\id 1TH - Migabac NT; 9 Sep 2011 1st draft 
\h 1 Tesalonika 
\toc1 Poldi Tesalonika Habu Yengele Molic-molic Hibi Kwelengkewec 
\toc2 1 Tesalonika 
\toc3 1Tes 
\mt2 Poldi  
\mt1 Tesalonika  
\mt2 Habu Yengele Molic-molic Hibi Kwelengkewec  
\is1 Mimi-yegeng yowa  
\ip Tesalonika yogo taon sugucne monic Masedonia himongka kiwec mecina fawec. Poldi Tesalonika hikelu Yesule Siduc edocebalu weduyelewec. Weduyeleme Yuda ngic-ngigac gocne nga Israel yengele alingkacni miyac, yengelacni homacnedi yowaine ngagesingkeibong. Aime Yuda ngic-ngigac micne gocne yengi hasowac ailu welu yebiyebong hikewec (Salecebaicne 17:1-14).  
\ip Hikelu lolickelu Korin taonka hikelu gawec. Galu Timoti saleme Tesalonika hikelu iwacni hefaliyelu siducngineng edowec. Yesu homackacni gboliyelu honocmengka feme hifa 20 ngama ingucne motome, hibi yago kwelengkewec. Hibi yagowa Poldi basanangebalu Yesule kwesi-kwesi damengte fungine mime yegengkewec.  
\is1 Yowa yago hibi nebocina fagac  
\io1 1:1 Wenac-madic yowa  
\io1 1:2–10 Yengele aibaba nga ngage-ngagesingte mitengebawec  
\io1 2:1—3:13 Pol nga bole-ngic yengele aibaba nga ngage-ngage  
\io1 4:1–12 Ngic-ngigac ngagesingkegaing, yenge aibaba madicne balaibedaing  
\io1 4:13—5:11 Yesule kwesi-kwesi damengte siduc weduyelewec  
\io1 5:12–28 Yowa basanangkelu wenac-madic milu kwelengkeyelewec  
\c 1  
\s1 Hibile molic-molic yowa  
\p
\v 1 \w Yesule|lemma="Yesu"\w* habu Tesalonika taonka galu Wapong Mamac nga Sugucne Yesu \w Kristoholec|lemma="Kristo"\w* wetackelu gagaing, ngengele hibi yago Pol, Sailas nga Timoti, nongi logabeleng. Kwele-madic nga kwele-mogungtowadi ngengela fadaic.\x - \xo 1:1 \xt Sale 17:1-9\x*   
\s1 Tapiliholec nga Tili Asuholec  
\p
\v 2-3 Ngenge ngagesingkelu aibaba madicne bafuwalu ngic-ngigac agofocngineng yengele kwelenginengti angacngebanale bole sugucnehac bacaigaing. Ailu ngenge tatakic mikac galu Sugucnenonggeng Yesu Kristole ailu wangec gagaing. Yogo ngagesilu damengsoc Wapong Mamacnonggengte haicka kwele-madic micnolu ngenge mimilocka locngebacaigabeleng.\x - \xo 1:2-3 \xt 1Kor 13:13; Kol 1:4-6\x*   
\p
\v 4 \w Ngic hae-gbafocnonggeng|lemma="ngic hae-gba"\w*, Wapongte kweledi ngengele angackeme bawosaecngebawec, yogo ngagegabeleng.  
\v 5 Yogolec fungine yanguc, nonge ngengela \w Siduc Madicne\w* balu kwesiibeng, yogo yowa sugu monic mi ngeleibeng, miyac. Nonge tapiliholec nga \w Tili Asuholec|lemma="Tili Asu"\w*, aime noine sanangnehac ngagegacgu bakwesilu ngeleibeng. Ngengeholec gaibeng, iwa ngengele aling aiibeng ailu baficngebaibeng, ngenge yogolec silicbac ngagegaing.\x - \xo 1:5 \xt 1Kor 2:4-5\x*  
\v 6 Ngenge aibabanonggeng balaibelu Sugucnele pasi inguchac balaibelu gagaing. I yangucte, ngenge doic sugucne bocyac ngagelu gaibong. Ailu sifu Wapongte yowa ngagelu angacngebawec. Angacngebame Tili Asudi baefecngebame belic-belicka gaibong.\x - \xo 1:6 \xt Sale 17:5-9\x*   
\p
\v 7 Ilec Masedonia nga Akaia ngic-ngigac ngage-ngagesingkolec gagaing, yengi ngengele aibabangineng madicne ingucne yogo nganilu inguchac balaibecaigaing.  
\v 8 Sugucnele yowadi ngengelacni molickelu Masedonia nga Akaia himongka mibong sawelu hikeme ngageibong. Aime ngenge Wapong ngagesingkeibong, yowa-siduc yogodi inguchac himong neboc nga nebocka sawelu hikewec. Inguc aime nongi bole yengela taockelu balu hike-hikeine yogo ngengi baefeweibong.  
\v 9 Yenge yengungtihac Tesalonika ngengele siduc yanguc mibong yegengkelu hikegac, “Pol agokecineholec ngengela kwesibong ngengi mac holeyelelu bacebaibong. Ailu ngenge Wapong gagaineholec nga yowaine noineholec yele kwelec kwekwe aling ainingte, siduc-gbongfocngineng haicine monic-monic hegilecebalu Wapongta taockeibong.  
\v 10 Ailu yanguctihac Madecine honocmengkacni wanale wangec gagaing.” Yenge siduc inguc mibong hikegac. Wapongti Madecine bagboliyeme homackacni gboliyelu fangkewec. Ailu ameine aalicineholec badu-badule damengine kwesidaicte. Ailu Yesudi hocne umac yogowacni baicnubame wasecne aigabeleng. Ngenge yogo ngagesingkegaing.   
\c 2  
\s1 Tesalonika taonka  
\p
\v 1 \w Ngic hae-gbafocne|lemma="ngic hae-gba"\w*, nonge ngengeholec gaibeng, yogo noineholec aiwec, yogo ngenge ngagegaing.  
\v 2 Nonge Filipai himongka molicke hikelu gaebengka, yengi doicka locnubalu misulec ainoleibong. Iwacni Tesalonika hikebeng ngic-ngigac gocne yengi inguchac yowa mife-miwa bocyac ainoleibong. Inguc ainolebong nonge Wapongti molickenoleme hangoc mikac galu Wapongte \w Siduc Madicne\w* mibeng yegengkengelewec, ngenge yogo ngagegaing.\x - \xo 2:2 \xt Sale 16:19-24; 17:1-9\x*  
\v 3 Nonge yowa kosa monic mi mibeng yegengkewec, miyac. Ailu wiyac monic kwesacka ewalicngebanogale mi aiibeng. Ailu kosa ganangte aibaba sowacne monic mi aiibeng.  
\v 4 Aime Wapongti wosaecnubalu ngageme nalic aime Siduc Madicne noleme damongkelu mibeng yegengkedaicte. Ngic yengi ngagebong madickenale yowa monic mi edocngebalu gaibeng, miyac. Wapong kwelewa ngani-ngani fileine, yedi angac ngagenolenale yele yowa milu gagabeleng.\x - \xo 2:4 \xt Gal 1:10\x*   
\p
\v 5 Ailu nonge mic-heloc yowa monic mi edocngebaibeng. Nga hane aibaba ingucne monic mi aiibeng, miyac. Yogo Wapongti widecnubagac, yogo ngagegaing.  
\v 6 Aime ngic yengelacni wac feicne banogale monic mi ainolegac. Yogo ngengelacni nga ngic gocne yengelacni inguchac banogale monic mi ainolecaigac.  
\v 7 Nonge hewacka \w Kristole|lemma="Kristo"\w* \w salecebaicne\w* gagabeleng, yogo nalic mibeng baficnubadaingte. Aime sifu bawacnagulu ulucne gaibeng. Nenggac monicti yeicne kogocine amuc gumelu damongkecaigac, silicine yogolecsoc damongngebaibeng.  
\v 8 Ailu nonge ngengeholec galu kwelenonggengti ngengele angac ngagelu angacka Wapongte Siduc Madicne wedungeleibeng. Ailu yogo sugu miyac, nonge ngengele inguc ailu gaganonggeng hegilenogale ngageibeng.   
\p
\v 9 Wapongte Siduc Madicne edocngebalu wedungeleibeng, dameng iwa ngengeholec galu soctepecka wiyacte umac monic mi bafuwangelenangte ngageibeng. Ilec ailu deboc hadeng bole sugucnehac doic feina balu gaibeng. Ngic hae-gbafocne, yogo ngengung ngagegaing.\x - \xo 2:9 \xt Sale 20:34\x*  
\v 10 Nonge gbagbacne nga dondonne ailu bikic mikac aibaba ingucne balu gaibeng. Ngenge ngage-ngagesingkolec yogo nganilu ngagebong, Wapongti inguchac widecnubawec.  
\v 11-12 Ngenge Wapongte \w ngani-damong\w* nga wac feicne iwa ganingte yedi hefolecngebawec. Ngenge yele ngage-ngage nga angac balaibeningte ailu mamac monicti yeicne adu-madecfocine bacebacaigac, nongi silicine ingucnehac dogbac aingelelu mibakoloc aingeleibeng, yogo ngagegabiyeng.\x - \xo 2:11-12 \xt Sale 20:31\x*   
\s1 Ngaba fikewec  
\p
\v 13 Aime ngengela kwesilu Wapongte yowa mibeng yegengkeme ngagelu yanguc miibong, “Yogo foinac, yogo Wapongte yowa, yogo ngic yengele yowa miyac.” Inguc milu yele yowale angacngebame baibong. Ilec ailu nonge damengsoc Wapong kwele-madic edolu gagabeleng. Wapongte yowa miibeng, yogodi ngage-ngagesingkolec, ngengele kwelenginang bole balu gagac.\x - \xo 2:13 \xt 2Tim 2:13\x*  
\v 14 Ngic hae-gbafocne, Wapongte habu Yudeya himongka Kristo \w Yesuholec|lemma="Yesu"\w* wetackelu gagaing, yengela doic fikewec, silicine ingucnehac ngengela inguchac fikeme, ngenge yenge ingucnehac aiibong. Aling gocne ngengele himongkacnidi umac yogo bafuwangeleibong. Silicine ingucnehac \w Yuda ngic-ngigac\w* yengelacni alingfocngineng yenge umac bafuwaibong.\x - \xo 2:14 \xt Sale 17:5\x*  
\v 15-16 Yengi hocne Sugucne Yesu nga Wapongte \w siduc-mimi ngic\w* wehomacebaibong. \w Israel yengele alingkacni miyac\w* yengi wasecne ainingte nonge Wapongte yowa edocebacaigabeleng. Aime yenge yogo mi ainingte Yuda ngic-ngigac yengi bolenonggeng welockelu weyebic ainolelu ngic-ngigac sasawa lobe holecebacaigaing. Wapong ye yogo nganilu ngageme mi madickecaigac, yenge damengsoc \w bikicngineng|lemma="Bikic"\w* taockeme taoc gagaing. Yuda ngic-ngigac yenge inguc aibong Wapongti yogolec ameine aalicineholec dameng iwahac baduyeledaicte.\x - \xo 2:15-16 \xt Sale 9:23,29; 13:45,50; 14:2,5,19\x*   
\s1 Hatacmac nganicebadaicte  
\p
\v 17 Ngic hae-gbafocne, ngengeholec gabeng yebicnubabong hikeibeng, dameng iwa socti sugu hegilecngebaibeng. Nga kwelenonggengtibac miyac. Ilec ailu ngenge hatacmac nganicngebanangte bocyac ainolegac.  
\v 18 I yangucte, nonge ngengela hatacmac funogale ngagesilu gaibeng, yogo foinac. Aime naneicne biyachac ngengela funogale dameng bocyac ainelewec. Aime \w Satangti|lemma="Satang"\w* yefenonggeng hedickeme kpungkeibeng.  
\v 19 Sugucne Yesudi kwesilu nongele bolele ailu ngenge nganicngebalu madicne mime wac feicne badabelengte. Nonge gbelong ailu ngenge sil ingucne bacngebagabeleng. Nonge inguc ngagesilu beliyelu wangec gagabeleng.\x - \xo 2:19 \xt Filp 2:15-16; 4:1; 2Tim 1:4\x*  
\v 20 Nonge ngengele ngagesilu wac feicne nga belic-belickolec aigabeleng.   
\c 3  
\p
\v 1-2 Ilec ailu nonge kwelenonggengti ngengele angacnubawec, aime nalic mi fudabelengte. Ilec medecnubame ngengele ngagesilu yanguc miibeng, “Nonge sugu Atens taonka ngiyelu, nalic \w ngic hae-gbanonggeng|lemma="ngic hae-gba"\w* Timoti salebeng fudaicte.” Inguc milu salebeng fuwec. Timoti ye Wapongte bole-ngicti nongeholec momoc bole balu \w Kristole|lemma="Kristo"\w* \w Siduc Madicne\w* mime yegengkecaigac. Yedi ngengela fulu ngage-ngagesingka basanangngebalu mibakoloc aingelenale milu salebeng fuwec.\x - \xo 3:1-2 \xt Sale 17:15; 16:1-3\x*  
\v 3 Umac haicine monic-monic ingucnedi ngengela fikeme, ngic-ngigac gocne kwelenginengti wawedaickale ailu, Wapongti umac ingucne tengkenangte ngagenolewec, ngenge yogo ngagegaing.\x - \xo 3:3 \xt 2Tim 3:12\x*  
\v 4 Ngic yengi weyebic ainoledaingte, yogo biyachac ngengeholec galu edocngebaibeng. Aime yogo biyachac fikewec, ngenge yogo ngagegaing.  
\v 5 Ilec ailu na inguc gabe kwelenele tapili wame, ngengele ngage-ngagesingte silicine ngagenogale Timoti salebe ngengela fuwec. Aime boletowa ngengela baibeng, yogo Lokwesac Ngicti kwesacngebame noine mikac aidaickale ailu, ngagenogale Timoti salebe ngengela fuwec.   
\s1 Haic-mesungineng nganinoga  
\p
\v 6 Aime Timoti ye ngengelacni hefaliyelu \w siducngineng madicne|lemma="Siduc Madicne"\w* yanguc mime yegengkenolewec, ngenge ngage-ngagesingkolec galu kwelenginengti angac ngagenagucaigaing. Ailu ngenge damengsoc nongele ngagesilu kwele-efec ailu gacaigaing. Aime nonge ngengele haic nganinangte ainolegac, silicine ingucnehac ngengi nongele haic nganinogale aingelecaigac, inguc hocne edocnubawec.\x - \xo 3:6 \xt Sale 18:5\x*  
\v 7 Ngic hae-gbafocnonggeng, nonge kwele-umac nga doic sugucne ngageebengka ngengele ngage-ngagesingte yowa-siducti nongele kwele basanangkewec.\x - \xo 3:7 \xt 2Tim 1:4\x*  
\v 8 I yangucte, ngenge Sugucneholec wetackelu gagangineng sanangne gagaingte ailu nonge gaga gbolicne gagabeleng.  
\v 9 Aime nonge ngengele ailu Wapongnonggeng hatacmac mitengkenogale ngagegabeleng. Aime ngengele ailu yele haicka belic-belicka galu beliyebeng madickegac.  
\v 10 Aime nonge ngengele haic nganinangte deboc hadengsoc sanangnehac milockelu gagabeleng. Inguc nganilu ngage-ngagesingngineng taockelu sanangkenale baficngebadabelengte.   
\s1 Wiyac madicne  
\p
\v 11 Aime Wapong Mamacnonggeng nga Sugucnenonggeng \w Yesu\w* yeki yefe bafuwanoleboc nonge ngengela fudabeleng.\x - \xo 3:11 \xt 2Tim 2:16\x*  
\v 12 Aime kwelenonggengti angac ngagengelecaigabeleng, silicine yogolecsoc Sugucne Yesu yeuctihac kwele-angacngineng hatacmac taockelu bame sugulengeledaic. Aime kwelenginengti angac ngagenagulu ngic-ngigac nebocine momoc kwelenginengti angac ngageyelelu gadabiyeng.  
\v 13 Inguc aibong ye kwelengineng basanangkelu gadaic. Aime Sugucnenonggeng Yesu ye ngic-ngigacfocine yeicne bingec yengeholec kwesidaicte, dameng iwa ngenge gbagbacne nga sowacnengineng mikac galu Wapong Mamacnonggeng yele haicka domadaingte.   
\c 4  
\s1 Gaga gbagbacne  
\p
\v 1 \w Ngic hae-gbafocnonggeng|lemma="ngic hae-gba"\w*, nonge Sugucne \w Yesuholec|lemma="Yesu"\w* wetackelu yowa yanguc biyac edocngebaibeng, Wapongti nganicngebame madickeningte ngenge yele yefe balaibedabiyeng. Inguc edocngebaibengte, ngenge yogo yanguctihac inguc gagaing. Aime yogodi ngengele hewacka sugulelu sanangkenale ngage-ngagengineng basanangkenogale ung-yowa hatacmac taockelu edocngebagabeleng.  
\v 2 Nonge ung-yowa sasawa Sugucne Yesulacni ngagelu edocngebaibeng, yogo ngagegaing.  
\v 3 I yangucte, Wapongte ngage-ngage nga angac yogo yanguc fagac, ngenge gaga gbagbacnebenang gadaing. I yangucte, ngenge selo-boic aibaba hegilelu\x - \xo 4:3 \xt 1Tim 5:23; 1Pi 1:16\x*  
\v 4 socngineng filesoc filesoc madicne damongkelu gbagbacne nga alang-babaholec gadaing.\x - \xo 4:4 \xt 1Kor 6:13\x*  
\v 5 \w Israel yengele alingkacni miyac\w*, yenge Wapong mi ngagelu gaga kosaine yogolec angac sugucnehac ngagelu balaibelu gagaing, ngenge yenge ingucnehac mi aidaing.  
\v 6 Ngenge bikickolec ailu ngic hae-gbafocngineng yengele ngawe me ngigac ewalicebadaingkale, socte angacte ailu yengeholec selo-boic aibaba mi aidaing. Sugucne ye bikic ingucnele ngagelu ameine ingucnehac yeledaicte, nonge yogolec sawang-yowa sanangne biyachac milu edocngebaibeng.  
\v 7 Wapongti gaga gbagbacne ganangte wacnubawec. Gaga kosaine ganangte mi wacnubawec, miyac.\x - \xo 4:7 \xt 1Pi 1:15-16\x*  
\v 8 Ilec yanguc aigac, ngengelacni monicti yowa yago milu hegilegac, ye ngic yengele yowa mi hegilegac, ye Wapongti \w Tili Asuine|lemma="Tili Asu"\w* ngelewec, yele yowa hegilegac.\x - \xo 4:8 \xt Luk 10:16; 2Kor 1:22\x*   
\s1 Kweledi doficnagulu angacnubadaic  
\p
\v 9 Ngenge kweledi angac ngagenaguningte Wapongti yefe yogo biyachac edocngebalu wedungelewec. Ilec ngenge ngic hae-gbafocngineng yenge kweledi angac ngageyeleningte yowa, yogolec monic mi kpungkegaing. Aime nonge yowa yogo hatacmac mi kwelengkedabelengte.\x - \xo 4:9 \xt Yoa 13:34\x*  
\v 10 Foinac, ngengi Masedonia prowins neboc nga nebocka ngic hae-gbafocnonggeng Yesule habu sasawa gagaing, ngenge kwelenginengti yengele angac ngagelu gagaing. Aime aibaba yogodi ngengele hewacka sugulelu yegengkenale sanangne migabeleng.  
\v 11 Aime ngenge ulucne galu bolengineng damongkelu ngengungtihac molenginengti bole balu ganingte ngage-ngagengineng sanangne fadaic. Molickelu aibaba ingucnele edocngebaibeng.\x - \xo 4:11 \xt Efs 4:28\x*  
\v 12 Bole inguc babong ngic-ngigac lobeina gagaing, yengele haicka aibabangineng dondonnedi yengele kwelewa kwefangkeme alang bangeledaingte. Aime molenginengti bole inguc babong ngenge wiyac monicte nalic mi kpungkedaingte.   
\s1 Kristoholec sasawadi fedabelengte  
\p
\v 13 Ngic-ngigac yenge honocmengte wangec gaga yogo mi ngagelu, yenge homac-damengka hii-songgong sugucnehac aicaigaing. Ngic hae-gbafocnonggeng, ngenge kwele-sowac ingucnehac mi aidaing. Ngenge homabong yengela oma wiyac fikedaicte, yogolec fungine ngage-motoningte angacnubame ngagelu migabeleng.  
\v 14 I yangucte, Yesu ye homalu gboliyelu fangkewec, yogo noinebenang ngagesingkegabeleng. Ilec ailu ngic-ngigac yenge biyachac Yesu ngagesingkelu homaibong, yenge Wapongti mengocebame Yesuholec kwesidaingte, yogo ngagesingkegabeleng.\x - \xo 4:14 \xt Rom 14:9; 1Kor 15:3-4,12\x*  
\v 15 I yangucte, Sugucnele kwesi-kwesi damengka ngic-ngigac gbolicne gagabeleng, nongilengti ngic-ngigac ngage-ngagesingkolec homaibong, yenge nalic mi molickeyeledabelengte. Yogo Sugucnedi yowa monic inguc miwec yogo balaibelu edocngebagabeleng.\x - \xo 4:15 \xt 1Kor 15:51-52\x*  
\v 16 Sugucne ye dameng iwa yowa tapiliineholec mime, angelo yengele damong monicti wackedaicte. Aime dameng iwahac Wapongte kpeng hiyadaicte. Hiyame Sugucne yeicne honocmengkacni sawawa kwesidaicte. Kwesime ngic-ngigac Kristoholec wetackelu homaibong, yenge molickelu gboliyelu fangkedaingte.  
\v 17 Fangkebong ngic-ngigac gbolicne gagabeleng, nongileng yengeholec inguchac kaguwa kwelina fulucnubame, nongileng sasawadi momochac Sugucneholec fedabelengte. Yogolec ailu Sugucneholec gaga-sanang gadabelengte.  
\v 18 Ilec ailu ngenge yowa yago edonagulu mibasanang ainagulu gadabiyeng.   
\c 5  
\s1 Kwele-gboli ganoga  
\p
\v 1-2 \w Ngic hae-gbafocnonggeng|lemma="ngic hae-gba"\w*, hise-baba ngic yengi debocka kwesilu hise babong nongileng kwesi-kwesi damengngineng mi ngagecaigabeleng, silicine ingucnehac Sugucnele damengtowa yogo kwesidaicte. Ngenge ngengungtihac yogo biyac ngagegaing. Yogo ma damengka me ma hadengka fikedaicte, yogolec hibiwa hatacmac nalic mi kwelengkelu ngeledabelengte.\x - \xo 5:1-2 \xt Mat 24:42-43; 2Pi 3:10; Miye 3:3\x*  
\v 3 Aime ngic-ngigac yengi yanguc midaingte, “Kwele-mogung nga damongkolec gagabeleng.” Inguc mibong, dameng iwahac umacti basowalecebanale fikeyeledaicte. Umac yogo ngigac gobeholecti madec banogale dameng mi ngageemewa gado hicaigac, silicine ingucnehac biyacbenang fikeyeledaicte. Fikeyeleme hangoc nalic mi hikedaingte.\x - \xo 5:3 \xt Mat 24:39; Luk 21:34-35\x*   
\p
\v 4 Aime ngic hae-gbafocne, hise-baba ngic kwesime ngenge kwatackecaigaing, silicine ingucnehac dameng yogo kwesime nalic mi kwatackedaingte. I yangucte, ngenge kundungka mi gagaing, miyac.  
\v 5 Ngenge sasawadi wenac nga angocte adu-madecfocine, aime nongileng deboc me kundungte aling miyac.\x - \xo 5:5 \xt Rom 13:12\x*  
\v 6 Ilec gocne gung facaigaing, silicine ingucnehac gung mi fadaing. Nongileng ngage-ngage damongkelu deboc-gboli galu damongnagudabeleng.  
\v 7 Aime gung-fafa ngic yenge debocka gung facaigaing. Nga misa sanangne nono yenge debocka misa nolu kwelengineng sifuwecaigac.   
\p
\v 8 Aimebac nongileng wenac agofocine. Ilec ailu ngagenagulu damongnagudabeleng. I yangucte, ngage-ngagesing nga kweledi angac ngagenagulu gaga, yogodi malekunonggeng ingucne holebeng haudaic. Aime wangec galu wasecne ainangte ngagesigabeleng, yogodi aen duunonggeng ingucne aime holelu domadabeleng.\x - \xo 5:8 \xt Yes 59:17; Efs 6:14,17\x*  
\v 9 I yangucte, Wapongti mimocto-mimoctole damengka ameine aalicineholec badunale mi edocnubawec. Ye Sugucnenonggeng \w Yesu\w* \w Kristodi|lemma="Kristo"\w* bikicte ameine bame wasecne ainangte edocnubawec.  
\v 10 Kwesi-kwesi damengina, gocne gbolicne gadabelengte nga gocne biyac homadabelengte, nongileng sasawadi yeholec gbolicne ganangte yedi hocne nongilengte ailu homawec.\x - \xo 5:10 \xt Rom 14:8-9; 1Tim 4:14\x*  
\v 11 Ilec ailu ngenge yanguctihac yowa edonagulu basanangnagulu baficnagulu gacaigaing, ingucnehac hatacmac taockelu aidaing.   
\s1 Damongfocngineng nga ngic hae-gbafocngineng  
\p
\v 12 Ngic hae-gbafocnonggeng, ngenge yanguc edocngebagabeleng, bole ngic-ngigac yenge ngengele hewacka boletowa balu gagaing, ngenge yenge alang bacebadabiyeng. Yenge Sugucneholec wetackelu damongngebalu sawang-yowa milu gacaigaing.  
\v 13 Yenge bole inguc balu gagaingte ailu kwelenginengti yengele angacngebame ngenge yogolec ngagebong feicne aidaic. Ailu ngengileng hewacka kwele-moniyang ainagudabiyeng.   
\p
\v 14 Ngic hae-gbafocnonggeng, nonge sawang-yowa milu yanguc edocngebagabeleng, ngic-ngigac oyong gacaigaing, ngenge yenge sawang-yowa edocebadabiyeng. Ailu kwelengineng wawaine gacaigaing, yenge basanangebadabiyeng. Ailu ngic-ngigac gocne sockapec tapili-wawa gacaigaing, yenge baficebadabiyeng. Ailu ngic-ngigac sasawa yengele tatakic mikac ulucne gadabiyeng.\x - \xo 5:14 \xt 2Tim 3:6,11\x*  
\v 15 Sowacnele ameine sowacnehac badungeledaickale, ngenge damongnagulu gadabiyeng. Aime ngenge damengsoc ngengileng hewacka ngic-ngigac sasawa yengeholec aibaba madicne ainogale bole sanangnehac balu gadabiyeng.\x - \xo 5:15 \xt Rom 12:17; 1Pi 3:9\x*   
\s1 Mimi-madic yowa  
\p
\v 16 Ngenge damengsoc belic-belicka gadabiyeng.\x - \xo 5:16 \xt Filp 4:4\x*  
\v 17 Ailu ngenge damengsoc milockelu gadabiyeng.  
\v 18 Aime ngengela wiyac sasawa fikengeledaicte, yogolec Wapong kwele-madic edodabiyeng. Ngenge Kristo Yesuholec wetackegaing. Ilec ailu Wapong ye aibaba yogolec ngageme angacine aicaigac.\x - \xo 5:18 \xt Efs 5:20\x*   
\p
\v 19 Ngenge \w Tili Asule|lemma="Tili Asu"\w* dac mi hepisickedabiyeng.\x - \xo 5:19 \xt Efs 4:30\x*  
\v 20 I yangucte, Wapongte siduc-mimi ngic yengele yowa edocngebabong, ngenge yowa yogo ngagebong sowaleme mi hegiledabiyeng.  
\v 21 Ngenge yowa yogo sasawa ngagelu ngage-wosaec ailu madicne sugu badabiyeng.\x - \xo 5:21 \xt 1Yoa 4:1\x*  
\v 22 Ailu ngenge sowacne haicine monic-monic yogo nganilu lobe holedabiyeng.   
\s1 Sugucnenonggeng kwesidaicte  
\p
\v 23 Wapong ye kwele-mogung fileine. Ye gbagbacne gagale pasi bame sugulelu wakengeledaic. I yangucte, Sugucnenonggeng Yesu Kristo kwesidaictewa, asufocngineng nga ilucfocngineng ailu socngineng bucbuchac dondonne nga bikicngineng miyac aingelenale bacngebame gadaing.\x - \xo 5:23 \xt 2Tim 3:3\x*  
\v 24 Wapongti wacngebalu bacngebawec, ye yowaine miwec yogo balaibecaigac. Ilec boleine bagacgu bamoctongeledaicte.   
\p
\v 25 Ngic hae-gbafocnonggeng, ngenge nongele inguchac ngagesilu milockelu gadabiyeng.\x - \xo 5:25 \xt Kol 4:3; 2Tim 3:1\x*   
\p
\v 26 Ngenge Wapongte bingec ailu gagaingte aibabaine balaibelu ngic hae-gbafocnonggeng sasawa molewa babac ainagulu\f + \fr 5:26 \ft Polle damengka yenge molewa babac ainogale bafaliyelu yanguc kwelengkewec, “muducnagudaing.”\f* wenac-madic minagudaing.  
\v 27 Ailu ngenge hibi yago ngic hae-gbafocnonggeng sasawa wafeyeledabiyeng, yogo Sugucnele wacka edocngebagabac.   
\p
\v 28 Sugucnenonggeng Yesu Kristole kwele-madicti ngengeholec fadaic.  
\p Yogo foinac.