\id 1PE - Migabac NT; 9 Sep 2011 1st draft 
\h 1 Pita 
\toc1 Pita Yedi Molic-molic Hibi Kwelengkewec 
\toc2 1 Pita 
\toc3 1Pi 
\mt1 Pita  
\mt2 Yedi Molic-molic Hibi Kwelengkewec  
\is1 Mimi-yegeng yowa  
\ip Pita, ye Yesule mic-tengteng monic. Yedi Yesu homalu homackacni gboliyelu fangkeme hifa 34 ngama ingucne motome, hibi yago kwelengkelu Yesule habu gocne yengela saleme hikewec. Dameng iwa ye Roma iwa gawec. Yesule habu yogo yenge Asia prowins nebocina kiwec Saecne fawec, emeina mac-aling faibong, yenge mac-aling iwa gaibong.  
\ip Ngic-ngigac Yesu ngagesingkeibong, yengele ngabadi umac yeleibong. Ilec ailu yenge Yesu hegiledaingkale, Pitadi baficebanale hibi yago kwelengkeyelewec.  
\is1 Yowa yago hibi nebocina fagac  
\io1 1:1–2 Molic-molic yowa  
\io1 1:3—2:10 Kristoholec gagale fungine  
\io1 2:11—4:11 Habu gocne yengeholec madicne gadaing  
\io1 4:11—5:12 Ngaba yengi umac yelebong umackolec gaibong  
\io1 5:12–14 Yowa moto-motoine nga wenac-madic yowa  
\c 1  
\s1 Hibile molic-molic yowa  
\p
\v 1 Na Pita, \w Yesu\w* \w Kristole|lemma="Kristo"\w* \w salecebaicne\w* gagabac. Wapongti bawosaecngebame Pontus nga Galata ailu Kapadosia nga Asia ailu Bitinia himongka gagaing, ngic-ngigac ngenge himongtowa yagowa kwilic kwesilu singsalolong kwelu gagaing, ngengele hibi yago kwelengkengelegabac.  
\v 2 Wapong Mamacti biyachac ngageme fawecte, yedi bawosaecngebalu yanguc mimoctowec, \w Tili Asudi|lemma="Tili Asu"\w* ngengela bole bame ngenge sugule-sanangkelu Wapongte bingec aidaingte. Inguc ailu ngenge Yesu Kristole yowa balaibebong, yele sacti wickeme suwecngebawec gagaing. Yele kwele-madic nga kwele-mogungtowadi ngengela sawelu fadaic.\x - \xo 1:2 \xt Rom 8:29; 2Tim 2:13\x*   
\s1 Gaga-sanangte wangec gagaing  
\p
\v 3 Wapong ye Sugucnenonggeng Yesu Kristo yele Mamac, ye mimitengineholec. Yedi kwele-sowactowa ngagenolelu Yesu Kristo bagboliyeme homackacni fangkewec. Yefe iwa nongileng gaga bafuwanoleme fike-fike gbolicne fikeibeng. Inguc fikelu wangec gagabeleng.  
\v 4 Ye inguc aime mole-damocngineng honocmengka felu baningte biyachac lowec fagac. Aime wiyac yogo mi miyac aidaicte. Ailu yogo nalic mi dangkedaicte, yogo gbagbacne faginowagac.\x - \xo 1:4 \xt Kol 1:12\x*  
\v 5 Ngenge ngage-ngagesingkolec gaebongka Wapong ye tapiliineholecti damongngebame dameng moto-motoina wasecne aidaingte. Inguc fikenale efeckelu fagac.\x - \xo 1:5 \xt Yoa 10:28; 17:11\x*   
\p
\v 6 Aime dameng kpisicnemac yagowa umac nga lokwesac haicine monic-monic fikengeleme, ngenge sifu wiyac lobewa kwesidaicte, yogolec ngagelu mamang hidulu beliyelu gagaing.\x - \xo 1:6 \xt 1Pi 5:10; Yak 1:2\x*  
\v 7 Gol silicine ngagegabeleng. Ngic yengi yogo esoickelu silicine ngani-motonogale dacka lobong lobeme wosaecaigaing. Aime gol noine yogo fikedaicte. Ailu yogo sifu lobewa miyac aidaicte. Aime umac nga lokwesacti ngage-ngagesingngineng esoickebong noine yegengkegac, yogo gol ewalilu wiyac feicne aigac. Yesu Kristodi fikelu yegengkedaicte, dameng iwa ngage-ngagesingngineng yogodi mimi-madicneholec nga wac feicneholec ailu alang-babaineholec aidaicte.\x - \xo 1:7 \xt Ynn 17:3; Sek 13:9; Mal 3:3; Yak 1:3\x*  
\v 8-9 Ngenge ye dongenginengti mi nganiibong. Ailu sifu kwelenginengti yele angac ngagegaing. Ailu yanguctihac ye mi nganicaigaing. Ailu sifu ngenge ye ngagesingkegaing. Ailu ngenge ye ngagesingkebong, yedi kwele-asunginang bikicte ameine bame, ngenge wasecne aigaing. Ngenge yogo ngagesilu belic-belic sugucnehac nga wac feicneholec ailu gagaing.\x - \xo 1:8-9 \xt Yoa 20:29; 2Kor 5:7\x*   
\s1 Wapongti wiyac baningte aling lowec  
\p
\v 10 \w Siduc-mimi ngic\w* yenge ngengi Wapongte kwele-madic banogale siduc-yowa miibong. Ailu ngenge wasecne aidaingte. Aime yengileng yefe yogo ngage-motoningte boletowa balu gaibong.\x - \xo 1:10 \xt Mat 13:16-17\x*  
\v 11 Inguc aibong Kristole Asudi yengele kwelewa game, Kristo ye doic ngagelu lobewa wac feicneholec banowagac, yogo Kristole Asudi kwelenginang gawecte gungka biyachac edalicebame mibong yegengkewec. Ailu yogo male yowa, nga ma damengka fikeme nganinogale donge hilalu gaibong.\x - \xo 1:11 \xt Mige 22; Yes 53; Luk 24:26-27\x*  
\v 12 Donge hilalu yengileng nganiningte miyac, yogo ngenge baficngebanogale yowaine mibong yegengkengelewec. Aime Wapongti yogo edalicebame yenge ngage-motoibong. Aime Wapongti \w Tili Asu\w* honocmengkacni himongka saleme walu tapili yeleme, gocne yenge \w Siduc Madicne\w* yogo balu ngengela mibong yegengkeme ngageibong. Aime \w angelo\w* yenge inguchac yogo nganinogale aiyelecaigac.   
\s1 Gaga gbolicne  
\p
\v 13 Ilec ailu kwele ngage-ngagegone wosaelu aibabagone ailu gageicne damongnagulu Yesu Kristole kwesi-kwesi damengka fikelu yegengkedaicte, iwa kwele-madicine balu kwesidaicte. Ga ngage-ngagegone bucbuchac yele kwele-madicka sanangne loengka fame wangec gadamec.  
\v 14 Ngenge esecne Siduc Madicnele yowa mi ngage-motolu socte angac balaibeibong. Ailu ngenge adu-madec ingucne yowa balaibelu gadabiyeng. Aime socte angacti hatacmac mi damongngebadaic.\x - \xo 1:14 \xt Rom 12:2; Efs 2:3; 4:17-18\x*  
\v 15 Wapongti wacngebawec, ye gbagbacne, aime ngenge ingucnehac hadengsoc aibabangineng gbagbacne aidaing.  
\v 16 Ilec yanguc kwelengkeicne fagac,  
\q1 “Na gbagbacne. Ilec ailu ngenge gbagbacnehac gadabiyeng.” \rq (Dep 11:44-45; 19:2; 20:7) \rq*\x - \xo 1:16 \xt Mat 5:48\x*   
\s1 Kristole sacti fuli bacnubawec  
\p
\v 17 Wapong ye lemi-welemi mi facnogac. Ailu ye ngic-ngigac filesoc filesoc aibabanginengte silicka yowangineng mimoctogac. Aime ngenge ye “Mamac” wackedaingtewa, ngenge yakumac kwilic gagaing, dameng yagowa yele hangocngebame alang bacnolu gadabiyeng.\x - \xo 1:17 \xt Rom 2:11; Miye 2:23\x*  
\v 18 Ngenge esecne ngambofocngineng yengele gagawa moc gaebongka, Wapongti fulingineng balu bikicte muckacni lukecnubawec, yogo siliwa me goldi mi fuli bacngebawec. I yangucte, siliwa nga gol yeke miyac aidabiyecte.  
\v 19 Yebac Kristole sacti fuli bacngebawec. Aime Kristole sac yogo wiyac feicnebenang, ye \w lama madecine|lemma="Lama"\w* monic puling, me sowacneine mikacti depecte lama ingucne wehomawec.\x - \xo 1:19 \xt Wah 12:5; 29:1; Dep 22:17-25; Sale 20:28; Hib 9:12-14\x*   
\m
\v 20 Himong nga sawa mi fikeebocka, Wapongti Kristo biyachac bawosaewec. Bawosaeme ye yakumac dameng moto-motoina ngengele ailu fikelu yegengkewec.\x - \xo 1:20 \xt Efs 1:4\x*  
\v 21 Fikelu yefe bafuwangeleme, yanguctihac Wapong ngagesingkelu gagabiyeng. Ye Madecine homackacni bagboliyeme fangkeme wac feicne lacnowec gagac. Ilec ailu ngengileng Wapong ngagesingkelu yela ngage-ngagengineng lolu wangec gagabiyeng.\x - \xo 1:21 \xt Yoa 14:6; Rom 5:1-2\x*   
\s1 Wapongte yowa faginowagac  
\p
\v 22 Ngenge yowa noine balaibebong yogodi kwelenginang suweme, kwelenginengti angac sugucnehac ngagelu aigabiyeng. Ilec ngenge ngic hae-gbafocngineng yengele kwelengineng gbagbacnedi angac kwesac mikac ngagelu damengsoc aiyeledabiyeng.\x - \xo 1:22 \xt Yoa 13:34; Rom 12:10\x*  
\v 23 Wapongte yowa yogo gagaineholec ailu sanangne domagac. Yowa yogodi bagboliyecngebame fike-fike gbolicne fikeibong. Yogo socte wasec hucine dongke-dongkeineholec ingucne miyac. Yogo dongke-dongkeine mikac, yogodi kwodu ofelu gaga-sanangkolec aidaicte.   
\p
\v 24 Ilec yowa yanguc kwelengkeicne fagac,  
\q1 “Ngic-ngigac sasawa himongka gagaing, yenge kpinding ingucne. Ailu wacngineng feicne yogo daling aliine ingucne. Yenge kpinding nga daling aliine dangkecaigaing, yogo ingucnehac molongkelu dangkedaingte.  
\v 25 Sugucnele yowadibac fafa-sanang fagidaicte.” \rq (Yes 40:6-8) \rq*  
\m Yogodi Siduc Madicne aigac. Aime ngic yenge yogo mibong yegengkengeleme ngageibong.   
\c 2  
\s1 Asule amuc  
\p
\v 1 Ilec ailu ngenge sisipilic haicine monic-monic nga kwesac-aibaba ailu hasowac aibaba hegiledaing. Ailu ngic-ngigac mi sulecebadabiyeng.\x - \xo 2:1 \xt Efs 4:22; Yak 1:21\x*   
\q1
\v 2-3 Sugucne ye madicne, ngenge yogo biyachac nonganiibong. \rq (Mige 34:8) \rq*  
\m Ilec ngenge kogoc gbolicnedi amucte aicnocaigac, silicine ingucnehac Wapongte yowa yogo asule amuc gbagbacne yogolec aingeledaic. Ngenge yogo nolu sugulebong yedi bikicte ameine bame wasecne aidaingte.   
\s1 Depec-baba ngic gbagbacne  
\p
\v 4 Sugucne ye posatowa gagaineholec ingucne, ngenge yela kwesilu gagabiyeng. Ngic yenge posa yogolec posa sowacne milu baickeibong. Aime Wapongtibac posa yogolec ngageme feicne aime yogo hocne bawosaewec.  
\v 5 Aime ngenge inguchac posa gagaineholec yele silic aigaing. Aime Wapongti ngenge posa ingucne bacngebalu asule ibu-macine bacngebacaigac. Bacngebame ngenge yeicne \w depec-babale|lemma="Depec"\w* bingec ailu Asule yefewa mimitengti depec ingucne logaing, yogo \w Yesu\w* \w Kristole|lemma="Kristo"\w* ailu Wapongti nganime madickegac.\x - \xo 2:5 \xt Efs 2:21-22; Miye 1:6\x*  
\v 6 Ilec Wapongte hibiwa yowa yanguc kwelengkeicne fagac,  
\q1 “Ngagegaing, na posa-bosing silicine monic feicne yogo bawosaelu \w Sion\w* iwa gunungkegabac. Monicti ye ngagesingkedaictewa, ye nalic mi gameedaicte.” \rq (Yes 28:16) \rq*\x - \xo 2:6 \xt Efs 2:20\x*   
\m
\v 7 Ngic-ngigac ye ngagesingkelu gagaing, ngengela posa yogodi silicine monic alang-babaineholec aigac. Nga mi ngagesingkegaing, yengela yanguc fikedaicte,  
\q1 “Mac-baba ngic yengi posa monic sowacne milu wickeibong. Aime posa yogodi macte posa-bosing ailu sanangne domadaicte.” \rq (Mige 118:22) \rq*   
\q1
\v 8 “Aime yenge posa yogodi edebong kwopocebame wawelu ngage-sowac bafuwadaingte.” \rq (Yes 8:14) \rq*  
\m Yenge Wapongte yowa wecaigaingte inguc aidaingte, yowa yogo biyachac yengele milu loicne.   
\p
\v 9 Wapongti hocne ngenge ngengung kundungkacni kwesiningte wacngebalu angocina hefolecngebalu yeicne angocine feicne, iwa locngebawec.  
\q1 “Aime ngenge Wapongte pasi tapiliineholec mibong yegengkenale, yedi ngenge alingfocine bawosaecngebawec. Aime ngictaule depec-baba ngic bacngebame gagaing. Ngenge yeicne bingecte aling bacngebame ngic-ngigacfocine gagaing.” \rq (Wah 19:5-6; Yes 43:20) \rq* \x - \xo 2:9 \xt Yef 7:6; 14:2; Yes 9:2; Tit 2:14; Sale 26:18; Efs 5:8\x*   
\m
\v 10 Ngenge esecne Wapongte habu moniyang mi gaibong, miyac. Aime yakumacbac Wapongte ngic-ngigacfocine ailu yele habu gagaing. Ngenge esecne Wapongte kwele-sowac monic mi nganilu gaibong. Aime yanguctihac yele kwele-sowac nganilu gagaing.\x - \xo 2:10 \xt Hos 2:23\x*   
\s1 Ngage-ngagesingngineng mikac yengeholec galu baficebanoga  
\p
\v 11 Agofocne kwelenedi ngengele angac ngagegabac, ngenge himong yagowa kwilic gagaing.\f + \fr 2:11 \ft Macngineng noine yogo honocmeng.\f* Ilec ngenge kwele esecnele angac haicine monic-monicti kwele-asunginang hudu wecaigac. Aime ngenge yogo hegilelu ganingte sanangne migabac.\x - \xo 2:11 \xt Gal 5:17,24\x*  
\v 12 Ngenge ngic-ngigac Wapong mi ngagegaing, yengele hewacka aibabangineng madicne ailu gadaing. Yengi ngenge yanguc misowalecngebagaing, “Ngenge yefe-yowa hegilecaigaing.” Inguc milubac aibabangineng madicne nganibong Wapongti yengela kwesidaicte, dameng iwa yenge wacine bafedaingte.\x - \xo 2:12 \xt Mat 5:16\x*   
\s1 Micne yenge alang bacebadaing  
\p
\v 13 Ngenge Sugucnele ailu kiya gamang nga ngic sugucne, yengele bagewa galu yowangineng ngagelu gadabiyeng. Yogo \w ngictaudi|lemma="ngictau"\w* tapili feicne balu gagac,\x - \xo 2:13 \xt Tit 3:1\x*  
\v 14 aime yele bagewa gawana sasawa gagaing. Ngictaudi bole-yowa yeleme yenge ngic-ngigac aibabangineng sowacne aicaigaing, yenge ameine baduyelecaigac. Nga aibaba madicne aicaigaing, yenge mitengebacaigac.  
\v 15 Ngic ngage-wosaecngineng mikac yenge wiyac monic mi ngage-motogaing, yogo yenge ngengi aibabangineng madicne aibong nganilu yowa mi midaing, yogodi Wapongte angac aigac.\x - \xo 2:15 \xt 1Pi 3:16\x*  
\v 16 Ngenge mucti mi witicngebaicne. Aime muc mikac gaga yogo gagaingte ailu sisipilic aibabanonggeng nalic aidabelengte milu mi ngagedaing, miyac. Ngenge Wapongte kwelec kwekwe aling gadabiyeng.  
\v 17 Ailu ngenge ngic-ngigac sasawa alang bayelelu ngage-ngagesingkolec \w ngic hae-gbafocngineng|lemma="Ngic hae-gba"\w* kwelenginengti angac ngageyelelu aidabiyeng. Ailu Wapongte hangocngebame alang bacnolu ngictau alang bacnodabiyeng.\x - \xo 2:17 \xt Rom 12:10\x*   
\s1 Doicka sanangne gadaing  
\p
\v 18 Kwelec kwekwe ngic gagaing, ngenge sugucnefocngineng alang bacebalu yengele bagewa galu yowangineng ngagelu gadabiyeng. Sugucnefocngineng ulucne nga madicne gagaing, yengele sugu miyac. Ngenge sugucne sowacne momochac inguc aiyeledabiyeng.\x - \xo 2:18 \xt Efs 6:5\x*  
\v 19 Monic ye Wapongte yowa kwele ngage-ngageina fame yogo balaibelu game nganilu, sifu ye umacka lobong doic ngagedaicte. Ailu aibaba iwa ye sanangkelu domagacte aibaba yogodi kwele-madicineholec aigac.  
\v 20 Aime ngic yengi \w bikicnginengte|lemma="Bikic"\w* ailu wecngebabong ngenge doicka felu yogolec bagewa sanangne gadaingtewa, yogolec wiyac monic madicne mi fagac, miyac. Ngenge aibabangineng madicne aibong doicka locngebabong yogolec bagewa sanangne gadaingte, yogodi Wapongta kwele-madicineholec aigac.\x - \xo 2:20 \xt 1Pi 3:14,17\x*   
\s1 Kristole hige-yefe  
\p
\v 21 Ngenge inguc ainingte Wapongti wacngebawec. Ailu ngenge Kristole hige-yefe balaibeningte ye ngengele ailu doic ngagelu yefe yogo edalicngebawec.\x - \xo 2:21 \xt Mat 16:24; Yoa 13:15\x*   
\q1
\v 22 “Ye \w bikic\w* monic mi bafuwawec. Ailu yele mickacni kwesac-yowa monic mi ngageibong.” \rq (Yes 53:9) \rq*   
\m
\v 23 Aime yenge misulec aicnobong ye yowangineng ameine monic mi bafaliyelu miwec. Ailu ye doic ngagelu yenge basowalecebanogale monic mi aiwec, miyac. Ye umacine yogo Wapongti yowa dondonna wosaelu micnonale, yele molewa lowec.\x - \xo 2:23 \xt Yes 53:7; 1Pi 3:9\x*  
\v 24 Ye yeicne socinedi nongileng bikic atickelu \w malicpongka|lemma="Malicpong"\w* domawec. Domame nongileng bikickacni homalu yefe dondonne balaibenangte inguc aiwec. Aime ye weibong, doic yogodi ngengele kwelele huc-doic yogo bamadickenale baficngebawec.\x - \xo 2:24 \xt Rom 6:11; Yes 53:5-6\x*  
\v 25 Ngenge esecne \w lama\w* ingucne yefe lilolu singsalolong kwelu gaibong. Aime yanguctihac Lama-damong yela biyachac hefaliye kwesibong, yedi hocne kwele-asungineng ngani-damong aingelecaigac.\x - \xo 2:25 \xt Esek 34:5-6; Mat 9:36; Yoa 10:14; Hib 13:20-21\x*   
\c 3  
\s1 Ngawe-ngigac gaga  
\p
\v 1-2 Aime ngigac, ga kwelec kwekwe aicaigaing, yefe yogohac ngawegone yele bagewa galu yowaine ngagelu gadamec. Aime ngic monicti Wapongte yowa mi ngagesingkedaictewa, ngigacine, ga yowa mikac aibabagonedi madicne aicaigic. Aime ngawegone ye aibaba yogo nganime aibabagonedi Sugucnele yefewa nalic fuluckeme hikedaicte.\x - \xo 3:1-2 \xt Efs 5:22\x*  
\v 3 Ngigac ngenge hodoc-dowecngineng mideckecaigaing. Nga kwanang goldi baicne socnginang locaigaing. Ailu ngakpi-kpoluc ngani-nganiine madicne holecaigaing. Aibaba yogodi aibabangineng madicne mi bafuwadaicte.\x - \xo 3:3 \xt 1Tim 2:9\x*  
\v 4 Aime asungineng ulucne nga kwele-mogungkolecti kwelengineng kwelina sangke-sangke fagac, yogodi ngani-ngani madicne bafuwadaicte. Yogolec hibile tapiliine mi wacaigac ailu faginowagac. I yangucte, Wapongte haicka yogodi wiyac feicne aigac.  
\v 5 Ngigac esecne Wapongte bingec gaibong, yenge silicine ingucnehac hibingineng bawalu ngawefocngineng yengele yowa ngagelu Wapongta ngage-ngagengineng lolu wangec gaibong.  
\v 6 Yogo Sara ingucne, ye ngaweine \w Abrahamte|lemma="Abraham"\w* yowa balaibelu “sugucnene” milu gawec. Ngenge aibaba madicne aigacgu ngic me wiyac monicte mi hangocngebagacka, ngenge Sara adufocine ailu gagaing.\x - \xo 3:6 \xt Fike 18:12\x*   
\p
\v 7 Ngigacte tapili, yogo ngictesoc miyac. Ngic ngigackolec, ga yogo ngagesilu yogolec silicka yeholec gadamec. Aime ga gagale kwele-madic yogolec mole-damoc yogo yeholec momochac badabiyecte. Aime wiyac monicti gale mimilocte aka holedaickale ailu, ngigacgone alang bacnolu gadamec.\x - \xo 3:7 \xt Efs 5:25\x*   
\s1 Kwele-angacka doficnagudabeleng  
\p
\v 8 Yowa kpatulelu mibe, ngenge sasawadi kwele ngage-ngagengineng moniyang fadaic. Ngenge kwele-sowac aiyelelu kweledi angac ngagelu aiyelelu kwele-sowacka baficebalu ngengileng bawacnagulu gadabiyeng.  
\v 9 Ngic-ngigac yenge sowacne aingelebong, ngenge sowacne ameine mi aiyeledabiyeng. Ailu yenge misofoc aingelebong, ngenge ameine misofockolechac mi aiyeledabiyeng, miyac. Mimi-madic yogo ngengele mole-damoc ainale wacngebaicne. Ilec ailu ngengi yenge inguchac mimi-madic milu edocebadabiyeng.   
\p
\v 10 I yangucte,  
\q1 “Monic ye gagale angac ngagelu gagac, ailu dameng madicne nganinogale aicnolu gagac, ye yowa sowacne nga kwesac-yowa midaickale, micine damongkedaic.   
\q1
\v 11 Ye aibaba sowacne lobe holecnolu aibaba madicne ailu gadaic.  
\q1 Ailu ye kwele-mogungte yefe bafuwanale bole sanangne badaic.   
\q1
\v 12 Sugucnedi ngic-ngigac dondonne yengela donge hilalu mimilocnginengte hedec locaigac.  
\q1 Nga sowacne aicaigaing, yengebac lobe holecebalu hegilecebacaigac.” \rq (Mige 34:12-16) \rq*   
\s1 Doickolec gaga  
\p
\v 13 Ga aibaba madicne ainogale mamang hidulu aidamectewa, weni yengi basowalecgudaingte? Yenge nalic mi basowalecgudaingte.  
\v 14 Aime sifu ngenge dondonne gaganginengte ailu, yengi ngenge doicka locngebadaingtewa, yogo ngenge kwele-angackolec.  
\q1 “Ngenge yengele damungebame hangoc mi aidaing.” \rq (Yes 8:12) \rq*\x - \xo 3:14 \xt Mat 5:10; 1Pi 2:20; 4:14\x*   
\m
\v 15-16 Aimebac ngenge \w Kristo\w* kwelenginang lobong Sugucnengineng aime balu gadaing. Ailu madicnengineng yogolec wangec gabong lobewa kwesidaicte, yogolec fungine sasawadi uwangelebong ameine bafaliyelu edocebaningte damengsoc efeckelu gadabiyeng. Ngenge ameine uwanogale ngageboc mikac, ulucne nga alang babaineholec ailu kwele ngage-ngagengineng gbagbacne galu ameine bafaliyelu edocebadaing. Ngenge inguc aidaingtewa, Kristole ailu aibabangineng madicne aicaigaing. Yogolec ailu ngic mimi-soling aingelecaigaing, yenge gameebadaicte.\x - \xo 3:15-16 \xt 1Pi 2:12\x*  
\v 17 Monic ye aibabaine madicnele ailu Wapongti ngagecnogacka doicka lodaingte, yogodi madickedaicte. Aime monic ye aibabaine sowacnele ailu doicka lodaingte, ye mi mitengkedaing.   
\s1 Kristo doicka loibong  
\p
\v 18 Kristodi Wapongte emewa locngebanale alecine moniyang \w bikicte|lemma="Bikic"\w* amengineng bame doicka loibong. Ngic dondonnedi ngic-ngigac nongileng dondonne miyac, nongilengte ailu inguc aiwec. Ye sockapec webong homawec, aime \w asuwapeckabac|lemma="Asu"\w* bagboliyeme gagac.  
\v 19 Galu aleng gocne muc-macka gagaing, yengela hikelu yowa edocebalu weduyelewec.  
\v 20 \w Noa\w* ye wageine baemewa aleng yenge Wapongte yowa hegileibong, yogo yengela hikewec.  
\p Noale damengka Wapongti ngic-ngigac yengele tatakic mikac wangecngineng gawec. Aime Noa ye wageine badickeme, dameng iwa Wapongti ngic-ngigac efecnemac, 8 sugu misawacni baicebame wasecne aiibong.\x - \xo 3:20 \xt Fike 6-7\x*  
\v 21 Misa yogodi \w Misa-lowacti|lemma="Misa-lowac"\w* umackacni bamoctocngebagac, yogolec ilucine aigac. Misa-lowac yogo socte wonong monic mi suweyackedaicte, miyac. I yangucte, \w Yesu\w* Kristodi homackacni gboliyelu fangkewecte ailu, kwele ngage-ngagengineng madicne aigacte, misa-lowac yogodi Wapongte haicka inguc yegengkedaicte.  
\v 22 Yesu ye biyachac honocmengka fewec. Ailu ye Wapong foleinapecka gagac. Aime \w angelo\w* nga wiyac gocne wac sugucne baicne, ailu wiyac gocne bole-yowa tapilinginengkolec, yogo yenge yele bagewa biyachac locebaicne gagaing.   
\c 4  
\s1 Wapongte yowa balaibenoga  
\p
\v 1 Kristo ye sockolec doicka loibong. Aime ye doic ngagewec, silicine ingucnehac ngenge nalic ngagedaingte, ngage-ngage yogodi malekungineng ingucne aidaic. Monic ye sockolec game doicka loibongka, ye \w bikicte|lemma="Bikic"\w* yefe biyachac hegilewec.\x - \xo 4:1 \xt Rom 6:2,7\x*  
\v 2 Ilec ailu yanguctihac sockapec domalu ye ngic-ngigac yengele angac haicine monic-monic hatacmac mi balaibedaicte. Yebac Wapongte ngage-ngage nga angac sugu balaibedaicte.  
\v 3 Ngic-ngigac Wapong mi ngagegaing, yengele socte gagale angac yogolec aibaba yanguc fagac. Selo-boic aibaba nga ngani-angac aicaigaing. Ailu misa sanangne alingfocngineng yengeholec nolu kwelengineng sifuweme gee wecaigabiyeng. Ailu yefe lilolu siduc-gbong haicine monic-monic balaibecebalu alang bacebacaigaing. Ngenge esecne aibaba ingucne ailu gaibong, aibaba yogolec dameng biyac miyac aigac.\x - \xo 4:3 \xt Efs 2:2-3\x*  
\v 4 Yenge aibabangineng silicine haicine monic-monic kosabenang homacnehac aibong, ngenge yengeholec hatacmac mi taockelu gagaing. Aime yenge yogo nganilu ngagebong silicine monic aime misulec aingelegaing.  
\v 5 Aime Wapong ye ngic gbolicne nga homaicne aibabangineng mimoctonale efeckelu gagac, yenge yela funginengineng midaing.\x - \xo 4:5 \xt Sale 10:42\x*  
\v 6 Ngic-ngigac yenge \w Siduc Madicne\w* mime yegengkeme ngagelu homaibong, yenge esecne sockapec gaga gaibong, yogolec ameine homaibong. Ailu sifu asuwabac Wapong gagac ingucnehac nalic gadaingte.   
\s1 Bole haicine monic-monic ngelewec  
\p
\v 7 Wiyac sasawa yogo miyac ainingte dameng biyac bangkalegac. Ilec ngenge mimiloc bole baningte kwele basifuc mi ailu damongnagulu gadabiyeng.\x - \xo 4:7 \xt Rom 13:11-12\x*  
\v 8 Kweledi angac ngagelu ainagulu gaga yogodi yengele bikic haicine monic-monic bocyac someckeyackegac. Ilec ngenge mamang hidulu kweledi angac ngagelu ainagulu gadabiyeng, yogodi wiyac feicne aigac.\x - \xo 4:8 \xt 1Pi 1:22\x*  
\v 9 Ngenge tatakic nga lobe-yowa mikac galu kwele-madicka hefolecnagulu macka lonagulu damongnagudabiyeng.\x - \xo 4:9 \xt Hib 13:2\x*  
\v 10 Wapongti ngageboc mikac kwele-madicinele tapili haicine monic-monic botoc balu ngelewec. Ilec ngenge Wapongte kwele-madicka galu filesoc filesoc baficnagulu wiyac yogo madicne damongkelu gadabiyeng.\x - \xo 4:10 \xt Rom 12:6-8\x*  
\v 11 Monic ye yowa noine ngic-ngigac yengela mime yegengkegacka, ye Wapongte yowa balaibelu fungine mime yegengkedaic. Nga monic ye baficebalu gacaigacka, ye Wapongti tapili lacnocaigac, yogolec silicina babafic bole badaic. Inguc aibong ngic-ngigac yenge aibaba sasawa yogo nganilu, \w Yesu\w* \w Kristole|lemma="Kristo"\w* ngagelu Wapong wacine bafedaingte. Yela wac feicne nga tapili moto-motoine mikac fafeginowagac, yogo foinac.   
\s1 Doicka galu beliyedabiyeng  
\p
\v 12 Agofocne kwelenedi ngengele angac ngagegabac, lokwesac doickolec fikengeledaicte, yogolec mi kwatackedaing. Aime yogo fikengeledaicte, yogodi aibaba fulune mi aigac.  
\v 13 Aime inguc fikengeledaicte iwa, ngenge Kristoholec taockelu doic ngagelu yogolec silicina beliyedaing. Inguc aibong ye gacgu wac feicne fikelu yegengkedaicte, dameng iwa ngengele belic-belic sugucnehac fikedaicte.\x - \xo 4:13 \xt Sale 5:41; Yak 1:2; 1Pi 1:6-7\x*  
\v 14 Aime ngic-ngigac yengi Kristole wacte ailu yowa kwelu midelec aingeledaingtewa, ngenge kwele-angackolec. I yangucte, yenge inguc aingelebong, Wapongte \w Asu\w* wac feicneholec, ye ngengele kwelewa gagac.\x - \xo 4:14 \xt 1Pi 2:20\x*  
\v 15-16 Aime monic ye wacine, “Kristole aling,” inguc miningte doic ngagedaictewa, ye yogolec mi gameedaic. Ye wac yogolec ailu Wapong wacine bafedaic. Aime ngengelacni monicti ngic-wewe, me woc-wiyac hise-baba, me kindololo ngic gacaigac, me ngic-ngigac gocne yengele wiyacte andac ailu kwelina haucaigac, ye aibabaine ingucnele ailu doic ngagelu gameedaicte. Ilec ngenge aibaba ingucne mi ailu gadaing.   
\p
\v 17 I yangucte, Wapong ye molickelu yeicne golowacfocine yengela aibabangineng wosaelu mimoctonale damengngine bangkalegac. Aime ye nongilang boleine yogo molickelu badaictewa, aling gocne yenge \w Siduc Madicnele|lemma="Siduc Madicne"\w* yowa kwecaigaing, yogo yengela boleine ingucnehac taockelu aibabanginengte ameine umacnehac yeledaicte.  
\v 18 Aime,  
\q1 “Ngic-ngigac dondonne gacaigaing, yenge wasecne aidaingte, yogo efecne miyac, umacineholec. Aibaba ingucne fikeyeledaictewa, \w bikic-baba|lemma="Bikic"\w* ngic nga Wapong lobe holecnocaigaing, yengela wenuc fikedaicte? Wapongti amengineng umacnebenang yeleme doictowa ngagedaingte.” \rq (Ynn 11:31) \rq*   
\m
\v 19 Ilec ailu ngic-ngigac gocne Wapongti ngageyelewecte doic ngagecaigaing, yenge aibabangineng madicne aidaing. Ailu kwele-asungineng bucbuchac Wapongti himong nga sawa bafuwawec, yele molewa lodaing. I yangucte, ye mic-yowaine balaibelu gagac.   
\c 5  
\s1 Ngic micne  
\p
\v 1 \w Kristo\w* ye doic ngagewec, yogo dongenedi nganiiba. Aime yogolec mibasanang ailu gagabac. Ailu yele wac feicne fikedaicte, iwa nongileng momochac gadabelengte. Yesule habu damong, na ngengeholec inguchac bole yogo balu gagabac. Ilec ailu sanangne milu yanguc edocngebagabac,  
\v 2 Lama-damong ye lamafocine madicne damongebacaigac, silicine ingucnehac ngenge Wapongte habudi ngengele hewacka gagaing, yenge madicne damongebadabiyeng. Bole yogo kwele-umacka mi badabiyeng, ngenge kwele-madicka bole yogo babong Wapongti ngageme madickedaicte. Ailu ngenge ngage-ngagenginang hiye-monengkolec ainingte bole yogo mi badabiyeng. Ngenge bolengineng yogo mamang hidulu badabiyeng.\x - \xo 5:2 \xt Yoa 21:15-17; Sale 20:28\x*  
\v 3 Wapongti habu ngelewec, yogo ngengi yengele feicne ingucne mi gadabiyeng. Ngenge aibaba madicne ngic-ngigac habu yogo edalicebabong, yenge yogo nganilu balaibedaing.\x - \xo 5:3 \xt 2Kor 1:24; Filp 3:17; Tit 2:7\x*  
\v 4 Inguc gaebongka Damong Sugucnedi lama-damong ingucne fikelu yegengkedaicte, dameng iwa yedi wac feicne dangke-dangkeine mikac ngeledaicte.   
\s1 Ulucne gaga  
\p
\v 5 Soc-gboli ngenge inguchac damongfocngineng yengele bagewa galu yowangineng ngagelu gadabiyeng. Ailu ngenge sasawadi bawacnagudabiyeng, yogodi ngakpi-kpoluc ingucne holebong haudaic. I yangucte,  
\q1 “Wapongti ngic soc bafefe gagaing, yengele takickeme ngaba aigac. Nga soc-kwelengineng bawalu gagaing, yenge kwele-madic aiyelelu gagac.” \rq (Ynn 3:34) \rq*\x - \xo 5:5 \xt Efs 5:21; Yak 4:6\x*   
\m
\v 6 Ilec ngenge Wapongte mole sanangne yogolec bagewa bawacnagudaing. Inguc gaebongka Wapongti yeicne damengka wacngineng bafedaicte.\x - \xo 5:6 \xt Mat 23:12; Luk 14:11; Yak 4:10\x*  
\v 7 Ye yeuctihac ngani-damong aingelelu gagacte, ngenge kwele-umacngineng sasawa yela lodabiyeng.\x - \xo 5:7 \xt Mat 6:25-30\x*   
\s1 Sanangne domadaing  
\p
\v 8 Ngabangineng Aleng Sugucnengineng, ye laion ingucne aukwelu lolickelu ngic-ngigac gbocebanale basacebalu boletowa balu gagac. Ilec ngenge sanangne domalu deboc-gboli galu damongnagulu\x - \xo 5:8 \xt 1Tim 5:6\x*  
\v 9 ngage-ngagesingnginengti Aleng Sugucnenginengte yowa wepackedaing. Wepackelu yanguc ngagedaing, ngage-ngagesingkolec \w ngic hae-gbafocngineng|lemma="Ngic hae-gba"\w* himongne himongne gagaing, yenge doic ingucnehac ngagelu gagaing.\x - \xo 5:9 \xt Efs 6:11-13; Yak 4:7\x*   
\p
\v 10 Wapong kwele-madic fileine, yele wac feicnedi fafa-sanang fagac, iwa ngengi \w Yesu\w* Kristoholec ganingte yedi wacngebawec. Ailu ngenge doicka dameng bangkacnemac gaebongka, Wapong yeuctihac bamadicngebalu nenggac ngiyengeleme sanangkelu domadaingte.  
\v 11 Ye Tapili fileinedi \w gaga-sanang\w* gaginowagac, yogo foinac.   
\s1 Wenac-madic yowa  
\p
\v 12 Sailas ye ngage-ngagesingkolec \w ngic hae-gbanonggeng|lemma="ngic hae-gba"\w* yele yanguc ngagelu migabac, ye bolewa sanangne domalu baficnume hibi bangkacne yago kwelengkengelegabac. Na Wapongte kwele-madic noine yogolec mibasanang ailu mibe yegengkegac, ngenge yogolec hewacka sanangne gadabiyeng.\x - \xo 5:12 \xt Sale 15:22,37-40; 12:2,25; 13:13\x*  
\v 13 Aime \w Babilon\w*\f + \fr 5:13 \ft Babilon, yogo Roma taonte nangeng yowa monic, yedi kwelengkewec.\f* taonka Yesule habu gagaing, Wapongti yenge nga ngenge momochac bawosaecngebawec, yenge nga madecne Mareko, yenge wenac-madic yowa ngengela lobong fugac.\x - \xo 5:13 \xt 2Tim 4:11\x*  
\v 14 Ngenge wenac-madic milu kwele-angacka molewa babac ainagudaing.\f + \fr 5:14 \ft Pitale damengka yenge aibabanginengte ailu yanguc kwelengkewec, “kwele-angackolec muducnagudaing.”\f* Ngic-ngigac sasawa Kristoholec wetackelu gagaing, kwele-mogungti ngengela fadaic.