\id 2PE - Mbula NT with Gen, Exo, Ruth, Psa, Pro, and Jonah [mna] -Papua New Guinea 1996 (DBL 2015) 
\h 2 Petrus 
\toc1 Ro Ki Petrus Ta Iwe Ru Pa 
\toc2 2 Petrus 
\toc3 2Pe 
\mt1 Ro Ki Petrus Ta Iwe Ru Pa  
\c 1  
\p
\v 1 Nio Simon Petrus, mbesooŋo mi ŋgoŋana ki Yesu Krisi.  
\p Aŋbeede ro ti ima piom wal tau kakam urlaŋana ŋonoono raraate kembei ta niam na. Urlaŋana tiom tana, mbulu ndeeŋeŋana ki Yesu Krisi ta Anutu kiti mi ulaaŋa kiti na, ina iwe zaala piom ma kakam.\x + \xo 1:1 \xt Ro 1:12\x*   
\p
\v 2 Niom tina ku'urur leleyom pa Anutu kiti mi Merere kiti Yesu, mi kuute kat zin. Ŋgar tiom tana ko iwe zaala piom be kampeŋana mi mbotŋana ambaiŋana ta Anutu ikamam piti na, izze tiom ma biibi. Ŋonoono.   
\s1 Mbulu pakan tabe takam, to bobi ki Anutu iur ŋonoono piti  
\p
\v 3 Iti tomtom ta tuur lelende pa Krisi mi tuute kati na, ni itunu mburaana ikam lende koroŋ ambaimbaiŋan boozomen kek, bekena iuulu iti ma takam mbotŋana kini mi mbulu ta ni leleene pa i. Pa Anutu, ni kampeŋana katuunu, mi zaana biibi pa mburaana mi mbulu kini ndabokŋana. Tanata iboobo iti ma tewe lene.  
\v 4 Mi ipomoozo iti, mi ikam ti ma zanda pa koroŋ bibip mi koroŋ ŋonoono ta ni imbuk sua pa na. Sua kini mbukŋan tina, ina irao be itooro iti ma lelende mi ŋgar kiti iwe kembei ta ni itunu. Mi itatke iti pa mbulu sananŋana ki kulindi ta ikiskis iti tomtom ta tombot su toono ti na, mi ipasansaana iti.\x + \xo 1:4 \xt Yo 1:12; 2Kor 3:8, 7:1; Ep 4:24; 1Yo 3:2\x*   
\p
\v 5 Anutu ikam mbulu boozomen tana piti kek, tana kakam kinkiini be keseeŋge urlaŋana tiom pa mbulu ambaiŋana. Mi mbulu ambaiŋana na, keseeŋge pa ŋgar ambaiŋana. Tana kakam kinkiini be kuute kat Anutu mi sua kini.\x + \xo 1:5 \xt Ga 5:6; Kol 2:3\x*  
\v 6 Mi ŋgar tiom tana na, keseeŋge pa mbulu ki tagabiizi itundu. Mi mbulu tana na, keseeŋge pa mbulu ki temender mbolŋana mi tabaada pataŋana. Mi mbulu tana na, keseeŋge pa mbulu ki tomototo Anutu mi tototo mbulu kini.\x + \xo 1:6 \xt 1Kor 9:25; Ga 5:22+\x*  
\v 7 Mi mbulu tana na, keseeŋge pa mbulu ki tuur lelende pizin toŋmatiziŋ kiti ta ki Krisi i. Mi mbulu tana na, keseeŋge pa mbulu ki tuur lelende pa tomtom ta boozomen.\x + \xo 1:7 \xt 1Tes 3:12; 1Yo 4:21\x*  
\v 8 Pa sombe mbulu ta boozomen tana izze be imbol piom, inako ŋgar ta kakamam pa Merere kiti Yesu Krisi na, iur ŋonoono ambaimbaiŋan boozomen.\x + \xo 1:8 \xt Yo 15:2; Tit 3:14\x*  
\v 9 Tamen tomtom ta so itoto mbulu tana som, na ni mata pisŋana, mi mataana ilala pa koroŋ ki Anutu som, mi mataana mbeleele uraata biibi ta Krisi ikam pini kek na. Uraata ta kembei: Ni ipusi pa sanaana kini ta muŋgu ikamam na.\x + \xo 1:9 \xt Ibr 9:14; 1Yo 1:7, 2:9+\x*   
\p
\v 10 O niom toŋmatiziŋ tio, Merere ipeikat yom, mi bobi kini ikam yom ma kewe lene kek. Tana kakam kinkiini pa mbulu ta boozomen tana. Naso ituyom kuute kat kembei bobi kini ikam yom kek, mi bobi tana iur ŋonoono piom. Mi niom ko irao kotop ma kipizil kat ndemeyom pini na som. Som kat.\x + \xo 1:10 \xt Ibr 3:12,14; 2Pe 3:17\x*  
\v 11 Mi kaimer, sombe kelela kar saamba, nako tikam yom ma tau lelen ambai kat piom. Kar tana, Yesu Krisi ta Merere mi ulaaŋa kiti na, kola ikam peeze pa ma alok.   
\s1 Petrus iso sua pa meeteŋana kini  
\p
\v 12 Ŋonoono, sua ti, niom kuute lup kek. Pa niom kikiskis sua ŋonoono ma imbol piom. Tamen nio leleŋ be aŋpototo sua tio. Naso motoyom iŋgalŋgal mi kikiskis kat.  
\v 13-14 Nio aŋute: Molo som to aŋzem beeze tio ta ki toono ti \f + \fr 1:13-14 \ft Beeze ti, ina Petrus iso pa itunu kuliini.\f* ma imborene. Pa Merere kiti Yesu Krisi iso yo ta kembei. Tana mazwaana ta so aŋbotmbot men su toono na, aŋre kembei ambai be aŋpeyei ŋgar tiom pa sua ti.\x + \xo 1:13-14 \xt Yo 21:18+; 2Kor 5:1+\x*  
\v 15 Mi nio ko aŋru zaala pakan. Beso aŋzem yom ma iŋgi, tona motoyom iŋgalŋgal sua ta aŋkamam piom. Kokena motoyom mbeleele.   
\s1 Petrus ire kat Krisi mburaana, tanata ipombolmbol ka sua  
\p
\v 16 Indeeŋe tau amso yom pa Merere kiti Yesu Krisi mburaana mi miiliŋana kini na, amto mbol soroksorok tau wal ŋgarŋan pakan tipakamkaam zin tomtom pa i na som. Niam amre kat mburaana mi azuŋka kini pa motoyam, tanata ampombolmbol ka sua.\x + \xo 1:16 \xt Mt 17:1+; Yo 1:14; 1Kor 1:17, 2:1\x*  
\v 17 Pa muŋgu, niam ambotmbot, mi amre Tamanda Anutu ipakuri, mi ikam mburaana ma zaana biibi pini. Mi amleŋ kalŋaana ta imbot lela azuŋka mburaanaŋana ki Anutu leleene ma ipet, mi iso pini ta kembei: “Ina nio lutuŋ ŋonoono ta leleŋ pini ilip.”\x + \xo 1:17 \xt Mt 17:5\x*  
\v 18 Ŋonoono kat. Niamŋan Krisi ambotmbot sala abal potomŋana, mi ituyam amleŋ kat Anutu kalŋaana ta imbot saamba mi isu.\x + \xo 1:18 \xt Mt 17:1+\x*   
\s1 Sua ta muŋgu Anutu kwoono bizin tibeede se ro na, iti bela tikiskis mi tototo  
\p
\v 19 Mbulu boozomen ta ipet pa Yesu na, ipombol yam ma amurla kat ta kembei: Sua ta muŋgu Anutu kwoono bizin tibeede se ro na, sua ŋonoono men. Tana niom sombe kikiskis sua kizin mi kototo, mi ila ila ma irao pitik Birae \f + \fr 1:19 \ft Pitik Birae, ina imender pa Krisi mi miiliŋana kini. Re Tur 22:16 mi Nam 24:17.\f* pok ma ise, mi iur mat pa leleyom, inako ambai. Pa sua kizin, ina kembei kai ta iyaryaara lela zugut leleene.\x + \xo 1:19 \xt Mbo 119:105; Yo 5:35; Tur 22:16\x*  
\v 20 Mi kere. Koroŋ ta, ta biibi kat. Tana kakam kat ŋgar pa. Merere sua kini ta muŋgu kwoono bizin tiso mi tibeede se ro na, suruunu sa ipet pa tomtom zitun ŋgar kizin som.  
\v 21 Pa zitun lelen mi tiso sua tana som. Ina Bubuŋana Potomŋana ta isalakaala zin, mi ikam zin ma tiso Anutu sua kini, kembei ta miiri isala wooŋgo leŋana, mi ipusuk ma ila.\x + \xo 1:21 \xt Ŋgo 1:16, 3:18; 2Tim 3:16; 1Pe 1:10+\x*   
\c 2  
\s1 Petrus isope zin pizin wal pakamkaamŋan  
\p
\v 1 Muŋgu zin Israel, tomtom kizin pakan tiso tiwe Anutu kwoono, mi tipakamkaam zin pa sua ki Merere. Mi mbulu raraate men ko ipet piom tomini. Tana kere yom. Pa tomtom tiom pakan kola timaŋga, mi tipasaana urlaŋana kizin tomtom pa sua kizin pakaamŋana tabe ipa ndel pa sua ŋonoono i. Uraata kizin tana, zin ko tikam ki keŋana. Mi Merere kizin ta iŋgiimi zin ma tiwe lene na, zin ko tipizil ndemen pini. Tana ko tikamam mbulu tana, mi molo som to Merere iur kadoono pizin karau men ma tila len. \x + \xo 2:1 \xt Mt 24:11; Ŋgo 20:29+; 1Tim 4:1+; 2Tim 3:1+; Yud 4\x*  
\v 2 Tomtom boozomen ko titop la kizin mi tito zin pa mbulu kizin sananŋana. Mi mbulu kizin ko kembei ta me ma ŋge. Tabe iti takam, so kanda miaŋ biibi kat. Tana zin ko tikam ma tomtom boozomen tipiri sua repiiliŋana pa zaala ki sua ŋonoono. \x + \xo 2:2 \xt 2Tim 4:3\x*  
\v 3 Mi zin matan koroŋŋan. Tana ko tipakaam yom pa sua soroksorok ta ipet pa zitun ŋgar kizin, bekena tiwatke len pat tiom. Kadoono tabe ise kizin na, Anutu leleene iur pa, mi iso ka sua ta muŋgu kek. Ni ko ipasaana zin ma tila len. Kadoono tana imbotmbot, mi izza zin a. \x + \xo 2:3 \xt Ro 16:18; 1Tes 2:5; 1Tim 6:5; Tit 1:11\x*   
\s1 Anutu iurur kadoono pa mbulu sananŋana  
\p
\v 4 Pa kere. Zin aŋela ta muŋgu tikam sanaana na, Anutu ileele zin? Som. Ipiri zin sula kar sanaana ta zugut muriini na, bekena timbot mi tinamnaama nol tabe iur kat kadoono pizin i. \x + \xo 2:4 \xt Yo 8:44; 1Yo 3:8; Yud 6; Tur 12:7+, 20:2+\x*  
\v 5 Mi zin wal ta muŋgu timbot su toono, mi tito zaala ki Anutu som na, zin ta kembena. Anutu ileele zin som, mi ikam nonor biibi ma ipet, mi ipambiriizi zin lup. Mi Noa ta izzoyaryaara sua pizin tomtom pa mbulu ndeeŋeŋana na, Anutu ikamke i raama wal kini lamata mi ru tomen. \x + \xo 2:5 \xt Un 7, 8; Ibr 11:7\x*  
\v 6 Mi kar Sodom ma Gomora tomini. Anutu iur kadoono pizin, mi ikam ma you ikan zin ma tiwe kokou men. Tana zin tiwe kin pa mbulu tabe ipet pizin wal tau titoto zaala kini som na. \x + \xo 2:6 \xt Un 19; Yud 7\x*  
\v 7 Mi Lot na, Anutu ikamke i. Pa ni tomtom ndeeŋeŋana, mi leleene ipata kat pa mbulu sananŋana ki kar ru tina. Pa zin tizorzooro mi tikamam mbulu kizin me ma ŋge tabe iti takam, so kanda miaŋ biibi pa. \x + \xo 2:7 \xt Un 19:1+\x*  
\v 8 Tomtom ndeeŋeŋana tana, ni imbotmbot la wal sananŋan tina mazwan, mi irre mbulu kizin ta tizorzooro na, mi ileŋleŋ sua kizin. Tanata ikam ma gorgori imbotmbot raama leleene ipata kat. \x + \xo 2:8 \xt Mbo 119:158\x*   
\p
\v 9 Mbulu boozomen tana ipaute iti ta kembei: Zin wal ta so titoto zaala ki Anutu, sombe toomboŋana ise kizin, na Merere, ni irao kat be ikamke zin pa toomboŋana tana. Mi zin wal ta so tikamam mbulu ndeeŋeŋana som, na ra, tembel zin kek. Tirao be tiko pa Anutu na som. Ni iurur kadoono pizin mi ila ila ma irao nol biibi ki mbeŋ kaimer, to ikam kat kadoono pizin. \x + \xo 2:9 \xt Mbo 34:17+; Ro 1:18; 1Kor 10:13; Tur 3:10\x*   
\s1 Mbulu kizin wal pakamkaamŋan  
\p
\v 10 Sua tana indeeŋe kat zin wal pakamkaamŋan ta titoto zitun lelen sananŋan ta ki toono i, mi tikamam mbulu kizin me ma ŋge. Wal tana tipakurkur zitun, mi tirepilpiili Anutu mi zin peeze kan kini. Mi timototo kosa sa som. Tiwirri sua sananŋana pizin aŋela ta zanŋan mi mburanŋan na. \x + \xo 2:10 \xt Yud 4,7+\x*  
\v 11 Mi zin aŋela ta mburan bibip ma tilip kat pizin wal pakamkaamŋan tana na, irao tiŋgal sua pa wal tana isu Merere kereene uunu na som. \x + \xo 2:11 \xt Yud 9\x*  
\v 12 Tamen wal tana tikam kat ŋgar sa som. Tanata tiwirri sorok sua repiiliŋana pa koroŋ ta zitun tikankaana pa. Zin kembei buzur saŋsaŋŋan ta len ŋgar somŋan i. Sombe ŋgar sananŋana sa ipet pizin, na tila men. Zin kembei buzur ta timbotmbot toono be tomtom tipun zin ma tikan. Tana zin ko tila len kembei ta zin buzur. \x + \xo 2:12 \xt Yud 10\x*   
\p
\v 13 Zin tinoknok mbulu sananŋana, tana ko tikam len kadoono sananŋana. Kere. Zin tiwinin mi tikamam mbulu bozboozo isu mat keteene. Kan miaŋ som. Pa kulin imet pa kek, mi lelen pa ilip. Mbulu ta tikamam na, iŋgeeze pa Anutu mataana som kat. Tamen zin menmeen zin biibi pa pakaamŋana ta tikamam na. Tana sombe tigaaba yom ma niomŋan kulup yom pa kini kanŋana mi suŋŋana, na tipasansaana lupŋana tiom mi tipamiaŋ yom. \x + \xo 2:13 \xt Ro 13:13; 1Kor 11:20+; Pil 3:19; Yud 12\x*  
\v 14 Zin tizemzem sanaana kamŋana som. Pa matan meŋan. Mi zin wal ta urlaŋana kizin imbol zen na, wal tana tiyaryaaru zin ma tikamam sanaana. Mbulu ki matanda koroŋŋanda na, zin tinoknok, tabe tirao pa kat. Tana Anutu kete malmalŋana kini imbotmbot se kizin.  
\v 15-16 Pa tizem zaala ambaiŋana kek. Mbulu kizin na, kembei ta mbulu ki Beor lutuunu Biliam. Biliam tina, muŋgu ni iwe Anutu kwoono. Tamen leleene pa pat ilip, tanata iso ikam mbulu sananŋana bekena ikam le pat. Iti tuute: Doŋki, ina irao iso sua som. Tamen Anutu ikam ma doŋki ki Biliam iso sua kembei ta tomtom. Mi doŋki kini iyaambi pa mbulu kini sananŋana, tabe ni izem ŋgar kini kankaanaŋana tana. \x + \xo 2:15-16 \xt Nam 22:4+; Yud 11; Tur 2:14\x*   
\p
\v 17 Zin wal ta tiso tipakaam yom na, sua kizin ŋono somŋana. Zin kembei yok lepeene ta zoŋ ikam ma imaaga kek. Mi zin kembei miiri tieene ta tere ma toso ko yaŋ isu, mi som. Miiri ikam ma ila ne. Tana Anutu, ni iurpe len lele ndabokŋana kek be timbot pa. Lele tana na, zugut mandiŋ muriini. \x + \xo 2:17 \xt Yud 12+\x*  
\v 18 Pa tipakurkur zitun pa sua kizin ta ŋono somŋana i, mi tipeyei ŋgar kizin tomtom pa mbulu sananŋan boozomen ta ki kulin i. Tana wal popoŋan tau tikamam be tizem zin wal ta tizorzooro sua ŋonoono na, wal pakamkaamŋan tana tiyaryaaru zin ma timilmiili mini. \x + \xo 2:18 \xt Yud 16\x*  
\v 19 Wal sananŋan tina tizzo ta kembei: “Niom koso koto yam, na kosa sa ko irao ipakaala yom mini na som. Ko karao be koto ituyom leleyom pa koroŋ ta boozomen.” Tamen zitun tiwe mbesooŋo sorok pa mbulu sananŋana ta tikamam na. Pa sombe koroŋ sa imborro iti, na iti tewe mbesooŋo pa koroŋ tana kek. \x + \xo 2:19 \xt Yo 8:34; Ro 6:16; 1Pe 2:16\x*   
\p
\v 20 Wal tana ra, tembel zin kek. Pa sombe tomtom sa iute Merere mi ulaaŋa kiti Yesu Krisi, mi izem mbulu sananŋana ki toono ti kek, to kaimer isu mini, mi mbulu sananŋana ikaukau i ma iloli, na ni ko isaana kat. Muŋgu na ambai ri. Mi buri na, iŋgi be isaana ma isaana kat. \x + \xo 2:20 \xt Mt 12:45; Ibr 6:4+; 1Yo 2:16\x*  
\v 21 Wal ta kembei tiute zaala ndeeŋeŋana ki Anutu som, so ndabok. Mi iŋgi tiute kek. Tamen tisu mini mi tipizil ndemen pa tutu potomŋana ta tileŋ mi tikan la kek na. Tana ra, tembel zin kek. \x + \xo 2:21 \xt Lu 12:47+; Yo 9:41\x*  
\v 22 Mbulu kizin indeeŋe kat sua ru ta gorgori tozzo i: “Me ilulu, to imiili ma ikan luluŋana mini. Mi ŋge ta kembena. Sombe kuliini iŋgeeze, nako imiili ma ila ipunzubup mini.” \x + \xo 2:22 \xt Tut 26:11\x*   
\c 3  
\s1 Merere izwar som. Nol biibi ki mbeŋ kaimer kola ipet  
\p
\v 1 O niom wal tio, iŋgi ro tio ta iwe ru pa, ta aŋbeede ima piom i. Ro tio ru na, kan un tamen ta kembei: Aŋso aŋpei ŋgar ambaiŋana piom.  
\v 2 Naso motoyom iŋgal sua ta muŋgu Anutu kwoono bizin potomŋan tiso na, mi kikiskis tutu ta Merere mi ulaaŋa kiti iur piti na. Tutu tana, zin ŋgoŋana kini tiso ma keleŋ kek. \x + \xo 3:2 \xt  Yud 17\x*   
\p
\v 3 Mi kere. Koroŋ biibi tabe niom kakam ŋgar pa, ina ta kembei: Mazwaana kaimer kana iso ipet, to tomtom kola titoto zitun lelen sananŋan, mi tikamam sua repiiliŋana pa Merere. \x + \xo 3:3 \xt  1Tim 4:1+; 2Tim 3:1+; Yud 18\x*  
\v 4 Ko tizzo ta kembei: “Lak, sua ta Krisi imbuk be imiili ma imar mini na, imar kek? Indeeŋe ta tumbundu bizin mi imar na, kosa sa itooro som. Koroŋ ta boozomen imbotmbot raraate men kembei ta Anutu iur zin ta mata popoten na.” \x + \xo 3:4 \xt  Yesa 5:19; Mt 24:48\x*   
\p
\v 5-6 Mi zin tiute kek. Muŋgu kat, Anutu iso sua men, mi saamba ma toono ipet. Mi yok ikam uraata pa toono mi ikel, tabe toono ise mat, mi yok imbot meleebe. Mi kaimer ma nonor biibi ipet, to ilol toono muŋguŋana tana ma ipasaana kat. Tamen wal pakamkaamŋan tana lelen be tikam ŋgar pa mbulu tina som. \x + \xo 3:5-6 \xt  Un 1:1,6, 7:11,21; Mbo 33:6; Kol 1:17; Ibr 11:3\x*  
\v 7 Mi koozi na, sua ki Anutu ta ikiskis saamba mi toono ma timbotmbot. Mi ni kola ikiskis zin ma ila irao nol biibi ipet, to you biibi ikan zin. Nol tana isombe ipet, to Anutu kola iur kadoono pizin wal tau titoto zaala kini som na, mi ipasaana zin ma tila len. \x + \xo 3:7 \xt  Mbo 102:26+; Mt 25:41; 2Tes 1:7+\x*   
\p
\v 8 Mi niom wal tio, motoyom iŋgal koroŋ ta ti. Merere, ni ire aigule ta, ina kembei ta ndaama munŋaana ta (1,000). Mi ndaama munŋaana ta, ina kembei ta aigule ta. Ziru raraate men pa ni mataana. \x + \xo 3:8 \xt  Mbo 90:4\x*  
\v 9 Tamen tomtom pakan tikam ŋgar sorok ma tizzo ta kembei: Merere, ni inaunau pa sua kini mbukŋana be ikam ma iur ŋonoono. Tamen som. Ni iurur kadoono pizin tomtom karau som, mi inamnaama paso, leleene be tomtom ta boozomen titooro lelen. Kokena tasa ila lene. \x + \xo 3:9 \xt  Ro 2:4; 1Tim 2:4; Ibr 10:37; 1Pe 3:20\x*   
\p
\v 10 Nol biibi ki Merere, ina ko ipamurur ti kembei ta tomtom kuumbuŋana. To saamba imap raama kalŋaana biibi, mi you ikan koroŋ boozomen ta timbotmbot sala maŋaanaŋana na, ma tila len lup. Mi toono ramaki koroŋ boozomen ta timbot pa na tomini, you ko ikan ma imap ma ila ne. \x + \xo 3:10 \xt  Mt 24:29,35,43; 1Tes 5:2+; Tur 16:15, 20:11\x*   
\s1 Tuurpe itundu mi tazza nol biibi  
\p
\v 11-12 Tana kakam kat ŋgar. Sombe koroŋ ta boozomen kola tila len lup, na niom be kakamam so mbulu i? Bela kewe potomŋoyom, kototo Anutu zaala kini, kazza nol kini, mi motoyom siŋsiŋ pa uruunu ambaiŋana soyaaraŋana. Naso kakam ma nol tana ipet karau. Nol tana isombe ipet, to you bilbilŋana kola ikan saamba ma ila lene, mi ikam ma koroŋ boozomen ta timbot sala maŋaanaŋana na, tireere mi timap ma tila len lup. \x + \xo 3:11-12 \xt  Mbo 50:3; Lu 12:36, 21:36; Tit 2:13\x*  
\v 13 Mi iti matanda iŋgalŋgal sua mbukŋana ki Anutu, tanata tu'urur matanda pa saamba ma toono popoŋan tabe tipet pa kaimer i. Saamba ma toono popoŋana tina na, wal ndeeŋeŋan men ta ko timbotmbot pa. \x + \xo 3:13 \xt  Tur 21:1, 21:27\x*   
\p
\v 14 O niom wal tio, mazwaana ta kombotmbot mi kazza mbulu ta boozomen tana be tipet na, kakam kinkiini be kuurpe mbulu tiom ta boozomen ma iŋgeeze pa Anutu mataana. Naso leyom uunu sa isaana som, mi niomŋan Anutu kaparlup yom ma kewe tamen. \x + \xo 3:14 \xt  1Kor 1:7; Pil 1:10; 1Tes 3:13\x*  
\v 15 Tana mbulu ki Merere ta iurur kadoono piti karau som, mi inamnaama iti na, kakam kat ŋgar pa. Ina, ni ikamam ta kembei paso, leleene be imuŋai iti mi ikamke iti. Motoyom iŋgal sua ki toŋmatiziŋ kiti Paulus ta lelende pini ilip na. Ni, Anutu ikam le ŋgar biibi. Mi sua ta ni ibeede piom na, ka ŋgar raraate men tau. \x + \xo 3:15 \xt  Ro 2:4\x*  
\v 16 Pa ro kini ta boozomen tizzo pa muŋaiŋana ki Anutu. Ŋonoono, sua pakan ta ni ibeede se ro, ina ipata piti be takam kat ŋgar pa. Tanata zin wal ta len ŋgar biibi som, mi urlaŋana kizin imbol som na, tipiŋgisŋgis sua kini kembei ta tikamam pa Anutu sua kini pakan ta tibeede se ro na. Mi ina tiwe uunu pa zitun be tisaana ma tila len. \x + \xo 3:16 \xt  Ro 10:3\x*   
\p
\v 17 O niom wal tio, mbulu ta boozomen tana kola ipet pa kaimer. Mi iŋgi aŋpaute yom pa ma kuute kek. Krisi, ni ikam yom ma kemender mbolŋana kek. Mi motoyom iŋgalŋgal ituyom. Kokena zin wal zorzooroŋan tiyaaru yom pa pakaamŋana kizin, to kotop mi kipizil ndemeyom pini. \x + \xo 3:17 \xt  Mk 13:5,23,33\x*  
\v 18 Yesu Krisi, ni Merere kiti mi ulaaŋa kiti. Kakam kinkiini be kuute kati mi kampeŋana kini, mibe ŋgar tiom tana izze ma iwe biibi. \x + \xo 3:18 \xt  1Pe 2:2\x*  
\p Iti tapakur ni zaana ta buri, mi iseeŋge iseeŋge ma ila. Ŋonoono.