\id JAS - Madak Bible [mmx] -Papua New Guinea 2011 (DBL 2015) 
\h Jems 
\toc2 Jems 
\toc1 Jems 
\toc3 Je 
\mt1 Jems  
\mt2 Lovoang At Ne Jems  
\imt1 Levelinga Loklox Axasep  
\imt2 Lamaares 62 A.D.  
\ip Laradi ga malagan i na lovoang neni ne Jems. Buaang nedi luvuttadi akleklen di lok do nai ne Jems neni neton ne Iesu. Neni ga malagan i na lovoang ti lara libinam tadi at ne Moroa ua nedi diga raba lorooro atnedi ri ne Iesu Karisito. Anai libinam tadi diga ekip tangarang aleng mi levesongsongot boro at limixin munepen mi ne Karisito. Kuren la diga epeseves at lengkot axap. Digak lok at levenmenemen silok buaang la digak lok ngan limixin me xadiong. Ti nai ne Jems neni laradi gomgo atnedi limixin nunu digak lok to Jerusalem.  
\iot Lengkot silok keneng at na lovoang  
\io1 \ior 1:1\ior* Levelinga momo at ne Jems ti limixin.  
\io1 \ior 1:2-8\ior* Langas ti lok ka lununu mi levendomdoma nunuan.  
\io1 \ior 1:9-11\ior* Lempapaase mumu limixin banbalo la limixin nopnovos.  
\io1 \ior 1:12-18\ior* Nemen dik tana subu kot la tana lok laxapmek.  
\io1 \ior 1:19-27\ior* Nedik ta noxo ronga aie xepe mene levelinga at ne Moroa.  
\io1 \ior 2:1-13\ior* Legesu ruptuvuk mun kantubu at limixin axap.  
\io1 \ior 2:14-26\ior* Atana lox asu lununu atdik, mi loklok tik lok tooro limixin.  
\io1 \ior 3:1-18\ior* Atana lok tatao avukat levempapaase atdik.  
\io1 \ior 4:1–5:6\ior* Lorooro atdik na nemen nunuan ngan laradi nunu.  
\io1 \ior 5:7-20\ior* Levenanasa vetpes bok.  
\c 1  
\s1 Lavapaase Axasep  
\p
\v 1 \x * \xo 1:1 \xt Ga 1:19; Gu 15:23; 1 Pi 1:1\x*Nenia ne Jems, lasaxaruki at ne Moroa la at Leeme Silok ne Iesu Karisito. Nia a malagan na levelinga ri lasangaun mi legepura larabibinat me Judaia di epeseves at na lavatbung menemen axap.  
\p Nia a malagan lavapaase momo rinemi.   
\s1 Levenmumuat I Lox Asu Lununu Lolos  
\p
\v 2 \x * \xo 1:2 \xt Ro 5:3-5\x*Luvutnetak mi luvurinuk. Do levenasen panga mumuat na vot parap nimi, i lox avukat do mina momo mene,  
\v 3 \x * \xo 1:3 \xt 1 Pi 1:7\x*atla miklen i do nom levenmumuat i tupot parap nimi kusu ti lox alolos lununu atnimi la melemu minaba tu tuxuruxun keneng at lununu atnimi.  
\v 4 Mina tu atmatkun amisik maxeneng at levenmumuat, la nemen mita subu kot. La kerepmo minaba vee ngan limixin mukun at lununu atnimi la kopmen tempanga xapmek nak lok at lorooro atnimi mo naba umsu aleng mi leveloklok nunuan.   
\p
\v 5 \x * \xo 1:5 \xt Ler 2:3-6\x*Ketla do tara atnimi ik pakes ti lodoxoma avukat, ni na sing ne Moroa, atla ne Moroa naba raba aleng i min. Moroa im taba buaang lempanga ri limixin getgesara la neni xopmen noxo rebeng alis toxot teren mumu loklok atdik.  
\v 6 \x * \xo 1:6 \xt Mk 11:24\x*Ketla mina nunu lolos at lengkonaleng mi ngising parap ne Moroa, la nemen lodoxoma atnimi na sixit ekarakat. Laradi xopmen na nunu lolos, i ngan lovotas i repit to at laras la ik sixit la lamanman i mas ekapus i uto la uto at lengkot axap.  
\v 7 Laradi xerepmo noxo nua i do naba lok ka levenasen panga boro at Leeme Silok.  
\v 8 Neni xopmen na epovo ri lox ali lodoxoma at lorooro axap teren la ni xopmen na epovo ri lox aulis lununu ren parap ne Moroa.   
\s1 Laradi Banbalo La Laradi Nopnovos  
\p
\v 9 \x * \xo 1:9 \xt Je 2:5\x*Do laradi banbalo ik lok kantubu atnemi limixin nunu, neni na lok momo mun, keke i do kopmen tevempanga ren. Laaleng move ne Moroa naba xip aurur i.  
\v 10 \x * \xo 1:10 \xt Ais 40:6-7; 1 Pi 1:24\x*Ketla do laradi nunu i ruuna buaang levempanga, neni naba lok momo mo do ne Moroa na lox asi i. Neni i lok ngan mun lempusuvus aaxa i nemen lixilik mun la ia met ta.  
\v 11 Laxangking i urut la iplivi aleng la i lox amolos axap nom lempusuvus aaxa la i subu uto xopok at laxangka. Lampeneves teren ira xap. At nom mun langas laradi i ruuna levempanga solo naba met basinge leven gugu axap teren ap mo levenaleng i lok lugugu ren.   
\s1 Leveloklok Tong Pen Ti Laradi Nunu  
\p
\v 12 \x * \xo 1:12 \xt 2 Ti 4:8\x*I lox avukat aleng do laradi nunu na tu tuxuruxun maxopok at leveloklok tong pen. Mo do laradi ira sak tup pam mi leveloklok tong pen, i lox avukat mila ne Moroa naba raba i mi lavatbungorong, ni lorooro avolo. Ganoxa ne Moroa ga paase ali i do ni naba raba i ri mo limixin di vavara aleng i.   
\p
\v 13 Do loklok tong pen i vot parap tara la i lok laxakapmek, ni noxo lok do ne Moroa i raba na loklok tong pen tin. Kopmen tara i epovo ri lok tong pen ne Moroa ti lok laxapmek, la neni xa noxo lok tong taradi.  
\v 14 \x * \xo 1:14 \xt Ro 7:7-10\x*Ketla laradi i suma loklok tong pen at loxonaleng lavavara xapmek axa ren i sar asoogong i.  
\v 15 La mo lavavara xapmek teren naba sisilok la na lox asuusu laxakapmek. Melemu at na, laxakapmek na sisilok la na lox asu lanmet.   
\p
\v 16 Luvutnetak mi luvurinuk orong. Nemen tara na xarang nimi mumu i na.  
\v 17 \x * \xo 1:17 \xt Mt 7:11\x*Leventamtaba mo i lox avukat aleng, ni axap nom boro vana at laxalibet. I si boro vana at ne Temen dik, mo ga rudum li laxangking, lagaaling, la laxampenti. Kopmen teretepukus at loklok teren la kopmen toxot at lamain ik lok keneng teren.  
\v 18 \x * \xo 1:18 \xt Jo 1:13\x*Neni ga mumu asu lavavara ren la ga raba nedik mi lorooro maxat, mo ga laa boro at levelinga ruturun teren, kusu nedik taba lok ngan levempipisik avot, la kerepmo ga lox asilok dik to mavana at lempanga axap, ni ga rudum li i.   
\s1 Nemi Mina Ronga  //  Na Levelinga, La Mina Mumu Asu Box I  
\p
\v 19 Luvutnetak mi luvurinuk. Mina doxoma na lavanga. Nemi axap mina lok soso ri ronga res, ketla nemen mita vaase porang soso levelinga, la mita musak soso.  
\v 20 \x * \xo 1:20 \xt Akl 7:9\x*Mila lumukmusak at laradi kopmen na lox asuusu luruptuvuk avukat, kerekngan ne Moroa i vara i.  
\v 21 \x * \xo 1:21 \xt Kl 3:8; 1 Pi 2:1\x*Kuren la, leveloklox axap i bilingot la laxakapmek i umsu aleng at na lavatbung menemen, ni nom mina lok pes kepe i. La mina lox asi nimi la mina xonom ka levelinga at ne Moroa, ni gatlo li i ro xeneng at lorooro atnimi. Ni mun nom levelinga i epovo na lox arooro nimi.   
\p
\v 22 \x * \xo 1:22 \xt Mt 7:26; Ro 2:13\x*Nemen mita lok ngan luvuttadi rongtonga xepe mun. Di ronga levelinga at ne Moroa, la kopmen dina mumu asu i.  
\v 23 Do laradi i ronga mo levelinga, ketla kopmen na gu mu asu i, ni i ngan laradi i ven loroonan teren at liriong.  
\v 24 La i reven avukat lemeren la melemu i vas kaxat, la soso mun i domampe mo lemeren i lok kereva.  
\v 25 \x * \xo 1:25 \xt Ro 8:2; Je 2:12; Jo 13:17\x*Ketla do tara i ven kibis mo Lenavolo ik mokso rinotno, mo levelinga naba lox asepmus i basinge loxokoxo at laxakapmek. Do neni nang tonga amisix i la noxo domampe i, ketla na gu mu asu i, Moroa naba lox anarong i at lempanga ni i lox i.   
\p
\v 26 \x * \xo 1:26 \xt Sam 34:13; 141:3\x*Lentaba dik lok keretna, “Nenia laradi nunu la loklok tarak i lox avukat at lemeren ne Moroa.” Ketla do ni xopmen na lok tatao avukat lavapaase ren, ni i xaxarang axa lebelen, la lununu ren i ngan lavanga gamasa.  
\v 27 Leveloklok mo i nemen, ne Moroa i vara i do limixin dina lox i. Do dina lox epovo i, i lox asuusu i do di nunu ruturun. Nom leveloklok i lox avukat aleng la i lok keretna. Limixin dina lok tatao avukat lubungkarun la lavakin, lavatlok atdi diga met pam. La dina lok tooro di at levenmumuat atdi. La lara lavanga bok, nedik ata lok tatao avukat lavatpas atnedik, la loklok at na lavatkangka noxo lox abilingot lorooro atnedik.   
\c 2  
\s1 Labalamu Atnedik Na Evan Mi Limixin Axap  
\p
\v 1 \x * \xo 2:1 \xt Gu 10:34; Je 2:9\x*Luvutnetak mi luvurinuk. Nemi mi nunu parap Leeme Silok ne Iesu Karisito, mo i umsu mi lisisixam. Kuren la nemen mita lox asi laradi kopmen taasen silok teren la nemen mita lox aurut tara vetpes. Ketla mina ven limixin axap ngan legesara.   
\p
\v 2 Mo dola laradi nopnovos i ruuna laarung molot at lekngen la i siga lempanga singsiga nunuan la ia vubeles at loogu lotu atnimi, i lox avukat mene. La do laradi kopmen tempanga ren i siga lempanga maut mun, la neni i beles bok at loogu lotu, loklok atnimi ridu na epovo mun.  
\v 3 Ixo lox avukat do nemi mi lox asuusu loklok ngangao aleng ti nom laradi i siga lempanga singsiga nunuan la mi tong i rin do ni na lok ka loxot kitkis avukat. Ketla ti laradi banbalo mi tong i rin, do ni na tu mun kopla na xis to vetpes kopla na xis kopok at laxangka parap lengkangkedek at limixin.  
\v 4 Mo do nemi mi lok na loklok, nemi mi lok laxakapmek, atla mi lox abulubun kepe limixin banbalo keneng at lotu atnimi. Na lodoxoma i lok kapmek aleng.   
\p
\v 5 \x * \xo 2:5 \xt 1 Ko 1:26-28\x*Luvutnetak mi luvurinuk orong. Nemi axap mina ronga ia. Luvuttadi mo di lok ngan luvuttadi gamasa at lemeren limixin at na lavatkangka, Moroa ga soxolik ka vam di kusu dina umsu mi lununu la dina nemen ngan lavaanat too at Linintoo ren. Neni ga paase ali i do nedi limixin di vavara aleng i, dinaba lok ka loxot at Linintoo ren.  
\v 6 Ketla nemi mi lox abulubun kepe limixin banbalo. Nemi miklen i do, limixin nopnovos di lox abulu nimi la di lok kaka lempilas atnimi. Nedi vam nom di lok li nimi at lavapaase.  
\v 7 La di paase kapmek ti laasen avukat at ne Iesu, mo ne Moroa ga lox anarong nimi min.   
\p
\v 8 \x * \xo 2:8 \xt Mt 19:19; Ga 5:14\x*Nemi minaba lok levempanga ik mokso, mo do mina mu asu mo levelinga i silok aleng la ik lok keneng at Lovoang Kaala, mo i lok keretna, “Mina balamu limixin petpes ngan mi balamu nimi.”  
\v 9 \x * \xo 2:9 \xt Lal 1:17\x*Ketla do mi lox asi tara la mi lox aurut tara vetpes, nemi mi lok laxakapmek, la mira los polo vam Laulis Linga at ne Moroa. La kerepmo mi lok ngan limixin tongtonga viribang.  
\v 10 \x * \xo 2:10 \xt Mt 5:19\x*Do taradi i mumu asu avukat Laulis Linga at ne Moroa, ketla i ronga xepe loxot lixilik teren, i lok ngan neni ia los polo axap pam i.  
\v 11 \x * \xo 2:11 \xt Pas 20:13-14; Ro 13:9\x*I lok ngan i na. Moroa ga vaase levelinga keretna, “Nemen gat lelongka.” La ga vaase bok, “Nemen gat uta sev amet taradi.” Mo do mixo lok loklok ti elongka, ketla mi sev amet taradi, nemi mi los polo vam levelinga axap at ne Moroa la mi lok ngan limixin tongtonga viribang.   
\p
\v 12 \x * \xo 2:12 \xt Ga 6:2; Je 1:25; 1 Pi 2:16\x*Lavapaase la loklok atnimi na lox avukat axap mila ne Moroa naba lok li nimi at lavapaase mo do loklok atnimi kopmen na epovo mi levelinga ren, mo ik lox asepmus nedik.  
\v 13 \x * \xo 2:13 \xt Mt 5:7; 18:32-35\x*At lorooro atnimi do kopmen mina ruuna lebelen tuntun, Moroa naba vaxaru nimi at lavapaase la ni noxo lox asuusu lebelen tuntun teren tinimi. Loklok ti vaxaru tara at lavapaase ixo lox avukat solo, ketla loklok ti lox asuusu lebelen tuntun i lox avukat aleng.   
\s1 Leven Gugu Nunuan Eburu Mi Lununu  
\p
\v 14 \x * \xo 2:14 \xt Mt 7:21\x*Luvutnetak mi luvurinuk. Do taradi i tong i do i ruuna lununu, ketla kopmen teveloklok nunuan at lorooro ren, lununu ren i lok ngan lavanga gamasa la ixo epovo do lununu kerepmo na lox arooro i.  
\v 15 \x * \xo 2:15 \xt 1 Jo 3:17\x*Dola luvutneton nimi xopla luvurinen nimi dik pakes ti levempanga singsiga, la kopmen dina lok ka epovo teveluxa anan.  
\v 16 La do tara atnimi na vot pasa di la na lok tidi keretna, “Moroa na lox anarong nimi, mina nemen avukat la mina anan avukat.” Ketla kopmen na lok tooro di mi lempanga singsiga la lempanga anan, mo levelinga ren kopmen na lok tooro di.  
\v 17 \x * \xo 2:17 \xt Je 2:20,26\x*La at na langas bok, mo do lununu xusuk ik lok la kopmen teven gugu nunuan nak lok eburu min, mo lununu i ngan lavanga gamasa.   
\p
\v 18 \x * \xo 2:18 \xt Ga 5:6\x*Taradi na lok keretna, “I lox avukat mun do lara i ruuna lununu la lara vetpes i lok leven gugu nunuan.” Ketla nia a tong i rin keretna, “Do tara xopmen na lok teven gugu nunuan, neni xopmen na ruuna lununu. Nia a lok leven gugu nunuan, mo i lox asuusu lununu rak.”  
\v 19 \x * \xo 2:19 \xt Mt 8:29\x*I lox avukat do una nunu do legesa Moroa xusuk mun. I ruturun, ketla lubunggas bok di nunu xuren la dik marat aleng.   
\p
\v 20 Mo laradi, neni lavanga baulang. Lununu ren i ngan lavanga gamasa mo do i ruuna lununu xusuk la kopmen teven gugu nunuan i nemen at lorooro ren.  
\v 21 \x * \xo 2:21 \xt Lur 22:9-12\x*Nenia ana lox asuusu i do na levelinga rak i ruturun mi lorooro at ne Abaram. Lurubuno atdik ne Abaram ga ronga res at ne Moroa. Ni ga raba lamdak teren ne Aisak ngan laplavang. La kerepmo ne Moroa ga tong i do ne Abaram ni laradi manmanton.  
\v 22 \x * \xo 2:22 \xt Ib 11:17-18\x*I xasep do mo loklok at ne Abaram ga lox asuusu lununu ren la ga lox amuat lununu ren.  
\v 23 \x * \xo 2:23 \xt Ro 4:3,9,22; 2 Let 20:7; Ais 41:8\x*Loxot at Lovoang Kaala ga soorun keretna,  
\q1 “Abaram ga nunu at ne Moroa la Moroa ga siam ka ba i ngan laradi manmanton.” \rq Lur 15:6\rq*  
\m La ne Moroa ga so asen ba i do lentangas teren.   
\p
\v 24 Kuren la nemi axap mina ven avukar i do ne Moroa na lox asepmus laradi mo do i ruuna leven gugu nunuan eburu mi lununu. Do i ruuna lununu xusuk mun, ixo epovo.   
\p
\v 25 \x * \xo 2:25 \xt Ib 11:31\x*La at na langas mun ne Raap, latkin ngarangat, gan manton tino at lemeren ne Moroa. Neni ga lok tooro luradi likling boro Israel la ga riki du uto vetpes kusu limixin esep di noxo ranga alis du.  
\v 26 \x * \xo 2:26 \xt Je 2:17\x*Kuren la mina xasep keretna, labantuxu kopmen toroonan teren, ni ira met pam. La kerepmo bok lununu kopmen teven gugu nunuan teren, ni ira met pam.   
\c 3  
\s1 Mina Lok Tatao Avukat Lavapaase Atnimi  
\p
\v 1 \x * \xo 3:1 \xt Lu 12:47\x*Luvutnetak mi luvurinuk. Kopmen na lox avukat do buaang atnimi na lok ka lugugu ngan luvuttadi loklox ase at levelinga at ne Moroa, mila ne Moroa naba ila mumu aleng lugugu at luvuttadi loklox ase. Mira xasep pam at na.  
\v 2 Nedik axap tak sak kikixin at leventaangas buaang. Ket do laradi kopmen nak lok laxakapmek at lavapaase ren, neni laradi manmanton tinotno la ni iklen bok ti lok tatao lorooro axap teren.   
\p
\v 3 Nedik ta lok li loxonaen lixilik at lungusno at lavaros ti lox i xusu naba ronga res atdik, la nedik ta epovo na sixit min uto at lengkot ta vara i.\fig Loxonaen ti lox akmokso lavaros.|alt="horse's heads with bridle" src="hk00029b.tif" size="col" loc="Jas 3:3" copy="BFBS (Knowles)" ref="Je 3:3" \fig*  
\v 4 Kopla mina doxoma mumu lavatmon i silok aleng la lamanman lolos ik lox asen i at laras. Lisitia at lavatmon i lixilik mun, ket do laradi gomgo ren na vara i do na sen min ti toxot, ni naba vaxar akmokso lisitia la lavatmon ira sen ti mo lenep i vara i.  
\v 5 Na lisitia i lok ngan lagam at laradi. Ni loxot lixilik mun at labantuxu ren, ketla lagam i epovo do na tong asu levelinga loklox asilok. Nemi minam doma mumu i na. Laxao lixilik i epovo ri an kaka axap laxairing silok.  
\v 6 \x * \xo 3:6 \xt Mt 12:36-37; 15:11,18-19\x*La lagam i lok ngan mo laxao. Ni i ngan lavanga xapmek ti lengkot axap at labantuxu, la ik lox axatu kaxat leveloklok kakapmek at labantuxu, la ik lox axatu kaxat bok leveloklok i bilingot at lorooro axap at laradi. La laxao xerepmo ip tavasu at lemenemen songsongot.   
\p
\v 7 Limixin di epovo na lox amenemen levenasen panga rooro axap at na lavatbung menemen, ngan levempanga mi lavanuet kangkedek boro at laxairing, levempixa, lempat sii la lempanga di kaxao mi lebelen di, la levenmat at laras.  
\v 8 \x * \xo 3:8 \xt Ro 3:13\x*Ketla kopmen taradi i epovo ri lox amenemen lagam. Amisik lagam ik lox axatu kaxat laxakapmek. Neni i epovo na sev amet tara kerekngan mun luxuasep.   
\p
\v 9 \x * \xo 3:9 \xt 1 Ko 11:7\x*Mi leven gam atdik nedik di xip aurut laasen at ne Moroa, ne temen dik. La nedik di paase kapmek bok min ti limixin petpes no ne Moroa ga rudum li di kerekngan lampoovo ren.  
\v 10 Levelinga ri xip aurut laasen at ne Moroa la levelinga xapmek bok ip tavasu at legesa gam mene nga. Luvutnetak mi luvurinuk, na loklok kopmen nak mokso.  
\v 11 I lok ngan na lempapaase poovo. Ladan mumudut eburu mi ladan i so mamao noxo sen su at legesa xatli dan.  
\v 12 Luvutnetak mi luvurinuk. Luuna pik ixo epovo ri visik levempeven olip. La luuna vaen ixo epovo ri visik levempeven pik. La ixo epovo bok do tara na lok ka ladan mumudut boro at ladan i so mamao.   
\s1 Lodoxoma Avukat  //  Ne Moroa Im Taba I  
\p
\v 13 Do tara xantubu atnemi i ruuna lodoxoma avukat mi lakleklen solo, neni na lox asuusu i mi lavatpas teren i lox avukat axap la i umsu mi leveloklok nunuan. Neni i lox i na mi langsangan loklok ngangao la lodoxoma avukat.  
\v 14 Ket dola tara i ruuna levereven peves ti lempanga at tara vetpes la loklox asilok, ixo epovo do neni na lox aurur i do neni laradi avukat. La ixo epovo na sev apkap do neni laradi rongtonga xepe at levelinga ruturun.  
\v 15 \x * \xo 3:15 \xt Je 1:5,17\x*Lodoxoma kerepmo kopmen na laa boro vana at ne Moroa. Ni loklok at na lavatkangka mun at ne Satan.  
\v 16 Do limixin at lara lemenemen di ruuna levereven peves ti lempanga at tara vetpes la loklox asilok, lixitkis atnedi naba ekarakat la buaang leveloklok kakapmek nabap tavasu kantubu atdi.   
\p
\v 17 Ketla nedi limixin di ruuna lodoxoma at ne Moroa, di ruuna leveloklok keretna. Lara avot, luruptuvuk atdi i dadat, limila i nemen kantubu atdi, loklok mulus bok mo, la ding tonga res at lentaba vetpes. Di umsu mi lebelen tuntun la dik lox amisik leveloklok nunuan. La di ke xepe loklok tik lox asi tara, la loklok kaxarang.  
\v 18 \x * \xo 3:18 \xt Mt 5:9; Ais 32:17; Ib 12:11\x*Nedi dik lok lumulum kantubu at limixin, mo lugugu atdi ba pisik asu lorooro nunuan kantubu at limixin axap.   
\c 4  
\s1 Lentangas At Laxakapmek Neni I Munepen Mi Ne Moroa  
\p
\v 1 \x * \xo 4:1 \xt Ro 7:23\x*Nom levenekarakat la levenedak kantubu atnimi i laa meva? Ni nom ik sixisu boro at lebelen nimi. Lavavara ri laxakapmek i nemen atnimi la na loklok ik paxaru kaxat levenesep keneng at lorooro atnimi.  
\v 2 Nemi mi vara levempanga, ketla kopmen mina epovo ri lok kaka i. Nemi mi sev amet limixin la mi ngaongao ri lempanga at lentaba vetpes, ketla kopmen mina epovo ri lok kaka nom levempanga mi vara rin. Mi vetep mi levelinga la mi vesep. La kopmen mina lok kaka tempanga avukat mila kopmen mina ngising ne Moroa rin.  
\v 3 Do nemi mi ngising ne Moroa ri levempanga mi vavara rin, kopmen minak lok kaka i, atla lodoxoma atnimi kopmen nak mokso. La mi vavara mun i xusu tik lox amomo labantuxu atnimi.   
\p
\v 4 \x * \xo 4:4 \xt Ro 8:7; 1 Jo 2:15\x*Loklok atnimi i lok ngan loklok at laradi ing longka tixin. Do laradi i vara mu loklok at na lavatkangka, neni i sok tixirixes kepe ne Moroa. Kerepmo la laradi i vara na etangas mi loklok at na lavatkangka, neni i munepen mi ne Moroa.  
\v 5 \x * \xo 4:5 \xt Pas 20:3,5\x*Nemen mita doma i do Lovoang Kaala i tong i do Loroonan Kaala, mo ik lok atdik, i sasat limixin ti levereven peves.  
\v 6 \x * \xo 4:6 \xt 1 Pi 5:5\x*Ketla ne Moroa i raba dik mi letaba nabalamu i lolos aleng ti nom laxapmek, kerekngan Lovoang Kaala i tong i,  
\q1 “Moroa ixo ru ebelen minedi di lox aurut levenasen atdi. Ketla neni i lox asuusu letaba nabalamu ren tinedi di lox asi lorooro atnedi maxopok teren.” \rq Ler 3:34\rq*   
\p
\v 7 \x * \xo 4:7 \xt Ep 6:12\x*Kuren la nemi mina lox asi lorooro atnimi la mina nemen maxopok at ne Moroa. Nemi mina sok tixirixes kepe levelinga at ne Satan la ni naba ke xepe nimi la naba sixiro.  
\v 8 \x * \xo 4:8 \xt Sak 1:3; Mal 3:7; Ais 1:16\x*Nemi mina nemen auret ne Moroa la ni naba nemen tino eburu minimi. Nemi luvuttadi at laxakapmek, lorooro atnimi na maxat bilong, i ngan laradi i gos lukngen la ira maxat manga. Nemi mi ruuna legepu doxoma, mina lok pes nom levendoxoma xapmek basinge lorooro atnimi.  
\v 9 Mina bulu, la minang teng. Nemi ming longon, mina soxun loklok ting longon la minang teng. Nemi mi sosoro, mina soxun nom loklok ti sosoro la mina bulu.  
\v 10 \x * \xo 4:10 \xt Jop 5:11; 1 Pi 5:6\x*Nemi mina lox asi xa nimi at lemeren ne Moroa. Do mina lox i xuren, Moroa naba xip aurut nemi.   
\s1 Nemen Mita Vaase Asi Luvutneton Nimi  
\p
\v 11 Luvutnetak mi luvurinuk. Nemen mita vaase asi tara kantubu atnimi mi tevelinga. Do taradi na vaase asi neton mi levelinga, kopla na ila mumu loklok teren, i lok ngan ta do i ronga xepe Laulis Linga at ne Moroa la i lox asi i. Do mina vaase asi levelinga at ne Moroa, kopmen mina ronga res teren, la mi lox aurut nimi mavana ren.  
\v 12 \x * \xo 4:12 \xt Ro 2:1; 14:4\x*Moroa xusuk mun im taba levelinga ngan Laulis Linga kusu limixin dina mumu asu i. La ni xusuk mun i viila mumu loklok atdik. Ni xusuk mun i epovo ri lox arooro laradi kopla na riki i uto at lemenemen songsongot. Ketla kopmen nak mokso do mina viila mumu loklok at limixin di nemen saparap nimi.   
\s1 Nemen Mita Lox Aurut Levenasen Atnimi  
\p
\v 13 \x * \xo 4:13 \xt Lu 12:18-20\x*Na mina ronga ia. Nemi lentaba luvuttadi mi paase xeretna, “Lingina kopla kantamak nedik tabat pas uto at lemenemen silok, la taba nemen go at legesa maares la taba lok leven gugu rip novos ka buaang levempilas.”  
\v 14 \x * \xo 4:14 \xt Ler 27:1; Sam 39:5,11\x*Ketla levelinga keretnom kopmen na mokso, mila nemi mixoklen i do lorooro atnimi naba lok kereva kantamak. Nemi mi lok ngan mene lamantakabu, ik lok lixilik mun la ira sonao gamasa manga.  
\v 15 \x * \xo 4:15 \xt Gu 18:21\x*Ketla nemi mina tong i keretna, “Mo do ne Moroa i vara i, nedik ata rooro, la ataba lok lempanga.”  
\v 16 Ketla nemi xa mi xip aurut levenasen atnimi la mi tong asu levelinga loklox asilok. Mo axap leveloklox asilok patlak kerepmo, ni i lok kapmek.  
\v 17 \x * \xo 4:17 \xt Lu 12:47\x*Kuren la do laradi iklen luruptuvuk nunuan, ketla neni kopmen na mu asu i, na laradi i lok laxakapmek.   
\c 5  
\s1 Levempapaase Ri Luvuttadi Nopnovos  
\p
\v 1 \x * \xo 5:1 \xt Lu 6:24\x*Nemi limixin nopnovos mina ronga ia. Minang teng la mina bulu mila levenmumuat naba vot saparap nimi.  
\v 2 \x * \xo 5:2 \xt Mt 6:19\x*Lapnovos atnimi ira xap pam, la levesingsiga atnemi, laxampide ira ngas koxorop pam i.  
\v 3 Leven gol atnimi la levesiliva ira lok kapmek pam mi libilinga, la na libilinga naba lox asuusu laxakapmek atnimi at laaleng ete la neni naba rin labantuxu atnimi ngan laxao. Nemi migak lok li bubua laxampilas solo at na levenaleng kavaxap.   
\p
\v 4 \x * \xo 5:4 \xt Lal 24:14-15; Mal 3:5\x*Nemi xovisi mina raba luunun at luvuttadi di kaxat panga ro xataamang. Mina lox empana levesingising atdi! Levenanteng atdi, ne Moroa ira ronga vam i. Neni Leeme Silok la Lanaraavuk.  
\v 5 \x * \xo 5:5 \xt Lu 16:25; Jer 12:3; 25:34\x*Lorooro atnimi at na lavatkangka i umsu mi laxampanga avukat la nemi mik lok momo. Nemi mira anan avukat la mirang pong solo, ketla laaleng at ne Moroa rip sep kutkut limixin kakapmek mo naba vot.  
\v 6 Nemi mi lok li limixin avukat at lavapaase la mip sev amet nedi di goxo lok taxakapmek, la kopmen digoxo esep tangarang minimi.   
\s1 Lorooro Atnedik Na Tu Tuxuruxun Mi Lising  
\p
\v 7 \x * \xo 5:7 \xt Lu 21:19; Lal 11:14; Jer 5:24; Jol 2:23\x*Luvutnetak mi luvurinuk. Mina ngangais mi lomomo se Leeme Silok nabamlong. Mina doma mumu laradi loklok tatao at laraamang. I tu tuxuruxun, la ia ngangais se laxangka na lox asuusu lempanga. Neni i nemen kangais bok ti larakabu mo na vot at leven gaaling teren.\fig Laradi loklok tatao i ngangais atnaasan.|alt="Farmer watching" src="hk00095b.tif" size="span" loc="Jas 5:7-8" copy="BFBS (Knowles)" ref="Je 5:7-8" \fig*  
\v 8 \x * \xo 5:8 \xt Ro 13:11-12; Ib 10:25; 1 Pi 4:7\x*Nemi bok mina tu tuxuruxun la mina ngangais mi lomomo, mila lovotpot at Leeme Silok i auret.  
\v 9 \x * \xo 5:9 \xt Mt 24:33\x*Luvutnetak mi luvurinuk. Nemen nemi mita gagalinga mu luvutneton nimi, mila ne Moroa naba vaxaru nimi at lavapaase. Lovotpot at laradi rongtonga linga i auret.   
\p
\v 10 Luvutnetak mi luvurinuk. Mina doma bilong ti lavaeme vapaase ali. Nedi diga vavang mi laasen at Leeme Silok la limixin diga lox asongot di, ketla diga tu tuxuruxun. La nedi di lok ngan lampoovo rinimi kusu mina tu tuxuruxun, mo do levenmumuat na vot saparap nimi.  
\v 11 \x * \xo 5:11 \xt Pas 34:6; Sam 103:8; 111:4\x*Nedik di so asen nedi lavaeme vapaase ali do limixin nunuan mila diga tu atmatkun. Nemi miga ronga vam leretere at ne Jop. Neni ga tu tuxuruxun la ga sosolok laxanmumuat gat pot parav i, la melemu Leeme Silok ga lox anarong i. Leeme Silok i umsu mi labalamu la lebelen tuntun.   
\p
\v 12 \x * \xo 5:12 \xt Mt 5:34-37\x*Luvutnetak mi luvurinuk. Lara lavanga i silok aleng, i lok keretna. Nemen mita vangpe mi laxalibet kopla laxangka kopla levempanga vetpes bok. Dola nemi mina tong i do, “tuturun,” kopla “kopmen,” Moroa naba lok momo. Do mina lok lavangpangpe xerepmo, Moroa naba raba luunun kapmek tinimi.   
\s1 Lising At Laradi Avukat I Ruuna Lolos  
\p
\v 13 \x * \xo 5:13 \xt Kl 3:16\x*Kereva, tara go atnimi ip kip tevenmumuat? Neni nak lok lising. Tara bok go i lok momo? Neni nak pixan emi asu.  
\v 14 \x * \xo 5:14 \xt Mk 6:13\x*Tara bok go atnimi i meres? Neni na ro ka loxongkulao silok at lotu la dina lok levesingising tin la dina saba i mi loxodan momonok at la olip at laasen at Leeme Silok.  
\v 15 \x * \xo 5:15 \xt Mk 16:18\x*Mo do nedi di nunu ruturun do Leeme Silok naba lox aroo mo laradi, Leeme Silok naba lox aroo i. La do neni ga lok laxakapmek, Leeme Silok naba doxoma xepe laxakapmek teren.  
\v 16 Kuren la mina soxomus ela laxakapmek atnimi, la mina sing tinemi getgesara, kusu Leeme Silok naba lox aroo limixin basinge levenanmeres. Do laradi nunu loklok teren in manton, levesingising teren naba lolos aleng la naba epovo rinotno ri lok tooro limixin.   
\p
\v 17 \x * \xo 5:17 \xt 1 Lav 17:1; Lu 4:25\x*I lok ngan levesingising at ne Elaisa. Ni laradi ga lok ngan dik. Neni ga ngising lolos ne Moroa ri larakabu noxo vot la larakabu goxo vot ti laxangka at lavantun maares la lavanna gaaling.  
\v 18 \x * \xo 5:18 \xt 1 Lav 18:42-45\x*La melemu ni ga lok bok lising la ne Moroa ga lox asi larakabu ri lavatkangka la leveluxa ro at lentaamang ga suu avukat.   
\s1 Laradi Nunu I Lox Amlong Laradi Xapmek Basinge Lanmet  
\p
\v 19 \x * \xo 5:19 \xt Ga 6:1\x*Luvutnetak mi luvurinuk. Mo do tara atnimi i vas tabaara basinge langas tuturun, mina sar amlong ka i.  
\v 20 \x * \xo 5:20 \xt Sam 51:13; Ler 10:12; 1 Pi 4:8\x*Nemi mina ven kisip na lavanga. Do taradi i lok tooro laradi xapmek, la laradi xapmek i on basinge langas at lanmet la iamlong parap ne Moroa, neni ira lox arooro vam mo laradi basinge lanmet lexen la ne Moroa naba doxoma xepe buaang laxaloklok kakapmek teren. I ruturun.