\id 1JN - Migabac NT; 9 Sep 2011 1st draft 
\h 1 Yoane 
\toc1 Yoane Yedi Molic-molic Hibi Kwelengkewec 
\toc2 1 Yoane 
\toc3 1Yoa 
\mt1 Yoane  
\mt2 Yedi Molic-molic Hibi Kwelengkewec  
\is1 Mimi-yegeng yowa  
\ip Yesu homalu homackacni gboliyelu fangkeme hifa 60 ngama ingucne motome, Yoane, ye Yesule mic-tengteng monic, yedi hibi yago kwelengkelu Yesule habu gocne yengela saleme hikewec.  
\ip Ngic gocne yengi kwesac-yowa yanguc miibong, “Soc-biuc yogo wiyac sowacne sugu aigac. Ilec Yesu ye soc-biuckolec noine mi aiwec. Aime Yesu ye Wapongte Madec noine miyac. Ailu Yesu ye hatacmac mi kwesidaicte.” Yenge kwesac-yowa inguc mibong ngageibongte ailu sawang-yowa kwelengkeyelelu yowa noine nga kwele-angacte aibaba basanangkewec.  
\is1 Yowa yago hibi nebocina fagac  
\io1 1:1–4 Hibile yowa noinele fungine  
\io1 1:5—2:17 Angocte yefe nga kundungte yefe  
\io1 2:18—2:27 Kristole ngaba  
\io1 2:28—3:24 Wapongte adu-madecfocine noine  
\io1 4:1—5:4 Kwele-angacte fungine  
\io1 5:5–21 Wiyac noine ngage-motogabeleng  
\c 1  
\s1 Yowadi gagaholec aigac  
\p
\v 1 Ngic esecnebenang molickelu gawec, yele siduc kwelengkengelegabeleng. Nonge ye hedecnonggengti ngagelu, dongenonggengti ngani-nganiine nga aibabaine nganilu, molenonggengti bauwaibeng. Yowadi gagaholec aigac, ngic yele hocne mibeng yegengkegac.\x - \xo 1:1 \xt Yoa 1:1\x*  
\v 2 \w Gaga-sanang\w* fileine ye hocne fikeme nganilu, yele ailu mibasanang aingelelu mibeng yegengkeme edocngebacaigabeleng. Ye esecne Mamackolec gawecti nongilang fikewec.\x - \xo 1:2 \xt Yoa 1:14\x*  
\v 3 Nonge wiyac ngani-ngagec aiibeng, yogo ngenge nongeholec gaga walec ganangte mibeng yegengkegac. Aime gaga walec, yogo Mamac nga Madecine \w Yesu\w* \w Kristo\w*, yekeholec momochac walec gagabeleng.  
\v 4 Nongileng sasawa belic-belicti wakenolenale yowa yago kwelengkengelegabeleng.\x - \xo 1:4 \xt Yoa 16:24\x*   
\s1 Angocka gaga  
\p
\v 5 Nonge yelacni yowa yago ngagelu ngengela yanguc mibeng yegengkegac, Wapong ye angoc, aime yela kundung monic mi fagac, miyac.\x - \xo 1:5 \xt 1Tim 6:16; Yak 1:17\x*  
\v 6 Aime yeholec momoc walec ganangte milu sifu kundungte aibabawa gadabelengtewa, nongileng kwesac ailu aibaba noine mi balaibedabelengte.\x - \xo 1:6 \xt 1Yoa 2:4\x*  
\v 7 Ye angocka gagac. Aime nongileng ingucnehac angocka gagabelengka, gaga walec moniyang gagabeleng. Inguc gaebengka madecine Yesule sacti \w bikicnonggeng|lemma="Bikic"\w* sasawa suwenoleyackegac.   
\p
\v 8 Aime bikic mikac gagabeleng midabelengtewa, nongileng kwesac aibeng yowa noinedi kwelenonggang mi fadaicte.\x - \xo 1:8 \xt Mige 32:5; Ynn 28:13\x*  
\v 9 Aime bikicnonggeng mifickebeng, Wapong pasi dondonne balu yeicne yowa balaibelu gacaigacti, bikicnonggeng hegilenolelu sowacnenonggeng sasawa suweyackedaicte.  
\v 10 Aime nongileng \w bikic\w* monic mi bafuwaibeng midabelengtewa, Wapong ye kwesac-ngic ingucne mibeng yele yowadi kwelenonggang monic mi fadaicte.   
\c 2  
\p
\v 1 Adu-madecfocne, ngenge \w bikic\w* mi baningte hibi yago kwelengkegabac. Aime monicti bikic bafuwadaictewa, nongileng ngic-hewacnonggeng monic gagac, yogo \w Yesu\w* \w Kristo\w*. Ye ngic dondonnedi Mamacte dongewa pasi dondonne bacaigac.\x - \xo 2:1 \xt Hib 9:24\x*  
\v 2 Ye nongileng \w bikicte|lemma="Bikic"\w* ailu yeuctihac bikicte ameine badu-badule fuli biyachac bawec. Ailu nongileng sugu miyac, himongtowa yagolec ngic-ngigac sasawa, yengele momochac bawec.\x - \xo 2:2 \xt Yoa 1:29; Kol 1:20; 1Yoa 4:10\x*   
\p
\v 3 Aime nongileng Wapongte ung-yowa fagaing yogo balaibegabelengka, ye ngage-motolu gagabeleng, inguc ngagegabeleng.  
\v 4 Monic ye Wapong ngagegabac milu yele ung-yowa mi balaibecaigac, ye kwesac-ngic ailu yele kwelewa yowa noine monic mi fagac.  
\v 5 Aime monic ye Wapongte yowa ngagelu balaibedaicte, ye kwele ngage-ngageinedi Wapongte angac ngagecnome yogolec noine bamadickedaicte. Yefe iwa hocne Wapongte kwelewa gagabeleng, yogo ngage-motogabeleng.\x - \xo 2:5 \xt Yoa 14:21,23\x*  
\v 6 Aime monic ye Wapongte kwelewa gagabac micaigac, ye Yesudi gaga gawec, ingucnehac gadaic.   
\p
\v 7 Agofocne kwelenedi ngengele angac ngagegabac, na ung-yowa gbolicne monic mi kwelengkegabac, miyac. Ngenge yowa esecne molickelu balu ngagelu gaibong, yogohac hatacmac kwelengkegabac. Ngenge yowa esecne ngageibong, yogodi ung-yowa esecne aigac.\x - \xo 2:7 \xt Yoa 13:34; 2Yoa 5-6\x*  
\v 8 Kundung baickeemewa angoc noinedi biyac fikelu angolegacte ailu ung-yowa yago gbolicne hatacmac kwelengkegabac. Yogodi Sugucnela nga ngengela noine aigac.\x - \xo 2:8 \xt Rom 13:12; Yoa 1:9\x*   
\p
\v 9 Aime monic ye angocka gagabac milu \w ngic hae-gbaine|lemma="ngic hae-gba"\w* kweledi wickedaicte, ye kundungka gagac hocne.\x - \xo 2:9 \xt 1Yoa 4:20\x*  
\v 10 Aime monic ye ngic hae-gbaine ago aicnolu kweleinedi yele angac ngagecnolu aicnocaigac, ye angocka game kweleina wiyac monicti okac ingucne mi aicnodaicte.\x - \xo 2:10 \xt Rom 14:13\x*\fig Monicti agoine kweledi wickeme, agoinedi angac ngagecnogac|alt="One hates his friend and another likes him" src="GT00137.tif" size="col" copy="Gordon Thompson © 2012 Wycliffe Bible Translators Inc." ref="2:10" \fig*  
\v 11 Nga monic ye ngic hae-gbaine kweledi wickedaicte, ye kundung kwelina lolickedaicte. Aime kundungti dongeine bame kundung kweme, ye yefe wenuwa hikegac, yogo mi ngagedaicte.\x - \xo 2:11 \xt Yoa 12:35\x*   
\q1
\v 12 Adu-madecfocne, Wapongti Yesule wacte ailu bikicngineng hegilewec.  
\q1 Yogolec ailu hibi yago kwelengkengelegabac.   
\q1
\v 13 Mamac, ngenge ngic esecne fungina molickelu gawec, ailu gagac, ngenge ye biyachac ngageibongte ailu hibi yago kwelengkengelegabac.  
\q1 Ailu soc-gboli ngic, ngenge \w Kindololo fileine\w* biyachac ewaliibongte ailu, hibi yago kwelengkengelegabac.   
\q1
\v 14 Adu-madec, ngenge Wapong Mamac biyachac ngagecnoibongte ailu, hibi yago kwelengkengelebac.  
\q1 Mamac, ngic esecnahac molickelu gawec, ailu gagachac, ngenge ye biyachac ngagecnoibongte ailu, hibi yago kwelengkengelebac.  
\q1 Soc-gboli ngic, ngenge tapilinginengkolec ailu Wapongte yowadi ngengela fame, Kindololo fileine biyachac ewaliibongte ailu hibi yago kwelengkengelebac.   
\s1 Himongte angac  
\p
\v 15-16 Ngenge himongtowa yagolec gaga nga himongtowa yagolec wiyac sasawa fagac, yogolec angac mi ngagedaing. I yangucte, himongtowa yagolec wiyac sasawale angac yogo yanguc fagac. Socti angackolec gaga, nga donge-helockolec gaga, ailu himongtowa yagolec moneng-mafale ailu wac sugucneholec gaga, yogo Mamactacni miyac. Yogo himongtowa yagowacni. Aime monic ye himongtowa yagolec angac ngagelu gadaicte, yele kwelewa Mamacte angac mi fagac.\x - \xo 2:15-16 \xt Rom 8:7; 13:14\x*  
\v 17 Aime himongtowa nga aibabaine angacine, yogo gacgu miyac aiyackedaicte. Aime monic ye Wapongte yowa balaibecaigac, ye gagaine moto-motoine mikac gaginowagac.\x - \xo 2:17 \xt Mat 7:21\x*   
\s1 Kristole ngaba  
\p
\v 18 Adu-madecfocne, dameng yago motonogale aigac. Aime Kristole ngaba kwesinale mibong ngageibong, ngaba ingucne bocyacbenangti biyachac fikelu yegengkelu gagaingte ailu dameng motonogale aigac, yogo ngage-motogabeleng.\x - \xo 2:18 \xt Mat 24:5,24; 2Yoa 7\x*  
\v 19 Yenge nongilengkolec gaibong. Ailu sifu nongileng alingkacni miyacte hegilecnubaibong. Nongileng alingkacni aidabongka midec yenge nongilengkolec gadabong. Yenge sasawa nongileng alingkacni miyac, yogo yegena fikelu yegengkenale, inguc fikewec.\x - \xo 2:19 \xt Sale 20:30\x*   
\p
\v 20 Aime Kristo ye gbagbacne, yedi Asu ngeleme ngenge sasawadi yowa noine ngageyackegaing.\x - \xo 2:20 \xt 1Kor 2:15\x*  
\v 21 Ngenge yowa noine mi ngagegaing milu ngengele hibi yago mi kwelengkegabac, miyac. Ngenge yowa noine ngagegaing. Aime yowa noinacni kwesac monic mi kwesicaigac, yogo ngage-motogaingte ailu hibi yago kwelengkengelegabac.   
\p
\v 22 Yesu ye Mesia gagac, monicti yogo bisockedaicte, ye kwesac-ngic aidaicte. Aime monic ye Mamac nga Madec yeke bisocepadaicte, ye hocne Kristole ngababenang aidaicte.\x - \xo 2:22 \xt 1Yoa 4:3; 2Yoa 7\x*  
\v 23 Monic ye Madec bisockedaicte, ye Mamackolec mi wetackelu gadaicte. Nga monicti Madecte mime yegengkeme ngagesingkedaicte, ye Mamackolec inguchac wetackelu gadaicte.\x - \xo 2:23 \xt Yoa 5:23; 1Yoa 4:15; 5:1\x*   
\p
\v 24 Ngenge ngengileng yowa molickelu ngageibong, yogodi ngengele kwelewa fagidaic. Ngenge inguc aidaingtewa, Madec nga Mamac yekeholec wetackelu gadabiyengte.  
\v 25 Madec ye yeuctihac \w gaga-sanang\w* nolenale mipangkelu edocnubawec.  
\v 26 Ngic gocne yengi kwesacka mengocngebadaingkale, hibi yago kwelengkengelegabac.   
\p
\v 27 Ngic ingucne yengi wedungelenogalesoc mi aigac. Yesudi esecne Asu ngeleme baibong, yogodi kwelenginang falu wiyac sasawa wedungeledaicte. Ailu Asudi yowa wedungeledaicte, yogo noinebenang, yogo kwesac miyac. Ngenge yefe iwa yeholec wetackelu gadabiyeng.\x - \xo 2:27 \xt Yoa 16:13\x*   
\s1 Wapongte adu-madec  
\p
\v 28 Adu-madecfocne ngagening, Yesu ye fikelu yegengkenale nongileng yele kwesi-kwesi damengka yele haicka game mikac sanangne domanangte ngenge yeholec wetackelu gadabiyeng.  
\v 29 Yesu ye dondonne, ngenge inguc ngagegaingka, ngenge inguchac yanguc ngagegaing, monic ye aibaba dondonne aicaigac, ye Sugucnele ngic fikewec gagac.\x - \xo 2:29 \xt 1Yoa 3:10\x*   
\c 3  
\p
\v 1 Ngagegaing, Mamac ye yeicne adu-madecfocine wacnubanale kwele-angac sugucnebenang nolewec. Aime nongilengti hocne yele adu-madecfocine gagabeleng. Aime himongtowa yagolec ngic-ngigac yenge Yesu mi ngageibongte ailu nongileng inguchac mi ngagecnubagaing.\x - \xo 3:1 \xt Yoa 1:12-13; 16:3\x*  
\v 2 Agofocne kwelenedi ngengele angac ngagegabac, nongileng yakumac Wapong adu-madecfocine gagabeleng. Gacgu wenuc aidabelengte, yogo mi mime yegengkenoleme ngagegabeleng. Gacgu ye fikelu yegengkeme nganinoga, yogowabac yeicne silic ingucne aidabelengte, yogo ngagegabeleng.\x - \xo 3:2 \xt 2Kor 3:18\x*  
\v 3 Ngic-ngigac Yesuholec wetackelu madicne yogo fikenale ngagesingkelu wangec gagaing, yenge sasawadi gagangineng suweyackelu ye \w gbagbacne\w* gagac, silicine ingucnehac gbagbacne aidaingte.   
\p
\v 4 Aime ngic-ngigac \w bikic\w* bafuwalu gagaing, yenge \w yefe-yowa\w* welu gagaing. I yangucte, bikicti yefe-yowa baickegac.  
\v 5 Yesudi bikicnonggeng baickenale fikewec. Aime yela bikic monic mi fagac, ngenge yogo ngagegaing.\x - \xo 3:5 \xt Yoa 1:29; 1Pi 2:22-24; 1Yoa 2:2\x*  
\v 6 Aime ngic-ngigac yeholec wetackelu gagaing, yenge \w bikic\w* mi bafuwalu gagaing. Aime ngic-ngigac bikickolec gagaing, yengi ye mi nganiibong ailu ye mi ngageibong gagaing.   
\p
\v 7 Adu-madecfocne, monicti bikic nalic aidaingte milu kwesacka mengocngebame ngenge ye mi balaibedabiyeng. Monic ye aibaba dondonne aicaigac, ye Yesu ingucne ngic dondonne gagac.  
\v 8 Aleng Sugucnenginengti molickelu bikic bafuwawecte, monic ye bikicte aibaba aicaigac, ye hocne Aleng Sugucnenginengte ngic. Aime \w Wapongte Madecti|lemma="Wapongte Madec"\w* Aleng Sugucnenginengte bole basowaleme miyac ainale ailu fikewec.\x - \xo 3:8 \xt Yoa 8:44\x*  
\v 9 Ngic-ngigac Wapongtacni fikeibong, yenge bikic monic mi bafuwacaigaing, miyac. Wapongte gaga yogodi yengele kwelewa fagacte bikic bafuwanogale kpungkedaingte.\x - \xo 3:9 \xt 1Yoa 5:18\x*  
\v 10 Aime ngic-ngigac aibaba dondonne mi aicaigaing, me \w ngic hae-gbafocngineng|lemma="ngic hae-gba"\w* yengele kwelenginengti angac mi ngagelu aiyelecaigaing, yenge sasawa Wapongtacni miyac. Aibaba yogowa hocne weni yogodi Wapongte adu-madec nga weni yogodi Aleng Sugucnenginengte adu-madec, yogo yegengkedaicte.   
\s1 Angac ngagenagudabeleng  
\p
\v 11 Ngenge esecne molickelu yowa yanguc ngageibong, nongileng ago ainagulu kwelenonggengti angac ngagelu ainagudabeleng.\x - \xo 3:11 \xt Yoa 13:34\x*  
\v 12 Ngenge \w Kein\w* ingucne mi aidabiyeng. Ye \w Kindololo fileine\w* balaibelu gbaine wehomawec. Omale wehomawec? I yangucte, ye yeicne aibabaine sowacne facnowec. Nga gbainele aibabadi nganime dondonne aiwecte ailu gbaine wehomawec.\x - \xo 3:12 \xt Fike 4:8\x*  
\v 13 Ngic hae-gbafocne, himongtowa yagolec ngic-ngigac yengi kweledi wicngebadaingte. Aime ngenge wiyac yogo aibaba gbolicne fikegac inguc mi ngagedaing.\x - \xo 3:13 \xt Yoa 5:18-19\x*  
\v 14 Nongileng ngic hae-gbafocnonggeng yengele kweledi angac ngageyelelu aiyelecaigabelengte ailu homac hegilelu gagawa felu gagabeleng, yogo ngagegabeleng. Aime monic ye kweleinedi yengele angac mi ngageyelelu aiyelecaigac, ye homacka gacaigac.\x - \xo 3:14 \xt Yoa 5:24\x*  
\v 15 Aime ngic-ngigac ngic hae-gbafocngineng yengele kweledi wicebacaigaing, yenge sasawadi ngic-wewe ailu gagaing. Aime ngic-ngigac ingucne yengele kwelewa \w gaga-sanang\w* mi fagac, yogo ngagegaing.\x - \xo 3:15 \xt Miye 21:8\x*   
\p
\v 16 Yesu Kristo ye nongilengte ailu gagaine hegilewec. Aime pasi yogo nganilu kwele-angacte aibaba ngagelu gagabeleng. Ilec nongileng inguchac ngic hae-gbafocnonggeng yenge baficebalu gaganonggeng hegilenogale efeckelu gadabeleng.\x - \xo 3:16 \xt Yoa 13:1; Gal 1:4\x*  
\v 17 Monicti himongtowa yagolec wiyackolec galu ngic hae-gbaine monic nganime socte moneng-mafawa waweweine gagac. Inguc nganilu kweleina kwele-sowac mi ngagelu mi bafickedaictewa, Wapongte kwele-angacti yele kwelewa mi fagac.\x - \xo 3:17 \xt Yef 15:7\x*   
\p
\v 18 Adu-madecfocne, “Nongileng kweledi angac ngageyelelu aiyeledabeleng.” Yogo micti me yowadi sugu mi midabeleng, miyac. Nongileng aibaba yogo noineholecbenang aidabeleng.\x - \xo 3:18 \xt Yak 2:15-16\x*  
\v 19-20 Inguc ailu yowa noinele alingka gagabeleng, yogo ngagedabelengte. Aime kwelenonggengti wiyac monicte yowawa locnubame, Wapongte haicka kwele-mogung gadabelengte. I yangucte, Wapong ye feicnetowanonggeng ailu ye nongileng kwelewa wiyac sasawa fagac, yogo ngageyackegac. Ailu Wapongti nongileng kwelewa ngage-ngage fagac yogo ewaligac.   
\p
\v 21 Agofocne kwelenedi ngengele angac ngagegabac, kwelenonggengti yowawa mi locnubadaictewa, Wapongta ngageboc mikac hikedabelengte.\x - \xo 3:21 \xt Hib 4:16\x*  
\v 22 Nongileng inguc galu ung-yowaine balaibelu yele angacka fagac, yogo ainogale, wiyac monicte Wapong uwacnolu bacaigabeleng.  
\v 23 Aime ung-yowaine yanguc fagac, nongileng Madecine \w Yesu\w* \w Kristo\w* ngagesingkedabeleng. Ailu kweledi angac ngagenagulu ainagudabeleng. Yedi ung-yowa yogo hocne nolewec.\x - \xo 3:23 \xt Yoa 6:29; 13:34\x*  
\v 24 Monic ye ung-yowaine balaibecaigac, ye Wapongte kwelewa game Wapongti yele kwelewa gagac. Ailu Wapongti \w Asuine|lemma="Asu"\w* nolewec kwelenonggang gagac. Ilec ailu Wapongti kwelenonggang gagac, yogo ngage-motogabeleng.\x - \xo 3:24 \xt 1Yoa 4:13\x*   
\c 4  
\s1 Siduc-mimi ngicte yowa ngani-wosaec ainoga  
\p
\v 1 Agofocne kwelenedi ngengele angac ngagegabac, \w siduc-mimi ngic\w* kwesacine bocyacti himongtowa yagowa lolickelu gagaingte ailu, ngenge yowangineng sasawa mi ngagesingkedaing. Ngenge ngani-wosaec ailu yengele asu yogo Wapongtacni me miyac, yogo ngani-motodaing.\x - \xo 4:1 \xt Mat 7:15; 1Yoa 2:18; 2Yoa 7; 1Tim 5:21\x*  
\v 2 Ngenge Wapongte \w Asu\w* silicine yangucka ngani-motodaingte, ngic-ngigac sasawadi \w Yesu\w* \w Kristo\w* ye ngic soc-biuckolec fikewec gagac, yogo mibong yegengkedaicte, yenge Wapongtacni.\x - \xo 4:2 \xt 1Kor 12:3\x*  
\v 3 Aime ngic-ngigac sasawadi Yesule inguc mi mibong yegengkedaicte, yenge hocne Wapongtacni miyac. Ngic yogo yengi Yesu Kristole ngaba yele tapili bagaing. Ngaba ye esecne kwesinale mibong ngageibong, yele tapili hocne himongtowa yagowa biyac fame balu gagaing.\x - \xo 4:3 \xt 1Yoa 2:18\x*   
\p
\v 4 Adu-madecfocne, ngenge Wapongtacni. I yangucte, ye ngengele kwelewa ngiyegac, yele tapilidi Kindololo fileine himongtowa yagowa gagac, yele tapili ewaligac. Ilec ailu ngenge siduc-mimi ngic kwesacine biyachac ewalicebalu gagaing.\x - \xo 4:4 \xt Mat 12:29; 1Yoa 5:4-5\x*  
\v 5 Yenge himongtowa yagowacni. Ilec yenge himongtowa yagolec ngage-ngage bagalu yowa mibong, himongtowa yagolec ngic-ngigac yengi yengele yowale hedec logaing.\x - \xo 4:5 \xt Yoa 8:47; 15:19\x*  
\v 6 Nongileng Wapongtacni. Ilec ngic-ngigac Wapong ngagegaing, yenge nongileng yowa hedec kwelu ngagecaigaing. Aime monic ye Wapongtacni miyac, yedibac nongileng yowa mi ngagecaigac. Aibaba iwa hocne nongileng yowa noinele Asu nga asu kwesacine ngani-motodabelengte.   
\s1 Wapongte kwele-angac  
\p
\v 7 Agofocne ngengele angac ngagegabac, kwele-angacte aibaba, yogo Wapongtacni. Ilec nongileng ago ainagulu kwelenonggengti angac ngagelu ainagudabeleng. Aime ngic-ngigac kweledi angac ngagelu aicaigaing, yenge Wapongtacni fikeibong. Ailu yenge Wapong ngagegaing.  
\v 8 Wapongti kwele-angacka gagale fungine aigac. Ilec monic ye kweleina angac mi ngagelu aicaigac, ye Wapong mi ngagegac.  
\v 9 Aime Wapong ye Madecine moniyang sugu, yela gaga-sanang banangte saleme himongtowa yagowa wawec. Yefe iwa hocne Wapongti nongileng kweleinedi angac ngagelu ainolegac, yogo yegengkegac.\x - \xo 4:9 \xt Yoa 3:16\x*  
\v 10 Nongilengti molickelu Wapongte kwelenonggengti angac ngagelu mi aiibeng, miyac. Yedi nongileng ailu kweleinedi angackeme Madecine yogo nongileng \w bikicte|lemma="Bikic"\w* ailu yeuctihac bikicte ameine badu-badule fuli banale saleme wawec. Yogodi kwele-angacte fungine aigac.\x - \xo 4:10 \xt Rom 5:8-10; 1Yoa 2:2\x*  
\v 11 Agofocne kwelenedi ngengele angac ngagegabac, Wapongti kweleinedi inguc angackeme ainolewecte, nongilengti inguchac kwelenonggengti angacnubame ainagudabeleng.  
\v 12 Monicti Wapong mi nganiwec. Aime nongileng kwelenonggengti angac ngagenagulu ainagugabelengka, Wapongti nongileng kwelewa game yele kwele-angacka gaga yogodi nongilang suguleme nganigaing.\x - \xo 4:12 \xt Yoa 1:18\x*   
\p
\v 13 Aime ye yeicne Asuine nolewecte ailu yanguc ngagegabeleng, nongileng yele kwele kwelina gabeng, yedi nongileng kwele kwelina inguchac gagac.\x - \xo 4:13 \xt 2Kor 1:22; 1Yoa 3:24\x*  
\v 14 Mamacti ngic-ngigac himongtowa yagolec \w bikicte amengineng|lemma="Asa-baba ngic"\w* banale Madecine lome wawec. Nongileng yogo nganilu mibeng yegengkeme gagabeleng.  
\v 15 Monic ye yanguc mime yegengkedaicte, “Yesu ye \w Wapongte Madec\w*,” Wapongti yele kwelewa game, yedi Wapongte kwelewa gagac.  
\v 16 Aime Wapongti kweleinedi angackeme ainolecaigac, yogo ngage-motolu ngagesingkelu gagabeleng.  
\p Wapong ye kwele-angacka gagale fungine aigac. Aime monic ye kwele-angacka gaga gacaigac, ye Wapongte kwelewa game Wapongti yele kwelewa gagac.  
\v 17 Inguc gaebengka kwele-angacka gagadi nongilang sawelu sugulegac. Suguleme mimocto-mimocto damengka nongileng ngageboc mikac sanangkelu domadabelengte. Aime nongileng himongtowa yagowa Yesu ingucnehac ailu gagabeleng.  
\v 18 Hangockolec gaga, yogo ba-batingngineholec. Aime monic hangocka gagacka, kwele-angacka gaga yogo yela mi sugulelu gagac. I yangucte, kwele-angacka gaga yogodi hangoc mikac aigac. Ilec ailu kwele-angacka gagadi sugucnehac fagac, yogodi hangoc baickedaicte.   
\p
\v 19 Wapongti molickelu kweleinedi angackeme ainolewecte kwelenonggengti angac ngagelu aigabeleng.  
\v 20 Aime monic ye “Wapongte kwelenedi angacnume aigabac” milubac \w ngic hae-gbaine|lemma="ngic hae-gba"\w* ye kweledi wickedaicte, ye kwesac-ngic. Monic ye ngic hae-gbaine dongedi nganicaigac, yele kweleinedi mi angackeme aidaictewa, ye Wapong dongedi mi nganiicne, yele kweleinedi nalic mi angackeme aidaicte.  
\v 21 Sugucnedi ung-yowa yanguc nolewec, monic ye Wapongte kweleinedi angackeme aicaigac, ye ngic hae-gbafocine yengele inguchac kweleinedi angackeme aidaic.\x - \xo 4:21 \xt Mrk 12:29-31\x*   
\c 5  
\s1 Madec ngagesingkenoga  
\p
\v 1 \w Yesu\w* ye \w Mesia\w* gagac, ngic-ngigac inguc ngagesingkegaing, yenge Wapongtacni fikeibong. Aime monic ye mamac monicte kweleinedi angac ngagecnolu aicnogac, ye adu-madecinele inguchac kweleinedi angac ngagecnolu aicnogac.\x - \xo 5:1 \xt 1Yoa 4:15\x*  
\v 2 Yogolec silicina nongileng Wapongte kwelenonggengti angac ngagelu aicnolu ung-yowaine balaibegabeleng. Inguc aigabelengka, yanguc ngagegabeleng, Wapong adu-madecfocine yengele kwelenongenggti angac ngageyelelu aiyelegabeleng.  
\v 3 Nongileng Wapongte kwelenonggengti angac ngagecnolu aigabeleng, yogo yanguc, ung-yowaine balaibegabeleng. Aime yele ung-yowa balaibelu gabeng umac mi nolegac.\x - \xo 5:3 \xt Yoa 14:15,23-24\x*   
\p
\v 4 Ngic-ngigac Wapongtacni fikeibong, yenge sasawadi gbelong ailu himongtowa yagolec tapili ewaligaing. Aime nongileng ngage-ngagesingkolecti gbelong ailu himongtowa yagolec tapili sasawa ewalinoga.  
\v 5 Madi gbelong ailu himongtowa yagolec tapili ewaligac? Yesu ye \w Wapongte Madec\w*. Aime monic ye yogo ngagesingkedaicte, yedi sugu himongtowa yagolec tapili ewaligac.   
\p
\v 6 Ye misawa nga sacka kwesiwec, yogo Yesu Kristo hocne.\f + \fr 5:6 \ft Misa yogo Yesudi misa lowawec, dameng iwa nangeng yowa kwelengkewec. Nga sac yogo Yesu homawec, dameng iwa nangeng yowa kwelengkewec.\f* Ye misawa sugu mi kwesiwec, miyac. Ye misawa nga sacka momochac kwesiwec. Aime \w Asu\w* ye yowa noinele Asu. Ilec ailu yedi Yesule mime yegengkegac.\x - \xo 5:6 \xt Yoa 1:29-34\x*  
\v 7-8 Wiyac habackang, yogo Asu nga misa ailu sac, yenge Yesule mibong Wapongte Madec yegengkeme kwele-moniyang ailu gacaigaing.\x - \xo 5:7-8 \xt Yoa 15:26\x*  
\v 9 Ngic yengi yowa mibong yegengkeme yowangineng ngagesingkecaigabeleng. Inguc aidabelengtewa, yanguc ngagedabeleng, Wapongti yowa mime yegengkedaictewa, yogodi feicne aigac. Ailu ye Madecinele yowa mime yegengkecaigac, yogo ngagesingkedabeleng.\x - \xo 5:9 \xt Yoa 5:32-37\x*  
\v 10 Monic ye Madecine ngagesingkegac, ye kweleinedi yanguc mime yegengkegac, “Yesu ye Wapongte Madec.” Nga monic ye Wapong Madecinele yowa mime yegengkewec, yogo mi ngagesingkegacka, yedi Wapong kwesac aicnogac, inguc micnogac.\x - \xo 5:10 \xt Gal 4:6\x*  
\v 11 Aime yowa yogodi yanguc edocnubame yegengkegac, Wapongti gaga moto-motoine mikac nolewec. Aime gaga yogodi Madecinela fagac.  
\v 12 Monic ye Madeckolec wetackelu gagac, ye gaga noineholec gagac. Nga monic ye Wapongte Madeckolec mi wetackelu gagac, yele gaga noine mikac aigac.\x - \xo 5:12 \xt Yoa 3:36\x*   
\s1 Hibi moto-motoine  
\p
\v 13 Ngic-ngigac Wapong Madecine ngagesingkegaing, yenge gaga-sanangkolec gagaing, ngenge yogo ngage-motoningte hibi yago kwelengkengelegabac.\x - \xo 5:13 \xt Yoa 20:31\x*  
\v 14 Aime nongileng yanguc ngage-motolu ngagepangkegabeleng, wiyac monicte milockenogale milu yeicne angac balaibelu uwacnobeng, ye ngagenoledaicte.\x - \xo 5:14 \xt Yoa 14:13; 1Yoa 3:21-22\x*  
\v 15 Aime mimilocnonggeng ngagenoleme, wiyac yogo noine biyac badabelengte, inguc hocne ngagelu gagabeleng.   
\p
\v 16 Monicti \w bikic\w* monic bafuwadaicte, aime bikic yogodi gaga-sanang mi hedickecnogac. Aime monicti \w ngic hae-gba\w* monicte bikic yogo nganilu yele ailu milockedaictewa, Wapongti bikickolec ngic ye gaga lacnodaicte. Bikic yogodi gaga-sanang mi hedickecnogac, inguc migabac. Aime bikicti gaga-sanang hedickegac,\f + \fr 5:16 \ft Monic ye Yesu lobe holecnogac, ye gaga-sanang nalic mi badaicte.\f* bikic ingucnele milockeningte mi migabac.\x - \xo 5:16 \xt Mat 12:31\x*  
\v 17 Sowacne sasawa yogo bikic, nga bikic gocne yogodi gaga-sanang mi hedickegac.   
\p
\v 18 Nongileng yanguc ngagegabeleng, ngic-ngigac Wapongtacni fikeibong, yenge sasawadi bikic mi balu gagaing. Aime yeicne Madecinedi bacebame, \w Kindololo fileinedi|lemma="Kindololo fileine"\w* nalic mi basowalecebadaicte.\x - \xo 5:18 \xt 1Yoa 3:9\x*  
\v 19 Aime nongileng Wapongte adu-madecfocine gagabeleng, yogo ngage-motogabeleng. Aime himongtowa yago nga ngic-ngigac ngage-ngagesing mikac yenge Kindololo fileinele tapilile bagewa fagaing.  
\v 20 Aime nongileng yowa noinele Fileine ngagenangte, Madecinedi walu ngage-ngage-motoc nolewec, yogo ngagegabeleng. Aime Wapong yowa noinele fileine, yele kwele kwelina nga Madecine Yesu Kristo, yele kwele kwelina momochac gagabeleng. Yesudi hocne Wapong noine ailu gaga-sanang.  
\v 21 Adu-madecfocne, ngenge siduc-gbong yengele emewa mi hikeningte damong balu gadabiyeng.  
\p Yogo foinac.