaine mibeng ngic-ngigac sasawadi wosaecnubalu kwele ngage-ngagenginang nalic ngage-motogaing.\x - \xo 4:2 \xt 2Kor 2:17; 1Tim 2:5\x*  
\v 3 Aime \w Siduc Madicne\w* micaigabeleng, yogo ngagebong ngage-ngagengineng hedickegacka, yenge dac-sanangte yefewa gagaingte, yengela inguc hedickegac.  
\v 4 Aime dameng yagolec wapong, yogo Aleng Sugucnengineng, yedi ngic-ngigac bacebame ngage-ngagesingngineng mikac gagaing. Ailu yenge \w Kristole|lemma="Kristo"\w* wac feicnele Siduc Madicnedi bacebame yegengkecaigaing, yogo mi nganiningte ngage-ngagengineng hedickecaigac. Ailu Kristo ye Wapong edalicnubagac.\x - \xo 4:4 \xt Efs 2:2; Kol 1:15; Hib 1:3\x*  
\v 5 Aime yowa yanguc edocebalu weduyelecaigabeleng, \w Yesu\w* Kristo ye Sugucne. Nonge nongileng siduc mi micaigabeleng, miyac. Yesule ailu ngengele kwelec kwekwe ailu gagabeleng.  
\v 6 Wapongti yanguc miwec,  
\q1 “Kundungkacni angoc fikena.” \rq (Fike 1:3) \rq*  
\m Wapong ye hocne kwelenonggeng bame angolelu gagac. Ailu Kristo ye Wapongte wac feicne angocineholec yogo ngage-motonoga. Ngage-ngage-motoc yogodi yele haic-mesuwacni kwesilu kwelenonggeng bame angolegac.\x - \xo 4:6 \xt Yes 9:2; 2Kor 3:18\x*   
\s1 Tapilitowa feicne iwa fedabeleng  
\p
\v 7 Nongileng sanangne miyac, yogo hebec ingucne gagabeleng. Aime Wapongte wac feicne yogolec tapili feicnebenang. Ailu yogo moneng-mafa ingucne kwelenonggang loicne fagac. Tapilitowa yogo yelacni kwesicaigac, yogo nongelacni miyac. Aime ngic-ngigac yengi yogo ngage-motoningte yedi yogo kwelenonggang lowec.\x - \xo 4:7 \xt 2Kor 5:1\x*  
\v 8 I yangucte, umac haicine monic-monicti neboc nga nebockacni kwesilu fikenolecaigac, yogodi mi hefecnubacaigac. Aime ngage-yaec aigabeleng, aimebac tapilinonggeng mi wawebenangkegac.\x - \xo 4:8 \xt 2Kor 1:8; 7:5\x*  
\v 9 Ngic yengi welu yebicnubabong, Sugucnedi mi hegilecnubacaigac. Yenge wecnubabong wawelu sifu mi miyac aicaigabeleng.  
\v 10 Yesule gagadi socnonggang fikelu yegengkenale ailu, Yesu homawecte doic yogo socnonggang ingucnehac fikeme gagabeleng.\x - \xo 4:10 \xt 1Kor 15:31\x*  
\v 11 Yesule gagadi himong-socnonggang fikelu yegengkenale ngic-ngigac yenge damengsoc Yesule ailu nonge gbolicne gaebengka socnonggeng homacka logaing.\x - \xo 4:11 \xt Rom 8:36\x*  
\v 12 Ilec ailu homac ye nongela bole inguc balu game, gagadi ngengela inguchac boleine balu gagac.   
\p
\v 13 Yowa monic yanguc kwelengkeicne fagac,  
\q1 “Na ngage-ngagesingkolec gaibale ailu miiba.” \rq (Mige 116:10) \rq*  
\m Aime nonge inguchac kwelenonggang ngage-ngagesingkolec galu ngagesingkelu yowa milu gagabeleng.  
\v 14 Wapongti Sugucne Yesu homackacni bagboliyewec. Aime yedi hocne homackacni bagboliyecnubalu Yesuholec taocnubame nonge ngengeholec momochac bacnubadaicte. Ailu yeicne emewa locnubame domadabelengte, yogo ngagegabeleng.\x - \xo 4:14 \xt 1Kor 6:14\x*  
\v 15 Umac sasawa yogo baficngebanogale ailu fikecaigac. I yangucte, Wapongte kwele-madicti taockeme taoc ngic-ngigac yengela kwesime ngic-ngigac bocyac yenge kwele-madic sugucnehac ngagelu Wapong mitengkebong wac feicne badaicte.   
\s1 Homalubac gagawa hikenoga  
\p
\v 16 Ilec nongileng kwelenonggeng mi wagac. Socnonggengti tapili-wawa ailu miyac ainogale aiyemewa, Wapongti sifu hadengsoc kwelenonggeng bame gboliyelu gagac.\x - \xo 4:16 \xt Efs 3:16\x*  
\v 17 Aime umac nga doic ngagecaigabeleng, yogo dameng bangkacnemac fadaicte, yogodi wiyac sugucne mi aigac. Yogodi yefenonggeng bame \w gaga-sanangte|lemma="Gaga-sanang"\w* tapili nga wac feicne sugucnehac ewalime balu gagabeleng.\x - \xo 4:17 \xt Rom 8:17-18\x*  
\v 18 Wiyac dongedi nganicaigabeleng, yogo damengngine kwesime miyac ainowagac. Aime wiyac dongedi mi ngani-nganiine, yogodi fafa-sanang fadaicte. Ilec wiyac dongedi mi ngani-nganiine, nongileng dongenonggeng yogowa hilalu gagabeleng. Nga wiyac dongedi nganicaigabeleng yogo hegilegabeleng.\x - \xo 4:18 \xt Kol 1:16\x*   
\c 5  
\s1 Honocmengte soc holenoledaicte  
\p
\v 1 Aime nonge yanguc ngagegabeleng, himongte soc yogo fale ingucne. Fale yago heliyelu musungkeme, Wapongti socnonggeng gbolicne, yogo mac ingucne monic moledi mi baicne honocmengka biyachac lowec fanolegac. Mac yogodibac fafa-sanang faginowagac.\x - \xo 5:1 \xt 2Kor 4:7\x*  
\v 2 Inguc aime nongileng yanguctihac falewa malacnonggeng gogoweme gaebengka, angacnonggengti honocmengte mac holenoleme haunangte ainolegac.\x - \xo 5:2 \xt Rom 8:23\x*  
\v 3 Foinac, yedi yogo holenoleme haudaictewa, asunonggeng someckeme senggang mi domadabelengte.  
\v 4 Aime nongileng fale yagowahac malacnonggeng gogoweme gabeng, umac ainoleme fale yogo baickelu moc ganogale mi ainolegac. Gagadi homac gbokenale ngagelu, ye mac gbolicne feina holeme haunale ainolegac.  
\v 5 Wapong yeuctihac soc yogo banangte bacnubame madickeibeng, yedi hocne \w Tili Asu\w* nolewec, aime yogodi mimipangte noine aigac.   
\p
\v 6 Ilec ailu socti macnonggeng aime iwa kwilic galu Sugucnele macka mi gagabeleng, nongileng inguc ngagelu ngagebocka mi gagabeleng.\x - \xo 5:6 \xt Hib 11:13-16\x*  
\v 7 Nongileng yanguctihac ngage-ngagesingte yefe balaibelu wiyac dongedi ngani-nganiine mi balaibecaigabeleng.  
\v 8 Inguc galu ngageboc mikac gagabeleng. Aime yefeine monic fadecka midec, nonge himong-socnonggeng yago nalic hegilelu Sugucnela hikelu macnonggeng gbolicna gadabeng.\x - \xo 5:8 \xt Filp 1:23\x*  
\v 9 Yogolec yanguc sanangne ngagegabeleng, yagowa me honocmengka yeholec gabeng kweleine madickenale nongileng boleine balu gagabeleng.\x - \xo 5:9 \xt Kol 1:10; 1Tim 4:1\x*  
\v 10 Nongileng sasawa \w Kristole|lemma="Kristo"\w* wowosaele damengka fedabelengte. Febeng yedi dameng iwa aibabanonggeng madicne nga sowacne ailu gaibeng, yogolec ameine filesoc badunoledaicte.\x - \xo 5:10 \xt Ngag 12:14\x*   
\s1 Sugucnele habuwa gaga  
\p
\v 11 Sugucne ye damuineholec, nonge yogo ngagegabelengte hangocnubame alang bacnocaigabeleng. Ilec ailu ngic-ngigac ngagesingkegaing, yogowa kpafengebanogale bole balu gagabeleng. Aime Wapongtibac funginenonggeng dondonne biyac nganilu ngagegac. Aime na ngagebe ngenge inguchac kwele ngage-ngagenginang funginenonggeng ngage-motolu gagaing.  
\v 12 Nonge wacnonggeng hatacmac mi bafegabeleng, miyac. Gocne yengi kwesilu wiyac dongedi nganicaigaing, yogolec socngineng bafecaigaing. Nga kwelenginengte noinebac mi bafecaigaing. Ngic ingucne yengi kwesilu wacnonggeng bawabong nalic yanguc edocebadaingte, “Nonge Pol nga bole-moniyangfocine yengele ngagebeng feicne aigaing.”  
\v 13 Nonge ngic haicka kwele-sifuc aigabelengka, yogo Wapongte ngagelu aigabeleng. Nga ngage-ngage-motockolec gagabelengka, yogo ngengele ngagelu, ailu gagabeleng.   
\p
\v 14 Ngic moniyangti ngic-ngigac sasawa yengele ame balu homawec. Aime yefe yogowahac sasawadi homayackeibong, inguc wosaelu ngagegabeleng. Ilec ailu Kristo ye kweleinedi angac ngagegac, yogo bacnubayackeme bole balu gagabeleng.  
\v 15 Kristodi ngic-ngigac sasawa yengele ailu homawec. Aime ngic-ngigac gbolicne gagaing, yengileng gagale ngagelu hatacmac mi gadaing, miyac. Yenge Sugucnele ngagelu gadaing. I yangucte, yedi yengele ailu homame Wapongti ye hatacmac bagboliyeme fangkewec.\x - \xo 5:15 \xt Rom 14:7-8\x*   
\s1 Kwele-moniyang bafuwanolewec  
\p
\v 16 Ilec ailu yanguctihac doma felu kwele esecnele aibaba balaibelu ngic-ngigac mi wosaecaigabeleng. Ailu esecne molickelu kwele esecna ngage-ngage ingucna Kristo wosaeibeng. Nga yanguctihacbac miyac.  
\v 17 Ilec ailu monic ye Kristoholec wetackelu gagacka, Wapongti ye bafickeme gbolicne fikelu gagac. Gaga esecnele wiyac yogo biyachac miyac aiwec. Hei, gaga gbolicne yogodi fikelu fagac hocne.\x - \xo 5:17 \xt Rom 8:1; Gal 6:15\x*  
\v 18 Yogo sasawa Wapongtacni kwesicaigac. Kristodi amenonggeng badume, yefe yogowa Wapongti nongilengkolec kwele-moniyang bafuwawec. Bafuwame kwele-moniyangte yowa mibeng yegengkenale bole noleme gagabeleng.\x - \xo 5:18 \xt Rom 5:10\x*  
\v 19 I yangucte, Wapongti Kristoholec game himongtowa yagolec ngic-ngigac yeholec kwele-moniyang ainingte aibaba inguc aiwec. Aime ye ngic-ngigac yengele \w bikic\w* hegilelu hatacmac mi ngagesiwec. Hegileme ngic-ngigac yeholec kwele-moniyang ainingte, kwelenonggang yowa yogo hocne lome mibeng yegengkecaigac.\x - \xo 5:19 \xt Rom 3:23-25\x*   
\p
\v 20 Ilec nonge Kristole mic-yowa babeng, Wapongti micnonggeng basanangkeme Kristole ailu ngic-ngigac yanguc edocebacaigabeleng, “Ngenge Wapongkolec kwele-moniyang aining.”  
\v 21 Kristo ye \w bikic\w* mikac. Aime Wapongti nongileng bikic lacnome bikicte ameine yogowa fewec. Feme nongileng yeholec wetackelu Wapongte ngic-ngigac dondonne ailu nalic gagabeleng.\x - \xo 5:21 \xt Hib 4:15\x*   
\c 6  
\s1 Bolele umac nga kwele-madic  
\p
\v 1 Nonge Wapongkolec momoc bole balu ganangte yanguc sanangne edocngebagabeleng, ngenge Wapongte kwele-madic baibong, yogo moc wickedaingkale ailu, edocngebagabeleng.  
\v 2 Wapongti yogolec yanguc miwec,  
\q1 “Dameng madicne aime na hedec kwelu mimilocgone ngageiba. Ailu na bikicte ameine baiba, dameng iwa baficguiba.” \rq (Yes 49:8) \rq*  
\m Ngagegaing, yakumac dameng madicne aigac, aime ye yanguctihac bikicte ameine bame wasecne aigabeleng.   
\p
\v 3 Aime ye bole noleme ngic-ngigac yenge yogo mibong sowaleme kwelenginengti hegiledaingkale ailu, nonge yengele yefewa okac mi locaigabeleng.  
\v 4 Ailu Wapongte mole-baficfocine gagabeleng, yogo aibabanonggeng sasawa ngic-ngigac edalicebalu fangkelu feina sanangnehac gagabeleng. Nonge doicka sanangke-benangkelu umac haicine monic-monic bafuwabeng, umacti hefecnubame gacaigabeleng.  
\v 5 Ngic yengi hududi wecnubacaigaing, ailu muc-macka locnubacaigaing, ailu nongele ailu aalic hendolongkolec bafuwacaigaing. Nonge boletowa balu deboc-gboli galu \w nosing-sawe\w* aicaigabeleng.\x - \xo 6:5 \xt 2Kor 11:23-27\x*  
\v 6 Nonge gbagbacne domalu ngage-ngage-motockolec galu, ulucne ailu ngic-ngigac baficebagabeleng. Ailu \w Tili Asuholec|lemma="Tili Asu"\w* wetackebeng kwelenonggengti angac kwesacine mikac ngagelu gagabeleng.\x - \xo 6:6 \xt 1Tim 4:12\x*  
\v 7 Ailu yowa noine milu Wapongte tapili balu gagabeleng. Gaga dondonne yogodi hudule wiyac ingucne, yogo mole-folenonggeng nga kananonggengti\f + \fr 6:7 \ft Folenonggeng, yogolec yanguc ngagecaigabeleng, yogodi tapiliholec wenagunoga. Kananonggeng, yogolec yanguc ngagecaigabeleng, yogo hudule wiyac damongkebeng asa-baba ingucne ailu bole badaicte.\f* balu damongkecaigabeleng.   
\p
\v 8 Gocne yengi wac feicne nolecaigaing. Nga gocne yengi nongele sowacne micaigaing. Ailu gocne yengi lobe-yowa ainolecaigaing. Nga gocne yengi mitengnubacaigaing. Nga gocne yengi nongele yowale kwesac-yowa micaigaing. Aime sifu nonge yowa noine migabeleng.  
\v 9 Bocyacti nonge ngic omane wacnubacaigaing. Ailu sifu bocyacti ngagecnubagaing. Nonge homanogale ailu sifu gbolicne gagabeleng. Ngic yengi hududi wecnubabong sifu mi homacaigabeleng.\x - \xo 6:9 \xt 2Kor 4:10\x*  
\v 10 Ailu ube-hobec ngagelu sifu damengsoc beliyelu gagabeleng. Nonge waweweine galu sifu ngic-ngigac baficebabeng yenge kwelele wiyac madicneholec aigaing. Wiyacnonggeng mikacbenang gagabeleng. Ailu sifu Wapongte wiyac sasawa fanolegac. Silic ingucne gabeng ngic-ngigac yenge funginenonggeng nalic ngage-motodaingte.   
\s1 Kweledi angac ngagenagulu ganoga  
\p
\v 11 Ngic-ngigac Korin taonka gagaing, ngengele ngagelu yowa yegena migabeleng. Ailu nonge ngengele kwelenonggengti angac sugucnehacbenang ngagegabeleng.  
\v 12 Aime ngenge nongele ngagelu kwelengineng hefegaing. Nga nongibac ngengele ailu sifu kwelenonggeng mi hefegabeleng, miyac.  
\v 13 Adu-madecfocne, na yakumac ngengele yanguc migabac, nongi ngengele aicaigabeleng, silicine ingucnehac ngengi hefaliyelu kwelenginengti nongele angac sugucnehacbenang aingeledaic.\x - \xo 6:13 \xt 1Kor 4:14\x*   
\s1 Kundung nga angoc  
\p
\v 14 Ngenge ngic-ngigac gocne ngage-ngagesing mikac, yengeholec mi wetackedabiyeng. Gaga dondonne nga \w yefe-yowa\w* wewe yeke yowa nalic hefedabiyecte, me? Yogo miyac! Nga angoc nga kundung yeke kwele-moniyang nalic aidabiyecte, me? \x - \xo 6:14 \xt Efs 5:11\x*  
\v 15 \w Kristodi|lemma="Kristo"\w* Aleng Sugucnengineng\f + \fr 6:15 \ft Grik yowawa Aleng Sugucnengineng wacine monic Belial kwelengkeicne. Wac yogolec fungine yogo “wiyac omane” me “basowalecaigac”.\f* yeholec kwele-moniyang nalic aidaicte, me? Nga ngic-ngigac ngage-ngagesingkolec yenge ngic-ngigac ngage-ngagesing mikac, yengeholec ngage-ngagengineng moniyang nalic aidaingte, me?  
\v 16 Ailu Wapongte \w ibu-mac\w* nga siduc-gbong yekele hewacka yowa nalic hefenoga, me? Yogo miyac! I yangucte, nongilengti Wapong gagaineholec, yele ibu-mac. Ilec ngenge ngic-ngigac gocne ngage-ngagesing mikac, yengeholec mi wetackedabiyeng. Wapongti yogolec yanguc miwec,  
\q1 “Na macne yengela balu yengeholec galu hewacnginang lec-welec aidacte. Galu yengele Wapong aibe yengi ngic-ngigacfocne aidaingte.” \rq (Dep 26:12; Yer 32:38; Esek 37:27) \rq*\x - \xo 6:16 \xt 1Kor 3:16\x*   
\m
\v 17 Ailu Sugucnedi yanguc migac,  
\q1 “Ngenge yengele hewacka galu wiyac monic wonongkolec bakpaduc mi aidabiyeng, ngenge yenge hegilecebalu baickelu ngengilangkac hikelu gadabiyeng. Ngenge inguc aidaingtewa, na ngengele angacnume bacngebadacte.” \rq (Yes 52:11; Esek 20:24,41) \rq*\x - \xo 6:17 \xt Miye 18:4\x*   
\q1
\v 18 “Ailu na ngengele Mamacngineng aibe, ngengi nale adu-madecfocne aidaingte, Sugucne Tapilitowa Fileinedi inguc migac.” \rq (2Sm 7:14) \rq*\x - \xo 6:18 \xt Yer 31:9\x*   
\c 7  
\p
\v 1 Agofocne kwelenedi ngengele angac ngagegabac, Wapongti inguc mipangkewec. Ilec nongileng wiyac sasawadi asunonggeng nga socnonggeng hedickeme wonongkolec aicaigac, yogo suweyackelu \w gbagbacne\w* aidabeleng. Ailu Wapongte hangocnubame alang bacnogabelengte ailu angacnubame molickelu Wapongte bingec ganangte, yogo bamoctoyackelu sugulelu sanangkedabeleng.   
\s1 Kwele-madic yowa  
\p
\v 2 Ngenge kwelengineng basugulelu angac ngagenoledabiyeng. Nonge ngic me ngigac monic aibaba sowacne mi aicnoibeng. Ailu monic mi basowaleibeng. Ailu kwesacka wiyacngineng monic mi ewalicebaibeng.  
\v 3 Ngengele yowa mimoctonogale mi midacte, miyac. Ngenge nongele kwele kwelina gagaing, yogo biyachac edocngebaiba. Ailu homadabelengte me gadabelengte, yogo ngenge nga nonge momochac aiyackedabelengte.  
\v 4 Na hangoc mikac yowa edocngebalu ngengele ngagebe feicne aime micaigabac. Ailu nonge umac haicine monic-monicte feina gaebengka ngengi nonge basanangnubaibong. Ilec belic-belic sugucnehac ngagegabac.   
\s1 Titusdi siduc balu kwesiwec  
\p
\v 5 Foinac, nonge Masedonia prowinswa hike sulumebeng, umac haicine monic-monicti fikenoleme ngiye-domacnonggeng madicne monic mi fikewec. Ngic-ngigac yengi weyebic ainoleibong, aime kwelenonggengti hangocnubame gaibeng.\x - \xo 7:5 \xt 2Kor 2:13\x*  
\v 6 Aime Wapong ye ngic-ngigac kwele-umackolec gabong basanangebacaigac, yeuctihac Titus saleme nongela kwesiwec, yogodi basanangnubawec.  
\v 7 Ailu Titus kwesiwec, yogo sugu miyac, ngengi wenucka mibasanang aicnoibong, ye yowa yogo edocnulu basanangnume ngageiba. Ailu ngenge nganicnunogale angac ngageibong. Aime umac yogolec ailu ubengineng hobeleme kwele-sowac ngageibong. Ailu ngenge wenucka nale angac sugucnehac ngageibong, ye yogo momochac edocnume beliyeiba.   
\s1 Siyeckelu gaibong  
\p
\v 8 Hibine kwelengkeiba, yogodi kwele-sowac bafuwangelewec. Na yogo ngagelu dameng bangkacnemac ngageboc aiiba. Nga yanguctihacbac ngageboc mi aigabac.\x - \xo 7:8 \xt 2Kor 2:4\x*  
\v 9 Na ngengele kwele-madic ngagelu beliyegabac. I yangucte, ngenge kwele-sowac sugu ngagedabong yogo mi beliyedaba. Ngenge kwele-sowac ngagelu \w kwele-hefaliyec\w* aiibong. Ngenge Wapongte angac nga ngage-ngage balaibebong kwele-sowac bafuwangelewec. Inguc ainingte yanguctihac molickelu nongele hibile ailu umacngineng fikewec, yogo biyachac miyac aiwec.  
\v 10 I yangucte, Wapongti kwele-sowac bafuwangeleme kwele-hefaliyec ailu wasecne aidaingte, yogo kwelenginengti ngageboc mi aigaing. Himongte kwele-sowac, yogodibac homac bafuwangeledaicte.\x - \xo 7:10 \xt Mat 27:3-5; Hib 12:16-17\x*   
\p
\v 11 Ngagegaing, Wapongti kwele-sowac ingucne bafuwangeleme yogodi ngengela noine yanguc fikengelewec, ngenge tatakic mikac aigaing. Ailu aibaba bikicineholecte hangocngebame, yogowacni baickegaing. Ailu yenge bikic yogolec aibong ngenge aalicngebagac. Ailu mibating aingeleningte mimedec aigaing. Ailu nganicnunogale aingelecaigac. Ailu nale dogbac aicaigaing. Ailu ngicti bikic aiwec, ye mibating aicnoibong. I yangucte, gagangineng yogodi bucbuchac gbagbacne fikeme nganicaigabeleng.  
\v 12 Ilec na molickelu hibi kwelengkengeleiba, yogo ngic monicti agoine basowalewec, Ngic yogo me agoine, yekele ailu hibi yogo mi kwelengkeiba, miyac. Ngenge Wapongte haicka nongele kwelenginengti angac ngagecaigaing, yogo fikelu yegengkeme ngengungtihac yogo ngani-motoningte ailu inguc kwelengkengeleiba.  
\v 13 Yogodi basanangnubame gagabeleng.  
\s1 Titus hefoleibong  
\p Galu taockelu yanguc ngageibeng, ngenge sasawadi Titusle kwele nga asuine yogo bamogungkelu tapili gbolicne bafuwacnoibong. Nonge yogo ngagelu belic-belic sugucnehac ngagebeng yogodi basanangnubawec.  
\v 14 Na Titusle haicka ngenge mitengngebalu yanguc edoiba, ye ngengela fulu nganicngebame na mi gamenuwec. Nonge ngengela fulu yowanonggeng sasawa yogo noine miibeng, silicine ingucnehac Titusle haicka mitengngebabeng noine fikewec.  
\v 15 Ye ngengele ngagelu kweleinedi angac sugucnehac ngagegac. Ye ngengela fume ngengi mac holecnolu hangoc ailu dengdengngebame yowaine ngageibong, ye yogo mi ngigeckewec.  
\v 16 Ngenge sanangne gagaingte na ngageboc mikac beliyegabac.   
\c 8  
\s1 Yerusalem yengele babafic  
\p
\v 1 \w Ngic hae-gbafocne|lemma="ngic hae-gba"\w*, Wapongti Masedonia habu gagaing, yenge kwele-madic wenucka aiyeleme gagaing, yogo edocngebanogale ngagegabeleng.\x - \xo 8:1 \xt Rom 15:26; 2Kor 9:1-2\x*  
\v 2 I yangucte, yenge umac feina doic ngagelu waweweinebenang galu sifu belic-belic homacnehac ngagelu ibu umacnehac loibong.\f + \fr 8:2 \ft 1 Korin 16:1 iwa Poldi ibu yogolec kwelengkewec. Yesule habu Yerusalem iwa umackolec gaibong. Ilec ibu yogo yenge yeledaicte.\f*  
\v 3 Yenge wiyac fayelewecsoc yogo loibong. Aime loibong, yogo sugu miyac, yenge wiyac sugucnehac ewalilu loibong. Inguc nganilu mibe yegengkegac. Aime nani aibe yenge mi loibong. Yenge yengungtihac inguc ngagelu loibong.  
\v 4 Yenge sanangne mikpafeng ainolelu yanguc edocnubaibong, “Nonge inguchac yengeholec kwele-madicte aibaba taockelu Wapongte bingec yenge baficebanogale ngagegabeleng.”  
\v 5 Inguc mibong yanguc ngageibeng, yenge molickelu moneng ngagesilu lodaingte. Aimebac yenge molickelu Wapongte ngage-ngage nga angac balaibelu yengileng Sugucnele molewa lonaguibong. Silicine ingucnehac nongela taockelu inguchac ainoleibong.   
\p
\v 6 Inguc aibong, Titus ye kwele-madicte ibule bole yogo lonogale ngengela fungkewec, ye bole yogo bamoctonale mipangkelu sanangne edoibeng.  
\v 7 Ngengela wiyac sasawa umacnehac fagac. I yangucte, ngage-ngagesing nga yowa madicne mimingineng fangelegac. Ailu ngage-ngage-motoc nga bolele angac ailu nongele kwele-angacngineng fangelegac. Inguc fagacte ngenge inguchac kwele-madicte wiyac sugucnehac lodaing.\x - \xo 8:7 \xt 1Kor 16:1-2\x*   
\p
\v 8 Na yowa yago ung-yowa mi edocngebagabac, miyac. Masedonia habu yenge bole yogo banogale angacngineng fagac. Aime yenge ingucne ngenge ngic-ngigac yengele kwelenginengti angac noine ngagegaing me miyac, yogolec lokwesacka locngebagabac.  
\v 9 Ngenge Sugucnenonggeng \w Yesu\w* \w Kristo\w* yele kwele-madic ngagegaing. Ye honocmengka wactowaineholec galu ngengilengte ailu macine hegilelu waweweinebenang ailu gawec. Ye waweweine aiwecte ngengileng kwelele wiyactowanginengkolec aiibong.\x - \xo 8:9 \xt Mat 8:20; Filp 2:6-7\x*   
\p
\v 10 Ngenge hifa bageina bole yogo sugu molickelu mi baibong, miyac. Ngenge molickelu angac biyachac ngagelu mipangkeibong. Ilec ngenge ibu loningte nale ngage-ngage taockebe yogodi baficngebadaic.  
\v 11 Ngenge molickelu efeckelu bole yogo kwele-angacka baibong, ingucnehac mamang hidulu yanguctihac bolengineng nalic aime yogo bamoctodaing.  
\v 12 Aime ngenge efeckelu wiyacngineng fangelegacsoc ibu lodaingte, yogo Wapongte haicka madickegac. Nga wiyacngineng mi fangeledaictewa, yogolec yowaine mikac.\x - \xo 8:12 \xt Mrk 12:43-44\x*  
\v 13 Ngic-ngigac gocne yenge umacngineng mikac gadaingte. Nga ngengibac baficebanogale ibu lolu umackolec gadaingte. Aibaba ingucnedi mi madickegac, miyac. Ngenge gagangineng silicine moniyang ailu ganingte migabac.  
\v 14 I yangucte, dameng yanguctihac ngengela wiyac bocyac fagac, wiyac yogolec nebocine ngic-ngigac wiyac monicte kpungkecaigaing, yenge baficebadaingte. Aime lobewa gacgu ngenge wiyac monicte kpungkedaingtewa, iwa yengela wiyac bocyac fadaicte, yogodi ngenge inguchac baficngebadaingte. Ngenge inguc ailu gagangineng silicine moniyang gadaingte.  
\v 15 Yogolec Wapongte hibiwa yanguc kwelengkeicne fagac,  
\q1 “Ngic nosing bocyac bawec, yele nosing andoine aicnowec. Nga efecnemac bawec, yebac ingucnehac nosing andoine aicnowec.” \rq (Wah 16:18) \rq*   
\s1 Hiye-moneng madicne damongkenoga  
\p
\v 16 Aime nonge ngengela kwele-madicka bole bacaigabeleng, silicine ingucnehac Wapongti Titusle kwele kwefangkeme ye ngengela boleine kwele-madicka balu gawec. Yogolec Wapong mitengkegabac.  
\v 17 Ye ngengela bole banale mikpafeng aicnobeng kweleine biyachac lolu yeicne mibasanang ainagulu angac sugucnehac ngagelu efeckelu ngengela fudaicte.   
\p
\v 18 Aime ngic hae-gbanonggeng monic, ye \w Siduc Madicne\w* mime Yesule habu sasawa gagaing, yenge yele mibong madickecaigac, ye salebeng Titusholec momoc fudabiyecte.  
\v 19 Sugucnedi wac feicnehac banale ailu baficebanogale edalicebalu nonge kwele-madicte ibu kpaduckelu gagabeleng. Yesule habu yengi ngic yogo bawosaeibong, ye nongeholec momochac ibu yogo balu hikenoga.  
\v 20 Aime ibu sugucne yogo wenuc damongkelu gagabeleng, monicti yogolec lobe-yowa midaickale, nongileng momochac balu hikenangte angacnubagac.  
\v 21 Sugucnele haicka sugu miyac, ngic-ngigac yengele haicka momochac aibaba madicne aibeng madickegac.  
\v 22 Ailu nonge ngic hae-gbanonggeng monic salebeng yekeholec fudaingte. Ngic yogo ye bole haicine monic-monicte angacine sugucnehac ngagecaigac, nonge dameng bocyac yogo nganilu kwelenonggeng madickewec. Ailu ye ngengele ngageme feicne aigac.   
\p
\v 23 Aime ngic yogo nga ngic hae-gbanonggeng monic yeke Yesule habu yengele \w salecebaicne\w* galu bolenginac Kristole wac bafecaigabiyec. Aime na Titusle yanguc mibe ngageibong, ye bole agone aime noke momoc ngengela fulu bole bacaigabelec.  
\v 24 Ilec ngenge Yesule habu yengele haicka angacngineng edalicebalu kwelenginengti yengele angacngebadaic. Aime nonge ngengele ngagelu yowa madicne miibeng, yogodi kwesac mi aidaic.\x - \xo 8:24 \xt 2Kor 7:13-14\x*   
\c 9  
\s1 Ibule yowa  
\p
\v 1-2 Aime na Wapongte bingec yenge baficebanogale kwelengkengelegabac. Ngenge bole yogo banogale biyachac efeckeibong yogo ngagegabac, hibi yagowa yowa yogo nalic hegiledackalesoc. Aime Masedonia yengele haicka ngengele yanguc mitengngebacaigabac, “Ngic hae-gbafocnonggeng Akaia gagaing, yenge bole yogo banogale hifa bageina biyachac efeckeibong.”\f + \fr 9:1-2 \ft Korin taon yogo Akaia prowins iwa fawec.\f* Ailu ngengi wiyac yeleningte kwele-efec bafuwaibong, homacne yenge ngengele siduc yogo ngagelu kwelengineng fangkeme yenge inguchac ainogale ngagesiibong.\x - \xo 9:1-2 \xt 2Kor 8:1-7\x*   
\p
\v 3 Aime nongi mitengngebaibeng, yogodi noine mikac aidaickale, \w ngic hae-gbafocnonggeng|lemma="ngic hae-gba"\w* yogo salecebabeng fugabiyeng. Ailu yowa biyachac miibeng, ngenge yogo ingucnehac Wapongte bingec baficebanogale efeckelu gadabiyeng.  
\v 4 Aime gacgu funogale mibe, Masedonia ngic gocne yenge naholec fulu nganicngebabong ngenge ibule bole yogowa mi efeckedaingtewa, ibac nonge nga ngenge momochac gamenubadaicte.  
\v 5 Ilec ailu nani ngic hae-gbafocnonggeng sanangne edocebabe yenge molickelu ngengela funingte ngagegabac. Yenge fulu baficngebabong ngenge kwele-madicte wiyac lobong hikenogale biyachac mipangkeibong, yogo bamockelu kpaduckelu lolu gadabiyeng. Aime ngenge kwele-umacka ibu lodaingkale ailu, ibungineng kwele-madicka lonogale ngic hae-gbafocnonggeng salecebabeng fugabiyeng.   
\s1 Kwele-madicka wiyac yelenoga  
\p
\v 6 Monic ye nosing efecnemac bolewa duwedaicte, ye noine efecnemac badaicte. Nga monic ye nosing bocyac duwedaicte, ye noine umacnehac badaicte, ngenge yogo ngagesidaing.\x - \xo 9:6 \xt Ynn 11:24-25\x*  
\v 7 Silicine ingucnehac monic ye kwele-madicka ngic-ngigac wiyac yeleme, Wapongti yele kwele-angac ngagecnodaicte. Ilec ngenge ngagebocka me ngic-ngigac gocne yengi kpafengngebabong ngic-ngigac wiyac yeledaingte, yogodi mi madickedaicte. Ngenge kwelenginang filesoc wiyac monic biyac ngagepangkeibong, yogo yeledaing.  
\v 8 Inguc aibong Wapongti kwele-madicka nalic baficngebalu game wiyac fangeledaicte, aime ngenge damengsoc woc-wiyacte mi kpungkedaingte. Inguc ailu ngenge bole madicne balu nalic baficebadaingte.  
\v 9 Yogolec yanguc kwelengkeicne fagac,  
\q1 “Ye angacine balaibelu wiyac homacnehac botoc balu ngic-ngigac waweweine yelegac. Yele pasi dondonne, yogo damengsoc faginowagac.” \rq (Mige 112:9) \rq*   
\p
\v 10 Wapongti wasecne bafuwame bole fileinedi wasec yogo duwegac. Ailu nosingngine inguc bafuwacaigac, ye ngengele wasec ingucnehac bafuwalu noba-nosingngineng bocyac bame sawedaicte. Aime ngenge aibabangineng dondonne, yogolec noine bocyac taockeme taoc ailu hikedaicte.\x - \xo 9:10 \xt Yes 55:10\x*   
\s1 Yesule habu yengele babafic  
\p
\v 11 Ngenge kwele-madicka baficebalu wiyac yelenogale aibong ngengela wiyacngineng bocyac fikedaicte. Inguc aime nonge kwele-madicte wiyac yogo ngic-ngigac yelebeng yenge Wapong kwele-madic micnodaingte.\x - \xo 9:11 \xt 2Kor 1:11; 4:15\x*  
\v 12 Ngenge babafic bole balu, yogodi Wapongte bingec yenge wiyac monicte kpungkecaigaing, yogo baficebadaingte. Yogodi socngineng sugu mi baficebadaingte, miyac. Yogo Wapongta inguchac kwele-madic homacnehac micnodaingte.  
\v 13 Ngenge yowa balaibelu ngic-ngigac babaficte bole yogo bacaigaing, yenge yogo nganidaingte. Inguc nganibong ngenge \w Kristole|lemma="Kristo"\w* \w Siduc Madicne\w* mibong yegengkeme, yenge nga ngic-ngigac sasawa momochac baficebacaigaing, yogo ngagelu Wapongte wac bafedaingte.  
\v 14 Aime Wapongte kwele-madic sugucnehac ngengela fagacte yenge ngengele angacebame ngengele milockedaingte.  
\v 15 Wapongti kwele-madicka wiyac nolewec, yogo Yesu hocne. Yele funginele yowa wenuc minogale kpungkegabeleng. Yogolec mitengkenang.   
\c 10  
\s1 Salecebaicne aibabangineng  
\p
\v 1 Ngic-ngigac gocne yengi nale yanguc micaigaing, “Pol ye nongilengkolec yawa galu hangocka yowa ulucne micaigac. Nga dalicka hikelu yowa sanangne hangoc mikac kwelengkelu lome hikecaigac.” \w Kristo\w* ye ulucne. Ailu ye kwele-efecka yefe yogo balaibegac. Ilec na aibaba ingucne kpafengebanogale aineleme  
\v 2 foloineholec edocngebagabac. Na ngengela fulu hangoc mikac yowa sanangne edocngebanogale mi ainelegac. Ilec aibabangineng aidaingtewa, yowa sanangne mibele mi aidaing. Aimebac na ngengela fube ngic gocne yengi nale yanguc micaigaing, “Pol ye kwele esecnele aibaba balaibelu boleine balu gagac,” yenge yowa sanangne yogo hangoc mikac nalic edocebadacte.\x - \xo 10:2 \xt 1Kor 2:3; 4:21\x*   
\p
\v 3 Nonge soctepecka gagabeleng, yogo noine. Aimebac hudu yuwenac yogo kwele esecnele aibaba mi balaibegabeleng, miyac.  
\v 4 Lebe-maleku nga hudule wiyac balu gagabeleng, yogo sockacni miyac. Yogo Wapongtacni ailu yogo tapiliineholec. Aime nonge yogo balu sowacnedi oda ingucne aigac yogo hembalackelu kwesac ngage-ngage baickegabeleng.\x - \xo 10:4 \xt Efs 6:13-17\x*  
\v 5 Aibaba nga ngage-ngage feicne sasawa yogodi Wapongte ngage-ngage gbolongne yogo wecaigac, nonge yogo momochac baickegabeleng. Baickelu ngage-ngage yogo Kristole yowa balaibeningte hefelu bageina logabeleng.  
\v 6 Aime ngenge nongele yowa balaibebong yegengkegac, dameng iwa gocne yowa kwekwe aigaing, yogolec ameine sasawa badunangte efeckelu gagabeleng.   
\p
\v 7 Aime monicti yanguc ngagedaicte, “Na Kristole ngic gagabac.” Ye yeuctihac inguc ngagepangkedaictewa, nonge Kristole ngic ye ingucnehac gagabeleng. Yogo inguchac yeuctihac ngagesidaic. Ngenge inguc ngagesibong, ye nga nonge aibabanonggengti ngengela fikelu yegengkedaic.  
\v 8 Sugucnedi bole-yowa tapiliineholec nolewec, yogo ngenge basowalecngebanogale mi nolewec, miyac. Ye ngenge basanangngebanogale tapili nolewec. Na tapiline yogolecsoc fagac, ailu yogo ngagebe feicne aigac. Inguc taockelu migabacte ailu, yogolec mi gamenudaicte.\x - \xo 10:8 \xt 2Kor 13:10\x*  
\v 9 Ailu hibi kwelengkecaigabac, yogodi hangoc sugucne fikengelenale mi ngagesicaigabac.  
\v 10 Aime gocne yengi yanguc micaigaing, “Polle hibi yogo yowa dacine nga umacineholec. Aimebac ye kwesilu nongilengkolec galu sockapec tapili-wawa galu yowa mime, ngic-ngigac yenge yowa omane milu hegilegaing.”  
\v 11 Ngic-ngigac inguc micaigaing, yenge yanguc ngagesidaing, nonge dalicka galu yowa dacineholec hibiwa kwelengkecaigabeleng. Aime iwa fulu ngengeholec galu aibabanonggeng aicaigabeleng. Nga hibiwa kwelengkeicne yogo silicine moniyang aiboc gagabeleng.   
\s1 Bole-yowa silicina balaibenoga  
\p
\v 12 Gocne yengibac yanguc micaigaing, “Nani nongileng hewacka sugucne gagabac.” Yenge yogo mingagec ailu wosaenagucaigaing. Ngic ingucne yenge yengileng sugu wosaecnagulu maaine locaigaing, yenge wiyac monic mi ngage-motolu yefe lilogaing. Aime nonge domalu madi nongileng feicne gagac, yogo nalic mi midabelengte.  
\v 13 Wapongti bawosaecnubalu bole-yowa noleme nonge yogo balaibelu ngengela inguchac fuibeng. Aime nonge Wapongte maa yogo sugu balaibelu bafelu midabelengte. Maa yogo ewalilu socnonggeng nalic mi bafelu midabelengte.\x - \xo 10:13 \xt Rom 12:3\x*  
\v 14 Nonge molickelu ngengela fulu Kristole \w Siduc Madicne\w* edocngebaibeng, yogo Wapongte maa mi ewaliwec. Nga ngengela mi fudabengka, bolenonggengte yowa-siduc yogodi maaine ewalime soc bafefe aidecka.  
\v 15 Aime gocne yenge bole biyachac baibong, nonge iwahac hikelu nongi molic-molic ailu feicne ainangte milu monic mi bacaigabeleng, miyac. Nonge yanguc ngagelu wangec gagabeleng, ngengele ngage-ngagesingti sugulelu sanangkeemewa, nongele bole yogo ngengela inguchac sugulelu sanangkedaicte.   
\p
\v 16 Aime ngenge ngage-ngagesingka sugulelu sanangkebong, nonge ngengele lobewa mac-himong gocne falegac, iwa inguchac hikelu \w Siduc Madicne\w* mibe yegengkeyeledaicte. Inguc ailu iwa ngic monicte bolele molic-molic ailu feicne aigabeleng mi midabelengte.  
\v 17 Aime  
\q1 “Monic ye mime feicne aidaicte, ye Sugucnele mime feicne aidaic.” \rq (Yer 9:24) \rq*\x - \xo 10:17 \xt 1Kor 1:31\x*   
\m
\v 18 Sugucnedi ngic monic bafegac, yele ngageme ngic madicne aigac. Nga monic ye yeuctihac socine bafegac, yedibac ngic madicne mi aigac.\x - \xo 10:18 \xt 1Kor 4:4\x*   
\c 11  
\s1 Salecebaicne kwesacine  
\p
\v 1 Ngenge ngageebongka na kwele-sifuc yowa monic mibe tatakic mikac ngageningte aigabac.  
\v 2 Wapongti wiyac yeicne sugu ainale bocyac aicnocaigac, silicine ingucnehac nani ngengele bocyac ainelecaigac. I yangucte, ngigac monic ye ngic bingecine biyachac micnoibong gacaigac, nani silicine ingucnehac \w Kristola|lemma="Kristo"\w* ngenge ngigac-bingecne gbagbacne locngebabe ganingte ngagesigabac.\x - \xo 11:2 \xt Efs 5:26-27\x*  
\v 3 Ngenge Kristo ngagepangkelu gbagbacne galu kweledi yele sugu angac ngagegaing. Aime hemadi Ewa kwesackelu lokwesacka lowec. Silicine ingucnehac monicti gagacka, gagangineng gbagbacne nga Kristole angac sugu ngagecaigaing, yogolec ngage-ngage ewalicngebadaickale, hangocnugac.\x - \xo 11:3 \xt Fike 3:4,13\x*  
\v 4 Na aibabangineng monic nganicaigabac, yogo nalic mi aigac. Nongi \w Yesule|lemma="Yesu"\w* siduc milu edocngebalu wedungeleibeng. Aime monicti kwesilu yogo hegilelu Yesu silicine monicte siduc milu edocngebalu wedungelecaigac. Me ngenge yele yowa mi wosaelu moc sugu kwele-madicka ngagecaigaing. Ailu ngenge Asu biyachac baibong, yogo hegilelu asu silicine monic ngic yengelacni kwele-madicka bacaigaing. Me nonge \w Siduc Madicne\w* milu edocngebalu wedungeleibeng. Ailu yogo hegilelu siduc madicne silicine monic mime, ngenge yogo inguchac mi wosaelu moc sugu kwele-madicka ngagecaigaing.\x - \xo 11:4 \xt Gal 1:8-9\x*   
\p
\v 5 Naneuc yanguc ngagesigabac, ngic yenge \w salecebaicne\w* feicnebenang wacebagaing, na yengele bagewa mi gagabac, miyac.\x - \xo 11:5 \xt 1Kor 15:10; 2Kor 12:11\x*  
\v 6 Yowa mimile tapili yenge ingucne nala bocyac mi fagac, yogo noine. Aimebac ngage-ngage-motoc yogo andoinebenang fanelegac. Nonge ngage-ngage-motoc yogo yefe haicine monic-monicka ngengela biyachac bafuwabeng nganiibong.\x - \xo 11:6 \xt 1Kor 2:1,13\x*   
\p
\v 7 Ngengi feicne ainingte bawacnaguiba. Na hiye-monengte ailu Wapong yeicne \w Siduc Madicne\w* mi mibe yegengkengeleme gaiba.\f + \fr 11:7 \ft Ngic ye hiye-monengte ailu bole bacaigac, yele bole yogo wiyac feicne aigac, Korin ngic-ngigac yenge inguc ngagelu gaibong. Ilec gocne yenge ngagebong Polle bole yogo wiyac omane aiwec.\f* Ilec ngagebong na \w bikickolec|lemma="Bikic"\w* aigabac, me? Yogo miyac!\x - \xo 11:7 \xt 1Kor 9:18\x*  
\v 8 Aime na ngengela bole babele Yesule habu gocne yengi hiye-moneng neleibong. Nelebong yenge mi baficebalu hise ngic ingucne balu ngenge baficngebaiba, yogo noine.\x - \xo 11:8 \xt Filp 4:15-16; 2Kor 12:13\x*  
\v 9 Ailu na ngengeholec galu wiyac gocnele kpungkeiba. Kpungkelu umacne yogo ngengelacni ngic monic mi lacnoiba, miyac. \w Ngic hae-gbafocnonggeng|lemma="ngic hae-gba"\w* Masedonia prowins iwacni kwesiibong, yengibac woc-wiyacte kpungkeiba, yogo sasawa baficnuyackeibong. Inguc aibong na umac monic mi ngeleiba. Ailu monic mi ngeledacte.  
\v 10 Aime ngic-ngigac Akaia prowinswa gagaing, yengelacni wiyac monic mi balu naneicne aibaba feicnele mibe yogo nalic mi hedickedaingte. Foinac, Kristole yowa noine nala fagacte yowa noine migabac.  
\v 11 Na omale babafic monic neleningte mi ainelegac? Na kwelenedi ngengele angac mi ngagegabac, ngenge inguc ngagegaing, me? Na kwelenedi ngengele angacnugac, yogo Wapongti ngagegac.  
\v 12 Ngenge ngic gocne wiyac yelebong, yenge nongeholec soc moniyang ainingte ailu socngineng inguchac bafenogale aidaingte. Yenge inguc midaingkale, na aka yogo holelu hiye-monengte aibaba weni yogo aicaigabac, yogohac ailu gadacte.   
\p
\v 13 Aime ngic ingucne yenge kwesac ailu salecebaicne ingucne aicaigaing. Ailu bole noine monic mi balu silicnginengti hefaliyeme Kristole salecebaicne yengele silic ingucne ailu gacaigaing.  
\v 14 Aibaba ingucne aibong ngenge mi kwatackedaing. \w Satang\w* ye ingucnehac yeicne silicine bafaliyeme angocte \w angelo\w*, yogo ingucne aicaigac.  
\v 15 Ye inguc aime, yele mole-baficfocine yenge inguchac silicngineng bafaliyebong aibaba dondonnele mole-bafic, ingucnehac aicaigaing. Aime yogo wiyac efecne aigac. Ailu yenge gacgu dameng moto-motoina aibabangineng yogolec ameine badaingte.   
\s1 Kwele-sifuc yowa ingucne  
\p
\v 16 Aime monic ye nale yanguc mi ngagedaic, “Ye kweleine sifuwegac.” Yogo hatacmac edocngebagabac. Ailu ngenge nale inguc ngagegaingka, ngenge kwele-sifuc ngic bacebagaing, ingucnehac na bacnubong ngic ingucne ailu mibe ngagedaing. Inguc aime na inguchac neicne wacne bafelu yowa kpisicnemac midacte.  
\v 17 Ailu yowa yago migabac, yogo Sugucnele mic balaibelu mi migabac, yogo kwele-sifuc yowa ingucne naneuc milu wacne bafelu migabac.  
\v 18 Ngic bocyac yenge socte ngage-ngage balaibelu yengileng wacngineng bafeningte yowa micaigaing. Ilec ailu na inguchac neicne wacne bafelu yowa gocne minogale ngagegabac.  
\v 19 Aime ngenge ngengungtihac ngage-ngage-motockolec gagabeleng inguc ngagegaing. Ailu ngenge kwele-sifuc yowale aka monic mi holelu angacka ngagecaigaing, aibabangineng yogobac nganilu gagabac.  
\v 20 Ngic gocne yengi kwelec kwekwe bacngebagaing, me woc-wiyacngineng ewalicngebagaing. Me ngengi baficebaningte kwesacngebagaing, me wacngineng bafegaing, me we-wepatang aingelegaing. Yenge inguc aibong ngenge yogo nganilu ngengi aka monic mi holeyelecaigaing, miyac.  
\v 21 Nonge aibaba ingucne ainogale tapilinonggeng mi fagac, na yowa ingucne minogale gamenugac.  
\s1 Polle fungine  
\p Aime ngic gocne yenge hangocngineng mikac galu wacngineng bafecaigaing, na ingucnehac hangoc mikac kwele-sifuc yowa milu wacne bafebe ngagegaing.\x - \xo 11:21 \xt Filp 3:5\x*  
\v 22 Yenge \w Hibru\w* ngic, me? Oc, na inguchac Hibru ngic. Yenge \w Israel ngic|lemma="Israel"\w*, me? Oc, na inguchac Israel ngic. Yenge \w Abraham\w* ngambofocine, me? Oc, na inguchac yele ngambo hocne aigabac.  
\v 23 Aime yenge Kristole mole-baficfocine aigaing, me? Na yengele feicne aigabac. Ailu hatacmac kwele-sifuc yowa ingucne taockelu migabac. Na Kristole bole ewalicebalu balu gagabac. I yangucte, ngaba yengi dameng bocyac muc-macka locnubong ngiyeiba. Ngiyebe yenge dameng bocyac muc-hududi umacnehac wecnuibong. Aime dameng bocyac homanogale ailu gaiba.\x - \xo 11:23 \xt Sale 16:23\x*   
\p
\v 24 I yangucte, alec 5 \w Yuda ngic|lemma="Yuda ngic-ngigac"\w* yengi umbikadi wecnuibong. Aime 5 yogolec kwelina moniyang moniyang hibe alecine 39 aiwec.\f + \fr 11:24 \ft Grik yowawa yowa yanguc fagac, “40 yogowacni moniyang sugu hegileibong.” Aibaba yogolec fungine Yefe-yowa 25:2-3 iwa migac, hudu 40 nalic wedaingte. Aime Yuda ngic yenge yefe-yowa mi hegiledaingkale ngagelu moniyang hegilelu 39 sugu wecebalu gaibong.\f*  
\v 25 Ailu dameng habackang Roma yengele hudu-baba ngic yengi hududi wecnuibong. Ailu dameng moniyang posadi holecnuibong. Nga dameng habackang lac-wagewa hikebe lac-wage kiwecka haume hauiba. Haulu dameng monicka deboc moniyang nga hadeng moniyang kiwec feina faiba.\x - \xo 11:25 \xt Sale 16:22; 14:19\x*  
\v 26 Na dameng bocyac himongne himongne lolicke hikelu misa sugucne falockebe wecnume sowalenogale aiiba. Aime kindololo ngic yengi yefewa basowalecnunogale aiibong. Ailu neicne alingfocne yengi basowalecnunogale aiibong. Ailu \w Israel yengele alingkacni miyac\w*, yengi basowalecnunogale aiibong. Nga taon gocna ngic yengi basowalecnunogale aiibong. Ailu himong kisiwa misaine mikacka, nga kiwecka galu umac bafuwaiba. Aime ngic hae-gba ingucne kwesacnulu basowalecnunogale aiibong.\x - \xo 11:26 \xt Sale 9:23; 14:5\x*   
\p
\v 27 Inguc ainelebong sifu bole sugucnehac doickolec balu gaiba. Bagacgu dameng bocyac gung-gboli galu nosing nga misale homalu gaiba. Ailu \w nosing-sawe\w* gaiba. Aime dameng bocyac ngakpi-kpolucte basackelu aibibiyelu tilodi homacne bacnume gaiba.  
\v 28 Ailu umac yogo sugu miyac, na hadengsoc Yesule habu sasawa damongebanogale ngagelu ngageboc ailu bole umacnehac balu gagabac.  
\v 29 Habu yengelacni monicti tapili mikac aime, na yogolec inguchac tapiline wacaigac. Aime yengelacni monicti agoine monic fuluckeme \w bikic bafuwame|lemma="Bikic"\w*, yele umac yogo nganibe kwelena dac ingucne lobecaigac.   
\p
\v 30 Na soc bafefele mi ainelegac. Aimebac wacne bafenogale mibe, wiyac gocnedi tapiline bawawecte ngagelu bafelu midacte.  
\v 31 Na yowa kwesacine mi migabac, yogo Sugucnenonggeng Yesu Kristo yele Mamac nga Wapong, yedi ngagegac. Yela mimitengti mimiteng fagidaicte.  
\v 32 Na Damasko taonka gabe \w ngictau\w* Aretasle gawanadi na bacnuningte taonte odale nuina damongfocine locebawec.\x - \xo 11:32 \xt Sale 9:23-25\x*  
\v 33 Locebame alingfocne yengi na baficnulu uficka umengnulu taonte odale gbelong nuwa yefe locnubong oda lobina haulu yele molewacni hangoc hikeiba.   
\c 12  
\s1 Poldi wiyac nganiwec  
\p
\v 1 Funginene gocne taockelu wacne bafebe, yogodi ngenge nalic mi baficngebadaicte. Ailu sifu yogo migabachac. Sugucnedi gung-didicka edalicnulu yowa sangkeicne milu edocnuwec, yogo minogale aigabac.  
\v 2 Ngic monic Kristoholec wetackelu gagac, ye ngagegabac, ye honocmeng habackang,\f + \fr 12:2 \ft Polle damengka ngic gocne yengi ngagelu yanguc milu gaibong, honocmeng habackang fagac. Monic yogo sawawa kaguwa nga nango gagaing. Nga monic yogo sawawabenang asocmeng nga tamacne gagaing. Nga monic yogo Wapongte mac ngiye-ngiye fagac. Ilec honocmeng habackang wackelu gaibong.\f* Wapongti iwa fuluckeme fewec. Aime yakumac gabeng hifaine 14 aigac. Ailu ye sockolec fewec me socine hegilelu fewec, yogo mi ngagegabac, Wapongtibac yogo ngagegac.  
\v 3 Na ngic yogo ngagegabac. Ailu ye sockolec me socine mikac fewec, yogo mi ngagegabac, Wapongti ngagegac.  
\v 4 Ngic yogo ye fuluckeme felu Wapongte mac madicnebenang iwa galu yowa gocne ngicti mimilesoc miyac. Ailu mi minogale aka-yowaineholec fagac, yogo ngagewec.  
\v 5 Na ngic yogolec wacine bafedacte. Naneicne wacne mi bafedacte, miyac. Na tapiline waicne. Ilec ailu funginene bafelu migabac.   
\p
\v 6 Naneicne soc bafenogale angacne fadecka, yogo kwele-sifuc yowa mi aidec, yowa noine midacte.\f + \fr 12:6 \ft Yowa noine, yogo Pol yeicnele ngagelu ngic monic miwec.\f* Ailu ngic yenge yogo ngagelu mimiteng ainelelu socne bafedaingkale, hegilegabac. Ngic-ngigac nganicnucaigaing, me siducne ngagecaigaing, yefe yogowa sugu nale fungine ngagesicaigaing.   
\s1 Wiyac monic  
\p
\v 7 Wiyac feicne sangkebenangkeicne milu edocnuwec. Yogolec ailu socne bafebele Wapongti mi ngagewec. Ilec na wiyac monic somang ingucne socna fikewec fagac, yogo \w Satangte|lemma="Satang"\w* bolele aleng monicti doic nelecaigac.\x - \xo 12:7 \xt Yop 2:6\x*  
\v 8 Neleme wiyac yogo socnacni baickenale Sugucne sanangne milockebe alecine habackang biyachac aiwec.  
\v 9 Aime Sugucnedi yanguc edocnuwec, \wj “Nale kwele-madicti ga andocgulu fadaicte. I yangucte, nale tapilidi tapili-wawa yogolec gagawa bucbuchac yegengkegac.”\wj* Inguc miwecte yanguc ngagegabac, \w Kristole|lemma="Kristo"\w* tapilidi somecnunale tapiline waicne yogo bafelu midacte.\x - \xo 12:9 \xt Filp 4:11-13\x*  
\v 10 Ilec ailu na tapili-wawa nga umacka gabe midelec ainelelu weyebic ainelebong kwele-umac ngagecaigabac. Inguc ainelebong Kristole ailu umac yogolec angacnugac. I yangucte, na tapiline waicne galu yogowahac tapiliholec aicaigabac.   
\s1 Pol ye salecebaicne noine  
\p
\v 11 Ngengi kpafengnuibongte ailu kwele-sifuc ngic ingucne aigabac. Ngenge ngengungtihac nale bole edalicebabong madickedecka. I yangucte, na ngic omane gaibawa, sifu \w salecebaicne\w* ngic feicnetowa wacebaibong, yogo yengele wamicne monic mi gacaigabac.\x - \xo 12:11 \xt 2Kor 11:5\x*  
\v 12 Na ngengele hewacka bolene umackolec balu sanangne gaiba. Yogo ngengi ngagesingkeningte pasile maaine haicine monic-monic, nga pasi mi ngani-nganiine ailu pasi damuineholec fikengelewec. Salecebaicne yengele bolele maa yogo babe fikelu yegengkeme nganiibong.\x - \xo 12:12 \xt Rom 15:19\x*  
\v 13 Ailu Yesule habu gocne yengele hewacka bole baiba, yogo ngengeholec galu silicine monic baiba, ngenge inguc ngagegaing, me? Wiyac moniyang sugu fagac, na moneng-mafale ailu umac monic mi bafuwangeleiba. Yogo nganibong sowacne aiibawa, ngenge nale sowacne yogo hegiledaing.\x - \xo 12:13 \xt 2Kor 11:9\x*   
\s1 Hikenogale efeckeicne  
\p
\v 14 Ngagegaing, ngengela hatacmac funogale efeckegabac, fube alecine habackang aidaicte. Fulu socte babaficte umac mi ngeledacte. Adu-madec yengi nenggac-mamac yengele wiyac mi bakpaduc aidaingte, miyac. Nenggac-mamac yengibac adu-madecfocngineng yengele wiyac bakpaduc aidaingte. Ilec na woc-wiyacngineng banogale mi fudacte, miyac. Na ngengele ailu fudacte.  
\v 15 Ailu ngengi gagangineng madickenale ailu na moneng-mafa fanelegac, yogo kwele-madicka nalic baficngebalu longeledacte. Ailu yogo sugu miyac, naneicne gaga inguchac bucbuchac ngengele kwele-ilucte ailu nalic hegiledacte. Na ngengele kwelenedi ago bacngebalu angac sugucne ngagegabacka, ngenge omale nale angac kpisicnemac ngagegaing?   
\p
\v 16 Na umac monic mi bafuwangeleiba, ngenge yogo yakumac hocne ngagegaing. Aime na kwesac-ngic, mic-heloc ailu wiyacngineng ewalicngebaiba, ngenge inguc ngagegaing, me?  
\v 17 Ailu ngic salecebabe fuibong, yengi nale ngagesilu wiyac monic ewalicngebaibong, me? Yogo miyac.  
\v 18 Ailu nani Titus ngengela funale sanangne edobe \w ngic hae-gbanonggeng|lemma="ngic hae-gba"\w* monic yeholec momoc salecepabe fuiboc. Fulu Titusdi inguchac wiyac monic ewalicngebawec, me? Yogo miyac. Noke asu moniyang balaibelu gagabelec, me? Oc, noke aibaba moniyang balaibeibec.\x - \xo 12:18 \xt 2Kor 8:6,16-18\x*   
\s1 Ngagebocte yowa  
\p
\v 19 Nonge funginenonggeng mibeng madickenale migaing, ngenge inguc ngagesigaing, me? Yogo miyac. Agofocne kwelenedi ngengele angac ngagegabac, nongebac Kristoholec wetacke galu Wapongte haicka yowa migabeleng. Ailu ngenge locngebabeng sugulelu sanangkeningte bole sasawa bagabeleng.  
\v 20 Na ngengela fulu ngagebe ngenge nale angac mi balaibedaingte. Ailu ngenge inguchac nale mi angacngebadaicte. Ilec ailu hangocnugac. Ngenge yowangineng mife-miwa nga hasowac ailu, aalic ngagelu bonec nono galu, sulecebalu, gube kwelu, socngineng bafelu, kwele-moniyang mi gabong, ngenge silicngineng ingucne nganicngebadackale, hangocnugac.  
\v 21 Aime fulu ngengelacni ngic-ngigac bocyac yenge \w bikic\w* bafuwalu aibaba wonongkolec, nga selo-boic aibaba ailu gaibong. Ailu gaga kosa gaibong, aibaba sasawa yogo mi hegileibong. Yogo yenge nganicebalu hii kwele-sowackolec aibe, Wapongti ngengele haicka bacnu wadaickale, hangocnugac.\x - \xo 12:21 \xt 2Kor 13:2\x*   
\c 13  
\s1 Kristo ye tapiliineholec gagac  
\p
\v 1 Na hatacmac ngengela funogale ngagegabac, iwa fube dameng habackang aidaicte. Yowa yanguc kwelengkeicne fagac,  
\q1 “Ngic yaeckang me habackang yenge yowanginengti moniyang aidaictewa, ngenge bikic-baba ngicte yowa nalic wosaelu noine midaingte.” \rq (Yef 19:15) \rq*\x - \xo 13:1 \xt Mat 18:16; 1Tim 5:19\x*   
\m
\v 2 Inguc aime na fube alecine yaeckang aiwec, iwa \w bikic-baba|lemma="Bikic"\w* nga Yesule habutowa ngenge sawang-yowa milu yowa edocngebaiba. Aime yakumac yowa yogo dalicka galu hatacmac kwelengkengelegabac. Ilec ailu na hatacmac ngengela hefaliye fudacte, dameng iwa ngic-ngigac gocne ngenge bikickacni kwele-hefaliyec mi aiibong, ngenge mibating sanangnehac aingeledacte.  
\v 3 \w Kristole|lemma="Kristo"\w* bole yogo ngengela tapiliine mi wacaigac, miyac, ye bole tapiliineholec bacaigac. Aime micna yowaine noine micaigabac me miyac, yogolec ngengi uwaibong. Na ngengela hefaliye fulu yowa mibating aingelebe yele tapiliwa yowaine micaigabac, yogo ngage-motodaingte.  
\v 4 Aime ye socine tapili mikac ingucne aime, \w malicpongka webong|lemma="Malicpong"\w* homawec. Homame Wapongti ye bafangkeme fangkelu yakumac yele tapiliwa gagac. Nonge ye ingucnehac yeholec wetackelu tapili-wawa gagabeleng. Aime yeholec wetackebeng, Wapongti locnubame yele tapiliwa, ngengela bole balu gbolicne gadabelengte.\x - \xo 13:4 \xt Filp 2:7-8\x*   
\s1 Gagangineng ngani-wosaec aidabiyeng  
\p
\v 5 Aime ngenge ngage-ngagesingkolec gagaing me miyac, yogolec ngengungtihac filesoc filesoc wosaecnagulu lokwesacka lonagudaing. Aime Kristo \w Yesu\w* ye kwelegona gagac, yogo mi ngage-motogic, me? Ga lokwesacka wawedengka, ibac ngage-motodeng.\x - \xo 13:5 \xt 1Kor 11:28\x*  
\v 6 Inguc aibong nonge momochac lokwesacka mi wawegabeleng, ngenge yogo bafuwaningte ngagesigabac.  
\v 7 Ngenge aibaba sowacne monic mi aidaingte. Nonge yogolec ailu Wapong milockelu gagabeleng. Nonge lokwesacka sanangne domagabeleng, ngic-ngigac yogo nganiningte ailu mi ngagegabeleng. I yangucte, nonge lokwesacka wawegabeleng, gocne yengi inguc ngagegaingka, yogo nalic aigac. Aimebac ngenge aibaba madicne ailu gagaing, yogodi feicne aigac.  
\v 8 Nonge yowa nga aibaba noine nalic mi hekecnodabelengte, nonge yowa nga aibaba noine bafickegabeleng.  
\v 9 Nonge tapili-wawa gaebengka ngenge tapilinginengkolec gabong beliyegabeleng. Ailu ngenge Kristoholec wetackelu sugulelu sanangkeningte inguchac milockelu gagabeleng.  
\v 10 Sugucnedi bole-yowa yago neleme na ngic-ngigac ngage-ngagesingkolec sugulelu sanangkeningte bole-yowa tapiliineholec yago balu gagabac. Nga ngenge basowalecngebanogale monic mi miwec, miyac. Ilec na dalicka galu ngengele hibi yago kwelengkegabac. Gacgu ngengela fudacte, dameng iwabac sugule-sanang aidabiyengtewa, mibating yowa sanangne nalic mi midacte.\x - \xo 13:10 \xt 2Kor 10:8\x*   
\s1 Yowa moto-motoine  
\p
\v 11 \w Ngic hae-gbafocne|lemma="ngic hae-gba"\w*, na yowa mimoctolu yanguc migabac, ngenge beliyelu Kristoholec wetackelu sugule-sanangkedabiyeng. Ailu kwelengineng basanangkelu ngage-ngage moniyangka galu kwele-mogung bafuwadabiyeng. Inguc aibong Wapong, kwele-angac nga kwele-mogung fileinedi, ngengeholec gadaicte.  
\v 12 Ngenge Wapongte bingec gagaingte aibaba madicne balaibelu molewa babac ainagulu\f + \fr 13:12 \ft Polle damengka yenge molewa babac ainogale bafaliyelu yanguc kwelengkewec, “muducnagudaing.”\f* wenac-madic minagudaing. Wapongte bingec sasawa yenge wenac-madicngineng salebong ngengela fugac.  
\v 13 Sugucnenonggeng Yesu Kristole kwele-madic, nga Wapongte kwele-angac, ailu Tili Asule kwele-moniyang, yogodi ngic-ngigac sasawa ngengela fagidaic.  
\p Yogo foinac.